\id 2CO
\h Tutu Corintu Uvi
\toc1 Tutu Corintu Uvi
\mt Tutu uvi tāchi rachaꞌnu Paulu nuu ñivi chìnuni tuꞌun Jesuu ìyo ñuu Corintu
\c 1
\s Paulu tàa ra tutu iꞌya kuenda ma ndian chìnuni ña ìyo ma ñuu Corintu
\p
\v 1 Yuꞌu Paulu, ra kùu tatun Jesucristu, ti takan kùuni Ndioo ña na kùi chiꞌin ma ra yani yo Timoteu, tàa ndi ma tutu iꞌya nuu ndyoꞌo ndian chìnuni tuꞌun Ndioo ìyo ma ñuu Corintu, ta juuni nuu tandiꞌi inga ma ndian chìnuni ìyo ma ñuꞌuꞌ Acaya ndia.
\v 2 Ma Ndioo, ra kùu Tatá yo chiꞌin ma Rachaꞌnu Jesucristu, na kata ra ma ñamani ra chata ndo, ikan na kuu koo vii ndo chiꞌin taꞌan ndo.
\s Ndioo, jàmani ra anima yo
\p
\v 3 Na jakaꞌnu yo ma Rachaꞌnu Ndioo ra kùu Tatá ma Rachaꞌnu Jesucristu, vati rakan kùu ma ra kùu Tatá yo ña kùndaꞌvini yo, ta jàmani anima yo.
\v 4 Vati takua jàmani ra anima yo ora ndèꞌo tundoꞌo, juuni kua ikan ìyo yi ña jàmani yo inga ma ndian ndeꞌe tundoꞌo takua jàꞌa ra chiꞌo ndia.
\v 5 Vati ma takua kàya ma tundoꞌo ña ndèꞌo chaꞌaꞌ ma Jesuu, juuni takan kàya ma tundeeni yo kuenda chaꞌaꞌ ra.
\v 6 Vati tu ndèꞌe ndi tundoꞌo, chaꞌaꞌ maa ndo kùu yi, kuenda ña jandeeni ndo ta kàkú ndo ora ndèꞌe ndo tundoꞌo, ta tu jàmani Ndioo ndi, juuni kùu yi kuenda maa ndo ndia, vati yakan kùu yi ña jaꞌa yi ña na jandeeni ndo ma tundoꞌo ndeꞌe ndo takua jàndeeni maa ndi ndia.
\v 7 Vati taku ndyuꞌu cha chìto vaꞌa ndi naja ni kuu yi chiꞌin ndo, ti vaji ndèꞌe ndo tundoꞌo takua ndèꞌe ndi yi, juuni kua ikan ni kuꞌva ma Ndioo tundeeni nuu ndo takua jàꞌa ra chiꞌin ndi ndia.
\v 8 Ndyoꞌo yani, kùuni ndi ña koto kachin ndo, ti yaꞌa ga kuaꞌaꞌ tundoꞌo ndēꞌe ndi ma ninii kaꞌnu ñuꞌuꞌ Asia niku. Vati yaꞌa ga xaan ma kuꞌva ikan, ti ndava kündeega ndi ña ndēꞌe ndi ma tundoꞌo ikan niku, vati töve chìto ndi niku, tu ni kee ndito ndi jàꞌa ma tundoꞌo ikan.
\v 9 Vati ndicha ña chànini ndi ña chani kuvi ndi niku. Va ma ñaꞌa kūu yi ña jànaꞌa yi nuu ndi, ña na küu jakakú ndi juuni maa ndi vati ìyo yi ña chinuni ndi ma ña jàꞌa ma Ndioo, ra jànataku ma ndian ndií.
\v 10 Ta juuni ma Ndioo ikan kùu ra ña jākakú ndi nuu ni kuvi ndi ma tiempu ikan. Ta chìto ndi ña takan jàkakú ra ndi vitin ta itiꞌ nuu ndia,
\v 11 tuva ndyoꞌo tìndee ndo ndi ña kaꞌan ndo chiꞌin Ndioo chaꞌaꞌ ndi. Ta tu yaꞌa ga kuaꞌaꞌ ndo kàꞌan chiꞌin Ndioo chaꞌaꞌ ndi, yaꞌa ga ni jakaꞌnu ndo ra, chaꞌaꞌ ma ñamani ña ìyo chiꞌin ndi jāꞌa ra.
\s Nuu kàꞌan Paulu nda chaꞌaꞌ kùu yi ña nī kuu kuꞌun ra ñuu Corintu
\p
\v 12 Vati ma ña yaꞌa chàtaꞌani ndi kùu ma ña ni kaꞌin vitin: ma chinituni ndi kàꞌan yi ña jiꞌna chiꞌin maa ndo kùu yi ña yaꞌa ga vaꞌa ta ndaa ìyo ndi, ña kua chiꞌin ma inga ñivi ìyo ñuñivi. Ta tìndee Ndioo ndi ña jàꞌa ndi ma ña kùuni ra, vati ma ña jàꞌa ndi kùu yi, chiꞌin ma ñamani Ndioo, ta yüvi chiꞌin ma ña chànini ma ñivi.
\v 13 Yakan va ndisaa ma tuꞌun ña tàa ndi kuenda ndo, tàa kachin ndi yi, ikan na kuu jakuaꞌa ndo yi ta kutunini ndo ma ña kàꞌan yi. Ta ndàtu ndi ña na kuu kutunini ndo yi ndia.
\v 14 Ma takua cha chāꞌa ndo kuenda naja kua jàꞌa ndi nuu ndo, yakan va ma ora ni kichi ndiko ma Rachaꞌnu Jesuu ni koto kachin ndo tiá. Ma kivi ikan yaꞌa sii ni kuuni ndo ndeꞌe ndo ndi, takua yaꞌa sii ni kuuni ndi ndeꞌe ndi ndo ndia.
\v 15 Va takua yuꞌu cha chāꞌi kuenda ña yaꞌa kùunio ndeꞌo taꞌan yo, yakan va chānini̱ ña vaꞌaga ña na kundeꞌe jiꞌnai ndo nuu ìyo ndo, ikan na sii kuuni ndo chaꞌaꞌ ña ni ndeꞌe ndo yuꞌu uvi chaꞌaꞌ.
\v 16 Takan chànini̱ ña yaꞌi ta kundeꞌe jiꞌnai ndo ma ora ni kuꞌin itiꞌ ñuꞌuꞌ Macedonia, tajan ma ora ni chikoniꞌi ndikoi kuu kundeꞌe ndikoi ndo ma chaꞌaꞌ uvi. Ta takan kuu tindee ndo yuꞌu chiꞌin ña kùmani nui, ikan na chaa vaꞌi ma itiꞌ ñuꞌuꞌ Judea.
\v 17 ¿A chànini ndo ña jàndaꞌviñaꞌi ndo, ora kāꞌin ña ni kundeꞌi ndo? ¿A chànini ndo ña yuꞌu ora kāꞌin ña ni jaꞌi iin tiñu, uvi nuu ña chànini̱, chaꞌaꞌ ña kāꞌin “vaꞌa” ta “väꞌaꞌ” iin tiempuni?, kùuni ndo.
\v 18 Va yöve takan kùu yi, ti ndava ndaa nuu Ndioo kàꞌin ña na küu kaꞌan ndi “vaꞌa” ta “väꞌaꞌ” ma iin tiempuni.
\v 19 Vati taku yuꞌu, Silvanu, chiꞌin Timoteu, ña kùu ma ndra kàtituꞌun tuꞌun Jesucristu ra seꞌe Ndioo tañu ndo, küu kàꞌan ndi “vaꞌa” ta “väꞌaꞌ” iin tiempuni. Vati uvanuu ma tuꞌun ña kàꞌan ndi kuenda ra kùu yi ña “vaꞌa”.
\v 20 Vati tandiꞌi ma tuꞌun ña chàꞌa Ndioo nuu ñivi, “vaꞌa” kùu yi ti jàchinu ra yi chaꞌaꞌ Jesuu. Yakan va ora jàkaꞌnu yo Ndioo, kàꞌan yo “Amén, (ña kùuni yi kaꞌan yi takan na kuu yi)” chaꞌaꞌ ma Rachaꞌnu Jesucristu ndia.
\v 21 Vati maa ma Ndioo kùu ra ña cha kāchin ra ndi chiꞌin ndo ta jàꞌa ra ña kùu ndicha yo kuenda Cristu. Vati ma ña jāꞌa ra kùu yi ña tāvaniꞌi siin ra yo kuenda ra,
\v 22 ta kāni ra ma tuni ra yo, ta tāchi ra ma Tati Ií ra ña koo yi chiꞌin yo endeeni, ta yakan kùuni yi kaꞌan yi ña ndicha ña ni niꞌo ma ña vaꞌa ìyo chiꞌin ra itiꞌ nuu.
\p
\v 23 Ta takäꞌan kuꞌin kundeꞌi ndo ma ñuu ndo takua chànini̱ niku, jāꞌi yi takan vati tüvi kùuni̱ jakuninai ndo. Ta tu tüvi ña ndicha kùu ma ña kàꞌin, yakan va ìyo vaꞌi ña jandeꞌe Ndioo tundoꞌo yuꞌu.
\v 24 Vati yüvi ndyuꞌu kùu ma ndian kùu chitoꞌo ndo ña chàꞌnda ndi tiñu nuu ndo. Uvaa ma ña kùuni ndi kùu yi ña kùuni ndi tindee ndi ndo, ikan na sii kùuni ndo chiꞌin ma ña chìnuni ndo, vati ndicha ña cha chìnuni vaꞌa ndo tuꞌun Jesuu.
\c 2
\p
\v 1 Ta chaꞌaꞌ ñaꞌa kùu yi ña chānini̱ ña vaꞌaga ña töve kuꞌin kundeꞌi ndo inga chaꞌaꞌ, koto jaꞌi ña na ndaꞌvi kùuni ndo.
\v 2 Ta tu yuꞌu kuꞌin kundeꞌi ndo niku, ta jaꞌi ña na ndaꞌvi kùuni ndo, ti nïꞌiin ndo töve kuu jandosii ndo yuꞌu chaꞌaꞌ ña ndaꞌvi kùuni ndo, tuva takan.
\v 3 Ta chaꞌaꞌ yakan kùu yi ña tāi ma tava kàꞌin chiꞌin ndo, ña töve nī kuuni kuꞌin kundeꞌi ndo koto jaꞌa ndo ña na ndaꞌvi kuuni̱, tuva juuni maa ndo kuu ma ndian ìyo yi ña jandosii yuꞌu ora ndèꞌi ndo. Ta chìto ndaa vaꞌi ña tu yuꞌu sii kùuni̱, nda maa ndo ni kichi sii kùuni ndo ndia.
\v 4 Vati ora tāi maa tutu carta ikan kuenda ndo, yaꞌa ga nàkanini̱, ta ndaꞌvi kùuni̱ ña ndava chàkui niku. Va na töve nī tai yi kuenda ña na ndaꞌvi kùuni ndo, vati tāi yi, ikan na koto kachin ndo ña yaꞌa ga kùuni̱ ndeꞌi ndo.
\s Paulu jàkaꞌnuni ra ma ra jàꞌa kuati
\p
\v 5 Ìyo iin ra jāꞌa ña ndaꞌvi kùuni̱, ta töve jàꞌa ra yi kuenda ña na ndaꞌvi kùuni uvaa yuꞌuni, vati juuni nda maa ndo ndaꞌvi kùuni ndo jàꞌa ra ndia. Takani kàꞌin kuenda ndo, koto yaꞌa nduu tuku ma kua kàꞌin.
\v 6 Ta ma tundoꞌo ña cha jāndeꞌe ndo ma rakan, cha vaꞌa takani, vati nduvaꞌa cha kuaꞌaꞌ kùu yi kuenda ra.
\v 7 Yakan va ma ña ìyo yi ña jaꞌa ndo ma vitin, kùu yi ña na jakaꞌnuni ndo ma kuati ra, ta na jamani ndo ra koto yaꞌa ga sutini kuuni ra, ta jaꞌa ra ma ña töve vaꞌa.
\v 8 Ta chaꞌaꞌ yakan kùu yi ña jànini̱ ndo, ña na janaꞌa ndiko ndo nuu ra naja kua yaꞌa kùuni ndo ndeꞌe ndo ra.
\v 9 Vati ma niku ga, cha tāi ma tuꞌun iꞌya nuu ma tutu ña tāchi̱ nuu ndo, kuenda ña na kiꞌi̱n kuꞌva ndo, ndeꞌo tuva ndicha ña jachiꞌin ndo ma ña kàꞌin.
\v 10 Yakan va tu jàkaꞌnuni ndo ma kuati ra, chaꞌaꞌ ma nda ña nikuuni ña jāꞌa ra, yuꞌu juuni jàkaꞌnuni̱ yi ra ndia. Vati ma ora jàkaꞌnuni̱ ma kuati, tuva ìyo iin nda chaꞌaꞌ kùu yi, ndisaa yakan jàꞌi yi chaꞌaꞌ ndo ndava nda nuu ma Rachaꞌnu Cristu, ti kùndaꞌvini̱ ndo,
\v 11 ikan ma kuiꞌna Satanaa, na tüvi kùu jaꞌánꞌ ma ña kùuni maánꞌ chiꞌo, vati cha nàkoto vaꞌa yo ma mañáꞌ.
