\id JHN Mundurukú [myu] NT (Brazil) -2010 bd. 
\h João
\toc1 João emudupmubararaktup
\toc2 João
\mt JESUS CRISTO MUWẼG̃AP EKAWẼNTUP- -JOÃO EMUDUPMUBARARAKTUP
\c 1
\p
\v 1 Jesus Cristo oajẽm Deus mubapuk am ijodiayũ be. Ipi mug̃ẽ awap Deus mubapukpukꞌukat kuy osunuy. Deus xe osunuy. Deus coꞌi osunuy. 
\v 2 Ixe Deus xe osunuy ipi mug̃ẽm pima. 
\v 3 Deus eju ixe soat oꞌg̃ug̃e- -ipi dag̃at, kabi beat tak. Kaꞌũma ma kajuk oꞌe ipi dag̃ ixe imujurũg̃ꞌũm pima. 
\v 4 Jaꞌõbi dak ixe itabẽg̃ayũ mujurũgrũg̃ꞌuk osunuy. Ixe icẽmãn wuymutaybitbinꞌuk osunuy Deus ekawẽn- -apẽn kaxi wuymukabiahamap puxim. 
\v 5 Ixe oajẽm ijodi Deus ekawẽn wuymutaybin am. Ade jĩjã ikẽrẽat mujurũg̃rũg̃ꞌukayũ osodop ijodi. Imẽnpit ixe ekawẽn muwẽnmuꞌũm paꞌore osodop ip.
\p
\v 6 Ixe ajẽm awap Deus wararaꞌacat oꞌg̃udot ijodi ag̃okatkat. Jaꞌõbi oꞌg̃udot. João i ibutet osunuy. 
\v 7 Oajẽm Jesus Cristo muwẽn ãm- -kabiaap puximat muwẽn ãm ijodiayũ be. Ixe oꞌg̃uwẽnuwẽn adeayũ mutabun am cekay. 
\v 8 João ma ixe Deus mubapukpukꞌukat g̃u osunuy. Oajẽm ixe muwẽn ãm acã.
\p
\v 9 — Ixe kawẽn icẽmat wuymutaybitbin jeꞌe — ioꞌe João. — Ixe jajẽm ijodi — ioꞌe João. — Soat mutaybitbin jeku Deus ekawẽn — ioꞌe João.
\p
\v 10 Deus mubapukpukꞌukat oajẽm ipi kay. Ijodi oekuku. Soat ipi dag̃acat ixe emumug̃ẽ osodopdop ip. Inaka ibuꞌu oꞌe ip jetabun cekay. 
\v 11 Jebadipyũ kay oajẽm- -Judeuyũ kay. Inaka itabut g̃u oꞌe ip cekay. 
\v 12 Wararaꞌacayũ bit ixe kay osodop ip. Itabut ip osodop ixe kay. Imẽnpuye:
\p — Deus ebekitkiyũ eyju g̃asũ, okay eyetabut puye — ioꞌe cebe ip.
\m
\v 13 Bekitkit jebapukpug̃ ijodi ayacatꞌuk pewi kapkam puye; ag̃okatkat aoyũ dabiꞌo pin eꞌem puye dak; ag̃okatkat jekpot mujurũg̃ pin puye dak. Imẽn g̃u bit wuyju Deus ebekitkin eꞌem. Ijodiayũ Deus ebekitkin eꞌem Deus ibikuy buye acã. 
\v 14 Deus mubapukpukꞌukat ijodian oꞌe. Jesus Cristo ijodian oꞌe. Wuyxe osunuy. Pũg̃ ma Deus ipot osunuy. Waraꞌat kaꞌũmg̃u- -ixe acã. Ijodiayũ ikẽrẽat mujurũg̃rũg̃ oekuku. Inaka ixe xe ikukpin cĩcã osodop ip. Icẽmãn ixe Deus ekawẽn wuymutaybitbinꞌuk osunuy. Imẽneju:
\p — Wararaꞌacat podi ma teku idip — i juy aceꞌeꞌe wuyewewebe.
\p
\v 15 João Batista abu Deus mubapukpukꞌukat iap muwẽnuwẽn oeku adeayũ be. Ixe imẽn oꞌe:
\mi Omuykuiat ma yaꞌõbuyxi, i. Õn pit kaꞌũma, i. Okap awap ixe itabẽg̃ osunuy iwag̃o maꞌg̃u õn, i. Imẽnpuye obodi ma yaꞌõbuyxi ixe ma, i. Ixe kuy og̃uwẽn eywebe, ioꞌe — João oꞌe.
\m Imẽn abu Deus mubapukpukꞌukat iap muwẽnuwẽn oeku João Batista.
\p
\v 16 Soat kabia ixe xe wuykukpin cĩcã ikẽrẽat mujurũg̃rũg̃ maꞌg̃u wuyju. Soat podi ma xipan wuykug̃, ixe xe wuykukpin puye.
\p
\v 17 — Eyju cũg̃ ma Deus xe cekawẽn tag̃ jekukum pima — i juk adi oꞌeꞌe Moisésꞌũm wuydobuyũꞌũmꞌũm pe. — Deus xe eykukpin cĩcã ikẽrẽat mujurũg̃rũg̃ maꞌg̃u eyju — i juk adi oꞌeꞌe Jesus Cristo bit.
\p Ixe kawẽn icẽmat muwẽnuwẽn oekuku. 
\v 18 Kaꞌũma ma Deus oꞌjojojo buk. Ixe ipot pũg̃ ma. Ipot acã oꞌjojojo. Ipot ikukpin cĩcã jebay mubapukpukꞌuk osunuy wuywebe. Deus mubapukpukꞌukat ixe.
\p
\v 19-28 Judeuyũ kukukayũ jepaĩyũ oꞌg̃uju João Batista kay. Oꞌg̃uju ip jekawẽn ãm ceweju. Jerusalém ka beayũ osodop ip ixeyũ Judeuyũ kukukayũ. Paĩyũ buywatwatꞌukayũ dak oꞌg̃uju ip. Levitayũ i ibuywatwatꞌukayũ butet osunuy. Fariseuyũ ixeyũ oꞌg̃uju João kay. Betânia ka xe oꞌjekawẽn ip. Jordãodi wĩnãbu oꞌjekawẽn ip. João iboceayũ mubatisasan osunuy ijudi be. Oajẽm ip João kay. Jay. João ibuꞌu g̃u oꞌe jekawẽn ãm ceweju ip.
\p — Abu ẽn? — ioꞌe ip João be.
\p — Cristo g̃u õn — ioꞌe João. — Ijodiayũ daxijojoꞌukan Deus emunaẽ g̃u õn.
\p — Abu ẽn? — ioꞌe maꞌg̃uto ip. — Elias du ẽn? — ioꞌe ip. — Deus ekawẽn muwẽnuwẽnꞌukat tu ẽn? Waram g̃uto du ekop ocekay? Kuyjeat tu ẽn? — ioꞌe ip cebe.
\p — Kaꞌũma — ioꞌe. — Elias g̃u õn.
\p — Deus ekawẽn muwẽnuwẽnꞌukat tu ẽn- -ocemumuwiwiiat? — ioꞌe ip.
\p — Kaꞌũma — ioꞌe. — Eyemumuwiwiiat g̃u õn — ioꞌe.
\p — Abu ẽn? — ioꞌe maꞌg̃uto ip. — Abu ẽn iap cuy eg̃uwẽn ocewebe. Abu ẽn iap muwẽn pin oceju ocemudocayũ be — ioꞌe ip João be.
\p — Ukꞌaꞌũmat pe wuyjuyũ mukũyjojom pit õn — ioꞌe João. — “Ikẽrẽat mujurũg̃rũg̃ap cuy epeyepere,” i õn eꞌem cebe ip. “Wuykukukat jajẽm,” i õn eꞌem. “Kũyjobin cuy epesop yaꞌõ kay,” i õn eꞌem cebe ip — ioꞌe. — Imẽn õn eꞌem cebe ip Isaías ekawẽn tag̃- -kuyat ekawẽn tag̃- -Deus ekawẽn muwẽnuwẽnꞌukat ekawẽn tag̃ — ioꞌe.
\p — “Deus ekawẽn muwẽnuwẽnꞌukat g̃u õn,” i juk ece ocewebe, “Eymumuwiwiiat g̃u õn,” i dak, “Elias g̃u õn,” i dak — ioꞌe ip. — Apẽnpuye dak ẽn wuyjuyũ mubatisasan? — ioꞌe ip.
\p — Õn ma ijodiayũ mubatisasan idibi be — ioꞌe João. — Waraꞌat pit omuy wuyparakpe. Eyetaybit g̃u ixem. Deus ekawẽn eymutaybitbin cuk adi ojekuku. G̃asũ bit ixe jeymutaybin. Omuykuiat yaꞌõbuyxiat. Õn pit ixe joꞌiꞌũmg̃u. Waꞌõbuyxi g̃u õn pit ixe buxim — ioꞌe João.
\p
\v 29 Kuyaje João jekay Jesus ajẽmap oꞌjojojo.
\p — Akꞌi juy epeꞌe! — ioꞌe João adeayũ be. — Teku Deus emunaẽ. Paĩyũ cordeiro aokakaꞌuk osodop ip ikẽrẽat uk am wuydobuyũꞌũmꞌũm pewi — ioꞌe. — Imẽnpuxim teku jeꞌũ ikẽrẽat uk am wuywebewi — ioꞌe. 
\v 30 — Ixe og̃uwẽn eywebe kapusu — ioꞌe. — “G̃asũ bit waraꞌat Deus ekawẽn jeymutaybin,” i juk oce eywebe. “Okap awap ixe kuy itabẽg̃ osunuy iwag̃o maꞌg̃u õn,” i juk oce eywebe. “Imẽnpuye ixe yaꞌõbuyxiat. Õn pit ixe joꞌiꞌũmg̃u. Waꞌõbuyxi g̃u õn pit” i juk oce eywebe — ioꞌe. 
\v 31-33 — Õn pit wetaybit g̃u og̃uy abu ixe osunuy iam. Imẽnpit Israel naxeg̃ebitbit mutaybin ojuy og̃uy abu Deus emunaẽ iam. Imẽnpuye ojot ijodiacat mubatisasan — ioꞌe. — Õn pit wetaybit g̃u og̃uy abu ixe iam — ioꞌe João. — Imẽnpit Deus cuk oꞌe owebe: “Obiõg̃buk jeꞌkop wemunaẽ kay,” i. “Ixe be jeedop,” i. “Ixe epejojojo,” i. “Ixe jebiõg̃buk g̃uõm ijoceayũ be,” i.
Imẽn omudocat cuk oꞌe owebe — ioꞌe- -João oꞌe.
\m Imẽn João Jesus muwẽnuwẽn oekuku.
\p — Deus biõg̃buk ojojojo — ioꞌe João. — Oꞌkop kabi kadiwi. Pukaso joꞌi osunuy ibiõg̃buk. Jesus abi jeje oꞌjecũg̃ — ioꞌe João. 
\v 34 — Ixe ma ojojojo. Ixe Deus ipot. Iboap og̃uwẽn eywebe — ioꞌe João iboceayũ be. 
\p
\v 35 Kuyaje João Batista waram Jesus oꞌjojojo. João cũg̃ꞌi osunuy jeweju etaybitbinayũ eju- -xepxepayũ eju. 
\v 36 Jesus cũg̃cũg̃ oꞌe cewap ip.
\p — Akꞌi juy epeꞌe! — ioꞌe João. — Teku Deus emunaẽ — ioꞌe. — Cordeiro eꞌũap coꞌi teku jeꞌũ ikẽrẽat uk am wuywebewi — ioꞌe.
\p
\v 37 Iboap co buje, Jesus kay oꞌju ip João eju etaybitbinayũ- -xepxepayũ. João ip oꞌsuiwat Jesus kay jeju am.
\p
\v 38 Jesus oꞌjekorepẽn.
\p — Ajo-kudadam eyju? — ioꞌe Jesus.
\p — Ocemutaybitbinꞌukat, poce ẽn? — ioꞌe ip.
\p
\v 39 — G̃aꞌa onuynuyapꞌa kay aju — ioꞌe Jesus.
\p Oꞌju ip Jesus eju. Oajẽm ip Jesus nuynuyapꞌa be. Katpuje ip oajẽm- -16 hora bima. Ukꞌa be ip oõm. Jesus eju ip osodop ixe kabia. 
\v 40 Pũg̃ ma ixeyũꞌin André i osunuy- -xepxepayũꞌin. André kuy João ekawẽn itaybit osunuy. Imẽneju Jesus eju oꞌju. Ixe André Simão kitpit osunuy.
\p
\v 41 G̃ebuje André oꞌju Simão kay- -jewag̃o kay.
\p — Cristo ocetobuxik — ioꞌe Simão be.
\m (Wuydaxijo am Deus emunaẽ iape Cristo.)
\p
\v 42 Oꞌtujowat Jesus kay. Jesus Simão oꞌjojojo.
\p — Ẽn acoꞌi Simão — ioꞌe. — João ipot acoꞌi ẽn. Waraꞌat ebuten g̃asũ — ioꞌe. — Ojomõg̃ ebuten. Céfo i ebuten jeꞌe — ioꞌe Jesus.
\m (Céfo Pedro iape Grego aꞌõm, witaꞌa iape Mundurukú aꞌõm).
\p
\v 43 Kuyaje:
\p — Cum puk õn Galiléia eipi kay — ioꞌe Jesus.
\p Jesus Filipe oꞌtobuxik e dag̃ pima.
\p — Filipe, oweju juy ejeku — ioꞌe.
\p
\v 44 Filipe Betsaida ka bewiat osunuy, André dak, Simão Pedro dak. Pũg̃ka bewiat ip osodop.
\p
\v 45 G̃ebuje Filipe Natanael oꞌtobuxik.
\p — Deus emunaẽ ocetobuxik — ioꞌe Natanael be. — Moisés ixe muwẽg̃aptup oꞌtupmubararak kuyje — ioꞌe. — Deus aꞌõbi oꞌtupmubararak. Deus ekawẽn muwẽnuwẽnꞌukayũꞌũmꞌũm tak ixe muwẽg̃aptup oꞌtupmubararak. Jesus i ibutet. Joséꞌũm ipot ixe, Nazaré ka bewiat — ioꞌe.
\p
\v 46 — Apẽn ẽn eꞌem? — ioꞌe Natanael. — Nazaré ka bewi g̃u Deus emunaẽ jajẽm — ioꞌe.
\p — Ejot cuy ijom — ioꞌe Filipe bit.
\p
\v 47 Jesus Natanael oꞌjojojo ajẽm pima.
\p — Akꞌi juy epeꞌe — Jesus oꞌe jewejuacat pe. — Teku Israel naxeg̃ebit — ioꞌe. — Wuymug̃uykukukuꞌukat g̃u teku! Icẽmãn eꞌeꞌukat ma teku! — ioꞌe.
\p
\v 48 — Ẽn pit ojojo g̃u buk — ioꞌe. — Apẽntak ẽn etaybit õn? — ioꞌe Natanael.
\p — Filipe be enomuwã buje õn ejojo wũy maꞌg̃u ẽn — ioꞌe Jesus. — Ẽn figueiraꞌip kabicuk pe bima ejojo õn — ioꞌe. — Waꞌõbacaam õn ejojo — ioꞌe.
\p
\v 49 — Ocemutaybitbinꞌukat — ioꞌe. — Ẽn ma Deus ipot — ioꞌe. — Icẽmãn ẽn ma Israel naxeg̃ebitbiyũ kukukat — ioꞌe.
\p
\v 50 — Etabut okay, “Ẽn figueiraꞌip kabicuk pe bima ejojo õn,” i juk oce buye. “Jesus itaybit cĩcã,” i ẽn eꞌem. G̃uyjom pit obacaap ojomõg̃ ijodiacayũ be. Iboap epejojojo. “Soat podi ma Jesus yaꞌõbaca,” i ece g̃ebuje bit — ioꞌe. 
\v 51 — Icẽmãn õn eꞌem eywebe — ioꞌe Jesus soat pe ijodiacayũ be. — Soat wag̃o õn — ioꞌe. — Koceꞌi jeꞌe kabi. Deus ekawẽn tojotjotꞌukayũ jeꞌkop okay. Jeu dak ip oxewi. Soat iboap epejojojo — ioꞌe Jesus cebe ip.
\b
\c 2
\p
\v 1 Xepxep xet kap puje Jesus oꞌju jewebumũnap epeta kay. Oꞌju jeweju etaybitbinayũ eju- -12 beayũ eju. Judeuyũ peta mug̃ẽg̃ẽꞌuk osodop ip jewebumũn puje. Caná ka be peta oꞌg̃ug̃ẽ. Ibo ka Galiléia eipi be oꞌsukadop. 
\v 2 Jesusyũ juk oꞌtomuwã ip. Ixi dak oꞌju ceweju ip.
\p
\v 3 G̃ebuje uvaꞌabidi kay oꞌe ip oꞌtiꞌũm puye.
\p — Uvaꞌabidi oꞌtiꞌũm — ioꞌe ixi Jesus pe.
\p
\v 4 — Aĩ — ioꞌe Jesus. — Iꞌe but g̃u iboap owebe. G̃asũ bit cũg̃ g̃u owebe Deus aꞌõbacaap mõg̃ ãm.
\p
\v 5 G̃ebuje ixi oꞌju peta iwat aꞌõbuywatwatꞌukayũ kay.
\p — Oꞌit aꞌõ kay juy epeꞌe — ioꞌe cebe ip.
\p
\v 6 Idibi mũnꞌa oꞌyadop iboce 6 be. Witaꞌa mug̃ẽg̃ẽ oꞌyadop yabog̃atꞌa. 80 litro opop pũg̃ꞌa be idibi, 100 litro dak. Judeuyũ jewebuwuywuyꞌuk ip osodop jekõn puje, jekõn epere buje dak. Jevasília wuywuyꞌuk osodop ip soat em. Imẽnpuye tiꞌade oꞌtidop ig̃oꞌa be.
\p
\v 7 Oꞌjekawẽn ibuywatwatꞌukayũ be ixe Jesus.
\p — Idibi juy epetibu iteꞌa munopapũn ãm- -poteꞌa munopapũn ãm — ioꞌe. — Epeyamunopapũnpũn cuy ip idibim — ioꞌe.
\p Idibi oꞌeimuõm ip poteꞌa be. Yanopapũn oꞌe.
\p
\v 8 — Tiꞌin cuy epetiꞌuk yabewi — Jesus oꞌe cebe ip. — Eyekariwa kay juy epetidujowat — ioꞌe.
\p Oꞌtiꞌuk ip yabewi. Oꞌtidujowat ip jekariwa kay.
\p
\v 9 Idibim g̃u oꞌe. Uvaꞌabidim oꞌjediewexat. Peta iwat oꞌtikõn. Peta iwat ma itaybit g̃u oꞌe abu oꞌtimuwexat uvaꞌabidim iam. Oꞌtiꞌukꞌiayũ bit itaybit oꞌe. 
\p G̃ebuje peta iwat jewebumũniat oꞌtomuwã.
\p
\v 10 — Soat oceju koam tikujĩjãti ũmũm ocebureyũ be. Ibeg̃beg̃ ip pima, oceju tikõõmati ũmũm cebe ip. Ẽn pit imẽn g̃u eꞌem. G̃asũ acã tikujĩjãati ũmũm ẽn ocewebe! — ioꞌe.
\p
\v 11 Imẽneju ceweju etaybitbinayũ oitabun cekay.
\p — Deus aꞌõbacaap kug̃ teku — ioꞌe ip.
\p Jesus idibi oꞌtimuwexat uvaꞌabidim. Jesus koam wuywebe iꞌe baꞌoreat oꞌg̃ubapuk Caná ka beayũ etabutpe Galiléia eipi be. Õn Deus aꞌõbacaap kug̃ iap oꞌg̃ubapuk adeayũ be.
\p
\v 12 Iboap tomukadi Jesus oꞌju Cafarnaum ka be. Oꞌju jexi eju, jekitpityũ eju dak, doze beayũ eju dak. Ade xet g̃u osodop ip ig̃o ka be- -pũg̃pũg̃ ã.
\p
\v 13 G̃ebuje oꞌju Jerusalém ka kay jeweju etaybitbinayũ eju. Oꞌju ip Judeuyũ epeta kay. Peta mujurũg̃rũg̃ꞌuk osodop ip Judeuyũ jeg̃ebu am Egito eipi bewi Deus wuydobuyũꞌũmꞌũm oꞌtujujẽm iap kay. Páscoa i ig̃o epeta butet osunuy. 
\v 14 Oꞌju Deus eju kawẽnwẽnapꞌa kay- -yabog̃atꞌa kay. Oajẽm. Oõm. Adeayũ oꞌjojojo ya be. Biopak teidadaꞌukayũ oꞌjojojo ukꞌa naxirõg̃ pe. Carneiro teidadaꞌukayũ dak oꞌjojojo. Pukaso deidadaꞌukayũ dak oꞌjojojo. Soat ip oꞌjojojo yanaxirõg̃ pe. Ajẽmjẽmayũ edinheiro mutrokakan ip osodop wararaꞌacayũ.
\p
\v 15 Jesus oitakomãn ukꞌa beacat kay. Ixibu oꞌsubumukirik bõrõbum. Iõhõyũ oꞌg̃uwat ya bewi soat. Bioooh. Aki kay oꞌg̃ujẽm. Dinheiro mutrokakanꞌukayũ dak oꞌg̃ujẽm. Biopak deidadaꞌukayũ dak oꞌg̃ujẽm. Carneiro deidadaꞌukayũ dak oꞌg̃ujẽm. Soat ip oꞌg̃ujẽm. Bug̃. Dinheiro mutrokakanꞌukayũ emesa oꞌg̃uyꞌat. Duooooh. Oꞌjedu. Soat oꞌg̃udu dinheiro isurũg̃at mesa bewi.
\p
\v 16 — Soat cuy epetujujẽm iteꞌa naxirõg̃ pewi! — ioꞌe Jesus pukaso deidadaꞌukayũ be. — Webay dukꞌa be g̃u juy epeteidada! — ioꞌe.
\p
\v 17 Oꞌjeg̃ebu ip Deus ekawẽn kay doze beayũ. Ibodup pe ibararak opop:
\mi Bay, ijopꞌa edukꞌa! i. Inaka warẽmtag̃ eꞌem ip iteꞌa be, i. Imẽnpuye wetakoma jĩjã, i.
\p
\v 18 G̃ebuje Judeuyũ kukukayũ oꞌjekawẽn Jesus eju.
\p — Abu-aꞌõbi iteyũ eg̃ujẽm Deus eju kawẽnwẽnapꞌa bewi? — ioꞌe ip Jesus pe. — Deus aꞌõbacaap cuy ejomõg̃ ocewebe — ioꞌe ip. — Iboap mõg̃ puje, “Cũg̃ ma cebe iteyũ mujẽm ãm,” i kuka oceꞌe — ioꞌe ip.
\p
\v 19 — Eywebe Deus eju kawẽnwẽnapꞌa muyꞌat puje, waraꞌatꞌa juy oyamuy õn ma — ioꞌe Jesus. — Xepxep xet kap puje, waraꞌatꞌa oyamuy ukꞌa — ioꞌe Jesus cebe ip.
\p
\v 20 — Ibaꞌore ewebe waraꞌatꞌa muy ãm xepxep xet — ioꞌe ip. — Oceju iteꞌa muymuy ade koato- -46 koato — ioꞌe ip Jesus pe.
\p
\v 21 Jesus ekawẽn cekawẽn paꞌarẽm oꞌe cexe ip. “Ukꞌa” iꞌe buje, jejebit oꞌg̃uwẽn Jesus. 
\v 22 Ceꞌũꞌũayũ xewi Deus pe Jesus muyu buje, Jesus ekawẽn kay oꞌjeg̃ebu ip doze beayũ.
\p — Deus ekawẽntup pe ibararak icẽmãn — ioꞌe ip. — Jesus icẽmãn oꞌeꞌe ocewebe — ioꞌe ip jewewebe.
\p
\v 23 Adeayũ oitabun Jesus kay ixe Jerusalém ka be bima- -Judeuyũ Páscoa epeta mug̃ẽg̃ẽm pima. Õn Deus aꞌõbacaap kug̃ iap oꞌg̃ubapukpuk Jesus. Iboap co buje itabut oꞌe ip cekay. Imẽnpit Pũg̃pũg̃ayũ yopĩt ma itabut oꞌe. 
\v 24 Jesus pit itaybit osunuy apẽn ixeyũ jewag̃uyg̃uy iam. Imẽnpuye ibapug̃ g̃u oꞌjewemuwẽn cebe ip. 
\v 25 Abu-be Jesus eꞌem: — Apẽn teku jewag̃uyg̃uy — i? Kaꞌũma be ma. Jewewebe ma itaybit osunuy.
\b
\c 3
\p
\v 1-2 Ixima be Nicodemos oajẽm Jesus kay. Nicodemos yaꞌõbuyxiat osunuy. Judeu osunuy. Fariseu osunuy. 
\p — Ocemutaybitbinꞌukat — ioꞌe Jesus pe. — Ocetaybit ẽn ocemutaybitbinꞌukat iam. Wuywebe iꞌe baꞌoreat mubapukpukꞌukat ẽn. Deus aꞌõbacaap mõg̃mõg̃ꞌukat ẽn. Abu-be Deus aꞌõbacaap mõg̃ put? Deus bikuyap tag̃ jekukuꞌukat pe acã! Ocexe ẽn Deus xewiat — ioꞌe Nicodemos.
\p
\v 3 — Icẽmãn õn eꞌem ewebe — ioꞌe Jesus. — Waram eykapꞌũm pima, ibaꞌore Deus pe eykukan — ioꞌe.
\p
\v 4 — Apẽn kuka dak waram akap aypa bima? Ibaꞌore! — ioꞌe Nicodemos. — Waram xeꞌe kuka aõm wuyxi uk pe? Ibaꞌore! — ioꞌe.
\p
\v 5-6 — Aoyũ uk pewi wuykap puje, wuyebay ipotpoyũm acesop — ioꞌe Jesus. — Deus biõg̃buk aꞌõbi bit Deus ebekitkiyũm acesop. Wuyag̃uyisum aceku. Icẽmãn õn eꞌem ewebe — ioꞌe Jesus. — Idibi be eymubatisasanꞌũm pima Deus eykukukan g̃u jeꞌe, Deus biõg̃buk eywebeꞌũm pima dak — ioꞌe. 
\v 7 — “Deus ebekin cuy eg̃uy,” i õn eꞌem ewebe — Jesus oꞌe. — “Ag̃uyisum cuy ejeku,” i õn eꞌem ewebe. Ag̃uybabiꞌũm g̃u juy eg̃uy waꞌõ kay — ioꞌe Nicodemos pe. 
\v 8 — Kabido jekpiwan ma pidojujum. Kabido aꞌĩjojom pit wuyju. Eyetaybit g̃u poma pidojujum iam, pomawi oꞌsubidodot iam tak. Imẽnpuxim eyetaybit g̃u dak apẽn kuka Deus ebekitkiyũm acesop ibiõg̃buk aꞌõbi iam — ioꞌe.
\p
\v 9 — Apẽn paxi kuka oꞌjebapuk? Ekawẽn paꞌarẽm oxe — ioꞌe Nicodemos.
\p
\v 10 — Ẽn Israel naxeg̃ebitbit mutaybitbinꞌukat- -Judeuyũ mutaybitbinꞌukat — ioꞌe Jesus. — Ẽn pit aꞌõbuyxi adeayũ xe. Apẽnpuye dak wekawẽn paꞌarẽm exe? — ioꞌe. 
\v 11 — Icẽmãn õn eꞌem ewebe — ioꞌe Jesus. — Wetaybicap muwẽnuwẽn õn. Kuy ojojojoiat muwẽnuwẽn õn. Inaka ẽn wekawẽn kay g̃u — ioꞌe. 
\v 12 — Ipi dag̃ayũ eꞌeap muwẽnuwẽn pima, etabut g̃u wekawẽn kay. Kabi beayũ eꞌeap muwẽn puje, iboap kay dak etabut g̃u kuka epeꞌe — ioꞌe. 
\v 13 — Wararaꞌacat g̃u oꞌkop kabi kadiwi oꞌjojojoiap muwẽn ãm ipi dag̃acat pe. Õn acã okop — ioꞌe. — Soat wag̃o õn — ioꞌe. 
\v 14 — Moisés puybujoꞌiatpu oꞌsubumuꞌãy ip-takũbi dag̃- -bronze mug̃ẽg̃ẽbu. Ukꞌaꞌũmat pe oꞌsubumuꞌãy kuyje. Ig̃obu kay ceakꞌibiyũ oeꞌũ g̃u puybu nuy pibun. Oꞌjeꞌada ip soat. Imẽnpuxim itakomaayũ obamupaya korosa be weꞌũ ãm. Soat wag̃o õn — ioꞌe. 
\v 15 — Okay itabucayũ yag̃uyisum jeku g̃asũ- -soat ip. Soat em itait jeedop ip Deus xe jeꞌũ buje dak — ioꞌe Jesus. 
\v 16 — Deus xe wuykukpin cĩcã ajop. Imẽnpuye jekpot oꞌg̃udot wuykay. Pũg̃ ma ipot. Ixe ipot kay wuyetabut pima, soat em g̃u wuyeꞌũ acesop. Ceꞌũꞌũayũm g̃u acesop. Waram acejetait. Soat em wuyetait acesop Deus xe — ioꞌe. 
\v 17 — “Ipiat osupiꞌajoat eywebe ikẽrẽat kug̃ eyju oxe buye,” iꞌe ojuy g̃u Deus. Imẽnpuye jekpot oꞌg̃ukop ipi kay. Oꞌg̃udot ipi dag̃ayũ daxijo am ipiatpiꞌajojoap kay cuap puxim — ioꞌe. 
\v 18 — Deus ipot pũg̃ ma. Deus eꞌem g̃u “Ikẽrẽat kug̃ eyju oxe,” i jekpot kay itabucayũ be. Deus kuy oꞌe “Ikẽrẽat kug̃ eyju oxe,” i itabutꞌũmayũ be bit, jekpot kay itabutꞌũm puye. 
\v 19 Deus ipot osodot ipi kay apẽn ikẽrẽat Deus xe iap mubapuk am wuywebe, apẽn cũg̃ ma iap mubapuk am tak. Ixe kabiaap puxim. Ijodiayũ bit ikẽrẽat mujurũg̃rũg̃. Kabiok tag̃ jekukuꞌukat puxim ip. Imẽnpuye ip ibuꞌu jetabut am Deus ipot kay — ioꞌe. 
\v 20 — Ikẽrẽat mujurũg̃rũg̃ꞌukayũ ibuꞌu jĩjã jemutaybinan ajo ikẽrẽ Deus xe iam. Imẽnpuye Jesus ekawẽn aꞌĩjojom g̃u ip. Ibuꞌu jĩjã ip wararaꞌacat pe itaybit am ikẽrẽat mujurũg̃rũg̃ teyũku iam. Kabiok tag̃ jekukuꞌukat puxim ip — ioꞌe. 
\v 21 — Idipat mujurũg̃rũg̃ꞌukayũ bit itabut Deus ipot kay, õn pit Deus ekawẽn tag̃ jekukum iap mubapuk am wararaꞌacat pe. Kabia dag̃ jekukuꞌukat puxim ip — ioꞌe.
\m Imẽn Jesus oꞌjekawẽn Nicodemos eju.
\p
\v 22 G̃uyjom Jesus oꞌju Judéia eipi kay. Jeweju etaybitbinayũ eju oꞌju- -doze beayũ eju. Iboceayũ mubatisasan osodop ip. 
\v 23 João Batista dak Enom ka be osunuy. Imubatisasan ip osunuy iboceayũ mutaybit am teyũku João Batista ebekitkiyũ iam. Salim ka xe osunuy tibog̃ puye. Adeayũ cucum oꞌe João kay. Imẽn João imubatisasan ip osunuy, 
\v 24 daomũnmũnapꞌa be g̃u buk puye. 
\v 25 João eju etaybitbinayũ oꞌjewaꞌõxikxik ip Judeu eju.
\p — Abu g̃u cũg̃ ma wuyjuyũ mubatisasan teyũku webekitkiyũ iap mubapuk am? — ioꞌe ip jewewebe. — Jesus g̃u xeꞌe? — ioꞌe ip. — João Batista g̃u xeꞌe? — ioꞌe ip jewewebe.
\p
\v 26 Imẽnpuye oꞌjekawẽn ip João eju.
\p — Ocemutaybitbinꞌukat — ioꞌe ip. — Ag̃okatkat iboceayũ mubatisasan g̃asũ! Kuy bima ixe oceweju oeku Jordão wĩnãbu bima — ioꞌe ip. — Ixe juk adi eg̃uwẽn ocewebe — ioꞌe ip. — Soat iboceayũ cum cekay acã oceju ixe ebekitkiyũm g̃asũ bit iꞌe am — ioꞌe ip.
\p
\v 27 — Ocokcok cĩcã adeayũ cum Jesus kay buye — ioꞌe João bit. — Deus acã wuymõg̃mõg̃ wuyaꞌõbuyxian — ioꞌe. 
\v 28 — “Õn pit Cristo g̃u- -Deus emunaẽ g̃u õn,” i juk adi oce eywebe — ioꞌe João. — “Deus acã omudot tot awap,” i juk adi oce eywebe. Kuy wekawẽn epeyaꞌĩjojo — ioꞌe João. 
\v 29 — Wuyewebumũn puje jewebumũnat jetayxi bum — ioꞌe João. — Jewebumũnat pure bit jewebumũnat xe nuynuy. Ibure icokcok eꞌem jewebumũnat icokcok puye. Jewebumũnat pure buxim õn — ioꞌe João. — Õn tak ocokcok cĩcã adeayũ cum Jesus kay yaꞌõkayayũm — ioꞌe. 
\v 30 — Ade jĩjã jeꞌe ip Jesus aꞌõ kayayũm. Waꞌõkayayũ bit ade g̃u jeꞌe ip- -pũg̃pũg̃ ã. Imẽnpit ocokcok cĩcã — ioꞌe João.
\m Imẽn João oꞌjekawẽn jeweju etaybitbinayũ eju.
\p
\v 31 Kabi kadiwi oajẽmiat itaybit cĩcã. Soat podi ma itaybit. Ipi dag̃at pit kaꞌũma. Itaybit ipi dag̃ayũ eꞌe am. Ipi dag̃ayũ eꞌe am acã kawẽnwẽn. Kabi bewiat pit itaybit cĩcã. 
\v 32 Oꞌjojojoiap muwẽnuwẽn ixe. Oꞌyaꞌĩjojoiap muwẽnuwẽn tak. Inaka pũg̃pũg̃ acã itabut yaꞌõ kay. 
\v 33 Ixe aꞌõ kay itabucat pit eꞌem: — Deus cũg̃ wuykug̃ — i soat pe jebureyũ be.
\m
\v 34 Deus emumudot Deus ekawẽn muwẽnuwẽn. Cebay tacup g̃u. Jebiõg̃buk muõmõm jekpot pe. Imẽnpuye soat em jebay biõg̃buk aꞌõbi jekukum ipot. 
\v 35 Deus xe jekpot kukpin cĩcã. Imẽnpuye soat jaꞌõbacaap oꞌg̃ũm jekpot pe.
\p — Okpot pit waꞌõbaca joꞌi — ioꞌe Deus.
\m
\v 36 Deus ipot kay itabucat yag̃uyisum jeku ijodi bima. Ceꞌũ buje itait jeenuy Deus xe. Itabutꞌũmat pit Deus xe g̃u ma jeenuy itait. Soat em Deus itakoma jĩjã cekay- -jaꞌõ kay kũyjobitꞌũmat kay.
\b
\c 4
\p
\v 1-3 Ibocewi Jesus oꞌjẽm Judéia eipi bewi, Fariseuyũ Jesus awẽg̃ oꞌyawẽg̃tobuxik puye. Adeayũ juk Fariseuyũ oꞌg̃ukũyjojo.
\p — Ade g̃u João Batista eju etaybitbinayũ — ioꞌe Fariseuyũ be. — Jesus eju etaybitbinayũ bit ade jĩjã — ioꞌe ip. — Ade iboceacat mubatisasan Jesus — i napa ma oꞌe ip.
