\id PHP
\h Tutu Filipu
\toc1 Tutu Filipu
\mt Tutu tāchi rachaꞌnu Paulu nuu ñivi chìnuni tuꞌun Jesuu ìyo ñuu Filipu
\c 1
\s Paulu chiꞌin Timoteu tàchi ndra tutu nuu ñivi ìyo ñuu Filipu
\p
\v 1 Paulu chiꞌin Timoteu, ndra jàꞌa tiñu kuenda Jesuu Cristu, tàa ndi ma tutu iꞌya kuenda ndyoꞌo, ndian kùu ma ñivi Ndioo ìyo ñuu Filipu, ndian indukuni kùu chiꞌin ma Rachaꞌnu Jesuu. Ta juuni tāchi ndi yi kuenda ndyoꞌo, ndra kuxini chiꞌin ndian jàꞌa kuenda ndian chìnuni tuꞌun Jesuu.
\v 2 Ma Rachaꞌnu Ndioo ra kùu Tatá yo chiꞌin ma Rachaꞌnu Jesuu, na kuꞌva ra ma ñamani ra chata ndo, ta na koo taxiin ma anima ndo jàꞌa ra ndia.
\s Kàꞌan Paulu chiꞌin Ndioo chaꞌaꞌ ma ndian chìnuni
\p
\v 3 Nani ora chàkuꞌuni̱ ndo, chàꞌi taꞌvindioo nuu ma Ndioo yo chaꞌaꞌ ndo.
\v 4 Ta nani chaꞌaꞌ ora kàꞌin chiꞌin ra chaꞌaꞌ ndo, yaꞌa chìsii̱ ora jàꞌi yi,
\v 5 vati indukuni kùtaꞌan ndo chiꞌi̱n ma tiñu kuenda Ndioo ña jànaꞌa yo ma tuꞌun vaꞌa ra nuu ma ñivi, nda ma kivi nunuu ta nda vitin.
\v 6 Chìto vaꞌi ña ma Ndioo, ra kīchaꞌa jàꞌa ma tiñu vaꞌa tichi anima ndo, endeeni jàtiñu vaꞌa ra chiꞌin ndo nda kati jachinu ra yi, nda keta ma kivi ña ni chikoniꞌi ndiko ma Jesuu.
\v 7 Yaꞌa ga ndaa kùu yi kuendai tuva chànini̱ ma teꞌen chaꞌaꞌ tandiꞌi ndo, vati yaꞌa ga vaꞌa kùuni ndeꞌi ndo, ti juuni indukuni kùtaꞌan ndo chiꞌi̱n chiꞌin ña kàtituꞌun ndo ma ñamani Ndioo, vaji indii̱ tichi vekaa a kaꞌin chaꞌaꞌ tuꞌun Cristu nuu ñivi chàꞌnda tiñu ñuu ña tuꞌun ndicha kùu yi, ta kùu yi ma ña sàma anima yo jàꞌa yi.
\v 8 Vati Ndioo kùu ma ra chìto vaꞌa ma naja yaꞌa kùuni̱ ndeꞌi ndisaa ndo, vati ndicha kuii kuuni̱ ndeꞌi ndo indukuni takua kùuni ma Rachaꞌnu Jesucristu ndeꞌe ra ndo ndia.
\p
\v 9 Chìkain ñamani nuu Ndioo ma ora kàꞌin chiꞌin ra ña na jaꞌa ra ña na kuuni ga kuaꞌaꞌ ga ndo ndeꞌe ndo taꞌan ndo, ta na koo ga ma chinituni ndo ta na kutunini vaꞌa ga ndo ndisaa nakuyi,
\v 10 ikan na kutuꞌva kachin ndo jaꞌa ndo mamaa ña vaꞌa. Ta takan kachin na kuu ndo, ta nïꞌiin ñivi na küu tisokuati ndo ndia, nda kati na chikoniꞌi ndiko ma Jesuu,
\v 11 vati ndyoꞌo chiꞌin tundeeni ma Jesuu cha chāꞌnu anima ndo kuenda ña jaꞌa ndo mamaa ña vaꞌa, ta chaꞌaꞌ yakan jànaꞌa yi ña yaꞌa iñuꞌu ta kaꞌnu kùu ma Rachaꞌnu Ndioo.
\s Nuu kàꞌan Paulu takua kùuni ra koo ra kuenda Cristu
\p
\v 12 Ndyoꞌo yani, kùuni̱ ña koto ndo ña ndisaa kuii ma ña tàꞌin ña ndèꞌi tundoꞌo tichi vekaa, vàchi tindee ndicha kuii yi ña na kuita kuati tiá kuaꞌaꞌ ma tuꞌun chaꞌaꞌ Jesucristu ña jànaꞌa yo.
\v 13 Vati tandiꞌi ma ndra jandaru, ndra kùmi vetiñu chiꞌin kuaꞌaꞌ tiaga ñivi, chìto na ña indii̱ ma tichi vekaa chaꞌaꞌ ña chìnuni̱ tuꞌun Jesucristu.
