\id 1JN

\h 1 FWANK
\mt Myʉtu'ukpʉ Neky Di'ibʉ Fwank Jyaay
\c 1
\s Jesús yajkypy ja jiky'a̱jtʉn
\p
\v 1 Ja'ats miits nduknija̱'a̱yʉdʉp pʉ́nʉ naty jaayʉm ijtp ko kyajnʉmʉ naty ja naxwíñʉdʉ tsyonda'aky, di'ibʉ myooy ja jiky'a̱jtʉn nidʉgekyʉ di'ibʉ jiky'a̱jtp. Ja'ats ʉʉdsʉty tʉ n'ix tʉ nmʉdowdʉ es tʉ ndoñ tʉ nmátstʉts mʉdʉdsʉ ngʉ'ʉjʉty.
\v 2 Tʉ yajnijáwʉ yʉ jiky'a̱jtʉn, es ʉʉdsʉty tʉ n'ixtʉ di'ibʉ yʉ jiky'a̱jtʉn yajkypy, es tyam miits nduknijáwʉdʉ es ja'a dʉ'ʉn ja jiky'a̱jtʉn winʉ xʉʉ winʉ tiempʉ. Yʉ'ʉ naty ijtp mʉdʉ Dios Teety es tʉ kyʉxe'eky mʉt ʉʉdsʉty.
\v 3 Pa̱a̱dyʉts miits ndukmʉmadya̱'a̱ga̱'a̱ndʉ di'ibʉts tʉ n'ixy es tʉ nmʉdóyʉts, es nandʉ'ʉn miits mdi'igyʉdya'aydyʉt mʉt ʉʉdsʉty es mʉt ja Dios Teety es mʉt ja 'yU'unk Jesukristʉ.
\v 4 Dʉ'ʉn nnijáyʉdʉ es ʉdsa̱jtʉm nxondákʉm nidʉgekyʉ ti'igyʉ es jotkʉda'aky.
\s Diosʉ dʉ'ʉn ja Ja̱jʉn
\p
\v 5 Tya̱a̱dʉ dʉ'ʉn ja ayuk di'ibʉts ja Jesukristʉ xytyuk'ʉxpʉjk es nga̱jxwa'xyʉts ma̱ miidsʉty ko yʉ Dios yʉ'ʉ dʉ'ʉn ja Ja̱jʉn, es ma̱ yʉ'ʉ kyaj ti agoots'a̱jtʉn.
\v 6 Pʉn jʉna̱'a̱nʉm ko ti'igyʉ n'ijtʉm mʉt yʉ Dios, es ndu'uyo'oyʉm agoots, andákʉm es kyaj ndu'unʉm ja tʉy'a̱jtʉn.
\v 7 Per pʉn tu'uyo'oyʉm ma̱ ja ja̱jʉn, nmʉda̱jtʉm ja ti'igyʉ'át nixim niyam esʉ 'yU'unk Jesukristʉ ñe'pyñ xyajwátsʉm mʉt tʉgekyʉ nbojpʉ'a̱jtʉm.
\p
\v 8 Pʉn njʉna̱'a̱nʉm ko kyaj nbojpʉja̱'a̱y'a̱jtʉm, naywyin'ʉ'ʉnʉm kʉ'ʉm es ni ti tʉy'a̱jtʉn ngamʉda̱jtʉm.
\v 9 Per pʉn maya̱jtsʉm ko nbekytyu'unʉm, Dios di'ibʉ tyiimpy ja tʉy'a̱jtʉn, xypyojpʉma'xa̱'a̱nʉm es xyajwátsʉm tʉgekyʉ nbojpʉ'a̱jtʉm.
\v 10 Per pʉn jʉna̱'a̱nʉm ko ngapekytyu'unʉm, mʉt yʉ'ʉ ngakupʉjkʉm ja Diosʉ 'yayuk es ndíjʉm ko andakp ja Dios ko jyʉna'añ: “Yʉ ja̱'a̱yʉty pojpʉtuundʉbʉ tʉgekyʉ.”
\c 2
\s Kristʉ ʉdsa̱jtʉm xyñika̱jxtútʉm
\p
\v 1 Nitítʉty, tyámʉts miits nnijáyʉdʉ kʉdiibʉ mbekytyúndʉt. Per pʉn jaa pʉ́n pyekytyúñ, nmʉda̱jtʉm tu'uk di'ibʉ xyñika̱jxtútʉm Dios windum. Yʉ'ʉ dʉ'ʉn ja Jesukristʉ di'ibʉ tyiimpy ja tʉy'a̱jtʉn.
\v 2 Pes yʉ'ʉ kʉ'ʉm naydyukwindsʉ'kʉ kruuzkʉjxy es dʉ'ʉn tkumʉdooy ja nbojpʉ'a̱jtʉm. Es kyaj 'yʉdsa̱jtʉmʉty je'eyʉ, nandʉ'ʉn tkumʉdooy nidʉgekyʉ ja naxwíñʉdʉ ja̱'a̱yʉdyʉ pyojpʉ.
\p
\v 3 ¿Wi'ix mba̱a̱t nmʉda̱jtʉm tʉy'a̱jtʉn ko n'ixy'a̱jtʉm ja Dios? Pes mʉdʉ tya̱a̱dʉ ko nguydyu'unʉm ja 'yana'amʉn.
