\id 2CO Mundurukú [myu] NT (Brazil) -2010 bd. 
\h 2 Coríntios
\toc1 Corinto ka watwat peaptup- -xepxepatup
\toc2 Segunda Carta aos Coríntios
\mt CORINTO KA WATWAT PEAPTUP PAULO EMUDUPMUBARARAKTUP XEPXEPATUP
\c 1
\p
\v 1 Corinto ka watwat, cartadup mubarararag̃ õn eywebeaptum- -Deus ebekitkiyũ adeayũ beaptum, Grécia eipi watwat beaptum. Õn Paulo. Jesus Cristo emumuju õn Deus bikuyap tag̃. Tupmubarararag̃ õn wuykitpit Timóteo eju- -wuyxe ikukpinat eju.
\p
\v 2 — Bay, xipan cuy Corinto ka watwat ejukuk — i õn eꞌem Deus pe- -wuyebay be, Jesus Cristo be dak- -wuykukukat pe. — Ixeyũ ag̃uymubabibin cuy eg̃uy — i õn eꞌem cebe ip.
\p
\v 3 — Soat podi ma ẽn xipat — i juy acece Deus pe.
\m Ixe ma wuykukukat Jesus Cristo ebay. Ixe ma wuyebayat tak. Soat em xipan wuykug̃. Soat em wuybuywatwan. 
\v 4 Xipatꞌũmat jebapukpug̃ ocewebe bima, ixe ma oxebuywatwan. Imẽnpuye wararaꞌacayũ be xipatꞌũmat ebapuk puje, ocetaybit ibuywat am ip, ipiatpiꞌajojom ip pima dak. Ocetaybit ixeyũ buywat am, Deus soat em kuy ocebuywatwan puye. 
\v 5 Apẽn Cristo juk adi ipiat oꞌsupiꞌajojo iap puxim oceju dak ipiatpiꞌajojom ocetabut Cristo kay buye. Imẽnpit big̃ ma oceju ipiatpiꞌajojom pima, big̃ ma ixe dak ocebuywatwan ocaꞌõmucanucan.
\p
\v 6-7 — Deus ocebuywatwan eꞌem — i juk adi oce eywebe kuy bima. — Deus ocedaxijojom ipiatꞌajojoap kay ocejuap puxim — i dak cuk adi oce eywebe. 
Imẽnpuye Deus kayꞌũmayũ ocekaykay jĩjã. Ipiatpiꞌajojoan ip ocewebe. Wuyju ipiatpiꞌajojom pima bit, Deus wuybuywatwan cĩcã. Kuy eyetaybit iboam. Imẽnpuye:
\p — Wuyju dak ipiatpiꞌajojom pima, Deus wuybuywatwan jeenuy — i juy epeꞌeꞌe eyewewebe aꞌõmucan am. — Wuykayꞌũmayũ wuykaykay bima dak, ixe wuybuywatwan ma jeenuy — i juy epeꞌeꞌe eyewewebe.
\m Ixe ma eyaꞌomucanucan jeenuy eywebe eyetabucap epereap puxim.
\p
\v 8 Okitpitpiyũ, ade jĩjã xipatꞌũmat oꞌjebapukpuk ocewebe Ásia eipi be bima. Iboap cuy og̃uwẽn eywebe eyetaybitꞌũmap puxim. Ipiat ocesupiꞌajo jĩjã. Ipoxi jĩjãat kug̃ oceweju iap coꞌi ma juk adi ocekukuku. Tũybe aceap iãn cuk adi oceꞌe. 
\v 9 Tũybe wararaꞌacat wuyaoka iãn cuk adi oceꞌe. Imẽnpuye juk adi ocetaybit ocesop ibaꞌore ocewebe jewedaxijoam iam, Deus pe acã ibaꞌore g̃u ocedaxijoam iam tak. Ixe be acã imutait put ceꞌũat tak. 
\v 10 Ixe juk adi ocedaxijojo wararaꞌacat pe ocaokaap puxim. Ixe ma ocedaxijojom jeenuy soat em. Ocedaxijojom jeenuy xipatꞌũmat ebapukpug̃ maꞌg̃u ocewebe. Imẽnpuye ocetabut cĩcã cekay. 
\v 11 Eyju dak cuy ocebuywatwan epesop kawẽnwẽn pima Deus eju ocewebeam. Deus tak ocebuywatwan jeenuy, ocewebeam eyju kawẽnwẽn puye. Xipat cĩcãat jeꞌg̃ũm ocewebe. Xipan jeenuy ocekug̃. Imẽnpuye adeayũ jeꞌe cebe:
\p — Bay, soat podi ma ẽn xipat, xipan Pauloyũ ejukuk puye — i. — Ẽn xipat cĩcãat ũmũm cebe — i dak jeꞌe ip cebe.
\p
\v 12 Abu buk oceg̃ug̃uykuku? Kaꞌũma ma. Cedag̃ ma juk adi ocekukuku. Xipan ma juk adi ocesop wararaꞌacat kug̃. Eykug̃ pit ibodi ma ocesop xipan eykug̃. Icẽmãn oceju iboam eꞌem. Apẽn cedag̃ ocexe iap tag̃ oceju jekukum, ocetaybit cĩcã buye g̃u- -Deus ocebuywatwan puye acã; ixe soat em xipat cĩcãat ũmũm ocewebe buye dak. Imẽnpuye ocecokcok ocekukuap kay cedag̃ ma ocekuku buye. 
\v 13 Kawẽn ibaꞌarẽmatup mubararag̃ g̃u õn eywebe- -kawẽn ibapukatup acã. Obuꞌu ma juk adi og̃uy eymug̃uykuku cartadup pe. Eyetaybitbũt ã õn. Imẽnpuye juy omuymuy g̃u bit epesop! 
\v 14 G̃uyjom pit acoꞌi eyetaybit cĩcã epeꞌe õn. Eycokcog̃ epesop okay g̃ebuje bit. Õn tak ocokcog̃ oce eykay waram wuykukukat Jesus ajẽmap kabia be.
\p
\v 15-16 Koap pima bit cuk adi aꞌg̃u waꞌõ kay jĩjã epesop. Imẽnpuye eyjo pin cuk adi og̃uy Macedônia eipi kay cum pima, ibocewi jepin pima dak. Imẽn eyjojo buje kuka juk xepxep em og̃uy eymucokcog̃ Deus ekawẽn eymutaybitbin. Eyju dak kuka juk obuywan epeꞌe Judéia eipi kay oju am. 
\v 17 Wetaybitꞌũm tu og̃uy eyxe eykay iju pin pima?
\p — Ewekay acã ẽn ẽbum — i du eyju eꞌem owebe? — “Cum õn eykay,” i ẽn eꞌem ocewebe cumꞌũm pima — i du eyju eꞌem owebe?
\m Imẽn g̃u õn eꞌem! 
\v 18 Deus pit napa g̃u eꞌem. Soat em jaꞌõ dag̃ eꞌem. Õn tak inapa bit oce g̃u. Deus itaybit iboam.
\p — Hm hm. Cum õn eykay — iꞌũmg̃u õn eꞌem, cumꞌũm pima bit.
\m
\v 19 Õn ma Jesus Cristo juk adi og̃uwẽnuwẽn eywebe. Timóteo dak cuk adi ixe ma oꞌg̃uwẽnuwẽn eywebe, Silas dak. Ixe Jesus Cristo Deus ipocat.
\p — Em õn — iꞌũmg̃u ixe eꞌem emꞌũm pima.
\m Jaꞌõ dag̃ pit soat em ma eꞌem.
\p
\v 20 — Xipacat og̃ũm eywebe — iꞌeꞌem Deus wuywebe.
\m Ibo bubum ma wuyju xipacat pupum, Jesus Cristo Deus aꞌõ dag̃ iũmũm wuywebe buye. Imẽnpuye:
\p — Imẽn cuy jeꞌe, soat em Deus jaꞌõ dag̃ eꞌem puye — i wuyju eꞌem soat pe. Imẽnpuye:
\p — Wararaꞌacat podi ma Deus idip — iꞌeꞌem adeayũ dak.
\m
\v 21 Deus ma jaꞌõbacaap ũmũm wuywebe Cristo ekukuap puxim wuyeku am. Ixe ma juk wuynaẽ jebekitkin. 
\v 22 Wuybutet mubarararag̃ wuybubut pe teku juy obubut iap mubapuk am soat pe. Imẽnpuxim Deus tak jebiõg̃buk oꞌg̃uõm wuywebe teyũku webekitkit iap mubapuk am soat pe. Ixe biõg̃buk wuywebe bima, wuyetaybit soat wuywebe iũm piniat acejat iam.
\p
\v 23 Deus itaybit icẽmãn õn eꞌem eywebe iam. Eykay oju buje bit, kuka mo õn eymukorẽm. Imẽnpuye oju g̃u eykay eymukorẽmap puxim. Obuꞌu eymug̃uycũg̃. 
\v 24 Jeymukũyjo g̃u bit oceju eyetabut am, kuy eyetabut cĩcã buye. Imẽnpit eycokcok cĩcã g̃u buk- -eycokcoksũ ma. Imẽnpuye ocexe eymucokcok pin.
\b
\c 2
\p
\v 1 Imẽnpuye:
\p — Odaobuꞌuꞌu Corinto ka beayũ kay imukorẽmap puxim ip- -imug̃uycũg̃ap puxim tak ip — i juk oce owebe ma.
\m Omucokcokcog̃ cuk adi epesop kuy bima. 
\v 2 Owebe eymug̃uycũg̃ puje bit, abu kuka omucokcog̃? Kaꞌũma ma! Soat kuka eyg̃uycũg̃ epesop. Imẽnpuye oju g̃u eykay obuꞌu eymukorẽm puye. 
\v 3 Imẽnpuye koapatup cuk otupmubararak cartadup eymukorẽmaptup. Ikẽrẽat mug̃ẽg̃ẽap cuy epeyepere oajẽm awap. Eywebe omug̃uycũg̃ap kay g̃u juy õn oajẽm puje. Eywebe omucokcog̃ap kay acã juy õn. Õn ocokcok pima, eyju dak eycokcok ma epesop. 
\v 4 Og̃uycũg̃ cĩcã eykay bima ibodup cuk otupmubararak eywebeaptup- -wag̃uybabiꞌũm eykug̃ pima. Wetadidetog̃ ma juk adi otupmubararak. Eymug̃uycũg̃ap ojuy g̃u bit cuk otupmubararak- -eymukũyjoap ojuy acã. Eymukũyjo pin cuk adi og̃uy eykukpin cĩcã oxe iam.
\p
\v 5 Ig̃o bit cuk adi omug̃uycũg̃ cĩcã ag̃okatkat, eyxeat, ikẽrẽat mug̃ẽg̃ẽꞌukat. Ig̃o juy epeg̃ukorẽm iaptup cuk adi otupmubararak eywebeaptup koapatup. Omug̃uycũg̃ap podi ma bit ig̃o juk adi eymug̃uycũg̃cũg̃ osunuy pũg̃pũg̃pũg̃ eyꞌin. Eyaꞌõpurug̃ g̃u bit cuy epeg̃ukorẽm- -eyaꞌõdidim ma. 
\v 6 Ade eyꞌin cuk kuy ig̃o oꞌg̃ukorẽmrẽm waram g̃uto cedag̃ ma ceku am. Kuy juy oꞌe. Waram pit epeg̃ukorẽm g̃u. 
\v 7 G̃ebum g̃u juy epesop g̃asũ bit apẽn ixe ikẽrẽat oꞌg̃ug̃ẽ iap kay. Epesubuywan g̃asũ bit. Iburem cuy epesop big̃ ma ig̃uycũg̃ap puxim- -Deus ikẽrẽat juꞌuk g̃u owebewi iꞌeap puxim. 
\v 8 Xipan cuy ixe epejukuk g̃asũ bit imutaybin am ocexe ekukpin cĩcã iam. 
\v 9 Kũyjobit paxi adi ip waꞌõ kay iam cuk adi og̃uy wetaybin pin. Imẽnpuye juk ibodup otupmubararak eywebeaptup koapatup. 
\v 10 Ig̃o ag̃okatkat cuk adi omug̃uycũg̃ ikẽrẽat mug̃ẽg̃ẽꞌukat. Imẽnpit eyju g̃ebumꞌũm pima apẽn ikẽrẽat oꞌg̃ug̃ẽ iap kay, õn tak g̃ebum g̃u oce iboap kay. Wag̃uybaꞌũm iboap kay Cristo etabutpe. Wag̃uybaꞌũm puje, xipat ma jeꞌe eywebeam tak. 
\v 11 G̃ebum g̃u oce iboap kay Satanás pe wuyag̃uybaꞌarẽmap puxim. Wuyetaybit apẽn Satanás jewag̃uymug̃ẽg̃ẽm. Ibikuy jĩjã wuywebe ikẽrẽat mug̃ẽg̃ẽan.
\p
\v 12 Kuy ma juk oju Trôade ka be kawẽn idipat muwẽn ãm iboka watwat pe- -Cristo muwẽn ãm cebe ip. Ibaꞌore jĩjã osunuy iju am. Emukacũg̃ap puxim wuykukukat pit omuju kawẽn idipat muwẽn ãm cebe ip. 