\v 14 Ta ora ndeꞌe ndian chìnuni tuꞌun ra ña indii̱ ma tichi ma vekaa, nduvaꞌa kuaꞌaꞌ na cha kùuni ga na janaꞌa na ma tuꞌun Ndioo nuu ma ñivi, ta na tükuii yuꞌvi na, ta chiꞌin tiaga ndatu kàtituꞌun na nuu ma ñivi chaꞌaꞌ ma Jesuu.
\p
\v 15 Ndicha vaꞌa ña ìyo uvi uni ndian kàꞌan chaꞌaꞌ ma Jesuu, va chaꞌaꞌ ña xàani na ta yaꞌa tixin na ndèꞌe na yuꞌu, va ma inga na vii kàꞌan na chaꞌaꞌ ma Jesuu ta kùuni na ndeꞌe na ra.
\v 16 Ìyo ndian kàꞌan chaꞌaꞌ ma Jesuu va chiꞌin ña nduvaꞌa kuii kùuni na ndeꞌe na yuꞌu, vati chìto na ña Ndioo kùu ma ra chàꞌa ma tiñu iꞌya nui ña na katituꞌin ma tuꞌun vaꞌa ña kàꞌan chaꞌaꞌ Jesuu.
\v 17 Ta ìyo inga ndian kàꞌan na ña kùu ma ña kùuni maa na, ta töve vaꞌa chànini na chiꞌin anima na ora kàꞌan na, vati kùuni na ña na kosoi tiaga kuati vitin ña cha indii̱ tichi vekaa iꞌya.
\v 18 Vaji takan jàꞌa na, na küa tuva takan. Vaji ndava nikuuni kùu yi, chiꞌin ña vaꞌa chànini na a töve, ña kàꞌan na chaꞌaꞌ Jesuu; chìsii̱, vaji takan kùu yi. Ta tiaga ni sii kùuni̱,
\v 19 vati chìto vaꞌi ña tandiꞌi ma ña tàꞌan chiꞌi̱n iꞌya nuu indii̱ tichi vekaa iin ña ni jaꞌa yi ña ni keta vaꞌi chaꞌaꞌ ña kàꞌan ndo chiꞌin Ndioo chaꞌi chiꞌin chaꞌaꞌ ña tìndee ma Tati Ií ma Jesuu Cristu yuꞌu.
\v 20 Vati yuꞌu, vaꞌa kuuni̱ ta ndàtui ña töve kùkanui ña kaꞌin tuꞌun Cristu nuu ñivi. Va vaꞌaga tu kaꞌin chiꞌin tundeeni ra ta takan kuu jakaꞌnui ra chiꞌin ndisaa ma ñandei ìyo kuñui, vaji tu juuni ìyo nditogai a tüvi.
\v 21 Vati tu kindoo nditogai va kuenda Cristu ni koi, ta kùu yi iin ña vaꞌa kuendai, va tu kuvi̱, tiaga vaꞌa kùu yi.
\v 22 Vati tu ìyo nditogai ma ñuñivi iꞌya kuu jaꞌi tiaga ma tiñu vaꞌa kuenda ma Rachaꞌnu Jesuu. Yakan va na töve chìtoi ndava kùu ma ña vaꞌa ña kùu kachi̱n.
\v 23 Yaꞌa ga ndetiñu kùu yi kuendai ma ninduvi ma ña takan: iin chiyo, ndava kùuni kuvi̱, ikan na kuu kuꞌin koi chiꞌin Jesuu, vati yakan kùu yi iin ma ña vaꞌa nduvaꞌa kuii kuendai,
\v 24 va ma inga chiyo vaꞌa ga kùu yi kuenda ndo ña na koo nditoi ñuñivi iꞌya.
\v 25 Ta chaꞌa yakan kùu yi ña chìto vaꞌi ña ni kindoi chiꞌin ndo, ikan na kutaꞌin chiꞌin ndo, ta takan kuu keta ndo itiꞌ nuu, ta ikan na kusii ga ndo chiꞌin ma ña chìnuni ndo ndia,
\v 26 ikan na sii tiaga kuuni ndo jaꞌa yi ña na jakaꞌnu ndo Jesucristu ora ni ndeꞌe ndo yuꞌu inga chaꞌaꞌ.
\s Na koo yo takua kaꞌan tuꞌun vaꞌa Jesucristu
\p
\v 27 Ndyoꞌo kùu ndo ma ndian chìnuni tuꞌun Cristu. Yakan va na jaꞌa ndo kuenda nuu ndo ta na koo ndo ma kua kaꞌan ma tuꞌun chaꞌaꞌ ra. Ta yuꞌu tu chai kundeꞌi ndo a töve, kuuni̱ tasoꞌi chaꞌaꞌ ndo ña ìyo tuꞌva ndo chiꞌin ma tuꞌun chaꞌaꞌ Cristu, ta na ndoꞌiin ndo chiꞌin ma tiñu jàꞌa ndo chaꞌaꞌ ma ña chìnuni ndo ma tuꞌun ra.
