\id 2TH Mundurukú [myu] NT (Brazil) -2010 bd. 
\h 2 Tessalonicenses
\toc1 Tessalônica ka watwat peaptup- -xepxepatup
\toc2 Segunda Carta aos Tessalonicenses
\mt TESSALÔNICA KA WATWAT PEAPTUP PAULO EMUDUPMUBARARAKTUP XEPXEPATUP
\c 1
\p
\v 1 Tessalônica ka watwat, cartadup mubararag̃ õn Silas eju. Timóteo eju dak. Ijudup mubarararag̃ õn eywebeaptum- -Jesus kay itabucayũ beaptum. Õn Paulo. Eyju Deus ebekitkit- -wuyebay ebekitkit. Wuykukukat ebekitkit eyju- -Jesus Cristo ebekitkit.
\p
\v 2 — Bay, xipan cuy Tessalônica ka watwat ejukuk — i õn eꞌem Deus pe- -wuyebay be, wuykukukat Jesus Cristo be dak. — Ixeyũ ag̃uymubabibin cuy eg̃uy — i õn eꞌem cebe.
\p
\v 3 Ocekitpitpiyũ, oceju eꞌem Deus pe: 
\p — Bay, ẽn xipat cĩcã — i. 
\m Soat em big̃ ma eyetabut Jesus Cristo kay. Soat em eyju big̃ ma xipan jewewekug̃. Imẽnpuye cedag̃ ocewebe “Ẽn xipat cĩcã” iꞌe am Deus pe. 
\v 4 Itabutꞌũmayũ juk adi ipiat oꞌsupiꞌajojoat eywebe. Inaka eybuꞌu g̃u epesop eyetabut am Jesus kay ipiatpiꞌajojom maꞌg̃u eyju. Eyetabut cĩcã Jesus kay. Eyetaxi jĩjã ipiatpiꞌajo am. Imẽnpuye:
\p — Tessalônica ka watwat xipat cĩcã. Ibuꞌu g̃u ip jetabut am Jesus kay ipiatꞌajojom maꞌg̃u ip — i oceju eꞌem waraꞌat ka watwat pe- -Jesus kay itabucayũ be. — Itaxi jĩjã ip ipiatpiꞌajo am — i oceju eꞌem cebe ip.
\p
\v 5 Ipiatpiꞌajojom eyju Deus ebekitkit puye. Imẽnpuye Deus jeꞌe eywebe:
\p — Cedag̃ ma eywebe soat em oxe eydop am — i. — On soat kukukan pima, oxe ma epesop, cuk adi eyetaxi epesop ipiatpiꞌajo am puye — i jeꞌe Deus eywebe.
\m Ixe cũg̃ ma eꞌem soat em ma. 
\v 6 Deus soat em cũg̃ ma eꞌem. Imẽnpuye ixe ipiat supiꞌajoat eykayꞌũmayũ be- -ipiatpiꞌajojoan eywebeꞌiayũ be. 
\v 7 Deus jeybuywan ipiatꞌajojom pima. Ocebuywan tak ipiatpiꞌajojom pima. Imẽn ixe wuybuywan waram g̃uto wuykukukat Jesus ajẽm puje dak. Kabi kadiwi ixe jajẽm. Jekawẽn tojotjotꞌukayũ eju jajẽm- -yaꞌõbacaayũ eju. 
\v 8 Daxa kug̃ jajẽm. Ixe jajẽm ipiatpiꞌajoan Deus itaybitꞌũmayũ be. Ipiat supiꞌajojoat wuykukukat Jesus aꞌõ kayꞌũmayũ be- -kawẽn idipat kayꞌũmayũ be.
\p
\v 9-10 — Jesus soat podi ma yaꞌõbaca — i jeꞌe ip ixe ebekitkit wuykukukat ajẽm puje.
\m Eyju dak imẽn ma epeꞌe.
\p — Soat podi ma aꞌõbuyxi ẽn — i jeꞌe ip soat itabucayũ.
