\id LUK Mundurukú [myu] NT (Brazil) -2010 bd. 
\h Lucas
\toc1 Lucas emudupmubararaktup
\toc2 Lucas
\mt JESUS CRISTO MUWẼG̃APTUP LUCAS EMUDUPMUBARARAKTUP
\c 1
\p
\v 1-2 Teofilo, ẽn aꞌõbuyxi soat xe ocexe. Õn ijudup mubararag̃ ewebeaptum- -apẽn cuk adi Jesus Cristo oꞌeꞌe wuyetabutpe iaptup. Kuy bima wararaꞌacayũ apẽn ixe Jesus Cristo oꞌeꞌe iaptup oꞌtupmubararak. Koap oꞌjekawẽn ip ixe eju oekukuꞌiayũ eju ixe eꞌeap oꞌjojojoꞌiayũ eju dak. Ixeyũ aꞌõbi juk ixe eꞌeaptup oꞌtupmubararak ip. 
\v 3 Õn pit cuk oce owebe ma:
\p — Õn tak cuy ocekawẽn ceweju ip — i. — Soat eju ixeyũ ejujuy ocekawẽn — i juk oce owebe ma. — “Apẽn ixe Jesus oꞌeꞌe?” i juy oce cebe ip — i juk oce owebe ma.
\p Imẽnpuye ixeyũ eju juk ocekawẽn. Soat cuk oꞌg̃uwẽn ip owebe. Õn tak apẽn oꞌeꞌe ip iaptup otupmubararak ewebeaptum g̃asũ bit, Teófilo. 
\v 4 Ijudup co buje, ẽn tak ece:
\p — Ixeyũ juk adi icẽmãn omutaybitbin apẽn Jesus Cristo oꞌeꞌe iam — i.
\p
\v 5 Teófilo, koam apẽn oꞌjebapuk Zacarias pe iap og̃uwẽn ewebe, apẽn oꞌjebapuk itayxi be iap tak. Herodes Judéia eipi watwat kukukat pima, Zacarias itabẽg̃ osunuy. Judeuyũ epaĩ osunuy ixe Zacarias. Kapikpikꞌuk osunuy Abias ebekitkit eju Deus eju kawẽnwẽnapꞌa be. Abias ebekitkit tak paĩyũ osodop ip. Zacarias tayxi Arão badip osunuy- -paĩyũ kukukat badip. Itayxi butet Isabel i osunuy. 
\v 6 Ixeyũ xepxepayũ cũg̃ ma ip osodop Deus xe. Kũyjobit ip osodop soat Deus aꞌõ kay. Deus bikuyap tag̃ jekukuꞌuk ip osodop. 
\v 7 Bekicat kug̃ g̃u ip osodop, itayxi iꞌit ta baꞌore buye. Yabut osunuy. Zacarias tak aypa osunuy.
\p
\v 8 G̃ebuje Zacarias oꞌju Deus eju kawẽnwẽnapꞌa kay- -yabog̃atꞌa kay. Iboꞌa be kapikpig̃ osunuy Deus etabixe paĩ buye. Kapikpig̃ osunuy Abias ebekitkit eju. 
\v 9 Jebabi dag̃ ibadipyũ juk Zacarias oꞌtaẽ iõm ãm badiatꞌa be. 
\v 10 Oõm tõmteꞌoatõm mupik am Deus etabixe. Adeayũ dak Deus eju kawẽnwẽnapꞌa eakiju ip osodop. Akiju kawẽnwẽn ip osodop Deus eju, Zacarias badi tõmteꞌoatõm mupikupig̃ pima.
\p
\v 11 G̃ebuje Deus ekawẽn tojotjotꞌukat oajẽm Zacarias kay. Cũg̃ꞌi osunuy tõmteꞌoatõm mupikupikapꞌa baꞌat kadi- -caixaꞌa joꞌiatꞌa baꞌat kadi. 
\v 12 Zacarias yag̃uyꞌũm oꞌe ixe Deus ekawẽn tojotjotꞌukat co buje. Iparara jĩjã oꞌe.
\p
\v 13 G̃ebuje Deus ekawẽn tojotjotꞌukat oꞌjekawẽn Zacarias pe.
\p — Tapu, epararam g̃u juy eg̃uy — ioꞌe. — Apẽn cuk adi ece cebe iap oꞌyaꞌĩjojo Deus — ioꞌe. — G̃asũ ma emumuojuy jeꞌg̃ũm ewebe — ioꞌe. — Etayxi ekpon g̃ukap. João i juy ibuten jeꞌe — ioꞌe. 
\v 14 — Eycokcog̃ cĩcã ma epesop bekicat kap puje. Adeayũ dak icokcok cĩcã jeꞌe eyweju. 
\v 15 Ekpot yaꞌõbuyxian jeꞌe Deus xe. Uvaꞌabidi juy idikõn g̃u, wuymukaꞌoꞌonapti dak. Ibiõg̃buk xipacat aꞌõbi ixe jeku jekapꞌisum piap — ioꞌe. 
\v 16-17 — Ekpot Judeuyũ ag̃uymuwarururun jeꞌe ixeyũ be Deus kay am, wuykukukat kay am tak. Deus biõg̃buk aꞌõbacaap kug̃ ixe jeku Elias ekukuap puxim. Kaꞌũma buk ocejojojoiap mubapukpug̃ jeku. Ixe omuyku wuykukukat ajẽm awap. Ixe cebayũ ag̃uymuwarururun jeꞌe ixeyũ be waram g̃uto jebekitkiyũ kay am. Ixe Deus aꞌõ kayꞌũmayũ ag̃uymuwarururun jeꞌe ixeyũ be waram g̃uto kawẽn icẽmat tag̃ jeku am. Ixe ijodiacat g̃ubikuy wuykukukat ajẽmap wiwi am — ioꞌe.
\m Imẽn Deus ekawẽn tojotjotꞌukat oꞌjekawẽn Zacarias pe.
\p
\v 18 G̃ebuje Zacarias oꞌjekawẽn Deus ekawẽn tojotjotꞌukat pe.
\p — Ibaꞌore ma owebe okpotpet am — ioꞌe. — Kuy aypa oce. Otayxi dak yabut kuy — ioꞌe.
\p
\v 19 — Gabriel i obutet — ioꞌe. — Deus etabixe cũg̃ꞌi õn nuynuy. Deus ma omudot jekawẽn ãm eweju. Ixe omudot iboap awẽg̃ muwẽn ãm ewebe- -yawẽg̃ tipatawẽg̃ muwẽn ãm ewebe. 
\v 20 Ẽn pit etabut g̃u waꞌõ kay — ioꞌe. — Imẽnpuye ekõmbicaca ecesũy. Ede baꞌore ecesũy. Wekawẽn tag̃ cebapuk puje bit, waram g̃uto ede but eceꞌe. Soat ma jeꞌbapuk ixe kabia be apẽn õn eꞌem ewebe iap tag̃ — ioꞌe.
\p
\v 21 Adeayũ dak Deus eju kawẽnwẽnapꞌa bewi Zacarias jẽmap wiwim ip osodop.
\p — Apẽnpuye dak Zacarias ibun cĩcã Deus eju kawẽnwẽnapꞌa be? — ioꞌe ip jewewebe kakijuayũ.
\p
\v 22 G̃ebuje Zacarias oajẽm akijuayũ kay. Cekawẽn paꞌore oꞌe cebe ip. Imẽnpuye itaybit ip oꞌe Deus eju kawẽnwẽnapꞌa be bima Zacarias jexey joꞌiat oꞌjojojo iam. Jekawẽn ojuy akijuayũ eju. Cekawẽn paꞌore bit oꞌe. Imẽnpuye jebum acã oꞌjekawẽn ceweju ip.
\p
\v 23 Deus eju kawẽnwẽnapꞌa be jekapikap epere buje, Zacarias oꞌjepit jedukꞌa kay.
\p
\v 24 G̃uyjom ma itayxi oꞌyukreg̃- -Isabel. Pũg̃põg̃bi kaxi jedukꞌa be ma osunuy Isabel.
\p
\v 25 — Okukukat xipat cĩcã oxe! — ioꞌe Isabel. — Koap cuk adi og̃uy osũsũn, oꞌitꞌetꞌũm puye — ioꞌe. — G̃asũ bit osũsũn g̃u oce oꞌukreg̃ puye — ioꞌe Isabel jewebe ma.
\p
\v 26-27 G̃ebuje Deus jekawẽn tojotjotꞌukat oꞌg̃uju yaypanꞌisuat kay- -ag̃okatkat eju oꞌjepo g̃uꞌiat kay. Oꞌg̃uju cekay Isabel 6 kaxi yukeg̃ puje. Deus ekawẽn tojotjotꞌukat putet Gabriel i osunuy. Oajẽm ag̃okatkat eju oꞌjepo g̃uꞌiat kay. Ixe ayacat Galiléia eipi be osunuy. Nazaré ka be osunuy. Maria i ibutet osunuy. José wadip osunuy. José Davi badip osunuy. 
\v 28 Oajẽm Deus ekawẽn tojotjotꞌukat Maria kay. 
\p — Tũꞌũ, ecokcog̃ cuy eg̃uy — ioꞌe. — Deus xipat cĩcãat jeꞌg̃ũm ewebe. Wuykukukat soat em jekukum eweju — Gabriel oꞌe.
\p
\v 29 Maria yag̃uybabiꞌũm oꞌe cekawẽn co buje.
\p — Apẽnpuye dak imẽn teku odobededem? — ioꞌe Maria jewebe ma.
\p
\v 30 — Tũꞌũ, epararam g̃u juy eg̃uy — ioꞌe. — Deus xe ekukpin cĩcã — ioꞌe. 
\v 31 — Jeꞌukreg̃. Ag̃okatkat eceg̃ukap eꞌin. Jesus i juy esubuteta — ioꞌe. 
\v 32 — Yaꞌõbuyxian jeꞌe eꞌit — ioꞌe. — “Deus ipot teku,” i jeꞌe soat ijodiat. “Soat podi yaꞌõbacaat ipot teku,” i jeꞌe ip. Deus ixe jomuy Judeuyũ kukukan. Kuy bima Davi Judeuyũ kukukat osunuy- -Jesus eajot. Imẽnpuxim Jesus Judeuyũ kukukan jeꞌe. 
\v 33 Soat em ma imẽn Jacó naxeg̃ebitbit kukukan jeenuy. Waraꞌat g̃u jomuy ixe dieg̃ ixeyũ kukukan — Gabriel oꞌe Maria be.
\p
\v 34 — Apẽn xeꞌe dak osuꞌitkap? Ocepo g̃u mabuk aꞌg̃u ag̃okatkat eju — ioꞌe Maria Deus ekawẽn tojotjotꞌukat pe.
\p
\v 35 — Ibiõg̃buk xipacat jajẽm ekay — ioꞌe. — Jeꞌukreg̃ soat podi ma yaꞌõbacaat aꞌõbi- -Deus aꞌõbi. Imẽnpuye bekicat ikẽrẽat kug̃ g̃u jeꞌe. Deus ipon jeꞌe. 
\v 36 G̃ebum cuy eg̃uy ebadip kay- -Isabel kay — ioꞌe. — Ixe Isabel oꞌyukreg̃ yabut maꞌg̃u. Kuy ag̃okatkat opop yuk pe. “Iꞌit ta baꞌore teku,” ioꞌeꞌe ip kuy bima. G̃asũ bit 6 kaxi yukreg̃. 
\v 37 Kaꞌũma ma ibaꞌore Deus pe — ioꞌe.
\p
\v 38 — Haꞌa — Maria oꞌe. — Deus okukukat. Deus aꞌõbi soat jeꞌbapuk owebe apẽn ẽn eꞌem owebe iap tag̃ — Maria oꞌe.
Deus ekawẽn tojotjotꞌukat oꞌjẽm cexewi.
\p
\v 39 G̃axĩn ma Maria oꞌju Isabel kay. Dao ma oꞌju coꞌaꞌuat kapẽn pe. Judéia eipi be oꞌju. Isabel ka be oꞌju. Jay. Oajẽm. 
\v 40 Oõm Zacarias dukꞌa be- -Isabel dukꞌa be. Isabel oꞌtobede. 
\v 41 Joroh. Isabel ukpeat oꞌjejoro yuk pe Maria be Isabel dobede buje. Ibiõg̃buk xipacat aꞌõbacaap kug̃ osunuy Isabel.
\p
\v 42 G̃ebuje Isabel oꞌjekawẽn yaꞌõberen Maria eju.
\p — Deus xipat cĩcã! — ioꞌe. — Deus xipacat ũmũm ewebe. Ecokcok soat cokcokap podi ma- -aoyũ cokcokap podi ma. “Ẽn xipat cĩcã,” i jeꞌe adeayũ eꞌuk peat pe. 
\v 43 Deus xipacan eꞌem owebeam tak! Ẽn okukukat xi. Inaka okay ajẽm, waꞌõbuyxi g̃u maꞌg̃u — ioꞌe. 
\v 44 — Ewebe odobede buje, oꞌuk peat oꞌjejoro jecokcok pibun — ioꞌe. 
\v 45 — “Soat jeꞌbapuk owebe apẽn okukukat eꞌem owebe iap tag̃,” i ẽn eꞌem. Imẽnpuye Deus xipacan eꞌem ewebeam — Isabel oꞌe.
\p
\v 46 G̃ebuje Maria oꞌjekawẽn Isabel eju.
\p — “Wuykukukat soat podi ma xipat,” i õn eꞌem — ioꞌe.
\qm
\v 47 — Ocokcok cĩcã Deus xipan okug̃ puye- -odaxijojoꞌukat xipan okug̃ puye — ioꞌe.
\q
\v 48 — Ixe acã okukukat. Odadaybot ma dak. Imẽnpit ixe soat em ag̃ okay — Maria oꞌe. — “Deus xipacan ixe ayacat oꞌjukuk,” i jeꞌe soat ka watwat omuwẽnuwẽn — ioꞌe. — G̃asũ imẽn jeꞌe ip, g̃uyjom tak — ioꞌe.
\qm
\v 49 — Ixe kaꞌũma buk ocejojojoiap oꞌg̃ubapuk owebe. Soat podi ma ixe yaꞌõbaca — ioꞌe. — Ibuyxim cuy ibutet ajukuk — ioꞌe.
\qm
\v 50 — Deus itabotaidabotbot cĩcã ibuyxim jekukayũ kay. Wuydobuyũꞌũmꞌũm kay itabotaidabotbot cĩcã osunuynuy. G̃asũayũ kay dak itabotaidabotbot- -soat kay. G̃uyjomayũ kay dak itabotaidabotbon jeedop — ioꞌe.
\qm
\v 51 — Deus jaꞌõbacaap oꞌg̃ubapukpuk. Yobog̃an pinayũ oꞌg̃uypõg̃põg̃. Ixeyũ eꞌeap oꞌg̃uꞌũm — ioꞌe.
\qm
\v 52 — Ika kukukayũ oꞌg̃ujẽm jenuyap pewi. Yaꞌõbuyxiꞌũmayũm oꞌe ip. Yaꞌõbuyxiꞌũmayũ oꞌjomuy ixeyũ nuyap pe. Yaꞌõbuyxiayũm oꞌe ip — ioꞌe.
\qm
\v 53 — Tadaybotbocayũ be xipat cĩcãat oꞌg̃ũmg̃ũm. Soat kug̃ ip oꞌe. Ibubut adeayũ bit ibuipuk oꞌg̃ujẽmjẽm — ioꞌe.
\qm
\v 54 — Ixe Israel naxeg̃ebitbit oꞌsubuywatwan cĩcã- -jaꞌõ kay kũyjobicayũ oꞌsubuywatwan cĩcã. Xipan wuydobuyũꞌũmꞌũm oꞌjukukuk apẽn cuk adi oꞌeꞌe iap tag̃ — ioꞌe.
\qm
\v 55 — Xipan wuydobuyũꞌũmꞌũm oꞌjukukuk- -Abraãoꞌũm oꞌjukukuk, cenaxeg̃ebitbitꞌũmꞌũm tak oꞌjukukuk. Jaꞌõ dag̃ soat em g̃ebum osunuy ixeyũ kay. Soat em ixe g̃ebum osunuy ixeyũ kay xipan ikuk am — ioꞌe- -Maria oꞌe.
\p
\v 56 Ebapũg̃ kaxi Maria Isabel xe osunuy. 
\p Ibocewi oꞌjepit jedukꞌa be.
\p
\v 57 Ija kaxi ajẽm puje, Isabel oꞌsuꞌitkap ag̃okatkat.
\p
\v 58-59 Bekicat 8 kabia bima ibadipyũ oajẽm ixe dukꞌa xeayũ dak. Oajẽm ip ikapꞌisuat taypuꞌag̃obixeedakat am “Deus ebekit teku” iꞌe am. Soat ibadipyũ icokcok cĩcã oꞌe ip.
\p — Deus xipan cĩcã ija xi oꞌjukuk — ioꞌe ip.
Ibutetaat ojuy ip.
\p — Zacarias i juy asubutetaat cebay butet kadin ma — ioꞌe ip jewewebe.
\p
\v 60 — Ap! — ixi bit oꞌe. — Ibo g̃u jeꞌe ibutet- -João i acã — ioꞌe ixi.
\p
\v 61 — Ebadipyũ butet João iꞌũmg̃u — ioꞌe ip ixi be.
\p
\v 62 G̃ebuje oꞌjekawẽn ip cebay eju.
\p — Apẽn ekpot puten jeꞌe? — ioꞌe ip cebay be.
\m Jebum acã oꞌjekawẽn cebay, cekawẽn paꞌore buye. 
\v 63 “Taperadup cuy etupũm owebe” iape, cebay oꞌe jebum cebe ip. Oꞌtupũm ip cebe.
\p Ibocewi oꞌtupmubararak cebay. Ibutet João i iaptup oꞌtupmubararak. Soat ip itabẽg̃bẽg̃ oꞌe ijojom. Zacarias i cebay jeꞌe tũybe iãn oꞌe ip. 
\p
\v 64 Cebay cekawẽn put oꞌe g̃ebuje bit. Xipan oꞌjekawẽn g̃uto.
\p — Deus xipat cĩcã — ioꞌe. — Kaꞌũma ma ixe joꞌiat yaꞌõbuyxiat — ioꞌe.
\p
\v 65 Imẽneju yag̃uybabiꞌũm oꞌe ip tukꞌa xeayũ. João kapap awẽg̃ oꞌyawẽg̃muwẽnuwẽn ip soat ka dag̃- -Judéia eipi dag̃, coꞌaꞌuat kapẽn tag̃ tak. 
\v 66 Oꞌyawẽg̃tobuxikꞌiayũ jewag̃uydadam ip osodop João kapap awẽg̃ kay.
\p — Apẽn xeꞌe jeꞌe ite bekicat yaypan pima? — ioꞌe ip jewewebe.
Imẽn oꞌjekawẽn ip, João Deus aꞌõbacaap kug̃ oeku buye.
\p
\v 67 G̃ebuje Zacarias apẽn g̃uyjom jeꞌbapuk iap oꞌg̃uwẽn- -ikapꞌisuat ebay. Iboap oꞌg̃uwẽn Ibiõg̃buk xipacat aꞌõbi.
\qm
\v 68 — G̃aꞌa ace Deus pe “Kaꞌũmg̃u ejoꞌiat,” i. Ixe Deus kay itabut ip osodop Israel naxeg̃ebitbit. Jebekitkiyũ oꞌsubuywan. Jebekitkiyũ oꞌtaxijo — ioꞌe.
\qm
\v 69 — Deus wuydaxijojoꞌukat oꞌg̃udot wuykay. Yaꞌõbacaat oꞌg̃udot wuykay. Wuydaxijojoꞌukat Davi naxeg̃ebit- -Deus aꞌõ kay kũyjobicat naxeg̃ebit — ioꞌe.
\qm
\v 70 — Ixe wuydaxijojoꞌukat yaꞌõbacat jĩjã. Kaꞌũma ma ixe joꞌi yaꞌõbaca. Imẽnpuxim kuyje Deus ekawẽn muwẽnuwẽnꞌukayũ oꞌeꞌe Deus aꞌõbi- -soat tag̃ iisuayũ oꞌeꞌe — ioꞌe.
\qm
\v 71 — “Deus wuydaxijo wuykay itakomaayũ be wuyaokaap puxim. Ixe wuykayꞌũmayũ aꞌõbacaap g̃uꞌũm ixeyũ be wuyaokaap puxim,” iꞌeꞌeꞌuk osodop ip — ioꞌe Zacarias.
\qm
\v 72 — Deus itabotaidabotbot osunuy wuydobuyũꞌũmꞌũm kay apẽn kuy oꞌeꞌe iap tag̃. “Wekawẽn tag̃ oce,” ioꞌe Deus. Jekawẽn tag̃ oꞌeꞌe soat em ma. Cekawẽnkẽrẽ g̃u osunuy- -cekawẽntip cĩcã — ioꞌe.
\qm
\v 73 — Ixe oꞌjekawẽn wuydobuꞌũm eju- -Abraãoꞌũm eju. “Jedaxijo õn ekay itakomaayũ bewi; ebekitkiyũ dak otaxijo,” ioꞌe Abraão be — ioꞌe.
\qm
\v 74 — “Jeybuywan õn eypararam g̃u kapik am owebeam,” ioꞌe Abraão be — ioꞌe.
\qm
\v 75 — “Cũg̃ ma epesop oxe,” ioꞌe. “Ikẽrẽat kug̃ g̃u epesop oxe,” ioꞌe. “Soat em epesop oxe eyetait,” ioꞌe. Ixe oꞌe apẽn cuk adi oꞌeꞌe iap tag̃ — ioꞌe Zacarias.
\qm
\v 76 — Bekit — Zacarias oꞌe jekpot pe- -ikapꞌisuat pe — Wuykukukat wap eceju soat muxipan am ixe mudot am. Deus ekawẽn muwẽnuwẽnꞌukan eceꞌe- -soat podi ma yaꞌõbacaat ekawẽn muwẽnuwẽnꞌukan — ioꞌe.
\qm
\v 77 — Adeayũ be eceꞌe “Deus ikẽrẽat juꞌuk eywebewi,” i. “Deus jeydaxijo,” i eceꞌe cebe ip — ioꞌe Zacarias.
\qm
\v 78 — Imẽn Deus itabotaidabotbot cĩcã wuykay. Yukpiceg̃ẽ g̃u wuykay. Wuydaxijojoap kabia jajẽm ixe aꞌõbi. Ixe jajẽm kabia buxim.
\qm
\v 79 — Ixe kabiok pe jekukuꞌukat puximayũ g̃ukabia. Jeꞌũap puxim ipararaayũ g̃ukabia. Ixe wuymutaybitbin jeꞌe wuywebe xipan jewewekuk am. Kabaꞌũm acesop wuyeweweju.
\qm — Imẽneju adeayũ jeꞌe ewebe: “Ẽn Deus ekawẽn muwẽnuwẽnꞌukat,” — ioꞌe ikapꞌisuat ebay.
\m Imẽn Zacarias apẽn g̃uyjom jeꞌbapuk iap oꞌg̃uwẽn Deus aꞌõbi.
\p
\v 80 Bekicat oꞌyaypan. Kũyjobit osunuy Deus aꞌõ kay. Ukꞌaꞌũmat pe osunuy Judeuyũ kay jejuꞌũm pima- -Judeuyũ mutaybitbinꞌũm pima.
\b
\c 2
\p
\v 1 Ixeyũ kabia be Augusto cartadup oꞌtupmubararak- -soat ka kukat. Oꞌtupmuju soat pe jebekitkiyũ be. Bekitkit, eykapap ka kay juy epeju eybutet mubararak am taperadup pe iꞌeaptup oꞌtupmuju. 
\v 2 Kaꞌũma ma ig̃o eipi watwat oꞌg̃uweg̃ũn ijoptup muju awap. Jebekitkit oꞌg̃uweg̃ẽg̃at Cirênio Síria eipi watwat kukat pima. 
\v 3 Imẽnpuye soat ixe ebekitkit oꞌju jebutet mubararak am taperadup pe. Jekapap ka be ip oꞌju.
\p
\v 4 Imẽnpuye José dak oꞌjẽm Galiléia eipi bewi- -Nazaré ka bewi. Oꞌju Judéia eipi be- -Belém ka be- -Davi osunuyiat ka be. Ixe José oꞌju Davi diwat osunuy buye. 
\v 5 Oꞌju jebutet mubararak am Maria eju- -jetayxi eju. Maria yukreg̃ osunuy. 
\v 6 Ixeyũ Belém ka be bima, Maria oꞌyukpasuk.
\p
\v 7 G̃ebuje Maria oꞌsuꞌitkap koapat- -ag̃okatkat. Ikapꞌisuat oꞌyamuekabek pag̃õm. Oꞌg̃uyxet biopak xat mũn pe- -cucuayũ nuyapꞌa be topapꞌũm puye.
\p
\v 8-9 Kabi bewi Deus ekawẽn tojotjotꞌukat tak oꞌkop ovelha kukukayũ kay. Kog̃ũnpi be osodop ip Belém ka tẽg̃ ma. Ovelha kukug̃ ip osodop ixima be. Deus oꞌg̃ukabia ovelha kukukayũ akokoreren. Iparara jĩjã ip oꞌe kabia jo buje, idip cĩcã maꞌg̃u kabia.
\p
\v 10 G̃ebuje Deus ekawẽn tojotjotꞌukat oꞌjekawẽn ceweju ip.
\p — Eypararam g̃u juy epesop — ioꞌe. — Kawẽn idipat otojot imuwẽn ãm eywebe eymucokcok am. Kawẽn idipat otojot soat pe imuwẽn ãm ijodiat pe. 
\v 11 Eydaxijojoꞌukat oꞌkap g̃asũ. Davi osunuyiat ka be oꞌkap — ioꞌe. — Soat kukat ixe- -ipi dag̃at kukat. Cristo i ibutet — ioꞌe Deus ekawẽn tojotjotꞌukat. 
\v 12 — Ixe ikapꞌisuat iekabek pag̃õm. Poꞌi biopak xat mũn pe. Imẽn õn eymukũyjojom eywebe tobuxik am — ioꞌe cebe ip.
\p
\v 13 G̃ebuje wararaꞌacayũ oꞌjebapuk kabi kadiwi Deus ekawẽn tojotjotꞌukayũ.
\p — Kaꞌũma ma Deus coꞌiat — ioꞌe ip. — Soat podi ma ixe yaꞌõbuyxi — ioꞌe ip.
\p
\v 14 — Kaꞌũmg̃u Deus coꞌiat xipacat — ioꞌe kabi kadiwiayũ. — Kabaꞌũm jeedop ip soat ijodiacat- -Deus emumukukpinyũ — ioꞌe ip.
\m
\v 15 Waram ip oꞌjeu kabi kay Deus ekawẽn tojotjotꞌukayũ.
\p Cexewi Deus ekawẽn tojotjotꞌukayũ cẽm puje, oꞌjekawẽn ip jeweweju ovelha kukukayũ.
\p — G̃aꞌa aju — ioꞌe ip. — Belém ka kay juy aju — ioꞌe ip. — Apẽn Deus oꞌe wuywebe iap cuy ajojo — ioꞌe ip jewewebe.
\m
\v 16 Dao ma ip oꞌju.
\p Oajẽm ip. Ixeyũ dak ikapꞌisuat oꞌtobuxik José eju, Maria eju dak. Poꞌi osodop biopak xat mũn pe.
\p
\v 17 Ikapꞌisuat tobuxik puje, ikapap awẽg̃ muwẽnuwẽn oekuku ip soat ka dag̃. Apẽn Deus ekawẽn tojotjotꞌukayũ bekicat kapap oꞌg̃uwẽn cebe ip iap muwẽnuwẽn oekuku ip soat ka dag̃. 
\v 18 Itabẽg̃bẽg̃ ip oꞌe cẽm paxi iam oꞌyaꞌĩjojoiayũ ma. 
\v 19 Maria bit soat em g̃ebum osunuy apẽn jeꞌit oꞌkap iap kay. Iboap kay jewag̃uymug̃ẽg̃ẽm osunuy. 
\v 20 Ovelha kukukayũ oꞌjepit kog̃ũnpi be.
\p — Ẽn xipat cĩcã — ioꞌe ip Deus pe. — Idip cĩcãat ocejojojo — ioꞌe ip. — Idim cuk ẽn ocemukũyjo — ioꞌe ip.
\m Soat oꞌtobuxik ip apẽn Deus ekawẽn tojotjotꞌukat oꞌe cebe ip iap tag̃. Imẽnpuye:
\p — Kaꞌũma ma ejoꞌiat xipacat — ioꞌe ip.
\p
\v 21 8 xet kap puje cebaydaap Jesus daypuꞌag̃obuxee oꞌsuxeedakacat Judeuyũ babim. Yukreg̃ awap Deus ekawẽn tojotjotꞌukat oꞌe Maria be: — Jesus i ibuten jeꞌe — i. Imẽnpuye Jesus i oꞌsubutetaat ip.
\p
\v 22-23 G̃ebuje cebaydaap Jesus oꞌtujowat Jerusalém ka kay. Jetayxi eju oꞌtujowat. Oꞌtujowat ip ikapꞌisuat mubapuk am paĩ be Moisés ekawẽn tag̃. Ibararak opop wuykukukat ekawẽntup pe: 
\mi Ag̃okatkat kap puje- -koapat kap puje, ixe ikapꞌisuat Deus ebekit ma, i.
\p Imẽneju cebaydaap Jesus oꞌtujowat Jerusalém kay imubapuk am Deus etabixe Deus eju kawẽnwẽnapꞌa be. 
\v 24-30 Imẽn eꞌem wuykukukat ekawẽntup:
\mi Bekicat kap puje, wũnca juy eg̃ũm paĩ be ixe be imupik am Deus etabixe, i. Xepxep pukaso juy eg̃ũm, i. Pukaso kug̃ꞌũm pima, xepxep coot cuy eg̃ũm, i.
\m Imẽn eꞌem wuykukukat ekawẽntup. Imẽneju cebaydaap oajẽm Jerusalém ka be ikapꞌisuat mubapuk am Deus etabixe.
\p G̃ebuje Ibiõg̃buk xipacat Simeão oõmat Deus eju kawẽnwẽnapꞌa be- -yabog̃atꞌa be. Cebaydaap tak Jesus oꞌtujuajẽm Deus eju kawẽnwẽnapꞌa be pukaso ũm ãm paĩ be Moisés ekawẽn tag̃. Simeão Jesus oꞌtakoy jebakopixirik ceje.
\p Ixe Simeão Jerusalém ka be osunuy. Cũg̃ cĩcã osunuy Deus xe. Itabut cĩcã osunuy Deus kay. Judeuyũ daxijojoꞌukat ajẽmap wiwim osunuy. Ibiõg̃buk xipacat ixe mutaybitbinꞌuk osunuy. Ibiõg̃buk xipacat oꞌe Simeão be kuy bima:
\p — Ejeꞌũ g̃u wuykukukat coꞌũm pima- -soat taxijo am Deus emunaẽ joꞌũm pima — i.
\p G̃ebuje Simeão Deus oꞌg̃uwẽnuwẽn xipan.
\p — Okukukat — ioꞌe. — G̃asũ õn iju jojom — ioꞌe. — Soat taxijo am etaẽiat cocom õn — ioꞌe. 
\v 31 — Soat etabixe juk etaẽiat cocom õn — ioꞌe. — G̃asũ bit weꞌũ but ocokcog̃ — Simeão oꞌe. — Ẽn acã okukukat — ioꞌe. — G̃asũ õn iju jojom apẽn cuk ece owebe iap tag̃ — ioꞌe. 
\v 32 — Kabiaap puxim jeꞌe ixe. Judeuꞌũmayũ mutaybitbin jeꞌe — ioꞌe. — Ebekitkiyũ dak kũyjobin jeedop ip wararaꞌacat aꞌõ kay g̃u- -ixe aꞌõ kay acã- -Israel naxeg̃ebitbiyũ — ioꞌe. — Edipap kug̃ jeedop ip — ioꞌe Deus pe.
\p
\v 33 Cebaydaap, ixi dak itabẽg̃bẽg̃ ip osodop Simeão ekawẽn cocom- -bekicat muwẽnuwẽnap cocom.
\p
\v 34-38 — Xipan cuy ikapꞌisuat ebayũ ejukuk — Simeão oꞌe Deus pe.
\p G̃ebuje Simeão oꞌjekawẽn Maria eju- -ikapꞌisuat xi eju.
\p — Aꞌõpicũg̃ cuy eg̃uy — ioꞌe. — Deus cuk ixe bekicat oꞌtaẽ — ioꞌe. — Inaka adeayũ iju kay g̃u jĩjã jeꞌe Judeuyũꞌin. Deus pit ixeyũ g̃uꞌũm. Ẽn tak eg̃uycũg̃ cĩcã eceꞌe — ioꞌe. — Ipiat ecesupiꞌajo jĩjã paja ewebe õmap puxim — Simão oꞌe Maria be. — Wararaꞌacayũ bit iju kay jĩjã jeꞌe. Icokcok cĩcã jeedop ip cekay. Deus imẽn adeayũ ag̃uymubapukpug̃ jeꞌe soat pe — ioꞌe Simeão Maria be.
\p Bekicat ebayũ Deus eju kawẽnwẽnapꞌa be bima, Ana oajẽm cekay ip. Oꞌjekawẽn Deus eju.
\p — Bay, ẽn xipat cĩcã — ioꞌe Deus pe- -Ana oꞌe.
\p Ixe Ana bekicat oꞌkapiap oꞌg̃uwẽn adeayũ be Jerusalém ka watwat pe- -Deus jebekitkit taxijoap wiwiꞌukayũ be. Ixe Ana Deus ekawẽn muwẽnuwẽnꞌukat osunuy. Fanuel daxit osunuy. Aser diwat osunuy. Yabut cĩcã osunuy. Yaypanꞌisu bima juk oꞌjewebumũn. 7 koato jektop xe osunuy. Kuy ma itopꞌũm oeꞌũ. Ixe Ana 84 koato osunuy g̃asũ. Deus eju kawẽnwẽnapꞌa bewi oꞌjẽm g̃u. Soat em ma ig̃oꞌa be nuynuy- -kabiam, ixima dag̃ tak. — Ẽn xipat cĩcã — iꞌeꞌeꞌuk osunuy Deus pe soat em. Deus eju kawẽnwẽnꞌuk osunuy. Jekpiwan ma jewemurerenꞌuk osunuy ceweju jekawẽn ojuy.
\p
\v 39 Deus ekawẽn tag̃ paĩ be bekicat mubapuk epere buje, cebayũ Jesus oꞌtujupit jeka kay. Nazaré ka kay ip oꞌjepit- -Galiléia eipi be. 
\v 40 Bekicat oꞌyaypan. Ibacaan oꞌe. Jebadipyũ bodi ma itaybican oꞌe. Deus xipacat ũmũmꞌuk osunuy cebe.
\p
\v 41 Jesus ebayũ waram oꞌju ip Jerusalém ka kay. Soat em Páscoa epeta be cucuꞌuk ip osodop Jerusalém ka kay. 
\v 42 12 koato bima, Jesus oꞌju g̃uto jebaydaap, ixi iat eju, peta be cucuꞌuk puye.
\p
\v 43 Peta epere buje, cebayũ ma oꞌjepit ip jeka be. Jesus pit oꞌjecũ Jerusalém ka be. Itaybit g̃u ip osodop cecũam. 
\v 44 Tũybe Jesus wuybadipyũ eju oꞌjepit iãn oꞌe ip cebayũ. Jepitpin oꞌju ip e dag̃ jeka kay. Oꞌxet ip e bidase. Jesus oꞌjokudada ip jebadipyũ dag̃, jebureyũ dag̃ tak. 
\v 45 Kaꞌũmg̃u. Oꞌtobuxik g̃u ip. Imẽnpuye ikudadam oꞌjepit g̃uto ip Jerusalém ka be. Ebapũg̃ kabia ikudadam oekuku ip.
\p
\v 46 G̃ebuje Jesus oꞌtobuxik ip Deus eju kawẽnwẽnapꞌa be- -yabog̃atꞌa be. Xikꞌi osunuy Moisés ekawẽn Judeuyũ mutaybitbinꞌukayũ xe- -aypapayũ xe. Cekawẽn cocom osunuy. Kawẽnwẽn osunuy ceweju ip. 
\v 47 Jesus kay jĩjã ip oꞌe soat cekawẽn cocoayũ, itaybit cĩcã buye, cũg̃ cĩcã jededem puye dak.
\p
\v 48 Jesus tobuxik puje, cebayũ itabẽg̃bẽg̃ ip oꞌe ijojom.
\p — Tapu — ioꞌe ixi Jesus pe. — Edaobuꞌu du eg̃uy jepin? — ioꞌe. — Ocag̃uybabiꞌũm cĩcã ocesop ekudadam- -õn, ebaydaap tak — ioꞌe- -jekpot pe oꞌe.
\p
\v 49 — Aĩ, apẽnpuye dak okudadam epeku? — ioꞌe. — Eyetaybit g̃u du webay dukꞌa be juy õn iam- -Deus eju kawẽnwẽnapꞌa be? — ioꞌe- -jexi be oꞌe.
\m
\v 50 Imẽnpit Jesus ekawẽn ibaꞌarem oꞌe cexe ip.
\p
\v 51 Ibocewi oꞌjepit jebayũ eju Jesus. Oajẽm jeka be- -Nazaré ka be. Jebaydaap aꞌõ kay kũyjobit osunuy. Ixi dak soat em g̃ebum osunuy apẽn Jesus cuk adi oꞌeꞌe cebe iap kay. 
\v 52 Ixe Jesus tak jebureyũ bodi ma itaybican oꞌe. Oꞌyaypan. Ikukpin cĩcã osunuy Deus xe, jexeayũ xe dak.
\b
\c 3
\p
\v 1-2 G̃ebuje Deus oꞌjekawẽn João Batista eju- -Zacarias ipot eju. João ukꞌaꞌũmat pe osunuy.
\p — Wekawẽn cuy eg̃uwẽnuwẽn itaybitꞌũmayũ be — Deus oꞌe João be.
\p Oꞌjekawẽn João eju Tibério Roma ka kukat pima. 15 koato kuy ika kukat osunuy. Oꞌjekawẽn ceweju Pôncio Pilatos Judéia eipi kukat pima dak, Herodes Galiléia eipi kukat pima dak, Lisânias Abilene eipi kukat pima dak, Filipe Ituréia eipi kukat pima dak. Ixe Filipe Traconites eipi kukat tak osunuy. Filipe Herodes kitpit osunuy. Oꞌjekawẽn João eju Anás Judeuyũ epaĩyũ kukukat pima. Caifás tak Judeuyũ epaĩyũ kukukat osunuy. 
\v 3 Imẽnpuye Jordãodi wãbu dag̃ oeku João.
\p G̃uyjom João Deus ekawẽn oꞌg̃uwẽnuwẽn adeayũ be.
\p — Eyg̃uycũg̃cũg̃ cuy epesop ikẽrẽat kug̃ puye — ioꞌe cebe ip. — Ikẽrẽat mujurũg̃rũg̃ap cuy epeyepere — ioꞌe. — Epeyewemubatisasanat cuy — ioꞌe. — Imẽn eyꞌe buje, Deus ikẽrẽat juꞌuk eywebewi — ioꞌe. 
\v 4 — Imẽntak eꞌem Isaías emudupmubararaktup- -Deus ekawẽn muwẽnuwẽnꞌukat emudupmubararaktup:
\mi Ag̃okatkat jewãwãwãm ukꞌaꞌũmat pe, i. Imẽn jewãwãwãm:
\mi Soat e juy epesuemukacũg̃ wuykukukat ajẽmap em, i. Ie juy epesuemudim ceku am, i. 
\v 5 Kabioreg̃reg̃at cuy epeg̃udim, i. Ipiweg̃ũn jeꞌe, i. Coꞌa dak epeyamuweg̃ũg̃ũn, i. Iebixirik tag̃ cuy epesuemujẽm, i. Wakenat e be epesuemujẽm, i. Soat iekẽrẽate iedip cĩcã jeꞌe, i. 
\v 6 Wuydaxijo am Deus emunaẽ coco ip soat ijodiacat, i.
\m Imẽn eꞌem Isaías emudupmubararaktup — ioꞌe João adeayũ be.
\m
\v 7 Imẽnpuye adeayũ oꞌju João be jemubatisanan.
\p G̃ebuje João adeayũ oꞌg̃ukũyjo.
\p — Deus itakoma eykay, ikẽrẽat kug̃ cĩcã buye — ioꞌe. — Ipiat supiꞌajoat eywebe, ikẽrẽat kug̃ puye — ioꞌe. — Eynapõn paꞌore Deus xewi — ioꞌe. 
\v 8 — Cũg̃ ma juy epeku kuy ikẽrẽat mujurũg̃rũg̃ap ocepere iap mubapuk am wararaꞌacayũ be — ioꞌe. — Tũybe Deus ipiat supiꞌajoat g̃u wuywebe wuyju Abraão naxeg̃ebitbit puye iãn purut eyju eꞌem — João oꞌe. — Imẽn g̃u juy epeꞌe — ioꞌe. — Ibaꞌore g̃u Deus pe witaꞌa muwexat am Abraão naxeg̃ebitbiyũm — ioꞌe. 
\v 9 — G̃axĩn ma oꞌa kukat jajẽm yaꞌaꞌeꞌũmatꞌip takat am yop xik am daxa be — ioꞌe. — Ixe buxim Deus tak g̃axĩn ma ipiat supiꞌajoat kũyjobitꞌũmayũ be — João oꞌe.
\p
\v 10 — Apẽntak oceꞌe ipiat piꞌajoap puxim? — ioꞌe ip João be.
\p
\v 11 — Xepxep eyekabek kug̃ pima, pũg̃ cuy epeg̃ũm ikug̃ꞌũmat pe — ioꞌe. — Puybit kug̃ pima, epeg̃uꞌẽꞌẽ juy ikug̃ꞌũmat pe — ioꞌe.
\p
\v 12 Iecug̃ap peam dinheiro bubuꞌukayũ dak oajẽm João be jemubatisanan.
\p — Pãm oceju? Apẽntak oceꞌe? — ioꞌe ip João be.
\p
\v 13 — Iecug̃ap emumubudei bodi g̃u juy epejat cebekitkit pewi- -ixe emumubudei acã — ioꞌe João.
\p

\v 14 — Pãm oceju? — ioꞌe ip sorarayũ dak.
\p — Puyxibun g̃u juy dinheiro epejat wararaꞌacat xewi — ioꞌe. — Napa g̃u juy epeꞌe dinheiro bu am wararaꞌacat xewi. Jemãmãmãm g̃u juy epesop eyekapikaptei kug̃- -eycokcog̃ acã — ioꞌe.
\p
\v 15 Soat g̃ebum cĩcã oꞌe ip João ekawẽn kay.
\p — Ite du Deus emunaẽ soat taxijo am? — ioꞌe ip jewewebe.
\p
\v 16 G̃ebuje João oꞌjekawẽn soat pe.
\p — Õn ma eymubatisasan idibi be — ioꞌe. — Waraꞌacat pit omuyku. Obodi ma ixe yaꞌõbuyxi. Soat podi ma yaꞌõbaca. Õn pit ajo pẽg̃ap g̃u cebeam? Cedag̃ g̃u kuka oce ixe aꞌõbuywatwatꞌukan, obog̃ g̃u buye. Õn ma eymubatisasan idibi be. Ixe bit Deus biõg̃buk g̃uõm eywebe yaꞌõ dag̃ eyeku am. Ixe dak ipiat supiꞌajoat eywebe cũg̃ ma eyeku am. 
\v 17 Wuyju taixee xikxig̃ tũmũntata mujẽm ãm taixee bewi. Tũmũntata muxipanpan wuyju tamũnꞌa be. Taixee mupikpig̃ daxa be. Imẽnpuxim Deus kũyjobicayũ muwajejem kũyjobitꞌũmayũ xewi. Kũyjobicayũ ixe xe jeedop soat em. Kũyjobitꞌũmayũ bit soat em ipiat supiꞌajojo — ioꞌe João.
\p
\v 18 Imẽn adeayũ awẽwẽm oeku João. Kawẽn idipat muwẽnuwẽn oeku.
\p
\v 19-22 Adeayũ mubatisasan epere buje, João Jesus oꞌg̃ubatisan. 
\p G̃ebuje Jesus kay Ibiõg̃buk xipacat oꞌkop. Jesus Deus eju kawẽnwẽn pima, oꞌkop. Pukaso joꞌi oꞌkop Ibiõg̃buk xipacat.
\p G̃ebuje Deus oꞌjekawẽn kabi kadiwi.
\p — Ẽn okpocat — ioꞌe. — Ocokcok cĩcã ekay — Deus oꞌe Jesus pe.
\p G̃uyjom Herodes João oꞌg̃uõmat daomũnmũnapꞌa be. Ixe Herodes Galiléia eipi kukat osunuy. Kuy bima João oꞌe Herodes pe:
\p — Cedag̃ g̃u ewebe ekitpit tayxi bum etayxim- -Herodias bum — i. — Ẽn ikẽrẽat kug̃ — ioꞌe Herodes pe.
\m Herodes ikẽrẽat kukukꞌuk osunuy. Waram ikẽrẽat oꞌjukuk g̃asũ dak. João ikẽrẽat oꞌjukuk g̃u. Inaka Herodes João oꞌg̃uõmat daomũnmũnapꞌa be.
\p
\v 23 Jesus 30 koato bima ijodiacat mutaybitbin oꞌe. — Jesus José ipot — ioꞌeꞌe ip adeayũ. 
\v 24 José ebay butet Eli i osunuy. Eli ebay butet Matate i osunuy. Matate ebay butet Levi i osunuy. Levi ebay butet Melqui i osunuy. Melqui ebay butet Janai i osunuy. 
\v 25 Janai ebay butet José i osunuy. José ebay butet Matatias i osunuy. Matatias ebay butet Amós i osunuy. Amós ebay butet Naum i osunuy. Naum ebay butet Esli i osunuy. Esli ebay butet Nagai i osunuy. Nagai ebay butet Maate i osunuy. 
\v 26 Maate ebay butet Matatias i osunuy. Matatias ebay butet Semei i osunuy. Semei ebay butet José i osunuy. José ebay butet Joda i osunuy. 
\v 27 Joda ebay butet Joanã i osunuy. Joanã ebay butet Resa i osunuy. Resa ebay butet Zorobabel i osunuy. Zorobabel ebay butet Salatiel i osunuy. Salatiel ebay butet Neri i osunuy. Neri ebay butet Melqui i osunuy. 
\v 28 Melqui ebay butet Adi i osunuy. Adi ebay butet Cosã i osunuy. Cosã ebay butet Elmadão i osunuy. Elmãdão ebay butet Er i osunuy. 
\v 29 Er ebay butet Josué i osunuy. Josué ebay butet Eliézer i osunuy. Eliézer ebay butet Jorim i osunuy. Jorim ebay butet Matate i osunuy. Matate ebay butet Levi i osunuy. 
\v 30 Levi ebay butet Simeão i osunuy. Simeaão ebay butet Judá i osunuy. Judá ebay butet José i osunuy. José ebay butet Jonã i osunuy. Jonã ebay butet Eliaquim i osunuy. 
\v 31 Eliaquim ebay butet Meleá i osunuy. Meleá ebay butet Mená i osunuy. Mená ebay butet Matata i osunuy. Matata ebay butet Natã i osunuy. 
\v 32 Natã ebay butet Davi i osunuy. Davi ebay butet Jessé i osunuy. Jessé ebay butet Obede i osunuy. Obede ebay butet Boaz i osunuy. Boaz ebay butet Salá i osunuy. Salá ebay butet Nasson i osunuy. Nasson ebay butet Aminadabe i osunuy. 