\m Imẽnpit Jesus g̃u iboceacat mubatisasan osunuy idibi be- -ceweju etaybitbinayũ acã.
\p Jesus epit ojuy Galiléia eipi kay jeweju etaybitbinayũ eju.
\p
\v 4 — G̃aꞌa aju Samaria eipi dag̃ — ioꞌe Jesus.
\p — G̃aꞌa — ioꞌe ip.
\p
\v 5 Ibocewi oajem ip ag̃oka be- -Sicar ka be. Kuyje Jacó jekat oꞌg̃ũm jekpot pe- -José be. Sicar ka José katpuk tẽg̃ ma oꞌsukadop.
\p
\v 6 Jesus oꞌju idibikũy kay. Ig̃okũy Jacó juk oꞌsukũykocat kuy bima. Jesus taopipi oꞌe cũg̃cũg̃ãm. Jebodoy am oabik. Oabik idibikũy xe oꞌsukopibareren puye. Kaxicug̃ oꞌe. 
\v 7-8 Jesus eju etaybitbinayũ oꞌju ag̃oka be jexat pum.
\p Ijẽm ip puje, ayacat oajẽm ikũy be- -Samaria eipi beat. Idibi bu ojuy oajẽm.
\p G̃ebuje Jesus oꞌjekawẽn ayacat eju.
\p — Etibu buk wekõnaptim — ioꞌe Jesus.
\p
\v 9 — Ap! — ioꞌe. — Ẽn Judeu. Õn pit Samaria eipi beat — ioꞌe ayacat. — Apẽnpuye ẽn eꞌem owebe “Etibu buk wekõnaptim,” i? — ioꞌe.
\p Judeuyũ ibuꞌu jĩjã osodop Samaria eipi beat ewaꞌe bewi jekõn ãm. Imẽnpuye ayacat oꞌe ibuꞌu jewaꞌe beati ũm Jesus pe.
\p
\v 10 — Deus teiꞌũma iũmũm wuywebe. Etaybit g̃u iboam — ioꞌe. — “Etibu buk wekõnaptim,” i oce ewebe. Etaybit g̃u dak abu õn iam — ioꞌe. — Etaybit õn ibima, “Etibu buk wekõnaptim,” i kuka ece owebe. Oxewi tiojuyjuy bima, ekõnaptim kuka otiũm ewebe. Itedi kõn puje, ag̃uyisum eceku. Eꞌũ buje dak soat em etait ecesũy Deus xe — ioꞌe Jesus.
\p
\v 11 — Tapu — ioꞌe. — Tibubuap kug̃ g̃u ẽn — ioꞌe. — Ikũyberen cĩcã idibikũy. Pomawi kuka ig̃odi etibu- -wuymutaiticapti? — ioꞌe. 
\v 12 — Ocedobuꞌũm yaꞌõbuyxi osunuy- -Jacóꞌũm — ioꞌe ayacat. — Soat xe yaꞌõbuyxi osunuy. Ixeꞌũm itekũy oꞌsukũykocat ocewebeam kuyje. Ixe Jacóꞌũm tikõnkõnꞌuk osunuy itekũy bewiati. Cebekitkiyũ dak tikõnkõnꞌuk osodop, iõhõyũ dak. Yaꞌõbuyxi osunuy ixeꞌũm Jacóꞌũm. Ẽn pit ibodi maꞌg̃u aꞌõbuyxi? — ioꞌe Jesus pe.
\p
\v 13 — Itekũybewiati kõn puje, waram tak ebipuruk eceꞌe — ioꞌe Jesus. 
\v 14 — Wemudiũmti kõn puje bit, waram ebipuruk g̃u eceꞌe- -pũg̃ em tak kaꞌũma — ioꞌe. — Wemudiũmti bit tiwaru. Idiꞌa buxim jeꞌe ewebe- -tiapepꞌũmati buxim. Imẽnpuxim jeꞌe wemudiũmti. Tiapap g̃u jeꞌe. Wemudiũmti kõn puje, waram eybipuruk g̃u epeꞌe. Itedi kõn puje, eyag̃uyisum epeku ijodi. Soat em eyetait epesop Deus xe eyeꞌũ buje dak — Jesus oꞌe cebe.
\p
\v 15 — Tapu — ioꞌe. — Itedi buk etiũm owebe! — ioꞌe. — Etiũm waram obipurukap puxim — ioꞌe. — Etiũm puk waram ijoce tibum wajẽmap puxim — ioꞌe Jesus pe.
\p
\v 16 — Ektop cuy eg̃udot okay — ioꞌe cebe. — Ektop eju juy ecepit — ioꞌe.
\p
\v 17 — Tã — ioꞌe. — Oktoptep g̃u — ioꞌe.
\p — Icẽmãn ẽn eꞌem “Oktoptep g̃u,” i — ioꞌe. 
\v 18 — Cinco beayũ eju juk aꞌg̃u ecewebumũn- -emumukukukyũ eju — ioꞌe. — G̃asũ ewejuat ektop g̃u — ioꞌe. — Imẽn ikẽrẽ Deus xe — ioꞌe. — Icẽmãn ẽn eꞌem pit “Oktoptep g̃u,” i — ioꞌe.
\p
\v 19 — Tapu — ioꞌe. — G̃asũ bit ibaꞌarẽm g̃u oꞌe oxe. Ẽn Deus ekawẽn muwẽnuwẽnꞌukat ma — ioꞌe ayacat. 
\v 20 — “Cũg̃ ma wuywebe Deus kay g̃ebum ma ijoce ma- -coꞌa be- -Gerazimꞌa be,” i juk adi oꞌe ocedobuyũꞌũmꞌũm. Eyju bit Judeuyũ. “Cũg̃ ma wuywebe Deus kay g̃ebum am waraꞌatka be g̃u- -Jerusalém ka be acã,” i eyju eꞌem — ioꞌe. — Abuyũ icẽm g̃u eꞌem exe? — ioꞌe Jesus pe.
\p
\v 21-22 — Tũꞌũ, eyaꞌõpicũg̃cũg̃ cuy waꞌõ kay — ioꞌe Jesus. — Eyju Samaria eipi beayũ — ioꞌe. — Eyju eꞌem Deus pe “Ẽn ma ocekukukat,” i. Imẽnpit eyetaybit g̃u abu ixe iam. Oceju bit Judeuyũ. Oceju bit ocetaybit abu ixe iam. Deus Judeu oꞌtaẽ ijodiayũ daxijojoꞌukan, — ioꞌe. — G̃uyjom ma “ ‘Ẽn ocekukukat,’ i juy aceꞌe wuyebay be Gerazimꞌa be acã,” iꞌũmg̃u epeꞌe; “Jerusalém ka be acã,” iꞌũmg̃u dak. Soat ka dag̃ “Ẽn ocekukukat,” i epeꞌeꞌe cebe — ioꞌe. 
\v 23 — G̃axĩn ma Deus pe eykukukan epesop — ioꞌe. — Ixe bikuyap tag̃ epeku. Ixe ekawẽn kay kũyjobin epesop. Imẽn eyeku buje, Deus kay g̃ebum epesop soat em. Eyebay ibikuy imẽn ma eyeku am — ioꞌe Jesus. 
\v 24 — Deus ijebitbet g̃u. Ijo baꞌore eywebe — ioꞌe. — Ixe kay juy g̃ebum epesop ijojom g̃u maꞌg̃u. Ixe biõg̃buk aꞌõbi juy epesop g̃ebum cekay. Cekawẽn tag̃ tak cuy epesop g̃ebum cekay- -kawẽn icẽmat tag̃ — ioꞌe Jesus.
\p
\v 25 — Wetaybit Cristo omuyku iam. Wuydaxijo am Deus emunaẽ omuyku — ioꞌe ayacat. — “Deus emunaẽ ixe,” i wuyju eꞌem, “Wuydaxijo ixe,” i dak — ioꞌe. — Yajẽm puje soan ocemutaybin ixe — ioꞌe.
\p
\v 26 — Õn ma Cristo — Jesus oꞌe ayacat pe. — Õn ma kawẽnwẽn eweju — ioꞌe.
\p
\v 27 Iboam e buje, ceweju etaybitbinayũ oꞌjepit Jesus kay jexat kug̃. Yag̃uybabiꞌũm oꞌe ip ibapug̃ ma Jesus ayacat eju kawẽnwẽn puye. Imẽnpit:
\p — Ajo-kay ẽn ayacat xewi? — iꞌũmg̃u oꞌe ip Jesus pe. 
\p — Apẽnpuye ẽn kawẽnwẽn ayacat eju? — iꞌũmg̃u dak ip oꞌe cebe.
\p
\v 28 G̃ebuje ayacat oꞌjepit jeka kay. Oꞌju jeka beacat kay. Timũnꞌa oꞌyaiwat idibikũy xe. Jay. Oajẽm.
\p
\v 29 — Epesot cuy ag̃okatkat com — ioꞌe cebe ip- -jeka beacayũ be. — Idibikũy xe omuy — ioꞌe. — “Ẽn cuk adi ikẽrẽat eg̃ujurũg̃rũg̃,” i juk oꞌe owebe — ayacat oꞌe. — Ixe xeꞌe Cristo? — ioꞌe. — Ixe xeꞌe Deus emunaẽ? — ioꞌe ayacat.
\p
\v 30 Oꞌju ip Jesus kay. Oꞌjẽm ip ag̃oka bewi.
\p
\v 31 Ag̃oka bewiayũ ajẽm awap ceweju etaybitbinayũ oꞌjekawẽn Jesus eju.
\p — Ocemutaybitbinꞌukat — ioꞌe ip. — Juku wuyxat — ioꞌe ip. — G̃aꞌa acekõn! — ioꞌe ip.
\p
\v 32 — Oxat g̃u omucokcokcog̃- -waraꞌat acã. Eyetaybit g̃u iboam — ioꞌe- -Jesus oꞌe.
\p
\v 33 — Wararaꞌacat xeꞌe ixat oꞌtojot cebe? — ioꞌe ip jeweweju.
\p
\v 34 — Eyju ma eycokcok eyxat kug̃ pima. Õn pit ocokcok omudocat bikuyap tag̃ weku am — ioꞌe. — Omudocat kapikap oꞌg̃ũm owebe. Ocokcok oce wekapikap muꞌũm ãm — Jesus oꞌe cebe ip. 
\v 35 — “Ebadipdip kaxi kap puje, wuyku beatꞌa yaop jeꞌe,” i eyju ma eꞌem. “G̃axĩn ma yaop,” i õn pit eꞌem eywebe. Imẽnpuxim eyxe adeayũ ibuꞌu jemutabun am okay. “Akꞌi epeꞌe iteyũ kay- -ajẽmjẽmayũ kay,” i õn pit eꞌem — Jesus oꞌe. — “G̃axĩn ma ip itabun okay,” i — ioꞌe. 
\v 36 — Kadaidaidadaꞌukat jekapikaptei bubum, jeku beatꞌa bubuꞌukat tak. Icokcok eꞌem ip jeku beatꞌa kug̃ pima. Imẽnpuxim omuwẽnuwẽnꞌukat icokcok jeꞌe wararaꞌacat pe itabut puje, wararaꞌacat mutabunbunꞌukat tak. Itabucayũ soat em itait jeedop ip webay xe kabi be — Jesus oꞌe. 
\v 37-38 — Õn cuk eymuju omuwẽn ãm adeayũ be. Icẽmãn wuyju eꞌem “Waraꞌat taidadam. Waraꞌat pit yabubum,” i. Imẽnpuxim pũg̃pũg̃ayũ omuwẽnuwẽn. Wararaꞌacayũ itabutꞌũmayũ mutabunbun. Adeayũ epeg̃utabun g̃asũ cebe ip omuwẽn puje. Itabut jeꞌe ip wararaꞌacayũ kuy omuwẽn puye — Jesus oꞌe.
\p
\v 39-40 G̃ebuje ag̃oka bewiayũ oajẽm cekay- -Jesus kay. Oitabun ip cekay. Ade oitabun Samaria eipi watwat. Itabut ip oꞌe ayacat oꞌjewemuwẽn puye.
\p — “Ikẽrẽat eg̃ujurũg̃rũg̃rũg̃,” i juk xeku oꞌe owebe — i juk ayacat oꞌe cebe ip.
\m Itabut ip oꞌe cekay.
\p — Ocexe juy eg̃uy — ioꞌe ip Jesus pe.
\p — Haꞌa. Og̃uy — ioꞌe.
\p Xet. Xet. Xepxep xet osunuy ig̃o ka be. 
\v 41 Wararaꞌacayũ Jesus kay itabut oꞌe cekawẽn co buje. Ade jĩjã itabut oꞌe cekay.
\p
\v 42 — Koap ma ekawẽn oceyaꞌĩjojo. Imẽnpuye ocetabut cĩcã ixe kay — ioꞌe ip ayacat pe. — Ixe ekawẽn oceyaꞌĩjojo g̃asũ bit. Ixe ipi dag̃acat taxijojoꞌukat wuyxe — ioꞌe ip.
\p
\v 43 Xepxep xet oꞌkap. Jesus waram oꞌju Galiléia eipi kay. Ixe ka Galiléia eipi be oꞌsukadop- -Nazaré ka.
\p
\v 44 — Wararaꞌacayũ xe Deus ekawẽn muwẽnuwẽnꞌukat yaꞌõbuyxi. Jeka beacat xe bit kaꞌũma — i juk oꞌe Jesus.
\p
\v 45 Galiléia eipi watwat pit Jesus oꞌtopabijurũg̃. Icokcok ip oꞌe. Jesus osunuy yaꞌõbuyxi cexe i Peta mug̃ẽg̃ẽm ip osodop Jerusalém ka be. Jerusalém ka be bima Jesus eꞌeap oꞌjojojo ip. Jaꞌõbacaap mõg̃mõg̃ap oꞌjojojo ip. Imẽnpuye icokcok ip oꞌe Jesus dopabijurũg̃ puje.
\p
\v 46 Jesus oꞌjepit Caná ka kay- -idibi oꞌtimuwexat uvaꞌabidim iat ka kay. Caná ka Galiléia eipi be oꞌsukadop. Ipi kukat ebekit ig̃oka be osunuy- -Caná ka be. Ixe ipot iwãtaxipi jĩjã osunuy. Poꞌi osunuy ipot Cafarnaum ka be. Oeꞌũ pin ipot jewãtaxipiap pibun.
\p
\v 47 — Jesus oajẽm ijoce, adeayũ oꞌe ipi kukat ebekit pe. Oajẽm Judéia eipi bewi — ioꞌe ip cebe.
\p Ipi kukat ebekit oꞌju Jesus kay. Jay. Oajẽm.
\p — Ejot cuy odukꞌa be — ioꞌe. — Okpot eg̃uꞌada! — ioꞌe Jesus pe. — Oeꞌũ pin okpot — ioꞌe.
\p
\v 48 — Deus jaꞌõbacaap mõg̃mõg̃ap cocoꞌũm puje, kuka eyetabut g̃u epeꞌe okay — ioꞌe Jesus — wuywebe iꞌe baꞌoreat mubapukpukap cocoꞌũm puje dak.
\p
\v 49 — Kariwa — ioꞌe. — Ejot cuy okpot eꞌũ awap — ioꞌe.
\p
\v 50 — Ecepit cuy edukꞌa be — ioꞌe Jesus. — Ekpot kuy oꞌjeꞌada. Oeꞌũ g̃u — ioꞌe.
\p Iwãtaxipi topibit ebay itabut oꞌe Jesus aꞌõ kay. Aripit. Oꞌjepit jedukꞌa kay. Jesus eju g̃u oꞌjepit- -jag̃epũg̃ ma. 
\v 51 Jedukꞌa be kapikpikꞌukayũ ixe oꞌtopabijuk e dag̃- -jedukꞌa be yajẽm pima.
\p — Ekpot oeꞌũ g̃u — ioꞌe ip. — Oꞌjeꞌada jĩjã — ioꞌe ip cebay be.
\p
\v 52 — Poce kaxi bima oꞌjeꞌada? — ioꞌe.
\p — Wuyase bima oꞌjeꞌada kapusu — ioꞌe. — Ipaꞌiat oiꞌũm — ioꞌe ip cebay be.
\p
\v 53 — Wuyase bima ma Jesus oꞌjekawẽn oweju — ioꞌe cebay. — “Ekpot kuy oꞌjeꞌada,” ioꞌe owebe — ioꞌe.
\p Imẽneju itabut oꞌe Jesus kay. Tukꞌa beacat tak itabut oꞌe ip cekay- -soat ip.
\p
\v 54 Imẽn Jesus waram wuywebe iꞌe baꞌoreat oꞌg̃ubapuk adeayũ etabutpe- -Galiléia eipi beacat etabutpe. Oꞌg̃ubapuk Judéia eipi bewi ijẽm puje.
\b
\c 5
\p
\v 1 G̃uyjom Jesus waram oꞌju Jerusalém ka kay. Oajẽm. Judeuyũ peta mug̃ẽg̃ẽm osodop ibo ka be. 
\v 2 Jerusalém ka be idibiꞌitꞌiti oꞌtinuy. Betesda i tibutet osunuy Judeuyũ aꞌõm. Ovelha muõmõmap exĩntabi xe oꞌtinuy ixedi- -ag̃oka ekorara exĩntabi xe. Pũg̃põg̃bi iwãtaxipiat nuyapꞌa oꞌyadop idibiꞌitꞌiti akokoreren. 
\v 3 Ade iwãtaxipipiayũ kapopoꞌi osodop joyũꞌabeku. Itaꞌũmayũ osodop ip, cexĩg̃xĩg̃ paꞌoreayũ dak, ijebit eꞌũayũ dak. Timukoruyap wiwim ip osodop iwãtaxipipiayũ. 
\v 4 Deus ekawẽn tojotjotꞌukat ajẽmjẽmꞌuk osunuy ig̃odi be. Idibi mukoruy buje, iwãtaxipipiayũ kopkopꞌuk ip osodop idibi kay. Koap kopat acã oꞌjeꞌada. 
\v 5 Jesus oajẽm ig̃odi xe.
\p G̃ebuje Jesus ag̃okatkat oꞌjojojo ig̃odi xe. Ixe ag̃okatkat ade koato iwãtaxipi osunuy. 38 koato iwãtaxipi osunuy. 
\v 6 Ade koato poꞌi osunuy jewãtaxipiap kug̃. Jesus itaybit oꞌe iboam.
\p — Tapu, eꞌada pin tu? i — ioꞌe Jesus cebe.
\p
\v 7 — Hm hm — ioꞌe ag̃okatkat. — Weꞌada pin oce. Imẽnpit kaꞌũmg̃u obure odujukop am idibi kay timukoruy buje — ioꞌe. — Okop paꞌore. Okop pin pima, wararaꞌacat ma kom. Ixe ma oꞌjeꞌada — ioꞌe. — Õn pit kaꞌũma — ioꞌe.
\p
\v 8 — Eꞌãy — ioꞌe Jesus. — Exexecaptup cuy etupu — ioꞌe. — Xĩg̃xĩg̃ ece — ioꞌe.
\p
\v 9 Oꞌjeꞌada g̃ebuje bit ag̃okatkat. Jexexecaptup oꞌtupu. Xĩg̃xĩg̃ oꞌe. Xipat oꞌe. Judeuyũ xe jebodoydoyap kabia osunuy. Sábado osunuy. 
\v 10 Imẽnpuye Judeuyũ kukayũ oꞌjekawẽn ag̃okatkat eju- -ceꞌadaꞌibit eju.
\p — Jebodoydoy oceju ijop kabia. Cũg̃cũg̃ g̃u — ioꞌe ip. — Kaꞌũmg̃u wuyekapikap g̃asũ. Wuymutaybitbinap tag̃ g̃u ẽn eꞌem — ioꞌe ip. — Cũg̃ g̃u ewebe exexecaptup tujowat am g̃asũ. Kapikpig̃ ẽn exexecaptup tujowatwan — ioꞌe ip.
\p
\v 11 — “Exexecaptup cuy etupu,” i juk oꞌe owebe omuꞌadaat — ioꞌe. — “Xĩg̃xĩg̃ ece,” ioꞌe owebe — ioꞌe ceꞌadaꞌibit.
\p
\v 12 — Abu oꞌe ewebe “Exexecaptup cuy etupu,” i; “Xĩg̃xĩg̃ ece,” i dak? — ioꞌe ip. — Apẽn ibutet? — ioꞌe ip.
\p
\v 13 Imẽnpit ceꞌadaꞌibit itaybit g̃u oꞌe jemuꞌadaat puten. Imuꞌada buje, Jesus dao ma oꞌjẽm adeayũ parakpewi. Imẽnpuye ceꞌadaꞌibit itaybit g̃u oꞌe ibuten.
\p
\v 14 Jesus ceꞌadaꞌibit oꞌtobuxik g̃uyjom. Deus eju kawẽnwẽnapꞌa be oꞌtobuxik- -yaboꞌgatꞌa be.
\p — Kuy eceꞌada — ioꞌe. — Ikẽrẽat cuy eg̃ujurũg̃ g̃u waram ewãtaxipinap puxim — ioꞌe Jesus imuꞌadaꞌibit pe.
\p — Hm hm. Ikẽrẽat og̃ujurũg̃ g̃u — ioꞌe.
\p
\v 15 Ceꞌadaꞌibit oꞌjẽm. Oꞌju Judeuyũ kukukayũ kay.
\p — Kuy bima wetaybit g̃u og̃uy abu omuꞌada iam — ioꞌe. — G̃asũ bit wetaybit oce ibuten — ioꞌe. — Jesus i ibutet — ioꞌe cebe ip. 
\p
\v 16 Imẽnpuye Judeuyũ kukukayũ Jesus kaykay oꞌe ip. Yaoka ojuy ip Jesus ag̃okatkat oꞌg̃uꞌada jebodoydoyap kabia be buye.
\p
\v 17 Imẽneju Jesus oꞌjekawẽn cebe ip.
\p — Webay soat kabia jekapikap kug̃ eꞌem. Imẽnpuxim õn tak wekapikap kug̃ eꞌem — ioꞌe Jesus cebe ip.
\p
\v 18 Imẽnpuye Jesus aoka ojuy ip Judeuyũ kukukayũ.
\p — Jesus oꞌjekapik jebodoydoyap kabia be. Ag̃okatkat oꞌg̃uꞌada — ioꞌe ip. — Imẽn cũg g̃u Deus xe — i napa ma ip oꞌe. — Jesus oꞌe “Deus webay,” i — ioꞌe ip. — “Deus webay” iꞌeꞌem pima, “Deus aꞌõbacaap coꞌi õn tak waꞌõbaca,” iꞌeꞌem tak — ioꞌe ip. — Imẽnpuye juy ayaoka — ioꞌe ip.
\m Imẽn oꞌjekawẽn ip jeweweju.
\p
\v 19 G̃ebuje Jesus oꞌjekawẽn Judeuyũ kukukayũ eju.
\p — Icẽmãn õn eꞌem eywebe — ioꞌe. — Deus ipot õn. Waꞌõbi g̃u õn eꞌem- -webay aꞌõbi acã. Webay eꞌeap cocom õn. Webay eꞌeap tag̃ acã õn eꞌem, ixe ipot puye — ioꞌe. 
\v 20 — Webay xe okukpin cĩcã. Webay aꞌõbi iwãtaxipiat muꞌadaꞌadaꞌuk og̃uy. Idip cĩcã oꞌe iwãtaxipiat muꞌadaap. Iboap podi ma idipat g̃ubapuk webay — ioꞌe Jesus. — Eyetabẽg̃bẽg̃ epeꞌe iboap cocom- -webay eꞌeap cocom — ioꞌe. 
\v 21 — Webay ceꞌũꞌũayũ mutaicin. Waram ip itait. Kabi kay ixeyũ muyuhum. Õn tak waram ceꞌũꞌũayũ mutaicin. Obikuy bima waram imutaicin õn ixe ipot puye — ioꞌe. 
\v 22 — Deus g̃u eꞌem ijodiacat pe “Eykẽrẽ oxe,” i. Owebe ma webay eꞌem “Ẽn ma ece ‘Ikẽrẽat kug̃ eyju Deus xe,’ i ijodiacat pe — ioꞌe Jesus. 
\v 23 — Imẽnpuye adeayũ jeꞌe owebe “Ẽn Deus ipot,” i. “Aꞌõbuyxi jĩjã ẽn,” i. “Deus tak yaꞌõbuyxi jĩjã,” i jeꞌe ip. Wararaꞌacayũ xe waꞌõbuyxiꞌũm pima, webay dak kuka oꞌe yaꞌõbuyxi g̃u. Omudocat tak kuka oꞌe yaꞌõbuyxi g̃u cexe ip — ioꞌe Jesus. 
\v 24 — Icẽmãn õn eꞌem eywebe — ioꞌe. — Waꞌõ kay kũyjobicayũ yag̃uyisum jekukum- -omudocat kay itabucayũ — ioꞌe. — Soat em Deus xe jeedop ip itait — ioꞌe. — “Ikẽrẽat kug̃ eyju oxe,” iꞌũmg̃u jeꞌe Deus okay itabucayũ be. “Soat em ipiat osupiꞌajoat eywebe,” iꞌũmg̃u dak jeꞌe cebe ip — ioꞌe Jesus. — “Soat em ipiatpiꞌajojoap pe juy epesop,” iꞌũmg̃u jeꞌe cebe ip- -“Soat em oxe ma juy epesop,” i acã — ioꞌe Jesus. 
\v 25 — Icẽmãn õn eꞌem eywebe. Deus ipot õn. G̃axĩn ma ojẽm eyxewi. Oajẽm waram. Wajẽm puje, waꞌõberen ocewãwã. Ceꞌũꞌũayũ waꞌĩjojo. Waram g̃uto jetait ip waꞌõberen wewãwã buje. 
\v 26 Wararaꞌacat Deus mutaicin g̃u. Jaꞌõbi ma itabẽg̃ eꞌem. Waꞌõbi ma õn tak wetait — ioꞌe. — Õn tak webay joꞌi — ioꞌe. 
\v 27 — Soat wag̃o õn. Webay aꞌõbi acã õn eꞌem pũg̃pũg̃ayũ be “Eykẽrẽ g̃u Deus xe,” i. Yaꞌõbi acã “Eykẽrẽ Deus xe,” i õn eꞌem wararaꞌacayũ be — ioꞌe. 
\v 28 — Eyag̃uybabiꞌũm g̃u juy epesop wekawẽn kay. G̃uyjom ma ceꞌũꞌũayũ waꞌĩjojo — ioꞌe. 
\v 29 — Ceꞌũꞌũayũ xewi jeu ip jedopap pewi. Xipacat mujurũg̃rũg̃ꞌukayũ jeu kabi kay. Soat em Deus xe jeedop ip. Ikẽrẽat mujurũg̃rũg̃ꞌukayũ dak jeu. “Eykẽrẽ oxe,” i jeꞌe Deus cebe ip. Ixeyũ g̃uju ipiatꞌajojoap pe — ioꞌe.
\p
\v 30 — Waꞌõbi g̃u õn kawẽnwẽn- -pũg̃ em tak kaꞌũma. Obikuyap tag̃ g̃u õn jekukum- -omudocat bikuyap tag̃ acã. Kuy owebe Deus eꞌeap tag̃ acã õn kawẽnwẽn. Imẽneju cũg̃ ma owebe “Ikẽrẽat kug̃ eyju Deus xe” iꞌe am pũg̃pũg̃ayũ be; “Xipat eyju Deus xe” iꞌe am wararaꞌacayũ be — ioꞌe. 
\v 31 — Õn acã omuwẽnuwẽn pima, “Deus aꞌõbi õn eꞌem,” iꞌeꞌem pima, “Dapxi ẽn,” i kuka juk epeꞌe. Waꞌõ kay eyetabut g̃u kuka epeꞌe — ioꞌe Jesus. 
\v 32 — Waraꞌacat tak omuwẽnuwẽn. Webay dak omuwẽnuwẽn. Ixe icẽmãn eꞌem. Wetaybit icẽmãn ixe omuwẽnuwẽn iam — ioꞌe. 
\v 33 — Eybureyũ juk epeg̃uju João Batista kay — ioꞌe Judeuyũ kukukayũ be. — Ixe João icẽmãn omuwẽnuwẽn oeku. 
\v 34 “Xipan cuy epeꞌe omuwẽnuwẽn,” iꞌũmg̃u õn pit eꞌem wararaꞌacayũ be. “João icẽmãn omuwẽnuwẽn oeku,” i õn eꞌem eywebe, eydaxijo ojuy õn puye — ioꞌe Jesus. 
\v 35 — Lamparina kug̃ pima wuyetaybit poma aju iam. João Batista lamparina buxim osunuy. João Deus ekawẽn muwẽnuwẽn oeku. Imẽnpuye eyetaybit cũg̃ ma jeku am Deus xe iam. Darem ma eycokcog̃ epesop ixe ekawẽn com — ioꞌe. 
\v 36 — João omuwẽnuwẽn oeku. Adeayũ okay itabut oꞌe. Webay aꞌõbi waꞌõbacaap mõg̃mõg̃ ojeku eyetabutpe. Iboap tobuxik puje adeayũ eꞌem owebe “Ebay juk omudot ocekay,” i. 
\v 37 Webay omuwẽnuwẽn. Omudocat omuwẽnuwẽn. Eyju bit kũyjobit g̃u webay aꞌõ kay. Webay kay eyetabut g̃u dak — ioꞌe Jesus. 
\v 38 — Webay juk omudot ijodi. Webay aꞌõmupubutbun eyju bit, eybuꞌu jĩjã eyetabut am okay buye — ioꞌe. 
\v 39 — Eyju Deus ekawẽntup cocom cĩcã. “Deus ekawẽn tag̃ jekukum pima, cebekitkiyũm acesop,” i eyju eꞌem. “Soat em Deus xe acesop wuyetait,” i dak eyju eꞌem. Imẽnpit Deus ekawẽntup tak omuwẽnuwẽn — ioꞌe. 
\v 40 — Inaka eybuꞌu jĩjã eyetabut am okay. Okay eyetabun pima, soat em epesop eyetait Deus xe — ioꞌe. 
\v 41-42 — Wetaybit apẽn eyju jewag̃uyg̃uy iam. Wetaybit cĩcã eyju Deus kay g̃u jĩjã iam — ioꞌe Jesus.
\p — Imẽnpuye eywebe ibuyxim okukap kudadam g̃u õn — ioꞌe Jesus. 
\v 43 — Webay aꞌõbi ojot. Imẽnpit eyju eyetabut g̃u jĩjã okay. Jaꞌõbi wararaꞌacat tot puje bit, ixe kay kuka eyetabut epeꞌe — ioꞌe. 
\v 44 — Pũg̃ ma Deusat. Kaũmg̃u waraꞌat. Eyju bit Deus pe xipan eymuwẽnuwẽnap kudadam g̃u- -wuyjuyũ be xipan eymuwẽnuwẽnap kudadam acã. Imẽneju eybuꞌu jĩjã eyetabut am okay — ioꞌe. 
\v 45-46 — Eyju teꞌe ma eꞌem “Moisés emudupmubararaktup tag̃ oceju jekukum,” i. “Imẽnpuye oceju cũg̃ cĩcã Deus xe,” i eyju teꞌe ma eꞌem — ioꞌe. — Moisés cuk adi omuwẽnuwẽn Deus ekawẽntup pe. Imẽnpuye Moisés aꞌõ kay eyju kũyjobit pima, waꞌõ kay dak kuka juk kũyjobit epeꞌe. “Teyũku ikẽrẽ,” iꞌũmg̃u õn pit eꞌem webay be. Deus acã jeꞌe eywebe “Eykẽrẽ oxe, Moisés aꞌõ kay kũyjobitꞌũm puye,” i. 
\v 47 Moisés emudupmubararaktup kay eyetabut g̃u. Imẽnpuye waꞌõ kay dak ibaꞌore eymutabut am — ioꞌe Jesus Judeuyũ kukukayũ be.
\b
\c 6
\p
\v 1 Ibocewi Jesus iodi oꞌtimudek- -Galiléia eipi beati. Tiberíades tibutet osunuy.
\p
\v 2 G̃ebuje adeayũ oꞌju Jesus kay.
\p — Jesus juk adi iwãtaxipipiayũ oꞌg̃uꞌadaꞌada. Wuywebe iꞌe baꞌoreat oꞌg̃ubapukpuk — ioꞌe ip. — Waram tak paxi iwãtaxipiat g̃uꞌada? — ioꞌe ip jewewebe.
\p Imẽnpuye oꞌju ip tomuju. 
\v 3 Oꞌjeu Jesus coꞌapẽn pe. Jeweju etaybitbinayũ eju oabik- -doze beayũ eju. 
\v 4 Judeuyũ epeta wap osodop ip- -Páscoa epeta wap.
\p
\v 5-6 G̃ebuje Jesus adeayũ oꞌjojojo.
\p — Teyũku og̃ubeg̃beg̃ ixan — ioꞌe jewebe ma. — Filipe du itabut adeayũ mubeg̃beg̃ put Jesus pe iap kay? — ioꞌe Jesus jewebe ma.
\m Imẽnpuye:
\p — Apẽn xeꞌe juy pãoꞌa aceyabu iteyũ xatꞌam- -soat xatꞌam? — ioꞌe Jesus Filipe be.
\p
\v 7 — 6 kaxi be wuyekapikap teim pãoꞌa bu buje, kuka oꞌe g̃u adeayũ xatꞌam — ioꞌe Filipe.
\p
\v 8 Waraꞌacat oꞌjekawẽn Jesus eju jeweju etaybinꞌibiyũꞌin. André oꞌjekawẽn ceweju. Simão Pedro wag̃o osunuy André.
\p
\v 9 — Akꞌi! — ioꞌe André. — Yaypanꞌisuat otobuxik. Cinco be pãoꞌa kug̃. Axima kug̃ tak xepxep — ioꞌe. — Imẽnpit apẽg̃ãm kuka ajat cexewi? Oꞌe g̃u kuka adeayũ xatꞌam — ioꞌe.
\p
\v 10 — “Epabik cuy,” i juy epeꞌe adeayũ be — Jesus oꞌe jeweju etaybitbinayũ be.
\p Oꞌjekawẽn ip adeayũ be. Oabikbik ip adeayũ kapĩꞌidip ceje, tipꞌade oꞌtiptop puye. Ade jĩjã ip osodop. Cinco mil ag̃okatkayũ osodop aoyũ parakpe, bekitkiyũ parakpe dak.
\p
\v 11 G̃ebuje Jesus pãoꞌa oꞌyabu. Oꞌjekawẽn Deus eju.
\p — Bay, ẽn xipat — ioꞌe cebe. — Ocexatꞌam eyamudot ocewebe — ioꞌe.
\p Oꞌyaũm doze beayũ be pãoꞌa. Yaũmũm pima oꞌyamuꞌaren cĩcã. Yaꞌada jĩjã oꞌe. Doze beayũ pãoꞌa oꞌyaũmũm kaxikxikꞌiayũ be. Axima dak oꞌg̃ũm doze beayũ be. Iũmũm pima oꞌg̃uꞌaren cĩcã. Doze beayũ oꞌg̃ũmg̃ũm cebe ip- -kaxikxikꞌiayũ be. Kuy jemuꞌopinput oꞌjat ip. Ibeg̃beg̃ ip oꞌjekõn. 
\v 12 Soat ip ibeg̃beg̃ oꞌe Jesus ixat oꞌg̃uꞌaren cĩcã buye.
\p — Ceaepoyatꞌa juy epeyabu — ioꞌe Jesus doze beayũ be. — Epeyamuxipan — ioꞌe. — Axima epoyat tak cuy epejat. Epeg̃uxipan cuy — ioꞌe. — Epejat cuy ierepap puxim — ioꞌe cebe ip.
\p
\v 13 Soat cepayat ip oꞌjat. Pag̃eiroꞌa joꞌiatꞌa be oꞌg̃uõm ip. Oꞌyamuporan ip cepoyan. Doze be oꞌyamunopapũn paꞌgeiroꞌa joꞌiatꞌa.
\p
\v 14 Imẽn Jesus wuywebe iꞌe baꞌoreat oꞌg̃ubapuk soat etabutpe. Ixat oꞌg̃uꞌaren cĩcã. Imẽnpuye:
\p — Ite ma Deus ekawẽn muwẽnuwẽnꞌukat! — ioꞌe ip jewewebe oꞌjojojoꞌiayũ. — Ade koato ma ixe ajẽmap wiwim ocesop — ioꞌe ip jewewewbe ma. 
