\id PHP Mundurukú [myu] NT (Brazil) -2010 bd. 
\h Filipenses
\toc1 Filipos ka watwat peaptup
\toc2 Aos Filipenses
\mt FILIPOS KA WATWAT PEAPTUP PAULO EMUDUPMUBARARAKTUP
\c 1
\p
\v 1 Filipos ka watwat, cartadup mubarararag̃ õn eywebeaptum- -Jesus kayayũ beaptum. Õn Paulo. Tupmubarararag̃ õn Timóteo eju. Jesus peam kapikpikꞌukayũ oceju. Eyju Deus ebekitkiyũ, Jesus Cristo eju mũg̃ꞌi eyju jekukum puye. Cartadup mubarararag̃ õn eywebeaptum, eykukukꞌukayũ beaptum tak, eybuywatwatꞌukayũ beaptum tak, eybuywatwatꞌukayũ beaptum tak.
\p
\v 2 — Bay, xipan cuy Filipos ka watwat ejukuk — i õn eꞌem Deus pe- -wuyebay be, Jesus Cristo be dak- -wuykukukat pe. — Ixeyũ ag̃uymubabibin cuy eg̃uy — i õn eꞌem cebe ip.
\p
\v 3 Õn g̃ebum eykay bima soat em:
\p — Bay, ẽn xipat cĩcã, soat em ẽn xipan Filipos ka watwat kug̃ puye — i õn eꞌem Deus pe.
\m
\v 4-5 Õn kawẽnwẽn Deus eju eywebeam- -soat peam. Õn eyka be bima juk adi obuywatwan cĩcã epesop owebe kawẽn idipat muwẽn ãm. Imẽnpuye ocokcok cĩcã kawẽn ãm Deus eju eywebeam. Koap pima juk adi obuywatwan epesop- -õn kawẽn idipan eymukũyjojom pima. Soat em cuk adi obuywatwan epesop owebe kawẽn idipat muwẽn ãm. 
\v 6 Jesus kay eyetabut pima Deus adi eydaxijojom oꞌe. G̃asũ dak soat kabia ma eydaxijojom. Waram Jesus Cristo ajẽmap kabia be bit eydaxijojoap jepere. Wetaybit cĩcã iboam. 
\v 7 Apẽn ixe xipan okug̃ iap coꞌi ma eyju dak Deus xipan eykug̃. Eyju juk adi obuywatwan epesop “Kawẽn idipat icẽmãn” i õn eꞌem pima itabut pinꞌũmayũ be, “Kawẽn idipat kay eyetabun cuy epesop” i õn eꞌem pima dak itaybitꞌũmayũ be. G̃asũ dak eyju obuywatwat daomũnmũnapꞌa be maꞌg̃u õn. Imẽneju soat em õn g̃ebum eykay. Eykukpin cĩcã dak oxe. 
\v 8 Apẽn Jesus Cristo xe eykukpin iap coꞌi oxe dak eykukpin cĩcã. Eykukpin cĩcã oxe Jesus Cristo juk omutaybitbitbin owebe eykukpin am puye. Deus itaybit icẽmãn õn eꞌem iam.
\p
\v 9 Õn kawẽnwẽn Deus eju eywebeam big̃ ma xipan eyewekuk am, big̃ ma eyetaybit am tak apẽn Deus eꞌem wuywebe iam, big̃ ma eyetaybit am tak apẽn xipat Deus xe iam, apẽn xipat g̃u cexe iam tak. 
\v 10 Deus pe imẽn eymukũyjo buje, soat podi ma xipacap ibapuk jeꞌe eyxe. Iboap acã epejukuk. Imẽnpuye waram Cristo ajẽm puje ikẽrẽat kug̃ g̃u epesop. Soat tag̃ eyisu epesop. Eysũsũn g̃u epeꞌe Deus kay eyebapuk am. 
\v 11 Idipat acã epejukuk eyweju, Jesus Cristo jaꞌõbacaap ũmũm eywebe buye. Ixe aꞌõbi acã eyju xipacat mujurũg̃rũg̃. Imẽn eyeku buje: 
\p — Ẽn xipat cĩcã ocexe, ebekitkit cũg̃ ma jekukum puye — i jeꞌe ip Deus pe eyjojoꞌukayũ.
\p — Kaꞌũma ma ejoꞌiat xipacat — i jeꞌe ip cebe.
\p
\v 12 Okitpitpiyũ, warẽmtag̃ ma juk adi ip okuk itabutꞌũmayũ. Inaka oparara g̃u ma juk adi oce kawẽn idipat muwẽn ãm. Big̃ ma õn imuwẽnuwẽn soat pe. Imẽnpuye wararaꞌacayũ itabucayũ dak big̃ ma imuwẽnuwẽn oꞌe. Imẽnpuye adeayũ dak oitaybitbitbin kawẽn idipan. G̃asũ õn iboam jeymukũyjo. 
