\id 2TI Mundurukú [myu] NT (Brazil) -2010 bd. 
\h 2 Timóteo
\toc1 Timóteo beaptup- -xepxepatup
\toc2 Segunda Carta a Timóteo
\mt TIMÓTEO BEAPTUP PAULO EMUDUPMUBARARAKTUP XEPXEPATUP
\c 1
\p
\v 1 Timóteo, cartadup mubarararag̃ õn ewebe kato mujuaptum. Õn Paulo. Jesus Cristo emumuju õn Deus aꞌõbi. — “Jesus Cristo eju mũg̃ꞌi eyju jekukum pima, soat em Deus xe epesop eyetait,” i juy ece ijodiacat pe — i juk oꞌe Jesus Cristo owebe.
\p
\v 2 Timóteo, ẽn okpot coꞌi. Ekukpin cĩcã oxe. Deus wuyebayat. Jesus Cristo wuykukukat. Deus eju õn kawẽnwẽn ewebeam.
\p — Xipan cuy Timóteo ejukuk — i õn eꞌem cebe. — Etabotaidabotbon cuy eg̃uy cekay — i õn eꞌem cebe. — Ixe ag̃uymubabibin cuy eg̃uy — i õn eꞌem cebe.
\p
\v 3 — Bay, ẽn xipat cĩcã — i õn eꞌem Deus pe.
\m Wararaꞌacat aꞌõ dag̃ g̃u õn jekukum- -ixe aꞌõ dag̃ acã. Wedobuyũꞌũmꞌũm tak ixe aꞌõ dag̃ jekukuꞌuk ip osodop. Ocokcok ixe kay soat apẽn cedag̃ oxe iap tag̃ õn jekukum puye. Ixe eju õn kawẽnwẽn ewebeam soat em. Kabiam õn kawẽnwẽn ceweju, ixima dag̃ tak. 
\v 4 G̃ebum cĩcã õn ekay. Exewi ojẽm puje etõn iap kay g̃ebum õn. Ejo pin cĩcã õn waram ocokcok am. 
\v 5 G̃ebum õn apẽn etabut Jesus Cristo kay iap kay. Jewexe g̃u etabut cekay- -icẽmãn. Koap pima eawa Lóide itabut osunuy cekay. Exi Eunice dak itabut osunuy cekay. Ixeyũ buxim ẽn tak etabut cekay. Wetaybit cĩcã iboam. 
\v 6 Imẽnpuye õn jeãwẽ. Itbucayũ kukukan emuy buje, juk ocewebumõg̃ abi jeje. Deus cuk jaꞌõbacaap oꞌjomõg̃ ewebe. G̃ebum cuy eg̃uy iboap kay. Ixe aꞌõbacaam cuy ejeku. 
\v 7 Deus jebiõg̃buk muõmõm wuywebe. Ixe biõg̃buk wuymuparararan g̃u- -wuyaꞌõmucanucan acã. Deus jaꞌõbacaap ũmũm wuywebe. Yaꞌõbacaap kug̃ pima xipan kuka wararaꞌacayũ ajukuk. Jewãwẽwẽm tak ajop ikẽrẽat mug̃ẽap puxim.
\p
\v 8 Itabutꞌũmayũ odaomũn wuykukukat ekawẽn og̃uwẽnuwẽn puye. Inaka esũsũn g̃u juy eg̃uy obuxim, daomũnmũnapꞌa be maꞌg̃u õn. Ebisũsũn g̃u dak cuy eg̃uy wuykukukat ekawẽn muwẽn ãm wararaꞌacayũ be. Owebe ipiatꞌajojoap puxim ipiat supiꞌajo an ip ewebe ẽn ixe ekawẽn muwẽnuwẽn puye. Ebuꞌum g̃u juy eg̃uy imuwẽn ãm ipiatpiꞌajojom maꞌg̃u. Deus jaꞌõbacaap jeꞌg̃ũm ewebe. 
\v 9 Ixe Deus kuy wuydaxijo. Ixe kuy wuynaẽ jebekitkiyũm. Ixe kuy wuynaẽ xipacat ag̃ug̃ẽg̃ẽ buye g̃u- -ixe wuynaẽ pin puye acã, ixe xe wuykukpin puye dak.
