\id 1TH Mundurukú [myu] NT (Brazil) -2010 bd. 
\h 1 Tessalonicenses
\toc1 Tessalônica ka watwat peaptup- -koapatup
\toc2 Primeira Carta aos Tessalonicenses
\mt TESSALÔNICA KA WATWAT PEAPTUP PAULO EMUDUPMUBARARAKTUP KOAPATUP
\c 1
\p
\v 1 Tessalônica ka watwat, cartadup mubarararag̃ õn soat peaptum eywebeaptum- -Jesus kay itabucayũ beaptum. Õn Paulo. Ijudup mubarararag̃ õn Timóteo eju, Silas eju dak. Eyju Deus ebekitkiyũ- -wuyebay ebekitkiyũ. Wuykukukat ebekitkiyũ eyju- -Jesus Cristo ebekitkiyũ.
\p — Bay, xipan cuy Tessalônica ka watwat ejukuk — i õn eꞌem Deus pe. — Ixeyũ ag̃uymubabibin cuy eg̃uy — i õn eꞌem cebe.
\p
\v 2 Eywebeam oceju kawẽnwẽn Deus eju soat em ma.
\p — Bay, ẽn xipat — i oceju eꞌem cebe, eyetabut cekay buye.
\m
\v 3 Deus wuyebayat. Ocetabut ixe kay. Eyju dak eyetabut ixe kay. Imẽnpuye soat em eyju wararaꞌacat puywatwan ixe aꞌõbi. Deus ikukpin eyxe. Ijodiacat tak ikukpin. Imẽnpuye eyju kapikpig̃ cĩcã ixe ekawẽn muwẽnuwẽn itabutꞌũmayũ be. Eyetaybit wuykukukat Jesus Cristo jajẽm waram iam. Imẽnpuye eybuꞌu g̃u ixe ajẽmap wiwi am. Imẽn eyju jekukum, eyju wuykukukat aꞌõ kay buye- -Jesus Cristo aꞌõ kay. Cũg̃ ma eyekukuap kay oceju g̃ebum Deus eju kawẽnwẽn pima. 
\v 4 Ocekitpitpiyũ, Deus xe eykukpin cĩcã. Ixe juk eynaẽ jebekitkiyũm. Ocetaybit iboam. 
\v 5 Kawẽn idipat cuk adi oceg̃uwẽnuwẽn eywebe- -ijodiat ekawẽn g̃u- -Deus ekawẽn acã. Deus aꞌõbacaan ma juk adi oceg̃uwẽnuwẽn eywebe. Ibiõg̃buk xipacat aꞌõbi oceg̃uwẽnuwẽn. Wuyetaybit kawẽn idipat icẽmãn iam. Eyetabutpe cũg̃ ma juk adi ocekukuku eywebe dak cũg̃ ma eyeku am. Eyetaybit iboam. 
\v 6 Imẽneju ocekukuap coꞌi juk adi epekuku. Wuykukukat ekukuap coꞌi dak epekuku. Kawẽn idipat kay juk adi eyetabun cĩcã epesop. Eyetabut pima, ipiatpiꞌajojom cuk adi epesop. Inaka Deus biõg̃buk cuk adi eymucokcokcog̃ osunuy- -Ibiõg̃buk xipacat. 
\v 7 Cũg̃ ma Tessalônica ka watwat jekukum iap awẽg̃ oꞌyawẽg̃coco ip soat itabucayũ- -Macedônia eipi watwat, Grécia eipi watwat tak. Imẽnpuye eyekukuap coꞌi juk ip oekuku. 
\v 8 Wuykukukat ekawẽn cuk adi epeg̃uwẽnuwẽn Macedônia eipi watwat pe, Grécia eipi watwat pe dak. Tessalônica ka watwat itabut cĩcã Deus kay iap awẽg̃ oꞌyawẽg̃tobuxik ip soat kaka dag̃ayũ. Oceju bit eyetabucap muwẽnuwẽn g̃u g̃asũ bit kuy ip itaybit puye. 
\v 9 Soat em eyetabucap muwẽnuwẽn ip jewewebe.