\m Eyju dak ixeyũ eju epesop ocewebe eymukũyjojoap kay juk eyetabut puye. Cekay itabutꞌũmayũ bit ipiatꞌajojom jeedop ip soat em. Soat em wũy ma jeedop ip wuykukukat wi.
\p — Soat podi ma Jesus idip- -yaꞌõbaca dak — i jeꞌe ip adeayũ.
\m Itabutꞌũmayũ bit ixe aꞌõbacaap jojo g̃u ip wũy buye. Idipap coco g̃u ip wũy buye.
\p
\v 11 Imẽneju soat em oceju kawẽnwẽn Deus eju eywebeam.
\p — Bay, Tessalônica ka watwat puywatwan cuy eg̃uy cũg̃ ma ceku am ip — i oceju eꞌem cebe. — Bay, ẽn cuk ixeyũ etaẽ cũg̃ ma ceku am ip — i oceju eꞌem. — Bay, kũyjobit pin ip aꞌõ kay — i oceju eꞌem. — Aꞌõbacaap cuy eg̃ũm cebe ip wararaꞌacat kuk am ip xipan — i oceju eꞌem. — Bay, Jesus kay itabut ip — i oceju eꞌem. — Imẽnpuye ixeyũ buywatwan cuy eg̃uy ebikuyap tag̃ ceku am ip — i oceju eꞌem Deus pe.
\m
\v 12 Imẽn oceju kawẽnwẽn Deus eju eywebeam.
\p — Soat podi ma Jesus Cristo xipat — i jeꞌe ip adeayũ, wuyju Deus bikuyap tag̃ jekukum puye.
\p — Tessalônica ka watwat xipat cĩcã oxe — i jeꞌe Deus.
\m Ixe imẽn jeꞌe soat em xipacat ũmũm wuywebe buye. Wuykukukat Jesus Cristo dak soat em xipacat ũmũm wuywebe.
\b
\c 2
\p
\v 1 — Wuykukukat Jesus Cristo waram jajẽm — i juk adi oceꞌeꞌe eywebe, ocekitpitpiyũ. — Ixe dopabe juy acejeꞌawero — i dak cuk adi oceꞌeꞌe eywebe. — Ixe xe acesop soat em — i dak cuk adi oceꞌeꞌe. 
\m Iboam eymukũyjojom cuk adi ocekuku. 
\v 2 Pũg̃pũg̃ayũ bit napa ma eꞌem eywebe:
\p — Wuykukukat Jesus Cristo kuy oajẽm waram — i. — Paulo iboap cuk adi oꞌg̃uwẽnuwẽn wuywebe Deus biõg̃buk aꞌõbi — i napa ma eꞌem ip. — Paulo wuykukukat kuy oajẽm waram iaptup cuk oꞌtupmubararak wuywebeaptum — i napa ma eꞌem ip eywebe.
\m Ocekitpitpiyũ, wekawẽn coꞌisum ma eyag̃uybabiꞌũma epesop! Eyag̃uybabiꞌũm g̃u juy epesop ixeyũ ekawẽn kay- -napaap ekawẽn kay. 
\v 3 Eydayꞌemꞌum cuy epesop wararaꞌacat pe eymug̃uykukuap puxim. Waraꞌat cuy koap jeꞌbapuk wuykukukat ajẽm awap. Koap cuy Deus kayꞌũmayũ jeꞌbapuk wuyparakpe. Deus aꞌõ kay kũyjobitꞌũm cĩcã jeku ip. Ikẽrẽat mujurũg̃rũg̃xiat tak cuy jeꞌbapuk. Kuyje:
\p — Õn ma ikẽrẽat mujurũg̃rũg̃xiat cuy og̃uju ipiatꞌajojoap kay — ioꞌe Deus. — Wũy ma jeenuy oxewi soat em ipiatꞌajojom — ioꞌe Deus.
