\id GAL
\h Tutu Gálata
\toc1 Tutu Gálata
\mt Tutu ña tāa rachaꞌnu Paulu kuenda ñivi chìnuni tuꞌun Cristu ña ìyo ñuu Gálata
\c 1
\p
\v 1 Yuꞌu Paulu, ra kùu tatun Jesucristu, va yüvi ñivi ìyo ñuñivi kùu ma ndian tāchi yuꞌu, ta yüvi ñivi kùu ma ndian jākuiso ma tiñu iꞌya yuꞌu ndia. Vati maa ma Jesucristu chiꞌin ma Tatá yo Rachaꞌnu Ndioo, ra jānataku ma Jesucristu tañu ndian ndií, rakan tāchi yuꞌu.
\v 2 Ta yuꞌu chiꞌin tandiꞌi ma ndian yani yo ndian chìnuni tuꞌun Jesuu ña ìyo chiꞌi̱n iꞌya, tàa ndi ma tutu iꞌya kuenda ndyoꞌo ndian chìnuni tuꞌun ra, ndian ìyo ndisaa ñuu kàndii ñuꞌuꞌ Galacia.
\v 3 Ta Rachaꞌnu Ndioo ra kùu Tatá yo chiꞌin ma Rachaꞌnu Jesucristu ra kùu chitoꞌo yo, na koso ra ma ñamani ra chata ndo, ta na jaꞌa ra ña na koo vii anima ndo ndia.
\v 4 Vati maa Jesuu chāꞌa ra ma kuñu ra ña na kuvi ra chaꞌaꞌ ma kuati yo, ikan na kuu kakú yo nuu ma kuati yaꞌa ga kini ña ìyo ma ñuñivi iꞌya. Takan ìyo yi ña kuu yi, ti takan kùuni ma Ndioo yo, ra kùu Tatá yo ña na kuu yi takan.
\v 5 Yakan va, ¡endeeni na jakaꞌnu yo ra! Ta takan na kuu yi. Amén.
\s Na tüvi ìyo inga tuꞌun vaꞌa takua kùu ma tuꞌun ña kàꞌan chaꞌaꞌ Jesucristu
\p
\v 6 Yaꞌa ga ndava kuàꞌan tati̱ ora chīni̱ ña yaꞌa numini kīchaꞌa jàña ndo ña chìnuni ndo tuꞌun Ndioo, ra kāchin yo chaꞌaꞌ ma ñamani Cristu. Ta vitin kīchaꞌa ndo chìnuni ndo inga tuku tuꞌun ña töve vaꞌa.
\v 7 Va töve ìyo inga tuku itiꞌ vaꞌa, vati ìyo iin ñivi kùuni jakanuu xini ndo, ti kàti na ña ma tuꞌun vaꞌa chaꞌaꞌ Cristu na töve tuꞌun ndaa kùu yi ti tuꞌun yakua kùu yi, kàti na.
\v 8 Yakan va tu kèta inga ma ndian kàtituꞌun tuꞌun chaꞌaꞌ ra nuu ndo, ta siin kàtituꞌun na yi kua ma tuꞌun ña cha kātituꞌun ndi nuu ndo niku, tiá vaꞌa ga ña na kuvi na endeeni, a maa ndi kuu ndi ña kaꞌan yi, a kuu yi iin tati vaꞌa jàꞌa tiñu nuu Ndioo ña kīchi itiꞌ andivi.
\v 9 Tandiꞌi ma tuꞌun iꞌya cha kāꞌin yi niku, ta vitin jàkukuꞌuni ndikoi yi ndo, ta ni kaꞌan ndikoi yi inga chaꞌaꞌ nuu ndo: tu ìyo inga ma ndian kàtituꞌun tuꞌun ra, ta siin kàa yi takua kàa ma tuꞌun ña cha nīꞌi ndo niku, na kuvi na endeeni jàꞌa ma Ndioo tuva jaꞌa na takan.
\v 10 Ta chaꞌaꞌ ma tuꞌun já kāꞌin chiꞌin ndo, ¿a chànini ndo ña nàndukui ña na kutaꞌani Ndioo ña kàꞌin a nandukui ña na kutaꞌani ñivi yi?, kùuni ndo. Yüvi takan kùu yi. Tu yuꞌu juuni chàkunui ña nàndukui ma ña na kutaꞌani ma ñivi, kùuni yi kaꞌan yi yüva ra jàꞌa tiñu nuu Jesucristu kùi, tuva takan.
\s Paulu kàtituꞌun ra nuu ma ñivi ma naja kua chāa ra ña kùu ra tatun Jesuu
\p
\v 11 Tandiꞌi ndyoꞌo yani ndian chìnuni, kùuni̱ katituꞌin nuu ndo ma tuꞌun iꞌya: Ma tuꞌun vaꞌa ña kàtituꞌin nuu ndo, töve iin tuꞌun ña vàchi ma chinituni ñivini kùu yi.
\v 12 Ti ma tuꞌun iꞌya nïꞌiin ñivi na töve nī chaꞌa yi ta na töve nī janaꞌa na yi nui, va maa ma Jesucristu kùu ra ña jāketa ra ta jānaꞌa ra yi nui ma itiꞌ andivi.
\p
\v 13 Vati tatiempu niku chākuꞌun soꞌo ndo ma takua nàtuꞌun ma ñivi chaꞌi, ña ora ìyoi kuenda ma ñivi judíu, yaꞌa ga ndīkuin ma ñivi chìnuni, ta yaꞌa ga jāndeꞌi tundoꞌo na niku. Ta chànini̱ ña kaꞌni̱ na niku.
\v 14 Ta yuꞌu yoso nui tiaga itiꞌ nuu takua ma ndra merui ora kūi iin ra endee jàkaꞌnui ma ña takani jàꞌa ma ndian judíu, ti yaꞌa ga chàtaꞌani̱ ma itiꞌ ikan, ti kūuni̱ kumi kuendai ma takua takani jāꞌa ma ndian kūu ñivi̱ chīyo tajiꞌna niku.
\v 15 Vati ma Ndioo kāchin ra yuꞌu ora juuni indii̱ tichi maꞌi niku. Ta chaꞌaꞌ ña ìyo kuaꞌaꞌ ñamani ra chiꞌi̱n kùu yi ña kāna ra yuꞌu ña jàkui tiñu nuu ra. Ta yaꞌa chìsii ra ña
\v 16 jāꞌa ra ña jāketa ma ra kùu seꞌe ra, ta na koo ra chiꞌi̱n, ikan na kuu nakoto ndichai ra, ta kùu katituꞌin ma tuꞌun chaꞌaꞌ ra tañu ma ndian yüvi judíu. Yakan va ora kīchaꞌi kàtituꞌin ma tuꞌun vaꞌa iꞌya nuu ma ñivi, na töve nī chikain ña kundayuꞌu nïꞌiin na yuꞌu chaꞌaꞌ ma tiñu jàꞌi.
\v 17 Ta juuni na töve nī chaꞌi ma ñuu Jerusalén ña kuꞌin kundeꞌi ma ndian kūu tatun Jesuu ma antea ña kùi tatun ra niku. Ti ma ña jāꞌi kùu ña na töve nī chatunui ta kēi kuàꞌin ma itiꞌ ñuꞌuꞌ ña nàni Arabia, tajan chīkoniꞌi ndikoi itiꞌ ñuu ña nàni Damascu.
\p
\v 18 Takan kūu ta ora cha yaꞌa ma uni kuiya kēi kuàꞌin itiꞌ ñuu Jerusalén, vati kùuni nakotoi ma ra nàni Petuꞌ, ta chiꞌin rakan chīyoi cha yatini chaꞌun kivi.
