\id 2PE

\h 2 PEEDRɄ
\mt Myʉmajtskpʉ Neky Di'ibʉ Peedrʉ Jyaay
\c 1
\p
\v 1 Ʉj Simonk Peedrʉ, Jesukristʉ myʉduumbʉ esʉ 'yapóstʉlʉ, ja'a njʉna̱'a̱nʉm ko tʉ xykyéxyʉts. Nduknigajxtʉptsʉ tya̱dʉ neky miits di'ibátyʉ nDios'a̱jtʉm esʉ Yajnitsókpʉ Jesukristʉ, di'ibʉ tyiimpy ja tʉy'a̱jtʉn, tʉ xymyo'oyʉm yʉ mʉbʉjkʉn jantsy oybyʉ.
\p
\v 2 Axá̱jʉdʉ ni'igʉ ja kunu'xʉn esʉ agujk'a̱jt jotkujk'a̱jtʉn mʉt ko xy'ixy'attʉ Dios es ja Nindsʉn'a̱jtʉm Jesús.
\s Mʉbʉjkpʉtʉjkʉ jyiky'a̱jtʉnʉty
\p
\v 3 Dios mʉt ja myʉk'a̱jtʉn tʉ xymyo'oyʉm tʉgekyʉ di'ibʉ xytyʉgoy'a̱jtxʉm es njiky'a̱jtʉm éxtʉmʉ Dios ttseky, yʉ'ʉ xywyo'om mʉt ja myʉj'a̱jtʉn esʉ 'yoy'a̱jtʉn.
\v 4 Es mʉt yʉ'ʉgyʉjxmʉ tya̱a̱dʉdyʉ Dios tʉ xymyo'oyʉm ja oybyʉ tsujpʉ wa̱ndakʉn, es dʉ'ʉn n'ijtʉm oy es wa̱'a̱ts, éxtʉmʉ Dios 'yity oy es wa̱'a̱ts, es dʉ'ʉn n'ʉxtíjʉm di'ibáty ja nini'x kʉba̱jk tsyejpy es dyajma̱'a̱ty di'ibáty ijtp ya̱ naxwiiñ.
\v 5 Pa̱a̱ty mʉt winʉ mjot naybyʉjta̱'a̱gʉdʉ mʉk, es xy'ak'ya'íxʉdʉt ja mjiky'a̱jtʉnʉty mʉt ja mmʉbʉjkʉn; es ko xymyʉdáttʉt ja mʉbʉjkʉn, nandʉ'ʉn xymyʉdáttʉt ja oyjya'ay'a̱jtʉn; es ko xymyʉdáttʉt ja oyjya'ay'a̱jtʉn, nandʉ'ʉn xymyʉdáttʉt ja wijy'a̱jt kejy'a̱jtʉn;
\v 6 es ko xymyʉdáttʉt ja wijy'a̱jt kejy'a̱jtʉn, nandʉ'ʉn xymyʉdáttʉt ja nayjyʉjwijtsʉmbítʉ; es ko xymyʉdáttʉt ja nayjyʉjwijtsʉmbítʉ, nandʉ'ʉn xymyʉdáttʉt ja ma'xtujkʉn; es ko xymyʉdáttʉt ja ma'xtujkʉn, nandʉ'ʉn xymyʉdáttʉt ja jiky'a̱jtʉn wi'ixʉ Dios 'yítʉt windsʉ'ʉgʉ;
\v 7 es ko xymyʉdáttʉt ja jiky'a̱jtʉn wi'ixʉ Dios 'yítʉt windsʉ'ʉgʉ, nandʉ'ʉn xymyʉdáttʉt ja tsojkʉn mʉt ja mmʉmʉbʉjkpʉty; es ko xymyʉdáttʉt ja tsojkʉn mʉt ja mmʉmʉbʉjkpʉty, nandʉ'ʉn ja naydsyokʉ nixim niyam.
\p
\v 8 Pʉn tʉgekyʉ tya̱dʉ oybyʉ winma̱'a̱ñ mmʉda̱jttʉp es xyajmʉj xyajmáyʉdʉ, kyajʉ naty nʉgoobʉ mnajiky'attʉ es nan kyajʉ naty nanatʉkʉ tʉ xy'ixy'attʉ ja Nindsʉn'a̱jtʉm Jesukristʉ.
