\id REV Mundurukú [myu] NT (Brazil) -2010 bd. 
\h Apocalipse
\toc1 João be Deus oꞌg̃ubapukiaptup
\toc2 Apocalipse au A Revelação de Deus a João
\mt JOÃO BE DEUS OꞌG̃UBAPUKIAPTUP
\c 1
\p
\v 1 Deus apẽn g̃axĩn ma juy jeꞌbapuk iap oꞌg̃uwẽn Jesus Cristo be ixe be iboap muwẽn ãm jebuywatwatꞌukat pe- -João be. Deus aꞌõbi Jesus Cristo iboap oꞌg̃ubapuk João be cexey joꞌiat pe. Ibocewi jekawẽn tojotjotꞌukat oꞌg̃uju João kay. Kabi bewiat oꞌg̃uju cekay. Oꞌg̃uju imukũyjo am apẽnape cexey joꞌian ixe be wararaꞌacayũ mukũyjo am iboam.
\v 2 Deus jekawẽn oꞌg̃uwẽn ixe João be. Jesus Cristo kawẽn icẽmat oꞌg̃uwẽn cebe. João soat oꞌjojojoiap oꞌg̃uwẽnuwẽn, soat oꞌyaꞌĩjojoiap tak oꞌg̃uwẽnuwẽn. Iboap ekawẽn ibararak opop ijudup pe.
\v 3 Ijudup cocoꞌukayũ icokcok jeꞌe. Apẽn g̃axĩn ma jeꞌbapukiaptup peat ekawẽn aꞌĩjojoꞌukayũ dak icokcok jeꞌe. Ijudup peat ekawẽn kay kũyjobicayũ dak icokcok jeꞌe. G̃axĩn ma jeꞌbapuk apẽn ibararak ijudup pe iap tag̃.
\p
\v 4 Õn João. Õn ijudup mubarararag̃ Ásia eipi watwat peaptum- -7 beatka watwat peaptum- -Jesus kay itabucayũ beaptum.
\p — Bay, xipan cuy ebekitkiyũ ejukuk — i õn eꞌem cebe. — Ebekitkiyũ ag̃uymubabibin cuy eg̃uy — i õn eꞌem cebe.
\m Ixe Deus itait g̃asũ. Kuyje dak itait osunuy. G̃axĩn ma jeedot g̃uto wuykay. 7 be omuy ibiõg̃buk Deus abikbikap topabe. Ixeyũ juy xipan jeykuk. Eyag̃uymubabibin cuy jeedop ip.
\v 5-6 Jesus Cristo dak xipan jeykuk. Ixe eyag̃uymubabibin cuy jeenuy. Ixe soat em icẽmãn eꞌem. Ixe koam oꞌjetait jeꞌũap tomukadi. Ixe Jesus Cristo yaꞌõbuyxi soat ka kukat aꞌõbuyxiap podi ma.
\p Ixe xe wuykukpin cĩcã. Korosa be oꞌjedoyekerereren. Oeꞌũ ikẽrẽat uk am wuywebewi.
\p — Paĩyũ buxim Deus peam epeyekapikpik- -webay beam — i juk adi oꞌe wuywebe.
\m Ixe soat em ma soat ipi juayũ kukan jeenuy. Imẽnpuye:
\p — Kaꞌũmg̃u omuy ejoꞌiat idipat — i juy acece ixe Jesus Cristo be soat em ma. — Kaꞌũma ma ejoꞌiat omuy yaꞌõbacaat — i dak cuy acece cebe.
\m Imẽn cuy acece soat em ma.
\p
\v 7 Ag̃ cuy epesop. Kabikerereat tag̃ ixe Jesus omuyku. Soat ma ixe jojo. Oꞌyaꞌõxamutokꞌiayũ dak ixe jojo ma. Soat tiwatwat jeetõtõn ixe dobuxik puje. Jeetõtõn ip jeg̃uycũg̃ap pibun. Imẽn ma juy jeedop ip. Imẽn jeꞌe.
\p
\v 8 — Soat kaꞌũm pima õn kuy kake — iꞌeꞌem wuykukukat Deus. — Soat iꞌũm puje dak õn pit kake. Kaꞌũma kake bimaat õn. Soatꞌũm pimaat tak õn ma — iꞌeꞌem wuykukukat Deus.
\m Ixe Deus soat podi ma yaꞌõbaca. Itait g̃asũ. Kuyje dak itait osunuy. G̃axĩn ma jeedot g̃uto wuykay.
\p
\v 9 Õn João- -eywag̃o. Eybuxim õn tak Jesus eju mũg̃i jekukum. Eybuxim õn tak ipiatꞌajojom. Õn tak soat kukukan og̃uy Jesus eju ixe soat kukukan pima. Õn tak eybuxim wukpiceg̃ẽ g̃u wetabucap kug̃. Tipꞌaweroro be juk adi og̃uy. Patmos i osunuy tipꞌaweroro butet. Iboce ip omuju Deus ekawẽn cuk adi og̃uwẽnuwẽn puye- -Jesus ekawẽn cuk adi og̃uwẽnuwẽn puye- -kawẽn icẽmat.
\v 10 Mutoꞌo bima wukpiwan g̃u juk adi ocewag̃uy- -wuykukukat ekabia be. Deus biõg̃buk cuk adi wag̃uyda. Yaꞌõberenatꞌaꞌõ oyaꞌĩjojo onõg̃pikadiwi jededem- -parasuy joꞌiatꞌaꞌõ.
\p
\v 11 — G̃axĩn ma ejojojoiaptup cuy etupmubararak — ioꞌe owebe parasuy joꞌiatꞌaꞌõ. — Ibodup cuy etupmuju Jesus kay itabucayũ beaptum- -7 beat ka watwat peaptum — i juk oꞌe owebe. — Etupmuju juy Ásia eipi watwat peaptum- -Éfeso ka watwat peaptum, Esmirna ka watwat peaptum tak, Pérgamo ka watwat peaptum tak, Tiatira ka watwat peaptum tak, Sardes ka watwat peaptum tak, Filadélfia ka watwat peaptum tak, Laodicéia ka watwat peaptum tak — i juk oꞌe owebe.
\p
\v 12 Korepẽnꞌi oce abu paxi kawẽnwẽn oweju iam. 7 be lamparinaꞌa mũn ojojojo- -ouro mug̃ẽg̃ẽ.
\v 13 Cepidase ip ijodiat coꞌiat cũg̃ꞌi osunuy. Jesay kug̃ osunuy iberenat kug̃. Ouro mug̃ẽg̃ẽbu kug̃ osunuy jekũmpi dag̃.
\v 14 Yaoparut oꞌyanuy lã buxim- -kabidig̃pu buxim- -aopaopu buxim. Itasop oꞌsutanuy daxae buxim.
\v 15 Suisopsep oꞌsuinuy bronze buxim- -icaat puxim- -daxa be oꞌjeieerotiat puxim- -oꞌg̃usopsupiat puxim. Ixe aꞌõ yaꞌõbog̃ osunuy tiꞌacapꞌaꞌõ buxim. Jororoh. Cororog̃iat puxim.
\v 16 Kasopta kug̃ osunuy jebaꞌat kadi- -7 beata kug̃. Ibi bewi jekawẽn cẽmcẽm osunuy. Payao buxim osodop cekawẽn- -xepxep kadi ma tũybibiat puxim. Topasop oꞌtopanuy kaxicug̃at kaxi joꞌi.
\p
\v 17 Ixe dobuxik puje oꞌat cewap ceꞌũat puxim. Iꞌat puje oꞌjewebumõg̃ wabi jeje ibaꞌat kadi.
\p — Epararam g̃u juy eg̃uy — ioꞌe owebe. — Kaꞌũma kake bimaat õn. Soat iꞌũm puje dak õn acã ocepoyat — ioꞌe owebe. 
\v 18 — Soat em ma õn wetabẽg̃. Kuy juk adi weꞌũ ojop. G̃asũ bit ocetait waram. Waram pit ojeꞌũ g̃u. Waꞌõbi ma ijodiacat jeꞌũꞌũm. Waꞌõbi ma ceꞌũꞌũayũ dopdopap pe jeedop ip — ioꞌe owebe. 
\v 19 — G̃axĩn ma ejojojoiaptup cuy etupmubararak, g̃asũ jebapukpug̃ ewebe iaptup tak, g̃uyjom jeꞌbapuk ewebe iaptup tak — ioꞌe owebe. 
\v 20 — Kasopta kug̃ õn obaꞌat kadi- -7 beata — ioꞌe owebe. — Lamparina mũn tak 7 be opop. Iboap ejojojo kuy — ioꞌe owebe. — Apẽg̃ap ibo iam pit etaybit g̃u. Iboam pit õn jemutaybin — ioꞌe owebe. — Lamparina mũn Jesus kay itabucayũ buxim- -7 beatka watwat puxim- -Deus ekawẽn tojotjotꞌukayũ buxim — ioꞌe.
\p Imẽn onõg̃pikadiat oꞌjekawẽn owebe- -Jesus oꞌjekawẽn owebe.
\b
\c 2
\p
\v 1 — Cartadup cuy etupmubararak Éfeso ka watwat kukukat awẽwẽaptum- -Jesus kay itabucayũ kukukat awẽwẽaptum — ioꞌe owebe onõg̃pikadiat.
\mi Õn ma kasopta kug̃ obaꞌat kadi. 7 beata kug̃ õn. Lamparinaꞌa mũn pidase õn cũg̃cũg̃- -7 beayũ pidase- -ouro mug̃ẽg̃ẽyũ pidase. Jeyawẽ õn. 
\v 2 Wetaybit cũg̃ ma juk adi epekuku iam. Wetaybit cuk adi epeyekapikpik cĩcã iam. Eyetaxi dak cuk adi epesop ipiatꞌajojom. Xipatꞌũmayũ kay g̃u jĩjã dak eyju. Jewexe Jesus emumujũyũ dak cuk adi epesubuyxijojo- -“Jesus aꞌõbi oceju kawẽn idipat muwẽnuwẽn eywebe” i napa ma eꞌeꞌukayũ. Eyetaybit napa ma eꞌem ip iam. 
\v 3 Itabutꞌũmayũ juk adi ipiat oꞌsupiꞌajojoat eywebe, eyetabut okay buye. Eyetaxi bit epesop ipiatꞌajojom. Eybuꞌu g̃u juk adi epesop eyetabut am okay. 
\v 4 Imẽnpit soat g̃u eyekukuap xipat oxe. Koap pima okukpin cĩcã og̃uy eyxe. G̃asũ bit kaꞌũma. Okukpinsũ ma eyxe g̃asũ bit. Imẽn xipat g̃u. 
\v 5 G̃ebum cuy epesop apẽn koap pima okukpin cĩcã eyju okuk iap kay- -apẽn g̃asũ bit eyju okukpin g̃u iap kay dak. Warẽmtag̃ ma okukap cuy epeyepere. Waram g̃uto okukpin cĩcã juy epesop okug̃. Eywebe warẽmtag̃ ma okukap epereꞌũm pima bit, õn ma ojot eykay. Apẽn wuyju lamparinaꞌa mũn muwedewedem waraꞌat muy ãm tũyap pe iap puxim eyju g̃u webekitkiyũm epesop. Jeymuwedewede õn. Wararaꞌacayũ ma ojomuy webekitkiyũm eydieg̃. 
\v 6 Obuxim eyju dak Nicolai aꞌõkayayũ ekawẽn kayꞌũm cĩcã. Iboap xipat oxe.
\q
\v 7 Deus biõg̃buk imẽn Jesus aꞌõkayayũ awẽwẽm. Eyetaybin pin eyawẽwẽ ãm pima, eyaꞌõpicũg̃cũg̃ cuy epesop.
\p Imẽn ma õn Éfeso ka watwat kukukat awẽwẽm — i juk oꞌe owebe onõg̃pikadiat- -Jesus. — Owebe yawẽwẽaptup cuy etupmubararak ixe beaptum — i juk oꞌe owebe.
\p
\v 8 — Cartadup cuy etupmubararak Esmirna ka watwat kukukat awẽwẽaptum- -Jesus kay itabucayũ kukukat awẽwẽaptum — i juk oꞌe owebe Jesus.
\mi Kaꞌũmg̃u bimaat õn. Soat iꞌũm puje dak õn ma og̃uy. Kuy juk ade weꞌũ ojop. G̃asũ bit ocetait waram. Jeyawẽ õn. 
\v 9 Wetaybit eyju ipiatꞌajojom iam. Wetaybit eydadaybot iam tak. Deus xe bit soat kug̃ eyju. Jewexe Judeuyũ eymuymuy. “Judeuyũ oceju- -Deus ebekitkiyũ” i napa ma eꞌem ip. Satanás aꞌõ kayayũ ixeyũ bit. 
\v 10 Eypararam g̃u epesop ipiatꞌajoap puxim. Ibiõg̃buk kẽrẽayũ kukukat ipiat supiꞌajojoat eywebe eyetabucap puyxijom. Ixe aꞌõ kayayũ warẽmtag̃ ma jeymuõm daomũnmũnapꞌa be. Inaka ibun g̃u ipiat epesupiꞌajojo- -10 kabia ma. Waꞌõ dag̃ cuy epeku soat em. Eyeꞌũ buje dak, waꞌõ dag̃ cuy epeku. Waꞌõ dag̃ eyeku buje, soat em epesop oxe eyetait. Soat em eyetait oxe iap idip cĩcã ipi kukukat a dag̃at puxim- -coroa buxim. 
\v 11 Deus biõg̃buk imẽn Jesus aꞌõ kayayũ kukukat awẽwẽm. Eyetaybin pin eyawẽwẽãm pima, eyaꞌõpicũg̃cũg̃ cuy epesop.
\mi Waꞌõ kay jĩjãayũ bit waram jeꞌũ g̃u. Waram wararaꞌacayũ eꞌũ buje, jeꞌũ g̃u ip.
\m Imẽn ma õn Esmirna ka watwat kukukat awẽwẽm — i juk oꞌe owebe onõg̃pikadiwiat- -Jesus. — Owebe yawẽwẽaptup cuy etupmubararak ixe beaptum — i juk oꞌe owebe.
\p
\v 12 — Cartadup cuy etupmubararak Pérgamo ka watwat kukukat awẽwẽaptum- -Jesus kay itabucayũ kukukat awẽwẽaptum — i juk oꞌe owebe onõg̃pikadiwiat- -Jesus.
\mi Õn ma payao kug̃- -xepxep kadi tũybibiat kug̃. Jeyawẽ õn. 
\v 13 Wetaybit poce eyju dopdom iam. Satanás aꞌõ kayayũ parakpe eyju. Waꞌõ kay acã eyju bit kũyjobit. Itakomaayũ Antipas oꞌyaoka eyka be- -Satanás aꞌõ kayayũ dopdopap ka be. Ixe Antipas cedag̃ ma juk adi omuwẽnuwẽn. Eyju bit cuk adi eybuꞌu g̃u epesop eyetabut am okay ixe aꞌg̃u ip oꞌyaoka ma. 
\v 14 Imẽnpit soat g̃u eyekukuap xipat oxe. Pũg̃pũg̃ eyꞌin Balaão emumutaybitbinap tag̃ jekukum. Ixe Balaão oꞌjekawẽn Balaque be. “Warẽmtag̃ cuy Israel naxeg̃ebitbit eg̃utaybin ixeyũ be ikẽrẽat mug̃ẽ ãm,” ioꞌe Balaãp Balaque be. Imẽnpuye “Xipat eywebe deusbaroyũ wap iẽnmõg̃ꞌibitẽn o am,” i napa ma oꞌe cebe ip. “Xipat eywebe wararaꞌacat tayxi eju jepo am- -wararaꞌacat itop eju dak,” i napa ma oꞌe cebe ip. 
\v 15 Ixe buxim pũg̃pũg̃ eyꞌin Nicolai aꞌõ kayayũ emumutaybitbinap tag̃ jekukum, warẽmtag̃ maꞌg̃u ip imutaybitbin. 
\v 16 Ikẽrẽat mujurũg̃rũg̃ap cuy epeyepere. Cepereꞌũm pima bit, g̃axĩn ma ojot eykay ipiatꞌajoan eywebe. Ixeyũ eju nopag̃õg̃õm oce- -warẽmtag̃ imutaybitbinayũ eju. Yaokakam ip oce wekawẽn- -payao buximan- -xepxep kadi tũyan.
\q
\v 17 Deus biõg̃buk imẽn Jesus kay itabucayũ kukukat awẽwẽm. Eyetaybit pin eyawẽwẽãm pima, eyaꞌõpicũg̃cũg̃ cuy epesop.
\mi Waꞌõ kay jĩjãayũ be manada otaũm ixatam ip tamunẽmꞌibita. Karatũg̃ꞌa buximatꞌa dak oyaũm soat pe ixeyũ be yarucatꞌa- -yadeibog̃atꞌa. Ibutet iisuat ibararak opop ig̃oꞌa be. Kaꞌũma ma itaybit ixe buten. Yabuat acã itaybit jeꞌe ixe buten.
\m Imẽn ma õn Pérgamo ka watwat kukukat awẽwẽm — ioꞌe Jesus owebe- -onõg̃pikadiwiat. — Owebe yawẽwẽaptup cuy etupmubararak ixe beaptum — i juk oꞌe owebe.
\p
\v 18 — Cartadup cuy etupmubararak Tiatira ka watwat kukukat awẽwẽaptum- -Jesus kay itabucayũ kukukat awẽwẽaptum — i juk oꞌe onõg̃pikadiwiat owebe- -Jesus.
\mi Deus ipot õn. Wetasop daxae buxim. Wui suisopsep bronze buxim- -oꞌg̃usopsep ip iat puxim. Jeyawẽ õn. 
\v 19 Wetaybit cũg̃ ma eyju jekukum iam. Deus ikukpin cĩcã eyxe. Eyetabut cĩcã ixe kay. Kapikpig̃ eyju. Eyetaxi dak ipiatꞌajojom maꞌg̃u. Koap pimaap podi ma g̃asũ dak eyju xipacat mujurũg̃rũg̃. 
\v 20 Imẽnpit soat g̃u eyekukuap xipat oxe. Jezabel warẽmtag̃ ma obuywatwatꞌukayũ mutaybitbin. E iekẽrẽat tag̃ webekitkit muykukum. Ixe napa ma eꞌem “Deus ekawẽn muwẽnuwẽnꞌukat õn,” i. Webekitkit mug̃uykukukum ixe ayacat. “Xipat eywebe wararaꞌacat tayxi eju jepo am, wararaꞌacat itop eju dak,” i napa ma eꞌem cebe ip. “Xipat eywebe deusbaroyũ wap iẽnmõg̃ꞌibitẽn o am,” i napa ma eꞌem cebe ip. Eyju bit epeg̃ujẽm g̃u eyxewi. Ãg̃ jeenuy jekpiwan. 
\v 21 Ibun ma ipiat osupiꞌajoat g̃u cebe. Tũybe g̃asũ paxi ikẽrẽat mujurũg̃rũg̃ap jepere iãn oce. Ixe bit ibuꞌu jeperem. 
\v 22 Imẽneju ixe ayacat õn ma ojoxik kama joꞌiat pe. Ijoce ipiat supiꞌajojo jĩjã ceweju oꞌjepoꞌiayũ dak. Ixeyũ be ikẽrẽat mujurũg̃rũg̃ap epereꞌũm pima, ipiatꞌajojom cĩcã jeedop ip. 
\v 23 Iꞌiyũ dak oyaokaka- -yaꞌõkayayũ. Ixeyũ aoka buje, Jesus aꞌõ kayayũ itaybit jeꞌe Deus itaybti apẽn ijodiacat jewag̃uyg̃uy iam. Apẽn ip ibikuy iam tak itaybit jeꞌe ip. Apẽn ijodi bima juk adi oekuku ip iaptei bit õn ma oteida soat pe.
\q
\v 24 Wararaꞌacatꞌin eyꞌin pit warẽmtag̃ ma eymutaybitbinꞌukayũ aꞌõ kay g̃u juk adi epesop- -Tiratira ka watwatꞌin. Satanás pabi kug̃ g̃u buk eyju. Ixe babi kukayũ soat g̃u Satanás babim itaybit. Eyju bit eybuꞌu ixe babi kuk am. 
\v 25 Wajẽmap wiwim pima kuy eyetaybicap ekawẽn tag̃ cuy epeku. Waraꞌat ekawẽn g̃u bit og̃uwẽn eywebe iboap ekawẽn tag̃ eyeku am. 
\v 26-28 “Ẽn ma soat ka watwat kukukan cuy ece,” i juk oꞌe webay owebe. “Eyju soat ka watwat kukayũm epesop oweju,” i oce waꞌõ kay jĩjãayũ be. Yaꞌõca ip jeedop ixeyũ kukukan yopcaatꞌip kukat puxim. Pipimꞌũm kũyjobitꞌũmayũ aꞌõbacaap g̃uꞌũm ip itĩg̃ꞌa kakaap puxim. “Eyju ma soat ka watwat kukukayũm cuy epesop oweju,” i oce waꞌõ kay jĩjãayũ be- -amap kabia wiwim pima waꞌõ dag̃ jekukuꞌukayũ be. Kabiada dak otaũm cebe ip- -kasopta- -waꞌõ kay jĩjãayũ be. 
\v 29 Deus biõg̃buk imẽn Jesus aꞌõ kayayũ awẽwẽm. Eyetaybin pin yawẽwẽam pima, eyaꞌõpicũg̃cũg̃ cuy epesop.
\m Imẽn ma õn Tiatira ka watwat kukukat awẽwẽm — ioꞌe onõg̃pikadiwiat owebe- -Jesus. — Iboaptup cuy etupmubararak ixe awẽwẽaptum — i juk oꞌe owebe.
\b
\c 3
\p
\v 1 Cartadup cuy etupmubararak Sardes ka watwat kukukat peaptum- -Jesus kay itabucayũ kukukat peaptum — i juk oꞌe owebe onõg̃pikadiwiat- -Jesus.
\mi Õn ma Deus biõg̃buk kug̃- -7 beayũ kug̃. Kasopta kug̃ tak õn- -7 beata kug̃. Jeyawẽ õn. Õn wetaybit warẽmtag̃ ma eyju jekukum iam. Adeayũ napa ma eꞌem “Sardes ka watwat itabut cĩcã Jesus kay,” i. Õn pit wetaybit eyetabutsũ ma cekay iam. Ceꞌũat puxim eyju cexe. 
\v 2 Ceꞌũat puxim g̃u juy epesop. Eyetabun cuy epesop cekay kuyjeap puxim. Eyag̃uysan cuy epeku. Eybuꞌum g̃u juy epesop cekawẽn tag̃ eyeku am. Soat g̃u bit xipat Deus xe apẽn cuk adi epekukuiap. Wetaybit iboam. 
\v 3 G̃ebum cuy epesop kuy eyetaybicap kay, kuy epeyaꞌĩjojoiap kay dak. Kawẽn icẽmat cuk adi epeyaꞌĩjojo. G̃ebum cuy epesop iboap ekawẽn kay. Kũyjobin cuy epesop iboap ekawẽn kay. Ikẽrẽat mujurũg̃rũg̃ap pit cuy epeyepere. Ixecat puxim eyju. Eyju ag̃ꞌũm pima ojot eykay. Ibukurukat puxim ojot eykay. Eyetaybit g̃u epeꞌe puju paxi oajẽm iam. 
\v 4 Pũg̃pũg̃ pit eyꞌin ikẽrẽat oꞌjukuk g̃u Sardes ka watwatꞌin. Ixeyũ bit yag̃uyisuayũ. Cesay isuayũ buxim ip. Ixeyũ ma oweju ma jeku jesay irucat kug̃- -iisuat kug̃, “Cedag̃ ip oxe” iꞌeꞌem Deus cebe ip puye. 
\v 5 Waꞌõ kay jĩjãayũ jesay irucat kug̃ jeku. Ixeyũ butet ojuꞌuk g̃u soat em itait jeedop ip Deus xe iaptup pewi. Soat em ibararak jeedop ixeyũ butet ig̃odup pe. “Teyũku webekitkit,” i oce webay be, ixe ekawẽn tojotjotꞌukayũ be dak.
