\id ROM Mundurukú [myu] NT (Brazil) -2010 bd.
\h Romanos
\toc1 Roma ka watwat peaptup
\toc2 Romanos
\mt PAULO EMUDUPMUBARARAKTUP ROMA KA WATWAT BEAPTUP
\c 1
\p
\v 1 Cartadup mubarararag̃ õn eywebeaptum- -Roma ka watwat peaptum. Õn Paulo. Jesus Cristo beam kapikpikꞌukat õn. Jesus Cristo emumuju õn. Deus cuk onaẽ.
\p — Waꞌõbi omuwẽnuwẽn cuy eg̃uy soat ka watwat pe — i juk oꞌe owebe. — Kawẽn idipat acã juy eg̃uwẽnuwẽn — i juk oꞌe owebe.
\p
\v 2 — Kawẽn idipat og̃uwẽg̃at soat pe ipi dag̃acat pe — ioꞌe Deus kuyje. Kawẽn idipat muwẽnuwẽn osodop ip cekawẽn muwẽnuwẽnꞌukayũ. Iboap ekawẽn tak ibararak opop Deus ekawẽntup pe. Waraꞌat ekawẽn podi ma iboap ekawẽn kawẽn idip. Kaꞌũmg̃u xipatꞌũmat iboap ekawẽnꞌin.
\v 3 Iboap ekawẽn co buje wuyetaybit abu Deus ipot iam. Ixe ipot wuykukukat- -Jesus Cristo. Deus ipot ijodian oꞌe. Davi naxeg̃ebit osunuy- -Judeuyũ kukukat naxeg̃ebit.
\v 4 Ixe Jesus Deus coꞌi osunuy. Imẽn ikẽrẽat oꞌjukuk g̃u ipi ju bima- -pũg̃ em tak kaꞌũma. Deus jaꞌõbacaan jekpot oꞌg̃utait ceꞌũap tomukadi. Oꞌg̃utait teku okpot iam wuymutaybit am, teku soat podi ma yaꞌõbaca iam wuymutaybit am tak. Ixe Jesus Cristo wuykukukat.
\v 5 Ixe xipan okug̃. Ixe dak cuk onaẽ kawẽn idipat muwẽn ãm soat kaka dag̃. Ixe emumuju õn. Imẽnpuye soat ka dag̃ayũꞌin itabut jeꞌe Cristo kay- -pũg̃pũg̃pũg̃. Cristo ekawẽn kay kũyjobit jeꞌe ip. Ibuyxin ip Cristo jukuk.
\v 6 Eyju dak Deus cuk eynaẽ, Roma ka watwat. Jesus Cristo kadiayũm cuk eynaẽ. G̃asũ bit ixe kadiayũm epesop.
\p
\v 7 Imẽneju cartadup mubarararag̃ õn soat peaptum eywebeaptum, Roma ka watwat. Deus xe eykukpin cĩcã. Ixe juk eynaẽ jebekitkiyũm.
\p — Bay, xipan cuy Roma ka watwat ejukuk — i õn eꞌem Deus pe- -wuyebay be, Jesus Cristo be dak, wuykukukat pe. — Ixeyũ ag̃uymubabibin cuy eg̃uy — i õn eꞌem cebe ip.
\p
\v 8 Roma ka watwat itabut cĩcã Jesus Cristo kay iap awẽg̃ oꞌyawẽg̃tobuxik ip soat ka watwat. Imẽnpuye ocokcok cĩcã eykay. Imẽnpuye:
\p — Bay, ẽn xipat cĩcã — i õn eꞌem Deus pe.
\m
\v 9 Deus itaybit soat kabia õn g̃ebum eykay iam. Kapikpig̃ cĩcã õn Deus peam ocokcok cekay buye. Kawẽn idipat muwẽnuwẽn õn soat kaka dag̃. Ixe ipot ekawẽn muwẽnuwẽn õn.
\v 10-11 Eyjo pin cĩcã oce. Deus biõg̃buk omutaybitbin iam eymukũyjo pin cĩcã õn. Ibiõg̃buk aꞌõbi eyaꞌõmucan ojuy õn big̃ ma eyetabut am Jesus kay. Imẽneju:
\p — Roma ka watwat com cuy omujum ece — i õn eꞌem cebe. — Ebikuy bima juy omujum ece — i õn eꞌem cebe.
\m Soat em imẽn õn eꞌem Deus eju kawẽnwẽn pima.
\v 12 Õn acã g̃u jeyaꞌõmucan eywebe big̃ ma eyetabut am. Jewewaꞌõmucanucan pit acesop big̃ ma wuyetabut am cekay. Big̃ ma eyetabut epeꞌe wetabucap co buje. Õn tak big̃ ma wetabut oce eyetabucap co buje.
\p
\v 13 Okitpitpiyũ, soat em cuk adi cu ojuy og̃uy eykay. Iboam eymukũyjo pin õn. Imẽnpit soat em omujuꞌũmꞌũm osunuy. Eywebe Deus ekawẽn muwẽn pin cuk adi og̃uy big̃ ma eyetabut am Jesus kay apẽn eybadipyũ oitabun iap coꞌi- -Judeuꞌũmayũ oitabun iap coꞌi.
\p
\v 14 — Omuwẽnuwẽn cuy eg̃uy soat kaka dag̃ayũ be — i juk oꞌe Jesus Cristo owebe.
\m Imẽnpuye Cristo juy og̃uwẽnuwẽn soat pe- -cewag̃õnayũ be, cewag̃õnꞌũmayũ be dak. Deus ekawẽn cuy og̃uwẽnuwẽn itaybicayũ be, itaybitꞌũmayũ be dak.
\v 15 Imẽnpuye obicokcok cĩcã kawẽn idipat muwẽn ãm eywebe, Roma ka watwat.
\p
\v 16 Deus jaꞌõbacaan kawẽn idipat kay itabucayũ daxijojom. Koap Judeuyũ daxijojom itabut puje ip. Judeuꞌũmayũ dak taxijojom itabut puje ip. Imẽneju obisũsũn g̃u kawẽn idipat muwẽn ãm soat ka watwat pe- -obicokcok cĩcã ma.
\v 17 Kawẽn idipat co buje, wuyetaybit apẽn Deus wuymucũg̃ucũg̃ iam.
\p — Jesus Cristo kay itabucayũ acã cũg̃ ma oxe — iꞌeꞌem Deus. Soat kabia: — Big̃ ma itabut ip cekay — iꞌeꞌem Deus.
\m Imẽn eꞌem Deus ekawẽntup: — Deus emumucũg̃yũ soat em itait jeedop ip Deus xe itabut ip puye, — i.
\p
\v 18 Deus kabi be omuy. Ixe itakoma jĩjã jekayꞌũmayũ kay, ikẽrẽat mujurũg̃rũg̃ꞌukayũ kay. Ibuꞌu jĩjã ip Deus ekawẽn co am- -kawẽn icẽmat co am, ikẽrẽat mujurũg̃rũg̃ ojuy jĩjã ip puye. Ikẽrẽat mujurũg̃rũg̃ꞌukayũ kawẽn idipat muwẽnap mubaꞌoreren tak ip ibuꞌu wararaꞌacayũ dak itabut am ibuye.
\v 19 Deus kuy apẽn ixe eꞌem iam oꞌg̃utaybin ijodiacat. Imẽn apẽn Deus eꞌem iam itaybit put cebe ip. Inaka cekay g̃u jĩjã ip. Imẽnpuye Deus ipiatpiꞌajojoan cebe ip.
\v 20 Deus ma ijo baꞌore wuywebe. Ixe bit soat oꞌg̃ug̃ẽ ipi dag̃acat. Ixe emumug̃ẽ jo buje, wuyetaybit soat podi ma Deus yaꞌõbaca iam- -yaꞌõbacaap iꞌũm g̃u iam. Wuyetaybit tak ixe acã Deusat iam. Kuyje itaybit osodop ip iboam ipi dag̃acayũ. Imẽnpuye “Deus kake iap ibaꞌarẽm wuyxe” iꞌe baꞌore cebe ip.
\v 21 Itaybit maꞌg̃u ip Deus kake iam. Imẽnpit ibuyxim g̃u ip ikug̃.
\p — Ẽn acã Deusat — iꞌeꞌem g̃u ip. — Ẽn xipat cĩcã — iꞌeꞌem g̃u ip Deus pe.
\m Cũg̃ꞌũma jewag̃uyg̃uy ip. Kabiok tag̃ jekukuꞌukat itaybit g̃u poma oju iam. Imẽnpuxim itaybitꞌũma jewag̃uyg̃uy ip. Yag̃uyꞌũm ip.
\p
\v 22 — Ocetaybit cĩcã ma oceju bit — i teꞌe ma eꞌem ip.
\m Deus xe bit itaybit g̃u jĩjã ip.
\v 23 Imẽnpit Deus acã jeꞌũ g̃u. Soat em itait nuynuy. Ixeyũ bit ibuꞌu jĩjã ibuyxim Deus kuk am, ijo baꞌore buye. Imẽneju ijodiat coꞌiat mug̃ẽg̃ẽm ip witaꞌam, im tak, ourom tak. Soat ijodiacat pit jeꞌũ. Soat em g̃u itait nuynuy ip. Wasũ joꞌiat tak imug̃ẽg̃ẽm ip, puca joꞌiat tak, jewururug̃at coꞌiat tak. Jemumug̃ẽ wap jẽg̃ꞌaecõg̃cõg̃ ip “Eyju acã Deusyũ ocexe” iꞌe am cebe.
\p
\v 24 Ikẽrẽat mujurũg̃ pin acã ip. Imẽnpuye jekupinap tag̃ ceku am ip Deus oꞌjepere. Imẽnpuye yukpiwatpi ma ip jekukum ikẽrẽat mujurũg̃rũg̃. Isũsũnꞌũma ip jekukum jeweweju ikẽrẽat mug̃ẽg̃ẽm.
\v 25 Imẽnpuye kawẽn icẽmat ip ibuꞌu napaap ekawẽn kay am.
\p — Ẽn acã aꞌõbuyxi — iꞌeꞌem ip soat mug̃ẽg̃ẽꞌukat pe g̃u- -cemumug̃ẽ be acã.
\m Deus pe acã wuyeꞌe but:
\p — Soat podi ma ẽn aꞌõbaca — i.
\m Soat em ma juy imẽn acece cebe.
\p
\v 26 Soat mug̃ẽg̃ẽꞌukat kug̃ g̃u ip ibuyxim- -jemumug̃ẽ kug̃ acã. Imẽnpuye Deus oꞌjepere ip ikẽrẽat mug̃ẽ ãn. Imẽnpuye ag̃okatkat kay oibuꞌun ip aoyũ. Jewenuyꞌũnakẽkẽm ã ip oꞌe jeweweju.
\v 27 Imẽnpuxim ag̃okatkayũ aoyũ aoyũ kay oibuꞌun. Ag̃okatkayũ acã oꞌe ip cekay jĩjã. Jewenũnꞌoꞌom ã oꞌe ip. Imẽg̃ap pit ikẽrẽ jĩjã Deus xe. Imẽneju jeweweju ma ip ipiatꞌajojom xipatꞌũm cĩcã ip puye.
\p
\v 28 Deus ekawẽn kay pin g̃u ip. Itaybin pin g̃u ip kawẽn icẽmãn. Imẽnpuye Deus ip oꞌjepere ikẽrẽat kay g̃ebum am, warẽmtag̃ ceku am tak.
\v 29 Imẽnpuye kaꞌũma ma ixeyũꞌin cũg̃ ma jekukum. Soat kabia warẽmtag̃ cĩcã ip jekukum Deus etabutpe, jebureyũ etabutpe dak. Ikẽrẽat mujurũg̃rũg̃xi ip. Itabikuku ip soat kay jebubun. Ikẽrẽm wararaꞌacat kug̃ ip. Itabutkarey ip wararaꞌacat kay. Wararaꞌacat aokakaxi ip. Dapxixiꞌuk cĩcã ip. Wararaꞌacat mug̃uykukukuxi ip. Soat em itakoma ip wararaꞌacat kay. Wararaꞌacat ekawẽn mukẽrẽrẽrẽnxi ip.
\v 30 Wararaꞌacat muymuyxi ip. Itakoma jĩjã ip Deus kay. Ibuyxim g̃u wararaꞌacat kug̃ ip. Jewexe ip yaꞌõbuyxi.
\p — Oceju acã ocaꞌõbaca — i napa ma eꞌem ip jewawẽg̃mubog̃ am jewexe. Soat em: — Apẽn g̃uto aceꞌe ikẽrẽan? — iꞌeꞌem ip jewewebe.
\m Kũyjobitꞌũm cĩcã ip jebay aꞌõ kay.
\v 31 Itaybitꞌũm cĩcã ip apẽn cũg̃ ma iam, apẽn cũg̃ g̃u iam tak. Jaꞌõ dag̃ g̃u ip jekukum. Kaꞌũma ma ikukpin cexe ip. Itabotaidabotbot g̃u ip wararaꞌacat kay.
\p
\v 32 — Ikẽrẽat mujurũg̃rũg̃ꞌukayũ jeꞌju ipiatꞌajojoap kay — iꞌeꞌem Deus. — Soat em jeedop ip ipiatꞌajojom — iꞌeꞌem.
\m Itaybit ip iboap ekawẽn. Inaka ip big̃ ma buk ikẽrẽat kay. Icokcok ip eꞌem wararaꞌacat pe ikẽrẽat mujurũg̃ ãm, jebuxim iꞌeat pin ip puye.
\b
\c 2
\p
\v 1 Eyju bit acoꞌi eꞌem eyewewebe: — Ocebuximꞌũma ixeyũ ikẽrẽat kug̃ Deus xe — i.
\m Imẽnpit ixeyũ ekukuap coꞌi eyju dak jekukum. Imẽnpuye eyju dak ikẽrẽat kug̃ cexe. “Ikẽrẽat kug̃ g̃u oceju bit” iꞌe baꞌore eywebe.
\p
\v 2 — Ipiat osupiꞌajoat eywebe, ikẽrẽat kug̃ eyju buye — iꞌeꞌem Deus pit ikẽrẽat mujurũg̃rũg̃ꞌukayũ be. 
\m Deus soat em cũg̃ ma eꞌem. Imẽnpuye wuyetaybit cũg̃ ma ixe ipiatpiꞌajoan ikẽrẽat mujurũg̃rũg̃ꞌukayũ be iam. 
\v 3 Oburereyũ, tũybe Deus ocewebe g̃u ipiat supiꞌajoat wararaꞌacat pe acã iãn eyju eꞌem. Inaka ixeyũ ekukuap coꞌi eyju dak jekukum. Imẽneju Deus ipiat supiꞌajoat eywebe ixeyũ beap coꞌi. Tũybe ocenapõn ipiatpiꞌajoap puxim iãn eyju eꞌem.
\p
\v 4 — G̃axĩn ma acoꞌi ikẽrẽat mug̃ẽg̃ẽap jepere ip — iꞌeꞌem Deus jewebe ma.
\m Imẽnpuye soat em xipan eykug̃. Yukpiceg̃e g̃u eykug̃. 
\p — Ipiat osupiꞌajoat g̃u buk cebe ip — iꞌeꞌem jewebe ma. 
\m Ixe xipan eykug̃ ibikuy eywebe ikẽrẽat mujurũg̃rũg̃ap epere am puye. Eyju bit eꞌem:
\p — G̃aꞌa ikẽrẽat ag̃ujurũg̃rũg̃ — i. — Deus ipiat supiꞌajoat g̃u wuywebe — i napa ma eyju eꞌem. 
\m
\v 5 G̃uyjom Deus jetakomaap g̃ubapuk ikẽrẽat mujurũg̃rũg̃ꞌukayũ be. Ibo kabia be ipiat supiꞌajoat ixeyũ be. Cũg̃ ma ipiat supiꞌajoat cebe ip. Eyju bit eybuꞌu jĩjã ikẽrẽat mujurũg̃rũg̃ap epere am. Eybuꞌu jĩjã kũyjobit am ixe aꞌõ kay. Imẽneju ikẽrẽat mujurũg̃rũg̃ꞌukayũ be ipiatpiꞌajoat puje, wararaꞌacat podi ma eywebe ipiat supiꞌajoat. 
\v 6 G̃uyjom Deus apẽn cuk adi oekuku ip iaptei ideida soat pe ijodiacat pe. 
\v 7 Pũg̃pũg̃ ijodiacayũꞌin xipacat mujurũg̃rũg̃xi. Deus bikuyap tag̃ ceku pin cĩcã ip. Deus coꞌian jedipap kudadam tak ip. Deus eꞌem cebe ip: “Eyju xipat oxe” iap kudadam tak ip. Deus xe jedop ip iap kudadam tak ip. Soat em itait jeedop ip cexe jeꞌũ buje ixeyũ ma. 
\v 8 Wararaꞌacayũ bit jewekay acã g̃ebum jewemucokcokap ojuy. Cũg̃at oꞌjepere ip xipatꞌũmat kay jeꞌe am. Deus itakoma jĩjã jeenuy ixeyũ kay. Ipiat supiꞌajoat cebe ip. 
\v 9 Deus ipiat supiꞌajoat soat pe ikẽrẽat mujurũg̃rũg̃ꞌukayũ be. Wararaꞌacat podi ma ipiat supiꞌajoat Judeuyũ be. Judeuꞌũmayũ be dak ipiat supiꞌajoat. Ipiatpiꞌajojom cĩcã jeedop ip. Imẽn Deus warẽmtag̃ ip cuk adi oekuku iaptei ideida cebe ip. 
\v 10 Deus xipacat mujurũg̃rũg̃ꞌukayũ g̃uwarurun. Jesus Cristo joꞌiayũm jeedop ip jedipap kug̃, jaꞌõbuyxiap kug̃ tak. Yag̃uybabibi jeedop ip soat em. Deus ixeyũ ag̃uymubabibin jeenuy. Imẽn Deus apẽn cũg̃ ma ip cuk adi oekuku iaptei ideida cebe ip. Koap Judeuyũ be ideida. Kanomũm Judeuꞌũmayũ be ideida. 
\v 11 Imẽn Deus cũg̃ ma soat kug̃- -Judeuyũ kug̃, Judeuꞌũmayũ kug̃ tak.
\p
\v 12-15 Judeuꞌũmayũ ma Deus pe wuyawẽwẽap ekawẽn tup kug̃ g̃u ip, Deus Moisés pe oꞌg̃uwẽn iap ekawẽn tup kug̃ g̃u. Imẽnpuye itaybit g̃u ip ixe ekawẽn. Ikẽrẽat mujurũg̃rũg̃ ip. Inaka Deus ixeyũ g̃uju ipiatꞌajojoap kay ikẽrẽat mujurũg̃rũg̃apteim. Imẽnpit:
\p — Wekawẽn tag̃ g̃u juk adi epekuku — iꞌũmg̃u jeꞌe cebe ip, ixe ekawẽn tup kug̃ꞌũm puye. — Cũg̃ ma eyju oxe — i jeꞌe Deus jekawẽn cocoꞌukayũ be g̃u- -jekawẽn tag̃ jekukuꞌukayũ be acã. 
Imẽn jeꞌe. Judeuꞌũmayũ Moisés ekawẽn tup kug̃ g̃u. Jekpiwatpin ma acoꞌi cekawẽn tag̃ jekukum ip itaybit g̃u maꞌg̃u ip cekawẽn. Cekawẽn tag̃ jekukuꞌukat coꞌi ip g̃ebuje bit. Ixeyũ ekukuap co buje, wararaꞌacayũ eꞌem:
\p — Jebinũn pewi ma teyũku Deus pe wuyawẽwẽap ekawẽn tag̃ jekukum cekawẽn tup kug̃ g̃u maꞌg̃u — i. 
\m Jebinũn pewi ma ip itaybit apẽn cedag̃ iam, apẽn cedag̃ g̃u iam tak. Ikẽrẽat mujurũg̃ puje, “Ikẽrẽat og̃ujurũg̃,” iꞌeẽm ip jewebe ma. Cũg̃ ma jeku buje dak, “Cũg̃ ma õn jekukum,” iꞌeꞌem ip jewebe ma. Judeuyũ bit Deus pe wuyawẽwẽap ekawẽn tup kug̃. Itaybit ip ixe ekawẽn. Inaka ikẽrẽat mujurũg̃rũg̃ ip. Imẽnpuye Deus ixeyũ g̃uju ipiatꞌajojoap kay. 
\p — Wekawẽn tag̃ g̃u juk adi epekuku — i jeꞌe cebe ip. 
\m
\v 16 G̃uyjom Deus Jesus Cristo jomuy apẽn cuk adi oekuku ip iaptei teida am soat pe. Xipacat jeꞌg̃ũm xipacayũ be xipacat mug̃ẽg̃ẽapteim. Kũyjobitꞌũmayũ bit g̃uju ipiatꞌajojoap kay kũyjobitꞌũmapteim.
\p
\v 17 Pãm eyju? Ajo-kay eyju jeg̃ebubum? 
\p — Oceju bit Judeuyũ — i eyju eꞌem. — Oceju acã cũg̃ ma Deus xe ixe be wuyawẽwẽap ekawẽn tup kug̃ puye — i eyju eꞌem.
\m Jewexe eyaꞌõbuyxi. 
\p — Oceju acã Deus ocenaẽ jebekitkiyũm — iꞌeꞌem eyju teꞌe ma. 
\v 18 — Oceju acã ocetaybit apẽn Deus ibikuy iam — i teꞌe ma eyju dak eꞌem. — Oceju acã ocetaybit apẽn cũg̃ ma iam, apẽn cũg̃ g̃u iam tak, Deus pe wuyawẽwẽap ekawẽn cocoꞌuk puye — i teꞌe ma eyju eꞌem. 
\v 19 — Wararaꞌacayũ itaybit g̃u apẽn cũg̃ ma iam, apẽn cũg̃ g̃u iam tak — i eyju eꞌem. — Oceju acã ocetaybit — i teꞌe ma eyju eꞌem. — Wararaꞌacayũ itaybit g̃u Deus ekawẽn — i dak eyju eꞌem. — Soat podi ma oceju bit ocetaybit — i teꞌe ma eyju eꞌem. — Oceju acã wararaꞌacayũ oceg̃utaybitbin — i teꞌe ma eyju eꞌem. 
