\id JUD Mundurukú [myu] NT (Brazil) -2010 bd. 
\h Judas
\toc1 Judas emudupmubararaktup
\toc2 Carta de Judas
\mt JUDAS EMUDUPMUBARARAKTUP CARTADUP
\c 1 
\p
\v 1 Õn Judas. Jesus Cristo buywatwatꞌukat õn. Tiago kitpit õn. Cartadup mubarararag̃ õn eywebeaptum. Deus cuk eynaẽ jebekitkiyũm. Ixe Deus wuyebayat. Ixe xe eykukpin cĩcã. Jesus Cristo dak soat em ag̃ eykay xipan eykuk am.
\p
\v 2 Kawẽnwẽn õn Deus eju eywebeam.
\p — Bay — i õn eꞌem cebe. — Etabotaidabotbon cuy eg̃uy ebekitkit kay — i õn eꞌem cebe. — Ixeyũ ag̃uymubabibin cuy eg̃uy — i õn eꞌem cebe. — Ikukpin cuy ixeyũ ejukuk — i õn eꞌem cebe.
\m Kuy aꞌg̃u ixe xipan eykug̃. Inaka kawẽnwẽn õn ceweju big̃ ma ixe be xipan eykuk am.
\p
\v 3-4 Oburereyũ ikukpinayũ, kuy juk cartadup mubararak ojuy og̃uy eywebeaptum- -Deus eydaxijojom apẽn cuk odaxijo iap puxim iaptup. Imẽnpit Deus kay itabutꞌũmayũ oajẽm wuykay. Ajojojoꞌũma ip yajẽm puje. Ibaꞌarẽm ma ip oajẽm. Cekawẽnwarun ma ip.
\p — Deus xipacat jeꞌg̃ũm wuywebe soat em ikẽrẽat mujurũg̃rũg̃ maꞌg̃u wuyju — i napa ma eꞌem ip wuywebe.
\m Imẽn ip Deus xipacat ũmũm wuywebe iap ekawẽn muwarururun, ikẽrẽat mujurũg̃rũg̃xi ip puye. Jesus Cristo acã wuykukukat. Soat podi ma ixe itaybit wuymutaybin am.
\p — Eykukukat g̃u ocekukukat pit — iꞌeꞌem ip, Jesus Cristo kayꞌũm ip puye.
\m Imẽn eꞌem Deus ekawẽntup:
\mi Deus ixeyũ g̃uju ipiatꞌajojoap kay ikẽrẽat kug̃ puye, i. “Xipat g̃u eyju oxe” i jeꞌe Deus cebe ip, i.
\m Iboap kuyje ma ibararak osodop Deus ekawẽntup pe. Deus cuk adi eymutabun Jesus Cristo kay. Ixe ebekitkiyũ eyju g̃asũ. Ipiꞌũm puje dak ixe ebekitkiyũm epesop. Imẽneju apẽn Deus wuydaxijojom iaptup g̃u otupmubararak eywebeaptum. Eybuꞌũm g̃u juy epesop eyetabut am Jesus kay iaptup acã otupmubararak. Eydayꞌemꞌum cuy epesop Deus kayꞌũmayũ be eymubuꞌunap puxim iaptup otupmubararak.
\p
\v 5 Kuyje Deus Israel naxeg̃ebitbit oꞌtaxijo. Oꞌtujujẽm ip Egito eipi bewi. Itabutꞌũmayũ bit oꞌg̃uyꞌũꞌũ. Wararaꞌacayũ dujujẽm puje oꞌg̃uyꞌũꞌũ. Kuy eyetaybit iboam. Inaka xipat eywebe soat em ma g̃ebum am iboap kay. Imẽnpuye waram iboap og̃uwẽn eywebe. 
\v 6 Pũg̃pũg̃ Deus ekawẽn tojotjotꞌukayũꞌin Deus coꞌi iꞌe pin ip oꞌe. 
\p — Deus coꞌi ocaꞌõbuyxi — i napa ma ip oꞌe. 
\m Jewexe ip Deus coꞌi osodop yaꞌõbuyxi. Imẽneju Deus ixeyũ oꞌg̃uju ipiatꞌajojoap kay. Kabiokbog̃ pe ip oꞌg̃uju. Taomũnmũn ip dopdom kabiokbog̃ pe. Ijẽm paꞌore ip. Jesus Cristo ajẽm puje ipiat supiꞌajo cebe ip. G̃ebum cuy epesop ixeyũ kay- -jewexe Deus coꞌi yaꞌõbuyxiayũ kay. 
