\id EPH
\h Tutu Efesu
\toc1 Tutu Efesu
\mt Tutu tāa rachaꞌnu Paulu nuu ndian chìnuni ñuu Efesu
\c 1
\s Tàchi Paulu iin tutu nuu ñivi Efesu
\p
\v 1 Yuꞌu Paulu, ra kùu tatun Jesucristu takua kùuni Ndioo ña na kui, tài ma tutu iꞌya kuenda ma ñivi ìyo ñuu Efesu, ndian kùu ñivi Ndioo, ndian chìnuni ma tuꞌun ma Jesucristu.
\v 2 Ma Ndioo, ra kùu Tatá yo chiꞌin ma Rachaꞌnu Jesucristu, na kuꞌva ra ma ñamani ra chata ndo, ta na jaꞌa ra ña na koo taxiin anima ndo ndia.
\s Ma Cristu kùu ra jāꞌií ra yo
\p
\v 3 Na jakaꞌnu yo ma Rachaꞌnu Ndioo ra kùu Tatá ma Rachaꞌnu Jesucristu, vati chāꞌa ña ndōꞌiin yo chiꞌin Jesucristu ta jāꞌií ra ma anima yo chiꞌin ndisaa ma ñamani ra ña ìyo ma andivi chaꞌaꞌ ña kùu yo kuenda Cristu.
\v 4 Ndioo kùu ma ra kāchin yo ma ora takäꞌan tuvi ma ñuñivi niku, kuenda ña na kuu yo ñivi ra chaꞌaꞌ ña ni ndoꞌiin yo chiꞌin Jesucristu, ikan na kuu yo ndian ií ta na küu jaꞌa niꞌi ndian tisokuati na yo nuu ra. Ta chaꞌaꞌ ña yaꞌa kùuni ra ndeꞌe ra yo kuu yi ña
\v 5 kūuni ra ña ni ndakiꞌin ndaꞌvi ra yo kuenda ña kùu seꞌe ra yo ma antea ña jātuvi ra ma ñuñivi, vati chaꞌaꞌ ma Jesuu kùu yi ña ndākiꞌin ra yo. Ti takan kùuni maa ra, ta takan chàtaꞌani ra jaꞌa ra ndia.
\v 6 Yakan va chaꞌaꞌ yakan kùu yi ña ìyo yi ña nani ora jakaꞌnu yo ma Ndioo chaꞌaꞌ ma ñamani ra ña yaꞌaga vaꞌa ña kùu yi, vati chiꞌin yi jàꞌií ra yo chaꞌaꞌ ma ña nduvaꞌa kuii kùuni ra ndeꞌe ra ma seꞌe ra Jesuu.
\v 7 Ta juuni chaꞌaꞌ ña ñivi Ndioo kùu yo, Ndioo jākakú ra yo chiꞌin nii ma ra seꞌe ra ña chāti niku, ta jākaꞌnuni ra yo chaꞌaꞌ ma kuati yo ndia. Ndisaa yakan jāꞌa ra kuenda yo chaꞌaꞌ ña ìyo kuaꞌaꞌ ñamani ra,
\v 8 ña chāꞌa ra nuu yo chiꞌin nduvaꞌa kuaꞌaꞌ ña chìto ra chiꞌin chinituni ra.
\v 9 Ta Ndioo chāꞌa ra ña nàkoto yo ma tuꞌun xeꞌe ra ña ìyo nuu ra, ma ña vaꞌa ña ni jaꞌa ra ña töve chìto yo niku. Ti cha nākanini maa ra naja kua ni jaꞌa ra yi chiꞌin Cristu. Ta yaꞌa chìsii ra ña jachinu ra yi chaꞌaꞌ ra.
\v 10 Vati ma tuꞌun ikan, kāti ra ña ni chinu yi ora na kutaꞌan jiꞌna ma tiempu ña ìyo yi ña kuu yi. Vati ma Ndioo ni jandoꞌiin ra tandiꞌi ma nakuyi chiꞌin ma ñivi nda ma andivi chiꞌin ma ñuñivi iꞌya ndia. Ta Jesucristu kùu ma ra ni ndakoo ra ña na kaꞌnda ra tiñu.
\p
\v 11 Juuni chaꞌaꞌ Cristu kùu yi ña tajiꞌna Ndioo kāchin ra yo ña na kuu yo ñivi ra, ikan na niꞌi yo ma tundeeni ra ña ni kuꞌva ra nuu yo, ma tava kùuni maa ma Ndioo. Vati tandiꞌi ma ña vaꞌa ña jàꞌa ra, ni kuu yi tava kùuni ra ña na kuu yi.
\v 12 Ta takan kùuni ra, vati maa yo kùu ma ndian nunuu ña kīchaꞌa ña chìnuni yo ma tuꞌun Jesuu, ta ikan na jakaꞌnu yo ra, ti yaꞌaga ìyo ma ndatu ra.
\v 13 Ta juuni ndyoꞌo ora chīto ndo ma tuꞌun ndaa chaꞌaꞌ Jesuu, ña kàꞌan yi ña ni kakú yo, ta juuni chīnuni ndo yi, ta ma ora ikan ndōꞌiin ndo chiꞌin ra ta ndākuu ndo ñivi Ndioo jàꞌa ña chāꞌa ra ma Tati Ií ra nuu ndo takua chāꞌa ra tuꞌun ña ni jaꞌa ra niku.
\v 14 Ta chiꞌin ma Tati Ií ra ña chāꞌa ra nuu yo, Ndioo jànaꞌa ra iin kuꞌva ña ndicha ña ni niꞌi yo ma tundeeni ra, ma tava chāꞌa ra tuꞌun ña ni jaꞌa ra, ti cha jākakú ra yo, ikan na ndakuu yo ndian kùu ñivi ra. Ta yakan kùu yi ña yaꞌa jakaꞌnu yo ra chaꞌaꞌ ña nduvaꞌa kaꞌnu ra kùu ra.
\s Paulu chìkan ra nuu Ndioo ña na kuꞌva ra tiaga chinituni nuu ma ndian chìnuni
\p
\v 15 Yakan va yuꞌu nda ora chītoi ña yaꞌa chìnuni ndo tuꞌun ma Rachaꞌnu Cristu, ta naja kua yaꞌa kùuni ndo ndeꞌe ndo tandiꞌi ma ndian kùu taꞌan yo ndian ií kuenda Ndioo,
\v 16 ta vitin töve ndàkoi ña kàꞌin taꞌvindioo nuu ra chaꞌaꞌ ndo, ta endee nàkanini̱ chaꞌaꞌ ndo ora kàꞌin chiꞌin ra.
\v 17 Chìkain ñamani nuu Ndioo, ra kùu Tatá yo, ra nduvaꞌa kuii kaꞌnu, ta juuni rakan jakaꞌnu ma Jesucristu ra, chìkain nuu ra ña na kuꞌva ra tiaga ma Tati Ií ra nuu ndo, ikan na koto kachin vaꞌa ndo ma chinituni Ndioo, ta kuu kutunini vaꞌa ga ndo naja kua kùu ma Rachaꞌnu Ndioo.