\v 13 Wag̃uybabiꞌũm cĩcã juk aꞌg̃u og̃uy, wuykitpit Tito dobuxikꞌũm puye. Imẽnpuye ocewemuwẽn ibo ka watwat pe. Macedônia eipi kay juk oju ikudadam.
\p
\v 14 Kuyje yaꞌõcaat oexe nopag̃õg̃õap tag̃wi taomũnmũnꞌibiyũ kug̃. Soat etabutpe oexe- -jebekitkit etabutpe. Imẽnpuxim Deus tak soat em wuyaꞌõmucanucan Cristo eju mũg̃ꞌi wuyeku am soat etabutpe jebekitkit etabutpe. Apẽn soat tag̃ teꞌokuat jepõg̃põg̃põg̃ iap puxim Deus tak wuymujujum soat kaka dag̃. Wuymujujum Cristo ekawẽn muwẽn ãm soat ka watwat itaybit am ixem. Imẽneju:
\p — Wararaꞌacat podi ma ẽn xipat! — i juy ace cebe- -Deus pe.
\p
\v 15 Kuyje paĩyũ teꞌokuatõm mupikupikꞌuk osodop ip tig̃muju am Deus kay. Wuyekukuap teꞌokuatig̃ puxim, wuyju Cristo bikuyap tag̃ jekukum puye. Cristo ijoptig̃ tig̃muyuhum Deus kay. Teꞌokuatig̃ jedig̃epõg̃põg̃põg̃ Deus taxijomꞌiayũ be teꞌoyõn ãm, ipiatꞌajojoap kay cumayũ be dak teꞌoyõn ãm. 
\v 16 Ipiatꞌajojoap kay cumayũ xe wuyju Cristo bikuyap tag̃ jekukum iap teꞌokõõmat puxim eꞌem- -wuyeꞌũꞌẽmateꞌo buxim. Deus taxijomꞌiayũ xe bit teꞌokuat puxim eꞌem wuyekukuap- -wuymuꞌadaꞌadaapteꞌo buxim. Abu-be Cristo imuwẽn put waraꞌat ka watwat pe? 
\v 17 Deus aꞌõbiat pe acã! Deus pe wuymuju buje, cedag̃ ma Cristo ag̃uwẽnuwẽn. Wararaꞌacat mug̃uykukukuꞌukꞌũmayũ wuyju. Deus etabutpe wuyju imuwẽnuwẽn. Wararaꞌacat pit warẽmtag̃ ma Cristo muwẽnuwẽn. Imuwẽnuwẽnaptei kay jĩjã dak eꞌem ip. Tũybe Cristo muwẽnuwẽn pima wuybuyxi jĩjãan aceꞌe iãn eꞌem ip. Ixeyũ buxim g̃u oceju bit.
\b
\c 3
\p
\v 1 Warẽmtag̃ ma eymutaybitbinꞌukayũ buxim g̃u oceju bit.
\p — Xipat cĩcã oceju — iꞌũmg̃u oceju bit eꞌem wararaꞌacayũ be.
\m Ijoptup kukat xipat iaptup kay xeꞌe oceju eyxewi cartadup? Kaꞌũma. Kuy ocetaybit eyju xipat iam. Iboaptup kay xeꞌe eyju ocexewi dak? Kaꞌũma. Kuy eyetaybit oceju xipat iam. 
\v 2 Oceju bit cartadup kay g̃u eyxewi Pauloyũ xipat iaptup. Eyju ma ocemudupmubararaktup puxim cartadup puxim. Apẽn eyju cedag̃ ma jekukum iap co buje soat jeꞌe:
\p — Paulo xipat. Cedag̃ ma Corinto ka watwat oꞌg̃utaybitbin — i.
\m Imẽn jeꞌe ip apẽn cuk ikẽrẽat mug̃ẽg̃ẽap epeyepere iap co buje dak. 
\v 3 Eyju cartadup puxim- -Cristo emudupmubararaktup puxim. Tintadim g̃u oꞌtupmubararak. Witaꞌa erũnꞌa be g̃u dak opop ibararak. Deus biõg̃buk pit cuk eyag̃uydadam oꞌe- -soat em itabẽg̃at biõg̃buk ma. Eyag̃uydadam oꞌe ocewebe kawẽn idipat muwẽn puje eywebe. Imẽnpuye eyekukuap cartadup puxim.
\p
\v 4 — Oceju xipat — i oceju eꞌem eywebe, ocetabut cĩcã Deus kay buye, Cristo kay dak.
\m
\v 5 Deus ocebuywanꞌũm pima, ibaꞌore kuka oꞌe ocewebe Cristo muwẽn ãm wararaꞌacat pe. Imuwẽn put ocewebe ixe ocebuywatwan pima acã. 
\v 6 Ixe ma ocebuywatwan kawẽn iisuat muwẽn ãm soat ka watwat pe- -apẽn ixe soat ijodiacat taxijo pin iap ekawẽn muwẽn ãm.
\p — Soat ekawẽn tag̃ eyekuꞌũm pima Deus pe wuyawẽwẽap ekawẽn tag̃, ixe wi wũy ma epesop eyeꞌũ buje — iꞌũmg̃u oceju eꞌem wararaꞌacayũ be. — Ibiõg̃buk xipacat eyag̃uydadam pima, Deus xe ma epesop eyeꞌũ buje — i acã oceju eꞌem. 
\m Wuyawẽwẽap ekawẽn tag̃ jeku ojuy eꞌem ip adeayũ. Jewedaxijo ojuy dak eꞌem ip. Ibaꞌore imẽnpit cewedaxijo am ip. Imẽnpuye wũy ma ip dopdom Deus wi. Ibiõg̃buk xipacat wuyag̃uydadam pima bit, Deus xe acesop soat em.
\p
\v 7 Kawẽn kuyat pit ibararak osodop witadopa be- -topaerũnatopa be. Deus dipap oꞌjebapuk iboap ekawẽn muwẽn puje Moisés pe. Idip cĩcãat oꞌjebapuk. Imẽnpuye Moisés osunuy topa jo baꞌore soat pe jebekitkit pe- -Israel naxeg̃ebitbit pe. Topa jo baꞌore osunuy topasopsup puye Deus dipap kug̃. G̃uyjom pit topasopsup g̃ũg̃ũn ã oꞌe. Imẽnpit ibaꞌore soat pe wuyawẽwẽap ekawẽn tag̃ jeku ojuyat wũy ma jeenuy Deus wi jeꞌũ buje. 
\v 8 G̃asũ bit Deus jebiõg̃buk moõmõm wuywebe soat em wuynuy ãm jexe. Iboap idip cĩcã wuyxe. Wuyawẽwẽap ekawẽn tag̃ wuyekuap idip cĩcã. Deus jebiõg̃buk muõmõm wuywebe iap pit ibodi ma idip wuyxe. 
\v 9 Ibaꞌore soat pe wuyawẽwẽap ekawẽn tag̃ jeku am kawẽn kuyat tag̃. Imẽnpuye:
\p — Ikẽrẽat kug̃ eyju oxe — iꞌeꞌem Deus soat pe wuywebe. 
\m Wuyawẽwẽap ekawẽn pit cekawẽntip. Ibodi ma kawẽn iisuat pit cekawẽntip. Kawẽn iisuat tag̃ jekukum pima, cũg̃ ma acesop Deus xe. 
\v 10 Moisés Deus dipap oꞌjojojo kawẽn kuyat muwẽn puje. Cekawẽntip osunuy. G̃asũ bit cũg̃ ma acesop Deus xe kawẽn iisuat tag̃ jekukum pima. Kawẽn kuyat podi ma cekawẽntip osunuy kawẽn iisuat. 
\v 11 Kawẽn kuyat cekawẽntip osodop. Ibun am g̃u bit Deus oꞌe “Iboap ekawẽn tag̃ cuy epeku,” i. Daream ma. Kawẽn iisuat pit kawẽn kuyat podi ma cekawẽntip. Soat em ma juy iboap ekawẽn tag̃ ajeku.
\p
\v 12 Soat em Deus xe acesop iap wiwim cĩcã wuyju. Imẽnpuye wuybisũsũn g̃u kawẽn iisuat muwẽn ãm soat pe. 
\v 13 Moisés buxim g̃u wuyju. Ixe Moisés pag̃o ierũnat kug̃ osunuy jedopa ajuy am. Ibuꞌu osunuy jebekitkiyũ be jedopasopsep g̃ũsũnap coan. 
\v 14 Topa jojom ip osodop ig̃ũg̃ũn ã Moisés ebekitkit- -Israel naxeg̃ebitbit. Itaybit g̃ũg̃ũn ma dak osodop ip Deus ekawẽn jedopa eju pag̃o kug̃ap coꞌi ma. G̃asũ dak ibaꞌore jĩjã ixeyũ etaybin am apẽnape Deus eꞌem iam cekawẽntup cocom maꞌg̃u ip. Cekawẽn paꞌarẽm cexe ip kawẽn kuyat. Cristo eju jemũg̃ puje acã itaybit jeꞌe ip cekawẽn. 
\v 15 Wuyawẽwẽap ekawẽntup co buje, g̃asũ dak itaybit g̃ũg̃ũn ma ip- -Moisés pe oꞌg̃uwẽn iap ekawẽntup co buje. Itaybit ip yopĩt ma. Jedopa eju pag̃o kug̃at coꞌma ip itaybit. 
\v 16 Imẽn eꞌem Deus ekawẽntup:
\mi Deus pag̃o oꞌjuꞌuk Moisés dopa ejuwi cepit puje wuykukukat kay, i.
\m Imẽnpuxim g̃asũ dak wuywebe ikẽrẽat mug̃eg̃ẽap epere buje Deus ikẽrẽat juꞌuk wuywebewi pag̃o oꞌjuꞌukiap puxim. Ikẽrẽat juꞌuk wuywebewi wuyetabun puje wuykukukat Jesus kay. 
\v 17 Ibodup pe wuykukukat Deus biõg̃buk iape. Ixe wuymuisusun soat em Deus xe wuynũy ãm wuyeꞌũ buje. Ixe biõg̃buk wuywebe bima, wuyetaybit wuyju cũg̃ ma Deus xe Jesus kay wuyetabut pima acã iam, wuyawẽwẽap ekawẽn tag̃ jekukum pima g̃u iam. 
\v 18 Wuyju bit kuy wuyetabut wuykukukat Jesus kay. Jedopa eju pag̃o kukat puxim g̃u wuyju. Wuykukukat biõg̃buk wuymuwexaxan wuydip am jejoꞌi iꞌeap ojuy. Ixe wuymuwexaxan waroa joꞌian. Wuykukukat dipap ip oꞌjojojo wuyjojoꞌukayũ waroa joꞌi buye. Imẽnpuye big̃ ma wuykukukat coꞌiayũm acesop. Imẽn aceꞌe big̃ ma wuydip.
\b
\c 4
\p
\v 1 Deus ma ocekapikam oꞌg̃ũm ocewebe, itabotaidabotbot ocekay buye.
\p — Kawẽn idipat cuy epeg̃uwẽnuwẽn soat kaka dag̃ — i juk adi oꞌe ocewebe.
\m Imẽnpuye ocebuꞌu g̃u ocesop ocekapikap kug̃. 
\v 2 Ibaꞌarẽm ikẽrẽat mug̃ẽg̃ẽap pit kuy ocepere. Warẽmtag̃ ma ocekukuap tak kuy ocepere. Wararaꞌacat mug̃uykukuꞌuk g̃u oceju bit imutabun am ip Jesus kay. Deus ekawẽn muwarururunꞌuk g̃u dak oceju. Soat em ma kawẽn icẽmat tag̃ oceju jekukum Deus etabutpe. Imẽnpuye:
\p — Pauloyũ cedag̃ ma jekukum — iꞌeꞌem ip soat pe ocekukuap cocoayũ.
\m
\v 3 Oceju kawẽn idipat muwẽnuwẽn. Ixe ekawẽn pit ibaꞌarẽm ipiatꞌajojoap kay cumayũ xe. 
\v 4 Kawẽn idipat kabia buxim. Wuyetaybit Cristo idip cĩcã iam kawẽn idipat cocom puye. Icẽmãn Cristo Deus coꞌi iam tak wuyetaybit ma. Satanás pit ipiat kay cumayũ mubuꞌuꞌun Jesus kay itabucap puxixim. Ixeyũ ag̃uymubarẽmrẽm kabiok pe imunẽmunẽmap puxim. Imẽnpuye itabut g̃u ip kawẽn idipat kay. Itaꞌũmat puxim ip eꞌem.
\p
\v 5 — Ocekay juy eyetabun epesop — iꞌũmg̃u oceju eꞌem wararaꞌacat pe. — Jesus Cristo kay juy eyetabun epesop — i acã oceju eꞌem. — Ãg̃ cuy ixe eykukan jeꞌe — i oceju eꞌem. 
\m Jesus Cristo xipat cĩcã ocekay. Imẽnpuye oceju eybuywatwan. 
\v 6 Kuyje:
\p — Kabiokat tag̃wi juy kabiaat jeꞌbapuk — ioꞌe Deus.