\v 19 Ta ora chāi ma ndakan, na töve nī ndeꞌi nïꞌiin inga ra kùu tatun Jesuu. Va uvani ra ña ndēꞌi kùu Jandiau ma ra yani ma Rachaꞌnu Jesuu.
\v 20 Tandiꞌi ma tuꞌun ña tài iꞌya nuu ndèꞌe ma Ndioo, ta chìto vaꞌa ra ti töve tuꞌun vata kùu yi.
\p
\v 21 Takan kūu tajan kēe ndioi kuànuꞌi ma itiꞌ ñuꞌuꞌ Siria ta ñuꞌuꞌ Cilicia ndia.
\v 22 Ta ma ndian chìnuni ndian ìyo ma veñuꞌu ña ndaa ñuꞌuꞌ Judea, na töve nī ndeꞌe kachin na yuꞌu ta töve nī nakoto na yuꞌu ndia.
\v 23 Vati chīnini na ña kàꞌan ma ñivi teꞌen chaꞌi: “Ma ra ndīkun kaꞌni yo niku, ta jāndeꞌe ra tundoꞌo yo, vitin chàkunuu ra jànaꞌa ra tuꞌun vaꞌa chaꞌaꞌ Cristu, ta ma tatiempu kūuni ra janaa ra ma tuꞌun ikan niku.”
\v 24 Ta chaꞌaꞌ ña Ndioo cha sāma ra yuꞌu, ta yakan kùu yi ña kīchaꞌa ndio na jàkaꞌnu na ra ndia.
\c 2
\s Ma inga ndra kùu tatun Jesuu ndàkiꞌin mani ndra Paulu
\p
\v 1 Takan kūu ta ora cha yāꞌa uchi kumi kuiya kēi kuàꞌan ndikoi inga chaꞌaꞌ ma ñuu Jerusalén chiꞌin ma Bernabé, ta juuni chāꞌan ma ra nàni Titu chiꞌi̱n ndia.
\v 2 Ta chāꞌin ma ñuu ikan, vati maa ma Ndioo jānaꞌa ra nui tichi nuu ñumaꞌnai ña kūuni ra ña na kotoi. Ta ora chāa ndioi ma ñuu ikan, jāꞌi ña na kutiꞌvi ta nātuꞌun xeꞌi chiꞌin ma ndra kuxini nuu ma ndian chìnuni, ta kīchaꞌa ndioi kàtituꞌin nuu ndra chaꞌaꞌ najakua kàa ña jànaꞌi tuꞌun vaꞌa nuu ma ndian yöve judíu. Jāꞌi takan ikan töve naa ma tiñu ña jàkui nuu ma ndian yüvi judíu, ta ikan kùu koto ndichai ña takan kùu yi.
\v 3 Ta ni ma ra nàni Titu, ra chàkunuu chiꞌi̱n, na töve nī janini na ra ña na taꞌnda ma ñii nuu ika ra vaji iin ra griegu kùu ra.
\v 4 Nduvaꞌa chīniñuꞌi kaꞌin chaꞌaꞌ ma kuati iꞌya, ti ìyo iin ndian jàꞌani ña iin ndian chìnuni tuꞌun Cristu kùu na, ta kīꞌvi xeꞌeni na ma tañu yo, ta koto na naja kua chàkunuu yo nuu nuna jàꞌa ña jākakú Cristu yo, ikan na jandaꞌviñaꞌa na yo ña ndakuu ndiko yo ndian musuni jàꞌa ma tuꞌun ley.
\v 5 Va ni itaꞌvi tiempu na töve nī chaꞌa ndi kiꞌvi ndi itiꞌ kuàꞌan ndiakan, vati kùuni ndi ña na koto kachin ndo ma tuꞌun ndaa ña kàꞌan chaꞌaꞌ ma Jesucristu, ikan na chinuni ndo yi ta na kindoo yi endeeni chiꞌin ndo.
\p
\v 6 Va ma ndra kuxini ìyo ma ñuu ikan, na töve nī chikan na ña samai ma tuꞌun vaꞌa ña kàtituꞌin. Va ndicha kuii töve ña kaꞌnu kùu yi kuendai tu kàꞌan yo a kùu ndra ndra kuxini a töve, ti indukuni ndèꞌe Ndioo ndisaa nuu ñivi.
\v 7 Ta ndicha kuii ora nātuꞌin chiꞌin ndra, chāꞌa ndra kuenda ña kāchin Ndioo yuꞌu kuenda ma tiñu ña kàtituꞌin ma tuꞌun vaꞌa chaꞌaꞌ Cristu nuu ma ndian yüvi judíu, indukuni kua kāchin ra Petuꞌ ña na katituꞌun ra yi nuu ma ndian judíu.
\v 8 Vati juuni maa ma Ndioo ra tāchi ma Petuꞌ nuu ma ndian judíu ña na kuu ra tatun nuu na, juuni ra kùu ma ra tāchi yuꞌu nuu ma ndian yöve judíu, ikan na kui tatun nuu na ndia.
\v 9 Ta ma Jandiau, chiꞌin ma Petuꞌ chiꞌin ma Xuva, ña kàꞌan na ña kùu ndra ndra kuxini ña kùmi ma ndian chìnuni, chāꞌa ndra kuenda ña maa ma Ndioo kùu ma ra chāꞌa ma ñamani kaꞌnu ikan nui ña na jaꞌi ma tiñu iꞌya. Yakan va chāꞌa ndra ma ndaꞌaꞌ ndra nui chiꞌin ma ra nàni Bernabé ña kāñaꞌa ndra chiꞌin ndi, ta chiꞌin ma kuꞌva ña jāꞌa ndra ikan, kùuni ndra ña na kuu ndi meru ndra. Ta juuni kīndoo vaꞌa ndra chiꞌin ndi ña ndyuꞌu kùu kuꞌun ndi kujanaꞌa ndi ma tuꞌun Cristu nuu ma ñivi yöve judíu, ta ndrakan ni jatiñu ndra chiꞌin ma ndian judíu.
\v 10 Ta uvanuu ma tuꞌun ña yaꞌa ga jākukuꞌuni ndra ndyuꞌu kùu ña na kukuꞌuni ndi ma ndian ndaꞌvi, ta ma tiñu ikan töve ndetiñu kuendai, ti chàtaꞌani̱ jaꞌi yi.
\s Paulu ndòxaan ra nuu ma Petuꞌ ma ora kaꞌìin ndra ma ñuu ña nàni Antioquía
\p
\v 11 Va kīchi Petuꞌ ma ñuu Antioquía nuu ndai ma ora ikan, ta nduvaꞌa kāꞌin nuu ra, ti ma ña jàꞌa ra töve vaꞌa yi.
\v 12 Vati jiꞌna ga kīchi ra chàchi ra chiꞌin ma ndian yüvi judíu, va takan jāꞌa ra ta nda kati kīchi iin ndian tāchi ma ra nàni Jandiau nuu ra. Ta Petuꞌ ora ikan kīchaꞌa ra chūndaa chiyo ra xiin ma ndian yüvi judíu ma nuu nàndi ra chàchi ra chiꞌin na niku, vati yuꞌvi ra ndēꞌe ra ma ndian judíu ña kàtituꞌun na ña ndisaa ndra chìnuni tuꞌun Cristu ìyo yi ña kaꞌnda ndra ma ñii nuu ika ndra.
\v 13 Ta ma inga ma ndian judíu ndian chìnuni kūtiꞌvi na chiꞌin Petuꞌ ta indukuni chiꞌin ra chūndaa chiyo na chàchi na chiꞌin ndian yüvi judíu. Ta chiꞌin uvi nuu kùu yi ña jàꞌa na yi, ta nda Bernabé kīꞌvi ra ma kuati jàꞌa na ndia.