\p
\v 15 Jesus dakoy ojuy ip oꞌe. “En ma juy ocekukan ece” iꞌe ojuy ip cebe.
\p — Odakoy ojuy ip jekukukan — ioꞌe. — G̃asũ bit obuꞌu ixeyũ kukukan — ioꞌe Jesus jewebe ma.
\p Imẽneju oꞌjepit jenomukay ma. Jag̃epũg̃ ma oꞌju coꞌa dag̃.
\p
\v 16 Kabiog̃kabiog̃ꞌi bima ceweju etaybitbinayũ oꞌkop iodi kay- -doze beayũ. 
\v 17 Iodi mudek ojuy ip.
\p — G̃aꞌa acepit Cafarnaum ka be — ioꞌe ip jewewebe.
\p Kobe be ip oõm. Kabiok oꞌe. Jesus oajẽm g̃u buk. 
\v 18 Tipodoybog̃ cĩcã oꞌe kabidobog̃ puye. Daum cĩcã kobe tipodoy dag̃. 
\v 19 Wũy jĩjã oꞌjekoykoy ip. 5 kilometro oꞌjekoykoy ip. Jesus oꞌjojojo ip. Xĩg̃xĩg̃ oeku idibi adopa dag̃ Jesus. Yakõmkẽm g̃u tipodoy dag̃. Xĩg̃xĩĩĩĩĩh. Tiꞌadopa dag̃ cũg̃cũg̃ ma oajẽm. Oajẽm pin kobe kay. Iparara jĩjã ip oꞌe tiꞌadopa dag̃at tobuxik puje- -xĩg̃xĩg̃at tobuxik puje.
\p — Ajo xeꞌe teku tiꞌadopa dag̃at? — ioꞌe ip jewewebe.
\p
\v 20 — Eypararam g̃u juy epesop — ioꞌe. — Waraꞌat g̃u õn. Õn ma — ioꞌe Jesus.
\p
\v 21 Iparara g̃u ip oꞌe doze beayũ Jesus ekawẽn co buje. Icokcok cĩcã ip oꞌe. Imẽnpuye:
\p — Eõm kobe be — ioꞌe ip cebe.
\m Kobe dak oꞌjemũg̃ wĩnãbu. Jejuap ojuy ka be oꞌjemũg̃. Mug̃.
\p
\v 22 Kuyaje tomukudadaayũ Jesus oꞌtobuxik g̃u. 
\p — Apu Jesus? — ioꞌe ip jewewebe. — Pũg̃ ma juk kobe ijoce osodop kapusu — ioꞌe ip. — Jesus pit oõm g̃u ibo be kobe be — ioꞌe ip. — Ceweju etaybitbinayũ acã juk oõm kobe be. Ixe bit kaꞌũma — ioꞌe ip. — Apoma oꞌju? — ioꞌe ip jewewebe.
\p
\v 23 Kawẽnwẽn pima wĩnãbuayũ oajẽm jekobe dag̃. Tiberíades ka bewi ip oajẽm. Oꞌjemũg̃ ip. Mug̃. Wuyjuyũ be pãoꞌa oꞌoap pe oꞌjemũg̃ ip. Jebay eju kapusu wuykukukat Jesus oꞌjekawẽn iap pe oꞌjemũg̃ ip.
\p
\v 24 — Jesus pit ijoce g̃u omuy — ioꞌe ip- -tomukudadaayũ oꞌe yajẽmꞌibiyũ be. — Ceweju etaybitbinayũ dak ijoce g̃u omuy — ioꞌe ip. — G̃aꞌa atimudek eyekobe dag̃ — ioꞌe ip. 
\p — G̃aꞌa — ioꞌe ip.
\p Imẽnpuye ip oõm kobe be- -Tiberíades ka bewiayũ ekobe be. Porog̃. Oõm ip soat. Toktek. Oꞌtimudek ip wĩnãbu. Cafarnaum ka ebikopap pe ip oꞌjemũg̃ Jesus kudadam.
\p — G̃aꞌa Jesus ajokudada!
\p — G̃aꞌa! — ioꞌe ip.
\p
\v 25 Oꞌtobuxik ip. Wĩnãbu ip oꞌtobuxik.
\p — Ocemutaybitbinꞌukat — ioꞌe ip. — Puje ajẽm ijoce? — ioꞌe ip. — Ekudadam oceku — ioꞌe ip Jesus pe.
\p
\v 26 G̃ebuje Jesus oꞌjekawẽn ceweju ip.
\p — Icẽmãn õn eꞌem eywebe — ioꞌe Jesus cebe ip. — Kapusu pãoꞌa epeyabu oxewi. Eybeg̃beg̃ epesop oxewiatꞌam. G̃asũ epesot okudadam “Ẽn xipat cĩcã” iꞌe am g̃u- -pãoꞌa o pin puye acã — ioꞌe Jesus cebe ip. 
\v 27 — Eyxat kay acã g̃u juy epeyeg̃ebu. Eybeg̃beg̃ eyxan ijodi bima acã — ioꞌe. — Waraꞌat tak opop eyxat eyag̃uymuisusunap xat — ioꞌe. — Ixe xat o buje, eyag̃uyisum epeku ijodi bima. Soat em epesop eyetait Deus xe eyeꞌũ buje dak — ioꞌe. — Soat wag̃o õn. Deus webay. “Obikuyap tag̃ ẽn jekukum soat em,” i juk oꞌe Deus owebe — ioꞌe. — “Imẽnpuye ẽn ma ibiat xat ũmũmꞌuk eg̃uy wuyjuyũ be,” i juk oꞌe owebe — ioꞌe. — Eyju dak Deus bikuyap tag̃ cuy epekuku soat em ma — ioꞌe.
\p
\v 28 — Apẽn xeꞌe oceku soat em Deus bikuyap tag̃? — ioꞌe ip Jesus pe. 
\p
\v 29-31 — Deus eꞌem “Wemumudot kay eyetabun cuy epesop,” i — ioꞌe. — Õn ma Deus emumudot — ioꞌe. — Okay eyetabut puje, Deus bikuyap tag̃ eyju jekukum — ioꞌe Jesus.
\p — Ocedobuyũꞌũmꞌũm pãoꞌa joꞌiatꞌa oꞌoꞌuk ip osodop ukꞌaꞌũmat tag̃ pima — ioꞌe ip Jesus pe. — Imẽn eꞌem Deus ekawẽntup:
\mi Moisés pãoꞌa mudodotꞌuk osunuy cekay ip- -kabi bewiatꞌa, i — ioꞌe ip.
\m — Deus aꞌõbi Moisés jaꞌõbacaap mõg̃mõg̃ꞌuk osunuy pãoꞌa joꞌiatꞌa mudodon — ioꞌe ip. — Pãm ẽn? Aꞌõbacaap cuy ejomõg̃ ocetabutpe — ioꞌe ip. — Imõg̃ puje ocetabut oceꞌe ekay — ioꞌe ip.
\p
\v 32 — Icẽmãn õn eꞌem eywebe — ioꞌe Jesus cebe ip. — Jaꞌõbi g̃u Moisés pãoꞌa joꞌiatꞌa mudodotꞌuk osunuy eydobuyũꞌũmꞌũm pe- -Deus aꞌõbi acã. Moisés Deus xewiatxat g̃u imudodotꞌuk osunuy cekay ip. Deus pit jexewiatxat mudodon eywebe- -eyag̃uymuisusunap xat — ioꞌe Jesus. 
\v 33 — Deus cuk omudot jexewi kuyje pãoꞌa joꞌiatꞌa mudocap coꞌi — ioꞌe. — Õn kabi kadi wiatxat coꞌi ojot ijodiat ag̃uymuisun am — ioꞌe. — Okay itabucayũ yag̃uyisum jeku — ioꞌe. — Õn ijodiat ag̃uymuisusunꞌukat — ioꞌe.
\p
\v 34 — Kariwa — ioꞌe ip Jesus pe. — Ibiatxat cuy eg̃ũm ocexan. Soat em cuy eg̃ũmg̃ũm ocewebe.
\p
\v 35 — Õn Deus xewiatxat — Jesus oꞌe. — Õn ma ijodiat ag̃uymuisusun — ioꞌe. — Okay eyetabut puje, soat em eycokcog̃ epesop ibeg̃beg̃at coꞌi. Okay eyetabut puje soat em eycokcog̃ epesop ibipurukꞌũmat coꞌi — ioꞌe Jesus. 
\v 36 — “Eybuꞌu eyetabut am okay,” i juk adi ocece eywebe — ioꞌe Jesus. 
\v 37 — Webay pũg̃pũg̃ayũ mutabunbun okay. Imẽnpuye itabut ip okay. “Eyetabun g̃u juy epesop okay,” iꞌũmg̃u õn pit eꞌem cebe ip- -itabun ojuyayũ be- -pũg̃ pe dak kaꞌũma — ioꞌe. 
\v 38 — Kabi kadiwi juk oajẽm obikuyap tag̃ weku am g̃u. Omudocat bikuyap tag̃ weku am oajẽm — ioꞌe. 
\v 39 — Soat em ag̃ õn okay itabucayũ kay. Imẽnpuye jetabucap epereperem g̃u ip- -pũg̃ tak kaꞌũma. Waram ixeyũ og̃uyu kabi kay ceꞌũꞌũayũ muyuap kabia be. Og̃uyu ip omudocat bikuyap tag̃ — ioꞌe Jesus. 
\v 40 — Okay itabucayũ og̃uyu ceꞌũꞌũayũ xewi, webay soat ceꞌũꞌũayũ muyuap kabia be — ioꞌe. — Soat ip jeedop itait Deus xe soat em- -abu õn iam itaybicayũ. Imẽn webay ibikuy — ioꞌe Jesus.
\p
\v 41 Imẽneju Jesus ekawẽn kay g̃u ip oꞌe Judeuyũ kukayũ. Jewaꞌõxikxig̃ oꞌe ip jeweweju.
\p — “Õn Deus xewiat,” i teku eꞌem — ioꞌe ip. — “Kabi kadiwiat xat coꞌi õn,” i teku eꞌem — ioꞌe ip. 
\v 42 — Jesus ma teku! — ioꞌe ip jewewebe. — Joséꞌũm ipot teku — ioꞌe ip teꞌe ma. — Wuyetaybit ixim, cebayꞌũm tak. Apẽntak “Deus xewi ojot,” i teku eꞌem? Dapxi teku — ioꞌe ip teꞌe ma. 
\p
\v 43 — Waꞌõxikxig̃ g̃u juy epesop — ioꞌe Jesus. 
\v 44 — Webay wuyjuyũ mutabunbun okay- -omudocat — ioꞌe. — Imutabunꞌũm pima, kuka itabut g̃u ip oꞌe okay. Okay itabucayũ acã og̃uyu kabi kay. Webay soat ceꞌũꞌũayũ muyuap kabia be ip og̃uyu. Soat em jeedop ip webay xe — ioꞌe. 
\v 45 — Kuyje Deus ekawẽn muwẽnuwẽnꞌukayũ oꞌtupmubararak. Imẽn ibararak opop tup pe:
\mi Deus soat wuyjuyũ g̃utaybin, i.
\m Imẽn eꞌem ig̃odup pe — ioꞌe. — Webay ekawẽn co buje, itabut ip okay ijodiacat, webay be imutaybin puje dak — ioꞌe. 
\v 46 — Pũg̃ ma webay oꞌjojojo. Wararaꞌacat pit kaꞌũma — ioꞌe. — Õn acã webay ojojojo — ioꞌe. 
\v 47 — Icẽmãn õn eꞌem eywebe — ioꞌe- -Jesus oꞌe. — Okay eyetabut pima, soat em epesop eyetait Deus xe eyeꞌũ buje — ioꞌe. 
\v 48 — Õn ma Deus xewiatxat — ioꞌe. — Ijodiat ag̃uymuisusun õn — ioꞌe. 
\v 49 — Wuydobuyũꞌũmꞌũm manaꞌa oꞌoꞌuk osodop ukꞌaꞌũmat pe bima. Inaka oeꞌũꞌũ ip. 
\v 50 Kabi bewiat kay eyetabut puje, Deus wi wũy g̃u epesop — ioꞌe. 
\v 51 — Õn ma kabi bewiat — ioꞌe. — Kabi bewi ojot ijodiat ag̃uymuisun am. Okay itabucayũ yag̃uyisum jeku ijodi bima. Soat em jeedop ip itait Deus xe ceꞌũ buje. Weꞌũ buje, oẽn osuẽnũm ijodiat xatẽn — ioꞌe.
\p
\v 52 Iboap co buje jewaꞌõxikxig̃ ip oꞌe Judeuyũ kukukayũ.
\p — Apẽntak sute jeẽn iẽnũm wuywebe iẽnꞌo am? — ioꞌe ip jewewebe.
\p Jesus ekawẽn cekawẽn paꞌarẽm osunuy ixeyũ xe- -Judeuyũ kukayũ xe. (Oẽnꞌoat okay itabucat iape. Imẽnpit itaybit g̃u ip osodop iboam.)
\p
\v 53 — Icẽmãn õn eꞌem eywebe — ioꞌe Jesus. — Soat wag̃o õn. Oẽnꞌoꞌũm pima Deus ebekitkin g̃u epeꞌe. Odoy kõnꞌũm pima dak cebekitkin g̃u epeꞌe — ioꞌe. 
\v 54 — Oẽnꞌo buje bit, Deus ebekitkin epesop. Odoy kõn puje dak, cebekitkin epesop. Soat em epesop Deus xe eyetait — ioꞌe. — Oẽnꞌoat og̃uyu kabi kay webay ceꞌũꞌũayũ muyuap kabia be. Odoy kõnat og̃uyu ibo kabia be — ioꞌe. 
\v 55 — Wuyjuyũ mutaicinatẽn oẽn. Odoy wuyjuyũ mutaicinatoy — ioꞌe Jesus. 
\v 56 — Obiõg̃buk omuy oẽnꞌoat pe- -odoykõnat pe — ioꞌe. — Obiõg̃buk aꞌõbacaap kug̃ jekukum ip. Õn tak pũg̃ tag̃ ma jekukum ceweju ip — ioꞌe Jesus. 
\v 57 — Webay jaꞌõbi ma itabẽg̃ soat em ma. Ixe ma omudot. Õn tak wetabẽg̃ ijodi webay aꞌõbi — ioꞌe. — Imẽnpuxim õn ma okay itabucayũ ag̃uymuisusun. Yag̃uyisum jekukum ip waꞌõbi- -oẽnꞌoayũ — ioꞌe- -Jesus oꞌe. 
\v 58 — Imẽn ma kabi kadi wiatxat — ioꞌe. — Pãoꞌa joꞌiatꞌa buxim g̃u- -wuydobuyũꞌũmꞌũm xat puxim g̃u. Wuydobuyũꞌũmꞌũm pãoꞌa joꞌiatꞌa oꞌoꞌuk ip osodop — ioꞌe. — Oeꞌũꞌũ ip- -yaꞌoꞌoꞌukayũꞌũmꞌũm ma. Kabi bewiat xat õn. Soat em jeedop ip itait Deus xe oẽnꞌoꞌoayũ — ioꞌe- -Jesus oꞌe. 
\p
\v 59 Jesus iboam oꞌe Judeuyũ eꞌaweroroapꞌa be- -Deus eju kawẽnwẽnapꞌa be. Ig̃oꞌa beacat mutaybinbin osunuy Cafarnaum ka be. Oẽnꞌoat okay itabucat iape. Odoykõnat tak okay itabucat iape. Imẽnpit cekawẽn paꞌarẽm osunuy ixeyũ xe. 
\v 60 Imẽneju:
\p — Cekawẽn paꞌarẽm cĩcã wuyxe — ioꞌe ip jewewebe cekawẽn oꞌjojojoꞌiayũ. — Cekawẽn kay g̃u wuyju — ioꞌe ip.
\p
\v 61 Wararaꞌacayũ be jemukũyjoꞌũm pima, Jesus itaybit oꞌe ixeyũ ekawẽn. Imẽnpuye oꞌjekawẽn ceweju ip.
\p — Wekawẽn paꞌarẽm tu eyxe? — ioꞌe. — Eybuꞌu du eyetabut am okay wekawẽn kayꞌũm puye? — ioꞌe Jesus. 
\v 62 — Soat wag̃o õn. Wekawẽn paꞌarẽm eyxe bima, eyetabut g̃u okay — ioꞌe. — Kabi kay waram omuyuap tobuxik puje dak eyetabut g̃u kuka epeꞌe okay — ioꞌe. — Oka kay wepicap co buje dak kuka eyetabut g̃u epeꞌe okay — ioꞌe Jesus. 
\v 63 — Ijodiat ag̃uymuisusun oẽn oꞌo am g̃u — ioꞌe. — Deus biõg̃buk acã ijodiat ag̃uymuisusun — ioꞌe. — “Oẽn cuy epesuẽnꞌo,” i juk oce eywebe — ioꞌe. — Imẽnpit okay eyetabun cuy epesop iam eymutaybin ojuy og̃uy — ioꞌe. — Wekawẽn kay eyetabut pima, obikuyap tag̃ epeku- -eyag̃uyisum epeku — ioꞌe Jesus. 
\v 64 — Imẽnpit pũg̃pũg̃ eyꞌin itabut g̃u okay — ioꞌe Jesus.
\p (Jesus kuy itaybit oꞌe abuyũ ibuꞌu osodop itabut am okay iam. Itaybit oꞌe abu oũm okay itakomaayũ be iam tak. Kuy bima itaybit oꞌe iboam doze beayũ naẽ buje.)
\p
\v 65 — Soat g̃u eyetabut okay — ioꞌe. — Webay emumutabunbunyũ acã itabut jeꞌe okay. Kuy iboap og̃uwẽn eywebe — ioꞌe. 
\m
\v 66 Kuy bima ceweju oekukuꞌiayũ Jesus kay ip ibuꞌu oꞌe, cekawẽn kayꞌũm puye.
\p G̃ebuje oibuꞌun ip Jesus eju jeku am. 
\v 67 Jesus oꞌjekawẽn doze beayũ eju- -jeweju etaybitbinayũ eju.
\p — Pãm eyju? — ioꞌe. — Eyju dak tu eybuꞌun oweju? — ioꞌe.
\p
\v 68 — Kariwa — ioꞌe Simão Pedro. — Abu-eju kuka oceku? — ioꞌe Jesus pe. — Ẽn acã apẽn itabucayũ yag̃uyisum jekukum iap ekawẽn muwẽnuwẽn ocewebe — ioꞌe. — Ẽn acã Deus xe epesop iap ekawẽn muwẽnuwẽn ocewebe — ioꞌe. 
\v 69 — Ekay acã ocetabut — ioꞌe. — Ocexe ẽn acã Deus emumudot — ioꞌe. — Ocexe ẽn acã xipacat — ioꞌe. — Ẽn acã ikẽrẽat ejukuk g̃u — ioꞌe- -Simão Pedro oꞌe.
\p
\v 70 — Õn cuk eynaẽ — ioꞌe Jesus. — Doze beayũ juk otaẽ — ioꞌe. — Imẽnpit pũg̃ eyꞌin Satanás aꞌõkayan oꞌe — ioꞌe.
\p
\v 71 Jesus Judas oꞌg̃uwẽn- -Simão Iscariotes ipot oꞌg̃uwẽn. Ixe Judas doze beayũꞌin osunuy. Inaka Jesus ũm ojuy oꞌe cekay itakomaayũ be yaoka am.
\b
\c 7
\p
\v 1 Ibocewi Jesus Galiléia eipi dag̃ oeku. Judeuyũ kukukayũ Judéia eipi be osodop ip. Ixeyũ Jesus aoka ojuy. Imẽnpuye Judéia eipi dag̃ oꞌju g̃u Jesus. 
\v 2 Judeuyũ epeta wap osunuy. Cepetabog̃ cĩcã osunuy. Xijap mõg̃mõg̃ꞌuk ip osodop. Xijap pe dopdom osodop ip ig̃o epeta bima.
\p
\v 3 G̃ebuje ikitpiyũ oꞌjekawẽn Jesus eju.
\p — Ejẽm cuy ijocewi — ioꞌe ip Jesus pe. — Judéia eipi kay juy eju — ioꞌe ip. — Aꞌõbacaap cuy ejomõg̃ aꞌõ kayayũ etabutpe ixeyũ be “Teku yaꞌõbaca jĩjã” iꞌe am — ioꞌe ip. 
\v 4 — Ibaꞌarẽm g̃u wuyju eꞌem xipan jewemuwẽn pin pima. Eju juy — ioꞌe ip. — Kaꞌũma buk ocejojojoiap cuy eg̃ubapuk — ioꞌe ip. — Xipan jewemuwẽnat cuy soat pe — ioꞌe ip.
\p
\v 5 Jesus kitpityũ imẽn oꞌe itabutꞌũm cekay buye.
\p
\v 6 — Cũg̃ g̃u mabuk oju am peta kay — ioꞌe Jesus. — Cũg̃ ma bit eyju am. Soat em cũg̃ ma eyju am. 
\v 7 Deus kayꞌũmayũ eykay g̃u itakoma ip. Okay bit itakoma jĩjã ip “Ikẽrẽat mujurũg̃rũg̃ eyju,” i õn eꞌem cebe ip puye — ioꞌe. 
\v 8 — Eyju ma peta kay epeju — ioꞌe jekitpiyũ be. — Õn pit oju g̃u ig̃o epeta kay. Cũg̃ g̃u mabuk oju am — ioꞌe Jesus.
\p
\v 9 Jesus imẽn oꞌe jekitpitpiyũ be. Oꞌjẽm ip ikitpitpiyũ. Jesus pit Galiléia eipi be osunuy pũg̃pũg̃ xet.
\p
\v 10 Ebapũg̃ xet kap puje, Jesus oꞌju peta kay. Soat etaꞌũmpi ma oꞌju. Ibaꞌarẽm ma oꞌju.
\p
\v 11-13 G̃ebuje Jesus oꞌjokudada ip Judeuyũ kukukayũ. Petatam pima oꞌjokudada ip.
\p — Apu Jesus? — ioꞌe ip jewewebe.
\p Adeayũ ibidadada ma jekawẽnwẽn osodop Judeuyũ kukukayũ be jaꞌõdobuxikap puxim. Jesus peam jewaꞌõxikxig̃ ip osodop.
\p — Xipat cĩcã teku — ioꞌe pũg̃pũg̃ ixeyũꞌin.
\p — Kaꞌũma — ioꞌe wararaꞌacayũ bit. — Wuymug̃uykukukuꞌukat teku — ioꞌe ip napa ma.
\p Adeayũ imẽn ibidadada ma jekawẽnwẽn ip oꞌe.
\p
\v 14 Jesus oꞌju Deus eju kawẽnwẽnapꞌa kay- -yabog̃atꞌa kay. Peta mug̃ẽg̃ẽm pima oꞌju. Ig̃oꞌa beacat mutaybitbin osunuy. 
\p
\v 15 Judeuyũ kukukayũ Jesus ekawẽn kay g̃u ip oꞌe.
\p — Apẽnpuye dak sute itaybit? — ioꞌe ip. — Wuymutaybitbinꞌukat xe g̃u osunuy jemutaybinan. Cũg̃ g̃u cexe wuyjuyũ mutaybin am — ioꞌe ip soat pe ig̃oꞌa beacat pe.
\p
\v 16 — Waꞌõbi g̃u õn adeayũ mutaybitbin- -omudocat aꞌõbi acã — ioꞌe Jesus. 
\v 17 — Waꞌõbi du eyxe õn eymutaybitbin? Pãm g̃uto Deus aꞌõbi? — ioꞌe. — Deus bikuyap tag̃ jeku ojuyat itaybit jeꞌe Deus aꞌõbi õn eymutaybitbin iam — ioꞌe cebe ip. 
\v 18 — Pũg̃pũg̃ayũ Deus aꞌõbi g̃u ijodiat mutaybitbin- -jaꞌõbi acã. Cũg̃ g̃u imutaybitbin ip. “Xipan omuwẽnuwẽn cuy epeꞌe,” iꞌeꞌem ip yaꞌĩjojoꞌibiyũ be. Wararaꞌacayũ bit Deus aꞌõbi ijodiat mutaybitbin- -jemudocat aꞌõbi. “Xipan Deus muwẽnuwẽn cuy epeꞌe,” iꞌeꞌem ip. Icẽmãn eꞌem ip. Napa g̃u ip eꞌem. 
\v 19 Moisés Deus ekawẽn cuk adi oꞌg̃uwẽnuwẽn eydobuyũꞌũmꞌũm pe kuyje. Imẽnpit soat eyju kũyjobit g̃u iboap ekawẽn kay. Abu eyꞌin iboap ekawẽn kay kũyjobit? Kaꞌũma ma! Eyju dak waoka ojuy. Apẽnpuye? — ioꞌe Jesus.
\p
\v 20 Adeayũ Jesus ekawẽn oꞌyaꞌĩjojo Deus eju kawẽnwẽnapꞌa beacayũ.
\p — Akpidapi ẽn — ioꞌe ip napa ma adeayũ Jesus pe. — Kaꞌũma ma aoka ojuy — ioꞌe ip Jesus pe.
\p Itaybit g̃u ip osodop adeayũ Jesus aoka ojuy iam Jerusalém ka be powatwat.
\p
\v 21 — Jebodoydoyap kabia be waꞌõbacaap ojomõg̃ pũg̃ em ma — ioꞌe Jesus. — “Cũg̃ g̃u teku eꞌem,” i juk adi epeꞌe iboap co buje. “Sábado be kapikpig̃ teku,” i juk adi epeꞌe — ioꞌe. 
\v 22 — “Wuydobuyũꞌũmꞌũm ekawẽn tag̃ ag̃okatkatꞌitꞌit epetaypuꞌag̃obixeedakat,” ioꞌe Moisés kuyje. “Ikapꞌisuat epetaypuꞌag̃obixeedakat teku Deus ebekit iap mubapuk am,” ioꞌe Moisés kuyje. Jebodoydoyap kabia bima dak eyju ixeedakatkan Moisés ekawẽn mupubutbunap puxim — ioꞌe. 
\v 23 — Sábado bima eyju ixeedakatkan Moisés ekawẽn mupubutbunap puxim. Sábado bima owebe iwãtaxipiat muꞌada buje bit, eyetakoma juk adi epeꞌe okay! “Ẽn jebodoydoy g̃u! Kapikpig̃ ẽn,” i eyju eꞌem owebe. “Ẽn Moisés ekawẽn mupubutbun,” i eyju eꞌem owebe. “Ikẽrẽat mujurũg̃rũg̃ ẽn,” i eyju eꞌem owebe — ioꞌe Jesus. 
\v 24 — Dao g̃u “Ẽn ikẽrẽat mujurũg̃rũg̃,” i juy epeꞌe wararaꞌacat pe — ioꞌe. — Tũybe teku ikẽrẽat mujurũg̃rũg̃ iãn eyju eꞌem. Cekuku am eyetaybitꞌũm pima, “Ẽn ikẽrẽat mujurũg̃rũg̃,” iꞌũmg̃u juy epeꞌeꞌe — ioꞌe Jesus.
\p
\v 25 — Ite aoka ojuy g̃u du wuyka kukayũ? — ioꞌe ip Jerusalém ka watwat jewewebe. 
\v 26 — Akꞌi juy epeꞌe — ioꞌe ip. — Ijoce ma omuy — ioꞌe ip. — Soat etabutpe teku kawẽnwẽn — ioꞌe ip. — Imẽnpit kaꞌũma ma ibubum — ioꞌe ip. — Wuyka kukayũ dak itabut xeꞌe Jesus Deus emunaẽ iap kay? — ioꞌe ip jewewebe. 
\v 27 — Teku Deus emunaẽ g̃u wuyxe — ioꞌe ip Jerusalém ka watwatꞌin. — Deus emunaẽ ajẽm puje, abu xeꞌe itaybit jeꞌe pomawi osodot iam? Kaꞌũma ma! Imẽnpit wuyetaybit pomawi teku osodot iam — ioꞌe ip.
\p
\v 28 Jesus adeayũ mutaybitbin mabuk osunuy Deus eju kawẽnwẽnapꞌa be- -yabog̃atꞌa be.
\p — Eyetaybit g̃u abu õn iam — ioꞌe Jesus. — Eyetaybit g̃u pomawi ojot iam. Waꞌõbi g̃u ojot- -omudocat aꞌõbi acã. Ixe icẽmãn eꞌem soat em. Eyetaybit g̃u abu ixe iam — ioꞌe. 
\v 29 — Õn pit wetaybit ixem — ioꞌe. — Ojot cexewi. Ixe ma omudot ijoce — ioꞌe Jesus. 
\p
\v 30 Imẽneju itakomaayũ Jesus daomũn ojuy ip. Deus pit jewebe ma oꞌe: — Jesus daomũn g̃u buk ip — i. 
\m Imẽnpuye kaꞌũma ma oꞌjat.
\p
\v 31 Tak g̃u oꞌyaꞌĩjojoꞌiayũ bit itabut oꞌe ip Jesus kay. Ade jĩjã itabut oꞌe.
\p — “Deus emunaẽ jaꞌõbacaap jomõg̃,” i wuyju eꞌem — ioꞌe ip. — Ite ag̃okatkat jaꞌõbacaap mõg̃mõg̃ cĩcã. Wuywebe iꞌe baꞌoreat mubapukpug̃ ite ma. Imẽneju ite ma Deus emunaẽ ocexe — ioꞌe ip.
\p
\v 32 Imẽnpuye Jesus daomũn ojuy oꞌe ip Fariseuyũ. Adeayũ Jesus muwẽnuwẽn iam oꞌjekũyjo ip Fariseuyũ. Fariseuyũ eju paĩyũ kukukayũ Deus eju kawẽnwẽnapꞌa wiwiꞌukayũ oꞌg̃uju Jesus daomũn ãm.
\p
\v 33 — Darem ma buk õn eyxe — ioꞌe Jesus adeayũ be. — G̃axĩn ma ocepit omudocat kay — ioꞌe. 
\v 34 — Okudadam epeku. Odobuxik g̃u eyju. Ojuap kay eyju baꞌore — ioꞌe.
\p
\v 35 — Apoma sute jeꞌju? — ioꞌe Judeuyũ kukukayũ. — Poce ibaꞌore kuka wuywebe tobuxik am? — ioꞌe ip. — Jeꞌju du sute Judeuyũ xe jenuy ãm Grécia eipi watwat xe jenuy ãm? — ioꞌe ip. — Ipõg̃põg̃ayũ kay du sute jeꞌju Judeuꞌũmayũ mutaybit am? — ioꞌe ip. 
\v 36 — “Okudadam epeku,” i juk oꞌe ocewebe — ioꞌe ip. — “Imẽnpit eyju odobuxik g̃u,” i juk oꞌe — ioꞌe ip. — “Ojuap kay eyju baꞌore,” i juk oꞌe — ioꞌe ip. — Cekawẽn paꞌarẽm ocexe — ioꞌe ip Fariseuyũ, paĩyũ kukukayũ dak.
\p
\v 37 Waram Jesus oꞌjekawẽn peta mug̃ẽg̃ẽayũ be. Peta epere buje oꞌjekawẽn cebe ip. Ibo kabia yobog̃ cĩcã osunuy Judeuyũ xe.
\p — Wuybipuruk pima, idibi kay jĩjã wuyju — ioꞌe. — Abu yag̃uyisum ceku pin cĩcã? — ioꞌe Jesus yaꞌõberen. — Eyetabun cuy epesop okay! — ioꞌe. — Okay eyetabut pima, eyag̃uyisum epeku — ioꞌe Jesus. 
\v 38 — Okay itabucayũ be idibi buxim jeenuy badi — ioꞌe. — Imẽnpuye yag̃uyisum ip jeku — ioꞌe. — Imẽn eꞌem Deus ekawẽntup — ioꞌe- -Jesus oꞌe.
\p
\v 39 Imẽn e buje Deus biõg̃buk oꞌg̃uwẽn Jesus. Deus biõg̃buk õmõm Jesus kay itabucayũ be. Jesus iboam oꞌe ipi kay Deus biõg̃buk ajẽm awap. Ixe oajẽm g̃u buk, Jesus jebay xe jenuy ãm oꞌjeu g̃u buk puye.
\p
\v 40 Jesus ekawẽn co buje pũg̃ tag̃ g̃u oꞌjekawẽn ip adeayũ- -waraꞌat tag̃tag̃tag̃ ma.
\p — Teku Deus ekawẽn muwẽnuwẽnꞌukat- -ocemumuwiwiiat ma — ioꞌe pũg̃pũg̃ ixeyũꞌin.
\p
\v 41 — Deus emunaẽ teku — ioꞌe wararaꞌacayũ.
\p — Kaꞌũma — ioꞌe wararaꞌacayũ bit. — Deus emunaẽ g̃u teku. Teku Galiléia eipi bewiat! — ioꞌe ip. — Deus emunaẽ Galiléia eipi bewi g̃u jajẽm — ioꞌe ip.
\m
\v 42 — Imẽn eꞌem Deus ekawẽntup:
\mi Davi naxeg̃ebit Deus emunaẽ, i. Belém ka be jeꞌkap- -Judéia eipi be, i. Davi osunuyiat ka be jeꞌkap, i — ioꞌe ip.
\m — Imẽn eꞌem Deus ekawẽntup — ioꞌe ip.
\p
\v 43 Pũg̃ tag̃ g̃u ip oꞌjekawẽn adeayũ Jesus muwẽnuwẽn. Jewaꞌõdawunuwun ip osodop. 
\v 44 Jesus daomũn ojuy ip yawiwiꞌukayũ. Imẽnpit oꞌtaomũn g̃u buk ip.
\p
\v 45 Jesus kug̃ g̃u yawiwiꞌukayũ oꞌjepit. Oajẽm ip kuy oꞌg̃ujuꞌiayũ kay- -paĩyũ kukukayũ kay, Fariseuyũ kay.
\p — Apẽnpuye Jesus epetojot g̃u? — ioꞌe ip yawiwiꞌukayũ be.
\p
\v 46 — Ixe ekawẽn kawẽntip cĩcã ocexe! Abu-buxim ixe kawẽnwẽn? Kaꞌũma buxim ã! — ioꞌe ip.
\p
\v 47 — Eyju dak eymug̃uykuku du ixe? — ioꞌe ip Fariseuyũ. 
\v 48 — Yaꞌõbuyxiayũ itabut g̃u ip cekay- -pũg̃ tak kaꞌũma — ioꞌe ip. — Oceju dak ocetabut g̃u cekay- -pũg̃ tak ocetabut g̃u ma — ioꞌe ip. 
\v 49 — Adeayũ bit itaybit g̃u Moisés ekawẽn. Imẽnpuye Deus eꞌem cebe ip “Eykẽrẽ oxe,” i, “Ipiat osupiꞌajoat eywebe,” i — ioꞌe ip. — Iteyũ acã itabut cekay- -Moisés ekawẽn itaybitꞌũmayũ acã — ioꞌe ip Fariseuyũ yawiwiꞌukayũ be.
\p
\v 50 Nicodemos pit oꞌjede Fariseuyũ be- -jebureyũ be. Ixe Nicodemos ibimãmãmãayũ ekawẽn cocoꞌukat osunuy. Kuy bima oꞌju Jesus kay jekawẽn ãm ceweju.
\p
\v 51 — Jesus puk atujuajẽm g̃u wuykay cekawẽn co am, imuymuyꞌukayũ ekawẽn co am tak — ioꞌe Nicodemos. — Cekawẽn coꞌũm pima, “Ite juy ayaokaat, ikẽrẽat kug̃ puye,” iꞌũmg̃u juy aceꞌe. Imẽn Moisés cuk adi wuymutaybitbin — ioꞌe Nicodemos.
\p
\v 52 — Galiléia eipi bewiat coꞌi ẽn kawẽnwẽn. Deus ekawẽn itaybitꞌũmat coꞌi ẽn kawẽnwẽn — ioꞌe ip Nicodemos wayway. — Ite ag̃okatkat napa ma eꞌem “Deus ekawẽn muwẽnuwẽnꞌukat õn,” i. Deus ekawẽntup cuy etupco! — ioꞌe ip Nicodemos pe. — “Kaꞌũmg̃u Deus ekawẽn muwẽnuwẽnꞌukat Galiléia eipi beat,” iꞌeꞌem ibiatup — ioꞌe ip Nicodemos pe.