\v 4 Mʉt ko di'ibʉ jʉna̱a̱mp: “Ʉj n'ixy'a̱jtypyʉts ja Dios”, es kyaj tkuydyúñ ja Diosʉ 'yana'amʉn, tya̱dʉ ja̱'a̱y andakp es ni ti tʉy'a̱jtʉn tkamʉdaty.
\v 5 Per ja ja̱'a̱y di'ibʉ kyuydyiimpy ja Diosʉ 'yana'amʉn, kexy ka'pxy tmʉdaty ja Diosʉ tsyojkʉn, es dʉ'ʉn nnija̱'a̱m ko ti'igyʉ n'ijtʉm mʉdʉ Dios.
\v 6 Mʉt ko pʉn njʉna̱'a̱nʉm ko nbanʉjxʉm ja Jesukristʉ, xypyátʉm es njiky'a̱jtʉm éxtʉmʉ Jesukristʉ jyiky'ajty.
\s Jembyʉ ana'amʉn
\p
\v 7 Mʉgu'ugítʉty, kyajts miits nduknijáyʉdʉ ana'amʉnʉ jembyʉ. Di'ibʉ nduknija̱'a̱yʉdʉp, ja'ayʉm mmʉda̱jtʉp di'ibʉ jawyíñʉp mya''anma̱a̱ydyʉ. Tya̱dʉ jeky ana'amʉn, ja'ayʉm ja ayuk di'ibʉ tʉ xymyʉdowdʉ.
\v 8 Oyʉ dʉ'ʉn, tya̱a̱dʉ di'ibʉ nduknija̱'a̱yʉdʉp, yʉ'ʉ tu'ugʉ jembyʉ ana'amʉn, es ya'ijxʉp ko tʉy'a̱jtʉnʉ'ʉ ma̱ Kristʉ es nandʉ'ʉn ma̱ miidsʉty, mʉt ko na̱jxp ja kugoots'át es ja̱j tʉ'xnʉp ja tʉy'a̱jtʉn.
\p
\v 9 Di'ibʉ jʉna̱a̱mp ko 'yity ma̱ ja ja̱jʉn es kyaj ttseky ja myʉgu'uk, taadʉ ijtpʉm kugoots.
\v 10 Di'ibʉ tsyejpy ja myʉgu'uk, jiky'a̱jtp ma̱ ja ja̱jʉn, es ni ti kyayajpekykya'ayʉty.
\v 11 Per di'ibʉ myʉdsip'a̱jtypy ja myʉgu'uk, jiky'a̱jtp es jyʉdity ma̱ wyingoodsʉty, es kyaj tnijawʉ ma̱ ñejxy, mʉt ko ja koots'át tʉ yajjʉmbítyʉty wiints.
\p
\v 12 Nitítʉty, nnijáyʉdʉts miidsʉty mʉt ko Dios tʉ tme'xy ja mbojpʉty mʉt yʉ'ʉgyʉjxmʉ Jesukristʉ.
\v 13 U'unkteedyʉty, nnijáyʉdʉts miits mʉt ko tʉ xy'ixy'attʉ Jesukristʉ di'ibʉ taayʉm ko naxwíñʉdʉ tsyondaky. Ʉna̱'kʉty, nnijáyʉdʉts miits mʉt ko tʉ xymyʉmada̱'a̱ktʉ ja mʉjku'ugópk.
\p Nitítʉty, nnijáyʉdʉts miidsʉty mʉt ko tʉ xy'ixy'attʉ Dios.
\v 14 U'unkteedyʉty, nnijáyʉdʉts miits mʉt ko tʉ xy'ixy'attʉ Jesukristʉ di'ibʉ taayʉm ko naxwíñʉdʉ tsyondaky. Ʉna̱'kʉty, nnijáyʉdʉts miits mʉt ko yajxón tʉ xy'axá̱jʉdʉ ja Diosʉ 'yayuk mʉt winʉ mjot. Pa̱a̱ty xymyʉdattʉ mʉk'a̱jtʉn es tʉ xymyʉmada̱'a̱ktʉ ja mʉjku'ugópk.
\p
\v 15 Katʉ xytsyoktʉ ja naxwíñʉdʉ winma̱'a̱ñ, mʉt ko yʉ ja̱'a̱y di'ibʉ tsyojktʉp ja naxwíñʉdʉ winma̱'a̱ñ, kyaj ttsoktʉ ja Dios Teety.
\v 16 Mʉt ko tʉgekyʉ di'ibʉ jaa'a̱jtp naxwiiñ, ko ja̱'a̱y t'ʉxta̱'a̱ydyʉ di'ibʉ nini'x kʉba̱jk tsyejpy, ko t'adsoktʉ ko tii t'ixtʉ es ko myʉj pya̱a̱dʉdʉ ko tii tmʉdat tjaygyaptʉ, tʉgekyʉ tya̱dʉ winma̱'a̱ñ esʉ dʉ'ʉmbʉ jiky'a̱jtʉn jaa myiñ ma̱ yʉ naxwíñʉdʉ, es kyaj myiñ ma̱ Dios.