\s Nàkanini Paulu chaꞌaꞌ ña naja ni nataꞌan ra ma ra yani ra Titu ma ñuu Troa
\p
\v 12 Takan kūu tajan ora chāa ndioi ma ñuu kaꞌnu ña nàni Troa, ña kuàkatituꞌin ma tuꞌun ma Rachaꞌnu Cristu, nduvaꞌa nūna Ndioo ma anima ma ñivi nui, chaꞌaꞌ ma tiñu jàꞌi kuenda ra.
\v 13 Va vaji takan jāꞌa Ndioo chiꞌi̱n, va yuꞌu yaꞌa nakanini̱ vaji ìyoi ikan, ti töve nātaꞌin ma ra yani yo Titu ma ikan. Ta chaꞌaꞌ yakan kùu yi ña nākaꞌin chiꞌin na ña ni kuꞌin, tajan kēe ndioi kuàꞌin ma itiꞌ ñuꞌuꞌ Macedonia.
\s Ndioo kùu ma ra tìndee ndi, ikan na kuu jakanaa ndi, ta takan kùu chinuni kuaꞌaꞌ ma ñivi ma tuꞌun Jesuu
\p
\v 14 Ta chàꞌi taꞌvindioo nuu ma ra ndàka ndi kuàꞌan ndi ma itiꞌ Jesucristu, ti cha jākanaa ra ndi kuenda ra, ta chaꞌaꞌ maa ndi kùu yi ña jàkoto ra ma tuꞌun ra nuu ma inga ñivi, takua jàꞌa iin xiko ña yaꞌa vii chàꞌan ma ora chìtakuati yi nda ni kùuni.
\v 15 Vati ndyuꞌu kùu ndi takua kùu ma xiko ma kutu ña sòkó ma Jesuu nuu Ndioo, ña chìtakuati yi nuu ndisaa ñivi a ma ndian jàkakú Ndioo a ma ndian töve ndia.
\v 16 Vati kuenda ma ndian töve chìnuni, ma xiko ma kutu iꞌya ni kaꞌni yi na takua jàꞌa iin xiko xaan. Va kuenda ma ndian jàkakú Ndioo, ma xiko iꞌya iin ña vii kùu yi, ti ni jaꞌa yi ña na koo ndito na indeeni. Ta ma tiñu iꞌya nïꞌiin ñivi tüvi ìyo vaꞌa na, ña kùu jaꞌa na yi.
\v 17 Va taku ndyuꞌu vii kàtituꞌun ndi ma tuꞌun Ndioo nuu ma ñivi, ta töve chàkunuu ndi jàꞌa ndi takua jàꞌa inga na, ña kàtituꞌun na yi kuenda ña jàndokuikani yi na. Vati ndava ndaa nuu Ndioo, kàꞌan kachin ndi ma tuꞌun Jesuu nuu ma ñivi, ti maa ma Ndioo kùu ma ra tāchi ndyuꞌu, ña na ndoꞌiin ndi chiꞌin Jesuu.
\c 3
\s Ma tuꞌun chaa ña jàndoꞌiin tuꞌun ma Paulu chiꞌin ma ñivi
\p
\v 1 Ta ma ora kàꞌan ndi teꞌen, ¿a chànini ndo ña cha kīchaꞌa ndiko ndi jàkaꞌnu ndi juuni maa ndi?, kùuni ndo. ¿A chànini ndo ña ìyo yi ña janaꞌa ndi iin tutu nuu kàꞌan yi ña ñivi vaꞌa kùu ndi, ta nda ñuu kìchi ndi, a ña ndàkan ndi nuu ndo, ña na jaꞌa ndo ma tutu ikan kuenda ndàa ndi takua jàꞌa ma inga na?, kùuni ndo. Na yüvi takan kùu yi.
\v 2 Vati juuni maa ndo kùu ndo takua kùu ma tutu ña chìniñuꞌu ndi ña kàꞌan ña ñivi vaꞌa kùu ndi. Ta ndisaa ma ñivi kùu jakuaꞌa na yi, ta takan kùu koto na nda ñivi kùu ndi chaꞌaꞌ ña cha ìyo ndo chiꞌin ndi ma tichi chinituni ndi.
\v 3 Ta takan kùu yi ña cha chìto ndaa vaꞌa na ña ndyoꞌo kùu ndo, takua kùu ma tutu ña tāa juuni maa ma Rachaꞌnu Cristu ña chāꞌa ndi nuu ndo, ora kàtituꞌun ndi ma tuꞌun ra nuu ndo niku. Ta töve nī taa ma Tati Ií Ndioo ndìto yi chiꞌin tinta chata yuu xaꞌnda kuenda ndo, takua jāꞌa Ndioo chiꞌin Moisés tatiempu, vati tāa ra yi va tichi anima ndo.
\v 4 Chìnuni ndi ma ña vaꞌa ña jàꞌa ma Ndioo chaꞌaꞌ ma Jesuu, yakan va chìto ndi ti ndicha vaꞌa ma ña kàꞌan ndi iꞌya.
\v 5 Ta na töve kùuni ndi kaꞌan ndi ña ma ña jàꞌa ndi, vàchi yi tichi chinituni maa ndi chaꞌaꞌ ña ìyo ndatu maa ndi, vati ndisaa ma ña kùu jaꞌa ndi vàchi yi, va tichi chinituni Ndioo.
\v 6 Vati ndyuꞌu cha chāꞌa Ndioo tundeeni ra nuu ndi kuenda ña na janaꞌa ndi ma tuꞌun chaa ra, ña jāndoꞌiin ra chiꞌin ndisaa yo. Ta takan kūu yi ña töve nī jandoꞌiin ra yi chiꞌin ma tutu ley chaꞌnu ña tāa Moisés, vati jāndoꞌiin ra yi chiꞌin ma Tati Ií ra. Vati ma tutu chaꞌnu ikan chàꞌni yi yo, ti taku ma Tati Ií ra ikan chàꞌa yi, va nuu koo ndìto yo endeeni.
\v 7 Ta ndicha kuii ma ley ña tāa Moisés chiꞌin letra chata ma yuu xaꞌnda, kīchi yi chiꞌin kuaꞌaꞌ ña tàcha, ña ni ma ndian israelita na küu ndeꞌe na nuu ma Moisés ma ora ikan chaꞌaꞌ ña yaꞌa tàcha yi. Ta vaji ndicha ña yaꞌa tàcha yi ma ora ikan, va chiꞌin tiempu ndāꞌva maa yi kueeni kueeni.
\v 8 Va tu iin ña nduvaꞌa kuii tàcha ta kaꞌnu kùu ma ley ikan ña chàꞌni yi, ¡ta nduvaꞌa ga kaꞌnu kùu ma tuꞌun chaa ña chāꞌa Ndioo nuu yo chaꞌaꞌ ña ìyo ma Tati Ií ra chiꞌo!
\v 9 Va jin ndicha ña yaꞌa kaꞌnu kùu ma ley ña tìsokuati yo kuenda ña na kuvi yo, vati nduvaꞌa ga kaꞌnu kùu ma tuꞌun chaa ña jàꞌa ña na kuu yo ndian ndaa.
\v 10 Vati chaꞌaꞌ ña nduvaꞌa kuii kaꞌnu kùu ma tuꞌun chaa, chaꞌaꞌ yakan kùu yi ña na tüva kuenda kùu ma tuꞌun chaꞌnu, tuva jando induku yo yi chiꞌin ma tuꞌun chaa.
\v 11 Yakan va tu yaꞌa ga kaꞌnu kūu ma ña ni ndaꞌva maa kueeni kueeni, nduvaꞌa ga kaꞌnu kùu ma tuꞌun chaa ña endee töve ndàꞌva ma ña tàcha yi.
\v 12 Ndicha kuii ti chìto ndi ña ni jachinu Ndioo ma ña ndàtu ndi, yakan va kùu kàꞌan kachin ndi naja kua kùuni maa ndi, ti ìyo tundeeni ra chiꞌin ndi.
\v 13 Vati taku ndyuꞌu, na töve jàꞌa ndi takua jāꞌa ma Moisés, ña chāsi ra ma jaꞌma nuu ra, koto ndeꞌe na ña nàa ma ña tàcha ma nuu ra kueeni kueeni.
\v 14 Va ma ndian israelita na töve nī kutunini na ma tuꞌun chaꞌnu ikan, ti juuni ndàsi ga ma nuu na chiꞌin ma jaꞌma mandil ikan, nda ma vitin. Ta uvanuu ra kùu kindaa ma jaꞌma ikan, kùu ma Rachaꞌnu Cristu ora kīchaꞌa yo chìnuni yo tuꞌun ra.
\v 15 Ta ndicha kuii ña takan kùu yi nda vitin, ti ora jàkuaꞌa na ma tutu chaꞌnu ña tāa Moisés, ndòndava ma chinituni na jàꞌa ña töve jàchiꞌin na tuꞌun Jesuu.
\v 16 Ta tu ìyo ma ndian ndàkoo na ma itiꞌ kini nuu jàꞌa na kuati, ta kìꞌvi na ma itiꞌ Rachaꞌnu Jesuu, ni kindaa ma jaꞌma mandil ña ndàsi nuu na.
\v 17 Vati maa ma Rachaꞌnu Ndioo kùu ra ma Tati Ií, ta tu ìyo ma Tati Ií ma Rachaꞌnu Ndioo tichi anima yo, ta ikan jan cha kùu kiꞌvi yo itiꞌ Jesuu vati tüva tisokuati yi yo.
\v 18 Yakan va tandiꞌi ma yo chìnuni, ña tüva ndàsi ma jaꞌma mandil ikan nuu yo, vati cha kùu yo takua kùu iin ma inu ña kàni yi ma xinaꞌñu Ndioo, ikan na kuu ndeꞌe ñivi ña ra vaꞌa kùu ra, ta nani kivi tiaga jàndakuu ra yo takua kàa ra, vati taꞌiiꞌiin kivi ìyo ga ma tundeeni ra chiꞌo, chaꞌaꞌ ma tiñu jàꞌa ma Tati Ií ra chiꞌo.
\b
\c 4
\p
\v 1 Yakan va yaꞌa jàndeeni ndi, vati Ndioo yaꞌa kùndaꞌvini ra ndi, ta chaꞌa yakan kùu yi ña chāꞌa ra tiñu nuu ndi ña kàtituꞌun ndi tuꞌun vaꞌa Jesuu nuu kuaꞌaꞌ ñivi.
\v 2 Vati ndyuꞌu cha kāchin ndi ña töve jàchiꞌin ndi ma tiñu xeꞌe ña jàꞌa tukanuu ma ñivi, ta juuni töve jàndaꞌviñaꞌa ndi a jàkanuu ndi xini na chiꞌin ma tuꞌun Ndioo ña jànaꞌa ndi. Vati uvaa ma tuꞌun jànaꞌa ndi kùu ma ña ndichani. Yakan va ndava nda nuu Ndioo kàꞌan ndi, ikan na kuꞌva na kuenda ña takan kùu yi.
\v 3 Ta ma tuꞌun chaꞌaꞌ ma Rachaꞌnu Jesuu ña kàtituꞌun ndi nuu ñivi, tu chàsi yi chinituni ma ñivi kùuni na, ndicha ña takan kùu yi va kuenda ma ndian kuànaa ni.
\v 4 Ta ma ñivi ikan töve chìnuni na ma tuꞌun chaꞌaꞌ Jesuu, ti ma kuiꞌna, ra chàꞌnda tiñu nuu ñuñivi iꞌya, cha chāsi ra ma chìnituni na, ikan na küu kutunini na ma tuꞌun vii ña kàꞌan chaꞌaꞌ Jesucristu, ra yaꞌa tacha, ra kàa indukuni takua kàa ma Rachaꞌnu Ndioo.
\v 5 Vati ndyuꞌu töve kàtituꞌun ndi ma tuꞌun ña jàkaꞌnu juuni maa ndi, ti ma tuꞌun kàtituꞌun ndi kùu ma ña kàꞌan ña Jesuu kùu ma ra chitoꞌo yo, vati ndyuꞌu kùu ndi takua kùu iin musu ndo, chaꞌaꞌ ña yaꞌa kùuni ndi ndeꞌe ndi ma Rachaꞌnu Jesuu.
\v 6 Vati juuni ma Ndioo ra tāchi ma ñuꞌú kuenda ña na jandondichin yi ma nuu naa, rakan kùu ra ña jātuvi ra ma ña tacha ra ña na koo yi chiꞌin yo ma tichi anima yo. Ta chiꞌin ma ña tacha ña ìyo nuu Jesucristu jàꞌa ma Rachaꞌnu Ndioo, kùu jandondichin yo nuu ma inga ñivi ta kùu koto na naja kua kàa ma ña tacha ra ndia.
\s Tu chìnuni yo tuꞌun Jesuu kùu koo vaꞌa yo ma ñuñivi iꞌya
\p
\v 7 Vati ma kuñu yo kùu yi takua kùu iin ma kisi ñuꞌuꞌ nuu indii ma ña kuika Ndioo ti tichi kuñu yo indii ma ndatu kaꞌnu Ndioo, ikan na koto ñivi ña ma ndatu iꞌya yöve ndatu maa yo kùu yi, ti ndatu ña chāꞌa Ndioo nuu yo kùu yi.
