\id JAS

\h Santya̱'a̱gʉ
\mt Neky Di'ibʉ Santya̱'a̱gʉ Jyaay
\c 1
\s Dios yajkypy ja wijy'a̱jtʉn
\p
\v 1 Ʉj Santya̱'a̱gʉ, Diosʉ myʉduumbʉ esʉ Nindsʉn'a̱jtʉm Jesukristʉ myʉduumbʉ. Nduknigajxtʉptsʉ tya̱dʉ neky ma̱jmajtsk ja Israelʉ mya̱a̱ngʉ tyʉʉmp 'ya̱a̱ts di'ibʉ oj ñʉjxtʉ tsʉnaabyʉ ma̱ wiink naxwíñʉdʉ.
\p
\v 2 Mʉgu'ugítʉty, nayjyáwʉdʉ jotkujk ko myínʉt oytyim di'ibʉ ayo'onʉty.
\v 3 Pes mnija̱'a̱dʉp miidsʉty ko m'ijxmátsʉdʉ yʉ ayo'on ja'agyʉjxm ko xymyʉbʉktʉ Nindsʉn'a̱jtʉm, miits m'ʉxpʉ́ktʉp es xymyʉmada̱'a̱ktʉt oytyim di'ibʉ ayo'onʉty.
\v 4 Ja'a tsojkʉp es xyjáttʉt wi'ix oy xymyʉmada̱'a̱ktʉt ja ayo'on, dʉ'ʉn m'íttʉt kexy ka'pxy éxtʉmʉ Dios ttseky, es kʉdii ni tii mdʉgoy'a̱jtxʉdʉt.
\p
\v 5 Pʉn miidsʉty nidu'ugʉty mdʉgoy'a̱jtxʉp ja wijy'a̱jtʉn, amdowdʉ Dios, es ja Dios mmo'oyʉdʉp; ja'a ko yʉ'ʉ ñayajkypy yajxón, ni je'eyʉ xykya'o'om.
\v 6 Es ko xy'amdówdʉt, koonʉm tsyékyʉty es xy'amdówdʉt mʉdʉ mʉbʉjkʉn, es kyaj xyjʉjpjáwʉdʉt; ja'a ko di'ibʉ jyʉjpja̱'a̱p, dʉ'ʉn yʉ'ʉ éxtʉm ko ja jikymyejyñ ñikapy es ja poj yajnejxyʉty xidsoo ya̱dsoo.
\v 7 Di'ibʉ dʉ'ʉn éxtʉmʉ tya̱a̱dʉ, nanatʉkʉ ti t'awíxʉt mʉt ja Nindsʉn'a̱jtʉm,
\v 8 mʉt ko tuk peky ttseky tyam, es bom dyajtʉgátsy ja wyinma̱'a̱ñ.
\p
\v 9 Ja nmʉgu'uk'a̱jtʉm di'ibʉ ayoo jottʉgeepy, nayjyáwʉdʉp agujk jotkujk mʉt ko Dios yʉ'ʉ pudʉ́kʉdʉp.
\v 10 Es ja di'ibʉ mʉkja̱'a̱y, nayjyáwʉdʉp agujk jotkujk ko natyʉ Dios 'yamútskyʉty. Ja'a ko dʉ'ʉn yʉ'ʉ éxtʉmʉ pʉjy di'ibʉ ijtp ujtsóty, kyaj jeky 'yity.
\v 11 Ko xʉʉ pyʉdsemy es mʉk 'yañ, ni'xp ja ujts, es ja pyʉjy kya'ay, ta tyʉgoy ja tsyuj'a̱jtʉn. Dʉ'ʉn ja mʉkja̱'a̱y tyʉgóyʉt ko naty ni'igʉ ñayyajmʉkja̱'a̱ydya̱'a̱ga̱'a̱ñʉty.
\s Kyajʉ Dios pʉ́n dyajpekytyúñ
\p
\v 12 Jotkujk ja ja̱'a̱y ko dyajnáxy ja ayo'on mʉt ja ma'xtujkʉn, es mʉdʉ tya̱a̱dʉ mo'oyʉdʉp ja Dios ja jiky'a̱jtʉn winʉ xʉʉ winʉ tiempʉ di'ibʉ Dios wya̱ndak tyukmay'ata̱'a̱ñʉty nidʉgekyʉ di'ibáty tsojkʉdʉp.
\v 13 Ko pʉ́n ñayjyáwʉty pyekytyuna̱'a̱ñ, kyaj jyʉna̱'a̱nʉt ko Dios myo'oyʉdyʉ tadʉ winma̱'a̱ñ, mʉt ko kyaj pʉ́n mba̱a̱t ttuñ esʉ Dios pyekytyúnʉt, es kyaj Dios ti ttuñ es ja ja̱'a̱y pyekytyúnʉt.
\v 14 Ja'agyʉjxmʉ ja̱'a̱y pyekytyuna̱'a̱ndʉ ko ja 'yadsojkʉn ñaydyukwin'ʉʉnʉdʉ, es mʉt ja kyʉ'ʉmdsojkʉn ñayyajtʉgóyʉty.
\v 15 Ko ja̱'a̱y ttsoktʉ di'ibʉ kyaj 'yóyʉty, jaa myiñ ja pojpʉ; es ko tya̱dʉ pojpʉ myʉjwindáknʉ, jaa myiinnʉ ja o'kʉn.
\p
\v 16 Mʉgu'ugítʉty, katʉ mnaywyin'ʉʉnʉdʉ.
