\id 2PE Mundurukú [myu] NT (Brazil) -2010 bd. 
\h 2 Pedro
\toc1 Pedro emudupmubararaktup- -xepxepatup
\toc2 Segunda Carta de Pedro
\mt PEDRO EMUDUPMUBARARAKTUP XEPXEPATUP
\c 1
\p
\v 1 Simão Pedro õn. Jesus buywatwatꞌukat õn. Deus emumuju õn. Cartadup mubarararag̃ õn soat peaptum- -Jesus Cristo kay itabucayũ beaptum. Jesus Cristo wuydaxijojoꞌukat. Deus coꞌi ma ixe dak cũg̃ ma eꞌem. Ixe juk eymutabun ocemutabunap puxim. Ixe kay wuyetabut pima, teibog̃ cĩcãat wuyju ikug̃ iap puxim. 
\v 2 Eyju kũyjobit eꞌem Deus aꞌõ kay, wuykukukat Jesus aꞌõ kay dak. 
\p — Bay, soat em ebekitkit ag̃uymubabibin cuy eg̃uy — i õn eꞌem Deus pe. — Soat em xipan cuy ixeyũ ejukuk — i õn eꞌem cebe.
\p
\v 3 Deus cuk wuynaẽ jejoꞌi wuywebe idipat kuk am, jejoꞌi xipacat mug̃ẽ ãm tak. Ixe dak cuk jaꞌõbacaap oꞌg̃uõm wuywebe. Imẽnpuye soat em ixe aꞌõ dag̃ wuyeku but ijodi bima. Yaꞌõ dag̃ jeku am ibaꞌore g̃u wuywebe, wuyetaybit wuynaẽan puye.
\p
\v 4 — Ojoꞌi eyju dak epesop xipacat mug̃ẽg̃ẽꞌukayũm — i juk adi oꞌe Deus wuywebe. — Ojoꞌi eyju dak epesop eydipap kug̃ — i dak cuk adi oꞌe wuywebe.
\m Iboap ekawẽn kay wuyetabut pima, wuycokcok cĩcã acesop teibog̃ cĩcãat kukat puxim. Xipat cĩcãat tak cuk oꞌg̃ũm wuywebe. Ixe emumuũm kug̃ pima, ikẽrẽat kay g̃u aceꞌe, ixe ekawẽn kay wuyetabut pima dak. Itabutꞌũmat buxim g̃u aceku. Deus kayꞌũmat ag̃uy dag̃ g̃u dak acesop jewag̃uyg̃uy- -Deus ag̃uy dag̃ acã. 
\v 5 Imẽneju eyetabut pima, xipacat tak cuy epeg̃ug̃ẽg̃ẽ. Xipacat mug̃ẽg̃ẽm pima, eyetaybin tak cuy epesop Deus eꞌe am. 
\v 6 Eyetaybit Deus eꞌe am pima, jewawẽwẽm tak cuy epesop eywebe ikẽrẽat mug̃ẽap puxim. Jewawẽwẽm pima, eybuꞌum g̃u dak cuy epesop Jesus kay, ipiatpiꞌajojoan maꞌg̃u ip eywebe. Eyetabut am eybuꞌuꞌũm pima, Deus ag̃uy dag̃ tak cuy epeyewag̃uyg̃uy. 
\v 7 Deus ag̃uy dag̃ jewag̃uyg̃uy bima, eykukpin tak cuy eykitpitpiyũ epejukuk. Eykukpin eykitpitpiyũ kug̃ pima, wararaꞌacat tak cuy eykukpin epejukuk. 
\v 8 Imẽn cuy epekuku. Imẽn jekukum pima, eyjojoayũ jeꞌe:
\p — Teyũku cedag̃ ma jekukum itabut wuykukukat Jesus Cristo kay buye — i. — Warẽmtag̃ g̃u ip jekukum itabut cekay buye — i jeꞌe ip.
\m
\v 9 Iboap ekawẽn tag̃ jekukuꞌukꞌũmayũ bit itabibacoyat puxim. Itaꞌũmat puxim tak ip. Yag̃uybaꞌũm ip Deus cuk ikẽrẽat oꞌjuꞌuk ocewebewi iap kay.
