\id ACT Mundurukú [myu] NT (Brazil) -2010 bd. 
\h Atos
\toc1 Jesus Cristo emumujuyũ eꞌeap ekwẽn
\toc2 Atos dos Apóstolos
\mt JESUS CRISTO EMUMUJUYŨ EꞌEAP EKAWẼN
\c 1
\p
\v 1 Teófilo, kuy bima livrodup otupmubararak ewebeaptum. Apẽn ijodi bima Jesus cuk adi oꞌg̃utaybitbiniaptup otupmubararak, apẽn ixe juk adi oꞌeꞌeiaptup tak. Soat iboap og̃ubararak kuyatup pe ewebeaptup pe.
\p
\v 2 Kabi kay jeu awap Jesus doze be oꞌtaẽ ag̃okatkayũ. Oꞌtaẽ jeweju itaybinꞌibiyũm. Taẽꞌibiyũ oꞌg̃utaybin Deus biõg̃buk aꞌõbi jeu awap. 
\v 3 40 kabia ijodi oeku waram jetait puje. Ade em oꞌjebapukpuk jeweju etaybitbinayũ kay. Itaybit cĩcã ip oꞌe Jesus waram oꞌjetait iam, ade em ixe oꞌjojojo buye.
\p — Deus soat kukukan jeꞌe — ioꞌe ixe cebe ip.
\m
\v 4 Awerom pima Jesus oꞌjekawẽn g̃uto ceweju ip.
\p — Epewatwat g̃u juy Jerusalém ka bewi — Jesus oꞌe. — Ijop ka ma epesop. Ibiõg̃buk xipacat ajẽmap pit cuy epejowiwi. Webay ixe g̃udot eykay apẽn eywebe juk adi ocece iap tag̃ — ioꞌe. 
\v 5 — Kuy bima João ijodiat mubatisasan osunuy idibi be — ioꞌe cebe ip.
\p — G̃axĩn ma bit Deus biõg̃buk jajẽm eykay. Ibiõg̃buk xipacat jeõm eywebe — ioꞌe Jesus.
\m Jesus imẽn oꞌjekawẽn jeweju etaybitbinayũ eju.
\p
\v 6 Waram Jesus emumujuyũ oꞌjeꞌawero ip. Oꞌjekawẽn ip Jesus eju.
\p — Kariwa — ioꞌe ip. — G̃asũ du ocebadipyũꞌin ecejomuy ocekukukan- -Judeuyũ kukukan? — ioꞌe ip.
\p
\v 7 — Eyetaybicap g̃u iboam — ioꞌe Jesus. — Webay acã itaybit. Ixe jaꞌõbi ixeyũꞌin eykukukan iap kabia oꞌg̃uweg̃ũn. 
\v 8 Imẽnpit eywebe Ibiõg̃buk xipacat õm puje, Deus aꞌõbacaap kug̃ epekuku. Eyaꞌõcam omuwẽnuwẽn epekuku soat kaka dag̃. Omuwẽnuwẽn epekuku Jerusalém ka watwat pe, Judéia eipi watwat pe dak, Samaria eipi watwat pe dak, wũyatka watwat pe dak — ioꞌe.
\p
\v 9 Iboap muwẽn puje, Deus Jesus oꞌtujowat jewekay. Ceweju etaybitbinayũ etabutpe oꞌtujowat. Ag̃ ip oꞌe cekay. Ceuap oꞌjojojo ip. Paꞌũm. Oꞌjepaꞌũm kabikerereat pe Jesus. Ibaꞌarẽm oꞌe.
\p
\v 10 Kabi kay apũn pima ag̃okatkayũ oajẽm Jesus eju oekukuꞌiayũ kay- -xepxepayũ- -cesayrucayũ.
\p
\v 11 — Tapupuyũ — ioꞌe ip. — Apẽnpuye dak eyju jeapũnapũn kabi kay? — ioꞌe ip Jesus emumujuyũ be- -Galiléia eipi bewiayũ be. — Deus Jesus oꞌtujowat eyxewi. Oꞌg̃uyu kabi kay. Ceuap epejojojo. Jeuap puxim waram jeꞌpit — ioꞌe ag̃okatkayũ.
\p
\v 12 Jesus emumujuyũ oꞌjepit Jerusalém ka kay. Oꞌjẽm ip coꞌa bewi- -Oliveira dipꞌa bewi. Oliveira dipꞌa Jerusalém ka tẽg̃ ma oꞌyanuy- -pũg̃ kilometro ma. 
\v 13 Oꞌjeawero ip ukꞌa be- -umatꞌabi be- -Jerusalém ka be- -kuy bima osodop ip iatꞌa be. Ibũrũ ma ibutet osodop ip; Pedro i, João i, Tiago i, André i, Filipe i, Tomé i, Bartolomeu i, Mateus i, waraꞌat Tiago i, Simão i, Judas i. Tiago Alfeu ipot osunuy. Judas Tiago ipot osunuy. Simão jeipi kay jĩjãat osunuy. Ibũrũ ma awerom ip osodop umatꞌabi be. 
\v 14 Pũg̃ tag̃ ma ip jewag̃uyg̃uy osodop. Soat em jeꞌaweroroꞌuk osodop ip Deus eju kawẽn ãm. Aoyũ dak jeꞌaweroroꞌuk ip osodop ceweju ip. Maria cexe ip osunuy- -Jesus xi. Jesus kitpitpiyũ dak jeꞌaweroroꞌuk ip osodop ceweju ip.
\p
\v 15 Awerom pima, Pedro oꞌãy itabucayũ xewi. Ade jĩjã ip osodop Jesus kay itabucayũ. 120 osodop ip. Pedro oꞌjekawẽn ceweju ip.
\p
\v 16 — Okitpitpiyũ, eyaꞌõpicũg̃cũg̃ cuy epesop waꞌõ kay — ioꞌe. — Kuyje Davi apẽn Judas kuka oꞌe iap oꞌg̃uwẽn Deus biõg̃buk aꞌõbi. Ixe Davi ekawẽn ibararak opop Deus ekawẽn tup pe. Ixe Judas Jesus pu ojuyayũ oꞌtujowat cekay. G̃asũ oꞌjebapuk ibiat tup ekawẽn tag̃- -kuyatup ekawẽn tag̃ — Pedro oꞌe. 
\v 17 — Jesus ixe Judas oꞌtaẽ kapik am oceweju — ioꞌe. — Oceweju juk adi oekuku. 
\v 18 Imẽnpit ixe Judas Jesus oꞌg̃ũm itakomaayũ be. Dinheiro oꞌjat Jesus ũmap teim — ioꞌe Pedro. — Ipi oꞌjat ixem dinheirom. Ig̃o eipi be oꞌjewag̃obua. Yabitorom oꞌat. Oꞌjeꞌukedeg̃. Oꞌtũnpujẽm ijebit pewi. Oeꞌũ — ioꞌe Pedro cebe ip. 
\v 19 — Soat Jerusalém ka watwat ceꞌũap awẽg̃ oꞌyawẽg̃tobuxik ip. Imẽnpuye ibo eipi butet Aceldama i oꞌsubuteta ip jaꞌõm.
(Aceldama ag̃okatkat toy oꞌtoyjẽmiap ka iape wuyaꞌõm). 
\v 20 Imẽn eꞌem Salmo dup:
\mi Tukꞌa juy yabibug̃, i. Kaꞌũma ma juy jeꞌe ya be, i.
\m Waraꞌat tup imẽn eꞌem:
\mi Waraꞌat cuy jeenuy tũyap pe kapik am ixe dieg̃, i — ioꞌe Pedro.
\m
\v 21-22 Imẽnpuye waraꞌatꞌin cuy ataẽ oceweju ceku am ixeꞌũm tieg̃. Waraꞌatꞌin cuy ataẽ wuykukukat Jesus waram oꞌjetait iap muwẽn ãm soat pe — ioꞌe. — Jesus ocexe bima oceweju juk adi oekukuꞌiayũꞌin cuy ataẽ — ioꞌe. — Joãoꞌũm imubatisasan pima oceweju juk adi oekukuꞌiayũꞌin cuy ataẽ- -Deus Jesus muyu buje kabi kay oceweju oekukuꞌiayũꞌin — ioꞌe.
\p — Ibiat cuy ataẽ — ioꞌe ip.
\p
\v 23 — José juy ataẽ — ioꞌe pũg̃pũg̃ayũ.
\p — Barsabás cuy ataẽ- -cũg̃ cĩcãat — ioꞌe wararaꞌacayũ Pedro be.
\p — Matias cuy ataẽ — ioꞌe ip wararaꞌacayũ bit.
\p
\v 24 G̃ebuje oꞌjekawẽn ip Deus eju.
\p — Bay — ioꞌe ip. — Etaybit apẽn oceju jewag̃uyg̃uy iam. 
\v 25 Judasꞌũm oibuꞌun oceweju jeku am — ioꞌe ip. — Oibuꞌun ekpot eju am. Jekapikap oꞌsuiwat jejuap ka kay jeju am — ioꞌe ip. — Abu g̃u xeꞌe ocetaẽ oceweju jeku am Judasꞌũm tieg̃? Barsabás tu ocetaẽ? Matias g̃u xeꞌe? — ioꞌe ip Deus pe.
\m Imẽn oꞌjekawẽn ip Deus eju.
\p
\v 26 G̃ebuje yabararukatꞌa oꞌyaxik ip pũg̃ꞌin ip taẽ ãm. Imẽn itaybit ip oꞌe abu Deus oꞌtaẽ iam. Imẽn Matias oꞌtaẽ ip jeweju ip jeku am Judasꞌũm tieg̃. Ixe Matias onze beayũ eju oekuku g̃ebuje bit.
\b
\c 2
\p
\v 1 Deus biõg̃buk oꞌkop Jesus eju etaybitbinayũ kay. Pentecostes bima oꞌkop. Pentecostes i kabia butet osodop. Pentecostes ajẽm puje pũg̃ pe ma ip osodop awerom itabucayũ- -Jesus eju etaybitbinayũ dak- -doze beayũ. Judeuyũ petataꞌuk osodop ip Pentecostes kabia be. 
\v 2 Deus biõg̃buk imẽn oꞌkop cekay ip. Kabi bewiataꞌõ oꞌyaꞌĩjojo ip. Kabidoxixi aꞌõ buxim oꞌe kabi bewiatꞌaꞌõ. Kaxikxikꞌi osodop ip ukꞌa be. Soat ip oꞌyaꞌĩjojo. 
\v 3 Daxae joꞌiat oꞌjebapuk cekay ip. Daxae joꞌiat oꞌkop ceparakpe ip- -soat parakpe. Soat pe oꞌsueabik cebe ip. 
\v 4 Deus biõg̃buk imẽn oõm soat pe cebe ip.
\p G̃ebuje itabucayũ wararaꞌacatꞌaꞌõm ma oꞌjekawẽn. Deus biõg̃buk aꞌõbi oꞌjekawẽn ip wararaꞌacat aꞌõm. 
\v 5 Ade powatwat Jerusalém ka be osodop ip- -soat kaka dag̃wiayũ. Judeuyũ etabucap puxim itabut ip osodop Deus kay.
\p
\v 6 Ixeyũ aꞌõm ekawẽn co buje, soat ip oꞌju cekay ip yaꞌĩjom powatwat. Yag̃uyꞌũm ip oꞌe itabucayũ soat aꞌõm kawẽnwẽn puye. Soat ip jaꞌõ ma oꞌyaꞌĩjojo. 
\v 7 Imẽnpuye yag̃uyꞌũm ip oꞌe.
\p — Eyaꞌõpicũg̃cũg̃ cuy epesop — ioꞌe ip. — Soat ijoyũ Galiléia eipi watwat ma — ioꞌe ip. — Imẽnpit jaꞌõm g̃u kawẽnwẽn ip- -wuyaꞌõm acã — ioꞌe ip jewewebe. 
\v 8 — Apẽntak soat wuyju wuyaꞌĩjojom- -bekin pima wuyju kawẽnwẽnap aꞌĩjojom? — ioꞌe ip. — Wuyaꞌõm ma ip kawẽnwẽn! — ioꞌe ip jewewebe. 
\v 9 — Pártia eipi bewi ajot peta be, Média eipi bewi dak, Elão eipi bewi dak — ioꞌe ip. — Mesopotâmia eipi bewi dak ajot, Judéia eipi bewi dak, Capadócia eipi bewi dak, Ponto eipi bewi dak, Ásia eipi bewi dak, 
\v 10 Frígia eipi bewi dak, Panfília eipi bewi dak, Egito eipi bewi dak, Líbia eipi bewi dak, Cirene ka bewi dak, Roma ka bewi dak — ioꞌe ip. 
\v 11 — Pũg̃pũg̃ wuyꞌin Judeuyũ ma. Wararaꞌacayũ kaꞌũma. Ixeyũ etabucap coꞌi wuyju dak wuyetabut Deus kay — ioꞌe ip. — Creta eipi bewi dak ajot, Arábia eipi bewi dak. “Deus soat podi ma yaꞌõbaca,” iꞌeꞌem ip itabucayũ wuywebe. “Soat podi ma xipat ixe,” iꞌeꞌem ip wuywebe. Wuyaꞌõm ma kawẽnwẽn ip — ioꞌe ip jewewebe.
\m
\v 12 Imẽn oꞌe ip yag̃uyꞌũm puye. Yag̃uybabiꞌũmꞌũm oꞌe ip.
\p — Apẽnpuye wuyaꞌõm ip kawẽnwẽn? Ajom Deus wuymukũyjo ojuy? — ioꞌe pũg̃pũg̃ ceꞌin ip.
\p
\v 13 — Ikaꞌoꞌo ip — ioꞌe ip napa ma wararaꞌacayũ bit Jesus eju etaybitbinayũ waywayway am.
\p
\v 14 Kirikꞌãy. Pedro oꞌãy jekawen am jeꞌaweroꞌibiyũ be. Oꞌãy onze beayũ eju. Oꞌjekawẽn yaꞌõberen adeayũ be.
\p — Tapupuyũ Judeuyũ, Jerusalém ka wat, eyaꞌõpicũg̃cũg̃ cuy epesop waꞌõ kay — ioꞌe Pedro. 
\v 15 — Ocekaꞌoꞌo g̃u. Tũybe ip ikaꞌoꞌo iãn eyju eꞌem. Kaxicug̃ mabuk 9 horas acã. Kabiam pit oceju uvaꞌabidi kõnkõn g̃u. Õn jeymukũyjo apẽnpuye oceju eyaꞌõm ma kawẽnwẽn iam — ioꞌe.
\p
\v 16 — Apẽn Joel juk adi oꞌeꞌe iap tag̃ oceju eyaꞌõm kawẽnwẽn g̃asũ. Soat aꞌõm kawẽnwẽn. Imẽn eꞌem Joel emudupmubararaktup- -Deus ekawẽn muwẽnuwẽnꞌukat emudupmubararaktup:
\q
\v 17 “Ipiꞌũm awap obiõg̃buk og̃uju eykay,” iꞌeꞌem Deus, ioꞌe Joel. “Soat pe og̃uõm,” iꞌeꞌem, ioꞌe. “Enaxeg̃ebitbit wekawẽn g̃uwẽn,” iꞌeꞌem, ioꞌe. “Ag̃okatkayũ og̃uyxeyxey wekawẽn,” iꞌeꞌem, ioꞌe. “Aypapayũ dak og̃uyxeyxey,” iꞌeꞌem, ioꞌe. 
\v 18 “Obiõg̃buk og̃uju obuywatwatꞌukayũ kay- -ag̃okatkayũ kay, aoyũ kay dak,” iꞌeꞌem Deus, ioꞌe Joel. “Imẽnpuye wekawẽn g̃uwẽn ip,” iꞌeꞌem, ioꞌe. 
\v 19 “Iꞌe baꞌoreat og̃ubapuk kabi be. Og̃ubapuk ipi juayũ ag̃uy mubabiꞌũm ãm,” iꞌeꞌem, ioꞌe. “Soat podi ma waꞌõbaca iap og̃ubapuk adeayũ be,” iꞌeꞌem, ioꞌe. “Doy jedoyebapuk. Daxa dak jeꞌbapuk. Daxidig̃ tak jedig̃ebapuk,” iꞌeꞌem, ioꞌe. 
\v 20 Kaxiepiat kabiok jeꞌe. Kaxi ipakpuk jeꞌe doy-buxim. Imẽn jeꞌbapuk wuykukukat ajẽm awap, ioꞌe Joel. Ixe ajẽmap kabia idip cĩcã jeꞌe. Yajẽm puje ixe soat kukukan jeꞌe- -ipi juacayũ kukukan, ioꞌe Joel. 
\v 21 “Kariwa, odaxijom cuy ece” iꞌeꞌeꞌukat ma Deus idaxijo, ioꞌe Joel — ioꞌe Pedro.
\m — Imẽn Joel oꞌe Deus aꞌõbi — Pedro oꞌe.
\p
\v 22 — Israel naxeg̃ebitbit — ioꞌe. — Eyaꞌõpicũg̃cũg̃ cuy wekawẽn kay — ioꞌe. — Jesus cuy og̃uwẽn eywebe- -Nazaré ka bewiat. Ixe Jesus Deus aꞌõbi wuywebe iꞌe baꞌoreat mubapukpug̃ oeku. Wuymucoatcoanap mubapukpug̃ oeku. Deus aꞌõbacaap mubapukpug̃ oeku. Eyetaybit iboam eyetabutpe ixe oeku buye — ioꞌe Pedro adeayũ be.
\p
\v 23 — Ikẽrẽat mujurũg̃rũg̃ꞌukayũ Jesus oꞌjat. Oꞌjat ip apẽn Deus ibikuy osunuy iap tag̃. Eyju ma ikẽrẽat mujurũg̃rũg̃ꞌukayũ be Jesus epesubamupayaat korosa be ceꞌũ ãm- -Judeuyũ kukukayũ be. 
\v 24 Deus pit Jesus oꞌg̃utait waram. Ceꞌũ buje Jesus oꞌg̃uyu ceꞌũap pewi ibun topap puxim — ioꞌe.
\p
\v 25 — Deus aꞌõbi Davi Jesus oꞌg̃uwẽn wuydobuyũꞌũmꞌũm pe kuyje — ioꞌe.
\m — Imẽn Davi oꞌe:
\mi Okukukat, oparara g̃u, soat em ẽn ag̃ okay ibuye, soat em ẽn obuywatwan ibuye dak, i. 
\v 26 Ocokcok cĩcã ma õn eꞌem, ioꞌe. Soat em “Deus, ẽn xipat cĩcã oxe” i õn eꞌem, i. Wetaybit soat em exe og̃uy iam, i. Weꞌũ buje dak aꞌg̃u og̃uy ewiwim, i. 
\v 27 Okukukat, obiõg̃buk esuiwat g̃u ceꞌũꞌũayũ dopap pe, i. Wetabut cĩcã iboap kay, i. Ẽn ojebit iwan g̃u ierepap puxim, õn xipat exe buye- -õn ekpot puye dak, i. 
\v 28 Okukukat, waram adi ẽn omutait, i. Ẽn maꞌg̃u omukũyjo soat em wetabẽg̃ og̃uy exe iam, i. Omucokcokcog̃ eceꞌe soat em exe og̃uy buye, ioꞌe- -oꞌe Davi Deus aꞌõbi — ioꞌe Pedro.
\p
\v 29 — Tapupuyũ, ibapug̃ ma juy Davi og̃uwẽn eywebe — ioꞌe Pedro jebadipyũ be. — Kuyje ma wuyꞌajoreꞌũm oeꞌũ- -yaꞌõbuyxiatꞌũm oeꞌũ. Oꞌjomõg̃ ip witabikũy be. G̃asũ dak puk ixeꞌũm mõg̃apkũy omuy ma. 
\v 30 Ixe Deus ekawẽn muwẽnuwẽnꞌukat osunuy. “Enaxeg̃ebit wemunaẽm jeꞌe,” ioꞌe Deus cebe. “Wemunaẽ soat kukukan jeꞌe- -Israel eipi watwat kukukan,” ioꞌe Deus cebe. Soat em Davi iboap ekawẽn kay g̃ebum osunuy. 
\v 31 Itaybit osunuy Deus jemunaẽ g̃utait ceꞌũap tomukadi iam. Imẽn Cristo mutaicap oꞌg̃uwẽn imutait awap. Imẽn oꞌe:
\mi Deus jemunaẽ biõg̃buk oꞌsuiwat g̃u ceꞌũꞌũayũ dopap pe, i. Ijebit oierep g̃u, i — ioꞌe Pedro.
\p
\v 32 — Deus ixe Jesus waram oꞌg̃utait ceꞌũap tomukadi — ioꞌe Pedro. — Waram cetait puje ocejojojo. Imẽnpuye oceju iboap muwẽnuwẽn eywebe — ioꞌe Pedro. 
\v 33 — Deus Jesus oꞌg̃uyu kabi kay- -jenuyap kay. Deus xe Jesus omuy g̃asũ. Soat kukukan Deus eju. Deus coꞌi yaꞌõbaca. “Obiõg̃buk og̃uõm itabucayũ be,” ioꞌe Deus Jesus pe. G̃asũ Jesus Ibiõg̃buk xipacat oꞌg̃udot ijodi apẽn Deus cuk adi oꞌeꞌe iap tag̃ — ioꞌe Pedro. — Ixe aꞌõbi oceju eyaꞌõm ma kawẽnwẽn. Imẽnpuye eyju eyaꞌĩjojom g̃asũ — ioꞌe Pedro.
\p
\v 34 — Daviꞌũm jebit g̃u oꞌjeu kabi kay ceꞌũ buje. Imẽnpuye Davi oꞌe:
\mi “Oxe juy eg̃uy,” ioꞌe Deus wuykukukat pe, i. 
\v 35 “G̃asũ bit ekay itakomaayũ aꞌõbacaap og̃uꞌũm,” ioꞌe, i. “Kũyjobin jedop ip aꞌõ kay,” ioꞌe Deus, ioꞌe Davi ajore wuydobuyũꞌũmꞌũm pe — ioꞌe Pedro.
\m — Davi oꞌjewemuwẽn g̃u- -Jesus acã oꞌg̃uwẽnuwẽn — ioꞌe Pedro.
\p
\v 36 — Waꞌõ kay bit cuy eyaꞌõpicũg̃cũg̃ epesop — ioꞌe. — Eyju ma ocekukukat Jesus epesubamupayaat korosa be ceꞌũ ãm, Israel naxeg̃ebitbit maꞌg̃u eyju. Deus pit ixe oꞌjomuy wuykukukan. Deus ixe oꞌtaẽ soat taxijo am- -wuydaxijo am. Icẽmãn õn eꞌem eywebe — ioꞌe Pedro.
\p
\v 37 Iboap co buje ig̃uycũg̃cũg̃ cĩcã ip oꞌe.
\p — Tapupuyũ, apẽn oceꞌe g̃asũ? — ioꞌe ip Pedroyũ be- -Jesus emumujuyũ be.
\p
\v 38 — Eyg̃uycũg̃cũg̃ cuy epeꞌe ikẽrẽat kug̃ puye — ioꞌe. — Ikẽrẽat mujurũg̃rũg̃ap cuy epeyepere — ioꞌe Pedro. — Jewemubatisasaan cuy epesop “G̃asu bit Jesus Cristo ebekitkiyũ oceju” iꞌe am soat pe — ioꞌe. — Imẽn cuy epeꞌe Deus pe ikẽrẽatꞌuk am eywebewi. Imẽn eyꞌe buje Ibiõg̃buk xipacat jeõm eywebe- -Deus emumudot — ioꞌe. 
\v 39 — “Obiõg̃buk muõm pin õn eywebe,” ioꞌe wuykukukat Deus kuy bima — ioꞌe. — “Obiõg̃buk og̃uõm eywebe, eyebekitkiyũ be dak, eybadipꞌũmayũ be dak- -soat wemunomuwãyũ be,” ioꞌe Deus — ioꞌe Pedro.
\p
\v 40 Pedro imẽn ip oꞌyawẽwẽ.
\p — G̃asũacat ikẽrẽat mujurũg̃rũg̃ cĩcã — ioꞌe. — Imẽnpuye Deus xe g̃u ip jeedop ceꞌũ buje. Eyju bit ixeyũ ekukuap puxim g̃u juy epeku — ioꞌe. — Wũy g̃u juy epesop Deus wi eyeꞌũ buje — ioꞌe Pedro.
Imẽn Pedro ip oꞌyawẽwẽ.
\p
\v 41 Imẽneju adeayũ itabut oꞌe Jesus kay, Pedro Jesus oꞌg̃uwẽn puye. Tak g̃u ip oitabun- -3000 beayũ. Oꞌjewemubatisasan ip. Jesus aꞌõkayayũ eju ip oekuku g̃ebuje bit. 
\v 42 Itabunꞌisuayũ mutaybitbinꞌuk ip osodop Jesus aꞌõkayayũ. Jewemukũyjojoꞌuk ip osodop. Jeburerexi osodop ip itabucayũ. Jeweweju ip jekõnkõnꞌuk osodop. Jekawẽnwẽnꞌuk ip osodop Deus eju. Pãoꞌa oꞌoꞌuk osodop ip Jesus eꞌũap kay g̃ebum am.
\p
\v 43 Jesus emumujuyũ Deus aꞌõbacaap mubapukpug̃ oekukuku soat etabut pe. Wuymucoatcoanap mubapukpug̃ ip oekukuku. Imẽnpuye adeayũ itabẽg̃bẽg̃ oꞌe ip ijojom — Deus acã yaꞌõbaca — iꞌeꞌem.
\p
\v 44 Soat jeburerexi ip osodop Jesus kay itabucayũ. Jebubut muꞌẽꞌẽꞌuk osodop ip jewewebe. 
\v 45 Kaꞌũma ma tacup oꞌe jebure be. Jebubut taidadaꞌuk ip osodop dinheiro bu am, jeipi dak. Ixe dinheiro ũmũmꞌuk ip osodop tadaybocayũ be- -ibubutꞌũmayũ be. 
\v 46 Soat kabia Deus eju kawẽnwẽnapꞌa be jeꞌaweroroꞌuk ip osodop- -yabog̃atꞌa be. Jeweweju ip jekõnkõnꞌuk osodop jedukꞌa be. Awerom jekõnkõnꞌuk ip osodop jebureyũ eju. Imẽneju icokcok cĩcã ip osodop. Kaꞌũma ma jewexe yaꞌõca osunuy. Jewekay g̃u g̃ebum osodop ip- -jebure kay acã.
\p
\v 47 — Ẽn xipat cĩcã ocewebe — iꞌeꞌeꞌuk ip osodop Deus pe.
Soat itabutꞌũmayũ xe cũg̃ ma ip oekukuku.
\p Soat kabia Deus wararaꞌacayũ oꞌg̃utabun Jesus kay. Ixeyũ dak waraꞌacayũ itabucayũ burem oꞌe.
\b
\c 3
\p
\v 1 Pedro oꞌju Deus eju kawẽnwẽnapꞌa be- -yabog̃atꞌa be. João eju oꞌju. Katpujesu ip oꞌju. Ixe ehora bima Judeuyũ kawẽnwẽnꞌuk ip osodop Deus eju ig̃oꞌa be. 
\v 2 Ag̃okatkat iboce osunuy- -taojereat. Jekapꞌisum piap ma taojere osunuy. Soat kabia ibureyũ tujowatwatꞌuk ip osodop ig̃oꞌa exĩntabi be. Xĩntabi butet Idipat i osunuy. Xĩntabi be taojereat dinheiro ojuyjuyꞌuk osunuy ig̃oꞌa be õmõmayũ be. 
\v 3 Ixe taojereat Pedroyũ oꞌjojojo. Ig̃oꞌa be õm pima oꞌjojojo ip.
\p — Dinheiroꞌin — ioꞌe cebe ip.
\p
\v 4 Pedroyũ oꞌjeak cĩcã cekay.
\p — Akꞌi juy ece ocekay — Pedro oꞌe.
\m
\v 5 Taojereat oꞌjeak cĩcã cekay ip. Tũybe dinheiro ũm ip owebe iãn oꞌe.
\p
\v 6 Pedro oꞌjekawẽn cebe.
\p — Dinheiro kug̃ g̃u õn — ioꞌe. — Okukukat pit jaꞌõbacaap ũmũm owebe. Ixe aꞌõbi jemuꞌada õn. Edaodip eceꞌe Jesus aꞌõbi- -Nazaré ka bewiat aꞌõbi. Eꞌãy — ioꞌe Pedro.
\p
\v 7 G̃ebuje Pedro taojereat pu oꞌsubuixik ibaꞌat kadi. Oꞌg̃uꞌãy. Dao ma ikag̃obidip oꞌe. Sui dak suidip oꞌe. 
\v 8 Ixe taojere osunuyꞌibit oꞌjejoro. Icokcok oꞌe jedaodip puye. Oꞌjexĩg̃xĩg̃. Oõm Deus eju kawẽnwẽnapꞌa be Pedroyũ eju. Oꞌjecũg̃cũg̃ ig̃oꞌa be. Jejorojorom oꞌe jecokcokap pibun.
\p — Ẽn xipat cĩcã — iꞌeꞌem Deus pe oꞌjejore. — Odaomudim ẽn — iꞌeꞌem.
\p
\v 9 Soat ig̃oꞌa beayũ taojere tũibit oꞌjojojo ip cũg̃cũg̃ pima. 
Deus pe “Ẽn xipat cĩcã” iꞌeꞌem pima, oꞌjojojo ip. Oꞌjekawẽn ip jewewebe.
\p
\v 10 — Ixe bit mo aꞌg̃u taojere osunuy — ioꞌe ip. — Ixe bit xikꞌi mo aꞌg̃u nuynuy ijopꞌa exĩntabi be- -Idipat pe. Ixe bit mo aꞌg̃u dinheiro ojuyjuyꞌuk osunuy — ioꞌe ip. — Apẽnpuye dak ixe xipat oꞌjexĩg̃xĩg̃? — ioꞌe ip.
\p Taojere tũibit muꞌadaap tobuxik puje itabẽg̃bẽg̃ oꞌe ip ijojom. Taojere tũibit ibuꞌu jĩjã oꞌe Pedroyũ nomu eperem.
\p
\v 11 Soat ig̃oꞌa beayũ dak oꞌjedau ebapũg̃ayũ kay- -Pedroyũ kay, taojere tũibit kay dak.
\p — Akꞌi! — ioꞌe ip. — Pedroyũ taojereat oꞌtaomudim — ioꞌe ip jewewebe.
\p Pedroyũ Deus eju kawẽnwẽnapꞌa ekorara be osodop ip- -yabog̃atꞌa ekorara be. Ixe korara butet Salomão ekorara i osunuy.
\p
\v 12 Adeayũ jo buje, Pedro oꞌjekawẽn cebe ip, Israel naxeg̃ebitbiyũ be.
\p — Tapupuyũ, wekawẽn kay eyaꞌõpicũg̃cũg̃ cuy epesop — ioꞌe. — Apẽnpuye eyju dak eyetabẽg̃bẽg̃ ocejojom? “Ite ag̃okatkat taojereat oꞌtaomudim yaꞌõbaca jĩjã buye, cũg̃ ma Deus xe buye,” i teꞌe ma eyju eꞌem. Ocaꞌõbi g̃u oꞌjeꞌada- -Jesus aꞌõbi acã — ioꞌe. 
\v 13 — Ixe Jesus soat em ma kũyjobit Deus aꞌõ kay. “Kaꞌũmg̃u ixe joꞌiat xipacat” iꞌeꞌem Deus Jesus muwẽnuwẽn. Wuyetabut ixe Deus kay. Wuyꞌajojoyũꞌũmꞌũm tak itabut osodop ip cekay- -Abraãoꞌũm, Isaqueꞌũm tak, Jacóꞌũm tak. Eyju ma aꞌg̃u ixe Jesus epeg̃ũm cekay itakomaayũ be yaoka am. Pilatos ma oꞌe “Jesus oyaoka g̃u õn pit,” i. “Imujẽm õn eywebe yaokaap puxim,” ioꞌe. Eyju bit “Ixe juy eg̃ujẽm g̃u,” i mo aꞌg̃u epeꞌe iecug̃ap pe- -Pilatos pe. “Xipat g̃u teku,” i mo aꞌg̃u epeꞌe cebe. Jesus mo aꞌg̃u epejomuymuy jĩjã. 
\v 14 Ixe Jesus Deus bikuyap tag̃ acã oekukuku. Ikẽrẽat kug̃ g̃u osunuy Deus xe. Eyxe bit ikẽrẽat kug̃. “Ixe juy eyaokaat,” i mo aꞌg̃u epeꞌe Pilatos pe. Waraꞌacat oꞌyaokaꞌiat mujẽm ojuy epesop daomũnmũnapꞌa bewi. 
\v 15 Wuymutaicitꞌukat pit mo aꞌg̃u epeyaokaat- -wuymuisusunꞌukat. Deus pit ixe oꞌg̃utait waram. Jesus ocejojojo waram cetait puje. Imẽnpuye oceju waram cetaicap muwẽnuwẽn eywebe. 
\v 16 Ite taojere osunuyiat cocom eyju. Eyetaybit cĩcã ixem. Jesus aꞌõbi oceju ocetaomudim. Soat etabutpe ocetaomudim Jesus kay ocetabut puye — ioꞌe.
\p
\v 17 — Obadipyũ, waꞌõ kay eyaꞌõpicũg̃cũg̃ cuy epesop — ioꞌe. — Eyju mo aꞌg̃u Jesus epeyaokaat eyetaybitꞌũm puye. Wuyeipi kukukayũ dak itaybit g̃u osodop ip. Eyju mo aꞌg̃u eyetaybit g̃u ikẽrẽ jĩjã Jesus aokaam iam. Wetaybit iboam. 
\v 18 Imẽnpit kuyje “Deus emunaẽ juy ipiat supiꞌajo,” ioꞌeꞌeꞌe Deus ekawẽn muwẽnuwẽnꞌukayũ. Imẽn cuk adi oꞌe ip Deus aꞌõbi itaybit g̃u maꞌg̃u ip — ioꞌe. — G̃asu bit kuy Jesus ipiat oꞌsupiꞌajo apẽn cuk adi oꞌeꞌe ip iap tag̃. 
\v 19 G̃asũ bit eyg̃uycũg̃cũg̃ cuy epesop ikẽrẽat kug̃ puye. Ikẽrẽat mujurũg̃rũg̃ap cuy epeyepere Deus pe ikẽrẽat uk am eywebewi — Pedro oꞌe. — Eywebe ikẽrẽat mujurũg̃rũg̃ap epere buje, Deus ikẽrẽat juꞌuk eywebewi. Ixe jeydaxijo. 
\v 20 Wuybipurukꞌũmap puxim eycokcog̃ epesop Deus pe eydaxijo buje. G̃uyjom Deus waram Jesus g̃udot ijodi- -jemunaẽ g̃udot- -wuydaxijojoꞌukat g̃udot. 
\v 21 “Deus soat g̃uisun,” i juk adi oꞌeꞌe Deus ekawẽn muwẽnuwẽnꞌukayũ kuyje- -ikẽrẽat kug̃ꞌũmayũ. Deus soat g̃uisun. Imuisunꞌũm pima Jesus kabi be mabuk jeenuy — ioꞌe. 
\v 22 — Kuyje Moisés imẽn oꞌe:
\mi Deus wuybadipyũꞌin g̃uju eykay, i. Ixe Deus ekawẽn g̃uwẽn eywebe, i. Omudocap puxim ixe ag̃okatkat g̃udot, i. Eyaꞌõpicũg̃cũg̃ cuy epesop soat cekawẽn kay, i. Ixe aꞌõ dag̃ cuy epeku, i. 
\v 23 Deus ipiatꞌsupiꞌajoat ixe aꞌõkayꞌũmayũ be, i. Deus ebekitkiyũ wi wũy ma jeedop ip ceꞌũ buje, i.
\m Imẽn Moisés oꞌjekawẽn kuyje — Pedro oꞌe. 
\v 24 — “Deus emunaẽ omuyku- -ocebodi ma yaꞌõbuyxiat,” i juk adi oꞌeꞌe ip soat Deus ekawẽn muwẽnuwẽnꞌukayũ. Samuel imẽn oꞌeꞌe tomujuayũ dak. 
\v 25 Deus oꞌe Abraão be “Xipacat og̃ũm soat ipi juacat pe, enaxeg̃ebitbit cũg̃ ma oxe buye,” i. Deus imẽn jekawẽn oꞌg̃uwẽn eydobuyũꞌũmꞌũm pe ã g̃u- -eywebe dak. Deus jeꞌe eywebe apẽn cuk adi oꞌeꞌe jekawẽn muwẽnuwẽnꞌukayũ be iap tag̃ — ioꞌe. 
\v 26 — G̃ebuje Deus jekpot oꞌg̃udot eykay- -jaꞌõ kay kũyjobicat oꞌg̃udot. Ibikuy osunuy eywebe ikẽrẽat mujurũg̃rũg̃ap epere am. Ibikuy osunuy xipacat ũm ãm eywebe. Imẽneju jekpot oꞌg̃udot eykay — ioꞌe.
\m Pedro imẽn Israel naxeg̃ebitbit oꞌg̃ukũyjo.
\b
\c 4
\p
\v 1 Deus eju kawẽnwẽnapꞌa beayũ mukũyjojom pima, Judeuyũ epaĩyũ oajẽm Pedroyũ kay. Ig̃oꞌa wiwiꞌukayũ kukat tak oajẽm cekay ip, Saduceuyũ dak. 
\v 2 Pedroyũ kawẽnwẽn mabuk oꞌe ig̃oꞌa beayũ be.
\p — Wuyeꞌũ buje waram acejetait Jesus waram oꞌjetait jeꞌũap tomukadi buye — ioꞌe ip cebe ip.
\p Itakoma ip oꞌe Pedroyũ kay iboam ig̃oꞌa beayũ mukũyjojom puye. 
\v 3 Imẽnpuye oꞌjat ip. Daomũnmũnapꞌa be ip oꞌg̃uõm. Ixe exima be jeperem ojuy ip daomũnmũnapꞌa be, kuy katpuje jĩjã buye. 
\v 4 Cekawẽn cocoayũ dak itabut oꞌe ip Jesus kay. Ade jĩjã ip itabut oꞌe. 5000 be ag̃okatkayũ oitabun.
\p
\v 5 Kuyaje oꞌjeꞌawero ip Jerusalém ka be yaꞌõbuyxiayũ, Judeuyũ kukukayũ, Moisés ekawẽn imutaybitbinꞌukayũ dak. Jewawẽwẽꞌukayũ yobog̃ayũ ip osodop. 
\v 6 Ana tak oajẽm. Ixe Judeuyũ epaĩyũ kukukat osunuy. Caifás tak oajẽm, Alexandre dak, João dak. Wararaꞌacayũ dak oajẽm paĩyũ kukukat badipyũ. Soat ip oꞌjeꞌawero. 
\v 7 Pedroyũ oꞌtojocat ip jewekay.
\p — Abu-aꞌõbi taojere tũibit epeg̃uꞌada? — ioꞌe ip Pedroyũ be. — Abu-aꞌõbacaam epeg̃uꞌada? — ioꞌe ip cebe ip.
\p
\v 8 G̃ebuje Pedro oꞌjede jewawẽwẽꞌukayũ yobog̃ayũ be. 
Deus biõg̃buk cebe jĩjã osunuy. Imẽnpuye yaꞌõbacam oꞌjede cebe ip- -Judeuyũ kukukayũ be.
\p
\v 9 — Tapupuyũ — ioꞌe. — “Abu-aꞌõbi taojere tũibit epeg̃uꞌada?” i eyju eꞌem ocewebe, “Apẽntak ixe epeg̃uꞌada?” i dak — ioꞌe. 
\v 10 — Eyetaybin cuy epesop Jesus Cristo aꞌõbi oꞌjeꞌada iam- -Nazaré ka bewiat oꞌjeꞌada iam. Ixe xipat omuy eyetabutpe g̃asũ, Jesus Cristo aꞌõbi oꞌjeꞌada buye. Eyju ma juk ixe Jesus epesubamupayaat korosa be ceꞌũ ãm. Deus pit ixe oꞌg̃utait waram. Oꞌg̃uyu ceꞌũꞌũayũ dopap pewi. Jesus aꞌõbi ma ite taojere tũibit xipat cũg̃ꞌi ijoce g̃asũ. 
\v 11 Imẽn eꞌem Deus ekawẽntup pe:
\mi Ukꞌa muymuyꞌukayũ iteꞌa kay g̃u osodop ip- -witaꞌa kay g̃u, i. Iteꞌa bit ukꞌa muycemapꞌam oꞌe, i.
\m Jesus muwẽnuwẽn ig̃odup — ioꞌe Pedro. — Ukꞌa muymuyꞌukayũ iteꞌa kayꞌũmap puxim eyju dak Jesus kay g̃u — ioꞌe. 
\v 12 — Deus Jesus acã oꞌg̃udot wuydaxijo am. Kaꞌũmg̃u waraꞌat wuydaxijojoꞌukat soat kaka dag̃- -Jesus acã — Pedro oꞌe.
\m Pedro imẽn Judeuyũ kukukayũ oꞌg̃ukũyjojo- -jewawẽwẽꞌukayũ yobog̃ayũ. 
\v 13 Jaꞌõca oꞌjede ip Pedroyũ. Iparara g̃u ip oꞌe Judeuyũ kukukayũ buxim. Yaꞌõca oꞌe ip. Imẽnpuye Judeuyũ kukayũ itabẽg̃bẽg̃ oꞌe ip ijojom.
\p — Apẽn tak iteyũ oitaybitbin? — ioꞌe ip. — Itaybit g̃u ip apẽn Deus ekawẽntup eꞌem iam. Yaꞌõbuyxi g̃u ip. Apẽnpuye dak iteyũ xepxepayũ iparara g̃u wuybuxim? — ioꞌe ip.
\m Itaybit oꞌe ip Jesus eju oekuku ip iam.
\p
\v 14 Imẽntak taojere tũibit ceparakpe ip cũg̃ꞌi osunuy. Imẽnpuye Pedroyũ imuymuy baꞌore oꞌe ip cebe. 
\v 15 Pedroyũ oꞌg̃ujẽm ip jexewi.
\p
— Epejẽm cuy ijocewi g̃asũ bit — ioꞌe ip Pedroyũ be.
Imujẽm puje ip oꞌjewawẽ ip jeweweju.
\p
\v 16 — Apẽntak aceꞌe iteyũ ag̃okatkayũ be? — ioꞌe ip jewewebe. — Icẽmãn wuywebe iꞌe baꞌoreat oꞌg̃ubapuk ip — ioꞌe ip. — Soat Jerusalém ka watwat itaybit taojere tũibit oꞌg̃uꞌada ip iam. “Oꞌg̃uꞌada g̃u ip” iꞌe baꞌore wuywebe. 
\v 17 Jesus awẽg̃ jawẽg̃epõg̃põg̃põg̃ jeꞌe soat ka dag̃ — ioꞌe ip. — Apẽntak aceꞌe yawẽg̃mupõg̃põg̃ꞌũm ãm? — ioꞌe ip jewewebe. — “Jesus cuy epeg̃uwẽn g̃u wararaꞌacat pe,” i juy ace cebe ip wuyaꞌõpurug̃ — ioꞌe ip. — “Waram wararaꞌacayũ be Jesus muwẽn puje, ipiat cuy ocesupiꞌajoat eywebe,” i juy ace cebe ip — ioꞌe ip jewewebe.
\p
\v 18 G̃ebuje waram Pedroyũ oꞌtojocat ip jewekay. Yaꞌõpurug̃ oꞌjekawẽn ip ceweju ip.
\p — Jesus cuy epeg̃uwẽn g̃u wararaꞌacat pe — ioꞌe ip. — Waram cuy epeg̃uwẽn g̃u cekawẽn — ioꞌe ip Pedroyũ be.
\p
\v 19 — Apẽntak cedag̃ eyxe? — ioꞌe Pedroyũ bit cebe ip. — Eyaꞌõ kay du oceꞌe? Deus aꞌõ kay g̃u xeꞌe? Apẽn g̃u cedag̃ eyxe? — ioꞌe ip. 
\v 20 — Mũg̃ g̃u juy ocesop. Jesus cuy oceg̃uwẽn. Jesus ocejojojo ceꞌũap tomukadi — ioꞌe. — Jesus emumutaybitbinam cuk adi ocejekũyjojo — ioꞌe. — Imẽnpuye cedag̃ g̃u ocewebe imuwẽnꞌũm ãm wararaꞌacat pe. Mũg̃ g̃u ocesop. Ixe juy ag̃uwẽn — ioꞌe Pedroyũ.
\p
\v 21-22 Taojere tũibit ade koato osunuy- -40 koato. Imẽnpuye jewawẽwẽꞌukayũ yobog̃ayũ ipiat oꞌsupiꞌajoat g̃u Pedroyũ be.
\p — Ẽn xipat cĩcã — iꞌeꞌem oꞌe ip Deus pe adeayũ, taojere tũibit oꞌjeꞌada buye. Imẽnpuye:
\p — Pedroyũ be ipiatꞌajoan pima, kuka oitakomãn ocekay adeayũ — ioꞌe ip jewewebe jewawẽwẽꞌukayũ yobog̃ayũ.
\m Pedroyũ bit waram oꞌg̃ujẽm jexewi ip.
\p — Jesus cuy epeg̃uwẽn g̃u wararaꞌacat pe — ioꞌe ip Pedroyũ be. — Jesus muwẽn puje, ipiat cuy ocesupiꞌajoat eywebe — ioꞌe ip waram Pedroyũ be.
\p
\v 23 Pedroyũ oꞌju jebureyũ kay- -itabucayũ kay. Apẽn cuk yaꞌõpurug̃ paĩyũ kukukayũ oꞌjekawẽn cebe ip iap oꞌg̃uwẽn cebe ip, apẽn Judeuyũ kukukayũ oꞌjekawẽn cebe ip iap tak.
\p
\v 24 Iboap co buje soat Jesus aꞌõkayayũ oꞌjekawẽn ip Deus eju.
\p — Ocekukukat — ioꞌe ip. — Soat mug̃ẽat ẽn. Kabi eg̃ug̃ẽ, ipi dak, idibi dak, tibog̃ cĩcãati dak — ioꞌe ip. — Soat kaka dag̃at tak eg̃ug̃ẽ — ioꞌe ip. 
\v 25 — Aꞌõkay osunuy kuyje Davi ajore — ioꞌe ip Deus pe. — Aꞌõmuwẽnuwẽnꞌuk osunuy. Jekawẽnwẽnꞌuk osunuy Ibiõg̃buk xipacat aꞌõbi. Ixe imẽn oꞌe kuyje:
\mi Apẽnpuye dak Judeuꞌũmayũ itakoma jĩjã oꞌe ip? i. Apẽnpuye dak teꞌe ma ixe aoka ojuy ip osodop? i. 
\v 26 Ipi kukukayũ oꞌjeꞌawero ip soat ka kukukayũ eju- -yaꞌõbuyxiayũ eju, i. Oꞌjeꞌawero ip wuykukukat Cristo aoka am- -emunaẽ aoka am, i.
\m Imẽn Davi oꞌe kuyje — ioꞌe ip Deus pe. 
\v 27 — Ibo dup ekawẽn tag̃ g̃asũ dak oꞌjeꞌawero ip ijopka be — ioꞌe ip. — Herodes oꞌjeꞌawero Pôncio Pilatos eju, Judeuꞌũmayũ dak, Judeuyũ dak — ioꞌe ip Deus pe. — Oꞌjeꞌawero ip ekpot aoka am- -Jesus aoka am- -soat tag̃ iisuat aoka am- -aꞌõ kay kũyjobicat aoka am- -wuydaxijo am emunaẽ aoka am — ioꞌe ip. 
\v 28 — Ixeyũ Judeuꞌũmayũ itaybit g̃u Moisés ekawẽn. Imẽnpit apẽn kuyje juk adi ecece iap tag̃ eꞌem ip — ioꞌe ip Deus pe.
\p
\v 29 — Bay, ag̃ cuy eg̃uy ocekay — ioꞌe ip Deus pe. — Jewawẽwẽꞌukayũ yobog̃ayũ itakoma jĩjã ocekay — ioꞌe ip. — Ipiatpiꞌajoat pin ip ocewebe — ioꞌe ip. — Oceju ebekitkiyũ. Imẽnpuye ocebuywan cuy eg̃uy — ioꞌe ip. — Ocaꞌõmucanucan cuy eg̃uy ocepararaꞌũm ma kawẽn idipat muwẽn ãm soat ka dag̃ — ioꞌe ip Deus pe. 
\v 30 — Aꞌõbacaap cuy eg̃ũm ocewebe aꞌõbi iwataxipipiayũ muꞌada am — ioꞌe ip. — Aꞌõbacaap cuy eg̃ũm ocewebe iꞌe baꞌoreat mubapuk am soat etabutpe Jesus aꞌõbi- -ekpot aꞌõbi- -soat tag̃ iisuat aꞌõbi- -aꞌõ kay kũyjobicat aꞌõbi — ioꞌe ip Deus pe.
\m Imẽn oꞌjekawẽn ip Deus eju. 
\v 31 Jeꞌaweroroapꞌa oꞌjeaexixi ceweju cekawẽn epere buje. Ibiõg̃buk xipacat osodot soat kay ip. Ixe Ibiõg̃buk xipacat oõm soat pe ixeyũ be. Imẽnpuye ip ipararaꞌũm cĩcã oekuku Deus ekawẽn muwẽnuwẽn soat itaybitꞌũmayũ be.
\p
\v 32 Soat Jesus kay itabucayũ xipan ip oꞌe jewewekug̃. Ade jĩjã ip osodop. Pũg̃ tag̃ ma ip jewag̃uyg̃uy osodop.
\p — Ijop owebeam acã — iꞌũmg̃u oꞌe ip.
Tacup g̃u ip osodop jewewebe. Soat ip jebubut muꞌẽꞌẽꞌẽꞌuk osodop. 
\v 33 Soat Jesus emumujuyũ “Ocekukukat Jesus waram oꞌjetait jeꞌũap tomukadi,” iꞌeꞌeꞌuk osodop soat pe. Deus xipacat oꞌg̃ũmg̃ũm soat pe ixeyũ be. 
\v 34 Kaꞌũmg̃u tadaybocat oꞌe ceparakpe ip kaꞌũmãn ma tacup puye. Ipi kukayũ jeipi oꞌteida dinheiro bu am. Jedukꞌa dak oꞌteida ip dinheiro bu am. Teiũmũmꞌuk ip osodop Jesus emumujuyũ be- -doze beayũ be. 
\v 35 Ixe dinheiro muꞌẽꞌẽꞌẽꞌuk ip osodop tadaybotbocayũ be.
\p
\v 36 G̃ebuje José dinheiro oꞌg̃ũm Jesus emumujuyũ be. José jeipi kug̃ osunuy. Jesus emumujuyũ waraꞌat oꞌjomõg̃ ibuten. Waraꞌat ibutet Barnabé i osunuy. Barnabé wuyaꞌõmucanucanꞌukat iape. Ixe Levi badip osunuy. Tipꞌaroro bewiat osunuy- -Chipre eipi bewiat. Ixe jeipi kug̃ osunuy. 