\v 17 Perʉ Dios yajkutʉgoyaampy ja naxwíñʉdʉ winma̱'a̱ñ mʉt tʉgekyʉ di'ibʉ ja̱'a̱y adsojktʉp naxwíñʉdʉ winma̱'a̱ñgyʉjxm, per ja ja̱'a̱y di'ibʉ kyuydyiimpy ja Diosʉ tsyojkʉn, jiky'a̱jtp winʉ xʉʉ winʉ tiempʉ.
\s Tʉy'a̱jtʉn esʉ andakʉn
\p
\v 18 Nitítʉty, tʉ jya'ty ma̱ tyam tu'uk óknʉm ja oorʉ. Tʉ xymyʉdowdʉ ko myina̱'a̱ñ di'ibʉ myʉdsip'a̱jtypy ja Kristʉ. Pes nʉgoo 'yokmay'a̱jnʉ di'ibʉ myʉdsip'a̱jttʉp ja Kristʉ. Pa̱a̱dyʉts nnijawʉ ko tʉ net jya'ty ja tiempʉ di'ibʉ tim ok.
\v 19 Tamʉ ja̱'a̱y di'ibʉ pʉdsʉʉmdʉ ma̱ ʉʉdsʉty, per kyaj yʉ'ʉ t'axá̱jʉdʉ Kristʉ éxtʉmʉ Yajnitsókpʉ. Mʉt kots xyñikaktʉ, pa̱a̱ty ya'ixy ko kyaj t'axá̱jʉdʉ Kristʉ es nan kyaj yʉ'ʉdyʉ nmʉmʉbʉjkpʉ'a̱jtʉm.
\p
\v 20 Per miidsʉty kyaj mdʉ'ʉn'áttʉ, mʉt ko Kristʉ mmooyʉdʉ ja Espíritʉ Santʉ es miidsʉty nidʉgekyʉ mnija̱'a̱dʉp ja tʉy'a̱jtʉn.
\v 21 Nnijáyʉdʉts miits mʉt ko yajxón xyñijáwʉdʉ ja tʉy'a̱jtʉn, kyaj nnijáyʉdʉ éxtʉm di'ibʉ kyaj tnijawʉ. Miidsʉty yajxón xyñijáwʉdʉ ko ma̱ yʉ tʉy'a̱jtʉn, kyaj myiñ ja andakʉn.
\p
\v 22 Yʉ'ʉ dʉ'ʉn andakp di'ibʉ jʉna̱a̱mp ko yʉ Jesús kyaj yʉ'ʉdyʉ Kristʉ. Esʉ taadʉ yʉ'ʉ dʉ'ʉn di'ibʉ myʉdsip'a̱jtypy ja Kristʉ, pes 'yʉxtijpy ja Dios Teety es ja 'yU'unk.
\v 23 Es di'ibʉ 'yʉxtijpy ja Diosʉ 'yU'unk, nan kyaj 'yity ti'igyʉ mʉʉt ja Dios Teety. Per pʉ́n 'yaxá̱jʉp ja Diosʉ 'yU'unk, nan ijtp ti'igyʉ mʉt ja Dios Teety.
\p
\v 24 Miidsʉty, pes jiky'attʉ éxtʉmʉ Jesukristʉ 'yʉxpʉjkʉn di'ibʉ m'axá̱jʉdʉ extʉ jawyíñʉp. Es ko dʉ'ʉn xytyúnʉt, m'íttʉp ti'igyʉ mʉt ja Dios Teety es mʉt ja 'yU'unk.
\v 25 Es tya̱a̱dʉ dʉ'ʉn di'ibʉ Jesukristʉ tʉ xytyukwa̱ndákʉm, ja jiky'a̱jtʉn winʉ xʉʉ winʉ tiempʉ.
\p
\v 26 Tʉts miits nnijáyʉdʉ es mnaygywentʉ'átʉdʉt mʉdʉ tadʉ di'ibʉty mwin'ʉʉnánʉdʉp.
\v 27 Per miidsʉty kyaj mdʉgoy'a̱jtxʉdʉ pʉ́n mduk'ʉxpʉ́kʉdʉp, ja'a ko Jesukristʉ tʉ mmo'oyʉdʉ yʉ Espíritʉ Santʉ, es yʉ'ʉ mduk'ʉxpʉjkʉdʉp tʉgekyʉ. Es yʉ'ʉ dʉ'ʉn ja tʉy'a̱jtʉn es kyaj tmʉdaty ja andakʉn. Pa̱a̱ty ittʉ ti'igyʉ mʉt ja Kristʉ, éxtʉm yʉ Espíritʉ Santʉ tʉ mya'ʉxpʉ́kʉdʉ.
\p
\v 28 Pes tyamʉ net nitítʉty, ittʉ ti'igyʉ mʉt ja Kristʉ es mnayjotmʉkmo'oyʉdʉt ko yʉ'ʉ kyʉxʉ'ʉgʉt jatʉgok, es kyaj xymyʉdsoydyúndʉt ko myínʉt.