\v 33 Aminadabe ebay butet Admim i osunuy. Admim ebay butet Arni i osunuy. Arni ebay butet Esrom i osunuy. Esrom ebay butet Peres i osunuy. Peres ebay butet Judá i osunuy. 
\v 34 Judá ebay butet Jacó i osunuy. Jacó ebay butet Isaque i osunuy. Isaque ebay butet Abraão i osunuy. Abraão ebay butet Tera i osunuy. 
\v 35 Tera ebay butet Nacor i osunuy. Nacor ebay butet Seruque i osunuy. Seruque ebay butet Ragaú i osunuy. Ragaú ebay butet Faleque i osunuy. Faleque ebay butet Éber i osunuy. Éber ebay butet Sala i osunuy. 
\v 36 Sala ebay butet Cainã i osunuy. Cainã ebay butet Arfaxade i osunuy. Arfaxade ebay butet Sem i osunuy. Sem ebay butet Noé i osunuy. Noé ebay butet Lameque i osunuy. 
\v 37 Lameque ebay butet Matusalém i osunuy. Matusalém ebay butet Enoque i osunuy. Enoque ebay butet Jarete i osunuy. Jarete ebay butet Maleleel i osunuy. Maleleel ebay butet Cainã i osunuy. Cainã ebay butet Enos i osunuy. 
\v 38 Enos ebay butet Sete i osunuy. Sete ebay butet Adão i osunuy. Adão Deus ipot osunuy, Deus oꞌg̃ug̃ẽ buye.
\b
\c 4
\p
\v 1 Jordãodi bewi Jesus epit puje, Ibiõg̃buk xipacat oꞌtujowat ukꞌaꞌũmat pe. Jesus ag̃uydadaꞌuk osunuy Ibiõg̃buk xipacat. 
\v 2 Ukꞌaꞌũmat tag̃ oeku 40 kabia. Jesus Ibiõg̃buk xipacat aꞌõbacaap kug̃ osunuy. Ibiõg̃buk kẽrẽayũ kukukat tak Jesus oꞌsubuyxijo iboce. Teꞌe ma ikẽrẽat mujurũg̃at ojuy Jesus pe iboce. 40 kabia Jesus jekõnkõn g̃u osunuy. Ire jĩjã osunuy.
\p
\v 3 G̃ebuje ibiõg̃buk kẽrẽayũ kukukat oꞌjekawẽn Jesus eju.
\p — Ẽn Deus ipot pima, aꞌõbi ma witaꞌa juy eyamuwexat pãoꞌam — ioꞌe Jesus pe.
\p
\v 4 — Ap! — ioꞌe Jesus. — Imẽn eꞌem Deus ekawẽntup: “Wuyetabẽg̃ wuyxat oꞌom puye g̃u- -Deus wuymutaicin puye acã,” i — ioꞌe.
\p
\v 5 Ibocewi ibiõg̃buk kẽrẽayũ kukukat Jesus oꞌtujowat umat pe. Soat eipi oꞌg̃ubapuk cebe. Dao ma soat eipi dag̃acat oꞌg̃ubapuk cebe. Soat ip oꞌjojojo.
\p
\v 6 — Õn cuy emuy soat eipi watwat kukukan — ioꞌe. — Waꞌõbi soat eipi watwat kukukan ecesũy — ioꞌe. — “Ẽn acã ocekukukat,” i jeꞌe ip ewebe — ioꞌe. — Ibubut adeayũ kukukan ecesũy waꞌõbi — ioꞌe. — Soat ma iũm put owebe omunaẽ be, soat podi ma õn waꞌõbaca buye — ioꞌe napa ma. 
\v 7 — “Ẽn xipat,” i ẽn eꞌem owebe bima, soat og̃ũm ewebe — ioꞌe. — Aꞌõbuyxian ecesũy waꞌõbi — ioꞌe Satanás Jesus pe.
\p
\v 8 — Ap! — ioꞌe Jesus. — Imẽn eꞌem Deus ekawẽntup: “ ‘Xipat ẽn,’ i juy epeꞌe Deus pe acã,” i. “Deus aꞌõ kay acã epesop kũyjobin- -eykukukat aꞌõ kay,” i — Jesus oꞌe Satanás pe.
\p
\v 9 Ibocewi oꞌtujowat Jerusalém ka be. Oꞌjomõg̃ Deus eju kawẽnwẽnapꞌabi jeje- -yabog̃atꞌabi jeje.
\p — Ẽn Deus ipot pima, ecewemuyꞌat ijopꞌabi jejewi ipi ju — ioꞌe Satanás. 
\v 10 — Imẽn eꞌem Deus ekawẽntup: “Deus jekawẽn tojotjotꞌukayũ g̃uju xipan ekuk am,” i. “Ixeyũ jedaxijo ewebe xipatꞌũmat ebapukap puxim,” i. 
\v 11 “Ixeyũ jeak ekay witaꞌa be eimucakcakap puxim,” i — ioꞌe Satanás.
\p
\v 12 — Ap! — ioꞌe Jesus. — “Cẽm paxi Deus jaꞌõ dag̃ eꞌem?” iꞌũmg̃u juy epeꞌe — ioꞌe Jesus.
\p
\v 13 G̃ebuje ibiõg̃buk kẽrẽayũ kukukat oꞌjewede Jesus xewi. Oꞌjẽm cexewi Jesus puyxijojoap epere buje. Teꞌe ma Jesus pe ikẽrẽat mujurũg̃at ojuy. Oꞌjẽm.
\p — Waram g̃uto osubuyxijo jĩjã — ioꞌe jewebe ma ibiõg̃buk kẽrẽayũ kukukat- -Satanás.
\p
\v 14 Jesus oꞌjepit Galiléia eipi kay. Ibiõg̃buk xipacat aꞌõbacaap kug̃ oeku. Soat ibo eipi watwat yajẽmap awẽg̃ oꞌyawẽg̃tobuxik.
\p
\v 15 G̃ebuje Jesus kawẽn idipan ip oꞌg̃utaybitbin Deus eju kawẽnwẽnapꞌa be. 
\p — Soat podi ma Jesus xipan wuymutaybitbin — ioꞌe ip yaꞌĩjojoayũ. — Kaꞌũmg̃u ixe joꞌiat xipacat — ioꞌe ip.
\p
\v 16 Jesus oꞌju jaypanap ka kay- -Nazaré ka kay. Jay. Oajẽm. Jebodoydoyap kabia bima Judeuyũ õmõmꞌuk ip osodop Deus eju kawẽnwẽnapꞌa be. Sábado bima ip õmõmꞌuk osodop. Jesus oõm jeweju ip ig̃oꞌa be. Oꞌãy Deus ekawẽntup com ig̃oꞌa beacat pe yaꞌĩjo am.
\p
\v 17 G̃ebuje ig̃oꞌa kukukat Deus ekawẽntup oꞌtupũm Jesus pe- -Isaías emudupmubararaktup- -Deus ekawẽn muwẽnuwẽnꞌukat emudupmubararaktup. Jesus oꞌtupmupaya. Pũg̃tup oꞌtuptobuxik. Imẽn eꞌem itedup:
\q
\v 18 Deus biõg̃buk owebe nuynuy, i. Imẽnpuye ixe onaẽ owebe kawẽn idipat muwẽn ãm tadaybotbocayũ be, i. Ixe omuju owebe: “Taomũnmũnayũ daomũnmũnapꞌa bewi g̃ujẽm ip” iꞌe am taomũnmũnayũ be, i. Ixe omuju owebe: “Itaꞌũmayũ itate jeꞌe ip” iꞌe am itaꞌũmayũ be, i. 
\v 19 Ixe omuju owebe tadaybotbocayũ mujẽm ãm imudadaybotbotꞌukayũ xewi, i. Ixe omuju owebe: “G̃axĩn ma Deus jebekitkit idaxijo” iꞌe am soat pe, i.
\m
\v 20 Imẽn eꞌem itedup. Jesus ibodup oꞌtupcoco yaꞌõberen. Otupmupirik. Waram oꞌtupũm yakukukat puywatwatꞌukat pe. Oabik.
\p Soat ig̃oꞌa beacat oꞌjeak cĩcã Jesus kay.
\p — Apẽntak teku? — ioꞌe ip jewewebe.
\p
\v 21 G̃ebuje Jesus oꞌjekawẽn ceweju ip.
\p — G̃asũ bit soan oꞌjebapuk ijudup peat ekawẽn tag̃- -g̃asũ otupcocoiatup ekawẽn tag̃ — ioꞌe.
\p
\v 22 Soat xe Jesus xipat cĩcã osunuy ig̃oꞌa beacat xe.
\p — Jesus ekawẽn soat podi ma cekawẽntip! — ioꞌe ip jewewebe. — Teku José ipot g̃u du? — ioꞌe ip jewewebe.
\p
\v 23 Jesus oꞌjekawẽn ceweju ip.
\p — “Tapu, ecewanũg̃ta juy,” i wuyju eꞌem wuyanũg̃tataꞌukat pe — ioꞌe. — Iboap kuka epeꞌe owebe dak. “Ocejojojo g̃u bukiap cuy eg̃ubapuk ocewebe ijo am apẽn cuk adi eg̃ubapukpuk Cafarnaum ka be bima,” i acoꞌi eyju eꞌem owebe — Jesus oꞌe. 
\v 24 — Icẽmãn õn eꞌem eywebe. Deus ekawẽn muwẽnuwẽnꞌukat jaypanap ka be bima, ibo ka watwat ixe ekawẽn kay g̃u — ioꞌe. 
\v 25 — Icẽmãn õn eꞌem eywebe. Kuyje Deus Elias oꞌg̃uju pũg̃ kay itop eꞌũꞌibit kay- -Sarepta ka beat kay- -Judeuꞌũmat kay- -Sidom eipi beat kay. Ixeyũ kabia dag̃ soat kaka beayũ irere oekuku. Kaꞌũmg̃u mubaꞌat osodop ebapũg̃ koato, ipidaseat koato dak. Soat ip irere jĩjã osodop. Imẽnpuye ade itop eꞌũꞌibiyũ tadaibotbot cĩcã osodop ixeyũ kabia dag̃- -Judeuyũ. 
\v 26-27 Imẽnpit Deus Elias oꞌg̃uju Judeuyũ kay g̃u- -Sarepta ka beacat kay acã- -Sidom ka tẽg̃atka beacat kay acã — Jesus oꞌe. — Deus Eliseu oꞌg̃uju Naamã kay imuꞌada am. Eliseu Deus ekawẽn muwẽnuwẽnꞌukat osunuy. Naamã ierepat osunuy. Ade ierepayũ Judeuyũ eipi dag̃ osodop ip ixeyũ kabia dag̃. Imẽnpit Eliseu wararaꞌacat g̃u oꞌg̃uꞌada. Naamã acã oꞌg̃uꞌada — Jesus oꞌe.
\p
\v 28-29 Iboap ekawẽn co buje oitakomãn cĩcã ip Jesus kay Deus eju kawẽnwẽnapꞌa beayũ. Jesus oꞌtujujẽm ip jeka bewi.
\p Jesus oꞌtujuu ip coꞌa bicũg̃ kay yaoka am. Ag̃oka iboꞌa pẽnpẽn tag̃ oꞌsukadop. Coꞌa bicũg̃ pewi yabitorom Jesus muyꞌat ojuy ip. 
\v 30 Imẽnpit Jesus oꞌkap cepidase ip. Jeju pinap tag̃ oꞌju.
\p
\v 31 Jesus oꞌju Cafarnaum ka kay- -Galiléia eipi beat ka kay, ikabog̃atka kay. Judeuyũ oꞌg̃utaybitbin Deus eju kawẽnwẽnapꞌa be jebodoydoyap kabia be. Soat esemana imutaybitbinꞌuk ip osunuy.
\p
\v 32 — Cũg̃ cĩcã ma Jesus wuymutaybitbin — ioꞌe ip. — Jesus jaꞌõbi ma wuymutaybitbin — ioꞌe ip. 
\p
\v 33 G̃ebuje ag̃okatkat oꞌjewãwã ig̃oꞌa beat- -ibiõg̃buk kẽrẽat kukat. Oꞌjewãwã yaꞌõberen ibiõg̃buk kẽrẽat cebe buye.
\p
\v 34 — Jesus, apẽn ẽn em ocewebe? — ioꞌe Jesus pe- -Nazaré ka bewiat pe. — Ocemuyꞌũ ãm tu ejot? — ioꞌe. — Wetaybit ẽn — ioꞌe. — Ẽn Deus ipot- -ikẽrẽat kug̃ꞌũmat ipot — ioꞌe.
\p
\v 35 G̃ebuje Jesus ibiõg̃buk kẽrẽat oꞌg̃ukorẽm.
\p — Ecemũg̃ — ioꞌe Jesus cebe. — Ejẽm cuy ag̃okatkat pewi — ioꞌe ibiõg̃buk kẽrẽat pe.
\p Ag̃okatkat pewi oꞌjẽm ipi ju imuyꞌatꞌan pima. Imẽnpit warẽmtag̃ g̃u ag̃okatkat oꞌjukuk cẽmcẽm pima. 
\v 36 Imẽnpuye itabẽg̃bẽg̃ oꞌe ip ijojom- -ibiõg̃buk kẽrẽat oꞌg̃ujẽm iap cocomayũ.
\p — Jesus ibiõg̃buk kẽrẽat mujẽmjẽm jaꞌõbi — ioꞌe ip. — Yaꞌõbacaat teku — ioꞌe ip jewewebe. — Itaybit ibiõg̃buk kẽrẽat mujẽm ãm — ioꞌe. — Imẽnpuye cẽmcẽm ip yaꞌõbi — ioꞌe ip.
\p
\v 37 Soat ka dag̃ Jesus awẽg̃ oꞌyawẽg̃cu- -Galiléia eipi korerenat ka dag̃.
\p
\v 38 Ibocewi Jesus oꞌjẽm Deus eju kawẽnwẽnapꞌa bewi.
\p Oꞌju Simão Pedro dukꞌa kay. Oajẽm. Cereg̃. Oõm. Simão daxijo osodop iboꞌa be. Ipaꞌi jĩjã osodop.
\p — Ipaꞌiat eg̃uꞌada — ioꞌe ip Jesus pe.
\p
\v 39 G̃ebuje Jesus oꞌju ipaꞌiat kay. Paꞌi oꞌg̃ukorẽm.
\p — Ejẽm cebewi — Jesus oꞌe paꞌi be.
\p Imẽnpuye paꞌi oꞌjẽm. Xipat oꞌe. Ipaꞌi topibit oꞌkop g̃ebuje bit. Ixat oꞌg̃ug̃ẽ Jesus peam, cewejuayũ beam tak.
\p
\v 40 Kaxi at puje ibo ka watwat iwãtaxipipiayũ oꞌtujowat Jesus kay imuꞌada am. Soat kug̃ ip osodop iwãtaxipi. Jesus oꞌjewebumõg̃ cebe ip- -soat pe. Soat ip oꞌg̃uꞌadaꞌada. Adah. 
\v 41 Ibiõg̃buk kẽrẽat oꞌg̃ujẽmjẽm ikukayũ bewi. Poxerewun. Oꞌjẽm.
\p — Ẽn Deus ipot — ioꞌe ip yaꞌõberen- -ibiõg̃buk kẽrẽayũ oꞌe.
Itaybit ip osodop Jesus Deus emunaẽ iam. Inaka Jesus ibuꞌu osunuy ixeyũ be iboap muwẽn ãm.
\p — Õn Deus emunaẽ iap epeg̃uwẽn g̃u juy — ioꞌe cebe ip. 
\p
\v 42 Kabiaꞌisum Jesus oꞌjẽm Simão Pedro dukꞌa bewi. Poxerewun. Oꞌju ukꞌaꞌũmat pe. Jay. Oajẽm. Adeayũ Jesus kudadam oꞌe ip. Jay. Oajẽm ip Jesus kay.
\p — Ejẽm g̃u juy ocexewi. Ijoce ma juy eg̃ũy — ioꞌe ip Jesus pe.
\p G̃ebuje oꞌjekawẽn ceweju ip.
\p
\v 43 — Wararaꞌacayũ be dak kawẽn idipat og̃uwẽn- -waraꞌatka watwat pe dak — ioꞌe. — “Deus soat kukukan jeꞌe,” i juy oce cebe ip — ioꞌe. — Deus cuk omudot ibo ekawẽn muwẽn ãm — ioꞌe Jesus.
\p
\v 44 Imẽnpuye kawẽn idipat muwẽnuwẽn oeku Deus eju kawẽnwẽnapꞌa be. Judéia eipi dag̃ imuwẽnuwẽn oeku- -soat kaka dag̃.
\b
\c 5
\p
\v 1 Adeayũ oꞌjewemuwunuwun ip Jesus ekawẽn co pin cĩcã buye. Jesus cũg̃ꞌi osunuy iodi wãbu kaꞌoririt pe. Iodi Genesaré eipi be oꞌtinuy. Genesaré i tibutet osunuy. Adeayũ jewemuwunuwun ip Deus ekawẽn co pinayũ.
\p
\v 2 G̃ebuje Jesus xepxep kobe oꞌjojojo kapurũg̃ pe. Axima bubuꞌukayũ jekobe be g̃u ip osodop. Kuy oꞌjẽm ip. Axima bubuap wuywuy ip osodop kapurũg̃ pe. 
\v 3 Jesus oõm pũg̃ pe ixeyũ ekobe be- -Simão ekobe be.
\p — Kobe eg̃uwun — ioꞌe. — Eg̃uwun cuy kapurũg̃ pewi — ioꞌe Jesus Simão be.
\p Xik. Jesus oabik kobe be. Kobe be bima adeayũ oꞌg̃utaybin- -kapurũg̃ peayũ oꞌg̃utaybin.
\p
\v 4 Imutaybin puꞌu bima, oꞌjekawẽn Simão eju- -kobe iwat eju.
\p — Tibucũg̃ pe aju axima bum — ioꞌe.
\m Tibucũg̃ pe ip oꞌju.
\p — Axima bubuap cuy eg̃uakõm tibucũg̃ pe axima bu am — ioꞌe Simão be.
\p
\v 5 — Kariwa, ixima bun oceku axima bu ojuy — ioꞌe Simão. — Ocejat g̃u. Imẽnpit waram oceg̃uakõm imẽn ẽn eꞌem ocewebe buye — ioꞌe.
\m Sa. Axima bubuap oꞌg̃uakõm.
\p
\v 6 G̃ebuje axima oꞌjat ade. Xeresu g̃u axima. Kurekoh. Axima bubuap jewek ojuy axima poxi pibun. 
\v 7 Wẽg̃wẽg̃ꞌi oꞌe ip jebureyũ kay- -waraꞌat kobe beacayũ kay. Jebureyũ oꞌtakoy yajẽm ãm jebuywat am. Ibureyũ oajẽm ibuywat am. Xepxep kobe oꞌg̃uporan ip aximãm. Imẽnpuye kobe jepirig̃ ojuy axima poxi pibun.
\p
\v 8 Iboap co buje, Simão Pedro oꞌjẽg̃ꞌaecõg̃cõg̃ Jesus wap jexe yaꞌõbuyxi buye.
\p — Okukukat, wede ece oxewi — ioꞌe. — Õn ma ikẽrẽat kug̃. Ẽn pit aꞌõbuyxi. Oxe g̃u juy eg̃uy — ioꞌe- -Simão oꞌe.
\p
\v 9 Simão itabẽg̃ oꞌe ijojom, soat cewejuayũ dak. Itabẽg̃bẽg̃ ip oꞌe ijojom ade jĩjã axima buye. 
\v 10 Wararaꞌacayũ dak itabẽg̃bẽg̃ ip oꞌe ijojom- -Tiago, João dak. Ixeyũ xepxepayũ Zebedeu ipotpoyũ ip osodop. Simão eju kapikpikꞌuk ip osodop axima bubum.
\p G̃ebuje Jesus oꞌjekawẽn Simão eju.
\p — Aꞌõꞌcam cuy eg̃uy — ioꞌe Simão be. — G̃asũ bit axima bubuꞌukan g̃u juy eg̃uy, — ioꞌe. — Kawẽn idipat muwẽnuwẽnꞌukan cuy eg̃uy adeayũ be imutabut am ip Deus kay — ioꞌe.
\p — Haꞌa — ioꞌe.
\p
\v 11 G̃ebuje Simão oꞌju Jesus kay, cewejuayũ dak. Putweduꞌi. Jekobe oꞌtujuu ip kapurũg̃ pe. Soat oꞌsuiwat ip ibun Jesus eju jeku am. Soat em Jesus eju oekuku ip.
\p
\v 12 Ikabog̃atka be bima ag̃okatkat oajẽm Jesus kay- -ierepat. Oꞌjẽg̃ꞌaecõg̃cõg̃ cewap jexe yaꞌõbuyxi buye.
\p — Kariwa! — ioꞌe Jesus pe. — Ebuꞌuꞌũm pima, omuꞌadam ece — ierepat oꞌe.
\p
\v 13 Pucũg̃. Jesus oꞌjebaepucũg̃ cekay.
\p — Obuꞌu g̃u emuꞌadam — ioꞌe. — G̃axĩn ma õn jemuꞌada — ioꞌe.
\p Jesus aꞌõbi ierep topibit dao ma oꞌjeꞌada. Xipat oꞌe.
\p
\v 14 — Emuꞌadaap eg̃uwẽn g̃u juy wararaꞌacayũ be — ioꞌe Jesus cebe. — G̃asũ bit paĩ kay juy eju — ioꞌe. — Eõhõyũꞌin cuy eg̃ũm paĩ be imupik am Deus etabixe eceꞌada buye. Eg̃ũm cuy cebe Moisés ekawẽn tag̃. Eõhõyũꞌin cuy eg̃ũm cebe eꞌadaap mubapuk am soat ka watwat pe — ioꞌe.
\p
\v 15 Imẽnpit soat ka watwat Jesus awẽg̃ oꞌyawẽg̃tobuxik ip- -ierepat oꞌg̃uꞌada iap awẽg̃. Imẽnpuye adeayũ oꞌjeꞌawero ip ixe ekawẽn co am. Oꞌjeꞌawero ip Jesus pe jewemuꞌada am tak. 
\v 16 Jesus pit oꞌjẽm cexewi ip. Poxerwun. Cexewi ip cẽmcẽmꞌuk osunuy jekawẽn ãm Deus eju. Ukꞌaꞌũmat pe kawẽnwẽnꞌuk osunuy Deus eju.
\p
\v 17 G̃ebuje Jesus adeayũ oꞌg̃utaybitbin kawẽn idipan. Fariseuyũ kaxikxikꞌi osodop iboce, Moisés ekawẽn imutaybitbinꞌukayũ dak. Judeuyũ osodop ip. Jesus ekawẽn co ojuy osodop ip. Oajẽm ip soat kaka dag̃wi- -Galiléia eipi dag̃wi, Judéia eipi dag̃wi dak, Jerusalém ka bewi dak. Jesus iwãtaxipipiayũ muꞌadaꞌadam osunuy Deus aꞌõbacaap kug̃ puye.
\p
\v 18 G̃ebuje ag̃okatkayũ oajẽm Jesus kay. Cexĩg̃xĩg̃ paꞌoreat oꞌtujuajẽm ip Jesus kay. Jay. Ukꞌa be tujuõm ojuy ip cexĩg̃xĩg̃ paꞌoreat mõg̃ ãm Jesus wap. 
\v 19 Imẽnpit tujuõm paꞌore ip oꞌe ukꞌa yapora buye. Imẽnpuye oꞌjeu ip ukꞌa abi jeje. Weru. Kawiꞌaꞌa oꞌyaꞌuk ip. Cabobum cexĩg̃xĩg̃ paꞌoreat oꞌg̃ukop ip yabitokat tag̃wi. Kop. Oꞌg̃ukop ip ixexecaptup pe. Oꞌg̃ukop ip Jesus wap imuꞌada am. Ukꞌa beayũ parakpe oꞌg̃ukop ip. 
\v 20 Jesus itaybit oꞌe teyũku itabut okay iam.
\p G̃ebuje Jesus oꞌjekawẽn cexĩg̃xĩg̃ paꞌoreat pe.
\p — Tapu — ioꞌe. — Ikẽrẽat kuy ojuꞌuk ewebewi — ioꞌe.
\p
\v 21 Moisés ekawẽn imutaybitbinꞌukayũ, Fariseuyũ dak jewag̃uydadam oꞌe ip Jesus ekawẽn kay.
\p — Ite be ikẽrẽatꞌuk paꞌore wuywebewi. Deus pe acã iꞌuk put — ioꞌe ip jewewebe. — Teku Deus muymuy — ioꞌe ip napa ma.
\p
\v 22 Jesus itaybit oꞌe apẽn ip oꞌe jewag̃uydadam iam.
\p
\v 23 — Apẽnpuye dak eyju imẽn jewag̃uydadam? — ioꞌe. — Ibaꞌore g̃u owebe “Ikẽrẽat kuy ojuꞌuk ewebewi” iꞌe am cebe — ioꞌe. — Ibaꞌore g̃u dak owebe “Eꞌãy” iꞌe am cebe, “Eceꞌada,” i dak — ioꞌe. — Kaꞌũma ma ibaꞌore owebe — ioꞌe. 
\v 24 — Soat wag̃o õn. G̃asũ cexĩg̃xĩg̃ paꞌoreat eju ocekawẽn eymutaybit am owebe ikẽrẽatꞌuk put ijodiat pewi iam. Deus aꞌõbacaap kug̃ õn ijodi bima dak — ioꞌe cebe ip.
\p — Eꞌãy! Ecexĩg̃xĩg̃ cuy — Jesus oꞌe cexĩg̃xĩg̃ paꞌoreat pe. — Cũg̃cũg̃ cuy eju — ioꞌe. — Exexecaptup cuy etupu — ioꞌe. — Eju juy edukꞌa be — ioꞌe cebe.
\p
\v 25 Cexĩg̃xĩg̃ paꞌore topibit oꞌjeꞌada. Oꞌãy. Cũg̃cũg̃ ma oꞌe adeayũ etabutpe. Jexexecaptup oꞌtupu. Kuruk. “Kaꞌũmg̃u ejoꞌiat xipacat,” iꞌeꞌem Deus pe bima, oꞌju jedukꞌa be. 
\v 26 Imẽneju ibo ka watwat itabẽg̃bẽg̃ ip oꞌe ijojom, oꞌjexĩg̃xĩg̃ puye.
\p — Oꞌjeꞌada xeku — ioꞌe ip. — Xĩg̃xĩg̃ oꞌe xeku — ioꞌe ip.
\m Yag̃uybabiꞌũm ip oꞌe.
\p — Kaꞌũma buk cexĩg̃xĩg̃ paꞌoreat oꞌg̃uꞌada wuyetabutpe — ioꞌe ip jewewebe. — G̃asũ acã cexĩg̃xĩg̃ paꞌoreat muꞌadaap ajojojo — ioꞌe ip jewewebe.
\p
\v 27 G̃ebuje Jesus oꞌjẽm. Porewuh. Cucum pima Levi oꞌjojojo. Levi dinheiro bubuꞌuk osunuy iecug̃ap peam. Ixe Levi kapikpig̃ osunuy iecug̃ap pe teidadaapꞌa be.
\p — Ejot cuy okay — ioꞌe Jesus. — Oweju juy ejeku — ioꞌe.
\m
\v 28 Imẽnpuye oꞌju Jesus kay. Soat oꞌsuiwat ibun Jesus eju jeku am.
\p
\v 29 G̃ebuje Levi Jesus oꞌtakoy jekõn ãm jeweju. Oꞌju. Oajẽm. Jay. Adeayũ awerom osodop Levi dukta be- -iecug̃ap peam dinheiro bubuꞌukayũ, wararaꞌacayũ dak. Jesus oꞌjekõn ceweju ip.
\p
\v 30 G̃ebuje Fariseuyũ Jesus oꞌjomuymuy Moisés ekawẽn imutaybitbinꞌukayũ dak- -Fariseuyũ ebekitkit.
\p — Apẽnpuye dinheiro bubuꞌukayũ eju eyju jekõnkõn, ikẽrẽat mujurũg̃rũg̃ꞌukayũ eju dak? — ioꞌe ip Jesus eju etaybitbinayũ be.
\p
\v 31 Jesus oꞌjekawẽn ceweju ip.
\p — Iwãtaxipiꞌumat g̃u cucum wuyanũg̃tataꞌukat kay- -iwãtaxipiat acã — ioꞌe. 
\v 32 — Imẽnpuxim cũg̃ ma jekukuꞌukayũ nomuwã ãm g̃u ojot- -ikẽrẽat mujurũg̃rũg̃ꞌukayũ nomuwã ãm acã — ioꞌe. — Ojot “Eyg̃uycũg̃cũg̃ cuy epesop ikẽrẽat kug̃ puye” iꞌe am cebe — ioꞌe Jesus. — “Ikẽrẽat mujurũg̃rũg̃ap cuy epeyepere” iꞌe am tak ojot — ioꞌe Jesus.
\p
\v 33 — João eju etaybitbinayũ soat em jekpiwan ma jewemureren xipat jeꞌe am Deus xe — ioꞌe ip Jesus pe. — Deus eju kawẽnwẽn tak ip soat em — ioꞌe ip cebe. — Fariseuyũ eju etaybitbinayũ dak ade em ip jekpiwan ma jewemureren jekawẽn ãm Deus eju — ioꞌe ip. — Eweju etaybitbinayũ bit repiꞌajojom g̃u. Jekõnkõn ip — ioꞌe ip. — Apẽnpuye ip repiꞌajojom g̃u? — ioꞌe ip. 
Jesus muymuy ojuy osodop ip.
\p
\v 34 — Ibaꞌore oweju etaybitbinayũ be jekpiwan ma repiꞌajo am õn ceweju ip puye — ioꞌe Jesus. — Õn iwadip puxim — ioꞌe. — Iwadip cexe ip pima, kaꞌũma ma jekpiwan ma repiꞌajojom jewebumũnap epeta be tomuwaꞌibiyũ. Jekõnkõn acã ip — ioꞌe Jesus. 
\v 35 — G̃uyjom pit iwadip jeꞌjẽm cexewi ip. Ijẽm puje bit, jekpiwan ma repi supiꞌajo ip — ioꞌe. — Õn ixeyũ xeꞌũm pima, oweju etaybitbinayũ dak jekpiwan ma repi ip supiꞌajo — ioꞌe Jesus.
\p
\v 36 G̃ebuje Jesus wuymutaybitbinap ekawẽn oꞌg̃uwẽn cebe ip. Imẽn oꞌg̃uwẽn.
\p — Iwuywuyꞌũmat g̃u ajoinũm iokokat muwaket am — ioꞌe. — Iwuywuyꞌũmat inũm pima, kuka oꞌjewek. Iwuywuyꞌũmat kuka oꞌjewaꞌi — ioꞌe. 
\v 37 — Uvaꞌabidi atimuõm yaokokatꞌa be g̃u timunꞌa be tiisuati- -yaisuatꞌa be acã — ioꞌe. — Yaokokatꞌa be timuõm puje, tidai eꞌem — ioꞌe. — Yaokokatꞌa timunꞌa kuka oꞌjeaebag̃. Uvaꞌabidi dak kuka oꞌjediepuy — ioꞌe. — Timũnꞌa dak kuka oꞌyaꞌũm — ioꞌe. 
\v 38 — Imẽnpit tiisuati atimõg̃ yaisuatꞌa be timũnꞌa be — Jesus oꞌe. 
\v 39 — Uvaꞌabidi kõn puje kuyati kõn puje, tiisuati kay g̃u aceꞌe — ioꞌe. — “Kuyati tiku eꞌem uvaꞌabidi,” i wuyju eꞌem — Jesus oꞌe. — Imẽnpuxim kuyjeat ekawẽn kay bima, wekawẽn kay g̃u kuka epeꞌe — ioꞌe.
\b
\c 6
\p
\v 1 Jebodoydoyap kabia be ceweju etaybitbinayũ trigodadot oꞌtadotꞌuk cucum pima ku dag̃ Jesus eju. 
\v 2 Oꞌtamukitikitik ip jebui be. Oꞌtaꞌoꞌo ip.
\p — Apẽnpuye eyju taꞌukꞌug̃? — ioꞌe Fariseuyũ cebe ip. — Kapikpi wuywebe jebodoydoyap kabia be — ioꞌe ip.
\p Tamukitikitikap kapikap osodop Fariseuyũ xe. Imẽnpuye Jesus oꞌjomuymuy ip.
\p
\v 3 — Apẽn cuk oꞌe Davi, ibureyũ dak, irere bima? — ioꞌe Jesus. — Iboap ekawẽntup epetupco g̃u du? — ioꞌe Jesus Fariseuyũ be. 
\v 4 Ixe Davi oõm Deus eju kawẽnwẽnapꞌa be. Pãoꞌa oꞌyabu- -Deus etabixe yamõg̃mõg̃ꞌibitꞌa. Oꞌyaꞌo. Oꞌyaũm jebureyũ be yaꞌopiatꞌa. Paĩyũ be acã yaꞌo pi g̃u oꞌyadop — ioꞌe. — Iboap ekawẽntup epetupco g̃u du? 
\v 5 Soat wag̃o õn — Jesus oꞌe Fariseuyũ be. — Õn pit eꞌem apẽn iꞌepi wuywebe jebodoydoyap kabia be iap, apẽn iꞌepi g̃u iap tak — ioꞌe Jesus.
\p
\v 6 G̃ebuje Jesus ibakẽrẽat oꞌtobuxik. Jebodoydoyap kabia be oꞌtobuxik. Oõm maꞌg̃uto Deus eju kawẽnwẽnapꞌa be. Iboꞌa be oꞌg̃utaybitbin. Iboꞌa be ag̃okatkat osunuy. Pũg̃pa ibakẽrẽ osunuy- -ibaatpa. 
\v 7 Jesus kay ag̃ cĩcã oꞌe ip Fariseuyũ, Moisés ekawẽn imutaybitbinꞌukayũ dak. 
\p — Jebodoydoyap kabia be dak paxi g̃uꞌada? — ioꞌe ip jewewebe.
\p Fariseuyũ “Jesus Moisés ekawẽn tag̃ g̃u jekukum” iꞌe ojuy napa ma.
\p
\v 8 — Omuymuy pin teyũku — ioꞌe Jesus pit jewebe ma.
\p G̃ebuje Jesus oꞌjekawẽn ibakẽrẽat pe.
\p — Eꞌãy — ioꞌe. — Ejot cuy ijoce soat pe ejo am — ioꞌe.
\m Ibakẽrẽat oꞌãy. Oꞌju iboꞌa beayũ wap.
\p
\v 9 G̃ebuje Jesus oꞌjekawẽn Fariseuyũ eju, Moisés ekawẽn imutaybitbinꞌukayũ eju dak.
\p — Jebodoydoyap kabia be Moisés ekawẽn tag̃ tu wuywebe xipan iꞌe am? Ikẽrẽan iꞌe am g̃u xeꞌe? — ioꞌe. — Wararaꞌacat taxijo am cekawẽn tag̃ tu? Wararaꞌacat aoka am g̃u xeꞌe? — ioꞌe.
\p
\v 10 G̃ebuje Jesus oꞌjeak soat kay.
\p — Pacũg̃ ece eba — Jesus oꞌe ibakẽrẽat pe.
\p Oꞌjepacũg̃. Ibadip oꞌe. 
\v 11 Imẽnpuye Fariseuyũ itakoma jĩjã ip oꞌe Jesus kay, Moisés ekawẽn imutaybitbinꞌukayũ dak, jebodoydoyap kabia bima oꞌsubamudim puye. Oꞌjeꞌawero ip. Oꞌjewawẽwẽ ip pẽn paxi aceꞌe Jesus pe iꞌe am.
\p
\v 12 G̃uyjom Jesus oꞌju coꞌa be jekawẽn ãm Deus eju. Ixima bun oꞌjekawẽn ceweju.
\p
\v 13 G̃ebuje 12 beayũ oꞌtaẽ jeweju etaybitbinayũm. Kabiaꞌisum ixeyũ oꞌtaẽ.
\p — Waꞌõbi epeju wekawẽn muwẽn ãm soat pe — ioꞌe ixeyũ be- -12 beayũ be.
\p
\v 14-16 Ibũrũn ma ip ibutet osodop: Simão i, André i, Tiago i, João i, Filipe i, Bartolomeu i, Mateus i, Tomé i, waraꞌat Tiago i, waraꞌat Simão i, Judas i, waraꞌat Judas i. Ibũrũn ma ip ibutet osodop. Ibũrũn ma oꞌtaẽ jeweju etaybitbinayũm. Tiago Alfeu ipot osunuy. Jesus Simão waraꞌan oꞌsubuteta. Pedro i waraꞌat ibutet osunuy. Xepxep putet osunuy Simão butet. Jeipi kay jĩjãat i dak ibutet osunuy. André Pedro kitpit osunuy. Judas Tiago ipot osunuy. Xepxep putet osunuy Judas putet. Iscariotes i dak ibutet osunuy. Ixe Judas g̃uyjom Jesus oꞌg̃ũm cekay itakomaayũ be yaoka am.
\p
\v 17 Ibocewi Jesus coꞌa dag̃wi oꞌkop jemunaẽyũ eju- -12 beayũ eju.
\p G̃ebuje adeayũ oajẽm Jesus kay. Wararaꞌacayũ kuy Jesus xe osodop ip- -ceweju etaybitbinayũ. Adeayũ kaweg̃ũnat pe oꞌjeꞌawero Jesus xe. Wũywi ip oajẽm. Judéia eipi dag̃wi oajẽm ip, Jerusalém ka bewi dak, Tiro ka bewi dak, Sidom ka bewi dak. 
\v 18 Oajẽm ip Jesus ekawẽn co am, jemuꞌada am tak. Ibiõg̃buk kẽrẽat kukayũ dak oajẽm cekay imujẽm ãm. Jesus ibiõg̃buk kẽrẽat oꞌg̃ujẽmujẽm ikukayũ bewi. Imẽnpuye Jesus mucay ojuy ip imuꞌada am. 
\v 19 Ixe be imuꞌada but osunuy Deus aꞌõbacaap kug̃ puye. Soat oꞌg̃uꞌadaꞌada iwãtaxipipiayũ.
\p
\v 20 Jesus oꞌjeak jeweju etaybitbinayũ kay. Oꞌjekawẽn cebe ip. Koap oꞌjekawẽn tadaybotbocayũ be.
\p Eycokcok cĩcã eyju — ioꞌe. — Eybubutbet g̃u g̃asũ. Imẽnpit Deus eykukukat — ioꞌe. 
\v 21 — Eycokcok cĩcã eyju. G̃asũ acã eyrere. G̃uyjom pit eybeg̃beg̃ epesop — Jesus oꞌe. — Eycokcok cĩcã eyju. G̃asũ acã eyju wa. G̃uyjom pit jewaywayway epesop. 
\v 22 Eycokcok cĩcã juy epesop wararaꞌacat itakoma eykay bima, eywebe “Oceweju g̃u juy epeku- -eyju soat wag̃o ebekitkit puye” iꞌe buje dak, wararaꞌacat eymuymuy bima dak, wararaꞌacat eyawẽg̃mukẽrẽrẽrẽn pima dak — ioꞌe. 
\v 23 — Eycokcog̃ cĩcã juy epesop wararaꞌacat warẽmtag̃ eykug̃ pima eyju webekitkit puye — ioꞌe. — “Eycokcog̃ cuy epesop,” i õn eꞌem eywebe — ioꞌe. — Kabi be ade kug̃ epesop idipat kug̃. Warẽmtag̃ ma Deus ekawẽn muwẽnuwẽnꞌukayũ kukukꞌuk osodop ip eydobuyũꞌũmꞌũm kuyje — Jesus oꞌe.
\p
\v 24 G̃ebuje Jesus oꞌjekawẽn ibubut adeayũ be.
\p — Karem g̃u eydadaybot epesop — ioꞌe. — G̃asũ eybubut ade — ioꞌe. — Kapikpig̃ꞌũm pima dak soat kug̃ eyju g̃asũ ma. 
\v 25 Karem g̃u eydadaybot epesop. G̃asũ acã eybeg̃beg̃. G̃uyjom pit eyrere epesop. Karem g̃u eydadaybot epesop. G̃asũ acã eyju jewaywayway. G̃uyjom pit wawa epeꞌe. Eyg̃uycũg̃cũg̃ epesop — ioꞌe. 
\v 26 — Karem g̃u eydadaybot epesop, wararaꞌacat xipan eymuwẽnuwẽn pima. Imẽnpuxim xipan jewexe Deus ekawẽn muwẽnuwẽnꞌukayũ kukukꞌuk ip osodop eydobuyũꞌũmꞌũm kuyje — Jesus oꞌe.
\p
\v 27 G̃ebuje soat pe oꞌjekawẽn.
\p — Õn kawẽnwẽn soat eju eyweju- -soat waꞌĩjojoayũ eju — ioꞌe. — “Eykay itakomaayũ burem cuy epesop,” i õn eꞌem eywebe — ioꞌe. — “Xipan cuy ixeyũ epejukuk,” i õn eꞌem — ioꞌe. 
\v 28 — “Xipan cuy omuymuyꞌukayũ ejukuk,” i juy epeꞌe Deus pe. Deus eju juy epeyekawẽn warẽmtag̃ eykukayũ beam — ioꞌe.
\p
\v 29 — Pũg̃ kadi wararaꞌacat pe eydopaoka buje, epeyaoka g̃u juy. Ãg̃ puk waraꞌat kadi jeydopaoka. Wararaꞌacat pe eyekabek pu buje, ãg̃ cuy eyekamixa dak juꞌuk. 
\v 30 Eyxewi iojuy buje, epeg̃ũm cuy soat pe. Wararaꞌacat pe darem eybubut pu buje, “Obubut cuy epetujupit okay,” iꞌũmg̃u juy epeꞌe cebe ip. 
\v 31 Eybikuy wararaꞌacat pe xipan eykuk am. Imẽnpuye xipan cuy wararaꞌacat epejukuk — ioꞌe.
\p
\v 32 — Eykayayũ acã ikukpin eyxe bima, “Deus cuy xipacat jeꞌg̃ũm ocewebe,” iꞌũmg̃u juy epeꞌe. Cekayayũ ikukpin ikẽrẽat mujurũg̃rũg̃ꞌukayũ xe dak. 
\v 33 Xipan eykayayũ kug̃ acã bima, “Deus cuy xipacat jeꞌg̃ũm ocewebe,” iꞌũmg̃u juy epeꞌe. Ikẽrẽat mujurũg̃rũg̃ꞌukayũ dak xipan jekayayũ kug̃ — ioꞌe.
\p
\v 34 — Eyju darem iũmũm wararaꞌacat pe waram tujupit okay iam eyetaybit puye. Imẽn iũmũm pima, “Deus cuy xipacat jeꞌg̃ũm ocewebe,” iꞌũmg̃u juy epeꞌe. Ikẽrẽat mujurũg̃rũg̃ꞌukayũ dak darem ma iũmũm waraꞌat ikẽrẽat mujurũg̃rũg̃ꞌukat pe dinheiro buap ojuy cexewi — ioꞌe. 
\v 35 — Ikẽrẽat mujurũg̃rũg̃ꞌukayũ ekukuap puxim g̃u juy epeku! — ioꞌe. — Warẽmtag̃ g̃u juy eykay itakomaayũ epejukuk. Xipan cuy ip epejukuk. Darem ma epeg̃ũm cebe ip ibubut puap ojuy g̃u. Imẽn eyeku buje, ade xipacat kug̃ epesop kabi be. Deus ebekitkiyũm epesop. Soat podi ma yaꞌõbacaat ebekitkiyũm epesop. “Ẽn xipat,” iꞌũmg̃u eꞌem adeayũ Deus pe. Deus pit soat em xipacat ũmũm cebe ip- -soat pe- -ikẽrẽat mujurũg̃rũg̃ꞌukayũ be dak. 
\v 36 Wuyebay itabotaidabotbot soat kay wuykay. Ixe buxim eyju dak eyetabotaidabotbon cuy epesop wararaꞌacat kay — ioꞌe.
\p
\v 37 — “Ekẽrẽ jĩjã Deus xe,” iꞌũmg̃u juy epeꞌe wararaꞌacat pe. Iboap eꞌemꞌũm pima, Deus tak “Eykẽrẽ oxe,” iꞌũmg̃u jeꞌe eywebe. “Ikẽrẽat kug̃ ẽn,” iꞌũmg̃u juy epeꞌe wararaꞌacat pe. Imẽn eꞌemꞌũm pima, Deus “Ikẽrẽat kug̃ eyju,” iꞌũmg̃u dak jeꞌe eywebe. G̃ebum g̃u juy epesop apẽn cuk adi wararaꞌacat warẽmtag̃ eykuk iap kay. G̃ebumꞌũm pima, Deus tak g̃ebum g̃u jeꞌe apẽn cuk adi warẽmtag̃ waraꞌacat epejukuk iap kay — ioꞌe.
\p
\v 38 — Wararaꞌacat pe epeg̃ũm pima, Deus tak jeꞌg̃ũm eywebe. Apẽn cuk epeg̃ũm iap puxim epejat. Yobog̃at epeg̃ũm pima, eyju dak yobog̃at epejat. Topapũn epejat- -iwajem, ibikbig̃ tak, kutukutuꞌi ma dak, cũg̃ꞌi ma dak. Apẽn wararaꞌacat pe eyju iũmap puxim Deus tak jeꞌg̃ũm eywebe — ioꞌe.
\p
\v 39 G̃ebuje Jesus wuymutaybitbinap ekawẽn oꞌg̃uwẽn cebe ip.
\p — Itaꞌũmat pe emubapuk paꞌore waraꞌat itaꞌũmat pe — ioꞌe. — Itaꞌũmat pe waraꞌat itaꞌũmat tujowat puje, xepxem ma kuka ip oꞌat ipikũykũy be. 
\v 40 Eyetaybitbin pima, eyemutaybitbinꞌukat podi g̃u eyetaybit. Eyewemutaybitan cĩcã bima bit, eyemutaybitbinꞌukat coꞌi eyetaybit epeꞌe — ioꞌe.
\p
\v 41 — Teꞌe ma eyju jeakag̃ eybure eta beatõmtõm kay, eyeta beapꞌip cocomꞌũm pima. 
\v 42 Teꞌe ma eyju eꞌem cebe: “Tapu, ma, otõmtõmꞌuk eta bewi,” i, eyeta beapꞌip cocomꞌũm pima. Eyju jewewemug̃uykukukum. Koam eyeta beapꞌip cuy epeyopꞌuk. Yopꞌuk puje, ibaꞌore g̃u jeꞌe eywebe tõmtõmꞌuk am eybure eta bewi — ioꞌe.
\p
\v 43 — Yoptipatꞌip pe yakẽrẽatꞌaꞌe g̃u- -yadipatꞌaꞌe acã. Imẽnpuxim yopkẽrẽatꞌip pe yadipatꞌaꞌe g̃u- -yakẽrẽatꞌaꞌe acã. 
\v 44 Yajo buje, wuyetaybit aceꞌe pubeatꞌip poro iam. Asãoꞌa bubum wuyju widaohoꞌip tag̃wi g̃u- -asãoꞌip tag̃wi acã. Bankaꞌa bubum wuyju arũꞌip tag̃wi g̃u- -bankaꞌip tag̃wi acã. 
\v 45 Imẽnpuxim xipacayũ ma xipacat mujurũg̃rũg̃. Xipatꞌũmayũ bit ikẽrẽat mujurũg̃rũg̃. Apẽn wuyju jewag̃uyg̃uy iap puxim wuyju kawẽnwẽn. Ikẽrẽat kay jewag̃uyg̃uy bima, ikẽrẽãn wuyju eꞌem. Idipat kay jewag̃uyg̃uy bima bit, xipacan wuyju eꞌem — ioꞌe.
