\id EPH Mundurukú [myu] NT (Brazil) -2010 bd. 
\h Efésios
\toc1 Éfeso ka watwat peaptup
\toc2 Aos Efésios
\mt ÉFESO KA WATWAT PEAPTUP PAULO EMUDUPMUBARARAKTUP
\c 1
\p
\v 1 Éfeso ka watwat, cartadup mubararag̃ õn eywebeaptum. Deus ebekitkiyũ eyju. Soat em eyju kũyjobit Jesus Cristo aꞌõ kay, ceweju eyju mũg̃ꞌi buye. Õn Paulo. Jesus Cristo emumuju õn Deus aꞌõbi.
\p
\v 2 Deus wuyebay. Jesus Cristo wuykukukat.
\p — Bay, Éfeso ka watwat cuy ejukuk xipan — i õn eꞌem Deus pe. — Ixeyũ ag̃uymubabibin cuy eg̃uy — i õn eꞌem cebe.
\p
\v 3 Kabi beacat pe xipacat ũmũmap coꞌi ma soat em Deus xipacat ũmũm wuywebe dak. Kabi beayũ buxim wuyju, Cristo eju mũg̃ꞌi wuyju buye. Imẽnpuye:
\p — Ẽn xipat cĩcã — i juy ace Deus pe soat em ma- -wuykukukat Jesus Cristo ebay be.
\m
\v 4 Ipi mug̃ẽꞌũm pima ma, Deus kuy wuynaẽ jebekitkiyũm. Cebekitkiyũ wuyju Cristo eju mũg̃ꞌi wuyju buye.
\p — Soat tag̃ iisu jeedop ip oxe webekitkiyũ — i juk oꞌe jewebe ma Deus. — Ikẽrẽat kug̃ g̃u ip jeedop oxe — i juk oꞌe jewebe ma.
\m Imẽn cuk wuynaẽ ixe xe wuykukpin puye.
\p
\v 5 — Jesus Cristo kay itabun puje, webekitkiyũm ip jeꞌe — ioꞌe Deus jewebe ma.
\m Imẽn Deus oꞌe, jexe wuykukpin puye. Ibikuy osunuy wuynaẽ ãm. Jemucokcok am cuk wuynaẽ. 
\v 6 Ipot ikukpin cĩcã osunuy cexe. Imẽnpit jekpot oꞌg̃udot wuykay wuydaxijo am teiꞌũmat ũmũmap puxim. Imẽneju:
\p — Kaꞌũma ma ejoꞌiat xipacat — i juy ace cebe soat em. — Soat podi ma ẽn xipacat ũmũm ocewebe — i dak cuy ace cebe.
\p
\v 7 Deus ikẽrẽat oꞌjuꞌuk wuywebewi Cristo oeꞌũ wuywebeam puye. G̃asũ bit ixe g̃ebum g̃u apẽn cuk adi ikẽrẽat ag̃ug̃ẽg̃ẽ iap kay. Soat podi ma ixe xipan wuykug̃. 
\v 8 Ibuꞌu g̃u xipan wuykuk am. Soat em wuykug̃ xipan. Soat podi ma itaybitbit ixe. Soan ma itaybit. 
\v 9-10 — Imuꞌawero pin pima, soat webekitkiyũ og̃uꞌawero- -soat ipi juacat, soat kabi beacat tak — i juk oꞌe Deus jewebe ma. — Cristo soat kukan jeꞌe g̃ebuje bit — i juk oꞌe jewebe ma. — Kũyjobit jeedop ip yaꞌõ kay — ioꞌe.
\m Kuy bima apẽn imuꞌawero ojuy ip osunuy iap ibaꞌarẽm osodop soat xe wuyxe. G̃asũ bit iboap oꞌg̃uwẽn wuywebe.
\p — Cristo soat kukan jeꞌe — i juk oꞌe wuywebe. — Soat ma kũyjobin jeedop ip yaꞌõ kay — i juk oꞌe wuywebe.
\p
\v 11 Soat ma jebapukpug̃ wuywebe Deus bikuyap tag̃- -apẽn ixe juk adi oꞌeꞌeiap tag̃. Ixe juk wuynaẽ jebekitkiyũm Cristo eju wuyju mũg̃ꞌi buye. Jebikuyap tag̃ wuynaẽ.
\p — Teyũku otaẽ webekitkiyũm — ioꞌe ipi mug̃ẽ awap.
\m Imẽnpuye juk wuynaẽ. 
\v 12 Oceju juk koam ocetabut oceꞌe Cristo kay. Imẽnpuye:
\p — Kaꞌũma ma ejoꞌiat yaꞌõbacaat — i oceju eꞌem Deus pe.
\p
\v 13 Eyju dak cuk eyetabut Cristo kay. Kawẽn icẽmat co buje Cristo kay juk eyetabut epesop- -kawẽn idipat co buje, Deus wuydaxijojomap ekawẽn co buje. Wuyju ma wuybutet mubarararag̃ wuybubut pe ijop cuy obubut iꞌe am soat pe. Imẽnpuxim Deus tak jebiõg̃buk muõmõm wuywebe “Teyũku webekitkiyũ” iꞌe am soat pe. Jebiõg̃buk muõmõm wuywebe apẽn cuk adi oꞌeꞌe iap tag̃. 
\v 14 Wuyetaybit ajo Deus jeꞌg̃ũm jebekitkiyũ be iap acejat iam ibiõg̃buk kug̃ puye. Ixe jaꞌõbacaap ũmũm wuywebe ikẽrẽat mug̃ẽap puxim. Imẽnpuye wuyetaybit ixe xe acesop ikẽrẽat kug̃ g̃u iam. Imẽneju:
\p — Kaꞌũma ma ejoꞌiat xipacat — i juy ace cebe- -Deus pe.
\p
\v 15 — Éfeso ka watwat itabut cĩcã wuykukukat kay- -Jesus kay — i juk oꞌe wararaꞌacayũ ocewebe. — Ikukpin wararaꞌacayũ kug̃ ip- -itabucayũ kug̃ — i juk oꞌe ip ocewebe.
\m
\v 16 Iboap awẽg̃ tobuxik puje:
\p — Bay, ẽn xipat cĩcã. Éfeso ka watwat buywatwan ẽn ixeyũ be wararaꞌacayũ kuk am xipan — i õn eꞌem Deus pe. 
\m Obuꞌun paꞌore ma imẽn iꞌeꞌe am cebe. Soat em eywebeam õn kawẽnwẽn Deus eju. 
\v 17 Kawẽnwẽn õn Deus eju- -wuykukukat Jesus Cristo ebay eju. Kaꞌũma ma ixe joꞌiat idipat.
\p — Ebiõg̃buk cuy eg̃uõm Éfeso ka watwat pe — i õn eꞌem cebe.
\m Ibiõg̃buk jeymutaybin cũg̃ ma eyeku am Deus etabutpe iam. Deus tak g̃ubapuk eywebe ibiõg̃buk. Eyetaybit epesop ixem apẽn ixe ibikuy eywebe eyetaybit am ixem.
\p
\v 18 — Bay, ixeyũ juy eg̃utaybin soat em exe jeedop ip iam — i õn eꞌem Deus pe.