\v 17 Tʉgekyʉ oybyʉ esʉ tsujpʉ, Dios ja'a yajkypy, di'ibʉ tʉ tpʉjta'aky ja ja̱j tʉ'xʉn tsa̱jpótm. Dios Teety ijtpʉmʉ'ʉ éxtʉm 'yity, kyaj tyʉgatsy.
\v 18 Tsyojkʉngyʉjxm tʉ xymyo'oyʉm yʉ njiky'a̱jtʉn'a̱jtʉm winʉ xʉʉ winʉ tiempʉ mʉt ko n'axá̱jʉm ja tʉy'a̱jtʉnbʉ ayuk, es ndʉ'ʉn'a̱jtʉm éxtʉm ja jawyiin tʉʉmp ma̱ tʉgekyʉ di'ibʉ Dios yajkoj.
\s Mʉbʉjkʉn
\p
\v 19 Mʉt ko tya̱a̱dʉ dʉ'ʉn nnija̱'a̱m, mʉgu'ugítʉty, miidsʉty nidu'ugáty m'íttʉp xy'awíxtʉt es xymyʉdoo'íttʉt di'ibʉ mya''awa̱'a̱nʉdʉp. Es katʉ mnay'oojʉdʉ mʉt waanʉ tii, es kyaj mnayyajjot'ambʉ́kʉdʉt mʉt waanʉ tii.
\v 20 Mʉt ko yʉ ja̱'a̱yʉty di'ibʉ ajkʉp, kyaj dʉ'ʉn ttuñ ja Diosʉ tsyojkʉn.
\v 21 Pa̱a̱ty mastu'uttʉ tʉgekyʉ di'ibʉ kyaj 'yóyʉty es ja axʉk winma̱'a̱ñ di'ibʉ mʉjwindʉjkʉp ya̱ naxwiiñ, es axá̱jʉdʉ tuda'akytyi'knʉ yʉ ka̱jxwíjʉn di'ibʉ Dios tʉ tpʉjta'aky mjodoty mwinma̱'a̱ñóty. Mʉt ko tadʉ ka̱jxwíjʉn myʉda̱jtypy ja mʉk'a̱jtʉn es dyajnitso'ogʉdʉ m'anmʉja̱'a̱n.
\p
\v 22 Pa̱a̱ty kuydyundʉ éxtʉm jyʉna'añ ja Diosʉ jyaaybyajtʉn; katʉ je'eyʉ xymyʉdoo'íttʉ. Mʉt ko pʉn je'eyʉ xymyʉdoo'íttʉ es kyaj xykyuydyundʉ, kʉ'ʉm mnaywyin'ʉʉnʉdʉ miidsʉty.
\v 23 Di'ibʉ je'eyʉ tmʉdoo'íty ja Diosʉ jyaaybyajtʉn es kyaj tkuydyúñ,
\v 24 dʉ'ʉn yʉ'ʉ éxtʉmʉ ja̱'a̱y ko tku'ixʉ ijxnóty ja wyiin jyʉjp, es ko ñejxy wiink tsoo, kyaj tnakyjyamyetsy wi'ix 'yíxyʉty.
\v 25 Per ja ja̱'a̱yʉty di'ibʉ kyaj tja̱'a̱ydyʉgóy di'ibʉ myʉdeepy, es ti'igyʉ tpʉjta'aky ja wyinma̱'a̱ñ wi'ix ja tim oybyʉ ana'amʉn jyʉna'añ di'ibʉ yajwʉ'ʉmp awa̱'a̱tstúm, es dʉ'ʉñʉm tpadúñ yʉ ana'amʉn, kunu'xʉdʉp ja Dios.
\p
\v 26 Per pʉ́n nayjya̱'a̱p ko twindsʉ'ʉgʉ Dios, es nʉgoo ñanigajxy ñakʉxkajxy, naywyin'ʉ'ʉnʉp kʉ'ʉm es ni ti tkatsooty di'ibʉ 'yandijpy twindsʉ'ʉgʉ Dios.
\v 27 Di'ibʉ oy 'yawda̱jtypy ja Dios, pyudʉjkʉp ja ke''egyu'ungʉty esʉ ku'ekytyo'oxyʉty ko 'yayow jyottʉgooydyʉ, es kyaj ñayya''axʉʉgʉty mʉt ja naxwíñʉdʉ winma̱'a̱ñ.
\c 2
\s Ayoobʉ ja̱'a̱y esʉ mʉkja̱'a̱y, ti'igyʉ nnaydsyojkʉm
\p
\v 1 Mʉgu'ugítʉty di'ibʉ myʉbʉjktʉp ja Nindsʉn'a̱jtʉm Jesukristʉ di'ibʉ ni'igʉ myʉda̱jtypy ja mʉj'a̱jtʉn, kyaj xywyin'íxtʉt ja ja̱'a̱y ni tu'uk es jatu'uk.