\v 28 Ta na chïnuni ndo ña jayuꞌvi ma ndian kùuni kuati ndeꞌe na ndo. Ta ñaꞌa kùu iin ma kuꞌva kachin ña ma ndiakan kuàꞌan na ma itiꞌ ni kuvi na, ta iin tiempuni juuni kùu yi iin kuꞌva ña ni kakú maa ndo. Ta ma tuꞌun iꞌya vàchi yi kuenda Ndioo.
\v 29 Vati chaꞌaꞌ ma Jesuu, töve uvanuu ña chinuni yo tuꞌun ra kùu yi ña kuu koo vaꞌa yo, ti juuni chāꞌa Ndioo ña na ndeꞌo tundoꞌo chaꞌaꞌ ra ndia.
\v 30 Ndyoꞌo chiꞌin yuꞌu indukuni ndèꞌo tundoꞌo chaꞌaꞌ Jesuu. Ta nīꞌi ndo tuꞌun naja kua cha ndēꞌi tundoꞌo, ta vitin juuni chìto ndo ña chàꞌa ndo kuenda ña ndeꞌegai tundoꞌo ndia.
\c 2
\s Na koo yo kua ìyo Jesucristu
\p
\v 1 Yakan va tu cha ìyo tundeeni Cristu chiꞌin ndo kuenda jàndomani ndo taꞌan ndo, ta tu ndòmani ndo jàꞌa ra chaꞌaꞌ ma ña yaꞌa ga kùuni ra ndeꞌe ra ndo, ta tu ìyo Tati Ií Ndioo chiꞌin ndo, ta tu nàkoto ndo nda chaꞌaꞌ kùu ña yaꞌa ga uꞌvini ma Ndioo ndeꞌe ra ndo chiꞌin chaꞌaꞌ ña yaꞌa ga kùndaꞌvini ra ndo,
\v 2 tu takan ìyo ndo, nduvaꞌa kuii sii ni kuuni̱, tuva vii vaꞌa ìyo tandiꞌi ndo, ta ndoꞌiin tandiꞌi ndo chiꞌin chaꞌaꞌ ma ña nduvaꞌa kuii kùuni ndo ndeꞌe ndo taꞌan ndo, chiꞌin iin ni ma ña kua chànini ndo, ta iin nuu ni ma ña chànini ndo jaꞌa ndo.
\v 3 Na jäꞌa ndo nïꞌiin nakuyi tuva yaꞌa ga tixin kùuni ndo a tu yaꞌa ga tayi kùuni ndo ndia. Vaꞌa ga tu ni jaꞌa ndo iin nakuyi, na jaꞌa ndo yi chiꞌin anima vita ndo, ta ma taꞌiiꞌiin ndo na tiñuꞌu ndo ma inga na ña iin ndian vaꞌa ga kùu na kua maa ndo.
\v 4 Ta na nänduku ndo ma ña vaꞌa kùuni maa ndo, vati na kutuꞌun ndo nanduku ndo ma ña vaꞌa kuenda ma iiꞌiin inga na ndia.
\p
\v 5 Na indukuni nakanini ndo ma takua nākanini ma Jesuu niku.
\v 6 Vati ma Jesuu, vaji Ndioo kùu ra, töve nī chikan ra nuu Ndioo ña na kuu ra indukuni ma takua kùu ra.
\v 7 Vati jāchiyo ra ra takua kùu ra niku, ta kīꞌin kuenda ga ra ña kùu ra iin ra jàꞌa tiñu takua kùu iin musu, ta kāku ra takua kàku ndisaa yo ñuñivi iꞌya.
\v 8 Ta ora cha ndākuu ra takua kùu maa yo tajan jākundaꞌvini ra juuni maa ra, ta jāchiꞌin ra tandiꞌi ña kàꞌan Ndioo, nda kati chāꞌa ra ña na kuvi ra nuu kruu.
\v 9 Yakan va Ndioo jākaꞌnu ra ra ta chāꞌa ra iin tiñu kaꞌnuga nuu ra, ta nīꞌi ra iin ma tiñu ta iin sivi kaꞌnuga kua tandiꞌi ma sivi ña ìyo.
\v 10 Yakan va ora kuni na ma sivi ma Jesuu ìyo yi ña kunandi chiti ma tandiꞌi ma ndian ìyo andivi, chiꞌin ndian ìyo ma ñuñivi iꞌya, chiꞌin ndian cha chīꞌí ndia,
\v 11 ta tandiꞌi na na nakoto na ña Jesuu kùu ma Rachaꞌnu chitoꞌo na, ta na katituꞌun na ña takan kùu ra. Ta takan ni tiñuꞌu na ma Rachaꞌnu Ndioo, ra kùu Tatá.