\m Ibo kabiaat wuymukabiaham iap coꞌi ixe wuymukũyjojom. Ixe wuymutaybitbin soat podi ma odip iam. Cristo dak ixe joꞌi ma jedipap kug̃- -Deus coꞌi ma.
\p
\v 7 Deus aꞌõbacaap kug̃ oceju cekawẽn muwẽn ãm. Imuwẽnuwẽn oceju ocebaca g̃u maꞌg̃u. Kaꞌwi mug̃ẽg̃ẽꞌa buxim oceju- -yacaꞌũmatꞌa buxim. Deus acã yaꞌõbaca. Ixe bit ocaꞌõmucanucan jekawẽn muwẽn ã. Imẽnpuye ocekawẽn cocoꞌukayũ itaybit jaꞌõbi g̃u teyũku imuwẽnuwẽn- -Deus aꞌõbi acã ip imuwẽnuwẽn iam. 
\v 8 Soat em xipatꞌũmat jebapukpug̃ ocewebe. Ocebuꞌu g̃u maꞌg̃u ocetabut am Jesus kay. Soat em ocag̃uybabiꞌũmꞌũm oceju eꞌem. Ocetabucap pit ocepere g̃u imẽnpit. 
\v 9 Ade ocekay itakomaayũ. Ocebureyũ dak ade ma. Soat em ocekay itakomaayũ ocemupokupog̃. Ocemuyꞌũ g̃u bit ip imẽnpit. 
\v 10 Soat em ocaoka ojuyap cocom oceju jekukum wuykukukat Jesus puxim. Ixe aꞌõbacaap kug̃ pit oceju soat em ma. Iboap ijo but soat pe ocejojoꞌukayũ be. 
\v 11 Soat em ip ocaoka ojuy jekukum itabutꞌũmayũ Jesus kay ocetabut puye. Ocejebit ma iꞌũm. Oceju bit soat em ma Jesus aꞌõbacaap kug̃ ocesop. Iboap ibapuk cĩcã eꞌem soat xe ocejojoꞌukayũ xe. 
\v 12 Ocaoka ojuyap cocom oceju jekukum, Jesus Cristo muwẽnuwẽn puye. Eyju bit soat em eyetabẽg̃ epesop Deus xe eyeꞌũ buje, ocekawẽn kay eyetabut puye.
\p
\v 13 Imẽn ibararak opop Deus ekawẽntup pe: 
\mi Kuy juk wetabut oce. Imẽnpuye juk ocekawẽn, iꞌeꞌem Deus ekawẽntup.
\m Oceju dak kuy juk ocetabut ajop. Imẽnpuye oceju kawẽn idipat muwẽnuwẽn jekukum wararaꞌacayũ bit aꞌg̃u ocaoka pin ma. 
\v 14 Deus cuk wuykukukat Jesus oꞌg̃utait ceꞌũap tomukadi. Ixe buxim oceju dak ocemutait oceꞌũap tomukadi Jesus oꞌg̃utait puye. Ocedujowat jewekay. Eyju dak jeydujowat jewekay. Ixe xe ma acesop soat em. 
\v 15 Oceju juk adi ipiat ocesupiꞌajojo Deus ekawẽn muwẽn ãm eywebe. Imẽnpuye big̃ ma Deus xipat cĩcãat ũmũm soat pe eywebe. Imẽnpuye big̃ ma eyju eꞌem cebe:
\p — Xipat cĩcã ẽn ocekay — i.
\m Imẽnpuye Deus dipap ibapuk eꞌem adeayũ xe.
\p
\v 16 Apẽnpuye kuka wuyg̃uycũg̃ aceꞌe? Ibacaꞌũm eꞌem wuyjebit. Wuybinũn pit iisu eꞌem, Deus wuyaꞌõmucanucan puye. Wuyaꞌõmucanucan big̃ ma wuyetabut am Jesus kay. 
\v 17 Wuykayꞌũmayũ wuykaykay jĩjã. Ipiatpiꞌajojoan cĩcã dak ip wuywebe. Imẽnpit ibun g̃u iboap acejukuk- -darem ma. G̃uyjom pit Deus jedipap jeꞌg̃ũm wuywebe. Idipap kug̃ acesop. Darem g̃u iboap kug̃ acesop- -soat em ma. Acejepere g̃u. 
\v 18 Imẽneju wuyju soat em g̃ebum wuywebe ijo bucat kay g̃u- -wuywebe ijo baꞌoreat kay acã. Wuywebe ijo bucat darem ma dopdom. Wuywebe ijo baꞌoreat pit soat em ma dopdom.
\b
\c 5
\p
\v 1 Wuyjebit xijapꞌaꞌa buxim. Wuyeꞌũap xijapꞌaꞌa muyꞌacap puxim. Wuyeꞌũ buje wuyjebit acejepere ijodi ipi be. Waraꞌat pit acejat wuyjebin iisuat. Kabi be bima bit waraꞌat ma jeꞌe wuyjebin. Iisuat ijodiat emumug̃ẽ g̃u- -Deus emumug̃ẽ acã. Ibiat kug̃ acesop soat em ma. 
\v 2 Wuyetabikuku jĩjã wuyjebit iisuat kay, kabi be wuynuy pin cĩcã buye. Kabi be bima iisuat acejat wuyjebin. 
\v 3 Waraꞌat acejat wuyjebin iisuat. Wuyjebitbet acesop kabi be bima. 
\v 4 Ijodi bima, xijapꞌaꞌa be iap puxim wuyju eꞌem. Soat em wuyju ipiat kug̃ eꞌem. Soat em wuywãtaxipi wuyju eꞌem. Imẽnpit wuybuꞌu jeꞌũ ãm. Iisuat pu pin pit wuyxe wuyjebin. Iisuat kug̃ pima wuyjebit kug̃, soat em ma wuyetabẽg̃ acesop. Aceꞌũ g̃u. 
\v 5 Deus ma iisuat oꞌg̃ug̃e wuyjebin. Ixe juk jebiõg̃buk oꞌg̃uõm wuywebe wuymutaybit am waraꞌat og̃ũm eyjebit iisuat iam.
\p
\v 6 Ijodi bima bit puk wuykukukat wi wũy ma wuyju nuynuy- -wuyjebit kuyat kug̃ pima. Imẽnpuye wuycokcok cĩcã soat em ixe xe acesop iap wiwi am. 
\v 7 Iboap wiwim wuyju ijojomap tomuju g̃u- -wuyetabucap tomuju acã. 
\v 8 Wuycokcok cĩcã wuyetabut am ixe xe acesop iap kay. Kuyat iwat pin wuyju- -wuyjebit iwat pin- -wuyju am wuykukukat kay. 
\v 9 Wuykukukat mucokcok pin cĩcã wuyju wararaꞌacat mucokcokap podi ma. Imucokcok pin cĩcã wuyju ijoce wuyjebit kuyat kug̃ pima, iboma cexe bima dak. 
\v 10 Soat cuy wuyju acejewemubapuk Cristo wap. Acejewemubapuk ixe be “Xipat eyju oxe” iꞌe am xipacayũ be, “Ikẽrẽat kug̃ eyju oxe” iꞌe am ikẽrẽat kukayũ be dak. Cedag̃ ma ixe ideida soat pe wuywebe apẽn cuk adi ijodi bima ajekukuku iaptei. Xipacat jeꞌg̃ũm xipacat mug̃ẽg̃ẽꞌukayũ be xipan cekukuaptei. Ipiat pit supiꞌajojoat ikẽrẽat mug̃ẽg̃ẽꞌukayũ be ikẽrẽm cekukuaptei.
\p
\v 11 Wuyparara wuykukukat puxim ixe soat podi ma yaꞌõbaca buye. Imẽnpuye oceju kapikpig̃ cĩcã wararaꞌacayũ mutabut am cekay. Imug̃uykukukum g̃u bit oceju imutabucap ojuy ip. Cedag̃ ma oceju imutaybitbin ã ip. Deus itaybit iboam. Eyju dak xeꞌe eyetaybit iboam?
\p
\v 12 — Eyetabun cuy epesop okay, xipat õn eykay buye — waram pit iꞌe pin g̃u oxe.
\m Eyju eycokcok ocekay iap kay oceju. Wararaꞌacayũ bit ocemuymuy acã eywebe. Jewexe ip yobog̃ãn kacũg̃tag̃ idip puye. Badi bit aꞌg̃u idipꞌũma ip. Oceju bit cedag̃ ma jekukum ixeyũ aꞌõmuypit am eymucokcok am tak ocekay. 
\v 13 Ocadaodao du eyxe “Cedag̃ ma oceju jekukum” iꞌeꞌem puye? Ocadaodao bima, imẽn ma buk oceꞌe wararaꞌacayũ be “Deus soat podi ma xipat” iꞌe am. Ocag̃uysat tu eyxe iboam eꞌem puye? Ocag̃uysat pima dak, xipat ma kuka oꞌe eywebeam. 
\v 14 Soan oceju eꞌem Cristo xe ocekukpin cĩcã buye. Kuy juk ocetaybit ocesop pũg̃ ag̃okatkat oeꞌũ soat peam ijodiacat peam iam. Imẽnpuye soat ipi juacat yukpiwat ceꞌũ ãm. 
\v 15 Ixe oeꞌũ soat peam wuywebeam. Oeꞌũ wuywebeam wuybikayap tag̃ wuyeku am g̃u. Jebikayap tag̃ jeku am acã oeꞌũ. Waram g̃uto oꞌjetait xipat wuykay iꞌe am.
\p
\v 16 Kacũg̃ kay acã wuyju ag̃. Imẽnpuye wuyꞌa bewi wuyju eꞌem:
\p — Teku xipat i. — G̃oku xipat g̃u — i dak.
\m G̃uyjom pit imẽn g̃u aceꞌe. Wuyꞌa bewi dak cuk adi g̃ebum ma ajop Cristo kay kuy bima. Imẽnpuye ijodiat coꞌi osunuy wuyxe. G̃asũ bit imẽn g̃u wuyju g̃ebum cekay. 
\v 17 Cristo ejo mũg̃ꞌi bima wuyisun ma acesop. Apẽn cuk adi warẽmtag̃ ma ajekukuku iap kuy oiꞌũm. Iisuat acã oꞌjepoyat. Kuyat pit kaꞌũmg̃u oꞌe. 
\v 18 Wuymuisusunap Deus pabi. Ixe wuymuisusun soat tag̃ Cristo oeꞌũ wuywebeam puye. Kuy bima bit cuk adi aꞌg̃u wuyetakoma ajop Deus kay. G̃asũ bit ixe wuymuwexaxan oꞌe jebureyũm.
\p — “Deus pe juy epeyewemuxat jebureyũm,” i juy epeꞌeꞌe wararaꞌacayũ be — iꞌeꞌem Deus wuywebe g̃asũ bit.
\p
\v 19 — Deus pit oꞌjeg̃ebu g̃u apẽn cuk adi ikẽrẽat epeg̃ug̃ẽg̃ẽ iap kay. Cristo oeꞌũ ikẽrẽat mug̃ẽg̃ẽap teida am puye — i wuyju eꞌem soat pe. — Jesus kay eyetabun puje Deus jeymuwexat jebureyũm Cristo oeꞌũ wuywebeam puye — i wuyju eꞌem soat pe ijodiacat pe.
\m Deus ma juk wuymuju iboam iꞌe am.
\p
\v 20 Imẽneju oceju kawẽnwẽn eyweju Cristo aꞌõbi. Deus ma juk ocemuju jekawẽn muwẽn ãm eywebe.
\p — Deus ibuꞌu eywebe jekayꞌũmãm — i oceju eꞌem eywebe. — Eymuwexat pin jebureyũm — i oceju eꞌem eywebe. — Ãg̃ cuy jeymuwexat jebureyũm — i oceju eꞌem eywebe.
\m Deus tak ijoce bima, imẽn ma kuka oꞌe eywebe. Ixe aꞌõbi ma iboam oceju eꞌem eywebe. 
\v 21 Cristo bit ikẽrẽat oꞌjukuk g̃u. Pũg̃ em tak kaꞌũma ma. Deus pit soat wuyju juk adi ikẽrẽat ag̃ug̃ẽg̃ẽg̃ẽ iap oꞌjomõg̃ Cristo be. Oꞌjomõg̃ cebe. Imẽnpuye kug̃ g̃u wuydop am. Imẽnpuye wuyju Cristo eju mũg̃ꞌi jekukum pima, ikẽrẽat kug̃ g̃u acesop Deus xe. Soat tag̃ wuyisu acesop cexe. Imẽn ibikuy eꞌem wuywebe iꞌe am.
\b
\c 6
\p
\v 1 Ocebuxim ma eyju dak kapikpig̃ Deus peam. Imẽnpuye oceju jeyawẽ. Kuy juk adi aꞌg̃u xipat cĩcãat epejajat Deus xewi. Waram pit cuy epeyepere g̃u xipacap. 
\v 2 Eyaꞌõpicũg̃cũg̃ cuy epesop Deus ekawẽn kay. Imẽn Deus eꞌem:
\mi “Ocedaxijom cuy ece” i eyju eꞌem owebe bima, kuy juk oyaꞌĩjojo eyꞌeap, i. Eydaxijojoap kabia be ma juk õn eydaxijo, iꞌeꞌem Deus.
