\id PHM Mundurukú [myu] NT (Brazil) -2010 bd.
\h Filemom
\toc1 Filemom beaptup
\toc2 A Filemom
\mt FILEMOM BEAPTUP PAULO EMUDUPMUBARARAKTUP
\c 1
\p
\v 1-2 Filemom, ijudup mubarararag̃ õn ewebeaptum. Õn Paulo. Daomũnmũnapꞌa be õn, Jesus Cristo muwẽnuwẽn cuk adi ojekuku buye. Wuykitpit Timóteo omuy oxe. Otupmuju ewebeaptum, Filemom, edukꞌa be jeꞌaweroroꞌukayũ beaptum tak- -itabucayũ beaptum. Otupmuju wuyixĩt Áfia beaptum tak. Arquipo beaptum tak otupmuju- -oweju Jesus Cristo beam kapikpikꞌukat peaptum. Ekukpin cĩcã ocexe. Ẽn kapikpig̃ oceweju kawẽn idipat muwẽnuwẽn.
\p
\v 3 Deus wuyebayat. Jesus Cristo wuykukukat. Ixeyũ eju õn kawẽnwẽn ewebeam.
\p — Bay, xipan cuy Filemom ejukuk — i õn eꞌem cebe. — Yag̃uymubabibin cuy eg̃uy yag̃uybabiꞌũmap puxim — i õn eꞌem cebe.
\p
\v 4-5 Filemom, soat em wararaꞌacayũ eꞌem owebe: Ixe Filemom itabut cĩcã wuykukukat Jesus kay — i. — Ixe xipan Jesus ebekitkit kug̃ — i dak.
\m Imẽnpuye õn kawẽnwẽn Deus eju ewebeam.
\p — Bay, ẽn xipat cĩcã — i õn eꞌem. — Filemom buywatwan cuy eg̃uy — i õn eꞌem. — Ibadipyũ buywatwan tak cuy eg̃uy — i õn eꞌem cebe.
\m
\v 6 Wuyag̃uywag̃õm wuyju eꞌem, pũg̃ kay wuyetabut puye- -Jesus Cristo kay. Imẽnpuye:
\p — Bay, ocemutaybin cuy ece ade jĩjã xipacat pupum eyju Cristo eju mũg̃ꞌi eyju buye iam — i õn eꞌem Deus pe.
\m Big̃ ma juy iboam wuyetaybin aceꞌe.
\v 7 Okitpit, ocokcok cĩcã. Waꞌõca jĩjã dak oce, Deus ebekitkit ikukpin exe buye, ẽn xipat oxeyũ kug̃ puye dak. Ẽn soat Deus ebekitkit mucokcokcog̃.
\p
\v 8 Obure, cũg̃ ma kuka oꞌe owebe “Kũyjobin cuy eg̃uy waꞌõ kay” iꞌe am ewebe, Cristo kay wuyetabut puye.
\p — Kũyjobin cuy eg̃uy waꞌõ kay — iꞌũmg̃u õn pit eꞌem ewebe,
\v 9 wuyewewekug̃ wuykukpin puye. — Ekpiwan ma ecekũyjobin waꞌõ kay, kũyjobit pin pima acã — i õn pit eꞌem ewebe.
\m Imẽn õn eꞌem ewebe Cristo aꞌõbi maꞌg̃u õn. Daomũnmũnapꞌa be õn g̃asũ, Jesus Cristo muwẽnuwẽn cuk adi ojekuku buye.
\v 10 Onésimo awẽg̃ muwẽn õn g̃asũ ewebe. Õn daomũnmũnapꞌa be bima, ixe Onésimo itabut oꞌe Jesus kay, Jesus og̃uwẽn cebe buye. Imẽnpuye ixe okpot coꞌi.
\v 11 Kuy bima ixe Onésimo xipat g̃u osunuy exe. Kũyjobitꞌũm osunuy aꞌõ kay. G̃asũ bit xipacan oꞌe wuyxe.
\p
\v 12 Ixe ikukpin cĩcã oxe. Inaka og̃uypit ekay.
\v 13 Obikuy oce oxe ma jeenuy am obuywacan edieg̃, õn daomũnmũnapꞌa be bima.
\p
\v 14 — “Ãg̃ jeenuy exe ebuywatwatꞌukan,” i juy ece owebe — iꞌũmg̃u õn pit eꞌem ewebe.
\m Obuꞌu ewebe ixe be obuywacan ebuꞌu bima. Ebikuy bima acã ixe be obuywacan ece. Ebikuy bima acã oxe jeenuy.
\p
\v 15 Ixe Onésimo ade kabia g̃u osunuy wũy ma ewi. G̃asũ bit acoꞌi soat em jeenuy exe ekay cepit puje.
\v 16 Ewebe teiꞌũma kapikpikꞌukat osunuy kuy bima. G̃asũ bit ekipit ma ixe, Cristo kay itabut puye. Ikukpin oxe ma. Exe bit ibodi ma ikukpin jeꞌe ewebe kapikpig̃ puye, wuykukukat kay itabut puye dak.
\p
\v 17 — Paulo obure jĩjã — i ẽn eꞌem pima, ixe Onésimo juy etujuõm edukã be ewebe odujuõmap puxim.
\v 18 Ixe juk adi ebubutꞌin oꞌtujupaꞌum pima, exe cewero bima dak, iboap cuy eg̃ubararak taperadup pe. Ceweroam g̃u jeꞌe- -weweroam acã.
\v 19 G̃uyjom õn ma ixe eweroap oteida ewebe. Paulo õn. Õn ma oteida iaptup mubarararag̃ õn ewebeaptum. Jesus Cristo kay mo etabut eg̃uy kawẽn idipat og̃uwẽn ewebe buye. Imuwẽnꞌũm pima kajuk etabut g̃u eg̃uy. Soat em etabẽg̃ eg̃uy Deus xe iap oweju eweroap coꞌi. G̃ebum cuy eg̃uy iboap kay.
\v 20 Imẽnpuye, okitpit, xipan cuy Onésimo ejukuk wuyetabut wuykukukat kay buye. Xipan cuy etujuõm edukꞌa be omucokcok am.
\p
\v 21 — Xipan cuy Onésimo ejukuk — i juk oce ewebe, Filemom. — Imẽnpit wekawẽn podi ma xipan ixe jukuk — i õn eꞌem owebe ma ijudup mubarararag̃ pima.
\m
\v 22 G̃axĩn ma acoꞌi Deus omudot eykay, “Paulo juy eg̃udot ocekay,” iꞌeꞌem eyju cebe buye. Imẽneju:
\p — Edukꞌa juy eyamuxipan owebeapꞌam oxecapꞌam — i õn eꞌem ewebe.
\p
\v 23 Epafras kato mujujum ewebe. Ixe Epafras tak taomũnmũn, oweju Jesus Cristo muwẽnuwẽn cuk adi oeku buye.
\v 24 Obureyũ kato ioꞌe ip eywebe soat pe- -Marcos, Aristarco dak, Demas tak, Lucas tak.
\p
\v 25 — Ocekukukat, xipan cuy Filemom ejukuk — i õn eꞌem Jesus Cristo be.
\m Ibũrũ ma.