\id COL Mundurukú [myu] NT (Brazil) -2010 bd. 
\h Colossenses
\toc1 Colosse ka watwat peaptup
\toc2 Aos Colossenses
\mt COLOSSOS KA WATWAT PEAPTUP PAULO EMUDUPMUBARARAKTUP
\c 1
\p
\v 1-2 Colossos ka watwat, cartadup mubarararag̃ õn eywebeaptum. Õn Paulo. Ijudup mubarararag̃ õn wuykitpit Timóteo eju. Eyju wuykitpitpiyũ Colossos ka be. Cristo aꞌõ dag̃ eyju jekukum soat em. Jesus Cristo emumuju õn Deus bikuyap tag̃.
\p — Bay, xipan cuy Colossos ka watwat ejukuk — i õn eꞌem Deus pe- -wuyebay be, Jesus Cristo be dak- -wuykukukat pe. — Ixeyũ ag̃uymubabibin cuy eg̃uy — i õn eꞌem cebe ip.
\p
\v 3-4 — Itabut cĩcã ip Jesus Cristo kay Colossos ka watwat — i juk oꞌe Epafro ocewebe. — Xipan Deus ebekitkiyũ kug̃ ip — i juk oꞌe. — Xipan soat kug̃ ip, Deus xe acesop iap wiwim puye — i juk oꞌe ocewebe. Imẽnpuye:
\p — Bay, ẽn xipat cĩcã — i oceju eꞌem soat em Deus eju eywebeam kawẽnwẽn pima- -Jesus Cristo ebay eju.
\m
\v 5 Soat em Deus xe acesop iap ekawẽn kuy epejojojo kawẽn icẽmat co buje- -kawẽn idipat co buje. Iboap wiwim eyju g̃asũ. Icẽmãn epesop ixe xe, “Oxe ma epesop” ioꞌe Deus puye- -kabi beat oꞌe buye. Imẽnpuye Jesus kay eyetabut cĩcã. Xipan soat kug̃ tak eyju.
\v 6 Deus xipan wuykug̃- -soat kug̃ iap ekawẽn kuy epeyaꞌĩjojo. Eyetaybit epesop iboap ekawẽn icẽmãn iam koap em cekawẽn coꞌisum. Soat eipi dag̃acat kawẽn idipat cocom g̃asũ. Ixeyũ dak itabut Jesus kay. Xipan soat kug̃ tak ip itabucayũ kug̃. Wuyeꞌũ buje soat em Deus xe acesop iap wiwim tak ip.
\v 7 Epafras kawẽn idipat oꞌg̃uwẽn eywebe. Ixe Epafras wuybure ikukpin cĩcãat wuyxe. Cũg̃ me ixe kapikpig̃ Cristo muwẽnuwẽn wararaꞌacat pe. Ixe eybuywatwan ocedieg̃ g̃asũ bit.
\p
\v 8 — Colossos ka watwat jewewekug̃ ip cewekukpin cĩcã, Deus jebiõg̃buk oꞌg̃uõm cebe ip puye — i juk oꞌe ixe Epafras ocewebe.
\p
\v 9 Imẽneju soat em oceju kawẽn Deus eju eywebeam. Eyawẽg̃ tobuxik puje ocebuꞌu g̃u ocesop jekawẽn ãm eywebeam. Imẽn oceju eꞌem Deus pe:
\p — Bay, ocekitpitpiyũ juy eg̃utaybin apẽn ebikuy ixeyũ be jeku am iam — i. — Ixeyũ juy eg̃utaybin apẽn xipat exe iam, apẽn ikẽrẽ exe iam tak — i oceju eꞌem. — Iboam itaybit cĩcã jeꞌe ip ebiõg̃buk ixeyũ mutaybitbin puye — i oceju eꞌem cebe.
\m
\v 10 Iboam eyetaybit pima, cũg̃ ma epeku; soat em wuykukukat bikuyap tag̃ epeku; soat em ixe mucokcokcog̃ epesop; xipacat epeg̃ujurũg̃rũg̃ soat em; big̃ ma eyetaybit epesop Deus eꞌe iam.
\p
\v 11 — Bay, ẽn soat podi ma aꞌõbaca — i õn eꞌem Deus pe. — Soat podi ma ẽn edipap kug̃ — i õn eꞌem. — Aꞌõbacaap cuy eg̃ũm Colossos ka watwat pe Jesus kay ip jebuꞌuap puxim ipiatpiꞌajojom maꞌg̃u ip — i õn eꞌem Deus pe. 
\p
\v 12 Deus kabiaat kukat. Ixe ebekitkit xipacat mujurũg̃rũg̃ꞌukayũ. Ixe xipacat muxipanpan iũm ãm jebekitkit pe.
\p — Cũg̃ ma eyju oxe webekitkiyũm — i juk oꞌe Deus wuywebe.
\m Imẽnpuye wuyju dak xipacat acejat. Iboap wiwim cĩcã wuyju. Imẽnpuye eyju dak eycokcog̃ cuy epesop.
