\id 1JN Mundurukú [myu] NT (Brazil) -2010 bd. 
\h 1 João
\toc1 João emudupmubararaktup- -koapatup
\toc2 Primeira Carta de João
\mt JOÃO EMUDUPMUBARARAKTUP KOAPATUP
\c 1
\p
\v 1 
Joãoyũ oceju. Cartadup mubarararag̃ oceju Jesus Cristo muwẽn ãm eywebe. Ixe ekawẽn kay wuyetabut pima, wuyag̃uyisum ajeku ijodi bima. Ixe xe wuyetait acesop wuyeꞌũ buje dak. Ixe itait osunuy ipi mujurũg̃ awap. Ixe ekawẽn cuk adi oceyaꞌĩjojo ijodi bima. Ocetam cuk adi ocejojojo ixe. Icẽmãn ixe ocejojojo ocetam. Ixe eju ma juk adi ocekukuku. 
\v 2 Oꞌjebapuk ocekay. Cebapuk puje, ocejojojo. Imẽneju ixe ma oceg̃uwẽn eywebe. Ixe kay itabucayũ yag̃uyisum jekukum g̃asũ. Deus xe itait jeedop ip jeꞌũ buje dak. Ixe wuymuisusun soat em Deus xe wuydop am wuyeꞌũ buje. Wuyebay xe osunuy kuyje. G̃asũ bit oꞌjebapuk ocekay. 
\v 3 Apẽn cuk adi ocejojojo iap muwẽnuwẽn oceju eywebe. Apẽn cuk adi oceyaꞌĩjojo iap tak imuwẽnuwẽn oceju eywebe. Iboap muwẽnuwẽn oceju eywebe dak ocebuxim Deus eju jeburerem am. Oceju Deus eju jeburerem. Ixe ipot eju dak oceju jeburerem ma- -Jesus Cristo eju. Iboap muwẽnuwẽn oceju eywebe dak ocebuxim ixeyũ eju jeburerem am. 
\v 4 Ijudup mubarararag̃ oceju eywebeaptum eymucokcok am. Wuycokcoksũ g̃u aceꞌe- -wuycokcok cĩcã ma. Darem g̃u dak wuycokcog̃ acesop- -soat em ma.
\p
\v 5 Deus kabia buxim eꞌem. Ikẽrẽat kug̃ g̃u ixe. Kaꞌũmg̃u kabiok Deus xe. Ikẽrẽat oꞌjukuk g̃u- -pũg̃ em tak kaꞌũma. Jesus Cristo juk adi iboap oꞌg̃uwẽnuwẽn ocewebe. Iboap ekawẽn muwẽnuwẽn ma oceju dak eywebe. 
\v 6 “Deus eju jeburerem oceju” i wuyju eꞌem pima ikẽrẽat mujurũg̃rũg̃ maꞌg̃u wuyju, napa ma wuyju eꞌem. Cũg̃ g̃u dak wuyju jekukum. 
\v 7 Deus pit ikẽrẽat mujurũg̃rũg̃ g̃u. Ixe kabia dag̃ jekukuꞌukat puxim. Cedag̃ ma jekukum. Ixe ekukuap puxim wuyju jekukum pima, jeburerem kuka ajeku wuyeweweju. Pũg̃ tag̃ ma kuka ajeku. Deus ikẽrẽat uk ũg̃ wuywebewi- -soat ukꞌug̃. Iꞌukꞌug̃ wuywebewi korosa be ipot oꞌjedoyekereren puye. Jesus Deus ipot. Ixe wuymuisusun soat tag̃.
\p
\v 8 “Ikẽrẽat kug̃ g̃u õn pit” iꞌeꞌem pima, jewemug̃uykukukum wuyju. Napa ma wuyju eꞌem:
\p — Ikẽrẽat kug̃ g̃u õn pit — i. 
\m
\v 9 Apẽn cuk adi ikẽrẽat ag̃ujurũg̃rũg̃iap cuy ag̃uwẽn Deus pe. Imuwẽn puje, ixe ikẽrẽat juꞌuk wuywebewi. Soat juꞌuk ikẽrẽat, ixe soat em apẽn cuk adi oꞌeꞌe iap tag̃ eꞌem puye. Cũg̃ ma ixe wuykug̃. Ixe wuymuisusun soat tag̃ wuywebe waram ikẽrẽat kukap puxim.
\p
\v 10 — Soat ipi juacat ikẽrẽat mujurũg̃rũg̃ — iꞌeꞌem Deus.
\m Wuyju eꞌem pima:
\p — Õn pit ikẽrẽat mujurũg̃rũg̃ g̃u — i; — Deus napa ma eꞌem — i dak wuyju eꞌem.
\m Imẽn eꞌem pima, wuybinũnpe g̃u Deus ekawẽn õmõm.
\b
\c 2
\p
\v 1 Bekitkit, cartadup mubarararag̃ õn eywebeaptum eywebe ikẽrẽat mujurũg̃rũg̃ap puxim. Wuywebe ikẽrẽat mujurũg̃ puje bit, wuywebeam Jesus Cristo kawẽnwẽn wuyebayat eju. Ixe Jesus Cristo soat podi ma cũg̃ ma. 