\p
\v 46 — Eyju teꞌe ma eꞌem owebe “Ẽn ocekukat,” i, waꞌõ kay kũyjobitꞌũm pima — ioꞌe. 
\v 47 — Abu-buxim okay ajẽmjẽmayũ iap og̃uwẽn eywebe- -abu-buxim waꞌõ kayayũ iap tak, ajo-buxim waꞌõ dag̃ jekukuꞌukayũ iap tak. 
\v 48 Itaybicat puxim ip- -ag̃okatkat puxim. Ixe ag̃okatkat ukꞌa oꞌyamuy. Koap ipikũykũy oꞌsukũykot. Ikũyberen oꞌsukũykot. Witaꞌa oꞌyadobuxik badi. Ukꞌaꞌabiꞌip oꞌyopmuy ig̃okũy be badiatꞌa jeje- -witaꞌa jeje. Cem ukꞌa oꞌyamuy. Kabidoxixi oajẽm ig̃oꞌa kay, mubaꞌatxiri dak. Mubaꞌat idibi oꞌtimubog̃. Oꞌtiajẽm ig̃oꞌa kay. Imẽnpit oꞌyaꞌat g̃u yacem puye- -witaꞌa jeje buye. Waꞌõ kayayũ ixe ag̃okatkat puxim- -cem jedukꞌa oꞌyamuyꞌiat puxim — Jesus oꞌe.
\p
\v 49 — Waꞌõ dag̃ g̃u jekukuꞌukayũ bit warẽmtag̃ ukꞌa oꞌyamuyꞌiat puxim- -waꞌõ kayꞌũmayũ. Waꞌĩjojom ip. Inaka kũyjobit g̃u ip waꞌõ kay. Warẽmtag̃ ukꞌa oꞌyamuyꞌiat puxim ip- -ag̃okatkat puxim. Ixe ag̃okatkat ukꞌa oꞌyamuy ipi ju. Cem g̃u oꞌyamuy. Idibi oꞌtiajẽm ig̃oꞌa kay- -tibog̃ati. Dao ma oꞌyaꞌat. Oꞌyaꞌũm cĩcã. Waꞌõ dag̃ g̃u jekukuꞌukayũ ixe ag̃okatkat puxim- -waꞌõ kay kũyjobitꞌũmayũ. Cemꞌũma jedukꞌa oꞌyamuyꞌiat puxim ip — Jesus oꞌe.
\b
\c 7
\p
\v 1 Adeayũ be jekawẽn epere buje, Jesus oꞌju Cafarnaum ka kay. Oajẽm. Sorarayũ kukat ibo ka be osunuy. 
\v 2 Ixe ibuywatwatꞌukat iwãtaxipi oꞌe- -kariwa xe ikukpinat. Oeꞌũ pin ibuywatwatꞌuikat.
\p
\v 3 G̃ebuje sorarayũ kukat pũg̃pũg̃ Judeuyũ kukukayũ oꞌg̃uju Jesus kay. Oꞌg̃uju ip Jesus Cafarnaum ka be iam oꞌjekũyjo buye.
\p — “Ejot cuy obuywatwatꞌukat muꞌada am,” i juy epeꞌe Jesus pe — ioꞌe sorarayũ kukat ixeyũ be.
\p Oꞌjẽm ip. Poxerewun. Jay. 
\v 4 Oajẽm ip. Oꞌjekawẽn ip Jesus eju.
\p — Cemuojuyjuy juy eg̃ũm ixe sorarayũ kukat pe — ioꞌe ip Jesus pe. — Xipat cĩcã ixe ocexe — ioꞌe ip. 
\v 5 — Ocebadipyũ ikukpin cĩcã ixe xe — ioꞌe ip. — Deus eju kawẽnwẽnapꞌa oꞌyamuyat ocewebeapꞌam — ioꞌe ip.
\m
\v 6 Imẽnpuye Jesus oꞌju ceweju ip.
\p Sorarayũ kukat tukꞌa wi wũyꞌũm pima, sorarayũ kukat jebureyũ oꞌg̃uju Jesus dopabe. Oꞌg̃uju ip jaꞌõmuwẽn ãm cebe. Oꞌjẽm ip. Poxerewu. Jay. Ibureyũ oajẽm Jesus kay. Oꞌjekawẽn ip Jesus eju.
\p — Ocebure ocemudot jaꞌõmuwẽn ãm ewebe — ioꞌe ip Jesus pe. — Aꞌõmudodon ewebe — ioꞌe ip Jesus pe.
\p — “ ‘Kariwa, ecewemuwaꞌũm g̃u juy odukꞌa kay edot am,’ i juy ece,” ioꞌe ocewebe — ioꞌe ip Jesus pe. — “ ‘Osũsũn emudon odukꞌa be. 
\v 7 Cedag̃ g̃u emudot am odukꞌa be waꞌõbuyxiꞌũm puye,’ i juy ece cebe,” ioꞌe ocewebe — ioꞌe ip Jesus pe. — “ ‘ “Eceꞌada juy,” i ẽn eꞌem pima, obuywatwatꞌukat jeꞌada. 
\v 8 Õn tak wararaꞌacat mujujum. Waꞌõ kay kũyjobit ip wesorarayũ. Pũg̃ pe õn eꞌem “Ejẽm” i bima, jeꞌjẽm. Waraꞌat pe õn eꞌem “Ejot” i bima, jeꞌdot. Obuywatwatꞌukat pe õn eꞌem: “Imẽn cuy ece,” i bima, imẽn jeꞌe,’ i juy ece Jesus pe,” ioꞌe ocewebe — ioꞌe ip Jesus pe. — Imẽn jaꞌõmudodon ewebe — ioꞌe ip Jesus pe.
\p
\v 9 Iboap co buje Jesus itabẽg̃ oꞌe ixeyũ ekawẽn cocom. Oꞌjekorepẽn adeayũ kay.
\p — Soat Judeuyũ etabucap podi ma itabut okay ig̃o sorarayũ kukat, Judeu g̃u maꞌg̃u — ioꞌe.
\p
\v 10 G̃ebuje Jesus kay oꞌg̃ujuꞌiayũ oꞌjepit sorarayũ kukat tukꞌa kay. Ibuywatwatꞌukat oꞌtobuxik ip- -iwãtaxipi topibit. Kuy xipat oꞌe Jesus aꞌõbi.
\p
\v 11 Oꞌju jeweju etaybitbinayũ eju. Ade wararaꞌacayũ dak oꞌju ceweju. Naim ka be oꞌju ip. 
\v 12 Jesusyũ oajẽm ikabog̃atka exĩntabi be- -Naim ka exĩntabi be. Jay.
\p Ibocewi ag̃okatkayũ yaypanꞌisuatꞌũm tujujẽmjẽm ip oꞌe ikabog̃atka bewi ikot am. Ceꞌũat xibuk iꞌitꞌet g̃u osunuy waraꞌat. Jag̃epũg̃ ma dak osunuy ceꞌũat xibuk. Itopꞌũm eꞌũꞌibit osunuy. Adeayũ oꞌju ceꞌũat xibuk eju ibo ka watwat.
\p
\v 13 Wuykukukat Jesus ite jo buje, itabotaidabotbot cĩcã oꞌe ceꞌũat xibuk kay.
\p — Wa g̃u, tũꞌũ — Jesus oꞌe ceꞌũat xibuk pe.
\p
\v 14 Oꞌju ceꞌũat kay. Ceꞌũat tujujẽmjẽmap oꞌg̃ucay. Ceꞌũat tujujẽmjẽmayũ oꞌjecũ ip e bidase.
\p — Tapu — Jesus oꞌe. — Ag̃obucẽg̃ ece — ioꞌe ceꞌũat pe.
\p
\v 15 G̃ebuje ceꞌũ topibit itabẽg̃ oꞌe. Oꞌjeꞌag̃obucẽg̃. Oꞌjekawẽn.
\p G̃ebuje Jesus oꞌjekawẽn ceꞌũ topibit xi eju.
\p — Eꞌit waram g̃uto oꞌjetait — Jesus oꞌe cebe.
\p
\v 16 Imẽnpit soat imuꞌadaap cocoayũ yag̃uybabiꞌũm cĩcã ip oꞌe.
\p — Kaꞌũmg̃u ejoꞌiat xipacat — ioꞌe ip Deus pe. — Deus ekawẽn muwẽnuwẽnꞌukat wuykay osodot- -yaꞌõbuyxiat — ioꞌe ip jewewebe. — Deus osodot jebekitkit com — ioꞌe ip.
\p
\v 17 Ibocewi Judéia eipi watwat Jesus ceꞌũat oꞌg̃uꞌada iap awẽg̃ oꞌyawẽg̃tobuxik- -soat ka watwat.
\p
\v 18 Ceweju etaybitbinayũ be Jesus ceꞌũat oꞌg̃uꞌada iam João mukũyjo buje, João xepxepayũ oꞌtomuwã jewekay- -jeweju etaybitbinayũ. 
\v 19 Ixeyũ oꞌg̃uju jaꞌõmuju am wuykukukat Jesus kay.
\p — “Deus emunaẽ ajẽmap wiwim oceju,” i juy epeꞌe cebe — ioꞌe João. — “Ẽn tu ixe? Waraꞌat g̃u xeꞌe ocejowiwi?” i juy epeꞌe cebe — ioꞌe João.
\p Poxerewun. Oꞌjẽm ip.
\p
\v 20 Jay. Oajẽm ip Jesus kay.
\p — João Batista ocemudot ekay — ioꞌe xepxepayũ Jesus pe. — “Ẽn tu omuykuiat? Waraꞌat g̃u xeꞌe ocejowiwi?” i juk oꞌe João ocewebe — ioꞌe ip Jesus pe.
\p
\v 21 G̃asũ Jesus tak adeayũ oꞌg̃uꞌadaꞌada João emumudotyũ etabutpe. Iwãtaxipipiayũ oꞌg̃uꞌadaꞌada. Ibiõg̃buk kẽrẽat oꞌg̃ujẽmujẽm ikug̃ayũ bewi. Itaꞌũmayũ oꞌsutada. Ierepayũ oꞌg̃uꞌadaꞌada. Jesus tak oꞌjekawẽn xepxepayũ eju- -João emumudotyũ eju.
\p
\v 22 — Epeyepit cuy João kay — ioꞌe cebe ip. — Epejojojoiap cuy epeg̃uwẽn João be, epeyekũyjojoiap tak — ioꞌe. — Itaꞌũm topibiyũ itate oꞌe g̃asũ. Taojere topibiyũ dak xipan ip oꞌe xĩg̃xĩg̃ g̃asũ. Ierep topibiyũ dak xipat oꞌe g̃asũ. Yaꞌõpiꞌũm topibiyũ dak yaꞌõpipe oꞌe ip. Jekũyjojom ip oꞌe. Ceꞌũ topibiyũ dak waram itait oꞌe g̃asũ. Itadaybotbocayũ dak kawẽn idipat cocom g̃asũ — ioꞌe. 
\v 23 — Imẽneju eycokcog̃ epesop okay eyetabut am eybuꞌuꞌũm pima — ioꞌe Jesus. — “Ite g̃u omuykuiat,” iꞌeꞌem pima bit, eycokcog̃ g̃u epesop — ioꞌe xepxepayũ be- -João emumudotyũ be.
\p
\v 24 Jesus João oꞌg̃uwẽn adeayũ be, cemumudotyũ jẽm puje.
\p — João jom cuk epeku ukꞌaꞌũmat pe — ioꞌe Jesus. — Ipiꞌũnꞌũn kay kabido ajẽm puje jeꞌipeꞌadededem. Yag̃uykorererenayũ iteꞌip puxim, soat em jewag̃uymuwarururun puye. João bit yag̃uykoreren g̃u. Witaꞌa buxim pit ixe. 
\v 25 João doti teibog̃ g̃u. Teibog̃at kukayũ adeayũ kukat tukꞌa be opop ip- -ibubut adeayũ. 
\v 26 João bit ibubut adeat g̃u- -Deus ekawẽn muwẽnuwẽnꞌukat acã. Waraꞌat Deus ekawẽn muwẽnuwẽnꞌukayũ bodi ma João yaꞌõbuyxi. 
\v 27 Imẽn Deus ekawẽntup eꞌem- -João muwẽg̃aptup:
\mi Ag̃ cuy epesop, iꞌeꞌem Deus, i. Wemumuju og̃uju ewap soat ajẽm puje emuxipan am, i.
\m Imẽn eꞌem Deus ekawẽntup- -João muwẽg̃aptup — ioꞌe. 
\v 28 — Kaꞌũma ma omuy João joꞌi yaꞌõbuyxian. Deus xe bit, yopĩcat João bodiat yaꞌõbuyxiat cebekitkiyũꞌin — Jesus oꞌe.
\p
\v 29 Iboap ekawẽn co buje, — Cũg̃ cĩcã Deus — ioꞌe soat ma, iecug̃ap peam dinheiro bubuꞌukayũ dak. João ixeyũ oꞌg̃ubatisasan. 
\v 30 Fariseuyũ bit ibuꞌu jĩjã osodop ip Deus bikuyap tag̃ jeku am, Moisés ekawẽn imutaybitbinꞌukayũ dak. Ixeyũ g̃u bit oꞌju João kay jemubatisan am- -waraꞌacat acã- -iecug̃ap peam dinheiro bubuꞌukayũ acã, waraꞌat ikẽrẽat mujurũg̃rũg̃ꞌukayũ dak.
\p
\v 31 G̃ebuje Jesus waram oꞌjekawẽn adeayũ eju.
\p — Abu-buxim g̃asũacat? Ajoap og̃uwẽn eywebe abu-buxim ip iap mubapuk am eywebe? 

\v 32 Bekitkit puxim ixeyũ- -pasiaham ip iap pe pubutbucayũ buxim. Jewãwãwãm ip jebureyũ kay bekitkiyũ.
\p — “Tẽg̃tẽg̃ꞌa oceyamuyde eywebe yaꞌĩjo am. Eydaobuꞌuꞌu eyju bit daꞌiꞌin,” iꞌeꞌem ip. “Wa ocesop jewexe iꞌũmcocom. Eybuꞌu eyju bit oceweju tõn,” iꞌeꞌem ip. Ijoyũ buxim g̃asũacat — Jesus oꞌe.
\p
\v 33 — João Batista oajẽm eykay. Ixe jekpiwan ma irere oeku Deus eju jekawẽn ãm. Eyju bit napa ma eꞌem ixe muwẽnuwẽn: “Ibiõg̃buk kẽrẽat kukat teku,” i. 
\v 34 Soat wag̃o õn. Ojot eykay. Soat xat oꞌom ojeku, soat tikõnkõn tak. Eyju bit napa ma eꞌem omuwẽnuwẽn: “Kaꞌoꞌonꞌukat teku,” i. “Teku iecug̃ap peam dinheiro bubuꞌukat pure,” i dak. “Teku ikẽrẽat mujurũg̃rũg̃ꞌukat pure,” i dak — ioꞌe. 
\v 35 — Wuyju Deus emumutaybitbinap tag̃ jekukum pima bit, wararaꞌacayũ jeꞌe “Deus cũg̃ ma wuymutaybitbin,” i — Jesus oꞌe.
\p
\v 36 G̃ebuje Fariseu Jesus oꞌtomuwã jeweju jekõn ãm. Simão ibutet osunuy. Jesus oꞌju Fariseu dukꞌa be. Oajẽm. Oabik jekõn ãm ceweju.
\p
\v 37 G̃ebuje ayacat oajẽm Jesus kay. Ixe ayacat ibo ka wat osunuy. Ikẽrẽat mujurũg̃rũg̃ꞌukat osunuy. Ixe itaybit oꞌe Jesus jekõnkõn Fariseu dukꞌa be iam. Imẽnpuye tideꞌoati oꞌtidojot Jesus kay timũnꞌa be. Timũnꞌa waenõm mug̃ẽg̃ẽ joꞌi osunuy- -alabastro mug̃ẽg̃ẽ osunuy. 
\v 38 Oajẽm Jesus kay. Xikꞌi osunuy Jesus nõg̃pikadi, sui xe. Wa osunuy. Ig̃uycũg̃ osunuy juk adi ikẽrẽat oꞌg̃ug̃ẽ iap kay. Jesus i oꞌsuimubot jetadim. Oꞌsuisup jadam. Oꞌsuikõn. Oꞌsuimudeꞌoꞌon tideꞌoatim. Imẽn oꞌe Jesus ikukpin cĩcã cexe buye. 
\v 39 Iboap oꞌjojojo Fariseu- -Jesus emunomuwã.
\p G̃ebuje Fariseu oꞌjekawẽn jewebe ma.
\p — Teku Deus ekawẽn muwẽnuwẽnꞌukat tu? — ioꞌe jewebe ma. — Deus ekawẽn muwẽnuwẽnꞌukat pima, itaybit kuka oꞌe abu ite ayacat wuimurerem iam — ioꞌe. — “Ejẽm cuy oxewi,” i kuka oꞌe cebe — ioꞌe teꞌe ma. — Ite ayacat ikẽrẽat mujurũg̃rũg̃xiat — ioꞌe Fariseu jewebe ma.
\p
\v 40 G̃ebuje Jesus oꞌjekawẽn Fariseu be.
\p — Simão — ioꞌe. — Kawẽn puk õn eweju — ioꞌe.
\p — Haꞌa — ioꞌe. — Ecekawẽn puk, kariwa — ioꞌe.
\p
\v 41 — Xepxep ag̃okatkat cewero ip osodop jekariwa eju. Pũg̃ ixeyũꞌin ceweroap bog̃ jĩjã osunuy. 500 dinheiro osunuy cewero. Waraꞌacat ixeyũꞌin ceweroap bog̃bug̃ ã osunuy. 50 dinheiro isurũg̃at osunuy cewero. 
\v 42 Xepxem ma teida baꞌore oꞌe ip jekariwa be. Ixe kariwa bit oꞌe cebe ip: “Teidam g̃u eyju owebe,” i. “Kaꞌũmg̃u g̃asũ bit jeꞌe oweju eyeweroap,” i. Abu-xe ixe kariwa ikukpin cĩcã jeꞌe ixeyũꞌin? — Jesus oꞌe. — 500 dinheiro isurũg̃at cewero tũibit xe xeꞌe? 50 dinheiro isurũg̃at tũibit xe g̃u xeꞌe? — Jesus oꞌe.
\p
\v 43 — 500 dinheiro isurũg̃at cewero tũibit xe acoꞌi — Simão oꞌe. — Cekariwa oꞌe ixe be: “Teidam g̃u eyju owebe,” i. “Kaꞌũmg̃u g̃asũ bit jeꞌe oweju eyeweroap,” i. Imẽnpuye ixe xe acoꞌi cekariwa ikukpin cĩcã jeꞌe — Simão oꞌe.
\p — Hm hm — Jesus oꞌe. — Ixe xe ma ikukpin oꞌe cekariwa — ioꞌe.
\p
\v 44 Jesus oꞌjekorepẽn ayacat kay. Waram oꞌjekawẽn Simão be bit- -Fariseu be.
\p — Akꞌi juy ece ite ayacat kay — ioꞌe. — Edukꞌa be oõm puje, ẽn ma idibi etiũm g̃u wuiwuyaptim wuybabi dag̃ — ioꞌe. — Ite bit wui oꞌsuimubot jetadim. Wui oꞌsuisup jadam — ioꞌe. 
\v 45 — Ẽn ma wag̃obu eyag̃obukõn g̃u wuybabi dag̃. Ite bit oibuꞌun g̃u wuikõn ãm — ioꞌe. 
\v 46 — Ẽn ma waꞌa eyamudeꞌon g̃u axeptim wuybabi dag̃. Ite bit wui oꞌsuimudeꞌon tideꞌoatim — ioꞌe. 
\v 47 — Icẽmãn õn eꞌem ewebe. Ite ayacat ikẽrẽat kug̃- -ade jĩjãat kug̃. Imẽnpit Deus soat oꞌjuꞌuk. Ikẽrẽat oꞌjuꞌuk cebewi, cexe Deus ikukpin cĩcã buye. Wuywebewi Deus yopĩt ma ikẽrẽat uk puje, ikukpin cĩcã g̃u Deus wuyxe- -ikukpinpũn ã — Jesus oꞌe. — Ade ikẽrẽat uk puje bit, ikukpin cĩcã eꞌem wuyxe — Jesus oꞌe Fariseuyũ be.
\p
\v 48 G̃ebuje Jesus oꞌjekawẽn ayacat eju.
\p — Ikẽrẽat kuy ojuꞌuk ewebewi — Jesus oꞌe cebe.
\p
\v 49 Imẽneju ceweju jekõnkõnayũ oꞌjekawẽn jeweweju.
\p — Abu ite ikẽrẽatꞌukꞌukꞌukan! — ioꞌe ip jewewebe.
\p
\v 50 — Deus kuy edaxijo, cekay etabut puye — Jesus oꞌe ayacat pe. — Kabaꞌũm cuy eg̃uy g̃asũ bit — ioꞌe. 
\b
\c 8
\p
\v 1 Ibunꞌũm pima Jesus kawẽn idipat oꞌg̃uwẽnuwẽn. Ikabog̃atka dag̃ oeku ikaꞌĩcatka dag̃ tak. Deus soat kukukan jeꞌe iap muwẽnuwẽn oeku. 
\v 2-3 12 beayũ Jesus eju oekuku ip, aoyũ dak. Jesus cuk ixeyũ aoyũ oꞌg̃uꞌada. Ibiõg̃buk kẽrẽat tak cuk oꞌg̃ujẽm cebewi ip. Maria Jesus eju oeku, Joana dak, Susana dak, ade wararaꞌacayũ dak. Madalena i osunuy waraꞌat Maria butet. 7 be ibiõg̃buk kẽrẽat cuk oꞌg̃ujẽm ixe Maria bewi. Joana Cuza tayxi osunuy. Herodes pubut kukukat ixe Cuza osunuy- -Galiléia eipi kukat pubut kukukat. Ixeyũ aoyũ jebubutꞌin iũmũmꞌuk osodop ip Jesus pe, 12 beayũ be dak. Jesus eju oekukuku ip Jesus xat mug̃ẽg̃ẽm.
\p
\v 4 Ade ka bewi oꞌjeꞌawero ip Jesus kay cekawẽn com. Adeayũ eꞌawero buje Jesus wuymutaybitbinap ekawẽn oꞌg̃uwẽn cebe ip.
\p
\v 5 — Ag̃okatkat kadaida oꞌtamudu jekat pe — ioꞌe Jesus. — Tamududum pima, taꞌade g̃u oꞌtaꞌat e bitako dag̃. Cũg̃cũg̃ayũ oꞌtamucakucak e bitako dag̃ puye — ioꞌe Jesus.
\p
\v 6 — Ibocewi wasũyũ ixeda oꞌtaꞌoꞌo. Tamududum pima waraꞌata oꞌtaꞌat karatũg̃ꞌa jeje. Oꞌjedaeꞌũ idibiꞌũm puye. Oꞌtanokap g̃u. 
\v 7 Tamududum pima waraꞌata oꞌtaꞌat widaoho nuybi be. Da aypapan oꞌe widaoho nuybi be — ioꞌe Jesus.
\p
\v 8 — Ibocewi widaoho kadai oꞌg̃uꞌũm. Waraꞌata bit oꞌtaꞌat katõ be. Imẽnpuye xipan oꞌyaypan. Kadaim oꞌe. Pũg̃ pe kadai be taꞌada jĩjã oꞌtadop- -100 be oꞌtadop — ioꞌe Jesus. — Waꞌĩjo pin pima, eyaꞌõpicũg̃cũg̃ cuy epesop waꞌõ kay — Jesus oꞌe adeayũ be.
\p
\v 9 G̃ebuje ceweju etaybitbinayũ oꞌjekawẽn Jesus eju.
\p — Apẽnape ibo kawẽn? — ioꞌe ip.
\p
\v 10 — Deus soat kukukan jeꞌe — Jesus oꞌe. — Deus ibikuy eywebe eyetaybit am iboam. Imẽnpuye ibapug̃ ma õn eymutaybitbin. Wararaꞌacayũ be bit imutaybitbinap ekawẽn muwẽnuwẽn õn. Jeakag̃ ip. Inaka ijojom g̃u ip. Wekawẽn paꞌarẽm cexe ip wekawẽn cocom maꞌg̃u ip — Jesus oꞌe.
\p
\v 11 — Apẽnape ibo kawẽn jeymukũyjo õn. Deus ekawẽn kadaida buxim- -tamuduꞌibita buxim — Jesus oꞌe. 
\v 12 — Deus ekawẽn cocomayũꞌin e bitako dag̃ata buxim. Deus ekawẽn cocom ip. Cekawẽn coꞌisum pit Satanás ajẽmjẽm cekay ip ibiõg̃buk kẽrẽayũ kukukat. “Teꞌe ma eyju iboap cocom,” i napa ma eꞌem Satanás cebe ip. “Iboap ekawẽn kay eyetabun g̃u juy epesop,” i napa ma eꞌem. Imẽn Satanás imubuꞌuꞌun ip itabucap puxim Deus kay. Ixeyũ mubuꞌuꞌun Deus pe ixeyũ daxijoap puxim — ioꞌe Jesus.
\p
\v 13 — Wararaꞌacat karatũg̃ꞌa jejeata buxim Deus ekawẽn cocomayũ — ioꞌe Jesus. — Cekawẽn co buje, icokcok eꞌem ip. Wekawẽn kay jĩjã ip. Imẽnpit darem ma itabut ip tãbubeꞌũmat puxim. Deus kay jetabucap epereperem ip. Wararaꞌacat ixeyũ be ikẽrẽat mujurũg̃at puje, ibuꞌun ip Deus kay jetabut am — Jesus oꞌe.
\p
\v 14 — Wararaꞌacat widaoho dag̃ata buxim Deus ekawẽn cocomayũ. Wekawẽn cocom ip. G̃uyjom pit soat em g̃ebum ip jemukaypin kay. Adem ibu pin ip jebubun. Jebikuyap tag̃ ip jeku ojuy, jemucokcokcog̃. Warẽmtag̃ ip jeku ojuy. Imẽnpuye ibuꞌu ip jetabut am Deus kay — Jesus oꞌe.
\p
\v 15 — Wararaꞌacat katõ beata buxim Deus ekawẽn cocomayũ. Deus ekawẽn cocom ip. Cekawẽn kay jĩjã ip. Oibuꞌun g̃u ip jetabut am Deus kay. Ixeyũ xipat Deus xe. Cũg̃ ma ip cexe ixeyũ. Cekawẽn muwẽnuwẽn ip wararaꞌacayũ be imutabut am ip Deus kay. Wararaꞌacat mutabunat kadai buxim- -yaꞌaꞌeat puxim — Jesus oꞌe.
\p
\v 16 G̃ebuje Jesus waraꞌat kawẽn oꞌg̃uwẽn.
\p — Imusop puje lamparina kuka ajomuy g̃u icoꞌaꞌa diotpe — ioꞌe. — Ajomuy g̃u dak kuka wuyxexecap tiotpe. Um kuka ajomuy ukꞌa be õmõmꞌukayũ be kabiok tag̃ iõmap puxixim. 
\v 17 Imẽnpuxim soat imunẽmꞌibit kuka oꞌtobuxik ip. Waraꞌacat pe yaꞌĩjoap puxim kawẽnwẽn ãm tak itaybit jeꞌe soat — ioꞌe.
\p
\v 18 — Imẽneju juy eyaꞌõpicũg̃cũg̃ epesop waꞌõ kay — ioꞌe. — Eyag̃uybaꞌũm g̃u juy epesop wekawẽn kay. Xipan eyaꞌõpicũg̃ pima, waram jeyetaybin wekawẽn. Xipanꞌũm pima bit, jeyag̃uybaꞌũm wekawẽn kay — ioꞌe.
\p
\v 19 Ixi ajẽm ojuy oeku Jesus kay jekawẽn ãm, ikitpitpiyũ dak. Cekay yajẽm paꞌore oꞌe ip adeayũ buye. 
\p
\v 20 — Exi omuy akiju, ekitpitpiyũ dak — ioꞌe ip. — Ejo pin ip — ioꞌe ip.
\p
\v 21 G̃ebuje Jesus oꞌjekawẽn adeayũ be.
\p — Deus ekawẽn cocoꞌukayũ oxi joꞌi oxe, okitpitpiyũ joꞌi dak — ioꞌe. — Kũyjobicayũ oxi joꞌi oxe, okitpitpiyũ joꞌi dak — ioꞌe.
\p
\v 22 G̃uyjom Jesus oõm kobe be jeweju etaybitbinayũ eju. Xik. Oabik.
\p — G̃aꞌa wĩnãbu aju — ioꞌe cebe ip.
\p Timudek ojuy oꞌju ip. 
\v 23 Timudekdeg̃ pima, Jesus oꞌxet. Tibicũg̃ pe bima kabidoxixi oajẽm iodi kay. Idibi oꞌtiõm kobe be tipodoy buye. Kobe ipoxi oꞌe idibim. Jepirig̃ ojuy oꞌe ip. Jakõmap puxixim iparara ip oꞌe. 
\v 24 Imẽnpuye ceweju etaybitbinayũ Jesus oꞌg̃uwurũg̃.
\p — Kariwa! — ioꞌe ip. — Akõm wuyju!
\p Wũrũh. Oꞌjewurũg̃. Jewurũg̃ puje, Jesus kabido oꞌsubidomukorẽm. Tipodoyat oꞌtipon. Iodi tipo oꞌe.
\p
\v 25 Imẽnpuye itabẽg̃bẽg̃ ip oꞌe ijojom dao ma oꞌtipon iap cocom.
\p — Apẽnpuye eyetabut g̃u Deus kay? — ioꞌe Jesus cebe ip. 
\p — Abu dak sute? Kabido kũyjobit yaꞌõ kay. Tipodoyat tak kũyjobit yaꞌõ kay — ioꞌe ip jewewebe.
\p
\v 26 Oajẽm ip wĩnãbu- -Gerasa eipi watwat kay, oꞌtimudek puye. Gerasa eipi Galiléia eipi weg̃ũn opop. Jesusyũ oajẽm.
\p
\v 27-29 G̃ebuje Jesus oꞌjẽm kobe bewi. Oajẽm ag̃okatkat kay. Ikabog̃atka wat osunuy ixe. Ibiõg̃buk kẽrẽat kukat osunuy ixe. Ikaꞌuat puxim osunuy. Totiꞌũm jekukuꞌuk osunuy kuy bin ma. Ukꞌa be g̃u osunuy. Ceꞌũꞌũayũ mõg̃mõg̃ap tag̃ ma oeku.
\p — Ejẽm cuy ag̃okatkat pewi — ioꞌe Jesus ibiõg̃buk kẽrẽat pe.
\p Imẽn Jesus oꞌe ibiõg̃buk kẽrẽat pe ag̃okatkat kukuꞌuk puye. Ixe ag̃okatkat daomunmunꞌuk osodop ip ibo ka watwat cabobum, correntebum tak kuy bin ma. Imẽnpit cabobu, correntebu dak oꞌsubudakatkat ixe. Ibiõg̃buk kẽrẽat ixe mujujuꞌuk osodop ukꞌaꞌũmat pe. Jag̃epũg̃ ma oeku ukꞌaꞌũmat tag̃.
\p Jesus cocom pima, oꞌjewãwã ixe ag̃okatkat. Oꞌjẽg̃ꞌaecõg̃cõg̃ Jesus wap, jexe yaꞌõbuyxi buye.
\p — Apẽn ẽn em owebe, Jesus? — ioꞌe. — Ẽn Deus ipot- -soat podi ma yaꞌõbacaat ipot — ioꞌe yaꞌõberen. — Ipiat esupiꞌajoat g̃u juy owebe — ioꞌe cebe.
\p
\v 30 Ibocewi Jesus oꞌjekawẽn ag̃okatkat pe.
\p — Apẽn ebutet? — ioꞌe Jesus.
\p — Ade i — ioꞌe.
\m Ade i ibutet osunuy ade ibiõg̃buk kẽrẽat cebe buye.
\p
\v 31 G̃ebuje ixeyũ ibiõg̃buk kẽrẽayũ oꞌjekawẽn Jesus pe.
\p — Ocemujum g̃u juy ipiatꞌajojoap kay — ioꞌe. — Dajebaroyũ be acã juy ocemujum ece — ioꞌe ip Jesus pe.
\m
\v 32 Imẽn oꞌe ip ade dajebaroyũ coꞌa pẽnpẽn tag̃ wũrũrũrũg̃ puye.
\p — Haꞌa — ioꞌe Jesus.
\p
\v 33 Oꞌjẽm ip ag̃okatkat pewi Jesus aꞌõbi. Oõm ip dajebaroyũ be.
Imẽnpuye dajebaroyũ daudau ip owat coꞌa pẽnpẽn tag̃. Oꞌkop ip iodi be. Oakõmkõm ip. Oꞌsũm ip. Pog̃. Oap ip.
\p
\v 34 Dajebaroyũ kukukayũ iboap oꞌtobuxik tak. Oꞌjenapõn ip. Jesus ibiõg̃buk kẽrẽat oꞌg̃uõm dajebaroyũ be iap muwẽnuwẽn cekuku ip ikabog̃atka watwat pe, kog̃ũnpi watwat pe dak.
\p
\v 35 G̃ebuje oꞌjekũyjoꞌiayũ oꞌju dajebaroyũꞌũmꞌũm com. Oajẽm ip Jesus kay. Jay. Ibiõg̃buk kẽrẽat kug̃ tũibit oꞌtobuxik ip Jesus xe. Xikꞌi osunuy Jesus xe. Totite oꞌe. Yag̃uysat oꞌe. Yag̃uybaꞌũm oꞌe ip oajẽmꞌiayũ. 
\v 36 Imẽnpuye oꞌjojojoꞌiayũ ma Jesus ibiõg̃buk kẽrẽat oꞌg̃ujẽm iap oꞌg̃uwẽn soat pe. 
\v 37 Ibo eipi watwat pit Jesus oꞌg̃ujẽm jeka bewi- -Geresa eipi watwat. Jesus oꞌg̃ujẽm ip jeparara pibun.
\p Oꞌjẽm Jesus ixeyũ xewi. Porewuh. Oõm kobe be waram timudek am. Xik. Oabik.
\p
\v 38 Ibiõg̃buk kẽrẽat kug̃ tũibit oajẽm tak Jesus kay.
\p — Ãg̃ eweju oju — ioꞌe Jesus pe. — Eweju ma ojeku — ioꞌe.
\p
\v 39 — Ap! Obuꞌu. Oweju g̃u juy. Ecepit cuy edukꞌa be — ioꞌe ibiõg̃buk kẽrẽat kug̃ tũibit pe. — “Deus xipan cuk okuk,” i juy ece cebe ip edukꞌa beayũ be — ioꞌe cebe.
\p G̃ebuje ibiõg̃buk kẽrẽat kug̃ tũibit oꞌjepit jedukꞌa kay. Soat kaka dag̃ oeku.
\p — Jesus ibiõg̃buk kẽrẽat oꞌg̃ujẽm owebewi — iꞌeꞌem oeku.
\m Jesusyũ dak waram oꞌtimudek.
\p
\v 40 Waram Jesus epit puje, Galiléia eipi watwat icokcok oꞌe iwiwim ip puye. Ag̃okatkat oajẽm Jesus kay. 
\v 41 Jairo i ixe ag̃okatkat putet osunuy. Deus eju kawẽnwẽnapꞌa kukukꞌukat osunuy ixe. Oꞌjẽg̃ꞌaecõg̃cog̃ Jesus topabe Jesus yaꞌõbuyxi cexe buye.
\p
\v 42 — Ejot cuy odukꞌa kay — ioꞌe Jesus pe. — Odaxit ceꞌũ pin — ioꞌe.
\p Doze koato Jairo daxit osunuy. Waraꞌat taxit kaꞌũmg̃u. Pũg̃ ma osunuy.
\p — G̃aꞌa — Jesus oꞌe.
\p E dag̃ cucum pima, adeayũ oꞌju ip Jesus nomuju. Jesus oꞌg̃ukug̃ukug̃ ip, ade buye.
\p
\v 43 E dag̃ cucum pima ayacat oajẽm Jesus kay. Jesus tõg̃pikadiwi oajẽm. Ixe ayacat iwãtaxipi oꞌe. Doybucukcug̃ g̃u osunuy 12 koato bun. Imẽnpuye jedinheiro oꞌg̃uꞌũm janug̃tataapteim. Dinheiro kug̃ g̃u oꞌe. Kaꞌũma ma kuka oꞌg̃uꞌada ayacat. 
\v 44 Jesus esay ukpu oꞌg̃ucay ixe. Oꞌtoybucuk g̃ebuje bit. Oꞌjeꞌada.
\p
\v 45 G̃ebuje Jesus oꞌe:
\p — Abu omucay? — i.
\p — Õn g̃u — ioꞌe soat.
\p — Kariwa — Pedro oꞌe. — Adeayũ ekug̃ukug̃ — ioꞌe. — Akokoreren ip ade — ioꞌe.
\p
\v 46 — Pũg̃ꞌin ixeyũꞌin omucay — ioꞌe. — Wetaybit iboam. Deus aꞌõbacaap oꞌjẽm owebewi — ioꞌe.
\p
\v 47 Imẽneju ayacat oꞌe jewebe ma:
\p — Wemunẽm paꞌore oce — i.
\p Ixe dak oajẽm Jesus dopabe. Ikarabakbak oꞌe jeparara pibun. Tũybe Jesus omukorẽm iãn oꞌe. Oꞌjẽg̃ꞌaecõg̃cõg̃ Jesus topabe.
\p G̃ebuje ixe ayacat jeꞌadaap oꞌg̃uwẽn soat etabun.
\p — Esay og̃ucay omuꞌada am — ioꞌe Jesus pe. — Eekabek ukpu mucay buje, oceꞌada — ioꞌe cebe.
\p
\v 48 — Tũꞌũ — Jesus oꞌe. — Eceꞌada, okay etabut puye. Kabaꞌũm cuy eg̃uy g̃asũ bit — ioꞌe ayacat pe.
\p
\v 49 Ag̃okatkat oajẽm tak Jairo kay- -Jesus xeat kay. Jairo dukꞌa bewiat oajẽm. Oajẽm ayacat pe Jesus kawẽnwẽn pima.
\p — Edaxitꞌũm kuy oeꞌũ — ioꞌe. — Kariwa Jesus eg̃uwaꞌũm g̃u juy — ioꞌe.
\p
\v 50 Jesus pit iboap co buje, oꞌjekawẽn Jairo eju.
\p — Eg̃uycũg̃ g̃u juy eg̃uy — ioꞌe Jesus cebe. — Etabun cuy eg̃uy okay — ioꞌe. — Etabut pima, jeꞌada, oeꞌũ maꞌg̃u edaxit — ioꞌe.
\p
\v 51 G̃ebuje Jesus oajẽm Jairo dukꞌa kay. Pũg̃pũg̃ ã oꞌg̃uõmat jeweju. Pedro oõm ceweju, João dak, Tiago dak, yaypanꞌisuatꞌũm ebay dak, ixi dak. 
\v 52 Soat iboꞌa beayũ dak wawa ip osodop yaypanꞌisuatꞌum cocom. Jewãwãwãm ip osodop. Imẽnpuye Jesus oꞌjekawẽn ceweju ip.
\p — “Wawa g̃u juy epesop,” i õn eꞌem — ioꞌe cebe ip. — Ixe ceꞌũ g̃u- -ixet acã — ioꞌe Jesus.
\p
\v 53 Waram g̃uto og̃uꞌada iam itaybit puye, “Ixet acã” ioꞌe. Imẽnpit Jesus oꞌjowayway ip, ixeꞌũm oeꞌũ iam itaybit ip puye ukꞌa beayũ.
\p
\v 54 G̃ebuje Jesus Jairo daxitꞌũm pa oꞌsubaixik.
\p — Tũꞌũ, ag̃obucẽg̃ ece — ioꞌe cebe.
\p
\v 55 Oꞌg̃uꞌag̃obucẽg̃ g̃ebuje bit waram g̃uto oꞌjetait puye. Itabẽg̃ ma oꞌe g̃asũ bit.
\p — Ixat epeg̃ũm cebe iꞌo am — Jesus oꞌe.
\p
\v 56 — Akꞌi — ioꞌe ip cebay. — Waram g̃uto oꞌjetait — ioꞌe ip.
\p — Waram g̃uto imutaicap cuy epeg̃uwẽn g̃u wararaꞌacayũ be — Jesus tak oꞌe cebay be.
\m Icokcok cĩcã oꞌe waram oꞌjetait puye.
\b
\c 9
\p
\v 1-2 Waram pima Jesus 12 beayũ oꞌtomuwã jeweju etaybitbinayũ. Jaꞌõbacaap oꞌg̃ũm cebe ip.
\p — Ibiõg̃buk kẽrẽat cuy epeg̃ujẽm waꞌõbi — ioꞌe cebe ip. — Iwãtaxipipiayũ juy epeg̃uꞌada waꞌõbi — ioꞌe cebe ip. — “Deus soat kukukan jeꞌe,” i juy epeꞌe soat pe — ioꞌe.
\p
\v 3 Ixeyũ mujum pima oꞌjekawẽn ceweju ip.
\p — Ade g̃u juy epetujowat eyjuap tag̃ — ioꞌe cebe ip. — Eybaꞌip g̃u epeyoptujowat, dinheiro mũn tak kaꞌũma, eyxat tak kaꞌũma, dinheiro dak kaꞌũma. Eyekamixa dak pũg̃ ma epetujowat — ioꞌe.
\p
\v 4 — Ag̃oka be eyajẽm puje, waraꞌatꞌa bebebe g̃u juy epesop- -pũg̃ꞌa be ma — ioꞌe. 
\v 5 — Ibo ka watwat ibuꞌu eykug̃ pima, juy epejẽm ibo ka bewi. Waraꞌat ka kay juy epeju. Eyjẽm puje kaꞌwi epeg̃udu eyei bewi “Deus ipiat supiꞌajoat eywebe yaꞌõ kayꞌũm puye” iap mubapuk am ibo ka watwat pe — ioꞌe.
\p
\v 6 Imẽneju 12 beayu oꞌjẽm. Soat kaka dag̃ oekuku ip. Kawẽn idipat muwẽnuwẽn oekuku ip. Iwãtaxipipiayũ muꞌadaꞌadam oekuku ip.
\p
\v 7 G̃uyjom Herodes Jesus eꞌeap oꞌyaꞌĩjojo- -Galiléia eipi kukat. Tũybe Jesus waram g̃uto oꞌjetaitiat iãn oꞌe ip adeayũ. Tũybe Jesus João Batista iãn oꞌe ip pũg̃pũg̃ayũ.
\p — João Batista waram g̃uto oꞌjetait jeꞌũap tomukadi — i teꞌe ma oꞌe ip Jesus muwẽnuwẽn.
\m
\v 8 Tũybe Eliasꞌũm waram oꞌjebapuk ijodi jeꞌũap tomukadi iãn oꞌe ip wararaꞌacayũ. Tũybe Deus ekawẽn muwẽnuwẽnꞌukatꞌũm waram g̃uto oꞌjetait- -kuyjeatꞌũm iãn oꞌe ip wararaꞌacayũ. Imẽnpuye Herodes yag̃uyꞌũm oꞌe Jesus eꞌeap co buje.
\p
\v 9 — Abu sute? — ioꞌe Herodes jewebe ma. — Õn ma João oyaꞌukat — ioꞌe. — Soat ip ite eꞌeap muwẽnuwẽn — ioꞌe jewebe ma.
\p Imẽneju Herodes Jesus co pin cĩcã osunuy.
\p
\v 10 Jesus emumujuyũ epit puje, soat oꞌg̃uwẽn ip Jesus pe. Apẽn cuk adi oꞌeꞌe ip iap oꞌg̃uwẽn ip cebe.
\p Ibocewi Jesus ip oꞌtujowat jeweju.
\p Oꞌjẽm ip adeayũ xewi. Oꞌju ip Jesus eju Betsaida ka kay. 
\v 11 Adeayũ bit oꞌju Jesus nomuju, kuy oꞌjẽm iam itaybit ip puye. Oajẽm ip adeayũ.
\p G̃ebuje Jesus icokcok oꞌe jenomuju iju buje ip. G̃axĩn ma Deus soat kukukan jeꞌe iap oꞌg̃uwẽn cebe ip. Iwãtaxipipiayũ oꞌg̃uꞌada. 
\v 12 Imẽnpit katpuje jĩjã oꞌe. Imẽnpuye 12 beayũ oꞌju kawẽn ãm Jesus eju. 
\p — Ajo kuka oꞌjoꞌo ip? Kaꞌũmg̃u puybit ijoce — ioꞌe ip Jesus pe. — Eg̃uypit cuy ip tomukay ma. Ikatẽg̃atka kay juy ip eg̃uju ixat pu am — ioꞌe ip cebe. — Ixeyũ juy eg̃uju ixet am — ioꞌe ip. — Ijoce bit yaꞌũmg̃u ukꞌa ixet am ip — ioꞌe ip.
\p
\v 13 — Eyju ma ixat epeg̃ũm cebe ip — ioꞌe Jesus pit jeweju etaybitbinayũ be.
\p — Apẽntak suteyũ xan acejat? — ioꞌe ip Jesus pe. — Cinco be ma pãoꞌa kug̃ oceju. Axima kug̃ tak xepxep ma oceju — ioꞌe ip. — Oꞌe g̃u kuka cebeam ip. Pomawi dak puybit suteyũ xan acejat? — ioꞌe ip Jesus pe.
\m
\v 14 Imẽn oꞌe ip ade jĩjã buye. 5000 ag̃okatkayũ osodop ip Jesus ekawẽn cocom.
\p — Adeayũ epeg̃uabik — Jesus oꞌe cebe ip.
\p — Haꞌa — ioꞌe ip.
\m
\v 15 Soat oabik ip. Kaxikxikꞌi ip oꞌe.
\p
\v 16 G̃ebuje Jesus ixat oꞌjat. Akoh. Pãoꞌa oꞌyabu- -cinco beatꞌa. Axima oꞌjat xepxepat. Ixe dak oꞌjeapũn kabi kay. Apũn.
\p — Bay, xipat cĩcã ẽn — Jesus oꞌe Deus pe. — Ocexan eg̃ubapuk ocewebe iꞌo am — ioꞌe.
\p Ixat oꞌtakatkat jebum. Pãoꞌa oꞌyadakatkat. Pan. Oꞌyaũmũm 12 beayũ be yaũm ãm adeayũ be. Iũmũm pima oꞌg̃uꞌacog̃ axima. 12 beayũ ixat oꞌg̃ũmg̃ũm adeayũ be. Soat ip oꞌjoꞌo. Ibeg̃beg̃ ip oꞌe. 
\v 17 12 beayũ cepoyat oꞌg̃uxipan. Oꞌjomõg̃ ip ico be. 12 be ico oꞌg̃unopapũn ip cepoyan. Imẽn Jesus yopĩcat oꞌg̃uꞌacog̃ adeayũ xan.
\p G̃ebuje Jesus adeayũ oꞌg̃uypit tukꞌa kay. Irerem g̃u ip oꞌg̃uypit- -ibeg̃beg̃ acã.
\p
\v 18 Waram pima Jesus oꞌjekawẽn Deus eju. Jag̃epũg̃ ma kawẽnwẽn oꞌe ceweju. Ceweju osodop ip 12 beayũ.
\p G̃ebuje Jesus oꞌjekawẽn jeweju etaybitbinayũ eju.
\p — Abu dak õn adeayũ xe? — ioꞌe Jesus cebe ip.
\p
\v 19 — Ẽn João Batista pũg̃pũg̃ayũ xe — ioꞌe ip. — “Teku João Batista,” i teꞌe ma eꞌem ip. “Teku Elias,” i teꞌe ma eꞌem wararaꞌacat — ioꞌe ip. — “Teku Deus ekawẽn muwẽnuwẽnꞌukat- -waram g̃uto oꞌjetaitiat,” i teꞌe ma eꞌem wararaꞌacat — ioꞌe ip.
