\id 1TI Mundurukú [myu] NT (Brazil) -2010 bd. 
\h 1 Timóteo
\toc1 Timóteo beaptup- -koapatup
\toc2 Primeira Carta a Timóteo
\mt TIMÓTEO BEAPTUP PAULO EMUDUPMUBARARAKTUP KOAPATUP
\c 1
\p
\v 1 Timóteo, ijudup mubarararag̃ õn ewebeaptum kato muju am ewebeiaptup. Paulo õn. Deus wuydaxijojoꞌukat. Soat em Deus xe acesop wuyetait Jesus Cristo kay wuyetabut puye. Iboap wiwim cĩcã wuyju. Ixe Jesus Cristo emumuju õn. Ixe aꞌõbi õn jekukum kawẽn idipat muwẽnuwẽn, Deus aꞌõbi dak. 
\v 2 Ẽn okpot coꞌi jewag̃uyjojoꞌi ma wuyetabut Jesus Cristo kay buye.
\p — Bay, xipan cuy Timóteo ejukuk — i õn eꞌem Deus pe- -wuyebay be. — Etabotaidabotbon cuy eg̃uy Timóteo kay — i õn eꞌem Deus pe, Jesus Cristo be dak- -wuykukukat pe. — Yag̃uymubabibin cuy eg̃uy — i õn eꞌem cebe.
\p
\v 3 — Éfeso ka be juy eg̃uy ibo ka watwat mutaybit am — i juk oce ewebe Macedônia eipi kay oju pin pima.
\m G̃asũ dak obikuy ewebe Éfeso ka be enuy am. Pũg̃pũg̃ayũ warẽmtag̃ ibo ka watwat mutaybitbin. Deus ekawẽn g̃u ip imutaybitbin- -jekawẽn acã.
\p — Warẽmtag̃ g̃u juy epeg̃utaybin — i juy ece ixeyũ ag̃okatkayũ be. — Epeyepere juy warẽmtag̃ ma imutaybitbinap — i. 
\v 4 — Epeyekawẽnwẽn g̃u juy apẽn wuydobuyũꞌũmꞌũm cuk adi oꞌeꞌe iam — i juy ece cebe ip. — Epeg̃uwẽnuwẽn g̃u juy wuydobuyũꞌũmꞌũm putet — i juy ece cebe ip. — Jewaꞌõxikxig̃ acã epesop iboap muwẽnuwẽn pima — i juy ece cebe ip. — Iboam eyju kawẽnwẽn pima, wararaꞌacat epeg̃ubikuy g̃u Deus ekawẽn tag̃ jeku am — i juy ece.
\m Wuyetabut pima acã wuyetaybit Deusan.
\p
\v 5 — “Wuydobuyũꞌũmꞌũm ekawẽn g̃u juy epeyekawẽn- -Deus ekawẽn acã,” i juy ece cebe ip — i õn eꞌem ewebe.
\m Imẽn õn eyawẽwẽm eywebe big̃ ma xipan eyewewekuk am. Apẽn cedag̃ wuyxe iap tag̃ jekukum pima xipan wuyju jewewekug̃, wuyag̃uyisu bima dak; icẽmãn wuyetabut Jesus Cristo kay bima dak. 
\v 6 Pũg̃pũg̃ayũ bit cũg̃ ma jekukuap oꞌjepere. Cũg̃at e dag̃wi oitabidaoꞌiayũ buxim ip. Warẽmtag̃ ma ip jemãmãmãm oꞌe. 
\v 7 Deus ekawẽn imutaybitbinꞌukayũm pin ip- -Moisés pe oꞌg̃uwẽnꞌiat ekawẽn imutaybitbinꞌukayũm pin. Imẽnpit itaybitbũt ã ip ixe ekawẽn. Iboap ekawẽn ibaꞌarẽm cexe ip. Imẽnpuye teꞌe ma eꞌem ip:
\p — Oceju ma juy Deus ekawẽn jeymutaybin — i.
\p
\v 8 Wuyetaybit Deus ekawẽn kawẽntip cĩcã iam- -Moisés pe oꞌg̃uwẽn iap ekawẽn- -wuyawẽwẽap ekawẽn. Ixe ekawẽn tag̃ jekukum pima xipat cĩcã kuka oꞌe wuyxe. 
\v 9 Deus jekawẽn oꞌg̃uwẽn cũg̃ ma jekukuꞌukayũ awẽ ãm g̃u- -warẽmtag̃ jekukuꞌukayũ awẽ ãm acã. Wuyetaybit iboam. Ibũrũ ma juk jekawẽn oꞌg̃uwẽn: ikaꞌũmayũ be, iecug̃ap aꞌõ kay kũyjobitꞌũmayũ be dak, jekay itabutꞌũmayũ be dak, ikẽrẽat mujurũg̃rũg̃ꞌukayũ be dak, jekayꞌũmayũ be dak, jebiõg̃buk aꞌõ kayꞌũmayũ be dak, cebay oꞌyaokaꞌiayũ be dak, wararaꞌacat oꞌyaokaꞌiayũ be dak, 
\v 10 wararaꞌacat tayxi kaykayꞌukayũ be dak, wararaꞌacat itop kaykayꞌukayũ be dak, jewekpidaodaoꞌukayũ be dak, jenuyꞌũnakekeꞌukayũ be dak, dinheiro bu am wararaꞌacayũ dujupaꞌumꞌumꞌukayũ be dak, napapaꞌukayũ be dak, wararaꞌacat awẽg̃ mukẽrẽrẽrẽnꞌukayũ be dak, jemumutaybitbinap muwarururunꞌukayũ be dak. Ibũrũ be ma jekawẽn oꞌg̃uwẽn. Ixeyũ awẽ ãm Deus jekawẽn oꞌg̃uwẽn.
\p
\v 11 — Wekawẽn acã juy eg̃uwẽnuwẽn soat kaka watwat pe — i juk oꞌe owebe Deus.
