\id 1TH
\h Tutu Tesalónica Nunuu
\toc1 Tutu Tesalónica Nunuu
\mt Ma tutu nunuu ña tāa rachaꞌnu Paulu kuenda ñivi chìnuni tuꞌun Jesuu ña ìyo ñuu Tesalónica
\c 1
\s Nuu kàñaꞌa Paulu chiꞌin ñivi chìnuni tuꞌun Jesuu ìyo ñuu Tesalónica
\p
\v 1 Yuꞌu Paulu chiꞌin Silvanu ta Timoteu, tāa ndi tutu iꞌya kuenda ndisaa ndyoꞌo ndian chìnuni tuꞌun Jesuu ìyo ma ñuu Tesalónica, vati ndyoꞌo kùu ndian ìyo kuenda Tatá yo Ndioo chiꞌin Rachaꞌnu Jesucristu. Ta ma Tatá yo Ndioo chiꞌin ma Rachaꞌnu Jesucristu, na jaꞌa ra ña na koo vii ma anima ndo ta na kuꞌva ra ma ñamani ra nuu ndo ndia.
\s Ma ñivi ìyo ñuu Tesalónica yaꞌa ga chìnuni na tuꞌun Jesuu
\p
\v 2 Nani ora ña kàꞌan ndi chiꞌin Ndioo ra kùu Tatá yo, juuni chàꞌa ndi taꞌvindioo nuu ra chaꞌaꞌ ndo,
\v 3 vati ora kàꞌan ndi chiꞌin ra, juuni chàkuꞌuni ndi ti yaꞌa ga jàꞌa ndo tiñu kuenda ra chaꞌaꞌ ña yaꞌa chìnuni ndo tuꞌun ra. Ta juuni chàkuꞌuni ndi naja kua kùtaꞌan ndo chiꞌin ra ña kùuni ndo ndeꞌe ndo ñivi taꞌan ndo, ta naja kua yaꞌa ga kùndeeni ndo ña ndèꞌe ndo tundoꞌo, vati töve jàña ndo ña ndàtu ndo Rachaꞌnu Jesucristu nda kati chaa ora ña ni kichi ndiko ra.
\v 4 Ndyoꞌo yani̱ ndian chìnuni, cha chìto vaꞌa ndi ti maa ma Ndioo kāchin ra ndo ña na kuu ndo ñivi ra, vati kùuni ra ndeꞌe ra ndo.
\v 5 Vati ora kātituꞌun ndi ma tuꞌun vaꞌa chaꞌaꞌ Jesucristu nuu ndo, töve nī katituꞌun ndi yi chiꞌin tuꞌun yuꞌuni ndi, vati juuni jānaꞌa ndi yi chiꞌin ndatu jàꞌa ma Tati Ií Ndioo ndia. Ta juuni chìto vaꞌa ndi ti tuꞌun ndicha kùu yi, ta juuni cha ndēꞌe ndo ma naja kua chīyo ndi chiꞌin ndo niku, vati mamaa tiñu vaꞌa jāꞌa ndi kuenda ndo ma kivi ikan.
\p
\v 6 Ndicha kuii ña ndyoꞌo indukuni vaꞌa ìyo ndo, takua ìyo ndi, ta indukuni ìyo ndo takua ìyo ma Rachaꞌnu ndia, ti indukuni tāndikun ndo kuàꞌan ndo chiꞌin ndi ma itiꞌ ra, ta jàꞌa ndo takua jàꞌa ra ndia. Ta juuni jāchiꞌin vaꞌa ndo ma tuꞌun ra ora kātituꞌun ndi yi nuu ndo. Ta ma Tati Ií Ndioo jàꞌa yi ña yaꞌa ga chìsii ndo ora kīchaꞌa ndo chìnuni ndo ma tuꞌun Jesuu ña jànaꞌa ndi nuu ndo, vaji ndēꞌe ndo kuaꞌaꞌ tundoꞌo chaꞌaꞌ ma tuꞌun ra.
\v 7 Ta ma kua chīyo ndo ikan, jānaꞌa ndiꞌi yi, ta ndēꞌe tandiꞌi ma ndian chìnuni ìyo ñuꞌuꞌ Macedonia ta ñuꞌuꞌ Acaya ma takua vaꞌa chīyo ndo.