\p — Xipacat og̃ũm soat pe Jesus Cristo kay itabucayũ be — i juk oꞌe Deus jewebe ma.
\m Imẽn cuk oꞌe jewebe ma kaꞌũmg̃u ipi bimãn ma. 
\v 10 Ixe xipacat ũm pin osunuy soat pe iam wuyetaybit g̃u juk adi ajop. G̃asũ bit wuyetaybit ace. Wuyetaybit ace wuydaxijojoꞌukat oajẽm puye. Jesus Cristo kuy oajẽm. Ixe Jesus Cristo xipacat ũmũm wuywebe. Ixe ceꞌũ osunuy. Inaka waram g̃uto oꞌjetait. Ixe wuyeꞌũꞌũap aꞌõbacaap oꞌg̃uꞌũm. Kawẽn idipat muwẽnuwẽn cuk adi oekuku.
\p — Soat em eyetait epesop Deus xe eyeꞌũap tomukadi — i juk adi oꞌeꞌe wuywebe.
\m Imẽnpuye Jesus Cristo kay wuyetabut pima, wuypararam g̃u wuyeꞌũap puxim.
\p
\v 11 Deus cuk onaẽ jemumujum.
\p — Waꞌõbi juy kawẽn idipat muwẽnuwẽn eg̃uy — i juk oꞌe owebe. — Itabucayũ mutaybitbin cuy eg̃uy — i juk oꞌe owebe.
\m
\v 12 Itabutꞌũmayũ ipiatpiꞌajojoan owebe, õn kawẽn idipat muwẽnuwẽn puye. Obuꞌu g̃u maꞌg̃u og̃uy wetabut am Jesus kay. Wetabut cuk adi og̃uy cekay. G̃asũ dak wetabut ma cekay, wetaybit cĩcã ixem puye. Wetaybit soat podi ma ixe yaꞌõbaca iam. Soat og̃ũm cebe iap muxipanpan jeenuy jajẽmap kabia wiwim pima. 
\v 13 Kawẽn icẽmãn cuk adi õn emutaybitbin. Iboap ekawẽn tag̃ cuy ejeku. Wekukuap puxim cuy ejeku. Etabun cĩcã juy eg̃uy Jesus Cristo kay. Xipan cuy wararaꞌacayũ ejukuk. Imẽn cuy ajeku Jesus Cristo eju mũg̃ꞌi wuyju jekukum pima. 
\v 14 Kawẽn idipat oꞌg̃uwẽn ip ewebe kuy bima. G̃ebum cuy eg̃uy iboap ekawẽn kay. Ibiõg̃buk xipacat omuy wuywebe- -Deus biõg̃buk. Ixe biõg̃buk wuybuywatwan ixe ekawẽn kay g̃ebum am.
\p
\v 15 Ade Ásia eipi watwatꞌin cuk opere iap awẽg̃ kuy eyawẽg̃tobuxik. Fígelo ma ixeyũꞌin osunuy, Hermógenes tak. 
\v 16 Onesíforo bit obuywatwatꞌuk osunuy. 
\p — Xipan cĩcã juy Onesíforo ejukuk, ibadipyũ dak — i õn eꞌem wuykukukat pe. 
\m Ixe isũsũn g̃u osunuy jajẽm ãm daomũnmũnapꞌa be ojo am. Pũg̃ em g̃u ixe Onesíforo omucokcokcog̃- -ade em ma. 
\v 17 Roma ka be jajẽmꞌisum okudadam oeku. Odobuxik puje acã oibuꞌun okudadam. 
\v 18 Etaybit Éfeso ka be bima soat em ixe obuywatwatꞌuk osunuy iam. Imẽneju:
\p — Wetabotaidabotbon cuy og̃uy ekay kũyjobitꞌũmayũ be ipiatꞌajoap kabia be iam cuy Onesíforo eg̃utaybin — i õn eꞌem wuykukukat pe.
\b
\c 2
\p
\v 1 Timóteo, ẽn okpot coꞌi. Deus soat em xipan wuykug̃ Jesus Cristo eju mũg̃ꞌi wuyju jekukum puye. Imẽnpuye aꞌõbacaam cuy eg̃uy! 
