\id MRK Mundurukú [myu] NT (Brazil) - -2010 b☺d 
\h Marcos
\toc1 Marcos emudupmubararaktup
\toc2 Marcos
\mt JESUS CRISTO MUWẼG̃APTUP- -MARCOS EMUDUPMUBARARAKTUP
\c 1
\s João Batista waraꞌacat awẽwẽap ekawẽn
\p
\v 1 Ijoptup pe ibararak opop Jesus Cristo ekawẽn- -kawẽn idipat ekawẽn- -Deus ipot ekawẽn. 
\v 2 Ixe oꞌjebapuk ijodi apẽn Deus ekawẽn muwẽnuwẽnꞌukat emudupmubararaktup ekawẽn tag̃- -Isaías emudupmubararaktup ekawẽn tag̃.
\mi Deus oꞌe: wemumuju og̃uju ewap emubapuk am ewebeam, i. 
\v 3 Ixe wemumuju jewãwãwãm ukꞌaꞌũmat pe: E juy epesuemudim wuykukukat kap am, iꞌeꞌem. Epesuemucũg̃cũg̃ cuy ixe em, iꞌeꞌem.
\m
\v 4 Ibo ekawẽn tag̃ João Batista oꞌjebapuk ukꞌaꞌũmat pe. Oꞌjebapuk ijodiat mubatisasan, Deus ekawẽn muwẽnuwẽn tak.
\p — Ikẽrẽat mujurũg̃rũg̃ap cuy epeyepere — ioꞌe ijodiat pe. — Epeyewemubatisaan cuy “Ikẽrẽat oꞌgujurlug̃ g̃u g̃asũ bit” iꞌe am soat pe. Imẽn eyꞌe buje, Deus ikẽrẽat juꞌuk eywebewi — ioꞌe.
\p
\v 5 Ade ma oꞌju João kay cekawẽn co am. Judéia eipi beayũ oꞌju, Jerusalém ka beayũ dak.
\p — Ikẽrẽat cuk adi og̃ujurũg̃rũg̃ — ioꞌe ip. — G̃asũ bit cuy og̃ujurũg̃ g̃u — ioꞌe ip.
\p Imẽnpuye ip oꞌg̃ubatisaan Jordãodi be. 
\v 6 Ixe João doti camelodap mug̃ẽg̃ẽ. Yukpumũnpu kug̃ oeku ixee mug̃ẽg̃ẽ. Arobidadek puximat oꞌoꞌuk osunuy. Eit kog̃ũfpi dag̃at oꞌoꞌuk tak osunuy João. 
\v 7 Imẽn oꞌe ijodiacat pe:
\p — Waraꞌat omuyku onomukadi. Ixe g̃u itaybitbit cĩcã obode ma. Owebe bit suiukꞌuk paꞌore kaꞌũma ma õn puye — ioꞌe. 
\v 8 — Idibi be õn eymubatisasan. Ixe bit Ibiõg̃buk xipacat g̃uõm eywebe eykukan — ioꞌe.
\p
\v 9 Jesus oajẽm João kay. Nazaré ka bewi oꞌjẽm- -Galiléia eipi beatka bewi, ikaꞌĩtcatka bewi. Oajẽm João kay jemubatisan am. João Jesus oꞌg̃ubatisan Jordãodi be. 
\v 10 Idibi dag̃wi jeu isum kabi ikoce oꞌjojojo. Deus biõg̃buk oꞌjojojo. Pukaso buxim oꞌkop jekay. 
\v 11 Deus oꞌjekawẽn kabi kadiwi.
\p — Okpot ẽn- -oxe ikukpin cĩcãat! — ioꞌe. — Ocokcok cĩcã ekay — ioꞌe Jesus pe. 
\p
\v 12 G̃ebuje Deus biõg̃buk Jesus oꞌg̃uju ukꞌaꞌũmat kay. 
\v 13 Quarenta kabia bun oeku iboce. Satanás teꞌe ma ikẽrẽat oꞌg̃ujurũg̃at cebe. Puca dak oeku iboce- -ikaꞌuayũ. Deus ekawẽn tojotjotꞌukayũ bit oajẽm Jesus buywan. Ibuywatwan ip osodop.
\p
\v 14 Daomũnmũnapꞌa be ip João muõm puje, Jesus Deus ekawẽn muwẽnuwẽn oꞌe. Galiléia eipi dag̃ oeku imuwẽnuwẽn. Kawẽn idipat muwẽnuwẽn oeku soat kaka dag̃.
\p
\v 15 — G̃axĩn ma Deus soat ijodiacat kukukan jeꞌe — ioꞌe. — Ixe be soat kukukat iap ehora oajẽm. Imẽnpuye ikẽrẽat mujurũg̃rũg̃ap cuy epeyepere! Eyetabun cuy kawẽn idipat kaywuydaxijojoap ekawẽn kay — ioꞌe.
\p
\v 16 G̃ebuje Jesus xepxep axima bubuꞌukayũ oꞌjojojo. Galiléiadi wãbu dag̃ cũg̃cũg̃ pima ip oꞌjojojo iodi wãbu dag̃. Simão oꞌjojojo, André dak. André Simão kitpit osunuy. Axima bubum ip osodop ũrũm. 
\v 17 Jesus oꞌe cebe ip:
\p — Epesot cuy oweju — ioꞌe. — Axima bubuꞌukayũm cuk adi epesop. G̃asũ bit kawẽn idipat epeg̃uwẽnuwẽn ijodiat pe imutabun ip okay — ioꞌe.
\p
\v 18 Imẽnpuye ip dao ma jẽg̃rũ oꞌsuiwat axima bubuap. Jesus eju ix oꞌju.
\p
\v 19 Bosusu oꞌju g̃ebuje Jesus. Xepxep oꞌjojojo- -Tiago, João dak. João Tiago kitpit osunuy. Zebedeu ipotpoyũ osodop ip. Jekobe be ip osodop axima bubuap muwaketken axima bu ojuy. 
\v 20 Ijo isum ma Jesus oꞌtomuwã ip.
\p — Epesop cuy oweju — ioꞌe.
\p Jebay oꞌsuiwat ip. Ceweju ip kapikpikꞌukayũ dak oꞌsuiwat ip jebay xe kobe be. Jesus eju ip oꞌju soat em jeku am ceweju.
\p
\v 21 Jesus oꞌju Cafarnaum ka kay ebadipdipayũ eju- -jeweju etaybitbinayũ eju.
\p Jebodoydoyap kabia bima oõm ip Judeuyũ eꞌaweroroapꞌa be- -Deus eju kawẽnwẽnapꞌa be. Ig̃oꞌa beayũ oꞌg̃utaybinbin.
\p
\v 22 — Idim cĩcã teku wuymutaybitbin! — ioꞌe ip. — Moisés ekawẽn wuymutaybitbinꞌukayũ buxim g̃u ite wuymutaybitbin. Wuyeajojoyũꞌũmꞌũm aꞌõbi wuymutaybitbin ixeyũ ma. Jesus pit jaꞌõbi ma wuymutaybitbin — ioꞌe ip jewewebe.
\p
\v 23 G̃ebuje ag̃okatkat oõm ig̃oꞌa be ibiõg̃buk kẽrẽat kukat. Ibiõg̃buk kẽrẽat cebe osunuy. Oꞌjewãwã yaꞌõberen Jesus kay. 
\p
\v 24 — Jesus, Nazaréka bewiat, apẽn ẽn em ocewebe? — ioꞌe. — Ocemuyꞌũm tu ejot? — ioꞌe. — Wetaybit abu ẽn iam. Ẽn Deus emumudot. Ikẽrẽat kug̃ g̃u ẽn- -soat tag̃ eisu — ioꞌe.
\p
\v 25 Imẽnpit Jesus ibiõg̃buk kẽrẽat oꞌg̃ukorẽm.
\p — Ecemũg̃ cuy! — ioꞌe. — Ejẽm cuy cebewi! — Jesus oꞌe.
\p
\v 26 G̃ebuje ibiõg̃buk kẽrẽat ag̃okatkat oꞌg̃ukutukutu jĩjã. Oꞌjewãwãwã yaꞌõberen. Oꞌjẽm cebewi. 
\v 27 Imẽnpuye oꞌjojojoꞌiayũ oꞌjewetakaka jĩjã ip.
\p — Ajo sute? — ioꞌe ip. — Yaꞌõbuyxiat teku! — ioꞌe ip. Ibiõg̃buk kẽrẽat kũyjobit ixe aꞌõ kay. Ixe itaybit ibiõg̃buk kẽrẽat mujẽm ãm wuyjuyũ jebit pewi! — ioꞌe ip. — Kawẽn iisuan tu ite wuymutaybitbin? — ioꞌe ip jewewebe.
\p
\v 28 Imẽneju soat Galiléia eipi dag̃ayũ Jesus awẽg̃ oꞌyawẽg̃coco ip.
\p
\v 29 G̃ebuje Jesus oꞌjẽm ig̃oꞌa bewi. Oꞌju Simão dukꞌa kay, André dukꞌa kay. Pũg̃ꞌa ukꞌa iwat osodop ip- -Simão, André dak. Oꞌju Tiago eju, João eju dak. 
\v 30 Simão daxijo ipaꞌi jĩjã opop.
\p — Simão daxijo ipaꞌi jĩjã — ioꞌe ip Jesus pe.
\p
\v 31 Jesus oꞌju cekay. Oꞌsubaixik. Oꞌg̃uꞌag̃obucẽg̃. Ipaꞌiat oiꞌũm g̃ebuje bit. Xipat oꞌe. Ipaꞌi topibit ixan oꞌg̃ũm cebe ip- -Jesusyũ be.
\p
\v 32 Katpuje ade iwãtaxipipiayũ oꞌtujowat Jesus kay ibo ka watwat. Axik kukukayũ dak oꞌtujowat cekay. 
\v 33 Soat ag̃oka watwat oꞌjeꞌawero ip ukꞌa esũntabi be.
\p
\v 34 G̃ebuje Jesus oꞌg̃uꞌadaꞌada ip iwãtaxipipiayũ. Kiiiih. Ade osodop ip iwãtaxipipiayũ. Soat iwarururu osodop iwãtaxipi cexe ip. Ade axik oꞌg̃ujẽmjẽm cebewi ip. Itaybit axik osodop ip Jesus Deus emunaẽ iam. Jesus pit ixeyũ be oꞌg̃uwẽnat g̃u.
\p — Abu õn iam cuy epeg̃ukũyjo g̃u ip — ioꞌe cebe ip.
\p
\v 35 G̃ebuje Jesus oꞌkop kuyg̃u. Kaxi jẽm awap oꞌkop. Oꞌjẽm ukꞌa bewi. Oꞌju ukꞌaꞌũmat kay. Iboce oꞌjekawẽn Deus eju.
\p
\v 36 G̃ebuje Simão oꞌjẽm ukꞌa bewi. Oꞌju Jesus kudadam, cewejuayũ dak. Oꞌtobuxik ip.
\p
\v 37 — Soat ijoceayũ ekudadam! — ioꞌe ip cebe.
\p
\v 38 — Ijoce g̃u og̃uy — ioꞌe Jesus pit. — G̃aꞌa juy waraꞌat ka watwat kay — ioꞌe. — Kawẽn idipat muwẽn pin õn waraꞌat ka watwat pe. Ixeyũ be dak ojot imuwẽn ãm — Jesus oꞌe cebe ip.
\p
\v 39 Ibocewi soat kaka dag̃ oekuku ip Jesusyũ- -Galiléia eipi dag̃. Deus ekawẽn muwẽnuwẽn oekuku ip Judeuyũ eꞌaweroroapꞌa be- -Deus eju kawẽnwẽnapꞌa be. Axik mujẽmujẽm oekuku ip ibo eipi watwat pewi.
\p
\v 40 Ag̃okatkat oajẽm Jesus kay ierepat. Oꞌjẽg̃ꞌaecõg̃cõg̃ cewap Jesus yaꞌõbuyxiat puye.
\p — Omuꞌada pin pima, ibaꞌore g̃u ewebe — ioꞌe Jesus pe.
\p
\v 41 G̃ebuje Jesus itabotaidabotbot oꞌe ierepat kay. Oꞌjebaepacũg̃ cekay. Oꞌg̃ucay.
\p — Emuꞌada pin õn — ioꞌe. — Kuy õn emuꞌada — ioꞌe.
\p
\v 42 Ierep tũibit oꞌjeꞌada g̃ebuje bit. Xipat oꞌe.
\p
\v 43 — Edukꞌa kay juy ecepit — ioꞌe Jesus yaꞌõpurug̃ cebe. 
\v 44 — Eꞌadaap cuy eg̃uwẽn g̃u wararaꞌacat pe — ioꞌe. — Paĩ kay juy eju — ioꞌe. — Ecewemubapuk cebe — ioꞌe. — Xepxem cuy pukaso eg̃ũm paĩ be Moisés ekawẽn tag̃. Imẽn eceꞌe soat ijoceayũ itaybit am Jesus ierepat oꞌg̃uꞌada iam. Ẽn pit eg̃uwẽn g̃u eꞌadaap. Paĩ ma juy g̃uwẽn eꞌadaap — ioꞌe ierep topibit pe.
\p
\v 45 Imẽnpit ierep tũibit kũyjobitꞌũm osunuy. Jesus aꞌõ kay g̃u osunuy. Oꞌjẽm Jesus xewi. Jeꞌadaap oꞌg̃uwẽnuwẽn soat pe jebureyũ be. Imẽnpuye soat kaka dag̃ oꞌyawẽg̃cu ceꞌadaap awẽg̃. Imẽnpuye Jesus pe ibapug̃ ceku baꞌore oꞌe ikabog̃atka be. Ukꞌaꞌũmat tag̃ acã oeku. Ade maꞌg̃u oꞌju ip cekay soat kaka dag̃wi jeꞌadaap ojuy.
\b
\c 2
\p
\v 1 Xepxep kabia kap puje, Jesus oꞌjepit Cafarnaum ka kay.
\p — Jesus jedukꞌa be omuy — ioꞌe ibo ka beayũ jewewebe.
\m
\v 2 Imẽnpuye adeayũ oꞌjeꞌawero ip Jesus dukꞌa etakobe. Kaꞌũmg̃u topap oꞌe wararaꞌacat pe iõm ãm ukꞌa be. Ade osodop ip ukꞌa be, ukꞌa esũg̃tabi xe dak. Jesus Deus ekawẽn ixeyũ mukũyjojom oꞌe. 
\p
\v 3 G̃ebuje ebadipdip ag̃okatkayũ oajẽm Jesus kay. Jebure dujuajẽm ojuy ip- -ijebit eꞌũat. 
\v 4 Imẽnpit tujuajẽm paꞌore oꞌe ip Jesus kay ade jĩjã Jesus akokoreren ip puye. Imẽnpuye ebadipdipayũ oꞌjeu ukꞌa abi jeje. Ukꞌa ip oꞌyabimutok Jesus ase. Ijebit eꞌũat oꞌg̃ukop ip ixexecap pe. Oꞌg̃ukop ip Jesus wap.
\p
\v 5 — Teyũku itabut okay — ioꞌe Jesus jewebe ma.
\p G̃ebuje Jesus oꞌjekawẽn ijebit eꞌũat pe.
\p — Tapu, ikẽrẽat kuy ojuꞌuk ewebewi — ioꞌe.
\p
\v 6 Pũg̃pũg̃ Moisés ekawẽn imutaybitbinꞌukayũ kaxikxikꞌi osodop ip iꞌgoꞌa be. Jewag̃uydadam osodop ip.
\p
\v 7 — Teku napa ma eꞌem! — ioꞌe ip jewewebe. — “Deus coꞌi õn,” i napa ma teku eꞌem — ioꞌe ip. — Abu-be ikẽrẽat uk put wuywebewi- -Deus pe acã — ioꞌe ip jewewebe.
\p
\v 8 Jesus itaybit oꞌe apẽn jewag̃uydadam ip oꞌe iam.
\p — Apẽnpuye dak eyju imẽn jewag̃uydadam? — ioꞌe. 
\v 9 — “Ikẽrẽat ojuꞌuk ewebewi,” i kuy oce cebe — ioꞌe. — Imẽnpit eyetabut g̃u ikẽrẽatꞌuk put owebe iap kay — ioꞌe. — “Eꞌãy,” i oce ibima, “Ecexĩg̃xĩg̃,” i dak, “Exexecap cuy etujuxe edukꞌa be,” i dak, eyetabut g̃u kuka epeꞌe okay — ioꞌe. 
\v 10 — Soat wag̃o õn — ioꞌe. — Waꞌõbi teku og̃uꞌada. Imuꞌadaap co buje, “Jaꞌõbi ma teku oꞌg̃uꞌada,” i epeꞌe — ioꞌe cebe ip.
\p
\v 11 G̃ebuje Jesus oꞌjekawẽn ijebit eꞌũat pe.
\p — Eꞌãy — ioꞌe cebe. — Exexecap cuy ejat — ioꞌe. — Eju juy edukꞌa be — ioꞌe Jesus cebe.
\p
\v 12 G̃ebuje ijebit eꞌũ topibit oꞌãy. Jexexecap oꞌjat. Oꞌjẽm soat etabun. Imẽneju soat itabẽg̃bẽg̃ oꞌe ip ijojom.
\p — Ajojojo g̃u buk imẽg̃at — ioꞌe ip jewewebe — Kaꞌũmg̃u xipacat Deus coꞌiat — ioꞌe ip.
\p
\v 13 Jesus waram oꞌjẽm. Oꞌju iodi kay- -Galiléiadi kay. Adeayũ oꞌju ikudadam. Oꞌtobuxik ip. Ixeyũ mutaybitbin oꞌe.
\p
\v 14 Kapkam pima Jesus Levi oꞌjojojo. Levi Alfeu ipot osunuy. Iecug̃ap edinheiro bubuꞌukat osunuy. Xikꞌi osunuy dinheiro bubuapꞌa be.
\p — Ejot. Oweju ejeku — Jesus oꞌe cebe.
\p Levi oꞌjẽm dinheiro bubuapꞌa bewi. Oꞌju Jesus eju.
\p
\v 15 G̃ebuje Jesus oꞌju Levi dukꞌa kay. Oꞌjekõn ceweju. Ade iecug̃ap edinheiro bubuꞌukayũ awerom osodop ip ig̃oꞌa be. Jekõnkõn ip oꞌe Jesus eju, ceweju etaybitbinayũ eju dak, ade ikẽrẽat mug̃ẽg̃ẽꞌukayũ dak. Ade jĩjã osodop ip Jesus eju jekukuꞌukayũ. 
\v 16 Pũg̃pũg̃ Fariseuyũꞌin ixeyũ oꞌjojojo- -Moisés ekawẽn imutaybitbinꞌukayũ. Ikẽrẽan eꞌeꞌukayũ eju Jesus jekõnkõn oꞌe iap oꞌjojojo ip- -iecug̃ap edinheiro bubuꞌukayũ eju iap tak.
\p — Apẽnpuye ekariwa jekõnkõn ikẽrẽat mug̃ẽg̃ẽꞌukayũ eju, iecug̃ap edinheiro bubuꞌukayũ eju dak? — ioꞌe ip Jesus eju etaybitbinayũ be. Imẽn xipat g̃u — ioꞌe ip.
\p
\v 17 Iboap co buje, Jesus oꞌjekawẽn ceweju ip.
\p — Iwãtaxipiꞌũmayũ bit wuyanũg̃tataꞌukat kay jeꞌju g̃u- -iwãtaxipipiayũ acã — ioꞌe. — Imẽnpuxim õn tak jewexe xipacayũ nomuwã ãm g̃u ojot- -xipatꞌũmayũ nomuwã ãm acã. Ikẽrẽat uk am ixeyũ bewi ojot — ioꞌe.
\p
\v 18 Koap pima João Batista eju etaybitbinayũ jekpiwan ma jewemureren ip osodop Deus eju kawẽn ãm, Fariseuyũ dak. Imẽnpuye ade oꞌju Jesus kay.
\p — João eju etaybitbinayũ jekpiwan ma jewemureren Deus eju kawẽn ãm, Fariseuyũ eju etaybitbinayũ dak — ioꞌe ip. — Eweju etaybitbinayũ bit jekõnkõn. Apẽnpuye dak? — ioꞌe ip cebe.
\p
\v 19 G̃ebuje Jesus oꞌjekawẽn ceweju ip.
\p — Oweju etaybitbinayũ jekõnkõn, õn ceweju ip puye — ioꞌe. — Tomuwãꞌibiyũ cucum pima jewebumũnap epeta kay, jekõnkõn cĩcã ip. Iwadip cexe ip pima, jekõnkõn cĩcã ip — ioꞌe. 
\v 20 — G̃uyjom pit iwadip juꞌuk ip ceparakpewi — ioꞌe. — Iꞌuk puje, jekõn g̃u ip — ioꞌe. — Imẽnpuxim, õn ixeyũ ejuꞌũm pima, oweju etaybitbinayũ jekpiwan ma jewemuren ip Deus eju jekawẽn ãm — ioꞌe. 
\v 21 — Pag̃o iisuat ajoinũm g̃u toti iorokat eju- -iwekwekat eju imuwaket am — ioꞌe Jesus. — Pag̃o iisuat inũm puje pag̃o iorokat eju, big̃ ma kuka oꞌjewekwek. Iwekat big̃ ma kuka oꞌe yobog̃ — Jesus oꞌe maꞌg̃uto. 
\v 22 — Uvaꞌabidi tiisuati atimuõm g̃u ixee mug̃ẽg̃ẽꞌa be- -timũnꞌa be- -yaokokatꞌa be — ioꞌe. — Yaokokatꞌa be tiisuati muõm puje, kuka oꞌjeaepaw. Uvaꞌabidi kuka oꞌjediepuy. Uvaꞌabidi mũnꞌa dak kuka oꞌjeaewenõmnõm. Imẽnpuye tiisuati atimuõm timũnꞌa be yaisuatꞌa be — ioꞌe Jesus.
\p Iboam eꞌem pima, “Wekawẽn pag̃o iisuat puxim, uvaꞌabidi tiisuati buxim tak” iꞌe ojuy osunuy.
\p
\v 23 G̃ebuje Jesus kapkam oꞌe trigodip tag̃ Sábado kabia be- -jebodoydoyap kabia be. Kapkam oꞌe jeweju etaybitbinayũ eju. Kapkam pima ceweju etaybitbinayũ oꞌtadotꞌuk, jere buye. 
\v 24 Imẽnpuye Fariseuyũ oꞌjekawẽn Jesus eju.
\p — Akꞌi juy ece! — ioꞌe ip. — Eweju etaybitbinayũ kapikpig̃ Sábado kabia be! Trigo dadot ukꞌug̃ ip! — ioꞌe ip. — Cũg̃ g̃u eꞌem ip! — ioꞌe ip. — Imẽn eꞌem Moisés ekawẽntup: jebodoydoyap kabia be juy epeyekapik g̃u, i — ioꞌe ip.
\p
\v 25 G̃ebuje Jesus oꞌjede Fariseuyũ be.
\p — Epetupcoco g̃u du apẽn Davi oꞌeꞌe iaptup- -Deus ekawẽntup? — ioꞌe cebe ip. — Ire bima, Davi oõm Deus eju kawẽnwẽnapꞌa be jebureyũ eju. 
\v 26 Ixe kabia be Abiatar paĩyũ kukukat osunuy. Pãoꞌa oꞌyaꞌo Daviyũ- -ig̃o beatꞌa- -Deus etabixe oꞌyamõg̃ ipi iatꞌa. Moisés ekawẽntup eꞌem: Deus etabixeatꞌa yaꞌopi, i — ioꞌe. — Paĩyũ be acã yaꞌopi g̃u — iꞌeꞌem Deus ekawẽntup — ioꞌe. — Imẽnpit Davi oꞌyaꞌo, paĩ g̃u maꞌg̃u. Oꞌyaũm jebureyũ be dak — ioꞌe. — Deus pit “Ekẽrẽ oxe,” ioꞌe g̃u cebe yaꞌo buje. Apẽnpuye dak eyju eꞌem owebe “Eweju etaybitbinꞌukayũ cũg̃ g̃u eꞌem,” i? — ioꞌe Jesus. 
\v 27 — Teꞌe g̃u Deus oꞌe: Pũg̃ kabia be juy epeyekapik g̃u, i. Imẽn ixe oꞌe ijodiat ebodoy am — ioꞌe. 
\v 28 — Soat wag̃o õn. “Epeyekapik cuy,” i õn eꞌem pima Sábado kabia be dak, cedag̃ kuka oꞌe Deus xe — Jesus oꞌe.
\b
\c 3
\p
\v 1 Sábado kabia be Jesus oõm maꞌg̃uto Judeuyũ eꞌaweroroapꞌa be- -Deus eju kawẽnwẽnapꞌa be. Ig̃oꞌa be ag̃okatkat osunuy. Pũg̃bũnũꞌa oꞌsubũnũꞌanũy ibũnũꞌakẽrẽ. 
\v 2 Fariseuyũ oꞌjeak cĩcã Jesus kay Jesus ibũnũꞌa kẽrẽat g̃uꞌada paxi jebodoydoyap kabia be iap com. Jesus muymuy ojuy ip. “Moisés ekawẽn tag̃ g̃u ẽn jekukum” iꞌe ojuy ip Jesus pe. “Jesus kapikpig̃ jebodoydoyap kabia be- -Sábado kabia be” iꞌe ojuy ip Jesus muymuy am.
\p
\v 3 — Ejot cuy ijoce — Jesus oꞌe ibũnũꞌa kẽrẽat pe.
\p
\v 4 Jesus oꞌjekawẽn Fariseuyũ eju g̃ebuje bit.
\p — Wuyeaypapayũꞌũmꞌũm xe cedag̃ tu osunuy wuywebe xipacat mug̃ẽ ãm jebodoydoyap kabia be? — ioꞌe cebe ip. — Cũg̃ g̃u xeꞌe wuywebe ikẽrẽat mug̃ẽ ãm? Cedag̃ tu wararaꞌacat aoka am? Cedag̃ g̃u xeꞌe wararaꞌacat daxijo am Sábado kabia be? — ioꞌe.
\m Mũg̃. Oꞌjemũg̃ ip. Cede baꞌore ip oꞌe.
\p
\v 5 G̃ebuje Jesus oꞌjeak cekay ip. Itakoma oꞌe cekay ip, Fariseuyũ itabotaidabotbotꞌũm ibũnũꞌa kẽrẽat kay buye. Ig̃uycũg̃ tak oꞌe ibuꞌu ip jemutaybin jekawẽn puye.
\p — Payaꞌi ece ebu! — ioꞌe ibũnũꞌa kẽrẽat pe.
\p G̃ebuje oꞌjewebumupaya. Ibũnũꞌadip oꞌe. 
\v 6 Imẽnpuye Fariseuyũ oꞌjẽm yabewi. Oꞌjewede ip Jesus xewi. Oꞌjeꞌawero ip Herodes ebekitkit eju- -Judeuyũ kukukat ebekitkit eju. Oꞌjewawẽ ip Jesus aoka am kapikpig̃ Sábado kabia be buye.
\p Jesus oꞌju iodi wãbu be jeweju etaybitbinꞌukayũ eju- -Galiléiadi wãbu be.
\p
\v 7 G̃ebuje ade oꞌju ip Jesus kay. Soat ka dag̃wi oꞌju ip: Galiléia eipi dag̃wi, Judéia eipi dag̃wi dak, 
\v 8 Jerusalém ka bewi dak, Iduméia eipi dag̃wi dak, Jordãodi wĩnãbu wi dak, Tiro ka tẽg̃atka bewi dak, Sidom ka tẽg̃atka bewi dak. Jesus idipat oꞌg̃ug̃ẽ iam oꞌjekũyjo ip. Imẽnpuye ade jĩjã ma oꞌju ip cekay. Kiiiih. 
\v 9 Jesus oꞌjekawẽn jeweju etaybitbinꞌukayũ eju.
\p — Kobe epeg̃udim owebeam adeayũ be omukug̃ap puxim — ioꞌe cebe ip.
\p
\v 10 Kuy bima Jesus ade ma oꞌg̃uꞌadaꞌada. Imẽnpuye soat iwãtaxipipiayũ ajẽm ojuy ip osodop imucay ojuy.
\p — Omuꞌada paxi ixe? — ioꞌe ip jewebe ma.
\p
\v 11 Jesus dobuxik puje ip ibiõg̃buk kẽrẽayũ kukukayũ oꞌjẽg̃ꞌaecõg̃cõg̃ cewap “Teku yaꞌõbuyxiat,” iꞌeꞌem jewebe ma buye. Oꞌjewãwã ip yaꞌõberen:
\p — Ẽn Deus ipot — ioꞌe ip.
