\id REV

\h DI'IBɄ JATANɄP
\mt Di'ibʉ Dios Myooy Ja Jesukristʉ Es Ttuknijáwʉdʉt Ja Myʉduumbʉty
\c 1
\p
\v 1 Di'ibʉts ngʉxjaapy ma̱ tya̱dʉ neky, yʉ'ʉ di'ibʉ Dios myooy ja Jesukristʉ es ttuknijáwʉdʉt ja myʉduumbʉty di'ibʉ tsojkʉp es tsojk tyuna̱'a̱ñ jyata̱'a̱ñʉty. Jesukristʉ tkejxy nidu'ugʉ 'yanklʉs ma̱ ʉj, Fwank, Jesukristʉ myʉduumbʉ, es tʉts xytyuknijawʉ tʉgekyʉ tya̱a̱dʉ.
\v 2 Pa̱a̱ty ma̱ tya̱dʉ neky nnika̱jxpétyʉts ko tyʉy'a̱jtʉnʉty di'ibʉts n'ijx nmʉdoo, ko yʉ'ʉ ja Diosʉ 'yayuk es di'ibʉ Jesukristʉ xytyuk'ijx xytyuknija̱'a̱jʉts.
\p
\v 3 Dios kunu'xʉdʉp di'ibʉty kya̱jxtʉp, es kunu'xʉdʉp nandʉ'ʉn di'ibʉ myʉdeepy ja myadya'agyʉ tya̱dʉ ayuk, es tmʉbʉ́ktʉt es tkuydyúndʉt di'ibʉ ijtp ya̱a̱ kʉxja̱'a̱y, mʉt ko tʉ wyingóñ ja tiempʉ ma̱ tyuna̱'a̱ñ jyata̱'a̱ñʉty.
\s Fwank tnijayʉ ja mʉbʉjkpʉtʉjk nijʉxtujk pekypyʉ
\p
\v 4 Ʉj Fwank. Nnijáyʉts yʉ mʉbʉjkpʉty di'ibʉ naymyujkʉdʉp ma̱ jʉxtujkpʉ ka̱jpn Asyʉ ña̱a̱xóty. Wa'an ja Dios mgunu'xʉdʉ es mmo'oyʉdʉ ja agujk'a̱jt jotkujk'a̱jtʉn, ja Dios di'ibʉ ijtp, dʉ'ʉñʉm 'yity, es dʉ'ʉñʉm 'yita̱'a̱ñ. Nandʉ'ʉn mgunu'xʉdʉt ja Espíritʉ Santʉ es mmo'oyʉdʉt ja agujk'a̱jt jotkujk'a̱jtʉn, ja Espíritʉ Santʉ di'ibʉ ijtp ma̱ uñaaybyajn ma̱ Dios yajkutíky, es ttuñ jʉxtujk naxʉ tuunk.
\v 5 Es nandʉ'ʉn ja Jesukristʉ, di'ibʉ ñika̱jxpejtypy ja tʉy'a̱jtʉn, mgunu'xʉdʉt es mmo'oyʉdʉt ja agujk'a̱jt jotkujk'a̱jtʉn, di'ibʉ jawyiin jikypyʉjk ko 'ye'ky, es tyam yajkutíky ma̱ nidʉgekyʉ naxwíñʉdʉ ja̱'a̱yʉdyʉ ryey. Jesukristʉ xytsyojkʉm, tʉ xyajwátsʉm ja nbojpʉ'a̱jtʉm mʉt ja ñe'pyñ,
\v 6 es tʉ xypyʉjtákʉm yajkutujkpʉ es teedyʉty, es nmʉdu'unʉm ja Dios Teety. ¡N'ok'awda̱jtʉm ja Jesukristʉ di'ibʉ winʉ xʉʉ winʉ tiempʉ tmʉdaty ja mʉj'a̱jtʉn esʉ mʉk'a̱jtʉn! Wa'an dʉ'ʉnʉty.
\p
\v 7 Ixtʉ, Kristʉ miimp yoodsóty. Nidʉgekyʉ naxwíñʉdʉ ja̱'a̱y t'íxtʉt, es extʉ ja'ajʉty di'ibáty yajkruuzpajtʉdʉ; es nidʉgekyʉ naxwíñʉdʉ ja̱'a̱yʉty jyʉ'ʉy ya̱'a̱xtʉt ko t'íxtʉt. Es dʉ'ʉn jyata̱'a̱ñ. Wa'an dʉ'ʉnʉty.
\p
\v 8 Nindsʉn'a̱jtʉm Dios, di'ibʉ tʉgekyʉ mʉk'a̱jtʉn myʉda̱jtypy, yʉ'ʉ dʉ'ʉn jʉna̱a̱mp: “Ʉjtsʉ dʉ'ʉn éxtʉm ja A es éxtʉm ja Z, ʉjtsʉ dʉ'ʉn ja jawyiimbʉ es ja tim okpʉ, di'ibʉ ijtp, dʉ'ʉñʉm 'yity, es dʉ'ʉñʉm 'yita̱'a̱ñ.”
\s Fwank t'ixy ja Kristʉ
\p
\v 9 Ʉj Fwank, mmʉmʉbʉjkpʉty. Mʉt yʉ'ʉgyʉjxmʉ Jesús ʉj n'ítyʉts mʉt miidsʉty ma̱ Diosʉ kyutujkʉn, ayo'on es ma'xtujkʉn. Tʉts xyjapʉjta̱'a̱ktʉ éxtʉmʉ tsimyjya'ay ya̱ ma̱ islʉ di'ibʉ xyʉ'a̱jtypy Patmʉs, mʉt ko nga̱jxwa'xyʉts ja Diosʉ 'yayuk es nnigajxy nnimadya'agyʉts ja Kristʉ.
\v 10 Ma̱ tu'ugʉ domingʉ xʉʉ ja Espíritʉ Santʉ xyñigʉdákʉts. Nétʉts nmʉdooy éxtʉm pʉ́n mʉk kyajxy n'ʉxkʉ'ʉyʉts mʉt tu'ugʉ ayuk, dʉ'ʉn éxtʉm ya'axy ja trompetʉ,
\v 11 es xy'anma̱a̱yʉts:
\p —Kʉxja̱'a̱y nekykyʉjxm di'ibʉ m'ijxypy, es tuknigaxʉ tadʉ neky ja mʉbʉjkpʉty di'ibʉ naymyujkʉdʉp ma̱ tya̱dʉ jʉxtujkpʉ ka̱jpn: Éfesʉ, Esmirnʉ, Pérgamʉ, Tyatiirʉ, Sardʉs, Filadelfyʉ esʉ Laodiseeʉ.
\p
\v 12 Nwa̱'kʉmbijtyʉts es n'ixa̱'a̱ñʉts pʉ́ndsʉ dʉn xymyʉga̱jxp. Nétʉts n'ijxy jʉxtujkʉ oorʉ kandaleerʉ,
\v 13 es kujk'a̱a̱y ma̱ tadʉ kandaleerʉ, n'ijxyʉts kyʉxe'eky éxtʉm tu'ugʉ yedyʉjk, es ñaywyítxʉty yeñ, extʉ tekyjyʉjp'amba̱a̱t, es tmʉdaty tu'ugʉ 'yoorʉ ka̱a̱tsywyʉʉn di'ibʉ jantsy mʉjʉ 'yok.
\v 14 Yʉ wyaay poop éxtʉmʉ lanʉ pooppʉ, es éxtʉmʉ tsa̱jp'e'pyky, esʉ wyiin dʉ'ʉn kyʉxe'eky éxtʉmʉ jʉnya'angʉn.
\v 15 Yʉ tyeky jantsy tʉ'xp, éxtʉmʉ bronsʉ ko mʉk 'yambeky; esʉ kyajxy jantsy mʉk, éxtʉm 'yʉʉtsy pyʉmimy ja mʉj nʉʉdáx.
\v 16 Ma̱ yʉ 'yaga̱'a̱ñgyʉ'ʉ tmʉdaty jʉxtujkʉ mʉdsa̱'a̱, esʉ wyiin jyʉjp tʉ'xp éxtʉm ko tye'xy ja xʉʉ mʉt winʉ myʉja̱a̱. Es ma̱ 'ya̱a̱ pyʉdsemy éxtʉm tu'ugʉ espa̱a̱dʉ jʉjpki'pyñ es majtskʉ 'ya̱a̱.
\p
\v 17 Kots n'ijxy, ngʉda̱a̱yʉts tyeky'ʉjxy éxtʉmʉ o'kpʉ. Es yʉ'ʉ tyuknikooñʉts ja 'yaga̱'a̱ñgyʉ'ʉ, es xy'anma̱a̱yʉts:
\p —Katʉ mdsʉ'ʉgʉ. Ʉjtsʉ dʉ'ʉn ja jawyiimbʉ es ja tim okpʉ.
\v 18 Ʉjtsʉ dʉ'ʉn di'ibʉ jiky'a̱jtp. Tʉts n'ok'o'kpʉ, nétʉts njikypyejky, es njiky'átyʉts winʉ xʉʉ winʉ tiempʉ, es nmʉda̱jtypyʉts ja kutujkʉn esʉts nyajjikypyʉ́kʉt ja o'kpʉty.
\v 19 Kʉxja̱'a̱y di'ibʉ tʉ xy'ixy, di'ibʉ jaa tyam, es di'ibʉ ya'ixa̱a̱mp óknʉm.
\v 20 Yʉ'ʉ dʉ'ʉn 'yandijpy ja ayu'udsyʉ winma̱'a̱ñ, ja jʉxtujkpʉ mʉdsa̱'a̱ di'ibʉ tʉ xy'ixy ma̱dsʉ n'aga̱'a̱ñgyʉ'ʉ es ja jʉxtujkpʉ oorʉ kandaleerʉ. Ja jʉxtujkpʉ mʉdsa̱'a̱ ja'a 'yandijpy ja jʉxtujkpʉ n'ayuk ka̱jxwa̱'xpʉts ma̱ ja mʉbʉjkpʉtʉjk ñaymyúkʉdʉ, esʉ jʉxtujkpʉ kandaleerʉ ja'a 'yandijpy ja mʉbʉjkpʉty di'ibʉ naymyujkʉdʉp ma̱ jʉxtujkpʉ ka̱jpn.
\c 2
\s Ayuk yajtuknigéxy ja mʉbʉjkpʉtʉjk jap Éfesʉ
\p
\v 1 ’Dʉ'ʉn xyñijáyʉt yʉ n'ayuk ka̱jxwa̱'xpʉts di'ibʉ ijtp ma̱ ja mʉbʉjkpʉtʉjk ñaymyúkʉdʉ jam Éfesʉ. “Dʉ'ʉn jyʉna'añ di'ibʉ myʉda̱jtypy jʉxtujkʉ mʉdsa̱'a̱ 'yaga̱'a̱ñgyʉ'ʉjóty es jyʉdity kujk'a̱a̱y ma̱ tadʉ jʉxtujkpʉ oorʉ kandaleerʉ:
\v 2 Ʉj nnija̱'a̱bʉts di'ibʉ mduundʉp, wi'ix mmʉktundʉ, es ja ma'xtujkʉn di'ibʉ mmʉda̱jttʉp. Es nnija̱'a̱bʉts ko kyaj mba̱a̱t xymyʉma'xtúktʉ ja axʉk ja̱'a̱yʉty. Nan nnija̱'a̱bʉts ko tʉ xywyinma̱'a̱ñ'íxtʉ di'ibʉ nʉgoobʉ ñayñiga̱jxʉdʉ ko yʉ'ʉ 'yapóstʉlʉty, es tʉ xyajnidʉ'xtʉ ko yʉ'ʉdyʉ andákpʉty.
\v 3 Tʉ xymyʉdánʉdʉ es xytyuknaxtʉ ja ayo'on mʉt ʉjtskyʉjxm, es ni tʉ mgatsipka'axtʉ.
\v 4 Per ma̱ miidsʉty tam tits nga'oyjya̱'a̱p, yʉ'ʉ ko kyaj xy'oknakytsyojknʉdʉts éxtʉm jawyíñʉp.
\v 5 Jamyatstʉ éxtʉm tʉʉyʉp xytsyojktʉts es yajxónʉts xymyʉduundʉ. Yajjʉmbíttʉ mjot es jiky'attʉ jatʉgok éxtʉmʉ naty jawyiin. Pʉn kyaj mjodʉmbittʉ, nninʉjxtʉp es nbʉjkʉdʉt ja mgandaleerʉ ma̱ 'yity.
\v 6 Oyʉ dʉ'ʉn xytyundʉ ko xykyatsoktʉ ja nikoláytʉdyʉ 'yaxʉk jiky'a̱jtʉn, mʉt ko ʉj nandʉ'ʉn n'axʉk'ijxpyʉts.
\v 7 Di'ibʉ mʉdoodʉp, wa'an tjaygyúkʉdʉ di'ibʉ ja Espíritʉ Santʉ 'yanma̱a̱ydyʉbʉ tadʉ mʉbʉjkpʉtʉjk ma̱ ñaymyúkʉdʉ. Pʉ́n madakp, tya̱a̱dʉ nmo'oyʉpts es tjʉ'xʉt ja ujts tʉʉmp di'ibʉ yajjiky'a̱jtp es tsa̱jpótm 'yity.”
\s Ayuk yajtuknigéxy ja mʉbʉjkpʉtʉjk jap Esmirnʉ
\p
\v 8 ’Nijayʉ nandʉ'ʉn yʉ n'ayuk ka̱jxwa̱'xpʉts di'ibʉ ijtp ma̱ yʉ mʉbʉjkpʉtʉjk ñaymyúkʉdʉ jam Esmirnʉ: “Dʉ'ʉn jyʉna'añ yʉ jawyiimbʉ esʉ tim okpʉ, di'ibʉ ok'o'kpʉ es net jyikypyejky.
\v 9 Ʉj nnija̱'a̱bʉts ko m'ayoodʉp. Per jotkujkʉdʉ mʉt ko Dios mdsókʉdʉ es mbudʉ́kʉdʉ. Es nnija̱'a̱bʉts ko nʉgoo mni'ow mniya̱a̱xʉdʉ di'ibáty naydyíjʉdʉp ko 'yisraelítʉty, di'ibʉ sitʉy je'eyʉ ko myʉjku'umʉdúndʉ.
\v 10 Katʉ mdsʉ'ʉgʉdʉ mʉt ko m'ayowa̱'a̱ndʉ. Yʉ mʉjku'ugópk yʉ'ʉ wyinma̱'a̱ñ myo'oyaampy ja myʉduumbʉty es mbʉjta̱'a̱ga̱'a̱ñʉty pujxndʉgóty miidsʉty nidu'ugʉty, es waanʉ tiempʉ mya''ayowa̱'a̱ñʉty mʉk, es dʉ'ʉn xymyastu'uttʉt ja mmʉbʉjkʉnʉty. Yajti'igyʉdʉ mjot mwinma̱'a̱ñʉty extʉ o'kʉnbyaaty, es ʉjts miits nmo'oydyʉp yʉ jiky'a̱jtʉn winʉ xʉʉ winʉ tiempʉ.
\v 11 Di'ibʉ mʉdoodʉp, wa'an tjaygyúkʉdʉ di'ibʉ 'yanma̱a̱ydyʉp ja Espíritʉ Santʉ tadʉ mʉbʉjkpʉty di'ibʉ naymyujkʉdʉp: Pʉ́n madakp, kyaj ja'a pya̱a̱dʉdʉt ja ayo'on di'ibʉ dʉ'ʉn éxtʉmʉ ja̱'a̱y 'yooktʉ myʉmajtsk ok.”
\s Ayuk yajtuknigéxy ja mʉbʉjkpʉtʉjk jap Pérgamʉ
\p
\v 12 ’Nijayʉ nandʉ'ʉn yʉ n'ayuk ka̱jxwa̱'xpʉts di'ibʉ ijtp ma̱ ja mʉbʉjkpʉty ñaymyúkʉdʉ jam Pérgamʉ: “Dʉ'ʉn jyʉna'añ di'ibʉ myʉda̱jtypy ja espa̱a̱dʉ jʉjpki'pymbyʉ es majtskʉ 'ya̱a̱:
\v 13 Ʉj nnija̱'a̱bʉts ko mdsʉʉnʉdʉ ma̱ ja Satanás 'yane'emy. Es nan nnija̱'a̱bʉts kots miits xypyanʉjxtʉ amumdu'uk jot, es kyajts xymyastu'uttʉ oy tjaya'o'ktʉ ja n'ayuk ka̱jxwa̱'xpʉ Antipʉs ma̱ miidsʉty, jap ma̱ ja Satanás tsyʉʉnʉ.
\v 14 Per ma̱ miidsʉty tam tits nga'oyjya̱'a̱p, mʉt ko tam ñaymyíkyʉty mʉt miidsʉty di'ibʉ pyanʉjxtʉp ja Balamʉ 'yʉxpʉjkʉn. Tadʉ Balán yʉ'ʉ wyinma̱'a̱ñmyooy ja Balak wi'ix dyajpekytyúnʉt ja israelítʉty, ttuktsu'tstʉ ja tsu'utsy di'ibʉ tʉ yajtukwindsʉ'ʉgʉ ja agojwinnáxʉty, es myʉ'induundʉ.
\v 15 Njʉna̱'a̱ñʉdsʉ dʉ'ʉnʉ tya̱a̱dʉ mʉt ko ma̱ miidsʉty, ta di'ibʉ pyanʉjxtʉp ja nikoláytʉdyʉ 'yʉxpʉjkʉn, mʉt ko ʉj nandʉ'ʉn n'axʉk'ijxpyʉts.
\v 16 Pa̱a̱ty jodʉmbittʉ. Pʉn kʉdii, nʉjxʉpts es nyajkutʉgóyʉptsʉ tadʉ axʉk ja̱'a̱yʉty mʉt ja espa̱a̱dʉ di'ibʉ pʉdsʉʉmp ma̱dsʉ n'a̱a̱.
\v 17 Di'ibʉ mʉdoodʉp, wa'an tjaygyúkʉdʉ di'ibʉ ja Espíritʉ Santʉ 'yanma̱a̱ydyʉp ja mʉbʉjkpʉty di'ibʉ naymyujkʉdʉp: Pʉ́n madakp, ndukjʉ'xʉpts ja ayu'udsyʉbʉ manaa. Es nandʉ'ʉn nmo'oyʉpts tu'ugʉ poop tsa̱a̱ di'ibʉ myʉda̱jtypy kʉxja̱'a̱y yʉ xyʉʉ jembyʉ di'ibʉ ni pʉ́n tkanijawʉ, ja'ayʉ ñija̱'a̱p di'ibʉts nmeepy.”
\s Ayuk yajtuknigéxy ja mʉbʉjkpʉtʉjk jap Tyatiirʉ
\p
\v 18 ’Nijayʉ nandʉ'ʉn yʉ n'ayuk ka̱jxwa̱'xpʉts di'ibʉ ijtp ma̱ ja mʉbʉjkpʉtʉjk ñaymyúkʉdʉ jam Tyatiirʉ: “Dʉ'ʉn jyʉna'añ ja Diosʉ 'yU'unk di'ibʉ myʉda̱jtypy ja wyiin éxtʉmʉ jʉnya'angʉn, esʉ tyeky dʉ'ʉn éxtʉm ja bronsʉ di'ibʉ jantsy tʉ'xp:
\v 19 Ʉj nnija̱'a̱bʉts di'ibʉ mduundʉp. Nnija̱'a̱bʉts ja mdsojkʉnʉty, yʉ mmʉbʉjkʉnʉty, yʉ mma'xtujkʉnʉty, es wi'ixʉ Dios xymyʉdundʉ. Es nnija̱'a̱bʉts ko tyam xytyundʉ oy waanʉ ni'igʉ kʉdiinʉm jawyíñʉp.
\v 20 Per mdʉgooydyʉp mʉt ko xyña'ixtʉ tadʉ toxytyʉjk Jezabel di'ibʉ nayñiga̱jxʉp ko yʉ'ʉ Diosʉ 'yayuk tka̱jxwa̱'xʉ, per je'eyʉ 'yanda'aky es twin'ʉʉndʉ ja di'ibʉts xymyʉduundʉp, es myʉ'indúndʉt es nan tjʉ'xtʉt ja di'ibʉ tʉ yajtukwindsʉ'ʉgʉ agojwinnáxʉty.
\v 21 Ʉj tʉts njamo'oyʉ tiempʉ esxyʉp yʉ'ʉ tʉ jyodʉmbity, esxyʉp tʉ dyajtʉgátsy ja wyinma̱'a̱ñ. Per kyajpʉ dʉ'ʉn tʉ ttuna̱'a̱ñ, kyaj tʉ tmastu'uty ja mʉ'induunk.
\v 22 Ja'agyʉjxm ko kyaj tmastu'uty ja pekytyu'unʉn, ʉjtsʉts nyajka̱'a̱p tu'ugʉ pa̱'a̱m es 'yayówʉt mʉk, nandʉ'ʉn 'yayówʉt pʉ́nʉty mʉʉt pyekytyundʉ pʉn kyaj tmastu'uttʉ ja pyekytyu'unʉn.
\v 23 Es nya'oogʉpts ja Jezabelʉ 'yu'ungʉty, es dʉ'ʉn nduknijáwʉdʉts nidʉgekyʉ mʉbʉjkpʉtʉjkʉty kots ʉj n'ixy'aty ja jyot wyinma̱'a̱ñʉty, es nidu'uk nidu'uk miits ndʉydyúndʉt o ngumáydyʉt éxtʉm mba̱a̱dʉdʉ.
\v 24 Per miidsʉty nija'ajʉty di'ibʉ ak'ijttʉp Tyatiirʉ di'ibʉ kyaj tpanʉjxtʉ tadʉ axʉk ʉxpʉjkʉn es ni tkanijáwʉdʉ di'ibʉty yʉ'ʉjʉty tyijtʉp yʉ Satanasʉ 'yʉxpʉjkʉnʉ ayu'udsyʉbʉ, kyaj nnakymyo'oyʉty wiinkpʉ ana'amʉn,
\v 25 je'eyʉ ko xykywentʉ'áttʉt di'ibʉ mmʉda̱jttʉp extʉ kots ʉj njʉmbítʉt.
\v 26 Pʉ́n madakp es ttuñ di'ibʉts ʉj ndsejpy, nmo'oyʉpts ʉj ja kutujkʉn es 'yana'amʉt ma̱ tʉgekyʉ ja naxwíñʉdʉ,
\v 27 es dʉ'ʉn 'yana'amʉt éxtʉm ko ja naxtu'ts yajtukwépy ja pujxnda̱jk, es tyukpu'ujʉ, dʉ'ʉn éxtʉmʉ nDeedyʉts tʉ xymyo'oy esʉts nyajkutúkʉt.