\q
\v 6 Deus biõg̃buk imẽn Jesus aꞌõ kayayũ awẽwẽm. Eyetaybin pin yawẽwẽãm pima, eyaꞌõpicũg̃cũg̃ cuy epesop.
\m Imẽn ma õn Sardes ka watwat kukukat awẽwẽm — ioꞌe onõg̃pikadiwiat owebe- -Jesus. — Iboaptup cuy etupmubararak ixe awẽwẽaptum — i juk oꞌe owebe.
\p
\v 7 — Cartadup cuy etupmubararak Filadélfia ka watwat kukukat awẽwẽaptum- -Jesus kay itabucayũ kukukat awẽwẽaptum — i juk oꞌe owebe.
\mi Õn pit ikẽrẽat kug̃ g̃u. Õn soat em icẽmãn eꞌem. Chave kug̃ õn- -Davi bubun osunuyiat kug̃. Iju chavem owebe tomudip puje, kuka ip oꞌtomudipꞌuk g̃u. Owebe tomudipꞌuk puje dak, kuka ip oꞌtomudip g̃u. Jeyawẽ õn. 
\v 8 Wetaybit apẽn eyju jekukum iam. Eyaꞌõbacaꞌũmꞌũm ma. Owebe eymutaybitbinap tag̃ pit cuk adi epekuku. Soat em epesop kũyjobit waꞌõ kay. Õn xĩntabi oꞌgukoce eywap. Soat pe bit tomudip paꞌore. Owebe acã tomudip put. 
\v 9 Eyaꞌõpicug̃cũg̃ cuy epesop waꞌõ kay. Satanás aꞌõ kayayũ napa ma eꞌem “Judeuyũ oceju- -Deus ebekitkit,” i. Napa ma eꞌem ip. Waꞌõbi ip jẽg̃ꞌaecõg̃cõg̃ eywap. Itaybit jeꞌe ip eykukpin cĩcã oxe iam. 
\v 10 “Eyukpiceg̃ẽg̃ẽm g̃u juy epesop okay eyetabucap kug̃ ipiatꞌajojom maꞌg̃u eyju,” i juk oce eywebe. Eyukpiceg̃ẽg̃ẽm g̃u okay juk adi epesop. Imẽnpuye ipiat osupiꞌajoat soat ipi dag̃acat pe ixeyũ etabucap puyxijom. Eyju bit õn jeydaxijo ixeyũ ipiatpiꞌajojom pima. 
\v 11 G̃axĩn ma oajẽm eykay. Xipat cĩcãat kug̃ eyju- -waꞌõ kay jĩjãaptei kug̃. Iboap cuy epeg̃uxipan cĩcã wararaꞌacat pe tujupaꞌumap puxim. 
\v 12 Waꞌõ kay jĩjãayũ aꞌõmucanucan cuy og̃uy. Deus eju kawẽnwẽnapꞌa beatꞌip puxim jeedop ip- -wararaꞌacatꞌip muycemucemapꞌip puxim. Waram pit jejẽm g̃u ip Deus xewi. Deus putet osubutetmubararak cebe, Deus ka butet tak. Jerusalém i ika butet- -ika isuatka butet. Iboka sukakop Deus xewi. Obutet iisuat tak osubutetmubararak cebe.
\q
\v 13 Deus biõg̃buk imẽn Jesus aꞌõ kayayũ awẽwẽm. Eyetaybit pin yawẽwẽãm pima, eyaꞌõpicũg̃cũg̃ cuy epesop.
\m Imẽn õn Filadélfia ka watwat kukukat awẽwẽm. Owebe yawẽwẽaptup cuy etupmubararak cebeaptum — i juk oꞌe onõg̃pikadiwiat owebe- -Jesus oꞌe owebe.
\p
\v 14 — Cartadup cuy etupmubararak Laodicéia ka watwat kukukat awẽwẽaptum- -Jesus kay itabucayũ kukukat awẽwẽaptum — i juk oꞌe owebe onõg̃pikadiwiat- -Jesus.
\mi “Imẽn cuy jeenuy” i õn eꞌem. Imẽnpuye “Amém” i obutet. Soat em waꞌõ dag̃ õn eꞌem. Soat em icẽmãn õn eꞌem. Deus pe soat mug̃ẽap awap kuy juk kake og̃uy. Jeyawẽ õn. 
\v 15-16 Wetaybit warẽmtag̃ cĩcã eyju jekukum iam. Taxipat puxim g̃u eyju- -icukat puxim g̃u dak. Taxiptoktokat puxim eyju, icukg̃ũg̃ũnat puxim tak. Okukpin g̃u eyju okug̃. Warẽmtag̃ g̃u dak eyju okug̃. Xipat ma kuka juk oꞌe warẽmtag̃ okug̃ pima, ikukpin okug̃ pima dak. Imẽnpit okukpin g̃u eyju okug̃. Imẽnpuye g̃axĩn ma ipiat osupiꞌajoat eywebe, ikoꞌõmat o buje jedadacap puxim. 
\v 17 “Soat kug̃ oceju bit,” i teꞌe ma eyju eꞌem. “Ocebubut ade oceju bit,” i teꞌe ma eyju eꞌem, “Xipat cĩcã oceju,” i dak, “Soat kake ocexe,” iꞌeꞌem eyju teꞌe ma. Eyetaybit g̃u eyju tadaybocat puxim iam. Iokokat puxim eyju- -ig̃ẽmat puxim- -ibisõat puxim. Tadaybocat puxim eyju, totiꞌũmat puxim tak. Itaꞌũmat puxim tak eyju. 
\v 18 Õn pit jeyawẽ. Ouro juy epejat oxewi- -iwekoykeyꞌũmat. Iboap kug̃ pima icẽmãn ibubut adeayũm epeꞌe. Eyesay irucat tak cuy epejat oxewi eywebe imuõm ãm eyesayꞌũmap puxim, eysũsũnap puxim. Posũg̃ tak cuy epejat oxewi itapiatkayat eyeta be imõg̃ ãm xipan eyecoat am. 
\v 19 Oxe ikukpinayũ bit og̃ukorẽm cedag̃ꞌũm jekukum pima. Ipiat osupiꞌajoat cebe ip waram g̃uto cũg̃ ma ceku am ip. Imẽnpuye juy waꞌõ kay epeꞌe waram. Ikẽrẽat mujurũg̃rũg̃ap cuy epeyepere. 
\v 20 Yaꞌõpicũg̃cũg̃ cuy epesop waꞌõ kay. Tag̃tag̃tag̃ꞌi õn eꞌem xĩntabi be. Waꞌĩjojoat pe tomudipꞌuk puje, oõm tukꞌa be. Jekõnkõnꞌuk og̃uy ixe eju. Ixe dak jekõnkõnꞌuk jeenuy oweju. 
\v 21 “Epabik cuy oxe- -wabikbikap pe” i oce waꞌõ kay jĩjãayũ be. Ixeyũ buxim õn tak cuk adi og̃uy webay aꞌõ kay kũyjobit. Imẽnpuye g̃asũ õn xikꞌi webay xe- -yabikbikap pe.
\q
\v 22 Deus biõg̃buk imẽn Jesus aꞌõ kayayũ awẽwẽm. Eyetaybin pin yawẽwẽãm pima, xipan cuy epeyaꞌõpicũg̃.
\m Imẽn õn Laodicéia ka watwat kukukat awẽwẽm. Owebe yawẽwẽaptup cuy etupmubararak cebeaptum — i juk oꞌe onõg̃pikadiwiat owebe- -Jesus oꞌe owebe.
\b
\c 4
\p
\v 1 G̃ebuje waraꞌat ma ojojojo wexey joꞌiat. Kabi beat exĩntabi ojojojo ikoce. Waram parasuy joꞌiat aꞌõ oyaꞌĩjojo- -kuy oyaꞌĩjojoiatꞌaꞌõ ma. Waram g̃uto oꞌjekawẽn owebe.
\p — Eceu juy ijoce — ioꞌe owebe. — Apẽn g̃uyjom jebapuk iap og̃ubapuk ewebe etaybit am — ioꞌe owebe.
\p
\v 2 Deus biõg̃buk wag̃uyda g̃ebuje bit. Iboce yabikbikap osunuy- -idip cĩcãat kabi be. Pũg̃ xikꞌi osunuy cebe. 
\v 3 Ixe dopa topasopsep oꞌtopanuy witaꞌa buxim- -yadip cĩcãatꞌa buxim- -jaspeꞌa buxim, sardônioꞌa buxim tak. Ixe abikbikap akokoreren konopsanobu oꞌjebueku. Ibusopsep oꞌjebueku esmeraldaꞌa buxim. 
\v 4 Idip cĩcãat akokoreren wararaꞌacat abikbikap osodop 24 be. Yaꞌõbuyxiayũ osodop ixeyũ jeje kaxikxikꞌi- -24 beat ceje. Jesay irucat kug̃ayũ osodop ip. Ouro mug̃ẽg̃ẽ kug̃ tak ip osodop jabi jeje- -idip cĩcãat kug̃. 
\v 5 Yabikbikap pewi xiririkiat cẽmcẽmꞌuk osunuy, tũmũnꞌaꞌõ dak, porog̃iat tak. Wexiktak puximat tak osunuy yabikbikap wap isopat, 7 be. Ixeyũ jojom pima wuyju g̃ebum Deus biõg̃buk kay- -7 beayũ kay. 
\v 6 Iodi buximati oꞌtinuy yabikbikap wap- -vidro mug̃ẽg̃ẽ. Tixiriruk oꞌtinuy cristalꞌa buxim.
\p Ebadipdip tak osodop ip itabẽg̃ayũ yabikbikap akokoreren- -idip cĩcãat akokoreren. Soat kadi osodop ip. Itaꞌade osodop ip. Soat kadi osodop ita ip- -cewap, yakpidakadi. 
\v 7 Pũg̃ ixeyũꞌin leão buxim osunuy. Waraꞌat ixeyũꞌin biopak puxim osunuy- -ag̃okatkat yobog̃at puxim. Waraꞌat ixeyũꞌinat topa ag̃okatkat topa buxim oꞌtopanuy. Waraꞌat ixeyũꞌin dace buxim osunuy- -pupumat puxim. 
\v 8 Soat ip ceg̃ebabe osodop. 6 be oꞌceg̃ebadop ip. Soat tag̃ itate ip osodop- -badi, kacũg̃kadi dak. Soat em ip jebibododon. Ixima dag̃ tak ibuꞌu em g̃u ip jebibododon, kabiam tak. Imẽn ip ibibodo:
\mi Wuykukukat Deus soat podi ma yaꞌõbaca, iꞌeꞌem ip jebibododon. Soat tag̃ iisu, i. Soat tag̃ iisu, i. Soat tag̃ iisu, i jebibododon ip. Ipi kaꞌũm pima itait osunuy, i. G̃axĩ dak itait, i. G̃axĩn ma jeedot waram wuykay, i.
\m Imẽn ip ibibodo.
\p
\v 9 — Ẽn pit soat podi ma edip — iꞌeꞌem ip Deus pe jebibododon ebadipdip itabẽg̃ayũ. — Ẽn pit soat podi ma aꞌõbuyxi — i dak eꞌem ip jebibododon. — Ẽn pit soat podi ma xipan ocekug̃ — i dak eꞌem ip jebibododon.
\m Yabikbikap cejeat peam cebibododon ip puje soat em itabẽg̃at peam, 
\v 10 24 beayũ aypapayũ pig̃ꞌi atꞌan ip cewap- -yabikbikap cejeat wap.
\p — Ẽn pit soat podi ma xipat — iꞌeꞌem ip cebe.
Jabi jejeat mõg̃mõg̃ ip yabikbikap cejeat wap- -idip cĩcãat- -ouro mug̃ẽg̃ẽ. Imõg̃mõg̃ ip cewap “Ẽn acã ocekukukat” iꞌe am cebe.
\m
\v 11 Imẽn ip jebibododon cebe:
\mi Ẽn acã soat kukukat, i. Ẽn acã Deusat, i. Ẽn cuk soat eg̃ug̃ẽ, i. Soat kake aꞌõbin ma, i. Ẽn ipi juacat mutaicin, i. Ẽn soat podi ma edipap kug̃, i. Soat podi ma aꞌõbuyxi, i. Ẽn acã soat podi ma aꞌõbacaap kug̃, i.
\m Imẽn ip jebibododon cebe- -yabikbikap cejeat pe.
\b
\c 5
\p
\v 1 G̃ebuje taperadup otupcoco tupꞌamũnmũnatup. Yabikbikap cejeat pui beatup otupcoco- -ibaꞌat kadiat pui beatup. Tupararak oꞌtuptop xepxep kadi ma. Tupmuymũg̃mũg̃ap osodop serabu joꞌian. 7 em oꞌtupmuymũg̃mũg̃ ip. 
\v 2 Deus ekawẽn tojotjotꞌukat tak ojojojo yaꞌõbacaat.
\p — Abu itaybit tupmuywut am? Kaꞌũma ma — ioꞌe ixe yaꞌõberen.
\p
\v 3 Imẽnpit itaybicat kaꞌũmg̃u osunuy. Kabi be kaꞌũmg̃u. Ipi ju dak kaꞌũmg̃u. Ipi diotpe dak kaꞌũmg̃u. Kaꞌũma ma itaybit tupmuywut am tup co am. 
\v 4 Otõn cĩcã kaꞌũmg̃u buye itaybicat tupmuywut am tup co am. 
\v 5 Imẽnpuye aypaat oꞌe owebe:
\p — Wa g̃u! Akꞌi juy ece. Judá diwat pe ibaꞌore g̃u tupmuywut am — ioꞌe. — Ixe acã itaybit tupmuywut am. Ixe be ma tup co but — ioꞌe. — 7 beat imuywut put ixe be — ioꞌe owebe. — Ixe leão buxim yaꞌõca. Yaꞌõbuyxi jĩjã ixe Davi naxeg̃ebit — ioꞌe owebe.
\p
\v 6 G̃ebuje mẽmẽ ojojojo- -ovelha. Cũg̃ꞌi osunuy yabikbikap pidase. Ebadipdip itabẽg̃ayũ ixe akokoreren osodop yaꞌõbuyxiayũ dak. Kuy bima ceꞌũ osunuyiat puxim osunuy. 7 be osodop yakanasũyũ. Ita dak 7 be ma oꞌsutanuy. 7 be itateat puxim Deus biõg̃buk- -soat ka kay imujumayũ. 
\v 7 Mẽmẽ oꞌju yabikbikap cejat topabe. Ibodup oꞌtupu ibui bewi ibaꞌat kadiatup. 
\v 8 Tupu buje ebadipdip itabẽg̃ayũ pig̃ꞌi oꞌat ipi ju mẽmẽ wap. Yaꞌõbuyxiayũ dak pig̃ꞌi oꞌat ip cewap yaꞌõbuyxi jĩjã cexe ip puye. Soat ip harpaꞌa kug̃ osodop yamuyde am. Waꞌe buximat kug̃ tak ip osodop- -ouro mug̃ẽg̃ẽ kug̃. Topapũn osodop tideꞌokuatim. Deus ebekitkit kawẽnwẽn ceweju iap tideꞌokuati buxim. 
\v 9 Pibodo iisuan oꞌjebibododon ip. Imẽn ibibodo ip:
\mi Kuy juk eꞌũ eg̃uy, i. Pũg̃ g̃u juk etaxijo eꞌũap puye soat tiwatwayũꞌin, soat aꞌõm kawẽnwẽnꞌukayũꞌin tak, soat iwarururuayũꞌin tak, soat kaka dag̃ayũꞌin tak, i. Imẽnpuye etaybit tupu am, i. Etaybit tupmuywut am tak, i. 
\v 10 Aꞌõbi ma soat eipi juayũ kukukayũm jeedop ip Deus eju, i. Paĩyũ buxim kapikpig̃ jeedop ip Deus peam- -ocekukukat peam, i.
\m Imẽn ip ibibodo.
\p
\v 11 Waram g̃uto oceak. Deus ekawẽn tojotjotꞌukayũ oyaꞌĩjojo. Deꞌat g̃u ip osodop- -kiiiii iãn. Imuweg̃ũn paꞌore osodop io. Ade jĩjã ma ip. Kacũg̃cũg̃ꞌi ip osodop yabikbikap akokoreren. Ebadipdip itabẽg̃ayũ akokoreren tak, yaꞌõbuyxiayũ akokoreren tak. 
\v 12 Yaꞌõberen oꞌjebibododon ip. Imẽn ibibodo ip:
\mi Ovelha buxim oeꞌũiat soat podi ma jedipap kug̃, i. Soat podi ma jaꞌõbacaap kug̃, i. Soat podi ma xipacap kug̃, i. Soat podi ma jetaybitbicap kug̃, i. Soat podi ma jaꞌõcaap kug̃, i. Soat podi ma jaꞌõbuyxiap kug̃, i. Soat podi ma jedipap kug̃, i. Soat kayap podi ma ocecokcok Cekay, ioꞌe ip jebibodo be.
\m Imẽn ibibodo ip.
\p
\v 13 Soat ma ip jebibododon oꞌe g̃ebuje bit waꞌõpiju- -kabi beacayũ, ipi juacayũ dak, ipi diotpeacayũ dak, tibog̃ cĩcãti dag̃acayũ dak- -soat kakeayũ. Imẽn ibibodo ip:
\mi Soat podi ma ẽn pit xipat, i. Soat podi ma ẽn pit aꞌõbuyxi, i. Soat podi ma ẽn pit edip, i. Soat podi ma ẽn pit aꞌõbaca, i. Imẽn cuy acece ewebe soat em, i. Soat em tak wuybuꞌum g̃u acesop imẽn iꞌe am ewebe, ioꞌe ip jebibodo be xikꞌi yabikbikap peat pe- -mẽmẽ- -ovelha buxim oeꞌũiat pe.
\p
\v 14 — Imẽn cuy ace — i oꞌjede ebadipdip itabẽg̃ayũ.
\p Yaꞌõbuyxiayũ dak pig̃ꞌi oꞌatꞌat ip topabe- -aypapayũ. Pig̃ꞌi oꞌatꞌat ip “Soat podi ma ẽn xipat” iꞌe am cebe.
\b
\c 6
\p
\v 1 Mẽmẽ tupmuymũg̃mũg̃ap oꞌg̃uywut wetabutpe. Koapat oꞌg̃uywut. 7 be osodop ip tupmuymũg̃mũg̃ap.
\p — Ejot cuy — ioꞌe yaꞌõberen ebadipdipayũꞌin- -itabẽg̃ayũꞌin.
\p Nobano aꞌõ buxim oꞌyaꞌõnuy yaꞌõpurug̃.
\p
\v 2 Waram g̃uto oceak. Cavaro ojojojo irucat. Yakpi jejeat daruk kug̃ oeku. Ixe xeat ouro mug̃ẽg̃ẽ oꞌjomõg̃ ya be- -ipi kukukat abeat- -idip cĩcãat. Oꞌjẽm soat aꞌõbacaap muꞌũmuꞌũm. Soat aꞌõbacaap muꞌũm ãm oꞌjẽm.
\p
\v 3 G̃ebuje mẽmẽ waraꞌat oꞌg̃uywut tupmuymũg̃mũg̃ap. Xepxep oꞌg̃uywut kuy.
\p — Ejot cuy — ioꞌe waraꞌat itabẽg̃ayũꞌin ebadipdipayũꞌin.
\p
\v 4 Waraꞌat osodot cavaro ipakpukat. Ixe xeat jaꞌõbacap oꞌg̃ũm yakpi jejeat pe.
\p — Aꞌõbi nopag̃õg̃õm jeꞌe ip jeweweju ipi dag̃acayũ — ioꞌe cexeat yakpi jejeat pe. Kaꞌũma ip kabaꞌũm jeꞌe waraꞌat eju. — Aꞌõbi jenopag̃õg̃õm jeꞌe ip soat — ioꞌe cebe.
\p Payao oꞌg̃ũm cebe yobog̃at.
\p
\v 5 G̃ebuje mẽmẽ waraꞌat oꞌg̃uywut tupmuymũg̃mũg̃ap. Ebapũg̃ kuy oꞌg̃uywut.
\p — Ejot cuy — ioꞌe waraꞌat ebadipdipayũꞌin itabẽg̃ayũꞌin.
\p Waram g̃uto oceak. Waraꞌat ojojojo cavaro iokat. Yakpi jejeat imupesarurunap kug̃ oeku jebui be. 
\v 6 Wuyaꞌĩjoiat oyaꞌĩjojo. Ebadipdip itabẽg̃ayũ parakpewi oyaꞌĩjojo.
\p — Pũg̃ litrom trigodadei tadeibog̃ cĩcã jeꞌe- -pũg̃ kabia ekapikapteim jeꞌe — ioꞌe. — Ebapũg̃ litrom cevadadadei dak tadeibog̃ cĩcã jeꞌe- -pũg̃ kabia ekapikapteim jeꞌe — ioꞌe. — Oliveiraꞌa xepti bit etimukẽrẽrẽn g̃u juy — ioꞌe. — Uvaꞌabidi dak etimukẽrẽrẽn g̃u juy — ioꞌe.
\p
\v 7 G̃ebuje mẽmẽ waraꞌat oꞌg̃uywut tupmuymũg̃mũg̃ap. Ebadipdip oꞌg̃uywut kuy. Ebapũg̃ mabuk opop imuywutꞌũmat.
\p — Ejot cuy — ioꞌe waraꞌat ebadipdipayuꞌin itabẽg̃ayũꞌin.
\p
\v 8 G̃ebuje waram g̃uto oceak. Cavaro ipekpukat ojojojo. Yakpi jejeat putet Ceꞌũap i osunuy. Ixe dobatban oekuku ip ceꞌũꞌũayũ dopdopap pewiayũ. Cexeat oꞌjekawẽn cebe ip.
\p — Adeayũ juy epeyaoka ipi juayũ — ioꞌe cebe ip. — Ebadipdip tobuxik puje, pũg̃ cuy epeyaoka — ioꞌe cebe ip. — Nopag̃õg̃õm ip epeg̃uap, repibun tak — ioꞌe. — Wãtaxipi pibun tak epeg̃uap ip, awaydip tag̃an tak, ikaꞌuan — ioꞌe cebe ip.
\p
\v 9 G̃ebuje mẽmẽ waraꞌat oꞌg̃uywut tupmuymũg̃mũg̃ap. Ebadipipdip oꞌg̃uywut kuy. Xepxep mabuk oꞌjepoyat imuywutꞌũmat. Oꞌyaokaka ip iayũꞌũmꞌũm biõg̃buk ojojojo wũnca mupikupikapꞌa diotpe caixaꞌa diotpe. Itakomaayũ juk ixeyũ oꞌyaoka Deus ekawẽn oꞌg̃uwẽnuwẽn ip puye, cekawẽn tag̃ oekuku ip puye dak. 
\v 10 Yaꞌõberen oꞌjewãwã ip:
\p — Ocekukukat, ẽn soat podi ma aꞌõbaca — ioꞌe ip. — Soat tag̃ eisu — ioꞌe ip yaꞌõberen. — Icẽmãn eꞌeꞌukat ẽn. Pug̃ũn xeꞌe ipiat ecesupiꞌajojoat kũyjobitꞌũmayũ be? — ioꞌe ip. — Pug̃ũn xeꞌe ipiat ecesupiꞌajojoat ocaokaayũ be? — ioꞌe ip yaꞌõberen.
\p
\v 11 Iboceat cesay oꞌg̃ũm cebe ip soat pe- -irucat.
\p — Epeyebodoy buk yopũt — ioꞌe cebe ip. — Itakomaayũ buk eykitpitpiyũ yaoka ma — ioꞌe cebe ip. — Eybure kapikpikꞌukayũꞌin yaoka mabuk ip apẽn cuk adi ip eyaoka iap puxim — ioꞌe cebe ip. — Ixeyũ aokaꞌũm pima bit cuy epeyebodoy — ioꞌe cebe ip.
\p
\v 12 G̃ebuje mẽmẽ waraꞌat oꞌg̃uywut tupmuymũg̃mũg̃ap. 6 be oꞌg̃uywut kuy. Pũg̃ ma omuy imuywutꞌũmat. Imuywut puje ipi oꞌjexixi jĩjã ma. Kaxiepiat iok oꞌe pag̃o iokat puxim- -mudiuhu doti buxim. Kaxiaat tak ipakpuk oꞌe doy buxim. 