\v 8 Ta ndicha kuii ña chītakuati ma tuꞌun chaꞌaꞌ Rachaꞌnu Jesuu ta chaꞌaꞌ naja kua chìnuni ndo tuꞌun Ndioo ninii ñuu ìyo ma ñuꞌuꞌ Macedonia ta ñuꞌuꞌ Acaya, va juuni chītakuati yi ndava kuaꞌaꞌ inga tuku ñuu ndia. Yakan va tüva ìyo yi ña katituꞌun ndiko ndi nuu nïꞌiin na, kua chìnuni ndo tuꞌun ra, vati cha chìto vaꞌa na naja kua kùu yi.
\v 9 Vati juuni maa ma ñivi ndisaa ñuu ikan kātituꞌun na nuu ndi naja kua tīñuꞌu ndo ndi ora chāꞌan ndi chāndeꞌe ndi ndo, ta naja kua jāꞌa ndo ña ndākoo ndo ña jàkaꞌnu ndo ma ndioo yutun ií, ta tāndikun ndo ma itiꞌ ndicha ta kīchaꞌa ndo jàkaꞌnu ndo Ndioo, vati uvanuu rakan kùu ma Ndioo ndito ta ndaa.
\v 10 Ta ma ñivi ñuu ikan juuni nātuꞌun na chiꞌin ndi ña ndicha kuii ña ndàtu ndo ma kivi ña ni kichi ndiko Jesuu itiꞌ andivi, vati rakan kùu ra Seꞌe Ndioo, ra jānataku ndiko ra tañu ma ndian ndií. Ta juuni ma Jesuu ni jakakú ra yo nuu ma tundoꞌo yaꞌa ga xaan ña ni jandeꞌe Ndioo ñivi tiá itiꞌ nuu.
\c 2
\s Ma tiñu jàꞌa Paulu ma ñuu Tesalónica
\p
\v 1 Ndyoꞌo yani, cha chìto vaꞌa ndo ti ora kīchi ndeꞌe ndi ndo, tüvi nī janaa kàꞌa ni ndi ma tiempu ndi chiꞌin ndo, vati kīchi jàꞌa ndi iin tiñu vaꞌa kuenda ndo ndia.
\v 2 Ta juuni cha chìto vaꞌa ndo naja kua kānduvaꞌa ma ñivi ñuu Filipu ndi, ta naja kua jāndeꞌe na tundoꞌo ndi antea ña chāa ndi ñuu ndo. Va vaji takan jāꞌa na chiꞌin ndi, va tüvi nī yuꞌvi ndi kuꞌun ndi ma ñuu ndo ña kukatituꞌun ndi nuu ndo tuꞌun chaꞌaꞌ naja jàkakú Jesuu yo, vati Ndioo tīndee ra ndi, vaji kāketa ndian kùuni kuati ndēꞌe nuu ndi.
\v 3 Ta yüvi tuꞌun vata kùu ma ña jānaꞌa ndi nuu ndo ti mamaa tuꞌun ndaa kùu yi, ta ni tüvi chànini ndi jandaꞌviñaꞌa ndi ndo ndia,
\v 4 vati juuni maa ma Rachaꞌnu Ndioo kūndeeni ra nuu ndi. Yakan va chāꞌa ra ma tiñu ikan nuu ndi ña na katituꞌun ndi nuu ndo naja kua kùu kakú ndo, ta takan kàtituꞌun ndi yi nuu ndo vitin. Ta chiꞌin ma tuꞌun kàtituꞌun ndi, tüvi nànduku ndi jaꞌa ndi ña na kutaꞌani ma ñivi yi, ti kuenda Ndioo kàꞌan ndi yi. Vati rakan kùu ma ra ña kìꞌin kuꞌva naja kua kàa ma anima yo.
\v 5 Ta cha chìto vaꞌa ndo ti na tüvi jàndaꞌviñaꞌa ndi chiꞌin ma tuꞌun vii ña kàꞌan ndi ta ni tüvi nànduku ndi naja kua jakanaa ndi xuꞌunꞌ nuu ndo ndia. Ndioo chìto ña ndicha kùu ma tuꞌun ña kàꞌan ndi nuu ndo iꞌya.
\v 6 Vati taku ndyuꞌu tüvi nànduku ndi ña na jakaꞌnu nïꞌiin ñivi ndyuꞌu, ni ndyoꞌo ta ni ñivi inga tuku ñuu ndia. Vaji kùu ndakan ndi nuu ndo ña na tindee ndo ndi chiꞌin ndisaa ma ña kùmani nuu ndi, chaꞌaꞌ ña chāꞌa ma Rachaꞌnu Cristu tiñu nuu ndi niku. Ta tüvi nī jaꞌa ndi yi takan,
\v 7 vati yaꞌa vii jāꞌa ndi chiꞌin ndo, ti ndyuꞌu kūuni ndi ndo takua kùuni iin ñaꞌa kùu maꞌá ora kùmian ndiakuati seꞌan.