\v 28 Nandʉ'ʉn nmo'oyʉp ja jayxyʉʉ.
\v 29 Di'ibʉ mʉdoodʉp, wa'an tjaygyúkʉdʉ di'ibʉ ja Espíritʉ Santʉ 'yanma̱a̱ydyʉp ja mʉbʉjkpʉty di'ibʉ naymyujkʉdʉp.”
\c 3
\s Ayuk yajtuknigéxy ja mʉbʉjkpʉtʉjk jap Sardʉs
\p
\v 1 ’Nijayʉ nandʉ'ʉn yʉ n'ayuk ka̱jxwa̱'xpʉts di'ibʉ ijtp ma̱ ja mʉbʉjkpʉtʉjk ñaymyúkʉdʉ jam Sardʉs: “Dʉ'ʉn jyʉna'añ di'ibʉ myʉda̱jtypy ja jʉxtujkʉ mʉdsa̱'a̱ es ja Diosʉ Jya̱'a̱jʉn di'ibʉ tyiimpy jʉxtujk naxʉ tuunk: Ʉj nnija̱'a̱bʉts di'ibʉ mduundʉp. Oy miits mjajiky'attʉ, dʉ'ʉn m'ittʉ éxtʉm eekypyʉn.
\v 2 Pa̱a̱ty wijtʉ es mʉk tundʉ ja mjot, mo'oydyʉ mʉk'a̱jtʉn di'ibʉ akwʉ'ʉmpnʉm, di'ibʉ jawaanʉ kya'o'knʉ, ja'a ko tʉts n'ixy es kyaj tyim'óyʉty di'ibʉ mduundʉp Dios windum.
\v 3 Jamyatstʉ ja oybyʉ n'ʉxpʉjkʉnʉts di'ibʉ m'axa̱jʉ. Kuydyundʉ es yajtʉgátstʉ mwinma̱'a̱ñʉty es mjiky'áttʉt. Pʉn kyajpʉ dʉ'ʉn xytyundʉ, nʉjxʉpts ti'in, éxtʉm tu'ugʉ ma'tspʉ, ma̱ ni xykya''awíxyʉdsʉ naty.
\v 4 Per jap Sardʉs tap na̱a̱gʉdyʉ ja̱'a̱y di'ibʉts sitʉy taayʉmts xymyʉduundʉp amumdu'uk jot. Yʉ'ʉ tya̱a̱dʉty jyʉdíttʉt mʉt ʉj poop witxʉ, mʉt ko dʉ'ʉn ñitʉ́kʉdʉ.
\v 5 Pʉ́n madakp, nan ndukpʉjta̱'a̱gʉpts ja poop wit, es kyajtsʉ xyʉʉ njo'tsʉt ma̱ 'yity kʉxja̱'a̱y nekykyʉjxy ja xyʉʉjʉty pʉ́nʉty jiky'a̱jttʉp winʉ xʉʉ winʉ tiempʉ. Ni'igʉts n'axá̱jʉt éxtʉmdsʉ nja'ajʉn ma̱dsʉ nDeety 'yity mʉt ja 'yánklʉsʉty.
\v 6 Di'ibʉ mʉdoodʉp, wa'an tjaygyúkʉdʉ di'ibʉ ja Espíritʉ Santʉ 'yanma̱a̱ydyʉp ja mʉbʉjkpʉty di'ibʉ naymyujkʉdʉp.”
\s Ayuk yajtuknigéxy ja mʉbʉjkpʉtʉjk jap Filadelfyʉ
\p
\v 7 ’Nijayʉ nandʉ'ʉn ja n'ayuk ka̱jxwa̱'xpʉts di'ibʉ ijtp ma̱ ja mʉbʉjkpʉtʉjk ñaymyúkʉdʉ jam Filadelfyʉ: “Dʉ'ʉn jyʉna'añ di'ibʉ ni madsoo pyojpʉ, di'ibʉ ja Tʉy'a̱jtʉn es di'ibʉ myʉda̱jtypy ja rey Davitʉ 'yawatsn; es ko dya''awa̱'a̱tsy tii, ni pʉ́n mba̱a̱t tkaya''adiky; es ko ti dya''adiky, ni pʉ́n mba̱a̱t tkaya''awa̱'a̱tsy.
\v 8 Ʉj nnija̱'a̱bʉts di'ibʉ mduundʉp. Tʉts mbʉjta'aky tu'ugʉ tʉjk a̱a̱ awa̱'a̱ts ma̱ miidsʉty, di'ibʉ ni pʉ́n mba̱a̱t tkaya''adiky. Oy nʉgoo xykyamʉda̱jtpʉ mʉja̱a̱, tʉ xykyuydyundʉ ja n'ayúkʉts es kyajts tʉ xy'ʉxtijy.
\v 9 Ja mʉjku'ugópk mʉduumbʉty, tadʉ andákpʉty di'ibʉ nayñiga̱jxʉdʉp ko yʉ'ʉ 'yisraelítʉty, per nʉgoo je'eyʉ 'yanda̱'a̱ktʉ, nyajkoxtánʉdʉpts mdeky'ʉjxy, es dʉ'ʉn tnijáwʉdʉt ko tʉts ʉj miits ndsoktʉ.
\v 10 Tʉ xykyuydyúndʉts ja n'ana'amʉn ko tʉ xymyʉdattʉ ja ma'xtujkʉn, es mʉdʉ tya̱a̱dʉ ʉjtsʉts mij nguwa̱'a̱nʉp ko naty myiñ ja ayo'on di'ibʉ mina̱a̱mp ma̱ tʉgekyʉ naxwíñʉdʉ, es yajtukkumʉdowa̱'a̱ñ di'ibʉ jiky'a̱jttʉp naxwiiñ.
\v 11 Ʉj mínʉpts tsojk. Mʉdattʉ mwinma̱'a̱ñóty es padundʉ ja n'ʉxpʉjkʉnʉts di'ibʉ tʉ xy'axá̱jʉdʉ, kʉdiibʉ pʉ́n mbʉjkʉdʉt yʉ mmay'aty.
\v 12 Pʉ́n madakp, nbʉjta̱'a̱gʉpts ʉj es 'yítʉt éxtʉm tu'ugʉ pila̱a̱r ma̱dsʉ nDiosʉ tyʉjk. Jap wyʉ'ʉmʉt winʉ xʉʉ winʉ tiempʉ. Ni pʉ́n tkayajjʉga'agʉt. Ngʉxja̱'a̱yʉpʉts ma̱ ja madákpʉty ja nDiósʉdsʉ xyʉʉ. Es nan ngʉxja̱'a̱yʉdʉts ja nDiósʉdsʉ kya̱jpn xʉʉ, ja jembyʉ Jerusalén di'ibʉ kʉdakp tsa̱jpótm. Es nan ngʉxja̱'a̱yaambyʉts yʉ jembyʉ nxʉʉts.
\v 13 Di'ibʉ mʉdoodʉp, wa'an tjaygyúkʉdʉ di'ibʉ ja Espíritʉ Santʉ 'yanma̱a̱ydyʉp ja mʉbʉjkpʉty di'ibʉ naymyujkʉdʉp.”
\s Ayuk yajtuknigéxy ja mʉbʉjkpʉtʉjk jap Laodiseeʉ
\p
\v 14 ’Nijayʉ nandʉ'ʉn ja n'ayuk ka̱jxwa̱'xpʉts di'ibʉ ijtp ma̱ ja mʉbʉjkpʉtʉjk ñaymyúkʉdʉ jam Laodiseeʉ: “Di'ibʉ dʉ'ʉñʉm 'yity éxtʉm jaayʉm es di'ibʉ ñigajxypy es ttuñ ja tʉy'a̱jtʉn, yʉ'ʉ dʉ'ʉn di'ibʉ yajtsonʉ'k yajtsondák tʉgekyʉ di'ibʉ Dios yajkoj, es dʉ'ʉn jyʉna'añ:
\v 15 Ʉj nnija̱'a̱bʉts di'ibʉ mduundʉp. Tim tʉy'a̱jtʉn ja'a dʉ'ʉn ko je'eyʉ mjokx'attʉ. Ni mgatʉtsn'attʉ es ni mga''an'attʉ. Ndsejpyʉts es mdʉtsn'áttʉt o m'an'áttʉt.
\v 16 Kom je'eyʉ mjokx'attʉ, pa̱a̱ty n'ok'ʉxtijtʉ éxtʉm ja ja̱'a̱y ya'ʉʉdsʉty di'ibʉ kyaj jyot tkupeky. Mʉdʉ tya̱a̱dʉ, ja'ats n'andijpy ko ni xykyadimtsóktʉts es ni xykyadimtuk'ak'áttʉts. Kyajts miits xymyʉtnaymyaayʉbʉ'áttʉ es ni xykyamʉdsip'áttʉts, es kyajtsʉ dʉ'ʉmbʉ ndseky di'ibʉ dʉ'ʉn.
\v 17 Miits mjʉnándʉp: Mʉkja̱'a̱yʉdyʉts ʉʉdsʉty, kyajts ti xytyʉgoy'a̱jtxʉdʉ, extʉ nani'igʉts nmʉdáttʉts. N'anma̱a̱ydyʉpts miidsʉty: Dios m'ijxʉdʉp éxtʉm tu'ugʉ mʉk ayoobʉ ja̱'a̱yʉn, es éxtʉmʉ niwa̱'a̱ts ʉxwa̱'a̱tspʉn, es éxtʉmʉ wiints.
\v 18 Pa̱a̱ty n'ʉwijy nga̱jxwijy esʉts xyñimíndʉdʉts es xyjúydyʉt ja wa̱'a̱ts oorʉ, es dʉ'ʉn sitʉy mmʉkja̱'a̱y'áttʉt. Es nandʉ'ʉn ma̱ ʉjʉn min xyjuydyʉ mwitʉ pooppʉ, es mnaywyítxʉdʉt, kʉdiibʉ m'íttʉt niwa̱'a̱ts ʉxwa̱'a̱ts. Es nan ma̱ ʉjʉn mmínʉt es xyjúydyʉt yʉ mwiindsooy, es dʉ'ʉn mba̱a̱t yajxón m'íxtʉt.
\v 19 N'oodʉpts es njʉjwijtsʉmbijttʉpts nidʉgekyʉ di'ibʉts ndsejpy. Pa̱a̱ty jodʉmbittʉ es mʉt winʉ mjot xykyuydyúndʉt di'ibʉts miits n'anma̱a̱ydyʉp.
\v 20 Mʉdowdʉ, tyápʉts tʉjk agʉ'ʉy nguga̱jxʉ. Pʉn pʉ́n myʉdeebyʉts ja n'ayuk es dya''awa̱'a̱dsʉt ja tyʉjk a̱a̱, tʉ́kʉbʉts es n'ítʉdʉts mʉt yʉ'ʉ, es ti'igyʉts ngáyʉt.
\v 21 Pʉ́n madakp, nya'u'uñʉpts ti'igyʉ ma̱ ʉj, es mʉʉt nyajkutúkʉdʉts, dʉ'ʉn éxtʉmts ʉj nmʉmadaky ja pojpʉ es uñaaybyʉts ti'igyʉ ma̱dsʉ nDeedyʉts, es nyajkutíkyʉts mʉt yʉ'ʉ.
\v 22 Di'ibʉ mʉdoodʉp, wa'an tjaygyúkʉdʉ di'ibʉ ja Espíritʉ Santʉ 'yanma̱a̱ydyʉp ja mʉbʉjkpʉty di'ibʉ naymyujkʉdʉp.”
\c 4
\s Wi'ixʉ Dios yajwindsʉ'ʉgʉ tsa̱jpótm
\p
\v 1 Es óknʉm n'ijxyʉts tu'ugʉ tʉjk a̱a̱ awa̱'a̱ts tsa̱jpótm. Es xymyʉgajxyʉts jatʉgok ja di'ibʉ myʉda̱jtypy ja 'yayuk éxtʉmʉ trompetʉ, es xy'anma̱a̱yʉts:
\p —Ku't ja yam, es nduk'íxʉt di'ibʉ koonʉm tyuna̱'a̱ñ jyata̱'a̱ñʉty óknʉm.
\p
\v 2 Netyʉ ja Espíritʉ Santʉ xymyʉnejxyʉts tsa̱jpótm. Es jámʉts n'ijxy tu'uk 'yu'uñʉ ma̱ 'yuñaaybyajn.
\v 3 Yʉ wyiin jyʉjp tye'xy éxtʉm ko tye'xy ja oybyʉ tsa̱a̱ di'ibʉ xyʉ'a̱jtypy jaspe es kornalinʉ. Es jamʉ natyʉ i'tsy juwʉdity ma̱ ja 'yuñaaybyajn, es jyantsytye'xy, éxtʉm tu'ugʉ tsuxk ja̱jʉn es éxtʉm tye'xy ja oybyʉ tsa̱a̱ di'ibʉ xyʉ'a̱jtypy esmeraldʉ.
\v 4 Es n'ijxyʉts ma̱ ja uñaaybyajn juwʉdity i'px ma̱jtáxkʉ uñaaybyajn ma̱ 'yu'uñʉdʉ es yajkutíky i'px ma̱jtáxkʉ mʉjja̱'a̱ydyʉjk, ak poobwítxʉ es mʉt ja 'yoorʉ koronʉ kyʉba̱jkkʉjxm.
\v 5 Esʉ uñaaybyajn di'ibʉ itkijky pyʉdsemy ja anaa jʉdsuk. Es wyindum tyoy éxtʉm jʉxtujkʉ tsinwaty, di'ibʉ 'yandijpy ja Diosʉ Jya̱'a̱jʉn di'ibʉ tyiimpy jʉxtujk naxʉ tuunk.
\v 6 Esʉ uñaaybyajn di'ibʉ itkijky, nan jam tu'uk éxtʉmʉ jikymyejyñ, yajtuk'ijxna̱jxp éxtʉmʉ viidrʉ. Es windujp ʉxkʉ'p es pyʉ'a̱a̱ybyʉ'a̱a̱y 'yity nima̱jtáxkʉ jiky'a̱jtpʉ di'ibʉ windiky ja ñini'x mʉt ja wiin.
\v 7 Tu'uk ja jawyiimbʉ kyʉxe'eky éxtʉmʉ ka̱a̱, ja myʉmajtskpʉ kyʉxe'eky éxtʉmʉ toorʉ, ja myʉdʉgʉʉkpʉ dʉ'ʉn tmʉdaty éxtʉmʉ ja̱'a̱yʉ wyiin jyʉjpʉn, es ja myʉma̱jtáxkpʉ kyʉxe'eky éxtʉmʉ witsnʉn kyaagʉdíty.
\v 8 Tya̱dʉ nima̱jtáxkpʉ jiky'a̱jtpʉty nidu'uk nidu'uk tmʉdaty ja kyakn tʉdujk. Esʉ kyakn nikʉjxy kyaknbatkʉ'ʉy tmʉdaty ja wiin. Es xʉʉñ koots dʉ'ʉñʉm jyʉna̱'a̱ndʉ:
\q Nʉgoo 'yokwa̱'a̱ts'a̱jnʉ yʉ Nindsʉn'a̱jtʉm Dios,
\q di'ibʉ tʉgekyʉ mʉk'a̱jtʉn myʉda̱jtypy,
\q di'ibʉ dʉ'ʉñʉm ijt, di'ibʉ ijtp es dʉ'ʉñʉm 'yita̱'a̱ñ.
\p
\v 9 Es tʉgok tʉgokʉ tadʉ nima̱jtáxkpʉ jiky'a̱jtpʉty t'awdattʉ es twindsʉ'ʉgʉdʉ es tja̱'a̱ygyʉda̱'a̱ktʉ di'ibʉ uñaapy tsʉnaapy uñaaybyajnóty ma̱ yajkutíky, es jyiky'aty winʉ xʉʉ winʉ tiempʉ,
\v 10 net ja i'px ma̱jtáxkpʉ mʉjja̱'a̱ydyʉjk twingoxtánʉdʉ di'ibʉ uñaapy tsʉnaapy uñaaybyajnóty, es t'awdattʉ di'ibʉ jiky'a̱jtp winʉ xʉʉ winʉ tiempʉ, es tpʉjta̱'a̱ktʉ ja kyoronʉ uñaaybyajn windum, es jyʉna̱'a̱ndʉ:
\q
\v 11 Nindsʉn'a̱jtʉm Dios,
\q mijtsʉ dʉ'ʉn mbátʉp es xy'axá̱jʉt
\q ja mʉj'a̱jtʉn, windsʉ'kʉn esʉ mʉk'a̱jtʉn,
\q mʉt ko mijtsʉ dʉ'ʉn tʉ xyajkojta̱'a̱y tʉgekyʉ di'ibʉ ijtp,
\q es mgʉ'ʉmdsojkʉngyʉjxm mij xya'ity es xyajkojy.
\c 5
\s Neky di'ibʉ winjayʉ windujp ʉxkʉ'p, es ja Borreegu'unk
\p
\v 1 Nétʉts n'ijxy ma̱ Diosʉ 'yaga̱'a̱ñgyʉ'ʉ tuk pityʉ neky di'ibʉ winjayʉ windujp ʉxkʉ'p, es jʉxtujkʉ seyʉ.
\v 2 Net tu'ugʉ mʉk anklʉs kya̱jxkéky:
\p —¿Pʉ́n pátʉp es dyajjʉnákʉt ja seyʉ es dya''awa̱'a̱dsʉdʉ tya̱dʉ neky?
\p
\v 3 Per ni tsa̱jpótm, ni naxwiiñ es ni nax patkʉ'p kyajápʉty pʉ́n mba̱a̱t dya''awa̱'a̱dsyʉ tadʉ neky, es ni mba̱a̱t tka'ixtʉ.
\v 4 Nétʉts ʉj njantsytyʉjkʉ jiibyʉ, ja'a ko kyajʉ naty pʉ́n yajpa̱a̱ty pʉ́n pátʉp es dya''awa̱'a̱dsʉt ja neky es t'íxʉt wi'ix jyʉna'añ.
\v 5 Net tu'uk ja ni'i'px ma̱jtáxkpʉ mʉjja̱'a̱ydyʉjk xy'anma̱a̱yʉts:
\p —Katʉ mjʉ'ʉy. Yʉ Judaa tyʉʉmp 'ya̱a̱ts di'ibʉ yajtijp Ka̱a̱, di'ibʉ nandʉ'ʉn tʉʉmp'a̱jt a̱a̱ts'a̱jtʉp ja rey Davit, yʉ'ʉ tʉ myada'aky. Yʉ'ʉ mba̱a̱t dya''awa̱'a̱dsyʉ tadʉ nekypyity es dyajjʉnákʉt ja jʉxtujkpʉ seyʉ.
\p
\v 6 Nétʉts n'ijxy kujk'ám ma̱ ja ni'i'px ma̱jtáxkpʉ mʉjja̱'a̱ydyʉjk es ma̱ ja nima̱jtáxkpʉ jiky'a̱jtpʉty di'ibʉ ijttʉp ma̱ Dios yajkutíky wyindum, es n'ijxyʉts tu'ugʉ Borreegu'unk tyanʉ di'ibʉ kʉxʉ'kp éxtʉm tʉ 'yokwindsʉ'kʉn'a̱jtpʉ. Es tmʉdaty yʉ Borreegu'unk jʉxtujkʉ wya̱j es jʉxtujkʉ wyiin. Es ja jʉxtujkpʉ wyiin, yʉ'ʉ 'yandijpy ja Diosʉ Jya̱'a̱jʉn di'ibʉ tyiimpy jʉxtujk naxʉ tuunk es di'ibʉ Dios tʉ tkexy ma̱ tʉgekyʉ naxwíñʉdʉ.
\v 7 Tadʉ Borreegu'unk yʉ'ʉ oj ñejxy es t'axa̱jʉ ja neky di'ibʉ naty ja Dios myʉda̱jtypy ma̱ ja 'yaga̱'a̱ñgyʉ'ʉ.
\v 8 Es ko t'axa̱jʉ ja neky, ja nima̱jtáxkpʉ jiky'a̱jtpʉty es ja ni'i'px ma̱jtáxkpʉ mʉjja̱'a̱ydyʉjk ñaygyoxtʉna̱a̱ydyákʉ Borreegu'unk wyindum. Nidu'uk nidu'ugʉ mʉjja̱'a̱ydyʉjk tmʉdattʉ arpʉ esʉ oorʉ tsim ujts mʉdʉ poom, di'ibʉ 'yandijpy ja Diosʉ jya'ayʉdyʉ kya̱jxtákʉn,
\v 9 es t'ʉwdʉ tya̱dʉ jembyʉ ʉy:
\q Mijtsʉ dʉ'ʉn mbátʉp es xy'axá̱jʉt tya̱dʉ neky es xyajjʉnákʉt ja jʉxtujkpʉ seyʉ.
\q Pa̱a̱ty mʉt ko tʉ mnejxy windsʉ'kʉn,
\q es mʉt ja mne'pyñ xyjuuy
\q éxtʉm ja Diosʉ jya'ayʉty,
\q pʉ́nʉty jiky'a̱jttʉ ma̱ maygya̱jpn, ma̱ wiinkpʉ may ayuk ka̱jxpʉty, es ma̱ mayñaxwíñʉdʉ.
\q
\v 10 Tʉ xypyʉjta̱'a̱ktʉ yajkutujkpʉty esʉ teedyʉty,
\q es tmʉdúndʉt ja Dios es yajkutúktʉt naxwiiñ.
\p
\v 11 Nétʉts n'ijxy kana̱k miyongʉ ánklʉsʉty juwʉdity ma̱ ja i'px ma̱jtáxkpʉ mʉjja̱'a̱ydyʉjk, es ja nima̱jtáxkpʉ jiky'a̱jtpʉty, es ma̱ di'ibʉ uñaapy tsʉnaapy uñaaybyajnóty,
\v 12 es jyʉna̱'a̱ndʉ mʉk:
\q Yʉ Borreegu'unk di'ibʉ tʉ ñejxy windsʉ'kʉn,
\q pátʉp winʉ xʉʉ winʉ tiempʉ t'axá̱jʉt ja kutujkʉn,
\q mʉj'a̱jtʉn, wijy'a̱jtʉn, mʉk'a̱jtʉn,
\q windsʉ'kʉn, oy'a̱jtʉn esʉ awda̱jtʉn.
\p
\v 13 Es nmʉdooyʉts nandʉ'ʉn nidʉgekyʉ di'ibʉ jiky'a̱jttʉp tsa̱jpótm, naxwiiñ, nax patkʉ'p, es jikymyejyñóty jyʉna̱'a̱ndʉ:
\q Pátʉdʉp ja Dios esʉ Borreegu'unk
\q ja awda̱jtʉn, windsʉ'kʉn, mʉj'a̱jtʉn
\q esʉ mʉk'a̱jtʉn winʉ xʉʉ winʉ tiempʉ.