\m Ibiat ekawẽn acã õn imuwẽnuwẽn. Iboap acã icẽmat. Ixe Deus soat podi ma xipat. Kaꞌũma ma omuy ixe joꞌiat yaꞌõbuyxiat, idipat tak.
\p
\v 12 — Ẽn xipat cĩcã oxe — i juk oꞌe owebe wuykukukat Jesus Cristo. — Owebeam cuy kapikpig̃ eg̃uy kawẽn idipat muwẽn ãm soat ka dag̃acat pe — i juk oꞌe owebe.
\m Ixe soat em waꞌõmucanucan owebe kawẽn idipat muwẽn ãm soat ka dag̃acat pe. Imẽnpuye soat em õn eꞌem cebe:
\p Ẽn xipan cĩcã okug̃ — i. 
\p
\v 13 Jesus cuk adi ojomuymuy. Ixe butet cuk osubutetmukẽrẽrẽrẽn kuy bima. Warẽmtag̃ ma juk adi Jesus kayayũ ojukukuk. Imẽnpit Deus itabotaidabotbot cĩcã osunuy okay, Jesus kay wetabut g̃u og̃uy buye. Wetaybitꞌũma ojekukuku wetabutꞌũm puye. 
\v 14 Wuykukukat wararaꞌacayũ bodi ma xipan cuk adi okuk. Ixe juk omutabun jewekay. Ixe juk omutaybin ikukpin wararaꞌacayũ kuk am. Imẽn wuyju jekukum Jesus Cristo eju mũg̃ꞌi bima.
\p
\v 15 — Jesus Cristo osodot ipi kay ikẽrẽat mujurũg̃rũg̃ꞌukayũ daxijo am — i wuyju eꞌem.
\m Icẽmãn wuyju iboam eꞌem. Cedag̃ cĩcã wuywebe wuyetabut am iboap ekawẽn kay. Wararaꞌacat ikẽrẽat mujurũg̃rũg̃ꞌukat podi ma õn ikẽrẽat mujurũg̃rũg̃ꞌukat. 
\v 16 Imẽnpit Deus itabotaidabotbot cĩcã osunuy okay. Jesus Cristo yukpiceg̃ẽm g̃u oꞌe okay. G̃asũ ixe eꞌem wararaꞌacayũ be:
\p — Eyaꞌõpicũg̃cũg̃ cuy epesop — i. — Paulo ma ikẽrẽat mujurũg̃rũg̃xi osunuy. Õn pit ikẽrẽm g̃u ixe ojukuk- -xipan acã ixe ojukuk — iꞌeꞌem Deus wararaꞌacayũ be.
\m Itabut jeꞌe ip cekay itabutꞌũmayũ, xipan okug̃ puye, yukpiceg̃ẽm g̃u oꞌe okay buye dak. Soat em Deus xe jeedop ip itait.
\p
\v 17 — Ẽn pit soat podi ma xipat — i juy ace ixe Deus pe.
\m Ibuyxim cuy ixe ajukuk. Kuyje ixe Deus soat kukukat osunuy. G̃asũ dak eꞌem ijodiacat kukukat. G̃uyjom tak soat kukukan jeenuy. Ixe acã jeꞌũ g̃u. Soat em itait jeenuy. Ixe ijo baꞌore wuywebe. Ixe acã Deusat. Kaꞌũmg̃u waraꞌat- -ixe acã. Imẽneju:
\p — Soat podi ma ẽn edip — i juy ace cebe soat em.
\m Imẽn cuy ace!
\p
\v 18 Timóteo, ẽn okpot coꞌi. Imẽnpuye jawẽwẽ juy õn. Kuy bima Deus ekawẽn muwẽnuwẽnꞌukayũ oꞌe ewebe:
\p — Deus cuk enaẽ jekawẽn muwẽn ãm soat ka watwat pe — i.
\m G̃ebum cuy eg̃uy ixeyũ ekawẽn kay! Sorarayũ icaat kug̃ jaokaap puxim. Imẽnpuxim g̃ebum cuy eg̃uy apẽn cuk oꞌeꞌe ip ewebe iap kay aꞌõbacaꞌũmap puxim. 
\v 19 Jesus Cristo kay etabucap ecepere g̃u juy. Apẽn cũg̃ ma exe iap tag̃ cuy ejeku, Timóteo. Pũg̃pũg̃ayũ bit apẽn cũg̃ ma jexe iap tag̃ g̃u ip jekukum. Jesus Cristo kay jetabucap oꞌjepere ip ixeyũ ag̃okatkayũ. Itabucap ip oiꞌũm apẽn kobexixi epirig̃ puje soat iꞌũmap puxim. 
\v 20 Himeneu ixeyũꞌin, Alexandre dak. Imẽnpuye ixeyũ xepxepayũ og̃ukorẽm.
\p — Satanás eykukan cuy jeꞌe — i juk oce cebe ip ixeyũ mukũyjo am. 
\m Ixeyũ og̃ukorẽm itaybit am Deus muymuyꞌũm ãm.
\b
\c 2
\p
\v 1 Koap õn jawẽ Deus eju kawẽn ãm. Acekawẽn cuy Deus eju soat peam ijodiat peam.
\p — Bay, xipan cuy ixeyũ ejukuk — i dak cuy ace cebe. — Ixeyũ juy esubuywan — i juy ace cebe.
\m Ajoojuy Deus xewi soat peam. Wuyetaybit ixe soat em xipan wuykug̃ iam. Imẽnpuye soat em:
\p — Bay, ẽn xipat cĩcã — i juy ace cebe.
\m
\v 2 Deus eju juy acekawẽn soat eipi kukukayũ beam, soat ka watwat kukukayũ beam tak. Deus eju juy acekawẽn ixeyũ be xipan wuykuk am, wuywebe kabaꞌũm wuydop am tak, wuywebe Deus bikuyap tag̃ wuyeku am tak, cedag̃ ma wuyeku am tak. 
\v 3 Xipan wuyekukuap xipat Deus xe- -wuydaxijojoꞌukat xe. Xipan wuyju jekukum pima, Deus mucokcokcog̃ acesop. 
