\id 3JN Mundurukú [myu] NT (Brazil) -2010 bd. 
\h 3 João
\toc1 João emudupmubararaktup- -kanomũmaptup
\toc2 Terceira Carta de João
\mt JOÃO EMUDUPMUBARARAKTUP KANOMŨMATUP
\c 1
\p
\v 1 Gaio, ijudup mubarararag̃ õn ewebeaptum. Jesus kay itabucayã kukukat õn. Ekukpin oxe icẽmat aꞌõ kay wuyetabut puye.
\p
\v 2 Obure ikukpinat, ewebeam õn kawẽnwẽn Deus eju.
\p — Bay, xipan cuy Gaio ejukuk iwãtaxipinap puxim — i õn eꞌem cebe.
\m Wetaybit etabut cĩcã Jesus kay iam, kuy juk awẽg̃ oyawẽg̃tobuxik puye. 
\v 3 Wuykitpitpiyũꞌin oajẽm okay- -exewiayũ. Awẽg̃ ip oꞌyawẽg̃muwẽn owebe.
\p — Gaio soat em kawẽn icẽmat tag̃ jekukum — i juk oꞌe ip owebe. — Cũg̃ ma ixe jekukum — i juk oꞌe ip owebe.
\m Ocokcok cĩcã oce awẽg̃tobuxik puje. 
\v 4 Ebekitkiyũ kawẽn icẽmat tag̃ jekukum iap awẽg̃ tobuxik puje, soat podi ma ocokcok oce.
\p
\v 5 Obure, ekukpin oxe. Ẽn xipan wuykitpitpiyũ kug̃ waraꞌat ka watwat maꞌg̃u ip. Cũg̃ ma ewebe xipan ixeyũ kuk am.
\p
\v 6 — Gaio juk adi xipan cĩcã ocekuk — i juk oꞌe ip itabucayũ- -exewi oajẽmiayũ.
\m Exewi waram ijẽm pin pima waraꞌatka kay iju am, ibuibibug̃ g̃u juy ip eg̃uju. Imẽn cũg̃ ma Deus xe, Deus peam kapikpig̃ ip puye. 
\v 7 Cẽmcẽm ip Cristo muwẽn ãm acã. Itabutꞌũmayũ g̃u iũmũm cebe ip ibubun- -itabucayũ acã. 
\v 8 Imẽneju ixeyũ buywan cuy ace- -wuyju ma, itabucayũ. Kawẽn icẽmat muwẽn ãm ip cum. Ibuywatwan pima, Deus xe wuyju dak kawẽn icẽmat muwẽnuwẽnat puxim cum g̃u maꞌg̃u wuyju ixeyũ eju.
\p
\v 9 Carta yopĩcat kuy otupmuju ekay exe itabucayũ beaptum. Diótrefes pit itabucayũ kukat ojuy oꞌe wararaꞌacayũ xe- -itabucayũ xe. Ixe Diótrefes kũyjobitꞌũm waꞌõ kay. 
\v 10 Imẽnpuye apẽn ixe Diótrefes cuk adi xipan g̃u wawẽg̃ oꞌg̃uwẽnuwẽn iap og̃uwẽn eywebe eykay wajẽm puje, apẽn ixe juk adi ocemuymuy iap tak og̃uwẽn eywebe. Omuymuy ã g̃u ixe bit. Wararaꞌacayũ kug̃ tak xipan g̃u. Wuykitpiyũ ajẽm puje, g̃uõm g̃u jedukã be. G̃uõmat g̃u dak ip Deus eju kawẽnwẽnapꞌa be. G̃ujẽmjẽm tak ip ya bewi.
\p
\v 11 Obure ikukpinat, xipatꞌũmat ekukuap puxim g̃u juy ejeku- -xipacat ekukuap puxim acã. Xipacat mujurũg̃rũg̃ꞌukayũ Deus ebekitkiyũ eꞌem. Ikẽrẽat mujurũg̃rũg̃ꞌukayũ bit cebekitkiyũ g̃u.
\p
\v 12 Soat wuyjuyũ eꞌem:
\p — Demétrio xipat cĩcã — i.
\p — Kawẽn icẽmat tag̃ ixe jekukum soat em — iꞌeꞌem ip.
\p — Ixe xipat cĩcã — i oceju dak eꞌem.
\m Eyetaybit icẽmãn oceju eꞌem iam.
\p
\v 13 Soat muwẽn pin puk õn eywebe. Imẽnpit obuꞌu soat muwẽn ãm taperadup pe. 
\v 14 G̃axĩn ma aꞌg̃u õn cu ojuy eyka be eyjom. Acejekawẽn cuy wuyeweweju.
\p
\v 15 — Gaio juy eyag̃uymubabin yag̃uybabiꞌũmap puxim — i õn eꞌem Deus pe.
\m Katoꞌi oꞌe ewebe ebureyũ. Katoꞌi juy ece wuybureyũ be- -iboceayũ be- -exeayũ be. Ijudup mubarararag̃ õn eywebeaptum.
\p Ibũrũ ma.