\p
\v 53 Soat ip oꞌjepit jedukꞌa be.
\b
\c 8
\p
\v 1 Jesus pit oꞌju coꞌa kay- -Oliveira dipꞌa kay.
\p
\v 2 Kabia isum Jesus waram oꞌjepit Deus eju kawẽnwẽnapꞌa be- -yabog̃atꞌa be. Adeayũ oꞌjeꞌawero Jesus ekawẽn co pin puye. Ixe oabik. Adeayũ mutaybitbin oꞌe.
\p
\v 3 G̃ebuje Fariseuyũ eju Moisés ekawẽn imutaybitbinꞌukayũ ayacat oꞌtojot Jesus kay. Ayacat itoptep maꞌg̃u osunuy. Inaka wararaꞌacat itop kay itabiku osunuy. Wararaꞌacat itop eju oꞌtobuxik ip Fariseuyũ. Oꞌtojot ip Jesus kay. Adeayũ etabutpe ip oꞌtojot.
\p
\v 4 — Kariwa — ioꞌe ip Jesus pe. — Ite ayacat ocetobuxik waraꞌacat itop eju. Imẽnpuye ocetojot ekay — ioꞌe ip. 
\v 5 — Moisés oꞌe wuydobuyũꞌũmꞌũm pe: “Waraꞌacat itop eju jepopomat cuy epeyabug̃bug̃ witaꞌam,” i. Imẽn Moisés ocemutaybitbin. Pãm ẽn? Apẽn ẽn eceꞌe? — ioꞌe ip Jesus pe.
\p
\v 6 Imẽn oꞌe ip Jesus pe. Tũybe cũg̃ꞌũma jede iãn oꞌe ip. “Cũg̃ g̃u ẽn eꞌem,” iꞌe ojuy ip Jesus pe. “Moisés ekawẽn tag̃ g̃u ẽn eꞌem,” iꞌe ojuy ip cebe.
\p Jesus oꞌjeꞌaetoro. Ipi mukorepkorem oꞌe jebum. Koreh. Yatoroh ipi mukorepkorem oꞌe. 
\p
\v 7 — Apẽn ẽn eceꞌe? — ioꞌe ip waram.
\p Kirikꞌãy. Oꞌãy.
\p — Eyꞌinat ikẽrẽat kug̃ꞌũm pima, ixe juy koam witaꞌa yamuju cekay ayacat abug̃ am — ioꞌe Jesus cebe ip.
\p
\v 8 Waram oꞌjeꞌaetoro. Waram jebum ipi mukorepkorem. Koreh.
\p
\v 9 Oꞌjẽm ip cekawẽn co buje. Koap aypapayũ oꞌjẽm õn tak ikẽrẽat kug̃ iam itaybit puye. Warit. Xerewun. Waraꞌat. Xerewun. Waraꞌat. Xerewun. G̃uyjom wararaꞌacayũ oꞌjẽm yaypanꞌisuayũ. Warit. Xerewun. Waraꞌat. Xerewun. Soat ip oꞌjẽm. Jesus acã oꞌjepoyat. Ayacat Jesus xe oꞌe cũg̃ꞌi.
\p
\v 10 Kirikꞌãy. Jesus oꞌãy. Oꞌjeak ayacat kay.
\p — Tũꞌũ — ioꞌe. — Apõma oꞌju ip “Ẽn ma ikẽrẽat kug̃ cĩcã Deus xe,” iꞌe ojuyayũ? “G̃aꞌa ayaoka witaꞌam,” iꞌe ojuyayũ? — ioꞌe- -Jesus oꞌe.
\p
\v 11 — Kariwa — ioꞌe. — Kaꞌũmg̃u ip — ioꞌe. — Oꞌjẽm ip — ioꞌe. — Weiwat xeyũku.
\p — “Ikẽrẽat kug̃ cĩcã ẽn,” iꞌũmg̃u õn tak eꞌem ewebe — ioꞌe Jesus. — Eju juy — ioꞌe. — Waram pit eg̃ujurũg̃ g̃u ikẽrẽat — ioꞌe Jesus.
\p
\v 12 Waram pima Jesus oꞌjekawẽn adeayũ eju.
\p — Kabia buxim õn — ioꞌe. — Deus ekawẽn eymutaybitbin õn cũg̃ ma eyeku am. Okay itabucayũ kabiok tag̃ jekukuꞌukayũ buxim g̃u. Ikẽrẽat mujurũg̃rũg̃ꞌuk g̃u ip. Cũg̃ ma ip jekukum kabia dag̃ jekukuꞌukat puxim. Yag̃uyisum jekukum ip — ioꞌe.
\p
\v 13 — Ẽn acã xipan jewemuwẽnuwẽn — ioꞌe Fariseuyũ. — Cũg̃ g̃u ẽn kawẽnwẽn — ioꞌe ip napa ma.
\p
\v 14 — Cũg̃ ma õn kawẽnwẽn — ioꞌe Jesus. — Eyetaybit g̃u pomawi ojot iam, poma õn cum iam tak — ioꞌe. — Õn pit wetaybit pomawi ojot iam, poma õn cum iam tak — ioꞌe. — Cũg̃ ma õn kawẽnwẽn wetaybit puye — ioꞌe. 
\v 15 — Eyju eꞌem “Cũg̃ ma ẽn kawẽnwẽn,” i, eyxe wararaꞌacat eꞌeap ibapukꞌũm maꞌg̃u. Imẽn g̃u õn pit eꞌem — ioꞌe. 
\v 16 — “Cũg̃ g̃u ẽn kawẽnwẽn,” i õn eꞌem pima bit, cũg̃ ma kuka oce. Cũg̃ ma kuka oce, omudocat tak imẽn eꞌem puye. Webay omudot. Pũg̃ tag̃ ma oceju eꞌem — ioꞌe. 
\v 17 — Imẽn eꞌem Moisés ekawẽntup:
\mi Xepxepayũ pũg̃ tag̃ ma kawẽnwẽn pima, “Teyũku icẽmãn eꞌem,” i kuka oꞌe ip yaꞌĩjojoꞌibiyũ, i — ioꞌe Jesus.
\m
\v 18 — Õn ma xipan jewemuwẽnuwẽn. Webay dak xipan omuwẽnuwẽn- -omudocat. Pũg̃ tag̃ ma omuwẽnuwẽn oceju- -õn, webay dak — ioꞌe.
\p
\v 19 — Poce omuy ebay? — ioꞌe ip Jesus pe.
\p — Etetaybit g̃u abu õn iam, abu webay iam tak — ioꞌe. — Abu õn iam eyetaybit pima, abu webay iam tak kuka eyetaybit epeꞌe — ioꞌe.
\p
\v 20 Imẽn Jesus oꞌe Deus eju kawẽnwẽnapꞌa be- -yabog̃atꞌa be. Adeayũ mutaybitbin osunuy. Dinheiro muõmõmapꞌa xe imutaybitbin osunuy. Cekay itakomaayũ Jesus daomũn ojuy. Imẽnpit oꞌtaomũn g̃u ip taomũnap kabia g̃u buk puye.
\p
\v 21-24 Waram Jesus oꞌjekawẽn Judeuyũ kukukayũ eju.
\p — G̃axĩn ma ojẽm ijocewi — ioꞌe Jesus. — Teꞌe ma epeku okudadam eydaxijoap ojuy. Epeꞌũ Deus pe eywebewi ikẽrẽat ukꞌũm pima. Ojuap kay eyju baꞌore — ioꞌe. — “Epeꞌũ Deus pe ikẽrẽat ukꞌũm pima,” i kuy oce eywebe. Õn Deus xewiat iap kay eyetabutꞌũm pima, epeꞌũ Deus pe eyewebewi ikẽrẽat ukꞌũm pima — ioꞌe Jesus.
\p — “Ojuap kay eyju baꞌore,” i teku eꞌem — ioꞌe ip Judeuyũ kukayũ. — Jewaoka du sute? — ioꞌe ip jewewebe.
\p — Eyju ma ipi dag̃acat. Õn pit kabi bewiat — ioꞌe Jesus. — Eyju ma jewag̃uyg̃uy ijodiat ag̃uy dag̃. Õn pit kaꞌũma.
\p
\v 25 — Abu ẽn? — ioꞌe ip.
\p — Iebikam piman ma juk ocewemuwẽn abu õn iam — ioꞌe. 
\v 26 — Adeat muwẽn pin mabuk õn eywebe. “Cũg̃ g̃u eyju kawẽnwẽn” iꞌe pin mabuk oce eywebe. Omudocat ekawẽn muwẽnuwẽn acã õn. Ixe icẽmãn eꞌem — ioꞌe Jesus.
\p
\v 27 Jesus jemudocat muwẽn puje, jebay oꞌg̃uwẽn. Iboap ekawẽn pit Judeuyũ kukayũ itaybit g̃u.
\p
\v 28 — Soat wag̃o õn — ioꞌe Jesus. — Obamuapay epeꞌe weꞌũ am korosa be. Obamupaya buje, “Icẽmãn xeku kabi bewiat,” i epeꞌe. “Jaꞌõbi g̃u xeku oeku- -jebay aꞌõbi acã,” i epeꞌe — ioꞌe. — “Wuyebay eꞌeap muwẽnuwẽn xeku oeku,” i epeꞌe — ioꞌe Jesus. 
\v 29 — Soat em omudocat bikuyap tag̃ õn jekukum. Imẽnpuye soat em ag̃ okay. Ixe opere g̃u — ioꞌe Jesus.
\p
\v 30 Imẽneju ade oitabun Jesus kay- -yaꞌĩjojoꞌukayũꞌin.
\p
\v 31 Jesus waram oꞌjekawẽn Judeuyũ kukukayũ eju. Pũg̃pũg̃ ixeyũꞌin oꞌe: — Teku icẽmãn eꞌem — i.
\p — Wekawẽn kay kũyjobit pima, oweju etaybitbinayũm epesop — ioꞌe Jesus. 
\v 32 — Kawẽn icẽmat muwẽnuwẽn õn eywebe — ioꞌe. — Kawẽn icẽmãn eyetaybit pima cekariwa be imudadaybotbotꞌibiyũ buximayũm g̃u epesop — ioꞌe cebe ip.
\p
\v 33 — Abu ocemudadaybotbotꞌuk osunuy? Kaꞌũma ma! — ioꞌe ip. — Abraão naxeg̃ebitbit oceju! — ioꞌe ip. — Apẽnpuye ẽn eꞌem ocewebe “Cekariwa be imudadaybotbotꞌibiyũ buximayũm g̃u epesop,” i? — ioꞌe ip.
\p
\v 34 — Icẽmãn õn eꞌem eywebe — ioꞌe Jesus. — Cekariwa be imudadaybotbotꞌibiyũ be ibaꞌore jekariwa epere am. Imẽnpuxim ikẽrẽat mujurũg̃rũg̃ꞌukat pe ibaꞌore ikẽrẽat mujurũg̃rũg̃ap epere am, Satanás ixe ekariwa buye — ioꞌe. 
\v 35 — Cekariwa be imudadaybotbotꞌibit ma soat em g̃u cekariwa dukꞌa be dopdom. Kariwa imujẽm pin pima, g̃ujẽm. Kariwa ipot pit, soat em jebay dukꞌa be dopdom. Cebay ixe g̃ujẽm g̃u — ioꞌe. 
\v 36 — Õn ma Deus ipot. Owebe eydaxijo buje, Satanás g̃u eykukukan jeenuy — ioꞌe. — Imẽnpuye ikẽrẽat mujurũg̃rũg̃ap epere but epesop — ioꞌe. 
\v 37 — Icẽmãn eyju Abraão naxeg̃ebitbit — ioꞌe. — Inaka eyju oaoka ojuy waꞌõ kay kũyjobitꞌũm puye — ioꞌe- -Jesus oꞌe. 
\v 38 — Webay be omutaybitbinap muwẽnuwẽn õn eywebe. Satanás ebekitkit eyju. Ixe ekukuap tag̃ eyju dak jekukum — ioꞌe Jesus.
\p
\v 39-40 — Kaꞌũma! Ocedobuꞌũm ekukuap coꞌi oceju jekukum- -Abraãoꞌũm ekukuap coꞌi — ioꞌe ip teꞌe ma.
\p — Deus kawẽn icẽmat oꞌg̃uwẽn owebe — Jesus oꞌe. — Iboap ekawẽn acã og̃uwẽn eywebe. Inaka eyju ma oaoka ojuy kawẽn icẽmat kayꞌũm puye — ioꞌe. — Abraão bit kawẽn icẽmat kay kũyjobit cĩcã osunuy. Abraão naxeg̃ebitbit eyju. Ixeꞌũm ekukuap coꞌi g̃u bit eyju jekukum — Jesus oꞌe. — Apẽnpuye dak? — ioꞌe. 
\v 41 — Satanás ekukuap coꞌi eyju jekukum — ioꞌe.
\p — Satanás ekukuap coꞌi g̃u oceju jekukum- -Deus ekawẽn tag̃ ma — ioꞌe ip. — Deus acã ocebay — ioꞌe ip.
\p
\v 42 — Deus xewi ojot. Waꞌõbi g̃u ojot. Ixe ma omudot — ioꞌe Jesus. — Deus eyebay bima, kajuk okukpin eyxe og̃uy — ioꞌe. 
\v 43 — Wekawẽn kay jekũyjobin pin g̃u eyju. Imẽnpuye wekawẽn paꞌarẽm eyxe — ioꞌe. 
\v 44 — Ibiõg̃buk kẽrẽayũ kukat ebekitkiyũ eyju- -Satanás ebekitkiyu — ioꞌe- -Jesus oꞌe. — Apẽn ixe ikẽrẽat mujurũg̃rũg̃ iap coꞌi eyju dak ikẽrẽat mujurũg̃rũg̃ — ioꞌe. — Ixe wararaꞌacat aokakaꞌuk osunuy ipi mujurũg̃ isum. G̃asũ dak wuyjuyũ muyꞌũꞌũꞌuk ixe — ioꞌe. — Kawẽn icẽmat kay kũyjobitꞌũm osunuy ixe — ioꞌe. — Ibaꞌore ixe be kawẽn icẽmat kay kũyjobit am. Icẽm g̃u teku eꞌem. Napa ma eꞌem. Napa ma eꞌem pima, jeꞌe pinap tag̃ eꞌem cexe. Dapxi teku — ioꞌe. — Icẽmꞌũmãn eꞌem ip ixe ebekitkiyũ. 
\v 45 Icẽmat õn pit eꞌem eywebe — ioꞌe. — Inaka eyetabut g̃u wekawẽn kay — ioꞌe. 
\v 46 — Kaꞌũma ma icẽmãn eꞌem owebe “Ikẽrẽat mujurũg̃rũg̃ ẽn” i — ioꞌe. — Icẽmãn wekawẽn. Apẽnpuye eyetabut g̃u wekawẽn kay? — ioꞌe. 
\v 47 — Kũyjobit ip cekawẽn kay Deus ebekitkit. Eyju bit Deus ebekitkit g̃u. Imẽnpuye Deus ekawẽn kay g̃u eyju — ioꞌe Jesus Judeuyũ kukukayũ be.
\p
\v 48 — Icẽmãn oceju eꞌem ewebe “Ibiõg̃buk kẽrẽat aꞌõbi ẽn eꞌem” i, “Akpidapi ẽn,” i dak — ioꞌe ip. — “Cũg̃ꞌũma ẽn jekukum Samaria eipi wat puxim,” i oceju eꞌem ewebe. Icẽmãn oceju eꞌem — ioꞌe ip.
\p
\v 49 — Icẽm g̃u eyju eꞌem — Jesus oꞌe. — Ibiõg̃buk kẽrẽat aꞌõbi g̃u õn eꞌem. Webay kug̃ õn ibuyxim. Eyju bit obuyxim g̃u okug̃ — ioꞌe. 
\v 50 — Õn ma obuyxim okug̃ap kudadam g̃u — ioꞌe. — Webay bit obuyxim okug̃. Ixe obuyxim g̃u okukat g̃uju ipiatꞌajojoap pe — ioꞌe. 
\v 51 — Icẽmãn õn eꞌem eywebe — ioꞌe. — Wekawẽn tag̃ jekukuꞌukat soat em g̃u jeedop ceꞌũꞌũayũ xe — ioꞌe Jesus.
\p
\v 52 — Ibiõg̃buk kẽrẽayũ kukat aꞌõbi ẽn kawẽnwẽn — i napa ma oꞌe ip Judeuyũ kukukayũ. — Abraãoꞌũm oeꞌũ. Deus ekawẽn muwẽnuwẽnꞌukayũꞌũmꞌũm tak oeꞌũꞌũ. “Wekawẽn tag̃ jekukuꞌukat soat em g̃u jeedop ceꞌũꞌũayũ xe,” i ẽn pit eꞌem — ioꞌe ip. 
\v 53 — Ocedobuꞌũm oeꞌũ- -Abraãoꞌũm. Abraão bit toto osunuy yaꞌõbuyxiat. Ixeꞌũm podi du aꞌõbuyxi? — ioꞌe ip. — Deus ekawẽn muwẽnuwẽnꞌukayũꞌũmꞌũm tak oeꞌũꞌũ. Ixeyũꞌũmꞌũm pit toto osodop yaꞌõbuyxiayũ. Ixeyũꞌũmꞌũm podi du aꞌõbuyxi? — ioꞌe ip. — Abu dak ẽn? — ioꞌe ip Jesus pe.
\p
\v 54 — Õn ma xipan jewemuwẽnuwẽn pima, abu kuka waꞌõ kay oꞌe? Kaꞌũma ma! — ioꞌe. — Webay bit xipan omuwẽnuwẽn. “Kaꞌũmg̃u okpot coꞌiat yaꞌõbuyxiat,” iꞌeꞌem ixe. “Ẽn acã ocekukukat,” i teꞌe ma eyju eꞌem webay be — ioꞌe Jesus. 
\v 55 — Eyju ma eyetaybit g̃u abu ixe iam. Õn pit wetaybit ixem. “Wetaybit g̃u ixem,” i õn e buje, napa ma kajuk oce. Eybuxim kajuk oce dapxi. Imẽnpit wetaybit cĩcã ixem. Kũyjobit õn cekawẽn kay — ioꞌe. 
\v 56 — Wuydobuꞌũm Abraãoꞌũm itaybit oꞌe ipi kay teku jajẽm wuydaxijojoꞌukan iam. Imẽnpuye icokcok oꞌe — ioꞌe Jesus.
\p
\v 57 — Aypa g̃u ẽn — ioꞌe ip. — Cinquenta koato g̃u buk ẽn — ioꞌe ip. — Abraão ejojojo g̃u! — ioꞌe ip. — Icẽm g̃u ẽn eꞌem — ioꞌe ip Jesus pe.
\p
\v 58 — Icẽmãn õn eꞌem eywebe — ioꞌe Jesus. — Abraão kap awap ma kuy wetabẽg̃ og̃uy — ioꞌe.
\p
\v 59 G̃ebuje witaꞌa oꞌyabu ip Jesus kay yamuju am Judeuyũ kukukayũ. Yaoka ojuy ip napa ma tũybe eꞌem iãn. Jesus pit oꞌjemunẽm adeayũ parakpe. Xerewun. Oꞌjẽm Deus eju kawẽnwẽnapꞌa bewi- -yabog̃atꞌa bewi. Akiju oꞌjẽm.
\b
\c 9
\p
\v 1 G̃ebuje Jesus itaꞌũmat oꞌjojojo doze beayũ eju cũg̃cũg̃ pima. Ikap puje ma itaꞌũm osunuy. Dinheiro ojuyjuyꞌuk osunuy itaꞌũm puye.
\p
\v 2 — Ocemutaybitbinꞌukat — ioꞌe ceweju etaybitbinayũ. — Apẽnpuye ite itaꞌũm oꞌkap? Itaꞌũm oꞌkap ite ma ikẽrẽat mujurũg̃rũg̃ puye du? — ioꞌe ip. — Pãm g̃uto cebay ikẽrẽat mujurũg̃rũg̃ puye du? Pãm g̃uto ixi ikẽrẽat mujurũg̃rũg̃ puye du? — ioꞌe ip.
\p
\v 3 — Itaꞌũm ma oꞌkap ikẽrẽat mujurũg̃rũg̃ puye g̃u, cebay ikẽrẽat mujurũg̃rũg̃ puye g̃u dak, ixi ikẽrẽat mujurũg̃rũg̃ puye g̃u dak — ioꞌe Jesus. — Deus jaꞌõbacaap jomõg̃ wuyetabutpe jabeku. Imẽnpuye itaꞌũm oꞌkap — ioꞌe. 
\v 4-5 — Apẽn kaxi wuymukabiaham iap puxim õn tak Deus ekawẽn ijodiat mutaybitbin ijodi bima cũg̃ ma ceku am ip. Weꞌũ buje kabiok jeꞌe — ioꞌe. — Deus omudot kapik am jewebeam jaꞌõbacaap mubapukpuk am. Deus peam cuy acejekapik wuyekapik put pima. G̃uyjom ibaꞌore jeꞌe wuywebe wuyekapik am cebeam.
\p
\v 6 Oꞌjexi ipi ju. Xih. Aꞌaꞌa. Kaꞌwi oꞌg̃uꞌaꞌa jebidim. Wũnxik. Porog̃. Kaꞌwiꞌaꞌa oꞌyamuy itaꞌũmat eta be imuꞌada am. (14) Judeuyũ ebodoydoyap kabia be oꞌyamuy ita be imuꞌada am.
\p
\v 7 — Eju juy idibiꞌitꞌiti be- -Siloédi be — ioꞌe Jesus. — Ecewedopawuy juy idibim — ioꞌe.
\m (Siloé timudotꞌibiti iape wuyaꞌõm).
\p Xĩg̃xĩg̃. Oꞌju jewedopawuy.
\p Jay. Oajẽm idibiꞌitꞌiti kay. Oꞌjewedopawuywuy. Boroboroꞌi. Itate oꞌe. Oꞌjeu. Jecoatcoan oꞌe. 
\p
\v 8 Imẽnpuye itaꞌũm tũibit tukꞌa etakobeayũ oꞌjekawẽn ip jeweweju, itaꞌũm tũibit oꞌjojojoꞌiayũ dak.
\p — Ijoce dinheiro ojuyjuyꞌuk osunuyiat g̃u du sute? — ioꞌe ip jewewebe.
\p
\v 9 — Ijoce osunuyiat teku — ioꞌe ip pũg̃pũg̃pũg̃.
\p — Kaꞌũma. Ijoce osunuyiat g̃u teku — ioꞌe wararaꞌacayũ. — Ixe-buximat acã teku — ioꞌe ip.
\p — Õn ma ijoce dinheiro ojuyjuyꞌuk og̃uy — ioꞌe itaꞌũm tũibit. 
\v 10 — Apẽn etate g̃asũ? — ioꞌe ip cebe.
\p
\v 11 — Ag̃okatkat oajẽm okay — ioꞌe itaꞌũm tũibit. — Ibutet Jesus i — ioꞌe. — Kaꞌwi oꞌg̃uꞌaꞌa. Oꞌyamuy weta be weta muꞌada am. “Eju juy Siloédi be,” i juk oꞌe owebe — ioꞌe. — “Ecewedopawuy juy,” i dak — ioꞌe. — Imẽnpuye oju. Ocewedopawuy. Wetate oceu — ioꞌe itaꞌũm tũibit. — Wecoan put oce — ioꞌe.
\p
\v 12 — Poce omuy ixe Jesus? — ioꞌe ip.
\p — Iye. Wetaybit g̃u — ioꞌe.
\p
\v 13 G̃ebuje Fariseuyũ kay tukꞌa etakobeayũ itaꞌũm tũibit oꞌtujowat.
\p
\v 14-16 — Apẽn ecewetada g̃asũ? — ioꞌe ip Fariseuyũ itaꞌũm tũibit pe.
\p — Kaꞌwiꞌaꞌa oꞌyamuy weta be — ioꞌe. — Ocewedopawuy. Wetate g̃asũ oce — ioꞌe.
\p — Itadaat oꞌjekapik jebodoydoyap kabia be- -Sábado bima — ioꞌe ip Fariseuyũ. — Moisés ekawẽn tag̃ g̃u ite jekukum. Deus aꞌõbi g̃u ite eꞌem — i napa ma oꞌe ixeyũ Fariseuyũ.
\p — Ikẽrẽat mujurũg̃rũg̃ꞌukat g̃u itadaat! Apẽn kuka ikẽrẽat mujurũg̃rũg̃ꞌukat pe wuywebe iꞌe baꞌoreat mubapuk put? — ioꞌe wararaꞌacayũ.
\p Imẽneju pũg̃ tag̃ g̃u ip Jesus muwẽnuwẽn oꞌe Fariseuyũ. Waraꞌat tag̃tag̃tag̃ ma kawẽnwẽn ip oꞌe.
\p
\v 17 — Pãm ẽn? — ioꞌe ip itaꞌũm tũibit pe. — Ixe etadaat. Abu ixe exe? — ioꞌe ip.
\p — Deus ekawẽn muwẽnuwẽnꞌukat xeku — ioꞌe itaꞌũm tũibit.
\p
\v 18 Judeuyũ kukukꞌukayũ ibuꞌu ip oꞌe jetabut am itaꞌũm tũibit aꞌõ kay. — Itaꞌũm g̃u teku osunuy — ioꞌe ip itabutꞌũm puye.
\m Imẽnpuye itaꞌũm tũibit ebay oꞌg̃udot ip, ixi dak. Oꞌjekawẽn ip ceweju ip yajẽm puje.
\p
\v 19-20 — Ekpot tu ig̃o? — ioꞌe ip cebay be.
\p — Hm hm. Okpot ig̃o — ioꞌe cebay.
\p — Itaꞌũm tu oꞌkap? — ioꞌe ip.
\p — Hm hm, itaꞌũm g̃oku oꞌkap.
\p — Apẽn tak oꞌjewetada g̃asũ? — ioꞌe ip cebayũ be. 
\p
\v 21 — Wetaybit g̃u bit apẽn xeꞌe oꞌjewetada iam — cebay oꞌe. — Wetaybit g̃u abu ixe oꞌg̃uꞌada iam — ioꞌe. — Ig̃o eju ma juy epeyekawẽn — ioꞌe ip Judeuyũ kukukayũ be. — Ite ma jewetadaap g̃uwẽn eywebe. Bekit g̃u g̃oku — ioꞌe ip.
\p
\v 22 Imẽn oꞌjede ip, Judeuyũ kukukayũ buxim iparara buye. Judeuyũ kukukayũ juk oꞌe jebekitkit pe:
\p — “Jesus Deus emunaẽ,” i eyju eꞌem pima, eymuõmat g̃u kuka oceꞌe Deus eju kawẽnwẽnapꞌa be — i.
\m
\v 23 Imẽnpuye iparara oꞌe ip Judeuyũ kukukayũ buxim. Imẽnpuye ixeyũ oꞌe:
\p — Bekit g̃u g̃oku — i. — Jeꞌadaap g̃uwẽn eywebe — i. — “Apẽn eceꞌada?,” i juy epeꞌe cebe — ioꞌe ip.
\p
\v 24 Fariseuyũ waram itaꞌũm tũibit oꞌtojocat jewekay.
\p — Deus etabutpe wuyju nuynuy — ioꞌe ip. — Imẽnpuye icẽmãn ma juy ece — ioꞌe ip Fariseuyũ. — Etadaat ikẽrẽat mujurũg̃rũg̃ꞌukat — ioꞌe ip napa ma. — Ocetaybit iboam — ioꞌe ip.
\p
\v 25 — Wetaybit g̃u ikẽrẽat kug̃ xeꞌe ixe iam — ioꞌe itaꞌũm tũibit. — Wetaybit wetate g̃u ojop iam. G̃asũ bit wetate ma oce — ioꞌe.
\p
\v 26 — Apẽn sute oꞌe ewebe? — ioꞌe ip. — Apẽn etada? — i waram oꞌe ip.
\p
\v 27 — Kuy juk iboap og̃uwẽnuwẽn eywebe — ioꞌe. — Eyju bit eyetabut g̃u waꞌõ kay. Apẽn eyju dak waram waꞌĩjo pin eyxe? — ioꞌe itaꞌũm tũibit. — Ixe ebekitkiyũm pin paxi eyju dak? — ioꞌe cebe ip.
\p
\v 28 — Ap! Ixe ebekitkiyũm pin g̃u oceju! — ioꞌe ip. — Ekawẽnkẽrẽ jĩjã ocexe! — ioꞌe ip.
\p Oitakomãn ip itaꞌũm tũibit kay. Oꞌg̃ukorẽm cĩcã ip.
\p — Ẽn ma ite ebekit — ioꞌe ip. — Oceju bit Moisés ebekitkit — ioꞌe ip. 
\v 29 — Ocetaybit Deus aꞌõbi Moisés eꞌeꞌuk osunuy iam. Ocetaybit g̃u abu aꞌõbi sute eꞌem iam — ioꞌe ip.
\p
\v 30 — “Abu-aꞌõbi sute eꞌem?” i eyju eꞌem — ioꞌe. — “Deus aꞌõbi ite wetada,” i õn pit eꞌem — ioꞌe. — Iboap iwaru jĩjã oxe — ioꞌe. 
\v 31 — Wuyetaybit Deus ikẽrẽat mujurũg̃rũg̃ꞌukat ekawẽn aꞌĩjojom g̃u ibuywat am iam. Jebikuyap tag̃ jekukuꞌukat ekawẽn aꞌĩjojom pit ibuywat am. Jebuyxim jekukat ekawẽn aꞌĩjojom Deus. 
\v 32 Kaꞌũma ma teku itaꞌũm oꞌkapꞌiat oꞌsutada iap awẽg̃ oꞌyawẽg̃tobuxik. Kuyje dak iboap awẽg̃ oꞌyawẽg̃tobuxik g̃u — ioꞌe. — G̃asũ bit Jesus wetada — ioꞌe. 
\v 33 — Deus aꞌõbiꞌũm pima, ibaꞌore kajuk oꞌe cebe wetada am. Deus aꞌõbi ma ite wetada — ioꞌe itaꞌũm tũibit.
\p
\v 34 — Wararaꞌacat podi ma ikẽrẽat kug̃ ẽn! Etaꞌũm ekap ikẽrẽat kug̃ cĩcã buye! — ioꞌe ip napa ma. — Ẽn tu ocemutaybin pin? Ejẽm cuy ocexewi! — ioꞌe ip. — Ejẽm cuy Deus eju kawẽnwẽnapꞌa bewi! — ioꞌe ip. — Waram cuy eõm g̃u ijopꞌa be — ioꞌe ip.
\m Oꞌg̃ujẽm ip itakoma itaꞌũm tũibit kay buye.
\p
\v 35 G̃ebuje Jesus itaꞌũm tũibit oꞌtobuxik. Oꞌtobuxik Fariseuyũ be ixe mujẽm iap awẽg̃ tobuxik puje. Oꞌjekawẽn ceweju.
\p — Tapu, ẽn pit tu etabut Deus ipot kay? — ioꞌe Jesus.
\p
\v 36 — Abu sute, Kariwa? — ioꞌe itaꞌũm tũibit. — Ixe juy eg̃ubapuk omutabut am — ioꞌe.
\p
\v 37 — Ixe jojom ẽn g̃asũ- -eweju kawẽnwẽnat cocom — ioꞌe. — Õn ma ixe — ioꞌe Jesus.
\p
\v 38 Oꞌjẽg̃ꞌaecõg̃cõg̃ Jesus wap Jesus yaꞌõbuyxi cexe buye.
\p — Kariwa, wetabut oce ekay g̃asũ bit — ioꞌe.
\p
\v 39 — Pũg̃pũg̃ ipi dag̃ayũꞌin cũg̃ ma Deus xe wedot puye. Okay itabucayũ cũg̃ ma cexe. Itateayũ buxim ip — ioꞌe Jesus. — Wararaꞌacayũ bit ikẽrẽ cexe. Itabutꞌũmayũ ikẽrẽ cexe — ioꞌe. — “Wetaybitsũ mabuk Deus ekawẽn. Imẽnpit wetaybin pin cĩcã,” iꞌeꞌem wararaꞌacayũ. G̃uyjom ixeyũ itabut jeꞌe okay — ioꞌe Jesus. — Wararaꞌacayũ bit teꞌe ma eꞌem “Wetaybit Deus ekawẽn,” i. Itabut g̃u jeꞌe ip okay. Itaꞌũmayũ buxim ip — ioꞌe.
\p
\v 40 — Teꞌe ma du oceju eꞌem “Ocetaybit Deus ekawẽn,” i? — ioꞌe ip Jesus pe, pũg̃pũg̃ Fariseuyũꞌin.
\p
\v 41 — “Ocetaybitsũ ma Deus ekawẽn. Imẽnpit ocetaybin pin cĩcã,” i eyꞌe buje, ikẽrẽat kug̃ g̃u kajuk epeꞌe Deus xe. Imẽnpit teꞌe ma eyju eꞌem “Ocetaybit cĩcã Deus ekawẽn,” i. Imẽnpuye ikẽrẽat kug̃ eyju cexe — ioꞌe Jesus. 
\b
\c 10
\p
\v 1 G̃ebuje Jesus wuymutaybitbinap ekawẽn oꞌg̃uwẽn adeayũ be. Ovelha ekawẽn oꞌg̃uwẽn cebe ip.
\p — Icẽmãn õn eꞌem eywebe — ioꞌe. — Ovelha ekorara be iõm pinat, xĩntabi be g̃u õmõm pima. “Teku ovelha bu pin,” i wuyju eꞌem. “Teku ovelha dujupaꞌumꞌumꞌukat,” i wuyju eꞌem — ioꞌe Jesus. 
\v 2 — Ovelha kukukꞌukat pit korara exĩntabi be õmõm — ioꞌe. 
\v 3 — Korara exĩntabi wiwiꞌukat xĩntabi muywekweg̃ ovelha kukat õm ãm. Ovelha jekukat aꞌĩjojom. Ikukat jeõhõ nomuwãwãm ibuten eꞌem. Jeõhõ mujẽmjẽm akiju korara exĩntabi be jekorara bewi — ioꞌe. 
\v 4 — Imujẽm puje cucum jeõhõyũ wap. Ovelha jekukat nomuju cucum jekukat aꞌõm itaybit ip puye. 
\v 5 Waraꞌacat nomuju bit taobuꞌu ip cum. Itaybit g̃u ip waraꞌacat aꞌõm. Jekukat aꞌõm acã itaybit ip. Waraꞌacat puxim pit jenapõnpõn ip itaybitꞌũm yaꞌõm puye — ioꞌe Jesus.
\p
\v 6 Ovelha ekawẽn oꞌg̃uwẽn Jesus. Xepxep pe oꞌjekawẽn. Ovelha muwẽnuwẽn pima, jekay itabucayũ dak oꞌg̃uwẽn. Imẽnpit cekawẽn paꞌarẽm oꞌe cexe ip- -adeayũ xe.
\p
\v 7 Waram Jesus oꞌjekawẽn cebe ip.
\p — Icẽmãn õn eꞌem eywebe — ioꞌe. — Xĩntabi dag̃ ovelha õmõm korara be. Korara be bima abu-be ixeyũ muyꞌũ but? Kaꞌũma be ma. Imẽnpuxim soat em ag̃ õn okay itabucayũ kay — ioꞌe Jesus. 
\v 8 — Ovelha itaybit g̃u dujupaꞌumꞌumꞌukat aꞌõm. Imẽnpuxim okay itabucayũ itabut g̃u icẽmꞌũma wuymutaybitbinꞌukayũ ekawẽn kay. Wajẽm awap osodotꞌiayũ icẽm g̃u wuyjuyũ oꞌg̃utaybitbin — Jesus oꞌe. 
\v 9 — Xĩntabi dag̃ ovelha õmõm korara be. Cẽmcẽm ip jexat kudadam. Korara be bima abu-be ixeyũ muyꞌũ but? Kaꞌũma be ma! Imẽnpuxim wuyjuyũ okay itabun puje soat em ag̃ õn ixeyũ kay. Abu-be ixeyũ muyꞌũ but? Kaꞌũma be ma! — ioꞌe Jesus. 