\p
\v 10 Okitpitpiyũ, big̃ ma juy Deus aꞌõ dag̃ epeku. Big̃ ma juy ixe bikuyap tag̃ epeku. Ixe juk wuynaẽ, wuynomuwã dak imẽn ma wuyeku am. Imẽn eyeku buje, epeyepere g̃u eyetabucap. 
\v 11 Ixe bikuyap tag̃ eyeku buje: — Epesop cuy okay — i jeꞌe wuykukukat Jesus Cristo eywebe.
\m Wuydaxijojoꞌukat imẽn jeꞌe eywebe.
\p — Soat em soat kukukayũm epesop oweju — i dak jeꞌe eywebe. — Xipat oxe eywebe ixeyũ kukukꞌukayũm oweju — i dak jeꞌe eywebe.
\p
\v 12 Kuy juk eyetaybit epesop kawẽn icẽmãn. Eyetabut cĩcã iboap ekawẽn kay. Inaka soat em iboap ekawẽn og̃uwẽn eywebe eyag̃uybaꞌũmap puxim. Epeyepere g̃u juy ixe ekawẽn. 
\v 13 Wetabẽg̃ pima, cũg̃ ma owebe waram ixe ekawẽn muwẽn ãm eywebe eyag̃uybaꞌũmap puxim. 
\v 14 Wetaybit g̃axĩn ma ojeꞌũ iam, wuykukukat Jesus Cristo kuy juk ibapug̃ ma omukũyjo buye. 
\v 15 Imẽnpuye waꞌõbuꞌu g̃u soat em ixe ekawẽn muwẽn ãm eywebe eyag̃uybaꞌũmap puxim weꞌũ buje.
\p
\v 16 — Wuykukukat Jesus Cristo waram jajẽm — i juk adi ocece eywebe. — G̃uyjom ixe jaꞌõbacaap g̃ubapuk soat pe ijo am — i juk adi ocece eywebe.
Ocekpiwatpi g̃u juk adi iboap oceg̃uwẽnuwẽn eywebe. Ocetam ixe soat podi ma yaꞌõbaca iap ocejojojo. 
\v 17 Deus soat podi ma yaꞌõbuyxiat- -wuyebayat. Soat podi ma ixe idip. Imẽnpit:
\p — Ojoꞌi ma ẽn tak soat podi ma aꞌõbuyxi — i juk adi oꞌe Deus jekpot pe. — Ojoꞌi ma ẽn tak soat podi ma edip — i juk adi oꞌe cebe. Imẽn eꞌem pima, ixe xe juk ocesop cekawẽn cocom. Kabi kadiwi juk oꞌjekawẽn.
\p — Ite okpot ikukpinat — i juk adi oꞌe ocewebe. — Ocokcok cĩcã cekay — i juk adi oꞌe.
\m
\v 18 Oceju ma kabi kadiwiat oceyaꞌĩjojo wuykukukat Jesus xe bima, coꞌa jeje bima, Jesus ebapukapꞌa jeje bima.
\p
\v 19 Kuy juk ocetabut Deus ekawẽn muwẽnuwẽnꞌukayũꞌũmꞌũm ekawẽn kay. Kabi kadiwiat aꞌĩjojo buje bit, big̃ ma juk ocetabut ocesop. G̃ebum cuy epesop ixeyũꞌũmꞌũm ekawẽn kay. Ixeyũꞌũmꞌũm ekawẽn lâmpada buxim- -kabiok peat puxim. Kabiam pima kabiada jedaebapukpug̃. Ig̃oda buxim Jesus Cristo jajẽm waram. Ixe ajẽmap wiwim pima, g̃ebum cuy epesop cekawẽn muwẽnuwẽnꞌukayũꞌũmꞌũm ekawẽn kay. 
\v 20 Deus ekawẽn muwẽnuwẽnꞌukayũ jekpiwatpi g̃u apẽn g̃uyjom jeꞌbapuk wuywebe iap oꞌg̃uwẽnuwẽn- -pũg̃ em tak kaꞌũma. Wuywebe dak wuyukpiwatpi g̃u iboap ekawẽn muwẽn put. G̃ebum cuy epesop iboap kay. 