\v 29 Mnija̱'a̱dʉp miidsʉty ko Jesukristʉ tyiimpy ja tʉy'a̱jtʉn. Pes nijáwʉdʉ nandʉ'ʉn ko di'ibʉ tyuundʉp ja tʉy'a̱jtʉn, yʉ'ʉ dʉ'ʉn u'unk'a̱jttʉp ja Dios.
\c 3
\s Diosʉ 'yu'ungʉty
\p
\v 1 Jaygyúkʉdʉ éxtʉm ja Dios Teety xyjantsytsyojkʉm es xy'u'unkniwa̱'a̱nʉm. Es tʉy'a̱jtʉnʉ'ʉ xy'u'unk'a̱jtʉm. Pa̱a̱ty kyaj xy'ixy'a̱jtʉm pʉ́nʉdyʉ naxwíñʉdʉ winma̱'a̱ñ ja'a'a̱jtʉdʉp, ja'a ko kyaj t'ixy'attʉ ja Dios.
\p
\v 2 Mʉgu'ugítʉty, ʉdsa̱jtʉm xy'u'unk'a̱jtʉm ja Dios. Es kyajnʉm xytyuk'ijxʉm wi'ix n'ak'ijtʉm, per ko Jesukristʉ kyʉxʉ'ʉgʉt, dʉ'ʉn n'ijtʉm éxtʉm ja Kristʉ, mʉt ko n'ixa̱'a̱nʉm wi'ixʉ dʉ'ʉn yʉ'ʉ.
\v 3 Es nidʉgekyʉ di'ibʉ dʉ'ʉn 'yaxá̱jʉdʉp ja Kristʉ éxtʉmʉ Yajnitsókpʉ, yʉ'ʉjʉty nayyajwátsʉp kʉ'ʉm éxtʉmʉ Jesukristʉ wya̱'a̱dsʉty.
\p
\v 4 Per di'ibʉ pekytyuump myʉdʉgeepy ja Diosʉ 'yana'amʉn. Yʉ'ʉ ja peky ko kyajʉ Dios ja 'yana'amʉn yajpadúñ.
\v 5 Es mnija̱'a̱dʉp ko Jesukristʉ myiiñ ya̱ naxwiiñ yajpojpʉnitʉgeebyʉ, es kyaj yʉ'ʉ tmʉdaty ni ti peky.
\v 6 Es nidʉgekyʉ di'ibʉ ijttʉp ti'igyʉ mʉt yʉ'ʉ, kyaj jyʉdity mʉt ja pojpʉ. Per nidʉgekyʉ di'ibʉ pekytyuundʉp, kyaj t'ixy'aty ja Kristʉ, es nan kyaj yʉ'ʉ jya'a'átyʉty.
\v 7 Nitítʉty, éxkʉm mwin'ʉʉnʉdʉ pʉ́n. Pʉ́nʉ Kristʉ ja'a'a̱jtʉp, ja'a tyiimpy ja tʉy'a̱jtʉn éxtʉm ja Kristʉ kʉ'ʉm.
\v 8 Per di'ibʉ pekytyuump, yʉ'ʉ ja'a'a̱jtʉp ja mʉjku'ugópk, ja'a ko yʉ mʉjku'ugópk pyekytyiimpy jawyíñʉp extʉ tyamba̱a̱t. Yʉ Diosʉ 'yU'unk tʉ myiñ naxwiiñ es dyajkutʉgoya'añ di'ibʉ ja mʉjku'ugópk tyiimpy.
\p
\v 9 Ni tu'uk ʉdsa̱jtʉm di'ibʉ Dios xy'u'unk'a̱jtʉm njiky'a̱jtʉm éxtʉmʉ pojpʉ tuumbʉ, mʉt ko nmʉda̱jtʉm ja jiky'a̱jtʉn di'ibʉ Dios tʉ xymyo'oyʉm es kyaj mba̱a̱t ni'igʉ ndu'unʉm ja pojpʉ, mʉt ko xy'u'unk'a̱jtʉm ja Dios.
\v 10 Es mʉdʉ tya̱a̱dʉ ñigʉxe'eky pʉ́nʉdyʉ Dios u'unk'a̱jttʉp es pʉ́nʉty ja mʉjku'ugópk u'unk'a̱jttʉp. Mʉt ko di'ibʉ jiky'a̱jtp axʉʉk es kyaj ttseky ja myʉgu'uk, kyaj jya'a'átyʉty ja Dios.
\s Naydsyojkʉm nixim niyam
\p
\v 11 Pes di'ibʉ Jesukristʉ xytyuk'ana'amʉm extʉ jawyíñʉp, tya̱a̱dʉ dʉ'ʉn ko nnaydsyojkʉm nixim niyam,
\v 12 es kyaj ndu'unʉm éxtʉm ja Kaín di'ibʉ ja'a'a̱jtʉp ja mʉjku'ugópk es dya'e'ky ja myʉga'ax Abel. ¿Es ti ko dya'e'ky? Mʉt ko Abel jyiky'aty tʉy'a̱jtʉn mʉʉt es ja Kaín kyaj.
\p
\v 13 Mʉgu'ugítʉty, katʉ dʉ'ʉñʉ mwʉ'ʉmʉdʉ pʉn mduk'ak'a̱jtʉdʉp pʉ́nʉdyʉ naxwíñʉdʉ winma̱'a̱ñ ja'a'a̱jtʉdʉp.