\v 14 Va ora chāꞌi kuenda ña na töve jàchiꞌin na ña ndaa ña kàꞌan tuꞌun vaꞌa chaꞌaꞌ Cristu, ta teꞌen nākaꞌin chiꞌin ma Petuꞌ ma nuu tùvi ñivi: “Ta yoꞌo ña kùu̱n iin ra judíu, va ìyoun ma ñuñivi iꞌya takua kùu iin ndra yöve kùu judíu. ¿A vaꞌa chàniniun ña jàniniun ma ndian yöve judíu ndian chìnuni tuꞌun Cristu ña jàchiꞌin na ndisaa ma ña takani jàꞌa ma ndian judíu?, kùuniun.” Takan kāꞌin chiꞌin Petuꞌ.
\p
\v 15 Ndyuꞌu kùu ndi ndian judíu nda ma ora kāku ndi, ta na töve jàꞌa ndi kuati ma takua jàꞌa ma ndian yüvi judíu.
\v 16 Vaji takan chìto yo ña nïꞌiin ñivi na töve iin ndian ña ndondaa kùu na jàꞌa ña jàkuu na tiñu ma takua kàꞌan ma tutu Ley ña tāa Moisés, vati iin ndian ña ndondaa kùu na jàꞌa ña chìnuni na ma tuꞌun Jesucristu. Chaꞌaꞌ yakan kùu yi ña juuni maa yo kùu yo ndian ña ndondaa kùu yo jàꞌa ña chìnuni yo ma tuꞌun ra, ta töve chaꞌaꞌ ña jàchinu yo ma tutu Ley, vati nïꞌiin ñivi töve ndòndaa na jàꞌa ña jàchinu na ña kàꞌan ma ley ikan.
\p
\v 17 Ta vitin vaꞌa nànduku yo ña na ndondaa yo chaꞌaꞌ ña ndòꞌiin yo chiꞌin Cristu, ta yakan jànaꞌa yi nuu ma ndian judíu ña maa yo kùu yo ma ndian jàꞌa kuati takua jàꞌa ma ndian yüvi judíu, ¿a kùuni yi kaꞌan yi ña Cristu jàꞌa ra ña kùu yo iin ndian jàꞌa kuati?, kùuni ndo. ¡Ndicha kuii ti töve takan kùu yi!
\v 18 Vati iin kuati kùu ma ña jàꞌi tu kichaꞌa janaꞌa ndikoi inga chaꞌaꞌ ma tuꞌun ña cha ndākoi niku.
\v 19 Vati chaꞌaꞌ ma tutu Ley kùu yi ña vitin kùi takua iin ra cha chīꞌí kuenda ma Ley. Ta tüva chàꞌnda yi tiñu nui. Ta chaꞌaꞌ yakan kùu yi ña vitin iin ra ndito kùi, ikan na kuu koo vaꞌi kuenda ma Rachaꞌnu Ndioo.
\v 20 Ta chiꞌin ma Cristu chūtakai nuu kruu niku. Ta yuꞌu na tüva kùi ma ra ìyo, ti Jesuu kùu ma ra ìyo ma tichi kuñui, ta vitin ña ìyo ndito ma kuñui, ìyo ndito yi, va chaꞌaꞌ ma ña chìnuni̱ ma tuꞌun ña kàꞌan ma Jesuu, ra Seꞌe Ndioo kùu yi. Vati rakan yaꞌa ga kùuni ra ndeꞌe ra yuꞌu, ta chāꞌa ra ma kuñu ra ña na kuvi ra chaꞌi.
\v 21 Na töve tàchiyoi ma ñamani Ndioo ña chàꞌa ra nuu yo, vati tu ndicha ña kùu ndondaa ma ñivi kuenda Ndioo jàꞌa ña jàchinu na ma tuꞌun Ley Ndioo, ta tu takan kùu yi kùuni yi kaꞌan yi ña töve kuenda jin chīꞌí Cristu chaꞌaꞌ yo.
\c 3
\s Vaꞌa ga ña chìnuni yo tuꞌun Cristu kua jàkuu yo ña jàchinu yo tutu Ley Ndioo ña tāa Moisés
\p
\v 1 ¡Yaꞌa ndava xini ndyoꞌo ñivi ña ìyo ñuu Gálata! ¿Yo kùu ma ndian jātakueꞌe ndo, ikan na tüva jachiꞌin ndo ma tuꞌun ndaa? Vati ora jānaꞌa ndi ma tuꞌun Ndioo nuu ndo, kachin vaꞌa jānaꞌa ndi ma tuꞌun ña chīꞌí ma Jesucristu ma nuu kruu.
\v 2 Uvanuu ma ña kùuni̱, kùu ña na kaꞌan ndo ma yuꞌi chaꞌaꞌ ma tuꞌun ña ni ndakatuꞌin nuu ndo iꞌya: ¿A chaꞌaꞌ ña jàkuu ndo ma ña kàꞌan ma Ley ña tāa ma Moisés kùu yi ña nīꞌi ndo ma Tati Ií Ndioo, a chaꞌaꞌ ma ña chìnuni ndo tuꞌun Cristu ña chīni ndo niku kùu yi?, kùuni ndo.
\v 3 ¿Ta naja yaꞌa ga ndava xini ndo?, ti cha nīꞌi ndo ña na koo Tati Ií Ndioo chiꞌin ndo chaꞌaꞌ ña chìnuni ndo tuꞌun Cristu, ta vitin, ¿a kuuni ndo jaꞌa ndo ma ña chànini maa ndo ña jàꞌa chiꞌin ma ñandee maa ndo, ta kuꞌun ndo itiꞌ nuu?, kùuni ndo.
\v 4 ¿Nda kuenda kùu yi ña cha ndēꞌe ndo kuaꞌaꞌ tundoꞌo chiꞌin ma ña jàꞌa kaꞌaꞌ maani ndo yi?, kùuni ndo. Va yuꞌu chìto vaꞌi ña ìyo nda kuenda yi.
\v 5 Vati ma Ndioo chàꞌa ra ma Tati Ií ra nuu ndo ta jàꞌa ra kuaꞌaꞌ vaꞌa ndatu kaꞌnu nuu ndo. ¿Ta naja kùu yi ña jàꞌa ra yi? Ndicha kuii ña jàꞌa ra yi chaꞌaꞌ ña chìnuni ndo ma tuꞌun chaꞌaꞌ Cristu ña kātituꞌun ndi nuu ndo kùu yi, ta töve jàꞌa ra yi chaꞌaꞌ ma ña jàkuu ndo ma ña kàꞌan ma tutu Ley.
\p
\v 6 Ta juuni takan kūu yi chiꞌin Abraham. Vati chìnuni ra tuꞌun Ndioo niku, ta chaꞌaꞌ yakan kùu yi ña Ndioo ndēꞌe ra ra ña iin ra ndōndaa kùu ra.
\v 7 Yakan va ìyo yi ña koto kachin vaꞌa ndo, ti chaꞌaꞌ ma ña chìnuni yo ma tuꞌun Cristu kùu yi ña kùu yo tata Abraham.
\v 8 Takua kūu tajiꞌna ña kàꞌan ma tutu Ndioo chaꞌaꞌ ña itiꞌ nuu ña indukuni ni chinuni ma ndian töve kùu judíu, ta takan ni ndondaa na jàꞌa Ndioo. Vati teꞌen kāꞌan Ndioo chiꞌin Abraham: “Chaꞌaꞌ yoꞌo ni jaꞌii̱ tandiꞌi grupu ñivi ìyo ma ñuñivi”, kāti ra.
\v 9 Yakan va tandiꞌi ma ndian chìnuni, indukuni jàꞌií Ndioo na chiꞌin ma Abraham, vati ma Abraham iin ra chìnuni tuꞌun Ndioo kùu ra.