\p
\v 12 — Epeg̃uwẽn g̃u juy wararaꞌacat pe: “Teku Deus ipot” i — Jesus pit oꞌe yaꞌõpurug̃ cebe ip.
\p
\v 13 G̃ebuje Jesus oꞌjeu coꞌa dag̃. Jemukaypinayũ oꞌtaẽ jeweju jeku am. Oajẽm ip cexe. 
\v 14 12 beayũ oꞌtaẽ. 
\p — Soat em cuy epeku oweju — ioꞌe cebe ip. — Deus wuydaxijojom iap ekawẽn cuy epeg̃uwẽnuwẽn soat ka dag̃ — ioꞌe cebe ip. 
\v 15 — Waꞌõbacaap og̃ũm eywebe ibiõg̃buk kẽrẽat mujẽm ãm ikukukayũ bewi — ioꞌe.
\p
\v 16 Ibũrũ ma ibutet osodop ip- -taẽꞌibiyũ butet: Simão, i, Tiago i, João i 
\v 17-19 André i, Filipe i, Bartolomeu i, Mateus i, Tomé i, waraꞌat Tiago i, Tadeu i, Simão i, Judas iscariotes i. Ibũrũ ma ibutet ip. Jesus waraꞌat oꞌsubutetmõg̃ Simão buten. Waraꞌat ibutet Pedro i osunuy. João Tiago kitpit osunuy. Jesus waraꞌat oꞌsubutetmõg̃ João buten- -Tiago buten tak. Boanerges i waraꞌat ibutet ip osunuy. Boanerges ibaca ip xiririkiap puxim iape. Zebedeu ipotpoyũ ip osodop xepxep. Waraꞌat Tiago Alfeu ipot osunuy. Simão jeipi kay jĩjãat osunuy. Judas Iscariotes g̃uyjom Jesus oꞌg̃ũm cekay itakomaayũ be yaoka am. Ibũrũ ma osodop ip 12 beayũ- -Jesus emumujuyũ. 
\v 20 Ibocewi Jesus oꞌju jebure dukꞌa be.
\p Ade maꞌg̃uto oajẽm ip Jesus kay. Cekõn paꞌore oꞌe cebuxim ip, ceweju etaybitbinayũ dak. 
\v 21 Ibadipyũ iboam jekũyjo buje, oꞌju ip Jesus dujupit ojuy jedukꞌa be. Tũybe Jesus yakpidapin iãn oꞌe ip jekõnkõnꞌũm puye.
\p
\v 22 Moisés ekawẽn imutaybitbinꞌukayũ oajẽm cekay- -Jerusalém ka bewiayũ. Jesus ip oꞌjomuymuy adeayũ be.
\p — Jesus jekukum ibiõg̃buk kẽrẽayũ kukukat aꞌõbi- -Belzebu aꞌõbi- -Satanás aꞌõbi — i napa ma oꞌe ip Jesus muymuy. — Ixe jaꞌõbacaap ũmũm Jesus pe ibiõg̃buk kẽrẽat mujẽm ãm adeayũ bewi — ioꞌe ip napa ma.
\p
\v 23 Imẽnpuye Jesus jemuymuy ojuyayũ oꞌtomuwã jewekay- -Moisés ekawẽn imutaybitbinꞌukayũ. Oꞌjekawẽn ceweju ip. “Napa ma eyju eꞌem” iꞌe ojuy. Wuymutaybitbinap ekawẽn oꞌg̃uwẽn cebe ip.
\p — Satanás aꞌõbi g̃u õn imujẽmujẽm — ioꞌe. — Satanás owebe ibiõg̃buk kẽrẽat mujẽmujẽmãn pima, jebekitkit kuka juk ixe oꞌg̃ujẽm! Imẽnpit Satanás aꞌõbi g̃u õn imujẽmujẽm — ioꞌe. 
\v 24 — Pũg̃ ka kukat jebekitkit mujẽm puje, abu kuka oꞌe yaꞌõ kay? Kaꞌũma ma! — ioꞌe. 
\v 25 — Pũg̃ti watwat kukat jebekitkit mujẽm puje, abu kuka oꞌe yaꞌõ kay? Kaꞌũma ma! — ioꞌe. 
\v 26 — Imẽnpuxim Satanás jebekitkit mujẽm puje, abu kuka oꞌe yaꞌõ kay? Kaꞌũma ma! Imẽneju Satanás jaꞌõbacaap ũmũm g̃u owebe ibiõg̃buk kẽrẽat mujẽm ãm- -jebekitkit mujẽm ãm — ioꞌe Jesus. 
\v 27 — Wuyõm paꞌore wuykay isapkaꞌoreat tukꞌa be ibubut pu am. Imukirig̃ acã koam — ioꞌe. — Imukirik puje bit, wuyõm put soat pu am- -ukꞌa beat pu am — ioꞌe. — Imẽnpuxim Satanás aꞌõbacaap muꞌũmꞌũm pima, ibaꞌore kuka oꞌe wuywebe Satanás ebekitkit aꞌõbacaap muꞌũm ãm — ioꞌe Jesus.
\p
\v 28 — Icẽmãn õn eꞌem eywebe — ioꞌe Jesus. — Wuywebe ikẽrẽat mug̃ẽ buje, Deus iboap juꞌuk wuywebewi- -ikẽrẽat juꞌuk — ioꞌe. — Wuywebe Deus muymuy buje dak, Deus iboap juꞌuk wuywebewi- -ikẽrẽat juꞌuk — ioꞌe. 
\v 29 — Wuywebe Deus biõg̃buk muymuy buje bit, Deus iboap juꞌuk g̃u wuywebewi. Iboap iꞌuk paꞌore Deus pe. Iboap kug̃ acesop soat em- -ikẽrẽat kug̃, ibiõg̃buk muymuyap kug̃ — Jesus oꞌe.
\p
\v 30 — Ẽn ibiõg̃buk kẽrẽat aꞌõbi jekukum — i juk oꞌe ip Jesus pe.
Imẽnpuye Jesus imẽn oꞌyaꞌõbu ip imukũyjojom ip.
\p
\v 31 Ixi oꞌju Jesus kay, ikitpitpit tak. Akiju osodop ip.
\p — Jesus etomuwã — ioꞌe ip kakijuayũ be. — Ceweju ocekawẽn pin — ioꞌe ip.
\m Kaxikxikꞌi osodop ip Jesus akokoreren akijuacat.
\p
\v 32 — Exi akiju omuy, ekitpitpit tak — ioꞌe ip Jesus pe. — Eweju cekawẽn pin ip — ioꞌe ip cebe.
\p
\v 33 — Icẽmãn ig̃o oxiat. Boyũku okitpitpicat — ioꞌe Jesus.
\p
\v 34 Jesus oꞌjeak jexeayũ kay. Oꞌjekawẽn ceweju ip. 
\p — Wararaꞌacayũ bit oxi joꞌi oxe, okitpitpit coꞌi dak — ioꞌe. 
\v 35 — Deus bikuyap tag̃ jekukuꞌukayũ okitpitpit coꞌi oxe, oĩxĩt coꞌi dak ip, oxi joꞌi dak ip — ioꞌe.
\b
\c 4
\p
\v 1 Jesus waram adeayũ oꞌg̃utaybin iodi wãbu be. Ade jĩjã oꞌjeꞌawero ip cexe. Imẽnpuye Jesus oõm kobe be. Oabik kobe bitakobu jeje iwãbu tẽg̃. Adeayũ bit kapurũg̃ pe osodop ip yaꞌĩjojom. 
\v 2 Wuymutaybitbinap ekawẽn oꞌg̃uwẽn Jesus. Ade oꞌg̃utaybin ip.
\p
\v 3 — Eyaꞌõpicũg̃cũg̃ cuy epesop waꞌõ kay — ioꞌe cebe ip. — Ag̃okatkat oꞌju jekat pe jekadai damuduudu am. 
\v 4 Tamududum pima xepxepta oꞌtaꞌat ipi ju e bitako dag̃ — ioꞌe.
\p — Wasũyũ oajẽm. Oꞌtaꞌoꞌo ip taduduata- -cekadaida- -e bitako dag̃ata — ioꞌe Jesus.
\p
\v 5 — Ibocewi waraꞌata oꞌtaꞌat karatũg̃ꞌa paraktag̃. Ade g̃u kaꞌwi oꞌe iboce. Ierũn ma oꞌe kaꞌwi. Dao ma oꞌtanõkap kaꞌwi ierũn puye — ioꞌe. 
\v 6 — Imẽnpit kaxiepi bima kaxie kadai oꞌg̃ukaraw. Oꞌg̃uyꞌũ. Oeꞌũ tãbuju baꞌore buye — ioꞌe.
\p
\v 7 — Waraꞌata oꞌtaꞌat widaoho parakpe. Yaypan pima widaoho kadai oꞌg̃uꞌũm. Oeꞌũ. Oꞌjewaꞌada g̃u — ioꞌe.
\p
\v 8 — Waraꞌata bit oꞌtaꞌat katõ be. Oꞌtanõkap. Xipan oꞌyaypan. Taꞌade oꞌe. Pũg̃pũg̃ kadai be taꞌadesũ oꞌe- -30 be oꞌe ta- -katõ peat. Waraꞌat kadai be taꞌade oꞌe- -60 be oꞌe ta. Waraꞌat kadai be taꞌade jĩjã oꞌe- -100 be oꞌe ta — ioꞌe.
Jesus imẽn wuymutaybitbinap ekawẽn oꞌg̃uwẽn.
\p
\v 9 — Wekawẽn eyetaybit pin pima, eyaꞌõpicũg̃cũg̃ cuy epesop waꞌõ kay — ioꞌe.
\p
\v 10 Adeayũ epit puje, pũg̃pũg̃ oꞌyaꞌĩjojoꞌiayũ oajẽm Jesus kay. 12 beayũ eju oajẽm ip.
\p — Ibaꞌarẽm ekawẽn ocexe — ioꞌe ip cebe. — Apẽn ocemutaybin ojuy eg̃uy kadaida mududuap ekawẽn muwẽnuwẽn? — ioꞌe ip.
\p
\v 11 — Kawẽn ibapukan õn eymutaybitbin — ioꞌe. — Ibapug̃ ma apẽn Deus soat ipi dag̃ayũ kukukan jeꞌe iap muwẽnuwẽn õn eywebe — ioꞌe. — Kuy bima iboam oꞌg̃utaybin g̃u. Wararaꞌacayũ mutaybitbin pit õn ibaꞌarẽmãn, waꞌõ kaykũy ip puye — ioꞌe. 
\v 12 — Ibaꞌarẽmãn õn ixeyũ mutaybitbin. Yaꞌĩjojom ip. Imẽnpit itaybit g̃u ip. Jekũyjojom ip. Imẽnpit wekawẽn paꞌarẽm cexe ip. Itaybit pima bit kuka juk ig̃uycũg̃ oꞌe ip ikẽrẽat kug̃ puye. Ikẽrẽat tak kuka juk oꞌjepere ip. Ikẽrẽat epere buje ip kuka juk Deus ikẽrẽat oꞌjuꞌuk ixeyũ bewi — ioꞌe. 
\v 13 — Kadai damuduuduap ekawẽn ibaꞌarẽm eyxe. Apẽntak eyetaybit epeꞌe owebe waraꞌat muwẽn puje wuymutaybitbinap ekawẽn muwẽn puje? Waraꞌat muwẽn puje dak, wekawẽn paꞌarẽm jeꞌe eyxe — ioꞌe.
\p
\v 14 — Apẽg̃ape ibo wekawẽn iam õn jeymutaybin. Kadaida muduuduap Deus ekawẽn muwẽnuwẽnap puxim — ioꞌe. 
\v 15 — Deus ekawẽn cocoꞌukayũ kadaida buxim — ioꞌe. — Pũg̃pũg̃ cekawẽn cocoꞌukayũ e bitako dag̃ata buxim — ioꞌe. — Deus ekawẽn co isu, Satanás ajẽmjẽm cekay ip — ioꞌe. — Yag̃uybaꞌũmꞌũm ip cekawẽn kay- -Deus ekawẽn kay — ioꞌe.
\p
\v 16 — Wararaꞌacayũ karatũg̃ꞌa paraktag̃ata buxim- -Deus ekawẽn cocoꞌukayũ — ioꞌe Jesus. — Koap icokcok eꞌem ip Deus ekawẽn co am. 
\v 17 Kadai tãbubeꞌũmat puxim Deus ekawẽn badi g̃u õmõm cebe ip. Ibureyũ eꞌem: “Teyũku Deus ekawẽn kay,” i, iwaywayway am. Ibureyũ itakoma cekay ip. Ipiat supiꞌajoat cebe ip. Imẽneju ibuꞌu ip jetabut am Deus kay — ioꞌe.
\p
\v 18 — Wararaꞌacayũ widaoho parak tag̃ata buxim Deus ekawẽn cocoꞌukayũ. Deus ekawẽn cocom ip — ioꞌe. 
\v 19 — Imẽnpit soat em g̃ebum ip jemukaypinput kay. Tũybe ocokcok cĩcã oce dinheiro kug̃ pima iãn eꞌem ip. Itabikuku ip soat kay jebubun. Deus ekawẽn kay bit ip yopĩt ma itabut, soat kay itabikuku jebubun puye. Deus ekawẽn muwẽnuwẽn g̃u ip wararaꞌacat pe jebureyũ be — ioꞌe.
\p
\v 20 — Wararaꞌacayũ bit katõ dag̃ata buxim Deus ekawẽn cocoꞌukayũ — ioꞌe. — Cekawẽn co buje, cekawẽn kay jĩjã ip. Idipat mujurũg̃rũg̃ ip soat peam. Kadaiꞌip puxim ixeyũ- -yaꞌaꞌeatꞌip puxim. 30 be oꞌe takug̃ꞌiatꞌip puxim ip, 60 be oꞌe takug̃ꞌiatꞌip puxim tak, 100 be oꞌe takug̃ꞌiatꞌip puxim tak — ioꞌe. 
\p
\v 21 Jesus waraꞌat kawẽn oꞌg̃uwẽn jeweju etaybitbinayũ be- -12 beayũ be dak- -wuymutaybitbinap ekawẽn.
\p — Lamparina musop puje, ico diotpe g̃u ajomuy — ioꞌe. — Wuyxexecap tiotpe g̃u dak ajomuy. Um ma ajomuy kabia iꞌe am wuykay- -soat ijo but am — ioꞌe. 
\v 22 — Soat wuyxe ibaꞌarẽmat ibapuk jeꞌe. G̃asũ ade ma wuyetaybitꞌũmat. G̃uyjom pit wuyetaybin aceꞌe soan ma — ioꞌe. 
\v 23 — Wekawẽn co pin pima, eyaꞌõpicũg̃cũg̃ cuy — ioꞌe.
\p Imẽn oꞌg̃uwẽn “Wekawẽn eyetaybin puje, wararaꞌacat pe juy epeg̃uwẽn dao ma eyag̃uybaꞌũmap puxim” iꞌe ojuy.
\p
\v 24 — Eyaꞌõpicũg̃cũg̃ cuy epesop waꞌõ kay — ioꞌe. — Xipanꞌũm yaꞌĩjo buje, yopĩt ma juy eyetaybin. Xipan yaꞌĩjo buje bit, yobog̃ cuy eyetaybin — ioꞌe. 
\v 25 — Waraꞌan eyetaybit pin pima, waraꞌan ma eyetaybit epesop. Yaꞌĩjom eybuꞌu buje bit, kuy juk epeyaꞌĩjojoiap kay jeyag̃uybaꞌũm — ioꞌe.
\p
\v 26 Jesus waram wuymutaybitbinap ekawẽn oꞌg̃uwẽn.
\p — Deus soat ipi dag̃acat kukukan iap kadai aypapanap puxim — ioꞌe. — Ag̃okatkat oꞌtaida jekat pe — ioꞌe. 
\v 27 — Taida buje, soat exima xexen ma. Kabia isum kopkom. Nõjẽmjẽm. Aypapan. Ag̃okatkat pit itaybit g̃u apẽn aypapan iam. 
\v 28 Kadai jekpiwan ma jewaꞌadadam. Koap dupcẽmcẽm. Taipuk cẽmcẽm g̃uyjom. Kanomũm dajẽmjẽm taipuk tag̃- -tajakata — ioꞌe. 
\v 29 — Tarumꞌisum kadai bubum kat iwat kadai bubuap kaxi oajẽm puye — ioꞌe. — Imẽnpuxim eyaꞌõbi g̃u wararaꞌacayũ itabut jeꞌe Deus kay- -Deus aꞌõbi acã — ioꞌe.
Jesus imẽn wuymutaybitbinap ekawẽn oꞌg̃uwẽn.
\p
\v 30 Jesus waram oꞌjekawẽn.
\p — Deus ade jĩjãayũ kukukan jeꞌe — ioꞌe. — Ajo-buxim xeꞌe jeꞌe? Eyaꞌõpicũg̃cũg̃ cuy epesop iboap ekawẽn kay — ioꞌe. 
\v 31 — Deus soat ipi dag̃acat kukukan iap mostardada buxim- -e da joꞌiat puxim. Ipi be taida buje, taꞌĩt ma mostardada. Wararaꞌata bodi ma taꞌĩt ma. Aypapan cĩcã taida buje bit. 
\v 32 Waraꞌat kadai bodi ma aypapan eꞌem. Tãkubog̃ eꞌem. Wasũ jedopi mõg̃mõg̃ tãku jeje — ioꞌe. — Imẽnpuxim g̃asũ Deus pũg̃pũg̃ayũ kukukat. G̃uyjom pit adeayũ kukukan jeꞌe — ioꞌe.
\p
\v 33 Jesus ibo ekawẽn puximat oꞌg̃uwẽnuwẽn adeayũ be. Deus soat kukukan jeꞌe iap ekawẽn oꞌg̃uwẽnuwẽn cebe ip. Imẽnpuye itaybit put ip. 
\v 34 Adeayũ mutaybitbin pima wuymutaybitbinap ekawẽn acã oꞌg̃uwẽn- -kawẽn ibaꞌarẽmat acã. Jeweju etaybitbinayũ mutaybitbin pima bit, ibapug̃ ma oꞌg̃utaybin ip. Kawẽn ibaꞌarẽmat g̃u oꞌg̃uwẽn cebe ip- -ibapukat ma.
\p
\v 35 Ixe kabia kabiog̃kabiog̃ꞌi bima, Jesus oꞌjekawẽn jeweju etaybitbinayꞌu be.
\p — G̃aꞌa iodi wĩnãbu aju — ioꞌe.
\p
\v 36 Ceweju etaybitbinayũ oꞌjewemuwẽn ip adeayũ be. Jesus kuy kobe be osunuy. Jeweju etaybitbinayũ oꞌtujowat jeweju. Wararaꞌacayũ dak oꞌtimudek jekobe dag̃ ma ip.
\p
\v 37 G̃ebuje kabidoxixi oajẽm cekobe kay. Oꞌsubidoajẽm cekay ip- -Jesus kay, jewejuayũ kay dak. Kobe be diõmõm oꞌe tipodoyat. Kobedi tibog̃ oꞌe. Kobe munopapũn ojuy oꞌe idibim. 
\v 38 Imẽnpit Jesus ixet osodop kobe ukpu be. Ixet jadipi jeje.
\p G̃ebuje ceweju etaybitbinayũ Jesus oꞌg̃uwurũg̃. 
\p — Ocemutaybitbinꞌukat! Akꞌadit ma du ẽn ocekay? — ioꞌe ip. — Jeꞌũm wuyju! — ioꞌe ip cebe.
\p
\v 39 Jesus oꞌãy.
\p G̃ebuje Jesus kabidoxixi oꞌg̃ukorẽm.
\p — Ebidopon! — ioꞌe kabidoxixi be. — Edipon! — ioꞌe iodi be.
\p Kabido dao ma oꞌsubidoꞌũm. Tipo oꞌe iodi. 
\v 40 Imẽneju Jesus oꞌjekawẽn jeweju etaybitbinayũ eju.
\p — Apẽnpuye dak eyparara? Eyetabut g̃u du Deus kay? — ioꞌe.
\p
\v 41 Iparara jĩjã ip oꞌe.
\p — Abu dak sute? — ioꞌe ip jewewebe. — Cekawẽn acã kabido oꞌsubidomuꞌũm! Dao ma oꞌtimupon iodi! — ioꞌe ip.
\b
\c 5
\p
\v 1 Jesus wĩnãbu oajẽm jeweju etaybitbinayũ eju. Oajẽm ip Gerasa eipi be. 
\v 2 Kobe bewi Jesus cẽm puje, ag̃okatkat osodot ceꞌũꞌũayũ mõg̃mõg̃ap pewi. Ibiõg̃buk kẽrẽat kukat osunuy. 
\v 3 Ixe ukã be g̃u osunuy- -ceꞌũꞌũayũ mõg̃mõg̃ap pe acã, ibiõg̃buk kẽrẽat kug̃ puye.
\p
\v 4 Ade em Gerasa eipi watwat cuk adi ibiõg̃buk kẽrẽat kug̃at oꞌtaomũnmũn ip. Correntebum cuk adi oꞌtaomũnmũn ip, cabobum tak. G̃asũ bit taomũn paꞌore ip osodop. Ibaꞌore osodop ip correntebum tak. Ade em ma juk adi oꞌtaomũnmũn ip correntebum, cabobum tak. Imẽnpit ixe ag̃okatkat correntebu oꞌsubumuwekapkap. Ixe cabobu oꞌsubudakatkat. Ixe muwag̃õn paꞌore oꞌe soat pe. 
\v 5 Kabia bun, ixima bun tak eꞌũꞌũayũ mõg̃mõg̃ap tag̃ oekuku ibiõg̃buk kẽrẽat kug̃at. Coꞌa dag̃ tak oekuku. Soat em jewãwãwãm oekuku. Jewemuwerikwerig̃ witaꞌam oekuku. Jewemudadaibotbon oekuku.
\p
\v 6 Wũywi ma Jesus co buje, ibiõg̃buk kẽrẽat kug̃at oꞌjedau Jesus kay. Oꞌjẽg̃ꞌaecõg̃cõg̃ Jesus wap yaꞌõbuyxi cexe buye.
\p
\v 7-8 — Ibiõg̃buk kẽrẽat, ejẽm cuy ag̃okatkat pewi — Jesus oꞌe.
\p Ibiõg̃buk kẽrẽat kug̃at oꞌjewãwã yaꞌõberen.
\p — Jesus, apẽn ẽn em owebe? — ioꞌe. — Ẽn Deus ipot- -soat podi ma yaꞌõbacaat ipot! — ioꞌe. — Ipiatꞌajoan g̃u juy ẽn owebe, Deus etabutpe wuyju buye — ioꞌe Jesus pe.
\p
\v 9-10 — Apẽn ebutet? — Jesus oꞌe.
\p — Obutet Ade i, ade oceju buye — ioꞌe. — Ijop ka bewi g̃u juy ibiõg̃buk kẽrẽat eg̃ujẽm — ioꞌe ag̃okatkat Jesus pe.
\p
\v 11 Ade jĩjã dajebaroyũ wurũrũrũg̃ osodop ip iboce coꞌa dag̃.
\p
\v 12 — Dajebaroyũ be juy eg̃uõm — ioꞌe. — Ãg̃ ocemuõm cebe ip — ag̃okatkat oꞌe.
\p
\v 13 — Haꞌa — ioꞌe. — Epeõm cuy cebe ip — Jesus oꞌe.
\p Ibocewi ibiõg̃buk kẽrẽayũ oꞌjẽm ag̃okatkat pewi. Oõm ip dajebaroyũ be.
\p Ade jĩjã osodop ip dajebaroyũ. Kiiiih. 2000 be acoꞌi osodop ip. Daudaum oꞌjenapõn ip coꞌa pẽnpẽn tag̃. Oꞌkop ip iodi be. Oakõm ip. Jeabokabog̃ oap ip iodi be. Pog̃. Oeꞌũꞌũ ip. 
\v 14 Imẽneju dajebaroyũ kukukayũ owatwat ip.
\p — Jesus ibiõg̃buk kẽrẽayũ oꞌg̃uõm dajebaroyũ be — ioꞌe ip wararaꞌacayũ be. — Oap ip ade — ioꞌe ip.
\m Oꞌg̃uwẽn ip ikabog̃atka watwat pe, kog̃ũnpi watwat pe dak. Ade oꞌju ip apẽn oꞌjebapuk iap com.
\p
\v 15 Oꞌju ip Jesus kay. Ibiõg̃buk kẽrẽat kug̃ tũibit oꞌjojojo ip. G̃asũ bit tadaibot g̃u oꞌe. Xikꞌi osunuy. Totite oꞌe g̃asũ bit. Yag̃uysat oꞌe g̃asũ bit. Imẽneju itabẽg̃bẽg̃ ip oꞌe ijojom.
\p
\v 16 Ibocewi oꞌjojojoꞌiayũ apẽn oꞌjebapuk iap oꞌg̃uwẽn oajẽmꞌiayũ be.
\p — Jesus ibiõg̃buk kẽrẽat oꞌg̃ujẽm ag̃okatkat pewi — ioꞌe ip. — Oꞌg̃uõm dajebaroyũ be — ioꞌe ip. — Oakõm ip iodi be. Oꞌjeabokabok ip. Oap ip — ioꞌe ip.
\p
\v 17 Imẽneju:
\p — Ejẽm cuy oceka bewi — ioꞌe ip Jesus pe Gerasa eipi watwat.
\m
\v 18 Imẽnpuye Jesus oõm kobe be jejẽm ãm.
\p Kobe be iõm puje ibiõg̃buk kẽrẽat kug̃ tũibit oꞌju Jesus kay.
\p — Eweju õn tak cum — ioꞌe. — Exe ma onuy pin — ioꞌe Jesus pe.
\p
\v 19 — Ap — ioꞌe Jesus pit. — Oweju g̃u ejot. Edukꞌa be juy eju, ebureyũ kay — ioꞌe Jesus cebe. — “Kariwa ibiõg̃buk kẽrẽat oꞌg̃ujẽm owebewi,” i juy ece cebe ip — Jesus oꞌe. — “Kariwa juk xipan okuk,” i juy ece cebe ip — Jesus oꞌe.
\p — Haꞌa — ioꞌe.
\p
\v 20 G̃ebuje oꞌju jeka kay. 10 beatka dag̃ oekuku: — Jesus ibiõg̃buk kẽrẽat oꞌg̃ujẽm owebewi — iꞌeꞌem soat pe. Iboam jekũyjo buje:
\p — Ajo ibaꞌore cekay- -Jesus kay? — ioꞌe jewewebe.
\p
\v 21 G̃ebujep Jesus iodi oꞌtimudek maꞌg̃uto kobe dag̃. Timudek puje, ade jĩjã ip oꞌju topabe kaꞌoririt pe. Kiiiih.
\p 
\v 22 Judeuyũ eꞌaweroroapꞌa kukukat oꞌju Jesus kay- -Deus eju kawẽnwẽnapꞌa kukukat. Ibutet Jairo i osunuy. Taxitxet osunuy. Taxit 12 koato osunuy. Jesus dopabijuk puje, oꞌjẽg̃ꞌaecõg̃cõg̃ cewap, Jesus yaꞌõbuyxi cexe buye.
\p
\v 23 — Tapu, odaxit oeꞌũ pin — ioꞌe. — Ejot cuy odukꞌa be — ioꞌe. — Ebu juy esubumõg̃ cebe imuꞌada am. Esubumõg̃ cuy cebe ceꞌũap puxim — ioꞌe Jesus pe.
\p
\v 24 Imẽnpuye Jesus oꞌju ceweju- -Jairo eju.
\p Ibocewi ade ip oꞌju Jesus nomuju. Icẽg̃sũg̃ ip oꞌe ade jĩjã buye. 
\v 25 Iboce ayacat tak osunuy. Ade koato ma toybucukbucug̃ g̃u osunuy- -12 koato ma. 
\v 26 Ade wuyanũg̃tataꞌukayũ ixe ayacat anũg̃tataꞌuk ip osodop. Imẽnpit big̃ ma xipatꞌũm cĩcã oꞌe. Soat jedinheiro oꞌg̃uꞌũm janũg̃tataapteim. Oꞌjexere g̃u. Big̃ ma xipatꞌũm cĩcã oꞌe.
\p
\v 27-28 Ixe ayacat Jesus iwãtaxipipi muꞌadaꞌadaap awẽg̃ oꞌyawẽg̃coco.