\v 18 Chìkain ñamani nuu Ndioo ña na jandondichin ra ma chinituni ndo, ikan na kuu koto kachin ndo ndava kuu ma ña vaꞌa ña ndàtu ndo, ña ni niꞌi tandiꞌi ndian kāchin Ndioo ña kùu na ñivi ra. Vati yaꞌa ga kaꞌnu ta kuika kùu ma tundeeni ña ni kuꞌva ra nuu ma ndian kùu ñivi ra ta chìnuni ma tuꞌun ra.
\v 19 Ta yaꞌa ga kaꞌnu kùu ma ndatu ra, ta endee töve ndiꞌi yi. Ta ndatu ikan kùu ma ña chàꞌa ra nuu yo ndian chìnuni ma tuꞌun ra. Ta juuni ma ndatu ikan kùu yi ña jànaꞌa ma Ndioo nuu yo chiꞌin ndisaa kuii ñandee ra
\v 20 ma ora jānataku ndiko ra ma Jesuu niku, ta jāꞌa ra ña chūnandi ra ma itiꞌ chiyo kuaꞌa ra ma andivi ma nuu chàꞌnda ra tiñu.
\v 21 Ta chāꞌa ra ndisaa kuii ndatu nuu ra ña na kaꞌnda ra tiñu nuu ma ñivi chiꞌin nuu ndisaa kuii ma ña ìyo ndatu andivi takua ndian ndiso tiñu, ta ndian kùu kuvienu chiꞌin nda ndian ni kùuni ña chàꞌnda tiñu, nda ma tiempu iꞌya chiꞌin ma tiempu ni kichi itiꞌ nuu ndia.
\v 22 Ndisaa kuii ma ña ìyo ma ñuñivi iꞌya chiꞌin andivi, chāꞌa ma Ndioo ndatu ña na kaꞌnda ma Jesuu tiñu nuu yi. Ta juuni ma Ndioo jākuiso ra ra tiñu, ikan na kuu ra iin ra kuxini nuu ma ndian chìnuni.
\v 23 Vati ma ndian ìyo kuenda ma veñuꞌu, ndiakan kùu na takua kùu ma kuñu ma Jesuu, ta ìyo ndatu chiꞌin ma ndian ìyo kuenda ma veñuꞌu jàꞌa Jesuu ndia, ta ma veñuꞌu ra kùu yi iin ña jàkutu yi ra, vati Jesuu kùu ma ra kaꞌnu ga kua tandiꞌi ma ña ìyo ñuñivi iꞌya chiꞌin andivi ndia.
\c 2
\s Jàkakú Ndioo yo nuu ma kuatio chaꞌaꞌ ña chīꞌí Jesucristu
\p
\v 1 Ma tatiempu, ndyoꞌo kūu ndo takua kùu ma ndian chīꞌí niku, chaꞌaꞌ ma ña kini ta ma kuati ña jàꞌa ndo,
\v 2 ora chākunuu ndo ma ñuñivi ña jàꞌa ndo niku, ta jāchiꞌin ndo ta jāꞌa ndo ma takua kùuni ma kuiꞌna ña chàꞌnda yi tiñu ma nuu tandiꞌi tati xaan ndia. Ta juuni chàꞌnda yi tiñu nuu ma ndian töve jàchiꞌin ma ña kàꞌan Ndioo ti töve chìnuni na ma tuꞌun kàꞌan ra.
\v 3 Takan ìyo yo ma tajiꞌna niku, ña jāchiꞌo ta jāꞌa yo ma ña kini chiꞌin ma chinitunio, ta ma ña chàtaꞌani ma kuñu yo jaꞌa yi ndia. Chaꞌaꞌ ma kuati ikan ìyo yi ña niꞌi yo ma tundoꞌo jàꞌa ma Ndioo niku, indukuni takua ni taꞌan ma inga ñivi.
\v 4 Va ma Ndioo yaꞌa ga kùndaꞌvini ra yo, ta yaꞌa ga kùuni ra ndeꞌe ra yo,
\v 5 ta vaji ndian cha chīꞌí kūu yo niku chaꞌaꞌ ma kuati jàꞌa yo, va ma Ndioo chāꞌa ra ña na koo ndito ndiko yo indukuni chiꞌin Jesucristu. Chaꞌaꞌ ña yaꞌa ga vaꞌa kùu ma ñamani Ndioo, yakan va jākakú ra yo.
\v 6 Ndioo kùu ma ra jānataku yo indukuni chiꞌin ma Jesucristu, ta jākunandi ra yo chiꞌin ra ma nuu chàꞌnda ra tiñu ma itiꞌ andivi.
\v 7 Ndioo jāꞌa ra takan, ikan ma ndian ni kichi itiꞌ nuu kuu ndeꞌe na naja kua kaꞌnu kùu ma ñamani ra, ta naja nduvaꞌa kuii kùuni ra ndeꞌe ra yo, chaꞌaꞌ ña ndōꞌiin yo chiꞌin ma Jesucristu.
\v 8 Vati chiꞌin ñamani Ndioo nīꞌi ndo ña ni kakú ndo chaꞌaꞌ ma ña chìnuni ndo. Ti ma ñamani iꞌya na töve ña nànduku maa ndo kùu yi, vati Ndioo kùu ma ra chāꞌa sani ra yi nuu ndo.
\v 9 Töve tiñu nīꞌi ndo ña jàꞌa maa ndo kùu yi, yakan va nïꞌiin ndo na töve ìyo yi ña kuu sukun kuuni ndo chaꞌaꞌ ña ndian cha kàkú kùu ndo.
\v 10 Vati Ndioo kùu ma ra jāꞌa ña tūvi yo, rakan kùu ma ra jātuvi ra yo kuenda ña ndoꞌiin yo chiꞌin Jesucristu, ikan na jaꞌa yo tiñu vaꞌa, ta yakan kùu yi ma ña kāꞌan ra ma ora kāchin ra yi kuenda yo.
\s Jesuu jàndoꞌiin ra yo chiꞌin Ndioo
\p
\v 11 Yakan va ndyoꞌo, ndian yöve judíu kùu ndo, ta ndyoꞌo kùu ma ndian kàꞌan ndian judíu ña nani ndo teꞌen, yöve ndian tàꞌnda ñii nuu ika kùu ndo, ta ma ndian judíu nàni na teꞌen, ndian tàꞌnda ñii nuu ika kùu na. Ta ñaꞌa kùu yi ma ña jàꞌa maani na chiꞌin ma kuñu na.
\v 12 Ta ndyoꞌo ndian yüvi judíu, na kukuꞌun vaꞌani ndo vati ma tatiempu niku töve ìyo Cristu chiꞌin ndo niku, ta juuni töve ìyo ndo indukuni chiꞌin ma ñuu Israel ndia. Ta ma tuꞌun ña jāndoꞌiin Ndioo chiꞌin ndian judíu ma ña töve ñaꞌa maa ndo kùu yi, ni ma tuꞌun ña kāti ma Ndioo ña ni kuꞌva ra nuu na ndia. Ni chiꞌin Ndioo töve ìyo ndo ma ñuñivi iꞌya, ta ni töve ndàtu ndo nïꞌiin nakuyi ña vaꞌa nuu Ndioo.