\v 2 Ixe ma oeꞌũ ikẽrẽat mug̃ẽg̃ẽap teida am. Imẽnpuye Deus ikẽrẽat ukꞌug̃ wuywebewi.
\p — Wuywebewi acã — iꞌũmg̃u õn pit eꞌem. — Soat pewi ipi juacayũ bewi ixe ikẽrẽat ukꞌug̃ — i õn eꞌem.
\p
\v 3 Deus ekawẽn kay kũyjobit pima dak, wuyetaybit ma wuyju Deus bureyũ iam. 
\v 4 Ixe ekawẽn kay kũyjobitꞌũmat pit napa ma eꞌem:
\p — Deus bure õn — i.
\m Icẽm g̃u eꞌem kũyjobitꞌũm puye. 
\v 5-6 Ixe ekawẽn kay kũyjobicayũ bit wararaꞌacat kayap podi ma Deus kay ip. Cekawẽn kay kũyjobin pima, wuyetaybit acesop Deus eju mũg̃ꞌi wuyju jekukum iam. “Deus eju mũg̃ꞌi oceju jekukum” i wuyju eꞌem pima, Jesus Cristo ekukuap puxim cuy ajeku. Ixe ekukuap puxim jekukum pima, wuyetaybit acesop Deus eju mũg̃ꞌi wuyju jekukum iam.
\p
\v 7 Oburereyũ ikukpinayũ, apẽn cuk adi ocece eywebe iaptup mubarararag̃ õn eywebeaptum. Iboap ekawẽn kawẽn iisuat g̃u. Kuy bima juk adi iboap ekawẽn epeyaꞌĩjojo- -xipan cuy epeyewekuk iap ekawẽn. 
\v 8 Iboap ekawẽn kawẽn iisuat puxim oꞌe Jesus ekukuap co buje. Ixe ekukuap kay g̃ebum pima, wuyetaybit aceꞌe iboap ekawẽn. Iboap ekawẽn icẽmãn. Jesus Cristo iboap ekawẽn tag̃ oekukuku- -xipan soat kug̃ ijodiacat kug̃. Jesus kabia buxim. Ixe ekawẽn tag̃ jekukuꞌukayũ kabia dag̃ jekukuꞌukayũ buxim. Ixe ajẽm puje, kabiokat kapkam iap puxim, ixe ekawẽn tag̃ jekukuꞌukayũ ade buye.
\p
\v 9 Jekitpit kay itakomaat napa ma eꞌem: — Deus ekawẽn tag̃ õn jekukum — i, ikẽrẽat mujurũg̃rũg̃ꞌuk puye. Kabiok tag̃ jekukuꞌukat puxim ixe. 
\v 10 Wuyxe wuykitpit ikukpin pima, Deus ekawẽn tag̃ wuyju jekukum. Soat ekawẽn tag̃ jekukuꞌukat kabia dag̃ jekukuꞌukat puxim. Imẽnpuye ikẽrẽat mujurũg̃rũg̃an g̃u wararaꞌacat pe. 
\v 11 Jekitpit kay itakomaat pit kabiok tag̃ jekukuꞌukat puxim. Kabiok tag̃ jekukuꞌukat itaybit g̃u poma oju iam. Imẽnpuxim jekitpit kay itakomaat warẽmtag̃ jekukum Deus kay kũyjobitꞌũm puye.
\p
\v 12 Bekitkiyũ, eyjuꞌin g̃axĩn ma juk eyetabut Jesus kay. Ijudup mubarararag̃ õn eywebeaptum g̃asũ eywebewi Deus ikẽrẽat oꞌjuꞌuk puye. Oꞌjuꞌuk Jesus Cristo oeꞌũ buye. 
\v 13 Baybayũ, eyjuꞌin cuk kuyje ma eyetabut Jesus kay. Ijudup mubarararag̃ õn eywebeaptum eyju Jesus Cristo bureyũ buye. Ixe Jesus Cristo ipi mujurũg̃ꞌisum itabẽg̃ osunuy. Tapupuyũ, eyjuꞌin g̃asũ ma eyetabut Jesus kay. Ijudup mubarararag̃ õn eywebeaptum kuy juk ikẽrẽat mujurũg̃rũg̃ꞌukayũ kukukat aꞌõbacaap epeg̃uꞌũm puye- -soat podi ma ikẽrẽat kukukat aꞌõbacaap epeg̃uꞌũm.
\p
\v 14 Wararaꞌacayũ eyꞌin kuy ma eyetabun. Ijudup mubarararag̃ õn eywebeaptum eyju Jesus Cristo bureyũ buye. Ipi mujurũg̃ awap ixe itabẽg̃ osunuy. Wararaꞌacayũ eyꞌin kapusukuruy eyetabun. Ijudup mubarararag̃ õn eywebeaptum eyaꞌõbaca buye. Soat em eyju g̃ebum Deus ekawẽn kay. Soat podi ma ikẽrẽat kukukat aꞌõbacaap epeg̃uꞌũm- -ikẽrẽat mujurũg̃rũg̃ꞌukayũ kukukat aꞌõbacaap epeg̃uꞌũm.