\m Ixe juk eynaẽ soat em jexe eydop am. Cexe eydopap wiwim eyju g̃asũ dak.
\p — Ixeyũ juy eg̃utaybin xipat cĩcãat eg̃uxipan iũm ãm ebekitkiyũ be iam — i õn eꞌem Deus pe. 
\v 19 — Soat podi ma aꞌõbaca iam cuy dak ixeyũ eg̃utaybin — i õn eꞌem. — Aꞌõbacaap ũmũm soat pe ebekitkiyũ be- -itabucayũ be iam tak cuy ixeyũ eg̃utaybin — i õn eꞌem.
\m
\v 20 Iboap aꞌõbacaan ma Deus Cristo oꞌg̃utait ceꞌũap tomukadi. Waram oꞌg̃utait. Oꞌg̃uyu kabi kay.
\p — Soat kukan cuy eg̃uy oweju — ioꞌe cebe- -Cristo be. — Wag̃uywag̃õm cuy eg̃uy — ioꞌe cebe. 
\m
\v 21 Kabi be omuy g̃asũ Cristo. Soat podi ma yaꞌõbaca ixe. Soat kabi beayũ kukayũ kũyjobit ixe aꞌõ kay acã- -yaꞌõbuyxiayũ, yaꞌõcaayũ dak, kariwaayũ dak. Soat ip kũyjobit Cristo aꞌõ kay. G̃asũ kaꞌũma ma ixe joꞌiat yaꞌõbuyxi. G̃uyjom tak kaꞌũma ma jeꞌe ixe joꞌian. 
\v 22 Deus soat aꞌõbacaap oꞌg̃uꞌũm ixeyũ be kũyjobit am Cristo aꞌõ kay.
\p — Soat kukat okpot — i juk oꞌe Jesus kay itabucayũ be. — Kaꞌũma ma ixe joꞌiat — i juk oꞌe cebe ip.
\m
\v 23 Wuyaꞌa wuyjebit kukat. Wuyaꞌa buxim Cristo dak itabucayũ kukat. Imẽnpuye itabucayũ Cristo jebit puxim. Ixe Cristo soat em jebekitkiyũ kug̃ xipan- -jekay itabucayũ kug̃. Ixe-buxim wuyju dak soat kug̃ xipan itabucayũ kug̃ soat kaka beayũ kug̃, ixe wuykukat puye.
\b
\c 2
\p
\v 1 Kuy bima bit juk adi eybuꞌu epesop Deus bikuyap tag̃ jeku am Deus aꞌõ kay kũyjobitꞌũm puye, ikẽrẽat mujurũg̃rũg̃ puye dak. 
\v 2 Itabutꞌũmat ekukuap puxim cuk adi epekukuku ikẽrẽat mug̃ẽg̃ẽm acã. Deus aꞌõ kay kũyjobitꞌũmayũ kukat aꞌõ kay epesop kũyjobit kabido dag̃ayũ kukat aꞌõ kay, yaꞌõbacaayũ kukat aꞌõ kay. 
\v 3 Soat wuyju dak itabutꞌũmayũ ekukuap coꞌi ma juk adi ajekukuku. Wuyukpiwatpin ma juk adi ajekukuku ikẽrẽat mujurũg̃rũg̃. Ajo-mug̃ẽ pin wuyxe iat mug̃ẽg̃ẽm cuk adi ajekukuku. Ajo-kay wuyju jewag̃uy pin iap kay dak cuk adi aceg̃ebububu. Wuykap isu ma wuycokcok ikẽrẽat mujurũg̃rũg̃ ãm ijodiat puye. Imẽneju Deus itakoma osunuy wuykay ikẽrẽat mujurũg̃rũg̃ puye. Ipiat kuka oꞌsupiꞌajoat soat pe wuywebe. 
\v 4 Deus pit soat podi ma itabotaidabotbot wuykay. Imẽnpuye ipiat oꞌsupiꞌajoat g̃u wuywebe. Soat podi ma wuykukpin cexe. 
\v 5 Imẽnpuye ixe juk adi wuymuisun. Ceꞌũat puxim cuk adi acesop. Ikẽrẽat mujurũg̃rũg̃ cuk adi ajekukuku. Ixe bit cuk wuymuisun. Kuy bima Deus waram g̃uto Jesus oꞌg̃utait ceꞌũap tomukadi. Jaꞌõbacaam oꞌg̃utait. Iboap aꞌõbacaam wuymuisusun tak Cristo eju wuyju mũg̃ꞌi buje. Deus kuy juk wuydaxijo wararaꞌacat podi ma xipan wuykug̃ puye. 
\v 6 Ixe juk wuymuisun ceꞌũat mutaicap puxim. Wuymuyu jexe wuydop am Jesus Cristo eju mũg̃ꞌi wuyju jekukum puye.
\p — Kabi be soat kukayũm jeꞌe ip webekitkiyũ Cristo eju — i juk oꞌe Deus jewebe ma.
\m
\v 7 Ixe juk wuymuyu jexe wuydop am. Imẽnpuye g̃uyjomayũ jeꞌe:
\p — Deus soat podi ma xipan wuykug̃, ikẽrẽat ag̃ujurũg̃rũg̃ maꞌg̃u wuyju — i. — Ixeyũ oꞌg̃uyu jexe jedop am Jesus Cristo oeꞌũ cebeam ip puye — i jeꞌe ip.
\m
\v 8 Deus wuydaxijojom xipan wuykug̃ puye. Ixe wuydaxijojom Jesus Cristo kay wuyetabun puje. Teiꞌũma wuydaxijojoap. Deus emumuũm puxim wuydaxijojoap teihe g̃u buye. 
\v 9 Deus wuydaxijojom cũg̃ ma wuyekukuap tomuju g̃u. Imẽnpuye:
\p — Deus cuk ocedaxijo cũg̃ ma oceju jekukum puye — iꞌe baꞌore wuywebe. 
\v 10 Deus cuk wuymug̃ẽ. G̃asũ bit cuk wuymuwexat xipacat mujurũg̃rũg̃ꞌukayũm Jesus Cristo eju mũg̃ꞌi wuyju buye.
\p — Xipacat mujurũg̃rũg̃ꞌukayũm ip jeedop Cristo eju mũg̃ꞌiayũ — i juk oꞌe Deus jewebe ma kuyje.
\p
\v 11 G̃ebum cuy epesop apẽn cuk adi warẽmtag̃ ma epekukuku iap kay. Judeuyũ g̃u eyju.
\p — Eyju jewedaypuꞌag̃obixeedakatkacan g̃u- -oceju acã — iꞌeꞌem ip Judeuyũ eywebe.
\m Jejebit pe ip takatkacap kug̃ oceju Judeuyũ iap mubapuk am soat pe. Judeuyũ xe eyokok epesop. 
\v 12 Wũy ma juk adi epekukuku Cristo wi kuy bima. Powatwat puxim cuk adi epesop, Judeuyũꞌũm puye- -Deus emunaẽꞌũm puye dak.
\p — Õn xipan jeykuk — i juk oꞌe Deus jebekitkiyũ be- -Judeuyũ be.
\m Eywebe bit imẽn g̃u oꞌe. Deus xe soat em wuyetait acesop iap wiwim g̃u juk adi epesop. Eyetabut g̃u juk adi epesop Deus kay. 