\v 8 Takan kūu ta ora kātituꞌun ndi tuꞌun vaꞌa Ndioo nuu ndo, va na yüvi yakani kùu ma ña jàꞌa ndi, vati ndava kùu kuvi ndi chaꞌaꞌ ndo chaꞌaꞌ ña yaꞌa ga kùuni ndi ndeꞌe ndi ndo.
\v 9 Yakan va ndyoꞌo yani, cha chìto vaꞌa ndo naja kua niꞌi jātiñu ndi nduvi ta niñuu, ikan na niꞌi ndi ña kachi ndi ora chīyo ndi chiꞌin ndo ma ora chākunuu ndi kàtituꞌun ndio ndi ma tuꞌun Ndioo nuu ndo. Takan jāꞌa ndi, vati tüvi kùuni ndi kuu ndi iin ndian jàtañu nuu nïꞌiin ndo.
\p
\v 10 Ta ndyoꞌo cha chìto ndo ta chìto vaꞌa Ndioo ndia, naja kua vaꞌa ta ndaa ña jāꞌa ndi ora chīyo ndi chiꞌin ndisaa ndyoꞌo ndian chìnuni tuꞌun Ndioo. Yakan va nïꞌiin ñivi na küu tisokuati na ndi.
\v 11 Ta juuni cha chìto ndo ña naja kua jāndomani ndi taꞌiiꞌiin ndo ta naja kua kīchi sii kùuni ndo ora tāsoꞌo ndo ma tuꞌun kātituꞌun ndi nuu ndo. Vati jāꞌa ndi chiꞌin ndo takua jàꞌa iin ra kùu tatá chiꞌin seꞌe ra,
\v 12 vati endee jànini ndi ndo ña na jaꞌa ndo takua ìyo yi ña jaꞌa ndo, ikan na koo vaꞌa ndo kuenda Ndioo, ti rakan kùu ra ña kāchin ra ndo ña na koo ndo chiꞌin ra nuu ni ndeꞌo naja kua yaꞌa ga kaꞌnu kùu ra ma nuu chàꞌnda ra tiñu.
\p
\v 13 Yakan va chaꞌaꞌ ñaꞌa kùu yi ña endee töve jàña ndi ña chàꞌa ndi taꞌvindioo nuu ra chaꞌaꞌ ndo, vati ndyoꞌo ora chīni ndo tuꞌun Ndioo ña kātituꞌun ndi nuu ndo, ma ora ikani jāchiꞌin ndo yi chiꞌin ndisaa anima ndo, vati cha chìto ndo ña yüvi tuꞌun yuꞌu ñivi kùu yi vati tuꞌun Ndioo kùu yi. Ta ndicha kuii ña ma tuꞌun Ndioo kùu ma ña jàꞌa ña koo ndo tiá vii nuu anima ndo, ikan na sii kuuni Ndioo jaꞌa ndo.
\v 14 Ta ndisaa ndyoꞌo yani, ndian ìyo ñuu Tesalónica, indukuni tāꞌan ndo takua tāꞌan ma ñivi Ndioo, ndian chìnuni tuꞌun Jesucristu ña ìyo ñuꞌuꞌ Judea. Vati ndyoꞌo indukuni ndēꞌe ndo tundoꞌo jāꞌa ma ndian töve chìnuni ìyo ñuu ndo, takua ndēꞌe ma ndian ñuꞌuꞌ Judea tundoꞌo jàꞌa ma ndian judíu ìyo juuni ma ñuu na ndia.
\v 15 Takan kūu ta ma ndian judíu ìyo juuni ma ñuu na, ndiakan kùu na ña chāꞌni na Rachaꞌnu Jesuu, ta juuni ndiakan kùu na ña chāꞌni na ndra kàꞌan chiꞌin tuꞌun yuꞌu Ndioo chīyo tajiꞌna ndia. Ta ikan jan jākunu na ndyuꞌu. Vati xaani na ndeꞌe na ndisaa ñivi ta kànitaꞌan na chiꞌin na ndia, va Ndioo töve chìsii ra ndèꞌe ra ma ña jàꞌa na.