\v 13 Kasopta dak oꞌtaꞌatꞌat kabi bewi. Oꞌtaꞌatꞌat ipi ju. Oꞌtaꞌatꞌat figoꞌa muyꞌatꞌacap puxim- -yakicatꞌa muyꞌatꞌacap puxim- -kabidoxixi be yamuyꞌatꞌacap puxim. 
\v 14 Kabi dak oꞌjeꞌarabot apẽn wuyju taperadup muꞌarabotboniap puxim. Coꞌa dak oꞌjeaewede jenuyap pewi soatꞌa. Tipꞌaweroro dak oꞌjedipewede jediptũyap pewi soat.
\p
\v 15 G̃ebuje soat ipi juayũ kukukayũ oꞌjewemunẽm- -iecug̃apyũ dak, sorarayũ kukukayũ dak, ibubut adeayũ dak, yaꞌõcayũ dak. Soat ipi juayũ oꞌjewemunẽm: jekpiwatpi ma kapikpikꞌukayũ, teiꞌũm kapikpikꞌukayũ dak. Soat ip oꞌjewemunẽm coꞌa kũy dag̃, coꞌa binũnpe dak. 
\v 16 Teꞌe ma ip oꞌjewãwã yaꞌõberen witaꞌa be, coꞌa be dak.
\p — Aꞌaꞌat cuy ocejeje ocemunẽm ãm — i teꞌe ma oꞌe ip coꞌa be, witaꞌa be dak. — Ocemunẽm cuy epeꞌe xikꞌi yabikbikap pe iat pe ocedobuxikap puxim — i teꞌe ma oꞌe ip. — Ocemunẽm cuy epeꞌe mẽmẽ itakoma ocekay buye — i teꞌe ma oꞌe ip. 
\v 17 — Mẽmẽ itakoma jĩjã ocekay, yaꞌõ kayayũ dak — ioꞌe ip. — Ixeyũ etakomaap ebapukap kabia ajẽm puje, kaꞌũma ma jepoyat. Soat iꞌũm — ioꞌe ip.
\b
\c 7
\p
\v 1 G̃ebuje Deus ekawẽn tojotjotꞌukayũ ojojojo ebadipdipayũ. Kacũg̃cũg̃ꞌi osodop ip ipiꞌabi dag̃. Kabido ixikixikꞌuk osodop ip ebadipdip kadiwiatpido. Kabido ixikixikꞌuk ip osodop ipi kay ibido kopap puxim, tibog̃cĩcãati kay dak, tũmũnꞌipꞌip kay dak. 
\v 2 Waraꞌat ojojojo g̃ebuje bit Deus ekawẽn tojotjotꞌukat. Kaxi jẽmjẽmap kadiwi oajẽm. Oajẽm teku Deus ebekit iam imubararakap kug̃ jebui be- -teku soat em itaicat ebekit iam imubararakap kug̃. Yaꞌõberen oꞌjewãwã jebadipyũ be- -Deus ekawẽn tojotjotꞌukayũ be- -ebadipdipayũ be. Deus kuy juk jaꞌõbacaap oꞌg̃ũm ixeyũ be. Jaꞌõbi ixeyũ oꞌg̃uju ipi mukẽrẽrẽn ãm, tibog̃cĩcãati mukẽrẽrẽn ãm tak.
\p
\v 3 — Deus buywatwatꞌukayũ dopaꞌa ocetopaꞌamubararak teku Deus ebekit iam — ioꞌe cebe ip. — Ocewebe ixeyũ dopaꞌa mubararakꞌũm pima bit, ipi epeg̃ukẽrẽrẽn g̃u, tibog̃cĩcãati dak epetimukẽrẽrẽn g̃u, tũmũnꞌipꞌip tak epeyopmukẽrẽrẽn g̃u — ioꞌe cebe ip.
\p — Haꞌa — ioꞌe ip.
\p
\v 4 Pebũrũ iteyũ Deus ebekitkiyũ iap oꞌg̃uwẽn owebe- -oꞌtopaꞌamubararak ip iap. Tak g̃u oꞌtopaꞌamubararak ip- -ade jĩjã ma- -144,000 be. Kiiiiãn. Soati watwatꞌin oꞌtopaꞌamubararak ip- -Israel naxeg̃ebitbiyũꞌin. 
\v 5-8 12,000 be oꞌtopaꞌamubararak ip Judá diwatwatꞌin; 12,000 be Rubem diwatwatꞌin tak; 12,000 be Gade diwatwatꞌin tak; 12,000 be Aser diwatwatꞌin tak; 12,000 Naftali diwatwatꞌin tak; 12,000 be Manassés diwatwatꞌin tak; 12,000 be Simeão diwatwatꞌin tak; 12,000 be Levi diwatwatꞌin tak; 12,000 be Issacar diwatwatꞌin tak; 12,000 be Zebulom diwatwatꞌin tak; 12,000 be José diwatwatꞌin tak; 12,000 be Benjamim diwatwatꞌin tak. Ibũrũ ma ip oꞌtopaꞌamubararak teyũku Deus ebekitkiyũ iam.
\p
\v 9 Waram g̃uto oceak. Tak g̃u wuyjuyũ ioꞌe kiiii. Ade jĩjã osodop ip. Imuweg̃ũn paꞌore ma osodop ip, ade jĩjã buye. Soat eipi watwatꞌin osodop ip, soat tiwatwatꞌin tak, soat iwarururuyũꞌin tak, soat aꞌõm kawẽnwẽnꞌukayũꞌin tak. Mẽmẽ abikbikap wap osodop ip jesay kug̃- -irucat kug̃. Kosunano kug̃ osodop ip jebui be.
\p
\v 10 — Deus acã wuydaxijojom — ioꞌe ip yaꞌõberen. — Mẽmẽ dak wuydaxijojom — ioꞌe ip. Ixe ma xikꞌi jabikbikap pe — ioꞌe ip yaꞌõberen.
\p
\v 11 Deus ekawẽn tojotjotꞌukayũ dak kacũg̃cũg̃ꞌi osodop ip yabikbikap akokoreren- -yaꞌõbuyxiayũ dak, ebadipdip itabẽg̃ayũ dak. Pig̃ꞌi oꞌat ip yabikbikap wap “Ẽn soat podi ma xipat” iꞌe am Deus pe.
\p
\v 12 Oꞌjebibododon ip Deus pe. Imẽn ibibodo:
\mi Imẽn cuy jeenuy, i. Deus ma soat podi ma xipat, i. Ixe ma soat podi ma jedipap kug̃, i. Ixe ma soat podi ma itaybitbit, i. “Xipat cĩcã ẽn ocexe” i juy ace cebe, i. Soat podi ma jaꞌõbuyxiap kug̃, i. Soat podi ma jaꞌõbacaap kug̃, i. Soat podi ma jebacaap kug̃ tak, i. Imẽn ma ixe g̃asũ. Kuyaje dak imẽn jeenuy. Soat iꞌũm puje dak, imẽn ma jeenuy, i. Imẽn cuy jeenuy, ioꞌe ip jebibododon.
\p
\v 13 — Abuyũ suteyũ cesayrurucayũ? — i juk oꞌe owebe yaꞌõbuyxiat, aypaat. — Pomawi ip osodot? — ioꞌe owebe.
\p
\v 14 — Bayꞌa, õn ma wetaybit g̃u. Ẽn acã etaybit — i juk oce cebe.
\p — Ixeyũ ipiatꞌajojom cĩcã juk adi osodop — ioꞌe owebe. — Inaka ibuꞌu g̃u oꞌe ip kũyjobit am Jesus aꞌõ kay — ioꞌe. — Mẽmẽ oꞌjedoyekereren wuywebeam iap kay itabut ip. Imẽnpuye soat tag̃ iisu ip doti iwuyꞌisuat puxim. Soat tag̃ ip ikẽrẽat kug̃ g̃u — ioꞌe owebe. 
\v 15 — Imẽnpuye ip kacũg̃cũg̃ꞌi Deus abikbikap wap g̃asũ — ioꞌe owebe. — Deus buywatwan ip kabiam, kabiog̃ tak — ioꞌe. — Deus xe ip nuynuy g̃asũ. Yabikbikap peat soat em ag̃ cekay ip xipatꞌũmat ebapukap puxim — ioꞌe. 
\v 16 — Waram pit irem g̃u ip. Soat em ibeg̃beg̃ ma. Ibipurug̃ g̃u dak ip jeedop. Kajepi kug̃ cĩcã g̃u dak ip jeedop — ioꞌe owebe. 
\v 17 — Mẽmẽ ma ixeyũ kukukan jeenuy apẽn õhõ iwat xipan jeõhõyũ kukap puxim. Ixeyũ idujowat wuymutaicinapti kay tikõn ãm. Deus itadisup ip. Waram pit ip jeetõn g̃u — ioꞌe owebe.
\b
\c 8
\p
\v 1 G̃ebuje mẽmẽ waraꞌat oꞌg̃uywut tupmuymũg̃mũg̃ap. Amap oꞌg̃uywut. 7 be oꞌg̃uywut kuy. Kaꞌũmg̃u waraꞌat oꞌe. Kuy oiꞌũm. Darem ma ip osodop mũg̃ kabi beacayũ- -meia hora ma. 
\v 2 Deus ekawẽn tojotjotꞌukayũ ojojojo g̃ebuje- -7 beayũ- -Deus xe kacũg̃cũg̃ꞌiayũ. Jexeat parasuy joꞌiat oꞌg̃ũm cebe ip. Pũg̃ pepepe ma oꞌg̃ũm cebe ip.
\p
\v 3 Waraꞌat oajẽm tõmteꞌokuatõm mupikupikapꞌa kay Deus ekawẽn tojotjotꞌukat- -caixaꞌa kay. Cũg̃ꞌi osunuy iboce. Tõmteꞌokuatõm mũnꞌa kug̃ oajẽm- -ouro mug̃ẽg̃ẽꞌaꞌa kug̃. Iboceat tõmteꞌokuatõm oꞌtõmũm cebe tõmꞌade.
\p — Deus ebekitkit kawẽnwẽn ceweju soat ip — ioꞌe cebe iboceat. Ixeyũ ekawẽn cuy eg̃uwekoy tõmteꞌokuatõm eju tõmupikupikapꞌa be ouro mug̃ẽg̃ẽꞌaꞌa be Deus abikbikap wap — ioꞌe cebe.
\p
\v 4 Oꞌtõmuwekoy Deus ebekitkit ekawẽn eju. Oꞌtõmupik. Tõmteꞌokuatõmtig̃ oꞌjedig̃eu Deus kay cekawẽn tojotjotꞌukat pui bewi- -Deus wap cũg̃ꞌiat pui bewi. Deus ebekitkit ekawẽn tak oꞌjeu cekay tig̃ eju. 
\v 5 Deus ekawẽn tojotjotꞌukat daxa oꞌjat tõmteꞌokuatõm mupikupikapꞌa bewi. Tõmteꞌokuatõm mũnꞌa oꞌyamunopapũn daxam. Oꞌyaxik ipi kay. Yaxik puje, porog̃iat oꞌe soat tag̃ ipi dag̃. Porog̃iat oꞌe soat tag̃ yaꞌõpararu, xiririkiat tak. Nobano dak oꞌe soat tag̃ ipi dag̃. Ipi dak oꞌjexixi jĩjã. Tũmũnꞌaꞌõ oꞌjedede soat tag̃ ipi dag̃.
\p
\v 6 G̃ebuje Deus ekawẽn tojotjotꞌukayũ parasuy joꞌiat oꞌjat imuyde am- -7 beayũ.
\p
\v 7 Koapat jeparasuy joꞌiat oꞌg̃uyde. Akadadada oꞌjedaedu daxa eju- -ade. Doy eju iwekoykey oꞌe. Kabi beat iwekoykeyat oꞌg̃uyꞌat ipi kay. Ade oꞌg̃upik ipiꞌin. Pũg̃ eipi oꞌg̃upik ebapũg̃ eipiayũꞌin. Xepxep pit oꞌjeipiepoyat ipiꞌũmat eipi. Tũmũnꞌipꞌip tak oꞌyopmupik yopꞌade. Pũg̃ꞌipꞌipꞌip oꞌyopmupik ebapũg̃ayũꞌipꞌin. Xepxep pit oꞌjeipepoyat ipikꞌũmatꞌip. Kapĩꞌidip tak oꞌtipik soatip. Kaꞌũma ma oꞌjedipepoyat.
\p
\v 8 G̃ebuje waraꞌat jeparasuy joꞌiat oꞌg̃uyde Deus ekawẽn tojotjotꞌukat. Xepxep oꞌe ip imuydedem kuy. Kabi beat coꞌa joꞌiatꞌa oꞌyamuakõm tibog̃cĩcãati be. Apikpig̃ pima oꞌyamuakõm. Tiꞌade oꞌjediewexaxat toy. Pũg̃ti oꞌjediewexat toy. Xepxepti bit idibi mabuk oꞌtinuy. Oꞌjediewexat g̃u toy. 
\v 9 Tibog̃cĩcãati dag̃ayũ oap ade- -idibi tiyuati dag̃acayũ. Pũg̃ꞌũm oeꞌũ ebapũg̃ayũꞌin. Tak g̃u kobexixi dak oꞌg̃uyubag̃bag̃bag̃. Ade jĩjã. Kiiiiãn. Pũg̃ ma oꞌg̃uybag̃bag̃bag̃ ebapũg̃ayũꞌin- -tibog̃cĩcãati adopa dag̃at.
\p
\v 10 G̃ebuje waraꞌat jeparasuy joꞌiat oꞌg̃uyde Deus ekawẽn tojotjotꞌukat. Ebapũg̃ oꞌe ip imuydedem kuy. Kasopta oꞌtaꞌat kabi kadiwi tabog̃ata. Tasop oꞌtanuy wexiktak puxim. Idibi be oꞌtaakõm. Pũg̃ti be oꞌtaakõm ebapũg̃tiayũdi be. Idiꞌaꞌa be dak oꞌtaakõm. Pũg̃tiꞌa be oꞌtaakõm ebapũg̃tiayũdiꞌa be. 
\v 11 Tacupata i ig̃oda butet omuy- -kasopta butet. Ixeda akõm puje idibi dak ticup oꞌe pũg̃ kadi. Pũg̃ti ticup oꞌe ebapũg̃ayũdiꞌin. Ade oap ipi watwat tikõn puje. Oap ip ticup pibun.
\p
\v 12 G̃ebuje waraꞌat jeparasuy joꞌiat oꞌg̃uyde Deus ekawẽn tojotjotꞌukat. Ebadipdip oꞌe ip imuydedem kuy. Pũg̃ kadi kaxiepiat oꞌsutamukẽrẽrẽn. Kaxiaat tak oꞌsutamukẽrẽrẽn ip pũg̃ kadi. Kasopta dak oꞌsutamukẽrẽrẽn ip pũg̃ kadi. Imẽnpuye kaxiepipũ ma oꞌe kaxi takẽrẽ buye. Kaxiamat tak yopĩt ma kabiam oꞌe. Kasopta dak yopĩt ma kabiam oꞌe. Kabiok oeku ebadipdip hora bima kabia bun. Kabiok oeku ebadipdip hora bima ixima bun.
\p
\v 13 Waram g̃uto oceak. Dace oceg̃ebaaꞌĩjojo. Um cĩcã jepupupum oeku. Yaꞌõberen ixe dace oꞌjewãwã.
\p — Karem g̃u ipi juayũ! — ioꞌe yaꞌõberen. — Ipiatpiꞌajojom cĩcã jeedop ip — ioꞌe yaꞌõberen. — Karem g̃u ipi juayũ — ioꞌe. — Ipiatꞌajojom cĩcã jeedop ip — ioꞌe. — Wararaꞌacat g̃asũ jeparasuy joꞌiat g̃uyde Deus ekawẽn tojotjotꞌukayũ — ioꞌe. — Ebapũg̃ayũ mabuk jeparasuy joꞌiat g̃uyde — ioꞌe. — Ixeyũ be imuyde buje, ipiat supiꞌajo jĩjã ipi juayũ — ioꞌe ixe dace.
\b
\c 9
\p
\v 1 G̃ebuje waraꞌat jeparasuy joꞌiat oꞌg̃uyde Deus ekawẽn tojotjotꞌukat. Pũg̃põg̃bi oꞌe ip imuydedem kuy. Kasopta joꞌiat ojojojo- -kabi kadiwi oꞌtakopiata joꞌiat. Kabi beat chave oꞌg̃ũm ixe be ikũybioreg̃ cĩcãatkũy domudipꞌukap echave. 
\v 2 Kasopta joꞌiat ig̃o kũy oꞌsukũynomudipꞌuk ibo echavem. Ikũynomudipꞌuk puje, oꞌtig̃cẽm ikũy bewi. Waẽn yobog̃at peatig̃ puxim oꞌtig̃cẽm. Ig̃odig̃ kaxi oꞌg̃upinẽm tig̃bog̃ cĩcã buye. Soat tag̃ oꞌe kabiok. 
\v 3 Arõxẽkxẽk coꞌiayũ oꞌkop ixe dig̃ eju. Ipi kay ip oꞌkop. Dat puxim ip tõg̃tapi osodop Deus aꞌõbi.
\p
\v 4 — Kapĩꞌidip cuy epetimukẽrẽrẽn g̃u — ioꞌe kabi beat cebe ip- -arõxẽkxẽk coꞌiayũ be. — Tũmũnꞌipꞌip tak cuy epeyopmukẽrẽrẽn g̃u — ioꞌe. — Waraꞌat tak cuy epeꞌgukẽrẽrẽn g̃u kadai — ioꞌe. — Teku Deus ebekit iam topaꞌa bararukꞌũmayũ kay acã juy epeju — ioꞌe. — Ixeyũ be acã juy ipiat epesupiꞌajoat — ioꞌe cebe ip- -arõxẽkxẽk coꞌiayũ be. 
\v 5 — G̃asũ bit puk yaoka pi ma eywebe — ioꞌe cebe ip. — Ipiat pit epesupiꞌajojoat cebe ip 5 kaxi bun ma — ioꞌe cebe ip.
\p Ixeyũ arõxẽkxẽk coꞌiayũ tõg̃tapi osodop ip dat puxim. 
\v 6 Deus ebekitkitꞌũmayũ be ipiat oꞌsupiꞌajojoat ip dat tõg̃tapi joꞌi 5 kaxi bima- -topaꞌa bararukꞌũmayũ be. Imẽnpuye jeꞌũap kudadam ip jeeku. Inaka jeꞌũap ip tobuxik g̃u. Jeꞌũ ojuy maꞌg̃u ip jeeku. Inaka ceꞌũ baꞌore jeꞌe ip.
\p
\v 7 Ixeyũ arõxẽkxẽk coꞌiayũ cavaroyũ buxim osodop ip- -jenopag̃õg̃õm cumayũ buxim- -icaat kug̃ ip jewebe. Jadag̃at kug̃ ip oeku ouro mug̃ẽg̃ẽ joꞌiat kug̃. Ag̃okatkat topa buxim ip oꞌtopadop. 
\v 8 Ayacatꞌadap puxim ip oꞌyadaptop. Leão nũy buxim oꞌtũydop ip. 
\v 9 Icaat kug̃ oeku ip jekũmꞌa eju- -ferro mug̃ẽg̃ẽ kug̃. Carro jenopag̃õg̃õap kay daodaodao ma cucum iap aꞌõ buxim oꞌceg̃ebaꞌaꞌõnuy- -cavaroyũ imupuxikpuxig̃iap aꞌõ buxim. 
\v 10 Dat puxim ip oeku tõg̃tapiat kug̃ jekpu be. Jenõg̃tapian ma juk adi oekuku ip ipiatpiꞌajojoan topaꞌa bararukꞌũmayũ be. 5 kaxi bima juk adi oekuku ip ipiatpiꞌajojoan cebe ip. 
\v 11 Ixeyũ kukukat ikũybioreg̃ cĩcãatkũy beayũ kukukat osunuy. Ixe butet Abadom i omuy Judeuyũ aꞌõm- -Hebreu aꞌõm. Apolião i omuy ibutet Grego aꞌõm. Ibutet wuymuꞌũmꞌũmꞌukat iape wuyaꞌõm.
\p
\v 12 Kuy pũg̃ oꞌkap ipararu jĩjãat. Xepxep mabuk omuyku.
\p
\v 13 G̃ebuje waraꞌat jeparasuy joꞌiat oꞌg̃uyde Deus ekawẽn tojotjotꞌukat. 6 be oꞌe ip imuydedem kuy. Tõmteꞌokuatõm mupikupikapꞌa bewiatꞌaꞌõ oyaꞌĩjojo- -ouro mug̃ẽg̃ẽꞌa bewiatꞌaꞌõ- -Deus abikbikap wapatꞌaꞌõ. 
\v 14 Ixe aꞌõ oꞌjekawẽn ixe Deus ekawẽn tojotjotꞌukat pe- -imuyde isuat pe.
\p — Ebureyũ juy eg̃uwekap — ioꞌe. — Ebadipdip omuy ip taomũnmũn — ioꞌe. — Taomũnmũn ip omuy Eufratesdi xe- -tibog̃ati xe — ioꞌe.
\p
\v 15 Kabi beat aꞌõbi ixeyũ Deus ekawẽn tojotjotꞌukayũ soat kug̃ ip osodop jebui be. Soat kug̃ ip osodop pũg̃ yaoka am ebapũg̃ayũꞌin- -ipi watwatꞌin. Deus epeju iꞌeap wiwim ip osodop. Waraꞌat koato be g̃u jeeju ip ixeyũ aoka am, waraꞌat kaxi be g̃u dak, waraꞌat kabia be g̃u dak, waraꞌat ehora be g̃u dak. Deus pe “Epeju” iꞌe buje acã jeeju ip ixeyũ aoka am. Ixeyũ ebadipdipayũ oꞌg̃uwekap. 
\v 16 Pebũrũ ixeyũ esorarayũ iap awẽg̃ oyawẽg̃tobuxik kuy. Takꞌũm ip osodop- -ade jĩjã. Kiiiiãn. 200,000,000 be ip osodop- -cavaro akpi jejeayũ- -nopag̃õg̃õꞌukayũ. 
\v 17 Sorarayũ õhõyũ ojojojo wexey joꞌiat pe cavaroyũ. Ixeyũ akpi jejeayũ dak ojojojo. Soat yakpi jejeayũ icaat kug̃ ip osodop jekũmꞌa eju. Pũg̃pũg̃ ikũmꞌa ejuat ipakpuk osunuy daxa buxim. Wararaꞌacat iremrum osunuy witaꞌa buxim- -yadeibog̃atꞌa buxim- -safiraꞌa buxim. Wararaꞌacat ipekpuk osunuy enxofrenõm puxim. Cavaroꞌa leãoꞌa buxim oꞌyanuy. Ibi dag̃wi dig̃ cẽmcẽm oꞌe daxadig̃, enxofrenõmtig̃ tak. Daxa dak cẽmcẽm oꞌe ibi bewi. 
\v 18 Ade jĩjã ipi watwat oap ip cavaro bi dag̃wi ijẽmꞌibit pibun- -daxae pibun, daxadig̃ pibun tak, enxofrenõmtig̃ pibun tak. Pũg̃ꞌũm oeꞌũ ebapũg̃ayũꞌin. Xepxep oꞌjepoyat. Imẽn ma ip oap. Xereꞌũma ipi watwat oap. Ade jĩjã. 
\v 19 Cavaroyũ ipi watwat oꞌyaoka jebi bewi oꞌjẽm ian, jedoaybu bean tak. Ipiat oꞌsupiꞌajojoat ip ipi watwat pe puybu nuypi joꞌi.