\v 4 Ixe Deus ibikuy soat taxijo am ipiatꞌajojoap kay ijuap puxim. Ibikuy ijodiacayũ be itaybit am kawẽn icẽmãn. 
\v 5-6 Pũg̃ ma Deusat omuy. Ixe itakoma jĩjã ikẽrẽat mujurũg̃rũg̃ap kay. Ijodi bima Jesus Cristo ag̃okatkan oꞌe. Jekpiwan ma oeꞌũ soat pewi ikẽrẽat uk am. Imẽneju Jesus Deus etakomaap oꞌg̃uꞌũm. Ixe Jesus jebay oꞌg̃udin ijodiat kay. Yawẽg̃ muwẽn pin pima, Deus Jesus eꞌũap awẽg̃ oꞌyawẽg̃muwẽn ijodiacayũ be. Yawẽg̃tobuxik puje itaybit ip oꞌe Deus ibikuy soat taxijo am wuydaxijo am iam. 
\v 7 Imẽneju Deus cuk onaẽ jekawẽn muwẽnuwẽnꞌukan. Ixe juk onaẽ Judeuꞌũmayũ mutaybitbinꞌukan. Napa g̃u õn eꞌem. Icẽmãn õn eꞌem ewebe.
\p — “Eyetabun cuy epesop Jesus Cristo kay” i juy ece cebe ip — ioꞌe owebe.
\p
\v 8 Jawẽ õn g̃asũ apẽn cũg̃ ma wuyeku am Deus eju kawẽnwẽnapꞌa be iam. Soat ka be bima juy acejekawẽn Deus eju. Deus ekawẽn tag̃ wuyeku pin pima juy acejekawẽn ceweju, wararaꞌacat kay wuyetakomaꞌũm pima dak, jewaꞌõxikxig̃ꞌũm pima dak.
\p
\v 9 Cũg̃ ma juy jeedop ip aoyũ Deus eju kawẽnwẽnapꞌa be. Cũg̃ ma juy jeedop ip jesay kug̃. Wararaꞌacat pe jejojoan g̃u juy ip jeedop. Yag̃uysan cuy ip jeedop. Iwarum g̃u jadapmug̃ẽg̃ẽm cuy jeedop ip wararaꞌacat pe jejojoan. Ouro mug̃ẽg̃ẽbu kug̃ g̃u juy jeedop ip, pérolaꞌa mug̃ẽg̃ẽꞌa kug̃ g̃u dak. Ibusopsupatpu kug̃ g̃u dak jeedop ip, teibog̃at kug̃ g̃u dak jesay kug̃. Wararaꞌacat pe jejojoan g̃u juy jeedop ip aoyũ. 
\v 10 Xipacat mujurũg̃rũg̃ cuy ip jeedop aoyũ- -“Jesus ebekitkit oceju” iꞌeꞌeꞌukayũ. 
\v 11 Deus eju kawẽnwẽnapꞌa be jemutaybitbin pima, mũg̃ cuy jeedop ip aoyũ.
\p — Kuy wetaybit soan iboam — iꞌũmg̃u juy jeꞌe ip jewebe ma.
\m
\v 12 Obuꞌu ayacat pe ag̃okatkat mutaybit am. Cũg̃ g̃u ayacat pe wararaꞌacat kukan- -ag̃okatkat pe acã. Mũg̃ cuy jeedop ip aoyũ. 
\v 13 Koap Adão oꞌg̃ug̃ẽ Deus- -ag̃okatkat oꞌg̃ug̃ẽ. Kanomũm Eva oꞌg̃ug̃ẽ- -ayacat oꞌg̃ug̃ẽ. 
\v 14 Adão g̃u oꞌg̃ug̃uykuku Satanás- -Eva acã. Eva koap Deus ekawẽn mubuyxiꞌũmꞌũm oꞌe. 
\v 15 Imẽneju aoyũ jeꞌitpiꞌajojom oꞌe. Imẽnpit Jesus kay ip itabut pima Deus ixeyũ idaxijo, xipan wararaꞌacat kug̃ pima dak, wararaꞌacat pe jejojoanꞌũm jekukum pima dak, ikẽrẽat mujurũg̃rũg̃ꞌũm pima dak.
\b
\c 3
\p
\v 1 Timóteo, g̃asũ õn jawẽ itabucayũ kukukayũ naẽ ãm.
\p — Ag̃okatkat itabucayũ kukukat ojuy bima, xipacan e ojuy — i wuyju eꞌem.
\m Iboap eꞌeap icẽmãn. 
\v 2 Imẽn cuy ip jeku Jesus kay itabucayũ kukukayũ. Cũg̃ ma juy jeku ip. Pũg̃ ma dak cuy jetayxim jukuk ip. Yag̃uysan tak cuy jeedop ip. Jewawẽ juy ip ikẽrẽat kukap puxim. Warẽmtag̃ g̃u ma dak cuy jeku ip. Powatwat tujuõmõmꞌug̃ tak cuy jeku ip jedukꞌa be. Deus ekawẽn wararaꞌacat mutaybitbinꞌug̃ tak cuy jeedop ip. 
\v 3 Ikaꞌom g̃u dak cuy jeedop ip. Wararaꞌacat aokakam g̃u dak cuy jeedop ip. Yaꞌõtareg̃ g̃u dak cuy jeedop ip. Itabotaidabotbon tak cuy jeedop ip wararaꞌacat kay. Itabikukum g̃u dak cuy jeedop ip wararaꞌacat edinheiro kay. 
\v 4 Jedukꞌa beayũ kug̃ tak cuy jeedop ip xipan. Jebekitkiyũ mukũyjobitbin tak cuy jeedop ip. Jebekitkiyũ be jemubuyxinam tak cuy jeedop ip. 
\v 5 Itaybitꞌũm xipan jedukꞌa beacat kug̃ iam pima, kuka Deus kay itabucayũ ikuk paꞌore oꞌe cebe ip. 