\v 2 Adeayũ mutaybitbin cuk adi og̃uy- -emutaybitbin tak. Ẽn pukto iboam cuy cũg̃ ma jekukuꞌukayũ mutaybitbin eg̃uy ixeyũ be wararaꞌacayũ mutaybin am.
\p
\v 3 Ade itabucayũ ipiatpiꞌajojom. Ẽn tak sorara buxim ebuꞌum g̃u juy eg̃uy ipiatpiꞌajo am. Jesus Cristo esoraram cuy eg̃uy. Sorara buxim ixe aꞌõ kay acã juy kũyjobin eg̃uy. 
\v 4 Nopag̃õg̃õm pima jedukꞌa beat coꞌiꞌũmg̃u jekukum sorarayũ. Jaꞌõbi g̃u ip jekukum- -jekukukat aꞌõbi acã. Imẽnpuxim Jesus Cristo aꞌõbi acã ejeku. 
\v 5 Cedag̃ ma oꞌjedau bima acã kuka oꞌjat jedauaptei wararaꞌacat podi ma iwũncaat. Cedag̃ꞌũm oꞌjedau bima bit, kuka oꞌjat g̃u. Imẽnpuxim ẽn tak cuy cedag̃ ma ejeku. 
\v 6 Ku be ibukapik cĩcãat cuy koam jexatꞌam yabu. Imẽnpuxim ẽn tak cuy ecekapik cĩcã Jesus Cristo beam. 
\v 7 Timóteo, g̃ebum cuy eg̃uy wekawẽn kay. Wuykukukat cuy jemutaybin apẽg̃ape wekawẽn iam.
\p
\v 8 G̃ebum cuy eg̃uy Jesus Cristo kay. Deus ixe Jesus Cristo oꞌg̃utait ceꞌũap tomukadi. Oꞌg̃uyu kabi kay. Davi naxeg̃ebit oꞌg̃uyu. Iboap cuk adi og̃uwẽnuwẽn kawẽn idipat muwẽnuwẽn pima. 
\v 9 Itabutꞌũmayũ juk adi ipiat oꞌsupiꞌajojoat owebe, kawẽn idipat og̃uwẽnuwẽn puye. Ikẽrẽat mujurũg̃rũg̃ꞌukat puxim ip odaomũn owebe kawẽn idipat muwẽg̃ap puxim. Imẽnpit ibaꞌore cebe ip kawẽn idipat muwẽg̃ap muꞌũm ãm. Kawẽn idipat muwẽnuwẽnap iꞌũm g̃u. 
\v 10 Imẽneju wetaxi jĩjã ipiatpiꞌajo am Deus emunaẽhẽyũ be kawẽn idipat aꞌĩjo am. Wetaxi jĩjã ixeyũ mutabut am Jesus Cristo kay. Deus ixeyũ dak idaxijo wuydaxijoap coꞌi. Deus dipap kug̃ jeedop ip. Ixeyũ dak Deus xe jeedop wuyweju. Soat em wuyetait acesop cexe. 
\v 11 Apẽn cuk adi og̃uwẽnuwẽn ewebe iap waram g̃uto og̃uwẽn ewebe g̃asũ dak. Iboap ekawẽn icẽmãn.
\mi Wuybuꞌuꞌũm pima wuyeꞌũ ãm Cristo bikuyap tag̃ wuyekuap ojuy, ixe xe acesop wuyetait, i.
\q
\v 12 Ipiatpiꞌajo am wuyetaxi bima, ijodiacat kukukayũm acesop Cristo eju, i.
\mi “Õn pit Cristo ebekit g̃u,” i wuyju eꞌem pima, “Eyju dak webekitkiyũ g̃u,” i jeꞌe wuywebe ixe dak, i.
\q
\v 13 Wuyju ixe ekawẽn epereperem. Cristo bit jaꞌõmuwarururun g̃u. Ixe soat em eꞌem apẽn cuk adi oꞌeꞌe iap tag̃, i.
\p
\v 14 Owebe awẽwẽap cuy eg̃uwẽn ebekitkiyũ be g̃ebum ip top am. Eg̃utaybitbin cuy ip.
\p — “Epeyewaꞌõxikxik g̃u juy,” i õn eꞌem eywebe Deus topabe — i juy ece cebe ip.