\p Eyaꞌõpicũg̃cũg̃ cuy epesop. G̃asũ juy Deus eydaxijo pin. Ãg̃ cuy ixe g̃asũ bit jeydaxijo.
\p
\v 3 Cũg̃ ma oceku pin wararaꞌacat mubuꞌunap puxim itabucap kay. Ocebuꞌu jĩjã wararaꞌacayũ be “Ocetabut g̃u juy Jesus kay, ixe aꞌõkayayũ warẽmtag̃ ma jekukum puye” iꞌe am ocekukuap cocom puye. 
\v 4 Cedag̃ ma oceku pin wararaꞌacat itaybit am teyũku Deus buywatwatꞌukayũ iam. Ocekpiceg̃e g̃u oceju jekukum, itabutꞌũmayũ bit adi aꞌg̃u ocekaykay jĩjã ma, ipiatpiꞌajojoan ma dak adi aꞌg̃u ip ocewebe, kaꞌũma kug̃ ma dak adi aꞌg̃u oceju. 
\v 5 Kuy juk adi aꞌg̃u ip ocemupokupok itabutꞌũmayũ. Teꞌe ma ip cuk adi aꞌg̃u ocemuõm daomũnmũnapꞌa be. Ikẽrẽm cĩcã juk adi ip ocekuk adeayũ eꞌawero buje ocekũyjoap mubarẽmrẽm ma ip. Kuy juk adi aꞌg̃u ocejekapikpikpik cĩcã ma. Ocexexexetꞌũma juk adi aꞌg̃u, ocejekõnkõnꞌũma dak. 
\v 6 Wararaꞌacayũ itaybit osodop teyũku Deus peam kapikpikꞌukayũ iam, cedag̃ ma oceju jekukum puye. Soat tag̃ oceisu. Ocekawẽnkẽrẽ g̃u- -ocekawẽntip ma. Ocetaybit cĩcã dak kawẽn idipat muwẽn ãm. Ocekpiceg̃e g̃u dak wararaꞌacat kug̃. Wararaꞌacat kug̃ tak xipan oceju. Imẽn oceju bit jekukum xipat cĩcãat biõg̃buk ocekukat puye. Wararaꞌacat kug̃ tak oceju ikukpin. 
\v 7 Kawẽn icẽmat muwẽnuwẽn acã oceju wararaꞌacat pe. Deus aꞌõbacaap kug̃ oceju jekukum. Cedag̃ ma oceju jekukum. Imẽnpuye:
\p — Cũg̃ ma juy epeku, Deus cũg̃ ma wuykug̃ puye — i oceju eꞌem itaybitꞌũmayũ be. — Ocemuymuy g̃u juy epesop, Deus cũg̃ ma wuykug̃ puye — i oceju eꞌem ocemuymuy ojuyayũ be dak. 
\p
\v 8 Pũg̃pũg̃ ocebuyxim ocekug̃. Wararaꞌacat ocebuyxim g̃u ocekug̃. Pũg̃pũg̃ ocemuymuy. Wararaꞌacat xipan ocekug̃. Pũg̃pũg̃ teꞌe ma eꞌem:
\p — Pauloyũ napa ma eꞌem — i.
\m Icemãn pit oceju eꞌem. 
\v 9 Pũg̃pũg̃ itaybit g̃u ocejum. Adeayũ bit itaybit cĩcã ocejum. Ocetabẽg̃ mabuk aꞌg̃u eyju ocejojom.
\p — Pauloyũ oꞌyaoka ip — iꞌeꞌem ip teꞌe ma owebe pũg̃pũg̃. 
\m Ade em ipiatꞌajojom oceju. Ocaoka g̃u ma bit ip. 
\v 10 Pũg̃ em ocemug̃uycũg̃cũg̃ wararaꞌacat. Soat em pit ocecokcok oceju eꞌem. Pũg̃pũg̃ayũ xe ocedadaibot. Adeayũ muwexaxan pit oceju ibubut adeat puximayũm kawẽn idipat kay itabut ip puye. Adeayũ xe oceju kaꞌũma kug̃. Deus xe bit soat kug̃ oceju.
\p
\v 11 Oceburereyũ, Corinto ka beayũ, eykukpin cĩcã ocexe. Ibaꞌarẽm g̃u juk adi ocejekawẽn eyweju- -ocekawẽn ojuy iap tag̃ acã. Eykukpin cĩcã ocexe iap kuy oceg̃uwẽn eywebe. Eykay jĩjã oceju. 
\v 12 Ocebuꞌu g̃u juk adi ocesop eykay. Eyju bit cuk adi eybuꞌu epesop ocekay. 
\v 13 Okpot eju kawẽnwẽn pimãn puxim õn kawẽnwẽn eyweju. Eybuꞌum g̃u juy epesop ocekay. Apẽn oceju eykay jĩjã iap puxim cuy eyju dak ocekay epesop.
\p
\v 14 Jesus kayꞌũmayũ eju cĩcã g̃u juy epeku. Ibaꞌore cũg̃ ma jekukuꞌukat pe jeburere am warẽmtag̃ ma jekukuꞌukat eju. Ibaꞌore kabia dag̃ jekukuꞌukat pe jeburere am kabiok tag̃ jekukuꞌukat eju. 
\v 15 Ibaꞌore Cristo ebekit pe pũg̃ tag̃ ma jewag̃uy am Satanás ebekit eju. Ibaꞌore itabucat pe itabutꞌũmat ag̃uy dag̃ jewag̃uy am. 
\v 16 Ibaꞌore Deus tukꞌa be cucuꞌukat pe jeweburedam deusbaro dukꞌa be cucuꞌukat eju. Deus nuynuyapꞌa buxim wuyju, ibiõg̃buk omuy wuywebe buye. Itabẽg̃at omuy wuywebe. Imẽn Deus cuk adi oꞌe:
\mi Ixeyũ eju juy og̃uy, i. Ixeyũ binũnpe juy og̃uy, i. “Ẽn acã Deusat ocexe,” i jeꞌe ip owebe, i. “Webeitkiyũ eyju,” i dak oce cebe ip, i juk adi oꞌe Deus. 
\v 17 Imẽnpuye wuykukukat cuk adi oꞌe: Ixeyũ juy epeyepere, i. Ixeyũ xewi juy epeyewede, i. Ikẽrẽat mujurũg̃rũg̃ꞌukat ekukuap puxim g̃u juy epekuku, i. Ixeyũ buxim g̃u jekukum pima bit, õn jeymudot okay, i. 
\v 18 Õn oce eyebay, i. Okpotpoyũm epesop. Odaxiyũm tak epesop, i.
\m Imẽn cuk adi wuykukukat oꞌe kuyje- -soat podi ma yaꞌõbacaat oꞌe.
\b
\c 7
\p
\v 1 Imẽn Deus eꞌem wuywebe, oburereyũ, oxe ikukpinayũ. Xipat cĩcãat ũm pin wuywebe. Imẽnpuye ikẽrẽat mujurũg̃rũg̃ap cuy acepere! Ikẽrẽat kay g̃u juy g̃ebum ajop! Ibuyxim cuy Deus ajukuk. Ixe be juy acemuisunat soat em ikẽrẽat kukap puxim.
\p
\v 2 Ocekukpin cuy epesop ocekug̃! Ikẽrẽm g̃u bit oceju soat kng̃- -xipan acã. Wararaꞌacat muymuy g̃u oceju. Wararaꞌacat mug̃uykukukum g̃u dak oceju xipacat puap ojuy ocewebeam. 
\v 3 Iboam õn eꞌem “Xipat g̃u eyju ocexe” iꞌe am g̃u. Imẽn ma juk adi ocecece eywebe kuy bima. Soat em eykukpin cĩcã ocexe. Eyxe bimaap coꞌin ma õn wetabẽg̃ pima, weꞌũ buje dak, soat em ma õn g̃ebum eykay buye. 
\v 4 Wetabut cĩcã eykay. Xipan õn eyawẽg̃muwẽnuwẽn soat em wararaꞌacat pe. Og̃uykuku jĩjã ade xipatꞌũmat jebapukpug̃ maꞌg̃u ocewebe. Yobog̃ cĩcã õn ocokcokap kug̃.
\p
\v 5 Macedônia eipi be ocajẽm puje, ocejebodoyꞌũma. Xipatꞌũmat oꞌjebapukpukpuk ocewebe soat kaka dag̃ pima. Ocaꞌõxikxig̃ cĩcã juk adi osodop ip ocekayꞌũmayũ. Ocepararan ma juk adi aꞌg̃u ocekukuku. 
\v 6 Deus pit ig̃uycũg̃at mucokcokcokꞌuk. Ixe juk adi ocaꞌõmucan Tito ajẽm puje. 
\v 7 Ocaꞌõca juk adi oceꞌe yajẽm puje. Yajẽm puje: 
\p — Xipan ma juk Corinto ka wat okuk — i juk oꞌe ocewebe. — G̃ebum cĩcã ip eykay — i dak cuk oꞌe ocewebe. — Ig̃uycũg̃ cĩcã oꞌe ip jebure kay- -ikẽrẽat oꞌg̃ug̃ẽꞌiat kay — i dak cuk oꞌe ocewebe. — “Paulo cedag̃ ma juk adi ocawẽwẽm” iꞌeꞌem ip — i dak cuk oꞌe ocewebe.
\m Iboap awẽg̃ co buje big̃ ma ocecokcok cĩcã oceꞌe.
\p
\v 8 Darem ma juk adi eyg̃uycũg̃ epesop cartadup co buje, wemudupmubararaktup co buje, eymukorẽmaptup co buje.
\p — Xipat g̃u oꞌe owebe iboaptup mubararak am imukorẽmaptup — iꞌũmg̃u õn pit eꞌem owebe ma.
\m Tupco buje juk eyg̃uycũg̃ epesop iam wetaybit pima kuka juk õn tak og̃uycũg̃ oce. 
\v 9 Og̃uycũg̃ g̃ũ õn pit. Eyg̃uycũg̃ cuk adi epesop wemudupmubararaktup co buje. Iboap kay g̃u bit ocokcok. Imẽnpit eybuꞌu juk adi aꞌg̃u epesop ikẽrẽat mug̃ẽ ãm õn eymug̃uycũg̃ puye. Ibo buye ocokcok. Deus ma juk eymug̃uycũg̃cũg̃ eymubuꞌunap ojuy ikẽrẽat kay. Imẽnpuye cũg̃ ma osodop owebe iboaptup mubararak am. 
\v 10 Deus wuymug̃uycũg̃cũg̃ wuymubuꞌunap ojuy ikẽrẽat kay wuyꞌeap puxim. Ikẽrẽat kuk am wuybuꞌun puje ixe wuydaxijojom. Ixe be wuydaxijo buje wuyg̃uycũg̃ap acepere. Wuycokcok ma acesop. Deus kayꞌũmat ig̃uycũg̃ puje bit, ibuꞌu g̃u ikẽrẽat kuk am. Jepereap kay g̃u. Big̃ ma cekay. Deus tak ixe idaxijo g̃u ma. Soat em Deus wi wũy ma jeenuy jeꞌũ buje. 
\v 11 Deus pit eyg̃uycũg̃ap oꞌg̃uwexat xipacap eywebeam. G̃ebum cuy epesop iboap kay. Itapurug̃ayũm cuk eymuwexat. Omutaybin pin cuk adi epesop ocekpiwatpi g̃u iam. Eyetakoma jĩjã juk adi epesop ixe kay- -ikẽrẽat mug̃ẽg̃ẽꞌukat kay. Eyparara dak cuk epesop ikẽrẽat mug̃ẽap puxixim. G̃ebum cĩcã juk epesop waꞌõ kay.
\p — Ipiat cuy asupiꞌajoat ikẽrẽat oꞌg̃ug̃ẽiat pe — i juk epeꞌe eyewewebe.
\m Imẽneju ibapuk eꞌem soat xe eyukpiwatpi g̃u iap.
\p
\v 12 Ibodup cuk otupmubararak ixe ag̃okatkat awẽaptup ojuy ixe be ikẽrẽat mug̃ẽap epereap ojuy. Tupmubarararag̃ pima cebay kay dak g̃ebum og̃uy, jebay mubuyxiꞌũmꞌũm oꞌe buye. Cebay kay g̃ebumap podin ma bit cuk otupmubararak, Deus pe eymug̃ẽbuap ojuy Pauloyũ ikukpin cĩcã ocexe iap kay. 
\v 13 Ocecokcok cĩcã juk adi ocekukpin eyxe iam ocetaybin puje.
\p Tito dak icokcok cĩcã osunuy xipan cĩcã juk adi ixe epejukuk puye. Icokcok cuk adi osunuy eyxe bima. Ocekay yajẽm puje, ocemucokcokcog̃ cuk adi osunuy eyawẽg̃muwẽnuwẽn ocewebe. Imẽnpuye juk adi big̃ ma ocecokcok oceꞌe. 
\v 14 Eykay cum pima:
\p — Xipan cuk jukuk ip Corinto ka watwat, xipat cĩcã ip puye — i juk oce cebe.