\p — Tessalônica ka watwat teꞌe ma itabut osodop ip deusbaroyũ kay — iꞌeꞌem ip jewewebe. — Pauloyũ bit cuk Deus ekawẽn oꞌg̃uwẽn cebe ip — iꞌeꞌem ip. — Imẽnpuye oibuꞌun ip deusbaroyũ kay — iꞌeꞌem ip. — Deusat aꞌõ kay acã g̃asũ ip- -soat em itaicat aꞌõ kay — iꞌeꞌem ip jewewebe. — Deus peam ip kapikpig̃ g̃asũ bit — iꞌeꞌem ip jewewebe. 
\v 10 — Kabi kadiwi waram Deus ipot jekop iap wiwim ip — iꞌeꞌem ip. — Jesus jajẽm iap wiwim ip — i.
\m Deus jekpot oꞌg̃utait ceꞌũap tomukadi. Ixe Jesus wuydaxijojom Deus pe wuykay itakomaap puxim. Imẽnpuye Deus wuymuju g̃u ipiatꞌajojoap kay.
\b
\c 2
\p
\v 1 Ocekitpitpiyũ, eyetaybit teꞌe g̃u juk adi eyjom oceku iam. 
\v 2 Eykay ocajẽm awap Filipos ka be juk adi ocekuku. Ibo ka watwat cuk adi xipan g̃u ocekuk. Warẽmtag̃ cuk adi ip ocekuk. Ocekayꞌũm cĩcã ip osodop. Ocekawẽn kayꞌũm cĩcã dak ip osodop. Eyetaybit iboam. Inaka Deus cuk adi ocaꞌõmucanucan osunuy. Imẽnpuye ocebuꞌu g̃u ocesop kawẽn idipat muwẽn ãm eywebe. 
\v 3 Kawẽn cũg̃at cuk adi oceg̃uwẽnuwẽn. Ikẽrẽat kayap tomuju g̃u juk adi oceg̃uwẽnuwẽn eywebe. Eymug̃uykuku ojuy g̃u dak juk adi ocesop.
\p
\v 4 — Oxe cũg̃ ma eywebe kawẽn idipat muwẽn ãm itabutꞌũmayũ be — i juk adi oꞌeꞌe Deus ocewebe.
\m Imẽnpuye kawẽn idipat muwẽnuwẽn cuk adi ocekukuku. Imuwẽnuwẽn oceju ijodiat mucokcokap ojuy g̃u- -Deus mucokcokap ojuy acã. Deus wuybuyxijojom waꞌõ dag̃ paxi jeꞌe ip iam.
\p
\v 5 — Eyju xipat cĩcã — iꞌũmg̃u juk adi oceꞌeꞌe eywebe eybikuy ocekay am. — Oceju eykay jĩjã — iꞌũmg̃u juk adi oceꞌeꞌe eywebe eyedinheiro ũmap ojuy.
\m Deus itaybit iboam. 
\v 6 Eywebe xipan ocemuwẽnuwẽnap kudadam g̃u oceju- -wararaꞌacat pe xipan ocemuwẽnuwẽnap kudadam g̃u dak. 
\v 7 Cũg̃ ma kuka oꞌe ocewebe “Kũyjobin cuy epesop ocaꞌõ kay, oceju Cristo emumujuyũ buye” iꞌe am eywebe. Imẽn g̃u bit oceju eꞌem wararaꞌacayũ be. Eywebe dak kaꞌũma. Imẽnpit eyxe bima ocaꞌõtareg̃ g̃u juk adi eykuk. Xipan cuk adi oceju eykuk ayacat xipan jeꞌit kug̃at puxim. 
\v 8 Eykukpin cĩcã ocexe. Imẽnpuye kawẽn idipat cuk adi oceg̃uwẽnuwẽn eywebe Deus ekawẽn. Oceparara g̃u juk adi ocesop wararaꞌacat pe ocaokaap puxim, Jesus kay eyetabucap ojuy jĩjã buye, eykukpin cĩcã ocexe buye dak. 