\p — Xipat cĩcã ẽn — i juy epeꞌeꞌe wuyebay be.
\m
\v 13 Satanás kabiokat kukat. Ixe ebekitkit ikẽrẽat mujurũg̃rũg̃ꞌukayũ. Deus pit wuyꞌuk kabiokat kukat pui bewi. Imẽnpuye Satanás g̃u wuykukukat g̃asũ- -Deus ipot acã. Deus ipot ikukpin cĩcã cexe. 
\v 14 Ixe ipot wuyꞌuk kabiokat kukat pui bewi. Ikẽrẽat mug̃ẽaptei oꞌteida, oeꞌũ buye. Imẽnpuye ikẽrẽat kug̃ g̃u wuyju ixe xe.
\p
\v 15 Deus ijo baꞌore wuywebe. Wuyetaybit bitku poro omuyku Cristo jojom, Cristo dak ijoꞌi buye. Ixe Cristo Deus ipot koapat. Soat Deus emumug̃ẽ bodi ma yaꞌõbuyxi ixe. Deus pe ipi mujurũg̃ꞌũm pima ipot itait osunuy. 
\v 16 Deus soat oꞌg̃ubapukpukpuk Cristo eju. Kabi beacat oꞌg̃ubapukukpuk soat ceweju, ipi dag̃acat tak. Wuywebe ijobucat oꞌg̃ubapuk soat, wuywebe ijo baꞌoreat tak. Yaꞌõbuyxiayũ kabi watwat oꞌg̃ubapuk Cristo eju, yaꞌõbacaayũ dak, wararaꞌacayũ mujujuꞌukayũ dak, wararaꞌacat kukukayũ dak. Deus ixe eju soat oꞌg̃ubapuk. Soat oꞌg̃ubapuk cebeam. Soat oꞌg̃ubapuk ijodiacat pe Cristo kuk am ibuyxi am. 
\v 17 Kabi, ipi kaꞌũm pima, Cristo kuy osunuy itabẽg̃. Ipi dag̃acat jedopap pe ma dopdom Cristo aꞌõbi. Kabi beacat tak dopdom jedopap pe ixe aꞌõbi. 
\v 18 Wuyaꞌa wuyjebit kukat iap puxim Cristo jekay itabucayũ kukat. Apẽn wuyaꞌa wuyag̃uydadam iap puxim Cristo dak itabut jekayayũ ag̃uydadam. Ixe Deus ipot koapat. Ceꞌũap tomukadi Deus ixe Cristo waram oꞌg̃utait. Soat podi ma yaꞌõbuyxian oꞌg̃utait. Wuyju dak waram acejetait wuyeꞌũ buje Deus ixe oꞌg̃utait puye. 
\v 19 Deus oꞌe jewebe ma:
\p — Okpot ojoꞌian jeꞌe — i.
\m Imẽnpuye jewaꞌõbaca jojoꞌi ma ip. 
\v 20 Ipi watwat itakoma osodop Deus kay, kabi beacat tak. Deus oꞌe jewebe ma:
\p — Soat ip oꞌg̃udin obureyũm- -ipi dag̃acat, kabi beacat tak — i. — Kũyjobin jeedop ip waꞌõ kay korosa be okpot eꞌũ buje — ioꞌe jewebe ma.
\m Imẽn Deus ip oꞌg̃udin jewekay. Itakomaap ip oꞌg̃uꞌũm korosa be jekpot oeꞌũ ibuye.
\p
\v 21 Eyju dak Deus bureyũm g̃u epesop kuy bima. Cekayꞌũm cĩcã juk adi epesop. Imẽnpuye ikẽrẽat kay acã juk adi g̃ebum epesop. Ikẽrẽat mujurũg̃rũg̃ꞌuk tak adi epesop. 
\v 22 G̃asũ bit Deus eymuwexat jebureyũm ipot oeꞌũ buye. Kuy eymuwexat eymudot am jewekay. Imẽnpuye cũg̃ ma epesop ixe wap eyajẽm puje. Ikẽrẽat kug̃ g̃u epesop. Abu jeꞌe eywebe:
\p — Xipat g̃u eyju! — i?
\m Kaꞌũma ma! 
\v 23 Imẽneju eyetabun cĩcã juy epesop Jesus kay. Eybuꞌum g̃u juy epesop cekay! Koap em kawẽn idipat co ebikam Deus xe acesop wuyeꞌũ buje iap wiwim cuk epesop. Eydayꞌemꞌum cuy epesop wararaꞌacat pe eymubuꞌunap puxim iboap wiwi am. Ibo muwẽnuwẽnꞌukat õn- -kawẽn idipat muwẽnuwẽnꞌukat. Kawẽn idipat muwẽnuwẽn õn soat kaka dag̃.
\p
\v 24 Ocokcok cĩcã, õn ipiat osupiꞌajo eywebeam puye. Cristo ipiatpiꞌajojom mabuk jekay itabucayũ beam- -jejebit puximayũ beam. Imẽnpuxim õn tak ipiatpiꞌajojom Cristo be oꞌsupiꞌajojo iap muꞌũm ãm. 