\v 20 — Oceju acã itaybitꞌũmayũ mutaybitbin kawẽn icẽmãn — i teꞌe ma eyju eꞌem. — Kawẽn icẽmãn yaypanꞌisuayũ mutaybitbin tak oceju bit — i teꞌe ma eyju eꞌem. — Oceju acã ocetaybit kawẽn icẽmãn, kawẽn cũg̃an, Deus pe wuyawẽwẽap ekawẽn tup kug̃ puye — i teꞌe ma eyju eꞌem. 
\m
\v 21 Wararaꞌacayũ mutaybitbin acã eyju jekukum. Jewemutaybitbinꞌũma eyju bit jekukum. 
\p — Wararaꞌacat pubut epetujupaꞌum g̃u juy — i eyju eꞌem wararaꞌacat pe ma. Eyju dak tujupaꞌumꞌum ma. 
\p
\v 22 — Wararaꞌacat tayxi kaykay g̃u juy epesop — i eyju eꞌem wararaꞌacayũ be. 
Eyju dak wararaꞌacat tayxi kaykay ma. 
\p — Deusbaroyũ kay g̃u juy epeku — i eyju eꞌem wararaꞌacayũ be. 
\m Eyju bit ijodiat kay jĩjã Jesus Cristo kayap podi ma. 
\p
\v 23 — Deus pe wuyawẽwẽap ekawẽn tup kug̃ oceju bit — i eyju eꞌem soat pe teꞌe ma. 
\m Cekawẽn tag̃ g̃u eyju bit jekukum. Imẽnpuye Judeuꞌũmayũ cekawẽn tup kug̃ꞌũmayũ Deus mubuyxiꞌũmꞌũm cũg̃ꞌũma eyju jekukum puye. 
\v 24 Imẽn eꞌem Deus ekawẽn tup: Judeuyũ, Judeuꞌũmayũ Deus muymuy eyju cũg̃ꞌũma jekukum puye, i.
\p
\v 25 Imẽntak Deus pe wuyawẽwẽap ekawẽn kay kũyjobit pima, cũg̃ ma eywebe ikapꞌisuat taypuꞌag̃obixeedakat am teku Deus ebekit iap mubapuk am soat pe- -Judeuꞌũmayũ be. Eyju ixeedakatkan oceju Deus ebekitkiyũ iap mubapukpug̃ soat pe. Deus ekawẽn kay kũyjobitꞌũm pima bit, teꞌe ma ixeedakatkan eyju, Deus ebekitꞌũmat coꞌi eyju jekukum puye. 
\v 26 Judeuꞌũmayũ bit jedaypuꞌag̃obixeedakatkan g̃u. Deus pe wuyawẽwẽap ekawẽn kay kũyjobit pima bit, Judeuyũ joꞌi eꞌem ip Deus xe- -jebekitkiyũ joꞌi- -kũyjobicayũ joꞌi. 
\p — Eyju webekitkit — iꞌeꞌem Deus cebe ip ixeedakat g̃u maꞌg̃u ip. 
\m
\v 27 Eyju ma eyxeedakatkanat. Deus pe wuyawẽwẽap ekawẽn tup kug̃ eyju. Imẽnpuye eyetaybit cũg̃ ma jeku am Deus xe iam. Inaka eyju kũyjobitꞌũm cekawẽn kay. Judeuꞌũmayũ bit ixeedakacap g̃u ip. Deus pe wuyawẽwẽap ekawẽn tup kug̃ g̃u ip. Inaka cekawẽn kay kũyjobit pima, ikẽrẽat kug̃ g̃u ip Deus xe- -Kũyjobicayũ- -Judeuꞌũmayũ. Eyju bit ikẽrẽat kug̃ cexe kũyjobitꞌũm puye, Judeuyũ. 
\v 28 Wuyju Deus ebekitkit wuyxeedakacap tomuju g̃u- -ixe ekawẽn kay kũyjobicap tomuju acã. Pũg̃pũg̃ayũ teꞌe ma eꞌem:
\p — Deus ebekitkit oceju — i. Teꞌe ma ip jexeedakatkacan. 
\m Teꞌe ma ip Deus ekawẽn tup kug̃, kũyjobitꞌũm ip puye. 
\p — Webekitkiyũ g̃u eyju — iꞌeꞌem Deus ixeyũ be, kũyjobitꞌũm puye. 
\m
\v 29 Wararaꞌacayũ cũg̃ ma eꞌem: 
\p — Judeuat oceju bit — i. — Deus ebekitkiyũ oceju — i dak. 
\m Jebikuyap tag̃ g̃u ip jekukum- -Deus bikuyap tag̃ acã. Deus biõg̃buk nuynuy cebe ip. 
\p — Eyju ma webekitkiyũ — iꞌeꞌem Deus ixeyũ be, jexeedakatkanat g̃u maꞌg̃u ip. — Xipat cĩcã eyju — iꞌeꞌem Deus cebe ip. 
\m “Eyju xipat oxe” iꞌeap kudadam g̃u ip ijodiat pe. Deus pe acã “Eyju xipat oxe” iꞌeap wiwim ip. Soat Deus ekawẽn kay kũyjobicayũ cebekitkiyũ- -Judeuyũ, Judeuꞌũmayũ dak.
\b
\c 3
\p
\v 1 — Jewewejoꞌi kũyjobicayũ Deus ebekitkiyũ bima, apeg̃ãm paxi wuyju judeuyũ? — i du eyju eꞌem owebe? — Apẽg̃ãm paxi wuyju wuydaypuꞌag̃obixeedakatkan? — i du eyju eꞌem owebe? — Xipat g̃u acoꞌi wuyju Judeuyũ iap — i du eyju eꞌem owebe? 
\p
\v 2 — Xipat cĩcã ma wuyju Judeuyũ iap — i õn pit eꞌem eywebe.
Deus jekawẽn oꞌg̃uwẽn Judeuꞌũmayũ be g̃u- -wuyꞌajojoyũꞌũmꞌũm pe acã. Imẽnpuye wuyju Judeuyũ iap xipat cĩcã. Jekawẽn oꞌg̃uwẽn cebe ip ixeyũ be imuwẽn ãm wararaꞌacayũ be. 
\p
\v 3 — Imẽnpit pũg̃pũg̃ wuyꞌajojoyũꞌũmꞌũmꞌin oibuꞌun ip ixe ekawẽn tag̃ jeku am — i du eyju eꞌem owebe? — G̃asũ acoꞌi Deus jeꞌe g̃u wuywebeam apẽn cuk adi oꞌeꞌe iap tag̃, cekawẽn tag̃ oibuꞌun ip puye — i du eyju eꞌem owebe? 
\p
\v 4 — Jaꞌõ dag̃ ma Deus jeꞌe wuywebeam tak — i õn pit eꞌem eywebe. 
\m Soat ma napapaꞌuk. Deus pit napapaꞌuk g̃u. Imẽn eꞌem Deus ekawẽn tup:
\mi Deus, ẽn acã icẽmãn eꞌem, i. “Cũg̃ꞌũma ẽn ocekug̃” i napa ma eꞌem emuymuyꞌukayũ, i. Inaka ẽn acã cũg̃ ma soat kug̃, i.
\m Imẽn eꞌem Deus ekawẽn tup.
\p
\v 5 — Cũg̃ꞌũma wuyeku buje bit, Deus acã cũg̃ ma jekukum iap ibapuk eꞌem wuyekukuap cocoayũ xe — i acoꞌi eyju eꞌem owebe.
\m Eyxe xipat wuywebe cũg̃ꞌũma jeku am wararaꞌacayũ mutaybit am Deus acã cũg̃ ma iam. Imẽnpuye:
\p — Cũg̃ g̃u Deus pe ipiatpiꞌajoan wuywebe warẽmtag̃ wuyekukuapteim — i teꞌe ma eyju eꞌem owebe. 
\m Ijodiat puxim õn kawẽnwẽn g̃asũ, adeayũ icẽm g̃u eꞌem puye. 
\p
\v 6 — Deus soat em cũg̃ ma wuykug̃ — i õn pit eꞌem. — Deus cũg̃ꞌũma ibima, ibaꞌore kuka oꞌe ixe be cũg̃ ma apẽn cuk adi ajekuku iap teida am soat pe wuywebe. Imẽnpit ixe cũg̃ ma iboap ideida — i õn pit eꞌem.
\p
\v 7 — Cũg̃ꞌũma weku buje, “Deus acã cũg̃ ma jekukum,” i jeꞌe ip ocekukuap cocoayũ — i du eyju eꞌem owebe? — “Soat podi ma Deus cũg̃ ma,” i jeꞌe ip — i du eyju eꞌem owebe? — Imẽnpuye warẽmtag̃ cuy ajeku wararaꞌacayũ be “Deus acã cũg̃ ma” iꞌe am — i teꞌe ma eyju eꞌem. — Imẽnpuye cũg̃ g̃u Deus pe ipiatpiꞌajoan ocewebe warẽmtag̃ ocekukuapteim — i teꞌe ma eyju eꞌem owebe. 
\v 8 Imẽneju: 
\p — G̃aꞌa ikẽrẽat ag̃ujurũg̃ — iꞌũmg̃u juy ace. — Wuywebe ikẽrẽat mujurũg̃ puje, adeayũ itabut jeꞌe Deus acã xipat iap kay — iꞌũmg̃u juy ace. — G̃aꞌa ikẽrẽat ag̃ujurũg̃ Deus acã xipat iam itabutꞌũmayũ mutaybit am — iꞌũmg̃u juy ace. 
\p — Imẽn eꞌem Paulo dak — i napa ma eꞌem omuymuyꞌukayũ dak. 
\m Deus cũg̃ ma ipiat supiꞌajoat omuymuyꞌukayũ be.
\p
\v 9 Deus xe Judeuꞌũmayũ podi ma xipat tu wuyju Judeuyũ buye? Kaꞌũma! Jewewejoꞌi ma wuyju ikẽrẽat kug̃ Deus xe- -Judeuyũ, Judeuꞌũmayũ dak. Wuywebe dak ikẽrẽat mujurũg̃rũg̃ap epere baꞌore. Kuy iboap og̃uwẽn eywebe. 
\v 10 Imẽn eꞌem Deus ekawẽn tup:
\mi Kaꞌũmg̃u cedag̃ ma jekukuꞌukat- -pũg̃ tak kaꞌũma ma, i. 
\v 11 Soat ip itaybit g̃u apẽn cũg̃ ma Deus xe iam, apẽn cũg̃ g̃u iam tak, i. Kaꞌũmg̃u Deus aꞌõ dag̃ cekupinat, i. 
\v 12 Wũy ma oꞌe ip Deus wi oitabidaoat puxim, i. Kaꞌũmg̃u xipacat mujurũg̃rũg̃ꞌukat- -pũg̃ tak kaꞌũma, i. 
\v 13 Cekawẽnkẽrẽ jĩjã ip itaypi koceat puxim, i. Napapaꞌuk cĩcã ip, i. Wararaꞌacat muymuyap cẽmcẽm ikõmbie dag̃wi ip puybu tũypiat puxim, i. 
\v 14 Warẽmtaksug̃ eꞌem ip wararaꞌacat pe, i. 
\v 15 Itadaodao ip wararaꞌacat ekawẽn mukẽrẽrẽnap kay, yaokaap kay dak, i. 
\v 16 Soat em jexeat cokcokap muꞌũm ojuy ip, i. Wararaꞌacat mutabibin ip soat em, i. 
\v 17 Itaybit g̃u ip kabaꞌũm jedop am wararaꞌacat eju, i. 
\v 18 Itaybit g̃u ip Deus kuk am ibuyxim, i. 
\m Imẽn eꞌem Deus ekawẽn tup.
\p
\v 19 Ibo dup ekawẽn icẽmãn! Imẽn Deus Judeuyũ awẽwẽm jekawẽn. Wuyetaybit iboam. Imẽnpuye teꞌe ma eꞌem ip Deus pe: — Oceju acã ekawẽn tag̃ jekukum — i. Judeuꞌũmayũ dak ixe ekawẽn tag̃ g̃u jekukum. Imẽneju mũg̃ ma ip Deus etabutpe soat ip ikẽrẽat kug̃ puye- -Judeuyũ, Judeuꞌũmayũ dak. 
\v 20 Kaꞌũma ma soat ekawẽn tag̃ jekukum- -Deus ekawẽn tag̃. Imẽnpuye abu be Deus eꞌem “Cũg̃ ma juy epesop oxe wekawẽn tag̃ eyekuap tomuju” i? Kaꞌũma be ma! Deus ekawẽn wuyetaybit puje, wuyetaybit soat wuyju ikẽrẽat kug̃ Deus xe iam.
\p
\v 21 G̃asũ bit apẽn õn ipi watwat mucũg̃cũg̃ iap Deus oꞌg̃uwẽn wuywebe.
\p — Eyju cũg̃ ma eꞌem oxe eyawẽwẽap ekawẽn tag̃ eyekukuap tomuju g̃u — ioꞌe Deus wuywebe. 
\m Imẽn Moisés wuymutaybitbin tak. Deus ekawẽn muwẽnuwẽnꞌukayũ dak iboam wuymutaybitbin.
\p
\v 22 — Eyju bit cũg̃ ma oxe — iꞌeꞌem Deus ipi watwat pe Jesus Cristo kay itabut puje acã. 
\m Soat pe itabucat pe: — Ẽn cũg̃ ma oxe — iꞌeꞌem Deus- -Judeu be- -Judeuꞌũmat pe dak. 
\m
\v 23 Soat ipi watwat ikẽrẽat oꞌg̃ug̃ẽ. Kaꞌũma ma ikẽrẽat kug̃ g̃u. Wũy ma oꞌe ip Deus wi- -wararaꞌacat podi ma idipat wi, ikẽrẽat kug̃ puye. 
\v 24 Deus pit ikẽrẽat ukꞌug̃ wuywebewi Jesus Cristo oeꞌũ wuywebeam puye. Ikẽrẽat mug̃ẽg̃ẽaptei oꞌteida jeꞌũ ãm. Imẽnpuye wuyju cũg̃ ma Deus xe ixe oeꞌũ buye. Deus teiꞌũma wuymucũg̃ucũg̃, ixe soat em xipan wuykug̃ puye. Cristo Jesus kay wuyetabun puje acã, wuymucũg̃ucũg̃. 
\v 25 Deus Jesus Cristo oꞌg̃udot ijodi ceꞌũ ãm wuywebeam. Ixe oeꞌũ ikẽrẽat mujurũg̃rũg̃apteida am. Ixe kay wuyetabut puje, Deus ikẽrẽat ukꞌug̃ wuywebewi. Jesus Cristo oꞌg̃udot ceꞌũ ãm õn cũg̃ ma eykug̃ iam wuymutaybit am. Kuyje Deus ikẽrẽat mujurũg̃rũg̃ꞌukayũ oꞌg̃uju g̃u ipiatꞌajojoap kay. Yukpiceg̃e g̃u osunuynuynuy ixeyũ kug̃. 
\p — G̃uyjom okpot jeꞌũ soat peam — ioꞌe jewebe ma. — Ixe kay itabucayũ og̃uju g̃u ipiatpiꞌajojoap kay — ioꞌe jewebe ma. 
\v 26 G̃asũ bit: — G̃ebum õn ipi watwat ikẽrẽat mujurũg̃rũg̃ iap kay — iꞌeꞌem Deus. — Cug̃ ma kuka oꞌe owebe ipiatpiꞌajoan cebe ip, ikẽrẽat ip oꞌg̃ujurũg̃rũg̃ iapteim — iꞌeꞌem ixe. — G̃asũ bit cũg̃ ma kuka oꞌe owebe ikẽrẽat uk am eywebewi, Cristo oeꞌũ buye — iꞌeꞌem Deus Jesus Cristo kay itabucayũ be. — Eyju cũg̃ ma oxe Jesus oeꞌũ buye — iꞌeꞌem itabucayũ be.
\p
\v 27 Imẽneju “Wararaꞌacat podi ma cũg̃ ma oceju bit,” iꞌe but tu wuywebe? Kaꞌũma. Iꞌe but g̃u wuywebe. Kaꞌũma ma cũg̃ ma Deus xe xipacat mujurũg̃rũg̃ap tomuju. Cũg̃ ma wuyju cexe Jesus Cristo kay wuyetabut puye acã. Imẽnpuye “Wararaꞌacat podi ma cũg̃ ma oceju bit” iꞌe baꞌore wuywebe. 
\v 28 Wuyju cũg̃ ma Deus xe xipacat mujurũg̃rũg̃ap tomuju g̃u- -Jesus Cristo kay wuyetabucap tomuju acã. Iboam wuyetaybit kuy. 
\v 29 Deus Judeuyũ mucũg̃ ojuy acã du? Ibuꞌu du Judeuꞌũmayũ mucũg̃ ãm? Kaꞌũma! Ibikuy ma. Soat itabucayũ mucũg̃ucũg̃ ixe- -Judeuyũ mucũg̃ucũg̃, Judeuꞌũmayũ mucũg̃ucũg̃ tak. 
\v 30 Imẽnpuye pũg̃ tag̃ ma Deus soat kug̃ ipi watwat kug̃. Jesus Cristo kay itabun puje acã Judeuyũ mucũg̃ucũg̃. Cekay itabun puje acã Judeuꞌũmayũ mucũg̃ucũg̃ tak. 
\v 31 Imẽneju:
\p — Moisés ekawẽn tag̃ g̃u ajeku- -Deus oꞌg̃uwẽn cebe iap ekawẽn tag̃ g̃u- -Jesus Cristo kay wuyetabut puye — iꞌũmg̃u juy ace. 
\m Cekay wuyetabut pima dak, kuyjeat ekawẽn cuy ibuyxim ajukuk.
\b
\c 4
\p
\v 1 — Ajoap tomuju Abraão cũg̃ ma osunuy Deus xe? — i du eyju eꞌem owebe?
\m Wuydobuꞌũm Abraãoꞌũm Judeuyũ dobuꞌũm. Apẽnpuye “Ẽn cũg̃ ma oxe” ioꞌe Deus cebe iam õn jeymutaybin. 
\p
\v 2 — Ẽn cũg̃ ma oxe — ioꞌe Deus Abraão be. 
\m Imẽn Deus eꞌem xipacat mug̃ẽg̃ẽap tomuju ibima: “Wararaꞌacat podi ma õn cũg̃ ma Deus xe” i kuka juk oꞌe Abraão. Imẽnpit xipacat mug̃ẽg̃ẽap tomuju g̃u “Cũg̃ ma ẽn oxe” ioꞌe Deus cebe. 
\m
\v 3 Imẽn eꞌem Deus ekawẽn tup: 
\mi Abraão bit itabut osunuy Deus kay, i. Deus tak oꞌe cebe “Cũg̃ ma ẽn oxe” i, cekay itabut puye, i.
\m Imẽn eꞌem Deus ekawẽn tup. 
\v 4 Wuyekapik puje wuyekapikaptei bubum wuyju. Teiꞌũm iũmꞌibit pupum g̃u wuyju. Wuyekariwa ceweroap wuyweju iap pupum acã wuyju. 
\v 5 Imẽn g̃u bit Deus wuykug̃. Deus eꞌem: 
\p — Ẽn cũg̃ ma oxe — i xipacat mug̃ẽg̃ẽꞌukat pe g̃u- -jekpot kay itabucat pe acã. 
\m Itabun puje acã:
\p — Ẽn cũg̃ ma oxe — iꞌeꞌem Deus ikẽrẽat mujurũg̃rũg̃ꞌuk osunuyiat pe. 
\m Ikẽrẽat mujurũg̃rũg̃ꞌuk osunuyiat cũg̃ ma Deus xe xipacat mug̃ẽg̃ẽap tomuju g̃u- -Jesus kay itabucap tomuju acã. 
\p
\v 6 — Ẽn cũg̃ ma oxe, xipacat mug̃ẽg̃ẽap tomuju g̃u, etabucap tomuju acã — iꞌeꞌem Deus. 
\m Imẽnpuye cũg̃at icokcok cĩcã eꞌem. Davi dak iboap cuk adi oꞌg̃uwẽnuwẽn. Imẽn Davi oꞌe:
\q
\v 7 Kuy bima kũyjobitꞌũm osunuy iat icokcok eꞌem Deus pe cebewi ikẽrẽat uk puje, i. Ikẽrẽat mujurũg̃rũg̃ꞌuk osunuyiat icokcok eꞌem Deus pe ikẽrẽat muꞌũm puje, i.
\v 8 Cũg̃at kay ibuꞌu tũibit icokcok eꞌem, i. Deus apẽn ixe juk adi ikẽrẽat oꞌg̃ujurũg̃rũg̃ iap kay g̃ebumꞌũm pima, icokcok eꞌem, i.
\m Imẽn Davi oꞌe kuyje.
\p
\v 9 — Icokcok ip eꞌem — i mo adi aꞌg̃u oꞌe Davi. 
Abuyũ icokcok soat em? Taypuꞌag̃obixeedakatꞌibiyũ acã du? Judeuyũ acã du? Kaꞌũma! Ixeedakatꞌũmꞌibiyũ dak icokcok ma- -Judeuꞌũmayũ. Imẽn eꞌem Deus ekawẽn tup:
\mi Abraão itabut oꞌe Deus kay, i. Deus oꞌe cebe “Ẽn cũg̃ ma oxe” i, cekay itabut puye, i.
\m
\v 10 Puje “Cũg̃ ma ẽn oxe” ioꞌe Deus Abraão be? Abraão jedaypuꞌag̃obixeedakacat puje du? Kaꞌũma! 
\p — Cũg̃ ma ẽn oxe — ioꞌe ixeedakatꞌũm pima. 
\m
\v 11 G̃uyjom acã oꞌjedaypuꞌag̃obixeedakacat Abraão. 