\v 9 Per di'ibʉ kyaj dʉ'ʉn tmʉdatyʉ tya̱dʉ oybyʉ winma̱'a̱ñ, dʉ'ʉn yʉ'ʉ éxtʉm tu'ugʉ wiints, o nandʉ'ʉn éxtʉm tu'uk di'ibʉ mba̱a̱t 'yixy je'eyʉ wingón, mʉt ko tʉ tja̱'a̱ydyʉgóy ti ko Dios tʉ yajwa̱'a̱dsyʉty ma̱ yʉ pyojpʉ di'ibʉ tyuun.
\v 10 Pa̱a̱ty mʉgu'ugítʉty, ni'igʉ mnaybyʉjta̱'a̱gʉdʉ mʉk es xya'íxʉdʉt ma̱ yʉ mjiky'a̱jtʉn ko tyʉy'a̱jtʉnʉty ko Dios mwin'ijxʉdʉ es mwoojʉdʉ. Pʉn mduundʉbʉ dʉ'ʉn, ni na̱'a̱ mgatu'udʉgóydyʉt,
\v 11 mʉj wiin myajni'awátsxʉdʉt es mdʉ́kʉdʉt ma̱ yajkutíky winʉ xʉʉ winʉ tiempʉ ja nYajnitsokpʉ'a̱jtʉm, ja Nindsʉn'a̱jtʉm Jesukristʉ.
\p
\v 12 Pa̱a̱ty dʉ'ʉñʉm n'aktukjamyatstʉ tʉgekyʉ tya̱a̱dʉ, oy xyjanijáwʉdʉ es mya'ijxʉdʉp xykyuydyundʉ ja tʉy'a̱jtʉn di'ibʉ tʉ myajtuk'ʉxpʉ́ktʉ.
\v 13 Dʉ'ʉnʉts nnasjawʉ ko xypyátpʉts esʉts nyákʉt tya̱dʉ ka̱jxwíjʉn ma̱a̱nʉmts n'akyjyiky'aty.
\v 14 Pes yʉ Nindsʉn'a̱jtʉm Jesukristʉ tʉts xytyuknijawʉ ko tsojkʉts n'oogánnʉ.
\v 15 Pa̱a̱ty n'akka̱jxwijtʉ es dʉ'ʉñʉm xyjamyátstʉt tʉgekyʉ tya̱a̱dʉ óyʉts nja'o'kpʉ.
\s Peedrʉ mʉdʉ jyamyʉʉt oj t'ixtʉ ja Kristʉ
\p
\v 16 Ko oj nduk'ʉxpʉktʉ wi'ix ja Nindsʉn'a̱jtʉm Jesukristʉ myʉk'a̱jtʉn es ko jyʉmbita̱'a̱ñ ya̱ naxwiiñ, kyaj oj ndukmʉmadya̱'a̱ktʉ anʉʉ madya'aky di'ibʉ ja̱'a̱yʉdyʉ naty tʉ dya'óyʉdʉ, pes mʉdʉdsʉ ngʉ'ʉm wiinʉts ʉʉdsʉty tʉ n'ixtʉ Jesusʉ myʉj'a̱jtʉn.
\v 17 Mʉt ko ʉʉdsʉty támʉdsʉ naty mʉt yʉ'ʉ ko Dios Teety myooyʉ windsʉ'kʉn esʉ mʉj'a̱jtʉn, ko myʉga̱jxʉ extʉ tsa̱jpótm, es jyʉnáñ: “Tya̱a̱dʉdsʉ dʉ'ʉn ja n'U'ungʉts di'ibʉts njantsytsyejpy, di'ibʉts mʉʉt njotkujk'áty.”
\v 18 Es ʉʉdsʉty kʉ'ʉm tʉ nmʉdowdʉ ko Dios oj dʉ'ʉn jyʉna'añ, mʉt ko támʉdsʉ naty mʉt ja Jesús kuni'xykyopkkʉjxm.