\p
\v 20 Cavaroyũ ipiatpiꞌajojoanap epere buje, jemumug̃ẽ kay jetabucap oꞌjepere g̃u ip- -oꞌjepoyatꞌiayũ. Wuyju Deus kay iap coꞌi ip osodop jemumug̃ẽ kay jĩjã. Jemumug̃ẽ kay jĩjã ip osodop- -ouro mug̃ẽg̃ẽ kay, prata mug̃ẽg̃ẽ kay dak, bronze mug̃ẽg̃ẽ kay dak, witaꞌa mug̃ẽg̃ẽ kay dak, ip mug̃ẽg̃ẽ kay dak. Ibiõg̃buk kẽrẽayũ kay dak ip osodop. Ixeyũ emumug̃ẽg̃ẽ be ijo baꞌore, cekũyjo baꞌore dak ip, cexĩg̃xĩg̃ paꞌore dak ip. Inaka tũybe iteyũ deusyũ iãn oꞌe ip. Oeꞌũꞌũ g̃u ip arõxẽkxẽk coꞌiayũ nũy pibun, cavaro nũy pibun tak. Imẽnpit jetabucap oꞌjepere g̃u ip jemumug̃ẽg̃ẽ kay. Deusat kay g̃u ip oꞌe. 
\v 21 Waraꞌacat aokakaap ip oꞌjepere g̃u. Jebukaypacap tak oꞌjepere g̃u ip. Wararaꞌacat tayxi kaykayap tak oꞌjepere g̃u ip. Wararaꞌacat itop kaykayap tak oꞌjepere g̃u ip. Wararaꞌacat pubut tujupaꞌumꞌumap tak oꞌjepere g̃u ip. Oibuꞌun g̃u ip ikẽrẽat mug̃ẽg̃ẽm.
\b
\c 10
\p
\v 1 G̃ebuje waraꞌat ojojojo Deus ekawẽn tojotjotꞌukat- -yaꞌõbacaat. Kabi kadiwi kom pima ojojojo. Ixe esay kabikerereat coꞌi osunuy. Koropsanobu oꞌjebueku yakokoreren. Ixe dopa kaxiepiat puxim oꞌtopanuy. Ixe dao daxae iecũg̃at puxim oꞌtaonuy- -isopat puxim. 
\v 2 Livrodup kug̃ osunuy jebui be- -tupꞌĩcatup kug̃- -tupayaatup kug̃. Jei oꞌsuimõg̃ tibog̃ cĩcãati be jedaoat kadiat i. Jedaoꞌũg̃at kadiat i bit oꞌsuimõg̃ ipi be. 
\v 3 Yaꞌõberen oꞌjewãwã leão ewãwãap puxim. Cewãwã buje 7 be xiririkpawꞌiat oꞌyaꞌõbu yaꞌõberen. Oꞌjepaw yaꞌõberen. 
\v 4 Cepaw isum apẽn cuk ip oꞌe iaptup kuka otupmubararak. Kabi beat pit oꞌjekawẽn owebe.
\p — Apẽn 7 be xiririkpawꞌiat oꞌe ewebe iaptup g̃u juy etupmubararak — ioꞌe owebe. — Etupmubararak g̃u juy wararaꞌacat pe itaybicap puxim — ioꞌe owebe.
\p
\v 5 G̃ebuje oꞌjebaepacũg̃ kabi kay Deus ekawẽn tojotjotꞌukat jebaꞌat kadi- -tibog̃ cĩcãati be cũg̃ꞌiat- -ipi be cũg̃ꞌiat- -kuy ojojojoiat. 
\v 6 Oꞌjekawẽn Deus aꞌõpiju. Ixe Deus soat em itait. Jeꞌũ g̃u ixe bit. Ixe juk kabi oꞌg̃ug̃ẽ, soat kabi beacat tak. Ipi dak cuk oꞌg̃ug̃ẽ, soat ipi juacat tak. Tibog̃ cĩcãati dak oꞌtimug̃ẽ, soat tidag̃acat tak.
\p — G̃asũ bit ibun g̃u jeku — ioꞌe Deus aꞌõpiju. 
\v 7 — “Soat jeꞌbapuk obikuyap tag̃,” i juk oꞌe Deus jebuywatwatꞌukayũ be- -jekawẽn muwẽnuwẽnꞌukayũ be — ioꞌe owebe. — Apẽn Deus ibikuy osunuy iap ibaꞌarẽm osunuy soat pe kuy bima — ioꞌe. — Ixe ekawẽn tojotjotꞌukat pe jeparasuy joꞌiat muyde buje bit, soat jeꞌbapuk apẽn ibikuy osunuy iap tag̃- -kanomũmat pe jeparasuy joꞌiat muyde buje — ioꞌe owebe.
\p
\v 8 Kabi kadiwiat aꞌõ waram oyaꞌĩjojo. Waram oꞌjekawẽn owebe.
\p — Tupayaatup cuy etupu- -tupꞌĩcatup- -Deus ekawẽn tojotjotꞌukat pui bewi- -ipi be cũg̃ꞌiat pui bewi- -tibog̃ cĩcãati be cũg̃ꞌiat pui bewi — ioꞌe owebe.
\p
\v 9 Oju cekay.
\p — Ma — i oce cebe. — Etupũm owebe, — i oce cebe.
\p — Juku — ioꞌe. — Etupu — ioꞌe owebe. — Etupꞌo — ioꞌe. — Ebi be bima tupkurukuru jeꞌe eit puxim — ioꞌe. — Edada be bit, tupsak jeꞌe — ioꞌe.
\p
\v 10 Otupu ibui bewi tupꞌĩcatup, tupayaatup. Otupkũn. Otupꞌo. Tupkurukuru oꞌe obi be bima. Tupkũn puje bit oꞌe tupsak odada be.
\p
\v 11 — Waram tak cuy apẽn Deus adeayũ idaxijo iap ekawẽn cuy eg̃uwẽnuwẽn soat pe — ioꞌe owebe. — “Ixe soat tiwatwayũꞌin idaxijo pin,” i juy ece, “soat ka watwayũꞌin tak, soat eipi watwayũꞌin tak, soat aꞌõm kawẽnwẽnꞌukayũꞌin tak,” i juy ece soat pe — ioꞌe owebe.
\b
\c 11
\p
\v 1 G̃ebuje kabi beat imuweg̃ũng̃ũnapꞌip oꞌyopũm owebe.
\p — Deus eju kawẽnwẽnapꞌa juy eyamuweg̃ũn- -yabog̃atꞌa — ioꞌe owebe. — Wũnca mupikupikapꞌa dak cuy eyamuweg̃ũn- -caixaꞌa — ioꞌe. — Pebũrũ paxi eꞌem “Ẽn xipat cĩcã,” i Deus pe ceweju kawẽnwẽnapꞌa be? Ixeyũ dak cuy eg̃uweg̃ũn — ioꞌe owebe. 
\v 2 — Kacũg̃kadiat pit cuy eg̃uweg̃ũn g̃u- -yakokorerenayũ yanaxinõm — ioꞌe. — “Wekawẽn kayꞌũmayũ jeõm oweju kawẽnwẽnapꞌa naxinõm pe,” i juk oꞌe Deus — ioꞌe owebe. — 42 kaxi bun warẽmtag̃ ma jeku ip Deus ka dag̃- -ikẽrẽat kug̃ g̃uiat ka dag̃ — ioꞌe owebe. 
\v 3 — Xepxepayũ og̃uju wekawẽn muwẽn ãm — ioꞌe. — Ikurususucat kug̃ jeku ip jesay kug̃ oceg̃uycũg̃ eykay eyju warẽmtag̃ ma jekukum puye iap mubapuk am soat pe. Ibun cĩcã jeedop ip Deus ekawẽn muwẽnuwẽn- -1,260 kabia bun — ioꞌe.
\p
\v 4 Ixeyũ xepxepayũ oliveiraꞌip puxim wekawẽn muwẽnuwẽnꞌukayũ. Lamparinaꞌa mũn puxim tak ip- -ipi juacat kukat etabun anuynuyatꞌa buxim. 
\v 5 Wararaꞌacayũ warẽmtag̃ ixeyũ xepxepayũ kuk ojuy bima, daxa cẽmcẽm ikõmbie dag̃wi yaoka am. Imẽnpuye jeꞌũ ip warẽmtag̃ ikuk ojuyayũ. 
\v 6 Ixeyũ aꞌõbi mubaꞌat ajẽmjẽm g̃u Deus ekawẽn muwẽnuwẽn ip pima. Deus aꞌõbacaap kug̃ ip xepxepayũ. Idiꞌa dak ip idimuwexat toy jaꞌõbi. Jaꞌõbi ip warẽmtaksug̃at g̃udot ipi juayũ muꞌũm ãm, ku beacat muꞌũm ãm tak, ku muypiꞌũm ãm. Imudot pin pima, ip g̃udot.
\p
\v 7 Deus ekawẽn muwẽn epere isum yobog̃ cĩcãat jajẽm ipararu jĩjãat. Jajẽm ikũybioreg̃ cĩcãatkũy bewi. Jebacacan jeꞌe xepxepayũ eju. Xepxepayũ aꞌõbacaap g̃uꞌũm ipararu jĩjãat. Yaoka ip. 
\v 8 Ixeyũꞌũmꞌũm jebit poꞌi jeedop akidag̃ ikabog̃atka be- -korosa be ixeyũ kukukat oꞌsubamupaya ip iatka be. Poꞌi jeedop ip ukꞌa ukpibubu be soat pe ijo am. Ibo ka watwat kay g̃ebum pima:
\p — Sodoma ka watwat coꞌi ip ikẽrẽat kug̃ — i wuyju eꞌem. — Egito eipi watwat coꞌi ip ikẽrẽat kug̃ — i dak.
\m
\v 9 Ibunꞌũma jeak ip adeayũ ixeyũꞌũmꞌũm jebit kay- -ebapũg̃ kabia bun ma, ipidaseat kabia dak. Adeayũ jeak ixeyũꞌũmꞌũm kay- -soat eipi watwatꞌin, soati watwatꞌin tak, soat aꞌõm kawẽnwẽnꞌukayũꞌin tak, soat iwarururuayũꞌin tak. Ikot an g̃u ip.
\p — Ixeyũꞌũmꞌũm cuy epejokot g̃u — i jeꞌe ip soat.
\p
\v 10 Icokcok cĩcã jeꞌe ip ipi juacayũ xepxepayũꞌũmꞌũm oeꞌũ iap kay- -Deus ekawẽn muwẽnuwẽnꞌukayũꞌũmꞌũm oeꞌũ iap kay. Peta g̃ug̃ẽ ip jecokcokap pibun ma. Iũmũmap jeꞌg̃ũm ip jewewebe jecokcokap pibun. Deus ekawẽn muwẽnuwẽnꞌukayũ ipiat oꞌsupiꞌajoat ipi watwat kay- -ixeyũ xepxepayũ. Imẽnpuye icokcok jeꞌe ip xepxepayũꞌũmꞌũm eꞌũap kay. 
\v 11 Xet. Xet. Xet. Kabiam. Kaxicug̃ pima, puw, Deus oꞌjepuw cekay ip jebidom. Waram ip oꞌjetait. Kirikꞌãy. Oꞌãyꞌãy ip. Imẽnpuye iparara jĩjã ip oꞌe waram ip oꞌjetait iap oꞌtobuxik puye. 
\v 12 Kabi beat yaꞌõberen oꞌjewãwã xepxepayũ be- -Deus ekawẽn muwẽnuwẽnꞌukayũ be- -waram oꞌjetaitꞌiayũ be.
\p — Epeyeu juy ijodi — ioꞌe cebe ip.
\p Jekay itakomaayũ etabun ma ip oꞌjeu kabi kay g̃ebuje bit. Kabikererereat tag̃ ip oꞌjeu.
\p
\v 13 Ceu isum ip ipi oꞌjexixi jĩjã. Pũg̃ kadi oꞌsukamuꞌũm 10 beatkaꞌin. Tak g̃u oap ip ipi exixi buje. Ade jĩjã oap ip. 7,000 beayũꞌũmꞌũm oap ip. Iparara jĩjã oꞌe ip oꞌjepoyatꞌiayũ.
\p — Deus soat podi ma yaꞌõbaca — ioꞌe ip jeparara pibun. — Kabi beacayũ kukukat soat podi ma yaꞌõbaca — ioꞌe ip jeparara pibun.
\p
\v 14 Kuy xepxep oꞌkap ipararu jĩjãat. Ag̃ cuy epesop imẽnpit. Waraꞌat cuy omuyku ipararu jĩjãat. Ebapũg̃ jeedop ip.
\p
\v 15 G̃ebuje waraꞌat jeparasuy joꞌiat oꞌg̃uyde Deus ekawẽn tojotjotꞌukat. 7 be kuy imuydedem oꞌe. Kaꞌũmg̃u waraꞌat. Oꞌe kuy.
\p — G̃asũ Deus soat kukukan oꞌe — ioꞌe kabi beayũ yaꞌõberen. — Ixe emunaẽ dak soat kukukan oꞌe g̃asũ — ioꞌe ip. — Soat em ixe soat kukukan jeenuy. Pug̃ũn xeꞌe ixe soat kukukan iap iꞌũm? Kaꞌũma em ma — ioꞌe ip.
\p
\v 16 Yaꞌõbuyxiayũ dak pig̃ꞌi oꞌatꞌat ip jedop am ipi ju Deus wap “Ẽn xipat” iꞌe am cebe- -24 beayũ, Deus xeayũ, jabikbikap ceje kaxikxikꞌiayũ.
\q
\v 17 — Ocekukukat, ẽn acã Deusat — ioꞌe ip. — Ẽn soat podi ma aꞌõbaca — ioꞌe ip. — G̃asũ ẽn etabẽg̃ — i. — Kuyje dak cuk adi etabẽg̃ eg̃uy — i. — Kuy juk aꞌõbacaap eg̃ubapuk soat pe — i. — Imẽnpuye “Ẽn xipat cĩcã,” i oceju eꞌem ewebe — i. — Soat kukukan ece g̃asũ — ioꞌe ip. 
\v 18 — Ekay itabutꞌũmayũ itakoma jĩjã ekay, etakomaap mubapukap ehora oajẽm puye — i. — G̃asũ ipiat esupiꞌajojoat aꞌõkayꞌũmayũ be — i. — Imẽnpuye itakoma jĩjã ip ekay — i. — Apẽn cuk adi oekuku ip ipi ju bima iaptei eteida soat pe ceꞌũꞌũayũ be — i. Cedag̃ ma juk adi oekuku ip iaptei eteida ebuywatwatꞌukayũ be- -ekawẽn muwẽnuwẽnꞌukayũ be dak, soat ebekitkit pe dak, ibuyxim ekukukꞌukayũ be dak — i. — Soat pe cedag̃ ma eteida- -yobog̃ayũ be, kaꞌũmaayũ be dak — i. — G̃asũ dak ipi muꞌũmuꞌũmꞌukayũ eg̃uꞌũm- -aꞌõkayꞌũmayũ — ioꞌe.
\m Imẽn oꞌe ip yaꞌõbuyxiayũ Deus pe.
\p
\v 19 Deus nuynuyapꞌa exĩntabi oꞌjekoce g̃ebuje- -kabi beatꞌa. Deus ekawẽn kukatopa mũnꞌa yabapuk oꞌe soat pe- -witadopa be ibararak iat mũnꞌa- -caixaꞌa- -ouro mug̃ẽg̃ẽꞌa. Ig̃oꞌa jo isum xiririkiat oꞌjepaw yaꞌõpurug̃. Kõnẽkõnẽk ioꞌe. Xiririk xiririk ioꞌe. Ipi oꞌjexixi jĩjã. Akadadada oꞌtaꞌat ipi be taꞌade.
\b
\c 12
\p
\v 1 G̃ebuje waraꞌat ipararuat ojojojo kabi be yobog̃at. Oꞌjebapuk omukũyjo am apẽn g̃uyjom jebapuk iam. Koam ayacat ojojojo. Iekabek oeku kaxiepiat kug̃. Kaxiaat ixe i diotpe osunuy. Ouro mug̃ẽg̃ẽ osunuy ya be- -12 be kasopta kug̃at. 
\v 2 Yukreg̃ osunuy. It kam pasug̃ osunuy. Yaꞌõberen oꞌjewãwã jeꞌit pibun.
\p
\v 3 G̃ebuje waraꞌacat oꞌjebapuk kabi be omukũyjo am apẽn g̃uyjom jebapuk iam. Seg̃emoxixi joꞌiat ojojojo ipakpukat. 7 be yaꞌa oꞌyanuy. Soatꞌa be ouro mug̃ẽg̃ẽ kukukug̃ osunuy. 10 be yakanasũ. 
\v 4 Taꞌadeata kug̃ oeku jenomuju jedoaybu eju kasopta. Pũg̃ta oꞌtaꞌuk kasopta ebapũg̃ayũdaꞌin. Tamuyꞌatꞌan oeku ipi kay. Cũ. Oꞌjecũg̃ yukreg̃at tobuxik puje. Ixe wap cũg̃ꞌi osunuy iꞌit oap ojuy. Ikap isum iꞌit o ojuy osunuy. 
\v 5 Ayacat oꞌsuꞌitkap ag̃okatkat. Ixe ag̃okatkat soat ka kukukan jeenuy g̃uyjom. Yaꞌõpurug̃ ip jukuk jebui be icaat kukat puxim. Kaꞌũma ma kũyjobitꞌũm jeenuy ixe aꞌõ kay. Soat yaꞌõ kay jeedop ip kũyjobit. Bekicat kap isum Deus pit oꞌtakoy. Kabi kay oꞌtujuu soat em jeenuy ãm jexe. Oꞌtujuu seg̃emoxixi be iꞌoap puxim. 
\v 6 Ayacat tak oꞌjenapõn ukꞌaꞌũmat kay. Iboce kuy juk Deus soat oꞌg̃umuxipan tũy ãm. Deus xipan jukuk iboce. 1,260 kabia bun xipan jukuk.
\p
\v 7 G̃ebuje nopag̃õg̃õm oꞌe ip jeweweju ma kabi beacayũ. Miguel aꞌõkayayũ nopag̃õg̃õm oꞌe seg̃emoxixi aꞌõkayayũ eju. Miguel aꞌõkayayũ Deus ekawẽn tojotjotꞌukayũ. Seg̃emoxixi aꞌõkayayũ Deus ekawẽn tojotjotꞌuk osodop ip kuy bima. G̃asũ bit oibuꞌun ip Deus ekawẽn tojotjon. 
\v 8 Miguel aꞌõkayayũ seg̃emoxixi aꞌõkayayũ aꞌõbacaap oꞌg̃uꞌũm. Top paꞌore oꞌe ip kabi be. Deus oibuꞌun ip ikug̃. 
\v 9 Seg̃emoxixi oꞌg̃ujẽm ip kabi bewi. Kuyje seg̃emoxixi puybum osunuy- -Deus ekadai be osunuyiat. Ibiõg̃buk kẽrẽayũ kukukat ixe. Satanás i ibutet. Ibutet ade. Soat ipi watwat mug̃uykukukuꞌukat ixe. Ixe ma oꞌjoxik ip kabi bewi. Ipi kay oꞌjoxik ip yaꞌõkayayũ eju.
\p
\v 10 G̃ebuje kabi beat oyaꞌĩjojo. Yaꞌõberen oꞌjekawẽn. Imẽn ixe oꞌe:
\p — G̃asũ bit Deus ipi juacayũ daxijojoapi oibuꞌun — ioꞌe. — Kuy juk jaꞌõbacaap oꞌg̃ubapukpuk soat pe — ioꞌe. — Ixe acã soat kukukan oꞌe — ioꞌe. — Deus emunaẽ dak jaꞌõbacaap oꞌg̃ubapukpuk soat pe- -Cristo — ioꞌe. — “Soat podi ma waꞌõbaca,” ioꞌe soat pe — ioꞌe. — Wuykitpitpiyũ muymuyꞌukat oꞌjoxik kabi bewi — ioꞌe. — Ixe teꞌe ma imuymuyꞌuk ip osunuynuynuy Deus pe — ioꞌe. — “Ikẽrẽat kug̃ eyju Deus xe,” i teꞌe ma eꞌeꞌuk osunuynuynuy. Soat em wuykitpitpiyũ muymuyꞌuk osunuynuynuy- -kabiabun, iximabun tak — ioꞌe. — Deus ixe bit oꞌjoxik kabi bewi — ioꞌe. 
\v 11 — Iparara g̃u ip osodop wararaꞌacat pe jaokaap puxim wuykitpitpiyũ Jesus kayayũ — ioꞌe. — Jetabucap oꞌjepere g̃u ip jaokaap puxim. Itabut osodop ip mẽmẽ buxim oꞌjedoyekereren jeꞌũ ãm wuywebeam iap kay — ioꞌe. — Ibuꞌu g̃u oꞌe ip kawẽn icẽmat muwẽn ãm — ioꞌe. — Imẽnpuye jemuymuyꞌukat aꞌõbacaap oꞌg̃uꞌũm ip — ioꞌe. 
\v 12 — Imẽneju: “Kabi icokcok cuy jeenuy,” i õn eꞌem. “Kabi beacayũ dak icokcok cĩcã juy jeedop ip,” i õn eꞌem — ioꞌe. — Karem ipi juacat, tibog̃ cĩcãati beacat tak — ioꞌe. — Ipiatꞌajojom cĩcã ip jeedop, ibiõg̃buk kẽrẽayũ kukukat kuy oꞌkop cekay ip puye — ioꞌe. — Itaybit darem ma ipiat osupiꞌajojoat Jesus kay itabucayũ be iam — ioꞌe. — Imẽnpuye itakoma jĩjã oꞌe — ioꞌe.
\p
\v 13 Ipi be juk oxik ip iam itaybit pima, ayacat tobatban oeku- -ag̃okatkatꞌitꞌit kukat tobatban- -ikapꞌisuat kukat tobatban. Tobatban oeku yaoka ojuy. 
\v 14 Inaka Deus dace buximat eg̃eba oꞌceg̃ebaũm ayacat pe. Oꞌceg̃ebaũm cebe pupupum jenapõn ãm jeka kay- -ukꞌaꞌũmatka kay. Ibo ka be Deus xipan ixe jukuk. Ebapũg̃ koato bun xipan jukuk, ipidaseat koato dak. Cekaykay baꞌore jeenuy puybu joꞌiat pe. 
\v 15 Seg̃emoxixi bit idibi oꞌtimujẽm jekõmbie dag̃wi. Idixidi buxim oꞌtimujẽm. Oꞌtimujẽm wũy jĩjã ayacat tujowacap ojuy. 
\v 16 Ipi bit ayacat oꞌtaxijo. Oꞌjedeg̃ idibi õm ãm seg̃emoxixi kõmbie dag̃wiati õm ãm. 
\v 17 Imẽnpuye seg̃emoxixi itakoma jĩjã oꞌe ayacat kay. Oꞌju nopag̃õg̃õ ãm ixe uktakyũ eju- -soat eju- -Deus ekawẽn kay kũyjobicayũ eju- -Jesus ekawẽn tag̃ jekukuꞌukayũ eju- -kawẽn icẽmat tag̃ jekukuꞌukayũ eju. 
\v 18 Seg̃emoxixi bit kaꞌoririt pe osunuy. Cũg̃ꞌi osunuy kaꞌũma kug̃ ma- -ibuipuk ma.
\b
\c 13
\p
\v 1 G̃ebuje ipararu jĩjãat ojojojo. Tibog̃ cĩcãati bewi jeuhum oꞌe kapurũg̃ kay. 7 be yaꞌa. 10 be yakanasũyũ. Ouro mug̃ẽg̃ẽ kukukug̃ osunuy soat akanasũ dag̃ wararaꞌacat kukukꞌukat adag̃at puxim. Deus muymuyap ibararak osodop soatꞌa dag̃. 
\v 2 Ixe ipararu jĩjãat leopardo buxim osunuy- -wida buxim. Ixe i urso i buxim- -widabaro i buxim. Leão bi buxim oꞌsubinuy. Seg̃emoxixi jaꞌõbacaap oꞌg̃ũm ipararu jĩjãat pe. Jabikbikap tak oꞌg̃ũm cebe. Imẽnpuye seg̃emoxixi joꞌi oꞌe yaꞌõca. Kũyjobit oꞌe ip seg̃emoxixi aꞌõkayayũ ipararu jĩjãat aꞌõ kay dak. 