\p
\v 15-16 Deus kay itakomaayũ ibikuy jĩjã ikẽrẽat mujurũg̃ ãm. Jeakag̃ cĩcã ip ikẽrẽat kay. Imẽnpuye itabikuku jĩjã ip ikẽrẽat kay. Yobog̃an pin ip adeayũ xe. Imẽn jekukum pima wuyebayat bikuyap tag̃ g̃u epeku- -itabutꞌũmat ekukuaptag̃ acã. Imẽneju eyetabikukum g̃u juy epesop Deus kayꞌũmayũ emumutabikukunap kay. Ixeyũ ekukuap puxim g̃u juy epeku. Ixeyũ ekukuap puxim eyeku pin pima, wuyebayat ikukpin g̃u eyxe. 
\v 17 Itabutꞌũmayũ eꞌeap iꞌũm. Iteyũ emumutabikukunap tak iꞌũm. Deus bikuyap tag̃ jekukuꞌukayũ bit iꞌũm g̃u. Soat em itabẽg̃ jeedop ip Deus xe.
\p
\v 18 Bekitkit, g̃axĩn ma soat iꞌũm. Cristo kay itakoma jĩjãat omuyku iap awẽg̃ kuy epeyawẽg̃coco. Cristo kayꞌũmayũ kuy oꞌjebapuk ijodi- -ade. Imẽnpuye wuyetaybit g̃axĩn ma ipi iꞌũm iam. Cristo soat kukukan iap kabia omuyku. 
\v 19 Ixeyũ Cristo kayꞌũmayũ oꞌjẽm wuyxewi. Wuykadiayũ g̃u ip osodop- -wuykadiꞌũmayũ ma. Imẽnpuye oꞌjẽm ip wuyxewi. Wuykadiayũ bima kuka adi oibuꞌun g̃u ip wuyxe. Ibuꞌunꞌũm pima wuyxe ma kuka adi ip osodop. Imẽnpit oꞌjẽm ip wuyxewi. Imẽnpuye wuyetaybit wuykadi g̃u teyũku iam.
\p
\v 20 Deus Ibiõg̃buk xipacat cuk oꞌg̃uõm eywebe Cristo kay eyetabucap tomuju. Imẽnpuye soat eyju eyetaybit kawẽn icẽmãn. 
\v 21 Kawẽn icẽmãn itaybitꞌũmayũ g̃u eyju. Ijudup mubarararag̃ õn eywebeaptum eyetaybit puye kawẽn icẽmãn. Napa eꞌeꞌukat pi bewi g̃u kawẽn icẽmãn cẽmcẽm. Eyetaybit iboam.
\p
\v 22 Abuyũ dapxiyũ iap og̃uwẽn eywebe. “Jesus Deus emunaẽ g̃u” iꞌeꞌeꞌukayũ dapxiyũ. “Deus Jesus ebay g̃u” iꞌeꞌeꞌukayũ dapxiyũ, “Jesus Deus ipot g̃u” iꞌeꞌeꞌukayũ dak. Ixeyũ Cristo kay itakoma jĩjãayũ. 
\v 23 Adeayũ etabutpe “Wetabut g̃u Jesus Deus ipot iap kay” iꞌeꞌeꞌukayũ Deus bureyũ g̃u. Adeayũ etabutpe “Wetabut Jesus Deus ipot iap kay” iꞌeꞌeꞌukayũ bit Deus burem eꞌem.
\p
\v 24 Kawẽn idipat cuk epeyaꞌĩjojo eyetabutꞌisum. Iboap ekawẽn tag̃ cuy epeku. Iboap ekawẽn tãg jekukum pima, Cristo eju mũg̃ꞌi epekuku soat em- -cebay bikuyap tag̃ tak.
\p
\v 25 — Eyag̃uyisum eyju jekukum ijodi bima — i juk adi oꞌe Cristo wuywebe. — Soat em Deus xe eyetait epesop eyeꞌũ buje dak — i juk adi oꞌe Cristo wuywebe.
\p
\v 26 Itabutꞌũmayũ ma eymug̃uykukuku ojuy jekukum. Imẽnpuye ijudup mubarararag̃ õn eymukũyjoaptum. 
\v 27 Eyju bit Deus biõg̃buk kukayũ Cristo Deus biõg̃buk oꞌg̃uõm eywebe buye. Ixe biõg̃buk nuynuy eywebe. Imẽnpuye:
\p — Ocemutaybitbinꞌukat cuy eg̃udot ocekay — iꞌũmg̃u juy epeꞌeꞌe.
\m Eywebe dopdopꞌukat acã eymutaybitbin soan. Napa g̃u xeku eymutaybitbin- -icẽmãn. 