\v 7 Sodoma ka watwat ikẽrẽat mujurũg̃rũg̃xi ip osodop, Gomorra ka watwat tak, ibo ka xeatka watwat tak. Jewenũnꞌoꞌoꞌuk ip osodop ag̃okatkayũ. Powatwat kay dak osodop ip tũnꞌo am. Nũnꞌoꞌoxi ip osodop. Deus ipiat oꞌsupiꞌajojoat Sodoma ka watwat pe apẽn cuk adi ipiat oꞌsupiꞌajojoat jekawẽn tojotjotꞌukayũ xipatꞌũmayũ be iap puxim. Daxabog̃ pe ip oꞌg̃uju soat em ipiatꞌajo am. Oꞌg̃uju wararaꞌacat mutaybit am ipiat osupiꞌajoat soat ikẽrẽat mujurũg̃rũg̃ꞌukayũ be iam. G̃ebum cuy epesop iboap kay.
\p
\v 8 G̃axĩn ma eykay oajẽmiayũ kuyjeayũ buxim soat em ikẽrẽat mujurũg̃rũg̃- -Deus kayꞌũmayũ. Jebinũnpe ip ikẽrẽat mug̃ẽg̃ẽm warẽmtaksug̃at cocom jexey joꞌiat pe buye. Deus soat podi ma yaꞌõbaca iap waywayway acã ip, yaꞌõ kayꞌũm puye ip. Kabi beacat muymuy dak ip- -idip cĩcãayũ muymuy. 
\v 9 Imẽn g̃u juk adi oeku Miguel. Deus ekawẽn tojotjotꞌukayũ kukukat putet Miguel i omuy. Ibiõg̃buk kẽrẽayũ kukukat jewaꞌõxikxig̃ oꞌe Miguel eju abu wuyꞌin Moisésꞌũm jebit jokot iam. Jewaꞌõxikxig̃ pima:
\p — Õn pit jemukorẽm g̃u — ioꞌe Miguel. — Okukukat cuy jemukorẽm — i acã oꞌe Miguel.
\m Ibiõg̃buk kẽrẽayũ kukukat oꞌjomuymuy g̃u Miguel. 
\v 10 Ixeyũ Deus kayꞌũmayũ bit jetaybitꞌũmap muymuy ip. Jekpiwatpi ma itaybit ip soan itaekat puxim. Jetaybicap g̃uꞌũmat ip. 
\v 11 Karem g̃u ipiat supiꞌajojo ip. Caim e dag̃ ip jekukum. Balaão buxim xipacap oꞌg̃udopat ip ikẽrẽat kay jĩjã ip dinheiro bu pinap tomuju ma. Kũyjobitꞌũm cĩcã ip Deus aꞌõ kay Coré buxim. Imẽnpuye Deus oꞌg̃uꞌũm ip. 
\v 12 Teꞌe ma ip jeꞌawerorom eyweju Jesus oeꞌũ iap kay g̃ebumiatꞌa o am. Iokokat puxim ip eyparakpe. Isũsũn g̃u ip pũg̃xirim ma jekaꞌon ma soat etabutpe. Wararaꞌacat kay g̃u ip g̃ebum- -jewekay acã. Wararaꞌacat kug̃ g̃u ip xipan- -jewekug̃ acã. Kabikerereat puxim ip- -mubaꞌatꞌũmat puxim- -kabido emumukap puxim. Yaꞌaꞌeꞌũmatꞌip puxim tak ip- -yaꞌaꞌeat ekaxi be yaꞌaꞌe g̃u iatꞌip puxim. Yopꞌukꞌukatꞌip puxim tak ip. Tũybiꞌukꞌukat puxim ip- -yopeꞌũat puxim. 
\v 13 Tipodoybog̃at puxim ip. Tipodoy iokokat muymũg̃mũg̃ kaꞌoririt eju. Imẽnpuxim isũsũnꞌũma ikẽrẽat mujurũg̃rũg̃ ip soat etabutpe. Teꞌe ma ip jekukum kasopta teꞌe ma jedaekukuꞌukata buxim. Deus kabiokat oꞌg̃uxipan ixeyũ dopdop am. Kabiokbog̃ pe ma jeedop ip soat em.
\p
\v 14-15 Kuyje ma Enoque ixeyũ oꞌg̃uwẽn- -Deus kayꞌũmayũ oꞌg̃uwẽn. Kuy ma ixeyũ oꞌg̃uwẽn ixeyũ kap awap ma. Ixe Enoque Adão naxeg̃ebit osunuy. Adão ipotpet oꞌe. Ixe ipot ipotpet oꞌe. Ixe ipotpet oꞌe. 6 be ipotpet ibima, Enoque oꞌjebapuk.