\v 2 N'okpʉjtákʉm ko myiñ ma̱ miits mnaymyúkʉdʉ tu'ugʉ mʉkja̱'a̱y di'ibʉ oyʉ wyit ñijam es mʉt ja kyʉjiits ak oorʉ, es myiñʉ net tu'ugʉ ayoobʉ ja̱'a̱y mʉt ja wyit ñijam patsy patsy,
\v 3 es pʉn miits m'axá̱jʉdʉp yajxón ja di'ibʉ oy xyoxy, es xy'anʉʉmʉdʉt: “U'uñʉ ya̱a̱ ma̱ tya̱dʉ oybyʉ uñaaybyajn”, per ja ayoobʉ ja̱'a̱y xy'anʉʉmʉdʉt: “Mij tanʉ jap”, o “U'uñʉ ya̱a̱ naxkʉjxy”,
\v 4 mʉdʉ taadʉ xya'íxyʉty ko xytsyoktʉ ja mʉkja̱'a̱y es xy'ʉxtijtʉ ja ayoobʉ ja̱'a̱yʉty. Ko xytyundʉ dʉ'ʉn mʉt ko m'adsoktʉ, mbekytyuundʉbʉ dʉ'ʉn.
\p
\v 5 Mʉdowdʉ mʉgu'ugítʉty es jaygyúkʉdʉ tya̱a̱dʉ. Yʉ ayoobʉtʉjkʉty di'ibʉ ijttʉp ya̱ naxwiiñ, yʉ'ʉ dʉ'ʉn ja Dios tʉ wyin'íxʉdʉ es ni'igʉ ja mʉbʉjkʉn tmʉdáttʉt es t'axá̱jʉdʉt éxtʉmʉ kyuma̱'a̱ñʉty es jyiky'átʉt tsa̱jpótm mʉt ja Dios, mʉt ko Diosʉ dʉ'ʉn tʉ twa̱nda'aky tmo'oya'añ pʉnaty tsojkʉdʉp;
\v 6 per miits mduktsoydyuundʉp ja ayoobʉ ja̱'a̱yʉty, mʉt ko xymyay'at xywyindsʉ'ʉgʉdʉ di'ibʉ mʉkja̱'a̱yʉty. ¿Ti kyaj yʉ mʉkja̱'a̱yʉty yʉ'ʉ dʉ'ʉn di'ibʉ mwijts mbo'tʉdʉp es mni'ʉʉnʉdʉ kumda̱ttʉgoty?
\v 7 ¿Ti kyaj yʉ'ʉjʉty di'ibʉ kya̱jxpáttʉp ja tsujti'knʉbʉ xyʉʉ ja Nindsʉn'a̱jtʉm Jesús di'ibʉ mja'a'a̱jtʉdʉp?
\p
\v 8 Oyʉ dʉ'ʉn xytyuñ pʉn mguydyiimpy ja Diosʉ 'yana'amʉn di'ibʉ ni'igʉ myʉ́jʉty ma̱ jyaaybyajtʉn: “Mdsókʉp ja mmʉdʉjkpa̱'a̱jʉty éxtʉm mij kʉ'ʉm mnaydsyékyʉty.”
\v 9 Es pʉn miits mwin'ijxtʉp pʉ́nʉty mdsokándʉp, taadʉ dʉ'ʉn mʉʉt mbekykya'ay Dios windum mʉt ko kyaj xykyuydyúñ yʉ 'yana'amʉn.
\v 10 Ko tu'ugʉ ja̱'a̱y tkuydyúñ tʉgekyʉ ja Diosʉ 'yana'amʉn, per mʉt tu'uk je'eyʉ tyʉgoy, pekyjya'ay yʉ'ʉ, dʉ'ʉn éxtʉmxyʉp tʉgekyʉ ja ana'amʉn tʉ tkakuydyúñ.
\v 11 Ja'a ko Dios jyʉnáñ: “Katʉ xyajtʉgóy ja pʉjk úkʉnʉ wyindsʉ'kʉn”, jyʉnáñ nandʉ'ʉn: “Katʉ myajja̱'a̱y'eeky.” Es dʉ'ʉn, oy xykyayajtʉgóy ja pʉjk úkʉnʉ wyindsʉ'kʉn, per pʉn tʉ myajja̱'a̱y'eeky, kyaj xykyuydyúñ ja Diosʉ 'yana'amʉn.
\v 12 Pa̱a̱ty miidsʉty ka̱jx madya̱'a̱ktʉ es jiky'attʉ éxtʉm di'ibʉ yajnika̱jxtútp ma̱ ja Diosʉ 'yana'amʉn di'ibʉ xy'awa̱'a̱nʉm wi'ix kyaj n'ijtʉm pekyoty.
\v 13 Pes di'ibʉ kyaj tʉ tmʉdaty ja pa''ayo'on mʉt ja wiingátypyʉ, nandʉ'ʉn kyajpʉ Dios pya''ayowa̱'a̱ñʉty; per di'ibʉ tʉ tmʉdaty ja pa''ayo'on mʉt ja myʉgu'ugʉty, ni ti tkajʉjpjawʉya'añ ja xʉʉ ko ja ja̱'a̱y yajpayo'oydyʉt, mʉt ko Dios pya''ayowa̱'a̱ñʉty nandʉ'ʉn.
\s Kyaj ti ttsooty ja mʉbʉjkʉn pʉn kyaj ti oy yajtúñ
\p
\v 14 Mʉgu'ugítʉty, ¿wi'ix tyuñ ko ja̱'a̱y jyʉna'añ ko myʉbejkypy ja Dios, per kyaj ti oy ttuñ? ¿Tii mba̱a̱dʉ tadʉ myʉbʉjkʉn ttuknitse'egyʉ?