\p — Deus biõg̃buk pe eymutaybitbinap tag̃ cuy epekuku — i õn eꞌem eywebe. 
\m Cristo eju mũg̃ꞌi dak cuy epekuku.
\p
\v 28 Bekitkit, soat em cuy Cristo eju mũg̃ꞌi epekuku. Ixe waram jeꞌbapuk ijodi. Ixe eju mũg̃ꞌi jekukum pima, wuyaꞌõcam acesop ixe ajẽm puje. Wuysũsũn g̃u acesop ixe ajẽm puje. Acejemunẽm g̃u cebuxim. 
\v 29 Eyetaybit Deus cũg̃ ma iam. Imẽnpuye eyetaybit cũg̃ ma jekukuꞌukayũ ixe ebekitkiyũ iam.
\b
\c 3
\p
\v 1 G̃ebum cuy epesop wuyebayat xe wuykukpin cĩcã iap kay. Deus eꞌem wuywebe:
\p — Webekitkit eyju — i.
\m Icẽmãn Deus ebekitkit wuyju. Deus kayꞌũmayũ bit itaybit g̃u Deus ebekitkit wuyju iam, Jesus Deus ipot iam itaybitꞌũm ip puye. 
\v 2 Oburereyũ ikukpinayũ, g̃asũ wuyju Deus ebekitkit. Wuyetaybit g̃ũg̃ũn ma apẽn g̃uyjom acesop iam. Waram Cristo ebapuk puje bit, ixe joꞌiayũm acesop. Wuyetaybit aceꞌe apẽn ixe omuyku iam, ixe ajojojo buye. Ixe joꞌiayũm acesop ixe ajojojo buye. 
\v 3 Cristo joꞌi acesop iap wiwim cĩcã wuyju. Cristo ikẽrẽat kug̃ g̃u. Ikẽrẽat oꞌjukuk g̃u- -pũg̃ em tak kaꞌũma. Soat tag̃ iisu. Imẽnpuye wuyju dak wuybuꞌu ikẽrẽat mujurũg̃ ãm. Wuyag̃uyisum cuy ajeku.
\p
\v 4 Ikẽrẽat mujurũg̃rũg̃ꞌukat kũyjobit g̃u Deus aꞌõ kay. Ikẽrẽat mujurũg̃rũg̃ap Deus aꞌõ kay kũyjobitꞌũmap coꞌi. 
\v 5 Cristo oꞌjebapuk wuykay ikẽrẽat uk am soat pewi ijodiacat pewi. Eyetaybit iboam. Ixe bit ikẽrẽat kug̃ g̃u. Kaꞌũmg̃u ikẽrẽat cebe. 
\v 6 Cristo eju mũg̃ꞌi jekukuꞌukat ibun g̃u jekukum ikẽrẽat mujurũg̃rũg̃. Ikẽrẽat mujurũg̃rũg̃ꞌukat pit itabut g̃u oꞌe Cristo kay. Ibuꞌu jĩjã mabuk Cristo aꞌõ dag̃ jeku am.
\p
\v 7 Bekitkit, eydayꞌemꞌum cuy epesop itabutꞌũmayũ be eymug̃uykukuap puxim. Cũg̃ ma jekukuꞌukayũ ma cũg̃ ma Deus xe Cristo buxim. 
\v 8 Ikẽrẽat mujurũg̃rũg̃ꞌukayũ bit Satanás ebekitkit- -ibiõg̃buk kẽrẽayũ kukukat ebekitkit. Ixe Satanás ikẽrẽat mujurũg̃rũg̃ꞌuk osunuy ipi mujurũg̃ꞌisum. Deus ipot osodot ijodi ixe eꞌeap muꞌũm ãm.
\p
\v 9 Deus ebekitkit ibun g̃u jekukum ikẽrẽat mujurũg̃rũg̃, Deus biõg̃buk nuynuy cebe ip puye. Ibaꞌore cebe ip ibun ikẽrẽat kuk am Deus ixeyũ ebay buye. 
\v 10 Ibapuk cĩcã wuyxe abuyũ Deus ebekitkit iap, abuyũ Satanás ebekitkit iap tak. Cũg̃ g̃u jekukuꞌukayũ Deus ebekitkit g̃u. Wararaꞌacat kay itakomaayũ dak Deus ebekitkit g̃u ip.
\p
\v 11 — Xipan cuy epeyewekuk — i õn eꞌem eywebe. 
\m Jesus Cristo kay eyetabutꞌisum cuk iboap ekawẽn epeyaꞌĩjojo. 
\v 12 Caim ekukuap puxim g̃u juy ajeku. Ixe Caim ikẽrẽat mujurũg̃rũg̃ꞌukayũ kukukat ebekit osunuy- -Satanás ebekit. Ixe jekitpitꞌũm oꞌyaoka. Caim ma cekawẽnkẽrẽ osunuy. Ikitpit pit cekawẽntip osunuy. Imẽnpuye Caim itabutkarey oꞌe jekitpit kay. Imẽnpuye oꞌyaoka.