\v 10 — Tujupaꞌumꞌumꞌukat ma ajẽmjẽm ovelha dujupaꞌum ãm, ixeyũ aoka am tak. Õn pit ojot ijodiat ag̃uymuisun am. Okay itabucayũ yag̃uyisum jekukum. Ojot ixeyũ mucokcok am — ioꞌe. — Okay itabucayũ icokcok cĩcã — ioꞌe. 
\v 11 — Okay itabucayũ kug̃ õn xipan ikukat jeõhõ kug̃ xipan iap puxim — ioꞌe. — Ovelha kukat puxim õn. Obuꞌu g̃u weꞌũ ãm wararaꞌacat pe okay itabucayũ aokaap puxim — ioꞌe. 
\v 12 — Ovelha kukukat aꞌõbuywatwatꞌukat ikukukat g̃u. Dinheiro bu am acã kapikpig̃. Ovelha iwat g̃u- -ibuywatwatꞌukat acã. Ovelha iwatiwan kak ajẽm puje. Jenapõnpõn kak puxim iparara buye. Kak ovelha bubum. Ovelha muwatwan soat tag̃. 
\v 13 — Ibuywatwatꞌukat jenapõnpõn dinheiro bum acã kapikpig̃ puye. Ibuꞌu ovelha kug̃, cexe ikukpinꞌũm puye. 
\v 14-15 Ovelha kukukat puxim õn- -xipacat puxim — Jesus oꞌe. — Wetaybit webay. Webay dak itaybit õn. Imẽnpuxim õn tak wetaybit okay itabucayũm. Ixeyũ dak itaybit õn — ioꞌe. — Obuꞌu g̃u weꞌũ ãm okay itabucayũ eꞌũap puxim — ioꞌe Jesus. 
\v 16 — Soat g̃u ovelha pũg̃ ekorara be. Imẽnpuxim soat ka dag̃acat itabut jeꞌe okay — ioꞌe Jesus. — Waꞌõ kay jeꞌe ip kũyjobit. Pũg̃ tag̃ ma ip jeku — ioꞌe. — Soat ixeyũ kukan og̃uy — ioꞌe Jesus. 
\v 17 — Ojeꞌũ okay itabucayũ eꞌũap puxim. Waram g̃uto õn pit ocetait weꞌũ buje. Imẽneju webay xe okukpin cĩcã obuꞌuꞌũm puye weꞌũ ãm — ioꞌe. 
\v 18 — Obuꞌu weꞌũ ãm pima, ibaꞌore kajuk oꞌe wararaꞌacat pe bit oaoka am. “Eceꞌũ” i juk oꞌe webay owebe. “Waram g̃uto etait eceꞌe,” i dak. Wukpiwatpi ma ojeꞌũ, webay ukpiwatpi dak. Wukpiwatpi ma waram g̃uto wetait oceꞌe, webay ukpiwatpi dak — ioꞌe Jesus.
\p
\v 19 Imẽneju pũg̃ tag̃ g̃u ip Jesus ekawẽn oꞌg̃uwẽn- -waraꞌat tag̃tag̃tag̃ ma Judeuyũ kukukayũ.
\p
\v 20 — Ibiõg̃buk kẽrẽat kug̃ teku — ioꞌe ip napa ma ade ixeyũꞌin. — Imẽnpuye yukpidapi — ioꞌe ip napa ma. — Apẽnpuye dak eyju ixe aꞌĩjojom? — ioꞌe ip.
\p
\v 21 — Ibiõg̃buk kẽrẽat kukat pit imẽn cekawẽn paꞌore! — ioꞌe wararaꞌacayũ bit. — Apẽn kuka ibiõg̃buk kẽrẽat kukat itaꞌũmat oꞌsutada? — ioꞌe ip Jesus pe jededem. — Ibaꞌore itada am ibiõg̃buk kẽrẽat kukat pe — ioꞌe ip.
\p
\v 22-24 Waram pima Judeuyũ kukukayũ oꞌju Jesus kay. Jerusalém ka beayũ peta mug̃ẽg̃ẽm ip osodop Judeuyũ. Peta mug̃ẽg̃ẽm ip osodop apẽn kuyjeayũ Deus eju kawẽnwẽnapꞌa oꞌyamudim iap kay g̃ebum am. Ihi bima peta mujurũg̃rũg̃ꞌuk osodop ip. Jesus Deus eju kawẽnwẽnapꞌa etaybu dag̃ cũg̃cũg̃ oꞌe- -Salomão emuamuyꞌa etaybu dag̃. Oajẽm ip Jesus kay Judeuyũ kukukayũ. Oꞌjekawẽn ip Jesus eju.
\p — Ẽn tu Cristo- -Deus emunaẽ? — ioꞌe ip. — Ibapug̃ cuy eg̃uwẽn ocewebe — ioꞌe ip. — Ade kabia emuwẽnap wiwim ocesop — ioꞌe ip. — Ibaꞌarẽm acã ẽn kawẽnwẽn ocewebe. Ẽn Deus emunaẽ bima, Cristo bima, ibapug̃ cuy eg̃uwẽn ocewebe — ioꞌe ip.
\p
\v 25 — Kuy juk adi ocewemuwẽnuwẽn eywebe- -ade em ma — ioꞌe Jesus. — Imẽnpit eyetabut g̃u waꞌõ kay — ioꞌe. — Webay aꞌõbi waꞌõbacaap ojomõg̃mõg̃ eyetabutpe — ioꞌe. — Teku Deus emunaẽ iap mubapukpug̃ og̃uy eywebe — ioꞌe. 
\v 26 — Imẽnpit eyetabut g̃u waꞌõ kay, okay eyetabutꞌũm puye — ioꞌe. 
\v 27 — Okay itabucayũ kũyjobit waꞌõ kay ovelha jekukat aꞌõ kayap puxim — ioꞌe Jesus. — Wetaybit ixeyũ eꞌeam. Wekawẽn tag̃ jekukum ip ovelha jekukukat aꞌõm itaybicap puxim — ioꞌe. 
\v 28 — Ixeyũ ag̃uymuisusun õn. Wararaꞌacayũ bit ixeyũ juꞌuk g̃u obui bewi- -pũg̃ tak kaꞌũma. Soat em itait jeedop ip Deus xe jeꞌũ buje — ioꞌe. 
\v 29 — Webay ixeyũ oꞌg̃utabun okay weõhõyũ buximayũm. Wararaꞌacat podi ma jaꞌõbacaap kug̃ webay. Abu-be ixeyũ uk put webay bui bewi- -weõhõyũ uk put? Kaꞌũma be ma! — ioꞌe. 
\v 30 — Jewaꞌõca jojoꞌi oceju webay eju — ioꞌe Jesus.
\p
\v 31 Iboap co buje, waram witaꞌa oꞌyabu ip Jesus abug̃ ojuy am Judeuyũ kukukayũ.
\p
\v 32 — Webay aꞌõbi juk adi waꞌõbacaap ojomõg̃mõg̃ eyetabutpe- -ade ma — ioꞌe Jesus. — Apẽnpuye dak eyju wabug̃ ojuy witaꞌam? — ioꞌe Jesus.
\p
\v 33 — “Ekẽrẽ Deus xe, juk adi aꞌõbacaap ejomõg̃mõg̃ puye,” iꞌũmg̃u oceju eꞌem ewebe — ioꞌe ip. — “Ekawẽnkẽrẽ Deus xe,” i acã oceju eꞌem ewebe — ioꞌe ip. — Ẽn ijodiat acã. Imẽnpit “Oceju jewaꞌõca jojoꞌi ma webay eju,” i napa ma ẽn eꞌem — ioꞌe ip jetakoma pibun. — Imẽneju abug̃ ojuy oceju — ioꞌe ip Jesus pe.
\p
\v 34 — Imẽn eꞌem Deus ekawẽntup:
\mi Eyju dak Deus aꞌõbiayũ — ioꞌe Deus kuyje, i.
\m Deus kuyje oꞌe “Deus aꞌõbiayũ eyju” i jekawẽn muwẽn ãm taẽhẽꞌibiyũ be — ioꞌe. 
\v 35 — Deus ekawẽntup napa g̃u eꞌem- -pũg̃ em tak kaꞌũma. Icẽmãn eꞌem. Wuyetaybit iboam — ioꞌe Jesus Judeuyũ kukukayũ be. 
\v 36 — Õn ma Deus cuk onaẽ ijodiat taxijo am. Õn ma ixe omudot — ioꞌe Jesus. — Apẽnpuye eyju napa ma eꞌem “Ekawẽnkẽrẽ Deus xe,” i, “Jewaꞌõca jojoꞌi oceju webay eju,” i õn eꞌem puye? — ioꞌe Jesus. 
\v 37 — Webay aꞌõbiꞌũm pima, eyetabun g̃u juy epesop okay — ioꞌe. 
\v 38 — Wekawẽn coco am eyetabutꞌũm pima, eyetabun cuy epesop waꞌõbacaap mõg̃mõg̃ap coco am — ioꞌe. — Eyetabun puje “Jesus yaꞌõbaca cebay aꞌõbacaap coꞌi,” i epeꞌe — ioꞌe.
\p
\v 39 Imẽneju Jesus daomũn ojuy maꞌg̃uto ip Judeuyũ kukukayũ. Jesus pit oꞌjenapõn jenaomũnap puxim.
\p
\v 40 Waraꞌat ka kay oꞌju Jesus. Toktek. Jordãodi waram oꞌtimudek. Jay. Oajẽm João Batista be adeayũ mubatisasan osunuy iatka kay. Wĩnãbu osunuy.
\p
\v 41-42 G̃ebuje ade ibo ka watwat oꞌtabun Jesus kay- -Jordãodi wĩnãbuayũ.
\p — João Batista ma wuywebe iꞌe baꞌoreat oꞌg̃ubapukpuk g̃u — ioꞌe ip adeayũ jewewebe. — Imẽnpit ixe ag̃okatkat muwẽnuwẽnꞌuk osunuy ocewebe. Icẽmãn João ixe oꞌg̃uwẽnuwẽn — ioꞌe ip.
\m Imẽnpuye Jesus kay itabut oꞌe ip adeayũ.
\b
\c 11
\p
\v 1 Lázaro iwãtaxipi oꞌe. Maria kipit iwãtaxipi oꞌe- -Betânia ka beat. Imẽnpuye iixĩyũ Lázaro wãtaxipiap awẽg̃ oꞌyawẽg̃muju Jesus kay. Betânia ka watwat osodop ip- -Maria, Marta dak, Lázaro dak.
\p
\v 2 G̃uyjom ixe Maria wuykukukat i oꞌsuimudeꞌon tideꞌoatim. Ixe oꞌsuimupuruk jadam. Imẽn oꞌe jexe Jesus ikukpin cĩcã buye.
\p Yawẽg̃tujowacat oajẽm Jesus kay. Jay.
\p
\v 3-4 — Kariwa — ioꞌe Jesus pe. — Lázaro iwãtaxipi jĩjã — ioꞌe. — Exe ikukpinat iwãtaxipi oꞌe — ioꞌe.
\p — Kuy wetaybit — ioꞌe Jesus. — Iwãtaxipi jĩjã opop — ioꞌe. — Ceꞌũ buje dak jeedop g̃u ceꞌũꞌũayũ xe. G̃uyjom adeayũ jeꞌe “Deus soat podi ma yaꞌõbaca; soat podi ma idip,” i — ioꞌe. — “Deus ipot tak yaꞌõbaca- -soat podi ma yaꞌõbaca,” i jeꞌe ip — ioꞌe Jesus.
\p
\v 5 Jesus xe Marta ikukpin cĩcã osunuy. Maria dak ikukpin cĩcã osunuy, Lázaro dak. 
\v 6 Inaka Jesus xepxep xet osunuy jenuyap ka be iwãtaxipiat awẽg̃ tobuxik puje. Oꞌju g̃u buk Lázaro kay. Xet. Xet.
\p
\v 7 G̃ebuje Jesus oꞌjekawẽn 12 beayũ eju- -jeweju etaybitbinayũ eju.
\p — G̃aꞌa bukto acepit Judéia eipi kay waram — ioꞌe.
\p
\v 8 — Ocemutaybitbinꞌukat — ioꞌe ip. — Iboceat abug̃ ojuy g̃axĩn ma witaꞌam- -Judeuyũ kukukayũ. Waram tak tu iboce eju pin? — ioꞌe ip Jesus pe.
\p
\v 9-10 — Hm hm — ioꞌe. — Wekapik put mabuk owebe. Pũg̃ kabia be doze hora kabiaham wuyju — ioꞌe. — Ixima be cũg̃cũg̃at kuka oꞌat kabiok puye. Kabia dag̃ cũg̃cũg̃at pit kuka oꞌat g̃u kaxi imukabiaham puye. Imẽnpuxim Deus bikuyap tag̃ jekukuꞌukat jeꞌũ g̃u jekapikap muꞌũmꞌũm pima. G̃aꞌa aju. Oaokam g̃u buk ip, weꞌũap kabia oajẽm g̃u buk puye — ioꞌe.
\p
\v 11 Waram Jesus oꞌjekawẽn ceweju ip- -doze beayũ eju.
\p — Wuybure, Lázaro opop ixet — ioꞌe- -Jesus oꞌe. — Õn pit cum ixe muwurũg̃ ãm — ioꞌe.
\p
\v 12 — Kariwa — ioꞌe ip. — Ixet pima, kuka oꞌjeꞌada — ioꞌe ip.
\p
\v 13 Jesus itaybit oꞌe Lázaroꞌũm oeꞌũ iam. Imẽnpit — Lázaro ixet — ioꞌe cebe ip.
\m Imenpuye tũybe Lázaro ixet iãn oꞌe ip 12 beayũ. 
\v 14 Imẽnpuye Jesus ibapug̃ oꞌjekawẽn cebe ip.
\p — Lázaroꞌũm oeꞌũ — ioꞌe.
\m Imẽn oꞌe ixeyũ mutaybit am.
\p
\v 15 — Oju g̃u cekay ceꞌũ awap — ioꞌe. — G̃asũ bit waꞌõbacaap og̃ubapuk eywebe eymutabun am okay. Waꞌõbacaap kay eyetabut cĩcã bima, ocokcok og̃uy. G̃aꞌa aju ixeꞌũm kay g̃asũ bit — ioꞌe doze beayũ be.
\p
\v 16 — G̃aꞌa wuyju dak aju ceweju. Ãg̃ itakomaayũ wuyju dak wuyaoka Jesus aoka buje — ioꞌe Tomé- -jebureyũ be oꞌe, xepxem ikapꞌibit.
\p Oꞌju ip Lázaroꞌũm com.
\p
\v 17-18 Jesusyũ oajẽm Betânia ka xe. Betânia ka Jerusalém ka etako oꞌsukadop. Ebapũg̃ kilometro oꞌsukadop Jerusalém ka bewi. Lázaroꞌũm kay yajẽm awap oeꞌũiap awẽg̃ oꞌyawẽg̃tobuxik Jesus.
\p — Lázaroꞌũm oꞌg̃uõm ip witabikũy be — ioꞌe ip Jesus pe. — Ebadipdip xet omuy ikũy be — ioꞌe.
\p
\v 19 Lázaroꞌũm ixĩtyũ mudiu ip oꞌe- -Marta, Maria dak. Ade ibureyũ ixeyũ mug̃uycũg̃ap muꞌũm ojuy ip oꞌe. 
\v 20 Jesus omuyku iap awẽg̃ Marta oꞌyawẽg̃tobuxik.
\p G̃ebuje Marta oꞌju Jesus dopabe. Jesus e dag̃ mabuk oeku. Maria bit jedukꞌa be osunuy. 
\v 21 Jay. Oajẽm Jesus kay.
\p — Kariwa — ioꞌe Marta. — Ẽn ijoce bima, okipitꞌũm kajuk oeꞌũ g̃u — ioꞌe. 
\v 22 — Imẽnpit Deus emujoojuyjuy jeꞌg̃ũm ewebe. Wetaybit iboam. Deus eju okipitꞌũm peam ekawẽn puje, Deus jekawẽn aꞌĩjojo — ioꞌe.
\p
\v 23 — Ekipitꞌũm waram jeu ceꞌũꞌũayũ xewi — ioꞌe Jesus Marta be.
\p
\v 24 — Wetaybit ixeꞌũm waram jeu iam — ioꞌe Marta. — Waram wuyeu buje, ixeꞌũm tak jeu- -wuyebay soat ceꞌũꞌũayũ muyuap kabia be — ioꞌe Marta.
\p
\v 25 — Õn ma ceꞌũꞌũayũ mutaicitꞌukat — ioꞌe Jesus. — Waꞌõbi ceꞌũꞌũayũ waram g̃uto jetait — ioꞌe. — Okay itabucat eꞌũ buje, waram g̃uto jetait. Soat em jeedop ip itait Deus xe — ioꞌe Jesus. 
\v 26 — Okay itabucat ceꞌũꞌũayũ xe g̃u jeenuy- -Deus xe acã. Etabut tu iboap kay? — ioꞌe Jesus Marta be.
\p
\v 27 — Hm hm, wetabut, Kariwa — ioꞌe. — Ẽn Deus emunaẽ oxe — ioꞌe. — Deus ipot ẽn — ioꞌe. — Ocemumuwiwi ẽn. Wetabut iboap kay — ioꞌe Marta.
\p
\v 28 Jesus eju jekawẽn epere buje, Marta oꞌjepit jekibit tomuwã ãm. Yaꞌõapĩn ma Maria oꞌtomuwã ukꞌa beacat pe jaꞌĩjojoap puxim.
\p — Tũꞌũ — ioꞌe. — Ejot puk — ioꞌe. — Wuyekariwa omuyku jexem — ioꞌe. — E dag̃ omuyku — ioꞌe. — Enomuwãwãm — ioꞌe jekibit pe, Maria be. — Ejot puk — ioꞌe. 
\p
\v 29 Maria oꞌju Jesus dopabe e dag̃at topabe. 
\v 30 Jesus ag̃oka be oexe g̃u mabuk. Wũy mabuk oeku. E dag̃ mabuk oeku. Marta be jedopabijukap pe mabuk osunuy. 
\v 31 Judeuyũ oꞌju Maria nomuju- -Lázaroꞌũm dukꞌa beacat- -iixĩt mug̃uycũg̃ap muꞌũm ojuyayũ. Ixeyũ etabixewi Maria oꞌjẽm jedukꞌa bewi. Imẽnpuye oꞌjẽm ip ixe nomuju. Tũybe ite witabikũy be cum wa am iãn oꞌe ip. 
\v 32 Jay. Maria oajẽm Jesus kay. Oꞌjẽg̃ꞌaecõg̃cõg̃ cewap.
\p — Kariwa — ioꞌe. — Ẽn ijoce bima, okipitꞌũm kajuk oeꞌũ g̃u — ioꞌe Maria.
\p
\v 33 Maria oꞌtõn. Maria eju yajẽmꞌibiyũ dak wawa osodop ip Lázaroꞌũm cocom. Jesus ig̃uycũg̃ cĩcã oꞌe wawaayũ jojom. Tadaybotbot cĩcã ip cexe oꞌe wawaayũ.
\p
\v 34 — Poce ixeꞌũm epeg̃uõm? — ioꞌe Jesus.
\p — Kariwa, ejot puk — ioꞌe ip. — Ejojo buk — ioꞌe ip.
\m
\v 35 Jesus oꞌtõn g̃ebuje bit. Ah. Wa. Imẽnpuye:
\p
\v 36 — Akꞌi cekay — ioꞌe ip Judeuyũ. — Lázaroꞌũm ikukpin cĩcã osunuy cexe — ioꞌe ip.
\p
\v 37 — Itaꞌũm tũibit oꞌsutadada teku — ioꞌe wararaꞌacayũ ixeyũꞌin. — Ibaꞌore g̃u du juk oꞌe cebe Lázaro muꞌada am ceꞌũap puxim? — ioꞌe ip jewewebe.
\p
\v 38 G̃ebuje Jesus oꞌju witabikũy kay- -Lázaroꞌũm muõmapkũy kay. Ig̃uycũg̃ cĩcã oꞌe. Oꞌju Marta eju, Maria eju, Lázaroꞌũm cocoayũ eju dak. Yabog̃atꞌa oꞌyanuy witaꞌa ikũy nomudipꞌam. Ikũynomudip cem osunuy.
\p
\v 39 — Ikũynomudipꞌa juy epeyamuwede — ioꞌe Jesus.
\p — Kariwa, eyamuwedeat g̃u juy — ioꞌe Marta. — Ig̃ẽm xeku opop. Ebadipdip xet opop witabikũy be — ioꞌe.
\p
\v 40 — “Okay etabut pima, Deus jaꞌõbacaap kuka oꞌjomõg̃ etabutpe,” i kuy oce ewebe — Jesus oꞌe. — Etabun cuy eg̃uy — ioꞌe.
\p
\v 41 Ikũynomudipꞌa oꞌyamuwede ip ikũy etako bewi. Jesus oꞌjekawẽn Deus eju.
\p — Bay — ioꞌe. — Soat em ẽn waꞌĩjojom — ioꞌe. — Imẽnpuye “Ẽn xipat cĩcã,” i õn eꞌem ewebe — ioꞌe Jesus jebay be. 
\v 42 — Bay, soat em wekawẽn cocom ẽn — ioꞌe. — Eweju õn kawẽnwẽn ijoceayũ be waꞌĩjo am- -ixeyũ mutabut am teku Deus emumudot iap kay — ioꞌe Jesus Deus pe, jebay be.
\p
\v 43 Jebay eju jekawẽn epere buje, Jesus yaꞌõberen oꞌjewãwã Lázaroꞌũm kay.
\p — Lázaro, ejẽm cuy! — ioꞌe.
\p
\v 44 Ceꞌũ topibit oꞌjetait waram. Oꞌjẽm witabikũy bewi. Soat tag̃ ijebit tag̃ imũnmũn mabuk oeku pag̃õm. Yamũnmũn mabuk oeku.
\p — Ejuꞌuk cuy pag̃o cebewi — ioꞌe Jesus.
\m Oꞌjuꞌuk ip pag̃o.
\p
\v 45 Imẽneju oitabun ip Jesus kay Judeuyũ ma- -Maria ejuacayũ ma- -adeayũ- -Jesus Lázaroꞌũm oꞌg̃utait iap oꞌjojojoꞌiayũ ma. 
\v 46 Wararaꞌacayũ bit oꞌju Fariseuyũ kay.
\p — Jesus Lázaroꞌũm oꞌg̃utait waram — ioꞌe ip Fariseuyũ be.
\p
\v 47 G̃ebuje paĩyũ kukukayũ oꞌjeꞌawero ip Fariseuyũ eju, jewãwẽwẽꞌukayũ eju dak. Oꞌjewãwẽ ip jeweweju.
\p — Apẽn kuka dak ace Jesus pe? — ioꞌe ip jewewebe. — Wuywebe iꞌe baꞌoreat mubapukpug̃ adeayũ etabutpe. Imẽnpuye ade itabut cekay — ioꞌe ip. 
\v 48 — Apẽn kuka dak ace cebe jaꞌõbacaap mõg̃ap puxim? — ioꞌe ip jewewebe. — Apẽn kuka dak ace adeayũ be jetabucap puxim? — ioꞌe ip. — Itabut puje ip Jesus pe jekukukan jeꞌe ip. Jesus pe jekukukan pima, Roma ka kukat jebekitkit kuka oꞌg̃udot wuykay — ioꞌe ip. — Wuyka kuka ip oꞌsukamuꞌũm. Deus eju kawẽnwẽnapꞌa dak kuka ip oꞌyamuꞌũm. Soat ka dag̃ kuka ip wuymuypõg̃põg̃põg̃. Wuydobuyũꞌũmꞌũm ekawẽn tag̃ g̃u kuka ajeku — ioꞌe ip jewewebe.
\p
\v 49 Caifás oꞌjekawẽn wararaꞌacat eju- -jawẽwẽꞌukayũ eju. Ixe Caifás paĩyũ kukukat osunuy ixe koato be.
\p — Eyetaybitꞌũmãn! — ioꞌe Caifás jeweju jewawẽwẽꞌukayũ be. 
\v 50 — Cũg̃ ma ixe ag̃okatkat eꞌũ ãm. Xipat kuka oꞌe pũg̃ pe ag̃okatkat pe jeꞌũ ãm soat eꞌũap tieg̃- -wuyeꞌũap tieg̃ — ioꞌe- -Caifás oꞌe.
\p
\v 51 Deus ibikuy osunuy Jesus eꞌũ ãm soat eꞌũꞌũap puxim. Caifás pit itaybit g̃u osunuy imẽn Deus ibikuy iam.
\p — Xipat kuka oꞌe pũg̃ pe ag̃okatkat pe jeꞌũ ãm soat eꞌũap puxim- -wuyeꞌũap tieg̃ — i juk oꞌe itaybit g̃u maꞌg̃u.
\m Caifás jag̃uy dag̃ g̃u imẽn oꞌe- -Deus ag̃uy dag̃ acã. 
\v 52 Ixe jeꞌũ Judeuyũ eꞌũꞌũap tieg̃. Wararaꞌacayũ eꞌũꞌũap tieg̃ tak jeꞌũ. Jeꞌũ Deus ebekitkiyũ be pũg̃ tag̃ ma jeku am. 
\v 53 Imẽneju apẽn paxi Jesus aceyaoka iam jekawẽnwẽn oekuku ip jeweweju Judeuyũ kukukayũ.
\p
\v 54 Imẽnpuye Jesus ibapug̃ g̃u oeku Judeuyũ kukukayũ etabun Judéia eipi dag̃. Oꞌjẽm ibocewi. Waraꞌatka be oꞌju- -Efraim ka be. Ibo ka ukꞌaꞌũmat xe oꞌsukadop. Iboka be osunuy doze beayũ eju- -jeweju etaybitbinayũ eju.
\p
\v 55 Ade Judeuyũ oꞌju Jerusalém ka kay. Peta mug̃ẽm ip oꞌju. Ig̃o epeta bima apẽn Deus wuydobuyũꞌũmꞌũm oꞌtujujẽm Egito eipi bewi iap kay g̃ebũm ip osodop. Soat ka dag̃wi oꞌju ip Jerusalém ka kay. Peta mug̃ẽ awap oꞌju ip jewemuisun am jebabi dag̃.
\p — Jewemuisun puje, xipat acesop Deus xe — ioꞌe ip jewewebe.
\p
\v 56-57 Paĩyũ kukukayũ oꞌjekawẽn peta mug̃ẽg̃ẽayũ eju- -Fariseuyũ dak.
\p — Poce Jesus nuyãm eyetaybit pima, epeg̃uwẽn cuy ocewebe — ioꞌe ip.
Iboam oꞌe ip Jesus daomũn ojuy buye. Imẽnpuye Jesus ajẽmap wiwim cĩcã osodop ip adeayũ. 
\p — Jesus omuyku du peta kay? — ioꞌe ip jewewebe. — Omuyku g̃u xeꞌe? — ioꞌe ip.
Deus eju kawẽnwẽnapꞌa be oꞌjekawẽn ip jewewebe adeayũ- -yabog̃atꞌa be.
\b
\c 12
\p
\v 1 Jesus waram oꞌju Lázaro kay- -waram g̃uto oꞌjetaitꞌiat kay. Betânia ka be osunuy Lázaro. Oꞌju peta mug̃ẽ awap. Seis kabia kuka Páscoa epeta ip oꞌg̃uyꞌat. Oajẽm doze beayũ eju. 
\v 2 Marta puybit mõg̃mõg̃ oꞌe Jesus pe iꞌo am, doze beayũ be dak. Lázaro jekõnkõn oꞌe Jesusyũ eju.
\p
\v 3 G̃ebuje Maria tideꞌoati oꞌtibu. Tiꞌade oꞌtibu. Nardo i tibutet osunuy. Tiwekoykeyati g̃u oꞌtinuy- -nardodi acã. Tideibog̃ cĩcãati oꞌtinuy. Puy. Oꞌsuiabi Jesus i. Oꞌsuisup jadam. Tideꞌokuati oꞌtinuy. Soat tag̃ oꞌe ukꞌa yabi deꞌo. Deꞌooooh. Imẽn oꞌe Maria ma. 
\v 4 Judas Iscariotes pit Maria oꞌg̃ukorẽm- -Simão ipot. Ixe Judas doze beayũꞌin osunuy. Ixe Judas Jesus oꞌg̃ũm cekay itakomaayũ be g̃uyjom Jesus aoka am cebe ip. Ixe bit Maria oꞌg̃ukorẽm.
\p
\v 5 — Apẽnpuye ig̃odi oꞌtideida g̃u dinheiro bu am? — ioꞌe- -Judas oꞌe jebureyũ be. — 300 dinheiro isurũg̃at kuka tidei oꞌe! — ioꞌe. — Tidei kajuk ag̃ũm ibubutꞌũmayũ be — ioꞌe Judas Iscariotes.
(Pũg̃ dinheiro isurũg̃at pũg̃ kabia be wuyekapikaptei osodop).
\p
\v 6 Judas Iscariotes doze beayũ edinheiro mũn kug̃ oeku. Imũn pewi iꞌukꞌukꞌuk osunuy jewebe ma.
\p — Apẽnpuye dak oꞌtideida g̃u? — ioꞌe dinheiro kay pin puye.
Itabotaidabotbot g̃u osunuy ibubutꞌũmat kay.
\p
\v 7 — Ãg̃ cuy Maria jeenuy kabaꞌũm — ioꞌe Jesus Judas pe. — Ijudi oꞌtimuxipan weꞌũ awap ojebit mudeꞌonaptim — ioꞌe. 
\v 8 — Soat em eybubutꞌĩn iũm put epesop ibubutꞌũmayũ be — ioꞌe. — Owebe bit kaꞌũma. Darem ma eyxe og̃uy — ioꞌe.
\p
\v 9 G̃ebuje ade Judeuyũ oꞌju Jesus kay. Jesus Betânia ka be omuy iap awẽg̃ oꞌyawẽg̃coco ip. Imẽnpuye ip oꞌju Jesus com. Oꞌju ip Lázaro jom tak- -Jesus oꞌg̃utaitꞌiat com- -waram oꞌjetaitꞌiat com.
\p
\v 10-11 Ade Judeuyũ oibuꞌun paĩyũ kukukayũ aꞌõ kay kũyjobit am. Jesus aꞌõ kay acã kũyjobit oꞌe ip Lázaroꞌũm waram oꞌg̃utait puye. Imẽnpuye oꞌjewawẽ ip paĩyũ kukukayũ.
\p — G̃aꞌa Lázaro ayaoka! — ioꞌe ip.
\p
\v 12-19 Oꞌjojojoꞌibiyũ Jesus eꞌeap oꞌg̃uwẽnuwẽn wararaꞌacayũ be- -Jerusalém ka beayũ be.
\p — Icẽmãn Jesus Lázaroꞌũm oꞌtomuwã witabikũy bewi — ioꞌeꞌe ip adeayũ be. — Icẽmãn Jesus waram Lázaroꞌũm oꞌg̃utait — ioꞌeꞌe ip. — Jesus ma jaꞌõbacaap mõg̃mõg̃ — ioꞌeꞌe ip.
\p Jerusalém ka be õm pasug̃ pima Jesus jumentoꞌitꞌit oꞌtobuxik. Deus ekawẽn tag̃ e ojuy- -kuyjeatup ekawẽn tag̃. Xik. Oabik jumentoꞌitꞌit akpi jeje. Imẽn eꞌem Deus ekawẽntup- -kuyjeatup:
\mi Jerusalém ka watwat, eyg̃uycũg̃cũg̃ g̃u juy epesop, i. Eykukukat omuyku jexem eykay, i. Jumentoꞌitꞌit akpi jeje omuyku jexem, i.
\m Imẽn eꞌem Deus ekawẽntup. Imẽnpuye Jerusalém ka be Jesus oajẽm jumentoꞌitꞌit akpi jeje Deus ekawẽn tag̃.
\p G̃ebuje Jesus kay oꞌju Jerusalém ka beayũ. Ade ma ip oꞌju, Jesus omuyku iap awẽg̃ oꞌyawẽg̃tobuxik puye. Kuy ip oajẽm Páscoa epeta mug̃ẽ ãm. Oꞌju ip Jesus dopabijug̃, Jesus wuywebe iꞌe baꞌoreat mubapukpug̃ iap awẽg̃ oꞌyawẽg̃tobuxik puye. Namusudup oꞌtupupu ip. Jesus kay oꞌju ip tup kukug̃. Imẽn Judeuyũ yaꞌõbuyxiat tobededeꞌuk ip osodop kuyje.
\p — Deus xipat cĩcã! — ioꞌe ip Jesus pe. — Ẽn ma omuyku yaꞌõbi! — ioꞌe ip. — Ẽn ma ocekukukat- -Israel naxeg̃ebitbit kukukat! Deus cuy xipacat jeꞌg̃ũm ewebe! — ioꞌe ip Jesus pe.
\p Jumentoꞌitꞌit akpi jeje Jesus oajẽm Jerusalém ka be Deus ekawẽntup pe ibararak iap puxim- -kuyjeatup puxim. Iboap ibaꞌarẽm osunuy doze beayũ xe Jesus õm puje. Waram kabi be Jesus eu buje bit oꞌjeg̃ebu ip ig̃odup peap ekawẽn kay.
\p — Ig̃odup peap ekawẽn puxim Jesus jumentoꞌitꞌit akpi jeje oajẽm Jerusalém ka be — ioꞌe ip jewewebe. — Ixe juk ocemuju jumentoꞌitꞌit tobuxik — ioꞌe ip jewewebe.
\p Fariseuyũ bit oꞌe jewewebe:
\p — Akꞌi juy epeꞌe! — ioꞌe ip. — Soat ma cekay itabut — ioꞌe ip. — Teꞌe ma wuyju eꞌem adeayũ be “Ixe kay eyetabun g̃u juy epesop,” i — ioꞌe ip jewewebe.
\p
\v 20 G̃ebuje Gregoyũ Jesus co pin oꞌe- -Grécia eipi watwat. Adeayũ eju kuy oajẽm ip Jerusalém ka be peta mug̃ẽ ãm. 
\v 21 Oꞌju ip Filipe eju kawẽn ãm. Ixe Filipe Betsaida ka bewiat osunuy. Galiléia eipi bewiat osunuy. Oꞌju ip Filipe be.
\p — Tapu — ioꞌe ip Filipe be. — Jesus co pin oceju — ioꞌe ip.
\p
\v 22 Filipe oꞌju André mukũyjo am.
\p — Gregoyũ Jesus co pin — ioꞌe Filipe André be.
\p Xepxem ip oꞌju Jesus mukũyjo am. Oajẽm ip cekay.
\p — Gregoyũ ejo pin — ioꞌe ip Jesus pe.
\p
\v 23 G̃ebuje Jesus oꞌjekawẽn xepxepayũ be. Adeayũ etabutpe oꞌjekawẽn ceweju ip.
\p — Soat wag̃o õn — ioꞌe Jesus. — G̃axĩn ma ojeꞌũ. G̃uyjom pit waram g̃uto ocetait. “Soat podi ma aꞌõbuyxi!” i jeꞌe adeayũ weꞌũap puye, waram g̃uto wetaicap puye dak — ioꞌe Jesus. 
\v 24 — Kadaida taida buje, ipi be atamõg̃ — ioꞌe. — Tamõg̃ puje, taeꞌũata joꞌi tadop ipi be ma. Pũg̃ta ma tadop ipi be. Kadai aypan puje bit, taꞌade tadop kadai dag̃ — ioꞌe.
\p Imẽn Jesus oꞌjekawẽn jeꞌũãm, waram jetaicam tak, g̃uyjom ade tiwatwat itabut jeꞌe okay iam tak.
\p
\v 25 — “Ocebuꞌu jĩjã ipiatꞌajom,” i wuyju eꞌem pima, “Ocebuꞌu jĩjã oceꞌũ ãm,” i dak, “Imẽnpuye ocekupinap tag̃ acã oceju,” i dak, aceꞌũ. “Ocebuꞌu g̃u ipiatꞌajom,” i wuyju eꞌem pima bit, “Ocebuꞌu g̃u oceꞌũ ãm,” i dak, “Deus bikuyap tag̃ acã oceku,” i dak, wuyag̃uyisum aceku ijodi. Soat em Deus xe acesop wuyeꞌũ buje dak — ioꞌe Jesus. 
