\id 1TI
\h Tutu Timoteu Nunuu
\toc1 Tutu Timoteu Nunuu
\mt Tutu nunuu ña tāa rachaꞌnu Paulu kuenda Timoteu
\c 1
\s Paulu, tāa ra tutu iꞌya kuenda Timoteu
\p
\v 1 Yuꞌu, Paulu, tài tutu iꞌya kuendaun, yoꞌo Timoteu, ti ma Ndioo tāchi ra yuꞌu ña kùi iin ra tatun Rachaꞌnu Jesucristu, ta na jakui tiñu kàꞌan ra, vati Ndioo kùu ma ra jàkakú yo, ta Jesucristu kùu ma ra ndàtu yo vitin.
\v 2 Ndicha kuii ña kùu̱n takua kùu iin raseꞌi, chaꞌaꞌ ña indukuni chìnuni vaꞌa yo ma tuꞌun Jesucristu. Ta vitin kùuni̱ ña ma Rachaꞌnu Ndioo Tatá yo chiꞌin ma Rachaꞌnu Jesucristu chitoꞌo yo, na kuꞌva ra ñamani ra nuu̱n, ta na kundaꞌvini ra ñu̱n, ta na jaꞌa ra ña na vii koun chiꞌin animaun.
\s Paulu, kàtituꞌun ra nuu Timoteu ña koto jächiꞌin ra tuꞌun vata
\p
\v 3 Ma kua cha jānini̱ ñu̱n ora kēi kuàꞌin ma ñuꞌuꞌ Macedonia ña na kindoun ma ñuu Efesu, ta na kaꞌun nuu ma ndian jànaꞌa tuꞌun vata, ña na jäꞌa ga na yi.
\v 4 Ta juuni na kaꞌun nuu na ña na väꞌa natuꞌun na ma tuꞌun ña töve induku kàa yi takua ña jànaꞌa Ndioo, ta juuni na kaꞌun ña na jäꞌa na kuenda naja kua tāꞌan ma ndian chīyo tatiempu ndia. Vati ndisaa yakan jàꞌa ña endee kànitaꞌan yuꞌu na, ti tüvi tìndee yi ña na chìnuni na ma tuꞌun kàꞌan Ndioo, takua kùuni ra ña koo yo.
\v 5 Ta ma ña kùuni̱ ña na kutunini ma ñivi kùu ma ña na kùunio ndeꞌo taꞌan yo chiꞌin ma ña vii vàchi tichi anima yo, ta na koo vaꞌa yo chiꞌin ma chinituni yo, ta na chinuni yo tuꞌun ra chiꞌin ndisaa anima yo.
\v 6 Vati ìyo ndian cha kēsiin itiꞌ iꞌya, ta vitin kìchaꞌa nàtuꞌun na tuꞌun ña tüvi nda kuenda.
\v 7 Ndiakan kùuni na kaꞌan kachin na ma tuꞌun ley Ndioo nuu ma ñivi, kàti na, vaji ni juuni ña jànaꞌa juuni maa na, na tüvi kùtunini vaꞌa na, niyi kùuni yi kaꞌan yi vaji kàꞌan na ña tuꞌun ndicha kùu yi.
\p
\v 8 Vati ndisaa yo cha chìto vaꞌa yo ti iin ley vaꞌa kùu ma ley Ndioo, tuva chàtiñu yo yi takua kùuni ra.
\v 9 Yakan va ìyo yi ña koto yo ti nïꞌiin ley tüvi ìyo yi kuenda ma ndian vaꞌa. Ti ma ley kùu yi kuenda ma ndian kini, ta ma ndian jàꞌa kuati, ta kuenda ndian tüvi jàchiꞌin ña kàꞌan yi. Ta juuni kuenda ma ndian tüvi iñuꞌu chiꞌin Ndioo, ta ma ndian chàtuꞌun ra, ta kuenda ma ndian kini xini ta jàꞌa kuati. Ta ma ley juuni kùu yi kuenda ndian chàꞌni tatá chiꞌin maꞌá, ta nda ndian chàꞌni inga tuku ñivi ndia.