\p — Xeyũku Deus kayꞌũm cĩcãayũ — i juk adi oꞌe Enoque kuyje ixeyũ muwẽnuwẽn. — Isũsũn g̃u ip ikẽrẽat mujurũg̃ am Deus etabutpe — i juk adi oꞌe. — Cekawẽnkẽrẽ jĩjã ip — i juk adi oꞌe. — Deus muymuyxi ip — i juk adi oꞌe. — Imẽneju wuykukukat omuyku jekawẽn tojotjotꞌukayũ eju- -adeayũ eju- -soat tag̃ iisuayũ eju — i juk adi oꞌe. — Yajẽm puje, “Eyju ikẽrẽat kug̃ oxe,” i jeꞌe Deus jekayꞌũmayũ be — i juk adi oꞌe. — Deus jekayꞌũmayũ g̃uju ipiatꞌajojoap pe — i juk adi oꞌe Enoque.
\p
\v 16 Ixeyũ Deus kayꞌũmayũ jetakomaap pibun ma jenuycaw ma ip kawẽnwẽn. Soat em ip wararaꞌacat muymuy. Jewemucokcokcog̃ ma ip jekukum. Jeweweju ma eꞌem ip:
\p — Xipat õn — i.
\p — Xipat ẽn — iꞌeꞌem ip wararaꞌacat pe jebubut ũmap ojuy.
\p
\v 17-18 Wuykukukat aꞌõbi jekukuꞌukayũ kay juk eymukũyjojo Jesus Cristo emumujuyũ.
\p — Amap kabia bima itabutꞌũmayũ jebapuk eykay- -jewemucokcokꞌukayũ — i juk adi oꞌe ip eywebe eymukũyjojom eywaywaywayꞌukayũ.
\m Imẽn oꞌe ip eywebe kuy bima- -ixeyũ ajẽm awap ma. G̃ebum cuy epesop ixeyũ ekawẽn kay, oburereyũ. 
\v 19 Ixeyũ Deus kayꞌũmayũ Jesus kayayũ mubuꞌuꞌun jebureyũ kay cewejakꞌũm ãm. Deus bikuyap tag̃ g̃u ip jekukum- -jebikuyap tag̃ acã. Deus biõg̃buk kug̃ g̃u ip. 
\v 20 Oburereyũ, kuy juk eyetabut Jesus Cristo kay. Big̃ ma juy eyetabun epesop cekay g̃asũ bit. Ixe kay wuyetabucap soat podi ma xipat. Kawẽnwẽn cuy epesop Deus eju ixe biõg̃buk aꞌõbacaan. 
\v 21 Eybuꞌum g̃u juy epesop Deus pe eykukan xipan. Wuykukukat Jesus Cristo itabotaidabotbot wuykay. Ixe wuydujuu jewekay. Soat em ixe xe acesop. Iboap cuy epejowiwi jĩjã.
\p
\v 22 Pũg̃pũg̃ayũ soat em jewag̃uymuwarururun, itabutbũt ã buye. Eyaꞌõpurug̃ g̃u juy ip epejukuk- -eyaꞌõdidim ma. 
\v 23 Ixeyũ juy epetaxijo daxabog̃ pe ijuap puxim. Wararaꞌacayũ isũsũn g̃u ikẽrẽat mujurũg̃ ãm. Iokokat puxim ip. Teꞌe ma ip jewemucokcokcog̃. Ixeyũ dak cuy eyaꞌõpurug̃ g̃u epejukuk- -eyaꞌõdidim ma. Eyetakomãm cuy epesop ixeyũ emug̃ẽg̃ẽ kay eywebe dak ixeyũ buxim ikẽrẽat mug̃ẽap puxim.
\p
\v 24 Deus itaybit cĩcã wuyaꞌõmubacan am wuywebe ikẽrẽat mug̃ẽap puxim. Ixe wuydujuu jeka kay soat em wuynuy ãm jexe. Ikẽrẽat kug̃ g̃u ajop g̃ebuje bit. Soat tag̃ wuyisu acesop. Soat em wuycokcok acesop ixe xe. Ixe xe acesop iap soat podi ma idip.
\p
\v 25 — Ẽn acã Deusat — i juy acece cebe. — Kaꞌũmg̃u waraꞌat — i dak cuy acece cebe. — Ẽn acã wuydaxijojoꞌukat, Jesus Cristo kay ocetabut puye, ocekukukat kay — i juy acece cebe. — Soat podi ma ẽn xipat ocexe — i dak. — Soat podi ma ẽn aꞌõbuyxi jĩjã — i dak. — Soat podi ma ẽn aꞌõbacaap kug̃ — i dak. — Soat podi ma ẽn soat kukukat — i dak cuy acece cebe- -Deus pe.
\m Imẽn ma oꞌeꞌe ip kuyje, ipi mug̃ẽ awap. G̃asũ dak imẽn ma wuyju eꞌem. Soat em ma juy imẽn acece cebe.
\p Ibũrũ ma.