\m Jewaꞌõxikxig̃ pima ip yaꞌĩjojomayũ buywatwan g̃u ip- -ixeyũ mubuꞌuꞌun acã jetabut am Jesus Cristo kay. 
\v 15 Soan ma ece Deus pe “Cũg̃ ma ẽn jekukum oxe” iꞌe am ewebe. Cũg̃ ma juy kapikpig̃ eg̃uy esũsũnap puxim Deus pe ekapikap coan. Kawẽn icẽmat cuy eg̃utaybitbin- -Deus ekawẽn. 
\v 16 Teꞌe ma jewaꞌõxikxig̃ ip adeayũ. Deus pit cekawẽn kay g̃u ip. Ixeyũ ekawẽn cocoꞌukayũ big̃ ma Deus kay g̃u eꞌem. Jewaꞌõxikxig̃ g̃u juy eg̃uy ixeyũ eju. 
\v 17 Otꞌũꞌũ wuyẽn muꞌũmuꞌũm. Imẽnpuxim ixeyũ wuymutaybitbin pima wuyetabucap kuka oꞌg̃uꞌŨm ip. Wuymubuꞌun kuka ip Cristo kay wuyetabut am. Himeneu ixeyũꞌin Fileto dak. 
\v 18 Pũg̃pũg̃ itabucayũꞌin ixeyũ ekawẽn kay itabut oꞌe. Imẽnpuye oibuꞌun ip Jesus kay. Jetabucap oꞌjepere ip e bewi itabidaoat puxim.
\p — Deus kuy itabucayũꞌũmꞌũm oꞌg̃uyu kabi kay — i napa ma eꞌem ip itabucayũ be. — Wuyiwat xeku — i napa ma eꞌem ip.
\m Imẽn ip itabucayũ muꞌukpiceg̃ẽg̃ẽn Jesus kay. 
\v 19 Wuyju bit acejepere g̃u wuyetabucap, kawẽn cũg̃at kay wuyetabut puye. Cem ma ukꞌa muy buje, yaꞌatꞌet g̃u. Imẽnpuxim kawẽn cũg̃at kay wuyetabun puje, acejere g̃u dak. Deus ebekitkiyũ wuyju. Imẽn eꞌem Deus ekawẽntup:
\mi Wuykukukat itaybit abuyũ webekitkiyũ iam, i.
\m Waraꞌatup eꞌem: 
\mi “Deus ebekit õn” iꞌeꞌeꞌukat ikẽrẽat mujurũg̃rũg̃ap cuy jepere, i dak eꞌem Deus ekawẽntup.
\p
\v 20 Yaꞌade opop ibubut mũnꞌaꞌa yaboꞌgatꞌa be- -ibubut adeat tukꞌa be. Ouro mug̃ẽg̃ẽꞌa opop, prata mug̃ẽg̃ẽꞌa dak, ip mug̃ẽg̃ẽꞌa dak, wuynõm mug̃ẽg̃ẽꞌa dak. Pũg̃pũg̃ꞌa kug̃ ip soat kabia. Waraꞌatꞌa kug̃ pit ip xipacat ebapuk puje acã, yaꞌõbuyxiat ajẽm puje acã. 
\v 21 Ikẽrẽat mujurũg̃rũg̃ap epere buje wuyju dak xipat acesop wuykukukat Jesus xe.
\p — Obuywatwan cuy eg̃uy, xipat ẽn oxe buye — i jeꞌe wuywebe. — Ocokcok cĩcã ekay — i jeꞌe wuywebe, wuyag̃uyisu buye, ikẽrẽat mujurũg̃rũg̃ap kuy acepere buye dak. 
\m
\v 22 Yaypanꞌisuayũ etabikukuap kay g̃u juy eg̃uy. Cũg̃ ma juy ejeku Deus etabutpe. Etabun cuy eg̃uy Jesus Cristo kay. Ikukpin cuy soat ejukuk. Kabaꞌũm cuy eg̃uy wararaꞌacat eju. Imẽn ma jekukum ip- -“Ocekukukat, ocebuywatwan cuy eg̃uy” iꞌeꞌeꞌukayũ- -Deus emumuisunyũ. 
\v 23 Ecekawẽn g̃u juy jewaꞌõdawutwutꞌukayũ eju, warẽmtag̃ ma kawẽnwẽnꞌukayũ eju dak. Jewaꞌõxikxig̃ acã ip. 