\p
\v 19 Es dʉ'ʉn ni'igʉ oy yajnijáwʉ ko tyʉy'a̱jtʉnʉty ja ayuk di'ibʉ Diosʉ kyuga̱jxpʉ yajwʉ'ʉmdʉ ja̱a̱ybyéty. Pa̱a̱ty miits xymyʉbʉ́ktʉt yajxón di'ibʉ yʉ'ʉjʉty kyʉxja̱a̱ydyʉ, mʉt ko yʉ 'yʉxpʉjkʉnʉty, dʉ'ʉn yʉ'ʉ éxtʉm tu'ugʉ kudʉ'xn di'ibʉ kyude'xypy ma̱ ja koots it extʉ ko jya̱jʉ'ʉgʉt ja xʉʉñ'át es pyʉdsʉ́mʉt ja jayxyʉʉ es tkudʉ'xʉt ja mjot mwinma̱'a̱ñʉty.
\v 20 Tim jʉjp'ám xyjaygyúkʉdʉ tya̱a̱dʉ: Ni tu'ugʉ Diosʉ kyuga̱jxpʉ kʉ'ʉm kyawinma̱'a̱ñbyaaty di'ibʉ ja̱a̱ybyéty ijtp ma̱ Diosʉ jyaaybyajtʉn,
\v 21 mʉt ko kyaj ja Diosʉ kyuga̱jxpʉty tyukja̱jtʉdʉ tii ja̱'a̱y wyinma̱'a̱ñgyʉjxm, ja Espíritʉ Santʉ winma̱'a̱ñmyooyʉdʉ.
\c 2
\s Pʉ́nʉty ya'ʉxpʉjktʉp ja andakʉn
\p
\v 1 Nandʉ'ʉn ma̱ ja israelitʉ ka̱jpn ijttʉ andákpʉty di'ibʉ jʉnandʉ ko yʉ'ʉdyʉ Diosʉ kyuga̱jxpʉ, es dʉ'ʉn nandʉ'ʉnʉ ya'ʉxpʉjkpʉ andákpʉty mduknimínʉdʉp miidsʉty yʉ ʉxpʉjkʉnʉ axʉʉgátypyʉ. Es extʉ 'yʉxtijtʉp yʉ Nindsʉn'a̱jtʉm di'ibʉ tʉ 'yeeky yʉ'ʉgyʉjxmʉty, es dʉ'ʉn ñaydyuknimínʉdʉ kʉ'ʉm pojʉn ja kutʉgo'oyʉn.
\v 2 Oyʉ tya̱a̱dʉ jyadʉ'ʉn'a̱jtpʉ, nimay di'ibʉ pyanʉjxaampy yʉ 'yaxʉk jiky'a̱jtʉn, es pa̱a̱dyʉ ja̱'a̱yʉty t'ʉxtijtʉ ja tʉy'a̱jtʉn.
\v 3 Tadʉ ya'ʉxpʉjkpʉ andákpʉty nʉgoo 'yok'adsojknʉdʉ, es tsyoka̱'a̱ndʉp es miits xymyʉjúydyʉt yajxón ko naty mdukmʉmadya̱'a̱gʉdʉ yʉ kya'oywyinma̱'a̱ñʉty; per jantsy jékyʉp oj Dios tpʉjta'aky ja dʉ'ʉmbʉ ja̱'a̱y es yajtʉydyúndʉt.
\p
\v 4 Mʉt ko Dios kyaj oj tpojpʉme'xy ja ánklʉsʉty di'ibʉ pekytyuundʉ jékyʉp, es tkujʉbijpʉ ma̱ mʉj koots'át, es jap oj dyajwe'emy kʉwʉʉñ mʉt ja kadenʉ, es tpʉjke'ky extʉ ko yajpayo'oydyʉt.
\v 5 Nan kyaj Dios oj tpojpʉme'xy ja jekyjya'ayʉty, ni'igʉ tkejxy ja ayo'onduu es dyajji'xta̱a̱y nidʉgekyʉ tadʉ axʉk ja̱'a̱yʉty, je'eyʉ dyajtséky ja No'ee, di'ibʉ kya̱jxwa̱'x esʉ ja̱'a̱y wa̱'a̱ts jyiky'áttʉt, ja'a mʉt nijʉxtujkpʉ ja̱'a̱yʉty.