\v 9 Ocekitpitpiyũ, g̃ebum cuy epesop apẽn cedag̃ ma juk adi ocekuku iap kay. Apẽn cuk adi ocejekapikpik eywebeam iap kay dak cuy g̃ebum epesop. Kabiam cuk adi kapikpig̃ cĩcã ocesop. Ixima be dak kapikpig̃ ma ocesop. Eyxewi ocemukaypinput ojuyap puxim cuk adi kapikpig̃ cĩcã ocesop. Kapikpig̃ cĩcã juk adi ocesop eywebe Deus ekawẽn muwẽnuwẽn pima- -kawẽn idipat muwẽnuwẽn pima.
\p
\v 10 Eyxe bima warẽmtag̃ g̃u juk adi ocekukuku. Cũg̃ ma juk adi ocekukuku eyetabutpe. Ocekawẽnkẽrẽ g̃u juk adi ocesop eyweju. Eyetaybit cũg̃ ma juk adi ocekukuku iam. Deus tak itaybit iboam. 
\v 11 Xipan cuk adi oceju eykuk ag̃okatkat xipan jekpot kukap puxim. Eyetaybit iboam. 
\v 12 Oceju juk adi eymucokcokcog̃ Jesus kay eyeꞌe am. Eyg̃uycũg̃ap muꞌũmuꞌũm cuk adi ocesop. Eyawẽwẽm cuk adi ocesop eywebe Deus mucokcok am. Deus cuk eynaẽ soat em jaꞌõ dag̃ eyeku am. Ixe soat kukukan jeꞌe. Soat kukukan iꞌe buje, eyju dak wararaꞌacat kukukꞌukayũm epesop ceweju. Ixe soat podi ma jedipap kug̃. Eyju dak ixe dipap kug̃ epesop.
\p
\v 13 Ocewebe Deus ekawẽn muwẽn puje, cuk adi kũyjobit epesop cekawẽn kay.
\p — Iboap ekawẽn ijodiat ekawẽn g̃u- -Deus ekawẽn acã — i juk adi epeꞌeꞌe.
\p Imẽneju soat em oceju eꞌem:
\p — Ẽn xipat cĩcã — i Deus pe.
\m Kawẽn idipat Deus ekawẽn ma. Ixe dak jaꞌõbacaap ũmũm soat pe jaꞌõ kay itabucayũ be. 
\v 14 Ocekitpitpiyũ, eybadipyũ ma juk adi ipiat oꞌsupiꞌajojoat eywebe- -eyka watwat ma. Apẽn Judéia eipi watwat ipiatꞌajojom iap puxim eyju dak ipiatꞌajojom. Deus kayayũ ixeyũ Judéia eipi watwat. Jesus Cristo ebekitkiyũ ixeyũ. Judeuyũ kukukꞌukayũ ixeyũ be juk adi ipiat oꞌsupiꞌajojoat. 
\v 15 Judeuyũ kukukayũ wuykukukat Jesus oꞌyaokaat. Deus ekawẽn muwẽnuwẽnꞌukayũꞌũmꞌũm aokakaꞌuk tak ip osodop ibadipyũ maꞌg̃u ip. Ocekaykay dak cuk adi ip osodop. Xipat g̃u ip Deus xe. Ijodiat kay dak ip itakoma. 
\v 16 Ibuꞌuꞌu jĩjã ip Deus pe Judeuꞌũmayũ daxijo am. Deus wuydaxijo pinap ekawẽn muwẽn pin oceju Judeuꞌũmayũ be. Imuwẽg̃ap mubaꞌorerem pit ip. Kuy bima ikẽrẽat mug̃ẽg̃ẽꞌuk ip osodop. Big̃ ma ikẽrẽat mug̃ẽg̃ẽm ip g̃asũ dak. Imẽnpit Deus itakoma jĩjã oꞌe cekay ip.
\p — Ikẽrẽat kug̃ cĩcã oxe — ioꞌe Deus cebe ip.
\m Ipiat oꞌsupiꞌajoat cebe ip- -ikẽrẽat mug̃ẽg̃ẽxiayũ be.
\p
\v 17 Ocekitpitpiyũ, eyxewi ocejẽmꞌisum ma ocepit pin cĩcã ocesop waram eyjom. Soat em oceg̃uykitkit cuk adi ocesop eykay. Eykay ocepicap kudadam cuk adi ocesop g̃ebum cĩcã eykay buye. 