\p — Ẽn cũg̃ ma oxe — ioꞌe Deus Abraão be ixeedakacat awap ma. — Ẽn cũg̃ ma oxe — ioꞌe Abraão be, jekay itabut puye. 
\m G̃uyjom oꞌjedaypuꞌag̃obixeedakacat “Õn cũg̃ ma Deus xe wetabucap tomuju” iꞌe am soat pe wararaꞌacat pe. Abraão cũg̃ ma osunuy Deus xe itabut puye. Cũg̃ ma osunuy ixeedakacatꞌũm awap ma. Imẽnpuxim Judeuꞌũmayũ dak cũg̃ ma Deus xe itabun puje. Cũg̃ ma ip cexe ixeedakacat g̃u maꞌg̃u ip. Imẽneju Abraão ixeyũ ebay joꞌi Abraão etabucap coꞌi ip itabut Deus kay buye. 
\v 12 Judeuyũ etabun puje, cũg̃ ma ip Deus xe. Cũg̃ ma cexe jexeecukap tomuju g̃u, jetabucap tomuju acã. Abraão etabucap coꞌi ma ip itabut. Imẽneju Abraão ixeyũ ebay buxim Deus xe ixe buxim ixeedakacap tomuju g̃u- -ixe buxim itabucap tomuju acã.
\p
\v 13 — Waꞌõbi soat ka dag̃acat kukan ecesũy — i juk oꞌe Deus Abraão be. — Enaxeg̃ebitbit tak soat ka dag̃acat kukan jeꞌe ip — i juk oꞌe. — Soat eipi og̃ũm eywebe — i dak oꞌe Deus. Ibaꞌore soat pe wuywebe soat ekawẽn tag̃ jeku am- -wuyawẽwẽap ekawẽn tag̃. Imẽnpuye Deus oꞌe: “Xipacat og̃ũm ewebe,” i Abraão be wuyawẽwẽap ekawẽn tag̃ cekuap tomuju g̃u- -itabucap tomuju acã; cũg̃ ma Deus xe iap tomuju dak. 
\v 14 Imẽnpuye Deus xipacat ũmũm wuyawẽwẽap ekawẽn tag̃ jekukuꞌukayũ be acã g̃u. Ixeyũ be acã iũmũm pima, teꞌe ma kuka juk ace wuyetabut Jesus Cristo kay; teꞌe ma dak kuka juk Deus oꞌe wuywebe “Xipacat og̃ũm eywebe” i. 
\v 15 Imẽn Deus ipiatpiꞌajojoan jekawẽn kay kũyjobitꞌũmayũ be. 
\p — Kũyjobit g̃u eyju wekawẽn kay — i g̃u bit eꞌem cekawẽn coꞌũmayũ be, itaybit g̃u ip cekawẽn puye.
\p
\v 16 Imẽneju Deus tacup g̃u. 
\p — Xipacat og̃ũm ewebe, okay etabut puye — i juk oꞌe wuydobuꞌũm pe- -Abraãoꞌũm pe. 
\m Deus soat em jaꞌõ dag̃ eꞌem wuywebe. Imẽnpuye soat itabucayũ xipacat jeꞌjat Deus xewi Abraão buxim. 
\p — Soat em wekawẽn kay kũyjobicayũ be acã xipacat og̃ũm — iꞌũmg̃u oꞌe Deus. — Soat pe okay itabucayũ be xipacat og̃ũm — i acã oꞌe. 
\m Imẽneju Abraão wuyebay buxim Deus xe, ixe etabucap coꞌi wuyetabut puye. 
\v 17 Imẽn eꞌem Deus ekawẽn tup: 
\mi Waꞌõbi ade ka watwat jeꞌe “Abraão wuyebay joꞌi Deus xe, ixe etabucap coꞌi wuyetabut puye,” i, ioꞌe Deus Abraão be, i.
\m Abraão itabut osunuy Deus kay. Ixe Deus waram ceꞌũꞌũayꞌu mutaicin. Kaꞌũmg̃u osodop iat mubapukpug̃ ixe. Ixe Deus jaꞌõ dag̃ ma juk adi Abraão kug̃ osunuy.
\p
\v 18 — Enaxeg̃ebitbit ma jeedop ade jĩjã — i juk oꞌe Deus Abraão be. — Waꞌõbi ade ka watwat kukukan ecesũy — ioꞌe. 
\m Iboap kay itabut osunuy Abraão. 
\p — Deus jaꞌõ dag̃ jeꞌe owebe — i juk adi oꞌe Abraão jewebe ma.
\m Itabut cĩcã osunuy imujurũg̃ paꞌoren maꞌg̃u ipot aypa buye. Owebe jekpot ũmap wiwim osunuy Deus cebe. 
\v 19 Ixe aypa jĩjã osunuy. Ijasũn 100 koatoap wi osunuy. 
\p — Okpotpet put g̃u ma oce aypa oce buye — ioꞌe jewebe ma. — Otayxi Sara dak iꞌitꞌet put g̃u oꞌe yabut puye — ioꞌe jewebe ma.
\m Inaka itabutbũt g̃u osunuy Deus ekawẽn kay- -itabut cĩcã ma.
\p
\v 20 — Deus okpon jeꞌg̃ũm g̃u — iꞌũmg̃u oꞌe Abraão. — Jeꞌg̃ũm paxi? — iꞌũmg̃u dak oꞌe. 
\m Ixe bit itabut cĩcã osunuy Deus okpon jeꞌg̃ũm iap kay aypa maꞌg̃u. Jewaꞌõmucanucan osunuy, itabut Deus kay buye. Imẽnpuye:
\p — Ẽn soat podi ma xipan okug̃ — iꞌeꞌeꞌuk osunuy Deus pe. 
\v 21 — Soat ibaꞌore g̃u Deus pe — iꞌeꞌeꞌuk osunuy Abraão. — Jaꞌõ dag̃ em owebe — iꞌeꞌeꞌuk osunuy. — Okpon jeꞌg̃ũm jaꞌõbacaan iꞌeꞌeꞌuk osunuy jewebe ma. 
\v 22 Imẽne ju:
\p — Ẽn cũg̃ ma oxe — i juk oꞌe Deus cebe.
\m Imẽn Deus oꞌe Abraão itabut osunuy buye. 
\v 23 Ixe cũg̃ ma osunuy Deus xe iap ibararak opop Deus ekawẽn tup pe. Abraão cũg̃ ma osunuy jetabucap tomuju iaptup oꞌtupmubararak kuyjeayũ. Kuyjeayũ mutaybit am acã g̃u ibodup oꞌtupmubararak ip. 
\v 24 Wuymutaybit am tak ibodup oꞌtupmubararak ip. 
\p — Eyju cũg̃ ma oxe — i jeꞌe Deus wuywebe, ixe kay wuyetabun puje.
\m Ixe Deus Jesus oꞌg̃utait ceꞌũap tomukadi. Wuykukukat oꞌg̃utait waram. 
\v 25 Deus Jesus oꞌg̃udot ijodi ceꞌũ ãm. Oeꞌũ ikẽrẽat uk am wuywebewi. Jesus oꞌg̃utait ceꞌũap tomukadi Deus pe “Cũg̃ ma eyju oxe” iꞌe am wuywebe- -oꞌg̃utaitꞌiat kay itabucayũ be.
\b
\c 5
\p
\v 1 Imẽneju Deus eꞌem wuywebe: — Cũg̃ ma eyju oxe — i, Jesus Cristo kay wuyetabut puye. Kuy bima kabaꞌũm ajop Deus eju wuyetabutꞌũm pima. G̃asũ bit kabaꞌũm ace Deus eju wuykukukat Jesus Cristo kay wuyetabut puye. 
\v 2 Jesus Cristo kay juk oꞌe jebay be: 
\p — Teyũku itabut okay — i. 
\m Imẽnpuye Deus xipan wuykug̃. Wuycokcok cĩcã ixe xipat wuykay buye. G̃uyjom Deus dipap coꞌi acesop. Wuycokcok cĩcã iboap wiwim. 
\v 3 Iboap wiwim pima wuyju ipiatpiꞌajojom ijodi. Wuyetaybit wuyetaxi acesop ipiatpiꞌajojom puye iam. Imẽnpuye ipiatpiꞌajojom pima dak wuycokcok wuyju eꞌem. 
\v 4 Ipiatꞌajoam wuyetaxi bima, Deus eꞌem wuywebe:
\p — Xipat cĩcã eyju oxe — i. 
\m Deus “Eyju xipat cĩcã oxe” iꞌeꞌem pima, wuycokcog̃ acesop Deus xe acesop soat em iap wiwi am. 
\v 5 Jewemug̃uykukukum g̃u wuyju Deus coꞌi acesop iap wiwi am. Ixe jebiõg̃buk oꞌg̃uõm wuywebe- -xipacat oꞌg̃uõm. Oꞌg̃uõm wuymukũyjo am eykukpin cĩcã oxe iam.
\p
\v 6 Wuywebe xipacat mug̃ẽ baꞌore bima Cristo oeꞌũ wuydaxijo am. Wuywebeam ixe oeꞌũ xipatꞌũmayũ beam. Deus “Ejeꞌũ juy” iꞌe buje, oeꞌũ. 
\v 7-8 Deus xe wuykukpin cĩcã. Imẽnpuye ixe jekpot oꞌg̃udot ceꞌũ ãm wuywebeam. Wuyju ma wuybuꞌu jeꞌũ ãm wararaꞌacat eꞌũap puxim, cũg̃ maꞌg̃u ip jekukum, xipacat mug̃ẽg̃ẽm maꞌg̃u ip. Cristo bit ibuꞌu g̃u osunuy jeꞌũ ãm wuywebeam ikẽrẽat mujurũg̃rũg̃ maꞌg̃u wuyju. 
\v 9 G̃asũ wuyju cũg̃ ma Deus xe wuywebeam Cristo oeꞌũ buye- -oꞌjedoyekereren puye. Cristo bureyũ ma wuyju bit g̃asũ. Imẽnpuye Deus wuymuju g̃u ipiatꞌajojoap kay. 
\v 10 Wuyetakoma juk adi ajop Deus kay. Deus pit wuymuwexat jebureyũm wuywebeam ipot oeꞌũ buye. G̃asũ bit Cristo waram itait oꞌe. Deus wuydaxijo Cristo itait puye, wuyju ibureyũ buye dak. 
\v 11 Wuykukukat Jesus Cristo juk wuymuwexat Deus bureyũm, ixe xe wuykukpin puye, wuywebeam oeꞌũ buye dak. Imẽnpuye:
\p — Obureyũ eyju — iꞌeꞌem Deus wuywebe. 
\m Imẽnpuye soat podi ma wuycokcok, wuyju Deus bureyũ buye.
\p
\v 12-19 Imẽnpit ipi watwat ikẽrẽat mujurũg̃rũg̃ꞌuk osodop ip Deus jekawẽn muwẽn awap Moisés pe. Deus pit ipiat oꞌsupiꞌajoat g̃u cebe ip jekawẽn tag̃ g̃u juk adi oekuku ip iap teim, Moisés pe wuyawẽwẽap ekawẽn muwẽn awap. Adão koap ikẽrẽat oꞌg̃ujurũg̃. Soat ipi watwat oꞌjebapuk ixe Adão bewi. Soat ixe ebekitkiyũ ikẽrẽat mujurũg̃rũg̃ꞌukayũm oꞌe Deus xe ixe ikẽrẽat oꞌg̃ujurũg̃ puye.
\p — Ikẽrẽat mujurũg̃rũg̃ꞌukayũ jeꞌũ — i juk oꞌe Deus Adão be. 
\m Imẽnpuye soat ipi watwat jeꞌũꞌũm g̃asũ dak. Soat wuyeꞌũꞌẽ ace Adão buxim wuyju dak ikẽrẽat mujurũg̃rũg̃ puye. Soat cebekitkiyũ ikẽrẽat oꞌg̃urũg̃rũg̃ Adão juk ikẽrẽat oꞌg̃ujurũg̃ iap coꞌiꞌũmg̃u. Inaka oeꞌũꞌũ ip soat- -Adão badipyũ, Moisés badipyũ dak. Oeꞌũꞌũ ip Adão koap ikẽrẽat oꞌg̃ujurũg̃ puye. Soat Adão ebekitkiyũ ikẽrẽat mujurũg̃rũg̃ꞌukayũm oꞌe Deus aꞌõ kay kũyjobitꞌũm ip puye. Adão kũyjobitꞌũm pima, soat ixe ebekitkiyũ dak kũyjobitꞌũmayũm oꞌe Deus xe. Imẽneju soat ipi watwat ikẽrẽat kug̃ oꞌe Deus xe pũg̃ ag̃okatkat ikẽrẽat oꞌg̃ujurũg̃ puye.
\p Soat Adão ebekitkiyũ ixe buxim oꞌe- -ikẽrẽat kug̃. Imẽnpuxim Jesus Cristo kay itabucayũ ixe buxim eꞌem- -ikẽrẽat kug̃ g̃u. Ixe Jesus Cristo oeꞌũ ikẽrẽat uk am ipi watwat pewi- -soat uk am. Imẽnpuye soat em itait jeedop ip Deus xe cekay itabucayũ. Adão kũyjobitꞌũm oꞌe Deus aꞌõ kay. Imẽnpuye soat ixe naxeg̃ebitbit jeꞌũꞌũm. Jesus Cristo bit kũyjobit osunuy Deus aꞌõ kay. Imẽnpuye soat em Deus xe itait jeedop ip cekay itabucayũ. Pũg̃ ag̃okatkat kũyjobitꞌũm osunuy Deus aꞌõ kay. Imẽnpuye adeayũ ikẽrẽat mujurũg̃rũg̃ꞌukayũm oꞌe Deus xe. Kũyjobitꞌũm cĩcã ip osodop Adão buxim. Waraꞌat pit kũyjobit cĩcã osunuy Deus aꞌõ kay. Imẽnpuye Deus jeꞌe adeayũ be:
\p — Eyju cũg̃ ma oxe — i. 
\m Ixeyũ adeayũ kũyjobit Jesus Cristo buxim. Jewejojoꞌi g̃u bit osodop ip Adão Cristo eju. Jesus xipan wuykug̃ wararaꞌacat podi ma. Ade Adão ebekitkiyũ bit oꞌju ipiatꞌajojoap pe ixe pũg̃ em ma ikẽrẽat oꞌg̃ujurũg̃ puye. Deus pit soat podi ma xipan wuykug̃. Imẽnpuye Cristo oꞌg̃udot ikẽrẽat uk am soat pewi- -ijodiacat pewi. Deus teiꞌũma adeayũ daxijojom ijodiacayũ daxijojom, pũg̃ em ma Cristo oeꞌũ buye. Adão pũg̃ ma osunuy. Soat ixe ebekitkiyũ ikẽrẽat mujurũg̃rũg̃ꞌukayũm oꞌe Deus xe, Adão ikẽrẽat oꞌg̃ujurũg̃ puye. 
\p — Ikẽrẽat kug̃ eyju oxe — iꞌeꞌem Deus soat pe Adão ebekitkiyũ be Adão pũg̃ em ikẽrẽat oꞌg̃ujurũg̃ puye. Deus eꞌem taxijoꞌibiyũ be bit: 
\p — Ikẽrẽat kug̃ g̃u eyju oxe — i, ade em maꞌg̃u ip ikẽrẽat oꞌg̃ujurũg̃rũg̃. — Webekitkiyũ eyju — iꞌeꞌem cebe ip, ixe xipat wuykay buye. 
\m Pũg̃ ag̃okatkat imẽn ikẽrẽat oꞌg̃ujurũg̃- -Adão. Imẽnpuye soat wuyeꞌũꞌẽ ace. Waraꞌacat pit ikẽrẽat kug̃ g̃u oeꞌũ- -Jesus Cristo. Imẽnpuye soat podi ma Deus xipan wuykug̃. 
\p — Cũg̃ ma eyju oxe — iꞌeꞌem wuywebe- -Jesus Cristo kay itabucayũ be. 
\m Imẽneju soat em wuyetait acesop Deus xe. Soat kukukan acesop Cristo eju. Jesus eꞌeap Adão eꞌeap podi ma xipacat kug̃.
\p
\v 20-21 Imẽntak Deus jekawẽn oꞌg̃uwẽn Adão ebekitkiyũ mukũyjo am eyju ikẽrẽat mujurũg̃rũg̃ cĩcã iam. Ipi watwat pit big̃ ma ikẽrẽat oꞌg̃ujurũg̃rũg̃. Soat ipi watwat jeꞌũꞌũm ikẽrẽat mujurũg̃rũg̃ puye. Jeꞌũ buje ip wũy ma dopdom Deus wi. Deus pit wararaꞌacat podi ma xipan wuykug̃. Ixe Cristo oꞌg̃udot ceꞌũ ãm ikẽrẽat uk am wuywebewi. Imẽnpuye wuyeꞌũ buje soat wuyju Deus xe wuyetait acesop, wuykukukat Jesus Cristo kay wuyetabun puje. Wuykukukat Jesus Cristo xe ma acesop soat em wuyetait
\b
\c 6
\p
\v 1 — Deus pit big̃ ma xipan wuykug̃ big̃ maꞌg̃u wuyju ikẽrẽat mujurũg̃rũg̃ — i õn eꞌem eywebe. 
\m Imẽnpuye: 
\p — Big̃ ma juy ikẽrẽat ag̃ujurũg̃rũg̃, big̃ ma Deus xipan wuykuk am — i du eyju eꞌem owebe? 
\m
\v 2 Imẽn g̃u juy eꞌem! Ceꞌũat jepidowatwan g̃u oꞌe. Imẽnpuxim wuyju dak ikẽrẽat mujurũg̃ pin g̃u aceꞌe Cristo kay wuyetabut puye. 
\v 3 Wuymubatisan puje, g̃asũ bit Jesus Cristo eju mũg̃ꞌi ojeku iap mubapukpug̃ wuyju soat pe wuyjojoayũ be. Ikẽrẽat mug̃ẽg̃ẽap acepere kuy apẽn ceꞌũat jepidowatwanap epererem. Kuy eyetaybit iboam. 
\v 4 Jesus eju kuy ip wuykot iap puxim ikẽrẽat mug̃ẽ pin g̃u aceꞌe, ceweju kuy ajeꞌũ iap puxim tak. Iboap mubapukpug̃ wuyju wuymubatisan puje. Cristo oeꞌũ jebay bikuyap tag̃. Wuyju dak Jesus Cristo bikuyap tag̃ ajeku g̃asũ bit. Jaꞌõbacaan Deus ixe waram oꞌg̃utait. Soat podi ma Deus yaꞌõbaca, idip tak. Jesus puxim wuyju dak acejetait waram. Imẽneju g̃asũ dak wuyag̃uyꞌisum ajeku.
\p
\v 5 Imẽntak Cristo jekpiwatpin ma oeꞌũ korosa be. Imẽnpuxim wuyju dak wuyukpiwatpin ma ikẽrẽat ag̃ujurũg̃ g̃u. Deus jaꞌõbacaap oꞌjomõg̃ Cristo be waram imutait puje. Imẽnpuxim wuyju dak Cristo aꞌõbacaap kug̃ g̃asũ. Ikẽrẽm cuk adi ajekuku iap kuy juk acepere. Wuyag̃uyꞌisum wuyju jekukum g̃asũ bit ixe aꞌõbacaap kug̃ puye. 
\v 6 Kuy bima juk adi ikẽrẽat ag̃ujurũg̃rũg̃. Soat em ikẽrẽat mujurũg̃rũg̃ꞌuk cuk adi ajop. Imẽn jewemudadaybotbon cuk adi ajekuku. Cekariwa be imudadaybotbotꞌibit enapõn paꞌoreap puxim ikẽrẽat mujurũg̃rũg̃ap epereap paꞌore osunuy wuywebe. G̃asũ bit ikẽrẽm cuk adi ajekuku iap acepere Jesus aꞌõbacaap kug̃ puye. Korosa be Jesus oeꞌũ jaꞌõbacaap muõm ãm wuywebe ikẽrẽat mujurũg̃ap puxim. Imẽnpuye ikẽrẽat ag̃ujurũg̃ g̃u g̃asũ bit. 
\v 7 Ikẽrẽat mujurũg̃rũg̃ap epere but wuywebe. Ceꞌũat jepidowatwanap epereperem. Imẽnpuxim wuyju dak ikẽrẽat mujurũg̃rũg̃ap acepere kuy. Cekariwa be imudadaybotbotꞌibiyũ buximayũ g̃u wuyju g̃asũ bit. 
\v 8 Cristo jekpiwatpin ma oeꞌũ. Wuyju dak wuyukpiwatpin ma ikẽrẽm cuk adi ajekukuiap acepere. Imẽneju wuyetabut soat em wuyetait acesop Cristo xe iap kay. 
\v 9 Deus Cristo waram oꞌg̃utait ceꞌũap tomukadi. Waram pit jeꞌũ g̃u. Abu-be ixe imuyꞌũ but? Kaꞌũma be ma! Kuy wuyetaybit iboam. 
\v 10 Pũg̃ em ma ixe oeꞌũ. Oeꞌũ ikẽrẽat uk am soat pewi wuywebewi. Waram pit jeꞌũ g̃u. G̃asũ bit itabẽg̃ omuy soat em Deus bikuyap tag̃ jeku am. 
\p
\v 11 — Ikẽrẽm cuk adi ajekukuiap kuy acepere — i juy epeꞌeꞌe eyewewebe. — Ikẽrẽat ag̃ujurũg̃ g̃u g̃asũ bit — i juy epeꞌeꞌe. — Ceꞌũat g̃ebum g̃u oꞌe ikẽrẽat mug̃ẽap kay — i. — Wuyju dak cuy g̃ebum g̃u ace ikẽrẽat mug̃ẽap kay — i juy epeꞌeꞌe eyewewebe. — Deus bikuyap tag̃ acã ajeku g̃asũ bit — i juy epeꞌeꞌe eyewewebe. — Mũg̃ꞌi wuykukukat Jesus Cristo eju ajeku g̃asũ bit — i juy epeꞌeꞌe eyewewebe.
