\id 2JN Mundurukú [myu] NT (Brazil) -2010 bd. 
\h 2 João
\toc1 João emudupmubararaktup- -ipidaseatup
\toc2 Segunda Carta de João
\mt JOÃO EMUDUPMUBARARAKTUP IPIDASEATUP
\c 1
\p
\v 1 Tũũ, ijudup mubarararag̃ õn ewebeaptum, eꞌĩyũ beaptum tak. Jesus kay itabucayũ kukukat õn. Eykukpin oxe. Wararaꞌacayũ xe dak eykukpin- -soat xe. 
\v 2 Eykukpin ocexe, wuyju kawẽn icẽmat kay buye. Soat em wuyju g̃ebum iboap ekawẽn kay. Wuyag̃uybaꞌũm g̃u iboap ekawẽn kay. Soat em iboap ekawẽn tag̃ ajeku.
\p
\v 3 — Bay, xipan cuy wuykuk — i õn eꞌem Deus pe- -wuyebay be, Jesus Cristo be dak- -Deus ipot pe. — Etabotaidabotbon cuy eg̃uy wuykay — i õn eꞌem cebe. — Wuyag̃uymubabibin cuy eg̃uy — i õn eꞌem cebe.
\m Wuyju kawẽn icẽmat tag̃ jekukum pima, imẽn ip wuykug̃, xipan wararaꞌacat kug̃ pima dak.
\p
\v 4 Eꞌiyũ ekukuap awẽg̃ oyawẽg̃tobuxik. Pũg̃ g̃u ixeyũꞌin kawẽn icẽmat tag̃ jekukum- -wuyebay be wuyawẽwẽap ekawẽn tag̃. Ocokcok cĩcã oce ixeyũ awẽg̃tobuxik puje. 
\p
\v 5 — Tũꞌũ ikukpinat, xipan cuy epeyewekuk — i õn eꞌem ewebe.
\m Iboap ekawẽn kawẽn iisuat g̃u- -kawẽn kuyat. Kuy bima xipan cuy epeyewekuk iap ekawẽn ayaꞌĩjojo- -Jesus kay wuyetabunꞌisum. 
\v 6 Xipan cuy epeyewekuk iap ekawẽn kuy epeyaꞌĩjojo Jesus Cristo kay eyetabunꞌisum. Xipan jewekug̃ pima Deus ekawẽn tag̃ tak kuka ajeku.
\p
\v 7 Wuymug̃uykukuꞌukayũ oꞌjepõg̃põg̃põg̃ soat kaka dag̃.
\p — Jesus Cristo ijodian g̃u oꞌe — iꞌeꞌem ip.
\m Imẽn eꞌeꞌukat wuymug̃uykukukuꞌukat. Cristo kay itakoma jĩjã ip. 
\v 8 Imẽneju eydayꞌemꞌum cuy epesop ixeyũ be eymug̃uykukuap puxim. Ixeyũ be eymug̃uykuku buje, eyekapikaptei epejat g̃u Deus xewi. Eymug̃uykukuꞌũm pima bit, Deus jeymucokcog̃ cĩcã eywebe eyekapikaptei ũm puje- -soatei ũm puje.
\p
\v 9 Cristo be wuymutaybitbinap kayꞌũmayũ ma Deus bikuyap tag̃ g̃u jekukum- -waraꞌat tag̃ acã. Deus bure g̃u ip. Itabut g̃u ip Deus kay. Cristo be wuymutaybitbinap tag̃ jekukuꞌukat pit pũg̃ tag̃ ma jekukum Deus eju. Deus tak pũg̃ tag̃ ma jekukum ixeyũ eju. Deus ixeyũ bure eꞌem. 
\v 10 Cristo ekawẽn imutaybitbinꞌũmat aꞌõ kay g̃u juy epesop. Ixeyũ juy epeg̃uõm g̃u eydukꞌa be, eykay yajẽm puje ip.
\p — Deus xipan cuy jeykuk — iꞌũmg̃u dak cuy epeꞌe cebe ip eyxewi ijẽm puje.
\m
\v 11 Wuydukꞌa be ixeyũ muõm puje, wuyju dak ixeyũ bureyũm kuka acesop ikẽrẽat mug̃ẽg̃ẽm.
\p
\v 12 Soat muwẽn pin puk õn eywebe. Imẽnpit obuꞌu oce soat muwẽn ãm eywebe taperadup pe. Cu ojuy bit aꞌg̃u õn eyka be eyjom kawẽn ãm eyweju. Kawẽnwẽn pima, wuycokcokap yobog̃ jeꞌe.
\p
\v 13 Ekibit iyũ kato mujujum eywebe. Ekibit tak Deus emunaẽ. Ijudup mubarararag̃ õn eywebeaptum.
\p Ibũrũ ma.