\v 13 Kuy bima Deus wi wũy jĩjã juk adi epesop eyetaybitꞌũm ixem puye. G̃asũ bit cuk eydojot jetẽg̃ Cristo oeꞌũ korosa be eywebeam puye. Ixe xe ma eyju dopdom g̃asũ Jesus Cristo eju mũg̃ꞌi eyju buye. 
\v 14 Cristo wuymudinudin. Judeuyũ itakoma osodop Judeuꞌũmayũ kay. Wuyparakpe korara opop iap puxim cewag̃õnꞌũm ip osodop jewewekay. Cristo bit itakomaap oꞌg̃uꞌũm korara muduap puxim. Oꞌg̃uꞌũm jeꞌũ buje. G̃asũ bit pũg̃ kadian ma oꞌe ip Judeuyũ, Judeuꞌũmayũ dak. Pũg̃ pe ma ip jewewekug̃ oꞌe itakomaap oiꞌũm puye. 
\v 15 Judeuyũ itakoma osodop ip Judeuꞌũmayũ kay Moisés ekawẽn tag̃ g̃u ip oekuku buye- -wuyawẽwẽap ekawẽn tag̃ g̃u.
\p — Moisés ekawẽn tag̃ eyekukuap tomuju g̃u eyju cũg̃ ma oxe — i juk oꞌe Cristo bit soat pe wuywebe. 
\m Imẽn cuk oꞌe jeꞌũ buje. Kuy bima Judeuyũ pũg̃ kadi g̃u osodop ip Judeuꞌũmayũ eju- -xepxep kadi. Cristo eju mũg̃ꞌi jeku buje bit, pũg̃ kadian ma ip oꞌe. Yag̃uyisu ip oꞌe Cristo ip oꞌg̃udin puye. Itakoma ip jewewekay iap oꞌg̃uꞌũm. 
\v 16 Wuyewewekay wuyetakomaap oꞌg̃uꞌũm, korosa be oeꞌũ buye. Pũg̃ kadian ma ixe juk wuymuwexat korosa be jeꞌũap tomuju- -Judeuyũ, Judeuꞌũmayũ dak. Ixe juk wuymubikuy Deus aꞌõ kay kũyjobit am. 
\v 17 Ipi ju jekop puje:
\p — Deus itakoma g̃u eykay! Eykukpin cĩcã cexe — i juk oꞌe Cristo. 
\m Imẽn ixe juk oꞌe eywebe- -Judeuꞌũmayũ be- -Deus wi wũyayũ be. Ocewebe dak imẽn cuk oꞌe Judeuyũ be- -Deus xeayũ be. 
\v 18 Soat wuyajẽm put wuyebay xe- -Deus xe- -Judeuyũ, Judeuꞌũmayũ dak, Cristo kay wuyetabun puje. Wuyajẽm put cexe pũg̃at aꞌõbi- -Deus biõg̃buk aꞌõbi, Deus biõg̃buk wuywebe buye.
\p
\v 19 Eyju Judeuꞌũmayũ. G̃asũ bit eyju wũyatka watwat puxim g̃u- -powatwat puxim g̃u dak. Ocebuxim eyju dak Deus ebekitkiyũm epesop g̃asũ- -Deus badipyũm, Deus ka watwan. 
\v 20 Deus nuynuyapꞌa buxim wuyju. Ukꞌa muy pin pima, tukꞌa diotpeat muymuy wuyju koap. Imẽnpuxim Jesus Cristo emumujuyũ cekawẽn oꞌg̃uwẽnuwẽn koap, Deus ekawẽn muwẽnuwẽnꞌukayũ dak. Ukꞌa muy bima, witaꞌa muymuy wuyju waraꞌatꞌa muycemucemapꞌa. Jesus Cristo ig̃oꞌa buxim. 
\v 21 Ig̃oꞌa waraꞌatꞌa muycemucem ukꞌa yacem iꞌe am. Imẽnpuxim wuykukukat Jesus itabucayũ aꞌõmucanucan. Imẽnpuye big̃ ma wuyetabut cekay. Big̃ ma wuyju xipan jewewekug̃. Big̃ ma wuyju kũyjobit yaꞌõ kay. Ukꞌa buxim wuyju yadipatꞌa buxim. 
\v 22 Eyju dak Cristo eju mũg̃ꞌi jekukum, Judeuyũ g̃u maꞌg̃u eyju. Imẽnpuye ocebuxim eyju dak Deus nuynuyapꞌa buxim epesop. Deus nuynuy eywebe, ibiõg̃buk nuynuy eywebe buye.
\b
\c 3
\p
\v 1 Paulo õn- -Jesus Cristo emunaẽ.
\p — Deus Judeuyũ daxijojom acã g̃u. Judeuꞌũmayũ daxijojom tak — i õn eꞌem.
\m Iboap puye õn daomũnmũnapꞌa be. 
\v 2 Deus soat podi ma xipan okug̃. Imẽnpuye juk omuju jekawẽn muwẽn ãm eywebe- -Deus xe soat ikukpin cĩcã iap ekawẽn muwẽn ãm eywebe. Kuy eyetaybit apẽn cuk ixe omuju eykay iam. 
\v 3-6 Kuyje Deus oꞌjekawẽn jewebe ma.
\p — Kawẽn idipat og̃uju Judeuꞌũmayũ be dak — i juk oꞌe jewebe ma. — Jesus Cristo kay ixeyũ etabun puje, ajo-ũmũm õn webekitkiyũ be iap jeꞌjat ip — i juk oꞌe jewebe ma. — Pũg̃ pe ma ip jewebot. Judeuyũ eju jewebot ip — i juk oꞌe. — Waꞌõ dag̃ oce Judeuꞌũmayũ be dak apẽn cuk adi ocece Judeuyũ be iap tag̃ — i juk oꞌe jewebe ma.
\m Kuyje apẽn pũg̃ kadian jeꞌe ip iap ekawẽn oꞌg̃uwẽn g̃u wararaꞌacat pe. Ibaꞌarẽm osodop soat xe iboap ekawẽn. G̃asũ bit jemumujuyũ oꞌg̃utaybin iboap ekawẽn- -soat tag̃ iisuayũ. Jemunaẽyũ oꞌg̃utaybin jekawẽn muwẽnuwẽnꞌukayũ dak. Jebiõg̃bug̃ ip oꞌg̃utaybin. Owebe dak Deus kuy bima ibaꞌarẽm osodop iap ekawẽn oꞌg̃uwẽn. Kuy iboap ekawẽntup oꞌtupmubararak yopĩtpĩt. Wemudupmubararaktup co buje, eyetaybit epeꞌe Paulo itaybit kuy bima ibaꞌarẽm osodop iap ekawẽn Cristo ekawẽn iam.
\p
\v 7 — Kawẽn idipat cuy eg̃uwẽnuwẽn itaybitꞌũmayũ be — i juk oꞌe Deus owebe.
\m Teiꞌũmat puxim jaꞌõbacaap oꞌg̃ũm owebe kawẽn idipat muwẽn ãm. Jaꞌõbacaap oꞌg̃ũm owebe imuwẽn ãm. Oꞌg̃ũm owebe yobog̃at g̃u maꞌg̃u õn. Ixe xipan okug̃ puye acã oꞌg̃ũm owebe. 