\v 25 Deus oꞌe owebe:
\p — Itabucayũ buywatwan cuy eg̃uy — i. — Imẽn ma kapikpig̃ cuy eg̃uy waꞌõbi — ioꞌe owebe.
\m Ijop ekapikap oꞌg̃ũm owebe eybuywat am.
\p — Wekawẽn muwẽnuwẽn cuy eg̃uy soat ka watwat pe — ioꞌe owebe.
\m
\v 26 Kuyje Deus soat ka watwat pe g̃u jekawẽn oꞌg̃uwẽnuwẽn. G̃asũ bit oꞌg̃uwẽn jekay itabucayũ be. Ibo ekawẽn muwẽnuwẽnꞌukat õn. 
\v 27 Cristo omuy eywebe Judeuyũ g̃u maꞌg̃u eyju. Imẽnpuye Deus jedipap mubapuk puje, eyju dak idipap kug̃ epesop. Iboap wiwim cĩcã eyju. Kuy bima iboap ibaꞌarẽm osodop soat xe ijodiacat xe. G̃asũ bit Deus soat jebekitkit mutaybit pin iboam. Iboap idip cĩcã. Xipat cĩcã dak. 
\v 28 Imẽneju Cristo muwẽnuwẽn oceju soat ka watwat pe.
\p — Teyũku soat em Jesus kay eꞌem — i oceju e ojuy Deus pe ixe dopabe ixeyũ dojot puje. — Soat em teyũku Cristo eju mũg̃ꞌi jekukum — i oceju e ojuy cebe.
\m Imẽneju Cristo muwẽnuwẽn oceju soat pe ijodiacat pe. Soat awẽwẽm oceju. Soat jetaybitbicap eju oceju ip imutaybitbin. 
\v 29 Imẽneju kapikpig̃ cĩcã õn. Cristo jaꞌõbacaap ũmũm owebe cebe wekapik am. Ixe Cristo soat podi ma yaꞌõbaca. Ixe Cristo jaꞌõbacaap ũmũm owebe. Imẽnpuye ijodiacat mutaybin put owebe.
\b
\c 2
\p
\v 1 Kapikpig̃ cĩcã juk adi og̃uy eywebeam- -ojojoꞌukꞌũmayũ beam, Laodicéia ka watwat peam tak. Õn jeymukũyjo iboam. 
\v 2 Cebeam ip cuk adi kapikpig̃ cĩcã og̃uy ixeyũ be big̃ ma jewewaꞌõmucan am Jesus ekawẽn tag̃ jeku am; big̃ ma jewewekukpin am tak; wararaꞌacat podi ma itaybit am tak kawẽn icẽmãn. Iboam itaybit pima, soat em Cristo kay jeedop ip. Jewag̃uymuwarururun g̃u jeedop ip Jesus ekawẽn tag̃ xeꞌe oceku iam. Kuy bima itaybit g̃u ip osodop Cristom. G̃asũ bit ip oitaybit ixem. 
\v 3 Soat g̃u wuyetaybit Deus emumutaybitbin iam. Wuyetaybit g̃ũg̃ũn ã. Cristo bit xĩntabi oꞌtomudipꞌuk iap puxim. Cristo eju mũg̃ꞌi wuyju jekukum pima, wuyetaybit put Deus emumutaybitbin iam, apẽn cũg̃ ma Deus xe iam tak, apẽn cũg̃ g̃u cexe iam tak.
\p
\v 4 Imẽneju jeymukũyjo õn. Eydayꞌemꞌum cuy epesop wararaꞌacat pe eymug̃uykukuap puxim. Adeayũ xe cekawẽntip ip. Imẽnpit cũg̃ g̃u ip. Napa ma ip kawẽnwẽn eyweju eymutabucap ojuy napaap kay. 
\v 5 Imẽneju soat em g̃ebum õn eykay, eyxe g̃u maꞌg̃u õn. Pũg̃ tag̃ ma eyju eꞌem. Soat em eyetabut Jesus kay. Ocokcok cĩcã ma iboap cocom puye.
\p
\v 6 — Ocekukukan cuy ece — i juk adi epeꞌe Jesus Cristo be, eyetabut puye cekay.
\m G̃asũ bit mũg̃ꞌi juy epeku ixe eju. 
\v 7 Kadai nãbu muycemap puxim Cristo wuyaꞌõmucanucan wuyetabucap epereap puxim. Imẽnpuye big̃ ma juy eyetabun epesop cekay. G̃ebum cekayap tomuju juy soan eꞌem epesop. Kuy juk adi ocewebe eymutaybitbinap tag̃ cuy epeku. Soat em cuy epeꞌeꞌe Deus pe:
\p — Bay, ẽn xipat cĩcã — i. — Soat em ẽn xipan ocekug̃ — i juy epeꞌeꞌe cebe.