\v 6 Jesus kay itabunꞌisuat g̃u juy epejomuy wararaꞌacayũ kukukan- -itabucayũ kukukan. Itabunꞌisuat muy buje: 
\p — Wararaꞌacat podi ma waꞌõbuyxi — i kuka oꞌe teꞌe ma. 
\p Kuyje Satanás:
\p — Wararaꞌacat podi ma waꞌõbuyxi — ioꞌe teꞌe ma- -ibiõg̃buk kẽrẽayũ kukukat.
\m Tũybe Deus podi ma waꞌõbuyxi iãn kuka oꞌe. Imẽnpuye dak Deus ipiat oꞌsupiꞌajoat cebe- -Satanás pe kuyje. Imẽnpuxim itabunꞌisuat jewexe yaꞌõbuyxi bima, Deus ipiat kuka oꞌsupiꞌajoat cebe. 
\v 7 Itabutꞌũmayũ emumubuyxin cuy epejomuy itabucayũ kukukan ikukukat pe jemug̃uycũg̃ap puxim. Ixeyũ xe yaꞌõbuyxiꞌũm pima, kuka oꞌjewemug̃uycũg̃ ikukukat ip.
\p — Warẽmtag̃ ma cuk ip emuy itabucayũ kukukan — i kuka oꞌe ip cebe.
\m Satanás enobanoꞌabibubu be kuka oꞌat. Satanás kuka oꞌg̃ug̃uykuku ikẽrẽat mujurũg̃ ãm.
\p
\v 8 G̃asũ õn jawẽ itabucayũ buywatwatꞌukayũ naẽ ãm. Imẽn cuy jeku ip ibuywatwatꞌukayũ. Yaꞌõbuyxim cuy jeedop ip. Waraꞌat tag̃tag̃tag̃ g̃u dak cuy jekawẽn ip- -pũg̃ tag̃ ma. Kawẽdi kõnkõnxi g̃u dak cuy jeedop ip. Itabikukum g̃u dak cuy jeedop ip soat kay jebubun. 
\v 9 Kawẽn icẽmãn osodop ip itaybit g̃u kuyje- -pũg̃pũg̃ ã. G̃asũ bit ade itaybicayũ oꞌe. Itabut cĩcã jeedop ip kawẽn icẽmat kay. Apẽn cedag̃ ma jexe ip iap tag̃ tak cuy jeku ip. 
\v 10 Koam puk itabucayũ buywatwatꞌukat ojuyat cuy esubuyxijo. Epeyeꞌawero juy teku xeꞌe xipat kuka oꞌe iam. Ibuyxijoap tomukadi soat xe xipat pima juy epejomuy ibuywatwatꞌukan. 
\v 11 Ixeyũ tayxi dak cuy xipat ipjeedop. Cekawẽnxim g̃u juy jeedop ip. Wararaꞌacat muymuy g̃u dak cuy jeku ip. Yag̃uysan tak cuy ip jeedop. Soat em ip jeedop icẽmat eꞌem. Imẽn cuy jeedop ip itayxiyũ. 
\v 12 Itabucayũ buywatwatꞌukayũ jetayxim pũg̃ ma ip jukuk. Jekpotpoyũ mukũyjobitbin tak cuy jeedop ip, jedaxiyũ dak, jedukꞌa beayũ dak soat. 
\v 13 Xipan itabucayũ buywatwan pima, soat ip ibuyxim jukuk. Yaꞌõcam ip jetabucap g̃uwẽn wararaꞌacat pe.
\p — Jesus Cristo kay wuyetabut pima, mũg̃ꞌi aceku ceweju — i jeꞌe ip soat pe.
\p
\v 14 Timóteo, ijudup mubararag̃ õn eywebeaptum. G̃axĩn maꞌg̃u õn cu ojuy ejom. 
\v 15 Ojuap ibun pima bit, etaybit ece cũg̃ ma jeku am wararaꞌacayũ eju- -Deus ebekitkit eju iam ijudup cocom pima. Wuyju Deus kay itabucayũ- -soat em itaicat kay itabucayũ. Wuyetaybit kawẽn icẽmãn.
\p — Ukꞌa muycemucemapꞌip puxim wuyju — iꞌeꞌem itabutꞌũmayũ cũg̃ ma wuyekukuap cocom pima, kawẽn icẽmat tag̃ wuyju jekukum puye.
\m
\v 16 Ibaꞌarẽm itabutꞌũmayũ xe apẽn wuyetabut Deus kay iap, itaybitꞌũm ip puye. G̃asũ bit ibaꞌarẽm g̃u oꞌe cebe ip, Jesus Cristo ixeyũ mukũyjojom puye.
\mi Ixe Jesus Cristo ijodian oꞌjebapuk. Deus biõg̃buk cuk adi oꞌe ixe be: “Ẽn cũg̃ cĩcã oxe,” i. Ixe oꞌjojojo Deus ekawẽn tojotjotꞌukayũ. Itabucayũ ixe oꞌg̃uwẽnuwẽn ijodi. Ade ijodiat itabut oꞌe ixe kay. Deus waram ixe oꞌg̃uyu kabi kay.
\b
\c 4
\p
\v 1 G̃asũ õn jawẽ ibiõg̃buk kẽrẽat aꞌõ kay kũyjobicayũ be eymug̃uykukuap puxim. Amap kabia be Jesus kay jetabucap jepere ip pũg̃pũg̃pũg̃. Ibiõg̃buk kẽrẽat ekawẽn kay ma itabut jeedop ip- -wuymug̃uykukukuꞌukayũ aꞌõ kay dak. 
\v 2 Soat em napa ma eꞌem ip. Wuymug̃uykukukuxi ip. Itaybit g̃u ip ajo xipat iam ajo xipat g̃u iam tak. Cewawẽ baꞌore ip. Ipikat puxim ip xidig̃ mupikupikap puxim.