\v 10 Ta juuni tāchi ra yi kuenda ndra kìꞌvi chiꞌin ñivi ñaꞌa yüvi ñasiꞌi ndra, ta ñaꞌa kìꞌvi chiꞌin inga ndraꞌii, ta kuenda ndra siꞌi ndia. Tāchi ra yi kuenda ma ndian kàꞌan tuꞌun vata, ta ndian chàꞌa iin tuꞌun vaji töve jàchinu na yi, chiꞌin ndian tìin xeꞌe ñivi ta xìko na na inga chiyo. Yakan va ma ña kùuni ma ley kaꞌan yi, kùu yi kuenda ndian jàꞌa ña kini ña töve induku kùu yi takua jànaꞌa Ndioo ña jàꞌa na.
\v 11 Vati ma Rachaꞌnu Ndioo, ra yaꞌa ga ií, kùu ma ra tāchi yuꞌu, ña na katituꞌin tuꞌun kaꞌnu iꞌya nuu kuaꞌaꞌ ñivi.
\s Chàꞌa Paulu taꞌvindioo nuu ma Rachaꞌnu Jesuu chaꞌaꞌ ña kùndaꞌvini ra ra
\p
\v 12 Yuꞌu Paulu, chàꞌi taꞌvindioo nuu ma Rachaꞌnu chitoꞌo yo Jesucristu, ti chàꞌa ra ñandei takua ndēꞌe ra ña ìyo tundeeni ra chiꞌi̱n. Yakan va chāꞌa ra tiñu nui ña na jatiñui kuenda ra,
\v 13 vaji chātuꞌin ra ta kāꞌan tiꞌini̱ chata ra niku. Vati jātakueꞌi ma ndian chìnuni tuꞌun ra ta kānduvaꞌi ra. Va Ndioo kūndaꞌvini ra yuꞌu, vaji takan jāꞌi, ti tüvi chìtoi nayi jàꞌi ma ora ikan niku, vati takäꞌan chinuni̱ ma tuꞌun ra niku.
\v 14 Ta nduvaꞌa kuii kaꞌnu ñamani jāꞌa ma Rachaꞌnu chiꞌi̱n, ti chāꞌa ra ña na chinuni̱ ma tuꞌun ra, ta juuni chāꞌa ra ña na kuunio ndeꞌo taꞌan yo chaꞌaꞌ ña indukuni kùu yo chiꞌin Jesucristu.
\p
\v 15 Yakan va ña ndicha kùu ma tuꞌun ña ni kaꞌin iꞌya, ta ndisaa ndo ìyo yi ña chinuni ndo yi: vati ma Rachaꞌnu Cristu Jesuu, kīchi ra ma nuu ñuꞌuꞌ ñuñivi iꞌya, ti kùuni ra jakakú ra tandiꞌi ndian ìyo kuati. Ta tañu ndiakan, ìyo iin yo ìyo ga kuati, ta rakan kùu yuꞌu.
\v 16 Ta yakan va ma Rachaꞌnu Jesucristu, nduvaꞌa kuii kūndaꞌvini ra yuꞌu, vaji ìyo ga kuati̱. Ta takan jànaꞌa ra nuu ma ñivi naja kua jàndeeni ra ma ña jàꞌa na ta jànaa ra ma kuati na, takua jāꞌa ra chiꞌi̱n ora kīchaꞌa chìnuni̱ tuꞌun ra. Ta takan kuu niꞌi na nuu koo na indeeni chiꞌin ra, tuva chinuni na tuꞌun ra ndia.
\v 17 Ta vitin na jakaꞌnu yo Rachaꞌnu Ndioo, ra yaꞌa kaꞌnu, ra ìyo ndisaa tiempu, ti juu ra kùu ma Rey chàꞌnda tiñu. Vati tüvi ni chaa iin kivi ña ni kuvi ra. Vaji na küu ndeꞌo ra va chìto yo ti ìyo ra, ta ìyo kuaꞌaꞌ chinituni ra. Ta uvanuu Ndioo kùu ra. Ta takan na kuu yi. Amén.
\p
\v 18 Yoꞌo seꞌyu Timoteu, jàyaꞌi tiñu iꞌya nuu̱n, ña na jandeeniun jaꞌun ma tiñu chiꞌin ma ñivi, ta na janaꞌun nuu na ma itiꞌ vaꞌa kuꞌun na, ta na jaꞌun yi chiꞌin animaun, takua kāꞌan ma ndrachaꞌnu yanio chaꞌun ora kāꞌan ndra chiꞌin tuꞌun yuꞌu Ndioo.
