\id 1CO Mundurukú [myu] NT (Brazil) -2010 bd. 
\h 1 Coríntios
\toc1 Corinto ka watwat peaptup- -koapatup
\toc2 Primeira Carta aos Coríntios
\mt CORINTO KA WATWAT PEAPTUP PAULO EMUDUPMUBARARAKTUP
\c 1
\p
\v 1 Corinto ka watwat, cartadup mubararag̃ õn eywebeaptum. Õn Paulo. Tupmubararag̃ õn wuykitpit Sóstenes eju. Jesus Cristo emumuju õn Deus bikuyap tag̃. 
\v 2 Tupmubararag̃ oceju soat pe Deus ebekitkiyũ be- -wuykukukat Jesus Cristo kay itabucayũ be. Deus cuk eynaẽ jebekitkiyũm Cristo eju mũg̃ꞌi eyju jekukum puye. Soat ixe ebekitkiyũ eꞌem:
\p — Ocebuywatwan cuy eg̃uy — i soat ka watwat. 
Ixe Jesus Cristo wuykukukat- -ixeyũ kukukat tak.
\p
\v 3 — Bay, xipan cuy Corinto ka watwat ejukuk — i õn eꞌem Deus pe- -wuyebay be, Jesus Cristo be dak- -wuykukukat pe. — Ixeyũ ag̃uymubabibin cuy eg̃uy — i õn eꞌem cebe ip.
\p
\v 4 Deus soat em xipan eykug̃, Jesus Cristo eju mũg̃ꞌi eyju buye. Imẽnpuye:
\p — Bay, ẽn xipat cĩcã — i õn eꞌem Deus pe soat em ma. 
\m
\v 5-6 Cristo juk adi oceg̃uwẽnuwẽn eywebe. Imẽnpuye ixe aꞌõ dag̃ eyju jekukum g̃asũ. Soat kug̃ eyju, Cristo eju mũg̃ꞌi eyju jekukum puye. Imẽnpuye eyetaybit kawẽn icẽmat muwẽn ãm. Kaꞌũma ma ibaꞌarẽm eyxe, eyetaybit cĩcã buye. 
\v 7 Imẽnpuye soat kug̃ eyju- -Deus biõg̃buk emumuũm kug̃. Deus waram wuykukukat Jesus Cristo g̃ubapuk soat ijodiacat etabutpe. Ixe mubapukap wiwim eyju. Iwiwim pima soat kug̃ eyju. Deus biõg̃buk emumuũm kug̃. 
\v 8 Soat em Deus eyaꞌõmucanucan jeenuy eywebe eyetabucap epereap puxim. Imẽnpuye ikẽrẽat kug̃ g̃u epesop Deus xe wuykukukat Jesus Cristo ajẽmap kabia be. Ixe kabia be abuyũ xipat iap g̃uwẽn. Abuyũ xipat g̃u iap tak g̃uwẽn. 
\v 9 Deus soat em eꞌem jaꞌõ dag̃. Ixe juk eynaẽ eywebe jekpot eju jeburere am- -Jesus Cristo eju jeburere am. Ixe Jesus Cristo wuykukukat.
\p
\v 10-11 Okitpitpiyũ, Cloe badipyũ bit cuk oꞌe owebe:
\p — Corinto ka watwat jewaꞌõdawutwun cĩcã jeweweju, Jesus Cristo kay itabut maꞌg̃u ip — i. 
\m Imẽnpuye jeymukũyjo õn, okitpitpiyũ. Wuykukukat aꞌõbi õn jeymukũyjo Jesus Cristo aꞌõbi. Jewaꞌõxikxig̃ g̃u juy epesop. Waraꞌat tag̃tag̃tag̃ g̃u dak cuy epeyewag̃uy- -pũg̃ tag̃ ma. Pũg̃ tag̃ ma dak cuy epeyekawẽn soat em. Pũg̃ tag̃ ma dak cuy eybikuy eyeku am. 
\v 12 Pũg̃pũg̃ eyꞌin eꞌem: — Paulo kadiayũ oceju bit — i. Wararaꞌacayũ eꞌem: — Apolo kadiayũ oceju bit — i. Wararaꞌacayũ eꞌem: — Pedro kadiayũ oceju bit — i. Wararaꞌacayũ eꞌem: — Cristo kadiayũ oceju bit — i. 
\m Iwarururum ma eyju eꞌem. 
\v 13 Waraꞌat tag̃tag̃tag̃ ma eyju eꞌem pima, eyju Cristo muweutun iap puxim. Õn g̃u obamupaya ip korosa be weꞌũ ãm eywebeam- -Cristo acã. “Paulo ebekin õn g̃asũ bit” iꞌe am g̃u jewemubatisasan epesop- -“Cristo ebekin õn g̃asũ bit” iꞌe am acã. Imẽnpuye jewaꞌõdawutwun g̃u juy epesop.
\p
\v 14-15 Imẽnpuye teꞌe ma eyju eꞌem: 
\p — Paulo juk omubatisasan jekadian — i. 
\m Õn pit cuk imubatisasan teku okadiat iam g̃u- -pũg̃ em tak kaꞌũma. Imẽnpuye ocokcok oce ade g̃u eyꞌin og̃ubatisasan puye- -pũg̃pũg̃ ã. Crispo og̃ubatisasan, Gaio dak. Wararaꞌacayũ bit acoꞌi kaꞌũma. 
\v 16 Icẽmãn. Waraꞌat kay oceg̃ebu g̃asũ bit. Estéfanas tak cuk og̃ubatisasan. Ibadipyũ dak cuk og̃ubatisasan. Wag̃uybaꞌũm wararaꞌacat tak paxi juk og̃ubatisasan iap kay. 
\v 17 Ijodiat mubatisasan am g̃u Cristo juk omuju- -kawẽn idipat muwẽn ãm acã. 
\p — Kawẽn idipat muwẽn puje, itaybit cĩcãat ekawẽn g̃u juy eg̃uwẽn- -Jesus Cristo juk oeꞌũiap ekawẽn acã — i juk oꞌe owebe. 
\m Itaybit cĩcãat ekawẽn imuwẽn puje:
\p — Teku itaybit cĩcã — i kuka oꞌe ip waꞌĩjojoayũ. 
\p — Jesus oeꞌũ korosa be wuywebeam — iꞌũmg̃u bit kuka oꞌe ip.
\p
\v 18 Korosa be Jesus oeꞌũ wuywebeam iap ekawẽn co buje, Deus pe taxijoꞌibiyũ ma eꞌem:
\p — Deus jaꞌõbacaam wuydaxijojom jekpot oceꞌũ buye — i.
\m Ipiatꞌajojoap kay cumayũ bit eꞌem:
\p — Apẽnpuye dak oeꞌũ? — i. — Teꞌe ma oeꞌũ — i napa ma eꞌem ip. 
\m
\v 19 Imẽn eꞌem Deus ekawẽntup:
\mi Itaybit cĩcãayũ jewexe ip itaybit iap og̃ubapuk soat pe, i. Itaybit cĩcã ip ipi juacat xe, i. Oxe bit itaybit g̃u, i.
\p
\v 20 Yaꞌõbuyxi g̃u ip Deus xe itaybit cĩcãat, ibabi jĩjãat tak, xipan cekawẽnat tak. 
\p — Ipi juayũ xe teyũku itaybit cĩcã, itabutꞌũmayũ xe- -oxe bit kaꞌũma — iꞌeꞌem Deus.
\p — Oceju cũg̃ ma Deus xe ocetaybit cĩcã buye — i teꞌe ma ip eꞌem.
\p
\v 21 — Ocetaybit Deus, soat podi ma ocetaybit puye — iꞌeꞌem teꞌe ma itabutꞌũmayũ. 
\m Deus pit soat podi ma itaybit.
\p — Eyetaybicap tag̃ g̃u eyetaybit õn- -eyetabucap tag̃ acã — iꞌeꞌem Deus. 
\p “Jesus oeꞌũ wuywebeam,” iꞌeꞌem pima:
\p — Eybidaodao — iꞌeꞌem itabutꞌũmayũ wuywebe. 
\m Deus pit wuydaxijojom wuyetaybit soan puye g̃u- -jekpot oeꞌũ iap kay wuyetabut puye acã. 
\p
\v 22 — Wuywebe iꞌe baꞌoreat cuy epeg̃ubapuk ocetabun — iꞌeꞌem Judeuyũ wuywebe. — Wuywebe iꞌe baꞌoreat mubapuk puje acã kuka ocetabut oceꞌe — iꞌeꞌem Judeuyũ ma. — Eywebe itaybit cĩcãat ekawẽn imuwẽn puje acã kuka ocetabut oceꞌe — iꞌeꞌem Judeuꞌũmayũ.
\m
\v 23 Wuyju bit imẽn g̃u eꞌem. 
\p — Cristo oꞌsubamupaya ip korosa be ceꞌũ ãm soat peam wuywebeam — i wuyju bit eꞌem. 
\m Imẽn eꞌem pima:
\p — Eybidaodao ocexe — iꞌeꞌem Judeuꞌũmayũ wuywebe. — Eyekawẽnkẽrẽ jĩjã ocexe — iꞌeꞌem Judeuyũ wuywebe. 
\m
\v 24 Deus emunaẽyũ xe bit Cristo oeꞌũ korosa be soat peam wuywebeam iap awẽg̃ yawẽg̃tip cĩcã- -Judeuyũ xe, Judeuꞌũmayũ xe dak. Deus jaꞌõbacaap mubapukpug̃ wuydaxijo am Cristo oeꞌũ buye. Jetaybicap mubapukpug̃ tak wuydaxijo am. 
\p
\v 25 — Deus pit itaybit g̃u — i teꞌe ma eꞌem itabutꞌũmayũ.
\m Ixeyũ xe itaybitꞌũmat pit, soat ijodiacat etaybitbicap podi ma itaybit.
\p — Deus pit yaꞌõbaca g̃u — i teꞌe ma eꞌem ip. 
\m Ixeyũ xe yaꞌõbacaꞌũmat pit soat ijodiacat aꞌõbacaap podi ma yaꞌõbaca.
\p
\v 26 Okitpitpiyũ, g̃ebum cuy epesop apẽn kuy bima epesop iap kay, Deus pe eynaẽ awap iap kay. Ade g̃u epesop itaybit cĩcãayũm ipi watwat xe. Yaꞌõbuyxiayũm tak kaꞌũma. Kariwawayũm tak kaꞌũma. 
\v 27 Deus pit abuyũ ipi watwat xe itaybitꞌũmayũ oꞌtaẽ jebekitkiyũm itaybit cĩcãayũ musũsũn ãm. Abuyũ ijodiacat xe yaꞌõbuyxiꞌũmayũ oꞌtaẽ jebekitkiyũm yaꞌõbuyxiayũ musũsũn ãm. 
\v 28 Deus ijodiat emumuymuyũ oꞌtaẽ jebekitkiyũm. Ijodiat emumupubutbunyũ oꞌtaẽ. Ijodiat xe kaꞌũm cĩcãayũ oꞌtaẽ. Ixeyũ ma oꞌtaẽ ipi watwat xe yobog̃at aꞌõbacaap muꞌũm ãm. 
\v 29 Imẽneju abu be xipan jewemuwẽn put? Kaꞌũma be ma! Xipan wuyewemuwẽn paꞌore g̃asũ dak Deus pe. 
\v 30 Deus pit cuk eymuwedayo Jesus Cristo kay. Imẽnpuye jetaybicap mõg̃mõg̃ wuywebe. Imẽnpuye Jesus Cristo eju mũg̃ꞌi wuyju jekukum g̃asũ. Imẽnpuye:
\p — Cũg̃ ma eyju oxe — iꞌeꞌem Deus wuywebe.
Deus ebekitkiyũm acesop. Ixe dak wuydaxijojom. Wuyaꞌõmucanucan wuywebe ikẽrẽat kukap puxim. 
\v 31 Imẽnpuye xipan g̃u acewemuwẽn. Imẽn eꞌem Deus ekawẽntup:
\mi “Xipat cĩcã oceju bit,” iꞌũmg̃u juy ace, i. “Wuykukukat soat em xipat cĩcã eꞌem wuykay,” i acã juy ace, i.
\b
\c 2
\p
\v 1-2 — Waraꞌat g̃u og̃uwẽnuwẽn cebe ip- -Jesus Cristo acã — i juk adi oce owebe ma eyxe bima. — Korosa be oeꞌũiat acã og̃uwẽnuwẽn cebe ip — i juk adi oce owebe ma. — Itaybit cĩcãat puxim g̃u juy iboap ekawẽn og̃uwẽnuwẽn cebe ip — i juk adi oce owebe ma. — Adem g̃u og̃uwẽn cebe ip — i juk adi oce owebe ma.
\m Imẽneju õn adi oajẽm eykay, okitpitpiyũ. Oajẽm Deus ekawẽn muwẽn ãm eywebe- -kawẽn icẽmat muwẽn ãm. Iboap ekawẽn ibaꞌarẽm osodop kuy bima soat xe wuyxe. G̃asũ bit ibapuk oꞌe. 
\v 3 Eyxe bima õn pit wag̃uyꞌũm cuk adi og̃uy. Õn cuk adi oparara og̃uy Deus bikuyap tag̃ g̃u paxi aꞌg̃u og̃uwẽn iap puxim. 
\v 4 Kawẽn icẽmat cuk adi og̃uwẽnuwẽn eywebe. Itaybit cĩcãat emumutaybitbinap tag̃ g̃u juk adi og̃uwẽnuwẽn- -Deus aꞌõbacaam acã.
\p — Wetaybit cĩcãap tomuju g̃u ixeyũ og̃utabun Jesus kay — i juk adi oce owebe ma. 
\m Owebe imuwẽn puje, Deus biõg̃buk Deus aꞌõbacaap oꞌg̃ubapukpuk eywebe. Imẽnpuye Jesus kay juk eyetabut epeꞌe. 
\v 5 Jesus Cristo kay juk eyetabut epesop itaybit cĩcãat ekawẽn co buje g̃u- -Deus aꞌõbacaap co buje acã.
\p
\v 6 Deus biõg̃buk aꞌõ kay kũyjobicayũ be bit itaybit cĩcãat ekawẽn muwẽnuwẽn õn. Itabutꞌũmayũ ekawẽn muwẽnuwẽn g̃u bit õn cebe ip. Yaꞌõcam wararaꞌacat kukukayũ ekawẽn muwẽnuwẽn g̃u dak õn. G̃asũ acã yaꞌõbuyxi jĩjã ip. G̃uyjom pit yaꞌõbuyxian g̃u ip jeꞌe. Abuyũ kukukan jeꞌe ip g̃uyjom? Kaꞌũma kukukan ma ip jeꞌe. Deus ixeyũ aꞌõbacaap g̃uꞌũm. 
\v 7 Soat podi ma Deus itaybit. Ixe Deus ekawẽn muwẽnuwẽn acã õn eywebe eyetaybit am.
\p — Cekay itabucayũ otaxijo korosa be okpot oeꞌũ buye. Okpot coꞌiayũm jeꞌe ip — ioꞌe Deus jewebe ma ipi mujurũg̃ꞌũm awap.
\m Kuy bima ibaꞌarẽm osodop iboap ekawẽn. G̃asũ bit ibapuk oꞌe wuyxe. 
\v 8 Ijodiat kukukayũ itaybit g̃u osodop iboap kawẽn. Itaybit pima ip kuka juk wuykukukat oꞌsubamupaya g̃u korosa be ceꞌũ ãm. Ixe Jesus soat podi ma jedipap kug̃, jaꞌõbuyxiap kug̃ tak. 
\v 9 Imẽn eꞌem Deus ekawẽntup:
\mi Deus idip cĩcãat oꞌg̃uxipan iꞌũm ãm jekayayũ be, i. Ajojojoiat podi ma idip, ayaꞌĩjojoiat podi ma dak, i. Wuyag̃uy bodi ma dak idip, i.
\m
\v 10 Ibiat pit Deus oꞌg̃ubapuk wuywebe. Kuy bima ibaꞌarẽm osodop soat xe wuyxe. G̃asũ bit oꞌg̃ubapuk wuywebe. Jebiõg̃buk oꞌg̃uõm wuywebe iboap mubapuk am wuywebe. Ibiõg̃buk xipacat soat cocoꞌukat. Imẽnpuye itaybit soan. Itaybit apẽn Deus ibikuy wuydaxijo am iam, ibaꞌarẽm maꞌg̃u wuyxe. 
\v 11 Wararaꞌacat g̃u itaybit apẽn wuyju jewag̃uyg̃uy iam- -wuyju acã. Imẽnpuxim wararaꞌacat g̃u itaybit apẽn Deus jewag̃uyg̃uy iam- -ixe biõg̃buk acã. 
\v 12 Wuyju itabutꞌũmayũ g̃u- -itabucayũ ma. Itabutꞌũmat biõg̃buk g̃u juk ajat- -Deus biõg̃buk acã. Deus ma jebiõg̃buk muõmõm wuywebe wuymutaybit am ajo kuy oꞌg̃uxipan iũm ãm wuywebe iam.
\p
\v 13 Ijodiat g̃u juk wuymutaybitbin osunuy- -Deus biõg̃buk acã. Imẽnpuye ijodiat ekawẽn muwẽnuwẽn g̃u wuyju wararaꞌacayũ be- -Deus ekawẽn acã. Deus biõg̃buk pe wuymutaybitbinap ekawẽn muwẽnuwẽn wuyju ixe biõg̃buk kukayũ be. 
\v 14 Ibiõg̃buk kug̃ꞌũmat pe bit Deus biõg̃buk ũmap ibu baꞌore. Itaybit paꞌore dak ip cebe apẽnpuye iũmũm wuywebe iam. Ibaꞌarẽm cebe ip.
\p — Apẽg̃ãm tak kuka iboap ojat? — i teꞌe ma eꞌem ip jewebe ma, Deus biõg̃buk kug̃ꞌũm puye.
\m Wuyetaybit Deus biõg̃buk emumuũm xipat cĩcã iam ibiõg̃buk wuywebe bima acã. 
\v 15 Ibiõg̃buk xipacat kukat ma soat em itaybit ajo xipat cĩcã iam, ajo xipatpũt iam tak, ajo xipat g̃u iam tak. Ibiõg̃buk kug̃ꞌũmat pe bit iboap ibaꞌarẽm. Imẽnpuye ibiõg̃buk kug̃ꞌũmayũ teꞌe ma ibiõg̃buk kukat aꞌõ waywayway ip. 
\v 16 Imẽn eꞌem Deus ekawẽntup:
\mi Abu xeꞌe itaybit apẽn Deus jewag̃uyg̃uy iam? Kaꞌũma ma, i. Abu be ixe awẽ but? Kaꞌũma be ma, i.
\m Cristo ag̃uy dag̃ wuyju bit jewag̃uyg̃uy, ixe biõg̃buk omuy wuywebe buye. Imẽneju teꞌe ma ibiõg̃buk kug̃ꞌũmat wuyaꞌõxikxig̃.
\b
\c 3
\p
\v 1 Okitpitpiyũ, bekicat ikapꞌisuat puxim epesop Deus biõg̃buk aꞌõ kay kũyjobitbũt puye. Imẽnpuye Deus biõg̃buk kukat eju wekawẽnap puxim g̃u juk adi ocekawẽn eyweju- -kũyjobitꞌũmat eju wekawẽnap puxim acã. 
\v 2 Apẽn wuyju kũmti ũmũm bekicat pe iap puxim kawẽn ibaꞌarẽmãn g̃u og̃uwẽnuwẽn eywebe kawẽn ibapukan acã Deus ekawẽnꞌin. Kawẽn ibaꞌarẽmãn pit eyetaybit paꞌore epesop. G̃asũ dak eyetaybit paꞌore ma, 
\v 3 itabutꞌũmayũ buxim eyju jekukum puye.
\p Eyetabutkarey eyewewekay. Jewaꞌõxikxig̃ eyju eyeweweju. Imẽn eyeku buje, itabutꞌũmayũ joꞌi eyju jekukum, Deus biõg̃buk aꞌõ kayꞌũmayũ joꞌi- -ibiõg̃buk kug̃ꞌũmayũ joꞌi. Imẽneju ibaꞌore owebe eymutaybit am yaypanat mukũyjoap puxim.
\p
\v 4 — Paulo kadiayũ oceju bit — iꞌeꞌem eyꞌin.