\p — Jesus esay mucay buje, oceꞌada — ayacat oꞌe jewebe ma.
\p G̃ebuje oꞌju Jesus tẽg̃ adeayũ parakpe- -aweromayũ parakpe.
\v 29 Jesus esay oꞌg̃ucay wararaꞌacat etaꞌũmpi. Cesay mucayꞌisum ma oꞌtoybucuk. Xipat oꞌe g̃ebuje bit. 
\v 30 Waꞌõbacaan acoꞌi og̃uꞌada iam itaybit oꞌe Jesus pit. Oꞌjekorepẽn adeayũ parakpe g̃ebuje bit.
\p — Abu wesay oꞌg̃ucay? — ioꞌe.
\p
\v 31 — Tã! — ioꞌe ceweju etaybitbinayũ. — Adeayũ wuymukug̃ukug̃ iap cocom g̃u du ẽn? — ioꞌe ip. — Apẽnpuye ẽn eꞌem “Abu wesay oꞌg̃ucay?” i? — ioꞌe ip.
\p
\v 32 Imẽnpit Jesus oꞌjeakak soat kay. Abu wesay oꞌg̃ucay iat kudadam oꞌjeakak. 
\v 33 Ayacat itaybit oꞌe Jesus omuꞌada iam. Imẽnpit iparara oꞌe Jesus itakoma jeꞌe okay iap puxixim. Ikarabakbak tak oꞌe jeparara pibun. Oꞌjẽg̃ꞌaecõg̃cõg̃ Jesus wap.
\p — Õn ma esay og̃ucay — ioꞌe cebe. — Ẽn cuk omuꞌada — ioꞌe.
\p
\v 34 Imẽnpuye:
\p — Tũꞌũ, kuy eceꞌada etabut okay buye — ioꞌe Jesus. — Ecepit cuy edukꞌa be — ioꞌe. — Ecokcog̃ cuy eg̃uy — ioꞌe. — Kuy eceꞌada. Xipat ecesũy g̃asũ bit — ioꞌe.
\p
\v 35 Jesus puk kawẽnwẽn ma ayacat eju bima, Jairo dukꞌa bewiayũ oajẽm cekay- -Jairo kay.
\p — Ig̃uje, edaxitꞌũm kuy oeꞌũ — ioꞌe ip. — Wuymutaybitbinꞌukat eg̃uwaꞌũm g̃u g̃asũ bit — ioꞌe ip.
\p
\v 36 Imẽnpit Jesus akꞌadit ma oꞌe oeꞌũ iap awẽg̃ kay.
\p — Eg̃uycũg̃ g̃u juy eg̃uy — Jesus oꞌe Jairo be. — Etabun pit cuy eg̃uy okay — ioꞌe.
\p
\v 37 G̃ebuje Jesus ebapũg̃ayũ acã oꞌtujowat jeweju. Pedro oꞌtujowat jeweju, Tiago dak, João dak. João Tiago kitpit osunuy. Ibũrũ ma oꞌtujowat jeweju.
\p
\v 38 Oꞌju ip Deus eju kawẽnwẽnapꞌa kukukat tukꞌa kay- -Jairo dukꞌa kay. Ade osodop ip tukꞌa be. Wawa ip osodop. Jewãwãwãm yaꞌõberen ip osodop yaypanꞌisuatꞌũm cocom. 
\v 39 Ukꞌa be jeõm puje, Jesus oꞌjekawẽn ceweju ip.
\p — Apẽnpuye eyju wawa? Eyaꞌõkarey jĩjã oxe! — ioꞌe cebe ip. — Yaypanꞌisuat ceꞌũ g̃u- -ixet ã! — Jesus oꞌe wawaayũ be.
\p Jesus itaybit oꞌe yaypanꞌisuatꞌũm oeꞌũ iam. Inaka waram imutain. Imẽnpuye:
\p — Ixet ã — ioꞌe.
\m
\v 40 Wawaayũ itaybit oꞌe yaypanꞌisuatꞌũm oeꞌũ iam. Imẽnpuye Jesus oꞌjowayway ip. Jesus soat ip oꞌg̃ujẽm ukꞌa bewi.
\p Ibocewi Jesus yaypanꞌisuatꞌũm ebay oꞌtujowat jeweju, ixi dak, ebapũg̃ayũ dak- -jeweju etaybitbinꞌukayũ. Oꞌju ip ceꞌũat kay. Oajẽm. 
\v 41 Ceꞌũat oꞌsubaixik.
\p — Talitá cumi — Jesus oꞌe jaꞌõm cebe.
\p (Talitá cumi “Tuꞌũ, ag̃obucẽg̃ ece” i õn eꞌem ewebe iape wuyaꞌõm).
\p
\v 42 Ceꞌũ topibit waram oꞌjetait. Oꞌjeꞌag̃obucẽg̃ g̃ebuje bit. Oꞌkop. Oꞌjexĩg̃xĩg̃. Imẽnpuye oꞌjojojoꞌiayũ itabẽg̃bẽg̃ oꞌe ip ijojom. 
\p
\v 43 — Ixan cuy eg̃ũm cebe — Jesus oꞌe ixi be. — “Jesus waram odaxitꞌũm oꞌg̃utait” iꞌũmg̃u juy epeꞌe wararaꞌacayũ be — ioꞌe cebe ip.
\b
\c 6
\p
\v 1 Jesus oꞌju ibocewi. Oꞌju jaypanapka kay. Oajẽm Nazaré ka be jeweju etaybitbinꞌukayũ eju. 
\v 2 Sábado bima ade oꞌg̃utaybin Deus eju kawẽnwẽnapꞌa be. Jebodoydoyap kabia be ip oꞌg̃utaybin.
\p Ade ixe ekawẽn oꞌyaꞌĩjojo ip. Yaꞌõpicũg̃cũg̃ ip oꞌe cekawẽn kay.
\p — Apẽntak ig̃o ag̃okatkat itaybit soan kawẽn? — ioꞌe ip jeweweju. — Abu dak ixe oꞌg̃utaybitbin? Wuywebe iꞌe baꞌoreap mubapukpug̃ g̃oku — ioꞌe ip. 
\v 3 — Ig̃o g̃u du karepig̃a? — ioꞌe ip. — Maria it ma g̃oku. Tiago wag̃o ma g̃oku. José wag̃o dak. Judas wag̃o dak. Simão wag̃o dak — ioꞌe ip. Iixĩtyũ dak ijoce ma wuyweju ma — ioꞌe ip. — Wuyju bit kũyjobin g̃u juy ajop ixe aꞌõ kay, ixe wuyjoꞌiat puye — i napa ma oꞌe ip.
\p
\v 4 Imẽnpuye Jesus oꞌjekawẽn ceweju ip.
\p — Soat ka dag̃acat ibuyxim ma Deus ekawẽn muwẽnuwẽnꞌukat kug̃ — ioꞌe. — Jaypanap ka beayũ bit ibuyxim g̃u ikug̃ — Jesus oꞌe cebe ip.
\p
\v 5-6 Nazaré ka be bima ade em g̃u Deus aꞌõbacaap oꞌg̃ubapuk, itabutꞌũm ip puye.
\p — Itabutꞌũm cĩcã ip okay — Jesus oꞌe jewebe ma.
\p Wararaꞌacayũ bit ixe kay jĩjã oꞌe. Imẽnpuye jebu oꞌjewebumõg̃ cebe ip- -iwãtaxipipiayũ be. Oꞌg̃uꞌadaꞌada ip.
\p G̃uyjom wuyjuyũxirixiri dag̃ oekukuku. Imutaybitbin ip oekukuku.
\p
\v 7 Jesus 12 beayũ oꞌtomuwã jewekay. Xepxepxem ip oꞌg̃ujuju wararaꞌacat ka dag̃.
\p G̃ebuje oꞌjekawẽn ceweju ip.
\p — Waꞌõbi ma ibiõg̃buk kẽrẽat epeg̃ujẽmjẽm ikug̃ayũ bewi — ioꞌe cebe ip. 
\v 8 — Eybaꞌip acã epeyoptujowat eyjuap tag̃ — ioꞌe cebe ip. — Eyxan pit epetujowat g̃u, sacola dak kaꞌũma, dinheiro isurũg̃at tak kaꞌũma. 
\v 9 Eyesandália dak epetujowat — ioꞌe. — Eyewebeat acã eydoti epetujowat- -xepxem pit kaꞌũma — ioꞌe. 
\v 10 — Pũg̃ka be eyajẽm puje, pũg̃ꞌa be ma epesopsop ukꞌa be. Pũg̃ꞌa be ma epesop ig̃o ka be bima — ioꞌe. 
\v 11 — Pũg̃ka be eyajẽm puje, ibo ka watwat pe eykukpinꞌũm pima, waraꞌatka kay juy epeju — ioꞌe. — Ibo ka watwat eyaꞌĩjo pinꞌũm pima, epejẽm cuy ibo ka bewi. Cẽm pima eyesandália epeg̃upoypoy “Deus pe ipiat piꞌajoat puje eywebe, ocekpiwatpi g̃u oceꞌe,” iꞌeꞌem cebe ip — ioꞌe. — “Eyju ma eyukpiwat Deus ekawẽn kayꞌũm puye,” i juy epeꞌe cebe ip — ioꞌe Jesus.
\p
\v 12 Imẽneju 12 beayũ oꞌju. Ade mukũyjojom oekukuku ip kawẽn idipan.
\p — Ikẽrẽat mug̃ẽg̃ẽap epeyepere juy — ioꞌe ip. — Cũg̃ ma juy epeku — ioꞌe ip adeayũ be.
\p
\v 13 Ibiõg̃buk kẽrẽat oꞌg̃ujẽmujẽm ip soat pewi. Ixepti oꞌtimõg̃mõg̃ ip iwãtaxipipiayũ a jeje imuꞌada am.
\p
\v 14 G̃ebuje ipi kukukat Herodes Jesus awẽg̃ oꞌyawẽg̃tobuxik soat kaka dag̃ oꞌjeawẽg̃epõg̃põg̃ puye. Tũybe waram g̃uto oꞌjetaitꞌiat teku iãn oꞌe ip adeayũ.
\p — João Batista teku — ioꞌe ip pũg̃pũg̃. — Waram g̃uto oꞌjetait teku jeꞌũap tomukadi — ioꞌe ip. — Imẽnpuye Deus aꞌõbacaam wuywebe iꞌe baꞌoreat mubapukpug̃ teku — ioꞌe pũg̃pũg̃pũg̃.
\p
\v 15 — Kaꞌũma — ioꞌe wararaꞌacat pit. — Eliasꞌũm teku — ioꞌe ip. — Waram g̃uto oꞌjetait — ioꞌe ip.
\p — Kaꞌũma — ioꞌe wararaꞌacayũ bit. — Deus ekawẽn muwẽnuwẽnꞌukatꞌũm teku — ioꞌe ip. — Waram g̃uto oꞌjetaitꞌiat teku — ioꞌe ip. — Kuyje osunuyiat teku — ioꞌe ip.
\p
\v 16 Imẽnpit ipi kukukat Herodes Jesus awẽg̃ co buje, imẽn oꞌjekawẽn.
\p — Oxe bit teku João Batista — ioꞌe. — Kuy bima wemuꞌaꞌuk teku. Imẽnpit waram g̃uto oꞌjetait — ioꞌe.
\p
\v 17-19 Kuy bima Herodias Filipe tayxi osunuy. Ikukat Herodes kitpit tayxi osunuy. Herodes pit Herodias oꞌjat jetayxim. Imẽnpuye João Batista oꞌe Herodes pe:
\p — Deus xe cedag̃ g̃u ewebe jewebumũn ãm ekitpit tayxi eju — i.
Imẽnpuye Herodias itakoma jĩjã oꞌe João kay. João aoka ojuy oꞌe. Imẽnpuye Herodes João oꞌg̃uõmat daomũnmũnapꞌa be jetayxi be yaokaap puxim. Herodias pe João aoka baꞌore oꞌe, Herodes xe João yaꞌõbuyxi buye.
\p
\v 20 — João cũg̃ cĩcã — ioꞌe Herodes. — Xipat cĩcã ixe- -ikẽrẽat kug̃ g̃u — ioꞌe.
\p Herodes João muxipanpan osunuy daomũnmũnapꞌa be yaokaap puxim. Herodes pe João ekawẽn co buje, yag̃uybabiꞌũmꞌũm osunuy. Inaka João ekawẽn co pin cĩcã osunuy.
\p
\v 21 G̃ebuje Herodes peta oꞌg̃ug̃ẽ jekapap kabia kay g̃ebum am. Peta bog̃ cĩcã oꞌg̃ug̃ẽ ip. Herodes yaꞌõbuyxiayũ oꞌtomuwã peta kay jebekitkiyũ. Sorarayũ kukukayũ dak oꞌtomuwã, Galiléia eipi beayũ dak- -kariwawa ecug̃apap. Peta kabia bima Herodias oꞌe jewebe ma:
\p — G̃asũ ma João oyaokaat — i.
\p
\v 22 Ibocewi Herodias it oõm peta mug̃ẽg̃ẽapꞌa be. Ayacat osunuy yaypanꞌisuat. Oꞌjedaꞌiꞌin Herodes etabutpe, ceweju jekõnkõnayũ etabutpe dak. Daꞌiꞌiap co buje, icokcok oꞌe ip. Imẽnpuye:
\p — Ajo-kay ẽn oxewi? — ioꞌe Herodes yaypanꞌisuat pe. — Emukaypin cuy og̃ũm ewebe — ioꞌe. — Ade obubut weipi be. Ipidaseat ma og̃ũm ewebe — ioꞌe. 
\v 23 — Deus etabun õn eꞌem ewebe — ioꞌe. — Soat emukaypin cuy og̃ũm ewebe — ioꞌe. — Ipidase juy og̃ũm ewebe obubut. Aꞌõ kay jeꞌe ip webekitkiyũ — Herodes oꞌe.
\p
\v 24 Ixe yaypanꞌisuat oꞌjẽm. Oꞌju jexi kay.
\p — Mamãi, ajo dak ojoojuy? — ioꞌe jexi be.
\p — “João Batista a juy eyaꞌukat. Eyaũm owebe,” i juy ece cebe — ioꞌe ixi.
\p
\v 25 Herodes kay yaypanꞌisuat oꞌjepit ipi kukukat kay g̃ebuje bit.
\p — João Batista a juy eyaũm owebe parato be — ioꞌe ipi kukukat pe. — G̃axĩn ma juy eyaũm owebe — ioꞌe jexi aꞌõbi.
\p
\v 26 Ipi kukukat Herodes ig̃uycũg̃ oꞌe. Ibuꞌu jĩjã yaꞌuk an osunuy.
\p — Soat emukaypin cuy og̃ũm ewebe — i juk oꞌe yaypanꞌisuat pe jeweju jekõnkõnayũ etabutpe.
Imẽnpuye isũsũn oꞌe jebureyũ buxim. “Oyaũm g̃u ewebe” iꞌeap puxim isũsũn oꞌe.
\p
\v 27 G̃ebuje oꞌjekawẽn sorara be.
\p — João a juy eyaꞌuk — ioꞌe. — Eyadojot cuy owebe — ioꞌe sorara be ipi kukukat.
\p Sorara oꞌju. João a oꞌyaꞌuk daomũnmũnapꞌa be. 
\v 28 Oꞌyadujupit parato be. Oꞌyaũm yaypanꞌisuat pe. Yaypanꞌisuat oꞌyadujowat jexi be. Oꞌyaũm cebe.
\p
\v 29 Joãoꞌũm eꞌũ ãm jekũyjo buje, ceweju oekukuꞌiayũ oꞌju Herodes kay. Joãoꞌũm jebit oꞌtujowat ip. Jebabim oꞌjomõg̃ ip witabikũy be.
\p
\v 30 Ixe be juk oꞌg̃ujuꞌiayũ oꞌjepit Jesus kay. Soat cuk oꞌeꞌe ip iat oꞌg̃uwẽn ip cebe, soat cuk oꞌg̃utaybitbitbin iap tak. 
\v 31 Ade jĩjã ajẽmjẽm ip oꞌe Jesus kay, ceweju etaybitbinꞌukayũ dak. Cẽmcẽm tak oꞌe ip cexewi ip. Ixeyũ dak cekõn paꞌore oꞌe ade ip puye.
\p Imẽnpuye Jesus oꞌjekawẽn ceweju ip.
\p — Eydaobire jĩjã — ioꞌe. — G̃aꞌa aju ukꞌaꞌũmat kay jebodoy am. Wuyju acã aju — Jesus oꞌe cebe ip.
\p — G̃aꞌa — ioꞌe ip.
\p
\v 32 G̃ebuje oꞌju ip ukꞌaꞌũmat kay. Kobe dag̃ ip oꞌju. Ixeyũ acã oꞌju jebodoy am.
\p
\v 33 Ijẽm puje ip, ade kapurũg̃ tag̃ayũ Jesusyũ oꞌjojojo.
\p — Jesus oꞌjẽm jeweju etaybitbinayũ eju — ioꞌe ip jewewebe. — G̃aꞌa aju kapurũg̃ tag̃wi ixeyũ dopabe — ioꞌe ip.
\p Imẽnpuye oꞌjedau ip kapurũg̃ tag̃. Oꞌjedau ip Jesusyũ dopabijuk am. Soat kaka dag̃wi oꞌju ip. Jesus ajẽmꞌũm awap ma oajẽm ip.
\p
\v 34 Kobe bewi jejẽm puje, Jesus ade jĩjã oꞌjojojo. Itabotaidabotbot oꞌe cekay ip.
\p — Teyũku ovelhayũ buxim oxe- -jekukatꞌũmayũ buxim — Jesus oꞌe jewebe ma.
\p Ade ma ip oꞌg̃utaybin.
\p
\v 35 Kaxi ipi tẽg̃ pima ceweju etaybitbinayũ oꞌju Jesus kay.
\p — Ijoce yaꞌũmg̃u ukꞌa — ioꞌe ip. — Kaꞌũmg̃u wuyxan. Kuy katpuje jĩjã — ioꞌe ip. 
\v 36 — Adeayũ juy eg̃uypit ag̃oka kay — ioꞌe ip. — Eg̃uypit ip ikatẽg̃atka be jexat pu am — ioꞌe ip.
\p
\v 37 — Eyju ma ixan epeg̃ũm cebe ip — Jesus oꞌe cebe ip.
\p — Apẽntak pãoꞌa oceyabu soat xatꞌam? — ioꞌe ip. — Pãoꞌa deim kuka oꞌe teibog̃ cĩcã. 200 dinheiro isurũg̃at kuka oꞌe- -prata mug̃ẽg̃ẽ — ioꞌe ip.
\p (Pũg̃ dinheiro isurũg̃at prata mug̃ẽg̃ẽ pũg̃ kabia ekapikapteim osunuy).
\p
\v 38 — Pebũrũꞌa eyju pãoꞌa kug̃? Epeju buk eyetaybit am — Jesus oꞌe.
\p Oꞌju ip jetaybit am. Itaybit puje ip oꞌjepit.
\p — 5 be pãoꞌa kug̃ oceju, xepxep axima kug̃ tak — ioꞌe ip Jesus pe.
\p
\v 39 — Epeꞌe juy adeayũ be “Epabik cuy tip kireat ceje,” i — Jesus oꞌe.
\p
\v 40 Soat ip awerom oabikbik. Ade jĩjã osodop ip. Pũg̃ eawero 50 be wuyjuyũ osodop ip. Waraꞌat eawero 100 be osodop ip. Waraꞌat eawero 50 be osodop ip. Waraꞌat eawero 100 be osodop ip. Ade jĩjã osodop ip. 5000 ag̃okatkat osodop ip- -pãoꞌa omayũ. Ixeyũ tayxiyũ dak yaꞌom, ipotpoyũ dak, taxityũ dak.
\p
\v 41-44 G̃ebuje Jesus oꞌjekawẽn jebay eju- -Deus eju. Pãoꞌa oꞌyabu. Axima dak oꞌjat xepxep. Ixe dak oꞌjeapũn kabi kay. Oꞌjekawẽn Deus eju.
\p — Bay, ẽn xipat — ioꞌe. — Pãoꞌa eyaũm ocexatꞌam — Jesus oꞌe Deus pe.
\p Pãoꞌa oꞌyadakat.
\p — Juku pãoꞌa — ioꞌe jeweju etaybitbinayũ be.
\p Cinco be pãoꞌa oꞌyadop. Imẽnpit Jesus oꞌyamuꞌacog̃. Yaꞌade jĩjã oꞌe. Ceweju etaybitbinayũ oꞌyaũm adeayũ be. Xepxep axima osodop. Jesus pit axima oꞌg̃uꞌacog̃. Imẽnpuye ade jĩjã oꞌe. Axima dak oꞌg̃ũm jeweju etaybitbinayũ be. Oꞌg̃ũm ip adeayũ be. Soat ip oꞌjoꞌoꞌo- -5000 beayũ- -ag̃okatkayũ. Soat ip ibeg̃beg̃ oꞌe, Jesus oꞌg̃uꞌacog̃ puye.
\p Ibocewi ceweju etaybitbinayũ cepoyat oꞌjat. Ico be ip oꞌg̃uõm. 12 be oꞌg̃unopapũn ip cepoyan- -pãoꞌa epoyatꞌam, axima epoyan tak.
\p
\v 45 G̃ebujeap tomukadi:
\p — Epeõm cuy kobe be — Jesus oꞌe jeweju etaybitbinayũ be. — Wĩnãbu epeju owap. Betsaida ka kay juy epeju — ioꞌe.
\p Jesus “Eydukꞌa be juy epeyepit,” iꞌeꞌem pima adeayũ be, ceweju etaybitbinayũ oꞌju wĩnãbu.
\p
\v 46 Tukꞌa be adeayũ muju buje, Jesus oꞌju coꞌa kay jekawẽn ãm Deus eju.
\p
\v 47 Kabiok pima Jesus jag̃epũg̃ ma oꞌe kapurũg̃ pe. Imẽnpit kobe dag̃ayũ iodi bicũg̃ pe oꞌe ip- -ceweju etaybitbinayũ. 
\v 48 Jesus ip oꞌjojojo- -kobe dag̃ayũ- -tibicũg̃ peayũ. Pipim jekoykoy oꞌe ip kabido oꞌsubidoajẽm topabe buye.
\p Oꞌju cekay ip kabiakabiaꞌi bima- -kaxi jẽm awap ma. Kuyg̃u oꞌju tibicũg̃ peayũ kay. Oꞌkop coꞌa dag̃wi. Idibi adopa dag̃ xĩg̃xĩg̃ oꞌju. Cekay ip oꞌju. 
\v 49 Jesus oꞌjojojo ip idibi adopa dag̃ xĩg̃xĩg̃ pima. Tũybe ite axik iãn oꞌe ip. Jesus co buje soat ip oꞌjewãwã jeparara pibun. 
\v 50 Iparara jĩjã ip oꞌe.
\p — Eyaꞌõcam cuy epesop! Eypararam g̃u juy! Õn ã! — Jesus oꞌe.
\p
\v 51 Ibocewi Jesus oõm kobe be ceweju ip. Kabido oꞌsubidoꞌũm g̃ebuje bit. Dao ma oꞌtipon. Imẽnpuye oꞌjekuy ip. Yag̃uybabiꞌũm oꞌe ip. Oꞌjojojo g̃u buk ip imẽg̃at. 
\v 52 Ixe kabido oꞌsubidomupon iap oꞌjojojo ip. Inaka teku Deus aꞌõbacaap kug̃ jekukum iap kay itabut g̃u ip. Pãoꞌa oꞌyamuꞌacog̃ iap oꞌjojojo ip. Inaka:
\p — Kaꞌũma ma ite joꞌi yaꞌõbuyxi — iꞌũmg̃u oꞌe ip. 
\m Itabut g̃u oꞌe ip cekay.
\p
\v 53 Iodi mudek puje ip, Jesusyũ oajẽm Genesaré eipi be. Oꞌjemũg̃ ip ebikopap pe. Kobe ip oꞌg̃ukirik kaꞌoririt pe.
\p
\v 54 Kobe bewi ijẽm isum ma ip itaybit oꞌe teyũku Jesusyũ iam ibo ka watwat. 
\v 55 Daudaum oꞌju ip ukꞌaꞌa dag̃ iwãtaxipipiayũ dakoykoy. Oꞌtujowat ip Jesus kay. Dobaptup ceje oꞌtujowat ip. Iwãtaxipipiayũ oꞌtujowat ip adeayũ oꞌe “Jesus omuyku ijoce” iap pe. 
\v 56 Ag̃oka dag̃ Jesus oeku, ikabog̃atka dag̃ tak, biopak kukukayũ ka dag̃ tak. Yajẽm puje jebureyũ iwãtaxipipiayũ oꞌjomõg̃ jeꞌaweroroap pe.
\p — Ãg̃ esay ukpi oceg̃ucay — ioꞌe ip Jesus pe.
Soat ip oꞌjeꞌada oꞌg̃ucayꞌiayũ. Soat iwãtaxipipiayũ xipat oꞌe.
\b
\c 7
\p
\v 1 Fariseuyũ oꞌjeꞌawero ip Jesus kay, Moisés ekawẽn imutaybitbinꞌukayũ dak- -Jerusalém ka bewiayũ. 
\v 2-4 Aypapayũꞌũmꞌũm ekawẽn tag̃ jekukuꞌuk osodop ip Fariseuyũ, soat wararaꞌacayũ Judeuyũ dak. Jebuꞌisu bima dak ip jebuwuywuyꞌuk ma osodop. Tũybe ade em wuybuwuyꞌũm pima wuykẽrẽ Deus xe iãn oꞌe ip. Imẽnpuye ade em jebuwuyꞌũm pima, oꞌjekõn g̃u ip. Tarekrek pupuap pewi jepit puje, oꞌjekõn g̃u ip ade em jebuwuyꞌũm pima. Ade ma ajojoyũꞌũmꞌũm ekawẽn tag̃ jekukuꞌuk osodop ip- -kuyjeayũꞌũmꞌũm ekawẽn tag̃. Imẽnpuxim soat em ma kopoꞌabi wuywuyꞌuk ip osodop, kamutiꞌabi wuywuyꞌuk tak ip osodop, kajarãoꞌabi wuywuyꞌuk tak ip osodop. Jesus eju etaybitbinayũ bit ade emꞌũma oꞌjewebuwuy jekõn pima- -pũg̃ em ã. Fariseuyũ iboap oꞌjojojo.
\p
\v 5 G̃ebuje Fariseuyũ oꞌjekawẽn Jesus eju, Moisés ekawẽn imutaybitbinꞌukayũ dak.
\p — Eweju etaybitbinayũ wuyajojoyũꞌũmꞌũm ekawẽn tag̃ g̃u jekukum — ioꞌe ip cebe. — Cedag̃ g̃u ip jekukum. Ade emꞌũma jewebuwuywuyꞌuk ip jekõn ãn — ioꞌe ip imuymuy ip.
\p
\v 6 G̃ebuje Jesus oꞌjekawẽn ceweju ip. Ixeyũ oꞌg̃ukorẽm.
\p — Kuyje ma juk Isaías emuwẽn icẽmãn — ioꞌe. — Imẽn oꞌe jemudupmubararaktup pe:
\p Deus eꞌem:
\mi “Deus kay oceju” i napa ma eꞌem iteyũ wuyjuyũ, i. Imẽnpit okay g̃u ip, iꞌeꞌem Deus, i juk oꞌe Isaías — ioꞌe Jesus.
\v 7 “Ẽn xipat,” i teꞌe ma eꞌem ip owebe, i. Imẽnpit xipat g̃u õn ip cexe, ioꞌe Deus, ioꞌe Isaías. “Deus ekawẽn eymutaybitbin oceju bit,” i napa ma eꞌem ip. Imẽnpit wuyjuyũ ekawẽn acã adeayũ mutaybitbin ip, iꞌeꞌem Deus, i juk oꞌe Isaías — ioꞌe Jesus. 
\m
\v 8 — Eyju Deus ekawẽn iwatiwan aypapayũꞌũmꞌũm ekawẽn tag̃ eyeku am — ioꞌe Jesus Fariseuyũ be, Moisés ekawẽn imutaybitbinꞌukayũ be dak. 
\v 9 — Deus ekawẽn kay g̃u eyju- -aypapayũꞌũmꞌũm ekawẽn kay acã! Jewexe eyetaybit cĩcã! — ioꞌe. 
\v 10-13 — Moisés oꞌe kuyje:
\mi Xipan cuy eyebay epejukuk, eyxi dak, i.