\v 16 Tatu kùuni ndi kaꞌan ndi chiꞌin ma ñivi yüvi judíu naja kua kuu jakakú Ndioo na, ta tüvi chàꞌa na ña na katituꞌun ndi yi nuu na. Ta chaꞌaꞌ yakan kùu yi ña tiaga ndòkuaꞌa ma kuati na. Ta vitin ma ndiakan ndèꞌe na tundoꞌo, ti yaꞌa kàyuni ma Ndioo ndeꞌe ra nuu na chaꞌaꞌ ma ña töve vaꞌa jàꞌa na.
\s Kàtituꞌun Paulu ña chànini ra kundeꞌe ra ñivi ìyo ñuu Tesalónica inga chaꞌaꞌ
\p
\v 17 Ndyoꞌo yani, vaji takäꞌan ndeꞌe ndiko ndi ndo nda ora kēsiin ndi chiꞌin ndo, va endee ñùꞌuni ndi ndo, ta ndisaa tiempu chànini ndi kundeꞌe ndiko ndi ndo ma ñuu ndo inga chaꞌaꞌ.
\v 18 Va taku yuꞌu Paulu nduvaꞌa kuii kuaꞌaꞌ chaꞌaꞌ chànini kundeꞌi ndo ñuu ndo niku, va ma kuiꞌna chāsiánꞌ ma itiꞌ ndi, yakan va nī kuu kuꞌun ndi kundeꞌe ndi ndo.
\v 19 Va ndyuꞌu kùuni ndi ña na koto kachin ndo ña tandiꞌi ndyoꞌo ndian chìnuni kùu ma ndian jàꞌa ña sii kùuni ndi, ta tayi kùuni ndi ti tīin vaꞌa ndo ma tuꞌun kātituꞌun ndi nuu ndo. Ta chaꞌaꞌ yakan kùu yi ña yaꞌa chìsii ndi ndàtu ndi ora ni kichaa ndiko ma Rachaꞌnu Jesucristu chitoꞌo yo.
\v 20 Vati ndicha kuii ña chaꞌaꞌ ndyoꞌo kùu yi ña yaꞌa ga chìsii ndi ta tayi kùuni ndi.
\b
\c 3
\p
\v 1 Takan kūu ta tava nī kundeeni ndi ña yaꞌa chànini ndi chaꞌaꞌ ndo, yakan va ndyuꞌu kāchin ndi ña vaꞌa ga ña kìndoo maꞌiin nia ndi ma ñuu Atenas,
\v 2 ta tāchi ndi ma ra yanio Timoteu nuu ndo, vati rakan jàkuu tiñu nuu Ndioo indukuni takua kùu ndi, vati juuni kàtituꞌun ra naja kua jàkakú Cristu yo ndia. Ta chaꞌaꞌ yakan kùu yi ña tāchi ndi ra, ikan na kuꞌva ra tundeeni ndo, ña na chinuni vaꞌa ndo ma tuꞌun Ndioo,
\v 3 ikan na jäña nïꞌiin ndo ma tundeeni Ndioo ña ìyo chiꞌin ndo jàꞌa ma tundoꞌo ndèꞌe ndo. Vati ndyoꞌo cha chìto vaꞌa ndo naja kua ìyo yi ña ndeꞌo tundoꞌo chaꞌaꞌ ña chìnuni yo ma tuꞌun Cristu.
\v 4 Vati ora chīyo ndi chiꞌin ndo juuni kātituꞌun ndi nuu ndo ña ni ndeꞌo tundoꞌo itiꞌ nuu, ta ndicha kuii ña takan kùu yi, ti takan cha ndèꞌe ndo yi vitin.
\v 5 Ta tava nī kundeeni gai tiá kivi ña chànini̱ chaꞌaꞌ ndo, yakan va tāchi̱ ma Timoteu nuu ndo, ikan na kuꞌva ra koto ndi tuva ndicha ña juuni chìnuni ga ndo tuꞌun Jesuu a tüva. Vati yuꞌu, ndasii̱ niku ti tu jandaꞌviñaꞌa ma kuiꞌna ndo ta kiꞌvi ndiko ndo jàꞌa ndo ma ña kini inga chaꞌaꞌ. Ta tu takan kùu yi, tüvi nda kuenda kùu ma tiñu jāꞌa ndi chiꞌin ndo tuva takan.