\v 21 Jekpiwatpi g̃u juk adi apẽn g̃eyjom jeꞌbapuk wuywebe iap oꞌg̃uwẽnuwẽn ip. Deus biõg̃buk aꞌõbi ma oꞌg̃uwẽnuwẽn ip- -Xipat cĩcãat aꞌõbi.
\b
\c 2
\p
\v 1 Kuyje Judeuyũ parakpe osodop ip jewexe Deus ekawẽn muwẽnuwẽnꞌukayũ. Imẽnpuxim g̃asũ dak warẽmtag̃ ma eymutaybitbinꞌukayũ jajẽm eykay. Napa ma jeymutaybin ip. Xipatꞌũmãn ip jeymutaybin. Jaꞌĩjojoꞌukayũ g̃ubuꞌun ip Jesus kay itabut am. Wuykukukat kuy ikẽrẽat oꞌjuꞌuk cebewi ip. Inaka ibuꞌu jeꞌe ip Deus pe ikẽrẽat ꞌuk an jewebewi. Imẽnpuye Deus dao ma ixeyũ g̃uju ipiatpiꞌajojoap kay. Soat em jeedop ip ipiatꞌajojom. 
\v 2 Adeayũ bit ixeyũ buxim jekpiwatpi ma jekuku ip ikẽrẽat mug̃ẽg̃ẽm. Ixeyũ ekukuap co buje, wararaꞌacayũ dak napa ma jeꞌe: — Jesus e icẽmat e g̃u — i. — Jesus ebekitkit tak ikẽrẽat mug̃ẽg̃ẽm itabutꞌũmat coꞌi — i dak jeꞌe ip napa ma. 
\v 3 Jag̃uybi ma ip jekawẽn eyweju warẽmtag̃ ma eymutaybin am, eyedinheiro kay jetabikuap tomuju ma. Napa ma jeꞌe ip eywebe.
\p — Ikẽrẽat kug̃ ip oxe — i juk adi oꞌe Deus kuyje ma ixeyũ muwẽnuwẽn.
\m Deus itanomudipdip g̃u cekay ip. Ag̃ ma. Soat cocom. Ixeyũ g̃uju ipiatꞌajojoap pe.
\p
\v 4 Jekawẽn tojotjotꞌukayũ be ikẽrẽat mug̃ẽ buje, Deus ibuꞌu g̃u osunuy ipiatpiꞌajoan cebe ip. Itabotaidabotbot g̃u oꞌe cekay ip. Ipiatꞌajojoap kay ip oꞌg̃uju. Iboce ma ip taomũnmũn correntebum kabiokbog̃ pe. G̃uyjom Deus soat ideida apẽn ijodi bima juk adi oekuku ip iapteim. Xipacat jeꞌg̃ũm cedag̃ oekukuꞌiayũ be. Ipiat supiꞌajoat warẽmtag̃ oekukuꞌiayũ be bit. Teidadaap kabia wiwim ip. 
\v 5 Kuyjeayũ be ikẽrẽat mug̃ẽ buje dak, ibuꞌu g̃u osunuy ipiatpiꞌajoan cebe ip. Itabotaidabotbot g̃u oꞌe cekay ip. Mubaꞌatxiri oꞌg̃uajẽm ikẽrẽat mujurũg̃rũg̃ꞌukayũ mua pam. Noé acã oꞌtaxijo yakõmap puxim. Ixe Noé xipatꞌũmayũ mukũyjojom oekukuku mubaꞌat ajẽm awap.
\p — Ikẽrẽat mujurũg̃rũg̃ap cuy epeyepere Deus pe eymucũg̃ ãm — iꞌeꞌem oekukuku.
\m Ixe badipyũ dak oꞌtaxijo. 7 beayũ oꞌtaxijo.
\p
\v 6 — Eyju ikẽrẽat kug̃ oxe — i juk adi oꞌe Deus. Sodoma ka watwat pe, Gomorra ka watwat pe dak.
\m Daxam ip oꞌg̃uap. Oꞌg̃uap ip ikẽrẽat mujurũg̃rũg̃ꞌukayũ mutaybit am eyju dak õn jeymuap ma iam. 