\p
\v 8 Eydayꞌemꞌum cuy epesop wararaꞌacat pe eymubuꞌunap puxim Jesus kay apẽn wuyju taomũn ãm ibubum iap puxim. Ixeyũ Cristo ekawẽn g̃u eymutaybitbin. Ijodiacat ekawẽn acã eymutaybitbin ip- -Deus kayꞌũmayũ ekawẽn- -ipi juacat ag̃uymubarẽmrẽmꞌukayũ ekawẽn. Eymug̃uykuku ojuy ip. Teꞌe ma eymutaybitbin ip. Eyetabun g̃u juy epesop ixeyũ aꞌõ kay. 
\v 9 Cristo jewaꞌõbaca jojoꞌi ma ip Deus eju. Cristo ijodiat coꞌian oꞌjewexat wuymutaybit am Deus eꞌe am. Wuyetaybit Deus eꞌe am Cristo eꞌeap co buje. Imẽneju eydayꞌemꞌum cuy epesop wararaꞌacat pe eymubuꞌunap puxim eyetabut am Jesus kay. 
\v 10 Cristo eju mũg̃ꞌi jekukum pima, wuyju dak Deus aꞌõbacaap kug̃ acesop. Ixe Cristo soat podi ma yaꞌõbuyxiat- -Deus ekawẽn tojotjotꞌukayũ kukukayũ bodi ma, ibiõg̃buk itabidaoiayũ kukukayũ bodi ma dak.
\p
\v 11 Imẽntak Cristo jaꞌõbacaap oꞌg̃ũm eywebe ikẽrẽat kukap puxim ixe eju eyju mũg̃ꞌi buye. Ag̃okatkatꞌitꞌit taypuꞌag̃obixeedakatkatꞌuk osodop ip kuyjeayũ teku iisu Deus xe iꞌeap ojuy. Deus pit soat tag̃ wuymuisusun wuyxeedakatkat puye g̃u- -Cristo eju wuyju mũg̃ꞌi buye acã. 
\v 12 Wuymubatisasan puje Cristo aꞌõbi wuyag̃uyokokat oiꞌũm wuyeꞌũap puxim. Ixe aꞌõbi oiꞌũm wuykocap puxim. Kuy bima Deus waram g̃uto Jesus oꞌg̃utait ceꞌũap tomukadi. Imẽnpuxim ijodi bima dak wuyag̃uyꞌisum wuyju jekukum waram g̃uto wuyetaicap puxim wuyeꞌũap tomukadi. Wuyag̃uyꞌisum wuyju jekukum g̃asũ Deus soat podi ma yaꞌõbaca iap kay wuyetabut puye. 
\v 13 Imẽnpuxim eyju ma ikẽrẽat mujurũg̃rũg̃ cĩcã juk adi epekukuku eyag̃uyokok puye. Ceꞌũat puxim cuk adi epesop Deus xe ikẽrẽat kay acã g̃ebum puye. Judeuꞌũmat puxim tak cuk adi epesop- -Deus pe wuyawẽwẽap ekawẽn tag̃ jekukumꞌũmat puxim. Deus pit kuy eyag̃uymuisun eywebe Cristo ag̃uy dag̃ jewag̃uy am. Wuyag̃uymuisun puje, ixe ikẽrẽat oꞌjuꞌuk wuywebewi. Soat oꞌjuꞌuk. 
\v 14 Ibaꞌore wuywebe Deus pe wuyawẽwẽap ekawẽn tag̃ jeku am- -soat ekawẽn tag̃. Deus itaybit soat em teyũku wekawẽn mupubutbun iam. Korosa be ixe eꞌũ buje bit, Cristo apẽn cuk adi iboap ekawẽn ag̃upubutbuniaptei oꞌteida. Oꞌteida wuyekariwa be wuyeweroap teidaap puxim. Imẽnpuye Deus ikẽrẽat oꞌjuꞌuk wuywebewi. 
\v 15 Imẽnpit Cristo Satanás aꞌõbacaap oꞌg̃uꞌũm korosa be jeꞌũ buje. Deus kayꞌũmayũ kukukayũ aꞌõbacaap oꞌg̃uꞌũm. Soat etabun yaꞌõbacaap oꞌg̃uꞌũmiayũ mubapukpug̃ oeku imusũsũn ãm. Imubapukpug̃ oeku kuyjeayũ be oꞌyaokaiat ariritꞌa mubapukap puxim.
\p
\v 16 Imẽneju wararaꞌacat aꞌõ kay g̃u juy epesop eywebe teꞌe ma ixeyũ eꞌem pima “Beku iꞌopi eywebe” i, “Ibiati tikõnpi eywebe” i dak, “Ibeat kabia be epeyekapikpik g̃u juy” i dak, “Kaxiaat ijẽmꞌisu bima, peta juy epeg̃ug̃ẽ” i dak, “Sábado bima epeyekapikpik g̃u juy” i dak. Yaꞌõ kay g̃u juy epesop. 