\v 6 Nandʉ'ʉn ja Dios oj ttukkumʉdoy ja pekyjya'ayʉty ma̱ Sodomʉ ka̱jpn esʉ Gomorrʉ ka̱jpn, tnine'ky es extʉ wyʉ'ʉmda̱a̱y ja̱a̱m. Dʉ'ʉnʉ tya̱a̱dʉ oj wye'emy éxtʉmʉ ijxpajtʉn wi'ix jya̱'ta̱'a̱n kyʉbata̱'a̱ndʉ ja axʉk ja̱'a̱ydyʉjk;
\v 7 per yajtsók ja Lot, tu'ugʉ ja̱'a̱y di'ibʉ jiky'a̱jt tʉy'a̱jtʉn mʉʉt, di'ibʉ ma̱a̱y ta̱j ko t'ijxy tadʉ axʉk jiky'a̱jtʉn ma̱ tadʉ axʉk ja̱'a̱yʉty.
\v 8 Pes tadʉ ja̱'a̱y di'ibʉ jiky'a̱jt tʉy'a̱jtʉn mʉʉt ma̱ yʉ'ʉjʉty, 'yayooy bom bom ma̱ ja 'ya̱a̱ jyot ko t'ijxy es tmʉdooy ja axʉʉkpʉ tu'un ka̱jxʉn.
\v 9 Es dʉ'ʉn ya'ixy ko Nindsʉn'a̱jtʉm Dios ñija̱'a̱p wi'ix dyajnitso'ogʉt di'ibʉ mʉduunʉp, es wi'ix tpʉjkʉ'ʉga̱'a̱ñ ja axʉk ja̱'a̱yʉty ko yajpayo'oydyʉt.
\p
\v 10 Dios tyukkumʉdowaampy waanʉ ni'igʉ di'ibáty yajtuundʉp ja 'yaxʉk winma̱'a̱ñ es t'ʉxtijtʉ pʉ́nʉty myʉda̱jttʉp ja kutujkʉn. Tadʉ ya'ʉxpʉjkpʉ andakpʉ, tsoydyu'undúkʉty es kujuunʉty, es kyaj tsyʉ'ʉgʉdʉ es twinga̱jxpáttʉt di'ibáty mʉj ja kutujkʉn myʉda̱jttʉp.
\v 11 Oy ja ánklʉsʉty di'ibʉ ni'igʉ tmʉdaty ja myʉk'a̱jtʉn esʉ kyutujkʉn es kʉdiinʉmʉ tya̱dʉ andákpʉty, kyaj tka̱jxpóktʉ mʉt yʉ'ʉjʉty Nindsʉn'a̱jtʉm wyindum.
\p
\v 12 Per yʉ tya̱a̱dʉ dʉ'ʉmbʉ andákpʉty kya̱jxtʉp di'ibʉ kyaj tjaygyúkʉdʉ, dʉ'ʉn tmʉdattʉ jyot wyinma̱'a̱ñ éxtʉmʉ ujts jʉyujk di'ibʉ 'yami'in 'yaja̱jtʉ es ja ja̱'a̱y ya'oogʉdʉt. Pa̱a̱ty dʉ'ʉn 'yooktʉt éxtʉmʉ ujts jʉyujkʉn,
\v 13 ayówdʉp éxtʉm tʉ dya''ayowdʉ myʉgu'ugʉty. Ni kyatsoydyundʉ xʉʉ'ám kyaya̱'a̱n 'yuuga̱'a̱ndʉ. Es yʉ'ʉ dʉn ayo'on tsoydyu'un ko ñaymyúkʉdʉ mʉt miidsʉty es kyaydyʉ, je'eyʉ kyax'attʉ, es je'eyʉ mwin'ʉʉna̱'a̱nʉdʉ miidsʉty.
\p
\v 14 Per je'eyʉ dʉ'ʉn tjantsy'ixy tjantsytyúñ ja toxytyʉjkʉty es mʉʉt pyekytyúnʉt, mʉt ko je'eyʉmʉ dʉ'ʉn pyekytyuna̱'a̱ñ. Es dʉ'ʉn dyajtʉgóy ja ja̱'a̱yʉty di'ibʉ mba̱a̱t twin'ʉʉñ. Tya̱dʉ andákpʉty naydyukpanʉjxʉdʉp ja di'ibátyʉ ja̱'a̱y kyaj tmʉdaty kajaa ja myʉbʉjkʉn. Je'eyʉ myeeñ'oogʉty. Dios tʉ kya̱jxpékyʉty.