\v 19 Yakan va na chinuni vaꞌun tuꞌun ma Rachaꞌnu chiꞌin ndisaa chinituniun, vati ìyo ndian töve chìnuni vaꞌa ma tuꞌun ra, ta ndākoo na yi. Ndiakan kùu na takua kùu iin varku ña kātitaꞌan chiꞌin yuu, vati tüva nda kuenda na.
\v 20 Vati takan cha tāꞌan ma ra nàni Himeneu chiꞌin ra nàni Jandu. Ndrakan tīꞌi̱ ndaꞌaꞌ ma kuiꞌna, ikan na kutuꞌva ndra ti küu kaꞌan tiꞌini ndra chata Ndioo.
\c 2
\s Naja kua ìyo yi ña jaꞌa yo ora kàꞌan yo chiꞌin Ndioo
\p
\v 1 Takan kūu ta vitin va ni kaꞌin iin tuꞌun kaꞌnu nuu ndisaa ndo ña na ndakan ndo nuu Ndioo, ta na nakaꞌan ndo ra chaꞌaꞌ ndisaa ñivi ñuñivi. Ta juuni na kuꞌva ndo taꞌvindioo nuu ra, ikan na koo vaꞌa ndisaa na.
\v 2 Ìyo yi ña kaꞌan yo chiꞌin ra chaꞌaꞌ ma ndra kùu kalechaꞌnu, ta chaꞌaꞌ ndisaa inga ndra ìyo tiñu chiꞌin ndra ndia. Yakan va ìyo yi ña jaꞌa yo ndisaa yakan, ikan na tüvi ndeꞌo tundoꞌo, ta vii koo yo chiꞌin tandiꞌi ñivio, ti takan kùu koo vaꞌa yo nuu Ndioo, ikan na kuu yo ñivi iñuꞌu ta ndaa.
\v 3 Ta nduvaꞌa kuii vaꞌa ña jàꞌa yo takan, ti ma Ndioo ra jàkakú yo, yaꞌa chìsii ra ora jàꞌa yo takan.
\v 4 Vati ma Rachaꞌnu Ndioo kùuni ra ña na kakú ndisaa ndo, ta kuu koto ndo ma tuꞌun ndaa.
\v 5 Vati uvanuu Ndioo, kùu ra ña takani ìyo, ta juuni uvanuu ra ña tāchi ra kùu ra ña jàndoꞌiin ra yo chiꞌin Ndioo. Ta rakan kùu ra Jesucristu, ta kùu ra iin ñivi takua kùu maa yo.
\v 6 Vati ma Rachaꞌnu Jesucristu, chāꞌa ra ña kaꞌni ñivi ra, ta na takaa na ra nuu kruu chaꞌaꞌ ma kuatio, ti takan jāꞌa ra, ikan na kuu kakú yo nuu ma kuatio. Ta ñaꞌa kùu ma tuꞌun ña jānaꞌa Ndioo nuu yo, ti ma kivi ña kāchin ra kùu yi.
\v 7 Ta juuni chaꞌaꞌ rakan kùu yi ña kāchin Ndioo yuꞌu, ña kùi iin tatun ra, ikan na katituꞌin ma tuꞌun Cristu nuu kuaꞌaꞌ ñivi, nuu ndian yüvi judíu ndia. Yakan va tüvi jandaꞌviñaꞌi ndo ti ña ndicha kùu ma ña kàꞌin kuenda Cristu, ti ìyo yi ña janaꞌi nuu ndian yüvi judíu, ti ña ndaa kùu yi tu chinuni na tuꞌun Cristu.
\p
\v 8 Takan kūu yakan va ndyoꞌo ndra kùu ndraꞌii, kùuni̱ ña na ndoniꞌi ndo ndaꞌaꞌ ndo ora kàꞌan ndo chiꞌin Ndioo ndanikuni ma nuu kàchika ndo chiꞌin anima vaꞌa ndo, ta tüvi kàyuni ndo ta töve kànitaꞌan yuꞌu ndo ndia.
\v 9 Ta ma ñivi ñaꞌa, kùuni̱ ña kuꞌun vi jaꞌma ndaꞌvini ta iñuꞌu ña tüvi yaꞌa yaꞌvi ndaa. Va chàkuni kanduu ña jandondacha vi vi, ti ìyo ñivi ña yaꞌa jàndovii vi ma ixi xini vi takua jàꞌa ma ñivi ñaꞌa ña chùtaka sukun oro a yuu tacha kuenda ña jàndondacha vi vi. Ta yüvi takan ìyo yi ña jaꞌa vi.