\m Imẽnpuye ibaꞌore wararaꞌacat pe ixe mujuꞌũm ãm. Jeꞌju ma Deus aꞌõbi ipiatꞌajojoap kay. 
\v 4 Ixe ikẽrẽat mujurũg̃rũg̃xiat itakoma jĩjã jeꞌe jewexe deusyũ kay- -deusbaroyũ kay. Ijodiat ibuyxim ikug̃ iayũ kay itakoma jĩjã jeꞌe.
\p — Iteyũ bodi ma waꞌõbuyxi — i napa ma jeꞌe ixe. — Ixeyũ aꞌõ kay g̃u juy epesop- -waꞌõ kay acã — i jeꞌe ixe soat pe ijodiat pe.
\m Ixe jabik Deus eju kawẽnwẽnapꞌa be- -yabog̃atꞌa be. Deus jomuymuy soat pe ijodiat pe.
\p — Õn acã Deus — i napa ma jeꞌe.
\m Imẽg̃ap ebapuk puje, Jesus Cristo jajẽm.
\p
\v 5 Ade em iboap cuk adi og̃uwẽnuwẽn eywebe eyxe bima. G̃ebum g̃u du eyju wekawẽn kay? 
\v 6 G̃asũ ma wararaꞌacat ikẽrẽat mujurũg̃rũg̃xiat ajẽmap mubaꞌoreren. Eyetaybit iboam. Ixe ajẽmap ekabia be bit jajẽm. 
\v 7 Ibaꞌarẽm ma ikẽrẽat mujurũg̃rũg̃ g̃asũ ikẽrẽat mujurũg̃rũg̃xiat. G̃uyjom pit Deus ixe ajẽmap mubaꞌorerenꞌukat juꞌuk. Iꞌuk puje, ibapug̃ ma ikẽrẽat g̃ujurũg̃rũg̃ soat etabutpe. 
\v 8 Iꞌuk puje, ikẽrẽat mujurũg̃rũg̃xiat jeꞌbapuk. Wuykukukat Jesus ajẽm puje bit, ixe g̃uꞌũm. Puw! Jebidom ixe g̃uꞌũm. ꞌũm. Ixe aꞌõbacaap g̃uꞌũm. ꞌũm. Ixe aꞌõbacaap g̃uꞌũm jajẽm ãm idipan. 
\v 9 Ikẽrẽat mujurũg̃rũg̃xiat jajẽm. Satanás aꞌõbacaap kug̃. Napa ma jaꞌõbacaap g̃ubapuk adeayũ etabutpe. Wuywebe iꞌe baꞌoreat g̃ubapuk adeayũ mug̃uykuku ojuy. Itabẽg̃bẽg̃ jeedop ip ixe aꞌõbacaap cocom, jewemug̃uykukukum ip puye. 
\v 10 Ipiatꞌajojoap kay cumayũ g̃ug̃uykuku. Ipiatꞌajojoap kay jeꞌju ip kawẽn icẽmat kay kũyjobitꞌũm puye. Ibuꞌu jĩjã ip osodop jetabut am kawẽn icẽmat kay. Deus pe jedaxijo an ibuꞌu ip osodop. 
\v 11 Imẽneju Deus wuymug̃uykukukuꞌukat g̃uju ixeyũ kay ixeyũ mutabut am napaap kay. 
\v 12 Imẽnpuye soat ip yukpiwat jeedop Deus xe. Wũy ma jeedop ip Deus wi kawẽn icẽmat kay kũyjobitꞌũm puye- -napa ma iꞌe am icokcok puye dak.
\p
\v 13 Ocekitpitpiyũ, eykukpin cĩcã wuykukukat xe. Ipi mujurũg̃ꞌisum Deus cuk eynaẽ eydaxijo am. Ibiõg̃buk xipacat jaꞌõbacaap ũmũm eywebe xipacat mujurũg̃rũg̃ꞌukayũm. Kawẽn icẽmat kay eyetabut. Imẽneju Deus ebekitkiyũ eyju. Imẽnpuye soat em:
\p — Bay, ẽn xipat cĩcã, Tessalônica ka watwat etaxijo buye — i oceju eꞌem Deus pe. 