\v 15 N'okpʉjtákʉm, pʉn nidu'ugʉ nmʉmʉbʉjkpʉ'a̱jtʉm tmʉdaty ja wyit ñijam ya''ayow ya''ama̱'a̱t es tyʉgoy'a̱jtxʉty ja kya'ay 'yukʉn,
\v 16 es miidsʉty nidu'uk xy'anʉʉmʉt: “Nʉjx mʉdʉ Dios, mʉgu'uk, es wa'an yʉ'ʉ mmo'oyʉty di'ibʉ mij mdʉgoy'a̱jtxʉp”, es pʉn kyaj ti pudʉjkʉn xymyo'oy, ¿ti oy'a̱jtʉnʉ taadʉ?
\v 17 Nandʉ'ʉn ja̱jtpʉ dʉnʉ tya̱a̱dʉ di'ibʉ je'eyʉ tmadya'aky'áty ko tmʉbeky es kyaj dyajnigʉxe'eky ma̱ jyiky'aty, kyaj tyuñ di'ibʉ myʉbejkypy.
\p
\v 18 Wa'anʉ da nandʉ'ʉn na̱a̱gʉty jyʉna'añ: “Mij mmʉbejkypy ja Dios, per ʉj ndiimbyʉts ja oybyʉ.” Ʉjts n'adsówʉp: “Weenʉ, tuk'ijxkʉts mij ko xymyʉbeky ja Dios es kyaj xytyuñ ja oybyʉ, es ʉj mij nduk'íxʉp mʉt ja oybyʉ ndu'unʉnʉts ko nmʉbejkypyʉts ja Dios.”
\v 19 Mij mmʉbejkypy ko tu'uk je'eyʉ Dios. Oyʉ dʉ'ʉn ko xymyʉbeky; per nandʉ'ʉnʉ mʉjku'udʉjk tmʉbʉktʉ ko jyámʉty ja Dios, es extʉ tsʉyʉʉydyʉp mʉt ja tsʉ'ʉgʉ.
\v 20 ¿Tii kyajnʉm xy'oktimjaygyujkʉnʉ mij kujuun, ko kyaj tyuñ ja mʉbʉjkʉn pʉn kyaj ti yajtúñ?
\v 21 ¿Wi'ix xy'ixy ko ja n'apteety'a̱jtʉm Abra̱a̱n oj wye'emy oy mʉt ja Dios? Ja'agyʉjxm oy wye'emy mʉt ja Dios ko dyajnejxy ja 'yu'unk Isa̱a̱ es tjatukwindsʉ'ʉgʉyáñ ja Dios.
\v 22 Tʉ xy'ixy ko Abra̱a̱n dya'ijxʉ ko Dios tmʉbejky es ja'agyʉjxm tmʉmʉdooy ja Dios, es di'ibʉ tyuun oj dyajka'pxy ja myʉbʉjkʉn.
\v 23 Es dʉ'ʉn yajkuydyuuñ éxtʉm jyʉna'añ ma̱ ja Diosʉ jyaaybyajtʉn: “Abra̱a̱n myʉbʉjk ja Dios, pa̱a̱dyʉ Abra̱a̱n oy wye'emy mʉt ja Dios”, es ja Abra̱a̱n yajtijy Diosʉ myʉtnaymyaayʉbʉ.
\p
\v 24 ¿Tʉ xy'ixyʉ? Oy nwʉ'ʉmʉm mʉt ja Dios ko nmʉmʉdo'om ja Dios es kyaj jye'eyʉty ko njʉna̱'a̱nʉm ko nmʉbʉjkʉm.
\v 25 Nandʉ'ʉn mʉt ja kujeñdyo'oxy Raap. Ja'a oy oj wye'emy mʉt ja Dios ja'agyʉjxm di'ibʉ tyuun, mʉt ko t'axa̱jʉ es dyu'tsy ja nimajtskpʉ israelitʉ di'ibʉ ijxtuundʉp, es tpudʉjkʉ es dyajkéky ma̱ ja myʉdsipʉn.
\v 26 Es dʉ'ʉn xytyuk'ijxʉm éxtʉm ja nini'x di'ibʉ tʉgoy'a̱jtxʉp ja 'yanmʉja̱'a̱n, o'kpʉ yʉ'ʉ, es nandʉ'ʉn yʉ nmʉbʉjkʉn 'yity éxtʉmʉ o'kpʉ, pʉn kyaj ndu'unʉm ja oybyʉ.
\c 3
\s Ya'an
\p
\v 1 Mʉgu'ugítʉty, oyʉ dʉ'ʉn ko kyaj may miits mnaybyʉjta̱'a̱gʉdʉ ya'ʉxpʉjkpʉty ma̱ ja mʉbʉjkpʉtʉjk ñaymyúkʉdʉ. Mnija̱'a̱dʉp ko di'ibʉ nya'ʉxpʉjkʉm, yʉ'ʉ waanʉ ni'igʉ pyayo'oyaampy ja Dios pʉn kyaj oy nguydyu'unʉm.
\v 2 Nidʉgekyʉ nbekytyu'unʉm; per pʉn jaa pʉ́n kyaj kya̱jxtʉgóy, yʉ'ʉ dʉ'ʉn sitʉy jiky'a̱jtp tʉy'a̱jtʉn mʉʉt es nandʉ'ʉn mba̱a̱t t'ane'emy tʉgekyʉ ñini'x.
\v 3 Es éxtʉm ko tu'ugʉ jʉyujk nduk'aja'anʉ'kʉm ja frenʉ, ja'a dʉ'ʉn es xymyʉmʉdo'om es mba̱a̱t n'ana'amʉm tʉgekyʉ ñini'x.