\v 26 — Obikuyap tag̃ jeku ojuyat kũyjobin cuy waꞌõ kay. Obikuyap tag̃ jekukuꞌukat oxe ma jeenuy. Webay dak jeꞌe cebe “Ẽn xipat oxe,” i — ioꞌe Jesus.
\p
\v 27 — Wag̃uybabiꞌũm cĩcã oce — Jesus oꞌe jewebe ma. — “Bay, obuywan ece weꞌũap puxim,” i du oce webay be? — ioꞌe jewebe ma. — Kaꞌũma! Imẽn g̃u juy oce cebe. Weꞌũ ãm ma ojot ijodi — ioꞌe jewebe ma. 
\v 28 — Bay — ioꞌe Deus pe. — Edipap cuy eg̃ubapuk soat pe ijodiat pe “Deus idip cĩcã” iꞌe am ip — ioꞌe jebay be.
\p Deus oꞌjekawẽn kabi kadiwi g̃ebuje bit.
\p — Odipap kuy og̃ubapuk cebe ip — ioꞌe jekpot pe- -Jesus pe. — G̃asũ adeayũ eꞌem owebe “Soat podi ma edip,” i. Waram tak og̃ubapuk wararaꞌacayũ be “Soat podi ma edip” iꞌe am owebe — ioꞌe Deus.
\p
\v 29 Adeayũ kacũg̃cũg̃ꞌi osodop iboce. Tũybe oꞌjexirikxirik iãn oꞌe ip pũg̃pũg̃ ixeyũꞌin. Tũybe Deus ekawẽn tojotjotꞌukat oꞌjekawẽn cebe iãn oꞌe ip wararaꞌacat ixeyũꞌin.
\p
\v 30 G̃ebuje Jesus oꞌjekawẽn ijoceat eju.
\p — Ixe oꞌjekawẽn kabi kadiwi omukũyjo am g̃u- -eymukũyjo am acã — ioꞌe Jesus. 
\v 31 — G̃axĩn ma Deus jeꞌe soat pe okay itabutꞌũmayũ be: “Eyju ikẽrẽat kug̃ oxe,” i. G̃axĩn ma itabutꞌũmayũ kukukat aꞌõbacaap oꞌguꞌũm. Abu-kukukan jeꞌe? Kaꞌũma ma! — ioꞌe. 
\v 32 — Okay itakomaayũ omuyu korosa eju oaoka am — ioꞌe. — Omuyu buje adeayũ itabut jeꞌe okay — ioꞌe Jesus ijoceat pe.
\p
\v 33 Jesus iboam oꞌe imutaybin am ip osubamupaya ip korosa eju weꞌũ ãm iam.
\p
\v 34 — Moisés ekawẽntup eꞌem:
\mi Cristo jeꞌũ g̃u- -Deus emunaẽ, i.
\mi Soat em itabẽg̃ eꞌem, i.
\m Imẽn Moisés ekawẽntup eꞌem — ioꞌe ip yaꞌĩjojoꞌibiyũ. — Ẽn pit eꞌem “Soat wag̃o õn,” i, “Soat wag̃o subamuyu ip ceꞌũ ãm,” i dak. Deus emunaẽ du soat wag̃o? — ioꞌe ip Jesus pe.
\p
\v 35 — Õn kabiaap puxim — ioꞌe. — Ojot ijodiat mutaybin am Deus ekawẽn — ioꞌe. — Darem ma ijodi og̃uy eymutaybinbin. Okay eyetabun cuy epesop eyetabun put pima. Eyetabun cuy epesop ipiatpiꞌajojoap pe eyjuap puxim. Kabiok tag̃ jekukuꞌukayũ itaybit g̃u poma oceju iam. Imẽnpuxim itabutꞌũmayũ itaybit g̃u ipiatpiꞌajojoap kay oceju iam — Jesus oꞌe. 
\v 36 — Õn eyxe bima, eyetabun cuy epesop okay — ioꞌe. — Eyetabun puje webekitkiyũm epesop. Kabia dag̃ jekukuꞌukayũ buximayũm epesop. Ikẽrẽat mujurũg̃rũg̃ꞌug̃ g̃u epesop. Eyag̃uyisum epeku — ioꞌe.
\p Jesus oꞌjẽm adeayũ xewi iboam e buje.
\p
\v 37 Soat em ma Jesus wuywebe iꞌe baꞌoreat mubapukpukꞌuk osunuy adeayũ etabun. Inaka ibuꞌu jĩjã ip osodop jetabut am cekay. 
\v 38 Imẽn cuk adi oꞌtupmubararak Isaíasꞌũm kuyje- -Deus ekawẽn muwẽnuwẽnꞌukatꞌũm:
\mi Kariwa, kawẽn icẽmat muwẽnuwẽn ocekukuku adeayũ be, i. Imẽnpit itabut g̃u ip oꞌe ocekawẽn kay, i. Soat podi ma aꞌõbaca ẽn iap ibaꞌarẽm oꞌe cexe ip, i.
\m Imẽn ibararak opop tup pe. Itabut g̃u ip oꞌe Jesus kay apẽn kuyjeayũ Isaíasꞌũm ekawẽn kay itabutꞌũmap puxim.
\p
\v 39 Judeuyũ kukukayũ ibuꞌu oꞌe jetabut am Jesus kay, Isaíasꞌũm emudupmubararaktup eꞌeap puxim oꞌjebapuk cebe ip puye. 
\v 40 Imẽn Isaíasꞌũm ekawẽn:
\mi Deus iteyũ adeayũ oꞌyag̃uymubabiꞌũm, i. Imẽnpuye itabut g̃u osodop ip, Deus aꞌõbacaap co maꞌg̃u ip, i. Itabut g̃u osodop ip Deus ekawẽn co maꞌg̃u ip, i. Ikẽrẽat mujurũg̃rũg̃ap oꞌjepere g̃u ip, i. Itabut g̃u osodop ip Deus kay ixe be ikẽrẽat uk am cebewi ip, i.
\m Imẽn Isaíasꞌũm ekawẽn. 
\v 41 Isaíasꞌũm iboam oꞌe kuyje Jesus soat podi ma idip iam itaybit puye. Imẽnpuye Jesus oꞌg̃uwẽnuwẽn.
\p
\v 42 Ade Judeuyũ kukukayũ oitabun ip Jesus kay. “Jesus kay ocetabut,” iꞌũmg̃u bit eꞌem oekuku ip Fariseuyũ buxim jeparara pibun. Jetabucap muwẽnuwẽn g̃u ip oekuku Fariseuyũ be ixeyũ mujẽmap puxim Deus eju kawẽnwẽnapꞌa bewi. 
\v 43 Deus mucokcok pin g̃u ip osodop- -ijodiat mucokcok pin acã. Fariseuyũ mucokcok pin ip osodop.
\p
\v 44 G̃ebuje Jesus oꞌjekawẽn adeayũ be.
\p — Okay itabucayũ omudocat kay dak itabut ip — ioꞌe. 
\v 45 — “Deus ipot teku” iꞌeꞌeꞌukat “Deus oꞌg̃udot ijodi,” iꞌeꞌem tak. 
\v 46 Ijodi juk ojot Deus ekawẽn eymutaybin am. Okay itabucayũ ikẽrẽat mujurũg̃rũg̃ g̃u. Yag̃uyisum jeku ip — ioꞌe. — Kabiok tag̃ jekukuꞌukayũ buxim g̃u ip- -kabia dag̃ jekukuꞌukayũ buxim acã — ioꞌe. 
\v 47 — Waꞌĩjo buje, kũyjobitꞌũm waꞌõ kay bima, “Ikẽrẽat kug̃ eyju Deus xe” iꞌũmg̃u õn pit eꞌem eywebe. Ijodi ojot “Ikẽrẽat kug̃ eyju Deus xe” iꞌe am g̃u adeayũ be. Adeayũ daxijo am acã ojot — ioꞌe. 
\v 48 — “Ikẽrẽat kug̃ eyju Deus xe,” i õn g̃u eꞌem okayꞌũmayũ be, waꞌõ kayꞌũmayũ be dak. Wararaꞌacat pit imẽn jeꞌe ixeyũ be webay soat ceꞌũꞌũayũ muyuap kabia be — ioꞌe. — Deus acã “Ikẽrẽat kug̃ eyju oxe,” i jeꞌe ixeyũ be. Imẽn Deus jeꞌe cebe ip wekawẽn tag̃ g̃u ip puye — ioꞌe Jesus. 
\v 49 — Waꞌõbi g̃u juk adi ojekukuku — ioꞌe. — Owebe webay eꞌeap acã juk adi og̃uwẽnuwẽn eywebe. Waraꞌacat g̃u og̃uwẽnuwẽn eywebe. Iboap acã og̃uwẽnuwẽn — ioꞌe. 
\v 50 — Deus ekawẽn tag̃ eyeku buje, eyag̃uyisum epeku ijodi. Deus xe epesop eyeꞌũ buje dak. Wetaybit iboam — ioꞌe. — Owebe webay oꞌeꞌe iap acã õn eꞌem — ioꞌe Jesus.
\b
\c 13
\p
\v 1 Jesus jebekitkiyũ kay jĩjã osunuy soat kabia ipi dag̃ pima. Jesus itaybit oꞌe g̃axĩn ma ojeꞌũ iam, g̃axĩn ma oceu webay kay iam tak. Eykukpin cĩcã oxe iap oꞌg̃ubapuk cĩcã jebekitkit pe jeꞌũ awap.
\p Páscoa epeta ajẽm pima, 
\v 2 Jesus jekõnkõn oꞌe doze beayũ eju. Judas Iscariotes Jesus ũm ojuy oꞌe cekay itakomaayũ be. Ixe Judas Simão Iscariotes ipot osunuy. Ibiõg̃buk kẽrẽayũ kukukat aꞌõbi Jesus ũm ojuy yaoka am. 
\v 3 Soat em Jesus itaybit osunuy webay soat jaꞌõbacaap oꞌjomõg̃ owebe iam. Deus xewi ojot iam tak itaybit osunuy. G̃axĩn ma ocepit Deus kay iam tak itaybit osunuy.
\p
\v 4 Jeꞌũap muwẽnuwẽn pima, kirikꞌãy, oꞌãy. Jesus oꞌãy mesa xewi. Jeekabek oꞌjuꞌuk. Kuruk. Toaya oꞌjat. Mũn. Oꞌjomũn jekpu dag̃. 
\v 5 Jeweju etaybitbinayũ i wuy am oꞌju. Waꞌe coꞌiatꞌa be idibi oꞌtimõg̃. Oꞌsuiwuy koapat i. Oꞌsuisup toayam. Pereh. Waraꞌacat oꞌsuiwuy. Oꞌsuisup. Pereh.
\p
\v 6 Oajẽm Simão Pedro kay. Simão ibuꞌu oꞌe Jesus pe jeiwuy an.
\p — Kariwa — ioꞌe Simão. — Ẽn tu wuiwuy? — ioꞌe.
\p
\v 7 — Hm hm. Etaybit g̃u buk apẽnpuye paxi ite wuiwuywuy iam — ioꞌe Jesus Simão be. — G̃uyjom pit etaybit eceꞌe — ioꞌe.
\p
\v 8 — Ap! Wuiwuy g̃u juy ece- -pũg̃ em tak kaꞌũma! — ioꞌe Simão bit.
\p — Eiwuyꞌũm pima, obuerm g̃u eg̃uy — ioꞌe Jesus.
\p
\v 9 — Kariwa — ioꞌe. — Wuiat g̃u esuiwuy — ioꞌe. — Waꞌa dak eyawuy — ioꞌe. — Oba dak — ioꞌe Simão Pedro Jesus pe.
\p
\v 10 — Oajokꞌiat iokok g̃u- -iisu ma! — ioꞌe. — Dao g̃u jajok waram. Jeiwuy acã — ioꞌe. — Wuyjuyũ bewi Deus pe ikẽrẽatꞌuk puje, iisuat puxim ip. Deus kuy ikẽrẽat oꞌjuꞌuk eywebewi. Pũg̃ pewi bit kaꞌũma. Ite ikẽrẽat kug̃ mabuk jewebe. Ixe iokokat puxim — ioꞌe.
\m
\v 11 Jesus kuy itaybit oꞌe abu oũm ixeyũꞌin okay itakomaayũ be iam. Imẽnpuye:
\p — Pũg̃ pit eyꞌin ikẽrẽat kug̃ mabuk jewebe — ioꞌe.
\p
\v 12 Ixeyũ i wuy buje, Jesus jeekabek oꞌg̃uõm waram. Oꞌjepit ip mesa kay. Oabik maꞌg̃uto jeweju etaybitbinayũ eju.
\p — Eyetaybit g̃u du apẽnpuye õn eyeiwuywuy iam? — ioꞌe Jesus. 
\v 13 — “Ẽn ocekukukat,” i eyju eꞌem owebe, “Ẽn ocemutaybitbinꞌukat,” i dak. Cũg̃ ma eywebe iboam eꞌem — ioꞌe. 
\v 14 — Õn eykukukat. Eymutaybitbinꞌukat tak õn — Jesus oꞌe. — Inaka eyeiwuywuy oce wararaꞌacat puywatwatꞌukat coꞌi — ioꞌe. 
\v 15 — Õn eyeiwuywuy, eykukukat maꞌg̃u õn. Eyju dak obuxim eybuꞌum g̃u juy epesop wararaꞌacat puywatwat am. 
\v 16 Eykukukat wararaꞌacat puywatwan pima, eyju dak eybuꞌum g̃u juy epesop wararaꞌacat puywatwat am. Eymujuat wararaꞌacat puywatwan pima, eyju dak eybuꞌum g̃u juy epesop wararaꞌacat puywatwat am — ioꞌe. 
\v 17 — Õn eykukukat. Inaka juk eyeiwuywuy oce. Jewebuywatwan cuy epesop obuxim. Jewebuywatwan pima, eycokcog̃ epesop. 
\v 18 Soat pe g̃u eywebe iboap muwẽnuwẽn õn. Wetaybit cĩcã wemunaẽyũ ekukuam. Pũg̃ eyꞌin oũm okay itakomaayũ be waoka am. Imẽn eꞌem Deus ekawẽntup:
\mi Obiwag̃odadaꞌukat ma ikẽrẽm cĩcã okuk, i.
\m Imẽn ibararak opop Deus ekawẽntup pe. G̃axĩn ma jeꞌbapuk owebe ig̃odup ekawẽn puxim — ioꞌe.
\p
\v 19 — Iboap muwẽnuwẽn õn eywebe waoka awap — ioꞌe. — Imẽg̃ap ebapuk puje ibodi ma eyetabun epesop soat em waꞌõ dag̃ õn eꞌem iap kay — ioꞌe. 
\v 20 — Icẽmãn õn eꞌem eywebe — ioꞌe. — Wemumujuyũ kay itabucat okay dak itabut. Okay itabucat omudocat kay dak itabut — ioꞌe Jesus doze beayũ be.
\p
\v 21 Iboam buje, Jesus ig̃uycũg̃ cĩcã oꞌe.
\p — Icẽmãn õn eꞌem eywebe — ioꞌe jeweju etaybitbinayũ be. — Eyꞌinat oũm okay itakomaayũ be — ioꞌe ibapug̃ ma. 
\p
\v 22 Oꞌjeakakak ip jewewekay.
\p — Abu paxi kuka oꞌg̃ũm cekay itakomaayũ be? — iꞌeꞌem ip jewewebe ma.
\m
\v 23 Doze beayũꞌinat xikꞌi osunuy Jesus tẽg̃ ma- -Jesus emumukukpinput. 
\v 24 Simão Pedro jebum oꞌjewẽg̃wẽg̃ Jesus tẽg̃at pe.
\p — “Abu eũm ekay itakomaayũ be?” i juy ece cebe — ioꞌe.
\p
\v 25 Jesus tẽg̃at wurũg̃ꞌi oꞌju Jesus kay iboap muwẽn ãm cebe.
\p — Kariwa, abu sute? — ioꞌe Jesus pe.
\p
\v 26 — Minkaꞌo be pãoꞌa oyamuakõm — ioꞌe Jesus. — Pũg̃ pe oyaũm. Ixe ma oũm okay itakomaayũ be — ioꞌe. 
\p Kuruko. Oꞌyabu. Oꞌyamuakõm. Wũntok. Yadirem pima, oꞌyaũm Judas pe- -Simão Iscariotes ipot pe.
\p
\v 27 Pãoꞌa bu buje, Judas Jesus kay oibuꞌun. Satanás aꞌõkayan oꞌe.
\p — Dao ma juy ece eꞌe pinap tag̃ — Jesus oꞌe Judas pe.
\p
\v 28-29 Tũybe Judas oꞌju Jesus aꞌõbi wuyxat pum peta be wuyemumuꞌom iãn oꞌe ip pũg̃pũg̃ mesa watwatyũꞌin. Tũybe Judas oꞌju wuyedinheiroꞌin iũm ãm ibubutꞌũmayũ be iãn oꞌe ip wararaꞌacayũ ixeyũꞌin. Jesus ekawẽn paꞌarẽm oꞌe mesa watwat pe.
\p
\v 30 Pãoꞌa oꞌyabu Judas. Kurukoh. Oꞌjẽm g̃ebuje bit. Wararaꞌacat xewi oꞌjẽm. Xerewun. Cũh. Kabiok tag̃ oꞌjẽm.
\p
\v 31 Judas cẽm puje, Jesus oꞌjekawẽn onze beayũ eju.
\p — Soat wag̃o õn — ioꞌe. — G̃axĩn ma ojeꞌũ. Odipap g̃asũ webay g̃ubapuk. Soat jeꞌe “Jesus idip cĩcã,” i. “Deus idip cĩcã,” i weꞌũap puye — ioꞌe. 
\v 32 — Owebe “Deus idip cĩcã” iꞌe buje, Deus tak eꞌem “Okpot idip cĩcã,” i. G̃axĩn ma imẽn jeꞌe — ioꞌe. 
\v 33 — Bekitkit — ioꞌe. — Ibun g̃u og̃uy eyxe. Okudadam epeku. “Ojuap kay eyju baꞌore epesop,” i kuy oce Judeuyũ kukukayũ be — ioꞌe. — Imẽn eywebe dak õn eꞌem — ioꞌe. 
\v 34 — Waraꞌan ma õn jeymutaybin g̃asũ bit — ioꞌe Jesus. — Eykukpin cĩcã juk adi epesop oxe. Imẽnpuxim cuy eyju dak eykukpin ma epeyewekuk — ioꞌe Jesus. 
\v 35 — Eykukpin jewewekug̃ pima, “Teyũku Jesus ebekitkiyũ,” i jeꞌe soat ijodiayũ — ioꞌe. 
\p
\v 36 — Kariwa — ioꞌe Simão Pedro. — Poma ẽn cum? — ioꞌe.
\p — G̃asũ eyju baꞌore ojuap kay — ioꞌe Jesus. — G̃uyjom pit epesot okay — ioꞌe. 
\p
\v 37 — Kariwa — ioꞌe maꞌg̃uto Simão. — Apẽnpuye oju baꞌore ejuap kay g̃asũ? Ekay jĩjã õn. Obuꞌu g̃u weꞌũ ãm owebe epereap puxim. Wararaꞌacayũ “Jesus eju ejeku bima, jaokam oceꞌe,” iꞌeꞌem pima dak, jeiwat g̃u õn — ioꞌe.
\p
\v 38 — Ebuꞌu g̃u du eꞌũ ãm ewebe opereap puxim? — ioꞌe Jesus. — Icẽmãn õn eꞌem ewebe. Ebapũg̃ em “Jesus ejuat g̃u õn pit,” i napa ma eceꞌe. Sapokay ede awap imẽn eceꞌe — ioꞌe. — G̃axĩn ma napa ma imẽn eceꞌe — ioꞌe.
\b
\c 14
\p
\v 1 — Eyag̃uykorereren g̃u juy epesop — Jesus oꞌe onze beayũ be. — Eyg̃uycũg̃cũg̃ g̃u juy epesop — ioꞌe. — Kuy eyetabut Deus kay. Okay dak cuy eyetabun epesop — ioꞌe. 
\v 2 — Yaꞌade opop webay ka be ukꞌa- -ijodiacat dopdopꞌam — ioꞌe. — Cum õn eydopdopapꞌa muxipan am. Icẽmãn õn eꞌem eywebe. Icẽmꞌũm pima, iboam kajuk oce g̃u eywebe — ioꞌe. 
\v 3 — Cum õn. Eydopdopapꞌa oyamuxipan eyajẽmjẽmapꞌam — ioꞌe. — Eydakoy ocepit eydopdopapꞌa muxipan puje — ioꞌe. — Onuyapka kay õn jeydujuxe. Onuyapka be epesop soat em — ioꞌe. 
\v 4 — Eyetaybit poma õn cum iam — ioꞌe Jesus. — Eyetaybit tak apẽn iboce epeju iam — ioꞌe.
\p
\v 5 — Kariwa — ioꞌe Tomé. — Poma eju? Ocetaybit g̃u. Apẽn tak ocetaybit oceꞌe enuyap ka kay oceju am? — ioꞌe Tomé.
\p
\v 6 — Okay itabucat mujujum õn webay nuyap ka be — ioꞌe. — Okay itabucat mutaybitbin õn kawẽn icẽmãn- -Deus ekawẽn. Okay itabucat yag̃uyisum jekukum waꞌõbi — ioꞌe. — Abuyũ jeꞌju webay kay? Okay itabucayũ acã! Õn ma okay itabucat og̃uju webay kay- -wararaꞌacat pit kaꞌũma — ioꞌe. 
\v 7 — Eyetaybit abu õn iam pima, eyetaybit kuka juk epesop abu webay iam — ioꞌe. — G̃asũ bit kuy eyetaybit webay eꞌeam, apẽn cuk adi ocece iap epejojojo buye — ioꞌe Jesus.
\p
\v 8 — Kariwa — ioꞌe Filipe. — Ebay juy eg̃ubapuk ocewebe. Wuyebay juy ejojoat ocewebe. Oꞌe kuka ocewebe ixe jo am — ioꞌe Filipe.
\p
\v 9 — Pũg̃ xet g̃u og̃uy eyxe — ioꞌe Jesus. — Eyetaybit g̃u buk tu abu õn iam, Filipe? — ioꞌe. — Abu õn iam itaybicat itaybit abu webay iam tak — ioꞌe. — Apẽnpuye ẽn pit eꞌem “Ebay juy ejojoat ocewebe,” i? — ioꞌe. 
\v 10 — Pũg̃ tag̃ ma oceju jekukum- -õn, webay dak — ioꞌe. — Filipe, eyetabut g̃u du iboap kay? — ioꞌe Jesus. — Wekawẽn muwẽnuwẽnꞌuk g̃u og̃uy eywebe- -webay ekawẽn muwẽnuwẽn acã — ioꞌe. — Pũg̃ tag̃ ma kawẽnwẽn oceju- -õn, webay dak. Waꞌõbi g̃u õn jekukum- -webay aꞌõbi acã — ioꞌe. 
\v 11 — “Pũg̃ tag̃ ma oceju jekukum- -õn, webay dak,” i õn eꞌem eywebe. Eyetabun cuy epesop wekawẽn kay. Wekawẽn kay eyetabutꞌũm pima, eyetabun cuy epesop okay waꞌõbacaap coco am — ioꞌe. 
\v 12 — Icẽmãn õn eꞌem eywebe. Okay itabucayũ wekukuap puxim jeku. Owebe Jaꞌõbacaap mõg̃mõg̃ap podi ma waꞌõbacaap jomõg̃ ip, webay kay oju buje — ioꞌe. 
\v 13 — Eyju eꞌem owebe “Ebikuyap tag̃ cuy ece owebe,” i bima, eyemuojuyjuy og̃ũm eywebe- -soat og̃ũm eywebe — ioꞌe. — Imẽnpuye “Kaꞌũmg̃u Deus coꞌiat xipacat,” i jeꞌe soat ijodiacat. 
\v 14 Eyju eꞌem owebe “Ebikuyap tag̃ cuy ece owebe,” i bima, soat eyemuojuyjuy og̃ũm eywebe — ioꞌe Jesus.
\p
\v 15 — Eyxe okukpin pima, kũyjobin cuy epesop waꞌõ kay — ioꞌe. 
\v 16 — Õn kawẽnwẽn webay eju. “Ibuywatwatꞌukan cuy eg̃uju okay itabucayũ kay,” i oce webay be — ioꞌe. — Ixe jebiõg̃buk g̃udot eykay eybuywatwatꞌukan. Soat em ixe jeenuy eyxe. Icẽmãn eymutaybitbin jeenuy. 
\v 17 Itabutꞌũmayũ be ibaꞌore ixe ekawẽn kay kũyjobit am. Ixe eꞌeap ibaꞌarẽm cexe ip. Itaybit g̃u ip ixe eꞌeam. Eywebe bit ixe nuynuy. Imẽnpuye eyxe ixe eꞌeap ibapuk — ioꞌe. 
\v 18 — Jeypere g̃u õn. Ocepit eykay — ioꞌe. — Eyag̃uyag̃epũg̃ g̃u epesop — ioꞌe. 
\v 19 — G̃axĩn ma Deus kayꞌũmayũ ojo g̃u. Eyju bit waram ojo. Eyag̃uyisum epeku, waram g̃uto wetait puye — ioꞌe. 
\v 20 — Pũg̃ tag̃ ma õn jekukum webay eju. Eyju dak pũg̃ tag̃ ma jekukum oceweju. Oceju dak pũg̃ tag̃ ma jekukum eyweju. Eykay eybuywatwatꞌukat ajẽm puje, iboap ibaꞌarẽm g̃u jeꞌe eyxe — ioꞌe. 
\v 21 — Waꞌõ kay jĩjãayũ xe okukpin- -waꞌõ kay kũyjobicayũ xe. Webay xe dak ixeyũ ikukpin jeꞌe. Oxe dak ikukpin cĩcã oceꞌe. Abu õn iam ixeyũ og̃utaybin. Itaybit cĩcã jeꞌe ip abu õn iam — ioꞌe Jesus.
\p
\v 22 — Kariwa — ioꞌe Judas — Apẽn tak ẽn iboam ocetaybin itabutꞌũmayũ mutaybinꞌũm pima? — ioꞌe.
\m (Iscariotes g̃u osunuy ixe Judas- -waraꞌat Judas acã).
\p
\v 23 — Waꞌõ kay jeedop ip kũyjobin okayayũ — ioꞌe. — Webay xe ixeyũ ikukpin jeꞌe. Ojot ixeyũ kay webay eju. Soat em ixeyũ xe ocesop- -õn, webay dak — ioꞌe. 
\v 24 — Okayꞌũmayũ bit kũyjobit g̃u waꞌõ kay. Waꞌõbi g̃u õn iboap muwẽnuwẽn eywebe- -webay aꞌõbi acã. Ixe juk omudot ijodi — ioꞌe. 
\v 25 — Iboap muwẽnuwẽn õn eywebe eyxe bima. 
\v 26 Webay jebiõg̃buk g̃udot eykay. Obikuyap tag̃ g̃udot. Ixe eybuywatwatꞌukat. Ixe xipat cĩcãat. Soan ma eymutaybin jeenuy. Ade ma õn cuk adi eymutaybinbin og̃uy. Ixe eybuywatwan jeenuy wekawẽn kay eyag̃uybaꞌũmap puxim — ioꞌe. 
\v 27 — Itabutꞌũmayũ be eyag̃uymukorerenapmuꞌũm paꞌore. Õn pit wag̃uykorereren g̃u. Imẽnpuye eyag̃uykorerenap og̃uꞌũm. Eyag̃uykorereren g̃u juy epesop ojuap kay. Eyg̃uycũg̃cũg̃ g̃u juy epesop — ioꞌe. — Eypararam g̃u juy epesop — ioꞌe. 
\v 28 “Cum õn,” i juk oce eywebe — ioꞌe. — “Waram tak eykay ocepit,” i juk oce. Iboap kuy epeyaꞌĩjojo. Webay kay õn cum. Waꞌõbuyxi. Webay bit obodi ma yaꞌõbuyxi. Imẽnpuye eycokcog̃ cuy epesop cekay ojuap kay. Eyxe okukpin pima, eycokcog̃ kuka epesop ojuap kay — ioꞌe. 
\v 29 — Oju awap iboap muwẽnuwẽn õn eywebe. “Icẽmãn adi xeku oꞌe ocewebe,” i epeꞌe oju buje — ioꞌe. 
\v 30 — G̃axĩn ma Deus kayꞌũmayũ kukukat omuyku — ioꞌe. — Imẽneju buk eyweju õn kawẽnwẽn darem. Ixe waꞌõbacaap muꞌũm pin. Imẽnpit itaybit g̃u — ioꞌe. 
\v 31 — G̃aꞌa aju. Apẽn webay oꞌe owebe iap tag̃ õn jekukum, oxe ikukpin cĩcã buye. Itabutꞌũmayũ og̃utaybin webay aꞌõ dag̃ õn jekukum iam — ioꞌe.
\b
\c 15
\p
\v 1 — Õn uvabune buxim — ioꞌe Jesus. — Webay uvadip puxim. 
\v 2 Okay itabucayũ ibuneꞌĩcat puxim. Webay bikuyap tag̃ jekum ibuꞌuꞌuayũ yaꞌũmatpune buxim. Yaꞌaꞌeꞌũm pima ibuneꞌĩcat ukꞌug̃ tip kukat. Imẽnpuxim webay jebikuyap tag̃ jekum ibuꞌuꞌuayũ mujẽmjẽm itabucayũ xewi. Kadaidip iokokatpune xikxig̃ yaꞌade iꞌe am. Imẽnpuxim webay itabucayũ mukũyjojom ixeyũ be ikẽrẽat mujurũg̃ap puxim. Ixeyũ mukũyjojom big̃ ma jebikuyap tag̃ jeku am — ioꞌe. 
\v 3 — Webay kuy ikẽrẽat oꞌjuꞌuk eybewi, wekawẽn kay kũyjobit puye — ioꞌe. 
\v 4 — Mũg̃ꞌi juy epeku oweju — ioꞌe. — Oweju jekukum pima, õn tak eyweju mũg̃ꞌi ojeku. Ibuneꞌĩcatpune uvabune beꞌũm pima, kuka oꞌyajẽm g̃u uvaꞌa. Imẽnpuxim mũg̃ꞌi oweju eyekuꞌũm pima, webay bikuyap tag̃ g̃u epeku — ioꞌe. 
\v 5 — Uvabune buxim õn — i waram oꞌe Jesus. — Eyju ibuneꞌĩcatpune buxim. Obikuyap tag̃ jekukum pima, xipan ma epeku Deus xe. Mũg̃ꞌi eyweju õn tak jekukum. Obikuyap tag̃ jekukumꞌũm pima bit, ajo eyeꞌeꞌeap xipat jeꞌe Deus xe? Kaꞌũma ma! — ioꞌe. 
\v 6 — Mũg̃ꞌi oweju jekum eybuꞌu bima, apẽn uvadip iwat yaꞌũmatpune kukap puxim Deus tak jeykuk- -yaꞌũmatpune xikap puxim. Wũn. Ibune xik puje ibunekaraw eꞌem. Ibune eꞌũatpune muꞌawerorom uvadip kukat. Aweroh. Ibunemupikupig̃ daxa be. Wũn. Pik. Hog̃. 
\v 7 Mũg̃ꞌi juy epeku oweju! Waꞌõ dak juy kũyjobin epesop! Oweju eyeku buje, Deus soat epejoojuyiat jeꞌg̃ũm eywebe — ioꞌe. 
\v 8 — Deus bikuyap tag̃ eyju jekukum pima, soat ijodiat jeꞌe webay be: “Kaꞌũmg̃u ejoꞌiat xipacat,” i — ioꞌe. — Itaybit jeꞌe ip eyju webekitkiyũ iam — ioꞌe. 
\v 9 — Eyju eykukpin cĩcã oxe webay xe okukpinap coꞌi. Eycokcog̃ cuy epesop Jesus xe ocekukpin iap kay g̃ebum. 
\v 10 Webay aꞌõ kay õn kũyjobit. Imẽnpuye ocokcok soat em webay xe okukpin iap kay g̃ebum. Imẽnpuxim waꞌõ kay kũyjobit pima, eycokcog̃ epesop Jesus xe ocekukpin iap kay g̃ebum — ioꞌe.
\p
\v 11 — Iboap og̃uwẽn eywebe eymucokcok am. Waꞌõcokcok cĩcã. Obuꞌu eywebe eycokcoksũ ãm. Obikuy eywebe eycokcok cĩcã ãm waꞌõcokcokap puxim — ioꞌe. 
\v 12 — “Oxe xipan eykukap puxim cuy xipan epeyewekuk,” i õn eꞌem eywebe — ioꞌe. 
\v 13 — Wuybureyũ eꞌũap puxim wuyeꞌũ ãm wuybuꞌuꞌũm pima, soat ijodiat jeꞌe “Akꞌi juy epeꞌe! Teyũxeku ibureyũ ikukpin cĩcã,” i. “Wararaꞌacat podi ma ikukpin cexe ip,” i jeꞌe ip — ioꞌe. 
\v 14 — Waꞌõ kay kũyjobit pima, obureyũm epesop — ioꞌe. 
\v 15 — “Eyju oweju kapikpikꞌukayũ ã,” iꞌũmg̃u õn eꞌem g̃asũ eywebe. Kapikpikꞌukat itaybit g̃u jekariwa eꞌeam. Webay owebe ieꞌeap pit og̃uwẽn eywebe soat. Iboap og̃uwẽn eywebe eyju obureyũ buye — ioꞌe. 
\v 16 — Eyju ma onaẽ g̃u eykukan. Õn pit eynaẽ obureyũm. Õn cuk eymuju omuwẽn ãm wararaꞌacayũ be imutabun am ip okay. Okay jetabucap jepere g̃u ip. Ibuꞌu g̃u ip jeꞌe itabut am okay. Obikuyap tag̃ webay eju kawẽnwẽn pima, soat epejoojuyiat jeꞌg̃ũm eywebe — ioꞌe. 
\v 17 — Imẽnpuye “Xipan cuy epeyewekuk,” i õn eꞌem eywebe — ioꞌe.
\p
\v 18 — Deus kayꞌũmayũ itakoma eykay. Koap pit okay itakoma ip osodop. Iboap kay g̃ebum cuy epesop — ioꞌe. 
\v 19 — Eyju Deus kayꞌũmayũ kadi bima, eykay kuka ip oꞌe. “Teyũdaku wuykadiacat,” i kuka ip oꞌe. Imẽnpit õn eymuweꞌuk Deus kayꞌũmayũ xewi. Deus kayꞌũmayũ kadi g̃u eyju. Imẽnpuye itakoma jĩjã ip eykay — ioꞌe. 
\v 20 — Kuy juk ocece eywebe iap kay g̃ebum cuy epesop. “Ikẽrẽm cĩcã ip wuyekariwa oꞌjukuk. Wuyju bit ikẽrẽm g̃u wuykuk ip,” iꞌũmg̃u juy epeꞌe eyewewebe. Deus kayꞌũmayũ ipiat oꞌsupiꞌajojoat owebe. Imẽnpuye eywebe dak ip jopiꞌajoat. Yopĩt ma waꞌõ kay ip osodop. Imẽnpuye dak eyaꞌõ kay jeꞌe ip yopĩt ma — ioꞌe. 
\v 21 — Eywebe ipiat supiꞌajoat ip, eyju webekitkit puye. Eywebe ipiat supiꞌajoat ip, omudocat kay itabutꞌũm puye — ioꞌe. 
\v 22 — Ijodi oajẽm. Deus ekawẽn cuk adi og̃uwẽnuwẽn ixeyũ be. Wekawẽn kay g̃u bit ip oꞌe. Odotꞌũm pima, “Ikẽrẽat kug̃ eyju oxe, wekawẽn kayꞌũm puye yaꞌĩjojom maꞌg̃u,” iꞌũmg̃u kajuk oꞌe Deus ixeyũ be. G̃asũ bit “Ikẽrẽat kug̃ g̃u oceju” iꞌe baꞌore cebe ip Deus pe. 
\v 23 Okay itakomaat webay kay dak itakoma — ioꞌe. 
