\id COL
\h Tutu Colosa
\toc1 Tutu Colosa
\mt Tutu tāchi rachaꞌnu Paulu nuu ñivi chìnuni tuꞌun Jesuu ìyo ñuu Colosa
\c 1
\s Tàchi Paulu chiꞌin Timoteu iin tutu nuu ñivi ìyo ñuu Colosa
\p
\v 1 Yuꞌu, Paulu, ra kùu tatun Jesuu Cristu ti takan kùuni Ndioo ña na kui, indukuni chiꞌin ma ra yani yo Timoteu,
\v 2 tài ma tutu iꞌya kuenda ndyoꞌo yani ìyo ñuu Colosa, ndian chìnuni tuꞌun Cristu ta kùu ií ndo jàꞌa Ndioo. Ma Ndioo, ra kùu Tatá yo na koso ra ma ñamani ra chata ndo, ta na jaꞌa ra ña na koo taxiin ma anima ndo ndia.
\s Kàꞌan Paulu chiꞌin Ndioo chaꞌaꞌ ma ndian chìnuni ìyo ñuu Colosa
\p
\v 3 Nani ora, ora kàꞌan ndi chiꞌin Ndioo, chàꞌa ndi taꞌvindioo nuu ma ra kùu Tatá ma Rachaꞌnu Jesuu chaꞌaꞌ ndo.
\v 4 Vati cha nīꞌi ndi ma tuꞌun chaꞌaꞌ ndo, ña nduvaꞌa kuii chìnuni ndo ma tuꞌun ma Jesuu ta chiꞌin ma ña nduvaꞌa kuii kùuni ndo ndeꞌe ndo ma ndisaa ñivi ìyo kuenda Ndioo.
\v 5 Chaꞌaꞌ yakan kùu yi ña chìsii ndo chaꞌaꞌ ma ña vaꞌa ndàtu ndo ña ni niꞌi ndo ndaꞌaꞌ Ndioo ora koo ndo chiꞌin ra ma andivi. Vati cha chīni ndo ña takan kàꞌan ma tuꞌun ndaa ña kàꞌan ra.
\v 6 Ma tuꞌun ndaa iꞌya cha chīnu yi nuu ndo, takua kùu ninii ma ñuñivi nuu cha yaꞌa ga kuaꞌaꞌ ma ñivi kuàkutuꞌva na ta kuàkuaꞌnu ma anima na jàꞌa yi, indukuni ma takua kūu chiꞌin ndo ma nda ora ña chīni ndo ta chīto vaꞌa ndo ma tuꞌun ndaa, ña kàꞌan chaꞌaꞌ ma ñamani Ndioo kuenda ndo.
\v 7 Tuꞌun iꞌya kùu ma ña jānaꞌa ma ra Epafra, ra yaꞌa kùunio ndeꞌo, ma ra jàtiñu chiꞌin yo, ta rakan kùu ra jàꞌa iin tiñu vaꞌa ña chāꞌa Jesuu nuu ra kuenda ma ña vaꞌa maa ndo.
\v 8 Epafra kùu ma ra ndaꞌa ma tuꞌun chaꞌaꞌ ndo nuu ndi, chiꞌin chaꞌaꞌ ma ña nduvaꞌa kuii kùuni ndo ndeꞌe ndo ma ñivi taꞌan ndo jàꞌa ma ndatu ña chàꞌa ma Tati Ií Ndioo nuu ndo.
\p
\v 9 Ta chaꞌaꞌ yakan kùu yi ña nda ma ora chīto ndi naja kua cha ìyo ndo, na töve ndàkoo ndi ña kàꞌan ndi chiꞌin Ndioo chaꞌaꞌ ndo, ta chìkan ndi nuu ra ña na kuꞌva ra ña na koto kachin vaꞌa ndo ndisaa kuii ma ña kùuni ra. Vati chàꞌa ma Tati Ií ra ma chinituni ña kùu kutunini ndo kuaꞌaꞌ vaꞌa ndisaa kuii nakuyi.
\v 10 Ta takan juuni kùu koo ndo ma takua kùuni ma Rachaꞌnu Jesuu ña jaꞌa ndo, ti iin ra iñuꞌu kùu ra. Takan ìyo yi ña jaꞌa ndo ma takua chàtaꞌani ra. Ti takan kùu jaꞌa ndo kuaꞌaꞌ nuu tiñu vaꞌa takua kùuni ra, ta ikan na kuu chaa vaꞌa ga ndo ña na nakoto ndo ma Ndioo.
\v 11 Ta juuni takan na kuꞌva ra ma ndatu kaꞌnu chiꞌin tundeeni ra nuu ndo. Ta ikan takan chiꞌin ma tundeeni ikan kùu kundeeni ndo ta kùu koo taxiin ndo ma nuu ñuñivi iꞌya.