\m Waꞌõ dag̃ ma xipan cuk adi ixe epejukuk. Omudapxin g̃u eyju. Soat em icẽmãn õn eꞌem eywebe:
\p — Corinto ka watwat xipat cĩcã — i juk adi ocece cebe.
\m Waꞌõ dag̃ ma juk adi xipan ixe epejukuk.
\p
\v 15 — Waꞌõ kay kũyjobit osodop ip — i juk adi oꞌe Tito ocewebe. — Obuyxim cĩcã juk adi okuk ip — i dak oꞌe. — Yobog̃an pin g̃u osodop ip- -obuywan pin acã ip osodop — i dak oꞌe ocewebe.
\m Ixe Tito g̃ebum cĩcã xipan cĩcã juk adi okuk ip iap kay. Imẽnpuye big̃ ma eykukpin cexe. 
\v 16 Ocokcok cĩcã eykay, soat em eyaꞌõ dag̃ eyju eꞌem puye.
\b
\c 8
\p
\v 1 Okitpitpiyũ, Deus cuk adi xipacat oꞌg̃ũmg̃ũm Jesus kay itabucayũ be- -Macedônia eipi watwat pe. Oceju aꞌg̃u eymutaybin ojuy iboam. 
\v 2 Ipiat oꞌsupiꞌajojo jĩjã ip jetabucap puyxijom. Icokcokap ip yobog̃ cĩcã ip oꞌe imẽnpit. Ade jĩjã oꞌg̃ũmg̃ũm ip tadaybotbocayũ be, tadaybot cĩcã g̃u maꞌg̃u ixeyũ dak. 
\v 3 Iũm pucat ip oꞌg̃ũm. Ibodi ma dak ip oꞌg̃ũm. Ocaꞌõbi g̃u ip oꞌg̃ũm- -jekpiwatpin ma.
\p
\v 4 — Oceju dak cuy oceg̃ũm ocedinheiro eywebe tujowat am Judéia eipi watwat peam- -itabucayũ beam- -tadabotbocayũ beam — i juk adi oꞌe ip ocewebe. Big̃ ma — Oceju dak cuy oceg̃ũm — ioꞌe ip.
\m
\v 5 Tũybe yopĩt ma jeꞌg̃ũm ip iãn oceꞌe. Yobog̃ ma ip oꞌg̃ũm. Koap ip oꞌjeweũm wuykukukat pe. Wuykukukat aꞌõ kay kũyjobit pin cĩcã osodop ip. Ocaꞌõ kay dak kũyjobit pin cĩcã ip osodop. 
\v 6 Dinheiro ũm pin cĩcã ip osodop ocewebe iap awẽg̃ cocom pima, eykay juk ocesop g̃ebum. Imẽnpuye juk ocejekawẽn Tito eju. Kuy bima:
\p — Eyedinheiro juy epeg̃uxipan imuju am tadaybotbocayũ be — i juk adi oꞌe ixe Tito eywebe. Imẽnpuye: — Corinto ka kay juy eju — i juk oce Tito be. — “Eyedinheiro juy epeg̃uxipan apẽn cuk adi epeꞌe iap tag̃ eykukpin ocexe iꞌe am tadaybotbocayũ be,” i juy ece cebe ip — i juk oce Tito be.
\m
\v 7 Wararaꞌacat podi ma eyju ade ikug̃. Wararaꞌacat podi ma eyetabut Jesus kay. Wararaꞌacat podi ma dak eyetaybit Deus ekawẽn muwẽn ãm. Ade eyꞌin tak itaybit cĩcãayũ. Wararaꞌacat podi ma dak eyju wararaꞌacat puywatwan. Wararaꞌacat podi ma dak ocekukpin eyxe. Imẽneju:
\p — Wararaꞌacat podi ma dak eycokcog̃ cuy epesop eyedinheiro ũm ãm tadaybotbocayũ be — i oceju eꞌem eywebe.
\p
\v 8 — Eyedinheiro juy epeg̃ũm tadaybotbocayũ be — iꞌũmg̃u õn pit eꞌem eywebe.
Waꞌõbi g̃u juy epeg̃ũm. Wararaꞌacat pit icokcok cĩcã iũm ãm cebe ip. Eywebe iũm puje, itaybit jeꞌe ip icẽmãn Corinto ka beayũ xe ocekuk pin cĩcã iam tadaybotbocayũ. 
\v 9 Kuy eyetaybit wuykukukat Jesus soat em xipan wuykug̃ iam. Kuyje soat kug̃ osunuy, kabi be bima. Ijodi ikop puje bit tadaybocan oꞌe. Tadaybocan oꞌe eywebe eycokcog̃ eydop am teibog̃at kug̃iat puxim.
\p
\v 10 G̃asũ õn jeyawẽ eyedinheiro epeg̃uxipan iam. Koapat koato bima:
\p — Ocedinheiro juy oceg̃uxipan imuju am tadaybotbocayũ be — i juk adi epeꞌeꞌe eyewewebe. 
\m Eybuꞌum g̃u juy epesop g̃asũ bit imuxipan am. Wararaꞌacayũ iũm ojuy awap, eyju bit cuk adi iũm ojuy epesop. Tadaybotbocayũ buywan ojuy juk adi epesop.
\p
\v 11 — G̃aꞌa ag̃uxipan wuyedinheiro — i juk adi epeꞌeꞌe eyewewebe. 
\m Eycokcok cuk adi epesop eyedinheiro ũm ãm. G̃asũ bit eybuꞌum g̃u juy epesop imuju am. Eycokcog̃ cuy epesop imuxipan am. Ade ikug̃ iap wiwim g̃u juy epesop. Epeg̃uxipan cuy ajo eyju ikug̃ iat. 
\v 12 Eycokcokap tomuju iũm puje xipat Deus xe- -yobog̃ pima, yopĩt pima dak xipat ma. Ajo wuyju ikug̃ g̃u iat ojuyjuy g̃u Deus wuyxewi.
\p
\v 13-14 Obuꞌu eymudadaybotbocan wararaꞌacayũ ibubut ade iꞌe am. G̃asũ eyju ade ikug̃. Ixeyũ bit ikug̃ g̃u. Imẽnpuye cedag̃ ma eywebe eyedinheiroꞌin iũm ãm cebe ip- -eybubut muꞌẽꞌẽ ãm cebe ip. Eyju g̃u kuka yopĩt ikug̃ pima, ixeyũ g̃u kuka oꞌg̃uꞌẽꞌẽ eywebe. Imẽn imuꞌẽꞌẽꞌẽm pima, jewejojoꞌin ma kuka epeꞌe ikug̃. Kaꞌũma ma kuka tadaybocat oꞌe. Kaꞌũma ma dak kuka ade ikug̃iat oꞌe. 
\v 15 Imẽn eꞌem Deus ekawẽntup:
\mi Ade oꞌjatiat cepoyat kug̃ g̃u dak oꞌe, i. Yopĩt ma oꞌjatiat tak ikug̃ ma oꞌe, i.
\m Imẽn eꞌem tup imuꞌẽꞌẽꞌẽꞌukayũ muwẽg̃uwẽn.
\p
\v 16 Ocebuxim Tito dak eybuywan pin cĩcã. Imẽnpuye:
\p — Bay, ẽn xipat — i õn eꞌem Deus pe. 
\v 17 “Edaobuꞌu du Corinto ka watwat com?” ioꞌe buje, — Hm hm. Oju juy g̃axĩn ma — ioꞌe. Iju pin oꞌe. — Ixeyũ juy oyawẽ cedinheiro ũm ãm — i juk oꞌe. Taobikuy jĩjã osunuy eyjom. 
\v 18 Waraꞌat tak wuykitpit oceg̃uju eykay. Ixe ibuyxiat soat xe itabucayũ xe, itaybit cĩcã kawẽn idipat muwẽn ãm puye. 
\v 19 Jesus kay itabucayũ ixe oꞌtaẽ oceweju iju am dinheiro dujowat am Jerusalém ka be. Dinheiro juy ocetujowat eykukpin cĩcã ocexe iap mubapuk am tadaybotbocayũ be. Ocetujowat cuy jewebuywatwan cĩcã ip wuykukukat kay itabucayũ iap mubapuk am soat pe. Imẽnpuye:
\p — Kaꞌũmg̃u ejoꞌiat xipacat — i jeꞌe ip Deus pe dinheiro jeejatꞌiayũ.
\p
\v 20 Ade dinheiro juy ocetujowat. Ocebuꞌun maꞌg̃u wararaꞌacat pe “Pauloyũ dinheiroꞌin ma oꞌjuꞌuk jewebeam” iꞌe an. Imẽnpuye wararaꞌacayũ ocetujowat oceweju ocemuymuyap puxim. 
\v 21 Cũg̃ ma oceku pin wuykukukat etabutpe acã g̃u. Soat etabutpe ma oceku pin cũg̃ ma.
\p
\v 22 Imẽnpuye waraꞌat wuykitpit cuy oceg̃uju eykay. Kuy juk adi ixe ocesubuyxijojojo ade em. Imẽnpuye ocetaybit cĩcã ixe soat em wararaꞌacat puywat pin iam. Itabut cĩcã eykay. Imẽnpuye:
\p — Corinto ka watwat tak jedinheiro jeeg̃ũm ma tadaybotbocayũ be — iꞌeꞌem ixe.
\m Imẽnpuye ixe eyjo pin cĩcã eybuywat am imuju am. Ibũrũ ma oceg̃uju eykay wuykitpitpiyũ. 
\v 23 Tito obure jĩjã. Ixe kapikpig̃ oweju eybuywatwan. Ixeyũ wuykitpitpiyũ cum ceweju eykay. Itabucayũ aꞌõbi cum ip. Ibuyxim ip Cristo kug̃. 
\v 24 Eykay yajẽm puje juy ikukpin epejukuk ip. Imẽnpuye soat itabucayũ itaybit jeꞌe Corinto ka watwat xe ixeyũ ikukpin cĩcã iam.
\p — Corinto ka watwat xipat cĩcã iap ocetobuxik apẽn soat em Pauloyũ eꞌem iap tag̃ — i jeꞌe ip.
\b
\c 9
\p
\v 1 Obuꞌu oce wararaꞌacayũ bit jedinheiro mujujum itabucayũ be Judéia eipi beayũ be iaptup mubararak am eywebe, 
\v 2 kuy eyju dak ixeyũ buywan pin puye.
\p — Tadaybotbocayũ buywan pin ip wuykitpitpiyũ Grécia eipi beayũ — i kuy juk oce Macedônia eipi beayũ be. — Kuy bima ma juk adi ip osodop ibuywan pin- -koapat koato bima ma — i juk adi oce cebe ip.
\m Ade ixeyũꞌin ibuywan pin oꞌe eyju ibuywan pin ip iam itaybin puje.
\p
\v 3 — Corinto ka beayũ kuy juk jedinheiro oꞌg̃uxipanpan ocewebe tujowat am iũm ãm tadaybotbocayũ be — i juk adi ocece cebe ip.
\m Eyedinheiro muxipanꞌũm pima bit, kuka juk eyju wawẽg̃mukẽrẽrẽn. Imuxipanꞌũm pima:
\p — Napa ma juk Corinto ka beayũ eg̃uwẽn ocewebe — i kuka oꞌe ip owebe.
Obuꞌu wekawẽn mukẽrẽrẽn ãn eywebe. Imẽnpuye wuykitpitpiyũ juy og̃uju eykay eywebe imuxipanꞌũmap puxim. 
\v 4 Oweju Macedônia eipi beayũ ajẽm puje, ocesũsũn kuka oceꞌe eykay, eyedinheiro muxipanꞌũm pima. Ocebodi ma eyju dak kuka eysũsũn ma epeꞌe teꞌe ma ocetabut eykay buye. Õn tak kuka osũsũn ma oce “Corinto ka beayũ jedinheiro muxipanpan jeꞌg̃ũm” i, teꞌe ma ocece buye. 
\v 5 Imẽnpuye ixeyũ wuykitpitpiyũ og̃uju eykay. Oajẽm awap ma og̃uju ip eybuywat am soat muxipan am. Epeg̃uxipan cuy apẽn cuk adi epeꞌeꞌe iap tag̃. Oajẽm puje, kuy ixipan jeꞌe. Ixipan pima, wararaꞌacat itaybit jeꞌe Corinto ka beayũ jedinheiro oꞌg̃ũm iũm pin puye iam. Wararaꞌacat aꞌõbi g̃u oꞌg̃ũm ip iam itaybit jeꞌe ip- -jekpiwatpin ma ip oꞌg̃ũm iam.
\p
\v 6 Ade g̃u taidadaꞌukat yopĩt ma ibubum. Ade taidadaꞌukat pit ade ibubum. G̃ebum cuy epesop iboap kay. 
\v 7 Eybuꞌu iũm pima bit cuy epeg̃ũm g̃u. “Eg̃ũm cuy” iꞌeꞌem pima dak, epeg̃ũm g̃u. Eyukpiwatpin ma juy epeg̃ũm. Bũrũ poro iũm pin cuy epeg̃ũm. Jecokcog̃ iũmũmꞌukat kay jĩjã Deus. 