\p
\v 10 Vati ma ndian chànini ña jakuu na ña kàꞌan ma tutu Ley ña tāa Moisés, iin ndian tuꞌun nduvaꞌa kùu na, vati ma nuu tutu Ley Ndioo teꞌen kàꞌan yi: “Iin ndian tuꞌun nduvaꞌa kùu ma ndian töve jàkuu vaꞌa tandiꞌi ma ña kàꞌan nuu tutu Ley Ndioo.”
\v 11 Yakan va tandiꞌi yo cha chìto kachin vaꞌa yo, ña nïꞌiin yo kùu ndian ndaa ndèꞌe Ndioo jàꞌa ña jàkuu yo ma tutu Ley ra, vati ma nuu ma tutu ra teꞌen kàꞌan yi: “Ma ndian ndaa kùu na ma ndian ni koo na kuenda Ndioo, ndiakan kùu ma ndian chìnuni vaꞌa ma tuꞌun kàꞌan ra.”
\v 12 Va ora jàchiꞌin ma ñivi ña kàꞌan ma tutu ley, töve indukuni takua ma ñivi chìnuni ma tuꞌun Cristu vati teꞌen kàꞌan yi: “Ma ñivi jàkuu ña kàꞌan ma tutu Ley Ndioo, ndiakan ni niꞌi na nuu koo vaꞌa na chiꞌin Ndioo, uvanuu tu jachinu na tandiꞌi ña kàꞌan ma Ley ikan.”
\p
\v 13 Jesucristu kùu ra ma ra jākakú yo ña kūu yo ndian nduvaꞌa jàꞌa ña kàꞌan ma Ley chata yo, vati maa ma Jesucristu sōkó ra ma kuñu ra, ikan na ndakuu ra iin ra nduvaꞌa chaꞌaꞌ yo, vati ma nuu tutu Ndioo teꞌen kàꞌan yi: “Iin ndian yaꞌa nduvaꞌa kùu ma ndian chīꞌí, ndian chūtaka iin nuu yutun.”
\v 14 Teꞌen tāꞌan ma Cristu, ikan na kuu jakakú ra yo, ta takan ma tuꞌun ña kāꞌan Ndioo nuu Abraham niku ña jāꞌií ra ra. Ta yakan kùu chaa yi nuu ma ndian yüvi judíu chaꞌaꞌ ña jāꞌa Jesucristu takan, ta juuni ikan takan chaꞌaꞌ ña chìnuni yo kuu niꞌi tandiꞌi yo ma Tati Ií Ndioo takua chāꞌa Ndioo tuꞌun nuu yo ña ni jaꞌa ra chiꞌin yo.
\s Ma tuꞌun ña kàꞌan ma tutu Ley ña tāa Moisés töve jànaa yi ma tuꞌun ña chāꞌa Ndioo nuu Abraham
\p
\v 15 Ndyoꞌo yani, ni kaꞌin chiꞌin ndo ma takua takani jàꞌa ma ñivi: ti tu iin raꞌii jàvaꞌa ra iin tutu chaꞌaꞌ iin tuꞌun ña jāndoꞌiin ra ra chiꞌin ñivi ta tìꞌi ra ndaꞌaꞌ ra yi ña kìndoo yi endeeni. Ta tu takan kùu yi, nïꞌiin ñivi na küu kati na ña na töve vaꞌa yi, ta na küu ga taa na ña kàti na ña sama na yi ndia.
\v 16 Ta teꞌen kùu yi chiꞌin ma ña chāꞌa Ndioo tuꞌun iꞌya nuu Abraham ta nuu ma ra ni kuu tata ra itiꞌ nuu. Ma nuu ma tutu Ndioo töve kàꞌan yi ma teꞌen: Kuenda ma ndian ni kuu tataun. Ti tu kàꞌan yi takan kutunini yo yi ña kuaꞌaꞌ na ni kuu yi. Vati teꞌen kàꞌan ma tuꞌun Ndioo: kuenda iini ra ni kuu tataun, takan kùu yi. Ta maꞌiini ra ikan, ta rakan kùu ra Cristu.
\v 17 Ta ma ña kàꞌin kùu ñaꞌa: Ndioo jāndoꞌiin tuꞌun ra chiꞌin Abraham, ta Ndioo chāꞌa ra tuꞌun nuu ra ña ni jachinu ra ña kàꞌan yi. Yakan va ma tutu Ley ña tāa Moisés kēta yi iin kumi cientu oko uchi kuiya itiꞌ nuu, na küu janaa yi ma tuꞌun nunuu ña jāndoꞌiin ma Ndioo chiꞌin ma Abraham niku.
\v 18 Vati tu ma tundeeni ña ìyo nuu Ndioo, ni kuꞌva ra yi nuu yo, kùu yi ña chaꞌaꞌ ña jàkuu yo ma ña kàꞌan ma tutu Ley ña tāa Moisés; ta tu takan kùu yi, kùuni yi kaꞌan yi ña töve chaꞌaꞌ ma tuꞌun ña chāꞌa Ndioo nuu Abraham kùu yi. Va ma ña ndicha kùu yi ña Ndioo chāꞌa ma ñamani ra nuu Abraham ora chāꞌa ra tuꞌun ra nuu ra ña ni kuꞌva saani ra ma tundeeni ña ìyo nuu ra.
\p
\v 19 Tu takan kùu yi, ¿nda chaꞌaꞌ tiñu kùu yi ña chāꞌa Ndioo ma ley tuva takan? Chāꞌa ra yi itiꞌ nuu kuenda ña na janaꞌa yi nuu yo ña ndian jàꞌa kuati kùu yo, ta juuni takan jàꞌa yi nda kati chaa ma ora ña kīchaa ma ra kùu tata Abraham, takua chāꞌa Ndioo tuꞌun nuu Abraham ña ni kuu itiꞌ nuu. Ma tuꞌun ña kàꞌan ma nuu ma tutu Ley Ndioo ikan, chiꞌin yuꞌu tati jàꞌa tiñu nuu ra, kāꞌan ra yi nuu Moisés, ra kàꞌan tiñu chaꞌaꞌ ma ñivi.
\v 20 Vati ora chaꞌaꞌ ma Ndioo tuꞌun nuu Abraham töve chìniñuꞌu ra inga yo kàꞌan yi, ti maꞌiini ra kùu ra ña kàꞌan yi, ti Ndioo iini ra kùu ra.
\s Kua kùu ma tutu Ley
\p
\v 21 Ta ma tutu ley ikan, ¿a chànini ndo ña kàꞌan yi chata ma tuꞌun ña chāꞌa Ndioo nuu Abraham?, kùuni ndo. ¡Va na tükuii takan kùu yi! Vati tu chāꞌa Ndioo iin ley ña jàꞌa yi ña na kùu koo ndito yo, kùuni yi kaꞌan yi ña chaꞌaꞌ ma ley ikan kùu ndondaa yo, tuva takan.
\v 22 Vati ma tutu Ndioo jànaꞌa yi ña ma kuati chàꞌnda yi tiñu nuu yo ta kùu yo takua kùu ñivi indii tichi vekaa jàꞌa yi. Ta takan kūu yi, ikan na niꞌi ma ndian chìnuni tuꞌun Cristu ma takua Ndioo chāꞌa ra tuꞌun nuu Abraham niku ña ni kuꞌva ra nuu ma ndian chìnuni.
\p
\v 23 Ta antea ña kīchaa ma tuꞌun chaa ña chìnuni yo, ta ma tutu ley chāsi kutu yi yo. Ta takan kīndoo yo takua iin ndian ndikun nda kati kēta ora ña Ndioo jānaꞌa ra ma itiꞌ nuu kīchaꞌa yo chìnuni yo tuꞌun Cristu.