\v 8 Yakan va vaji yaꞌa ndeꞌe ndi tundoꞌo jaꞌa na, va jàndeeni ndi. Ta vaji nduvaꞌa nàkanini ndi va töve jàña ndi ma itiꞌ kuàꞌan ndi ti chìto ndi ña ni keta vaꞌa yi.
\v 9 Ta vaji ndìkun na ndi, va Ndioo töve ndàkoo maꞌiin ra ndi, ta vaji ndoꞌo ndi jaꞌa ma ñivi, va na küu jandiꞌi na ndi.
\v 10 Ta ndanikuni ma nuu kuàꞌan ndi ndèꞌe ndi tundoꞌo, endee chàkuꞌuni ndi tava chīꞌí ma Jesuu ma nuu kruu, ikan na ndeꞌe ma ñivi ña ndicha ña nīꞌi ndi ma ndatu ña nīꞌi ra ora nātaku ndiko ra.
\v 11 Vati ma ora juuni ìyo ndito ga ndi ma ñuñivi iꞌya, ìyo tuꞌva ndi kuenda ña kuvi ndi chaꞌaꞌ ma Rachaꞌnu Jesuu, ikan na ndeꞌe ma ñivi ña ndicha ña nīꞌi ndi ma ndatu ña jānaꞌa ra nuu yo ma ora nātaku ndiko ra.
\v 12 Chaꞌaꞌ yakan kùu yi ña ndyuꞌu endee ndèꞌe ndi tundoꞌo, ña ndava kùu kaꞌni na ndi chaꞌaꞌ ndo, ikan na kuu niꞌi ndo nuu koo ndito ndo endeeni chiꞌin Jesuu.
\p
\v 13 Ta iin ra tāa ma tutu Ndioo tatiempu teꞌen kāꞌan ra: “Yaꞌa ga chìnuni̱ tuꞌun Ndioo, yakan va kàtituꞌin yi.” Ta indukuni kùu yi chiꞌin ndyuꞌu, ti chìnuni ndi ma tuꞌun ra ta kàtituꞌun ndi yi ndia.
\v 14 Vati cha chìto yo ña ma Ndioo, ra jānataku ma Rachaꞌnu Jesuu ma ora chīꞌí ra, juuni ma rakan kùu ra ña ni janataku ra ndi, ikan na ndoꞌiin ndisaa yo chiꞌin Jesuu ta kuꞌun yo chiꞌin ra ma nuu ìyo Tatá ra andivi.
\v 15 Tandiꞌi ma tundoꞌo ña ndēꞌe ndi kuenda ndo, yakan jànaꞌa yi ña yaꞌa kùuni ndi ndeꞌe ndi ndo, ikan ma ora cha niꞌi ndo ma ñamani Ndioo kuu jànaꞌa ndo yi nuu kuaꞌaꞌ ñivi. Ta takan kuaꞌaꞌ na kichaꞌa na jakaꞌnu na ra ora chàꞌa na taꞌvindioo nuu ra.
\v 16 Ta chaꞌaꞌ yakan kùu yi ña yaꞌa jàndeeni ndi, vaji ma itiꞌ nuu nuna cha kuàndochaꞌnu ndi, va ma itiꞌ tichi ma kuñu ndi tiá kuàndochaa yi nani kivi.
\v 17 Vati ma tundoꞌo ña ndèꞌe ndi ma ñuñivi iꞌya, nduvaꞌa yati yàꞌa yi. Va chìto ndi ña nduvaꞌa kaꞌnuga ma ndatu ña ni niꞌi ndi jaꞌa ma tundoꞌo ikan, ti ni niꞌi ndi nuu ni koo ndi endeeni chiꞌin Ndioo.
\v 18 Vati na töve kìꞌin kuenda yo ma ña tàꞌan yo ma ñuñivi iꞌya ña kùu ndeꞌo, ti ma ña kìꞌin kuenda yo kùu ña, naja kua ni niꞌo nuu ni koo yo endeeni chiꞌin Ndioo ña töve ndichin ndeꞌo ma vitin. Vati ma ña kùu ndeꞌo ma ñuñivi iꞌya yaꞌa yati yàꞌa yi, va ma ña ìyo andivi, töve.
\b
\c 5
\p
\v 1 Ta cha chìto yo ña tu ma kuñu yo jàndiꞌi na nuu yi, ni niꞌo inga tuku yi ma nuu ni koo yo itiꞌ andivi jàꞌa Ndioo. Vati ma kuñu yo ña ìyo ma nuñuꞌuꞌ ñuñivi iꞌya kùu yi takua kùu ma veꞌe jaꞌma ña töve kùndee yi kuaꞌaꞌ tiempu, ti taku ma kuñu chaa, yöve iin ña jāvaꞌa ñivini kùu yi ti iin ña jāꞌa Ndioo kuenda yo kùu yi.
\v 2 Ta ndicha ña ora juuni ìyo ga yo ma ñuñivi iꞌya, yaꞌa ndaꞌvi kùuni yo chaꞌaꞌ ña cha kùuni yo niꞌo ma kuñu chaa ña ni kuꞌva Ndioo nuu yo ma itiꞌ andivi.
\v 3 Ta ora ni niꞌo ma kuñu ikan, ni kuu yi takua jaꞌma ñùꞌu yo, ti töve ni kakunuu viti yo jàꞌa yi.
\v 4 Vati ma ora juuni ìyo ga yo chiꞌin ma kuñu chaꞌnu yo ñuñivi iꞌya, yaꞌa taxiini yo ta ndaꞌvi kùuni yo jàꞌa ma tundoꞌo ña ndèꞌo. Ta ndicha vaꞌa ña töve kùuni yo kuvi yo, ti ma ña kùuni yo kùu yi ña na sama ma Ndioo yo chiꞌin ma kuñu chaa ña kùndee ndisaa tiempu, takua jàꞌa yo ma ora sàma yo yo chiꞌin ma jaꞌma chaa.
\v 5 Vati maa ma Ndioo kùu ra ña jāndovaꞌa ra ma tiñu iꞌya kuenda yo, ti chāꞌa ra ma Tati Ií ra ña na koo yi chiꞌo, ikan na kuꞌva yo kuenda ña takan kùu ma ña vaꞌa ña ni niꞌo tiá itiꞌ nuu.
\p
\v 6 Ta chaꞌaꞌ yakan kùu yi ña nduvaꞌa kuii jàndeeni yo nani ora, ta chìto yo ti ora juuni ìyo ndito ga yo chiꞌin ma kuñu ña ìyo yo ma ñuñivi iꞌya, kùuni yi kaꞌan yi ña yöve veꞌe maa yo kùu ma nuu ìyo yo, ti ìyo chika yo nuu ma Rachaꞌnu Jesucristu.
\v 7 Vati vaji takäꞌan kundeꞌo ra, va ma ña jàꞌa yo vitin, jàꞌa yo yi chaꞌaꞌ ña chìnuni yo ma tuꞌun kàꞌan ra.
\v 8 Va chìto yo ti ni jachinu ma Ndioo ma ña kàꞌan ra, yakan va nduvaꞌa kuii kùuni yo sama yo nuu ìyo yo, ta takan ndakoo yo kuñu yo ndeꞌve, ta koꞌo koo yo chiꞌin ma Rachaꞌnu Jesuu.
\v 9 Ta chaꞌaꞌ yakan kùu yi ña ndisaa tiempu nànduku yo jaꞌa yo ma ña chàtaꞌani ma Rachaꞌnu Jesuu, ta takan jaꞌa yo tuva kuꞌun yo koo yo chiꞌin ra andivi vitin a kìndoo ga yo ma ñuñivi iꞌya.
\v 10 Vati tandiꞌi yo ìyo yi ña kujanaꞌa yo yo ma nuu jàkutuni Jesuu ma kuati yo, ta ikan taꞌiiꞌiin yo ni kuꞌva ra ma yaꞌvi yo, chaꞌaꞌ ma ña jāꞌa yo chiꞌin ma kuñu yo ora chīyo yo ma ñuñivi iꞌya, tuva ña vaꞌa kùu yi a töve.
\s Ma tuꞌun ña kàꞌan chaꞌaꞌ ña jàndomani Rachaꞌnu Ndioo yo
\p
\v 11 Yakan va tava cha chìto vaꞌa ndi ña ma Rachaꞌnu, ìyo yi ña tiñuꞌu ndi ra. Ta chaꞌaꞌ yakan kùu yi ña jànini ndi ma ñivi ña na na koto na ra ndia. Vati ma Rachaꞌnu cha na koto vaꞌa ra ndi, ta yakan va ndàtu ndi ña na koto maa ndo naja kua ìyo ndi ndia.
\v 12 Ta koto näkanini ndo ña chaꞌaꞌ ña jàkaꞌnu ndi juuni maa ndi kùu yi, vati ma ña kùuni ndi janaꞌa ndi nuu ndo kùu yi ña na sii kùuni ndo chaꞌaꞌ ndi, ikan na kuu kaꞌan ndo yuꞌu ma ñivi ora yöve ña ndicha kùu ña kàꞌan na, vati ma ña nànduku na kùu yi ña na jakaꞌnu ma ñivini na, ta töve jàꞌa na yi kuenda ma Rachaꞌnu chiꞌin anima na.
\v 13 Tuva ndyuꞌu ndian tivi xini kùu ndi kàꞌan ma ñivi, takan kùu ndi, va kuenda Ndioo, va tu yöve takan kùu yi kuenda maa ndo kùu yi.
\v 14 Ta chaꞌaꞌ ña yaꞌa kùuni ma Cristu ndeꞌe ra yo kùu yi, ña cha chàꞌa yo kuenda ña cha ndìkun yo kuenda ra. Ta tava cha chìto vaꞌa yo ña chīꞌí ra chaꞌaꞌ yo, yakan va, kùuni yi kaꞌan yi ña juuni takan cha chīꞌí ndisaa yo chiꞌin ra ndia.
\v 15 Ta chīꞌí ra chaꞌaꞌ ndisaa ñivi, ta chaꞌaꞌ yakan kùu yi ña ma ndian ìyo ndito, na tüvi ìyo ndito na kuenda juuni maa na, vati ìyo ndito na, va kuenda ma ra cha chīꞌí, ta nātaku ndiko ra chaꞌaꞌ na.
\v 16 Ta chaꞌaꞌ ñaꞌa kùu yi ña nda vitin ta itiꞌ nuu, ndyuꞌu na tüva nakanini ndi chaꞌaꞌ ñivi takua nàkanini inga ñivi ìyo ñuñivi chaꞌaꞌ na, vaji takan chānini ndi chaꞌaꞌ ma Rachaꞌnu Cristu takua chànini ma ñivi ndia, va vitin na tüva.
\v 17 Ta \fig Dejando a todo lo malo|53GR-gn10n.tif|col|5:17||Ma ndian cha ndōꞌiin chiꞌin Cristu, iin ñivi chaa kùu na|5.17\fig*chaꞌaꞌ yakan kùu yi ña ma ndian cha ndōꞌiin chiꞌin Cristu, iin ñivi chaa kùu na. Vati cha ndākoo na ma ña chaꞌnu ña jāꞌa na, ta vitin kùu na ma ndian chaa kuenda ra.
\v 18 Ta tandiꞌi ma tiñu iꞌya kùu yi ña jāꞌa ma Rachaꞌnu Ndioo yi chiꞌin ndi, chaꞌaꞌ ña jāꞌa Cristu, ña chāꞌa ra ma tiñu nuu ndi ña na jandomani ndi ma ñivi kuenda ra.
\v 19 Ta takan kùu yi ña jāndomani ndiko ma Rachaꞌnu Ndioo ma ñivi ìyo ñuñivi, chaꞌaꞌ ma ña jāꞌa ma Cristu ña tüva kiꞌin Ndioo kuenda ma kuati jàꞌa na, vati ma ña kùuni ra kùu yi ña na jakoto ndi tandiꞌi ma ñivi ìyo ñuñivi ma tuꞌun ra ña kàꞌan chaꞌaꞌ naja kua jandomani ra ma ñivi kuenda ra.
\v 20 Yakan va ndyuꞌu kùu ndi ndian kàtituꞌun ma tuꞌun Jesuu, ta ma ora janini ndi ndo kùuni ndi ña na kiꞌin ndo kuenda ma tuꞌun kàꞌan ndi, ti tuꞌun Ndioo kùu yi. Yakan va chiꞌin sivi Jesuu jànini ndi ndo ña na ndomani ndo chiꞌin Ndioo.
\v 21 Vaji Cristu na töve ni jāꞌa ra nïꞌiin kuati, va Ndioo, jāndaku ra ra ña na kuu ra iin ra ìyo kuati chaꞌaꞌ yo. Ta juuni chaꞌaꞌ Cristu kùu yi ña Ndioo, jāndoꞌiin ra yo ña na kuu yo ñivi ndaa kuenda ra ndia.
\b
\c 6
\p
\v 1 Yakan va vitin, chaꞌaꞌ ña jàꞌa ndi tiñu nuu ma Ndioo chiꞌin ndo, kùu yi ña jànini ndi ndo ña koto jäña ndo ma ñamani Ndioo ña chàꞌa ra nuu ndo.