\p
\v 3 — Cũg̃ g̃u wuywebe jewebumũn ãm — iꞌeꞌem ip wuywebe napa ma. — Ibiat iꞌopi wuywebe — i dak eꞌem ip napa ma.
\m Deus pit soat xat oꞌg̃ubapuk itabucayũ xan- -kawẽn icẽmãn itaybicayũ xan. 
\v 4 Soat Deus emumug̃ẽ xipat.
\m Imẽnpuye kaꞌũmg̃u iꞌopiat wuywebe.
\m Imẽnpuye jekõn pima:
\p — Bay, xipat cĩcã ẽn, soat em ẽn ocexan iũmũm ocewebe — i wuyju eꞌem Deus pe.
\p
\v 5 — Soat wemumug̃ẽ xipat ipi watwat xan — i juk oꞌe Deus.
\m Jekõn pima wuyju dak kawẽnwẽn Deus eju.
\p — Ẽn xipat cĩcã — iꞌeꞌem wuyju cebe.
\m Imẽneju kaꞌũmg̃u iꞌopiat wuywebe.
\p
\v 6 Timóteo, owebe awẽap cuy eg̃uwẽn wuykitpitpiyũ be itabucayũ be. Iboam ixeyũ mukũyjojom pima, xipacan ecesũy Jesus Cristo be kapikpikꞌukan. Kuy bima etabun cuy eg̃uy Jesus Cristo kay iap ekawẽn icẽmãn. Kũyjobin cuy eg̃uy iboap ekawẽn kay bekicat jetitinap puxim. Iboap ekawẽn tag̃ cuk adi ejekuku. 
\p — G̃asũ dak imẽn cuy ejeku — i õn eꞌem ewebe. 
\m
\v 7 Itabutꞌũmayũ dobuyũꞌũmꞌũm ekawẽn kay g̃u juy eg̃uy. Teꞌe ma kuka eg̃uy ixeyũ ekawẽn kay etabut. Ixeyũꞌũmꞌũm ekawẽn kay bima, wuybuꞌu kuka ace wuyetabut am Jesus kay. Ẽn pit soat em kũyjobin cuy eg̃uy Deus biõg̃buk aꞌõ kay big̃ ma etabut cĩcã am Cristo kay. 
\v 8 Xipat wuywebe wuyjebit mubacacan am. Ibodi ma bit xipat wuywebe soat em kũyjobit am Deus biõg̃buk aꞌõ kay. Ixe aꞌõ dag̃ jekukum pima, wuyag̃uyꞌisum kuka ajeku ijodi bima. Wuyeꞌũ buje dak soat em Deus xe acesop waram wuyetait puje. 
\v 9 Icẽmãn õn emutaybitbin iboam. Wuyetabun cuy ajop iboap ekawẽn kay. 
\v 10 Wuyetabut cĩcã Deus kay- -soat em itaicat kay. Imẽnpuye wuyju kapikpig̃ cĩcã wararaꞌacat mutabut am cekay. Ixe soat taxijo ojuy. Ixe soat jekay itabucayũ daxijojom.
\p
\v 11 Timóteo, wawẽwẽap cuy eg̃uwẽn wuykitpitpiyũ be.
\p — Paulo ekawẽn tag̃ cuy epekuku — i juy ece cebe ip.
\p
\v 12 — Aypa g̃u buk ẽn. Ocetabut g̃u ekawẽn kay — iꞌũmg̃u juy jeꞌe ewebe wararaꞌacayũ.
\m Cũg̃ cĩcã juy ejeku. Ekawẽntim cuy eg̃uy. Xipan tak cuy itabucayũ ejukuk, itabutꞌũmayũ dak. Etabun cĩcã dak cuy eg̃uy Deus kay. Ag̃uyꞌisum tak cuy eg̃uy. Cũg̃ ma juy ejeku wararaꞌacayũ be ekuap coꞌi jeku am. 
\v 13 Wajẽmap wiwim pima Deus ekawẽntup cocom cuy eg̃uy jeꞌaweroromꞌukayũ be yaꞌĩjo am. Deus ekawẽn muwẽnuwẽn cuy eg̃uy cebe ip. Ixeyũ mutaybitbin cuy eg̃uy Cristo ekawẽn. 
\v 14 Deus cuk jaꞌõbacaap oꞌg̃ũm ewebe kapik am cebeam. Ixe juk jaꞌõbacaap oꞌg̃ũm ewebe jekawẽn muwẽnuwẽnꞌukayũ eweju kawẽn puje- -itabucayũ kukukayũ eweju kawẽn puje. Oꞌjewebumõg̃ ip abi jeje Deus ekapikap pe emuy ãm. Imẽn cuk oꞌe ip Deus biõg̃buk aꞌõbi. Ixe aꞌõbacaap tag̃ cuy epeku. 
\v 15 G̃ebum cuy eg̃uy owebe awẽwẽap kay. Iboap tag̃ cuy ejeku. Imẽn eku buje, “Big ma Jesus Cristo ekawẽn tag̃ ẽn jekukum” i jeꞌe ip ewebe ejojoayũ. 
\v 16 Edayꞌemꞌum cuy eg̃uy warẽmtag̃ ekuap puxim, warẽmtag̃ ma wararaꞌacat mutaybinap puxim tak. Cũg̃ ma eku buje, ag̃uyꞌisum ejeku ijodi. Deus xe eg̃uy eꞌũ buje dak. Ekawẽn cocoayũ dak ixe xe jeedop ip soat em.
\b
\c 5
\p
\v 1 Ikẽrẽat mujurũg̃ puje, aypaat eg̃ukorẽm g̃u juy. Eyawẽ acã juy. Ixe juy eyawẽ ebure awẽap puxim. Aypapuat eyawẽ juy ekitpit awẽap puxim. 
\v 2 Yabubut cuy eyawẽ eixĩt awẽap puxim. Wararaꞌacayũ aoyũ dak cuy eyawẽ eixĩt awẽap puxim. Aoyũ eju kawẽnwẽn pima jaejubuku ocepo iap kay juy g̃ebum g̃u eg̃uy.