\p
\v 12 Imẽneju g̃ebum g̃u juy epesop ikẽrẽat mujurũg̃rũg̃ap kay. Ikẽrẽat epeg̃ug̃ẽ g̃u eyjebit tag̃. Ikẽrẽat epeg̃ug̃ẽ g̃u eybinũnpe. Eybikuyap tag̃ g̃u juy epeku- -Deus bikuyap tag̃ acã. 
\v 13 Ikẽrẽat mujurũg̃rũg̃ꞌukayũ cucum ipiatꞌajojoap kay. Yag̃uyꞌisum jekukuꞌukayũ bit kabi kay cucum. Kuy bima ikẽrẽat mujurũg̃rũg̃ꞌuk cuk adi epesop. G̃asũ bit eyag̃uyꞌisum eyju jekukum. Imẽnpuye:
\p — Ẽn ocekukan — iꞌũmg̃u juy epeꞌe Satanás pe. — Ikẽrẽat oceg̃ujurũg̃ aꞌõbi — iꞌũmg̃u juy epeꞌe Satanás pe ma. Deus pe bit:
\p — Ẽn acã ocekukukan soat em — i juy epeꞌe. — Aꞌõbacaap cuy eg̃uõm ocewebe cũg̃ ma oceku am — i juy epeꞌe cebe.
\m
\v 14 G̃asũ bit cũg̃ ma wuyju Deus xe kuyat ekawẽn tag̃ wuyju jekukum puye g̃u- -Deus xipan wuykug̃ puye acã. Imẽnpuye ikẽrẽat ag̃ujurũg̃ g̃u. 
\p — Ẽn ma ocekukan — iꞌũmg̃u aceꞌe Satanás pe.
\p
\v 15 G̃asũ bit cũg̃ ma wuyju Deus xe kawẽn kuyat tag̃ wuyju jekukum puye g̃u- -wuyawẽwẽap ekawẽn tag̃ wuyju jekukum puye g̃u dak. Deus xipan wuykug̃ puye acã wuyju cũg̃ ma Deus xe. Imẽnpuye:
\p — Ag̃ug̃ẽ juy waram ikẽrẽat! — i du eyju eꞌem? 
Imẽn g̃u juy eꞌem! 
\v 16 “Ocekariwam cuy ece” i eyꞌe buje ag̃okatkat pe, eyekariwam jeꞌe. Kũyjobin epesop yaꞌõ kay. Eyekariwa epeyepere g̃u ikukpin cĩcã eyxe buye. Imẽnpuxim ikẽrẽat mujurũg̃rũg̃ꞌukayũ ikẽrẽat mug̃ẽap epereperem g̃u, ikẽrẽat kay jĩjã ip puye. Imẽnpuye soat em Deus wi wũy jeedop ip jeꞌũ buje. Deus aꞌõ kay kũyjobicayũ bit cũg̃at ekawẽn epereperem g̃u Deus aꞌõ kay jĩjã ip puye. Imẽnpuye cũg̃ ma ip Deus xe. Deus xe itait jeedop ip jeꞌũ buje. Kuy eyetaybit cĩcã iboam. 
\v 17 Kuy bima juk adi Satanás aꞌõ kay kũyjobit epesop. Kawẽn idipat co buje bit, eyetabun epesop iboap ekawẽn kay. Iboap ekawẽn icẽmãn. Eycokcog̃ epesop iboap ekawẽn kay am. Eybikuy jĩjã iboap ekawẽn tag̃ jeku am. Imẽneju: 
\p — Bay, ẽn xipat cĩcã — i oceju eꞌem Deus pe. 
\m
\v 18 Deus kuy jaꞌõbacaap oꞌg̃uõm eywebe waram Satanás aꞌõ kay kũyjobicap puxim. G̃asũ bit Deus aꞌõ kayayũm epesop. Eybikuy epesop ikẽrẽat mug̃ẽ ãm g̃u- -xipacat mug̃ẽ ãm acã. 
\v 19 Kawẽn ibapukan õn kawẽnwẽn eywebe, apẽn ikẽrẽat acepere wuyag̃uyꞌisum wuyeku am iap ibaꞌarẽm eyxe buye. Kuy bima juk adi ikẽrẽat kay g̃ebum epesop. Ikẽrẽat mujurũg̃rũg̃ cuk adi epekuku. Xipatꞌũmayũ kukukat aꞌõ kay kũyjobin epesop. G̃asũ bit cũg̃ ma juy epeku. Xipacat kay juy g̃ebum epesop. Deus aꞌõ kay juy kũyjobin epesop.
\p
\v 20 Ikẽrẽat mujurũg̃rũg̃ꞌuk pima, Deus bikuyap tag̃ g̃u epeku. 
\v 21 Xipacat tu epejat ikẽrẽat mujurũg̃rũg̃apteim? Kaꞌũma! Eyetaybit ikẽrẽat mujurũg̃rũg̃ꞌukayũ soat em Deus wi wũy ma jeedop ip iam. G̃asũ bit eysũsũn epeꞌe ikẽrẽat mujurũg̃rũg̃ꞌuk puye. 
\v 22 Deus aꞌõ kay kũyjobicayũm epesop g̃asũ bit. Deus kuy jaꞌõbacaap oꞌg̃uõm eywebe waram ikẽrẽat mug̃ẽap puxim. Soat em eyju ixe mucokcokcog̃ g̃asũ bit. Eyeꞌũ buje soat em Deus xe eyetait epesop. 
\v 23 Kapikpikꞌukat jekapikaptei bubum. Imẽnpuxim ikẽrẽat mujurũg̃rũg̃ꞌukat Deus wi wũy ma jeenuy jeꞌũ buje. Ixe wi wũy ma jeenuy ikẽrẽat oꞌg̃ujurũg̃rũg̃iap teim.
\p — Soat em oxe eyetait epesop — iꞌeꞌem Deus wuywebe bit, wuykukukat Jesus Cristo eju mũg̃ꞌi wuyju jekukum puye. 
\m Soat em ixe xe wuydopap teiꞌũmat coꞌi. Kapikpig̃ g̃u wuyju iboap pu am. Teiꞌũma Deus iũmũm wuywebe.
\b
\c 7
\p
\v 1 Okitpitpiyũ, eyetaybin put apẽn õn em iam eyetaybit wuyawẽwẽap ekawẽn puye. Wuyetabẽg̃ pima acã wuyawẽwẽap ekawẽn tag̃ wuyju jekukum. Wuyeꞌũ buje bit ibaꞌore eꞌem. 
\v 2 Imẽnpuxim “Ayacat itoptep pima, jektop xe ma juy jeenuy itop itait pima” iꞌeꞌem iboap ekawẽn. “Ektop eperem g̃u juy waraꞌat pu am” iꞌeꞌem iboap ekawẽn. Itop eꞌũ buje bit, ite ayacat itoptepꞌũmat coꞌi eꞌem. Wuyawẽwẽap ekawẽn mupubutbun g̃u waraꞌat pu buje itopꞌũm kuy oeꞌũ buye. 
\v 3 Waraꞌat pu buje jektom koapat itop itait pima bit, ikẽrẽat mug̃ẽg̃ẽm koapat pe jektop pe. Itopꞌũm eꞌũ buje bit, ayacat ikẽrẽat mug̃ẽg̃ẽm g̃u waraꞌat pu buje. Wuyawẽwẽap ekawẽn kuka oꞌg̃upubun g̃u waraꞌat pu buje. 
\v 4 Okitpitpiyũ, ixe ayacat puxim eyju. Wuyawẽwẽap ekawẽn koapatꞌũm itopꞌũm puxim- -kawẽn kuyat. Jektopꞌũm eꞌũ buje jektop eju g̃u eꞌem ayacat. Imẽnpuxim wuyju dak kawẽn kuyat tag̃ g̃u wuyju jekukum g̃asũ bit, Jesus Cristo ekawẽn tag̃ acã. Ixe ekawẽn tag̃ wuyju jekukum wuyju Cristo jebitꞌin puye. Ixe ebekitkiyũm acesop g̃asũ. Deus waram ixe oꞌg̃utait. 
\v 5 Kuy bima wuyekpiwatpin ma juk adi ajekuku. Imẽnpit wuyawẽwẽap ekawẽn co buje, wuybikuy juk adi ajop- -ikẽrẽat mujurũg̃ ãm acã. Wuybuꞌu juk adi ajop kũyjobit am iboap ekawẽn kay. Ikẽrẽm wuyekuap epereꞌũm pima, wũy ma kuka juk ajop Deus wi. 
\v 6 Kuy bima wuyawẽwẽap ekawẽn tag̃ cuk adi jeku ojuy ajop correntebum taomũnmũnat puxim. G̃asũ bit Jesus oeꞌũ wuywebeam. Imẽnpuye g̃asũ bit Deus bikuyap tag̃ wuyeku but. Ixe bikuyap tag̃ wuyju jekukum g̃asũ, “Obikuyap tag̃ cuy epeku” iap ibararak opop kawẽn kuyatup pe buye g̃u- -ixe biõg̃buk wuymuisusun puye acã.
\p
\v 7 — Kawẽn kuyat pit ikẽrẽ — i du aceꞌe? — Wuyawẽwẽap ekawẽn pit ikẽrẽ — i du aceꞌe? 
\m Imẽn g̃u juy ace- -pũg̃ em tak kaꞌũma. Wuyawẽwẽap ekawẽn cuk adi omutaybitbin apẽn ikẽrẽ Deus xe iam. Wuyawẽwẽap ekawẽn wuymutaybitbin eyetabikukum g̃u juy epesop wararaꞌacat pubut kay iam. Iboap ekawẽn coꞌũm pima, kuka juk wuyetaybit g̃u ikẽrẽ Deus xe wuyetabikukuap iam. 
\v 8 Iboap ekawẽn co buje bit, wuyetaybit cuk ace ikẽrẽ Deus xe wuyetabikukuap iam. Imẽnpit big̃ ma juk adi wuyetabikukum ace wararaꞌacat pubut kay iboap ekawẽn cocom maꞌg̃u wuyju. Iboap ekawẽn wuyetaybitꞌũm pima, wuyetaybit g̃u kuka ace apẽn ikẽrẽ Deus xe iam. 
\v 9 Kuy bima õn tak wetaybit g̃u juk adi og̃uy wuyawẽwẽap ekawẽn. Tũybe xipat cĩcã õn Deus xe iãn cuk adi oce. Iboap ekawẽn wetaybin puje bit, ikẽrẽat kug̃ õn Deus xe iam tak wetaybit oce. 
\v 10 Deus ibikuy osunuy soat ipi watwat pe top am ip soat em jexe itait. Imẽnpuye jekawẽn oꞌg̃uwẽn wuyawẽ ãm. Imẽnpit ikẽrẽat kug̃ õn iam wetaybin puje:
\p — Ibaꞌore owebe Deus xe onuy ãm ikẽrẽat kug̃ puye — i juk oce owebe ma. — Wũy ma og̃uy Deus wi soat em, ikẽrẽat kug̃ puye — i juk oce owebe ma. 
\m
\v 11 Tũybe xipat õn Deus xe iãn cuk adi oce kuy bima. Imẽnpit ikẽrẽat mujurũg̃rũg̃ꞌuk cuk adi og̃uy. Imẽn cuk adi ocewemug̃uykuku, ikẽrẽat mujurũg̃ ojuy buye. Wuyawẽwẽap ekawẽn wetaybin puje bit, “Ikẽrẽat kug̃ õn Deus xe” i juk oce owebe ma.
\p — Wũy ma og̃uy cewi — i juk oce owebe ma.
\p
\v 12 Inaka iboap ekawẽn xipat- -wuyawẽwẽap ekawẽn. Ikẽrẽat kug̃ g̃u. Soat ekawẽn tag̃ xipat. Cũg̃ cĩcã iboap ekawẽn. Cekawẽntip cĩcã dak. 
\v 13 Wuyawẽwẽap ekawẽn wetaybicap tomuju g̃u Deus wi wũy ma og̃uy. Soat em õn ikẽrẽat kug̃ iap tomuju acã cewi wũy ma og̃uy. Iboap ekawẽn xipat cĩcã. Imẽnpit iboap ekawẽn wuymutaybitbin soat ipi dag̃acat ikẽrẽat mujurũg̃rũg̃ iam. Iboap ekawẽn wetaybitꞌũm pima, tũybe xipat õn Deus xe iãn cuk adi oce. Iboap ekawẽn wetaybin puje bit, “Ikẽrẽat kug̃ õn Deus xe,” i juk oce owebe ma.
\p
\v 14 Wuyetaybit Deus jebiõg̃buk aꞌõbi wuyawẽwẽap ekawẽn oꞌg̃uwẽn wuywebe iam. Õn pit ijodiat ma. Obuyxi g̃u õn pit. Ikẽrẽat mujurũg̃rũg̃ꞌukat õn pit. 
\v 15 Xipacat mujurũg̃ pin maꞌgu oxe. Õn pit xipacat mujurũg̃rũg g̃u. Ikẽrẽat mujurũg̃ pin g̃u maꞌg̃u oxe. Õn pit ikẽrẽat mujurũg̃rũg̃. Wetaybit g̃u apẽnpuye imẽn õn jekukum iam. 
\v 16 E buꞌuap tag̃ õn jekukum obuꞌu maꞌg̃u jekum. Imẽnpuye wetaybit wuyawẽwẽap ekawẽn cũg̃ ma iam. Cũg̃ g̃u maꞌg̃u õn pit iam tak wetaybit. 
\v 17 Imẽneju okpiwatpi g̃u õn ikẽrẽat mujurũg̃rũg̃. Imẽnpit ikẽrẽat opop obinũnpe. Imẽnpuye obinũn pewi ma õn ikẽrẽat mujurũg̃rũg̃. 
\v 18 Wetaybit kaꞌũmg̃u xipacat opop owebe iam. Obikuy jĩjã xipacat mujurũg̃ ãm. Inaka xipacat mujurũg̃ paꞌore owebe. 
\v 19 Imẽn obikuy jĩjã xipacat mujurũg̃ ãm. Inaka imujurũg̃rũg̃ g̃u õn. Obuꞌu jĩjã ikẽrẽat mujurũg̃ ãm. Inaka soat em ma imujurũg̃rũg̃ õn. 
\v 20 E buꞌuap tag̃ acã õn jekukum. Okpiwatpi g̃u õn ikẽrẽat mujurũg̃rũg̃. Ikẽrẽat mujurũg̃rũg̃ õn ikẽrẽat opop obinũnpe buye.
\p
\v 21 Xipacat mujurũg̃ ojuy bima, imujurũg̃ paꞌore owebe xipatꞌũmat opop obinũn pe buye. Imẽg̃ap ibapuk cĩcã oxe. 
\v 22 Deus ekawẽn kay jĩjã õn- -soat ekawẽn kay jĩjã- -wuyawẽwẽap ekawẽn kay jĩjã. 
\v 23 Obikuy jĩjã ma xipacat mujurũg̃ ãm. Imẽnpit:
\p — Ikẽrẽat og̃ujurũg̃ ojebin — i õn eꞌem owebe ma, ikẽrẽat opop obinũnpe buye.
\m Taomũnmũnat puxim õn. Taomũnmũnat pe ibaꞌore ijẽm ãm daomũnmũnapꞌa bewi taomũnmũn puye. Imẽnpuxim xipacat mujurũg̃rũg̃ paꞌore owebe obacaꞌũm puye. 
\v 24 Imẽnpuye og̃uycũg̃ cĩcã. Abu kuka omubacan owebe ikẽrẽat mujurũg̃ap puxim- -soat em ipiatꞌajojoap pe onuyap puxim? 
\v 25 Wuykukukat Jesus Cristo soat podi ma yaꞌõbacaat. Ixe ma juy omubacan. Imẽnpuye: 
\p — Ẽn xipat cĩcã — i õn eꞌem Deus pe.
\p Kũyjobit cĩcã õn e ojuy Deus aꞌõ kay. Õn acã bima bit, kuka juk ikẽrẽat acã og̃ujurũg̃- -Jesus Cristo aꞌõbacaap kug̃ꞌũm pima.
\b
\c 8
\p
\v 1 Imẽneju Deus Jesus Cristo eju mũg̃ꞌi jekukuꞌukayũ g̃uju g̃u ipiatꞌajojoap kay. 
\v 2 Deus cuk jaꞌõbacaap oꞌg̃uõm wuywebe waram ikẽrẽat mug̃ẽap puxim. Imẽn Ibiõg̃buk xipacat wuymuisusun, wuyju Jesus Cristo eju mũg̃ꞌi jekukum pima. Imẽneju aceju g̃u ipiatꞌajojoap kay. 
\v 3 Ibaꞌore wuyeku am wuyawẽwẽap ekawẽn tag̃, wuyaꞌõbacaꞌũm puye. Imẽnpuye kaꞌũma ma cũg̃ ma Deus xe iboap ekawẽn tag̃ jekuap tomuju. Deus pit jekpot oꞌg̃udot ijodi. Ijodian oꞌe. Ikẽrẽat mujurũg̃rũg̃ꞌukat coꞌian oꞌe, ikẽrẽat kug̃ g̃u maꞌg̃u. Imẽn ixe wuywebewi ikẽrẽat ukaptei oꞌteida jeꞌũ buje. Oꞌteida jaꞌõbacaap ũm ãm wuywebe ikẽrẽat mug̃ẽap puxim. 
\v 4 Imẽn oꞌteida wuywebe wuyawẽwẽap ekawẽn tag̃ wuyeku am. G̃asũ wuyaꞌõbacaap kug̃ g̃u wuyju jekukum- -Deus aꞌõbacaap kug̃ acã. Ibiõg̃buk xipacat aꞌõ dag̃ tak wuyju jekukum. Imẽnpuye wuyeku but wuyawẽwẽap ekawẽn tag̃. 
\v 5 Jebikuyap tag̃ jekukuꞌukayũ ma soat em g̃ebum jemukaypinput kay acã. Deus biõg̃buk bikuyap tag̃ jekukuꞌukayũ bit Ibiõg̃buk yag̃uydadam ip. 
\v 6 Imẽn soat em jemukaypinput kay g̃ebumayũ soat em ipiat supiꞌajojo. Wũy jeedop ip Deus wi jeꞌũ buje. Ibiõg̃buk yag̃uydadaꞌukayũ bit yag̃uyꞌisum jeku ijodi. Yag̃uybabi ip jeku ijodi- -yag̃uykorereren g̃u. Soat em Deus xe jeedop ip jeꞌũ buje. 
\v 7 Jemukaypinput kay g̃ebumayũ bit itakoma eꞌem Deus kay. Kũyjobit g̃u ip Deus ekawẽn kay- -wuyawẽwẽap ekawẽn kay. Ibaꞌore ma dak ixeyũ be kũyjobit am iboap ekawẽn kay. 
\v 8 Ibaꞌore jebikuyap tag̃ jekukuꞌukayũ be Deus mucokcok am.
\p
\v 9 Eyju bit eybikuyap tag̃ g̃u jekukum. Deus biõg̃buk bikuyap tag̃ eyju bit jekukum g̃asũ ixe biõg̃buk eywebe bima. Cristo biõg̃buk kug̃ꞌũmayũ cebekitkiyũ g̃u. 
\v 10 Cristo biõg̃buk kug̃ pima, Cristo omuy eywebe iap puxim. Inaka eyjebit jeꞌũꞌũm cuk adi ikẽrẽat epeg̃ujurũg̃rũg̃ puye. Deus biõg̃buk pit waram jeymutait soat em Deus xe eyetait eydop am eyjebit eꞌũ maꞌg̃u. Ixe waram jeymutait “Eyju cũg̃ ma oxe,” i juk oꞌe Deus eywebe buye. 
\v 11 Deus ma waram Jesus Cristo oꞌg̃utait. Eyju dak Deus biõg̃buk kug̃ pima, Cristo mutaicap puxim waram jeymutait eyeꞌũap tomukadi. Eyjebit g̃uyu ceꞌũꞌũayũ dopdopap pewi. Iisuat jeꞌg̃ũm eyjebin. Deus jebiõg̃buk aꞌõbacaan iboap jeꞌg̃ũm eywebe- -xipacat aꞌõbacaan.
\p
\v 12 Okitpitpiyũ, imẽn Deus xipan wuykug̃. Imẽnpuye wuybikuyap tag̃ g̃u juy ajeku. Wuyemukaypinput kay g̃u juy g̃ebum ajop.
\v 13 Wuybikuyap tag̃ jekukum pima, wuyemukaypinput kay g̃ebum pima dak, wũy ma acesop Deus wi. Ipiatꞌajojoap kay aceju. Deus biõg̃buk aꞌõbacaan ikẽrẽat mujurũg̃rũg̃ꞌũm pima bit soat em cexe acesop wuyetait. 
\v 14 Soat Deus biõg̃buk aꞌõ kay kũyjobicayũ Deus ebekitkiyũ. 
\v 15 Deus jebiõg̃buk oꞌg̃uõm wuywebe. Ixe biõg̃buk wuymudadaybotbon g̃u, wuymuparararan g̃u dak. Ixe wuymuy Deus ipotpoyũm. Imẽnpuye:
\p — Bay — i wuycokcog̃ wuyju eꞌem Deus pe, ixe biõg̃buk aꞌõbi. 
\v 16 — Bay — i wuyju eꞌem cebe, wuyetaybit puye Deus ebekitkiyũ wuyju iam. 
\m Ixe biõg̃buk tak:
\p — Eyju Deus ebekitkiyũ — iꞌeꞌem wuywebe. 
\m
\v 17 Imẽn Deus ebekitkiyũ wuyju. Imẽnpuye wuyju dak jebekitkiyũ be oꞌg̃uxipaniatꞌin ajat. Jekpot pe oꞌg̃uxipaniatꞌin wuyju dak ajat Cristo eju. Deus kayꞌũmayũ bit ipiat supiꞌajojoat wuywebe Cristo aꞌõ kay wuyju buye. G̃uyjom pit Cristo dipap kug̃ acesop. Cristo soat kukan pima bit wuyju dak soat kukukayũm acesop ixe eju, ipiatpiꞌajojom maꞌg̃u wuyju ijodi.