\p
\v 14 Ja nima̱jtáxkpʉ jiky'a̱jtpʉ jyʉna̱'a̱ndʉ:
\q —Wa'an dʉ'ʉnʉty.
\p Es ja ni'i'px ma̱jtáxkpʉ mʉjja̱'a̱ydyʉjk ñaygyoxtʉna̱a̱ydyákʉdʉ es t'awda̱jttʉ Dios.
\c 6
\s Jʉxtujkpʉ seyʉ
\p
\v 1 Nétʉts n'ijxy ja Borreegu'unk ko dyajjʉnáky myʉtu'ukpʉ seyʉ ma̱ ja jʉxtujkpʉ. Es nmʉdoogajxyʉts nidu'ugʉ nima̱jtáxkpʉ jiky'a̱jtpʉty, es jantsy mʉk kyajxy, éxtʉm ja anaa ñekyʉn:
\p —¡Min!
\p
\v 2 Nétʉts n'ijxy tu'ugʉ poop kwa̱a̱y, es di'ibʉ tyuk'uñaapy tmʉdaty tu'ugʉ ti'pxn, es tpʉjtákʉdʉ tu'ugʉ koronʉ. Ta oj pyʉdsemy éxtʉm di'ibʉ madakp es myada̱'a̱ga̱'a̱ñ.
\p
\v 3 Ko ja Borreegu'unk dyajjʉnajky ja myʉmajtskpʉ seyʉ, nmʉdoogajxyʉts ja myʉmajtskpʉ jiky'a̱jtpʉ kyajxy:
\p —¡Min!
\p
\v 4 Es pyʉdseemy tu'ugʉ tsapts kwa̱a̱y. Es di'ibʉ tyuk'uñaapy yajmooy ja kutujkʉn es yajtsiptʉ́kʉt ma̱ tʉgekyʉ naxwíñʉdʉ, es ja ja̱'a̱yʉty ñayya'oogʉdʉt nixim niyam. Es yajmooy tu'ugʉ mʉj espa̱a̱dʉ.
\p
\v 5 Ko ja Borreegu'unk dyajjʉnajky ja myʉdʉgʉʉkpʉ seyʉ, nmʉdoogajxyʉts ja myʉdʉgʉʉkpʉ jiky'a̱jtpʉ jyʉna'añ:
\p —¡Min!
\p Nétʉts n'ijxy pyʉdsemy tu'ugʉ yʉk kwa̱a̱y. Es di'ibʉ tyuk'uñaapy, yʉ'ʉ myʉda̱jtypy tu'ugʉ balanzʉ.
\v 6 Es nmʉdooyʉts kyajxy kujk'a̱a̱y ma̱ ja nima̱jtáxkpʉ jiky'a̱jtpʉ, es jyʉna'añ:
\p —Je'eyʉ tuk kilʉ triigʉ xyákʉt tuk xʉʉ nidún, es tʉgʉk kilʉ seba̱a̱dʉ xyákʉt tuk xʉʉ nidún, per ni je'eyʉ xykyatónʉt yʉ aseytʉ oliivʉ es ni yʉ vinʉ.
\p
\v 7 Ko yʉ Borreegu'unk dyajjʉnajky ja myʉma̱jtáxkpʉ seyʉ, nmʉdoogajxyʉts ja myʉma̱jtáxkpʉ jiky'a̱jtpʉ jyʉna'añ:
\p —¡Min!
\p
\v 8 Nétʉts n'ijxy tu'ugʉ bayʉ kwa̱a̱y. Es di'ibʉ tyuk'uñaapy, ja'a txʉ'aty O'kʉn. Es ʉx'a̱a̱y pyamíñʉty ja di'ibʉ ñiwindsʉn'a̱jtypy ma̱ ja o'kpʉtʉjk. Yajmooydyʉ ja kutujkʉn es dya'ooktʉt tuk peky ja di'ibʉ wa̱'xp taxk peky ja naxwíñʉdʉ ja̱'a̱y, dya'oogʉt mʉt ja espa̱a̱dʉ, yuu, pa̱'a̱m esʉ awa̱'a̱n jʉyujkʉty.
\p
\v 9 Ko ja Borreegu'unk dyajjʉnajky ja myʉmʉgoxkpʉ seyʉ, n'ijxyʉts artal patkʉ'ʉy ja 'yanmʉja̱'a̱nʉty ja ja̱'a̱yʉty di'ibʉ naty tʉ 'yooktʉ mʉt yʉ'ʉgyʉjxm ja Diosʉ 'yayuk di'ibʉ naty yʉ'ʉjʉty tʉ tka̱jxwa̱'xtʉ.
\v 10 Tya̱a̱dʉ kya̱jxtʉ jantsy mʉk:
\p —Nindsʉn'a̱jtʉm Dios, mij sitʉy mmʉda̱jtypy tʉgekyʉ kutujkʉn. Mjantsywya̱'a̱dsʉty es mdʉy'a̱jtʉnmʉʉdʉty. ¿Extʉ na̱'a̱nʉm xypyayo'oya'añ es xytyukkumʉdowa̱'a̱ñ ja naxwíñʉdʉ ja̱'a̱yʉty mʉt kots tʉ xya'ooktʉ?
\p
\v 11 Net yajmooydyʉ nidu'uk nidu'uk pyoop wit, es tyuk'ana'amʉdʉ:
\p —Awixtʉ mʉt ja ma'xtujkʉn jawaandi'knʉ. Nandʉ'ʉn éxtʉm miidsʉty oj m'ooktʉ, tʉʉ dʉn tyimpatypy ma̱ dʉn 'yooga̱'a̱ndʉ ja mmʉgu'uk di'ibʉts ʉj nandʉ'ʉn nja̱'a̱y'a̱jttʉp. Yʉ'ʉ yajka̱'pxaampy ja jyamyʉʉt di'ibáty oogándʉp mʉt kots xymyʉdúñ.
\p
\v 12 Ko ja Borreegu'unk dyajjʉnajky ja myʉdʉdujkpʉ seyʉ, nétʉts n'ixy ko myiiñ ja tʉgoymyʉk ujx, ja xʉʉ yʉkʉdyaay éxtʉmʉ yʉk wit, yʉ po'o jyʉmbijtta̱a̱y tsapts, dʉ'ʉn éxtʉmʉ ne'pyñ,
\v 13 esʉ mʉdsa̱'a̱ kya'ay naxkʉjxy éxtʉm ja iigʉ tʉʉmp kya'ay ma̱ ja kyepy ko myiñ ja mʉk poj.
\v 14 Dʉ'ʉn ja tsa̱jp ya'ijxtʉgooy éxtʉmʉ neky ko ya''axa̱a̱tsy. Tʉgekyʉ tun kópkʉty esʉ naxwíñʉdʉ di'ibʉ jikymyejyñóty yajwijtsxijtta̱a̱ydyʉ.
\v 15 Net yʉ naxwíñʉdʉ ja̱'a̱yʉty ja ryey ñayyu'tsʉdʉ a̱a̱ngóty es mʉj kaadsóty, ti'igyʉ mʉt ja mʉkja̱'a̱ydyʉjk, solda̱a̱dʉ wyindsʉ́nʉty, yajkutujkpʉty, yajmʉduumbʉty esʉ mʉduumbʉty,
\v 16 es t'anʉʉmʉdʉ ja tun kopk esʉ kaats:
\p —Nijijtpajtkʉts ʉʉdsʉty es yu'tskʉts kʉdiibʉts x'íxʉt ja di'ibʉ uñaapy uñaaybyajngʉjxm, es kʉdiibʉts xypya̱a̱dʉt ja mʉk tʉydyu'unʉn di'ibʉ yakaampy ja Borreegu'unk,
\v 17 ja'a ko tʉ net jya'ty ja mʉj xʉʉ ma̱ ja tʉydyu'unʉn 'yita̱'a̱ñ, ¿es pʉ́n mba̱a̱t tmʉmada'aky?
\c 7
\s Israelitʉ ja̱'a̱yʉty di'ibʉ yajtsa̱a̱ydyʉ
\p
\v 1 Oknʉmts n'ijxy nima̱jtáxkʉ wiinkpʉ anklʉs tyánʉdʉ, tu'uk ma̱ xʉʉ pyʉdsemy, jatu'uk ma̱ xʉʉ tsyi'ity, jatu'uk ma̱ jʉmboj myiñ, es jatu'uk ma̱ yukpoj myiñ, es tma̱jtswʉ'ʉmdʉ tʉgekyʉ pójʉty, kʉdiibʉ pyójʉt ya̱ naxwiiñ ma̱ tʉgekyʉ a̱a̱y kepy, es ni ma̱ jikymyejyñ.
\p
\v 2 Nétʉts n'ijxy jatu'ugʉ wiinkpʉ anklʉs di'ibʉ miimp ma̱ xʉʉ pyʉdsemy, mʉt ja syeyʉ Dios di'ibʉ winʉ xʉʉ winʉ tiempʉ ijtp. Tya̱dʉ anklʉs tmʉyaxykyeky ja nima̱jtáxkpʉ anklʉs, ja di'ibʉ Dios tʉ tmo'oy ja kutujkʉn es ttʉydyúnʉt yʉ naxwíñʉdʉ esʉ jikymyejyñ, es 'yanma̱a̱yʉ:
\p
\v 3 —Katʉ xytyʉydyundʉ yʉ naxwíñʉdʉ esʉ jikymyejyñ, es ni yʉ a̱a̱y kepy. Awixtʉ extʉ kots ndsa̱'a̱yʉtnʉm wyimbokkʉjxm nidʉgekyʉ yʉ Nindsʉn'a̱jtʉm Diosʉ myʉduumbʉ.
\p
\v 4 Dʉ'ʉn nmʉdóyʉts ko mʉgo'px jajustyikxymya̱jtáxk mil yajtsa̱a̱ydyʉ ja israelitʉ ja̱'a̱yʉty, ja nima̱jmajtsk pekypyʉ ja Israelʉ tyʉʉmp 'ya̱a̱ts:
\v 5 nima̱jmajtsk mil yajwinwijtstʉ ja Judaa tyʉʉmp 'ya̱a̱ts, nima̱jmajtsk mil ja Rubengʉ jya'a, nima̱jmajtsk mil ja Gaadʉ jya'a,
\v 6 nima̱jmajtsk mil ja Aserʉ jya'a, nima̱jmajtsk mil ja Neftalii jya'a, nima̱jmajtsk mil ja Manasesʉ jya'a,
\v 7 nima̱jmajtsk mil ja Simeongʉ jya'a, nima̱jmajtsk mil ja Leví jya'a, nima̱jmajtsk mil ja Isakarʉ jya'a,
\v 8 nima̱jmajtsk mil ja Zabulongʉ jya'a, nima̱jmajtsk mil ja Joseejʉ jya'a, es nan nima̱jmajtsk mil ja Benjamingʉ jya'a.
\s Mayjya'ay wyítxʉty poop
\p
\v 9 Oknʉmts n'ijxy tʉgoymyay ja ja̱'a̱y di'ibáty jiky'a̱jttʉ ma̱ maygya̱jpn, ma̱ wiinkpʉ may ayuk ka̱jxpʉty, es ma̱ mayñaxwíñʉdʉ. Es tamʉ naty tyánʉdʉ uñaaybyajn winduuy ma̱ ja Dios yajkutíky, es Borreegu'unk wyinduuy, es wyítxʉty poop, es tmʉdattʉ kyʉ'ʉjótmʉ tʉʉxy'a̱a̱y.
\v 10 Es nidʉgekyʉ yaxkaktʉ mʉk:
\q Yʉ nitsokʉn myiñ ma̱ yʉ Nindsʉn'a̱jtʉm Dios,
\q di'ibʉ uñaapy ma̱ uñaaybyajn ma̱ yajkutíky,
\q es nandʉ'ʉn myiñ ma̱ yʉ Borreegu'unk.
\m
\v 11 Nidʉgekyʉ ánklʉsʉty wyʉ'ʉmda̱a̱ydyʉ tanʉ juwʉdity ma̱ ja mʉjja̱'a̱ydyʉjk, es ma̱ ja nima̱jtáxkpʉ jiky'a̱jtpʉty, es ma̱ ja uñaaybyajn ma̱ Dios yajkutíky. Net ñayjyujpʉdʉ naxkʉjxy wyinduuy ma̱ Dios yajkutíky, es t'awdattʉ Dios,
\v 12 jyʉna̱'a̱ndʉ dʉ'ʉn:
\q ¡Wa'an dʉ'ʉnʉty!
\q Yʉ awda̱jtʉn, mʉj'a̱jtʉn, wijy'a̱jtʉn,
\q ja̱'a̱ygyʉdákʉn, windsʉ'kʉn, kutujkʉn esʉ mʉk'a̱jtʉn,
\q wa'an tʉgekyʉ tya̱a̱dʉ tja'a'áty yʉ Nindsʉn'a̱jtʉm Dios winʉ xʉʉ winʉ tiempʉ.
\q Wa'an dʉ'ʉnʉty.
\p
\v 13 Net nidu'ugʉ mʉjja̱'a̱ydyʉjk xyajtʉʉyʉts:
\p —¿Pʉ́nʉdyʉ dʉnʉ tya̱a̱dʉty di'ibʉ ak poop ja wyit, es ma̱a̱ dʉn tsyoondʉ?
\p
\v 14 Ʉj n'adsooyʉts:
\p —Windsʉ́n, mij mnija̱'a̱p.
\p Yʉ'ʉ 'yadsooy:
\p —Tya̱a̱dʉ dʉ'ʉn di'ibʉ tʉ dyajnáxtʉ ja mʉk ma̱'a̱y ta̱jʉn, di'ibʉ tʉ dyajwa̱'a̱tstʉ es tʉ dyajpoobʉ ja wyit mʉt ja Borreegu'ungʉ ñe'pyñ.
\v 15 Pa̱a̱ty 'yittʉ uñaaybyajn winduuy ma̱ ja Dios yajkutíky, es tmʉdundʉ ja Dios xʉʉñ koots ma̱ tyʉjk. Es ja Dios yʉ'ʉ kwentʉ'atánʉdʉp es 'yítʉt ma̱ yʉ'ʉ.
\v 16 Ni na̱'a̱ kyanaky'ayówʉt mʉt ja yuu es ja tʉʉdsʉ, es ni ja xʉʉ kyatsa̱'a̱yʉdʉt, es ni kya''an'oogʉt,
\v 17 mʉt ko yʉ Borreegu'unk di'ibʉ ijtp uñaaybyajn windum ma̱ Dios yajkutíky, yʉ'ʉ kywentʉ'a̱jttʉp éxtʉm ja byorreegʉ, es dyajnʉjxʉt ma̱ myuxy ja nʉʉ di'ibʉ yajkypy ja jiky'a̱jtʉn. Es ja Dios yajtʉ́tsxʉdʉt tʉgekyʉ ja wyinnʉʉ.
\c 8
\s Myʉjʉxtujkpʉ seyʉ
\p
\v 1 Ko ja Borreegu'unk dyajjʉnajky ja myʉjʉxtujkpʉ seyʉ ma̱ ja neky, ta dʉ'ʉñʉ 'yamoonda̱a̱y tsa̱jpótm éxtʉm kujm oorʉ.
\v 2 Nétʉts n'ijxyʉ tadʉ jʉxtujkpʉ anklʉs di'ibʉ tʉna̱a̱ydyʉp Dios windum. Yʉ'ʉjʉty yajmooydyʉ kʉjktu'ugʉ trompetʉ.
\v 3 Oknʉm myiiñ jatu'ugʉ anklʉs mʉt tu'ugʉ oorʉ jʉʉnxijn. Ta tyʉna̱a̱y artal winduuy. Ta yajmooy mayʉ poom es yajpoomjókʉt es ttukwindsʉ'ʉgʉt mʉt ja kya̱jxtákʉn di'ibátyʉ Diosʉ jya'ayʉty, ma̱ ja oorʉ artal di'ibʉ ijtp uñaaybyajn winduuy ma̱ Dios yajkutíky.
\v 4 Es ja poom jok, ti'igyʉ mʉt ja kya̱jxtákʉn di'ibáty ja Diosʉ jya'ayʉty, pyatʉkʉ ma̱ Dios 'yity.
\v 5 Ta ja anklʉs ttukko'ojʉ ja jʉʉnxijn mʉt ja jʉmba̱jk ma̱ ja artal, es tjʉbijpe'ky naxwiiñ. Net myiiñ ja anaa jʉdsuk esʉ ujx.
\s Jʉxtujkpʉ trompetʉ
\p
\v 6 Ta ja jʉxtujkpʉ anklʉs ñayjyʉjp'ijxʉdʉ es ttukxu'uxa̱'a̱ndʉ ja trompétʉty.
\p
\v 7 Ta ja myʉtu'ukpʉ anklʉs ttukxuxy ja trompetʉ. Ta oj myiñ ja tʉtsn, jʉnya'ank tuktʉkʉ mʉt ja ne'pyñ, es kya'ay naxwiiñ. Ta tyooy tuk peky ja naxwíñʉdʉ di'ibʉ wa̱'x tʉgʉk peky, mʉt nandʉ'ʉn tuk peky ja a̱a̱y kepy di'ibʉ nandʉ'ʉn wa̱'x tʉgʉk peky. Es nan tyooy tʉgekyʉ tsuxk mʉʉy.
\p
\v 8 Ta ja myʉmajtskpʉ anklʉs ttukxuxy ja trompetʉ. Ta yajjʉbijpe'ky jikymyejyñóty éxtʉm tu'ugʉ mʉj kopk di'ibʉ winya'amp mʉt ja jʉʉn. Tuk peky ja jikymyejyñ di'ibʉ wa̱'x tʉgʉk peky jyʉmbijty ne'pyñ.
\v 9 Es tuk peky 'yo'ktʉ di'ibʉ wa̱'x tʉgʉk peky di'ibʉ naty tsʉna̱a̱ydyʉp jikymyejyñóty, es tuk peky tyʉgooy ja di'ibʉ wa̱'x tʉgʉk peky ja barkʉ.
\p
\v 10 Ta ja myʉdʉgʉʉkpʉ anklʉs ttukxuxy ja trompetʉ. Ta oj kya'ay tu'ugʉ mʉj mʉdsa̱'a̱ tsa̱jpótmʉdʉ, jantsy winya'amp kya'ay ma̱ tuk peky ja mʉjnʉʉ di'ibʉ wa̱'x tʉgʉk peky, es ma̱ nʉʉ myuxy.
\v 11 Ja mʉdsa̱'a̱ ja'a txʉ'a̱jty Ta̱'a̱m. Es tuk peky ja nʉʉ di'ibʉ wa̱'x tʉgʉk peky jyʉmbijty ta̱'a̱m. May ja ja̱'a̱y 'yo'ktʉ mʉt yʉ'ʉgyʉjxmʉ tadʉ nʉʉ.
\p
\v 12 Ta ja myʉma̱jtáxkpʉ anklʉs ttukxuxy ja trompetʉ. Ta oj ñaywya'xyʉty tʉgʉk peky ja xʉʉ, ja po'o es ja mʉdsa̱'a̱jʉty. Net tuk peky ja xʉʉ, ja po'o es ja mʉdsa̱'a̱ oj jyʉmbity koots. Pa̱a̱ty xʉʉñ myʉkwingoodsʉ taxk oorʉ es nandʉ'ʉn koots myʉkwingoodsʉ taxk oorʉ.
\p
\v 13 Nétʉts n'ijxy tu'ugʉ witsn kyaagʉdíty tsa̱jwínm. Es nmʉdooyʉts ko mʉk ya'axy, es jyʉna'añ:
\p —¡Ay! ¡Ay! ¡Ay! Pʉroobʉ yʉ naxwíñʉdʉ ja̱'a̱yʉty ko jatʉgʉʉkpʉ anklʉs t'aktukxu'uxtʉt ja trompétʉty.
\c 9
\p
\v 1 Ta ja myʉmʉgoxkpʉ anklʉs ttukxuxy ja trompetʉ. Nétʉts n'ijxy tu'ugʉ mʉdsa̱'a̱ di'ibʉ ka̱'a̱ naxwiiñ. Tadʉ mʉdsa̱'a̱ yajmooy ja kʉk jutʉ 'yawatsn.
\v 2 Net ja mʉdsa̱'a̱ dya''awatsy ja kʉk jut, es jap jyantsypyʉdseemy ja jok éxtʉm ma̱ tu'ugʉ mʉj jornʉ. Esʉ tadʉ jok yʉ'ʉ yajwingoodsʉ ja xʉʉ, es kyoodsʉdyaay tʉgekyʉ ja tsa̱jwínmʉdʉ it.
\v 3 Es ma̱ tadʉ jok pyʉdsʉʉmdʉ mu'u es ñaywya̱'xta̱a̱yʉdʉ naxwiiñ. Esʉ tadʉ mu'u yajtuk'ana'amdʉ es ttʉ́pʉt ja ja̱'a̱yʉty éxtʉm 'yadʉ'ʉtstʉ jaybyu'uk,
\v 4 yajtuk'ane'emy es kʉdiibʉ dyajwindʉgóyʉt ja a̱a̱y ujts, ni ja mʉʉy es ni ja kepy, yʉ'ʉyʉ je'eyʉ tyʉ́pʉp ja ja̱'a̱yʉty di'ibʉ kyaj yajtsa̱a̱ydyʉ wyimbokkʉjxy mʉt ja Diosʉ syeyʉ.
\v 5 Per kyaj yajtuknipejky es dya'oogʉt, je'eyʉ dya''ayówʉt mʉgoxk po'o. Ko tyipy, dʉ'ʉn myʉ́kʉty éxtʉm ko ja ja̱'a̱yʉty tyʉ́pʉdʉ jaybyu'uk.
\v 6 Ma̱ tadʉ tiempʉ ja̱'a̱yʉty jyantsyjya'oogándʉ, per kyaj mba̱a̱t ni wi'ix tsoo.
\p
\v 7 Ja mu'ujʉty dʉ'ʉn kyʉxʉ'ʉktʉ éxtʉmʉ kwa̱a̱y di'ibʉ tʉ ja̱'a̱y twʉ'ʉnda̱'a̱y es dyajnʉjxa̱'a̱ñ tsiptuumbʉ. Yʉ kyʉba̱jk nandʉ'ʉn kyʉxe'eky tmʉdaty éxtʉmʉ oorʉ koronʉ, esʉ wyiin jyʉjp dʉ'ʉn éxtʉmʉ ja̱'a̱yʉn.
\v 8 Es yʉ wyaay dʉ'ʉn tmʉdaty éxtʉmʉ toxytyʉjkʉ wyaay, esʉ tyʉts dʉ'ʉn éxtʉmʉ ka̱a̱dʉ́ts.