\v 24 Wuykukukat buywatwatꞌukat pit jewaꞌõxikxig̃ g̃u juy. Xipan cuy soat jukuk. Xipan ma juy soat mutaybitbin jeenuy. Yukpiceg̃ẽm g̃u juy wararaꞌacat jukuk. 
\v 25 Wuymuymuyꞌukayũ mukũyjobitbin pima, wuyaꞌõpurug̃ g̃u juy acekawẽn ceweju ip. Ibuyxim cuy ip ajukuk. G̃uyjom paxi Deus ixeyũ g̃ubuꞌun ikẽrẽat kay am. Ixeyũ acoꞌi g̃utabun kawẽn icẽmat kay. 
\v 26 Kuy bima ibiõg̃buk kẽrẽayũ kukukat ixeyũ oꞌjat puca buap puxim. Ibiõg̃buk kẽrẽayũ kukukat bikuyap tag̃ ip jekukum g̃asũ. G̃axĩn ma acoꞌi g̃uto ip yag̃uysan. Ibuꞌun acoꞌi kuka ip ibiõg̃buk kẽrẽayũ kukukat aꞌõ kay nobanoꞌabibubu bewi puca oꞌkap iat puxim.
\b
\c 3
\p
\v 1 Amap kabia ibaꞌore jĩjã jeꞌe itabucayũ be Deus ekawẽn tag̃ jeku am adeayũ ikẽrẽat g̃ujurũg̃rũg̃ puye. G̃ebum cuy eg̃uy iboap kay. 
\v 2 Jewekay acã g̃ebum jeedop ip ijodiacat. Itabikuku jĩjã jeedop ip dinheiro kay.
\p — Soat podi ma ocaꞌõbuyxi — i jeꞌe ip napa ma. — Kaꞌũmg̃u ocejoꞌiat yaꞌõbuyxiat — i napa ma jeꞌe ip.
\m Wararaꞌacat ekawẽn mukẽrẽrẽrẽn jeedop ip.
\p — Ẽn xipat cĩcã — iꞌũmg̃u jeꞌe ip, wararaꞌacat xipacat ũmũm maꞌg̃u cebe ip.
\m Kũyjobit g̃u jeedop ip jebay aꞌõ kay, jexi aꞌõ kay dak. Ibuyxim g̃u ip Deus jukuk. Ixe kay itabucayũ dak jukuk ip ibuyxim g̃u. 
\v 3 Abu jukuk ikukpin? Kaꞌũma ma. Yaꞌõpurug̃ ip soat jukuk. Wararaꞌacat muymuyxi jeedop ip. Jewawẽwẽm g̃u jeedop ip ikẽrẽat kukap puxim. Dao ma ip etakomamãn. Xipacat kay g̃u jĩjã jeedop ip. 
\v 4 Jebureyũ tujowat ip cekay itakomaayũ be yaoka am. Warẽmtag̃ ma jeku ip. Jewexe yobog̃ cĩcãayũm jeedop ip. Deus mucokcok pin g̃u jeedop ip- -jewemucokcok pin acã.
\p
\v 5 — Oceju dak Deus ebekitkiyũ — i napa ma jeꞌe ip wararaꞌacat pe.
\m Inaka itaybit g̃u jeedop ip Deus aꞌõbacaap kuk am. Deus bikuyap tag̃ g̃u jeku ip- -jebikuyap tag̃ acã. Ixeyũ burem g̃u juy eg̃uy, ẽn pit. 
\v 6-7 Ixeyũꞌin aoyũ mug̃uykukukum- -yag̃uyꞌũmayũ mug̃uykukukum. Ixeyũ aoyũ ikẽrẽat mujurũg̃rũg̃ soat em.
\p — Ikẽrẽat kug̃ oceju — iꞌeꞌem ip ixeyũ aoyũ.
\m Inaka ikẽrẽat mujurũg̃rũg̃ap epereperem g̃u ip. Iparara ip Deus ipiat supiꞌajoat ocewebe iap puxim. Inaka kũyjobit pin g̃u ip Deus pe jedaxijoan. Jewexe ip kawẽn icẽmat kudadam. Jewexe jewemutaybitbin ip. Inaka itaybit paꞌore cebe ip kawẽn icẽmãn. Imẽnpuye imug̃uykukuꞌukayũ õmõm ixeyũ aoyũ dukꞌa be. Warẽmtag̃ imutaybitbin ip.