\v 8 Soat podi ma õn yopĩt ma Deus kayayũ bodi ma. Owebe bit Deus oꞌe:
\p — Kawẽn idipat cuy eg̃uwẽnuwẽn Judeuꞌũmayũ be — i. Imẽnpuye:
\p — Soat podi ma Cristo xipan wuykug̃ — i õn eꞌem cebe ip. — Soat podi ma xipacat ũmũm wuywebe — i dak. 
\v 9 — “Kuyje Deus ibikuy osunuy soat kay jebekitkin- -Judeuyũ kay, Judeuꞌũmayũ kay dak,” i juy ece soat pe — i juk oꞌe Deus owebe, soat mug̃ẽg̃ẽꞌukat cuk oꞌe. — “Jebikuyap tag̃ Judeuyũ daxijojom g̃asũ, Judeuꞌũmayũ daxijojom tak,” i juy ece soat pe — i juk oꞌe Deus owebe.
Apẽn Deus ibikuy osunuy iap ibaꞌarẽm osodop soat xe kuy bima. G̃asũ acã ibapuk oꞌe. 
\v 10 Ibaꞌarẽm osodop kuy bima. G̃asũ bit ade taxijojoꞌibiyũ- -Judeuyũ, Judeuꞌũmayũ dak- -soat kaka dag̃ayũ. Ixeyũ jojom pima, kabi beayũ itaybit jeꞌe soat podi ma Deus itaybit iam.
\p — Deus acã itaybit soat kaka dag̃ayũ daxijo am — i jeꞌe ip kabi beayũ- -yaꞌõbuyxiayũ, Deus ekawẽn tojotjotꞌukayũ kukukayũ dak.
\m
\v 11 Ipi mug̃ẽ awap Deus g̃ebum osunuy jebekitkiyũ kay. Soat ka watwat mutabun ojuy osunuy. Deus ebekitkiyũm oꞌe ip wuykukukat Jesus Cristo kay itabut ip oꞌe buye. 
\v 12 Ixe Jesus Cristo eju mũg̃ꞌi wuyju, cekay wuyetabut puye. Imẽnpuye wuyekawẽnpi g̃u Deus eju. Wuybisũsũn g̃u kawẽn ãm ceweju. 
\v 13 Imẽnpuye eyg̃uycũg̃ g̃u epesop ipiatꞌajojom maꞌg̃u õn daomũnmũnapꞌa be. Õn ipiatꞌajojom cuk adi kawẽn idipat og̃uwẽnuwẽn eywebe buye. Õn kawẽn idipat muwẽnuwẽnap xipat osodop eywebeam. Õn daomũnmũnapꞌa be iap tak xipat eywebeam.
\p
\v 14 Apẽn Deus soat kaka watwat oꞌtaxijo jebekitkiyũm iap kay õn g̃ebum pima, ocẽg̃ꞌaecõg̃cõg̃ wuyebay wap “Ẽn soat podi ma xipat ocekay” iꞌe am cebe. 
\v 15 Deus xipan wuykug̃ iap puxim soat wuyebayũ jebekitkiyũ kug̃ xipan- -kabi beayũ, ipi dag̃ayũ dak. 
\v 16 Eywebeam õn kawẽnwẽn Deus eju. Ixe soat podi ma idip, yaꞌõbaca dak. Imẽnpuye:
\p — Bay, aꞌõbacaap cuy eg̃ũm Éfeso ka watwat pe — i õn eꞌem cebe. — Ebiõg̃buk cuy ip eyaꞌõmucan kũyjobit am ip aꞌõ kay — i õn eꞌem cebe. 
\v 17 — Cristo juy jeeku ceweju ip itabut puye ip cekay — i õn eꞌem cebe.
\m Kanabũ badi nabũ õmõmat puxim cuy epesop. Darem g̃u wararaꞌacat kug̃ epesop xipan- -soat em ma.
\p — Bay, ibuywatwan cuy ip eg̃uy xipan ip jewekuk am, yaꞌõbacaam tak ip — i õn eꞌem Deus pe. 
\v 18 — Ixeyũ juy eg̃utaybin apẽn Cristo xe ocekukpin iam — i õn eꞌem cebe. — Soat ebekitkit cuy eg̃utaybin iboam — i õn eꞌem cebe. — Soat podi ma ocekukpin exe — i õn eꞌem.
\m Apẽn Cristo xe ocekukpin iap imuweg̃ũn paꞌore ocewebe, yobog̃ cĩcã buye.
\p — Apẽn ocekukpin cexe iam cuy eg̃utaybin ip — i õn eꞌem Deus pe. 
\v 19 — Itaybit g̃u ip ikukpin cĩcã ip exe iam — i õn eꞌem cebe. — Apẽn ocekukpin exe iam ocetaybitbũt ã — i õn eꞌem cebe. — Iboam cuy ip eg̃utaybin — i õn eꞌem cebe. — Iboam ip itaybin puje, kaꞌũma kay jeꞌe ip. Icokcok cĩcã jeꞌe ip soat kukat puxim — i õn eꞌem Deus pe.
\p
\v 20 Deus pe soat iꞌe but. Wuyemuojuy bodi ma ixe iũmũm wuywebe. Wuyag̃uyg̃ebuap podi ma dak iũmũm wuywebe. Ixe aꞌõbacaap kug̃ wuyju. Ixe jaꞌõbacaam soan eꞌem wuywebeam. Imẽnpuye:
\p — Kaꞌũma ma ejoꞌiat xipacat, idipat tak — i juy ace cebe.
\m
\v 21 Soat em ma: — Kaꞌũma ma ejoꞌiat xipacat — iꞌeꞌem jeedop ip Deus pe Jesus kay itabucayũ. 
\m Imẽn iꞌeꞌem jeedop ip, soat em Jesus Cristo aꞌõ kay ip jekukuꞌukayũ. Ibuꞌu g̃u ma ip jeꞌe imẽn jeꞌe am.
\b
\c 4
\p
\v 1 Deus wararaꞌacat podi ma xipan wuykug̃. Imẽnpuye õn jeyawẽ. Daomũnmũnapꞌa be õn wuykukukat Jesus Cristo beam kapikpig̃ puye. Deus kuy juk eynaẽ jebekitkiyũm cedag̃ ma eyeku am. Ixe bikuyap tag̃ cuy epeku. 
\v 2 Yobog̃an pin g̃u juy epesop wararaꞌacat mug̃uykukuap ojuy. Eyaꞌõtareg̃ g̃u juy wararaꞌacat epejukuk. Eyukpiceg̃ẽm g̃u juy epesop wararaꞌacat kug̃. Jewebuywatwan cuy epesop. Ikukpin cuy wararaꞌacat epejukuk. 
\v 3 Deus biõg̃buk bikuyap tag̃ jekukum pima, pũg̃ tag̃ ma kuka acewag̃uyg̃uy. Kabaꞌũm cuy epeyewekuk pũg̃ tag̃ ma eyewag̃uy am. 