\p
\v 20 — Pãm eyju? Abu dak õn eyxe? — ioꞌe.
\p — Ẽn Cristo ma — ioꞌe Pedro. — Deus pe wuydaxijo am taẽꞌibit ẽn — Pedro oꞌe.
\p
\v 21 — Iboap pit cuy epeg̃uwẽn g̃u wararaꞌacayũ be — Jesus oꞌe cebe ip. 
\v 22 — Soat wag̃o õn. Õn pit ipiat osupiꞌajo — ioꞌe. — Paĩyũ kukukayũ itakoma jĩjã jeꞌe okay, Moisés ekawẽn imutaybitbinꞌukayũ dak, Judeuyũ kukukayũ dak. Waoka ojuy jeꞌe ip. Waoka ip g̃uyjom. Xepxep xet kap puje bit, waram ocetait — Jesus oꞌe.
\p
\v 23 G̃ebuje Jesus oꞌjekawẽn soat eju- -cekawẽn cocomayũ eju.
\p — Oweju jeku pin pima eybikuyap tag̃ g̃u juy epeku- -obikuyap tag̃ acã — ioꞌe. — Wekawẽn tag̃ cuy epeku — ioꞌe. — Eybuꞌum g̃u juy epesop eyeꞌũ ãm owebeam — ioꞌe. 
\v 24 — Obikuyap tag̃ eyeku buje, soat em Deus xe eyetait epesop eyeꞌũ buje — ioꞌe. — Eybikuyap tag̃ eyeku buje bit, wũy ma Deus wi epesop — ioꞌe. 
\v 25 — Eyeꞌũ buje soat em wũy ma Deus wi epesop pima, teꞌe ma eyju soat pupum ijodi eybubun. 
\v 26 Soat wag̃o õn. Waram ojot ijodi Deus ekawẽn tojotjotꞌukayũ eju- -ikẽrẽat kug̃ꞌũmayũ eju. Waram ojot webay aꞌõbi. Soat jeꞌe owebe: “Kaꞌũmg̃u ejoꞌiat yaꞌõbuyxiat,” i. “Kaꞌũmg̃u ejoꞌiat idipat,” i dak. Okay eybuꞌu bima, õn tak obuꞌun ma oce eykay wedot puje. Waꞌĩjo am eybuꞌu bima, õn tak obuꞌun ma oce eyaꞌĩjo am — ioꞌe. 
\v 27 — Icẽmãn õn eꞌem eywebe — ioꞌe. — Deus soat kukukan jeꞌe. Pũg̃pũg̃ puk ijodiacat jeꞌũ g̃u iboap comꞌũm pima — Jesus oꞌe.
\m Jesus imẽn waram jedocap oꞌg̃uwẽn cebe ip.
\p
\v 28 8 xet kap puje, Jesus oꞌju Pedro eju, João eju dak, Tiago eju dak. Oꞌju ip coꞌa kay jekawẽn ãm Deus eju.
\p
\v 29 Oajẽm ip. Jay. Jesus oꞌjekawẽn Deus eju. Kawẽnwẽn pima oꞌjedopaewarurun. Iekabek irut cĩcã oꞌe. Isopsep cĩcã oꞌe. 
\v 30 Xepxep ag̃okatkayũ dak oꞌjekawẽn Jesus eju- -kuyayũ, kuy oeꞌũꞌiayũ. Moisés oꞌjekawẽn, Elias dak. 
\v 31 Idip cĩcã osunuy cebapukap. Oꞌjekawẽn ip jeweweju.
\p — Jesus jeꞌũ Jerusalém ka be Deus bikuyap tag̃ — ioꞌe ip jewewebe.
\p
\v 32 Imẽnpit Pedro oꞌxet, Tiago dak, João dak. Oꞌxet ip itaxet pinpin ip puye. Jewurũg̃ puje, Jesus oꞌjojojo ip. Idip cĩcãat oꞌjojojo ip. Ixeyũ dak xepxep ag̃okatkayũ oꞌjojojo- -Jesus eju kawẽnwẽnayũ.
\p
\v 33 G̃ebuje Pedro oꞌjekawẽn Jesus eju xepxepayũ cẽm pima.
\p — Kariwa! — ioꞌe Pedro. — Xipat cĩcã wuyju ijoceam. Xijap cuy ocejomõg̃ ebapũg̃ — ioꞌe. — Pũg̃ ewebeam jeꞌe, waraꞌat Moisés peam jeꞌe. Waraꞌat Elias peam jeꞌe — ioꞌe.
\m Pedro imẽn oꞌe itaybitꞌũm apẽn oce iam puye. Yag̃uybabiꞌũm oꞌe.
\p
\v 34 Kabikerereat tak Pedro oꞌg̃ubaꞌarẽm, Tiago dak, João dak. Kabidig̃ pe ip oꞌe. Iparara ip oꞌe kabidig̃ pe jebaꞌarẽm puye.
\p
\v 35 G̃ebuje kabikerereat pewi Deus ekawẽn ip oꞌyaꞌĩjojo.
\p — Xeku okpot — ioꞌe Deus. — Wemunaẽ xeku — ioꞌe. — Kũyjobin cuy epesop yaꞌõ kay — ioꞌe Deus.
\p
\v 36 Ibocewi Jesus acã oꞌjojojo ip. Kuy oꞌjẽm xepxepayũ. Wararaꞌacat pe g̃u apẽn cuk oꞌjojojo ip iap oꞌg̃uwẽn ip- -jewewebe acã. Oꞌjojojo maꞌg̃u ip. Oꞌg̃uwẽn g̃u bit ip.
\p
\v 37 Kuyaje Jesus coꞌa bewi oꞌkop ebapũg̃ayũ eju. 
\v 38 Adeayũ oajẽm Jesus kay. Ag̃okatkat oꞌjekawẽn Jesus eju- -ceparakpeat ip.
\p — Ocemutaybitbinꞌukat — ioꞌe. — Okpot cuy esubuywan! 
\v 39 Pũg̃ ma okpot. Axik pe ikukuk puje, pipim imuyꞌatꞌan ipi ju, jewãwãwãm yaꞌõberen, ibidopabokbek eꞌem, imuwerikwerig̃ — ioꞌe. — Ibuꞌu oꞌe cẽm cebewi — ioꞌe. 
\v 40 — “Axik cuy epeg̃ujẽm okpot pewi,” i kuy oce eweju etaybitbinayũ be. Imẽnpit imujẽm paꞌore oꞌe cebe ip — cebay oꞌe Jesus pe.
\p
\v 41 — Tãh! — ioꞌe. — Eyetabutꞌũm cĩcã okay — ioꞌe Jesus iboceayũ be. — Xipat g̃u eyju — ioꞌe. — Pug̃ũn tak og̃uy eyxe? Ibun ma okpiceg̃ẽ eyetabutꞌũmap cocom! — Jesus oꞌe. — Ekpot cuy etojot okay — Jesus oꞌe cebay be.
\p
\v 42 G̃ebuje axik pipim ag̃okatkatꞌitꞌit oꞌg̃uyꞌat Jesus kay ajẽmjẽm pima. Oꞌg̃uwerik cĩcã.
\p — Ejẽm cuy ag̃okatkatꞌitꞌit pewi — ioꞌe axik pe.
\p Ag̃okatkatꞌitꞌit pewi oꞌg̃ujẽm. Waram g̃uto oꞌg̃ũm cebay be.
\p
\v 43 — Soat podi ma Deus yaꞌõbaca — ioꞌe ip soat oꞌjojojoꞌiayũ.
\p G̃ebuje Jesus oꞌjekawẽn jeweju etaybitbinayũ eju. Adeayũ itabẽg̃bẽg̃ ip oꞌe ijojom, axik oꞌg̃ujẽm puye. G̃ebum osodop ip apẽn Jesus oꞌg̃ujẽm iap kay.
\p
\v 44 — Eyag̃uybaꞌũm g̃u juy waꞌõ kay — ioꞌe cebe ip. — Soat wag̃o õn. Wararaꞌacayũ oũm okay itakomaayũ be — ioꞌe. — G̃ebum cuy epesop waꞌõ kay — ioꞌe cebe ip.
\p
\v 45 Imẽnpit cekawẽn paꞌarẽm oꞌe ceweju etaybitbinayũ xe.
\p — Apẽg̃ape dak cekawẽn? — ioꞌe ip jewewebe ma.
Imẽnpit isũsũn ip oꞌe “Apẽg̃ape dak ekawẽn?” iꞌe am cebe.
\p
\v 46 Ibocewi jewaꞌõxikxig̃ oꞌe ip ceweju etaybitbinayũ.
\p — Abu omuy yaꞌõbuyxiat wuyꞌin wararaꞌacat podi ma? — ioꞌe ip jewewebe.
\m
\v 47 Jesus itaybit osunuy yag̃uy ip iam. Imẽnpuye bekicat oꞌtojot jexe am.
\p
\v 48 G̃ebuje oꞌjekawẽn ceweju ip.
\p — Cexe okukpin puye xipan ite bekicat kug̃ pima, xipan okug̃ tak epeꞌe — ioꞌe. — Xipan okug̃ pima, omudocat kug̃ tak xipan epeꞌe — ioꞌe. — “Õn pit waꞌõbuyxi” iꞌeꞌemꞌũmat yaꞌõbuyxi Deus xe — ioꞌe Jesus.
\p
\v 49 G̃ebuje João oꞌjekawẽn Jesus eju.
\p — Kariwa — ioꞌe. — Ag̃okatkat cuk ocejojojo. Aꞌõbi ma ibiõg̃buk kẽrẽat mujẽmjẽmꞌUk osunuy — ioꞌe. — “Imẽn g̃u bit cuy,” i juk oce cebe, wuywejuꞌũm puye — ioꞌe João.
\p
\v 50 — Imukorẽmrẽm g̃u juy — ioꞌe Jesus pit. — Wuykay itakomaꞌũmat wuykadiat — Jesus oꞌe.
\p
\v 51 Kabi kay waram Jesus euap ekabia ajẽm pin pima: — Jerusalém ka kay juy oju — ioꞌe Jesus jeweju etaybitbinayũ be. Iju pin oꞌe ibo ka kay. 
\v 52 Jaꞌõdujowacayũ oꞌg̃uju jewap. Oꞌju ip. E dag̃ pima ag̃oka be oajẽm ip Jesus nuyapꞌa muxipan am- -Samaria eipi watwat ka be.
\p
\v 53 Ibo ka watwat pit Jesus kay g̃u oꞌe, Jerusalém ka kay cum puye. Ibuꞌu oꞌe ip imuꞌabig̃ jeka be. 
\v 54 Imẽnpuye Tiago oꞌjekawẽn Jesus eju, João dak.
\p — Kariwa — ioꞌe ip. — Ebikuy du ocewebe daxa mudot am kabi bewi ijop ka watwat muyꞌũ ãm? — ioꞌe ip.
\p
\v 55 — Ap — ioꞌe Jesus pit cekay ip jekorepẽn puje. — Epeg̃uyꞌũ g̃u juy ip — ioꞌe.
\m Oꞌjẽm ip ibo ka bewi.
\p
\v 56 Soat kaka dag̃ oekuku ip waraꞌatka dag̃. 
\v 57 E dag̃ cucum pima, ag̃okatkat oajẽm Jesus kay.
\p — Soat ka dag̃ ojekuku eweju ejuap tag̃ — ioꞌe Jesus pe.
\p
\v 58 — Oweju du eku pin? — ioꞌe Jesus. — Kak ikũykẽy — ioꞌe. — Wasũ topipe. Soat wag̃o õn. Imẽnpit yaꞌũmg̃u odopdopapꞌa. Eku pin tu oweju? — ioꞌe cebe.
\p
\v 59 G̃ebuje Jesus oajẽm waraꞌat ag̃okatkat kay.
\p — Oweju juy ejeku — ioꞌe cebe.
\p — G̃asũ g̃u. G̃uyjom acã — ioꞌe. — Ãg̃ webayꞌũm ojokot — ioꞌe cebe.
\p
\v 60 — Ãg̃ Deus ekawẽn kayꞌũmat jebadipyũꞌũmꞌũm jokot — ioꞌe. — Ẽn pit oweju juy ejeku — ioꞌe. — Deus soat kukukan jeꞌe iꞌeꞌeꞌukan cuy eg̃uy — ioꞌe cebe.
\p
\v 61 Waraꞌat ag̃okatkat oajẽm Jesus kay.
\p — Kariwa, eweju juy ojeku — ioꞌe. — Odukꞌa beat pe buk õn jekawẽn. “Cum puk õn,” i buk oce cebe ip — ioꞌe Jesus pe.
\p
\v 62 — Biopak kug̃ ipi kotkon pima cekorepẽn puje, ipi kocap wakẽnwakẽnꞌi kuka oꞌe — ioꞌe Jesus pit. — Imẽnpuxim etabut am ebuꞌu bima, teꞌe ma kuka ece Deus soat kukukan jeꞌe iap ekawẽn muwẽnuwẽnꞌukan — ioꞌe Jesus.
\b
\c 10
\p
\v 1 Iboap tomukadi wuykukukat Jesus 70 beayũ oꞌtaẽ kawẽn idipat muwẽn ãm adeayũ be. Xepxepxem ma ip oꞌg̃uju jewap.
\p — Soat kaka dag̃ cuy epeju — ioꞌe cebe ip. — Õn tak oju eynomuju — ioꞌe cebe ip. 
\v 2 — Jeymuju õn apẽn ag̃okatkat jekat peatꞌa bum jebuywatwatꞌukat mujuap puxim — ioꞌe. — Apẽn yaꞌade opop kat pe kadaiꞌa yaopatꞌa iap puxim ade opop ipi ju Deus ekawẽn itaybitꞌũmayũ. Ade g̃u bit Deus ekawẽn muwẽnuwẽnꞌukayũ. Imẽnpuye imuwẽnuwẽnꞌukayũ kukat eju juy epeyekawẽn- -Deus eju. “Adeayũ juy eg̃uju ekawẽn muwẽn ãm,” i juy epeꞌe cebe — Jesus oꞌe.
\p
\v 3 — Epeju juy g̃asũ — ioꞌe. — Õn ma dak jeymuju. Deus ekawẽn muwẽnuwẽn pima, ovelhaꞌitꞌit puxim epesop- -widayũ pidaseat puxim, ikẽrẽat kay jĩjãayũ pidase buye — ioꞌe.
\p
\v 4 — Sacola g̃u juy epetujowat eyjuap tag̃, dinheiro mũn tak kaꞌũma, eyeiuk tak kaꞌũma — ioꞌe. — Ibun g̃u juy epesop kawẽnwẽn wararaꞌacat eju e bidase — ioꞌe.
\p
\v 5 — Ukꞌa be eyõm puje, “Deus cuy ijaꞌa watwat jukuk kabaꞌũm ip jedop am,” i juy epeꞌe — ioꞌe. 
\v 6 — Xipan jewewekug̃ ip pima, kabaꞌũm ip jeedop ig̃oꞌa watwat. Jewewekay itakoma ip pima bit, teꞌe ma “Deus cuy ijaꞌa watwat jukuk kabaꞌũm ip jedop am,” i epeꞌe — ioꞌe cebe ip.
\p
\v 7 — Ig̃oꞌa be ma epesop ukꞌa be — ioꞌe. — Soat cuy epejoꞌo ajo ip oꞌg̃ũm eywebe iap. Soati juy epetikõn ajo ip oꞌtiũm eywebe iapti. Eysũsũn g̃u juy epesop eyxat pu am cexewi ip. Cekapikaptei juy ateida kapikpikꞌukat pe — Jesus oꞌe.
\p
\v 8 — Ag̃oka be eyajẽm puje juy ajo ip oꞌg̃ũm eywebe iap epejoꞌo xipan ip eykug̃ pima. 
\v 9 Iwãtaxipipiayũ juy epeg̃uꞌada- -ibo ka watwat. “G̃axĩn ma Deus soat kukukan jeꞌe,” i juy epeꞌe cebe ip — ioꞌe.
\p
\v 10 — Ag̃oka be eyajẽm puje, “Epeõm cuy odukꞌa be,” iꞌeꞌemꞌũm ip pima ukꞌa ukpibubu dag̃ cuy epeju. 
\v 11 “Kaꞌwi opop ocei eju- -eyka beat kaꞌwi,” i juy epeꞌe cebe ip. “Kaꞌwi mududum ocei bewi eyukpiwat puye, Deus ekawẽn co pinꞌũm puye,” i juy epeꞌe cebe ip. “Deus soat kukukan jeꞌe,” i juy epeꞌe. “Eyetaybit g̃u iboam, wekawẽn kayꞌũm puye,” i juy epeꞌe cebe ip — ioꞌe Jesus. 
\p
\v 12 — Icẽmãn õn eꞌem eywebe. Deus kũyjobitꞌũmayũ be ipiatpiꞌajoap kabia bima, Sodoma ka watwat pe ipiat supiꞌajoat. Ixeyũ be iap podi ma bit ibo ka watwat pe ipiat supiꞌajoat, eyekawẽn com ip ibuꞌu buye — ioꞌe Jesus.
\p
\v 13 G̃ebuje Jesus waraꞌat kaka watwat oꞌg̃uwẽn.
\p — Karem ma ipiat epesupiꞌajo jĩjã, Corazim ka watwat — Jesus oꞌe. — Karem ma ipiat epesupiꞌajo jĩjã, Betsaida ka watwat — ioꞌe. — Kaꞌũma buk epejojojoiap cuk adi og̃ubapukpuk eyetabutpe eyka be bima — ioꞌe. — Tiro ka be iboap mubapuk pima, Sidom ka be dak, kajuk ikẽrẽat mujurũg̃rũg̃ap oꞌjepere ip ibo ka watwat. Itabut kajuk ip oꞌe Deus kay — ioꞌe. — Ibo ka be iboap mubapuk pima, kajuk ikurususucat oꞌg̃uõm ip jedotim. Daxadaypi be dak kajuk oꞌe ip kaxikxikꞌi. Imẽn kajuk oꞌe ip oceg̃uycũg̃ cĩcã ikẽrẽat kug̃ puye iap mubapuk am jebureyũ be, g̃asũ bit ikẽrẽat ag̃ujurũg̃ g̃u iap mubapuk am tak — ioꞌe.
\p
\v 14 — Deus kũyjobitꞌũmayũ be ipiatpiꞌajoap kabia bima, Tiro ka watwat pe ipiat supiꞌajoat, Sidom ka watwat pe dak. Ixeyũ be iat podi ma bit eywebe ipiat supiꞌajoat — ioꞌe Jesus.
\p
\v 15 — Cafarnaum ka watwat — ioꞌe. — Deus jeymuyu g̃u kabi kay — ioꞌe Jesus. — Jeymukop ipiatꞌajojoap kay — ioꞌe.
\p
\v 16 — Eyekawẽn kayayũ wekawẽn tak ip cekay — ioꞌe jeweju etaybitbinayũ be. — Eykayꞌũmayũ õn tak ip okay g̃u. Okayꞌũmayũ omudocat tak ip cekay g̃u — Jesus oꞌe. — Epeju juy g̃asũ — ioꞌe. — Wekawẽn cuy epeg̃uwẽnuwẽn soat ka watwat pe — ioꞌe.
\p — Haꞌa — ioꞌe ip.
\m Ibun cĩcã ip oekuku kawẽn idipat muwẽnuwẽn.
\p
\v 17 G̃ebuje icokcok cĩcã ip oꞌjepit Jesus kay — 72 beayũ. Oꞌjekawẽn ip Jesus eju.
\p — Kariwa, ibiõg̃buk kẽrẽayũ kũyjobit ocaꞌõ kay, aꞌõbi oceju jekukum puye — ioꞌe ip Jesus pe.
\p
\v 18 — Hm hm — ioꞌe Jesus. — Kabi bewi Satanás atꞌanap ojojojo. Dao ma oꞌat xiriririkiat puxim — Jesus oꞌe.
\p
\v 19 — Eyaꞌõpicũg̃cũg̃ cuy epesop waꞌõ kay — Jesus oꞌe. — Waꞌõbacaap cuy og̃ũm eywebe. Waꞌõbi juy epeku soat em. Puybu epesubumucak tũypiatpu. Dat tak epeg̃ucak. Kaꞌũma bit jeyaoka. Eykay itakomaayũ dak oꞌe g̃u eywebe, waꞌõbi eyju jekukum puye. 
\v 20 Imẽnpit eycokcog̃ cuy epesop ibiõg̃buk kẽrẽat cẽmcẽm eyaꞌõbi iap kay g̃u- -kabi beatup pe eybutet ibararak opop iap kay acã — Jesus oꞌe.
\p
\v 21 Jesus Ibiõg̃buk xipacat aꞌõbi icokcok cĩcã oꞌe g̃ebuje bit.
\p G̃ebuje Jesus oꞌjekawẽn Deus eju.
\p — Bay — ioꞌe. — Ẽn acã soat kukukat- -kabi beacat kukukat, ipi juacat kukukat tak — ioꞌe. — Jewexe itaybit cĩcãayũ xewi eg̃unẽmiap eg̃ubapuk itaybitꞌũmayũ be — ioꞌe. — Ixeyũ be acã iboap eg̃ubapuk, imẽn ebikuy buye, xipat exe buye dak — ioꞌe Deus pe.
\p
\v 22 — Soat ma juk webay oꞌg̃ũm owebe — ioꞌe. — Wararaꞌacat g̃u itaybit cĩcã abu Deus ipot iam- -cebay acã. Imẽnpuxim wararaꞌacat g̃u itaybit cĩcã abu ipot ebay iam- -ipot acã. Iboap mubapuk am ipot ibikuy bima acã, wararaꞌacat itaybit jeꞌe abu Deus ipot iam — Jesus oꞌe cebe ip.
\p
\v 23 G̃ebuje Jesus jebidadam oꞌjekawẽn jeweju etaybitbinayũ eju wararaꞌacat pe yaꞌĩjoap puxim.
\p — Eycokcok wekawẽn cocom puye — ioꞌe. 
\v 24 — Kuyje ajo eyju ijojomap co pin cĩcã osodop ip ade Deus ekawẽn muwẽnuwẽnꞌukayũ, ika kukukayũ dak. Imẽnpit oꞌjojojo g̃u ip. Eymukũyjojomap co pin cĩcã ip osodop. Imẽnpit oꞌjekũyjo g̃u ip — Jesus oꞌe. 
\p
\v 25 G̃ebuje Moisés ekawẽn imutaybitbinꞌukat oajẽm Jesus kay. Oꞌjekawẽn Jesus eju cekawẽn puyxijo ojuy.
\p — Kariwa — ioꞌe. — Apẽntak oce soat em Deus xe onuy ãm? — ioꞌe.
\p
\v 26 — Apẽn eꞌem wuyawẽwẽap ekawẽntup? Apẽn iboaptup wuymutaybitbin exe? — Jesus oꞌe.
\p
\v 27 — Imẽn eꞌem wuyawẽwẽaptup — ioꞌe ag̃okatkat.
\mi — Deus kay jĩjã juy epesop, i. Ixe Deus eykukukat, i. Ixe bikuyap tag̃ jekukum pima, ixe kay jĩjã epesop; soat em xipacat kay g̃ebum pima dak; yaꞌõ kay kũyjobit pima dak; ixe ag̃uy dag̃ jewag̃uyg̃uy bima dak, i. Imẽn cuy epeku, i. Xipan cuy eyxeat epejukuk eyewekukap puxim, i.
\m Imẽn eꞌem wuyawẽwẽap ekawẽntup — ioꞌe Moisés ekawẽn imutaybitbinꞌukat.
\p
\v 28 — Icẽmãn ẽn eꞌem — Jesus ma oꞌe. — Imẽn eku buje, soat em Deus xe ecesũy etait — ioꞌe.
\p
\v 29 — Abu oxeat pit? — ioꞌe ixe bit jewedayo ojuy.
\p
\v 30 Imẽnpuye Jesus wuymutaybitbinap ekawẽn oꞌg̃uwẽn abu wuyxeat iam imutaybit am.
\p — Ag̃okatkat kopkom oꞌe Jerusalém ka bewi — Jesus oꞌe cebe. — Ixe ag̃okatkat cu ojuy Jericó ka kay. Judeu osunuy. Cucum pima ibukurukayũ ixe oꞌtopabijuk e dag̃.
\p — Oajẽm ip cekay. Toti oꞌjuꞌuk ip. Soat oꞌjat ip cexewi ibubut. Oꞌyaokaka jĩjã ip. Jeꞌũjeꞌũm ip oꞌsuiwat ebidakpe.
\p
\v 31 — Paĩ cucum oꞌe ixe e dag̃. Jeꞌũjeꞌũmat co buje, oꞌkap waraꞌat e bitako dag̃. Oꞌsubuywan g̃u — Jesus oꞌe. 
\v 32 — Imẽntak paĩ buywatwatꞌukat oajẽm ixe e dag̃ cucum pima. Jeꞌũjeꞌũmat co buje, oꞌkap waraꞌat e bitako dag̃- -paĩ buywatwatꞌukat. Oꞌsubuywan g̃u — ioꞌe.
\p
\v 33 — G̃ebuje bit Samaria eipi bewiat oajẽm cucum pima ixe e dag̃. Samaria eipi watwat Judeuyũ kayꞌũm cĩcã ip. Ixe jo buje, itabotaidabotbot oꞌe jeꞌũjeꞌũmat kay. Oꞌju cekay taxijo ojuy. 
\v 34 Posũg̃ti oꞌtimõg̃ werowero be- -uvaꞌabidi, ixepti dak. Werowero oꞌjomũnmũn pag̃õm.
\p — Jeꞌũjeꞌũmat oꞌtujowat powatwat ajẽmjẽmapꞌa kay. Jejumento akpi jeje oꞌtujowat. Xipan ixe oꞌjukuk ig̃oꞌa be.
\p
\v 35 — Kuyaje xepxep jedinheiro oꞌjat isurũg̃at, teibog̃at, prata mug̃ẽg̃ẽ. Oꞌg̃ũm ukꞌa iwat pe jeꞌũjeꞌũmat kukapteim.
\p — “Xipan cuy ite ejukuk,” ioꞌe ukꞌa iwat pe — ioꞌe Jesus. — “Ijop edinheiroꞌũm pima, waraꞌat og̃ũm ewebe wedinheiro wepit puje,” Samaria eipi bewiat oꞌe — ioꞌe Jesus.
\m Imẽn Jesus wuymutaybitbinap ekawẽn oꞌg̃uwẽn. 
\p
\v 36 — Ebapũg̃ayũ jeꞌũjeꞌũmat oꞌjojojo- -ibukurukayũ emuaokaka — ioꞌe. — Abu xipan oꞌjukuk jexeat kukap puxim? — Jesus oꞌe.
\p
\v 37 — Oꞌsubuywanꞌiat — ioꞌe Jesus pe.
\p — Ixe ekukuap coꞌi juy ejeku — Jesus oꞌe. — Wararaꞌacat puywatwatꞌukan cuy eg̃uy — ioꞌe Moisés ekawẽn imutaybitbinꞌukat pe.
\p Oꞌjẽm Jesus xewi.
\p
\v 38 Waram pima Jesus oõm ag̃oka be jeweju etaybitbinayũ eju. Oꞌju ip ayacat kay- -Marta kay.
\p — Odukꞌa be juy epesop — Marta oꞌe Jesusyũ be.
\p — Ma — ioꞌe ip.
\p
\v 39 Marta dukꞌa be ip osodop. Marta kibit tak ukꞌa be osunuy. Ikibit putet Maria i osunuy.
\p G̃ebuje Maria Jesus ekawẽn oꞌyaꞌĩjojo jĩjã jewemutaybin ojuy. Maria ma xikꞌi osunuy Jesus xe cekawẽn cocom. 
\v 40 Marta bit kapikpig̃ osunuy ixat tatam, ixat tojotjon tak. Yag̃uybabiꞌũm oꞌe jekapikap kay cekapikap ade buye.
\p G̃ebuje Marta oꞌjekawẽn Jesus eju.
\p — Kariwa — ioꞌe. — Akꞌg̃u du ẽn okay? Okibit oibuꞌun obuywat am. Wag̃epũg̃ ma õn wuyxat tatam, wuyxat tojotjon — ioꞌe. — “Ewag̃o juy esubuywan,” i juy ece cebe — ioꞌe Jesus pe.
\p
\v 41 — Ap — ioꞌe Jesus Marta be. — G̃ebum cĩcã ẽn wuyxataap kay- -ekapikap kay. Ag̃uykoreren soat kay ekapikap kay. 
\v 42 Maria bit wekawẽn co pin cĩcã. Soat em g̃u wuyxat dopdom. Soat em pit Maria g̃ebum wekawẽn kay jeenuy — ioꞌe Jesus.
\b
\c 11
\p
\v 1 Waram pima Jesus oꞌjekawẽn Deus eju. Pereh. Oꞌjepere.
\p G̃ebuje ceweju etaybitbinat oꞌjekawẽn ceweju- -12 beayũꞌin.
\p — Kariwa — ioꞌe. — João kuy jeweju etaybitbinayũ oꞌg̃utaybin kawẽn ãm Deus eju. Imẽnpuxim oceju dak cuy ocemutaybin ece — ioꞌe Jesus pe.
\p
\v 2 — Imẽn cuy epeꞌe, Deus eju kawẽnwẽn pima — Jesus oꞌe.
\p — “Bay, soat cuy ip jeedop ibuyxim ebutet kug̃,” i juy epeꞌe Deus pe- -kabi beat pe — ioꞌe. — “G̃axĩn ma juy soat kukukan eg̃uy,” i dak cuy epeꞌe cebe — ioꞌe.
\p
\v 3 — “Soat kabia ocexan cuy eg̃ũmg̃ũm ocewebe,” i dak.
\p
\v 4 — “Oceju g̃ebum g̃u apẽn waraꞌacat cuk adi warẽmtag̃ ocekukiap kay,” i dak. “Imẽnpuye g̃ebum g̃u juy eg̃uy apẽn cuk adi ikẽrẽat oceg̃ujurũg̃rũg̃ iap kay,” i dak cuy epeꞌe cebe.
\p — “Ocaꞌõmubacacan cuy eg̃uy ocewebe ikẽrẽat kukap puxim,” i dak cuy epeꞌe — ioꞌe.
\p — Imẽn ma juy epeꞌe Deus eju kawẽnwen pima — Jesus oꞌe.
\p
\v 5 G̃ebuje Jesus waram adeayũ oꞌg̃utaybin.
\p — Apẽn kuka epeꞌe powatwat ajẽm puje pãoꞌa kug̃ꞌũm pima? — ioꞌe. — Cum acoꞌi eyju eybure kay iximadakpe. “Obure, pãoꞌa kay õn pũg̃ꞌa ma,” i acoꞌi epeꞌe cebe. 
\v 6 “Waraꞌat obure oajẽm odukꞌa be jekuap tag̃wi,” i acoꞌi epeꞌe cebe. 
\v 7 “Yaꞌũmg̃u pãoꞌa. Yaꞌaꞌe bima oyaũm kajuk,” i acoꞌi epeꞌe cebe. Ixe eybure jeꞌe eywebe badiwi: “Okaykay g̃u juy,” i. “Kuy odukꞌa exĩntabi otomudip,” i du jeꞌe? “Webekitkit kuy ixexet,” i du jeꞌe eywebe? “Kuy õn poꞌi” i du jeꞌe? “Okop paꞌore yaũm ãm ewebe,” i du jeꞌe? Imẽn tu jeꞌe eywebe? — Jesus oꞌe. 
\v 8 — Kaꞌũma! Imẽn g̃u jeꞌe — ioꞌe. — Eybure jeꞌkop yaũm ãm eywebe. Eybure buye g̃u yaũm eywebe. Ibun eyju yaojuyjuy buye bit kuka oꞌyaũm — ioꞌe.
\p
\v 9 — Icẽmãn õn eꞌem eywebe — ioꞌe. — Deus xewi juy epejoojuy. Iojuyjuy bima, epejat. Ixe xewi juy epejokudada. Ikudadam pima epetobuxik. Ixe xewi iojuyjuyap xĩntabi be tag̃tag̃tag̃ꞌiap puxim. Xĩntabi be tag̃tag̃tag̃ꞌi bima, tomudipꞌuk ip eymuõm ãm. 
\v 10 Soat ojuyjuyꞌukat jeꞌjat; soat kudadaꞌukat tobuxik; xĩntabi be tag̃tag̃tag̃ꞌiat pe xĩntabi tomudipꞌuk ip — ioꞌe.
\p
\v 11 — Puybu g̃u juy epesubuũm eyipotpot pe “Axima kay õn” iꞌe buje. 
\v 12 “Sapokay dopsa kay õn” iꞌe buje, dat epeg̃ũm g̃u cebe. 
\v 13 Eyju ma xipacat ũmũm eyipotpoyũ be ikẽrẽat kug̃ maꞌg̃u eyju. Eyju xipacat ũmũmap podi ma eyebayat pit xipacat ũmũm eywebe- -kabi beat. Ibiõg̃buk xipacat jeꞌg̃ũm soat pe jexewi iojuyjuyꞌukat pe — ioꞌe Jesus. 
Imẽn Jesus ijodiacat oꞌg̃utaybin.
\p
\v 14 G̃ebuje Jesus ibiõg̃buk kẽrẽat oꞌg̃ujẽm ag̃okatkat pewi. Ixe ibiõg̃buk kẽrẽat ag̃okatkat muydeꞌũmꞌũmꞌuk osunuy. Cekawẽn paꞌore osunuy ag̃okatkat.
\p Ag̃okatkat pewi ibiõg̃buk kẽrẽat cẽm puje bit, xipan oꞌjekawẽn. Imẽnpuye adeayũ icokcok cĩcã ip oꞌe. 
\v 15 Wararaꞌacayũ bit oꞌjekawẽn ip jewewebe.
\p — Belzebu aꞌõbi Jesus ibiõg̃buk kẽrẽat mujẽmjẽm cebewi- -ibiõg̃buk kẽrẽayũ kukat aꞌõbi- -Satanás aꞌõbi — ioꞌe ip napa ma.
\p
\v 16 — Kaꞌũma buk ocejojojoiap cuy eg̃ubapuk ẽn Deus aꞌõbi ibiõg̃buk kẽrẽat mujẽmjẽm iap mubapuk am ocewebe — ioꞌe ip wararaꞌacat warẽmtag̃ cekuap ojuy.
\p
\v 17 Imẽnpit Jesus itaybit osunuy apẽn ixeyũ jewag̃uyg̃uy iam.
\p G̃ebuje Jesus oꞌjekawẽn ceweju ip.
\p — Pũg̃ eipi watwat jeweweju ma jewaoka buje, jewemuꞌũm ip. Imẽnpuxim pũg̃ꞌa watwat ukꞌa watwat jeweweju ma jewaoka buje, jewemuꞌũm ip — ioꞌe. 
\v 18 — Imẽnpuxim Satanás ebekitkit jeweweju ma jewaoka buje, jewemuꞌũm ip. Jewaoka buje, ikoro g̃u ip jeꞌe. Imẽnpuye “Belzebu aꞌõbi ẽn ibiõg̃buk kẽrẽat mujẽmjẽm ijodiat pewi,” i eyju eꞌem napa ma owebe — ioꞌe. 
\v 19 — Belzebu aꞌõbi õn ibiõg̃buk kẽrẽat mujẽmjẽm pima, abu aꞌõbi dak eyebekitkiyũ imujẽmjẽm ip? Jewemug̃uykukukum eyju iap mubapukpug̃ cĩcã eyebekitkiyũ. 
\v 20 Belzebu aꞌõbi g̃u õn ibiõg̃buk kẽrẽat mujẽmjẽm- -Deus aꞌõbi acã. Deus soat kukukan jeꞌe iap mubapukpug̃ õn eywebe imujẽmjẽm pima — ioꞌe Jesus.
\p
\v 21 G̃ebuje Jesus meg̃apekawẽnku boku iap oꞌg̃ubapuk cebe ip.
\p — Ibacaat nobano kug̃ jedukꞌa wiwim pima, ibukurukat pe iõm paꞌore tukꞌa be ibubut pu am. 
\v 22 Ibacaat podiat ajẽm puje bit ixe kuka ibacaat oꞌg̃uwun pipim jeõm ãm. Ibaca jĩjãat oꞌe kuka cebe. Cenobano kuka oꞌjat. Soat ibubut kuka oꞌjat. Ibubut kuka oꞌg̃uꞌẽꞌẽ jebureyũ be — ioꞌe.
\p
\v 23 — Okayꞌũmat itakoma okay. Imuꞌawerom obuywatwatꞌukꞌũmat imuypõg̃põg̃põg̃ — ioꞌe.
\p
\v 24 — Ag̃okatkat pewi ibiõg̃buk kẽrẽat cẽm puje, idibiꞌũmat tag̃ jekukum jebodoyap kudadam. Jebodoyap tobuxikꞌũm pima kuka oꞌe jewebe ma “Jepin ma õn kuy bima onuyap kay,” i — Jesus oꞌe.
\p
\v 25 — Jepitpin. Yajẽm puje, ixe ag̃okatkat tobuxikxig̃. Kaꞌũmg̃u ibiõg̃buk kẽrẽat opop ixe ag̃okatkat pe g̃asũ. Ixe ag̃okatkat ukꞌa buxim- -yabiꞌõg̃ꞌõg̃atꞌa buxim- -yaxipanatꞌa buxim — ioꞌe.
\p
\v 26 — Ibocewi ixe ibiõg̃buk kẽrẽat cẽmcẽm maꞌg̃uto. 7 beayũ dobuxikxig̃- -ibiõg̃buk kẽrẽayũ dobuxikxig̃- -cebodi ma xipatꞌũmayũ dobuxikxig̃. Ixeyũ dak õmõm ixe ag̃okatkat pe 7 beayũ. Kuy bima ixe ag̃okatkat tadaybot osunuy. G̃asũ bit ibodi ma tadaybot oꞌe — Jesus oꞌe.
\p
\v 27 Iboam iꞌe buje ayacat oꞌjewãwã Jesus kay- -adeayũ parakpe
at.
\p — Icokcok cĩcã juy exi- -emukapat- -emuytititꞌukat! — ioꞌe Jesus pe.
\p
\v 28 — Hm hm — Jesus oꞌe. — Deus ekawẽn cocoꞌukat pit oxi cokcokap podi ma icokcok- -cekawẽn tag̃ jekukuꞌukat tak — ioꞌe.
\p
\v 29 G̃ebuje Jesus oꞌjekawẽn adeayũ be- -jakokoreren jeꞌaweroromayũ be.
\p — Xipatꞌũm cĩcã g̃asũacat! — ioꞌe Jesus. — “Kaꞌũma buk ocejojojoiap cuy eg̃ubapuk ocewebe,” i eyju eꞌem owebe — ioꞌe. — “Ẽn Deus aꞌõbi jekukum iap cuy eg̃ubapuk ocewebe,” i eyju teꞌe ma eꞌem. Ade g̃u og̃ubapuk eywebe epejojo g̃u buk iap. 
\v 30 Pũg̃ ma og̃ubapuk eywebe. Jonas kay juy g̃ebum epesop. Kuy bima Deus Jonas oꞌg̃uju Deus soat podi ma yaꞌõbaca iap mubapuk am Nínive ka watwat pe. Deus Jonas waram g̃uto oꞌg̃utait ceꞌũap tomukadi soat podi ma waꞌõbaca iap mubapuk am ig̃o ka watwat pe. Imẽnpuxim Deus omudot eykay g̃asũ dak. Õn soat wag̃o — ioꞌe.
\p
\v 31 — Kaxi etajoreg̃atka kukat jeꞌbapuk soat etabixe- -ayacat — ioꞌe. — “Teyũku ikẽrẽat kug̃ oxe,” i Deus eꞌemap kabia bima, ixe ka kukat jeꞌbapuk — ioꞌe. — G̃asũacat tak jeꞌbapuk ixe kabia be. “Ikẽrẽat kug̃ eyju Deus xe,” i jeꞌe ibo ka kukat ixeyũ be. Ixe ayacat oajẽm wũyatka bewi Salomão ekawẽn co am- -itaybit cĩcãat ekawẽn co am. Õn eyxe g̃asũ. Salomão etaybicap podi ma õn wetaybit cĩcã. Imẽnpit eyju wekawẽn kay g̃u — Jesus oꞌe.
\p
\v 32 — “Teyũku ikẽrẽat kug̃ oxe,” i Deus eꞌemap kabia bima, Nínive ka watwat jeꞌbapuk soat etabutpe. Ixeyũ jeꞌe g̃asũacat pe: “Eyju ikẽrẽat kug̃ Deus xe,” i. Nínive ka watwat oibuꞌun ikẽrẽat mujurũg̃ ãm. Ikẽrẽat mujurũg̃rũg̃ap oꞌjepere ip Jonas pe Deus ekawẽn muwẽn puje. Õn eyxe g̃asũ. Jonas etaybicap podi ma wetaybit cĩcã Deus ekawẽn muwẽn ãm. Imẽnpit eyju wekawẽn kay g̃u — Jesus oꞌe.
\p
\v 33 — Imusop puje, lamparina ag̃unẽm g̃u ico diotpe. Ipikũykũy be g̃u ajomuy. Um acã ajomuy ukꞌa be õmõmayũ be soat co am — Jesus oꞌe. 
\v 34 — Imẽnpuxim wuyeta lamparina buxim. Wuyetadip pima, soat ijo but wuywebe. Kabia dag̃ ajeku. Wuyetakẽrẽ bima, ijo baꞌore wuywebe. Kabiok tag̃ ajeku. Kabiok tag̃ jekukuap ikẽrẽat mujurũg̃rũg̃ap puxim. 
\v 35 Ag̃ cuy epesop ikẽrẽat mujurũg̃ap puxim. 
\v 36 Ikẽrẽat mujurũg̃rũg̃ꞌũmap kabia be jekukuap puxim. Ikẽrẽat mujurũg̃rũg̃ꞌũm pima, kabia buxim wuyju — Jesus oꞌe.
\p
\v 37 Jesus ekawẽn epere buje Fariseu oꞌjekawẽn ceweju.
\p — Ejot cuy odukꞌa be jekõn ãm — ioꞌe.
\p Oꞌju ceweju. Oabik jekõn ãm. 
\v 38 Jekõn pima Jesus Judeuyũ babi dag̃ g̃u oꞌjewebuwuy. Imẽnpuye Fariseu itabẽg̃ oꞌe ijojom.
\p
\v 39 G̃ebuje Jesus oꞌjekawẽn ceweju ip.
\p — Fariseuyũ — ioꞌe. — Kacũg̃kadi acã eyju kopo wuywuy, prato wuywuy dak. Yabi bit kaꞌũma. Yabiokok cĩcã. Prato buxim eyju dak eyokok, eyetabikuku jĩjã buye, ikẽrẽat mujurũg̃xi buye dak — ioꞌe. 
\v 40 — Eyag̃uybaꞌarẽm! Kacũg̃kadiat oꞌg̃ug̃ẽiat badiat tak oꞌg̃ug̃ẽ. 
\v 41 Eybubutꞌin cuy epeg̃ũm tadaybotbocayũ be. Iũmũm pima, xipat epesop Deus xe — ioꞌe.
\p
\v 42 — Karem ma ipiat epesupiꞌajojo — Jesus oꞌe Fariseuyũ be. — Soat em eybubut muꞌawerorom 10 be. Pũg̃at ũmũm eyju Deus pe. Waraꞌat pit eyju imuxipanpan eybubun. Eyju puybit mukunukunaptup ũmũm Deus pe, arrudadup ũmũm tak, posũg̃ puximatup ũmũm tak, puybit peaptup ũmũm tak. Xipat eywebe iboap ũm ãm Deus pe. Imẽnpit cedag̃ g̃u wararaꞌacat kug̃ eyju- -warẽmtag̃ ma! Deus ikukpin g̃u eyxe. Imẽn xipat g̃u! Xipan cuy wararaꞌacat epejukuk. Ikukpin cuy Deus epejukuk — ioꞌe.
\p
\v 43 — Karem ma ipiat epesupiꞌajojo, Fariseuyũ — Jesus oꞌe. — Eyju abik ojuy yaꞌõbuyxiat tũyap pe Deus eju kawẽnwẽnapꞌa be. Eycokcok cĩcã wararaꞌacat pe ibuyxim eykuk am soat etabutpe — ioꞌe.
\p
\v 44 — Karem ma ipiat epesupiꞌajojo, Fariseuyũ — Jesus oꞌe. — Eyetaybit Judeu be ceꞌũat etaypi jeje cexĩg̃xĩg̃pi iam. Eyju wuyjuyũꞌũmꞌũm etaypi buxim ibaꞌarẽmat puxim. Wuyju itaypi dag̃ kapkam itaypi opop ijoce iam wuyetaybitꞌũm puye. Imẽnpuxim eyju wararaꞌacat pe ikẽrẽat mujurũg̃an — ioꞌe.
\p
\v 45 G̃ebuje Moisés ekawẽn imutaybitbinꞌukat oꞌjekawẽn Jesus eju.
\p — Tapu, ẽn oceju dak ocemukorẽmrẽm imẽn eꞌem Fariseuyũ be bima — ioꞌe.
\p
\v 46 — Hm hm — Jesus oꞌe. — Eyju dak karem ma ipiat epesupiꞌajojo — ioꞌe. — Wararaꞌacat ukxabi be ipoxiat mõg̃mõg̃at puxim eyju. Eyju eꞌem wararaꞌacat pe: “Moisés ekawẽn tag̃ cuy epeku- -soat tag̃” i. Imẽnpit soat tag̃ g̃u eyju dak jekukum ixe ekawẽn tag̃ — ioꞌe.
\p
\v 47 — Karem ma ipiat epesupiꞌajojo — ioꞌe. — Eydobuyũꞌũmꞌũm ade Deus ekawẽn muwẽnuwẽnꞌukayũꞌũmꞌũm oꞌyaoka. Ixeyũꞌũmꞌũm etaypi mubapukapꞌa epeyamuy witaꞌa yadipatꞌa. 
\v 48 Ig̃oꞌa muymuy bima, “Ocedobuyũꞌũmꞌũm cũg̃ ma oekuku,” i eyju eꞌem napa ma. Ixeyũꞌũmꞌũm ekukuap tag̃ eyju dak warẽmtag̃ ma jekukum. 
\v 49 Imẽnpuye kuyje Deus oꞌe:
\mi Wekawẽn muwẽnuwẽnꞌukayũ juy og̃uju cekay ip waꞌõdujowatwatꞌukayũ dak, i. Pũg̃pũg̃ ip yaoka ixeyũꞌin, i. Ipiat supiꞌajoat ip wararaꞌacayũ be dak, i — Jesus oꞌe.
\m — Imẽn Deus oꞌe kuyje, itaybit soan puye. 
\v 50-51 Deus ipiat supiꞌajoat g̃asũacat pe cekawẽn muwẽnuwẽnꞌukayũꞌũmꞌũm oꞌyaoka buye. Kuy jĩjã ixeyũꞌũmꞌũm oꞌyaoka ip. Deus ipi mujurũg̃ puje, ixeyũꞌũmꞌũm oꞌyaoka ip. Koap Abelꞌũm oꞌyaoka ip. Kanomũm Zacariasꞌũm oꞌyaoka ip. Deus eju kawẽnwẽnapꞌa be bima oꞌyaoka ip, iõhõ mupikupikap xe bima. Deus ipiat supiꞌajoat g̃asũacat pe ikẽrẽat oꞌg̃ujurũg̃rũg̃ ip puye — ioꞌe.