\v 3 Pũg̃ꞌa werowero kug̃ oꞌyanuy ipararu jĩjãatꞌa. Ceꞌũatꞌa joꞌi oꞌyanuy. Werowerobog̃ pit kuy oiyo. Imẽnpuye:
\p — Apẽnpuye xeꞌe oeꞌũ g̃u werowero pibun? — ioꞌe ip jewewebe ipi dag̃acat.
\m Itabẽg̃bẽg̃ oꞌe ip yajojom. Kũyjobit ip oꞌe yaꞌõ kay oeꞌũ g̃u buye. 
\v 4 Seg̃emoxixi jaꞌõbacaap oꞌg̃ũm ipararu jĩjãat pe. Imẽnpuye soat ipi juacat itabut cĩcã osodop seg̃emoxixi kay. Ipararu jĩjãat aꞌõ kay dak ip osodop.
\p — Soat podi ma ipararu jĩjãat jaꞌõbacaap kug̃ — i teꞌe ma oꞌe ip. — Kaꞌũma be ma ixe aꞌõbacaap muꞌũm put — i teꞌe ma oꞌe ip.
\m Tũybe seg̃emoxixi Deus iãn oꞌe ip.
\p
\v 5 Seg̃emoxixi oꞌjekawẽn ipararu jĩjãat pe.
\p — Deus cuy ejomuymuy — ioꞌe cebe. — Ekawẽnkẽrẽm cuy eg̃uy — ioꞌe cebe — Quarenta e dois kaxi bun cuy ejeku ipi dag̃ayũ paraktag̃ — ioꞌe cebe.
\p
\v 6 Imẽnpuye ipararu jĩjãat Deus oꞌjomuymuy jĩjã. Deus oꞌsubutetmuymuy. Deus nuynuyap tak oꞌjomuymuy jĩjã. Kabi beayũ dak oꞌjomuymuy jĩjã.
\p
\v 7 — Deus ebekitkit eju juy nopag̃õg̃õm eg̃uy — ioꞌe seg̃emoxixi cebe. — Eg̃ubuꞌun cuy ip Deus kay — ioꞌe ipararu jĩjãat pe.
\p Seg̃emoxixi jaꞌõbacaap oꞌg̃ũm cebe soat tiwatwatꞌin yaꞌõ kay iꞌe am, soat eipi watwatꞌin tak, soat aꞌõm kawẽnwẽnꞌukayũꞌin tak, soat iwarururuayũꞌin tak. Soat ip kũyjobit oꞌe yaꞌõ kay. 
\v 8 Imẽnpuye jewemug̃uykukukum ip jeꞌe ipi juacayũ. Tũybe Deus iãn jeꞌe ip ipararu jĩjãat pe.
\p — Ẽn acã Deusat — i teꞌe ma jeꞌe ip.
\m Ixe kay ip itabut jeꞌe apẽn wuyju wuyetabut Deus kay iap puxim. Mẽmẽ buxim oeꞌũiat pubutup pe ibutetet g̃u ip- -abuyũ Deus xe itait jeedop iaptup pe. Ig̃odup pe osodop g̃u ibutet ip ipi mug̃ẽꞌisum ma.
\p
\v 9 Iboam eyetaybit pin pima, eyaꞌõpicũg̃cũg̃ cuy epesop. 
\v 10 Taomũnmũn ijuibit taomũn ma ip. Payaom yaokaꞌibit yaokan ma ip payaom. Imẽnpuye yukpiceg̃ẽm g̃u juy jeedop ip Deus ebekitkit jetabucap kug̃ ipiatꞌajojom maꞌg̃u ip. Itabut cĩcã juy jeedop ip cekay.
\p
\v 11 G̃ebuje waraꞌat ojojojo ipararu jĩjãat. Xepxep osodop ip g̃asũ. Ipi bewi oꞌjẽm badiwi. Xepxep akanasũ oꞌyakanasũnuy. Cordeiroꞌitꞌit akanasũ joꞌi. Seg̃emoxixi ekawẽn coꞌi oꞌjekawẽn kawẽnkẽrẽ. 
\v 12 Yaꞌõbaca jĩjã osunuy koapat ipararu jĩjãat aꞌõbacaap coꞌi. Jaꞌõbacaap mubapukpug̃ osunuy koapat ipararu jĩjãat etabutpe.
\p — Koapat ipararu jĩjãat aꞌõ kay juy epesop — ioꞌe soat ipi juayũ be. — Werowero pibun oeꞌũ pin iat aꞌõ kay juy epesop — ioꞌe cebe ip. — Kuy oiyo iat aꞌõ kay juy epesop — ioꞌe cebe ip.
\m Imẽnpuye yaꞌõ kay oꞌe ip ipararu jĩjãat aꞌõbi. 
\v 13 Wuywebe imug̃ẽ baꞌoreap mubapukpug̃ oekuku koapat ipararu jĩjãat. Jaꞌõbacaan daxa oꞌg̃ukopkop kabi bewi. Ipi kay oꞌg̃ukopkop soat etabutpe ixeyũ mutabut am jewekay. 
\v 14 Soat ipi juayũ oꞌg̃ug̃uykukuku ibaꞌoreap oꞌg̃ubapuk puye. Wuywebe iꞌeꞌbaꞌoreat mubapukpug̃ osunuy koapat ipararu jĩjãat etabutpe.
\p — Koapat ipararu jĩjãat puximat cuy epeg̃ug̃ẽ witaꞌam — ioꞌe soat ka watwat pe. — Payaom werowero ip oꞌg̃ug̃ẽiat puximat cuy epeg̃ug̃ẽ — ioꞌe. — Oeꞌũ g̃uiat puximat cuy epeg̃ug̃ẽ — ioꞌe.
\p Imẽnpuye ixe buximat oꞌg̃ug̃ẽ ip witaꞌam. 
\v 15 Kanomũmat ipararu jĩjãat yaꞌõbacaap oꞌjat koapat pewi jaꞌõbacaan. Yaꞌõbacaap oꞌjat koapat puximat mutait am. Imẽnpuye oꞌjetait koapat puximat- -witaꞌa mug̃ẽg̃ẽ. Cekawẽn put oꞌe. Jekay itabutꞌũmayũ dak yaoka but oꞌe cebe.
\p
\v 16-17 — Obutet cuy epesubutetmubararak eybũnũꞌa be eybaꞌat kadi, eydopaꞌa be dak — ioꞌe. — Obutet mubararakꞌũm pima, wenúmero ma epeg̃ubararak eydopaꞌa be, eybũnũꞌa be dak — ioꞌe.
\p Imẽn ixe oꞌe soat pe ipi juayũ be- -yaꞌõbuyxiayũ be, yaꞌõbuyxiꞌũmayũ be dak; yopĩcayũ be, kariwayũ be dak; jekpiwatpin ma kapikpikꞌukayũ be, teiꞌũma kapikpikꞌukayũ be dak. Cewebubut pu baꞌore osodop ip topaꞌa bararakꞌũm pima, ibũnũꞌa bararakꞌũm pima dak. Tarekrek tak teida baꞌore ip osodop ixe butet ibararakꞌũm pima, ibutet enúmero ibararakꞌũm pima dak.
\p
\v 18 Wuyetaybitbicap cuy ajat wuyetaybit am iboam. Wuyetaybit pima bit ixe enúmero imuweg̃ũn put kuka oꞌe wuywebe. Ag̃okatkat putet coꞌi ixe enúmero. Ixe enúmero 666.
\b
\c 14
\p
\v 1 Deus omukũyjojom mabuk osunuy apẽn jebapuk ãmap kabia be iam. Apẽn jebapuk ãmap kabia bima iap cocom mabuk og̃uy wexey joꞌiat pe. Mẽmẽ buxim oeꞌũiat ojojojo. Cũg̃ꞌi osunuy coꞌa bicũg̃pe- -Siãoꞌa bicũg̃pe- -Jerusalém ka beatꞌa bicũg̃pe. Adexiri osodop ixe eju- -144,000 beayũ. Mẽmẽ butet ibararak osodop topaꞌa be ip. Ixe ebay butet tak ibararak osodop topaꞌa be ip. 
\v 2 Kabi kadiwiatꞌaꞌõ dak oyaꞌĩjojo. Yaꞌõbog̃ oꞌyaꞌõnuy tiꞌacapꞌaꞌõ joꞌi. Yaꞌõpurug̃ tak oꞌyaꞌõnuy xiririkiatꞌaꞌõ joꞌi. Yaꞌõdip cĩcã dak oꞌyaꞌõnuy adedeayũ jebubutꞌuk muydedem pimaap aꞌõ buxim- -harpa muydedem ip pimaap aꞌõ buxim. 
\v 3 Ixeyũ 144,000 beayũ pibodo iisuan ip oꞌjebibododon. Deus abikbikap wap kacũg̃cũg̃ꞌi osodop ip jebibododon, ebadipdip itabẽg̃ayũ wap tak, 24 beayũ yaꞌõbuyxiayũ wap tak. Kaꞌũma be ma itaybit put ibo pibodom. 144,000 beayũ be acã itaybit put- -Deus emudaxijojoyũ be acã- -ipi ju oekukuꞌiayũ be acã. 
\v 4 Ixeyũ 144,000 beayũ oꞌjewemukẽrẽrẽn g̃u- -pũg̃ em tak kaꞌũma. Soat tag̃ iisu ip osodop ayacat eju oꞌjepo g̃u bukiat puxim. Mẽmẽ badiptatam oekuku ip soat tag̃. Deus ixeyũ oꞌtaxijo kũyjobitꞌũmayũ parakpewi- -ipi juacayũ parakpewi. Ixeyũ ma koam oꞌjewejak Deus kay soat em jedop am cexe. Mẽmẽ kay dak oꞌjewejak ip soat em jedop am cexe. 
\v 5 Napapaꞌuk g̃u ip osodop. Soat tag̃ ip iisu.
\p
\v 6 G̃ebuje waraꞌat ojojojo Deus ekawẽn tojotjotꞌukat. Um oeku eium. Kopkom oeku kawẽn idipat muwẽn ãm soat pe ipi juayũ be- -soat iwarururuayũ be, soat tiwatwat pe dak, soat aꞌõm kawẽnwẽnꞌukayũ be dak, soat eipi watwat pe dak. Kawẽn idipat iꞌũm g̃u. Soat em itabucayũ ibo muwẽnuwẽn jeedop. Iꞌũm g̃u cekawẽn- -kawẽn idipat.
\p
\v 7 — Ibuyxim cuy Deus epejukuk — ioꞌe yaꞌõberen um cĩcãat. — “Deus soat podi ma yaꞌõbaca,” i juy epeꞌeꞌe — ioꞌe. — G̃axĩn ma ixe Deus ideida soat pe apẽn ipi dag̃ pima juk adi oekuku ip iaptei — ioꞌe. — Xipacat jeꞌg̃ũm xipacayũ be. Ipiat supiꞌajoat ikẽrẽat mujurũg̃rũg̃ꞌukayũ be bit — ioꞌe. — “Wararaꞌacat podi ma ẽn xipat,” i juy epeꞌe Deus pe — ioꞌe. — Ixe Deus kabi oꞌg̃ujurũg̃, ipi dak — ioꞌe. — Tibog̃ cĩcãati dak oꞌtimujurũg̃ — ioꞌe. — Idiꞌa dak oꞌtiꞌamujurũg̃ — ioꞌe.
\p
\v 8 Waraꞌat Deus ekawẽn tojotjotꞌukat koapat nomuju oeku. Um oeku eium.
\p — Babilônia ka watwat puximayũ aꞌõbacaap oiꞌũm — ioꞌe. — Ikẽrẽat mug̃ẽg̃ẽꞌuk osodop ip soat ka watwat eju — ioꞌe. — Wararaꞌacat tayxi eju jepopoꞌukap puxim ikẽrẽat mug̃ẽg̃ẽꞌuk ip osodop, wararaꞌacat itop eju jepopoꞌukap puxim tak — ioꞌe. — G̃asũ bit ixeyũ aꞌõbacaap oiꞌũm — ioꞌe.
\p
\v 9-10 Waraꞌat Deus ekawẽn tojotjotꞌukat ojojojo- -soat tag̃ iisuayũ. Ebapũg̃ ip um oekuku eium.
\p — Ipararu jĩjãat pe “Ẽn xipat cĩcã” iꞌeꞌeꞌukayũ ipiat supiꞌajojo jĩjã- -ixe joꞌiat pe “Ẽn xipat cĩcã” iꞌeꞌeꞌukayũ dak — ioꞌe. — Ibutet pararak topaꞌa beayũ dak ipiat supiꞌajojo jĩjã- -ibutet pararak ibũnũꞌa beayũ dak — ioꞌe. — Deus itakoma jĩjã jeꞌe ixeyũ kay. Itabotaidabotbot g̃u jeꞌe ixeyũ kay- -pũg̃ kay dak kaꞌũma. Ibaꞌore jeꞌe cebe ip jenapõn ãm ipiatꞌajojoap puxim — ioꞌe. — Ipiat supiꞌajojo jĩjã ma ip. Daxa be ipiat supiꞌajojo ip, enxofre isopat pe dak — ioꞌe. — Deus ekawẽn tojotjotꞌukayũ etabutpe ipiat supiꞌajojo ip, soat tag̃ iisuayũ etabutpe. Mẽmẽ etabutpe dak ipiat supiꞌajojo ip — ioꞌe. 
\v 11 — Ixeyũ beaptig̃ jedig̃euhum soat em daxadig̃. Kaꞌũmg̃u kabi dag̃ tig̃ꞌũmat. Soat em ma tig̃teg̃ eꞌem. Iximabun, kabiabun tig̃teg̃ eꞌem — ioꞌe. — Ixeyũ be ipiatpiꞌajojoap tak iꞌũm g̃u. Cebodoy baꞌore cebe ip. Kabiabun ipiatꞌajojom ip jeedop, iximabun tak- -ipararu jĩjãat pe “Ẽn xipat” iꞌeꞌeꞌukayũ, ixe joꞌiat pe imẽn iꞌeꞌeꞌukayũ dak- -topaꞌa be ibutet pararakayũ — ioꞌe.
\p
\v 12 Apẽn ibutet pararak ibũnũꞌa beayũ ipiat supiꞌajojo jĩjã iap kay g̃ebum pima, yukpiceg̃ẽm g̃u juy jeedop ip jetabucap kug̃ Deus ebekitkiyũ- -Deus aꞌõ kay kũyjobicayũ- -Jesus kay jetabucap kukayũ.
\p
\v 13 G̃ebuje kabi kadiwiatꞌaꞌõ oyaꞌĩjojo.
\p — Pũg̃pũg̃ xipacayũꞌin mabuk yaoka ip g̃asũ itakomaayũ jetabucap epereꞌũmayũ, ipararu jĩjãat putet mubararakan ibuꞌuꞌuayũ — ioꞌe. — Icokcok ip jeedop oꞌyaoka maꞌg̃u ip — ioꞌe. — Iboap cuy eg̃ubararak taperadup pe — ioꞌe.
\p — Icẽmãn ẽn eꞌem — i Deus biõg̃buk oꞌjede. — Icokcok cĩcã ma ip jeedop — ioꞌe. — Ipi ju bima oꞌjekapikpik cĩcã ip wuykukukat peam — ioꞌe cebe- -kabi beat pe. — Ceꞌũ buje bit ip jeebodoy — ioꞌe. — Kapikap kay g̃u ip jeꞌe — ioꞌe cebe. — Jekabaꞌũm ip — ioꞌe. — Xipan cĩcã ip oꞌjekapikpik iapteim tak ip idujuu jeweju — ioꞌe cebe.
\p Imẽn Deus biõg̃buk oꞌjede kabi kadiwiatꞌaꞌõ waꞌõpiju.
\p
\v 14 Apẽn jebapuk ãmap kabia bima iap cocom mabuk og̃uy wexey joꞌiat pe. Ag̃okatkat coꞌiat ojojojo. Xikꞌi osunuy kabikerereat ceje. Ouro mug̃ẽg̃ẽ kug̃ jabe osunuy. Pẽg̃ap kug̃ osunuy jebui be- -tũybibiat kug̃.
\p
\v 15 Deus ekawẽn tojotjotꞌukat oꞌjẽm Deus eju kawẽnwẽnapꞌa bewi. Oꞌjewãwã yaꞌõberen kabikerereat cejeat pe.
\p — Epẽg̃ãm cuy etiptakat soat eipi dag̃atip, kuy oꞌtaop puye — ioꞌe yaꞌõberen. — G̃asũ ma juy etiptakat — ioꞌe.
\p
\v 16 Imẽnpuye cococoꞌi oꞌe. Tiptakatkan oꞌe jepẽg̃ãm kabikerereat cejeat. Jepẽg̃ap oꞌg̃uyco. Soat eipi dag̃atip takatkan oꞌe. Pere. Soat oꞌtiptakat. Kuy oꞌjepere.
\p
\v 17 G̃ebuje waraꞌat ojojojo Deus ekawẽn tojotjotꞌukat. Ixe dak oꞌjẽm Deus eju kawẽnwẽnapꞌa bewi- -kabi beatꞌa bewi. Ixe dak pẽg̃ap kug̃ osunuy tũybibiat kug̃.
\p
\v 18 Ibocewi waraꞌat Deus ekawẽn tojotjotꞌukat oꞌjẽm tõmteꞌokuatõm mupikupikapꞌa xewi. Ixe daxa kukukꞌukat osunuy tõmteꞌokuatõm mupikupikapꞌa beat taxa kukukꞌukat. Ixe oꞌjewãwã yaꞌõberen jebure be- -pẽg̃ap kukat pe.
\p — Epẽg̃ãm cuy uvaꞌadot eyadotꞌag̃obidakat — ioꞌe. — Soat eipi dag̃atip pe juy eyadotꞌag̃obidakat — ioꞌe. — Kuy oꞌyaop — ioꞌe yaꞌõberen.
\p
\v 19 Imẽnpuye cocococoꞌi oꞌe. Yag̃obidakatkan oeku soat eipi dag̃ uvadip tag̃. Pereh. Oꞌjepere. Oꞌyamõg̃ yamucakcakcakapꞌa be yabidiꞌuk am. Deus ipiat supiꞌajojoat kũyjobitꞌũmayũ be apẽn ip uvaꞌa mucakcakcag̃ iap puxim. 
\v 20 Ikabog̃atka etakobe yamucakcakcag̃ ip osodop. Xere g̃u oꞌyabidijẽm uvaꞌabidi. Yamucakcakcakapꞌa bewiapti kũyjobitꞌũmayũꞌũmꞌũm toy buxim. Xere g̃u toy oꞌtoyjẽm. Kiiii iãn toy. 3000 quilometrom oꞌtoyjẽm. Toydibida pũg̃ metro ipidase dak oꞌjedoyeku- -Deus ekawẽn kay kũyjobitꞌũmayũꞌũmꞌũm toy.
\b
\c 15
\p
\v 1 G̃ebuje waraꞌat ipararuat ojojojo kabi be yobog̃at. Oꞌjebapuk omukũyjo am apẽn g̃uyjom jebapuk iam. 7 be ojojojo Deus ekawẽn tojotjotꞌukayũ. Omukũyjojoap ibaꞌarẽm mabuk osunuy oxe. Yobog̃ osunuy. Ipararu jĩjãat osunuy. Warẽmtaksug̃at kug̃ ip oekuku- -ãmap kug̃. Ipi kay ixik puje Deus jetakomaap g̃uꞌũm.
\p — Eyju ma warẽmtaksug̃at epejoxik kũyjobitꞌũmayũ be — ioꞌe Deus cebe ip. — Waꞌõbi ma ipiat cuy epesupiꞌajojoat cebe ip — ioꞌe. — Ixeyũ acã ojoxikat wetakoma eykay iap mubapuk am soat pe kũyjobitꞌũmayũ be — ioꞌe Deus cebe ip- -7 beayũ be.
\p
\v 2 G̃ebuje iodi buximat ojojojo- -vidro mug̃ẽg̃ẽ. Vidro iwekoykey osunuy daxa eju. Ixiriruk osunuy. Ipararu jĩjãat aꞌõ kayꞌũmayũ dak ojojojo- -ixe joꞌiat aꞌõ kayꞌũmayũ dak- -jebutet enúmero kukat kukat aꞌõ kayꞌũmayũ. Kacũg̃cũg̃ꞌi ip osodop iodi buximat xe- -vidro mug̃ẽg̃ẽ xe. Harpaꞌa muydedem ip osodop- -Deus emuaũm muydedem. 
\v 3 Moisés bibodom ip oꞌjebibododon- -wuykukukat puywatwatꞌukat pibodom. Mẽmẽ buxim oeꞌũiat pibodom tak ip oꞌjebibododon. Ibom oꞌjebibododon ip:
\mi Ocekukukat, ẽn acã Deusat, i. Ẽn soat podi ma aꞌõbacaap kug̃, i. Yobog̃ cĩcã eg̃ug̃ẽg̃ẽiat, i. Ocecokcok cĩcã g̃ebum am emumug̃ẽ kay, i. Ẽn soat tiwatwat kukukat, i. Soat em cũg̃ ma ẽn ocekug̃, i. Icẽmãn acã ẽn eꞌem, i. 
\v 4 Abu ibuyxim g̃u ekug̃? Soat ma ibuyxim ekug̃, i. Abu kuka iꞌe pin g̃u “Ẽn soat podi ma aꞌõbaca” i? Soat ma imẽn iꞌe pin, i. Ẽn acã ikẽrẽat kug̃ g̃u, i. Soat tag̃ eisu, i. Soat tiwatwat jajẽm “Ẽn xipat cĩcã” iꞌe am ewebe, i. Soat em cũg̃ ma ẽn wuykug̃ iap cocom soat ipi juacayũ, i.
\m Ibom oꞌjebibododon ip. 
\v 5 Cebibododon epere buje, Deus eju kawẽnwẽnapꞌa oyajojo. Xĩntabi ekoce buje oyajojo. Torojoꞌa oꞌyanuy iboꞌa be- -Deus nuynuyap cĩcãapꞌa. 
\v 6 7 beayũ oꞌjẽm Deus eju kawẽnwẽnapꞌa bewi Deus ekawẽn tojotjotꞌukayũ. Warẽmtaksug̃at kug̃ ip osodop ipiatꞌajoan kũyjobitꞌũmayũ be. Cesaysopsepat kug̃ ip osodop irucat kug̃, iarixig̃sũg̃at kug̃. Ouro mug̃ẽg̃ẽ kug̃ ip osodop jekũmꞌa eju. 
\v 7 Pũg̃ ebadipdip itabẽg̃ayũꞌin baciaꞌa joꞌiatꞌa oꞌyaũmũm soat pe 7 beayũ be- -ouro mug̃ẽg̃ẽꞌa. Soat ip yakug̃ pũg̃pũg̃pũg̃ jebui wedim. Yanopapũn ip oꞌyadop Deus etakomaap kug̃- -soat em itaicat etakomaap kug̃. 
\v 8 Deus soat podi ma jedipap kug̃ iaptig̃ oꞌjedig̃epõg̃põg̃ soatꞌabi dag̃ Deus eju kawẽnwẽnapꞌabi dag̃, Deus soat podi ma jaꞌõbacaap kug̃ iaptig̃ tak. Soat iõm paꞌore ip osodop badiatꞌabi be 7 be Deus ekawẽn tojotjotꞌukayũ be warẽmtaksug̃at xikap epereꞌũm pima- -ipiatpiꞌajojoan epereꞌũm pima.
\b
\c 16
\p
\v 1 G̃ebuje Deus eju kawẽnwẽnapꞌabi oyaꞌĩjojo. Oꞌjekawẽn yaꞌõberen 7 be Deus ekawẽn tojotjotꞌukayũ be.
\p — Epeju juy — ioꞌe cebe ip. — Baciaꞌa buximatꞌa beati juy epetixik ipi kay- -Deus etakomaapti — ioꞌe. — Deus etakomaapti juy epetidi soat kũyjobitꞌũmayũ be — ioꞌe. — Epeju — ioꞌe.
\p
\v 2 Koapat oꞌju Deus ekawẽn tojotjotꞌukat. Jebaciaꞌa buximat beati oꞌtidi ipi watwat kay. Imẽnpuye weroweropi oꞌjebak cebe ip- -topaꞌa be ipararu jĩjãat putet kukayũ be- -ixe joꞌiat aꞌõ kayayũ be dak. Ipi jĩjã osodop, ierep cĩcã dak, iohe g̃u dak. Kuy pũg̃ ma jebaciaꞌa buximat beati oꞌtixik.