\v 9 Yʉ ñini'x dʉ'ʉn jyuunʉty éxtʉm tmʉdatyʉ pujxn. Es ko kyaagʉdíty, yʉ kyakn dʉ'ʉn jyʉna'añ éxtʉm ko yʉ maygyarrʉ 'yamu'uy ko ñʉjxtʉ tsiptuumbʉ.
\v 10 Yʉ pyi'ixy dʉ'ʉn éxtʉmʉ jaybyu'uk mʉt ja tyʉjpn, es mʉt yʉ'ʉ dya''ayoy ja ja̱'a̱y mʉgoxk po'o.
\v 11 Tadʉ mu'u tmʉdattʉ tu'ugʉ wyindsʉ́n, es yʉ'ʉ dʉ'ʉn ja ka'oybyʉ anklʉs di'ibʉ windsʉn'a̱jtp ma̱ ja kʉk jut. Tya̱dʉ ka'oybyʉ anklʉs txʉ'aty ebreeʉ ayuk Abadonk es grieegʉ ayuk Apolyonk, di'ibʉ 'yandijpy yajkutʉgeebyʉ.
\p
\v 12 Tʉ ñaxy tu'uk ja mʉk ayo'on, per tʉgoy'a̱jtp jamajtsk.
\p
\v 13 Ta ja myʉdʉdujkpʉ anklʉs ttukxuxy ja trompetʉ. Nétʉts nmʉdooy éxtʉm pʉ́n kyajxy ma̱ ja oorʉ artal di'ibʉ ijtp Dios windum,
\v 14 es t'anʉʉmʉ ja myʉdʉdujkpʉ anklʉs:
\p —Mʉgajʉ tadʉ nima̱jtáxkpʉ anklʉs di'ibʉ ijtp tsimy Eufrates mʉjnʉʉbʉ'a̱a̱y.
\p
\v 15 Es dʉ'ʉn oj yajnasmátsʉdʉ tadʉ nima̱jtáxkpʉ anklʉs di'ibʉ naty tʉ yajjʉjp'íxy ma̱ tadʉ oorʉ, xʉʉ, po'o esʉ jʉmʉjt, es dya'oogʉt tuk peky ja ja̱'a̱yʉty di'ibʉ wa̱'x tʉgʉk peky.
\v 16 Es nmʉdooyʉts nʉ'ʉn ñiwínʉty ja solda̱a̱dʉ kwa̱a̱ygyʉjxypyʉty, ja'a nidʉgékyʉty majtsk mʉgo'px miyonk.
\p
\v 17 Es n'ijxyʉts ijxma̱'tʉngyʉjxm ja di'ibʉ tyuk'uñaaydyʉp ja kwa̱a̱y tmʉdattʉ kyaatsykyʉjxy ak pujxn, tʉgʉk kolor: tsapts, azul es pu'ts. Es ja kwa̱a̱yʉty tmʉdattʉ kyʉba̱jk éxtʉmʉ ka̱a̱, es ma̱ 'ya̱a̱ pyʉdsemy ja jʉnya'ank, jok esʉ azufrʉ.
\v 18 Ja tuk pekypyʉ ja̱'a̱yʉty di'ibʉ wa̱'x tʉgʉk peky 'yo'kta̱a̱ydyʉ mʉdʉ tadʉ jʉnya'ank, jok esʉ azufrʉ, di'ibʉ pʉdsʉʉm ma̱ tadʉ kwa̱a̱yʉ 'ya̱a̱.
\v 19 Mʉt ko tadʉ kwa̱a̱yʉ myʉk'a̱jtʉn tmʉdaty ma̱ yʉ 'ya̱a̱ es ma̱ yʉ pyi'ixy. Pes yʉ pyi'ixyʉty dʉ'ʉn kyʉxe'eky éxtʉmʉ awa̱'a̱ndsa̱'a̱ñ mʉdʉ kyʉba̱jk. Es yʉ'ʉ mʉt dyajtsayúty ja ja̱'a̱yʉty.
\p
\v 20 Per di'ibʉ akwʉ'ʉmdʉ ja ja̱'a̱yʉty di'ibʉ kyaj 'yo'ktʉ mʉdʉ tadʉ ayo'on, nan kyaj tmastuttʉ es t'awdáttʉt ja ka'oybyʉ es nandʉ'ʉn ja agojwinnáx di'ibʉ oorʉ, platʉ, bronsʉ, tsa̱a̱, kepy, di'ibʉ ni na̱'a̱ mba̱a̱t kya'ixy es kyamʉdoy, es ni na̱'a̱ mba̱a̱t kyayo'oy.
\v 21 Esʉ tadʉ ja̱'a̱yʉty ni je'eyʉ tkamastuttʉ ja brujʉ'a̱jtʉn, mʉ'induunk esʉ ma'tsk.
\c 10
\s Anklʉs mʉt tu'ugʉ nekypyity
\p
\v 1 Oknʉm n'ijxyʉts jatu'ugʉ mʉk anklʉs di'ibʉ kʉdakp tsa̱jpótm, abity mʉt ja yoots. Es kyʉba̱jkkʉjxy tmʉdaty ja i'tsy. Yʉ wyiin jyʉjp jyantsytye'xy éxtʉmʉ xʉʉ, esʉ tyeky dʉ'ʉn kyʉxe'eky éxtʉm majtskʉ pila̱a̱r di'ibʉ winya'amp.
\v 2 Es kyʉ'ʉjóty tmʉdaty tu'ugʉ nekypyity. Es tpʉjtáky ja 'yaga̱'a̱ñdyéky ma̱ yʉ jikymyejyñ, esʉ 'yana̱jñdyéky tpʉjtáky ma̱ naxwíñʉdʉ.
\v 3 Net kya̱jxkéky mʉk éxtʉm tu'ugʉ ka̱a̱ myu'uy. Es ko dʉ'ʉn yaxkeky, ta ja jʉxtujkpʉ anaa kya̱jxtʉ.
\v 4 Nétʉts ʉj njaja̱'a̱yáñ éxtʉm ja anaa jyʉnáñ. Per tats nmʉdooy xymyʉgajxyʉts tsa̱jpótm, es xy'anʉʉmʉts:
\p —Katʉ xykyʉxja̱'a̱y di'ibʉ ja anaa tʉ tkajxy. Mʉdat ayu'udsyʉ mjodoty mwinma̱'a̱ñóty.
\p
\v 5 Nétʉts n'ijxy ja anklʉs di'ibʉ naty tʉ ñaxwa'aky ma̱ ja jikymyejyñ es ma̱ ja nax, es tkone'ky ja 'yaga̱'a̱ñgyʉ'ʉ,
\v 6 es jyʉnáñ:
\p —Dios di'ibʉ jiky'a̱jtp winʉ xʉʉ winʉ tiempʉ, es yajkoj ja tsa̱jp, naxwíñʉdʉ, jikymyejyñ, es tʉgekyʉ di'ibʉ jaa'a̱jtp ma̱ yʉ'ʉ, yʉ'ʉts ndestiigʉ'a̱jtypyʉts ko tʉy'a̱jtʉn yʉ'ʉ di'ibʉ tyam n'anma̱a̱ydyʉp. Dios kyaj ñakyjyaka̱'a̱ñ ma̱ tkuydyuna̱'a̱ñ ja di'ibʉ wya̱ndak.
\v 7 Per ko ja myʉjʉxtujkpʉ anklʉs ttukxu'uxa̱'a̱ñ ja trompetʉ, tʉ naty tyuñ jyátyʉty di'ibʉ Dios kyaj dyajnija̱'a̱jʉ ma̱ ja ja̱'a̱yʉty, éxtʉm jékyʉp t'awa̱'a̱nʉdʉ ja myʉduumbʉty, ja kyuga̱jxpʉty.
\p
\v 8 Net di'ibʉdsʉ naty tʉ xy'okmʉga̱jxpʉ tsa̱jpótm, jatʉgok xymyʉgajxyʉts, es xy'anma̱a̱yʉts:
\p —Nʉjx axa̱jʉ tadʉ nekypyity di'ibʉ myʉda̱jtypy ja anklʉs kyʉ'ʉjóty.
\p
\v 9 Nétʉts nninejxy ja anklʉs, es n'amdooyʉts esʉts xymyo'oyʉt ja nekypyity. Tats ja'a xy'adsooy:
\p —Tya̱a̱, mats, jʉ'x. Ma̱ m'a̱a̱ xyjáwʉt pa̱'a̱k éxtʉmʉ seerʉ pa̱'a̱k, per mjodoty jyʉmbítʉt ta̱'a̱m.
\p
\v 10 Nétʉts n'axa̱jʉ ja nekypyity, es oj nje'xyʉts. Es n'a̱a̱jótyʉts nja̱'a̱jʉ pa̱'a̱k éxtʉmʉ seerʉ pa̱'a̱k, per kots njʉ'xta̱a̱y, net jyʉmbijty ta̱'a̱m njodótyʉts.
\v 11 Nétʉts xy'anma̱a̱y:
\p —Mga̱jxwa̱'xʉp ja Diosʉ 'yayuk jatʉgok di'ibʉ pátʉp pʉ́nʉty jiky'a̱jttʉp ma̱ maygya̱jpn, ma̱ mayñaxwíñʉdʉ, ma̱ wiinkpʉ may ayuk ka̱jxpʉty, es ma̱ mayryéyʉty.
\c 11
\p
\v 1 Nétʉts xymyooydyʉ tu'ugʉ tsa̱jkápyñ di'ibʉ dʉ'ʉn éxtʉmʉ kijxn, es xy'anma̱a̱ydyʉts:
\p —Nʉjx es xykyijxʉt ja Diosʉ tsya̱jptʉjk esʉ 'yartal, es madsyow na̱a̱k jap di'ibʉ Dios awda̱jttʉp.
\v 2 Per katʉ xykyijxy ja tsa̱jptʉjk tʉja̱'a̱, mʉt ko tʉ yajkʉyáky mʉt ja naxwíñʉdʉ di'ibʉ kyaj 'yisraelítʉty. Es yʉ'ʉjʉty tyuktaanán tyukwa̱'a̱gándʉp justyikxymyajtsk po'o ja Jerusalén ka̱jpn.
\v 3 Esʉts ʉj ngáxʉp majtskʉ ndestiigʉts, u'xpʉ witxʉ, es yʉ'ʉdsʉ n'ayuk kya̱jxwa̱'xʉp ma̱jmajtsk mʉgo'px jatʉgʉ'px xʉʉ.
\p
\v 4 Tya̱dʉ majtskpʉ testiigʉ yʉ'ʉ dʉ'ʉn ja majtskpʉ oliivʉs kepy es ja majtskpʉ kandaleerʉ di'ibʉ ijtp Dios windum.
\v 5 Pʉn ja pʉ́n tyuna̱'a̱nʉdʉ axʉʉk, yʉ'ʉjʉty yajpʉdsʉ́mdʉp ja jʉnya'ank ma̱ 'ya̱a̱, es tno'kta̱'a̱yʉt nidʉgekyʉ ja myʉdsip. Esʉ dʉ'ʉn 'yooktʉt oytyim pʉ́nʉty di'ibʉ tunánʉp axʉʉk.
\v 6 Tya̱dʉ testiigʉty myʉda̱jttʉp ja mʉk'a̱jtʉn es dya''adúkʉt ja tsa̱jp kʉdiibʉ tyu'ujʉt ja tiempʉ ma̱ tka̱jxwa̱'xʉdʉ ja Diosʉ 'yayuk. Es nan myʉda̱jttʉp ja mʉk'a̱jtʉn esʉ nʉʉ dyajjʉmbítʉt ne'pyñ, es dya''ayówdʉt ja naxwíñʉdʉ ja̱'a̱yʉty mʉt kana̱k naxʉ ayo'on na̱a̱k ok yʉ'ʉ ttsoktʉ.
\v 7 Per ko naty tʉ tka̱jxwa̱'xta̱'a̱ydyʉ ja Diosʉ 'yayuk, net ja axʉk jʉyujk di'ibʉ pʉdsʉʉmp ma̱ ja kʉk jut tmʉttsiptuna̱'a̱ñ yʉ nimajtskʉ testiigʉty, esʉ axʉk jʉyujk myada̱'a̱ga̱'a̱ñ es ya'oogʉdʉt,
\v 8 es ja ñini'x wyʉ'ʉmʉt tu'ugijky ma̱ tadʉ ka̱jpn ma̱ kyruuzpejty ja Nindsʉn'a̱jtʉm. Es mʉt ko yʉ kuga̱jpnʉty jyantsymyʉjpojpʉja̱'a̱y'áttʉ, yajxʉʉyejky Sodomʉ es nandʉ'ʉn Ejiptʉ.
\v 9 Es tʉgʉk xʉʉ jakujm t'íxtʉt ja ja̱'a̱y pʉ́nʉty jiky'a̱jttʉp ma̱ maygya̱jpn, ma̱ may ayuk ka̱jxpʉty, es ma̱ mayñaxwíñʉdʉ, es kyaj ñigutíkyʉty dyajnaxtʉ́kʉdʉ tadʉ o'kpʉty.
\v 10 Nidʉgekyʉ naxwíñʉdʉ ja̱'a̱y xyondakta̱'a̱yʉt mʉt yʉ'ʉgyʉjxmʉ 'yo'kʉn, es jyantsyñayjyáwʉdʉt jotkujk, extʉ naydyuknigáxʉdʉp ja may'aty nixim niyam mʉt ko tadʉ majtskpʉ Diosʉ kyuga̱jxpʉ tʉ jyantsyya''ayóyʉty.
\v 11 Per ko ñajxy tʉgʉk xʉʉ jakujm, Dios yajjikypyʉjk es dyajpʉde'ky jatʉgok. Es nidʉgekyʉ di'ibáty ijxʉdʉ jyantsyñay'adsʉ'kʉdyaayʉdʉ.
\v 12 Net majtsk ja testiigʉty tmʉdoodʉ kyajxy mʉk tsa̱jpótm, es jyʉna'añ:
\p —¡Ku'ttʉ yam!
\p Ta pyatʉjkʉdʉ tsa̱jpótm yoodsóty, es yʉ myʉdsípʉty 'yijxʉdʉ.
\v 13 Netyʉ myiiñ ja mʉk ujx, es tyʉgooy tuk peky ja ka̱jpn di'ibʉ wa̱'x ma̱jk peky. Es jʉxtujk mil ja ja̱'a̱yʉty 'yo'ktʉ mʉt ja ujx. Es nʉ'ʉn ja ja̱'a̱yʉty 'yaknadʉjkʉ mʉt ja tsʉ'ʉgʉ t'awda̱jttʉ ja Dios.
\p
\v 14 Dʉ'ʉn jyajty ja myʉmajtsk ok nibʉdʉ'ʉk ja ayo'on. Per tim tsojk myina̱'a̱ñ ja myʉdʉgʉʉkpʉ.
\s Myʉjʉxtujkpʉ trompetʉ yajtukxu'uxy
\p
\v 15 Ja myʉjʉxtujkpʉ anklʉs ttukxuxy ja trompetʉ. Net yajmʉdooy kajxy mʉk tsa̱jpótm, es jyʉna'añ:
\q Tyamʉ netʉ Nindsʉn'a̱jtʉm Dios esʉ Kyristʉ
\q tʉ dyajkutujktsoona̱'a̱ndʉ naxwiiñ,
\q es yajkutuka̱'a̱ñ winʉ xʉʉ winʉ tiempʉ.
\m
\v 16 Net ja ni'i'px ma̱jtáxkpʉ mʉjja̱'a̱ydyʉjk di'ibʉ naty uñaaydyʉp uñaaybyajnóty Dios windum, ñayjyujpʉdʉ es t'awda̱jttʉ Dios,
\v 17 es jyʉna̱'a̱ndʉ:
\q Windsʉ́n Dios di'ibʉ tʉgekyʉ mʉk'a̱jtʉn mmʉda̱jtypy,
\q mijtsʉ dʉ'ʉn m'ijt, es mijts dʉ'ʉn m'ijtp.
\q Nja̱'a̱ygyʉdákypyʉts mij ko tʉ xyajtsonda'aky myajkutíky.
\q
\v 18 Yʉ naxwíñʉdʉ ja̱'a̱yʉty ajkʉdʉp mʉt mij.
\q Per tʉ jya'ty ja xʉʉ ma̱ mij xytyukkumʉdówʉt.
\q Es nandʉ'ʉn tʉ net tpa̱a̱ty
\q ma̱ ja o'kpʉty xypyayo'oya̱'a̱ndʉ
\q es xyajjʉmbita̱'a̱ñ oy ja mmʉduumbʉty
\q di'ibʉ tʉ m'ayuk tka̱jxwa̱'xtʉ,
\q es nidʉgekyʉ mja̱'a̱yʉty, mʉj mutsk,
\q di'ibʉ mij m'a̱wda̱jtʉdʉp,
\q es tʉ net tpa̱a̱ty ma̱ mij xyajtʉgoya'añ ja di'ibáty yajma̱'ttʉp ja naxwíñʉdʉ.
\p
\v 19 Net 'yawatsy ja Diosʉ tsya̱jptʉjk di'ibʉ tsa̱jpótm, es kyʉxe'ky tsa̱jptʉgóty ja ka̱a̱xʉ ma̱ 'yity ja kajxy'átypyʉ di'ibʉ Dios tyuun mʉdʉ jya'ay. Ta myiiñ ja mʉk ujx, anaa jʉdsúkʉty esʉ mʉk tʉtsnduu.
\c 12
\s Toxytyʉjk esʉ sarpyentʉ
\p
\v 1 Es net kyʉxe'ky tsa̱jpótm tu'ugʉ mʉj ijxwʉ'ʉmʉn: tu'ugʉ toxytyʉjk mʉt ja wyit éxtʉmʉ xʉʉ tye'xy, es tyekypyatkʉ'ʉy dʉ'ʉn kyʉxe'eky éxtʉmʉ po'o, es kyʉba̱jkkʉjxm tmʉdaty ja koronʉ mʉt ma̱jmajtskʉ mʉdsa̱'a̱.
\v 2 Tya̱dʉ toxytyʉjk u'unkmʉʉdʉ naty, es ya'axy mʉt ja pʉjkʉn, ja'a ko ayoop mʉt ko dyajja̱'ta̱'a̱ñ ja maxu'unk.
\v 3 Net kyʉxe'ky tsa̱jpótm jatu'ugʉ mʉj ijxwʉ'ʉmʉn: tu'ugʉ sarpyentʉ di'ibʉ mʉj es tsapts, es jʉxtujkʉ kyʉba̱jk es ma̱jkʉ wya̱j, es mʉt ja koronʉ ma̱ tu'uk tu'ugʉ kyʉba̱jk.
\v 4 Yʉ pyi'ixy ttukpajʉdojte'ky tuk peky ja mʉdsa̱'a̱ di'ibʉ wa̱'x tʉgʉk peky. Ta tkujʉbijpna̱jxy naxwiiñ. Tya̱dʉ sarpyentʉ wya̱'kwʉ'ʉmʉ ma̱ ja toxytyʉjk di'ibʉ naty yajja̱'taampy ja maxu'unk, es tjʉʉna̱'a̱ñ ja maxu'unk jantsy netyʉ ko jya̱'tʉt.
\v 5 Ja toxytyʉjk dyajja̱jty tu'ugʉ u'ungu'unk yedyʉjk di'ibʉ yajkutuka̱a̱mp mʉt ja pyujxnda̱jk ma̱ tʉgekyʉ naxwíñʉdʉ. Net ja 'yu'unk yajpʉjkʉ es yajmʉnejxy ma̱ Dios es ja uñaaybyajn ma̱ yajkutíky.
\v 6 Es ja toxytyʉjk oj kyaknʉ ma̱ mʉj it, ma̱ naty ja Dios tʉ tyuknibʉjta̱a̱gʉty tu'ugʉ luga̱a̱r. Es jap yajmo'oyʉt ja kya'ay 'yukʉn ma̱jmajtsk mʉgo'px jatʉgʉ'px xʉʉ.
\p
\v 7 Net ja tsip tyuunʉ tsa̱jpótm: ja Migel es ja 'yanklʉs tsiptuundʉ mʉt ja sarpyentʉ es mʉt ja sarpyentʉ 'yanklʉs.
\v 8 Per kyajyʉm myadaktʉ ja sarpyentʉ esʉ 'yanklʉs, kyaj ñakyyajna'ijxy ja sarpyentʉ esʉ 'yánklʉsʉty 'yítʉt tsa̱jpótm.
\v 9 Dʉ'ʉn oj yajkujʉbijpnáxyʉ tadʉ sarpyentʉ, di'ibʉ 'yandijpy mʉjku'ugópk es Satanás, di'ibʉ wyin'i'impy nidʉgekyʉ ja naxwíñʉdʉ ja̱'a̱y. Ta naxwiiñ yajkujʉbijpna̱jx mʉt ja 'yánklʉsʉty.
\p
\v 10 Nétʉts nmʉdooy kajxy mʉk tsa̱jpótm, es jyʉna'añ:
\p —Tʉ jya'ty ja Diosʉ ñitsokʉn, myʉk'a̱jtʉn esʉ kyutujkʉn. Nan ana'amnʉbʉ net ja Diosʉ Kyristʉ, es tʉ yajkujʉbijpnáxy tsa̱jpótm ja di'ibʉ ñi'ʉ'ʉnʉp ja nmʉgu'uk'a̱jtʉm. Xʉʉñ koots tmʉ'ʉʉñʉ Nindsʉn'a̱jtʉm Dios.
\v 11 Yʉ nmʉgu'uk'a̱jtʉm tʉ tmʉmada̱'a̱ktʉ mʉt yʉ'ʉgyʉjxmʉ Borreegu'ungʉ ñe'pyñ, mʉt ja 'yayuk es mʉt ja tyʉy'a̱jtʉn di'ibʉ tʉ yajka̱jxwa'xy. Pes kyaj tjʉjptsʉ'kʉdʉ 'yo'kʉn, ni'igʉ tmʉdundʉ Dios oytyim'ooktʉt.
\v 12 Pa̱a̱ty xonda̱'a̱ktʉ miidsʉty di'ibʉ ijttʉp tsa̱jpótm. Per pʉroobʉ miidsʉty di'ibʉ jiky'a̱jttʉp naxwiiñ es jikymyejyñóty, mʉt ko ja mʉjku'ugópk tʉ mnijʉnákʉdʉ awa̱'a̱n es ñija̱'a̱p ko tyimpatypyʉ dʉ'ʉn ja tiempʉ.