\v 24 Yakan va ma tutu ley ikan kūu yi takua iin matru yo kuenda kùmi yi yo ta kundaka yi yo nuu Cristu, ikan na kuu ndondaa yo jàꞌa ña chinuni yo tuꞌun ra.
\v 25 Ta vitin ña cha kīchaa ma tuꞌun chaa ña chìnuni yo chaꞌaꞌ ra, ta ma matru ikan tüva chìniñuꞌu yo yi.
\p
\v 26 Yakan va ndisaa ndo kùu ndo seꞌe Ndioo chaꞌaꞌ ma ña chìnuni ndo tuꞌun Jesucristu.
\v 27 Ti nda ndian ni kuuni ña cha kūnduta na chiꞌin sivi Cristu, juuni ndiakan cha chākuꞌun na Cristu chaꞌaꞌ ña chìnuni na tuꞌun ra.
\v 28 Ta na tüva iin ña kaꞌnu kùu yi kuenda yo vitin ña kùu yo iin ndian judíu a ndian griegu, a ndian kùyaꞌvi a ndian chàkuu nuna, a raꞌii a ñaꞌa ndia. Vati ndisaa yo kùu yo iin ñivini chiꞌin Cristu.
\v 29 Ta tu ndian chìnuni tuꞌun Jesucristu kùu yo, juuni kùu yo tata Abraham, ta ni niꞌi yo ma tundeeni ña ìyo chiꞌin Ndioo ña chāꞌa ra tuꞌun nuu ra ña ni kuꞌva ra nuu ra itiꞌ nuu.
\b
\c 4
\p
\v 1 Yakan va ma ña kùuni̱ kaꞌin kùu ma tuꞌun iꞌya: Nda ravali ni kuuni ña ni niꞌi ra ma tundeeni jàꞌa tatá ra ta indukuni kùu ra takua kùu iin musu jàtiñu saani. Ndicha kuii ti ma ravali ikan xuñaꞌa ra tandiꞌi ma ndatiñu tatá ra, va na küu kuàtiñu ra yi jàꞌa ña takäꞌan kuaꞌnu vaꞌa ra.
\v 2 Vati ma tatá ra tàchi ra inga ñivi, ndra kùu musu veꞌe ra ña na kumi ndra ma ravali ikan, ta na kuàtiñu ndra ma ndatiñu ra, nda kati chaa ma tiempu ña kati ma tatá ra ña vaꞌa chaꞌnu ra kuenda ña kuàtiñu ra ma ndatiñu maa ra.
\v 3 Ta indukuni takan taꞌan chiꞌin yo ndia, ti ma ora kūu yo ndiakuati kùu yo takua kùu iin ndian musu ña chàꞌnda na tiñu nuu yo antea ña nākoto yo ma Cristu. Ta ma tuꞌun ña chāꞌnda yi tiñu nuu yo kùu yi ña jànaꞌa yi naja kua kīchaꞌa ñuñivi iꞌya niku.
\v 4 Va ora ña chāa ma tiempu vaꞌa, Ndioo tāchi ra ma ra seꞌe ra ma ñuñivi iꞌya, ta rakan ti tichi iin ñaꞌa chākuꞌun ra ta kāku ra, ta jāchiꞌin ra ma tuꞌun Ley Ndioo ña tāa Moisés,
\v 5 ikan na kuu jakakú ra ndisaa ñivi ña chàꞌnda ma ley tiñu nuu, ta takan kùseꞌe ndaꞌvi ra yo ta kùu niꞌi yo ndisaa kuii ña vaꞌa ña niꞌi ndian kùu seꞌe ra.
\v 6 Ta tava kùuni Ndioo ña janaꞌa ra ña ndyoꞌo cha kùu ndo ma ndian seꞌe ra, yakan va tāchi ra ma Tati Ií ma Ra seꞌe ra ma tichi ma anima yo. Ta ma Tati Ií ikan teꞌen kàꞌan yi: “¡Yoꞌo Tatá!”
\v 7 Yakan va yoꞌo tüva kùu̱n iin musu va kùu̱n iin ra seꞌe Ndioo. Ta chaꞌaꞌ ña kùu̱n iin ra seꞌe ra, kùu yi ña Ndioo cha chàꞌa ra nuu̱n ma tundeeni ña ìyo nuu ra.
\s Paulu kùuni ra ndeꞌe ra ma ndian chìnuni tuꞌun Jesuu ìyo ñuu Galacia
\p
\v 8 Ma tatiempu niku ma ora takäꞌan nakoto ndo ma Ndioo, kùu ndo musu ma ndian jàꞌani na ña kùu na Ndioo niku, va ma ndiakan na töve Ndioo ndicha kùu na.
\v 9 Va vitin cha nàkoto ndo ma Ndioo, vaꞌaga ña kàꞌin ña rakan nàkoto ra ndo. Tu takan kùu yi, ¿a vaꞌaga ña chìnuni ndiko ndo ma tuꞌun ña jànaꞌa naja kua kūu nuu kīchaꞌa ñuñivi iꞌya niku?, kùuni ndo. Ndicha ña ma tuꞌun ikan chàsi yi ndo ta töve tìndee yi ndo. Ta tu jaꞌa ndo takan ni kuu ndiko ndo ma takua kùu ndian musu jàꞌa ma tuꞌun ikan.
\v 10 Ndyoꞌo, ¿a juuni jàkaꞌnu ga ndo kivi takua, ma nani yoo, ta kivi viko, ta kuiya ndia?
\v 11 Yaꞌa ga nàkanani̱ ti ma tiñu ña jākui chiꞌin ndo koto töve nava kùu yi ti töve nī tiꞌi vaꞌa ndo yi tichi anima ndo.
\v 12 Ndyoꞌo yani jànini̱ ndo ña na ndakuu ndo ma takua kùi, vati yuꞌu cha ndākui ma takua kùu ndo.
\p Nïꞌiin ma kuati töve nī jaꞌa ndo chiꞌi̱n.
\v 13 Vati ndyoꞌo takua cha chìto vaꞌa ndo ña chaꞌaꞌ ma ña kūꞌvi̱ kùu yi ña kātituꞌin ma tuꞌun vaꞌa chaꞌaꞌ Cristu nuu ndo ma tajiꞌna.
\v 14 Ta vaji ma kueꞌe ndoꞌi niku kùu yi iin kuꞌva kuenda ndo ña ndēꞌe ndo yi niku, va töve nī kaꞌan ndo ña töve ndakuendai ta töve nī kanuu ndo ndeꞌe ndo yuꞌu ndia. Ta takua iin tati vaꞌa jàꞌa tiñu nuu Ndioo a takua maa ma Jesucristu, kīꞌin kuenda ndo yuꞌu veꞌe ndo.
\v 15 Ta tu takan kūu yi niku, ta vitin, ¿ndanu kuàꞌan ma ña chìsii ndo? Kùuni kaꞌin iin ma ña vaꞌa kuenda ndo ti ma ora ikan ma ora chāꞌin ma nuu ìyo ndo, nda ma tinuu ndo ni tava ndo yi ta ni kuꞌva ndo yi nui niku ña yaꞌa kùuni ndo ndeꞌe ndo yuꞌu.
\v 16 Ta vitin, ¿a iin ra kini kùi?, kùuni ndo, chaꞌaꞌ ña kàtituꞌin ma tuꞌun ndaa nuu ndo.
\p
\v 17 Ta ma ñivi ikan yaꞌa ga kùuni na ña na tiñuꞌu ndo na, va väꞌaꞌ yi kuenda ndo. Vati ma ña tava siin na ndo chiꞌin ndi kùu ma ña kùuni na jaꞌa na, ikan na uvaa maa na kùu tiñuꞌu ndo.