\p
\v 6 Va tava vitin já kīchaa ndiko Timoteu ña chāndeꞌe ra ndo ma ñuu Tesalónica, ta kātituꞌun ra nuu ndi naja kua chìnuni vaꞌa ndo ma tuꞌun Jesuu, ta naja kùuni ndo ndeꞌe ndo taꞌan ndo, ta naja kua chàkuꞌuni ndo ndi ta juuni naja kua yaꞌa ìyoni ndo ndeꞌe ndo ndi, takua ìyoni ndi kundeꞌe ndi ndo ma nuu ìyo ndo ndia,
\v 7 yakan va chaꞌaꞌ ndisaa ma tuxaan ini ña tàꞌan ndi iꞌya vaji ndèꞌe ndi kuaꞌaꞌ tundoꞌo. Ta ndetiñu kùu yi kuenda ndi, va vitin chìsii ndi ti chìto ndi ña chìnuni vaꞌa ndo ma tuꞌun Jesuu.
\v 8 Yakan va vitin cha tüva nakani ndi chaꞌaꞌ ndo vati cha chìto ndi ña juuni ìyo ndaaga ndo itiꞌ ma Rachaꞌnu.
\v 9 Yakan va ora kàꞌan ndi chiꞌin Ndioo juuni yaꞌa chàꞌa ndi taꞌvindioo nuu ra chaꞌaꞌ ndo, ti chaꞌaꞌ ndo kùu yi ña yaꞌaga sii kùuni ndi nuu ma Rachaꞌnu Ndioo.
\v 10 Vati nduvi ta niñuu ora kàꞌan ndi chiꞌin ra chaꞌaꞌ ndo, chìkan ndi ñamani nuu ra ña na kuꞌva ra kuꞌun ndi kundeꞌe ndi ndo nuu ìyo ndo. Vati kùuni ndi katituꞌun ndi nuu ndo ma tuꞌun ra ña kùmaniga koto ndo.
\p
\v 11 Yakan va chìkan ndi nuu ma Rachaꞌnu Ndioo ra kùu Tatá yo chiꞌin ma Rachaꞌnu Jesuu, ña na tindee ra ndi, ikan na kuu kuꞌun ndi kundeꞌe ndiko ndi ndo inga chaꞌaꞌ.
\v 12 Ta juuni na tindee ma Rachaꞌnu ndo, ikan na kuuniga ndo ndeꞌe ndo ma ndian chìnuni chiꞌin ma ndian töve chìnuni, takua kùuni ndi ndeꞌe ndi ndo ndia.
\v 13 Ta ma Rachaꞌnu Ndioo ra kùu Tatá yo, na kuꞌva ra tundeeni ra nuu ndo, ikan na köo ga ma kuati ndo nuu ra, ta kuu ndo ñivi vaꞌa ta ií kuenda ra ora ni kichi ndiko ma Rachaꞌnu Seꞌe ra Jesucristu, chiꞌin tandiꞌi ndian ií ña ni kichaa chiꞌin ra.
\c 4
\s Rachaꞌnu Ndioo yaꞌa chìsii ra
\p
\v 1 Yakan va vitin ndyoꞌo yani jànini ndi ndo ta chìkan ndi chaꞌaꞌ ña kùu ndo ndian kuenda ma Rachaꞌnu Jesuu ma kua jānaꞌa ndi nuu ndo niku, ña na koo ndo ma takua kùuni ra, ikan na sii kuuni ra chaꞌaꞌ ndo. Chìto ndi ña takan ìyo ndo vitin, va jànini ndi ndo ña na jaꞌa ndo yi tiá kuaꞌaꞌ.
\p
\v 2 Vati ndisaa ndo cha chìto vaꞌa ndo ma tuꞌun kātituꞌun ndi nuu ndo chiꞌin ndatu ña chāꞌa Rachaꞌnu Jesuu nuu ndi,
\v 3 vati ma Rachaꞌnu Ndioo kùuni ra ña na kuu ndo ndian ií kuenda ra, ta töve kùuni ra ña kiꞌvi ndo chiꞌin ñaꞌa yüvi ñasiꞌi ndo.
\v 4 Ta na koto vaꞌa ndo naja kua koo vii taꞌiiꞌiin ndo chiꞌin ñasiꞌi ndo ta iñuꞌu koo ndo chiꞌin vi,
\v 5 ta tüvi jàꞌa ndo ma ña chàtaꞌani ma kuñu ndo takua jàꞌa ma ñivi ña töve nàkoto Ndioo.