\v 14 Mʉt ko ndsojkʉm ja nmʉgu'uk'a̱jtʉm, nnija̱'a̱m ko yʉ Dios tʉ xyajjʉgákʉm ma̱ yʉ o'kʉn es tʉ xyajmi'inʉm ma̱ yʉ jiky'a̱jtʉn. Di'ibʉ kyaj ttseky yʉ myʉgu'uk, wʉ'ʉmp yʉ'ʉ ma̱ ja o'kʉn.
\v 15 Di'ibʉ kyaj ttseky ja myʉgu'uk, yʉ'ʉ dʉ'ʉn yajja̱'a̱y'o'kpʉ. Es miits mnija̱'a̱dʉp ko ja yajja̱'a̱y'o'kpʉ kyaj tmʉdaty ja jiky'a̱jtʉn winʉ xʉʉ winʉ tiempʉ.
\v 16 Nnija̱'a̱m di'ibʉ dʉn tsojkʉn'a̱jtp, mʉt ko Jesukristʉ dya'ijxʉ ko jyiky'a̱jtʉn dyajky mʉt ʉdsa̱jtʉmgyʉjxm. Es dʉ'ʉn xypyátʉm ʉdsa̱jtʉm es nya̱jkʉm ja njiky'a̱jtʉn'a̱jtʉm mʉt ja'agyʉjxm ja nmʉgu'uk'a̱jtʉm.
\v 17 Pʉn ja pʉ́n tmʉdaty tjaygyepy di'ibʉ ndukjiky'a̱jtʉm, es t'ixy ja myʉgu'uk tyʉgoy'a̱jtxʉty, es kyaj tpa''ayoy, ¿wi'ix mba̱a̱t tmʉdaty ja Diosʉ tsyojkʉn?
\s Amumdu'uk jot naybyʉjtákʉm ma̱ Dios
\p
\v 18 Nitítʉty, kyaj nnaydsyojkʉm je'eyʉ wingʉ'ʉy agʉ'ʉy, naydsyojkʉm éxtʉm mba̱a̱t ya'ixy di'ibʉ ndu'unʉm mʉt ja tʉy'a̱jtʉn.
\v 19 Dʉ'ʉn nnija̱'a̱m ko xyja'a'a̱jtʉm ja Dios es n'ijtʉm jotkujk Dios windum
\v 20 ko nbekyjya̱'a̱m, Dios ni'igʉ myʉ́jʉty es kʉdiinʉm ʉdsa̱jtʉmʉ njot'a̱jt nwinma̱'a̱ñ'a̱jtʉm, ñija̱'a̱p yʉ'ʉ tʉgekyʉ.
\v 21 Mʉgu'ugítʉty, pʉn kyaj ti nbekyjya̱'a̱m, nwinguwa̱'kʉm jotkujk ja Dios,
\v 22 es yʉ'ʉ xymyo'oyʉm di'ibʉ ʉdsa̱jtʉm n'amdo'om, mʉt ko nguydyu'unʉm ja 'yana'amʉn es ndu'unʉm di'ibʉ yʉ'ʉ tsyejpy.
\v 23 Es ja Dios tni'ana'amʉ es nmʉbʉjkʉm ja 'yU'unk Jesukristʉ es nnaydsyojkʉm nixim niyam, éxtʉm ja Kristʉ xytyuk'ana'amʉm.
\v 24 Pʉn nguydyu'unʉm ja Diosʉ 'yana'amʉn, jiky'a̱jtʉm mʉt yʉ'ʉ, es yʉ'ʉ jyiky'aty mʉt ʉdsa̱jtʉm. Nnija̱'a̱m ko yʉ'ʉ jyiky'aty ma̱ ʉdsa̱jtʉm, mʉt ko tʉ xymyo'oyʉm ja Espíritʉ Santʉ.
\c 4
\s Espíritʉ Santʉ esʉ ka'oybyʉ
\p
\v 1 Mʉgu'ugítʉty, jaa may ja ja̱'a̱y di'ibʉ nayñiga̱jxʉdʉp ko yʉ'ʉ ya'ʉxpʉktʉ es ko xytyuknimi'inʉm ja Diosʉ 'yayuk. Katʉ miits xymyʉbʉktʉ, ja'a ko taa may di'ibʉ andáktʉp, je'eyʉ xywyin'ʉʉna̱'a̱nʉm. Ixtʉ yajxónʉ tadʉ 'yʉxpʉjkʉn es net xymyʉbʉ́ktʉt pʉn tʉy'a̱jtʉn ko yʉ'ʉ Dios tja'a'áty.
\p
\v 2 Dʉ'ʉn xyñijáwʉdʉt ko yʉ'ʉ Diosʉ Jya̱'a̱jʉn tja'a'áty: nidʉgekyʉ pʉ́nʉty jʉnándʉp ko yʉ Jesús yʉ'ʉdyʉ dʉ'ʉn ja Kristʉ, Diosʉ 'yU'unk di'ibʉ miin ya̱ naxwiiñ éxtʉmʉ naxwíñʉdʉ ja̱'a̱y, ja'a myʉda̱jttʉp ja Diosʉ Jya̱'a̱jʉn.