\v 24 — Waꞌõbacaap mõg̃mõg̃ cuk adi ojekuku soat etabutpe. Soat aꞌõbacaap podi ma waꞌõbacaap mõg̃mõg̃ ojekuku. Okay g̃u bit ip oꞌe. Imõg̃mõg̃ꞌũm pima, “Ikẽrẽat kug̃ eyju oxe, okay eyetabutꞌũm puye, waꞌõbacaap mõg̃ap cocom maꞌg̃u eyju,” iꞌũmg̃u kajuk oꞌe Deus ixeyũ be. G̃asũ bit ikẽrẽat kug̃ ip cexe. Inaka itakoma jĩjã ip okay, webay kay dak — ioꞌe. 
\v 25 — Ixeyũ muwẽnuwẽn Deus jekawẽntup pe- -kuyatup pe:
\mi Ikẽrẽmꞌũm aꞌg̃u ip ojukuk, i.
\mi Inaka ip oitakomãn okay, i.
\m Itakoma ip okay ig̃odup ekawẽn puxim — Jesus oꞌe.
\p
\v 26 — “Ebiõg̃buk cuy eg̃uju okay itabucayũ kay,” i oceꞌe cebe- -webay be — ioꞌe Jesus. — Ixe g̃udot eybuywatwatꞌukan. Ixe icẽmãn eꞌeꞌukat. Ixe ma omuwẽn eywebe — ioꞌe. 
\v 27 — Eyju dak cuy epesop omuwẽnuwẽn ijodiayũ be. Õn ijodiat mutaybitbin pima, oweju juk adi epekuku. Imẽnpuye juy epesop omuwẽnuwẽn g̃asũ bit — ioꞌe.
\b
\c 16
\p
\v 1 — Imẽn õn eꞌem eywebe okay eyetabucap epereap puxim — ioꞌe. 
\v 2 — Eykay itakomaayũ jeymuõmat g̃u Deus eju kawẽnwẽnapꞌa be. Jeyaoka ip. Eyaoka buje, tũybe Deus bikuyap tag̃ wuyju jekukum iãn jeꞌe ip — ioꞌe. 
\v 3 — Ikẽrẽm jeykuk ip abu õn iam itaybitꞌũm puye, abu webay iam tak. 
\v 4 G̃asũ iboap muwẽnuwẽn õn g̃uyjom eyeg̃ebu am apẽn õn eymukũyjojo iap kay — ioꞌe. — Warẽmtag̃ eykuk puje, “Imẽn kuka ip wuykuk,” i juy epeꞌe eyewewebe — ioꞌe Jesus jeweju etaybitbinayũ be.
\p — Kuy bima aꞌg̃u eyxe ma og̃uy — ioꞌe. — Imẽnpuye juk iboam g̃u õn eymukũyjo. 
\v 5 G̃asũ bit ocepit omudocat kay. Kaꞌũma ma eyꞌin pit eꞌem owebe “Poma ẽn cum?” i. 
\v 6 Eyg̃uycũg̃cũg̃ cĩcã imẽn õn eꞌem puye. 
\v 7 Wepitꞌũm pima, xipat g̃u kuka oꞌe eywebe. Wepit pima bit, xipat jeꞌe eywebe. Wepitꞌũm pima kuka eybuywatwatꞌukat osodot g̃u. Oju buje bit ixe og̃udot eykay. Imẽnpuye eycokcog̃ cuy epesop ojuap kay — ioꞌe. 
\v 8 — Ixe dot puje, “Soat eyju ikẽrẽat kug̃ Deus xe,” i jeꞌe soat pe ipi dag̃ayũ be. “Deus acã itaybit eymucũg̃ ãm,” i dak jeꞌe. “Ipiat supiꞌajoat Deus ikẽrẽat mujurũg̃rũg̃ꞌukayũ be,” i dak jeꞌe — ioꞌe. 
\v 9 — “Soat eyju ikẽrẽat kug̃ Deus xe,” i jeꞌe, okay itabutꞌũm ip puye — ioꞌe Jesus. 
\v 10 — Eyju ojo g̃u waram, Deus jewekay odujuu buye — ioꞌe. — Imẽnpuye “Deus acã itaybit eymucũg̃ ãm,” i jeꞌe Deus biõg̃buk — ioꞌe. 
\v 11 — Deus kuy oꞌe “Deus kayꞌũmayũ kukukat soat em jeenuy ipiatpiꞌajojoap pe- -Satanás,” i. Imẽnpuye “Ipiat supiꞌajoat ikẽrẽat mujurũg̃rũg̃ꞌukayũ be Deus,” i jeꞌe Deus biõg̃buk — ioꞌe Jesus.
\p
\v 12 — Ade mabuk õn imuwẽn pin eywebe. G̃asũ bit ibaꞌore eywebe eyetaybin am wekawẽn, eyg̃uycũg̃cũg̃ cĩcã buye — ioꞌe. 
\v 13 — Ibiõg̃buk xipacat icẽmãn eꞌeꞌukat. Ixe ajẽm puje soan kawẽn icẽmãn eymutaybin jeenuy. Jaꞌõbi g̃u ixe g̃uwẽn. Kuy oꞌyaꞌĩjojoiap acã g̃uwẽn. G̃uyjom acejebapukiap tak g̃uwẽn eywebe — ioꞌe. 
\v 14 — Ixe obuyxim okuk. Itaybit wekawẽn jeꞌe. Icẽmãn soat wekawẽn g̃uwẽn eywebe — ioꞌe. 
\v 15 — Webay eꞌeap tag̃ õn tak eꞌem. Imẽnpuye cuk adi ocece eywebe “Deus biõg̃buk wekawẽn g̃uwẽn eywebe,” i — ioꞌe.
\p
\v 16 — G̃axĩn ma eyju ojo g̃u. G̃uyjom pitapit waram eyju ojo — ioꞌe Jesus.
\p
\v 17 — Apẽn ite eꞌem wuywebe? — ioꞌe ip jewewebe jeweju etaybitbinayũ. — Ite eꞌem “G̃axĩn ma eyju ojo g̃u,” i. “G̃uyjom pitapit eyju waram ojo,” i — ioꞌe ip. — “Imẽn jeꞌbapuk webay kay oju buye,” i teku eꞌem wuywebe — ioꞌe ip jewewebe. 
\v 18 — Apẽnpuye ite eꞌem “G̃uyjom pitapit waram eyju ojo,” i? — ioꞌe ip. — Cekawẽn paꞌarẽm cĩcã wuyxe — ioꞌe ip jewewebe.
\p
\v 19 Jesus itaybit oꞌe teyũku “Apẽn tak ẽn eꞌem ocewebe?” iꞌe ojuy owebe iam. Imẽnpuye waram oꞌjekawẽn ceweju ip.
\p — “Apẽn ẽn ocemutaybin pin?” i du eyju e pin owebe? — ioꞌe Jesus. — “G̃axĩn ma eyju ojo g̃u,” i juk oce eywebe — ioꞌe. — “G̃uyjom pitapit waram eyju ojo,” i dak cuk oce — ioꞌe. — Wekawẽn paꞌarẽm tu eyxe? — ioꞌe Jesus. 
\v 20 — Icẽmãn õn eꞌem eywebe. Wawa jĩjã juy epesop weꞌũ buje — ioꞌe. — Itabutꞌũmayũ bit wa g̃u jeꞌe. Darem ma eyg̃uycũg̃cũg̃ epesop. G̃uyjom pit eyg̃uycũg̃cũg̃ g̃u epesop- -eycokcok ã — ioꞌe. — Eyg̃uycũg̃ap iꞌũm — ioꞌe. 
\v 21 — Iꞌit kam pima, ayacat ig̃uycũg̃ eꞌem jeꞌit pibun. Jeꞌit kap puje bit, ipiat kay g̃ebum g̃u eꞌem. Icokcok eꞌem jeꞌit kug̃ puye. 
\v 22 Imẽnpuxim eyju dak. G̃asũ eyg̃uycũg̃cũg̃ oju buye. G̃uyjom pit waram eyjojom oce. Eycokcok cĩcã ma epeꞌe g̃ebuje bit. Abu-be eycokcokap muꞌũm put ixe kabia be? Kaꞌũma be ma! — ioꞌe. 
\v 23 — Eybuywatwatꞌukat ajẽm puje bit, ixe ma jeymutaybin — ioꞌe. — Imẽnpuye “Ocemutaybin cuy ece,” iꞌũmg̃u epeꞌe owebe ma — ioꞌe. — “Ekawẽn paꞌarẽm ocexe,” iꞌũmg̃u dak epeꞌe owebe — ioꞌe Jesus. — Icẽmãn õn eꞌem eywebe. Obikuyap tag̃ cexewi iojuyjuy bima, webay soat eyemuojuyjuy jeꞌg̃ũm eywebe — ioꞌe. 
\v 24 — Obikuyap tag̃ epejoojuy g̃u buk. Pũg̃ em tak kaꞌũma — ioꞌe. — G̃asũ bit cuy epejoojuy cexewi! — ioꞌe. — Eyemuojuyjuy epejat. Ibu buje, eycokcoksũ g̃u epesop- -eycokcok cĩcã ma — ioꞌe.
\p
\v 25 — Koap puk cuk adi ibapug̃ g̃u ocekawẽn eywebe — ioꞌe. — Ijodiat mutaybitbinap ekawẽn acã og̃uwẽnuwẽn eywebe. G̃uyjom pit ibapug̃ ma webay ekawẽn og̃uwẽn eywebe — ioꞌe. 
\v 26 — Ibapug̃ owebe imuwẽn puje, obikuyap tag̃ cuy epejoojuy webay xewi. Õn acã g̃u webay xewi ojojuy eywebeam — ioꞌe. 
\v 27 — Eyju dak cuy epejoojuy. Webay eyekawẽn yaꞌĩjo, ixe xe eykukpin cĩcã buye. Webay xe eykukpin cĩcã, eyxe okukpin puye; “Icẽmãn Jesus osodot Deus xewi,” i eyju eꞌem puye dak — ioꞌe. 
\v 28 — Icẽmãn webay xewi juk ojot. Ipi kay juk ojot- -ijodi. Ojeꞌũ. Ipi dag̃wi ojẽm g̃asũ. Webay kay juy ocepit — ioꞌe Jesus.
\p
\v 29 — G̃asũ bit ẽn ibaꞌarẽm g̃u kawẽnwẽn ocewebe — ioꞌe onze beayũ Jesus pe. — Ibapug̃ ma ẽn kawẽnwẽn g̃asũ bit — ioꞌe ip. 
\v 30 — Etaybit soan ma. Etaybit apẽn oceju jewag̃uyg̃uy iam. Ẽn ocemukũyjojom, “Apẽn ẽn eꞌem ocewebe,” iꞌũmg̃u maꞌg̃u oceju eꞌem — ioꞌe ip. — Imẽnpuye “Deus xewi teku osodot,” i oceju eꞌem g̃asũ — ioꞌe ip.
\p
\v 31 — Eyetabut tu epeꞌe okay? — ioꞌe Jesus. 
\v 32 — G̃axĩn ma bit epewatwatwat eydukã dag̃. Opere eyju eyaokaap puxim. Wag̃epũg̃ ma og̃uy opere buje. Imẽnpit odadaybot g̃u og̃uy, webay soat em oxe buye — ioꞌe. 
\v 33 — Itabutꞌũmayũ ma ipiat supiꞌajoat eywebe. Õn pit kuy Deus kayꞌũmayũ kukat aꞌõbacaap og̃uꞌũm. Imẽnpuye eyaꞌõcam cuy epesop! Imẽn õn eꞌem eywebe eypararaap puxim. Eyag̃uykorereren g̃u, mũg̃ꞌi oweju buye — ioꞌe.
\b
\c 17
\p
\v 1 Iboam e buje, Jesus oꞌjeꞌapũn kabi beat kay- -jebay kay. Oꞌjekawẽn jebay eju.
\p — Bay — ioꞌe. — G̃axĩn ma ojeꞌũ. Õn ma ekpot. Odipap cuy eg̃ubapuk adeayũ be. Õn tak edipap cuy og̃ubapuk cebe ip — ioꞌe. 
\v 2 — Pũg̃pũg̃pũg̃ayũ juk eg̃utabun okay ipi dag̃ayũꞌin. Aꞌõbacaap cuk eg̃ũm owebe. Imẽnpuye okay itabucayũ yag̃uyisum jekukum waꞌõbi — ioꞌe jebay be. 
\v 3 — Ẽn acã Deusat. Kaꞌũmg̃u waraꞌat. Õn ma emumudot- -Jesus Cristo. Ijodiat yag̃uyisum jeku okay itabun puje, ekay itabun puje dak — ioꞌe. — Soat em exe ma jeedop ip ceꞌũ buje — ioꞌe. 
\v 4 — Wekapikap cuk adi eg̃ũm owebe. Ipi dag̃ pima abu ẽn iap cuk adi og̃uwẽnuwẽn edipap mubapukpug̃. G̃asũ wekapikap og̃uꞌũm — ioꞌe Jesus.
\p
\v 5 — Bay — ioꞌe Jesus. — Exe bima soat kabi beacat odipap mubapukpukꞌuk ip osodop- -ekawẽn tojotjotꞌukayũ. Ipi mujurũg̃ awap odipap mubapukpukꞌuk ip osodop. Waram cuy odipap mubapukpug̃ ip jeenuy, exe wajẽm puje — ioꞌe.
\p
\v 6 Jesus jekay itabucayũ oꞌg̃uwẽn jebay be g̃ebuje bit.
\p — Pũg̃pũg̃ayũ juk eg̃utabun okay ipi dag̃ayũꞌin — ioꞌe. — Ebekitkiyũm osodop ip. Ixeyũ eg̃utabun okay. Ixeyũ itabucayũ be emuwẽnuwẽn ojekuku. Kũyjobit oꞌe ip aꞌõ kay — ioꞌe Jesus jebay be. 
\v 7 — Itaybit ip g̃asũ aꞌõbi acã õn emuwẽnuwẽn iam — ioꞌe. 
\v 8 — Apẽn cuk adi ecece iap ma og̃uwẽnuwẽn soat pe okay itabucayũ be. Waꞌõ kay ip osodop. Itaybit oꞌe ip icẽmãn Deus xewi Jesus osodot iam. Itabut oꞌe ip Deus ma Jesus oꞌg̃udot iap kay — ioꞌe Jesus.
\p
\v 9 — Bay, ixeyũ beam ma õn kawẽnwẽn eweju- -onze beayũ beam — ioꞌe. — Itabutꞌũmayũ beam g̃u õn kawẽnwẽn- -okay emumutabunyũ beam acã — ioꞌe. — Ebekitkiyũ ixeyũ. 
\v 10 Soat okay itabucayũ ebekitkiyũ. Imẽnpuye webekitkiyũ dak ip. Adeayũ odipap cocom webekitkiyũ cũg̃ ma jekukum puye — ioꞌe.
\p
\v 11 — Bay, soat podi ma aꞌõbaca. Aꞌõbacaap cuk adi eg̃ũm owebe. Aꞌõbacaap coꞌi waꞌõbaca. G̃axĩn ma oajẽm maꞌg̃uto ekay. Õn ma ipi dag̃ g̃u ojeku. Okay itabucayũ bit ipi dag̃ ip jeku.
\p — Bay — ioꞌe. — Pũg̃ em ikẽrẽat ejukuk g̃u. Imẽnpuxim ag̃ cuy eg̃uy ixeyũ kay cũg̃ ma ip ceku am wekuap coꞌi, ekuap coꞌi dak — ioꞌe. 
\v 12 — Aꞌõbacaap cuk adi eg̃ũm owebe. Õn ixeyũ xe bima, aꞌõbi ma juk adi ag̃ og̃uy cekay ip itabucap epereap puxim. Kaꞌũma ma ixeyũꞌin oibuꞌun okay. Pũg̃ acã oibuꞌun- -jetabucap epereperemxi acã. Apẽn ixe jetabucap oꞌjepere iap ibararak opop Deus ekawẽntup pe. Ig̃odup ekawẽn tag̃ jetabucap jepere g̃asũ — ioꞌe.
\p
\v 13 — Bay, g̃axĩn maꞌg̃uto ocepit ekay — ioꞌe Jesus. — Ijoce bima bit õn kawẽnwẽn ewebe onze beayũ beam ixeyũ mucokcok am ocokcokap coꞌi. Obuꞌu icokcoksũ ãm ip. Obikuy icokcok cĩcã ãm ip ocokcokap coꞌi — ioꞌe. 
\v 14 — Ekawẽn cuk adi og̃uwẽnuwẽn cebe ip. Ekayꞌũmat ekukuap puxim g̃u õn jekukum. Ixeyũ dak ekayꞌũmat ekukuap puxim g̃u jekukum. Imẽnpuye ixeyũ kay itakoma oꞌe ip itabutꞌũmayũ, ekayꞌũmayũ — ioꞌe. 
\v 15 — Bay, “Okay itabucayũ juy etujujẽm ipi dag̃wi,” iꞌũmg̃u õn pit eꞌem ewebe. “Ixeyũ juy eg̃uxipan ikẽrẽat mujurũg̃rũg̃ꞌukayũ kukukat xewi,” i õn pit eꞌem ewebe — ioꞌe. 
\v 16 — Itabutꞌũmat ekukuap puxim g̃u õn jekukum. Imẽnpuxim itabutꞌũmat ekukuap puxim g̃u jekukum ip okay itabucayũ — ioꞌe. 
\v 17 — Bay, ixeyũ juy eg̃uwexat soat em ebikuyap tag̃ jekukuꞌukayũm. Ekawẽn cocoam cuy ip eg̃uwexat. Ekawẽn acã kawẽn icẽmat — ioꞌe. 
\v 18 — Ẽn cuk omudot ijodiat mutaybin am kawẽn icẽmãn. Imẽnpuxim ixeyũ og̃uju ijodiat mutaybin am kawẽn icẽmãn — ioꞌe. 
\v 19 — Og̃eꞌũnꞌũn g̃asũ, oxe ixeyũ ikukpin puye. Ebikuyap tag̃ ojeꞌũ ixeyũ dak ebikuyap tag̃ ceku am — ioꞌe. 
\v 20 — Onze beayũ beam acã g̃u õn kawẽnwẽn eweju, Bay. Wararaꞌacayũ itabut jeꞌe okay, ixeyũ omuwẽnuwẽn puye. Ixeyũ beam tak õn kawẽnwẽn eweju- -g̃uyjom itabunayũ beam — ioꞌe. 
\v 21 — Bay, “Ixeyũ juy esubuywan pũg̃ tag̃ ma ip ceku am,” i õn eꞌem ewebe. Bay, pũg̃ tag̃ ma ẽn jekukum oweju. Õn tak pũg̃ tag̃ ma eweju jekukum.
\p — Bay — ioꞌe. — Obikuy wuyekukuap coꞌi ceku am ip. Wuyekukuap tag̃ jekukum pima, itabutꞌũmayũ jeꞌe “Deus Jesus emumudot,” i — ioꞌe. 
\v 22 — Bay, aꞌõbacaap cuk adi ejomõg̃ owebe. “Ojoꞌi ẽn tak aꞌõbaca,” i juk adi ece owebe, Bay. Imẽnpuxim “Ojoꞌi eyju dak eyaꞌõbaca,” i õn eꞌem okay itabucayũ be. Imẽn õn eꞌem cebe ip pũg̃ tag̃ ma ceku am ip wuyekukuap coꞌi — ioꞌe Jesus. 
\v 23 — Pũg̃ tag̃ ma õn jekukum ixeyũ eju. Ẽn tak oweju pũg̃ tag̃ ma jekukum. Imẽneju pũg̃ tag̃ ma jekukum ip wuyekukuap coꞌi. Wuyekukuap coꞌi jekukum pima, itabutꞌũmayũ itabut jeꞌe ẽn ma omudocat iap kay. Deus xe wuykukpin apẽn jekpot ikukpin cexe iap coꞌi iap kay dak itabut jeꞌe ip — ioꞌe. 
\v 24 — Exe okukpin cuk adi og̃uy ipi mujurũg̃ puje. “Waꞌõbacaap coꞌi ẽn tak aꞌõbaca,” i juk adi ecece owebe.
\p — Bay — ioꞌe. — Onze beayũ juk adi eg̃utabun okay. Obikuy wuydopap pe ixeyũ dop am okpot waꞌõbacaap coꞌi yaꞌõbaca iap co am — ioꞌe. 
\v 25 — Bay — ioꞌe. — Soat em ẽn cũg̃ ma eꞌem. Ikẽrẽat ejukuk g̃u- -pũg̃ em tak kaꞌũma. Itabutꞌũmayũ itaybit g̃u abu ẽn iam. Õn pit wetaybit cĩcã abu ẽn iam. Onze beayũ itabut cebay teku oꞌg̃udot ijodi iap kay — ioꞌe. 
\v 26 — “Webay xe eykukpin cĩcã,” i juk adi ocece cebe ip. Iboap og̃uwẽn cebe ip cewemukukpin am ip exe okukpinap coꞌi. Iboap og̃uwẽn cebe ip pũg̃ tag̃ ma weku am ceweju ip — ioꞌe Jesus.
\m Imẽn Jesus oꞌjekawẽn cĩcã jebay eju.
\b
\c 18
\p
\v 1 Jebay eju jekawẽn epere buje, Jesus oꞌjẽm Jerusalém ka bewi. Jeweju etaybitbinayũ eju oꞌjẽm. Kadidi dag̃wi oꞌju ip- -Cedromti dag̃wi. Kadaidip oꞌtiptop kadidi wĩnãbu. Jesus oꞌju ibodip pe onze beayũ eju. Oajẽm ip kadaidip kay. 
\v 2 Ade em Jesus cuk adi oekukuku ibodip tag̃ doze beayũ eju. Imẽnpuye Judas itaybit osunuy ibodim Cedromtim. Judas Jesus ũm ojuy cekay itakomaayũ be.
\p
\v 3 Judas oꞌju Jesus kay. Oꞌju kadaidip pe. Oꞌju sorarayũ eju, Deus eju kawẽnwẽnapꞌa wiwiꞌukayũ eju dak. Oꞌju ip paĩyũ kukukayũ aꞌõbi, Fariseuyũ aꞌõbi dak. Oꞌju ip lamparinaꞌa kukug̃ jebui be, jebaꞌip kukug̃ tak, wexiktak kukug̃ tak. Oajẽm ip cekay- -Jesus kay. 
\v 4 Jesus kuy itaybit oꞌe soan- -apẽn owebe jeꞌbapuk iam. Oꞌju ajẽmayũ dopabe- -Judasyũ dopabe. Oꞌjekawẽn ceweju ip.
\p — Abu-kudadam epesot? — ioꞌe- -Jesus oꞌe.
\p
\v 5 — Jesus kudadam oceju — ioꞌe ip. — Nazaré ka bewiat kudadam oceju — ioꞌe ip.
\p — G̃ebujeat maꞌg̃u õn — ioꞌe Jesus.
\p
\v 6 “G̃ebujeat maꞌg̃u õn” iꞌe buje, soat ip oꞌjewede cexewi ajẽm ojuyayũ. Oꞌat ip ipi ju Jesus ekawẽn co buje. Waram Jesus oꞌe:
\p — Abu-kudadam eyju? — i cebe ip.
\p
\v 7 Waram ip oꞌe:
\p — Jesus kudadam oceju — i. — Nazaré ka bewiat kudadam — i.
\p
\v 8 — “G̃ebujeat maꞌg̃u õn,” i kuy oce eywebe — Jesus oꞌe. — Õn ma eyju okudadam. Owejuayũ bit cuy epejat g̃u. Ãg̃ cuy jeꞌjẽm ip — ioꞌe.
\p (
\v 9 — Bay, juk eg̃utabunꞌiayũ jetabucap jepere g̃u- -pũg̃ tak kaꞌũma — i juk Jesus oꞌe. Imẽnpuye — Ãg̃ cuy jeꞌjẽm ip — ioꞌe Judasyũ be jeweju etaybitbinayũ daomũnap puxim, ixeyũ be ipiat supiꞌajoacap puxim).
\p
\v 10 Iboap co buje, Simão Pedro jepaja oꞌjuꞌuk iyuk pewi. Kiririk. Paĩyũ kukukat puywatwatꞌukat g̃uybu oꞌsug̃uybuꞌuk ig̃uybuikibi dag̃ pajam. Tẽg̃wũn. Ibaꞌat kadiat g̃uybu oꞌsug̃uybuꞌuk. Ibuywatwatꞌukat putet Malco i osunuy.
\p
\v 11 — Odaxijom g̃u juy paja kug̃! Ipiat osupiꞌajo webay bikuyap tag̃- -kuyjeat ekawẽn tag̃ — ioꞌe Simão Pedro be.
\p
\v 12 Jesus oꞌjat ip Judasyũ, sorarayũ dak, sorarayũ kukukayũdak, Deus eju kawẽnwẽnapꞌa wiwiꞌukayũ dak. Oꞌsubamukirik ip.
\p
\v 13 Koam Jesus oꞌtujowat ip Anás kay. Ixe Anás Caifás tadop osunuy. Caifás paĩyũ kukukat osunuy ixe koato.
\p
\v 14 — Xipat wuywebe ite ag̃okatkat aoka am wuymuyꞌũꞌũap puxim — i juk oꞌe ixe Caifás Judeuyũ kukukayũ be.
\p (24) Anás Jesus oꞌg̃ujuat Caifás kay- -paĩyũ kukukat kay. Ibõg̃bikirig̃ oꞌg̃ujuat.
\p
\v 15 Simão Pedro oꞌju Jesus nomuju. Wararaꞌacat tak oꞌju ceweju. Ixe dak onze beayũꞌin osunuy. Ixe waraꞌacat ma Jesus eju oõm paĩyũ kukukat tukꞌa ekorara be. Oõm paĩyũ kukukat itaybit cĩcã ixem puye. 
\v 16 Pedro bit ukꞌa ekorara exĩntabi xe osunuy. Oõm g̃u buk ukꞌa ekorara be. Wararaꞌacat oꞌjepit korara exĩntabi be. Oꞌjekawẽn xĩntabi wiwiꞌukat pe- -ayacat pe.
\p — Ãg̃ jeõm obure — ioꞌe ayacat pe.
\p — Xipat — ioꞌe cebe.
\p — Eõm cuy — iwiwiꞌukat oꞌe Pedro be.
\m Oõm ukꞌa ekorara be.
\p
\v 17 — Jesus eju etaybitbinat g̃u du ẽn? — ayacat oꞌe Simão Pedro be- -xĩntabi wiwiꞌukat oꞌe.
\p — Kaꞌũma — i napa ma oꞌe Simão Pedro. — Ceweju etaybitbinat g̃u õn — ioꞌe napa ma jebuap puxim.
\p
\v 18 Kajuk kug̃ osunuy. Paĩyũ kukukat puywatwatꞌukayũ daxanabõẽ oꞌtabõẽmusop jeweweam. Daxa etako be kacũg̃cũg̃ꞌi ip osodop daxae oꞌom jewewewem ibuywatwatꞌukayũ, sorarayũ dak. Pedro dak oꞌju daxa etako be. Jewewewem ip osodop.
\p
\v 19 G̃ebuje paĩyũ kukukat oꞌjekawẽn Jesus eju.
\p — Eweju etaybitbinat eꞌeap cuy eg̃uwẽn owebe — ioꞌe Jesus pe. — Apẽg̃ap ekawẽn ixeyũ eg̃utaybitbitbin? — ioꞌe cebe.
\p
\v 20-21 — Apẽnpuye ẽn eꞌem owebe ma “Apẽg̃ap ekawẽn ixeyũ eg̃utaybitbitbin?” i? Soat em ibapug̃ ma ijoceat og̃utaybitbitbin — ioꞌe Jesus. — Adeayũ etabutpe og̃utaybitbitbin Deus eju kawẽnwẽnapꞌa be, yabog̃atꞌa be dak — ioꞌe. — Ibaꞌarẽm g̃u og̃utaybitbitbin- -pũg̃ em tak kaꞌũma — ioꞌe. — Wemumutaybitbinyũ be juy ecekawẽn. “Apẽn eymutaybin Jesus?” i juy epeꞌe cebe ip — ioꞌe. — Itaybit ip — ioꞌe Jesus.
\p
\v 22 Deus eju kawẽnwẽnapꞌa wiwiꞌukat Jesus dopa oꞌtopaokaka jebum cekawẽn co buje.
\p — Imẽn tu ẽn kawẽnwẽn paĩyũ kukukat eju? — ioꞌe. — Cedag̃ g̃u ẽn kawẽnwẽn! — ioꞌe.
\p
\v 23-24 — Wekawẽn cũg̃ꞌũm pima, iboap cuy eg̃uwẽn soat pe, ijoceacat pe — ioꞌe Jesus. — Wekawẽn cũg̃ ma bima bit, apẽnpuye dak ẽn odopaokaka? — ioꞌe.
\p Mũg̃ ma oꞌe. Jededem g̃u.
\p
\v 25 Pedro jewewewem mabuk oꞌe daxa etakobe. Cũg̃ꞌi osunuy wararaꞌacayũ parakpe.
\p — Ibakirikat eju etaybitbinat g̃u du ẽn? — ioꞌe ip Pedro be.
\p — Õn g̃u — ioꞌe Pedro napa ma. — Ig̃o ejuat g̃u õn — i napa ma oꞌe.
\p
\v 26 Wararaꞌacat oꞌjekawẽn Pedro be g̃ebuje bit. Ixe waraꞌacat paĩyũ kukukat puywatwatꞌukat osunuy. Pedro emug̃uybuꞌuk badip osunuy.
\p — Õn ma ejojo ig̃o eju kadaidip pe! — ioꞌe waraꞌacat.
\p
\v 27 — Õn g̃u- -wararaꞌacat acã — ioꞌe Pedro napa ma.
\p G̃ebuje isum ma sapokay oꞌjede.
\p
\v 28 Jesus oꞌtujujẽm ip Caifás tukꞌa bewi ceweju jekawẽn epere buje.
\p G̃ebuje Caifás Jesus oꞌtujowacat iecug̃ap tukꞌa kay- -Pilatos tukꞌa kay. Oꞌtujowat ip kabia isum. Judeuyũ oõm g̃u iecug̃ap tukꞌa be Pilatos Judeuꞌũm puye. Tukꞌa akiju ma ip osodop. Cedag̃ g̃u kuka oꞌe õm ãm Judeuꞌũmat tukꞌa be Páscoa epeta muyꞌan pima. Õm pima:
\p — Wuyisu g̃u Deus xe — i kajuk oꞌe ip. — Peta xat o baꞌore wuywebe — i kajuk oꞌe ip.
\m Imẽneju oõm g̃u ip iecug̃ap tukꞌa be- -Pilatos tukꞌa be.
\p
\v 29 Imẽnpuye Pilatos oꞌjẽm jedukꞌa bewi. Oꞌju Judeuyũ kukukayũ eju jekawẽn ãm.
\p — Jesus ikẽrẽat kug̃ tu eyxe? — ioꞌe Pilatos Judeuyũ kukukayũ be.
\p
\v 30 — Hm hm — ioꞌe ip. — Ocexe ma ite ikẽrẽat cuk adi oꞌjukuk. Ocedobuyũꞌũmꞌũm ekawẽn tag̃ g̃u teku jekukum. Ẽn cuy ite eyaokaat — ioꞌe ip.
\p
\v 31 — Eyju ma juy epetujujẽm oxewi — ioꞌe Pilatos. — Eyju ma juy ipiat epesupiꞌajoat cebe eydobuyũꞌũmꞌũm ekawẽn tag̃ — ioꞌe.
\p — Ap! — ioꞌe ip. — Ocaꞌõbi g̃u oceju ibamupaya ojuy ceꞌũ ãm- -aꞌõbi acã — ioꞌe ip Pilatos pe- -iecug̃ap pe.
\v 32 (Jesus cuk adi oꞌe — Obamupaya ip weꞌũ ãm — i. Itaybitꞌũm pima Judeuyũ kukukayũ oꞌjekawẽn Pilatos pe kuy oꞌeꞌe iap coꞌi- -Jesus pe oꞌeꞌe iap coꞌi).
\p
\v 33 Pilatos oõm maꞌg̃uto jedukꞌa be. Jesus oꞌg̃udocat jewekay.
\p — Judeuyũ kukukat tu ẽn? — ioꞌe Jesus pe.
\p
\v 34 — Ag̃uy dag̃ tu iboam ẽn eꞌem owebe? — ioꞌe. — Wararaꞌacat ag̃uy dag̃ g̃u xeꞌe? — ioꞌe Jesus.
\p
\v 35 — Wag̃uy dag̃ g̃u! — ioꞌe- -Pilatos oꞌe. — Judeu g̃u õn pit — ioꞌe Pilatos. — Judeuyũ ma edojot okay. Apẽn ẽn tak ece ikẽrẽan? — ioꞌe Jesus pe. — “Judeuyũ kukukat õn,” i du ẽn eẽm? — ioꞌe Jesus pe.
\p
\v 36 — Eybuxim g̃u õn ijodiacat kukukat — ioꞌe. — Õn ijodiat puximan pima kuka adi webekitkit oꞌjewaokaka okay itakomaayũ eju. Oꞌjewaokaka kuka adi ip Judeuyũ be obuap puxim. Imẽnpuye ijodiat aꞌõbi g̃u õn wararaꞌacayũ kukukat — ioꞌe Jesus.
\p
\v 37 — Ijodiat kukukat tu ẽn? — ioꞌe Pilatos.
\p — Hm hm. Ikukukat õn — ioꞌe. — Kawẽn icẽmat muwẽn ãm okop ijodi. Kawẽn icẽmat muwẽn ãm okap. Kawẽn icẽmat kay kũyjobicayũ wekawẽn kay dak kũyjobit — ioꞌe Jesus.
\p
\v 38 — Kaꞌũmg̃u kawẽn icẽmat! — ioꞌe Pilatos.
\p G̃ebuje Pilatos Jesus eju jekawẽn oꞌjepere. Oꞌjẽm maꞌg̃uto jedukꞌa bewi. Oꞌjẽm jekawẽn ãm maꞌg̃uto Judeuyũ kukukayũ eju. Akiju ip osodop.
\p — Oxe ma ite ag̃okatkat ikẽrẽat oꞌjukuk g̃u. Pũg̃ em tak oꞌjukuk g̃u ma — Pilatos oꞌe cebe ip. — Cũg̃ g̃u kuka oꞌe wuywebe yaoka am — ioꞌe. 
\v 39 — Páscoa epeta bima pũg̃ ma õn imujẽmjẽmꞌuk daomũnmũnapꞌa bewi jekpiwan ma ceku am. Eybikuy du owebe eykukukat mujẽm ãm jekpiwan ma ceku am- -Jesus mujẽm ãm? — ioꞌe Pilatos.
\p
\v 40 — Ap! — ioꞌe ip. — Ixe g̃u juy eg̃ujẽmat — ioꞌe ip yaꞌõberen. — Barrabás pit eg̃ujẽmat — ioꞌe ip. — Barrabás kay oceju! — ioꞌe ip yaꞌõberen.
\m (Ixe Barrabás jebureyũ aokakaxi osunuy).
\b
\c 19
\p
\v 1 — Jesus cuy epeyukxabimupokupok wuyukxabimupokupokapxeem — ioꞌe Pilatos sorarayũ be.
\p Oꞌyukxabimupokupok ip sorarayũ. 
\v 2 Jesus waywayway pin ip osodop. Jesus ijodiat kukat iap waywayway pin osodop ip. Imẽnpuye widaohobune oꞌsubunemuwakẽn ip yabeam. Oꞌjomõg̃ ip ya be ijodiat kukat a beat mõg̃ap coꞌi. Iekabek oꞌg̃uõm ip Jesus pe ijodiat kukat ekabek coꞌiat. Oꞌg̃uõm ip iberenat- -iremrumg̃ug̃ũnat. Oꞌg̃uõm ip iwaywayway am.
\p
\v 3 — Akꞌi! Teku Judeuyũ kukukat! — ioꞌe ip Jesus waywayway am.
Wararaꞌacat ma ip oꞌtopaokaka jebum.
\p
\v 4 Pilatos waram oꞌju jedukꞌa ekorara be. Judeuyũ kukukayũ kay oꞌju.