\v 12 Ta juuni tu takan jaꞌa ndo, ni koo siini ndo ora kuꞌva ndo taꞌvindioo nuu ma Tatá yo Ndioo. Ta rakan cha jāndondaa ra ndo, ikan na kuu niꞌi ndo ma tundeeni ra ña ni kuꞌva ra nuu ndo, ma ndyoꞌo ndian kùu ñivi ra, ndian chìto kachin vaꞌa ma itiꞌ ra nuu chàꞌnda ra tiñu.
\v 13 Ndioo kùu ma ra jākakú yo ma nuu naa, nuu chàꞌnda ma kuiꞌna tiñu, ta ndākiꞌin ra yo kuàꞌan yo chiꞌin ra ma nuu chàꞌnda ma ra Seꞌe ra tiñu, ra yaꞌa kùuni ra ndeꞌe ra.
\v 14 Ta chaꞌaꞌ nií Jesuu kùu yi ña jàkakú ma Ndioo yo ta jànaa ra ma kuati ña jàꞌa yo.
\s Ndomani ndiko yo kuenda Ndioo chaꞌaꞌ ña chīꞌí ma Jesuu chaꞌaꞌ ma kuatio
\p
\v 15 Ndioo kùu ma ra na küu ndeꞌo, va Jesuu kùu ma xindaꞌvi ra ña kùu ndeꞌo. Ta juuni Jesuu, ra Seꞌe Ndioo, kùu ma ra kaꞌnu ga kua nuu tandiꞌi ña tùvi ma ñuñivi iꞌya.
\v 16 Ta chaꞌaꞌ Jesuu kùu yi, ña jātuvi ma Ndioo tandiꞌi ma ña ìyo ma andivi chiꞌin tandiꞌi ma ña ìyo ma nuu ñuꞌu ñuñivi ndia. Ta juuni jāꞌa ra ña tūvi ma ña kùu ndeꞌo chiꞌin ma ña töve kùu ndeꞌo ndia, indukuni ma takua kùu ma ndian kùu rey, ta ma ndian tati xaan chàꞌnda tiñu, ta tandiꞌi ndian ìyo ndatu ndia. Tandiꞌi yakan, tūvi jāꞌa Ndioo chiꞌin ndaꞌaꞌ Jesuu ta kuenda ra kùu yi ndia.
\v 17 Jiꞌna ga ma Jesuu kùu ma ra ìyo ta yoso nuu ra nuu tandiꞌi nakuyi, ta jāꞌa ra ña ìyo vaꞌa tandiꞌi nakuyi ma ñuñivi iꞌya ndia.
\v 18 Ta juuni Jesuu, kùu xini ma kuñu yo, ta ma ñaꞌa kùuni yi kaꞌan yi ña rakan kùu ma ra kuxini nuu ma ndisaa ndian chìnuni tuꞌun ra. Ta ma ra nunuu, jiꞌna ga ra nātaku ndiko ña chīꞌí ra, ikan na niꞌi ra ma tiñu kaꞌnu ga kua nuu tandiꞌi nakuyi.
\v 19 Vati yaꞌa ga chìsii Rachaꞌnu Ndioo, ti Jesucristu kùu ra indukuni ma takua kùu maa ra.
\v 20 Ta chiꞌin Jesuu, jāꞌa ma Ndioo ña na jandomani ra tandiꞌi nda ña ni kuuni, nda ma ña ìyo ma ñuñivi chiꞌin tandiꞌi ma ña ìyo ma andivi ndia. Ta takan juuni kùu koo vaꞌa na chaꞌaꞌ ma nií ña sōkó ma Jesuu ña chāti ra nuu ma kruu.
\p
\v 21 Ndyoꞌo tajiꞌna niku yaꞌa ga chika ìyo ndo nuu Ndioo, ti töve kùuni ndo ndeꞌe ndo ra ta töve chìnuni ndo ma tuꞌun ra chiꞌin ndisaa ma anima ndo, chaꞌaꞌ ma ña kini jāꞌa ndo niku.
\v 22 Va vitin, cha jāndomani Jesucristu ndo nuu Ndioo chaꞌaꞌ ña sōkó ra kuñu ra nuu Ndioo ora chīꞌí ra. Ta takan jāꞌa ma Jesuu, ikan na kuu ndaka ra ndo nuu nda Ndioo, ikan na kuu ndo ndian ií kuenda ra. Ta nïꞌiin kuati ndo na koo, ta na küu tisokuati na chata ndo nuu Ndioo ndia.
\v 23 Va chaꞌaꞌ ma ñaꞌa ìyo yi ña koo ndaa vaꞌa ndo ta ìyo yi ña chinuni ndo ma ña jàꞌa Ndioo, ta na töve ìyo yi ña kesiin ndo chìnuni ndo ma tuꞌun ra. Ti ma tuꞌun iꞌya cha chīni ndo ta vitin ndàtu ndo ña ni kakú yo. Tuꞌun iꞌya kùu ña cha tākutuꞌun nuu tandiꞌi ma ñuu ìyo ma ñuñivi, ta yuꞌu ra nàni Paulu juuni kāchin Ndioo yuꞌu ña tìndei ña kàtituꞌin ma tuꞌun iꞌya ndia.