\p
\v 13 Okitpitpiyũ, itabutꞌũmayũ itakoma eykay bima, “Pẽnpuye xeꞌe itakoma ip wuykay?” iꞌũmg̃u juy epeꞌe eyewewebe. 
\v 14 Ipiatꞌajojoap kay cumayũ ekukuap puxim g̃u wuyju jekukum. Wuyag̃uyisum ma wuyju jekukum. Wuyxe wararaꞌacat ikukpin- -itabucat. Imẽnpuye wuyetaybit aceju g̃u ipiatꞌajojoap kay iam. Ikẽrẽm wararaꞌacat kukukꞌukat pit yag̃uyisum g̃u jekukum. Imẽnpuye ixe jeꞌju ipiatꞌajojoap kay. 
\v 15 Jekitpit kay itakomaat ikẽrẽat kug̃ Deus xe waraꞌacat oꞌyaokaiat coꞌi. Ikẽrẽat mujurũg̃ap epereꞌũm pima, wararaꞌacat oꞌyaokaiat yag̃uyisum g̃u jekukum ijodi. Eyetaybit iboam. Deus xe g̃u jeenuy jeꞌũ buje dak. 
\v 16 Cristo oeꞌũ wuyeꞌũap puxim. Imẽnpuye wuyetaybit Cristo xe wuykukpin cĩcã iam. Wuyju dak wuybuꞌun g̃u juy ajop wuyeꞌũ ãm wararaꞌacat eꞌũap puxim- -itabucat eꞌũap puxim ixeyũ ikukpin wuyxe buye. 
\v 17 Wuyju dak wuyetabotaidabotbon cuy ajop ibubutꞌũmayũ kay- -itabucayũ kay- -wuykitpitpiyũ kay. Wuybubut ade bima, iꞌin cuy ag̃ũm ixeyũ be. Iũm ãm wuybuꞌu bima bit, teꞌe ma wuyju eꞌem “Deus ikukpin ocexe” i. 
\v 18 Bekitkit, wararaꞌacat puywanꞌũm pima, teꞌe ma kuka ace cebe ip “Eykukpin oxe” i. Icẽmãn wararaꞌacat ikukpin wuyxe bima, xipan cuy ixeyũ ajukuk, wuybubutꞌin tak cuy ag̃ũm cebe ip.
\p
\v 19 Xipan wararaꞌacat kug̃ pima, wuyetaybit kawẽn icẽmat tag̃ wuyju jekukum iam. Imẽnpuye:
\p — Kawẽn icẽmat tag̃ paxi juk adi ocekuku? — iꞌũmg̃u aceꞌe Deus pe cetabutpe bima.
\m Imẽnpuye wuypararam g̃u ajop ixe etabixe bima. 
\v 20 Ikẽrẽat mujurũg̃ puje dak, “Oceju ikẽrẽat kug̃ Deus xe” i wuyju eꞌem wuywebe ma. Deus pit wuyetaybicap podi ma itaybit. Ixe itaybit teyũku ibuꞌu oꞌe ip ikẽrẽat mujurũg̃ ãm iam. Imẽnpuye:
\p — Oceju ikẽrẽat kug̃ Deus xe,” iꞌũmg̃u juy ace. Wuypararam g̃u juy ajop Deus etabutpe. 
\v 21 Oburereyũ ikukpinayũ, ikẽrẽat kug̃ paxi wuyju iap kay wuyag̃uykorererenꞌũm pima, wuyaꞌõcam cuy ajop Deus etabixe. 
\v 22 Ixe xewi wuyemukaypinput acejat. Ixe ekawẽn kay kũyjobit pima, kuka wuyemuojuyjuy acejat cexewi ixe bikuyap tag̃ jekukum pima dak.
\p
\v 23 — Eyetabun cuy epesop okpot kay- -Jesus Cristo kay — iꞌeꞌem Deus wuywebe. — Ikukpin cuy epeyewekuk — i dak.
Imẽn Deus eꞌem wuywebe. Imẽn Cristo dak cuk adi oꞌe wuywebe. 
\v 24 Deus ekawẽn kay kũyjobicat Deus eju mũg̃ꞌi jekukum. Deus tak jekukum mũg̃ꞌi ceweju ip- -jebekitkiyũ eju. Ixe jebiõg̃buk oꞌg̃uõm wuywebe. Wuyetaybit Deus soat em jekukum mũg̃ꞌi wuyweju iam ibiõg̃buk nuynuy wuywebe buye.
\b
\c 4
\p
\v 1 Oburereyũ ikukpinayũ, wuymug̃uykukukuꞌukayũ omuy soat kaka dag̃- -ade. Imẽnpuye soat ekawẽn kay bit eyetabun g̃u juy epesop- -“Deus biõg̃buk omuy ocewebe” iꞌeꞌeꞌukayũ ekawẽn kay. Koap eyaꞌõpicũg̃cũg̃ cĩcã juy epesop ixeyũ ekawẽn kay.