\p
\v 13 Ko ja sarpyentʉ naty tʉ yajkujʉbijpnáxy naxwiiñ, ta tjaya''ayowáñ ja toxytyʉjk di'ibʉ naty tʉ tpa̱a̱ty ja maxu'unk.
\v 14 Per ja toxytyʉjk yajmooy majtskʉ kyakn éxtʉm tu'ugʉ mʉj witsnʉ jya'a, es mba̱a̱t kyaagʉdíty ma̱ ja mʉj it. Jap wyʉ'ʉmʉt tʉgʉk jʉmʉjt jakujm, es yajmo'oyʉt ja kya'ay 'yukʉn, es kʉdiibʉ mba̱a̱t wi'ix 'yadʉ'ʉtsy ja sarpyentʉ.
\v 15 Ja sarpyentʉ t'ʉ'tsy ja nʉʉ, es oj dyajmʉjnʉʉgojy es jyʉ'ʉdʉt ja toxytyʉjk.
\v 16 Per yʉ naxwíñʉdʉ pyudʉjkʉ ja toxytyʉjk, awats ja naxwíñʉdʉ es t'ukta̱a̱y ja mʉjnʉʉ di'ibʉ naty ja sarpyentʉ tʉ t'ʉʉtsy.
\v 17 Es mʉdʉ taadʉ ja sarpyentʉ ttukjot'ambejky ja toxytyʉjk. Ta oj ñejxy tsiptuumbʉ mʉt ja toxytyʉjkʉ tyʉʉmp 'ya̱a̱ts di'ibʉ akwʉ'ʉmdʉp, ja'a njʉna̱'a̱nʉm di'ibʉ pyaduundʉp ja Diosʉ 'yana'amʉn es tpanʉjxtʉ ja Jesukristʉ 'yʉxpʉjkʉn. Es ja sarpyentʉ tyʉna̱a̱y pu'ujótm jikymyejyñbyʉ'a̱a̱y.
\c 13
\s Nimajtskpʉ axʉk jʉyujk
\p
\v 1 Esʉts n'ijxy jikymyejyñóty pyʉdsemy tu'ugʉ axʉk jʉyujk di'ibʉ myʉda̱jtypy jʉxtujkʉ kyʉba̱jk es ma̱jkʉ wya̱j. Es tu'uk tu'ugʉ wya̱j tmʉdaty ja koronʉ. Es ma̱ yʉ kyʉba̱jkʉty tmʉdaty tu'uk tu'uk kʉxja̱'a̱y ja xyʉʉjʉty di'ibʉ Dios myʉdʉgeepy.
\v 2 Tya̱dʉ axʉk jʉyujk di'ibʉts n'ijx, dʉ'ʉn kyʉxe'ky ja ñini'x éxtʉmʉ kuxyʉbyʉjy, esʉ tyeky éxtʉmʉ osʉ, esʉ 'ya̱a̱ éxtʉmʉ ka̱a̱. Yʉ sarpyentʉ yʉ'ʉ mooyʉ ja myʉk'a̱jtʉn esʉ kyutujkʉn es 'yana'amʉt.
\v 3 Nidu'ugʉty ja axʉk jʉyujkʉ kyʉba̱jk, dʉ'ʉn éxtʉm jyawʉ tmʉda̱jty tu'ugʉ mʉj tsayut di'ibʉ ya'oogʉdʉp. Per ja tsyayut oj 'yagʉda'aky. Es ja naxwíñʉdʉ ja̱'a̱yʉty dʉ'ʉñʉ jyantsywyʉ'ʉmʉdyaaydyʉ es tpanʉjxtʉ ja axʉk jʉyujk.
\v 4 Es nidʉgekyʉ ja̱'a̱y t'awda̱jttʉ ja sarpyentʉ mʉt ko tʉ tmo'oy ja kyutujkʉn ja axʉk jʉyujk. Es t'awda̱jttʉ nandʉ'ʉn ja axʉk jʉyujk, jyʉna̱'a̱ndʉ:
\p —¿Pʉ́nʉ dʉ'ʉn éxtʉmʉ tya̱dʉ axʉk jʉyujk?, ¿es pʉ́nʉ mba̱a̱t mʉʉt tsyiptúñ?
\p
\v 5 Es ja sarpyentʉ yajmooy ja tu'u es ñaymyʉjpʉjta̱'a̱gʉdʉt esʉ Dios tmʉga̱jxtʉgóyʉt. Nandʉ'ʉn yajmooy ja tu'u es 'yana'amʉt justyikxymyajtsk po'o.
\v 6 Es dʉ'ʉn tmʉga̱jxtʉgooy ja Dios es twin'ʉbat twinga̱jxpátʉ ma̱ tsyʉʉnʉ es di'ibáty ijttʉp tsa̱jpótm.
\v 7 Nandʉ'ʉn yajmooy es tsyiptúnʉt mʉt ja Diosʉ jya'ayʉty, extʉ tmʉmadaktʉ, es yajmooy ja kutujkʉn ma̱ tʉgekyʉ ka̱jpnʉty, ma̱ tʉgekyʉ ayuk ka̱jxpʉty, es ma̱ tʉgekyʉ naxwíñʉdʉ.
\v 8 Es nidʉgekyʉ ja̱'a̱yʉty t'awda̱jtta̱'a̱yʉdʉ tadʉ axʉk jʉyujk, ja'a njʉna̱'a̱nʉm ja di'ibáty kyajpʉ xyʉʉ 'yity kʉxja̱'a̱y ma̱ ja ñeky ja Borreegu'unk di'ibʉ Dios ya̱jk windsʉ'kʉn. Esʉ tadʉ neky tmʉdaty kʉxja̱'a̱y extʉ ma̱ naty kyajnʉmʉ naxwíñʉdʉ kyojy, ja xyʉʉ nidʉgekyʉ di'ibáty myʉda̱jttʉp ja jiky'a̱jtʉn winʉ xʉʉ winʉ tiempʉ.
\p
\v 9 Di'ibʉ mʉdoodʉp, wa'an tjaygyúkʉdʉ.
\v 10 Di'ibʉ yajmʉnʉjxándʉp tsimy, tsimy yajmʉnʉjxtʉt, es di'ibʉ oogándʉp mʉdʉ espa̱a̱dʉ, mʉdʉ espa̱a̱dʉ 'yooktʉt. Pa̱a̱ty pʉ́nʉty ijttʉp ja Diosʉ jya'ay, wa'an mʉk a̱a̱ mʉk jot dyajnáxtʉ pʉn ti ayo'on tukkʉdákʉp, es dʉ'ʉñʉm tmʉbʉ́ktʉt ja Dios.
\p
\v 11 Oknʉmts n'ijxy pyʉdsemy na̱a̱xóty jatu'ugʉ axʉk jʉyujk, tmʉdaty majtskʉ wya̱j éxtʉm ja borreegʉ, es dʉ'ʉn jyʉna'añ éxtʉmʉ sarpyentʉ,
\v 12 es tmʉdaty tʉgekyʉ kyutujkʉn ja jawyiimbʉ axʉk jʉyujk, es yʉ'ʉ tmʉdúñ. Es dʉ'ʉn ttuñ esʉ naxwíñʉdʉ ja̱'a̱yʉty 'yawdátʉdʉt ja jawyiimbʉ axʉk jʉyujk di'ibʉ yajtsók ja mʉj tsayut.
\v 13 Nandʉ'ʉn ttuuñ ja ijxwʉ'ʉmʉn di'ibʉ myʉda̱jtypy ja mʉj'a̱jtʉn, extʉ yajkʉdákypy ja jʉnya'ank tsa̱jpótm ja̱'a̱y wyinduuy,
\v 14 es dʉ'ʉn twin'ʉʉñ ja naxwíñʉdʉ ja̱'a̱yʉty mʉt ja mʉj'a̱jtʉn di'ibʉ ja jawyiimbʉ axʉk jʉyujk tuktuunʉp. Es yajtuk'ane'emy es dyajnikojtu'uttʉt tu'ugʉ awinnax es twindsʉ'ʉgʉdʉt ja jawyiimbʉ axʉk jʉyujk di'ibʉ jyayajtsayujt mʉdʉ espa̱a̱dʉ es 'yakjiky'ajty.
\v 15 Es ja myʉmajtskpʉ axʉk jʉyujk yajmooy ja kutujkʉn es tmo'oyʉt ja jyiky'a̱jtʉnʉ tadʉ awinnax es dyajka̱jxʉt, es extʉ dya'oogʉt di'ibáty kyaj 'yawdátyʉty.
\v 16 Esʉ tadʉ myʉmajtskpʉ axʉk jʉyujk tyukkuwa̱'a̱nʉ es nidʉgekyʉ mʉj mutsk, mʉkja̱'a̱y esʉ ayoobʉ ja̱'a̱yʉty, mʉduumbʉty esʉ yajmʉduumbʉty, yajtsa̱'a̱yʉt ma̱ 'yaga̱'a̱ñgyʉ'ʉ o ma̱ wyimbok.
\v 17 Es dʉ'ʉn ni pʉ́n mba̱a̱t kyajuy kyateegyʉty pʉn kyaj tmʉdaty ja seyʉ, ja'a njʉna̱'a̱nʉm pʉn kyaj tsya'ayʉty mʉt ja xyʉʉ o ja ñumbrʉ ja jawyiimbʉ axʉk jʉyujk.
\v 18 Tya̱a̱dʉ yʉ'ʉ tsojkʉp ja jaygyujkʉn. Es di'ibáty kuwijy mba̱a̱t tnijáwʉdʉ di'ibʉ 'yandijpy yʉ ñumbrʉ tadʉ axʉk jʉyujk, mʉt ko yʉ ñumbrʉ ja'a 'yandijpy ja xyʉʉ tu'ugʉ yedyʉjk. Yʉ ñumbrʉ ja'a tʉdujk mʉgo'px jatʉgʉ'px tʉdujk.
\c 14
\s Mʉgo'px jajustyikxymya̱jtáxk mil ja̱'a̱yʉty di'ibʉ ʉʉdʉp
\p
\v 1 Oknʉmts n'ijxy ja Borreegu'unk ko naty jam tyanʉ ma̱ Syon Kopk. Jamʉ naty mʉʉt mʉgo'px jajustyikxymya̱jtáxk mil ja ja̱'a̱yʉty di'ibʉ naty tsa̱'a̱y wyimbokkʉjxy mʉt ja syeyʉ ja Borreegu'unk esʉ Dios Teety.
\v 2 Es nmʉdooyʉts tsa̱jwínm jyʉna'añ éxtʉmʉ nʉʉdáx 'yʉʉtsy pyʉmimy, es éxtʉmʉ anaa mʉk ya'axy, dʉ'ʉn éxtʉmʉ may arpʉ koobʉ kyowdʉ.
\v 3 Es t'ʉwdʉ jembyʉ ʉy uñaaybyajn winduuy ma̱ Dios yajkutíky es ma̱ nima̱jtáxkpʉ jiky'a̱jtpʉty es ma̱ ja mʉjja̱'a̱ydyʉjk. Ni pʉ́n mba̱a̱t tkajatyʉ tadʉ ʉy, ja'ayʉ je'eyʉ tadʉ mʉgo'px jajustyikxymya̱jtáxk mil di'ibʉ oj ñitso'oktʉ naxwiiñ.
\v 4 Yʉ'ʉ dʉ'ʉnʉty di'ibʉ tsuj yajxón tʉ jya'ay'áttʉ, di'ibʉ nayyajwa̱'a̱ts'a̱jtʉdʉp éxtʉmʉ kixyʉdo'oxyʉty, es tpanʉjxtʉ ja Borreegu'unk oytyim ma̱a̱ty ñejxy. Yʉ'ʉ dʉ'ʉnʉty oj ñitso'oktʉ ma̱ naxwíñʉdʉ ja̱'a̱y es ijttʉp éxtʉm ja tʉʉmp di'ibʉ jawyiin tʉʉmp'a̱jtp es yajtukmʉyóxy ja Dios esʉ Borreegu'unk.
\v 5 Ni na̱'a̱ oj kya''anda̱'a̱ktʉ, ja'a ko wa̱'a̱ts ja̱'a̱yʉty yʉ'ʉ.
\s Di'ibʉ kya̱jxtʉp ja nidʉgʉʉkpʉ anklʉs
\p
\v 6 Nétʉts n'ijxy jatu'ugʉ anklʉs kyaagʉdíty tsa̱jpótm, es tmʉdaty ja oybyʉ ayuk di'ibʉ winʉ xʉʉ winʉ tiempʉ wʉ'ʉmp, es yajka̱jxwa̱'xʉt ma̱ tʉgekyʉ nax ka̱jpn, ma̱ tʉgekyʉ naxwíñʉdʉ, es ma̱ tʉgekyʉ wiinkpʉ ayuk ka̱jxpʉ.
\v 7 Es jyʉna'añ jantsy mʉk:
\p —Windsʉ'ʉgʉdʉ Dios es awdattʉ, mʉt ko tʉ net jya'ty ja oorʉ ma̱ net tpayo'oya'añ ja naxwíñʉdʉ ja̱'a̱yʉty. Awdattʉ di'ibʉ yajkoj ja tsa̱jp, naxwíñʉdʉ, jikymyejyñ, es ma̱ nʉʉ myuxy.
\p
\v 8 Es ja myʉmajtskpʉ anklʉs tpanejxy ja jawyiimbʉ anklʉs, es jyʉna'añ:
\p —Tʉ net, tʉ net jyijtta̱'a̱y ja Babiloñʉ mʉj ka̱jpn di'ibʉ nidʉgekyʉ naxwíñʉdʉ ja̱'a̱yʉty tʉ dyajtʉgóy mʉt ja 'yaxʉk tu'unʉn, éxtʉm ko pʉ́n dyajmi'igyʉty ja myʉgu'uk.
\p
\v 9 Es ja myʉdʉgʉʉkpʉ anklʉs tpanejxy ja jawyiimbʉ nimajtsk, es jyʉna'añ mʉk:
\p —Pʉn ja pʉ́n t'awdatyʉ tadʉ axʉk jʉyujk, es pʉ́n nayya̱jkʉp yajtsa̱'a̱yʉt wyimbokkʉjxy o ma̱ kyʉ'ʉ,
\v 10 Dios jantsy tukkumʉdówʉdʉp mʉk ma̱ ja luga̱a̱r mʉdʉ azufrʉ jʉnya'ank di'ibʉ yajtukjʉjp'ijxp, ma̱ 'yayówdʉt Diosʉ 'yanklʉs wyinduuy es Borreegu'unk wyinduuy.
\v 11 Ja jʉʉn di'ibʉ tsa̱'a̱yʉdʉp, ja'a yajpʉdʉ'ʉgʉp ja jok winʉ xʉʉ winʉ tiempʉ. Ja'a njʉna̱'a̱nʉm ko yajtukkumʉdowa̱'a̱ñ winʉ xʉʉ winʉ tiempʉ nidʉgekyʉ di'ibáty 'yawda̱jttʉp ja axʉk jʉyujk, o ja 'yawinnax, o ko tʉ yajtsa̱'a̱ydyʉ mʉt ja syeyʉ.
\v 12 Wa'an yʉ'ʉ dyajjotkujkʉ ja Diosʉ jya'ay es tmʉdánʉdʉt ma'xtujkʉn mʉʉt oytyim ti ayo'onʉty, ja'a di'ibʉ kyuydyuundʉp ja Diosʉ 'yana'amʉn es oy tmʉdundʉ ja Jesús.
\p
\v 13 Nétʉts nmʉdooy tsa̱jpótm, es xy'anma̱a̱yʉts:
\p —Kʉxja̱'a̱yʉ tya̱a̱dʉ: “Jotkujk di'ibʉ tyam o'ktʉp es di'ibʉ óknʉm ooga̱a̱mp ja'agyʉjxm ko tmʉbʉktʉ ja Nindsʉn'a̱jtʉm.” Ja Espíritʉ Santʉ dʉ'ʉn jyʉna'añ: “Tʉy'a̱jtʉn ko yʉ'ʉjʉty jyotkujkʉty, mʉt ko jaba̱a̱dʉ dʉ'ʉn myʉk'ayoy es tyuñ. Dios mo'oyʉdʉp ja pyo'xtákn es myay'ata̱'a̱ñʉty mʉt ko oy tʉ tmʉdúñ naxwiiñ.”
\s Ja̱'a̱y yajpayo'oydyʉ
\p
\v 14 Nétʉts n'ijxy tu'ugʉ poop nima̱'a̱. Jam 'yu'uñʉ ma̱ tadʉ nima̱'a̱ kyʉxe'eky éxtʉm ja Naxwíñʉdʉ Ja̱'a̱yʉdyʉ Kyudʉnaabyʉ. Jam tmʉdaty kyʉba̱jkkʉjxm tu'ugʉ oorʉ koronʉ, es tkʉkápyʉty tu'ugʉ mʉʉydsyujkn jantsy jʉjp.
\v 15 Ta pyʉdseemy tsa̱jptʉgóty jatu'ugʉ anklʉs, es mʉk tmʉgajxy di'ibʉ uñaapy nima̱'a̱gʉjxm:
\p —Tʉ net tpa̱a̱ty ja oorʉ. Yajpʉdʉ'ʉk ja mbʉjta'aky mʉdʉ tadʉ mmʉʉydsyujkn, mʉt ko tʉ tsya'amy ja naxwíñʉdʉ pyʉjta'aky.
\p
\v 16 Ta ja di'ibʉ naty uñaapy nima̱'a̱gʉjxm, ttsujkmijky ja naxwíñʉdʉ pyʉjta'aky.
\p
\v 17 Ta pyʉdseemy jatu'ugʉ anklʉs ma̱ ja tsa̱jptʉjk tsa̱jpótm, tmʉnejxy nandʉ'ʉn tu'ugʉ myʉʉydsyujkn jantsy jʉjp.
\v 18 Ta pyʉdseemy jatu'ugʉ anklʉs ma̱ ja artal di'ibʉ jam kywentʉ'a̱jtypy ja jʉʉn, es mʉk dyaxʉ ja di'ibʉ myʉda̱jtypy ja myʉʉydsyujkn jʉjppʉ, es t'anʉʉmʉ:
\p —Mʉt ja mmʉʉydsyujkn tsujkmúk ja naxwíñʉdʉ 'yuuvʉ, mʉt ko tʉ tsya'amy.
\p
\v 19 Ta ja anklʉs dyajmijky ja uuvʉ ma̱ ja naxwíñʉdʉ. Ta tniko'obejty es twinma̱'a̱dsa̱'a̱ñ. Ja'a tya̱a̱dʉ 'yandijpy ja mʉk tsa̱a̱tsytyu'unʉn di'ibʉ Dios yakaampy.
\v 20 Ja uuvʉ oj yajwinma̱'a̱tsy ka̱jpnbʉ'a̱a̱y. Es ma̱ ya''ama̱'tsʉ pyʉdseemy ja ne'pyñ tuk metrʉ jakujm kyʉjxmʉty es pyʉye'ky tʉgʉk mʉgo'px mil metrʉn.
\c 15
\s Anklʉsʉty mʉt ja jʉxtujkpʉ ayo'on
\p
\v 1 N'ijxyʉts tsa̱jpótm jatu'ugʉ mʉj ijxwʉ'ʉmʉn di'ibʉ ja̱'a̱y dʉ'ʉñʉ yajwe'empy. N'ijxyʉts jʉxtujkʉ anklʉs mʉt jʉxtujkʉ óknʉmbʉ ayo'on. Es mʉdʉ tadʉ jʉxtujkpʉ ayo'on kyʉjxta̱'a̱y ja Diosʉ 'yajkʉn.
\p
\v 2 N'ijxyʉts nandʉ'ʉn éxtʉm kyʉxe'eky tu'ugʉ jikymyejyñ, éxtʉmʉ viidrʉ tuktʉkʉ mʉt ja jʉnya'ank. Es n'ijxyʉts nandʉ'ʉn ja di'ibʉ myʉmadaktʉ ja axʉk jʉyujk mʉt ko kyaj t'awda̱jttʉ ja 'yawinnax es kyaj tkupʉjktʉ ja syeyʉ. Tamʉ naty yʉ'ʉjʉty tyánʉdʉ jikymyejyñgyʉjxm, es tmʉdaty ja 'yarpʉ di'ibʉ natyʉ Dios tʉ myo'oyʉdʉ,
\v 3 es t'ʉwdʉ ja Moisesʉ 'yʉy, ja Diosʉ myʉduumbʉ, es ja Borreegu'ungʉ 'yʉy. Esʉ dʉ'ʉn 'yʉwdʉ:
\q Windsʉ́n Dios di'ibʉ tʉgekyʉ mʉk'a̱jtʉn myʉda̱jtypy,
\q jyantsymyʉ́jʉty es jyantsy'oy jyantsytsyújʉty di'ibʉ mdiimpy.
\q Mij myajkutujkp mʉdʉ tʉy'a̱jtʉn,
\q mij myajkutijkypy nidʉgekyʉ naxwíñʉdʉ ja̱'a̱y.
\q
\v 4 Nindsʉn'a̱jtʉm, ¿pʉ́n mgawindsʉ'ʉgʉdʉp, pʉ́n mga''awdátʉdʉp?
\q Mʉt ko mijtsʉ dʉn je'eyʉ di'ibʉ wa̱'a̱ts,
\q pa̱a̱ty nidʉgekyʉ naxwíñʉdʉ ja̱'a̱yʉ myíndʉt
\q ma̱ mij es m'awdátʉdʉt,
\q mʉt ko tʉ t'ixtʉ ko tʉy'a̱jtʉn tʉgekyʉ di'ibʉ mij mdiimpy.
\p
\v 5 Oknʉmts n'ijxy jam tsa̱jpótm 'yawa̱'a̱tsy ja tsa̱jptʉjk, ja Diosʉ tyʉjk.
\v 6 Jap tsa̱jptʉgóty pyʉdsʉʉmdʉ tadʉ jʉxtujkpʉ anklʉs di'ibʉ myʉnejxypy ja jʉxtujkpʉ ayo'on, es wa̱'a̱ts poop ja wyit es jyantsytye'xy, es tmʉdaty ja 'yoorʉ ka̱a̱tsywyʉʉn di'ibʉ mʉj ja 'yok.
\p
\v 7 Net nidu'ugʉ nima̱jtáxkpʉ jiky'a̱jtpʉty di'ibʉ ijttʉp Dios windum, yʉ'ʉ myooyʉ kʉjktu'ugʉ anklʉs oorʉ tsim nidu'ugáty ujts mʉt ja mʉk tʉydyu'unʉn di'ibʉ yajkypy ja Dios di'ibʉ ijtpʉm winʉ xʉʉ winʉ tiempʉ.