\v 2 Vati ma Ndioo teꞌen kàꞌan ra nuu ma tutu ra:
\q Ma ora kūuniun ña tasoꞌi ma ña kàꞌun, ta jāꞌi yi.
\q Ta juuni tīndei ñu̱n ma kivi ña jākakúi ñu̱n ndia
\m kàti Ndioo.
\m Ta vitin kùu ma kivi ña tàsoꞌo Ndioo ña kàꞌan yo ta jàkakú ra yo.
\v 3 Töve nī chasi koo ndi nïꞌiin ñivi chiꞌin ma tiñu jàꞌa ndi. Chaꞌaꞌ yakan kùu yi ña na küu kaꞌan ma ñivi ña na yöve ña vaꞌa kùu ma ña jàꞌa ndi.
\p
\v 4 Ma ña jàꞌa ndi kùu yi ña tandiꞌi ma nuu kuàꞌan ndi jànaꞌa ndi nuu ndisaa ñivi, ti ndian jàkuu tiñu Ndioo kùu ndi. Ta juuni jàndeeni ndi ña jàꞌa ndi tiñu ikan, vaji yaꞌa ndèꞌe ndi tundoꞌo ta kùmani ndatiñu nuu ndi.
\v 5 Ta juuni yaꞌa ga jàndeeni ndi vaji kàni na ndi, ta tìꞌi na ndi vekaa ta yaꞌa jàkanuu na xini taꞌan na kuenda ña jàndeꞌe na tundoꞌo ndi. Ta juuni yaꞌa ga ndetiñu kùu ma tiñu jàꞌa ndi kuenda ma ñivi, ti yaꞌa ga kènaa ñumaꞌna ndi ta yaꞌa ga yàꞌa soko ndi ndia.
\v 6 Ta juuni jànaꞌa ndi ma tiñu vaꞌa ña jàꞌa ndi chaꞌaꞌ ña kùu ndi ma ñivi ndaa, ta chìto ndi ma ña ndicha. Ta juuni yaꞌa jàndeeni ndi ta tìñuꞌu ndi inga ñivi, chaꞌaꞌ ña ìyo ma Tati Ií Ndioo chiꞌin ndi, ta chaꞌaꞌ ña yaꞌa ga kùuni ndi ndeꞌe ndi Ndioo,
\v 7 ta chaꞌaꞌ ma tuꞌun ndaa ña kàtituꞌun ndi, ta chaꞌaꞌ ma ndatu Ndioo ña ìyo chiꞌin ndi ndia. Ta ndyuꞌu chàtiñu ndi ndisaa tuꞌun ndaa ña chàꞌa Ndioo nuu ndi kuenda ña tìndee yi ma ndian vaꞌa, ta kuenda ña kàꞌan ndi yuꞌu ma ndian kàꞌan chata tuꞌun ndaa ikan.
\v 8 Ta ìyo iin ora tìñuꞌu ma ñivi ndi, ta ìyo inga ora ña kùu ndi tuꞌun nduvaꞌa jàꞌa na. Ta ìyo ora vii kàꞌan na chaꞌaꞌ ndi, ta inga ora, töve. Ta juuni ìyo ndian kàꞌan ña yaꞌa ga siini ndi tuꞌun vata, vaji kàꞌan ndi tuꞌun ndicha.
\v 9 Ma ñivi jàꞌa na chiꞌin ndi, takua jàꞌa na chiꞌin ndian töve nàkoto na, vaji nàkoto vaꞌa na ndi. Ta kùu ndi takua kùu ma ndian cha kèe ña ndito, va juuni ndìto ga ndi. Ta vaji yaꞌa ga jàndeꞌe na tundoꞌo ndi, va na tüvi chìꞌí ndi jàꞌa na.
\v 10 Ta juuni yaꞌa chìsii ndi nani kivi, vaji ndèꞌe ndi tundoꞌo. Ta vaji ndicha ña kùu ndi ma ndian ndaꞌvi, va chàꞌa Ndioo ña na jàndokuika ndi kuaꞌaꞌ ñivi chiꞌin tuꞌun ra ña kàtituꞌun ndi. Ta kàa ndi takua kàa iin ndian tükuii na ìyo nuu, va tandiꞌi nakuyi ìyo nuu ndi jàꞌa Ndioo.
\p
\v 11 Ndyoꞌo yani ndian ìyo ñuu Corintu, cha kātituꞌun kàchin vaꞌa ndi chiꞌin ndisaa anima ndi nuu ndo, ti yaꞌa kùuni ndi ndeꞌe ndi ndo.
\v 12 Yüvi maa ndi kùu ma ndian küuni ndeꞌe ndo, vati maa ndo kùu ma ndian küuni ndeꞌe ndi.
\v 13 Yakan va janini̱ ndo, takua jàꞌa iin tatá chiꞌin ndiakuati seꞌe ra, ña na kuuni ndo ndeꞌe ndo ndi takua kùuni ndi ndeꞌe ndi ndo.
\s Maa yo kùu yo tava kùu ma veñuꞌu Ndioo ra chàꞌa nuu koo yo endeeni
\p
\v 14 Yakan va koto ndöꞌiin ndo chiꞌin ñivi töve chìnuni tuꞌun Jesuu, vati ma ndian jàꞌa takan kùu na takua kùu iin yunta chiꞌin iin burru ña jùndii yo ma yuku xini ndri ta töve induku xìta ndri. ¿A indukuni chànini ma ndian vaꞌa chiꞌin ma ndian kini? Ta, ¿a induku chàkunuu ndian kuàꞌan itiꞌ ndichin chiꞌin ndian chàkunuu nuu naa kùuni ndo?
\v 15 Ña yöve takan kùu yi, vati töve induku chànini ma Cristu kua ma kuiꞌna. Ta juuni na küu koo vii ma ndian chìnuni kua iin ndian töve chìnuni vaꞌa.
\v 16 Na töve indukuni kùu ma veñuꞌu nuu jàkaꞌnu yo Ndioo, kua ma nuu ìyo ma yutun ií ña jàkaꞌnu ma ndian töve chìnuni. Ti maa yo kùu ma ndian kùu veñuꞌu ma Ndioo, ra chàꞌa kivi koo yo. Ta chaꞌaꞌ yakan kùu yi ña teꞌen kāꞌan Ndioo chaꞌaꞌ yi niku:
\q Ni koi chiꞌin na ta ni kakunui ma chiꞌin na,
\q ti yuꞌu ni kuu ma Ndioo na
\q ta ndiakan ni kuu na ma ñivi̱.
\m
\v 17 Yakan va juuni teꞌen kāꞌan ma Ndioo ndia:
\q Na kee ndo ma tañu ma ñivi töve chìnuni ikan, ta na koo siin ndo,
\q ta koto jäꞌa ndo ma ña töve vaꞌa,
\q tajan kùu kuꞌvai ña kìꞌvi ndo ma iti̱,
\q
\v 18 vati ndyoꞌo ndian kùu ñivi ñaꞌa ta ndraꞌii, ni kui iin tatá kuenda ndo,
\q ta maa ndo ndian kùu seꞌi,
\m takan kàti ma Rachaꞌnu Ndioo ra yaꞌa ga ìyo ndatu ninii kaꞌnu nuñuꞌuꞌ ñuñivi chiꞌin andivi.
\b
\c 7
\p
\v 1 Ta chaꞌaꞌ ma tuꞌun ña chāꞌa Ndioo nuu yo iꞌya ndyoꞌo yani, ìyo yi ña jaña yo tandiꞌi ma ña kini jàꞌa yo chiꞌin ma kuñu yo ta ma chinituni yo ta jakaꞌnu yo ra, ikan na ndoꞌií yo chaꞌaꞌ ña kùu yo ñivi ña tìñuꞌu Ndioo.
\s Yaꞌa ga chìsii Paulu chaꞌaꞌ ña sàma kua chànini ma ndian ìyo Ñuu Corintu
\p
\v 2 Yakan va na kuꞌva ndo itaꞌvi nuu nuna ma anima ndo nuu ndi, vati ndyuꞌu yüvi ndian jàndaꞌviñaꞌa kùu ndi ta ni yüvi ndian kini kùu ndi ta töve jàkanuu ndi xini nïꞌiin ñivi ndia.
\v 3 Ta koto näkanini ndo ña chiꞌin ma ña kàꞌan ndi iꞌya chata ndo kàꞌan ndi, kùuni ndo, vati tava cha kāꞌin chiꞌin ndo niku ña, maa ndo kùu ma ndian yaꞌa kùuni ndi ndeꞌe ndi, vaji ndava ìyo yi ña kuvi ndi chaꞌaꞌ ndo, tuva takan kùu yi.
\v 4 Chaꞌaꞌ yakan kùu yi ña yaꞌa chìsii ndi chaꞌaꞌ ndo, ta tüvi ndasii ndi ña kaꞌan ndi ma tuꞌun ndaa nuu ndo. Vaji tañu ma tundoꞌo ndèꞌe ndi juuni yaꞌa chìsii ndi chaꞌaꞌ ndo ndia.
\p
\v 5 Vati nda ora kīchaa ndi ma ñuꞌuꞌ Macedonia, ni itaꞌvi takäꞌan nindee ndi, vati ma ña tàꞌan ndi kùu ña, tandiꞌi nuu kuàꞌan ndi yaꞌa ga ndèꞌe ndi tundoꞌo, ti kànitaꞌan ma ñivi chiꞌin ndi, ta chaꞌaꞌ yakan kùu yi ña yaꞌa ndasii ndi ndia.
\v 6 Va ma Ndioo ra jàndomani ma ndian yaꞌa ga ndaꞌvi kuuni, rakan kùu ra ña jāndomani ndyuꞌu chaꞌaꞌ ma ra nàni Titu ma ora kīchaa ra.
\v 7 Va na yöve uvaa chaꞌaꞌ ña kīchaani Titu kùu yi ña kūu takan, vati ndava nda maa ra juuni yaꞌa chìsii ra chaꞌaꞌ ma tiñu vaꞌa ña jāꞌa ndo ndia. Ta juuni kātituꞌun ra nuu ndi naja kua yaꞌa ga kùuni ndo ndeꞌe ndo ndi, ta naja kua yaꞌa ndaꞌvi kuuni ndo ora nàkanini ndo chaꞌaꞌ ndi. Yakan va tiaga chīsii ndi ma ora kāꞌan ra takan.
\v 8 Ta ndaꞌvi kùuni̱ ora chāꞌi kuenda ña ma tutu ña tāchi̱ nuu ndo ni jaꞌa yi ña na ndaꞌvi kuuni ndo niku. Va vitin töva ndaꞌvi kùuni̱ ti cha chāꞌi kuenda ña ndicha kuii ña takan kūu yi chiꞌin ndo, va kuenda uvi uni kivi ni.
\v 9 Ta vitin yaꞌa chìsii̱, va yöve chaꞌaꞌ ña yaꞌa ndaꞌvi kūuni ndo jāꞌi ora tāchi ma tutu nuu ndo, ti chìsii̱ va chaꞌaꞌ ña chīkoniꞌi ndiko ndo chiꞌin Ndioo jāꞌa ma ña ndaꞌvi kùuni ndo. Ta chìtoi ña chaꞌaꞌ Ndioo kùu yi ña ndaꞌvi kūuni ndo, ta juuni chàꞌi kuenda ña töve nī jachika ndo ndo ma itiꞌ ra jàꞌi ora tāchi̱ ma tutu nuu ndo.
\v 10 Vati tu chìkoniꞌo ma itiꞌ Ndioo jàꞌa ña yaꞌa ndaꞌvi kùuni yo, iin ña vaꞌa kùu yi nuu Ndioo, ta takan kùu niꞌo nuu jàkakú ra yo ta tüva ìyo yi ña nàkanini yo chaꞌaꞌ yi. Va tu yaꞌa ga ndaꞌvi kùuni yo takua ndàꞌvi kùuni ma ñivi ìyo ñuñivi, ni jaꞌa yi ña na endee kèsiin yo ma itiꞌ Ndioo.
\v 11 Yaꞌa chàtaꞌani Ndioo naja kua jāꞌa ndo ña jāndeeni ndo ma ña yaꞌa ndaꞌvi kùuni ndo ma tava kùuni ra. Ta vitin, ¡na ndeꞌe ndo ma naja kua vaꞌa jāꞌa ma tuꞌun ña tāchi̱ nuu ndo! Jāꞌa yi ña na kuꞌva ndo kuenda, ta tandikun ndo ma itiꞌ vaꞌa. Ta juuni jāꞌa yi ña na kuxaan ndo chiꞌin ma ra jàꞌa kuati, vaji yaꞌa kanuu ndo jàꞌa ndo yi. Ta juuni jāꞌa yi ña na yaꞌa kuuni ndo ndeꞌe ndo yuꞌu ndia, ta juuni jāndeꞌe ndo tundoꞌo ma ra jāꞌa ma kuati ikan. Ta chaꞌaꞌ ma ña jāꞌa ndo iꞌya, jànaꞌa yi nuu ndi ña na töve nī ndoꞌiin ndo chiꞌin ña kini.