\s Paulu, ndiso ra tiñu ña jàꞌa ra tiñu kuenda ndian chinuni tuꞌun Jesuu
\p
\v 24 Vitin ndicha kuii ña yaꞌa ga chìsii̱ ña ndèꞌi ma tundoꞌo chaꞌaꞌ ndo, vati takan kùu ndoꞌii̱n chiꞌin Jesuu ña ndèꞌi tundoꞌo takua tāꞌan ra. Vati maa yo kùu yo takua kùu ma kuñu Jesuu, ta ñaꞌa kùuni yi kaꞌan yi ña kùu yo ma ñivi chìnuni ma tuꞌun ra.
\v 25 Ndioo kùu ma ra jākuiso tiñu iꞌya yuꞌu, ikan na kui iin musu kuenda ña na jaꞌi tiñu kuenda ma ña vaꞌa ndo, ndyoꞌo ndian chìnuni tuꞌun Jesuu. Ta takan kùu jachinui katituꞌin ma tuꞌun ra nuu tandiꞌi ñivi.
\v 26 Ma ña kùuni̱ kaꞌin kùu yi ña ma tuꞌun xeꞌe ña kūmi ma Ndioo niku, cha kuaꞌaꞌ vaꞌa kuiya, ta vitin ja tākutuꞌun yi nuu ndo, ndyoꞌo ndian kùu ñivi ií ra, ndian chìnuni tuꞌun ra.
\v 27 Yakan va jāꞌa ma Ndioo ña na koto ndo ma tuꞌun nduvaꞌa kuii kaꞌnu ikan, ña xeꞌe niku, ndyoꞌo ndian yüvi judíu. Ta ma tuꞌun xeꞌe ikan kùu Jesuu ìyo ma tichi anima ndo. Ta vitin juuni maa ndo ndàtu ndo koo ndo nuu ìyo ra ma andivi ma nuu yaꞌa ga tacha ra.
\p
\v 28 Ndyuꞌu kùu ma ndra kàtituꞌun ma tuꞌun Jesuu nuu ndisaa kuii ñivi, ta chùndayuꞌu ndi na, ta jànaꞌa ndi nuu na chiꞌin kuaꞌaꞌ tandiꞌi chinituni ña chàꞌa Ndioo nuu ndi, ikan na nda janaꞌa ndi na nuu Ndioo chaꞌaꞌ ma ña chìnuni vaꞌa na ma tuꞌun Cristu.
\v 29 Ta chaꞌaꞌ ñaꞌa kùu ña jàtiñu niꞌi vaꞌi ta kàtituꞌin chiꞌin ndisaa kuii ma ña ndei chiꞌin ndatu ña chàꞌa ma Jesuu nui ndia.
\b
\c 2
\p
\v 1 Kùuni̱ ña na koto vaꞌa ndo ña jàtiñu niꞌi vaꞌi chaꞌaꞌ ndo chiꞌin chaꞌaꞌ ma ñivi ìyo ñuu Laodicea chiꞌin chaꞌaꞌ ma ndisaa ndian takäꞌan ndeꞌe yuꞌu.
\v 2 Jàtiñui kuenda ndo, ikan na sii kùuni ndo chiꞌin ma anima ndo, ikan na ndoꞌiin ndo chiꞌin anima ma taꞌan ndo ta kùuni ndo ndeꞌe ndo na ndia. Ta takan na koo kuaꞌaꞌ vaꞌa iin chinituni ndaa vaꞌa, ta na kuꞌva yi ña na kutunini vaꞌa ndo ma tuꞌun xeꞌe ña kūmi ma Ndioo niku, ta juuni ma chaꞌaꞌ Cristu kùu ma tuꞌun xeꞌe ikan.
\v 3 Vati nuu rakan, kùu nataꞌan yo ndisaa kuii ma ña vaꞌa, ti iin ra yaꞌa ga chìto kùu ra ta ìyo kuaꞌaꞌ chinituni ra ndia.
\v 4 Tuꞌun iꞌya kùu ma ña kàtituꞌin nuu ndo, ikan nïꞌiin ma ñivi na küu jandaꞌviñaꞌa ndo chiꞌin tuꞌun vatania.
\v 5 Vaji na töve ìyoi chiꞌin ndo ma tañu ndo, ta na töve ndeꞌe ndo yuꞌu, va nani ora nàkanini chaꞌaꞌ ndo ta yaꞌa ga chìsii̱ ña chàꞌi kuenda ña ìyo vaꞌa ndo chiꞌin ma ñivi. Ta juuni chìsii̱ ña ìyo ndaa vaꞌa ndo chaꞌaꞌ ma ña chìnuni ndo ña jàꞌa ma Jesuu ndia.
\s Kìchaꞌa chàa ndiko ma ñivi ìyo ñuu Colosa ìyo na chiꞌin Jesuu
\p
\v 6 Yakan va takua ndyoꞌo cha kīꞌvi ndo itiꞌ kuàꞌan Jesuu ña kùu ra chitoꞌo yo, ta takan ìyo yi ña tandikun ndo kuꞌun ndo itiꞌ ra, nda vitin a itiꞌ nuu ndia.