\v 8 Es ja tsa̱jptʉjk 'yujtspejty mʉt ja jok di'ibʉ miimp ma̱ ja Diosʉ myʉj'a̱jtʉn es ja myʉk'a̱jtʉn. Es ni pʉ́n mba̱a̱t oj kyatʉkʉ extʉ ko kyʉjxta̱a̱yñʉm ja jʉxtujkpʉ ayo'on di'ibʉ myʉnʉjxtʉp ja jʉxtujkpʉ ánklʉsʉty.
\c 16
\s Ayo'ondsím
\p
\v 1 Nétʉts nmʉdooy pyʉdsemy ja kajxy tsa̱jptʉgóty di'ibʉ tyuk'ane'empy ja jʉxtujkpʉ anklʉs:
\p —Nʉjxtʉ es tuktaamdu'uttʉ ja jʉxtujkpʉ tsim di'ibʉ myʉda̱jtypy ja mʉk tʉydyu'unʉn di'ibʉ Dios yajkypy naxwiiñ.
\p
\v 2 Ja jawyiimbʉ anklʉs oj ñejxy. Ta ttuktaamdúty ja tsyim naxwiiñ. Net pyʉdseemy ja mʉk pu'uts ñikʉjxmʉty di'ibʉ mʉk jantsy pʉjkp ma̱ nidʉgekyʉ di'ibáty myʉda̱jttʉp ja axʉk jʉyujkʉ syeyʉ es di'ibáty nandʉ'ʉn 'yawda̱jttʉp ja awinnax.
\p
\v 3 Net ja myʉmajtskpʉ anklʉs ttuktaamdúty ja tsyim jikymyejyñóty. Ta ja jikymyejyñ jyʉmbijty éxtʉmʉ ne'pyñ, dʉ'ʉn éxtʉmʉ o'kpʉ ne'pyñ. Ta 'yo'kta̱a̱ydyʉ nidʉgekyʉ di'ibʉ jiky'a̱jttʉp jikymyejyñóty.
\p
\v 4 Ja myʉdʉgʉʉkpʉ anklʉs ttuktaamdúty ja tsyim ma̱jatyʉ mʉjnʉʉ es ma̱jatyʉ nʉʉ myuxy. Ta jyʉmbijtta̱a̱y ne'pyñ.
\v 5 Nétʉts nmʉdooy ja anklʉs jyʉna'añ:
\p —Dios, mijts m'ijt es mijts m'ijtpʉm. Wa̱'a̱ts mij. Mdiimpy ja tʉy'a̱jtʉn es dʉ'ʉn xytyukkumʉdówʉt,
\v 6 mʉt ko ttuktaam ttuk'yojktʉ mijʉ m'ayuk ka̱jxwa̱'xpʉ ñe'pyñ, es mijʉ mja̱'a̱yʉty. Es tyam mij xytyuk'iiky ja ne'pyñ. Pes dʉ'ʉn ñitʉ́kʉdʉ.
\p
\v 7 Nétʉts nmʉdooy nandʉ'ʉn kyajxy extʉ ma̱ artal, es jyʉna'añ:
\p —Oyʉ dʉ'ʉn, Windsʉ́n Dios di'ibʉ tʉgekyʉ mʉk'a̱jtʉn myʉda̱jtypy. Tʉ xypyayo'oy yajxón mʉt ja tʉy'a̱jtʉn.
\p
\v 8 Ja myʉma̱jtáxkpʉ anklʉs ttuktaamdúty ja tsyim ma̱ ja xʉʉ. Es mʉt yʉ'ʉ ni'igʉ oj myʉjʉ ja xʉ'án es ttsa̱'a̱ydyʉt ja naxwíñʉdʉ ja̱'a̱yʉty.
\v 9 Es dʉ'ʉn ja ja̱'a̱y jantsy mʉk tyooydyʉ mʉt ja xʉ'án. Per ni mʉt yʉ'ʉ kyajodʉmbijttʉ, kyaj t'awda̱jttʉ Dios di'ibʉ yajkypyʉ tya̱dʉ tʉydyu'unʉn. Ni'igʉ tmʉ''ʉdʉgooy tmʉga̱jxtʉgooy ja Dios.
\p
\v 10 Ja myʉmʉgoxkpʉ anklʉs ttuktaamdúty ja tsyim ma̱ yajkutíky ja axʉk jʉyujk. Ta kyoodsʉdyaay ma̱ 'yane'emy.
\v 11 Net ja ja̱'a̱yʉty ñayya'andsu'udsʉdʉ mʉt ja mʉk pʉjkʉn di'ibʉ yajna̱jxtʉp. Per ni mʉt yʉ'ʉ tkamastuttʉ ja 'yaxʉk winma̱'a̱ñ di'ibʉ tyuundʉp. Ni'igʉ tmʉ''ʉdʉgooy tmʉga̱jxtʉgooy ja Dios.
\p
\v 12 Ja myʉdʉdujkpʉ anklʉs ttuktaamdúty ja tsyim ma̱ ja Eufrates mʉjnʉʉ. Ta ja nʉʉ tyʉtsy es 'yawa̱'a̱dsʉt ja tyu'u ja réyʉty di'ibʉ miindʉp ma̱ xʉʉ pyʉdsemy.
\p
\v 13 Nétʉts n'ijxy ma̱ ja sarpyentʉ 'ya̱a̱, es ma̱ ja axʉk jʉyujkʉ 'ya̱a̱, es ma̱ nandʉ'ʉn ja kyuga̱jxpʉ di'ibʉ andakpʉ 'ya̱a̱, pyʉdsemy tʉgʉʉgʉ mʉjku'u di'ibʉ kʉxʉ'kp éxtʉmʉ nootsy.
\v 14 Tya̱a̱dʉ yʉ'ʉ dʉ'ʉnʉ mʉjku'ujʉty di'ibʉ tyuundʉp ijxwʉ'ʉmʉn di'ibʉ myʉda̱jtypy ja mʉj'a̱jtʉn, es nʉjx twowa̱'a̱ndʉ ja réyʉty ma̱jatyʉ naxwíñʉdʉ es ñaymyujkta̱'a̱yʉdʉt es tsyiptuna̱'a̱ndʉ mʉt ja Nindsʉn'a̱jtʉm Dios di'ibʉ tʉgekyʉ mʉk'a̱jtʉn myʉda̱jtypy, ko tpa̱a̱dʉt ja tiempʉ.
\v 15 “Mʉdowdʉ es jaygyúkʉdʉ. Ʉj, Diosʉ 'yU'unk, nmina̱'a̱ñʉts ti'in, éxtʉm ko jya'ty ja ma'tspʉ. Jotkujk di'ibʉ naty wijy es witxʉ, kʉdiibʉ tsoydyu'un mʉʉt jyʉdítʉt niwa̱'a̱ts ʉxwa̱'a̱ts ja̱'a̱y wyinduuy.”
\p
\v 16 Ta ñaymyujkʉdʉ ja naxwíñʉdʉ réyʉty ma̱ ja luga̱a̱r di'ibʉ ebreeʉ ja̱'a̱yʉty tyukxʉ'a̱jttʉp Armajedón.
\p
\v 17 Ja myʉjʉxtujkpʉ anklʉs ttuktaamdúty ja tsyim pojotm. Ta yajmʉdooy kajxy ma̱ Dios yajkutíky es ma̱ ja tsa̱jptʉjk jam tsa̱jpótm, es jyʉnáñ mʉk:
\p —¡Tʉ net tyuñ jyátyʉty!
\p
\v 18 Net myiiñ ja anaa jʉdsuk, es ja naxwíñʉdʉ jyantsypyʉmiimy mʉt ja mʉk ujx. Kyaj ni windii dʉ'ʉmbʉ ujx kyanaxy extʉ ma̱ tsyondaky ja naxwíñʉdʉ ja̱'a̱y.
\v 19 Ta ja Jerusalén ka̱jpn tsya̱'pxwa'xy tʉgʉk peky. Es ma̱jatyʉ ka̱jpn naxwiiñ jya̱'a̱dʉgooydyaay. Es ja Dios tjamyejtsy ja Babiloñʉ mʉj ka̱jpn es ttuk'uuga̱'a̱ñ ja vyinʉ, ja'a njʉna̱'a̱nʉm ja tʉydyu'unʉn di'ibʉ yajkypy mʉt ja 'yakʉ.
\v 20 Net tʉgekyʉ islʉ es tʉgekyʉ kopk tyʉgooydyaay.
\v 21 Nandʉ'ʉn kya'ay tsa̱jpótm yʉ tʉtsn jantsy mʉjjátyʉty, extʉ justyikxy kilʉ jye'emdsyʉty tu'ugáty. Es ja naxwíñʉdʉ ja̱'a̱yʉty tmʉ''ʉdʉgoy tmʉga̱jxtʉgóy ja Dios mʉt ja myʉj ayo'onʉ tadʉ tʉtsn, mʉt ko mʉk ayo'onʉ dʉ'ʉn yʉ'ʉ.
\c 17
\s Kujeñdyo'oxyʉ 'yayo'on
\p
\v 1 Net myiiñ nidu'ugʉ nijʉxtujkpʉ anklʉs di'ibʉ myʉda̱jttʉ ja jʉxtujkpʉ tsim, es xy'anma̱a̱yʉts:
\p —Min es nduk'íxʉt ja tyʉydyu'unʉn ja mʉj kujeñdyo'oxy di'ibʉ uñaapy mejyñwyingʉjxm.
\v 2 Yʉ naxwíñʉdʉ ja̱'a̱yʉ ryéyʉty tʉ ñaygyʉyákʉdʉ es pyekytyundʉ mʉt yʉ'ʉ, es ja naxwíñʉdʉ ja̱'a̱yʉty tʉ myu'uuk myʉmu'ugʉdʉ mʉt yʉ'ʉ, ja'a njʉna̱'a̱nʉm t'ʉxtijtʉ ja Dios es tpanʉjxtʉ ja kujeñdyo'oxyʉ 'yaxʉk winma̱'a̱ñ.
\p
\v 3 Kodsʉ natyʉ dʉ'ʉn tʉ xy'awanʉ, nétʉts ja anklʉs xymyʉnejxy mʉj ittum. Jámʉts n'ijxy tu'ugʉ toxytyʉjk ttuk'u'uñʉ tu'ugʉ tsapts axʉk jʉyujk. Tadʉ axʉk jʉyujk windikyʉ ñini'x tmʉdaty mʉdʉ axʉk ayuk kʉxja̱'a̱y di'ibʉ Dios mʉʉt twinga̱jxpéty. Jʉxtujkʉ kyʉba̱jk tmʉdaty es ma̱jkʉ wya̱j.
\v 4 Tadʉ toxytyʉjk ñaywyítxʉty mʉt ja tsu'unk wit esʉ tsapts wit, es 'yoydyúñʉty mʉt ja oorʉ, mʉt ja tsujjátypyʉ tsa̱a̱ esʉ perlʉ. Es tmʉdaty kyʉ'ʉjóty tu'ugʉ oorʉ tsim ujts mʉt ja axʉʉkpʉ. Ja'a tya̱a̱dʉ 'yandijpy ja 'yaxʉk jiky'a̱jtʉn.
\v 5 Es wyimbokkʉjxy tmʉdaty kʉxja̱'a̱y tu'ugʉ xʉʉ di'ibʉ tsip yajmʉdoop: “Ja Babiloñʉ mʉj ka̱jpn, naxwíñʉdʉ kujeñdyo'oxyʉdyʉ tya̱a̱k es nandʉ'ʉn tya̱a̱k'átyʉty nidʉgekyʉ di'ibáty axʉʉk jiky'a̱jttʉp naxwiiñ.”
\v 6 Nétʉts nbejkyʉ kwentʉ ko tadʉ toxytyʉjk múkʉbʉ naty mʉt ja Diosʉ jya'ayʉdyʉ ñe'pyñ es mʉt ja ñe'pyñʉty pʉ́nʉty o'ktʉ mʉt ko t'awda̱jttʉ ja Nindsʉn'a̱jtʉm Jesukristʉ. Es kodsʉ taadʉ dʉ'ʉn n'ijxy, tats dʉ'ʉñʉ oj njantsywyʉ'ʉmʉ.
\p
\v 7 Nétʉdsʉ tadʉ anklʉs xy'anma̱a̱y:
\p —¿Ti ko dʉ'ʉñʉ mwe'emy? Tyam nduknijáwʉt di'ibʉ 'yandijpy yʉ ayu'udsyʉ winma̱'a̱ñ: tadʉ toxytyʉjk esʉ tadʉ axʉk jʉyujk di'ibʉ tyuk'uñaapy, di'ibʉ myʉda̱jtypy jʉxtujkʉ kyʉba̱jk es ma̱jkʉ wya̱j.
\v 8 Tadʉ axʉk jʉyujk di'ibʉ tʉ xy'ixy, yʉ'ʉ tu'uk di'ibʉ jékyʉp jiky'a̱jt, es tyam kyaj ñakyjyaa'áty, per pʉdsʉma̱a̱mp kʉk jutoty, es ñejxy ma̱ kyutʉgooyñʉt.
\p ’Ja naxwíñʉdʉ ja̱'a̱y di'ibʉ xyʉʉ kya'ity kʉxja̱'a̱y nekykyʉjxy extʉ ma̱ naty kyajnʉmʉ naxwíñʉdʉ kyoj, ja'a dʉ'ʉñʉ wyʉ'ʉmʉdya'aydyʉt ko t'íxtʉt jatʉgok jya'ty ja axʉk jʉyujk di'ibʉ jékyʉp jiky'a̱jt. Es yʉ xyʉʉjʉty di'ibʉ kʉxja̱'a̱y ma̱ ja neky, ja'a xyʉʉjʉty di'ibáty myʉda̱jttʉp ja jiky'a̱jtʉn winʉ xʉʉ winʉ tiempʉ.
\p
\v 9 ’Tyámʉts nniga̱jxʉt di'ibʉ tsojkʉp ja wijy'át kejy'át es yajjaygyúkʉt. Ja jʉxtujkpʉ kʉba̱jk ja'a 'yandijpy ja jʉxtujkpʉ kopk ma̱ tadʉ toxytyʉjk 'yu'uñʉ.
\v 10 Es nandʉ'ʉnʉ tadʉ kʉba̱jk, yʉ'ʉ 'yandijpy ja jʉxtujkpʉ réyʉty. Nimʉgoxk tʉ 'yooktʉ, ja myʉdʉdujkpʉ tam yajkutíky tyam, es ja myʉjʉxtujkpʉ, yʉ'ʉ kyajnʉm myiñ. Es ko myínʉt, je'eyʉ waanʉ 'yítʉt.
\v 11 Es ja axʉk jʉyujk di'ibʉ jékyʉp ijt es tyam kyaj ñakyjyaaty, yʉ'ʉ dʉ'ʉn rey ma̱ tadʉ nijʉxtujkpʉ, es jya̱'ta̱'a̱ñ jatʉgok éxtʉm ja myʉduktujkpʉ rey, per nʉjxpʉ dʉ'ʉn ma̱ kyutʉgooyñʉt.
\p
\v 12 ’Ja ma̱jkpʉ wya̱j di'ibʉ tʉ xy'ixy, yʉ'ʉ dʉ'ʉn ma̱jkʉ rey di'ibʉ kyaj dyajtsonda̱'a̱ktʉnʉm yajkutúktʉt. Per 'yaxa̱jʉyándʉp ja kutujkʉn éxtʉmʉ rey tuk oorʉn mʉt ja axʉk jʉyujk.
\v 13 Tya̱dʉ ma̱jkpʉ réyʉty ti'igyʉ wyinma̱'a̱ñʉty, es myo'oyʉp ja myʉk'a̱jtʉn es ja kyutujkʉn ja axʉk jʉyujk.
\v 14 Tsiptuna̱a̱mp mʉt ja Borreegu'unk. Per ja Borreegu'unk mʉmada̱'a̱gʉdʉp, mʉt ko yʉ'ʉ Windsʉn'a̱jtp ma̱ windsʉ́nʉty es Rey'a̱jtp ma̱ réyʉty. Es di'ibáty yʉ'ʉ mʉʉt, Dios woojʉ yʉ'ʉjʉty, wyin'ix, es oy tmʉdundʉ Dios.
\p
\v 15 Ja anklʉs xy'anma̱a̱yʉts nandʉ'ʉn:
\p —Tadʉ mejyñ di'ibʉ tʉ xy'ixy ma̱ 'yu'uñʉ ja kujeñdyo'oxy, yʉ'ʉ dʉ'ʉn 'yandijpy ja ja̱'a̱y pʉ́nʉty jiky'a̱jttʉp ma̱ maygya̱jpn, ma̱ wiinkpʉ may ayuk ka̱jxpʉty, es ma̱ mayñaxwíñʉdʉ.
\v 16 Ja ma̱jkpʉ wa̱j es ja axʉk jʉyujk tyuk'ak'átʉp ja kujeñdyo'oxy, es dyajwʉ'ʉmʉt niwa̱'a̱ts ʉxwa̱'a̱ts. Es extʉ tsyu'tsta̱'a̱ydyʉp ja ñini'x, es ñino'kta̱'a̱ydyʉp di'ibʉ wʉ'ʉmp.
\v 17 Diosʉ dʉ'ʉn tʉ pyʉjta̱'a̱gʉdʉ es dyajtuunʉdʉ Diosʉ wyinma̱'a̱ñ, ti'igyʉ ñaybyʉjta̱'a̱gʉdʉ es dyaky ja kutujkʉn éxtʉmʉ rey ma̱ ja axʉk jʉyujk extʉ ko yajkuydyuunda̱'a̱yʉt di'ibʉ Dios ñaska̱jxʉ.
\v 18 Tadʉ kujeñdyo'oxy di'ibʉ tʉ xy'ixy, yʉ'ʉ dʉ'ʉn 'yandijpy ja mʉj ka̱jpn di'ibʉ 'yane'empy ja naxwíñʉdʉ ryéyʉty.
\c 18
\s Babiloñʉ ka̱jpn kyutʉgoy
\p
\v 1 Nétʉts n'ijxy jatu'ugʉ anklʉs jyʉnaky tsa̱jpótm mʉt ja myʉj kutujkʉn. Ta ja naxwíñʉdʉ wye'emy kude'xy mʉt ja jya̱jʉn,
\v 2 es mʉk kyajxy:
\p —Tʉ net, tʉ net jyijtta̱'a̱y ja Babiloñʉ mʉj ka̱jpn, es tʉ jyʉmbity mʉjku'u tsʉna̱a̱ydyákn. Ni pʉ́n jap kyanaky'ity. Yʉ'ʉyʉ je'eyʉ jap tsʉna̱a̱ydyʉp ja ka'óybyʉty, es jyap'attʉ ni'amukʉ axʉk joon axʉk jʉyujk.
\v 3 Dʉ'ʉn tʉ yajtʉydyúñ mʉt ko ja Babiloñʉ ka̱jpn tmastuty ja Dios, es wiinkpʉ t'awdaty, es nidʉgekyʉ naxwíñʉdʉ ja̱'a̱yʉty ti'igyʉ mʉt yʉ'ʉ. Es ja naxwíñʉdʉ réyʉty pyekytyuundʉ mʉt ja Babiloñʉ ja̱'a̱yʉty. Esʉ ajuuy ado'kpʉ di'ibʉty ma̱jatyʉ naxwíñʉdʉ, myʉkja̱'a̱ydyáktʉ mʉt ko ttukmʉdeeky nidʉgekyʉ di'ibáty amdoop es ñayyajmʉjpʉdsʉma̱'a̱ñʉty.
\p
\v 4 Nétʉts nmʉdooy jatu'ugʉ kajxy myiñ tsa̱jpótm, es jyʉna'añ:
\p —Pʉdsʉmdʉ ma̱ tadʉ ka̱jpn, miidsʉty di'ibáty nja̱'a̱y'a̱jttʉp, kʉdiibʉ xymyʉtpekytyúndʉt es kʉdiibʉ miits myajtʉydyúndʉt mʉt yʉ'ʉjʉty.
\v 5 Ja'a ko yʉ pyeky tʉ jyantsyñipajnʉ, extʉ myʉbátnʉp ja tsa̱jp, es tʉ ja Dios jyamyajtsxʉty ja pyojpʉ.
\v 6 Tuunʉmbít nandʉ'ʉn éxtʉmʉ wiinkpʉ tʉ t'axʉktúñ. Mʉgʉbat majtsk dʉ'ʉnʉn éxtʉm yʉ'ʉ tʉ dyaky, es taam'yo'oy majtsk dʉ'ʉnʉn myʉ́kʉty di'ibʉ ya'ukp éxtʉm yʉ'ʉ oj ttaam'yo'oy.
\v 7 Tʉydyún es ya''ayow nandʉ'ʉn éxtʉm tʉ myʉj tʉ pya̱a̱dʉ. Pes yʉ'ʉ dʉ'ʉn jyʉna'añ jyodoty wyinma̱'a̱ñóty: “Tya̱a̱ts n'u'uñʉ éxtʉm tu'ugʉ reynʉ. Kyajts ʉj ngu'ekytyo'oxyʉty, ni na̱'a̱ts nga''ayówʉt.”
\v 8 Pa̱a̱ty ma̱ tu'ugʉ xʉʉ ti'in myínʉt ja pya̱'a̱m, 'yayo'on, jyotmay, yuu, es mʉt ja jʉnya'ank yajnino'ogʉt, mʉt ko Nindsʉn'a̱jtʉm Dios jyantsymyʉ́jʉty di'ibʉ tʉ pyekymyo'oyʉty es tkumʉdówʉt.
\p
\v 9 Yʉ naxwíñʉdʉ réyʉty di'ibʉ tʉ pyekytyundʉ mʉt yʉ'ʉ es dʉ'ʉn tʉ dyajtʉgóydyʉ jyiky'a̱jtʉn, ñijʉ'ʉy ñiya̱'a̱xtʉp ko t'íxtʉdʉ tadʉ ka̱jpn ko tyoy.
\v 10 Wʉ'ʉmda̱a̱ydyʉp jagam jyantsytsyʉ'ʉgʉt mʉt ja tyʉydyu'unʉn, es jyʉna̱'a̱ndʉt:
\p —¡Ay, pʉroobʉ mij Babiloñʉ mʉj ka̱jpn di'ibʉ tʉ 'yane'emy! Jantsy tuk pojʉn tʉ myiñ ja mdʉydyu'unʉn.