\v 18 Ta ndicha iin ña vaꞌa ña tiñuꞌu yo ma tiñu vaꞌa ña jàꞌa ma ñivi ndisaa kivi. Ta vaji ìyoi chiꞌin ndo a töve, ìyo yi ña tiñuꞌu ndo na.
\v 19 Ndyoꞌo ndian kùu takua kùu seꞌi. Chaꞌaꞌ ndyoꞌo ndeꞌe tukui tundoꞌo takua iin ñaꞌa ora chàꞌnda yi tichi vi ña ni kaku seꞌe vi. Ta endeeni ni ndeꞌi tundoꞌo chaꞌaꞌ ndo nda kati ña ndicha kuii kùu ndo takua kùu ma Cristu.
\v 20 Ta vitin yaꞌa kùuni koi chiꞌin ndo ta sama naja kàꞌin chiꞌin ndo, ti töva chitoi niyi kuu jàꞌi chiꞌin ndo.
\s Ma ña jànaꞌa yi nuu yo ma ña kàꞌan chaꞌaꞌ Agar chiꞌin ma ña kàꞌan chaꞌaꞌ Sara
\p
\v 21 Tandiꞌi ndyoꞌo ndian kùuni ña kaꞌnda ma ley tiñu nuu ndo, kùuni̱ ña na kaꞌan ndo ma tuꞌun ña ni ndakatuꞌin nuu ndo iꞌya: ¿a takäꞌan kutunini vaꞌa ndo ma ña kàꞌan juuni ma ley ikan?
\v 22 Vati ma nuu tutu ley kàꞌan yi ti ma Abraham chākoo uvi taꞌan ma ndrakuati seꞌe ra: iin ra chākoo chiꞌin ma ña kùyaꞌvi ta inga ra chākoo chiꞌin ma ñasiꞌi ra, iin ña chàkuu nuna.
\v 23 Ta ma ravali nunuu chākoo ra chiꞌin ma ña kùyaꞌvi, ta indukuni kāku ra ma tava kàku nda ndiakuati ni kùuni. Va siin kūu yi chiꞌin ra uvi, ti kāku ra kuenda ña jāchinu ra ma tuꞌun ña chāꞌa Ndioo nuu Abraham. Ta ravali ikan kāku ra chiꞌin ma ña chākuu nuna.
\v 24 Ma tuꞌun iꞌya kùu yi iin kuꞌva ña jànaꞌa yi nuu yo uvi nuu tuꞌun ña jāndoꞌiin Ndioo chiꞌin ma ñivi chaꞌaꞌ ma ninduvi ñaꞌa ikan. Iin tuꞌun ña jāndoꞌiin ra tuꞌun kùu ma tuꞌun ña kāꞌan ra nuu ma yuku nàni Sinaí. Ta ma ndian kuàꞌan chata ma tuꞌun ikan kùu na takua kùu ma seꞌe ma ñaꞌa kùyaꞌvi takua kūu ma ña nàni Agar.
\v 25 Vati Agar kùan takua kùu ma yuku Sinaí ña kàndii nuu ñuꞌuꞌ nàni Arabia. Ta juuni iin xinaꞌñu ma ñivi ìyo ñuu Jerusalén vitin kùan chaꞌaꞌ ña indukuni kùu na iin ndian cha kùyaꞌvi, takua kūu yakan.
\v 26 Va juuni ma kuꞌva kàꞌan yi ti ma ñuu Jerusalén ña ìyo itiꞌ andivi kùu yi ma ñuu nuu kàndii ndisaa yo, ti ñivi chàkuu nuna kùu yo.
\v 27 Vati ma nuu tutu Ndioo teꞌen kàꞌan yi:
\q Na sii kuuniun yoꞌo ñaꞌa na küu koo seꞌe,
\q ta yoꞌo ña na töve nïꞌiin seꞌun;
\q na niꞌi vaꞌa kaꞌun ña yaꞌa ga chìsiun
\q ti yoꞌo na töve nakotoun ma naja kua ndeꞌe ma ñaꞌa ni kàku seꞌe ma tundoꞌo ma ora chàꞌnda yi tichi ña.
\q Vati ìyo kuaꞌaꞌ ga seꞌe ma ñaꞌa kīndoo ndaꞌvi kua ma ñaꞌa takani cha ìyo ii.
\m Takan kùuni yi kaꞌan yi.
\p
\v 28 Yakan va ndyoꞌo yani̱ kùu yo ñivi Ndioo chaꞌaꞌ ma ña chāꞌa ra tuꞌun nuu Abraham, indukuni takua kùu Isaac niku.
\v 29 Va ma tava kùu yi ma tatiempu ikan, ta ma ravali ña kāku ma indukuni ma tava takani kàku ma ndiakuati, tüvi kùuni ra ndeꞌe ra ma ravali ña kāku jāꞌa ma ndatu Tati Ií Ndioo; ta takan kùu yi ma tiempu vitin ndia.
\v 30 Va, ¿naja kua kàꞌan yi nuu ma tutu Ndioo? Teꞌen kàꞌan yi: “Na jandiku̱n ma ña kùu musu̱n chiꞌin ma ravali seꞌan ma veꞌun, vati ma ravali seꞌe ma ña kùu musu̱n na küu nataꞌvi ra ma tundeeni ña ni niꞌi ma ra kùu seꞌe ma ña chàkuu nuna ña yüvi musu̱n kùu.”
\v 31 Yakan va ndyoꞌo yani yüvi seꞌe ma ña kuyaꞌvi kùu yo, va seꞌe ma ña chàkuu nuna kùu yo.
\c 5
\s Endee nànduku yo kua koo nuna yo chaꞌaꞌ Jesucristu
\p
\v 1 Ta vitin cha chàkuu yo itiꞌ nuna chaꞌaꞌ ña Jesucristu cha jākakú ra yo. Yakan va na chinuni vaꞌa ndo itiꞌ nuna ikan, ta na chïnuni ga ndo ta kuu tuku ndo musu ma ña chàꞌnda tiñu nuu ndo niku.
\p
\v 2 Na tasoꞌo vaꞌa ndo ma ña ni kaꞌin iꞌya. Yuꞌu Paulu, kàti̱ nuu ndo tu ndyoꞌo chinuni ndo ta jachiꞌin ndo ma takua kàꞌan ma ley chaꞌnu ta kaꞌnda ndo ma ñii nuu ika ndo, kùuni yi kaꞌan yi ña töve nda kuenda ma Cristu kuenda ndo, tuva takan jàꞌa ndo.
\v 3 Kùuni kaꞌan ndikoi ma tuꞌun iꞌya kuenda ma nda raꞌii nikuuni, ña kuꞌva ra ña na taꞌnda ma ñii nuu ika ra kuenda ndondaa ra chiꞌin Ndioo, ti ndisaa kuii ma tutu Ley ña tāa Moisés ìyo yi ña jàkuu ra yi, tuva takan jàꞌa ra.
\v 4 Ta ma itiꞌ Cristu cha tāva siin ndo ndo ndisaa ndyoꞌo ña kùuni ndo jandondaa ndo nuu Ndioo jàꞌa ña jàchinu ndo ma ley. Ndicha kuii ña cha jāña ndo ma ñamani Ndioo tu jàꞌa ndo takan.
\v 5 Vati ndyuꞌu ti ma chaꞌaꞌ ma Tati Ií Ndioo kùu yi ña endeeni ndàtu yo ña ni niꞌi yo nuu ndondaa yo jàꞌa ña chìnuni yo tuꞌun Cristu,
\v 6 ti tu yo chìnuni yo ma tuꞌun ra, töve nda kuenda tuva taꞌnda ma ñii nuu ika yo a töve tàꞌnda yi. Va ma ña ìyo kuenda kùu ña na chinuni vaꞌa yo. Ta ma ña chìnuni yo iꞌya na jaꞌa yi ña na koo vaꞌa yo ta na kuuni yo ndeꞌo ma taꞌan yo ndia.