\v 3 Ja di'ibʉ jʉna̱a̱mp ko Kristʉ kyaj dʉ'ʉn oj myiñ, kyaj ja Espíritʉ Santʉ tmʉdaty, ja'a taadʉ myʉdsip'a̱jtypy ja Kristʉ. Es tʉ xymyʉdowdʉ miidsʉty ko myina̱'a̱ñ di'ibʉ myʉdsip'a̱jtypy ja Kristʉ. Pes ta net ya̱ naxwiiñ.
\p
\v 4 Nitítʉty, miidsʉty Dios mja'a'a̱jtʉdʉp. Tʉ xymyʉmada̱'a̱ktʉ tadʉ andakpʉty, mʉt ko yʉ Espíritʉ Santʉ di'ibʉ miidsʉty mʉʉt m'ittʉ, ni'igʉ yʉ'ʉ myʉ́jʉty es kʉdiinʉmʉ ka'oybyʉ di'ibʉ ja ya̱ naxwiiñ.
\v 5 Tadʉ andakpʉ yʉ'ʉ ja'a'a̱jtʉdʉp ja naxwíñʉdʉ winma̱'a̱ñ, pa̱a̱ty tka̱jxwa̱'xtʉ ja naxwíñʉdʉ winma̱'a̱ñ, es myʉdoo'ijtʉdʉ ja ja̱'a̱y di'ibʉ naxwíñʉdʉ winma̱'a̱ñ ja'a'a̱jtʉdʉp.
\v 6 Per ʉdsa̱jtʉm Dios xyja'a'a̱jtʉm. Di'ibʉ Dios 'yijxy'ajtypy, myʉdoo'ijtypy ja ayuk di'ibʉ nga̱jxwa̱'xʉm. Per di'ibʉ kyaj Dios jya'a'átyʉty, kyaj xymyʉdoo'ijtʉm. Es dʉ'ʉn mba̱a̱t n'ʉxka̱jpʉm pʉ́n myʉda̱jtypy ja Espíritʉ Santʉ di'ibʉ tʉy'a̱jtʉn yajkypy, es pʉ́n myʉda̱jtypy ja ka'oybyʉ di'ibʉ win'ʉ'ʉmp.
\s Dios yʉ'ʉ dʉ'ʉn ja tsojkʉn
\p
\v 7 Mʉgu'ugítʉty, n'oknaydsyojkʉm nixim niyam, mʉt ko yʉ tadʉ tsojkʉn myiñ ma̱ Dios. Nidʉgekyʉ di'ibʉ myʉda̱jttʉp ja tsojkʉn, yʉ'ʉ Dios u'unk'a̱jtʉdʉp, es 'yixy'a̱jttʉp ja Dios.
\v 8 Di'ibʉ kyaj tmʉdaty ja tsojkʉn, kyaj yʉ'ʉjʉty t'ixy'attʉ Dios, mʉt ko Dios yʉ'ʉ dʉ'ʉn ja tsojkʉn.
\v 9 Dios xytyuk'ijxʉm ja tsyojkʉn ʉdsa̱jtʉm ko tkejxy ja tyu'uk U'unk ya̱ naxwiiñ es nmʉda̱jtʉm ja njiky'a̱jtʉn'a̱jtʉm mʉt yʉ'ʉgyʉjxmʉ 'yU'unk.
\v 10 Kyaj 'yʉdsa̱jtʉmʉty jawyiin ndsojkʉm ja Dios, jawyiin'a̱jtp yʉ'ʉ oj xytsyojkʉm es xytyuk'ijxʉm mʉt ko xytyuknigajxʉm ja 'yU'unk es xyajpojpʉnitʉgo'oyʉm.
\p
\v 11 Mʉgu'ugítʉty, mʉt ko dʉ'ʉn ja Dios tʉ xytsyojkʉm, nandʉ'ʉn nnaydsyojkʉm nixim niyam.
\v 12 Ni na̱'a̱ pʉ́nʉ Dios tka'ixy. Per pʉn nnaydsyojkʉm nixim niyam, Dios ijtp ma̱ ʉdsa̱jtʉm es nmʉda̱jtʉm ja tsyojkʉn.
\v 13 Es mʉt ko Dios tʉ xymyo'oyʉm yʉ Espíritʉ Santʉ, tʉ xytyuk'ijxʉm ko yʉ'ʉ 'yity mʉt ʉdsa̱jtʉm, es ʉdsa̱jtʉm n'ijtʉm mʉt yʉ'ʉ.
\v 14 Es tʉts n'íxyʉts kʉ'ʉm es nga̱jxte'xyʉts ko Dios Teety tkejxy ja 'yU'unk ya̱ naxwiiñ éxtʉmʉ Yajnitsókpʉ.
\v 15 Oytyim pʉ́nʉty di'ibʉ 'yijxkajpy ko Jesús yʉ'ʉ Dios 'yU'unk'átyʉty, jiky'a̱jtp mʉt ja Dios es ja Dios jyiky'aty mʉt yʉ'ʉ.