\v 7 Na kuꞌun ndaa vaꞌa ndo itiꞌ ra takua kuàꞌan kono vaꞌa iin yoꞌo yutun tichi ñuꞌuꞌ. Ta takan ìyo yi ña kuaꞌnu ndaa vaꞌa ndo chiꞌin ma ña chìnuni ndo chaꞌaꞌ ra, ma takua cha kūtuꞌva ndo. Ta nani kivi ìyo yi ña kuꞌva ndo taꞌvindioo nuu ma Rachaꞌnu Ndioo ndia.
\p
\v 8 Na jaꞌa vaꞌa ndo kuenda nuu ndo. Ta na küꞌva ndo ña na jandaꞌviñaꞌa ma ñivi ndo ndia, chiꞌin ma tuꞌun ña chànini na ña yaꞌa ga ndaa kùu yi, vaji töve takan kùu yi. Vati ndiakan, na töve tìndee na na chiꞌin ma tuꞌun Jesuu, vati tìndee na na va chiꞌin ma tuꞌun ña jànaꞌa naja kua kūu nuu kīchaꞌa ñuñivi iꞌya niku.
\p
\v 9 Vati tandiꞌi ma ña kùu Ndioo, ta juuni takan indii kuñu Jesucristu ndia.
\v 10 Ta ndyoꞌo nïꞌiin ga nakuyi töve kùmani anima ndo, vati ìyo ndaa vaꞌa ndo kuenda ra ña ndòꞌiin ndo chiꞌin ra. Vati rakan, ra kuxini nuu tandiꞌi ña ìyo ndatu ta juuni ra chàꞌnda ma tiñu nuu ma tandiꞌi tati ndia.
\v 11 Ta chaꞌaꞌ ña ndōꞌiin ndo chiꞌin Jesuu ta sāma ndo ma kua ìyo ndo niku, vati kīndaa ma kuati ndo. Va Ndioo na töve nī sama ra yo ma takua jàꞌa ma ndian judíu chiꞌin ndaꞌaꞌ na, ora chàꞌnda na ma ñii nuu ika seꞌe na, vati jàꞌa ra yi va chaꞌaꞌ Jesucristu.
\v 12 Vati ndyoꞌo, ora kūnduta ndo niku, juuni kùu yi takua cha kūchi ndo indukuni chiꞌin Jesuu, ta nātaku ndiko ndo chiꞌin ra ndia, vati chìnuni ndo ma ndatu ña jàꞌa ma Ndioo ña jānataku ndiko ra ma Jesuu tañu ma ndian ndií.
\v 13 Ta ndyoꞌo ma tatiempu niku, kùu ndo takua ma ndian chīꞌí chaꞌaꞌ ma kuati ña jàꞌa ndo, ta chaꞌaꞌ ña na töve nī chiyo ndo takua kùuni Ndioo niku. Va vitin Ndioo, cha jāndochaa ndiko ra ma kua koo ndo, ta jāndoꞌiin ra ndo chiꞌin Cristu, ta chaꞌaꞌ rakan kùu yi ña jānaa Ndioo ma kuati yo.
\v 14 Vati Ndioo cha jānaa ra ma tutu ña tìsokuati chata yo ña kàꞌan yi ña ìyo yi ña koꞌo andayaꞌ chaꞌaꞌ ma kuati yo. Va Ndioo jānaa ra yi chaꞌaꞌ ña chīꞌí Jesuu nuu kruu.
\v 15 Ta chiꞌin Jesuu kùu yi ña nāmaa ra ma ndatu ma kuiꞌna chiꞌin inga tati xaan, ta nduvaꞌa kuii jākukanuu ra na nuu tùvi ñivi, va ndicha kuii ña jākanaa ra na ora chīꞌí ra nuu kruu.
\s Na nanduku ndo ma ña vaꞌa ga ìyo andivi
\p
\v 16 Yakan va na jächiꞌin ndo tuva kàꞌan ma ñivi chata ndo chaꞌaꞌ ma ña chàchi ndo a chìꞌi ndo. Ta juuni na jächiꞌin ndo tuva kàꞌan na chaꞌaꞌ kivi ña jàꞌa ndo iin viko chiꞌin chaꞌaꞌ ma yoo chaa a chaꞌaꞌ ma kivi nindee yo ndia.
\v 17 Tandiꞌi ma ñaꞌa kùu yi takua iin xindaꞌvini ña jànaꞌa yi naja kua ni kuu yi itiꞌ nuu, va ma ña ndaa kùu Cristu.