\p — Deus ekawẽn tag̃ paxi ite wuymutaybitbin- -cekawẽn tag̃ g̃u xeꞌe? — i juy epeꞌe eyewewebe.
\p — Deus biõg̃buk omuy ocewebe — iꞌeꞌem ip napa ma.
\m
\v 2 Eyetaybit put abuyũ ixeyũꞌin Deus aꞌõbi wuymutaybitbin iam, abuyũ ixeyũꞌin jekpiwatpi wuymutaybitbin iam tak. “Jesus Deus emunaẽ” iꞌeꞌeꞌukayũ Deus aꞌõbi wuymutaybitbitꞌukayũ, “Jesus ijodian oꞌe” iꞌeꞌeꞌukayũ dak. Deus biõg̃buk omuy ixeyũ be. 
\v 3 “Jesus ijodian g̃u oꞌe” iꞌeꞌeꞌukayũ bit Deus aꞌõbi g̃u wuymutaybitbin- -jaꞌõbi acã. Deus biõg̃buk nuynuy g̃u cebe ip. Cristo kay itakoma jĩjãat aꞌõbi ixeyũ wuymutaybitbin. “G̃axĩn ma Cristo kayꞌũm cĩcãat omuyku” iap awẽg̃ kuy juk epeyawẽg̃coco. Kuy ijodi ma omuy.
\p
\v 4 Bekitkit, Deus ebekitkiyũ eyju bit. Cristo kayꞌũm cĩcãat itabutꞌũmayũ kukat. Ixe yaꞌõbaca. Deus biõg̃buk pit ixe bodi ma yaꞌõbaca- -eywebeat. Imẽneju jewexe Deus ekawẽn muwẽnuwẽnꞌukayũ aꞌõbacaap kuy epeg̃uꞌũm. 
\v 5 Apẽn itabutꞌũmayũ eꞌe am ma ip kawẽnwẽn soat em jewexe Deus ekawẽn muwẽnuwẽnꞌukayũ. Itabutꞌũmayũ ixeyũ ekawẽn kay jĩjã, itabutꞌũmayũ kukukat kadi ip puye. 
\v 6 Wuyju bit Deus kadiayũ. Deus bureyũ wuyekawẽn cocoꞌuk. Deus bureꞌũmayũ bit wuyekawẽn cocoꞌuk g̃u. Imẽneju wuyetaybit abuyũ Deus biõg̃buk aꞌõbi icẽmãn wuymutaybitbin iam, abuyũ cedag̃ g̃u wuymutaybitbin iam tak.
\p
\v 7 Oburereyũ ikukpinayũ, Deus ibikuy wuywebe xipan jewekuk am. Imẽnpuye xipan cuy acewekuk. Xipan wararaꞌacat kukukꞌukayũ Deus ebekitkit. Deus bureyũ ixeyũ. 
\v 8 Deus xe soat ijodiat ikukpin. Jekpiwatpi ma wuykay. Imẽnpuye ikukpin wararaꞌacat kug̃ꞌũm pima Deus burem g̃u kuka ace. 
\v 9 Wuykay jekpot mudot puje, Deus jexe wuykukpinap oꞌg̃ubapuk wuywebe. Pũg̃ ma Deus ipot. Oꞌg̃udot ijodi wuykay soat em wuyetait wuydop am cexe wuyeꞌũ buje. Imẽneju wuyetaybit wuykukpin cĩcã Deus xe iam. 
\v 10 Wuyxe Deus ikukpin g̃u osunuy kuyje. Ixe xe bit wuykukpin cĩcã ajop. Imẽnpuye jekpot oꞌg̃udot wuykay. Oꞌg̃udot ikẽrẽat uk am wuywebewi. Deus ikẽrẽat ukꞌug̃ wuywebewi ipot oeꞌũ buye. Oeꞌũ ikẽrẽat mug̃ẽg̃ẽap teida am.
\p
\v 11 Oburereyũ ikukpinayũ, Deus xe wuykukpin cĩcã ajop. Imẽnpuye wuyju dak xipan cuy acewekuk. 
\v 12 Wuywebe Deus ijo baꞌore. Xipan jewekug̃ pima, Deus wuyweju mũg̃ꞌi jekukum. Deus wuyweju mũg̃ꞌi jekukum pima, xipan wararaꞌacat ajukuk apẽn Deus xipan wuykug̃ iap puxim. 
\v 13 Deus cuk jebiõg̃buk oꞌg̃uõm wuywebe. Imẽnpuye wuyetaybit Deus eju mũg̃ꞌi wuyju jekukum iam, ixe wuyweju mũg̃ꞌi jekukum iam tak. 
\v 14 Deus ipot eꞌeap cuk adi ocejojojo. Imẽnpuye:
\p Deus jekpot oꞌg̃udot wuydaxijo am- -soat taxijo am ipi watwat taxijo am — i oceju eꞌem soat pe. 
\m
\v 15 Wuybisũnꞌũm pima “Jesus Deus ipot” iꞌe am wararaꞌacayũ be, soat em Deus jekukum wuyweju; wuyju dak soat em jekukum ceweju- -Deus eju. 