\p Waram oꞌe g̃uto:
\mi Jebay muymuyꞌukat cuy epeyaoka- -jexi muymuyꞌukat tak, i.
\m Imẽn Moisés oꞌe — ioꞌe. — Imẽn eyju wararaꞌacayũ muwaꞌũmꞌũm cebay buywat am, ixi buywat am tak. “ ‘Dinheiro kuka adi og̃ũm eywebe eybuywat am,’ i juy epeꞌe eyebay be,” i eyju bit eꞌem wararaꞌacat mukũyjojom — ioꞌe Jesus. “ ‘Imẽnpit ibo edinheiro og̃ũm cuy Deus pe,’ i juy epeꞌe eyebay be,” iꞌeꞌem eyju bit wararaꞌacat mukũyjojom — ioꞌe Jesus. — “ ‘G̃asũ ibaꞌore owebe eybuywat am,’ i juy epeꞌe cebe ip,” i eyju eꞌem imukũyjojom ip — ioꞌe Jesus. — Imẽn eyju Deus ekawẽn kay g̃u. Deus ekawẽn g̃u wararaꞌacayũ mutaybitbin eyju- -eyekawẽn acã. Deus ekawẽn tag̃ g̃u eyju jekukum- -eyekawẽn tag̃ acã. Soan eyju eꞌem cedag̃ꞌũmãn — Jesus oꞌe Fariseuyũ be. 
\p
\v 14 G̃ebuje Jesus waram adeayũ oꞌtomuwã jewekay.
\p — Eyaꞌõpicũg̃cũg̃ cuy apẽn õn em iap kay — ioꞌe cebe ip. — Eyetaybin cuy epesop! — ioꞌe. 
\v 15 — Wuywebe iõmõmap g̃u wuymukẽrẽrẽrẽn- -wuybinũn peat acã! — ioꞌe. 
\v 16 — Wekawẽn eyetaybit pin pima, xipan cuy eyaꞌõpicũg̃cũg̃! — ioꞌe.
\p
\v 17 Jesus oꞌjẽm adeayũ xewi.
\p G̃ebuje oõm ukꞌa be jeweju etaybitbinayũ eju. Oꞌjekawẽn ip ceweju- -Jesus eju.
\p — “Wuywebe iõmõmap g̃u wuymukẽrẽrẽrẽn- -wuybinũn peat acã,” i kuy ece adeayũ be — ioꞌe ip. — Ibaꞌarẽm ekawẽn ocexe — ioꞌe ip.
\p
\v 18-19 — Eyju dak eyetaybit g̃u du wekawẽn? ioꞌe. — Adeayũ-buxim wekawẽn paꞌarẽm tu eyxe? — Jesus oꞌe. — Eyaꞌõpicũg̃cũg̃ cuy epesop waꞌõ kay. Eyxat õmõm eybinũn pe g̃u- -eydada be acã! G̃uyjom cẽmcẽm g̃u to eywebewi — ioꞌe. — Imẽneju eyxat g̃u eymukẽrẽrẽrẽn — ioꞌe.
\m Jesus iboam iꞌe buje “Soat iꞌopi g̃u wuywebe” iam imutaybin ojuy ip oꞌe.
\p
\v 20 — Ixat g̃u ijodiacat mukẽrẽrẽrẽn — ioꞌe. — Ijodiacat ikẽrẽat mujurũg̃rũg̃ soat em ikẽrẽat kay g̃ebum puye — ioꞌe. 
\v 21 — Soat em ijodiat g̃ebum ikẽrẽat kay. Imẽnpuye soat em ikẽrẽat kay jewag̃uydadam ip: aoyũ kaykay dak ip, wararaꞌacat pubut tujupaꞌumꞌum tak ip; wararaꞌacat aokakam tak ip, 
\v 22 wararaꞌacat tayxi kaykay dak ip; itabikuku dak ip wararaꞌacat pubut kay; ikẽrẽat mujurũg̃rũg̃ tak ip; napapaꞌuk tak ip; wararaꞌacat mug̃uykuku ojuy dak ip; cekawẽnkẽrẽ dak ip; itabutkarey dak ip; wararaꞌacat awẽg̃tatam tak ip; yobog̃an pin tak ip; yag̃uybaꞌarẽm tak ip — ioꞌe Jesus. 
\v 23 — Ijodiacat ikẽrẽat mujurũg̃rũg̃ jexat oꞌom puye g̃u- -soat em ikẽrẽat kay g̃ebum puye acã — Jesus oꞌe.
\m Imẽn Jesus jewejuayũ oꞌg̃utaybitbin
\p
\v 24 Ibocewi Jesus oꞌju Tiro ka kay, ig̃o ka tẽg̃atka kay dak. Oõm ukꞌa be jenuy ãm. Ibuꞌu osunuy wararaꞌacat pe itaybit am Jesus omuy ijoce iam. Imẽnpit cemunẽm paꞌore osunuy.
\p
\v 25 G̃ebuje Jesus ukꞌa be omuy iam oꞌjekũyjo ayacat. Ixe ayacat it axik kug̃ osunuy jewebe- -ayacatꞌitꞌit. Jeꞌit muꞌadaap ojuy oꞌju Jesus kay. Oꞌjẽg̃ꞌaecõg̃cõg̃ cewap. 
\v 26 Grego aꞌõm kawẽnwẽnꞌukat osunuy ayacat. Judeu g̃u osunuy. Sirofenícia eipi bewiat osunuy.
\p — Oꞌit axik kug̃ — ioꞌe. — Eg̃ujẽm cuy cebewi — ioꞌe Jesus pe.
\p
\v 27 — Ap! — ioꞌe. — Judeu g̃u ẽn — ioꞌe. — Koap puk õn webekitkit puywan- -Judeuyũ buywan. G̃uyjom acã Judeuꞌũmayũ osubuywan — ioꞌe. — Cedag̃ g̃u wuywebe webekitkit xat pum iũm ãm akurice be. Icẽm g̃u du? — ioꞌe Jesus ibuyxijojom.
\p
\v 28 — Icẽmãn ẽn eꞌem, Kariwa — ayacat oꞌe. — Imẽnpit akuriceyũ bekitkit pi nõmnõm acap wiwim mesa diotpe — ioꞌe. — Õn tak ewebe obuywacap wiwim akurice be ibi nõmnõm acap wiwiap puxim — ioꞌe ayacat.
\p
\v 29 — Icẽmãn ẽn eꞌem — ioꞌe. — Imẽnpuye juy ecepit edukꞌa kay — ioꞌe. — Axik kuy og̃ujẽm eꞌit pewi — ioꞌe.
\p
\v 30 Oꞌjepit jeꞌit kay. Jeꞌit oꞌtobuxik poꞌi jexexecap pe. Axik kuy oꞌjẽm cebewi. Xipat oꞌe.
\p
\v 31 G̃ebuje Jesus oꞌjẽm Tiro ka tẽg̃atka bewi. Jepitpin pima oꞌkap Sidom ka dag̃, 10 beatka dag̃ tak. Oꞌju iodi kay Galiléia eipi beati kay.
\p
\v 32 G̃ebuje ibureyũ yaꞌõpiꞌũmat oꞌtujowat Jesus kay. Yaꞌõpiꞌũmat yaꞌõbabiꞌũm tak osunuy.
\p — Ebu juy esubumõg̃ yaꞌõpiꞌũmat pe imuꞌada am — ioꞌe ip Jesus pe.
\p
\v 33 G̃ebuje Jesus yaꞌõpiꞌũmat oꞌtujowat adeayũ parakpewi. Jag̃epũg̃ ma oꞌtujowat. Oꞌjewebumuy yaꞌõpiꞌũmat aꞌõpi be. Oꞌjexi. Jebidim yaꞌõpiꞌũmat kõ oꞌsukõmucay. 
\v 34 Kabi kay jeapũnapũn pima, oꞌjepidowat.
\p — Efatá! — Jesus jaꞌõm oꞌe cebe.
\p (Efatá “aꞌõpi juy jaꞌõpietok” iape). 
\v 35 Yaꞌõpiꞌũmat oꞌjeaꞌõpietok g̃ebuje. Oꞌjekõewut tak. Xipan oꞌe jekũyjojom. Xipan oꞌe kawẽnwẽn tak. Jesus oꞌjepit adeayũ kay yaꞌõpiꞌũm tũĩbit eju.
\p
\v 36 — Jesus yaꞌõpiꞌũmat aꞌõpi oꞌyaꞌõpimutok iap awẽg̃ epeguwẽn g̃u wararaꞌacayũ be — ioꞌe Jesus adeayũ be.
\p Imẽnpit big̃ ma ip oꞌg̃uwẽnuwẽn yawẽg̃.
\p
\v 37 Yawẽg̃ cocoꞌukayũ itabẽg̃bẽg̃ oꞌe ip ijojom.
\p — Xipan acã xeku eꞌem — ioꞌe ip jewewebe. — Ixe aꞌõbi yaꞌõpiꞌũm tũibiyũ jekũyjojom oꞌe g̃asũ bit. Ixe aꞌõbi yaꞌõkẽrẽ tũibiyũ xipan kawẽnwẽn oꞌe g̃asũ bit — ioꞌe ip.
\b
\c 8
\p
\v 1 G̃uyjom g̃uto adeayũ oajẽm Jesus kay. Ebapũg̃ kabiabun ixeyũ mutaybitbin osunuy Jesus. Ixat ip oiꞌũm. Jesus jeweju etaybitbinayũ oꞌtomuwã jewekay.
\p
\v 2 — Wetabotaidabotbot iteyũ kay — ioꞌe. — Xepxep xet oweju ip jekukum. G̃asũ bit ixatꞌũmg̃u ip oꞌe — ioꞌe. 
\v 3 — Jedukꞌa kay ip imuypit puje, e dag̃ ma kuka juk ip oꞌtaoꞌũmꞌũm repibun — ioꞌe. — Pũg̃pũg̃ wũywi oajẽmjẽm — Jesus oꞌe jeweju etaybitbinayũ be.
\p
\v 4 — Apẽn iteyũ xan acejat? Kaꞌũmg̃u ijoce — ioꞌe ip Jesus pe.
\p
\v 5 — Pebũrũꞌa eyju pãoꞌa kug̃? — Jesus oꞌe.
\p — 7 be ma — ioꞌe ip.
\p
\v 6 — Epabik cuy ipi ju — Jesus oꞌe adeayũ be- -jexat kug̃ꞌũmayũ be oꞌe.
\p G̃ebuje Jesus ixan oꞌjat. 7 be oꞌyabu pãoꞌa.
\p — Bay, ẽn xipat — ioꞌe. — Eyaũm ocexatꞌam pãoꞌa — Jesus oꞌe Deus pe.
\p Pãoꞌa oꞌyadakat. Oꞌyamuꞌacog̃ cĩcã. Yaꞌade jĩjã oꞌe.
\p — Juku. Epeyaũm cuy adeayũ be — ioꞌe Jesus jeweju etaybitbinayũ be.
\m Yaũmũm oꞌe cebe ip ixeyũ be yamuꞌẽꞌẽ ãm adeayũ be. Oꞌyamuꞌẽꞌẽ ip cebe ip. 
\v 7 Axima kug̃ oꞌe ip pũg̃pũg̃ ma.
\p — Bay, ẽn xipat — ioꞌe. — Axima eg̃ũm ocewebe — Jesus oꞌe Deus pe.
\p — Judaku — ioꞌe. — Epeg̃ũm cuy adeayũ be — ioꞌe jeweju etaybitbinayũ be.
\m Oꞌyamuꞌẽꞌẽ ip adeayũ be.
\p
\v 8 G̃ebuje soat ip oꞌjoꞌoꞌo adeayũ. Ibeg̃beg̃ oꞌe ip Jesus pãoꞌa oꞌyamuꞌacog̃ puye. Ceweju etaybitbinayũ cepoyat oꞌjat ip. Axima epoyat oꞌjat ip, pãoꞌa epoyatꞌa dak. 7 be oꞌyamunopapũn ip cepoyan yobaꞌa. 
\v 9 Ade jĩjã wuyjuyũ oꞌjoꞌoꞌo. Ebadipdip mil oꞌjoꞌoꞌo.
\p G̃ebuje Jesus adeayũ oꞌg̃uypit ip tukꞌa kay. 
\v 10 Ixe oõm kobe be jeweju etaybitbinayũ eju. Oꞌju ip Dalmanuta eipi be.
\p
\v 11 Fariseuyũ oꞌju Jesus kay. Jesus buyxijo ojuy ip oꞌju.
\p — Ocewebe iꞌe baꞌoreat cuy eg̃ubapuk ocewebe — ioꞌe ip. — Iboap co buje, acetabun ẽn Deus xewiat iap kay — ioꞌe ip cebe.
\p
\v 12 Imẽn oꞌe ip Jesus buyxijoap ojuy. Jesus ig̃uycũg̃ oꞌe jekay itabut am ibuꞌu ip puye. 
\p — Ap! — ioꞌe cebe ip. — Eyju eꞌem “Ocewebe iꞌe baꞌoreat cuy eg̃ubapuk ocewebe,” i — ioꞌe. — Imẽnpit eybuꞌuꞌu eyetabut am okay. Imẽnpuye eywebe iꞌe baꞌoreat og̃ubapuk g̃u eywebe — ioꞌe.
\p
\v 13 Ibocewi Jesus Fariseuyũ oꞌsuiwat. Oõm kobe be. Oꞌju wĩnãbu jeweju etaybitbinayũ eju. 
\v 14 Pũg̃ꞌa ma pãoꞌa kug̃ oꞌe ip kobe be. Oꞌyag̃uybaꞌũm ip waraꞌatꞌa dujowat am jexatꞌam. 
\v 15 Jesus oꞌjekawẽn ceweju ip.
\p — Fariseuyũ epãoꞌa muyuhuhuaptõm kay g̃u juy epesop, Herodes ebekitkit epãoꞌa muyuhuhuaptõm kay g̃u dak — Jesus oꞌe.
\p
\v 16 — Apẽnpuye dak ixe kawẽnwẽn oceweju pãoꞌa muyuhuhuaptõm? — ioꞌe ip jewewebe. — Imẽn kawẽnwẽn oceweju pãoꞌa kug̃ꞌũm puye wuyju — ioꞌe ip.
\p
\v 17 Jesus itaybit oꞌe apẽn ip oꞌjekawẽn jewewebe iam. Imẽnpit pãoꞌa muyuhuhuaptõm iꞌe buje, Fariseuyũ emumutaybitbinap iꞌe ojuy osunuy.
\p — “Pãoꞌa kug̃ g̃u wuyju,” iꞌũmg̃u juy epeꞌe! — ioꞌe. — Wekawẽn paꞌarẽm tu eyxe? Eyetaybit g̃u du? — ioꞌe. 
\v 18 — Eyetaybit g̃u eyetate maꞌg̃u. Jekũyjojom g̃u eyju, eyaꞌõpiehe maꞌg̃u — ioꞌe. — Eyag̃uybaꞌũm waꞌõbacaam ma pãoꞌa oyamuꞌacog̃ iap kay — ioꞌe. 
\v 19 — Pãoꞌa oyaũm 5000 beayũ xatꞌam iap kay g̃ebum g̃u du eyju? Pebũrũꞌa yobaꞌa epeyamunopapũnpũn yaepoyan? — ioꞌe cebe ip.
\p — 12 beatꞌa yobaꞌa — ioꞌe ip.
\p
\v 20 — G̃ebum g̃u du eyju 7 be pãoꞌa oyaũm 4000 beayũ xatꞌam iap kay? — ioꞌe. — Pebũrũ ico epeg̃unopapũnpũn yaepoyan? — ioꞌe.
\p — 7 be ico — ioꞌe ip.
\p
\v 21 — Eyetaybit g̃u du kaꞌũmãn ma ibaꞌore owebe iam? — ioꞌe Jesus.
\p
\v 22 Jesus oajẽm Betsaida ka be jeweju etaybitbinayũ eju. Ig̃o ka watwat ag̃okatkat oꞌtujowat Jesus kay- -itaꞌũmat.
\p — Itaꞌũmat cuy eg̃ucay imuꞌada am — ioꞌe ip Jesus pe.
\p
\v 23 G̃ebuje Jesus itaꞌũmat oꞌsubaixik. Oꞌtujowat ag̃oka bewi. Jebidi oꞌtimõg̃ itaꞌũmat eta be. Jebu oꞌsubumõg̃ cebe.
\p — Ijojom tu ẽn? — ioꞌe.
\p
\v 24 Itaꞌũmat oꞌjeak.
\p — Ag̃okatkayũ jojom õn — ioꞌe. — Imẽnpit awaydip coꞌi ip cũg̃cũg̃ oxe — ioꞌe.
\p
\v 25 Jesus jebu oꞌsubumõg̃ maꞌg̃uto ita be xipan g̃u ijojom puye. Kabia oꞌe ijojom g̃ebuje bit. Xipan oꞌe ijojom.
\p
\v 26 G̃ebuje Jesus itaꞌũm tũibit oꞌg̃uypit tukꞌa kay.
\p — Ecepit cuy edukꞌa be — ioꞌe. — Eju g̃u juy ikabog̃atka kay — ioꞌe.
\p
\v 27 G̃ebuje Jesus oꞌju jeweju etaybitbinayũ eju. Oꞌju ip ag̃oka kay ikaꞌĩcatka kay. Cesaréia eipi dag̃ oꞌkap ip- -Filipe eipi dag̃. E dag̃ pima ip oꞌjekawẽn ceweju ip.
\p — Abu xeꞌe õn wuyjuyũ xe? — Jesus oꞌe cebe ip.
\p
\v 28 — “Teku waram g̃uto oꞌjetaitꞌiat,” iꞌeꞌem ip soat wuyjuyũ — ioꞌe ip. — “Teku João Batista- -waram g̃uto oꞌjetaitꞌiat,” i pũg̃pũg̃pũg̃ eꞌem — ioꞌe ip. — “Teku Elias- -waram g̃uto oꞌjetaitꞌiat,” iꞌeꞌem wararaꞌacayũ — ioꞌe ip. — “Teku kuyjeat- -Deus ekawẽn muwẽnuwẽnꞌukat- -waram g̃uto oꞌjetaitꞌiat,” iꞌeꞌem wararaꞌacayũ — ioꞌe ip.
\p
\v 29 — Abu õn eyxe bit? — ioꞌe.
\p — Ẽn Cristo- -Deus emunaẽ ẽn — Pedro oꞌe.
\p
\v 30 — Omuwẽn g̃u juy epeꞌe — ioꞌe Jesus. — Adeayũ be: “Teku Deus emunaẽ,” i g̃u juy epeꞌe cebe ip — ioꞌe.
\p
\v 31 Jesus jaokaap oꞌg̃uwẽn jeweju etaybitbinayũ be. 
\p — Soat wag̃o õn — ioꞌe. — Ipiatpiꞌajom cĩcã õn — ioꞌe. — Judeuyũ kukukayũ okayꞌũm cĩcã jeꞌe, Moisés ekawẽn imutaybitbinꞌukayũ dak, Judeuyũ epaĩyũ kukukayũ dak — ioꞌe. — Oaokaat ip. Xepxep xet kap puje waram ocetait — ioꞌe Jesus.
\p
\v 32 Cekawẽnbapuk cĩcã oꞌe cebe ip.
\p G̃ebuje Pedro Jesus oꞌtujowat wararaꞌacayũ xewi.
\p — “Oaokaat ip,” iꞌũmg̃u juy ece! — ioꞌe Jesus pe.
\p
\v 33 Jesus oꞌjekorepẽn. Wararaꞌacayũ jojom pima, jeweju etaybitbinayũ jojom pima dak, Pedro oꞌg̃ukorẽm.
\p — Mũg̃ ece! — ioꞌe. — Satanás ekawẽn puxim ẽn kawẽnwẽn. Satanás tak ibuꞌu owebe weꞌũ ãm adeayũ beam! Deus ag̃uy dag̃ g̃u ẽn jewag̃uyg̃uy- -Satanás ag̃uy dag̃ acã — ioꞌe.
\p
\v 34 G̃ebuje Jesus adeayũ oꞌtomuwã jewekay, jeweju etaybitbinayũ dak. Oꞌjekawẽn ceweju ip.
\p — Oweju jeku pin pima, eywekay ma eyag̃uybaꞌũm cuy; eybuꞌum g̃u dak cuy jeꞌũ ãm owebeam; waꞌõ dag̃ tak cuy epeku — ioꞌe. 
\v 35 — Eybuꞌu jeꞌũ ãm owebeam pima, epeꞌũꞌũ. Owebeam eyꞌũ buje bit, soat em eyetait epesop kabi be eyeꞌũap tomukadi, kawẽn idipat muwẽn ãm eyeꞌũ buje dak — ioꞌe. 
\v 36 — Ajo-kug̃ tak epesop soat tarekrek kug̃ ipi dag̃at kug̃, eybiõg̃buk ipiatpiꞌajojoap pe imẽnpit? Kaꞌũma kug̃ ma! — ioꞌe. 
\v 37 — Teiꞌũmg̃u soat em Deus xe wuydopapteim. 
\v 38 G̃asũacat ikẽrẽat mujurũg̃rũg̃. Deus kay jetabucap oꞌjepere ip. Okayꞌũm cĩcã ip. Waꞌõ kay g̃u dak. Soat wag̃o õn. “Jesus ebekitkiyũ g̃u oceju bit,” iꞌeꞌem ip. Wepit puje õn tak “Webekitkiyũ g̃u eyju,” i oceꞌe cebe ip. Ocepit ma. Idip cĩcã jeꞌe wepicap. Deus ekawẽn tojotjotꞌukayũ eju ocepit- -idip cĩcãayũ eju — ioꞌe. 
\b
\c 9
\m
\v 1 — Deus soat kukukan pima kaꞌũma ma ixe joꞌian jeꞌe yaꞌõbacaan. Ixe xe ma epesop ixe soat kukukan pima. Ijoꞌũm puje epeꞌũꞌũ g̃u pũg̃pũg̃ eyꞌin — ioꞌe Jesus.
\p
\v 2 5 xet kap puje Jesus Pedro oꞌtujowat jeweju, João dak, Tiago dak. Oꞌju ip coꞌa kay- -yaumatꞌa kay. Oajẽm ip. Oꞌjeu ip.
\p G̃ebuje Jesus oꞌjewemuwarurun itabun ip. 
\v 3 Cesay isopsep cĩcã oꞌe. Irut cĩcã oꞌe. Ibaꞌore wuywebe say murun am cesay rucap coꞌiam.
\p
\v 4 G̃ebuje aypapayũꞌũmꞌũm oꞌjebapuk iboce. Kabi kadiwi oꞌjebapuk ip. Moisés oꞌjebapuk, Elias dak. 
\v 5 Kawẽnwẽn osodop ip Jesus eju. Pedro oꞌjekawẽn Jesus eju.
\p — Ocemutaybitbinꞌukat, xipat wuyju ijoceam — ioꞌe Pedro. — Ebapũg̃ xijap cuy ocejomõg̃- -pũg̃ edopam, waraꞌat Moisés dopam, waraꞌat Elias dopam — ioꞌe.
\p
\v 6 Itaybit g̃u oꞌe jede am jeparara pibun. Pedro bureyũ dak iparara ip oꞌe. 
\v 7 Kabikerereat oꞌjebapuk. Oꞌg̃ubaꞌarẽm ip Jesusyũ.
\p G̃ebuje Deus oꞌjekawẽn kabikerereat pewi.
\p — Teku okpot — ioꞌe. — Ikukpin cĩcã oxe. Eyaꞌõpicũg̃cũg̃ cuy epesop yaꞌõ kay — ioꞌe.
\p
\v 8 Ceweju etaybitbinayũ jeakag̃ pima, xepxepayũ oꞌjeu maꞌg̃uto- -kabi kadiwi oajẽmꞌiayũ. Waraꞌacat g̃u oꞌjojojo ip- -Jesus acã.
\p
\v 9 G̃ebuje Jesus oꞌjekawẽn jeweju etaybitbinayũ eju. Coꞌa dag̃wi kopkom pima oꞌjekawẽn ceweju ip.
\p — G̃asũ g̃u juy epejojojoiap epeg̃uwẽn adeayũ be — ioꞌe. — Soat wag̃o õn — ioꞌe. — Weꞌũ buje waram ocetait. Waram wetait puje acã juy epeg̃uwẽn epejojojoiap — ioꞌe.
\p
\v 10 Imẽneju kũyjobit osodop ip Jesus aꞌõ kay. Oꞌjojojoiap oꞌg̃uwẽn g̃u ip wararaꞌacat pe. Imẽnpit jeweweju ma ip oꞌjekawẽn.
\p — Apẽnpuye ixe oꞌe “Waram g̃uto ocetait,” i? — ioꞌe ip jewewebe ma.
\p
\v 11 — Apẽnpuye Moisés ekawẽn ocemutaybitbinꞌukayũ eꞌem “Elias koam omuyku,” i? — ioꞌe ip Jesus pe.
\p
\v 12 — Icẽmãn õn eꞌem eywebe — Jesus oꞌe. — Elias coꞌiat koam omuyku adeayũ muisun ãm. Adeayũ ag̃uymuwarurun jeꞌe itabut am ip Deus kay — ioꞌe. — Kuyje omuwẽg̃aptup ip oꞌtupmubararak. Imẽn eꞌem ibodup:
\mi Ite ipiat supiꞌajo jĩjã, i. Warẽmtag̃ ma ip ixe jukuk, i. Itakoma jĩjã jeꞌe ip cekay, iꞌeꞌem ibodup — ioꞌe Jesus. 
\m
\v 13 — Icẽmãn õn eꞌem eywebe. Elias coꞌiat kuy oajẽm. Warẽmtag̃ ma ip oꞌjukuk. Ikẽrẽm cĩcã ip oꞌjukuk — ioꞌe Jesus. — Oꞌg̃udadaibotbon cĩcã ip. Kuyjeatup ekawẽn tag̃ ikẽrẽm ip oꞌjukuk — ioꞌe.
\p
\v 14 Wararaꞌacayũ kay, jeweju etaybitbinayũ kay yajẽm puje, ade jĩjã wuyjuyũ oꞌjojojo yakokoreren ip. Moisés ekawẽn imutaybitbinꞌukayũ Jesus eju etaybitbinayũ aꞌõxikxig̃ oꞌe yaꞌõberen.
\p
\v 15 Jesus co buje adeayũ itabẽg̃bẽg̃ oꞌe ip ijojom. Oꞌjedau ip cekay- -Jesus kay.
\p — Ajẽm tu? — ioꞌe ip Jesus pe.
\p
\v 16 — Oajẽm — ioꞌe Jesus. — Apẽnpuye eyju oweju etaybitbinayũ aꞌõxikxig̃? — ioꞌe.
\p
\v 17 — Ocemutaybitbinꞌukat, axik opop okpot pe — ioꞌe pũg̃. — Ixe axik okpot aꞌõmuꞌũmuꞌũm, yaꞌõpimuꞌũmuꞌũm tak. 
\v 18 Axik pe ixe bu buje, okpot muyꞌatꞌan. Ibidopabok cẽmcẽm ibi bewi dak, jenũyekũnũykũnũy dak, ibacaꞌũm eꞌem tak — ioꞌe cebay. — Imẽnpuye okpot otojot ekay. Ajẽm awap “Axik cuy epeg̃ujẽm okpot pewi,” i juk oce eweju etaybitbinayũ be. Imẽnpit ibaꞌore oꞌe cebe ip imujẽm ãm — ioꞌe Jesus pe.
\p
\v 19 — Eyetabut g̃u Deus kay — ioꞌe adeayũ be. — Pug̃ũn og̃uy eyxe? Ade koato eyxe og̃uy bima dak, kuka eyetabutꞌũm ma epesop okay — ioꞌe. — Yaypanꞌisuat cuy epetojot okay — ioꞌe Jesus cebe ip.
\p
\v 20 Imẽnpuye yaypanꞌisuat oꞌtujowat ip.
\p Jesus co buje, axik yaypanꞌisuat oꞌg̃ukutukutu jĩjã. Ipi ju oꞌat. Oꞌjejorojoro dak ipi ju. Ibidopabok oꞌjẽm ibi bewi.
\p
\v 21 — Puju ku ite ekpot oꞌe imên? — ioꞌe Jesus cebay be.
\p
\v 22 — Bekin pin ma — ioꞌe. — Ade em imuyꞌatꞌan daxa be. Imuꞌakõmkõm idibi be imuyꞌũap ojuy. Etabotaidabotbon cuy eg̃uy ocekay — ioꞌe. — Ocebuywan cuy ece ewebe iꞌe but pima — ioꞌe.