\v 18 Na küꞌva ndo ña na jakesiin na ndo itiꞌ vaꞌa Ndioo, vaji jàꞌani na ña iin ndian yaꞌa ga vaꞌa kùu na, va jandaꞌvi na na nuu ndeꞌe ñivi, ta jàkaꞌnuni na kuaꞌaꞌ nuu tati, ta kàꞌan na, ti ndèꞌe na ma Ndioo ma tañu ñumaꞌna na, ta ndava jàkaꞌnuni nduvaꞌa kuii na juuni maa na, ta yaꞌa ga tayi kùuni na chaꞌaꞌ ma chinituni na, vaji töve nda kuenda yi.
\v 19 Vati ndiakan, na töve nī ndoꞌiin na chiꞌin ma Cristu ra kuxini, ti kùu ra takua kùu iin xini yo. Ta ma xini yo jàꞌa yi ña kùu kuaꞌnu ma kuñu yo ma ora chàꞌa yo ma ña kachi yi. Ta juuni takan jàꞌa ra ña kuaꞌnu ma ñivi ra, ta jàndoꞌiin ra na ma takua kùuni Ndioo.
\p
\v 20 Va takua ndyoꞌo cha chìnuni ndo ta ndōꞌiin ndo chiꞌin Jesuu. Yakan va kùu ndo ndian cha chīꞌí chiꞌin ra. Ta na tüva chàꞌnda ma ña töve ndicha chàkunuu ma ñuñivi iꞌya tiñu nuu ndo. ¿Ta naja juuni jàchiꞌin ndo ma tuꞌun jànaꞌa ma ndatu xaan ikan, tuva takan? Ta ìyo iin kuꞌva ña kàꞌan teꞌen:
\v 21 “¡Na tïun ñaꞌa! ¡Na kächun yakan, na kïꞌun yakan chiꞌin ndaꞌun!”
\v 22 Tandiꞌi ma kuꞌva iꞌya kùu yi chaꞌaꞌ ma ndatiñu ña ndiꞌi yi ma ora chàtiñu yi, ta ñaꞌa kàꞌan yi chaꞌaꞌ ma ña kùuni na ña na jàꞌa yo, va ña jànaꞌa ñivini kùu yi.
\v 23 Ta ndicha vaꞌa ña ma tuꞌun iꞌya juuni kùu yi iin tuꞌun kaꞌnu nduvaꞌa kuii chànini na, vati ndiakan endee jàkaꞌnu na ma Ndioo, ikan na ndeꞌe ma inga ñivi na, kùuni na. Ta jàꞌani na ña ñivi ndaꞌvi kùu na, ta yaꞌa ga jàndeꞌe na tundoꞌo juuni ma kuñu maa na ndia, ti chànini na ña iin ña vaꞌa kùu yi kuenda Ndioo. Va na tükuii nda kuenda yi. Va tandiꞌi ma ña jàꞌa na, ma ña chàtaꞌani maa kuñuni na kùu yi.
\b
\c 3
\p
\v 1 Yakan va takua ndyoꞌo, cha nātaku ndiko ndo chiꞌin Jesuu, na nanduku ndo ma ña ìyo andivi, ma nuu nàndi ma Jesuu ma chiyo kuaꞌa ma Ndioo ma nuu chàꞌnda ra tiñu.
\v 2 Tüva nakanini kuaꞌaꞌ ndo chaꞌaꞌ ma ña ìyo ma ñuñivi, va chaꞌaꞌ ma ña ìyo andivi na nakanini ndo tiaga kuaꞌaꞌ.
\v 3 Vati Ndioo cha ndīkivaꞌa ra ma naja kua koo ndo endeeni chiꞌin Jesuu, chaꞌaꞌ ña cha ndōꞌiin ndo chiꞌin ra, vati kùu ndo takua kùu ndian cha chīꞌí chiꞌin Jesuu kuenda Ndioo.
\v 4 Ta Jesuu kùu ma ra chàꞌa ña ìyo ndito endeeni ndo. Ma ora ni kichaa ndiko ra ma ñuñivi iꞌya, juuni ni niꞌi ndo ña kuu koo ndo indukuni chiꞌin ra ma nuu chàꞌnda ra tiñu.
\s Naja kua chīyo ma ñivi Ndioo chiꞌin ma naja kua ìyo na ma vitin ndia
\p
\v 5 Na jaña ndo ma ña töve vaꞌa, ña chàtaꞌani ma ñivi ìyo ñuñivi jaꞌa na. Ta nïꞌiin ndo, na töve kiꞌvi ndo chiꞌin ma ñaꞌa töve kùu ñasiꞌi ndo. Ta na jäꞌa ndo iin ña kini. Ta na küꞌun ndo ma itiꞌ yaꞌa ga chàtaꞌani ma kuñu ndo. Ta na nänduku ndo ma ña töve vaꞌa ña kùuni ma anima ndo. Ta na jäkaꞌnu ndo ma xuꞌunꞌ a ndatiñu, koto jaña ndo ña jàkaꞌnu ndo nuu Ndioo.
\v 6 Ta chaꞌaꞌ ma ñaꞌa, ndicha kuii ña ni kichaa iin kivi ña ni ndeꞌe na kuaꞌaꞌ vaꞌa ma tundoꞌo jàꞌa ma Ndioo, ma ndian töve jàchiꞌin ma ña kàꞌan ra.