\m Wararaꞌacayũ bit eꞌem:
\p — Apolo kadiayũ oceju bit — i.
\m Imẽnpuye eyju itabutꞌũmayũ joꞌi jekukum.
\p
\v 5 Apolo bit yobog̃at g̃u. Õn tak yobog̃at g̃u. Õn Deus peam kapikpikꞌukat acã. Apolo dak ibicat ma. Jesus Cristo muwẽnuwẽnꞌukayũ acã oceju. Eyetabut cekay g̃asũ, juk adi ixe oceg̃uwẽn eywebe buye. Wuykukukat kapikap ũmũm soat pe wuywebe. Imẽg̃ap pe acã kapikpig̃ wuyju. 
\v 6-9 Eyju Deus kat puxim. Kat iwat puxim Deus eykug̃ xipan. Apolo, õn tak Deus kat pe kapikpikꞌukayũ buxim. Oceju eymutaybitbin. Cristo muwẽnuwẽnap ig̃o kat pe kadai daidadamap puxim. Koap õn cuk adi Cristo og̃uwẽnuwẽn eywebe. Imẽnpuye eyetabut cekay. Cristo ekawẽn imutaybitbinap kadai abibimap puxim. G̃uyjom Apolo juk adi Cristo ekawẽn eymutaybitbin osunuy. Deus pit cuk eymubikay jebiõg̃buk aꞌõ kay am. Deus pe acã kadai muaypan put. Imẽnpuxim Deus acã wuymubikuy jebiõg̃buk aꞌõ kay am. Imẽnpuye yobog̃ g̃u Cristo muwẽnuwẽnꞌukat, cekawẽn imutaybitbinꞌukat tak. Deus acã yobog̃, ixe wuymubikuy jebiõg̃buk aꞌõ kay am puye. Cristo muwẽnuwẽnꞌukat cekawẽn imutaybitbinꞌukat coꞌi Deus xe. Jewejojoꞌi ma ip. Deus kapikaptei ideida soat pe kapikpikꞌukat pe. Apẽn cuk adi oꞌjekapikpik ip iap tag̃ ideida ip cebe. Ade xipacat jeꞌg̃ũm cedag̃ ma oꞌjekapikpikꞌiat pe. Warẽmtag̃ ma oꞌjekapikpikꞌiat pe bit yopit ma jeꞌg̃ũm.
\p Deus emuamuyꞌa buxim eyju. Ukꞌa iwat puxim Deus eykug̃ xipan. 
\v 10 Cristo ukꞌa muycemucemꞌiat puxim. Wuyju ukꞌa muycemucemap mõg̃mõg̃ ukꞌaꞌabi dag̃ yaꞌacap puxim. Imẽnpuxim cuk adi Cristo og̃uwẽnuwẽn eywebe eyetabut am cekay, ipiatꞌajojoap pe eyjuap puxim. Deus jaꞌõbacaap oꞌjomõg̃ owebe Cristo muwẽn ãm itabutꞌũmayũ be. Cristo muwẽnuwẽnap ukꞌa muycemucemap mõg̃mõg̃ap puxim. Wararaꞌacat cekawẽn eymutaybitbin g̃asũ odieg̃. Ixe ukꞌa muymuyꞌukat puxim. Ixe cũg̃ ma juy jeymutaybin. 
\v 11 Deus kuy Jesus Cristo oꞌg̃udot ijodi.
\p — Wararaꞌacat kay g̃u juy epesop eyetabun- -okpot kay acã — iꞌeꞌem Deus ijodiacat pe.
\m Wuyju ukꞌa muycemucemap mõg̃mõg̃ yamuycem am. Imẽnpuxim Deus jekpot oꞌg̃udot ijodi wuywebe wuyetabut am cekay ipiatꞌajojoap pe wuyjuap puxim. 
\v 12 Eymutaybitbinꞌukayũ ukꞌa muymuyꞌukayũ buxim. Pũg̃pũg̃ ukꞌa muymuyꞌukayũ yakoroatꞌa muymuy. Ourom yamuymuy ixeyũ, pratam tak, witaꞌam tak- -yasopsepatꞌam- -yadeibog̃atꞌam. Cũg̃ ma eymutaybitbinꞌukayũ buxim ixeyũ ma. Wararaꞌacayũ bit yakoroꞌũmatꞌa muymuy. Im yamuymuy ip, kapiꞌidim tak, uktum tak. Cũg̃ꞌũma eymutaybitbinꞌukayũ buxim ip. 
\v 13 Daxam yamupik puje abuyũ yacematꞌa oꞌyamuy iap ibapuk eꞌem soat xe, abuyũ yacemꞌũmatꞌa oꞌyamuy iap tak, yakoroꞌũmatꞌa yamupik puye. Imẽn tak jeꞌe Cristo ajẽmap kabia, kũyjobitꞌũmayũ be ipiatpiꞌajoan iap kabia. Ibapuk jeꞌe abuyũ juk adi cũg̃ ma eymutaybitbin iap, abuyũ cũg̃ꞌũma juk adi eymutaybitbin iap tak. Cũg̃ ma eymutaybitbin pima, eyetabut cĩcã epesop yajẽm puje. Cũg̃ꞌũma eymutaybitbin pima bit, kuy juk adi eyetabucap epeyepere yajẽm puje. 
\v 14 Yapikpekꞌũmatꞌa dukꞌa iwat tukꞌaꞌe mabuk daxa epirẽm puje. Imẽnpuxim cũg̃ ma eymutaybitbinꞌukayũ xipacat jeꞌjat Deus xewi jekapikapteim. 
\v 15 Yapikpekatꞌa dukꞌa iwat pit tukꞌaꞌe g̃u eꞌem, soat oꞌyapik puye. Imẽnpuxim cũg̃ꞌũma eymutaybitbinꞌukayũ xipacat jeꞌjat g̃u jekapikapteim. Imẽnpit idaxijo ma ip daxa bewi oꞌjenapõniat puxim. 
\v 16 Eyju g̃ebum g̃u acoꞌi Deus biõg̃buk nuynuy wuywebe iap kay. Eywebe dak ixe nuynuy ma. Imẽnpuye Deus nuynuyap coꞌi wuyju. 
\v 17 Deus nuynuyap ikẽrẽat kug̃ g̃u. Idip cĩcã soat tag̃. Wuyju ma ixe nuynuyap coꞌi. Imẽneju Deus ipiat supiꞌajoat cũg̃ꞌũma eymutaybitbinꞌukayũ be jenuynuyap mukẽrẽrẽnꞌiayũ buxim ip puye.
\p
\v 18 Jewemug̃uykukum g̃u bit cuy epesop.
\p — Itabutꞌũmayũ xe ocetaybit cĩcã — i teꞌe ma pũg̃pũg̃ eyꞌin eꞌem.
\m Jewexe eyetaybicap cuy epeyepere icẽmãn eyetaybit am Deus xe. 
\v 19 Itabutꞌũmayũ xe itaybit cĩcãayũ ibidaodao ip Deus xe. Imẽn eꞌem Deus ekawẽntup:
\mi Deus aꞌõbi jewexe itaybicat jewemug̃uykuku jetacokcokap kug̃, i.
\m
\v 20 Waraꞌatup eꞌem:
\mi Deus itaybit jewexe itaybicat teꞌe ma jewag̃uyg̃uy iam, i.
\m
\v 21 Imẽneju:
\p — Wuyetaybit soan ma — iꞌũmg̃u juy ace. 
Soat kukat puxim eyju Cristo eykukat puye. 
\v 22 Õn eybuywatwatꞌukat Cristo aꞌõbi, Apolo dak, Pedro dak. Deus soat ipi dag̃acat oꞌg̃ug̃ẽ xipan eykuk am. Eyetabẽg̃ pima, xipan eykug̃. Eyeꞌũ buje dak, xipan jeykuk. Xipan eykug̃ g̃asũ. G̃uyjom tak xipan jeykuk. 
\v 23 Deus Cristo kukat. Cristo dak eykukat. Imẽneju soat kukat puxim eyju.
\b
\c 4
\p
\v 1 Cristo buywatwatꞌukayũ kukap puxim cuy ocekug̃ epesop, oceju Deus ekawẽn muwẽnuwẽn puye- -kuyje ibaꞌarẽm osunuy iap ekawẽn muwẽnuwẽn puye- -g̃asũ ibapuk oꞌe iap ekawẽn muwẽnuwẽn puye. 
\v 2 Kariwa eꞌem jebekitkit pe:
\p — Waraꞌacat aꞌõ kay g̃u bit cuy ece- -waꞌõ kay acã — i.
\m Waraꞌan g̃u eꞌem cebe ip- -jebekitkit pe. Imẽnpuxim Deus eꞌem jebuywatwatꞌukat pe:
\p — Waraꞌacat aꞌõ kay g̃u bit cuy ece- -waꞌõ kay acã — i.
\m Waraꞌan g̃u eꞌem cebe. 
\v 3 Akꞌaritꞌũma oce eyekawẽn kay “Paulo jekariwa aꞌõ dag̃ jekukum” iꞌe buje. Wararaꞌacat pe “Paulo jekariwa aꞌõ dag̃ jekukum” iꞌe buje dak, akꞌaritꞌũma oce cekawẽn kay. Owebe “Wekariwa aꞌõ dag̃ õn jekukum” iꞌe buje dak, akꞌaritꞌũma oce wekawẽn kay. 
\v 4 Oweweju bit aꞌg̃u wekariwa aꞌõ dag̃ õn jekukum. Imẽnpit wekariwa aꞌõ dag̃ õn jekukum iap ibapuk g̃u soat xe ijodiat xe, “Wekariwa aꞌõ dag̃ õn jekukum” i maꞌg̃u õn eꞌem. Wuykukukat Jesus pe “Paulo waꞌõ dag̃ jekukum” iꞌe buje bit, ibapuk eꞌem yaꞌõ dag̃ õn jekukum iap. 
\v 5 Imẽnpuye waram wuykukukat ajẽmꞌũm pima:
\p — Ikẽrẽat kug̃ ẽn Deus xe — iꞌũmg̃u juy epeꞌe wararaꞌacat pe.
\m Wuykukukat ma apẽn cuk adi ibaꞌarẽm maꞌg̃u ag̃ujurũg̃rũg̃ iap g̃ubapuk soat pe. Jajẽm puje iboap g̃ubapuk. Apẽn cuk adi wuybikuy iꞌe am ajop iap tak g̃ubapuk soat pe. Ixe jeꞌe: — Xipat eyju oxe — i wuywebe, cedag̃ ma ajekuku bima.
\p
\v 6 — Eybureyũ ejomuymuy g̃u juy waraꞌat muwẽnuwẽn xipan pima — iꞌeꞌem Deus ekawẽntup. 
\m Imẽnpuye:
\p — “Paulo yaꞌõbuyxi g̃u ocexe- -Apolo acã” iꞌũmg̃u juy epeꞌe — i õn eꞌem eywebe, okitpitpiyũ.
\m Eyju pũg̃ tag̃ ma ocekug̃ pima, kuka ibo dup ekawẽn tag̃ epeku.
\p — Pũg̃ tag̃ ma juy soat epejukuk i õn eꞌem waram eywebe. 
\m
\v 7 Ibit wedep ma soat wuyju Deus xe. Kaũmg̃u iwaruat cexe. Imẽnpuye pũg̃ tag̃ ma juy soat epeyewekuk. Ajo-kug̃ eyju Deus oꞌg̃ũm g̃u eywebe iat? Kaꞌũma kug̃ ma! Apẽnpuye dak eyju napa ma eꞌem: — Deus soat g̃u oꞌg̃ũm ocewebe — i?
\p
\v 8 Tũybe oceju soat kug̃ iãn eyju eꞌem. Tũybe oceju ibubut adeayũ iãn eyju eꞌem. 
\p — Deus eju wararaꞌacat kukukayũ oceju, Paulo bit kaꞌũma, Apolo dak kaꞌũma — i eyju eꞌem teꞌe ma. 
\m Eyju wararaꞌacat kukukan pima bit, kuka juk ocokcok oce. Eyju wararaꞌacat kukukan pima, wuyju dak kuka juk ixeyũ kukukan acesop eyweju. 
\v 9 Deus acoꞌi juk ocemuy kaꞌũmaayũm ma soat xe, ixe emumujuyũ maꞌg̃u oceju. “Ixeyũ juy ayaoka soat etabutpe xipatꞌũm cĩcã ip puye” iꞌeꞌem ip iat puxim acoꞌi oceju. Soat acoꞌi ocejojom- -kabi beacat, ipi juacat tak. 
\v 10 Itabutꞌũmat xe ocadaodao, Cristo kay ocetabut puye. Eyju bit eyetaybit cĩcã ceweju mũg̃ꞌi eyju jekukum puye. Itabutꞌũmat xe ocaꞌõca g̃u. Eyju bit eyaꞌõca cexe ip. Ocemuybuyxiꞌũmꞌũm ip. Eybuyxim pit ip eykug̃. 
\v 11 Ocereren ma juk adi ocekuku, ocebipurukruk tak. Iokokat kug̃ ma dak cuk adi ocekuku ocedotim. Wararaꞌacat tak cuk adi ocemupokupok. Pũg̃ ka be g̃u dak cuk adi ocekuku- -soat kaka dag̃. Imẽn ma oceju jekukum g̃asũ dak. 
\v 12 Kapikpig̃ cĩcã ocexat pu am, ocedoti bu am tak. Wararaꞌacat pe ocemuymuy buje, ocejede g̃u cebe ip.
\p — Deus cuy xipacat jeꞌg̃ũm eywebe — i bit oceju eꞌem cebe ip.
\m Ipiatꞌajojom pima dak ocetaxi jĩjã. 
\v 13 Wararaꞌacat pe ocemuymuy buje, ikẽrẽm g̃u bit ocejede- -xipan ma. Kaokok coꞌi oceju itabutꞌũmat xe.
\p
\v 14 Imẽg̃aptup mubararag̃ õn eymusũsũn ãm g̃u- -eymukũyjo am acã. Eykukpin cĩcã oxe. Webekitkiyũ joꞌi eyju oxe. Imẽnpuye õn eymukũyjo ojuy. 

\v 15 Adeayũ kuka eymutaybin Cristo ekawẽn- -10,000 beayũ ma. Pũg̃ ma eyebay bit. Kuy juk eyetabut epesop Jesus Cristo kay kawẽn idipat og̃uwẽn eywebe buye. Ceweju mũg̃ꞌi eyju jekukum g̃asũ. Imẽnpuye õn eyebay joꞌi. Imẽnpuye õn eymukũyjo ojuy. 
\v 16 Imẽnpuye:
\p — Obuxim cuy epesop yobog̃an pin g̃u — i õn eꞌem eywebe. 
\p
\v 17 Imẽnpuye Timóteo juy og̃uju eykay. Ixe Timóteo okpot coꞌi. Ixe cũg̃ ma kapikpig̃ wuykukukat peam. Ikukpin cĩcã oxe. 
\p — Paulo yag̃uyisu jekukum Jesus Cristo aꞌõ dag̃ jekukum puye — i jeꞌe eywebe ixe Timóteo ma. — Imẽn Paulo itabunꞌisuayũ mutaybitbin tak soat ka watwat mutaybitbin — i jeꞌe eywebe eyag̃uybaꞌũmap puxim.
\p
\v 18 Pũg̃pũg̃ eyꞌin pit jewexe itaybicayũm oꞌe. Tũybe Paulo omuyku g̃u ocejo am iãn oꞌe ip. 
\v 19 Deus ibikuy bima bit, g̃axĩn ma oju eyjo am. Wetaybit maꞌg̃u g̃asũ jewexe itaybicayũ ekawẽn. Eyjo buje bit, wetaybit oce Deus aꞌõbacaap kug̃ ip iam, ikug̃ g̃u ip iam tak. 
\v 20 Deus wuykukukat eꞌem “Ẽn ma ocekukukat” i wuyju eꞌem pima g̃u- -yaꞌõbacaap kug̃ wuyju jekukum pima acã. 
\v 21 Eybuꞌu du omudon waꞌõpurug̃ eymukorẽm ãm? Eybuꞌu g̃u xeꞌe owebe eykuk am xipan? Eybikuy owebe eykuk am xipan pima, ikẽrẽat mug̃ẽg̃ẽap cuy epeyepere.
\b
\c 5
\p
\v 1 — Corinto ka beat jexidaap eju oꞌjepo itabut maꞌg̃u Jesus kay — iꞌeꞌem owebe yajẽmꞌisuat.
\m Imẽg̃ap ikẽrẽ jĩjã Deus xe. Itabutꞌũmayũ bit isũsũn kuka oꞌe imẽn iꞌe am. 
\v 2 Teꞌe ma eyju bit eꞌem:
\p — Xipat cĩcã oceju — i. 
\m Imẽn g̃u juy epeꞌe! Eyg̃uycũg̃cũg̃ cuy epesop ixe ag̃okatkat ikẽrẽat mujurũg̃rũg̃ puye. Ixe ag̃okatkat ikẽrẽat kay ig̃uycũg̃ꞌũm pima, epeg̃uõm g̃u juy Deus eju kawẽnwẽnapꞌa be jeꞌawero am eyweju. 
\v 3 Wũy ma õn pit eywi. Inaka g̃ebum cĩcã ma õn eykay soat em. 
\p — Ixe ag̃okatkat ikẽrẽ jĩjã, Deus xe ikẽrẽat mujurũg̃rũg̃ puye — i õn eꞌem eywebe Jesus Cristo aꞌõbi. 
\m Eyxe bima dak imẽn ma kuka oce eywebe. Imẽneju awerom g̃u juy epesop ixe eju. 
\v 4 Eyeꞌawero buje wuykukukat Jesus jeenuy eyxe. Soat em ma wuykukukat Jesus jekukum wuyweju wuyaꞌõmucanucan. Eyeꞌawero buje dak jeenuy eyxe. Õn tak eyxe bimaap coꞌi ma og̃uy, soat em õn g̃ebum eykay buye. 
\v 5 Eyeꞌawero buje juy epeꞌe ixe ag̃okatkat pe:
\p — Satanás acã juy ekukan — i.
\m Imẽn cuy epeꞌe ixe mubuꞌun am ikẽrẽat mujurũg̃ap puxim. Jeꞌũ acoꞌi xeku. Ikẽrẽat mujurũg̃ap oꞌjepere bima bit Deus ixe ag̃okatkat biõg̃buk idaxijo. Ibiõg̃buk idaxijo wuykukukat ajẽm puje, kũyjobitꞌũmayũ be ipiatpiꞌajoan iap kabia be.
\p
\v 6 Teꞌe ma eyju eꞌem: — Wararaꞌacat podi ma oceju xipat — i, cũg̃ g̃u eyju jekukum puye. Pãoꞌa muyuhuaptõm ikẽrẽat mujurũg̃rũg̃ap puxim. 
\p — Tõmꞌĩcatõm pãoꞌa muyuhum- -yabog̃atꞌa muyuhum — i wuyju eꞌem. 
\m Imẽnpuxim pũg̃ ma wuyꞌinat ikẽrẽat kug̃ pima, wararaꞌacayũ dak ikẽrẽat mujurũg̃ ojuy ma eꞌem ixe buxim. 
\v 7 Ikẽrẽat mujurũg̃rũg̃ap cuy epeyepere- -soat eyju! Ikẽrẽat mujurũg̃ꞌũm pima, ikẽrẽat kug̃ g̃u epesop. Pãoꞌa buxim epesop- -yamuyuhuhuaptõmtẽmꞌũmatꞌa buxim. Kuyje Judeuyũ ovelha oꞌyaoka ip Egito eipi bewi cẽm pima. Ovelha oeꞌũ ukꞌa beat eꞌũap puxim. Imẽnpuxim Cristo oeꞌũ wuyeꞌũꞌũap puxim. Páscoa epeta bima Judeuyũ g̃ebum wuydobuyũꞌũmꞌũm eꞌũap puxim ovelhaꞌũm oeꞌũiap kay. Wuyju dak cuy aceg̃ebu wuyeꞌũꞌũap puxim Cristo oeꞌũiap kay. 
\v 8 Jesus oeꞌũ wuyeꞌũꞌũap puxim. Imẽnpuye ikẽrẽat mujurũg̃rũg̃ap cuy acepere. Ikẽrẽat ag̃ujurũg̃ g̃u auy g̃asũ bit. Cũg̃ ma juy aceku. Icẽmãn cuy acekawẽn. Imẽn jekukum pima, Jesus eꞌũap kay juy aceg̃ebu apẽn Judeuyũ ovelha eꞌũap kay g̃ebum iap puxim.