\v 37 Jeipi oꞌteida dinheiro bu am. José ma soat ixe edinheiro oꞌg̃ũm Jesus emumujuyũ be- -Pedroyũ be. 
\b
\c 5
\p
\v 1 Ananias pit teꞌe ma Deus mug̃uykuku ojuy oꞌe. Ixe Jesus kay itabut osunuy. Itayxi butet Safira i osunuy. Dinheiro oꞌjat. Ananias jeipi oꞌteida ixe dinheiro bu am. 
\v 2 Iꞌin oꞌg̃uxipan jewebeam. Itayxi itaybit oꞌe iꞌin oꞌg̃uxipan jewebeam iam. Soat g̃u jedinheiro oꞌtujowat Pedroyũ be iũm ãm. Iꞌin ã oꞌtujowat.
\p — Juku — ioꞌe Pedroyũ be. — Weipi dei. Soat tei — i napa ma oꞌe cebe ip.
\p
\v 3 G̃ebuje Pedro yaꞌõpurug̃ oꞌjede cebe.
\p — Ananias — ioꞌe. Satanás aꞌõ kay ẽn g̃asũ — ioꞌe. — Apẽnpuye Deus biõg̃buk mug̃uykuku ojuy ẽn? — ioꞌe. — Apẽnpuye eipi deiꞌin eg̃uxipan ewebeam? — ioꞌe. 
\v 4 — Koap pit aꞌg̃u eipin ma osodop. Eipi dei ũmũm pima, xipat kuka oꞌe. Iũmũmꞌũm pima dak xipat kuka oꞌe — ioꞌe. — Kaꞌũma ma oꞌe ewebe “Eipi juy eteida dinheiro bu am,” i — ioꞌe. — Apẽnpuye dak ikẽrẽat eg̃ujurũg̃? Ocemug̃uykuku ojuy g̃u ẽn. Deus mug̃uykuku ojuy acã ẽn — ioꞌe Pedro. — Ocewebe g̃u ẽn napa eꞌem- -Deus pe acã — ioꞌe Pedro.
\p
\v 5 Ananias dao ma oeꞌũ iboap co buje. Pog̃. Imẽnpuye ceꞌũap awẽg̃ tobuxikayũ iparara jĩjã ip oꞌe Deus mug̃uykukuap puxim.
\p
\v 6 Ag̃okatkayũ oajẽm yaypanꞌisuayũ. Ananiasꞌũm oꞌg̃uekabek ip pag̃õm. Oꞌtujowat ip ibocewi. Oꞌjomõg̃ ip witabikũy be jebabim.
\p
\v 7 Ananiasꞌũm kot isum Safira oajẽm Pedro kay- -ebapũg̃ ehora kap puje- -Ananiasꞌũm tayxibuk. Itaybit g̃u mabuk osunuy jektopꞌũm oeꞌũ iam.
\p
\v 8 — Bũrũnmaku du eipi dei osodop? — Pedro oꞌe Safira be. — Ektop oꞌe iat tei joꞌi ma du ijop? — ioꞌe.
\p — Hm hm. Ibo joꞌin ma ipi dei — ioꞌe napa ma Safira.
\p
\v 9 — Apẽnpuye dak mo aꞌg̃u ikẽrẽat epeg̃ujurũg̃? — Pedro oꞌe. — Apẽnpuye dak eyju teꞌe ma mo aꞌg̃u Deus biõg̃buk mug̃uykuku ojuy? Imẽn mo aꞌg̃u epeyewawẽ eyeweweju. Akꞌi juy ece — ioꞌe. — Witabikũy be ektopꞌũm oꞌjomõg̃ꞌiayũ omuyku ijoce — ioꞌe. — Omuyku ip ukꞌa exĩntabi be — ioꞌe. — G̃asũ ip jedujowat tak — ioꞌe.
\p
\v 10 G̃ebujeꞌisum ma Safira dak oeꞌũ. Pog̃. Ceꞌũ oꞌat Pedro i xe.
\p G̃ebuje yaypanꞌisuayũ oajẽm waram. Ceꞌũat oꞌjojojo ip. Oꞌtujujẽm ip. Oꞌjomõg̃ ip witabikũy be itopꞌũm xe. 
\v 11 Soat Jesus kay itabucayũ oꞌjekũyjo Ananiasꞌũm eꞌũãm, Safiraꞌũm eꞌũãm tak. Wararaꞌacayũ dak ixeyũꞌũmꞌũm eꞌũãm oꞌjekũyjo ip. Imẽnpuye iparara jĩjã ip oꞌe Deus xe ikẽrẽat mujurũg̃ap puxim. Ibuꞌu oꞌe ip ikẽrẽat mujurũg̃ ãm.
\p
\v 12-14 Soat Jesus emumujuyũ jeꞌaweroroꞌuk ip osodop Deus eju kawẽnwẽnapꞌa ekorara be- -yabog̃atꞌa ekorara be. Ijop ekorara butet Salomão ekorara i osunuy. Jesus ebekitkit cũg̃ ma oekuku ip soat xe. Ade jĩjã itabut oꞌe ip wuykukukat Jesus kay- -ag̃okatkayũ, aoyũ dak. Wararaꞌacayũ iparara oꞌe ip Jesus kay jetabut am. Imẽnpuye oꞌjeꞌawero g̃u ip Jesus ebekitkit eju. Wuywebe iꞌe baꞌoreat mubapukpug̃ ip oekuku Jesus emumujuyũ. Ajojojo g̃u buk iap mubapukpug̃ oekuku ip Deus aꞌõbi. Adeayũ etabutpe Deus aꞌõbacaap mubapukpug̃ ip oekuku.
\p
\v 15 G̃ebuje ade iwãtaxipipiayũ oꞌtujowat ip ukꞌa ukpibubu dag̃. Iboce iwãtaxipipiayũ oꞌjomõg̃ ip jexexecap pe, jedipidup ceje dak. Jebureyũ iwãtaxipipiayũ oꞌjomõg̃ ip Pedro kapap pe. Iwãtaxipipiayũ oꞌjomõg̃ ip Pedro ekabicuk pe imuꞌada am. 
\v 16 Ade oꞌjẽm ip Jerusalém ka tẽg̃atka bewi. Iwãtaxipipiayũ oꞌtujowat ip Pedro kapap pe. Soat ip oꞌg̃uꞌadaꞌada. Ibiõg̃buk kẽrẽat kukayũ dak oꞌtujowat ip. Ibiõg̃buk kẽrẽat oꞌg̃ujẽmjẽm. Xipat oꞌe ip- -soat.
\p
\v 17 Judeuyũ epaĩyũ kukukat pit itabutkarey oꞌe Jesus emumujuyũ kay. Paĩyũ kukukat ejuayũ dak itabutkarey oꞌe ip cekay ip- -Saduceuyũ. Jesus emumujuyũ oꞌtaomũnat ip. 
\v 18 Daomũnmũnapꞌa be ip oꞌg̃uõmat. Oꞌg̃uõmat ip ikẽrẽat mujurũg̃rũg̃ꞌukayũ eju ikẽrẽat mujurũg̃rũg̃ g̃u maꞌg̃u ip.
\p
\v 19 Ibocewi Deus ekawẽn tojotjotꞌukat oajẽm daomũnmũnapꞌa be Jesus emumujuyũ kay. Ixima be oajẽm. Xĩntabi oꞌtomudipꞌuk- -yobog̃at- -ipoxiat. Jesus emumujuyũ oꞌtujujẽm ig̃oꞌa bewi. 
\m Tujujẽm puje oꞌjekawẽn ceweju ip.
\p
\v 20 — Deus eju kawẽnwẽnapꞌa be juy epeju- -yabog̃atꞌa be — ioꞌe Jesus emumujuyũ be. — Jesus kayayũ yag̃uyisum jekukum iam cuy ig̃oꞌa beayũ epeg̃ukũyjo. Soat em Deus xe jeedop ip jeꞌũ buje iam cuy ip epeg̃ukũyjo. Soan cuy ip epeg̃ukũyjo — ioꞌe cebe ip.
\p — Imẽn cuy oceꞌe — ioꞌe ip.
\p
\v 21 Deus tojotjotꞌukat ekawẽn co buje Jesus emumujuyũ kawẽn idipat oꞌg̃uwẽn yabog̃atꞌa beayũ be.
\p — Jesus kayayũ yag̃uyisum jekukum — ioꞌe ip imukũyjojom.
\m Oꞌju ip Deus eju kawẽnwẽnapꞌa be- -yabog̃atꞌa be. Kabiaꞌisum ip oꞌju. Kawẽn idipan ip ig̃oꞌa beayũ oꞌg̃ukũyjojo.
\p Iboam eꞌem pima jewawẽwẽꞌukayũ yobog̃ayũ teꞌe ma Jesus emumujuyũ oꞌg̃udocat jewekay daomũnmũnapꞌa bewi. Tũybe daomũnmũnapꞌa be ma ip opop iãn oꞌe ip. Paĩyũ kukukat oꞌjeꞌawero jebureyũ eju. Judeuyũ kukukayũ oꞌtomuwã jeꞌawero am- -Israel naxeg̃ebitbit kukukayũ, aypapayũ dak. Ixeyũ ag̃okatkayũ jewawẽwẽꞌukayũ yobog̃ayũ ip osodop.
\p — Jesus emumujuyũ juy epeg̃ujẽm daomũnmũnapꞌa bewi — ioꞌe ip teꞌe ma Deus eju kawẽnwẽnapꞌa wiwiꞌukayũ be. — Epetojot ip ocekay — ioꞌe ip teꞌe ma.
\p
\v 22 Deus eju kawẽnwẽnapꞌa wiwiꞌukayũ oꞌju daomũnmũnapꞌa be. Jesus emumujuyũ oꞌtobuxik g̃u ip. Oꞌjepit ip paĩyũ kukukat pe. Teꞌe ma oꞌju ip Deus eju kawẽnwẽnapꞌa wiwiꞌukayũ.
\p
\v 23 — Daomũnmũnapꞌa be g̃u ip Jesus emumujuyũ — ioꞌe ip. — Daomũnmũnapꞌa exĩntabi cem cĩcã ocetobuxik — ioꞌe ip. — Yawiwim mabuk ip osodop yawiwiꞌukayũ. Kacũg̃cũg̃ꞌi osodop ip xĩntabixixi weg̃ũn. Ocetomudipꞌuk. Kaꞌũma ma ocetobuxik badi. Jesus emumujuyũ ocetobuxik g̃u — ioꞌe ip ika kukukayũ be- -jewawẽwẽꞌukayũ yobog̃ayũ be.
\p
\v 24 Iboap co buje yag̃uyꞌũm oꞌe ip jewawẽwẽꞌukayũ yobog̃ayũ, paĩyũ kukukayũ dak, Deus eju kawẽnwẽnapꞌa wiwiꞌukayũ kukukat tak, wararaꞌacayũ dak paĩyũ yobog̃ayũ.
\p — Apẽn oꞌjebapuk cebe ip? — ioꞌe ip jewewebe. — Apẽntak aceꞌe g̃asũ? — ioꞌe ip. — Oꞌjẽm ip iap awẽg̃ jeawẽg̃epõg̃põg̃ soat ka dag̃ — ioꞌe ip.
\p
\v 25 Ag̃okatkat tak oajẽm.
\p — Eyaꞌõpicũg̃cũg̃ cuy epesop waꞌõ kay — ioꞌe. — Epetaomũnmũnꞌiayũ Deus eju kawẽnwẽnapꞌa be- -yabog̃atꞌa be opop ip. Ig̃oꞌa beayũ mutaybitbin ip — ioꞌe jewawẽwẽꞌukayũ yobog̃ayũ be.
\p
\v 26 Deus eju kawẽnwẽnapꞌa wiwiꞌukayũ kukukat oꞌju Deus eju kawẽnwẽnapꞌa be Jesus emumujuyũ kay. Oꞌju jebekitkit eju- -yawiwiꞌukayũ eju. Waram g̃uto Jesus emumujuyũ oꞌtaomũn ip. Imẽnpit iparara ip oꞌe adeayũ be jaokaap puxim.
\p — Oceju warẽmtag̃ iteyũ kug̃ pima, adeayũ kuka ocabug̃bug̃ iteyũ kay jĩjã ip puye — ioꞌe ip jewewebe.
\m Imẽnpuye xipan ip oꞌjukuk taomũnmũn pima. 
\v 27 Waram Jesus emumujuyũ oꞌtujowat ip jewawẽwẽꞌukayũ yobog̃ayũ be.
\p G̃ebuje paĩyũ kukukat oꞌjekawẽn Jesus emumujuyũ eju.
\p
\v 28 — Kuy mo aꞌg̃u ocaꞌõpurug̃ oceꞌe eywebe “Jesus cuy epeg̃uwẽn g̃u wararaꞌacat pe,” i — ioꞌe. — Eyju bit kũyjobit g̃u ocaꞌõ kay — ioꞌe. — Soat Jerusalém ka watwat mutaybitbin eyju. “Jewawẽwẽꞌukayũ yobog̃ayũ Jesus oꞌyaokaat,” iꞌeꞌem eyju napa ma — ioꞌe.
\p
\v 29 G̃ebuje Pedroyũ oꞌjede cebe ip.
\p — Deus aꞌõ kay juy oceju kũyjobit — ioꞌe. — Ocewebe iwarum eyꞌe buje eyaꞌõ kay g̃u oceꞌe Deus aꞌõ kay acã — ioꞌe. 
\v 30 — Eyju ma Jesus epesubamupayaat korosa be. Eyju ma epeyaokaat — ioꞌe. — Deus pit waram g̃uto ixe oꞌg̃utait ceꞌũap tomukadi. Wuydobuyũꞌũmꞌũm tak itabut osodop ip Deus kay — ioꞌe. 
\v 31 — Deus aꞌõbi ixe yaꞌõbuyxian oꞌe g̃asũ. Imẽnpuye Deus xe omuy g̃asũ. Wuykukukan oꞌe Deus aꞌõbi. Wuydaxijojoꞌukan oꞌe Deus aꞌõbi. Deus ibikuy osunuy Israel naxeg̃ebitbit pe ig̃uycũg̃ iꞌe am ikẽrẽat kug̃ puye. Ibikuy osunuy ikẽrẽat mujurũg̃rũg̃ap epere am cebe ip. Ibikuy osunuy ikẽrẽat uk am cebewi ip. Imẽnpuye Jesus wuydaxijojoꞌukan oꞌe Deus aꞌõbi. Oceju dak ocetaybit apẽn Deus cuk adi oꞌeꞌe iam — ioꞌe. 
\v 32 — Imẽnpuye oceju ixe eꞌeap muwẽnuwẽn eywebe. Ibiõg̃buk xipacat tak iboap muwẽnuwẽn. Deus jebiõg̃buk muõmõm jaꞌõkayayũ be — Pedro oꞌe.
\p
\v 33 Iboap co buje jewawẽwẽꞌukayũ yobog̃ayũ itakoma jĩjã oꞌe ip Jesus emumujuyũ kay. Yaokaat ojuy ip.
\p
\v 34 G̃ebuje ag̃okatkat oꞌãy- -jewawẽwẽꞌukat yobog̃at. Oꞌjekawẽn jebureyũ eju. Ixe Fariseu osunuy. Moisés ekawẽn imutaybitbinꞌuk ip osodop Fariseuyũ. Ixe butet Gamaliel i osunuy. Yaꞌõbuyxi jĩjã osunuy soat xe jeka watwat xe. Imẽn oꞌjekawẽn jebureyũ be.
\p — Taupuyũ — ioꞌe. — Koam puk ip ag̃ujẽm — ioꞌe. — G̃aꞌa acewawẽ — ioꞌe.
\p Jesus emumujuyũ oꞌg̃ujẽm ip jewewãwã apꞌa bewi. 
\v 35 Gamaliel jebureyũ oꞌyawẽ.
\p — Israel naxeg̃ebitbiyũ — ioꞌe. — Eyaꞌõpicũg̃cũg̃ cuy epesop waꞌõ kay — ioꞌe. — Eydayꞌemꞌum cuy epesop! Xipan cuy iteyũ ag̃okatkayũ epejukuk. Eyag̃uysan cuy epesop — ioꞌe. 
\v 36 — Kuyꞌũmꞌũm ma waraꞌat ag̃okatkat osunuy. Ibutet Teudas i osunuy. “Soat podi ma waꞌõbuyxi,” i napa ma oꞌeꞌe wararaꞌacat pe. Adeayũ ceweju oekuku ip- -400 beayũ. Imẽnpit waraꞌacat ixe Teudas oꞌyaoka. Oꞌjepõg̃põg̃põg̃ ixe aꞌõ kayayũ. Soat oiꞌũm ixe ekapikap — ioꞌe.
\p
\v 37 — G̃ebuje waraꞌat ag̃okatkat tak osunuy. Ibutet Judas i osunuy. Galiléia eipi bewiat osunuy. Wuyeipi kukayũ jebekitkiyũ oꞌg̃uweg̃ũn ixeyũ kabia dag̃. Ade oeku ip ixe Judas eju. Ixe Judasꞌũm tak oeꞌũ. Oꞌjepõg̃põg̃põg̃ ip ixe aꞌõ kayayũ. Soat oiꞌũm ixe ekapikap — ioꞌe.
\p
\v 38 — G̃asũ dak imẽn ma. Kaꞌũmã ma juy aceꞌe iteyũ ag̃okatkayũ be. Ijodiat aꞌõbi jekukum pima, soat iteyũ eꞌeap tak iꞌũm. 
\v 39 Deus aꞌõbi jekukum pima bit, iteyũ eꞌeap muꞌũm paꞌore wuywebe — ioꞌe. — Iteyũ eꞌeap muꞌũm pin pima, Deus eju kuka jewaokakam ace — ioꞌe Gamaliel.
Gamaliel ekawẽn kay oꞌe ip jewewãwãꞌukayũ yobog̃ayũ. 
\v 40 Waram Jesus emumujuyũ oꞌg̃udocat ip. Sorarayũ be ip oꞌyukxabiokakaat ixee mug̃ẽg̃ẽm.
\p — Jesus cuy epeg̃uwẽn g̃u wararaꞌacat pe — ioꞌe ip cebe ip.
\m Waram oꞌg̃ujẽm ip jexewi.
\p
\v 41 Ibocewi Jesus emumujuyũ oꞌjẽm jewewãwãꞌukayũ yobog̃ayũ xewi. Icokcok cĩcã oꞌjẽm ip.
\p — Deus xe ocekukpin cĩcã — ioꞌe ip jewewebe. — Cedag̃ Deus xe ixeyũ ag̃okatkayũ be oceꞌukxabiokakaan. Ipiat ocesupiꞌajo Jesus kay ocetabut puye — ioꞌe ip.
\p
\v 42 Jesus oꞌg̃uwẽnuwẽn ip adeayũ be. “Jesus wuydaxijo am Deus emunaẽ,” iꞌeꞌeꞌuk osodop ip. Soat kabia Deus eju kawẽnwẽnapꞌa be imutaybitbinꞌuk osodop ip, jedukꞌa be dak.
\b
\c 6
\p
\v 1 Pũg̃pũg̃ itabucayũꞌin oꞌjemãmãmã ip jebureyũ kay. Jesus kayayũ big̃ ma oiacog̃. Soat ip Judeuyũ osodop. Grego aꞌõm kawẽnwẽnꞌuk osodop ip pũg̃pũg̃ ixeyũꞌin. Hebraico aꞌõm kawẽnwẽnꞌuk osodop ip wararaꞌacayũ. Ixeyũ parakpe osodop ip itopꞌũm eꞌũꞌibiyũ tadaybotbocayũ. Imẽnpuye pũg̃pũg̃ itabucayũꞌin oꞌjemãmãmã ip jebureyũ kay.
\p — Ocexat ũmũm g̃u ip ocewebe — ioꞌe ip aoyũ itopꞌũm eꞌũꞌibiyũ. — Jewewebe acã ip imuꞌẽꞌẽꞌẽm — ioꞌe ip.
\p — Dapxi eyju! Eywebe dak oceju iũmũm! — ioꞌe ip wararaꞌacayũ bit.
\p
\v 2 Imẽnpuye Jesus emumujuyũ soat itabucayũ oꞌtomuwã jeꞌawero am. Oꞌjeꞌawero ip. Doze beayũ oꞌjekawẽn wararaꞌacayũ eju- -Jesus kay itabucayũ eju.
\p — Oceju Deus ekawẽn muwẽnuwẽn — ioꞌe ip. — Ibo ma ocekapikap — ioꞌe ip. — Xipat g̃u ocewebe Deus ekawẽn muwẽnap epere am itopꞌũm eꞌũꞌibiyũ xat muꞌẽꞌẽ ãm — ioꞌe ip. 
\v 3 — Imẽnpuye, tapupuyũ, 7 be ag̃okatkayũꞌin ataẽ ixat muꞌẽꞌẽ ãm itop eꞌũꞌibiyũ be — ioꞌe ip. — Wuybadipyũꞌin cuy ataẽ- -itabut cĩcãayũ- -itaybit cĩcãayũ- -Deus biõg̃buk aꞌõkay jĩjãayũ — ioꞌe. — Ibiayũ ma ataẽ — ioꞌe. — Ijop ocekapikap oceg̃ũm taẽꞌibiyũ be. Ixeyũ ma itop eꞌũꞌibiyũ xat g̃uꞌẽꞌẽꞌẽ — ioꞌe ip. 
\v 4 — Oceju bit soat em Deus eju kawẽnwẽnꞌuk ocesop — ioꞌe. — Soat em ixe ekawẽn imutaybitbin ocekuku — ioꞌe ip.
\p
\v 5 Doze beayũ ekawẽn kay oꞌe ip soat itabucayũ. Cekawẽn tag̃ e ojuy ip.
\p G̃ebuje Jesus kay itabucayũ 7 beayũ oꞌtaẽ. Ibũrũ ma ibutet osodop ip- -taẽꞌibiyũ butet: Estêvão i, Filipe i, Prócoro i, Nicanor i, Timom i, Pármenas i, Nicolau i. Estêvão Deus kay itabut cĩcãat osunuy. Deus biõg̃buk aꞌõ dag̃ jekukuꞌuk osunuy. Nicolau Antioquia ka bewiat osunuy. Judeu g̃u osunuy. Deus kay Judeuyũ etabucap puxim pit itabut osunuy. Ibũrũ ma ip osodop taẽꞌibiyũ.
\p
\v 6 Jesus kay itabucayũ ixeyũ 7 beayũ oꞌtujowat Jesus emumujuyũ kay- -doze beayũ kay. Jesus emumujuyũ oꞌjekawẽn Deus eju ixeyũ beam- -7 beayũ beam. Oꞌjewebumõg̃ ip yabi jeje.
\p — Iteyũ juy ixat g̃uꞌẽꞌẽꞌẽ itop eꞌũꞌibiyũ be — ioꞌe ip soat aꞌõpiju.
\p
\v 7 Imẽneju adeayũ oitabun ip Jesus kay. Deus aꞌõ kay oitabun ip. Deus ekawẽn tag̃ oekuku ip. Ade jĩjã Jerusalém ka beayũ itabut oꞌe ip Jesus kay, ade Judeuyũ epaĩyũ dak.
\p
\v 8 Estêvão wuywebe iꞌe baꞌoreat mubapukpug̃ oeku Deus aꞌõbi.
Adeayũ oꞌg̃ucoatcoan Deus aꞌõbacaap kug̃ puye. Deus Estêvão buywatwan osunuy. 
\v 9 Pũg̃pũg̃ayũ bit Estêvão oꞌjomuymuy jĩjã Judeuyũꞌin. Ixeyũ Judeuyũ jeꞌaweroroꞌuk ip osodop jeꞌaweroroapꞌa be- -Deus eju kawẽnwẽnapꞌa be. Ceꞌaweroroapꞌa butet jekupinap tag̃ jekukuꞌukayũ eꞌaweroroapꞌa i osunuy. Cirene ka bewi osodop ip ixeyũ Judeuyũ, Alexandria ka bewi dak. Cilícia eipi bewi ip osodop, Ásia eipi bewi dak. Estêvão aꞌõxik oꞌe ip ig̃oꞌa be. 
\v 10 Deus biõg̃buk pit Estêvão mukũyjojom osunuy. Imẽnpuye yaꞌõxik paꞌore ip osodop. 
\v 11 Imẽnpuye yaꞌõxik ojuyayũ dinheiro oꞌg̃ũm wararaꞌacat pe napaap muwẽg̃apteim- -Estêvão awẽg̃ mukẽrẽrẽnapteim.
\p — “Estêvão cũg̃ꞌũma wuybadipyũ mutaybitbin,” i juy epeꞌe napa ma — ioꞌe. — “Estêvão Deus muymuy,” i juy epeꞌe napa ma — ioꞌe ip cebe ip.
\p
\v 12 Imẽnpuye ixeyũ napapaꞌukayũ Estêvão awẽg̃ oꞌyawẽg̃mukẽrẽrẽn soat aꞌõpiju. Yaꞌõxik ojuyayũ adeayũ oꞌg̃utakomãn Estêvão kay. Judeuyũ kukukayũ oꞌg̃utakomãn ip, Moisés ekawẽn imutaybitbinꞌukayũ dak.
\p Soat ixeyũ oꞌju Estêvão kay. Estêvão oꞌjat ip. Oꞌtujowat ip jewawẽwẽꞌukayũ yobog̃ayũ etabutpe. 
\v 13 Napapaꞌukayũ dak oꞌtujowat ip. Estêvão aꞌõ oꞌyaꞌõdada jĩjã ip.
\p — Soat em teku Deus eju kawẽnwẽnapꞌa muymuy- -ikẽrẽat kug̃ g̃u iatꞌa muymuy — ioꞌe ip napa ma. — Soat em teku Moisés ekawẽn mupubutbun — ioꞌe ip napa ma. 
\v 14 — Cekawẽn cuk adi oceyaꞌĩjojo! “Jesus Deus eju kawẽnwẽnapꞌa g̃uꞌũm yabog̃atꞌa. Nazaré ka bewiat ig̃oꞌa g̃uꞌũm,” ioꞌe ite napa ma — ioꞌe ip napa ma. — “Moisés wuyawẽwẽap ekawẽn g̃uwarurun,” i juk adi oꞌeꞌe — ioꞌe ip napa ma.
\m Estêvão aꞌõ oꞌyaꞌõdada jĩjã ip.
\p
\v 15 Jewawẽwẽꞌukayũ yobog̃ayũ oꞌjeak Estêvão kay g̃ebuje bit. Estêvão dopa Deus ekawẽn tojotjotꞌukat topa joꞌi oꞌe. Imẽn oꞌjojojo ip jewawẽwẽapꞌa beayũ.
\b
\c 7
\p
\v 1 — Icẽm tu ixeyũ eꞌem? — ioꞌe paĩyũ kukukat Estêvão be.
\p
\v 2 Estêvão oꞌjekawẽn iboceayũ be. Apẽn Deus xipan jeꞌajojoyũꞌũmꞌũm kukug̃ osunuy iap oꞌg̃uwẽn cebe ip.
\p — Okotkotyũ, owag̃og̃oyũ, baybayũ, waꞌõ kay juy epesop — ioꞌe. — Deus soat podi ma yaꞌõbuyxi — ioꞌe. — Soat podi ma idip — ioꞌe. — Ixe oꞌjebapuk wuydobuꞌũm kay- -Abraãoꞌũm kay kuyje. Oꞌjebapuk cekay Mesopotâmia eipi be bima. Oꞌjebapuk cekay Hará ka be ajẽm awap. 
\v 3 “Ejẽm cuy eka bewi, ebadipyũ xewi,” i mo aꞌg̃u oꞌe Abraão be Deus. “Ekam osukamubapukꞌiat ka be juy eju,” i mo aꞌg̃u oꞌe. 
\v 4 Imẽnpuye Abraão oꞌjẽm jeipi bewi- -Mesopotâmia eipi bewi- -Caldéia eipi bewi. Hará ka kay oꞌju jenuy ãm — Estêvão oꞌe.
\p — G̃uyjom Abraão ebayꞌũm oeꞌũ. Ceꞌũ buje Deus Abraão oꞌg̃udot ijop ipi kay- -wuyeipi kay. 
\v 5 Deus ipi oꞌg̃ũm g̃u Abraão be. Yopĩt tak oꞌg̃ũm g̃u ipi. Imẽnpit “Soat ijop ipi eipim jeꞌe,” i mo aꞌg̃u oꞌe Deus Abraão be. “Eꞌũ buje enaxeg̃ebitbit eipim jeꞌe,” ioꞌe. Deus iboam oꞌe Abraão be ipotpetꞌũm pima — ioꞌe.
\p
\v 6 — Deus imẽn oꞌjekawẽn Abraão eju. Deus oꞌe cebe:
\mi Obure, wararaꞌacat eipi be jeedop ip enaxeg̃ebitbit, i. 400 koato jeedop ip iboce, i. Iboceayũ warẽmtag̃ cĩcã enaxeg̃ebitbit jukuk, i. Enaxeg̃ebitbit g̃udadaybotbon ip, i. 
\v 7 Enaxeg̃ebitbit g̃upokupok ip yaoka am, i. Imẽnpit ipiat osupiꞌajoat warẽmtag̃ ixeyũ kukayũ be, i. G̃uyjom ibo eipi bewi jeꞌjẽm ip enaxeg̃ebitbit, i. G̃ebuje ijoce ma “Ẽn xipat cĩcã,” i jeꞌe ip owebe, i mo aꞌg̃u oꞌe Deus Abraão be — ioꞌe Estêvão.
\p
\v 8 — Deus waram oꞌjekawẽn Abraão eju.
\mi — Ag̃okatkatꞌitꞌit epetaypuꞌag̃obixeedakacat ikapꞌisum, i. Epetaypuꞌag̃obixeedakacat “Oceju Deus ebekitkit” iꞌe am soat pe wararaꞌacat pe, i mo aꞌg̃u oꞌe Deus Abraão be — ioꞌe Estêvão.
\p — G̃uyjom Isaque oꞌkap- -Abraão ipot. 8 kabia bima ikapꞌisuat oꞌtaypuꞌag̃obixeedakat Deus aꞌõbi. Isaque yaypan puje oꞌjewebumũn. G̃uyjom ixe ipot oꞌkap. Ibutet Jacó i osunuy — ioꞌe Estêvão adeayũ be.
\p — Jacó ipotpoyũ ade osunuy. Doze be osodop ip ipotpoyũ. Ixeyũ doze beayũ Judeuyũ dobuyũꞌũmꞌũm osodop ip. Wuyeipi kukukayũ osodop ip — ioꞌe Estêvão.
\p
\v 9 — José Jacó ipotpoyũꞌin osunuy. Iwag̃oyũ itabutkarey jĩjã oꞌe ip jekitpit kay- -José kay. José oꞌteida ip Egito eipi kay cuayũ be dinheiro bu am — ioꞌe.
\p — Ibocewi José oꞌtujowat ip Egito eipi be teihem g̃u kapik am — ioꞌe. — Teihem g̃u kapikpikꞌuk osunuy Egito eipi kukukat peam- -Faraó beam.
\p — Soat em Deus osunuy ag̃ José kay. 
\v 10 Deus José buywatwatꞌuk osunuy ipiatpiꞌajojom ma aꞌg̃u. José itaybit cĩcãan oꞌe Faraó xe, Deus ixe oꞌg̃utaybitbin puye. Imẽnpuye Faraó José kay jĩjã oꞌe. “G̃asũ ẽn tak Egito eipi kukukan ecesũy oweju,” ioꞌe Faraó José be. “Odukꞌa kukukan tak ecesũy,” ioꞌe cebe — ioꞌe Estêvão.
\p
\v 11 — G̃uyjom Egito eipi dag̃ayũ jexat oꞌjokudada jĩjã, Canaã eipi dag̃ayũ dak. Kaꞌũmg̃u ixat osodop Egito eipi dag̃, Canaã eipi dag̃ tak. Soat kaka dag̃ ire oekuku ip. Ixat tobuxik paꞌore oꞌe ip wuydobuyũꞌũmꞌũm, oiꞌũm puye — ioꞌe.
\p
\v 12 — Jacó oꞌjekũyjo tũmũntata kake Egito eipi be iam. Iboam jekũyjo buje jekpotpoyũ oꞌg̃uju iboce- -wuydobuyũꞌũmꞌũm oꞌg̃uju. Trigoda bu am ip oꞌg̃uju Egito eipi kay. Xepxep ekum oꞌju ip trigoda bum. 
\v 13 José oꞌjebapuk jewag̃oyũ kay xepxep em oeku ibima. “Õn eykitpit José,” ioꞌe cebe ip. Faraó itaybit oꞌe ixeyũm- -José wag̃oyũm — Estêvão oꞌe.
\p
\v 14 — Imẽneju José oꞌjewaꞌõmuju jebay be soat jewag̃oyũ badipyũ be dak. Ade osodop ip José badipyũ- -75 be osodop ip. “Epesot cuy Egito eipi be soat eyju,” ioꞌe José cebe ip — ioꞌe Estêvão.
\p
\v 15 — Soat ip oꞌju Egito eipi kay. José ebay oꞌju, soat iwag̃oyũ dak. Oꞌju ip jebadipyũ eju. Iboce osodop ip. Jacóꞌũm oeꞌũ iboce. Soat Jacóꞌũm ipotpoyũꞌũmꞌũm tak oeꞌũꞌũ iboce. Oeꞌũꞌũ ip wuydobuyũꞌũmꞌũm. 
\v 16 Ibocewi jebayũꞌũmꞌũm tao oꞌtaodujowat ip jeka be taokot am ade koato kap puje. Wuydobubuyũꞌũmꞌũm tao oꞌtaodujowat ip Jacó ka be- -Siquém ka be Canaã eipi be. Kuy bima Abraão ibo eipi oꞌjat. Emor ipotpoyũ xewi. Dinheiro oꞌg̃ũm isurũg̃at cebe ip ipi deim. Ibo ka be wuydobubuyũꞌũmꞌũm tao oꞌtaomõg̃ ip witabikũy be — ioꞌe Estêvão.
\p
\v 17 — Egito eipi be bima wuydobubuyũꞌũmꞌũm ade jĩjã ip osodop- -Judeuyũ. Pũg̃ koato g̃u ip osodop Egito eipi be- -ade koato. G̃axĩn ma jeꞌjẽm ip Egito eipi bewi apẽn Deus oꞌe Abraão be iap tag̃. 
\v 18 Waraꞌacat Egito eipi kukukan oꞌe. Ixe ipi kukukat itaybit g̃u oꞌe Joséꞌũm, kuy ma ixeꞌũm oeꞌũ buye. Kuyjeayũ mudadaybotbon cĩcã oꞌe ip. 
\v 19 Kuyjeayũ oꞌg̃ug̃uykukuku ip. Ipiat oꞌsupiꞌajojoat cĩcã cebe ip. “Soat ikapꞌisusuayũ epejomõg̃ akiju ceꞌũ ãm eyipotpoyũ,” ioꞌe kuyjeayũ be Egito eipi kukukat. Imẽn oꞌe wuydobuyũ acog̃ap puxim — ioꞌe Estêvão.
\p
\v 20 Moisés oꞌkap g̃ebuje. Idip cĩcã osunuy. Ebapũg̃ kaxi acã Moisés jexi xe osunuy. 
\v 21 Bekicat oꞌg̃ujẽm ip jedukꞌa bewi. Imẽnpit oeꞌũ g̃u — ioꞌe.
\p — Imujẽm puje Faraó daxit Moisés oꞌtobuxik- -Egito eipi kukukat taxit. Oꞌtujoõm jedukꞌa be. Moisés oꞌg̃uaypan jeꞌit muaypanap puxim. 
\v 22 Imẽnpuye Moisés itaybit oꞌe soan. Egito eipi watwat oꞌg̃utaybitbitbin. Yaꞌõbacaan oꞌe. Itaybit cĩcãan oꞌe kawẽn ãm, soat mug̃ẽ ãm tak — ioꞌe Estêvão.
\p
\v 23 — Moisés oajẽm jebadipyũ kay. Oajẽm jebadipyũ jo pin cĩcã buye- -Israel eipi watwat co pin cĩcã buye. 40 koato osunuy.
\p
\v 24 — Egito eipi wat warẽmtaksug̃ Israel eipi bewiat oꞌjukuk yukpiwat g̃u maꞌg̃u. Moisés oꞌjojojo ip. Jebadip kay itabotaidabotbot oꞌe. Egito eipi watꞌũm oꞌyaoka jebadip kay jeweik pin puye. 
\v 25 “Obadipyũ itaybit Deus omudot tujujẽm ãm ip Egito eipi bewi iam,” ioꞌe Moisés jewebe ma. Imẽnpit ibadipyũ itaybit g̃u oꞌe iboam — Estêvão oꞌe.
\p
\v 26 — Kuyaje Moisés oꞌju waram jebadipyũ jom. Xepxepayũ oꞌtobuxik jebadipyũ. Jewaokakam oꞌe ip. Oꞌju jewaokakaayũ mubuꞌun am. “Tapupuyũ, apẽnpuye dak eyju jewaokakam- -ibadipyũ eyju!” ioꞌe cebe ip. 
\v 27 Jebadip aokakaat pit Moisés oꞌg̃uwun. Ixe dak oꞌe Moisés pe: “Abu dak emudot ocekukukan?” i. “Abu dak emudot ‘Cũg̃ g̃u eyju jekukum’ iꞌe am ocewebe?” ioꞌe Moisés pe. 
\v 28 “Kapusu Egito eipi wat eyaoka iat puxim tu ẽn oaoka ojuy?” ioꞌe Moisés pe. 
\v 29 Imẽnpuye Moisés oꞌjenapõn Egito eipi bewi jaokaap puxim — ioꞌe.
\p — Midiã eipi kay oꞌju. Osunuy. Oꞌjewebumũn iboceat eju. Koapat oꞌkap ipot. G̃uyjom waraꞌat oꞌkap ipot. Moisés 40 koato osunuy Midiã eipi be — Estêvão oꞌe.
\p
\v 30 — G̃ebuje Deus ekawẽn tojotjotꞌukat oꞌjebapuk Moisés kay. Ukꞌaꞌũmat pe osunuy coꞌa xe. Coꞌa butet Sinaiꞌa i osunuy. Moisés tipꞌaroroꞌitꞌit oꞌjojojo. Tipsop oꞌe. Oꞌtipik g̃u bit. 
\v 31 Imẽnpuye Moisés itabẽg̃ oꞌe ijojom. “Ajo xeꞌe ijop?” ioꞌe jewebe ma. Oꞌju cetẽg̃ ma xipan tip co am. Deus oꞌjekawẽn ceweju tipꞌaroroꞌitꞌit pewi. 
\v 32 “Õn Deus,” ioꞌe Moisés pe. “Edobuyũꞌũmꞌũm itabut osodop ip okay- -Abraão, Isaque dak, Jacó dak,” ioꞌe Deus cebe. Moisés ikarabakbak oꞌe jeparara pibun. Ibuꞌu oꞌe ijom iparara buye. 
\v 33 Deus waram oꞌjekawẽn ceweju. “Eyuk ejuꞌuk ei bewi waꞌõbuyxi exe iap mubapuk am,” ioꞌe Deus cebe. “Xipat cĩcãatka mucakucag̃ ẽn, õn ijoce buye,” ioꞌe. 
\v 34 “Egito eipi watwat ikẽrẽm cĩcã webekitkit kug̃,” ioꞌe. “Ipiatpiꞌajojom cĩcã ip. Imẽnpuye jeꞌũhũꞌũm cĩcã ip. Wetaybit iboam,” ioꞌe Deus. “Õn ma okop Egito eipi watwat xewi ixeyũ dujujẽm ãm,” ioꞌe. “G̃aꞌa aju,” ioꞌe. “Õn jemuju webekitkit tujujẽm ãm Egito eipi watwat xewi,” ioꞌe Deus Moisés pe. Imẽn Deus oꞌjekawẽn Moisés eju — Estêvão oꞌe.
\p
\v 35 — Deus Moisés oꞌg̃uypit Egito eipi be. Moisés oꞌg̃uypit ixe be jebekitkit tujujẽm ãm Egito eipi bewi- -Judeuyũ dujujẽm ãm. Deus ixe oꞌg̃uypit jekawẽn tojotjotꞌukat ebapuk puje cekay tipꞌaroroꞌitꞌit pewi. Deus ma ixe oꞌg̃uypit. Judeuyũ bit ixe aꞌõ kay g̃u ip osodop. Judeuyũ ma oꞌe Moisés pe: “Abu-dak emudot ocekukukan?” i. “Abu-dak emudot ‘Cũg̃ g̃u eyju jekukum’ iꞌe am ocewebe?” ioꞌe ip Moisés pe. Deus pit ixe oꞌjomuy Judeuyũ kukukan, Egito eipi bewi Judeuyũ dujujẽmjẽmꞌukan tak — ioꞌe Estêvão.
\p
\v 36 — G̃uyjom ixe Moisés wuywebe iꞌe baꞌoreat oꞌg̃ubapukpuk Egito eipi be bima, tibog̃ cĩcãati mudeg̃ pima dak. Tibog cĩcãati butet Tipakpekati i osunuy. Ixe Moisés Judeuyũ oꞌtujujẽm Egito eipi bewi. Ade koato ukꞌaꞌũmat tag̃ oekuku ip- -40 koato. Wuywebe iꞌe baꞌoreat oꞌg̃ubapukpuk iboce dak.
\p
\v 37 — Ixe Moisés oꞌe Israel naxeg̃ebitbiyũ be:
\m “Deus jekawẽn muwẽnuwẽnꞌukat g̃udot eykay,” i. “Omudocap puxim ixe g̃udot,” i. “Eybadipyũꞌin g̃udot,” i.
\p
\v 38 — Ixe Moisés Israel naxeg̃ebitbiyũ xe osunuy ukꞌaꞌũmat pe. 
Israel naxeg̃ebitbiyũ oꞌjeꞌawero ip Sinaiꞌa etakobe. Deus ekawẽn tojotjotꞌukat oꞌjekawẽn Moisés eju ig̃oꞌa jeje — ioꞌe.
\p — Ig̃oꞌa be Moisés oꞌjekawẽn wuydobuyũꞌũmꞌũm eju- -Israel naxeg̃ebitbitꞌũmꞌũm eju. Deus ekawẽn oꞌg̃uwẽn cebe ip- -wuyawẽwẽap ekawẽn. Moisés iboap ekawẽn oꞌg̃ubararak witadopa be topaꞌerũnat topa be g̃uyjom ocetaybit am iboam — Estêvão oꞌe.
\p
\v 39 — G̃uyjom wuydobuyũꞌũmꞌũm oibuꞌun Moisés aꞌõ kay. Moisés kayꞌũm cĩcã ip oꞌe. Egito eipi kay jepit ojuy oꞌe ip. 
\v 40 Imẽnpuye oꞌjekawẽn ip Arão eju. Oꞌjekawẽn ip Moisés coꞌa jeje ibun pima.
\p — “Wuyedeusyũm cuy eg̃ug̃ẽ,” ioꞌe ip Arão be. “Ixeyũ jeꞌju wuywap Egito eipi kayate mubapuk am wuywebe,” ioꞌe ip. “Poce paxi omuy Moisés- -Egito eipi bewi wuydujujẽmat?” ioꞌe ip. “Ocetaybit g̃u poma paxi oꞌju iam,” ioꞌe ip Arão be napa ma.
\p
\v 41 — Imẽnpuye biopakꞌitꞌit coꞌiat oꞌg̃ug̃ẽ ip ourom. Ovelha oꞌyaoka ip imõg̃ ãm biopakꞌitꞌit coꞌiat wap “Teku Deus” iꞌe am. Petatam oꞌe ip jedeusbaro kug̃ puye, jemumug̃ẽ kug̃ puye. Icokcok ip oꞌe. 
\v 42 Imẽnpuye Deus ibuꞌu oꞌe cekay ip itabut ip biopakꞌitꞌit coꞌiat kay buye. Tũybe biopakꞌitꞌit coꞌiat Deus iãn oꞌe ip. Tũybe kaxiepiat Deus iãn oꞌe ip, kaxiamat tak, kasoptayũ dak iãn oꞌe ip. Deus kay wuyetabucap puxim itabut oꞌe ip ixeyũ kay. Imẽn cedag̃ꞌũm cĩcã oꞌe Deus xe. Imẽn eꞌem Deus ekawẽn muwẽnuwẽnꞌukayũ emudupmubararaktup:
\mi “Bekitkit, owebe g̃u ovelha ũmũmꞌuk epesop ukꞌaꞌũmat pe bima- -40 koato bima,” iꞌeꞌem Deus Israel naxeg̃ebitbit pe, i. “Eyedeusbaroyũ be acã iũmũmꞌuk epesop- -eyemumug̃ẽ be acã,” iꞌeꞌem, i. 
\v 43 “Ibiõg̃buk epeg̃ug̃ẽg̃ẽ,” iꞌeꞌem, i. “ ‘Ocexe eyju acã deus,’ i epeꞌe napa ma cebe ip,” iꞌeꞌem Deus, i. “ ‘Ocetabut eykay,’ i epeꞌeꞌe,” iꞌeꞌem Deus, i. “Tũybe Moloque eyedeus iãn epesop, Renfã dak,” iꞌeꞌem, i. “Moloque dukꞌa dujowatwan epekuku- -torojoꞌa dujuwatwan- -yaꞌĩcatꞌa dujowatwan,” iꞌeꞌem, i. “Moloque biõg̃buk ig̃oꞌa be osunuy,” i. “Tũybe kasopta joꞌiat tak deus iãn epesop,” iꞌeꞌem, i. “Renfã i kasopta joꞌiat putet osunuy,” iꞌeꞌem, i. “Imẽnpuye ipiat osupiꞌajoat eywebe,” iꞌeꞌem, i. “Wũyat eipi kay jeymuju õn,” i. “Õn jeymuju Babilônia eipi weg̃ũnat ka kay,” i.
\m Imẽn eꞌem Deus ekawẽn muwẽnuwẽnꞌukayũ emudupmubararaktup — Estêvão oꞌe.
\p
\v 44 — Ukꞌaꞌũmat tag̃ jekukum pima wuydobuyũꞌũmꞌũm Deus eju kawẽnwẽnapꞌa dujowatwan oekuku ip- -ixeeꞌaꞌa dujowatwan. Witadopa oꞌtopadop ig̃oꞌa be- -xepxeptopa- -topaerũnatopa. Deus ekawẽn ibararak osodop ixe dopa be. Ig̃oꞌa oꞌyamug̃ẽ ip apẽn Deus oꞌe Moisés pe iap tag̃ — Estêvão oꞌe.
\p
\v 45 — Moisésꞌũm eꞌũ buje Josué wuydobuyũꞌũmꞌũm kukukan oꞌe. Josuéyũ Deus eju kawẽnwẽnapꞌa oꞌyadujujẽm ukꞌaꞌũmat pewi torojoꞌa- -ixee mug̃ẽg̃ẽꞌa. Oꞌyadujuajẽm ip Canaã eipi be. Judeuꞌũmayũ osodop ip iboce yajẽm puje ip. Deus ixeyũ Judeuꞌũmayũ oꞌg̃ujẽm ibo ipi bewi wuydobuyũꞌũmꞌũm top am. Deus eju kawẽnwẽnapꞌa oꞌyadujuajẽm ip jeweju Canaã eipi be — ioꞌe adeayũ be.
\p
\v 46 — G̃uyjom Davi oꞌe Deus pe: “Ukꞌa muy ojuy aꞌg̃u õn eweju kawẽnwẽnapꞌam,” i — ioꞌe. — Canaã eipi be bima Davi wuydobuyũꞌũmꞌũm kukukan oꞌe. Davi ikukpin cĩcã osunuy Deus xe. Deus soat em idipat oꞌg̃udotdot cekay. Davi oꞌe: “Deus, ukꞌa muy ojuy aꞌg̃u õn eweju kawẽnwẽnapꞌam,” i. “Jacó itabut osunuy ekay,” i. “Õn tak wetabut ekay,” i. “Imẽnpuye ukꞌa muy ojuy aꞌg̃u õn- -ewebeapꞌam,” i. Imẽn Davi oꞌe Deus pe. 
\v 47 Imẽnpit Deus oꞌyamuyat Davi be g̃u. Davi g̃u Deus eju kawẽnwẽnapꞌa oꞌyamuy- -ipot acã. Salomão oꞌyamuy. 
\v 48 Deus pit ukꞌa be g̃u nuynuy- -ijodiat emuamuyꞌa be g̃u. Ixe Deusat. Soat podi ma yaꞌõbacaat. Kabi be bit nuynuy. Deus imẽn oꞌe jekawẽn muwẽnuwẽnꞌukayũ ekawẽn tag̃:
\q
\v 49 Kabi wabikbikap puxim, iꞌeꞌem Deus. Ipi wuimõg̃mõg̃ap puxim, iꞌeꞌem. Soat kug̃ õn kabi beacat kug̃- -ipi dag̃acat kug̃ tak, ioꞌe. Apẽntak ijodiat emuamuyꞌa be og̃uy? i. 
\v 50 Õn ma soat og̃ug̃ẽ. Ipi og̃ug̃ẽ, ipi dag̃acat tak, kabi dak, kabi beacat tak, i.
\m Imẽn Deus oꞌe ixeyũ ekawẽn tag̃ — Estêvão oꞌe.
\p
\v 51 — Tapupuyũ, eyaꞌõpicũg̃cũg̃ cuy epesop waꞌõ kay — Estêvão oꞌe jebadipyũ be. — Kũyjobitꞌũm cĩcã eyju! — ioꞌe. — Eybuꞌu jĩjã Deus ekawẽn com. Deus kay itabutꞌũm coꞌi eyju. Eybuꞌu jĩjã Deus aꞌõ dag̃ eyeku am. Eyebayũ ekukuap puxim eyju dak jekukum. 
\v 52 Warẽmtag̃ cĩcã Deus ekawẽn muwẽnuwẽnꞌukayũ oꞌjukukuk ip eyebayũ. Kaꞌũma ma ixeyũꞌin xipan ip oꞌjukuk! Pũg̃ tak kaꞌũma. “Cũg̃ cĩcãat omuyku,” ioꞌeꞌe ip Deus ekawẽn muwẽnuwẽnꞌukayũ. Imẽn oꞌeꞌe ip yajẽm awap. Imẽn eꞌeꞌukayũ oꞌyaoka ip eyebayũ — ioꞌe Estêvão.
\p — G̃asũ ma ixe cũg̃ cĩcãat epeg̃ũm cekay itakomaayũ be. Jesus i ixe butet. Ixe epesubamupaya korosa eju. 
\v 53 Kuy juk Deus ekawẽn epeyaꞌĩjojo Deus ekawẽn muwẽnuwẽnꞌukat pi bewi. Imẽnpit yaꞌõkayꞌũm cĩcã eyju — Estêvão oꞌe adeayũ be, jebadipyũ be.
\p
\v 54 Yaꞌĩjoꞌibiyũ oitakomãn Estêvão kay. Cekawẽn co buje ip oitakomãn. Yaoka pin oꞌe ip jetakoma pibun. 