\v 8 Deus pe bit iũm put eywebe eyemukaypinput. Soat jeꞌg̃ũm eywebe. Soat em epesop eyemukaypinput kug̃. Ajo eyju cekayiat podi ma dak jeꞌg̃ũm eywebe. Cepoyat kug̃ tak epesop iũm ãm wararaꞌacat pe- -xipan iꞌe am ip cebe. 
\v 9 Imẽn eꞌem Deus ekawẽntup:
\mi Deus yopĩt g̃u iũmũm tadaybotbocayũ be yobog̃ ma, i. Soat em xipan ip ikug̃, i.
\m Imẽn eꞌem Deus ekawẽn tup.
\p
\v 10 Deus tarekrektata ũmũm wuywebe taida am. Kadai muaypapan tak wuywebe iꞌo am. Imẽnpuxim eywebe dak ade ma jeꞌg̃ũm eyemukaypinput. Soat em epesop cepoyat kug̃ tak. Ixe buxim eyju dak yopĩt g̃u epeg̃ũm tadaybotbocayũ be- -yobog̃ ma. 
\v 11 Cepoyat kug̃ ma epesop soat em ixe xipan eykug̃ puye. Ibubut adeayũ buxim epesop wararaꞌacat pe iũm ãm. Imẽnpuye:
\p — Bay, xipat cĩcã ẽn! Corinto ka beayũ ade juk oꞌg̃ũm Pauloyũ be tojot am ocewebe — i jeꞌe ip Deus pe tadaybotbocayũ- -Judéia eipi beayũ. 
\m
\v 12 Eywebe iũm puje, tadaybotbocayũ buywatwan epeseop- -Deus ebekitkit puywatwan.
\p — Bay, soat podi ma ẽn xipat — i jeꞌe ip Deus pe, epeg̃ũm puye.
\m
\v 13 Icokcok cĩcã jeꞌe ip.
\p — Bay, kaꞌũmg̃u ejoꞌiat xipacat — i jeꞌe ip Deus pe. — Bay, tacup g̃u iũmũm ip Corinto ka beayũ — i jeꞌe ip cebe. — Soat em tadaybotbocayũ buywatwan ip — i jeꞌe ip. — Cristo kay jetabucap mubapukpug̃ cĩcã ip ocebuywatwan pima, wararaꞌacat puywatwan pima dak — i jeꞌe ip Deus pe. — Cristo ekawẽn tag̃ cĩcã ip jekukum — i jeꞌe ip Deus pe.
\p
\v 14 Imẽneju soat em jekawẽnwẽn jeedop ip Deus eju eywebeam, eykukpin cexe ip puye.
\p — Bay, ẽn xipan cĩcã ocekug̃ — i jeꞌe ip Deus pe. — Tacum g̃u juk ocekuk ip Corinto ka beayũ dak. Ocekukpin cĩcã juk ip ocekuk, kuy bima ẽn ixeyũ ikukpin ejukuk puye — i jeꞌe ip Deus pe. 
\m
\v 15 Icẽmãn Deus wararaꞌacat podi ma wuykukpin wuykug̃. Teimuweg̃ũn paꞌoreatei iũmat puxim jekpot oꞌg̃udot wuykay. Imẽnpuye:
\p — Wararaꞌacat podi ma ẽn xipan ocekug̃ — i juy ace cebe.
\b
\c 10
\p
\v 1 Õn Paulo. Deus omudot eymutaybin am. Deus aꞌõbi õn jeyawẽ. Apẽn Cristo wuyawẽwẽm iap puxim ma õn tak waꞌõkadidim ma jeyawẽ. Ixe Cristo yaꞌõkadidim ma wuykug̃. Xipan ma wuykug̃. Eyju bit:
\p — Paulo yaꞌõpurug̃ ocemukorẽmrẽm wũy ocewi bima. Ijasũn ocexe bima bit iparara ocebuxim — i teꞌe ma eꞌem.
\m
\v 2 Obuꞌu waꞌõpurug̃ eymukorẽm ãm. Warẽmtag̃ mabuk eyju jekukum pima bit, waꞌõpurug̃ ma õn jeymukorẽm.
\p — Paulo Deus aꞌõbi g̃u jekukum- -jaꞌõbi acã- -jewekay acã g̃ebum itabut ũmat puxim — i napa ma eyju eꞌem eyewewebe pũg̃pũg̃ eyꞌin.
\m Waꞌõpurug̃ ma omuymuyꞌukayũ og̃ukorẽm eykay wajẽm puje. 
\v 3 Ijodi wuyju dopdom itabutꞌũmayũ parakpe. Wuyaꞌõbacaam g̃u bit wuyju jekukum imutabunap ojuy ip. 
\v 4 Ijodiat aꞌõbacaap kug̃ g̃u wuyju bit jekukum, Deus aꞌõbacaap kug̃ acã. Ixe aꞌõbacaam acã Satanás aꞌõkayayũ aꞌõbacaap aceg̃uꞌũm. Wuyju yaꞌõbacaap kug̃ pima, wuyaꞌõmuypit paꞌore cebe ip Deus kayꞌũmayũ be. 
\v 5 Yobog̃an pin ip. Wuymubuꞌuꞌun ojuy ip jekukum Deus kay wuyetabucap puxixim. Jag̃uybi ma jewaꞌõxikxig̃ ip ceweju imubuꞌunap ojuy Deus kay. Wuyju Deus aꞌõbacaap kug̃ pima bit, ixeyũ aꞌõxikap aceg̃uꞌũm. Aceg̃uymũg̃ ip. Mũg̃ ma jeedop ip. Imuymũg̃ puje adeayũ itabut jeꞌe Deus kay. Cristo aꞌõ kay dak kũyjobin jeedop ip. 
\v 6 Koap ixe aꞌõbacaam õn jeymubikuy kũyjobit am Cristo aꞌõ kay. Eyekũyjobin puje, ipiat acesupiꞌajoat soat pe kũyjobitꞌũmayũ be.
\p
\v 7 Kacũg̃ tag̃ acã eyju pũg̃pũg̃pũg̃ ag̃. Eyxeat teꞌe ma eꞌem eywebe:
\p — Õn acã Cristo aꞌõbi jekukum- -Pauloyũ bit kaꞌũma — i.
Ixe juy jeenuy jewag̃uyg̃uy Cristo aꞌõ dag̃ paxi õn jekukum iap kay. Ixe joꞌi oceju dak Cristo aꞌõbi jekukum.
\p
\v 8 — Wuykukukat cuk onaẽ eymutaybitbin am — i juk adi ocece eywebe.
\m Obisũsũn g̃u oce iboap muwẽn ãm g̃uto eywebe. Icẽmãn õn cemunaẽ. Yaꞌõbiat õn. Ixe juk onaẽ eymukorẽmrẽmꞌukan g̃u- -eybuywatwatꞌukan acã. Eybuywat am cuk onaẽ big̃ ma eyju kũyjobit am Deus biõg̃buk aꞌõ kay. 
\v 9 Eymupararan pin g̃u õn wemudupmubararaktum cartadum. 
\v 10 Okayꞌũmat pit acoꞌi jeꞌe:
\p — Paulo yaꞌõpurug̃ ocemukorẽmrẽm jemudupmubararaktum — i. — Ocexe bima bit, yaꞌõkadidim ocekug̃ — i dak acoꞌi jeꞌe. — Yaꞌĩjo pinꞌũma dak ocexe warẽmtag̃ kawẽnwẽn puye — i dak acoꞌi jeꞌe napa ma.
\m
\v 11 Wũy õn eywi bima wemudupmubarararaktup eyweju õn kawẽnwẽn iap coꞌi ma jeꞌe. Itaybit jeꞌe ip iboam okayꞌũmayũ- -ocemuymuyꞌukayũ.
\p
\v 12 Pũg̃pũg̃ eyꞌin teꞌe ma eꞌem:
\p — Wararaꞌacat podi ma oceju xipacap kug̃ — i. — Ixeyũ bodi ma oceju bit xipacap kug̃ — iꞌũmg̃u õn pit eꞌem eywebe.
\m Ajom itaybit ip? Kaꞌũma ma. Jag̃uybin ma ip eꞌem: — Cedag̃ cĩcã oceju jekukum — i.
\m Deus ag̃uy dag̃ g̃u ip jewag̃uyg̃uy- -jag̃uy dag̃ acã. 
\v 13 Deus ocemujujumꞌũm pima:
\p — Deus aꞌõbi oceju jekukum — iꞌũmg̃u bit kuka oceꞌe.
\m Poma Deus ocemujujum iap tag̃ acã oceju cucum. Eykay bit cuk ocemuju kapik am eyweju- -eymutaybit am Deus ekawẽn. 
\v 14 Deus cuk ocemuju eyka kay. Imẽnpuye juk adi Deus aꞌõ kay kũyjobin ocesop, eykay ocajẽm puje. Eykay juk ocajẽm kawẽn idipat muwẽn ãm eywebe- -Cristo muwẽn ãm eywebe. 
\v 15 Wararaꞌacayũ dak cuk adi eymutaybitbin osodop ip Cristo ekawẽn. Imẽnpuye:
\p — Oceju acã juk adi ocesop Corinto ka watwat mutaybitbin — iꞌũmg̃u oceju eꞌem.
\m Big̃ ma jeuruꞌurum eyetabucap kay oceju. G̃asũ ma oceju kapig̃ eyweju big̃ ma Cristo ekawẽn muwẽn ãm soat pe. G̃asũ ma oceju eymutaybin ojuy. Imẽnpit poma Deus ocemujujumatka kay acã oceju. 
\v 16 Eyka be imuwẽn epere buje, eyka bodiatka kay oceju imuwẽn ãm. Kaꞌũma ma buk kawẽn idipat oꞌg̃uwẽn iatka be oceju. Imẽnpuye “Paulo bit kawẽn idipat muwẽnuwẽn kuy oꞌyaꞌijojoꞌiayũ be acã” iꞌe baꞌore jeꞌe soat pe.
\p
\v 17 Imẽn eꞌem Deus ekawẽntup: 
\mi “Xipat cĩcã oceju bit” iꞌũmg̃u juy ace, i. “Ocekukukat acã xipat cĩcã” i acã juy ace, i.
\m
\v 18 “Xipat ma oceju” i wuyju eꞌem pima, abu xe xeꞌe wuyju xipat? Kaꞌũma xe ma. “Xipat ma eyju” iꞌeꞌem Deus wuywebe bima bit, wuyju xipat ma.
\b
\c 11
\p
\v 1 Yadaodaoat puxim õn kawẽnwẽn eyweju. Imẽnpit cuy eyukpiceg̃ẽm g̃u epesop okay. Ãg̃ puk cuy ocekawẽn eyweju. 
\v 2 Apẽn Deus yag̃uybabiꞌũm eykug̃ iap puxim õn tak wag̃uybabiꞌũm eykug̃. Eybay buxim õn tak wag̃uybabiꞌũm eykug̃. Ag̃okatkat eju oꞌjepo g̃u bukiat puxim eyju. Cebay bit kuy ibumũg̃ãm oꞌtobuxik iwadim iap puxim eyju. Ibumũnmẽnꞌũmat soat kay g̃u- -jewadip kay acã. Imẽnpuxim obikuy eywebe Cristo kay jĩjã ãm wararaꞌacat kayap podi ma. Obikuy eywebe soat tag̃ eyisu eydop am. 
\v 3 Wag̃uybabiꞌũm eykug̃. Wararaꞌacat kayap podi ma eyju Cristo kay g̃asũ. Jewexe g̃u eyju cekay. Wararaꞌacayũ bit eyag̃uymuwarururunap ojuy. Eymug̃uykuku ojuy ip. Cristo kay eyꞌeap epereap ojuy ip. Imẽnpuxim Satanás Eva oꞌg̃ug̃uykuku kuyje. 
\v 4 Oceju juk adi Jesusat oceg̃uwẽnuwẽn eywebe. Eymug̃uykuku ojuyayũ bit Jesus iwaruat muwẽnuwẽn eywebe. Teꞌe ma eycokcok ixeyũ ekawẽn kay. Oceju juk adi Deus biõg̃buk oceg̃uwẽnuwẽn eywebe. Eymug̃uykuku ojuyayũ bit ibiõg̃buk iwaruat muwẽnuwẽn eywebe. Inaka teꞌe ma eycokcok ixeyũ ekawẽn kay. Oceju juk adi kawẽn idipat acã oceg̃uwẽnuwẽn eywebe. Eymug̃uykuku ojuyayũ bit kawẽn iwaruat muwẽnuwẽn eywebe.
\p — Ijop ma kawẽn idipat — i napa ma eꞌem ip eywebe.
\m Inaka teꞌe ma eyetabut ixeyũ ekawẽn kay.
\p
\v 5 Eyxe bit ixeyũ wararaꞌacat podi ma yaꞌõbuyxi jewexe maꞌg̃u ip Deus emumujuyũ. Õn pit ixeyũ joꞌi ma waꞌõbuyxiap kug̃. 
\v 6 Õn pit wetaybit cĩcã g̃u imẽnpit kawẽn ãm. Wetaybit cĩcã bit apẽn õn eꞌem iam. Soat em cuk adi wetaybicap osodop ibapuk eyxe.