\p
\v 3 G̃asũ õn jemukũyjo apẽn itopꞌeꞌũꞌibiyũ buywan- -ibadipꞌũmayũ iam. 
\v 4 Itopꞌeꞌũꞌibit iꞌitꞌet pima, iꞌiyũ juy xipan jexi jukuk. Yuktaxitxet pima, yuktaxit cuy xipan jeawa jukuk. Deus xe cũg̃ ma wararaꞌacayũ be g̃u ixeyũ xi kuk am, ixeyũ eawa kuk am tak- -ibadipyũ be acã. Ixeyũ itaybit cuy cũg̃ ma Deus xe wuybadip kuk am iam kuy bima xipan ip jekukap teim. Irem g̃u juy jexi jukuk ip. Ixeyũ juy ixat jeꞌg̃ũmg̃ũm cebe ip, cesay dak. Imẽn xipat Deus xe. 
\v 5 Pũg̃pũg̃ itopꞌeꞌũꞌibiyũ tadaybot ma. Iꞌitꞌet g̃u ip. Yuktaxitxet g̃u dak. Ixeyũ itabut wararaꞌacat kay g̃u- -Deus kay acã. Kabiam, ixima dag̃ tak kaꞌũmat ojuyjuy ip Deus xewi acã- -wararaꞌacat xewi g̃u- -ixeyũ itopꞌeꞌũꞌibiyũ. Deus eju kawẽnwẽn ip wararaꞌacat peam, wararaꞌacat kay g̃ebum puye. Ixeyũ be acã itabucayũ juy ixat jeꞌg̃ũm, cesay dak, ibadipyũꞌũm puye. 
\v 6 Wararaꞌacayũ bit imẽn g̃u jekukum itopꞌeꞌũꞌibiyũ. Jewemucokcokcog̃ ã jekukum ip. Itabẽg̃ ip. Inaka Deus xe ceꞌũat coꞌi ip warẽmtag̃ ma jekukum puye. Ixeyũ juy esubuywan g̃u. 
\v 7 Owebe awẽwẽap cuy eg̃uwẽn wuykitpitpiyũ be wararaꞌacayũ be ixeyũ ekukuap muymuyap puxim. 
\v 8 Xipan wuybadip kug̃ꞌũm pima, wuyetabucap epereap coꞌi aceku. Itabutꞌũmat ekukuap podi ma ikẽrẽm aceku.
\p
\v 9 Soat g̃u juy esubutetmõg̃ ip itopꞌeꞌũꞌibiyũ butet itabucayũ eꞌaweroroapꞌa beatup pe. Itopꞌeꞌũꞌibit yabut pima- -60 koato kug̃ pima; ceweitopta ebikamat itom pima dak; 
\v 10 wararaꞌacayũ “Teku xipacan eꞌem soat em” iꞌeꞌem pima dak; xipan jeꞌiyũ oꞌg̃uaypan pima dak; jedukꞌa be powatwat tujuõmõm pima dak, soat em Deus ebekitkiyũ buywatwan pima dak; ibaꞌoreat kukayũ buywatwan pima dak; wararaꞌacat pe idipat mujurũg̃rũg̃ pima dak- -ixeyũ butet acã esubutetmubararak taperadup pe- -teyũku kapikpig̃ Deus peam iaptup pe.
\p
\v 11 Yaypanꞌisuat putet pit esubutetmõg̃ g̃u juy ig̃odup pe- -itopꞌeꞌũꞌibit putetup pe. Waram jewebumũn pin jeꞌe ip. Ibuꞌu jeꞌe ip kapik am Cristo beam. 
\v 12 Koap pima:
\p — Waram pit ocewebumũn g̃u. Cristo beam acã kapig̃ õn — i juk oꞌe ip. Ibuꞌu ip pima bit:
\p — Teꞌe ma “Cristo beam acã kapig̃ õn,” i juk ece — i jeꞌe wararaꞌacayũ cebe ip.
\m
\v 13 Ixeyũ itopꞌeꞌũꞌibiyũ teꞌe ma ip kabiabun kapkam ukꞌa kapkam. Ibukapikꞌũmayũ ip. Cekawẽnxi ip. Kawẽn mukẽrẽrẽn tak ip. Imuwẽnpiat muwẽnuwẽn ip. 
\v 14 Imẽneju:
\p — Waram jewebumũn cuy ip itopꞌeꞌũꞌibiyũ yaypanꞌisuayũ — i õn eꞌem. — Waram jeweꞌita juy ip — i õn eꞌem. — Xipan cuy ip jeedop jeꞌiyũ kug̃ — i õn eꞌem.
\m Waram ip jewebumũn puje, wuymuy baꞌore jeꞌe wuykayꞌũmayũ be. 
\v 15 Pũg̃pũg̃ itopꞌeꞌũꞌibiyũꞌin oꞌjẽm Deus e dag̃wi. Satanás aꞌõ kay kũyjobit am ip oꞌjẽm. 
\v 16 Itabucat padip itop eꞌũ buje, ibadipyũ juy ixe subuywan.
\p — Ocebadip cuy epesubuywan — iꞌũmg̃u juy jeꞌe wararaꞌacayũ be, itabucayũ be.
\m Ibadipꞌũmayũ buywatwan pit ip jeedop itabucayũ.
\p
\v 17 Xipan cuy itabucayũ kukukayũ ajukuk. Eykukayũ xipan itabucayũ kug̃ pima, xepxem cuy cekapikaptei epeteida cebe ip. Kapikpig̃ cĩcã bima, xepxem cuy cekapikaptei epeteida cebe ip Jesus ekawẽn muwẽnuwẽnꞌukayũ be- -Deus ekawẽn eymutaybitbinꞌukayũ be dak. 
\v 18 Imẽn eꞌem Deus ekawẽn tup- -Moisés emudupmubararaktup: Imukapikpig̃ pima, eõhõbi epesubimukirik g̃u juy jexatꞌoap puxim- -ãg̃ jekõn, i. Imẽn eꞌem Lucas emudupmubararaktup: Cekapikaptei juy epeg̃ũm kapikpikꞌukat pe, i. Imẽneju cekapikaptei juy epeteida itabucayũ kukukayũ be. 