\p
\v 23 — “Iꞌe but ewebe bima,” iꞌũmg̃u juy ece! Okay etabut pima etaybit eceꞌe soat iꞌe but owebe iam — ioꞌe Jesus.
\p
\v 24 — Wetabut cĩcã g̃u — ioꞌe cebay. — Wetabutsũ ma. Obuywan cuy ece wetabut cĩcã am — ioꞌe yaꞌõberen g̃ebuje bit.
\p
\v 25 Adeayũ oꞌjedau cekay ijo am. Ixeyũ jo buje, Jesus axik oꞌg̃ukorẽm.
\p — Ejẽm cuy cebewi — ioꞌe wuyjuyũ aꞌõmuꞌũmuꞌũmꞌukat pe, yaꞌõpimuꞌũmuꞌũmꞌukat pe. — Waram pit eõm g̃u juy cebe — ioꞌe.
\p
\v 26 G̃ebuje axik oꞌjewãwãwã yaꞌõberen. Ixe dak yaypanꞌisuat oꞌg̃ukutukutu jĩjã. Oꞌjẽm cebewi. Yaypanꞌisuat ceꞌũat puxim oꞌe. Imẽnpuye:
\p — Oeꞌũ teku — ioꞌe adeayũ.
\m Tũybe ceꞌũ iãn oꞌe ip.
\p
\v 27 Imẽnpit Jesus yaypanꞌisuat oꞌsubaixik. Oꞌg̃uꞌag̃obucẽg̃. Yaypanꞌisuat oꞌãy. Xipat oꞌe.
\p
\v 28 Ukã be Jesus õm puje, ceweju etaybitbinayũ oꞌjekawẽn ceweju.
\p — Apẽnpuye ocewebe axik mujẽm paꞌore oꞌe? — ioꞌe ip.
\p
\v 29 — Soat em ma Deus eju kawẽnwẽnꞌukꞌũm pima, ibaꞌore wuywebe ite buximat mujẽm ãm — Jesus oꞌe.
\p
\v 30-31 Jesus waram g̃uto jeꞌũap oꞌg̃uwẽn jeꞌũm awap. Jesus Galiléia eipi dag̃ oeku jeweju etaybitbinayũ eju. Imutaybin ojuy ip oeku. Imẽnpuye ibuꞌu oꞌe wararaꞌacayũ be itaybit am poce omuy iam.
\p — Soat wag̃o õn — ioꞌe. — Oũm ip okay itakomaayũ be — ioꞌe Jesus. — Oaokam ip. Xepxep xet kap puje bit, waram ocetait — ioꞌe Jesus.
\m
\v 32 Imẽn imutaybin ojuy oꞌe. Imẽnpit pẽg̃ape ite oꞌe iam itaybit g̃u oꞌe ip. Ade em cuk adi oꞌeꞌe cebe: — Ekawẽn paꞌarẽm ocexe — i. Imẽnpuye ibisũsũn oꞌe ip “Pẽg̃ape ẽn eꞌem” iꞌe am cebe. 
\p
\v 33-34 Ibocewi Jesus oꞌju Cafarnaum ka be jeweju etaybitbinayũ eju.
\p E dag̃ pima jewaꞌõxikxig̃ ip.
\p — Õn ma wararaꞌacat podi ma waꞌõbuyxiat! — ioꞌe ip soat.
\p Oexexe ip Cafarnaum ka be.
\p G̃ebuje Jesus oꞌjekawẽn ceweju ip. Ukã be bima oꞌjekawẽn ceweju ip.
\p — Apẽn cuk epeꞌe eyewewebe e dag̃ pima? — ioꞌe.
\p Oꞌjede g̃u ip, e dag̃ pima “Õn ma wararaꞌacat podi ma waꞌõbuyxiat,” i juk oꞌe ip puye. Oꞌjewemusũsũn ip jede am.
\p
\v 35 Jesus oabik.
\p — Eyaꞌõpicũg̃cũg̃ cuy — ioꞌe. — Yobog̃an pin pima, yopican cuy epesop. Soat puywatwan tak cuy epesop — ioꞌe Jesus.
\p
\v 36 Ixe dak bekicat oꞌsubuixik. Oꞌtujuajẽm cepidase ip. Oꞌyakobot. Oꞌjekawẽn maꞌg̃uto jeweju etaybitbinayũ eju.
\p
\v 37 — Bekitkit xipan cuy epejukuk, eyju webekitkit puye — ioꞌe. — Xipan bekitkit kug̃ pima, xipan okug̃ tak epesop. Xipan okug̃ pima, xipan omudocat kug̃ tak epesop — ioꞌe Jesus.
\p
\v 38 G̃ebuje João oꞌjekawẽn Jesus eju.
\p — Kariwa — ioꞌe. — Ag̃okatkat cuk ocejojojo — ioꞌe. — Ibiõg̃buk kẽrẽat mujẽmujẽm oꞌe ijodiacayũ bewi “Jesus aꞌõbi õn jemujẽm,” iꞌeꞌem — ioꞌe. — “Imẽnmẽn g̃u bit,” i juk oce cebe, ixe wuyweju jekukuꞌukꞌũm puye — ioꞌe. 
\m
\v 39 Imẽnpit Jesus oꞌjede:
\p — “Imẽnmẽn g̃u bit,” iꞌũmg̃u juy epeꞌe cebe — ioꞌe. — Waꞌõbi wuywebe iꞌe baꞌoreat mubapukpug̃ pima, dao g̃u kuka omuy — ioꞌe. 
\v 40 — Wuykay itakomaꞌũmat wuykadiat — ioꞌe. 
\v 41 — Icẽmãn õn eꞌem eywebe. Waraꞌacat idibi tiũm eywebe tikõn ãm eyju Cristo ebekitkit puye. Deus tak xipacat jeꞌg̃ũm cebe — ioꞌe. 
\p
\v 42 — Bekicat mubuꞌun puje okay itabut am, ikẽrẽat mujurũg̃rũg̃ eyju, okay itabucat mubuꞌun puje. Imubuꞌun puje, Deus cuy ipiat supiꞌajoat eykay. Imẽn eyꞌe awap, xipat kuka juk oꞌe witaꞌa yabog̃atꞌa mukirik am eyag̃obu eju idibi be eymuakõm. Imubuꞌunꞌũm piam Deus kuka juk ipiat oꞌsupiꞌajoat g̃u eywebe — ioꞌe. 
\v 43 — Eybum ikẽrẽat mujurũg̃rũg̃ pima, epeyewebudakat cuy — ioꞌe. — Xipat kuka oꞌe eyõm ãm kabi be pũg̃pu bima dak. Xipat g̃u kuka oꞌe eyõm ãm ipiatꞌajojoap pe xepxepu ma- -daxa epirẽmꞌũmap pe — ioꞌe. 
\v 44 — (Iboce iohe g̃u- -soat em ma ierep. Daxa dak jepirẽmrẽm g̃u). 
\v 45 Ikẽrẽat mujurũg̃ ãm soat em eyju buje, epeyeweidakat cuy — ioꞌe cebe. — Xipat kuka oꞌe eyõm ãm kabi be eyeicug̃ tak. Xipat g̃u kuka oꞌe eywebe eyxik am ipiatꞌajojoap pe xepxep im ma — ioꞌe. 
\v 46 — (Iboce iohe g̃u- -soat em ierep. Daxa dak jepirẽmrẽm g̃u). 
\v 47 Eyetam ikẽrẽat mujurũg̃rũg̃ pima, epeyewetaꞌuk cuy! — ioꞌe. — Xipat kuka oꞌe eyõm ãm kabi be pũg̃ etam tak- -soat ma Deus aꞌõ kay iap pe. Xipat g̃u kuka oꞌe eywebe eyxik am daxabog̃ pe xepxep eta bima — ioꞌe. 
\v 48 — (Iboce iohe g̃u- -soat em ierep. Daxa dak jepirẽmrẽm g̃u. Iboceayũ soat em ipiatpiꞌajojom eꞌem) — ioꞌe Jesus.
\p
\v 49 — Wuyju puybit muyunuyun ig̃ẽmap puxim. Imẽnpuxim Deus tak ipiat piꞌajoan wuywebe, wuywebe ikẽrẽat mujurũg̃ap puxixim — ioꞌe. 
\v 50 — Kawta tayu bima, xipat cĩcã. Tayuꞌũm pima bit, xipat g̃u. Apẽg̃ãm tak takug̃ kuka acesop? Taxik am acã. Kawta tayuat pit xipat. Xipan cuy epeyewekuk eyju dak — ioꞌe.

\b
\c 10
\p
\v 1 Jesus oajẽm Judéia eipi kay. Jordãodi wĩnãbu oajẽm.
\p G̃ebuje ade jĩjã wuyjuyũ oꞌjeꞌawero maꞌg̃uto Jesus kay. Adeayũ mutaybitbinꞌuk osunuy iap puxim imutaybitbin maꞌg̃uto oꞌe waram. 
\v 2 Fariseuyũ oajẽm. Oꞌjekawẽn ip ceweju yaꞌõmukorẽm ojuy.
\p — Wuyawẽwẽap ekawẽn tag̃ tu wuytayxi epereperem? — ioꞌe ip Jesus pe.
\p
\v 3 — Apẽn wuyꞌajore Moisés oꞌe kuyje? — ioꞌe.
\p
\v 4 — “Eytayxi epere ojuy bima otayxim g̃u ece g̃asũ bit iaptup cuy epetupmubararak cekay,” i juk oꞌe Moisés — ioꞌe ip. — “Epetupũm cebe eytayxi be. Tup ũm puje, xipat eytayxi epere am,” i juk oꞌe Moisés — ioꞌe ip Jesus pe. — Itayxi epereap cũg̃ ma osunuy Moisés xe. Pãm exe? — ioꞌe ip cebe yaꞌõmuwarurunap ojuy.
\p
\v 5 — Moisés imẽn oꞌe eybuꞌu jĩjã yaꞌõ dag jekum puye — ioꞌe Jesus. 
\v 6 — Kuyje bit imẽn g̃u oꞌe. Kuyje Deus soat oꞌg̃ug̃ẽ — ioꞌe. — Ag̃okatkat oꞌg̃ug̃ẽ, ayacat tak. Ixeyũ oꞌg̃ug̃ẽ xepxem ma jekuku am. 
\v 7-8 Imẽnpuye jetayxi bu buje, ag̃okatkat cẽmcẽm jebay dukꞌa bewi. Jetayxi eju cucum. Jektop pu buje ayacat tak cẽmcẽm jexi dukꞌa bewi. Jektop eju cucum. Xepxep ma ip. Imẽnpit pũg̃at puxim ip oꞌe jewekug̃ soat em jeweweju ip cucum puye. 
\v 9 Deus xe ip pũg̃ ma. Imẽnpuye eytayxi juy epeyepere g̃u — ioꞌe Jesus.
\p
\v 10 G̃uyjom ukꞌa be oõm maꞌg̃uto Jesus, ceweju etaybitbinayũ dak.
\p — Ekawẽnpaꞌarẽm ocexe — ioꞌe ip Jesus pe. — Ocetayxi epeream cuy ocemutaybin — ioꞌe ip cebe.
\p
\v 11 — Ag̃okatkat jetayxi epere buje waraꞌat pu am jetayxim, ikẽrẽãn eꞌem koapat pe- -jetayxi be — ioꞌe. 
\v 12 — Imẽnpuxim ayacat jektop epere buje waraꞌat pu am jektom, ikẽrẽãn eꞌem koapat pe jektop pe — ioꞌe cebe ip.
\p
\v 13 Iboceayũ jeꞌiyũ oꞌtujowat ip Jesus kay Deus cuy xipan jeykuk iꞌe am.
\p — Bekitkit g̃u juy epetujowat Jesus kay — ioꞌe ceweju etaybitbinayũ bit cebe ip.
\p
\v 14 Jesus itakoma oꞌe jeweju etaybitbinayũ kay bekitkit tujowat ojuyacat oꞌg̃ukorẽmrẽm ip puye. 
\p — “Bekitkit g̃u juy epetujowat Jesus kay,” iꞌũmg̃u juy epeꞌe — ioꞌe cebe ip. — Ãg̃ jeedot ip okay — ioꞌe. — Ixeyũ buximayũ jeeõm kabi be soat Deus aꞌõ kay kũyjobit pima. Jeeõm ip ibuꞌuꞌũm puye ip Deus pe jekukan — ioꞌe. 
\v 15 — Icẽmãn õn eꞌem eywebe. Bekitkit ibuꞌu g̃u Deus pe jekuk an. Deus pe eykuk an eybuꞌu bima, Deus xe g̃u epesop soat Deus aꞌõ kay kũyjobit pima — ioꞌe.
\p
\v 16 Bekicat oꞌyakobot. Oꞌjekawẽn Deus eju.
\p — Bay, xipan cuy iteyũ bekitkiyũ ejukuk — ioꞌe.
\p
\v 17 Ibubut adeat oꞌju Jesus kay. Jesus cu ojuy bima ag̃okatkat daudaum oajẽm cekay- -yaypanꞌisuat. Oꞌjẽg̃ꞌaecõg̃cõg̃ cewap, Jesus yaꞌõbuyxi cexe buye.
\p — Kariwa, — ioꞌe. — Ẽn xipat cĩcã. Soat em Deus xe onuy pin wetait. Apẽntak oce soat em cexe onuy ãm? — ioꞌe Jesus pe.
\p
\v 18 — Apẽnpuye ẽn eꞌem owebe “Xipat cĩcã ẽn,” i? — ioꞌe. — Kaꞌũmg̃u xipacat- -Deus acã — ioꞌe. 
\v 19 — Kuy etaybit apẽn Moisés oꞌe wuyeꞌajojoyũꞌũmꞌũm pe iam — ioꞌe. — Imẽn oꞌe: wararaꞌacat epeyaoka g̃u juy, i; waraꞌacat tayxi kay g̃u juy, i dak; eybukurug̃ g̃u juy epesop, i dak; napa g̃u juy epeꞌe, i dak; wararaꞌacat epeg̃ug̃uykukuku g̃u juy, i dak; xipan cuy eyebay epejukuk, eyxi dak, i dak.
Imẽn Moisés oꞌe kuyje. Kuy etaybit ijom soan — ioꞌe Jesus.
\p
\v 20 — Kariwa, soat ijop ekawẽn tag̃ ojekukuku bekin pin ma — ioꞌe.
\p
\v 21 Jesus xe ibubut adeat ikukpin cĩcã oꞌe.
\p — Waraꞌan puk ece g̃u — ioꞌe. — Eju — ioꞌe ibubut adeat pe. — Soat ebubut cuy eteida. Ibo juy dinheiro teiꞌũma eg̃ũm tadaybocayũ be — ioꞌe. — Imẽn eꞌe buje, ade jeꞌe ebubut kabi be — ioꞌe. — Imẽn eꞌe buje juy ejot oweju — ioꞌe Jesus. 
\p
\v 22 Cekawẽn co buje ig̃uycũg̃ cĩcã oꞌe. Itakoma dak oꞌe. Ig̃uycũg̃ ma oꞌjẽm Jesus xewi ibubut ade jĩjã buye. Tacup oꞌe jebubun. Oꞌju g̃u Jesus eju.
\p
\v 23 Imẽnpuye Jesus jakokoreren oꞌjeak adeayũ kay. Ixe dak oꞌjekawẽn jeweju etaybitbinayũ eju.
\p — Ibaꞌore jĩjã ibubut adeat õm ãm kabi be — ioꞌe. — Ibuꞌu jĩjã ip Deus aꞌõ kay am, itabut cĩcã ip jebubut kay buye — ioꞌe.
\p
\v 24 Ceweju etaybitbinayũ itabẽg̃bẽg̃ oꞌe ip ijojom cekawẽn co buje.
\p Imẽnpuye Jesus oꞌjekawẽn maꞌg̃uto ceweju ip.
\p — Tapupuyũ, ibaꞌore jĩjã ijodiacat õm ãm kabi be. Ibuꞌu ip Deus aꞌõ kay am — ioꞌe. 
\v 25 — Camelo ikap paꞌore awi daobiꞌatok tag̃. Imẽnpit ibodi ma ibaꞌore ibubut adeat õm ãm kabi be — ioꞌe.
\p
\v 26 Jewag̃uymug̃ẽg̃ẽm oꞌe ip.
\p — Abu be dak jewedaxijo but? — ioꞌe ip.
\p
\v 27 G̃ebuje Jesus oꞌjeak cekay ip.
\p — Wuywedaxijo baꞌore soat em Deus xe wuydop am — ioꞌe cebe ip. — Deus pe bit wuydaxijo but. Soat iꞌe but Deus pe — ioꞌe Jesus.
\p
\v 28 — Kariwa! Kuy soat ocesuiwat eweju jeku am — ioꞌe Pedro.
\p
\v 29-30 — Icẽmãn õn eꞌem eywebe — ioꞌe Jesus. — Eyju okay jĩjã. Eyju kawẽn idipat muwẽn pin cĩcã soat kaka watwat pe. Imuwẽg̃ap ojuy eybubut epere buje, ade epejat waraꞌat eybubun. Eydukꞌa epere buje, yaꞌade epeyabu eydukꞌam- -100 beatꞌa. Eywag̃o epere buje, “owag̃o” i epeꞌe adeayũ be- -100 beayũ be. Eykitpit epere buje, “okitpit” i epeꞌe adeayũ be- -100 beayũ be. Eyxi epere buje “oxi” i epeꞌe adeayũ be- -100 beayũ be. Eyebay epere buje “webay” i epeꞌe adeayũ be- -100 beayũ be. Eyebekitkit epere buje, “webekitkit” i epeꞌe adeayũ be- -100 beayũ be. Eykat epere buje ade epejat eykan- -100 be. Wararaꞌacayũ jeꞌe itakoma eykay. Ipiat supiꞌajoat ip eywebe. Guyjom pit Deus xe epesop kabi be. Soat em epesop cexe eyetabẽg̃ — ioꞌe. 
\v 31 — Ade yaꞌõbuyxiayũꞌin yopicayũm jeedop ip. Ade yopicayũꞌin yaꞌõbuyxiayũm jeedop ip — ioꞌe Jesus.
\p
\v 32 Waram Jesus jeꞌũmap oꞌg̃uwẽn. Jeweju etaybitbinayũ eju cum oꞌe e dag̃ Jerusalém ka kay. Jesus oꞌju koap. G̃asũ ixeyũ oꞌju tomuju. Yag̃uybabiꞌũmꞌũm ip osodop. Iparara osodop ip wararaꞌacayũ ixeyũ nomujuayũ. Jesus 12 beayũ oꞌtomuwã jewekay.
\p
\v 33 — Eyaꞌõpicũg̃cũg̃ cuy epesop! — ioꞌe cebe ip. — Jerusalém ka kay cum wuyju. Soat wag̃o õn. Oũm ip okay itakomaayũ be, paĩyũ kukukayũ be, Moisés ekawẽn imutaybitbinꞌukayũ be dak. “Ikẽrẽat kug̃ ẽn Deus xe, ocexe dak,” i jeꞌe ip owebe — ioꞌe. — “Ejeꞌũ juy,” i jeꞌe ip owebe — ioꞌe. — Judeuꞌũmayũ be oũm ip — ioꞌe. 
\v 34 — Owaywayway jĩjã jeꞌe ip. Jetakomaap pibun ip omuxi. Omupokupok ip. G̃ebuje oaoka ip — ioꞌe. — Xepxep xet kap puje bit, waram g̃uto ocetait — ioꞌe Jesus.
\p
\v 35 G̃ebuje Tiago oajẽm Jesus kay, João dak. Zebedeu ipotpoyũ osodop ip.
\p — Kariwa — ioꞌe ip. — Ocemuojuyjuy eg̃ũm ocewebe — ioꞌe ip.
\p
\v 36 — Ajo ojuyjuy eyju oxewi? — ioꞌe Jesus.
\p
\v 37 — Soat kũyjobit aꞌõkay bima ãg̃ ocabik exe ixeyũ kuk am eweju- -pũg̃ oceꞌin ebaꞌat kadi, waraꞌat ebaꞌũg̃at kadi — ioꞌe ip. — Soat kũyjobit aꞌõ kay iap idip cĩcã jeꞌe — ioꞌe ip.
\p
\v 38 — Ap! — ioꞌe. — Eyetaybit punꞌũma eyju iboap ojuyjuy oxewi. Apẽn osupiꞌajo iap puxim tu eyju dak epesupiꞌajo? — ioꞌe.
\p
\v 39 — Hm hm — ioꞌe ip. — Oceju dak ipiat ocesupiꞌajo ebuxim ma.
\p — Imẽn ma — ioꞌe. — Ipiatpiꞌajojom pima bit, “Ipiat esupiꞌajoat g̃u juy ocewebe,” i du epeꞌe? — ioꞌe Jesus.
\p — Ap! “Ipiatpiꞌajoat g̃u juy ocewebe,” iꞌũmg̃u oceꞌe! — ioꞌe ip.
\p
\v 40 — Haꞌa — ioꞌe Jesus. — Obuxim ma eyju dak ipiat epesupiꞌajo — ioꞌe. — Õn g̃u bit eꞌem: “Abik cuy obaꞌat kadi obaꞌũg̃at kadi,” i. Webay imẽn iꞌe but. Ixe ma oweju adeayũ kukayũ nuy ãm oꞌg̃uxipan. Ixe ma jeꞌe abuyũ jabik iboce iap — ioꞌe Jesus.
\p
\v 41 Xepxepayũ ekawẽn co buje, wararaꞌacayũ ceweju etaybitbinayũ itakoma oꞌe ip cekay ip- -Tiago kay, João kay dak. 
\v 42 Imẽnpuye: — Epesot cuy okay — ioꞌe Jesus cebe ip.
\p — Eyetaybit Judeuꞌũmayũ kukukayũ soat em yaꞌõpurug̃ jebekitkiyũ mujujum iam — ioꞌe cebe ip. — Ikukukayũ soat em eꞌem “Ocaꞌõbuyxi jĩjã,” i. Big̃ ma ip jebekitkiyũ mukapikpig̃,” ioꞌe. 
\v 43 — Eyju bit- -imẽn g̃u juy epeyewekuk. Kariwabog̃ pin pima, wararaꞌacat puywatwan cuy epesop! — ioꞌe. 
\v 44 — Yaꞌõbuyxian pin pima, teiꞌũma epeyekapik cuy wararaꞌacat peam — ioꞌe Jesus. 
\v 45 — Imẽntak soat wag̃o õn. Wararaꞌacat pe obuywat am g̃u ojot ijodi. Wararaꞌacat puywatwatꞌukan ojot. Adeayũ daxijo am ma ojot. Soat em itabẽg̃ jeedop ip kabi be, ojeꞌũ buye — ioꞌe.
\p
\v 46 Ibocewi Jesus oajẽm Jericó ka be jeweju etaybitbinayũ eju. Oꞌjẽm ip Jericó ka bewi wuyjuyũxirixiri eju.
\p G̃ebuje Jesus oajẽm itaꞌũmat kay. Itaꞌũmat xikꞌi osunuy e bitakobe. Ibutet Bartimeu i osunuy. Timeu ipot osunuy. Kapkamayũ xewi dinheiro ojuyjuyꞌuk osunuy itaꞌũm puye.
\p
\v 47 — Jesus Nazareno omuyku — ioꞌe ip kapkamayũ Bartimeu be.
\p Iboap co buje, itaꞌũmat oꞌjewãwã Jesus kay. Oꞌjewãwã yaꞌõberen.
\p — Jesus! Ẽn Daviꞌũm naxeg̃ebit — ioꞌe — wuyeꞌajojoyũꞌũmꞌũm kukukat naxeg̃ebit — ioꞌe. — Etabotaidabotbon cuy eg̃uy okay! — i oꞌjewãwã yaꞌõberen.
\p
\v 48 Imẽnpuye adeayũ itaꞌũmat oꞌg̃ukorẽm.
\p — Ecemũg̃! — ioꞌe ip. — Ecewãwã g̃u juy! — ioꞌe adeayũ Bartimeu be.
\p Imẽnpit big̃ ma oꞌjewãwã yaꞌõberen.
\p — Jesus! Daviꞌũm naxeg̃ebit! Etabotaidabotbon cuy eg̃uy okay — ioꞌe.
\p
\v 49 Ibocewi Jesus oꞌjecũ e bidase.
\p — Itaꞌũmat cuy etomuwã — ioꞌe Jesus adeayũ be. 
Itaꞌũmat oꞌtomuwã ip.
\p — Epararam g̃u eg̃uy! — ioꞌe ip cebe. — Eꞌãy. Jesus enomuwãwãm — ioꞌe ip itaꞌũmat pe.
\p
\v 50 Bartimeu jeekabek oꞌjoxik g̃ebuje jecokcok pibun. Dao ma oꞌãy. Jesus kay oꞌjedau.
\p
\v 51 — Ajo-kay ẽn oxewi? — ioꞌe Jesus itaꞌũmat pe.
\p — Ocemutaybitbinꞌukat, wecoat pin oce! — ioꞌe itaꞌũmat.
\p G̃ebuje Jesus oꞌjekawẽn itaꞌũmat eju.
\p
\v 52 — Ecepit cuy edukꞌa kay — ioꞌe. — Kuy eceꞌada okay etabut puye — ioꞌe Jesus.
\p Itaꞌũm tũibit oꞌjecoan g̃ebuje bit. Dao ma oꞌe ijojom. Xipan oꞌjojojo. Ixe dak oꞌju Jesus eju e dag̃.


\b
\c 11
\p
\v 1 Jesusyũ oajẽm Jerusalén ka be. Jerusalém ka tẽg̃ pima ip oajẽm Betfagé ka tẽg̃ Betânia ka tẽg̃ tak, Oliveira dipꞌa tẽg̃ tak. Jesus xepxep jeweju etaybitbinayũ oꞌg̃uju ikabog̃atka be- -Jerusalém ka be.
\p
\v 2 — Epeju juy ag̃oka kay- -wuywapatka kay — ioꞌe cebe ip. — Eyajẽmꞌisu ma jumento epetobuxik- -yaypanꞌisuat, ikirikat, yakpi jeje ibitꞌũmat. Epeg̃uwekap cuy — ioꞌe. — Epetojot cuy okay — ioꞌe cebe ip. 
\v 3 — “Apẽnpuye eyju jumento dujowan?” iꞌe buje eywebe ijoceat, “Ocekariwa buk cekay darem ma,” i juy epeꞌe cebe. “G̃axĩn ma waram ocetujupit eykay,” i juy epeꞌe cebe — ioꞌe Jesus.
\p
\v 4 Oꞌju ip. Oajẽm ip jumento kay. Jumento oꞌtobuxik ip- -yaypanꞌisuat. Ukꞌa ukpibubu be oꞌtobuxik ip. Ikirik xintabi be oꞌtobuxik ip. Oꞌg̃uwekap ip.
\p
\v 5 — Apẽnpuye eyju jumento dujowan? — ioꞌe iboceayũ cebe ip.
\p
\v 6 — Ocekariwa buk cekay darem ma — ioꞌe ip. — G̃axĩn ma waram ocetujupit eykay — ioꞌe xepxepayũ cebe ip.
\p — Haꞌa. Epetujowat — ioꞌe iboceayũ xepxepayũ be.
\p
\v 7 Jumento oꞌtujowat ip Jesus kay. Jeekabek ip oꞌjomõg̃ jumento ukxabi jeje. Jesus oabik iekabek ceje jumento ukxabi jeje. 
\v 8 Adeayũ jeekabek oꞌg̃upayapaya ip Jesus ajẽmap tag̃ e dag̃. Wararaꞌacayũ uktup oꞌtuptakat kog̃ũnpi dag̃atup. Oꞌtupmõg̃mõg̃ ip e dag̃.
\p — Wuyekabek ajomõg̃ cuy e dag̃ — ioꞌe ip. — Yaꞌõbuyxiat omuyku! Uktup atupmõg̃ ixe dobede am — ioꞌe ip jewewebe.
\p
\v 9 Jesus wap ijuꞌibiyũ oꞌjewãwã yaꞌõberen icokcok cĩcã buye, tomujuayũ dak.
\p — Deus xipat cĩcã! — ioꞌe ip. — Teku omuyku Deus aꞌõbi! — ioꞌe ip yaꞌõberen. — Deus aꞌõbacaap kug̃ teku! Teku xipat cĩcã — ioꞌe ip. 