\v 15 Tadʉ andákpʉty tʉ dʉn tyʉgoydyʉ mʉt ko tʉ tmʉdu'udʉgóydyʉ ja Diosʉ ñʉ'ʉ tyu'u, es ja'a pyanʉjxtʉp ja wyinma̱'a̱ñ ja Balán, Beorʉ mya̱a̱nk, ko tjaganaratáñ ja meeñ ko tkamʉmʉdooy ja Dios.
\v 16 Perʉ Dios yajka̱jx ja Balangʉ byurrʉ éxtʉmʉ ja̱'a̱yʉn, es 'yoojʉ mʉt ko kyaj oy ttunáñ.
\p
\v 17 Tu'ugʉ nʉda̱jñ di'ibʉ tʉ tyʉtsnʉ kyaj mba̱a̱t dyajnáxy ja tʉʉdsʉ, esʉ yoots di'ibʉ yʉ poj wojpʉyʉ'kʉp kyaj dyaky ja tuu; ja̱jtpʉ dʉ'ʉn nandʉ'ʉnʉ tya̱dʉ ya'ʉxpʉjkpʉ andakpʉ, pa̱a̱dyʉ Dios pyʉjta̱'a̱ga̱'a̱nʉdʉ ma̱ agoots it winʉ xʉʉ winʉ tiempʉ.
\v 18 Pes mʉt ja 'yanʉʉ ʉxpʉjkʉn dyajtúñ ja naxwíñʉdʉ ja̱'a̱yʉdyʉ 'yaxʉk winma̱'a̱ñ, es dyajtu'adíky di'ibʉty apénʉnʉm tmastu'uty ma̱ jyiky'aty pyojpʉtúñ.
\v 19 Tya̱dʉ andákpʉty je'eyʉ twa̱nda̱'a̱ktʉ ko ja̱'a̱y wa̱'a̱ts jyiky'áttʉt, es kʉ'ʉm 'yittʉ pekyoty. Pes nidu'uk nidu'uk 'yane'emyʉdyʉ tadʉ di'ibʉ tʉ myʉmada'agyʉty.
\v 20 Ko pʉ́n tmastu'uty ja 'yaxʉk'a̱jtʉn ja'agyʉjxm ko t'ixy'attʉ Nindsʉn'a̱jtʉm éxtʉmʉ Yajnitsókpʉ Jesukristʉ, es óknʉm tnijʉmbity es ñaygyʉyákyʉty mʉt ja 'yaxʉk'a̱jtʉn, waanʉ o'ktʉ́y wyʉ'ʉmʉt kʉdiinʉm jawyíñʉp.
\v 21 Nik óyxyʉp ko ni na̱'a̱ tkadimnijawʉ yʉ oybyʉ nʉ'ʉ tu'u, mʉt ko di'ibʉ myʉdsondak yʉ nʉ'ʉ tu'u oybyʉ es óknʉm tmastu'uty es tnijʉmbijnʉ ja 'yaxʉk'a̱jtʉn,
\v 22 ja'a tyukpatypy éxtʉm jyʉna'añ ja ayuk: “Yʉ uk ñijʉmbijtypy ja 'yʉʉtsy es tje'xy”, es “ja ʉdsʉm ko wya̱'a̱tsnʉʉdsiida̱'a̱y, jʉmbijtp es nʉjx myo'ontstsi'iy jatʉgok.”
\c 3
\s Mínʉp jatʉgok ja Nindsʉn'a̱jtʉm
\p
\v 1 Mʉgu'ugítʉty, tya̱a̱dʉ dʉ'ʉn ja myʉmajtskpʉ neky di'ibʉ nduknija̱'a̱yʉdʉp. Ma̱ ja jawyiimbʉ neky es ma̱ tya̱dʉ myʉmajtskpʉ nandʉ'ʉn nduknijáyʉdʉ es xyja̱'a̱ygyúkʉdʉt yajxón.
\v 2 Jamyatstʉ ja ʉxpʉjkʉn di'ibʉ ja Diosʉ kyuga̱jxpʉty ñiga̱jxtʉ jékyʉp; es nandʉ'ʉn ja Nindsʉn'a̱jtʉm Yajnitsókpʉ 'yana'amʉn di'ibʉ yʉ 'yapóstʉlʉty mduk'ʉxpʉjkʉdʉ.