\v 4 Ixtʉ nandʉ'ʉn ma̱ yʉ barkʉ. Oy jyamʉjjátyʉty esʉ mʉk poj jyayajnʉjxa̱'a̱ñʉty oytyim ma̱a̱ty, per di'ibʉ 'yane'empy tyuknidíjʉp es dyajnʉjxʉt ma̱ tjantsytyim'yajnʉjxa̱'a̱ñ mʉt tu'ugʉ mutsk kepyu'unk di'ibʉ xyʉ'a̱jtypy timón.
\v 5 Nandʉ'ʉn ja̱jtpʉ dʉ'ʉn mʉt ja ja̱'a̱yʉty ja ya'an. Mutskʉ'ʉ, per naymyʉjpʉjtákʉp ko kyajxy. Nnija̱'a̱m yajxón ko tu'ugʉ jʉnya'angu'unk ño'kta̱'a̱yʉp ja tun kopkʉ mʉjjátypyʉ.
\v 6 Es yʉ ya'an yʉ'ʉ dʉ'ʉn éxtʉmʉ tadʉ jʉnya'angu'unk, extʉ mba̱a̱t dyajtʉgóy ja jot winma̱'a̱ñ tʉgekyʉ ja'agyʉjxm di'ibʉ kyajxypy. Dʉ'ʉn ja ya'an éxtʉm tu'ugʉ jʉmba̱jk di'ibʉ tʉ tyoy ayoodaknóty, es óknʉm dyajtoybyéky oytyim na̱'a̱jʉty, es dʉ'ʉn dyajtʉgooydya'ay tʉgekyʉ ja ja̱'a̱yʉ jyiky'a̱jtʉn.
\p
\v 7 Yʉ ja̱'a̱yʉty mba̱a̱t dyaj'yujy nidʉgekyʉ kana̱k naxʉ añimal, éxtʉmʉ joon, tsa̱'a̱ñ, es di'ibʉ jikymyejyñóty tsʉna̱a̱ydyʉp, es tʉ dʉn dyaj'yujy;
\v 8 per ni pʉ́n mba̱a̱t tkayaj'yujy ja ya'an, mʉt ko yʉ'ʉ dʉ'ʉn éxtʉmʉ awa̱'a̱ndsa̱'a̱ñ ja xyʉwat di'ibʉ extʉ ya'o'kp es ni na̱'a̱ kyape'xy.
\v 9 Es mʉt ja nya'an'a̱jtʉm n'awda̱jtʉm ja Dios Teety, es nan mʉt yʉ'ʉ n'amdo'om ko Dios tka̱jxpókʉt ja ja̱'a̱yʉty di'ibʉ Dios tʉ dyajkojy ko ñayya''agojwinna̱jxʉ.
\v 10 Es nan ma̱ n'a̱a̱'a̱jtʉm pyʉdsemy majtsk nax ja ayuk, yʉ oygyajxy esʉ axʉk kajxy. Mʉgu'ugítʉty, ¡kyaj 'yóyʉty ndu'unʉmʉ dʉ'ʉn!
\v 11 ¿Mba̱a̱t yʉ pa̱'a̱k nʉʉ esʉ ta̱'a̱m nʉʉ tuk náxyʉty pyʉdsemy ma̱ tu'ugʉ nʉʉ myuxy?,
\v 12 o ¿mba̱a̱t tu'ugʉ oliivʉs kepy tyʉʉmp'áty tsabox limʉ, o ja muuxy'a̱a̱ts tyʉʉmp'áty pox? Nan kyaj mba̱a̱t myuxy ja pa̱'a̱k nʉʉ ma̱ myuxy ja ta̱'a̱m nʉʉ.
\s Wijy'a̱jtʉn di'ibʉ Dios yajkypy
\p
\v 13 Pʉn nidu'ugʉty miits nayjya̱'a̱p kuwijy es kudʉy'a̱jtʉn, wa'an dya'íxyʉty mʉt ja oybyʉ jiky'a̱jtʉn es mʉt ja yuunk'a̱jt naxypyʉ'a̱jtʉn di'ibʉ miimp ma̱ ja wijy'a̱jtʉn.
\v 14 Per pʉn dʉ'ʉñʉmʉ dʉ'ʉn miits xyñaywyinnaxʉjáwʉdʉ es je'eyʉ kʉ'ʉm xytyuk'oy'ata̱'a̱ndʉ, katʉ mdimjʉna̱'a̱ndʉ ko mij mguwijy'áttʉ, mʉt ko andakʉn yʉ'ʉ es kyaj tyʉy'a̱jtʉnʉty.
\v 15 Pesʉ tya̱dʉ dʉ'ʉmbʉ kuwijy'át, kyaj yʉ'ʉ dyaky ja Dios. Yʉ'ʉ wyinma̱'a̱ñ'a̱jttʉp ja naxwíñʉdʉ ja̱'a̱yʉty, es myiñ ma̱ yʉ mʉjku'ugópk.
\v 16 Mʉt ko ma̱ ja̱'a̱y tnaywyinnaxʉjawʉ es je'eyʉ kyʉ'ʉmdsojkʉn dyajtuna̱'a̱ndʉ, jaa nandʉ'ʉn myiñ ja akʉ esʉ tsip, es tʉgekyʉ axʉk'a̱jtʉn;
\v 17 per ja di'ibʉ myʉda̱jttʉp ja wijy'a̱jtʉn di'ibʉ tso'omp ma̱ Dios, tim jayʉjp'a̱jtp tmʉdattʉ ja jiky'a̱jtʉn wa̱'a̱tspʉ, kyaj tsyiptʉjkʉty, oyjya'ay, tuda'aky, ajiiky amʉgu'uk, myʉda̱jttʉp ja pa''ayo'on, es tyiimpy ja oybyʉ.