\v 6 Ta juuni tüvi jàndaꞌviñaꞌa ndo ma meru ndo ta kìꞌvi ndo chiꞌin ñasiꞌi ndra, vati ma Rachaꞌnu Ndioo nduvaꞌa kuii jàndeꞌe ra tundoꞌo ma ndian jàꞌa takan, takua cha kātituꞌun ndi nuu ndo niku.
\v 7 Vati Ndioo kāchin ra yo ña na kuu yo ñivi ií kuenda ra, ta yüvi ndian jàꞌa kuati.
\v 8 Yakan va nda ndian ni kuuni ña töve jàchiꞌin na ma tuꞌun iꞌya, ìyo yi na koto na ña yüvi tuꞌun ñivini kùu yi, vati tuꞌun Ndioo ra chàꞌa ma Tati Ií ra nuu yo ña na koo yi chiꞌin yo kùu yi.
\p
\v 9 Takan kūu yakan va tüva chìniñuꞌu ndo ña tàa ndi nuu ndo naja kua koo ndo chiꞌin ma ñivi taꞌan ndo, vati maa ma Ndioo kùu ra ña cha jānaꞌa ra nuu ndo naja kua ìyo yi ña kuuni ndo ndeꞌe ndo taꞌiiꞌiin taꞌan ndo,
\v 10 ti ndicha kuii ña takan jàꞌa ndo chiꞌin ma ñivi taꞌan yo ña ìyo ninii kaꞌnu ñuꞌuꞌ Macedonia vitin. Va vitin ndyuꞌu jànini ndi ndo, ndyoꞌo yani, ña na kuuniga ndo ndeꞌe ndo ma ndian taꞌan ndo tiaga kuaꞌaꞌ.
\v 11 Yakan va na nanduku ndo kua kuu koo vaꞌa ndo, ta jaꞌa ndo ma tiñu maa ndo. Ta na jatiñu ndo chiꞌin ndaꞌaꞌ ndo takua cha kātituꞌun ndi ña ìyo yi ña jaꞌa ndo.
\v 12 Takan ìyo yi ña jaꞌa ndo, ikan na tiñuꞌu ma ñivi töve chìnuni tuꞌun Ndioo ndo, ikan na tüvi kùmani nïꞌiin nakuyi nuu ndo ndia.
\s Jesuu ni kichi ndiko ra inga chaꞌaꞌ
\p
\v 13 Ndyoꞌo ndra yani, kùuni ndi ña na koto ndo naja kua ìyo ña taꞌan chiꞌin ma ndian ndií ña chìnuni tuꞌun Jesuu, vati tüvi kùuni ndi ña na ndaꞌvi kuuni ndo takua ndaꞌvi kùuni ma ndian tüvi chìto tu ni koo vaꞌa na chiꞌin Ndioo itiꞌ nuu.
\v 14 Vati takua cha chìto vaꞌa yo ña Jesuu chīꞌí ra ta nātaku ndiko ra, juuni takan ìyo yi ña koto kachin yo ña ma Rachaꞌnu Ndioo ni janataku ndiko ra tandiꞌi yo ndian ni kuvi ña chìnuni tuꞌun Jesuu ndia.
\p
\v 15 Takan kūu yakan va kàtituꞌun ndi takan nuu ndo takua jānaꞌa Rachaꞌnu Jesuu ora kīchi ra. Ta ndisaa nda yo ìyo nditoga nda ma ora ni kichi ndiko ma Rachaꞌnu, jiꞌna ma ndian ndií kùu ma ndian ni ndaa nuu sukun chiꞌin ra kua maa yo.
\v 16 Ora \fig La resurrección|57GR-gn38n.tif|col|4:16||Ndisaa ndian chìnuni ni koo ndito na endeeni chiꞌin Jesucristu|4:16\fig*ni nuu ma Rachaꞌnu Jesuu itiꞌ andivi juuni ni kunio iin tati ña kànachaa niꞌi vaꞌa, ta ni kaꞌan ma tati kaꞌnuga ña jàꞌa tiñu nuu Ndioo, ta juuni ni kunio ma tati ma yutun tìvi ma Ndioo. Tajan ma ndian chīꞌí ña chìnuni tuꞌun Jesuu, jiꞌna kuii ga ndiakan kùu ma ndian ni nataku.