\v 12 Yakan va ora tāchi̱ ma inga tutu nuu ndo, töve yaꞌa nàkanini̱ chaꞌaꞌ ma ra jāꞌa kuati ikan, ta ni töve yaꞌa nàkanini̱ chaꞌaꞌ ma ra ndēꞌe ma tundoꞌo ndia. Ti ma ña chānini̱ ora tāchi̱ yi nuu ndo kùu yi ña na koto ndaa vaꞌa ndo tu ndicha kuii ña yaꞌa kùuni ndo ndèꞌe ndo ndi ndava nuu Ndioo.
\v 13 Ta chaꞌaꞌ yakan kùu yi ña nīꞌi ndi tundeeni ndi.
\p Va chìsii ga ndi ora ndēꞌe ndi ña yaꞌa ga sii kùuni ma Titu chaꞌaꞌ ña tīndee ndo ra ta chàꞌa ndo tundeeni ra ora chāndeꞌe ra ndo.
\v 14 Ta ora kātituꞌin nuu Titu ña ñivi yaꞌa iñuꞌu kùu ndo ma nuu ra, nduvaꞌa kīndoo vaꞌi jāꞌa yi ta töve nī kukanui, ti takan kūu yi. Ta tava ndisaa ma tuꞌun kātituꞌun ndi nuu ndo kūu yi ma ña ndaa, juuni ña ndaa kūu ma ña kātituꞌun ndi nuu Titu chaꞌaꞌ ndo ndia.
\v 15 Ta ma Titu tiaga kùuni ra ndeꞌe ra ndo ma ora chàkuꞌuni ra ma ña jāꞌa ndo chiꞌin ra ña jāchiꞌin ndo ma tuꞌun yuꞌu ra, ta yaꞌa tīñuꞌu ndo ra ora chīyo ra chiꞌin ndo.
\v 16 Chaꞌaꞌ yakan kùu yi ña yaꞌa ga chìsii̱ , vati ìyo kuaꞌaꞌ tundeeni̱ chiꞌin ndo.
\c 8
\s Kàtituꞌun Paulu chaꞌaꞌ xuꞌunꞌ sòkó yo nuu Ndioo
\p
\v 1 Ta vitin ndyoꞌo yani, kùuni ndi jakoto ndi nuu ndo naja kua chàꞌa Ndioo ma ñamani ra nuu ndian chìnuni ña ìyo ninii ñuu ñuꞌuꞌ Macedonia.
\v 2 Ta ma ndian chìnuni ñuu ikan, vaji cha ndēꞌe na kuaꞌaꞌ tundoꞌo, va nduvaꞌa kuii chìsii na, ta vaji ndicha ña ndaꞌvi na, va ndiakan kùu ma ndian sòkó ga ma ndatiñu kuenda ma Ndioo.
\v 3 Ta chaꞌaꞌ yakan kùu yi ña, yuꞌu chàꞌi kuenda chaꞌaꞌ na, ña ndicha kuii ña maa ndio na sōkó na ma ndatiñu kuenda Ndioo chiꞌin anima na, ta tandiꞌi inga tuku ma ña chāꞌa na, ta ndava tiaga ma ña kùu kuꞌva na ndia.
\v 4 Ta nduvaꞌa chīkan na ñamani nuu ndi ña, na kuꞌva ndi ña kiꞌin na itaꞌvi ma ndatiñu ña sōkó ma ñivi nuu ndi, kuenda ña na tindee na ma ñivi Ndioo ndia.
\v 5 Takan kūu ña sōkó na tiaga ma kua chànini ndi niku, vati jiꞌna sōkó na maa na kuenda ma Rachaꞌnu, tajan sōkó ndio na na nuu ndi kuenda ña na tindee na ndi, ma takua kùuni Ndioo.
\v 6 Ta chaꞌaꞌ yakan kùu yi ña jānini ndi Titu ña, na jachinu ra ña jatiꞌvi ra ma ndatiñu ña sōkó ma ñivi ña ìyo tañu ndo, ma takua kīchaꞌa ra jàꞌa ra yi niku.
\v 7 Vati takua ndyoꞌo yaꞌa ga vaꞌa kèta tandiꞌi ma tiñu jàꞌa ndo, tava kùu ma ña yaꞌa chìnuni ndo, ta yaꞌa ìyo chinituni ndo kuenda ma tiñu Ndioo ña jànaꞌa ndo ma tuꞌun ra nuu inga ñivi chiꞌin ndisaa anima ndo, ta yaꞌa kùuni ndo ndeꞌe ndo ndi. Ta takua indukuni jàꞌa ndo, ta ìyo yi ña jachinu ndo jàtiꞌvi ndo ma ña kàꞌan Titu ndia.
\v 8 Ta chaꞌaꞌ ñaꞌa töve jànini̱ ndo ña jaꞌa ndo yi chiꞌin na, ti ma ña kuuni̱ kùu yi ña na kuꞌva ndo kuenda tu indukuni anima ndo chiꞌin inga na, ikan na koto ndo tu ndicha ña kùuni ndo ndeꞌe ndo na.
\v 9 Ndyoꞌo cha nàkoto ndo ma ñamani ña chāꞌa Rachaꞌnu Jesucristu nuu ndo, vati rakan vaji yaꞌa ga kuika ra ora chīyo ra andivi, va ndeꞌve ndōndaꞌvi ra chaꞌaꞌ ndo, ikan na kuu ndokuika ndo chaꞌaꞌ ndisaa ma ña jāꞌa ra kuenda ndo.
\p
\v 10 Ta chaꞌaꞌ ñaꞌa kùu yi ña, chùndayuꞌi ndo ña na jàchinu ndo ña jàtiꞌvi ndo ma ndatiñu ikan, takua cha kīchaꞌa ndo jàꞌa ndo yi chiꞌin ndisaa anima ndo ma kuyava.
\v 11 Yakan va na jaꞌa ndo ma tiñu ikan, ta jachinu ndo yi ma takua chànini ndo ma ora kīchaꞌa ndo jaꞌa ndo yi. Ta juuni na kuꞌva ndo yi nuu na takua ìyo yi chiꞌin ndo.
\v 12 Vati tu ìyo ñivi ña kùuni na soko na iin nakuyi chiꞌin ndisaa anima na, ma Ndioo kiꞌin ra kuenda yi tuva sòkó na yi ma takua ìyo yi nuu na. Vati taku rakan tüvi chìkan ra ña na sòkó na tia yi tuva tüvi ìyo yi nuu na.
\v 13 Ta töve kùuni ndi ña, na kumani ndatiñu nuu ndo chaꞌaꞌ ña tìndee ndo inga ñivi, vati ma ña kùuni ndi kùu yi ña, na ndoo induku na chiꞌin ndo.
\v 14 Ti taku ma vitin, nuu ndyoꞌo ìyo ma ndatiñu ña kumani nuu na, va ni keta iin kivi ña nuu maa ndo ni kumani yi, tajan ndiakan kùu tìndee ndio na ndo chiꞌin ma ña kumani nuu ndo, ti maa na ni koo yi nuu. Ta takan kùu yi ña ndisaa ndo ni ndo induku ndo.
\v 15 Vati taku nuu ma tutu Ndioo teꞌen kàꞌan yi: “Ni töve nī chakoso nïꞌiin nakuyi nuu ma ndian yaꞌa kuaꞌaꞌ ndatiñu jātiꞌvi, ta ni töve nī kumani nïꞌiin nakuyi nuu ma ndian yaꞌa ga tiani nakuyi jātiꞌvi ndia.”
\s Nuu kuàꞌan Titu chiꞌin ndian kùtaꞌan ra ñuu Corintu
\p
\v 16 Ta chaꞌaꞌ yakan kùu yi ña yaꞌa ga chàꞌi taꞌvindioo nuu ma Rachaꞌnu Ndioo, chaꞌaꞌ ña induku chànini Titu ma kua chànini̱ chaꞌaꞌ ndo ndia.
\v 17 Takan kàti̱, ti jāchiꞌin ra ma kua chànini̱, va tava juuni yaꞌa ga ìyoni ra ña na koo vaꞌa ndo. Yakan va, maa ndio ra kùu ma ra kùuni kundeꞌe ndo ma vitin.
\v 18 Ta chiꞌin Titu tāchi ndi iin ra yani yo ra chìnuni, ña yaꞌa vaꞌa kàꞌan taꞌiiꞌiin ma ñivi Ndioo chata, chaꞌaꞌ ña yaꞌa vaꞌa kàtituꞌun ra ma tuꞌun Ndioo ña jàkakú yo.
\v 19 Ta na yöve uvaa ñaꞌani kùu yi, vati juuni kāchin na ma ra yani yo iꞌya, kuenda ña kakunuu ra chiꞌin ndi, ta tìndee ra ndi ña jàchaa ndi ma ndatiñu ña sòkó ndo nuu ndi kuenda na. Ta ndisaa ma tiñu iꞌya jàꞌa ndi yi takan, ikan na kuꞌva ndo kuenda ña nduvaꞌa ìyoni ndi tìndee ndi ndo, ta juuni jàꞌa ndi yi chaꞌaꞌ ña tìñuꞌu ndi ma Jesucristu ndia.
\v 20 Ta takan kùuni ndi jaꞌa ndi, ikan na töve kaꞌan ma ñivi chata ndi chaꞌaꞌ ma xuꞌunꞌ ña sōkó ndo kuenda ña nataꞌvi ndi yi kuenda ndian chiniñuꞌu yi ña ìyo inga ñuu.
\v 21 Vati ndisaa ña chànini ndi jaꞌa ndi kùu ma tiñu ndaa, yöve uvaa nuu ndèꞌe ma Rachaꞌnu kùu yi, ti juuni nuu ndèꞌe ma ñivi ndia.
\p
\v 22 Chiꞌin ma ninduvi ndraꞌya tāchi ndi inga ra yani yo ma nuu ndo, vati raꞌya kuaꞌaꞌ chaꞌaꞌ cha jānaꞌa ra nuu ndi ña chàtaꞌani ra jaꞌa ra ma tiñu Ndioo, va vitin tiaga chìsii ra ña kùuni ra jaꞌa ra yi chaꞌaꞌ ña ìyo tundeeni ra chiꞌin ndo.
\v 23 Tu ìyo ndian chìkatuꞌun nuu ndo chaꞌaꞌ ma ra yanio Titu, na kaꞌan ndo chiꞌin na, ti merui, ra jàtiñu chiꞌi̱n chaꞌaꞌ ndo kùu ra. Ta tu chìkatuꞌun ga na chaꞌaꞌ ma inga ndra yani yo, na kaꞌan ndo chiꞌin na, ti ndra tāchi ma ndian chìnuni ña ìyo inga ñuu kùu ndra. Ta juuni yaꞌa ga tìñuꞌu ndra ma Jesucristu ndia.
\v 24 Yakan va ìyo yi ña janaꞌa kachin ndo nuu ndraꞌya, ikan na kuu koto ndra ti ñivi jàchinu ña kàꞌan kùu ndo, ta takan kùu koto ndra ña ìyo kuenda ma tuꞌun tayi kàꞌan ndi chaꞌaꞌ ndo, ikan na kuꞌva ma ndian chìnuni kuenda naja kua kuu ndo.
\c 9
\s Nuu kàꞌan Paulu chaꞌaꞌ ña na sokó yo ma ndatiñu kuenda ma ndian taꞌan yo ndian kùmani yi nuu
\p
\v 1 Ta chaꞌaꞌ ma xuꞌunꞌ ña nàkuiso ndo kuenda ma ndian taꞌan yo ndian chìnuni, tüva chiniñuꞌi kàtituꞌin nuuni nuuni nuu ndo,
\v 2 vati cha chìtoi ti yaꞌa ga ìyoni ndo jàꞌa ndo yi, ta nduvaꞌa kàtituꞌin nuu ma ndian chìnuni ñuꞌuꞌ Macedonia naja kua yaꞌa tayi kùuni̱ chaꞌaꞌ ndyoꞌo ndian ìyo ñuꞌuꞌ Acaya, vati nda kuyava kùu yi ña chàtuꞌva ndo ña tìndee ndo na. Ta chayatin ma ndian ñuꞌuꞌ Macedonia cha nduvaꞌa chìsii na chaꞌaꞌ ña yaꞌa chàtaꞌani ndo jàꞌa ndo yi.
\v 3 Ta chaꞌaꞌ yakan kùu yi ña tàchi ma ndra yani yo iꞌya, na tindee ndra ndo jatiꞌvi ndo ma ña ni sokó ndo, ikan na töve nakanini ma ñivi ña jatayi maani ndi ndi chaꞌaꞌ ndo nuu na, ma ora kàtituꞌun ndi ña ndicha kuii ña ìyo tuꞌva ndo jàꞌa ndo yi,
\v 4 koto najani kaani kuꞌun iin ma ndian ñuꞌuꞌ Macedonia ña chìnuni chiꞌi̱n ma ñuu ndo, ta nataꞌan ndi ndo ña töve ìyo tuꞌva ndo ña jàchinu ndo ma tiñu ikan. Ta tu takan ni kuu yi tajan ni kukanuu ndi chaꞌaꞌ ndo chaꞌaꞌ ña nduvaꞌa kùndeeni ndi ndo niku. Va maa ndo kùu ma ndian nduvaꞌa ga ni kukanuu chaꞌaꞌ yi.