\v 10 Vati kùuni Ndioo ña na koo vaꞌa vi chiꞌin ma ña chìnuni vi tuꞌun ra, ta chiꞌin ma ña vaꞌa ña jàꞌa vi, ti takan jàꞌa ma ñivi tìñuꞌu Ndioo, ta jàkaꞌnu vi ra.
\v 11 Yakan va ma ñivi ñaꞌa, na tasoꞌo taxiini vi ma tuꞌun vaꞌa Ndioo ta na jachiꞌin vi ma ña kàꞌan ra.
\v 12 Ta juuni na tüvi chàꞌi ndatu nuu ma ñivi ñaꞌa ña jànaꞌa vi tuꞌun Ndioo nuu ndraꞌii, ta ni tüvi vaꞌa ña kaꞌnda vi tiñu nuu ndra ndia. Tiá vaꞌa ña na taxiin kindoo vi.
\v 13 Vati ma Rachaꞌnu Ndioo, jiꞌna jātuvi ra ma ra nàni Adán tajan jātuvi ra ma Eva.
\v 14 Ta yüvi rakan jāndaꞌviñaꞌa ma kuiꞌna, ti Eva kùu ma ña jāndaꞌviñaꞌánꞌ. Ta ora jāꞌa ña ma ña kāꞌan Ndioo ña tüvi ìyo yi ña jaꞌa ña, kōyoan iin tichi kuati.
\v 15 Va ma ñivi ñaꞌa, kùu kakú vi tuva jaꞌa vaꞌa vi ma tiñu Ndioo takua kùu vi ñivi chàkoo seꞌe. Vati tu chìnuni vi ma tuꞌun Ndioo, ta tu kùuni vi ndeꞌe vi inga ñivi, ta kuu vi ndian ií kuenda ra, ta na töve yaꞌa ndu vi ma tiñu ña chāꞌa Ndioo ña na jaꞌa vi.
\c 3
\s Paulu, kàtituꞌun ra naja kua ìyo yi ña koo ma ndra ndiso tiñu kuenda Ndioo
\p
\v 1 Ña ndicha kùu ma ña kàꞌin chiꞌin ndo, ti tu ìyo ndra chìnuni ña chànini kuu ndra iin ndra kuiso tiñu nuu ñivi chìnuni tuꞌun Ndioo, ndicha ña ma tiñu vaꞌa kùu yi ña kùuni ndra jakuu ndra.
\v 2 Yakan va taku ma ra ndiso tiñu veñuꞌu, ìyo yi ña jaꞌa ra mamaa ña vaꞌa, ikan küu kaꞌan ma ñivi chata ra. Ta ìyo yi ña koo ivanuuni ñasiꞌi ra, ta juuni ìyo yi ña kùu ra iin ra tüvi yaꞌa ndu ña jàꞌa ra nïꞌiin nakuyi, ta ra kachin chinituni, ta iñuꞌu chiꞌin ndisaa nakuyi. Ta ìyo yi ña kundaꞌvini ra ndian tüvi veꞌe ña chaa veꞌe ra, ta kuꞌva ra kindoo na veꞌe ra. Ta ìyo yi ña kuu ra iin ra kachini xini ña jànaꞌa vaꞌa ra ndia.
\v 3 Ta na tüvi ìyo yi ña kuu iin ra yaꞌa ga chìꞌi ndixi ta tüvi ìyo yi ña ndikitaꞌan ra chiꞌin ndian yaꞌa tuꞌva kànitaꞌan. Vati ìyo yi ña kùu ra iin ra vaꞌa ña jàndomani ñivi. Ta juuni tüvi ìyo yi ña kùu ra iin ra yaꞌa ga chàtaꞌani ra ndeꞌe ra xuꞌunꞌ.
\v 4 Vati ìyo yi ña kaꞌnda vaꞌa ra tiñu ma veꞌe ra, ta janaꞌa ra ña na kandicha ma seꞌe ra tiñu tàva ra nuu na, ikan na iñuꞌu koo na.
\v 5 ¿Vati tu töve chìto yo kaꞌnda yo tiñu juuni ma veꞌe maa yo, naja kùunio kaꞌnda yo tiñu nuu ma ndian chìnuni tuꞌun Ndioo?, tuva takan.