\p
\v 3 G̃ebuje waraꞌat oꞌtidi jebaciaꞌa buximat peati. Oꞌtidi tibog̃ cĩcãati be tiyuati be. Imẽnpuye oꞌjediewexat. Ceꞌũatoy buxim oꞌe. Imẽnpuye idibi dag̃acat oap soat. Soat ip oap idibi dag̃ayũꞌũmꞌũm. Kuy xepxepayũ jebaciaꞌa buximat peati oꞌtidi.
\p
\v 4 G̃ebuje waraꞌat jebaciaꞌa buximat peati oꞌtidi idibi kay- -tiyuꞌũmati kay. Idiꞌa dag̃ tak oꞌtidi. Imẽnpuye oꞌjediewexat. Toy oꞌjediewexat. 
\v 5 Waraꞌat Deus ekawẽn tojotjotꞌukat oꞌjekawẽn Deus eju g̃ebuje bit. Ixe idibi kukukat osunuy- -soati kukukat. Ixe ekawẽn oyaꞌĩjojo.
\p — Ẽn ikẽrẽat kug̃ g̃u- -pũg̃ em tak kaꞌũma — ioꞌe Deus pe. — Cũg̃ ma ẽn ipiatꞌajoan kũyjobitꞌũmayũ be soat pe — ioꞌe. — Soat em ma etait. Kuyje dak cuk adi etait eg̃uy — ioꞌe. 
\v 6 — Kũyjobitꞌũmayũ ma juk adi ebekitkiyũꞌũmꞌũm oꞌyaoka. Oꞌtoymukereren ip. Ekawẽn muwẽnuwẽnꞌukayũꞌũmꞌũm tak oꞌyaoka ip — ioꞌe. — G̃asũ bit cuy etoykõnat cebe ip toymukererenapteim — ioꞌe. — Ikẽrẽm cuk adi ip oekuku iaptei bubum ip g̃asũ exewi — ioꞌe Deus pe.
\p
\v 7 Tõmteꞌokuatõm mupikupikapꞌa xeatꞌaꞌõ dak oꞌjekawẽn waꞌõpiju.
\p — Ocekukukat, ẽn acã Deusat — ioꞌe. — Ẽn soat podi ma aꞌõbaca — ioꞌe. — Ẽn cedag̃ ma ipiatꞌajojoan kũyjobitꞌũmayũ be — ioꞌe. — Cũg̃ cĩcã ewebe ipiatꞌajoan cebe ip kũyjobitꞌũm cĩcã ip puye — ioꞌe.
\p Kuy ebapũg̃ayũ jebaciaꞌa buximat peati oꞌtidi Deus ekawẽn tojotjotꞌukayũ.
\p
\v 8 G̃ebuje waraꞌat jebaciaꞌa buximat peati oꞌtidi kaxiepiat etabe. Imẽnpuye adedeayũ oipik ipi watwat. 
\v 9 Kũyjobitꞌũmayũ oipik cĩcã kaxie pibun. Imẽnpuye ip Deus oꞌjomuymuy jĩjã, ixe warẽmtaksug̃ati oꞌtidiat cebe ip puye. Imẽnpit ikẽrẽat mug̃ẽg̃ẽap oꞌjepere g̃u ip. “Ẽn soat podi ma aꞌõbaca,” iꞌe buꞌuꞌu jĩjã ip osodop Deus pe.
\p Kuy ebadipdipayũ jebaciaꞌa buximat peati oꞌtidi Deus ekawẽn tojotjotꞌukayũ.
\p
\v 10 G̃ebuje waraꞌat jebaciaꞌa buximat peati oꞌtidi ipararu jĩjãat abikbikap pe- -idip cĩcãat pe. Imẽnpuye kabiokbog̃ oꞌe cekay. Soat yaꞌõ kayayũ kay dak kabiokbog̃ oꞌe. Jekõ ip oꞌsukõaha ipibun ma. 
\v 11 Deus tak oꞌjomuymuy jĩjã ip kũyjobitꞌũmayũ. Kabi beacat kukukat oꞌjomuymuy jĩjã ip ipiat oꞌsupiꞌajo ip puye, werowero kug̃ ip puye dak- -soat tag̃ ipi jĩjãat kug̃ puye. Inaka oibuꞌunꞌũma ip ikẽrẽat mug̃ẽg̃ẽm. Oꞌjẽmꞌũma ip e iekẽrẽate dag̃wi.
\p Kuy 5 be jebaciaꞌa buximat peati oꞌtidi.
\p
\v 12 G̃ebuje waraꞌat jebaciaꞌa buximat peati oꞌtidi. Oꞌtidi idibi be- -tibog̃ati be- -Eufratesti be. Imẽnpuye oꞌtiap. Idibi oꞌtiapat tag̃ e oꞌjeeebapuk. Oꞌtiap ipi juayũ kukukayũ beapem- -kaxi jẽmap pewiacat peapem. 
\v 13 Ebapũg̃ ibiõg̃buk kẽrẽayũ dak ojojojo. Muo buxim ip osodop. Pũg̃ oꞌjẽm seg̃emoxixi kõmbie dag̃wi. Waraꞌat oꞌjẽm ipararu jĩjãat kõmbie dag̃wi. Waraꞌat oꞌjẽm jewexe Deus ekawẽn muwẽnuwẽnꞌukat kõmbie dag̃wi. 
\v 14 Ixeyũ ibiõg̃buk kẽrẽayũ wuywebe iꞌe baꞌoreat mubapukpug̃. Ixeyũ ebapũg̃ayũ cucum soat ka kay ika kukukayũ muꞌawero am nopag̃õg̃õ ãm. Nopag̃õg̃õm ip jeꞌe. Nopag̃õg̃õm pima Deus soat podi ma waꞌõbaca iap g̃ubapuk soat pe.
\p
\v 15 — Eyaꞌõpicũg̃cũg̃ cuy epesop — iꞌeꞌem Cristo wuywebe. — Ibukurukat puxim oajẽm — iꞌeꞌem. — Adeayũ ag̃ꞌũm pima oajẽmtujupaꞌumꞌumꞌukat puxim — iꞌeꞌem. — Icokcok ip jeꞌe wajẽmap wiwiꞌukayũ- -jewemukẽrẽrẽrẽnꞌũmayũ — iꞌeꞌem. — Totiteayũ buxim ip jeꞌe wajẽm puje — iꞌeꞌem. — Isũsũn g̃u ip jeꞌe — iꞌeꞌem Cristo.
\p
\v 16 Ixeyũ ibiõg̃buk kẽrẽayũ soat ka kukukayũ oꞌg̃uꞌawero ip pũg̃ka be ma. Ixe ka butet Armagedom i omuy Hebreu aꞌõm- -Judeuyũ aꞌõm.
\p Kuy seis beayũ jebaciaꞌa buximat peati oꞌtidi.
\p
\v 17 G̃ebuje kanomũmat jebaciaꞌa buximat peati oꞌtidi eiumwi. Deus eju kawẽnwẽnapꞌa bewiat oꞌjewãwã yaꞌõberen- -Deus abikbikap xeat.
\p — Kuy oꞌe, ioꞌe.
\p
\v 18 Imẽn iꞌe buje, xiririk. Paw. Oꞌjepaw. Xiririkpawiat oꞌjepaw yaꞌõpurug̃ cĩcã. Tũmũnꞌaꞌõ dak oꞌjede yaꞌõberen. Porog̃iat tak oꞌjede yaꞌõpurug̃. Ipi dak oꞌjexixi jĩjã. Puje buk aꞌg̃u oꞌjebapuk iboap? Kaꞌũma ma. G̃asũ acã. Ipi mubapuk pujeap aꞌg̃u iboap kaꞌũmg̃u. Soat podi ma ipararuat oꞌjebapuk g̃ebuje. 
\v 19 Babilônia ka dak oꞌsukamuweꞌutꞌut ipi exixi buje. Ebapũg̃kam oꞌjekaewexat. Deus soat eipi dag̃atka dak oꞌsukamuꞌũm. Deus oꞌjeg̃ebu Babilônia ka watwat kay. Ikẽrẽat mujurũg̃rũg̃xiayũ kay oꞌjeg̃ebu. Wararaꞌacat peap podi ma ipiat oꞌsupiꞌajoat cebe ip. Jetakomaap muꞌũm puje acã oibuꞌun ipiatꞌajoan cebe ip kũyjobitꞌũmayũ be. 
\v 20 Paꞌũm. Oꞌjepaꞌũm soat tipꞌaweroro. Paꞌũm. Coꞌa dak oꞌjeaepaꞌũm. 
\v 21 Akadadada dak oꞌtaꞌatꞌat kabi bewi tapoxiata. Pũg̃pũg̃ta tapoxi jĩjã oꞌtadop- -40 kiloata. Oꞌtaꞌatꞌat ipi juacayũ be- -kũyjobitꞌũmayũ be. Itakoma oꞌe ip Deus kay ipiatꞌajojom puye, warẽmtaksug̃at puye dak, akadadada buye dak. Deus oꞌjomuymuy jĩjã ip.
\b
\c 17
\p
\v 1 G̃ebuje 7 beayũꞌin oajẽm okay- -Deus ekawẽn tojotjotꞌukayũꞌin- -baciaꞌa buximat kukayũꞌin.
\p — Ejot — ioꞌe owebe. — Apẽn Deus iboka sukamuꞌũm cĩcã iap cuy og̃ubapuk ewebe — ioꞌe. — Ibo ka omuy idibi xe- -tiꞌadeati xe — ioꞌe. — Ikẽrẽat mug̃ẽg̃ẽm cĩcã ip ibo ka watwat — ioꞌe. — Apẽn yapoat waraꞌat kaykaykay ma jepo am iap puxim waraꞌat kaykaykay ma eꞌem ip itabut. Tũybe Deusat iãn eꞌem ip — ioꞌe. — Imẽnpuye Deus ibo ka sukamuꞌũm cĩcã — ioꞌe owebe. 
\v 2 — Ikẽrẽ jĩjãat oꞌg̃ug̃ẽ ip ibo ka watwat eju soat ka kukukayũ- -yapoat coꞌiayũ eju — ioꞌe. — Ixe adeayũ be ikẽrẽat oꞌg̃ujurũg̃at apẽn itabutꞌũmayũ jebureyũ mukaꞌoꞌon iap puxim — ioꞌe. — Imẽnpuxim ibo ka watwat tak ade kũyjobitꞌũmayũ be ikẽrẽat oꞌg̃ujurũg̃at — ioꞌe owebe.
\p
\v 3 G̃ebuje okpiwan g̃u juk ocewag̃uy. Deus biõg̃buk cuk wag̃uyda. Deus ekawẽn tojotjotꞌukat odujowat ukꞌaꞌũmat pe. Ayacat ojojojo iboce. Xikꞌi osunuy waraꞌat ipararu jĩjãat akpi jeje- -ipakpukat akpi jeje. Deus muymuyap ekawẽn ibararak osunuy ixe dag̃ soat tag̃. 7 be yaꞌa oꞌyanuy. 10 be yakanasũ oꞌyakanasũnũy. 
\v 4 Ayacat esay ipakpusk osunuy. Ouro mug̃ẽg̃ẽbu kug̃ osunuy soat tag̃ jesay dag̃. Witaꞌa kug̃ tak osunuy- -yadeibog̃ cĩcãatꞌa kug̃. Pérolaꞌa kug̃ tak osunuy yadeibog̃ cĩcãatꞌa kug̃. Baciaꞌa buximatꞌa kug̃ osunuy jebui be- -ouro mug̃ẽg̃ẽꞌa kug̃. Yanopapũn oꞌyanuy xipatꞌũmap kug̃, wuymusũsũsũnap kug̃ tak, ixe ag̃okatkayũxi jĩjã buye. 
\v 5 Topaꞌa be ibutet ibararak osunuy. Kaꞌũma ma itaybit apẽnape ibutet iam. Babilônia ka ikabog̃atka i ikabutet osunuy. Ag̃okatkayũ xiayũ kukat i dak ibutet osunuy. Xipatꞌũmayũ kukat i dak ibutet osunuy. Jekpiwatpin ma jewag̃uymukẽrẽrẽrẽnꞌukat i dak ibutet osunuy. Ebapũg̃putet ibutet. 
\v 6 Ayacat ikaꞌoat puxim icokcok osunuy ade Deus ebekitkiyũꞌũmꞌũm oꞌtoymukereren puye. Ixe ayacat ojojojo. Ayacat ixeyũꞌũmꞌũm oꞌyaoka, Jesus kay jĩjã ip puye, jetabucap oꞌjepere g̃u ip puye. Oparara jĩjã ojeku ixe jo buje.
\p
\v 7 — Pẽnpuye eparara ixe buxim? — ioꞌe owebe Deus ekawẽn tojotjotꞌukat. — Ajo ibaꞌarẽm exe iam cuy õn jemukũyjo — ioꞌe owebe. — Abu-buxim ixe ayacat iam tak õn jemukũyjo — ioꞌe. — Abu-buxim ipararu jĩjãat iam tak õn jemukũyjo — ioꞌe. — Apẽnape subo iam tak õn jemukũyjo- -ayacat kug̃ jekpi jeje iam — ioꞌe. — Apẽnape 7 be yaꞌaat iam tak õn jemukũyjo — ioꞌe. — Apẽnape 10 be yakanasũat iam tak õn jemukũyjo — ioꞌe owebe. 
\v 8 — Ixe ipararu jĩjãat kuy bima itait osunuy. G̃asũ bit itait g̃u oꞌe. G̃axĩn ma ixe jeejẽm ikũybioreg̃ cĩcãatkũy bewi. Imẽnpit Deus ixe g̃uꞌũm — ioꞌe. — Abuyũ soat em itait jeedop Deus xe iaptup pe ibutet pararakꞌũmayũ iparara jĩjã jeꞌe ipararu jĩjãat co buje — ioꞌe. — Ibutetpararak g̃u ip ipi mug̃ẽꞌisum ma — ioꞌe. — Ixe ipararu jĩjãat itait osunuy kuy bima. G̃asũ bit itait g̃u oꞌe. Waram g̃uto jebapuk — ioꞌe.
\p
\v 9 — Itaybit cĩcãat acã itaybit eꞌem apẽnape ojojojo iam- -yag̃uybabiat acã — ioꞌe owebe. — 7 be yaꞌaat puxim 7 be ma coꞌa dak. Ayacat xikꞌi ig̃oꞌa jeje- -7 beatꞌa jeje. Ika kukayũ buxim tak ip yaꞌa — ioꞌe owebe. 
\v 10 — 5 be ixeyũꞌin ibacaꞌũm oꞌe ip. Kaꞌũma ma kũyjobit ixeyũ aꞌõ kay g̃asũ bit — ioꞌe. — Pũg̃ ma ixeyũꞌin yaꞌõbacaat g̃asũ — ioꞌe. — Adeayũ ixe aꞌõ kay oꞌe kũyjobit — ioꞌe. — Waraꞌat ixeyũꞌin oajẽm g̃u buk adeayũ kukukan. Ixe ajẽm puje bit, darem ma adeayũ kukukan jeenuy — ioꞌe owebe. 
\v 11 — Ipararu jĩjãat kanomũm adeayũ kukukan jeꞌe- -kuy bima itait osunuyiat- -g̃asũ itait g̃u iat — ioꞌe. — 7 beayũ nomukadi ixe dak adeayũ kukukan jeꞌe. Deus ixe dak g̃uꞌũm — ioꞌe owebe.
\p
\v 12 — 10 beat yakanasũ eyakanasũjojo — ioꞌe. — Ixeyũ yakanasũyũ 10 beayũ buxim ika kukukayũ buxim. Adeayũ kukukayũm g̃u buk oꞌe ip. G̃uyjom acã jeꞌe ip — ioꞌe. — Darem ma ikukukayũm ip jeedop ipararu jĩjãat eju- -pũg̃ hora ma — ioꞌe owebe. 
\v 13 — Jewag̃uycocom ip 10 beayũ. Imẽnpuye jaꞌõbacaap ũmũm ip ipararu jĩjãat pe. Imẽnpuye ixeyũ aꞌõbi jeku ipararu jĩjãat — ioꞌe owebe. 
\v 14 — Ixeyũ 10 beayũ nopag̃õg̃õm ip jeꞌe mẽmẽ buxim oeꞌũiat eju. Mẽmẽ nopag̃õg̃õm jeꞌe ixeyũ aꞌõbacaap muꞌũm ãm — ioꞌe. — Nopag̃õg̃õm jeꞌe jemunomuwãyũ eju, jemunaẽyũ eju- -jaꞌõkayayũ eju. Ixeyũ aꞌõbacaap g̃uꞌũm mẽmẽ. Ixe soat podi ma yaꞌõbacaat. Adeayũ kukayũ kukat ixe. Imẽnpuye ixeyũ aꞌõbacaap g̃uꞌũm — ioꞌe owebe.
\p
\v 15 — Idibi dak cuk etijojo — ioꞌe owebe Deus ekawẽn tojotjotꞌukat. — Ayacat xikꞌi osunuy ixedi adopa dag̃ — ioꞌe. — Ixedi soat tiwatwat puxim, soat eipi watwat puxim tak, soat iwarururuayũ buxim tak, soat aꞌõm kawẽnwẽnꞌukayũ buxim tak — ioꞌe owebe. 
\v 16 — 10 be yakanasũat tak cuk ejojojo — ioꞌe owebe. — Ixeyũ yakanasũyũ itakoma jeedop ip ayacaw kay- -ag̃okatkayũxi kay. Ipararu jĩjãat tak itakoma jeꞌe cekay — ioꞌe. — Soat ibubut juꞌuk ip cexewi. Cesayꞌũm suiwat ip. Ixe aokam ip. Ixeꞌũm ẽn suẽnꞌo ip. Cepoyat ip g̃upik daxa be — ioꞌe. 
\v 17 — Deus ixeyũ oꞌg̃ubikuy jebikuyap tag̃ jeku am. Ixeyũ oꞌg̃ubikuy jewag̃uyco am jeweweju. Imẽnpuye Deus bikuyap tag̃ yaoka ip. Imẽnpuye “Wuyaꞌõbacaap cuy ag̃ũm ipararu jĩjãat pe,” i jeꞌe ip jewewebe ika kukukayũ. “Wuyaꞌõbi juy ixe jeꞌku” i jeꞌe ip jewewebe ma. Imẽn ma soat jebapuk apẽn cuk adi Deus oꞌeꞌe iap tag̃ — ioꞌe owebe.
\p
\v 18 — Ixe ayacat- -ejojojoiat- -ikabog̃atka buxim — ioꞌe owebe. — Adeayũ kukukayũ emukakukpinputka buxim — ioꞌe owebe. — Adeayũ kukukayũ cucum ibo ka be ikẽrẽat mug̃ẽ ãm — ioꞌe owebe Deus ekawẽn tojotjotꞌukat.
\b
\c 18
\p
\v 1 Iboap co buje, waraꞌat ojojojo Deus ekawẽn tojotjotꞌukat. Kopkom oꞌe kabi kadiwi. Yaꞌõbacaat osunuy. Isopsep osunuy. Imẽnpuye jesopsepap kabiam soat eipi oꞌg̃ukabia.
\p
\v 2 — Oꞌsukaꞌũm cĩcã ma — ioꞌe yaꞌõberen. — Babilônia ka oꞌsukaꞌũm cĩcã ma — ioꞌe. — Kuy bima yaꞌõbacaayũ cucuꞌuk ip oosodop ibo ka be — ioꞌe. — G̃asũ bit ibiõg̃buk kẽrẽayũ acã oꞌjepoyat ibo ka be, axikyũ ikẽrẽ jĩjãayũ dak — ioꞌe. — Wasũyũ dak oꞌjepoyat ibo ka be- -iꞌoibitꞌũmat — ioꞌe. 
\v 3 — Ibo ka watwat ikẽrẽat oꞌg̃ujurũg̃rũg̃at soat ka watwat pe wuybureyũ mukaꞌoꞌonap puxim, — ioꞌe. — Jekpiwatpin ma ikẽrẽat mug̃ẽg̃ẽꞌuk ip osodop ibo ka watwat eju. Ika kukukayũ dak ikẽrẽat mujurũg̃rũg̃ꞌuk ip osodop ibo ka watwat eju. Tarekrek kukukayũ dak jewemukariwawanꞌuk ip osodop ixeyũ ikẽrẽat mug̃ẽg̃ẽaptei bubum — ioꞌe.
\p
\v 4 Waraꞌatꞌaꞌõ dak oyaꞌĩjojo kabi kadiwiatꞌaꞌõ.
\p — Bekitkit, epewat cuy ite ka bewi — ioꞌe. — Epejẽm cuy ite ka watwat xewi — ioꞌe. — Ixeyũ buxim g̃u juy epesop — ioꞌe. — Ixeyũ burem g̃u juy epesop ikẽrẽat mujurũg̃rũg̃ — ioꞌe. — Ixeyũ eju ikẽrẽat mujurũg̃rũg̃ pima, Deus ipiat supiꞌajoat eywebe apẽn ipiat supiꞌajoat ixeyũ be iap coꞌi — ioꞌe. 
\v 5 — Ibo ka watwat xipatꞌũmap mug̃ẽg̃ẽxi. Imuꞌawero buje, kabi tẽg̃ kuka oꞌe xipatꞌumap — ioꞌe. — Deus oꞌjeg̃ebu apẽn cuk adi ikẽrẽat oꞌg̃ujurũg̃rũg̃ ip iap kay — ioꞌe. 
\v 6 — Apẽn ip cuk adi warẽmtag̃ eykukaptei juy epeteida cebe ip — ioꞌe. — Xepxepteim pit cuy epeteida cebe ip — ioꞌe cebe. — Tipiati juk ip oꞌtimug̃ẽ eywebe tikõg̃aptim. Tipi jĩjãati juy epetimug̃ẽ cebe ip tikõg̃aptim — ioꞌe. — Ibodim cuy baciaꞌa epeyamunopapũn ixeyũ mukaꞌonaptim — ioꞌe. 
\v 7 — Ipiat cuy epesupiꞌajoat cebe ip, idip cĩcã ip osodop jewexe iapteim — ioꞌe. — Epeg̃ug̃ũycũg̃cũg̃ cuy ip teibog̃ cĩcãat pupuꞌuk ip osodop iapteim — ioꞌe. — “Soat kug̃ õn ika kukukat coꞌi,” i teꞌe ma oꞌe ip jewebe ma. “Itayxibuk g̃u õn,” i teꞌe ma oꞌe. “Ipiat osupiꞌajo g̃u- -pũg̃ em tak kaꞌũma ma,” i teꞌe ma oꞌe jewebe ma. “Og̃uycũg̃ g̃u juy oce,” i teꞌe ma juk adi oꞌeꞌe. 
\v 8 Teꞌe ma imẽn cuk adi oꞌeꞌe — ioꞌe. — Imẽnpuye pũg̃ kabiam ma soat ipiat jeꞌbapuk cebe- -warẽmtaksug̃pi. Iwãtaxipi dak jeꞌe. Ipiat tak supiꞌajo. Re dak supiꞌajo — ioꞌe. — Daxa be ipik — ioꞌe. — Soat iboap jeꞌbapuk cebe wuykukukat yaꞌõca buye. Ixe wuykukukat Deusat- -soat podi ma yaꞌõbacaat. Wuykukukat apẽn ipi ju bima juk adi oekuku ip iaptei ideida soat pe — ioꞌe.
\m Imẽn Deus ekawẽn tojotjotꞌukat yaꞌõberen oꞌe owebe.
\p
\v 9 Babilônia ka pikpig̃aptig̃ co buje, ig̃uycũg̃ cĩcã jeꞌe ika kukukayũ- -ig̃o ka watwat puxim jemucokcok am ikẽrẽat mujurũg̃rũg̃ꞌukayũ- -yapoat eju jepopoꞌukayũ buximayũ. Jeetõn ip ibo ka pikpig̃aptig̃ co buje. 
\v 10 Wũy ma ip jeedop kacũg̃cũg̃ꞌi ikapikap cocom. Wuywebe dak xeꞌe jeꞌe imẽn iap puxim iparara ip.