\v 5 Ta chaꞌaꞌ ñaꞌa kùu yi ña chīkain nuu ma ndra yani yo ña na kuꞌun jiꞌna ndra kundeꞌe ndra ndo nuu ìyo ndo, ikan na tindee ndra ndo ña na jachinu ndo ma xuꞌunꞌ ña jàtiꞌvi taꞌan ndo, takua chāꞌa ndo tuꞌun niku. Vati kùuni ndi ña na jaꞌa ndo ña kana ma anima ndo, ta yöve ña jàꞌa ndo yi chaꞌaꞌ ña jànini ndi ndo.
\s Tu sòkó yo iin nakuyi, na jaꞌa yo yi va chiꞌin ndisaa anima yo
\p
\v 6 Na kukuꞌuni ndo takua kàꞌan ma tuꞌun iꞌya: Taku ma yo tàchi tiani, juuni tiani ma ndatiñu ni ndakiꞌin yo ndia. Ta ma yo tàchi kuaꞌaꞌ, juuni kuaꞌaꞌ ma ndatiñu ni ndakiꞌin yo ndia.
\v 7 Taꞌiiꞌiin yo, ìyo yi ña sokó yo iin nakuyi, va chiꞌin ndisaa anima yo, ta na töve ìyo yi ña sokó yo yi chaꞌaꞌ ña jànini inga na yo, tuva töve ìyoni yo jaꞌa yo yi, vati Ndioo yaꞌa ga kùuni ra ndeꞌe ra ma ñivi ña yaꞌa chìsii ora soko na iin nakuyi.
\v 8 Ndioo kùu jandokuaꞌaꞌ ra tandiꞌi nuu ma ñamani ra kuenda ndo, ikan na kümani nïꞌiin nakuyi nuu ndo, ta takan kùu tindee ga ndo inga tuku ñivi chiꞌin ma tiñu vaꞌa jàꞌa ndo ndia.
\v 9 Vati tutu Ndioo teꞌen kàꞌan yi:
\q Nātaꞌvi na ma ña chìniñuꞌu ma ndian ndaꞌvi,
\q ta ma tiñu vaꞌa ña jàꞌa na ìyo yi endeeni.
\m
\v 10 Vati ma Ndioo ra chàꞌa ma tata ña tàchi yo chiꞌin ma ña chàchi yo, ni kuꞌva ra yi nuu ndo, ta ni jandokuaꞌaꞌ ra yi, ikan na kuu jatiñu ndo yi kuenda ña tìndee ndo inga ñivi.
\v 11 Ta takan ndyoꞌo ni koo kuaꞌaꞌ nuu ma ña kuika ndo, ikan na kuu tindee ndo ma ndian kùmani yi nuu. Ta ora ni kundaka ndi yi nuu na, ni kuꞌva na taꞌvindioo nuu ma Rachaꞌnu chaꞌaꞌ ña jàkuu ndo ma tiñu ikan.
\v 12 Vati ora tindee ndo ma ndian taꞌan ndo ña kùmani yi nuu, na yöve uvaa chaꞌaꞌ yakani kùu yi ña jàꞌa ndo ma ña vaꞌa, vati juuni jàꞌa ndo ña na kuꞌva na kuaꞌaꞌ taꞌvindioo nuu ma Rachaꞌnu ndia.
\v 13 Ta ndiakan nduvaꞌa ni jakaꞌnu na Ndioo, chaꞌaꞌ ma ña sòkó ndo kuenda na. Ta chiꞌin yakan jànaꞌa ndo ña ndicha vaꞌa ña jàchiꞌin ndo ma tuꞌun Cristu ña kàtituꞌun ndo. Yakan va ni tiñuꞌu na Ndioo chaꞌaꞌ ma tiñu vaꞌa ña jàꞌa ndo kuenda na, ta kuenda inga ñivi ndia.
\v 14 Ta juuni ndiakan ni kaꞌan na chiꞌin Ndioo chaꞌaꞌ ndo chiꞌin ndisaa anima na, chaꞌaꞌ ña ndèꞌe na ña nduvaꞌa ìyo ma ñamani Ndioo chiꞌin ndo.
\v 15 ¡Taꞌvindioun yoꞌo Rachaꞌnu chaꞌaꞌ ña chàꞌun iin ña yaꞌa kaꞌnu nuu ndi ña nī kuu naniꞌi ndi naja kua kaꞌan ndi yi!
\c 10
\s Nuu ìyo ndatu Paulu chaꞌaꞌ ña kùu ra tatun Jesucristu
\p
\v 1 Yuꞌu Paulu chàꞌi kuenda ña ìyo ma ndian ìyo tañu ndo kàꞌan na ña kanui kàꞌin nuu ndo ora ìyoi tañu ndo, ta xaan kàꞌin nuu ndo chiꞌin tutu ora chàkunui nuu chika, kùuni ndo. Va vitin yuꞌu jànini̱ ndo chiꞌin tuꞌun vita ta vii takua vii kàꞌan Cristu,
\v 2 ña koto jänini ndo yuꞌu ña na kàꞌan xain nuu uvi uni ma ndian ìyo tañu ndo ña kàꞌan ña ndisaa ña jàꞌa ndi kùu kuenda juuni maa ndi, ora ni kundeꞌe ndiko ndi ndo.
\v 3 Ndicha vaꞌa ña juuni ma ñivi ìyo ñuñivi kùu ndi, va töve kànitaꞌan ndi takua jàꞌa ma ndian ìyo ñuñivi iꞌya.
\v 4 Vati ma ña ndaꞌa ndi kuenda ña kànitaꞌan ndi, töve indukuni kùu yi takua kùu ma ña chàtiñu ma ndian ìyo ñuñivi iꞌya, ti ma ña ndaꞌa ndi kùu ma ndatu ña chāꞌa Ndioo kuenda ña na jàkanaa ndi ndian ìyo ndatu ma ñuñivi iꞌya.
\v 5 Ta takan kùu yi ña jandiꞌi ndi ma tuꞌun kàꞌan ma ndian kàꞌan chata Ndioo chiꞌin tandiꞌi tuꞌun tayi ña töve chàꞌa ña na nakoto ñivi ma Rachaꞌnu Ndioo. Ta tandiꞌi ma ndian chànini takan ndàkoo ndi na ndaꞌaꞌ Cristu, ikan na jachiꞌin na ma ña kàꞌan ra.
\v 6 Ta ora cha chāꞌa ndi kuenda ña cha jàchiꞌin vaꞌa ndo ma tuꞌun Cristu, tajan ndyuꞌu cha ìyo tuꞌva ndio ndi kuenda ña jàndeꞌe ndi tundoꞌo tandiꞌi ma ndian töve kùuni jachiꞌin ma tuꞌun ra.
\p
\v 7 Kùuni ndi ña jaꞌa vaꞌa ndo kuenda naja kua kùu ma ñivi. Tu ìyo nda ndyoꞌo ña ndicha vaꞌa ña kùu ndo ndian chìnuni tuꞌun Cristu, ìyo yi ña kiꞌin kuenda ndo ndyuꞌu chaꞌaꞌ ña juuni ndian chìnuni tuꞌun ra kùu ndi ndia.
\v 8 Ta ndicha ña vaji yaꞌa ndui tiá ma kua jànini̱ ndo chiꞌin ma tiñu ndisoi, na töve kànui jaꞌi yi, ti chìtoi ña ma ndatu ña chāꞌa ma Rachaꞌnu nuu ndi kùu yi kuenda ña na tindee yi ndo ña kuaꞌnu vaꞌa ndo, ta yöve kuenda ña jànaa yi ndo.
\v 9 Na töve kùuni̱ ña nakanini ndo ña jayuꞌvi̱ ndo chiꞌin ma tutu ña tàchi̱ nuu ndo.
\v 10 Vati ìyo iin ndo ña kàꞌan ña yaꞌa ga xaan kàꞌin nuu ma tutu tàchi̱ nuu ndo, va ora kàꞌin yi chiꞌin ma tuꞌun yuꞌi, yaꞌa vita kàꞌin yi ta töve nda kuenda yi, kùuni ndo.
\v 11 Va ma ndian kàꞌan teꞌen, ìyo yi ña koto vaꞌa na ti ma ora tüvi ndi chiꞌin ndo ta kàꞌan ndi takan nuu ma tutu tàchi ndi nuu ndo, indukuni takan ni jaꞌa ndi yi ora ni koo ndi chiꞌin ndo ma nuu ìyo ndo ndia.
\p
\v 12 Ta na töve kànani ndi jando induku ndi ndi chiꞌin ma ndian jàkaꞌnu juuni maa. Taku ma ndian chànini takan, tìvi xini na ti yüvi ña vaꞌa kùu ma ña chànini na, ña kùuni na jando induku na na chiꞌin juuni maa na, kuenda ña jayaꞌa na yi nuu inga tuku na.
\v 13 Vati taku ndyuꞌu, na tüvi chàtaꞌani ndi jakaꞌnu ndi ndi tiá ma kua ìyo yi ña jaꞌa ndi. Vati maa ma Ndioo kùu ra ña jànaꞌa ra nuu ndi ndanu ìyo yi ña kukuita ndi chiꞌin ma tiñu jàꞌa ndi, ta maa ra kùu ra ña chāꞌa ra ña kèta ndi nda ma ñuu Corintu nuu ìyo ndo chiña.
\v 14 Ti tu tüvi chāꞌan ndi chākatituꞌun ndi tuꞌun Cristu nuu ndo niku, na töve nda kuenda kùu yi ma ña kàꞌan ndi vitin, va chaꞌaꞌ ña maa ndi kùu ma ndian nunuu ña chākatituꞌun yi nuu ndo, yakan va chàꞌa ndi kuenda ña tüvi yaꞌa nduu ndi tiá ma kua ìyo yi ña jàꞌa ndi.
\v 15 Ta na töve jàtayi ndi ndi chaꞌaꞌ ma tiñu ña jāꞌa inga ñivi, ta iin ña maa ndi kùu ma ndian jāꞌa yi. Ti ma ña chànini ndi jaꞌa ndi kùu ña jàtiñu ga ndi chiꞌin ndo takua kùuni Ndioo ña jàꞌa ndi, ikan na chinuni ndo tiaga.
\v 16 Ta tiá itiꞌ nuu chànini ndi kuꞌun ndi nda itiꞌ nuu ga ma ñuu ndo ña kukatituꞌun ndi nuu inga ñivi chaꞌaꞌ ña naja kua ni jakakú Cristu yo, va ma ña töve chàtaꞌani ndi jaꞌa ndi kùu ña xìtakaa ndi ñivi chìnuni tuꞌun Cristu jàꞌa inga ndra, ta jakaꞌnu ndi ndi chaꞌaꞌ ma ñivi chìnuni jàꞌa ndra.
\v 17 Ta tu ìyo nda yo kuunio jakaꞌnu yo yo chaꞌaꞌ iin nakuyi, vaꞌa ga ña na jakaꞌnu yo yo chaꞌaꞌ ña kùu yo kuenda ma Rachaꞌnu.
\v 18 Vati na yöve chaꞌaꞌ ña jàkaꞌnu yo juuni maa yo kùu yi ña kindoo vaꞌa yo, ti tu kìndoo vaꞌa yo nuu Ndioo kùu yi chaꞌaꞌ ña kàti Ndioo ña ñivi vaꞌa kùu yo.
\c 11
\s Nuu kàꞌan Paulu chata ma ndra jàꞌani ña kùu tatun Jesuu
\p
\v 1 ¡Ma ña kùuni̱ kuu yi ña na jandeeni ndo uvi uni tuꞌun töve nda kuenda ña ni kaꞌin vitin nuu ndo! Ta a kùuni ndo a küuni ndo, va ìyo yi ña tasoꞌo ndo yi.
\v 2 Vati yuꞌu yaꞌa ga kuiñui takua kuiñu ma Rachaꞌnu Ndioo chaꞌaꞌ ndo koto kèsiin ndo ma itiꞌ ra. Chàꞌi tuꞌun nuu Cristu ña ni kuꞌvai ndo nuu uvanuuni ra, takua jàꞌa iin ndian kùu tatá ora chàꞌa na ñayoko seꞌe na nuu ma ra ni tandaꞌa chiꞌan.
\v 3 Vati yuꞌu yaꞌa nàkanini̱ chaꞌaꞌ ndo koto jandaꞌviñaꞌa inga ñivi ndo, ta jàña ndo ña jàkaꞌnu ndo ma Cristu, takua jāꞌa ma koo xaán ña jāndaꞌviñaꞌa ri ma ña chūnani Eva chiꞌin maña ri tatiempu.
\v 4 Va yuꞌu teꞌen chànini̱ chaꞌaꞌ ndo. ¿Ta naja tìin ndo ña kàꞌan ma nda ndra nikuuni ña vàchi kàtituꞌun chaꞌaꞌ iin Jesuu ña siin kàa kua ma Jesuu ndicha ña cha kātituꞌun ndi nuu ndo? ¿A ta naja tìin ndo inga tuꞌun ña kàꞌan chaꞌaꞌ ma Tati Ií Ndioo ña siin kàa kua ma ña cha nīꞌi ndo? ¿A ta naja ìyo tuꞌva ndo ña chìnuni ndo ma tuꞌun kàꞌan ndra ña siin kàa kua ma tuꞌun Ndioo ña cha chìnuni ndo jāꞌa ndi?, ndia.