\v 55 Estêvão bit Deus biõg̃buk kug̃ cĩcã osunuy. Oꞌjeapũn kabi kay. Deus dipap oꞌjojojo. Jesus tak oꞌjojojo. Cũg̃ꞌi osunuy kabi be Deus xe soat kukukan. Estêvão oꞌjekawẽn ixe jojom pima.
\p
\v 56 — Akꞌi juy epeꞌe — ioꞌe. — Kabi ikoce õn ijojom — ioꞌe. — Soat wag̃o jojom õn. Cũg̃ꞌi Deus xe soat kukukan — ioꞌe.
\p
\v 57 Iboap co buje, yaꞌĩjoꞌibiyũ big̃ ma oitakomãn cekay. Oꞌjewãwã ip yaꞌõberen. 
\p — G̃aꞌa ayaoka — ioꞌe ip yaꞌõberen. 
\m Oꞌjewaꞌopinomudipdip ip waram yaꞌĩjoap puxim. Adedem ip oꞌjedau cekay. 
\v 58 Kururug̃ oꞌtujowat ip ikabog̃atka eakiju. Jeekabek ip oꞌjuꞌukꞌuk. Oꞌjomõg̃ ip Saulo be imuxipan am. Ixe Saulo yaypanꞌisuat osunuy. Estêvão oꞌyabug̃ ip witaꞌam.
\m
\v 59 Yabug̃bug̃ pima Estêvão oꞌjekawẽn Jesus eju.
\p — Okukukat Jesus, ojeꞌũ — ioꞌe. — Ekay ojot — ioꞌe.
\m
\v 60 Oꞌjẽg̃ꞌaecõg̃cõg̃. Waram oꞌjewãwã yaꞌõberen.
\p — Okukukat Jesus — ioꞌe. — Ipiat cuy ecesupiꞌajoat g̃u teyũbeku wabug̃bug̃apteim — ioꞌe Deus pe.
\b
\c 8
\p
\v 1 Oeꞌũ. Saulo dak Estêvão aokaap ojuy.
\m
\v 2 Xipat cĩcãayũ Estêvãoꞌũm jebit oꞌjomõg̃ witabikũy be- -Jesus kay itabucayũ. Iꞌũmcocom cĩcã oꞌe ip.
\p Oꞌjepõg̃põg̃põg̃ ip soat ka dag̃ Jesus kay itabucayũ. Pũg̃pũg̃ ixeyũꞌin oꞌjepõg̃põg̃põg̃ ip Judéia eipi dag̃. Wararaꞌacayũ ixeyũꞌin oꞌjepõg̃põg̃põg̃ ip Samaria eipi dag̃. Jesus emumujuyũ bit oꞌjepõg̃põg̃põg̃ g̃u- -doze beayũ. Jerusalém ka be ip osodop.
\p
\v 3 Saulo dak Jesus kay itabucayũ muꞌũm ojuy oekuku. Taomũn ãm õmõmꞌuk osunuy ixeyũ dukꞌa be. Ag̃okatkayũ oꞌtaomũnmũn, aoyũ dak. Daomũnmũnapꞌa be ip oꞌg̃uõmõm. Saulo ipiat oꞌsupiꞌajoat cĩcã cebe ip. 
\v 4 Imẽnpit Deus ekawẽn muwẽnuwẽn oekuku ip oꞌjepõg̃põg̃ꞌiayũ- -Jerusalém ka bewiayũ. Soat ka dag̃ ip oekuku Deus ekawẽn muwẽnuwẽn.
\p
\v 5 Jesus kay itabucayũ Deus ekawẽn oꞌg̃uwẽnuwẽn Samaria eipi watwat pe. Filipe oꞌju ikabog̃atka be Samaria eipi beatka be. Ixe oꞌjepõg̃põg̃põg̃ꞌiayũꞌin osunuy. Ibo ka be Deus ekawẽn oꞌg̃uwẽnuwẽn.
\p — Deus Jesus oꞌtaẽ soat taxijo am — ioꞌe ibo ka watwat pe.
\m
\v 6 Ibo ka watwat itabut cĩcã oꞌe ip Filipe aꞌõ kay- -Deus aꞌõbacaan wuywebe iꞌe baꞌoreat oꞌg̃ubapukpuk puye.
\p
\v 7 Ibiõg̃buk kẽrẽat oꞌg̃ujẽmjẽm adeayũ bewi. Yaꞌõberen jewãwãwãm oꞌjẽm ip cebewi. Ade ijebit eꞌũ topibiyũ dak oꞌg̃uꞌadaꞌada. Ade taojere topibiyũ dak oꞌg̃uꞌadaꞌada. 
\v 8 Imẽneju icokcok cĩcã ip oꞌe ibo ka watwat. Itabut oꞌe ip Jesus kay.
\p
\v 9 Kuy bima Simão kay itabut cĩcã ip osodop ibo ka watwat. Ixe Simão yaꞌõbuyxiat osunuy adeayũ xe, wuywebe iꞌe baꞌoreat mubapukpug̃ wamoat puxim puye.
\p — Soat podi ma waꞌõbacaap kug̃ õn — ioꞌe soat pe napa ma. 
\m
\v 10 Imẽnpuye tũybe teku yaꞌõbaca jĩjã iãn oꞌe ip. Soat Samaria eipi watwat itabut cĩcã oꞌe Simão kay- -yaꞌõbuyxiayũ, tadaybotbocayũ dak. 
\p — Teku yaꞌõbaca jĩjã, Deus jaꞌõbacaap oꞌg̃ũm cebe buye — ioꞌe ip napa ma. — Teku Deus aꞌõbi jekukum — ioꞌe ip napa ma.
\m
\v 11 Ade koato Simão wuywebe iꞌe baꞌoreat mubapukpug̃ oekukuku ibo ka beayũ etabutpe. Imẽnpuye adeayũ itabut oꞌe ip cekay.
\p
\v 12 G̃ebuje Filipe Deus ekawẽn oꞌg̃uwẽnuwẽn ibo ka watwat pe- -Simão nuyapka watwat pe. 
\p — Deus soat kukukan jeꞌe — ioꞌe cebe ip.
\m Jesus Cristo oꞌg̃uwẽnuwẽn cebe ip. Kawẽn idipat oꞌg̃uwẽnuwẽn. Imẽnpuye itabut oꞌe ip Jesus kay. Oꞌjewemubatisanat ip- -ag̃okatkayũ, aoyũ dak. 
\v 13 Simão dak itabut oꞌe Jesus kay- -wamo tũibit. Oꞌjewemubatisanat. Filipe eju oeku. Filipe Deus aꞌõbacaan wuywebe iꞌe baꞌoreat oꞌg̃ubapukpuk adeayũ etabutpe. Deus aꞌõbacaap oꞌg̃ubapukpuk cebe ip. Simão iboap oꞌjojojo. Itabẽg̃ cĩcã oꞌe Filipe jojom.
\p
\v 14 Jesus emumujuyũ Jerusalém ka be osodop ip. Samaria eipi watwat awẽg̃ oꞌyawẽg̃tobuxik ip.
\p — Samaria eipi watwat itabut oꞌe Deus ekawẽn kay — ioꞌe ip.
\m Imẽnpuye ixeyũ Pedro oꞌg̃uju Samaria eipi kay. João dak ip oꞌg̃uju.
\p
\v 15 Pedroyũ oajẽm Samaria eipi watwat kay- -Jesus kay itabucayũ kay. Oꞌjekawẽn ip Deus eju.
\p — Ebiõg̃buk cuy eg̃uõm cebe ip — ioꞌe Deus pe, 
\v 16 ibiõg̃buk oõm g̃u buk cebe ip puye.
\m “Wuykukukat Jesus ebekit õn g̃asũ” iꞌe am oꞌjewemubatisasaan ip. Imẽnpit Deus biõg̃buk oõm g̃u buk cebe ip.
\p
\v 17 G̃ebuje jebu oꞌsubumõg̃ ip itabucayũ abi jeje. Deus biõg̃buk oõm cebe ip g̃ebuje bit. 
\v 18 Pedroyũ ixeyũ abi jeje jebu mõg̃ puje Deus biõg̃buk oõm cebe ip iap oꞌjojojo Simão. Imẽnpuye ixe Simão dinheiro ũm ojuy oꞌe Pedro be ibubabi bu ojuy.
\p
\v 19 — Ebubabi bu pin õn — Simão oꞌe Pedro be. — Juku. Edinheirom — ioꞌe cebe ip. — Aꞌõbacaap cuy eg̃ũm owebe dak imẽn eꞌe am — ioꞌe. — Wetaybit pin Deus biõg̃buk muõm ãm waraꞌacat pe — ioꞌe Pedro be.
\p
\v 20 Pedro itakoma oꞌe Simão kay. Yaꞌõpurug̃ oꞌjede cebe.
\p — Tũybe Deus emumuũm ojat wedinheirom iãn ẽn eꞌem — ioꞌe Simão be. — Deus cuy jemuju ipiatꞌajojoap kay edinheiro kug̃! — ioꞌe yaꞌõpurug̃. 
\v 21 — Ibaꞌore ewebe kapik am Deus beam oceweju. Ikẽrẽat kug̃ ẽn Deus xe. 
\v 22 Eg̃uycũg̃ cuy eg̃uy, ikẽrẽat kug̃ puye — ioꞌe cebe. — Ikẽrẽat mujurũg̃rũg̃ap cuy ecepere — ioꞌe cebe. — “Ikẽrẽat mujurũg̃ ojuy õn,” i juy ece Deus pe. “Ikẽrẽat cuy ejuꞌuk owebewi,” i juy ece cebe. Imẽn eꞌe buje Deus g̃ebum g̃u jeꞌe apẽn cuk adi ikẽrẽat eg̃ujurũg̃rũg̃ iap kay. 
\v 23 Ẽn pit etabutkarey jĩjã wararaꞌacat kay. Ikẽrẽat kay acã ẽn — ioꞌe Pedro yaꞌõpurug̃ Simão be.
\p
\v 24 Simão iparara oꞌe Pedro ekawẽn co buje.
\p — Owebeam cuy ecekawẽn Deus eju — Simão oꞌe. — Ecekawẽn cuy ceweju owebe apẽn cuk ece iap ebapukap puxim — ioꞌe Pedroyũ be.
\p — Haꞌa. Ocekawẽn cuy — ioꞌe.
\p
\v 25 Pedroyũ oꞌjepit Jerusalém ka kay. Deus ekawẽn muwẽnuwẽn oekuku ip Samaria eipi watwat pe jeka kay jexexem pima- -Jerusalém ka kay. Wuykukukat oꞌeꞌe iap muwẽnuwẽn oekuku ip, apẽn cuk adi oꞌjebapuk cebe ip iap muwẽnuwẽn tak. Ade ka dag̃ ip oekuku Samaria eipi dag̃. Ade ka watwat pe Deus ekawẽn muwẽnuwẽn oekuku ip jexexem pima.
\p
\v 26 Deus ekawẽn tojotjotꞌukat oꞌjekawẽn Filipe eju- -kabi kadi wiat.
\p — Ecewemuxipan cuy — ioꞌe. — Kaxietajoreg̃at ka kayat e dag̃ cuy eju- -Jerusalém ka bewiat e dag̃, Gaza ka kayat e dag̃. Ixe e ukꞌaꞌũmat tag̃ opop — ioꞌe Filipe be.
\p — Hm hm — ioꞌe. — Cum puk õn — ioꞌe.
\m
\v 27 Dao ma oꞌju. Ixe e dag̃ oꞌju.
\p Etiópia eipi bewiat Deus ekawẽntup cocom oeku ixe e dag̃. Jepitpin oꞌe jeipi kay- -Etiópia eipi kay. Yaꞌõbuyxi jĩjãat osunuy. Etiópia eipi kukukat buywatwatꞌukat osunuy. Etiópia eipi kukukat ayacat osunuy. Ipi kukukat putet Candace i osunuy. Etiópia eipi kukukat edinheiro kukukat osunuy. Kuy bima oꞌju Jerusalém ka be “Ẽn xipat cĩcã oxe” iꞌe am Deus pe. 
\v 28 Jepitpin oꞌe Jerusalém ka bewi. Jeipi kay jepitpin oꞌe- -Etiópia eipi kay. Cavalo emumupuxikpuxik tag̃ oeku. Xikꞌi osunuy jabikbikap pe Deus ekawẽntup cocom yaꞌõberen. Kuyjeatup cocom oeku Deus ekawẽn muwẽnuwẽnꞌukat emudupmubararaktup cocom- -Isaías emudupmubararaktup cocom.
\p
\v 29 — Ixe ecarro juy etomuixik — Deus biõg̃buk oꞌe Filipe be.
\m
\v 30 Filipe oꞌjedau carro nomuju. Ag̃okatkat aꞌõ oꞌyaꞌĩjojo yaꞌõberen tupcocom puye. Isaías emudupmubararaktup cocom oeku.
\p — Ibapuk tu exe ig̃odup ekawẽn? — ioꞌe Filipe Etiópia eipi bewiat pe.
\p
\v 31 — Kaꞌũma. Cekawẽn paꞌarẽm oxe — ioꞌe. — Apẽntak kuka cekawẽn pabuk oꞌe oxe? — ioꞌe. — Kaka g̃u omutaybinat ijoce — ioꞌe. — Ejot cuy ijoma — ioꞌe. — Eõm cuy wecarro be — ioꞌe. — Xikꞌi abik oxe — ioꞌe Filipe be.
\p
\v 32 Jesus muwẽg̃aptup cocom oeku. Imẽn eꞌem ig̃o dup:
\mi Yaoka am tujowan pima, ovelha wa g̃u, i. Imẽnpuxim ixe dak oꞌtõn g̃u, i. Mũg̃ ma eꞌem cordeiro jexeedapꞌukꞌug̃ pima, i. Imẽnpuxim ixe dak mũg̃ ma osunuy ikẽrẽm cĩcã ip oꞌjukuk pima, i. 
\v 33 Warẽmtag̃ cĩcã ip oꞌjukuk, i. “Ikẽrẽat kug̃ teku” ioꞌe ip napa ma, i. Kaꞌũma ma oꞌe “Ikẽrẽat kug̃ g̃u” i. Oꞌjomuymuy jĩjã ip, i. Ipotpet g̃u jeenuy, oꞌyaoka ip puye, i.
\m Imẽn eꞌem ig̃o dup. Ig̃o dup cocom oeku ixe Etiópia eipi bewiat.
\p
\v 34 — Apẽg̃ape ijop ibararakat ijudup pe? — ioꞌe. — Abu-muwẽnuwẽn Deus ekawẽn muwẽnuwẽnꞌukat ijudup pe? — ioꞌe. — Jewemuwẽnuwẽn tu? Waraꞌacat muwẽnuwẽn g̃u xeꞌe? — ioꞌe Filipe be.
\m
\v 35 Filipe oꞌg̃ukũyjo mẽg̃apeku tedupeku ibararak opop iam. Kawẽn idipat oꞌg̃uwẽn cebe. Jesus oꞌg̃uwẽn cebe.
\p
\v 36 G̃ebuje idibi oꞌtidobuxik ip e dag̃ cucum pima.
\p — Akꞌi juy ece — ioꞌe Etiópia eipi bewiat Filipe be. — Jodiku idibi! — ioꞌe. — Cedag̃ tu ewebe omubatisaan? — ioꞌe.
\p
\v 37 — Jesus kay etabut pima, cedag̃ kuka oꞌe — ioꞌe.
\p — Wetabut Jesus Cristo Deus ipot iap kay — ioꞌe.
\p
\v 38 Etiópia eipi bewiat jecarro oꞌg̃uycũ. Oꞌkop Filipe eju. Oꞌkop ip idibi be. Filipe Etiópia eipi bewiat oꞌg̃ubatisaan.
\p
\v 39 Idibi bewi ceu buje ip Deus biõg̃buk Filipe oꞌtujujẽm ibocewi. Imẽnpuye Etiópia eipi bewiat waram g̃u Filipe oꞌjojojo. Inaka oꞌju maꞌg̃uto e dag̃ jeka kay. Icokcok cĩcã osunuy. 
\v 40 Filipe oꞌjebapuk Azoto ka be. Ibocewi pug̃ ka dag̃ g̃u oeku- -ade ka dag̃. Kawẽn idipat muwẽnuwẽn oekuku soat kaka dag̃. Cesaréia ka be oꞌju ibocewi.
\b
\c 9
\p
\v 1 Saulo oꞌju Judeuyũ epaĩyũ kukukat kay, itakoma jĩjã wuykukukat Jesus aꞌõkayayũ kay buye. Warẽmtag̃ suykukukat Jesus aꞌõkayayũ kug̃ oekukuku. Taomũn ojuy ip oekukuku. Soat aokaka ojuy oekukuku. Imẽnpuye oꞌju Judeuyũ epaĩyũ kukukat kay. Oꞌjekawẽn ceweju.
\p
\v 2 — Cum õn Damasco ka kay — ioꞌe cebe. — Cartadup cuy etupũm owebe — ioꞌe. — Damasco ka be bime otuptujowat Judeuyũ eꞌaweroroapꞌa kukayũ be- -Deus eju kawẽnwẽnapꞌa kukayũ be. Ixeyũ acoꞌi Jesus aꞌõkayayũ g̃ubapuk owebe carta dup ũm puje — ioꞌe. — Tobuxik puje otujupit ip ijoce Jerusalém ka be — ioꞌe. — Ekay ip otujupit. Taomũnmũn ip otujupit- -ag̃okatkayũ, aoyũ dak — Saulo oꞌe.
\p — Haꞌa — ioꞌe. — Eyju juy — ioꞌe. — Imẽn cuy ece — ioꞌe.
\p
\v 3 Damasco ka kay Saulo oꞌju. E dag̃ pima Damasco ka tẽg̃ pima, dao ma kabi bewiat ekabia oikabia. Yakokoreren kabia jĩjã oꞌe. 
\v 4 Akoh! Oꞌjeako. Oꞌat ipi ju jeakoat pibun.
\p G̃ebuje wuykukukat oꞌjekawẽn Saulo eju. Saulo kabi kadiwiat aꞌõ oꞌyaꞌĩjojo.
\p — Saulo — ioꞌe. — Apẽnpuye ẽn warẽmtag̃ okug̃? — ioꞌe- -kabi beat oꞌe.
\p
\v 5 — Abu ẽn tak, Kariwa? — ioꞌe.
\p — Ekukukat Jesus õn — ioꞌe. — Warẽmtag̃ ma ẽn okug̃ — ioꞌe. — Ẽn ma juk adi ipiat esupiꞌajojoat owebe — ioꞌe. 
\v 6 — Eꞌãy — ioꞌe Saulo be. — Ikabog̃atka be juy eõm. Iboka be bima, ag̃okatkat og̃udot ekay. Apẽn ẽn em iam cuy jemukũyjo — ioꞌe wuykukukat.
Imẽn kabi beat oꞌjekawẽn Saulo eju. 
\v 7 Imẽnpuye cewejuayũ oꞌjecũcũ jĩjã ip. Oꞌjekõbidaekug̃ ip jeparara pibun. Mũg̃ ma ip oꞌe. Kabi kadiwiat aꞌõ oꞌyaꞌĩjojo ip. Imẽnpit oꞌjojojo g̃u ma ip. 
\v 8 Saulo oꞌãy ipi juwi. Wedak. Oꞌjetaewedakwedak. Imẽnpit ijojom g̃u. Imẽnpuye cewejuayũ iba com ma oꞌtujowat Damasco ka be. 
\v 9 Ebapũg̃ kabia ibo ka be osunuy ijojom g̃u. Jekõnkõn g̃u osunuy, tikõnkõn g̃u dak.
\p
\v 10 Wuykukukat oꞌjebapuk Ananias kay cexeybi. Ananias Damasco ka be osunuy. Jesus kay itabut osunuy. Wuykukukat oꞌjekawẽn cebe cexeybi.
\p — Ananias — ioꞌe.
\p — Ajo, okukukat? — ioꞌe.
\p
\v 11 — Ukꞌa ukpibubu dag̃ cuy eju- -cũg̃at ka ukpibubu dag̃ — ioꞌe. — Ag̃okatkat cuy ejokudada iboce- -Tarso ka bewiat — ioꞌe. — Ibutet Saulo i — ioꞌe. — Judas dukꞌa kay juy eju — ioꞌe. — Saulo omuy ixe dukꞌa be. Kawẽnwẽn oweju. 
\v 12 Ixe juk ag̃okatkat oꞌjojojo jexeybi. Ixe ag̃okatkat putet Ananias i osunuy cexeybi — ioꞌe. — Ananias oꞌjewebumõg̃ yajeje itada am iap oꞌjojojo jexeybi — ioꞌe. — Soat iboap oꞌjojojo jexeybi — wuykukukat oꞌe Ananias pe.
\p
\v 13 — Okukukat, odaobuꞌu — ioꞌe. — Oparara oce. Obureyũ kuy omukũyjo apẽn ixe ag̃okatkat eꞌem iam — ioꞌe. — “Saulo juk adi ipiat oꞌsupiꞌajojoat Jesus aꞌõkayayũ be- -Jerusalém ka watwat pe,” i juk oꞌe ip owebe — ioꞌe. 
\v 14 — “Ixe Paulo oajẽm ijoce paĩyũ kukukayũ aꞌõbi,” iꞌeꞌem ip owebe — ioꞌe Ananias. — “Ixe oajẽm wuydaomũn ãm- -Jesus eju kawẽnwẽnꞌukayũ daomũn ãm,” iꞌeꞌem ip owebe — ioꞌe Ananias.
\p
\v 15 — Epararam g̃u juy eg̃uy — ioꞌe. — Eju juy cekay — wuykukukat oꞌe. — Õn ma ixe Saulo otaẽ kapik am owebeam. G̃axin ma ixe omuwẽn adeayũ be- -Judeuꞌũmayũ be, ipi kukukayũ be dak, Judeuyũ be dak — ioꞌe. 
\v 16 — “Ẽn cuy ipiat ecesupiꞌajo jĩjã ẽn wekawẽn muwẽnuwẽn puye,” i oce kuy cebe — wuykukukat oꞌe Ananias pe.
\p
\v 17 Ananias oꞌju Saulo kay. Judas dukꞌa be oꞌju. Jay. Oajẽm. Cereg̃. Oõm. Jebu oꞌjebumõg̃ Saulo abi jeje.
\p — Tapu — ioꞌe. — Ẽn okitpit — ioꞌe. — Wuykukukat aꞌõbi ojot ekay — ioꞌe. — Jesus oꞌjebapuk ekay ijop ka kay ajẽm pima — ioꞌe. — Ixe ma omudot ekay — ioꞌe. — Waram etada am omudot. Deus biõg̃buk muõm ãm ewebe omudot — ioꞌe Saulo be.
\p
\v 18 Axima xee joꞌiat dao ma oꞌjedu Saulo eta bewi. Cecoat put oꞌe. Oꞌãy Saulo. Oꞌjewemubatisaat “Jesus ebekit õn g̃asũ” iꞌe am soat pe. 
\v 19 Jexat oꞌom oꞌe waram. Oibacan waram.
\p Saulo Jesus oꞌg̃uwẽnuwẽn Damasco ka watwat pe. Ade kabia osunuy Damasco ka be. Wararaꞌacayũ xe osunuy Jesus aꞌõkayayũ xe. 
\v 20 Itabunꞌisum Jesus oꞌg̃uwẽnuwẽn soat pe ibo ka watwat pe. Jesus oꞌg̃uwẽnuwẽn Judeuyũ eꞌaweroroapꞌa be- -Deus eju kawẽnwẽnapꞌa be. 
\p
\v 21 — Jesus Deus ipot — ioꞌeꞌeꞌe soat pe.
\m Oꞌyaꞌĩjojoꞌiayũ yag̃uyꞌũm oꞌe. 
\p — Ite ag̃okatkat g̃u xeꞌe juk adi Jesus aꞌõkayayũ taomũnmũn oekukuku? — ioꞌe ip jewewebe. — Ite ag̃okatkat g̃u xeꞌe juk adi ixeyũ aoka ojuy oekukuku? — ioꞌe ip jewewebe. — Itabucayũ daomũn ãm g̃u xeꞌe osodot ijoce? Paĩyũ kukukayũ kay wuydaomũnmũn wuydujupit am g̃u xeꞌe osodot? — ioꞌe ip.
\p — Ite ma burut — ioꞌe ip.
\p
\v 22 Imẽnpit Saulo Jesus oꞌg̃uwẽnuwẽn cĩcã Judeuyũ be- -Damasco ka watwat pe Deus biõg̃buk aꞌõbacaap kug̃ puye.
\p — Icẽmãn Deus Jesus oꞌtaẽ wuydaxijojoꞌukan — ioꞌeꞌeꞌe cebe ip.
\m Ibapug̃ ip oꞌg̃utaybitbin. Imẽnpuye cede baꞌore oꞌe ip Judeuyũ.
\p
\v 23 Ade xet kap puje Judeuyũ Saulo aoka ojuy oꞌe ip. Oꞌjeꞌawero ip.
\p — Apẽn xeꞌe Saulo ayaoka? — ioꞌe ip jewewebe.
\v 24 Saulo bit jaoka ojuy ip iap awẽg̃ oꞌyawẽg̃tobuxik. Judeuyũ soat em ag̃ ma osodop ip ikabog̃atka exĩntabi be Saulo aokaap wiwim. Kabiam ip ag̃ ma osodop. Ixima be dak ip ag̃ ma. 
\v 25 Imẽnpuye Jesus aꞌõkayayũ Saulo oꞌg̃ukop ag̃oka ekorara bodi yaokaap puxim. Ixima be oꞌg̃ukop ip. Pag̃eiroꞌa bog̃ pe oꞌg̃ukop ip. Saulo imẽn oꞌjenapõn Damasco ka bewi.
\p
\v 26 Saulo oꞌju Jerusalém ka be wararaꞌacayũ kay- -Jesus aꞌõkayayũ kay. Jay. Oajẽm. Jesus aꞌõkayayũ eju ceku pin oꞌe. Inaka soat ip iparara oꞌe Saulo buxim. Tũybe warẽmtag̃ g̃asũ dak wuykuk iãn oꞌe ip. Tũybe Saulo itabut g̃u Jesus kay iãn oꞌe ip. 
\v 27 Barnabé bit Saulo oꞌtujowat Jesus emumujuyũ jom- -doze beayũ jom. Barnabé oꞌjekawẽn Jesus emumujuyũ eju.
\p — Saulo wuykukukat oꞌjojojo Damasco ka kayate dag̃ — ioꞌe cebe ip. — Wuykukukat oꞌjekawẽn ceweju. Saulo yaꞌõcam Jesus oꞌg̃uwẽnuwẽn Damasco ka watwat pe — ioꞌe.
\p
\v 28 Imẽneju Jesus aꞌõkayayũ iparara g̃u oꞌe ip Saulo buxim.
\p G̃ebuje Saulo yaꞌõcam wuykukukat oꞌg̃uwẽnuwẽn Jerusalém ka watwat pe. Jesus aꞌõkayayũ eju oekukuku. 
\v 29 Oꞌg̃uwẽnuwẽn Grego aꞌõm kawẽnwẽnꞌukayũ be. Ixeyũ Grego aꞌõm kawẽnwẽnꞌukayũ Saulo aꞌõ oꞌyaꞌõdada. Teꞌe ma ip Saulo aoka ojuy oꞌe. 
\v 30 Jesus aꞌõkayayũ bit itaybit oꞌe Saulo aoka ojuy ip iam. Imẽnpuye ip Saulo oꞌtujowat Cesaréia ka kay yaokaap puxim.
\p — Xipat eju am Tarso ka kay- -aypanap ka kay — ioꞌe ip Saulo be.
\p
\v 31 Oꞌju. Imẽneju itabucayũ kaykay am ip oibuꞌun itabutꞌũmayũ. Ipiat oꞌsupiꞌajoat g̃u cebe ip. Kabaꞌũm ip osodop Judéia eipi watwat, Galiléia eipi watwat tak, Samaria eipi watwat tak. Warẽmtag̃ itabucayũ kukap oꞌjepere ip. Imẽnpuye ip big̃ ma oitabun Jesus kay. Deus aꞌõ dag̃ ip oꞌe jekukum. Deus biõg̃buk ixeyũ buywatwan osunuy. Imẽnpuye tak g̃u ip oitabun wuykukukat Jesus kay. Ade jĩjã ip oitabun.
\p
\v 32 Pedro oajẽm Enéias kay. Soat ka dag̃ oekukuku. Jesus aꞌõkayayũ jojom oekukuku. Lida ka be dak oꞌju Jesus aꞌõkayayũ jom. 
\v 33 Enéias oꞌtobuxik ig̃o ka be. Enéias ibun poꞌi osodop jexexecap pe- -oito koato bun, ijebit eꞌũ buye. Pedro oꞌju cekay.
\p
\v 34 — Enéias — ioꞌe. — Jesus Cristo jemuꞌada — ioꞌe. — Eꞌãy — ioꞌe. — Exexecap cuy eg̃uxipan edukꞌa be eju am — Pedro oꞌe cebe.
\p Oꞌjeꞌada g̃ebuje bit Enéias. Xipat oꞌe. 
\v 35 Oꞌãy. Adeayũ ijebit eꞌũ topibit oꞌjojojo- -iboceayũ- -Sarona ka watwat, Lida ka watwat tak. Imẽnpuye kuyap jetabucap oꞌjepere ip. Wuykukukat Jesus kay acã oitabun ip.
\p
\v 36 Jope ka be osunuy Jesus kay itabucat- -ayacat. Ibutet Tabita i osunuy. Tabita Dorcas iape Grego aꞌõm. Ixe soat em xipan wararaꞌacat kukukꞌuk osunuy. Xipat cĩcã osunuy. Tadaybocayũ buywatwatꞌuk osunuy soat em. 
\v 37 Ixe ayacat oiwãtaxipin. Oiꞌũ. Imẽnpuye itabucayũ ixeꞌũm jebit oꞌjowuy jebabin. Dorcasꞌũm oꞌtujowat ip umatꞌabi be.
\p
\v 38 G̃ebuje oꞌjekũyjo ip Pedro omuy Lida ka be iam. Lida ka Jope ka tẽg̃ ma oꞌsukadop. Xepxep ag̃okatkat oꞌg̃uju ip Lida ka be Pedro dakoy am. Oꞌju ip. Jay. Itabucayũ oajẽm Pedro kay.
\p — Ejot cuy oceweju — ioꞌe ip Pedro be. — Oceka be juy aju- -Jope ka be — ioꞌe ip.
\p — G̃aꞌa — ioꞌe.
\p
\v 39 Pedro oꞌju ceweju ip. Oajẽm Dorcasꞌũm kay. Jesus kay itabucayũ Pedro oꞌtujuu umatꞌabi be ceꞌũat kay. Itopꞌũm eꞌũꞌibiyũ osodop ip ig̃oꞌabi be ade- -Dorcasꞌũm pureyũ. Wawa ip osodop iꞌũmcocom. Jesay ip oꞌg̃ubapuk Pedro be.
\p — Dorcasꞌũm ijop oꞌjoinũm owebe — ioꞌe ip Pedro be. 
\m
\v 40 Pedro soat ip oꞌg̃ujẽm umatꞌabi bewi. Oꞌjẽm ip. Oꞌjẽg̃ꞌaecõg̃cõg̃ kawẽn ãm Deus eju. Oꞌjekoreren ceꞌũat kay.
\p — Tabita — ioꞌe. — Ag̃obucẽg̃ ece — ioꞌe ceꞌũat pe.
\p Ceꞌũ topibit oꞌjetaeweak. Ak. Oꞌjeak Pedro kay. Oꞌjeꞌag̃obucẽg̃. Oabik. Xikꞌi oꞌe. 
\v 41 Pedro ceꞌũ topibit oꞌsubaixik.
\p — Kirikꞌãyꞌi — ioꞌe. 
\m Oꞌg̃uꞌãy.
\p G̃ebuje Pedro wararaꞌacayũ oꞌtomuwã- -Jesus kay itabucayũ, itopꞌũm eꞌũꞌibiyũ dak.
\p — Epesot cuy ceꞌũ topibit com — ioꞌe. — Waram oꞌjetait — ioꞌe cebe ip.
\p
\v 42 Waram oꞌjetait iap awẽg̃ oꞌjeawẽg̃epõg̃põg̃ soat tag̃ Jope ka watwat tag̃. Imẽnpuye adeayũ itabut oꞌe ip wuykukukat Jesus kay. 
\v 43 Pedro Jope ka be osunuy ade kabia. Simão dukꞌa be osunuy. Simão ixeemug̃ẽg̃ẽꞌukat osunuy.
\b
\c 10
\p
\v 1 Deus ekawẽn tojotjotꞌukat oꞌjebapuk Cornélio kay. Cornélio Cesaréia ka be osunuy. 100 be sorarayũ kukukat osunuy. Itália eipi bewiayũ osodop ip cesorarayũ. 
\v 2 Cornélio xipat cĩcã osunuy Deus xe. Itabut osunuy Deus kay Judeu g̃ũn maꞌg̃u. Ibadipyũ dak itabut osodop ip Deus kay, soat tukꞌa beayũ. Ade dinheiro ũmũmꞌuk osunuy tadaybotbocayũ be. Deus eju kawẽnwẽnꞌuk osunuy. 
\v 3 Deus ekawẽn tojotjotꞌukat oꞌjebapuk Cornélio kay.
\p Katpuje oꞌjekawẽn Cornélio eju- -15 hora bima. Deus ekawẽn tojotjotꞌukat oꞌjojojo. Cetẽg̃ ma oajẽm.
\p — Cornélio — ioꞌe.
\p
\v 4 — Ajo, Kariwa? — ioꞌe.
\m Ipararam oꞌjeak cekay.
\p — Ekawẽn cocom Deus jekawẽnwẽn ẽn ceweju bima — ioꞌe Cornélio be. — Deus itaybit ebubutꞌin iũmũmꞌuk eg̃uy tadabotbocayũ be iam — ioꞌe. — Imẽnpuye Deus g̃ebum ekay — ioꞌe.
\p
\v 5 — G̃asũ juy ebuywatwatꞌukayũꞌin eg̃uju Jope ka be — ioꞌe. — Ibo ka wat cuy etomuwã — ioꞌe. — Pedro i ibutet. Ixe juy etomuwã — ioꞌe. 
\v 6 — Simão dukꞌa be omuy- -ixeemug̃eg̃eꞌukat tukꞌa be- -tibog̃ cĩcãati wãbu beatꞌa be — ioꞌe. — Ixe juy etomuwã edukꞌa be tot am — ioꞌe.
\p
\v 7 Kabi kay Deus ekawẽn tojotjotꞌukat epit puje, Cornélio ebapũg̃ayũ oꞌtomuwã jebuywatwatꞌukayũ. Xepxep ixeyũꞌin jedukꞌa be kapikpikꞌukayũ osodop. Waraꞌat ixeyũꞌin sorara osunuy. Sorara Deus kay itabucat osunuy. 
\v 8 Cornélio Deus ekawẽn tojotjotꞌukat oꞌjebapuk cebe iap oꞌg̃uwẽn cebe ip.
\p Iboap muwẽn puje ip oꞌg̃uju Jope ka be Pedro dakoy am. Xerewun. Ebapũg̃ayũ oꞌju- -Cornélio emumujuyũ. E bidase oꞌxet ip. Kuyaje oꞌju ip. 
\v 9 Jope ka tẽg̃ oꞌe ip. Ijasũn ip pima Pedro jexey joꞌiat oꞌjojojo kaxicug̃.
\p Pedro oꞌjekawẽn Deus eju. Oꞌjeu ukꞌa abi jeje kawẽn ãm ceweju. Ukꞌa abi yabicug̃ g̃u oꞌyanuy- -yapo ma. 
\v 10 Ire jĩjã oꞌe iboce. Cekõn pin oꞌe. Ukꞌa beayũ Pedro xat tatam pima, Pedro jexey joꞌiat oꞌjojojo. 
\v 11 Pag̃o bog̃ kopkom oꞌe kabi kadiwi. Pag̃o bog̃ oꞌjojojo Pedro jexey joꞌiat pe. Pag̃o kabi kadiwi kopkom cekay iap oꞌjojojo jexey joꞌiat pe. Pag̃o ierunbog̃ cĩcã oꞌe. Ebadipdip abi eju yabikirikirik oꞌe. Ixe pag̃o oꞌkop cexe. 
\v 12 Warẽmtaksug̃ osodop pag̃o be- -cũg̃cũg̃ayũ, wurũrũg̃ayũ dak, pupumayũ dak.
\p
\v 13 G̃ebuje Deus oꞌjekawen Pedro eju jexeybi.
\p — Pedro — ioꞌe. — Ixeyũ juy eyaoka exan — ioꞌe. — Yaoka buje juy ejoꞌo — ioꞌe.
\p
\v 14 — Ap! — ioꞌe. — Ojoꞌo g̃u, Kariwa — ioꞌe. — Oxat g̃u bit teku! — ioꞌe. — Iꞌo pi beku ocexe- -Judeuyũ xe — ioꞌe. — Õn pit beku ojoꞌo g̃u- -pũg̃ em tak kaꞌũma! — ioꞌe. — G̃asũ dak ojoꞌo g̃u — Pedro oꞌe.
\p
\v 15 Deus waram oꞌjekawẽn ceweju.
\p — Exan ma teyũku! — ioꞌe. — Õn ma exan og̃ũm. Imẽnpuye “Oxat g̃u bit teku,” iꞌũmg̃u juy ece owebe — ioꞌe. — “Iꞌo pi beku ocexe,” iꞌũmg̃u juy ece owebe — ioꞌe Pedro be. — Õn ma exan og̃ũm — ioꞌe. — Imẽnpuye iꞌo pi g̃u exe — Deus oꞌe.
\p
\v 16 Ebapũg̃ em Deus imẽn oꞌjekawẽn Pedro eju. Pag̃o oꞌjepaꞌũm ibocewi. Waram oꞌjeu kabi kay.
\p
\v 17 Pedro oꞌjewag̃uyda jexey joꞌiat kay.
\p — Apẽn omutaybin ojuy oꞌe Deus? — ioꞌe jewebe ma. — Apẽg̃ãm iboap oꞌg̃ubapuk owebe? — ioꞌe jewebe ma.
\p Ebapũg̃ayũ oajẽm Pedro nuyapꞌa kay Pedro g̃ebum pima jexey joꞌiat kay. Cornélio emumujuyũ oajẽm.
\p
\v 18 — Puꞌa be Simão Pedro omuy? — ioꞌe ip.
\p Oajẽm ip Simão nuyapꞌa exĩntabi be.
\p — Ijoce du Simão Pedro omuy? — ioꞌe ip ukꞌa beayũ be.
\m
\v 19 Pedro ukꞌa abi jeje mabuk osunuy. G̃ebum mabuk osunuy jexey joꞌiat kay.
\p G̃ebuje Deus biõg̃buk oꞌjekawẽn Pedro be.
\p — Ebapũg̃ ag̃okatkayũ ekudadam- -Judeuꞌũmayũ — ioꞌe. — Oajẽm ip enuyapꞌa be. 
\v 20 Ekop cuy ixeyũ dopabe — ioꞌe Pedro be. — Ceweju juy ip eju — ioꞌe. — “Oju g̃u xeꞌe ceweju ip?” iꞌũmg̃u juy ece ewebe ma — ioꞌe. — Õn ma ip og̃uju edakoy am — ioꞌe Pedro be.
\m
\v 21 Oꞌkop. Ebapũg̃ayũ dobedem oꞌju.
\p — Okudadam eyju — ioꞌe. — Apẽg̃ãm epesot ijoce? — ioꞌe cebe ip.
\p
\v 22 — Cornélio ocemudot — ioꞌe ip. — 100 be sorarayũ kukukat ixe. Ixe cũg̃ cĩcã Deus xe — ioꞌe ip. — Itabut cĩcã Deus kay. Yaꞌõbuyxi soat xe Judeuyũ xe. Deus ekawẽn tojotjotꞌukat mo aꞌg̃u oꞌjekawẽn Cornélio be- -ocekukukat pe — ioꞌe ip. — “Pedro juy etomuwã,” i mo aꞌg̃u oꞌe cebe — ioꞌe ip. “Pedro juy jeedot edukꞌa be,” i mo aꞌg̃u oe cebe — ioꞌe ip. “Cekawẽn kay juy eyaꞌõpicũg̃ eg̃uy,” i mo aꞌg̃u oꞌe cebe — ioꞌe ip Pedro be.
\p
\v 23 — Haꞌa — ioꞌe. — Epeõm cuy ocedukꞌa be — ioꞌe. — Ijoce juy epexet — ioꞌe.
\p — Ma — ioꞌe ip.
\m Oꞌxet ip ig̃oꞌa be.
\p
\v 24 Kuyaje Pedro oꞌkop. Oꞌjewemuxipan. Oꞌju Cornélio emumujuyũ eju. Cornélio kay ip oꞌju Cesaréia ka be. Waraꞌacayũ itabucayũ dak oꞌju Pedro eju- -Jopé ka watwat. Xet. E bidase ip oꞌxet. Kuyaje oꞌju ip. Jay. Oajẽm ip Cesaréia ka be. Cornélio kuy jebadipyũ oꞌtomuwã jedukꞌa be, jebureyũ dak. Pedro ajẽmap wiwim ip osodop. Pedroyũ oajẽm tukꞌa be. Cornélio kay oajẽm.
\p
\v 25 Pedro õm pima, Cornélio oꞌju cekay tobedeam. Oꞌjẽg̃ꞌaecõg̃cõg̃ Pedro wap. Tũybe Pedro Deus iãn oꞌe. 
\v 26 Dao ma Pedro Cornélio oꞌg̃uꞌãy.
\p — Owap g̃u juy ecẽg̃ꞌaecõg̃cõg̃ — ioꞌe. — Eꞌãy — ioꞌe. — Deus g̃u õn- -ag̃okatkat acã — ioꞌe.
\p
\v 27 G̃ebuje oõm ip tukꞌa be kawẽnwẽn. Tukꞌa beayũ adeayũ oꞌjeꞌaweroroꞌiayũ Pedro oꞌjojojo. Pedro oꞌjekawẽn ceweju ip.
\p
\v 28 — Oceju Judeuyũ — ioꞌe. — Eyetaybit ocexe oceꞌaweropi Judeuꞌũmat eju iam. Imẽnpit kapusu Deus mo aꞌg̃u waraꞌan ma omukũyjojo. “Cedag̃ g̃u ewebe ‘Judeuꞌũmat xipat g̃u’ iꞌe am,” i mo aꞌg̃u Deus oꞌe owebe — ioꞌe. 
\v 29 — Imẽnpuye ojot eykay, Judeuyũ g̃u maꞌg̃u eyju. Eywebe onomuwã buje dao ma ojot — ioꞌe. — Odaobuꞌu g̃u wedot am eykay — ioꞌe. — Apẽg̃ãm eyju onomuwã? — Pedro oꞌe.
\p
\v 30 Cornélio oꞌjekawẽn Pedro eju.
\p — Tapu, kapusukuruy ijoce ma mo aꞌg̃u og̃uy ijaꞌa be — ioꞌe. — Katpujesũ mo adi kawẽnwẽn og̃uy Deus eju. Dao ma Deus ekawẽn tojotjotꞌukat oꞌjebapuk okay- -doti isopsepat kukat — ioꞌe. 
\v 31 — Oꞌjekawẽn oweju. “Cornélio,” i mo aꞌg̃u oꞌe owebe. “Ekawẽn cocom Deus, jekawẽnwẽn ẽn ceweju bima,” i mo aꞌg̃u oꞌe owebe — ioꞌe. — “Deus itaybit ebubutꞌinꞌin iũmũmꞌuk eg̃uy tadaybotbocayũ be iam,” i mo aꞌg̃u oꞌe owebe — ioꞌe. 
\v 32 — “Ebuywatwatꞌukayũꞌin cuy eg̃uju Jope ka be,” i mo aꞌg̃u oꞌe owebe — ioꞌe. — “Ag̃okatkat cuy etomuwã. Pedro i ibutet. Simão dukꞌa be ixe omuy- -ixee mug̃ẽg̃ẽꞌukat tukꞌa be- -tibog̃ cĩcãati wãbu beatꞌa be,” i mo aꞌg̃u owebe — ioꞌe. 
\v 33 — Imẽneju dao ma obuywatwatꞌukat og̃uju edakoy am — ioꞌe. — Xipat cĩcã ajẽm okay — ioꞌe. — G̃asũ soat wuyju ijoce Deus etabixe. Apẽn Deus oꞌe ewebe iap cuy eg̃uwẽn ocewebe. Soat cuy eg̃uwẽn ocewebe — ioꞌe Pedro be.
\p
\v 34 Pedro oꞌjekawẽn ceweju ip- -Judeuꞌũmayũ eju.
\p — “Judeuyũ kay acã õn,” iꞌeꞌem g̃u Deus. “Judeuꞌũmayũ kay g̃u õn,” iꞌeꞌem g̃u Deus. G̃asũ bit wetaybit iboam — ioꞌe. — Deus xipan soat kug̃ ijodiat kug̃. Pũg tag̃ ma ip ikug̃ — ioꞌe. 
\v 35 — Soat Deus aꞌõ dag̃ jekukuꞌukayũ cũg ma cexe- -Judeuyũ, Judeuꞌũmayũ dak. Deus bikuyap tag̃ jekukuꞌukayũ cũg ma cexe- -soat ip — ioꞌe.
\p
\v 36 G̃asu Deus kawẽn idipat oꞌg̃udot ocewebe- -Judeuyũ be — ioꞌe. — “Jesus Cristo kay eyetabut puje wetakoma g̃u oce eykay,” iꞌeꞌem Deus wuywebe. Ixe Jesus soat kukukat. 
\v 37 “G̃asũ bit epeyewemubatisasaan cuy ‘Waram g̃u ikẽrẽat oceg̃ujurũg̃’ iꞌe am eybureyũ be,” ioꞌeꞌe João Batista. Imẽn oꞌeꞌe soat pe Judéia eipi watwat pe. Eyetaybit iboam — ioꞌe.
\p
\v 38 — Deus Jesus oꞌtaẽ. Nazaré ka be osunuyiat oꞌtaẽ. Deus jebiõg̃buk oꞌg̃uõm cebe- -Jesus pe. Jaꞌõbacaap oꞌg̃uõm cebe. Jesus soat ka dag̃ oekukuku xipacat mug̃ẽg̃ẽm waraꞌacat peam. Ibiõg̃buk kẽrẽat oꞌg̃ujẽmjẽm Satanás aꞌõ kayayũ bewi. Jesus imẽn oekukuku soat em Deus aꞌõbi jekukum puye — ioꞌe. 
\v 39 — Apẽn cuk adi Jesus oꞌeꞌe iap ocejojojo Judéia eipi dag̃ jekukum pima, Jerusalém ka be bima dak — Pedro oꞌe.
\p — Judeuyũ kukukayũ ma Jesus oꞌsubamupaya korosa be yaoka am. 
\v 40 Deus pit waram Jesus oꞌg̃utait — ioꞌe. — Ebapũg̃ kabia ceꞌũap. Xepxep xet kap puje, Deus Jesus oꞌg̃utait waram — ioꞌe.
\p — Jesus waram oꞌjebapuk jewekay itabucayũ kay. Deus aꞌõbi oꞌjebapuk. 
\v 41 Waram itait puje Jesus oꞌjebapuk soat kay g̃u- -ocekay acã. Ocekay oꞌjebapuk kuy bima Deus ocenaẽ buye — ioꞌe. — Deus cuk ocenaẽ ocewebe Jesus muwẽn ãm itaybitꞌũmayũ be — ioꞌe.
\p — Deus pe waram imutait puje, oceweju Jesus oꞌjekõn, oꞌtikõn tak. 
\v 42 “Kawẽn idipat cuy epeg̃uwẽnuwẽn soat pe,” i mo aꞌg̃u oꞌe Jesus ocewebe — ioꞌe Pedro. — “ ‘Deus Jesus oꞌtaẽ ixe be “Teyũku ikẽrẽat kug̃ Deus xe,” iꞌe am kũyjobitꞌũmayũ be. “Teyũku xipat Deus xe” iꞌe am kũyjobicayũ be,’ i juy epeꞌe soat pe,” i mo ag̃u oꞌe Deus ocewebe. “ ‘Imẽn ixe jeꞌe soat pe- -itabẽg̃ayũ be, ceꞌũꞌũayũ be dak,’ i juy epeꞌe soat pe,” i mo ag̃u oꞌe ocewebe — ioꞌe Pedro.
\p
\v 43 — Kuyje dak Deus ekawẽn muwẽnuwẽnꞌukayũ Jesus oꞌg̃uwẽnuwẽn. “Ag̃okatkat omuyku,” ioꞌe ip kuyje. “Cekay eyetabut pima, jaꞌõbi Deus ikẽrẽat juꞌuk eywebewi,” ioꞌeꞌeꞌe ip. Kuyje Deus ekawẽn muwẽnuwẽnꞌukayũ imẽn oꞌeꞌeꞌe Jesus muwẽnuwẽn — Pedro oꞌe.
\p
\v 44 Pedro kawẽnwẽn pima Deus biõg̃buk oꞌkop Judeuꞌũmayũ kay.
\p Soat pe oõm- -oꞌyaꞌĩjojoꞌiayũ be- -Judeuꞌũmayũ be. 
\v 45 Yag̃uyꞌũm cĩcã ip oꞌe Judeuyũ- -Jesus kay itabucayũ- -Pedro ejuayũ. Yag̃uyꞌũm ip oꞌe Deus jebiõg̃buk oꞌg̃uõm Judeuꞌũmayũ be buye. Tũybe wuywebe acã Deus jebiõg̃buk g̃uõm iãn oꞌe ip. 
\v 46 Yaꞌõbaꞌarẽmatꞌaꞌõm kawẽnwẽn ip oꞌe Judeuꞌũmayũ.
\p — Deus, ẽn xipat cĩcã — ioꞌe ip yaꞌõbaꞌarẽmatꞌaꞌõm.
\m Judeuyũ iboap oꞌyaꞌĩjojo. Imẽneju Pedro oꞌjekawẽn jebureyũ eju- -Judeuyũ eju.
\p
\v 47 — Deus jebiõg̃buk oꞌg̃uõm cebe ip — ioꞌe. — Oꞌg̃uõm cebe ip apẽn cuk oꞌg̃uõm wuywebe iap coꞌi — ioꞌe. — Imẽnpuye cedag̃ g̃u du ocewebe ixeyũ mubatisaan? — ioꞌe. — Abu dak kuka oꞌe ocewebe “Cedag̃ g̃u,” i? — Pedro oꞌe.
\p
\v 48 Oꞌjekawẽn Judeuꞌũmayũ eju dak.
\p — Epeyewemubatisasaan cuy “Wuykukukat Jesus ebekitkit oceju g̃asũ bit” iꞌe am soat pe eybureyũ be — ioꞌe cebe ip.
\m Oꞌjewemubatisaan ip.
\p — Ibun ma juy eg̃uy ocexe — ioꞌe ip Pedroyũ be.
\m Imẽnpuye Pedroyũ ibun osodop ip cexe ip.
\b
\c 11
\p
\v 1 Judéia eipi watwat oꞌyawẽg̃coco ip- -Jesus emumujuyũ. Wararaꞌacayũ dak oꞌyawẽg̃coco ip Jesus kay itabucayũ. Judeuꞌũmayũ dak Deus ekawẽn kay oꞌe iap awẽg̃ oꞌyawẽg̃coco ip. 