\p — Tadaybot cĩcã opop ip pikpig̃! — i jeꞌe ip tig̃cocoayũ. — Karem ip ipiatꞌajojom — i jeꞌe ip. — Kuy bima ikabog̃ cĩcãatkam oꞌsukadop — i jeꞌe ip. — Soat pe bit ibo ka ikamuꞌũm paꞌore oꞌsukadop — i jeꞌe ip. — Deus pe bit pũg̃ hora ma oꞌsukamuꞌũm — i jeꞌe ip.
\p
\v 11 Ibo ka pikpig̃aptig̃ cocom pima, ig̃uycũg̃ cĩcã jeꞌe ip tarekrek kug̃ topibiyũ dak. Kaꞌũmg̃u oꞌe tarekrek pupuꞌukayũ, oipik ip puye. Imẽnpuye cewebubut pu baꞌore oꞌe ip. Kaꞌũmg̃u ip oꞌe ibubut pupuayũ. Imẽnpuye jeetõn ip. 
\v 12 Imẽn jeꞌe ip tõtõn:
\p — Abu xeꞌe g̃asũ jeꞌjat wuyeouro, wuyeprata dak? — ioꞌe ip jewewebe. — Abu xeꞌe g̃asũ yadeibog̃atꞌa yabu wuyxewi, pérolaꞌa dak? — ioꞌe ip jewewebe. — Abu xeꞌe pag̃o jeꞌjat wuyxewi- -iarixig̃at, ipakpukat tak, lã ipakpukat tak? — ioꞌe jewewebe. — Abu xeꞌe g̃asũ soatꞌip yopu wuyxewi- -ip warẽmtaksug̃atꞌip? — ioꞌe. — Abu xeꞌe g̃asũ marfim mug̃ẽg̃ẽ jeꞌjat wuyxewi? — ioꞌe. — Abu xeꞌe yopteibog̃ cĩcãatꞌip mug̃ẽg̃ẽ jeꞌjat wuyxewi? — ioꞌe. — Abu xeꞌe g̃asũ icaat mug̃ẽg̃ẽ jeꞌjat wuyxewi- -bronze mug̃ẽg̃ẽ, ferro mug̃ẽg̃ẽ dak, mármore mug̃ẽg̃ẽ dak? — iꞌeꞌem ip tõtõn. 
\v 13 — Abu xeꞌe wuyxat mukunukunap jeꞌjat wuyxewi- -canela? — ioꞌe ip. — Abu xeꞌe g̃asũ tibu wuyxewi tideꞌoati, mirradi dak? — i. — Abu xeꞌe tõmpu wuyxewi pãoꞌanõm? — i. — Abu xeꞌe tibu wuyxewi uvaꞌabidi, oliveira xepti dak? — i. — Abu xeꞌe tõmpu wuyxewi trigonõm? — i. — Abu xeꞌe tabu wuyxewi trigoda? — i. — Abu xeꞌe g̃asũ gado jeꞌjat wuyxewi, ovelha dak, cavalo dak? — i. — Abu xeꞌe carro jeꞌjat wuyxewi cavaro imupuxikpuxig̃at? i. — Abu xeꞌe wuyjuyũ jeꞌjat wuyxewi jebuywatwatꞌukan? — i.
\m Imẽn jeꞌe ip tarekrek kug̃ topibiyũ jewewebe. Imẽn jeꞌe ip tõtõn pima jebubut pupuꞌukayũꞌũmꞌũm oipik puye. 
\v 14 Imẽn jeꞌe ip ibo ka watwat pe:
\p — Soat eyetabikukuap kuy oiꞌũm — i jeꞌe ip ibo ka watwat pe. — Soat eybubut oiꞌũm — i jeꞌe. — Kuy bima ade idipat kug̃ epesop, ade ouro dak — i jeꞌe ip. — G̃asũ bit soat oiꞌũm — i jeꞌe ip. — Waram pit epetobuxik g̃u — i jeꞌe ip ibo ka watwat pe.
\p
\v 15 Ibo ka be ip oꞌjekariwawan. G̃asũ bit wũy wi ma ip oꞌe ikadig̃ cocom. Wuyju dak xeꞌe acepik iap ip imuparararan. Jewãwã ip. Jeetõn tak ip.
\p
\v 16 — Tadaybotbot cĩcã ip opop pikpig̃ ibo ka watwatꞌũmꞌũm — i jeꞌe ip. — Karem ip oipik — i jeꞌe ip. — Kuy bima teibog̃ cĩcãat kug̃ oekuku ip jesay kug̃- -pag̃o iadixig̃at kug̃ — i. — Ipakpukg̃ũg̃ũnat kug̃ tak oekuku ip, ipakpukat kug̃ tak, lã mug̃ẽg̃ẽ kug̃ tak — i jeꞌe ip. — Ouro mug̃ẽg̃ẽ kug̃ tak ip oekuku jemujoipin am — i jeꞌe ip. — Witaꞌaꞌitꞌitꞌa mug̃ẽg̃ẽ kug̃ tak ip oekuku jemujoipin am, pérolaꞌa mug̃ẽg̃ẽ kug̃ tak — i jeꞌe ip. 
\v 17-18 — Soat oꞌjepaꞌũm pũg̃ hora ma — i jeꞌe ip. — Soat jekariwaap oiꞌũm — i jeꞌe ip.
\p Ibo ka wi wũy ma dak ip osodop ibo ka pikpig̃aptig̃ cocom kobexixi kukukꞌukayũ, kobexixi dag̃ cucuꞌukayũ dak, kobexixi mudidimyũ dak, kobexixi bewi yajẽmꞌibiyũ be tarekrek ũmũmꞌukayũ dak.
\p — Ibo ka soat ka podi ma ikadip oꞌsukadop — ioꞌe ip tig̃ cocom pima. — Kaꞌũmg̃u ag̃oka iboka joꞌiatka ikadip cĩcãatka — ioꞌe ip.
\p
\v 19 Jebabim ip oꞌjewaꞌamudididig̃ kaꞌwinõm jeg̃uycũg̃ap mubapuk am. Oꞌtõn cĩcã ip ig̃uycũg̃ cĩcã buye.
\p — Tadaybot cĩcã ip opop pikpig̃ ibo ka watwatꞌũmꞌũm — ioꞌe ip. — Karem ip oipik — ioꞌe ip. — Kuy bima oꞌjekariwawan ip soat kobexixi kukukꞌukayũ ibo ka watwat cedinheirobog̃ cĩcã buye — ioꞌe ip. — Pũg̃ hora ma oiꞌũm soat. Soat ibo ka watwat pubut oipik pũg̃ hora ma — ioꞌe ip.
\p
\v 20 — “Eyju bit eycokcog̃ cuy epesop,” i õn pit eꞌem kabi beacat pe — ioꞌe kabi beat owebe. — “Eycokcog̃ cuy epesop,” i õn eꞌem Deus ebekitkiyũ be, Deus emumujuyũ be dak, Deus ekawẽn muwẽnuwẽnꞌukayũ be dak. “Eycokcog̃ cuy epesop, Deus ipiat oꞌsupiꞌajoat ibo ka watwat pe ikẽrẽm cĩcã ip osodopdopdopiapteim,” i õn eꞌem. “Apẽn ip cuk adi ikẽrẽm eykukapteim ipiat oꞌsupiꞌajoat cebe ip,” i õn eꞌem — ioꞌe owebe kabi beat.
\p
\v 21 G̃ebuje Deus ekawẽn tojotjotꞌukat witaꞌa oꞌyabu yaꞌõbacaat. Yabog̃ cĩcãatꞌa oꞌyabu- -tũmũntata mucakcakcakapꞌa joꞌiatꞌa. Oꞌyaxik idibi be tiyuati be.
\p — Apẽn ig̃oꞌa oyaxik iap coꞌi Deus tak Babilônia ka sukaxik — ioꞌe. — Waram pit acesukajo g̃u ibo ka — ioꞌe. 
\v 22 — Waram pit harpa muydedeꞌukatꞌaꞌõ aceyaꞌĩjo g̃u ibo ka be — ioꞌe. — Waraꞌat pubutꞌuk muydedeꞌukatꞌaꞌõ dak aceyaꞌĩjo g̃u — ioꞌe. — Tũmũnꞌukꞌuk muydedeꞌukatꞌaꞌõ aceyaꞌĩjo g̃u, parasuy joꞌiat muydedeꞌukatꞌaꞌõ dak — ioꞌe. — Warẽmtaksug̃ pikpikꞌukat acetobuxik g̃u ibo ka be — ioꞌe. — Waram aceyaꞌĩjo g̃u tũmũntata mucakcakcakapꞌaꞌõ dak ibo ka be — ioꞌe. 
\v 23 — Waram acejojo g̃u lamparinaꞌae ibo ka be — ioꞌe. — Waram aceyaꞌĩjo g̃u jewebumũnꞌisuayũ icokcokapꞌaꞌõ ibo ka be — ioꞌe. — Ibo ka beayũ kariwawayũ wararaꞌacat podi ma ibubut ade ip osodop — ioꞌe. — Soat kaka dag̃ayũ mug̃uykukukuꞌuk ip osodop jebukaypacam ma — ioꞌe. 
\v 24 — Deus pit ipiat oꞌsupiꞌajoat Babilônia ka watwat pe jekawẽn muwẽnuwẽnꞌukayũꞌũmꞌũm aokakaapteim- -jebekitkiyũꞌũmꞌũm aokakaapteim- -soat kaka watwatꞌũmꞌũm aokakaapteim — ioꞌe.
\b
\c 19
\p
\v 1 Iboap tomukadi, yaꞌõberenatꞌaꞌõ oyaꞌĩjojo ade jĩjã kabi beacayũ aꞌõ.
\p — “Deus xipat cĩcã,” i juy ace — ioꞌe ip. — Deus acã wuydaxijojoꞌukat — ioꞌe ip. — Soat podi ma jedipap kug̃ ixe — ioꞌe ip. — Soat podi ma jaꞌõbacaap kug̃ — ioꞌe ip. 
\v 2 — Ixe cũg̃ ma ipiatꞌajojoan kũyjobitꞌũmayũ be — ioꞌe ip. — Cedag̃ ma ipiatꞌajojoan cebe ip — ioꞌe ip. — Ipiat oꞌsupiꞌajoat ag̃okatkayũxiat pe, soat ipi juayũ be ikẽrẽat oꞌg̃ujurũg̃rũg̃at puye- -ikẽrẽat mujurũg̃rũg̃xi ma jewag̃uy mukẽrẽrẽrẽnat puye dak — ioꞌe ip. — Deus ipiat oꞌsupiꞌajoat cebe, jebuywatwatꞌukayũꞌũmꞌũm oꞌyaokaat puye — ioꞌe ip.
\p
\v 3 Waram g̃uto oꞌjewãwã ip yaꞌõberen.
\p — “Deus xipat cĩcã,” i juy ace! — ioꞌe ip yaꞌõberen. — Apẽn soat em kapiktig̃ jedig̃euhum iap puxim, soat em cuy ipiatꞌajojom tak jeedop ip Babilônia ka watwat puximayũ — ioꞌe ip.
\p
\v 4 — Imẽn cuy jeedop ip — i dak oꞌe 24 be aypapayũ- -yaꞌõbuyxiayũ.
\p — “Deus xipat cĩcã,” i juy ace — ioꞌe ip ebadipdip itabẽg̃ayũ dak.
\p Oꞌjẽg̃ꞌaecõg̃cõg̃ ip Deus wap: — Ocecokcok cĩcã ekay — iꞌeꞌem cebe.
\m Jabikbikap ceje xikꞌiat wap oꞌjẽg̃ꞌaecõg̃cõg̃ ip.
\p
\v 5 Deus abikbikap pewi oꞌyaꞌõajẽm.
\p — “ ‘Deus xipat cĩcã,’ i juy epeꞌe,” i õn eꞌem soat ixe buywatwatꞌukayũ be, soat kaka dag̃ayũ be dak — ioꞌe Deus xeat. — “ ‘Deus xipat cĩcã,’ i juy epeꞌe,” i õn eꞌem soat pe ibuyxim Deus kukayũ be- -yaꞌõbuyxiayũ be, yaꞌõbuyxiꞌũmayũ be dak — ioꞌe.
\p
\v 6 G̃ebuje waraꞌatꞌaꞌõ oyaꞌĩjojo. Adeayũ eꞌawero buje iapꞌaꞌõ buxim oꞌyaꞌõnuy. Tiꞌacapꞌaꞌõ buxim tak oꞌyaꞌõnuy- -yaꞌõbog̃ cĩcãatꞌaꞌõ buxim. Konẽkonẽkꞌiatꞌaꞌõ buxim tak oꞌyaꞌõnuy yaꞌõpurug̃.
\p — G̃asũ bit ocekukukat soat ipi juacat kukukan oꞌe — ioꞌe ip. — Ixe acã Deusat ocexe — ioꞌe ip. — Ixe soat podi ma yaꞌõbacaat — ioꞌe ip. — Imẽnpuye: “Deus xipat cĩcã,” i juy ace! — ioꞌe ip. 
\v 7-8 Mẽmẽ buxim oeꞌũiat g̃axĩn ma jewebumũn — ioꞌe ip. — Ixe wadip kuy oꞌjewemuxipan jewebumũn ãm ceweju — ioꞌe ip. — Imẽnpuye wuycokcog̃ cĩcã juy ajop — ioꞌe ip. — Iwadip kuy jesay oꞌjat jewebumũnap esay- -pag̃o iarixig̃at mug̃ẽg̃ẽ, isopsupat mug̃ẽg̃ẽ, iwekoykeyꞌũmat mug̃ẽg̃ẽ — ioꞌe ip. — Imẽnpuye juy acewemucokcog̃! — ioꞌe ip.
\m (Iwadip pag̃o iarixig̃at kug̃ soat Deus ebekitkiyũ idipat mug̃ẽg̃ẽm iape).
\p
\v 9 — Deus emunomuwãyũ icokcok cĩcã — ioꞌe waram Deus ekawẽn tojotjotꞌukat owebe. — Ixe juk oꞌtomuwã ip jekõn ãm mẽmẽ buxim oeꞌũiat ewebumũnap epeta be — ioꞌe. — Icokcok cĩcã ip iaptup cuy etupmubararak — ioꞌe owebe. — Deus ma imẽn cuk omukũyjojo — ioꞌe owebe Deus ekawẽn tojotjotꞌukat.
\p
\v 10 Ixe be omukũyjo buje ocẽg̃ꞌaecõg̃cõg̃ cewap soat podi ma aꞌõbuyxi ẽn iꞌe am cebe.
\p — Owap pit cuy ecẽg̃ꞌaecõg̃cõg̃ g̃u — ioꞌe owebe. — Ebuxim ma õn tak Deus buywatwatꞌukat, wuykitpitpiyũ buxim tak — ioꞌe. — Jesus ekawẽn kay jĩjãayũ buxim õn tak kawẽn icẽmat kay jĩjãayũ buxim — ioꞌe owebe. — Deus wap acã juy ecẽg̃ꞌaecõg̃cõg̃ “Soat podi ma aꞌõbuyxi ẽn” iꞌe am cebe — ioꞌe owebe.
\p Jesus kawẽn icẽmat muwẽnuwẽn oekukuku. G̃asũ dak Deus ekawẽn muwẽnuwẽnꞌukayũ icokcok cĩcã iboap ekawẽn muwẽn ãm, kawẽn icẽmat cexe ip puye.
\p
\v 11 G̃ebuje kabi ikoce otobuxik. Cavaro ojojojo irucat. Cavaro akpi jejeat ojojojo irucat akpi jejeat. Ixe butet soat em jaꞌõ dag̃ jekukuꞌukat i osunuy. Icẽmat eꞌeꞌukat i dak ibutet osunuy. Xepxeputet osunuy. Ixe cũg̃ ma ipiatꞌajoan kũyjobitꞌũmayũ be. Cedag̃ ma nopag̃õg̃õm jekay itakomaayũ eju. 
\v 12 Ixe eta itasop oꞌsutanuy daxanabõẽ buxim. Ade ouro mug̃ẽg̃ẽ kug̃ osunuy ya dag̃ ika kukukat puxim. Ibutet ibararak osunuy topaꞌa be. Ixe acã itaybit jebuten. Wararaꞌacayũ bit itaybit g̃u. 
\v 13 Iekabek kug̃ osunuy. Toy kug̃ osunuy iekabek soat tag̃. Ixe butet Deus ekawẽn i osunuy. 
\v 14 Ixe nomuju oekuku ip sorarayũ kabi beayũ. Cavaroyũ akpi jeje ip oekuku ixeyũ dak- -irucayũ akpi jeje. Cesay kug̃ ip osodop irucat kug̃- -iarixig̃at mug̃ẽg̃ẽ kug̃- -xipat cĩcãat kug̃. 
\v 15 Ibi bewi payao cẽmcẽm osunuy yobog̃at, tũybibiat. Ixem payaom Deus aꞌõkayꞌũmayũ aꞌõbacaap oꞌg̃uꞌũm. Yaꞌõpurug̃ ixeyũ kukukan jeenuy- -icaat kukat puxim. Soat podi ma yaꞌõbaca ixe. Kũyjobitꞌũmayũ aokam jetakomaap mubapuk puje. Ixeyũꞌũmꞌũm toy toyꞌade jeꞌe uvaꞌa mucakcakcakapꞌa bewiati buxim. 
\v 16 Ixe butet ibararak opop jeekabek tag̃ jedao dag̃ tak. Ika kukukayũ kukukat i ibutet. Yaꞌõbuyxiayũ kukukat i dak ibutet. Xepxeputet osunuy.
\p
\v 17 G̃ebuje Deus ekawẽn tojotjotꞌukat ojojojo. Cũg̃ꞌi osunuy kaxiepiat eta be. Yaꞌõberen oꞌjewãwã soat wasũyũ kay- -umayũ kay- -ig̃ẽmatꞌoꞌoꞌukayũ kay.
\p — Epesot cuy — ioꞌe yaꞌõberen cebe ip, wasũyũ be. — Epeyeꞌawero juy peta be- -Deus emumug̃u be- -yobog̃at pe — ioꞌe cebe ip- -ig̃ẽmatꞌoꞌoꞌukayũ be. 
\v 18 — Epesot cuy ika kukukayũꞌũmꞌũm ẽn o am, sorarayũ kukukayũꞌũmꞌũm ẽn o am tak, sorarayũꞌũmꞌũm ẽn o am tak, cavaroyũꞌũmꞌũm ẽn o am tak, cavaroyũ akpi jeje oekukuꞌiayũꞌũmꞌũm ẽn o am tak — ioꞌe cebe ip- -wasũyũ be. — Epesot cuy soatꞌũmꞌũm ẽn o am- -teiꞌũm kapikpikꞌukayũꞌũmꞌũm ẽn o am, jaꞌõbi kapikpikꞌukayũꞌũmꞌũm ẽn o am tak; yaꞌõbuyxiayũꞌũmꞌũm ẽn o am, yopĩcayũꞌũmꞌũm ẽn o am tak — ioꞌe cebe ip- -wasũyũ be.
\p
\v 19 Ibocewi waram g̃uto ipararu jĩjãat ojojojo. Ixe ipararu jĩjãat oꞌjeꞌawero ika kukukayũ eju, ixeyũ aꞌõkayayũ eju dak. Kuy juk ip oꞌjewemuꞌawero nopag̃õg̃õ ãm cavaro irucat akpi jejeat eju, ixe aꞌõkayayũ eju dak. Oꞌjenopag̃õg̃õm cĩcã ip. 
\v 20 Cavaro akpi jejeat oꞌe jĩjã ipararu jĩjãat pe. Oꞌtaomũn. Jewexe Deus ekawẽn muwẽnuwẽnꞌukat tak oꞌtaomũn. Ipararu jĩjãat etabutpe wuywebe iꞌe baꞌoreat mubapukpukꞌukat oꞌtaomũn. Jedopaꞌa dag̃ ipararu jĩjãat putet kukayũ oꞌg̃ug̃uykukuku wuywebe iꞌe baꞌoreat mubapukpug̃ puye. Ipararu jĩjãat pe “Ẽn xipat cĩcã” i teꞌe ma iꞌeꞌeꞌukayũ oꞌg̃ug̃uykukuku. Ipararu jĩjãat oꞌjoxik daxabog̃ pe, enxofre nõm sop pe. Jewexe Deus ekawẽn muwẽnuwẽnꞌukat tak oꞌjoxik ibo be. Itabẽg̃ ma ip oꞌjoxik ibo be. 
\v 21 Cavaro irucat akpi jejeat ixikꞌibiyũ aꞌõkayayũ dak oꞌyaoka. Payaom ip oꞌyaoka jebi bewi ijẽmꞌibin. Wasũyũ oꞌsubibuꞌuꞌun iẽn.
\b
\c 20
\p
\v 1 G̃ebuje Deus ekawẽn tojotjotꞌuk ojojojo waraꞌat. Kopkom oꞌe kabi kadiwi. Chavebog̃ kug̃ osunuy jebui be- -ikũybioreg̃ cĩcãatkũy nomudipꞌukap kug̃. Correntebu kug̃ tak osunuy ibupoxi jĩjãatpu kug̃. 
\v 2 Ixe Deus ekawẽn tojotjotꞌukat seg̃emoxixi oꞌg̃ukirik- -ibiõg̃buk kẽrẽayũ kukukat oꞌg̃ukirik. Satanás i ibutet. Ixe oꞌg̃ukirik ade koato tũy ãm- -1000 be koato tũy ãm. 
\v 3 Imukirik puje oꞌjoxik ikũybioreg̃ cĩcãatkũy be. Chavem tak oꞌsukũynomudip. Oꞌsukũymuymũg̃mũg̃ tak ijẽmap puxim waram soat ka dag̃ayũ mug̃uykukukuap puxim. Jeejẽm g̃u 1000 be koato dak. 1000 be koato kap puje bit waram ixe g̃ujẽm darem ma tũy ãm.
\p
\v 4 G̃ebuje yabikbikapyũ ojojojo idip cĩcãayũ. Ixeyũ jeje kaxikxikꞌiayũ dak ojojojo. Deus jaꞌõbacaap oꞌg̃ũm cebe ip.
\p — Apẽn ipi juayũ juk adi oekuku ip iaptei juy epeteida waꞌõbi — ioꞌe Deus cebe ip. — Xipacat cuy epeg̃ũm cedag̃ ma jekukuꞌukayũ be, — ioꞌe. — Ipiat pit cuy epesupiꞌajoat warẽmtag̃ jekukuꞌukayũ be — ioꞌe Deus.
\p Jesus kay jĩjã osodop iayũꞌũmꞌũm piõg̃buk tak ojojojo. Kuy juk itakomaayũ ixeyũꞌũmꞌũm oꞌyaoka. Oꞌyaꞌukꞌuk ip Jesus ekawẽn muwẽnuwẽn osodop puye- -kawẽn icẽmat muwẽnuwẽn osodop puye- -Deus ekawẽn muwẽnuwẽn osodop puye. Ipararu jĩjãat wap tak oꞌjẽg̃ꞌaecõg̃cõg̃ g̃u ip- -pũg̃ em tak kaꞌũma. Ixe buximat wap tak oꞌjẽg̃ꞌaecõg̃cõg̃ g̃u ip. Ibutet tak oꞌsubutetmubararakat g̃u jedopaꞌa be, jebũnũꞌa be dak kaꞌũma. Waram ip oꞌjetait. Soat em itait jeedop ip Cristo xe. Ixe eju dak adeayũ kukukayũm jeedop ip 100 koato bun. 
\v 5 Imẽn Deus Jesus kay jĩjã osodop iayũꞌũmꞌũm g̃utait waram. Wararaꞌacayũꞌũmꞌũm pit waram g̃utait 1000 koato kap puje acã- -kũyjobitꞌũmayũꞌũmꞌũm. 
\v 6 Icokcok jeedop ip Deus emumutaityũ- -koam oꞌg̃utaitꞌiayũ. Xipat cĩcãat kug̃ ip jeedop- -Deus xewiat kug̃. Waram kũyjobitꞌũmayũ eꞌũ buje, ixeyũ bit jeꞌũ g̃u. Deus buywatwatꞌukayũm ip jeedop paĩ buxim- -Cristo buywatwatꞌukayũm tak. Cristo eju adeayũ kukukayũm ip jeedop 1000 koato bun.