\v 4 Jesus kay itabucayũ pũg̃ tiwatwat ma. Pũg̃ ma omuy wuywebe ibiõg̃buk- -Deus biõg̃buk. Pũg̃at wiwim soat wuyju- -Deus xe acesop iap wiwim. Deus kuy juk wuynaẽ iboap wiwi am. 
\v 5 Pũg̃ ma wuykukukat. Pũg̃at kay wuyetabut. Pũg̃at ebekitkiyũ oceju iap mubapuk am wuymubatisasanan. 
\v 6 Pũg̃ ma Deus. Pũg̃ ma soat ebay. Ixe soat kukat. Soat kake ixe aꞌõbi. Soat tag̃ ixe kake.
\p
\v 7 Jekpiwatpin ma Cristo jaꞌõbacaap ũmũm soat pe wuywebe. Iũmũm wuywebe waraꞌat tag̃tag̃tag̃ ma kapik am cebeam. 
\v 8 Imẽn eꞌem Deus ekawẽntup:
\mi Jekay itakomaayũ oꞌg̃uꞌũmiat puxim oꞌjeu kabi kay, i. Yaꞌõbaca topibiyũ oꞌtujuu jeweju taomũnmũnayũ buxim, i. Jaꞌõbacaap oꞌg̃ũm ijodiacat pe, i.
\m
\v 9-10 Koap ixe oꞌkop. Ijodi ma oꞌkop. Ipi tẽg̃at pe oꞌkop. Oꞌkopꞌiat ma waram g̃uto oꞌjeu. Oꞌjeu kabi kay soat kukan- -ipi watwat kukan, kabi beacat kukan tak. Deus iboam wuymutaybin pin osunuy “Ixe oꞌjeu” iꞌe buje. 
\v 11 Ixe ma jaꞌõbacaap oꞌg̃ũm soat ijodiat pe. Pũg̃pũg̃ oꞌtaẽ jemumujuyũm. Wararaꞌacayũ oꞌtaẽ jekawẽn muwẽnuwẽnꞌukayũm. Wararaꞌacayũ oꞌtaẽ itabutꞌũmayũ mutabun am. Wararaꞌacayũ oꞌtaẽ itabucayũ kukayũm. Wararaꞌacayũ oꞌtaẽ itabucayũ mutaybitbitꞌukayũm. 
\v 12 Deus jaꞌõbacaap ũmũm soat pe jebekitkiyũ be jewebeam ip kapik am. Jaꞌõbacaap ũmũm cebe ip wararaꞌacayũ mutabut am Cristo kay. 
\v 13 Ixe aꞌõbacaap kug̃ pima; waraꞌat kaykaykay g̃u acesop wuyetabun- -Cristo kay acã. Jewewejoꞌi ma acesop wuyetabut cekay. Jewewejoꞌi ma acesop wuyetaybit Deus ipon. Itabunꞌisuat ekukuap puxim g̃u ajeku- -Cristo ekukuap puxim acã. 
\v 14 Bekitkit dao ma yag̃uymuwarururun. Waraꞌat kaykaykay ma ip itabut. Kabidoxixi bima kobe soat tag̃ jedekudekum tipodoyat tag̃ puye. Bekitkit puxim g̃u juy ajop- -kobe edekudekuap puxim g̃u dak. Jewag̃uymuwarururun g̃u juy ajop. Wuyetabun g̃u juy ajop wuymug̃uykukukuꞌukayũ aꞌõ kay. Cedag̃ g̃u wuymutaybin ojuy ip. Wuymutabun ojuy ip napaap kay. Wuymug̃uykuku ojuy ip kawẽn cũg̃ꞌũmat kay. 
\v 15 Icẽmãn cuy ace. Wuyewekukpin cuy acewewekuk. Cristo bikuyap tag̃ tak cuy ajeku soat em. Ixe wuyaꞌa buxim. 
\v 16 Wuyaꞌa wuyag̃uymucũg̃ucũg̃. Wuyewedap wuyjebit mucanucan. Wuyjebit tag̃ soat xipat pima, xipat ma acesop. Xipan tak wuyju aypapan. Imẽnpuxim Cristo wuykukukat. Wuyju ixe jebit tag̃at puxim. Cristo aꞌõbacaap kug̃ pima, ikukpin jewewekug̃ pima dak, big̃ ma acesop wuyetabun Jesus kay; big̃ ma ixe ekukuap puxim tak ajeku.
\p
\v 17 Imẽnpuye õn jeyawẽ wuykukukat aꞌõbi. Deus itaybitꞌũmat ekukuap puxim g̃u juy epeku g̃asũ bit. Teꞌe ma ip jewag̃uyg̃uy itabutꞌũmayũ. 
\v 18 Itaybit g̃u ip Deus ekawẽn. Kabiok tag̃tag̃ꞌukayũ buxim ip. Itaybitꞌũm cĩcã ip. Kũyjobitꞌũm cĩcã dak ip. Imẽnpuye ibuꞌu ip Deus pe jag̃uymuisunan. 
\v 19 Isũsũn g̃u ip eꞌem. Icokcok cĩcã ip ikẽrẽat mujurũg̃rũg̃ap kay. Ibikuy jĩjã ip ikẽrẽat mujurũg̃ ãm. Wuysũsũnap mujurũg̃rũg̃xi jĩjã ip.
\p
\v 20 Eyju bit imẽn g̃u jekukum, Cristo ekukuam eyetaybit puye. 
\v 21 Cedag̃ ma ixe juk adi oekuku iam kuy epeyekũyjo. Ixe eju mũg̃ꞌi wuyju jekukum. Soat em Jesus icẽmãn eꞌem iam kuy eyetaybit. 
\v 22 Kuy bima eymucokcok am acã soat pupum cuk adi epekukuku eyemumukaypinput pupum. Jewemug̃uykukukum cuk adi epekukuku ikẽrẽat mujurũg̃rũg̃. Imẽn jekukuꞌukayũ ikẽrẽ jĩjã Deus xe. Iisuat pu buje wuyju iokokat xikxig̃. Imẽnpuxim ikẽrẽm eyekukuap cuy epeyepere. 
\v 23 Eyag̃uyisum cuy epeku g̃asũ bit. Ãg̃ cuy Deus jeyag̃uymuisun. Ãg̃ cuy ixe jeyag̃uyda.
\p
\v 24 — Ocag̃uymuisun cuy ece — i juy epeꞌe Deus pe.
\m Eyag̃uyisum jekukum pima Deus ekukuap puxim epeku. Kawẽn icẽmat tag̃ epeku. Cũg̃ ma dak epeku. Ikẽrẽat tak epeg̃ug̃ẽ g̃u.
\p
\v 25 Imẽnpuye napa g̃u juy epeꞌeꞌe. Soat wuyju ikitpitpiyũ Cristo jebitꞌin wuyju buye. Imẽnpuye icẽm acã epeꞌeꞌe eyewewebe. 
\v 26 Ikẽrẽat epeg̃ujurũg̃ g̃u juy eyetakomaap pibun. Kabiabun g̃u juy eyetakomaap epejukuk. Dao ma juy epedidin. 
\v 27 Ibiõg̃buk kẽrẽayũ kukukat pe juy jeymug̃uykukuan g̃u ikẽrẽat mujurũg̃ ãm. 