\v 2 Pũg̃pũg̃ Jesus aꞌõkayayũꞌin iboap awẽg̃ kay g̃u oꞌe ip- -Judeuyũ. Tũybe soat Jesus kay itabucayũ juy jedaypuꞌag̃obixeedakatkan iãn oꞌe ip.
\p Jerusalém ka be Pedro ajẽm puje ixeyũ Judeuyũ Pedro oꞌg̃ukorẽm.
\p
\v 3 — Pedro, apẽn mo ẽn tak ece? — ioꞌe ip. — Apẽnpuye mo ẽn tak eõm Judeuꞌũmat tukꞌa be? — ioꞌe ip. — Apẽnpuye ẽn tak mo ecekõn taypuꞌag̃obixeedakatꞌũmayũ eju? — ioꞌe ip Pedro be.
\p
\v 4 G̃ebuje Pedro apẽn oꞌjebapuk cebe ip iap oꞌg̃uwẽn cebe ip.
\p — Mẽnpuk, obureyũ! — ioꞌe. — Eyaꞌõpicũg̃cũg̃ puk! — ioꞌe. 
\v 5 — Jope ka be bima kawẽnwẽn mo oce Deus eju. Wexey joꞌiat ojojojo. Kabi kadi wi pag̃o bog̃ kopkom iap mo ojojojo wexey joꞌiat pe — ioꞌe. — Okay kopkom oꞌe. Yabikirikirik oꞌe ebadipdip abi eju. 
\v 6 Xipan mo oceak cekay. Puca mo ojojojo- -cũg̃cũg̃ayũ, wurũrũg̃ayũ dak, pupumayũ dak, widayũ dak. Soat ip iꞌopi wuyxe — Pedro oꞌe.
\p
\v 7 — Deus mo oꞌjekawẽn oweju. “Pedro,” i mo oꞌe owebe. “Ixeyũ juy eyaoka exan,” i mo oꞌe — ioꞌe. 
\v 8 — “Kaꞌũma, okukukat,” i mo oce cebe. “Iꞌopi beku ocexe Judeuyũ xe. Ojoꞌo g̃u buk,” i mo oce cebe — ioꞌe Pedro. 
\v 9 — Imẽnpuye Deus waram oꞌjekawẽn oweju. “Exat ma ijop,” i mo oꞌe. “ ‘Iꞌopiat beku’ iꞌũmg̃u juy owebe,” i mo oꞌe owebe. “Õn ma exan og̃ũm. Imẽnpuye iꞌopi g̃u ewebe,” i mo oꞌe owebe. 
\v 10 Ebapũg̃ em Deus imẽn oꞌjekawẽn oweju. Pag̃o bog̃ waram oꞌjepaꞌũm kabi kay — ioꞌe.
\p
\v 11 — G̃ebuje ebapũg̃ ag̃okatkayũ oajẽm ocesopiatꞌa kay. Cesaréia ka wat cuk ip oꞌg̃ujuat odakoy am. Cornélio i ibutet — ioꞌe.
\p
\v 12 — G̃ebuje Deus biõg̃buk oꞌjekawẽn oweju — ioꞌe. — “ ‘Oju xeꞌe Judeuꞌũmat eju?’ iꞌũmg̃u juy ece owebe,” i mo oꞌe owebe — ioꞌe. — Imẽnpuye oju ceweju ip — ioꞌe.
\p — Cornélio dukꞌa kay oju- -Judeuꞌũmat tukꞌa kay — ioꞌe. — Iboceayũ dak oꞌju ip oweju- -6 beayũ- -Jope ka watwat — ioꞌe. — Soat mo ocajẽm Judeuꞌũmat tukꞌa be- -Cornélio dukꞌa be- -omudocat tukꞌa be — ioꞌe.
\p
\v 13 — Cornélio mo apẽn Deus ekawẽn tojotjotꞌukat oꞌjebapuk jekay iap oꞌg̃uwẽn ocewebe: “Deus ekawẽn tojotjotꞌukat mo ojojojo,” i. “Cũg̃ꞌi mo og̃uy odukꞌa be,” i. “Ixe mo oꞌe owebe: ‘Ebuywatwatꞌukayũꞌin cuy eg̃uju Jope ka be,’ i,” i. “ ‘Simão Pedro juy etomuwã,’ i,” i. 
\v 14 “ ‘Ixe kawẽn idipat g̃uwẽn eywebe,’ i,” i. “ ‘Kawẽn idipat co buje, Deus jedaxijo- -ebadipyũ dak taxijo’ i,” i. Imẽn Cornélio mo oꞌe ocewebe — Pedro oꞌe.
\p
\v 15 — Iboam Cornélio e buje, Jesus mo og̃uwẽn cebe ip- -Judeuꞌũmayũ be — ioꞌe.
\p — Õn kawẽnwẽn pima Deus biõg̃buk oꞌkop cekay ip- -Judeuꞌũmayũ kay. Cebe ip oõm. Apẽn wuywebe oõm koap iap puxim oõm cebe ip. 
\v 16 Imẽneju wuykukukat ekawẽn kay mo oceg̃ebu. Wuykukukat mo oꞌe wuywebe: “João idibi be imubatisasan oeku,” i. “Eywebe bit Deus biõg̃buk jeõm,” i mo oꞌe wuywebe — ioꞌe Pedro. 
\v 17 — Deus ma jebiõg̃buk oꞌg̃uõm wuywebe wuykukukat Jesus Cristo kay wuyetabut puye. Apẽn kuy bima mo oꞌg̃uõm wuywebe iap coꞌi jebiõg̃buk oꞌg̃uõm cebe ip g̃asũ. Cedag̃ osunuy Deus pe jebiõg̃buk muõm ãm cebe ip. Imẽnpuye “Cedag̃ g̃u Deus pe jebiõg̃buk muõm ãm cebe,” iꞌũmg̃u oce õn pit — Pedro oꞌe cebe ip.
\p
\v 18 Pedro aꞌĩjo buje Jerusalém ka watwat oꞌjede g̃u Judeuyũ. Pedro mukorẽmap oꞌjepere ip.
\p — Kaꞌũmg̃u Deus coꞌiat xipacat! — ioꞌe ip cebe. — Judeuꞌũmayũ dak ikẽrẽat mujurũg̃rũg̃ap epereap ojuy acoꞌi Deus — ioꞌe ip. — Ibikuy acoꞌi ikẽrẽat uk am cebewi ip. Soat em Deus xe jeedop ip jeꞌũ buje — ioꞌe ip. — Deus xipat cĩcã! — ioꞌe ip.
\p
\v 19 Estêvão eꞌũ buje oꞌjepõg̃põg̃põg̃ ip itabucayũ. Oꞌjepõg̃põg̃põg̃ ip wararaꞌacayũ ixeyũ be ipiat oꞌsupiꞌajoat cĩcã buye. Pũgpũg̃ ixeyũꞌin wũy ma oꞌju. Fenícia eipi be oꞌju ip. Chipre eipi be dak, Antioquia ka be dak. Ade kaka dag̃ jekukum pima Jesus oꞌg̃uwẽnuwẽn ip jajẽmapka watwat pe. Jesus oꞌg̃uwẽnuwẽn ip Judeuꞌũmayũ be g̃u- -Judeuyũ be acã.
\p
\v 20 Pũg̃pũg̃ ixeyũꞌin oꞌju Antioquia ka kay. Chipre eipi be osodopiayũ oꞌju ip Antioquia ka kay, Cirene eipi be osodopiayũ dak.
\p G̃ebuje kawẽn idipat oꞌg̃uwẽnuwẽn ip Judeuꞌũmayũ be- -Grego aꞌõm kawẽnwẽnꞌukayũ be.
\p — Jesus acã ocekukukat — ioꞌe ip cebe ip.
\m
\v 21 Deus ip oꞌsubuywatwan cĩcã wuykukukat Jesus muwẽnuwẽnayũ. Imẽneju adeayũ oibuꞌun ip jetabut am jedobuyũꞌũmꞌũm ekawẽn kay. Kuyap jetabucap oꞌjepere ip. Wuykukukat Jesus kay ip oitabun.
\p
\v 22 G̃ebuje Jesus kay itabucayũ apẽn Antioquia ka watwat itabut oꞌe iap awẽg̃ oꞌyawẽg̃tobuxik ip- -Jerusalém ka watwat.
\p — Ade Judeuꞌũmayũ itabut oꞌe Jesus kay- -Antioquia ka watwat — ioꞌe itaybicayũ.
\m Imẽnpuye itabucayũ kukukayũ Barnabé oꞌg̃uju Antioquia ka be. 
\v 23-24 Xipat cĩcãat osunuy Barnabé. Soat em Deus biõg̃buk aꞌõ dag̃ oekukuku. Wuykukukat Jesus kay itabut cĩcã osunuy.
\p Barnabé oajẽm Antioquia ka be itabucayũ kay- -Jesus kayayũ kay. Apẽn cuk adi Deus xipacat oꞌg̃ũm iboceayũ be iap awẽg̃ tobuxik puje icokcok cĩcã oꞌe. Soat ip oꞌg̃utaybitbin Deus ekawẽn.
\p — Eyetabun cĩcã juy epesop wuykukukat Jesus kay! — ioꞌe cebe ip. — Yaꞌõ dag̃ cuy epeku! Kũyjobin cuy epesop cekawẽn kay — ioꞌe cebe ip.
Imẽnpuye ade jĩjã oitabun wuykukukat Jesus kay.
\p
\v 25 G̃ebuje Barnabé Saulo oꞌtakoy. Tarso ka be oꞌju Saulo dakoy am. Oꞌtakoy. Oꞌtobuxik. Oꞌjekawẽn ceweju.
\p — G̃aꞌa acepit Antioquia ka be — ioꞌe.
\p — G̃aꞌa — ioꞌe.
\m
\v 26 Oꞌjepit ip- -Barnabé, Saulo dak. Pũg̃ koato ibo ka be osodop ip. Jeꞌaweroroꞌuk ip osodop itabucayũ eju. Ade itabucayũ mutaybitbinꞌuk ip osodop. Antioquia ka be bima soat em wararaꞌacayũ oꞌe: — Cristo ebekitkit — i Jesus kay itabucayũ be.
\p
\v 27 Pũg̃pũg̃ Deus ekawẽn muwẽnuwẽnꞌukayũ oajẽm itabucayũ kay- -Antioquia ka beayũ kay. Oajẽm ip Barnabé Antioquia ka be bima, Saulo dak. Jerusalém ka bewi ip oajẽm. Oꞌjeꞌawero ip itabucayũ eju. 
\v 28 Pũg̃ ixeyũꞌin oꞌjekawẽn itabucayũ eju. Ibutet Ágabo i osunuy. Deus biõg̃buk ixe Ágabo oꞌg̃ukũyjo apẽn g̃uyjom jeꞌbapuk iam. Imẽnpuye oꞌjekawẽn ceweju ip.
\p — Wuyrere jĩjã acesop! Wuyxat iꞌũm soat ka dag̃ — ioꞌe cebe ip.
\p Cláudio ipi kukukan pima oireren ip apẽn kuy bima Ágabo oꞌe iap tag̃. 
\v 29 Oꞌjeꞌawero ip Jesus kay itabucayũ.
\p — G̃aꞌa dinheiro ag̃uju wararaꞌacayũ be- -itabucayũ be- -Judéia eipi watwat pe — ioꞌe ip jewewebe. — Irere ip jekukum — ioꞌe ip.
\m
\v 30 Imẽn soat ip jedinheiro muxipanpanꞌuk osodop ikug̃ pima. Imẽnpuye Barnabé oꞌg̃uju ip Saulo dak. Oꞌg̃uju ip dinheiro ũm ãm itabucayũ kukukayũ be- -irereayũ kukukayũ be.
\b
\c 12
\p
\v 1 Ixeyũ ekabia be Herodes Judeuyũ kukukat osunuy. Ixe ipiat oꞌsupiꞌajoat Jesus kay itabucayũ be. 
\v 2 Koap Tiago oꞌyaokaat pajam. Tiagoꞌũm oeꞌũ- -João wag̃oꞌũm. 
\v 3 Icokcok oꞌe ip Judeuyũ oꞌyaokaat puye- -itabutꞌũmayũ. Imẽnpuye Herodes Pedro oꞌtaomũnat. Oꞌtaomũnat Judeuyũ petatam pima. Ixe epeta bima pãoꞌa oꞌoꞌuk ip osodop- -yamuyuhuhuaptõmtẽmꞌũmatꞌa.
\p
\v 4 Taomũn puje Pedro oꞌg̃uõmat daomũnmũnapꞌa be.
\p — Peta kap puje Pedro og̃ujẽm g̃uto daomũnmũnapꞌa bewi — Herodes oꞌe jewebe ma. — Ixe ekawẽn cuy oyaꞌĩjo soat etabut pe — ioꞌe jewebe ma.
\p Sorarayũ oꞌg̃uju Pedro wiwi am. 16 be sorarayũ oꞌg̃uju. Ebadipdipayũ iwiwim oꞌe kabia buje. Ebadipdipayũ g̃uto iwiwim oꞌe ip kaxicug̃. Ebadipdipayũ g̃uto iwiwim oꞌe ip katpuje. Ebadipdipayũ g̃uto iwiwim oꞌe ip ixima be. 
\v 5 Sorarayũ ma xipan cĩcã Pedro wiwim ip oꞌe cenapõnap puxim. Itabucayũ bit kawẽnwẽn cĩcã oꞌe ip Deus eju Pedro mujẽm ãm.
\p
\v 6 Herodes ma kajuk Pedro oꞌg̃ujẽm daomũnmũnapꞌa bewi kabia buje. Deus ekawẽn tojotjotꞌukat pit oꞌg̃ujẽm ixima be. Deus ekawẽn tojotjotꞌukat oajẽm Pedro kay ixe exima be. Pedro ixet osunuy daomũnmũnapꞌa be. Ixet osunuy xepxep sorarayũ pidase. Cem ibakirik osunuy correntebum. Sorara ag̃ osunuy daomũnmũnapꞌa exĩntabi be- -badiat exĩntabi be. Waraꞌat tak kacũg̃ kadiat exĩntabi be osunuy ag̃. 
\v 7 Deus ekawẽn tojotjotꞌukat oꞌjebapuk daomũnmũnapꞌa be. Dao ma oikabia. Jok. Pedro oꞌg̃ujok jebum. Oꞌg̃uwurũg̃.
\p
\v 8 — Daosuw! Eꞌãy! — ioꞌe cebe. — Ekop cuy okay! — ioꞌe. 
Oꞌjebuedu ipi ju Pedro bakirikpu- -correntebu. Waram oꞌjekawẽn Pedro eju Deus ekawẽn tojotjotꞌukat.
\p — Ekamixa juy eg̃uõm — ioꞌe. — Eyuk cuy eg̃uõm — ioꞌe cebe.
\m Pedro oꞌg̃uõm.
\p — Eekabek cuy eg̃uõm — ioꞌe. — Ejot cuy onomuju — ioꞌe cebe.
\p
\v 9 G̃ebuje oꞌjẽm ip- -Pedro, Deus ekawẽn tojotjotꞌukat tak. Oꞌjẽm ip ya bewi. Pedro oꞌjẽm Deus ekawẽn tojotjotꞌukat nomuju. Kacũg̃ kay ip oꞌju. Pedro itaybit g̃u oꞌe apẽn oꞌjebapuk okay iam. Tũybe wexeybi Deus ekawẽn tojotjotꞌukat cocom õn iãn oꞌe. 
\v 10 Oꞌkap ip koapayũ deg̃ sorarayũ deg̃. Waram oꞌju ip. Ãmap sorarayũ deg̃ ip oꞌkap. Oajẽm ip kacũg̃ kadiat exĩntabi be. Yobog̃ cĩcã osunuy. Cem cĩcã osunuy. Icaat mug̃ẽg̃ẽ osunuy. Ixe exĩntabi kacũg̃ kay wuyjẽmjẽmap exĩntabi osunuy. Ixe exĩntabi jekpiwa ma oꞌjewenomudipꞌuk. Oꞌkap ip cedag̃. Kacũg̃ pe ip oꞌjẽm. Ukꞌa ukpibubu dag̃ ip oꞌkap. Deus ekawẽn tojotjotꞌukat Pedro oꞌsuiwat. 
\v 11 Pedro apẽn oꞌjebapuk cekay iam oꞌyag̃uysan g̃ebuje bit.
\p — Wetaybit g̃asũ apẽn oꞌjebapuk okay iam — ioꞌe jewebe ma. — Deus jekawẽn tojotjotꞌukat oꞌg̃udot omujẽm ãm daomũnmũnapꞌa bewi — ioꞌe jewebe ma. — Ixe omujẽm Herodes pe waokaap puxim — ioꞌe. — Judeuyũ ma waoka ojuy. Deus pit odaxijo ixeyũ be waokaap puxim — ioꞌe jewebe ma.
\p
\v 12 Pedro oꞌju Maria dukꞌa kay. Ixe Maria João Marcos xi osunuy. Ade Jesus kay itabucayũ awerom osodop ip ixe dukꞌa be. Deus eju kawẽnwẽn oꞌe ip.
\p — Daomũnmũnapꞌa bewi Pedro juy eg̃ujẽm — iꞌoꞌeꞌe ip Deus pe.
\m
\v 13 Pedro oꞌju xĩntabi be. Tag̃tag̃tag̃ ioꞌe xĩntabi be. Oꞌtomuwã tomudipꞌukan. Ayacat oajẽm xĩntabi be- -yaypanꞌisuat. Rode i ibutet osunuy. Oajẽm abu tag̃tag̃tag̃ ioꞌe iap co am. 
\v 14 Ixe yaypanꞌisuat itaybit oꞌe Pedro aꞌõm. Icokcok cĩcã oꞌe. Xĩntabi oꞌtomudipꞌuk g̃u. Badi oõm jebureyũ mukũyjom- -itabucayũ mukũyjom.
\p — Pedro omuy xĩntabi be — ioꞌe cebe ip.
\p
\v 15 — G̃ujeat g̃u eku! — ioꞌe ip. — Pedro g̃u eku. Adaodao ma ece — ioꞌe ip.
\p — Pedro ma eku — ioꞌe. — Wadaodao g̃u. Pedro ma.
\p — Pedro g̃u eku — ioꞌe ip. — Pedro eju jekukuꞌukat acã eku- -Deus ekawẽn tojotjotꞌukat acã — ioꞌe ip.
\p
\v 16 Pedro tag̃tag̃tag̃ꞌi mabuk osunuy. Iõm pin oꞌe. Ibun pima acã xĩntabi oꞌtomudipꞌuk ip. Pedro oꞌjojojo ip. Itabẽg̃bẽg̃ ip ijojom oꞌe.
\p — Pedro ma! — ioꞌe ip.
\m Yag̃uybabiꞌũm ip oꞌe. 
\v 17 Imẽnpit Pedro jebum oꞌe wẽg̃wẽg̃ꞌi yaꞌõkareyap puxim.
\p Apẽn Deus oꞌg̃ujẽmat daomũnmũnapꞌa bewi iap oꞌg̃uwẽn cebe ip Pedro.
\p — Deus omujẽmap cuy epeg̃uwẽn Tiago be, wararaꞌacayũ be dak wuykitpitpiyũ be- -itabucayũ be — ioꞌe.
\p Oꞌjẽm ibocewi. Waraꞌat ka kay oꞌju.
\p
\v 18 Kabia buje Pedro oꞌtobuxik g̃u taomũnmũnyũ wiwiꞌukayũ. Yag̃uybabiꞌũmꞌũm ip oꞌe Pedro ip oꞌtobuxik g̃u ya be buye.
\p — Poma xeꞌe oꞌju Pedro? — ioꞌe ip. — Oꞌjenapõn xeꞌe? — ioꞌe ip jewewebe.
\p
\v 19 Herodes Pedro oꞌg̃udocat jewekay. Teꞌe ma jebuywatwatꞌukayũ oꞌg̃uju Pedro kudadam. Tobuxik paꞌore oꞌe ip.
\p Ibocewi Herodes oꞌjekawẽn Pedro wiwim osodopꞌiayũ be.
\p — Apẽn Pedro oꞌjẽm daomũnmũnapꞌa bewi? — ioꞌe.
Cede baꞌore oꞌe ip. Imẽnpuye Herodes jebuywatwatꞌukayũ oꞌg̃uju Pedro wiwim osodopꞌiayũ aokaan.
\p Herodes oꞌjẽm Judéia eipi bewi. Cesaréia ka kay oꞌju. Ibo ka be osunuy.
\p
\v 20 Herodes itakoma oꞌe Tiro ka watwat kay, Sidom ka watwat kay dak. Kuy bima Herodes ebekitkiyũ ixat tujowatwatꞌuk ip osodop Tiro ka watwat xan, Sidom ka watwat xan tak, ixatꞌũm ip ika be buye. G̃asũ bit oibuꞌun ip ixat tujowat am Herodes itakoma buye. Imẽneju Tiro ka watwat oꞌjeꞌawero ip Sidom ka watwat eju. Ixeyũ Herodes buywatwatꞌukat purem oꞌe. Ibuywatwatꞌukat putet Blasto i osunuy. Yaꞌõbuyxiat osunuy. Oꞌju ip Blasto kay. Oꞌjekawẽn ip Blasto eju.
\p — Ocebuywan cuy ece — ioꞌe ip cebe. — Ecekawẽn cuy Herodes eju ocewebeam — ioꞌe ip. — Ocebikuy ixe be waram oceburem iꞌe am — ioꞌe ip.
Oꞌjekawẽn ceweju Herodes mudinap ojuy. Herodes tak kabia oꞌg̃uweg̃ũn jekawẽn ãm jebekitkiyũ eju.
\p
\v 21 Ixe ekabia bima ade jĩjã iboceayũ oꞌjeꞌawero ip cekay. Oꞌjeꞌawero ip Herodes aꞌĩjo am. Herodes jesay oꞌg̃uõm- -idip cĩcãat. Oabik ipi kukukat abikbikap pe. Idip cĩcãat pe oabik. Oꞌjekawẽn cĩcã aweromayũ be. Kawẽnwẽn pima aweromayũ oꞌjewãwã ip yaꞌõberen.
\p
\v 22 — Ag̃okatkat g̃u teku- -oceweju kawẽnwẽnat- -Deus acã! — i napa ma oꞌe ip.
\p Ixe Herodes jewexe yaꞌõbuyxi jĩjã.
\p — Deus g̃u õn. Deus kukap puxim g̃u juy epeꞌe okug̃ — iꞌũmg̃u oꞌe. — Deus acã yaꞌõbuyxi- -õn pit kaꞌũma — iꞌũmg̃u oꞌe cebe ip. 
\m
\v 23 Imẽnpuye Deus ekawẽn tojotjotꞌukat Herodes oꞌg̃uwãtaxipin. Nasẽg̃pu oꞌtũnpuꞌoꞌo. Oeꞌũ.
\p
\v 24 Imẽneju adeayũ Deus ekawẽn oꞌyaꞌĩjojo ip. Soat kaka dag̃ayũ oꞌyaꞌĩjojo ip.
\p
\v 25 Barnabé, Saulo dak dinheiro oꞌtujowat Jesus ebekitkiyũ be- -Jerusalém ka beayũ be.
\b
\c 13
\p
\v 1 Dinheiro ũm puje ip oꞌjepit Antioquia ka kay. João Marcos oꞌju ceweju ip. Deus ekawẽn muwẽnuwẽnꞌukayũ osodop ip Antioquia ka be, Deus ekawẽn imutaybitbinꞌukayũ dak. Ibũrũ ma ibutet osodop ip: Barnabé, i. Simão i, Lúcio i, Manaém i, Saulo i. Ibũrũ ma ibutet osodop ip. Simão xepxep putet osunuy. Waraꞌat ibutet Topayõn i osunuy. Lúcio Cirene ka bewiat osunuy. Manaém oꞌyaypan Herodes eju, Galiléia eipi kukukat eju.
\p
\v 2 Deus biõg̃buk oꞌjekawẽn ixeyũ ag̃okatkayũ eju. Awerom ip osodop. Deus eju kawẽnwẽn pima, jekpiwan ma jewemurenuren pima dak, Deus biõg̃buk oꞌjekawẽn ceweju ip.
\p — Õn ma kuy Barnabé otaẽ kapik am owebeam, Saulo dak — ioꞌe. — Imẽnpuye ixeyũ juy epeg̃ujẽm kapik am owebeam — ioꞌe cebe ip.
\p
\v 3 Deus eju kawẽnwẽn pima, jewemurenuren pima dak, Deus ekawẽn muwẽnuwẽnꞌukayũ Barnabé oꞌg̃ujẽm ibocewi, Saulo dak. Oꞌjewebumõg̃ ip Saulo abi jeje, Barnabé abi jeje dak. Imẽn oꞌg̃ujẽm ip Deus aꞌõbi.
\p
\v 4-5 Imujuꞌibiyũ oꞌju Chipre eipi kay- -tipꞌawerorobog̃ kay. Tipꞌawerorobog̃ putet Chipre i osunuy. Saulo oꞌju Barnabé eju. João Marcos oꞌju ixeyũ buywatwatꞌukan. Oꞌju ip apẽn Deus biõg̃buk oꞌe cebe ip iap tag̃. Oꞌju ip Selêucia ka dag̃ Chipre eipi kay cum pima. Selêucia ka tibog̃cĩcãati wãbũ osunuy. Oajẽm ip. Jay. Oõm ip kobexixi be Selêucia ka be bima. Oꞌtimudek ip kobexixi dag̃. Oajẽm ip Salamina ka be- -tipꞌawerorobog̃ pe.
\p Iboce yajẽm puje Deus ekawẽn oꞌg̃uwẽnuwẽn ip. Oõm ip Judeuyũ eꞌaweroroapꞌa be Deus eju kawẽnwẽnapꞌa be. Deus ekawẽn muwẽn ãm ip oõm. 
\v 6-8 Soat tipꞌaweroro dag̃ oekuku ip Deus ekawẽn muwẽnuwẽn. Pafos ka be ip oajẽm. Wamoat oꞌtobuxik ip ibo ka be. Wamoat putet Barjesus i osunuy. Barjesus xepxep ibutet osunuy. Waraꞌat ibutet Elimas i osunuy. Judeu osunuy wamoat. Ibukaypat osunuy. Ixe Barjesus tipꞌawerorobog̃ watwat mug̃uykukuꞌuk osunuy. 
\p — Deus ekawẽn muwẽnuwẽnꞌukat õn — ioꞌeꞌe cebe ip napa ma.
\m Ixe wamoat Sérgio Paulo eju osunuy- -iecug̃ap eju. Sérgio Paulo itaybit cĩcãat osunuy.
\p G̃ebuje Sérgio Paulo Barnabéyũ oꞌtomuwã. Deus ekawẽn co am oꞌtomuwã ip.
\p — Deus ekawẽn cuy eg̃uwẽn owebe — Sérgio Paulo oꞌe cebe ip.
\p Sérgio Paulo ma Deus ekawẽn co pin cĩcã osunuy. Barjesus pit ibuꞌu oꞌe Sérgio Paulo be Deus ekawẽn coan. Imẽnpuye Barjesus Barnabéyũ awẽg̃ oꞌyawẽg̃mukẽrẽrẽn. Oꞌyawẽg̃mukẽrẽrẽrẽn ibuꞌu jĩjã buye Sérgio Paulo be Jesus kay itabut am. Barjesus Sérgio Paulo mubuꞌun ojuy osunuy Jesus kay itabucap puxim.
\p
\v 9-12 G̃ebuje Saulo oꞌjeak cĩcã wamoat kay- -Barjesus kay. Kũyjobit cĩcã oꞌe Deus biõg̃buk aꞌõ kay. Yaꞌõpurug̃ oꞌjekawẽn Barjesus pe- -wamoat pe.
\p — Satanás ebekit ẽn — ioꞌe. — Xipacat kay g̃u ẽn- -pũg̃ em tak kaꞌũma — ioꞌe. — Wuymug̃uykukukum ẽn — ioꞌe. — Soat em ẽn ikẽrẽat mujurũg̃rũg̃ — ioꞌe. — Deus e ie cũg̃. Ẽn pit waraꞌacayũ mubuꞌuꞌun Deus e dag̃ cekuap puxim ip. Ẽn ikẽrẽat mujurũg̃rũg̃ap epereperem g̃u. Imẽnpuye Deus ipiat supiꞌajoat ewebe g̃asũ — ioꞌe. — Deus jetamuꞌũm cuk adi ikẽrẽat eg̃ujurũg̃rũg̃ iap teim. Ade kabia g̃u etaꞌũm ecesũy pũg̃pũg̃ ã — ioꞌe wamoat pe- -Barjesus pe.
\p Wamoat dao ma oꞌsutaꞌũm. Wuyjojom g̃u oꞌe. Wararaꞌacat kudadam oꞌe jeba co am- -jedujowat am. Imẽneju iecug̃ap Sérgio Paulo oitabun Deus ekawẽn kay.
\p Deus ekawẽn imutaybitbin osodop ip Barnabéyũ. Paulo xepxep ibutet osunuy- -Saulo i, Paulo i dak. Paulo i ibutet osunuy Grego aꞌõm. Saulo i ibutet osunuy Hebreu aꞌõm. Sérgio Paulo wuykukukat ekawẽn kay jĩjã osunuy.
\p
\v 13 G̃ebuje Paulo oꞌjẽm Pafos ka bewi, cewejuayũ dak. Oꞌju ip Perge ka kay Panfília eipi beatka kay. Kobexixi dag̃ ip oꞌju.
\p G̃ebuje João Marcos oꞌjepit Jerusalém ka kay. Oibuꞌun Paulo eju, Barnabé eju dak. Oꞌjeok cewejuwi ip.
\p
\v 14 G̃ebuje Paulo oajẽm Antioquia ka kay, Barnabé dak. Ijop Antioquia ka Síria eipi be g̃u osunuy- -Pisídia eipi be osunuy.
\p Sábado bima oꞌju ip Judeuyũ eꞌaweroroapꞌa kay- -Deus eju kawẽnwẽnapꞌa kay. Oabik ip. 
\v 15 Moisés ekawẽntup oꞌtupcoco ip, Deus ekawẽn muwẽnuwẽnꞌukayũ ekawẽntup tak. Ukꞌa kukukayũ oꞌjekawẽn Pauloyũ eju.
\p — Ocebureyũ — ioꞌe. — Wuymucokcok am Deus ekawẽn muwẽn pin pima juy epeyekawẽn — ioꞌe ip.
\p
\v 16 G̃ebuje Paulo oꞌãy jekawẽn ãm. Wẽg̃wẽg̃ꞌi oꞌe jebum ig̃oꞌa beayũ muymũg̃ ãm. Oꞌjekawẽn cebe ip.
\p — Tapupuyũ — ioꞌe. — Pũg̃pũg̃ eyꞌin Israel naxeg̃ebitbit- -Judeuyũ. Wararaꞌacayũ Deus kay eyetabut Judeuyũ etabucap puxim — ioꞌe. — Eyaꞌõpicũg̃cũg̃ cuy waꞌõ kay — ioꞌe. 
\v 17 — Deus kuyjeayũ oꞌtaẽ wuyꞌin. Judeuyũ ma oꞌtaẽ jebekitkiyũm. Wuyetabut ixe Deus kay — ioꞌe. — Deus ip oꞌg̃uꞌacog̃ cĩcã Egito eipi be bima — ioꞌe. — Xipan cĩcã ip oꞌjukuk. Egito eipi bewi ip oꞌtujujẽm, yaꞌõbaca jĩjã buye. 
\v 18 Ukꞌaꞌũmat tag̃ oekuku ip pũg̃ koato g̃u- -40 koato bun. Deus yukpiceg̃e g̃u bit ikug̃ ip osunuy kũyjobit g̃u maꞌg̃u ip. 
\v 19 Deus 7 be ipi watwat oꞌg̃uꞌũmuꞌũm Canaã eipi watwat. Imuꞌũm puje cebekitkit Canaã eipi oꞌjat jeipim — ioꞌe.
\p
\v 20 — G̃ebuje Deus ibimãmãmãayũ ekawẽn cocoꞌukayũ oꞌjomuy kuyayũ kukukan. Canaã eipi be osodop ip ade jĩjã koato- -450 koato. Jekawẽn muwẽnuwẽnꞌukayũ oꞌjomuy g̃ũyjom ixeyũ mukũyjojoꞌukayũm. 
\v 21 Samuel koap osunuy Deus ekawẽn muwẽnuwẽnꞌukan. G̃uyjom kuyjeayũ oꞌe Deus pe: “Ag̃okatkat cuy ejomuy ocekukukan,” i — ioꞌe Paulo.
\p — Imẽnpuye Deus Saulo oꞌjomuy Canaã eipi watwat kukukan kuyayũ kukukan. Saulo Quis ipot osunuy. Ixe Benjamim diwat osunuy. Ixe Canaã eipi watwat kukukat osunuy 40 koato. 
\v 22 Deus oibuꞌun Saulo be jebekitkiyũ kukukan. Ixe oꞌjuꞌuk jebekitkit kukap puxim — ioꞌe.
\p — G̃ebuje Deus Davi oꞌjomuy jebekitkit kukukan Saulo dieg̃. Davi Deus ebekitkit kukukat osunuy Deus bikuyap tag̃. Deus imẽn Davi oꞌg̃uwẽn:
\mi Wetaybit Davi soat em obikuyap tag̃ jekukum iam, i. Ixe Jessé ipot waꞌõ kay jekukum soat em ma, i.
\m
\v 23 Deus imẽn Davi oꞌg̃uwẽn. Deus oꞌe kuyje:
\mi Davi naxeg̃ebitbit og̃uju eydaxijo am, i — ioꞌe Paulo.
\p — G̃ebuje Deus Jesus oꞌg̃uju Judeuyũ daxijo am apẽn cuk adi oꞌeꞌeꞌe iap tag̃ — ioꞌe. — Jesus Davi naxeg̃ebit osunuy. 
\v 24 João Batista oajẽm Jesus adeayũ mutaybitbin awap. Imubatisasan oeku. Ixe João Batista oꞌe Judeuyũ be: “Eyg̃uycũg̃cũg̃ cuy epesop ikẽrẽat kug̃ puye,” i. “Ikẽrẽat mujurũg̃rũg̃ap cuy epeyepere,” i. “Epeyewemubatisasaan cuy,” i.
\p
\v 25 — João jekapikap eperem pima, imẽn oꞌe Judeuyũ be: “Tũybe ẽn Deus emunaẽ iãn eyju eꞌem owebe,” i. “Eyxe õn Deus emunaẽ,” i. “Eyemuwiwi g̃u õn pit,” i. “Yaꞌõbuyxi jĩjãat omuyku onomuju,” i. “Õn pit waꞌõbuyxi g̃u,” i. “Cedag̃ g̃u owebe weꞌatoro am suiuk muwekap am waꞌõbuyxiꞌũm puye,” i.
\m João imẽn oꞌe — ioꞌe Paulo.
\p
\v 26 — Obureyũ — ioꞌe. — Pũg̃pũg̃ eyꞌin Abraão naxeg̃ebitbit. Wararaꞌacat eyꞌin Judeuyũ g̃u. Inaka eyetabut Deus kay Judeuyũ etabucap coꞌi — ioꞌe. — Deus wuydaxijojoap awẽg̃ oꞌyawẽg̃muwẽn wuywebe — ioꞌe. 
\v 27 — Imẽnpit Jerusalém ka watwat itaybit g̃u oꞌe Jesus wuydaxijojoꞌukat iam. Ika kukukayũ dak itaybit g̃u oꞌe ip iboam. Soat jebodoydoyap kabia be Judeuyũ yaꞌõberen tupcocoꞌuk ip osodop jeꞌaweroroapꞌa- -Deus ekawẽnmuwẽnuwẽnꞌukat emudupmubararaktup. Soat Sábado bima ip tupcocoꞌuk osodop. Imẽnpit itaybit g̃u ip apẽg̃ape xeꞌe ijoptup ekawẽn iam. “Jesus cuy jeꞌũ ikẽrẽat kug̃ puye,” ioꞌe ip napa ma. Kuyje Deus ekawẽn muwẽnuwẽnꞌukayũ oꞌeꞌeꞌe iap tag̃ Jesus oꞌyaoka ip — ioꞌe Paulo.
\p
\v 28 — Ixeyũ mo oꞌjekawẽn Pilatos eju- -iecugap eju. Jesus ikẽrẽat oꞌjukuk g̃u- -pũg̃ em tak kaꞌũma. Inaka “Jesus cuy eyaokaat,” i mo oꞌe ip Pilatos pe. 
\v 29 Imẽn ibararak opop Deus ekawẽn tup pe. Soan oꞌeꞌe ip Jesus pe apẽn Deus emunaẽ jukuk ip iaptup ekawẽn tag̃. Apẽn ip oꞌtupmubarararak iap ekawẽn tag̃ oꞌjebapuk g̃asũ — ioꞌe.
\p — Ig̃odup ekawẽn tag̃ soat ebapuk puje wararaꞌacayũ ma Jesusꞌũm jebit mo oꞌg̃ukop korosa ejuwi. Witabikũy be adi oꞌjomõg̃ ip. 
\v 30 Deus pit waram Jesus oꞌg̃utait. Oꞌg̃uyu ceꞌũꞌũayũ dopap pewi — ioꞌe.
\p
\v 31 — G̃ebuje waram oꞌjetaitꞌiat oꞌjojojo ip Jesus eju oekukuiayũ. Ibun oeku ip ceweju- -Galiléia eipi bewi ceweju oꞌjẽmꞌiayũ- -Jerusalém ka kay ceweju oꞌjuꞌiayũ. Ade kabia ceweju oeku ip waram oꞌjetaitꞌiat eju — ioꞌe.
\p — G̃asũ ixeyũ ma icẽmãn Jesus muwẽnuwẽn Judeuyũ be. Oꞌjojojo ip iap muwẽnuwẽn ip g̃asũ. 
\v 32-33 Oceju dak kawẽn idipat muwẽnuwẽn eywebe. “Waram wemunaẽ og̃utait waram ceꞌũap puxim,” ioꞌe Deus kuyje wuydobuyũꞌũmꞌũm pe. G̃asũ Jesus oꞌg̃utait apẽn cuk adi oꞌeꞌeꞌe iap tag̃. Imẽn eꞌem Deus ekawẽntup- -Salmodup- -jebidododonaptup- -xepxeptupatup:
\mi “Ẽn okpot,” iꞌeꞌem Deus, i. “G̃asũ õn ebay oce,” iꞌeꞌem Deus, i.
\m Imẽn eꞌem Salmodup.
\p
\v 34 — Kuyje Deus oꞌe: “Waram wemunaẽ og̃utait waram ceꞌũap puxim,” i. Imẽn eꞌem Deus ekawẽn tup:
\mi “Xipacat og̃ũm ewebe,” i juk adi oce Davi be, i. “Obuꞌu g̃u xipacat ũm ãm ewebe,” i juk adi oce Davi be, i. Xipacat og̃ũm ewebe apẽn cuk adi ocecece Davi be iap puxim, i.
\p
\v 35 — Imẽn eꞌem waraꞌatup pe jebibododonaptup- -Salmodup:
\mi Wetaybit ekpotꞌũm iwan g̃u ẽn ierepap puxim iam, i. Aꞌõ kay kũyjobit cĩcãat iwan g̃u ẽn, i.
\m Ixe imẽn Jesus oꞌg̃uwẽn. Imẽn eꞌem Salmodup — ioꞌe. 
\v 36 — Icẽmãn Daviꞌũm oeꞌũ. Itabẽg̃ puje Deus ekawẽn tag̃ oekukuku — ioꞌe. — Icẽmãn Daviꞌũm oꞌjomõg̃ ip witabikũy be jedobuyũꞌũmꞌũm etaypi tẽg̃. Daviꞌũm ma oierep. 
\v 37 Jesusꞌũm pit oierep g̃u Deus waram oꞌg̃utait puye — ioꞌe.
\p
\v 38 — Obureyũ — ioꞌe. — Eyetaybin cuy epesop Deus ikẽrẽat ukꞌug̃ wuywebewi Jesus oeꞌũ buye iam. Ixe Jesus muwẽnuwẽn õn eywebe. 
\v 39 Moisés ekawẽn tag̃ jekukum pima wuyaꞌõbaca g̃u juk adi ajop waram ikẽrẽat kukap puxim. Jesus kay wuyetabut pima bit Deus jaꞌõbacaap ũmũm wuywebe waram ikẽrẽat kukap puxim — ioꞌe.
\p
\v 40-41 Imẽn eꞌem Deus ekawẽn muwẽnuwẽnꞌukayũ emudupmubararaktup- -kuyayũ emudupmubararaktup:
\mi Eyetabutꞌũm cĩcã eyju! i. Eybuꞌu jĩjã eyetabut am okay, i. Eyetabẽg̃bẽg̃ cuy epesop! Epeap eyetabutꞌũm puye, i. Õn Deus. Eywebe iꞌe baꞌoreap og̃ubapuk eyetabutpe, i. Imẽnpit eyetabutꞌũm okay epeꞌe, i. Wararaꞌacat pe eymukũyjo buje dak, eyetabutꞌũm okay epeꞌe, i.
\m Imẽn eꞌem Deus ekawẽn muwẽnuwẽnꞌukayũ emudupmubararaktup — Paulo oꞌe.
\p — Eydayꞌemꞌum cuy epesop Deus ekawẽn muwẽnuwẽnꞌukayũ oꞌeꞌe iap tag̃ jeꞌbapukap puxim eywebe — ioꞌe cebe ip- -Judeuyũ be.
\p
\v 42 Jeꞌaweroroapꞌa bewi Pauloyũ jẽm puje, Judeuyũ oꞌjekawẽn ceweju ip.
\p — Waram cuy epeꞌe ocemukũyjom iboam — ioꞌe ip. — Waraꞌat Sábado juy ejot g̃uto — ioꞌe ip Judeuyũ.
\p
\v 43 Ceꞌawero epere buje tak g̃u ip oꞌju Pauloyũ kay- -Judeuyũ, Judeuꞌũmayũ dak- -Judeuyũ etabucap coꞌi Deus kayayũ. Pauloyũ oꞌjekawẽn ceweju ip.
\p — Soat em ma Deus xipan wuykug̃ — ioꞌe ip. — Soat em cuy g̃ebum epesop iboap kay — ioꞌe ip Pauloyũ.
\p
\v 44 Waram pimaat esábado tak g̃u oꞌjeꞌawero Deus ekawẽn com ig̃o ka beayũ.
\p
\v 45 Adeayũ eꞌaweroap tobuxik puje Judeuyũ oitabutkarey Pauloyũ kay. Paulo ip oꞌyaꞌõmuwarururun- -Jesus kay itabutꞌũmayũ. Oꞌjomuymuy jĩjã ip.
\p
\v 46 G̃ebuje Pauloyũ ipararaꞌũm cĩcã oꞌjekawẽn ceweju ip- -Judeuyũ eju.
\p — Cedag̃ osunuy ocewebe koam Deus ekawẽn muwẽn ãm eywebe, eyju Judeuyũ buye — ioꞌe. — Cekawẽn kay g̃u eyju bit — ioꞌe. — Eybuꞌu Jesus pe eydaxijoan, eywebe ipiatꞌajoap puxim — ioꞌe. — Eybuꞌu eyag̃uyisum eyekuam — ioꞌe. — Imẽnpuye wararaꞌacat pe juy oceg̃uwẽn Deus ekawẽn- -Judeuꞌũmayũ be — ioꞌe. 
\v 47 — Imẽg̃ãm Deus cuk ocemuju. Kuyje Isaísat Cristo oꞌg̃uwẽn. Imẽn oꞌe:
\mi Õn cuk enaẽ wekawẽn muwẽn ãm Judeuꞌũmayũ be, i. Kabia buje wuyetaybit wuyeku am, i. Imẽnpuxim wekawẽn co buje Judeuꞌũmayũ itaybit jeꞌe apẽn Deus soat taxijojom iam, i. Soat wekawẽn kayayũ otaxijo, i.
\m Imẽn Deus oꞌe kuyje — ioꞌe Paulo. — Imẽnpuye Judeuꞌũmayũ be juy oceg̃uwẽn Deus ekawẽn — Paulo oꞌe.
\p
\v 48 Judeuꞌũmayũ icokcok cĩcã ip oꞌe iboap co buje.
\p — Kaꞌũmg̃u Deus ekawẽn coꞌi xipat — ioꞌe ip.
Soat itabut oꞌe Jesus kay, jexe jenuy am Deus emunaẽyũ.
\p
\v 49 G̃ebuje Jesus kay itabucayũ wuykukukat ekawẽn oꞌg̃uwẽnuwẽn soat pe itaybitꞌũmayũ be. Soat ibo eipi dag̃ oekuku ip wuykukukat ekawẽn muwẽnuwẽn.
\p
\v 50 Judeuyũ oitakomãn Pauloyũ kay. Oꞌjewawẽ ip ag̃okatkayũ eju- -ibo ka kukukayũ eju. Aoyũ eju dak oꞌjewawẽ ip- -yaꞌõbuyxiayũ eju. Ixeyũ aoyũ Deus aꞌõ kay ip osodop. Imẽnpit itakoma ip oꞌe Pauloyũ kay.
\p Pauloyũ ip oꞌyawẽg̃mukẽrẽrẽrẽn. Imẽnpuye soat ip itakoma jĩjã oꞌe Pauloyũ kay. Jeipi bewi ip oꞌg̃ujẽm. 
\v 51 Oꞌjẽm Pauloyũ. Jesandália ip oꞌg̃upoypoy ibo ka bewi jejẽm puje “Eyukpiwat Deus xe ocekawẽn co pinꞌũm puye” iꞌe am ibo ka watwat pe. 
\v 52 Itabucayũ bit icokcok cĩcã oꞌe- -Antioquia ka beayũ. Ibiõg̃buk xipacat cebe ip osunuy.
\b
\c 14
\p
\v 1 Icônio ka kay ip oꞌju Pauloyũ. Oõm ip Judeuyũ eꞌaweroroapꞌa be- -Deus eju kawẽnwẽnapꞌa be. Kawẽn idipat oꞌg̃uwẽn ip ig̃oꞌa be. Imẽnpuye tak g̃u ip oitabun Jesus kay- -Judeuyũ, Judeuꞌũmayũ dak. 
\v 2 Judeuyũ kukukayũ bit Pauloyũ oꞌyawẽg̃mukẽrẽrẽn- -itabutꞌũmayũ. Oꞌyawẽg̃mukẽrẽrẽn ip Judeuꞌũmayũ be cekayap puxim. Imẽnpuye itakoma oꞌe ip Pauloyũ kay Judeuꞌũmayũ.
\p
\v 3 G̃ebuje Pauloyũ wuykukukat oꞌg̃uwẽnuwẽn soat pe- -Icônio ka watwat pe. Ibun cĩcã ip osodop ibo ka be. Pũg̃ kabia g̃u ip osodop Icônio ka be, ade oitabun Jesus kay buye. Ipararaꞌũma wuykukukat oꞌg̃uwẽnuwẽn ip.
\p — Deus xipan soat kug̃ wuykug̃ — ioꞌeꞌe ip.
Wuywebe iꞌe baꞌoreap oꞌg̃ubapukpuk ip Deus aꞌõbi. Deus aꞌõbacaap oꞌg̃ubapukpuk ip soat etabutpe. Deus ibo ka watwat oꞌg̃utabun Pauloyũ ekajwẽn kay. 
\p — Paulo icẽmãn eꞌem — ioꞌe ip.
\p
\v 4 Imẽneju pũg̃ tag̃ g̃u oꞌe ip Icônio ka watwat- -waraꞌat tag̃tag̃tag̃ ma. Pũg̃pũg̃ ixeyũꞌin Judeuyũ kay ip oꞌe. Wararaꞌacayũ bit Jesus emumujuyũ kay oꞌe.
\p
\v 5 G̃ebuje pũg̃pũg̃ Icônio ka watwat oꞌjekawẽn jeka kukukayũ eju- -Judeuyũ, Judeuꞌũmayũ dak.
\p — Ikẽrẽm cuy ip ajukuk. Ayabug̃bug̃ cuy ip witaꞌam — ioꞌe ip.
\m
\v 6 Pauloyũ jaoka ojuyap oꞌyawẽg̃tobuxik. Imẽnpuye dao ma oꞌjẽm ip Icônio ka bewi. Waraꞌat ka kay ip oꞌju. Listra ka kay ip oꞌju Derbe ka kay dak, ig̃o ka korerenatka kay dak. Ixeyũ ka Licaõnia eipi be opop. 
\v 7 Kawẽn idipat muwẽnuwẽn oekuku ip soat kaka dag̃ soat pe yaꞌĩjo am.
\p
\v 8 Taokẽrẽat kay Pauloyũ oajẽm. Taokẽrẽat Listra ka be osunuy. Ikapꞌisum pin ma taokẽrẽ osunuy. Cexĩg̃xĩg̃ paꞌore osunuy. 
\v 9 Soat Paulo oꞌeꞌeiap oꞌyaꞌĩjojo. Paulo oꞌjeak cĩcã cekay.
\p — Deus kay teku itabut jemuꞌadaam — Paulo oꞌe jewebe ma.
\p
\v 10 Oꞌjekawẽn taokẽrẽat pe.
\p — Eꞌãy — ioꞌe. — Cũg̃ꞌi ece — ioꞌe yaꞌõberen cebe.
\m Taokẽrẽ tũibit oꞌãy. Xipan oꞌjexĩg̃xĩg̃. 
\v 11 Paulo be imuꞌada buje, oꞌjewãwã ip yaꞌõberen Listra ka watwat.
\p — Deusyũ oꞌkop wuykay! — ioꞌe ip jaꞌõm. — Ag̃okatkayũ jojoꞌi ip! — ioꞌe ip jewewebe.
\m Tũybe Pauloyũ deusyũ iãn oꞌe ip. Oꞌjewãwã ip Paulo aꞌõm g̃u- -jaꞌõm ma.
\p
\v 12 — Wuyedeus teku! — ioꞌe ip napa ma. — Júpiter teku! — ioꞌe ip Barnabé muwẽnuwẽn.
\p — Wuyedeus tedaku! — ioꞌe ip napa ma. — Mercúrio teku! — ioꞌe ip Paulo muwẽnuwẽn.
\m Imẽn oꞌe ip Paulo cekawẽnxi buye. Listra ka watwat edeusbaro butet Júpiter i osunuy, Mercúrio i dak.
\p
\v 13 Ixeyũ edeusbaro dukꞌa kukukat oajẽm Pauloyũ kay- -Júpiter tukꞌa kukukat. Biopak oꞌtujuajẽm. Yaoka ojuy ip imupik am Pauloyũ wap. Tũybe deus iãn oꞌe ip. Tumũntitit oꞌtitujuajẽm biopak akãrãsũ eju titmukirik am Pauloyũ yaꞌõbuyxi cekay ip puye. Oꞌtujuajẽm ip ag̃oka ekorara exĩntabi be. Júpiter tukꞌa iboce oꞌyanuy. Tũybe teyũku wuyedeusyũ iãn oꞌe ip. 