\s Ma ndian chìnuni tuꞌun Jesuu kùu na takua kùu ma ñuꞌú ña jàtuun ma andivi
\p
\v 12 Yakan va ndyoꞌo yani ndian nduvaꞌa kuii kùuni ndeꞌi, va takua ndyoꞌo nani ora, ora ìyoi chiꞌin ndo jāchiꞌin ndo ma ña kàꞌin, yakan va na jachiꞌin ndo tiaga ma ña kàꞌin ma vitin ña yaꞌa ga chika ìyoi. Ta na kuàtiñu ndo jànaꞌa ndo, ti ndicha kuii kùu ndo ndian cha kākú. Va na tiñuꞌu ndo Ndioo ora jàꞌa ndo yi,
\v 13 vati Ndioo jàketa ra ña nakanini ndo jaꞌa ndo ma ña vaꞌa ta juuni rakan tindee ra ndo ña na jachiꞌin ndo ta jaꞌa ndo tandiꞌi ma ña kùuni ra.
\p
\v 14 Töve kaꞌan xaan ndo a kanitaꞌan yuꞌu ndo, ora jàꞌa ndo nda ña nikuuni ña jàꞌa ndo,
\v 15 ikan nïꞌiin ma ñivi na küu tisokuati ndo ti töve ìyo kuati ndo. Ta takan na kuu ndo ndian seꞌe Ndioo chiꞌin nïꞌiin kuati ma tañu ma ñivi töve vaꞌa jàꞌa chiꞌin ndian yaꞌa ga ìyo kuati ñuñivi iꞌya. Vati ma tañu ma ñivi ñuñivi iꞌya kùu ndo ndian yaꞌa tacha ma takua tacha ma chele ma nuu ma ñuñivi nduvaꞌa kuii naa.
\v 16 Ta janaꞌa ndo ma tuꞌun ña kàꞌan chaꞌaꞌ naja kua kuu koo vaꞌa yo, ikan ora keta ma kivi ña na kichaa ndiko ma Jesuu, ma ñuñivi iꞌya, ndava vaꞌa kùuni̱ chaꞌaꞌ ma ña jàꞌa ndo, vati cha chìto vaꞌi ti ndisaa tiñu jàꞌi ti töve ni jaꞌa kaꞌa ni̱ yi.
\v 17 Vaji ni ndeꞌi tundoꞌo nda kati kuvi̱ ta kùi takua kùu iin ña sokó yo nuu Ndioo chaꞌaꞌ ma ña katituꞌin ma tuꞌun chaꞌaꞌ Cristu nuu ndo indukuni takua ma ña chìnuni ndo ma tuꞌun ra kùu yi iin ña sokó ndo nuu ra ndia. Ta vaji takan kùu yi, va yuꞌu chìsii̱, ta kutaꞌin ña juuni chisii̱ chiꞌin ndo ndia.
\v 18 Ta ndyoꞌo na kichi sii kuuni ndo ndia, ta na kutaꞌan ndo chaꞌaꞌ ma ña chìsii̱ ndia.
\s Tàchi Paulu ma Timoteu chiꞌin Epafroditu ñuu Efesu
\p
\v 19 Yakan va ndàtui ña na kuꞌva ma Rachaꞌnu Jesuu ña na kuu tachi̱ numini ma Timoteu nuu ndo, ikan na nduvaꞌa kuii kichi sii kuuni̱ ora niꞌi̱ ma tuꞌun chaꞌaꞌ ndo.
\v 20 Vati töve nàtaꞌin nïꞌiin ma inga ndian chànini takua chànini yuꞌu, uvanuu Timoteu kùu ra ña chànini ra takan, ti nàkanini ndicha kuii ra chaꞌaꞌ ma ña vaꞌa kuenda ndo.
\v 21 Vati tandiꞌi tiaga na nànduku na ma ña kùuni maa na, va na töve nànduku na ma ña kùuni Jesuu ña na jaꞌa na.
\v 22 Va ndyoꞌo cha chìto vaꞌa ndo ma tiñu vaꞌa ña jàꞌa ma Timoteu chiꞌi̱n ña kàtituꞌun ra nuu ma ñivi ma tuꞌun ña kàꞌan chaꞌaꞌ ña ni kakú yo, ta tìndee ra yuꞌu ma takua kùu iin seꞌi.
\v 23 Yakan va ndàtui ña ni tachi̱ ra nda ora ña ndeꞌe jiꞌnai ma naja kua kuàndita ma ña taꞌin,
\v 24 vaji chìnuni̱ ña ma Rachaꞌnu ni kuꞌva ra ña na numini kuu kundeꞌi ndo ndia.
\p
\v 25 Ta vitin chànini̱ jachikokani̱ ndikoi ma ra yani yo Epafroditu nuu ndo, ma ra kùu merui, ma ra jàꞌa tiñu indukuni chiꞌi̱n, takua jàtiñu iin ra jandaru. Ta rakan kùu ma ra tāchi juuni maa ndo nui, ikan na jaꞌa ra ma tiñu ña chìniñuꞌi.