\v 5 Chànini ñivi ña tatun kaꞌnu ga kùu ndrakan kua yuꞌu, kùuni na, va töve ndicha.
\v 6 Ta vaji ndicha ña na töve nduvaꞌa vii kàꞌin ora kàtituꞌin nuu ndo, va chìtoi ña ìyo chinituni̱ kuenda ma tuꞌun Ndioo. Ta chìto ndo yi, ti kuaꞌaꞌ chaꞌaꞌ cha jānaꞌi̱ yi nuu ndo chiꞌin tandiꞌi ma tiñu jàꞌa ndi.
\v 7 ¿A chànini ndo ña na väꞌa jāꞌi ma ora jānaꞌa saani̱ ma tuꞌun Jesuu nuu ndo? ¿A iin kuati kùu yi ña jandotaꞌani̱ yuꞌu chaꞌaꞌ ña jandokaꞌnui ndo?, kùuni ndo.
\v 8 Taku yuꞌu ti tīndee ma ndian chìnuni inga ñuu yuꞌu chiꞌin xuꞌunꞌ, ikan na kuu kuàtiñui yi chiꞌin ndo.
\v 9 Ta ma ora chīyoi chiꞌin ndo ta chaa iin kivi ña kūmani ndatiñu nui, va na töve nī chikain yi nuu nïꞌiin ndo, vati ma ndian kùu yani yo ndian kīchi ñuꞌuꞌ Macedonia, ndiakan kùu ma ndian tīndee yuꞌu chiꞌin tandiꞌi ña kūmani nui. Yakan va ma kivi ikan töve nī chikain nïꞌiin nakuyi nuu ndo, ta takan ni jaꞌi yi itiꞌ nuu ndia.
\v 10 Ta ndicha vaꞌa ña ndava nuu Cristu kùu ma ña kàꞌin, ti chìtoi ña jàtiñu vaꞌi ta töve chīkain nïꞌiin nakuyi nuu ndo, yakan va na küu kaꞌan nïꞌiin ndyoꞌo ndian ìyo ninii kaꞌnu ñuꞌuꞌ Acaya chatai.
\v 11 ¿Tanuu? ¿A kàꞌin teꞌen chaꞌaꞌ ña töve kùuni̱ ndeꞌi ndo?, kùuni ndo. ¡Na yüvi takan kùu yi, vati ndava nda nuu Ndioo kàꞌin ña yaꞌa kùuni̱ ndeꞌi ndo!
\p
\v 12 Va yuꞌu ni jaꞌi ma takua takani jàꞌi, ikan na küu niꞌi ndrakan ña kàꞌan ndra ña indukuni jàꞌa ndra kua ndyuꞌu, ti töve ndicha ña takan jàꞌa ndra.
\v 13 Va ma ña ndicha kùu yi ña ndrakan kùu ndra, ndra jàꞌani ña tatun Cristu kùu ndra, ti ma tiñu jàꞌa ndra kùu yi ña jàndaꞌviñaꞌa ndra ñivini.
\v 14 Ta ndisaa ñaꞌa na töve ndetiñu kùtunini yo ña takan jàꞌa ndra, vati nda ma kuiꞌna jàyaꞌán ñáꞌ ña kùuánꞌ tati jàtiñu kuenda Ndioo.
\v 15 Ta chaꞌa yakan kùu yi ña tu cha chàꞌa yo kuenda ña takan jàꞌa ma ndian jàtiñu kuenda ma kuiꞌna, tajan kùuni yi kaꞌan yi ña juuni kùu jayaꞌa na na ña kùu na ndian jaꞌa tiñu vaꞌa ndia. Va ni chaa iin kivi ña Ndioo ni jandeꞌe ra tundoꞌo na chaꞌaꞌ ma tiñu kini ña jàꞌa na.
\s Nuu ndèꞌe Paulu tundoꞌo chaꞌaꞌ ña kùu ra tatun Ndioo
\p
\v 16 Inga chaꞌaꞌ kàꞌan ndikoi chiꞌin ndo ña na töve vaꞌa jàꞌa ndo ña chànini ndo ña ra tìvi xini kùi. Va tu takan chànini ndo, na kuꞌva ndo ña na kaꞌin nuu ndo takua kàꞌan iin ra tìvi xini, ikan na kuu jakaꞌnui yuꞌu itaꞌvi chaꞌaꞌ ma ña kàꞌin,
\v 17 ta na yöve ma Rachaꞌnu Ndioo kùu ra ña chāꞌa ra ña na kaꞌin takan nuu ndo, va ni kaꞌin yi kuenda ña jàkaꞌnui juuni mai takua jàꞌa iin ra tìvi xini tuva takan chànini ndo ña kùi.
\v 18 Vati tu kuaꞌaꞌ ñivi ìyo ñuñivi iꞌya jàtayi na na chaꞌaꞌ ma ña jàꞌa na, juuni kua ikan ni jatayi̱ yuꞌu tuva takan kùuni ndo ndia.
\v 19 ¿A vaꞌa ña jàndeeni ndo tàsoꞌo ndo tuꞌun kàꞌan ma ndra tivi xini?, kùuni ndo. ¿A chànini ndo ña yaꞌa ìyo chinituni ndo chaꞌaꞌ ña jàꞌa ndo takan?, kùuni ndo.
\v 20 Ta juuni töve vaꞌa ña yaꞌa jàndeeni ndo jàkuu ndo tiñu nuu ndrakan chaꞌaꞌ ña jànini ndra ndo, ta kùu ndra ña suꞌu ndra nuu ndo, ta kùmusu ndra ndo, ta töve tìñuꞌu ndra ndo, ta juunni kuꞌva ndo ña kani ndra nuu ndo ndia.
\v 21 ¿A chànini ndo ña na töve vaꞌa jàꞌa ndi chaꞌaꞌ ña töve jàꞌa ndi ma kua jàꞌa ndra chiꞌin ndo?, kùuni ndo.
\p Vati tu ndrakan jàtayi ndra ndra chaꞌaꞌ ma ña jàꞌa ndra, nda yuꞌu kùu jatayi yuꞌu chaꞌaꞌ ña jàꞌi, vaji ma tuꞌun ikan kùu yi iin ña töve nda kuenda, kuenda ndo.
\v 22 Vati tu ndrakan kùu ndra ndian hebreu, ta juuni yuꞌu ndia. Tatu ndrakan kùu ndra ndian ñuꞌuꞌ Israel, nda yuꞌu ndia. Tatu ndrakan kùu ndra ndian kīchi tata Abraham, nda mai ndia.
\v 23 Tatu kàti ndra ña kùu ndra ma ndra jàtiñu kuenda Cristu; mai tiaga, vaji kàꞌin yi takua kàꞌan iin ra tivi xini. Va ndicha kuii ña jàtiñui tiá kua ndrakan, vati ndoꞌo gai kua ndrakan, ta chùndii gai vekaa kua ndrakan, ta kuaꞌaꞌ chaꞌaꞌ cha yatin ni kuvi̱ chaꞌaꞌ ma Rachaꞌnu ndia.
\v 24 Ta uꞌun chaꞌaꞌ jāndeꞌe ma ndian judíu tundoꞌo yuꞌu ña kāni na oko chaꞌun kumi yoꞌo chatai taꞌiiꞌiin chaꞌaꞌ.
\v 25 Ta uni chaꞌaꞌ kāni na yuꞌu chiꞌin koroti, ta iin chaꞌaꞌ kāni na yuꞌu chiꞌin yuu. Ta uni chaꞌaꞌ sāꞌvi ma varku kuàꞌin ma tichi tañuꞌu ndia. Ta iin chaꞌaꞌ kīndoi tichi tañuꞌu iin nduvi ta iin niñuu.
\v 26 Ta juuni yaꞌa ga kuaꞌaꞌ ma nuu chàkunui ndēꞌi tundoꞌo: taku ma tichi yuta kaꞌnu, taku chiꞌin ma ndra suꞌu, taku chiꞌin ma ndian judíu ñui, ta ndian töve, taku tichi ñuu, tichi kuꞌu, ta tichi tañuꞌu, ta juuni taku chiꞌin ma ndian jàꞌani ña ndian chìnuni kùu na ndia.
\v 27 Ta kuaꞌaꞌ chaꞌaꞌ jātiñui kuenda ma Rachaꞌnu ta ndēꞌi tundoꞌo, ta kuaꞌaꞌ chaꞌaꞌ tāꞌnda ñumaꞌnai, ta chīsokoi ti tüvi chàꞌa na ña kachi̱, ta nātii̱ takuii ndia. Ta juuni kuaꞌaꞌ chaꞌaꞌ ndēꞌi tundoꞌo chiꞌin ña vichin ta chaꞌaꞌ ña kùmani jaꞌma kuꞌin.
\p
\v 28 Yöve uvaa chaꞌaꞌ tundoꞌo iꞌya ni kùu ma ña nàkanini̱, vati taꞌiiꞌiin kivi juuni nàkanini̱ chaꞌaꞌ ma ndian chìnuni ìyo ñuu ndo chiꞌin ndian chìnuni inga ñuu ndia.
\v 29 Tu ìyo nda ndian kùmani ñandee, nda yuꞌu kùmani ñandei chaꞌaꞌ na ndia. Ta tu ìyo ndian tindaniꞌni inga ñivi tichi kuati ña na jaꞌa na yi, nda yuꞌu yaꞌa kàyuni̱ jàꞌa yi ndia.
\p
\v 30 Tu ìyo nda chaꞌaꞌ ìyo yi ña jatayi na na, nda yuꞌu ni jatayi yuꞌu chaꞌaꞌ ma ña kàꞌan na ña tüvi ndàkutiñui.
\v 31 Ma Rachaꞌnu Ndioo, ra kùu Tatá ma Rachaꞌnu yo Jesucristu, ra yaꞌa ií, ta ra ìyo yi ña jàkaꞌnu yo ndisaa tiempu, cha chìto vaꞌa ra ti yöve tuꞌun vata kùu ma ña kàꞌin.
\v 32 Ma ora chīyoi ñuu Damascu, ma ra kùu kuvienu ña jàkuu tiñu nuu ma rey Areta ma ñuu ikan, tāchi ra kuaꞌaꞌ jandaru ña na kumi ndra ma yuveꞌe kaꞌnu ña ìyo yuꞌu ñuu ikan, kuenda na tiin ndra yuꞌu ta kuꞌin vekaa.
\v 33 Va \fig Cómo Pablo se escapó|54MX-69.tif|col|11:33||Nuu jākakú ndra meru Paulu ra chiꞌin iin tuka|11.33\fig*ma ndra merui jākakú ndra yuꞌu tichi iin tuka, ta jānuu ndra yuꞌu nuu ìyo iin yavi ma muru ña chīkonuu ma yuꞌu ñuu ikan. Ta takan kūu yi ña kākú xeꞌi ndaꞌa kuvienu.
\c 12
\s Ña ndèꞌe Paulu jaꞌa Ndioo
\p
\v 1 Na töve nda kuenda kùu yi tuva jàkaꞌnu yo juuni maa yo, ta vaji takan kùu yi va ìyo yi ña katituꞌin ma ña ndēꞌi ña kàa takua kàa ña ndèꞌo tichi ñumaꞌna yo jāꞌa ma Ndioo.
\v 2 Nàkotoi iin ma ra chìnuni tuꞌun Cristu, ña cha chinu uchi kumi kuiya kùu yi ña kīchi kiꞌin Ndioo ra, ta chāꞌan ra chiꞌin ra ma andivi sukun ga nuu ìyo ra. Ta töve chìtoi a chāꞌan ra chiꞌin ra chiꞌin kuñu ra a chiꞌin tatini ra, uvanuu Ndioo kùu ma ra chìto.
\v 3 Ta ndicha ña vaji töve chìtoi tu chāꞌan ra chiꞌin kuñu ra a töve, uvanuu ma ña chìtoi kùu yi ña
\v 4 chāꞌan ra chiꞌin Ndioo nuu ìyo vii ma ñivi. Ta ikan kùu nuu chīni ra tuꞌun xeꞌe ña kēe yuꞌu Ndioo, ña na küu katituꞌun yo yi nuu inga ñivi.
\v 5 Kùu jatayi̱ yuꞌu chaꞌaꞌ iin ra kùu takua kùu rakan, va kuenda yuꞌu töve jàtayi̱ chaꞌaꞌ juuni mai, ti uvanuu chaꞌaꞌ ña jàtayi̱ yuꞌu kùu chaꞌaꞌ ma ña na küu jaꞌa vaꞌi.
\v 6 Ta tu kùuni kaꞌan vaꞌi chaꞌaꞌ juuni mai, kùu jaꞌi yi tu kùuni̱, ti ma tuꞌun ndicha kùu ma ña kàꞌin, va na töve jàꞌi yi koto kuuni ma ñivi ña yaꞌa ndu ma kua ìyo yi ña kaꞌin a ma kua ndeꞌe na ña kùi.
