\id 1PE

\h 1 PEEDRɄ
\mt Myʉtu'ukpʉ Neky Di'ibʉ Peedrʉ Jyaay
\c 1
\p
\v 1 Ʉj Peedrʉ, Jesukristʉ 'yapóstʉlʉ, ja'a njʉna̱'a̱nʉm ko tʉ xykyéxyʉts. Nduknigajxtʉptsʉ tya̱dʉ neky di'ibátyʉty kyaj ñaky'ittʉ ma̱ yʉ Israelʉ ñaxwíñʉdʉ, es tsyʉʉnʉdʉ oymya̱a̱ty ma̱ yʉ ñaxwíñʉdʉ: Pontʉ, Galasyʉ, Kapadosyʉ, Asyʉ esʉ Bitiñʉ.
\v 2 Dios Teety mwin'ijxʉdʉ éxtʉmʉ jawyiin tnija̱'a̱jʉ es ttuknibʉjtákʉ. Espíritʉ Santʉ myʉk'a̱jtʉngyʉjxm myajpʉjtáktʉ Diosʉ jya'ay, esʉ dʉ'ʉn xymyʉmʉdówdʉt ja Dios es mwa̱'a̱tstʉt mʉt ja Jesukristʉ ñe'pyñ. Wa'an ja Dios ni'igʉ mgunu'xʉdʉ es mmo'oyʉdʉ ja agujk'a̱jt jotkujk'a̱jtʉn.
\s “N'ok'awda̱jtʉm ja Dios”
\p
\v 3 N'ok'awda̱jtʉm ja Dios, Nindsʉn'a̱jtʉm Jesukristʉ Tyeety, di'ibʉ tʉ xytsyojkʉm es xypya''ayo'om es xyajmi'in xyajja̱jtʉm jemy es xytyuk'awijxʉm ja jiky'a̱jtʉn di'ibʉ winʉ xʉʉ winʉ tiempʉ, ja'a ko ja Nindsʉn'a̱jtʉm Jesukristʉ jyikypyejky jatʉgok.
\v 4 Pa̱a̱ty ʉdsa̱jtʉm n'awijx njʉjp'ijxʉm ko Dios xymyo'oya̱'a̱nʉm ja kuma̱'a̱ñ di'ibʉ pʉjke'eky ya'ijtypy tsa̱jpótm, di'ibʉ kyaj mba̱a̱t kyutʉgoy, ni mba̱a̱t kya''axʉʉgʉ es ni mba̱a̱t kyani'xy éxtʉmʉ pʉjy o a̱a̱y ujtsʉn.
\v 5 Ja'a ko xymyʉbʉktʉ Dios, yʉ'ʉ mguwa̱'a̱nʉdʉp mʉt ja myʉk'a̱jtʉn ma̱a̱nʉm xy'awixtʉ ja tiempʉ ma̱ yʉ'ʉ dya'ixa̱'a̱ñʉty ja ñitsokʉn, di'ibʉ myʉda̱jtypy pʉjke'eky koonʉm myínʉt ja tiempʉ di'ibʉ tim óknʉm.
\p
\v 6 Pa̱a̱ty miits mjantsy'it mjantsyxyondʉ, oyʉ daa kana̱k peky ayo'on jotmay xyjapa̱a̱da̱a̱mbʉdʉ je'eyʉ waanʉ tiempʉ.
\v 7 Ja'a ko miidsʉ mmʉbʉjkʉnʉty, dʉ'ʉn éxtʉm ja oorʉ di'ibʉ ya'ijxmatsa̱a̱mp mʉdʉ jʉʉn es ya'íxʉt pʉn oyʉ dʉ'ʉn. Ja mʉbʉjkʉn di'ibʉ myʉmadakypy ko ya'ijxmátsy, waanʉ ni'igʉ tsoba̱a̱ty kʉdiinʉm ja oorʉ di'ibʉ kʉjx na̱jxp, es dʉ'ʉn miidsʉdyʉ mmʉbʉjkʉnʉty ko dʉ'ʉn ya'ijxmátsʉt, mba̱a̱dʉdʉp miidsʉty ja mʉj'a̱jtʉn es ja windsʉ'kʉn es myajniga̱jxʉt oy ko Jesukristʉ myínʉt.
\p
\v 8 Oy xykya'ixtʉ ja Jesukristʉ, mdsojktʉp miidsʉty ja'a; es oy yʉ'ʉ xykya'ixtʉ, mmʉbʉjktʉp miidsʉty yʉ'ʉ es mjantsyxyonda̱'a̱ktʉ éxtʉm kyaj yajpa̱a̱ty ja ayuk wi'ix mba̱a̱t yajka̱jxpʉdsémy,
\v 9 mʉt ko xyajpʉdʉ'ʉktʉ ja pʉjta'aky di'ibʉ ma̱ ja mmʉbʉjkʉnʉty, ja'a njʉna̱'a̱nʉm, m'axá̱jʉdʉp ja m'anmʉja̱'a̱nʉ ñitsokʉn.
\p
\v 10 Yʉ tya̱dʉ nitsokʉn ja'a di'ibʉ Diosʉ kyuga̱jxpʉty 'yʉxpʉjktʉ es tpayo'oydyʉ, es yʉ'ʉjʉty jʉnandʉ ko Dios mmo'oya̱'a̱nʉdʉ ja kunu'xʉn.
\v 11 Yʉ Diosʉ kyuga̱jxpʉty jyanijawʉyandʉ na̱'a̱ dʉ'ʉnʉ tya̱a̱dʉ es wi'ixʉ dʉ'ʉn jyata̱'a̱ñ. Es ja Kristʉ Jya̱'a̱jʉn yʉ'ʉ naty ijtp mʉt yʉ'ʉjʉty, es tyuknija̱'a̱jʉ es koonʉm yʉ Kristʉ tmʉmada̱'a̱gʉt ja ayo'on jawyiin es óknʉm t'axá̱jʉt yʉ myʉj'a̱jtʉn.