\p
\v 11 Yʉ ajuuy ado'kpʉty ma̱jatyʉ naxwíñʉdʉ jʉ'ʉydyʉp nandʉ'ʉn es pya''ayówdʉbʉ tadʉ mʉj ka̱jpn, mʉt ko kyaj tnakypya̱a̱dʉt pʉ́n jyúyʉp ja tyeeky yaky,
\v 12 mʉt ko ni pʉ́n tkanakyjyuydyʉ ja oorʉ, ja platʉ, ja tsujjátypyʉ tsa̱a̱, ja perlʉ, ja oyatypyʉ wit di'ibʉ tsu'unk, tsaptspʉ, seedʉbʉ, kana̱k naxʉ oyatypyʉ kepy di'ibʉ pa̱'a̱k xu'kp, ja tsujjátypyʉ di'ibʉ kojp mʉt ja marfil, bronsʉ, pujxn es ja mármol;
\v 13 es nandʉ'ʉn ni pʉ́n tkanakyjyuydyʉ ja kanelʉ, pa̱'a̱k xu'kpʉ, mirrʉ, poom, vinʉ, aseytʉ oliivʉ, arinʉ, triigʉ, tsa̱jka̱a̱jʉty, borreegʉty, kwa̱a̱yʉty, kárrʉty, es extʉ ja̱'a̱yʉty ijty tyo'ktʉp.
\v 14 Es dʉ'ʉn yʉ ajuuy ado'kpʉty t'anʉʉmʉdʉt tadʉ ka̱jpn:
\p —Kyaj xyñakymyʉdatyʉ tadʉ mje'xy mbeky es tʉgekyʉ tadʉ oyatypyʉ di'ibʉ tʉ xyjantsytsyeky. Tʉʉ dʉn tyʉgooydya'ay winʉ xʉʉ winʉ tiempʉ yʉ mmʉkja̱'a̱y'át esʉ mdsuj'a̱jtʉn.
\p
\v 15 Pʉ́nʉty ajuuy ado'ktʉp ma̱ ja Babiloñʉ ka̱jpn es ñayyajmʉkja̱'a̱ydya̱'a̱gʉdʉ jap, jagam tyánʉdʉt mʉdʉ tsʉ'ʉgʉ ko dʉ'ʉn 'yayówʉt ja ka̱jpn, es yʉ'ʉ jyʉ'ʉy ya̱'a̱xtʉt:
\p
\v 16 —¡Ay, pʉroobʉ mʉj ka̱jpn! Tsuj tʉ 'yity éxtʉm tu'ugʉ toxytyʉjk mʉt ja wyitʉ oyatypyʉ, tsu'unkpʉ, tsaptspʉ, es 'yoydyúñʉty mʉt ja oorʉ, tsujjátypyʉ tsa̱a̱ esʉ perlʉ;
\v 17 ¡es tuk pojʉn tʉ tyʉgoyʉ tya̱dʉ jyiky'a̱jtʉn!
\p Es nandʉ'ʉn yʉ barkʉ yaj'ye'ebyʉty esʉ di'ibáty tuundʉp jap barkoty, es di'ibáty mʉduundʉp jikymyejyñóty, wʉ'ʉmdʉp jagam
\v 18 ko t'íxtʉt pyʉde'eky ja jok ma̱ tyoyʉ tadʉ mʉj ka̱jpn, es jyʉna̱'a̱ndʉt mʉk:
\p —Ni ma̱a̱ dʉ'ʉmbʉ ka̱jpn éxtʉm tʉ 'yityʉ tya̱dʉ mʉj ka̱jpn, ¿kʉdii?
\p
\v 19 Es mʉt ja jyotmay ñaydyukkuwʉjʉ'kʉdʉ naxway, es jyantsyjyʉ'ʉy jyantsyya̱'a̱xtʉ:
\p —¡Pʉroobʉ tadʉ mʉj ka̱jpn! Mʉt ja myʉkja̱'a̱y'át tʉ ñayyajmʉkja̱'a̱ydya̱'a̱gʉdʉ nidʉgekyʉ di'ibʉ myʉda̱jttʉp ja barkʉ. ¡Es tuk pojʉn tʉ tyʉgooydya'ay!
\p
\v 20 Es ja kajxy 'yakjʉna̱'a̱ñ tsa̱jpótm:
\p —Miidsʉty pʉ́nʉty ijttʉp tsa̱jpótm, es miidsʉty apóstʉlʉty esʉ Diosʉ 'yayuk ka̱jxwa̱'xpʉty es nidʉgekyʉ di'ibʉ Dios jya'a'a̱jtypy, xonda̱'a̱ktʉ mʉt ko Dios tʉ ttukkumʉdoy yʉ tadʉ ka̱jpn éxtʉm tʉ mdúnʉdʉ.
\p
\v 21 Net tu'ugʉ anklʉs kumʉja̱a̱bʉ tkone'ky ja tsa̱a̱ di'ibʉ dʉ'ʉn éxtʉm tu'ugʉ mʉj pa̱a̱n, es tkujʉbijpʉ jikymyejyñóty, es jyʉnáñ:
\p —Nandʉ'ʉn mij Babiloñʉ mʉj ka̱jpn, myajkujʉbipnaxa̱'a̱ñ, es ni na̱'a̱ jatʉgok mgakʉxʉ'ʉgʉt.
\v 22 Ni na̱'a̱ kyanakyyajmʉdówʉt mga̱jpnóty ja trompet xuxpʉ, tsa̱jkapyñxyúxpʉ esʉ arpʉ koobʉ. Es ni kyanakyjyap'átʉt ja mmʉduumbʉty di'ibʉ ʉxpékyʉty, es ni ma̱ kyanakyyajmʉdówʉt jap ja jʉjts tu'unʉn.
\v 23 Kyaj jap ñakyjyá̱jʉt ni tu'ugʉ lamprʉ, es ni na̱'a̱ jap kyanakyyajmʉdówʉt yajtúñ ja xʉʉ ma̱ ja pʉjkpʉty. Ja m'ajuuy m'ado'kpʉty tʉ 'yittʉ naxwiiñ jantsy mʉj, es tʉ twin'ʉʉndʉ nidʉgekyʉ naxwíñʉdʉ ja̱'a̱yʉty mʉt ja byrujʉ winma̱'a̱ñʉty.
\p
\v 24 Pes ma̱ tadʉ ka̱jpn tʉ yajpa̱a̱ty temy yeky ja Diosʉ 'yayuk ka̱jxwa̱'xpʉty ja ñe'pyñ, es ja ñe'pyñ di'ibʉ Dios jya'ay'ajtypy, es nidʉgekyʉ ja ñe'pyñ ja ja̱'a̱y di'ibʉty ja̱'a̱y ya'o'kʉdʉ naxwiiñ.
\c 19
\p
\v 1 Nétʉts nmʉdooy jantsy mʉk ja ja̱'a̱yʉty kya̱jxtʉ tsa̱jpótm, es jyʉna̱'a̱ndʉ:
\q ¡Awdattʉ Dios!
\q Yʉ nitsokʉn, mʉj'a̱jtʉn esʉ mʉk'a̱jtʉn,
\q yʉ'ʉ Dios jya'a'a̱jtypy.
\q
\v 2 Pesʉ Dios paye'epy mʉt ja tʉy'a̱jtʉn,
\q es tʉ tmo'oy ja kumʉdo'on ja mʉj pekykya̱jpn es ñʉjxʉt ayodaknoty.
\q Mʉt ko tʉ dyajpekytyúñ ja naxwíñʉdʉ ja̱'a̱yʉty
\q es dya'e'ky ja Diosʉ myʉduumbʉty,
\q pa̱a̱dyʉ Dios yajʉmbijtxʉty.
\p
\v 3 Net jyʉnandʉ jatʉgok:
\p —Awdattʉ Dios. Pes timjókʉp winʉ xʉʉ winʉ tiempʉ ma̱ yajnine'egyʉ taadʉ.
\p
\v 4 Es ja ni'i'px ma̱jtáxkpʉ mʉjja̱'a̱ydyʉjk es ja nima̱jtáxkpʉ jiky'a̱jtpʉty di'ibʉ ijttʉp Dios windum, ñaygyoxtʉna̱a̱ydyákʉdʉ, t'awda̱jttʉ Dios es jyʉna̱'a̱ndʉ:
\p —Wa'an dʉ'ʉnʉty. ¡Awda̱jtta̱'a̱ydyʉ Dios!
\p
\v 5 Nétʉts nmʉdoogajxy ma̱ uñaaybyajn ma̱ Dios yajkutíky, es jyʉna'añ:
\q Miidsʉty di'ibáty myʉduundʉp ja Nindsʉn'a̱jtʉm Dios,
\q mʉjja̱'a̱y mutsk ja̱'a̱yʉty, awdattʉ Dios.
\s Nixʉdúñ ja Borreegu'unk
\p
\v 6 Nmʉdooyʉts nandʉ'ʉn ko nimayjya'ay kya̱jxtʉ, dʉ'ʉnʉts nmʉdooy éxtʉmʉ nʉʉdáx 'yʉʉtsy pyʉmimy, es éxtʉmʉ anaa mʉk ya'axy, es jyʉna̱'a̱ndʉ:
\q Awda̱jtta̱'a̱ydyʉ ja Nindsʉn'a̱jtʉm Dios di'ibʉ tʉgekyʉ mʉk'a̱jtʉn myʉda̱jtypy,
\q mʉt ko yajkutíky.
\q
\v 7 N'okxondákʉm, n'okjotkujkʉm es n'okwindsʉ'kʉm, mʉt ko Dios jyantsymyʉ́jʉty
\q es tʉ net tpa̱a̱ty ma̱ ja Borreegu'unk pyʉka̱'a̱ñ,
\q es tʉ ja ñʉdo'oxy ñayjyʉjp'íxyʉty.
\q
\v 8 Tʉ yajmo'oy ja wit ja oybyʉ es ja wa̱'a̱tspʉ di'ibʉ tʉ'x jʉdsujkp, es ñayxyóxʉdʉt.
\m Pes ja oybyʉ wit ja'a 'yandijpy ja oybyʉ di'ibʉ tyuun kya̱jxtʉp ja Diosʉ jya'ayʉty.
\p
\v 9 Nétʉts ja anklʉs xy'anma̱a̱y:
\p —Kʉxja̱'a̱y: “Jotkujkʉty di'ibáty tʉ yajwówdʉ ma̱ tya̱dʉ xʉʉ ko ja Borreegu'unk pyʉka̱'a̱ñ.”
\p Es xy'ak'anma̱a̱yʉts:
\p —Tya̱a̱dʉ dʉ'ʉn tʉy'a̱jtʉn di'ibʉ Dios kyajxypy.
\p
\v 10 Njakoxtanʉyáñʉts anklʉs tyeky'ʉjxy, es nja''awdatáñʉts, per yʉ'ʉts xy'anma̱a̱y:
\p —Katʉ dʉ'ʉn m'adʉ'ʉtsy. Nmʉdiimbyʉts ja Dios éxtʉm mij, es éxtʉmʉ mmʉgu'ugʉty di'ibʉ pyanʉjxtʉp ja Jesusʉ 'yʉxpʉjkʉn. Awdat ja Dios.
\p Pes ja tʉy'a̱jtʉn di'ibʉ Jesús ya̱jk, ja'a yʉ'ʉ di'ibʉ wyinma̱'a̱ñmyeepy ja Diosʉ kyuga̱jxpʉ.
\s Di'ibʉ tyuk'uñaapy ja poop kwa̱a̱y
\p
\v 11 Nétʉts n'ijxy ja tsa̱jp awa̱'a̱ts, es kyʉxe'eky tu'ugʉ poop kwa̱a̱y. Es di'ibʉ tyuk'uñaapy txʉ'aty Di'ibʉ Kyuydyiimpy Ja 'Yayuk, es nandʉ'ʉn txʉ'aty Tʉy'a̱jtʉn, mʉt ko tʉy'a̱jtʉn mʉʉt pyayo'oy es tsyiptúñ.
\v 12 Yʉ wyiin dʉ'ʉn éxtʉmʉ jʉnya'ank jyantsytye'xy, es jam kyʉba̱jkkʉjxm tmʉdaty may ja koronʉ. Es tmʉdaty ja xyʉʉ kʉxja̱'a̱y di'ibʉ yʉ'ʉyʉ naydyi'igyʉ ñija̱'a̱p.
\v 13 Es ja wyit ne'pyñ ne'pyñ. Es txʉ'aty Diosʉ 'yAyuk.
\v 14 Es pyanʉjxʉdʉ tʉgoymyay nidsiptuumbʉty di'ibʉ tsa̱jpótm. Ak poop ja wyit, ja oybyʉ esʉ wa̱'a̱tspʉ, es ak poop kwa̱a̱ygyʉjxy.
\v 15 Es di'ibʉ xyʉ'a̱jtypy Diosʉ 'yAyuk, jap 'ya̱a̱jóty pyʉdsemy tu'ugʉ espa̱a̱dʉ jʉjppʉ, es yʉ'ʉ mʉʉt dyajtsayuta̱'a̱ñ ja naxwíñʉdʉ ja̱'a̱yʉty. Es yajkutuka̱'a̱ñ mʉdʉ pujxnda̱jk. Es ttukkumʉdowa̱'a̱ñ, mʉt ko Dios di'ibʉ tʉgekyʉ mʉk'a̱jtʉn myʉda̱jtypy, jyantsy'ajkʉnʉ mʉt ja naxwíñʉdʉ ja̱'a̱y. Pa̱a̱dyʉ dʉ'ʉn ttukkumʉdowa̱'a̱ñ éxtʉm ko jyawʉ yajwinma̱'a̱tsy ja uuvʉ tʉʉmp.
\v 16 Es tmʉnejxy kʉxja̱'a̱y ma̱ ja kyapʉ es ma̱ ja pyuuy tya̱dʉ xʉʉ: “Rey'a̱jtp ma̱ réyʉty es Windsʉn'a̱jtp ma̱ windsʉ́nʉty.”
\p
\v 17 Nétʉts n'ijxy tu'ugʉ anklʉs tyanʉ jam xʉʉ ñikʉjxm es t'anʉʉmʉdʉ jantsy mʉk ja joon jʉyujk di'ibʉ ka'agʉdijtp:
\p —¡Min naymyúkʉdʉ ma̱ ja mʉj xʉʉ di'ibʉ Dios tyunaampy!
\v 18 Min es xytsyu'utstʉt ja tsyu'udsyʉdyʉ réyʉty esʉ solda̱a̱dʉ windsʉ́nʉty, ja jotmʉk ja̱'a̱yʉty, ja kwa̱a̱yʉty es mʉt ja di'ibʉ tuk'uñaayʉdʉp, nidʉgekyʉ ja̱'a̱y ja tsyu'udsyʉty, pʉ́nʉty yajjuuydyʉp es pʉ́nʉty awa̱'a̱tstuuy ijttʉp, nandʉ'ʉn ja mʉj ja̱'a̱y mutsk ja̱'a̱ybyʉ.
\p
\v 19 Nétʉts n'ijxy ko ja axʉk jʉyujk es ja naxwíñʉdʉ ryéyʉty dyajnaymyúkʉdʉ syolda̱a̱dʉty es tsyiptuna̱'a̱ñ mʉt ja di'ibʉ poop kwa̱a̱ygyʉjxy es mʉt ja ñidsiptuumbʉty.
\v 20 Per ja axʉk jʉyujk yajtsuum ti'igyʉ mʉt ja kuga̱jxpʉ di'ibʉ andakp, di'ibʉ naty tʉ ttuñ axʉk jʉyujk wyinduuy ja mʉj ijxwʉ'ʉmʉn di'ibʉ myʉda̱jtypy ja mʉj'a̱jtʉn. Es mʉdʉ tya̱dʉ mʉj ijxwʉ'ʉmʉn ja kuga̱jxpʉ di'ibʉ andakp tʉ twin'ʉʉndʉ naty di'ibáty tʉ ñayyákyʉty es ja axʉk jʉyujk tsya'ayʉdʉt, es t'awda̱jttʉ ja 'yawinnax. Net nimajtsk yajkujʉdu'ujʉ jiigyʉty ma̱ yʉ mejyñ di'ibʉ teepy azufrʉ.
\v 21 Es yʉ syolda̱a̱dʉty ya'o'kta̱a̱y mʉt ja 'yespa̱a̱dʉ di'ibʉ pʉdsʉʉmp 'ya̱a̱jóty di'ibʉ tyuk'uñaapy ja poop kwa̱a̱y. Es nidʉgekyʉ joon jʉyujk di'ibʉ ka'agʉdijtp 'yujts jyotkʉdaktʉ mʉdʉ tadʉ tsyu'udsyʉty.
\c 20
\s Mil jʉmʉjtpʉ
\p
\v 1 Nétʉts n'ijxy tu'ugʉ anklʉs jyʉnaky tsa̱jpótm mʉt ja kʉk jutʉ 'yawatsn, es tkʉwítsyʉty tu'ugʉ mʉj kadenʉ.
\v 2 Ta tma̱jtsy ja sarpyentʉ, tadʉ mʉjku'ugópk, ja Satanás, es tkʉwʉ'ʉñ ttekywyʉ'ʉñ mʉt ja mʉj kadenʉ, es 'yítʉt tsimy tuk mil jʉmʉjt.
\v 3 Ta tkujʉbijpʉ kʉk jutoty, es dyajni'adijky ijxwʉ'ʉmʉn mʉʉt kʉdiibʉ tnakywyin'ʉʉnʉt ja naxwíñʉdʉ ja̱'a̱yʉty extʉ ko kya̱'pxʉt tuk mil jʉmʉjt. Ta naty koonʉm 'yok'yajnasmatsʉya'añ waanʉ.
\p
\v 4 Nétʉts n'ijxy uñaaybyajnʉty, es jam 'yu'uñʉdʉ di'ibátyʉ naty tʉ t'axá̱jʉdʉ ja kutujkʉn es pyayo'oydyʉt. Yʉ'ʉdyʉ dʉ'ʉn di'ibʉ yajnibo't ja kyʉba̱jkʉty mʉt ko tpanʉjxtʉ ja Jesusʉ 'yʉxpʉjkʉn es tka̱jxwa̱'xʉdʉ ja Diosʉ 'yayuk. Nandʉ'ʉn kyaj t'awda̱jttʉ ja axʉk jʉyujk es ni ja 'yawinnax, es ni tkakupʉjktʉ yajtsa̱'a̱yʉt wyimbokkʉjxy o ma̱ kyʉ'ʉ mʉt ja axʉk jʉyujkʉ syeyʉ. Es ja Dios yajjikypyʉjkʉdʉ, es 'yana'amdʉ mʉt ja Kristʉ tuk mil jʉmʉjt.
\v 5 Tya̱a̱dʉ dʉ'ʉn ma̱ tim jawyiinʉ Dios dyajjikypyejky ja ja̱'a̱yʉty. Per di'ibʉ akwʉ'ʉmdʉ ja o'kpʉty, yʉ'ʉjʉty kyaj jyikypyʉ́ktʉt extʉ ko kya̱'pxʉt tuk mil jʉmʉjt.
\v 6 Kuni'xy es jotkujkʉty di'ibátyʉ Dios yajjikypyʉ́kʉdʉp ma̱ tya̱dʉ jawyiimbʉ jikypyʉjkʉn. Kyaj pya̱a̱dʉdʉt ja ayo'on di'ibʉ dʉ'ʉn éxtʉmʉ ja̱'a̱y 'yooktʉ myʉmajtsk ok, ja'a dʉ'ʉn tmʉdúndʉt ja Dios esʉ Kristʉ éxtʉmʉ teedyʉty, es 'yana'amdʉt mʉt ja Kristʉ tuk mil jʉmʉjt.
\p
\v 7 Ko naty tʉ ñaxy tuk mil jʉmʉjt, ta Satanás yajnasmatsʉya'añ ma̱ tsyimy'ity.
\v 8 Es net ñʉjxʉt naxwiiñ, es nʉjx twin'ʉʉñ tʉgekyʉ naxwíñʉdʉ, ja Gook naxwíñʉdʉ esʉ Magook naxwíñʉdʉ. Ja Satanás yajnaymyujkta̱'a̱yʉdʉp nidʉgekyʉ naxwíñʉdʉ ja̱'a̱yʉty di'ibʉ ni mba̱a̱t nga'okmadsyo'onʉ, dʉ'ʉn éxtʉmʉ pu'u di'ibʉ jikymyejyñbyʉ'a̱a̱y, es tsyiptuna̱'a̱ndʉ.
\v 9 Oytyim madsooty ma̱ tʉgekyʉ naxwíñʉdʉ ta tsyo'ondʉ, es dyajnadujktʉ nidʉgekyʉ Dios ja jya'ayʉty ma̱ ja ka̱jpn di'ibʉ Dios jyantsytsyejpy. Perʉ Dios dyajjʉnajky tsa̱jpótmʉ jʉnya'ank di'ibʉ mʉʉt tnino'kta̱a̱y nidʉgekyʉ tadʉ ja̱'a̱yʉty.
\v 10 Net ja mʉjku'ugópk di'ibʉ natyʉ ja̱'a̱y tʉ twin'ʉʉñ, yajkujʉdu'ujʉ ma̱ ja mejyñ di'ibʉ teepy azufrʉ, ma̱ naty nandʉ'ʉn tʉ yajkujʉdúwʉ ja axʉk jʉyujk es ja kuga̱jxpʉ di'ibʉ andakp. Jap 'yayówʉt xʉʉñ koots winʉ xʉʉ winʉ tiempʉ.
\s Payo'oyʉn ma̱ ja poop uñaaybyajn
\p
\v 11 Nétʉts n'ijxy ja Dios 'yu'uñʉ ma̱ tu'ugʉ mʉj uñaaybyajn pooppʉ. Esʉ tsa̱jp esʉ naxwíñʉdʉ jyʉgaktʉ ma̱ naty 'yity, es ya'ijxtʉgooydyaay.
\v 12 Es n'ijxyʉts ja o'kpʉty, mʉj mutsk, tyánʉdʉ Dios winduuy. Ta ja neky oj ya''aya'pwa'xy, es ya'ixy wi'ix tʉ tyundʉ nidu'uk nidu'uk. Es nandʉ'ʉn wiinkpʉ neky ya''aya'pwa'xy ma̱ 'yity kʉxja̱'a̱y ja xyʉʉjʉty pʉ́nʉty jiky'a̱jttʉp winʉ xʉʉ winʉ tiempʉ. Esʉ Dios tpayo'oy es ttukkumʉdooy ja o'kpʉty éxtʉm nidu'uk nidu'uk tʉ 'yadʉ'ʉtstʉ, dʉ'ʉn éxtʉmʉ naty 'yity kʉxja̱'a̱y nekykyʉjxm.
\v 13 Tam 'yijttʉ tʉgekyʉ ja o'kpʉty, ja'a mʉʉt di'ibʉ o'ktʉ mejyñóty, es tʉgekyʉ yajpayo'oydyʉ éxtʉm tii tʉ ttundʉ.