\p
\v 9 Waraꞌatup kuy otupmubararak eywebeaptum cartadup. Ixedup pe juk oce eywebe:
\p — Aoyũ kaykayat purem g̃u juy epeku, wararaꞌacat itop kaykayat purem g̃u dak, jewekpidaodaoꞌukat purem g̃u dak, jenuyꞌũnakẽkẽꞌukat purem g̃u dak — i. 
\m
\v 10 Itabutꞌũmayũ wararaꞌacat tayxi kaykay ip, wararaꞌacat itop kaykay dak. Itabikuku jĩjã dak ip wararaꞌacat pubut kay. Kũyjobit g̃u dak ip jeka kukat aꞌõ kay. Teꞌe ma dak itabut ip jewexe deusꞌiayũ kay- -witaꞌa mug̃ẽg̃ẽ kay. Itabutꞌũmayũ xe eydop pinꞌũm pima bit, kuka epejẽm ipi dag̃wi. “Ixeyũ xe epesop g̃u” iꞌũmg̃u juk oce eywebe, “Ixeyũ burem g̃u juy epeku” acã. 
\v 11 Wararaꞌacat pit jewexe itabut Jesus kay. Teꞌe ma wuyju eꞌem “Ocekitpit” i ixeyũ be. Wararaꞌacat tayxi eju jepopoꞌuk ip. Wararaꞌacat itop eju dak jepopoꞌuk ip. Itabikuku dak ip wararaꞌacat pubut kay. Teꞌe ma dak itabut ip jewexe deusꞌiayũ kay- -witaꞌa mug̃ẽg̃ẽ kay. Jebureyũ muymuyꞌuk tak ip. Ikaꞌoꞌom tak ip jekukum. Kaꞌũma am ma ip xipat.
\p — Jewexe itabucayũ burem g̃u juy epesop — i õn eꞌem eywebe.
\m Epeyekõn g̃u dak cuy ceweju ip- -pũg̃ em tak kaꞌũma.
\p
\v 12-13 — Ikẽrẽat kug̃ eyju Deus xe — iꞌũmg̃u õn pit eꞌem itabutꞌũmayũ be. 
\m Deus pit imẽn jeꞌe cebe ip. Õn pit, kaꞌũma. Cũg̃ ma eywebe bit “Ikẽrẽat kug̃ ẽn Deus xe” iꞌe am eyxeat pe- -Jesus kay itabucat pe- -eyweju jeꞌaweroroꞌukat pe. Imẽn eꞌem Deus ekawẽntup:
\mi Ikẽrẽat mujurũg̃rũg̃ꞌukat cuy epeg̃ujẽm eyxewi, i.
\b
\c 6
\p
\v 1 Eyju ikitpitpiyũ Jesus Cristo kay eyetabut puye. Eyeweweju jewaꞌõmukorẽmrẽm pima, itabutꞌũmat kay bit cuy epeju g̃u ibimãmãat ekawẽn cocoꞌukat kay ixe be eymudin am. Eykitpit kay acã juy epeju- -itabucat kay acã. Ixe kay juy epeju ixe be eymudin am. 
\v 2 Wuyju Deus ebekitkit. Ipiꞌũm puje abuyũ ipi dag̃ayũꞌin ikẽrẽ Deus xe iap aceg̃uwẽn. Abuyũ ikẽrẽ g̃u cexe iap tak aceg̃uwẽn. Eyetaybit g̃u du iboam? Ibaꞌore xeꞌe eywebe eykitpitpiyũ mudin am? 
\v 3 Abuyũ Deus ekawẽn tojotjotꞌukayũꞌin ikẽrẽ Deus xe iap aceg̃uwẽn. Abuyũ ixeyũꞌin ikẽrẽ g̃u cexe iap tak aceg̃uwẽn. Eyetaybit g̃u du iboam? Imẽnpuye eybuꞌum g̃u juy epesop eykitpitpiyũ mudin am. 
\v 4 Imẽnpuye eyju jewaꞌõxikxig̃ pima, itabutꞌũmat kay g̃u juy epeju ixe be eymudin am- -yaꞌõbuyxi g̃u ip Jesus kay itabucayũ xe buye. 
\v 5 Eysũsũn cuy epesop itabutꞌũmat kay eyju cucum pima. Kaꞌũmg̃u du eyparakpeat itaybicat? Kake ma! Ibaꞌore du eywebe jewemudin am? Ibaꞌore g̃u ma! 
\v 6 Inaka eyju eykitpit tujowatwan itabutꞌũmat kay imuymuy am. Imẽg̃ap pit cũg̃ g̃u!
\p
\v 7 Eykitpit tujowatwan itabutꞌũmat kay imuymuy am pima, itabutꞌũmat ekukuap coꞌi ma eyju dak jekukum. Deus ekawẽn tag̃ꞌũma. Epetujowat g̃u juy. Ãg̃ jeenuy ikẽrẽm eykug̃. Akꞌaritꞌma juy eybubut tujupaꞌum puje dak. 
\v 8 Eyju ma warẽmtag̃ wararaꞌacat kug̃ jeweik am. Wararaꞌacat pubut tujupaꞌumꞌum tak eyju jeweik am. Warẽmtag̃ eykitpit kug̃ tak eyju jeweik am. Eykitpit pubut tujupaꞌumꞌum tak eyju jeweik am. Imẽnpuye cũg̃ g̃u eyju jekukum. 
\v 9 Deus soat kukukan pima, cũg̃ꞌũma jekukuꞌukayũ g̃u bit jeedop cexe. G̃ebum cuy epesop iboap kay. Jewemug̃uykukukum g̃u juy epesop iboap kay. Ikẽrẽat mujurũg̃rũg̃ꞌukayũ g̃u bit jeedop cexe Deus soat kukukan pima; wararaꞌacat tayxi eju jepopoꞌukayũ g̃u dak; wararaꞌacat tayxi eju jepopoꞌukayũ g̃u dak, jewexe deusꞌiat kayayũ g̃u dak; jewekpidaodaoꞌukayũ g̃u dak; jenuyꞌũnakẽkẽꞌukayũ g̃u dak; 
\v 10 wararaꞌacat pubut tujupaꞌumꞌumꞌukayũ g̃u dak; wararaꞌacat pubut kay itabikukuayũ g̃u dak; ikaꞌoꞌonꞌukayũ g̃u dak; jebureyũ muymuyꞌukayũ g̃u dak; jeka kukat aꞌõ kayꞌũmayũ g̃u dak. Ixeyũ g̃u bit jeedop Deus xe ixe soat kukukan pima. 
\v 11 Pũg̃pũg̃ eyꞌin tak imẽn cuk adi epekuku kuy bima- -eyetabutꞌũm pima. G̃asũ bit Deus ikẽrẽat oꞌjuꞌuk eywebewi. Ixe kuy juk eynaẽ jebekitkin soat em jaꞌõ dag̃ eyeku am. Ixe eꞌem eywebe:
\p — Cũg̃ ma eyju oxe — i.
\m Imẽn Deus eꞌem wuywebe, wuyetabut wuykukukat Jesus Cristo kay buye. Imẽn ixe eꞌem wuywebe, Deus biõg̃buk omuy wuywebe buye dak.
\p
\v 12 Eyꞌinat pit acoꞌi jeꞌe owebe: — Õn pit Cristo ebekit. Imẽnpuye soat iꞌepi g̃u owebe — i. Icẽmãn ixe eꞌem. Soat iꞌepi g̃u wuywebe. Imẽnpit soat g̃u xipat wuywebe iꞌe am. “Soat iꞌepi g̃u ocewebe” iꞌe but wuywebe. Inaka soat g̃u ojoixik cepere baꞌoreap puxim. 
\v 13 Wararaꞌacat pit acoꞌi jeꞌe owebe:
\p — Wuyxaxet wuydadade buye- -wuydadade wuyxaxet puye dak — i.
\m Icẽmãn ixe eꞌem. G̃uyjom pit Deus xepxem ma g̃uꞌũm- -wuyxat, wuydada dak. Deus cuk wuymug̃ẽ wararaꞌacat tayxi eju wuyepo am g̃u, wararaꞌacat itop eju wuyepo am g̃u dak; wuyekpidaodao am g̃u dak; wuyenuyꞌũnakẽkẽ ãm g̃u dak. Deus cuk wuymug̃ẽ jaꞌõ kay am acã. Jewebe am kapik am tak cuk wuymug̃ẽ. Yaꞌõ kayꞌũm pima, teꞌe ma kuka ajeku. 
\v 14 Deus pit wuykukukat oꞌg̃utait ceꞌũap tomukadi. Imẽnpuxim wuyju dak wuymutait wuyeꞌũap tomukadi. Jaꞌõbacaan ma wuymutait.
\p
\v 15 Jesus kay wuyetabun puje wuyjebit Cristo jebitꞌinat eꞌem. Imẽnpuye ikẽrẽ jĩjã wuyewedaodao am yapoat eju. Ikẽrẽ jĩjã Deus xe wuyjebit Cristo jebitꞌinat puye. Imẽnpuye yapoat eju epeyepo g̃u juy- -pũg̃ em tak kaꞌũma. 
\v 16 Yapoat eju jewedaodao bima pũg̃at puxim wuyju eꞌem ceweju. Eyetaybit iboam. Imẽn eꞌem Deus ekawẽntup: Xepxepayũ pũg̃at puxim eꞌem, i. 
\v 17 Wuykukukat eju mũg̃ꞌi jekukum pima bit, pũg̃at puxim wuyju dak eꞌem ceweju ibiõg̃buk aꞌõbi.
\p
\v 18 Tapupuyũ, wararaꞌacat tayxi eju juy epeyepo g̃u. Tũꞌũꞌũyũ, wararaꞌacat itop eju juy epeyepo g̃u. Waraꞌat mujurũg̃rũg̃ pima ikẽrẽat kuka wuyjebit ag̃ukẽrẽrẽn g̃u. Yapoat eju jepopom pima bit, kuka wuyjebit ag̃ukẽrẽrẽn. 
\v 19 Eyag̃uybaꞌũm g̃u juy iboap kay. Wuyjebit Deus biõg̃buk tũytũyap- -Ibiõg̃buk xipacat tũytũyap. Ixe biõg̃buk omuy wuyjebit pe- -Deus wuywebe oꞌg̃uõmiat. Wuyju g̃u jewekukat. Deus acã wuykukat. 
\v 20 Deus ma juk ikẽrẽat oꞌjuꞌuk eywebewi. Cristo eꞌũap eywebe ikẽrẽat mug̃ẽg̃ẽaptei oꞌteida. Imẽnpuye idipat acã juy ag̃ug̃ẽ ijodi. Idipat mug̃ẽg̃ẽm pima bit, “Kaꞌũmg̃u Deus coꞌi idipat” i jeꞌe itabutꞌũmayũ eyekukuap co buje.
\b
\c 7
\p
\v 1 Kuy juk eyemudupmubararaktup otupu cartadup. Ibodup pe juk epeꞌe owebe “Xipat tu ocewebe jewebumũn ãm? Xipat g̃u xeꞌe?” i. Iboam õn jeymukũyjo g̃asũ. Ag̃okatkat ewebumũnꞌũm pima, xipat ma jeku. 
\v 2 Imẽnpit adeayũ ikẽrẽat mujurũg̃rũg̃ cewebumũnꞌũm pima. Cewebumũnꞌũm pima wararaꞌacat tayxi eju jepopom ag̃okatkat. Ayacat tak jepopom wararaꞌacat itop eju. Imẽnpuye juy epeyewebumũn. Xipat soat pe ag̃okatkat pe cewetayxida am. Xipat soat pe ayacat pe dak ceweitopta am. 
\v 3 Tapupuyũ, etayxi eju juy ecepo, cepo pin pima. Aoyũ, ektop eju juy ecepo, cepo pin pima. Eybuꞌum g̃u juy epesop jepo am eytayxi eju eytop eju dak. 
\v 4 Aoyũ, eybikuy bima acã g̃u juy epeyepo eyitop eju, ixe ibikuy bima dak. Tapupyũ, eybikuy bima acã g̃u juy epeyepo eytayxi eju- -ixe ibikuy bima dak. 
\v 5 Pũg̃ em g̃u acoꞌi epeꞌe eyewewebe:
\p — G̃asũ bit acejewedaodao g̃u dak — i. — Deus eju acã acejekawẽn g̃asũ bit — i acoꞌi epeꞌe eyewewebe.
\m Ade kabia g̃u bit epeꞌe:
\p — G̃asũ bit ocepo g̃u eweju — i eytayxi be, eyitop pe dak.
\m Deus eju eyekawẽnap kabia kap puje juy waram g̃uto epeyepo eyitop eju, eytayxi eju dak. Ade kabia “Acepo g̃u g̃asũ bit” i eyju eꞌem pima, Satanás “Wararaꞌacat eju juy epeyepo” i jeꞌe eywebe. Ade kabia jepopomꞌũm pima, kuka Satanás aꞌõ kayan epeku.
\p
\v 6 — Imẽn cuy epeku — iꞌũmg̃u õn pit eꞌem eywebe. — Oxe bit xipat kuka oꞌe imẽn eyeku am — i acã õn eꞌem. 
\m
\v 7 Otayxixe g̃u õn pit. Soat eytayxixeꞌũm pima, xipat kuka oꞌe. Deus pũg̃pũg̃ayũ buywatwan ixeyũ be ikẽrẽat kukap puxim itayxixe g̃u maꞌg̃u ip. Wararaꞌacat pe bit ibaꞌore cũg̃ ma jeku am itayxixeꞌũm pima. Ikẽrẽat mujurũg̃rũg̃ ip itayxixeꞌũm pima. Imẽnpuye Deus ibikuy ixeyũ ewebumũn ãm ikẽrẽat kukap puxim.
\p
\v 8 — Epeyewebumũn g̃u juy — i õn eꞌem tak oꞌjewebumũn g̃u buk ip iayũ be. — Obuxim cuy epesop — i õn eꞌem cebe ip. — Waram g̃u juy epeyewebumũn — i õn eꞌem itopꞌũm eꞌũꞌibiyũ be, itayxi eꞌũꞌibiyũ be dak.
\m
\v 9 Soat em g̃ebum ayacat kay bima juy epeyewebumũn. Aoyũ kay eyetabikukuap xipat g̃u. Jewebumũn ãm acã kuka oꞌe xipat eywebe.
\p
\v 10-11 Cewebumũnꞌibiyũ og̃ukũyjo g̃asũ bit. Waꞌõbi g̃u õn jeymukũyjo- -wuykukukat aꞌõbi acã. Tapupuyũ, eytayxi juy epeyepere g̃u. Aoyũ, eyitop cuy epeyepere g̃u. Eyitop epere buje bit cuy waram epeyewetopta g̃u. Eyepit put koap epesop ikug̃ iat kay eyitop kay.
\p
\v 12 Wararaꞌacayũ og̃ukũyjo g̃asũ bit. Itabutꞌũmat eju cewebumũnꞌibiyũ og̃ukũyjo g̃asũ- -itabucayũ og̃ukũyjo. Deus aꞌõbi g̃u õn jeymukũyjo. Okpiwatpi ma õn eꞌem eywebe. Okitpitpiyũ, pũg̃pũg̃ eyꞌin cuk epeyewebumũn itabutꞌũmat eju. Eytayxi itabut g̃u Jesus kay. Eyxe tũy pin cĩcã bima bit cuy epeyepere g̃u. 
\v 13 Wuyĩxĩyũ, pũg̃pũg̃ eyꞌin cuk epeyewebumũn itabutꞌũmat eju. Eyitop itabut g̃u Jesus kay. Eyxe tũy pin pima bit cuy epeyepere g̃u. 
\v 14 Ixeyũ epereꞌũm pima, Deus xipacat jeꞌg̃ũm eyitop pe, itabut g̃u maꞌg̃u ip, itabucat xe nuynuyꞌuk puye- -jetayxi xe nuynuyꞌuk puye. Imẽnpuxim Deus xipacat jeꞌg̃ũm eytayxi be, itabut g̃u maꞌg̃u ip, itabucat xe nuynuyꞌuk puye- -jektop xe nuynuyꞌuk puye. Imẽnꞌũm pima, itabutꞌũmayũ ebekitkiyũ joꞌi ma kuka oꞌe eyebekitkiyũ. Deus pit xipacat ũmũm eywebe, eyebekitkiyũ be dak itabucat xe nuynuyꞌuk puye. 
\v 15 Deus cuk wuynaẽ kabaꞌũma wuydop am wuyitop eju, wuytayxi eju dak. Imẽnpuye itabutꞌũmat jetayxi epere pin pima, itabucat epere pin pima, xipat kuka oꞌe jetayxi epere am.
\p — Operem g̃u juy ece — iꞌũmg̃u juy jeꞌe itabucat itabutꞌũmat pe.
\m Ãg̃ jeꞌju ip. 
\v 16 Imẽnpuye eyitop xe juy epesop, wuyĩxĩt! Ixeyũ xe eynuy buje, kuka itabut oꞌe ip Jesus kay. Imẽnpuye, eytayxi xe juy epesop, okitpitpiyũ. Ixeyũ xe eynuy buje, kuka itabut oꞌe ip Jesus kay.
\p
\v 17 Deus jaꞌõbacaap ũmũm wuywebe soat tag̃ wuyekapik am cebeam. Imẽnpuye ibikuyap tag̃ cuy epekuku. Deus pe eynaẽ buje eyekapikap kug̃ cuk adi epesop. Ibeat kug̃ cuy epeyekapik g̃asũ dak. Imẽn soat ka watwat mukũyjojom õn- -itabucayũ mukũyjojom. 
\v 18 Deus eꞌem taypuꞌag̃obixeedakatꞌibit pe:
\p — Webekin cuy ece — i.
\m “Ebekin oce g̃asũ” iꞌeꞌem pima, waram pit suxeemõg̃ g̃u juy. Imẽnpuxim Deus eꞌem taypuꞌag̃obixeedakꞌũmat pe:
\p — Webekin cuy ece — i.
\m “Ebekin oce g̃asũ” iꞌeꞌem pima, jedaypuꞌag̃obidakacat g̃u juy.
\p
\v 19 — Ecewedaypuꞌag̃obixeedakat tu? — iꞌũmg̃u Deus eꞌem wuywebe. — Ecewedaypuꞌag̃obixeedakat g̃u du? — iꞌũmg̃u dak. — Wekawẽn tag̃ tu eyju jekukum? — i acã Deus eꞌem wuywebe.
\m
\v 20 Deus pe eynaẽ buje eyekapikap kug̃ epesop. Ibeat kug̃ cuy epeyekapik g̃asũ dak. 
\v 21 Pũg̃pũg̃ eyꞌin teiꞌũma kapikpikꞌukayũm cuk adi epesop Deus pe eynaẽ buje. Eyag̃uybabiꞌũm g̃u bit cuy iboap kay. Kapikpig̃ cuy epesop eyekariwa beam. Eyekariwa xewi eyjẽm put pima bit, epejẽm cuy teihem kapik am wararaꞌacat peam. 
\v 22 Inaka teiꞌũma kapikpikꞌukayũ jekpiwatpin g̃u jekukum- -jekariwa ukpiwatpi acã. Wuykukukat pe ixeyũ naẽ buje bit, wuykukukat ukpiwatpi jeku ip. Teihem kapikpikꞌukat pit jekpiwatpi jekukum. Wuykukukat pe ixeyũ naẽ buje bit, jekpiwatpin g̃u jeku ip- -wuykukukat ukpiwatpi acã. 
\v 23 Deus cuk teihem wuydaxijo. Imẽnpuye ijodiat ukpiwatpin g̃u juy epesop. Cristo ukpiwatpi acã epeku. 
\v 24 Okitpitpiyũ, Deus pe eynaẽ buje, eyekapikap kug̃ epesop. Ibeat kug̃ cuy epeyekapik g̃asũ dak. Deus tak eybuywatwan jeenuy.