\v 7 Ló bit oꞌtujujẽm Sodoma ka bewi ceꞌũap puxim. Ixe Ló cũg̃ ma osunuy Deus xe. Yag̃uybabiꞌũm osunuy Sodoma ka watwat ikẽrẽat mug̃ẽg̃ẽap cocom puye, ibo ka watwat ikẽrẽat kay acã g̃ebumap cocom puye dak. 
\v 8 Ixe Ló xipat osunuy. Soat kabia yukpiceg̃ẽ osunuy jeka watwat ikẽrẽat mug̃ẽg̃ẽap cocom puye, cekawẽnkẽrẽap cocom puye dak. 
\v 9 Wuykukukat itaybit cĩcã jaꞌõkayayũ daxijo am ipiatpiꞌajoap puxim. Jaꞌõ kayꞌũm cĩcãayũ be bit ipiat supiꞌajoat. Ixe yag̃uybaꞌũm g̃u ixeyũ muju am ipiatꞌajojoap kay warẽmtag̃ ma oekuku ip iap teidadaap kabia be. 
\v 10 Wararaꞌacat podi ma ipiat supiꞌajoat jekpiwatpi ikẽrẽat mug̃ẽg̃ẽꞌukayũ be- -jaꞌõ kayꞌũmayũ be dak.
\p Ixeyũ warẽmtag̃ ma wuymutaybitbinꞌukayũ isũsũn g̃u ikẽrẽat mujurũg̃ ãm. Jewexe ip yaꞌõbuyxi. Ibuyxin g̃u ip Deus ekawẽn tojotjotꞌukayũ kug̃. Imuymuy acã ip. 
\v 11 Warẽmtag̃ wuymutaybitbinꞌukayũ bodi ma yaꞌõbaca Deus ekawẽn tojotjotꞌukayũ. Ixeyũ bodi ma yaꞌõbuyxi dak ip. Inaka warẽmtag̃ wuymutaybitbinꞌukayũ muymuy g̃u ip Deus etabutpe.
\p — Teyũku xipat g̃u ocexe — iꞌũmg̃u eꞌem ip Deus pe. — Deus cuy ipiat supiꞌajoat cebe ip — i bit eꞌem ip.
\m
\v 12 Puca kake yaokaam acã- -wuyxan acã. Ixeyũ warẽmtag̃ ma wuymutaybitbinꞌukayũ puca buxim jekpiwan ma jekukum. Itaekat puxim ip jekukum. Jetaybitꞌũmap waywayway ip. Puca aokaap puxim Deus ixeyũ g̃uꞌũm. 
\v 13 Apẽn cuk adi ipiat oꞌsupiꞌajoat ip wararaꞌacat pe iaptei ideida ip. Ipiatꞌajojo am ip ideida. Deus ipiat supiꞌajoat cebe ip. Ikẽrẽat mug̃ẽg̃ẽm ip kabiabun soat etabun. Jemucokcok am ip ikẽrẽat mug̃ẽg̃ẽm soat em. Isũsũn g̃u ip ikẽrẽat mujurũg̃ ãm soat tabutpe. Iokokat puxim ip ikẽrẽat mujurũg̃rũg̃ xi ip puye. Eyju Jesus oeꞌũ wuywebeam iap kay wuyeg̃ebuapꞌa oꞌom pima, teꞌe ma ip jekõnkõn eyweju, ikẽrẽat mug̃ẽg̃ẽ ip jemucokcok am puye. Icokcok cĩcã ip wararaꞌacat mug̃uykuku am oceju xipat iam. 
\v 14 Ayacat coꞌisum ip itabiku cekay. Taobirerenꞌũma ip xipatꞌũmap mug̃ẽg̃ẽm. Itabutbũcayũ mug̃uykukukum ip. Dinheiro buap kay acã ip g̃ebum. 
\p — Ipiat osupiꞌajoat eywebe — i juk adi oꞌe Deus ixeyũ be. 
\m Cemunẽm ãm jeꞌe ip ibaꞌore ipiatꞌajoap puxim. 
\v 15 Kawẽn cũg̃at kay ip oibuꞌun cũg̃at e dag̃wi itabidaoat puxim. Balaão ekukuap puxim ip jekukum- -Beor ipot ekukuap puxim. Ixe Balaão dinheiro bu ojuy oekukuku xipatꞌũmap mug̃ẽg̃ẽapteim. 