\v 13 Va vitin ndicha kuii ña cha ndōꞌiin ndo chiꞌin Jesuu chaꞌaꞌ ma nii ra ña chāti, ndyoꞌo yaꞌa ga chika ìyo ndo niku, ta vitin cha ndōyatin ndo xiin Jesuu.
\v 14 Jesuu kùu ma ra jākutaxin ma anima yo. Rakan kùu ma ra jāꞌa ña na ndoꞌiin ma ñivi judíu chiꞌin ndyoꞌo ndian yüvi judíu ña na ndoꞌiin na ta kùu na iin ñuuni, ma ora kīndaa ra ma ña xaani ña kùu yi takua kùu iin xaꞌva sukun ña jākesiin yi na.
\v 15 Ora chīꞌí Jesuu jāchinu ra ma ña kàꞌan ma tuꞌun ley ña jàchiꞌin ma ndian judíu ña kaꞌnda yi tiñu nuu na, ta chiꞌin juuni maa ra kuu jandoꞌiin ra ndian judíu chiꞌin ma ndian yöve judíu, ikan na kuu na iin ñuu chaa, ña kùu koo vii na chiꞌin Ndioo.
\v 16 Chaꞌaꞌ ña chīꞌí ma Jesuu nuu kruu, jāndomani ra ninduvi ñuu, ña na küu koto na ndeꞌe na taꞌan na niku. Ta jākutaxin ra ma anima na ta jāndoꞌiin ra na, ikan na kuu na iin ñuuni, ta na koo taxiin na chiꞌin Ndioo.
\v 17 Jesuu kīchi ra ta kātituꞌun ra iin tuꞌun vaꞌa ña na koo taxiin ma anima tandiꞌi ndo, nda ndyoꞌo ndian ìyo chika chiꞌin Ndioo chiꞌin ma ndian ìyo yatin chiꞌin ra ndia.
\v 18 Vati chaꞌaꞌ Jesuu kùu yi ña ndyuꞌu chiꞌin ndyoꞌo kùu jatuꞌva yo yo nuu ma ra kùu Tatá yo jàꞌa ma Tati Ií Ndioo ña ìyo chiꞌin ndisaa yo.
\v 19 Yakan va ndyoꞌo, na tüva ga kuu ndo takua kùu ma ndian kīchi inga ñuu, vati vitin indukuni kùu ndo takua kùu ma ñivi Ndioo, ta ma ñuu ndian kùu ñivi ra indukuni kùu yi ma ñuu ndo ndia.
\v 20 Ndyoꞌo kùu ndo tava kùu iin veꞌe ña kūvaꞌa siki yuu chaꞌa veꞌe ma ora ja ni kichaꞌa yi kuvaꞌa yi, ma tava kùu ma ndra tatun Ndioo chiꞌin ma ndra kàꞌan chiꞌin tuꞌun yuꞌu ra, ta juuni maa ma Jesuu kùu ra ma yuu nunuu ña kaꞌnuga ña kùvaꞌa chaꞌa ma veꞌe.
\v 21 Ta ndōꞌiin yo chiꞌin Jesuu takua kùu ma ndatiñu ña kùvaꞌa ma veꞌe. Ta kuàndita kuvaꞌa yi, nda kati chaa yi kùu yi iin veñuꞌu ií ña ndoꞌiin yi chiꞌin ma Rachaꞌnu Jesuu.
\v 22 Ta ma Tati Ií Ndioo, jàꞌa yi takan ña juuni ndyoꞌo kuàndoꞌiin ndo indukuni chiꞌin na, nda kati chaa ndo koo ndo tava kuu iin veñuꞌu kaꞌnu ma nuu ìyo ma Ndioo tichi yi, jàꞌa ma Tati Ií ra.
\c 3
\s Paulu ndiso ra tiñu ña na janaꞌa ra ma tuꞌun Ndioo nuu ma ndian töve kùu judíu
\p
\v 1 Yakan va yuꞌu Paulu, indii̱ vekaa chaꞌaꞌ ña jàkui tiñu nuu Jesucristu kuenda ndo, ndyoꞌo ndian yüvi kùu ñivi judíu.
\v 2 Ta ndyoꞌo cha chìto ndo ña Ndioo jākuiso tiñu ra yuꞌu ña na janaꞌi ma tuꞌun chaꞌaꞌ ma ñamani Ndioo nuu ndo.
\v 3 Ta tava cha tāi yi, Ndioo jànaꞌa kachin ra nui ma tuꞌun xeꞌe ña ni jaꞌa ra.
\v 4 Na jakuaꞌa jiꞌna ndo yi, tajan kuꞌva ndo kuenda ña chìtoi ma tuꞌun xeꞌe ña kàꞌan chaꞌaꞌ Cristu.
\v 5 Iin tuꞌun xeꞌe ña töve nī nakoto ma ñivi yi ma tatiempu niku. Va chaꞌaꞌ Tati Ií ra, vitin cha chāꞌa ma Ndioo ña na koto ma ndra ií ña kùu tatun ra chiꞌin ndra kàꞌan chiꞌin tuꞌun yuꞌu ra ma tuꞌun xeꞌe ikan.
\v 6 Ta ma tuꞌun xeꞌe ikan kùu ñaꞌa: Ña chaꞌaꞌ ma tuꞌun ña kàꞌan Ndioo ña ni kakú ma ndian töve kùu judíu, ta ni niꞌi na indukuni ma tundeeni ña ni niꞌi ma ndian judíu, vati juuni iin ñivini ni kùu na chiꞌin na ndia. Ta ma tuꞌun chāꞌa Ndioo nuu ma ndian judíu chaꞌaꞌ ma Jesucristu, indukuni ni kusii kuuni na, ora niꞌi na yi ndia, ti takan kàꞌan ma tuꞌun vaꞌa chaꞌaꞌ Jesucristu.
\v 7 Ta chaꞌaꞌ ma ñamani ña chāꞌa Ndioo nui, kùu yi ña Ndioo cha jākuiso tiñu ra yuꞌu ña na katituꞌin ma tuꞌun ra, vati ndatu ma Ndioo jàꞌa ña ìyo yi chiꞌi̱n.
\p
\v 8 Yuꞌu yüvi ma ra vaꞌa tiaga kùi tañu ma ndian kùu ñivi Ndioo, va kùi takua kùu iin ravalini tañu na. Vaji iin ra takan kùi, Ndioo kāchin ra yuꞌu ta chāꞌa ra ma ñamani ra nui ña na katituꞌin ma tuꞌun vaꞌa chaꞌaꞌ Jesucristu nuu ma ndian yüvi judíu. Ma tuꞌun ikan nduvaꞌa kuii kaꞌnu kùu yi ña na töve kùu niꞌi ndiꞌi yo yi.