\v 12 Perʉ Dios tyuknija̱'a̱dʉ ja kyuga̱jxpʉty ko yʉ tya̱dʉ ka̱jxwíjʉn kyaj myʉt'yʉ'ʉ'áttʉ, ja'a es ʉdsa̱jtʉm nduk'oy'a̱jtʉm. Miidsʉty tʉ xymyʉdowdʉ tya̱dʉ oybyʉ ayuk di'ibʉ tʉ m'anʉ'ʉmxʉdʉ mʉt ja myʉk'a̱jtʉnʉ Espíritʉ Santʉ di'ibʉ tso'on tsa̱jpótm, es extʉ yʉ ánklʉsʉty jyanijawʉyandʉ tya̱a̱dʉ.
\s Wa̱'a̱ts njiky'a̱jtʉm
\p
\v 13 Pa̱a̱ty, miidsʉty nidʉgékyʉty, naybyʉjta̱'a̱gʉdʉ wijy es pe'typy, es ya'óyʉdʉ yajxónʉ mjiky'a̱jtʉn. Awixtʉ mʉt winʉ mjot ja kunu'xʉn di'ibʉ m'axa̱jʉyándʉp ko Jesukristʉ myínʉt jatʉgok.
\v 14 Extʉmʉ u'unk ʉna̱'kʉty di'ibʉ mʉdoodʉp, mʉmʉdowdʉ miidsʉty yajxón ja Dios. Katʉ mjiky'attʉ mʉt ja axʉk adsojkʉn di'ibʉ mmʉda̱jttʉ ko naty kyajnʉm xyñijáwʉdʉ wi'ix ja Dios ttseky es njiky'a̱jtʉm.
\v 15 Jiky'attʉ wa̱'a̱ts, ja'a ko Dios di'ibʉ tʉ mwin'ijxʉdʉ, wa̱'a̱dsʉ'ʉ;
\v 16 tya̱a̱dʉ dʉ'ʉn kyajxypy ja Dios ma̱ jyaaybyajtʉn: “M'íttʉp miidsʉty wa̱'a̱ts, mʉt kots ʉj nwa̱'a̱dsʉty.”
\p
\v 17 Ja'a ko xyTyeety'áttʉ ja Dios, di'ibʉ pyaye'epy nidu'uk nidu'uk, es kyaj wyin'ixy wyingéxyʉty, na̱a̱m m'akjiky'a̱jtpnʉm naxwiiñ, m'akjiky'áttʉp es xymyʉmʉdówdʉt ja Dios, es xywyindsʉ'ʉgʉdʉt.
\v 18 Mnija̱'a̱dʉp éxtʉm tkʉbejty tkumʉdooy ja Dios es dyajtso'ogʉt ma̱ tadʉ axʉʉkpʉ jiky'a̱jtʉn di'ibʉ xytyukmʉnikákʉm ja n'aptʉjk'a̱jtʉm. Pes ja Dios kyaj tkʉbejty ja nnitsokʉn'a̱jtʉm mʉt ja platʉ meeñ oorʉ meeñ di'ibʉ na̱jxp;
\v 19 jantsy tsooxʉ Dios mgujuuyʉdʉ es mnitso'oktʉt ko mbojpʉ tkʉbejty mʉdʉ Jesukristʉ ñe'pyñ di'ibʉ tyukwindsʉ'kʉ éxtʉm tu'ugʉ borreegʉ di'ibʉ ni tii tkamʉdaty ja axʉk'a̱jtʉn.
\v 20 Jékyʉp ja Diosʉ dʉ'ʉn ttuknibʉjtákʉ kyajnʉmʉ naty dyajkojy ja naxwíñʉdʉ, per tyam ma̱ tya̱dʉ xʉʉ tiempʉ ko yʉ naxwíñʉdʉ kyʉxannʉ, tʉ kyʉxe'eky miits m'oy'a̱jtʉngyʉjxmʉty.
\v 21 Es Jesukristʉkyʉjxm xymyʉbʉktʉ Dios, di'ibʉ yajjikypyʉjkʉ ma̱ 'ye'ky es tʉ tmo'oy ni'igʉ ja mʉj'a̱jtʉn, es dʉ'ʉn nmʉbʉjkʉm ja Dios es n'ajot'a̱jtʉm.
\p
\v 22 Es mʉt ko tʉ xymyʉmʉdowdʉ ja tʉy'a̱jtʉn, tʉ xyajwa̱'a̱tstʉ m'anmʉja̱'a̱n es mʉt winʉ mjot mnaydsyókʉdʉt nixim niyam, éxtʉm jyawʉ mdukka'ax'áttʉ.
\v 23 Pesʉ myajmiin myajja̱jtʉdʉ jemy mʉt yʉ'ʉgyʉjxm ja Diosʉ 'yayuk di'ibʉ ijtp winʉ xʉʉ winʉ tiempʉ; kyaj dyʉ'ʉnʉty éxtʉm ja jiky'a̱jtʉn di'ibʉ kʉjxp na̱jxp, di'ibʉ m'axá̱jʉdʉ ko mmiin mja̱jttʉ naxwiiñ,
\v 24 mʉt ko xytyuknija̱'a̱m ja Diosʉ jyaaybyajtʉn ko jyʉna'añ:
\q Dʉ'ʉn ja ja̱'a̱yʉty éxtʉm ja a̱a̱y ujtsʉn,
\q es ja myʉj'a̱jtʉnʉty éxtʉm ja a̱a̱y ujtsʉ pyʉjyʉn.
\q Tʉtsp ja a̱a̱y ujts es ja pyʉjy kya'ay;
\q
\v 25 perʉ Dios 'yayuk, ijttʉʉp winʉ xʉʉ winʉ tiempʉ.