\v 17 Ta ikan jan, yo ndian kīndoo ndito ma ñuñivi iꞌya ni ndaa yo ta kuꞌun ndito yo nuu kaꞌìin ma ndian cha nātaku ma tichi viko ma nuu sukun, ta ndakan ni ndikitaꞌan yo chiꞌin ma Rachaꞌnu ma nuu tati. Ta takan ni niꞌo nuu koo yo endeeni chiꞌin ra.
\v 18 Yakan va na jandomani taꞌiiꞌiin ndo taꞌan ndo chiꞌin ma tuꞌun iꞌya.
\b
\c 5
\p
\v 1 Ndyoꞌo yani, va chaꞌaꞌ ma kuiya a ma ora ni kuu yakan, tüvi chìniñuꞌu ndo ña na taa ndi naja ni kuu yi.
\v 2 Vati cha chìto vaꞌa ndo ti tüvi chìto yo nda kivi ta nda ora ni kichi ma Rachaꞌnu ti janaꞌinio ora ni kichaa ra. Ta ndicha ña takan kùu yi chiꞌin ma ndra suꞌu ndia, vati ndrakan kìꞌvi ndra ta suꞌu ndra iin veꞌe ma ora jànaꞌini na kaꞌìin na.
\v 3 Vati ìyo ma ñivi ni kaꞌan ña na koo vaꞌa yo vati cha yāꞌa ma nuu ni ndeꞌo tundoꞌo. Va tüvi chìto na ña ma kivi ikan ni koyo ma tundoꞌo ikan chata na ora jànaꞌini na takua jànaꞌini ma ñivi ñaꞌa ora chàꞌnda yi tichi vi ña ni kàku seꞌe vi. Yakan va ma ora ikan, tüva ni niꞌi na naja kua kuu kakú na.
\v 4 Va taku ndyoꞌo yani ña tüvi jàꞌa ndo kuati takua jàꞌa ma ndian töve nàkoto Ndioo, ti ìyo tuꞌva ndo ma ora ni kichaa ma Rachaꞌnu. Yakan va ora ni kichaa ma Rachaꞌnu tüvi jànaꞌini ndo takua jànaꞌini ñivi ora kìꞌvi ma ndra suꞌu veꞌe na.
\v 5 Yakan va ndisaa yo ndian kùu ñivi Ndioo, cha jàndakuu Ndioo yo ña na kuu yo ndian vaꞌa ña chàkunuu ora ndichin, ta tüvi kùu yo takua kùu ma ndian jàꞌa kuati chàkunuu ora chanikuaa.
\v 6 Yakan va töve ìyo yi ña kuu yo takua kùu ma ndian töve chìnuni tuꞌun Ndioo ña tüvi chàꞌa na kuenda ma ña kùuni ra, va ìyo yi ña koo tuꞌva yo ta kuàndiꞌi yo.
\v 7 Ta ndian kìxi, kìxi na ora naa, ta ndian chìꞌi ndixi, juuni chìní na ora naa ndia.
\v 8 Yakan va taku maa yo ña kùu yo ñivi Ndioo, chàkunuu yo ora ndichini, vati ìyo yi ña koo tuꞌva yo ta kumio yo, takua jàꞌa ma ndra jandaru ña chàkuꞌun ndra iin kamixa ña kuvaꞌa chiꞌin kaa kuenda ña kùmi ndra ndra. Yakan va takan ìyo yi ña jaꞌa yo kuenda yo chiꞌin ma ña chìnunio tuꞌun Ndioo, ta chiꞌin ña kùunio ndeꞌo inga ñivi. Ta juuni ìyo yi ña kuatu vaꞌa yo ma Rachaꞌnu Jesuu, ikan na kuu niꞌo ña jakakú ra yo ora janaa ra ma ñuñivi, takua jàꞌa ma jandaru ña chàkoso ndra iin tuxini kaa kuenda ña jakakú yi ndra.
\v 9 Vati ma Ndioo tüvi nī chaꞌaꞌ ra ña na ndeꞌo tundoꞌo, ti kùuni ra jakakú ra yo nuu ma tundoꞌo chaꞌaꞌ ma Rachaꞌnu Jesucristu.
\v 10 Vati ma Rachaꞌnu Jesucristu chīꞌí ra chaꞌaꞌ yo. Yakan va indukuni kùu yi tu kuvio a koo ndito yo, vati ni koo ndito yo chiꞌin ra endeeni.
\v 11 Yakan va na jandomani ndo taꞌan ndo, ta na kuꞌva ndo tundeeni na takua cha kīchaꞌa ndo jàꞌa ndo yi vitin.