\v 18 Pʉ́nʉty tyuundʉp esʉ ja̱'a̱y tsyʉʉnʉdʉ jotkujk, ja'agyʉjxm mayjya'ay tsyʉʉnʉdʉt tʉy'a̱jtʉn mʉʉt.
\c 4
\s Myʉdsip'a̱jttʉp ja Dios pʉ́nʉty tsyojktʉp ja naxwíñʉdʉ winma̱'a̱ñ
\p
\v 1 ¿Ma̱ ja tsip tsyooñ ko ak miits mnayyajjot'ambʉ́kʉdʉ es mdsiptundʉ nixim niyam? Pes di'ibʉ dʉ'ʉn mya''adʉ́tsʉdʉp, yʉ'ʉ tadʉ m'axʉk winma̱'a̱ñ ko ak miits mnayyajmʉjpʉdsʉma̱'a̱nʉdʉ.
\p
\v 2 Mdsojktʉp oytyiity di'ibʉ kyaj xymyʉdattʉ, es kyaj xypya̱a̱ttʉ; myajja̱'a̱y'o'ktʉp es naywyinnaxʉ xyjáwʉdʉ ko ja̱'a̱y ti tmʉdaty, per kyaj ni wi'ix tsoo xykyapa̱a̱ttʉ es xymyʉdáttʉt di'ibʉ mdsojktʉp. Mdsiptuun mdsipka̱jxtʉp. Kyaj xymyʉdattʉ di'ibʉ mdsojktʉp mʉt ko kyaj xy'amdoy ja Dios;
\v 3 es pʉn m'amdoodʉp, kyaj mmo'oyʉdʉ mʉt ko xymyʉdattʉ axʉk winma̱'a̱ñ es mʉt ko je'eyʉ xyajtuna̱'a̱ndʉ ma̱ mgʉ'ʉmdsojkʉn.
\p
\v 4 Miits, ja̱'a̱yʉty di'ibʉ Dios myastúttʉp, kyaj xyñijáwʉdʉ ko pʉ́n naymyaayʉp mʉt di'ibʉ ijtp ya̱ naxwiiñ, kyajp ja Dios ttsoktʉ. Pʉ́nʉty tsyojktʉp es ñaymyaya̱'a̱nʉdʉ mʉt di'ibʉ ijtp ya̱ naxwiiñ, myʉdsip'a̱jttʉp ja Dios.
\v 5 Pes kyaj ñanʉgoobʉty ja Diosʉ jyaaybyajtʉn jyʉna'añ ko yʉ ja̱'a̱jʉn di'ibʉ Dios tʉ tpʉjta'aky es 'yítʉt ma̱ ʉdsa̱jtʉm, yʉ'ʉ tsyejpy es ʉdsa̱jtʉm je'eyʉ xyja'a'a̱jtʉm.
\v 6 Perʉ Dios xypyudʉjkʉm ni'igʉ mʉdʉ myay'a̱jtʉn. Pa̱a̱ty jyʉna'añ ja Diosʉ jyaaybyajtʉn: “Dios 'yʉxtijpy di'ibʉ mʉj kʉjxmʉp, per pyudʉjkʉp myay'a̱jtʉngyʉjxm di'ibʉ yuunk náxypyʉty.”
\v 7 Pa̱a̱ty naygyʉyákʉdʉ ti'igyʉ ma̱ Dios. Katʉ xykyupʉktʉ ja mʉjku'ugópk, net miits mguga'agʉdʉt.
\v 8 Mʉwingondʉ Dios, es yʉ'ʉ nandʉ'ʉn mmʉwingónʉdʉp miidsʉty.
\p Yajwa̱'a̱tstʉ mgʉ'ʉ esʉ mjot mwinma̱'a̱ñ, miidsʉty, pojpʉ ja̱'a̱yʉty es di'ibáty 'yaduunmukándʉp dʉ'ʉn di'ibʉ Dios tsyejpy, es nandʉ'ʉn ja naxwíñʉdʉ winma̱'a̱ñ.
\v 9 Ya'íxʉdʉ ko tʉy'a̱jtʉn mjotmay'eeky mʉt ja mbojpʉty. May ta̱jtʉ es jáwʉdʉ. Yajtʉgátstʉ mxik mxo'onʉn mʉt ja mjʉ'ʉy myaxʉn, esʉ mxondakʉn yajtʉgátstʉ mʉdʉ m'amay mjotmay.
\v 10 Amutsk'attʉ ma̱ Dios, es yʉ'ʉ mbʉjta̱'a̱gʉdʉp mʉj.
\s Kyaj nnibi'tska̱jxʉm ja nmʉgu'uk'a̱jtʉm
\p
\v 11 Mʉgu'ugítʉty, katʉ mnayñi'ow mnayñiya̱a̱xʉdʉ nixim niyam. Di'ibʉ ñi'o'o ñiyáxʉp ja myʉgu'uk es tnibi'tska̱jxʉ, dʉ'ʉn ja'a éxtʉmʉ ja̱'a̱y di'ibʉ jʉna̱a̱mp ko kyaj tʉgekyʉ ja Diosʉ 'yana'amʉn tyuñ. Es pʉn mjʉna̱a̱mp ko tam ja Diosʉ 'yana'amʉn di'ibʉ kyaj tyuñ, kyaj mij xykyuydyúñ ja ana'amʉn, dʉ'ʉn mij éxtʉmʉ ana'ambʉn di'ibʉ jʉna̱a̱mp ti oy es ti ka'oy.