\m Esʉ tya̱dʉ ayuk ja'a ñigajxypy ja nitsokʉn di'ibʉ tʉ myajtukmʉdówdʉ.
\c 2
\p
\v 1 Pa̱a̱ty miidsʉty, mastu'uttʉ tʉgekyʉ axʉk'a̱jtʉn. Kyaj pʉ́n xywyin'ʉʉndʉt. Katʉ nan nʉgoobʉ je'eyʉ m'akjʉna̱'a̱ndʉ ko xymyʉbʉktʉ Dios, mya'íxʉdʉbʉ dʉ'ʉn mʉt ja mgʉ'ʉm jiky'a̱jtʉn, es katʉ xyñaywyinnaxʉjáwʉdʉ mʉt tii. Mastu'uttʉ tʉgekyʉ pi'tskajxy.
\p
\v 2 Extʉmʉ maxu'ungu'ungʉty jantsy tsi'idsa̱a̱mp, dʉ'ʉn miidsʉty nandʉ'ʉn xytsyóktʉt ja Diosʉ 'yayuk, es dʉ'ʉn xymyʉyaak xymyʉbátʉt ja Diosʉ ñʉ'ʉ tyu'u es xymyʉdátʉt ja nitsokʉn,
\v 3 mʉt ko tʉ xyñijáwʉdʉ ko Nindsʉn'a̱jtʉm jyantsy'óyʉty mʉt ʉdsa̱jtʉm.
\s Dʉ'ʉn ja Kristʉ éxtʉmʉ tsa̱a̱ jiikypyʉ
\p
\v 4 N'okmʉwingo'onʉm ʉdsa̱jtʉm ja Jesús. Yʉ naxwíñʉdʉ ja̱'a̱yʉty tʉ 'yʉxtíjʉdʉ, perʉ Dios jyantsytsyejpy es tʉ twin'ixy, es dyajtúñ éxtʉmʉ tsa̱a̱ jiikypyʉ ma̱ potsy ʉjx.
\v 5 Xyajtu'unʉm ʉdsa̱jtʉm nandʉ'ʉn éxtʉm ja tsa̱a̱ jiikypyʉ, di'ibʉ mʉʉt ja potsy dyajpéty ma̱ Dios tsyʉʉnʉya'añ. Ma̱ tadʉ tsʉna̱a̱ydyákn, ja Jesukristʉ tʉ xypyʉjtákʉm éxtʉmʉ teetytyʉjkʉty, wa̱'a̱ts ja̱'a̱y, es nwindsʉ'kʉm ja Dios, es n'awda̱jtʉm mʉt ja njot'a̱jtʉm es mʉdʉ n'anmʉja̱'a̱n'a̱jtʉm, es ja Dios 'yaxá̱jʉp yʉ n'awda̱jtʉn'a̱jtʉm éxtʉmʉ windsʉ'kʉn di'ibʉ yʉ'ʉ tsyejpy.
\v 6 Pa̱a̱dyʉ Dios jyʉnáñ ma̱ ja jyaaybyajtʉn:
\q ¡Ixtʉ! Ʉj nbʉjta'agyʉts ma̱ Syon ka̱jpn tu'ugʉ tsujpʉ tsa̱a̱ ma̱ potsy ʉjx,
\q di'ibʉts ʉj tʉ nwin'ixy.
\q Di'ibʉ 'yaxá̱jʉdʉp, ni na̱'a̱ tkamʉdátʉt ja tsoydyu'un.
\m
\v 7 Es mʉt miidsʉty di'ibʉ myʉbʉjktʉp, tadʉ tsa̱a̱ myʉda̱jtypy kajaa yʉ mʉj'a̱jtʉn; per mʉt di'ibʉ kyaj tmʉbʉktʉ, kyuydyiimbyʉ tya̱a̱dʉ éxtʉm jyʉna'añ ja Diosʉ jyaaybyajtʉn:
\q Ja tsa̱a̱ di'ibʉ ja pojtspʉ kyaj ttsojktʉ,
\q tʉ net jya'ty ma̱ ja tʉjk t'ʉjx'áty.
\m
\v 8 Es nandʉ'ʉn yajkuydyúñ jatu'uk ma̱ jyʉna'añ:
\q Tya̱a̱dʉ dʉ'ʉn ja tsa̱a̱ di'ibʉ yajtukkunajpʉp es yajkʉdáy.
\m Tyukkunajpʉdʉp yʉ'ʉjʉty di'ibʉ kyaj tkupʉktʉ ja Diosʉ 'yayuk, mʉt ko dʉ'ʉnʉ dʉn tʉ pyʉjta̱'a̱gʉdʉ Dios.
\p
\v 9 Perʉ Dios tʉ mwin'íxʉdʉ miidsʉty di'ibʉ myʉbʉjktʉp, mmʉduundʉp ja Rey éxtʉmʉ teetytyʉjkʉty, wa̱'a̱ts ja̱'a̱yʉty miidsʉty, ja̱'a̱y di'ibʉ Dios ja̱'a̱y'a̱jtʉdʉp. Yʉ'ʉ mwin'ijxʉdʉ es xykya̱jxwa̱'xʉt ja oybyʉ tuunk di'ibʉ yʉ'ʉ tʉ tpʉjta'aky, mʉt ko mdukniwoodu'udyʉty ko m'ijttʉ ma̱ ja koots'át, es myajnejxyʉty jiky'a̱jtpʉ ma̱ ja jyá̱jʉnʉ tsujpʉ.
\v 10 Tʉʉyʉp kyajpʉ Dios mja̱'a̱y'átʉdʉ, per tyam sitʉy yʉ'ʉ mja̱'a̱y'a̱jtʉdʉp; tʉʉyʉp kyajʉ Dios mba''ayoojʉdʉ, per tyam tʉ mba''ayówʉdʉ.