\v 18 Waram eyjo pin maꞌg̃u ocesop. Pũg̃ em g̃u wepit pin maꞌg̃u og̃uy eykay- -soat em. Soat em ma:
\p — G̃aꞌa acepit — i juk adi ocece obureyũ be.
\m Satanás pit ocemuypitꞌũmꞌũm cuk adi osunuy. Imẽnpuye ocepit paꞌore juk adi ocesop. 
\v 19 Waram wuykukukat Jesus ajẽm puje soat wuyju acejewemubapuk cewap. Wuycokcog̃ acesop cewap pima. Wararaꞌacat kayap podi ma ocecokcok oceꞌe eykay cewap pima. Xipan oceju jeymuwẽn Jesus pe.
\p — Teyũku juk adi ipiat oꞌsupiꞌajojo jĩjã. Inaka oibuꞌun g̃u ip ekay — i oceꞌe cebe eymuwẽnuwẽn.
\p Ocekawẽn coco buje, Jesus jeꞌe ocewebe: — Eyju xipat cĩcã oxe — i. 
\m Iboap wiwim cĩcã oceju. 
\v 20 Xipan oceju eymuwẽnuwẽn wararaꞌacayũ be. Eyju ocemucokcokcog̃ eyetabut cĩcã buye.
\b
\c 3
\p
\v 1 Imẽneju oceg̃uykitkit cĩcã juk adi ocesop eyawẽg̃ tobuxikꞌũm puye.
\p — Xipat ma wag̃epũg̃ ma onuy am ijopka be- -Atenas ka be — i juk oce obureyũ be.
\p — Haꞌa — i juk oꞌe ip owebe. — Ijopka be ma eg̃uy — i.
\m
\v 2 Wuykitpit Timóteo bit cuk õguju eykay. Deus cuk ixe oꞌtaẽ kawẽn idipat muwẽn ãm oceweju. Ixe Cristo ekawẽn muwẽnuwẽn soat ka dag̃. Ixe juk oceg̃uju eykay eymucokcok am. Eyaꞌõmucan am tak oceg̃uju big̃ ma Cristo kay eyetabut am. 
\v 3 Ixe juk oceg̃uju eykay eywebe eyetabucap epereap puxim ipiatꞌajojomap tomuju. Deus kayꞌũmayũ ipiatpiꞌajojoan wuywebe. Inaka iboap cũg̃ ma Deus xe. Deus ibikuy jebekitkit pe ipiatꞌajo am ixeyũ etabucap puyxijo am. Eyju dak eyetaybit iboam. 
\v 4 Eyxe bima:
\p — Itabutꞌũmayũ ipiat supiꞌajojoat wuywebe Jesus Cristo kay wuyetabut puye — i juk adi oceꞌeꞌe eywebe.
\m G̃asũ dak ipiat oꞌsupiꞌajojoat ip soat pe ocewebe apẽn cuk adi ocece eywebe iap tag̃. 
\v 5 Oceg̃uykitkit cuk adi ocesop eyawẽg̃ tobuxikꞌũm pima.
\p — Ibiõg̃buk kẽrẽayũ kukukat paxi ikẽrẽat oꞌg̃ug̃ẽat cebe ip? — i juk adi oce owebe ma. — Wuymug̃uykukukuꞌukat ekawẽn kay paxi ip oꞌe? — i juk adi oce owebe ma. — Teꞌe ma paxi juk kawẽn idipat og̃uwẽn cebe ip? — i juk adi oce. — Oibuꞌun paxi ip Jesus Cristo kay jetabut am? — i juk adi oce owebe ma.
\p Imẽneju Timóteo juk og̃uju eykay g̃asũ dak paxi Jesus Cristo kay itabut ip iam wetaybit am.
\p
\v 6 G̃asũ bit Timóteo oajẽm eyxewi. Eyawẽg̃ oꞌyawẽg̃tojot ocekay- -yawẽg̃tipatawẽg̃.
\p — Deus kay itabut cĩcã ip — i juk oꞌe ocewebe. — Soat ikukpin cĩcã cexe ip — i juk oꞌe ocewebe. — Soat em g̃ebum ip wuykay, wuykukpin cexe ip puye — i juk oꞌe ocewebe. — Ixeyũ wuyjo pin cĩcã wuywebe ixeyũ jo pinap coꞌi — i juk oꞌe ocewebe.