\p
\v 7 Ndyoꞌo cha vaꞌani ña chìnuni ndo itiꞌ Cristu niku. ¿Yo kùu ma ña jākanuu xini ndo ña jāña ndo ña chìnuni ndo ma ña ndaa?
\v 8 Ma Ndioo, ra kāchin ra ndo töve nī janaꞌa ra ña jàꞌa ndo takan.
\v 9 Ta koto näani ndo “ña itaꞌvi ni ma yuchan iya jàꞌa yi ña na jandaa ndisaa kuii ma yuchan ña kùvaꞌa paan.”
\v 10 Ìyo tundeeni ma Rachaꞌnu chiꞌi̱n ña ndyoꞌo na töve ni nakanini ndo siin siin ma takua chìnuni̱, va juuni chìtoi ña ndicha ña Ndioo ni jandeꞌe ra tundoꞌo ma nda ra nikuuni ña jàkanuu xini ndo.
\p
\v 11 Yakan va kuenda yuꞌu, ndyoꞌo yani tu yuꞌu juuni chìnuni̱ katituꞌin ta jakukuꞌuni̱ ma ñivi ma ña kaꞌnda na ma ñii nuu ika na, ma ndian judíu töve ni nanduku na yuꞌu kuenda jandeꞌe na tundoꞌo nui, tuva takan jàꞌi. Ti juuni tu takan jàꞌi niku, tüva xaan na ndeꞌe na tuꞌun chaꞌaꞌ ña chīꞌí Cristu nuu kruu tu takan jàꞌi, ti töve sàma ma ña chìnuni na.
\v 12 Vati kàꞌin chata ma ndian chàkunuu jàkanuu xini ndo ta jakayuni na ndo chaꞌaꞌ ña kàꞌan na chiꞌin ndo ña na kaꞌnda ndo ma ñii nuu ika ndo. ¡Vaꞌa ga na kukapu juuni maa na chaꞌaꞌ ña endee jànaꞌa na nuu ndo takan!
\p
\v 13 Vati ndyoꞌo yani, Ndioo kàna ra ndo ña na kuu ndo ñivi nuna, va kàtituꞌin nuu ndo ña na töve kuàtiñu ndo ma ña nuna ña ìyo ndo kuenda ña na jaꞌa ndo kuati takua chàtaꞌani ma kuñu ndo jaꞌa yi, va na kuàtiñu ndo yi kuenda kùu ndo musu inga ñivi ta na tindee ndo chiꞌin taꞌan ndo jàꞌa ña yaꞌa kùuni ndo ndeꞌe ndo na.
\v 14 Vati tandiꞌi ma ña kàꞌan ma tutu ley Ndioo kùu kaꞌan yo yi chiꞌin ma tuꞌun iꞌya: “Na kuuniun ndeꞌun ma inga ñivi ma takua kùuniun ndeꞌun juuni maun.”
\v 15 Va tu endeeni chàchi taꞌan ndo chata taꞌan ndo, ta tu jàꞌa ndo takan ndicha kuii ña ndisaa ndo ni ndiꞌi ndo chaꞌaꞌ ma kuati jàꞌa ndo chiꞌin taꞌan ndo.
\s Ma kua chàtaꞌani maa yo jaꞌa yo chiꞌin kuñu yo ta ma ña kua chàtaꞌani yo jaꞌa yo chaꞌaꞌ ña ìyo ma Tati Ií Ndioo chiꞌin yo
\p
\v 16 Yakan va ma ña kùuni kaꞌin chiꞌin ndo kùu ñaꞌa: Ma itiꞌ ña kùuni ma Tati Ií Ndioo ña na kuꞌun ndo, ta takan ìyo yi ña kuꞌun ndo, ta ora jaꞌa ndo takan, ta ma ña kini ña chàtaꞌani ndo jaꞌa ndo chiꞌin kuñu ndo, na töva ni jaꞌa ndo yi.
\v 17 Ti ma ña kini ña kùuni maa yo jàꞌa yo chiꞌin kuñu yo na töve chàtaꞌani ma Tati Ií Ndioo yi; ta ma ña kùuni ma Tati Ií Ndioo jaꞌa yi, na töve chàtaꞌani ma kuñu yo yi. Vati ninduvi yi kànitaꞌan taꞌan yi. Ta chaꞌaꞌ yakan, va ndyoꞌo na töve jàꞌa ndo ma ña vaꞌa ña kùuni ndo jaꞌa ndo.
\v 18 Vati tu maa ma Tati Ií Ndioo kùu ma ña chàꞌnda tiñu nuu yo, ñaꞌa kùuni yi kaꞌan yi ña na tüva ìyo yi ña kaꞌnda ma ley tiñu nuu yo.
\p
\v 19 Na töve ndetiñu kùu ndeꞌo ma ña kini jàꞌa ma ndian chàtaꞌani na jaꞌa na chiꞌin kuñu na. Ta tandiꞌi ma ña teꞌen kùu ma ña jàꞌa na: kìꞌvi ndra chiꞌin ñaꞌa yüvi ñasiꞌi ndra, jàꞌa na ma ña kini chiꞌin kuñu na, ta ma maa ña kini kùu ma ña chànini na.
\v 20 Ndiakan juuni jàkaꞌnu na ma yutun ií, ta yaꞌa ga chàtaꞌani na jatakueꞌe na ma ñivi chiꞌin tuꞌun nduvi. Yaꞌa ga xaani na ma ñivi ta yaꞌa ga kànitaꞌan yuꞌu na, ta yaꞌa ga kuiñu na ndia. Yaꞌa ga numini kayuni na, ta jàkesiin na ma ñivi ta jàꞌa na ma iin grupu vali.
\v 21 Ta yaꞌa ga tixin na, ta yaꞌa ga chìꞌi na ndixi ta yaꞌa ga chàkunuu na nànduku na ña kini jàꞌa na, ta jàꞌa na inga tuku tuꞌun ña cha yatin ni indukuni kàa yi ndia. Jàkukuꞌuni ndo chaꞌaꞌ ma tandiꞌi ma tuꞌun ma tava kāꞌin niku, ta tandiꞌi ma ndian jàꞌa ma tuꞌun ña töve vaꞌa ikan, na küu kiꞌvi na koo na ma nuu chàꞌnda Ndioo tiñu.
\p
\v 22 Va ma chàꞌa ma Tati Ií Ndioo ña ìyo tichi anima yo kùu yi ña na kuu yo ñivi ña kùuni yo ndeꞌe yo ma taꞌan yo, ta na sii kùuni yo, na koo taxiin yo ta na kuu yo ndian kundeeni yo ña jàꞌa inga ñivi ta na vii jaꞌa yo chiꞌin inga ñivi ta na kuu yo iin ndian vaꞌa. Ta na kuu yo iin ndian yaꞌa ga chìnuni ndia.
\v 23 Ta juuni na kuu yo ndian iñuꞌu ta töve yaꞌa nduu ña ìyo yi ña jaꞌa yo. Töve nïꞌiin ley ña kàꞌan ña na väꞌa jàꞌa yo ma tuꞌun ña já kāꞌin nda cheꞌe.
\v 24 Ta ma ndian cha ndōꞌiin chiꞌin Jesucristu cha ndākoo na ma ña kini takani ìyo na niku, ikan na takaa yi na nuu ma kruu chiꞌin ndisaa ma ña kini chànini na a chàtaꞌani na jaꞌa na.