\p
\v 52 — Karem ma ipiat epesupiꞌajo — Jesus oꞌe Moisés ekawẽn imutaybitbinꞌukayũ be. — Eyju wararaꞌacat mug̃uykukukum kawẽn icẽmãn itaybicap puxim ip. Eyetabut g̃u kawẽn icẽmat kay. Eyju wararaꞌacat mubuꞌuꞌun tak kawẽn icẽmat kayap puxim — ioꞌe.
\p
\v 53 Ibocewi Jesus cẽm puje itakoma jĩjã oꞌe ip Jesus kay Moisés ekawẽn imutaybitbinꞌukayũ, Fariseuyũ dak. Jesus oꞌjomuymuy ip. Jewaꞌõmukorẽmrẽm oꞌe ip. Ixe ekawẽn cocom cĩcã ip oꞌe. Yawẽg̃mukẽrẽrẽn ojuy ip. Cekawẽn puyxijo ojuy ip. 
\v 54 Ixe warẽmtag̃ eꞌem pima, kuka oꞌjomuymuy ip. Warẽmtag̃ eꞌem pima, kuka oꞌyawẽg̃mukẽrẽrẽn ip.
\b
\c 12
\p
\v 1 Tak g̃u ip oꞌju Jesus kay- -ade jĩjã. Jewemucakucakan ip oꞌe, ade buye.
\p G̃ebuje Jesus oꞌjekawẽn jeweju etaybitbinayũ be- -12 beayũ be.
\p — Ag̃ cuy epesop Fariseuyũ be eymug̃uykukuap puxim — ioꞌe. — Ixeyũ emumutaybitbinap pãoꞌa muyuhuhuaptõm puxim. Ixeyũ emumutaybitbinap tag̃ g̃u juy epeku — ioꞌe. — Jewexe ip xipat. 
\v 2 Yajuyjuyat jewedobuxik g̃uyjom. Ibaꞌarẽmat ibapuk jeꞌe soat xe. 
\v 3 Kabiok tag̃ epeyekawẽn iap yaꞌĩjojo ip kabiam. Badiatꞌa be eybidadadam epeyekawẽn iap g̃uwẽn ip soat aꞌõpiju — ioꞌe. — Imẽneju wararaꞌacat mug̃uykukukum g̃u juy epesop xipat oceju iam. Fariseuyũ ekukuap puxim g̃u juy epeku — ioꞌe.
\p
\v 4 — Obureyũ — ioꞌe. — Eyaoka ojuyayũ buxim g̃u juy eypararam epesop. Ixeyũ be eyaoka but ma. G̃uyjom pit eybiõg̃buk muꞌũm paꞌore cebe ip. 
\v 5 Deus buxim acã juy eypararam epesop. Ixe be bit wuyaoka pi g̃u. Wuyeꞌũ buje dak ipiatꞌajojoap pe wuybiõg̃buk xik put cebe. Imẽneju juy ixe buxim eypararam epesop — ioꞌe.
\p
\v 6 — 5 be pidiwe dei teiꞌĩt ma- -pũg̃ centavo ma. Deus pit yag̃uybaꞌũm g̃u wasũyũ kay. Pũg̃ kay dak yag̃uybaꞌũm g̃u. 
\v 7 Deus itaybit wuyadap pebũrũdap iam. Deus xe teibog̃ g̃u wasũdei. Imẽnpit ag̃ cekay. Imẽnpuxim wuykay dak ag̃ soat em. Imẽneju eyag̃uybabiꞌũmꞌũm g̃u juy epesop — ioꞌe.
\p
\v 8 — Icẽmãn õn eꞌem eywebe. Soat wag̃o õn. Eyju “Jesus ebekitkiyũ oceju,” iꞌeꞌem pima, õn tak “Teyũku webekitkit,” i oce Deus ekawẽn tojotjotꞌukayũ be. 
\v 9 Eyju eꞌem wararaꞌacayũ be “Jesus bure g̃u oceju,” i bima, õn tak “Iteyũ bure g̃u õn,” i oce Deus ekawẽn tojotjotꞌukayũ be. 
\v 10 Soat wag̃o õn. Omuymuy bima, eyju ikẽrẽat kug̃ Deus xe. Deus iboap juꞌuk eywebewi ikẽrẽat. Ibiõg̃buk xipacat muymuy bima bit, Deus iboap juꞌuk g̃u eywebewi ikẽrẽat — ioꞌe.
\p
\v 11 — Wararaꞌacayũ jeydujowat Deus eju kawẽnwẽnapꞌa be ipi kukukayũ dopabe dak, iecug̃ap dopabe dak. Eydujowat puje, eyag̃uybabiꞌũm g̃u juy epesop eyewedayo am. “Pẽn paxi oce,” iꞌũmg̃u juy epeꞌe — ioꞌe. 
\v 12 — Ixeyũ dopabe eydujowat puje Ibiõg̃buk xipacat jeymukũyjo jekawẽn ãm — ioꞌe.
\p
\v 13 G̃ebuje ag̃okatkat oꞌjekawẽn Jesus eju adeayũ parakpeat.
\p — Tapu — ioꞌe. — “Ebayꞌũm pubut cuy eg̃uꞌẽꞌẽ ekitpit pe,” i juy ece owag̃o be — ioꞌe Jesus pe.
\p
\v 14 — Ap! — ioꞌe. — Deus cuk omudot eykay eyemãmãap coco am g̃u, ceꞌũat pubut muꞌẽꞌẽ ãm g̃u dak — ioꞌe.
\p
\v 15 — Eyetabikukum g̃u juy epesop! Soat em Deus xe wuyetait acesop ade wuybubut pupum puye g̃u- -cekay wuyetabut puye acã — ioꞌe.
\p
\v 16 G̃ebuje Jesus wuymutaybitbinap ekawẽn oꞌg̃uwẽn aweromayũ be.
\p — Ibubut adeat kat katõ be osodop. Oꞌjewaꞌada jĩjã. Yaꞌade oꞌe — ioꞌe. 
\v 17 — Imẽnpuye ibubut adeat oꞌjekawẽn jewebe ma.
\p — “Okat pewiat mũnꞌa yabog̃ g̃u,” ioꞌe. “Apẽntak oce? Jeꞌe g̃u, yaꞌade jĩjã buye,” ioꞌe jewebe ma — ioꞌe Jesus. 
\v 18 — “Imẽn ma oce. Okat pewiat mũnꞌa oyamuyꞌat- -yabog̃bug̃atꞌa. Yabog̃atꞌa oyamuyat,” ioꞌe jewebe ma. “Yamuyisuatꞌa be okat pewiat og̃uxipan, soat obubut tak,” ioꞌe jewebe ma. 
\v 19 “ ‘Ocokcog̃ og̃uy, ade obubut puye,’ i juy oce owebe ma,” ioꞌe jewebe ma. “ ‘Soat kug̃ og̃uy,’ i juy oce owebe ma,” ioꞌe jewebe ma. “ ‘Kapikpig̃ g̃u og̃uy jebodoydoy acã, jekõnkõn acã dak, tikõnkõn acã dak,’ i juy oce owebe ma,” ioꞌe jewebe ma ibubut adeat — Jesus oꞌe.
\p
\v 20 — Imẽnpit Deus oꞌjekawẽn ixe ibubut adeat pe.
\p — “Ag̃uybaꞌarẽm!” ioꞌe. “Ade jĩjã juk adi eg̃uxipan ewebeam ma,” ioꞌe Deus. “Ijop kabiok ma eceꞌũ,” ioꞌe. “Abu jeꞌjat ebubut eꞌũ buje?” ioꞌe Deus — ioꞌe Jesus. 
\p
\v 21 — Pũg̃pũg̃ayũ soat em g̃ebum apẽn xeꞌe waraꞌatꞌin ojat obubun iap kay. Deus kay g̃ebum g̃u maꞌg̃u ip. Ixe ag̃okatkat puxim ip- -yadaodaoat puxim — Jesus oꞌe.
\p
\v 22 — Imẽnpuye eyag̃uyꞌũm g̃u juy epesop eybubut kay — ioꞌe jeweju etaybitbinayũ be. — “Ajo paxi acejoꞌo?” iꞌũmg̃u juy epeꞌe — ioꞌe. — “Ajo paxi aceg̃uõm wuydotim?” iꞌũmg̃u dak cuy epeꞌe. 
\v 23 Xipat eyxat kug̃ pima, eydoti kug̃ pima dak. Ibodi ma bit xipat soat em Deus xe eydop am — ioꞌe.
\p
\v 24 — G̃ebum cuy epesop wasũ iokat kay — ioꞌe. — Taidadam g̃u ip. Jeku beat pupum g̃u dak ip. Jeku bewiat mũnꞌaꞌe g̃u ip. Imẽnpit Deus ixat ũmũm cebe ip- -wasũyũ be. Deus xe teibog̃ g̃u wasũ. Imẽnpit ag̃ cekay ip. Wuykay dak ag̃ soat em ma. 
\v 25 Ade koato mabuk wetabẽg̃ og̃uy iap kay g̃ebum cĩcã bima, eyetabẽg̃ xeꞌe? Kaꞌũma. G̃axĩn ma acoꞌi epeꞌũ. 
\v 26 Iboap ibaꞌore eywebe bima, teꞌe ma eyag̃uyꞌũm ijodiap kay- -eydoti kay, eyxat kay dak — ioꞌe.
\p
\v 27 — G̃ebum cuy epesop kog̃ũnpi dag̃atit kay, apẽn dit aypapan iap kay. Kapikpig̃ g̃u tũmũntitit. Jedoti mug̃ẽg̃ẽm g̃u dak ip. Icẽmãn õn eꞌem eywebe. Salomão ibubut adeat osunuy. Idip cĩcãat kug̃ osunuy jesay kug̃. Salomão dipap podi ma bit titip tip tag̃atip. 
\v 28 G̃asũ ma tũmũntitit titetabẽg̃ eꞌem. Kuyaje bit titeꞌũ eꞌem. Deus aꞌõbi titip. Jaꞌõbi dak eyemukaypinput jeꞌg̃ũm eywebe eyetabutsũ maꞌg̃u cekay — ioꞌe Jesus.
\p
\v 29 — “Ajo paxi acejoꞌo,” iꞌũmg̃u juy epeꞌe, “Ajo paxi aceg̃uõm,” i dak — ioꞌe. 
\v 30 — Deus kay itabutꞌũmayũ yag̃uyꞌũm iboap kay. Wuyebayat pit itaybit wuyju ikug̃ꞌũm pima iam- -kabi beat. 
\v 31 G̃ebum cuy epesop Deus acã wuykukukat iap kay. Iboap kay g̃ebum pima, Deus soat jeꞌg̃ũm eywebe. Eyxan jeꞌg̃ũm, eydotim tak — ioꞌe.
\p
\v 32 — Eypararam g̃u juy epesop — ioꞌe. — Wuyebay Deus eykukukat ovelha kukukꞌukat puxim. Ixe ibikuy eywebe jekukan — Jesus oꞌe.
\p
\v 33 — Eybubutꞌin cuy epeteidaat eyedinheiro bu am — ioꞌe. — Ixe dinheiro juy epeg̃ũm tadaybotbocayũ be. Iũmũm pima eybubut ade epeꞌe kabi be. Eybubut iwekwek g̃u jeꞌe kabi beat. Iꞌũm g̃u dak. Kaꞌũmg̃u ibukurukat kabi be eybubut tujupaꞌum am. Kopiꞌi eybubut joꞌo g̃u kabi be. 
\v 34 Eybubut ijodi bima, soat em g̃ebum epesop eybubut kay. Kabi be bima bit g̃ebum epesop kabi beat kay — ioꞌe.
\p
\v 35-36 — Kariwa ajẽmap wiwimap puxim cuy epesop wajẽmap wiwim — ioꞌe. — Ixe kariwa juk oꞌju jewebumũnap epeta kay. Cepicat wiwim ibuywatwatꞌukayũ. Lamparina kug̃ ip- -isopsepat kug̃. Jekariwa ajẽmap wiwim ip xĩntabi nomudipꞌuk am cebeam yajẽm puje, cetag̃tag̃ puje. 
\v 37 Ag̃ ip tobuxik puje icokcok jeꞌe ip ixeyũ ibuywatwatꞌukayũ jekariwa ajẽm puje. Icẽmãn õn eꞌem eywebe. Ixe kariwa jeõm jedukꞌa be. Ixat jeꞌg̃ũm cebe ip. “G̃aꞌa acekõn,” i jeꞌe jebuywatwatꞌukayũ be. 
\v 38 Iximadak pe, iximadak pepu i acoꞌi jajẽm. Yajẽmap wiwim ip tobuxik puje, icokcok jeꞌe ip ixeyũ ibuywatwatꞌukayũ. 
\v 39-40 Imẽnpuxim cuy ag̃ epesop wepicap wiwim- -soat wag̃o epicap wiwim. Ocepit eyju wepicap wiwimꞌũm pima, ag̃ꞌũm pima dak. Ibukurukat ajẽmap ehoram itaybit pima, jedukꞌa kajuk oꞌyaiwat g̃u ukꞌa iwat. Oꞌyaiwat g̃u puyxibutꞌũm iõmap puxim. Imẽnpuye juy ag̃ epesop wepicap kay — ioꞌe Jesus.
\p
\v 41 G̃ebuje Pedro oꞌjekawẽn Jesus eju.
\p — Kariwa — ioꞌe. — Ẽn ijop ekawẽn muwẽnuwẽn ocewebe yaꞌĩjo am acã du? Soat pe yaꞌĩjo am g̃u xeꞌe? — ioꞌe.
\p
\v 42 — Õn ijop ekawẽn muwẽnuwẽn xipan jekariwa bubut kukayũ be yaꞌĩjo am- -itaybicayũ be yaꞌĩjo am — ioꞌe. — “Obubut kukukan cuy ece,” iꞌeꞌem kariwa cebe ip. “Aꞌõ kay jeedop ip kũyjobin wararaꞌacayũ obuywatwatꞌukayũ,” iꞌeꞌem kariwa. “Ixeyũ xan cuy eg̃ũmg̃ũm,” iꞌeꞌem cebe, cedag̃ kapikpig̃ puye — ioꞌe. 
\v 43 — Jekariwa aꞌõ kay kũyjobin pima, ixe ibuywatwatꞌukat icokcok jeꞌe jekariwa ajẽm puje. 
\v 44 Icẽmãn õn eꞌem eywebe — ioꞌe. — “Obubut kukukan cuy ece,” i jeꞌe kariwa ixe jebuywatwatꞌukat pe. 
\v 45 — “Oꞌjekuyan ma wekariwa,” iꞌe buje bit, g̃ebujeꞌisum ma jajẽm cekariwa. Kapikpig̃ꞌũm pima jajẽm. Ixe ibuywatwatꞌukat wararaꞌacayũ kaykay bima, jajẽm. Jekpiwan ma jekõnkõn cĩcã bima jajẽm. Ikaꞌo bima, jajẽm. 
\v 46 Jebuywatwatꞌukat yajẽmap wiwimꞌũm pima jajẽm, yajẽmam itaybitꞌũm pima dak. Imẽnpuye cekariwa ipiat supiꞌajoat jebuywatwatꞌukat pe. Jebuywatwatꞌukat g̃uju kũyjobitꞌũmayũ dopap pe jenuy am. 
\v 47 Apẽn jekariwa ibikuy osunuy jekapikam iam itaybicat yobog̃ ipiat supiꞌajojo jewemuxipanꞌũm pima, kũyjobitꞌũm pima dak. Yobog̃ ipiat supiꞌajojo itaybit puye. 
\v 48 Apẽn jekariwa ibikuy osunuy iam itaybitꞌũmat pit yopĩt ma ipiat supiꞌajojo kũyjobitꞌũm pima. Yopĩt ma ipiat supiꞌajojo itaybitꞌũm puye. Ade ikug̃at cuy ade jeꞌg̃ũm wararaꞌacat pe. Ade oꞌjatiat xewi juy ade acejoojuy — ioꞌe.
\p
\v 49 — Daxa buxim okop ijodiacat pe waraꞌat tag̃tag̃tag̃ ma jewag̃uy ãm — Jesus oꞌe. — Iboap wekapikap. Wekapik epere ojuy õn. 
\v 50 “Wararaꞌacat ipiat supiꞌajoat ewebe,” i juk oꞌe Deus owebe. “Aokam ip,” i juk oꞌe. Deus bikuyap tag̃ weku pin cĩcã soat em. Soat em g̃ebum õn iboap kay. 
\v 51 Tũybe teku osodot kabaꞌũm wuydop am iãn eyju eꞌem. Imẽg̃ãm g̃u ojot. Ojot ijodiacat pe waraꞌat tag̃tag̃tag̃ ma jeku am. 
\v 52 Ibadipyũ waraꞌat tag̃tag̃tag̃ ma jeku õn ojot puye. Xepxepayũ pũg̃ tag̃ ma jeku ip. Ixeyũ badipyũ bit waraꞌat tag̃ ma jeku ip ebapũg̃ayũ. 
\v 53 Cebay ma okay jeꞌe. Ixe ipot pit okay g̃u jeꞌe. Ixi ma okay jeꞌe. Ixeꞌit pit okay g̃u jeꞌe. Yuktayxi ma okay jeꞌe. Ixe ayacat uktayxi bit okay g̃u jeꞌe. Imẽneju waraꞌat tag̃tag̃tag̃ ma jeku ip — Jesus oꞌe.
\p
\v 54 G̃ebuje Jesus wuymutaybitbinap ekawẽn oꞌg̃uwẽn adeayũ be. 
\p — Kaxiꞌacap pewi kabikerereat ebapuk puje “Mubaꞌat omuyku,” i eyju eꞌem. Icẽmãn ajẽmjẽm. 
\v 55 Kaxietajoreg̃at pido ajẽm puje “Kaxiepi jĩjã g̃asũ,” i eyju eꞌem. Icẽmãn kaxiepi jeꞌe. 
\v 56 Eyetaybit mubaꞌat ajẽm iam kabi kay ag̃ puye. Eyetaybit kaxiepi jeꞌe iam kabido jojom puye. Imẽnpit eyetaybit g̃u ajo g̃uyjom jeꞌbapuk eywebe iam wekawẽn cocom maꞌg̃u eyju. Wekawẽn paꞌarẽm eyxe — ioꞌe.
\p
\v 57 — Eyju jewawẽwẽm g̃u dak cedag̃ ma eyeku am. 
\v 58 Eykay itakomaat eꞌem eywebe “Eyweroap cuy epeteida owebe,” i. “Teidaꞌũm pima, jeydujowan õn ibimãmãayũ ekawẽn cocoꞌukat kay,” i. Imẽn iꞌe buje, ixe juy epeg̃udin e dag̃ pima. E dag̃ pima itakomaat mudinꞌũm pima, ixe jeydujowat ibimãmãayũ ekawẽn cocoꞌukat kay. Ibimãmãayũ ekawẽn cocoꞌukat tak jeydujowat sorarayũ kay. Sorarayũ jeymuõm daomũnmũnapꞌa be. 
\v 59 Soat g̃u eyeweroap teidaꞌũm pima, jeymujẽm g̃u ip daomũnmũnapꞌa bewi — Jesus oꞌe.
\b
\c 13
\p
\v 1 G̃ebuje pũg̃pũg̃ayũ oꞌjekawẽn Jesus eju.
\p — Iecug̃ap Pilatos Galiléia eipi watwatꞌin oꞌyaokaat — ioꞌe ip. — Oꞌyaokaat ip Deus eju kawẽnwẽnapꞌa be bima, wũnca ũmũm pima paĩ be imupik an Deus etabixe — ioꞌe ip.
\p
\v 2 — “Oꞌyaokaat ixeyũ ag̃okatkayũ wararaꞌacat podi ma xipatꞌũm puye- -Galiléia eipi watwat podi ma,” i du eyju eꞌem? 
\v 3 Imẽn g̃u juy epeꞌeꞌe! Icẽmãn õn eꞌem eywebe. Ikẽrẽat epereꞌũm pima, Deus kay eyetabutꞌũm pima dak, ipiatꞌajojoap kay epeju eyju dak — ioꞌe. 
\v 4 — Waram pima oap ip Siloé ka watwat 18 beayũ. Oap ip ukꞌa oꞌjeꞌaedu buye- -umatꞌa. Oꞌg̃ucak ip. “Oap ip soat podi ma xipatꞌũm puye- -Jerusalém ka watwat podi ma,” i du eyju eꞌem? Imẽn g̃u juy epeꞌeꞌe! 
\v 5 Ikẽrẽat epereꞌũm pima, Deus kay eyetabutꞌũm pima dak, ixeyũ buxim epeju ipiatꞌajojoap kay eyju dak — ioꞌe Jesus.
\p
\v 6 G̃ebuje Jesus wuymutaybitbinap ekawẽn oꞌg̃uwẽn adeayũ be- -figueiraꞌip ekawẽn.
\p — Ag̃okatkat figueiraꞌip oꞌyoptaida jekat pe, uvadip pe — ioꞌe Jesus. — Oajẽm figueiraꞌip kay figoꞌa kudadam. 
\v 7 Oꞌyadobuxik g̃u. Imẽnpuye oꞌjekawẽn uvadip wiwiꞌukat pe — ioꞌe. 
\p — “Tapu, ebapũg̃ koato juk adi oajẽm ijaꞌip kay figueiraꞌip kay”, ioꞌe cebe — ioꞌe. — “Yaopap ekaxi bima juk adi oajẽm figoꞌa kudadam,” ioꞌe — ioꞌe. — “Yaꞌũmg̃u. Oyadobuxik g̃u. Teꞌe ma ijopꞌip omuy. Eyopxik cuy,” ioꞌe uvadip wiwiꞌukat pe — ioꞌe.
\p
\v 8 — G̃ebuje tipwiwiꞌukat oꞌjekawẽn tip iwat pe — ioꞌe Jesus.
\p — “Kariwa, jewebuyxijo buk,” ioꞌe. “Ijop koato g̃u eyopxikat,” ioꞌe. “Oyokobidog̃ cuy yokobi koreren. Tũmũntũntũn otũnmõg̃ yokobi koreren,” ioꞌe. 
\v 9 “Waraꞌat koato bima yaꞌaꞌe bima, xipat jeꞌe. Yaꞌaꞌeꞌũm pima bit oyopxik,” ioꞌe tip iwat pe — Jesus oꞌe.
\p
\v 10-12 Waram pima Jesus Deus eju kawẽnwẽnapꞌa beayũ oꞌg̃utaybin. Sábado bima ip oꞌg̃utaybin jebodoydoyap kabia bima. Jesus ayacat oꞌjojojo ig̃oꞌa be. Ixe ayacat ikokpiwakun osunuy ade koato- -18 koato bun. Ikokpiwakun osunuy ibiõg̃buk kẽrẽat aꞌõbi. Ceꞌag̃obucẽg̃ paꞌore osunuy ibiõg̃buk kẽrẽat aꞌõbi. Jesus ixe oꞌg̃udot jekay.
\p — Tũꞌũ — ioꞌe. — Õn jemuꞌada — ioꞌe.
\p
\v 13 Oꞌjewebumõg̃ ixe jeje. Oꞌg̃uꞌada g̃ebuje bit. Oꞌsukokpimucũg̃. Oꞌsukokpimudim. Ikokpicũg̃ oꞌe.
\p — Bay, xipat cĩcã ẽn owebeam — ioꞌe Deus pe.
\v 14 Deus eju kawẽnwẽnapꞌa kukukꞌukat pit itakoma oꞌe Jesus kay, jebodoydoyap kabia bima ayacat oꞌg̃uꞌada buye. Tũybe imuꞌada pi jebodoydoyap kabia be iãn oꞌe. Imuꞌadaap kapikap coꞌi osunuy cexe.
\p — Seis kabia bima cũg̃ ma wuywebe wuyekapik am — yakukukꞌukat oꞌe ig̃oꞌa beayũ be. — Jebodoydoyap kabia be bit epesot g̃u jemuꞌadaan- -waraꞌat kabia be acã — ioꞌe cebe ip.
\p
\v 15 G̃ebuje Jesus oꞌjekawẽn ig̃oꞌa beayã be.
\p — Tũybe imuꞌada pi wuywebe iãn eyju eꞌem — ioꞌe. — Jebodoydoyap kabia bima epeg̃uwekap g̃u du ehõyõ- -biopak? — ioꞌe. — Jumento dak epeg̃uwekap g̃u du tujujẽm ãm korara bewi idibi kõn ãm? Soat eyju eyõhõ muwekapkam soat kabia bima- -jebodoydoyap kabia bima dak.
\v 16 Imẽnpuye cedag̃ ma owebe ixe ayacat muꞌada am g̃asũ. Abraão naxeg̃ebit puxim itabut ixe. 18 koato bun Satanás ixe ayacat kokpi muwakunkunꞌuk osunuy- -ibiõg̃buk kẽrẽayũ kukukat — ioꞌe Jesus.
\p
\v 17 Cekay itakomaayũ ma isũsũn oꞌe ip Jesus edeap co buje. Wararaꞌacayũ bit icokcok oꞌe ip Jesus kay.
\p — Kaꞌũma buk ocejojojoiap mubapukpug̃ Jesus wuyetabutpe — ioꞌe ip. — Idip cĩcãat mubapukpug̃ wuyetabutpe — ioꞌe ip.
\p
\v 18 G̃ebuje Jesus waram wuymutaybitbinap ekawẽn oꞌg̃uwẽn.
\p — Apẽn jeꞌe Deus soat kukukan pima? — ioꞌe. — Apu ekawẽn tak og̃uwẽn iboam eymukũyjo am? — ioꞌe.
\p
\v 19 — Ag̃okatkat mostardada oꞌtaida jekat pe. Mostardada taꞌĩt ma. Oꞌyaypan cĩcã bit. Mostardaꞌim oꞌe. Yobog̃ oꞌe. Wasũyũ jedopi oꞌjomõg̃mõg̃ takũ dag̃. Imẽnpuxim koap Deus adeꞌũmayũ kukukan jeꞌe. G̃uyjom pit soat kukukan jeꞌe — Jesus oꞌe.
\p
\v 20 — Apu ekawẽn tak og̃uwẽn waram eymukũyjo am Deus soat kukukan jeꞌe iam? — ioꞌe.
\v 21 — Trigonõm kug̃ osunuy ayacat- -ebapũg̃ copo. Ixe ayacat pãoꞌa muyuhuhuaptõm oꞌtõmpu. Oꞌtõmõg̃ trigonõm pe. Oꞌtõmupinã. Soat tag̃ oꞌjenõmepõg̃põg̃ trigonõm tag̃. Imẽnpuxim soat ka watwat Deus soat kukukan jeꞌe iap awẽg̃ coco — ioꞌe.
\p
\v 22 G̃ebuje Jesus oꞌju Jerusalém ka kay. Cucum pima soat ka dag̃ oekuku- -ikaꞌĩcatka dag̃, ikabog̃atka dag̃ tak. Soat kaka dag̃ imutaybitbin oekuku.
\p
\v 23 G̃ebuje ag̃okatkat oꞌjekawẽn Jesus pe.
\p — Kariwa, taxijojoꞌibiyũ xepxep ma du jeꞌe? — ioꞌe.
\v 24 — Tapu, okay eyetabucap xĩntabi be wuyõmap puxim. Eyetabun cuy epesop okay! — ioꞌe. — Kabi kayat exĩntabi itokbog̃ gu- -itokꞌĩt ma — ioꞌe. — Soan cuy epeꞌe kabi be eyõm ãm! Icẽmãn õn eꞌem eywebe. Adeayũ õm ojuy jeꞌe. Imẽnpit iõm paꞌore jeꞌe ip. 
\v 25 Ukꞌa iwat jeꞌkop xĩntabi nomudim. Tomudip puje, eyõm paꞌore epesop. Kacũg̃kadi epesop. Xĩntabi be tag̃tag̃tag̃ꞌi epesop. “Kariwa, ocewebe xĩntabi etomudipꞌuk oceõm ãm,” i epeꞌe. Imẽnpit kariwa jeꞌe eywebe “Wetaybit g̃u pomawiacat eyju iam,” i — Jesus oꞌe. 
\v 26 — “Jekõnkõn tak ocesop eweju,” i epeꞌe cebe. “Ocemutaybitbin cuk ejeku oceka dag̃,” i epeꞌe. 
\v 27 Imẽnpit kariwa jeꞌe eywebe: “Icẽmãn õn eꞌem eywebe. Wetaybit g̃u dak pomawiacat eyju iam,” i. “Eyõm paꞌore ijoce eyju ikẽrẽat kug̃ oxe buye. Epejẽm,” i jeꞌe — ioꞌe Jesus. 
\v 28 — G̃ebuje epetõtõn. Eyg̃uycũg̃cũg̃ cĩcã ma epesop. Deus soat kukukan pima, Abraão cexe jeenuy, Isaque dak, Jacó dak. Deus ekawẽn muwẽnuwẽnꞌukayũ dak Deus xe jeedop ip. Wũy wi ixeyũ epejojojo. “Wũy ma juy epesop owi,” i jeꞌe Deus eywebe. 
\v 29 Adeayũ jajẽm soat eipi dag̃wi- -kaxijẽmap kadiwi, kaxiꞌacap kadiwi dak, kaxijẽmapcoreg̃wi dak, kaxiejoreg̃wi dak. Soat ip jabik jekõn ãm Deus ka be Deus soat kukukan pima — Jesus oꞌe. 
\p
\v 30 — Koapayũ kanomũmayũm jeꞌe. Imẽnpuxim kanomũmayũ koapayũm jeꞌe — Jesus oꞌe.
\p
\v 31 G̃ebuje isum ma Fariseuyũ oajẽm Jesus kay.
\p — Aoka ojuy Herodes- -oceipi kukat — ioꞌe ip Jesus pe. — Ecenapõn cuy ijocewi ixe be aokaap puxim — ioꞌe ip.
\p — Ocenapõn g̃u — ioꞌe. — Deus ibikuy bima acã ojeꞌũ. Herodes eymug̃uykukukuꞌukat kak puxim — Jesus oꞌe. — Epeju juy cekay. Waꞌõ juy epeyaꞌõmuwẽn cebe. 
\v 32 “G̃asũ, kuyaje dak ibiõg̃buk kẽrẽat og̃ujẽmjẽm ijodiat pewi,” i juy epeꞌe cebe — Jesus oꞌe. — “Iwãtaxipipiayũ og̃uꞌadaꞌada,” i juy epeꞌe. “Kuyajebusu wekapikap og̃uꞌũm,” i. 
\v 33 “Ojeꞌũ. Imẽnpit wekupinap tag̃ ojeku g̃asũ, kuyaje dak, kuyajebusu dak,” i juy epeꞌe cebe — Jesus oꞌe. — “Eka be g̃u ojeꞌũ, Jerusalém ka be acã,” i juy epeꞌe Herodes pe — ioꞌe Jesus.
\p
\v 34 — Jerusalém ka watwat, Deus ekawẽn muwẽnuwẽnꞌukayũ aokakam eyju — ioꞌe Jesus. — Yabug̃bug̃ tak eyju ip witaꞌam. Sapokayꞌitꞌit jexi kay. Jedaudaum jexi eg̃ebadap tiotpe kajuk pibun. Eyju bit okay g̃u. Eybuꞌu jĩjã eyetabut am okay, eykukpin cĩcã aꞌg̃u oxe — Jesus oꞌe.
\p
\v 35 — Eyaꞌõpicũg̃cũg̃ cuy epesop waꞌõ kay — ioꞌe. — Jeywat õn ag̃okatkat jedukã iwacap puxim — Jesus oꞌe. — Icẽmãn õn eꞌem eywebe. Waram ojo g̃u eyju waram wajẽmꞌũm pima. Wajẽm puje, “Deus xipan wuykukukat aꞌõbi yajẽmꞌibit jukuk,” i epeꞌe — Jesus oꞌe.
\b
\c 14
\p
\v 1 Jebodoydoyap kabia bima Jesus oꞌju ag̃okatkat tukꞌa kay- -Fariseu dukꞌa kay- -yaꞌõbuyxiat tukꞌa kay. Sábado bima oꞌju. Jekõn ãm ceweju oꞌju.
\p
\v 2 Iyeuhuhuat Jesus xe osunuy. Ukꞌa beayũ oꞌjeak Jesus kay. Tũybe imuꞌada pi osunuy jebodoydoyap kabia be iãn oꞌe ip. Imuꞌada buje, kuka oꞌjomuymuy ip.
\p
\v 3 G̃ebuje Jesus oꞌjekawẽn Fariseuyũ eju, Moisés ekawẽn imutaybitbinꞌukayũ eju dak.
\p — Wuyawẽwẽap ekawẽn tag̃ tu iwãtaxipiat muꞌada am jebodoydoyap kabia bima? Cedag̃ g̃u xeꞌe? — Jesus oꞌe.
\p
\v 4 Yaꞌõbuꞌu osodop ip jedem. Mũg̃ ma ip osodop.
\p G̃ebuje Jesus iyeuhuhuat oꞌsubaixik. Oꞌg̃uꞌada. Iyeuhuhu g̃u oꞌe. Xipat oꞌe. Oꞌg̃uypit tukꞌa be.
\p
\v 5 G̃ebuje waram oꞌjekawẽn Fariseuyũ be, Moisés ekawẽn imutaybitbinꞌukayũ be dak.
\p — Soat eyju kapikpig̃ jebodoydoyap kabia be — ioꞌe. — Ipikũykũy be eyipot at puje, epejuꞌuk g̃u du kuka jebodoydoyap kabia bima? Eyeõhõ biopak at puje dak, epejuꞌuk g̃u xeꞌe kuka? Dao ma kuka epejuꞌuk! Imẽnpuye teꞌe ma eyetakoma okay — ioꞌe.
\p
\v 6 Yaꞌõbu baꞌore oꞌe ip cebe.
\p
\v 7 G̃ebuje Jesus wuymutaybitbinap ekawẽn oꞌg̃uwẽn jekõn ãm takoyꞌibiyũ be. Ixeyũ takoyꞌibiyũ kariwa bog̃at nuyap pe abik ojuy ip oꞌe. Imẽnpuye ijop ekawẽn oꞌg̃uwẽn cebe ip.
\p
\v 8 — Jewebumũnap epeta be eydakoy buje, kariwa yobog̃at tũyap pe g̃u juy epabik- -kaꞌũmaap tũyap pe acã — ioꞌe. — Kariwa yobog̃at acoꞌi oꞌtakoy ip- -eybodiat. 
\v 9 Kariwa yobog̃at tũyap pe eyabik puje, eydakoyat jajẽm eykay. “Wedeꞌi ece. Ẽn kariwa g̃u,” i jeꞌe eywebe — ioꞌe. — “Ig̃o bit kariwa. Ig̃o abik pin enũyap pe,” i jeꞌe eywebe — ioꞌe. — Imẽn iꞌe buje, eysũsũn epeꞌe. Jeymuabik kaꞌũmaap tũyap pe — ioꞌe. 
\v 10 — Eydakoy buje juy epeju. Kaꞌũmaap tũyap pe juy epabik. Eydakoyat pe iboap co buje, jajẽm eykay. “Obure, kariwa yobog̃at tũyap pe juy abik, ẽn kariwa buye,” i jeꞌe eywebe — ioꞌe. — Imẽn iꞌe buje, eyweju jekõnkõnayũ xe eyaꞌõbuyxiayũm epeꞌe — ioꞌe. 
\v 11 — Eyaꞌõbuyxian pin pima, Deus xe eyaꞌõbuyxi g̃u epesop. Eyaꞌõbuyxian pinꞌũm pima bit, cexe eyaꞌõbuyxiayũm epesop — ioꞌe Jesus.
\p
\v 12 G̃ebuje Jesus oꞌjekawẽn jedakoyat pe.
\p — Peta mug̃ẽg̃ẽm pima, ibubut adeayũ acã g̃u juy etomuwã. Ibubut adeayũ acã g̃u juy etomuwã, ebureyũ acã g̃u dak, ewag̃oyũ acã g̃u dak, ebadipyũ acã g̃u dak, edukꞌa xeacat kariwaat acã g̃u dak. Ixeyũ waram cuy jenomuwã apẽn cuk ixeyũ enomuwãap puxim. Apẽn cuk eg̃ũm iap puxim ejat. 
\v 13 Peta mug̃ẽg̃ẽm pima tadaybocayũ dak etomuwã, taokẽrẽayũ dak, taojereayũ dak, itaꞌũmayũ dak. 
\v 14 Ixeyũ be waram iũm paꞌore ewebe apẽn cuk cebe ip eg̃ũm iap puxim. Deus pit xipacat jeꞌg̃ũm ewebe. Waram g̃uto cũg̃ ma jekukuꞌukayũꞌũmꞌũm etait puje, Deus xipacat jeꞌg̃ũm ewebe — ioꞌe.
\p
\v 15 Ceweju jekõnkõnat oꞌjekawẽn Jesus eju ibo ekawẽn co buje.
\p — Deus soat kukukan pima icokcok cĩcã jeꞌe ceweju cekõnꞌibit — ioꞌe.
\p
\v 16 — Hm hm — Jesus oꞌe. — Abuyũ jekõn Deus eju iap og̃uwẽn eywebe — ioꞌe. — Ag̃okatkat petabog̃ oꞌg̃ug̃ẽ. Jebureyũ oꞌtomuwã- -ibubut adeayũ — ioꞌe.
\p
\v 17 — Soat ixipan pima jebuywatwatꞌukat oꞌg̃uju jemunomuwãyũ dakoy am. Oꞌju.
\p — “Kuy soat ixipan,” ioꞌe. “Epesop cuy wekariwa epeta be,” ibuywatwatꞌukat oꞌe tomuwãꞌibiyũ be — ioꞌe Jesus.
\p
\v 18 — Imẽnpit tomuwãꞌibiyũ “Ocedaobuꞌu,” ioꞌe ibuywatwatꞌukat pe. Oꞌtaobuꞌun ip peta kay.
\p — “Ipi ojat okat mõg̃ ãm,” ioꞌe ibuywatwatꞌukat pe — ioꞌe Jesus. — “Cum puk õn ipi jom,” ioꞌe. “Imẽnpuye odaobuꞌu ekariwa epeta be,” ioꞌe. “Imẽn cuy ece ekariwa be,” ioꞌe — ioꞌe Jesus. 
\v 19 — “10 be ojat biopak,” waraꞌacat oꞌe. “Cum puk õn ibuyxijom ip,” ioꞌe. “Imẽnpuye odaobuꞌu ekariwa epeta be. Imẽn cuy ece ekariwa be,” ioꞌe — ioꞌe Jesus.
\p
\v 20 — “Kapusu ma juk ocewebumũn ayacat eju,” waraꞌacat oꞌe. “Oju baꞌore ekariwa epeta be. Imẽn cuy ece cebe,” ioꞌe — ioꞌe Jesus.
\p
\v 21 — Imẽneju ibuywatwatꞌukat oꞌjepit jekariwa kay- -peta iwat kay. Taobuꞌuꞌuayũ aꞌõ oꞌyaꞌõmuwẽn jekariwa be — Jesus oꞌe. — Iboap co buje cekariwa itakoma jĩjã oꞌe. — “Tadaybocayũ juy etojot wepeta kay taobuꞌuꞌuayũ dieg̃,” ioꞌe jebuywatwatꞌukat pe. “Cexĩg̃xĩg̃ paꞌoreayũ juy etojot, taokẽrẽayũ dak, itaꞌũmayũ dak,” ioꞌe. “Dao ma eju ikabog̃atka kay,” ioꞌe. “Ukꞌa ukpibubu dag̃ cuy eju, e dag̃ tak,” ioꞌe. “Soat ip etojot wepeta kay,” ioꞌe cebe — ioꞌe Jesus.
\p
\v 22 — Oꞌju ikabog̃atka kay. Tadaybocayũ oꞌtojot jekariwa dukꞌa be.
\p — “Kariwa,” ioꞌe. “Otojot ip aꞌõbi,” ioꞌe. “Imẽnpit edukꞌa be wuydop pun mabuk,” ioꞌe — ioꞌe Jesus.
\p
\v 23 — “Waram cuy eju tadaybocayũ kay,” ioꞌe cebe. “E dag̃ cuy eju, kog̃ũnpi dag̃ tak. Eg̃uõm ip odukꞌa be yamuporan am. ‘Epesot cuy wekariwa epeta be,’ i juy ece cebe ip,” ioꞌe — Jesus oꞌe. 
\v 24 — “Õn soat kukukan pima koap tomuwãꞌibiyũ jekõn g̃u oweju- -pũg̃ tak kaꞌũma,” ioꞌe peta iwat — ioꞌe Jesus.
\m Imẽn Jesus wuymutaybitbinap ekawẽn oꞌg̃uwẽn jeweju jekõnkõnat pe.
\p
\v 25 Waram pima Jesus oꞌjekawẽn adeayũ be. Ceweju jekukuꞌuk osodop ip. Oꞌjekawẽn ceweju ip.
\p
\v 26 — Oweju eyeku pin pima, okay jĩjã ma juy epesop — ioꞌe. — Eyebay kayap podi ma okayꞌũm pima, webekitkin g̃u epeꞌe, eyxi kayap podi ma dak, eytayxi kayap podi ma dak, eyebekitkit kayap podi ma dak, eywag̃o kayap podi ma dak, eykibit kayap podi ma dak, eykipit kayap podi ma dak. Jewekayap podi ma okayꞌũm pima dak, webekitkin g̃u epeꞌe — ioꞌe. 
\v 27 — Owebeam jeꞌũ ãm eybuꞌu bima, webekitkin g̃u epeꞌe, oweju jekum eybuꞌu bima dak — ioꞌe Jesus.
\p
\v 28 — Yaberenatꞌa muy pin pima, koam kuka yamuyaptei epeg̃uweg̃ũn — ioꞌe. — “Jeꞌe paxi wedinheiro?” i juy epeꞌe eyewewebe ma. 
\v 29 Imuweg̃ũnꞌũm pima yamuy epere baꞌore kuka oꞌe eywebe. Imuweg̃ũnꞌũm pima eyedinheiro kuka oiꞌũm ipi kayat muy buje. Ipi kayatꞌa jojoayũ kuka eywaywayway — ioꞌe. 
\v 30 — “Akꞌi juy epeꞌe ig̃oꞌa kay,” i kuka oꞌe ip. “Yaberenatꞌa muy ojuy. Imẽnpit oꞌyamuy g̃u cedinheiro oiꞌũm puye,” i kuka oꞌe ip eywaywayway — ioꞌe Jesus.
\p — Ukꞌa muy pin pima wuyju eꞌem “Jeꞌe paxi wedinheiro?” i. Imẽnpuxim eyju dak webekitkit pin pima, “Ipiatꞌajojom pima paxi kuka ocebuꞌun?” i juy epeꞌe eyewewebe ma — ioꞌe Jesus.
\p
\v 31 — Waraꞌat ka kukat eju jenopag̃õg̃õ ojuy bima, ag̃oka kukat koam kuka oꞌjewawẽ jebureyũ eju- -itaybit cĩcãayũ eju. “Wuyesorarayũ adesũ- -10,000 beayũ,” i kuka oꞌe cebe ip. “Wuykay itakomaayũ esorarayũ bit ade jĩjã- -20,000 beayũ,” i kuka oꞌe cebe ip. “Oꞌe paxi wuywebe ixeyũ muꞌũm ãm?” i kuka oꞌe — ioꞌe. 
\v 32 — Itaybit cĩcãayũ be: “Ibaꞌore wuywebe” iꞌe buje, ipi kukukat iparara kuka oꞌe. Oibuꞌun kuka jenopag̃õg̃õm. Jexewi wũy bima, jebekitkit kuka oꞌg̃uju cekay ip jekay itakomaayũ mudin am — ioꞌe. — “G̃aꞌa juy acenopag̃õg̃õm g̃u,” i kuka oꞌe cebe — ioꞌe Jesus.
\p — “Oꞌe paxi wesorarayũ be itakomaayũ muꞌũm ãm?” iꞌeꞌem ipi kukukayũ. 
\v 33 Imẽnpuxim eyju dak webekitkit pin pima, “G̃uyjom paxi ocebuꞌun?” i juy epeꞌe eyewewebe ma. Soat eybubut iwan eybuꞌu bima, webekitkin g̃u epesop — Jesus oꞌe.
\p
\v 34 — Kawta xipat. Imẽnpit takõꞌõm puje, teꞌe ma kuka atakuk. 
\v 35 Tamuyun paꞌore wuywebe. Taxik am acã xipat. Imẽnpuxim okay eybuꞌu bima, teꞌe ma kuka epeꞌe: “Cristo ebekit õn,” i. Wekawẽn aꞌĩjo pin pima juy xipan epeyaꞌĩjo.
\b
\c 15
\p
\v 1 G̃ebuje iecug̃ap peam dinheiro bubuꞌukayũ oꞌju Jesus kay, wararaꞌacayũ ikẽrẽat mujurũg̃rũg̃ꞌukayũ dak. Oꞌju ip Jesus ekawẽn com.
\p
\v 2 G̃ebuje Fariseuyũ Jesus oꞌjomuymuy Moisés ekawẽn imutaybitbinꞌukayũ dak.
\p — Ite ag̃okatkat ikẽrẽat mujurũg̃rũg̃ꞌukat purem. Jekõnkõn ceweju ip — ioꞌe ip.
\p
\v 3 Iboap co buje, Jesus wuymutaybitbinap ekawẽn oꞌg̃uwẽn cebe ip jemuymuyayũ be.
\p
\v 4 — Eyju 100 be eyõhõ kug̃ acoꞌi- -ovelha kug̃ — ioꞌe. — Pũg̃ oitabidao bima, waraꞌacat eyõhõ kuka epesuiwat kog̃ũnpi dag̃ itabidaoat kuda am. Tobuxikꞌũm pima kuka epeju itabidaoat kuda am. Epejokuda kuka tobuxik puje. 
\v 5 Tobuxik puje, eycokcok kuka epeꞌe. Eyaꞌõpiꞌa jeje kuka epejomõg̃. Eydukꞌa be kuka epetujuxe. 
\v 6 Eydukꞌa be eyõm puje, eybureyũ kuka epetomuwã, eydukꞌa xeayũ dak. “Oceõhõ ocetobuxik! Eycokcog̃ cuy oceweju,” i kuka epeꞌe cebe ip — ioꞌe. — “Ovelha ocetobuxik- -itabidao oekuiat,” i kuka epeꞌe. 
\v 7 Icẽmãn õn eꞌem eywebe. Itabidao oekuiat puxim ikẽrẽat mujurũg̃rũg̃ap oꞌjepere iat- -ovelha buxim — ioꞌe. — Imẽnpuye Deus icokcok eꞌem ade cũg̃ayũ kay. Imẽnpit jekay ikẽrẽat mujurũg̃rũg̃ꞌukat etabun puje, ibodi ma icokcok eꞌem Deus, ikẽrẽat mujurũg̃rũg̃ap epere buje dak — ioꞌe Jesus.
Imẽn Jesus wuymutaybitbinap ekawẽn oꞌg̃uwẽn cebe ip.
\p
\v 8 G̃ebuje Jesus waraꞌat ekawẽn oꞌg̃uwẽn cebe ip.
\p — Ayacat 10 be dinheiro kug̃- -isurũg̃at kug̃- -teibog̃at kug̃- -prata mug̃ẽg̃ẽ kug̃. Pũg̃ ma oꞌjepaꞌũm. Imẽnpuye ixe ayacat lamparina oꞌg̃usop jedinheiro kuda am.
\p — Jedinheiro oꞌjokudada. Jedukã oꞌyabiꞌõg̃ jedinheiro kudadam. Tobuxikꞌũm pima ikudadam mabuk — ioꞌe.
\p
\v 9 — Tobuxik puje, jebureyũ oꞌtomuwã ayacat, jedukꞌa xeayũ dak. “Wuycokcog̃ cuy ajop wedinheiro otobuxik puye- -isurũg̃at- -cepaꞌũmꞌibit,” iꞌeꞌem ixe ayacat cebe ip.