\s Ayo'on yajmʉmada'aky mʉt ja ma'xtujkʉn
\p
\v 11 Mʉgu'ugítʉty, nmʉnu'xtáktʉpts miidsʉty, éxtʉm jabye'xyjya'ay ma̱ wiink nax wiink ka̱jpn, katʉ xy'anʉjx xy'a'oogʉdʉ di'ibʉ ja nini'x kʉba̱jk tsyejpy, di'ibʉ myʉdsip'a̱jtypy ja n'anmʉja̱'a̱n'a̱jtʉm.
\v 12 Mʉdattʉ oybyʉ mjot mwinma̱'a̱ñ mʉt ja di'ibʉ kyaj t'ixy'attʉ Dios, es dʉ'ʉn yʉ'ʉjʉty, oy tyam mjaniwa̱a̱mbajttʉbʉ nanatʉkʉkyʉjxm éxtʉmxyʉp m'axʉkja̱'a̱y'áttʉ, 'yíxtʉp ja oy'a̱jtʉn di'ibʉ miits mduundʉp, es ko ja̱'a̱y yajpayo'oydyʉt, net t'awdáttʉt ja Dios.
\p
\v 13 Nindsʉn'a̱jtʉmgyʉjxm mʉmʉdowdʉ pʉ́nʉty yajkutujkp ya̱ naxwiiñ, dʉ'ʉn ja yajkutujkpʉkópk, mʉt ko yʉ'ʉ waanʉ kʉjxm ja kyutujkʉn,
\v 14 es pʉ́nʉty ana'amdʉp kyutujkʉn patkʉ'ʉy, pʉ́nʉty kyejxypy es ttukkumʉdówʉt di'ibáty axʉʉk adʉ́tstʉp es oy tnimadya̱'a̱gʉt di'ibáty oy tuundʉp.
\v 15 Mʉt ko Dios tsyejpy es miidsʉty oy xytyúndʉt, es dʉ'ʉn xya''amóndʉt di'ibʉ nanatʉkʉkyʉjxm mniwa̱a̱mbajtʉdʉp.
\p
\v 16 Jiky'attʉ miidsʉty éxtʉmʉ di'ibʉ kyaj myʉdúñ ma̱ wiink ja̱'a̱y, es katʉ mnaybyʉjta̱'a̱gʉdʉ kujuun ma̱ ti xytyuna̱'a̱ndʉt axʉʉk. Jiky'attʉ éxtʉm ja Diosʉ myʉduumbʉ.
\v 17 Windsʉ'ʉgʉdʉ mʉjpʉ mutskpʉ. Tsoktʉ mmʉmʉbʉjkpʉty. Windsʉ'ʉgʉdʉ es awdattʉ Dios. Mʉj'íxtʉ ja yajkutujkpʉ kopk.
\p
\v 18 Miidsʉty di'ibʉ mʉduundʉp, windsʉ'ʉgʉdʉ mwindsʉ́n mwinda̱j es mʉmʉdowdʉ, kyaj jya'ayʉty je'eyʉ di'ibʉ oyjya'ayʉty, nandʉ'ʉn di'ibʉ ana'amp mʉk.
\v 19 Ja'a dʉ'ʉn oy ko xymyʉmada̱'a̱ktʉ ko nanʉgoobʉ mya''ayówʉdʉ, ja'agyʉjxm ko xyñijáwʉdʉ ko Dios 'yijxypy.
\v 20 Per pʉn miits mduundʉp ti oynʉ'ʉnʉn axʉʉk, es mʉt ja ma'xtujkʉn xymyʉmada'aky ko mdukkumʉdóyʉty, ¿ti oy'a̱jtʉnʉ dʉnʉ taadʉ? Per pʉn m'ayoodʉp mʉt ko ti oy tʉ xytyuñ, es mmʉmadáktʉp mʉt ja ma'xtujkʉn, tya̱a̱dʉ dʉ'ʉnʉ Dios 'yoyjya̱'a̱p.
\v 21 Pa̱a̱dyʉ Dios xywyo'om es dʉ'ʉn nma'xtujkʉm, ja'a ko Kristʉ 'yayooy mʉt ʉdsa̱jtʉmgyʉjxm, es xymyo'oyʉm tu'ugʉ ijxpajtʉn es nbadu'unʉm yʉ'ʉ.
\v 22 Jesukristʉ kyaj pyekytyuuñ es ni na̱'a̱ tkawin'ʉ'ʉñ pʉ́n.
\v 23 Ko pʉ́n wi'ixáty 'yanma̱a̱yʉ, kyaj wi'ixáty 'yadsoojʉmbijty; ko tsyaatsytyuunʉdʉ, kyaj t'adsʉ'kʉdʉ, je'eyʉ ttukkʉdʉjkʉ ja Dios, di'ibʉ pyaye'epy mʉt ja tʉy'a̱jtʉn.
\v 24 Kristʉ ja nbojpʉ'a̱jtʉm myʉnʉjx ma̱ ñini'x kruuzkʉjxm. Dʉ'ʉn ttuuñ es n'ijtʉm éxtʉmʉ o'kpʉ ko nbekytyuna̱'a̱nʉm es njiky'a̱jtʉm éxtʉm pyaadyʉty, es dʉ'ʉnʉ Kristʉ 'yo'kʉngyʉjxm oj nwátsʉm ma̱ ja nbojpʉ'a̱jtʉm, es tyam njiky'a̱jtʉm tʉy'a̱jtʉn mʉʉt, éxtʉmʉ Dios dyajnigutúkʉ.
\v 25 Tʉʉyʉp dʉ'ʉn miits m'ijttʉ éxtʉm ja borreegʉ di'ibʉ tʉ 'yʉxyo'oy, perʉ tʉ mjʉmbittʉ ma̱ Kristʉ, di'ibʉ mgwentʉ'a̱jtʉdʉp éxtʉm tu'ugʉ borreegʉ kwentʉ'a̱jtpʉ.