\p
\v 25 Kuyatup pe owebeaptup pe “Apẽn xeꞌe kuka cwebumũnꞌũmayũ oceg̃ukuyjo?” i juk epeꞌe owebe. Wuykukukat pit cuk omukũyjo g̃u iboam. Jeymukũyjo õn wuykukukat aꞌõbi g̃u- -wag̃uybin ma. Imẽnpit wuykukukat Jesus itabotaidabotbot cĩcã osunuy okay. Imẽnpuye yaꞌõ dag̃ õn jekukum. Imẽnpuye eyetabun cuy epesop wekawẽn kay.
\p
\v 26 Wuykay itakomaayũ ipiatꞌajojoan cĩcã wuywebe- -itabutꞌũmayũ. Imẽnpuye:
\p — Xipat kuka wuywebe wuyewebumũnꞌũm ãm — i õn eꞌem.
\m
\v 27 Eytayxixe bima bit cuy epeyepere g̃u. Eytayxixeꞌũm pima bit cuy epeyewetayxida g̃u. 
\v 28 Eyewebumũn puje bit, ikẽrẽat epeg̃ug̃ẽ g̃u. Imẽnpit eyewebumũn puje, g̃ebum cĩcã epesop eyxat puap kay, eytayxi esay buap kay dak. Õn pit obuꞌu eywebe eyeg̃ebu am ijodiap kay.
\p
\v 29-31 Okitpitpiyũ, g̃axĩn ma acoꞌi Cristo jajẽm waram. Ijop eipi dao ma jeekop. Apẽn g̃asũ dopdom iap iꞌũm. Imẽnpuye itayxixeat cuy itayxixeꞌũmat coꞌi jeku. Waat tak cuy icokcokat puxim jeku. Jewaywaywayat tak cuy ig̃uycũg̃at puxim jeku. Tarekrek pupuꞌukat tak cuy oꞌjat g̃u bukꞌiat puxim jeku. Tarekrek kukukꞌukat tak cuy ikukukꞌũmat puxim jeku.
\p
\v 32 Õn pit obuꞌu eywebe soat em g̃ebum am ijodiap kay- -eybubut puap kay. Itayxixeꞌũmat soat em g̃ebum Deus kay. Soat em Deus mucokcok pin.
\p — Apẽn xeꞌe oce Deus mucokcok am? — iꞌeꞌem soat em jewebe ma.
\m
\v 33 Itayxixeat pit soat em g̃ebum ijodiap puap kay tarekrek puap kay, jetayxi mucokcok pin puye. Soat em ixe eꞌem jewebe ma:
\p — Apẽn xeꞌe oce otayxi mucokcok am? — i.
\m
\v 34 Xepxep aꞌõ kay pin ma- -Deus aꞌõ kay- -jetayxi aꞌõ kay dak. Itoptepꞌũmat pe soat em cekapik put wuykukukat peam. Ixe soat em jekukukat mucokcok pin. Soat em jekukukat kay g̃ebum. Itoptepat pit soat em g̃ebum jebubut puap kay. Jektop mucokcok pin soat em.
\p
\v 35 Imẽg̃ap pit imuwẽnuwẽn õn eywebe eybuywat pin puye. Eyewebumũnap mubaꞌoren pin g̃u bit õn.
\p — Epeyewebumũn g̃u juy ibaꞌore jĩjã maꞌg̃u eywebe — iꞌũmg̃u õn eꞌem eywebe. — Cũg̃ ma epeku Deus xe — i acã õn eꞌem eywebe. — Ixe ekawẽn tag̃ cuy epeku — i dak õn eꞌem eywebe. — Soat em g̃ebum cuy epesop waraꞌat kay g̃u- -wuykukukat kay acã — i dak õn eꞌem eywebe.
\p
\v 36 G̃asũ iwadipyũ og̃ukũyjo. “G̃asũ bit puk wewebumũn pin g̃u oce” i kuy juk oꞌeꞌeꞌiayũ og̃ukũyjo.
\p — Wewebumũnꞌũm pima bit cedag̃ g̃u kuka owadip kug̃ oce — iꞌeꞌem ag̃okatkat jewebe bima, juy jewebumũn ip. 
\m Ceweju jewedaodao pin cĩcã bima dak, cuy jewebumũn ip. “Ocewebumũn cuy g̃asũ bit” iꞌe buje dak cuy jewebumũn ip. Cewebumũn puje ikẽrẽat oꞌg̃ug̃ẽ g̃u ip. 
\v 37 Imẽnpit ag̃okatkat jekpiwatpin ma “G̃asũ bit wewebumũn pin g̃u oce” iꞌe buje, xipat kuka oꞌe cewebumũnꞌũm ãm. Ibuꞌu jewebumũn ãm pima dak, xipat kuka oꞌe cewebumũnꞌũm ãm. Jewedaodao pin cĩcãꞌũm pima dak, xipat kuka oꞌe cewebumũnꞌũm ãm. 
\v 38 Imẽneju xipacan eꞌem ip jewadip eju cewebumũn puje. Jewebumũnꞌũm pima bit, ibodi ma xipacan eꞌem ip.
\p
\v 39 Itop eꞌũꞌibiyũ og̃ukũyjo g̃asũ. Itop itait pima, ayacat jektop xe ma jeenuy. Cũg̃ g̃u jektop epere am. Itop eꞌũ buje bit, cũg̃ ma wararaꞌacat eju jewebumũn ãm- -jemukaypinput eju. Imẽnpit cũg g̃u itabutꞌũmat eju jewebumũn ãm- -itabucat eju acã. 
\v 40 Imẽnpit itop eꞌũꞌibit ibodi ma icokcok kuka oꞌe waram jewebumũnꞌũm pima. Waram pit cewebumũnap g̃u oxe ma ibodi ma kuka oꞌe icokcok. Deus biõg̃buk omuy owebe. Imẽnpuye eyaꞌõpicũg̃cũg̃ cuy epesop waꞌõ kay.
\b
\c 8
\p
\v 1 Kuyatup pe juk epeꞌe owebe: “Xipat tu ocewebe deusbaro wap iẽnmõg̃ꞌibitẽn o am? Ocesuẽnꞌo g̃u xeꞌe?” i. Iboam õn jeymukũyjo g̃asũ.
\p — Icẽmãn ocetaybit Deusan — i wuyju eꞌem.
“Soat podi ma ocetaybit” iꞌeꞌem pima bit, xipat g̃u kuka oꞌe. Wararaꞌacat kug̃ xipan pima bit, xipat kuka oꞌe soat peam. 
\v 2 Soan g̃u wuyetaybit- -pũg̃pũg̃ ã. Imẽnpuye wuyju teꞌe ma eꞌem:
\p — Ocetaybit cĩcã — i. 
\m
\v 3 Wuyxe Deus ikukpin cĩcã bima bit, Deus itaybit wuyjum. Deus burem tak cuy ajop.
\p
\v 4 Deusbaroyũ wap iẽnmõg̃ꞌibitẽn jeymukũyjo õn g̃asũ. Deusbaro kaꞌũmaap ma ibiõg̃buk. Ade g̃u Deus- -pũg̃ ma. Wuyetaybit iboam. 
\v 5 Ade ipi watwat xe bit ade ma desuyũ. Tũybe ade deusyũ iãn eꞌem ip. Tũybe ade wuykukukꞌukayũ iãn eꞌem ip. Tũybe ipi dag̃, kabi be dak omuy ip iãn eꞌem ip. 
\v 6 Wuyxe bit pũg̃ ma Deusat. Ixe Deus wuyebay. Soat ixe emumug̃ẽ. Ixe beam ma soat wuyju dopdom. Pũg̃ ma wuykukukat- -Jesus Cristo acã. Ixe aꞌõbi Deus soat oꞌg̃ug̃ẽ kuyje- -Jesus Cristo aꞌõbi. Ixe aꞌõbi ma wuyju dak dopdom.
\p
\v 7 Soat g̃u bit itabucayũ iboam itaybit. Ikabap cĩcã ip deusbaroyũ kug̃. Kuy ade kabia ma teꞌe ma itabut osodop ip ixeyũ kay- -deusbaroyũ kay. Imẽnpuye tũybe ijopẽn deusbaroyũ xatẽn iãn eꞌem ip. G̃asũ dak imẽn eꞌem ip. Itaybit g̃u ip deusbaroyũ kaꞌũma am ma ibiõg̃buk ip iam. Tũybe ig̃o ẽn o buje, ikẽrẽat kug̃ kuka oce Deus xe iãn eꞌem ip. 
\v 8 Wuyju bit cũg̃ ma Deus xe iẽn oꞌoap tomuju g̃u. Iwaru g̃u Deus xe. Ibit wedep ma- -iẽn oꞌoap, iẽn oꞌoꞌũmap tak.
\p
\v 9 Xipat eyxe ig̃o ẽn o buje, iẽn oꞌũm pima dak. Eykitpit xe bit, itabutcũcat xe, cũg̃ g̃u ig̃o ẽn o am. Eykitpit pe ikẽrẽat epeg̃ujurũg̃at g̃u juy- -itabutbũcat pe. Ixe xe cũg̃ꞌũm pima, ig̃o ẽn o am, epesuẽnꞌo g̃u juy. 
\v 10 Eyetaybit deusbaroyũ kake g̃u iam. Imẽnpuye:
\p — Cũg̃ ma wuywebe ig̃o ẽn o am — iꞌeꞌem eyju.
\m Imẽnpuye deusbaroyũ dukꞌa be eyju õmõm, ixe xatẽn o am. Itabutbũcat eyjojom ig̃o ẽn oꞌom pima bit:
\p — Cũg̃ ma owebe dak ig̃o ẽn o am — i acoꞌi jeꞌe jewebe ma.
\m Imẽnpit cũg̃ g̃u buk ixe xe bit ig̃o ẽn o am, tũybe deusbaroyũ kake iãn eꞌem puye. 
\v 11 Ixe dak acoꞌi iẽn o eyjojom iẽn oꞌom puye. Iẽn o buje bit ig̃uycũg̃ cĩcã jeꞌe itabutbũcat.
\p — Ojeꞌũ acoꞌi ikẽrẽat og̃ujurũg̃ puye — i teꞌe ma jeꞌe jewebe ma.
\m Cristo oeꞌũ ixe eꞌũap puxim. Ixe ekitpit. Imẽnpit ig̃uycũg̃ ma jeku, ẽn ma ikẽrẽat eg̃ujurũg̃at cebe buye. 
\v 12 Cũg̃ g̃u cexe iꞌo am pima:
\p — Ẽn tak esuẽnꞌo — iꞌũmg̃u juy epeꞌe cebe. 
\m Imẽn iꞌe buje, warẽmtag̃ ma eykitpit kug̃ tak eyju. Warẽmtag̃ eykitpit kug̃ pima, eyju dak ikẽrẽat kug̃ epesop Cristo xe. 
\v 13 Imẽneju okitpit pe ikẽrẽat og̃ujurũg̃at g̃u. Okitpit xe ig̃o ẽn oꞌoap cũg̃ g̃u bima, õn tak kuka osuẽnꞌo g̃u- -pũg̃ em tak kaꞌũma. Osuẽnꞌo g̃u okitpit pe ikẽrẽat mujurũg̃ap puxim. Imẽnpuxim eyju dak cuy eykitpitpiyũ be ikẽrẽat epeg̃ujurũg̃at g̃u.
\b
\c 9
\p
\v 1 Cũg̃ ma owebe wekupinap tag̃ weku am. Cristo emumuju õn. Wuykukukat Jesus cuk ojojojo. Kuy bima juk eyetabut wuykukukat Jesus Cristo kay õn ma juk ixe ekawẽn og̃uwẽn eywebe buye. 
\v 2 Wararaꞌacayũ xe ma Cristo emumuju g̃u õn. Eyxe bit cemumuju õn.
\p — Corinto ka watwat Cristo eju mũg̃ꞌi jekukum oꞌe g̃asũ bit, Paulo cekawẽn oꞌg̃uwẽn cebe ip puye. Imẽnpuye ocetaybit Paulo Cristo emumuju iam — iꞌeꞌem adeayũ.
\p
\v 3 Waraꞌacat omuymuy bima, jewedayoyom õn.
\p — Õn tak Cristo emumuju ma — i õn eꞌem cebe ip.
\m
\v 4 Cũg̃ ma owebe oxat pu am, oxati bu am tak kawẽn idipat muwẽnuwẽnapteim. 
\v 5 Wararaꞌacayũ Cristo emumujuyũ jetayxi eju jekukum- -itabucat eju. Imẽn cũg̃ ma Deus xe. Wuykukukat kitpitpiyũ dak jetayxi eju jekukum ip, Pedro dak. Cũg̃ ma kuka oꞌe owebe dak. 
\v 6 Wararaꞌacayũ Cristo emumujuyũ waraꞌat pe g̃u kapikpig̃ ip- -kawẽn idipat muwẽnuwẽn acã. Cũg̃ tu eyxe owebe waraꞌat pe kapik am, Barnabé be dak? 
\p — Cũg̃ g̃u — i õn pit eꞌem. 
\m
\v 7 Sorarayũ teihem jenopag̃õg̃õm. Jenopag̃õg̃õaptei bubum ip. Waraꞌat pe g̃u ip kapikpig̃ jemukaypinput pu am. Kadaidip iwat tak teihem jekat pe kapikpig̃. Jekat peatꞌa oꞌom ip jekapikapteim. Waraꞌat pe g̃u ip kapikpig̃ jemukaypinput pu am. Ovelha kukukꞌukat tak teihem ovelha kug̃. Jeõhõ kũmti kõnkõn ip ikukapteim.
\p
\v 8 Ixeyũ buxim wuyju dak cũg̃ ma wuyekapikaptei bu am- -Deus ekawẽn muwẽnuwẽnapteim. Moisés tak imẽn cuk adi wuymutaybitbin osunuy. 
\v 9 Moisés ekawẽntup imẽn eꞌem:
\mi Taixeeꞌuk am kadaida mucakucan pima, juy biopakpi esubimukirik g̃u, i. Ãg̃ cuy jekõn kapikpig̃ puye, i.
\m Iboaptup mubarararag̃ pima biopak kay acã du g̃ebum osunuy Deus? 
\v 10 Kaꞌũma! Wuykay dak g̃ebum ma osunuy. Õn tak oxatꞌam cuy oyabu iap kay g̃ebum taidadaꞌukat, ku beatꞌa bubuꞌukat tak. 
\v 11 Kawẽn idipat muwẽnuwẽn eywebe juk adi ocekuku apẽn ayacat ku beat taidadam iap puxim. Cũg̃ ma g̃asũ ocewebe dak ocekapikaptei bu am eyxewi. 
\v 12 Cedag̃ ma wararaꞌacat pe dinheiro ojuyjuy am eyxewi, kawẽn idipat oꞌg̃uwẽn ip eywebe buye. Ixeyũ bodi ma oceju bit cuy iojuy eyxewi.
\p Oceju bit cuk ocejoojuy g̃u eyxewi. Teihem kawẽn idipat muwẽnuwẽn pima:
\p — Kawẽn idipat aꞌĩjo pin g̃u õn pit, Paulo dinheiro kay jĩjã imuwẽnuwẽnapteim puye — i kuka oꞌe itabutꞌũmayũ.
\m Imẽnpuye teiꞌũma juk adi kawẽn idipat oceg̃uwẽnuwẽn. Waraꞌat pe ocesop kapikpikꞌuk ocemukaypinput pu am. 
\v 13 Deus eju kawẽnwẽnapꞌa be kapikpikꞌukayũ jexat pupum tukꞌa be õmõmꞌukayũ xewi. Deus etabixe wũnca mupikpikꞌukayũ ipikꞌũmat pupum ip jexan. Kuy eyetaybit iboam. 
\v 14 Imẽnpuxim:
\p — Kawẽn idipat muwẽnuwẽnꞌukayũ dak cuy imuwẽnuwẽnaptei jeꞌjat ip jemukaypinput pu am — i juk oꞌe wuykukukat.
\p
\v 15 Õn pit obuꞌu dinheiro bu am waꞌĩjojoꞌukayũ xewi kawẽn idipat muwẽnuwẽnapteim. Ijudup mubarararag̃ õn imuwẽnuwẽnaptei juy epeg̃ũm owebe iaptum g̃u bit. Weꞌũ ãm obuꞌuap podi ma obuꞌu imuwẽnuwẽnaptei bum. Kaꞌũma ma juy jeꞌe:
\p — Paulo kawẽn idipat muwẽnuwẽnaptei kay jĩjã — i.
\p
\v 16 — Ẽn pit cuy kawẽn idipat eg̃uwẽnuwẽn — i juk oꞌe Deus owebe.
\m Imẽnpuye “Waꞌõbuyxi jĩjãat õn kawẽn idipat muwẽnuwẽn puye” iꞌe baꞌore owebe. Õn kawẽn idipat muwẽnꞌũm pima bit kuka Deus ipiat oꞌsupiꞌajoat owebe. 
\v 17 Okpiwatpin ma kawẽn idipat muwẽnuwẽn pima, cũg̃ ma kuka oꞌe owebe wekapikaptei bu am. Okpiwatpi g̃u bit õn imuwẽnuwẽn. 
\p — Ẽn pit cuy kawẽn idipat eg̃uwẽnuwẽn — i juk oꞌe Deus owebe.
\m Deus ma juk oꞌg̃ũm wekapikam iboap. 
\v 18 Apẽg̃ãm kuka wekapikaptei ojat? Dinheiro kay g̃u õn wekapikapteim.
\p — Dinheiroꞌin cuy epeg̃ũm owebe imuwẽnuwẽnapteim — iꞌũmg̃u dak õn pit eꞌem waꞌĩjojomayũ be. 
\m Ocokcok cĩcã teiꞌũma kawẽn idipat muwẽn ãm. Ocokcokap tak wekapikaptei joꞌi ma.
\p
\v 19 Imẽneju ijodiat g̃u bit omujujum kapik am. Wukpiwatpin ma õn kapikpig̃. Imẽnpit wukpiwat pin ma dak õn soat peam kapikpig̃ kawẽn idipat muwẽnuwẽn adeayũ mutabut am Jesus Cristo kay. 
\v 20 Imẽnpuye Moisés ekawẽn tag̃ acã g̃u õn jekukum Jesus Cristo ekawẽn tag̃ tak õn jekukum. Judeuyũ parakpe kawẽn idipat muwẽnuwẽn pima bit, ixeyũ buxim õn tak Moisés ekawẽn tag̃ jekukum ixeyũ mubuꞌunap puxim Jesus ekawẽn kay. Judeuyũ parakpe õn imuwẽnuwẽn pima, ixeyũ ekukuap puxim õn tak jekukum ixeyũ mutabut am Jesus Cristo kay. 
\v 21 Imẽnpuxim õn Judeuꞌũmayũ parakpe bima, ixeyũ buxim õn tak Moisés ekawẽn tag̃ g̃u jekukum ixeyũ mutabut am Jesus Cristo kay. Cristo ekawẽn tag̃ õn jekukum. Imẽnpuye Deus ekawẽn kay dak kũyjobit õn. 
\v 22 Itabutbũcayũ parakpe bima, ixeyũ ekukuap puxim õn tak jekukum ixeyũ buywat am big̃ ma itabut am Jesus kay. Soat em oxeacat ekukuap puxim õn tak jekukum ixeyũ mutabut am Jesus Cristo kay. Soan õn eꞌem wararaꞌacat mutabut am cekay.
\p
\v 23 Imẽn ma õn jekukum kawẽn idipat muwẽn ãm soat pe ijodiat pe. Õn kawẽn idipat muwẽnuwẽn pima, Deus xipacan eꞌem waꞌĩjojomayũ beam, owebeam tak. 
\v 24 Adeayũ jedaudauap tag̃ daudaum cĩcã. Pũg̃ ma bit jabeatup pupum- -koam yajẽmꞌibit acã- -jeburewũn podi ma iwũncaat acã. Wuyedauap puxim wuyju dak jekukum Jesus Cristo ekawẽn tag̃ jekukum pima. Cekawẽn tag̃ cuy epeku ixe be “Cũg̃ ma juk adi epekuku” iꞌe am eywebe. Ixe be eywebe imẽn iꞌe buje, jabeatup oꞌtupuꞌiat cokcokap podi ma eycokcok epesop. 
\v 25 Jedaudauꞌukat soat kabia ma jewemuwũncacan iwũnca jedau am iꞌe am. Soat em jewemuwũncacan ip jabeatup pu pin cĩcã buye. Ig̃odup ade kabia g̃u tuptip eꞌem- -pũg̃ kabia ma. Dao ma dupkarawraw. Jesus Cristo ekawẽn tag̃ jekukum pima bit, pũg̃ kabia g̃u acesop Deus xe- -soat kabia ma. 