\v 14 Apẽn e ojuy ip ocewebe iam jetaybin puje, yag̃uybabiꞌũm cĩcã Pauloyũ oꞌe.
\p — Tũybe oceju deusyũ iãn oꞌe ip — ioꞌe Paulo jebure be- -Barnabé be.
\m Jesay oꞌg̃uwek ip jag̃uybabiꞌũmap mubapuk am ibo ka watwat pe.
\p Pauloyũ oꞌjedau ajẽmayũ kay. Oꞌjekawẽn ceweju ip.
\p
\v 15 — Tapupuyũ — ioꞌe. — Imẽn g̃u juy epeꞌe ocewebe! — ioꞌe. — Deus g̃u oceju- -ag̃okatkayũ acã! — ioꞌe. — Oceju dak eyjoꞌi ma — ioꞌe. — Ocajẽm ijoce kawẽn idipat muwẽn ãm eywebe. Eymubuꞌun am eyedeusbaroyũ kay ocajẽm ijoce. Teꞌe ma eyetabut ixeyũ kay — ioꞌe ip Listra ka watwat pe. — Deusbaroyũ kay eyetabucap cuy epeyepere! — ioꞌe. — Deusat kay juy eyetabun epesop. Deusat soat em itait omuy. Ixe kay acã eyetabun cuy epesop — ioꞌe. — Ixe kabi oꞌg̃ug̃ẽ, ipi dak. Tibog̃ cĩcãati dak oꞌtimug̃ẽ. Ixe soat oꞌg̃ug̃ẽ- -kabi dag̃at, ipi dag̃at tak, tibog̃ cĩcãat dag̃at tak — iꞌeꞌem ip. 
\v 16 — Deus kuyjeayũ oꞌjepere jekpiwan ma ip jeku am- -Judeuyũ, Judeuꞌũmayũ dak — ioꞌe. 
\v 17 — Imẽnpit Deus xipacan eꞌeꞌuk osunuy soat peam ijodiat peam. Imẽn õn soat podi ma xipat iam wuymutaybitbin. Ixe mubaꞌat muajẽmjẽm kabi bewi wuywebe. Ixe kadai muꞌaypapan wuywebe iꞌo am. Deus soat em wuyemukaypinput ũmũm wuywebe wuymucokcok am. Deus imẽn xipan wuykug̃ ibikuy wuywebe wuyetabut am cekay buye — ioꞌe ip.
\m Imẽn Paulo Listra ka watwat oꞌg̃utaybin Deus ekawẽn.
\p
\v 18 Listra ka watwat biopak aoka ojuy jĩjã tũybe Pauloyũ deusyũ iãn oꞌe ip puye. Pauloyũ bit oꞌg̃ubuꞌun ip biopak aoka am.
\p
\v 19 Judeuyũ oajẽm Pauloyũ kay- -itabutꞌũmayũ. Oajẽm ip Antioquia ka bewi, Icônio ka bewi dak. Listra ka be ip oajẽm. Ade oꞌg̃ubuꞌun ip Pauloyũ kay. Oꞌg̃utakomãn ip cekay ip.
\p Imẽnpuye Paulo oꞌyabug̃bug̃ ip yaokaap ojuy. Kururug̃ Paulo oꞌtujujẽm ip jeka bewi- -Listra ka bewi. Kacũg̃pe oꞌjepere ip. Tũybe oeꞌũ iãn oꞌe ip. 
\v 20 Paulo bit oꞌãy Jesus kay itabucayũ cekay ceꞌawero buje. Waram oõm Listra ka be.
\p Kuyaje Paulo oꞌkop Derbe ka be Barnabé eju. 
\v 21 Kawẽn idipat oꞌg̃uwẽnuwẽn ip Derbe ka watwat pe. Imẽnpuye tak g̃u oitabun ip Jesus kay.
\p G̃ebuje oꞌjepit ip jedocap e dag̃ ma. Listra ka dag̃ ip oꞌjepit Icônio ka dag̃ tak, Antioquia ka dag̃ tak. 
\v 22 Jesus aꞌõkayayũ jojom ip oꞌjepit. Ixeyũ aꞌõmucanucan oekuku ip. Yawẽwẽm ip oekuku. Paulo oꞌjekawẽn ceweju ip.
\p — Jesus kay eyetabucap cuy epeyepere g̃u — ioꞌe. — Jesus kay wuyetabut pima, wararaꞌacat ipiat supiꞌajoat wuywebe — ioꞌe.
\p — G̃uyjom pit Deus xe acesop. Ixe soat kukukan pima, cexe ma acesop soat yaꞌõ kay kũyjobit pima — ioꞌe cebe ip.
\p Paulo soat kaka dag̃ oeku Barnabé eju.
\p
\v 23 Ixeyũ dak ag̃okatkayũ oꞌtaẽ Jesus day itabucayũ kukukayũm. Soat kaka dag̃wi oꞌtaẽ ip. Jekpiwa ma oꞌjewemurun ip jekawẽn ãm Deus eju. Deus eju oꞌjekawẽn ip oꞌtaẽꞌibiyũ beam. Imẽn oꞌjekawẽn ip Deus eju:
\p — Ocekukukat — ioꞌe ip Jesus pe. — Iteyũ ag̃okatkayũ juy ejukuk xipan, ekay itabut ip puye — ioꞌe ip Deus pe.
\p
\v 24 Oꞌkop ip Panfília eipi dag̃, Pisídia eipi dag̃ tak.
\p
\v 25 G̃ebuje waram Deus ekawẽn oꞌg̃uwẽnuwẽn ip Perge ka be. Atália ka dag̃ ip oꞌkop.
\p
\v 26 Antioquia ka kay ip oꞌju waram. Kobexixi dag̃ ip oꞌju. Koap jejẽmap ka be ip oajẽm- -Antioquia ka be.
\p — Xipan cuy ixeyũ ejukuk kapikpig̃ pima- -ekawẽnmuwẽnuwẽn pima — i mo oꞌe itabucayũ Deus pe ibo ka be koap cẽm pima.
\p
\v 27 Oajẽm ip maꞌg̃uto Antioquia ka be jekapikap oꞌjepere ip puye. Paulo ekawẽn co am oꞌjeꞌawero ip soat Jesus aꞌõkayayũ.
\p G̃ebuje Paulo apẽn Deus ixeyũ buywatwanap oꞌg̃uwẽn cebe ip. Apẽn soat kaka dag̃ oekuku ip iap oꞌg̃uwẽn.
\p — Deus juk adi ocaꞌõmucanucan osunuy Jesus muwẽnuwẽn pima — ioꞌe. — Judeuꞌũmayũ be ocemuju jekawẽn muwẽn ãm — ioꞌe. — Tak g̃u ip oitabun Jesus kay — ioꞌe cebe ip.
\p
\v 28 Ibo ka be osodop ip ũm kaxi. Jesus aꞌõkayayũ xe osodop ip ibun ma.
\b
\c 15
\p
\v 1 Judeuyũ oꞌju Antioquia ka kay- -Judéia eipi bewiayũ. Oajẽm ip.
\p G̃ebuje cedag̃ g̃u Jesus kay itabucayũ oꞌg̃utaybin ip- -Judeuꞌũmayũ oꞌg̃utaybin ip.
\p — Moisés ekawẽn tag̃ eyedaypuꞌag̃obixeedakatꞌũm pima, Deus jeydaxijo g̃u — ioꞌe ip napa ma itabucayũ be.
\p
\v 2 Imẽneju Pauloyũ oꞌjewaꞌõxikxik cĩcã ceweju ip Judéia eipi bewiacat eju. Imẽnpuye Jesus aꞌõkayayũ itaybin pin oꞌe ip apẽn g̃u paxi cũg̃ ma wuyxe iam.
\p — Acesuxeedakat tu Moisés ekawẽn tag̃? Acesuxeedakat g̃u xeꞌe? — ioꞌe ip jewewebe.
\m Imẽnpuye ip Paulo oꞌg̃uju Jerusalém ka be, Barnabé dak, jebureyũ dak.
\p — Jerusalém ka be juy epeju — ioꞌe ip. — Epeju juy jekawẽn ãm Jesus emumujuyũ eju- -itabucayũ kukukayũ eju dak — ioꞌe ip. — Epeyewawẽ juy ceweju ip. “Acesuxeedakat tu Moisés ekawẽn tag̃? Acesuxeedakat g̃u xeꞌe?” i juy epeꞌe cebe ip — ioꞌe ip.
\p
\v 3 Pauloyũ oꞌjewemuwẽn cebe ip. Oꞌjẽm ip Antioquia ka bewi.
\p Oꞌju ip itabucayũ kukukayũ kay. Cucum pima Fenícia eipi dag̃ oꞌkop ip, Samaria eipi dag̃ tak. Soat ka dag̃ oꞌjeꞌawero ip itabucayũ eju cucum pima.
\p — Ade jĩjã Judeuꞌũmayũ kuyap jetabucap oꞌjepere ip — ioꞌe ip. — Jesus kay ip oitabun — Pauloyũ oꞌe cebe ip.
\p Icokcok cĩcã ip oꞌe itabucayũ iboap awẽg̃ tobuxik puje- -Fenícia eipi watwat, Samaria eipi watwat tak.
\p
\v 4 Oajẽm ip Jerusalém ka be. Oꞌju ip itabucayũ kukukayũ kay. Itabucayũ kukukayũ ip oꞌtobede, Jesus emumujuyũ dak, waraꞌacayũ itabucayũ dak. Itabucayũ kukukayũ oꞌjeꞌawero ip cexe.
\p G̃ebuje Paulo oꞌjekawẽn cebe ip.
\p — Deus cuk adi ocebuywatwatn kawẽn idipat muwẽn ãm — ioꞌe. — Pũg̃ g̃u Judeuꞌũmat oitabun Jesus kay- -ade jĩjã ma! — ioꞌe Paulo.
\p
\v 5 Pũg̃pũg̃ pit Fariseuyũ oꞌãy Paulo mukorẽm ãm- -Jesus kay itabucayũ.
\p — Ixeyũ dak cuy Moisés ekawẽn tag̃ jeku, itabut maꞌg̃u ip Jesus kay — ioꞌe ip. — Jedaypuꞌag̃obixeedakat cuy ip cekawẽn tag̃ — ioꞌe ip teꞌe ma.
Imẽnpuye Pauloyũ oꞌjewaꞌõxikxik cĩcã Fariseuyũ eju.
\p
\v 6 G̃ebuje Jesus emumujuyũ oꞌjeꞌawero ip Jesus kay itabucayũ kukukayũ eju. Oꞌjewawẽwẽ jĩjã ip.
\p — Apẽntak cedag̃ wuywebe Judeuꞌũmayũ mutaybit am Jesus kay itabun ip puje? — ioꞌe ip jewewebe. — “Moisés ekawẽn tag̃ cuy epeku,” i du aceꞌe cebe ip? Imẽn g̃u xeꞌe aceꞌe cebe ip? — ioꞌe ip jewewebe.
\m
\v 7 Oꞌjekawẽn cĩcã ip jeweweju jewemudin ãm. Ibun cĩcã ip oꞌjewaꞌõxikxik waraꞌat tag̃tag̃tag̃ iꞌeap puxim.
\p Pedro oꞌjekawẽn soat pe aweromayũ be.
\p — Okitpitpityũ — ioꞌe. — Eyaꞌõpicũg̃cũg̃ cuy epesop wekawẽn kay — ioꞌe. — Kuy bima Deus onaẽ kawẽn idipat muwẽn ãm Judeuꞌũmayũ be. Eyetaybit iboam — ioꞌe. — Ixe mo omuju ibikuy osunuy ixeyũ mutabut am jekay buye. 
\v 8 Deus itaybit apẽn wuyju jewag̃uyg̃uy iam — ioꞌe.
\p — Ixe mo jebiõg̃buk oꞌg̃udot Judeuꞌũmayũ kay apẽn wuykay oꞌg̃udot iap coꞌi. Imẽn Judeuꞌũmayũ kay dak õn iam wuymutaybitbin oꞌe Deus. 
\v 9 Soat ipi dag̃ayũ ibit ma Deus xe. Soat jewejojoꞌi ma ip cexe. Imẽnpuye Deus ikẽrẽat oꞌjuꞌuk Judeuꞌũmayũ bewi Jesus kay ip itabut puye. Oꞌjuꞌuk apẽn wuywebewi ikẽrẽat oꞌjuꞌuk iap coꞌi — ioꞌe. 
\v 10 — “Cedag̃ g̃u Deus pe jebiõg̃buk muõm ãm cebe ip, Moisés ekawẽn tag̃ g̃u ip puye,” i du eyju eꞌem? — Pedro oꞌe. — Ibaꞌore osunuy wuydobuyũꞌũmꞌũm pe ixe ekawẽn tag̃ jeku am. Wuywebe dak ibaꞌore. Ibaꞌore kuka oꞌe Judeuꞌũmayũ be dak. Imẽnpuye “Moisés ekawẽn tag̃ cuy epeku,” iꞌũmg̃u juy ace cebe ip- -Jesus kay itabunꞌisuayũ be. 
\v 11 Wuykukukat Jesus wuydaxijojom cekay wuyetabut puye. Wuydaxijojom xipan wuykug̃ puye. Imẽnpuxim Judeuꞌũmayũ dak idaxijo itabun puje ip — Pedro oꞌe.
\p
\v 12 G̃uyjom Pauloyũ oꞌjekawẽn aweromayũ be.
\p — Deus mo ocemuju kawẽn idipat muwẽn ãm Judeuꞌũmayũ be — ioꞌe. — Deus aꞌõbi juk adi wuywebe iꞌe baꞌoreat oceg̃ubapukpuk soat etabutpe — ioꞌe. — Deus soat podi ma yaꞌõbaca iap juk adi oceg̃ubapukpuk itabutpe ip — ioꞌe ip aweromayũ be.
Soat ip mũg̃ osodop yaꞌĩjojom.
\p
\v 13 G̃uyjom Tiago oꞌjekawẽn aweromayũ be.
\p — Okitpitpityũ — ioꞌe. — Eyaꞌõpicũg̃cũg̃ cuy epesop wekawẽn kay. 
\v 14 Simão Pedro ekawẽn epeyaꞌĩjojo kuy — ioꞌe. — Deus xipan Judeuꞌũmayũ kug̃ iam wuymukũyjojo — ioꞌe. — Deus Judeuꞌũmayũ oꞌtaẽ itabut am jekay. Ixeyũ dak oꞌtaẽ jebekitkiyũm — ioꞌe.
\v 15 — Iboap oꞌjebapuk kuyayũ ekawẽn tag̃- -Deus ekawẽn muwẽnuwẽnꞌukayũ emudupmubararaktup ekawẽn tag̃ — ioꞌe. — Imẽn eꞌem iboaptup:
\q
\v 16 “Õn Deus,” i. “Waram ocepit yaꞌatꞌibitꞌa mudim am- -Davi dukꞌa mudim am,” i. “Yadipatꞌam jeꞌe maꞌg̃uto,” i. “Soat xe ijodiat xe waꞌõbuyxian og̃uy apẽn Davi yaꞌõbuyxi osunuy iap coꞌi,” i. “Obikuyap tag̃ jeku ip waram,” i. 
\v 17 “Soat kaka dag̃acat itabut jeꞌe okay Judeuꞌũmayũ,” i. “Webekitkiyũm jeꞌe ip,” i. 
\v 18 Imẽn wuykukukat eꞌem, i. Kuyje ma iboap oꞌg̃uwẽn, i.
\m Imẽn eꞌem iboaptup — ioꞌe Tiago. — Imẽn cuk adi Deus ekawẽn muwẽnuwẽnꞌukayũ oꞌeꞌeꞌe Deus aꞌõbi — Tiago oꞌe.
\p
\v 19 — “Imẽnpuye Judeuꞌũmayũ kaykay g̃u juy ajop,” i õn eꞌem — ioꞌe Tiago. — “Jesus kay itabunꞌisuayũ kaykay g̃u juy ajop,” i õn eꞌem — Tiago oꞌe. — Iboam acã juy ace Judeuꞌũmayũ be- -itabunꞌisuayũ be:
\q
\v 20 Deusbaroyũ wap iẽnmõg̃ꞌibitẽn cuy epesuẽnꞌo g̃u, i. Waraꞌacat tayxi kaykay g̃u juy epesop, waraꞌat itop kaykay g̃u dak, i. Iẽntoyteyatẽn cuy epesuẽnꞌo g̃u, i. Puca doy juy epetoykõnkõn g̃u, i.
\m Iboam acã juy ace Judeuꞌũmayũ be- -itabunꞌisuayũ be — Tiago oꞌe.
\p
\v 21 — Kuy bin ma opop Moisés ekawẽn wuymutaybitbinꞌukayũ soat kaka dag̃ — ioꞌe. — G̃asũ dak soat kaka dag̃ opop ip. Soat Sábado cekawẽntup cocom ip wuyꞌeaweroroapꞌa be- -Deus eju kawẽnwẽnapꞌa be. Iboam acã juy ace cebe ip — Tiago oꞌe.
\p — Imẽn cuy ace! — ioꞌe ip aweromayũ.
\p
\v 22-23 Soat ceꞌaweroꞌibiyũ Tiago be jawẽwẽap kay ip oꞌe- -soat Jesus emumujuyũ, soat itabucayũ kukukayũ dak, soat itabucayũ dak.
\p G̃ebuje Jesus emumujuyũ cartadup oꞌtupmubararak itabucayũ kukukayũ. Oꞌtupmubararak ip tup muju am wararaꞌacayũ awẽaptum- -itabucayũ awẽwẽaptum- -Antioquia ka watwat awẽwẽaptum. Xepxep ag̃okatkayũ oꞌg̃uju ip cartadup tujowat am Antioquia ka watwat pe. Judas oꞌg̃uju ip, Silas tak. Judas xepxep ibutet osunuy. Waraꞌat ibutet Barsabás i osunuy. Ixeyũ xepxepayũ yaꞌõbuyxi ip osodop soat xe. Ixeyũ xepxepayũ cartadup oꞌtuptujowat Antioquia ka watwat pe. Oꞌju ip Paulo eju, Barnabé eju dak.
\p Cartadup imẽn oꞌe:
\p Oceju Jesus emumujuyũ, itabucayũ kukukayũ dak, waraꞌacat itabucayũ dak, i. Eykitpitpiyũ oceju, i. Kato mujujum oceju soat pe eywebe Judeuꞌũmayũ be, i. Kato mujujum ocejũ soat kaka dag̃acat pe- -Antioquia ka watwat pe, Síria eipi watwat pe dak, i. 
\v 24 Kuy bima ag̃okatkayũ mo aꞌg̃u eyag̃uymubabiꞌũmꞌũm oceꞌin, i. G̃asũ eyetaybit g̃u apẽn oceku cedag̃ iam, i. “Moisés ekawẽn tag̃ eyedaypuꞌag̃obixeedakatꞌũm pima, Deus jeydaxijo g̃u,” ioꞌe ip napa ma eywebe, i. Oceju g̃u mo aꞌg̃u ixeyũ oceg̃uju eykay, i. Jaꞌõbi ma mo aꞌg̃u ip oꞌju eykay, i. 
\v 25 Imẽnpuye juk aꞌg̃u ocejeꞌawero pũg̃ tag̃ ma eyawẽ ãm, i. G̃asũ xepxep ag̃okatkayũ ocetaẽ imuju am eyjom, i. Ixeyũ cum Barnabé eju, Paulo eju dak, i. 
\v 26 Pauloyũ oꞌyaoka pin kuy bima, i. Inaka ipararaꞌũm ma wuykukukat Jesus Cristo muwẽnuwẽn oekuku ip, i. Imẽnpuye ikukpin cĩcã ip ocexe, i. 
\v 27 Xepxepayũ oceg̃uju eykay- -Judas, Silas tak, i. Ixeyũ soat g̃uwẽn eywebe g̃asũ ocekawẽn, i. 
\v 28-29 Iboam acã oceju eꞌem eywebe: Deusbaroyũ wap iẽnmõg̃ꞌibitẽn cuy epesuẽnꞌo g̃u, i. Puca doy juy epetoykõnkõn g̃u, i. Iẽntoyteyatẽn cuy epesuẽnꞌo g̃u, i. Waraꞌat tayxi kaykay g̃u juy epesop, waraꞌat itop kaykay g̃u dak, i. Iboam acã juy oceju eꞌem eywebe, i. Iboap tag̃ jekukum pima, cedag̃ epeku. Eywãtaxipipem g̃u juy epesop. Ibũrũ ma oceju eꞌem eywebe eyawẽwẽm, Deus biõg̃buk tak eyawẽwẽm, i.
\m Imẽn oꞌtupmubararak ip Judeuꞌũmayũ awẽwẽaptup itabucayũ kukukayũ Jerusalém ka be awerom pima.
\p
\v 30 G̃ebuje taẽꞌibiyũ cartadup oꞌtuptujowat ip Antioquia ka watwat kay- -itabucayũ kay. Judas oꞌtuptujowat, Silas eju. Oꞌju ip Barnabé eju, Paulo eju dak.
\p Yajẽm puje soat itabucayũ oꞌtomuwã ip jeꞌawero am.
\p
\v 31 G̃ebuje ip oꞌtupũm cebe ip. Itabucayũ kukukayũ yaꞌõberen oꞌtupcoco soat pe yaꞌĩjo am. Soat ip icokcok oꞌe ibodup ekawẽn co buje.
\p
\v 32 Judas Silas tak itabucayũ oꞌyawẽwẽ. Antioquia ka watwat oꞌyawẽwẽ ip. Deus ekawẽn muwẽnuwẽnꞌukayũ osodop ip. Deus ekawẽn ip oꞌg̃utaybitbin. Imẽnpuye big̃ ma ip itabut oꞌe Jesus kay. Icokcok ip oꞌe jetabucap kug̃. Pũg̃ kabia g̃u osodop ip Antioquia ka be.
\p
\v 33 Ibocewi oꞌjewemuwẽn ip itabucayũ be.
\p — Deus cuy xipan jeydujupit — itabucayũ oꞌe cebe ip.
\p Oꞌjepit ip Jerusalém ka be. Kuy bima oꞌg̃ujuꞌiayũ kay ip oꞌjepit. 
\v 34 Imẽnpit Silas oꞌjepit g̃u.
\p — Ijoce ma og̃uy — ioꞌe. — Ocepit g̃u juy — ioꞌe.
\m
\v 35 Paulo dak Antioquia ka be osunuy, Barnabé dak. Wuykukukat ekawẽn oꞌg̃uwẽnuwẽn ip adeayũ be. Jebureyũ eju wuykukukat ekawẽn oꞌg̃uwẽnuwẽn ip.
\p
\v 36 Ibunꞌũm pima Paulo oꞌjekawẽn Barnabé eju.
\p — G̃aꞌa juy acepit — ioꞌe. — Soat kaka dag̃ cuy aju- -kuy bima Deus ekawẽn ag̃uwẽnuwẽn iap kaka dag̃ — ioꞌe. — Wuynomukay juy acepit waram Jesus aꞌõkayayũ jom — ioꞌe. — G̃aꞌa acepit xipat paxi opop ip iam — ioꞌe Barnabé be.
\p — G̃aꞌa — ioꞌe Barnabé.
\p
\v 37 Barnabé ma João Marcos dujowat ojuy ceweju ip. 
\v 38 Paulo bit ibuꞌu oꞌe tujowan.
\p — Oxe ma xipat g̃u João Marcos ju am wuyweju — Paulo oꞌe. — Koap pima mo wuyiwat — ioꞌe. — Panfília eipi be bima, oꞌjepit — ioꞌe. — Wuyweju bit mo oibuꞌun Deus ekawẽn muwẽn ãm — ioꞌe. — Obuꞌu oce ikug̃ — Paulo oꞌe.
\m
\v 39 Oꞌjewaꞌõxikxik cĩcã ip. Imẽnpuye oꞌjeok ip jewewejuwi oibuꞌun ikug̃ puye.
\p G̃ebuje Barnabé João Marcos oꞌtujowat jeweju. Kobexixi be ip oõm. Tibog̃ cĩcãati oꞌtimudek ip. Chipre eipi be ip oꞌju- -tipꞌawerorobog̃ pe.
\p
\v 40 G̃ebuje Paulo waraꞌat ma oꞌtaẽ jeweju am. Silas oꞌtaẽ jeweju am. Soat ikitpitpiyũ oꞌjekawẽn Deus eju cebeam ip- -Antioquia ka watwat.
\p — Bay, xipan soat kug̃ ẽn — ioꞌe ip. — Iteyũ xepxepayũ juy ejukuk xipan — ioꞌe ip Deus pe.
\p
\v 41 Paulo oꞌju Silas eju. Síria eipi dag̃ oekuku ip, Cilícia eipi dag̃ tak. Deus ekawẽn itabucayũ mutaybitbin oekuku ip.
\b
\c 16
\p
\v 1 Pauloyũ oꞌju Derbe ka be, Listra ka be dak. Listra ka be ag̃okatkat osunuy. Jesus aꞌõkayat osunuy. Ibutet Timóteo i osunuy. Paulo oꞌju Timóteo kay. Timóteo xi Judeu osunuy. Ixe ayacat Deus ekawẽn kay itabut osunuy. Cebay Judeu g̃u osunuy- -Grego acã. 
\v 2 Jesus aꞌõkayayũ Timóteo oꞌg̃uwẽn Paulo be- -Listra ka watwat, Icônio ka watwat tak.
\p — Timóteo xipat cĩcã — ioꞌe ip Paulo be.
\p
\v 3 Timóteo dujowat ojuy oꞌe jeweju jebuywatwatꞌukan Paulo. Koap Paulo Timóteo oꞌtaypuꞌag̃obixeedakat Judeuyũ babi dag̃, ade Judeuyũ osodop ika kay ip cumiat ka be buye. Itaybit cĩcã osodop ip Timóteo Judeuꞌũmat ipot iam, taypuꞌag̃obixeedakatꞌũm iam tak ixeyũ Judeuyũ.
\p
\v 4 G̃ebuje Paulo oꞌju Silas eju, Timóteo eju dak. Soat kaka dag̃ ip oekuku Jesus kay itabucayũ jojom. Jerusalém ka watwat pe jawẽwẽap muwẽnuwẽn oekuku ip. Jesus emumujuyũ be jawẽwẽap muwẽnuwẽn oekuku ip- -itabucayũ kukukayũ be jawẽwẽap muwẽnuwẽn. Mẽnku Judeuꞌũmayũ jekuku iap muwẽnuwẽn oekuku ip.
\p — Kũyjobin cuy epesop eyawẽwẽap ekawẽn kay — ioꞌe ip itabucayũ be soat kaka watwat pe.
\m Soat kaka dag̃ oekuku ip imukũyjojom.
\p
\v 5 Imẽneju big̃ ma itabut oꞌe Jesus kay. Soat kabia wararaꞌacayũ oitabun Jesus kay.
\p
\v 6 Deus biõg̃buk Pauloyũ oꞌg̃ujuat g̃u Ásia eipi be. Oꞌg̃ujuat g̃u ip iboce Deus ekawẽn muwẽn ãm. Imẽnpuye Frígia eipi dag̃ ip oekuku Galácia eipi dag̃ tak. Kapurũg̃ tag̃ ip oekuku.
\p
\v 7 Ibocewi oajẽm ip Mísia eipi tẽg̃ ma. Bitínia eipi be cu ojuy ip. Deus biõg̃buk pit oꞌg̃ujuat g̃u ip. 
\v 8 Imẽnpuye Mísia eipi dag̃ oꞌtimudek ip. Trôade ebikopap pe oajẽm ip. Ibo ka tibog̃ cĩcãati xe osunuy.
\p
\v 9 G̃ebuje Paulo jexey joꞌiat oꞌjojojo ixe exima. Trôade ka be bima oꞌjojojo. Ag̃okatkat oꞌjojojo jexey joꞌiat pe. Macedônia eipi bewiat oꞌjojojo. Cũg̃ꞌi osunuy.
\p — Macedônia eipi kay juy ejot — ioꞌe Paulo be jexey joꞌiat pe. — Ocebuywan cuy ece — ioꞌe Paulo be.
\p
\v 10 Paulo imẽn jexey joꞌiat oꞌjojojo. Õn tak cuk Paulo xe og̃uy Trôade ka be bima. Õn Lucas- -ijudup mubarararag̃at. Macedônia eipi kay aꞌg̃u cu ojuy ocejewag̃uy Paulo exey joꞌiat puye. Ocetaybit cĩcã Deus cuk ocemuju Macedônia eipi kay kawẽn idipat muwẽn ãm iam.
\p
\v 11 G̃ebuje kobexixi be oceõm. Ocejẽm Trôade ka bewi. Tibog̃ cĩcãati ocetimudek. Cũg̃ ma oceju tipꞌaweroro kay Samotrácia eipi kay. Kuyaje oceju Neápolis ebikopap kay.
\p
\v 12 — G̃ebuje Filipos ka kay oceju. Filipos ka Macedônia eipi be opop. Ikabog̃ cĩcã ma oꞌsukadop. Waraꞌatka bodi ma ikabog̃ oꞌsukadop- -Macedônia eipi beatka bodi ma. César ebekitkit ibo ka oꞌsukada Roma ka kukat ebekitkit. 
\v 13 Ag̃oka bewi ocejẽm Sábado kabia.
\p Idibi wãbũ kay oceju.
\p — Judeuyũ acoꞌi kawẽnwẽn Deus eju ijoce — i juk aꞌg̃u oceꞌe.
\m Aoyũ awerom osodop ip iboce. Ocabik ma aꞌg̃u ceparakpe ip- -aweroayũ parakpe.
\p
\v 14 G̃ebuje Deus ekawẽn oceg̃uwẽn cebe ip. Ayacat iboce osunuy. Ibutet Lídia i osunuy. Tiatira ka bewiat osunuy. Pag̃o idipat teidadaꞌukat osunuy. Deus kay itabucat osunuy. Deus Paulo ekawẽn oꞌg̃ubapuk Lídia be itabut cĩcã iꞌe am. Imẽnpuye itabut cĩcã oꞌe Jesus kay. 
\v 15 Oꞌjewemubatisanat “Jesus ebekit õn g̃asũ bit” iꞌe am soat pe. Lídia dukꞌa watwat tak oꞌjewemubatisanat ip, itabut puye. Lídia oꞌjekawẽn ocewebe.
\p — Eyxe wuykukukat Jesus kay wetabut pima, odukꞌa be juy epesop g̃asũ bit — ioꞌe ocewebe.
\m Imẽnpuye Lídia dukꞌa be ocesop Filipos ka be bima.
\p
\v 16 G̃ebuje ayacat ocedopabijuk- -yaypanꞌisuat- -cekariwa be imudadaybotbotꞌibit. Deus eju Judeuyũ kawẽnwẽnꞌuk osodop iap kay cum pima, ocedopabijuk. Ibiõg̃buk kẽrẽat kug̃ osunuy jewebe. Ibiõg̃buk kẽrẽat aꞌõbi yaypanꞌisuat apẽn g̃uyjom jeꞌbapuk iap muwẽnuwẽnꞌuk osunuy adeayũ be. Ag̃okatkayũ yaypanꞌisuat kukayũ osodop ip. Ade dinheiro bubum ip osodop apẽn g̃uyjom jeꞌbapuk eykay iap muwẽg̃ap teim. Ixe yaypanꞌisuat ocedopabijuk. 
\v 17 Jewãwãwãm oekuku ocenomuju soat kabia. Oꞌjekawẽn ocekawẽn cocoꞌukayũ be.
\p — Teyũku Deus aꞌõ kay kũyjobicayũ — ioꞌeꞌeꞌe. — Ixe Deus soat podi ma yaꞌõbuyxiat — ioꞌeꞌeꞌe. — Apẽn wuyewedaxijo but iap muwẽnuwẽn wuywebe — ioꞌeꞌeꞌe yaꞌõberen ocekawẽn cocoꞌukayũ be.
\p
\v 18 Iboap muwẽnuwẽn oekuku ocedobatban yaypanꞌisuat. Waraꞌat kabia dak. Waraꞌat kabia dak. Ade kabia iboap muwẽnuwẽn oekuku ocenomuju. Imẽnpuye Paulo yukpiceg̃ẽn oꞌe cekay. Oꞌjekorepẽn yaypanꞌisuat kay.
\p G̃ebuje Paulo oꞌjekawẽn ibiõg̃buk kẽrẽat pe- -yaypanꞌisuat peat pe.
\p — Ejẽm cuy yaypanꞌisuat pewi — ioꞌe. — “Ejẽm cuy,” i õn eꞌem ewebe Jesus aꞌõbi — Paulo oꞌe.
\p G̃ebujeꞌisum ma oꞌjẽm cebewi. Xipat oꞌe.
\p
\v 19 Cebewi ibiõg̃buk kẽrẽat cẽmap co buje, yaypanꞌisuat kukayũ oitakomãn ip Paulo kay.
\p — G̃asũ bit ixe ibiõg̃buk kẽrẽat aꞌõbi g̃uwẽn g̃u — ioꞌe ip. — Abu dinheiro jeꞌg̃ũm ocewebe g̃asũ bit? — ioꞌe ip.
\p Pauloyũ oꞌjat ip. Akiju ip oꞌtujowat. Jeka kukukat topabe oꞌtujowat ip imuymuy am.
\p
\v 20 G̃ebuje oꞌjekawẽn ip jeka kukukayũ eju.
\p — Teyũku Judeuyũ — ioꞌe ip. — Wuyka watwat kaykay ip — ioꞌe ip napa ma. — Iwaru ma ocemutaybitbin ip. Jebabim ip ocemutaybitbin — ioꞌe ip. 
\v 21 — Cedag̃ g̃u iteyũ eꞌeap tag̃ wuyeku am, wuyju Roma ka kukukat ebekitkit puye — ioꞌe ip napa ma.
\p
\v 22 G̃ebuje ibo ka watwat oitakomãn ip Pauloyũ kay, imuymuy buje. Ika kukukayũ Pauloyũ eekabek oꞌg̃uwekuwek ip.
\p — Epeyukxabimupokupog̃ cuy daxadaypam — ioꞌe ip.
\m
\v 23 Oꞌyukxabimupokupok cĩcã ip. Daomũnmũnapꞌa be oꞌg̃uõm.
\p — Ag̃ cuy epesop cekay — ioꞌe ip daomũnmũnapꞌa kukukat pe. — Epejowiwi juy ip ijẽmap puxim — ioꞌe ip.
\p
\v 24 Iboap co buje ãmapꞌabi be Pauloyũ oꞌg̃uõm ig̃oꞌa kukukat. Badiatꞌabi be ip oꞌg̃uõm, “Xipan cĩcã juy iteyũ epejowiwi,” i juk oꞌe buye. Sui oꞌsuimuõm ip iptok pe. Oꞌjekag̃obiece ip parakpe. Cem cĩcã oꞌe ip. Ceok paꞌore ip oꞌe.
\p
\v 25 Iximadakpe Pauloyũ oꞌjebibododon Deus kay. Oꞌjekawẽn ip Deus eju. Ibibodo aꞌĩjojom oꞌe ip soat daomũnmũnapꞌa beayũ. 
\v 26 Ipi oꞌjexixi g̃ebuje bit. Imẽnpuye daomũnmũnapꞌabiꞌip oꞌjeꞌabiꞌipekutu. Soat xĩntabi dak jekpiwa ma oꞌjeorek. Oꞌtomudipꞌuk. Ikag̃obimuparakapꞌip tak oꞌjeipeorek jekpiwan ma.
\p
\v 27 Imẽn cebapuk puje daomũnmũnapꞌa kukukat oꞌjewũrũg̃. Xĩntabi tomudipꞌukꞌuk oꞌjojojo. Tũybe taomũnmũnayũ kuy oꞌjẽm iãn oꞌe. Imẽnpuye jepaja oꞌjuꞌuk iyuk pewi jewaoka ojuy. 
\v 28 Imẽnpuye Paulo yaꞌõberen oꞌjewãwã.
\p — Ecewaoka g̃u juy — ioꞌe yaꞌõberen. — Ocejẽm g̃u buk — ioꞌe. — Soat oceju ijoce mabuk — ioꞌe yakukukat pe.
\p
\v 29 — Wexiktak cuy eg̃ũm owebe — ioꞌe jebure be ya kukukat. — Etojot cuy kabia iam.
\m Oꞌg̃ũm cebe. Badi oꞌju.
\p Pauloyũ kay oꞌju. Ikarabakbak oꞌe jeparara pibun. Oꞌjẽg̃ꞌaecõg̃cõg̃ Pauloyũ dopabe. 
\v 30 Oꞌtujujẽm ip yabewi.
\p — Obureyũ — ioꞌe. — Apẽntak wewedaxijo but? — ioꞌe.
\p
\v 31 — Etabun cuy eg̃uy Jesus kay- -wuykukukat kay — ioꞌe. — Etabut pima Deus jedaxijo. Edukꞌa watwat tak idaxijo — ioꞌe ip.
\p
\v 32 G̃ebuje Paulo Deus ekawẽn oꞌg̃uwẽn yakukukat pe, soat tukꞌa watwat pe dak. 
\v 33 Soat ip oitabun wuykukukat Jesus kay. Daomũnmũnapꞌa kukukat Pauloyũ oꞌyukxabiwuy iximadakpe ma.
\p G̃ebuje daomũnmũnapꞌa kukukat oꞌjewemubatisanat “G̃asũ bit Jesus ebekitkit oceju” iꞌe am jebureyũ be. Soat tukꞌa watwat tak oꞌjewemubatisanat. 
\v 34 Pauloyũ oꞌtujowat ip jedukꞌa be. Puybit oꞌg̃ũm cebe ip.
\p — Juku eyxan — ioꞌe. — Epejoꞌo — ioꞌe.
\m Soat ip icokcok cĩcã oꞌe Jesus kay itabut puye.
\p
\v 35 Kabia buje Filipos ka kukukayũ teꞌe ma sorarayũ oꞌg̃uju daomũnmũnapꞌa beayũ dakoy am- -Pauloyũ dakoy am.
\p — Pauloyũ juy epeg̃ujẽm daomũnmũnapꞌa bewi — ioꞌe ip sorarayũ be.
\m
\v 36 Oꞌju ip daomũnmũnapꞌa be. Ika kukukayũ ekawẽn oꞌg̃uwẽn ip ig̃oꞌa kukukat pe.
\p Ixe oꞌju Pauloyũ kay.
\p — “Pauloyũ juy epeg̃ujẽm daomũnmũnapꞌa bewi,” i juk oꞌe ip oceka kukukayũ — ioꞌe yakukukat Pauloyũ be. — Epejẽm cuy — ioꞌe ip. — Eyekupinap tag̃ cuy epeju — ioꞌe Pauloyũ be.
\m
\v 37 Imẽnpit Paulo ika kukukayũ aꞌõ kay g̃u oꞌe.
\p Oꞌjekawẽn sorarayũ be Paulo.
\p — Oceju soat eipi kukukat ebekitkit- -César ebekitkit Roma ka kukat ebekitkit — ioꞌe. — Soat etabutpe ip ocukxabiaokaka — ioꞌe. — Ocedujowat g̃u ip ibimãmãmãmayũ ekawẽn cocoꞌukat kay ocekawẽn co am — ioꞌe. — Itaybit g̃u mo aꞌg̃u ip Pauloyũ ikẽrẽat oꞌg̃ujurũg̃ iam, oꞌg̃ujurũg̃ g̃u iam tak, ocekawẽn coꞌũm puye. Jetaybitpunꞌũma ip ocemuõm daomũnmũnapꞌa be — ioꞌe. — Ibaꞌarẽm ma ip ocemujẽm ojuy! — ioꞌe. — Ibaꞌarẽm g̃u juy ip ocemujẽm — ioꞌe. — Soat etabutpe juy ip ocemujẽm — Paulo oꞌe.
\p
\v 38 Imẽneju sorarayũ oꞌjepit ika kukukayũ kay. Paulo ekawẽn oꞌg̃uwẽn ip cebe ip.
\p — César ebekitkit teyũbitku — ioꞌe ip.
Imẽnpuye ika kukukayũ iparara jĩjã ip oꞌe César ebekitkit ukxabi mupok pi osodop buye.
\p
\v 39 Oꞌju ip Pauloyũ kay. Daomũnmũnapꞌa be ip oꞌju.
\p — Oceju juk aꞌg̃u xipan g̃u eykuk kapusu — ioꞌe ip. — Imẽnpit eyag̃uybaꞌũm cuy iboap kay — ioꞌe. — “Filipos ka kukukayũ juk aꞌg̃u ikẽrẽm cĩcã ocekuk,” iꞌũmg̃u juy epeꞌe — ioꞌe ip. — Epejẽm oceka bewi — ioꞌe ip Pauloyũ be.
\m
\v 40 Oꞌjẽm ip daomũnmũnapꞌa bewi. Oꞌju ip Lídia dukꞌa be. Ixe dukꞌa be osodop ip kawẽnwẽn Jesus aꞌõkayayũ eju. Oꞌyawẽwẽ ip. Oꞌjẽm ip ibocewi.
\b
\c 17
\p
\v 1 Pauloyũ oꞌju Tessalônica ka kay. Cucum pima oꞌkap ip Anfípolis ka dag̃, Apolônia ka dag̃ tak. Oajẽm ip Tessalônica ka be. Ebapũg̃ esemana ibo ka be ip osodop. Judeuyũ eꞌaweroroapꞌa ibo ka be oꞌyanuy- -Deus eju kawẽnwẽnapꞌa. 
\v 2 Ebapũg̃ Sábado bima ig̃oꞌa be oꞌjujuju ip. Oõm ip ig̃oꞌa be.
\p G̃ebuje Paulo Deus ekawẽn oꞌg̃uwẽnuwẽn ig̃oꞌa beacat pe. Imutaybitbin oꞌe ip.
\p
\v 3 — Deus ekawẽn muwẽnuwẽnꞌukayũ juk adi Jesus Cristo oꞌg̃uwẽnuwẽn — ioꞌe. — Imẽn eꞌem ip:
\mi Deus emunaẽ juy ipiat supiꞌajo, i. Jeꞌũ juy, i. Waram imẽnpit jetait, i.
\m Imẽn eꞌem Deus ekawẽn tup — ioꞌe. — Ibodup ekawẽn tag̃ oꞌjebapuk Jesus pe — ioꞌe. — Õn ixe Jesus muwẽnuwẽn eywebe. Deus ixe Jesus oꞌtaẽ wuydaxijojoꞌukan — Paulo oꞌe.
\p
\v 4 Iboap co buje ade Judeuyũ oitabun Jesus kay. Pauloyũ eju oekuku ip. Ade Grego aꞌõm kawẽnwẽnꞌukayũ dak oitabun Jesus kay- -Deus kay itabut osodopꞌiayũ. Ade aoyũ dak oitabun Jesus kay- -Grego aꞌõm kawẽnwẽnꞌukayũ- -soat xe ibuyxiayũ.
\p
\v 5 Wararaꞌacayũ bit oitabutkarey Pauloyũ kay Judeuyũ- -itabutꞌũmayũ. Itabutkarey oꞌe ip ibadipdipyũ oitabun Jesus kay buye. Itabutkareyayũ ikẽrẽat mujurũg̃rũg̃ꞌukayũ oꞌtomuwã jeꞌawero am. Ibukapikꞌũmayũ oꞌtomuwã ip- -kaycõmꞌũmayũ. Oꞌjeꞌawero ip itabutkareyayũ Pauloyũ oꞌjomuymuy buye. Itabutkareyayũ wararaꞌacayũ oꞌg̃utakomãn ip Pauloyũ kay. Puyxibutꞌũm ip oõm Jasão dukꞌa be Pauloyũ bu ojuy. Pauloyũ dujowat ojuy ip aweromayũ kay. 
\v 6 Pauloyũ bit oꞌtobuxik g̃u ip Jasão dukꞌa be. Imẽnpuye Jasão oꞌjat ip Pauloyũ nuyap pe, Pauloyũ kaꞌũm puye. Waraꞌacat itabucayũ dak oꞌjat ip.
\p Ibocewi oꞌtujowat ip ika kukukayũ kay. Pauloyũ oꞌjomuymuy ip ika kukukayũ be.
\p — Soat kaykay teyũku osodop! — ioꞌe ip napa ma. — Soat kaka dag̃ ip oekuku wuybadipyũ kaykay — ioꞌe ip napa ma. — Wuyka be g̃asũ ip oajẽm — ioꞌe ip. 
\v 7 — Jasão ixeyũ oꞌtujuõm jedukꞌa be tũy ãm — ioꞌe ip jeka kukukayũ be. — Wuyeipi kukukat aꞌõdadam ip- -César aꞌõdadam — ioꞌe ip napa ma. — “César g̃u soat kukukat- -Jesus acã,” i napa ma eꞌem ip ocewebe — ioꞌe ip napa ma.
\p
\v 8 Iboap co buje ika kukukayũ oitakomãn Pauloyũ kay Pauloyũ wuyeipi kukukat aꞌõdadam tũybe iãn oꞌe buye. Adeayũ dak oitakomãn cekay ip. 
\v 9 Imẽnpuye ika kukukayũ dinheiro oꞌjat Jasãoyũ xewi Pauloyũ mujẽmap teida am.
\p — Pauloyũ juy epeg̃ujẽm wuyka bewi — ioꞌe ip Jasãoyũ be. — Ixeyũ jẽm puje waram eyedinheiro oceg̃ũm eywebe — ioꞌe ip.
\p Jasãoyũ oꞌg̃uypicat ip waram tukꞌa be. 
\v 10 Imẽnpuye Jasãoyũ Pauloyũ oꞌg̃ujẽm jeka bewi. Oꞌg̃ujẽm ip ixima be. Oꞌg̃uju ip Beréia ka kay.
\p Pauloyũ oꞌju Beréia ka kay. Oajẽm. Judeuyũ eꞌaweroroapꞌa be ip oõm Deus eju kawẽnwẽnapꞌa be.
\p
\v 11 G̃ebuje Pauloyũ Deus ekawẽn Beréia ka watwat oꞌg̃utaybitbin. Beréia ka watwat Tessalônica ka watwat puxim g̃u ip osodop. Itabut pin ip osodop icẽmat aꞌõ kay. Paulo ekawẽn cocoꞌuk ip osodop. Soat kabia Deus ekawẽn tup cocoꞌuk ip osodop jetaybit am Paulo icẽmãn paxi eꞌem iam, icẽmãn g̃u paxi iam tak. 
\v 12 Imẽneju ade ma oitabun Jesus kay. Ade Judeuyũ itabut oꞌe ip cekay. Ade aoyũ dak itabut oꞌe ip Jesus kay- -Grego aꞌõm kawẽnwẽnꞌukayũ- -soat xe yaꞌõbuyxiayũ. Ade ag̃okatkayũ dak itabut oꞌe Jesus kay- -Grego aꞌõm kawẽnwẽnꞌukayũ.
\p
\v 13 G̃ebuje Judeuyũ oꞌyawẽg̃tobuxik Paulo Deus ekawẽn muwẽnuwẽn Beréia ka be iap awẽg̃- -Tessalônica ka watwat. Imẽnpuye Paulo kay ip oꞌju. Oajẽm ip. Paulo awẽg̃ oꞌyawẽg̃mukẽrẽrẽn ip Beréia ka watwat pe. Oꞌjomuymuy jĩjã ip. Oꞌgubuꞌun ip Paulo aꞌĩjo am.
\p
\v 14 G̃ebuje itabucayũ Paulo oꞌtujowat tibog̃ cĩcãati be. Silas pit Beréia ka be oꞌjecũ, Timóteo dak. 
\v 15 Ibocewi Paulo oꞌtujowat ip Atenas ka be. Paulo dujowacayũ oꞌjepit jeka be- -Beréia ka be. Jepitpin pima, Paulo oꞌjekawẽn ceweju ip.
\p — “G̃axĩn ma juy epesot okay,” i juy epeꞌe Silasyũ — ioꞌe cebe ip. — “Ibun g̃u juy epesop Beréia ka be,” i juy epeꞌe cebe ip- -Silas pe, Timóteo be dak — ioꞌe Paulo cebe ip.
\p
\v 16 Paulo yag̃uybabiꞌũmꞌũm oꞌe Atenas ka watwat kug̃. Silasyũ ajẽmap wiwim osunuy ibo ka be. Ade deusbaroyũ kay itabut cĩcã ip osodop Atenas ka watwat. Tũybe ade deusyũ iãn oꞌe ip Atenas ka watwat. Paulo oꞌyukpiceg̃ẽn deusbaroyũ biõg̃buk cocom puye. Atenas ka watwat kug̃ yag̃uybabiꞌũmꞌũm oꞌe.
\p
\v 17 G̃ebuje Paulo oꞌjekawẽn Atenas ka watwat eju. Oꞌjekawẽn Judeuyũ eꞌaweroroapꞌa be- -Deus eju kawẽnwẽnapꞌa be. Judeuyũ eju oꞌjekawẽn Judeuyũꞌũmayũ eju dak- -Deus kayayũ eju. Wuyjuyũ eꞌaweroroap pe dak oꞌjekawẽnwẽn soat kabia aweromayũ eju. 
\v 18 Itaybit cĩcãayũ dak oꞌjekawẽnwẽn Paulo eju- -Estóicoyũ, Epicureuyũ dak. Ixeyũ ag̃okatkayũ itaybit cĩcã osodop ip. Paulo oꞌg̃uwẽnuwẽn ip jeweweju.
\p — Apẽntak sute e ojuy itaybitꞌũmat? — ioꞌe ip.
\p — Deus muwẽnuwẽn teku oxe bit — ioꞌe wararaꞌacayũ. — Wuyju bit wuyetaybit g̃u iꞌem — ioꞌe ip.
\m Imẽn oꞌe ip, Paulo soat em Jesus muwẽnuwẽn oekukuku buye, wuyeꞌũ buje waram acejetait iap muwẽnuwẽn oekukuku buye dak. Jesus buten itaybit g̃u ip osodop.
\p
\v 19 G̃ebuje itaybit cĩcãayũ Paulo oꞌtujowat jeꞌaweroroap pe jeweweju kawẽn ãm. Jeꞌaweroroap putet Areópago i osunuy.
\p
\v 20-21 — Ekawẽn iisuat cuy epeg̃uwẽn ocewebe — iꞌeꞌeꞌuk osodop ip jewewebe Atenas ka watwat soat em.
\m Soat em iisuat muwẽnuwẽn oekuku ip iisuat cocom tak. Paulo oꞌju jeꞌaweroroap pe Atenas ka beayũ eju.
\p — Ejot cuy oceweju ekawẽn iisuat muwẽn — ioꞌe ip Paulo be. — Apẽn etaybit iap cuy eg̃uwẽn ocewebe — ioꞌe ip. — Ekawẽn iisuat cuy ocemutaybin ece. Waraꞌan ma ẽn ocemutaybitbin — ioꞌe ip. — Oceyaꞌĩjojo g̃u buk iboap. Ocetaybin pin iboam — ioꞌe ip Paulo be.
\p
\v 22 G̃ebuje Paulo oꞌjekawẽn cĩcã ceweju ip iboce Areópago be.
\p — Atenas ka watwat — ioꞌe Paulo. — Eyetabut cĩcã deusbaroyũ kay. 