\c 3
\s Wi'ix jyiky'áttʉt ja kasa̱a̱dʉty
\p
\v 1 Nandʉ'ʉn miidsʉty kasa̱a̱dʉ toxytyʉjkʉty, naydyukkʉdʉ́kʉdʉ ja mña'ay, es dʉ'ʉn, oy mña'ay tkamʉbʉktʉ ja Diosʉ 'yayuk, mduk'axá̱jʉdʉp ja Jesukristʉ kyaj ja'agyʉjxm ko wi'ix xy'anʉʉmʉdʉ,
\v 2 ja'a dʉ'ʉn ko t'íxtʉt ko miits xyjiky'attʉ wa̱'a̱tspʉ jiky'a̱jtʉn es windsʉ'kʉn mʉʉt.
\v 3 Nayya'oy nayyajpa̱a̱dʉdʉ. Kyajts yʉ'ʉ n'andijy es xymyʉmay xymyʉda̱jtʉt ja mwit mgʉ'ʉgʉ jantsy oybyʉ, o wi'ixʉ mwa̱a̱y mgʉba̱jkkʉjxy xyajtsujtʉ́kʉdʉt, o wi'ix ja mnini'x oy kyʉxʉ'ʉgʉt mʉdʉ oorʉ.
\v 4 Ja tsuj'a̱jtʉn di'ibʉ kyaj ñaxy es ni'igʉ tsobatp Dios wyindum, ja'a yʉ'ʉ ko ja̱'a̱y oyjyot oywyinma̱'a̱ñ tmʉdattʉ es jyiky'attʉ yuunk naxypyʉ.
\v 5 Pes dʉ'ʉn ñayya'ijtʉdʉ tsuj ja wa̱'a̱tspʉ toxytyʉjk jékyʉp, wyindsʉ'kʉdʉ ja Dios es ñaydyukkʉdʉjkʉdʉ ja ña'ay.
\v 6 Dʉ'ʉnʉ Saarʉ, yʉ Abra̱a̱nʉ ñʉdo'oxy, tmʉmʉdooy ja Abra̱a̱n, es ttijy “nwindsʉ́n”. Miits mja̱'ttʉp dʉ'ʉn éxtʉmʉ Saarʉ pʉn mduundʉp ja oybyʉ es kyaj ti xytsyʉ'ʉgʉdʉt.
\p
\v 7 Es nandʉ'ʉn miidsʉty kasa̱a̱dʉ yedyʉjkʉty, mʉma'xtúktʉ mnʉdo'oxyʉty. Windsʉ'ʉgʉ éxtʉm yʉ'ʉ pyaadyʉty. Kyaj jye'eyʉty mʉt ko toxytyʉjkʉty 'yama̱a̱yʉty, per mʉt ko nandʉ'ʉn tmʉdattʉ mʉt miidsʉty ja jiky'a̱jtʉn di'ibʉ tʉ mmo'oyʉdʉ ja Dios mʉt ja kyʉ'ʉmdsojkʉn. Tundʉ dʉ'ʉn, es net kʉdiibʉ ni tii mga''adsípʉdʉt ko mga̱jxta̱'a̱ktʉt.
\s Di'ibʉ ayoodʉp ko ttundʉ ja oybyʉ
\p
\v 8 Di'ibʉts ʉj tʉ njatuk'ʉxpʉka̱'a̱ndʉ nidʉgekyʉ miidsʉty di'ibʉ myʉbʉjktʉp ja Kristʉ, yʉ'ʉ tya̱a̱dʉ: Ittʉ ti'igyʉ, naymyʉma'xtúkʉdʉ nixim niyam, naydsyókʉdʉ nixim niyam mʉt winʉ mjot, pa''ayowdʉ ja̱'a̱y, es tuda'aky'áttʉ.
\v 9 Ni na̱'a̱ xykyayajjʉmbíttʉt axʉʉk ko pʉ́n axʉʉk mdúnʉdʉt, es ni xykya'oojʉmbíttʉt ko pʉ́n m'oojʉdʉt. Nik ni'igʉ kunu'xtʉ, mʉt ko Dios mwoojʉdʉ es xy'axá̱jʉdʉt yʉ kunu'xʉn.
\v 10 Extʉm jyʉna'añ ja Diosʉ jyaaybyajtʉn:
\q Di'ibʉ tsyejpy jyiky'ata̱'a̱ñ oy es jeky,
\q kyaj 'yanda̱'a̱gʉt es kyaj axʉk kajxy tka̱jxʉt;
\q
\v 11 kyaj t'oktuunnʉt ja axʉk'a̱jtʉn; ja'a tyúnʉp ja oybyʉ,
\q 'yʉxta̱'a̱yʉp ja ti'igyʉ'át, es kyaj jyiky'átʉt tsipoty.
\q
\v 12 Mʉt ko Dios tam kywentʉ'átyʉty ja ja̱'a̱y di'ibʉ jiky'a̱jtp tʉy'a̱jtʉn mʉʉt,
\q es myʉdo'oxʉty ja kya̱jxtákʉn,
\q per myʉdsip'a̱jtypy di'ibʉ axʉʉk adʉ́tstʉp.
\p
\v 13 Pʉn amumdu'uk jot miidsʉty dʉ'ʉñʉm xytyundʉ oy tʉgékyʉty, ¿pʉ́n axʉʉk mdúnʉdʉp?
\v 14 Per pʉn m'ayoodʉp mʉt ko mjiky'attʉ wa̱'a̱ts, Dios mgunu'xánʉdʉp. Katʉ pʉ́n xytsyʉ'ʉgʉdʉ es katʉ mmay mda̱jtʉ.
\v 15 Mʉt winʉ mjot awdattʉ Kristʉ éxtʉmʉ mWindsʉ́n. Dʉ'ʉñʉm jʉjp'íxy mnayya'ítʉdʉt es xy'adsówdʉt pʉnaty myajtʉʉjʉdʉp ti ko xymyʉbʉktʉ Dios, es ti m'awijx mjʉjp'ijxtʉp.