\p
\v 10 — Icẽmãn õn eꞌem eywebe — ioꞌe. — Deus ekawẽn tojotjotꞌukayũ icokcok eꞌem pũg̃ ma itabun Deus kay buje- -ikẽrẽat mujurũg̃rũg̃ap epere buje dak. Ixe ayacat cokcokap puxim icokcok eꞌem — ioꞌe Jesus.
\m Imẽn Jesus wuymutaybitbinap ekawẽn oꞌg̃uwẽn adeayũ be.
\p
\v 11 G̃ebuje Jesus waraꞌat ekawẽn oꞌg̃uwẽn cebe ip.
\p
\v 12 — Ag̃okatkat xepxep ipotpot kug̃ osodop. Ikitpit oꞌjekawẽn jebay be. “Bay,” ioꞌe. “Ebubuteiꞌin cuy eg̃ũm owebe obubuteim,” ioꞌe. “Eꞌũap wiwim g̃u õn obubut pu am,” ioꞌe jebay be — ioꞌe Jesus. — Imẽnpuye cebay jebubutei oꞌg̃uꞌẽꞌẽ jekpotpoyũ be- -xepxepayũ be. Ade ma oꞌg̃ũm cebe ip — Jesus oꞌe.
\p
\v 13 — Ibunꞌũm pima ikitpit jebubut oꞌjat. Oꞌg̃uxipan. Oibuꞌun jebay xe. Oꞌjenapõn jebay xewi. Poxerewun. Oꞌjẽm jebay dukꞌa bewi. Oꞌju wũyatka kay. Jay. Oajẽm. Ibo ka be teꞌe ma jebubut oꞌg̃uꞌũm. 
\v 14 Ũm. Oꞌg̃uꞌũm. Warẽmtag̃ ma oꞌg̃uꞌũm soat — Jesus oꞌe. — Mubaꞌatꞌũmg̃u oeku. Ibun cĩcã oeku. Imẽnpuye ibo ka watwat irere jĩjã ip oꞌe. 
\v 15 Ikitpit tak ire jĩjã oꞌe ibubut oiꞌũm puye — Jesus oꞌe. — Ikitpit oꞌju ibo ka beat kay. Oꞌjekapik ixe ag̃okatkat eju. Ixe ag̃okatkat ikitpit oꞌg̃uju jeõhõ muykõn ãm- -dajebaro muykõn ãm — Jesus oꞌe. 
\v 16 — Ikitpit dajebaro xatꞌa kay oꞌe jexatꞌam, reren cĩcã buye. Imẽnpit oꞌg̃ũm g̃u cebe — Jesus oꞌe. 
\v 17 — G̃ebuje ikitpit oꞌyag̃uysan. Oꞌjewag̃uy. Oꞌjekawẽn jewebe ma.
\p — “Webay eju kapikpikꞌukayũ ma soat kug̃ jexat kug̃,” ioꞌe jewebe ma. “Õn pit ijoce ojeꞌũ repibun!” ioꞌe jewebe ma — ioꞌe Jesus. 
\v 18 — “Jepin puk õn webay kay,” ioꞌe jewebe ma. “Ocekawẽn webay eju,” ioꞌe. “ ‘Bay,’ i juy oce cebe. ‘Ikẽrẽat kug̃ õn Deus xe, exe dak,’ i juy oce cebe,” ioꞌe. 
\v 19 “ ‘Õn ekpot. Imẽnpit ekpon g̃u juy oce g̃asũ bit, aꞌõmubuyxiꞌũmꞌũm ojeku buye. Eweju ocekapik acã dinheiro bu am,’ i juy oce webay be,” ioꞌe ikitpit jewebe ma — ioꞌe Jesus. 
\p
\v 20 — G̃ebuje oꞌjẽm wũyat ka bewi. Oꞌjepit jebay kay. Cebay dukꞌa wi wũy bima, cebay bit ikitpit oꞌjojojo. Tadaybot cĩcã oꞌe jekpot ibubut kug̃ꞌũm puye. Itabotaidabotbot cĩcã oꞌe jekpot kay — ioꞌe.
\p — G̃ebuje cebay oꞌjedau jekpot kay. Oꞌtopabijuk. Oꞌyakobot. Oꞌyag̃obukõn jecokcokap kug̃. 
\v 21 Ipot oꞌjekawẽn jebay eju. “Bay,” ioꞌe. “Ikẽrẽat kug̃ õn Deus xe, exe dak, aꞌõmubuyxiꞌũmꞌũm ojeku buye,” ioꞌe. “Ekpon g̃u oce g̃asũ bit. Eweju ocekapik acã,” ioꞌe ipot jebay be — ioꞌe Jesus. — “Kaꞌũma!” ioꞌe cebay bit. “Okpon ma ẽn soat em,” ioꞌe — ioꞌe Jesus. 
\v 22 — Cebay oꞌjekawẽn jebuywatwatꞌukayũ be g̃ebuje bit. “Daosuw!” ioꞌe. “Xipacat cuy og̃ũm okpot pe,” ioꞌe cebay. “Iekabek cuy epetojot- -xipacat,” ioꞌe. “Epeg̃uõm cuy okpot pe,” ioꞌe cebay. “Ibumũn cuy epeg̃uõm ibu be,” ioꞌe. “Suiyuk cuy epeg̃uõm sui be,” ioꞌe cebay. 
\v 23 “Biopakꞌitꞌit cuy epejat- -kuy ag̃uxepꞌiat,” ioꞌe. “Epeyaoka juy,” ioꞌe. “G̃aꞌa peta ag̃ug̃ẽ,” ioꞌe. “G̃aꞌa acewemucokcog̃,” ioꞌe. 
\v 24 “Tũybe okpotꞌũm oeꞌũ iãn cuk oce,” ioꞌe. “G̃asũ bit wetaybit oce itabẽg̃ ma iam,” ioꞌe. “Warẽmtag̃ ma oeku wũyat ka dag̃,” ioꞌe. “G̃asũ bit cexe,” ioꞌe cebay. “G̃aꞌa peta ag̃ug̃ẽ,” ioꞌe. Icokcok cĩcã oꞌe ip — Jesus oꞌe. — Petatam oꞌe ip. Jedaꞌiꞌin oꞌe ip — ioꞌe.
\p
\v 25 — Tukꞌa be jewemucokcog̃ ip pima, waraꞌat ipot tak jekat pe osunuy kapikpig̃- -koapat. Oexe jebay dukꞌa be. Ukꞌa wi wuyꞌũm pima, cedarukrekatꞌa aꞌõ oꞌyaꞌõdobuxik, daꞌiꞌiayũ aꞌõ dak. 
\v 26 Jebay eju kapikpikꞌukat oꞌtomuwã. “Ajo pẽnpẽn iꞌeayũ?” ioꞌe iwag̃o cebe. 
\v 27 “Petatam ip ekitpit oexe buye,” ioꞌe kapikpikꞌukat. “Ebay biopakꞌitꞌit oꞌyaokaat- -kuy ag̃uxepꞌiat,” ioꞌe. “Oꞌyaokaat, xipan oexe buye,” ioꞌe — Jesus oꞌe.
\p
\v 28 — Imẽnpit iwag̃o itakoma oꞌe. Taobuꞌu jĩjã oꞌe ukꞌa be jeõm ãm jekitpit tobede am — Jesus oꞌe. — G̃ebuje cebay oajẽm jekpot kay akiju- -koapat kay. “Eõm cuy,” ioꞌe cebay jekpot pe- -koapat pe — ioꞌe Jesus. 
\v 29 — “Ap!” ioꞌe. “Ade koato juk adi ocekapikpik cĩcã eweju,” ioꞌe. “Puju og̃uy kũyjobitꞌũm aꞌõ kay? Soat em cuk adi aꞌõ kay og̃uy,” ioꞌe. “Imẽnpit cuk bodeꞌitꞌit eyaokaat g̃u owebe peta mug̃ẽ ãm obureyũ beam,” ioꞌe jebay be iwag̃o — ioꞌe Jesus. 
\v 30 — “Ite ekpot peam pit eyaoka,” ioꞌe. “Soat edinheiro oꞌg̃uꞌũm yapoyũ eju jepoapteim,” ioꞌe jebay be — ioꞌe Jesus. — “Cexe buje bit, ẽn peta mug̃ẽg̃ẽm!” ioꞌe. “Biopakꞌitꞌit aokakam ẽn,” ioꞌe iwag̃o — Jesus oꞌe.
\p
\v 31 — “Tapu,” ioꞌe. “Soat em ẽn oweju. Obubut ebubun jeꞌe soat,” ioꞌe. 
\v 32 “Tũybe okpotꞌũm oeꞌũ ekitpitꞌũm iãn cuk oce,” ioꞌe. “G̃asũ bit wetaybit oce itabẽg̃ ma iam. Warẽmtag̃ ma oeku wũyatka dag̃,” ioꞌe. “G̃asũ bit xipan oexe,” ioꞌe. “Imẽneju cedag̃ ma wuywebe peta mug̃ẽ ãm, wuymucokcok am tak,” cebay oꞌe — Jesus oꞌe. — Ikẽrẽat mujurũg̃rũg̃ap oꞌjepereiat jebay kay oꞌjepitꞌiat puxim — ioꞌe Jesus.
\m Imẽn Jesus wuymutaybitbinap ekawẽn oꞌg̃uwẽn Fariseuyũ be, Moisés ekawẽn imutaybitbinꞌukayũ be dak.
\b
\c 16
\p
\v 1 G̃ebuje Jesus waraꞌat ekawẽn oꞌg̃uwẽn jeweju etaybitbinayũ be.
\p — Ibubut adeat jedinheiro oꞌg̃ũm ag̃okatkat pe imuxipan am jewebeam — ioꞌe.
\p — “Warẽmtag̃ ebubut muꞌũmuꞌũm edinheiro kukat,” ioꞌe ibureyũ ibubut adeat pe — Jesus oꞌe.
\p
\v 2 — Imẽnpuye ibubut adeat jekaxero oꞌtomuwã. “ ‘Warẽmtag̃ ebubut muꞌũmuꞌũm edinheiro kukat,’ iꞌeꞌem obureyũ owebe,” ioꞌe ibubut adeat — ioꞌe Jesus. — “Cũg̃ g̃u ẽn oubut kug̃,” ioꞌe. “Imẽnpuye soat ip cewero oweju iaptup etupmubararak omutaybit am,” ioꞌe. “G̃asũ bit ẽn kapig̃ g̃u oweju,” ioꞌe — ioꞌe Jesus. — “Waraꞌat ma ojomuy edieg̃,” ioꞌe. Cekaxero oꞌjẽm.
\p
\v 3 — G̃ebuje cekaxero oꞌjekawẽn jewebe ma.
\p — “Apẽntak oce g̃asũ bit?” ioꞌe jewebe ma. “Wekariwa oꞌe owebe ‘G̃asũ bit ẽn kapig̃ g̃u oweju,’ i,” ioꞌe jewebe ma. “Ibaꞌore owebe kapik am kat pe, obacaꞌũm puye,” ioꞌe. “Osũsũn oce wararaꞌacat xewi dinheiro ojuy am,” ioꞌe jewebe ma. “Wetaybit apẽn oce iam,” ioꞌe. 
\v 4 “Wekariwa og̃ug̃uykuku,” ioꞌe jewebe ma. “Ixe eju õn kapikpig̃ꞌũm pima, wararaꞌacayũ jeꞌe owebe: ‘Eõm cuy odukꞌa be eg̃uy am,’ i,” ioꞌe jewebe ma cekaxero — ioꞌe Jesus.
\p
\v 5 — Imẽneju cekaxero ceweroap kug̃ayũ oꞌtomuwã. Pũg̃pũg̃pũg̃ ma ip oꞌtomuwã. Pũg̃pũg̃pũg̃ ma ip ceweju oꞌjekawẽn.
\p — “Pebũrũ eweroap wekariwa eju?” ioꞌe koap oajẽmiat pe.
\p
\v 6 — “Ade jĩjã omuyku ixepti weweroap teida am- -100 be bahiꞌuk,” ioꞌe.
\p — “Juku. Eweroaptup etupu,” ioꞌe. “Ade g̃u omuyku bahiꞌuk ixeptim weweroap teida am- -50 ma iam cuy eg̃ubararak tup pe,” ioꞌe cekaxero koap oajẽmiat pe — Jesus oꞌe.
\p
\v 7 — “Pãm ẽn? Pebũrũ eweroap wekariwa eju?” ioꞌe wararaꞌacat pe.
\p — “Taꞌade omuyku weweroap teida am trigoda- -1000 be trigoda,” ioꞌe.
\p — “Juku. Eweroaptup etupu. “Ade g̃u omuyku weweroap teida am trigoda- -800 be iam cuy eg̃ubararak,” cekaxero oꞌe cebe — Jesus oꞌe.
\p
\v 8 — Imẽnpuye kaxero itaybit cĩcãat osunuy jekariwa xe, imug̃uykukuꞌuk maꞌg̃u — ioꞌe Jesus.
\p — “Etaybit cĩcã,” ioꞌe cekariwa jekaxero be — Jesus oꞌe. — Itaybit cĩcã g̃u Deus ekawẽn kayayũ jebubut kug̃. Cekawẽn kayꞌũmayũ bit itaybit cĩcã jebubut kug̃ — Jesus oꞌe.
\m Imẽn Jesus wuymutaybitbinap ekawẽn oꞌg̃uwẽn cebe ip.
\p
\v 9 — Ceweroap teibubuꞌukat ekukuap puxim g̃u juy epeku — ioꞌe Jesus. — Eybubutꞌin cuy epeg̃ũm tadaybotbocayũ be iburem am ip. Cebe ip iũmũm pima, ixeyũ eybureyũ jeydobede kabi be eyexe buje. Soat em kabi be epesop — Jesus oꞌe. 
\v 10 — Eyju cedag̃ yopĩcat kug̃ pima, cedag̃ ma yobog̃at tak epejukuk. Warẽmtag̃ yopĩcat kug̃ pima bit, warẽmtag̃ ma yobog̃at tak epejukuk — ioꞌe. 
\v 11 — Eyju warẽmtag̃ ijodiap kug̃ pima- -dinheiro kug̃, Deus kabi beat jeꞌg̃ũm g̃u eywebe- -idip cĩcãat. 
\v 12 Eyju warẽmtag̃ waraꞌacat pubut kug̃ pima, kaꞌũma ma waraꞌat jeꞌg̃ũm eywebe eybubun. 
\v 13 Pũg̃ꞌa be ukꞌa be bima, ibaꞌore ibuywatwatꞌukat pe xepxepayũ beam kapik am. Kariwawayũ waraꞌat tag̃tag̃tag̃ eꞌem pima, itakoma kuka oꞌe pũg̃ kay jekariwa kay, waraꞌat jekariwa ikukpin cĩcã bima. Kũyjobit kuka oꞌe pũg̃ aꞌõ kay waraꞌat aꞌõ kay kũyjobitꞌũm pima. Imẽnpuxim dinheiro kay jĩjã bima, Deus kay jĩjã g̃u kuka epeꞌe — ioꞌe Jesus.
\p
\v 14 Soat Fariseuyũ iboap oꞌyaꞌĩjojo. Ixeyũ Jesus oꞌjowaywayway dinheiro kay jĩjã ip puye.
\p
\v 15 G̃ebuje Jesus oꞌjekawẽn Fariseuyũ eju.
\p — “Cũg̃ ma oceju Deus xe,” i napa ma eyju eꞌem wararaꞌacat pe — ioꞌe. — Deus pit itaybit ajo kay eyju g̃ebum iam. Ijodiat xe xipat cĩcãat Deus xe xipat g̃u — ioꞌe.
\p
\v 16 — Moisés ekawẽn tag̃ jekukuꞌuk osodop ip kuyjeayũ, Deus ekawẽn muwẽnuwẽnꞌukayũ dak. G̃uyjom pit João Batista oꞌeꞌe adeayũ be: “Deus soat kukukan jeꞌe,” i. Deus ekawẽn muwẽnuwẽnꞌukayũ imẽnpuxim imuwẽnuwẽn g̃asũ dak soat ip. G̃asũ adeayũ ibikuy Deus pe jekukan. 
\v 17 Kabi iꞌũm, iꞌpi dak. Deus pe wuyawẽwẽap ekawẽn pit iꞌũm g̃u- -pũg̃ em tak kaꞌũma — ioꞌe. — Soat em cedag̃ cĩcã wuywebe wuyeku am ixe ekawẽn tag̃ — ioꞌe Jesus.
\p
\v 18 — Ag̃okatkat jetayxi epere buje, waraꞌat pu am jetayxim, ikẽrẽat kug̃ Deus xe. Imẽnpuxim cepereꞌibit eju jewebumũn puje, ikẽrẽat kug̃ Deus xe ag̃okatkat — ioꞌe cebe ip.
\p
\v 19 G̃ebuje Jesus wuymutaybitbinap ekawẽn oꞌg̃uwẽn cebe ip.
\p — Ag̃okatkat jexat oꞌjoꞌoꞌo- -iku jĩjãat oꞌjoꞌoꞌo — ioꞌe. — Ibubut adeat osunuy. Ixat ku jĩjã osunuy. Jesay idip cĩcãat kug̃ osunuy. 
\v 20 Tadaybocat tak oabik ixe ibubut adeat tukꞌa exĩntabi be- -ag̃okatkat. Xĩntabi xe abikbikꞌuk osunuy soat kabia. Lázaro i tadaybocat putet osunuy. Ade werowero kug̃ osunuy ixe Lázaro dag̃ soat tag̃. 
\v 21 Oabik iboce ibinõmnõm kay itabiku buye, cemesa be jedudumat o pin puye. Imẽntak akuriceyũ oajẽm cewerowero kõnkõn ãm.
\p
\v 22 — Lázaroꞌũm eꞌũ buje, Deus ekawẽn tojotjotꞌukat ixeꞌũm oꞌtujuu Abraão kay- -Deus xeat kay. Iku jĩjãat oꞌom osunuy Abraão eju. Ixe ibubut adeatꞌũm pit oeꞌũ. Ag̃okatkayũ ixeꞌũm oꞌjokot.
\p
\v 23 — G̃ebuje ibubut ade osunuyiat Abraão oꞌjojojo wũy wi. Ipiatꞌajojoap pewi oꞌjojojo. Lázaro dak oꞌjojojo Abraão xe. 
\p
\v 24 — “Ajot!” ioꞌe ibubut ade tũibit Abraão be. “Etabotaidabotbon cuy eg̃uy okay,” ioꞌe yaꞌõberen. “Lázaro juy eg̃udot okay idibi be ibuꞌabi muakõm ãm okõ mucuk am idibim,” ioꞌe. “Ipiatꞌajojom cĩcã õn daxa be,” ioꞌe.
\p
\v 25 — “Kaꞌũma, og̃uju g̃u,” ioꞌe Abraão bit. “Etabẽg̃ pima, ade idip cĩcãat kug̃ cuk adi eg̃uy. Lázaro bit ikẽrẽat kug̃ cuk adi osunuy itabẽg̃ pima. Ẽn ma ecokcok cuk adi eg̃uy. Ixe bit tadaybot osunuy. G̃ebum cuy eg̃uy iboap kay. G̃asũ bit ixe ma icokcok. Ẽn pit ipiatꞌajojom,” ioꞌe.
\p
\v 26 — “Imẽntak katek omuy wuypidase. Itediacat pe iju baꞌore ig̃odi kay eykay. Ibodiacat pe dak tot paꞌore ijodi ocekay. Ibaꞌore cebe ip katek puye,” Abraão oꞌe.
\p
\v 27 — “Ajot,” ioꞌe Abraão be. “Eyaꞌopicũg̃ cuy waꞌõ kay! Lázaro juy eg̃uju webay dukꞌa kay, okitpitpiyũ kay,” ioꞌe. 
\v 28 5be opop ip webay dukꞌa be. Eg̃uju ixeyu mukũyjo am ipiatꞌajojoap pe tocap puxim,” ioꞌe.
\p
\v 29 — “Kaꞌũma,” ioꞌe. “Og̃uju g̃u,” ioꞌe Abraão. “Ekitpitpiyũ Moisés ekawẽntup kug̃, Deus ekawẽn muwẽnuwẽnꞌukayũ emudupmubararaktup kug̃ tak,” ioꞌe. “Kũyjobin cuy ekitpitpiyũ jeedop ibo dup aꞌõ kay,” ioꞌe.
\p
\v 30 — “Ajot, ebuꞌum g̃u juy ixe muju am,” ioꞌe. “Ceꞌũat tomukadi waram oꞌjetaitꞌiat co buje bit, ig̃uycũg̃ jeꞌe ip ikẽrẽat kug̃ puye,” ioꞌe. “Ikẽrẽat mujurũg̃rũg̃ap jepere ip,” ioꞌe ibubut ade tũibit.
\p
\v 31 — “Kaꞌũma. Og̃uju g̃u,” Abraão oꞌe. “Ekitpitpiyũ kũyjobitꞌũm Moisés aꞌõ kay. Kũyjobitꞌũm tak ip Deus ekawẽn muwẽnuwẽnꞌukayũ aꞌõ kay. Ceꞌũꞌũayũ dopdopap pewiat tobuxik puje dak, waram g̃uto oꞌjetaitꞌiat tobuxik puje, itabut g̃u jeꞌe ip. Imẽnpuye og̃uju g̃u cekay ip,” Abraão oꞌe — Jesus oꞌe.
\s G̃ebum g̃u juy epesop apẽn ixe juk adi ikẽrẽat oꞌg̃ujurũg̃rũg̃ iap kay iap ekawẽn
\b
\c 17
\p
\v 1 G̃ebuje Jesus oꞌjekawẽn jeweju etaybitbinayũ eju.
\p — Adeayũ wuymubuꞌun wuyetabucap epere am — ioꞌe. — Imẽnpit Deus ixeyũ g̃uju ipiatꞌajojoap kay. 
\v 2 Wararaꞌacat pe okay itabutꞌisuat mubuꞌun puje, ikẽrẽat kug̃ ip Deus xe. Imẽnpuye imutabutꞌũm awap xipat kuka wuywebe ixeyũ aoka am- -yag̃obu eju witaꞌa mukirik am yapoxiatꞌa mukirik am ticog̃ pe imuakõm ãm. Xipat g̃u wuyeꞌũ ãm. Ibodi ma xipat g̃u wuyju am ipiatꞌajojoap kay. Ikẽrẽm g̃u juy epesop eyewewebe- -idim acã — ioꞌe.
\p
\v 3 — Eybure be ikẽrẽat mujurũg̃ puje juy epeg̃ukũyjo. Ikẽrẽat kay ig̃uycũg̃ pima, g̃ebum g̃u juy epesop apẽn cuk adi ikẽrẽat oꞌg̃ujurũg̃ iap kay. 
\v 4 Sete em acoꞌi ikẽrẽat mubapukpug̃ eywebe pũg̃ kabia. 7 em tak “Og̃uycũg̃ ikẽrẽat og̃ubapuk ewebe buye” iꞌe buje, juy g̃ebum g̃u epesop apẽn cuk adi ikẽrẽat oꞌg̃ujurũg̃rũg̃ iap kay — ioꞌe Jesus.
\p
\v 5 G̃ebuje cemumujuyũ oꞌjekawẽn jekukukat eju- -Jesus eju.
\p — Ocebuywan cuy ece big̃ ma ocetabut am Deus kay — ioꞌe ip cebe.
\p
\v 6 — Deus kay eyetabutbũt pima, eyemuojuy jeꞌg̃ũm eywebe — ioꞌe. — “Ixe-ip cuy eyopꞌuk tãbu dag̃wi” iꞌe buje cebe, Deus yopꞌuk. “Eyoptaida juy ticõg̃ pe” iꞌe buje, Deus yoptaida — ioꞌe.
\p
\v 7 — Eyaꞌõpurug̃ eybuywatwatꞌukat kug̃- -eykat kotkotꞌukat kug̃- -eyõhõ kukukꞌukat kug̃- -ovelha kukukꞌukat kug̃ — ioꞌe. — Jekapikap pewi yajẽm puje, “Xikꞌi buk. Ecebodoy,” iꞌũmg̃u eyju eꞌem cebe. 
\v 8 “Oxan cuy ejoda,” iꞌeꞌem eyju cebe. “Dao ma eg̃udot okay,” i dak. “Wekõn epere buje acã ecekõn,” iꞌeꞌem eyju cebe. 
\v 9 Eybuywatwatꞌukat eyaꞌõ dag̃ kapikpig̃ pima, “Xipat cĩcã eyju,” iꞌũmg̃u eyju eꞌem cebe. 
\v 10 Deus aꞌõ dag̃ jekukum pima, “Xipat cĩcã oceju,” iꞌũmg̃u juy epeꞌe eyju dak. “Ocekukat aꞌõ dag̃ ocekuku,” i acã juy epeꞌe — Jesus oꞌe.
\m Imẽn Jesus oꞌjekawẽn jeweju etaybitbinayũ eju.
\p
\v 11 Jesus oꞌju Jerusalém ka kay. Kapkam oꞌe Galiléia eipi dag̃, Samaria eipi dag̃ tak.
\p
\v 12 G̃ebuje 10 be ierepayũ Jesus oꞌtopabijuk ag̃oka be yajẽm pima. Kacũg̃cũg̃ꞌi osodop ip bosusu cewi.
\p
\v 13 — Jesus! Kariwa! — ioꞌe ip yꞌõberen. — Etabotaidabotbon cuy eg̃uy ocekay! — ioꞌe ip Jesus pe.
\p
\v 14 Ixeyũ jo buje, oꞌjekawẽn ceweju ip.
\p — Epeju juy paĩ kay, ixe be eyjo am — ioꞌe ierepayũ be.
\m Oꞌju ip.
\p Jeju buje ip oꞌjeꞌada ierep topibiyũ. Xipat oꞌe ip.
\p
\v 15 G̃ebuje pũg̃ ma oꞌjepit Jesus kay ixeyũꞌin jeꞌadaap tobuxik puje.
\p — Deus, ẽn xipat cĩcã — ioꞌe.
\m
\v 16 Oꞌjẽg̃ꞌaecõg̃cõg̃ Jesus topabe yaꞌõbuyxi jexe buye.
\p — Xipat cĩcã ẽn, Kariwa — ioꞌe. — Ẽn omuꞌada — ioꞌe yaꞌõberen.
\m Samaria eipi beat osunuy ixe oꞌjepitiat.
\p
\v 17 G̃ebuje Jesus oꞌjekawẽn ceweju.
\p — Dez be g̃u du og̃uꞌada? — ioꞌe. — Pu wararaꞌacayũ- -9 beayũ? — ioꞌe Jesus. 
\v 18 — 9 beayũ g̃u oꞌjepit “Xipat cĩcã ẽn omuꞌada” iꞌe am Deus pe. Ite Samaria eipi beat acã oꞌjepit — ioꞌe jexeayũ be. 
\v 19 — Eꞌãy — Jesus oꞌe cẽg̃ꞌaecõg̃cõg̃ꞌibit pe. — Õn emuꞌada, etabut okay buye — ioꞌe.
\p
\v 20 Waram pima Fariseuyũ oꞌjekawẽn Jesus pe.
\p — Pug̃ũn Deus soat kukukan jeꞌe? — ioꞌe ip.
\p — Ixe soat kukukan pima, ibapuk g̃u jeꞌe wuyxe — ioꞌe. 
\v 21 — “Bomaku Deus soat kukukan,” iꞌũmg̃u aceꞌe, “Jodiku Deus soat kukukan,” iꞌũmg̃u dak — ioꞌe. — Ibapuk g̃u wararaꞌacat xe. Deus wuykukukan pima, wuywebe nuynuy — ioꞌe Jesus.
\p
\v 22 G̃ebuje Jesus oꞌjekawẽn jeweju etaybitbinayũ eju- -12 beayũ eju.
\p — G̃uyjom ojo pin cĩcã epesop- -soat wag̃o jo pin. “Ocebikuy jĩjã g̃axĩn ma soat wag̃o jajẽm ocekay,” i epeꞌe — ioꞌe. — “Ocebikuy pũg̃ kabia ocexe am,” i epeꞌe — ioꞌe Jesus. — Imẽnpit eyxe g̃u og̃uy — Jesus oꞌe.
\p
\v 23 — Wararaꞌacayũ napa ma jeꞌe eywebe “Akꞌi juy epeꞌe,” i, “Soat wag̃o oꞌjepit,” i, “Bomaku omuy,” i. “Soat wag̃o oꞌjepit,” i jeꞌe ip eywebe. “Joceku omuy,” i napa ma jeꞌe ip. Epeju g̃u juy okudadam yaꞌõbi ip. Eyetabun g̃u juy epesop ixeyũ aꞌõ kay — Jesus oꞌe.
\p
\v 24 — Wepit puje, eyetaybit epesop- -soat wag̃o epit puje — ioꞌe. — Xiririkiat soat tag̃ kabiam. Jodiwiku kabiam, bodiwidaku. Soat ijodiat xiririkiat cocom. Imẽnpuxim soat ijodiat wepicap jojo. 
\v 25 Imẽnpit koam cuy ipiat osupiꞌajo — ioꞌe. — Ade g̃asũacat okay g̃u jeꞌe — ioꞌe.
\p
\v 26 — Wepit puje, ijodiat jeku apẽn Noé kabia be juk adi oekuku ip iap puxim. 
\v 27 Jekõnkõnꞌuk osodop ip Noé itabẽg̃ pima, tikõnkõnꞌuk tak, jewebumũnmũnꞌuk tak. Ag̃ꞌũm pima, dao ma mubaꞌatxiri oajẽm — ioꞌe.
\p — Kobexixi be Noé õm puje, mubaꞌatxiri oajẽm soat kay ipi juacat kay. Soat ipi juacat oꞌg̃uꞌũm. Oeꞌũꞌũ ip — ioꞌe. 
\v 28 — Imẽnpuxim ip oekuku Ló itabẽg̃ pima — ioꞌe. — Jekõnkõnꞌuk osodop ip, tikõnkõnꞌuk tak, jebubut pupuꞌuk tak, teidadaꞌuk tak, taidadaꞌuk tak, ukꞌa muymuyꞌuk tak. Sodoma ka watwat ag̃ꞌũm pima dao ma Deus daxa oꞌg̃udot iꞌg̃o ka kay. 
\v 29 Sodoma ka bewi Ló jẽm puje, Deus daxa isopat oꞌg̃udot kabi kadiwi daxa daxik tak. Soat ibo ka watwatꞌũmꞌũm oꞌg̃uꞌũm — ioꞌe. 
\v 30 — Soat wag̃o õn. Wepit puje kaꞌũma ma wepicatp wiwim jeꞌe. Apẽn kuyje oekuku ip iap puxim jeku ip ijodiat — ioꞌe.
\p
\v 31 — Wepit puje, jedukꞌa be g̃u juy jeõm akijuat yabeat pu am — ioꞌe. — Jepit g̃u juy jedukꞌa kay jekat peat. 
\v 32 G̃ebum cuy epesop Ló tayxi epit ojuyap kay — ioꞌe. 
\v 33 — Oburemap tomuju eybuꞌu jeꞌũm pima, soat em ipiatꞌajojoap pe epesop eyeꞌũ buje. Jeꞌũm eybuꞌuꞌũm pima bit, soat em Deus xe epesop eyeꞌũ buje — ioꞌe.
\p
\v 34 — Wepicap exima be xepxepayũ ixet ip jeedop pũg̃ pe ma kama be. Deus pũg̃ ma tujowat jeweju. Waraꞌat pit suiwat. 
\v 35 Imẽnpuxim xepxep aoyũ tadedem ip jeedop. Deus pũg̃ ma tujowat jeweju. Waraꞌat pit suiwat. 
\v 36 Xepxep ag̃okatkat jekat pe kapikpig̃ ip jeꞌe. Deus pũg̃ ma tujowat jeweju. Waraꞌat pit suiwat — ioꞌe.
\p
\v 37 — Poma ip tujowat, Kariwa? — ioꞌe ip Jesus pe.
\p — Urupuyũ jeꞌawerorom ig̃ẽmat kay iꞌo am. Imẽnpuxim Deus jaꞌjẽm ipiatpiꞌajoan ikẽrẽat mujurũg̃rũg̃ꞌukayũ be — ioꞌe Jesus.
\b
\c 18
\p
\v 1 G̃ebuje Jesus wuymutaybitbinap ekawẽn oꞌg̃uwẽn jeweju etaybitbinayũ be soat em cuy epeyekawẽnwẽn Deus eju iam ixeyũ mutaybit am, eybuꞌun g̃u juy epesop Deus eju jekawẽn ãm iam tak.
\p
\v 2 — Ibimãmãmãat ekawẽn cocoꞌukat osunuy ikabog̃atka be — ioꞌe Jesus. — Tũybe Deus yaꞌõbuyxi g̃u iãn oꞌe. Wararaꞌacat kug̃ tak ibuyxim g̃u osunuy — Jesus oꞌe.
\p
\v 3 — Itopꞌũm eꞌũibit ade em ma ajẽmjẽm ixe ibimãmãmãat ekawẽn cocoꞌukat kay — ioꞌe. — Oꞌtaobuꞌun g̃u cekay. — “Obuywan cuy ece okay itakomaat pe okaykayap puxim,” ioꞌeꞌe itopꞌũm eꞌũibit — Jesus oꞌe.
\p
\v 4 — Ade kabia ibimãmãmãat ekawẽn cocoꞌukat ibuꞌu osunuy itopꞌũm eꞌũibit puywan. G̃uyjom pit oꞌjekawẽn jewebe ma. “Deus yaꞌõbuyxi g̃u oxe,” ioꞌe jewebe ma — ioꞌe. — “Wararaꞌacat tak ibuyxim g̃u ojukuk,” ioꞌe jewebe ma — ioꞌe. 
\v 5 — “Imẽnpit ixe itopꞌũm eꞌũibit cuy osubuywan ixe be omuꞌukpiceg̃ẽg̃ap puxim,” ioꞌe jewebe ma — ioꞌe. — “Ibuywanꞌũm pima, soat em kuka oajẽmjẽm okay, omuꞌadaodao kuka,” ioꞌe jewebe ma — Jesus oꞌe.
\p
\v 6 — Ixe ibimãmãmãat ekawẽn cocoꞌukat itopꞌũm eꞌũibit oꞌsubuywan jemuꞌukceg̃ẽap puxim cũg̃ g̃u maꞌg̃u jekukum — ioꞌe. 
\v 7 — Pãm Deus? Eyxe Deus ibuꞌu du jemunaẽhẽyũ buywan- -soat kabia, soat ixima be dak jekay jewãwãwãꞌukayũ buywan- -“Obuywatwan cuy ece” iꞌeꞌeꞌukayũ buywan? 
\v 8 Ibuꞌu g̃u ixeyũ buywan — ioꞌe. — Soat em ag̃ cekay ip. G̃axĩn ma ixeyũ buywan — ioꞌe. — Soat wag̃o õn. Ocepit cuy ijodi. Wepit puje Deus kay itabucayũ xeꞌe otobuxik? Tobuxik pin cĩcã oxe. Imẽnpuye juy eybuꞌun g̃u epesop Deus eju jekawẽn ãm — Jesus oꞌe.
\p
\v 9 G̃ebuje Jesus waraꞌat ekawẽn oꞌg̃uwẽn jewexe xipacayũ be- -wararaꞌacat mubuyxiꞌũmꞌũmayũ be- -“Oceju acã xipat Deus xe” iꞌeꞌeꞌukayũ be.
\p
\v 10 — Xepxep ag̃okatkat oꞌju Deus eju kawẽnwẽnapꞌa kay- -yabog̃atꞌa kay — ioꞌe. — Oajẽm ip Deus eju jekawẽn ãm. Pũg̃ Fariseu osunuy. Waraꞌat iecug̃ap peam dinheiro bubuꞌukat osunuy — ioꞌe.
\p
\v 11 — G̃ebuje Fariseu oꞌjekawẽn Deus eju. Jag̃epũg̃ ma cũg̃ꞌi osunuy. Jewexe yaꞌõbuyxi jĩjã osunuy. Imẽn oꞌjekawẽn:
\p — “Deus,” ioꞌe. “Ocokcok oce wararaꞌacat puxim g̃u õn etabixe buye,” ioꞌe. “Ixeyũ ma itabikuku wararaꞌacat pubut kay. Õn pit kaꞌũma,” ioꞌe. “Ixeyũ ma warẽmtag̃ ma jekukum. Õn pit kaꞌũma,” ioꞌe. “Ixeyũ ma jepopom wararaꞌacat tayxi eju. Õn pit kaꞌũma,” ioꞌe. “Ig̃o buxim g̃u dak õn- -iecug̃ap peam dinheiro bubuꞌukat puxim g̃u,” ioꞌe. 
\v 12 “Pũg̃ semana be xepxep kabia okpiwat ma õn jewemureren kawẽn ãm eweju,” ioꞌe Deus pe. “Wedinheiroꞌin õn iũmũm ewebe,” ioꞌe. “10 be ikug̃ pima, pũg̃ ma õn iũmũm ewebe,” ioꞌe — Jesus oꞌe.
\p
\v 13 — Iecug̃ap peam dinheiro bubuꞌukat pit cũg̃ꞌi osunuy wũy ma Fariseu wi. Isũsũn osunuy kabi kay jeak am yaꞌõbuyxiꞌũm cexe buye. Yatoro ma oꞌjekawẽn Deus eju. Oꞌjewekũmpiokaka jeg̃uycũg̃ap pibun, ikẽrẽat kug̃ puye — ioꞌe. — “Deus,” ioꞌe — ioꞌe. — “Ikẽrẽat kug̃ õn,” ioꞌe — ioꞌe. — “Imẽnpuye etabotaidabotbon cuy eg̃uy okay,” ioꞌe — ioꞌe Jesus.
\p
\v 14 — Icẽmãn õn eꞌem eywebe — Jesus oꞌe. — Jedukꞌa be ixeyũ epit puje, Fariseu g̃u cũg̃ ma oꞌe Deus xe- -iecug̃ap peam dinheiro bubuꞌukat acã — ioꞌe. — Eyaꞌõbuyxian pin cĩcã bima, eyaꞌõbuyxian g̃u epesop Deus xe. Eyaꞌõbuyxian pinꞌũm pima bit, eyaꞌõbuyxian epesop cexe — Jesus oꞌe.
\p
\v 15 G̃ebuje Jesus eju etaybitbinayũ wararaꞌacat oꞌg̃ukorẽm. Oꞌg̃ukorẽm ip Jesus kay mucayan bekitkit tojotjon puye. 
\v 16 Imẽnpit:
\p — Ebekitkit cuy epetojot okay — ioꞌe Jesus cebayũ be ip.
\p G̃ebuje Jesus oꞌjekawẽn jeweju etaybitbinayũ eju- -12 beayũ eju.
\p — Bekitkit mubuꞌun g̃u juy okay imudot am — ioꞌe. — “Epeju g̃u juy Jesus kay,” iꞌũmg̃u juy epeꞌe cebe ip. Deus ixeyũ buximayũ kukukan jeꞌe soat kukukan pima. 
\v 17 Icẽmãn õn eꞌem eywebe. Bekitkit ibuꞌu g̃u Deus pe jekukan. Imẽnpuxim Deus pe eykukan eybuꞌuꞌũm pima, cexe epesop ixe soat kukukan pima — ioꞌe.
\p
\v 18 G̃ebuje ag̃oka kukat oajẽm Jesus kay. Oꞌjekawẽn Jesus eju.
\p — Tapu — ioꞌe. — Ẽn xipat, cedag̃ ocemutaybitbin puye — ioꞌe. — Apẽntak oce soat em Deus xe onũy ãm? — ioꞌe Jesus pe.
\p
\v 19 — Apẽnpuye dak ẽn eꞌem owebe “Ẽn xipat,” i? — Jesus oꞌe. — Kaꞌũmg̃u xipacat- -Deus acã — ioꞌe. 
\v 20 — Etaybit Deus pe wuyawẽwẽap ekawẽn — ioꞌe. — “Wararaꞌacat tayxi kaykay g̃u juy epesop,” ioꞌe Deus. “Wararaꞌacat epeyaoka g̃u juy,” i dak. “Eyetabikum g̃u juy wararaꞌacat pubut kay,” i dak. “Napa g̃u juy epeꞌe,” i dak. “Ibuyxim cuy eyebay epejukuk, eyxi dak,” i dak oꞌe Deus wuywebe — Jesus oꞌe.
\p
\v 21 — Soat tag̃ ibiat ekawẽn tag̃ cuk adi ojekuku bekin piman ma — ioꞌe.
\p
\v 22 Iboap co buje, Jesus waram oꞌjekawẽn cebe.
\p — Pũg̃ ma buk omuy ewebe iꞌe am — ioꞌe. — Soat ebubut cuy eteida dinheiro bu am. Dinheiro juy eg̃ũm ikug̃ꞌũmayũ be — ioꞌe. — Iũm puje, ebubut ade eceꞌe kabi be — ioꞌe. — G̃ebuje juy ejot. Oweju juy ejeku — ioꞌe Jesus.
\p
\v 23 Ig̃uycũg̃ cĩcã oꞌe iboap co buje, ade jĩjã ibubut puye. Tacup osunuy. Ibuꞌu oꞌe jebubut ũm tadaybotbocayũ be. Xerewun. Oꞌjẽm Jesus xewi.
\p
\v 24 Ag̃oka kukat cemap co buje, Jesus oꞌjekawẽn jeweju etaybitbinayũ eju- -ig̃uycũg̃at cẽmap co buje.
\p — Ibaꞌore jĩjã ibubut adeat Deus pe jekukan — ioꞌe Jesus. 
\v 25 — Ibaꞌore camelo be ikap am awi daobiꞌatog̃. Imẽnpuxim ibaꞌore jĩjã ma ibubut adeat Deus pe jekukan, ibuꞌu ip puye — ioꞌe.
\p
\v 26 — Abu be dak kuka oꞌe taxijo but? — ioꞌe oꞌyaꞌĩjojoꞌiayũ.
\p
\v 27 — Ijodiat pe jewedaxijo baꞌore — ioꞌe. — Deus pe bit ibaꞌore g̃u soat ma — Jesus oꞌe.
\p
\v 28 G̃ebuje Pedro oꞌjekawẽn Jesus eju.
\p — Oceju bit soat ocesuiwat eweju am — Pedro oꞌe Jesus pe. 
\p
\v 29 — Icẽmãn õn eꞌem eywebe — Jesus oꞌe. — Deus bikuyap tag̃ eybadip iwat puje, eywebe epesuiwat podi ma epejat — ioꞌe. — Eydukꞌa beayũ acoꞌi epesuiwat, eytayxi dak, eywag̃o dak, eyebay dak eyxi dak, eyebekitkit tak. 
\v 30 Deus bikuyap tag̃ iwat puje, eywebe epesuiwat podi ma epejat — ioꞌe. — Eyetait pima Deus xipacat jeꞌg̃ũm eywebe. Eyeꞌũ buje dak waram g̃uto epeyetait — ioꞌe. — Soat em Deus xe epesop — Jesus oꞌe. 
\p
\v 31 Adeayũ parakpewi Jesus 12 beayũ oꞌtujowat. Oꞌjekawẽn ceweju ip.
\p — Eyaꞌõpicũg̃cũg̃ cuy epesop waꞌõ kay — ioꞌe cebe ip. — Jerusalém ka kay aju — ioꞌe. — Soat wag̃o õn. Kuyjeayũ emudupmubararaktup ekawẽn tag̃ adeayũ warẽmtag̃ ma ip okuk — ioꞌe. 
\v 32 — Ixeyũ oũm Judeuꞌũmayũ be okay itakomaayũ be. Owaywayway ip jeꞌe. Warẽmtag̃ ma ip okuk. Omuxixuxi ip. Omupokupok ip. 
\v 33 Oaoka ip. Imẽnpit xepxep xet kap puje, waram g̃uto ocetait — ioꞌe Jesus cebe ip- -12 beayũ be.
\p
\v 34 Imẽnpit 12 beayũ xe cekawẽn paꞌarẽm osunuy Jesus ekawẽn.
\p — Apẽnape ite eꞌem? — ioꞌe ip jewewebe. — Cekawẽn paꞌarẽm ocewebe — ioꞌe ip.
\p
\v 35 Jericó ka be Jesus ajẽm pima, itaꞌũmat dinheiro oꞌjoojuy kapkapayũ xewi. 
\v 36 E bitako dag̃ xikꞌi bima kapkapayũ daobiwẽg̃ cocom ixe itaꞌũmat. 
\p — Apẽnpuye eyju kapkam ijoma? — ioꞌe kapkapayũ be.
\p
\v 37 — Jesus ijoma kapkam puye- -Nazaré ka bewiat — ioꞌe ip cebe.
\p
\v 38 G̃ebuje itaꞌũmat oꞌjewãwã Jesus kay.
\p — Jesus! — ioꞌe. — Davi naxeg̃ebit ẽn! — ioꞌe. — Etabotaidabotbon cuy eg̃uy okay — ioꞌe yaꞌõberen.
\m
\v 39 Imẽnpuye kapkapayũ itaꞌũmat oꞌg̃ukorẽm.
\p — Ecemũg̃ cuy! — ioꞌe ip.
\m Imẽnpit big̃ ma oꞌjewãwã yaꞌõberen.
\p — Jesus! — ioꞌe maꞌg̃uto. — Davi naxeg̃ebit ẽn! Etabotaidabotbon cuy eg̃uy okay — ioꞌe.
\p
\v 40 Jesus oajẽm itaꞌũmat kay. Oꞌjecũ e bidase.
\p — Ixe itaꞌũmat epetojot okay — ioꞌe jexeacat pe.
\m Oꞌtojot. Oꞌjekawẽn cebe, yajẽm puje.
\p
\v 41 — Ajo-kay ẽn oxewi? — ioꞌe- -Jesus oꞌe.
\p — Wetadam ece — ioꞌe.
\p
\v 42 — Jetada õn — ioꞌe Jesus. — Etate eceꞌe Deus kay etabut puye — ioꞌe.
\p
\v 43 Jesus iboap e isum ma oꞌjewetada. Jecoatcoan oꞌe. Ixe dak oꞌju Jesus eju.
\p — Kaꞌũmg̃u ejoꞌiat xipacat — ioꞌe Deus pe.
\p Imẽneju soat oꞌjojojoꞌiayũ:
\p — Kaꞌũmg̃u ejoꞌiat xipacat — ioꞌe ip Deus pe.
\b
\c 19
\p
\v 1 Jesus oajẽm ikabog̃atka kay- -Jericó ka kay. Kapkam oeku ibo ka dag̃. 
\v 2 Ibo ka be ag̃okatkat osunuy. Ibutet Zaqueu i osunuy. Iecug̃ap peam dinheiro bubuꞌukat osunuy. Ibubut adeat osunuy.
\p
\v 3 Ixe dak Jesus co ojuy oꞌe. Imẽnpit Jesus co baꞌore osunuy taoapĩn puye. Ijo baꞌore osunuy adeayũ Jesus akokoreren oekuku buye.
\p
\v 4 Imẽnpuye Zaqueu oꞌjedau Jesus topabe. Jesus co am oꞌjeu figueiraꞌip eju. Oꞌjeu ijopꞌip tẽg̃ ma jeꞌkap iam itaybit puye.
\p
\v 5 Iboꞌip tiotpe yajẽm puje, Jesus oꞌjeapũn Zaqueu kay. 
\p — Zaqueu — ioꞌe. — Ekop cuy! — ioꞌe. — Daosuw! — ioꞌe. — Edukꞌa be õn cum — Jesus oꞌe.
\p
\v 6 Zaqueu dao ma oꞌkop ip ejuwi. Icokcok oꞌe Jesus tukꞌa be cu ojuy buye.
\p — Ejot cuy odukꞌa be — ioꞌe Jesus pe. 
\m
\v 7 Iboap oꞌjojojoꞌiayũ Jesus oꞌjomuymuy ip jeweweju.