\v 9 Ta jākuiso tiñu ra yuꞌu ña na kuꞌvai koto tandiꞌi ndo ndava kùu ma tuꞌun xeꞌe ña kùmi ma Ndioo tajiꞌna niku, ra jāꞌa ña tūvi tandiꞌi ma ña ìyo ma ñuñivi iꞌya.
\v 10 Ta takan vitin ndisaa nuu tati ña chàꞌnda tiñu andivi kùu nataꞌan yi kuaꞌaꞌ nuu ma chìnituni ma Rachaꞌnu Ndioo ora ndeꞌe yi ma ndian chìnuni ña ìyo kuenda ma veñuꞌu Cristu.
\v 11 Ta Ndioo jāꞌa ma teꞌen chaꞌaꞌ ma tiñu ña kùuni ra jaꞌa ra endeeni chiꞌin ma Rachaꞌnu Jesucristu, ra kùu chitoꞌo yo.
\v 12 Ta chaꞌaꞌ ña cha ndōꞌiin yo chiꞌin ra ta chìnuni yo ma tuꞌun ra kùu yi ña töve ndasii yo kùtuꞌva yo nuu ma Ndioo, ña ìyo tundeeni ra chiꞌin yo.
\v 13 Yakan va jànini̱ ndo ña koto kündaꞌvi kùuni ndo chaꞌaꞌ ma ña ndèꞌi tundoꞌo vitin chaꞌaꞌ ndo, vati ma ñaꞌa iin ña nduvaꞌa kuii vaꞌa kùu yi kuenda ndo.
\s Nduvaꞌa kuii kùuni Jesuu ndeꞌe ra yo
\p
\v 14 Chaꞌaꞌ ñaꞌa kùu yi ña nàndi chiti̱ ta chàꞌi taꞌvindioo nuu ma ra kùu Tatá yo ìyo andivi,
\v 15 ma ra jàꞌa ña niꞌi ma taꞌiiꞌiin ma seꞌe ma ñivi ma sivi na, ndava nda ma andivi chiꞌin ma nuñuꞌuꞌ ñuñivi ndia.
\v 16 Chìkain ñamani nuu ra ña na kuꞌva ra ma ña iñuꞌu ra chiꞌin ma ña kuika ra ta chiꞌin ma ña vaꞌa ra nuu ndo, ta juuni na kuꞌva ra ña na koo ñandee ndo chiꞌin ndatu ra ma tichi anima ndo jàꞌa ma Tati Ií ra ña ìyo chiꞌin ndo.
\v 17 Ta na koo ma Jesucristu chiꞌin tuꞌun ra ma tichi ma anima ndo chaꞌaꞌ ma ña chìnuni ndo ma ña kàꞌan ra. Tuva takan ndaa vaꞌa chìnuni ndyoꞌo, nda ma tichi anima ndo ta kùuni ndo ndeꞌe ndo Jesuu,
\v 18 kuu kutunini ndo chiꞌin ndisaa kuii ma ndian chìnuni ña yaꞌa ga kiꞌin ta kani, ta kono ta sukun kùu ña yaꞌa ga kùuni ma Jesuu ndeꞌe ra ndo,
\v 19 ikan na nakoto vaꞌa ndo ña yaꞌa ga kùuni ma Jesuu ndeꞌe ra ndo, vati kaꞌnu nduvaꞌa kuii ga kùu yi takua ndisaa kuii ña kùu nakanini yo ta na küu chaa yo nakoto ndiꞌi yo yi. Ti Ndioo kùuni ra ña na niꞌi yo tandiꞌi ma tundeeni ra ña ìyo ra, ikan na ndakuu yo koo yo takua ìyo ra chiꞌin ma ndatu kaꞌnu ra.
\p
\v 20 Yakan va na jakaꞌnu yo Ndioo, vati ìyo kuaꞌaꞌ vaꞌa ndatu ra ña na kuu jaꞌa ra ma ña chìkan yo chiꞌin ma ña chànini yo, ta kùu kuꞌva ra tiaga kua ma ña chìkan yo nuu ra ndia. Ta chiꞌin ndatu ra jàꞌa ra ma ña kùuni ra kuꞌva ra nuu yo.
\v 21 ¡Na jakaꞌnu yo ma Rachaꞌnu Ndioo, ti iin ra nduvaꞌa kuii kaꞌnu kùu ra!, ta ndeꞌo ma ña kaꞌnu jaꞌa ra nuu ma ñivi ìyo veñuꞌu Jesucristu ta juuni takan ndeꞌo yi chiꞌin ra ndia. Ta, ¡takan na kùu yi ndisaa tiempu ta endeeni! Amén.
\c 4
\s Ndioo jàndoꞌiin ra ñivi ra chiꞌin Tati Ií ra
\p
\v 1 Yakan \fig Portándose como cristianos|55GR-gn37n.tif|col|4:1||Nuu ndòꞌiin tiꞌvi ma ñivi ña chìnuni tuꞌun Jesuu|4.1\fig*va yuꞌu indii̱ ma vekaa chaꞌaꞌ ña kàtituꞌin chaꞌaꞌ ma Rachaꞌnu Jesucristu. Yakan va jànini̱ ndo ña na koo ndo ma takua ìyo yi ña koo ma ndian kàchin ma Ndioo ña na kuu na ñivi ra.
\v 2 Na kuu ndo ndian masu anima, ta vii kàꞌan ndo chiꞌin inga ñivi, ta na jandeeni ndo chiꞌin ma ña jaꞌa taꞌiiꞌiin taꞌan ndo chaꞌaꞌ ña yaꞌa ga kùuni ndo ndeꞌe ndo na.
\v 3 Ta ndisaa tiempu na nanduku vaꞌa ndo naja koo vii ndo chiꞌin taꞌan ndo, ikan na töve naa ma ña ndoꞌiin taꞌan ndo ña chāꞌa ma Tati Ií Ndioo nuu ndo.
\v 4 Ta iin kuñuni kùu yo chiꞌin ra, ta uvani Tati Ií Ndioo ìyo, ta indukuni kāna ndio ra yo, ña ndàtu yo ña vaꞌa ña ni kuꞌva ra nuu yo.
\v 5 Uvanuu Rachaꞌnu Jesuuni ìyo, ta iin ni ña kùu chinuni yo ndia, ta iin ni kua kuu kunduta yo ndia.
\v 6 Uvanuu Ndioo ra kùu Tatá ndisaa yo, ta rakan kùu ra chàꞌnda tiñu nuu ndisaa yo, ta kùtaꞌan ra chiꞌin yo, ikan na kuu jachinu ndisaa yo takua kùuni ra, ta ìyo ra chiꞌin ndisaa yo ndia.
\v 7 Va taꞌiiꞌiin yo nīꞌi yo ma ña sōkó ma Jesuu nuu yo, ña kùu yi ma ñamani ra ña kùuni ra kuꞌva ra nuu yo.
\v 8 Yakan va ma nuu tutu Ndioo kàꞌan yi teꞌen: “Ndāa ma Jesuu kuàꞌan ra itiꞌ andivi ña ndàkan ra ndian ndikun chiꞌin karena kuàꞌan chiꞌin ra, tajan sōkó ndio ra iin ma ndatiñu na nuu ma ñivi ñuu ra.”