\p
\v 3 Tim jʉjp'ám jamyatstʉ ko naty tyimminannʉ ja Jesús, mnija̱'tʉdʉp yʉ ja̱'a̱yʉty di'ibʉ jiky'a̱jttʉp mʉdʉ 'yaxʉk winma̱'a̱ñ esʉ kyʉ'ʉmdsojkʉn, es yʉ'ʉjʉty mdukxi'igʉdʉp miidsʉty
\v 4 es jyʉna̱'a̱na̱'a̱ndʉ: “Jesús wya̱ndak ko myina̱'a̱ñ jatʉgok, ¿kʉdii? Pes, ¿ma̱ net? Yʉ n'aptʉjk'a̱jtʉm tʉ 'yo'knʉdʉ, per dʉ'ʉñʉm wye'emy tʉgekyʉ nandʉ'ʉn éxtʉmʉ naty ko yʉ naxwíñʉdʉ tsyondaky.”
\v 5 Tya̱a̱dʉty ja tukxíkpʉty kyaj tjaygyukʉya̱'a̱ndʉ es kyaj tjamyatsa̱'a̱ndʉ ko jantsy jékyʉp taayʉmʉ natyʉ tsa̱jp esʉ nax, di'ibʉ Dios mʉt ja 'yayuk pyʉjták esʉ nan ñʉʉwimbʉdsʉ́mʉt, es dya'ity nʉʉgujkóty,
\v 6 es mʉt ja nʉʉ, ja ayo'onduu, Dios dyajkutʉgooy ja naxwíñʉdʉ ja̱'a̱yʉty.
\v 7 Perʉ tsa̱jp esʉ nax di'ibʉ jaa tyam, Dios tʉ jyʉna'añ ko yajtoyaampy ko ja̱'a̱y yajpayo'oydyʉt es ko naty dyajkutʉgoya'añ ja pekyjya'ayʉty.
\p
\v 8 Katʉ xyja'aydyʉgóydyʉ mʉgu'ugítʉty, ko mʉt ja Dios tuk mil jʉmʉjt kyaj jyékyʉty yʉ'ʉ, es ni tu'ugʉ xʉʉ kyapójʉnʉty. Mʉt ja Dios, ti'igyʉ yʉ'ʉ, dʉ'ʉn éxtʉm tuk xʉʉ o éxtʉm tuk mil jʉmʉjt.
\v 9 Kyaj tyʉy'a̱jtʉnʉty éxtʉm na̱a̱gʉty jyʉna̱'a̱ndʉ, ko Dios jajkp tkuydyúñ yʉ di'ibʉ wya̱ndakypy. Ja'a dʉ'ʉn ko xymyʉma'xtujkʉm, es ja'a dʉ'ʉn yajkypy ja tiempʉ es ja pojpʉ ja̱'a̱y jyodʉmbíttʉt, es t'axá̱jʉdʉt ja Jesús, kʉdiibʉ kyutʉgóydyʉt.
\p
\v 10 Per ja̱'tʉp ja tiempʉ ma̱ myina̱'a̱ñ ja Nindsʉn'a̱jtʉm Jesukristʉ ko ni nga''awijx ngajʉjp'ijxʉm, éxtʉm ja ma'tspʉ myiñ ni jawyiin tkanigajxy. Es ma̱ tadʉ tiempʉ yʉ tsa̱jp n'ijxtʉgo'oyʉm mʉt tu'ugʉ mʉk pʉmi'imʉn. Yʉ xʉʉ esʉ po'o esʉ mʉdsa̱'a̱jʉty tyoyʉ'kta̱'a̱yʉt, es wyingín wyinga̱'a̱t ak jʉʉn, es yʉ naxwíñʉdʉ es tʉgekyʉ di'ibʉ ja ya̱a̱ yajno'kta̱'a̱yʉt.