\p
\v 18 Ipiatꞌajojom maꞌg̃u wuyju ijodi bima. G̃uyjom pit xipat cĩcã acesop. Kaꞌũma ma ibo joꞌiat xipacat. Imẽnpuye wuyag̃uykorereren g̃u juy ajop ipiatꞌajoap puxim. 
\v 19 “Teyũku webekitkiyũ” i Deus eap wiwim cĩcã soat cemumug̃ẽyũ. “Okpot coꞌi ip g̃asũ bit” iꞌeap wiwim cĩcã ip. 
\v 20-21 Soat Deus emumug̃ẽ jeꞌũꞌũm. Imẽn ixe emumug̃ẽyũ teꞌeam ma oꞌe. Jekpiwatpi g̃u ip teꞌeam oꞌe kuy bima. Teꞌe ma oꞌe ip Adão ikẽrẽat oꞌg̃ujurũg̃ puye.
\p — Teꞌeam jeedop ip g̃asũ wemumug̃ẽyũ — i mo oꞌe Deus.
\m Inaka Deus soat g̃uisun iap wiwim cĩcã ip. Ixe ebekitkiyũ Jesus Cristo joꞌi bima, Deus soat jemumug̃ẽyũ g̃uisun. Imuisun puje, jeꞌũ g̃u ip. 
\v 22 G̃asũ mabuk soat ma ipi dag̃ayũ ipiatꞌajojom omuisunꞌũm puye. Ipiatꞌajojom ip ayacat jeꞌit piap oꞌsupiꞌajoꞌiat coꞌi. 
\v 23 Wuyrem. Wuybipurug̃. Wuyewãtaxipim. Xipatꞌũmat jebapukpug̃ wuywebe. Imẽneju jeꞌũhꞌũm wuyju dak. Imẽnpit Deus jebiõg̃buk oꞌg̃uõm wuywebe wuymutaybit am Jesus Cristo joꞌiayũm epesop iam. “Teyũku okpot coꞌiayũ” i Deus eap wiwim cĩcã wuyju. Wuyjebit g̃uisuniap wiwim cĩcã dak wuyju. 
\v 24 Wuymuisunap wiwim mabuk wuyju. Wuydaxijo buje, wuyetaybit ajop Deus g̃uyjom wuymuisun iam. Wuyemumuwiwi bu buje kuka juk iboap ajowiwi g̃u. Abu kuy oꞌjatiat wiwim? Kaꞌũma ma! 
\v 25 Imẽnpit ijoꞌibitꞌũmat wiwim wuyju. Imẽnpuye wuyukpiceg̃ẽm g̃u wuymuisunap wiwim.
\p
\v 26 Imẽnpuxim Deus biõg̃buk kawẽnwẽn Deus eju wuywebeam. Wuybikuyap muwẽnuwẽn cebe. 
\p — Apẽn xeꞌe acejekawẽn Deus eju? — i wuyju eꞌem. — Apẽn xeꞌe acejoojuy cexewi? — i dak wuyju eꞌem. 
\m Ceweju jekawẽn ãm wuyetaybitꞌũm pima, jeꞌũhuꞌũm acã wuyju. Deus biõg̃buk pit wuybuywatwan wuywebe jekawẽn ãm ceweju. Ixe wuyaꞌõmucanucan wuyaꞌõbacaꞌũm puye. 
\v 27 Deus bikuyap tag̃ ixe biõg̃buk kawẽnwẽn Deus eju cebekitkiyũ beam. Deus itaybit wuyag̃uyda am. Itaybit ajo-kug̃ g̃u wuyju iam. Itaybit tak ajo ũm ojuy jebiõg̃buk wuywebe iam. 
\v 28 Deus xe wuykukpin cĩcã. Jebikuyap tag̃ cuk wuynaẽ jebekitkiyũm. Imẽnpuye soat wuywebe jeꞌbapukiap xipat jeꞌe wuywebe ixe aꞌõbi. 
\v 29 Deus itaybit osunuy abuyũ webekitkiyũm jeꞌe iam ipi mujurũg̃ awap.
\p — Okpot ixeyũ wag̃õm jeꞌe — ioꞌe kuyje. — Ade okpot kitpitpiyũm jeꞌe — ioꞌe. 
\m Ixeyũ ma oꞌtomuwã jekpot coꞌiayũm. 
\v 30 Imẽn tomuwãꞌibiyũ oꞌtaẽ jebekitkiyũm.
\p — Eyju cũg̃ ma oxe — iꞌeꞌem taẽꞌibiyũ be. — Okpot coꞌĩayũm epesop — ioꞌe imucũg̃ꞌibiyũ be. 
\m Deus dipap kug̃ acesop. Imẽneju soat wuywebe jebapukiat xipat jeꞌe wuywebe Deus aꞌõbi, Deus ikukpin wuyxe buye.
\p
\v 31 Soat xipat jeꞌe wuywebe iap kay g̃ebum pima apẽn xeꞌe aceꞌe? Deus wuywebe jaꞌõbacaap ũm puje, teꞌe ma jeꞌe wuykaykay kũyjobitꞌũmayũ. 
\v 32 Deus jekpot oꞌtaxijo g̃u yaokaap puxim. Oꞌg̃udot ma ijodi ceꞌũ ãm soat peam wuywebeam. Ixe dak tacup xeꞌe jeꞌe g̃asũ soat ũm ãm wuywebe- -xipacat ũm ãm? Tacup g̃u jeꞌe! 
\v 33 Deus ma eꞌem wuywebe:
\p — Ikẽrẽat kug̃ g̃u eyju oxe — i.
\m Imẽnpuye abu kuka oꞌe wuywebe: — Ikẽrẽat kug̃ eyju Deus xe — i- -Deus emunaẽyũ be? Kaꞌũma ma! 
\v 34 Jesus Cristo kuy oeꞌũ ikẽrẽat mujurũg̃rũg̃ap teida am. Imẽnpuye kaꞌũma be ma “Ikẽrẽat cuk adi epeg̃ujurũg̃rũg̃iaptei juy epeteida,” iꞌe but wuywebe. Ixe dak waram g̃uto oꞌjetait. Deus xe g̃asũ omuy. Deus aꞌõbacaap coꞌi ixe yaꞌõbaca. Ixe dak kawẽnwẽn Deus eju wuywebeam. 
\v 35 Ijodiat pe Cristo mubuꞌun paꞌore ikukpin wuykuk am. Itabutꞌũmayũ acoꞌi ikẽrẽm wuykuk. Ipiat acoꞌi ip supiꞌajoat wuywebe. Wuymunapõn acoꞌi ip wuyka bewi. Wuyrem acoꞌi aceku. Wuydadaybot acoꞌi aceku. Wuyaoka pinap cocom acoꞌi aceku. Wuyaoka ip acoꞌi pajam. Kaꞌũma be bit Cristo mubuꞌun put ikukpin wuykuk am. 
\v 36 Imẽn eꞌem Deus ekawẽn tup:
\mi Ocaoka pinap cocom oceju soat kabia, ebekitkit oceju buye, i. Ovelha kukap puxim ip ocekug̃- -yaokam pimaap puxim, i.
\m Ibo dup ekawẽn puxim xipatꞌũmat jebapukpug̃ wuywebe. 
\v 37 Inaka wuyaꞌõbacaap muꞌũm paꞌore ip. Soat em wuycokcog̃ acesop ipiatꞌajojom maꞌg̃u wuyju, Cristo xe wuykukpin puye; ixe wuyaꞌõmucanucan puye dak. 
\v 38 Imẽn wuyetaybit cĩcã kaꞌũma be ma Deus mubuꞌun put ikukpin wuykuk am. Wuyeꞌũ buje, ixe xe wuykukpin acesop, wuyetait pima dak. Deus ekawẽn tojotjotꞌukayũ be ixe mubuꞌun paꞌore xipan wuykuk am- -kũyjobitꞌũmayũ be. Iecug̃cug̃apap pe dak ixe mubuꞌun paꞌore xipan wuykuk am- -ijodiacayũ- -kũyjobitꞌũmayũ. Kabi watwat pe dak ixe mubuꞌun paꞌore xipan wuykuk am- -kũyjobitꞌũmayũ. Kaꞌũma ma ixe mubuꞌun g̃asũ. G̃uyjom tak ibuꞌu g̃u jeꞌe xipan wuykuk am. 
\v 39 Ixe ibuꞌu g̃u xipan wuykuk am wuyju um pima, badi bima dak. Deus xe wuykukpin cĩcã, wuykukukat Jesus Cristo kay wuyetabut puye. Imẽnpuye kaꞌũma be ma, Deus emumug̃ẽ be ma ixe mubuꞌun put xipan wuykuk am.
\b
\c 9
\p
\v 1-2 — Og̃uycũg̃ cĩcã obadipyũ kay- -Judeuyũ kay — i õn eꞌem.
\m Imuꞌũm paꞌore ma og̃uycũg̃ap. Icẽmãn õn eꞌem eywebe. Cristo kay wetabut. Imẽnpuye napapaꞌuk g̃u õn. Ibiõg̃buk xipacat omuy owebe wag̃uymucũg̃ucũg̃. Imẽnpuye napa g̃u õn eꞌem:
\p — Og̃uycũg̃ cĩcã obadipyũ kay- -Judeuyũ kay — i. 
\m
\v 3 Obikuy jĩjã Deus pe okitpitpiyũ mutabun am Jesus kay. Obadipyũ ip. Pũg̃ ma ocedobu bit. 
\p — Bay, wũy ma og̃uy Cristo wi soat em ipiatꞌajojom ewebe obadipyũ daxijoap teim — i õn e ojuy acoꞌi Deus pe. 
\m
\v 4 Obadipyũ Israel naxeg̃ebitbit. Kuyje:
\p — Eyju webekitkiyũ — ioꞌe Deus cebe ip. 
\m Deus ixeyũ oꞌjomuy jebekitkiyũm. Deus jedipap oꞌg̃ũm cebe ip jewejoꞌi iꞌe am.
\p — Xipan õn jeykuk — i juk adi oꞌeꞌe Deus cebe ip. — Ade jĩjã jeꞌe ip enaxeg̃ebitbiyũ — i juk adi oꞌeꞌe cebe ip. — Ipi og̃ũm eyipim — i juk adi oꞌeꞌe.
Jekawẽn oꞌg̃uwẽn Moisés pe ixeyũ awẽ ãm. Icẽmãn ip Deus mubuyxixin.
\p — Eynaxeg̃ebit ma otaẽ ipi dag̃ayũ daxijojoꞌukan — i juk adi oꞌeꞌe Deus cebe ip.
\m
\v 5 Israel ipotpot naxeg̃ebitbiyũ ip- -doze beayũ naxeg̃ebitbiyũ. Ijodi ikap puje Cristo dak ixeyũ badim oꞌe. Ixe Cristo soat podi ma yaꞌõbacaat. 
\p — Soat podi ma ẽn aꞌõbuyxi — i juy acece cebe.
\m Soat em ma juy imẽn acece.
\p
\v 6 Deus jaꞌõ dag̃ g̃u eꞌem, xepxep ã Judeuyũ itabut g̃asũ Deus kay buye — iꞌũmg̃u juy ace.
\m Soat g̃u Israel naxeg̃ebitbit Deus emunaẽyũ- -pũg̃pũg̃ ã. 
\v 7 Soat g̃u Abraão naxeg̃ebitbit tak taxeg̃ebitbicat Deus xe- -pũg̃pũg̃ ã.
\p — Pũg̃at taxeg̃ebitbit acã enaxeg̃ebitbicat oxe- -Isaque naxeg̃ebitbit acã — i juk oꞌe Deus Abraão be. 
\m
\v 8 Imẽneju wuyetaybit soat g̃u Abraão naxeg̃ebitbit Deus oꞌtaẽ jebekitkiyũm iam. Deus aꞌõ dag̃ oꞌkapiat taxeg̃ebitbit acã Deus ebekitkiyũ. Waraꞌat taxeg̃ebitbit pit kaꞌũma.
\p
\v 9 — Waraꞌat koato dak oajẽm ekay ija ekaxi ma — i mo aꞌg̃u oꞌe Deus. — Ija ekaxi ma Sara iꞌitꞌet jeꞌe — i juk oꞌe Deus Abraão be.
\m Imẽn Deus oꞌjekawẽn Abraão be.
\p
\v 10 Waraꞌat ekawẽn tak og̃uwẽn eymutaybit am soat g̃u Deus oꞌtaẽ- -pũg̃pũg̃ ã iam. Deus oꞌjekawẽn Rebeca eju xepxepayũ yuk pe bima- -wuydobu Isaque ipotpoyũ yuk pe bima.
\p
\v 11-12 — Iwag̃o kũyjobit jeenuy jekitpit aꞌõ kay — ioꞌe Deus Rebeca be xepxepayũ yuk pe bima.
\m Xipatꞌũmat oꞌg̃ug̃ẽ g̃u buk ip- -xipacat tak kaꞌũma. Deus pũg̃ ma jebekin oꞌtaẽ. Waraꞌat pit kaꞌũma. Apẽn kuy bima jewag̃uyg̃uy osunuy iap tag̃ oꞌtaẽ. Apẽn ixeyũ juk adi oekuku iap tomuju g̃u oꞌtaẽ. Jebikuyap tag̃ acã oꞌtaẽ. 
\v 13 Imẽn eꞌem Deus ekawẽn tup: Jacó ikukpin oꞌe oxe, Esaú bit ikukpin g̃u oxe oꞌe, i.
\m Imẽn oꞌtupmubararak ip Rebeca iyũ muwẽnuwẽn.
\p
\v 14 Pũg̃ ma oꞌtaẽ, waraꞌat pit kaꞌũma. Imẽnpuye:
\p — Deus cũg̃ g̃u — i du aceꞌe?
\m Imẽn g̃u juy ace! 
\v 15 Imẽnpuye:
\p — Wetabotaidabotbot pin pima, wetabotaidabotbon oce — ioꞌe Deus Moisés pe. — Obuꞌu bima bit, wetabotaidabotbon g̃u oce — ioꞌe cebe. Imẽnpuye:
\p — Wemukaypinpucayũ kay acã wetabotaidabotbon oce — ioꞌe Deus Moisés pe.
\m
\v 16 Imẽn Deus itabotaidabotbot wuykay “Etabotaidabotbon cuy eg̃uy ocekay,” i wuyju eꞌeap tomuju g̃u, wuyju xipacat mujurũg̃rũg̃ap tomuju g̃u dak. Ixe itabotaidabotbon wuykay, itabotaidabotbot pin puye acã. 
\v 17 Imẽn eꞌem Deus ekawẽn tup- -Faraó be kuyje oꞌjekawẽn iaptup- -Egito eipi kukukat pe oꞌjekawẽn iaptup:
\mi “Õn ma juk emuy adeayũ kukan,” ioꞌe Deus, i. “Ade em waꞌõbacaap og̃ubapukpuk etabutpe,” ioꞌe Deus, i. “Imẽnpuye soat kaka watwat itaybit jeꞌe obuten. Itaybit ip jeꞌe Deus soat podi ma yaꞌõbacaat iam” iꞌeꞌem Deus, i.
\m Imẽn eꞌem Deus ekawẽn tup. 
\v 18 Imẽneju Deus itabotaidabotbot jemukaypinpucayũ kay. Kũyjobitꞌũmayũ mukũyjobitꞌũmꞌũm tak big̃ ma.
\p
\v 19 — Deus ma “Ãg̃ jeenuy itabutꞌũmãn” iꞌeꞌem Judeuyũ be bima, cũg̃ g̃u Deus pe iꞌe am cebe ip “Ipiat osupiꞌajoat eywebe eyetabutꞌũm puye,” i kuka ece teꞌe ma owebe. — Deus ibuꞌu bima, itabut paꞌore ip — i teꞌe ma kuka ece owebe. 
\p
\v 20 — Tapu, imẽn g̃u juy ece — i õn pit eꞌem. 
\m Ecede g̃u juy Deus pe: 
\p — Apẽnpuye dak ẽn imẽn omug̃ẽ? — iꞌũmg̃u eꞌem itĩg̃ꞌa bit jamug̃ẽat pe. 
\m
\v 21 Wuynõm mug̃ẽg̃ẽꞌukat jebikuyap tag̃ yamug̃ẽg̃ẽm. Pũg̃tõm pewi ma xepxepꞌa yamug̃ẽg̃ẽm. Pũg̃ꞌa yadeibog̃atꞌa yamug̃ẽg̃ẽm. Waraꞌatꞌa bit yadeiꞌĩcatꞌa yamug̃ẽg̃ẽm. Jebikuyap tag̃ ma yamugẽg̃ẽm.
\p
\v 22-24 Wuynõm mug̃ẽg̃ẽꞌukat puxim Deus Judeuyũ kug̃. Jebikuyap tag̃ ma ip ikug̃. Jetakomaap mubapuk ojuy osunuy kũyjobitꞌũmayũ be. Jaꞌõbacaap mubapuk ojuy dak osunuy. G̃uyjom pit ipiat supiꞌajoat cebe ip, kũymobitꞌũm puye. Inaka tog̃a osunuy jetakomaap kug̃- -ade koato. Ipiat oꞌsupiꞌajoat g̃u cebe ip. Wararaꞌacayũ nomuwãwãm jebekitkiyũm pima, ipiat oꞌsupiꞌajoat g̃u Judeuyũ be- -kũyjobitꞌũmayũ be. Imẽn Deus cuk wuynaẽ jebekitkiyũm. Pũg̃pũg̃ wuyꞌin Judeuyũ. Wararaꞌacayũ Judeuꞌũmayũ. Deus pit soat wuynaẽ jebekitkiyũm. 
\p — G̃asũ bit okpot kay itabucayũ acã webekitkiyũm jeꞌe — i juk adi oꞌeꞌe Deus jewebe ma. 
\m Imẽnpuye ixe juk wuynaẽ wuyetabut am Jesus kay. 
\p — Wetabotaidabotbot eykay — i juk adi oꞌeꞌe jekpot kay itabucayũ be. — Ojoꞌi jeꞌe ip jedipap kug̃ okpot kay itabucayũ — i juk adi oꞌeꞌe Deus jewebe ma. 
\m Imẽg̃ap soat podi ma odip iam jekayayũ mutaybitbin. 
\v 25 Imẽn Deus eꞌem Oséias emudupmubararaktup pe:
\q
“Webekitkinꞌũm topibiyũ webekitkiyũm jeꞌe,” ioꞌe Deus, i. “Ikukpin g̃u ip osodop oxe iayũ ikukpin jeꞌe oxe,” ioꞌe, i.
\q
\v 26 “Eyju dak webekitkit g̃u,” i mo aꞌg̃u oꞌe Deus cebe ip pũg̃ ka be ma, i. G̃uyjom pit: “Webekitkit eyju- -soat em itaicat ebekitkit,” i jeꞌe Deus ibo ka be ma, i.
\m Imẽn Deus eꞌem Oséias emudupmubararaktup pe, apẽn Judeuꞌũmayũ dak Deus ebekitkin jeꞌe iap tup pe.
\p
\v 27 Isaías tak Israel naxeg̃ebitbit mug̃ẽaptup oꞌtupmubararak:
\mi Israel naxeg̃ebitbit ade jĩjã- -kaꞌoririt puxim, i. Xepxep ã bit Deus idaxijo, i.
\v 28 Deus ipiat supiꞌajoat soat kũyjobitꞌũmayũ be, i. Apẽn kuy oꞌeꞌe iap tag̃ ipiat supiꞌajoat cebe ip, i. G̃axĩn ma ipiat supiꞌajoat cebe ip, i. Pũg̃ em ma ipiat supiꞌajoat cebe ip, i.
\m Imẽn Isaías eꞌem jemudupmubararaktup pe. 
\v 29 Waraꞌatup pe imẽn ibararak- -Isaías emudupmubararaktup pe- -kuy bima oꞌtupmubararakiatup pe:
\mi Wuykukukat soat podi ma yaꞌõbacaat, i. Ixe pũg̃ wuyꞌinat taxijoꞌũm pima, soat kuka juk oap- -apẽn Sodoma ka watwatꞌũmꞌũm oap iap puxim- -apẽn Gomorra ka watwatꞌũmꞌũm oap iap puxim, i.
\m Imẽn ibararak opop Isaías emudupmubararaktup pe- -apẽn Deus pũg̃pũg̃ ã Judeuyũ idaxijo iap tup pe.
\p
\v 30 — Apẽnpuye ade Judeuꞌũmayũ itabut Jesus kay xepxep ã Judeuyũ itabut pima? — i du eyju eꞌem owebe? 
\m Apẽn cũg̃ ma ajeku Deus xe iap oꞌjokudada g̃u Judeuꞌũmayũ. Inaka:
\p — Eyju cũg̃ ma oxe — ioꞌe Deus cebe ip, Jesus Cristo kay itabut ip puye.
\m
\v 31 Tũybe cũg̃ ma acesop Deus xe wuyawẽwẽap ekawẽn tag̃ wuyekuap tomuju iãn oꞌe ip Judeuyũ bit- -Deus emunaẽyũ.
\p — Cũg̃ ma eyju oxe — iꞌũmg̃u oꞌe Deus pit cebe ip, iboap ekawẽn tag̃ ceku baꞌore cebe ip puye.
\m
\v 32-33 Itabut g̃u ip osodop cũg̃ ma wuyju Deus xe wuyetabucap tomuju iap kay. Imẽnpuye:
\p — Cũg̃ ma eyju oxe — iꞌũmg̃u oꞌe Deus cebe ip. 
Tũybe cũg̃ ma acesop Deus xe wuyawẽwẽap ekawẽn tag̃ wuyekuap tomuju iãn oꞌe ip. Ibuꞌu ip oꞌe jetabut am Jesus Cristo kay. Imẽn eꞌem Deus ekawẽn tup:
\mi Pũg̃ꞌa oyamuy Sião ka be witaꞌa, i. Ig̃oꞌa be Sião ka watwat jeweikaka, i. Jeꞌatꞌat ip ya be, i. Cekay itabucayũ bit soat em icokcok jeedop ip jetabucap kug̃, i.