\v 9 ¿Ta niyi kùuni yi kaꞌan yi ma ña ndāa ra kuàꞌan ra ma itiꞌ andivi?, kùuni ndo. Yakan kùuni yi kaꞌan yi ña jiꞌna nūu ra ma nuu ñuꞌuꞌ ñuñivi iꞌya.
\v 10 Ta ma ra nūu, juuni ra kùu ma ra ndāa ma nuu sukun ga ma andivi, ikan ma ndatu ra ni jakutu yi yi ninii kaꞌnu ma andivi chiꞌin ñuñivi.
\v 11 Ta juuni maa ra kùu ma ra chāꞌa ra ndatu ña jākuiso ra tiñu nuu taꞌiiꞌiin yo ndian chìnuni tuꞌun ra. Vati iin ndian nìꞌi tiñu ña na kuu na ma tatun ra, ta inga ndian nìꞌi na tiñu ña na kuu na ndian kàꞌan chiꞌin tuꞌun yuꞌu ra, ta inga na nìꞌi na tiñu ña na kuu na ndian kàtituꞌun naja kùu yi ña jàkakú Cristu yo, ta inga ndian nìꞌi na tiñu pato ta matru ndian jàꞌa kuenda ta jànaꞌa na nuu ma ndian chìnuni ndia.
\v 12 Takan jàꞌa Cristu ña jàkuiso ra tiñu nuu ma ndian kùu ñivi ra, ikan na jaꞌa na tiñu Ndioo kuenda ma ndian chinuni ta jaꞌa na ña na kuaꞌnu ndisaa ma ndian kùu ma kuñu ma Jesuu,
\v 13 nda kati chaa ndisaa yo chinuni vaꞌa ma tuꞌun ra ta ndoꞌiin yo chiꞌin ra ta nakoto yo ma ra kùu seꞌe ma Ndioo, ikan na ndakuu yo ndian nduvaꞌa kuii vaꞌa ta ndaa nuu Ndioo takua kùu Cristu. Ta tu takan jaꞌa yo ni niꞌi yo ña na kuu kuicha vaꞌa ma chinituni yo ta takan kuu ndakuu yo koo yo indukuni takua ìyo ra.
\v 14 Na tüva kuu yo tava kùu ndiakuati, vati ma ndiakuati numini sàma ma kua chànini na, ta ndiakan kùu na takua iin varku ña kuàꞌan run teꞌen tikan jàꞌa ma tati. Takan kùu ma ndian chìni nda tuꞌun ni kùuni ña jànaꞌa ma ndra jandaꞌviñaꞌa ñivi. Vati ma tuꞌun jànaꞌa ndra jaꞌani ndra ña tuꞌun ndicha kùu yi, jin ma tuꞌun vatani kùu yi.
\v 15 Vaꞌaga tuva kàꞌan yo ma ña ndaa chiꞌin taꞌan yo chaꞌaꞌ ña kùunio ndeꞌo na, chiꞌin tandiꞌi ña ìyo tichi anima yo kùakuaꞌnu yo, ikan na kuàndakuu yo takua kùu ma Cristu, ra kùxini.
\v 16 Ta Cristu kùu ma ra ña jàndoꞌiin ra taꞌiiꞌiin yo ña kùu yo kuenda ma veñuꞌu ra. Ta nuu taꞌiiꞌiin yo chàꞌa ra iin tiñu ña jàꞌa yo. Ta ora chatiñu yo ma tiñu ikan endee tindeo taꞌan yo, ikan na kuaꞌnu vaꞌa yo, ikan na kuunio ndeꞌo taꞌan yo tiá kuaꞌaꞌ ga.
\s Kìchaꞌa ìyo chaa ndiko ñivi koo na chiꞌin Cristu
\p
\v 17 Ñaꞌa kùu ma ña kàꞌin chiꞌin ndo ta chìkain ñamani nuu ndo chiꞌin ma sivi Rachaꞌnu Jesuu ña na köo ga ndo ma tava ìyo ma ndian töve chìnuni, vati ma ndiakan ìyo na ma tava kùuni ma chinituni na ma ña töve vaꞌa.
\v 18 Ta tükuii kùtunini na nïꞌiin nakuyi. Ma ndiakan cha jākesiin na na itiꞌ vaꞌa ña kùuni Ndioo ña na kuꞌun na chaꞌaꞌ ña töve chìto na chaꞌaꞌ ña yaꞌa ga ndava ma anima na.
\v 19 Ta tüva kanuu na jaꞌa na ña kini ta endee tivi ma anima na kuenda ña jaꞌa na ma ña kini. Ta ndisaa tiempu jàꞌa na tandiꞌi ña töve vaꞌa ña chànini na chiꞌin kuñu na.
\p
\v 20 Va ndyoꞌo, na yöve tuꞌun iꞌya kùu ma ña kūtuꞌva ndo chaꞌaꞌ ma Cristu.
\v 21 Va ma tuꞌun ña kūtuꞌva ndo ora chīni ndo ña ma ndian kātituꞌun chaꞌaꞌ ra kùu yi mamaa tuꞌun ndaa ña ìyo chiꞌin Jesuu.
\v 22 Ma tuꞌun chaꞌaꞌ ra jànaꞌa yi ña ìyo yi ña ndakoo ndo naja kua chīyo ndo tatiempu, vati yakan kùu ma ña jātivi yi ma anima ndo niku, ta yaꞌa ga jāndaꞌviñaꞌa yi ndo chaꞌaꞌ ma ña kùuni ndo ña töve vaꞌa.
\v 23 Va ndyoꞌo ìyo yi ña jandochaa ndo ndo ma chinituni ndo chiꞌin ma anima ndo.
\v 24 Ta na jandochaa ndiko ndo ma kua koo ndo ma ñuñivi, chaꞌaꞌ ña jātuvi ma Ndioo ndo takua kùu ra, ti iin ra ndicha vaꞌa ta ndaa ta ií kùu ra.
\p
\v 25 Yakan va vitin, na käꞌan ga ndo ma tuꞌun vata, vati na kaꞌan ndo ma tuꞌun ndaa chiꞌin taꞌan ndo, ti ndisaa yo kùu yo iin kuñuni.
\v 26 Tu kuxaan ndo, na jaꞌa ndo kuenda nuu ndo ta koto jäꞌa ndo ma kuati, ta ora kuxaan ndo, ta na küꞌva ndo ña koo yi ninii nduvi chiꞌin ndo.
\v 27 Ta na küꞌva ndo ña kaꞌnda ma kuiꞌna tiñu nuu ndo.
\v 28 Ta tu ìyo nda ndyoꞌo ña kùu ndo ndian suꞌu, vaꞌa ga ña jàtiñu ndo ta jàña ndo ña suꞌu ndo, ta jàꞌa ndo iin tiñu vaꞌa chiꞌin ndaꞌaꞌ ndo, ikan na koo taꞌan ma ndatiñu nuu ndo kuenda ña tìndee ndo ndian chiniñuꞌu yi.