\m
\v 14 Ixe juk eynaẽ wuykukukat Jesus Cristo dipap coꞌi eyꞌe am. Ixe ekawẽn kay eyetabut, kawẽn idipat oceg̃uwẽn eywebe buye.
\p — Kaꞌũma ma wuykukukat Jesus Cristo joꞌiat idipat — i jeꞌe adeayũ. 
\m Deus cuk wuynaẽ Jesus Cristo joꞌiayũm wuyꞌe am. 
\v 15 Imẽneju, ocekitpitpiyũ, kawẽn icẽmat kay jĩjã juy epesop. Eybuꞌum g̃u juy epesop kawẽn icẽmat tag̃ eyeku am- -pũg̃ em tak kaꞌũma. Kawẽn icẽmat cuk adi oceg̃uwẽnuwẽn eywebe ocekawẽn tag̃, ocemudupmubararaktup pe dak- -eywebeaptup pe.
\p
\v 16 Jesus Cristo wuykukukat. Deus wuyebay. Ixeyũ xe juk adi wuykukpin cĩcã ajop. Wuyaꞌõmucanucanꞌuk ip osodop. Wuybuywatwatꞌuk ip osodop wuywebe soat em Jesus xe acesop iap wiwi am. Wararaꞌacat podi ma xipan wuykug̃ ip, xipat g̃u maꞌg̃u wuyju. 
\v 17 Imẽneju Deus eju õn kawẽnwẽn eywebeam.
\p — Tessalônica ka watwat aꞌõmucanucan cuy eg̃uy — i õn eꞌem cebe. — Ixeyũ buywatwan cuy eg̃uy ixeyũ be soat em xipacat mujurũg̃rũg̃ ãm; soat em cekawẽntip iꞌe am tak — i õn eꞌem Deus pe.
\b
\c 3
\p
\v 1 Ocekitpitpiyũ, g̃asũ õn waraꞌat ekawẽn jeymukũyjo. Ocewebeam cuy epeyekawẽn Deus eju.
\p — Pauloyũ juy esubuywan ixeyũ be dao ma ekawẽn muwẽn ãm soat ka watwat pe — i juy epeꞌe cebe. — Yaꞌĩjojoꞌibiyũ juy eg̃utabun ekawẽn kay apẽn cuk adi ẽn ocemutabun iap puxim — i juy epeꞌe cebe.
\m
\v 2 Soat g̃u itabut Jesus ekawẽn kay. Ixeyũ itabutꞌũmayũ ikẽrẽat mujurũg̃rũg̃ soat ka dag̃. Warẽmtag̃ ip jekukum. Imẽnpuye:
\p — Pauloyũ juy etaxijo ikẽrẽat mujurũg̃rũg̃ꞌukayũ be yaokaap puxim — i juy epeꞌe Deus pe.
\p
\v 3 Imẽnpit soat em wuykukukat eꞌem apẽn cuk adi oꞌeꞌe iap tag̃. Ixe jeyaꞌõmucan. Ixe jeydaxijo ikẽrẽat mujurũg̃rũg̃ꞌukayũ kukukat pui bewi- -Satanás pui bewi. 
\v 4 Apẽn cuk adi oce eywebe iap tag̃ eyju jekukum. G̃uyjom tak iboap tag̃ epeku soat em. Ocetaybit iboam. Imẽnpuye wuykukukat ocemucokcokcog̃ eykay.
\p
\v 5 Eywebeam õn kawẽnwẽn Deus eju.
\p — Bay, exe ocekukpin cĩcã juk adi ocesop — i õn eꞌem cebe. — Tessalônica ka watwat cuy esubuywan ixeyũ be xipan wararaꞌacat kuk am — i õn eꞌem. — Bay, Cristo juk adi itaxi jĩjã osunuy ipiatꞌajo am — i õn eꞌem. — Tessalônica ka watwat cuy esubuywan itaxi am ip ipiatꞌajo am — i õn eꞌem.