\p
\v 16 Es dʉ'ʉn nnija̱'a̱m es nmʉbʉjkʉm ko Dios xytsyojkʉm. Dios yʉ'ʉ dʉ'ʉn ja tsojkʉn, es pʉn nnaydsyojkʉm nixim niyam, Dios jiky'a̱jtp mʉt ʉdsa̱jtʉm, es ʉdsa̱jtʉm njiky'a̱jtʉm mʉt ja Dios.
\v 17 Es ko njiky'a̱jtʉm mʉt ja Dios, mʉj máyʉp es kexy ka'pxy 'yítʉt ja ndsojkʉn'a̱jtʉm es ndukmʉ'awda̱jtʉm ko Dios xypyayo'oyʉm, ja'a ko n'ijtʉm ya̱ naxwiiñ éxtʉmʉ Kristʉ.
\v 18 Ma̱ jyámʉty ja tsojkʉn, kyaj jyámʉty ja tsʉ'kʉn. Di'ibʉ myʉda̱jtypy kexy ka'pxy ja tsojkʉn, yajkekypy ja tsʉ'ʉgʉ. Ja'a ko pʉn ndsʉ'kʉm tii, njʉjptsʉ'kʉm ko xytyukkumʉdowa̱'a̱nʉm di'ibʉ tʉ ndu'undʉgo'oyʉm. Ko ti ndsʉ'kʉm, kyaj kexy ka'pxy nmʉda̱jtʉm ja tsojkʉn.
\p
\v 19 Dios jawyiin xytsyojkʉm ʉdsa̱jtʉm. Pa̱a̱ty ʉdsa̱jtʉm ndsojkʉm ja Dios.
\v 20 Pʉn ja pʉ́n jyʉna'añ: “Ʉj ndsejpyʉts ja Dios”, es kyaj ttseky ja myʉgu'uk, andakpʉ taadʉ. Pʉn di'ibʉ kyaj ttseky ja myʉgu'uk di'ibʉ ya̱a̱ 'yijxypy, nan kyaj mba̱a̱t ttseky ja Dios di'ibʉ kyaj t'ixy.
\v 21 Mʉt ko Dios tʉ xytyuk'ana'amʉm ko di'ibʉ tsyejpy ja Dios, nandʉ'ʉn ttsókʉt ja myʉgu'uk.
\c 5
\s Wi'ix ja ka'oybyʉ nmʉmadákʉm
\p
\v 1 Nidʉgekyʉ di'ibʉ 'yaxá̱jʉp ja Jesús éxtʉmʉ Kristʉ, yʉ'ʉ dʉ'ʉn ja Dios u'unk'a̱jtʉdʉp. Ja ja̱'a̱y di'ibʉ tsyejpy tu'ugʉ u'unkteety, nandʉ'ʉn ttseky yʉ u'unkteedyʉ 'yu'ungʉty.
\v 2 Ko ndsojkʉm ja Dios es nguydyu'unʉm ja 'yana'amʉn, ndsojkʉmʉ naty nandʉ'ʉnʉ 'yu'ungʉty.
\v 3 Es ko ndsojkʉm ja Dios, nguydyu'unʉmʉ naty yʉ 'yana'amʉn. Es kom xy'u'unk'a̱jtʉm ja Dios es ndsojkʉm, kyaj mʉk nja̱'a̱m es nguydyu'unʉm di'ibʉ yʉ'ʉ xytyuk'ana'amʉm,
\v 4 mʉt ko nidʉgekyʉ ʉdsa̱jtʉm di'ibʉ xy'u'unk'a̱jtʉm ja Dios, nmʉmadákʉm es kyaj ndu'unʉm ja naxwíñʉdʉ winma̱'a̱ñ. Nmʉmadákʉm mʉt ko nmʉbʉjkʉm ko ja Jesús yʉ'ʉ Kristʉ, Diosʉ 'yU'unk.
\v 5 Pʉ́nʉty myʉbʉjktʉp ko Jesús yʉ'ʉ Diosʉ 'yU'unk, myʉmadáktʉp es kyaj ttúndʉt ja naxwíñʉdʉ winma̱'a̱ñ.
\s Jesús yajnigajxy ko Dios 'yu'unk'átyʉty
\p
\v 6 Ko Jesús myiiñ ya̱ naxwiiñ, oj ya'ijxwe'emy mʉt ja nʉʉ es ja ne'pyñ, kyaj jye'eyʉty ja nʉʉ, ja'a mʉt ja nʉʉ es ja ne'pyñ. Es ja Espíritʉ Santʉ kʉ'ʉm dyajtʉydyʉ́kʉ, es ni na̱'a̱ kya''anda'aky.
\v 7 Tʉgʉʉk jyam'aty tsa̱jpótm di'ibʉ yajtʉydyʉjkʉbʉ tya̱a̱dʉ: ja Dios Teety, ja Diosʉ 'yU'unk esʉ Espíritʉ Santʉ. Es ti'igyʉ ja tʉy'a̱jtʉn di'ibʉ ya̱jktʉp.
\v 8 Es tʉgʉʉk jyaa'áty naxwiiñ di'ibʉ yajtʉydyʉjkʉdʉbʉ tya̱a̱dʉ: ja Espíritʉ Santʉ, ja nʉʉ es ja ne'pyñ. Es ti'igyʉ ja tʉy'a̱jtʉn di'ibʉ ya̱jktʉp.