\p
\v 7 Õn kawẽn idipat muwẽnuwẽn eywebe bima kaꞌũma ma ojat eyxewi imuwẽnuwẽnapteim. Imẽnpit:
\p — Paulo yaꞌõbuyxiat g̃u acoꞌi teihemꞌũma kapikpig̃ puye — iꞌũmg̃u juy epeꞌeꞌe owebe.
\m Cedag ma osodop teihem g̃u imuwẽn ãm eywebe. 
\v 8 Õn kawẽn idipat muwẽnuwẽn eywebe bima dinheiro mudodotꞌuk osodop ip waraꞌat ka beayũ itabucayũ. Jewexe ma õn cuk adi tujupaꞌumꞌum og̃uy ixeyũ xewi teihemꞌũma imuwẽn ãm eywebe. 
\v 9 Wuykitpitpiyũ juk adi oajẽm Macedônia eipi bewi. Soat cuk adi oꞌtojot ip owebeam wemukaypinput. Imẽnpuye kaꞌũma ma juk adi ojoojuy eyxewi. Ikug̃ꞌũm pima dak “Dinheiroꞌin puk” i g̃u oce eywebe. Pũg̃ em tak kaꞌũma ma. Kuy bima dak juk adi ojoojuy g̃u ma dinheiro eyxewi. G̃uyjom tak ojoojuy g̃u ma. Puju dinheiro ojoojuy eyxewi? Kaꞌũma em ma. 
\v 10 Abu ideidaat owebe? Kaꞌũma ma. Teihem g̃u õn pit kawẽn idipat muwẽnuwẽn soat pe Grécia eipi watwat pe. Icẽmãn õn eꞌem. Napapaꞌukat g̃u õn, Cristo aꞌõkayat puye.
\p
\v 11 — Ẽn iojuyjuyũk g̃u ocexewi ocekukpin g̃u exe buye — i teꞌe ma eyju eꞌem owebe.
\m Eykukpin cĩcã oxe. Deus itaybit iboam.
\p
\v 12 — Pauloyũ joꞌi oceju dak kapikpig̃ — iꞌe ojuy ip jewexe Deus ekawẽn muwẽnuwẽnꞌukayũ.
Õn pit teihem g̃u kawẽn idipat muwẽnuwẽn. Imẽnpuye ibo iꞌe baꞌore cebe ip, imuwẽnuwẽnaptei bubum ip puye. G̃uyjom tak teihem g̃u og̃uwẽnuwẽn. 
\v 13 Ixeyũ bit icẽmãn g̃u Deus emumujuyũ. Jewexe ip Deus emumujuyũ.
\p — Yaꞌõbi oceju dak Deus ekawẽn muwẽnuwẽn — i eꞌem ip napa ma.
\m Wararaꞌacayũ mug̃uykukukum ip oceju dak Cristo emumujuyũ iam.
\p
\v 14 — Apẽn kuka itabut oꞌe ip imug̃uykukuꞌukayũ aꞌõ kay Corinto kay beayũ? — iꞌŨmg̃u õn pit eꞌem owebe ma.
\m Satanás pit cewemuwexat put Deus ekawẽn tojotjotꞌukat coꞌian. Deus ekabia dag̃wiat coꞌian cewemuwexat put wuymug̃uykuku ojuy. 
\v 15 Imẽnpuxim cebekitkit tak cewemuwexat put xipacat mug̃ẽg̃ẽꞌukat coꞌiayũm wuymug̃uykuku ojuy. Ipiꞌũm puje bit, xipatꞌũm cĩcãat jeꞌjat ip wuymug̃uykukukuapteim. Cedag̃ ma Deus ideida cebe ip.
\p
\v 16 — “Paulo yadaodao,” iꞌũmg̃u juy epeꞌe — i õn eꞌem waram eywebe.
\m Wadaodao eyxe bima dak cuy waꞌĩjom ma epeꞌe. Jewexe Deus ekawẽn muwẽnuwẽnꞌukayũ buxim õn tak eꞌem eywebe “Xipat cĩcã õn” i. 
\v 17 Wuykukukat aꞌõbi g̃u õn kawẽnwẽn eywebe g̃asũ bit- -wukpiwatpi ma. “Xipat cĩcã õn” iꞌeꞌem pima yadaodaoat puxim ma õn tak kawẽnwẽn. 
\v 18 Wararaꞌacayũ eꞌem — Xipat cĩcã õn — i eywebe, yaꞌõbuyxian pin ip eyxe buye. 
\m Imẽnpuxim õn tak: — Xipat cĩcã õn — i oce eywebe. 
\v 19 Jewexe ma eyetaybit cĩcã. Yadaodaoayũ joꞌiayũ kay jĩjã bit eyju! 
\v 20 Eyag̃uyꞌũm cĩcã. Ixeyũ kay jĩjã eyju, yaꞌõpurug̃ cĩcã maꞌg̃u eymujujum ip; eymudadaybotbon ma aꞌg̃u ip; eymug̃uykukukum ma aꞌg̃u ip; warẽmtag̃ ma aꞌg̃u ip eykug̃; eyukpiokakakam ma aꞌg̃u ip eykug̃. 
\v 21 Oceju bit cuk aꞌg̃u ocesũsũn ocesop eykuk am imẽn.
\p Wararaꞌacayũ eꞌem: — Xipat cĩcã õn — i eywebe. 
\m Ixeyũ buxim õn tak jeymukũyjo õn g̃asu õn xipat cĩcã iam. Eyetaybit õn yadaodaoat puxim kawẽnwẽn iam.
\p
\v 22 — Hebreuyũ bit oceju icẽmãn — iꞌeꞌem ip eywebe jewexe Deus emumujuyũ.
\m Õn tak ibiat ma.
\p — Israel naxeg̃ebitbit pit oceju — iꞌeꞌem ip eywebe.
\m Õn tak ibiat ma.
\p — Abraão naxeg̃ebitbit pit oceju — iꞌeꞌem ip eywebe.
\m Õn tak ibiat ma.
\p
\v 23 — Cristo buywatwatꞌukayũ bit oceju — iꞌeꞌem ip eywebe.
Ixeyũ bodi ma õn pit Cristo buywatwatꞌukat xipacat. Ixeyũ bodi ma juk adi ocekapikpik cĩcã Cristo beam, yadaodaot puxim maꞌg̃u õn kawẽnwẽn g̃asũ eywebe. Ixeyũ muõmõmap podi ma juk adi omuõmõmõm ip daomũnmũnapꞌa be. Ade em juk adi ip wukxabiokakaka ixee mug̃ẽg̃ẽbum. Ade em ma ojeꞌũ pinpin. 
\v 24 Cinco em Judeuyũ kukukꞌukayũ wukxabiokaka ixee mug̃ẽg̃ẽbum- -icaat yabi beatpum. Ade em wukxabiokaka ip- -39 em ma. Soat em ip ibũrũ em ma wukxabiokaka. 
\v 25 Ebapũg̃ em cuk adi wukxabiokaka im Roma ka kukat ebekitkit. Pũg̃ em cuk adi wabug̃bug̃ ip witaꞌam okay itakomaayũ. Ebapũg̃ em cuk adi oakõmkõm tibog̃ati be kobexixi epirig̃ puje- -odujowat ojuyat epirig̃ puje. Pũg̃ em pit tibiꞌadopa dag̃ ojeku- -kabiabun, iximabun tak. 
\v 26 Soat kaka dag̃ cucum pima ade em cuk adi waoka ojuyap cocom ojekuku. Idibi adi oꞌtiõm ukã be bima adi ojeꞌũ pin tibog̃ puje. Ibukurukayũ dak cuk adi oaoka pin osodopdopdop. Obadipyũ dak cuk adi oaoka pin osodopdopdop- -Judeuyũ kukukꞌukayũ. Judeuꞌũmayũ dak cuk adi oaoka pin osodopdopdop ade em ma. Weꞌũ pinap cocom cuk adi ojekukuku ikabog̃atka dag̃, ukꞌaꞌũmat tag̃ tak, tibog̃cĩcãati dag̃ tak. Jewexe obureyũ dak cuk adi oaoka pin osodopdopdop. 
\v 27 Soat em cuk adi ocekapikpik cĩcã. Soat em odaobire juk adi ojekukuku wekapikap tag̃. Xexenꞌũma juk adi ojekukuku. Ade em cuk adi ojekukuku oxatꞌũmg̃u, odotiũm tak, oxexecapꞌaꞌũmg̃u dak. 
\v 28 Imẽn ma õn jekukum ipiatpiꞌajojom. Wag̃uybabiꞌũm tak itabucayũ kug̃- -soat ka beacat kug̃- -Jesus ekawẽn kayayũ kug̃ cedag̃ ma paxi aꞌg̃u ip jekukum iam. 
\v 29 Itabucat warẽmtag̃ ma oeku bima, õn tak ixe buxim ma og̃uycũg̃ kuka oce. Ikẽrẽat mug̃ẽ buje dak, õn tak wag̃uybabiꞌũm cĩcã oce ip ikug̃.
\p
\v 30 Ade em waꞌõbacaꞌũmap ibapuk eꞌem soat pe. “Xipat cĩcã õn” iꞌe ojuy bima, waꞌõbacaꞌũmap kuka og̃uwẽn. 
\v 31 Deus itaybit õn napa g̃u eꞌem eywebe iam. Ixe ma wuykukukat Jesus Cristo ebya.
\p — Soat podi ma ẽn xipat — i wuyju eꞌem cebe- -Deus pe.
\m
\v 32-33 Õn Damasco ka be bima ibo ka kukukat oaoka ojuy oꞌe. Imẽnpuye jeka wiwiꞌukayũ oꞌg̃uju jeka ekorara exĩntbi wiwi am odaomũnap ojuy. Obureyũ bit cuk adi odaxijo. Pag̃eiroꞌabog̃ pe ip omukop ika ekorara tok tag̃wi. Imẽn ocenapõn waoka ojuyacat xewi- -Aretas aꞌõbi ika kukukat xewi.
\b
\c 12
\p
\v 1 Teꞌe ma wuyju eꞌem:
\p — Xipat cĩcã õn — i wararaꞌacat pe. Imẽnpit puk jeymukũyjo õn xipat cĩcã õn iam. Ade ma juk adi ojojojo wexey joꞌiat pe idip cĩcãat. Wuykukukat tak cuk adi soat ma oꞌg̃ubapukpuk owebe omutaybit am. Iboap cuy og̃uwẽn xipat cĩcã õn iam eymukũyjo am. 
\v 2 Kuy bima Deus cuk odujuu jewekay kabi kay- -bodiat ka kay. Kuy quartoze koato oꞌkap pima juk adi odujuu. Õn xeꞌe odujuu? Wexeybi g̃u xeꞌe odujuu? Wetaybit g̃u toto. Deus acã itaybit. 
\v 3 Dao ma juk adi odujuu ikadip cĩcãatkay kay Deus tũytũyapka kay. 
\p Õn xeꞌe odujuu? Wexeybi g̃u xeꞌe odujuu? Wetaybit g̃u toto. Deus acã itaybit — i õn eꞌem waram. 
\m
\v 4 Kawẽn idip cĩcãat cuk adi oyaꞌĩjojo ibodi. Imuwẽn paꞌore eywebe iboap. Kaꞌũmg̃u wuyaꞌõ kawẽn iboam eymukũyjo am.
\p
\v 5 — Xipat cĩcã õn — i kuka oce wararaꞌacat pe, iboap ojojojo buye.
\m Imẽnpit obuꞌu imẽn iꞌe am. Soat xe eꞌem ibapuk waꞌõbaca g̃u iap.
\p — Xipat cĩcã õn — iꞌũmg̃u oce wararaꞌacat pe. — Waꞌõbuyxi g̃u õn — i acã oce cebe ip.
\m
\v 6 “Xipat cĩcã õn” iꞌe pin pima bit wadaodao g̃u kuka oce. Napa g̃u kuka oce eywebe. Icẽmãn kuka oce. Kuy juk wekukuap epejojojo. Wekawẽn tak cuk kuy epeyeꞌĩjojojo. Õn xipat g̃u maꞌg̃u eyxe bima bit, “Xipat cĩcã õn” i g̃u oce eyag̃uymuwarurun am okay iꞌe am.
\p
\v 7 Idip cĩcãat cuk adi ojojojo wexey joꞌiat pe. Imẽnpuye:
\p — Jeweweju yobog̃an pin cĩcã acoꞌi jeꞌe Paulo — i juk oꞌe Deus jewebe ma.
\m Imẽnpuye soat em õn jekukum owãtaxipi jewexe obog̃an oꞌeap puxim. Ipiatpiꞌajojom õn jekukum. Deus aꞌõbi acã Satanás cuk omuwãtaxipin. Deus aꞌõbi ma owãtaxipi õn jekukum jewexe obog̃an oꞌeap puxim.
\p
\v 8 — Owãtaxipiat ejuꞌuk owebewi — i juk adi ocece wuykukukat pe.
\m Ebapũg̃ em cuk aꞌg̃u oce cebe imẽn.