\v 26 Yaꞌa ga kùuni ra kundeꞌe ra ndo, ta yaꞌa ga nàkanini ra chaꞌaꞌ ndo vati chìto ndo ña kuꞌvi ra.
\v 27 Ta ndicha kuii ña kuꞌvi ra niku, ta ndava chani kuvi kuii ra niku, va ma Ndioo kūndaꞌvini ra ra, va na töve uvaa rakan ti nda yuꞌu ndia, ikan na töve nduvaꞌa kuii ndaꞌvi kuuni̱.
\v 28 Yakan va yaꞌa ga kunumi ña ni tachi̱ ra nuu ndo, ikan na kichi sii kuuni ndo na ndeꞌe ndo ra inga chaꞌaꞌ, ta juuni ikan na töve ndaꞌvi kùuni̱ chaꞌaꞌ ndo ndia.
\v 29 Ora chaa ra ma nuu ndo na sii kuuni ndo ndeꞌe ndo ra, ma takua kùu iin yani ndo chaꞌaꞌ ma Rachaꞌnu Jesuu, ta na tiñuꞌu nduvaꞌa kuii ndo ra chiꞌin ma ndian kùu takua kùu ra,
\v 30 vati chani kuvi kuii ra niku chaꞌaꞌ ña jàꞌa ra tiñu kuenda ma Jesuu. Ta chani kuvi kuii ra chaꞌaꞌ ña chàꞌa ra tuꞌun ña jàꞌa ra ma tiñu kuendai, ta ndyoꞌo ña küu jaꞌa ndo ma tiñu chiniñuꞌi niku.
\c 3
\s Ma ña ndicha vaꞌaga kùu yi ña nakoto yo ma Rachaꞌnu Jesucristu
\p
\v 1 Ta vitin ndyoꞌo yani, na sii kuuni ndo ndeꞌe ndo ma ña jàꞌa ma Rachaꞌnu Jesuu. Ta kuendai na töve kayuni tuva nunuuni nunuuni kàꞌin ma ña cha tāi, vati kuenda ndo yaꞌa ga chìniñuꞌu ndo yi.
\v 2 Na kumi kuenda vaꞌa ndo ndo chiꞌin ma ñivi yaꞌa xaani ndeꞌe na yo, kùu ndian takua kùu ma ina, chiꞌin ma ndian jàꞌa ña töve vaꞌa chiꞌin ma ndian chàꞌnda kuatí na ma kuñu yo, ti kàti na ña ìyo yi ña koo iin kuꞌva ma nuu ika kuñu yo kuenda ña na kakú yo chiꞌin Ndioo.
\v 3 Vati ma kuꞌva ña ndicha vaꞌa ña chanaꞌa ìyo yo kuenda Ndioo kùu ma ña jàkaꞌnu yo ra chiꞌin Tati Ií ra ña ìyo tichi anima yo, ta chiꞌin ña yaꞌa sii kuuni yo chaꞌaꞌ ña ñivi kuenda Jesucristu kùu yo. Töve ìyo yi ña nanduku yo ña tàꞌnda ñii nuu ika yo a inga nakuyi ña jàꞌa ma ñivini kuenda koo vaꞌa yo nuu Ndioo, takan chànini ndiakan.
\v 4 Tu chìnunio ña ndicha kùu yi ña kindoo vaꞌa yo chiꞌin Ndioo chaꞌaꞌ ma ña jàꞌa maa yo, va tüvi inga yo kindoo vaꞌaga nuu ra takua kindoo mai tuva takan.
\v 5 Vati yuꞌu juuni chàndaka na ña na kaꞌnda ma sutu ñii̱ nuu ikai ma ora já kētai una kivini ña kākui niku. Ta ñivi ndian ñuu Israel kùi, ta tata Benjamín kùi ndia. Juuni tandiꞌi tata nuu kīchi̱ kùu na nda vitin ndian Hebreu. Ta kuenda ña kàꞌan yo ña ra jàchinu ma tuꞌun ley Ndioo tāa Moisés, kùu kaꞌin ña juuni kùi iin ra fariseu.
\v 6 Yaꞌa ga kùuni̱ jachinui ma tuꞌun Ndioo, yakan va chākunui jàndeꞌi tundoꞌo chata ma ndian chìnuni tuꞌun Jesucristu niku, ti chànini̱ ña töve vaꞌa jàꞌa na niku. Ta chaꞌaꞌ ña jākui ma ña kàꞌan ma ley Ndioo, nïꞌiin ma ñivi na töve kùu tisokuati na yuꞌu, ti iin ra ndaa kùi kuenda jàchinui ma ley Ndioo.
\p
\v 7 Va tandiꞌi ma ñaꞌa yaꞌa ga vaꞌa kùu yi kuendai niku, va vitin chìto vaꞌi ña tüvi nda kuenda yi, uvanuu ña na nakotoi Jesucristu ìyo kuenda.