\v 16 Deus pit jumento oꞌg̃uydeat Balaão mukorẽm ãm, kũyjobitꞌũm puye.
\p — Kũyjobin cuy eg̃uy Deus aꞌõ kay — i juk oꞌe jumento jekukat pe.
\m Jekukat aꞌõm oꞌjekawẽn Deus aꞌõbi. Imẽn Deus jumento be Balaão oꞌg̃ukorẽmat. Jekawẽn muwẽnuwẽnꞌukat oꞌg̃ukorẽmat ikẽrẽat kay imubuꞌunap ojuy.
\p
\v 17 Idiꞌa tiꞌũmat puxim warẽmtag̃ wuymutaybitbinꞌukayũ. Kabikerereat puxim tak ip- -kabido ixikxig̃iat puxim. Teꞌe ma idibi wiwim iap puxim teꞌe ma dak eyju ixeyũ bi bewi icẽmat cẽmcẽmap wiwim. Deus kabiok cĩcãatka oꞌsukanaẽ tibira jĩjãat puxim cebeam ip soat em top am ip. 
\v 18 Cedag̃ g̃u ip kawẽnwẽn eyweju, yobog̃an pin ip puye, yakpidapi ip eꞌem puye dak.
\p — Xipat ma wuyju Deus xe ikẽrẽat mug̃ẽg̃ẽm wuymucokcok am maꞌg̃u wuyju, aoyũ kaykay maꞌg̃u wuyju — i napa ma eꞌem ip eywebe.
\m Imẽn ikẽrẽat mug̃ẽg̃ẽꞌukayũ xewi puꞌun ojuyacayũ mug̃uykukukum ip waram g̃uto warẽmtag̃ ceku am.
\p
\v 19 — Warẽmtag̃ ma juy ajeku- -wuyekupinap tag̃. Deus wuydaxijo ma — i napa ma ip eꞌem.
\m Ibaꞌore cebe ip cedag̃ ma jeku am. Xipacat kay bima, xipacat acã juy aceg̃ug̃ẽ. Xipatꞌũmat kay bima bit, xipatꞌũmat acã aceg̃ug̃ẽ. Ibaꞌore cebe ip cũg̃ ma jeku am xipatꞌũmat kay buye. 
\v 20 Pũg̃pũg̃pũg̃ ikẽrẽat mug̃ẽg̃ẽap epereperem oꞌe. Xipacat muꞌũm ojuyayũ ekukuap epereperem ip oꞌe wuykukukat aꞌõ kay kũyjobit am- -wuydaxijojoꞌukat Jesus Cristo aꞌõ kay. Itabut ip oꞌe cekay. Imẽnpit waram g̃uto oibuꞌun yaꞌõ kay. Imẽnpuye waram g̃uto ikẽrẽat mug̃ẽg̃ẽm ip oꞌe. Waram g̃uto itabutꞌũmat ekukuap puxim ip jekukum oꞌe. Tadaybot ip osodop kuy bima jetabut awap. Waram g̃uto ikẽrẽat mujurũg̃ puje bit, ibodi ma ip tadaybotbot oꞌe. 
\v 21 Kawẽn cũg̃an itaybitꞌũm pima, Deus yopĩt ma kuka juk ipiat oꞌsupiꞌajoat cebe ip ceꞌũ buje, itaybitꞌũm puye. Imẽnpit itaybit ip osodop kawẽn cũg̃an, kuy ip oꞌyaꞌĩjojo buye. Darem ma ixe ekawẽn tag̃ oekuku ip- -Deus ekawẽn tag̃. Ibo ekawẽn ikẽrẽ g̃u- -soat tag̃ xipat. Inaka waram ip oibuꞌun. Deus yobog̃ ma ipiat supiꞌajoat cebe ip ceꞌũ buje, cũg̃at aꞌõ kay ip oibuꞌun puye. 
\v 22 Imẽn wuyju eꞌem: 
\p — Cedadat puje akurice waram jedat oꞌom — i. — Idibi be dajebaro akõm epere buje, jepitpin kaerep kay waram jewemukotektekteg̃ kaerep pe — i. 