\v 17 Ixeyũ ekawẽn tag̃ cuk adi jekukuꞌuk ajop Cristo ajẽmꞌũm pima. Kabicuk jewurũg̃wurũg̃ iap puxim jekawẽn muwarururun ip soat em. G̃asũ bit Cristo oajẽm. Ixe ekawẽn soat em ma ibit. Imẽnpuye ixeyũ ekawẽn tag̃ g̃u wuyju jekukum g̃asũ- -Cristo ekawẽn tag̃ acã. 
\v 18 Warẽmtag̃ eymutaybitbinꞌukayũ:
\p — Deus ipiat supiꞌajoat eywebe, cũg̃ g̃u eyju cexe buye — i napa ma eꞌem ip eywebe.
\m Ixeyũ ekawẽn kay bit eyetabun g̃u juy epesop. Jewexe yaꞌõbuyxi ip.
\p — Wararaꞌacat podi ma oceju xipat Deus xe, soat em Deus ocemuyxeyxey buye — iꞌeꞌem ip teꞌe ma. — Kaꞌũma ma oceju bit — iꞌeꞌem ip wararaꞌacayũ be, “Wararaꞌacat podi ma xipat oceju” iꞌeꞌem pima jewebe ma. — Deus kukap coꞌi juy cekawẽn tojotjotꞌukayũ ajukuk — iꞌeꞌem ip ocewebe teꞌe ma. — Wararaꞌacat podi ma oceju xipat Deus xe — iꞌeꞌem ip teꞌe ma.
\m Warẽmtag̃ ma ip jewag̃uydadam. Deus ag̃uy dag̃ g̃u ip jewag̃uyg̃uy- -jag̃uy dag̃ acã. 
\v 19 Cristo eju mũg̃ꞌi g̃u ip warẽmtag̃ jewag̃uyg̃uy buye. Cristo wuyaꞌa buxim. Cekay itabucayũ ijebit puxim. Deus bikuyap tag̃ wuyju aypapan. Wuyekururukpu ibubog̃atpu wuykukatpu wuyewedap tag̃atpu wuyewedap mucũg̃ucũg̃atpu. Ibobu buxim Deus wuyaꞌõmucanucan Cristo eju mũg̃ꞌi wuyeku am. Jewexe yaꞌõbuyxiayũ bit mũg̃ꞌi g̃u ceweju.
\p
\v 20 Cristo aꞌõbi eyag̃uyokokat oiꞌũm eyeꞌũap puxim. Deus jaꞌõbacaap oꞌg̃ũm eywebe ibiõg̃buk kẽrẽat kukukayũ aꞌõ kayap puxim- -Deus kayꞌũmayũ kukukayũ aꞌõ kayap puxim. Imẽneju Deus kayꞌũmat ekukuap cuy epeyepere. Warẽmtag̃ eymutaybitbinꞌukayũ aꞌõ kay g̃u juy epesop.
\p
\v 21 — Boku juy epejukuk g̃u — iꞌeꞌem ip teꞌe ma. — Beku juy epejoꞌo g̃u — i dak. — Imẽnmẽn g̃u bit epeku — i dak eꞌem ip teꞌe ma.
\m
\v 22 Soat ixeyũ xe ikukpiat, iꞌopiat, tikõnpiati darem ma kuy kapkam. Ijodiacat ekawẽn acã imuwẽnuwẽn ip- -Deus ekawẽn g̃u bit. Ijodiacat ag̃uy dag̃ acã ip kawẽnwẽn- -Deus ag̃uy dag̃ g̃u bit. 
\v 23 Jewexe ip itaybitbit.
\p — Deus kukap coꞌa juy cekawẽn tojotjotꞌukayũ ajukuk — iꞌeꞌe ip teꞌe ma. — Kaꞌũma ma oceju bit — iꞌeꞌem ip wararaꞌacat pe, “Wararaꞌacat podi ma xipat oceju Deus xe” iꞌeꞌem pima jewebe ma. Ade cexe ip ikukpiat, iꞌopiat tak, tikõnpiati dak. Xipan g̃u ip jejebit kug̃. Tũybe ikẽrẽat acejukukꞌũma iãn eꞌem ip. Ibo bit kaꞌũma joꞌi ma. Wuybuywat paꞌore ikẽrẽat kukap puxim.
\b
\c 3
\p
\v 1 Waram oꞌjetaitiat puxim eyju Cristo eju mũg̃ꞌi jekukum puye. Imẽnpuye eyetabikum cuy epesop kabi beat kay. Iboce Cristo omuy Deus xe xikꞌi yaꞌõbuyxiat tũyap pe, Deus coꞌi yaꞌõbuyxi buye. 
\v 2-3 Ijodiacat eju g̃u mũg̃ꞌi eyju jekukum- -Cristo eju acã mũg̃ꞌi eyju jekukum. Imẽnpuye ijoceap kay g̃u juy epeyewag̃uyg̃uy- -kabi beat kay acã. Pũg̃ tag̃ ma jewag̃uyg̃uy ip Deus, Cristo dak. Ixeyũ ag̃uy dag̃ eyju dak jewag̃uyg̃uy g̃asũ bit, Cristo eju mũg̃ꞌi eyju jekukum puye. Iboap ibapuk g̃u itabutꞌũmayũ xe. Ibaꞌarẽm iboap cexe ip. 