\v 26 Cũg̃ ma jedaudaum jedaudauapuꞌabi kay ma jedaudauꞌukat. Cũg̃ ma jedaudaum warẽmtag̃ ma jedauap puxim. Ixe buxim õn tak cũg̃ ma weku pin. Jesus Cristo ekawẽn tag̃ weku pin warẽmtag̃ ma wekuap puxim. Wararaꞌacat mureureꞌukat puxim tak õn. Wararaꞌacat muyꞌat ojuy bima teꞌe g̃u ip jewemureurem ip- -pipim ma. Imẽnpuxim owebe dak teꞌe g̃u Jesus Cristo ekawẽn tag̃ wekuap. 
\p
\v 27 — Jesus Cristo ekawẽn tag̃ cuy epeku — i juk adi ocece wararaꞌacat pe. 
\m Imẽnpuye owebe ikẽrẽat mug̃ẽ buje, kuka osũsũn oce soat xe, wekawẽn oꞌjojojoꞌiayũ xe. Imẽnpuye õn ikẽrẽat mug̃ẽ pin pima, wag̃uydag̃ g̃u oce. Wag̃uymubuꞌuꞌun cĩcã õn ikẽrẽat mug̃ẽap puxim, Jesus owebe “Ekẽrẽ oxe” iꞌeap puxim.
\b
\c 10
\p
\v 1 Imẽnpuye g̃ebum cuy epesop wuydobuyũꞌũmꞌũm kay, okitpitpiyũ- -Moisés ebekitkiyũꞌũmꞌũm kay. Ukꞌaꞌũmat tag̃ jekukum pima kabikerereat soat pe ixeyũ be e mubapukpug̃ oeku. Soat ixeyũ iodi oꞌtimudek tibog̃ati. Tipakpukati i ig̃odi butet osunuy. 
\v 2 Kabikerereat cocom pima, timudekdeg̃ pima dak, soat ip kũyjobit osodop Moisés aꞌõ kay.
\p — Kũyjobin acesop aꞌõ kay — ioꞌe ip Moisés pe. 
\m Imẽnpuxim:
\p — Kũyjobin acesop aꞌõ kay — i wuyju eꞌem Jesus pe wuymubatisasan pima. 
\m
\v 3 Soat ip kabi bewiat oꞌom osodopdop jexan ukꞌaꞌũmat pe. Maná oꞌom osodopdop ip. 
\v 4 Soat ip kabi bewiat kõnkõn osodopdop. Tikõnkõn osodopdop ip Cristo idibi oꞌtimujẽm puye. Cristo aꞌõbi witaꞌa bewi Moisés oꞌtimujẽm ixeyũ eim. Imẽnpuye:
\p — Witaꞌa jekukum wuyweju — ioꞌe ip Cristo muwẽnuwẽn, Cristo ixeyũ eju oeku buye.
\m
\v 5 Deus mucokcog̃ g̃u ip osodop ade ixeyũꞌin. Imẽnpuye Deus itakoma oꞌe cekay ip. Deus aꞌõbi ip oeꞌũꞌũ ukꞌaꞌũmat tag̃. Oꞌjokotkot ip ukꞌaꞌũmat pe.
\p
\v 6 Deus pit imẽn ixeyũ oꞌjukukuk wuymukũyjo am wuywebe ikẽrẽat mujurũg̃ap puxim. Ixeyũ ma itabikuku osodop ikẽrẽat kay. Wuyju bit cuy wuyetabikukum g̃u ajop. 
\v 7 Oibuꞌun ip Deus kay. Deusbaroyũ kay oꞌe ip- -jemumug̃ẽ kay. Oꞌjekõnkõn ip deusbaroyũ wap peta mug̃ẽg̃ẽm “Ocetabut eykay” iꞌe am cebe ip. Imẽn eꞌem Deus ekawẽntup:
\mi Oꞌjekõnkõn ip deusbaroyũ wap, oꞌtikõnkõn tak ip, i. Oꞌjedaꞌiꞌiꞌin tak ip cewap, i.
\m Wuyju bit cuy wuyetabun g̃u ajop jewexe deusꞌiayũ kay. 
\v 8 Ixeyũ ma oꞌjepopo wararaꞌacat tayxi eju, wararaꞌacat itop eju dak. Imẽnpuye pũg̃ kabia be ade oap ip ixeyũꞌin, 23,000 ma oap ip pũg̃ kabia be. Wuyju bit cuy acepo g̃u wararaꞌacat tayxi eju, wararaꞌacat itop eju dak- -pũg̃ em tak kaꞌũma. 
\v 9 Ixeyũ ma jemamamaꞌuk cĩcã oekuku Deus pe. Deus oꞌjobuyxijo ip itabotaidabotbot paxi wuykay iam.
\p — Deus ipiat supiꞌajoat g̃u acoꞌi wuywebe ikẽrẽat mujurũg̃rũg̃ maꞌg̃u wuyju — ioꞌe ip teꞌe ma.
\m Ikẽrẽat oꞌg̃ujurũg̃rũg̃ ip. Imẽnpuye Deus puybu oꞌsubumudot ixeyũ kay tũypiatpu. Ade oꞌjoa ixeyũꞌin. Ade oap ip puybu nuy pibun. Wuyju bit cuy wuykukukat ajobuyxijo g̃u. 
\v 10 Oꞌjemãmã ip Deus pe. Imẽnpuye Deus jekawẽn tojotjotꞌukat oꞌg̃udot adeayũ aoka am ixeyũꞌĩn. Deus xewiat ixeyũ oꞌyaoka. Oeꞌũꞌũ ip. Wuyju bit cuy acemãmã g̃u Deus pe.
\p
\v 11 Soat iboam pit oꞌjebapuk wuydobuyũꞌũmꞌũm pe wuymukũyjo am. Apẽn Deus ipiat oꞌsupiꞌajojoat cebe ip kũyjobitꞌũm pima iap ibararak opop Deus ekawẽntup pe. Iboaptup co buje, ixeyũꞌũmꞌũm ekukuap puxim g̃u juy ajeku. G̃axĩn ma soat iꞌũm. Imẽnpuye ixeyũꞌũmꞌũm ekukuap puxim g̃u juy ajeku.
\p
\v 12 Imẽnpuye:
\p — Oceju bit ikẽrẽat oceg̃ujurũg̃ g̃u ocebaca buye — iꞌũmg̃u juy ace. — Ocebuywan cuy eg̃uy ocewebe ikẽrẽat mujurũg̃ap puxim — i acã juy ace Deus pe. 
\m
\v 13 Wararaꞌacat ikẽrẽat mug̃ẽat ojuy du eywebe? Soat ijodiat pe ikẽrẽat mug̃ẽat ojuy ip. Deus pit soat em jaꞌõ dag̃ eꞌem. Wuybacaꞌũm pima, Deus wuybuywanwan. Wuybuywatwan jeenuy wuywebe ikẽrẽat mujurũg̃ap puxim.
\p
\v 14 Imẽneju, okitpitpiyũ, deusbaroyũ buxixim cuy epewatwat. 
\v 15 Eyag̃uysat kuy oxe. Wekawẽn puyxijom cuy epeꞌe cedag̃ paxi Paulo eꞌem iam. 
\v 16 G̃ebum cuy epesop Jesus Cristo eꞌũap kay wuyeg̃ebuapti kõn puje. Cristo eꞌũap kay wuyeg̃ebuapti kõn puje: — Bay, ẽn xipat cĩcã — i juy ace. 
\m Wuyju g̃ebum Cristoꞌũm toy kay, apẽn Cristo wuymuisusunap kay dak. Pãoꞌa o buje, Cristoꞌũm jebit kay wuyju g̃ebum, apẽn Cristo wuymuisusun oeꞌũ wuywebeam puye iap kay dak. 
\v 17 Pũg̃ꞌa bewi ma wuyju yaꞌoꞌom Cristo eꞌũap kay g̃ebum am, ade maꞌg̃u wuyju. Pũg̃at jebit puxim wuyju, pũg̃at kay wuyju g̃ebum puye.
\p
\v 18 G̃ebum cuy epesop Judeuyũ kay. Ixeyũ epaĩyũ Deus wap oꞌg̃upik ip iat epoyat oꞌom. Ibiat oꞌom pima g̃ebum ip wuyju Deus ebekitkiyũ iap kay. 
\v 19 Deusbaroyũ bit kake g̃u. Eyetaybit iboam. Õn tak wetaybit iboam. Kaꞌũmaap ma deusbaroyũ bit.
\p — Ixeyũ wap oceju puybit ẽn mõg̃mõg̃ ixeyũ xatẽn — iꞌeꞌem teꞌe ma deusbaroyũ kayayũ bit. 
\m 
\v 20 Deusbaroyũ wap iẽn mõg̃ puje Deus pe g̃u ma ip iũmũm- -ibiõg̃buk kẽrẽat pe acã, ibiõg̃buk kẽrẽayũ kukat ebekitkiyũ ip puye. Obuꞌu jĩjã eywebe ibiõg̃buk kẽrẽayũ babim eyeku am. 
\v 21 Jesus eꞌũap kay wuyeg̃ebuapti kõn puje, wuyju Deus ebekitkiyũ iap kay wuyju g̃ebum. Imẽnpuye ibaꞌore wuywebe deusbaroyũ wap timõg̃ꞌibiti kõn ãm ibiõg̃buk kẽrẽayũ kukat aꞌõbi. Wuykukukat Jesus eꞌũap kay wuyeg̃ebuapꞌa o buje, wuyju Deus ebekitkiyũ iap kay wuyju g̃ebum. Imẽnpuye ibaꞌore wuywebe deusbaroyũ wap iẽnmõg̃ꞌibitẽn o am ibiõg̃buk kẽrẽayũ kukat aꞌõbi. 
\v 22 Wuybuꞌu wuykukukat mutaek am. Cẽm g̃u du? Wuykukukat podi ma wuyaꞌõbaca iꞌeꞌem pima, kuka ibiõg̃buk kẽrẽayũ kukat kadiayũm aceꞌe. Ibiõg̃buk kẽrẽayũ kukat kadiayũ bima bit, kuka itaek oꞌe wuykukukat. Itaek pima, xipat g̃u kuka oꞌe wuywebeam.
\p
\v 23 — Cristo ebekitkit oceju. Imẽnpuye soan oceꞌe but — i napa ma eꞌem pũg̃pũg̃ayũ.
\p — Soat g̃u bit xipat wuywebeam — i õn pit eꞌem.
\p — Soan oceꞌe but — i napa ma eꞌem ip. 
\p — Teꞌe ma kuka pũg̃pũg̃ pit ajukuk — i õn pit eꞌem.
\m
\v 24 Cũg̃ g̃u wuywebe xipan jewewekuk am wararaꞌacat kay akꞌaritꞌiꞌũm pima. Wararaꞌacat tak cuy xipan ajukuk. 
\v 25-26 Imẽn eꞌem Deus ekawẽntup: Deus ipi kukukat ipi dag̃acat kukukat tak, i.
\p Imẽneju kaꞌũma ma iꞌopiat eywebe. Soatẽn cuy epejat eyxatẽn teidadaꞌukat xewi.
\p — Ite ẽn tu deusbaroyũ wap iꞌenmõg̃ꞌibitꞌen? — iꞌũmg̃u juy epeꞌe iẽn pum pima.
\p
\v 27 Jeweju jekõn ãm Jesus kay itabutꞌũmat pe eynomuwã buje, epeju juy eyju pin pima. Ajo oꞌg̃ũm ip iat ẽn cuy epesuẽnꞌo.
\p — Ite ẽn tu deusbaroyũ wap iẽnmõg̃ꞌibitẽn? — iꞌũmg̃u juy epeꞌe eynomuwãat pe. 
\m
\v 28-29 Itabutbũcat pe “ite ẽn deusbaroyũ wap iẽnmõg̃ꞌibitẽn” iꞌe buje bit cuy epesuẽnꞌo g̃u ixe mug̃uycũg̃ap puxim. Xipat eywebe ma ite ẽn o am. Itabutbũcat xe bit xipat g̃u ite ẽn o am. Ite ẽn oꞌũm pima bit, xipat jeꞌe ixe xe, exe dak. Kaꞌũma ma iꞌguycũg̃ jeꞌe. Soat eycokcok werep ma epeꞌe.
\p Wararaꞌacat pit acoꞌi jeꞌe:
\p — Apẽnpuye dak ite ẽn osuẽnꞌo g̃u wararaꞌacat xe cũg̃ꞌũm puye? Cũg̃ ma oxe bit iboap — i. 
\v 30 — Iẽn om pima õn eꞌem Deus pe “Bay, ẽn xipat,” i — i acoꞌi jeꞌe owebe. — Apẽnpuye dak wararaꞌacat kuka oꞌe owebe, “Cũg̃ g̃u ewebe ite ẽn o am,” i? — i acoꞌi jeꞌe owebe.
\p
\v 31 Cũg̃ ma juy epeku soat em wararaꞌacat pe “Deus idip cĩcã, yaꞌõbaca jĩjã” iꞌe am. Cũg̃ ma juy epeku jekõnkõn pima, tikõnkõn pima dak, soan eꞌem pima dak. 
\v 32 Cũg̃ ma juy epeku Judeuyũ etabutpe, Judeuꞌũmayũ etabutpe dak, Deus kay itabucayũ etabutpe dak. Cũg̃ ma juy epeku wararaꞌacat mubuꞌunap puxim Jesus Cristo kay. 
\v 33 Wekukuap puxim cuy epeku. Wararaꞌacat mucokcok pinap kug̃ õn jekukum soat em. Ajo xipat kuka oꞌe owebeam iap kay g̃u õn g̃ebum- -ajo xipat kuka oꞌe wararaꞌacat peam iap kay acã. Imẽn õn jekukum Deus pe wararaꞌacat taxijoap ojuy.
\b
\c 11
\p
\v 1 Cristo ekukuap puxim õn tak jekukum. Imẽnpuye wekukuap puxim cuy epeku.
\p
\v 2 Soat kabia eyju g̃ebum okay. Apẽn cuk adi õn eymutaybitbinap tag̃ tak eyju jekukum- -soat tag̃.
\p — Xipat cĩcã eyju oxe — i õn eꞌem eywebe. 
\m
\v 3 Imẽnpit waram jeymukũyjo õn. Ag̃okatkat jetayxi kukat. Cristo soat ag̃okatkayũ kukat. Deus Cristo kukat. 
\v 4 Imẽneju ag̃okatkat cuy jewajuy g̃u pag̃õm jebureyũ parakpe Deus eju kawẽnwẽn pima, Deus ekawẽn muwẽnuwẽn wararaꞌacat pe bima dak. Jewajuy buje bit ibuyxim g̃u kuka Cristo kug̃ oꞌe. 
\v 5 Ayacat pit cuy jewajuy jeenuy jebureyũ parakpe Deus eju kawẽnwẽn pima, Deus ekawẽn muwẽnuwẽn wararaꞌacat pe bima dak. Jewajuyꞌũm pima bit, ibuyxim g̃u kuka jektop kug̃ oꞌe. Ayacat yajuyꞌũmat pit yakoekoeat puxim yasũsũn. 
\v 6 Imẽnpuye ayacat jewajuyꞌũm pima, epeyadaptakat cuy. Wuywebe ayacat isũsũn jakoean, jadaptakacan tak. Imẽnpuye juy yajuyjuy jeedop ip pag̃õm jesũsũnap puxim. 
\v 7 Imẽntak ag̃okatkat pit cuy jewajuyjuy g̃u, Deus jejoꞌian oꞌg̃ug̃ẽ buye jedipap kug̃ oꞌg̃ug̃ẽ buye. Deus ag̃okatkat oꞌg̃ug̃ẽ jaꞌõ dag̃ ceku am. Ayacat pit oꞌg̃ug̃ẽ jektop aꞌõ dag̃ ceku am. 
\v 8 Deus ag̃okatkat mug̃ẽm pima ayacat pewi g̃u oꞌjuꞌuk. Ayacat mug̃ẽm pima bit, ag̃okatkat pewi oꞌjuꞌuk. 
\v 9 Ag̃okatkat oꞌg̃ug̃ẽ ayacat puye g̃u. Ayacat pit oꞌg̃ug̃ẽ ag̃okatkat puye. 
\v 10 Imẽneju itabucayũ awerom, pima aoyũ juy jaekabek kug̃ jeedop ip Deus ekawẽn tojotjotꞌukayũ wuyjojom puye. Jaekabek kug̃ cuy jeedop ip jektop aꞌõ kay kũyjobicap mubapuk am soat pe. 
\v 11 Wuykukukat Jesus kay wuyetabut puje bit, wuyag̃epũg̃ g̃u wuyju jekukum- -ayacat, ag̃okatkat tak. Jewemukũyjojom tak wuyju, jewebuywatwan tak. 
\v 12 Ag̃okatkat aꞌõxa bewi Deus ayacat oꞌjuꞌuk. Ayacat uk pewi g̃asũ bit ag̃okatkat kapkam. Deus xewiat pit soat kake.
\p
\v 13 Cedag̃ tu eyxe ayacat pe jaekabek kug̃ꞌũma kawẽn ãm Deus eju wararaꞌacat parakpe? Cedag̃ g̃u! 
\v 14 Wuyukpiwatpin ma wuyetaybit xipat g̃u ag̃okatkat pe yadaperean am iam. Ag̃okatkat yadaperen pima bit, jewemubuyxiꞌũmꞌũm. 
\v 15 Ayacat pit idip cĩcã wuyxe soat xe yadaperen pima. Yadaperenat yaekabekat coꞌi. 
\p
\v 16 — Cedag̃ g̃u ayacat peam pit kawẽn ãm Deus eju yajuyꞌũm pima — i õn eꞌem.
\m Imẽn eꞌem soat itabucayũ dak- -soat kaka dag̃ayũ. Imẽn tak cuy oceꞌe soat pe ocaꞌõxik pinat pe.
\p
\v 17 — Cũg̃ ma eyju jeꞌawerorom — iꞌũmg̃u õn pit eꞌem eywebe.
\m Awerom pima eyju jewebuywatwan g̃u big̃ ma eyetabut am Jesus kay- -jewemubuꞌuꞌun acã. Imẽg̃ap xipat g̃u! Jeymukũyjo õn cũg̃ ma eyeꞌawero am.
\p
\v 18 — Awerom pima jewaꞌõxikxig̃ ip Corinto ka watwat, Jesus kay itabucayũ, pũg̃ kadi g̃u ip puye — iꞌeꞌem owebe pũg̃pũg̃ayũ. 
\m Icẽm xeꞌe ixeyũ eꞌem? 
\p
\v 19 — Wuyju pũg̃pũg̃ kadiayũ bima, ibapuk eꞌem soat xe abuyũ wuyꞌin cũg̃ ma jekukum iap, abuyũ cũg̃ g̃u iap tak — i teꞌe ma eyju eꞌem.
\m Xipat g̃u wuyju Deus xe pũg̃pũg̃ kadiayũ bima. 
\v 20 Eyju jeꞌawerorom wuykukukat eꞌũap kay jeg̃ebu am g̃u- -jekõn ãm acã. 
\v 21 Jekõn pima, soat eyju eyukpiwatpin ma jekõnkõn cĩcã. Imẽnpuye koap ajẽmꞌibit jekõnkõn cĩcã jebureyũ wiwimꞌũma. Kanomũm yajẽmꞌibit pit jekõnkõn g̃u. Ire mabuk ip eꞌem waraꞌacat ibeg̃beg̃ pima, waraꞌacat ikaꞌo bima dak. 
\v 22 Apẽntak oce eywebe imẽn eyju jeꞌawerorom pima? 
\p — Cũg̃ ma eyju jeꞌawerorom — i du oce eywebe? Kaꞌũma! — Cũg̃ꞌũma — i acã oce.
\m Eyre bima, eydukꞌa be ma juy epeyekõn. Deus eju kawẽnwẽnapꞌa be bit warẽmtag̃ g̃u juy epeyekõn. Ibubutꞌũmat musũsũm g̃u juy epesop ig̃oꞌa be. Cũg̃ g̃u oxe eyju jeꞌawerorom.
\p
\v 23 — Weꞌũap kay eyeg̃ebu am cuy epeyekõn eyeweweju — i juk oꞌe wuykukukat Jesus owebe.