\p
\v 7 Ocekitpitpiyũ, ocag̃uybabiꞌũm cĩcã juk adi ocesop eykug̃. Jesus Cristo kay eyetabut cĩcã mabuk iap awẽg̃ tobuxik puje bit, ocag̃uykuku oceꞌe eykay, ipiatꞌajojom maꞌg̃u oceju. 
\v 8 Wuykukukat Jesus kay eyetabut cĩcã bima, ocecokcok cĩcã oceꞌe- -ixe kay eybuꞌuꞌũm pima. 
\v 9 Deus eju kawẽnwẽn pima, ocecokcok cĩcã Cristo kay eyetabut puye. Imẽnpuye soat em oceju eꞌem Deus pe: — Bay, ẽn xipat cĩcã — i. — Tessalônia ka watwat itabut cĩcã ekay — i oceju eꞌem cebe.
\m
\v 10 Kabia bun oceju kawẽnwẽn Deus eju eywebeam, ixima bun tak.
\p — Bay, ãg̃ ocejepit Tessalônica ka watwat com — i oceju eꞌem cebe. — Ãg̃ ocejepit ixeyũ mutaybit am ajom itaybit g̃u ip iam, big̃ ma itabut am ip ekay — i oceju eꞌem cebe.
\p
\v 11 — Bay, ocedujupin cuy ece ixeyũ jom — i oceju eꞌem Deus pe.
\m Imẽn oceju eꞌem Deus pe wuyebayat pe, wuykukukat Jesus pe dak. 
\p
\v 12 — Bay, kuy xipan jewewekug̃ ip soat — i oceju eꞌem. — Xipan tak ip wararaꞌacat kug̃ — i oceju eꞌem. — Ixeyũ juy esubuywan big̃ ma ip xipan jewewekuk am, big̃ ma wararaꞌacat kuk am tak ocexe ikukpin ip iap puxim — i oceju eꞌem Deus pe.
\m
\v 13 Imẽn Deus pe eybuywan pima, kaꞌũma ma kuka oꞌe eywebe:
\p — Ikẽrẽat kug̃ eyju Deus xe — i.
\m Ikẽrẽat kug̃ g̃u epesop cexe wuykukukat Jesus ajẽm puje. Ixe jajẽm soat jebekitkit eju- -jaꞌõkayayũ eju.
\b
\c 4
\p
\v 1 Ocekitpitpiyũ, eymukũyjojom cuk adi ocekukuku.
\p — Kũyjobin cuy epesop Deus aꞌõ kay — i juk adi oceꞌeꞌe eywebe.
\m Eyju kũyjobit g̃asũ yaꞌõ kay. Imẽnpit:
\p — Big̃ ma juy kũyjobin epesop yaꞌõ kay ixe mucokcok am — i õn eꞌem eywebe wuykukukat Jesus aꞌõbi.
\m
\v 2 Deus pe ocawẽwẽ ãm eymutaybitbin cuk adi oceku wuykukukat Jesus aꞌõbi. Eyetaybit iboam. 
\v 3 Deus ibikuy wuyekawẽntim wuyeku am soat em. Ibuꞌu jĩjã wuywebe ikẽrẽat kukan. Imẽneju eytayxiꞌũmat eju g̃u juy epeyepo- -eytayxi eju acã. Eyektopꞌũmat eju g̃u juy epeyepo- -eyektop eju acã. 
\v 4-5 Itabutꞌũmayũ ma jewebumũnmũn ayacat tabi o pin cĩcã buye- -Deus itaybitꞌũmayũ. Eyju bit epeyewebumũn cuy ayacat ikukpin cĩcã buye acã. Ibuyxim cuy eytayxi epejukuk cũg̃ ma jeku am Deus etabutpe, ijodiat etabutpe dak. 