\v 16 Deus jekpot oꞌg̃udot wuydaxijo am. Imẽnpuye wuyetaybit Deus xe wuykukpin cĩcã iam. Wuyetabut tak Deus xe wuykukpin cĩcã iap kay.
\p Soat ipi watwat ikukpin Deus xe. Xipan wararaꞌacat kug̃at Deus eju mũg̃ꞌi jekukum. Deus tak jekukum mũg̃ꞌi ceweju. 
\v 17 Deus eju mũg̃ꞌi jekukum pima ixe buxim wuyju dak xipan wararaꞌacat ajukuk. Deus ipiat supiꞌajoat kũyjobitꞌũmayũ be ikẽrẽat muju rũg̃rũg̃ꞌukayũ be. Ipiatꞌajoan pima wuypararam g̃u acesop ixe etabixe. Wuyaꞌõcam acesop cetabixe. Ijodi bima Cristo ekukuap puxim wuyju dak jekukum puye, wuyaꞌõcam acesop cetabixe. 
\v 18 Wuyxe wararaꞌacat ikukpin pima, wuypararam g̃u kuka ace Deus etabixe. Deus buxim ikukpin wararaꞌacat kug̃ pima bit, wuypararaap ajukuk g̃u wuyweju. Wuyparara bima bit:
\p — Ipiat supiꞌajoat xeꞌe Deus wuywebe? — i kuka ace wuywebe ma.
\m Wuyparara bima, ibaꞌore wuywebe Deus puxim wararaꞌacat kuk am ikukpin.
\p
\v 19 Kuyje Deus xe wuykukpin cĩcã ajop. Imẽnpuye wuyju dak g̃asũ wuyxe Deus ikukpin cĩcã, wararaꞌacayũ dak ikukpin wuyxe. 
\v 20 Wararaꞌacat kay itabucat kay wuyetakoma bima, napa ma wuyju eꞌem:
\p — Deus ikukpin oxe — i.
\m Kaꞌũma ma Deus oꞌjojojo buk. Deus ma ijojom g̃u wuyju. Wuyxeacat pit ijojom soat em. Wuyxe wuyemumujojoyũ ikukpinꞌũm pima, ibaꞌore wuywebe ikukpin wuyemumujojoꞌũm kuk am.
\p
\v 21 — Deus ikukpin eyxe bima, xipan cuy eykitpitpiyũ dak epejukuk — i juk adi oꞌeꞌe Cristo wuywebe.
\b
\c 5
\p
\v 1 Jesus Deus emunaẽ iap kay itabucayũ Deus ebekitkiyũ. Wuyxe bekitkiyũ ebay ikukpin pima, ixe ebekitkiyũ dak ikukpin ma wuyxe. 
\v 2 Wuyxe Deus ikukpin pima, ixe ekawẽn tag̃ jekukum pima dak, wuyetaybit acesop wuyxe Deus ebekitkiyũ ikukpin iam. 
\v 3-4 Soat pe Deus ebekitkit pe Deus kayꞌũmayũ aꞌõbacaap muꞌũm put. Wuyju itabutꞌũmayũ aꞌõbacaap muꞌũmuꞌũm Jesus kay wuyetabut puye. Ibaꞌore g̃u wuywebe kũyjobit am yaꞌõ kay, ixe aꞌõbacaap kug̃ puye. Deus wuyxe ikukpin pima, cekawẽn tag̃ ajeku. Deus ikukpin wuyxe bima, “Ocebuꞌu ixe ekawẽn kay kũyjobit am,” iꞌũmg̃u kuka ace. 
\v 5 Abu be Deus kayꞌũmayũ aꞌõbacaap muꞌũm put? Jesus Deus ipot iap kay itabucayũ be acã.
\p
\v 6 Jesus Deus emunaẽ ma. Ixe Jesus oajẽm Deus bikuyap tag̃ jeku am. Imẽnpuye soat em kũyjobit osunuy Deus aꞌõ kay. Imẽnpuye idibi be oꞌjewemubatisanat. Oeꞌũ korosa be. Oꞌjedoyekereren korosa be soat em wuydop am Deus xe. Soat em ma Deus emunaẽ osunuy. Jeꞌũ buje dak Deus emunaẽ osunuy. G̃asũ dak Deus emunaẽ. 
\v 7-8 Ixe Jesus oajẽm wuymutaybit am “Õn Deus ipot” iam. Wuyetaybit ixe Deus ipot iam apẽn ixe idibi be oꞌjewemubatisanat iap kay g̃ebum pima, apẽn ixe oꞌjedoyekerereren iap kay dak. Cewemubatisanap acã g̃u wuymutaybitbin icẽmãn Jesus Deus ipot iam. Cedoyekerererenap tak iboam wuymutaybitbin. Deus biõg̃buk tak wuymutaybitbin Jesus Deus ipot iam. Ixe biõg̃buk icẽmãn eꞌem wuywebe. 