\v 28 Ibukuruk tũibit ibukurug̃ g̃u juy jeenuy g̃asũ bit. Jekapik cuy g̃asũ bit jebubut pu am, cedag̃ ma jeku am. Ibukapig̃ cuy jeenuy ikug̃ꞌũmat puywat am tak. 
\v 29 Eyekawẽnkẽrẽm g̃u juy epesop- -eyekawẽntim acã. Eyekawẽntim pima xipat jeꞌe eyekawẽn cocoꞌukayũ be. Big̃ ma ip jeedop itabut Cristo kay. Jemumukaypinput ip jeejat Deus xewi. 
\v 30 Deus biõg̃buk ikẽrẽat kug̃ g̃u. Soat tag̃ iisu. Ixe juy epeg̃ug̃uycũg̃ g̃u. Soat eyju eyetaybit oceju Deus ebekitkiyũ iam, Deus biõg̃buk omuy eywebe buye. Ixe wuywebe buye, wuyetaybit g̃uyjom ikẽrẽat kug̃ g̃u acesop iam, Deus coꞌiayũm acesop iam. 
\v 31 Eyaꞌõpurug̃ wararaꞌacat kug̃ap cuy epeyepere. Eysapkaꞌorem g̃u dak cuy epesop. Eyetakomãm g̃u dak cuy epesop. Eyaꞌõberen g̃u dak cuy epeyekawẽnwẽn wararaꞌacat kay. Wararaꞌacat epejomuymuy g̃u dak cuy. Ikẽrẽm g̃u dak cuy wararaꞌacat epejukuk. 
\v 32 Xipan cuy wararaꞌacat epejukuk. Eyaꞌõdidin cuy wararaꞌacat epejukuk. Deus g̃ebum g̃u apẽn cuk adi ikẽrẽat ag̃ujurũg̃rũg̃iap kay, Cristo wuywebewi ikẽrẽat uk am oeꞌũ buye. Ixe buxim cuy epeyeg̃ebu g̃u apẽn waraꞌacat cuk adi ikẽrẽm eykuk iap kay.
\b
\c 5
\p
\v 1 Deus ebekitkiyũ eyju. Eykukpin cĩcã cexe. Imẽnpuye ixe ekukuap coꞌi juy epeku. Xipan cuy epeyewekuk. 
\v 2 Wũnca ũmũmꞌuk osodop ip kuyjeayũ paĩ be Deus mucokcok am; Deus pe ikẽrẽat ukꞌukapteim tak. Imẽnpuxim Cristo jekpiwatpin ma oeꞌũ ikẽrẽat uk am wuywebewi. Deus icokcok osunuy ixe eꞌũap kay. Ixe eꞌũap teꞌokuap puxim osunuy Deus xe. Apẽn ixe wuykug̃ iap puxim cuy epeyewekuk xipan.
\p
\v 3 Deus ebekitkiyũ eyju. Imẽnpuye wararaꞌacat tayxi kaykay g̃uu juy epesop- -pũg̃ em tak kaꞌũma, wararaꞌacat itop kaykay g̃u dak. Wuysũsũnap cuy epeg̃ug̃ẽ g̃u- -pũg̃ em tak kaꞌũma. Eyetabikukum g̃u juy epesop wararaꞌacat pubut kay. Iboam tak cuy epeyekawẽn g̃u. 
\v 4 Eyekawẽnkẽrẽm g̃u juy epesop. Teꞌem g̃u dak cuy epeyekawẽnwẽn. Eyekawẽnwẽn. Eyekawẽnxim g̃u dak cuy epesop.
\p — Bay, soat podi ma ẽn xipat — i bit cuy epeꞌe Deus pe soat em. 
\m
\v 5 Cristo ebekitkiyũm g̃u bit jeꞌe ip aoyũ xiayũ, ag̃okatkayũ xiayũ dak; wuysũsũnap mug̃ẽg̃ẽꞌukayũ dak; itabikukuayũ dak. Deus ka be ip jeõm g̃u. Wuyetabikukuap deusbaroyũ kay wuyetabucap coꞌi ikẽrẽ Deus xe.
\p
\v 6 Deus jetakomaap g̃ubapuk jaꞌõ kay kũyjobitꞌũmayũ be. Ipiat supiꞌajoat cebe ip kũyjobitꞌũm puye. Imẽneju eydayꞌemꞌum cuy epesop teꞌe ma kawẽnwẽnꞌukayũ be eymug̃uykukuap puxim. 
\p — Deus ipiat supiꞌajoat g̃u wuywebe ikẽrẽat mug̃ẽg̃ẽm maꞌg̃u wuyju — i teꞌe ma eꞌem ip. 
\m
\v 7 Ixeyũ kay g̃u juy eybureyũm. 
\v 8 Ikẽrẽat mujurũg̃rũg̃ cuk adi epekuku kuy bima kabiok tag̃tag̃ꞌukat puxim. G̃asũ bit wuykukukat ebekitkiyũm epesop. Kabia dag̃ jekukuꞌukat puxim eyju g̃asũ bit. Kabia dag̃ jekukuꞌukat ekukuap tag̃ cuy epeku. 
\v 9 Kabia dag̃ jekukuꞌukat xipacat mujurũg̃rũg̃. Cũg̃ ma ip jekukum. Icẽmãn ip kawẽnwẽn. 
\v 10 Eyetaybin cuy epesop wuykukukat mucokcok am. 
\v 11 Warẽmtag̃ jekukuꞌukayũ burem g̃u juy epesop- -kabiok tag̃tag̃xiayũ burem g̃u. Ixeyũ juy epeyawẽ cedag̃ ma jeku am kabia dag̃ jekukuꞌukat puxim. 
\v 12 Wuybisũsũn cĩcã apẽn ip ibaꞌarẽm ikẽrẽat mujurũg̃rũg̃ iap muwẽn ãm. 
\v 13 Kabia kay warẽmtaksug̃at tojot puje wuyetaybit ajo ijop iam. Imẽnpuxim Cristo kay ixeyũ dojot puje wuyetaybit ikẽrẽat kug̃ joyũku iam. 
\v 14 Cristo kay wuyetabut pima kabia dag̃ jekukuꞌukayũ puximayũm acesop. Imẽnpuye kuyjeayũ eꞌem:
\mi Ixecat, ecewurũg̃ cuy, i. Ceꞌũꞌũayũ dopdopap pewi juy eceu, i. Cristo jeymukabia, i.
\m Cristo wuymukabiaham Cristo wuymuisusun iape.
\p
\v 15 Imẽneju g̃ebum cuy epesop eyekukuap kay warẽmtag̃ eyekuap puxim. Eyag̃uyꞌũm g̃u juy epesop. Eyag̃uybabim ma juy epesop. 
\v 16 Kabia mupaꞌũmꞌũm g̃u juy epesop, g̃asũacat ikẽrẽat mujurũg̃rũg̃ cĩcã buye. 
\v 17 Eybidaodao g̃u juy epesop. Eyetaybin pit cuy epesop apẽn wuykukukat ibikuy eyekuam iam.
\p
\v 18 Jewemukaꞌoꞌon g̃u juy epesop. Eykaꞌoꞌo bima itabidaoayũ buxim eyju. Ãg̃ cuy Deus biõg̃buk pit jeyag̃uydada. 