\v 13 Teꞌe ma juk ip omuõm daomũnmũnapꞌa be Cristo eju kapikpikꞌukat õn puye. Soat ma juk aꞌg̃u ip itaybit osodop iboam iecug̃ap tukꞌa wiwiꞌukayũ. Wararaꞌacayũ dak cuk aꞌg̃u itaybit osodop iboam ijopka beayũ. 
\v 14 Obisũsũn g̃u kawẽn idipat muwẽnuwẽn daomũnmũnapꞌa be maꞌg̃u õn. Imẽnpuye ade wuykitpitpiyũ big̃ ma itabut oꞌe wuykukukat kay. Iparara g̃u oꞌe ip kawẽn idipat muwẽn ãm. Ibisũsũn g̃u oꞌe ip Jesus ekawẽn muwẽn ãm. Big̃ ma ip imuwẽnuwẽn oꞌe. 
\v 15-18 Pũg̃pũg̃ ixeyũꞌin Cristo muwẽnuwẽn itabutkarey ip okay buye; waꞌõxik ojuy ip puye dak. Cristo muwẽnuwẽn ip xipacap kayap tomuju g̃u. Wararaꞌacat kay g̃u ip g̃ebum. Jewekay acã ip g̃ebum. Imuwẽnuwẽn ip waꞌõbacaap podi ma e ojuy.
\p — Cristo muwẽnuwẽn pima, kuka Paulo bodi ma ocaꞌõbacaap kug̃ oceꞌe — i teꞌe ma eꞌem ip. 
\m Tũybe Paulo ig̃uycũg̃ jeꞌe daomũnmũnapꞌa be ocawẽg̃ cocom pima iãn oꞌe ip. Imẽnpit omug̃uycũg̃ paꞌore cebe ip imẽn eꞌem pima.
\p Wararaꞌacayũ bit Cristo muwẽnuwẽn xipacap tomuju. Ixeyũ xe okukpin. Itaybit ip Deus aꞌõbi õn kawẽn idipat muwẽnuwẽn iam. Õn pit ocokcok soat ip Cristo muwẽnuwẽn puye- -xipatꞌũmap kayap tomuju ma, xipacap kayap tomuju dak. Big̃ ma jeꞌe ocokcokap tak. 
\v 19 Jesus Cristo biõg̃buk nuynuy owebe obuywatwan. Eyju dak kawẽnwẽn Deus eju owebeam. Imẽneju wetaybit daomũnmũnapꞌa bewi omujẽm ip iam. Imẽnpuye ocokcokap iꞌũm g̃u. Bodinmaku ocokcokap jeku yobog̃ ma. 
\v 20 Obikuy jĩjã Cristo bikuyap tag̃ weku am. Weku pin ixe bikuyap tag̃ acã soat em. G̃asũ bit aꞌg̃u oce waꞌõca pin ixe ekawẽn tag̃ weku am soat em. Soat tag̃ iꞌe pin õn ibuyxim Cristo kuk am wetabẽg̃ pima, weꞌũ buje dak. 
\v 21 Ajo xipat ijodi bima oxe? Cristo acã xipat oxe. Weꞌũ buje dak soat podi ma xipacap ojukuk ixe xe acã soat em ma og̃uy buye. 
\v 22 Wetabẽg̃ pima bit kuka wekapik put oce Cristo beam. Wetait pima kuka oꞌe itabut wararaꞌacayũ Cristo kay wekawẽn co buje. Apẽg̃ap xeꞌe xipat oxe? Wetabẽg̃ap? Pãm g̃uto weꞌũap i xeꞌe? Wetaybit g̃u oweweju bit. 
\v 23 Wetaybit g̃u buk apẽg̃ap g̃u paxi xipat iam. Weꞌũ buje dak xipat ma owebe soat em Cristo xe og̃uy buye. Ixe xe bima soat podi ma idipat kug̃ og̃uy. 
\v 24 Wetait pima bit xipat kuka oꞌe eywebeam. Wetait pima eybuywan mabuk kuka õn. 
\v 25 Wetaybit eyxe og̃uy eybuywat am big̃ ma eyetabut am Jesus kay iam. Õn eyxe bima, big̃ ma eycokcok epeꞌe kũyjobit am ixe aꞌõ kay. 
\v 26 Waram eykay oajẽm puje, eycokcok epeꞌe okay xipat cĩcã õn eywebeam puye. Eycokcok cĩcã epeꞌe okay, Jesus Cristo eju mũg̃ꞌi eyju jekukum puye. 