\v 9 Ijodiacat Jesus Deus ipot iap muwẽnuwẽn wuywebe. Wuyetabut ixeyũ ekawẽn kay. Deus tak Jesus okpot iap oꞌg̃uwẽnuwẽn wuywebe. Ijodiacayũ eꞌeap podi ma icẽmãn Deus eꞌem. Imẽnpuye wuyetabun cuy ajop ixe ekawẽn kay. 
\v 10 Deus oꞌe:
\p — Jesus okpot icẽmat — i. 
\m Ixe ipot kay itabucat eꞌem jewebe ma:
\p — Cũg̃ ma oꞌe owebe wetabut am Deus ipot kay — i.
\m Deus kay itabutꞌũmat pit napa ma eꞌem: — Deus dapxi — i. Tũibe Deus dapxi iãn eꞌem itabutꞌũmat, Deus eꞌeap kay itabutꞌũm puye- -“Jesus okpot” iꞌeꞌeap kay itabutꞌũm puye.
\p
\v 11 — Eyag̃uyisum epeku ijodi bima okpot oeꞌũ eywebeam puye — iꞌeꞌem Deus soat pe wuywebe. — Soat em eyetait epesop oxe eyeꞌũ buje dak — iꞌeꞌem wuywebe.
\m
\v 12 Ipot kay itabucayũ ma yag̃uyisum jekukum ijodi. Soat em Deus xe itait jeedop ip jeꞌũ buje dak. Itabutꞌũmayũ bit yag̃uyisum g̃u jekukum ijodi. Soat em Deus wi wũy ma jeedop ip ceꞌũ buje dak.
\p
\v 13 Eyetabut Deus ipot kay. Imẽnpuye eyag̃uyisum eyju jekukum ijodi bima. Eyeꞌũ buje dak soat em eyetait epesop Deus xe. Ijudup mubarararag̃ õn iboam eymutaybit am. 
\v 14 Deus eju wuyju kawẽnwẽn. Ixe bikuyap tag̃ cexewi iojuyjuy bima, ixe wuyekawẽn cocom. Wuyetaybit iboam. Imẽnpuye wuyparara g̃u kawẽn ãm ceweju. Ijudup mubarararag̃ õn eymutaybit am iboam. 
\v 15 Wuyetaybit ixe soat em wuyekawẽn cocom iam. Wuyekawẽn cocom cexewi wuyju iojuyjuy bima. Imẽnpuye wuyetaybit ixe xewi wuyemukaypin ajat iam.
\p
\v 16-17 Wuykitpit pe ikẽrẽat mujurũg̃ puje, acekawẽn cuy Deus eju ixe beam. Deus iboap juꞌuk cebewi ikẽrẽat. Ixe soat em itait jeenuy Deus xe ceꞌũ buje. Cũg̃ g̃u wuyju jekukum pima ikẽrẽat mujurũg̃rũg̃ wuyju Deus xe. Pũg̃ pit ikẽrẽat jĩjã Deus xe ikẽrẽat mujurũg̃rũg̃ap. Waraꞌat podi ma ikẽrẽ cexe. Wuybure iboap mug̃ẽg̃ẽm pima, ikẽrẽat mug̃ẽg̃ẽm pima, “Epeyekawẽn cuy Deus eju ixe beam,” iꞌũmg̃u õn eꞌem eywebe. Iboap mug̃ẽg̃ẽxiat soat em ipiatpiꞌajojom jeenuy. Deus wi wũy ma jeenuy ceꞌũ buje dak.
\p
\v 18 Deus ebekitkiyũ ibun g̃u ikẽrẽat mujurũg̃rũg̃ Deus ipot ag̃ ip cekay buye. Ikẽrẽat mujurũg̃rũg̃ꞌukayũ kukukat pe Deus ebekitkit kuk paꞌore, Deus ipot ag̃ ip cekay buye.
\p
\v 19 Wuyetaybit Deus aꞌõ kay wuyju iam. Wararaꞌacayũ bit ikẽrẽat mujurũg̃rũg̃ꞌukayũ kukukat aꞌõ kay acã- -itabutꞌũmayũ.
\p
\v 20 Wuyju acã wuyetaybit Deus ipot kuy oajẽm ijodi iam. Ixe juk adi wuymutaybitbin oeku apẽn Deus omuyku iam. Imẽnpuye wuyetaybit apẽn Deus omuyku iam. Ixe acã Deusat. Soat em Deus eju mũg̃ꞌi wuyju jekukum- -cũg̃at eju. Ixe ipot eju dak mũg̃ꞌi wuyju jekukum- -Jesus Cristo eju. Ixe acã Deusat. Ixe eju mũg̃ꞌi jekukuꞌukayũ yag̃uyisum jekukum ijodi. Soat em itait jeedop ip Deus xe ceꞌũ buje dak.
\p
\v 21 Bekitkiyũ, eyetabun g̃u juy epesop Deus pabi kug̃ ojuyacat kay!
\p Ibũrũ ma.