\v 16 Mʉdattʉ ja mjot mwinma̱'a̱ñ wa̱'a̱ts, es dʉ'ʉn ko pʉ́n mniwa̱a̱mbátʉdʉt nanatʉkʉ mʉt ko miits m'ʉxpʉjkpʉ'átyʉty ja Kristʉ, yʉ'ʉjʉty kʉ'ʉm wʉ'ʉmda̱'a̱ydyʉp tsoydyu'un mʉʉt.
\v 17 Es pʉn dʉ'ʉnʉ Dios ttseky es m'ayówdʉt, ni'igʉ 'yóyʉty m'ayówdʉt ko mjiky'attʉ wa̱'a̱ts, es kyaj m'ayówdʉt mʉt ja tʉydyu'unʉn ko mjiky'attʉ axʉʉk.
\p
\v 18 Mʉt ko Kristʉ, oy ni ti peky tkatuuñ, tʉgok je'eyʉ mʉt winʉ xʉʉ winʉ tiempʉ 'ye'ky ma̱ jyapatʉ n'o'kʉm ʉdsa̱jtʉm pekyjya'ayʉty, es xytyukniwátsʉm ja nbojpʉ'a̱jtʉm es xyajnʉjxʉm wa̱'a̱ts Dios wyindum. Oj 'yeeky ja Jesusʉ ñini'x, per Espíritʉ Santʉkyʉjxm jyikypyejky.
\v 19 Mʉdʉ 'yanmʉja̱'a̱n oj ñejxy ma̱ ja anmʉja̱'a̱nʉty di'ibʉ tsimy ijttʉp, es jap oj tka̱jxwa'xy ja Diosʉ 'yayuk,
\v 20 ja anmʉja̱'a̱n di'ibʉ kyaj tmʉmʉdoodʉ ko Dios jya''awijxʉdʉ ma'xtujkʉn mʉʉt esxyʉp jyodʉmbijttʉ ma̱a̱nʉm ja No'ee naty dya'oyʉ ja arkʉ, ma̱ oj je'eyʉ niduktujk ja ja̱'a̱y tsyo'oktʉ ko ja ayo'onduu myiiñ.
\v 21 Ja tadʉ nʉʉ, dʉ'ʉn ja'a tpaty éxtʉmʉ nʉbajtʉn di'ibʉ xyajnitsókʉm. Ja nʉbajtʉn, kyaj yʉ'ʉjʉty es nʉʉgyʉjxm ja nini'x wya̱'a̱tsʉt, ja'a dʉ'ʉn esʉ ja̱'a̱y jyot wyinma̱'a̱ñ wa̱'a̱ts 'yíttʉt Dios wyindum. Ja nʉbajtʉngyʉjxm nnitsókʉm ja'agyʉjxm ko Jesukristʉ jyikypyeky ma̱ 'ye'ky,
\v 22 di'ibʉ patʉjkʉ tsa̱jpótm es tyam 'yity aga̱'a̱ñdsyoo ma̱ Dios, es oytyim di'ibʉ ánklʉsʉty es oytyim di'ibʉty ja kyutujkʉnʉty tmʉmʉdowdʉ ja Jesús.
\c 4
\s Naybyudʉjkʉm nixim niyam
\p
\v 1 Es dʉ'ʉn éxtʉm 'yayooy ja Kristʉ ya̱ naxwiiñ, nandʉ'ʉn miits mʉdattʉ ja winma̱'a̱ñ éxtʉm ko 'yayooy, ja'a ko di'ibʉ dʉ'ʉn tʉ 'yayoy ma̱ ñini'x kyʉba̱jk, tʉ tmastutta̱'a̱y ja pyeky
\v 2 es jyiky'átʉt éxtʉm ja Dios ttseky maba̱a̱dʉ jyiky'a̱jtʉn, es kyaj éxtʉmʉ ñini'x kyʉba̱jk ttseky.
\v 3 Tsya'a nadʉ'ʉn ko mjiky'a̱jttʉ éxtʉm jyiky'attʉ pʉ́nʉty kyaj tmʉdundʉ Dios, mjiky'a̱jttʉ éxtʉm mnini'x mgʉba̱jk ttsojktʉ, m'adsojktʉp tii, ami'ikyjya'ay m'ijttʉ, je'eyʉ mgáxʉty, es m'awda̱jttʉ ja agojwinnáx.
\v 4 Di'ibʉ ijty mmʉgu'uk'a̱jttʉp ma̱ tya̱dʉ axʉʉkpʉ jiky'a̱jtʉn, dʉ'ʉñʉ tyam wyʉ'ʉmʉdya'aydyʉ mʉt ko kyaj ja'a mʉʉt xyñakypyanʉjxtʉ ko kyaj ñayjyʉjwijtsʉmbítʉdʉ, es mduk'ak'átʉdʉ.
\v 5 Per yʉ'ʉjʉty myʉgwentʉ'a̱jtypy ja Dios, mʉt ko Dios pyayo'oyaampy di'ibʉ jiky'a̱jttʉp es di'ibʉ o'ktʉ.
\v 6 Pa̱a̱ty oj yajka̱jxwa'xy ja oybyʉ ayuk nandʉ'ʉn ma̱ di'ibáty o'ktʉ, es oy yajtʉydyúndʉ mʉdʉ o'kʉn ma̱ ñini'x tmʉda̱jttʉ, dʉ'ʉn jyiky'áttʉt ja jya̱'a̱jʉn mʉdʉ Dios.
\p
\v 7 Tʉʉ wyingóñ esʉ ja̱'a̱y yajpayo'oydyʉt. Pa̱a̱ty miits ittʉ tuda'aky, wijy es mga̱jxta̱'a̱ktʉt.