\v 8 Ta tandiꞌi ña kīꞌi̱n kuendai niku ña ìyo ñuñivi iꞌya tüva chiniñuꞌi yi. Vati vitin uvaa ña kaꞌnu kuendai kùu yi ña tandikui kuàꞌin chata ma Rachaꞌnu Jesuu. Ta chaꞌaꞌ Jesuu kùu yi ña nāa tandiꞌi nakuyi, ta ndisaa kuii nakuyi ndèꞌi yi takua kùu iin ma chaꞌan ni, chaꞌaꞌ ña yaꞌa kùuni ndeꞌi Jesuu. Ta kùuni chai nakotogai ra tiaga,
\v 9 ta na chai koi indukuni chiꞌin ra. Na töve nàndukui ña kui iin ra ndaa jàꞌa ña jàchiꞌi̱n ma ley ndian judíu, vati nàndukui kùi iin ra ndaa chaꞌaꞌ ña chìnuni ña jāꞌa Jesuu chaꞌi. Ma ña kùuni̱ kaꞌin kùu yi ña na kùu yo ndian ndaa jàꞌa Ndioo chaꞌaꞌ ma ña chìnuni yo tuꞌun Jesuu.
\v 10 Va ma ña kùuni̱ kùu ña nakotoi ma Jesuu, ta kùuni kotoi ma ndatu ma takua nātaku ra niku, ta kùuni ndeꞌi ma tundoꞌo takua ndēꞌe ra tundoꞌo, vaji tu kuvi̱ indukuni takua chīꞌí ra ndia,
\v 11 vati ndàtui ña Ndioo ni janataku ndiko ra yuꞌu tañu ndian chīꞌí.
\s Kumani tiaga chaa yo ma nuu kùuni yo chaa yo
\p
\v 12 Na töve kùuni kaꞌin ña cha nīꞌi̱ ma tandiꞌi nakuyi ña ìyo yi ña niꞌo nuu Jesucristu, ta na töve kùuni kaꞌin ña iin ra ndaa nduvaꞌa kuii kùi ndia, va juuni ndàtui itiꞌ nuu, ta jàtiñui chiꞌin ndisaa animai, ña kùuni jakanai ra takua cha jākanaa ra yuꞌu kuenda ra.
\v 13 Na töve kàꞌin ña juuni mai kùu iin ra ña cha jākanai ma nuu ni koi itiꞌ nuu, ta ma ña jàꞌa ndicha kuii̱ kùu ña na naani̱ ma ña cha kīndoo itiꞌ chata, ta jatiñui chaꞌaꞌ ma ña vàchi itiꞌ nuu,
\v 14 ikan na chai ta kùu jakanai ndisaa ña vaꞌa ña ìyo andivi, vati Ndioo kāna ra yo, ikan na ndakiꞌo yi jaꞌa Jesucristu.
\p
\v 15 Tandiꞌi yo takani cha chìnuni ma ña kàꞌan Ndioo. Ìyo yi ña nakanini yo ma takani ta na töve sàma yo yi. Tu ìyo nda ndyoꞌo siin chànini ndo ma chaꞌaꞌ nakuyi, juuni ni kuꞌva ma Ndioo ña na koto ndo ma ña vaꞌa chiꞌin ña töve vaꞌa.
\v 16 Yakan va vitin ndicha kuii ìyo yi ña koo yo ma takua takani ìyo yo niku chiꞌin ma ña cha nīꞌo.
\p
\v 17 Ndyoꞌo yani, na jaꞌa ndo ma takua jàꞌi, ta na jaꞌa vaꞌa ndo kuenda ma takua ìyo ma ndian jàꞌa takua jànaꞌa ndi chiꞌin ma ña takani jàꞌa ndi.
\v 18 Yaꞌa ga kuaꞌaꞌ chaꞌaꞌ kāꞌin chiꞌin ndo, ta nda vitin chiꞌin takuii tinui chàkui ña kàꞌan tukui nuu ndo ña ìyo kuaꞌaꞌ ñivi ña töve chìnuni na ma ña ndaa chaꞌaꞌ ña chīꞌí Jesuu nuu kruu kuenda yo niku.
\v 19 Ta ndiakan ni naa na chaꞌaꞌ ma ña töve chìnuni na. Ta ndisaa tiempu nànduku na ma ña kùuni maa na. Ndian cha ndākuu kini ta yaꞌa ga itiꞌ kùuni na, yakan va tüva kukanuu na chaꞌaꞌ ña jàꞌa na. Ta uvani chaꞌaꞌ tandiꞌi ma ña ìyo ma ñuñivi iꞌya titunini na.
\v 20 Va kuenda maa yo ma ñuu ndicha yo kùu ma andivi, ti ni koo yo tikan chiꞌin Ndioo. Ta juuni andivi ni kichi ndiko ma Rachaꞌnu Jesucristu ra ni jakakú yo. Ta kuenda rakan ndàtu yo chiꞌin ndisaa anima yo nani kivi.