\p — Jesus oꞌju Zaqueu dukꞌa be — ioꞌe ip jewewebe. — Ixe Zaqueu ikẽrẽat mujurũg̃rũg̃xi! — ioꞌe ip jewewebe.
\p
\v 8 G̃ebuje Zaqueu oꞌjekawẽn Jesus eju jedukꞌa be.
\p — Kariwa — ioꞌe. — Aꞌõpicũg̃ cuy eg̃uy. Ikẽrẽat cuk adi og̃ujurũg̃rũg̃iap cuy ocepere. Obubutꞌin og̃ũm ikug̃ꞌũmayũ be. Ipidase og̃ũm cebe ip — ioꞌe. — Adeayũ mug̃uykukukum cuk adi og̃uy dinheirom — ioꞌe. — Ebadipdip dinheiro juy og̃ũm pũg̃ dinheiro ojatꞌiat pe soat pe — ioꞌe Zaqueu.
\p
\v 9 — Zaqueu, Deus edaxijo g̃asũ bit — ioꞌe Jesus. — Xipat ixe be edaxijo am ẽn Abraão naxeg̃ebit puye. 
\v 10 Soat wag̃o õn. Ijodi ojot ikẽrẽat mujurũg̃rũg̃ꞌukat kudada am. Ixeyũ daxijo am ojot — ioꞌe Jesus.
\p
\v 11 Adeayũ be iboap co buje, Jesus wuymutaybitbinap ekawẽn oꞌg̃uwẽn cebe ip. Jerusalém ka be Jesus oajẽm pin. Tũybe g̃axĩn ma Deus soat kukukan jeꞌe iãn oꞌe ip adeayũ. Imẽnpuye iboap ekawẽn oꞌg̃uwẽn Jesus.
\p
\v 12 — Kariwa yobog̃at cu ojuy wũyatka kay — ioꞌe Jesus. — Wũyatka watwat ixe kariwa yobog̃at muy ojuy jekukan. 
\v 13 Ijuꞌũm pima 10 beayũ oꞌg̃udot jewekay jebuywatwatꞌukayũ. Pũg̃pũg̃pũg̃ ma oꞌg̃ũm soat pe dinheiro isurũg̃at. Soat ip pũg̃pũg̃pũg̃ oꞌe ikug̃. “Õn ijoceꞌũm pima, epeyekapik ijop kug̃ dinheiro kug̃ waraꞌat pu am- -dinheiro bu am,” ioꞌe ixe kariwa cebe ip. 
\v 14 Imẽnpit cebekitkityũꞌin itakoma osodop ip jekariwa yobog̃at kay. Imẽnpuye itakomaayũ jebureyũ oꞌg̃uju jekariwa nomuju jekawẽn ãm ceweju. E dag̃ ip oꞌe cebe: “Ekay g̃u oceju,” i. “Ocekukat pin g̃u ewebe,” ioꞌe ip cebe e dag̃ — Jesus oꞌe.
\p
\v 15 — G̃ebuje oꞌju wũyat ka kay — ioꞌe. — Wũyatka be bima ibo ka watwat ixe kariwa yobog̃at oꞌjomuy jekukan. Ade ka kukan ip oꞌjomuy. Oꞌjẽm wũyatka bewi. Jay. Oajẽm g̃uto jeka be — ioꞌe. — Jebuywatwatꞌukayũ oꞌtomuwã jewekay. 10 be dinheiro oꞌg̃ũmg̃ũm cebeꞌiayũ oꞌtomuwã. Itaybit pin oꞌe pebũrũ paxi ip dinheiro oꞌjat waraꞌat iam — ioꞌe Jesus.
\p
\v 16 — G̃ebuje ibuywatwatꞌukat oajẽm jekariwa kay — ioꞌe. — “Kariwa,” ioꞌe. “Pũg̃ dinheiro eg̃ũm owebe isurũg̃at. 10 be ojat waraꞌat,” ioꞌe — Jesus oꞌe.
\p
\v 17 — “Xipat ẽn,” ioꞌe. “Xipan cĩcã juk adi ecekapik,” ioꞌe. “Xipan cuk adi ecekapik pũg̃at kug̃ ewebe og̃ũmꞌiat kug̃- -dinheiro kug̃- -yopĩcat kug̃,” ioꞌe. “Imẽnpuye 10 be ag̃oka kukan ecesũy,” ioꞌe kariwa cebe — Jesus oꞌe.
\p
\v 18 — Ibocewi waraꞌat oajẽm ibuywatwatꞌukat — ioꞌe. — “Kariwa,” ioꞌe. “Ixaat kug̃ pima, 5 be ojat waraꞌat,” ioꞌe waraꞌacat — Jesus oꞌe.
\p
\v 19 — “5 be ikabog̃atka kukan ecesũy- -wũyat eipi ka kukan,” ioꞌe kariwa cebe — Jesus oꞌe.
\p
\v 20 — Ibocewi waraꞌat oajẽm ibuywatwatꞌukat — ioꞌe. — “Juku, kariwa,” ioꞌe. “Edinheirom. Pũg̃ ma,” ioꞌe. “Ocekapik g̃u waraꞌat pu am. Og̃uekabek pit pag̃õm,” ioꞌe. 
\v 21 “Oparara ebuxim, ẽn wararaꞌacat mudadaybotbon puye,” ioꞌe. “Ẽn ibubum wararaꞌacat xewi iũmũm g̃u maꞌg̃u,” ioꞌe. “Ẽn ibubum cexewi ip taidadam g̃u maꞌg̃u,” ioꞌe ibuywatwatꞌukat — Jesus oꞌe.
\p
\v 22 — “Xipatꞌũm cĩcã ẽn,” ioꞌe kariwa. “Ajo pẽg̃ap g̃u ẽn?” kariwa oꞌe yaꞌõberen jebuywatwatꞌukat pe. “ ‘Ocekapik g̃u waraꞌat pu am,’ i ẽn eꞌem owebe. ‘Og̃uekabek pag̃õm,’ i ẽn eꞌem owebe,” ioꞌe. ‘Ẽn wararaꞌacat mudadaybotbon,’ i ẽn eꞌem owebe,” ioꞌe. ‘Ẽn ibubum wararaꞌacat xewi iũmũm g̃u maꞌg̃u,’ i ẽn eꞌem owebe,” ioꞌe. “ ‘Ẽn ibubum cexewi ip taidadam g̃u maꞌg̃u,’ i ẽn eꞌem owebe,” ioꞌe. 
\v 23 “Apẽnpuye dak dinheiro eg̃ũm g̃u dinheiro muxipanpanꞌukat pe ixe be waraꞌat pu am? Ixe be iũm puje, waraꞌat kug̃ kajuk eceꞌe dinheiro kug̃,” ioꞌe kariwa — Jesus oꞌe.
\p
\v 24 — “Pũg̃ ma ikug̃at pui bewi juy cedinheiro epejat,” ioꞌe kariwa jexeayũ be. 10 be ikug̃at pe juy epeg̃ũm,” ioꞌe — Jesus oꞌe.
\p
\v 25 — “Kariwa, imẽn g̃u bit,” ioꞌe ip. “Teku kuy 10 be ikug̃!” ioꞌe ip kariwa be.
\p
\v 26 — “Imẽn ma õn eꞌem,” ioꞌe kariwa bit. “Adeat kukat pe waraꞌat jeꞌg̃ũm ip. Adeꞌũmat kukat xewi bit jeꞌjat ip,” ioꞌe kariwa — Jesus oꞌe.
\p
\v 27 — “Okay itakomaayũ juy epetojot ijoce,” ioꞌe. “ ‘Ocekukat pin g̃u ewebe,’ i juk oꞌe ip owebe,” ioꞌe. “Ixeyũ juy epetojot ijoce,” ioꞌe. “Ixeyũ ma epeyaoka wetabixe,” ioꞌe kariwa — Jesus oꞌe.
\m Imẽn Jesus wuymutaybitbinap ekawẽn oꞌg̃uwẽn cebe ip.
\p
\v 28 Jesus iboap e buje, oꞌju Jerusalém ka kay. Jeweju etaybitbinayũ wap oꞌju Jesus. 
\v 29 Oajẽm ip Betfagé ka xe, Betânia ka xe dak, coꞌa xe. Coꞌa butet Oliveira dipꞌa i osunuy. Ajẽm pima xepxepayũ oꞌg̃uju waraꞌatka be jeweju etaybitbinayũ.
\p
\v 30 — Epeju juy ag̃oka kay- -wuywapatka kay — ioꞌe xepxepayũ be. — Iboce jumentoꞌitꞌit epetobuxik- -ikirikat- -yakpi jejeꞌibitꞌũmat. Ixe jumentoꞌitꞌit epeg̃uwekap — ioꞌe cebe ip. 
\v 31 — Ixe juy etojot ijoce — ioꞌe. — “Apẽnpuye dak eyju jumentoꞌitꞌit muwekapkam?” iꞌe buje ip, “Ocekariwa cekay, ikug̃ꞌũm puye,” i juy epeꞌe cebe — ioꞌe cebe ip.
\m
\v 32 Oꞌju ip xepxepayũ.
\p Oajẽm ip jumentoꞌitꞌit kay. Oꞌtobuxik ip apẽn cuk Jesus oꞌe iap tag̃. 
\v 33 Imuwekapkam pima õhõ iwat oꞌjekawẽn cebe ip.
\p — Apẽnpuye eyju jumentoꞌitꞌit muwekapkam? — ioꞌe õhõ iwat.
\p
\v 34 — Ocekariwa cekay, ikug̃ꞌũm puye — ioꞌe xepxepayũ.
\p — Haꞌa — ioꞌe.
\p
\v 35 Oꞌtujowat ip Jesus kay. Oajẽm. Jumentoꞌitꞌit akpi jeje jeekabek oꞌjomõg̃ ip. Ceweju etaybitbinayũ Jesus oꞌg̃uju jumentoꞌitꞌit akpi jeje- -iekabek ceje. 
\v 36 Jerusalém ka xe Jesus ajẽm pima, adeayũ jeekabek oꞌg̃upayapaya ip Jesus wap e dag̃ yaꞌõbuyxi cexe ip puye. 
\v 37 Jesus oꞌtobede jĩjã ip g̃ebuje. Icokcok cĩcã ip oꞌe Oliveira dipꞌa pẽnpẽn tag̃ kopkom pima- -soat cebekitkit. Oꞌjewãwã ip Jesus kay.
\p — Deus xipat cĩcã — ioꞌe ip yaꞌõberen. — Teku kaꞌũma buk ajojojoiap mubapukpug̃ jekukum — ioꞌe ip. 
\v 38 — Wuykukukat omuyku Deus aꞌõbi — ioꞌe ip jewewebe. — Kaꞌũma ma ixe joꞌiat idipat! — ioꞌe ip. — Kabaꞌũm jeedop ip kabi watwat — ioꞌe ip. — Deus cuy xipacat jeꞌg̃ũm cebe — ioꞌe ip Jesus cocom pima. 
\p
\v 39 Imẽneju Fariseuyũ oꞌjewãwã Jesus pe adeayũ parakpewi.
\p — Tapu — ioꞌe ip. — “Epeyemũg̃ cuy,” i juy ece eweju etaybitbinayũ be, warẽmtag̃ ma ip eꞌem puye — ioꞌe ip.
\p
\v 40 — Iteyũ mũg̃ꞌi bima, witaꞌa ma kuka oꞌjeaewãwã odobede am — ioꞌe.
\p
\v 41 Jajẽm puje, Jerusalém ka kay oꞌjeak Jesus. Oꞌtõn ika jojom pima ade ika watwat kũyjobitꞌũm puye. Oꞌjekawẽn ika jojom pima.
\p
\v 42 — Jerusalém ka watwat, Deus omudot eydaxijoap ojuy kabaꞌũm eydop am — ioꞌe Jesus. — Obikuy jĩjã g̃asũ ma eymutaybit am iboam. Eyju bit eybuꞌu ixe be eydaxijo am. Imẽnpuye wekawẽn baꞌarẽm eyxe — ioꞌe. 
\v 43 — Imẽnpuye g̃uyjom eykay itakomaayũ korara joꞌiat jomuy ip eyka koreren jeõm ãm eyaokaka am — ioꞌe. — Kaꞌwi mug̃ẽg̃ẽ ip jomuy. Jeymukoreren ip eyenapõnap puxixim. Jeyakodip ip — ioꞌe. 
\v 44 — Jeymuꞌũm ip. Soat eyka watwat g̃uꞌũm ip. Kaꞌũma ma jepoyat. Ikabog̃atka sukamuꞌũm cĩcã ip. Witaꞌa yamudu ip- -soatꞌa ukꞌa mug̃ẽg̃ẽapꞌa. Pũg̃ꞌa iwat g̃u ip waraꞌatꞌa jeje. Deus omudot eydaxijo am. Eyju bit okay g̃u. G̃asũ ocedaxijo pin Deus iam eyetaybit g̃u. Imẽnpuye soat ip jeymuꞌũm. Pũg̃ tak epeyepoyat g̃u. Soat ip jeymuꞌũm — ioꞌe Jesus.
\p
\v 45 Jesus oajẽm Deus eju kawẽnwẽnapꞌa kay- -yabog̃atꞌa kay. Ya be oõm. Ag̃okatkayũ oꞌg̃ujẽm ukꞌa ekorara bewi- -õhõ deidadaꞌukayũ.
\p
\v 46 — Imẽn eꞌem Deus ekawẽntup: “Odukꞌa bit cuy yanuy Deus eju kawẽnwẽnapꞌam” i — ioꞌe cebe ip. — Eyju bit epeyamuwexat ibukurukayũ munẽmapꞌam — ioꞌe cebe ip.
\m
\v 47 Jesus adeayũ mutaybitbin osunuy soat kabia Deus eju kawẽnwẽnapꞌa be- -yabog̃atꞌa be.
\p G̃ebuje paĩyũ kukukayũ Jesus aoka ojuy oeku ip- -Moisés ekawẽn imutaybitbinꞌukayũ dak, wararaꞌacayũ dak- -Judeuyũ kukukayũ. Jesus aoka ojuy osodop ixeyũ ma.
\p
\v 48 Adeayũ bit Jesus ekawẽn kay jĩjã osodop. Imẽnpuye Jesus aoka baꞌore oꞌe cekayꞌũmayũ be.
\b
\c 20
\p
\v 1 Jesus imutaybitbin pima paĩyũ kukukayũ oajẽm cekay. Oajẽm ip Jesus kawẽn idipat muwẽnuwẽn pima Deus eju kawẽnwẽnapꞌa be- -yabog̃atꞌa be. Oajẽm ip Moisés ekawẽn imutaybitbinꞌukayũ eju, Judeuyũ kukukayũ eju dak. 
\v 2 Soat ip oꞌjekawẽn Jesus eju.
\p — Abu-aꞌõbi juk ijaꞌa beayũ eg̃ujẽm? — ioꞌe ip. — Abu-aꞌõbi ẽn jekukum? — ioꞌe ip. — Iboam cuy ocemukũyjom ece — ioꞌe ip.
\p
\v 3 — Eyju ma omukũyjom cuy epeꞌe — Jesus oꞌe. 
\v 4 — Abu-aꞌõbi g̃u juk João ijodiat mubatisasan oeku? Deus aꞌõbi du? Ijodiat aꞌõbi g̃u xeꞌe? Iboam cuy epeꞌe omukũyjom — ioꞌe cebe ip.
\p
\v 5 G̃ebuje oꞌjewaꞌõxikxik ip jeweweju.
\p — Apẽn xeꞌe acejede? — ioꞌe ip. — “Deus aꞌõbi” iꞌe buje cebe, “Apẽnpuye juk eyetabut g̃u João kay?” i jeꞌe Jesus wuywebe — ioꞌe ip. 
\v 6 — “Ijodiat aꞌõbi,” iꞌe buje bit cebe, adeayũ wuyabug̃bug̃ jeꞌe witaꞌam, ixeyũ xe João Deus aꞌõbi juk adi oeku buye — ioꞌe ip jewewebe.
\p
\v 7 Imẽnpuye:
\p — Ocetaybit g̃u abu-aꞌõbi juk João ijodiat mubatisasan oeku iam — ioꞌe ip cebe.
\p
\v 8 — Õn tak jeymukũyjo g̃u abu-aꞌõbi õn jekukum iam — ioꞌe Jesus.
\p
\v 9 G̃ebuje Jesus wuymutaybitbinap ekawẽn oꞌg̃uwẽn adeayũ mukũyjo am Deus aꞌõbi õn jekukum iam.
\p — Ag̃okatkat ibuneꞌĩcatpune oꞌtaida uvabune — ioꞌe Jesus. — Ixe uvadip iwat ag̃okatkayũ oꞌjomuy tip wiwi an. “Wekadaidip cuy epetipwiwi,” ioꞌe cebe ip. Oꞌju waraꞌat ka be ixeyũ ag̃okatkayũ tip wiwim pima. Ibun cĩcã osunuy waraꞌat ka be — ioꞌe. 
\v 10 — Yaopap ekaxi bima tip iwat uvaꞌa kay oꞌe. Jebuywatwatꞌukat oꞌtomuwã.
\p — “Eju juy wekadaidip kay,” ioꞌe. “Uvaꞌa juy eyadojot oxatꞌam,” ioꞌe. Imẽn jebuywatwatꞌukat oꞌg̃uju uvaꞌa bum. Oꞌjẽm. Jay. Oajẽm uvadip pe. Imẽnpit tip wiwiꞌukayũ ibuywatwatꞌukat oꞌyamupãupã tip iwat buywatwatꞌukat. Oꞌg̃ujẽm ip tip pewi. Ibui pug̃ ma oꞌg̃ujẽm ip. Pũg̃ꞌa dak ip oꞌyaũm g̃u cebe. Jebui pug̃ ma oꞌjepit tip iwat pe — Jesus oꞌe.
\p
\v 11 — Ibocewi tip iwat waraꞌat oꞌg̃uju uvaꞌa kay jebuywatwatꞌukat.
\p — “Eju juy uvadip kay wekadaidip kay,” ioꞌe waraꞌat pe. “Uvaꞌa juy eyadojot oxatꞌam,” ioꞌe.
\p — Xerewun. Oꞌjẽm ibuywatwatꞌukat. Jay. Oajẽm uvadip pe. Imẽnpit ixe waraꞌacat tak oꞌg̃ujẽm ip. Ixe dak ip oꞌyaokaka jĩjã. Warẽmtag̃ ma oꞌjukuk ip. Ibui pug̃ ma oꞌg̃ujẽm ip. Pũg̃ꞌa dak ip oꞌyaũm g̃u cebe. Jebui pug̃ ma oꞌjepit kadai iwat pe — ioꞌe.
\p
\v 12 — Ibocewi waraꞌat oꞌg̃uju uvaꞌa kay jebuywatwatꞌukat. Ixe waraꞌacat oajẽm tip pe. Ixe dak ip oꞌyamupãupã. Ixe dak oꞌg̃ujẽm ip tip pewi. Jebui pug̃ ma oꞌjepit tip iwat pe — ioꞌe.
\p — Imẽn kadaidip wiwiꞌukayũ ebapũg̃ayũ oꞌg̃ujẽm tip pewi. Tip iwat buywatwatꞌukayũ oꞌg̃ujẽm ip. Ebapũg̃ em ip ibui pug̃ ma oꞌg̃uypit kadaidip iwat kay.
\p
\v 13 — Imẽneju tip iwat oꞌjekawẽn jewebe ma.
\p — “Apẽn paxi oce?” ioꞌe jewebe ma. Okpot cuy og̃uju tip kay yabum,” ioꞌe. “Oxe ikukpin cĩcãat cuy og̃uju. Ibuyxim ma ip okpot jukuk,” ioꞌe jewebe ma.
\p
\v 14 — Kadaidip tip iwat jekpot oꞌg̃uju tip kay. Xerewun. Oꞌjẽm. Jay. Oajẽm tip pe. Imẽnpit ipot co buje, tip wiwiꞌukayũ oꞌjekawẽn jewewebe.
\p — “G̃aꞌa tip iwat ipot ayaoka,” ioꞌe ip jewewebe. “Cebay eꞌũ buje, teku soat jeꞌjat jebayꞌũm pubut,” ioꞌe ip. “Tip kukan jeꞌe,” ioꞌe ip. “G̃aꞌa ayaoka. Wuyju ma ibubut ajat. Wuyju ma tip kukan acesop,” ioꞌe ip jewewebe.
\p
\v 15 — Tip iwat ipot oꞌtujujẽm ip tip pewi. Kacũg̃ kay oꞌtujowat ip. Ipotꞌũm oꞌyaoka ip — ioꞌe Jesus imutaybitbin.
\p — Apẽn jeꞌe tip iwat jekpotꞌũm oꞌyaokaꞌiayũ be? — ioꞌe Jesus jaꞌĩjojomayũ be. 
\v 16 — Og̃uwẽn eywebe. Kadaidip iwat jeꞌju tip wiwiꞌukayũ kay. Yaoka ip. Wararaꞌacayũ jomuy ixeyũꞌũmꞌũm tieg̃ jekadaidip wiwi an — ioꞌe.
\p — Cẽm tu? — ioꞌe Jesus ekawẽn cocoayũ. — Imẽn xeꞌe jeꞌe? — ioꞌe ip Jesus pe.
\p
\v 17 — Icẽmãn — ioꞌe Jesus. — Omuwẽg̃aptup imẽn eꞌem:
\mi “Iteꞌa witaꞌa xipat g̃u,” ioꞌe ukꞌa muymuyꞌukayũ jewewebe, i. Iteꞌa oꞌyaxik ip, i. Imẽnpit oꞌyaxikiatꞌa xipat cĩcãatꞌam oꞌe, i. Waraꞌatꞌa muycemapꞌam oꞌe ceꞌaeduap puxim, i.
\m Imẽn eꞌem Deus ekawẽntup- -omuwẽg̃aptup — ioꞌe Jesus. 
\v 18 — Ig̃oꞌa jejewi jeꞌat puje, oꞌjewenõmnõmnõm kuka. Ijodiat ceje ig̃oꞌa at puje, tõm ã kuka oꞌe ip — ioꞌe.
\m Iboap ekawẽn oꞌg̃uwẽn Deus aꞌõbi õn jekukum iam ixeyũ mukũyjoap ojuy.
\p
\v 19 Oꞌyaꞌĩjojoꞌiayũ oitakomãn Jesus kay ibo ekawẽn cocom puye- -Moisés ekawẽn imutaybitbinꞌukayũ, paĩyũ kukukayũ dak.
\p — Jesus ijop ekawẽn oꞌg̃uwẽn wuymukorẽm ãm — ioꞌe ip jewewebe.
\p Imẽnpuye Jesus pu ojuy oꞌe ip. Imẽnpit iparara oꞌe ip adeayũ buxim. 
\v 20 Ixeyũ dak dinheiro oꞌg̃ũm ag̃okatkayũ be Jesus ekawẽn puyxijo am.
\p — Jewexe juy Jesus ekawẽn kay epeku — ioꞌe ip. — Ixe dobatban cuy epeku — ioꞌe ip cebe. — Ixe ekawẽn puyxijojom cuy epeku — ioꞌe ip. — Warẽmtag̃ ma acoꞌi jekawẽn — ioꞌe ip. — Warẽmtag̃ ma cekawẽn puje, iecug̃ap kay juy atujowat — ioꞌe ip. — Iecug̃ap aꞌõbi acã yaoka but wuywebe — ioꞌe ip.
\p Oꞌju ip Jesus kay. Jay. Oajẽm ip.
\p
\v 21 — Tapu — ioꞌe ip. — Ocetaybit cedag̃ ma ẽn kawẽnwẽn iam. Cedag̃ ma ẽn ocemutaybitbin tak — ioꞌe ip cebe. — Kocũg̃ kadi kay g̃u ẽn ag̃- -badiat kay acã — ioꞌe ip.
\m Imẽn oꞌe ip yaꞌĩjojoayũ mug̃uykuku ojuy Jesus kay oceju iam.
\p
\v 22 — Cedag̃ tu exe wuywebe dinheiro ũm ãm soat xe yaꞌõbuyxiat pe- -wuyeipi kukat pe- -César be? Aceg̃ũm g̃u xeꞌe? — ioꞌe ip Jesus pe.
\p
\v 23 Jesus pit oꞌe jewebe ma: — Iteyũ wekawẽn puyxijo ojuy — i.
\p
\v 24 — Dinheiro isurũg̃at cuy epetojot okay — ioꞌe Jesus cebe ip- -jedobatbanayũ be- -jekawẽn puyxijojo ojuyacat pe.
\p — Juku — ioꞌe ip.
\m Oꞌg̃ubapuk cebe.
\p — Abu-biõg̃buk ija cebe? — ioꞌe. — Abu-butet tak? — ioꞌe.
\p — César biõg̃buk- -soat xe yaꞌõbuyxiat biõg̃buk — ioꞌe ip. — Ixe butet tak opop cebe — ioꞌe ip.
\p
\v 25 — César emukaypin cuy epeg̃ũm cebe — ioꞌe. — Deus emukaypin pit cuy epeg̃ũm cebe — ioꞌe Jesus.
\p
\v 26 Jesus ekawẽn puyxijo baꞌore oꞌe cebe ip soat etabun. Cede baꞌore oꞌe ip. Mũg̃ ma osodop ip.
\p — Itaybit cĩcã teku jede am — ioꞌe ip. — Yaꞌõmuypit paꞌore wuywebe — ioꞌe ip jewewebe.
\p
\v 27 Saduceuyũ oajẽm Jesus kay. Saduceuyũ Judeuyũ dak osodop ip. Tũybe wuyeꞌũ buje acejetaitꞌũma waram iãn oꞌe ip. Oꞌjekawẽn ip Jesus eju.
\p
\v 28 — Tapu — ioꞌe ip. — Moisés Deus pe wuyawẽwẽaptup cuk adi oꞌtupmubararak ocewebeaptum — ioꞌe ip. — Imẽn eꞌem ibodup:
\mi Ag̃okatkat wag̃oꞌũm eꞌũ buje, ikitpit puk cuy jewebumũn jewagoꞌũm tayxibuk eju itayxibuk iꞌitꞌetꞌũm pima, i. Jewebumũn cuy imuꞌukreg̃ am, bekicat muaypan am jewag̃oꞌũm tieg̃, i.
\m
\v 29 Imẽn Moisés oꞌtupmubararak — ioꞌe ip.
\p G̃ebuje 7 beayũ oꞌg̃uwẽn ip Jesus pe- -ikitpitpiyũ.
\p — Koapat oꞌjewebumũn. Ixe koapatꞌũm oeꞌũ jekpotpetꞌũm pima ma — ioꞌe ip. 
\v 30 — G̃ebuje jewag̃oꞌũm tomujuat oꞌjewebumũn jewag̃oꞌũm tayxibuk eju. Ixe tomujuatꞌũm oeꞌũ jekpotpetꞌũm pima maꞌg̃uto — ioꞌe ip. 
\v 31 — Ibocewi wararaꞌacayũ oꞌjewebumũnmũn jewag̃oꞌũm tayxibuk eju 5 beayũ- -koapat tayxibuk eju- -pũg̃ eju ma. Soat ip oꞌjewebumũnmũn ceweju. Jekpotpetꞌũm pima ma oeꞌũꞌũ ip soat ma — ioꞌe ip. 
\v 32 — Soat ip ceꞌũ buje, ayacatꞌũm tak oeꞌũ. 
\v 33 Soat oꞌjewebumũnmũn ceweju 7 beayũ. Imẽneju waram wuyetait puje, abu-tayxim xeꞌe jeꞌe? — ioꞌe ip Jesus pe.
\p
\v 34-35 G̃ebuje Jesus oꞌjekawẽn Saduceuyũ be.
\p — Ijodiat ma jewebumũnmũn — ioꞌe. — Waram oꞌjetaitꞌiayũ bit jewebumũnmũn g̃u. Deus ixeyũ oꞌg̃utait ceꞌũap tomukadi. Jewebumũnmũn g̃u ip. 
\v 36 Waram oꞌjetaitꞌiayũ waram g̃u jeꞌũ, Deus ekawẽn tojotjotꞌukat puxim ip puye. Deus ipotpoyũ ip, Deus ixeyũ oꞌg̃utait ceꞌũap tomukadi buye — ioꞌe Jesus. 
\v 37 — Napa ma eyju eꞌem “Waram acejetait g̃u,” i. Waram epeyetait — ioꞌe. — Waram acejetait wuyeꞌũ buje iam cuk adi oꞌg̃utaybitbin Moisés — ioꞌe. — Ixe Moisés tipsopat ekawẽntup oꞌtupmubararak. “Deus Abraão kukukat, Isaque kukukat tak, Jacó kukukat tak,” i juk oꞌe Moisés, ceꞌũꞌũ ip puje. 
\v 38 Deus ceꞌũat kukukat g̃u- -itaicat kukukat acã. Imẽnpuye wuyetaybit ixeyũꞌũmꞌũm waram oꞌjetait ceꞌũap tomukadi iam. Soat itait Deus xe- -itaicayũ, waram oꞌjetaitꞌiayũ dak — Jesus oꞌe.
\p
\v 39 — Etaybit cĩcã ma jede am — ioꞌe Moisés ekawẽn imutaybitbinꞌukat.
\m
\v 40 Yaꞌõbabiꞌũm ip oꞌe Jesus aꞌõbu am.
\p
\v 41 Jesus pit oꞌe cebe ip:
\p — Addeayũ eꞌem “Deus emunaẽ Davi naxeg̃ebit,” i — ioꞌe Jesus cebe ip. 
\v 42 — Imẽn eꞌem Davi Salmodup pe:
\mi 
Deus oꞌe okukukat pe: “Xikꞌi abik obaꞌat kadi,” i. 
\v 43 “Ekay itakomaat aꞌõbacaap og̃uꞌũm,” i. Kũyjobit jeedop ip aꞌõ kay, i — ioꞌe.
\m
\v 44 — Imẽn Davi eꞌem Salmodup pe- -jebibododonaptup pe — ioꞌe. — Davi oꞌe Deus emunaẽ be “Okukukat” i. Imẽnpuye Deus emunaẽ Davi naxeg̃ebit acã g̃u osunuy. Davi kukukat tak osunuy — ioꞌe Jesus cebe ip.
\p
\v 45 G̃ebuje Jesus oꞌjekawẽn jeweju etaybitbinayũ eju. 12 beayũ eju oꞌjekawẽn adeayũ aꞌõpiju.
\p
\v 46 — Eydayꞌemꞌum cuy epesop Moisés ekawẽn eymutaybitbinꞌukayũ be eymug̃uykukuap puxim — ioꞌe. — Tũybe soat podi ma ocaꞌõbuyxi iãn eꞌem ip — ioꞌe. — Jesay ukpi wẽnẽg̃wẽnẽg̃ãn ip jekukum soat pe jejojoan. Icokcok cĩcã ip wararaꞌacat pe ibuyxim ikuk am soat etabutpe — ioꞌe. — Kariwa yobog̃at tũyap pe abik ojuy ip Deus eju kawẽnwẽnapꞌa be. Peta kabia be dak cucum ip kariwa yobog̃at tũyap kay yabikap ojuy. 
\v 47 Ag̃okatkatꞌũm eꞌũ buje, itayxibuk pubut pupum ip. Cekawẽn waꞌũm cĩcã ip Deus eju wararaꞌacat pe “Eyetaybit cĩcã Deus eju kawẽn ãm” iꞌe am cebe ip. Jewexe Deus eju ip kawẽnwẽn. Deus xe g̃u ip yaꞌõbuyxi- -jewexe acã. Imẽnpuye soat podi ma ipiat supiꞌajo ip — ioꞌe Jesus.
\b
\c 21
\p
\v 1 G̃ebuje Jesus oꞌjeak dinheiro mũnꞌa kay- -isurũg̃at mũnꞌa kay. Dinheiro mũnꞌa Deus eju kawẽnwẽnapꞌa be oꞌyanuy. Ibubut adeayũ dinheiro mõg̃mõg̃ ip oꞌe ig̃oꞌa be. Xeresu g̃u oꞌjomõg̃mõg̃ ip ya be.
\p
\v 2 G̃ebuje Jesus ayacat oꞌjojojo- -itopꞌũm eꞌuibit- -tadaybocat. Ixe ayacat dinheiro isurũg̃at oꞌjomõg̃ ig̃oꞌa be- -xepxep ã oꞌjomõg̃. Xepxepatei teibog̃ g̃u osodop- -teiꞌĩt ma.
\p
\v 3-4 — Icẽmãn õn eꞌem eywebe — Jesus oꞌe jexeayũ be. — Ibubut adeayũ ma ade oꞌjomõg̃mõg̃ ip. Yopĩt ma bit jexewiatꞌin oꞌjomõg̃mõg̃ ip ya be jedinheiroꞌin. Ixe ayacat pit soat jexewiat oꞌjomõg̃ jedinheiro. Kaꞌũma ma oꞌjepoyat cexe. Teiꞌĩcat oꞌjomõg̃. Inaka soat oꞌjomõg̃ jedinheiro. Jexat pu ojuyap tak oꞌjomõg̃. Imẽnpuye Deus xe ayacat teibog̃ oꞌjomõg̃ teiꞌĩt maꞌg̃u wuyxe. Deus xe wararaꞌacat podi ma oꞌjomõg̃ — ioꞌe Jesus.
\p
\v 5 G̃ebuje ceweju etaybitbinayũ oꞌjekawẽn Jesus eju.
\p — Tapu, akꞌi juy ece — ioꞌe ip. — Deus eju kawẽnwẽnapꞌa yadip cĩcã! — ioꞌe ip. — Witaꞌa mug̃ẽg̃ẽꞌa yadip cĩcã! — ioꞌe ip. — Adeayũ juk adi jedinheiro oꞌg̃ũmg̃ũm yamudipapteim — ioꞌe ip.
\p
\v 6 — Icẽmãn — ioꞌe Jesus cebe ip. — Yadip cĩcã g̃asũ. G̃axĩn ma bit soatꞌa jeꞌaedu. Xepxepꞌa jewaꞌawebotbon g̃u jeꞌe witaꞌa — ioꞌe Jesus.
\p
\v 7 — Tapu, pug̃ũn xeꞌe jeꞌaedu? — ioꞌe ip. — Ajo jeꞌbapuk g̃asũ jeꞌaedu iam ocemutaybit am? — ioꞌe ip.
\p
\v 8 — Eydayꞌemꞌum cuy epesop wararaꞌacat pe eymug̃uykukuap puxim! — ioꞌe. — Napapaꞌukayũ jajẽm. “Cristo õn,” i napa ma jeꞌe ip wararaꞌacat pe. “Ijodiat taxijojoꞌukan Deus emunaẽ õn,” i napa ma jeꞌe ip. “G̃axĩn ma Deus soat kukukan jeꞌe,” i napa ma jeꞌe ip. Eyetabun g̃u juy epesop ixeyũ ekawẽn kay — ioꞌe. 
\v 9 — Soat kaka dag̃ nopag̃õg̃õm jeꞌe ip- -ijoxĩn ma, wũy dak. Nopag̃õg̃õmap awẽg̃ tobuxik puje, eyag̃uykorereren g̃u juy epesop. Imẽn cuy jeꞌe koam. Imẽnpit soat iꞌũmap kabia oajẽm g̃u buk.
\p
\v 10 — Pũg̃ eipi watwat nopag̃õg̃õm jeꞌe waraꞌat eipi watwat eju. Pũg̃ ka watwat nopag̃õg̃õm jeꞌe waraꞌat ka watwat eju. 
\v 11 Soat kaka dag̃ ipi jexixi. Soat ka dag̃ jeꞌe reap. Soat ka dag̃ jeꞌe iwãtaxipipi ade. Xipatꞌũm cĩcãat jeꞌbapuk. Wuymuparararanap tak jeꞌbapuk kabi be — ioꞌe.
\p
\v 12 — Iboap ebapuk awap itakomaayũ jeydaomũn. Ipiat supiꞌajoat ip eywebe. Jeydujowat ip Deus eju kawẽnwẽnapꞌa be Judeuyũ be eymuymuy am. Daomũnmũnapꞌa be ip jeymuõm. Jeydujowat ip iecug̃ap dopabe ika kukukayũ dopabe dak, okay eyetabut puye. 
\v 13 Ixeyũ dopabe bima juy kawẽn idipat epeg̃uwẽn cebe ip — ioꞌe. 
\v 14 — “Apẽn paxi oceꞌe cebe ip?” iꞌũmg̃u juy epeꞌe. “Apẽn paxi ocewedayo?” iꞌũmg̃u dak cuy epeꞌe. Eyag̃uybabiꞌũmꞌũm g̃u juy epesop apẽn paxi ocewedayo iap kay. 
\v 15 Õn ma jeymutaybin jedem ixeyũ dopabe bima. Eyaꞌõmuypit paꞌore jeꞌe cebe ip eykay itakomaayũ be — ioꞌe. 
\v 16 — Eyebay ma jeyũm eykay itakomaayũ be eyaoka am, eywag̃oyũ dak, eybadipyũ dak, eybureyũ dak. Ixeyũ ma eyꞌin yaoka pũg̃pũg̃. 
\v 17 Soat eykay g̃u jĩjã jeꞌe okay eyetabut puye — ioꞌe. 
\v 18 — Õn pit soat em ag̃ og̃uy eykay. Soat em õn xipan jeykuk. 
\v 19 Eyetabun cuy epesop okay ipiatꞌajojom maꞌg̃u eyju. Soat em Deus xe epesop eyeꞌũ buje — ioꞌe Jesus.
\p
\v 20 — Sorarayũ be Jerusalém ka mukoreren puje, eyetaybit epesop g̃axĩn ma ip ikamuꞌũm iam. 
\v 21 Jerusalém ka koreren pima, jewat cuy ip coꞌa kay jaokaap puxim Judéia eipi watwat. Jeka bewi juy ip jeꞌjẽm g̃u ikabog̃atka watwat. Ikabog̃atka kay g̃u juy ip jenapõn kog̃ũnpi watwat. 
\v 22 Jenapõn g̃u juy ip ixe kabia be Deus jekay itakomaayũ be jeweig̃ puye. Ixe soat pe jeweik jemudupmubararaktup ekawẽn tag̃- -kuyjeatup ekawẽn tag̃ — ioꞌe.
\p
\v 23 — Yukreg̃ayũ ipiat supiꞌajojo jĩjã ixe kabia be, jekũm pe jeꞌit kukayũ dak. Judéia eipi watwat ipiat supiꞌajojo jĩjã. Deus ipiat supiꞌajoat Judeuyũ be itakoma jĩjã buye. 
\v 24 Cekay itakomaayũ Judeuyũ yaokaka pajam. Wararaꞌacat ip taomũn. Taomũnmũn ip tujowat waraꞌat ka dag̃. Jerusalém ka sukamuꞌũm Judeuꞌũmayũ. Imẽn jeꞌbapuk Judeuꞌũmayũ soat kukukan pima — Jesus oꞌe.
\p
\v 25 — Iwaruat jeꞌbapukpuk kaxiepiat pe, kaxiaat pe dak, kasopta be dak. Soat ka watwat yag̃uybabiꞌũmꞌũm cĩcã jeꞌe. Yag̃uybabiꞌũmꞌũm jeꞌe ip soati jediexixi jĩjã buye, tipodoy jĩjã buye dak. 
\v 26 Soat kabi beacat muycemcemap jearere. Soat yaꞌõcaꞌũm jeꞌe jeparara pibun. Yaꞌõcaꞌũm jeꞌe ip ipararuat ebapuk puje — ioꞌe.
\p
\v 27 — G̃ebuje ip ojo — ioꞌe Jesus. — Kabikerereat eju oajẽm puje ip ojo — ioꞌe Jesus. — Soat wag̃o õn. Ixeyũ ojo. “Kaꞌũma ma ejoꞌiat yaꞌõbacaat,” i jeꞌe ip owebe — ioꞌe Jesus. — “Soat podi ma edip,” i jeꞌe ip owebe — ioꞌe Jesus. 
\v 28 — Iboap ebapuk puje, g̃axĩn ma taxijojom epeꞌe. Imẽnpuye eycokcog̃ cuy epesop. Eyaꞌõcam cuy epesop — ioꞌe.
Imẽn Jesus oꞌjekawẽn cebe ip.
\p
\v 29 G̃ebuje Jesus wuymutaybitbinap ekawẽn oꞌg̃uwẽn jexeayũ be.
\p — Figueiraꞌip cuy epeyopcoco, waraꞌatꞌip tak. 
\v 30 Tupkireatup cẽm puje, eyetaybit g̃axĩn ma koato jeꞌe iam. 
\v 31 Imẽnpuxim ipararuat ebapuk puje, eyetaybit epeꞌe g̃axĩn ma Deus soat kukukan jeꞌe iam — ioꞌe.
\p
\v 32 — Icẽmãn õn eꞌem eywebe. Soat g̃asũacayũ eꞌũ awap soat jeꞌbapuk wekawẽn tag̃. 
\v 33 Kabi iꞌũm, iꞌpi dak. Wekawẽn pit iꞌũm g̃u. Soat em wekawẽn kay itabut jeedop ip adeayũ — ioꞌe.
\p
\v 34 — Ag̃ cuy epesop wajẽmap kay — ioꞌe. — Puybitxim g̃u juy epesop kawedixim g̃u dak, tarekrek pupuxim g̃u dak — ioꞌe. — Ag̃ cuy epesop wepit pujeap kay. 
\v 35 Ag̃ꞌũm pima epeyekuy wepit puje puca ekuyap puxim ibu buje. 
\v 36 Imẽnpuye soat em ma ag̃ cuy epesop wepicap kay. Soat em cuy epeyekawẽn Deus eju — ioꞌe. — “Bay, ocemutaxin cuy eg̃uy ipiatꞌajoap puxim,” i juy epeꞌe Deus pe. “Bay, ocebuywatwan cuy eg̃uy soat wag̃o kay ocajẽm puje ocesũsũnap puxim,” i juy epeꞌe cebe — Jesus oꞌe.
\p
\v 37-38 Soat kabia Jesus adeayũ mutaybitbinꞌuk osunuy Deus eju kawẽnwẽnapꞌa be- -yabog̃atꞌa be. Kabiaꞌisum adeayũ jeꞌaweroroꞌuk ip osodop ig̃oꞌa be Jesus ekawẽn com. Kabiog̃kabiog̃ꞌi bima oꞌjepitpit Jesus Oliveira dipꞌa bicũg̃pe xexen.
\b
\c 22
\p
\v 1 Peta ajẽm pima paĩyũ kukukayũ Jesus aoka ojuy ip, Moisés ekawẽn imutaybitbinꞌukayũ dak. Peta butet Páscoa i osunuy. 
\v 2 Ixe epeta bima Judeuyũ pãoꞌa oꞌoꞌuk osodop- -yamuyuhuhuaptõmtẽmꞌũmatꞌa. Soat kabia Jesus aoka ojuy oekuku ip paĩyũ kukukayũ, Moisés ekawẽn imutaybitbinꞌukayũ dak.
\p — Apẽn g̃u xeꞌe aceyaoka? — ioꞌe ip jewewebe.
Adeayũ etaꞌũm pima ip yaoka ojuy oekuku, adeayũ buxim iparara ip puye.
\p
\v 3-4 G̃ebuje Judas oꞌju paĩyu kukukayũ kay oibuꞌun Jesus kay buye. Kũyjobit oꞌe Satanás aꞌõ kay. Ixe Judas xepxep putet osunuy. Iscariote i waraꞌat ibutet osunuy. 12 beayũꞌin osunuy ixe. Deus eju kawẽnwẽnapꞌa wiwiꞌukayũ kukukayũ kay dak oꞌju. Jekawẽn ãm ceweju ip oꞌju. Oajẽm cekay ip. Jay.
\p — Õn ma Jesus og̃ũm eywebe yaoka am — ioꞌe. — Apẽn xeꞌe og̃ũm eywebe? — ioꞌe Judas.
\p
\v 5 Icokcok cĩcã ip oꞌe paĩyũ kukukayũ, Deus eju kawẽnwẽnapꞌa wiwiꞌukayũ kukukayũ dak.
\p — Ocewebe Jesus ũm puje, dinheiro oceꞌg̃ũm ewebe iũmapteim — ioꞌe ip Judas pe.
\p
\v 6 — Haꞌa, dinheiro juy eg̃ũm owebe — ioꞌe cebe ip.
\p Imẽneju soat kabia paĩyũ be Jesus ũm ojuy oeku Judas. Adeayũ etaꞌũm pi iũm ojuy oeku.
\p
\v 7-8 Peta ajẽm puje, Jesus Pedro oꞌg̃uju ikabog̃atka be, João dak. Ixe epeta bima Judeuyũ pãoꞌa oꞌoꞌuk osodop ip yamuyuhuhuaptõmtẽmꞌũmatꞌa. Ovelha aokakaꞌuk ip osodop Páscoa epeta bima. Imẽnpuye Jesus Pedroyũ oꞌg̃uju soat muxipan am.
\p — Ikabog̃atka be juy epeju — ioꞌe. — Ovelha juy epejat. Epeyaoka juy. Epejoyoy juy wuywebe iꞌo am Páscoa kabia be — ioꞌe cebe ip- -Pedro be, João be dak.
\p
\v 9 — Puꞌa be xeꞌe oceyoyoy wuyxat? — ioꞌe ip.
\p
\v 10 — Eyaꞌõpicũg̃cũg̃ cuy epesop! — ioꞌe. — Ikabog̃atka be eyõm puje, ag̃okatkat eydopabijuk- -idibi mũnꞌa kukat. Ixe nomuju juy epeju — ioꞌe. — Ixe be ukꞌa be iõm puje, eyju dak epeõm ig̃oꞌa be — ioꞌe. 
\v 11 — Ukꞌa iwat pe juy epeyekawẽn. “Ocemutaybitbinꞌukat oꞌjewaꞌõmudot ewebe,” i juy epeꞌe cebe. “ ‘Puꞌabi be ebikuy omujum jekõn ãm oweju etaybitbinayũ eju Páscoa kabia bima,’ i juk oꞌe ocemutaybitbinꞌukat,” i juy epeꞌe ukꞌa iwat pe — ioꞌe Jesus. 
\v 12 — Ukꞌa iwat yabimubapuk eywebe umatꞌabi, yabog̃atꞌabi, soat opop iatꞌabi — ioꞌe. — Iboꞌabi be juy ovelha epejoyoy wuyxan — ioꞌe cebe ip.
\m
\v 13 Oꞌju ip ikabog̃atka be. Apẽn cuk adi Jesus oꞌe cebe ip iap tag̃ oꞌtobuxik ip soat tag̃. Ovelha oꞌjoyoy ip ig̃oꞌabi be.
\p
\v 14 Jekõn pima Jesus oꞌjekawẽn jemumujuyũ eju- -12 beayũ eju. Kaxikxikꞌi osodop ip mesa be.
\p
\v 15 — Páscoa xat o pin cĩcã õn eyweju ijop epeta bima — ioꞌe. — G̃axĩn ma juy õn ipiatꞌajom — ioꞌe. 
\v 16 — Deus soat kukukanꞌũm pima Páscoa xat ojoꞌo g̃u. Imẽnpit Deus soat kukukan pima, ojoꞌo waram — ioꞌe.
\p
\v 17 G̃ebuje Jesus uvaꞌabidi oꞌtimuõm tikõnkõg̃ap pe.
\p — Bay, ẽn xipat cĩcã — ioꞌe Deus pe.
\p Tikõnkõg̃ap oꞌg̃ũm jeweju etaybitbinayũ be.
\p — Juku — ioꞌe. — Epetikõn. Epetimuꞌẽꞌẽ eyewewebe — ioꞌe. 
\v 18 — Ijodi g̃u waram uvaꞌabidi otikõn. Deus soat kukukan pima bit, waram otikõn — ioꞌe Jesus.
\p
\v 19 G̃ebuje pãoꞌa oꞌyabu.