\m Apẽn ixe oꞌe owebe iam cuk õn eymutaybitbin. Jekay itakomaayũ be jeũm pimaap exima be pãoꞌa oꞌyabu. 
\p
\v 24 — Bay, ẽn xipat cĩcã — ioꞌe Deus pe. 
\m Pãoꞌa oꞌyadakat. G̃ebuje:
\p — Korosa be obamupaya ip iap kay juy epeg̃ebu ibeatꞌa o buje — ioꞌe jebekitkiyũ be. — Ojeꞌũ eywebeam — ioꞌe cebe ip. — Pãoꞌa juy epeyaꞌo weꞌũap kay eyeg̃ebu am — ioꞌe.
\m
\v 25 Imẽnpuxim kopo dak oꞌjat jekõn epere buje ip.
\p — Deus kawẽn iisuat g̃uwẽn ipi juayũ be ojeꞌũ buye, odoymukerereren puye — ioꞌe wuykukukat. — Odoymukererenap kay juy epeyeg̃ebu uvaꞌabidi kõn puje — ioꞌe. — Tikõn puje, weꞌũap kay juy epeyeg̃ebu — ioꞌe. 
\m Imẽn wuykukukat oꞌe owebe kuy bima. 
\v 26 Imẽneju ibeatꞌa oꞌom wuyju. Ibeatꞌa o buje, wuykukukat oeꞌũ wuywebeam iap muwẽnuwẽn wuyju soat pe, ibeati kõn puje dak. Imẽn cuy epeyekõnkõn waram wuykukukat ajẽmap wiwim pima.
\p
\v 27 Imẽneju Deus ipiat supiꞌajoat wuywebe warẽmtag̃ ma iꞌo buje. Warẽmtag̃ ma wuykukukat eꞌũap kay wuyeg̃ebuapꞌa o buje kuka ceꞌũap ajomuymuy, warẽmtag̃ ma ceꞌũap kay wuyeg̃ebuapti kõn puje dak. 
\v 28 Imẽnpuye:
\p — Cedag̃ tu õn jekukum Deus xe? — i juy ace wuywebe ma pãoꞌa o awap, uvaꞌabidi kõn awap tak. 
\m Cedag̃ ma jekukum pima acã kuka ayaꞌo. Atikõn tak kuka. Warẽmtag̃ jekukum pima bit, kuka ayaꞌo g̃u, atikõn g̃u dak kuka. 
\v 29 Apẽg̃ãm korosa be wuykukukat oeꞌũ iam eyetaybitꞌũm pima juy epeyaꞌo g̃u wuyeg̃ebuapꞌa. Epetikõn g̃u dak cuy wuyeg̃ebuapti. Eyetaybitꞌũma yaꞌo buje, eyukpiwat epeꞌe Deus xe. Imẽnpuye ipiat supiꞌajoat eywebe. 
\v 30 Ade eyꞌin warẽmtag̃ ma oꞌyaꞌoꞌo. Imẽnpuye ip iwãtaxipipe oꞌe. Ibaca g̃u ip oꞌe. Pũg̃pũg̃ oeꞌũꞌũ kuy. 
\v 31 Yaꞌom pima:
\p — Ikẽrẽat kug̃ tu õn exe? — i juy ace Deus pe.
\m Ikẽrẽat kug̃ pima, iboap cuy ag̃uwẽn ixe be iꞌuk am wuywebewi. Iꞌuk puje:
\p — Ikẽrẽat kug̃ eyju oxe” iꞌũmg̃u jeꞌe wuywebe. 
\m Ipiat tak supiꞌajoat g̃u wuywebe.
\p
\v 32 — Ikẽrẽat kug̃ eyju oxe — iꞌeꞌem Deus wuywebe ikẽrẽat epereap ojuy.
\m Ipiatpiꞌajojoan tak wuywebe wuymukũyjo am waram wuywebe ikẽrẽat kukap puxim. Ixe imẽn wuymukũyjojom ipiatꞌajojoap kay wuymujuap puxim kũyjobitꞌũmayũ eju.
\p
\v 33 Imẽneju, okitpitpiyũ, eybureyũ ajẽmap puk cuy epejowiwi. Wuykukukat eꞌũap kay wuyeg̃ebuapꞌa o am awerom pima, soat ajẽm puje juy epeyaꞌo. 
\v 34 Abu ire mabuk iat cuy jedukꞌa be ma jekõn. Imẽnꞌũm pima Deus ipiat supiꞌajoat eywebe awerom pima. Waraꞌan cuk adi epeyekawẽn owebeaptup pe- -kuyatup pe. Eykay oajẽm puje bit iboam õn jeymukũyjo.
\b
\c 12
\p
\v 1 Okitpitpiyũ, “Ajo ũmũm wuywebe Deus biõg̃buk?” i juk epeꞌe owebe kuyatup pe eyemudupmubararaktup pe. Iboam õn jeymutaybin. 
\v 2 Jesus kay eyetabutꞌũm pima waraꞌat kaykaykay ma eyetabut epesop- -jewexe deusyũ kay- -adeayũ kay. Pũg̃ tak ixeyũꞌin cede baꞌore ma deusparoyũ. Soat em eymug̃uykukukuꞌuk ip osodop. 
\v 3 G̃asũ bit “Deus aꞌõbi oceju eꞌem” iꞌeꞌeꞌukayũ jojom eyju. Deus biõg̃buk aꞌõbi eꞌeꞌukat eꞌem g̃u:
\p — Jesus wũy ma jeenuy Deus wi ipiatꞌajojom — i. 
\m Ibaꞌore cebe Jesus muymuy am. Deus biõg̃buk kukat acã icẽmãn eꞌem:
\p — Jesus acã ocekukukat — i. 
\m Wararaꞌacat pe bit ibaꞌore imẽn iꞌe am. Iboam eyetaybit pima eyetaybit tak abuyũ Deus aꞌõbi eꞌem iam, abuyũ napa ma eꞌem iam tak.
\p
\v 4 Ade ma Deus biõg̃buk emumuũm omuy. Pũg̃ pit iũmũm wuywebe- -Deus biõg̃buk acã. 
\v 5 Deus peam kapik put wuywebe waraꞌat tag̃tag̃tag̃ maꞌg̃u wuyju kapikpig̃. Pũg̃ peam pit wuyju kapikpig̃- -wuykukukat peam acã. 
\v 6 Soat wuyju wuyetaybit kapik am warẽmtaksug̃ tag̃ ma Deus peam. Pũg̃ pit wuymutaybitbin wuyekapik am- -Deus acã. Ixe be wuymutaybinꞌũm pima bit kuka wuyetaybit g̃u. 
\v 7 Deus ma jaꞌõbacaap ũmũm soat pe wuywebe wuymutaybit am obiõg̃buk omuy eywebe iam. Soat wuykitpitpiyũ buywat am iũmũm wuywebe- -wararaꞌacat itabucat puywat am. 
\v 8 Imẽn Deus biõg̃buk jaꞌõbacaap ũmũm pũg̃pũg̃ayũ be kawẽn icẽmat muwẽn ãm. Deus ekawẽn wararaꞌacat mutaybit am jaꞌõbacaap ũmũm wararaꞌacat pe. 
\v 9 Jesus kay itabut cĩcãam jaꞌõbacaap ũmũm wararaꞌacat pe. Iwãtaxipipiayũ muꞌadaꞌada am jaꞌõbacaap ũmũm wararaꞌacat pe. 
\v 10 Wuywebe iꞌe baꞌoreat mubapukpuk am jaꞌõbacaap ũmũm wararaꞌacat pe. Deus ekawẽn muwẽnuwẽn ãm jaꞌõbacaap ũmũm wararaꞌacat pe. Wararaꞌacat pe jaꞌõbacaap ũmũm ixeyũ be itaybit am abuyũ jekukum Deus biõg̃buk aꞌõbi iam, abuyũ jaꞌõbi ma jekukum iam tak. Wararaꞌacat pe jaꞌõbacaap ũmũm ixeyũ be yaꞌõbaꞌarẽmatꞌaꞌõm kawẽnwẽn ãm. Wararaꞌacat pe jaꞌõbacaap ũmũm ixeyũ be yaꞌõbaꞌarẽmatꞌaꞌõm kawẽnwẽnꞌukat ekawẽn muwẽn ãm wuyaꞌõm ma. 
\v 11 Ade ma ibiõg̃buk xipacat emumuũm. Pũg̃ ma bit ibiõg̃buk xipacat iũmũmat. Jekpiwatpin ma jaꞌõbacaap ũmũm wuywebe.
\p
\v 12 Pũg̃ ma wuyjebit. Ade bit opop wuyjebit pe. Wuyjebit puxim Cristo kay itabucayũ dak ade. Pũg̃at puxim pit wuyju. 
\v 13 Adeayũ itabut Jesus Cristo kay. Judeuyũ itabut cekay, Judeuꞌũmayũ dak. Teiꞌũm kapikpikꞌukayũ itabut cekay, teihem kapikpikꞌukayũ dak. Soat ip itabut cekay. Deus biõg̃buk kuy juk wuymuwexat Cristo jebit puximayũm pũg̃an. Deus aꞌõbacaap kug̃ wuyju ibiõg̃buk nuynuy wuywebe buye.
\p
\v 14 Soat wuyjebit tag̃at pit jekapikap kug̃. Pũg̃ g̃u opop wuyjebit pe- -ade ma- -wuyeta, wuyei, wuyba, wuybu. Pũg̃ ma wuyjebit pit. Imẽnpuxim soat itabucayũ jekapikap kug̃. Pũg̃at aꞌõbi bit wuyju kapikpig̃. 
\v 15 Wuyjebit tag̃at pit jemãmãmãm g̃u Deus pe. “Wuyjuyũ jebit tag̃at g̃u õn ibu g̃u buye” iꞌe but maꞌg̃u wuyei be. Wuyjebit tag̃ maꞌg̃u nuynuy. 
\v 16 “Wuyjuyũ jebit tag̃at g̃u õn, ita g̃u buye” iꞌe but maꞌg̃u wuyg̃uybu be. Wuyjebit tag̃ maꞌg̃u nuynuy. Jemãmãmãm g̃u Deus pe wuyjebit tag̃at. Icokcok jekapikap kug̃. 
\v 17 Wuyjebit wuyeta acã bima, kuka acekũyjo g̃u. Wuyjebit wuyg̃uybu acã bima, kuka ajoyõn g̃u. 
\v 18 Imẽnpit Deus pũg̃ g̃u oꞌjomuy wuyjebit pe. Ade ma oꞌjomuy. Wuybu oꞌsubumuy. Wuyeta oꞌsutamuy. Wuyba oꞌsubamuy. Wuydao oꞌtaomuy. Jekpiwatpi ma oꞌjomuy soat. 
\v 19 Pũg̃ ma oꞌjomuy bima bit, wuyjebitbet g̃u kuka adi ace. 
\v 20 Imẽneju ade ma opop wuyjebit pe. Pũg̃ ma wuyjebit pit. Wuyjebit tag̃at pũg̃ tag̃ ma eꞌem, ade maꞌg̃u cebe. Imẽnpuxim wuyju dak pũg̃ tag̃ cuy ajeku pũg̃at kay wuyetabut puye- -Jesus Cristo kay. Pũg̃ tag̃ cuy ajeku Deus biõg̃buk omuy soat pe wuywebe buye.
\p
\v 21 Ajo omuy teꞌe ma wuyjebit pe? Kaꞌũma ma. Soat jekapikap kug̃ wuyjebit tag̃at. Jecoatcoan wuyju wuyetam. Cũg̃cũg̃ wuyju wuyeim. Kapikpig̃ wuyju wuybum. Jewebuywatwan soat wuyjebit tag̃at. Imẽnpuxim wuyju dak cuy acejewebuywan, Jesus Cristo kay wuyetabut puye. 
\v 22 Imẽn ma Deus wuyjebit oꞌg̃ug̃ẽ. Pũg̃pũg̃ wuyjebit tag̃at ibaca g̃u wuyxe. Imẽnpit ixeyũ dak kaꞌũmg̃u bima bit, kuka adi ajeꞌũ. 
\v 23 Imẽntak pũg̃pũg̃ wuyjebit tag̃at idip g̃u wuyxe. Imẽnpit xipan wuyju ikug̃. Wuysũsũn pũg̃pũg̃ wuyjebit tag̃at ajuyꞌũmãm. Imẽnpit xipan wuyju ikug̃. 
\v 24 Xipanꞌũmꞌũm ma wuyju idipat kug̃- -wuyjebit tag̃at kug̃. Wuysũsũn wuyju eꞌem pũg̃pũg̃ wuyjebit tag̃at kug̃. Deus pit isũsũn g̃u wuykug̃. Soat ma oꞌg̃ug̃ẽ wuyjebit tag̃an. Imẽnpuye juy soat ajukuk xipan wuyjebit tag̃at wuysũsũn maꞌg̃u ikug̃. 
\v 25 Waraꞌat tag̃tag̃tag̃ g̃u wuyjebit eꞌem- -pũg̃ tag̃ ma. Soat wuyjebit tag̃at pũg̃ tag̃ ma eꞌem. Imẽnpuxim wuyju dak waraꞌat tag̃tag̃tag̃ g̃u juy ajeku- -pũg̃ tag̃ ma. 
\v 26 Pũg̃ pe maꞌg̃u ipiat pima, soat wuyjebit tag̃at itaybit jopku ipi iam. Pũg̃ ma wuyjebit tag̃at xipat pima dak, soat wuyjebit tag̃at itaybit jopku xipat iam. Cristo kay itabucayũ wuyjebit puxim. Wuybure ipiatꞌajojom pima, soat kuka wuyg̃uycũg̃ ace cekay. Wararaꞌacat wuybure awẽg̃mudim pima dak, soat kuka wuycokcok ace cekay, wuybure kay.
\p
\v 27 Imẽneju Deus ade ma oꞌjomuy wuyjebit pe. Jekpiwatpi ma oꞌjomuy. Imẽntak wuyju Jesus Cristo jebit puxim. Soat wuyju ijebit tag̃at puxim. 
\v 28 Imẽnpuye Deus soat jekpot kay itabucayũ oꞌjomuy jekitpitpiyũ buywat am. Koap pima:
\p — Wemumujuyũm epesop — i juk adi oꞌe pũg̃pũg̃ayũ be.
\m G̃ebuje: 
\p — Soat kaka dag̃ cuy epeju wekawẽn muwẽnuwẽn ãm — i juk adi oꞌe wararaꞌacayũ be. 
\m G̃ebuje: 
\p — Jesus kay itabucayũ juy epeg̃utaybitbin — i juk adi oꞌe wararaꞌacayũ be. 
\p — Eywebe iꞌe baꞌoreat cuy epeg̃ubapukpukpuk waꞌõbi — iꞌeꞌem wararaꞌacayũ be. — Iwãtaxipipiayũ juy epeg̃uꞌadaꞌada — iꞌeꞌem wararaꞌacayũ be. — Eykitpitpiyũ buywatwan cuy epesop Jesus kay ibuꞌuap puxim — iꞌeꞌem wararaꞌacayũ be. — Eybureyũ kukukayũm cuy epesop — iꞌeꞌem wararaꞌacayũ be. — Yaꞌõbaꞌarẽmatꞌaꞌõm cuy epeyekawẽnwẽn — iꞌeꞌem wararaꞌacayũ be. 
\m
\v 29 Soat g̃u ip Deus emumujuyũ- -pũg̃pũg̃ ã. Soat g̃u ip Deus ekawẽn muwẽnuwẽnꞌukayũ- -pũg̃pũg̃ ã. Soat g̃u ip itabucat mutaybitbinꞌukayũ- -pũg̃pũg̃ ã. Soat pe g̃u Deus jaꞌõbacaap ũmũm wuywebe iꞌe baꞌoreat mubapuk am- -pũg̃pũg̃ pe acã. 
\v 30 Soat pe g̃u jaꞌõbacaap oꞌg̃ũm iwãtaxipipiayũ muꞌada am- -pũg̃pũg̃ pe ma. Soat pe g̃u jaꞌõbacaap oꞌg̃ũm yaꞌobaꞌarẽmatꞌaꞌõm kawẽn ãm- -pũg̃pũg̃ pe ma. Soat pe g̃u jaꞌõbacaap oꞌg̃ũm yaꞌõbaꞌarẽmatꞌaꞌõm kawẽnuwẽnꞌukat ekawẽn muwẽn ãm wuyaꞌõm- -pũg̃pũg̃ pe ma. 
\v 31 Eyju bit eyetabikukum cuy epesop Deus emumuũm kay- -xipat cĩcãat kay.
\p Ajo soat podi ma xipat iam pit õn jeymutaybin.
\b
\c 13
\p
\v 1 Wuyetaybit kuka ajop kawẽn ãm wararaꞌacatꞌaꞌõm, Deus ekawẽn tojotjotꞌukat aꞌõm tak. Wuyxe wararaꞌacat ikukpinꞌũm pima bit, teꞌe ma kuka wuyetaybit ajop wararaꞌacat aꞌõm, Deus ekawẽn tojotjotꞌukat aꞌõm tak. Wuyxe ikukpinꞌũm pima, wuyaꞌõkarey acã kuka ace Deus xe- -tamarakaꞌa muydedeap puxim. 
\v 2 Ixe aꞌõbi Deus ekawẽn kuka ag̃uwẽn. Wuyetaybit kuka ajop ajom soat ijodiat itaybit iam. Wuyetaybit kuka ajop ajo ibaꞌarẽm wararaꞌacat xe iam tak. Coꞌa yamuwede but kuka oꞌe wuywebe wuyetabut cĩcã buye. Imẽnpit wuyxe wararaꞌacat ikukpinꞌũm pima, kaꞌũma ma kuka ace Deus xe. 
\v 3 Soat kuka ace itabutꞌũmayũ be wuymupikan wuyetabucap mubapuk am soat pe. Imẽnpit wuyxe wararaꞌacat ikukpinꞌũm pima, teꞌe ma kuka acemupikat, teꞌe ma dak kuka ag̃ũm wuybubut ikug̃ꞌũmayũ be.
\p
\v 4 Wuyxe wararaꞌacat ikukpin pima bit, wuyukpiceg̃ẽm g̃u kuka ajop cekay ip; xipacat tak kuka ag̃ũmg̃ũm cebe ip; wuyetabutkarey g̃u dak kuka ajop cekay ip; yobog̃an pin g̃u dak kuka ajop; — Wararaꞌacat podi ma ocaꞌõbuyxi — iꞌũmg̃u dak kuka ace; 
\v 5-6 warẽmtag̃ g̃u dak kuka ajeku- -cedag̃ ma; jewekay acã g̃u dak kuka ajop g̃ebum- -wararaꞌacat kay dak; dao g̃u dak kuka wuyetakomãm ajop; warẽmtag̃ g̃u dak kuka wararaꞌacat ajukuk- -cedag̃ ma; g̃ebum g̃u dak kuka ajop apẽn wararaꞌacat cuk adi ikẽrẽm wuykukiap kay; wuyg̃uycũg̃cũg̃ tak kuka ajop ikẽrẽat mujurũg̃rũg̃ ip iap kay; wuycokcog̃ tak kuka ajop cũg̃ ma jekukum ip iap kay.
\p
\v 7 Wuyxe wararaꞌacat ikukpin pima, wuybuꞌum g̃u dak kuka ajop wararaꞌacat kay; — Soat ma iꞌe but Deus xe — i dak kuka acece soat em; wararaꞌacat idipan eꞌeap wiwim tak kuka ajop; wuyukpiceg̃ẽm g̃u dak kuka wararaꞌacat ajukuk. 
\v 8 Wuyxe wararaꞌacat ikukpin ijodi bima, soat em ma dak ikukpin jeedop ip wuyxe. Wuyxe ikukpin ip iap iꞌũmꞌẽm g̃u. Darem ma bit ip kawẽnwẽn Deus aꞌõbi kawẽnwẽnꞌukayũ. Ijodi bima acã. Darem ma dak ip kawẽnwẽn yaꞌõbaꞌarẽmatꞌaꞌõm kawẽnwẽnꞌukayũ. Ijodi bima acã. Itaybitbũcayũ dak omuy ijodi bima acã. 
\v 9 Soan g̃u wuyetaybit g̃asũ- -yopĩt ma. Soat g̃u dak wuyju imuwẽnuwẽn Deus biõg̃buk aꞌõbi- -yopĩt ma. 