\m Iboap tup ekawẽn pe Cristo witaꞌa buxim eꞌem- -Judeuyũ jeweikakaꞌibiyũ buxim.
\b
\c 10
\p
\v 1 Okitpitpiyũ, obikuy jĩjã Deus pe obadipyũ daxijo am.
\p — Bay, obadipyũ juy etaxijo — i õn eꞌem Deus pe. — Israel naxeg̃ebitbit cuy etaxijo — i õn eꞌem cebe.
\m
\v 2 Ixeyũ dak ibikuy jĩjã Deus bikuyap tag̃ jeku am. Kawẽn icẽmãn pit itaybit g̃u ip. Apẽn cũg̃ ma aceku Deus xe iam itaybit g̃u ip. 
\v 3 Imẽn itaybit g̃u ip osodop Deus acã wuymucũg̃ucũg̃ iam. Imẽnpuye jag̃uy dag̃ ma ip jewemucũg̃ ojuy osodop. Deus wuymucũg̃ucũg̃ Jesus Cristo kay wuyetabut pima. Imẽnpit ip ibuꞌu osodop jetabut am cekay. 
\v 4 Cristo oajẽm ijodi wuymucũg̃ ãm. Wuymucũg̃aptei oꞌteida jeꞌũãm. Cekay wuyetabut pima acã, cũg̃ ma acesop Deus xe. Imẽnpit:
\p — Wuyawẽwẽap ekawẽn tag̃ wuyeku buje cũg̃ ma acesop Deus xe — iꞌeꞌem ip teꞌe ma.
\p
\v 5 Imẽntak: “Cũg̃ ma acesop Deus xe wuyawẽwẽap ekawẽn tag̃ wuyeku buje” i teꞌe ma eꞌeꞌukayũ oꞌyawẽ Moisés kuyje. 
\p — Soat tag̃ cekawẽn tag̃ ceku buje, kuka juk cũg̃ ma oꞌe ip Deus xe — ioꞌe Moisés cebe ip.
\p
\v 6 — Cristo kay eyetabut puje acã cũg̃ ma eyju oxe — iꞌeꞌem Deus pit. — Ixe eymucũg̃ucũg̃aptei kuy oꞌteida — iꞌeꞌem Deus.
\m Pũg̃pũg̃ayũ bit teꞌe ma eꞌem:
\p — Cristo oꞌteida g̃u buk — i.
\m Imẽnpuye teꞌe ma eꞌem ip:
\p — Abu paxi jeu kabi kay Cristo mukop am wuymucũg̃ ãm?” i. 
\m Imẽn ip teꞌe ma eꞌem itabutꞌũm puye ixe kuy oꞌkop ijodi wuymucũg̃ ãm iap kay. 
\p
\v 7 — Abu paxi jeꞌkop ceꞌũꞌũayũ dopdopap pe Cristo muyu am wuymucũg̃ ãm? — i teꞌe ma eꞌem ip.
\m Imẽn teꞌe ma eꞌem ip itabutꞌũm puye Cristo waram g̃uto oꞌjetait wuymucũg̃ ãm iap kay. 
\v 8 Imẽn eꞌem Deus ekawẽn tup pit:
\mi Eyetaybin put cũg̃ ma wuyju Deus xe wuyetabun puje iam, i. Iboap ekawẽn kuy epejojojo, i. Kuy iboap ekawẽn epeg̃uwẽn, i. Kuy g̃ebum epesop iboap ekawẽn kay, i.
\m — Cristo kay eyetabun cuy epesop — i õn eꞌem pima, iboap ekawẽn imuwẽnuwẽn õn. 
\v 9 Imẽneju Deus jeydaxijo. “Jesus ocekukukat,” i eyꞌe buje, Deus jeydaxijo. Deus waram Jesus oꞌg̃utait ceꞌũap tomukadi iap kay eyetabut pima, ixe jeydaxijo. 
\v 10 Jesus kay wuyetabun puje, Deus eꞌem wuywebe: — Cũg̃ ma eyju oxe — i. “Jesus ocekukukat,” i wuyꞌe buje dak, Deus wuydaxijo. 
\v 11 Imẽn eꞌem Deus ekawẽn tup: “Cekay itabucat soat em icokcok jeenuy jetabucap kug̃,” i. 
\v 12 Imẽn Judeu Judeuꞌũmat coꞌi Deus xe. Jesus Cristo soat kukukat- -Judeu kukukat, Judeuꞌũmat kukukat tak. Imẽntak ixe soat em xipan soat kug̃- -“Obuywatwan cuy eg̃uy” iꞌeꞌem cebe iayũ kug̃- -Judeuyũ kug̃, Judeuꞌũmayũ kug̃ tak. 
\v 13 Imẽn eꞌem Deus ekawẽn tup: 
\mi “Obuywatwan cuy eg̃uy, ocekukukat,” iꞌeꞌeꞌukayũ idaxijo- -soat ip idaxijo, i.
\p
\v 14 Ixe kay itabutꞌũm pima bit, “Obuywatwan cuy eg̃uy” iꞌe baꞌore jeꞌe cebe ip. Ixe ekawẽn coꞌũm pima, ibaꞌore jeꞌe cebe ip jetabut am cekay. Wararaꞌacat ixe ekawẽn muwẽnꞌũm pima, yaꞌĩjo baꞌore jeꞌe cebe ip. 
\v 15 Deus pe wararaꞌacat mujuꞌũm soat ka be bima, ixe ekawẽn muwẽn paꞌore jeꞌe cebe ip. Imẽn eꞌem Deus ekawẽn tup:
\mi Yawẽg̃tipat muwẽnuwẽnꞌukat ajẽmap xipat cĩcã ocexe, i. 
\m Imẽn eꞌem kuyatup.
\p
\v 16 Soat g̃u bit kawẽn idipat kay oꞌe- -xepxep ã. Imẽn Isaías oꞌe Deus pe kuyje:
\mi — Okukukat, abu xeꞌe itabut oꞌe wekawẽn kay? Xepxep ã — i.
\m
\v 17 Imẽneju wuyetabut Cristo kay ixe awẽg̃ tobuxik puje acã. Ayawẽg̃tobuxik tak waraꞌacat yawẽg̃ muwẽn puje acã.
\p
\v 18 — Judeuyũ bit kawẽn idipat oꞌyaꞌĩjojo — i õn eꞌem eywebe.
\m Oꞌyaꞌĩjojo ip. Imẽn eꞌem Deus ekawẽn tup- -Isaías emudupmubararaktup:
\mi Ixeyũ ekawẽn oꞌyaꞌĩjojo ip soat kaka dag̃ayũ, i. Ag̃okaꞌabi dag̃ oꞌyawẽg̃mupõg̃põg̃põg̃, i.
\m Imẽn eꞌem Deus ekawẽn tup.
\p
\v 19 Cristo ekawẽn ibaꞌarẽm tu osodop Judeuyũ xe? Ibaꞌarẽm g̃u. Imẽn eꞌem Moisés emudupmubararaktup:
\mi Eyju Judeuyũ, i. Deus kuka Judeuꞌũmayũ g̃u oꞌtaẽ jebekitkiyũm, i tete ma eyju eꞌem, i. Itaybitꞌũmayũ g̃u kuka oꞌtaẽ jebekitkiyũm i tũybe eꞌem iãn eyju, i. Eyetabutkarey epesop cekay ip, owebe webekitkiyũ ixeyũ naẽ buje, i. Eyetakoma epesop cekay ip, owebe webekitkiyũ ixeyũ naẽ buje, i.
\m Imẽn eꞌem kuyatup.
\p
\v 20 Isaías iparara g̃u osunuy icẽmãn iꞌe am. Imẽn eꞌem cemudupmubararaktup:
\mi Ikudadamꞌumayũ Deus oꞌtobuxik, i. Tomuwãwãꞌũmayũ kay oꞌjebapuk, i.
\m Imẽn eꞌem Isaías emudupmubararaktup.
\q
\v 21 Imẽntak Judeuyũ oꞌg̃uwẽn Isaías. “Kabia bun ‘Eyetabun cuy epesop okay,’ i juk adi oꞌeꞌe Deus kũyjobitꞌũmayũ be- -jekawẽn kayꞌũmayũ be,” ioꞌe
Isaías.
\b
\c 11
\p
\v 1 — Deus jebekitkit oꞌjepere- -Judeuyũ oꞌjepere — i du eyju eꞌem owebe?
\p — Kaꞌũma! Oꞌjepere g̃u — i õn pit eꞌem. 
\m Õn tak Israel naxeg̃ebit. Abraão naxeg̃ebit õn. Benjamin diwat õn. 
\v 2 Deus Judeuyũ oꞌtaẽ jebekitkiyũm kuyje ma- -ipi mujurũg̃ puje. G̃asũ dak ixeyũ oꞌjepere g̃u. Elias Israel naxeg̃ebitbit oꞌg̃uwẽnuwẽn Deus pe. Eyetaybit g̃u du iboap ekawẽntum? Imẽn eꞌem ijudup:
\q
\v 3 “Kariwa, ekawẽn muwẽnuwẽnꞌukayũ oꞌyaoka ip,” i. “Etabutpe tõmteꞌokuatõm mupikupikapꞌa oꞌyamukẽrẽrẽn ip,” i. “Õn acã ocepoyat ekay itabucayũꞌin,” i. “G̃asũ okudadam ip oaoka am,” ioꞌe Elias Deus pe kuyje.
\m
\v 4 Imem Deus oꞌjede Elias pe:
\mi “Ẽn ã g̃u etabucat okay,” ioꞌe Deus Elias be, i. “Ade ma osubuywan ixeyũ be okay jetabucap epereap puxim- -7,000 beayũ,” ioꞌe ixe bit, i. “Imẽnpuye oꞌjẽg̃ꞌaecõg̃cõg̃ g̃u ip Baal wap- -deusbaro wap ‘Ẽn acã deus,’ iꞌe am cebe,” ioꞌe Deus, i.
\m
\v 5 Elias itabẽg̃ osunuy bimaayũ etabucap puxim g̃asũ dak pũg̃uũg̃ ã itabut Judeuyũ. Kuyje 7000 be osodop iayũ buxim, g̃asũ dak Deus pũg̃pũg̃ oꞌtaẽ Israel naxeg̃ebitbiyũꞌin. Ixeyũ oꞌtaẽ, xipan ip ikug̃ puye.
\v 6 Idipat oꞌg̃ujurũg̃rũg̃ ip ibuye g̃u oꞌtaẽ- -jexe ikukpin ip puye acã. Idipat mujurũg̃rũg̃ap tomuju wuynaẽ bima, jexe ikukpinap tomuju g̃u kuka juk wuynaẽ.
\p
\v 7 Eyaꞌõpicũg̃cũg̃ cuy epesop waꞌõ kay! Israel naxeg̃ebitbit ibikuy osodop Deus pe jemucũg̃ ãm. Imẽnpit cũg̃ g̃u oꞌe ip cexe. Xepxep ã ixeyũꞌin cũg̃ ma oꞌe cexe- -kuy oꞌtaẽꞌiayũ acã. Apẽn cũg̃ ma acesop Deus xe iap ibaꞌarẽm osodop wararaꞌacayũ xe. Yaꞌõpiꞌũmayũ buxim ip osodop Deus aꞌõ kay. 
\v 8 Imẽn eꞌem Deus ekawẽn tup:
\mi Deus ixeyũ ooꞌg̃ubuꞌun jekay itabucan, i. Deus ekawẽn ibaꞌarẽm cexe ip cekawẽn cocom maꞌg̃u ip, i. Ixeyũ dak itabut g̃u cekay kawẽn icẽmat aꞌĩjojom maꞌg̃u ip, i.
\m Ibodup ekawẽn puxim g̃asũ dak itabut g̃u ip Israel naxeg̃ebitbiyũ. 
\v 9 Imẽn Davi dak oꞌe:
\mi Jewemug̃uykukukum ip jekukum, i. Cedag̃ꞌũm cĩcã ip jewag̃uyg̃uy, i. Imẽnpuye cũg̃ ma Deus pe ipiatpiꞌajoan cebe ip, i. Ixeyũ juy jewemug̃uykuku wuyju wasũ mug̃uykukukum ibu am iap puxim, wuyju puca mug̃uykukukum ibu am iap puxim tak, i.
\v 10 Itaꞌũmat puxim cuy jeku ip, i. Ipoxiat kukat puxim cuy ip ipiat supiꞌajo, i.
\m Imẽn Davi oꞌe kũyjobitꞌũmayũ be.
\p
\v 11 Soat em g̃u bit jeedop ip cedag̃ꞌũma je wag̃uyg̃uy Judeuyũ- -darem ma. Soat kabia g̃u Deus ipiat supiꞌajoat ixeyũ be- -darem ma. Judeuyũ ma kũyjobitꞌũm osodop. Deus pit Judeuꞌũmayũ daxijojom Judeuyũ etabutkarey am. Deus ibikuy Judeuyũ etabutkarey am Judeuꞌũmayũ kay taxijo ip puye.
\p — “Wuyju dak cuy acetabun Deus kay ixe be wuydaxijo am,” i xeꞌe jeꞌe Judeuyũ ioꞌe Deus jewebe ma.
\m
\v 12 Judeuyũ kũyjobitꞌũm osodop. Imẽnpuye Deus Judeuꞌũmayũ daxijojom oꞌe g̃asũ. Itabut g̃u ip osodop Judeuyũ. Imẽnpuye Judeuꞌũmayũ itabut eꞌem g̃asũ. G̃asũ Deus xipacat ũmũm Judeuꞌũmayũ be Judeuyũ kũyjobitꞌũm puye. G̃uyjom pit bũrũmaku ip jeꞌe itabut Judeuyũ. Deus itaybit bũrũku iam. Ixeyũ itabun puje, ibodi ma xipacat jeꞌg̃ũm cebe ip.
\p
\v 13 Judeuꞌũmayũ, eywebe ma õn kawẽnwẽn g̃asũ. Deus cuk omuju jaꞌõbi jekawẽn muwẽn ãm eywebe. Ocokcok cĩcã cekawẽn muwẽnuwẽn. 
\v 14 Obadipyũ itabutkarey jeꞌe xeꞌe eykay, ade Judeuꞌũmayũ itabun puje. Obadipyũ dak xeꞌe itabut jeꞌe Jesus kay- -Judeuyũ. Imẽn Jesus ixeyũꞌin idaxijo. 
\v 15 Deus Judeuyũ kayꞌũm pima, xipat oꞌe Judeuꞌũmayũ be. Deus bureyũm oꞌe ip. Deus pe waram Judeuyũ kay buje bit, ibodi ma xipat jeꞌe soat peam ijodiat peam. Waram ceꞌũat mutaicap puxim xipat jeꞌe.
\p
\v 16 Pãoꞌa yaꞌĩn ma xipat pima, soatꞌa dag̃ xipat. Imẽnpuxim tũmũnꞌipꞌip tãbu xipat pima, soatꞌip tag̃ xipat. Imẽnpuxim Deus kuy bima itabucayũ kay bima, g̃asũayũ kay dak jeꞌe itabucayũ kay. Abraão kuy bima itabucat osunuy. Deus ebekit osunuy. Imẽnpuye ixe naxeg̃ebitbiyũ dak Deus ebekitkiyũ. 
\v 17 Wuyju oliveiraꞌip takũ dakatkan tiptag̃at takũ muy am ixe nakũ dieg̃. Idibi mujujum wuyju ig̃o dakũ kay takũ nojẽm ãm. Imẽnpuxim pũg̃pũg̃ Judeuyũꞌin kuy oꞌtakũdakatꞌiatakũ buxim. Ixeyũ oibuꞌun Deus ebekitkiyũm itabutꞌũm puye. Eyju bit Deus ebekitkiyũm epesop eyetabut puye. Eyju Judeuꞌũmayũ. Imẽnpuye eyju oꞌtakũmuyiatakũ buxim- -tiptag̃atakũ buxim. 
\v 18 Tãbu tãbuetait takũkẽ buye g̃u. Takũ bit takũetait tãbube buye. Imẽnpuye:
\p — Deus Judeuyũ kay g̃u- -ocekay acã — iꞌũmg̃u juy epeꞌe. — Oceju acã ixe juk ocenaẽ jebekitkiyũm — iꞌũmg̃u juy epeꞌe.
\p
\v 19 — Tiptag̃atakũ muyap coꞌi Deus ocemuy jebekitkiyũm Judeuyũ dieg̃ — i eyju acoꞌi eꞌem. 
\m
\v 20 Icẽmãn eyju eꞌem. Imẽnpit takũ dakacap puxim darem Deus Judeuyũ kay g̃u osunuy Cristo kay itabutꞌũm puye. Jebekitkiyũm cuk eymuy ixeyũ dieg̃ Cristo kay eyetabut puye. Imẽneju:
\p — Oceju acã Deus ebekitkiyũ — iꞌũmg̃u juy epeꞌe.
\m Eydayꞌemꞌum ma juy epesop eyetabucap epereap puxim! 
\v 21 Takũdakacap coꞌi Deus ipiat oꞌsupiꞌajoat Judeuyũ be itabutꞌũm puye. Ipiat oꞌsupiꞌajoat cebe ip takũat puxim maꞌg̃u ip. Eyetabutꞌũm pima, eywebe dak ipiat supiꞌajoat. 
\v 22 Cristo kay itabutꞌũm puye Deus ipiatpiꞌajoan Judeuyũ be ibima, “Cũg̃ ma Deus,” i wuyju eꞌem. Cristo kay ip puye, Judeuꞌũmayũ kay jĩjã ibima dak, “Xipat cĩcã Deus” i wuyju eꞌem. Eyju bit eydayꞌemꞌum cuy epesop Cristo kay eyetabucap epereap puxim. Eyetabucap epere buje, eyju dak takũdakacatakũ buxim epesop. 
\v 23 Judeuyũ oibuꞌun Deus ebekitkiyũm. Itabut g̃u oꞌe ip cekay. Imẽnpuye Deus tak oibuꞌun cekay ip takũ dakatꞌibit puxim. Waram ibikuy buje bit, waram Deus ebekitkiyũm jeedop ip waram oꞌtakũdakatꞌiatakũ muyap coꞌi. Ibaꞌore g̃u Deus pe imẽg̃ap. 
\v 24 Eyju Judeuꞌũmayũ. Tiptag̃atakũ buxim eyju. Tiptag̃atakũ imẽn atakũmuy oliveiraꞌip pe. Imẽnpuxim kuy bima Deus ebekitkiyũm g̃u epesop. G̃asũ bit ixe ebekitkiyũm epeꞌe. Imẽnpit Deus pe ibaꞌore g̃u waram Judeuyũ muy am jebekitkiyũm oꞌtakũdakatꞌiatakũ muyap puxim oliveiraꞌip pe. Itabun puje, waram ixeyũ jomuy jebekitkiyũm.
\p
\v 25 Soat em g̃u Judeuyũ ibuꞌu jeedop jetabut am Cristo kay. Deus Judeuꞌũmayũ mutabutbun pima acã, ibuꞌu ip jeedop- -Deus jemunaẽꞌibiyũ mutabutbun pima. Deus iboam ibikuy osunuy kuy bima ma. Bũrũmaku itabut jeꞌe ip. Wuyxe bit ibaꞌarẽm osodop iboap. G̃asũ acã õn iboap muwẽnuwẽn eywebe ibapuk oꞌe owebe g̃asũ bit puye. Okitpitpiyũ, g̃ebum cuy epesop iboap kay “Deus oceju acã juk ocenaẽ jebekitkiyũm” i eyꞌeap puxim. 
\v 26 Deus soat Judeuyũ idaxijo. Imẽn eꞌem Deus ekawẽn tup:
\mi Ipi watwat taxijojoꞌukat jajẽm Sião ka watwat xewi, i. Soat ikẽrẽat juꞌuk Jacó naxeg̃ebitbit pewi- -Judeuyũ bewi, i.
\v 27 Ixeyũ bewi ikẽrẽat uk puje, apẽn kuyje
juk adi ocece cebe ip iap tag̃ oce, i.
\p
\v 28 Pũg̃pũg̃ Judeuyũ Jesus ekawẽn kay g̃u oꞌe ip. Imẽnpuye ip Deus kay itakomaat coꞌi oꞌe. Iboap puye eyetabut put Jesus Cristo kay, Judeuyũ g̃u maꞌg̃u eyju. Kuyje bit Deus Judeuyũ oꞌtaẽ jebekitkiyũm. Kuyje:
\p — Webekitkiyũ eyju — ioꞌe ixeyũ ebika be- -Abraão be, Isaque be dak, Jacó be dak.
\m Imẽnpuye ikukpin cĩcã ip cexe. 
\v 29 Deus pit jewag̃uymuwarururun g̃u- -pũg̃ tag̃ ma yag̃uy. “Xipan ixeyũ ojukuk” iꞌe buje, xipan ma ixeyũ jukuk. “Xeyũku otaẽ webekitkiyũm” iꞌe buje, ixeyũ inaẽ jebekitkiyũm. 
\v 30 Imẽneju Deus itabotaidabotbot g̃asũ eykay, Judeuyũ kũyjobitꞌũm pima. Kuy bima juk adi epesop kũyjobitꞌũm ixe aꞌõ kay. G̃asũ bit itabotaidabotbot eykay. 
\v 31 Judeuyũ kũyjobit g̃u Deus aꞌõ kay g̃asũ, Deus itabotaidabotbot eykay buye. G̃uyjom pit itabotaidabotbon jeꞌe ixeyũ kay eykay itabotaidabotbocap coꞌi. 
\v 32 Jewejojoꞌi ma ip kũyjobitꞌũmap kug̃ Deus xe- -Judeuyũ, Judeuꞌũmayũ dak. Imẽnpuxim ma jewejojoꞌi ma itabotaidabotbon jeꞌe cekay ip.