\v 6-7 Deus cuk wuynaẽ ikẽrẽm wuyeku am g̃u- -cũg̃ ma wuyeku am acã. Soat tag̃ wuyisum wuydop am cuk wuynaẽ. Eyetabut Jesus kay. Imẽneju wararaꞌacat tayxi kaykay g̃u juy epesop, wararaꞌacat itop kaykay g̃u dak. Ixeyũ kaykay bima bit, wuykukukat ipiat supiꞌajoat eywebe. Kuy bima ocaꞌõpurug̃ cuk adi iboap oceg̃uwẽnuwẽn eywebe. 
\v 8 Deus jebiõg̃buk muõmõm wuywebe- -xipacat muõmõm. Ijudup mubarararag̃ õn ijodiat aꞌõbi g̃u- -Deus aꞌõbi acã. Imẽnpuye wekawẽn kayꞌũmat Deus ekawẽn kay g̃u dak.
\p
\v 9 Deus ma juk adi eymutaybitbin osunuy xipan cuy epeyewekuk eyju ikitpitpiyũ buye iam. Õn pit iboam g̃u jeymutaybin ijudup pe. 
\v 10 Macedônia eipi watwat kug̃ cuk adi epesop xipan. Ocekitpitpiyũ: 
\p — Big̃ ma juy xipan ip epejukuk — i oceju eꞌem eywebe.
\p
\v 11 — Kabaꞌũm cuy epesop eyeweweju — i oceju eꞌem eywebe.
\m Wararaꞌacat ekapikap kay g̃u juy epesop ag̃- -eyekapikap kay acã. Eyekapikap kug̃ ma juy epesop eyemukaypinput pu am. Imẽn ma juk adi eyawẽwẽm ocesop kuy bima dak. 
\v 12 Imẽn eyju kapikpig̃ pima, ibuyxim jeykuk itabutꞌũmayũ. Wararaꞌacat xewi epejoojuy g̃u dak eyemukaypinput.
\p
\v 13 Ocekitpitpiyũ, oceju jeymukũyjo apẽn jeꞌbapuk Jesus kay itabucat pe ceꞌũ buje iam. Iboam eyetaybit pima, eyg̃uycũg̃sũ ma epesop itabucat eꞌũ buje. Itabutꞌũmat eꞌũ buje bit ibureyũ ig̃uycũg̃ cĩcã eꞌem, soat em Deus xe acesop wuyeꞌũ buje iap wiwimꞌũm puye. 
\v 14 Wuyetabut Jesus oeꞌũ iap kay, waram g̃uto oꞌjetait iap kay dak. Imẽnpuye icẽmãn Deus itabucayũꞌũmꞌũm g̃utait g̃uto. Jesus oꞌg̃utaitꞌiayũ idojot ceweju waram jedot puje. Wuyetabut iboap kay dak.
\p
\v 15 Ijodi wuyetait pima, acejeu wuykukukat topabe waram ixe ajẽm puje. Acejeu itabucayũꞌũmꞌũm eu awap g̃u. Ixeyũ eju ma acejeu- -waram cemumutaityũ eju. Iboap muwẽnuwẽn oceju eywebe wuykukukat aꞌõbi. 
\v 16 Wuykukukat Jesus jeꞌkop kabi kadiwi. Deus ekawẽn tojotjotꞌukayũ kukukat ewãwã buje jeꞌkop- -yaꞌõbuyxiat ewãwã buje. Deus eparasuy joꞌiat ede buje jeꞌkop. Deus koam Cristo kay itabucayũꞌũmꞌũm jebit g̃uyu. Soat em itait jeedop ip cexe. 
\v 17 Wuymuyu g̃ebuje. Itabẽg̃ayũ g̃uyu. Ijodiat g̃uyu. Wuymuyu koam oꞌg̃uyuꞌiayũ nomuxik am kabikerereat pe. Ixeyũ eju acejeu wuykukukat topabe. Imẽn soat em acesop cexe- -wuykukukat Jesus xe. 
\v 18 Imẽneju jewemucokcokcog̃ cuy epesop g̃ebum ibo ekawẽn kay- -apẽn jeꞌbapuk itabucayũꞌũmꞌũm pe iap ekawẽn kay.
\b
\c 5
\p
\v 1 Kuy eyetaybit wuykukukat jajẽm iam. Apẽn jeꞌbapuk ixe ajẽm awap iam tak eyetaybit. Imẽnpuye iboaptup otupmubararak g̃u eywebeaptum. 