\p
\v 6 Ocekitpitpiyũ, pũg̃pũg̃ wuykitpitpiyũꞌin ibuꞌu jĩjã kapig̃. Apẽn cuk adi oceju eymutaybitbinap tag̃ g̃u ip jekukum. Ixeyũ burem cĩcã g̃u juy epeku. Iboam oceju eꞌem eywebe wuykukukat Jesus Cristo aꞌõbi. 
\v 7 Eyju eyetaybit apẽn cuk adi ocekukuku iam. Imẽnpuye ocekukuap puxim cuy epekuku. Eyxe bima juk adi ocebuꞌuꞌu g̃u ocesop kapig̃. 
\v 8 Teiꞌũm g̃u juk adi ocejajat ocexan eyxewi- -teihem acã. Kabiam cuk adi ocejekapikpik, ixima dag̃ tak eyxewi ocexat ojuyap puxim, ocemukaypinput ojuyap puxim tak. 
\v 9 Cedag̃ kuka oꞌe ocewebe ocexat ojuy am eyxewi, Deus ekawẽn eymutaybitbin puye. Imẽnpit eyxewi juk adi ocejoojuyjuy g̃u. Ocebuꞌuꞌu g̃u juk adi ocesop kapig̃ eyju dak eybuꞌuap puxim.
\p
\v 10 — Ibukapikꞌũmat jekõn g̃u juy — i juk adi oceꞌeꞌe eywebe eyxe bima.
\p
\v 11 Ijudup mubarararag̃ oceju kuy juk eyawẽg̃ oceyawẽg̃tobuxik puye.
\p — Ibuꞌuꞌu ip kapig̃ pũg̃pũg̃ Tessalônica ka watwat — i juk adi oꞌeꞌe ip ocewebe. — Jebureyũ muymuy acã ip eꞌem — i juk adi oꞌeꞌe ip ocewebe.
\p
\v 12 — Eybuꞌum g̃u juy epesop kapig̃ eyxat pu am, eydoti bu am tak — i oceju eꞌem ibukapikꞌũmayũ be. — Eybureyũ epejomuymuy g̃u juy — i oceju eꞌem cebe ip. — Eyekawẽntim cuy epesop — i oceju eꞌem cebe ip wuykukukat aꞌõbi- -Jesus Cristo aꞌõbi.
\m
\v 13 Ocekitpitpiyũ, eyju bit xipacat mujurũg̃rũg̃ap epeyepere g̃u juy. 
\v 14 Ijudup ekawẽn kay kũyjobitꞌũmat eju g̃u juy epekuku ixe musũsũn ãm. Waram acoꞌi kũyjobin jeꞌe isũsũn puye. 
\v 15 Eykay itakomaat kukap puxim cuy ixe epejukuk. Ixe bit cuy epeyawẽ eykitpit puye.
\p
\v 16 Wuykukukat wuyag̃uymucũg̃ucũg̃.
\p — Okukukat, Tessalônica ka watwat ag̃uymubabibin cuy eg̃uy soat em- -xipacat cebe ip jebapukpug̃ pima, xipatꞌũmat jebapukpug̃ pima dak — i õn eꞌem cebe. — Soat em cuy ag̃ eg̃uy ixeyũ kay — i õn eꞌem cebe.
\p
\v 17 Paulo kato mujujum eywebe iaptup mubarararag̃ õn obubin ma. Imẽn cuk adi otupmubararak soatup- -wemudupmubararaktup. Imẽn ma ijudup tak otupmuju eykay.
\p
\v 18 — Xipan cuy Tessalônica ka watwat ejukuk — i õn eꞌem wuykukukat pe- -Jesus Cristo be.
\m Ibũrũdup ma.