\p
\v 11 Es kom dʉ'ʉn tʉgekyʉ kyutʉgoya'añ, dʉ'ʉn miidsʉty byeen yajxón xy'íxtʉt wi'ix mjiky'áttʉt wa̱'a̱ts es éxtʉmʉ Dios ttseky
\v 12 ma̱a̱nʉm xy'awixtʉ myina̱'a̱ñ tadʉ xʉʉ, es xytyúndʉt wi'ix tsojk myínʉt. Ma̱ tadʉ xʉʉ yajno'oga̱'a̱ñ es kyutʉgoya'añ mʉt ja jʉʉn di'ibʉ ijtp tsa̱jwínm, es di'ibʉ jaa'a̱jtp, tʉgekyʉ jyʉʉywya̱'xta̱'a̱yʉt ko mʉk tyóyʉt.
\v 13 Perʉ Dios tʉ twa̱nda'aky xymyo'oya̱'a̱nʉm ja jembyʉ tsa̱jp esʉ jembyʉ naxwíñʉdʉ ma̱ tʉgekyʉ yajtúnʉt di'ibʉ tʉy'a̱jtʉn.
\p
\v 14 Pa̱a̱ty mʉgu'ugítʉty, ma̱a̱nʉm miits xy'awix xyjʉjp'íxtʉ ko myina̱'a̱ñ jyata̱'a̱ñ tʉgekyʉ taadʉ, jiky'attʉ éxtʉm ja Dios ttseky, wa̱'a̱tsti'knʉ, kyaj mdsiptúndʉt, es ni mgapekytyúndʉt, es dʉ'ʉn kyaj ti xyjáwʉdʉt di'ibʉ mjatánʉdʉp ko ja'a myínʉt.
\v 15 Jaygyúkʉdʉ, es yʉ Nindsʉn'a̱jtʉmʉ mya'xtujkʉn ko kyaj tsojk myiñ, ja'a myeepy ja tiempʉ es jyodʉmbíttʉt ja pojpʉ ja̱'a̱yʉty, es yʉ'ʉ yajnitso'ogaampy. Dʉ'ʉn nandʉ'ʉn tim mnijáyʉdʉ yʉ nmʉgu'uk'a̱jtʉm Pa̱a̱blʉ mʉt ja kyuwijy'át di'ibʉ Dios mooyʉ.
\v 16 Dʉ'ʉn ja Pa̱a̱blʉ tka̱jxwijy ja ja̱'a̱yʉty ma̱ tʉgekyʉ ñeky di'ibʉ jyaay. Tʉy'a̱jtʉnʉ'ʉ ko yʉ'ʉ tʉ tkʉxja̱'a̱y na̱a̱gʉty di'ibʉ tsip njaygyujkʉm. Taa yʉ ja̱'a̱yʉty di'ibʉ kyaj yajxón t'axá̱jʉdʉ ja Diosʉ jyaaybyajtʉn, es kyaj ñay'aguwítsʉdʉ mʉt ja Diosʉ 'yʉxpʉjkʉn, yʉ'ʉjʉty kyutʉjtʉp ja Pa̱a̱blʉ 'yʉxpʉjkʉn di'ibʉ tsip es yajjaygyúkʉt, dʉ'ʉn éxtʉm tkutʉjtʉ di'ibʉ nandʉ'ʉn jaybyety ijtp ma̱ Diosʉ jyaaybyajtʉn. Dʉ'ʉn dyajtʉydyʉ́kʉdʉ kʉ'ʉm ko Dios tyʉydyuna̱'a̱nʉdʉ.
\p
\v 17 Per miits mʉgu'ugítʉty, tʉ xyñijáwʉdʉ tʉgekyʉ tya̱a̱dʉ. Pa̱a̱ty éxkʉm ko tya̱dʉ dʉ'ʉmbʉ ja̱'a̱yʉty mwin'ʉʉnʉdʉ es xymyastu'udʉt yʉ mjiky'a̱jtʉnʉ wa̱'a̱tspʉ es ma̱ xymyʉbeky ja Dios.
\v 18 Yajmʉj yajmáyʉdʉ wi'ix ni'igʉ oy xy'ix'áttʉt ja Nindsʉn'a̱jtʉm Yajnitsókpʉ Jesukristʉ. Mʉj'a̱jtʉn mʉʉt yʉ'ʉ 'yítʉt winʉ xʉʉ winʉ tiempʉ. Wa'an dʉ'ʉnʉty.