\p — Ocekawẽn tag̃ cuy epeku eyejuap puxim ipiatꞌajojoap kay — iꞌeꞌem ip cebe ip napa ma.
\m Imẽn aoyũ mug̃uykukukum ip kawẽn icẽmat tobuxikap puxim. 
\v 8 Moisés kawẽn icẽmat muwẽnuwẽnꞌuk osunuy Deus aꞌõbi kuyje. Janes Moisés aꞌõ kayg̃u jĩjã osunuy, Jambres tak. Kawẽn icẽmat kay g̃u jĩjã osodop ip. Imẽnpuxim ixeyũ ag̃okatkayũ wararaꞌacayũ mug̃uykukukum ixeyũ be kawẽn icẽmat kayap puxim. Yag̃uyꞌũm ip. Jesus kay jetabucap ip oꞌjepere. Itabutꞌũmat coꞌi ip Deus xe. 
\v 9 Soat em g̃u bit ijodiacat g̃ug̃uykuku ip- -xepxep kabia ã. G̃uyjom soat ijodiacat jeꞌe cebe ip:
\p — Ajo am eyetaybit? Kaꞌũma am ma! — i.
\m Imẽnpuxim kuyjeayũꞌũmꞌũm oꞌe Janes pe, Jambres pe dak.
\p
\v 10 Bekit, etaybit cĩcã apẽn õn jekukum iam, apẽn õn wararaꞌacat mutaybitbin iam tak, apẽn obikuy Deus bikuyap tag̃ weku am iam tak. Etaybit apẽn wetabut Jesus Cristo kay iam, apẽn wuypiceg̃ẽm g̃u õn wararaꞌacat kug̃ iam tak, apẽn ikukpin wararaꞌacat kug̃ õn iam tak, apẽn wetaxi ipiatꞌajo am iam tak. 
\v 11 Itabutꞌũmayũ juk adi ikẽrẽm okuk. Ipiat cuk adi oꞌsupiꞌajoat ip owebe. Ikẽrẽm cĩcã juk adi ip okuk Antioquia ka be bima, Icônio ka be bima dak, Listra ka be bima dak. Ade em cuk adi ipiat osupiꞌajojojo. Wuykukukat Jesus pit odaxijo ixeyũ bui bewi. Etaybit iboam. 
\v 12 Jesus Cristo eju mũg̃ꞌi wuyeku am wuybikuy bima, itabutꞌũmayũ ipiat supiꞌajoat wuywebe, Deus ekawẽn tag̃ wuyeku am wuybikuy bima. 
\v 13 Big̃ ma ip ikẽrẽat g̃ujurũg̃ xipatꞌũmayũ- -warẽmtag̃ ijodiacat mutaybitbinꞌukayũ. Wararaꞌacat mug̃uykukukukum ip jeku. Jewemug̃uykuku dak ip. 
\v 14 Ẽn pit apẽn õn cuk adi emutaybitbin iap tag̃ cuy ejeku- -apẽn wuybadipyũ juk adi emutaybitbin iap tag̃ tak. Etaybit cĩcã icẽmãn oceju juk adi emutaybitbin iam. Imẽnpuye ocekawẽn kay etabun cĩcã juy eg̃uy. 
\v 15 Bekin pin ma Deus ekawẽntup cocoꞌuk eg̃uy. Etaybit oxe ekawẽn. Ibodup cocom pima wuyetaybit acesop apẽn Deus wuydaxijojom Jesus Cristo kay wuyetabun puje iam. 
\v 16 Deus aꞌõbi kuyjeayũꞌũmꞌũm ixe ekawẽntup oꞌtupmubararak- -soatup. Iboaptup ekawẽn xipat cĩcã kawẽn icẽmãn wuymutaybit am. Xipat cĩcã ikẽrẽat mujurũg̃rũg̃ꞌukayũ mug̃uycũg̃ ãm ikẽrẽat kay. Xipat cĩcã ikẽrẽat mujurũg̃rũg̃ꞌukayũ mubikuy am ikẽrẽat mujurũg̃rũg̃ap epere am. Xipat cĩcã itabucayũ mukũyjo am Deus bikuyap tag̃ jeku am. 