\v 12 Perʉ Diosʉ dʉ'ʉn je'eyʉ di'ibʉ ya̱jk ja ana'amʉn, es nan yʉ'ʉ dʉ'ʉn mba̱a̱t xytyukkumʉdo'om, es nan yʉ'ʉ mba̱a̱t xyajnitsókʉm es xyajkutʉgo'oyʉm; ¿per mbʉ́nʉ dʉn mij ko xyñibi'tska̱jxʉ ja mmʉgu'ugʉty?
\s Kyaj yajnijáwʉ ti miimp kʉdakp
\p
\v 13 Okmʉdowdʉ miidsʉty di'ibʉ jʉnándʉp: “Bom o jʉxtʉjm njo'omʉm wiink ka̱jpn, es jap n'ijtʉm ndo'k nya̱jkʉm tuk jʉmʉjt, es dʉ'ʉn nganara̱jtʉm ja maymyeeñ.”
\v 14 ¡Per ni je'eyʉ xykyanijáwʉdʉ ti miin mgʉdákxʉp aya̱ bom! Pes yʉ ja̱'a̱yʉty ja jyiky'a̱jtʉn dʉ'ʉn éxtʉmʉ nima̱'a̱ju'unk, waanʉ 'yity es tuk pójʉnʉ tyʉgooydya'ay.
\v 15 Di'ibʉ oy es njʉna̱'a̱nʉm yʉ'ʉ tya̱a̱dʉ: “Pʉnʉ Dios tsyejpy es xy'akmo'oyʉm ja njiky'a̱jtʉn'a̱jtʉm, ndu'unʉm xi'idʉ ya̱'a̱dʉ.”
\v 16 Per ko mij mjʉna̱'a̱ndʉ xytyuna̱'a̱ndʉ xi'idʉ ya̱'a̱dʉ aya̱ bom, mgawindsʉ'kʉbʉ dʉ'ʉnʉ Dios, mʉt ko je'eyʉ mnayyajmʉj mnayyajkʉjxmʉty. Es ko nmʉj ngʉjxmʉm, pekytyu'unʉmʉ dʉ'ʉn.
\v 17 Ja'a pʉ́n ñija̱'a̱p ttúnʉt ja oybyʉ es kyaj ttuñ, pekytyuump yʉ'ʉ.
\c 5
\s Ka̱jxwíjʉn mʉt ja mʉkja̱'a̱y
\p
\v 1 Mʉdowdʉ tya̱a̱dʉ, miits mʉkja̱'a̱ydyʉjkʉty. Jʉ'ʉy ya̱'a̱xtʉ mʉt ko myiñ ja ayo'on di'ibʉ mjantsyya''ayowánʉdʉp.
\v 2 Di'ibʉ mmʉda̱jt mjaygyajptʉp, dʉ'ʉn yʉ'ʉ Dios wyindum éxtʉm ti tʉgekyʉ wyindʉgooydya'ay, es éxtʉmʉ wit di'ibʉ ja ajkxytsyík tʉ tsyu'tsjujtta̱'a̱yʉty.
\v 3 Yʉ m'oorʉ meeñ es yʉ mblatʉ meeñ tʉ tyowʉdya'ay, esʉ tya̱dʉ tow yʉ'ʉ yajnigʉxʉ'ʉgʉp ko kyaj yajxón tʉ mduñ mʉt ja mmeeñ, es yʉ'ʉ dʉ'ʉn éxtʉm ja jʉnya'ank di'ibʉ myajtóyʉdʉp. Tʉ xyñikoombát xyñipʉjkpáttʉ maymyeeñ ma̱ tadʉ xʉʉ di'ibʉ tim óknʉm.
\v 4 Per ja mʉju'uñ di'ibʉ mgamooydyʉ ja mduumbʉty di'ibʉ yajmujktʉ ja mbʉjta'aky, ja'agyʉjxm ja tuumbʉ mni'ʉʉnʉdʉ, es myʉdooda̱a̱y ja Dios di'ibʉ tʉgekyʉ mʉk'a̱jtʉn myʉda̱jtypy.
\v 5 Ya̱ naxwiiñ miidsʉty tʉ mjiky'attʉ es tʉ mnaymyo'oyʉdʉ jotkujk'a̱jtʉn, es tʉ m'uts mjotkʉda̱'a̱ktʉ, éxtʉm ja ja̱'a̱y dyajni'xʉ ja tsa̱jka̱a̱ di'ibʉ ya'oogaampy.
\v 6 Miidsʉty tʉ xyñiwa̱a̱mbáttʉ nanatʉkʉ. Yʉ'ʉ jyiky'attʉ tʉy'a̱jtʉn mʉʉt, es xya'o'ktʉ, es kyaj ñaygyuwanʉ.
\s Ma'xtujkʉn esʉ ka̱jxtákʉn
\p
\v 7 Mʉgu'ugítʉty, ma'xtúktʉ miits extʉ ko myínʉt ja Nindsʉn'a̱jtʉm. Tʉ xy'ixtʉ wi'ix ja naymyʉduunʉbʉ ja̱'a̱y t'awixtʉ ja oybyʉ pyʉjta'aky. Mʉt ja ma'xtujkʉn t'awixtʉ ja potn es myínʉt ja nʉʉ tuu.