\v 10 — Teku ijodiacat kukukan jeenuy apẽn cuk adi Davi wuyꞌajoreyũ kukukan osunuy iap puxim. Deus yaꞌõbuyxi jĩjã. Idip cĩcã! — ioꞌe ip Jesus mucokcokcog̃.
\p
\v 11 G̃ebuje Jesus oajẽm Jerusalém ka be. Oõm Deus eju kawẽnwẽnapꞌa be- -yabog̃atꞌa be. Oꞌjeak soat kay- -ukꞌa beat kay. Oꞌju jeweju etaybitbinayũ eju, Betânia ka be jexet am. Oꞌju ip katpuje jĩjã buye. Xet. Oꞌxet ip Betânia ka be.
\p
\v 12 Kuyaje Jesusyũ oꞌjẽm Betânia ka bewi. Cucum pima Jesus ire oꞌe. 
\v 13 Wũy wi figueiraꞌip oꞌyopcoco- -yoptuptepatꞌip. Yajom oꞌju yaꞌaꞌe paxi iam. Yop xe yajẽm puje oꞌyadobuxik g̃u. Tup acã oꞌtuptobuxik yaꞌaꞌe g̃u buk puye.
\p
\v 14 G̃asũ bit aꞌaꞌe g̃u ecesũy wuyjuyũ be yaꞌoap puxim! — ioꞌe Jesus yop pe.
\p Ceweju etaybitbinayũ iboap oꞌyaꞌĩjojo ip.
\p
\v 15 G̃ebuje Jesusyũ oajẽm maꞌg̃uto Jerusalém ka be. Oõm ip Deus eju kawẽnwẽnapꞌa be- -yabog̃atꞌa be. Itakoma oꞌe wuyjuyũ mug̃uykukukuꞌukayũ kay- -ukꞌa eaki korerenayũ kay. Puca deidadaꞌukayũ oꞌg̃ujẽm ukꞌa bewi, puca bubuꞌukayũ dak. Wũnꞌi. Jesus dinheiro mutrokakanꞌukayũ emesa oꞌg̃uyꞌat. Wũnꞌi. Pukaso deidadaꞌukayũ abikbikap tak oꞌg̃uyꞌat jetakoma pibun.
\p
\v 16 — G̃asũ bit cuy eybubut epetujukap g̃u Deus eju kawẽnwẽnapꞌa dag̃- -yabog̃atꞌa dag̃ — ioꞌe yaꞌõpurug̃ cebe ip.
\p
\v 17 Ukꞌa beayũ mutaybitbin oꞌe.
\p — Imẽn eꞌem Deus kawẽntup:
\mi Odukꞌa soat ka dag̃wiacat oweju kawẽnwẽnapꞌam jeꞌe, iꞌeꞌem Deus ekawẽntup.
\m Imẽn eꞌem Deus ekawẽntup — ioꞌe Jesus. — Eyju bit odukꞌa be ajẽmjẽmayũ mug̃uykukukum dinheiro bu am. Imẽn odukꞌa epeyamuwexat ibukurukat dopdopapꞌam — ioꞌe.
\p
\v 18 Jesus ekawẽn oꞌyaꞌĩjojo paĩyũ kukukayũ, Moisés ekawẽn imutaybitbinꞌukayũ dak. Itakoma jĩjã oꞌe ip cekay. “Apẽntak Jesus aceyaoka?” iap kay ip oꞌjewag̃uy. Adeayũ bit “Jesus itaybit cĩcã Deus ekawẽn ocemutaybit am” iꞌeꞌeꞌuk osodop ip. Imẽnpuye paĩyũ kukukayũ iparara oꞌe ip Jesus aokaap puxim.
\p — Apẽn tak ibaꞌarẽm ma Jesus aceyaoka? — ioꞌe ip jewewebe.
\p
\v 19 Katpuje Jesusyũ oꞌjẽm ikabog̃atka bewi. Oꞌjepit ip Betânia ka be jexet am. Xet. Oꞌxet ip.
\p
\v 20 Kabiaꞌisu ma oꞌkop ip. Oꞌjẽm ip maꞌg̃uto. Oꞌkap ip figueiraꞌip tẽg̃ ma. Oꞌyopkaraw g̃asũ bit tãbu dag̃wi. 
\v 21 Pedro g̃ebum oꞌe “G̃asũ bit aꞌaꞌe g̃u ecesũy” ioꞌe iap kay.
\p — Ocemutaybitbinꞌukat, akꞌi ece! — ioꞌe Pedro. — Eyopmukorẽmiatꞌip oꞌyopkaraw- -figueiraꞌip — ioꞌe.
\p
\v 22 — Eyetabun cuy epesop Deus kay! — ioꞌe Jesus. 
\v 23 — Deus kay eyetabut pima, “Wede ece ijocewi” iꞌe but eywebe coꞌa be, “Idixidi be juy aakõm” i dak — ioꞌe. — Eyetabut pima, Deus coꞌa yamuakõm idixidi be — ioꞌe. — “Yaakõm paxi?” i eyꞌeꞌũm pima, yamuakõm tak — ioꞌe. 
\v 24 — Deus xewi iojuy buje, eyetabun cuy epesop “Ite ma Deus jeꞌg̃ũm owebe” iap kay. Eyetabut pima, epejat ma — ioꞌe. 
\v 25 — Deus eju kawẽnwẽn pima, eyag̃uybaꞌũm cuy epesop apẽn cuk adi waraꞌacat pe ikẽrẽm eykuk iap kay. Eyag̃uybaꞌũm puje, eyebay dak kabi beat yag̃uybaꞌũm apẽn cuk adi ikẽrẽat epeg̃ug̃ẽ iap kay. Ikẽrẽat juꞌuk eywebewi — ioꞌe Jesus. 
\v 26 — Apẽn cuk adi wararaꞌacat pe ikẽrẽm eykuk iap kay eyag̃uybaꞌũmꞌũm pima bit, Deus tak yag̃uybaꞌũm g̃u apẽn cuk adi ikẽrẽat epeg̃ug̃ẽg̃ẽ iap kay — ioꞌe Jesus.
\p
\v 27 Oajẽm maꞌg̃uto ip Jerusalém ka be. Deus eju kawẽnwẽnapꞌa ekorara be xĩg̃xĩg̃ pima paĩyũ kukukayũ oꞌju Jesusyũ kay, Moisés ekawẽn imutaybitbinꞌukayũ dak, Judeuyũ kukukayũ dak.
\p
\v 28-30 — Abu-aꞌõbi ijaꞌa beacat eg̃ujẽm? — ioꞌe ip Jesus pe. — Abu dak “Eg̃ujẽm cuy,” i juk oꞌe ewebe? — ioꞌe ip cebe.
\p — Abu-aꞌõbi João Batistaꞌũm ijoceacat mubatisasanꞌuk osunuy? — ioꞌe Jesus. — Deus aꞌõbi du? Ijodiat aꞌõbi g̃u xeꞌe? — ioꞌe cebe ip. — Eywebe iboap muwẽn puje, õn tak abu-aꞌõbi õn jekukum iap og̃uwẽn eywebe — ioꞌe Jesus.
\p
\v 31 Iboap co buje oꞌjekawẽn cĩcã ip jeweweju.
\p — Apẽn kuka ace cebe? — ioꞌe ip jewewebe. — “Deus aꞌõbi” i wuyꞌe buje, “Apẽnpuye dak eyetabut g̃u epesop cekay?” i kuka oꞌe Jesus wuywebe — ioꞌe ip jewewebe. 
\v 32 — “Ijodiat aꞌõbi,” i wuyꞌe buje bit, adeayũ kuka itakoma jĩjã oꞌe wuykay — ioꞌe ip. — Soat ip itabut João Batistaꞌũm Deus aꞌõbi oekuku iap kay — ioꞌe ip jewewebe.
\p
\v 33 Imẽnpuye:
\p — Ocetaybit g̃u — ioꞌe ip Jesus pe.
\p — Ka — ioꞌe. — Abu-aꞌõbi João Batista oeku iap epeg̃uwẽn g̃u owebe. Õn tak abu-aꞌõbi õn jekukum iap og̃uwẽn g̃u eywebe — ioꞌ

e.
\b
\c 12
\p
\v 1 G̃uyjom Jesus wuymutaybitbinap ekawẽn oꞌg̃uwẽn cebe ip.
\p — Ag̃okatkat uvadip oꞌtiptaida — ioꞌe Jesus. — Tiptaida buje, korara oꞌg̃ug̃ẽ. Uvadip koreren korara oꞌjomuy. Uvaꞌabidi muwesõg̃sõg̃ap oꞌg̃ug̃ẽ. Uvadip wiwiapꞌa oꞌyamuy- -umatꞌa. Wararaꞌacayũ oꞌjomuy tip wiwi an. Uvaꞌaꞌin kuka oꞌyaũm tipwiwiꞌukayũ be yaꞌade tip wiwiapteim. Waraꞌatꞌaꞌin kuka oꞌyabu jexatꞌam. Kadai iwat waraꞌat ka kay oꞌju.
\p
\v 2 — Yabubuap ekaxi ajẽm puje, kadai iwat jebuywatwatꞌukayũ oꞌg̃uju tip wiwiꞌukayũ kay jekadaiꞌa bu am.
\p — “Oxatꞌa juy epeyadujupit okay,” ioꞌe cebe ip — ioꞌe Jesus.
\p
\v 3 — Imẽnpit tip wiwiꞌukayũ ibuywatwatꞌukayũ oꞌjat. Oꞌyaokaka ip. Ibui pug̃ ma ip oꞌg̃uypit kadai iwat kay. Oajẽm ip — ioꞌe Jesus.
\p
\v 4 — Waram g̃uto waraꞌat jebuywatwatꞌukat oꞌg̃uju. Oꞌyamupãupã ip. Warẽmtaksug̃ ip oꞌe cebe. Oꞌjepit ip jebui pug̃ ma kadai iwat kay — ioꞌe Jesus.
\p
\v 5 — Waram g̃uto wararaꞌacayũ jebuywatwatꞌukayũ oꞌg̃ujuju. Pũg̃pũg̃pũg̃ ma imujujum. Imẽn ma ikẽrẽm ip oꞌjukuk. Pũg̃pũg̃ oꞌyamupãupã ip. Wararaꞌacayũ oꞌyaokaka ip. Pog̃. Oeꞌũꞌũ ip. Oꞌjepit ip jebui pug̃ ma kadai iwat kay — ioꞌe Jesus.
\p
\v 6 — Pũg̃ ma oꞌjepoyat cexe- -ipot acã — ioꞌe Jesus. — Cexe ikukpin cĩcã osunuy. Amãm jekpot ma oꞌg̃uju.
\p — “Ibuyxim ip okpot jukuk,” kadai iwat oꞌe jewebe ma — ioꞌe Jesus.
\p
\v 7 — Imẽnpit uvadip wiwiꞌukayũ oꞌjekawẽn jeweweju. “Akꞌi! Kadai iwat ipot omuyku!” ioꞌe ip jewewebe. “Cebay eꞌũ buje, ite ma kadai iwan jeꞌe. G̃aꞌa ayaoka. Wuyju ma uva dip iwan aceꞌe!” ioꞌe ip jewewebe — ioꞌe Jesus.
\p
\v 8 — G̃ebuje ipot oꞌjat ip. Oꞌyaoka ip. Pog̃. Oeꞌũ. Xik. Ijebit oꞌjoxik ip uva dip pewi — ioꞌe Jesus.
\m Imẽn wuymutaybitbinap ekawẽn oꞌg̃uwẽn cebe ip.
\p
\v 9 — “Ãg̃ puk jeedop ip,” i du jeꞌe uva dip iwat? — ioꞌe Jesus Judeuyũ kukukayũ be. — Imẽn g̃u jeꞌe! Ixe jeꞌju jekadaidip wiwiꞌukayũ aoka am — ioꞌe. — Wararaꞌacayũ jomuy uva dip wiwian — ioꞌe. 
\v 10 — Imẽn eꞌem Deus ekawẽntup:
\mi Ukꞌa muymuyꞌukayũ oꞌe “Iteꞌa xipat g̃u witaꞌa” i, i. Yakẽrẽ oꞌe cexe ip, i. Oꞌyaxik ip, i. Wararaꞌacat pit oꞌe “Iteꞌa yadip ma” i, i. Ukꞌa muycemucemapꞌam oꞌe, i. 
\v 11 Iboap xipat cĩcã wuyxe, Deus imẽn oꞌe buye, iꞌeꞌem Deus ekawẽntup.
\m Iboaptup epetupcoco g̃u du? — ioꞌe Jesus cebe ip- -Judeuyũ kukukayũ be.
\p
\v 12 Iboap ekawẽn co buje:
\p — “Oꞌyaxikꞌiayũ buxim eyju!” iꞌe ojuy osunuy Jesus wuywebe — ioꞌe ip jewewebe. — “Tip ipot oꞌyaokaꞌiayũ buxim eyju” iꞌe ojuy osunuy wuywebe — ioꞌe ip jewewebe.
\p Jesus daomũn ojuy oꞌe ip. Imẽnpit iparara oꞌe ip ixe daomũnap puxim adeayũ buxim iparara buye. Imẽnpuye Jesus oꞌsuiwat ip- -taomũn ojuyayũ. Ixeyũ dak oꞌjẽm.
\p
\v 13 G̃ebuje Judeuyũ kukukayũ Fariseuyũ oꞌg̃uju ip Jesus kay. Iecug̃ap Herodes ebekitkit tak oꞌg̃uju ip cekay. Ixeyũ oꞌg̃uju ip Jesus aꞌõmuwarurun ojuy. “Ẽn iecug̃ap muymuy” iꞌe ojuy osodop ip. 
\v 14 Oajẽm ip.
\p — Kariwa — ioꞌe ip. — Soat em ẽn icẽmãn eꞌem — ioꞌe ip. — Apẽn Deus ibikuy ocewebe jeku am iam ẽn ocemutaybitbin — ioꞌe ip. — “Ig̃o du xipat exe?” iꞌũmg̃u ẽn eꞌem wararaꞌacat pe emutaybit am. Kacũg̃ kadiat cocoap tomuju g̃u ẽn eꞌem “Teku xipat” i — ioꞌe ip. — Roma ka kukat wuyedinheiro ojuyjuy cebe teidadam- -César be. Teida buje wuyawẽwẽap ekawẽn tag̃ g̃u kuka ajeku? 
\v 15 Aceteida xeꞌe? Aceteida g̃u xeꞌe? — ioꞌe ip.
\p César ip oꞌjomuyat pin Jesus pe. Imẽnpit Jesus itaybit oꞌe waꞌõmuwarurun ojuy ip iam.
\p — Apẽnpuye eyju waꞌõmuwarurun ojuy? — ioꞌe. — Dinheiro isurũg̃at cuy epetojot owebe. Ojojo buk — ioꞌe Jesus.
\p
\v 16 Dinheiro isurũg̃at oꞌtojot ip cekay.
\p — Abu-biõg̃buk ija be dinheiro be? — ioꞌe. — Abu-butet tak ija be? — Jesus oꞌe.
\p — César biõg̃buk, ibutet tak — ioꞌe ip.
\p
\v 17 — Cemuojuyjuy epeg̃ũm César be- -wuyeipi kukat pe — ioꞌe. — Deus pe dak cuy epeg̃ũm cemuojuyjuy — ioꞌe Jesus.
\p — Itaybitbin ma oꞌjede — ioꞌe ip jewewebe.
\m Ibaꞌore oꞌe ip cebe yaꞌõbu am.
\p
\v 18 Saduceuyũ oꞌju Jesus kay g̃ebuje bit. Tũybe wuyeꞌũ buje waram acejetait g̃u iãn oꞌe ip. Oꞌjekawẽn ip ceweju.
\p
\v 19 — Ocemutaybitbinꞌukat — ioꞌe ip. — Imẽn Moisés wuymutaybitbin:
\mi Iwag̃o eꞌũ buje, jekitpit jewebumũn cuy jewag̃oꞌũm tayxibuk eju itayxibuk iꞌitꞌetꞌũm pima, i. Iꞌitkap puje, iwag̃oꞌũm ipot tieg̃ kuka oꞌe iꞌit, i.
\m Imẽn Moisés oꞌg̃utaybin kuyje — ioꞌe ip. — Imẽn eꞌem Deus ekawẽntup — ioꞌe ip. 
\v 20 — 7 be ikitpitpiyũ osodop ip — ioꞌe ip. — Koapat oꞌjewebumũn. Ixe koapatꞌũm jekpotpetꞌũm puxen ma oeꞌũ — ioꞌe ip. 
\v 21 — G̃ebuje ikitpit oꞌjewebumũn jewag̃oꞌũm tayxibuk eju. Ixe tomujuatꞌũm tak jekpotpetꞌũm puxen ma oeꞌũ. Imẽnpuxim ma oeꞌũ waraꞌatꞌũm ikitpitꞌũm tomujuatꞌũm — ioꞌe ip. 
\v 22 — Ibocewi 7 beayũ soat oꞌje webumũnmũn ip jewag̃oꞌũm tayxibuk eju- -pũg̃ eju ma. Soat ip oeꞌũꞌũ jekpotpetꞌũm puxen ma. Soat oeꞌũ ip pima, ayacatꞌũm tak oeꞌũ — ioꞌe ip. 
\v 23 — Waram ceꞌũꞌũayũ etait puje, abu-tayxim xeꞌe jeꞌe? — ioꞌe ip. — Soat 7 beayũ oꞌjewebumũnmũn ip ceweju — ioꞌe ip Jesus pe yaꞌõbuap ojuy.
\p
\v 24 — Ijoꞌi g̃u eyju eꞌem iboam — ioꞌe Jesus. — Cedag̃ g̃u eyju jewag̃uyg̃uy. Eyetaybit g̃u Deus ekawẽn. Eyetaybit g̃u Deus wararaꞌacat podi ma jaꞌõbacaap kug̃ iam — ioꞌe. 
\v 25 — Waram jetait puje, wuyjuyũ jewebumũnmũn g̃u ip — ioꞌe. — Kabi beat coꞌi ip jeꞌe- -Deus ekawẽn tojotjotꞌukat coꞌi — ioꞌe Jesus. 
\v 26 — Moisés emutupmubararaktup epetupcoco g̃u du- -wuyeꞌũ buje waram acejetait iatup? — ioꞌe. — Deus ekawẽn ibararak opop kadai oꞌjedipesop iaptup pe. Deus oꞌe Moisés pe:
\mi Õn Deus, i. Abraão itabut mabuk okay, Isaque dak, Jacó dak, i.
\m Imẽn Deus oꞌe Moisés pe. Kuyje ixeyũꞌũmꞌũm oeꞌũ- -Abraãoꞌũm, Isaqueꞌũm tak, Jacóꞌũm tak. Imẽnpit: “Itabut mabuk ip okay,” ioꞌe Deus — ioꞌe Jesus. 
\v 27 — “Itabut ip okay,” ioꞌe Deus, waram g̃uto ip oꞌjetait puye. Ceꞌũꞌũayũ g̃u itabut Deus kay- -itabẽg̃ayũ acã. Cedag̃ g̃u jĩjã eyju eꞌem. “Wuyeꞌũ buje waram g̃u acejetait,” i teꞌe ma eyju eꞌem — ioꞌe.
\p
\v 28 Moisés ekawẽn imutaybitbinꞌukat kuy juk oajẽm Jesus kay. Jesus ekawẽn oꞌyaꞌĩjo- -yaꞌõbu ojuyayũ eju iap ekawẽn.
\p — Aiyuuui! Itaybitbit cĩcã oꞌjede — ioꞌe jexeayũ be. — Moisés ade ma wuymutaybitbin cedag̃ wuyeku am Deus etabutpe iam — ioꞌe Jesus pe. — Pu g̃u ixe ekawẽnꞌin yobog̃ cĩcã wuymukũyjobit am? — ioꞌe.
\p
\v 29 — Imẽn Moisés oꞌe — ioꞌe Jesus.
\mi Eyaꞌõpicũg̃cũg̃ cuy epesop, Israel naxeg̃ebitbit, i. Pũg̃ ma Deusat, i. Ixe kay wuyetabut, i. Kaꞌũmg̃u waraꞌat deus, i. 
\v 30 Deus cuy ikukpin cĩcã epejukuk, i. Wararaꞌacat kukpinap podi ma juy epejukuk. Eyxe ikukpin cĩcã buye, ibikuyap tag̃ cuy epeku soat em; xipacat kay dak cuy epesop g̃ebum; kapikpig̃ tak cuy epesop cebeam, i.
\m Imẽn Moisés wuymutaybitbin — ioꞌe Jesus. 
\v 31 — Waraꞌat tak ixe ekawẽnꞌin yobog̃ cĩcã wuymukũyjobit am.
Imẽn oꞌe:
\mi Xipan cuy wararaꞌacat epejukuk eyewekukap puxim ma, i — ioꞌe Jesus.
\m — Ade ma Moisés wuymutaybitbin. Ijop ekawẽnꞌin kay bit cuy kũyjobin cĩcã ma epesop — ioꞌe Jesus.
\p
\v 32 G̃ebuje Moisés ekawẽn imutaybitbinꞌukat oꞌe:
\p — Kariwa — ioꞌe Jesus pe — Etaybitbit ma ẽn eꞌem — ioꞌe. — Icẽmãn ẽn eꞌem — ioꞌe. — Pũg̃ ma Deusat omuy. Kaꞌũmg̃u waraꞌat deusat — ioꞌe. 
\v 33 — Ikukpin cuy Deus ajukuk wararaꞌacat kukpinap podin ma — ioꞌe. — Wuyxe ikukpin puye, ibikuyap tag̃ cuy ajeku soat em; xipacat kay dak cuy ajop g̃ebum; kapikpig̃ tak cuy ajop cebeam — ioꞌe. — Xipan tak cuy wararaꞌacat ajukuk wuyewekukap puxim — ioꞌe. — Deus icokcok eꞌem wuywebe wũnca ũm puje paĩyũ be imupik am cetabixe. Ibodi ma bit icokcok eꞌem wuywebe xipan wararaꞌacat kuk puje wuyewekukap puxim — ioꞌe. — Wuyxe ikukpin cĩcã bima dak icokcok cĩcã eꞌem — ioꞌe.
\p
\v 34 Yaꞌõetaybit oꞌjede iap co buje, Jesus oꞌe cebe:
\p — Wũy g̃u ẽn Deus ka wi — ioꞌe. — Jekũyjobin ojuy ẽn Deus aꞌõ kay — ioꞌe.
\p — Abu be jede but Jesus pe? — ioꞌe ip soat yaꞌĩjoꞌibiyũ Jesus edeap co buje.
\p
\v 35 Ibocewi Jesus wuyjuyũ mutaybitbin oꞌe Deus eju kawẽnwẽnapꞌa be- -yabog̃atꞌa be.
\p — Apẽnpuye “Cristo Davi naxeg̃ebit- -Deus emunaẽ,” iꞌeꞌem Moisés ekawẽn eymutaybitbinꞌukayũ? — ioꞌe Jesus. 
\v 36 — Davi oꞌjekawẽn Deus biõg̃buk aꞌõbi. Imẽn ixe eꞌem ixe emudupmubararaktup pe:
\mi Cristo okukat- -Deus emunaẽ, i. Deus oꞌjekawẽn Cristo be, i. Xikꞌi Ekay itakomaayũ aꞌõbacaap cuy og̃uꞌũm, ioꞌe, i. Aꞌõ kay kũyjobin jeedop ip, ioꞌe, i. Ẽn ixeyũ kukanꞌũm pima oxema juy eg̃uy, ioꞌe, i.
\m Imẽn Davi kuyje oꞌtupmubararak Deus biõg̃buk aꞌõbi — ioꞌe Jesus. 
\v 37 — “Ẽn ma okukukat,” ioꞌe Davi Cristo be- -Deus emunaẽ be. Imẽnpuye ibapuk ma wuyxe Davi naxeg̃ebit acã g̃u Cristo osunuy- -Davi kukukat tak osunuy — ioꞌe Jesus.
\p Adeayũ icokcok cĩcã ip oꞌe Jesus ekawẽn co buje.
\p
\v 38-39 — Moisés ekawẽn eymutaybitbinꞌukayũ ekukuap puxim g̃u juy epeku — ioꞌe Jesus adeayũ be. — Eymug̃uykukukum ip. Jesay iwaruat kug̃ ip jekukum wararaꞌacat muyak am jekay. Jewexe ip yaꞌõbuyxi jĩjã. Soat etabutpe ceꞌaweroroap pe wararaꞌacayũ yaꞌõbuyxim jeweju ip kawẽnwẽn pima, icokcok eꞌem ip — ioꞌe. — Kariwawayũ abikbikap pe yabik pin ip Deus eju kawẽnwẽnapꞌa be. Petatam pima icokcok eꞌem ip koap jekõn ãm kariwawa ekõnꞌũm awap ma — ioꞌe. 
\v 40 — Itayxibuk mug̃uykukukum ip ibubut pu am — ioꞌe. — Ibun ma ip jewexe kawẽnwẽn Deus eju “Teku yaꞌõbuyxiat” iꞌe ojuy wararaꞌacat pe. Deus pit ipiat supiꞌajoat ixeyũ be wararaꞌacat pe ipiat supiꞌajoat podi ma — ioꞌe Jesus.
\p
\v 41 G̃ebuje Jesus oajẽm dinheiro mũnꞌa kay. Ya tẽg̃ ma oabik Deus eju kawẽnwẽnapꞌa be- -yabog̃atꞌa be. Iboce ajẽmjẽmayũ jojom oꞌe ya be jedinheiro mõg̃mõg̃ayũ jojom. Ibubut adeayũ dinheiro mõg̃mõg̃ ip oꞌe ade.
\p
\v 42 G̃ebuje itopꞌũm eꞌũꞌibit oajẽm- -ibubut kug̃ꞌũmat. Dinheiro isurũg̃at oꞌjomõg̃ ya be xepxep. Ixeyũ xepxep isurũg̃at teiꞌĩt ma osodop. 
\v 43-44 Jesus oꞌjekawẽn jeweju etaybitbinayũ eju.
\p — Akꞌi juy epesop ixe ayacat kay- -ibubut kug̃ꞌũmat kay- -itopꞌũm eꞌũꞌibit kay — ioꞌe. — Ixeyũ ma ade jexewiatꞌin oꞌjomõg̃ dinheiro ibubut adeayũ — ioꞌe. — Deus xe bit ade g̃u oꞌjomõg̃ ip. Ade kug̃ mabuk ip. Ixe ayacat yopĩt ma oꞌjomõg̃ jedinheiro. Deus xe bit ade jĩjã oꞌjomõg̃, soat jexewiat oꞌjomõg̃ puye- -jexat puap ojuy ma oꞌjomõg̃ puye — ioꞌe. — Ajo-kug̃ g̃asũ ixe ayacat? Kaꞌũma kug̃ ma! Imẽnpuye Deus xe ixe ayacat wararaꞌacat pe oꞌjomõg̃iap podi ma oꞌjomõg̃ — ioꞌe Jesus.
\b
\c 13
\p
\v 1 Deus eju kawẽnwẽnapꞌa bewi Jesus cẽm puje, ceweju etaybitbinat oꞌjekawẽn ceweju ukꞌa jojom pima.
\p — Kariwa, akꞌi juy ece! — ioꞌe. — Witaꞌa yabog̃ cĩcã g̃u du? Ukꞌa yadip cĩcã! — ioꞌe.
\p
\v 2 — Iteꞌa yadip cĩcã du exe? Xipat cĩcã du iteꞌa exe? — ioꞌe Jesus. — Xepxepꞌa jewaꞌatẽg̃tẽg̃ g̃u jeꞌe witaꞌa. Soatꞌa jeꞌaedu — ioꞌe Jesus.
\p
\v 3 G̃uyjom Jesus oabik Oliveira dipꞌa bicũg̃pe- -coꞌa bicũg̃pe. Oabik Deus eju kawẽnwẽnapꞌa weg̃ũn- -yabog̃atꞌa weg̃ũn. Ebadipdip ceweju etaybitbinayũ oꞌjekawẽn ceweju. Jag̃epũg̃ pima Pedro oꞌjekawẽn ceweju, Tiago dak, João dak, André dak- -ebadipdip. 
\p
\v 4 — Pug̃ũn soatꞌa jeꞌaedu? Ajo jeꞌbapuk iboap em pima? Ajo g̃ubapuk Deus jeꞌaedu awap? — ioꞌe ip.
\p
\v 5-6 G̃ebuje Jesus ixeyũ oꞌg̃utaybin.