\v 17 Ibodupkug̃ pima waraꞌat kay g̃u jeꞌe ip itabikuku Deus buywatwatꞌukayũ. Soat kug̃ kuy ip. Ibodup kug̃ pima, ibaꞌore g̃u jeꞌe ixeyũ be xipacat mug̃ẽ ãm- -iwarururuat mug̃ẽ ãm.
\b
\c 4
\p
\v 1 Deus etabun g̃asũ õn awẽm, Timóteo, Jesus Cristo etabun tak. Ixe Jesus Cristo apẽn cuk adi oekuku ip iaptei ideida soat pe- -itabẽg̃ayũ be, ceꞌũꞌũayũ be dak. Ixe Cristo waram jajẽm. Ipiat supiꞌajoat ikẽrẽat mujurũg̃rũg̃ꞌukayũ be ikẽrẽat ip oꞌg̃ujurũg̃rũg̃ iapteim. Xipacat pit jeꞌg̃ũm jebekitkiyũ be- -xipacat mujurũg̃rũg̃ꞌukayũ be xipacat ip oꞌg̃ujurũg̃rũg̃ iapteim. 
\v 2 Soat kukukan jeꞌe ixeyũ eju- -jebekitkiyũ eju. Imẽneju Deus ekawẽn cuy eg̃uwẽnuwẽn soat pe. Cekawẽn cuy eg̃uwẽnuwẽn imuwẽn paꞌore ewebe bima, imuwẽn paꞌoreꞌũm pima dak. Warẽmtag̃ ma cekuꞌibiyũ juy eg̃ukorẽmrẽm.
\p — Ikẽrẽat mujurũg̃rũg̃ap cuy epeyepere — i juy ece cebe ip. — Eyetabun cuy Jesus kay — i juy ece cebe ip.
\m Eyaꞌõmucanucan cuy ip ixeyũ be cũg̃ ma jeku am. Ekpicẽg̃ẽ g̃u juy ixeyũ eg̃utaybitbin. 
\v 3 G̃uyjom kawẽn icẽmat com ip ibuꞌun adeayũ. Jekpiwan ma ip jewemucokcog̃. Warẽmtag̃ ma imutaybitbinꞌukayũ tomuwã ip jemutaybit am. Yaꞌĩjo pinap acã ip g̃uwẽn cebe ip. 
\v 4 Kawẽn icẽmat aꞌĩjojoap jepere ip. Warẽmtag̃ eꞌeꞌukayũ ekawẽn kay acã jeꞌe ip- -aypapayũꞌũmꞌũm ekawẽn kay acã. 
\v 5 Ẽn pit, Timôteo, ag̃uysan cuy eg̃uy warẽmtag̃ ekuap puxim. Etaxim cuy eg̃uy ipiatpiꞌajojom pima. Kawẽn idipat cuy eg̃uwẽnuwẽn soat pe. Deus cuk enaẽ kapik am cebeam. Imẽnpuye soat em cuy ixe beam kapikpig̃ eg̃uy.
\p
\v 6 Õn pit g̃axĩn ma oaoka ip. Apẽn kuyje Deus etabutpe wũnca aokakakaap puxim ip oaoka. G̃axĩn ma ojẽm ijodiwi kobe oꞌjenapõn iap puxim. 
\v 7 Sorara xipacat puxim õn kapikpig̃ Jesus Cristo beam. Pũg̃pũg̃ daudauꞌukayũꞌin cedag̃ g̃u jedaudaum ip. Ixeyũ buxim g̃u õn pit. Cedag̃ ma ojekuku- -Deus ekawẽn tag̃. Pũg̃pũg̃ ixeyũꞌin taobuꞌu eꞌem ip jedau am. Ixeyũ buxim g̃u õn pit. Obuꞌu g̃u og̃uy Jesus kay wetabut am. 
\v 8 Daudauat iwat tumũntuptup mõg̃mõg̃ iwũncaat a be soat etabutpe. Soat etabutpe dak wuykukukat Jesus jeꞌe owebe:
\p — Ẽn xipat Deus xe ixe emucũg̃ kuy buye — i.