\v 19 Davi pibodo juy jebibododon epesop awerom pima. Jebibododon tak cuy epesop “Cristo soat podi ma xipat” iꞌe pin pima wuykukukat pe; “Ocecokcok cĩcã oceju ebekitkit puye” iꞌe pin pima dak cebe; “Cristo acã ocekukukat” iꞌe pin pima dak; eycokcok pima dak Cristo kay eyetabut puye; “Ẽn xipat cĩcã” iꞌe pin pima dak cebe. Jebibododon cuy epesop eycokcokap mubapuk am wuykukat pe.
\p
\v 20 — Soat em ẽn xipan ocekug̃, ocekukukat Jesus Cristo xe ocekukpin puye — i juy epeꞌe Deus pe- -wuyebay be.
\m Imẽn cuy epeꞌe cebe, xipacat jebapukpug̃ eywebe bima, xipatꞌũmat jebapukpug̃ pima dak. 
\v 21 Soat eyju ibuyxim Cristo kug̃. Imẽnpuye kũyjobin cuy epesop eyewaꞌõ kay.
\p
\v 22 Tũꞌũꞌũyũ, kũyjobin cuy epesop eyitopyũ aꞌõ kay wuykukukat aꞌõ kayap puxim. 
\v 23 Apẽn Cristo itabucayũ kukat iap puxim ag̃okatkat tak jetayxi kug̃. Cristo itabucayũ daxijojoꞌukat. Itabucayũ ixe jebit puxim. 
\v 24 Imẽneju juy itabucayũ kũyjobit Cristo aꞌõ kay. Imẽnpuxim aoyũ dak cuy jeedop jektop aꞌõ kay.
\p
\v 25 Tapupuyũ, xipan cuy eytayxiyũ epejukuk apẽn Cristo xipan itabucayũ kug̃ iap puxim. Jekpiwatpin ma oeꞌũ cebeam ip. 
\v 26 Oeꞌũ itabucayũ be Deus bikuyap tag̃ jeku am. Itabucayũ oꞌg̃uisun jekawẽn kay kũyjobit am. Oꞌg̃uisun ip apẽn wuyju idibim jewebuwuywuy iap puxim. 
\v 27 Oꞌg̃uisun ip “Eyju eydip cĩcã oxe” iꞌe am cebe ip. Cristo imẽn jeꞌe cebe ip jexe yajẽm puje. Soat tag̃ iisu jeꞌe ip ixe xe yajẽm puje. Ikẽrẽat kug̃ g̃u ip jeꞌe. Iokokat kug̃ g̃u dak jeꞌe ip- -idipat kug̃ acã. Soat tag̃ xipat jeꞌe ip. Xipatꞌũmat kug̃ g̃u dak jeꞌe ip- -pũg̃ tak kaꞌũma. 
\v 28 Ag̃okatkat cuy xipan jetayxi jukuk xipan jewekukap puxim. Xipan jetayxi kug̃at xipan tak jewekug̃. 
\v 29 Kaꞌũma ma xipanꞌũm jejebit kug̃. Jewemuykõnkõn wuyju. Xipan wuyju wuyjebit kug̃. Imẽnpuxim Cristo xipan itabucayũ kug̃. 
\v 30 Wuyju Cristo jebit puxim. Apẽn xipan wuyjebit kug̃ iap puxim xipan cuy acewewekuk. 
\v 31 Imẽn eꞌem Deus ekawẽntup:
\mi Imẽneju ag̃okatkat jebay iwaciwan, jexi iwaciwan tak jetayxi xe jeenuy am, i. Pũg̃ tag̃ ma ip oꞌe xepxepayũ, i.
\m
\v 32 Iboaptup ekawẽn icẽmãn wuymutaybitbin. Wuymutaybitbin apẽn Cristo xipan itabucayũ kug̃ iam. 
Iboap ibaꞌarẽm osodop wuyxe kuyje. G̃asũ bit ibapuk oꞌe wuywebe. Imẽnpuye juy iboap ekawẽn tag̃ cuy aceku. 
\v 33 Iboaptup ekawẽn wuymutaybitbin apẽn cuy ajeku iam tak. Ag̃okatkat cuy xipan jetayxi jukuk xipan jewekukap puxim. Ayacat tak cuy ibuyxim jektop jukuk.
\b
\c 6
\p
\v 1 Bekitkit, kũyjobin cuy epesop eyebay aꞌõ kay, eyxi aꞌõ kay dak. Cedag̃ ma eywebe ixeyũ aꞌõ kay am, wuykukukat Jesus ikukpin eyxe buye. 
\v 2 “Ibuyxim cuy eyebay epejukuk, eyxi dak” iꞌe buje, “Xipan õn tak jeykuk apẽn cuk adi oceceiap tag̃” i dak oꞌe Deus. Waraꞌan yawẽwẽm pima:
\p — Xipan õn tak jeykuk — iꞌũmg̃u oꞌe. 
\v 3 — Ibuyxim cuy eyebay epejukuk, eyxi dak xipan eydop am, ibun eydop am ipi ju — ioꞌe Deus wuyawẽwẽm.
\p
\v 4 Cebayũ, eyaꞌõpurug̃ g̃u juy eyekpotpoyũ epejukuk ixeyũ mubuꞌunap puxim eyaꞌõ kay. Ixeyũ bit cuy epeg̃utaybitbin wuykukukat Jesus bikuyap tag̃ ceku am iam. Warẽmtag̃ ip ceku buje juy epeg̃ukorẽm.
\p
\v 5 Teiꞌũm kapikpikꞌukayũ, kũyjobin cuy epesop eyekariwa aꞌõ kay- -ijodiat aꞌõ kay. Eypararam cuy epesop “Ap” iꞌe am cebe ip. Eyekariwa aꞌõmupubutbun g̃u juy epesop. Jewexe g̃u juy kũyjobin epesop yaꞌõ kay ip- -icẽmãn. Ixeyũ aꞌõ kay kũyjobin pima, Cristo aꞌõ kay dak eyju kũyjobit. 
\v 6 Eyekariwa eyjojom pima acã g̃u juy xipan epeyekapik- -eyjojomꞌũm pima dak. Eyekariwa be “Ẽn xipat” iꞌeap kudadam g̃u juy xipan epeyekapik. Eycokcokap kug̃ cuy epeyekapik cebeam ip. Deus bikuyap tag̃ cuy epeku wuykukukat Jesus peam kapikpikꞌukat puxim. 
\v 7 Eycokcog̃ cuy epeyekapik.
\p — Ijodiat peam acã g̃u õn kapikpig̃- -okukukat peam tak- -kabi beat peam tak — i juy epeꞌeꞌe eywebe ma.
\m
\v 8 Wuykukukat xipacat jeꞌg̃ũm soat pe xipan kapikpikꞌukayũ be xipan kapikpikapteim- -kariwayũ be, teiꞌũm kapikpikꞌukayũ be dak. Warẽmtag̃ kapikpikꞌukayũ bit warẽmtag̃ ma jeꞌjat. G̃ebum cuy epesop iboap kay.