\v 4 Eyag̃uyꞌisum eyju jekukum Cristo eju mũg̃ꞌi buye. Waram yajẽm puje, wuyju dak acejewemubapuk ceweju. Ixe dipap acejat. Wuydip aceꞌe ixe joꞌi.
\p
\v 5 Imẽneju ikẽrẽat epeg̃ug̃ẽ g̃u juy. Ikẽrẽat mug̃ẽg̃ẽ pin eyju Deus kayꞌũmat puxim. Epeg̃ug̃ẽ g̃u bit. Wararaꞌacat tayxi eju epeyepo g̃u juy. Wararaꞌacat itop eju epeyepo g̃u juy. Ikẽrẽãn cuy epeyekaypatpan g̃u. Ikẽrẽat epeg̃ujurũg̃ g̃u juy eyemumukaypin pu am. Aoyũ kaykay g̃u juy epesop. Eyetabikukum g̃u juy epesop wararaꞌacat pubut kay. Wuyetabikukuap ikẽrẽat Deus xe deusbaroyũ kay wuyetabucap puxim. 
\v 6 Deus ipiat supiꞌajojoat imẽn jekukuꞌukayũ be- -kũyjobitꞌũmayũ be- -jaꞌõ kayꞌũmayũ be. 
\v 7 Eyju dak cuk adi kuy bima warẽmtag̃ ma epekukuku. Eycokcok epesop ikẽrẽat mug̃ẽg̃ẽꞌukap kug̃.
\p
\v 8 G̃asũ bit ijop epeyepere. Eyetakomãm g̃u juy epesop wararaꞌacat kay. Aoyũ kaykay g̃u juy. Eysapkaꞌorerem g̃u juy epesop. Wararaꞌacat epejomuymuy g̃u juy. Eyekawẽnkẽrẽm g̃u juy epesop- -pũg̃ em tak kaꞌũma. 
\v 9-10 Cristo kay eyetabut puje, yag̃uyꞌsuayũm epesop. Kuy bima eyag̃uyokok cuk adi epekuku. Eyag̃uyokok g̃u juy epekuku g̃asũ bit. Deus soat em wuyag̃uymuisusun wuywebe jejoꞌi iꞌe am. G̃uyjom Deus ag̃uy dag̃ acã g̃ebum acesop. Big̃ ma wuyetaybit aceꞌe Deus eꞌe am. Napa g̃u juy epeꞌeꞌe eyewewebe. 
\v 11 Wuyag̃uyꞌisu bima, g̃ebum g̃u acesop teku Judeu iap kay, teku Judeu g̃u iap kay dak. G̃ebum g̃u acesop teku taypuꞌag̃obixeecukat iap kay dak, teku taypuꞌag̃obixeecukꞌũmat iap kay dak. G̃ebum g̃u acesop teku pariwat iap kay, teku wuyjuyũ iap kay dak. G̃ebum g̃u acesop teku teiꞌũma kapikpikꞌukat iap kay, teku teibubum kapikpikꞌukat iap kay dak. Cristo kay acã g̃ebum acesop. Iteyũ be soat pe Cristo muymuy iap kay g̃ebum acesop.
\p
\v 12 Deus ebekitkit eyju. Deus xe eykukpin cĩcã epesop. Ixe juk eynaẽ jewekay am. Imẽneju eyetabotaidabotbon cuy epesop eyewewekay. Xipan cuy epeyewewekuk. Yobog̃an pin g̃u juy epesop Eyekawẽnkẽrẽm g̃u juy epesop- -eyekawẽntim ma. Eyukpiceg̃ẽm g̃u juy epesop eyewewekay. 
\v 13 Epeyewebuywatwan cuy soat em. Eyxeat warẽmtag̃ eykug̃ pima, ixe epejomuymuy g̃u juy. G̃ebum g̃u juy epesop apẽn cuk adi warẽmtag̃ eykuk iap kay. Wuykukukat Jesus g̃ebum g̃u apẽn cuk adi ikẽrẽat ag̃ujurũg̃rũg̃ iap kay. Ixe buxim cuy eyju dak g̃ebum g̃u epesop apẽn cuk adi warẽmtag̃ eykuk iap kay. 
\v 14 Xipan eyekukuap xipat Deus xe. Ibodi ma bit xipat eywebe xipan eyewewekuk am. Xipan jewewekug̃ pima, waraꞌat tag̃tag̃tag̃ g̃u epekuku- -pũg̃ tag̃ ma. 
\v 15 Cristo juk wuymuwexat jebekitkiyũm pũg̃ tag̃ ma wuyeku am. Ixe wuyag̃uymubabibin wuyag̃uybabiꞌũmap puxim. Ãg̃ cuy ixe jeyag̃uymubabin. Ixe be eyag̃uymubabin puje xipan epeyewekuk. Pũg̃ tak ma dak epeyewag̃uy. Soat em:
\p — Bay, ẽn xipan cĩcã ocekug̃ — i juy epeꞌeꞌe Deus pe.