\v 21 Ta rakan kùu ra ni sama ra ma kuñu yo ña yaꞌa ga ndaꞌvi kùu yi, ikan na kuu yi takua kùu ma kuñu ma Jesuu ña yaꞌa ga vii kàa yi ta tacha yi. Ta ni jaꞌa ra yi chiꞌin ma ndatu ra ña kuàtiñu ra ña kaꞌnda yi tiñu nuu ma tandiꞌi nakuyi.
\c 4
\s Na kusii vaꞌa kuuni̱ ña ndōꞌiin ndo chiꞌin Jesuu
\p
\v 1 Yakan va ndyoꞌo yani, ndian yaꞌa ga kùuni̱ ndeꞌi, ndian yaꞌa ga kùuni̱ kundeꞌi, ndian chìnuni ma ña kàꞌin ndian jàꞌa ña yaꞌa ga chìsii̱ ta tayi kùuni̱ chaꞌaꞌ ndo, na koo vaꞌa ndo, ta na töve ndakoo ndo ña chìnuni ndo ma tuꞌun Rachaꞌnu Jesuu.
\v 2 Jànini̱ ma ña nàni Evodia chiꞌin ma ña nàni Síntique na jandoꞌiin tuꞌun vi chaꞌa ña kùu vi ma iin taꞌan vi chaꞌaꞌ ña chìnuni vi ma tuꞌun Jesuu.
\v 3 Ta yoꞌo yani, ra yaꞌa ga vaꞌa kùu merui, ra jàtiñu indukuni chiꞌi̱n, chìkain ñamani nuu̱n ña na tindeun vi, vati jātiñu vi indukuni chiꞌi̱n ma ora chàkuu ndi kàtituꞌun ndi ma tuꞌun vaꞌa chaꞌaꞌ Cristu nuu ma ñivi niku, indukuni chiꞌin ma Clemente chiꞌin ma inga tiaga ma ndra jàtiñu chiꞌi̱n. Vati cha ìyo ma sivi ndo nuu ma tutu ña kàꞌan nda ñivi ni koo na chiꞌin Ndioo endeeni.
\v 4 Yakan va na sii vaꞌa kuuni ndo ña ìyo ndo chiꞌin Jesuu. Ta jàkukuꞌuni ndikoi ndo, na sii kuuni ndo.
\v 5 Ta na tandiꞌi ma ñivi na nakoto na ndo takua kùu iin ndian nduvaꞌa kuii vaꞌa ta yaꞌa iñuꞌu, vati ma Rachaꞌnu Jesuu chani kuyatin kichaa ra inga chaꞌaꞌ.
\v 6 Koto kütuꞌun ndo chaꞌaꞌ nïꞌiin nakuyi, vati ndisaa tiempu, na ndakan ndo ña chìniñuꞌu ndo nuu Ndioo ora kàꞌan ndo chiꞌin ra, ta kuꞌva ndo taꞌvindioo nuu ra ndia.
\v 7 Takan ìyo yi ña jaꞌa ndo, ikan na kuꞌva Ndioo ña na koo ma tundeeni ra chiꞌin ndo. Ta ma tundeeni ikan nduvaꞌa kaꞌnu yi ña ni küu kutunini yo ndisaa yi. Yakan kùu yi ña kùmi yi ma anima yo chiꞌin chinituni yo chaꞌaꞌ ña cha ndōꞌiin yo chiꞌin Cristu Jesuu.
\s Na nakanini ndo chaꞌaꞌ tandiꞌi ma ña vaꞌa
\p
\v 8 Chaꞌaꞌ nuu ndiꞌi nia jàkukuꞌuni̱ ndo, ndyoꞌo yani, ña na nakanini ndo chaꞌaꞌ ma ña ndicha ta ma ña iñuꞌu, ta na nakanini ndo chaꞌaꞌ ma ña ndaa chiꞌin ña vaꞌa, ta na nakanini ndo chaꞌaꞌ ma ña nduvaꞌa kuii kùuni ma ñivi ndeꞌe na. Ndisaa ñaꞌa ìyo yi ña jakaꞌnu ndo yi.
\v 9 Na jakuaꞌa ndo ta jachinu vaꞌa ndo tandiꞌi ña jānaꞌi nuu ndo ña kùu ma tuꞌun ña kāꞌin chiꞌin ndo. Ta yakan kùu ma ña chīni ndo ta ndēꞌe ndo jāꞌi. Yakan va na jakuaꞌa ndo ta jachinu vaꞌa ndo yi, ta takan koo ma Ndioo chiꞌin ndo, ra chàꞌa ña na koo vii anima ndo.
\s Paulu chàꞌa ra taꞌvindioo chaꞌaꞌ ña sòkó ndian chìnuni ñuu Filipu
\p
\v 10 Yaꞌa ga sii kùuni̱ ña ìyoi kuenda ma Rachaꞌnu Jesuu vati ndyoꞌo cha kīchaꞌa ndiko ndo nàkanini ndo chaꞌi. Va na töve kùuni kaꞌin ña ndyoꞌo cha nāani ndo yuꞌu niku, vati kùuni̱ kaꞌin ña ndyoꞌo ña nïꞌiin chaꞌaꞌ takäꞌan kùu tindee ndo yuꞌu.