\v 8 Pa̱a̱ty nandʉ'ʉn miidsʉty ma'xtúktʉ es ti'igyʉ mwinma̱'a̱ñ xypyʉjta̱'a̱ktʉt ma̱ Kristʉ, mʉt ko tʉʉ dʉn tim wingoomp ma̱ myina̱'a̱ñ ja Nindsʉn'a̱jtʉm.
\v 9 Mʉgu'ugítʉty, kʉdii mnayñi'ʉʉnʉdʉ nixim niyam, es kʉdiibʉ myajpayo'oydyʉt, ja'a ko Dios di'ibʉ pojpʉ pyaye'epy, taa ja'a.
\v 10 Mʉgu'ugítʉty, jamyatstʉ Diosʉ kyuga̱jxpʉ es pʉjta̱'a̱ktʉ éxtʉmʉ ijxpajtʉn wi'ix tmʉdʉna̱a̱y ja ayo'on esʉ ma'xtujkʉn tmʉda̱jttʉ.
\v 11 Pes ʉdsa̱jtʉm njʉna̱'a̱nʉm ko jotkujk yʉ'ʉjʉty di'ibáty tʉ tmʉmada̱'a̱ktʉ ja ayo'on. Tʉ xymyʉdowdʉ ja Jopʉ mya'xtujkʉn, es xyñijáwʉdʉ wi'ix ja Nindsʉn'a̱jtʉm óknʉm oj myo'oyʉty ja jotkujk'a̱jtʉn, mʉt ko jyantsypya''ayoy yʉ Nindsʉn'a̱jtʉm.
\p
\v 12 Mʉgu'ugítʉty, di'ibʉ tim jʉjp'ám, katʉ xyajtestiigʉ'áttʉ yʉ tsa̱jp, ni yʉ naxwíñʉdʉ es ni ja wiinkpʉ. Nik oy ko mjʉna̱'a̱ndʉt “oy” di'ibʉ oy, es “kyaj” di'ibʉ kyaj, kʉdiibʉ Dios mdukkumʉdówʉdʉt.
\p
\v 13 Pʉn ja pʉ́n 'yayoy jyottʉgoy, wa'an tka̱jxta'aky; es pʉn ja pʉ́n jyotkujk'áty, wa'an t'ʉy ja alabanzʉ.
\v 14 Pʉn ja pʉ́n pyékyʉty, wa'an twoy ja mʉjja̱'a̱ydyʉjk di'ibʉ tuundʉp ma̱ mʉbʉjkpʉtʉjk ñaymyúkʉdʉ, es tniga̱jxta̱a̱gʉt ja puma̱'a̱y, es mʉt ja Nindsʉn'a̱jtʉm Jesukristʉ xyʉʉgyʉjxm ttukja̱a̱xʉt waanʉ aseytʉ oliivʉ.
\v 15 Es pʉn mmʉbʉjktʉp ko Dios ttúnʉt éxtʉm mga̱jxta̱'a̱ktʉ, yʉ puma̱'a̱y agʉda̱'a̱gʉp; es pʉn pekytyuun, Dios ma'xʉdʉp ja pyojpʉ.
\v 16 Pa̱a̱ty pʉn miidsʉty tʉ xymyʉdʉgoydyʉ wiinkpʉty, mʉmayats nidu'uk nidu'uk, es pʉjktsów ja ma'xʉn. Nayñiga̱jxta̱a̱gʉdʉ nixim niyam es m'agʉda̱'a̱ktʉt. Ko kya̱jxtáky tu'ugʉ ja̱'a̱y di'ibʉ jiky'a̱jtp tʉy'a̱jtʉn mʉʉt, yʉ kya̱jxtákʉn myʉda̱jtypy ni'igʉ ja mʉk'a̱jtʉn.
\v 17 Okwinmaydyʉ ko ja Diosʉ kyuga̱jxpʉ Eliiʉsʉ dʉ'ʉn ijty jya'ay'áty éxtʉm ʉdsa̱jtʉm. Ja'a amumdu'uk jot kya̱jxtáky es kʉdiibʉ tyu'ujʉt, es kyaj tyuuy tʉgʉk jʉmʉjt jakujm.
\v 18 Ko jatʉgok kya̱jxtáky, nétnʉm tyuuy jatʉgok, es oj wyindʉy ja pʉjta'aky.
\p
\v 19 Mʉgu'ugítʉty, pʉn miidsʉty nidu'uk myʉdu'udʉgeepy ja tʉy'a̱jtʉn esʉ wiinkpʉ ja̱'a̱y tyuknijʉmbítyʉty,
\v 20 nijáwʉdʉ miits ko yʉ di'ibʉ tʉ ja pojpʉ ja̱'a̱y ttukmastu'uty ja ñʉ'ʉ tyu'u ja axʉʉkpʉ, es ttuknijʉmbity ja nʉ'ʉ tu'u di'ibʉ Dios xytyukni'ijxʉm, tadʉ dʉ'ʉmbʉ ja̱'a̱y tyiimpy es tsyo'ogʉt ma̱ ja o'kʉn, es yʉ'ʉgyʉjxm ja ja̱'a̱y yajtuknima'xʉt may ja pyeky.