\p
\v 9 — Ojuꞌuk g̃u ewãtaxipiat — ioꞌe owebe. — Soat em pit õn xipan jekuk — ioꞌe. — Waꞌõbacaap og̃ũm ewebe — ioꞌe. — Waraꞌat kay g̃u bit eg̃uy — ioꞌe. — Aꞌõbacaꞌũm pima, big̃ ma waꞌõbacaap ejat — i juk oꞌe owebe.
\m Imẽnpuye waꞌõbacaꞌũmap kug̃ ma ocokcok.
\p — Waꞌõbaca õn pit — iꞌũmg̃u õn eꞌem wararaꞌacat pe.
\m Cristo soat kabia jaꞌõbacaap ũmũm owebe waꞌõbacaꞌũm puye. Imẽnpuye ocokcok cĩcã waꞌõbaca g̃u maꞌg̃u. 
\v 10 Soat em ocokcok õn eꞌem waꞌõbaca g̃u maꞌg̃u; okayꞌũmayũ dak aꞌg̃u omuymuy ma; yopĩt ma dak aꞌg̃u õn jekukum ikug̃; itabutꞌũmayũ dak aꞌg̃u ipiatpiꞌajojoan owebe; xipatꞌũmat tak aꞌg̃u jebapukpug̃ owebe. Imẽn ma ipiatpiꞌajojom õn jekukum Cristo aꞌõ dag̃ õn jekukum puye. Inaka soat em ocokcok õn eꞌem. Waõbacaꞌũm pima, wuykukukat jaꞌõbacaap ũmũm owebe buye.
\p
\v 11 Xipan kuka aꞌg̃u eyju bit omuwẽnuwẽn. Imẽnpit xipan g̃u eyju omuwẽnuwẽn. Imẽnpuye yadaodaoat puxim õn ma xipan jewemuwẽnuwẽn eywebe. Kaꞌũma joꞌi ma õn eyxe. Jewexe Deus emumujuyũ bit ijoꞌi ip eyxe. Ajo mug̃ẽg̃ẽm ip imug̃ẽ baꞌore owebe iat? Kaꞌũma ma. 
\v 12 Õn eyxe bima juk adi Deus aꞌõbacaap og̃ubapukpukpuk eywebe. Ixe aꞌõbacaam wuywebe imubapuk paꞌoreat tak cuk adi og̃ubapukpukpuk soat etabutpe eyetabutpe. Iboap mubapuk puje eyetabẽg̃bẽg̃ epesop ijojom idip cĩcã eyxe buye. Wukpiceg̃e g̃u juk adi og̃uy iboap mubapuk am eywebe. Iboap coco buje juk eyetaybit epesop õn Deus emumuju iam Deus emumuju acã iboap mubapukpug̃ puye. 
\v 13 Waraꞌatka be bima juk adi wemumukaypinput ũmũmꞌuk osodop ip owebe ibo ka watwat- -itabucayũ. Eyxe bima bit cuk iojuyjuyꞌuk g̃u og̃uy eyxewi. Apẽnpuye “Paulo jemumukaypinput ojuyjuyꞌuk g̃u wuyxewi,” i eyju eꞌem eyewewebe?
\p — Wuykay g̃u xeꞌe? — i teꞌe ma eyju eꞌem.
\m Imẽn g̃u bit cuy epeꞌe. Eykay maꞌg̃u õn.
\p
\v 14 Xepxep em cuk ojeku eyjom. G̃asũ dak waram oju pin eyjom. Eyju bit cuy ojuaptei epeteida g̃u. Eyedinheiro kay g̃u õn. Eykay acã õn okay am. Webekitkit puxim eyju. Bekitkiyũ ma jedinheiro muxipanpan g̃u jebay beam, jexi beam tak. Ag̃okatkayũ bit jedinheiro muxipanpan jekpotpoyũ beam, jedaxiyũ beam tak. 
\v 15 Ocokcok cĩcã soat obubut ũm ãm eywebe eybuywat am. Obuꞌu g̃u weꞌũ ãm tak eybuywacap ojuy. Big̃ ma õn eykay eꞌem. Eyju g̃u xeꞌe big̃ ma okay g̃u eꞌem?
\p
\v 16 Soat ma acoꞌi eyju eꞌem eyewewebe: — Icẽmãn wuyedinheiro ag̃uꞌũm g̃u Paulo beam — i. 
\m Pũg̃ pit acoꞌi jeꞌe napa ma: 
\p — Ixe bit cuk adi ocemug̃uykukuku — i. — Ixe juk adi ade acoꞌi oꞌtujupaꞌum ocexewi napaap tomuju ma — i dak acoꞌi jeꞌe napa ma.
\m
\v 17 Eymug̃uykukuap ojuy g̃u dak obureyũ juk og̃uju eykay. 
\v 18 Tito juk og̃uju eykay. Waraꞌat tak wuykitpit cuk og̃uju eykay. Ajo dak ip oꞌtujupaꞌum eyxewi jebubun? Kaꞌũma ma! Õn, Tito dak jewejojoꞌi ma oceju. Cedag̃ ma oceju jekukum. Wararaꞌacat mug̃uykukukuꞌuk g̃u oceju.
\p
\v 19 — Pauloyũ jewedayoyom ocewebe, yobog̃an pin puye — i teꞌe ma eyju eꞌem.
\m Jewedayoyom g̃u oceju bit. Cristo aꞌõbi oceju kawẽnwẽn eywebe Deus etabutpe. Oburereyũ, eykukpin ocexe. Soan ma oceju eꞌem eybuywat am acã. 
\v 20 Eykay wajẽm puje iwarum ma acoꞌi õn jeydobuxik. Apẽn õn cekay iap coꞌi g̃u acoꞌi õn jeydobuxik. Eyju dak imẽn ma odobuxik. Apẽn eyju cekay iap coꞌi g̃u acoꞌi eyju odobuxik. Jewaꞌõxikxig̃ acoꞌi õn jeydobuxik, eyetabutkarey dak eyewewekay, eyetakomãmã dak eyewewekay. Wararaꞌacat kay dak eyju g̃ebum g̃u- -eyewewekay acã. Jewemuymuy acoꞌi õn jeydobuxik, eyekawẽnkẽrẽ dak, yobog̃an pin tak. Pũg̃ tag̃ g̃u dak acoꞌi eyju jekukum- -waraꞌat tag̃tag̃tag̃ ma. Imẽn õn eydobuxik puje og̃uycũg̃ cĩcã oce eykay. Jeymukorẽm tak õn. Owebe eymukorẽm puje eyju dak eyg̃uycũg̃cũg̃ epeꞌe. 
\v 21 Waram eykay wajẽm puje og̃uycũg̃ cĩcã oce eykay. Pũg̃ g̃u eyꞌin cuk adi ikẽrẽat oꞌg̃ug̃ẽ kuy bima. Wararaꞌacat tayxi eju jepopoꞌuk osodop ip, wararaꞌacat itop eju dak. Ibuꞌun paꞌore ma eꞌem ip ikẽrẽat mug̃ẽg̃ẽap kug̃. Cepere baꞌore ma cebe ip. Imẽnpit ig̃uycũg̃ꞌũma eꞌem ip ikẽrẽat mug̃ẽg̃ẽap kay. Ibuꞌu g̃u oꞌe ip ikẽrẽat mug̃ẽ ãm. Imẽnpuye og̃uycũg̃ cĩcã oce Deus etabutpe ikẽrẽat kay acã eyju g̃ebum puye, ade em maꞌg̃u õn eyawẽwẽm. Deus omug̃ebu ajo g̃u õn iap kay.
\b
\c 13
\p
\v 1 Kuy xepxep em cuk adi eyjom ojeku. Waram g̃uto õn eyjo ojuy. Imẽn eꞌem Deus ekawẽntup:
\mi Pũg̃ pe wararaꞌacat muwara buje wuyetabut g̃u cekay, i. Xepxepayũ be, ebapũg̃ayũ be dak imuwara buje bit, wuyetabut cuy aceꞌe cekay, i.
\m Imẽnpuye koap cuy bit õn jeymukorẽm. Xepxepayũ, ebapũg̃ayũ aꞌĩjoꞌũm pima bit, õn jeymukorẽm g̃u. 
\v 2 Xepxep em kuy ojeku eyjom. Waram wajẽm puje waꞌõdim g̃u õn jeymukorẽm- -waꞌõpurug̃ ma. Abu itabotaidabotbon jeꞌe eykay? Kaꞌũma ma. Kuy bima ade em cuk adi ocece eywebe imẽn. G̃asũ dak g̃uto imẽn ma oce. Imẽn ma õn eꞌem soat kuy bima ikẽrẽat oꞌg̃ug̃ẽꞌiayũ be. Soat pe dak eyꞌin imẽn ma õn eꞌem ikẽrẽat mug̃ẽg̃ẽꞌukayũ be. 
\v 3 Eyetaybit epeꞌe õn Cristo aꞌõbi eꞌem iam. Eyetaybit g̃ug̃ũn g̃u epeꞌe iboam. Eyetaybit cĩcã ma. Cristo yaꞌõbacaꞌũm g̃u eykug̃- -yaꞌõbacam ma. Soat em jaꞌõbacaap mubapukpug̃ eywebe. 
\v 4 Korosa be jeꞌũ buje yaꞌõbacaꞌũm osunuy. G̃asũ bit itait maꞌg̃uto oꞌe. Deus ixeꞌũm oꞌg̃utait jaꞌõbacaam soat podi ma ixe yaꞌõbaca buye. Ipi dag̃ pima oceju dak ixe buxim ocaꞌõbaca g̃u. Ceweju mũg̃ꞌi bima bit, yaꞌõbacaap kug̃ oceju eꞌem. Eybuywat am tak yaꞌõbacaap kug̃ oceju.
\p
\v 5 Eyekukuap kay juy g̃ebum epesop Cristo ekawẽn tag̃ paxi oceju jekukum iap kay.
\p — Wuyetabucap tag̃ paxi wuyju jekukum? — i juy epeꞌeꞌe eyewewebe.
\m Cristo aꞌõbacaap kug̃ tu eyju jekukum? Jewexe du eyju Cristo ebekitkiyũ? Eyetabucap epereꞌũm pima, eyetaybit cĩcã Jesus Cristo wuywebe nuynuy iam. 
\v 6 Eyetaybit acoꞌi ocetabucap ocejepere g̃u iam. Icẽmãn Cristo ekawẽn tag̃ oceju jekukum.
\p
\v 7 — Bay, soat em cuy Corinto ka beayũ buywatwan eg̃uy ixeyũ be ikẽrẽat mug̃ẽap puxim — i õn eꞌem Deus pe.
\m Imẽn õn eꞌem cebe wararaꞌacayũ be “Pauloyũ cedag̃ ma Corinto ka beayũ oꞌg̃utaybitbin” iꞌeꞌeap ojuy g̃u- -eywebe cedag̃ ma jekukuap ojuy acã. “Pauloyũ warẽmtag̃ ma Corinto ka beayũ oꞌg̃utaybitbin” i wararaꞌacat eꞌem pima bit, akꞌarit ma oce cekawẽn kay. 
\v 8 Abu kuka kawẽn icẽmat tak oꞌg̃uꞌũm? Kaꞌũma ma. Imuꞌũm paꞌore. Ibaꞌore g̃u bit ocewebe kawẽn icẽmat tag̃ oceku am. 
\v 9 Eyju eyetabut cĩcã bima, ocecokcok oceꞌe ocaꞌõbaca g̃u maꞌg̃u wararaꞌacayũ xe. Imẽnpuye:
\p — Bay, aꞌõbacaap cuy eg̃ũm Corinto ka watwat pe ikẽrẽat kayꞌũmayũm jeꞌe am — i oceju eꞌem Deus pe.
\m
\v 10 Wajẽm awap eymukorẽmaptup mubarararag̃ õn wajẽm puje dak eymukorẽmap puxim. Obuꞌu waꞌõpurug̃ eymukorẽm ãm wuykukukat aꞌõbi. Ixe juk jaꞌõbacaap oꞌg̃ũm owebe eymukorẽm ãm g̃u- -eybuywat am acã. Owebe oꞌg̃ũm eybuywat am big̃ ma kũyjobit am jebiõg̃buk aꞌõ kay am.
\p
\v 11 Ibũrũ ma buk, okitpitpiyũ. Soat em cuy epesop g̃ebum ikẽrẽat mug̃ẽap puxixim. Eyaꞌõpicũg̃cũg̃ waꞌõ kay. Jewag̃uycom cuy epesop eyeweweju. Kabaꞌũm cuy epesop eyewekug̃. Deus ma wuymutaybitbin wararaꞌacat kug̃ xipan am. Ixe dak wuyag̃uymubabibin soat em. Ixe juy soat em jeꞌku eyweju.
\p
\v 12 Epeyewakobotbot cuy wuykukpin wuyeweweju iap mubapuk am soat pe.
\p — Katoꞌi juy cebe ip — iꞌeꞌem eywebe soat oxeayũ itabucayũ.
\p
\v 13 — Xipan cuy Corinto ka watwat ejukuk — i õn eꞌem wuykukukat Jesus Cristo be. — Eykukpin cuy ixeyũ ejukuk — i õn eꞌem Deus pe. — Ixeyũ burerem cuy eg̃uy soat em — i õn eꞌem Deus biõg̃buk pe.
\m Ibũrũ ma.