\m Imẽn ixe jeꞌe waram jajẽm puje- -kũyjobitꞌũmayũ be ipiatꞌajoap kabia be. Wuykukukat cũg̃ cĩcã. Ixe wuyekukuap cocom- -soat cocom.
\p — Eyju xipat Deus xe ixe eymucũg̃ kuy buye — i jeꞌe wararaꞌacayũ be dak- -ixe ajẽmap wiwiꞌukayũ be- -jekayayũ be.
\p
\v 9 Bekit, g̃axĩn ma juy ejot ojom. 
\v 10 Kuy ip oꞌjẽm oxewi oxe osodopꞌiayũ. Demas itabiku oꞌe ijodiat kay jebubun. Imẽnpuye opere. Oꞌju Tessalônica ka kay. Crescente oꞌju Galácia eipi kay. Tito oꞌju Dalmácia eipi kay. 
\v 11 Lucas acã oxe jeenuy. Marcos cuy etakoy. Ixe juy etojot eweju okay don pima. Ixe xipat cĩcã jeꞌe obuywat am Deus ekapikap pe. 
\v 12 Kuy Tíquico og̃uju Éfeso ka kay. 
\v 13 Weekabek cuk osuiwat Trôade ka be. Carpo dukꞌa be juk osuiwat. Ibo juy etojot don pima. Obubutup tak cuy etuptojot okay ixeemug̃ẽg̃ẽdup.
\p
\v 14 Alexandre juk adi ikẽrẽm cĩcã okuk- -icaat mug̃ẽg̃ẽꞌukat- -ferro mug̃ẽg̃ẽꞌukat. Wuykukukat cuy ideida cebe warẽmtag̃ okukapteim. 
\v 15 Ixe wuyaꞌõxikxikxi jĩjã osunuy. Imẽnpuye edayꞌemꞌum cuy eg̃uy cekay ixe be ikẽrẽm ekukap puxim.
\p
\v 16 César ebekitkit wap õn jewedayoyom pima, kaꞌũma ma oꞌe:
\p — Teku xipat cĩcã- -ikẽrẽat oꞌg̃ug̃ẽ g̃u — i. 
\m Soat ma ip oiwat. Õn pit obuꞌu Deus pe “Ikẽrẽat kug̃ cĩcã eyju oxe, Palo epesuiwat puye” iꞌe am cebe ip. Imẽnpuye:
\p — Bay, etakomãm g̃u juy cekay oiwat maꞌg̃u ip — i õn eꞌem Deus pe. 
\m
\v 17 Ixeyũ ma juk opere. Wuykukukat pit oiwat g̃u. Oxe ma osunuy. Ixe obuywatwatꞌuk osunuy owebe Judeuꞌũmayũ mukũyjo am kawẽn idipan- -soat em imukũyjo am. Ixe juk odaxijo leão buximayũ bui bewi- -ikaꞌuat puximayũ bui bewi. 
\v 18 Wuykukukat odaxijo ikẽrẽat mujurũg̃rũg̃ꞌukayũ bui bewi- -soat pui bewi waokaap puxim. G̃uyjom odujuu soat em jexe onuy am kabi be. Ixe soat ka watwak kukukan jeꞌe.
\p — Ẽn soat podi ma edipap kug̃ — i juy ace cebe- -wuykukukat pe. Imẽn cuy ace cebe.
\p
\v 19 Kato i juy ece soat pe- -Priscila be, Áquila be dak, Onesíforo badipyũ be dak. 
\v 20 Erasto Corinto ka be omuy. Trófimo juk osuiwat Mileto ka be iwãtaxipi buye. 
\v 21 Ejot cuy okay ihi wap. Êubolo eꞌem: — Kato — i juy ewebe, Prudente dak, Lino dak, Cláudia dak, soat wararaꞌacayũ dak- -wuykitpitpiyũ.
\p
\v 22 Õn kawẽnwẽn wuykukukat eju ewebeam.
\p — Bay, Timóteo aꞌõmucanucan cuy eg̃uy soat em — i õn eꞌem cebe. — Bay, xipan cuy soat itabucayũ ejukuk — i õn eꞌem Deus pe.
\m Ibũrũ ma.