\p — Bay, ẽn xipat — ioꞌe Deus pe.
\p Oꞌyadakat. Oꞌyaũm cebe ip.
\p — Ijuꞌa ojebit — ioꞌe. — Eywebeam ojeꞌũ. Yaꞌo buje weꞌũap kay juy g̃ebum epesop — ioꞌe cebe ip.
\p
\v 20 Jekõn epere buje, uvaꞌabidi oꞌtiũm cebe ip.
\p — Ijudi kõn puje, odoymukererenap kay juy g̃ebum epesop — ioꞌe. — G̃asũ Deus ikẽrẽat juꞌuk eywebewi odoymukereren puye, ojeꞌũ buye. Ikẽrẽat juꞌuk eywebewi apẽn kuyje ixe oꞌe iap tag̃ — ioꞌe Jesus. 
\v 21 — Mesa be xikꞌi owejuat ma oũm okay itakomaayũ be — ioꞌe. 
\v 22 — Soat wag̃o õn. Ojeꞌũ apẽn cuk adi webay ibikuy osunuy iap tag̃. Imẽnpit Deus ipiat supiꞌajoat oũmat pe — ioꞌe.
\p
\v 23 — Abu xeꞌe wuyꞌin kuka Jesus oꞌg̃ũm cekay itakomaayũ be? — ioꞌe ip jewewebe Jesus eju jekõnkõnayũ.
\p
\v 24 G̃ebuje Jesus eju etaybitbinayũ oꞌjewaꞌõbubu jeweweju.
\p — Abu wuyꞌin soat podi ma yaꞌõbuyxian jeꞌe? — ioꞌe ip jewewebe.
\p Oꞌjewaꞌõxikxik ip. 
\v 25 Jesus oꞌjekawẽn cebe ip.
\p — “Kũyjobin cuy epesop waꞌõ kay,” iꞌeꞌem ijodiat kukukayũ jebekitkit pe. “Kariwa yobog̃at õn,” iꞌeꞌem ip — ioꞌe. — Ijodiat bure ip adeayũ xe. 
\v 26 Eyju bit imẽn g̃u juy epesop. Kariwa yobog̃at pin pima, yaꞌõbuyxiꞌũmat puxim cuy epeku — ioꞌe Jesus cebe ip. — Wararaꞌacat kukukat pin pima juy ibuywatwan ip epesop — ioꞌe cebe ip. 
\v 27 — Abu kariwa yobog̃at? — ioꞌe. — Jekõn ãm mesa be xikꞌiat tu? Ixat tojotjotꞌukat g̃u xeꞌe? Jekõn ãm mesa be xikꞌiat ma kariwa yobog̃at. Imẽnpit eyxe bima wuyxat tojotjotꞌukat puxim cuk adi ojekuku. Wararaꞌacat puywatwan cuk adi ojekuku — ioꞌe Jesus. 
\v 28 Eybuꞌun g̃u juk adi epesop okay, wararaꞌacat aꞌg̃u ipiat oꞌsupiꞌajoat owebe — ioꞌe. 
\v 29 — Kuy bima webay oꞌe owebe “Soat kukukan ecesũy,” i. Imẽnpuxim “Eyju dak soat kukukayũm epesop oweju,” i õn eꞌem eywebe. 
\v 30 Õn soat kukukan pima, wemesa be epeyekõn oweju — ioꞌe. — “Eyju ikẽrẽat kug̃ Deus xe,” i epeꞌe kũyjobitꞌũmayũ be. “Eyju ikẽrẽat kug̃ g̃u Deus xe,” i dak cuy epeꞌe kũyjobicayũ be. Imẽn epeꞌe Israel naxeg̃ebitbit pe- -12 be tiwatwat pe — ioꞌe Jesus jeweju etaybitbinayũ be. 
\p
\v 31 — Simão — ioꞌe Jesus Simão Pedro be. — Eyaꞌõpicũg̃ cuy — ioꞌe. — Satanás kuy oꞌe owebe “Simão buyxijo pin õn, itabut paxi jeꞌe waꞌõ kay iam,” i — ioꞌe Jesus Simão be. — Satanás itabucayũ xewi emujẽm pim apẽn wuyju tarekrektata mujẽmjẽm taixee bewi iap puxim — ioꞌe. — “Haꞌa. Esubuyxijo,” i juk oce Satanás pe — ioꞌe Jesus. — “Soat cuy esubuyxijo oweju etaybitbinayũ,” i juk oce cebe — ioꞌe Jesus. 
\v 32 — Imẽnpit kuy ocekawẽn Deus eju ewebeam. “Simão juy esubuywan itabucap epereap puxim,” i oce Deus pe — Jesus oꞌe. — Waram okay etabun pima, eykitpitpiyũ juy esubuywan itabut cĩcã am ip okay — ioꞌe Jesus.
\p
\v 33 — Kariwa, jeiwat g̃u õn — ioꞌe Simão Jesus pe. — Obuꞌun g̃u ekay — ioꞌe. — Daomũnmũnapꞌa be dak cuy oju eburem. Weꞌũap kay ma juy oju eburem — ioꞌe Pedro.
\p
\v 34 — Pedro — ioꞌe. — Sapokay edeꞌũm awap, ebapũg̃ em “Ixe bure g̃u õn,” i eceꞌe — ioꞌe Jesus pit.
\p
\v 35 G̃ebuje oꞌjekawẽn waraꞌacayũ eju- -jeweju etaybitbinayũ eju.
\p — Patorõn kug̃ꞌũm cuk adi õn eymuju, sako kug̃ꞌũm tak, bolsa kug̃ꞌũm tak, eyiuk kug̃ꞌũm tak — ioꞌe. — Irerem tu juk adi epekuku? — ioꞌe.
\p — Kaꞌũma. Xipan cuk adi ocekuku — ioꞌe ip.
\p
\v 36 — G̃asũ bit — ioꞌe cebe ip — patorõn kug̃ pima juy epetujowat eyekuap tag̃ — ioꞌe. — Sako kug̃ pima juy epetujowat. Payao kug̃ꞌũm pima juy eyeekabek epeteida ibu am — ioꞌe. 
\v 37 — Imẽn eꞌem Deus ekawẽntup- -omuwẽg̃aptup:
\mi 
“Ikẽrẽat mug̃ẽg̃ẽꞌukat ẽn,” i napa ma ijodiat eꞌem Deus emunaẽ be, i.
\m Ibodup ekawẽn tag̃ jeꞌe ip owebe g̃asũ — ioꞌe Jesus.
\p
\v 38 — Kariwa, akꞌi ece — ioꞌe ip. — Xepxep oceju payao kug̃ — ioꞌe ip.
\p — Oꞌe ma burut — ioꞌe.
\p
\v 39 Ibocewi oꞌjẽm ip jekõnkõnapꞌa bewi umatꞌabi bewi.
\p Jesus oꞌju coꞌa kay- -Oliveira dipꞌa kay- -cucuꞌuk osunuyiapꞌa kay. Ceweju etaybitbinayũ dak oꞌju tomuju. 
\v 40 Oꞌjekawẽn ceweju ip yajẽm puje.
\p — Epeyekawẽn cuy Deus eju eywebe ikẽrẽat kukap puxim — ioꞌe.
\p
\v 41 Jesus oꞌjewerũg̃ jeweju etaybitbinayũ xewi. Bosusu oꞌju. Jag̃ẽpũg̃ ma oꞌe.
\p G̃ebuje Jesus oꞌjekawẽn Deus eju. Jẽg̃ꞌaecõg̃cõg̃ oꞌjekawẽn.
\p
\v 42 — Bay, ebuꞌu bima bit ipiat esupiꞌajoat g̃u owebe — ioꞌe Deus pe. — Imẽnpit obikuyap tag̃ g̃u juy ece- -ebikuyap tag̃ acã — ioꞌe.
\p
\v 43 Ibocewi Deus ekawẽn tojotjotꞌukat oꞌkop kabi kadiwi Jesus aꞌõmucan am.
\p
\v 44 Big̃ ma jaꞌõbuyxim oꞌjekawẽn Deus eju. Jeg̃uycũg̃at pibun ma oeꞌũ pin. Topaꞌadiayey oꞌe toy buxim, ig̃uycũg̃ cĩcã buye. Oꞌjedopadoyebot ipi ju.
\p
\v 45 Deus eju jekawẽn epere buje oꞌãy. Kirikꞌãy. Jeweju etaybitbinayũ kay oajẽm. Jay. Ixexet ma ip oꞌtobuxik. Ixexet ip jeg̃uycũg̃ap kug̃ ip yobog̃ cĩcã buye.
\p
\v 46 — Apẽnpuye eyxexet? — ioꞌe. — Epeyewurũg̃ cuy! — ioꞌe cebe ip. — Epeyekawẽn cuy Deus eju eywebe ikẽrẽat kukap puxim — ioꞌe.
\p
\v 47 Wararaꞌacayũ dak oajẽm Judas eju. Ixe Judas wararaꞌacayũ wap oajẽm jaku Jesus iam imutaybin am ip. Ixe 12 beayũꞌin osunuy.
\p Oajẽm Jesus kay Judas. Oajẽm Jesus ag̃obu kõn ãm tobede am.
\p
\v 48 — Judas — ioꞌe Jesus. — Soat wag̃o õn — ioꞌe. — Wag̃obu kõn tu ẽn oũm ãm okay itakomaayũ be? — ioꞌe.
\p
\v 49 G̃ebuje Jesus eju etaybitbinayũ itaybit oꞌe Jesus pum ip iam.
\p — Kariwa, oceyaoka du ip pajam? — ioꞌe ip Jesus pe.
\p
\v 50 Pũg̃ ixeyũꞌin tak paĩyũ kukukat puywatwatꞌukat oꞌsug̃uybuꞌuk pajam. Tep. Ibaꞌat kadiat g̃uybu oꞌsug̃uybuꞌuk.
\p
\v 51 — Imẽn g̃u bit epesop! — ioꞌe Jesus jeweju etaybitbinayũ be.
\m Cay. Oꞌsug̃uybumucay. Oꞌsug̃uybumuwedap. G̃uybudip oꞌe.
\p
\v 52 G̃ebuje Jesus oꞌjekawẽn Judas ejuayũ eju- -paĩyũ kukukayũ eju, Deus eju kawẽnwẽnapꞌa wiwiꞌukayũ kukukayũ eju dak, Judeuyũ kukukayũ eju dak.
\p — Epajẽm odaomũn ãm ibukurukat taomũnap puxim — ioꞌe. — Eybaꞌip kukug̃ epajẽm — ioꞌe Jesus. 
\v 53 — Soat kabia Deus eju kawẽnwẽnapꞌa be juk adi og̃uy. Epesot g̃u juk adi odaomũn ãm ig̃oꞌa be bima — ioꞌe. — G̃asũ bit okuk put eywebe eybikuyap tag̃. Eybikuyap tag̃ eyeku but g̃asũ. Kabiokbog̃ tag̃ jekukuꞌukayũ kukat ijodiat kukat g̃asũ. Satanás ijodiat kukat g̃asũ. Eyju dak kũyjobit ixe aꞌõ kay — ioꞌe Jesus.
\p
\v 54 Judas ejuayũ Jesus oꞌjat. Oꞌtujowat ip paĩyũ kukukat dukꞌa kay. Pedro dak oꞌju Jesus nomuju. Wũy ma oeku Jesus nomuju. Oajẽm ip.
\p
\v 55 G̃ebuje daxa oꞌg̃usop ip paĩyũ kukat tukꞌa xe, ukꞌa ekorara be. Oabikbik ip daxa etako be. Pedro xikꞌi oꞌe ixeyũ parakpe.
\p
\v 56 G̃ebuje ayacat Pedro oꞌjojojo- -yaypanꞌisuat- -paĩyũ kukukat puywatwatꞌukat. Oꞌjojojo Pedro daxa ekabia dag̃ puye. Oꞌjeak cekay.
\p — Ixe dak Jesus eju oeku — ioꞌe ixe ayacat.
\p
\v 57 — Kaꞌũma — Pedro bit oꞌe napa ma. — Tũꞌũ, ixe bure g̃u õn — ioꞌe napa ma jebuap puxim.
\p
\v 58 Waraꞌacat Pedro oꞌjojojo ibunꞌũm pima ag̃okatkat.
\p — Ẽn tak ejeku Jesus eju — ioꞌe cebe.
\p — Kaꞌũma — Pedro oꞌe. — Jekukum g̃u õn ceweju. Ojeku g̃u õn pit ceweju — ioꞌe napa ma.
\p
\v 59 Pũg̃ hora kap puje, waraꞌacat oꞌjekawẽn.
\p — Icẽmãn ẽn ma Jesus eju ejeku — ioꞌe. — Galiléia eipi bewiat ẽn — ioꞌe Pedro be.
\p
\v 60 — Tapu — Pedro bit oꞌe. — Wetaybit g̃u apẽn ẽn eꞌem iam — ioꞌe napa ma. — Ixe bure g̃u õn pit — ioꞌe napa ma.
\p Sapokay oꞌjede iboam iꞌe buje. Kariwa Jesus oꞌjekorepẽn.
\p
\v 61 G̃ebuje oꞌjeak Pedro kay. Pedro dak oꞌjeg̃ebu Jesus aꞌõ kay- -kuy bimaap aꞌõ kay.
\p — Ebapũg̃ em napa ma eceꞌe “Jesus bure g̃u õn,” i — i juk oꞌe Jesus Pedro be.
\p
\v 62 Kacũg̃ kay Pedro oꞌju. Jesus bure g̃u õn iap kay oꞌjeg̃ebu. Imẽnpuye oꞌtõn cĩcã.
\p
\v 63 Iwiwiꞌukayũ Jesus oꞌjowayway- -oꞌjatꞌiayũ. Jesus oꞌg̃upokupok ip. 
\v 64 Jesus eta oꞌsutamuekabek ip pag̃õm.
\p — Abu emupok exe? — ioꞌe ip cebe iwaywayway am.
\m
\v 65 Jesus oꞌjomuymuy jĩjã ip. Warẽmtag̃ ma ip Jesus oꞌjukuk.
\p
\v 66 G̃ebuje Judeuyũ kukukayũ oꞌjeꞌawero ip, paĩyũ kukukayũ dak, Moisés ekawẽn imutaybitbinꞌukayũ dak. Judeuyũ awẽwẽꞌukayũ yobog̃ayũ ip osodop. Kabiaꞌisum ip oꞌjeꞌawero. Jesus oꞌtujowat ip ixeyũ kay. Waram g̃uto Jesus oꞌjowaywayway ip.
\p
\v 67 — Ẽn tu Deus emunaẽ? — ioꞌe ip. “Cemunaẽ bima bit cuy ece ocewebe,” ioꞌe ip Jesus pe.
\p — Õn eymukũyjo bima, okay eyetabut g̃u kuka epeꞌe — ioꞌe Jesus pit. 
\v 68 — Omukũyjom cuy epeꞌe i õn eꞌem eywebe bima, kuka omukũyjom g̃u epeꞌe. 
\v 69 Imẽnpit soat wag̃o õn. G̃axĩn ma oabik Deus baꞌat kadi- -soat podi ma yaꞌõbacaat baꞌat kadi. Ixe joꞌi waꞌõbaca og̃uy — ioꞌe Jesus. — Jewejojoꞌi ma ocesop ocaꞌõbacaap kug̃ — ioꞌe.
\p
\v 70 — Deus ipot tu ẽn? — ioꞌe ip Jesus pe.
\p — Eyju ma iboam eꞌem — ioꞌe.
\p
\v 71 — Apẽg̃ãm kuka wararaꞌacat atakoy Jesus muy am? Kuy oꞌe! Kuy ixe ekawẽn oceyaꞌĩjojo — ioꞌe Judeuyũ kukukayũ. Deus muymuy xeku — ioꞌe ip napa ma. 
\p Oibuꞌun ip awerom.
\b
\c 23
\p
\v 1 G̃ebuje Jesus oꞌtujowat ip Pilatos kay- -iecug̃ap kay. Jesus oꞌjomuymuy ip Pilatos pe.
\p
\v 2 — Ite ag̃okatkat warẽmtag̃ ma ocemutaybitbin — ioꞌe ip Pilatos pe napa ma. — “Kũyjobin g̃u juy epesop wuyeipi kukat aꞌõ kay,” iꞌeꞌem Jesus ocewebe — ioꞌe ip napa ma. — “Eyedinheiro juy epeg̃ũm g̃u César be- -wuyeipi kukat pe,” iꞌeꞌem ocewebe — Judeuyũ napa ma oꞌe Pilatos pe. — “Adeayũ kukukat õn,” iꞌeꞌem teku — ioꞌe ip napa ma Judeuyũ. — “Deus emunaẽ õn,” iꞌeꞌem teku — ioꞌe ip.
\p
\v 3 — Judeuyũ kukukat tu ẽn? — Pilatos oꞌe Jesus pe.
\p — Ẽn ma iboam eꞌem — ioꞌe Jesus.
\p
\v 4 — Ite ag̃okatkat ikẽrẽat kug̃ g̃u oxe bit — ioꞌe Pilatos soat pe paĩyũ kukukat pe, jeꞌaweroꞌibiyũ be dak.
\p
\v 5 — Warẽmtag̃ ma teku ebekitkit mutaybitbin — ioꞌe ip napa ma Pilatos pe. — Koap warẽmtag̃ ma Galiléia eipi watwat mutaybitbin oekuku. Soat tag̃ imutaybitbin oekuku- -Judéia eipi dag̃. G̃asũ ijoce oajẽm. Teku ebekitkit mubuꞌuꞌun César aꞌõ kayap puxim — ioꞌe ip napa ma. 
\p
\v 6 — Teku Galiléia eipi bewiat tu? — ioꞌe Pilatos cebe ip.
\p — Hm hm — ioꞌe ip.
\p
\v 7 Imẽnpuye Pilatos Jesus oꞌg̃uju Herodes kay, Herodes Galiléia eipi kukukat puye, Jesus tak Galiléia eipi bewiat puye dak. Ixe Herodes Jerusalém ka be osunuy ixeyũ kabia be.
\p
\v 8 Oajẽm ip Herodes kay. Herodes Jesus oꞌjojojo. Icokcok cĩcã oꞌe ijojom pima. Kuy bima Herodes ijo pin osunuy Jesus awẽg̃ oꞌyawẽg̃tobuxik puye.
\p — Wuywebe iꞌe baꞌoreat paxi g̃ubapuk wetabutpe? — ioꞌe jewebe ma.
\p
\v 9 Oꞌjekawẽn Jesus eju.
\p — Abu-aꞌõbi ẽn jekukum? — ioꞌe cebe. — Ojojojo g̃u buk iat mubapug̃ tu ebuꞌu wetabutpe? — ioꞌe cebe.
\p Mũg̃ ma osunuy Jesus pit. 
\v 10 Paĩyũ kukukayũ dak Jesus oꞌjomuymuy jĩjã, Moisés ekawẽn imutaybitbinꞌukayũ dak.
\p
\v 11 Herodes tak Jesus oꞌjowayway jĩjã. Warẽmtag̃ ma Jesus oꞌjukuk, cesorarayũ dak. Cesay idipat oꞌg̃uõm ip Jesus pe iwaywayway am.
\p G̃ebujep waram Jesus oꞌg̃uju Pilatos kay. 
\v 12 Ixe kabia dak Herodes Pilatos burem oꞌe. Kuy bima itakoma jĩjã osodop ip jewewekay.
\p
\v 13 G̃ebuje Pilatos paĩyũ kukukayũ oꞌtomuwã, Judeuyũ kukukayũ dak, wararaꞌacat tak Judeuyũ. 
\v 14 Oꞌjekawẽn cebe ip.
\p — Ite ag̃okatkat epetojot okay — ioꞌe. — “Ite ag̃okatkat warẽmtag̃ ma ocemutaybitbin,” i juk epeꞌe owebe — ioꞌe. — Kuy ocekawẽn ceweju eyetabun — ioꞌe. — Oxe bit ikẽrẽat oꞌg̃ujurũg̃ g̃u- -pũg̃ em tak kaꞌũma — ioꞌe. — Teꞌe ma eyju eꞌem “Ikẽrẽat kug̃ teku,” i — ioꞌe. 
\v 15 — Herodes tak oꞌjekawẽn ceweju — ioꞌe. — Herodes xe dak ikẽrẽat kug̃ g̃u — ioꞌe. — Imẽnpuye waram Jesus oꞌtujupicat ip ocekay. Cedag̃ g̃u ocewebe bit yaoka am. 
\v 16 Imẽnpuye imupok puje og̃uwekap jekpiwan ma iju am — ioꞌe Pilatos.
\p
\v 17-18 — Ap! — ioꞌe adeayũ yaꞌõberen Pilatos pe — Ite ag̃okatkat eg̃ujẽm g̃u — ioꞌe ip. — Eyaoka ma! — ioꞌe ip. — Barrabás pit eg̃ujẽm daomũnmũnapꞌa bewi. Ite ag̃okatkat pit eg̃ujẽm g̃u — ioꞌe ip yaꞌõberen.
\p Ig̃o epeta bima Pilatos pũg̃ ma daomũnmũnapꞌa beat mujẽmjẽmꞌuk osunuy. Ixe Barrabás daomũnmũnapꞌa be osunuy. 
\v 19 Kuy bima ixe Barrabás iecug̃ap ebekitkit eju oꞌjenopag̃õg̃õm. Jenopag̃õg̃õm pima waraꞌacat oꞌyaoka. Imẽnpuye daomũnmũnapꞌa be osunuy.
\p
\v 20 G̃ebuje Pilatos ma Jesus muwekap ojuy oꞌe.
\p — Jesus ma og̃uwekap — ioꞌe adeayũ be.
\p
\v 21 Adeayũ bit Jesus pamupayaat ojuy korosa be ceꞌũ ãm.
\p — Jesus cuy epeyaokaat! — ioꞌe ip Pilatos pe. — Jesus juy esubamupayaat korosa be ceꞌũ ãm — ioꞌe ip yaꞌõberen.
\p
\v 22 — Apẽnpuye dak osubamupayaat? — ioꞌe Pilatos. — “Ikẽrẽat oꞌg̃ujurũg̃ g̃u,” i õn eꞌem — ioꞌe. — Cedag̃ g̃u wuywebe yaoka am — ioꞌe. — Og̃upokupokat acã. Imupokupok puje, juy og̃uwekap — ioꞌe. 
\p
\v 23 — Ap! — ioꞌe ip. — Jesus esubamupayaat korosa be — ixeyũ bit oꞌe.
\m Imẽn oꞌe ip ade em ma. Yaꞌõberen oꞌjewãwã ip. Imẽnpuye:
\p
\v 24 — Iteyũ bikuyap tag̃ oce, big̃ ma cewãwãwãap puxim ip — ioꞌe Pilatos jewebe ma. — Ixeyũ etabun imuwekap paꞌore owebe — ioꞌe jewebe ma.
\p — Haꞌa — ioꞌe adeayũ be- -aweromayũ be. — Eybikuyap tag̃ cuy oce — ioꞌe Pilatos cebe ip.
\p
\v 25 Imẽnpuye Pilatos Barrabás oꞌgujẽmat daomũnmũnapꞌa bewi- -iecug̃ap ebekitkit eju oꞌjenopag̃õg̃õmꞌiat oꞌg̃ujẽmat- -waraꞌacat oꞌyaokaꞌiat oꞌg̃ujẽmat- -adeayũ oꞌjoojuy imujẽm ãmꞌiat oꞌg̃ujẽmat. Jesus pit oꞌg̃ũm adeayũ be.
\p — Eybikuyap tag̃ cuy epeꞌe cebe — ioꞌe Pilatos.
Jesus oꞌjat ip.
\p
\v 26 G̃ebuje sorarayũ Simão oꞌjat. Cirene ka bewiat oꞌjat ip- -kog̃ũnpi bewi ajẽmꞌibit. Oꞌjat ip Jesus korosa dujowan coꞌa kay bima. Korosa oꞌjomuy ip Simão aꞌõpiꞌa jeje. Oꞌtujowacat Jesus nomuju. 
\v 27 Adeayũ dak oꞌju Jesus nomuju.
\p Aoyũ dak oꞌtõn cĩcã Jesus kay. Ig̃uycũg̃ cĩcã ip oꞌe Jesus kay.
\p
\v 28 Imẽnpit Jesus oꞌjekorepẽn cekay ip.
\p — Tũꞌũꞌũyũ — ioꞌe cebe ip- -Jerusalém ka watwat pe- -aoyũ be. — Eyewewekay acã juy epetõtõn- -okay bit kaꞌũma — ioꞌe. — Eyꞌiyũ kay dak cuy epetõtõn — ioꞌe. 
\v 29 — Ipiat epesupiꞌajojo. Ipiatꞌajojom pima soat jeꞌe “Icokcok eꞌem iꞌit kapkapꞌũmayũ, iꞌitꞌitꞌibitꞌũmayũ dak, iꞌit muytinꞌũmꞌibiyũ dak,” i — ioꞌe Jesus. 
\v 30 — Adeayũ ceꞌũ pin jeꞌe ixe kabia be ipiatꞌajojom puye. “Ocejeje juy aꞌaꞌat ocemuyꞌũ ãm,” i jeꞌe ip coꞌa be. “Ocemunẽm cuy,” i jeꞌe ip coꞌaꞌũnꞌa be — ioꞌe. 
\v 31 — “Imẽn yopkicatꞌip kukug̃ pima, apẽn xeꞌe kuka yopkarawatꞌip oꞌjukuk ip?” iꞌeꞌem eyju — ioꞌe Jesus waayũ be.
\m Imẽn Jesus oꞌe cebe ip warẽmtag̃ ip jekug̃ puye.
\p
\v 32 Xepxepayũ dak oꞌtujowat ip Jesus eju yaoka am- -iecug̃ap aꞌõ kayꞌũmayũ.
\p
\v 33 Coꞌa be yajẽm puje Jesus pa oꞌsubamupaya ip korosa jeje. Ceꞌũatꞌa riritꞌa i omuy coꞌa butet. Iecug̃ap aꞌõ kay kũyjobitꞌũmayũ dak oꞌsubamupaya ip waraꞌat pe korosa be- -xepxepayũ. Pũg̃ korosa oꞌjomuy ip ipikũykũy be Jesus baꞌat kadi. Waraꞌat oꞌjomuy ip ibaꞌũg̃at kadi. Jesus tak oꞌjekawẽn Deus eju.
\p
\v 34 — Bay — ioꞌe. — G̃ebum g̃u juy apẽn ip warẽmtag̃ okuk iap kay, itaybit g̃u ip ajo pẽnpẽn oceju iam puye — ioꞌe Jesus.
\p G̃ebuje dado oꞌjoxikxik ip Jesus pa oꞌsubamupayaꞌiayũ. Jesus esay muꞌẽꞌẽ ãm jewewebe oꞌjoxikxik ip ipi ju. Dado karatũg̃ꞌa buxim oꞌyanuy. Ibararuk oꞌyanuy. 
\v 35 Adeayũ dak osodop Jesus cocom. Judeuyũ kukukayũ bit warẽmtag̃ oꞌe ip Jesus pe iwaywayway am. 
\p — Teku wararaꞌacat oꞌtaxijo — ioꞌe Judeuyũ kukukayũ. — Teku Deus emunaẽ bima, juy jewedaxijo — ioꞌe ip iwaywayway am. — Deus pe wuydaxijo am oꞌtaẽꞌibit pima juy jewedaxijo — ioꞌe ip. 
\p
\v 36 Sorarayũ dak Jesus oꞌjowaywayway. Uvaꞌabidi ũm ojuy ip oꞌe cebe tikõn ãm- -tideibog̃ꞌũmati.
\p
\v 37 — Ẽn Judeuyũ kukukat pima juy ecewedaxijo — ioꞌe sorarayũ.
\p
\v 38 Taperadup toroꞌi oeku korosa eju Jesus abi ase- -tupararukatup- -Judeuyũ kukukat teku iap mubapukatup.
\p
\v 39 G̃ebuje waraꞌat korosa ejuat Jesus oꞌjomuymuy- -iecug̃ap aꞌõ kay kũyjobitꞌũmat.
\p — Ẽn Deus emunaẽ bima, ocedaxijom cuy ece — ioꞌe yaꞌõberen Jesus pe. — Ecewedaxijo dak cuy — ioꞌe.
\p
\v 40 Waraꞌat ejuat pit jebure oꞌg̃ukorẽm korosa ejuat.
\p — Eparara g̃u du Deus puxim? — ioꞌe jebure be. — Wuyeweweju ma wuyju jeꞌũm korosa eju. 
\v 41 Cedag̃ wuywebe jeꞌũ ãm ikẽrẽat cuk adi ag̃ujurũg̃rũg̃iap teim — ioꞌe. — Ite bit oꞌg̃ujurũg̃rũg̃ g̃u ikẽrẽat — ioꞌe.
\p
\v 42 — Jesus — ioꞌe ixe waraꞌat. — G̃ebum cuy okay eg̃uy ẽn soat kukukan pima — ioꞌe Jesus pe.
\p
\v 43 — Icẽmãn õn eꞌem ewebe, g̃asũ ma ẽn oweju ecesũy onuyapka be- -idip cĩcãatka be — ioꞌe Jesus ixe waraꞌat pe.
\p
\v 44-45 Pag̃o oicuk jekpiwan ma- -Deus eju kawẽnwẽnapꞌa beat epag̃o- -xĩntabi nomudip epag̃o. Oicuk ipidase ixe pag̃o bit.
\p Kaxi wuyase bima kabiok oꞌe soat tag̃ iꞌpi dag̃. Kaxiepiat oꞌjepirẽm. Oꞌjekabia g̃u. Ibun ma kabiok oeku- -ebapũg̃ ehora.
\p
\v 46 G̃ebuje Jesus oꞌjekawẽn Deus pe.
\p — Bay — ioꞌe. — Ag̃ cuy eg̃uy okay. Jeꞌũm cuy õn ebikuyap tag̃ — ioꞌe yaꞌõberen.
\p Oeꞌũ. 
\v 47 100 be sorarayũ kukat oꞌjeak cekay. Apẽn oeꞌũ iap oꞌjojojo.
\p — Aꞌõbuyxi soat podi ma — ioꞌe Deus pe. — Icẽmãn ite ag̃okatkat ikẽrẽat kug̃ g̃u osunuy — ioꞌe.
\p
\v 48 Korosa be ceꞌũap com oꞌjeꞌaweroꞌiayũ dak oꞌjepit ip jedukꞌa be. Oꞌjepit ip jewekũmpi okakam jeg̃uycũg̃ap pibun. 
\v 49 Jesus bureyũ dak wũywũy ma korosa wi ip osodop, aoyũ dak- -Galiléia eipi bewi Jesus eju yajẽmꞌibiyũ. Kacũg̃cũg̃ꞌi osodop ip Jesus eꞌũap cocom.
\p
\v 50 G̃ebuje José oꞌju Pilatos kay- -Arimatéia ka bewiat- -Judéia eipi bewiat. Ixe Judeuyũ awẽwẽꞌukat yobog̃at osunuy. Xipat cĩcã osunuy. Cũg̃ cĩcã osunuy. Soat xe yaꞌõbuyxi osunuy. 
\v 51 Wararaꞌacayũ juk adi Jesus aoka ojuy osodop ip Judeuyũ awẽwẽꞌukayũ yobog̃ayũ. José bit kaꞌũma. Deus soat kukukan iap wiwim osunuy José bit. 
\v 52 Oajẽm Pilatos kay ixe José.
\p G̃ebuje korosa ejuwi Jesusꞌũm jebit mukop ojuy oꞌe.
\p — Jesusꞌũm jebit cuy ojuꞌukat — ioꞌe Pilatos pe.
\p — Ejuꞌuk cuy — ioꞌe Pilatos.
\p
\v 53 Oꞌju iꞌug̃. Oajẽm. Jesusꞌũm jebit oꞌjuꞌuk korosa ejuwi José. Jesusꞌũm jebit oꞌjomũnmũn pag̃õm- -idip cĩcãan, irucan. Imũnmũn epere buje, oꞌtujowat witabikũy kay. Jesusꞌũm jebit oꞌjomõg̃ witabikũy be ikũykotꞌisuatkũy be.
\p
\v 54 Sexta-feira osunuy. Katpuje jĩjã oꞌe. G̃axĩn ma jebodoydoyap kabia Judeuyũ be.
\p
\v 55 Aoyũ oꞌju José eju- -Galiléia eipi bewiayũ. Witabikũy oꞌsukũyjojo ip. Apẽn Jesusꞌũm jebit oꞌjomõg̃ꞌiap oꞌjojojo ip.
\p
\v 56 Ibocewi oꞌjepit ip jedukꞌa be. Tõmteꞌoatõm oꞌtõmuwekoy ip Jesusꞌũm jebit mudeꞌonap ojuy. Kuyaje acã ijebit mudeꞌon ojuy ip osodop, kuy jebodoydoyap kabia buye. Kapikpi kuka oꞌe kuyaje.
\b
\c 24
\p
\v 1 Judeuyũ ebodoydoyap kabia bima aoyũ oꞌjebodoy jawẽwẽap ekawẽn tag̃. Kabiaꞌisum pit waram oꞌju ip witabikũy kay. Domingo bima ip oꞌju. Tõmteꞌoatõm tujowan oꞌju ip Jesusꞌũm mudeꞌon ojuy. Jay. Oajẽm ip.
\p
\v 2 Yajẽm puje witaꞌa oꞌyadobuxik ip yawede- -ikũynomudipꞌa. 
\v 3 Oõm ip witabikũy be. Jesusꞌũm jebit oꞌtobuxik g̃u ip. 
\v 4 Yag̃uybabiꞌũm cĩcã ip oꞌe tobuxikꞌũm puye.
\p — Apẽn xeꞌe ixe oꞌe? — ioꞌe ip jewewebe.
\p Xepxep ag̃okatkayũ dak oꞌjebapuk aoyũ wap- -kabi bewiayũ. Cesay kug̃ osodop ip isopsupat kug̃. 
\v 5 Jeparara pibun ma ip oꞌjẽg̃ꞌaecõg̃cõg̃ cewap ip. Ag̃okatkayũ dak oꞌjekawẽn aoyũ be.
\p — Tũꞌũꞌũyũ — ioꞌe ip. — Apẽnpuye eyju itaicat kudadam ceꞌũat topapkũy be? — ioꞌe ip. 
\v 6 — Ixe ijoce g̃u. Deus ixe oꞌg̃utait waram. Oꞌg̃uyu kabi kay — ioꞌe ip. — G̃ebum cuy epesop ixe aꞌõ kay- -Galiléia eipi be bima iap aꞌõ kay. 
\v 7 “Soat wag̃o õn,” i mo oꞌe eywebe. “Ikẽrẽat mujurũg̃rũg̃ꞌukayũ be oũm ip,” i mo oꞌe eywebe — ioꞌe ip. — “Obamupaya ip korosa be. Ojeꞌũ. Imẽnpit xepxep xet kap puje waram ocejetait,” i mo oꞌe eywebe — ioꞌe aoyũ be ixeyũ ag̃okatkayũ.
\p
\v 8 G̃ebuje Jesus aꞌõ kay oꞌjeg̃ebu ip. Oꞌjẽm ip witabikũy bewi. 
\v 9 Aripit. Oꞌjepit onze beayũ mukũyjo am apẽn cuk ip oꞌjojojo iam. Jay. Oajẽm ip. Soat oꞌg̃uwẽn ip onze beayũ be- -Jesus eju oekukuꞌiayũ be, wararaꞌacayũ be dak. 
\v 10 Maria Madalena soat oꞌg̃uwẽn Jesus emumujuyũ be, Joana dak, Tiago xi dak, wararaꞌacayũ dak. Tiago xi butet Maria i osunuy. Soat oꞌg̃uwen ip Jesus emumujuyũ be. 
\v 11 Warẽmtag̃ ma tũybe aoyũ kawẽnwẽn iãn oꞌe ip. Itabut g̃u ip oꞌe cekawẽn kay.
\p
\v 12 Pedro bit dao ma oꞌju witabikũy kay. Oajẽm. Oꞌjeerot. Itaburuh. Oꞌjetaburut witabikũy kay. Pag̃o acã oꞌjojojo- -idip cĩcãat- -irucat. Waraꞌat pit oꞌjojojo g̃u.
\p — Kaꞌũmg̃u Jesus! — ioꞌe.
\p Ibocewi oꞌjepit jedukꞌa be. Yag̃uybabiꞌũm cĩcã oꞌe.
\p — Apen xeꞌe oꞌe ip Jesusꞌũm jebit pe? — ioꞌe jewebe ma. — Poma xeꞌe ijebit oꞌtujowat ip? — ioꞌe.
\p
\v 13 Ixe kabia be xepxep Jesus eju oekukuꞌiayũ oꞌju Emaús ka kay. Emaús ka 10 kilometros osunuy Jerusalém ka wi. 
\v 14 E dag̃ ip kawẽnwẽn oeku. Apẽn Jesusꞌũm oꞌtobuxik g̃u ip witabikũy be iam kawẽnwẽn ip oeku. 
\v 15 Kawẽnwẽn pima Jesus oajẽm ixeyũ kay- -xepxepayũ kay. Ceweju ip oꞌju e dag̃. 
\v 16 Jesus oꞌjojojo ip. Oꞌjetabiebarẽm ip Jesus teku iam. Tũybe Jesus ceꞌũ mabuk opop iãn oꞌe ip.
\p
\v 17 — Apẽn eyju kawẽnwẽn e dag̃? — ioꞌe Jesus cebe ip.
\m Topag̃uycũg̃cũg̃ oꞌjecũcũ ip. 
\v 18 Ixeyũꞌin oꞌjede Jesus pe. Cleopas i ibutet osunuy.
\p — Soat Jerusalém ka watwat itaybit apẽn oꞌjebapuk ibo ka be g̃asũ iam. Ẽn acã etaybit g̃u! — ioꞌe.
\p
\v 19 — Apẽn xeꞌe oꞌjebapuk? — ioꞌe Jesus cebe ip.
\p — Apẽn Jesus pe oꞌe ip iap awẽg̃ eyawẽg̃tobuxik g̃u du- -Nazaré ka bewiat pe iap awẽg̃? — ioꞌe. — Ixe Jesus Deus ekawẽn muwẽnuwẽnꞌukat osunuy. Soat xe yaꞌõbuyxi osunuy. Ocejojojo g̃u iap mubapukpug̃ oekuku Deus aꞌõbi. Ixe juk cedag̃ ocemutaybitbitbin — ioꞌe. 
\v 20 — Paĩyũ kukukayũ wuyka kukukayũ dak Jesus oꞌg̃ũm Judeuꞌũmayũ be yaoka am. Jesus pa oꞌsubamupaya ip korosa be — ioꞌe. 
\v 21 — Oceju bit tũybe ixe Judeuyũ taxijo iãn cuk adi oceꞌe — ioꞌe. — Inaka ebapũg̃ kabia kuy oꞌkap ceꞌũap kabia. 
\v 22 Imẽnpit oceꞌin ip ocag̃uymubabiꞌũm aoyũ — ioꞌe. — Witabikũy be oꞌju ip kabiaꞌisum. Ikudadam ip oeku — ioꞌe. 
\v 23 — Jesusꞌũm jebit oꞌtobuxik g̃u ip ikũy be — ioꞌe. — Ocekay oꞌjepit ip — ioꞌe. — “Deus ekawẽn tojotjotꞌukayũ ocejojojo,” i mo oꞌe ip ocewebe — ioꞌe Jesus pe. — “Kabi bewiat ocejojojo,” i mo oꞌe ip ocewebe — ioꞌe. — “Jesus waram oꞌjetait,” i mo oꞌe ip ocewebe — ioꞌe Jesus pe. 
\v 24 — Waraꞌat ocebureyũ oꞌju witabikũy kay — ioꞌe. — Apẽn aoyũ oꞌe iap tag̃ oꞌtobuxik ip — ioꞌe. — Jesus pit oꞌjojojo g̃u ip — ioꞌe Jesus pe.
\p
\v 25 — Eyetaybin waꞌũm cĩcã Deus ekawẽn muwẽnuwẽnꞌukayũꞌũmꞌũm ekawẽn — ioꞌe Jesus cebe ip. — Eyetabun waꞌũm cĩcã! 
\v 26 Cedag̃ osunuy Deus xe Cristo imẽn ipiatꞌajo am, jeꞌũ ãm tak- -wuydaxijo am Deus emunaẽ. Cedag̃ osunuy waram kabi kay jeu am soat kukukan- -Deus coꞌi yaꞌõbacaan- -Deus coꞌi idipan — ioꞌe Jesus cebe ip.
\p
\v 27 Jemuwẽnuwẽg̃aptup ekawẽn oꞌg̃ukũyjojo ip soatup ekawẽn- -Deus ekawẽntup ekawẽn- -Moisés emudupmubararaktup ekawẽn, soat Deus ekawẽn muwẽnuwẽnꞌukayũ emudupmubararaktup ekawẽn tak. Iboaptup ekawẽn oꞌg̃ukũyjojo ip.
\p
\v 28 Imẽn oajẽm ip jejuapka kay- -Emaús ka kay.
\p — Bosusu ma buk oju — Jesus oꞌe cebe ip.
\p
\v 29 — Ocexe juy eg̃uy — ixeyũ bit oꞌe. — Katpuje jĩjã oꞌe kuy. Kabiog̃ wuyju — ioꞌe xepxepayũ Jesus pe.
\m Imẽnpuye Jesus oꞌju ceweju ip cexe ip jenũy ã. Oõm ip tukꞌa be.
\p
\v 30 G̃ebuje Jesus pãoꞌa oꞌyabu jekõn pima ceweju ip.
\p — Bay, ẽn xipat — ioꞌe Deus pe.
\m Oꞌyadakatkat. Oꞌyaũm cebe ip. 
\v 31 Jetaan ip oꞌjeak. Teku Jesus iam itaybit ip oꞌe. Imẽnpit Jesus oꞌjepaꞌũm.
\p
\v 32 — Ocaꞌõxabida karabakbakãn oceꞌe e dag̃ oceweju kawẽnwẽn pima, Deus ekawẽn muwẽnuwẽn pima — ioꞌe ip jewewebe.
\p
\v 33 G̃ebuje oꞌjẽm ip mesa bewi. Aripit. Oꞌjepit ip Jerusalém ka kay. Jay. Oajẽm ip.
\p G̃ebuje onze beayũ oꞌtobuxik ip- -jebureyũ. Awerom ip oꞌtobuxik.
\p
\v 34 — Wuykukukat waram oꞌjetait — ioꞌe ip xepxepayũ be. — Simão itaicat oꞌjojojo — ioꞌe ip.
\p
\v 35 G̃ebuje xepxepayũ apẽn Jesus oꞌe cebe ip iap oꞌg̃uwẽn jebureyũ be.
\p — Jesus oꞌjebapuk ocekay e dag̃ — ioꞌe ip. — Pãoꞌa dakat puje, ocetaybit oceꞌe teku Jesus iam — ioꞌe xepxepayũ cebe ip.
\p
\v 36 Dao ma Jesus oꞌjebapuk aweromayũ kay imẽn kawẽnwẽn pima ip.
\p — Kabaꞌũm cuy epesop — ioꞌe.
\m
\v 37 Oꞌjekuy ip. Iparara jĩjã ip oꞌe. Tũybe axik iãn oꞌe ip.
\p
\v 38 — Apẽnpuye eykuykuykuy? — ioꞌe Jesus. — Apẽnpuye eyju eꞌem “Cẽm tu Jesus waram oꞌjetait?” i? Apẽnpuye eyetabut g̃u okay? — Jesus oꞌe. 
\v 39 — Ak epeꞌe obu kay, wui kay dak. G̃oku tapoa kuybut — ioꞌe. — Obu kukug̃ cuy epeꞌe — ioꞌe. — Wui kukug̃ tak cuy epeꞌe. Asubitꞌũm! Axik tu õn eyxe? Axik taohe g̃u. Õn pit odaohe — ioꞌe Jesus.
\p
\v 40 Imẽn eꞌem pima, oꞌjewebumubapuk cebe ip. Oꞌjeweimubapuk.
\p
\v 41 Imẽnpit itabut g̃u ma buk oꞌe ip Jesus kay jecokcok pibun, yag̃uybabiꞌũmꞌũm ip puye.
\p — Ajo opop eyxe iꞌo am? — Jesus tak oꞌe cebe ip.
\p
\v 42 Axima yoyoy oꞌg̃ũm ip cebe iꞌo am. 
\v 43 Oꞌjat. Etabutpe ip oꞌjoꞌo.
\p
\v 44 G̃ebuje oꞌjekawẽn ceweju ip.
\p — Moisés apẽn warẽmtag̃ itakomaayũ okuk iaptup oꞌtupmubararak, Deus ekawẽn muwẽnuwẽnꞌukayũꞌũmꞌũm tak — ioꞌe. — Davi dak apẽn warẽmtag̃ ip okuk iaptup oꞌtupmubararak Salmodup pe- -jebibododonaptup pe — ioꞌe. — Ixeyũꞌũmꞌũm emudupmubararakatup pe iap tag̃ ma ip okuk ikẽrẽm — ioꞌe. — Eyweju õn pima iboap og̃uwẽn eywebe — ioꞌe Jesus.
\p
\v 45 Ixeyũ mutaybitbin oꞌe apẽnape Deus ekawẽn iam.
\p
\v 46 — Imẽn eꞌem ig̃odup:
\mi Deus emunaẽ juy ipiat supiꞌajo, i. Jeꞌũ juy, i. Xepxep xet kap puje, waram jetait g̃uto, i. 
\v 47 Ixe aꞌõbi itabucayũ juy kawẽn idipat g̃uwẽn soat ka watwat pe, i. Koap Jerusalém ka watwat pe juy g̃uwẽn ip, i. G̃uyjom waraꞌatka watwat pe juy g̃uwẽn ip, i. “Ikẽrẽat mujurũg̃rũg̃ap cuy epeyepere,” i juy jeꞌe ip, i. “Ikẽrẽat mujurũg̃rũg̃ap epere buje, Deus ikẽrẽat juꞌuk eywebewi,” i juy jeꞌe ip, i.
\m Imẽn eꞌem ig̃odup, — ioꞌe Jesus. 
\v 48 — Wekawẽn epeyaꞌĩjojo. Weꞌũap tak epejojojo ma. Soat ka watwat pe juy iboap epeg̃uwẽn — ioꞌe Jesus cebe ip. 
\v 49 — “Jeyaꞌõmucan õn,” ioꞌe webay eywebe — ioꞌe. — Webay aꞌõbi õn jeyaꞌõmucan — ioꞌe Jesus. — Deus pe eyaꞌõmucanap wiwim cuy epesop ikabog̃atka be- -Jerusalém ka be — ioꞌe. — G̃axĩn ma juy jeyaꞌõmucan — ioꞌe cebe ip.
\p
\v 50 Jesus ixeyũ oꞌtujowat Betânia ka be.
\p G̃ebuje oꞌjekawẽn Deus eju cebeam ip.
\p — Bay, xipan cuy teyũku ejukuk — ioꞌe Deus pe.
\m
\v 51 Bosusu oꞌju cexewi ip Deus eju kawẽnwẽn pima.
\p G̃ebuje Deus oꞌtujowat jewekay, kabi kay.
\p
\v 52 — Bay, ẽn xipat cĩcã — ioꞌe ip Deus pe tujowacap cocoayũ. — Kaꞌũma ma ejoꞌiat yaꞌõbacaat — ioꞌe ip cebe.
\p G̃ebuje oꞌjepit ip Jerusalém ka kay. Icokcok cĩcã ip osodop. 
\v 53 Deus eju kawẽnwẽnapꞌa be osodop ip soat em- -yabog̃atꞌa be. — Bay, kaꞌũma ma ejoꞌiat yaꞌõbuyxiat — iꞌeꞌem ip osodop.