\v 8 Pa̱a̱ty wa'an t'ity nan ni'igʉ tsojkʉn ma̱ miidsʉty, mʉt ko ma̱ ja̱'a̱y ñaydsyókʉdʉ, may ja peky ñaydyuknima'xʉdʉ.
\v 9 Es naymyo'oyʉdʉ nixim niyam yʉ ja̱jttákn esʉ ka̱'a̱y ukʉn mʉt winʉ mjot.
\v 10 Naybyudʉ́kʉdʉ nixim niyam éxtʉm ja Dios tʉ mmo'oyʉdʉ nidu'ugátyʉty ja madakʉn. Yajtúndʉ yajxón ja kana̱k pekypyʉ madakʉn di'ibʉ Dios tʉ mmo'oyʉdʉ.
\v 11 Ko pʉ́n tka̱jxwíjʉt ja myʉgu'uk, wa'an t'anʉʉmʉ éxtʉm ja Dios tʉ tyuk'ʉxpékyʉty. Es ko pʉ́n ttukpudʉkʉ tii ja myʉgu'uk, wa'an ttuñ mʉt ja mʉk'a̱jtʉn di'ibʉ Dios tʉ myo'oyʉty, es dʉ'ʉnʉ Dios awdaty 'yítʉt Jesukristʉkyʉjxm ma̱ tʉgekyʉ di'ibʉ ijtp. Wa'anʉ Dios tmʉdaty ja mʉj'a̱jtʉn winʉ xʉʉ winʉ tiempʉ. Wa'an dʉ'ʉnʉty.
\s 'Yayowdʉ pʉ́nʉdyʉ Kristʉ myʉbʉjktʉp
\p
\v 12 Mʉgu'ugítʉty, katʉ dʉ'ʉñʉ mwʉ'ʉmʉdʉ mʉt ja mʉk ayo'on di'ibʉ myajna̱jxtʉp. Katʉ xywyinmaydyʉ es kyaj dʉ'ʉn jyátʉt di'ibáty myʉbʉjktʉp ja Kristʉ.
\v 13 Ni'igʉ mxonda̱'a̱ktʉt, mʉt ko pʉn dʉ'ʉn miits xytyukmuktʉ ja Jesukristʉ 'yayo'on, nandʉ'ʉn xytyukmúktʉt ni'igʉ ja xondakʉn ko naty myiñ jatʉgok.
\v 14 Es pʉn ja ja̱'a̱yʉty mduunʉdʉp axʉʉk mʉt ko xypyanʉjxtʉ Jesukristʉ, xonda̱'a̱ktʉ, mʉt ko 'yity ma̱ miidsʉty ja Diosʉ Jya̱'a̱jʉn di'ibʉ ni'igʉ mʉj'a̱jtʉn myʉda̱jtypy.
\v 15 Per ko m'ayówdʉt miidsʉty, kyaj mʉt ko myajja̱'a̱y'ooktʉ, o mmaatstʉ, o m'axʉkja̱'a̱y'áttʉ, o m'abi'ts'áttʉ, o mʉt ko oytyiity xytyuktʉ́kʉdʉ di'ibʉ kyaj mba̱a̱dʉdʉ.
\v 16 Mʉt ko pʉn m'ayoodʉp ko Kristʉ mja̱'a̱y'átʉdʉ, kyaj tya̱dʉ tsyoydyu'unʉty; ni'igʉ xy'awdáttʉt ja Dios mʉt ko miits mja̱'a̱y'átʉdʉ Kristʉ.
\p
\v 17 Mʉt ko tʉ tpa̱a̱ty ja tiempʉ ma̱ Dios tpayo'oya'añ ja jya'ayʉty; es pʉn tsondakp ja Diosʉ pyayo'oyʉn mʉt ʉdsa̱jtʉm, tʉy'a̱jtʉnʉ'ʉ ko 'yakjata̱'a̱ndʉ di'ibáty kyaj tkupʉktʉ ja oybyʉ ayuk di'ibʉ Dios kyajx.
\v 18 Yʉ'ʉ dʉnʉ tya̱a̱dʉ di'ibʉ 'yandijpy ja Diosʉ jyaaybyajtʉn ma̱ jyʉna'añ: “Pʉn tsip es ñitso'ogʉt ja ja̱'a̱y di'ibʉ jiky'a̱jtp tʉy'a̱jtʉn mʉʉt, ¿ti jatánʉdʉp ja pekyjya'ay es pʉ́nʉty kyawindsʉ'kʉdʉp ja Dios?”
\v 19 Pa̱a̱ty pʉn yʉ'ʉ tsyojkʉn'a̱jtypy ja Dios es n'ayo'om, n'okjiky'a̱jtʉm yajxón, éxtʉm dyajnigutúkʉ ja Dios di'ibʉ xyajkójʉm es kyuydyiimpy di'ibʉ kyajxypy.
\c 5
\s Wi'ix yajka̱jxwijtʉ ja mʉbʉjkpʉtʉjk
\p
\v 1 Nmʉnu'xtáktʉpts ja mʉjja̱'a̱ydyʉjkʉty ma̱ mnaymyúkʉdʉ. Pes ʉj nandʉ'ʉn mʉjja̱'a̱y éxtʉm miidsʉty. Taptsʉ naty ʉj n'ixy ja Kristʉ ko 'yayooy ma̱ ja kruuz es 'ye'ky, es ʉj nandʉ'ʉn ndukmukaambyʉts mʉt miidsʉty ja mʉj'a̱jtʉn di'ibʉ óknʉm nigʉxʉ'ʉga̱a̱mp.
\v 2 Pa̱a̱ty nmʉnu'xta̱'a̱ktʉ, ko éxtʉm ja borreegʉ kwentʉ'a̱jtpʉ dyajjʉ'xe'eky yajxón ja byorreegʉty, nandʉ'ʉn miits xykywentʉ'áttʉt yʉ ja̱'a̱yʉty di'ibʉ Dios tʉ mdukkʉdʉ́kʉdʉ. Tundʉ dʉ'ʉn xonda'aky'a̱a̱ xonda'akyjyót, éxtʉmʉ Dios ttseky, es kyaj mʉt ko tʉ myajtuk'ana'amdʉ o mʉt ko mmeeñ'ook'áttʉ.