\p
\v 9 Kariwawayũ, xipan cuy eywebeam kapikpikꞌukayũ epejukuk. Imuparararan g̃u juy ip epejukuk. Eyju, eywebeam kapikpikꞌukayũ dak wuykukukat ebekitkiyũ- -kabi beat ebekitkiyũ. Wuykukukat pũg̃ pe ma soat kug̃ xipan. Eyag̃uybaꞌũm g̃u juy iboap kay.
\p
\v 10 Wuykukukat soat podi ma yaꞌõbaca. Kaꞌũma ma ixe joꞌiat yaꞌõbacaat. Ixe aꞌõbacaap cuy epejat. Ikug̃ pima ceweju mũg̃ꞌi epeku. 
\v 11 Sorarayũ kukat icaat ũmũm jebekitkiyũ be yaokaap puxim. Cesay icaat ũmũm cebe ip. Payao buximat ũmũm tak. Imẽnpuxim Deus jaꞌõbacaap ũmũm wuywebe xipan wuyeku am. Imẽnpuye: — Aꞌõbacaap cuy eg̃ũm owebe — i juy epeꞌe Deus pe.
\m Ixe aꞌõbacaap kug̃ cuy epeku ibiõg̃buk kẽrẽayũ kukukat aꞌõ kayap puxim. 
\v 12 Sorarayũ ma jenopag̃õg̃õm ijodiat eju yaꞌõbacaap muꞌũm ojuy. Wuyju bit Deus kayꞌũmayũ aꞌõbacaap muꞌũm ojuy jekukum. Kabiokbog̃ tag̃ jekukuꞌukayũ aꞌõbacaap muꞌũmap ojuy wuyju jekukum. Ipi dag̃ g̃u ip jekukum- -kabi be ma. Ade jĩjã ip. Itakoma jĩjã ip wuykay. Wuymuyꞌũ pin ip. Ixeyũ aꞌõbacaap muꞌũmap ojuy wuyju jekukum. 
\v 13 Imẽneju, Deus aꞌõbacaap cuy epejat sorarayũ be icaat puap puxim. Deus aꞌõbacaap kug̃ pima, ikẽrẽat mug̃ẽg̃ẽꞌukayũ jeꞌe g̃u wuywebe. Wuykay itakomaayũ dak kuka wuyaoka g̃u. Wuypararam g̃u dak kuka ace cebuxim ip. Wuyetabucap kuka acepere g̃u dak.
\p
\v 14 Sorara buxim cuy epeku soat icaat kukat puxim. Icaat muõm pin pima, sorara jesay mukirikirig̃ jekpumũnpum. Imukirikꞌũm pima, ibaꞌore kuka oꞌe icaat muõm ãm. Icẽmãn cuy epeyekawẽn. Icẽmãn kawẽnwẽn pima, jekpumũnpu kukat puxim kuka ajop. Icẽmãn cuy acekawẽn wararaꞌacat pe wuymuymuyap puxim. Cedag̃ ma juy epeku. Cedag̃ ma jekukum pima, jekũmꞌa eju icaat kukat puxim kuka ajop. Cedag̃ ma juy ajeku wararaꞌacat pe wuykukukat Jesus muymuyap puxim. 
\v 15 Eycokcog̃ cuy epesop kawẽn idipat muwẽn ãm wararaꞌacat pe. Imuwẽn puꞌuꞌũm pima, jei be icaat kukat puxim kuka ajop. 
\v 16 Eyetabun cuy epesop Jesus kay. Cekay wuyetabut pima, jewap icaat kukat puxim kuka ajop. Sorarayũ isopat kug̃ osodop jedopꞌabi be waraꞌat kadiacat wũywũy ãm. Imẽnpuxim ikẽrẽat mujurũg̃rũg̃ꞌukayũ kukukat wuykaykay jĩjã wuymubuꞌunap ojuy Jesus kay. Jesus kay wuyetabut pima bit, wuymubuꞌun paꞌore kuka oꞌe cebe. 
\v 17 G̃uyjom Jesus coꞌiayũm acesop Deus wuydaxijojom puye. Iboap cuy epejowiwi jĩjã. Iboap wiwim pima, jabe icaat kukat puxim kuka ajop. Sorara jepayao kug̃ osunuy jaokaap puxim. Deus ekawẽn payao buxim. Deus biõg̃buk jekawẽn ũmũm wuywebe ikẽrẽat kukap puxim. Cekawẽn kay g̃ebum pima, payao kukat puxim kuka ajop. 
\v 18 Kawẽnwẽnꞌug̃ cuy epesop Deus eju. Wuybuywatwacap cuy epejoojuy cexewi. Soat em cuy epeyekawẽnwẽn ceweju. Kawẽnwẽn pima, ãg̃ cuy Deus biõg̃buk jeyag̃uydada. Ceweju kawẽnwẽn pima, xexen g̃u juy epesop, eyetabẽg̃ ma. Eybuꞌum g̃u juy epesop kawẽn ãm ceweju. Soat em cuy epeyekawẽnwẽn Deus eju. Soat peam cuy epeyekawẽn cebekitkiyũ beam. 
\v 19 Owebeam tak cuy epeyekawẽn ceweju.
\p — Bay, Paulo juy eg̃utaybin kawẽn muwẽn ãm — i juy epeꞌeꞌe Deus pe. — Ixe juy eyaꞌõmucanucan ipararaꞌũma kawẽn idipat muwẽn ãm — i dak cuy epeꞌeꞌe cebe. 
\m Iboap ekawẽn ibaꞌarẽm osodop kuy bima. G̃asũ bit ibapuk oꞌe. 
\v 20 Wuykukukat Jesus aꞌõbuywatwatꞌukat õn. G̃asũ bit õn daomũnmũnapꞌa be, kawẽn idipat muwẽnuwẽn ojekuku buye. Imẽnpuye owebeam cuy epeyekawẽnwẽn Deus eju.
\p — Bay, aꞌõbacaap cuy eg̃ũm Paulo be yaꞌõcam ekawẽn muwẽn ãm — i juy epeꞌe cebe.
\p
\v 21 Wuykitpit Tícico wawẽg̃ g̃uwẽn eywebe. Eyetaybin cuy epesop apẽn õn eꞌem iam. Ixe Tícico ikukpin cĩcã wuyxe. Soat em kapikpig̃ wuykukukat peam. Waraꞌat kaykaykay g̃u itabut- -wuykukukat kay acã. 
\v 22 Imẽnpuye ixe og̃uju eykay. Ixe apẽn oceju iap g̃uwẽn eywebe. Ocawẽg̃ tobuxik puje eycokcok epesop.
\p
\v 23 Deus eju õn kawẽnwẽn eywebeam- -wuyebayat eju.
\p — Éfeso ka watwat ag̃uymubabibin cuy eg̃uy — i õn eꞌem cebe. — Esubuywan cuy ip xipan jewekuk am — i õn eꞌem cebe. — Esubuywan cuy ip big̃ ma itabut am Jesus kay — i õn eꞌem cebe.
\m Imẽn õn eꞌem Deus pe, wuykukukat Jesus Cristo be dak.
\p
\v 24 — Bay, xipan cuy soat epejukuk wuykukukat kayayũ, Jesus Cristo kayayũ- -soat em Jesus kay g̃ebumayũ — i õn eꞌem Deus pe.
\m Ibũrũ ma.