\v 7 Yakan kùu ma ña jāꞌa ndo ma tatiempu niku, ora chākunuu ndo ma itiꞌ kini.
\v 8 Va vitin na ndakoo ndo ma tandiꞌi ña tuꞌun kini takua kùu ma ña kùxaani ndo, ma ña kàꞌan tiꞌini ndo, ta ma ña jàtiꞌini ndo, chiꞌin ña kàꞌan ndaa ndo, chiꞌin tuꞌun töve vaꞌa ña kee yuꞌu ndo ora kàꞌan ndo ndia.
\v 9 Na töve ìyo yi ña kaꞌan ndo tuꞌun vata chiꞌin ma taꞌan ndo, vati cha sāma ndo jàꞌa Ndioo, ta ndākoo ndo ma itiꞌ chata ma takua jāꞌa ndo niku.
\v 10 Va vitin ndyoꞌo cha kīꞌvi ndo kuàꞌan ndo itiꞌ chaa, ikan na kuu chaa ndo kùu ndo takua kùu ndian chaa, vati Ndioo ra jātuvi ndo, cha kīchaꞌa ra jàꞌa ra ña kuàsama ndo, ikan na kuu ndo ma takua kùu maa ra, ikan na kuu nakoto kachin vaꞌa ndo ra.
\v 11 Na tüva ni kuenda yi, vaji kùu yo ndian griegu a kùu yo ndian judíu, na tüva kuenda a tàꞌnda ñii nuu ika yo, a töve ndia. Ta juuni na tüva na kuenda tuva kichi yo chika a yatin ni, ta tüva na kuenda tuva kùu yo musu a ndian chàꞌnda tiñu ndia. Va uvanuu Cristuni kùu ra ìyo ga kuenda, vati rakan kùu ra kuxini, ta juuni ìyo ra chiꞌin tandiꞌi ñivi ra ndia.
\p
\v 12 Yaꞌa ga kùuni ma Ndioo ndeꞌe ra ndo ta kāchin ra ndo ña na kuu ndo ma ñivi ra, ndian ií jàꞌa ra. Yakan va na sama chaa vaꞌa ndo, ta na kundaꞌvini ndo taꞌan ndo. Ta na tindee ndo na, ta na koo tundeeni ra chiꞌin ndo, ta na koo taxiini ndo, ta na kundeeni ndo ndia.
\v 13 Tuva kayuni ma inga ñivi ndeꞌe na nuu ndo, ìyo yi ña kundeeni ndo ta na jakaꞌnuni ndo ma kuati nuu taꞌan ndo. Indukuni ma takua jākaꞌnuni ma Rachaꞌnu Jesuu ma kuati maa ndo niku, takan ìyo yi ña janaa ndo ma kuati nuu ma taꞌan ndo ndia.
\v 14 Yakan va na kichaꞌa chaa ndiko ndo koo ndo, ti ma ña ndaa ga kùu ña na kuuni ndo ndeꞌe ndo taꞌan ndo, vati yakan kùu ma ña jàꞌa ña kuu ndoꞌiin vaꞌa ndo chiꞌin taꞌan ndo.
\v 15 Ta na kuꞌva ndo ña na kaꞌnda Cristu tiñu nuu anima ndo, ikan na kuu koo vii ndo chiꞌin ma taꞌan ndo. Vati chaꞌaꞌ yakan kùu yi ña kāchin ma Ndioo ndo, ikan na kuu ndoꞌiin ndisaa ndyoꞌo ndian chìnuni tuꞌun Jesuu, va koto na jäña ndo ña kuꞌva ndo taꞌvindioo nuu ra.
\p
\v 16 Ma tuꞌun Jesuu na koo yi nani kivi ma tichi ma anima ndo. Ta chiꞌin kuaꞌaꞌ chinituni ña chàꞌa Ndioo nuu ndo, na janaꞌa ndo ta jandomani ndo ma inga ñivi. Ta chiꞌin ndisaa kuii ma anima ndo, na kata ndo tanuu yaa kuenda Ndioo, takua kùu ma salmu, ma yaa ií, chiꞌin iin inga nuu yaa ña jàkaꞌnu yi ma Ndioo, vati chàꞌa ra ma ñamani ra nuu ndo.
\v 17 Ta tandiꞌi ma ña jàꞌa ndo chiꞌin ma ña kàꞌan ndo, na jaꞌa ndo yi chiꞌin ma sivi ta ndatu ma Rachaꞌnu Jesuu. Ta na kuꞌva ndo taꞌvindioo nuu Ndioo Tatá yo chaꞌaꞌ ma Rachaꞌnu Jesuu.
\s Naja kua ìyo yi ña jaꞌa ma ñivi Ndioo, ta naja kua ìyo yi ña koo na chiꞌin ma ñivi na
\p
\v 18 Ndyoꞌo ñivi ñaꞌa ña cha tāndaꞌa, na jachiꞌin ndo ta na tiñuꞌu ndo ndra kùu ii ndo, ti ñaꞌa kùu ma ña ìyo yi ña jaꞌa ndo chaꞌaꞌ ña chìnuni ndo ma tuꞌun ma Rachaꞌnu.