\v 27 Cristo ekawẽn tag̃ cuy epeku- -kawẽn idipat tag̃. Ixe ekawẽn tag̃ eyeku buje, wetaybit oce eyetabut cĩcã pũg̃at kay- -Jesus kay iam. Wetaybit oce iboam waram eyjom oajẽm puje, oajẽmꞌũm pima dak. Wetaybit oce soat eyju pũg̃ tag̃ ma soat kay jewag̃uyap muwebotbon iam, soat eyju jewebuywatwan kawẽn idipat muwẽn pin cĩcã buye itaybitꞌũmayũ be iam tak. Kawẽn idipat co buje acã kuka wuyetabut ajop Jesus kay. 
\v 28 Eypararam g̃u juy epesop eykay itakomaayũ buxim. Deus ixeyũ bodi ma yaꞌõbaca. Imẽnpuye eyaꞌõcam cuy epesop soat em. Eypararaꞌũm pima bit itaybit jeꞌe ip itabutꞌũmayũ Deus ocemuju ipiatꞌajojoap kay iam. Yaꞌõkayayũ bit taxijo iam tak itaybit jeꞌe ip. Deus acã eydaxijojom soat em tũy ãm cexe. 
\v 29 Deus cuk eynaẽ Cristo be kapikpikꞌukayũm. Ixe beam kapikpig̃ eyju ixe kay eyetabut puye. Inaka ixe beam kapikpig̃ pima dak ipiat cuy epesupiꞌajo ma Deus aꞌõbi. 
\v 30 Kuy bima itabutꞌũmayũ juk adi ipiat oꞌsupiꞌajojoat owebe, õn Cristo muwẽnuwẽn puye. Kuy eyetaybit iboam. G̃asũ dak ipiatpiꞌajojoan ip owebe. Apẽn owebe juk adi ipiat oꞌsupiꞌajoat ip iap puxim eywebe dak ipiat supiꞌajoat ip eyju Cristo muwẽnuwẽn pima.
\b
\c 2
\p
\v 1 Eyju eyaꞌõca Cristo eju mũg̃ꞌi eyju jekukum puye. Eycokcok eyju eꞌem ixe xe eykukpin puye. Deus biõg̃buk nuynuy soat pe eywebe eymukũyjojom. Xipan ma eyju eꞌem eyewewekug̃. Eyetabotaidabotbot eyewewekay. 
\v 2 Imẽneju jewag̃uycocom cuy epesop eyeweweju. Ikukpin tak cuy epeyewekuk. Pũg̃ kay dak cuy epesop g̃ebum. Imẽn ma juy õn eyawẽwẽm. Imẽn eyeku buje ocokcok cĩcã oce eykay. 
\v 3 Jewewekay at g̃u juy epesop g̃ebum- -wararaꞌacat kay dak. Wararaꞌacayũ be “Xipat cĩcã eyju” iꞌeꞌeap epejokudada g̃u dak cuy. Yobog̃an pin g̃u dak cuy epesop.
\p — Wararaꞌacat obodi ma xipat — i dak cuy epeꞌeꞌe eywebe ma.
\m
\v 4 Ajo kuka oꞌe xipat ocewebeam iap kay at g̃u juy epesop g̃ebum. Ajo kuka oꞌe xipat wararaꞌacat peam iap kay dak cuy epesop g̃ebum.
\p
\v 5 Jesus Cristo ekukuap puxim cuy epekuku.
\q
\v 6 Ixe Jesus Cristo soat em Deus coꞌian osunuynuynuy. Inaka “Soat em cuy ejoꞌian og̃uy. Ipi juan g̃u juy oce,” iꞌũmg̃u oꞌe jebay be.
\q
\v 7 Jekpiwatpin ma bit ixe soat oꞌsuiwat ikug̃ osunuyiat ipi juan am. Wararaꞌacat puywatwatꞌukan oꞌjewexat. Ag̃okatkat puximan oꞌjewexat. Ipi juan oꞌjewexat.
\q
\v 8 Yaꞌõca pin g̃u oekukuku. Soat em Deus aꞌõ kay kũyjobit osunuynuynuy. Kũyjobit osunuy jeꞌũ ãm tak. Korosa be ma oeꞌũ ikẽrẽat mug̃ẽg̃ẽꞌukat puxim.
\q
\v 9 Imẽneju Deus ixe oꞌg̃uyu jewekay. Oꞌg̃uyu jag̃uywag̃õm soat kukukꞌukan. Ixe oꞌjomuy wararaꞌacat podi ma yaꞌõbacaan.
\q
\v 10 Imẽnpuye soat ma jẽg̃ꞌaecõg̃cõg̃ ip Jesus wap- -kabi beacayũ, ipi juacayũ dak, ceꞌũꞌũꞌibiyũ dak. Jẽg̃ꞌaecõg̃cõg̃ ip kũyjobit am yaꞌõ kay.