\m Icẽmat aꞌõ kay oibuꞌunꞌiayũ ixeyũ buxim.
\b
\c 3
\p
\v 1 Oburereyũ ikukpinayũ, ijudup xepxepatup cartadup wemudupmubararaktup eywebeaptup. Ijoptupyũ otupmubararak eywebe xipacat kay acã g̃ebum am. Kuy otupmubararak eywebe eyag̃uybaꞌũmap puxim waram Jesus Cristo jajẽm iap kay. 
\v 2 Kuyje ma juk adi Deus ekawẽn muwẽnuwẽnꞌukayũꞌũmꞌũm ixe waram jajẽm iap oꞌg̃ukũyjojo- -soat tag̃ iisuayũꞌũmꞌũm. G̃ebum cuy epesop ixeyũꞌũmꞌũm ekawẽn kay. G̃asũ dak wuykukukat wararaꞌacayũ oꞌg̃udot jekawẽn muwẽn ãm eywebe. Wuydaxijojoꞌukat oꞌg̃udot ip. G̃ebum cuy epesop ixeyũ ekawẽn kay dak. 
\v 3 Ãmap kabia bima ikẽrẽat mug̃ẽg̃ẽxiayũ jajẽm eykay jemucokcok am ikẽrẽat mug̃ẽg̃ẽꞌukayũ. Iboam cuy õn eymukũyjojom. Cristo waram jajẽm iap ip jowayway.
\p
\v 4 — “Waram g̃uto oajẽm eykay,” i teꞌe ma Cristo juk adi oꞌe eywebe — i napa ma ip jeꞌe eywebe. — Pu ig̃uje? — i jeꞌe ip. — Wuyebayũꞌũmꞌũm pit kuy oeꞌũꞌũ. Inaka oajẽm g̃u buk — i jeꞌe ip iwayway am. — G̃asũ soat ibit ma apẽn ipi mug̃ẽ buje osodop iap coꞌi ma — i jeꞌe ip Cristo waram jajẽm iap wayway am.
\m
\v 5 Jaꞌõm acã Deus kabi oꞌg̃ujurũg̃, ipi dak. Idibi ma oꞌtimuwexat ipim. Idibi parakpewi ma ipi oꞌg̃ubapuk. 
\v 6 Idibim tak kuyjeayũ oꞌg̃uap- -ipi juayũ oꞌg̃uap. Mubaꞌatxiri oꞌg̃uajẽm soat muap am. 
\v 7 G̃asũ dak Deus aꞌõbi ma kabi jemõg̃ap pe opop Deus aꞌõbi. Deus aꞌõbi ipi dak opop jemõg̃ap pe ma. G̃uyjom pit jaꞌõm maꞌg̃uto idibi g̃uꞌũm daxam. Jaꞌõm ma ipi dak g̃uꞌũm. Imuꞌũm puje, ipiat supiꞌajoat kũyjobitꞌũmayũ be- -ikẽrẽat mujurũg̃rũg̃ꞌukayũ be. Waram Cristo jajẽm iap waywaywayꞌukayũ jekpiwan ma yag̃uybaꞌũm iboap ekawẽn kay.
\p
\v 8 Wuykukukat xe bit pũg̃ kabia mil koato joꞌi. Mil koato dak pũg̃ kabia joꞌi cexe. Eyag̃uybaꞌũm g̃u juy cuy epesop iboap kay, oburereyũ.
\p
\v 9 — Ocepit ma eykay — i juk adi aꞌg̃u oꞌe wuykukukat.
\p — Ibun cĩcã omuyku — i teꞌe ma eꞌem yajẽmap waywaywayꞌukayũ bit.
\m Ixe ibuꞌu kũyjobitꞌũmayũ muꞌũm ãm. Ibikuy soat pe ikẽrẽat mujurũg̃rũg̃ap epere am. Imẽnpuye ibun omuyku. Yukpiceg̃ẽ g̃u wuykug̃.