\p
\v 33 Soat podi ma Deus xipat wuykay! Kaꞌũma ma ibaꞌarẽm cexe. Soat podi ma itaybitbit tak. Ibaꞌore wuywebe bit wuyetaybitbit am apẽn ixe jewag̃uyg̃uy iam. Ibaꞌarẽm wuyxe bit ixe jewag̃uymug̃ẽg̃ẽmap. 
\v 34 Imẽn eꞌem Deus ekawẽn tup:
\mi Kaꞌũma ma itaybit apẽn Deus jewag̃uyg̃uy iam, i. Kaꞌũma ma ixe awẽwẽm, i.
\v 35 Kaꞌũma xe ma ixe eweroap opop, i.
\m Imẽn eꞌem Deus ekawẽn tup.
\p
\v 36 Soat Deus emumug̃ẽ. Yaꞌõbi soat kake. Cebeam tak kake soat. Soat kake “Soat podi ma ẽn xipat ocexe” iꞌe am cebe. 
\p — Soat podi ma Deus yaꞌõbuyxi, idip tak — i juy ace cebe dak.
\m Soat em ma juy imẽn acece.
\b
\c 12
\p
\v 1 — Okitpitpiyũ, epeyeweũm Deus pe soat em kũyjobit am yaꞌõ kay — i õn eꞌem eywebe. 
\m Apẽn kuyje wũnca ũmap puxim cuy epeyeweũm cebe. Deus itabotaidabotbot wuykay iap ibapuk cĩcã wuyxe. Imẽneju kũyjobin cuy epesop yaꞌõ kay. Eycokcog̃ cuy epeyekapik cebeam. Ibikuyap tag̃ cuy epeku imucokcok am. Ixe aꞌõ kay kũyjobit pima, teꞌe g̃u kuka epeꞌe cebe “Ẽn xipat ocexe” i. Icẽmãn imẽn kuka epeꞌe. 
\v 2 Deus kayꞌũmat ekukuap puxim g̃u juy epeku. Deus pe juy epeyewag̃uymuisunat. Ixe be eyag̃uymuisun puje, eyetaybit epeꞌe apẽn Deus ibikuy wuyeku am iam. Iboam eyetaybit pima xipan epeku itabutpe. Ikẽrẽat kug̃ g̃u epesop cexe. Soat em Deus mucokcokcog̃ epeku.
\p
\v 3 Deus kuy jaꞌõbacaap oꞌg̃uõm owebe jekawẽn muwẽn ãm soat pe. Imẽnpuye õn jeymukũyjo Deus bikuyap tag̃ eyeku am. Eyag̃uytog̃ cuy epesop jewewekay. Ajo iꞌe but eywebe iap pe ma juy epeyekapik- -waraꞌat pe bit kaꞌũma. Deus ma oꞌg̃ũm eyekapik am. Ajo eyxe ibapuk imug̃ẽ ãm iat Deus ma oꞌg̃ũm eywebe. 
\v 4 Ade opop wuyjebit pe- -wuyeta, wuyba dak, wuyi dak. Imẽnpit pũg̃pũg̃pũg̃ soat mug̃ẽg̃ẽm ip. Soat cewedapdepdapdep. Onejujujun ma. Soat wuyju ikug̃iat waraꞌat puxim g̃u- -jexeat puxim g̃u. Waraꞌat tak imẽnpuxim ma ikug̃. 
\v 5 Imẽnpuxim tak wuyju- -Jesus Cristo kay itabucayũ. Ade wuyju. Pũg̃at puxim pit wuyju Cristo eju mũg̃ꞌi wuyju jekukum puye. Jewebuywatwan wuyju wuyekapikap kug̃ wuyjebit puxim. 
\v 6 Deus xipan wuykug̃. Imẽnpuye ixe jaꞌõbacaap ũmũm soat pe wuywebe waraꞌat pe jekapik am jebeam. Pũg̃pũg̃ayũ wuyꞌin yaꞌõbacaap kug̃ ixe ekawẽn muwẽn ãm. Ixeyũ juy jeedop imuwẽnuwẽn. 
\v 7 Wararaꞌacayũ wuyꞌin pit yaꞌõbacaap kug̃ wararaꞌacat peam kapik am. Ixeyũ juy jeedop wararaꞌacat puywatwan. Wararaꞌacayũ wuyꞌin pit yaꞌõbacaap kug̃ wararaꞌacat mutaybit am. Ixeyũ juy jeedop wararaꞌacat mutaybitbin. 
\v 8 Wararaꞌacayũ wuyꞌin yaꞌõbacaap kug̃ wararaꞌacat aꞌõmucan am. Ixeyũ juy jeedop wararaꞌacat aꞌõmucanucan. Wararaꞌacayũ bit ade kug̃ jebubut kug̃. Tacum g̃u juy jeedop ip. Ade ma juy jeg̃ũmg̃ũm ip ikug̃ꞌũmat pe. Wararaꞌacayũ bit yaꞌõbacaap kug̃ wararaꞌacat kukan. Yaꞌõpurug̃ g̃u juy jeedop ip ikug̃- -yaꞌõdidin ma. Wararaꞌacayũ bit yaꞌõbacaap kug̃ tadaybocayũ buywat am. Icokcog̃ cuy jeedop ip ixeyũ buywatwan.
\p
\v 9 Jewexe g̃u ikukpin eyxeat epejukuk- -icẽmãn. Ikẽrẽat kay g̃u juy epesop. Xipacat acã epeg̃ujurũg̃. 
\v 10 Ikitpitpiyũ eyju, Cristo kay eyetabut puye. Imẽnpuye xipan cuy epeyewekuk eydukꞌa beat kukpinap coꞌi. Ibuyxim cuy epeyewekuk.
\v 11 Eybuꞌuꞌum g̃u juy epesop kapik am. Kapikpikꞌukayũm cuy epesop. Wuykuukat peam cuy epesop kapikpig̃. Eycokcokap kug̃ cuy epesop kapikpig̃ cebeam. 
\v 12 Soat em Deus xe wuyetait acesop iap wiwim wuyju. Imẽnpuye eycokcog̃ cuy epesop. Eyukpiceg̃ẽm g̃u juy epesop xipatꞌũmat jebapukpug̃ eykay bima dak. Deus eju kawẽnwẽg̃ap cuy epeyepeg̃u. 
\v 13 Eybubutꞌin cuy epeg̃ũm ikug̃ꞌũmat pe- -itabucayũ be. Xipan cuy powatwat epeg̃uõm eydukꞌa be.
\p
\v 14 Itabutꞌũmayũ eykaykay bima:
\p — Bay, ipiat cuy esupiꞌajoat cebe ip — iꞌũmg̃u juy epeꞌe Deus pe. — Xipan cuy ejukuk ip — i acã. 
\m
\v 15 Icokcokayũ xe bima, eyju dak eycokcog̃ epesop. Waayũ xe bima, eyju dak epetõtõn. 
\v 16 Pũg̃ tag̃ ma juy epeyewag̃uyg̃uy. 
\p — Soat podi ma oceju xipat — iꞌũmg̃u juy epeꞌe. 
\m Ibuyxiꞌũmat ekapikap cuy epejoixik g̃u. 
\p — Soat podi ma ocetaybit cĩcã — iꞌũmg̃u juy epeꞌe.
\p
\v 17 Wararaꞌacat pe ikẽrẽm eykuk puje, ikẽrẽm g̃u juy epejukuk ikẽrẽm eykukapteim. Xipan cuy epeku soat etabutpe wararaꞌacat pe eymuymuyap puxim. 
\v 18 Eywebe ibaꞌoreꞌũm pima, kabaꞌũm cuy epesop soat eju eyxeat eju. 
\v 19 Okitpitpiyũ, Deus acã juy ipiat supiꞌajoat ikẽrẽat kukayũ be. Imẽnpuye epeyeweik g̃u juy- -pũg̃ em tak kaꞌũma. Imẽn eꞌem Deus ekawẽn tup:
\mi “Õn ma oceweik,” iꞌeꞌem wuykukukat, i. “Õn ma ipiat osupiꞌajoat cebe ip ikẽrẽm eykukapteim,” i.
\m
\v 20 Imẽn eꞌem Deus ekawẽn tup: 
\mi Ekay itakomaat ire bima, eg̃uykõn cuy, i. Puybit cuy eg̃ũm cebe, i. Ibipuruk pima, idibi juy etiũm cebe, i. Imẽn isũsũn cĩcã jeꞌe, i. Ig̃uycũg̃ jeꞌe xipanꞌũm ekug̃ pima, i.
\m
\v 21 Ikẽrẽat mug̃ẽg̃ẽꞌukayũ be juy ikẽrẽat mug̃ẽan g̃u eywebe. Xipacatꞌin cuy epeg̃ug̃ẽ ixeyũ beam imubuꞌun am ip ikẽrẽat kay.
\b
\c 13
\p
\v 1 Kũyjobin cuy ajop iecug̃ap ebekitkit aꞌõ kay. Deus ma ixeyũ oꞌjomuyat ipi watwat kukan. Imẽnpuye soat ixeyũ opop Deus aꞌõbi. 
\v 2 Imẽnpuye iecug̃ap ebekitkit aꞌõ kayꞌũmat Deus oꞌjomuyiat aꞌõ kay g̃u. Ipiat supiꞌajoat ip jeweju ma. 
\v 3 Xipacat mujurũg̃rũg̃ꞌukayũ g̃u iparara iecug̃ap ebekitkit puxim- -ikẽrẽat mujurũg̃rũg̃ꞌukayũ acã. Yaꞌõbuyxiayũ buxim eyparara pinꞌũm pima, xipacat cuy epeg̃ujurũg̃. Xipacat mujurũg̃ puje:
\p — Xipat ma eyju ocexe — i jeꞌe ip eywebe.
\m
\v 4 Deus ma ixeyũ oꞌjomuyat eykukan. Xipan eykuk ojuy ip. Eywebe ikẽrẽat mujurũg̃ puje bit, eypararam cuy epesop cebuxim ip. Deus ixeyũ oꞌjomuyat ipiatpiꞌajoan ikẽrẽat mujurũg̃rũg̃ꞌukayũ be. Imẽnpuye cũg̃ ma cebe ip ipiatpiꞌajoan wuywebe. 
\v 5 Imẽneju kũyjobin cuy epesop iecug̃ap ebekitkit aꞌõ kay. “Deus acoꞌi ipiat supiꞌajoat ocewebe kũyjobitꞌũm pima,” i wuyju eꞌem puye g̃u kũyjobin cuy ajop ixeyũ aꞌõ kay. Cedag̃ ma wuywebe kũyjobit am ixeyũ aꞌõ kay buye juy kũyjobin ajop yaꞌõ kay ip.
\p
\v 6 Xipan kapikpig̃ pima, Deus aꞌõbi ip kapikpig̃ eykukayũ. Deus ma dinheiro bubuꞌukayũ dak oꞌjomuyat wuykukan. Imẽneju wuyedinheirom wuyju dak imposto deidadam cebe ip. 
\v 7 Eyeweroap cuy epeteida cebe ip. Eipi etaxa dak cuy epeteida. Ibuyxim cuy iecug̃ap ebekitkit epejukuk. Ixeyũ aꞌõ mupubutbun g̃u juy epesop.
\p
\v 8 Eyeweroap kug̃ g̃u juy epesop. Eyeweroap cuy epeg̃uꞌũm. Ikukpin wararaꞌacat kug̃ pima, wuyeweroap ateida iap puxim. Xipan wararaꞌacat kug̃ pima, Deus pe wuyawẽwẽap ekawẽn tag̃ wuyju jekukum. 
\v 9 Imẽn Deus wuyawẽwẽm:
\p — Wararaꞌacat tayxi eju epeyepo g̃u juy — i. — Wararaꞌacat epeyaoka g̃u juy — i. — Wararaꞌacat pubut epetujupaꞌum g̃u juy — i. — Eyetabikukum g̃u juy wararaꞌacat pubut kay — i.
\m Kanomũm tak imẽn wuyawẽwẽm: 
\p — Xipan cuy eyxeat epejukuk apẽn xipan eyju jewekug̃ iap puxim — i. 
Kanomũm eyawẽwẽap tag̃ eyeku buje, koap eyawẽwẽap tag̃ tak epeku. 
\v 10 Ikukpin wuyxeat kug̃ pima, ikẽrẽm g̃u ixe ajukuk. Imẽnpuye ikukpin wuyxeat kug̃ pima, soat ekawẽn tag̃ wuyju jekukum- -Deus ekawẽn tag̃- -wuyawẽwẽap ekawẽn tag̃.
\p
\v 11 Waram Jesus ajẽmap kabia wũy ma osunuy wuyetabun puje. G̃asũ bit wũy g̃u oꞌe. G̃axĩn ma wuydaxijojoap kabia jajẽm. Imẽnpuye xetxiat puxim g̃u juy ajop. Wuyawẽwẽap ekawẽn tag̃ cuy ajeku. 
\v 12 Wuykukukat ajẽmap kabia kabiam wuyju bimãn coꞌi. Kabiok ajẽm pasug̃ pimãn coꞌi. Kuy kabia ijasũn, g̃axĩn ma ixe jajẽm puye. Imẽnpuye acepere juy ikẽrẽat mujurũg̃ap! Ikẽrẽat mujurũg̃rũg̃ꞌukayũ kabiok tag̃ jekukuꞌukayũ buxim. G̃aꞌa ajeku Deus bikuyap tag̃ acã! Sorara icaat kug̃ jekukum jaokaap puxim. Cristo aꞌõbacaap kug̃ cuy ajeku waram wuywebe ikẽrẽat kukap puxim. 
\v 13 Cũg̃ ma juy ajeku wuysũsũnap puxim. Cũg̃ ma juy ajeku kabiam soat etabutpe jekukum iat puxim. Wuybabitorog̃ g̃u juy ajeku. Wuykaꞌokẽrẽm g̃u juy ajeku. Wararaꞌacat tayxi kaykay g̃u juy ajeku, wararaꞌacat itop kaykay g̃u dak. Wuysũsũg̃ap g̃u juy ajeku. Wararaꞌacat aꞌõdawutwun g̃u juy ajeku. Wuyetabutkarey g̃u juy ajop. 
\v 14 Wuyag̃uy dag̃ jekukum pima, ikẽrẽat mujurũg̃rũg̃ wuyju. Eyag̃uy dag̃ g̃u juy epeku! Wuykukukat jaꞌõbacaap ũmũm wuywebe sorarayũ kukat jesorarayũ be icaat ũmap coꞌi itakomaat yaokaap puxim. 
\p — Aꞌõbacaap cuy eg̃ũm ocewebe — i juy epeꞌe Jesus Cristo be.
\b
\c 14
\p
\v 1 Eyukpiceg̃ẽm g̃u juy epesop “Apẽn g̃u xeꞌe kuka cũg̃ Deus xe?” iꞌeꞌeꞌukayũ kay- -itabucayũ kay. Jewaꞌõxikxig̃ g̃u juy epesop ceweju ip yag̃uymuwarurun am. 
\v 2 Pũg̃pũg̃ itabucayũꞌin eꞌem:
\p — Cũg̃ ma wuywebe deusbaroyũ wap iẽnmõg̃ꞌibitẽn o am — i.
\m Imẽnpuye soat ẽn oꞌom ip. Wararaꞌacayũ bit eꞌem:
\p — Cũg̃ g̃u wuywebe ibiat ẽn o am — i. 
\m Imẽnpuye iẽn oꞌom g̃u ip- -kadai oꞌom acã ip. 
\v 3 Iẽn oꞌoꞌukat — Etaybitꞌũm cĩcã — i jeꞌe g̃u kadai oꞌoꞌukat pe. Kadai oꞌoꞌukat tak: — Cedag̃ g̃u ẽn jekukum iẽn oꞌoꞌuk puye — i jeꞌe g̃u iẽn oꞌoꞌukat pe, Deus ixe kay buye. 
\v 4 Cũg̃ g̃u wuywebe “Cedag̃ g̃u ẽn jekukum” iꞌe am wararaꞌacat aꞌõkayat pe. Deus aꞌõkayat ixe. Cũg̃ pima, Deus acã jeꞌe cebe “Cũg̃ ma ẽn jekukum” i. Cũg̃ꞌũm pima dak, “Cũg̃ g̃u ẽn jekukum” i jeꞌe cebe. Wuykukukat jaꞌõbacaap jeg̃ũm cebe cũg̃ ma jeku am. Imẽnpuye cũg̃ ma jeku.
\p
\v 5 Pũg̃pũg̃ xe ma pũg̃pũg̃ kabia kabiaꞌipi. Wararaꞌacayũ xe bit kaꞌũmg̃u kabiaꞌipiat. Soat kabia ma ipi g̃u. Jewejojoꞌi ma soat kabia ma cexe ip. 
\v 6 Pũg̃pũg̃ayũ xe pũg̃pũg̃ kabia kabiaꞌipiat wuykukukat aꞌõmubuyxin ojuy ip. Iẽn oꞌoꞌukat tak soat ẽn oꞌom wuykukukat aꞌõmubuyxin ojuy. Jekõn pima: 
\p — Bay, ẽn xipan ocekug̃. Iẽn ũmũm ocexatẽn — iꞌeꞌem Deus pe.
\m Iẽn om ibuꞌuat tak iẽn oꞌom g̃u wuykukukat aꞌõmubuyxin ojuy. Jekõn pima:
\p — Bay, ẽn xipan ocekug̃. Soat em kadai ũmũm ocewebe ocexan — iꞌeꞌem Deus pe.
\m
\v 7 Deus wuyekukuap cocom wuyetabẽg̃ pima, wuyeꞌũ buje dak, wuyju Cristo aꞌõ kayayũ buye. 
\v 8 Wuyetabẽg̃ pima wuykukukat bikuyap tag̃ wuyju jekukum. Wuyeꞌũ buje dak cexe acesop- -wuykukukat xe. Imẽneju wuykukukat aꞌõkayayũ wuyju wuyetabẽg̃ pima, wuyeꞌũ buje dak. 
\v 9 Imẽneju Cristo oeꞌũ. Waram g̃uto oꞌjetait jeꞌũap tomukadi. Waram oꞌjetait soat itabucayũ kukukan- -itabẽg̃ayũ kukukan, ceꞌũꞌũayũ kukukan tak. 
\v 10 Pãm eyju? Apẽnpuye dak eyju eykitpitpiyũ muymuy? cũg̃ g̃u eywebe imuymuy am. G̃uyjom soat wuyju acejebapuk Deus wap. Ixe apẽn ijodi bima juk adi ajekuku iaptei ideida wuywebe. Xipacat jeꞌg̃ũm xipacayũ be xipacat mujurũg̃rũg̃apteim. Kũyjobitꞌũmayũ bit g̃uju ipiatꞌajojoap pe kũyjobitꞌũmapteim. Imẽnpuye cũg̃ g̃u eywebe dak “Ikẽrẽat kug̃ eyju Deus xe” iꞌe am eykitpitpiyũ be. 
\v 11 Imẽn eꞌem Deus ekawẽn tup:
\mi “Soat ipi watwat jẽg̃ꞌaecõg̃cõg̃ owap kũyjobit waꞌõ kay am, soat em wetait puye,” iꞌeꞌem Deus, i. “Soat ip ‘Ẽn acã Deusat,’ i jeꞌe owebe,” iꞌeꞌem, i.
\m
\v 12 Imẽneju soat wuyju apẽn ijodi bima juk adi ajekuku iap ag̃uwẽn Deus pe.
\p
\v 13 Imẽnpuye wuykitpitpiyũ muymuyap cuy acepere. Cũg̃ ma juy ajeku wuykitpitpiyũ etabutpe ixeyũ be “Teku cedag̃ꞌũma jekukum” iꞌeap puxim. Cedag̃ꞌũm ixeyũ xe bima juy ayag̃uymuwarurun g̃u. Ãg̃ ip jeedop. 
\v 14 Wuykukukat Jesus eju mũg̃ꞌi õn jekukum. Imẽnpuye wetaybit soat iꞌopi g̃u owebe iam. Wararaꞌacat pe bit “Ibo iꞌopi owebe” iꞌe buje, iꞌopi ma oꞌe cebe. Ixe be iꞌo buje, cedag̃ g̃u jekukum, cedag̃ g̃u cexe buye. 
\v 15 Eykitpitpiyũ juy epeg̃ug̃uycũg̃ g̃u soat oꞌo am. Soat oꞌoap tomuju eykitpitpiyũ mug̃uycũg̃ pima, ikukpin g̃u ip eyxe. Cristo oeꞌũ eykitpitpiyũ beam. Epeg̃ubuꞌun g̃u juy ip Jesus kay am soat oꞌoam. Ibuꞌu ip pima, soat em Deus wi wũy ma jeedop ip, ixeyũ etabutpe ikukpin g̃u ip epejukuk puye. 
\v 16 Imẽnpuye eykitpitpiyũ xe xipatꞌũm pima:
\p — Eyetaybit g̃u eyju bit — iꞌũmg̃u juy epeꞌe cebe ip. — Xipat ma iẽn o am ocewebe bit — iꞌũmg̃u juy epeꞌe cebe ip.
\m Ikukpin g̃u ip ikug̃ pima ip jeymuymuy. 
\p — “Soat ẽn xipat iꞌo am,” i teꞌe ma teyũku eꞌem — i jeꞌe ip.
\m
\v 17 Deus ma wuykukukat. Ixe ebekitkiyũm acesop wuyxat oꞌomap tomuju g̃u, wuyxati kõnkõnap tomuju g̃u ma dak. Cũg̃ ma wuyju jekukum pima bit, ixe ebekitkiyũm acesop, kabaꞌũm wararaꞌacat kug̃ pima dak, wuycokcog̃ jekukum pima dak. Deus biõg̃buk wuymucokcokcog̃at. 
\v 18 Imẽn Cristo aꞌõ dag̃ jekukum pima, Deus mucokcokcog̃ acesop. Ijodiacat tak eꞌem: — Teyũku cũg̃ ma jekukum — i.