\v 29 Na käꞌan ndo tuꞌun kini, vaꞌaga ña na kaꞌan ndo mamaa tuꞌun vii ma ora kàꞌan ndo, ikan na tindee yi na ña naniꞌi na naja kua koo vaꞌa na, ta takan sii kuuni ma ndian chìni yi.
\v 30 Ta na jaꞌa ndo kuenda nuu ndo, koto kündaꞌvi kuuni ma Tati Ií Ndioo jaꞌa ndo, vati cha ìyo ma kuꞌva yi chiꞌin ndo ña kàꞌan yi ña ñivi Ndioo kùu ndo, ta chaꞌaꞌ yakan kùu yi ña ni jakakú ra ndo ora ni chaa ma kivi ña jàchinu ra yi.
\v 31 Ta na jaña ndo tandiꞌi tuꞌun kini ña kàꞌan ndo: takua kùu ma ña yaꞌa kayuni ndo, chiꞌin ña kùxaan ndo, chiꞌin ña chàtaꞌani ndo kanachaa koꞌo ndo ora kànitaꞌan ndo, chiꞌin ña kàtiꞌini ndo chata ñivi, ta chiꞌin tandiꞌi inga tuku ña kini ña chàtaꞌani ndo jaꞌa ndo ndia.
\v 32 Vaꞌaga ña na kuu ndo iin ndian vaꞌa ta vii koo ndo chiꞌin inga ñivi. Ta na kundaꞌvini ndo na, ta jakaꞌnuni ndo ma kuati jàꞌa taꞌiiꞌiin ndo chata taꞌan ndo tava jāꞌa ma Ndioo ora jākaꞌnuni ra ma kuatio chaꞌaꞌ Cristu.
\c 5
\s Naja kua ìyo yi ña koo ma ñivi Ndioo
\p
\v 1 Vati ndyoꞌo kùu ndo seꞌe Ndioo, iin ndian yaꞌa ga kùuni ra ndeꞌe ra. Yakan va na janini ndo kùu ndo tava kùu ra.
\v 2 Na kuuni ndo ndeꞌe ndo ma taꞌan ndo, indukuni ma takua kūuni ma Cristu ndeꞌe ra yo, ta sōkó ra ra ta chīꞌí ra chaꞌaꞌ yo takua kùu ora sòkó yo iin mvechala kuenda Ndioo. Ta ora sōkó ra ra kùu yi iin ña vaꞌa ta iin ña xiko nduvaꞌa kuii vii kùu yi kuenda ma Ndioo.
\v 3 Ndyoꞌo ndian kùu ñivi Ndioo na töve ìyo yi ña kiꞌvi ndo chiꞌin ñaꞌa yüvi ñasiꞌi ndo, ta ñaꞌa chiꞌin iin ra yüvi ii ndo, ta juuni töve vaꞌa jàꞌa ndo nïꞌiin inga ña kini, ta ña nänduku ndo ma ña kukuika ndo. Tandiꞌi ñaꞌa ña töve vaꞌa nakanini ndo yi a kaꞌan ndo yi ndia.
\v 4 Na käꞌan ndo ma tuꞌun kini ni tuꞌun kàtiꞌini ndo chiꞌin tuꞌun ña kàꞌan ndaa ndo ndia, vati ma tuꞌun iꞌya ña töve ìyo yi ña kaꞌan yo yi. Vaꞌa ga ña na jakaꞌnu ndo ma Ndioo chiꞌin ma tuꞌun ndo.
\v 5 Ta vitin va cha chìto vaꞌa ndo ti tu ndyoꞌo ndian kìꞌvi chiꞌin ma ñaꞌa töve kùu ñasiꞌi ndo, a jaꞌa ndo iin ña kini, a kùuni ndo ndokuika ndo, na küu niꞌi ndo nuu ni koo ndo ma nuu chàꞌnda Ndioo tiñu chiꞌin Cristu. Ta ndisaa ndian jàꞌa takan kùu na takua ndian jàkaꞌnu na yutun ií.
\v 6 Ta na küꞌva ndo ña kèñaꞌa na ndo chiꞌin tuꞌun töve nda kuenda, vati ma Ndioo kuxaan ra chiꞌin ma ndian töve jàchiꞌin ma tuꞌun ra.
\v 7 Ta ña töve kuii ndoꞌiin ndo chiꞌin ma ndiakan.
\v 8 Ndyoꞌo antea yaꞌa ga naa ma ñuñivi ìyo ndo niku, ta vitin ña ndōꞌiin ndo chiꞌin ma Rachaꞌnu, yakan va ndichin vaꞌa ma ñuñivi ìyo ndo. Na kundaa vaꞌa ndo ti seꞌe ma Rachaꞌnu kùu ndo.
\v 9 Vati ma ñuꞌú ra jāꞌa yi ña na niꞌi ndo ma ña ndicha, ña ndaa chiꞌin ña nduvaꞌa kuii vaꞌa.
\v 10 Na nanduku ndo jaꞌa ndo ma ña chàtaꞌani ma Rachaꞌnu.
\v 11 Na ndïkitaꞌan ndo ta na ndöꞌiin ndo chiꞌin ma tiñu kini ña jàꞌa ma ndian ìyo ma ñuñivi naa, ma ndian töve nàkoto na ma Rachaꞌnu, vaꞌaga ña na katakuati ndo ma ña jàꞌa na ma nuu ndichin ma nuu kaꞌìin kuaꞌaꞌ ñivi.
\v 12 Vati ndava kanuu kùuni yo ora kàꞌan yo chaꞌaꞌ ma ña jàꞌa xeꞌe na.
\v 13 Vati tu ndisaa kuii ma tuꞌun kàꞌan yo keta yi ma nuu ndichin nuu kaꞌìin kuaꞌaꞌ ñivi, kìndoo kachin vaꞌa yi. Vati ma ñuꞌú kùu ma ña jandondichin ndisaa kuii ma nakuyi.
\v 14 Yakan va teꞌen kàꞌan yo:
\q Na ndakoun, yoꞌo ña kìxi,
\q Na ndetaun tañu ma ndian chīꞌí,
\q Ti Cristu kùu ma ra ni jatuun ra ma itiꞌ kuàꞌun.
\p
\v 15 Yakan va na kumi kuenda vaꞌa ndo ma ña jàꞌa ndo chiꞌin ma ña kàꞌan ndo. Na köo ndo ma tava kùuni maa ndo, vati na koo ndo va chiꞌin kuaꞌaꞌ chinituni vaꞌa ndo.
\v 16 Na koo vaꞌa ndo ma tiempu iꞌya ta na jaña ndo ma ña töve vaꞌa ña jàꞌa ndo, vati ma tiempu vitin yaꞌa ga kini jàꞌa na.
\v 17 Na jäꞌa ndo ma ña töve vaꞌa ña kùuni maa ndo, vati na numi nanduku ndo naja kua kutunini ndo ma ña kùuni ma Ndioo ña jaꞌa ndo.