\v 23 Deusbaroyũ biõg̃buk cocom ocekukuku ijoce. Pũg̃ꞌa oyajojo witꞌa mug̃ẽg̃ẽ- -eyedeusbaroyũ kay eyeg̃ebubuapꞌa. Ibararak opop ig̃oꞌa eju. Imẽn eꞌem: “Waraꞌat paxi omuy deus, i. Ocetaybit g̃u buk ixem,” i. Ijopꞌa oceyamug̃ẽ cekay oceg̃ebubuapꞌam,” i. Imẽn ibararak opop ig̃oꞌa eju — Paulo oꞌe. — Õn pit wetabut ixe kay. Ixe Deusat. Kaꞌũmg̃u waraꞌat. Õn wetaybit ixem, eyju bit kaꞌũma. Teꞌe ma ig̃oꞌa mo aꞌg̃u epeyamug̃ẽ, eyetaybit g̃u ixem puye. Ixe ekawẽn muwẽnuwẽn õn eywebe. 
\v 24 Kuyje ixe ipi oꞌg̃ug̃ẽ, soat ipi dag̃acat tak. Ixe kabi beacat kukukat, ipi dag̃acat kukukat tak. Ixe bit wuyemuꞌamuyꞌa be g̃u nuynuy. 
\v 25 Ixe buywat paꞌore wuywebe. Ixe soatkug̃. Kaꞌũma kay ixe. Ixe wuymutaicin, wuymuꞌadaꞌadam tak. Ixe wuyxat ũmũm wuywebe. Wuydoti dak iũmũm. 
\v 26 Soat ka dag̃acat oꞌg̃uꞌacog̃ pũg̃ ag̃okatkat pewi. Jebikuyap tag̃ ip oꞌg̃ujuju soat kaka dag̃. Poce ixeyũ jeedop iap oꞌg̃uwẽnuwẽn, poce ixeyũ cum iap tak — ioꞌe Paulo. 
\v 27 — Deus imẽn oꞌg̃uwẽn ixeyũ etaybit am ixem, jekay jetabut am tak. Wũy g̃u wuywi nuynuy- -wuytẽg̃ ma. Deus dobuxik pin pima, ibaꞌore g̃u wuywebe tobuxik am. 
\v 28 Wuyetait ixe itait puye. Soat tag̃ wuyju cũg̃cũg̃ cucum ixe ag̃ wuykay buye. Wuyju kake ixe kake buye — Paulo oꞌe. — Eybadipyũ dak imẽn oꞌe- -tupmubararakꞌukayũ: “Deus ebekitkit wuyju dak,” i mo oꞌe ip. 
\v 29 Deus ebekitkit wuyju. Imẽnpit xipat g̃u wuywebe iꞌe am: “Deus witaꞌa mug̃ẽg̃ẽ buxim” i, “Deus ouro mug̃ẽg̃ẽ buxim” i dak, “Deus prata mug̃ẽg̃ẽ buxim” i dak, “Wuyemuꞌamug̃ẽg̃ẽꞌa buxim” i dak — Paulo oꞌe.
\p
\v 30 — Kuyje ma Deus g̃ebum g̃u osunuy apẽn ipi dag̃acat ikẽrẽat oꞌg̃ujurũg̃rũg̃ iap kay, kawẽn icẽmãn itaybitꞌũm ip puye. G̃asũ bit “Ikẽrẽat mujurũg̃rũg̃ap cuy epeyepere,” iꞌeꞌem Deus soat pe wuywebe — Paulo oꞌe.
\p
\v 31 — Deus ag̃okatkat oꞌtaẽ- -Jesus oꞌtaẽ — ioꞌe. — Kabia oꞌg̃uweg̃ũn. Soat ijodiat jeꞌbapuk Deus wap ixe kabia be. Abuyũ ikẽrẽat kug̃ Deus xe iap Jesus g̃uwẽn. Abuyũ ikẽrẽat kug̃ g̃u iap tak g̃uwẽn. Cũg̃ ma g̃uwẽn itaybit puye. Deus pe waram Jesus mutait puje soat iboap oꞌg̃ubapuk soat pe wuywebe — Paulo oꞌe Atenas ka watwat be.
\p
\v 32 “Deus ceꞌũat oꞌg̃utait waram” iꞌe buje Paulo ekawẽn oꞌjowaywayway ip Atenas ka watwatꞌin. Wararaꞌacat pit Paulo ekawẽn kay oꞌe ixeyũꞌin.
\p — Waram pima juy g̃uto ejot iboam ocemutaybin am — ioꞌe ip Paulo be.
\p
\v 33 Paulo oꞌjẽm cexewi ip.
\p
\v 34 Pũg̃pũg̃ ag̃okatkayũ oitabun ip Jesus kay. Paulo eju oekuku ip oitabunꞌiayũ. Pũg̃ ma itabucat putet Dionísio i osunuy. Ixe Areópago be jeꞌaweroroꞌukat osunuy. Ayacat tak itabut oꞌe Jesus kay. Damáris i ibutet osunuy. Pũg̃pũg̃ ã oitabun Jesus kay.
\b
\c 18
\p
\v 1 G̃uyjom Paulo oꞌjẽm Atenas ka bewi. Waraꞌat ka kay oꞌju- -Corinto ka kay.
\p
\v 2 Paulo oajẽm ag̃okatkat kay- -Áquila kay. Áquila Roma ka bewiat osunuy. Kuy mo oꞌjẽm Roma ka bewi jetayxi eju. Itayxi butet Priscila i osunuy. Áquila Judeu osunuy. Bekin pi ma Ponto eipi be osunuy. Kuy ma mo oꞌjẽm ip Roma ka bewi Itália eipi bewi. Soat kukukat putet Cláudio i osunuy. Oꞌjẽm ip ixe Cláudio jeipi bewi Judeuyũ oꞌg̃ujẽmat puye. Oajẽm Áquila kay Paulo. 
\v 3 Áquila torojoꞌa mug̃ẽg̃ẽꞌukat osunuy- -ixeeꞌaꞌa mug̃ẽg̃ẽꞌukat. Paulo dak ixeeꞌaꞌa mug̃ẽg̃ẽꞌukat osunuy. Ixeeꞌaꞌa deidadaꞌuk ip osodop- -Paulo, Áquila dak. Xepxem ip oꞌjekapikpik. Imẽnpuye Paulo Áquila dukꞌa be osunuy Corinto ka be bima.
\p
\v 4 G̃ebuje soat Sábado cucuꞌuk osunuy Judeuyũ eꞌaweroroapꞌa be- -Deus eju kawẽnwẽnapꞌa be. Ixe dak Jesus oꞌg̃uwẽnuwẽn ig̃oꞌa be Judeuyũ ag̃uymuwarururun ojuy, Judeuꞌũmayũ ag̃uymuwarururun ojuy dak. 
\p — Icẽmãn Jesus acã Deus emunaẽ — iꞌeꞌeꞌuk osunuy cebe ip.
\m
\v 5 Silas tak oajẽm Paulo kay, Timóteo dak. Macedônia eipi bewi ip oajẽm. Jesus oꞌg̃uwẽnuwẽn cĩcã ip Judeuyũ eꞌaweroroapꞌa be. 
\p — Deus Jesus acã oꞌtaẽ wuydaxijojoꞌukan — ioꞌeꞌeꞌe cebe ip.
\p
\v 6 Pũg̃pũg̃ Judeuyũꞌin Paulo ekawẽn kayꞌũm cĩcã oꞌe. Paulo oꞌjomuymuy jĩjã ip. Oꞌyaꞌõdada jĩjã ip. Imẽneju Paulo oibuꞌun ceweju ip jeꞌawero am.
\p — Jesus ekawẽn og̃uwẽn eywebe — ioꞌe. — Inaka eyetabut g̃u wekawẽn kay — ioꞌe. — Ipiatꞌajojoap pe eyju buje, õn ma okpiwat g̃u Deus xe. Eyju bit eyukpiwat, cekay eyetabutꞌũm puye — ioꞌe Paulo.
Paulo jesay oꞌg̃uxikxik ixeyũ xewi ijẽm puje okpiwat g̃u iap mubapuk am cebe ip.
\p
\v 7 Ibocewi oꞌjẽm, Judeuyũ cekawẽn kayꞌũm puye.
\p Tício Justo dukꞌa kay oꞌju. Ixe dukꞌa Judeuyũ eꞌaweroroapꞌa tẽg̃ ma oꞌyanuy- -Deus eju kawẽnwẽnapꞌa tẽg̃ ma. Itabut osunuy Deus kay. Ixe dukꞌa be oꞌju Paulo. Judeuꞌũmayũ be oꞌju Jesus ekawẽn muwẽn ãm.
\p G̃ebuje Paulo Jesus oꞌg̃uwẽnuwẽn Tício Justo dukꞌa be. 
\v 8 Crispo itabut oꞌe wuykukukat Jesus kay- -ixe dukꞌa watwat tak. Ixe Crispo Judeuyũ eꞌaweroroapꞌa kukukat osunuy. Itabut oꞌe Jesus kay g̃asũ bit. Wararaꞌacayũ dak oitabun Jesus kay. Tak g̃u Corinto ka wat oitabun. Deus ekawẽn co buje ip oitabun. Oꞌjemubatisasanat ip “Jesus ebekitkiyũ oceju g̃asũ bit” iꞌe am jebureyũ be.
\p
\v 9 G̃ebuje jexey joꞌiat oꞌjojojo Paulo. Wuykukukat oꞌjebapuk Paulo kay jexey joꞌiat pe. Ixima be oꞌjekawẽn Paulo eju.
\p — Epararam g̃u juy eg̃uy — ioꞌe Paulo be. — Mũg̃ g̃u juy eg̃uy — ioꞌe. — Ebibuꞌum g̃u juy eg̃uy wekawẽn muwẽn ãm — ioꞌe. 
\v 10 — Õn ma exe og̃uy — ioꞌe. — Imẽnpuye aoka baꞌore cebe ip — ioꞌe. — Ade mabuk itabut jeꞌe okay ijop ka watwat — wuykukukat oꞌe Paulo be jexey joꞌiat pe.
\p
\v 11 Imẽnpuye Paulo ibun cĩcã osunuy Corinto ka be. Pũg̃ koato osunuy ibo ka be, koato ipidase dak. Soat em Deus ekawẽn muwẽnuwẽnꞌuk osunuy ibo ka watwat pe.
\p
\v 12 G̃ebuje Judeuyũ Paulo kay g̃u oꞌe ip. Paulo oꞌjat ip taomũn ojuy. Oꞌtujowat ip Gálio be yaꞌĩjo am. Gálio Grécia eipi kukukat osunuy. Iecug̃ap osunuy. Oõm ip ibimãmãayũ ekawẽn cocoapꞌa be. Paulo oꞌjomuymuy ip.
\p
\v 13 — Teku ocemubuꞌuꞌun kuyat ekawẽn tag̃ wuyeku am — ioꞌe ip Gálio be. — “Xipat ma epesop Deus xe eydobuyũꞌũmꞌũm ekawẽn tag̃ jekukum g̃u maꞌg̃u eyju,” i napa ma teku eꞌem wuywebe — ioꞌe ip. — Eg̃ukorẽm cuy! — ioꞌe ip.
\p
\v 14 Paulo jede ojuy oꞌe jemuymuyayũ be. Gálio bit:
\p — Ecede g̃u juy — ioꞌe Paulo be.
\p Gálio bit oꞌjede Judeuyũ be.
\p — Judeuyũ — ioꞌe. — Õn pit ite ag̃okatkat og̃ukorẽm g̃u — ioꞌe. — Wuykukukat mupubutbun puje, õn kajuk og̃ukorẽm, ikẽrẽat kug̃ wuykukukat xe buje dak — ioꞌe. 
\v 15 — Jewaꞌõxikxikxi eyju. “Teku wuybadip ekawẽn mukẽrẽrẽrẽn,” iꞌeꞌem eyju — ioꞌe. — “Teku wuydobuyũꞌũmꞌũm ekawẽn tag̃ g̃u jekukum,” iꞌeꞌem eyju. Imẽnpuye õn pit og̃ukorẽm g̃u. Eyju ma juy epeg̃ukorẽm — ioꞌe Judeuyũ be. — Eyxe ma ikẽrẽat kug̃. Oxe bit ikẽrẽat kug̃ g̃u — ioꞌe.
\p
\v 16 Oꞌg̃ujẽm ip ibimãmãayũ ekawẽn cocoapꞌa bewi. 
\v 17 Imẽneju Judeuꞌũmayũ itakoma oꞌe ip Judeuyũ kay, Paulo oꞌtujujẽm puye. Imẽnpuye Sóstenes oꞌjat ip Judeuꞌũmayũ. Oꞌjat ip ixe Judeuyũ eꞌaweroroapꞌa kukukat puye. Oꞌg̃upokupok cĩcã ip ibimãmãayũ ekawẽn cocoapꞌa exĩntabi weg̃ũn. Gálio bit akꞌaditꞌũma osunuy ixeyũ kay.
\p — Ãg̃ g̃upokupok ip — ioꞌe jewebe ma. — Õn g̃u wukpiwat. Waꞌõbi g̃u ip imupokupog̃ — ioꞌe.
\p
\v 18 Pũg̃ kabia g̃u Paulo Corinto ka be osunuy. Ibun ma osunuy Jesus aꞌõkayayũ eju. G̃uyjom oꞌjewemuwẽn cebe ip. Corinto ka bewi oꞌjẽm. Síria eipi dag̃ cu ojuy.
\p
\v 19 Éfeso ka kay oꞌju. Priscila oꞌju ceweju, Áquila dak. Cencréia ka dag̃ ip oꞌkap. Cencréia ka be bima Paulo oꞌjakoeat apẽn kuy bima Deus pe oꞌe iap tag̃. Waram ip oꞌju kobexixi dag̃. Oꞌtimudek ip. Oajẽm ip Éfeso ka be. Paulo oibuꞌun cewejuwi ip- -Áquila ejuwi, Priscila ejuwi dak.
\p G̃ebuje Paulo Judeuyũ oꞌtobuxik. Oõm jeꞌaweroroapꞌa be- -Deus eju kawẽnwẽnapꞌa be. Jesus oꞌg̃uwẽnuwẽn cebe ip. Oꞌjewaꞌõxikxik Judeuyũ eju.
\p
\v 20 — Ibunbun ma juy eg̃uy ocexe — Judeuyũ oꞌe cebe.
\m Paulo bit ibuꞌu oꞌe cexe ip.
\p
\v 21 — Kaꞌũma — ioꞌe. — Deus ibikuy bima bit ocepit eykay — ioꞌe cebe ip.
\m Oꞌjewemuwẽn cebe ip. Éfeso ka bewi oꞌjẽm. Kobexixi dag̃ oꞌju.
\p
\v 22 Cesaréia ka ebikopap pe cemũg̃ puje oꞌju Jerusalém ka be. Itabucayũ kay oꞌju. Oꞌtobede ip.
\p G̃ebuje kapurũg̃ tag̃ oꞌju Antioquia ka kay Síria eipi beat ka kay. 
\v 23 Jay. Oajẽm. Ibun ma osunuy ibo ka be.
\p G̃ebuje itabucayũ oꞌg̃utaybinbin. Soat kaka dag̃ imutaybitbin ip oekukuku. Oꞌjẽm Antioquia ka bewi. Kapurũg̃ tag̃ oꞌju. Galácia eipi dag̃ oekukuku, Frígia eipi dag̃ tak. Jesus aꞌõkayayũ mutaybinbin oekukuku. Itabut cĩcã ip oꞌe cũg̃ ma oꞌg̃utaybinbin puye.
\p
\v 24 Apolo oajẽm Éfeso ka be. Apolo ag̃okatkat osunuy. Judeu osunuy. Alexandria ka bewiat osunuy. Idim cĩcã oꞌjekawẽnwẽnwẽn. Itaybit cĩcã Deus ekawẽn. 
\v 25 Kuy bima waraꞌacat ixe oꞌg̃utaybitbin wuykukukat e dag̃ wuyeku am iam. Jedokdokap kug̃ oꞌg̃utaybitbin ip. Cũg̃ ma oꞌg̃utaybitbin apẽn wuykukukat cuk adi oekuku iam. Itaybit osunuy apẽn João Batista adeayũ oꞌg̃ubatisasan ikẽrẽat mujurũg̃rũg̃ap oꞌjepere ip iap mubapuk am iam. Itaybit g̃u bit osunuy apẽn g̃asũ wuyju jewemubatisasanan “Jesus ebekitkit oceju” iꞌe am wuybureyũ be iam. 
\v 26 Jecokcokap kug̃ osunuy imutaybitbin Judeuyũ eꞌaweroroapꞌa be- -Deus eju kawẽnwẽnapꞌa be. Áquila, Priscila dak Apolo oꞌtujowat jedukꞌa be cekawẽn co epere buje. Apẽn wuykukukat e dag̃ ajeku iam oꞌg̃utaybin ip. Itaybitꞌũmapi oꞌg̃utaybin ip- -ixe oꞌyaꞌĩjojo g̃u buk iam. Cũg̃ cĩcã ma oꞌg̃utaybin ip.
\p
\v 27 Ibocewi Jesus kay itabucayũ Apolo oꞌtomuwã ixe cu ojuy Grécia eipi kay buye.
\p — Cum puk õn Grécia eipi kay — Apolo oꞌe.
\p — Haꞌa — ioꞌe ip.
\p Cartadup oꞌtupmubararak ip tupmuju am Apolo eju. Oꞌtupmubararak ip Grécia eipi watwat peaptum- -itabucayũ beaptum. Oꞌtupmubararak ip xipan cuy Apolo epejukuk iaptum.
\p G̃ebuje Apolo itabucayũ oꞌg̃utaybitbin cĩcã Deus ekawẽn Grécia eipi be jajẽm puje. Oitabun ip Jesus kay, Deus xe ikukpin ip puye. 
\v 28 Apolo Judeuyũ aꞌõxikxig̃ oꞌe soat etabutpe.
\p — Jesus acã Deus emunaẽ. Jesus acã oꞌtaẽ wuydaxijojoꞌukan — ioꞌe cebe ip. — Imẽn ibararak opop Deus ekawẽn tup pe — ioꞌe cebe ip.
\m Mũg̃ ma ip osodop. Yaꞌõmuypit paꞌore cebe ip.
\b
\c 19
\p
\v 1 Apolo Corinto ka be bima Paulo oꞌkap soat kaka dag̃. Éfeso ka kay oꞌju. Jay. Oajẽm Éfeso ka be.
\p G̃ebuje Jesus aꞌõkayayũ oꞌtobuxik. Doze be ip osodop. João Batista imubatisasan oeku ikẽrẽat mujurũg̃rũg̃ap epereap mubapuk am wararaꞌacayũ be. Itaybit oꞌe ip João emumutaybinbinam. 
\v 2 Paulo oꞌjekawẽn ceweju ip.
\p — Ibiõg̃buk xipacat oõm tu eywebe, Jesus kay eyetabun puje? — ioꞌe.
\p — Kaꞌũma. Oõm g̃u — ioꞌe ip. — Ajo xeꞌe Ibiõg̃buk xipacat? Ocejekũyjo g̃u buk ixem — ioꞌe ip.
\p
\v 3 — Abu-aꞌõbi juk eymubatisasaan? — Paulo oꞌe.
\p — João Batista aꞌõbi juk ocemubatisasaan — ioꞌe ip.
\p
\v 4 — João ikẽrẽat mujurũg̃rũg̃ oꞌjepereꞌiayũ mubatisasan oeku — ioꞌe. — Imubatisasan pima, “Waraꞌacat omuyku kanomũm. Ibutet Jesus i. Ixe kay juy eyetabun epesop,” iꞌeꞌeꞌuk osunuy João — ioꞌe Paulo.
\p
\v 5 Iboap co buje oꞌjewemubatisasaan ip “Oceju Jesus ebekitkiyũ g̃asũ bit- -ixe acã ocekukukat” iꞌe am jebureyũ be. 
\v 6 Paulo jebu oꞌsubumõg̃ yabi jeje ip. Ibiõg̃buk xipacat oõm cebe ip. Yaꞌõbaꞌarẽmat aꞌõm oꞌjekawẽnwẽn ip. Deus ekawẽn oꞌg̃uwẽnuwẽn ip. 
\v 7 Doze be osodop ip- -Jesus kay itabucayũ.
\p
\v 8 G̃ebuje Paulo Deus ekawẽn oꞌg̃uwẽnuwẽn Judeuyũ eꞌaweroroapꞌa be- -Deus eju kawẽnwẽnapꞌa be- -Éfeso ka beatꞌa be. Jaꞌõcam Deus ekawẽn muwẽnuwẽnꞌuk osunuy ibo ka watwat pe.
\p — G̃axĩn ma Deus soat kukukan jeꞌe — ioꞌe ibo ka watwat pe.
\p Ibun osunuy ibo ka be imutaybitbin- -ebapũg̃ kaxi. 
\v 9 Pũg̃pũg̃ayũ bit Paulo be jemutaybitbinap kay g̃u oꞌe ip. Ibuꞌu ip oꞌe jetabut am Jesus kay. Jesus oꞌjomuymuy ip adeayũ be.
Imẽnpuye Paulo oꞌjeok cexewi ip- -Jesus kay jetabut am ibuꞌuꞌuayũ xewi.
\p Waraꞌatꞌa kay oꞌju Jesus aꞌõkayayũ eju. Ig̃oꞌa wuymutaybitbinapꞌa oꞌyanuy. Soat kabia Paulo imutaybitbin osunuy ig̃oꞌa be. Ig̃oꞌa be Tirano imutaybitbinꞌuk osunuy pũg̃pũg̃ ehora dag̃. Ixe imutaybitbinꞌũm pima Paulo Jesus ekawẽn imutaybitbinꞌuk osunuy. 
\v 10 Imẽn imutaybitbinꞌuk osunuy xepxep koato bun. Imẽneju ade jĩjã wuykukukat Jesus ekawẽn oꞌyaꞌĩjojo- -Judeuyũ, Judeuꞌũmayũ dak. Soat Ásia eipi watwat oꞌyaꞌĩjojo.
\p
\v 11 G̃ebuje Deus jaꞌõbacaap oꞌg̃ũm Paulo be wuywebe iꞌe baꞌoreat mubapuk am adeayũ etabutpe- -oꞌjojojo g̃u buk ip iap mubapuk am. 
\v 12 Imẽnpuye adeayũ Paulo epag̃o oꞌjat cexewi- -pag̃onõmnõm, ikũmpi ekabek tak. Ixe pag̃o oꞌjomõg̃ ip iwãtaxipipiayũ be. Oꞌjeꞌadaꞌada ip ixe pag̃o mõg̃ puje. Xipat oꞌe ip. Ibiõg̃buk kẽrẽat tak oꞌjẽmjẽm adeayũ bewi ixe pag̃o mõg̃ puje.
\p
\v 13 G̃ebuje pũg̃pũg̃ Judeuyũ ibiõg̃buk kẽrẽat oꞌg̃ujẽmjẽm wararaꞌacat pewi. Pũg̃ ka be g̃u ip osodop. Soat kaka dag̃ oekukuku ip. Ibiõg̃buk kẽrẽat mujẽmjẽmꞌuk oekukuku ip.
\p Paulo babim imujẽm ojuy ip.
\p — Ocekukukat Jesus aꞌõbi oceju eꞌem ewebe “Ejẽm cuy cebewi,” i — ioꞌe ip ibiõg̃buk kẽrẽat pe.
\p
\v 14 Imẽn imujẽmjẽm ip osodop 7 be ag̃okatkayũ. Ikitpitpityũ osodop ip. Cebay butet Ceva i osunuy. Ceva Judeu osunuy. Judeuyũ epaĩyũ kukukat osunuy. Jesus aꞌõbi ibiõg̃buk kẽrẽat mujẽmjẽmꞌuk osodop ip adeayũ bewi ikitpitpiyũ.
\p
\v 15 Jesus aꞌõbi imujẽm ojuy bima bit, ibiõg̃buk kẽrẽat oꞌjede cebe ip.
\p — Wetaybit Jesus — ioꞌe. — Wetaybit Paulom tak — ioꞌe. — Pãm eyju? Abuyũ eyju? Jesus aꞌõkayayũ g̃u eyju oxe bit — ibiõg̃buk kẽrẽat oꞌe cebe ip.
\p
\v 16 Ibiõg̃buk kẽrẽat kukat oꞌjejorojoro cekay ip- -7 beayũ kay. Toti ip oꞌg̃uwekuwek. Oꞌwatwat ip ig̃oꞌa bewi 7 beayũ. Oꞌjenapõn ip soat iwekwek. Soat ip yaokaka oꞌjẽm. Ibo oꞌjebapuk Éfeso ka be.
\p
\v 17 Iboap awẽg̃ oꞌyawẽg̃tobuxik ip- -Éfeso ka watwat, Judeuyũ, Judeuyũꞌũmayũ dak. Iparara oꞌe ip teꞌe ma “Jesus aꞌõbi õn” iꞌeap puxim.
\p — Wuykukukat Jesus yaꞌõbuyxi jĩjã — ioꞌeꞌe ip.
Ade ixeyũꞌin oitabun wuykukukat Jesus kay.
\p
\v 18 Ade wamomoyũ dak oitabun Jesus kay. Apẽn cuk adi ikẽrẽat oꞌg̃ujurũg̃rũg̃ ip iap oꞌg̃uwẽn ip Paulo be. Itabut cĩcã oꞌe ip Jesus kay. Jebukaypacap oꞌjepere ip.
\p
\v 19 G̃ebuje ibukaypacap ibararak osodop taperadup pe ibibodo. Oibuꞌun ip jebibododon. Wararaꞌacat muyꞌũ ãm ip oibuꞌun. Jebukaypacaptup oꞌtupmuꞌawero ip tupmupik am soatup. Oꞌtupmupik ip soat etabutpe. Teibog̃ cĩcã osodop tuptei. Tuptei 50,000 dinheiro osodop isurũg̃at prata mug̃ẽg̃ẽ.
\p
\v 20 Imẽneju wararaꞌacayũ oitabun Jesus kay. Tak g̃u ip oitabun. Deus ekawẽn kay jĩjã ip oꞌe, cũg̃ cĩcã cexe ip puye.
\p
\v 21 G̃ebuje Paulo co ojuy Jerusalém ka kay. Deus aꞌõbi cu ojuy oꞌe Macedônia eipi dag̃ cu ojuy, Acaia eipi dag̃ tak.
\p — Jerusalém ka kay oju pin — ioꞌe jewebe ma. — Ibo ka be oju buje Roma ka kay dak oju pin — ioꞌe jewebe ma.
\p
\v 22 Xepxep jewejuayũꞌin oꞌg̃uju jewap Macedônia eipi be. Timóteo oꞌg̃uju, Erasto dak. Ixe bit Ásia eipi be ibunbun mabuk osunuy.
\p
\v 23 G̃ebuje Demétrio adeayũ oꞌg̃utakomãn Jesus aꞌõkayayũ kay. Oꞌg̃utakomãn ip, soat kaka dag̃ayũ oitabun Jesus kay buye. 
\v 24-25 Demétrio pratam yamug̃ẽg̃ẽꞌukat osunuy. Diana kay jeꞌeꞌeapꞌaꞌitꞌitꞌa mug̃ẽg̃ẽꞌukat osunuy. Ade Éfeso ka watwat kapikpikꞌuk ip osodop Demétrio eju ibiatꞌa mug̃ẽg̃ẽm. Ade dinheiro bubuꞌuk ip osodop ibiatꞌa mug̃ẽg̃ẽapteim. Tũybe Diana Deus iãn oꞌe ip Éfeso ka watwat. Imẽnpuye teꞌe ma Diana kay jĩjã ip osodop. Demétrio ibiatꞌa mug̃ẽg̃ẽꞌukayũ oꞌtomuwã jeꞌawero am soat jeweju kapikpikꞌukayũ dak.
\p Ibocewi oꞌjekawẽn cebe ip.
\p — Oburereyũ — ioꞌe. — Eyetaybit ade dinheiro bubum wuyju wuyekapikapteim iam. 
\v 26 Paulo bit adeayũ mubuꞌuꞌun jetabut am Diana kay. “Ijodiat emumug̃ẽ Deus g̃u,” iꞌeꞌem ixe soat pe. Imẽnpuye adeayũ puꞌuꞌun ip jetabut am Diana kay. Jetabucap epereperem ip — ioꞌe.
\p — Itabut oꞌe ip Paulo ekawẽn kay- -Éfeso ka watwat, soat Ásia eipi watwat tak — ioꞌe. — Imẽn xipat g̃u jĩjã wuywebe! 
\v 27 Imẽn ibun pima, ajo be acejekapik? Wuyekapikap kaꞌũmg̃u oꞌe. “Ibuyxim g̃u oceꞌe Diana dukꞌa!” i jeꞌe ip adeayũ- -Ásia eipi watwat, soat ka dag̃ayũ dak — ioꞌe. — “Diana Deus g̃u,” i jeꞌe ip — ioꞌe.
\p
\v 28 Imẽneju Demétrio ekawẽn cocoayũ isapkaꞌore oꞌe Paulo kay.
\p G̃ebuje oꞌjewãwã ip yaꞌõberen- -Diana kay jeꞌeꞌeapꞌaꞌitꞌitꞌa mug̃ẽg̃ẽꞌukayũ.
\p — Diana yaꞌõbuyxi jĩjã! — ioꞌe ip yaꞌõberen. — Soat ka watwat itabut cekay! — ioꞌe ip. — Diana kay acã wuyetabut! Diana acã Deus! — i teꞌe ma oꞌe ip yaꞌõberen.
\m
\v 29 Tũybe Diana Deus iãn oꞌe ip. Imẽnpuye soatꞌaꞌa dag̃ ip yaꞌõberen oꞌjewãwã.
\p Ade ip dao ma oꞌju jeꞌaweroroapꞌa kay- -yabog̃atꞌa kay. Cum pima ip xepxepayũ oꞌjat Paulo eju jekukuꞌukayũ- -Macedônia eipi bewiayũ. Gaio oꞌjat ip, Aristarco dak. Oꞌtujowat ip jeꞌaweroroapꞌa be- -yabog̃atꞌa be. Tak g̃u ip oꞌjeꞌawero ig̃oꞌa be. 
\v 30 Paulo õm ojuy oꞌe ig̃oꞌa be. Imẽnpit itabucayũ oꞌg̃uõmat g̃u. 
\v 31 Wararaꞌacayũ dak oꞌjewaꞌõmuju Paulo be- -Ásia eipi kukukayũ- -ibureyũ.
\p — Eõm g̃u juy jeꞌaweroroapꞌa be — ioꞌe ip. — Aokam cuy ip — ioꞌe ip Paulo be.
\p — Oõm g̃u — ioꞌe.
\p
\v 32 G̃ebuje aweromayũ warẽmtag̃ ma oꞌjewãwã. Waraꞌat tag̃tag̃tag̃ ma ip jewãwãwãm. Apẽg̃ãm ijoce awerom wuyju iam itaybit g̃u oꞌe ip. Inaka yaꞌõberen ma jewãwãwãm ip. Itakoma jĩjã ip oꞌe Paulo ejuayũ kay, Judeuyũ kay dak.
\p
\v 33 G̃ebuje Judeuyũ itakomaayũ mudin ojuy oꞌe. Imẽnpuye Alexandre oꞌg̃uju ip jewãwãayũ dopabe. Alexandre itakomaayũ mudin ojuy oꞌe. Oꞌjebaeuru mũg̃ ma epesop iꞌe am aweromayũ be.
\p
\v 34 Teku Judeu iam itaybit puje, big̃ ma ip oꞌjewãwã.
\p — Diana yaꞌõbuyxi jĩjã! — ioꞌe ip yaꞌõberen. — Ixe Diana deus wuyxe soat xe, Éfeso ka watwat xe! — ioꞌe ip yaꞌõberen.
\p Ibun cĩcã ip oꞌjewãwã. Xepxep hora yaꞌõberen oꞌjewãwã ip. Oꞌjewãwã ip tũybe Diana Deus iãn oꞌe ip puye.
\p
\v 35 G̃ebuje ag̃okatkat jewãwãwãayũ oꞌg̃uymũg̃. Ixe ag̃okatkat Éfeso ka kukukayũꞌin sunuy. Paꞌorem cĩcã jewãwãwãayũ oꞌg̃uymũg̃. Oꞌjekawẽn cebe ip.
\p — Éfeso ka watwat, eyaꞌõpicũg̃cũg̃ cuy epesop wekawẽn kay! — ioꞌe. — Soat kaka dag̃ayũ itaybit ip Éfeso ka watwat Diana kay jeꞌeꞌeapꞌa kukan iam- -deus tukꞌa kukan iam- -kuy bima kabi bewi oꞌkopiatꞌa kukan iam. 
\v 36 Abu kuka oꞌe: “Éfeso ka watwat itabut g̃u Diana kay,” i? Kaꞌũma ma! — ioꞌe. — Imẽnpuye juy epeyewãwã g̃u — ioꞌe. — Mũg̃ ma epesop! — ioꞌe. — Warẽmtag̃ g̃u juy epeꞌeꞌe! — ioꞌe cebe ip. 
\v 37 — Teꞌe ma juk iteyũ ag̃okatkayũ epetojot ijoce — ioꞌe. — Diana kay jeꞌeꞌeapꞌa beat oꞌtujupaꞌum g̃u ip — ioꞌe. — Diana nuyapꞌa oꞌjomuymuy g̃u ip — ioꞌe.
\p
\v 38 — Demétrio, ceweju kapikpikꞌukayũ dak wararaꞌacat muy pin pima, cum ip ibimãmãat ekawẽn cocoꞌukat topabe — ioꞌe. — Ade ip wuyka be. Ijoce g̃u bit ip wararaꞌacat jomuymuy- -ibimãmãat ekawẽn cocoꞌukat topabe acã — ioꞌe. — Soat em ip jeꞌawerorom. 
\v 39 Ceꞌawero buje ip ceweju juy ip epeyekawẽn — ioꞌe. — Wuydobuyũꞌũmꞌũm ekawẽn tag̃ cuy ajeku — ioꞌe. — Cedag̃ꞌũm cĩcã wuyju eꞌem g̃asũ bit — ioꞌe. — Warẽmtag̃ wuyju eꞌem g̃asũ bit — ioꞌe.
\p
\v 40 — César ebekitkit kuka oꞌe wuywebe: “Cedag̃ g̃u juk adi epeꞌeꞌe,” i. “César aꞌõ dag̃ g̃u juk epeyeꞌawero,” i kuka oꞌe ip wuywebe — ioꞌe. — Ipiat kuka oꞌsupiꞌajoat ip wuywebe — ioꞌe. — “Cedag̃ ma mo aꞌg̃u oceju eꞌem” iꞌe baꞌore wuywebe — ioꞌe cebe ip.
\p
\v 41 Soat aweromayũ oꞌg̃uypit iboap epere buje. Oꞌjepit ip jedukꞌa be.
\b
\c 20
\p
\v 1 Ceꞌaweroap epere buje Paulo Jesus kay itabucayũ oꞌtomuwã jeꞌawero am. Oꞌjekawẽn ceweju ip yaꞌõmucan am. G̃uyjom:
\p — Cum puk õn — ioꞌe cebe ip. — Macedônia eipi kay õn cum. Eybuꞌum g̃u juy epesop Jesus kay — ioꞌe cebe ip.
\m Oꞌjẽm Éfeso ka bewi. Oꞌju.
\p
\v 2 G̃ebuje Macedônia eipi dag̃ oeku. Soat kaka dag̃ oekuku itabucayũ jojom. Oꞌg̃ubikuy ip big̃ ma itabut am Jesus kay.
\p
\v 3 Grécia eipi kay oajẽm. Ebapũg̃ kaxi ibo eipi be osunuy. Paulo ma tibog̃ cĩcãat mudek ojuy oꞌe Síria eipi kay jeju am. Judeuyũ bit Paulo aoka ojuy ip. Oꞌjewawẽ ip Paulo aoka am.
\p — G̃aꞌa juy ayaoka — ioꞌe ip. — Kobexixi be iõm puje juy ayaoka — ioꞌe ip.
\p Paulo oꞌjekũyjo jaoka ojuy ip iam. Imẽnpuye oibuꞌun tibog̃ cĩcãati mudek am.
\p Fílipos ka kay Paulo oꞌju. Kapurũg̃ tag̃ oꞌju. Macedônia eipi dag̃wi oꞌju. Wararaꞌacayũ oꞌju ceweju itabucayũ. 
\v 4 Ibũrũ ma ip oꞌju Paulo eju: Sópatro, Aristarco, Segundo, Gaio, Timóteo, Tíquico, Trófimo. Sópatro Beréia ka bewiat osunuy. Pirro ipot osunuy. Aristarco Tessalônica ka bewiat osunuy, Segundo dak. Gaio Derbe ka bewiat osunuy. Tíquico Ásia eipi bewiat osunuy, Trófimo dak. Ibũrũ ma ip oꞌju Paulo eju- -7 beayũ. 
\v 5 Jay. Oajẽm ip. Õn tak cuk adi og̃uy Filipos ka be. Õn Lucas. Ijudup mubarararag̃ õn.
\p Ibocewi 7 beayũ oꞌju ocewap Trôade ka be ocewiwi am. Paulo odopabijuk Filipos ka be. 
\v 6 Judeuyũ peta mug̃ẽg̃ẽm osodop ixeyũ kabia dag̃. Imug̃ẽg̃ẽm pima pãoꞌa oꞌoꞌuk osodop ip- -yamuyuhuhuaptõmtẽmꞌũmatꞌa.
\p Ixe epeta kap puje Trôade ka kay oceju. Ocejẽm Filipos ka bewi. Kobexixi be oceõm. Xet. Xet. Xet. Xet. Xet. Pũg̃põg̃bi xet tibog̃ cĩcãati dag̃ oceku. Wararaꞌacayũ ocenomuixik pũg̃põg̃bi xet kap puje- -itabucayũ- -7 beayũ. Ocenomuixik ip Trôade ka be. Xet. Xet. Xet. Xet. Xet. Xet. Xet. 7 xet ibo ka be ocesop.
\p
\v 7 Katpuje ocejeꞌawero soat itabucayũ eju Sábado bima. Pãoꞌa o am ocejeꞌawero Jesus eꞌũap kay oceg̃ebu am. Yabog̃atꞌabi be ocejeꞌawero- -umatꞌabi be. Paulo ocemutaybitbin oꞌe umatꞌabi be, kuyaje waraꞌat ka kay cum puye. Ibun osunuy ocemutaybitbin. Iximadakpe mabuk ocemutaybitbin osunuy. 
\v 8 Torotoroꞌi oeku lamparinaꞌa umatꞌabi dag̃ yabimukabia am.
\p
\v 9 Ag̃okatkat tak Paulo ekawẽn oꞌjekũyjo iboce- -yaypanꞌisuat. Ibutet Êutico i osunuy. Xikꞌi osunuy ukꞌabaꞌetatok pe. Xiiih. Oixet pin cĩcã ibun osunuy kawẽnwẽn puye. Xet. Oꞌxet. Wũn. Bẽkũ. Umwi oꞌat. Oꞌg̃uꞌãy ip. Kuy ceꞌũ. 
\v 10 Paulo oꞌkop umatꞌabi bewi.
\p Oꞌkop ceꞌũat kay. Erot ioꞌe. Oꞌjeerot. Ceꞌũat oꞌyakobut. Oꞌjekawẽn itabucayũ eju.
\p — Epeyekuy g̃u juy — ioꞌe. — Ceꞌũ g̃u teku! Itait ma — ioꞌe.
\p
\v 11 G̃ebuje umatꞌabi be g̃uto ocejeu. Pãoꞌa oceyadakat ig̃oꞌabi be Jesus eꞌũap kay oceg̃ebu am. Ocejekõn. Paulo kabiam oibuꞌun kawẽnwẽnapi. Oikabia kawẽnwẽn. Oꞌjẽm kabia buje.
\p
\v 12 Yaypanꞌisuat oꞌtujowat ip tukꞌa be. Soat ip icokcok oꞌe iꞌatꞌibit oꞌjetait puye.
\p
\v 13 — Cum õn Assôs ka kay — Paulo juk oꞌe ocewebe. — Kapurũg̃ tag̃wi ma õn cum — ioꞌe. — Iboce õn jeydopabijuk. Kobexixi dag̃wi juy eyju bit epeju — ioꞌe ocewebe.
\p
\v 14 Oceju Paulo wap. Kobexixi be oceõm. Oceju Assôs ka be. Paulo dak oꞌju kapurũg̃ tag̃wi Assôs ka be. Ibo ka bewi ixe dak oõm kobexixi be oceweju.
\p G̃ebuje oceju Mileto ka kay. Mitilene ka dag̃ oceku. 
\v 15 Ocejẽm Mitilene ka bewi. Kuyaje ocajẽm tipꞌaweroro weg̃ũn. Tipꞌaweroro butet Quios i osunuy. Kuyaje ocejemũg̃ waraꞌat tipꞌaweroro be. Ixe tipꞌaweroro butet Samos i osunuy. Kuyaje ocajẽm Mileto ka be. 
\v 16 Paulo ibuꞌu osunuy ibun jenuy am Ásia eipi be. Imẽnpuye ocejecũ g̃u Éfeso ka be. Ocekap ma. Jerusalém ka be yajẽm pin oꞌe peta mug̃ẽ awap- -Pentecostes ekabia awap.
\p
\v 17 G̃ebuje Paulo Éfeso ka watwat oꞌtomuwã Mileto ka be bima- -Jesus kay itabucayũ kukukayũ. Mileto ka Efeso ka tẽg̃ ma oꞌsukadop. Oꞌtomuwã ip tot am jekay.
\p
\v 18 Yajẽm puje Paulo oꞌjekawẽn ceweju ip.
\p — Oburereyũ — ioꞌe. — Ibun cuk og̃uy eyxe. Wuykukukat peam kapikpig̃ pima cedag̃ ma juk adi ojekukuku. Ásia eipi bewi wajẽm pujeap ojekukuku cedag̃. Eyetaybit wekukuam. 
\v 19 “Soat podi ma waꞌõbuyxi õn,” iꞌũmg̃u juk adi ocece eywebe. Og̃uycũg̃ cuk adi ojekukuku wararaꞌacayũ ikẽrẽat mug̃ẽg̃ẽm pima. Ipiat cuk adi osupiãjojojo. Judeuyũ oaoka ojuy bima. Kawẽn idipat muwẽnuwẽn cuk adi ojekukuku soat pe. 
\v 20 Obuꞌun g̃u adi kawẽn idipat muwẽn ãm eywebe. Soan õn eymukũyjojo. Eymutaybitbitbin cuk adi jeꞌaweroroapꞌa be, eydukꞌa be dak.
\p
\v 21 — Jesus muwẽnuwẽn cuk adi ojekukuku soat pe eywebe- -Judeuyũ be, Judeuꞌũmayũ be dak. “Eyg̃uycũg̃cũg̃ cuy epesop ikẽrẽat kug̃ puye,” i juk adi ocece eywebe. “Ikẽrẽat mujurũg̃rũg̃ap cuy epeyepere,” i juk adi ocece eywebe. “Deus ekawẽn tag̃ cuy epekuku,” i juk adi ocece eywebe. “Jesus Cristo kay eyetabun cuy epesop- -wuykukukat kay,” i juk adi ocece eywebe. Imẽn cuk adi eymutaybitbin ojekukuku. Eyetaybit soat iboam — ioꞌe.
\p
\v 22 — G̃asũ bit Jerusalém ka kay õn cum. Deus biõg̃buk aꞌõbi õn cum. Wetaybit g̃u apẽn jeꞌbapuk owebe Jerusalém ka be iam. 
\v 23 Ipiat cuy osupiꞌajo ibo ka be. Obu ip ibo ka be. Omuõm ip daomũnmũnapꞌa be. Wetaybit iboam. Soat ka dag̃ õn cucum pima, Deus biõg̃buk kuy juk omukũyjojojo iboam. 
\v 24 Imẽnpit omuparararan g̃u iboap. Waokapi g̃u. Obikuy jĩjã bit soat wekapikap muꞌũm ãm- -Jesus Cristo oꞌg̃ũm owebe iap muꞌũm ãm. Ixe juk oꞌe owebe “ ‘Ikẽrẽat mujurũg̃rũg̃ap cuy epeyepere,’ i juy ece soat pe,” i. “ ‘Eyepere buje Deus ikẽrẽat juꞌuk eywebewi,’ i juy ece soat pe,” ioꞌe owebe. “ ‘Wuykukukat Jesus kay eyetabun puje, Deus ikẽrẽat juꞌuk eywebewi,’ i juy ece cebe ip,” ioꞌe. “Deus soat em xipan jeykuk,” i juy ece cebe ip,” ioꞌe. “Obikuy jĩjã wekapikap muꞌũm ãm,” ioꞌe.
\p
\v 25 — “Soat ipi dag̃acat jeꞌe ‘Deus acã wuykukukat,’ ” i juk adi ocece eywebe kuy bima. 
\v 26-27 G̃asũ bit wetaybit waram eyju ojo g̃u ijodi iam. Imẽnpit Deus ekawẽn cuk adi og̃uwẽnuwẽn eywebe. Deus pe eymukũyjojoap ekawẽn tak og̃uwẽnuwẽn soat pe eywebe. Abu be og̃uwẽnꞌũm? Soat pe ma og̃uwẽn. Imẽnpuye pũg̃ eyꞌin Jesus kay itabutꞌũm pima, õn g̃u okpiwat. 
\v 28 Deus ekawẽn tag̃ cuy epeku — ioꞌe cebe ip. — Deus biõg̃buk cuk eynaẽ Jesus kay itabucayũ kukukayũm. Jesus ebekitiiyũ ip, ixe oꞌjedoyekereren cebeam ip puye — ioꞌe. — Xipan cuy ip epejujuk ovelha kukukꞌukat puxim — ioꞌe.
\p
\v 29 — Wetaybit õn ijoceꞌũm pima ag̃okatkayũ jajẽm eykay iam- -ikẽrẽat mujurũg̃rũg̃ꞌukayũ- -ikaꞌuat puximayũ. Napaap ip g̃uwẽn eywebe Jesus kay eyetabucap epereap ojuy. Ovelha kay wida ajẽmap puxim jajẽm ip eykay. Adeayũ g̃ug̃uykukuku ip. Icẽmãn g̃u ip g̃utaybin- -napaam acã. 
\v 30-31 Wararaꞌacayũ g̃ug̃uykukuku ip jetabucap epereap ojuy. Imẽneju ag̃ cuy epesop ixeyũ be eymug̃uykukuap puxim. Pũg̃pũg̃ eyꞌin tak wararaꞌacayũ g̃ug̃uykukuku jetabucap epereap ojuy — ioꞌe cebe ip.
\p — Ebapũg̃ koato ma juk adi eymutaybinbin og̃uyg̃uyg̃uy. Kawẽn idipat muwẽnuwẽn cuk adi og̃uyg̃uyg̃uy eywebe kabiam, ixima dag̃ tak — ioꞌe. — Ekay wetabotaidabotbon kapikpig̃ cuk adi og̃uyg̃uyg̃uy. G̃ebum cuy epesop iboap kay — ioꞌe cebe ip.
\p
\v 32 — Deus pit xipan cĩcã jeykuk — ioꞌe cebe ip. — Deus ekawẽn kay juy epesop — ioꞌe. — Ixe ekawẽn kay bima, eypararam g̃u epesop. Deus ekawẽn kay bima, jeybuꞌun g̃u Jesus kay eyetabut am. Deus xipacat ũmũm jebekitkiyũ be. Eywebe dak xipacat jeꞌg̃ũmg̃ũm — ioꞌe. 
\v 33 — Eyxe bima wetabikuku g̃u juk og̃uy eybubut kay eyxe bima, eyeprata kay dak, eyeouro kay dak, eydoti kay dak. 
\v 34 Õn ma kapikpikꞌuk og̃uy obubut pu am, odoti bu am tak, owejuayũ bubut pu am tak, owejuayũ doti bu am tak. Eyju dak eyetaybit iboam. Imẽn cuk adi ojekuku eyxe bima. 
\v 35 Eyju dak wekukuap puxim cuy epeku g̃asũ — ioꞌe. — Acejekapik cĩcã juy tadaybotbocayũ buywat am. Kuy imẽn adi eymutaybitbin og̃uy — ioꞌe. — Wuykukukat Jesus imẽn oꞌe:
\mi Ibubuꞌukat cokcokap podi ma iũmũmꞌukat pit eꞌem, i. 
\m Imẽn oꞌe wuykukukat Jesus Cristo — ioꞌe. — Cekawẽn kay g̃ebum cuy epesop — ioꞌe cebe ip.
\m
\v 36 Paulo imẽn oꞌjekawẽn Jesus aꞌõkayayũ kukukayũ eju- -Éfeso ka bewiayũ eju.
\p Iboap e buje Paulo oꞌjẽg̃ꞌaecõg̃cõg̃. Oꞌjekawẽn Deus eju. Soat Éfeso ka bewiayũ dak oꞌjekawẽn Deus eju. 
\v 37 Soat ip wawa oꞌe Paulo cẽm puye.
\p G̃ebuje Paulo ip oꞌyakobutbut. Oꞌyag̃obukõnkõn ip cẽm puye. 
\v 38 Ig̃uycũg̃cũg̃ ip oꞌe Paulo ekawẽn kay, “Waram eyju ojo g̃u ijodi,” ioꞌe buye.
\b
\c 21
\p
\v 1 Oꞌju ip Paulo eju kobexixi kay. Ocejewemuwẽn cebe ip. Ocejẽm cexewi ip. Oceõm kobexixi be.
\p Tiro ka kay oceju. Cucum pima oceju tipꞌaweroro be. Ocajẽm tipꞌaweroro be. Tipꞌaweroro butet Cós i osunuy. Kuyaje ocajẽm Rodes ka ebikopap pe. Ibocewi ocajẽm Pátara ka be.
\p
\v 2 Waraꞌat kobexixi ocetobuxik. Oceõm cebe- -Fenícia eipi kay cu ojuyat pe. Ocejeok ebikopap pewi. 
\v 3 Waraꞌat tipꞌaweroro ocetipcoco g̃ebuje. Ibutet Chipre i osunuy. Ocekap wuybaꞌũg̃at kadi. Oceju Síria eipi be. Ocejemũg̃ Tiro ka ebikopap pe. Tiro ka Síria eipi be opop. Kobexixi be kapikpikꞌukayũ tarekrek tujujẽm ojuy kobexixi bewi iboce. Imẽn ocajẽm Tiro ka kay.
\p
\v 4 Jesus kay itabucayũ ocetobuxik ibo ka be. Ibun ma ocesop cexe ip. 7 xet ocesop cexe ip. Ixeyũ oꞌjekawẽn Paulo eju Deus biõg̃buk aꞌõbi.
\p — Eju g̃u juy Jerusalém ka be — ioꞌe ip Paulo be. — Jaoka ip itakomaayũ — ioꞌe ip.
\p
\v 5 Ocejẽm puje, itabucayũ oꞌjeꞌawero ocewebe jewemuwẽn ãm- -ag̃okatkayũ, aoyũ dak, bekitkit tak. Oceweju oꞌju ip ebikopap pe. Ocejẽg̃ꞌaecõg̃cõg̃ kaꞌoririt pe. Deus eju ocejekawẽn.