\v 25 Ta chaꞌaꞌ ma Tati Ií Ndioo kùu yi ña ìyo vaꞌa yo vitin, yakan va juuni ìyo yi ña na kuꞌva yo yo nuu yi ña na jànaꞌa yi yo itiꞌ kuàꞌan yo chiꞌin ma ña jàꞌa yo.
\v 26 Na töve ìyo yi ña yaꞌa ga tayi kùuni yo, ta na kïchaꞌa yo kanitaꞌan yuꞌu yo chiꞌin ma inga ñivi, ta juuni na töve ìyo yi ña kutixin yo ndeꞌe yo juuni ma taꞌan yo ndia.
\c 6
\s Na tindee yo ma taꞌan yo chiꞌin inga na ndia
\p
\v 1 Ndyoꞌo yani, tu chàꞌa ndo kuenda ña iin ra kìchaꞌa ra jàꞌa ra kuati, ndyoꞌo tava kùu ndo iin ndian chìnuni tiaga, ìyo yi ña tindee ndo ra, ikan na jaña ra ña jaꞌa ra ma kuati. Va chiꞌin tandiꞌi ma ña vaꞌa kùuni anima ndo tindee ndo ra, ta taꞌiiꞌiin ndo ìyo yi ña jaꞌa vaꞌa ndo ma kuenda ma ña jàꞌa ndo, koto nda maa ndo kichaꞌa ndo jaꞌa ndo kuati ndia.
\v 2 Na tindee ndo ma taꞌan ndo chiꞌin inga na, ta na kutaꞌan ndo chiꞌin na ora ìyo kuati chiꞌin na. Ta takan kùu jachinu ndo ma tava kàꞌan tuꞌun ley ña kàꞌan Jesucristu.
\v 3 Vati tu ìyo nda ndyoꞌo chìnuni ndo ña iin ndian kaꞌnu kùu ndo ta yüvi takan kùu yi, ndiakan jandaꞌviñaꞌa juuni maa.
\v 4 Yakan va taꞌiiꞌiin ndo ìyo yi ña kiꞌin ndo ma kuꞌva ma tiñu jàꞌa ndo tuva vaꞌa ma ña jaꞌa ndo, tajan takan kùu kati ndo ña yaꞌa ga kaꞌnu kùu ma tiñu jàꞌa ndo, ta töve kiꞌin ndo kuꞌva ma tiñu jàꞌa ndo chiꞌin ma tiñu jàꞌa inga na ndeꞌo tu kaꞌnu ga kùu yi a töve.
\v 5 Va taꞌiiꞌiin yo jakuu yo ma tiñu jàꞌa taꞌiiꞌiin yo.
\p
\v 6 Ta nda ndian ni kùuni ña kùtuꞌva na ma tuꞌun Ndioo ña jànaꞌa inga ra, ìyo yi ña nataꞌvi na ndatiñu vaꞌa ìyo nuu na chiꞌin ra.
\p
\v 7 Ña jändaꞌviñaꞌa ndo juuni maa ndo, ti chata Ndioo nïꞌiin ndo na küu kaꞌan tiꞌini ndo. Vati ndatiñu ña tàchi ndo, juuni yakan ni niꞌi ndo itiꞌ nuu.
\v 8 Taku ma ñivi ña endee jàꞌa ma ña kini chàtaꞌani ma kuñu na jàꞌa yi, ta ma ña ni niꞌi na chaꞌaꞌ ña jàꞌa na kùu ña ni kuvi na. Va tu endee jàꞌa na ma ña chàtaꞌani ma Tati Ií Ndioo, juuni ni niꞌi na nuu koo na endeeni chiꞌin ra.
\v 9 Yakan va ña na kütatu yo jàꞌa yo ma ña vaꞌa, vati ni niꞌo ma ndatiñu vaꞌa nuu Ndioo ma ora kuꞌva ra yi tu töve yaꞌa maxii kùuni ndo.
\v 10 Yakan va nani kivi ña juuni tu kuu jaꞌa yo ña vaꞌa, na jaꞌa yo yi chiꞌin tandiꞌi ma ñivi, ta na jaꞌa ga yo yi tiaga chiꞌin ma ndian kùu taꞌan yo, va ndian chìnuni na ma tuꞌun Cristu indukuni kua maa yo.
\s Chaꞌaꞌ nuu ndiꞌinia chùndayuꞌu Paulu ta kàñaꞌa ra chiꞌin tandiꞌi ñivi ìyo ñuꞌuꞌ Galacia
\p
\v 11 Na ndeꞌe ndo ti chiꞌin ma letra naꞌnu tài chiꞌin ndaꞌaꞌ mai nuu ma tutu iꞌya kuenda ndo.
\v 12 Ma ndian kùuni na kindoo vaꞌa na chiꞌin ma ñivi, juuni ndiakan jànini na ndo ña na kaꞌnda ndo ma ñii nuu ika ndo, ta takan jaꞌa na ti töve ìyo tuꞌva na ndeꞌe na tundoꞌo chaꞌaꞌ ña kàtituꞌun na ma tuꞌun chaꞌaꞌ Cristu, ta chaꞌaꞌ ña chīꞌí ra nuu kruu kuenda yo.
\v 13 Vati ni ma ndian chìnuni ña chàꞌnda na ma ñii nuu ika na, na töve jàchiꞌin na tandiꞌi ma tuꞌun ña kàꞌan nuu ma tutu ley ña tāa Moisés. Va ndyoꞌo kùuni na ña na kaꞌnda ndo ma ñii nuu ika ndo, ta ikan chaꞌaꞌ ña taꞌnda ma ñii nuu ika ndo kuu yaꞌa tayi kùuni na.
\v 14 Vati yuꞌu na töve kùuni̱ kutayi̱ chaꞌaꞌ nïꞌiin yakan, va tayi vaꞌa kùuni̱ chaꞌaꞌ ña uvanuu ma Rachaꞌnu Jesucristu kùu jakakú ra yo chaꞌaꞌ ña chīꞌí ra ma nuu kruu. Ta chaꞌaꞌ yakan yuꞌu kùi takua kùu iin ra cha chīꞌí nuu kruu ña kùuni yi kaꞌan yi ña tüvi ìyoi chaꞌaꞌ ma ña kuuni ma ñivi ìyo ma ñuñivi, ta juuni chaꞌaꞌ yuꞌu cha chīꞌí ma ñivi ìyo ñuñivi ña tüva kiꞌin na kuenda yuꞌu.
\v 15 Vati chaꞌaꞌ ña cha ndōꞌiin yo chiꞌin Jesucristu, ta na töve nda kuenda tuva taꞌnda ma ñii nuu ika yo a töve taꞌnda yi, va ma ña ìyo kuenda kùu yi ña ndākuu yo ndian chaa jàꞌa Ndioo.
\v 16 Ta tandiꞌi ndyoꞌo ndian chìnuni ma ña kàꞌan ma tuꞌun já tāi, na niꞌi ndo ña na koo vii ndo. Ta Ndioo na kundaꞌvini ra ndo ta takani na jaꞌa ra chiꞌin tandiꞌi ndian chìnuni ndicha kuii tuꞌun ra, ti ndiakan ndicha kuii kùu ñivi ra.
\p
\v 17 Vitin ta itiꞌ nuu na tüva kuuni̱ ña nïꞌiin ñivi na jändeꞌe ga na tundoꞌo yuꞌu, vati ìyo tìꞌin kuꞌva kuñui ña jànaꞌa yi ña kùi iin ra jàꞌa tiñu kuenda ma Jesucristu.
\p
\v 18 Ndyoꞌo yani na niꞌi tandiꞌi ndo ma ñamani Rachaꞌnu Jesucristu tichi anima ndo. Ta takan na kuu yi. Amén.