\v 18 Na töve ìyo yi ña koꞌo ndo ndixi, ta kùuní ndo jàꞌa raꞌ, vati yakan kùu ma ña jàꞌa ña töve vaꞌa jàꞌa ndo. Ma ña ìyo yi ña jaꞌa ndo kuu ña na koo kuaꞌaꞌ vaꞌa ma Tati Ií Ndioo chiꞌin ndo.
\v 19 Ta na kaꞌan ndo chiꞌin ma inga ñivi chiꞌin tuꞌun Salmu ta kata ndo iin yaa, iin yaa ña kàꞌan tuꞌun ií kuenda ma Rachaꞌnu, kata ndo ta jakaꞌnu ndo ra chiꞌin ndisaa kuii anima ndo.
\v 20 Na kuꞌva ndo taꞌvindioo nuu ma ra kùu Tatá yo nani ora chaꞌaꞌ ndisaa ña jàꞌa ra chaꞌaꞌ yo. Ta takan na jaꞌa ndo chiꞌin sivi ma Rachaꞌnu chitoꞌo yo Jesucristu.
\s Naja kua ìyo yi ña koo ma ñivi chìnuni tuꞌun Jesuu chiꞌin ma ñivi na
\p
\v 21 Ndyoꞌo ndian iñuꞌu chiꞌin Cristu, ìyo yi ña tiñuꞌu ndo ta jachiꞌin taꞌiiꞌiin ndo chiꞌin taꞌan ndo.
\v 22 Ndyoꞌo ñivi ñaꞌa ña cha tāndaꞌa, na jachiꞌin ndo ta na tiñuꞌu ndo ndra kùu ii ndo, ti ñaꞌa kùu ma ña ìyo yi ña jaꞌa ndo chaꞌaꞌ ña chìnuni ndo ma tuꞌun ma Rachaꞌnu.
\v 23 Vati ma ra kùu iian, kùu ra ma ra kuxini nuan, indukuni ma takua ma Cristu kùu ra ma ra kùxini nuu ma veñuꞌu ma ndian chìnuni. Ta juuni Cristu kùu ma ra jàkakú ra na, vati ndiakan kùu na takua kùu ma kuñu ra.
\v 24 Ti indukuni takua ma ndian chìnuni ta jàchiꞌin na ma Cristu, ta juuni takan kùu chiꞌin ma ñivi ñaꞌa cha tāndaꞌa ña jàchiꞌin vi ndisaa ma ña kàꞌan ma ra kùu ii vi.
\p
\v 25 Ndyoꞌo ndraꞌii na kuuni vaꞌa ndo ndeꞌe ndo ma ñivi kùu ñasiꞌi ndo indukuni ma tava Cristu kùuni ra ndeꞌe ra ma veñuꞌu ma ndian chìnuni ta sōkó ra ra ña chīꞌí ra chaꞌaꞌ na.
\v 26 Ta takan kuàndakuu na ndian ií jàꞌa ra, ta janandoo ra na chiꞌin takuii ta chiꞌin ma tuꞌun ra ndia.
\v 27 Ta takan kūu, ikan na jayaꞌa ra na nuu ìyo maa ra. Ta takan ndākuu na ndian tacha ta nduvaꞌa kuii vii, ti ni kuu na takua kùu iin jaꞌma töve tií yi ta töve meku yi kuenda ra, vati ni kuu na iin veñuꞌu nduvaꞌa kuii ií ta ndaa vaꞌa.
\v 28 Ta takan ma ndra tāndaꞌa ìyo yi ña kuuni ndra ndeꞌe ndra ma ñasiꞌi ndra takua kùuni ndra ndeꞌe ndra ma kuñu ndra. Ti ma ra kùuni ndeꞌe ma ñasiꞌi ra kuuni ra ndeꞌe ra juuni maa ra ndia.
\v 29 Vati nïꞌiin ñivi töve xàani na ndeꞌe na ma kuñu juuni maa na vati jakachi na yi ta kumi kuenda na yi, indukuni ma tava jàꞌa ma Jesuu chiꞌin ma veñuꞌu ndian chìnuni.
\v 30 Vati ma ndian chìnuni kùu na takua kùu ma kuñu ra. Ta juuni maa yo kùu yo ma kuñu ra ndia.
\v 31 “Yakan va ma ndraꞌii ni ndakoo ndra ma tatá ndra chiꞌin maꞌa ndra ora tandaꞌa ndra chiꞌin ma ñasiꞌi ndra, ta ninduvi vi ni kùu vi iin kuñuni.”
\v 32 Ñaꞌa kùu iin ma tuꞌun xeꞌe kaꞌnu nduvaꞌa kuii, va yuꞌu kàꞌin chaꞌaꞌ ma Cristu chiꞌin chaꞌaꞌ ma ndian chìnuni tuꞌun ra.
\v 33 Yakan va ndisaa kuii kivi, ma taꞌiiꞌiin ndo ìyo yi ña kuuni ndo ndeꞌe ndo ma ñasiꞌi ndo ma tava kùuni ndo ndeꞌe ndo juuni maa ndo, ta ma ñaꞌa cha tāndaꞌa, na tiñuꞌu vi ma ndra kùu ii vi ndia.
\b
\c 6
\p
\v 1 Ndyoꞌo ndiakuati chiꞌin ndian yoko, na jachiꞌin ndo ma ña kàꞌan ma tatá ndo chiꞌin maꞌá ndo chaꞌaꞌ ña cha ndōꞌiin ndo chiꞌin ma Rachaꞌnu, vati ñaꞌa iin ña ndaa vaꞌa kùu yi.
\v 2 Iin tuꞌun Ley ña kàꞌan Ndioo ña kùu yi ma ña nunuu ta juuni ndaka yi iin tuꞌun ña chāꞌa ra nuu ma ñivi ña na jachiꞌin na ma ña kàꞌan ma Ley ikan ña kàꞌan teꞌen: “Na tiñuꞌu nduvaꞌa kuiun ma tatáun chiꞌin ma maꞌun,
\v 3 ikan na koo sii vaꞌun kuaꞌaꞌ vaꞌa tiempu ma nuu ñuꞌuꞌ ñuñivi iꞌya.”
\v 4 Ta ndyoꞌo, ndra kùu tatá, na jäkayuni ndo ma seꞌe ndo, vati vaꞌa ga ña jakuaꞌnu vaꞌa ndo na ta kundayuꞌu vaꞌa ndo na ta na janaꞌa ndo nuu na ma itiꞌ ra, ikan na kiꞌvi na itiꞌ ma Rachaꞌnu ta kùuni na ndeꞌe na ra ndia.
\v 5 Ndyoꞌo ndian kùu musu, na jachiꞌin ndo ndisaa ma tiñu ña tàva ndian chàꞌnda tiñu nuu ndo ma ñuñivi iꞌya. Ta ora jàꞌa ndo yi na tiñuꞌu ndo na chiꞌin ndisaa ma anima ndo, takua jàꞌa ndo ña jàchiꞌin ndo ma Cristu.