\p — Adeayũ omuyku “Deus omudot,” i napa ma eꞌem wararaꞌacayũ be. “Jesus Cristo õn,” i napa ma jeꞌe ip soat pe. Ixeyũ ade g̃ug̃uykuku. Imẽneju eydayꞌemꞌum cuy epesop ixeyũ be eymug̃uykukuap puxim! — ioꞌe. 
\v 7 — “Jenopag̃õg̃õm ip ijoxĩn ma,” i wararaꞌacayũ eꞌem pima, “Jenopag̃õg̃õm ip wũyat eipi be,” iꞌeꞌem pima dak, eypararam g̃u juy epesop. Imẽn cuy jeꞌbapuk. Imẽnpit soat puk oiꞌũm g̃u — ioꞌe. 
\v 8 — Pũg̃ eipi watwat nopag̃õg̃õm jeꞌe waraꞌat eipi watwat eju. Pũg̃ ka watwat nopag̃õg̃õm jeꞌe waraꞌat ka watwat eju. Ipi jexixi ijoce, iboce dak soat ka dag̃. Reren cĩcã jeꞌe ip soat ka dag̃. Yopĩt ma ipiat supiꞌajo ip koam ipi dag̃ayũ. Iꞌitpinꞌisumapi joꞌma jeꞌe koam. G̃uyjom pit ipiat supiꞌajo jĩjã ma ip — ioꞌe. 
\v 9 — Eydayꞌemꞌum cuy epesop ixeyũ be eymug̃uykukuap puxim — ioꞌe. — Eykay itakomaayũ jeydaomũn. Jeydujowat ip ibimãmãayũ ekawẽn cocoꞌukayũ be. Jeymupokupok ip Deus eju kawẽnwẽnapꞌa be. Jeydujowat ip iecug̃apyũ etabixe, ipi kukukayũ etabixe dak, eyetabut okay buye. Kawẽn idipat epeg̃uwẽn cebe ip — ioꞌe. 
\v 10 — Kawẽn idipan soat ka dag̃ayũ mukũyjojomꞌũm pima, ipi buk iꞌũm g̃u. 
\v 11 Jeydaomũn ip. Ika kukukayũ etabixe ip eydujowat puje, eyag̃uybabiꞌũm g̃u juy epesop. “Apẽn paxi oceꞌe?” iꞌũmg̃u juy epeꞌe. Ixeyũ etabixe buje, Deus ma jeymutaybin apẽn epeꞌe iam. Eya bewi g̃u juy epeg̃uwẽn. Deus biõg̃buk cuy jeymutaybin imuwẽn ãm — ioꞌe. 
\v 12 — Ixe kabia bima adeayũ jebadipyũ kay itakoma jeꞌe, ixeyũ webekitkit puye. Iwag̃o jekitpit jeꞌg̃ũm cekay itakomaayũ be yaoka am. Ikitpit tak jewag̃o jeꞌg̃ũm yaoka am. Cebayũ dak jekpot jeꞌg̃ũm cebe ip yaoka am. Ipotpetayũ dak itakoma jeꞌe jebay kay. Jebay jeꞌg̃ũm ip cebe yaoka am — ioꞌe. 
\v 13 — Soat itabutꞌũmayũ itakoma jĩjã jeꞌe eykay, eyetabut okay buye. Ipiatpiꞌajojom maꞌg̃u eybuꞌu g̃u okay bima, Deus jeydaxijo. Jeydakoy jexeam — ioꞌe.
\p
\v 14 — Ipararu jĩjãat epejojo — ioꞌe. — Imõg̃piat pe jeedop- -Deus eju kawẽnwẽnapꞌa be — ioꞌe. — (Eyetaybin cuy epesop ijudup cocoꞌukayũ!). Ipararu jĩjãat ig̃oꞌa be bima, jenapõn cuy ip coꞌa bicũg̃ kay Judéia eipi watwat — ioꞌe. 
\v 15 — Eydukꞌa eakiju bima, epeõm g̃u juy eydukꞌa be yabeat pum — ioꞌe. 
\v 16 — Eykat pe bima, epeyepit g̃u juy eydukꞌa kay eyesay bum — ioꞌe. 
\v 17 — Ixeyũ kabia dag̃ ibaꞌore jĩjã jeꞌe yukreg̃ayũ enapõn ãm, jeꞌit mutitinayũ enapõn ãm tak. 
\v 18 “Ihi bima g̃u juy ixeyũ eg̃udot ipiatpiꞌajo an ocewebe,” i juy epeꞌe Deus pe. 
\v 19 — Ixeyũ kabia dag̃ soat ipi dag̃ayũ ipiat supiꞌajojo jĩjã. Ibitpi bit ipiat asupiꞌajo g̃u Deus pe ipi mubapuk isum — ioꞌe. — Waram pit ibitpi g̃u acesupiꞌajo- -ixeyũ kabia dag̃ acã — ioꞌe. 
\v 20 — Deus pe ipiatpiꞌajojoap kabia muꞌũmꞌũm pima, kaꞌũma kuka oꞌjewedaxijo. Imẽnpit: “Pũg̃pũg̃ kabia acã ipi watwat supiꞌajojo,” ioꞌe Deus kuy bima. “Pũg̃pũg̃ kabia acã,” ioꞌe Deus, taxijo am oꞌtaẽꞌiayũ ikukpin cĩcã cexe buye — ioꞌe.
\p
\v 21 — Waraꞌacat jeꞌe eywebe napa ma “Akꞌi! Teku Cristo- -wuydaxijojoꞌukan Deus emunaẽ,” i. “Akꞌi! G̃oku Cristo,” i dak jeꞌe. Imẽn iꞌe buje, eyetabun g̃u juy epesop ixeyũ ekawẽn kay — ioꞌe. 
\v 22 — Jewexe Deus emunaẽhẽyũ jebapuk, jewexe Deus ekawẽn muwẽnuwẽnꞌukayũ dak. Wuymucoatcoanap g̃ubapuk ip Deus emunaẽhẽyũ mug̃uykuku ojuy. Deus aꞌõbacaap g̃ubapuk ip imug̃uykuku ojuy. 
\v 23 G̃uyjom jajẽm ip adeayũ mug̃uykuku ojuy iap kuy og̃uwẽn eywebe. G̃ebuꞌi epeꞌe wekawẽn kay ixeyũ be eymug̃uykukuap puxim — ioꞌe.
\p
\v 24-25 — Ipiatpiꞌajojoap kabia kap puje kabi beacat muycemcemap iaruaru jeꞌe — ioꞌe. — Kaxiepiat kaxiepi g̃u jeꞌe. Kabiok jeꞌe. Kaxiamat tak kaxiam g̃u jeꞌe. Kabiok jeꞌe. Kasopta dak idaꞌat kabi kadiwi — ioꞌe. 
\v 26 — G̃ebuje okop ipi kay. Kabikerereat tag̃wi okop. Soat wag̃o õn. Waꞌõbacaap kug̃ okop, odipap kug̃ tak. Soat ipi dag̃ayũ jeꞌe “Jesus wararaꞌacat podi ma yaꞌõbaca,” i. “Wararaꞌacat podi ma idip,” i jeꞌe ip. “Abu ixe joꞌiat? Kaꞌũma ma,” i jeꞌe ip — ioꞌe. 
\v 27 — G̃ebuje Deus jekawẽn tojotjotꞌukayũ g̃uju soat tag̃wi. Ixeyũ g̃uju jemunaẽhẽyũ kay. Jemunaẽhẽyũ ip g̃uꞌawero soat tag̃wi. Kabi dag̃wi ixeyũ g̃uꞌawero ip, ipi dag̃wi dak — ioꞌe.
\m Jesus waram jedocap oꞌg̃uwẽn jeweju etaybitbinayũ be.
\p
\v 28 — G̃ebum cuy epesop wajẽmap kay figueiraꞌip kay g̃ebum pima — ioꞌe. — Figueiraꞌa bikit cẽm puje, “Koato ijasũn ma,” iꞌeꞌem eyju, dup cẽm pima dak — ioꞌe. 
\v 29 — Imẽnpuxim soat ipi dag̃ayũ ipiatpiꞌajojom pima, “G̃axĩn ma Jesus jajẽm,” i juy epeꞌe — ioꞌe. 
\v 30 — G̃asũayũꞌin iboap coco ip jeꞌũ awap. G̃ebum cuy epesop iboap kay! — ioꞌe. 
\v 31 — Kabi iꞌũm, ipi dak. Wekawẽn pit iꞌũm g̃u. Wekawẽn kayayũ bit soat em jeedop — ioꞌe.
\p Imẽn Jesus oꞌjekawẽn jeweju etaybitbinayũ eju.
\p
\v 32 — Itaybit g̃u ip wajẽmap kabiam, ipiatpiꞌajoap kabiam tak — ioꞌe. — Deus ekawẽn tojotjotꞌukayũ itaybit g̃u ibo kabiam. Õn Deus ipot. Õn tak wetaybit g̃u ibo kabiam. Webay acã itaybit — ioꞌe. 
\v 33 — Eyetaybit g̃u puje oajẽm iam. Imẽneju epejowiwi juy ag̃. Wajẽmap wiwim cĩcã juy epesop — ioꞌe. 
\v 34 — Wajẽmap kariwa epicat puxim — ioꞌe. — Kariwa oꞌjẽm jedukꞌa bewi. “Ijoce ma epesop,” ioꞌe jebuywatwatꞌukayũ be — ioꞌe. — “Epeyekapik oka be,” ioꞌe cebe ip — ioꞌe. — Jedukꞌa exĩntabi wiwiꞌukat pe “Ijoce ma eg̃uy wararaꞌacat pe obubut tujupaꞌumap puxim,” ioꞌe kariwa — ioꞌe. — “Wepicap wiwim cuy epesop,” ioꞌe cebe ip — ioꞌe Jesus. 
\v 35 — Ixe kariwa buxim õn tak — ioꞌe. — “Pug̃ũn paxi waram wekariwa jeꞌpit?” i eyju eꞌem. Katpuje paxi ocepit. Iximadakpe paxi ocepit. Kabiakay paxi ocepit. Kabiaꞌisu paxi ocepit. Eyetaybit g̃u pũg̃ũn ocepit iam — ioꞌe. 
\v 36 — Imẽnpuye juy epejowiwi ag̃. Ocepicap wiwim cuy epesop. Obuꞌu jĩjã eyxen ma eydobuxik am wepit puje! — ioꞌe. 
\v 37 — “Epejowiwi juy ag̃,” i õn eꞌem soat pe. “Epejowiwi juy ag̃,” i õn eꞌem eywebe dak — ioꞌe Jesus jeweju etaybitbinay

ũ be.
\b
\c 14
\p
\v 1 Xepxep kabia peta e awap cekay itakomaayũ Jesus daomũn ojuy ip- -Páscoa epeta e awap. Ixe epeta bima Judeuyũ pãoꞌa oꞌoꞌuk ip osodop- -yamuyuhuhuaptõmtẽmꞌũmatꞌa. Ijop epeta mug̃ẽg̃ẽm pima apẽn Deus wuydobuyũꞌũmꞌũm oꞌtujujẽm Egito eipi bewi iap kay g̃ebumꞌuk ip osodop. Ibaꞌarẽm Jesus daomũn ojuy ip. Paĩyũ kukukayũ Jesus aoka ojuy osodop ip, Moisés ekawẽn imutaybitbinꞌukayũ dak. Jesus kay itakoma osodop ip.
\p
\v 2 — Petatam pima bit Jesus ataomũn g̃u adeayũ be wuyaokaap puxim — ioꞌe ip jewewebe.
\p
\v 3 Jesus Betânia ka be osunuy. Simão dukꞌa be osunuy- -ierep tũibit tukꞌa be. Jekõnkõn pima ayacat oajẽm Jesus kay. Timũnꞌa kug̃ oajẽm- -witaꞌa mug̃ẽg̃ẽꞌa kug̃. (Witaꞌa butet alabastro i osunuy). Tideꞌoati otinuy ya be. (Tideꞌoati butet nardo i osunuy). Judeuyꞌu ceꞌũat mudeꞌoꞌoꞌuk ip osodop nardodim. Tideibog̃ cĩcã otinuy. Ayacat oajẽm Jesus kay. Timũnꞌa ũ oꞌsuꞌũkaka. Tideoꞌati oꞌtidi Jesus a be Jesus ikukpin cĩcã cexe buye. 
\v 4 Iboceayũ bit pũg̃pũg̃ itakoma oꞌe ayacat kay ixe oꞌtidi buye.
\p — Akꞌi! Etidi! — ioꞌe ip. — Etimukereren — ioꞌe ip ayacat pe. 
\v 5 — Tideꞌoati deida buje, kajuk teibog̃ ejat! Ade kuka juk dinheiro isurũg̃at ejat prata mug̃ẽg̃ẽ — ioꞌe ip. — 300 be kuka juk ejat! Tadaybotbocayũ be kuka juk dinheiro eg̃ũm — ioꞌe ip cebe.
\p Yaꞌõpurug̃ ip ayacat oꞌg̃ukorẽm oꞌtimukereren puye.
\p
\v 6 — Ãg̃ jeenuy ayacat jekpiwan — Jesus pit oꞌe. — Epeg̃ukorẽm g̃u juy — ioꞌe. — Cekaykay g̃u! Xipacan ma teku oꞌe owebe! — ioꞌe. 
\v 7 — Tadaybotbocayũ soat em ma eyxe — ioꞌe. — Eybikuy bima, ixeyũ buywan put eywebe. Õn pit soat em g̃u og̃uy eyxe. Soat em g̃u xipacan eyꞌe but owebe — ioꞌe. 
\v 8 — Ite ayacat tideꞌoati kug̃ osunuy. Tiũm put owebe. Ojebit oꞌg̃udeꞌon, ojeꞌũ g̃u buk maꞌg̃u. Wetabẽg̃ pima ma kuy omudeꞌon okot awap — ioꞌe. 
\v 9 — Okay itabucayũ kawẽn idipat g̃uwẽnuwẽn soat kaka dag̃. Apẽn ite ayacat oꞌtidi wa be iap g̃uwẽnuwẽn tak ip soat kaka dag̃. Soat ka watwat g̃ebum jeꞌe apẽn ixe oꞌe iap kay. G̃ebum cuy epesop iboap kay — ioꞌe Jesus.
\p
\v 10 G̃ebuje Judas Iscariotes oꞌju paĩyũ kukukayũ kay.
\p — Jesus cuy og̃ũm eywebe yaoka am — ioꞌe cebe ip.
\m Ixe Judas Iscariotes 12 beayũꞌin osunuy. 
\p
\v 11 Ixe ekawẽn co buje, icokcok cĩcã oꞌe ip paĩyũ kukukayũ.
\p — Dinheiro juy oceg̃ũm ewebe iũmapteim — ioꞌe ip Judas pe.
\p Imẽnpuye “G̃asũ du Jesus ũm put owebe paĩyũ kukukayũ be?” iꞌeꞌem jewebe ma oeku. Cekay itakomaayũ be Jesus ũmap kudadam oeku.
\p
\v 12 Jesus oꞌjekõn jeweju etaybitbinayũ eju Páscoa epeta bima. Páscoa epeta bima Judeuyũ ovelha aokakaꞌuk osodop ip- -koapat kabia bima. Soat ip pãoꞌa oꞌoꞌuk osodop- -yamuyuhuhuaptõmtẽmꞌũmatꞌa. Ixe kabia be ceweju etaybitbinayũ oꞌjekawẽn Jesus eju.
\p — Poce wuyxan oceg̃ug̃ẽ Páscoa epeta be iꞌo am? — ioꞌe ip.
\p
\v 13 G̃ebuje Jesus xepxepayũ oꞌg̃uju Jerusalém ka kay jeweju etaybitbinayũ.
\p — Epeju juy ikabog̃atka be — ioꞌe cebe ip. — Ag̃okatkat epetobuxik- -idibi mũnꞌa kug̃at. Ceweju juy epeju — ioꞌe. 
\v 14 — Ukꞌa be iõm puje, epeõm cuy ceweju — ioꞌe cebe ip. — “Ocekariwa eꞌem: ‘Apuꞌa be juy ocekõn Páscoa kabia oweju etaybitbinayũ eju?’ i,” i juy epeꞌe ig̃o dukꞌa iwat pe — ioꞌe Jesus. 
\v 15 — Ixe jedukꞌa yabimubapuk eywebe- -umatꞌabi, yabibog̃atꞌabi — ioꞌe. — Kuy mesa kake ig̃oꞌabi be, abikbikap tak. Soat ixipan jeꞌe kuy — ioꞌe. — Ig̃oꞌabi be ovelha juy epejoyoy wuywebe iꞌo am Páscoa kabia be — ioꞌe.
\p — Haꞌa — ioꞌe ip.
\p
\v 16 G̃ebuje ceweju etaybitbinayũ oꞌju ikabog̃atka be. Soat oꞌtobuxik ip apẽn cuk cebe ip Jesus oꞌe iap tag̃. Ig̃oꞌa be ovelha ip oꞌjoyoy Páscoa kabia be iꞌo am.
\p
\v 17 Kabiog̃ pima Jesus oajẽm ig̃oꞌa be jeweju etaybitbinayũ eju- -12 beayũ eju. Oabik ip mesa akokoreren. 
\v 18 Jekõnkõn pima Jesus oꞌjekawẽn ceweju ip.
\p — Icẽmãn õn eꞌem eywebe — ioꞌe. — Pũg̃ eyꞌin oũm okay itakomaayũ be waoka am- -oweju jekõnkõnat ma — ioꞌe.
\p
\v 19 Ig̃uycũg̃cũg̃ oꞌe ip.
\p — Õn xeꞌe? — ioꞌeꞌe ip pũg̃pũg̃pũg̃.
\p
\v 20 — Pũg̃ eyjuꞌin — ioꞌe Jesus. — Oweju prato be pãoꞌa oꞌyamuerepꞌiat ma — ioꞌe. 
\v 21 — Soat wag̃o õn. Apẽn ojeꞌũ iaptup tag̃ ojeꞌũ- -Deus ekawẽntup tag̃ — ioꞌe. — Karem g̃u ipiat supiꞌajo oũmat pit. Xipat kuka adi aꞌg̃u ixe bit oꞌjebapukꞌũma — ioꞌe Jesus.
\p
\v 22 — Weꞌũap kay g̃ebum cuy epesop — ioꞌe Jesus cebe ip.
\p Jekõnkõn oꞌe jeweju etaybitbinayũ eju. Jekõnkõn pima Jesus pãoꞌa oꞌyabu.
\p — Bay, ẽn xipat — ioꞌe. — Pãoꞌa eyaũm ocewebe — ioꞌe Jesus Deus pe.
\p Oꞌyamuweka. Oꞌyaũm cebe ip.
\p — Juku, epeyaꞌo — ioꞌe cebe ip. — Ite ojebit — Jesus oꞌe. — Pãoꞌa muwekaap puxim ip obamupaya — ioꞌe.
\p
\v 23 Tikõnkõnap oꞌjat. Uvaꞌabidi oꞌtinuy tikõnkõnap pe.
\p — Bay, ẽn xipat — ioꞌe. — Uvaꞌabidi etiũm ocewebe — ioꞌe Deus pe.
\p Tikõnkõnap oꞌg̃ũm cebe ip. Soat ip oꞌtikõn.
\p
\v 24 — Juku. Epetikõn. Ite odoy — ioꞌe Jesus. — Weꞌũ buje odoy jedoyekoreren “Adeayũ bewi ikẽrẽat ojuꞌuk,” ioꞌe Deus puye — ioꞌe. — Imẽnpuye Deus adeayũ g̃uisun. Cũg̃ ma jeedop ip cexe- -Deus xe — ioꞌe. 
\v 25 — Icẽmãn õn eꞌem eywebe. Waram g̃u otikõn uvaꞌabidi soat ipi watwat Deus aꞌõ kay kũyjobitꞌũm pima. Soat ipi watwat yaꞌõ kay kũyjobin pima bit, tiisuati otikõn uvaꞌabidi — ioꞌe Jesus.
Imẽn Jesus oꞌe cebe ip: — Weꞌũap kay g̃ebum cuy epesop — i.
\p
\v 26 G̃ebuje soat ip oꞌjebibododon Deus kay. Umatꞌa bewi ip oꞌkop. Oꞌju ip coꞌa bicũg̃pe- -Oliveira dipꞌa bicũg̃pe.
\p
\v 27 Oajẽm ip Oliveira dipꞌa bicũg̃pe. Jesus waram oꞌjekawẽn ceweju ip.
\p Soat eyju operem — ioꞌe. — Epeyenapõn — ioꞌe. — Imẽn Deus ekawẽntup omuwẽnuwẽn:
\mi Ovelhayũ kukukat oyaoka, i. Soat ip jepõg̃põg̃ iõhõyũ, i.
\m Imẽn Deus ekawẽntup omuwẽnuwẽn — ioꞌe Jesus. 
\v 28 — Imẽnpit weꞌũap tomukadi Deus waram g̃uto omutait. Õn ovelha kukukat puxim. Okay itabucayũ ovelhayũ buxim. Oju eywap Galiléia eipi be — ioꞌe.
\p
\v 29 — Soat ip jepere obureyũ. Õn pit jepere g̃u — ioꞌe Pedro.
\p
\v 30 — Tapu, icẽmãn õn eꞌem ewebe — ioꞌe Jesus Pedro be. — Ijop exima ma: “Obure g̃u teku,” i napa ma eceꞌe ebapũg̃ em — ioꞌe. — Xepxep em sapokay ede awap: “Obure g̃u teku,” i napa ma eceꞌe — ioꞌe Jesus.
\p
\v 31 — Oce g̃u ma buk “Obure g̃u teku,” i, eweju waokaap puxim — ioꞌe Pedro.
Yaꞌõpurug̃ oꞌjede. Soat cewejuayũ imẽn oꞌeꞌe.
\p
\v 32 G̃ebuje oꞌju ip kadaihiaptip kay. Kadaihiaptip putet Getsêmani i osunuy.
\p — Jocebuku epabikbik — ioꞌe Jesus. — Deus eju buk õn jekawẽn — ioꞌe jeweju etaybitbinayũ be.
\p
\v 33 Ibocewi Jesus oꞌju kawẽn ãm Deus eju. Pedro oꞌtujowat jeweju, Tiago dak, João dak. Ig̃uycũg̃ cĩcã oꞌe. Yag̃uyꞌũm oꞌe ipiatpiꞌajoap kay.
\p
\v 34 — Jeꞌũmayũ joꞌi õn og̃uycũg̃ap pibun — ioꞌe. — Ag̃ cuy epesop ijoce — ioꞌe.
\p
\v 35 Bosusu Jesus oꞌju. Iboce oꞌjepo ipi ju jeg̃uycũg̃ap pibun.
\p G̃ebuje oꞌjekawẽn Deus eju.
\p — Bay — ioꞌe. — Odaxijom ece weꞌũap puxim, ẽn odaxijo pin pima — ioꞌe Deus pe. — Ipiat esupiꞌajoat g̃u owebe — ioꞌe. 
\v 36 — Bay — ioꞌe. — Webay ẽn. Soat ibaꞌore g̃u ewebe. Omuwedem ece ip owebe ipiatꞌajoap puxim. Waꞌõbi bit weꞌũ pin g̃u. Ẽn ebikuy bima bit, ojeꞌũ — ioꞌe Deus pe.
\p
\v 37 G̃ebuje ebapũg̃ayũ kay oꞌjepit- -Pedro kay, Tiago kay dak, João kay dak. Ixet ma ip oꞌtobuxik.
\p — Simão Pedro — ioꞌe. — Exet ma du? — ioꞌe. — Pũg̃ hora dak tu ag̃ paꞌore ewebe? 
\v 38 Ag̃ cuy epesop! — ioꞌe cebe ip ebapũg̃ayũ be. — Xen g̃u juy epesop. Deus eju juy epeyekawẽn eyewebe ikẽrẽat mug̃ẽap puxim- -eywee Satanás aꞌõ kay kũyjobicap puxim — ioꞌe. — Eybuꞌu jĩjã ikẽrẽat mug̃ẽ ãm. Imẽnpit ikẽrẽat epeg̃ug̃ẽ eyaꞌõbacaꞌũm puye. Imẽneju Deus eju juy epeyekawẽn ixe aꞌõbacaan kug̃ eyeku am — ioꞌe cebe ip.
\p
\v 39 G̃ebuje bosusu oꞌju waram. Kuyat ekawẽn puxim waram oꞌjekawẽn Deus eju. 
\v 40 Jesus waram oꞌjepit ebapũg̃ayũ kay. Ixet ip oꞌtobuxik maꞌg̃uto. Itaxeebaca oꞌe ip xet pibun.
\p — Apẽn tak Jesus pe acejede? Wuyxexet teku wuydobuxik — ioꞌe ip jewewebe.
\p
\v 41 Jesus waram oꞌjepit bosusu. Waram oꞌjekawẽn Deus eju. Waram g̃uto oꞌjepit ebapũg̃ayũ kay.
\p — Eyxet mabuk tu? — ioꞌe cebe ip. — Jebodoydoy mabuk tu eyju? — ioꞌe. — Kuy oꞌe xexecap! Soat wag̃o õn. Weꞌũap kabia kay õn ajẽm — ioꞌe. — G̃asũ oũm ip ikẽrẽat mujurũg̃rũg̃ꞌukayũ be waoka am. 
\v 42 Epeꞌãy! — ioꞌe cebe ip. — Akꞌi juy epeꞌe! Oũmat omuyku! G̃aꞌa atopabijuk ip — ioꞌe.
\p
\v 43-44 Judas oajẽm Jesus kay. Yajẽm puje, Jesus kawẽnwẽn mabuk osunuy jeweju etaybitbinayũ eju. Ixe Judas 12 beayũꞌin osunuy. Jesus eju jekukuꞌuk osunuy.
\p — Wuyajẽm puje juy owebe yag̃obukõnꞌibit cuy epejat — i juk oꞌe ixe Judas jewejuayũ be- -Jesus aoka ojuyayũ be. — Cem ma juy epetujowat — i juk oꞌe cebe ip.
\p Ixe Judas oajẽm Jesus kay. Ceweju adeayũ oajẽm paja kukug̃, jebaꞌip kukug̃ tak. Paĩyũ kukukayũ ixeyũ oꞌg̃uju Jesus daomũn ãm, Moisés ekawẽn imutaybitbinꞌukayũ dak, Judeuyũ kukukayũ dak. 
\v 45 Yajẽmꞌisum ma Judas oꞌju Jesus kay.
\p — Ocemutaybitbinꞌukat! — ioꞌe Jesus pe.
\p
\v 46 Judas eju oajẽmiayu Jesus oꞌjat. Cem ma oꞌtaomũn ip. 
\v 47 Imẽnpuye Jesus ejuat jepaja oꞌjuꞌuk iyuk pewi. Paĩyũ kukukayũ ebekit g̃uybuikibi oꞌsug̃uybuikibika. Oꞌsug̃uybuꞌuk pajam. 
\p
\v 48 G̃ebuje Jesus oꞌjekawẽn oajẽmiayu eju.
\p — Eyju dak epesot odaomũn ãm paja kukug̃, eybaꞌip kukug̃ tak ibabikurukat taomũnap puxim — ioꞌe cebe ip. — Ibukurukat g̃u õn pit! — ioꞌe. 
\v 49 — Ade kabia adi og̃uy eyxe. Imukũyjojomꞌuk cuk adi og̃uy Deus eju kawẽnwẽnapꞌa be- -yabog̃atꞌa be — ioꞌe. — Ig̃oꞌa be g̃u bit eyju odaomũn. Kuy bima oꞌtupmubararak ip Deus ekawẽntup apẽn ip odaomũn iaptup — ioꞌe. — “Ibabikurukat taomũnap puxim ixe taomũn ip,” iꞌeꞌem ig̃odup — ioꞌe. — Imẽn ma odaomũn ip g̃asũ dak — ioꞌe Jesus.
\p
\v 50 G̃ebuje soat ip Jesus oꞌjepere ceweju etaybitbinayũ. Soat ip oꞌwatwat.
\p
\v 51 Jesus daomũnmũn ip pima ag̃okatkat oꞌju Jesus nomuju- -yaypanꞌisuat. Jeekabek kug̃ acã oeku. Iekabek oꞌjat ip Jesus daomũnayũ. Yaypanꞌisuat taomũn ojuy ip. 
\v 52 Imẽnpit jeekabek oꞌsuiwat jedaomũnap puxim. Totiꞌũm ma oꞌjenapõn jeparara pibun.
\p
\v 53-54 G̃ebuje taomũnꞌibiyũ Jesus oꞌtujowat paĩyũ kukukat kay.