\v 11 Töve kàꞌin takan ña chìniñuꞌi iin nakuyi, vati cha chìto vaꞌi naja kua chisii̱ chiꞌin ña ìyo nui.
\v 12 Chìtoi koi takua kùuni ma ndian ìyo ndaꞌvi, ta juuni chìtoi koi takua ìyo ma ndian kuika ndia. Cha kūtuꞌvai naja koo vaꞌi chiꞌin ma ninduvi nakuyi, juuni chìtoi ma takua kùuni yo ma ora nduvaꞌa kuii vaꞌa kùuni yo ta chisoko yo ndia, ta juuni chìtoi ma takua kùuni yo ma ora ña ndava chakoso ma nakuyi nuu yo chiꞌin ma ora nïꞌiin nakuyi na töve ìyo nuu yo ndia.
\v 13 Ndisaa kuii ma kuati kùu ndondaa yi, ta ndisaa ña vaꞌa kùu jàꞌi, vati Jesucristu kùu ma ra jàꞌa kuenda yuꞌu ta chàꞌa ra ma ndatu ra nui.
\v 14 Vaji takan kùi, va ndyoꞌo juuni vaꞌa jāꞌa ndo kuendai. Yakan va vaꞌa ni taꞌan jāꞌa ndo ña tīndee ndo yuꞌu ña kundei ma tundoꞌo ña ndèꞌi vitin.
\v 15 Ta ndyoꞌo ndian chìnuni ña ìyo ñuu Filipu cha chìto ndo ña uvaa ndyoꞌoni kùu ndo ma ndian tīndee yuꞌu chiꞌin ña sōkó ndo nui ma ora kīchaꞌi kàtituꞌin ma tuꞌun chaꞌaꞌ Cristu ora kēi ñuꞌuꞌ Macedonia. Nïꞌiin inga ndian chìnuni inga ñuu tīndee na yuꞌu takua jāꞌa ndo chiꞌi̱n.
\v 16 Ta juuni ora ìyoi ma ñuu Tesalónica niku, ta tāchi ndiko ndo ma ña sōkó ndo nui ma ora chīniñuꞌi ma nakuyi. Kuaꞌaꞌ chaꞌaꞌ jāꞌa ndo takan.
\v 17 Na töve ndatui nani ora ma ña sòkó ndo nui, ti ma ña sòkó ndo kuenda Ndioo kùu yi, ta ndàtui ña Ndioo ni tiꞌi ra kuenda yi ta ni ndokuaꞌa yi kuenda ndo.
\v 18 Vati ma ña sōkó ndo nui cha nīꞌi̱ tandiꞌi yi ta ndava chākoso yi nui chiꞌin ma ña tāchi ndo nui chiꞌin ma ra nàni Epafroditu. Ta ma ña tāchi ndo nui kùu yi takua kùu ma xiko kutu ña nduvaꞌa kuii vii chaꞌan ña sōkó ndo nuu Ndioo. Ta yaꞌa chìsii Ndioo chaꞌaꞌ ma ña jàꞌa ndo iin ma ña jàkaꞌnu ndo ra ma takua kùu iin ma ña nduvaꞌa kuii vii chaꞌan kuenda Ndioo.
\v 19 Yakan va ma Rachaꞌnu Ndioo ra tìñuꞌi, ni kuꞌva ra nuu ndo tandiꞌi ma ña chìniñuꞌu ndo, nda chaꞌaꞌ ndisaa ña vaꞌa ta kaꞌnu ña ìyo chiꞌin Jesucristu.
\v 20 Ndicha ña nduvaꞌa kuii kaꞌnu kùu ra kùu Ndioo Tatá yo. Yakan va na jakaꞌnu yo ra endeeni. Ta takan na kuu yi. Amén
\s Tuꞌun nuu ndiꞌi nia ña kàꞌan Paulu
\p
\v 21 Na kañaꞌa ndo chiꞌin tandiꞌi ñivi ìyo ñuu Filipu kuendai, ndian kùu ñivi Ndioo chaꞌaꞌ ña chìnuni na ña jàꞌa Jesuu. Ma ndian kùu yani yo, ndian jàꞌa tiñu indukuni chiꞌi̱n juuni tàchi ndra saludu nuu ndo ndia.
\v 22 Ta juuni tàchi ndian chìnuni tuꞌun Jesuu ìyo ñuu Roma saludu nuu ndo. Ta ma ndian chìnuni ña jàtiñu veꞌe ma ra kùu rey César tàchi na iin saludu kaꞌnu ga nuu ndo ndia.
\p
\v 23 Ta chìkain ñamani nuu ma Rachaꞌnu Jesucristu ña na kuꞌva ra ma ñamani ra chata tandiꞌi ndo. Takan na kuu yi. Amén.