\p
\v 19 Imẽneju xipan cuy acewewekuk wuyweweju kabaꞌũm wuydop am. Jewewaꞌõmucanucan cuy ajop big̃ ma wuyetabut am Jesus kay. 
\v 20 Deus kuy juk eykitpitpiyũ mutabun Jesus kay. Epeg̃ubuꞌun g̃u juy ip soat ẽn oꞌoam. Soat iꞌopi g̃u wuywebe. Inaka wuykitpit pe ikẽrẽat mujurũg̃at puje, wuyju dak ikẽrẽat mujurũg̃rũg̃ soat oꞌom pima. 
\v 21 Wuykitpit pe ikẽrẽat ag̃ujurũg̃at g̃u juy! Wuyxe ma xipat soat ẽn oꞌoap, uvaꞌabidi kõnkõg̃ap tak. Wuykitpit xe cedag̃ꞌũm pima bit asuẽnꞌo g̃u, atikõn g̃u dak. 
\v 22 Soat oꞌoap eyxe xipat pima:
\p — Soat iꞌopi g̃u ocewebe — i juy epeꞌe wararaꞌacayũ be g̃u- -Deus pe acã. 
\m Cũg̃ ma juy ajeku wuyag̃uy dag̃. Apẽn xipat wuyxe iap tag̃ wuyju jekukum pima, wuycokcok aceꞌe. 
\v 23 Itabutbũt xipat g̃u xeꞌe owebe ibiat o am iap kay bima bit, ig̃uycũg̃ jeꞌe iꞌo buje. 
\p — Ikẽrẽat g̃u xeꞌe oꞌgujurũg̃? — i jeꞌe jewebe ma. — Deus xeꞌe ipiat supiꞌajoat owebe? — i jeꞌe jewebe ma. 
\m Itabutbũt pima oꞌjoꞌo. Imẽnpuye xipat g̃u tũybe osunuy cexe. Iboap xipat Deus xe iap kay wuyetabutꞌũm pima, wuyju dak ikẽrẽat mujurũg̃rũg̃, iboap mujurũg̃ puje.
\b
\c 15
\p
\v 1 Pũg̃pũg̃ wuyꞌin eꞌem: — Ocetaybit cedag̃ ma jeku am Deus xe iam — i.
Wuyukpiceg̃ẽm g̃u juy ajop “Apẽn g̃u xeꞌe kuka cedag̃ ajeku Deus xe?” iꞌeꞌeꞌukayũ kay. Itaybitbũcayũ buywatwan cuy ajop. Jewekay acã g̃u juy ajop g̃ebum. 
\v 2 Wuykitpitpiyũ kay dak cuy ajop g̃ebum. Wuykitpitpiyũ kay g̃ebum cuy ajop xipan ip ikuk am, Jesus kay itabut cĩcã ip jedop am tak. 
\v 3 Cristo dak jewekay g̃u g̃ebum osunuy- -wararaꞌacayũ kay acã. Cristo juk oꞌe Deus pe: 
\p — Ikẽrẽm ip cuk adi okuk apẽn ip ikẽrẽm ekuk iap coꞌi — i.
\m Imẽn Cristo oꞌe Deus pe kuyje. 
\v 4 Kuyjeayũ Deus ekawẽntup oꞌtupmubararak wuymutaybit am- -soatup. Ibiatup kawẽn wuymutaybitbin wuyetaxiꞌũmap puxim ipiat kay. Wuyaꞌõmucanucan tak ibiatup ekawẽn. Ibiatup ekawẽn kay wuyetabut pima, Deus xe acesop iap acejowiwi jĩjã. 
\v 5 Deus ma wuybuywatwan wuyetaxi am ipiatꞌajo am. Wuyaꞌõmucanucan tak. Ixe eju õn kawẽnwẽn eywebeam.
\p — Bay, Roma ka watwat aꞌõmucanucan cuy eg̃uy — i õn eꞌem cebe. — Esubuywan cuy ip ixeyũ be wararaꞌacat kay g̃ebum am Jesus Cristo wararaꞌacat kay g̃ebum osunuy iap coꞌi — i õn eꞌem cebe. 
\m
\v 6 Imẽn õn kawẽnwẽn eywebeam Deus eju, pũg̃ tag̃ ma eyeku am. Ceweju õn kawẽnwẽn “Kaꞌũmg̃u ejoꞌiat xipacat” iꞌe am Deus pe- -wuykukukat ebay be- -Jesus Cristo ebay be.
\p
\v 7 Imẽneju xipan cuy epeyewekuk apẽn Cristo xipan eykuk iap coꞌi. Xipan eyju jewekug̃ pima: 
\m — Deus xipat cĩcã acoꞌi, cebekitkiyũ xipan jewekug̃ puye — i jeꞌe eyjojoayũ. 
\m
\v 8 Imẽn Cristo oajẽm ijodi. Judeuyũ daxijojoꞌukan oꞌe. Deus soat em jaꞌõ dag̃ eꞌem iam ixeyũ mutaybit am oajẽm. Oajẽm ijodi apẽn Deus oꞌe kuyjeayũ be iap tag̃- -Judeuyũ dobuyũꞌũmꞌũm pe iap tag̃. 
\v 9 Judeuyũ daxijojoꞌukan oꞌe, Judeuꞌũmayũ be “Ẽn xipan cĩcã ocekug̃, ocekay etabotaidabotbot puye” iꞌe am Deus pe. Imẽn eꞌem Deus ekawẽn tup- -Davi emudupmubararaktup:
\mi Imẽneju “Soat podi ma ẽn xipat cĩcã,” i oce Deus pe Judeuꞌũmayũ aꞌõpiju, i. Jebibododon oce ẽn xipat cĩcã iꞌeꞌem ewebe yaꞌõpiju ip, i.
\m
\v 10 Waraꞌatup tak imẽn eꞌem- -Moisés emudupmubararaktup:
\mi Judeuyũ g̃u eyju, i. Inaka eycokcog̃ cuy epesop soat Deus emunaẽyũ eju, i.
\m Imẽn eꞌem ig̃odup. 
\v 11 Waraꞌatup tak imẽn eꞌem- -Davi emudupmubararaktup:
\mi — “Ẽn acã aꞌõbacaat,” i juy epeꞌe Deus pe — i õn eꞌem Judeuꞌũmayũ be, i. — Soat eyju “Ẽn soat podi ma xipan ocekug̃,” i juy epeꞌe cebe — i õn eꞌem soat tag̃acat pe, i.
\m
\v 12 Waraꞌatup tak imẽn eꞌem- -Isaías emudupmubararaktup:
\mi Bekicat jeꞌkap- -Jessé naxeg̃ebit, i. Ixe bekicat Judeuꞌũmayũ kukukan jeꞌe, i. Judeuꞌũmayũ dak ixe jowiwi jedaxijo am, i.
\m Imẽn Isaías oꞌtupmubararakat Cristo ekawẽntup- -Jessé naxeg̃ebit ekawẽntup.
\p
\v 13 Imẽn Deus soat em jexe wuyetait acesop iap wiwian wuywebe. Ixe eju õn kawẽnwẽn eywebeam: 
\p — Bay, Roma ka watwat itabut ekay — i õn eꞌem cebe. — Imucokcokcog̃ cuy ip eg̃uy — i õn eꞌem cebe. — Yag̃uymubabibin cuy ip eg̃uy — i õn eꞌem cebe. 
\m Imẽn õn kawẽnwẽn Deus eju eywebe big̃ ma iboap wiwian jebiõg̃buk aꞌõbacaan- -Xipacat piõg̃buk aꞌõbacaan.
\p
\v 14 Okitpitpiyũ, õn ma wetaybit eyjum. Soat em eyju xipan wararaꞌacat kug̃. Soan eyetaybit. Eyetaybit tak Jesus Cristo ekawẽn. Jewawẽwẽ but eyeweweju. 
\v 15 Inaka ijudup pe osũsũn g̃u waꞌõbapug̃ eyawẽ ãm eyag̃uybaꞌũmap puxim icẽmat ekawẽn kay. Osũsũn g̃u Deus aꞌõbiat õn puye. 
\v 16 Ixe Deus cuk onaẽ Jesus Cristo ekawẽn muwẽn ãm Judeuꞌũmayũ be. Paĩ buxim Deus ekawẽn muwẽnuwẽn õn cebe ip- -kawẽn idipat muwẽnuwẽn. “Ẽn soat podi ma aꞌõbuyxi” i ixeyũ e buje, Deus icokcok eꞌem. Xipacayũm ip jeꞌe Deus xe, Ibiõg̃buk xipacat ixeyũ muisun puje. 
\v 17 Imẽn kapikpig̃ õn Deus peam Jesus Cristo eju mũg̃ꞌi õn jekukum puye. Imẽnpuye:
\p — Ocokcok wekapikap kug̃ — i õn eꞌem Deus pe. 
\m
\v 18 Cristo ma waꞌõmucanucan osunuy owebe Judeuꞌũmayũ mutabun am jekay. Cũg̃ ma juk adi ocekawẽnuwẽn ceweju ip. Cũg̃ ma juk adi ojekukuku cetabutpe ip. Imẽnpuye itabut ip oꞌe Jesus kay. Deus aꞌõ kay ip oꞌjekũyjobin, Cristo bikuyap tag̃ õn jekukum puye. Obisũsũn g̃u “Obuye adeayũ itabut oꞌe” iꞌe am eywebe. 
\v 19 Deus biõg̃buk cuk adi jaꞌõbacaap oꞌjomõg̃mõg̃ owebe. Imẽnpuye wuywebe iꞌe baꞌoreat og̃ubapukpuk Judeuꞌũmayũ be. Itabẽg̃bẽg̃ oꞌe ip Deus aꞌõbacaap cocom. Imẽnpuye soat ka dag̃ cuk adi ojekukuku. 
\p — Cristo kay eyetabun puje, Deus jeydaxijo — iꞌeꞌem cuk adi ojekukuku. 
Koap Jerusalém ka watwat og̃ukũyjojo. Ibo ka bewi juk ojẽm. Soat kaka dag̃ cuk adi ojekukuku adeayũ mukũyjojom, kawẽn idipat muwẽnuwẽn. Wũyat eipi be oajẽm g̃ebuje- -Ilíria eipi be. 
\v 20 Kawẽn idipat muwẽn ojuy og̃uy Jesus Cristo awẽg̃ tobuxikayũ be g̃u- -yawẽg̃ tobuxikꞌũmayũ be acã, itaybitꞌũm ip puye. 
\v 21 Imẽn eꞌem Deus ekawẽn tup:
\mi Yawẽg̃ tobuxikꞌũmayũ yawẽg̃tobuxik, i. Yawẽg̃paꞌarẽm g̃u jeꞌe cexe ip, i.
\m Imẽnpuye ibo dup ekawẽn tag̃ õn kawẽn idipat muwẽnuwẽn yawẽg̃tobuxikꞌũmayũ be acã.
\m
\v 22 Eyjo am omujuꞌũmꞌũm osunuy soat em maꞌg̃u oju pin, yawẽg̃tobuxikꞌũmayũ be õn kawẽn idipat muwẽnuwẽn puye. 
\v 23 Ade koato eyjo pin cuk adi og̃uy. Imẽnpit g̃asũ acã ijop kaka dag̃ kawẽn idipat muwẽg̃ap og̃uꞌũm. 
\v 24 Imẽnpuye g̃axĩn ma acoꞌi oju eyjom. Espanha eipi kay cum pima eyjo pin oce. Eyxe dak ibun onuy buje, obuywan cuy epeꞌe Espanha eipi kay oju am. 
\v 25-26 G̃asũ bit õn cum Jerusalém ka kay. Judeuꞌũmayũ jedinheiro muꞌawero ojuy ip osodop- -Macedônia eipi beayũ- -Grécia eipi beayũ dak. Iboap edinheiro ũm ojuy ip Jerusalém ka beayũ be- -Judeuyũ be- -itabucayũ be- -tadaybotbocayũ be. Imẽneju iboap edinheiro dujowan õn iũm ãm cebe ip. 
\v 27 Ixeyũ Macedônia eipi beayũ Judeuyũ g̃u- -Grécia eipi beayũ dak. Imẽnpit itabut ip oꞌe Jesus kay, Judeuyũ kawẽn idipat oꞌg̃uwẽn cebe ip puye- -Jerusalém ka beayũ. Imẽnpuye ip jedinheiro ũm ojuy cebe ip. Xipat imẽn Judeuꞌũmayũ be Judeuyũ buywat am- -jekitpitpiyũ buywat am- -tadaybotbocayũ buywat am. 
\v 28 Imẽneju ibiat dinheiro og̃ũm cebe ip. Soat oꞌg̃uxipanꞌiat og̃ũm cebe ip. Iũm puje Espanha eipi kay oju. Espanha eipi kay cucum pima eyjom oju. 
\v 29 Eyxe wajẽm puje, apẽn Cristo xipan okug̃ iap og̃uwẽn eywebe. Soat podi ma Cristo xipan okug̃ iap og̃uwẽn eymucokcok am.
\p
\v 30 Okitpitpiyũ, eyju dak eyetabut wuykukukat Jesus Cristo kay. Eyju xipan jewewekug̃ Deus biõg̃buk aꞌõ kay kũyjobit puye. Imẽnpuye epeyekawẽn cuy Deus eju owebeam. Owebeam Deus eju eyekawẽnap ojuyjuy jĩjã õn. 
\p
\v 31 — Paulo kay juy ag̃ eg̃uy Judéia eipi watwat pe yaokaap puxim- -itabutꞌũmayũ be yaokaap puxim — i juy epeꞌe Deus pe. — Jerusalém ka watwat cuy eg̃ubikuy- -itabucayũ juy eg̃ubikuy Paulo xewi ibo edinheiro bu am — i juy epeꞌe Deus pe. 
\m
\v 32 Imẽn cuy epeyekawẽn owebeam Deus eju. Imẽn kawẽnwẽn pima, ocokcok cĩcã oajẽm eykay. Deus ibikuy bima ocokcok cĩcã oajẽm eykay. Eyju dak omucokcokcog̃ epesop. 
\v 33 Okitpitpiyũ, Deus wuyag̃uymubabibinꞌukat. 
\p — Roma ka watwat kay juy ag̃ eg̃uy — i õn eꞌem cebe. 
\m Imẽn ma ag̃ jeenuy eykay.
\b
\c 16
\p
\v 1 Wuyixĩg Febe og̃uju eykay. Ixe Febe Jesus kay itabucayũ buywatwatꞌukat- -Cencréia ka watwat buywatwatꞌukat. 
\v 2 Imẽnpuye ixe juy epeg̃uõm eydukꞌa be tũy ãm. Wuykukukat kay itabucayũ juy ag̃uõm wuydukꞌa be pũg̃ kay ma wuyetabut puye. Ixe Febe juk adi adeayũ buywatwatꞌuk osunuy. Õn tak cuk adi xeku obuywatwatꞌuk osunuy. Imẽnpuye eywebe ibuywan put pima, eyju dak cuy epesubuywan!
\m
\v 3 “Kato” i juy epeꞌe Priscila be, Áquila be dak. Ixeyũ juk adi oꞌjekapikpik oweju Jesus Cristo beam. 
\v 4 Oeꞌũ pin ip Áquilayũ weꞌũap puxim.
\p — Xipat cĩcã eyju — i õn eꞌem cebe ip. 
\m Imẽn tak eꞌem soat Judeuꞌũmayũ- -Jesus kay itabucayũ. 
\v 5 “Kato,” i juy epeꞌe Áquilayũ dukꞌa be jeꞌaweroroꞌukayũ be dak- -Jesus kay itabucayũ be.
\p Obure Epêneto be dak, “Kato,” i juy epeꞌe. Koap ixe oitabun Jesus kay Ásia eipi watwatꞌin. 
\v 6 Maria be dak, “Kato,” i juy epeꞌe. Ixe juk adi oꞌjekapikpik cĩcã eywebeam. 
\v 7 Obadipyũ be dak, “Kato,” i juy epeꞌe- -Andrônico be, Júnias pe dak. Daomũnmũnapꞌa be osodop ip oweju. Doze beayũ Jesus emumujuyũ itaybit cĩcã ixeyũm xepxepayũm. Ixeyũ oitabun Cristo kay wetabut awap.
\p
\v 8 Amplíato be dak, “Kato,” i juy epeꞌe. Ixe obure ikukpin cĩcã oxe wuykukukat kay ixe dak itabut puye. 
\v 9 Urbano be dak, “Kato,” i juy epeꞌe. Ixe dak oceweju juk adi Cristo muwẽnuwẽn oeku. Estáquis pe dak, “Kato,” i juy epeꞌe. Ixe obure ikukpin cĩcã oxe. 
\v 10 Apeles pe dak, “Kato,” i juy epeꞌe. Cristo kay jetabucap kug̃ jekukum ixe soat etabutpe. Aristóbolo badipyũ be dak, “Kato,” i juy epeꞌe- -soat pe. 
\v 11 Obadip Herodião be dak, “Kato,” i. Soat wuykukukat kay itabucayũ be dak, “Kato,” i juy epeꞌe- -Narcisco badipyũ be.
\p
\v 12 Wuyixĩt Trifena be dak, “Kato,” i juy epeꞌe, wuyixĩt Trifosa be dak. Kapikpig̃ cĩcã ip wuykukukat peam. Wuyixĩt Perside be dak, “Kato,” i. Wuyxe ixe ikukpin cĩcã. Ixe juk adi oꞌjekapikpik cĩcã wuykukukat peam. 
\v 13 Rufo be dak, “Kato,” i. Ixe dak kapikpig̃ cĩcã wuykukukat peam. Ixe xi be dak, “Kato,” i juy epeꞌe. Ixe juk adi xipan okuk jeꞌit kukap coꞌi. 
\v 14 Asíncrito be dak, “Kato,” i, Flegonte be dak, Hermes pe dak, Pátrobas pe dak, Hermas pe dak, ixeyũ xeayũ be dak- -wuykitpitpiyũ be. 
\v 15 “Kato,” i juy epeꞌe Filólogo be dak, Júlia be dak, Nereu be dak, ixe ixĩt pe dak, Olimpas pe dak, ixeyũ xeayũ be dak- -Deus ebekitkiyũ be.
\p
\v 16 Epeyewakobotbot cuy wuykukpin wuyeweweju iap mubapuk am soat pe. Soat Cristo ebekitkiyũ kato mujujum eywebe- -soat ka watwat.
\p
\v 17 Okitpitpiyũ, jeyawẽ õn. Eydayꞌemꞌum cuy epesop cewejakꞌũm jewewekayayũ kay- -eymutaybitbinap muwarururun ojuyayũ kay- -Cristo ekawẽn muwarururun ojuyayũ kay. Ixeyũ burem g̃u juy epesop. 
\v 18 Wuykukukat Cristo mucokcokcog̃ g̃u ip jekukukum- -jemucokcokcog̃ acã. Idim cĩcã ip kawẽnwẽn. “Eyju xipat cĩcã” iꞌeꞌem ip wararaꞌacat pe jekay am. Imẽn ip itaybitꞌũmꞌũmayũ mug̃uykukukum. 
\v 19 Soat kaka dag̃ayũ kuy itaybit eyetabut cĩcã Jesus kay iam. Imẽnpuye ocokcok eykay. Obikuy jĩjã eyetaybit cĩcã ãm xipacat mujurũg̃ ãm. Ikẽrẽrẽat mujurũg̃ ãm pit cuy õn eykay g̃u. 
\v 20 Deus ma Satanás aꞌõbacaap g̃uꞌũm g̃axĩn ma ixe be waram wuymug̃uykukuap puxim. Ixe Deus wuyag̃uymubabibinꞌukat. Wuykukukat Jesus Cristo xipan cuy jeykuk.
\p
\v 21 Wuykitpit Timóteo kato mujujum eywebe. Ixe kapikpig̃ oweju. Wuykitpit Lúcio dak kato mujujum eywebe, Jasão dak, Sosípatro dak. Obadipyũ ip.
\p
\v 22-23 Gaio dak kato mujujum eywebe. Ixe dukꞌa be õn g̃asũ. Ixe dukꞌa be Jesus kay itabucayũ jeꞌawerorom. Erasto dak kato mujujum eywebe. Ixe Corinto ka kukat edinheiro muxipanpanꞌukat. Wuykitpit Quarto kato mujujum eywebe.
\p Õn tak- -Tércio õn. Õn tak kato mujujum eywebe, pũg̃ kay ma wuyetabut puye wuykukukat kay. Õn ijudup mubarararag̃ eywebeaptum Paulo aꞌõbi. 
\v 24 Wuykukukat Jesus Cristo cuy xipan jeykuk- -soat jukuk. Imẽn cuy jeykuk.
\p
\v 25 — Ẽn soat podi ma aꞌõbuyxi — i juy ace Deus pe. 
\m Ixe be wuyaꞌõmubacan put wuybuꞌuap puxim Jesus kay. Jesus Cristo ekawẽn muwẽnuwẽn cuk adi og̃uy- -kawẽn idipat muwẽnuwẽn. Kuyje Deus iboap ekawẽn oꞌg̃uwẽn g̃u ipi watwat pe. Kawẽn ibaꞌarẽm osunuy soat xe ipi watwat xe. Ibun ibaꞌarẽm osunuy. 
\v 26 Ibaꞌarẽm ma juk adi iboap ekawẽn muwẽnuwẽnꞌuk ip osodop Deus ekawẽn muwẽnuwẽnꞌukayũ kuyjeayũ be. G̃asũ bit ibapug̃ ma Deus aꞌõbiayũ iboap ekawẽn muwẽnuwẽn soat ka watwat pe. Ixe Deus soat em itait. Ibapug̃ ma oꞌg̃uwẽnat adeayũ be itabut am Cristo kay, kũyjobit am tak ip yaꞌõ kay.
\p
\v 27 — Soat podi ma edip — i juy acece soat em Deus pe. — Soat podi ma aꞌõbuyxi — i dak. 
\m Imẽn cuy ace cebe itaybit soan puye; ixe Jesus Cristo oꞌg̃udot wuykay buye dak. Imẽn cuy acece cebe. Ixe acã Deusat.