\q
\v 11 “Jesus Cristo acã ocekukukat” i jeꞌe ip soat pe. Imẽnpuye Deus soat podi ma yaꞌõbaca iap ibapuk cĩcã jeꞌe soat xe- -wuyebayat soat podi ma yaꞌõbaca iap.
\p
\v 12-13 Oburereyũ, eykukpin cĩcã oxe. Õn eyxe bima soat em cuk adi kũyjobit epesop waꞌõ kay. Wũy õn pima dak cuy waꞌõ kay epesop kũyjobin. Deus soat em jaꞌõbacaap ũmũm wuywebe wuymubikuy am ixe bikuyap tag̃ wuyeku am. Jaꞌõbacaap ũmũm wuywebe ixe ag̃uy dag̃ wuyag̃uy am. Imẽnpuye yaꞌõbacaap cuy epejoojuy cexewi ixe be eydaxijojoap epere am. Kũyjobin cuy epesop yaꞌõ kay. Eypararam cuy epesop “Ap” iꞌe am cebe.
\p
\v 14 Mãmãmãm g̃u juy epesop Deus kay. Jewaꞌõxikxig̃ g̃u dak cuy epesop. 
\v 15 Ikẽrẽat mug̃ẽg̃ẽꞌukayũ parakpe eyju nuynuy- -warẽmtag̃ ma jekukuꞌukayũ parakpe- -Deus aꞌõmpubutbunꞌukayũ parakpe. Eyju bit Deus ebekitkit. Ikẽrẽat kug̃ g̃u eyju. Imẽnpuye Deus ebekitkit ekukuap puxim cuy epekuku. Soat etabutpe cedag̃ cuy epekuku ixeyũ be eymuymuyap puxim. Kasopta tabapuk cĩcã kabiok pima. Imẽnpuxim eyju dak Jesus Cristo bikuyap tag̃ jekukum pima, cũg̃ ma eyju jekukumap ibapuk cĩcã jeꞌe itabutꞌũmayũ xe. 
\v 16 Wuymutaicinap ekawẽn cuy epeg̃uwẽnuwẽn ixeyũ be. Cedag̃ eyju jekukum pima, ocokcok cĩcã oce eykay waram Cristo ajẽmap kabia be. Wetaybit tak oce teꞌe g̃u juk adi õn og̃uy eymutaybitbitbin iam.
\p
\v 17 G̃axĩn ma acoꞌi itabutꞌũmayũ oaoka. Odoymukereren ip. Deus pit icokcok jeꞌe weꞌũap kay apẽn kuyjeayũ wũnca oꞌg̃ũmg̃ũm cebe iap kay icokcok osunuy iap puxim. Weꞌũ buje õn tak ocokcok oce.
\p — Õn tak ocokcok oce — i õn waram eꞌem eywebe. 
\m
\v 18 Weꞌũ buje eyju dak eycokcog̃ cuy epesop weꞌũ maꞌg̃u. Eyag̃uyꞌũm g̃u juy epesop weꞌũap kay. Eycokcog̃ tak cuy epeꞌe weꞌũ buje.
\p
\v 19 Wuykukukat Jesus ibikuy bima, Timóteo og̃uju eykay. Ixe muju ojuy õn ixe be eyawẽg̃ tojot am okay. Eyawẽg̃ tobuxik puje, ocokcok oce. 
\v 20 Ixe Timóteo acã obuxim soat em ma g̃ebum eykay. Eykukpin cĩcã ocexe. 
\v 21 Soat wararaꞌacayũ bit g̃ebum Jesus Cristo kay g̃u- -jewekay acã. Ibuꞌu ip jekapik am Jesus Cristo beam. Jewebeam acã ip kapikpig̃. 
\v 22 Ixe Timóteo bit soat em jaꞌõ dag̃ eꞌem. Xipat cĩcã ixe. Jebay eju kapikpikꞌukat puxim oweju ixe juk adi oꞌjekapikpikpik kawẽn idipat muwẽnuwẽn. Eyju dak kuy eyetaybit iboam. 
\v 23 G̃axĩn ma õn ixe muju ojuy eykayy. Wetaybit apẽn jeꞌe ip owebe iam pima, ixe og̃uju eyka. 
\v 24 Wetabut wuykukukat kay. G̃axĩn ma acoꞌi ixe omuju eykay.
\p
\v 25 Wuykitpit Epafrodito muypit ojuy dak õn eykay. Ixe juk epeg̃udot kuy okay obuywatwatꞌukan. Oweju juk adi oꞌjekapikpikpik kawẽn idipat muwẽnuwẽn. Oburem cuk adi osunuy. 