\p — Akꞌi! — ioꞌe. — Waram ixe otojocat eyetabixe am — ioꞌe. — “Oxe bit ite ikẽrẽat oꞌjukuk g̃u- -pũg̃ em tak kaꞌũma,” i õn eꞌem eywebe — ioꞌe Pilatos.
\p
\v 5 Imẽnpuye ixe Jesus oꞌjẽm ukꞌa bewi. Xerwun. Oꞌju Pilatos xe. Oajẽm adeayũ wap. Yabeat kug̃ mabuk osunuy- -widaohobune kug̃. Iekabek kug̃ mabuk osunuy- -iremrumg̃ug̃ũnat kug̃.
\p — Akꞌi juy epeꞌe — ioꞌe Pilatos adeayũ be. — Ijoce ma ag̃okatkat — ioꞌe cebe ip.
\p
\v 6 — Ite ba juy esubamupayaat korosa be ceꞌũ ãm — ioꞌe ip yaꞌõberen paĩyũ kukukayũ, Deus eju kawẽnwẽnapꞌa wiwiꞌukayũ dak.
\p Oꞌjewãwã ip. Imẽn oꞌe ip Jesus co buje.
\p — Ite ba juy esubamupayaat korosa be ceꞌũ ãm — ioꞌe ip yaꞌõberen.
\p — Eyju ma juy epejat — ioꞌe Pilatos cebe ip. — Eyju ma juy epesubamupaya korosa be — ioꞌe. — Oxe bit cũg̃ g̃u wuywebe yaoka am. Oxe ikẽrẽat oꞌjukuk g̃u- -pũg̃ em tak kaꞌũma — ioꞌe.
\p
\v 7 — Cũg̃ ma ocexe bit yaoka am cekawẽnkẽrẽ buye — ioꞌe Judeuyũ kukukayũ. — “Deus ipot õn,” i juk adi oꞌe teku — ioꞌe ip. — Imẽnpuye ocedobuyũꞌũmꞌũm ekawẽn tag̃ oceju yaokam — ioꞌe ip.
\p
\v 8 Pilatos iparara jĩjã ma oꞌe “Deus ipot õn,” i teku eꞌem iap tobuxik puje. 
\v 9 Waram oõm jedukꞌa be Jesus eju kawẽn ãm. 
\p — Apomawi ejot? — ioꞌe Pilatos Jesus pe.
\m Imẽnpit Jesus jededem g̃u.
\p
\v 10 — Ede pin g̃u du owebe? — ioꞌe Pilatos. — Waꞌõbuyxi õn. “Iteba juy epesubamuwekap,” i õn eꞌem pima, jebamuwekap ip. Ekupinap tag̃ eceku — ioꞌe Pilatos. — “Epesubamupaya korosa be ceꞌũ ãm,” i õn eꞌem pima bit, jebamupaya ip eꞌũ ãm — ioꞌe- -Jesus pe oꞌe.
\p
\v 11 — Aꞌõbuyxi ẽn Deus cuk aꞌõbuyxian emuy buye — ioꞌe Jesus. — Emuyꞌũm pima, apẽn kuka ece owebe? Kaꞌũma ma! — ioꞌe- -Jesus oꞌe. — Ewebe oaokaan puje, ikẽrẽat kug̃ eceꞌe Deus xe. Ebodi ma bit ekay odojocat pit ikẽrẽat kug̃ jeꞌe cexe — ioꞌe.
\p
\v 12 Iboap co buje, Pilatos Jesus pa muwekap ojuy jĩjã oꞌe.
\p — Jesus pa muwekap ojuy oce — ioꞌe Pilatos jewebe ma.
\p — Roma ka kukat itakoma soat kay- -“Õn ma ijodiat kukat,” iꞌeꞌeꞌukayũ kay — ioꞌe Judeuyũ kukukayũ Pilatos pe. — César itakoma cekay ip — ioꞌe ip. — Ewebe ibamuwekap puje, César kuka itakoma oꞌe ekay dak — ioꞌe ip Pilatos pe.
\p
\v 13 Pilatos waram Jesus oꞌtujowat jedukꞌa eakiju. Oꞌtujowat adeayũ wap iboap co buje. Pilatos oabik ibimãmãmãat ekawẽn cocoꞌukap pe. Gabatá i ukꞌa eakijuat putet osunuy. Gabatá witaꞌa mug̃ẽg̃ẽ iape wuyaꞌõm. 
\v 14 Sexta-feira kaxicug̃ osunuy. Sábado emap kabia Judeuyũ jekaxipanpan ip oꞌe peta muyꞌan- -Páscoa epeta muyꞌan.
\p — Akꞌi juy epeꞌe — ioꞌe. — Teku eykukukat — ioꞌe Pilatos Judeuyũ kukukayũ be.
\p
\v 15 — Ite g̃u ocekukukat! i oꞌjede paĩyũ kukukayũ. — Ite juy eyaokaat! — ioꞌe ip yaꞌõberen. — Ite juy eyaokaat — ioꞌe ip. — Esubamupayaat korosa be ceꞌũ ãm — ioꞌe ip jetakoma pibun.
\p — Eykukukatpa du osubamupayaat korosa be? — ioꞌe Pilatos.
\p — Pũg̃ ma wuykukukat — ioꞌe ip. — César acã wuykukukat — ioꞌe ip paĩyũ kukukayũ.
\p
\v 16 Imẽneju Pilatos jesorarayũ oꞌtomuwã.
\p — Ite juy epejat — ioꞌe cebe ip. — Epesubamupaya korosa be — ioꞌe cebe ip.
\p
\v 17 Jesus oꞌjat ip. Ibocewi oꞌjẽm ip Pilatos dukꞌa bewi.
\p G̃ebuje Jesus oꞌtujowat ip coꞌa kay. Wuyjuyũꞌariritꞌa i coꞌa butet osunuy. (Gólgota i coꞌa butet osunuy Judeuyũ aꞌõm). Korosa kug̃ oꞌju Jesus. Jay. Oajẽm ip. 
\v 18 Ig̃oꞌa be sorarayũ Jesus pa oꞌsubamupaya ip korosa jeje ipiju. Tag̃tag̃tag̃ꞌi tapoam oꞌe ip. Ibubida be tapoa oꞌjomuy ip. Cẽh. Korosa oꞌg̃uꞌag̃obucẽg̃ ip ipikũykũy be. Bẽg̃. Wararaꞌacayũ be dak oꞌsubamupaya ip korosa eju xepxepayũba. Waraꞌacat ceje oꞌsubamupaya ip korosa jeje. Pũg̃ korosa oꞌjomuy ip ipikũykũy be Jesus baꞌat kadi. Waraꞌat oꞌjomuy ip ibaꞌũg̃at kadi. Jesus ixeyũ parakpe osunuy korosa eju. Toroꞌih.
\p
\v 19 Pilatos tak taperadup oꞌtupmubararakat. Oꞌtupmõg̃at korosa eju. Tupararakatup oꞌtupcoco ip kapkamayũ “Jesus teku,” ioꞌe taperadup pe. “Nazaré ka bewiat- -Judeuyũ kukukat” ioꞌe taperadup pe. 
\v 20 Iboaptup oꞌtupmubararak ip Judeuyũ aꞌõm, Romanoyũ aꞌõm tak, Gregoyũ aꞌõm tak. Jesus oꞌsubamupayaiat ka Jerusalém ka tẽg̃ ma oꞌsukadop. Imẽneju iboaptup oꞌtupcoco Jerusalém ka be powatwatyũ. 
\v 21 Imẽneju paĩyũ kukukayũ oꞌjekawẽn Pilatos eju.
\p — “Teku Judeuyũ kukukat osunuy” iaptup g̃u juy etupmubararak, “ ‘Õn Judeuyũ kukukat,’ i juk adi oꞌe teku” iaptup acã — ioꞌe ip paĩyũ kukukayũ.
\p
\v 22 — Ap! — ioꞌe Pilatos. — Otupmuwarurun g̃u juy wemudupmubararaktup — ioꞌe.
\p
\v 23 Korosa eju Jesus pa mupaya buje sorarayũ cesay muꞌẽꞌẽ ojuy ip jewewebe. Cesay osodop ebadipdip. Sorarayũ dak ebadipdip osodop. Ibinũnpeat pit pũg̃ ma imug̃ẽg̃ẽ osunuy pag̃õm. Iinũmnũm g̃u ikug̃ osunuy. Soat iinũmnũmꞌũmat kay oꞌe ip sorarayũ.
\p
\v 24 — Ibinũnpeat ag̃uwek g̃u juy — ioꞌe ip jewewebe. — G̃aꞌa karatũg̃ꞌa joꞌiatꞌa ayaxik ipi ju. Yaꞌat puje pũg̃ ma jeꞌjat. Yaꞌat puje wuyetaybit aceꞌe abu jeꞌjat iam — ioꞌe ip jewewebe.
\p Oꞌyaxik ip ipi ju. Deus ekawẽntup eꞌem- -kuyjeatup:
\mi Wesay oꞌg̃uꞌẽꞌẽ ip jewewebe, i. Karatũg̃ꞌa joꞌiatꞌa oꞌyaxik ip obinũnpeat pu am, i.
\m Imẽn eꞌem Deus ekawẽntup. Sorarayũ be yaxik puje Jesus ekabek pu am, iboaptup ekawẽn tag̃ ip oꞌe. 
\p
\v 25 G̃ebuje Jesus jexi oꞌjojojo. Jesus xi korosa xe osunuy. Ixi kibit tak iboce osunuy. Maria Madalena dak iboce osunuy korosa xe. Waraꞌat Maria dak iboce osunuy- -Clopas tayxi.
\p
\v 26 Jesus jexi oꞌjojojo. Doze beayũꞌinat ixi xe osunuy. Ixe Jesus emumukukpinput osunuy. Ixe dak Jesus cocom oꞌe.
\p — Tũꞌũ — ioꞌe. — Teku jekuk g̃asũ jexi kukap coꞌi — ioꞌe. 
\v 27 — Tapu — ioꞌe jemumukukpinput pe. — Oxi juy ejukuk g̃asũ exi kukap coꞌi — ioꞌe Jesus.
\p Ixe ag̃okatkat Jesus xi oꞌg̃uõm jedukꞌa be g̃ebuje bit. Jesus eꞌũ buje jexi kukap coꞌi ma xipan oꞌjukuk.
\p
\v 28 Jesus itaybit oꞌe soat wekapikap og̃uꞌũm iam.
\p — Obipuruk — ioꞌe Jesus.
\p Iboam oꞌe Deus ekawẽntup ekawẽn tag̃.
\p
\v 29 Uvaꞌabidi oꞌtinuy iboce waꞌe joꞌiatꞌa be- -tideibog̃ꞌũmati. Iboceat tibubuap oꞌg̃uakõm ig̃odi be. Oꞌjomuy ip ipꞌabi be hissopoꞌip abi be. Bẽg̃ꞌi. Oꞌyopmuyu Jesus pe tikõn ãm. 
\v 30 Oꞌtikõn tibubuap pewi. Korotkorotꞌi.
\p — Soat wekapikap og̃uꞌũm — ioꞌe Jesus.
\m Oꞌjeꞌaetore. Jekpiwan ma oeꞌũ.
\p
\v 31 G̃ebuje Judeuyũ kukukayũ ibamupayaꞌibit mukop ojuy korosa ejuwi. Oꞌju ip kawẽn ãm Pilatos eju- -iecug̃ap eju.
\p — Ocebuꞌu jĩjã jebodoydoyap kabia be korosa eju ceꞌũꞌũayũ nuy ãm — ioꞌe ip. — Ibamupayaꞌibit tao juy etaodakacat dao ma ceꞌũ ãm — ioꞌe ip Pilatos pe. — Ixeyũꞌũmꞌũm cuy eg̃ukopat Sábado ajẽm awap — ioꞌe ip Pilatos pe.
\p Imẽn oꞌe ip sexta-feira buye. Kuyaje Sábado- -jebodoydoyap kabia. Judeuyũ xe petabog̃ cĩcã osunuy. Imẽneju ibuꞌu jĩjã ip osodop ixeyũꞌũmꞌũm nuy ãm korosa eju Sábado bima- -jebodoydoyap kabia bima.
\p
\v 32 Imẽneju sorarayũ oꞌju korosa ejuayũ kay. Wẽg̃. Pa. Koapatao oꞌtaodakat ip korosa ejuatao. Wẽg̃. Pa. Waraꞌacatao dak oꞌtaodakat ip- -Jesus eju ibamupayaꞌibitao. 
\v 33 Sorarayũ oajẽm Jesusꞌũm kay.
\p — Kuy oeꞌũ — ioꞌe ip jewewebe.
\p Imẽnpuye Jesusꞌũmtao oꞌtaodakat g̃u ip. 
\v 34-37 Imẽn eꞌem Deus ekawẽntup:
\mi 
Ixe dao taodakat g̃u ip- -pũg̃tao dak kaꞌũma, i.
\m Tik. Oꞌyaꞌõxamutik. Sorara Jesusꞌũm oꞌyaꞌõxamutik obukakaꞌukren. Waraꞌatup imẽn eꞌem- -Deus ekawẽntup:
\mi Yaꞌõxamutikꞌibit kay jeakak ip wuyjuyũ, i.
\m Kuyjeatup ekawẽn tag̃ oꞌjebapuk Jesus eꞌũ buje- -Deus ekawẽntup ekawẽn tag̃. Jesusꞌũm oeꞌũiap oꞌjojojoiat ceꞌũap oꞌg̃uwẽn ocewebe. Ocetaybit ixe icẽmãn eꞌem iam. Oceju dak Jesusꞌũm eꞌũap muwẽnuwẽn eywebe dak eyetabun cekay am.
\p
\v 38 José oꞌju Pilatos kay Jesusꞌũm jebit mukopap ojuy korosa ejuwi. Arimatéia ka bewiat osunuy ixe. Jesus kay itabut osunuy. Ibapug̃ g̃u bit Jesus kay wetabut iꞌeꞌeꞌuk osunuy wararaꞌacayũ be- -ibaꞌarẽm mabuk. Ibapug̃ g̃u iꞌeꞌeꞌuk osunuy Judeuyũ kukukayũ buxim jeparara buye.
\p — Jesusꞌũm jebit mukop ojuy õn pit korosa ejuwi — ioꞌe José Pilatos pe.
\p — Haꞌa — ioꞌe Pilatos. — Esujebitmukop — ioꞌe. 
\p José oꞌju Jesusꞌũm kay- -korosa ejuatꞌũm kay. Ijebit oꞌg̃ukop korosa ejuwi.
\p Oꞌtujowat witabikũy kay. 
\v 39 Nicodemos oꞌju José eju. Imudeꞌoꞌonap kug̃ oꞌju. Ade ikug̃ oꞌju- -45 kilo ikug̃. Iwekoykeyap osunuy imudeꞌoꞌonap. Mirraꞌip peati tiwekoykey oꞌe aloéꞌip peati eju. Jesusꞌũm jebit mudeꞌoꞌon ojuy ig̃ẽmap puxim. Ixe Nicodemos kuy bima Jesus eju oꞌjekawẽn ixima be. 
\v 40 Xepxepayũ Jesusꞌũm jebit oꞌjat- -José, Nicodemos tak. Imudeꞌoꞌonap oꞌg̃uwedi ip pag̃o dag̃- -xipacat tag̃. Ijebit oꞌjomũnmũn ip ixem pag̃õm. Pereh. Imẽn ma Judeuyũ wuyjuyũꞌũmꞌũm muxipanpanꞌuk ip osodop witabikũy be imuõm ãm. 
\v 41 Kadaidip oꞌtiptop Jesus pamupayaap pe. Ig̃odip pe witabikũy oꞌsukũynuy- -wuyjuyũꞌũmꞌũm muõmuõmapkũy. Ikũyisuatkũy oꞌsukũynuy. Ikũyisuatkũy be ceꞌũat oꞌjomõg̃ g̃u buk ip. 
\v 42 Sexta-feira osunuy. Sexta-feira bima jexat muxipanpanꞌuk ip osodop Judeuyũ Sábado bima iꞌoꞌibin. Sábado bima jebodoydoyꞌuk ip osodop. Witabikũy ibamupayaap tẽg̃ ma oꞌsukũynuy. Imẽneju Jesusꞌũm oꞌjomõg̃ ip ig̃okũy be.
\b
\c 20
\p
\v 1 Domingo bima Maria Madalena oꞌju witabikũy kay. Kabiakabiaꞌi bima oꞌju. Kabiok ma bima buk oꞌju. Ikũynomudipꞌa oꞌyajojo witaꞌa. Yabog̃atꞌa oꞌyajojo. Tũybe wuyjuyũ oꞌtujupaꞌum ijebit iãn oꞌe Maria. Yawede oꞌyadobuxik tomudipꞌa. 
\v 2 Oꞌjedau Pedroyũ kay. Oajẽm cekay ip. Pũg̃ ixeyũꞌin Simão Pedro osunuy. Waraꞌacat Jesus emumukukpinput osunuy. Ixe dak Jesus eju etaybitbinat osunuy. 
\p — Wuykukukatꞌũm oꞌtujupaꞌum ip witabikũy bewi — ioꞌe Maria xepxepayũ be. — Poce xeꞌe ip ixeꞌũm oꞌjomõg̃? Ocetaybit g̃u — ioꞌe. 
\p
\v 3 Oꞌjẽm Pedroyũ jedukꞌa bewi. Oꞌju ip witabikũy kay. 
\v 4 Xepxem ma oꞌju ip daudaum. Wararaꞌacat pit dao ma oꞌjedau. Koap oajẽm witabikũy be. Jay. 
\v 5 Atoroh. Oꞌjeꞌatoro ikũy kay. Etaburut. Oꞌjetaburut. Pag̃o oꞌjojojo irucat. Ijebit mũnmũn oꞌjojojo. Imẽnpit oõm g̃u ikũy be. 
\v 6 Kanomũm Simão Pedro oajẽm. Jay. Oõm witabikũy be Simão Pedro. Cereg̃. Bodiku pag̃o osodop irucat xipacat. Ibo oꞌjojojo. 
\v 7 Waraꞌat pag̃o oꞌtobuxik- -Jesusꞌũm a dag̃ osodopiat. Yadag̃ osodopiat ijebit mũnmũnap epag̃o xe g̃u osodop. Waraꞌat pe ma osodop. Iekabek acã osodop yaꞌa oꞌyadopiat pe. Kaꞌũmg̃u ijebit pit. 
\v 8 Waraꞌacat tak oõm g̃asũ- -Jesus eju etaybitbinat- -Jesus emumukukpinput. Badi oꞌjeak.
\p — Akꞌi ece! Kaꞌũmg̃u ijebit! — ioꞌe jewebe ma. — Waram Jesus oꞌjetait! — ioꞌe jewebe ma.
\p
\v 9 Deus ekawẽntup imẽn eꞌem:
\mi Deus ixe g̃uyu ceꞌũꞌũayũ xewi, i.
\m Kuy bima ibodup ekawẽn cekawẽn paꞌarẽm osodop cexe ip. G̃asũ bit ibapuk oꞌe Jesus eju etaybitbinayũ xe.
\p
\v 10 Xepxepayũ ma oꞌjepit jedukꞌa be.
\p
\v 11 Maria Madalena bit waram oꞌju witabikũy jom. Jay. Oajẽm. Ikũy jojom osunuy itabẽg̃ ikũy etakobe. Wa osunuy. Oꞌjeꞌatoro. Atoroh. Axih. Wa oꞌe. Oꞌjetaburut ikũy be.
\p
\v 12 Deus ekawẽn tojotjotꞌukayũ oꞌjojojo xepxepayũ- -kabi kadiwiayũ. Cesay irucat kug̃ ip osodop. Kaxikxikꞌi osodop ip Jesusꞌũm osodopiap pe. Pũg̃ ixeyũꞌin yaꞌa oꞌyadopiap pe osunuy. Waraꞌacat ixeyũꞌin sui oꞌsuidopiap pe osunuy.
\p
\v 13 — Tũꞌũ — ioꞌe ip Maria be. — Abu-kay ẽn wa? — ioꞌe ip.
\p — Okukukatꞌũm kay — ioꞌe. — Okukukatꞌũm oꞌtujupaꞌum ip — ioꞌe. — Imẽnpuye õn wa. Wetaybit g̃u poce ip oꞌjomõg̃ iam — ioꞌe. 
\p
\v 14 Oꞌjekorepẽn imẽg̃ap e buje. Jesus cũg̃ꞌi osunuy tõg̃pikadi. Jesus oꞌjojojo. Imẽnpit itaybit g̃u oꞌe ixem. Oꞌjetabiebaꞌarẽm ixem. Tũybe ija g̃u iãn oꞌe.
\p
\v 15 — Tũꞌũ — ioꞌe Jesus. — Abu-kay ẽn wa? — ioꞌe cebe. — Abu-kudadam ẽn? — ioꞌe.
\p Tũybe sute kadaidip wiwiꞌukat iãn oꞌe Maria cebe.
\p — Okukukatꞌũm kudadam õn — ioꞌe. — Ẽn tu ixeꞌũm etujujẽm? Poce ejomõg̃iap cuy eg̃uwẽn owebe! — ioꞌe. — Õn ma oju ixeꞌũm tujupit am — ioꞌe. 
\p
\v 16 — Maria! — ioꞌe.
\p Oꞌjekorepẽn Jesus kay.
\p — Raboni — ioꞌe jaꞌõm- -Judeuyũ aꞌõm.
\m (Raboni wekariwa iape).
\p
\v 17 — Obaixig̃ g̃u ece — ioꞌe. — Webay kay buk oceu g̃u — ioꞌe Jesus. — Eju juy okitpiyũ kay- -oweju etaybitbinayũ kay — ioꞌe. — “Webay kay waram oceu- -eyebay kay,” i juy ece cebe ip — ioꞌe. — “Wuyebay Deus oxe, eyxe dak,” i juy ece cebe ip — ioꞌe Jesus Maria be.
\p — Hm hm — ioꞌe- -Maria oꞌe.
\p
\v 18 Maria Madalena oꞌju Jesus eju etaybitbinayũ kay. 
\p — Wuykukukat ojojojo! — ioꞌe cebe ip. — Waram oꞌjetait! — ioꞌe.
\m Jewebe Jesus oꞌeꞌe iap oꞌg̃uwẽn cebe ip.
\p
\v 19 Kabiog̃ pima Jesus oꞌjebapuk jeweju etaybitbinayũ kay. Ixe Domingo bima oꞌjebapuk cekay ip. Awerom ip osodop ukꞌa be. Cem maꞌg̃u tomudipdip osunuy xĩntabi, Judeuyũ kukukayũ buxim iparara buye. Inaka Jesus oꞌjebapuk cekay ip.
\p — Kabaꞌũm cuy epeyewekuk — ioꞌe cebe ip.
\p
\v 20 Oꞌjewebumupaya cekay ip. Oꞌjewaꞌõxamubapuk cekay ip. Icokcok cĩcã ma ip oꞌe jekukukat tobuxik puje.
\p
\v 21 — Kabaꞌũm cuy epeyewekuk — ioꞌe waram Jesus. — Webay juk omudot ijodi. Imẽnpuxim õn tak jeymuju omuwẽn ãm ijodiat pe — ioꞌe.
\p
\v 22 Jebido oꞌsubidomuju cekay ip. Puw ioꞌe.
\p — Obiõg̃buk og̃uõm eywebe — ioꞌe. — Xipacat og̃uõm eywebe — ioꞌe cebe ip. 
\v 23 — “Deus ikẽrẽat juꞌuk eywebewi” i eyꞌe buje, ikẽrẽat juꞌuk ixeyũ bewi — ioꞌe. — “Deus ikẽrẽat juꞌuk g̃u eywebewi” i eyꞌe buje bit, juꞌuk g̃u ikẽrẽat ixeyũ bewi — ioꞌe Jesus.
\p
\v 24 G̃ebuje Jesus oꞌju Tomé kay- -jeweju etaybitbinat kay. Ixe Tomé doze beayũꞌin osunuy. Xepxem ikapꞌibit i ixe butet osunuy waraꞌat ibutet. Wararaꞌacayũ eju g̃u ixe Tomé osunuy ixeyũ kay Jesus ebapuk puje. Jesus oꞌjojojo g̃u buk waram cetait puje. 
\v 25 Imẽnpuye wararaꞌacayũ oꞌjekawẽn Tomé eju- -ceweju etaybitbinayũ.
\p — Tapu, wuykukukat ma ocejojojo! — ioꞌe ip. — Waram g̃uto oꞌjetait! — ioꞌe ip.
\p — Dapxi eyju! — ioꞌe. — Wetabut g̃u oce waram ixeꞌũm oꞌjetait iap kay — ioꞌe. — Tapoa kũybut cocomꞌũm pima, wetabut g̃u oce — ioꞌe. — Tapoa kũybut pe osubumõg̃ꞌũm pima dak, wetabut g̃u oce — ioꞌe. — Yaꞌõxatikat pe osubumõg̃ꞌũm pima, wetabut g̃u oce — ioꞌe Tomé.
\p
\v 26 7 xet kap puje Jesus eju etaybitbinayũ waram awerom osodop ip ukꞌa be. Tomé dak cexe ip oꞌe. Ukꞌa exĩntabi tomudipcẽm cĩcã osunuy. Jesus pit oõm ig̃oꞌa be. Onze beayũ kay waram oꞌjebapuk.
\p — Kabaꞌũm cuy epeyewekuk — ioꞌe Jesus cebe ip.
\p
\v 27 Jesus dao ma oꞌjeak Tomé kay. Akꞌi oꞌe. Oꞌjekawẽn ceweju- -Tomé eju.
\p — Ak ece obubida kay — ioꞌe Tomé be. — Tapoa kũybut cuy ejojojo obubida be — ioꞌe. — Tapoa kũybut pe juy ebu esubumuõm — ioꞌe. — Waꞌõxatikat pe juy ebu esubumuõm itikatkũybut pe icẽmãm poro iam — ioꞌe Jesus. — “Ixeꞌũm waram oꞌjetait g̃u,” iꞌũmg̃u juy ece — ioꞌe. — Etabun cuy eg̃uy! — ioꞌe.
\p
\v 28 — Kariwa, wetabut ekay — ioꞌe Tomé. — “Ẽn ma Deusat,” i õn eꞌem — ioꞌe- -Tomé oꞌe.
\p
\v 29 — Etabut ojojom ẽn puye — ioꞌe Jesus. — Wararaꞌacayũ bit ojojo g̃u. Inaka itabut jeꞌe ip okay. Icokcok cĩcã ma ip jeꞌe — ioꞌe.
\p
\v 30 Jesus jaꞌõbacaap oꞌjomõg̃mõg̃ jeweju etaybitbinayũ etabixe. Soat g̃u yaꞌõbacaap mõg̃mõg̃ap mubarararag̃ õn ijudup pe. 
\v 31 Pũg̃pũg̃ ã õn imubarararag̃ ijudup pe Jesus pe oꞌg̃ubapukpukiap. Iboap og̃ubararak eymutabut am Jesus Deus emunaẽ iap kay, Jesus Deus ipot iap kay dak. Iboap kay eyetabun pima, ixe aꞌõbi eyag̃uyisum epeku ijodi; eyetait epesop cexe eyeꞌũ buje dak.
\b
\c 21
\p
\v 1 G̃uyjom Jesus waram oꞌjebapuk jeweju etaybitbinayũ kay. Iodi xe oꞌjebapuk cekay ip. Iodi butet Tiberíades i osunuy. Oꞌjeꞌawero ip 7 beayũ ceweju etaybitbinayũ. Iodi xe oꞌjeꞌawero ip. Pũg̃ em g̃u oꞌjebapuk ceꞌũꞌũꞌibiyũ xewi jeu buje. 
\v 2 Ibũrũ ma ibutet osodop ip: Simão Pedro i, Tomé i, Natanael i, Zebedeu ipotpoyũ xepxep, wararaꞌacayũ dak xepxep. Xepxem ikapꞌibit i Tomé butet osunuy waraꞌat ibutet. Natanael Caná ka bewiat osunuy- -Galiléia eipi bewiat. Ibũrũ ma oꞌjeꞌawero ip.
\p
\v 3 — Cum puk õn axima bum — ioꞌe Simão Pedro jebureyũ be.
\p — Haꞌa — ioꞌe ip. — Oceju dak cum eweju ocexat pum — ioꞌe ip.
\p Ixima dag̃ axima bubum ojuy ip. Kobe be ip oõm axima bu pinayũ. Haham oeku ip. Imẽnpit oꞌjat g̃u ip. Teꞌe ma ip oeku.
\p
\v 4 Jesus oꞌjebapuk iodi wãbu be kabia buje. Imẽnpit teku wuyekariwa iap ibaꞌarẽm oꞌe 7 beayũ xe. Itaybit g̃u oꞌe ip teku wuyekariwa iam. Wĩnãbu wi oꞌjewãwã cebe ip.
\p
\v 5 — Tapupuyũ — ioꞌe Jesus cebe ip. — Peburũ axima epejat?
\p — Kaꞌũma ma — ioꞌe ip. — Ocejat g̃u! Teꞌe ma oceku — ioꞌe ip.
\p — Eybaꞌat kadi ma ũrũ epeg̃uakõm — ioꞌe Jesus. — G̃ebuje bit ade ma epejat — ioꞌe.
\p — Hm hm — ioꞌe ip.
\p
\v 6 Tok. Ũrũ oꞌg̃uakõm ip jebaꞌat kadi. Ade oꞌjat ip axima. Ũrũ mupuxik paꞌore oꞌe cebe ip axima poxi pibun.
\p
\v 7 — Akꞌi juy g̃okayku! Wuykukukat ma g̃oku! — ioꞌe Jesus emumukukpinput Simão Pedro be.
\p Simão Pedro jeekabek oꞌg̃uõm jekukukat topabe jejuam. Jeekabek kug̃ g̃u kapikpikꞌuk osodop ip. Tip. Oꞌjetip iodi be dao ma Jesus kay jajẽm ãm. 
\v 8 Wararaꞌacayũ Jesus kay oajẽm kobe dag̃wi. Oajẽm ip ũrũ mupuxikpuxig̃ kobe ukpu bewi. Ade jĩjã osodop axima ũrũ be. Wũy g̃u ip osodop kapurũg̃ pewi- -100 metros acã. 
\v 9 Jay. Mug̃. Jesus oꞌjojojo ip. Axima yoyoy oꞌe daxa be. Pãoꞌa kug̃ tak osunuy.
\p
\v 10 — Aximaꞌin epetojot- -g̃asũ epejatꞌiatꞌin — ioꞌe Jesus cebe ip.
\p — Hm hm — Pedro oꞌe.
\p
\v 11 Oõm kobe be axima bum. Ũrũ oꞌg̃uwekap. Oꞌtujuu kapurũg̃ kay. Jay. Axima oꞌtojot. Ade osodop ũrũ be axima yobog̃at. 153 osodop ip. Inaka ũrũ oꞌjewek g̃u.
\p
\v 12 — G̃aꞌa acekõn — ioꞌe jeweju etaybitbinayũ be.
\p — G̃aꞌa — ioꞌe ip.
\p — Abu ẽn? — ioꞌe g̃u ma cebe.
\m Itaybit oꞌe ip wuykukukat teku iam- -waram oꞌjetaitiat teku iam.
\p
\v 13-14 Jesus pãoꞌa oꞌyabu. Axima dak oꞌjat. Oꞌg̃ũm cebe ip ixan.
\p
\v 15 G̃ebuje Jesus oꞌjekawẽn Simão Pedro eju- -João ipot eju. Oꞌjekawẽn ceweju jekõn epere buje.
\p — Simão — ioꞌe Jesus. — Wararaꞌacat kukpinap podi ma du okukpin exe? — ioꞌe.
\p — Hm hm, Kariwa — ioꞌe Simão. — Etaybit ebure õn iam — ioꞌe.
\p — Wekawẽn cuy eg̃utaybin itabunꞌisuayũ — ioꞌe Jesus. — Xipan cuy ixeyũ ejukuk apẽn ovelha kukat xipan jeõhõꞌitꞌit kukap puxim — ioꞌe.
\p
\v 16 — Simão — ioꞌe Jesus waram. — Okukpin tu exe?
\p — Hm hm, wekariwa — ioꞌe. — Etaybit ebure õn iam.
\p — Wekawẽn cuy okay itabucayũ eg̃utaybin — ioꞌe. — Xipan cuy ixeyũ ejukuk apẽn ovelha kukat jeõhõyũ kukap puxim — ioꞌe.
\p
\v 17 — Simão — ioꞌe Jesus waram. — Ebure du õn? — ioꞌe. 
\m Ebapũg̃ em imẽn oꞌjekawẽn Simão eju. Imẽnpuye Simão ig̃uycũg̃ oꞌe Jesus eꞌeap kay.
\p — Kariwa — ioꞌe. — Etaybit soan. Etaybit õn ebure iam.
\p — Wekawẽn cuy itabucayũ eg̃utaybin — ioꞌe Jesus. — Xipan cuy ixeyũ ejukuk apẽn ovelha kukat jeõhõyũ kukap puxim — ioꞌe. 
\v 18 — Simão, icẽmãn õn eꞌem ewebe. Jaypanꞌisum ekpiwat ma jekukuꞌuk eg̃uy. Esay muõm puje, ekupinap tag̃ acã jekukuꞌuk eg̃uy. Aypa bima bit ecejebaepacũg̃ wararaꞌacat pe ebamũn ãm correntebum. Wararaꞌacat jedujowat edaobuꞌunap tag̃ — ioꞌe Jesus.
\p
\v 19-24 Imẽn Jesus apẽn Pedro jeꞌũ iam oꞌg̃ukũyjo. Apẽn Pedro Deus dipap g̃ubapukpuk iam tak oꞌg̃ukũyjo.
\p — Obikuyap tag̃ cuy ejeku — ioꞌe Jesus Pedro be.
\p Jekorepẽn puje Pedro Jesus emumukukpinput oꞌjojojo. Cemumukukpinput doze beayũꞌin osunuy. Pedro nomuju oꞌe. 
\p — Kariwa — ioꞌe. — Apẽn jeꞌbapuk g̃uyjom g̃obeku? — ioꞌe Simão Pedro Jesus emumukukpinat co buje.
\p — “Apẽn jeꞌbapuk g̃obeku g̃uyjom,” iꞌũmg̃u juy ece owebe — ioꞌe. — “Õn tu wekariwa bikuyap tag̃ jekukum?” i acã ece ewebe ma — ioꞌe Jesus. — Obikuy bima bit kuka adi teku oeꞌũ g̃u — ioꞌe. — Obikuy bima, ijoce mabuk teku kuka adi osunuy waram wajẽmap com — ioꞌe. — Imẽn obikuy bima, akꞌadit maꞌg̃u kuka eg̃uy iboap kay — ioꞌe Jesus.
\p Imẽneju itabucayũ oꞌJekawẽn cĩcã jeweweju. Tũybe jeꞌũ g̃u iãn oꞌe ip. Imẽnpit:
\p — Teku jeꞌũ g̃u — iꞌũmg̃u oꞌe Jesus. — Obikuy bima kuka adi teku ijoce mabuk jeenuy waram wajẽmap com — i juk oꞌe Jesus.
\p Jesus eju oekukuiat ma apẽn Jesus cuk adi oꞌeꞌe iap oꞌg̃uwẽn ocewebe- -Jesus xe ikukpinat. Jesus tẽg̃ ma osunuy doze beayũ eju jekõnkõn pima Jesus eꞌũ awap.
\p — Kariwa, abu oceꞌin jeꞌũm ekay itakomaayũ be? — i juk oꞌe ceꞌũ awap.
Ixe ma Jesus oꞌeꞌeiap oꞌg̃uwẽn ocewebe. Wuyetaybit ixe icẽmãn eꞌem iam. Ixe ekawẽn mubarararag̃ õn ijudup pe- -cartadup pe.
\p
\v 25 Ade jĩjã ma osunuy Jesus eꞌeap. Soat g̃u ixe eꞌeap oꞌg̃ubararak cemudupmubararaktup pe- -ijudup pe. Soat pit ixe oꞌeꞌe iap mubarararag̃ pima, apoce dak kuka atupmõg̃? Tup ade jĩjã ma kuka oꞌe ibiatup. Oꞌe g̃u kuka ipi dag̃ wuywebe ibiatup mõg̃ ãm. Imẽn kuka oꞌe wuyxe.
\m Ibũrũ ma.