\v 10 Deus xe bima bit, kaꞌũmg̃u jeꞌe itaybitbũcayũ. Soan ma wuyetaybit acesop. Yopĩt ma imuwẽnuwẽnꞌukayũ dak kaꞌũmg̃u jeꞌe. Soat ma aceg̃uwẽnuwẽn.
\p
\v 11 Bekin pima bekitkit ekawẽnap puxim cuk adi og̃uy; bekitkit ag̃uy buxim tak; bekitkit ekukuap puxim tak. Ag̃okatkan g̃asũ bit oce. Bekitkit puxim wekukuap pit cuk ocepere. 
\v 12 G̃asũ wuyetaybitbũt ma Deus eꞌeam. Waroa itabidig̃ peat cocoap puxim wuyetaybitbũt ã ixem. Ixe xe bima bit, jewejojom aceꞌe. G̃asũ wuyetaybitbũt ma ixem. Ixe bit itaybit cĩcã wuyjum. G̃uyjom pit wuyetaybit aceꞌe ixem apẽn ixe itaybit wuyjum iap coꞌi.
\p
\v 13 Wuyetabut Deus kay. Ixe xe wuydopap wiwim tak wuyju. Wararaꞌacat tak ikukpin cĩcã wuyxe. Deus xe xipat cĩcã wuyetabut pima, ixe xe wuydopap wiwim pima dak. Wuyxe wararaꞌacat ikukpin pima bit, ibodi ma xipat cexe.
\b
\c 14
\p
\v 1 Xipan wararaꞌacat kukam cuy epejokuda. Soan cuy epeꞌe Deus biõg̃buk emumuũm pu am. Cekawẽn muwẽnap pit wararaꞌacat podi ma xipat. Imẽnpuye:
\p — Aꞌõbacaap cuy eg̃ũm owebe ekawẽn muwẽn ãm — i juy epeꞌe cebe- -Deus pe. 
\v 2 Yaꞌõbaꞌarẽmat aꞌõm kawẽnuwẽnꞌukat ma wuywebe g̃u kawẽnwẽn- -Deus pe acã, cekawẽn paꞌarẽm wuyxe buye. Ibiõg̃buk xipacat aꞌõbi ixe yaꞌõbaꞌarẽmat aꞌõm kawẽnwẽn. Icẽmãn ixe eꞌem. Wararaꞌacat xe bit cekawẽn paꞌarẽm. 
\v 3 Deus ekawẽn muwẽnuwẽnꞌukat pit kawẽnwẽn soat peam wuywebeam. Ixe wuybuywatwan big̃ ma wuyetabut am. Wuypararaap muꞌũmuꞌũm tak ixe. Wuyg̃uycũg̃ap mukapkam tak ixe. 
\v 4 Yaꞌõbaꞌarẽmatꞌaꞌõm kawẽnwẽnꞌukat ma jewebuywatwan acã big̃ ma jetabut am Jesus kay. Deus ekawẽn muwẽnuwẽnꞌukat pit soat itabycayũ buywatwan big̃ ma itabut am ip.
\p
\v 5 Ocokcoksũ ma kuka oce Deus pe jaꞌõbacaap ũm puje eywebe yaꞌõbaꞌarẽmatꞌaꞌõm kawẽn ãm. Ocokcok cĩcã ma bit kuka oce ixe be jaꞌõbacaap ũm puje eywebe Deus ekawẽn muwẽn ãm. Yaꞌõbaꞌarẽmatꞌaꞌõm kawẽnwẽnꞌukat xipan kapikpig̃ Deus peam. Deus ekawẽn muwẽnuwẽnꞌukat pit ixe bodi ma xipan kapikpig̃ cebeam. Teꞌe ma kuka oꞌjekawẽn yaꞌõbaꞌarẽmatꞌaꞌõm waraꞌacat cewejuꞌũm pima wuyaꞌõm cekawẽn muwẽn ãm ceꞌaweroꞌibiyũ be. Teꞌe ma kuka oꞌjekawẽn yaꞌõbaꞌarẽmatꞌaꞌõm Jesus kay itabucat buywatwanꞌũm puye. 
\v 6 Okitpitpiyũ, eykay juy oajẽm. Yaꞌõbaꞌarẽmatꞌaꞌõm kawẽnwẽn pima bit, eybuywan g̃u kuka õn, wekawẽn paꞌarẽm eyxe buye. Apẽn Deus cuk adi oꞌg̃uwẽnuwẽn owebe iap muwẽn puje bit, kuka õn eybuywan, apẽn cuk adi ixe omutaybitbiniap muwẽn puje dak. Deus biõg̃buk aꞌõbi imuwẽn puje dak, kuka õn eybuywan, Deus ekawẽn muwẽn puje dak.
\p
\v 7 Wuyaꞌõꞌẽ. Yamuydedeap tak yaꞌõꞌẽ ma. Tarekrekꞌukꞌuk tak yaꞌõꞌẽ ma- -flautaꞌuk tak yaꞌõꞌẽ ma, harpaꞌuk tak. Itaybitꞌũmat cedag̃ꞌũm yamuydedem pima bit, ajom iꞌeyũ imuydedem i kuka oꞌe ip, warẽmtag̃ ma yamuydedem puye. 
\v 8 Kededeg̃ꞌuk kukat warẽmtag̃ ma yukmuydedem pima bit, kuka oꞌjemuxipan g̃u ip sorarayũ jeju am nopag̃õg̃õ ãm. 
\v 9 Imẽnpuxim ẽn yaꞌõbaꞌarẽmatꞌaꞌõm kawẽnwẽn pima, ekawẽn cocoayũ dak itaybit g̃u kuka oꞌe ip ekawẽn, yaꞌĩjojom maꞌg̃u ip. Kawẽnwẽnꞌũma ẽn ceweju ip iat puxim kuka oꞌe ip. 
\v 10 Pũg̃ꞌãꞌõ g̃u wuyju. Warẽmtaksug̃ ma wuyaꞌõ. Wuyaꞌõwarururu. Ibeatꞌaꞌõm kawẽnwẽnꞌukat xe bit yaꞌõbapuk. 
\v 11 Yaꞌõbaꞌarẽmatꞌaꞌõm kawẽnwẽnꞌukat pit wũyatka bewiat puxim oxe; õn tak cexe wũyatka bewiat puxim ma. 
\v 12 Deus biõg̃buk emumuũm kay jĩjã eyju kuy. Imẽnpuye soat podi ma xipat cĩcãat cuy epejoojuy cexewi. Yaꞌõbacaap cuy epejoojuy wararaꞌacat puywat am- -Jesus kay itabucayũ buywat am.
\p
\v 13 Imẽnpuye yaꞌõbaꞌarẽmatꞌaꞌõm kawẽnuwẽnꞌukat cuy jekawẽn Deus eju.
\p — Aꞌõbacaap cuy eg̃ũm owebe apẽn cuk adi oceceiap muwẽn ãm waꞌĩjojoꞌukat aꞌõm tak — i juy jeꞌe ip Deus pe. 
\m
\v 14 Õn yaꞌõbaꞌarẽmatꞌaꞌõm kawẽnwẽn Deus eju bima, wag̃uybi g̃u õn kawẽnwẽn. Obiõg̃buk pe acã õn kawẽnwẽn. 
\v 15 Imẽnpuye apẽn paxi oce? Obiõg̃buk pe juy ocekawẽn Deus eju, wag̃uybi dak. Obiõg̃buk pe juy ocebibododon tak, wag̃uybi dak. 
\v 16 “Bay, ẽn xipat cĩcã” iꞌeꞌem eyju eybiõg̃buk pe acã bima, “Xipat cĩcã ma” iꞌe baꞌore kuka oꞌe eyweju jeꞌaweroromayũ be, eyekawẽn cekawẽnpaꞌarẽm cexe ip puye.
\p — Apẽn xeꞌe ite eꞌem? — i acã kuka oꞌe ip.
\m
\v 17 Eyaꞌõdip cĩcã ma acoꞌi eybiõg̃buk pe eyju kawẽnwẽn Deus eju. Imẽnpit eyweju jeꞌaweroromayũ buywatwan g̃u eyju. 
\v 18 Eyekawẽnap podi ma õn pit kawẽnwẽn yaꞌõbaꞌarẽmatꞌaꞌõm. Imẽnpuye:
\p — Ẽn xipat cĩcã oxe — i õn eꞌem Deus pe. 
\m
\v 19 Wararaꞌacat eju awerom pima bit cuy yaꞌõbaꞌarẽmatꞌaꞌõm g̃u ocekawẽn. Soat ip waꞌĩjojom iatꞌaꞌõm acã ocekawẽn ixeyũ mutaybit am. 10.000 palavra yaꞌõbaꞌarẽmatꞌaꞌõm wekawẽn puje, kaꞌũma ma kuka itaybit oꞌe ip. 5 palavra ixeyũ aꞌõm wekawẽn puje bit, kuka itaybit oꞌe ip. Imẽn kuka ip osubuywan.
\p
\v 20 Okitpitpiyũ, yopĩt ma juy eyetaybin ikẽrẽat mug̃ẽ ãm bekitkit puxim. Bekitkit ag̃uy buxim g̃u bit cuy epeyewag̃uyg̃uy- -yaypanayũ ag̃uy buxim acã. 
\v 21 Imẽn eꞌem Deus wuyawẽwẽap ekawẽntup pe:
\mi “Ocekawẽn puk ijodiat eju,” iꞌeꞌem wuykukukat, i. “Yaꞌõbaꞌarẽmatꞌaꞌõm puk ocekawẽn ceweju ip- -wũyatka watwat aꞌõm,” i. “Imẽnpit waꞌĩjo pin g̃u juy jeꞌe ip,” i.
\m Imẽn eꞌem ig̃odup.
\p
\v 22 Imẽn wuyju yaꞌõbaꞌarẽmatꞌaꞌõm kawẽnwẽn Deus soat podi ma yaꞌõbaca iꞌe am itabucayũ be g̃u- -itabutꞌũmayũ be acã. Deus ekawẽn muwẽnuwẽn pit wuyju Deus soat podi ma yaꞌõbaca iꞌe am itabutꞌũmayũ be g̃u- -itabucayũ be acã. 
\v 23 Jesus kay itabucayũ eꞌawero buje, soat eyju acoꞌi yaꞌõbaꞌarẽmatꞌaꞌõm kawẽnwẽn. G̃ebuje itabutꞌũmat acoꞌi jajẽm eykay- -oꞌyaꞌĩjojo g̃u bukiat tak.
\p — Teyũku yadaodaoayũ — i acoꞌi jeꞌe ip eyekawẽn cekawẽn paꞌarẽm cexe ip puye.
\m
\v 24 Deus ekawẽn muwẽnuwẽn pima bit, itaybit jeꞌe ip ikẽrẽat kug̃ oceju iam- -eyekawẽn co buje. Yaꞌõbaꞌarẽmatãꞌõ oꞌyaꞌĩjojo g̃uꞌibit tak itaybit jeꞌe iboam.
\p — Deus omuju juy ipiatꞌajojoap kay ikẽrẽat kug̃ õn cexe buye — i jeꞌe eyekawẽn co buje. 
\v 25 — Ikẽrẽat kay õn g̃ebum soat em — i dak jeꞌe ixe soat pe eywebe- -aweromꞌayũ be.
\p Jẽg̃ꞌaecõg̃cõg̃ Deus wap:
\p — Bay, ẽn xipat cĩcã — i dak jeꞌe Deus pe. — Icẽmãn Deus omuy eyxe — i dak jeꞌe eywebe.
\p
\v 26 Imẽneju, okitpitpiyũ, jeymukũyjo õn cedag̃ ma eyeꞌawero am. Epeyeꞌawero juy eyewebuywat am big̃ ma eyetabut am. Eyeꞌawero buje, pũg̃ꞌin cuy eyꞌin jebibododon Deus kay; waraꞌat cuy jebureyũ ma g̃utaybin; waraꞌat cuy apẽn Deus oꞌe cebe iap g̃uwẽn; waraꞌat cuy jekawẽn yaꞌõbaꞌarẽmatꞌaꞌõm; waraꞌat cuy wuyaꞌõm ma g̃uwẽn apẽn yaꞌõbaꞌarẽmatꞌaꞌõm kawẽnwẽnꞌukat oꞌe iap. Soan cuy epeꞌe eyewebuywat am big̃ ma eyetabut am Jesus kay. 
\v 27 Pũg̃ g̃u eyꞌin kawẽnwẽn yaꞌõbaꞌarẽmatꞌaꞌõm. Adedem g̃u bit cuy jekawẽn pũg̃ eꞌawero buje- -xepxep ã. Ebapũg̃ tak xipat ma. Xepxem g̃u dak cuy jekawẽn ip. Pũg̃ ma koap jede. Ixe emũg̃ puje waraꞌat jede kanomũm. Waraꞌat tak cuy wuyaꞌõm ma apẽn ite oꞌe iap g̃uwẽn. 
\v 28 Kaꞌũma ma acoꞌi itaybit apẽn ite oꞌe iap muwẽn ãm wuyaꞌõm. Itaybitꞌũm pima, mũg̃ ma juy ip jeedop. Yaꞌõberen g̃u juy jede ip- -jewebe acã- -Deus pe dak. 
\v 29 Xepxep ã juy apẽn Deus oꞌg̃uwẽn cebe ip iap g̃uwẽn pũg̃ eꞌawero buje. Ebapũg̃ tak xipat ma. Ixeyũ ekawẽn cocom cĩcã juy jeedop ip wararaꞌacat.
\p — Cedag̃ xeꞌe ixeyũ eꞌem? — i juy jeꞌe ip jewewebe. 
\m
\v 30 Waraꞌacat pe Deus jekawẽn mubapuk puje bit, kawẽnwẽnat cuy jemũg̃ waraꞌacat ekawẽn ãm. 
\v 31 Deus jekawẽn g̃ubapuk pũg̃ pe g̃u- -soat pe ma. Soat ip iꞌe but ajo Deus oꞌe cebe iap. Pũg̃ ma juy g̃uwẽn. Ixe emũg̃ puje juy waraꞌat g̃uwẽn. Imẽn bodinmaku g̃uwẽn ip. Imẽn eẽm pima, soat cuy eyetaybin. Soat tak eycokcok epesop. Jewebuywatwan tak cuy epesop. 
\v 32 Jekpiwatpin ma jede Deus ekawẽn muwẽnuwẽnꞌukat. Jekpiwatpin ma dak jemũg̃. 
\v 33 Deus icokcok g̃u warẽmtag̃ wuyeꞌaweroap kay bit. Cedag̃ ma wuyeꞌawero buje bit, icokcok eꞌem.
\p
\v 34 Itabucayũ eꞌawero buje juy mũg̃ ma jeedop ip aoyũ. Imẽn jeꞌawerorom soat ka dag̃ itabucayũ. Abu ayacat oꞌg̃uydeat ceꞌawero buje ip? Kaꞌũma ma. Ag̃okatkayũ kukukan g̃u juy jeedop ip aoyũ. Judeuyũ awẽwẽap ekawẽn tak imẽn wuymutaybitbin. 
\v 35 Wuysũsũn kuka ace ayacat ekawẽn puje aweromayũ be. “Apẽn ite oꞌe?” iꞌe pin pima, jektop eju ma juy jekawẽn jedukꞌa be ma- -awerom pima bit kaꞌũma.
\p
\v 36 Eyxewi g̃u Deus ekawẽn oꞌjebapuk- -cexewi ma- -Deus xewi. Eywebe ã g̃u Deus jekawẽn oꞌg̃uwẽn- -soat pe ma. Imẽneju:
\p — Oceju acã cedag̃ ma jeꞌawerorom Deus eju kawẽnwẽnapꞌa be — iꞌũmg̃u juy epeꞌe. 
\m
\v 37 Pũg̃pũg̃ eyꞌin Deus ekawẽn muwẽnuwẽnꞌukayũ. Wararaꞌacat eyꞌin Deus biõg̃buk emumuũm kug̃ayũ- -yaꞌõbacaap kug̃ayũ.
\p — Wuykukukat aꞌõbi Paulo ijudup mubarararag̃ wuymukũyjoaptum — i juy jeꞌe ixeyũ ma. 
\m
\v 38 Pũg̃at pit wemudupmubararaktup peat ekawẽn kayꞌũm pima, ixe eꞌeap kay g̃u juy epesop.
\p
\v 39 Imẽneju, okitpitpiyũ: — Aꞌõbacaap cuy eg̃ũm owebe ekawẽn muwẽn ãm — i juy epeꞌe Deus pe. — Yaꞌõbaꞌarẽmatꞌaꞌõm g̃u juy ecekawẽn — iꞌũmg̃u bit cuy epeꞌe waraꞌacat pe. 
\m
\v 40 Awerom pima bit, warẽmtag̃sug̃ g̃u juy epesop. Cedag̃ ma juy epeyeꞌawero.
\b
\c 15
\p
\v 1 Okitpitpiyũ, g̃ebum cuy epesop kawẽn idipat kay. Kuy bima juk adi iboap ekawẽn og̃uwẽnuwẽn eywebe. Iboap ekawẽn kay eyetabut epesop. Iboap ekawẽn tag̃ eyju jekukum g̃asũ dak. 
\v 2 Iboap ekawẽn cekawẽntip. Iboap ekawẽn cuk adi og̃uwẽnuwẽn eywebe. Deus eydaxijojom iboap ekawẽn kay eyetabut puye. Eybuꞌuꞌũm pima, jeydaxijo. Eybuꞌu bima bit, teꞌe ma juk eyetabut epesop.
\p
\v 3 Apẽn cuk adi oyaꞌĩjojoiap cuk og̃uwẽn eywebe. Iboap ekawẽn podi ma xipat. Cristo oeꞌũ ikẽrẽat uk am wuywebe. Oeꞌũ apẽn ibararak opop Deus ekawẽntup pe iap tag̃. 
\v 4 Ixeꞌũm oꞌjomõg̃ ip witabikũy be. Xepxep xet kap puje dak, Deus ixe oꞌg̃uyu ceꞌũꞌũayũ dopap pewi. Waram g̃uto oꞌjetait apẽn ibararak opop Deus ekawẽntup pe iap tag̃. 
\v 5 Pedro kay oꞌjebapuk jeꞌũap tomukadi. G̃asũ 12 beayũ kay oꞌjebapuk- -jemumujuyũ kay. 
\v 6 G̃asũ jeweju juk adi oekukuꞌiayũ kay oꞌjebapuk adeayũ kay- -500 beayũ kay. Ade ma buk ixeyũꞌin pit itabẽg̃ ma. Wararaꞌacat kuy oeꞌũꞌũ ixeyũꞌin. 
\v 7 Tiago kay oꞌjebapuk g̃uyjom. Soat jemumujuyũ kay oꞌjebapuk g̃uyjom.
\p
\v 8 Ixeyũ kay jebapukap tomukadi okay oꞌjebapuk. It kapat waꞌũmat puxim õn, kanomũm okay oꞌjebapuk puye. 
\v 9 Imẽnpuye obodi ma ip yaꞌõbuyxi wararaꞌacayũ Jesus emumujuyũ. Kuy bima Jesus kay itabucayũ be ipiatpiꞌajojoan cuk adi ojekukuku. Imẽnpuye osũsũn “Jesus emumuju õn” iꞌe am. 
\v 10 Deus pit soat podi ma xipan okug̃, xipat g̃u maꞌg̃u õn. Imẽnpuye juk omuy Jesus emumujum. Teꞌe g̃u juk omuy. Wararaꞌacat ekapikap podi ma juk adi ocekapikpik Jesus emumujuyũ ekapikap podi ma. Waꞌõbacaam g̃u bit cuk adi ocekapikpik- -Deus aꞌõbacaam acã. Ixe waꞌõmucanucanꞌuk osunuy soat em. 
\v 11 Kawẽn idipat acã og̃uwẽn eywebe. Wararaꞌacayũ dak ibeat acã oꞌg̃uwẽn eywebe- -Jesus emumujuyũ. Abu imuwẽnuwẽn iat pit yobog̃ g̃u. Cekawẽn pit yobog̃. Iboap ekawẽn kay juk eyetabut epesop.
\p
\v 12 — Deus waram g̃uto Cristo oꞌg̃utait ceꞌũap tomukadi — i wuyju eꞌem. 