\v 26 Ixe eyjo pin cĩcã. Yag̃uybabiꞌũm oꞌe iwãtaxipi opop iap awẽg̃ epejojojo buye. 
\v 27 Iwãtaxipi jĩjã osunuy. Oeꞌũ pin. Deus pit itabotaidabotbot osunuy cekay. Okay dak itabotaidabotbot ma osunuy. Ceꞌũ buje bit kuka adi og̃uycũg̃ cĩcã oce. 
\v 28 Imẽnpuye ixe muypit pin cĩcã õn eykay waram eywebe ijo am eycokcok eyꞌe am. Og̃uycũg̃ap tak kuka oꞌjepaꞌũm ma. 
\v 29 Eycokcog̃ cuy ixe epeg̃uõm eydukꞌa be wuykitpit muõmap puxim, pũg̃ ma wuykukukat puye. Ibuyxim cuy epejukuk. 
\v 30 Ixe Epafrodito iparara g̃u osunuy jeꞌũ ãm. Eywebe obuywat paꞌore bima ixe juk adi obuywatwan osunuy. Ceꞌũ g̃ũg̃ũn cĩcã osodop Cristo beam kapikpig̃ oweju buye.
\b
\c 3
\p
\v 1 Obureyũ, bũrũdupaku oꞌe tupmubararak am eywebeaptum. Wuykukukat cuy jeymucokcog̃. Obuꞌu g̃u waram apẽn kuy bima otupmubararakiatup peap ekawẽn muwẽn ãm eywebe eyag̃uybaꞌũmap puxim. Owebe eyawẽap tag̃ eyeku buje, soat em ma xipat jeꞌe eywebeam. 
\v 2 Eydayꞌemꞌum cuy epesop ikẽrẽat mujurũg̃rũg̃ꞌukayũ be eymug̃uykukuap puxim- -akurice buximayũ be- -“Epedaypuꞌag̃obixeedakacat cuy” iꞌeꞌeꞌukayũ be.
\p
\v 3 — Oceju acã Deus ebekitkit ocedaypuꞌag̃obixeedakatkat puye — i napa ma eꞌem ixeyũ ma.
\m Wuyju bit icẽmãn Deus ebekitkit. Soat em wuyju g̃ebum cekay ixe biõg̃buk pe wuymutaybitbinap tag̃. Wuyju ma wuycokcok cĩcã Jesus Cristo ag̃uy dag̃ wuyju jewag̃uyg̃uy buye. Kacũg̃kadiwi jewewuywuy bima bit wuymucũg̃ paꞌore Deus xe. Wuyetaybit cĩcã iboam. 
\v 4 Teꞌe ma wuyetabut put kacũg̃kadiwi jewewuywuy bima, cũg̃ ma acesop Deus xe iap kay. Adeayũ ma teꞌe ma eꞌem:
\p — Wuymucũg̃ put Deus xe kacũg̃kadiwi jewewuywuy bima — i.
\m Õn tak iꞌe but imẽn owebe, bekin pin ma kacũg̃kadiwi oisu buye. 
\v 5 Oito kabia bima wuybabim ma odaypuꞌag̃obixeedakacat ip “Deus ebekit teku” iap mubapuk am soat pe. Judeu dak õn, Israel naxeg̃ebit puye. Benjamim diwat tak õn. Hebreu aꞌõm kawẽnwẽnꞌuk tak og̃uy bekin pima. Judeuyũ awẽwẽap ekawẽn tag̃ cĩcã dak cuk adi ojekukuku Fariseu adi õn g̃ebuje. 
\v 6 Judeuyũ awẽwẽap ekawẽn tag̃ cĩcã juk adi ojekukuku- -soat ekawẽn tag̃ ma. Iboap ekawẽn og̃upubutbun g̃u- -pũg̃ em tak kaꞌũma. Tũybe cũg̃ ma õn Deus xe Judeuyũ awẽwẽap tag̃ jekukum puye iãn cuk adi oce. Jesus kay itabucayũ be juk adi ipiat osupiꞌajojoat, Judeuyũ awẽwẽap ekawẽn tag̃ g̃u ip jekukum puye. Tũybe xipat g̃u ip iãn cuk adi oce. 
\v 7 G̃asũ bit Cristo ikukpin cĩcã oxe oꞌe. Imẽnpuye ajo kuy bima juk adi xipat oxe iap xipat g̃u oxe oꞌe g̃asũ bit. 
\v 8 G̃asũ bit waraꞌat ma otobuxik. Oceweũm Jesus Cristo be. Okukukan oꞌe. Ixe aꞌõ dag̃ weku pin cĩcã oce. Soat podi ma xipacap kug̃ õn ixe obure buye. Waraꞌat pit kaokokap coꞌi oꞌe oxe. Soat ma ocepere ixe aꞌõ dag̃ weku am. Kaꞌũma kug̃ tak weku but ma. 