\v 6 Na jaꞌa vaꞌa ndo ma tiñu kuenda na, va töve ivaa ma ora ndeꞌe ni na, vaji ora töve na ña jaꞌa na kuenda ndo ìyo yi ña jaꞌa vaꞌa ndo ma tiñu kuenda na, va töve ivaa chiꞌin ndiakan ni, vati iin tiñu vaꞌa kùu yi ña jàꞌa ndo kuenda Cristu ndia. Vati chiꞌin ndisaa kuii anima ndo jaꞌa ndo ma ña kùuni Ndioo.
\v 7 Tandiꞌi ma ña jàꞌa ndo, na jaꞌa vaꞌa ndo yi chiꞌin ndisaa kuii ma tundeeni ndo. Na jaꞌa ndo yi ma takua kùuni ndo ña jàꞌa ndo ma tiñu nuu ma Rachaꞌnu, ta na töve nuu ñivini.
\v 8 Yakan va cha chìto taꞌiiꞌiin ndo, chïto a kùu ndo musu a chàkuu nuna ndo, ni niꞌi ndo ma ña ni kuꞌva ma Ndioo va naja kua kàa ma ña vaꞌa ña jāꞌa ndo.
\v 9 Ta ndyoꞌo ndian chàꞌnda tiñu nuu ndian kùu musu, na tiñuꞌu vaꞌa ndo ma ndian jàꞌa tiñu nuu ndo. Na töve jayuꞌvi ndo na. Na kukuꞌuni vaꞌa ndo, ti juuni kùu ndo musu ma Rachaꞌnu chitoꞌo yo, ra ìyo andivi. Ta rakan ti iin nuuni ndèꞌe ra ndisaa ma ñivi.
\s Na kuàtiñu yo ma ñandee chàꞌa Ndioo, nuu ndian chìnuni kuenda jàkanaa yo ma kuati
\p
\v 10 Yakan va vitin ndyoꞌo yani, na ndoꞌiin ndo chiꞌin ma Rachaꞌnu, ikan na ndakuu niꞌi ndo chaꞌaꞌ ma ndatu kaꞌnu ra.
\v 11 Na kasi ndo ndo chiꞌin ndisaa kuii ma ndatiñu ña chāꞌa Ndioo nuu ndo, ikan na kundeeni ndo, ta ikan na töve kùu keñaꞌa ma kuiꞌna ndo.
\v 12 Vati töve kànitaꞌan yo chiꞌin iin ñivi kua kàa maa yo, vati kànitaꞌan yo chiꞌin kuaꞌaꞌ nuu tati xaan ña chàkunuánꞌ ma itiꞌ andivi. Vati yakánꞌ kùu ma ñánꞌ jàꞌa tiñu nuu naa nuu ma ñuñivi iꞌya, ta chàꞌndánꞌ tiñu nuu ma ñivi ña ìyo nuu yi.
\v 13 Yakan va na kasi ndo ndo ta kuàtiñu ndo ndisaa kuii ma ndatiñu ña chāꞌa ma Ndioo nuu ndo, ikan na kundeeni ndo ma ora ni keta ma kivi xaan, ta ora cha chinu jaꞌa ndo ndisaa yi, ta na kundeeni ndo tiaga.
\p
\v 14 Yakan va na kuꞌun ndo ma tuꞌun ndicha ña chìnuni ndo, ikan na kumi yi ndo takua kùu iin pañu. Ta na kuꞌun ndo ma ña ndaa ña kùu yi takua kùu iin chaleku ña kùmi yi ndo.
\v 15 Ta na koo yati vaꞌa ndo kuenda na katituꞌun ndo ma tuꞌun Ndioo ña jànaꞌa yi naja kua kuu koo vii yo chiꞌin ra. Ñaꞌa kùu yi takua kùu iin ndichan ña tìꞌi ndo chaꞌa ndo.
\v 16 Ta ma ña chìnuni vaꞌa ndo ma tuꞌun ra kùu yi kuenda ndo takua kùu iin kaa kutaa ña kùmi yi ndo. Ta takan kùu jakanaa ndo ma kuiꞌna ora kànitaꞌánꞌ chiꞌin ndo.
\v 17 Ta \fig Armadura|56GR-lllc24n.tif|col|6:17||Na kuatiñu ndo ndisaa kuii ma ndatiñu ña chāꞌa ma Ndioo nuu ndo|6.17\fig*ma ña ni jàkakú Ndioo ndo kùu yi takua kùu iin teꞌe ña chundii yi xini ndo, ta ma tuꞌun Ndioo kùu yi kuenda ndo takua kuu iin machiti ña chàꞌa ma Tati Ií Ndioo nuu ndo.
\v 18 Koto ndäkoo ndo ña kàꞌan ndo chiꞌin Ndioo: ta nani ora jànini ndo ta ndàkan ndo nuu ra ña na kutaꞌan ma Tati Ií ra chiꞌin ndo ora kàꞌan ndo yi chiꞌin ra. Na koo yati vaꞌa ndo, ta koto jäña ndo ña kàꞌan ndo chiꞌin Ndioo. Ta na kaꞌan ndo chiꞌin Ndioo chaꞌaꞌ ma ñivi chìnuni ma ña kàꞌan ra ndia.
\v 19 Na kaꞌan ndo chiꞌin Ndioo chaꞌi ndia, ikan na kuꞌva ra nui ma kua kùu kaꞌin, ikan na töve yuꞌvi̱ katituꞌin ma tuꞌun ña ìyo xeꞌe niku chaꞌaꞌ Jesucristu.
\v 20 Ndioo kùu ma ra tāchi yuꞌu ña na katituꞌin ma tuꞌun iꞌya nuu ndo, ta chaꞌaꞌ yakan kuu yi ña indii̱ ma tichi vekaa vitin. Yakan va na kaꞌan ndo chiꞌin Ndioo chaꞌi, ikan na töve yuꞌvi̱ katituꞌin yi nuu ma ñivi.
\s Ta ñaꞌa kùu tuꞌun nuu ndiꞌinia ña tàa Paulu nuu ñivi ìyo ñuu Efesu
\p
\v 21 Ta tàchi̱ ma ra nàni Tíkiku, ra yani yo ña yaꞌa kùuni̱ ndeꞌi, ra vaꞌa jàꞌa tiñu kuenda ma Rachaꞌnu, ikan na katituꞌun ra nuu ndo ma naja kua taꞌin ta niyi kùu ma ña jàꞌi ndia.
\v 22 Yakan va tàchi̱ ra nuu ndo, ikan na katituꞌun ra yi nuu ndo, ikan na kuu jandomani ra ndo.
\v 23 ¡Ma Ndioo, ra kùu Tatá yo, chiꞌin ma Rachaꞌnu Jesucristu, na kuꞌva ra ña na koo vii ndo! ¡Ta na kuꞌva ra ma tundeeni ra nuu ndo, ikan na chìnuni vaꞌa ndo tuꞌun ra, ta kuuni ndo ndeꞌe ndo taꞌan ndo!
\v 24 Ta na koso ra ma ñamani ra chata ndo tandiꞌi ndyoꞌo ndian kùuni ndeꞌe ma Rachaꞌnu Jesuu. Ta takan töve jaña yo ma ña kùuni yo ndeꞌo ra endeeni. Ta takan na kuu yi. Amén.