\v 19 Ndyoꞌo ndraꞌii, na kuuni vaꞌa ndo ndeꞌe ndo ma ñivi kùu ñasiꞌi ndo, ta na töve ìyo yi ña koo nduvaꞌa ndo chiꞌin vi.
\p
\v 20 Ndyoꞌo ndiakuati chiꞌin ndian yoko, na jachiꞌin ndo ndisaa kuii ma ña kàꞌan ma tatá ndo chiꞌin ma maꞌá ndo, vati takan chàtaꞌani ma Rachaꞌnu Ndioo.
\v 21 Ndyoꞌo ndra kùu tatá, na töve ìyo yi ña jakayuni ndo ma ndiakuati seꞌe ndo, koto yaꞌa maxii kùuni na jàꞌa ndo.
\p
\v 22 Ndyoꞌo ndian kùu musu, na jachiꞌin ndo ndisaa ma tiñu ña tàva ndian chàꞌnda tiñu nuu ndo ma ñuñivi iꞌya. Na jaꞌa ndo yi vaji ndeꞌe na a töve, ikan na kindoo vaꞌa ndo chiꞌin na. Vati ìyo yi ña jaꞌa ndaa vaꞌa ndo ma tiñu jàꞌa ndo, ti ndèꞌe Ndioo ma ña jàꞌa ndo, ta yaꞌa tìñuꞌu ndo ra.
\v 23 Tandiꞌi ma ña jàꞌa ndo, na jaꞌa vaꞌa ndo yi chiꞌin ndisaa kuii ma tundeeni ndo. Na jaꞌa ndo yi ma takua kùuni ndo ña jàꞌa ndo ma tiñu nuu ma Rachaꞌnu, ta na töve nuu ñivini.
\v 24 Vati cha chìto vaꞌa ndo ña ma ña ni niꞌi ndo ndaꞌaꞌ ma Rachaꞌnu kùu ma tundeeni ra. Vati ndyoꞌo, jàꞌa ndo tiñu nuu Cristu, ti ma ra chitoꞌo ndicha kuii kùu ra.
\v 25 Va ma ndian jàꞌa ña töve vaꞌa, ni niꞌi na ña töve vaꞌa jàꞌa ra, ta ni jandeꞌe ra tundoꞌo na chaꞌaꞌ yi. Vati ma Rachaꞌnu Ndioo, nïꞌiin ñivi töve kaꞌnu ga kùu iin na kua inga na, vati indukuni kùu ndisaa na kuenda ra.
\b
\c 4
\p
\v 1 Ndyoꞌo ndian chàꞌnda tiñu nuu ndian kùu musu, na tava ndaa vaꞌa ndo tiñu nuu na. Na kukuꞌuni vaꞌa ndo, ti juuni kùu ndo musu ma Rachaꞌnu chitoꞌo yo, ra ìyo andivi. Ta rakan juuni chàꞌnda ra tiñu nuu ndo ndia.
\s Na kaꞌan ndo chiꞌin Ndioo
\p
\v 2 Na nani kivi kàꞌan ndo chiꞌin Ndioo, ta yati vaꞌa koo ndo ora kàꞌan ndo chiꞌin ra ndia. Ta na kuꞌva ndo taꞌvindioo nuu ra.
\v 3 Na kaꞌan ndo chiꞌin Ndioo chaꞌaꞌ ndi ndia, ikan na nuna ma Ndioo itiꞌ kuꞌun ndi, ikan na kuu kuꞌun ndi nuu tùvi ñivi ta katituꞌun ndi nuu na ma tuꞌun chaꞌaꞌ Cristu, ma tuꞌun indii xeꞌe chiꞌin Ndioo niku. Vati chaꞌaꞌ ña kàtituꞌin ma tuꞌun iꞌya kùu yi ña indii̱ vekaa vitin.
\v 4 Ta na kaꞌan ndo chiꞌin Ndioo chaꞌi, ña na jaꞌa ra ñamani, ikan na kuu kaꞌan kachin vaꞌi nuu na ma takua ìyo yi ña jaꞌi yi.
\v 5 Na koo vaꞌa ndo ta vii kàꞌan ndo chiꞌin ma ndian töve chìnuni tuꞌun Jesuu. Ta na janaꞌa vaꞌa ndo ma tuꞌun ra nuu na ma tiempu ña kùmani.
\p
\v 6 Ma tuꞌun ña ni natuꞌun ndo, nani ora ìyo yi ña vii natuꞌun ndo yi chiꞌin na, ta ikan na kuu koto vaꞌa ndo ma naja kua nàkaꞌan kachin ndo chiꞌin ma taꞌiiꞌiin na ma ora chìkatuꞌun na nuu ndo.