\s Paulu jàkuninaa ra ma ndian chìnuni tuꞌun Ndioo
\p
\v 12 Ndyoꞌo yani jànini ndi ndo ña tiñuꞌu ndo ma ndra jànaꞌa tuꞌun Ndioo ña ìyo tañu ndo, ti Ndioo kāchin ndra ña na janaꞌa ndra nuu ndo ta kumi ndra itiꞌ kuàꞌan ndo.
\v 13 Yakan va ìyo yi ña tiñuꞌu ndo ndra ta kuuni ndo ndeꞌe ndo ndra chaꞌaꞌ ma tiñu jàꞌa ndra. Ta juuni takan ìyo yi ña koo vaꞌa ndo chiꞌin taꞌan ndo ndia.
\v 14 Takan kūu ta juuni kùuni ndi ña na jaꞌa tuku ndo inga tiñu ndia. Na jakuninaa ndo ma ndian suchan ña tüvi kùuni jatiñu. Ta na kuꞌva ndo tundeeni ma ndian töve sii kuuni chiꞌin ma ña chìnuni na ndia. Ta juuni na tindee ndo ma ndian kumani chìnuni vaꞌa, ta ìyo yi ña kundaꞌvini ndo ndisaa ma ñivi.
\v 15 Ta na jaꞌa ndo kuenda nuu ndo tuva ìyo iin ñivi ña xaani ndeꞌe ndo, koto jäꞌa ndo chiꞌin na takan ndia. Vati na nanduku ndo jaꞌa ndo ma ña vaꞌa chiꞌin taꞌan ndo, ta chiꞌin tandiꞌi ñivi ìyo ñuñivi ndia.
\p
\v 16 Yakan va na sii kuuni ndo tandiꞌi kivi.
\v 17 Ta koto jäña ndo ña kàꞌan ndo chiꞌin Ndioo.
\v 18 Ta na kuꞌva ndo taꞌvindioo nuu ra chaꞌaꞌ ndisaa ma ña tàꞌan ndo, vati yakan kùu ma ña kùuni ra ña na jaꞌa ndyoꞌo ndian chìnuni tuꞌun Jesucristu.
\p
\v 19 Na kuꞌva ndo ña na jaꞌa ma Tati Ií Ndioo ma ña kùuni ra tichi anima ndo.
\v 20 Ta juuni koto kuätuꞌun ndo ma tuꞌun jànaꞌa ma ndra kàꞌan chiꞌin tuꞌun yuꞌu Ndioo.
\v 21 Ta na kiꞌin ndo kuenda ma ña jànaꞌa ndra, ndeꞌo tu ndicha a ña vaꞌa kùu yi a töve. Ta ikan jan kachin ndio ndo ma ña vaꞌa jàꞌa ndo.
\v 22 Ta juuni na jaña ndo ña jàꞌa ndo tandiꞌi nuu ña kini ndia.
\p
\v 23 Ta juuni ma Ndioo, ra jàꞌa ña na koo vaꞌa ndo, na jaꞌií vaꞌa ra ndo ta jaꞌa ra ña na koo vaꞌa ma anima ndo chiꞌin ndisaa ma kuñu ndo chiꞌin ma chinituni ndo ndia, ikan tüvi nataꞌan ra ndo chiꞌin kuati ndo ora ni kichaa ndiko ma Rachaꞌnu Jesucristu, ra kùu chitoꞌo yo.
\v 24 Vati ma Rachaꞌnu ña kāchin yo kùu iin ra ndicha ti jàchinu ra ña kàꞌan ra.
\s Ma tuꞌun nuu ndiꞌinia ña kàꞌan Paulu nuu na
\p
\v 25 Ndyoꞌo yani, na nakaꞌan ndo Ndioo chaꞌaꞌ ndi, ikan na tindee ra ndi ndia.
\p
\v 26 Ta kunumindaa taꞌan ndo ma ndian taꞌan yo ña chìnuni tuꞌun Ndioo ora kañaꞌa ndo chiꞌin na.
\p
\v 27 Ta juuni katituꞌin nuu ndo kuenda ma Rachaꞌnu chitoꞌo yo ña ìyo yi ña jakuaꞌa ndiꞌi ndo ma tutu iꞌya nuu ma ndra yanio, ta ñivi taꞌan yo ña chìnuni tuꞌun ra.
\p
\v 28 Ta maa ma Rachaꞌnu Jesucristu, na jaꞌií ra ndo. Ta takan na kuu yi. Amén.