\m
\v 16 Soat em Cristo ekawẽn tag̃ cuy epekuku. Xipat cekawẽn tag̃ wuyeku am wuyju idip cĩcãat kug̃at puxim. Soan cuy jewemutaybitbin epesop. Soan cuy jewemukũyjobitbin tak epesop. Soat em cuy pibododon epesop Deus kay. “Cristo soat podi ma yaꞌõbuyxi” iꞌe pin pima, epeyebibododon cuy, “Cristo acã wuykukukat” iꞌe pin pima dak, eycokcok pima dak Cristo kay eyetabut puye, “Ẽn xipat cĩcã” iꞌe pin pima dak Deus pe. Deus biõg̃buk aꞌõbi juy pibododon epesop. 
\v 17 Imẽneju soat em cuy epekuku wuykukukat Jesus aꞌõ dag̃. Soat em cuy epeyekawẽnwẽn ixe aꞌõ dag̃. Soat em:
\p — Ẽn xipat cĩcã — i juy epeꞌeꞌe wuyebay be- -Deus pe, wuykukukat Jesus oeꞌũ buye.
\p
\v 18 Tũꞌũꞌũyũ, kũyjobin cuy epesop eyitopyũ aꞌõ kay. Kũyjobin cuy epesop yaꞌõ kay ip wuykukukat Jesus kay eyetabut puye.
\p
\v 19 Tapupuyũ, ikukpin cuy eytayxiyũ epejukuk. Xipan cuy ip epejukuk.
\p
\v 20 Bekitkit, kũyjobin cuy epesop eyebay aꞌõ kay soat em, eyxi aꞌõ kay dak. Wuykukukat icokcok eꞌem eyebay aꞌõ kay bima.
\p
\v 21 Cebayũ, imuparararan g̃u juy eyebekitkiyũ epejukuk ixeyũ mubuꞌunap puxim kũyjobit am eyaꞌõ kay.
\p
\v 22 Teiꞌũma kapikpikꞌukayũ, soat em cuy kũyjobin epesop eyekariwa aꞌõ kay ixeyũ eyjojom pima, eyjojomꞌũm pima dak. Ixeyũ aꞌõ kay kũyjobin cuy epesop ixeyũ be “Ẽn xipat” iꞌeap ojuy g̃u. Kũyjobin cuy epesop kũyjobit pin puye. Kũyjobin cuy epesop wuykukukat Jesus yaꞌõbuyxi eyxe buye. 
\v 23 Eycokcog̃ cuy eyekapikap epejukuk. G̃ebum cuy epesop ijodiacat peam acã g̃u õn kapikpig̃ iap kay. Wuykukukat peam tak õn kapikpig̃ iap kay g̃ebum cuy epesop. 
\v 24 Cristo ma wuykukukat. Ixe beam ma wuyju kapikpig̃. Wuykukukat jebekitkit peam xipacat oꞌg̃uxipan. Ibo juy epejat. G̃ebum cuy epesop iboap kay. Cũg̃ ma wuyeku buje, cũg̃ ma jekuaptei jeꞌg̃ũm wuywebe. 
\v 25 Warẽmtag̃ wuyeku buje bit, warẽmtag̃ jekuaptei dak jeꞌg̃ũm wuywebe. Ipiat supiꞌajoat wuywebe. Ixe Deus cũg̃ ma wuykug̃. Cedag̃ ma wuyekapikaptei jeꞌg̃ũm wuywebe. Weg̃ũg̃ũn ma wuykug̃.
\b
\c 4
\p
\v 1 Kariwawayũ, cũg̃ ma juy eywebeam teiꞌũma kapikpikꞌukayũ epejukuk. Imug̃uykukukum g̃u ip epejukuk. Eyju dak kapikpig̃ eyekariwa beam- -kabi beat peam. G̃ebum cuy epesop iboap kay.
\p
\v 2 Eybuꞌum g̃u juy epesop Deus eju kawẽn ãm. Xexen g̃u juy epesop kawẽnwẽn pima ceweju- -eyetabẽg̃bẽg̃ ma.
\p — Ẽn xipat cĩcã — i juy epeꞌeꞌe cebe.
\m
\v 3 Ocewebeam tak cuy epeyekawẽn Deus eju.
\p — Pauloyũ buywatwan cuy eg̃uy ixeyũ be ekawẽn muwẽn ãm soat ka watwat pe — i juy epeꞌeꞌe cebe. — Ixeyũ buywatwan cuy eg̃uy Cristo muwẽn ãm soat pe- -kuy bima oꞌg̃uwẽn g̃u iat ekawẽn muwẽn ãm — i juy epeꞌeꞌe cebe.
\m Daomũnmũnapꞌa be õn g̃asũ iboap ekawẽn muwẽnuwẽn cuk adi ojekuku buye. 