\v 3 Katʉ je'eyʉ xy'ana'ama̱'a̱ndʉ ja ja̱'a̱yʉty di'ibʉ Dios tʉ mmo'oyʉty es xykywentʉ'áttʉt, ni'igʉ yajxón m'íttʉt mʉt yʉ'ʉjʉty éxtʉmʉ ijxpajtʉn.
\v 4 Mʉt ko dʉ'ʉn xykyuydyúndʉt, es ko myínʉt ja Borreegʉ Kwentʉ'a̱jtpʉ Wyindsʉ́n, ja'a njʉna̱'a̱nʉm Nindsʉn'a̱jtʉm Jesukristʉ, mmay'atánʉdʉp. Per kyaj mmo'oya̱'a̱nʉdʉ ja ujts a̱a̱ygyorónʉ éxtʉm di'ibʉ ya̱ naxwiiñ naymyooyʉdʉp ja ja̱'a̱yʉty ko gyanarattʉ ma̱ pyʉyʉ'kkijxyʉdʉ. Tya̱dʉ koronʉ pójʉnʉ ñi'xta̱'a̱y. Perʉ di'ibʉ Dios xymyo'oyʉm, ijtp winʉ xʉʉ winʉ tiempʉ.
\p
\v 5 Miits ʉna̱'ktʉjkʉty, mʉmʉdowdʉ ja mʉjja̱'a̱ydyʉjkʉty; es nidʉgekyʉ miits mʉjja̱'a̱ydyʉjkʉty es ʉna̱'ktʉjkʉty, naybyudʉ́kʉdʉ nixim niyam mʉt ja tuda'aky'át, mʉt ko
\q Dios myʉdsip'a̱jtypy ja di'ibʉ mʉjpátʉp,
\q per pyudʉjkʉp pʉ́nʉty yuunk naxypy ja̱'a̱y'a̱jttʉp.
\m
\v 6 Pa̱a̱ty yuunk náxypyʉdʉ Dios wyindum, es dʉ'ʉn ja̱'tʉp ja tiempʉ ma̱ Dios mya'ita̱'a̱nʉdʉ mʉj.
\v 7 Tukkʉdʉkʉ tʉgekyʉ Dios di'ibʉ mjotmay'ajtypy, mʉt ko yʉ'ʉ naydyukjotmaydyuunʉp mʉt miidsʉty.
\p
\v 8 Jiky'attʉ miits tuda'aky es wijy, mʉt ko yʉ mmʉdsip, ja mʉjku'ugópk, dʉ'ʉn jyʉdity éxtʉm ja ka̱a̱ myu'uy mʉt ja yuu es t'ʉxta̱'a̱y ti 'yokjʉ'xʉp.
\v 9 Tukmʉmada̱'a̱ktʉ ja mʉjku'ugópk ja'agyʉjxm ko xymyʉbʉktʉ Dios, ja'a ko xyñijáwʉdʉ ko dʉ'ʉn 'yayoodʉp ja mmʉmʉbʉjkpʉty oytyim ma̱a̱ty.
\v 10 Pa̱a̱ty ko naty miidsʉty tʉ m'ok'ayowdʉ waanʉ, Dios nʉjx mjʉjwijtsʉmbítʉdʉ oy, myʉj myáyʉt ja mmʉbʉjkʉnʉty, es oy xyñijáwʉdʉt ko Dios mdsókʉdʉ. Yʉ Dios xykyunu'xʉm mʉj wiin kajaa, es xywyo'om es ti'igyʉ n'ijtʉm mʉdʉ Jesukristʉ ma̱ myʉj'a̱jtʉn winʉ xʉʉ winʉ tiempʉ.
\v 11 Myʉda̱jtypy yʉ Dios ja mʉj'a̱jtʉn winʉ xʉʉ winʉ tiempʉ. Wa'an dʉ'ʉnʉty.
\s Ka̱jxpo'xʉn
\p
\v 12 Ma̱ tya̱dʉ neky tʉ nnijáyʉdʉ miidsʉty, nyajtúñʉts ja Silvanʉ éxtʉmʉ ʉskriba̱a̱n, nmʉmʉbʉjkpʉ'a̱jtʉm es nmʉgu'uk'a̱jtʉm di'ibʉ oy tmʉdúñ ja Nindsʉn'a̱jtʉm. Tʉ nnijáyʉdʉ tuk a̱a̱ majtsk a̱a̱ es mjotkujk'áttʉt, es n'anʉʉmʉdʉ ko di'ibʉ nduknija̱'a̱yʉdʉp, ja'a dʉ'ʉn ja Diosʉ myay'a̱jtʉnʉ tʉy'a̱jtʉnbʉ, es ko dʉ'ʉn mjiky'áttʉt.
\p
\v 13 Es éxtʉm ja Dios tʉ mwin'íxʉdʉ miidsʉty, nandʉ'ʉn tʉ yajwin'íxtʉ yʉ mmʉmʉbʉjkpʉty di'ibʉ naymyujkʉdʉp Babiloñʉ. Nidʉgékyʉty yʉ'ʉjʉty mduknigáxʉdʉ Dioskajxy. Esʉ Markʉs di'ibʉts nja̱'a̱p éxtʉmdsʉ n'u'ungʉn, nandʉ'ʉn mduknigáxʉdʉ Dioskajxy.
\v 14 Naygya̱jxpo'xʉdʉ nixim niyam es naymyʉnánʉdʉ éxtʉm tukka'axpʉn. Wa'an ja Dios mmo'oyʉdʉ jotkujk'a̱jtʉn miidsʉty di'ibʉ Jesukristʉ jya'ay'a̱jttʉp.