\v 9 Nmʉbʉjkʉm ko tnika̱jxpáttʉ ja̱'a̱yʉty. Per yʉ Diosʉ ñika̱jxpajtʉn kana̱k nipat 'yóyʉty. Yʉ Dios tʉ jyʉna'añ ko Jesús yʉ'ʉ 'yU'unk'a̱jtypy.
\v 10 Di'ibʉ myʉbejkypy ja Diosʉ 'yU'unk, myʉda̱jtypy jyodoty wyinma̱'a̱ñóty di'ibʉ ñika̱jxpejtypy ko tyʉy'a̱jtʉnʉty. Per di'ibʉ kyaj tmʉbeky ja Dios, dʉ'ʉn t'ixy éxtʉm 'yanda'aky ja Dios, mʉt ko kyaj tmʉbeky ja Diosʉ ñika̱jxpajtʉn ko jyajʉnáñ: “Jesús ʉj n'U'unk'a̱jtypy.”
\v 11 Tya̱dʉ nika̱jxpajtʉn yʉ'ʉ dʉ'ʉn: ja Dios tʉ xymyo'oyʉm ja jiky'a̱jtʉn winʉ xʉʉ winʉ tiempʉ, esʉ tya̱dʉ jiky'a̱jtʉn 'yity mʉt ja 'yU'unkkyʉjxm.
\v 12 Di'ibʉ 'yaxá̱jʉp ja Jesús éxtʉm ja Diosʉ 'yU'unk, myʉda̱jtypyʉ tya̱dʉ jiky'a̱jtʉn. Per di'ibʉ kyaj t'axa̱jʉ Jesús éxtʉm ja Diosʉ 'yU'unk, kyaj tmʉdatyʉ tya̱dʉ jiky'a̱jtʉn.
\s Ka̱jxwíjʉn esʉ ka̱jxpo'xʉn
\p
\v 13 Nnija̱'a̱yʉdʉpts miits di'ibʉ myʉbʉjktʉp ja Diosʉ 'yU'unk, es xyñijáwʉdʉt ko xymyʉdattʉ ja jiky'a̱jtʉn winʉ xʉʉ winʉ tiempʉ.
\p
\v 14 Kyaj ndsʉ'k nja̱'a̱m ko n'amdo'om tii ja Dios, mʉt ko nnija̱'a̱m ko ti n'amdo'om di'ibʉ ijtp ti'igyʉ di'ibʉ yʉ'ʉ tsyejpy, yʉ'ʉ xymyʉdo'om.
\v 15 Es mʉt yʉ'ʉyʉ ko xymyʉdo'om, nnija̱'a̱m ko xymyo'oyʉmʉ naty di'ibʉ n'amdo'om.
\p
\v 16 Pʉn 'yijxypy ko tu'ugʉ myʉgu'uk ttuñ ja peky di'ibʉ kyaj myʉnejxyʉty ma̱ ja o'kʉn, wa'an tka̱jxta'aky ma̱ Dios kʉdiibʉ 'yoogʉt. Ja'a ko taa yʉ peky di'ibʉ mʉnʉjxp ma̱ ja o'kʉn, es mʉdʉ tya̱dʉ peky kyajts njʉna̱'a̱ñ es kya̱jxta̱'a̱gʉt yʉ'ʉgyʉjxm.
\v 17 Tʉgekyʉ axʉʉkpʉ yʉ'ʉ dʉn peky. Es taa yʉ peky di'ibʉ kyaj myʉnejxy ma̱ ja o'kʉn.
\p
\v 18 Nnija̱'a̱m ko di'ibʉ myʉda̱jtypy ja Dios éxtʉmʉ Tyeety, kyaj pyekytyuun'adʉ'ʉtsy, mʉt ko Diosʉ 'yU'unk tkwentʉ'aty di'ibʉ Dios jya'a'a̱jtypy, es kyaj ja mʉjku'ugópk wi'ix tyúñʉty.
\p
\v 19 Nnija̱'a̱m ʉdsa̱jtʉm ko Dios xyja'a'a̱jtʉm esʉ mʉjku'ugópk yʉ'ʉ ja'a'a̱jtʉdʉp tʉgekyʉ di'ibátyʉ naxwíñʉdʉ winma̱'a̱ñ ja'a'a̱jtʉdʉp.
\p
\v 20 Es nnija̱'a̱m nandʉ'ʉn ko ja Diosʉ 'yU'unk tʉ myiñ es tʉ xymyo'oyʉm yʉ nwinma̱'a̱ñ'a̱jtʉm es n'ixy'a̱jtʉm ja Dios. N'ijtʉm ti'igyʉ mʉt ja Dios es mʉt ja 'yU'unk Jesukristʉ. Tyʉy'a̱jtʉnʉty ko yʉ'ʉdyʉ Dios, es yʉ'ʉ dʉ'ʉn yajkypy ja jiky'a̱jtʉn winʉ xʉʉ winʉ tiempʉ.
\v 21 Nitítʉty, éxkʉm ko xywyindsʉ'ʉgʉdʉt di'ibʉ kyaj Dyios'aty.