\v 7 Ta chaꞌaꞌ ña koto yaꞌa ndui ña jatayi̱ yuꞌu chaꞌaꞌ ña jāndeꞌe Ndioo yuꞌu ma tañu ñumaꞌnai, yakan va juuni maa ra kùu ra ña chāꞌa ra ña na jandeꞌe ma kuiꞌna tundoꞌo yuꞌu. Ta ma tundoꞌo ikan ti yaꞌa uꞌvi yi takua uꞌvi nuu kiꞌvi ma iñu naꞌnu kuñu yo.
\v 8 Vati uni chaꞌaꞌ cha chīkain nuu ma Rachaꞌnu ña na tavaniꞌi ra ma tundoꞌo ikan yuꞌu.
\v 9 Va ma Rachaꞌnu java teꞌen nākaꞌan ra chiꞌi̱n: “Yoꞌo seꞌyu, cha ìyo ndisaa ma ñamani̱ chiꞌun ta tüva chìniñuꞌu̱n inga nakuyi, vati ma ndatui ndichin ga nàꞌa yi nuu ma ñivi ora kùmani ñandee na.” Ta chaꞌaꞌ yakan kùu yi ña yaꞌa ga chìsii̱ ta jatayi̱ ña kùi iin ra kùmani ñandee, vati takan kùu ndeꞌe ma ñivi kuaꞌaꞌ ndatu ma Cristu jàꞌa yi nui.
\v 10 Yakan va yaꞌa ga chìsii̱ chaꞌaꞌ ña kùi takan, vaji kùmani ñandei, a kàꞌan tiꞌini ñivi chatai, a ña yaꞌa ndu sokoi, a kanitaꞌan ñivi chiꞌi̱n a ña ndeꞌi tundoꞌo chaꞌaꞌ ña kùuni ndeꞌi Cristu, vati ma ora yaꞌa ga vita kùuni̱, juuni yaꞌa tùvini̱ ña ìyo ma ñandee Cristu chiꞌi̱n.
\s Yaꞌa ga chìtuꞌun ma Paulu chaꞌaꞌ ma ñivi chìnuni ñuu Corintu
\p
\v 11 Ma ña já kātituꞌin nuu ndo ndacheꞌe, kāꞌin yi kuenda ndo takua kàꞌan iin ra tivi xini, vati maa ndo kùu ma ndian jāꞌa ña na kaꞌin yi takan. Va tüvi nī tiñuꞌu ndo yuꞌu, vati ma ndra tīñuꞌu ndo kùu ma ndra kàti maa, ña kùu tatun Cristu ña yaꞌa vaꞌa. Tatu yuꞌu na töve nda kuendai, na yüvi chaꞌaꞌ yakan kùuni yi kaꞌan yi ña kaꞌnu ga ndra kua yuꞌu.
\v 12 Ta chiꞌin ña jāndeeni̱ ña ndēꞌi tundoꞌo ta chiꞌin ma seña jāꞌi, ta chiꞌin ndatu ta chiꞌin ma tiñu yaꞌa vaꞌa ña jāꞌi ora chīyoi chiꞌin ndo. Chiꞌin ndisaa yakan jànaꞌa yi ña ndicha kuii ña iin ra tatun Cristu kùi.
\v 13 ¿A chànini ndo ña töve kùuni ndeꞌi ndo takua kùuni ndeꞌi ndian chìnuni inga ñuu chaꞌaꞌ ña töve nī chìkain ma ña chiniñuꞌi nuu ndo?, kùuni ndo. Ta tu takan kùu yi, kùuni ndo, ¡kaꞌnu kooni ndo!, tuva takan.
\p
\v 14 Yuꞌu cha ìyo tuꞌvai ña kundeꞌi ndo ma chaꞌaꞌ uni. Ta indukuni na töve ni jatañui nuu ndo, ti töve ni ndakain ndatiñu nuu ndo ña ni kuniñuꞌi nuu ndo itiꞌ nuu ndia. Vati yöve ndatiñu ndo kùu ma ña kuànandukui ti ma ña kuànandukui kùu maa ndo. Takua jàꞌa ma ndian kùu tatá, ña jàkaya na xuꞌunꞌ kuenda ma ndiakuati seꞌe na, ta yüvi ma ndiakuati seꞌe na jàkaya na yi kuenda ma ndian kùu tatá na.
\v 15 Ta yaꞌa kùuni̱ ndeꞌi ndo, ña kùu janaa ndiꞌi̱ ma ña ìyo nui kuenda ndo, nda ña kùu kuvi̱ chaꞌaꞌ ndo. Ta tu ndicha kuii ña nani kivi kùuni gai ndeꞌi ndo, ta, ¿a vaꞌa jàꞌa ndo ña taꞌiiꞌiin kivi kuàjaña ndo ña kùuni ndo ndeꞌe ndo yuꞌu?, kùuni ndo.
\p
\v 16 Ta ndyoꞌo vaji chìto kachin ndo ña töve chìkain ña chiniñuꞌi nuu ndo, va ìyo iin ndian ìyo tañu ndo ña kàꞌan, ti iin ra kèñaꞌa ñivini kùi.
\v 17 Ta chìto vaꞌa ndo ña ni yuꞌu tüvi jandaꞌviñaꞌi ndo, ta ni ma ndra tāchi̱ nuu ndo ndia.
\v 18 Vati nuu ra yani Titu chīkain ña na kundeꞌe ra ndo. Ta kùuni̱ ndakatuꞌin iin nakuyi nuu ndo, ¿a kēñaꞌa ma Titu ndo ora chāndeꞌe ra ndo chiꞌin inga ma ra yanio?, kùuni ndo. Cha chìto vaꞌa ndo ña tüvi nī jandaꞌviñaꞌa ndi ndo, ti ninduvi ndi iin kuꞌva ni chànini ndi ora jànaꞌa ndi nuu ndo takua kùuni Ndioo ña jàꞌa ndi.
\p
\v 19 Ndyoꞌo ndian yaꞌa kùuni ndi ndeꞌe ndi, ¿a chànini ndo ña juuni chaꞌaꞌ maa ndi kàꞌan ndi ña kàꞌan ndi teꞌen?, kùuni ndo. Na yöve takan kùu yi, ti ndava nda nuu Ndioo kàꞌan ndi yi chaꞌaꞌ ña kùu ndi ndian chìnuni tuꞌun Cristu. Ti tandiꞌi ma tuꞌun ña kàꞌan ndi iꞌya kùu yi kuenda ña na chinuni vaꞌa ndo ta kuaꞌnu vaꞌa ndo chiꞌin yi.
\v 20 Vati ma ora kundeꞌi ndo yuꞌvi̱ koto nataꞌin ndo ña töve vaꞌa ìyo ndo ma kua kuuni̱ nataꞌin ndo, ta koto töve nataꞌan ndo yuꞌu ma kua kùuni ndo ndia. Chaꞌaꞌ yakan kùu yi ña yuꞌvi̱ nataꞌin ndo ña kànitaꞌan yuꞌu ndo, a tixin ndo, a kayuni ndo chiꞌin taꞌan ndo, a ña kuenda maani ndo kùuni ndo, a ña kànduvaꞌa ndo taꞌan ndo, a kàꞌan ndaa ndo chata na, a jatayi ndo ndo, a ña jakanuu ndo xini taꞌan ndo.
\v 21 Ta yuꞌvi̱, koto jakukanuu Ndioo yuꞌu chaꞌaꞌ ndo, ta kichaꞌi kuàkui ma ora ni kundeꞌi ndo chaꞌaꞌ ma kuati jaꞌa ndo, ña juuni jaꞌa ga ndo nda vitin, takua kùu ña kìꞌvi ndraꞌii chiꞌin ñivi ñaꞌa yöve ñasiꞌi ndra, a ñivi ñaꞌa ña kìꞌvi chiꞌin ndra yöve ii vi, a inga tuku ña kini ña takäꞌan jàña ndo ña jàꞌa ndo ndia.
\c 13
\s Tuꞌun nuu ndiꞌi nia ña tàchi Paulu nuu ndian chìnuni ìyo ñuu Corintu
\p
\v 1 Ñaꞌa kùu ma chaꞌaꞌ uni ña kuàndeꞌi ndo. Tu ora tìsokuati yo iin ñivi, ìyo yi ña tisokuati uvi a uni na na, ikan na kuu kaꞌan yo ti iin ña ndicha kùu yi.
\v 2 Nuu tandiꞌi ndyoꞌo ndian jāꞌa kuati tatiempu chiꞌin nuu inga tuku ndo, kàtituꞌun ndikoi nuu ndo inga chaꞌaꞌ chiꞌin tuꞌun iꞌya: tu kuꞌin kundeꞌi ndo inga chaꞌaꞌ tüva ni kundaꞌvini̱ ndo tuva juuni jàꞌa ga ndo ma kuati. Tuꞌun iꞌya kùu ma ña cha kātituꞌin nuu ndo ma ora chāndeꞌi ndo chaꞌaꞌ uvi, ta vitin tàa ndikoi yi kuenda ndo vaji ìyo chikai.
\v 3 Takan ni jaꞌi, ikan na koto kachin ndo ña ndicha kuii ña yuꞌu kùu ma ra kàꞌan chiꞌin tuꞌun yuꞌu Cristu. Vati taku Cristu ti tüvi kumani ñandee ra chaꞌaꞌ ma tiñu jàꞌa ra chiꞌin ndo, vati nduvaꞌa ìyo ndatu ra chiꞌin ndo.
\v 4 Ta ndicha kuii ña ndyuꞌu tüvi ñandee ndi indukuni takua tüvi nī chiyo ñandee Cristu ora chīꞌí ra nuu kruu. Va tava jānataku ndiko ma Rachaꞌnu Ndioo ra chiꞌin ndatu ra, indukuni kua ikan ni ndoꞌiin ndi chiꞌin ra chaꞌaꞌ ma ndatu ra kuenda ña jàkuu ndi tiñu nuu ndo ndia.
\p
\v 5 Yakan va ndyoꞌo, na jaꞌa vaꞌa ndo kuenda ma naja kua kùu ndo, ikan na kuu koto kachin ndo tuva ndicha ña chinuni vaꞌa ndo tuꞌun Cristu. ¡Na kiꞌin ndo kuꞌva ndo! ¿A töve chàꞌa ndo kuenda ña Jesucristu ìyo ra chiꞌin ndo, tuva ndicha ña ndian chìnuni kùu ndo?
\v 6 Ndàtu ndi ña na kuꞌva ndo kuenda ña ndicha vaꞌa ña ndra chìnuni kùu ndi ndia.
\v 7 Ta chaꞌaꞌ yakan kùu yi ña ndyuꞌu kàꞌan ndi chiꞌin Ndioo chaꞌaꞌ ndo, ti tüvi kùuni ndi ña na jaꞌa ndo nïꞌiin ma ña töve vaꞌa. Ta ora kàꞌan ndi chiꞌin Ndioo takan, töve kàꞌan ndi yi kuenda ña na jandondaa ndi juuni maa ndi, vati ma ña kùuni ndi kùu yi ña na jaꞌa ndo ña vaꞌa vaji ìyo ndian chànini ña ndian vatani kùu ndi.
\v 8 Vati ndisaa ma tiñu jàꞌa ndi kùu yi kuenda ña na koto ma ñivi ma tuꞌun ndaa, ta yüvi kuenda ña tixeꞌe ndi ma ña ndaa nuu na kùu yi.
\v 9 Yakan va yaꞌa chìsii ndi vaji tüvi ñàndee ndi, vati ma ña kùuni ndi kùu yi ña maa ndo na koo ñandee, ti takan chìkan ndi nuu Ndioo chaꞌaꞌ ndo ña na kuꞌva ra kuaꞌnu vaꞌa ndo chiꞌin ma tuꞌun ra.
\v 10 Tài ma tutu iꞌya kuenda ndo ma antea ña kuꞌin kundeꞌi ndo, ikan ma ora chai chiña na tüva yaꞌa ga jandeꞌi tundoꞌo ndo chaꞌaꞌ ma tiñu ndisoi, jāꞌa ma Rachaꞌnu. Vati ma tiñu iꞌya kùu yi kuenda ña na tindei ndo ña kuaꞌnu vaꞌa ndo chiꞌin ma ña chìnuni ndo tuꞌun Ndioo, ta yüvi kuenda ña na kuita kuati ndo.
\p
\v 11 Ta vitin ndyoꞌo yani, kùuni̱ ña na sii kuuni ndo ta na nanduku ndo naja kua kuu kuaꞌnu ndo takua kùuni Ndioo. Ta na koo vii ndo ta ndoꞌiin ndo ta jandomani ndo taꞌan ndo. Ta ma Ndioo ra kùuni ndeꞌe yo ta ra jaꞌa ña na koo vaꞌa yo chiꞌin taꞌan yo, na koo ra chiꞌin ndo ndia.
\v 12 Na kañaꞌa ndo chiꞌin taꞌiiꞌiin taꞌan ndo chiꞌin ndaꞌaꞌ ndo ta tutu ndo sitin ndo.
\p
\v 13 Ta tandiꞌi ma ndian kùu taꞌan yo ndian chìnuni tàchi na saludu nuu ndo ndia.
\p
\v 14 Ta na koo ma ñamani ma Rachaꞌnu Jesucristu chiꞌin ndo, ta na kundaꞌvini ma Rachaꞌnu Ndioo ndo, ta juuni na koo ma Tati Ií Ndioo chiꞌin ndo ndia. Ta takan na kuu yi. Amén.