\v 9 Cristo eju õn mũg̃ꞌi. Kuy bima tũybe õn cũg̃ ma Deus xe wuyawẽwẽap ekawẽn tag̃ jekukum puye iãn cuk adi oce. G̃asũ bit wetaybit oce cũg̃ ma õn cexe Cristo kay wetabut puye iam.
\p — Ẽn cũg̃ ma oxe okpot kay etabut puye — iꞌeꞌem Deus owebe.
\m
\v 10 Obikuy jĩjã soat em weku am Cristo aꞌõ dag̃ acã. Ixe yaꞌõbaca jĩjã, waram g̃uto oꞌjetait jeꞌũap tomukadi buye. Obikuy jĩjã ig̃o aꞌõbacaap kuk am. Obuꞌu g̃u õn tak ipiatꞌajo am apẽn ixe juk adi oꞌsupiꞌajojo iap puxim. Ixe oeꞌũ jebay aꞌõ kay kũyjobit puye. Õn tak cebuxim yaꞌõ kay weꞌũ maꞌg̃u. 
\v 11 Õn tak Deus waram omuꞌada weꞌũap tomukadi. Soat em ma wetabẽg̃ og̃uy ixe xe. Iboap wiwim cĩcã õn.
\p
\v 12 — Soat em ma õn pit ixe aꞌõ kay kũyjobit — iꞌũmg̃u õn pit eꞌem wararaꞌacat pe. — Ikẽẽat kug̃ g̃u õn pit- -pũg̃ em tak kaꞌũma — iꞌũmg̃u dak õn pit eꞌem.
\m Imẽnpit Cristo kuy juk omuwedayo jewekay. Imẽnpuye kũyjobit pin cĩcã õn soat em yaꞌõ kay. 
\v 13 Obureyũ, “Soat em ma õn pit ixe aꞌõ dag̃ jekukum, ixe ebekit puye” iꞌũmg̃u õn pit eꞌem eywebe. G̃ebum g̃u õn pit eꞌem kuyap kay ikẽrẽat kukukap kay. Wag̃uybaꞌũm õn pit iboap kay. G̃ebuje bit idipat ojukuk. Idipat kukap kay acã õn g̃ebum. Imẽnpuye soan ma õn eꞌem soat em weku am ixe bikuyap tag̃. 
\v 14 Jedaudauꞌukat cũg̃ ma jedaudaum tupteibog̃atup pu am- -jadag̃aptup pu am. Ixe-buxim õn tak soan ma eꞌem Deus emumuũm pu am. Deus kuy juk onaẽ soat em jexe onuy am, Jesus Cristo kay wetabut puye.
\p — Soat em cuy eg̃uy oxe kabi be — i mo adi aꞌg̃u oꞌe owebe.
\p
\v 15 Kuy wuyetaybit Cristo bikuyap tag̃ wuyeku am. Imẽnpuye juy soat em ixe bikuyap tag̃ ajeku! Pũg̃pũg̃ eyꞌin ibuꞌu bima bit, Deus cuy ixe g̃utaybin xipat cĩcã ewebe waꞌõ dag̃ eku am iam. 
\v 16 Ixe aꞌõ dag̃ cuy ajeku! Apẽn kuy bima yaꞌõ dag̃ ajekukuku iap coꞌi ma juy ajeku g̃asũ dak. 
\v 17 Obureyũ, kuy bima cũg̃ ma juk adi ojekukuku eyetabutpe. G̃asũ bit eyju dak wekukuap puxim cuy epeku. Ag̃ cuy epesop obuxim jekukuꞌukayũ kay ixeyũ ekukuap puxim eyeku am. 
\v 18 Cristo korosa be oeꞌũ iap kayꞌũm cĩcã adeayũ. Kuy soat em iboap oꞌguwẽnuwẽn eywebe. G̃asũ dak iboap muwẽn õn eywebe wetadidim. 
\v 19 Wuyju ma soat em g̃ebum Deus kay. Ixeyũ bit soat em g̃ebum apẽn aceꞌe iap kay acã. Soat em ip g̃ebum jecokcokap kay acã. Isũsũn kuka aꞌg̃u oꞌe ip warẽmtag̃ jekukuap kay. Inaka isũsũn g̃u ip. Xipatꞌũmat mug̃ẽg̃ẽm ip wararaꞌacayũ etabun ma. Jeweweju bit ip xipat. G̃ebum g̃u ip kabi kay. Soat em g̃ebum ip ijodiap kay acã. Imẽneju wũy ma jeedop ip Deus wi jeꞌũ buje. Soat em ipiat supiꞌajojo ixeyũ ma. 