\m Imẽnpuye:
\p — Deus waram pit ceꞌũꞌũꞌibiyũ g̃utait g̃u — iꞌeꞌem teꞌe ma pũg̃pũg̃ eyꞌin.
\m
\v 13 Ixeyũ eꞌeap icẽm pima bit: — Deus waram g̃uto Cristo oꞌg̃utait g̃u — i dak eꞌem ip. 1
\m
\v 14 Deus pe waram g̃uto Cristo mutaitꞌũm pima bit, teꞌe ma kuka kawẽn idipat waraꞌacat pe- -teꞌe ma dak kuka adi eyetabut iboap ekawẽn kay.
\p
\v 15 — Deus waram Cristo oꞌg̃utait — i wuyju eꞌem.
\m Ixeyũ eꞌeap icẽm pima bit, napa ma wuyju eꞌem:
\p — Deus Cristo oꞌg̃utait — i.
\m Deus waram g̃uto ceꞌũꞌũayũ mutaicin g̃u iap ekawẽn icẽm pima, Cristo dak waram g̃uto oꞌg̃utait g̃u. 
\v 16 Waram g̃uto ceꞌũꞌũꞌibiyũ mutaicitꞌukꞌũm pima, Cristo dak waram g̃uto oꞌg̃utait g̃u. 
\v 17 Ixe be waram g̃uto Cristo mutaitꞌũm pima, teꞌe ma juk eyetabut cekay. Ikẽrẽat kug̃ mabuk eyju. Ixe be imutaitꞌũm pima, ipiatꞌajojoap kay epeju eyeꞌũ buje. 
\v 18 Ixe be imutaitꞌũm pima, Cristo kay itabucayũꞌũmꞌũm wũy ma opop ip Deus wi. Ipiatꞌajojoap pe ma ip opop. 
\v 19 Ijodi bima acã du Cristo xipan wuykug̃? Wuyeꞌũ buje bit wuykay g̃u xeꞌe? Imẽn pima, wararaꞌacat podi ma kuka wuyg̃uycũg̃ ace.
\p
\v 20 Imẽnpit ixeyũ eꞌeap icẽm g̃u. Deus waram g̃uto Cristo oꞌg̃utait. Oꞌg̃utait waram g̃uto soat webekitkiyũꞌũmꞌũm og̃utait iam wuymutaybit am. 
\v 21 Soat jeꞌũꞌũm aceꞌe pũg̃ ma ag̃okatkat ikẽrẽat oꞌg̃ug̃ẽ buye. Imẽnpuxim soat acejetait waram waraꞌat pit idipat oꞌg̃ug̃ẽ buye. 
\v 22 Soat jeꞌũꞌũm aceꞌe wuyju Adão naxeg̃ebitbit puye. Imẽnpuxim waram acejetait Cristo eju mũg̃ꞌi wuyju buye. 
\v 23 Cristo koap oꞌjetait waram. G̃uyjom pit Cristo aꞌõkayayũ waram g̃uto jetait. Waram acejetait ixe ajẽm puje. 
\v 24 Cristo Deus kayꞌũmayũ aꞌõbacaap g̃uꞌũm. Soat g̃uꞌũm. Soat xipatꞌũmayũ kukukat aꞌõbacaap g̃uꞌũm. Soat yaꞌõbuyxiat aꞌõbacaap tak g̃uꞌũm. Soat yaꞌõcaat aꞌõbacaap tak g̃uꞌũm. Kaꞌũma ma kũyjobit jeenuy ixeyũ aꞌõ kay. Deus aꞌõ kay acã jeedop ip kũyjobit.
\p — Ẽn acã soat kukukat. Soat kũyjobit aꞌõ kay acã — i soat jeꞌe ip Deus pe. 
\m
\v 25 Cristo soat kukukan jeꞌe Deus pe cekay itakomaayũ aꞌõbacaap muꞌũm puje. Soat jeedop ip kũyjobit Cristo aꞌõ kay. 
\v 26 Wuyeꞌũap wuykay itakomaat puxim. Wuyparara wuykay itakomaat puxim. Wuyparara dak jeꞌũm. Deus soat kukukan pima bit aceꞌũ g̃u. 
\v 27 Imẽn eꞌem Deus ekawẽntup:
\mi Deus soat aꞌõbacaap oꞌg̃uꞌũm, i. Soat jeedop ip kũyjobit ixe aꞌõ kay, i.
\m Deus soat aꞌõbacaap g̃uꞌũm. Soat jeedop ip kũyjobit Cristo aꞌõ kay. Jaꞌõbacaap pit g̃uꞌũm g̃u. 
\v 28 Cristo aꞌõ kay am Deus pe soat mukũyjo buje, Cristo jeenuy kũyjobit Deus aꞌõ kay- -jebay aꞌõ kay. Koap cebay soat g̃ukũyjo jaꞌõ kay am. G̃asũ:
\p — Õn tak kũyjobin oce aꞌõ kay — i jeꞌe ipot jebay be.
\m Deus soat ipi dag̃acat kukukan jeenuy kabi beacat kukukan tak. Soat em jeenuy ixeyũ kukukan. Ixeyũ kukukap iꞌũmꞌẽm g̃u.
\p
\v 29 Deus pe ceꞌũꞌũꞌibiyũ mutaicitꞌukꞌũm pima, teꞌe ma pũg̃pũg̃ eyꞌin jemubatisasanan ceꞌũꞌibit tieg̃.
\p — Deus waram g̃uto ceꞌũꞌũꞌibiyũ mutaicin g̃u — i napa ma eꞌem ixeyũ. 
\m Ixeyũ eꞌeap icẽm pima bit, teꞌe ma jemubatisasanan ip ceꞌũꞌibit tieg̃. 
\v 30 Ixe be ceꞌũꞌũꞌibiyũ mutaicitꞌukꞌũm pima, teꞌe ma soat kabia oaoka ojuyap cocom õn. Imẽnpit waram g̃uto ip imutaicitꞌuk. Imẽnpuye teꞌe g̃u wuyaoka ojuyap cocom wuyju. 
\v 31 Ocokcok eykay, wuykukukat Jesus Cristo eju mũg̃ꞌi eyju jekukum puye. Imẽnpuye:
\p — Soat kabia oaoka ojuyap cocom õn, okitpitpiyũ — i õn eꞌem eywebe. 
\m
\v 32 Ijopka be dak cuk adi weꞌũpinpinap ojojojo wida ikaꞌuat eju ocebacacanap puxim. Deus ekawẽn muwẽnuwẽn pima, weꞌũpinpinap ojojojo ijopka be- -Éfeso ka be. Omucokcok am imuwẽn puje, teꞌe ma kajuk weꞌũpinpinap ojojojo.
\p — Kuyaje aceꞌũ. Imẽnpuye juy jekõnkõn acã ajop, tikõnkõn tak — i teꞌe ma eꞌem itabutꞌũmayũ. 
\m Deus pe ceꞌũꞌũayũ mutaicitꞌukꞌũm pima, ixeyũ eꞌeap tag̃ cuy ajeku.
\p
\v 33 Eydayꞌemꞌum cuy epesop waraꞌacat pe eymug̃uykukuap puxim. Ikẽrẽat mujurũg̃rũg̃xiat purem pima, wuyju dak kuka cũg̃ ma wuyekukuap acepere ma ixeyũ buxim ikẽrẽat mujurũg̃ ãm. 
\v 34 Pũg̃pũg̃ eyꞌin pit eyetaybit g̃u Deus eꞌe am. Imẽg̃ãm õn eꞌem eymusũsũn ãm. Waram pit cuy eyag̃uysan epesop. Ikẽrẽat mujurũg̃rũg̃ap cuy epeyepere!
\p
\v 35 Imẽnpit:
\p — Apẽntak Deus waram ceꞌũꞌũꞌibiyũ g̃utait? — i jeꞌe acoꞌi pũg̃ eyꞌin owebe. — Apebitak ixeyũ jebin jeꞌe iisuat? — i jeꞌe acoꞌi owebe.
\m
\v 36 Eyetaybit g̃u eyju. Kadaida dadadam wuyju ipi be. Tamuwexat puje acã kadaim eꞌem. 
\v 37 Kadai g̃u wuyju taidadam- -warẽmtaksug̃ta ma. Trigoda acoꞌi taidadam wuyju- -warẽmtaksug̃ta ma. 
\v 38 Deus jekpiwatpin ma tamuwexaxan kadaim. Kadaida taidaꞌibita buxim ma jedaewexaxan yaypan puje- -waraꞌatam g̃u.
\p
\v 39 Soat itabẽg̃ayũ ẽn pũg̃ẽn g̃u. Wuyẽn pũg̃ẽn. Pucaẽn pit waraꞌatẽn ma. Wasũẽn tak waraꞌatẽn ma. Aximaẽn tak waraꞌatẽn ma.
\p
\v 40 Imẽn ma opop kabi be dak warẽmtaksug̃at ma. Ipi dag̃ tak imẽn ma- -warẽmtaksug̃at ma. Kabi beacat idip. Ipi dag̃acat tak idip. Jewejojoꞌi g̃u bit ip idip. 
\v 41 Imẽntak kaxie iesop. Kaxiamat pit g̃uto iesop warun ma. Kasopta bit g̃uto taesop warun ma. Jewejojoꞌi g̃u ip isop. Imẽntak pũg̃pũg̃ta bit g̃uto kasopta waraꞌatasop coꞌi g̃u- -tasop warun ma.
\p
\v 42 Imẽnpuxim Deus waram g̃uto wuymutaicin. Wuykot puje wuyjebit ierep eꞌem. Waram g̃uto imutait puje bit, ierep paꞌore jeꞌe. 
\v 43 Wuykot puje ikẽrẽ eꞌem wuyjebit ibaca g̃u dak. Waram g̃uto imutait puje bit, idip cĩcã jeꞌe. Ibaca jĩjã dak jeꞌe. 
\v 44 Wuykot puje, ijodiatꞌũm jebit ma wuyjebit. Waram g̃uto wuymutait puje bit, waraꞌan jeꞌe. Deus biõg̃buk emumug̃ẽ jebin jeꞌe wuyjebit. Ijodi bima wuyjebit ijodiat jebit ma. Waram wuymutait puje bit Deus biõg̃buk emumug̃ẽ jebit wuyjebin jeꞌe. 
\v 45 Imẽn eꞌem Deus ekawẽntup:
\mi Deus koapat ag̃okatkat oꞌg̃ug̃ẽ- -Adão oꞌg̃ug̃ẽ, i. Ijebin oꞌg̃ug̃ẽ cebeam ijodiat jebin ma, i.
\m Kanomũmat Adão bit ijodiat jebit podi ma. Ixe biõg̃buk pit wuymutaicitꞌukat. Kanomũmat Adão i waraꞌat putet Jesus Cristo butet. 
\v 46 Koapat pit wuyjebit ijodiat jebit ma. G̃uyjom pit Deus waraꞌat jebit jeꞌg̃ũm wuyjebin. Jebiõg̃buk mug̃ẽg̃ẽ jeꞌg̃ũm- -kabi beat jebit. 
\v 47 Koapat Adão kaꞌwi mug̃ẽg̃ẽ osunuy. Kanomũmat pit oꞌkop kabi bewi- -wuykukukat Jesus. 
\v 48 Ijodiat jebit kaꞌwi mug̃ẽg̃ẽ Adão jebit puxim. Kabi kay cumayũ bit waraꞌat jeꞌjat jejebin jeꞌũ buje- -Cristo jebit puxim- -kabi beat jebit puxim. 
\v 49 G̃asũ kaꞌwi mug̃ẽg̃ẽ buxim wuyju. G̃uyjom pit kabi beat puxim acesop.
\p
\v 50 Okitpitpiyũ, imẽn õn eymutaybin pin. Deus soat kukukan pima kaꞌũma ma jeꞌũ. Imẽnpuye ijodiat jebit kug̃ pima aceõm g̃u cexe ixe soat kukukan pima- -ierep em iat kug̃ pima. Ierep em iat g̃u jeenuy cexe.
\p
\v 51 Eyaꞌõpicũg̃cũg̃ cuy epesop waꞌõ kay. Soat g̃u aceꞌũ. Dao ma bit Deus soat wuyju wuymuwexat. Kuy bima iboap ibaꞌarẽm osodop soat xe wuyxe. G̃asũ bit ibapuk oꞌe. 
\v 52 Dao ma wuymuwexat wuyetapokap coꞌi. Ixe wuymuwexat amãm parasuy joꞌiat muyde buje. Parasuy joꞌiat g̃uyde kabi be. Imuyde buje, Deus waram g̃uto itabucayũꞌũmꞌũm jebit g̃uyu ipi bewi. Iisuat jeꞌg̃ũm ijebin. Waram g̃uto itait jeꞌe ip. Waram pit jeꞌũ g̃u ip. Soat em itait ip jeedop. Wuyju wuyetait pima parasuy joꞌiat muyde buje, iisuat jeꞌg̃ũm wuywebe dak wuyjebin. 
\v 53 Ijodiat jebit jeꞌũꞌũm. Ierep eꞌem. Deus pit ibeat jebit g̃uwexat kabi beat jebin- -ierep g̃uian, jeꞌũ g̃uian. 
\v 54 Imẽn eꞌem Deus ekawẽntup:
\mi Kaꞌũmg̃u jeꞌe jeꞌũap Deus soat kukukan pima, i. Soat kũyjobit jeedop ip Deus aꞌõ kay, i. Deus jeꞌũiat g̃uwexat jeꞌũ g̃uian, i.
\m Imuwexat puje ibodup peat ekawẽn coꞌi jeꞌe.
\q
\v 55 Wuyeꞌũap dat pe wuyeiduap coꞌi. Deus pit ceꞌũat mutaicin dat tõg̃taꞌukap puxim. Jeꞌũaptipꞌũm pima, kaꞌũma buxim aceꞌe wuyparara. Acesupiꞌajo g̃u dak ipiat. Pũg̃ em tak kaꞌũma.
\p
\v 56 Soat aceꞌũ ikẽrẽat kug̃ puye. Ikẽrẽat mujurũg̃rũg̃ap dat tõg̃ta buxim. Wuyetaybit wuyju ikẽrẽat kug̃ iam Deus ekawẽn cocom puye. 
\v 57 Deus pit wuyaꞌõmucanucan wuywebe ikẽrẽat mujurũg̃ap puxim, wuykukukat Jesus Cristo aꞌõ dag̃ wuyju jekukum puye. Imẽnpuye:
\p — Soat podi ma ẽn xipan ocekug̃ — i juy ace cebe.
\p
\v 58 Imẽneju, okitpitpiyũ, oxe ikukpinayũ, eyag̃uywarururun g̃u juy epesop! Eybuꞌum g̃u dak cuy epesop eyetabut am Cristo kay. Soat em cuy kapikpig̃ epesop wuykukukat peam. Ixe aꞌõbacaam kapikpig̃ pima, teꞌe g̃u kuka acekapik.
\b
\c 16
\p
\v 1 — Ocedinheiro juy oceg̃uxipan imuju am Deus ebekitkit pe- -Judéia eipi watwat pe — i juk epeꞌe owebe eyemudupmubararaktup pe kuyatup pe. 
\m Epeg̃uxipanpan cuy! Apẽn cuk Galácia eipi watwat pe oceceiap tag̃ cuy eyju dak epeg̃uxipan- -apẽn cuk itabucayũ be oceceiap tag̃. 
\v 2 Soat edomingo be eyedinheiroꞌin cuy epeg̃uxipan. Ade ma ikug̃ayũ adem ma juy g̃uxipan. Adeꞌũm ikug̃at pit adem g̃u juy g̃uxipan. Imẽn eyju g̃asũ imuxipanpan pima: 
\p — Eyedinheiroꞌin cuy epejat — i g̃u kuka oce eywebe eykay oajẽm puje. 
\m Oajẽm puje at g̃u juy epeg̃uxipanpan. G̃asũ dak cuy epeg̃uxipanpan. Soat cuy jeꞌe ixipan oajẽm puje. 
\v 3 Oajẽm puje ag̃okatkayũ og̃uju Jerusalém ka kay- -eyemunaẽyũ. Cartadup tak otupmubararak eyedinheiro eju tupmujuaptum. Eyedinheiro tujowat ip cartadup tak. 
\v 4 Oju baꞌoreꞌũm pima bit õn tak oju ceweju ip.
\p
\v 5 Macedônia eipi dag̃ cuy ojeku. Macedônia eipi dag̃ weku epere buje bit, eykay juy oajẽm. 
\v 6 Ibun ma acoꞌi og̃uy eyxe. Ihi bun acoꞌi og̃uy. G̃uyjom cuy obuywan epeꞌe ojuap tag̃ weku am. 
\v 7 Darem g̃u onuy pin eyxe- -ibun ma. Wuykukukat ibikuy bima, ibun ma og̃uy eyxe.
\p
\v 8 Ijoce bit og̃uy Pentecostes epeta ajẽmap wiwim- -Éfeso ka be. 
\v 9 Adeayũ mutaybin put owebe ijoce. Jesus ekawẽn muwẽnuwẽn õn adeayũ be. Wararaꞌacayũ bit itakoma okay, Jesus muwẽnuwẽn õn puye.
\p
\v 10 Obuxim Timóteo dak kapikpig̃ wuykukukat peam kawẽn idipat muwẽnuwẽn. Imẽnpuye eykay yajẽm puje juy xipan epejukuk ikabap iꞌe am eyxe. 
\v 11 Ixe juy epeg̃upubun g̃u yaypanꞌisu maꞌg̃u. Ixe epicap wiwim õn wuykitpitpiyũ eju. Imẽnpuye juy ixe epesubuywan icokcog̃ cepit am okay.
\p
\v 12 — Ẽn tak cuy eju Corinto ka watwat jom wuykitpitpiyũ eju — i juk adi oce wuykitpit Apolo be.
\m Ade em ma imẽn cuk adi ocece cebe.
\p — G̃asũ g̃u acoꞌi oju — ioꞌe owebe. 
\m Iju baꞌoreꞌũm pima bit, jeꞌju eykay.
\p
\v 13 Eydayꞌemꞌum cuy epesop wararaꞌacat pe eymubuꞌunap puxim Cristo kay. Eyetabun cĩcã juy epesop cekay. Eyaꞌõcam cuy epesop. Waraꞌat kaykaykay g̃u juy eyetabucap epejukuk. 
\v 14 Wararaꞌacat ikukpinap tomuju juy epeyekapikpik.
\p
\v 15 Kuy eyetaybit Estéfanas- -ibadipyũm tak. Ixeyũ koap ma itabut oꞌe Jesus kay Grécia eipi watwatꞌin. Soat em Deus ebekitkit puywatwan ip Estéfanasyũ. Okitpitpiyũ, 
\v 16 ixeyũ aꞌõ dag̃ cuy epekuku- -ixeyũ eju kapikpikꞌukayũ aꞌõ dak.
\p
\v 17 Ocokcok cĩcã Estéfanas ajẽmap kay, Fortunato ajẽmap kay dak, Acaíco ajẽmap kay dak. Eywebe obuywan paꞌore bima, ixeyũ ma obuywatwan. 
\v 18 Ixeyũ omucokcokcog̃ cĩcã. Eymucokcokcog̃ tak cuk adi ip osodop. Xipat cĩcã ip oxe. Eyxe dak acoꞌi xipat ma ip.
\p
\v 19 Ásia eipi watwat kato mujujum eywebe- -itabucayũ. Áquila, Priscila dak kato mujujum eywebe, soat ixeyũ dukꞌa be jeꞌaweroroꞌukayũ dak, wuykukukat kay itabucayũ. 
\v 20 Soat wuykitpitpiyũ dak kato mujujum eywebe- -oxeayũ.
\p Epeyewakobotbot cuy wuykukpin wuyeweweju iap mubapuk am soat pe. 
\v 21 Obubin ma Paulo dak kato mujujum eywebeiaptup mubarararag̃ õn.
\p
\v 22 — Wũy ma jeedop ip Deus wi ipiatꞌajojom wuykukukat kayꞌũmayũ — i õn eꞌem. — Ocekukukat, ajẽm cuy! — i dak õn eꞌem.
\p
\v 23 — Ocekukukat, xipan cuy Corinto ka watwat ejukuk- -ekayayũ ejukuk — i õn eꞌem Jesus Cristo be.
\p
\v 24 Eykukpin cĩcã oxe- -soat wuyju Jesus Cristo eju mũg̃ꞌi jekukum puye.
\p Ibũrũ ma.