\v 19 Pũg̃ pe itabucayũ kukukat muymuy buje, eyetabun g̃u juy epesop ixe ekawẽn kay. Xepxepayũ bit, ebapũg̃ayũ dak pũg̃ tag̃ ma ixe muymuy buje, eyetabun cuy epesop ixeyũ ekawẽn kay. Waraꞌat tag̃tag̃tag̃ pima bit, eyetabun g̃u juy epesop ixeyũ ekawẽn kay. 
\v 20 Itabucayũ kukukat ikẽrẽat mujurũg̃rũg̃ap epere am ibuꞌu bima juy epeg̃ukorẽm soat etabutpe. Epeg̃ukorẽm cuy wararaꞌacat pe iparara am ikẽrẽat mujurũg̃ap puxim.
\p
\v 21 Timóteo, owebe awẽwẽap tag̃ cuy ejeku. Pũg̃ tag̃ ma juy ejukuk soat itabucayũ. Ebuꞌum g̃u juy eg̃uy imukorẽm ãm ip ebureyũ maꞌg̃u ip. Iboap muwẽnuwẽn õn ewebe Deus aꞌõpiju, Jesus Cristo aꞌõpiju dak, Deus ekawẽn tojotjotꞌukayũ aꞌõpiju dak- -ikẽrẽat kug̃ꞌũmayũ aꞌõpiju. 
\v 22 Dao g̃u juy ecewebumõg̃ ag̃okatkat abi jeje imuy ãm itabucayũ kukukan. Wararaꞌacayũ ikẽrẽat mujurũg̃rũg̃ pima, eju g̃u juy ceweju ip. Ag̃uyꞌisum cuy eg̃uy. Ikẽrẽat cuy eg̃ug̃ẽ g̃u- -pũg̃ em tak kaꞌũma.
\p
\v 23 Idibi at g̃u juy etikõnkõn. Uvaꞌabidi dak etikõnkõn, edada muxere am.
\p
\v 24 Pũg̃pũg̃ayũ soat etabutpe ikẽrẽat mujurũg̃rũg̃. Soat itaybit ikẽrẽat mujurũg̃rũg̃ ip iam. Itaybit ip g̃axĩn ma Deus ipiat supiꞌajoat cebe ip iam. Wararaꞌacayũ bit ibaꞌarẽm ma ikẽrẽat mujurũg̃rũg̃. G̃uyjom pit soat itaybit jeꞌe ikẽrẽat oꞌg̃ujurũg̃rũg̃ ip iam. 
\v 25 Imẽnpuxim pũg̃pũg̃ayũ ma soat etabutpe ma xipacat mujurũg̃rũg̃. Soat itaybit xipacat mujurũg̃rũg̃ ip iam. Wararaꞌacayũ bit ibaꞌarẽm ma xipacat mujurũg̃rũg̃. G̃asũ kaꞌũma ma itaybit apẽn ixeyũ eꞌem iam. G̃uyjom pit itaybit jeꞌe ip.
\b
\c 6
\p
\v 1 Teiꞌũm kapikpikꞌukayũ be ecekawẽn cuy- -Jesus kay itabucayũ be.
\p — Ibuyxim cuy eyekariwa epejukuk — i juy ece cebe ip. — Ibuyxim ip ikug̃ pima kuka Deus oꞌjomuymuy g̃u ip itabutꞌũmayũ — i juy ece cebe ip. — “Pauloyũ warẽmtag̃ ma itabucayũ mutaybitbin,” iꞌũmg̃u kuka dak oꞌe ip — i juy ece cebe ip.
\p
\v 2 Pũg̃pũg̃ ixeyũꞌin kapikpig̃ itabucayũ beam, jekitpitpiyũ beam.
\p — “Kũyjobin g̃u oce wekariwa aꞌõ kay, ixe dak itabut Jesus kay buye,” iꞌũmg̃u juy epeꞌe — i juy ece cebe ip. — Xipan cĩcã juy epeyekapik cebeam ixeyũ dak itabut puye, Jesus xe ikukpin ip puye dak — i juy ece cebe ip.
\p Timóteo, iboam cuy itabucayũ eg̃utaybin
\p — Xipan cuy epeku — i juy ece cebe ip- -teiꞌũm kapikpikꞌukayũ be.
\m
\v 3 Wuykukukat ekawẽn icẽmãn- -Jesus Cristo ekawẽn. Ixe ekawẽn tag̃ jekukuꞌukat Deus bikuyap tag̃ tak jekukum. Adeꞌũmayũ bit cekawẽn kay g̃u. Cekawẽn g̃u imutaybitbin ip. Warẽmtag̃ ma imutaybitbin ip.
\p
\v 4 — Wararaꞌacat podi ma ocetaybit — iꞌeꞌem ip teꞌe ma.
\m Imẽnpit itaybit g̃u ma ip. Soat em jewaꞌõxikxig̃ ip. Jewaꞌõdawutwutxi ip. Itabikuku eꞌem ip jewewekay, imẽn jekukum puye. Waraꞌat tag̃tag̃tag̃ ma ip kawẽnwẽn. Itabutkarey ip jewewekay. 
\v 5 Soat em ip jewaꞌõxikxig̃ jeweweju. Yag̃uybaꞌarẽm ip oꞌe. Oibuꞌun ip kawẽn icẽmat kay. Tũybe Deus kay wuyetabut pima acejekariwan iãn eꞌem ip. 
\v 6 Deus kay itabucat ibubut adeat puxim eꞌem icokcok, Deus kay wuyetabucap wuybubut kug̃ iap podi ma xipat puye. 
\v 7 Ajo-kug̃ wuybui be wuykapꞌisum? Kaꞌũma kug̃! Imẽnpuxim ajoꞌin acetujowat ijodiwi wuyeꞌũ buje? Kaꞌũma ma! 