\v 20 Wuyju bit kabi watwan acesop. Wuydaxijojoꞌukat kabi kadiwi jeekop- -wuykukukat Jesus Cristo. Waram jajẽm ijodi. Ixe ajẽmap wiwim cĩcã wuyju. 
\v 21 Ixe Jesus Cristo wararaꞌacat aꞌõbacaap g̃uꞌũm ixe soat podi ma yaꞌõbaca buye. Soat ip jeedop kũyjobin ixe aꞌõ kay. Ixe jaꞌõbacaan wuyjebit g̃uwexat. Ijodi bima wuybaca g̃u wuyju eꞌem. Ixe bit wuyjebit g̃uwexat jejebit coꞌian idipan. Imẽneju waram aceꞌũ g̃u g̃ebuje bit.
\b
\c 4
\p
\v 1 Okitpitpiyũ, eykukpin cĩcã oxe. Og̃uykit eykay. Omucokcog̃ cĩcã eyju. Xipat eyju oxe. Imẽneju eybuꞌum g̃u juy epesop wuykukukat bikuyap tag̃ eyeku am, okitpitpiyũ.
\p
\v 2 Evódia, jemukũyjo õn g̃asũ. Síntique, ẽn tak jemukũyjo õn. Tũꞌũꞌũyũ, eyju ikibiyũ, xepxem ma wuykukukat kay eyetabut puye. Imẽnpuye eyetakomãm g̃u juy epesop eyewewekay. Eyetakomaap cuy epeyepere. 
\v 3 Ẽn pit, obure, ixeyũ aoyũ juy eg̃udin- -xepxepayũ. Xipan cĩcã kapikpikꞌuk eg̃uy oweju, obure. Ixeyũ aoyũ dak cuk adi obuywatwan oekuku ip õn soat kaka dag̃ kawẽn idipat muwẽnuwẽn pima. Clemente dak cuk adi oꞌjekapikpik oweju. Wararaꞌacayũ dak cuk adi oꞌjekapikpik oweju. Iboyũ butet ibararak opop Deus pubutup pe- -obuywatwatꞌukayũ butet. Ibararak opop abuyũ soat em itait jeedop ip Deus xe iaptup pe.
\p
\v 4 Wuykukukat kuy wuymuwedayo jewekay. Imẽnpuye eycokcog̃ cuy epesop. 
\p — Soat em cuy eycokcog̃ epesop — i waram õn eꞌem eywebe.
\p
\v 5 G̃axĩn ma xeku omuyku wuykukukat! Imẽnpuye soat cuy xipan epejukuk ijodiayũ. 
\v 6 Kaꞌũma kay ma juy epeyag̃uyg̃ebu. Soat pit cuy epeg̃uwẽnuwẽn Deus pe. Ajo kaꞌũmg̃u eyxe iat cuy epejoojuyjuy cexewi. Iojuy buje, ajo Deus kuy juk oꞌg̃ũmg̃ũm eywebe iap kay juy g̃ebum epesop. 
\v 7 Wuyetaybit g̃u apẽn Deus wuyag̃uymubabibin iam. Inaka ixe itaybit cĩcã wuyag̃uymubabin am. Jesus Cristo eju mũg̃ꞌi bima, ixe wuyag̃uymubabibin jeenuy. Imẽnpuye wararaꞌacat aꞌõ kay g̃u aceꞌe- -ixe aꞌõ kay acã. Wararaꞌacat kay g̃u dak acesop g̃ebum- -ixe kay acã.
\p
\v 8 Oburereyũ, g̃asũ mabuk õn jeyawẽ. Soat em ma juy epesop g̃ebum ajo xipat iap kay, ajo ibuyxi iap kay dak, ajo icẽmat iap kay dak, ajo warẽmtag̃ g̃u iap kay dak, ajo cedag̃ iap kay dak, ajo iisu iap kay dak, ajo Deus xe ikukpin iap kay dak, ajo inapa g̃u iap kay dak. Iboap kay juy epesop g̃ebum soat em. 
\v 9 Apẽn cuk adi õn eymutaybitbitbin iap tag̃ cuy epekuku, apẽn cuk adi õn eymukũyjojojo iap tag̃ tak. Wekukuap puxim cuy epekuku. Wekawẽn puxim tak cuy epeyekawẽnwẽn. Obuxim eyju jekukum pima, Deus soat em eybuywatwan jeenuy. Ixe ma wuyag̃uymubabibinꞌukat.
\p
\v 10 Ocokcokap yobog̃ cĩcã wuykukukat eju mũg̃ꞌi õn puye. Ade kaxi kap puje waram g̃uto ibaꞌore g̃u oꞌe eywebe obuywat am oceju g̃ebum cĩcã ekay iap mubapuk am owebe. 