\s Chaꞌaꞌ nuu ndiꞌi nia tàchi Paulu tutu nuu ñivi ìyo ñuu Colosa
\p
\v 7 Ma ra yani yo, ma ra nduvaꞌa kuii kùunio ndeꞌo, ra nàni Tíkiku, ma ra nduvaꞌa vaꞌa ña tìndee ta jàꞌa ra tiñu nuu ma Rachaꞌnu, indukuni chiꞌin ndi. Ta ni chaa ra katituꞌun ra ma tuꞌun chaꞌi nuu ndo.
\v 8 Yakan va tàchi̱ ra nuu ndo, ikan na koto kachin ndo ma naja kua ìyo ndi, ta takan kùu jandomani ra ndo.
\v 9 Ta juuni chiꞌin ra, ni kuꞌun ra yani yo ra nàni Onésimu, iin ra ñuu ndo ña nduvaꞌa kuii kùunio ndeꞌo kùu ra. Ta juuni ra chìnuni vaꞌa tuꞌun Jesuu kùu ra. Yakan va ndrakan, ni katituꞌun ndra ma nuu ndo ndisaa ma naja kua tàꞌan ndi ma ndeꞌve.
\p
\v 10 Ma ra nàni Aristarcu, ra kùu merui ma tichi vekaa iꞌya, juuni tàchi ra iin tuꞌun ña kañaꞌa ra chiꞌin nuu ndo ndia. Ta takani ma ra nàni Marku, ra kùu seꞌe tachaꞌnu Bernabé ndia. Ndyoꞌo, cha nīꞌi ndo ma tuꞌun ña nda tiñu kùu ma ña jàꞌa ma rachaꞌnu Marku ndia. Tuva kuàꞌan ra kuàndeꞌe ra ndo ma nuu ìyo ndo, na chaa vaꞌa ra nuu ndo.
\v 11 Ta juuni Jesuu ra juuni nàni Justo, juuni tàchi ra ña kañaꞌa ra chiꞌin ndo ndia. Ndraꞌya kùu ndra judíu ña jàtiñu chiꞌi̱n chaꞌaꞌ ma nuu chàꞌnda Ndioo tiñu. Ta tüvi inga ndra judíu ña tìndee na yuꞌu takan. Ta ndraꞌya kùu ma ndra nduvaꞌa kuii ndaani̱.
\v 12 Ma ra nàni Epafra, ra jàꞌa tiñu kuenda Jesucristu. Tàchi ra iin tuꞌun ña kañaꞌa ra chiꞌin ndo ndia. Ta rakan ti iin ra ñuu ndo kùu ra ndia. Ta nani ora kàꞌan ra chiꞌin Ndioo chaꞌaꞌ ndo, ikan na koo ndaa vaꞌa ndo kuenda Ndioo, ta na ndakiꞌin itiꞌ ndo chata ra chiꞌin ndisaa kuii tundeeni ndo ma takua kùuni ra ña na jaꞌa ndo ndia.
\v 13 Yuꞌu kùu ma ra chìto ndaa vaꞌa ña ma Epafra, yaꞌa ga nàkanini ra chaꞌaꞌ ndo chiꞌin chaꞌaꞌ ma ndian ìyo ma ñuu Laodicea chiꞌin chaꞌaꞌ ma ndian ìyo ñuu nàni Hierápolis.
\v 14 Ma ra nàni Luka, ma ra kùu ndotor, ra nduvaꞌa kuii kùunio ndeꞌo, juuni tàchi ra ma tuꞌun ña kàñaꞌa ra chiꞌin ndo ndia. Ta takani ma Dema ndia.
\p
\v 15 Na kañaꞌa ndo chiꞌin ma ñivi ìyo ñuu Laodicea. Ta juuni na kañaꞌa ndo chiꞌin ma ña nàni Ninfa, chiꞌin ma ndian chìnuni kùtiꞌvi ma veꞌan ndia.
\v 16 Ma ora na yaꞌa ndio ña jàkuaꞌa ndo ma tuꞌun iꞌya, na tachi ndo yi nuu ma veñuꞌu ña nda ma ñuu Laodicea, ikan na jakuaꞌa ma ñivi chìnuni ìyo ñuu ikan yi ndia. Ta ndyoꞌo, na jakuaꞌa ndo ma tutu ña vàchi nuu ndo nda ma ñuu Laodicea ndia.
\v 17 Na kaꞌan ndo teꞌen chiꞌin ma Arquipu: “Na janiniun ña jaꞌa vaꞌun ma tiñu ña tātuu ma Rachaꞌnu Jesuu ñu̱n.” Takan kati ndo chiꞌin ra, kùuni̱.
\p
\v 18 Yuꞌu ra nàni Paulu, tài ma tuꞌun iꞌya chiꞌin ndaꞌi chiꞌin ma letra mai ndia ña ni kañaꞌi chiꞌin ndo. Na kukuꞌuni ndo ña indii̱ ma vekaa. Ndioo na kuꞌva ra ma ñamani ra chata ndo. Takan na kuu yi. Amén.