\p — Cum puk oceju — i oce Tiro ka bewiayũ be.
\p — Haꞌa — ioꞌe ip. — Deus cuy jeꞌju eyweju — ioꞌe ip ocewebe.
\p
\v 6 Oceõm kobexixi be. Ixeyũ bit oꞌjepit jedukꞌa be. Imẽn ocejẽm Tiro ka bewi. 
\v 7 Kobexixi dag̃ oceju.
\p Ocejẽm Ptolemaida ka kay. Itabucayũ ocetobuxik. Pũg kabia ocesop cexe ip.
\p
\v 8 Kuyaje ocajẽm Cesaréia ka be. Filipe ocetobuxik. Filipe kawẽn idipat muwẽnuwẽnꞌukat osunuy. Kuy bima Jerusalém ka watwat Filipe oꞌjomuy itabucayũ buywatwatꞌukan 6 beayũ eju. Ixe dukꞌa be ocesop. 
\v 9 Ixe ebadipdip taxit osunuy. Itoptep gũ ixeyũ bit osodop. Deus ekawẽn muwẽnuwẽnꞌukayũ osodop ip. Pug̃ kabia gũ ixe dukꞌa be ocesop.
\p
\v 10 Ag̃okatkat tak oajẽm ocekay. Oajẽm Judéia eipi bewi. Deus ekawẽn muwẽnuwẽnꞌukat osunuy. Ágabo i ibutet osunuy. Apẽn g̃uyjom jeꞌbapuk iam Deus ocemutaybitbinꞌuk osunuy. 
\v 11 Ixe Paulo ukpumũnpu oꞌsubuꞌuk. Jebõg̃bi oꞌjomũnmũn Paulo ukpumũnpum. Jekag̃obi dak oꞌjomũnmũn yukpumũnpum.
\p Imũnmũn epere buje, oꞌjekawẽn Paulo eju.
\p — Deus biõg̃buk omukũyjojom — ioꞌe. — Jerusalém ka watwat jedaomũn — ioꞌe. — Jedaomũn ip apẽn obõg̃bi mũnmũn iap puxim — ioꞌe. — Jeũm ip Judeuꞌũmayũ be- -itakomaayũ be — ioꞌe.
\m Ágabo imẽn oꞌe Paulo be.
\v 12 G̃ebuje oceju ocejekawẽn Paulo eju.
\p — “Eju g̃u juy Jerusalém ka kay,” — i juk ocece ewebe — ioce cebe. — Jedaomũn ip — ioce.
\p — Eju g̃u juy — ioꞌe wararaꞌacayũ dak yaokaap puxim.
\p Itabucayũ oꞌtõtõn Paulo iju pin puye- -Cesaréia ka watwat.
\p
\v 13 — Apẽnpuye eyju wawa? — ioꞌe Paulo. — Cum cuy õn Jerusalém ka kay — ioꞌe. — Omug̃uycũg̃cũg̃ eyju? Apẽnpuye eyju omudaobuꞌun ojuy? Wuykukukat Jesus ibikuy bima, obuꞌu g̃u oce ixeyũ be odaomũn ãm. Obuꞌu g̃u dak weꞌũ ãm. Wuykukukat Jesus aꞌõbi acã ojeku — ioꞌe.
\p
\v 14 Paulo ag̃uymuwarurun paꞌore oꞌe ocewebe. Imẽnpuye ocebuꞌun yag̃uymuwarurun.
\p — Wuykukukat bikuyap tag̃ cuy ejeku — i oce cebe.
\p
\v 15 Imẽneju ocejewemuxipan Jerusalém ka kay oceju am. Oceju.
\p
\v 16 Jay. Ocajẽm Jerusalém ka kay. Jesus kay itabucayũ oꞌju oceweju. Ocedujowat ip Menasom kay Cesaréia ka watwat. Menason Chipre eipi bewiat osunuy. Kuyje ma itabucat osunuy Jesus kay. Ixe dukꞌa be ocesop.
\p
\v 17 Jerusalém ka be ocajẽm puje itabucyũ jom oceku. Icokcok oꞌe ip ocajẽm puje.
\p
\v 18 Kuyaje Paulo oꞌju Tiago kay oceweju. Tiago xe awerom osodop ip itabucayũ kukukayũ- -Jerusalém ka watwat. 
\v 19 Paulo ixeyũ oꞌtobede.
\m G̃ebuje:
\p — Deus jaꞌõbacaap oꞌg̃ubapukpukpuk Judeuꞌũmayũ be õn ixeyũ xe bima — ioꞌe Paulo. — Tak g̃u ip oitabun Jesus kay Judeuꞌũmayũ. Ade jĩjã ip oitabun — ioꞌe Paulo cebe ip.
\p
\v 20 — Kaꞌũmg̃u Deus coꞌiat xipacat! — ioꞌe ip, iboap co buje.
\p G̃ebuje itabucayũ kukukayũ oꞌjekawẽn Paulo eju.
\p — Xipit ma, ocekitpit — ioꞌe ip. — Imẽnpit etaybit ade Judeuyũ itabut oꞌe Jesus kay iam — ioꞌe ip. — “Jesus kay wuyetabut puje dak Moisés ekawẽn tag̃ cuy ajeku,” iꞌeꞌem pit ip — ioꞌe ip. 
\v 21 — “Paulo bit warẽmtag̃ ma Judeuyũ mutaybitbin Judeuyũꞌũmayũ ka be bima,” iꞌeꞌem ip napa ma — ioꞌe ip Paulo be. — “ ‘Moisés ekawẽn tag̃ g̃u juy epeku,’ iꞌeꞌem Paulo,” iꞌeꞌem ip — ioꞌe ip. — “ ‘Eyipotpoyũ juy epetaypuꞌag̃obixeedakat g̃u,’ iꞌeꞌem Paulo,” iꞌeꞌem ip — ioꞌe ip. — “ ‘Aypapayũꞌũmꞌũm ekawẽn tag̃ g̃u juy epeku g̃asũ bit,’ iꞌeꞌem Paulo,” iꞌeꞌem ip napa ma — ioꞌe ip Paulo be. — Imẽn emuymuy Judeuyũ, itabut maꞌg̃u ip Jesus kay — ioꞌe ip. 
\v 22 — Kuy ip oꞌjekũyjo ijoce ajẽmap awẽg̃ — ioꞌe ip Paulo be.
\p
\v 23 — Oceꞌeꞌeap tag̃ cuy ece — ioꞌe ip Paulo be. — Ebadipdip ag̃okatkayũ jewemuisusun Deus xe, itabucayũ — ioꞌe ip. — “Ocewemuisun cuy,” i juk oꞌe ip Deus pe. 
\v 24 Ixeyũ ebadipdipayũ juy etujowat eweju. Wuybabi dag̃ cuy ecewemuisun ceweju ip — ioꞌe ip Paulo be. — Dinheiro juy eg̃ũm ebadipdipayũ be yakoeapteim, iõhõ buap teim tak. Iõhõ juy ip jeꞌg̃ũm paĩyũ be imupik am Deus etabixe. Imẽn eꞌe buje, soat itaybit jeꞌe icẽm g̃u eꞌem ip Paulo muymuy iam — ioꞌe ip. — Itaybit jeꞌe ip ẽn tak Moisés ekawẽn tag̃ jekukum iam — ioꞌe ip Paulo be.
\p
\v 25 — Kuy ocejeꞌawero Judeuꞌũmayũ awẽ ãm — ioꞌe ip. — Cartadup ocetupmuju cebe ip- -itabucayũ be. Imẽn eꞌem ig̃odup: “Deusbaroyũ wap iẽnmõg̃ꞌibitẽn cuy epesuẽnꞌo g̃u,” i. “Puca doy juy epetoykõn g̃u,” i. “Iẽntoyteyatẽn cuy epesuẽnꞌo g̃u,” i. “Waraꞌat tayxi eju g̃u juy epeyepo, waraꞌat itop eju g̃u dak,” i. Ibiatup ocetupmubararak ixeyũ awẽaptum — ioꞌe ip. — Ocewebe yawẽwẽap tag̃ cuy jeku ip — ioꞌe ip Paulo be.
\p — Ma — Paulo oꞌe. — Eyekawẽn tag̃ cuy oce — ioꞌe.
\p
\v 26 Paulo ixeyũ be jawẽap tag̃ oꞌe. Ebadipdipayũ oꞌtujowat jeweju. Kuyaje oꞌju jewemuisun am Deus xe ceweju ip. Oõm Deus eju kawẽnwẽnapꞌa be- -yabog̃atꞌa be.
\p — G̃axĩn ma oceisu oceꞌe — ioꞌe ip paĩyũ be. — Oceisu bima, iõhõ oceg̃ũm eywebe imupik am Deus etabixe — ioꞌe ip paĩyũ be.
\p Paulo iõhõ kuka oꞌg̃ũm ebadipdipayũ muisunapteim 7 xet kap puje. Iboap tak oꞌg̃uwẽn paĩyũ be.
\p
\v 27 7 xet kapap wi ijawũn pima Judeuyũ Paulo oꞌjojojo Deus eju kawẽnwẽnapꞌa be- -Ásia eipi bewiayũ. Ixeyũ Judeuyũ adeayũ oꞌg̃utakomãn Pauloyũ kay. Ixeyũ Paulo oꞌjat. 
\v 28 Oꞌjewãwã ip yaꞌõberen adeayũ be.
\p — Israel naxegebitbit! — ioꞌe ip. — Ocebuywan cuy epeꞌe! — ioꞌe ip. — Daosuw! — ioꞌe ip. — Ag̃okatkat cuy ajat — ioꞌe ip. — Ixe warẽmtag̃ wuymutaybitbin jekukum soat kaka dag̃ — ioꞌe ip napa ma.
\p — Ixe eꞌem adeayũ be: “Judeuyũ ikẽrẽat kug̃ Deus xe,” i; “Moisés ekawẽn tag̃ g̃u juy epeku,” i dak — ioꞌe ip napa ma. — Ixe Deus eju kawẽnwẽnapꞌa muymuy — ioꞌe ip napa ma. — Judeuꞌũmayũ oꞌtujuõm ijaꞌa be — ioꞌe ip. — Ijaꞌa mubuyxiꞌũmꞌũm cĩcã ip — Judeuyũ napa ma oꞌe- -Ásia eipi bewiayũ.
\p
\v 29 Tũybe Paulo Judeuꞌũmat oꞌtujuõm Deus eju kawẽnwẽnapꞌa be iãn oꞌe ip. Imẽnpuye oitakomãn ip Paulo kay. Ixe Judeuꞌũmat putet Trófimo i osunuy. Éfeso ka bewiat osunuy. Koap pima Judeuyũ Paulo oꞌjojojo Trófimo eju. Xepxem oekuku ip Jerusalém ka be- -Paulo Trófimo eju. 
\v 30 Imẽneju ade Jerusalém ka watwat oꞌjedau Paulo kay. Soat tag̃wi oꞌjedau ip. Paulo oꞌjat ip. Kururug̃ oꞌtujujẽm ip ijaꞌa bewi. Akikay oꞌtujowat ip. Dao ma ijaꞌa exĩntabi oꞌtomudip ip. 
\v 31 Paulo aoka ojuy ip.
\p Adeayũ dak oꞌjedau 1000 be sorarayũ kukukat kay imukũyjom- -Jerusalém ka wiwiꞌukayũ kukukat kay.
\p — Soat Jerusalém ka watwat jewaokakam! — ioꞌe ip cebe. — Kawẽn ikẽrẽ jĩjã — ioꞌe ip. — Jewaoka ojuy ip — ioꞌe ip cebe.
\m
\v 32 Imẽnpuye sorarayũ kukukat dao ma oꞌjedau ig̃oꞌa be. Ade jĩjã jesorarayũ oꞌtujowat jeweju. 100 be sorarayũ kukukayũ dak oꞌtujowat jeweju.
\p Oꞌjedau ip Paulo kay. Itakomaayũ Paulo mupokupog̃ oꞌe. Oibuꞌun ip yaoka am sorarayũ dobuxik buje. 1000 be sorarayũ kukukat oajẽm. Jesorarayũ oꞌg̃uju Paulo bum ig̃oꞌa beayũ be yaokaap puxim.
\p
\v 33 — Epesubumukirik cuy correntebum- -xepxepum — ioꞌe sorarayũ be.
\p — Abu ite ag̃okatkan? — ioꞌe yaoka ojuyayũ be. — Apẽn ite oꞌe eywebe? — ioꞌe.
\p
\v 34 G̃ebuje yaoka ojuyayũ oꞌjewãwã yaꞌõberen. Waraꞌat tag̃tag̃tag̃ ma ip oꞌjewãwã. Imẽnpuye 1000 be sorarayũ kukukat pe itaybit paꞌore oꞌe apẽnpuye Paulo aoka ojuy ip iam.
\p — Epetujowat cuy wuydopdopapꞌa be — ioꞌe jesorarayũ be.
\p
\v 35 Sorarayũ Paulo oꞌtujowat jedopdopapꞌa kay. Toptopapꞌa ewadag̃g̃ũn xe bima sorarayũ jaꞌõpiꞌa jeje Paulo oꞌtujuu itakomaayũ be yaokaap puxim. 
\v 36 Itakomaayũ nomuju oꞌjedau ip Paulo bu ojuy.
\p — Epeyaoka juy! — ioꞌe ip yaꞌõberen.
\p
\v 37 G̃ebuje Paulo oꞌjekawẽn 1000 be sorarayũ kukukat pe.
\p — Wekawẽn put tu eweju? — ioꞌe Grego aꞌõm 1000 be sorarayũ kukukat pe.
\p
\v 38 — Etaybit tu Grego aꞌõm? — ioꞌe. — Egito eipi bewiat g̃u du ẽn? — ioꞌe. — Kuy bima ixe Egito eipi bewiat adeayũ oꞌg̃uꞌawero jenopag̃og̃o ãm Roma ka kukukat esorarayũ eju. 4000 ag̃okatkayũ oekuku ip ceweju. 4000 beayũ oꞌtujowat ukꞌaꞌũmat pe. Wararaꞌacat aoka ojuy ip oꞌe. Ẽn ixe ag̃okatkat g̃u du? 1000 be sorarayũ kukukat oꞌe Paulo be.
\p
\v 39 — Kaꞌũma — ioꞌe. — G̃ujuat g̃u õn — ioꞌe. — Waraꞌat ma õn pit. Judeu õn. Tarso ka be okap- -Cilícia eipi be — ioꞌe. — Tarso ka waypanap ka- -ikabog̃atka — ioꞌe. — Wekawẽn pin cĩcã waoka ojuyayũ be. Ãg̃ puk ocekawẽn ceweju ip — Paulo oꞌe.
\p
\v 40 — Haꞌa. Ecekawẽn puk — ioꞌe.
\p Paulo cũg̃ꞌi osunuy sorarayũ dopdopapꞌa ewadag̃g̃ũn ceje. Wẽg̃wẽg̃ꞌi oꞌe jebum itakomaayũ muymũg̃ ãm.
\p G̃ebuje Paulo oꞌjekawẽn itakomaayũ be. Yaꞌõm ma ip oꞌjekawẽn ceweju ip- -Judeuyũ aꞌõm- -Hebreu aꞌõm.
\b
\c 22
\p
\v 1 — Tapupuyũ okitpitpiyũ, baybayũ — ioꞌe. — Eyaꞌõpicũg̃cũg̃ cuy epesop waꞌõ kay. Ocewedayo juy eywebe waꞌĩjoam — ioꞌe.
\p
\v 2 — Wuyaꞌõm ma teku kawẽnwẽn! — ioꞌe ip Judeuyũ.
\m Mũg̃ oꞌe ip yaꞌĩjo am. Paulo oꞌjekawẽn ceweju ip.
\p
\v 3 — Ocewedayo juy — ioꞌe. — Judeu õn. Tarso ka be okap Cilícia eipi be — ioꞌe. — Ijop ka be ma bit owaypan- -Jerusalém ka be Gamaliel be omutaybit am. Moisés ekawẽn omutaybitbin osunuy. Ocedobuyũꞌũmꞌũm ekawẽn omutaybitbin osunuy — ioꞌe. — Kaypatpan g̃u õn pit wetaybin. Soat eyju Deus bikuyap tag̃ jeku ojuy. Õn tak eybuxim cuk adi ibikuyap tag̃ jeku ojuy og̃uy — ioꞌe.
\p
\v 4 — Wetakoma jĩjã juk adi og̃uy Jesus aꞌõkayayũ kay- -ieisuate dag̃ jekukuꞌukayũ kay. Ixeyũ kaykay jĩjã ma juk adi og̃uy. Ade ip otaomũnmũn. Daomũnmũnapꞌa be ip og̃uõmõm- -ag̃okatkayũ, aoyũ dak. Ade ip oyaokaat ixeyũꞌin. 
\v 5 Paĩyũ kukukayũ itaybit imẽn cuk adi ojekuku iam, Judeuyũ kukukayũ dak — ioꞌe. — Ixeyũ juk cartadup oꞌtupũm owebe- -Judeuyũ beaptum- -Damasco ka watwat beaptum — ioꞌe.
\p — Damasco ka kay juk oju. Jesus kay itabucayũ daomũn ãm oju. Ijoce taomũnmũn ip tujupit ojuy oju Jerusalém ka be. Ipiat piꞌajoat ojuy cebe ip oju.
\p
\v 6 E dag̃ cucum pima juk oajẽm Damasco ka tẽg̃ ma. Kaxicug̃ oajẽm. Dao ma oikabia jĩjã ma wakokoreren. 
\v 7 Oꞌat ipiju wekuyap pibun.
\p — G̃ebuje kabi beat oyaꞌĩjojo. Oꞌjekawẽn oweju.
\p — “Saulo,” ioꞌe. “Apẽnpuye warẽmtag̃ ma ẽn okug̃?” ioꞌe owebe.
\p
\v 8 — “Abu ẽn tak, Kariwa?” i oce cebe.
\p — “Jesus õn,” ioꞌe. “Nazaré ka be tũibit õn. Ẽn ma ipiat esupiꞌajojoat owebe,” ioꞌe.
\m
\v 9 Oweju oekukuiayũ oꞌjekuy jĩjã. Kabiaat oꞌjojojo ip. Oweju kawẽnwẽnat aꞌõ bit oꞌjojojo g̃u ip. 
\p
\v 10 — “Apẽntak oce, Kariwa?” i oce.
\p — “Eꞌãy,” ioꞌe. “Damasco ka be juy eju,” ioꞌe. “Ibo ka be ag̃okatkat apẽn Deus ibikuy ewebe eku am iap g̃uwẽn ewebe,” ioꞌe — Paulo oꞌe.
\p
\v 11 — G̃ebuje wekabiokok ojekuku ixe kabiaat iepokat wetabimuꞌũmꞌũm puye. Owejuayũ obacom okug̃. Imẽn ocajẽm Damasco ka be — ioꞌe.
\p
\v 12 Ibo ka be bima, ag̃okatkat oajẽm okay. Ibutet Ananias i osunuy. Moisés ekawẽn tag̃ jekukuꞌukat osunuy. Xipat cĩcã osunuy soat Damasco ka watwat xe- -Judeuyũ xe. 
\v 13 Oꞌjekawẽn oweju.
\p — “Obure Saulo, ececoan waram,” i adi oꞌe owebe. 
\p — G̃ebujeꞌisum ma ocecoan. Oceak cekay — ioꞌe Paulo. — Waram wetate buje Ananias oꞌjekawẽn oweju. 
\p
\v 14 — “Saulo,” ioꞌe. “Kuyje Deus enaẽ,” i adi oꞌe Ananias. “Ocedobuyũꞌũmꞌũm itabut osodop ip ixe kay. Ixe juk enaẽ ixe bikuyam etaybit am. Ixe juk enaẽ ewebe ixe buywatwatꞌukat co am- -cũg̃ cĩcãat co am. Ixe juk enaẽ ibuywatwatꞌukat pe emukũyjo am,” i adi oꞌe owebe. 
\v 15 “Ixe ekawẽn muwẽnuwẽnꞌukan cuy eg̃uy,” i adi oꞌe. “Apẽn ejojojoiap cuy eg̃uwẽnuwẽn, apẽn eyaꞌĩjojoiap tak,” i adi oꞌe Ananias owebe — ioꞌe Paulo.
\p
\v 16 — “Ajo wiwim tak ẽn? Eꞌãy!” i adi oꞌe owebe. “Ecewemubatisaan cuy!” i adi oꞌe. “ ‘Ikẽrẽat cuy ejuꞌuk owebewi,’ i juy ece wuykukukat pe,” i adi oꞌe. “Imẽn eꞌe buje, Deus ikẽrẽat juꞌuk ewebewi,” i adi oꞌe owebe. 
\m Imẽn Ananias oꞌjekawẽn owebe — Paulo oꞌe.
\p
\v 17 — Jerusalém ka kay juk ocepit — ioꞌe. — Deus eju kawẽnwẽnapꞌa be oju jekawẽn ãm Deus eju. 
\v 18 Deus ekawẽn kay g̃ebum pima wuykukukat ojojojo wexey joꞌiat pe — Paulo oꞌe.
\p — G̃ebuje wuykukukat oꞌjekawẽn oweju.
\p — “Daosuw!” i adi oꞌe owebe. “Ejẽm cuy Jerusalém ka bewi. Ijopka beayũ itabut g̃u jeꞌe ip ekawẽn kay cedag̃ maꞌg̃u ẽn omuwẽnuwẽn,” i adi oꞌe owebe wexey joꞌiat pe.
\p
\v 19 — “Kaꞌũma, Kariwa,” i adi oce. “Wekawẽn kay itabut jeꞌe ip,” i adi oce. “Soat ip itaybit apẽn cuk adi ojekuku iam,” i adi oce cebe. “Itaybit ip apẽn soat kaka dag̃ ojekuku iam, apẽn Judeuyũ eꞌaweroroapꞌa be juk adi oõmõm itabucayũ bu ojuy iam tak, apẽn taomũnmũn ip cuk adi otujupitpit ijop ka be iam tak, apẽn cuk adi ip oyaokaka iam tak, apẽn cuk adi daomũnmũnapꞌa be ip og̃uõmõm iam tak,” i adi oce cebe. 
\v 20 “Estêvão aokam pima, õn tak cuk ojojojo ip- -ekawẽn muwẽnuwẽnꞌukat aokam pima,” i adi oce cebe. “Tũybe xipat yaoka am iãn mo oce. Estêvãoꞌũm oꞌyaokaꞌiayũ eekabek kug̃ og̃uy,” i adi oce. “G̃asũ bit wag̃uyisun ma õn jekukum. Soat ijoceayũ itaybit iboam. Imẽnpuye wekawẽn kay jeꞌe ip,” i adi oce wuykukukat pe.
\p
\v 21 — “Kaꞌũma,” i adi oꞌe. “Ejẽm cuy ijocewi,” ioꞌe. “Ewebe omuwẽn puje, itabut g̃u jeꞌe ip ekawẽn kay,” i adi oꞌe. “Õn ma wũy ma jemuju. Judeuꞌũmayũ kay õn jemuju,” i adi wuykukukat oꞌe owebe — Paulo oꞌe adeayũ be.
\p
\v 22 Paulo ekawẽn cocom cĩcã ip osodop. “Judeuꞌũmayũ kay õn jemuju” iꞌe buje bit, oibuꞌun ip yaꞌĩjo am. Oꞌjewãwã ip yaꞌõberen.
\p — Epeyaoka juy! — ioꞌe ip yaꞌõberen. — Epeyaoka juy! — ioꞌe ip. — Epejoxik akikay — ioꞌe ip.
\p
\v 23 Yaꞌõberen jewãwãwã ip oꞌe. Jesay wẽg̃wẽg̃ãn ip jetakoma jĩjã buye. Kaꞌwi oꞌjoxikxik ip jetakomaap pibun. 
\v 24 1000 be sorarayũ kukukat tak Paulo oꞌg̃uõmat sorarayũ dopdopapꞌa be- -yabog̃atꞌa be. Itaybin pin oꞌe apẽnpuye adeayũ yaꞌõberen oꞌjewãwã iam. Imẽnpuye oꞌjekawẽn sorarayũ be.
\p — Epeg̃upokupok cuy ixee mug̃ẽg̃ẽbum — ioꞌe. — G̃uwẽn paxi jekpiwacap jemupikupikap? Apẽnpuye oꞌjewãwã ip yaꞌõberen cekay iap g̃uwẽn paxi? — ioꞌe sorarayũ be.
\p
\v 25 Sorarayũ Paulo oꞌsubõg̃bimukirik imupokupok am.
\p G̃ebuje Paulo oꞌjekawẽn 100 be sorarayũ kukukat eju.
\p — César ebekit õn- -Roma ka kukukat ebekit õn — ioꞌe. — Cedag̃ tu eywebe César ebekit mupokupok am? — ioꞌe. — Eyju odujowat g̃u buk ibimãmãmãꞌukat ekawẽn cocoꞌukayũ dopabe — ioꞌe. — Eyetaybit g̃u ma buk õn ma xeꞌe okpiwat iam, pãm g̃uto kaꞌũma iam — ioꞌe.
\p
\v 26 Imẽneju 100 be sorarayũ kukukat oꞌjekawẽn 1000 be sorarayũ kukukat eju. Apẽn Paulo oꞌe cebe iap ekawẽn oꞌg̃uwẽn cebe.
\p — Apẽntak ẽn em cebe? — ioꞌe. — Ixe ag̃okatkat César ebekit — ioꞌe.
\p
\v 27 1000 be sorarayũ kukukat oajẽm Paulo kay.
\p — Cẽm tu ẽn César ebekit? — ioꞌe Paulo be.
\p — Hm hm — ioꞌe.
\p
\v 28 — Õn tak cebekit ma — ioꞌe. — Ade wedinheiro og̃uꞌũm cebekin em pima — ioꞌe.
\p — Õn pit cebekit okapap ma — Paulo oꞌe.
\p
\v 29 Dao ma oꞌjewede ip cexewi sorarayũ- -Paulo mupokupok ojuyayũ. 1000 be sorarayũ kukukat tak yag̃uybabiꞌũm oꞌe. Yag̃uybabiꞌũm oꞌe Paulo César ebekit iam itaybit puye, oꞌsubõg̃bimukirikat puye dak. Soat ip oibuꞌun Paulo kaykay am.
\p
\v 30 1000 be sorarayũ kukukat itaybin pin oꞌe apẽnpuye Judeuyũ Paulo oꞌjomuymuy iam. Paulo bõg̃bikirikpu oꞌsubumuwekap kuyaje. Judeuyũ yaꞌõbuyxiayũ oꞌtomuwã jeꞌawero am. Paĩyũ kukukayũ dak oꞌtomuwã ibimãmãmãat ekawẽn cocoꞌukayũ dak. Soat ip oꞌjeꞌawero. 1000 be sorarayũ kukat Paulo oꞌtujowat aweromayũ dopabe- -jewawẽwẽꞌukayũ yobog̃ayũ dopabe.
\b
\c 23
\p
\v 1 Paulo oꞌjeak jewawẽwẽꞌukayũ yobog̃ayũ kay.
— Oburereyũ — ioꞌe. — Apẽn cedag̃ ma oxe iap tag̃ cuk adi ojekuku. Cedag̃ ma g̃asũ dak õn jekukum Deus etabutpe — ioꞌe.
\p
\v 2 Iboap co buje paĩyũ kukukat oitakomãn Paulo kay. Paĩyũ kukukat putet Ananias i osunuy. Tũybe Paulo Deus muymuy iãn oꞌe.
\p — Esubioka juy — ioꞌe Paulo xeayũ be. 
\v 3 — Deus cuy ipiat supiꞌajoat ewebe ma — Paulo oꞌe paĩyũ kukukat pe. — Ocemug̃uykukukuꞌukat ẽn! — Paulo oꞌe. — Ẽn xikꞌi ijoce waꞌĩjo am etaybit am wuydobuyũꞌũmꞌũm ekawẽn tag̃ ocece iam pãm g̃uto kaꞌũma iam. Imẽn pit wuydobuyũꞌũmꞌũm ekawẽn tag̃ g̃u juk ẽn tak obiokaat! — ioꞌe Paulo.
\p
\v 4 — Ẽn Deus epaĩyũ kukukat muymuy — cexeat oꞌe Paulo be.
\p
\v 5 — Obadipdipyũ — ioꞌe. — Wetaybit g̃u juk ixe paĩyũ kukukat iam. Wetaybit pima bit imẽn g̃u kajuk oce cebe. Imẽn eꞌem Deus ekawẽn tup:
\mi Eybadipyũ kukukat cuy epejomuymuy g̃u, i.
\m Imẽn Deus ekawẽn tup eꞌem — Paulo oꞌe.
\p
\v 6 Paulo oꞌjeak Fariseuyũ kay. Oꞌjewãwã yaꞌõberen.
\p — Obadipdipyũ — ioꞌe. — Fariseu õn! Webay dak Fariseu osunuy. Wetabut wuyeꞌũ buje waram g̃uto acejetait iap kay. Imẽnpuye eyju waꞌĩjojom g̃asũ eyetaybit am okpiwat paxi iam — ioꞌe cebe ip.
\p Pũg̃pũg̃ jewawẽwẽꞌukayũ yobog̃ayũꞌin Fariseuyũ ip osodop. Wararaꞌacayũ ixeyũꞌin Saduceuyũ ip osodop. Paulo itaybit oꞌe iboam. 
\v 7 Imẽneju oꞌjewãwã yaꞌõberen — Fariseu õn — i. Ade osodop ip jewawẽwẽꞌukayũ yobog̃ayũ. 
\v 8 Fariseuyũ ma eꞌem — Wuyeꞌũ buje waram g̃uto acejetait — i. Itabut ip wuybiõg̃buk kake iap kay, Deus ekawẽn tojotjotꞌukayũ kake iap kay dak. Saduceuyũ bit napa ma eꞌem: — Wuyeꞌũ buje waram acejetait g̃u — i. Itabut g̃u ip wuybiõg̃buk kake iap kay, Deus ekawẽn tojotjotꞌukayũ kake iap kay dak. Paulo itaybit oꞌe pũg̃ tag̃ g̃u ip itabut ip iam. Imẽnpuye — Fariseu õn — ioꞌe cebe ip.
\p
\v 9 Iboap co buje oꞌjewaꞌõxikxik cĩcã ip jeweweju jewawẽwẽꞌukayũ yobog̃ayũ. Waraꞌat tag̃tag̃tag̃ ma oꞌe ip. Big̃ ma ip oꞌjewãwã yaꞌõberen. Fariseuyũ Paulo dayoyom oꞌe- -Moisés ekawẽn imutaybitbitꞌukayũ.
\p — Ite ag̃okatkat ikẽrẽat mujurũg̃rũg̃ g̃u ocexe — ioꞌe ip. — Warẽmtag̃ g̃u juy ajukuk! Ibiõg̃buk xipacat acoꞌi oꞌjekawẽn ceweju. Deus ekawẽn tojotjotꞌukat acoꞌi oꞌjekawẽn ceweju — ioꞌe ip.
\p
\v 10 Jewawẽwẽꞌukayũ yobog̃ayũ oꞌjewaꞌõxikxik cĩcã. Imẽnpuye jewaokaka ojuy ip.
\p — Paulo g̃uwekap acoꞌi teyũku — ioꞌe 1000 be sorarayũ kukukat jewaꞌõxikxikayũ jojom.
\p — Paulo juy epejat — ioꞌe jesorarayũ be. — Epetojot cuy wuydopdopapꞌa be jewaꞌõxikxikꞌukayũ be yaokaap puxim — ioꞌe cebe ip.
\m Yaꞌõ dag̃ oꞌe ip sorarayũ. Oꞌtujowat ip jedopdopapꞌa be. Ig̃oꞌa be osunuy Paulo.
\p
\v 11 Waram pimaat exima be wuykukukat oꞌjebapuk Paulo kay yaꞌõmucan am. Oꞌjekawẽn ceweju.
\p — Paulo, aꞌõcam cuy eg̃uy — wuykukukat oꞌe cebe- -Paulo be. — Apẽn cuk adi Jerusalém ka watwat pe ẽn omuwẽnuwẽn iap puxim Roma ka watwat pe dak omuwẽnuwẽn cuy eg̃uy — Jesus oꞌe Paulo be.
\p
\v 12 Kabia buje Judeuyũꞌin oꞌjeꞌawero jewawẽ ãm apẽn Paulo aceyaoka iam.
\p — G̃aꞌa Paulo ayaoka — ioꞌe ip. — Paulo aokaꞌũm pima juy acejekõn g̃u, acetikõn g̃u dak — ioꞌe ip. — Yaokaꞌũm pima juy Deus ipiat supiꞌajoat wuywebe — ioꞌe ip jewewebe.
\p — G̃aꞌa — ioꞌe ip.
\m
\v 13 Imẽn oꞌjekawẽn ip jewewebe Deus etabutpe. 40 be osodop ip imẽn oꞌeꞌeꞌiayũ ag̃okatkayũ- -Paulo aoka ojuyayũ.
\p
\v 14 Imẽn jewawẽ buje ip oꞌju paĩyũ kukukayũ kay, Judeuyũ kukukayũ kay dak.
\p — Deus etabutpe juk ocejekawẽn — ioꞌe ip. — Pũg̃ tag̃ ma ocag̃uy — ioꞌe ip. — “Paulo aokaꞌũm pima juy acejekõn g̃u, acetikõn g̃u dak,” i juk oce — ioꞌe ip. — Imẽnpuye Paulo juy epetomuwã ocewebe jekawẽn ãm ceweju — ioꞌe ip. 
\v 15 — “Paulo juy eg̃udot ocekay- -jewawẽwẽꞌukayũ yobog̃ayũ kay,” i juy epeꞌe 1000 be sorarayũ kukukat pe — ioꞌe ip. — “Iwiwim oceju waram cekawẽn co am,” i juy epeꞌe cebe — ioꞌe ip. — “Cedag̃ ocewebe waram cekawẽn co am,” juy epeꞌe cebe — ioꞌe ip. — Imẽnpit Paulo jajẽm g̃u jĩjã. E dag̃ iwiwim oceꞌe yaoka am — ioꞌe ip Paulo aoka ojuyayũ paĩyũ kukukayũ be- -40 beayũ oꞌe.
\p
\v 16 Imẽnpit ag̃okatkat iboce osunuy- -yaypanꞌisuat- -Paulo ixĩtꞌit. Apẽn Paulo aoka ojuy ip iam oꞌjekũyjo.
\p G̃ebuje ixe yaypanꞌisuat oꞌju Paulo kay imukũyjo am. Oõm sorarayũ dopdopapꞌa be. Apẽn cuk oꞌyaꞌĩjojoiap oꞌg̃uwẽn Paulo be. 
\v 17 Paulo 100 be sorarayũ kukukat oꞌtomuwã.
\p — Ite yaypanꞌisuat cuy etujowat 1000 be sorarayũ kukukat kay, yawẽg̃ muwẽn pin cebe — ioꞌe 100 be sorarayũ kukukat pe.
\m
\v 18 Yaypanꞌisuat oꞌtujowat.
\p — Taomũnmũnat Paulo juk onomuwã ite yaypanꞌisuat tojon ekay — ioꞌe. — Yawẽg̃ muwẽn pin ewebe — ioꞌe 1000 be sorarayũ kukukat pe- -Cláudio Lísias pe.
\p
\v 19 Cláudio Lísias yaypanꞌisuat pu oꞌsubuixik. Iba com oꞌtujowat jeweju. Oꞌtujowat waraꞌacat xewi ixeyũ be yaꞌĩjoap puxim.
\p — Ajo-muwẽn pin ẽn owebe? — ioꞌe.
\p
\v 20 — Judeuyũ oꞌjewawẽ — ioꞌe. — Kuyaje jeꞌe ewebe ip: “Paulo juy eg̃udot ocekay,” i — ioꞌe. — “Kuyaje juy eg̃udot ocewebe waram cekawẽn co am,” i jeꞌe ip ewebe — ioꞌe. 
\v 21 — Imẽnpit emug̃uykuku ojuy ip. Etabun g̃u juy eg̃uy apẽn jeꞌe ip ewebe iap kay — ioꞌe. — 40 ag̃okatkayũ ebitako be Paulo kapap wiwim. “Paulo aokaꞌũm pima juy acejekõn g̃u, acetikõn g̃u dak,” i juk oꞌe ip jewewebe — ioꞌe. — “Paulo aokaꞌũm pima wuyekõn puje, Deus cuy ipiat supiꞌajoat wuywebe,” i juk oꞌe ip jewewebe — ioꞌe. — G̃asũ ma edeap wiwim ip — yaypanꞌisuat oꞌe Cláudio Lísias pe.
\p
\v 22 — Owebe eg̃uwẽn iap cuy eg̃uwẽn g̃u waraꞌacat pe — ioꞌe yaypanꞌisuat pe.
\p Yaypanꞌisuat oꞌg̃uypit tukꞌa be.
\p
\v 23 G̃ebuje Cláudio Lísias xepxep 100 be sorarayũ kukukayũ oꞌtomuwã.
\p — 200 sorarayũ juy epeg̃uxipanat iju am Cesaréia ka kay — ioꞌe cebe. — Iximadakpe juy epeju — ioꞌe. — 70 cavalo akpi jejeayũ juy jeꞌju. 200 wararaꞌacayũ dak jeꞌju sorarayũ- -obukakaꞌuk coꞌiat kukayũ. 
\v 24 Cavalo dak epeg̃uxipan Paulo beam. Xipan cuy Paulo epetujowat Félix dopabe- -wuyecug̃ap dopabe — ioꞌe 100 be sorarayũ kukukayũ be.
\p
\v 25 G̃ebuje cartadup oꞌtupmubararak tupmuju am Félix mukũyjoaptum. Imẽn eꞌem ibo dup:
\p
\v 26 Félix, ocecug̃ap ẽn, i. Obutet Cláudio Lísias, i. Aꞌõbuyxiat oxe, i. Kato mujujum õn ewebe ijudup pe, i. 
\v 27 Taomũnmũn ag̃okatkat mujujum õn ewebe, i. Judeuyũ ixe oꞌjat, i. Yaoka ojuy ip, i. Ixe César ebekit iam omutaybin puje wesorarayũ eju oju cekay, i. Otujupaꞌum yaoka ojuyꞌiayũ xewi, i. 
\v 28 Wetaybin pin og̃uy apẽntak ite ikẽrẽãn oꞌe cebe ip iam, i. Imẽnpuye ixe otujowat Judeuyũ kukukayũ dopabe- -jewawẽwẽꞌukayũ yobog̃ayũ dopabe, i. 
\v 29 “Ite ag̃okatkat wuydobuyũꞌũmꞌũm ekawẽn tag̃ g̃u jekukum,” i juk oꞌe ip owebe, i. Imẽnpit wuyeipi kukukat oꞌjomuymuy g̃u. Cedag̃ g̃u wuywebe imuõm ãm daomũnmũnapꞌa be, yaoka am tak, i. 
\v 30 Ibocewi ip omukũyjo Judeuyũ Paulo aoka ojuy iam, i. Imẽnpuye ekay õn Paulo mujujum, i. “Félix kay juy epeju Paulo awẽg̃ mukẽrẽrẽn ãm,” i juk oce yawẽg̃ mukẽrẽrẽn ojuyayũ be, i. Bayꞌa, ewãtaxipipem g̃u juy eg̃uy, i.
Imẽn oꞌtupmubararak. Oꞌtupũm sorarayũ be tup tujowat am Félix pe.
\p
\v 31 G̃ebuje sorarayũ Paulo oꞌtujowat Cesaréia ka be. Oꞌtujowat ip apẽn 1000 be sorarayũ kukukat oꞌe cebe ip iap tag̃. Oꞌju ip cavalo akpi jeje. Ixima be ip oꞌju. Ixima bun oeku ip cũg̃cũg̃. Kuyaje dak cũg̃cũg̃ ma. Jay. Oajẽm ip Antipátride ka be. 
\v 32 Ibocewi sorarayũ oꞌjepit Jerusalém ka kay- -cavalo akpi jejeꞌũmayũ.
\p Ibocewi cavalo akpi jejeayũ Paulo oꞌtujowat kabia buje. 
\v 33 Jay. Oajẽm ip Cesaréia ka be. Iecug̃ap tukꞌa kay oꞌju ip- -Félix dukꞌa kay. Oꞌtupũm ip Félix pe- -Cláudio Lísias emudupmubararaktup. Paulo dak oꞌg̃ũm cebe. 
\v 34 Félix oꞌtupcoco.
\p Tupco buje Félix oꞌjekawẽn Paulo eju.
\p — Ajo-eipi wat ẽn? — ioꞌe.
\p — Cilícia eipi wat õn — ioꞌe.
\p
\v 35 — Awẽg̃mukẽrẽrẽnayũ ajẽm puje jenomuwã õn aꞌĩjo am — ioꞌe Paulo be.
\p — Paulo epeg̃uõm Herodes tũyapꞌa be- -ika kukukat tũyapꞌa be- -yabog̃atꞌa be — Félix oꞌe jesorarayũ be.
\m Oꞌtujuõm ip.
\b
\c 24
\p
\v 1 Judeuyũ Paulo awẽg̃ oꞌyawẽg̃mukẽrẽrẽn Félix pe. 5 xet kap puje paĩyũ kukukat oajẽm iecug̃ap kay- -Félix kay. Cesaréia ka be oajẽm. Ibutet Ananias i osunuy. Xepxep Judeuyũ kukukayũ dak oajẽm ceweju. Ibimãmãat aꞌõbuywatwatꞌukat tak oajẽm ceweju ip. Ibutet Tértulo i osunuy. Oajẽm ip cekay. Paulo awẽg̃mukẽrẽrẽn ãm ip oajẽm. 
\v 2 Félix Paulo oꞌtojocat.
\p Paulo ajẽm puje Tértulo Paulo awẽg̃ oꞌyawẽg̃mukẽrẽrẽrẽn Félix pe.
\p — Félix — ioꞌe. — Ocecug̃ap ẽn. Aꞌõbuyxi jĩjã ẽn — ioꞌe. — Soat em ẽn xipacan eꞌem ocewebeam. Etaybit cĩcã wuyeipi kukan. Imẽnpuye ocecokcok cĩcã ekay. Ade kabia kaꞌũmg̃u nopag̃o soat wuyeipi dag̃ ẽn xipan ocekug̃ puye. Ẽn idipan eꞌem ocewebeam.
\v 3 Aꞌõbuyxi jĩjã ẽn ocexe. Ocecokcok ẽn soan eꞌem ocewebeam puye. 
\v 4 Imẽnpit ibun g̃u ocekawẽn eweju. Imẽnpuye eyaꞌõpicũg̃ cĩcã buk — ioꞌe.
\p
\v 5 — Ocetaybit soat em ite ag̃okatkat ocebadipyũ kaykayxi iam. Ite ag̃okatkat soat kaka dag̃ jekukum- -jewaoka ojuyap mubapukpug̃. Iwarum ma Judeuyũ mutaybitbin. Ite Nazaré ka be tũibit kay itabucayũ kukukat- -Jesus kay itabucayũ kukukat — ioꞌe.
\p
\v 6 — Deus eju kawẽnwẽnapꞌa mubuyxiꞌũm ojuy- -yabog̃atꞌa mubuyxiꞌũm ojuy — ioꞌe napa ma. — Judeuꞌũmat tujowat ojuy ig̃oꞌa be — ioꞌe napa ma. — Imẽnpuye ocejat — ioꞌe. — Oceyaꞌĩjo kajuk ocetaybit am ocedobuyũꞌũmꞌũm ekawẽn tag̃ yukpiwat paxi iam, pãm g̃uto kaꞌũma ma iam — ioꞌe.
\p
\v 7 — 1000 be sorarayũ kukukat pit oajẽm Paulo kay. Cláudio Lísias oajẽm — ioꞌe. — Puyxibut g̃u oꞌtujupaꞌum ocexewi — ioꞌe. — “Félix kay juy epeju yawẽg̃ mukẽrẽrẽn ãm,” ioꞌe Cláudio Lísias ocewebe. Imẽnpuye ocajẽm ekay — ioꞌe Tértulo.
\p
\v 8 — Ẽn tak cuy ecekawẽn Paulo eju — ioꞌe Félix pe. — Etaybit eceꞌe cedag̃ ma oceju Paulo awẽg̃ mukẽrẽrẽrẽn iam — Tértulo oꞌe Félix pe.
\p
\v 9 — Tértulo icẽmãn eꞌem ewebe — soat wararaꞌacayũ Judeuyũ dak oꞌe napa ma Félix pe.
\m Soat ma ip imẽn oꞌe.
\p
\v 10 Félix oꞌjepacũg̃ Paulo kay ẽn pukto ecede iape. Paulo oꞌjewedayo Félix pe.
\p — Ocokcok cĩcã wewedayo am ewebe, ade koato ẽn ocekawẽn cocoꞌukat puye- -Judeuyũ ekawẽn cocoꞌukat puye ibimãmãat ekawẽn cocoꞌukat puye — ioꞌe.
\p
\v 11 — Kuy jĩjã g̃u oajẽm Jerusalém ka kay- -doze kabia bima ma — ioꞌe. — Wajẽm “Ẽn xipat cĩcã oxe” iꞌe am Deus pe. Ẽn tak etaybit icẽmãn õn eꞌem iam. 
\v 12 Abu-aꞌõxikxig̃ aꞌg̃u og̃uy? Kaꞌũma ma! Kaꞌũma kaykay maꞌg̃u og̃uy Deus eju kawẽnwẽnapꞌa be, Judeuyũ eꞌaweroroapꞌa be — ioꞌe. — Ag̃oka dag̃ tak kaꞌũma kaykay maꞌg̃u og̃uy — ioꞌe. 
\v 13 — Imẽneju waꞌõmukorẽnrẽnap mubapuk paꞌore cebe ip wukpiwat g̃u buye — ioꞌe.
\p
\v 14 — Icẽmãn õn eꞌem ewebe — ioꞌe. — Wetabut Deus kay. Ixe kay dak ocedobuyũꞌũmꞌũm itabut osodop. Wetabut cekay apẽn g̃asũ oꞌeꞌe wuywebe iap tag̃. Judeuyũ g̃axĩat ekawẽn kay g̃u ip g̃ebum. Kuyjeap ekawẽn kay ma ip g̃ebum. G̃axĩat ekawẽn cedag̃ g̃u cexe ip. Wetabut Deus ekawẽn muwẽnuwẽnꞌukayũ emudupmubararaktup peat ekawẽn kay. Wetabut soat Moisés pe wuyawẽwẽap ekawẽn kay dak. 
\v 15 Wetabut wuyeꞌũ buje waram g̃uto acejetait- -xipacat mujurũg̃rũg̃ꞌukayũ, ikẽrẽat mujurũg̃rũg̃ꞌukayũ dak iap kay. Obuxim iteyũ Judeuyũ dak itabut iboap kay — ioꞌe.
\p
\v 16 — Apẽn cedag̃ oxe iap tag̃ õn jekukum. Soan õn eꞌem ikẽrẽat kukap puxim Deus xe, ijodiacat xe dak. Deus itaybit wekuam, ijodiacat tak — ioꞌe.
\p
\v 17 — Ade koato wũyat eipi dag̃ ojekukuku. G̃ebuje ocepit oka kay. Kuyꞌũmꞌũm ma ocepit. Dinheiro ũm ãm tadaybotbocayũ be ocepit- -Jerusalém ka watwat pe. Kuy bima Jesus kay itabucayũ ixe dinheiro oꞌg̃ũm owebe iũm ãm cebe ip. Obubutꞌin kuka õn tak og̃ũm Deus pe — ioꞌe.
\p
\v 18 — G̃ebuje xepxep Judeuyũ odobuxik Deus eju kawẽnwẽnapꞌa be- -yabog̃atꞌa be. Ásia eipi bewiayũ odobuxik. Ocebabi dag̃ jewemuisusun og̃uy Deus xe. Adeayũ eju g̃u ip odobuxik. Ig̃oꞌa beayũ kaykay g̃u ip odobuxik. Deus eju kawẽnwẽnapꞌa be ip odobuxik Deus pe wedinheiro ũmũm pima. 
\v 19-20 Odobuxikayũ oajẽm g̃u ijoce. Wawẽg̃ mukẽrẽrẽn pin pima juy jajẽm ip ijoce wawẽg̃ mukẽrẽrẽ ãm ewebe — ioꞌe. — Ajo og̃ug̃ẽ ikẽrẽãn cexe ip jewawẽwẽꞌukayũ yobog̃ayũ dopabe bima? — ioꞌe Félix pe.
\p — Jajẽm cuy ip ijoce iboap muwẽn ãm ewebe. 
\v 21 “G̃asũ eyju waꞌĩjojom wuyeꞌũ buje waram g̃uto acejetait iap kay wetabut puye,” i õn pit mo oce cebe ip yaꞌõberen. Iboap xeꞌe cedag̃ g̃u exe? — ioꞌe Félix pe. — Wuyeꞌũ buje waram acejetait iap kay wetabut. Imẽnpuye Judeuyũ wawẽg̃ mukẽrẽrẽrẽm ojuy — Paulo oꞌe.
Imẽn Paulo oꞌjewedayo Félix pe.
\p
\v 22 Félix itaybit cĩcã kuy apẽn Jesus aꞌõkayayũ itabut iam. Waram Paulo jo ojuy oꞌe. Waraꞌat kabia oꞌg̃uweg̃ũn waram Paulo aꞌĩjo am.
\p — 1000 be sorarayũ kukukat ajẽm puje juy waram aꞌĩjom oce- -Cláudio Lísias ajẽm puje — ioꞌe Paulo be.
\p
\v 23 — Xipan teku ejukuk — ioꞌe 100 be sorarayũ kukukat pe. — Xipan cuy ejowiwi ukꞌa be — ioꞌe. — Ibureyũ juy tot pi g̃u ijo am. Cemukaypinput cuy tojot pi g̃u cebe — ioꞌe 100 be sorarayũ kukukat pe.
\p
\v 24 Pũg̃pũg̃ xet kap puje Félix oajẽm jetayxi eju. Itayxi butet Drusila i osunuy. Itayxi Judeu osunuy. Ixe dak Paulo oꞌtojocat. Jekũyjo pin oꞌe apẽn wuyetabut Jesus Cristo kay iam. Paulo oꞌjekawẽn ceweju ip.
\p
\v 25 — “Xipan cuy epeku wetabutpe,” iꞌeꞌem Deus wuywebe — ioꞌe Paulo. — “Jewawẽwẽm cuy epesop ikẽrẽat mujurũg̃ap puxim,” iꞌeꞌem — ioꞌe. — Soat acejebapuk Deus xe — ioꞌe. — Ixe kabia be abuyũ ikẽrẽat kug̃ jexe iap g̃uwẽn, abuyũ ikẽrẽat kug̃ g̃u iap tak — Paulo oꞌe cebe ip.
\m Félix tak iparara oꞌe ikẽrẽat mujurũg̃rũg̃ꞌuk osunuy buye.
\p — G̃asũ bit cuy ejẽm oxewi — ioꞌe Paulo be. — Obaꞌorereꞌũm pima waram õn jedojocat — ioꞌe.
\p Ibocewi Félix Paulo oꞌg̃ujuat g̃u jeju pinap tag̃ iju am. Ade kaxi sorarayũ Paulo wiwim osodop. 