\p — Kuy juk adi eybuꞌu epesop xipan oiuk am iꞌũmg̃u õn pit eꞌem eywebe. 
\m Imẽnpit ibaꞌore osunuy eywebe obuywat am, ẽn ekukpin cĩcã ocexe iap mabapuk am owebe. 
\v 11 Imẽn õn eꞌem eywebe. Inaka: 
\p — Eyju juk opere — iꞌũmg̃u õn pit eꞌem eywebe. 
\m Kuy wetaybit oce ocokcok am ajo-kug̃ õn iap kay. 
\v 12 Kuy juk adi ojeku yopĩt ma ikug̃. Ade dak ikug̃ kuy juk adi ojeku. Ocokcok ma õn eꞌem obeg̃beg̃ pima, ore bima dak; odadaybot pima, soat-kug̃ pima dak. Wararaꞌacayũ be ibaꞌore jewemucokcok am soat tag̃. Õn pit cuk wetaybit oce jewemucokcok am soat em. Soat kaka dag̃ ma ojekukuku ocokcok. 
\v 13 Soat em Cristo jaꞌõbacaap ũmũm owebe. Imẽnpuye ixe aꞌõbacaap kug̃ õn xipacat jebapukpug̃ owebe bima, xipatꞌũmat ebapuk puje dak.
\p
\v 14 Filipos ka watwat, eyju ma juk adi obuywatwan epesop õn ipiatpiꞌajojom pima. Iboap xipat cĩcã osodop. 
\v 15 Macedônia eipi bewi ojẽm puje, eyju acã juk adi obuywatwan epesop. Obuywatwan cuk adi epesop koapat kabia õn kawẽn idipat muwẽnuwẽn pima. Eyju ma juk adi eyemumuũm epeg̃udot okay. Eyju ma juk adi g̃ebum epesop okay õn ade ikug̃ pima, yopĩt ma ikug̃ pima dak. Wararaꞌacayũ bit g̃ebum g̃u osodop ip okay Jesus kay itabucayũ. 
\v 16 Pũg̃ em g̃u juk adi eyemumuũm epeg̃udodot okay õn Tesalônica ka be bima, yopĩt ma ikug̃ pima. 
\v 17 Waram paxi ip jeꞌg̃ũm owebe iap wiwim g̃u cuk og̃uy. Deus xipacat jeꞌg̃ũm eywebe eydacup g̃u epesop okug̃ iapteim. 
\v 18 Kuy Epafrodito eyemumuũm oꞌtojot okay. Soat ma oꞌtojot. Cartadup mubarararag̃ õn eywebeaptum- -kuy soat ojat eyemumudodot iaptum- -eyju xipan cĩcã okug̃ iaptum. Oꞌe jĩjã ma kuy. Kuy õn ade ikug̃. Kuyjeayũ be wũnca mupik puje, Deus icokcok osunuy cekay ip. Teꞌoku osunuy cekay. Oꞌg̃upik ip iap xipat osodop cexe. Imẽnpuxim ma okay eyemumudodot tak teꞌokuat puxim okay. Deus tak icokcok eyemumudodot cocom pima, eydacup g̃u epeg̃ũm owebe buye. 
\v 19 Wetabut cĩcã ixe kay- -Deus kay. Soat kug̃ ma Deus- -idipat kug̃. Soat jeꞌg̃ũm eywebe dak, eyju Jesus Cristo aꞌõ dag̃ jekukum puye. Tacup g̃u Deus. Imũmũm pin cĩcã cexe wuywebe. Ajo kaꞌũmg̃u eyxe iat jeꞌg̃ũm eywebe. Soat jeꞌg̃ũm eywebe. 
\v 20 Ixe Deus wuyetayat. Soat kabia ma:
\p — Soat podi ma ẽn aꞌõbuyxi — i juy acece cebe.
\m Imẽn cuy acece cebe soat em ma. Imẽn cuy jeꞌeꞌe.
\p
\v 21 Oceju kato mujujum cebe ip soat pe- -Deus ebekitkit pe- -Jesus Cristo kayayũ be. Wuykitpitpiyũ dak kato mujujum eywebe- -ocexeayũ- -ijoceayũ. 
\v 22 Soat Deus ebekitkit kato mujujum eywebe. Wuyeipi kukat peam kapikpikꞌukayũ dak kato mujujum eywebe.
\p
\v 23 — Soat cuy ip xipan ejukuk Filipos ka watwat — i õn eꞌem wuykukukat Jesus Cristo be.
\p Bũrũdupku otupmuju eywebe. Kuy cartadup mubararakapi ocepere.