\p
\v 10 Imẽnpit wuykukukat jajẽm. Ukꞌa iwat ag̃ꞌũm pima ibukurukat ajẽmjẽm. Imẽnpuxim itabutꞌũmayũ ag̃ꞌũm pima, wuykukukat jajẽm. Yajẽmap kabia be kabi iꞌũm. Yaꞌõkareyat ipararu jĩjãat pibun ma iꞌũm. Soat kabi beat tak ipik ma. Iꞌũm. Ipi dak iꞌũm- -soat ipi dag̃at tak. 
\v 11 Deus imẽn soat g̃uꞌũm. Eyetaybit iboam. Imẽnpuye ikẽrẽat epeg̃ug̃ẽ g̃u juy- -pũg̃ em tak kaꞌũma. Deus aꞌõ dag̃ acã juy epekuku soat kabia. 
\v 12 Deus pe waram Jesus Cristo mudocap kabia juy epejowiwi. Eywebe iꞌe but iap cuy epeꞌeꞌe. Dao ma kuka aꞌg̃u oajẽm. Ixe ajẽm puje, kabi ipik. Iꞌũm. Kabi beat iero jeꞌe taxipap pibun.
\p
\v 13 — Kabi iisuat og̃ug̃ẽ — i juk adi aꞌg̃u oꞌe Deus pit. — Ipi dak waraꞌat og̃ug̃ẽ iisuat — i juk adi aꞌg̃u oꞌe. — Cedag̃ ma jekukuꞌukayũ acã jeedop ipi iisuat pe — i juk adi aꞌg̃u oꞌe.
\m Iisuat wiwim cĩcã wuyju.
\p
\v 14 Oburereyũ ikukpinayũ, ixe ajẽmap kabia wiwim wuyju. Imẽnpuye ikẽrẽat epeg̃ujurũg̃ g̃u. Deus aꞌõ dag̃ cuy epekuku soat kabia. Imẽn eyeku buje, ikẽrẽat kug̃ g̃u epesop Deus etabun. Eyisun ma epesop itabun. Kabaꞌũm cuy epesop ixe eju. 
\v 15 Wuykukukat ibun ma omuyku wararaꞌacat taxijo pin puye. Yukpiceg̃ẽ g̃u wuykug̃. G̃ebum cuy epesop iboap kay. Wuykitpit ikukpinat Paulo dak cuk imẽg̃aptup oꞌtupmubararak eywebeaptum Deus kuy ixe oꞌg̃utaybin puye. Imẽn ixe dak cuk adi eymutaybitbin osunuy. 
\v 16 Ixe juk adi wuykukukat jajẽm iaptup oꞌtupmubararak. Pũg̃pũg̃ ixe emudupmubararaktup peat ekawẽn cekawẽn paꞌarẽm. Ibaꞌore wuywebe wuyekũyjo am. Imẽnpuye warẽmtag̃ ma itaybitꞌũmayũ wuymutaybitbin ixe emudupmubararaktup peat ekawẽn- -itabutbũcayũ dak. Waraꞌatup peat ekawẽn warẽmtag̃ ma ip wuymutaybitbin Deus ekawẽntup peat ekawẽn. Imẽneju ixeyũ ma jemujuat ipiatꞌajojoap pe. Soat em ipiatꞌajojom jeedop ip jeꞌũ buje.
\p
\v 17 Oburereyũ, eyju bit eyetabutbũt g̃u. Eyetabut cĩcã ma. Yobog̃ cĩcã eyju eyetabucap kug̃. Kuy eyetaybit cedag̃ g̃u wuymutaybitbinꞌukayũ omuyku iam. Imẽnpuye eydayꞌemꞌum cuy epesop ixeyũ be eymubuꞌunap puxim kawẽn icẽmat kay. Deus aꞌõ kayꞌũm cĩcã ip. 
\v 18 Big̃ ma juy Jesus Cristo ekawẽn tag̃ epeku- -wuydaxijojoꞌukat ekawẽn tag̃. Big̃ ma juy cekawẽn tag̃ epeku big̃ ma ixe be xipan eykuk am. Big̃ ma juy eyetabun cekay.
\p — Soat podi ma ẽn edipap kug̃ — i juy ace wuydaxijojoꞌukat pe- -wuykukukat Jesus Cristo be.
\m Imẽn ma wuyju eꞌem cebe g̃asũ. Imẽn cuy acece soat em cebe.
\p Ibũrũ ma.