\v 8 Waraꞌat kug̃ꞌũm pima, wuycokcog̃ mabuk acesop wuydotite bima, wuyxaxet pima dak. 
\v 9 Ibubut ade pinayũ ikẽrẽat mujurũg̃rũg̃ dinheiro buap ojuy. Warẽmtag̃ eꞌem ip itabikuku soat kay jebubun puye. Xipat g̃u ip soat xe ijodiat xe. Soat em ipiat supiꞌajojo ip. Deus wi wũy ma jeedop ip. 
\v 10 Ikẽrẽat mujurũg̃rũg̃ ip soan dinheiro kay itabikukuap tomuju. Pũg̃pũg̃ayũ oibuꞌun ip Jesus kay. Jetabucap oꞌjepere ip dinheiro kay jĩjã buye. Ade oꞌjat ip dinheiro. Inaka ig̃uycũg̃ cĩcã ip jekukum jetabucap oꞌjepere buye.
\p
\v 11 Ẽn pit, Timóteo, Deus aꞌõbuywatwatꞌukat ẽn. Imẽnpuye ikẽrẽat pewi juy ecenapõn. Cũg̃ ma juy ejeku. Ikukpin cĩcã juy Deus ejukuk. Etabun cĩcã juy eg̃uy cekay. Ikukpin cuy wararaꞌacat tak ejukuk. Etaxim cuy ipiat esupiꞌajo. Yobog̃an pin g̃u juy eg̃uy. 
\v 12 Jedaudauꞌukat soan jewũncaan jedaudaum koap jedauap epere am jabeatup pu ojuy adeayũ etabutpe. Ixe buxim ẽn tak soan aꞌõbacaan cuy etabut eg̃uy Jesus kay. Ebuꞌuꞌũm pima, soat em Deus xe eg̃uy eꞌũ buje. Adeayũ etabutpe:
\p — Wetabun og̃uy Jesus kay g̃ebuje bit — i juk ece kuy bima.
\m Imẽn iꞌe buje, Deus cuk enaẽ soat em enuy am jexe. 
\v 13-14 Jesus ekawẽn tag̃ cuy ejeku ewebe ikẽrẽat mug̃ẽap puxim; Jesus pe “Ikẽrẽat kug̃ ẽn” iꞌeap puxim ewebe. Waraꞌat tag̃ g̃u juy ejeku- -Jesus ekawẽn tag̃ acã- -soat ekawẽnwẽnap tag̃ acã. Ixe ekawẽn tag̃ cuy ejeku wuykukukat ajẽmap wiwim pima- -Jesus Cristo ajẽmap wiwim pima. Iboam õn awẽwẽm Deus etabutpe, Jesus Cristo etabutpe dak. Ixe Deus soat mutaicin. Ixe Jesus Cristo ipararaꞌũma kawẽn icẽmat oꞌg̃uwẽn iecug̃ap pe- -Pôncio Pilatos pe. 
\v 15 Imudot pin pima, Deus waram ixe Jesus Cristo g̃udot wuykay. Ixe Deus xipat cĩcã. Waraꞌat g̃u omuy ijodiat kukukat- -Deus acã. Ixe ijodiat kukukayũ kukukat. Ixe ijodiat ekariwawayũ ekariwa. 
\v 16 Soat pit aceꞌũ. Ixe bit jeꞌũ g̃u. Kaꞌũmg̃u xipatꞌũmat cebe. Daxadiea beat coꞌi. Wuyajẽm paꞌore cetẽg̃. Abu ixe oꞌjojojo? Kaꞌũma ma. Ibaꞌore wuywebe ijo am.
\p — Kũyjobin ocesop aꞌõ kay acã — i juy ace cebe. — Soat podi ma ẽn aꞌõbaca — i juy ace cebe.
\m Imẽn cuy ace.
\p
\v 17 Timóteo, ibubut adeayũ juy eyawẽwẽ.
\p — Eyaꞌõbuyxian pin g̃u juy epesop — i juy ece cebe ip. — Dao ma kuka eybubut oiꞌũm — i juy ece cebe ip. — Imẽnpuye eyetabun g̃u juy epesop eybubut kay- -Deus kay acã eyetabun — i juy ece cebe ip. — Deus ade iũmũm wuywebe wuymucokcok am — i juy ece cebe ip. — Soat wuyemumukaypinput ũmũm wuywebe — i juy ece cebe ip. 
\v 18 — Xipan cuy wararaꞌacat epejukuk — i juy ece cebe ip. — Xipacat cuy epeg̃ujurũg̃rũg̃ — i juy ece cebe ip. — Eydacum g̃u juy epesop wararaꞌacat pe — i juy ece cebe ip. — Ibubutꞌũmat pe juy eybubutꞌin epeg̃ũm — i juy ece cebe ip. 
\v 19 — Eybubutꞌin iũmũm pima ade epejukuk eybubun kabi be — i juy ece cebe ip. — Iꞌũm g̃u eybubut — i juy ece cebe ip. — Icẽmãn Deus xe epesop eyetait — i juy ece cebe ip.
\p
\v 20 Timóteo, apẽn Deus oꞌe ewebe iap tag̃ cuy ejeku. Adeꞌũmayũ warẽmtag̃ ma kawẽnwẽn ip. Jewaꞌõxikxiꞌg ip. Deus muymuy ip. Cekawẽnxiayũ ip.
\p — Wararaꞌacat podi ma ocetaybit — iꞌeꞌem ip napa ma.
\m Ecekawẽn g̃u juy ceweju ip.
\p
\v 21 — Wararaꞌacat podi ma ocetaybit — iꞌeꞌem ip napa ma.
\m Jetabucap ip oꞌjepere e bewi oitabidaoꞌibit puxim.
\p — Bay, xipan cuy Timóteo ejukuk — i õn eꞌem Deus pe. — Xipan cuy soat Jesus kay itabucayũ ejukuk — i õn eꞌem cebe.
\m Ibũrũ ma.