\v 2 Eyetaybit apẽn wuykukukat waram jajẽm iam. Ixima be ibukurukat ajẽmjẽmap puxim jajẽm ukꞌa iwat ag̃ꞌũma pima iap puxim. Adeayũ ag̃ꞌũm pima jajẽm. 
\v 3 Yukreg̃at teꞌe ma eꞌem:
\p — Obuꞌu oꞌit piꞌajom — i.
\m Jeꞌitpi bima, cenapõn paꞌore eꞌem jeꞌit pibun. Jopiꞌajo ma. Imẽnpuxim adeayũ teꞌe ma eꞌem:
\p — Kabaꞌũm wuyju wuyeweweju — i. — Kaꞌũma ma ipiat supiꞌajoat wuywebe — iꞌeꞌem ip teꞌe ma.
\m Jesus ajẽm puje bit, Deus dao ma ipiat supiꞌajoat cebe ip- -kũyjobitꞌũmayũ be. Cenapõn paꞌore jeꞌe ip ipiat puxixim. 
\v 4 Kabiok tag̃ ibukurukat ajẽmjẽm wuymukuy am. Ocekitpitpiyũ, kabiok tag̃ jekukuꞌukat puxim g̃u wuyju bit. Imẽneju wuykukukat ajẽmap cuy ajowiwi yajẽm puje wuyekuyap puxim. Ibukurukat pe wuymukuyap puxim g̃u juy ace.
\p
\v 5 — Kabiaat ebekitkit oceju — i wuyju eꞌem, Jesus ekawẽn tag̃ wuyju jekukum puye. — Kabiokat ebekitkit g̃u oceju — i wuyju eꞌem, ikẽrẽat mug̃ẽg̃ẽm g̃u wuyju eꞌem puye.
\m Imẽnpuye wuykukukat ajẽm puje acejekuy g̃u. 
\v 6 Jesus kay itabutꞌũmat ixecat puxim- -ag̃ꞌũmat puxim. Ixecat puxim g̃u juy ajekuku. Ag̃ cuy ajekuku. Wuykukukat ajẽmap cuy ajowiwi. 
\v 7 Kabiokat ebekitkiyũ yag̃uybaꞌarẽm jekukum soat em ikaꞌoat puxim. Ikẽrẽat mug̃ẽg̃ẽm ip soat em. 
\v 8 Wuyju bit kabiaat ebekitkiyũ. Ikẽrẽat mug̃ẽg̃ẽm g̃u wuyju eꞌem. Imẽnpuye wuyag̃uybaꞌarẽm g̃u juy ajeku- -wuyag̃uysan acã. Jesus Cristo kay wuyetabun cĩcã juy ajop wuyjuap puxim ipiatꞌajojoap kay. Xipan cuy soat ajukuk. Imẽn jekukum pima sorara buxim acesop, xipan wararaꞌacat kug̃ pima dak. Sorara jaꞌõxa dag̃ icaat kug̃ jaokaap puxim. Soat em Deus xe acesop iap wiwim cuy acesop. Iboap wiwim pima ja be icaat kukat puxim aceꞌe. 
\v 9 Ipiatꞌajojoap kay wuymuju am g̃u Deus cuk wuynaẽ- -wuydaxijo am acã. Ixe wuydaxijojom wuykukukat Jesus Cristo oeꞌũ wuywebeam puye. 
\v 10 Ixe Cristo oeꞌũ wuywebeam. Oeꞌũ wuywebe soat em jexe wuydop am. Ixe ajẽm puje aceju cekay wuyetait pima, wuyeꞌũ bima dak. 
\v 11 Imẽneju juy epeyewemucokcog̃. Jewebuywatwan tak cuy epesop big̃ ma eyetabut am Jesus kay. G̃asũ dak eyju jewemucokcokcog̃, jewebuywatwan tak. Imẽnpit big̃ ma juy: — Imẽn epesop — i õn eꞌem eywebe.