\v 14 Yʉ o'kʉn esʉ infyernʉ tʉ naty nandʉ'ʉn dya̱jkta̱'a̱ydyʉ ja o'kpʉty tʉgekyʉ di'ibʉ naty yʉ'ʉjʉty myʉda̱jttʉp. Net ja o'kpʉty yajkujʉdúwʉdʉ ma̱ ja mejyñ di'ibʉ ya'amp éxtʉmʉ jʉʉn. Ko ja̱'a̱y jam 'yayowdʉ, dʉ'ʉn ja'a éxtʉm 'yooktʉ myʉmajtsk ok.
\v 15 Ja'ayʉ ja̱'a̱y di'ibʉ xyʉʉ kʉxja̱'a̱y nekykyʉjxy ma̱ yajja̱a̱ybyéty ja xyʉʉjʉty pʉ́nʉty jiky'a̱jttʉp winʉ xʉʉ winʉ tiempʉ, yʉ'ʉyʉ kyaj yajkujʉdúwʉdʉ ma̱ ja mejyñ di'ibʉ ya'amp éxtʉmʉ jʉʉn.
\c 21
\s Jembyʉ tsa̱jp esʉ jembyʉ naxwíñʉdʉ
\p
\v 1 Nétʉts n'ijxy ja jembyʉ tsa̱jp esʉ jembyʉ naxwíñʉdʉ, mʉt ko yʉ jawyiimbʉ tsa̱jp esʉ jawyiimbʉ naxwíñʉdʉ kyaj ma̱a̱nʉ, es kyaj ma̱a̱nʉ jikymyejyñ.
\p
\v 2 Es n'ijxyʉts nandʉ'ʉn ja jembyʉ Jerusalén ka̱jpn di'ibʉ tso'omp tsa̱jpótm ma̱ Dios, es kyʉda'aky, es jantsy tsuj oydyúñ éxtʉmʉ pʉjkpʉ toxytyʉjk ko pyʉka̱'a̱ñ.
\v 3 Es nmʉdoogajxyʉts jantsy mʉk ma̱ uñaaybyajn ma̱ Dios yajkutíky, es jyʉna'añ:
\p —Tyamʉ net ja Dios 'yity mʉt ja ja̱'a̱yʉty, es jyiky'ata̱'a̱ñ mʉt yʉ'ʉjʉty, es yʉ'ʉjʉty tja̱'a̱y'ata̱'a̱ñ. Kʉ'ʉm ja Dios 'yita̱'a̱ñ mʉt yʉ'ʉjʉty, es Dyios'átʉdʉt.
\v 4 Esʉ Dios yajtʉ́tsxʉdʉt tʉgekyʉ ja wyinnʉʉ. Kyaj 'yok'ijnʉt ja o'kʉn, jʉ'ʉy yaxʉn o ja pʉjk ado'onʉn, ja'a ko tʉgekyʉ di'ibʉ tʉ 'yity, tʉ ja'a ñaxy kyexy.
\p
\v 5 Net ja di'ibʉ uñaapy ma̱ yajkutíky jyʉnáñ:
\p —Ʉjts nyajkejpy tʉgekyʉ ak jemy.
\p Nandʉ'ʉn jyʉnáñ:
\p —Kʉxja̱'a̱y, mʉt ko tya̱a̱dʉ di'ibʉts ngajxypy, tʉy'a̱jtʉnʉ'ʉ es mba̱a̱t xymyʉbeky.
\p
\v 6 Nétʉts xy'anma̱a̱y:
\p —Tʉ net yajkuydyuunda̱'a̱y. Ʉjtsʉ dʉ'ʉn éxtʉm ja A es éxtʉmʉ Z, ʉjtsʉ dʉ'ʉn ja jawyiimbʉ es ja tim okpʉ. Di'ibʉ tʉ́tsʉp, ʉjtsʉts nnamo'oyʉp es t'uugʉt ja nʉʉ di'ibʉ pʉdsʉʉmp ma̱ myuxy es dyaky ja jiky'a̱jtʉn.
\v 7 Es di'ibʉ myʉmadakypy ja pojpʉ, yʉ'ʉts nmo'oyʉbʉ tya̱a̱dʉ éxtʉmʉ kyuma̱'a̱ñ, ʉjtsʉ dʉ'ʉn xyDyios'átʉp, es yʉ'ʉts n'u'unk'átʉt.
\v 8 Per di'ibáty jyʉjpja̱'a̱dʉp, di'ibátyʉts ʉj xykyamʉbʉjktʉp éxtʉmʉ Yajnitsókpʉ, di'ibáty jiky'a̱jttʉp axʉʉk, yajja̱'a̱y'o'ktʉp, mʉ'induundʉp, brujʉ'a̱jttʉp, 'yawda̱jttʉp di'ibʉ kyaj Dyiósʉty, es nidʉgekyʉ di'ibʉ andáktʉp, taadʉty nidʉgekyʉ pya̱a̱dʉdʉ es yajpʉjta̱'a̱gʉt ma̱ ja mejyñ di'ibʉ teepy azufrʉ. Ko ja̱'a̱y jam 'yayowdʉ, dʉ'ʉn ja'a éxtʉmʉ ja̱'a̱y 'yooktʉ myʉmajtsk ok.
\s Jembyʉ Jerusalén
\p
\v 9 Nétʉts xyñimiiñ nidu'ugʉ anklʉs di'ibʉ tʉ ttuktaamdu'uty ja tsyim mʉt ja ayo'on, esʉts xy'anma̱a̱y:
\p —Min es nduk'íxʉt di'ibʉ pyʉkaampy ja Borreegu'unk.
\p
\v 10 Net mʉdʉ Espíritʉ Santʉ myʉk'a̱jtʉn oj xyajnejxyʉts ma̱ tu'ugʉ mʉj kopk jantsy kʉjxm, es xytyuk'ijxyʉts ja mʉj ka̱jpn Jerusalén kuni'xypyʉ ko kyʉda'aky, jam tsyo'oñ tsa̱jpótm ma̱ Dios 'yity.
\v 11 Esʉ tadʉ ka̱jpn jantsy tʉ'xp mʉt ja Diosʉ jya̱jʉn. Esʉ tyʉ'xʉn dʉ'ʉn éxtʉmʉ tsujjátypyʉ tsa̱a̱, éxtʉmʉ tsa̱a̱ju'unk di'ibʉ xʉ'a̱jtypy jaspe, wa̱'a̱ts éxtʉmʉ viidrʉ.
\v 12 Es juwʉdity ja ka̱jpn ñabótsyʉty majpxy es kʉjxm, mʉt ma̱jmajtskʉ tyʉjk a̱a̱. Es tu'uk tu'ugʉ tʉjk a̱a̱ tmʉdaty tu'ugʉ anklʉs di'ibʉ kywentʉ'a̱jtypy. Es ma̱ tadʉ tu'uk tu'ugʉ tʉjk a̱a̱ 'yity kʉxja̱'a̱y tu'ugʉ xyʉʉ ja ma̱jmajtskpʉ Israelʉ mya̱a̱nk.
\v 13 Tʉgʉʉk 'yixy ja tʉjk a̱a̱ ma̱ xʉʉ pyʉdsemy, tʉgʉʉk 'yixy ma̱ yukpoj myiñ, tʉgʉʉk 'yixy ma̱ ja xʉʉ tsyi'ity es jatʉgʉʉk 'yixy ma̱ myiñ ja jʉmboj.
\v 14 Ja potsy di'ibʉ ñabots'a̱jtypy ja ka̱jpn, ma̱jmajtskʉ 'yʉjx tmʉdaty. Es ma̱ ja ma̱jmajtskpʉ potsy ʉjx kʉxja̱'a̱y 'yity tu'uk tu'ugʉ xyʉʉ ja nima̱jmajtskpʉ Borreegu'ungʉ 'yapóstʉlʉ.
\p
\v 15 Yʉ anklʉs di'ibʉts xymyʉga̱jx tmʉdaty tu'ugʉ oorʉ kijxn, es tkijxa̱'a̱ñ ja ka̱jpn, ja tyʉjk a̱a̱ es ja ñabots.
\v 16 Ja ka̱jpn kwadra̱a̱dʉ 'yity, yʉ yeñ'a̱jtʉn ti'igyʉ mʉt ja wyooñ'a̱jtʉn. Ja anklʉs tkijxy ja ka̱jpn mʉt ja kyijxn, esʉ yeñ'a̱jtʉn wyinja̱jty majtsk mil jamajtsk mʉgo'px kilometrʉ. Yʉ yeñ'a̱jtʉn, ti'igyʉ yʉ'ʉ mʉt ja kyʉjxm'a̱jtʉn esʉ wyooñ'a̱jtʉn.
\v 17 Net tkijxy ja wyooñ'a̱jtʉn ja ñabots, es wyinja̱jty tʉgʉ'px mʉgoxk metrʉ. Ja kijxn di'ibʉ ja anklʉs yajtiimpy, dʉ'ʉn ja yeñ'a̱jtʉn éxtʉm di'ibʉ ja̱'a̱y yajtiimpy.
\p
\v 18 Ja ka̱jpn nabots pyótsyʉdyʉ naty mʉt ja jaspe tsa̱a̱. Es ja ka̱jpn, ak tim wa̱'a̱ts oorʉ, dʉ'ʉn kyʉxe'eky éxtʉmʉ viidrʉ wa̱'a̱tspʉ.
\v 19 Ja ka̱jpn nabots pyotsy'ʉjx mʉt kana̱k naxʉ oyatypyʉ tsa̱a̱. Ja jawyiimbʉ tsa̱a̱ txʉ'aty jaspe. Ja myʉmajtskpʉ txʉ'aty zafiirʉ, ja myʉdʉgʉʉkpʉ txʉ'aty ágatʉ, ja myʉma̱jtáxkpʉ txʉ'aty esmeraldʉ,
\v 20 ja myʉmʉgoxkpʉ txʉ'aty ónise, ja myʉdʉdujkpʉ txʉ'aty kornalinʉ, ja myʉjʉxtujkpʉ txʉ'aty krisólitʉ, ja myʉduktujkpʉ txʉ'aty berilʉ, ja myʉdaxtujkpʉ txʉ'aty topasyʉ, ja myʉma̱jkpʉ txʉ'aty krisoprasʉ, ja myʉma̱jk tu'ukpʉ txʉ'aty jasintʉ, ja myʉma̱jmajtskpʉ txʉ'aty amatistʉ.
\v 21 Ja ma̱jmajtskpʉ tʉjk a̱a̱, ma̱jmajtsk je'eyʉ ja perlʉ. Tu'uk tu'ugʉ tʉjk a̱a̱, ti'igyʉ je'eyʉ t'aga̱j'áty ja perlʉ. Es ja mʉj tu'u di'ibʉ ka̱jpngijky, ak tim wa̱'a̱ts oorʉ, éxtʉmʉ wa̱'a̱ts viidrʉ.
\p
\v 22 Es kyajts n'ijxy ni tu'ugʉ tsa̱jptʉjk jap, mʉt ko yʉ Nindsʉn'a̱jtʉm Dios di'ibʉ tʉgekyʉ mʉk'a̱jtʉn myʉda̱jtypy, esʉ Borreegu'unk, yʉ'ʉ tsya̱jptʉjk'a̱jttʉbʉ tadʉ ka̱jpn.
\v 23 Tadʉ ka̱jpn kyaj ttseky esʉ xʉʉ es ni yʉ po'o ñi'ánʉdʉt, mʉt ko Dios esʉ Borreegu'unk, ja'a jya̱jʉn mʉʉt kyude'xyʉty.
\v 24 Es ja ja̱jʉn ma̱ tadʉ ka̱jpn, ja'a kyudʉ'xʉp nidʉgekyʉ naxwíñʉdʉ ja̱'a̱y, es ja naxwíñʉdʉ réyʉty tmʉmíndʉt ja myʉkja̱'a̱y'át ma̱ ja ka̱jpn.
\v 25 Dʉ'ʉñʉm wyʉ'ʉmʉt awa̱'a̱ts yʉ ka̱jpn nabots a̱a̱. Ni na̱'a̱ kya''adúkʉt, mʉt ko jap kyaj kyoodsʉya'añ.
\v 26 Es ja naxwíñʉdʉ ja̱'a̱y tmʉmíndʉt ja myʉj'a̱jtʉn es ttukwindsʉ'ʉgʉdʉt ja Dios.
\v 27 Es ni na̱'a̱ kyatʉ́kʉdʉ di'ibʉ axʉʉk, o di'ibʉ tsoydyu'un mʉʉt, o win'ʉ'ʉmbʉty, yʉ'ʉyʉ tʉ́kʉdʉp di'ibʉ xyʉʉ ijtp kʉxja̱'a̱y jap Borreegu'unk ñekykyʉjxy ma̱ yajja̱a̱ybyéty ja xyʉʉjʉty pʉ́nʉty jiky'a̱jttʉp winʉ xʉʉ winʉ tiempʉ.
\c 22
\p
\v 1 Nétʉts ja anklʉs xytyuk'ijxy tu'ugʉ mʉjnʉʉ di'ibʉ mujxp ma̱ uñaaybyajn ma̱ Dios esʉ Borreegu'unk yajkutúktʉ. Tadʉ nʉʉ jantsy wa̱'a̱ts éxtʉmʉ viidrʉ, es yʉ'ʉ dʉ'ʉn yajkypy ja jiky'a̱jtʉn winʉ xʉʉ winʉ tiempʉ.
\v 2 Tadʉ nʉʉ pyʉye'eky mʉj tu'ugijky ma̱ tadʉ ka̱jpn. Es mʉjnʉʉbʉ'a̱a̱y majtsk adu'um yoñ ja kepy di'ibʉ yajkypy ja jiky'a̱jtʉn es tyʉʉmp'áty ma̱jmajtsk ok tuk jʉmʉjtpʉ, winduk po'ojʉty tyʉʉmp'áty. Es ja kepy'aay yʉ'ʉ tsyooy'átʉp ja naxwíñʉdʉ ja̱'a̱yʉty.
\v 3 Es ni ma̱ kyanaky'ítʉt ni tii di'ibʉ ka̱jxpojkp.
\p Ma̱ tadʉ ka̱jpn, Dios esʉ Borreegu'unk yajkutuka̱'a̱ndʉ, esʉ myʉduumbʉty 'yawdata̱'a̱nʉdʉ,
\v 4 es 'yíxtʉp ja Dios ja wyiin jyʉjp, es tmʉdáttʉt ja Diosʉ xyʉʉ ma̱ wyimbok.
\v 5 Jap kyaj kyoodsʉya'añ. Es di'ibáty ijttʉp jap, kyaj ttsóktʉt ni ja lyamprʉ es ni yʉ xʉʉ ñijá̱jʉdʉt, mʉt ko yʉ Nindsʉn'a̱jtʉm Dios kudʉ'xánʉp, es yajkutúktʉt winʉ xʉʉ winʉ tiempʉ.
\s Tsojk ja Kristʉ myina̱'a̱ñ
\p
\v 6 Nétʉdsʉ anklʉs xy'anma̱a̱y:
\p —Tya̱dʉ ayuk, tʉy'a̱jtʉnʉ'ʉ es mba̱a̱t xymyʉbʉktʉ. Pa̱a̱dyʉ Nindsʉn'a̱jtʉm Dios di'ibʉ wyinma̱'a̱ñmyeepy ja kyuga̱jxpʉty, yʉ'ʉ tʉ tkexy ja 'yanklʉs es yajtuk'ixa̱'a̱ndʉ ja myʉduumbʉty di'ibʉ tsojk tunán jatánʉp.
\p
\v 7 Dʉ'ʉn ja Jesukristʉ jyʉna'añ:
\p —¡Mʉdoo'íttʉ! ¡Tsojkʉts nmina̱'a̱ñ!
\p ¡Jotkujk di'ibáty pyaduundʉp ja n'ʉxpʉjkʉnʉts di'ibʉ ijtp kʉxja̱'a̱y ma̱ tya̱dʉ neky!
\p
\v 8 Ʉj Fwank. N'ijx nmʉdoots tʉgekyʉ tya̱a̱dʉ. Es kots n'ijxta̱a̱y nmʉdooda̱a̱y, taats nnaygyoxtʉna̱a̱ydyákʉ anklʉs tyeky'ʉjxy di'ibʉdsʉ naty tʉ xytyuk'ixy, es nja''awdatáñʉts.
\v 9 Per yʉ'ʉts xy'anma̱a̱y:
\p —Kátʉts xy'awdaty. Nmʉdiimbyʉts ja Dios, éxtʉm mij, es éxtʉmʉ mmʉgu'ugʉty di'ibʉ Dios ja 'yayuk kya̱jxwa̱'xʉdʉp, es nidʉgekyʉ di'ibáty pyaduundʉp ja Diosʉ 'yʉxpʉjkʉn di'ibʉ ijtp kʉxja̱'a̱y ma̱ tya̱dʉ neky. ¡Awdat ja Dios!
\p
\v 10 Es ja anklʉs xy'ak'anma̱a̱yʉts:
\p —Ka̱jxwa̱'x yajxónʉ tya̱dʉ Diosʉ 'yʉxpʉjkʉn. Katʉ xykyuyu'utsy, mʉt ko tʉ dʉn tyimpatypy ja tiempʉ ma̱ yajkuydyuna̱'a̱ñ.
\v 11 Pʉ́nʉty axʉʉk adʉ́tstʉp, wa'anʉ dʉ'ʉn t'aktimtuun'adʉ'ʉtstʉ; es pʉ́nʉty pyanʉjxtʉp ja ka'oybyʉ winma̱'a̱ñ, wa'anʉ dʉ'ʉn t'aktimpanʉjx'adʉ'ʉtstʉ; es pʉ́nʉty pyanʉjxtʉp ja tʉy'a̱jtʉn, wa'anʉ dʉ'ʉn t'aktimpanʉjx'adʉ'ʉtstʉ; es pʉ́nʉty kyuydyuundʉp ja Diosʉ wyinma̱'a̱ñ, wa'anʉ dʉ'ʉn t'aktimkuydyuun'adʉ'ʉtstʉ.
\p
\v 12 Dʉ'ʉnʉ Jesukristʉ jyʉna'añ:
\p —¡Tsojkʉts nmina̱'a̱ñ! Es kots nmínʉt, nmo'oya'añʉts nidu'uk nidu'uk éxtʉm pyaadyʉty wi'ixáty tʉ jyiky'attʉ.
\v 13 Ʉjtsʉ dʉ'ʉn éxtʉm ja A es éxtʉmʉ Z, ʉjtsʉ dʉ'ʉn ja jawyiimbʉ es ja tim okpʉ. Ʉjtsʉ dʉ'ʉn di'ibʉ tʉgekyʉ yajtsondák, es ʉjtsʉ dʉ'ʉn nandʉ'ʉn di'ibʉ ya''abatʉdyaapy.
\v 14 Jotkujkʉdyʉ taadʉty di'ibáty tʉ tpujtʉ yajxónʉ wyit, ja'a njʉna̱'a̱nʉm di'ibʉ tʉ jyodʉmbittʉ es tʉ tmastu'uttʉ ja pyojpʉ. Yʉ'ʉdyʉ dʉn je'eyʉ pátʉdʉp tyʉ́kʉt ma̱ tadʉ ka̱jpn es tjʉ'xʉt ja ujts tʉʉmp di'ibʉ yajkypy ja jiky'a̱jtʉn winʉ xʉʉ winʉ tiempʉ.
\v 15 Mʉt ko ni na̱'a̱ mba̱a̱t kyatʉ́kʉdʉ jap di'ibʉ myʉda̱jttʉp ja axʉk winma̱'a̱ñ, yʉ brújʉty, mʉ'induumbʉty, yajja̱'a̱y'o'kpʉty, yʉ di'ibʉ 'yawda̱jttʉp di'ibʉ kyaj Dyiósʉty, es di'ibáty tsyojktʉp tyuundʉp ja andakʉn.
\p
\v 16 ’Ʉj Jesús, tʉts ngexy ja n'anklʉs es t'awánʉt nidʉgekyʉ ja mʉbʉjkpʉtʉjk ma̱ ñaymyúkʉdʉ. Ʉjtsʉ dʉ'ʉn ja Davitʉ tyʉʉmp 'ya̱a̱ts, es ʉjtsʉ dʉ'ʉn éxtʉmʉ jayxyʉʉ di'ibʉ móñʉm pʉdsʉʉmp.
\p
\v 17 Yʉ Espíritʉ Santʉ esʉ Borreegu'ungʉ ñʉdo'oxy, ja'a njʉna̱'a̱nʉm ja ja̱'a̱y di'ibʉ myʉbʉjktʉp ja Jesukristʉ, ja'a jʉnándʉp:
\p —¡Min!
\p Es di'ibʉ myʉmʉdeepy, wa'an nandʉ'ʉn tjʉna̱'a̱ñ:
\p —¡Min!
\p Es di'ibáty tʉ́tsʉdʉp, wa'an tmindʉ es t'axá̱jʉdʉt nadʉ'ʉñʉ ja nʉʉ di'ibʉ yajkypy ja jiky'a̱jtʉn winʉ xʉʉ winʉ tiempʉ.
\p
\v 18 Ʉj n'anmaabyʉts nidʉgekyʉ di'ibáty myʉdoo'ijttʉp yʉ Diosʉ 'yayuk di'ibʉ ijtp kʉxja̱'a̱y ma̱ tya̱dʉ neky, pʉn ja pʉ́n tnikóñ yʉ tya̱a̱dʉ di'ibʉ ijtp kʉxja̱'a̱y, Dios nandʉ'ʉn niko'onxʉdʉp ja 'yayo'on di'ibʉ ijtp kʉxja̱'a̱y ma̱ tya̱dʉ neky.
\v 19 Es pʉn ja pʉ́n oynʉ'ʉnʉn tpuwitsy yʉ ayuk di'ibʉ ijtp kʉxja̱'a̱y ma̱ tya̱dʉ neky, Dios nandʉ'ʉn puwijtsxʉdʉp di'ibʉ naty pátʉp tjʉ'xʉt ja kepytyʉʉmp di'ibʉ yajjiky'a̱jtp, es kyaj tyʉ́kʉt ma̱ ja Diosʉ kya̱jpn. Yʉ kepytyʉʉmp esʉ Diosʉ kya̱jpn kʉxja̱'a̱y 'yity ma̱ tya̱dʉ neky.
\p
\v 20 Di'ibʉ tya̱a̱dʉ ñigajxypy, dʉ'ʉn jyʉna'añ:
\p —Tsojkʉts nmina̱'a̱ñ.
\p Es nandʉ'ʉnʉts njʉna̱'a̱ñ:
\p —Wa'an dʉ'ʉnʉty. ¡Min, Nindsʉn'a̱jtʉm Jesús!
\p
\v 21 Wa'anʉ Nindsʉn'a̱jtʉm Jesús tkunu'xtʉ nidʉgekyu ja Diosʉ jya'ayʉty.