\p
\v 7 1000 koato kap puje Deus Satnaás g̃ujẽmat daomũnmũnapꞌa bewi- -ikũybioreg̃ cĩcãatkũy bewi. 
\v 8 Ixe Satanás jeeju soat ka dag̃ayũ mug̃uykukukum. Gogue aꞌõkayayũ g̃ug̃uykukuku. Magogue aꞌõkayayũ dak g̃ug̃uykukuku. Soat ka watwat g̃uꞌawero. Nopag̃õg̃õ ãm Deus aꞌõkayayũ eju ip g̃uꞌawero. Tak g̃u ma jeedop ip. Kaꞌoririt coꞌiãn ip jeedop adeap kug̃. Imuwẽg̃ũn paꞌore ma ip jeedop ade jĩjã buye. 
\v 9 Jepõg̃põg̃ ip soat ka dag̃ Satanás aꞌõkayayũ. Deus ebekitkiyũ ip yakodip yaokaap ojuy. Deus xe ikakukpinatka dak ip ikaakodip ika watwat aokaap ojuy. Imẽnpit daxa jeekop kabi kadiwi yaoka ojuyayũ mupik am. Soat ixeyũ g̃uꞌũm Satanás aꞌõkayayũ. 
\v 10 Deus ibiõg̃buk kẽrẽayũ kukukat joxik daxabog̃ pe- -iodi joꞌiat pe- -enxofre nõm sop pe. Adeayũ mug̃uykukukuꞌuk osunuyiat joxik ibo be. Kuy bima juk ipararu jĩjãat oꞌjoxik ibo be, jewexe Deus ekawẽn muwẽnuwẽnꞌukat tak. Ipiatꞌajojom cĩcã ip jeedop ibo be. Kabia bun ipiatꞌajojom ip jeedop, ixima bun tak. Soat em ma ipiatꞌajojom ip jeedop. Ipiatꞌajojoap iꞌũm g̃u cebe ip. 
\p
\v 11 G̃ebuje yabikbikap ojojojo idip cĩcãat, yobog̃at, irucat. Ixe jeje xikꞌiat tak ojojojo. Ipi oꞌjenapõn itabixewi, kabi dak. Ijojom g̃u ip osodop g̃ebuje bit. 
\v 12 Oeꞌũꞌũꞌiayũ ojojojo g̃ebuje- -yobog̃ayũꞌũmꞌũm, kaꞌũmaayũꞌũmꞌũm tak. Kacũg̃cũg̃ꞌi ip osodop yabikbikap wap. Deus jebubutupyũ oꞌtupmupaya livrodupyũ. Waraꞌatup oꞌtupmupaya g̃ebuje. Soat em itait jeedop ip Deus xe iayũ butet kukatup oꞌtupmupaya. Apẽn ijodi bima juk adi oekuku ip iap ibararak osunuy ibodup pe. Deus oꞌteida soat pe oeꞌũꞌũꞌiayũ be apẽn ijodi bima juk adi oekuku ip iapteim. Xipacat oꞌg̃ũm cedag̃ ma oekukuꞌiayũ be. Ipiat pit oꞌsupiꞌajoat ikẽrẽm oekukuꞌiayũ be. 
\v 13 Kuy juk tiyuati be oakõmꞌiayũꞌũmmꞌũm tak oꞌjebapuk kabi beat wap- -yabikbikap ceje xikꞌiat wap. Kuy juk ipi be oꞌjokot ipꞌiayũꞌũmꞌũm tak oꞌjebapuk cewap- -kuy juk ipiatꞌajojoap pe oꞌjoxik ip iayũꞌũmꞌũm tak. Xipacat oꞌg̃ũm cedag̃ ma oekukuꞌiayũ be. Ipiat pit oꞌsupiꞌajoat ikẽrẽm oekukuꞌiayũ be. 
\v 14 Deus wuymuyꞌũꞌũap oꞌjoxik daxabog̃ pe- -iodi joꞌiat pe. Ceꞌũꞌũayũ dak oꞌjoxik ibo be. Daxabog̃ pe ixeyũ xikap xepxep em wuyeꞌũap coꞌi. 
\v 15 Soat em itait jeedop ip Deus xe iaptup pe ibutet pararakꞌũmayũ bit oꞌjoxik daxabog̃ pe- -iodi joꞌiat pe.
\b
\c 21
\p
\v 1 G̃ebuje kabi iisuat ojojojo, ipi iisuat tak. Kuyat kuy oꞌjepaꞌũm- -kabi, ipi dak. Tiyuati dak oꞌjediepaꞌũm. 
\v 2 Ikaisuatka dak osukajojo- -Jerusalém ka. Õn, João, osukajojo. Kakopkom oꞌe kabi kadiwi- -Deus xewi. Ikadip cĩcã oꞌsukadop apẽn ayacat jewemudipudim jewebumũn ãm iap coꞌi. 
\v 3 Yabikbikap cejeat oꞌjekawẽn yaꞌõberen.
\p — G̃asũ bit Deus jemumug̃ẽg̃ẽyũ xe jeenuy — ioꞌe. — Cebekitkiyũm jeꞌe ip — ioꞌe. — Deus tak ixeyũ xe jeenuy soat em — ioꞌe. — “Ekay acã ocetabut ẽn acã Deusat puye,” i jeꞌe ip cebe — ioꞌe. 
\v 4 — Itadisup ip itõnap etadi. Kaꞌũmg̃u jeꞌe wuyeꞌũꞌũap — ioꞌe. — Wuyg̃uycũg̃ap tak kaꞌũmg̃u jeꞌe. Wuytõnap tak kaꞌũmg̃u jeꞌe. Ipiatꞌajojoap tak kaꞌũmg̃u jeꞌe wuywebe — ioꞌe. — Kuyatokok pit oiꞌũm kuy — ioꞌe.
\p
\v 5 — G̃asũ bit õn soat og̃uisun — ioꞌe yabikbikap cejeat. — Apẽn cuk adi eyaꞌĩjojoiaptup cuy etupmubararak iboap ekawẽn icẽmãn puye — ioꞌe owebe. — Soat jeꞌbapuk iboap ekawẽn tag̃. Imẽnpuye cũg̃ ma eywebe eyetabut am iboap ekawẽn kay — ioꞌe owebe. 
\v 6 — Soat kuy og̃ug̃ẽ — ioꞌe. — Soat kaꞌũm pima õn kuy kake. Soat iꞌũm puje dak õn pit kake — ioꞌe. — Kaꞌũma kake bimaat õn. Soatꞌũm pimaat tak õn ma — ioꞌe owebe. — Tideihem g̃u idibi otiũm ibipurukayũ be- -wuymutaicinaptiꞌa bewiati — ioꞌe. 
\v 7 — Xipat cĩcãat og̃ũm waꞌõkay jĩjãayũ be — ioꞌe. — Õn acã Deusat og̃uy cexe ip. Okpotpoyũm ip jeedop — ioꞌe. 
\v 8 — Waꞌõ kayꞌũmayũ kũyjobitꞌũmayũ bit daxabog̃ pe ip jeedop iodi joꞌiat pe- -ikẽrẽat mug̃ẽg̃ẽap epereꞌũmayũ- -jetabucap oꞌjepereꞌiayũ dak, kawẽn icẽmat muwarururunꞌukayũ dak, wararaꞌacat aokakaꞌukayũ dak, aoyũxiayũ dak, ibukaypacayũ dak, deusbaroyũ kay itabucayũ dak, dapxiyũ dak — ioꞌe. — Daxabog̃ pe ip jeedop soat em- -enxofre nõm sop pe — ioꞌe. — Deus pe ixeyũ xik puje ibo be waram jeꞌũꞌũap jeꞌe cebe ip — ioꞌe.
\p
\v 9 G̃ebuje waraꞌat oajẽm okay Deus ekawẽn tojotjotꞌukayũꞌin- -7 beayũꞌin- -baciaꞌa joꞌiat kukayũꞌin- -warẽmtaksug̃at kukayũꞌin- -ãmãm oꞌjoxik iat kukayũꞌin.
\p — Ejot — ioꞌe owebe. — Iwadip og̃ubapuk ewebe- -mẽmẽ buxim oeꞌũiat eju jewebumũnat — ioꞌe.
\p
\v 10 Waram g̃uto Deus biõg̃buk wag̃uyda. Deus ekawẽn tojotjotꞌukat odujuu coꞌa jeje- -um cĩcãatꞌa jeje. Jerusalém ka oꞌsukamubapuk owebe- -ikaisuatka- -soat tag̃ ikaisuatka- -Deus xewi ikakopꞌibitka.
\p
\v 11 — Deus soat podi ma jaꞌõbacaap kug̃ — iꞌeꞌem ibo ka jojoꞌukayũ. Ikasopsup oꞌsukadop Deus dipap kug̃.
\m Ikasopsup oꞌsukadop witaꞌitꞌitꞌa buxim- -yadeibog̃ cĩcãatꞌa buxim- -jaspeꞌa buxim. Ikaxiriruk tak oꞌsukadop cristalꞌa buxim. 
\v 12 Korara osodop ika akokoreren- -yobog̃at- -um cĩcãat. 12 be osodop ip korara exĩntabi. 12 beayũ ig̃o exĩntabi wiwiꞌukayũ osodop- -Deus ekawẽn tojotjotꞌukayũ. Israel ipotpoyũ butet ibararak osodop xĩntabi be 12 beayũ butet. 
\v 13 Ebapũg̃ osodop ip pũg̃ kadi xĩntabi. Ebapũg̃ osodop ip kaxi jẽmap kadi. Kaxiꞌatꞌacat kadi dak ebapũg̃. Kaxiꞌatꞌacap joreg̃at kadi dak ebapũg̃ ma. Kaxijẽmap joreg̃at kadi dak ebapũg̃ ma. 
\v 14 Ibo ka ekorara oꞌg̃ug̃ẽ ip 12 beatꞌa jeje witaꞌa jeje. Iboꞌa be mẽmẽ buxim oeꞌũiat emumujuyũ butet ibararak osodop- -12 beayũ butet.
\p
\v 15 Deus ekawẽn tojotjotꞌukat imuweg̃ũg̃ũnapꞌip kug̃ osunuy jebui be- -oweju kuy oꞌjekawẽniat. Ouro mug̃ẽg̃ẽꞌip kug̃ osunuy. Iboꞌip kug̃ osunuy ika muweg̃ũn ãm, ika exĩntabi muweg̃ũn ãm tak, cekorara muweg̃ũn ãm tak. 
\v 16 Ibo ka soat kadi jewekaꞌabiweg̃ũg̃ũn oꞌsukadop. Ixeꞌim Deus ekawẽn tojotjotꞌukat oꞌsukamuweg̃ũn. Pũg̃ kadi 2,200 quilometro oꞌsukadop. Ikaꞌa bicũg̃kadi ikaꞌaꞌõxakadiwi dak ibug̃ũn ma oꞌsukadop. 
\v 17 Korara dak oꞌg̃uweg̃ũn. 64 metro yabijodekadi osunuy. Ixeꞌim oꞌg̃uweg̃ũn. Pebũrũ metro osunuy iap oꞌg̃uwẽn owebe Deus ekawẽn tojotjotꞌukat. 
\v 18-20 Ibo ka soat tag̃ ikaisu oꞌsukadop. Ouro mug̃ẽg̃ẽka oꞌsukadop- -iwekoykeyꞌũmat mug̃ẽg̃ẽka. Ikaxiriruk oꞌsukadop vidro buxim. Ixe ekorara jaspeꞌa mug̃ẽg̃ẽ osunuy. Korara oꞌjomuymuy ip witaꞌa dag̃- -12 beatꞌa dag̃. Ig̃oꞌa dag̃ yadeibog̃ cĩcãatꞌa oꞌyamuymuy ip yaꞌĩcatꞌa yamudim am. Koam jaspeꞌa oꞌyamuy ip. Jaspeꞌa nomuju safiraꞌa oꞌyamuy ip. Safiraꞌa nomuju ágataꞌa oꞌyamuy ip. Ágataꞌa nomuju esmeraldaꞌa oꞌyamuy ip. Esmeraldaꞌa nomuju sardônioꞌa oꞌyamuy ip. Sardônioꞌa nomuju sárdioꞌa oꞌyamuy ip. Sárdioꞌa nomuju cristólitoꞌa oꞌyamuy ip. Crisólitoꞌa nomuju beriloꞌa oꞌyamuy ip. Beriloꞌa nomuju topázioꞌa oꞌyamuy ip. Topázioꞌa nomuju crisóprasoꞌa oꞌyamuy ip. Crisóprasoꞌa nomuju jacintoꞌa oꞌyamuy ip. Jacintoꞌa nomuju amestistaꞌa oꞌyamuy ip. Ibũrũꞌa ip oꞌyamuy yaꞌĩcatꞌa 12 beatꞌa. Idip cĩcã korara osodop yamuy buje. 
\v 21 Xĩntabi pérolaꞌa mug̃ẽg̃ẽ osodop 12 be. Pũg̃pũg̃pũg̃ xĩntabi pũg̃ꞌa ma imug̃ẽg̃ẽ osunuy pérolaꞌa ma. Ika ukpibu ouro mug̃ẽg̃ẽ osunuy- -iag̃uat. Ixiriruk osunuy vidro buxim.
\p
\v 22 Deus eju kawẽnwẽnapꞌa dobuxik g̃u ibo ka be, wuykukukat Deus ibo ka be nuynuy buye. Ixe soat podi ma yaꞌõbaca. Mẽmẽ buxim oeꞌũiat tak ig̃o ka be nuynuy. Imẽnpuye yaꞌũmg̃u Deus eju kawẽnwẽnapꞌa. 
\v 23 Kaxi g̃u ig̃o ka mukabiaham. Kaxiaat tak kaꞌũma. Deus jedipam ma ikamukabiaham, mẽmẽ dak. Lâmpadaꞌa bodi ma idip Deus dipap, mẽmẽ dipap tak. 
\v 24 Jekukum ip jeꞌe ibo kabia dag̃ soat ka dag̃ayũ. Ibo ka ekabia soat ipi juayũ g̃ukabia.
\p — Deus ocebodi ma yaꞌõbuyxiat- -mẽmẽ buxim oeꞌũiat tak — i jeꞌe ip ijodi bima yaꞌõbuyxi osodopꞌiayũ. — Deus ocebodi ma yaꞌõbacaat mẽmẽ buxim oeꞌũiat tak — i jeꞌe ip ijodi bima yaꞌõca osodopꞌiayũ.
\m
\v 25 Kabia bun ibo ka exĩntabi ikoce. Soat em ma ikoce. Nomudip g̃u ma ip, kabiok g̃u buye. Soat em kabia. 
\v 26 Jaꞌõbuyxiap ip idojot ibo ka be soat ka watwat.
\p — Ẽn ocebodi ma aꞌõbuyxi, mẽmẽ buxim oeꞌũiat tak — i jeꞌe ip Deus pe. — Ẽn ocebodi ma aꞌõbacaat — i dak jeꞌe ip cebe.
\m Soat jebubut ip idojot teibog̃at. Soat jeꞌg̃ũm ip Deus pe, mẽmẽ buxim oeꞌũiat pe dak. 
\v 27 Soat tag̃ iisuꞌũmat pit jeõm g̃u ibo ka be. Wuysũsũg̃at mug̃ẽg̃ẽꞌukat tak kaꞌũma ma. Napapaꞌukat tak kaꞌũma ma. Mẽmẽ buxim oeꞌũiat pubutup pe ibutet pararakayũ acã jeõm- -soat em itait jeedop ip Deus xe iatup pe ibutet pararakayũ acã.
\b
\c 22
\p
\v 1 Wuymutaicinapti dak oꞌtimubapuk owebe Deus ekawẽn tojotjotꞌukat. Tixiriruk oꞌtinuy cristal buxim. Deus abikbikap pewi dijẽmjẽm, mẽmẽ buxim oeꞌũiat abikbikap pewi dak. 
\v 2 Ixedi jediekukum ika ukpibu dag̃. Wuymutaicinapꞌip opop tiwãbu dag̃, jodiwinãbudaku. 12 em pũg̃ koato be yaꞌaꞌe nuynuy. Soat kaxi yaꞌaꞌe nuynuy. Iboyũdup soat ka dag̃ayũ muꞌadaꞌadaaptup. 
\v 3 Deus xe ikẽrẽat pit opop g̃u ibo ka be- -pũg̃ tak kaꞌũma.
\p Deus abikbikap jeedop ibo ka be, mẽmẽ buxim oeꞌũiat abikbikap tak. Cebeam kapikpikꞌukayũ soat em jeꞌe cebe: — Ẽn soat podi ma xipat — i.
\m
\v 4 Mẽmẽ buxim oeꞌũiat topajo ip. Ixe butet jeꞌe ibararak topaꞌa be ip. 
\v 5 Kabiok g̃u jeꞌe ibo ka be. Lamparinaꞌa kug̃ g̃u dak jeedop ip ibo ka watwat. Kaxie dak kaꞌũma ma. Wuykukukat Deus ma ibo ka watwat mukabiahaꞌukan jeenuy. Ixe eju adeayũ kukukayũm jeedop ip soat em.
\p
\v 6-7 G̃ebuje Deus ekawẽn tojotjotꞌukat oꞌjekawẽn oweju.
\p — “G̃axĩn ma g̃uto waram oajẽm,” iꞌeꞌem Jesus — ioꞌe owebe. — Iboap ekawẽn pit icẽmãn — ioꞌe. — Xipat ewebe etabut am iboap ekawẽn kay — ioꞌe. — Deus jekawẽn muwẽnuwẽnꞌukayũ mutaybitbin apẽn g̃uyjom jeꞌbapuk iam — ioꞌe owebe. — Ixe juk jekawẽn tojotjotꞌukat oꞌg̃udot emutaybit am apẽn g̃axĩn ma jeꞌbapuk iam — ioꞌe. — Icokcok jeedop ip iju dup peat ekawẽn kay kũyjobicayũ dak — ioꞌe.
\p
\v 8 Õn João. Õn ma juk soat iboap ojojojo. Soat iboap oyaꞌĩjojo. Soat co epere buje, ocẽg̃ꞌaecõg̃cõg̃ pin cuk Deus ekawẽn tojotjotꞌukat wap- -soat cuk adi iboap oꞌg̃ubapuk owebe iat wap. “Ẽn xipat cĩcã” iꞌe am cebe ocẽg̃ꞌaecõg̃cõg̃.
\p
\v 9 — Owap pit cuy ecẽg̃ꞌaecõg̃cõg̃ g̃u! — i bit oꞌe owebe. — Õn tak ebure ma, wuykitpitpiyũ bure dak — ioꞌe. — Deus ekawẽn muwẽnuwẽn õn eybuxim — ioꞌe. — Pũg̃ tag̃ ma wuyju kũyjobit ijudup peat ekawẽn kay — ioꞌe owebe. — Deus wap acã ecẽg̃ꞌaecõg̃cõg̃ “Ẽn xipat cĩcã” iꞌe am cebe — ioꞌe. 
\v 10 — G̃axĩn ma soat jeꞌbapuk ijudup peat ekawẽn tag̃ ma — ioꞌe. — Imẽnpuye ebuꞌum g̃u juy eg̃uy apẽn g̃uyjom jeꞌbapuk iap muwẽn ãm itaybitꞌũmayũ be — ioꞌe. 
\v 11 — Apẽn ip jekukum g̃asũ iap puxim jeeku ip ipi juayũ. Ikẽrẽat mujurũg̃rũg̃ ma jeedop ip ikẽrẽat mujurũg̃rũg̃ꞌukayũ. Ikẽrẽat kay acã jeedop ip g̃ebum ikẽrẽat kay g̃ebumayũ. Xipacat mug̃ẽg̃ẽm pit jeedop ip xipacat mug̃ẽg̃ẽꞌukayũ. Soat tag̃ iisu jeedop ip soat tag̃ iisuayũ — ioꞌe owebe.
\p
\v 12 — “Eyaꞌõpicũg̃cũg̃ cuy epesop,” iꞌeꞌem Jesus. “G̃axĩn ma g̃uto oajẽm,” iꞌeꞌem. “Wetaybit cĩcã eyekukuam,” iꞌeꞌem. “Apẽn ipi dag̃ pima juk adi oekuku ip iaptei õn ma oteida soat pe ipi juayũ be,” iꞌeꞌem Jesus. “Xipacat og̃ũm xipacayũ be,” iꞌeꞌem. “Ipiat pit osupiꞌajoat xipatꞌũmayũ be,” iꞌeꞌem Jesus — ioꞌe owebe. 
\v 13 — Soat kaꞌũm pima õn kuy kake. Soat iꞌũm puje dak õn pit kake,” iꞌeꞌem Jesus — ioꞌe. — Kaꞌũma kake bimaat õn. Soatꞌũm pimaat tak õn ma. Koapat õn. Kanomũmat tak õn ma,” iꞌeꞌem Jesus — ioꞌe.
\p
\v 14 Icokcok jeedop ip jesay iwuywuyat kukayũ- -iisuat kukayũ.
\p — Eyesay iisuat pima, “Eymutaicinapꞌa epeyaꞌo juy. Yaꞌo pi g̃u eywebe,” i jeꞌe Deus eywebe. “Epeõm cuy okay ikabog̃atka exĩntabi dag̃wi,” i jeꞌe eywebe. 
\v 15 Wũy ma ikabog̃atka wi jeedop ip ikẽrẽat mug̃ẽg̃ẽap epereꞌũmayũ bit, ibukaypacayũ dak, ikẽrẽat mug̃ẽg̃ẽꞌukayũ dak, waraꞌacat oꞌyaokaꞌibiyũ dak, deusbaroyũ kay itabucayũ dak, napapaꞌukayũ dak, wararaꞌacat mug̃uykukukuꞌukayũ dak — ioꞌe.
\p
\v 16 — Jesus õn — iꞌeꞌem. — Õn cuk wekawẽn tojotjotꞌukat og̃udot eymukũyjo am apẽn g̃uyjom jeꞌbapuk iam — iꞌeꞌem. — Okay itabucayũ mukũyjo am og̃udot — iꞌeꞌem. — Ipi kukat Davi naxeg̃ebit õn — iꞌeꞌem. — Kasopta buxim õn- -tasopata buxim- -kabiada buxim — iꞌeꞌem Jesus.
\p
\v 17 — Ejot cuy! — iꞌeꞌem Deus biõg̃buk, iwadip tak.
\p — Ejot cuy! — i juy jeꞌe ip ijop ekawẽntup cocoꞌukayũ dak.
\p Ibipurukat cuy jeedot. Tikõn pinayũ wuymutaicinapti idikõn. Tideiꞌũma idikõn ip.
\p
\v 18 João õn. Ijoptup ekawẽn cocoꞌukayũ oyawẽ g̃asũ. Kaypatpan g̃u õn eꞌem. Icẽmãn õn eꞌem. Apẽn Deus warẽmtaksug̃pi supiꞌajoat kũyjobitꞌũmayũ be iap ibararak opop ijudup pe.
\p — Eyabewiat ekawẽn iboap ekawẽn muacokcog̃ pima, Deus imẽn ma ipiat supiꞌajoat eywebe — i õn eꞌem eywebe.
\m
\v 19 Ijudup ekawẽnꞌin imuwẽn puꞌu bima bit yaꞌopi jeꞌe eywebe wuymutaicinapꞌa. Epeõm g̃u ikaisuatka be- -Deus ka be. Apẽn ibo ka ikadip cĩcã iap ibararak opop ijudup pe.
\p
\v 20 — G̃axĩn ma g̃uto oajẽm waram — iꞌeꞌem soat iboap oꞌg̃uwẽniat. — Oajẽm ma — iꞌeꞌem ixe- -Jesus eꞌem.
\p — Imẽn cuy jajẽm — i õn tak eꞌem.
\p — Ejot cuy! — i õn eꞌem wuykukukat Jesus pe.
\p
\v 21 — Jesus, xipan cuy soat ebekitkiyũ ejukuk — i õn eꞌem wuykukukat Jesus pe.
\p Ibũrũ ma.