\v 26 Tũybe Paulo dinheiro jeꞌg̃ũm owebe jemujẽmapteim iãn oꞌe Félix. Imẽnpuye ade em Paulo oꞌtojotjocat jekay. Ade em oꞌjekawẽnwẽn ceweju. 
\v 27 Imẽn osunuy xepxep koato. Pórcio Félix jebureyũm Judeuyũ muwexat ojuy. Imẽnpuye Paulo oꞌjepere daomũnmũnapꞌa be jejẽm puje.
\p Waraꞌat ag̃okatkat oajẽm Cesaréia ka kay Félix dieg̃. Ibutet Pórcio Festo i osunuy. Judéia eipi kukukan oꞌe Félix dieg̃.
\b
\c 25
\p
\v 1 Ebapũg̃ xet kap puje Festo oꞌjẽm Cesaréia ka bewi. Jerusalém ka be oꞌju Judeuyũ kay. 
\v 2 Oꞌjekawẽn paĩyũ kukukayũ eju, Judeuyũ kukukayũ eju dak. Ixeyũ waram Paulo oꞌjomuymuy cebe- -Festo be.
\p
\v 3 — Paulo juy eg̃udot ijoce Jerusalém ka be — ioꞌe ip cebe. — Eg̃udot cuy ocewebe waram yaꞌĩjo am — ioꞌe ip.
Paulo aoka am ip oꞌjewawẽ. E dag̃ iju buje yaoka ojuy ip. Imẽnpit Festo oꞌjede cebe ip.
\p
\v 4 — Paulo taomũnmũn Cesaréia ka be — ioꞌe. — G̃axĩn ma ocepit iboce — ioꞌe. 
\v 5 — Eyꞌin pit cuy jeꞌju oweju- -iju pinayũ- -eykukukayũꞌin — ioꞌe. — Paulo ikẽrẽat oꞌg̃ujurũg̃ pima, iboam cuy ip omukũyjo Cesaréia ka be — ioꞌe.
\p
\v 6 Xet. Xet. Xet. Xet. Xet. Xet. Xet. Xet. Xet. Xet. Dez kabia Jerusalém ka be osunuy.
\p G̃ebuje Festo oꞌjepit Cesaréia ka kay. Pũg̃pũg̃ Judeuyũ kukukayũ oꞌju ceweju. Jay. Oajẽm ip Cesaréia ka be.
\p Kuyaje Festo Paulo oꞌtojocat. Oꞌju ibimãmãat ekawẽn cocoapꞌa be. Oabik ipi kukukat abikbikap pe. Judeuyũ kukukayũ oꞌjeꞌawero cexe- -Jerusalém ka bewi oajẽmꞌiayũ.
\p
\v 7 Yajẽm puje Paulo awẽg̃ oꞌyawẽg̃mukẽrẽrẽn ip Jerusalém ka bewiayũ.
\p — Paulo ikẽrẽ jĩjããn oꞌe — ioꞌe ip napa ma. — Soat em ikẽrẽat mujurũg̃rũg̃ꞌuk osunuy — ioꞌe ip napa ma.
Imẽnpit icẽmãn oceju eꞌem iap mubapuk paꞌore oꞌe cebe ip.
\p
\v 8 G̃ebuje Paulo oꞌjewedayo.
\p — Ikẽrẽãn oce g̃u — ioꞌe. — Deus pe Judeuyũ awẽwẽap ekawẽn tag̃ acã õn jekukum. Deus eju kawẽnwẽnapꞌa ojomuymuy g̃u. Wuyeipi kukukat César dak ojomuymuy g̃u — ioꞌe Paulo.
\p
\v 9 Festo bit Judeuyũ mucokcog̃ ojuy. Imẽnpuye:
\p — Jerusalém ka be du eju pin? — ioꞌe. — Jerusalém ka be du ixeyũ be awẽg̃ mukẽrẽrẽnap co pin oxe? — ioꞌe Paulo be.
\p
\v 10 — Ap! — ioꞌe. — Odaobuꞌu. Cũg̃ꞌi oce g̃asũ eyxe- -César beam kapikpikꞌukayũ xe- -Roma ka kukat ebekitkiyũ xe — ioꞌe. — Jerusalém ka be g̃u juy wawẽg̃ mukẽrẽrẽnayũ epeyaꞌĩjo- -ijoce acã — ioꞌe. — Ajom g̃u ikẽrẽãn oce Judeuyũ be? Kaꞌũma ma! Eyetaybit iboam. 
\v 11 Pũg̃ em ma ikẽrẽat og̃ug̃ẽ ibima acã kuka epeꞌe waokam. Eyxe cedag̃ waokam ip ibima, “Omujẽm cuy ece,” iꞌũmg̃u kuka oce. Iteyũ be wawẽg̃ mukẽrẽrẽnap icẽmꞌũm pima bit, cedag̃ g̃u waram oũm ãm cebe ip. César kay bit oju pin ixe be wawẽg̃ mukẽrẽrẽnayũ aꞌĩjo am. Soat eipi kukukat kay bit oju pin — Paulo oꞌe Festo be.
\p
\v 12 Oꞌjekawẽn jeweweju jewawẽwẽꞌukayũ eju Festo. Oꞌjekawẽn Paulo eju.
\p — “César kay bit oju pin ixe be wawẽg̃ mukẽrẽrẽnayũ aꞌĩjo am,” i ẽn eꞌem owebe. Imẽnpuye César kay õn jemuju — ioꞌe Festo.
\p
\v 13-14 Ibunꞌũm pima waraꞌat eipi kukukat oajẽm Cesaréia ka be. Ibutet Agripa i osunuy. Jetayxi eju oajẽm. Itayxi butet Berenice i osunuy. Oajẽm ip Festo jom. Ade kabia osodop ip iboce.
\p G̃ebuje Festo Paulo oꞌg̃uwẽn Agripa be.
\p — Félix ag̃okatkat taomũnmũn oꞌjepere ijoce- -Paulo i ibutet — ioꞌe. — Oꞌjepere iecug̃am oõm puje — ioꞌe.
\p
\v 15 — Õn Jerusalém ka be bima paĩyũ kukukayũ Paulo oꞌg̃uwẽn owebe Judeuyũ kukukayũ dak. Paulo kay g̃u jĩjã ip. “Teku ikẽrẽ jĩjãat oꞌg̃ujurũg̃rũg̃ ocewebe,” i adi oꞌe ip owebe napa ma. “Paulo cuy eyaokaat,” i adi oꞌe ip owebe — ioꞌe. 
\v 16 — Õn cuk oce cebe ip “Cedag̃ g̃u wuywebe imẽn e am Roma ka be,” i, “Waraꞌacat awẽg̃ mukẽrẽrẽn puje, ikẽrẽat oꞌg̃ujurũg̃ꞌiat ekawẽn cocom wuyju,” i. “Cekawẽn cocom wuyju ixe ag̃okatkat etabutpe, yawẽg̃mukẽrẽrẽnayũ etabutpe dak,” i adi oce cebe ip. “Soat ip jekawẽnwẽn jeweweju bima, cekawẽn cocom wuyju,” i adi oce cebe ip. “Yawẽg̃mukẽrẽrẽnꞌibit jewedayo but,” i adi oce cebe ip — ioꞌe Festo.
\p
\v 17 G̃ebuje Judeuyũ oajẽm ijoce okay. Obuꞌu g̃u og̃uy yaꞌĩjo am ip — ioꞌe. — Kuyaje oju ibimãmãat ekawẽn cocoapꞌa be. Paulo otojocat — ioꞌe.
\p
\v 18 G̃ebuje Paulo awẽg̃ oꞌyawẽg̃mukẽrẽrẽn ip. Tũybe “Paulo ikẽrẽat oꞌg̃ujurũg̃ César be,” i jeꞌe ip owebe iãn oce. 
\v 19 Imẽnpit “Ocedobuyũꞌũmꞌũm ekawẽn tag̃ g̃u Paulo jekukum,” adi oꞌe ip owebe — ioꞌe.
\p — G̃ebuje Jesus oꞌg̃uwẽn ip owebe — ioꞌe. — “Jesusꞌũm oeꞌũ,” i adi oꞌe ip owebe — ioꞌe Festo. — “Inaka waram oꞌjetait,” i adi oꞌe ip — ioꞌe. — Judeuyũ Paulo oꞌyawẽg̃mukẽrẽrẽrẽn iboap oꞌg̃uwẽnuwẽn puye. 
\v 20 Imẽneju “Apẽn xeꞌe kuka oce icẽmãn omukũyjo am,” i adi oce owebe ma. Paulo eju adi ocekawẽn. “Jerusalém ka be du eju pin?” i adi oce cebe. “Ibo ka be du awẽg̃mukẽrẽrẽnayũ oyaꞌĩjo?” i adi oce cebe — ioꞌe. — “Ibo ka be du ocejekawẽn eweju icẽmãn wetaybit am?” i adi oce cebe. 
\v 21 — Imẽnpit Paulo adi oꞌe owebe: “Odaobuꞌu. César kay bit oju pin ixe be wawẽg̃ mukẽrẽrẽnayũ aꞌĩjo am,” i. Imẽnpuye õn adi oce sorarayũ be: “Taomũnmũnat cuy epejowiwi ukꞌa be,” i. “G̃uyjom og̃uju César kay yaꞌĩjo am,” i adi oce — Festo oꞌe Agripa be.
\p
\v 22 Agripa oꞌjede Festo be.
\p — Õn tak ixe ag̃okatkat ekawẽn co pin — Agripa oꞌe.
\p — Haꞌa. Kuyaje juy eyaꞌĩjo — Festo oꞌe.
\p
\v 23 Kuyaje Agripa oajẽm ibimãmãat ekawẽn cocoapꞌa kay Berenice eju. Oajẽm ip jedoti dip cĩcãat kug̃- -ipi kukukat toti kug̃. Oajẽm ip 1000 be sorarayũ kukukayũ eju. Wararaꞌacayũ eju dak ip oajẽm- -yaꞌõbuyxiayũ eju- -Cesaréia ka watwat eju. Festo Paulo oꞌtojocat.
\p
\v 24 G̃ebuje Festo oꞌjekawẽn Agripa eju aweromayũ etabutpe.
\p — Agripa — ioꞌe. — Soat ocewejuayũ dak — ioꞌe. — Ak epeꞌe ite ag̃okatkat kay — ioꞌe. — Õn Jerusalém ka be bima ade Judeuyũ oajẽm okay ite ag̃okatkat muymuy am — ioꞌe. — Oajẽm ip ijoce dak imuymuy am. Soat em eꞌem ip: “Ite ag̃okatkat cuy eyaokaat,” i. 
\v 25 Oxe bit kaꞌũma ma ikẽrẽãn oꞌe yaoka am — ioꞌe.
\p — G̃ebuje Paulo adi oꞌe owebe: “César juy wawẽg̃ mukẽrẽrẽnayũ yaꞌĩjo- -wuyeipi kukukat,” i. Imẽnpuye ijuju pin õn César kay. 
\v 26 Imẽnpit apẽn otupmubararak iam wetaybit g̃u César mukũyjoaptum. Wetaybit g̃u apẽn ite oꞌe ikẽrẽãn iam tak — ioꞌe.
\p — Paulo otojocat ewebe, Agripa — ioꞌe. — Cũg̃ꞌi ijoce exe. Ẽn tak aꞌõpicũg̃ cuy eg̃uy yaꞌõ kay. Ewebe cekawẽn co buje, wetaybit oce tupmubararak am César mukũyjoaptum — ioꞌe. 
\v 27 — Apẽnpuye Judeuyũ ixe oꞌjomuymuy iap muwẽn paꞌore owebe. Imẽnpuye cedag̃ g̃u taomũnmũn imuju am César kay. Cedag̃ꞌũm cĩcã oxe — Festo oꞌe cebe ip.
\b
\c 26
\p
\v 1 G̃ebuje Paulo oꞌjewedayo Agripa dopabe. Agripa koam oꞌjekawẽn Paulo be.
\p — Ecewedayo juy — ioꞌe Paulo be.
\m Paulo oꞌjebueuru. Oꞌjewedayo.
\p
\v 2 — Agripa — ioꞌe. — Ocewedayo edopabe — ioꞌe. — Wuyeipi kukukat ẽn — ioꞌe. — Judeuyũ omuymuy jĩjã. Napa ma eꞌem ip. “Ikẽrẽãn cĩcã oꞌeꞌe teku,” i. Ocokcok cĩcã wawẽg̃mukẽrẽrẽnayũ aꞌõmuypit am edopabe 
\v 3 etaybit cĩcã Judeuyũ babim puye, Judeuyũ be jewaꞌõxikxikap ekawẽn tak. Imẽnpuye ekpiceg̃ẽm g̃u juy waꞌĩjo am — ioꞌe.
\p
\v 4-5 Bekin pi ma õn adi ojekuku Fariseuyũ etabucap kug̃ — ioꞌe. — Fariseuyũ jekukum Moisés pe wuyawẽwẽap ekawẽn tag̃ cĩcã ma. Soat Judeuyũ itaybit apẽn ojekuku bekin pi ma iam, okapap ka be bima iam tak, Jerusalém ka be bima iam tak. Imuwẽn pin pima iboap muwẽn put ip ewebe, ade koato itaybit ip iboam puye — ioꞌe.
\p
\v 6 — G̃asũ ẽn waꞌĩjojom ijoce Deus waram ceꞌũꞌũayũ g̃utait iap kay wetabut puye — ioꞌe. — “Waram ceꞌũꞌũayũ og̃utait,” ioꞌe Deus kuyjeayũ be. 
\v 7 Soat Judeuyũ itabut Deus waram ceꞌũꞌũayũ g̃utait iap kay- -doze be tiwatwat — ioꞌe. — Imẽnpuye “Kaꞌũma ma ejoꞌiat xipacat,” iꞌeꞌem ip Deus pe. Imẽn eꞌem ip kabiam, ixima be dak. Agripa, Judeuyũ ma wawẽg̃mukẽrẽrẽn Deus waram ceꞌũꞌũayũ g̃utiat iap kay wetabut puye — ioꞌe. 
\v 8 — Apẽnpuye eyetabut g̃u Deus waram ceꞌũꞌũayũ g̃utait iap kay? — ioꞌe jaꞌĩjojomayũ be.
\p
\v 9 — Kuy bima ikẽrẽm cĩcã Jesus kay itabucayũ ojukukuk. Tũybe xipat cĩcã owebe imẽn ikuk am ip iãn oce- -Nazaré ka be tũibit ebekitkit kuk am. 
\v 10 Xipanꞌũm cĩcã ip ojukukuk Jerusalém ka be bima. Ade itabucayũ og̃uõmõm daomũnmũnapꞌa be. Paĩyũ kukukayũ aꞌõbi ocece iboam. “Ayaoka juy ip,” iꞌeꞌem pima ip, õn tak “Epeyaoka juy,” i oce. Ade em ipiat osupiꞌajojoat cebe ip itabucap epereap ojuy. “Jesus Deus emunaẽ g̃u,” iꞌeꞌe an ip cebe og̃uy. 
\v 11 Imẽn cuk adi ojekuku soat kaka dag̃, soat Judeuyũ eꞌaweroroapꞌa dag̃ tak- -Deus eju kawẽnwẽnapꞌa dag̃. Wetakoma jĩjã juk adi og̃uy cekay ip. Imẽnpuye tobatban ip oju waraꞌat ka kay. Ipiatpiꞌajoan cebe ip oju taomũn ãm tak — ioꞌe.
\p
\v 12 — Imẽnpuye Damasco ka kay oju. Paĩyũ kukukayũ aꞌõbi oju. Ade itabucayũ daomũnap ojuy oju. Apẽn oꞌjebapuk owebe iap cuy og̃uwẽn ewebe, Agripa — Paulo oꞌe.
\p
\v 13 — Kabia yobog̃at ojojojo kaxicug̃. Kabi kadiwi ojojojo. Kabiam cĩcã oꞌe. Kaxie bodi ma isopsep oꞌe. Wakokoreren oꞌe kabia, owejuayũ akokoreren tak. 
\v 14 Oꞌat ipi ju. Owejuayũ dak oꞌat ipi ju — ioꞌe.
\p — G̃ebuje kabi kadiwiat oꞌjekawẽn oweju waꞌõm- -Judeuyũ aꞌõm. “Saulo,” ioꞌe. “Apẽnpuye ẽn ipiatpiꞌajojoan owebe?” ioꞌe. “Imẽn eꞌem pima jumento-buxim ẽn. Jumento jejorojorom jeiwat jemuju am jekpiokakam pima,” kabi kadiwiat adi oꞌe owebe.
\p
\v 15 — “Abu ẽn, Kariwa?” i adi oce cebe.
\p — “Jesus õn,” i adi oꞌe owebe. “Ẽn ipiatpiꞌajojoan owebe,” i adi oꞌe owebe. 
\v 16 “Eꞌãy,” i adi oꞌe owebe. “Cũg̃ꞌi eg̃uy edaocam,” ioꞌe. “Õn ma ocebapuk ekay enaẽ ãm wekawẽn muwẽnuwẽnꞌukan,” i adi oꞌe owebe. “Õn enaẽ ewebe apẽn g̃asũ ejojojo iap muwẽn ãm waraꞌacat pe. Waraꞌat tak og̃ubapuk ewebe g̃uyjom. Iboap tak cuy eg̃uwẽnuwẽn waraꞌacat pe,” i adi oꞌe owebe. “Omuwẽnuwẽnꞌukan eg̃uy adeayũ be. 
\v 17 Õn jekuk Judeuyũ be aokaap puxim, Judeuꞌũmayũ be aokaap puxim tak,” i adi oꞌe owebe. “G̃asũ õn jemuju Judeuꞌũmayũ be. Õn jemuju ewebe cũg̃ ma ixeyũ mutaybit am. 
\v 18 Õn jemuju cebe ip kabiok tag̃ cekuap puxixim ip- -kabia dag̃ ceku am acã ip- -Deus bikuyap tag̃ acã. Õn jemuju Satanás aꞌõ dag̃ cekuap puxixim- -Deus kay itabut am acã ip. Imẽn eꞌe buje Deus ikẽrẽat juꞌuk cebewi ip. Deus pe oꞌtaxijojoꞌiayũ eju jeedop ip okay itabut ip puye,” Jesus adi oꞌe owebe — Paulo oꞌe.
\p
\v 19 — Imẽnpuye, Agripa — ioꞌe. — Apẽn kabi kadiwiat oꞌjekawẽn owebe wexey joꞌiat pe iap tag̃ ojekuku — ioꞌe.
\p
\v 20 — G̃ebuje kawẽn idipat og̃uwẽnuwẽn. Koam og̃uwẽnuwẽn Damasco ka watwat pe. Jerusalém ka watwat pe dak og̃uwẽnuwẽn, Judéia eipi watwat pe dak- -soat pe. Judeuyũ be og̃uwẽnuwẽn, Judeuꞌũmayũ be dak. “Eyg̃uycũg̃cũg̃ cuy epesop ikẽrẽat kug̃ puye,” i adi ocece cebe ip. “Ikẽrẽat mujurũg̃rũg̃ap cuy epeyepere,” i. “Eyetabun cuy epesop Deus kay,” i. “Cedag̃ cuy epekuku wararaꞌacat pe itaybit am kuy ikẽrẽat mujurũg̃rũg̃ap oꞌjepere ip iam,” i adi ocece cebe ip. 
\v 21 Imẽnpuye Judeuyũ obu Deus eju kawẽnwẽnapꞌa be. Waoka ojuy ip oꞌe. Deus pit obuywatwan osunuy — ioꞌe.
\p
\v 22 — Jesus muwẽnuwẽn õn g̃asũ soat pe ijodiacat pe- -yaꞌõbuyxiayũ be, kaꞌũmaayũ be dak. Imuwẽnuwẽn õn cebe ip Deus ekawẽn muwẽnuwẽnꞌukayũ emudupmubararaktup ekawẽn tag̃. Imuwẽnuwẽn õn Moisés ekawẽntup ekawẽn tag̃ tak. Iwarum g̃u imuwẽnuwẽn õn. Cũg̃ ma imuwẽnuwẽn õn. 
\v 23 Imẽn eꞌem kuyatup:
\mi Cristo juy ipiat supiꞌajo wuydaxijojoꞌukan Deus emunaẽ, i. Jeꞌũ juy, i. Ceꞌũ buje juy waram itait jeꞌe, i. Ixe koapat jeꞌe wuyꞌin waram itait, i. Wuyju waram acejetait Cristo oꞌjetait waram puye, i. Iboap icẽmãn, i. Cristo iboap oꞌg̃uwẽn Judeuyũ be, Judeuꞌũmayũ be dak, i.
\m Imẽn eꞌem kuyatup — Paulo oꞌe Festo be.
\p
\v 24 Paulo imẽn jewedayo buje, Festo oꞌjewãwã:
\p — Paulo, adaodao! — ioꞌe napa ma. — Adaodao ẽn tupcocom cĩcã buye — ioꞌe napa ma.
\p
\v 25 — Kaꞌũma! Wadaodao g̃u, Festo — ioꞌe. — Wag̃uysat ma õn. Icẽmãn õn eꞌem ewebe — ioꞌe.
\p
\v 26 G̃ebuje Paulo oꞌjekawẽn ipi kukukat eju- -Agripa eju.
\p — Agripa, waꞌõcam õn jewejom exe — ioꞌe. — Etaybit icẽmãn õn eꞌem iam. Soat og̃uwẽn Festo be iam kuy etaybit. Soat iboap oꞌjebapuk adeayũ etabutpe — ioꞌe. — Ibaꞌarẽm g̃u oꞌjebapuk — ioꞌe. 
\v 27 — Agripa — ioꞌe. — Etabut tu Deus aꞌõbi cekawẽn muwẽnuwẽnꞌukayũ ekawẽn kay? Wetaybit kuy etabut iam — ioꞌe.
\p
\v 28 — Tũybe dao ma Cristo kay og̃utabun iãn purut ẽn — Agripa oꞌe Paulo be.
\p
\v 29 — Xipat kuka oꞌe dao ma etabut am, daoꞌũm pima dak — ioꞌe. — Xipat cĩcã kuka oꞌe soat eyju Cristo kay eyetabut am- -ẽn, soat wekawẽn cocomayũ dak — ioꞌe. — Xipat kuka oꞌe eyju obuxim an. Xipat kuka oꞌe obuxim eyetabut pima. Obamũnmũnap puxim eybamũnmũn pima bit xipat g̃u kuka oꞌe — Paulo oꞌe.
\p
\v 30 Iecug̃ap Agripa oꞌjẽm ibocewi. Festo dak oꞌjẽm, Berenice dak, soat cewejuayũ dak. 
\v 31 Kawẽnwẽn ma oꞌjẽm ip.
\p — Ite ag̃okatkat xipat — ioꞌe ip jewewebe. — Wuyxe bit kaꞌũma ma oꞌe ikẽrẽãn. Cũg̃ g̃u wuyxe taomũn ãm, yaoka am tak — ioꞌe ip.
\p
\v 32 — “César juy wawẽg̃mukẽrẽrẽnayũ yaꞌĩjo,” i juk oꞌeꞌũm pima, kajuk og̃ujẽmat daomũnmũnapꞌa bewi — Agripa oꞌe Festo be.
\b
\c 27
\p
\v 1 Paulo muju ap ojuy ip Roma ka kay Festo, Agripa dak. Kobexixi dag̃ ip oꞌg̃uju Roma ka kay- -Itália eipi beatka kay.
\p G̃ebuje Paulo oꞌg̃ũm ip 100 be sorarayũ kukukat pe, waraꞌacayũ taomũnmũnayũ dak. 100 be sorarayũ kukukat putet Júlio i osunuy. Cesorarayũ ijop eipi kukukat esorarayũ osodop- -César esorarayũ. Õn tak oju Paulo eju.
\p Imẽn oceju Roma ka kay. Aristarco eju oceju- -Macedônia eipi bewiat eju- -Tessalônica ka bewiat eju. 
\v 2 Kobexixi be oceõm. Ixe kobexixi Adramítio ka ebikopap pewiat osunuy. Soat Ásia eipi ebikopap tag̃ cum. Purewuh. Ocejẽm Cesaréia ka bewi. Tibog̃ cĩcãati ocetimudek.
\p
\v 3 Kuyaje ocajẽm Sidom ka be. Jay. Júlio xipan cĩcã Paulo oꞌjukuk. Paulo iju pi g̃u oꞌe jebureyũ jom. Paulo bureyũ iju pi g̃u oꞌe Paulo buywat am.
\p
\v 4 Ibocewi waram oceju. Purewuh. Tibog̃ cĩcãati mudekdeg̃ oceku. Kabido oꞌsubidoajẽm ocedopa bewi. Imẽnpuye tipꞌawerorobog̃ kay oceju wuybaꞌũg̃at kadi. Tipꞌaweroro butet Chipre i osunuy. 
\v 5 Totek. Tibog̃ cĩcãati ocetimudek. Cilícia eipi weg̃ũn ocekap, Panfília eipi weg̃ũn tak. Jay. Mirra ka be ocajẽm Lícia eipi beatka be. Ibo ka be bima ocekap koapat pewi kobexixi bewi. 
\v 6 100 be sorarayũ kukukat waraꞌat oꞌtobuxik kobexixi. Ixe kobexixi Alexandria ka ebikopap pewiat osunuy. Cum Itália eipi kay. Porog̃. Oceõm ixe kobexixi be waram oceju am. 
\v 7 Pũg̃ kabia g̃u daodaodao g̃u oceju. Paꞌorem cĩcã Cnido ebikopap pe ocejemũg̃. Mũg̃.
\p Ooooh. Kabidoxixi oꞌsubidoꞌat ocedopa bewi. Ibaꞌore oꞌe ocewebe oceju pinap tag̃ kabidoxixi ocewap puye. Imẽnpuye oceju tipꞌaweroro tẽg̃ ma. Tipꞌaweroro butet Creta i osunuy.
\p Iboce kabidoxixiꞌũmg̃u oꞌe- -kabidoꞌĩt ma oꞌe. Purewuh. Salmona eipi tẽg̃ ma oceju. 
\v 8 Paꞌorem cĩcã oceju Creta eipi tẽg̃ ma.
\p Ibocewi ocejemũg̃ ebikopap pe- -Creta eipi be. Jay. Ebikopap putet Bons Portos i osunuy. Ikabog̃atka tẽg̃ ma osunuy- -Laséia ka tẽg̃ ma. 
\v 9 Ibun cĩcã ocesop ibo ka be. Judeuyũ epeta kuy oꞌkap Deus xe jemuisusunap epeta. Imẽnpuye oceku pi oceꞌe kobexixi dag̃. Kabidoxixi oeku kabiam, mubaꞌatxiri dak.
\p G̃ebuje Paulo oꞌjekawẽn kobexixi beayũ eju.
\p
\v 10 — Obureyũ — ioꞌe. — Tibog̃ cĩcãati dag̃ wuyju buje ibaꞌore jĩjã kuka oꞌe wuywebe. Wuyju buje bit soat wuybubut kuka oakõm, soat kobexixi beat tak — ioꞌe. — Kobexixi dak kuka oꞌjepirig̃. Wuyju dak kuka ajeꞌũ — ioꞌe.
\p
\v 11 Imẽnpit 100 be sorarayũ kukukat Paulo aꞌõ kay g̃u oꞌe- -kobexixi iwat aꞌõ kay acã, kobexixi mujujuꞌukat aꞌõ kay dak.
\p Kobexixi iwat aꞌõ kay oꞌe kobexixi mujujuꞌukat aꞌõ kay dak. 
\v 12 Ocesopiat ebikopap xipat g̃u osunuy ihi bun ocedop am kabidoxixi buye, mubaꞌatxiri buye dak. Soat wararaꞌacayũ iju pin ibocewi. Waraꞌat ebikopap pe ajẽm ojuy wararaꞌacayũ- -Fenice ka ebikopap pe. Ibo ka dak Creta eipi be osunuy. Kabidoxixi g̃u ajẽmjẽmꞌuk Fenice ebikopap pe- -kaxie tajoreg̃atpido acã. Imẽneju iboce ihi mukap ojuy ip.
\p — Fenice ebikopap pe juy aju — ioꞌe ip. — Kabidoꞌũm puje juy aju — ioꞌe ip.
\p
\v 13 Kaxietajoreg̃atpido oꞌsubidoajẽm- -ibidodipat. Kabido ibidobog̃ g̃u oꞌe- -ibidoꞌĩt ma. Oꞌsubidoajẽm ocenomujuwi. Imẽnpuye oꞌjekawẽn ip jeweweju.
\p — Kabido ibidodip g̃asũ — ioꞌe ip. — G̃aꞌa aju — ioꞌe ip. — Kabido juy wuydujowat wuyjupinap tag̃ — ioꞌe ip.
\p Kobexixi muycũcũap oꞌg̃uyu ip- -ipoxiat, icaat mug̃ẽg̃ẽ. Kabido xipan ocedujowatwan oꞌe. Oceju tiwãbũ etako dag̃- -Creta eipi etako dag̃.
\p
\v 14 G̃uyjomsũm kabidoxixi oꞌsubidoajẽm ocekay. Ooooxxxꞌi. Oꞌsubidoajẽm ocedopa bewi jĩjã. Oꞌsubidoajẽm kapurũg̃ kadiwi- -Creta eipi kadiwi.
\v 15 Oꞌsubidoajẽm kobexixi kay. Ixe kabido butet Nordeste i osunuy. Oꞌsubidoajẽm ocedopa bewi jĩjã. Ibaꞌore oꞌe kobexixi mukorẽrẽn ãm kabidoxixi dopabe. Imẽnpuye ocebuꞌun kobexixi mukorẽrẽn ãm. Kabido kobexixi oꞌtujowat.
\v 16 Oceju waraꞌat tipꞌaweroro biõg̃ kay. Tipꞌaweroro butet Cauda i osunuy. Kabidoxixiꞌũmg̃u oꞌe iboce- -kabidoꞌĩt ma.
\v 17 Kobe yopĩcat kug̃ tak ocesop. Kururug̃ oeku kobexixi nomuju. Paꞌorem kobe yopĩcat oceg̃uyu idibi bewi. Oceg̃uyu kobexixi be.
\p Ibocewi kobexixi be kapikpikꞌukayũ correntebu oꞌsubumukirik kobexixi koreren- -ibubog̃atpu. Oꞌsubumukirik ip kobexixi ewekaap puxim.
\p — Kaꞌoririt ijoce ma opop Líbia eipi — ioꞌe ip. — Pipim kobexixi kakam iboce! — ioꞌe ip.
\m Iparara oꞌe ip kaꞌoririt pe kobexixi kakaap puxim. Imẽnpuye kobexixi mujujuap epag̃o oꞌg̃ukop ip kapurũg̃ kay, kabidoxixi be kobexixi mujuap puxim. Kabidoxixi kobexixi oꞌg̃uju ijuap tag̃. Ocekat. Xet. Ocexet iboce.
\p
\v 18 Kuyaje tarekrek oꞌjoxikxik ip idibi be- -kobexixi be tujowat ojuyap. Oꞌjoxikxik ip kobexixi poxi muꞌũm ãm. Oꞌjoxikxik ip tipodoyat ocemudekudekun cĩcã buye. Ocekat. Xet. Ocexet iboce.
\p
\v 19 Kuyajebusu kobexixi be kapikpikꞌukayũ kobexixi beat oꞌjoxik ipoxiat. Jebum ip oꞌjoxik. Xet. Xet. Xet. Xet.
\p
\v 20 Ade kabia oceju kaxi jojom g̃u, kasopta dak, kabidoxixi buye. Ocewedaxijo baꞌore. 
\v 21 Ade kabia ocejekõnkõn g̃u.
\p G̃ebuje Paulo oꞌjekawẽn kobexixi beayũ eju.
\p — Oburereyũ — ioꞌe. — Eyju juk adi waꞌõ kay g̃u epesop. Creta ka be bima juk waꞌõ kay g̃u epesop. Creta ka bewi wuyjuap g̃u.
\p — Wuyjẽmꞌũm pima kajuk teꞌe ma soat tarekrek ag̃upaꞌũm g̃u, xipat kajuk wuywebe dak — ioꞌe.
\p
\v 22 — G̃asũ bit eyaꞌõcam cuy epesop — ioꞌe. — Kobexixi juy jepirig̃. Kaꞌũma ma wuyꞌin pit jeap — ioꞌe.
\p
\v 23 — Koapat exima Deus ekawẽn tojotjotꞌukat oꞌjebapuk okay — ioꞌe. — Deus ixe oꞌg̃udot okay. Ixe Deus okukukat. Ixe Deus ebekit õn. Cekawẽn tojotjotꞌukat oꞌjekawẽn oweju.
\p
\v 24 — “Paulo, epararam g̃u juy eg̃uy,” ioꞌe owebe — ioꞌe Paulo. “Ajẽm cuy César kay- -Roma ka kukukat kay,” ioꞌe. “Õn ag̃ ekay, ewejuacat kay dak eyeꞌũap puxim, ẽn cuk imẽn ejoojuy oxewi buye,” ioꞌe. “Deus jeꞌe ewebeam apẽn cuk ejoojuy cexewi iap tag̃,” Deus ekawẽn tojotjotꞌukat oꞌe owebe — ioꞌe Paulo.
\p
\v 25 — Imẽnpuye, eyaꞌõcam cuy epesop, oburereyũ — ioꞌe. — Deus kay wetabut. Apẽn jeꞌbapuk wuywebe iap oꞌg̃uwẽn owebe Deus imẽn ebapuk awap. Imẽn jeꞌbapuk. 
\v 26 Imẽnpit pipim cuy acejemũg̃ tipꞌaweroro be — Paulo oꞌe kobexixi beayũ be.
\p
\v 27 Xepxep semana kap puje:
\p — Kapurũg̃ kay acoꞌi ajẽmjẽm oceju — ioꞌe kobexixi be kapikpikꞌukayũ.
\p Uhum oceju jekukum iximadakpe tibog̃ cĩcãati dag̃. Tibog̃ cĩcãati butet Mediterrâneodi i osunuy. 
\v 28 Imẽnpuye oꞌtibimuweg̃ũn ip tibimuweg̃ug̃ũnãm. Tibiraat 36 metros oꞌe. Bosusu oceju. Waram oꞌtibimuweg̃ũn ip. Tibiraat 27 metros oꞌe- -tibira g̃ũn ma.
\p
\v 29 Iparara oꞌe ip witaꞌa be kobexixi kakaap puxim. Imẽnpuye ebadipdip kobexixi muycũcũap oꞌg̃uakõm ip. Oꞌg̃uakõm ip kobexixi ukpu bewi kobexixi muycũ ãm. Oꞌjecũ. Cucum g̃u oꞌe g̃asũ- -iwiwim acã. Kabia pin cĩcã oꞌe ip.
\p
\v 30 G̃ebuje kobexixi be kapikpikꞌukayũ kobexixi bewi jenapõn ojuy. Kobeꞌitꞌit oꞌg̃ukop ip tibog̃ cĩcãati be jewexe kobexixi muycũcũap muakõmkõm pima.
\p — Kobexixi muycũcũap muakõmkõm oceju — ioꞌe ip napa ma ocewebe.
\p
\v 31 Imẽnpit kobexixi bewi jenapõn ojuy ip. Paulo oꞌjekawẽn l00 be sorarayũ kukukat pe- -waraꞌacat sorarayũ be dak.
\p — Ixeyũ kobexixi be kapikpikꞌukayũ watwat puje wuyewedaxijo baꞌore aceꞌe — ioꞌe.
\m
\v 32 Imẽnpuye sorarayũ kobeꞌitꞌit ekabobu oꞌsubudakat. Kobeꞌitꞌit oꞌat idibi be. Uhum oꞌjewede kobexixi xewi.
\p
\v 33 Kabiaꞌisum Paulo oꞌjekawẽn kobexixi beayũ eju.
\p — Epeyekõn g̃asũ bit — ioꞌe. — 14 kabia eyag̃uybabiꞌũmꞌũm epeku. Jekõnkõn g̃u epeku — ioꞌe. 
\v 34 Epeyekõn cuy eybaca am — ioꞌe. — Eyag̃uybabiꞌũmꞌũm g̃u juy epsop — ioꞌe. — Kaꞌũma ma wuyꞌin jeꞌũ — ioꞌe.
\p
\v 35 Paulo pãoꞌa oꞌyabu. Oꞌjekawẽn Deus eju pãoꞌa kug̃ puye. Soat etabun oꞌjekawẽn ceweju.
\p — Bay xipat cĩcã ẽn — ioꞌe cebe.
\p Oꞌyadakat. Oꞌyaꞌo. 
\v 36 Imẽneju soat ip waram oꞌyaꞌõcan- -kobexixi beayũ. 
\v 37 Soat ip oꞌjekõn. Ade jĩjã ocesop kobexixi be. 276 be ocesop.
\p
\v 38 Ibeg̃beg̃ puje kobexixi be kapikpikꞌukayũ tarekrektata oꞌtaxikxik ip idibi be- -badi oꞌtadopꞌiata- -trigoda. Oꞌtaxikxik ip kobexixi poxi muꞌũm ãm. Jepirig̃ap puxim ip oꞌtaxikxik.
\p
\v 39 Kabia buje tinebabaat oꞌtobuxik ip kobexixi be kapikpikꞌukayũ. Tinebabaat kay oceju. Itaybit g̃u oꞌe ip apoceat ipi iam. Kaꞌoririt ixe tinebabaat pe osodop. Adeg̃u witaꞌa oꞌyadop iboce. Kobexixi muymũg̃ ojuy ip iboce. 
\v 40 Imẽnpuye kobexixi muycũcũapu oꞌsubudakat ip. Oꞌsubudakat ip tinebabaat xe bima. Pilatokukatpu oꞌsubumurore ip. Kobexixi mujujuap epag̃o oꞌg̃upaya ip kabido at am. Kobexixi oꞌju kaꞌoririt kay.
\p
\v 41 Imẽnpit kabido kobexixi oꞌg̃uyjayjay tibacaat ewebotbocap kay. Iboce kobexixiꞌa oꞌjeaece. Oꞌjecug̃. Iju baꞌore oꞌe. Kobexixi ukpu oꞌjekpuewekap. Tipodoyat paca ma oꞌyukpumuweka. Imẽn kobexixi oꞌjepirig̃.
\p
\v 42 Sorarayũ taomũnmũnayũ aoka ojuy dokdog̃ jenapõnap puxim kapurũg̃ kay. 
\v 43 Imẽnpit l00 be sorarayũ kukukat ibuꞌu oꞌe Paulo eꞌũ ãm. Taomũnmũnayũ oyaokaat g̃u sorarayũ be.
\p — Kapurũg̃ kay epeyedok! — ioꞌe taomũnmũnãyũ be. — Epakõm! — ioꞌe l00 be sorarayũ kukukat itaybit jedog̃ayũ be.
\p
\v 44 — Kobexixi bag̃bag̃ epejat! — ioꞌe. — Kapurũg̃ kay juy epeju ip com! — ioꞌe itaybitꞌũm jedog̃ayũ be.
\p Imẽneju soat ocejeu kapurũg̃ pe.
\b
\c 28
\p
\v 1 Tipꞌaweroro kay ocajẽm. Iboce bima ocetaybit ocesop tip puten. Tip putet Malta i osunuy.
\p
\v 2 Tipꞌaweroro watwat oajẽm ocekay. Ocedobede ip. Xipan cĩcã ip ocekuk. Daxa oꞌg̃usop ip ocewewe am kajuk kukug̃ puye, mubaꞌat oeku buye dak. 
\v 3 Paulo daxadaypa oꞌtaypabu. Oꞌjomõg̃ daxa be.
\p G̃ebuje puybu oꞌjẽm daxadaypa diotpewi. Paulo oꞌsubua. Tore iãn oeku Paulo bu eju. 
\v 4 Iboceayũ puybu oꞌsubujojo tore iãn Paulo bu eju. Imẽnpuye oꞌjekawẽn ip jeweweju.
\p — Wuyjuyũ aokakaꞌukat acoꞌi teku — ioꞌe ip teꞌe ma. — Tibog̃ cĩcãati be oeꞌũ g̃u. Puybu nuy pibun pit jeꞌũ ikẽrẽat oꞌg̃ujurũg̃ puye — ioꞌe ip teꞌe ma jewewebe.
\p
\v 5 Imẽnpit bug̃ꞌi oꞌsubuxik. Paulo oꞌsubumuyꞌat daxa be. Iboceayũ itabẽg̃bẽg̃ oꞌe ip Paulo jojom. 
\v 6 Ibu euhuap wiwim oꞌe ip, ceꞌũap wiwim tak. Ibun ma iwiwim osodop ip Paulo jojom. Imẽnpit Paulo bu oꞌjebuehu g̃u. Oeꞌũ g̃u dak. Xipat ma osunuy. Imẽnpuye oꞌjeag̃uymuwarurun ip Paulo kay.
\p — Wuyjuyũ g̃u teku- -deus ma! — ioꞌe ip napa ma jewewebe.
\p
\v 7 G̃ebuje Públio ocenomuwã jedukꞌa kay. Públio Malta eipi kukukat osunuy. Ixe ka oceweweweap tẽg̃ oꞌsukadop. Oceju cekay. Iboce ocesop ebapũg̃ kabia. Xipan cĩcã ocekuk. Ocexan oꞌg̃ũm ocewebe, soat ocemukuypinput tak.
\p
\v 8 Paulo oꞌju Públio ebay kay. Iwãtaxipi osunuy. Ipaꞌi osunuy, yukpidi dak. Paulo oꞌjekawẽn Deus eju Públio ebay beam. Jebu oꞌsubumõg̃ cebe. Oꞌg̃uꞌada. Xipat oꞌe.
\p
\v 9 Ceꞌadaap awẽg̃ tobuxik puje, ade iwãtaxipipiayũ oꞌju ip Paulo kay. Jay. Oajẽm ip. Ixeyũ dak oꞌg̃uꞌadaꞌada Paulo. Xipat ip oꞌe. 
\v 10 Imẽnpuye ade ip jebubut oꞌg̃ũm ocewebe “Eyju xipat ocexe” iꞌe am ocewebe. Kobexixi be õm ojuy bima ocemukaypinput oꞌjomõg̃ ip kobexixi be. Purewuh. Ocejẽm tipꞌaweroro bewi.
\p
\v 11 Ebapũg̃ kaxi kap puje oceju Roma ka kay. Ocejẽm Malta eipi bewi. Waraꞌat tag̃ ocejẽm kobexixi dag̃. Ixe kobexixi Malta ebikopap pe osodop ihi bun. Ixe kobexixi Alexandria ebikopap pewiat osunuy. Kobexixi butet deusyũ xepxem ikapꞌibiyũ i osunuy.
\v 12 Mũg̃. Ocejemũg̃ Siracusa ebikopap pe. Iboce ocesop ebapũg̃ kabia.
\p
\v 13 Ibocewi tiwãbu dag̃ oceju. Mũg̃. Ocejemũg̃ Régio ebikopap pe. Kabido oꞌsubidoajẽm kaxietajoreg̃at kadiwi kuyaje. Purewuh. Waram ocejẽm ibocewi. Pozuoli ebikopap pe ocejemũg̃ xepxep kabia kap puje. Jay. Kapurũg̃ pe ocejeu ibocewi. 
\v 14 Jesus ebikitkit ocetobuxik. 7 xet ocesop ixeyũ xe.
\p Purewuh. Ibocewi kapurũg̃ tag̃ oceju. Roma ka kay oceju e dag̃. 
\v 15 Jesus ebekitkit Pauloyũ e dag̃ ajẽmap awẽg̃ oꞌyawẽg̃tobuxik Roma ka watwat. Imẽnpuye oꞌjẽm ip ebidase ocedopabijuk am. Ocedopabijuk ip oceju Roma ka wuyꞌũmꞌũm pima. Ocedopabijuk ip Praça de Ápio ka be, Três Tavernas ka be dak. Paulo icokcok cĩcã oꞌe ixeyũ jo buje.
\p — Bay, xipan cĩcã ẽn ocekug̃ — ioꞌe Deus pe.
\v 16 Imẽn ocajẽm Roma ka be.
\p G̃ebuje 100 be sorarayũ kukukat Paulo oꞌg̃ũm 1000 be sorarayũ kukukat pe. Ixe Paulo oꞌg̃uju daomũnmũnapꞌa be g̃u- -ukꞌa be acã. Jag̃epũg̃ ma osunuy ukꞌa be. Imẽnpit pũg̃ sorara ceweju osunuy soat em. Xet. Xet. Xet. Ebapũg̃ xet oꞌkap.
\p
\v 17 G̃ebuje Paulo Judeuyũ kukukayũ oꞌtojocat jewekay Roma ka beayũ.
\p Ceꞌawero buje Paulo oꞌjekawẽn ceweju ip.
\p — Oburereyũ — ioꞌe. — Cedag̃ cuk adi ojekukuku. Deus pe ocemukũyjojoap ekawẽn tag̃ cuk adi ojekukuku, aypapayũꞌũmꞌũm ekawẽn tag̃ tak. Ixeyũ ekawẽn ojomuymuy g̃u- -pũg̃ em tak kaꞌũma — ioꞌe. — Imẽnpit Judeuyũ obu Jerusalém ka be. Oũm ip César ebekitkit pe. César ebekitkit oꞌjekawẽn oweju. Ixeyũ xe ikẽrẽat og̃ujurũg̃ g̃u- -pũg̃ em tak kaꞌũma. Cũg̃ g̃u ixeyũ xe odaomũn ãm, waoka am tak — ioꞌe cebe ip.
\p
\v 18 — César ebekitkit ma omujẽm ojuy daomũnmũnapꞌa bewi. 
\v 19 Judeuyũ bit ibuꞌu jĩjã osodop omujẽm ãm yabewi. Imẽnpit “Judeuyũ yukpiwat,” iꞌũmg̃u adi oce. “César wawẽg̃mukẽrẽrẽnayũ yaꞌĩjo,” i acã adi oce. 
\v 20 Imẽnpuye õn eymudocat ijoce owebe eyjo am, eyweju jekawẽn ãm tak — ioꞌe.
\p — Kuy bi ma wuydaxijo am Deus emunaẽ ajẽmap wiwim Judeuyũ. Ixe kay wetabut- -Jesus kay. Imẽnpuye obamũnmũn oce correntebum — Paulo oꞌe Judeuyũ kukukayũ be.
\p
\v 21 — Judéia eipi watwat cartadup oꞌtupmudot g̃u ocekay- -apẽn Paulo eꞌem iaptup — ioꞌe ip Paulo be. 
\v 22 — Ijoce oajẽmjẽmꞌiayũ dak “Paulo ikẽrẽat oꞌg̃ujurũg̃,” i juk oꞌe g̃u ip ocewebe- -Judeuyũ — ioꞌe ip. — Imẽnpit ekawẽn co pin cĩcã oceju. Soat ka dag̃ayũ Jesus kay itabucayũ muymuy. Imẽnpuye etabucam cuy ocemukũyjo — ioꞌe ip Paulo be.
\p
\v 23 Imẽnpuye kabia oꞌg̃uweg̃ũn ip waram Paulo ekawẽn co am.
\p G̃ebuje ade Judeuyũ oꞌjeꞌawero ip Paulo nuyapꞌa be ixe kabia. Kabiaꞌisum Paulo apẽn Deus soat kukukan oꞌe iap oꞌg̃uwẽnuwẽn cebe ip. Kabiꞌisum piap imuwẽnuwẽn osunuy. Oikat imuwẽnwẽn.
\p — Jesus ma Deus emunaẽ — ioꞌe cebe ip. — Deus Jesus ma oꞌtaẽ soat ipi dag̃at taxijo am — ioꞌe. — Ixe muwẽg̃aptup Moisés emudupmubararaktup, soat Deus ekawẽn muwẽnuwẽnꞌukat emudupmubararaktup tak — ioꞌe. — Jesus ma Deus emunaẽ — ioꞌe.
\p
\v 24 Xepxep ixeyũꞌin Paulo aꞌõ kay oꞌe. Itabut ip oꞌe Jesus kay. Wararaꞌacayũ bit itabut g̃u oꞌe. 
\v 25 Waraꞌat tag̃tag̃tag̃ ma jewag̃uyg̃uy oꞌe ip.
\p Ade ixeyũꞌin Paulo aꞌõ kay g̃u ip oꞌe. Oꞌãy ip jedukꞌa be jepit ojuy. Paulo oꞌjekawẽn cebe ip.
\p — Kuyje Isaías icẽmãn oꞌe wuydobuyũꞌũmũm pe — ioꞌe. — Iboam Isaías oꞌe Deus biõg̃buk aꞌõbi. Imẽn eꞌem ixe emudupmubararaktup:
\q
\v 26 “Eju juy ixeyũ wuyjuyũ kay,” ioꞌe Deus owebe, i. Imẽn ece cebe ip: “Deus eꞌem: ‘Jekũyjojom cĩcã eyju. Imẽnpit eyetaybit g̃u. Jeakag̃ cĩcã eyju. Ijojom eyju. Imẽnpit ibaꞌarẽm cĩcã eyxe,’ i,”. 
\v 27 “Imẽn ece cebe ip,” ioꞌe Deus owebe, i. “Ixeyũ wuyjuyũ itabut g̃u, ibuꞌu ip jetabut am puye. Yaꞌõpicũg̃cũg̃ g̃u ip waꞌõ kay jekũyjopinꞌũm puye,” ioꞌe. “Ibuꞌu ip kawẽn icẽmat co am ibuꞌu ip jetabut am puye,” ioꞌe. “Ibuꞌu ip ikẽrẽat mujurũg̃rũg̃ap epere am Deus pe ikẽrẽat uk am cebewi,” ioꞌe, i.
\m Imẽn eꞌem Isaías emudupmubararaktup- -Deus ekawẽntup — Paulo oꞌe.
\p
\v 28 — Oburereyũ — ioꞌe Paulo Judeuyũ be. — Eyetaybin cuy epeꞌe iboap ekawẽn! G̃asũ bit Judeuꞌũmayũ be juy kawẽn idipat oceg̃uwẽn. “Deus jeydaxijo,” i oceꞌe cebe ip. Ixeyũ bit xipan yaꞌĩjo. Deus ixeyũ acã idaxijo — ioꞌe Judeuyũ be.
\p
\v 29 Imẽneju Judeuyũ oꞌjẽm Paulo xewi. Jewaꞌõxikxig̃ cĩcã jeweweju ip oꞌjẽm.
\p
\v 30 Paulo kawẽn idipat oꞌg̃uwẽnuwẽn Roma ka watwat pe. Xepxep koato Roma ka be osunuy. Ixe ma jedinheiro oꞌg̃ũmg̃ũm ukꞌa be jenuyapteim. Icokcok oꞌe wararaꞌacayũ ajẽm puje jejo am.
\p
\v 31 — Deus soat tiwatwat kukukan jeꞌe — ioꞌe cebe ip.
\m Cũg̃ ma ip oꞌg̃utaybitbin. Wuykukukat Jesus Cristo oꞌg̃uwẽnuwẽn cebe ip. Kaꞌũma ma ixe oꞌg̃uymũg̃ kawẽn idipat muwẽnap puxim. Soat pe wuykukukat Jesus Cristo ekawẽn oꞌg̃uwẽnuwẽn.