\p Wũy ma Pedro oꞌju Jesus nomuju jeparara pibun. Oꞌju paĩyũ kukukat tukꞌa kay. Imẽnpit tukꞌa naxĩnõm pe osunuy. Xikꞌi osunuy sorarayũ parakpe. Jewewewem oꞌe daxa etako be.
\p G̃ebuje paĩyũ kukukayũ oꞌjeꞌawero ip Judeuyũ kukukayũ dak, Moisés ekawẽn imutaybitbinꞌukayũ dak. Ixeyũ ma ibimãmãayũ cocoꞌukayũ osodop ip. Oꞌjeꞌawero ip ibimãmãayũ ekawẽn cocoapꞌa be. Oꞌjeꞌawero ip Jesus xipat g̃u iap mubapukap ojuy yaoka am. 
\v 55 Ibimãmãayũ ekawẽn cocoꞌukayũ wararaꞌacayũ kudadam oꞌe ip Jesus muymuy am. Ibikuy oꞌe ip xepxepayũ be pũg̃ tag̃ ma Jesus muy am. Jesus aoka ojuy ip. 
\v 56 Adeayũ napa ma ip Jesus oꞌyawẽg̃mukẽrẽrẽrẽn. Imẽnpit pũg̃ tag̃ g̃u oꞌyawẽg̃mukẽrẽrẽrẽn ip- -waraꞌat tag̃tag̃tag̃ ma. Jesus muymuy jĩjã oꞌe ip. 
\v 57 Wararaꞌacayũ imẽn napa ma Jesus oꞌyawẽg̃mukẽrẽrẽn soat etabutpe.
\p
\v 58 — “Ijopꞌa Deus eju kawẽnwẽnapꞌa oyamuꞌũm- -ijodiat emuamuyꞌa oyamuꞌũm,” i kuy juk oꞌe ite ma — i napa ma oꞌe ip. — “Xepxep xet kap puje waraꞌatꞌa oyamuy,” i kuy juk oꞌe ite — ioꞌe ip napa ma. — “Ijodiat emuamuyꞌam g̃u jeꞌe,” i juk oꞌe — i napa ma oꞌe ip. — Imẽn ixe ekawẽn oceyaꞌĩjojo — ioꞌe ip napa ma.
\p
\v 59 Imẽnpit pũg̃ tag̃ g̃u ip oꞌyawẽg̃mukẽrẽrẽn- -waraꞌat tag̃tag̃tag̃ ma.
\p
\v 60 Ixeyũ ekawẽn co buje paĩyũ kukukat oꞌãy soat wap jekawẽn ãm Jesus eju.
\p — Apẽnpuye ecede g̃u awẽg̃mukẽrẽrẽnayũ kay? — ioꞌe. — Icẽm tu ip eꞌem? — ioꞌe Jesus pe.
\p
\v 61 Imẽnpit Jesus mũg̃ ma osunuy. Oꞌjede g̃u.
\p — Ẽn tu Deus emunaẽ? — ioꞌe. — Soat wuyju eꞌem: “Ẽn xipat cĩcã,” i Deus pe. Ixe ipot tu ẽn? — ioꞌe Jesus pe.
\p
\v 62 — Hm hm — ioꞌe Jesus. — Ixe ipot ma õn — ioꞌe. — Soat wag̃o õn — ioꞌe. — Ojojom epeꞌe. Xikꞌi og̃uy Deus xe ibaat kadi. Ixe Deus soat podi ma yaꞌõbacaat. Cexe õn pima ojojom epeꞌe. Soat kukukan oce ixe eju. G̃uyjom ijodi waram ojot. Kabikerereat tag̃wi okop — ioꞌe Jesus.
\p
\v 63-64 Iboap co buje paĩyũ kukukat jesay oꞌg̃uwek jetakoma pibun.
\p — Tũybe Deus joꞌi õn iãn teku eꞌem — ioꞌe. — Kuy epeyaꞌĩjojo ixe ekawẽn — ioꞌe. — Wararaꞌacayũ g̃u ajokudada ixe awẽg̃ mukẽrẽrẽn ãm. Deus muymuy teku — ioꞌe. — Apẽntak aceꞌe cebe? — ioꞌe cebe ip.
\p — G̃aꞌa ayaokaat — ioꞌe ip. — Ikẽrẽat kug̃ teku Deus xe — i napa ma oꞌe ip ibimãmãayũ ekawẽn cocoꞌukayũ.
\p
\v 65 Jesus oꞌg̃uxiuxi ip pũg̃pũg̃ ixeyũꞌin jetakoma pibun ma. Jesus oꞌtopamuekabek ip pag̃õm. Oꞌyaokaka ip.
\p — Abu aokakam i ece! — ioꞌe ip iwaywayway am. 
\p Jesus pu buje sorarayũ dak jebum oꞌyaokaka. Soat tag̃ ma oꞌyaokaka ip.
\p
\v 66 Pedro mabuk ukꞌa daxirõg̃ pe bima, paĩyũ kukukat puywatwatꞌukat oꞌju Pedro kay. Ayacat oꞌju cekay. 
\v 67 Ixe ayacat Pedro oꞌjojojo jewewewem daxa etako be. Oꞌjeak cĩcã cekay. 
\p — Ẽn tak mo Jesus eju ejeku- -Nazaré ka bewiat eju — ioꞌe Pedro be ayacat.
\p
\v 68 — Õn g̃u! Apên ẽn eꞌem? Ixe bure g̃u õn! — i napa ma oꞌe Pedro.
\p Ibocewi Pedro oꞌju ukꞌa ekorara exĩntabi be. Sapokay oꞌjede g̃ebuje bit. 
\v 69 Ixe ibuywatwatꞌukat waram Pedro oꞌjojojo iboce.
\p — Jesus bure tedaku! — ioꞌe iboceayũ be.
\p
\v 70 Imẽnpit Pedro napa ma oꞌe g̃uto:
\p — Ite bure g̃u õn — i.
\m Ibũnbũn pima iboceayũ oꞌjekawẽn Pedro eju.
\p — Ocetaybit ẽn. Ejojo oceju ceweju. “Ite bure g̃u õn,” iꞌũmg̃u juy ece! — ioꞌe. — Ẽn tak Galiléia eipi bewiat! — ioꞌe.
\p
\v 71 — Dapxi ẽn! — i napa ma oꞌe Pedro. — Ixe bure g̃u õn! Ceweju õn pit ocekuku g̃u — i napa ma oꞌe. — Õn icẽmãn eꞌemꞌũm pima, Deus cuy ipiat supiꞌajoat owebe — Pedro oꞌe.
\p
\v 72 Sapokay waram oꞌjede g̃ebuje bit. Pedro Jesus aꞌõ kay oꞌjeg̃ebu.
\p — Ijop exima ma: “Ite bure g̃u õn,” i napa ma eceꞌe ebapũg̃ em — i juk oꞌe Jesus cebe. — Xepxep em sapokay ede awap: “Ite bure g̃u õn,” i napa ma eceꞌe — i juk oꞌe Jesus cebe.
\m Iboap kay oꞌjeg̃ebu Pedro. Oꞌjewemug̃uycũg̃ cĩcã. O

ꞌtõn.
\b
\c 15
\p
\v 1 Kabia isum paĩyũ kukukayũ oꞌjeꞌawero ip, Judeuyũ kukukayũ dak, Moisés ekawẽn imutaybitbinꞌukayũ dak, ibimãmãayũ ekawẽn cocoꞌukayũ dak. Oꞌjeꞌawero ip jewawẽ ãm apẽn Jesus aceyaoka iam. Jesus oꞌsubamukirikat ip.
\p Oꞌtujowat ip Pilatos kay- -Judéia eipi kukat kay. Pilatos oꞌjekawẽn Jesus eju.
\p
\v 2 — Ẽn tu Judeuyũ kukukat? — ioꞌe Pilatos Jesus pe.
\p — Ẽn imẽn eꞌem owebe — ioꞌe Jesus.
\p
\v 3 Jesus oꞌjomuymuy jĩjã ip Pilatos pe paĩyũ kukukayũ.
\p
\v 4 — Aꞌõpicũg̃ cuy ece! Emuymuy jĩjã ip — ioꞌe Pilatos Jesus pe. — Apẽnpuye ẽn jedem g̃u? — ioꞌe Jesus pe.
\p
\v 5 Imẽnpit Jesus mũg̃ ma osunuy. Imẽnpuye Pilatos yag̃uyabiꞌũm oꞌe.
\p — Apẽnpuye mũg̃ ma teku eꞌem? — ioꞌe jewebe ma. 
\p
\v 6-7 Ag̃okatkat daomũnmũnapꞌa be osunuy- -iecug̃ap ebekitkit eju jenopag̃og̃oꞌibiyũ xe. Ibutet Barrabás i osunuy. Soat ip cuk waraꞌacat oꞌyaoka daomũnmũnapꞌa beayũ iecug̃ap ebekitkit eju jenopag̃og̃õm pima. Páscoa epeta bima iecug̃ap pũg̃ ma taomũnmũnat mujẽmjẽmꞌuk osunuy daomũnmũnapꞌa bewi. Adeayũ emuojuyjuy mujẽmjẽmꞌuk osunuy.
\p
\v 8-11 G̃ebuje adeayũ oꞌjeꞌawero Pilatos xe- -iecug̃ap xe.
\p — Ijop epeta bima taomũnmũnat mujẽmjẽmꞌuk eg̃uy — ioꞌe ip. — Pũg̃ cuy eg̃ujẽm g̃asũ dak ocewebe, — ioꞌe ip Pilatos pe.
\p Paĩyũ kukukayũ itabutkarey oꞌe ip Jesus kay adeayũ cekay jĩjã buye. Imẽnpuye oꞌtujowat ip Pilatos pe. Pilatos itaybit osunuy paĩyũ kukukayũ itabutkarey Jesus kay iam. Paĩyũ kukukayũ kuy oꞌe adeayũ be: — Barrabás cuy epejoojuy Pilatos pe imujẽmãn daomũnmũnapꞌa bewi — i.
\p — Judeuyũ kukukat mujẽmãn pin tu eyju owebe? — ioꞌe Pilatos Judeuyũ be.
\p — Ap! — ioꞌe ip paĩyũ kukukayũ.
\p
\v 12 — Apẽntak oce ite ag̃okatkat pe- -Judeuyũ kukukat i eyju eꞌemat pe? — ioꞌe maꞌg̃uto Pilatos adeayũ be.
\p
\v 13 — Esubamupayaat korosa be imuyꞌũ ãm — ioꞌe ip.
\p
\v 14 — Apẽnpuye osubamupayaat? Ikẽrẽat oꞌjukuk g̃u teku- -pũg̃ em tak kaꞌũma! — ioꞌe Pilatos.
\p Imẽnpit big̃ ma yaꞌõberen oꞌjewãwã ip:
\p — Esubamupayaat korosa be imuyꞌũ ãm — i. 
\m
\v 15 Imẽnpuye Pilatos Barrabás oꞌg̃ujẽmat daomũnmũnapꞌa bewi. Oꞌg̃ujẽmat adeayũ mucokcokap ojuy. Jesus oꞌtujowacat sorarayũ be.
\p — Jesus cuy epeg̃upok ixee mug̃ẽg̃ẽbum — ioꞌe sorarayũ be. — Epesubamupaya korosa be imuyꞌũ ãm — ioꞌe cebe ip.
\m Imẽn Pilatos oꞌe adeayũ mucokcokap ojuy. 
\p
\v 16 G̃ebuje sorarayũ Jesus oꞌtujowat iecug̃ap tukꞌa kay. Tukꞌa eaki be oꞌtujowat. Wararaꞌacayũ oꞌtakoy ip sorarayũ- -jewejuacatꞌin ma.
\p — G̃aꞌa ite ma ajowaywayway — ioꞌe ip jebureyũ be.
\p
\v 17 Iwaywayway am iekabek ip oꞌg̃uõm cebe- -ipakpukg̃ũg̃ũnat. Widaohobune oꞌsubunemuwakẽn ip yakoreren am. Oꞌjomõg̃ ip yakoreren.
\p
\v 18 — Ẽn ma Judeuyũ kukukat! — ioꞌe ip iwaywayway am. — Wararaꞌacat podi ma ẽn aꞌõbuyxi — ioꞌe ip iwaywayway am.
\p
\v 19 Oꞌyamupãupã ip im. Oꞌg̃uxiuxi ip. Oꞌjẽg̃ꞌaecõg̃cõg̃ ip cewap iwaywayway am: — Soat podi ma ẽn aꞌõbuyxi — iꞌeꞌem cebe. 
\v 20 Iwaywaywayap epere buje iekabek oꞌjuꞌuk ipakpukg̃ũg̃ũnat. Cesay ip waram oꞌg̃uõm cebe. Oꞌtujujẽm ip ukꞌa eaki bewi ibamupaya am korosa be imuyꞌũ ãm.
\p
\v 21 Tujujẽm pima oajẽm ip ag̃okatkat kay. Ag̃okatkat ajẽmjẽm oꞌe kog̃ũnpi bewi. Ibutet Simão i osunuy. Cirene ka bewiat osunuy. Alexandre ebay osunuy, Rufo ebay dak.
\p — Korosa juy ejukuk Jesus pe ikukap puxim — ioꞌe sorarayũ ixe Simão be.
\p
\v 22 Jesus oꞌtujowat ip coꞌa kay. Gólgota i coꞌa butet osunuy. (Gólgota ceꞌũat ariritꞌa iape wuyaꞌõm). Oajẽm ip. 
\v 23 Iboceat mirradup oꞌtupmuwekoy uvaꞌabidi be wuypipimuꞌũmaptim.
\p — Juku! Etikõn — ioꞌe ip Jesus pe.
\p — Ap! — ioꞌe bit.
\p Oꞌtikõn g̃u.
\p
\v 24 G̃ebuje sorarayũ Jesus oꞌsubamupaya ip korosa be. Tapoa oꞌjomõg̃ ip Jesus bu be, sui be dak. Korosa oꞌjomõg̃ ip ipikũykũy be. Imẽn ma oꞌsubamupaya ip. Karatũg̃ꞌa buximatꞌa ip oꞌyamuju ipi ju- -yabararukatꞌa. Oꞌyamuju ip Jesus esay bu am. Imẽn Jesus esay oꞌg̃uꞌẽꞌẽꞌẽ ip jewewedag̃. 
\v 25 Kaxi jeum pima Jesus oꞌsubamupaya ip korosa be- -9 hora bima.
\p
\v 26 — “Apẽnpuye dak oꞌsubamupaya ip imuyꞌũ ãm?” i jeꞌe ip kapkapayũ — ioꞌe Pilatos jewebe ma.
\p Imẽnpuye oꞌtupmubararakat apẽnpuye oꞌsubamupaya ip iaptup. “Judeuyũ kukukat teku” iaptup oꞌtupmubararakat Pilatos. Oꞌtupmõg̃ ip korosa be Jesus abi ase. 
\v 27 Jesus pa mupayapayam pima xepxep ibukurukayũ dak oꞌsubamupaya ip waraꞌat korosa be. Pũg̃ ma Jesus paꞌat kadi osunuy. Waraꞌat ibaꞌũg̃at kadi osunuy. 
\v 28 Deus ekawẽn tup oꞌtupmubararak ip kuyje. Imẽn eꞌem ibodup:
\mi Ikẽrẽat mujurũg̃rũg̃ꞌukat kukap puxim ixe dak oꞌjukuk ip, i.
\m Jesus pa oꞌsubamupaya ip ijoptup ekawẽn tag̃.
\p
\v 29 G̃ebuje korosa etako dag̃ kapkapayũ Jesus muymuy oꞌe. Jesus oꞌjowaywayway jĩjã ip.
\p — “Deus eju kawẽnwẽnapꞌa oyamuꞌũm- -yabog̃atꞌa,” i juk ece — ioꞌe ip cebe. — “Xepxep xet kap puje, waraꞌatꞌa oyamuy,” i juk ece — ioꞌe ip Jesus pe iwaywayway am. 
\v 30 — Ecewedaxijo juy! Etaybitbit pima juy korosa ejuwi ekop eꞌũap puxim — ioꞌe ip cebe iwaywayway am.
\p
\v 31 Imẽnpuxim paĩyũ kukukayũ dak Jesus oꞌjowaywayway jeweweju ma ip, Moisés ekawẽn imutaybitbinꞌukayũ dak.
\p — Teku wararaꞌacayũ daxijojoꞌuk osunuy. Imẽnpit jewedaxijo baꞌore jeꞌũap puxim — ioꞌe ip jewewebe. 
\v 32 — Teku juk oꞌe: “Deus emunaẽ õn,” i, “Judeuyũ kukukat õn,” i dak — i napa ma oꞌe ip. — Teku Deus emunaẽ bima, juy jeꞌkop korosa ejuwi jeꞌũap puxim — ioꞌe ip. — Ikop puje, bit kuka wuyetabut aceꞌe cekay — ioꞌe ip jewewebe.
\p Ceweju ibamupayaꞌibiyũ dak Jesus oꞌjomuymuy jĩjã ibukurukayũ.
\p
\v 33 Kaxi wuyase bima kabiok oꞌe soat tag̃ Judéia eipi dag̃. Ibun ma kabiok oeku. Ebapũg̃ hora bun kabiok oeku.
\p
\v 34 Katpuje Jesus oꞌjewãwã yaꞌõberen.
\p — Eloí, eloí, lemá sabactani? — ioꞌe jaꞌõm.
\p (Ijop ekawẽn, Deus, Deus, apẽnpuye ẽn opere iape wuyaꞌõm).
\p
\v 35 Iboap oꞌyaꞌĩjojo ip iboceayũ.
\p — Eyaꞌõpicũg̃cũg̃ cuy epesop! Elias nomuwãwãm teku! — ioꞌe ip, xipan g̃u ip oꞌjekũyjo buye.
\p
\v 36 Iboceat oꞌjedau idibi bubuap munopapũn ãm uvaꞌabidim- -tideibog̃ꞌũmati. Ixe dak idibi bubuap oꞌjomõg̃ ipꞌabi be.
\p G̃ebuje oꞌyopmuyu Jesus pe timutitit am.
\p — Mẽnpuk! — ioꞌe. — Omuy paxi Elias imukop am korosa ejuwi — ioꞌe.
\p
\v 37 Jesus oꞌjewãwã yaꞌõberen. Pog̃. Oeꞌũ. 
\v 38 Pag̃o Deus eju kawẽnwẽnapꞌa be osunuy- -yabog̃atꞌa be- -ukꞌa exĩntabi nomudip epaꞌgo. Jekpiwan ma ixe pag̃o oꞌjewek Jesus eꞌũ buje. Oꞌjewek kabi kadi wi ipi kay. 
\v 39 100 be sorarayũ kukat cũg̃ꞌi osunuy Jesus wap. Apẽn Jesus oeꞌũiap oꞌjojojo.
\p — Icemãn iteꞌũm Deus ipot osunuy — ioꞌe.
\p
\v 40 Jesus korosa eju bima, aoyũ dak iboce ijojom osodop. Wũy wi ip ijojom osodop- -Jesus cocom. Ixeyũ aoyũ parakpe ebapũg̃ aoyũ osodop ip. Ibũrũ ma ip osodop: Maria Madalena, Salomé, waraꞌat Maria dak. Waraꞌat Maria José xi osunuy- -Tiago xi dak- -yaypanꞌisuat xi. 
\v 41 Ixeyũ aoyũ Jesus eju oekuku Galiléia eipi dag̃ pima. Ibuywatwan oekuku ip. Ade wararaꞌacayũ aoyũ dak osodop ip korosa xe. Jerusalém ka be oajẽm ip ceweju kuy bima. Soat ip Jesus kay jeakag̃ osodop.
\p
\v 42 Katpuje jĩjã oꞌe. Kuyaje Sábado jeꞌe- -Judeuyũ xe jebodoydoyap kabia. Kabiog̃kabiog̃ꞌi bima jexat tataꞌuk ip osodop Judeuyũ Sábado bima jekapikap puxim. 
\v 43 Kabiog̃kabiog̃ꞌi bima José oꞌju Pilatos kay. Ixe José Arimatéia ka bewiat osunuy. Ixe ibimãmãayũ ekawẽn cocoꞌukat osunuy. Yaꞌõbuyxi jĩjã dak osunuy soat xe. Deus pe soat kukukan iap wiwim osunuy. Ipararaꞌũm oꞌju Pilatos kay. Oajẽm.
\p — Jesusꞌũm jebit mukop pin oce — ioꞌe Pilatos pe.
\p
\v 44 — Kuy du ixeꞌũm oeꞌũ? — ioꞌe Pilatos.
Imẽnpuye 100 be sorarayũ kukat oꞌtomuwã.
\p — Kuy ma du oeꞌũ Jesus? — ioꞌe sorarayũ kukukat pe.
\p
\v 45 — Hm hm. Kuy ma — ioꞌe sorarayũ kukukat.
\p — Haꞌa — ioꞌe José be. — Ijebit cuy eg̃ukop — ioꞌe.
\p
\v 46 G̃ebuje José Jesusꞌũm jebit oꞌg̃ukop korosa ejuwi. Kuy juk pag̃o oꞌjat- -xipacat- -irucat. Ijebit oꞌg̃ukabekbek ixem pag̃õm. Oꞌjomõg̃ witabikũy be.
\p Witaꞌa yaboꞌgatꞌa oꞌyamuypen witabikũy nomudipꞌam. 
\v 47 Xepxep Mariayũ osodop iboce. Maria Madalena iboce osunuy. Waraꞌat Maria José xi osunuy- -yaypanꞌisusu xi. Poce Jesusꞌũm jebit oꞌjomõg̃ ip iap oꞌ

jojojo ip.
\b
\c 16
\p
\v 1 Sábado jebodoydoyap kabia Judeuyũ xe. Kaxi at puje, waram ip jekapikpig̃ maꞌg̃uto.
\p Kaxi at puje ebapũg̃ aoyũ tideꞌoati oꞌtibu. Oꞌtibu ip Jesusꞌũm jebit mudeꞌon am. Ebapũg̃ aoyũ oꞌju: Maria Madalena, Salomé dak, waraꞌat Maria dak- -Tiago xi. Ixeyũ ebapũg̃ayũ oꞌju.
\p
\v 2 Domingo bima oꞌju ip witabikũy kay- -kabiaꞌisum ma- -kaxi jẽmꞌisum ma.
\p
\v 3 — Abu witaꞌa ug̃ ocewebe- -witabikũy nomudipꞌa? — ioꞌe ip jewewebe.
\p
\v 4 Imẽn oꞌjekawẽn ip ikũynomudipꞌa yabog̃ cĩcã buye. Oꞌjeak ip witabikũy kay. Kuy witaꞌa yawede oꞌyadobuxik ip. 
\v 5 Oõm ip witabikũy be. Deus xewiat oꞌjojojo ip- -yaypan isuat. Xikꞌi osunuy ibaꞌat kadi. Cesay irut cĩcã osunuy.
\p G̃ebuje oꞌjewetakaka ip aoyũ.
\p
\v 6 — Epeyekuy g̃u! — ioꞌe cebe ip. — Wetaybit Jesus kudadam eyju iam. Nazaré ka bewiat kudadam eyju- -korosa be ibamupayaꞌibit kudadam — ioꞌe. — Ijoce g̃u opop. Kuy oꞌjetait waram — ioꞌe. — Ak epeꞌe topap kay. Topap acã — ioꞌe. 
\v 7 — Epeju juy g̃asũ bit — ioꞌe aoyũ be. — Ceweju etaybitbin oekukuꞌiayũ juy epeg̃ukũyjo — ioꞌe. — Pedro dak cuy epeg̃ukũyjo. “Kuy oꞌjetait waram,” i juy epeꞌe cebe ip. “Cum eywap Galiléia eipi kay,” i juy epeꞌe cebe ip — ioꞌe. — “Iboce ma epetobuxik apẽn ixe kuy oꞌe eywebe iap tag̃,” i juy epeꞌe cebe ip — ioꞌe. — “Waram oꞌjetaitꞌiat cuy epetobuxik,” i juy epeꞌe cebe ip — ioꞌe- -yaypanꞌisuat oꞌe.
\p
\v 8 G̃ebuje oꞌjẽm ip. Owatwat ip witabikũy bewi jeparara pibun. Ikarabakbak oꞌe ip jeparara pibun. Kabi bewiat ekawẽn oꞌg̃uwẽn g̃u ip wararaꞌacayũ be iparara jĩjã ip puye.
\p
\v 9 Jesus waram oꞌjetait kabiꞌisum. Waram oꞌjetait Domingo bima. Koam oꞌjebapuk Maria Madalena kay- -kuy bima cebewi 7 be ibiõg̃buk kẽrẽayũ oꞌg̃ujẽmiat kay. 
\v 10-11 Jesus eju oekukuiayũ wawa oꞌe ig̃uykitkit ip Jesus kay buye. Wawa ip pima Maria Madalena oꞌju ixeyũ mukũyjom.
\p — Wuyekariwa waram oꞌjetait! — ioꞌe cebe ip. — Oꞌjebapuk okay. Ojojojo — ioꞌe Maria.
\p Imẽnpit itabutꞌũm oꞌe ip Maria ekawẽn kay.
\p — Dapxi ẽn — ioꞌe ip Maria be.
\p
\v 12 G̃uyjom Jesus oꞌjebapuk xepxepayũ kay. Iwarun ma oꞌjebapuk cekay ip. Oꞌjebapuk cekay ip cucum pima kog̃ũnpi be. 
\v 13 Imẽnpuye ixeyũ oꞌjepit wararaꞌacayũ kay- -jebureyũ kay.
\p — Wuyekariwa itabẽg̃ maꞌg̃uto! Ocejojojo! — ioꞌe ip cebe ip.
\p — Dapxi eyju — ioꞌe ip xepxepayũ be.
\p Itabutꞌũm oꞌe ip ixeyũ ekawẽn kay.
\p
\v 14 G̃uyjom oꞌjebapuk 11 beayũ kay. Jekõnkõn ip pima, oꞌjebapuk cekay ip. Oꞌg̃ukorẽm ip itabutꞌũm puye waram oꞌjetait iap ekawẽn kay.
\p — Apẽnpuye eyetabut g̃u okay? — ioꞌe. — Oweju oekukuiayũ kuy oꞌe eywebe: “Wuyekariwa waram oꞌjetait,” i — ioꞌe. — Eyetabut g̃u ixeyũ ekawẽn kay. Eybuꞌu jĩjã eyetabut am waram ocetait iap ekawẽn kay — ioꞌe.
\m Imẽn ip oꞌg̃ukorẽm.
\p
\v 15 — Epeju juy soat kaka dag̃ — ioꞌe Jesus. — Soat ka dag̃ayũ be juy kawẽn idipat epeg̃uwẽn — ioꞌe. 
\v 16 — Okay itabut pima, jemubatisasanan pima dak, Deus taxijo — ioꞌe. — “Eykẽrẽ oxe,” i jeꞌe Deus okay itabutꞌũmayũ be bit. “Soat em ipiat epesupiꞌajo,” i dak jeꞌe — ioꞌe. 
\v 17 — Deus jaꞌõbacaap jeꞌg̃ũm okay itabucayũ be kaꞌũma ma ajojojoiap mubapuk am soat etabutpe — ioꞌe. — Iboap aꞌõbacaam ibiõg̃buk kẽrẽayũ g̃ujẽmjẽm ip ikug̃ayũ bewi — ioꞌe. — Wararaꞌacat aꞌõm jekawẽn ip iisuan — ioꞌe. 
\v 18 — Itaybitꞌũma puybu tũypiatpu mucay buje, jeꞌũ g̃u ip — ioꞌe. — Itaybitꞌũma tipiati kõn puje, jeꞌũ g̃u ip — ioꞌe. — Iwãtaxipipiayũ jeje jebu mõg̃ puje, jeꞌada ip — ioꞌe Jesus.
\p
\v 19 Kariwa Jesus imẽn oꞌjekawẽn jeweju etaybitbinayũ eju.
\p Cekawẽn epere buje, Deus Jesus oꞌg̃uyu kabi kay. Oabik Deus xe ixe eju soat kukukan.
\p
\v 20 Ibocewi ceweju etaybitbinayũ oꞌjẽm. Soat ka dag̃ oꞌju ip. Kawẽn idipat muwẽnuwẽn oekuku ip. Wuyekariwa Jesus ixeyũ buywatwan osunuy. Soat etabutpe kaꞌũma buk ajojoiap mubapukpug̃ oekuku ip ixe aꞌõbi. Imẽneju adeayũ itabut oꞌe ip ixeyũ ekawẽn kay.