\p
\v 12 Ocekitpitpiyũ: — Ibuyxim cuy eymutaybitbinꞌukayũ epejukuk — i oceju eꞌem eywebe. Wuykukukat cuk ixeyũ oꞌtaẽ jekawẽn eymutaybitbin am, eymukũyjojo am tak. 
\v 13 Kapikg̃pig̃ ip eywebeam. Imẽnpuye xipan cuy ixeyũ epejukuk. Ibuyxim cuy epejukuk ip. 
\p
\v 14 Imẽn cuy jeyawẽ oceju. Eyaꞌõpurug̃ cuy ibukapikꞌũmat epeyawẽ. Ig̃uycũg̃cũg̃ayũ juy epeg̃ucokcog̃. Itabutbũcayũ juy epesubuywan big̃ ma itabut am ip Jesus kay. Eyukpiceg̃ẽm g̃u juy epejukuk wararaꞌacat- -eyaꞌõdim ma. 
\v 15 Ikẽrẽm g̃u juy wararaꞌacat epejukuk, ikẽrẽm maꞌg̃u ip eykug̃. Soat em xipan cuy epeyewekuk. Wararaꞌacayũ dak cuy epejukuk xipan.
\p
\v 16 Soat em cuy eycokcog̃ epesop. 
\v 17 Soat em cuy kawẽnwẽn epesop Deus eju. 
\v 18 Soat em cuy epeꞌeꞌe Deus pe:
\p — Bay, ẽn xipat cĩcã — i.
\m Imẽn cuy epeꞌeꞌe cebe xipacat jebapukpug̃ eywebe bima, xipatꞌũmat jebapukpug̃ pima dak. Deus ibikuy eywebe imẽn eyeku am Jesus Cristo ejo mũg̃ꞌi jekukum pima. 
\v 19 Ibiõg̃buk xipacat e ojuyaap mubaꞌarẽmrẽm g̃u juy epesop. 
\v 20 Deus biõg̃buk aꞌõbi wararaꞌacat ekawẽn puje juy epejowayway g̃u. 
\v 21 Ijodiat ekawẽn co buje juy epeꞌeꞌe eyewewebe:
\p — Icẽm tu ite eꞌem? — i.
\m Wararaꞌacat ekawẽn kay g̃u juy epesop eyetabun- -xipacat ekawẽn kay ã. 
\v 22 Ade opop iwarururuat xipatꞌũmat. Epejukuk g̃u- -pũg̃ tak kaꞌũma.
\p
\v 23 Deus eju õn kawẽnwẽn eywebeam. Ixe Deus wuyag̃uymubabibinꞌukat.
\p — Bay, Tessalônica ka watwat cuy eg̃uisun soat tag̃ ikẽrẽat kukap puxim ip — i õn eꞌem Deus pe. — Ixeyũ juy eyaꞌõmucanucan ikẽrẽat mug̃ẽap puxim — i õn eꞌem cebe. — Ixeyũ jebit cuy eg̃uisun — i õn eꞌem cebe. — Eyag̃uymuisun tak cuy ip — i dak. — Esubiõg̃bukmuisun tak cuy ip — i dak õn eꞌem cebe. — Ixeyũ aꞌõmucanucan pima, ikẽrẽat kug̃ g̃u jeꞌe ip exe, ocekukukat Jesus Cristo ajẽm puje — i õn eꞌem Deus pe. — Soat tag̃ idip jeꞌe ip exe — i õn eꞌem cebe.
\m
\v 24 Deus wuynaẽhẽm ikẽrẽat kug̃ꞌũmayũm. Ixe ma wuymuisun soat tag̃, soat em jaꞌõ dag̃ eꞌem puye.
\p
\v 25 Ocekitpitpiyũ, ocewebeam tak cuy epeyekawẽnwẽn Deus eju.
\p
\v 26 Epeyewakobotbot cuy wuykukpin wuyeweweju iap mubapuk am soat pe.
\p
\v 27 — Ijudup cuy epetupcoat soat pe- -wuykitpitpiyũ be — i õn eꞌem eywebe.
\m Imẽn õn eꞌem wuykukukat aꞌõbi.
\p
\v 28 — Xipan cuy Tessalônica ka watwat ejukuk — i õn eꞌem wuykukukat Jesus Cristo be.
\m Ibũrũ ma.