\v 4 Ibapug̃ ma juy iboap ekawẽn og̃uwẽn. Imẽnpuye:
\p — Pauloyũ juy esubuywatwan ixeyũ be ibapug̃ ma kawẽn idipat muwẽn ãm adeayũ be — i juy epeꞌeꞌe cebe.
\p
\v 5 Eysũsũn g̃u juy epesop Jesus muwẽn ãm itabutꞌũmayũ be imuwẽn put pima. Eyag̃uysan cuy epeku ixeyũ muꞌukpiceg̃ẽg̃ẽnap puxim Cristo kay. 
\v 6 Teꞌe g̃u juy epeyekawẽn itabutꞌũmayũ eju. Eyekawẽnkum cuy epeyekawẽn ceweju ip eyekawẽn kay ip ibuꞌunap puxim. Eyetaybin cuy epesop cedag̃ ma yaꞌõbu am ip.
\p
\v 7 Wuykitpit Tícico wawẽg̃ g̃uwẽn eywebe- -soat awẽg̃ g̃uwẽn. Ixe Tícico ikukpin cĩcã wuyxe. Ixe cũg̃ ma kapikpig̃ wararaꞌacayũ beam- -itabucayũ beam. Wuyweju ixe dak kapikpig̃ wuykukukat peam. 
\v 8 Ixe og̃uju eykay eymucokcok am, oceju xipat iap muwẽn ãm eywebe. 
\v 9 Wuykitpit Onésimo og̃uju eykay Tícico eju. Ixe Onésimo cũg̃ ma jekukum. Ikukpin cĩcã wuyxe. Eyka bewiat ixe. Apẽnpẽn ijopka watwat iap gũwẽn ip eywebe.
\p
\v 10 Aristarco kato mujujum eywebe. Oweju ixe dak omuy daomũnmũnmũnapꞌa be. Marcos tak kato mujujum eywebe- -Barnabé kipitaap. Ixe Marcos eykay jajẽm iap awẽg̃ kuy epeyawẽg̃tobuxik. Ixe ajẽm puje xipan cuy epeg̃uajẽm eydukꞌa be. 
\v 11 Josué Justo kato mujujum eywebe. Ixeyũ acã Judeuyũ kapikpig̃ oweju- -ebapũg̃ayũ: Aristarco, Marcos, Josué Justo. Ibũrũ ma. Kapikpig̃ ip oweju wararaꞌacayũ mutabut am Jesus kay, Deus pe jekuk am. Obuywatwan cĩcã osodop ip omucokcokcog̃.
\p
\v 12 Epafras tak kato mujujum eywebe- -eyka bewiat- -Jesus Cristo beam kapikpikꞌukat. Soat em ixe kawẽnwẽn Deus eju eywebeam.
\p — Colossos ka watwat aꞌõmucanucan cuy eg̃uy ixeyũ be jetabucap epereap puxim — iꞌeꞌem ixe Deus pe eymuwẽnuwẽn. — Ixeyũ aꞌõmucanucan cuy eg̃uy ixeyũ be Jesus eju mũg̃ꞌi jeku am — iꞌeꞌem ixe cebe. — Ixeyũ aꞌõmucanucan cuy eg̃uy ixeyũ be soat em ma ebikuyap tag̃ jeku am — iꞌeꞌem ixe Deus pe eymuwẽnuwẽn.
\m
\v 13 Kapikap ibaꞌore jĩjãat kukap puxim ixe Epafro kawẽnwẽn cĩcã Deus eju eywebeam, Laodicéia ka watwat peam tak, Hieriápolis ka watwat peam tak. Õn ma iboap muwẽnuwẽn eymukũyjojom. 
\v 14 Lucas kato mujujum eywebe- -ocexe ikukpin cĩcãat- -wuyanũg̃tataꞌukat. Demas tak kato mujujum eywebe.
\p
\v 15 Oceju kato mujujum wararaꞌacayũ be Jesus kay itabucayũ be- -Laodicéia ka watwat pe. Ninfa be dak kato mujujum oceju, ixe dukꞌa be jeꞌaweroroꞌukayũ be dak- -itabucayũ be. 
\v 16 Eywebe ijudup co buje juy epetupmuju Laodicéia ka watwat pe ixeyũ be tup co am. Kuy juk waraꞌatup otupmuju ixeyũ beaptum. Ixedup ixeyũ tupmuju eywebe tupco buje. Ixedup tak epetupcoat.
\p
\v 17 — Wuykukukat ewebe oꞌg̃ũmiap ekapikap kug̃ cuy ejeku — i juy epeꞌe Arquipo be. — Ekapikap cuy eg̃uꞌũm — i juy epeꞌe cebe.
\p
\v 18 Õn ma obubin ma Paulo kato mujujum eywebe iaptup mubarararag̃. Eyag̃uybaꞌũm g̃u juy epesop kawẽn ãm Deus eju owebeam, õn daomũnmũnapꞌa be bima.
\p — Bay, xipan cuy Colossos ka watwat ejukuk — i õn eꞌem Deus pe.
\m Wemudupmubararaktup pe bit kuy oiꞌũm.