\v 6 Yakan va ma ra ndiso tiñu, tüvi ìyo yi ña kuu iin ra já kīꞌvi kuenda Cristu, ti koto jatayi maa ra ra chiꞌin ma tiñu ikan, ta tu jaꞌa ra takan, juuni kani koyo ra tichi kuati takua tāꞌan ma kuiꞌna.
\v 7 Ta juuni ìyo yi ña kuu ra iin ra iñuꞌu nuu ma ndian tüvi chìnuni tuꞌun Ndioo ndia, vati tu tüvi jàꞌa ra yi takan, ni koo tukanuu nuu ra, ti takan jàꞌa ma kuiꞌna ña jàndaꞌviñaꞌánꞌ yo.
\s Naja ìyo yi ña koo ma ndian chàkoo tiñu ña tìndee na ma ndian chìnuni tuꞌun Cristu
\p
\v 8 Ta juuni takani ma ndra chìnuni ña ndiso tiñu ña tìndee ma ndian chìnuni tuꞌun Cristu, ìyo yi ña kuu ndra iin ndra iñuꞌu. Ta juuni ìyo yi ña jachinu ndra tuꞌun kàꞌan ndra, ta tüvi kùu ndra ndra chìꞌi kuaꞌaꞌ ndixi, ta ni tüvi kùuni ndra ña koo kuaꞌaꞌ xuꞌunꞌ ndra ndia, ña tüvi vaꞌa jàkanaa ndra.
\v 9 Ta chiꞌin iin chinituni kachin ìyo yi ña endee chinuni ndra ma tuꞌun ndaa ña já jānaꞌa Ndioo nuu yo.
\v 10 Yakan va jiꞌna ìyo yi ña kiꞌo kuꞌva ndra, ndeꞌo tuva ndicha ña jàꞌa ndra ma tiñu takua kàꞌan Ndioo ña jàꞌa ndra, ta tu vaꞌa jàꞌa ndra, tajan kuu koo ndra ma tiñu ikan.
\v 11 Ta ma ñivi ñaꞌa, juuni ìyo yi ña iñuꞌu koo vi, ta tüvi ìyo yi ña kaꞌan vi chata ma taꞌan vi chiꞌin tuꞌun vata, ta tüvi yaꞌa ndu vi jàꞌa vi nïꞌiin nakuyi, ta kachin koo vi chiꞌin ndisaa nakuyi.
\v 12 Ta ma ndra tìndee ma ndian chìnuni, ìyo yi ña koo uvani ñasiꞌi ndra, ta ìyo yi ña kundayuꞌu ndra ma ndiakuati seꞌe ndra chiꞌin tandiꞌi ñivi ìyo veꞌe ndra ndia.
\v 13 Vati ma ndra jàkuu vaꞌa ma tiñu ña tìndee ndra ma ndian chìnuni tuꞌun Ndioo, ni keta iin kivi ña yaꞌa ni tiñuꞌu ndisaa ma ñivi ndra. Ta ìyo kuaꞌaꞌ tundeeni Ndioo chiꞌin ndra, ta takan kùu kàtituꞌun ndra nuu ma ñivi, naja kùu chinuni na ma tuꞌun chaꞌaꞌ Jesucristu.
\s Ma tuꞌun kachin ña tüvi nàkoto yo niku
\p
\v 14 Chànini̱ ña kuꞌin kundeꞌi ñu̱n numini. Va tu kuyanga kuàchai, tajan chaꞌaꞌ yakan, va tàchi̱ ma tutu iꞌya nuu̱n,
\v 15 ikan na kotoun naja kua ìyo yi ña koo yo chiꞌin ma inga ndian chìnuni tuꞌun Ndioo, ti ñivi Ndioo ndito kùu yo. Vati ma ñivi Ndioo kùu ma ndian kùmi ma tuꞌun ndaa, ta juuni jànaꞌa yi nuu inga ñivi ndia.
\v 16 Takan kūu yakan va, ma tuꞌun ña tüvi nàkoto yo niku, ndicha ña cha jànaꞌa Ndioo yi nuu yo vitin, ta ma tuꞌun ikan, nduvaꞌa kuii kaꞌnu yi:
\q Rachaꞌnu Ndioo, ndākuu ra iin ñivi,
\q ta ra vaꞌa kùu ra, kàti ma Tati Ií Ndioo.
\q Ta juuni ndēꞌe ma tati jàkuu tiñu nuu Ndioo ra.
\q Ta chītakuati ma tuꞌun ra tandiꞌi ñuu ñuñivi,
\q ta kuaꞌaꞌ ñivi chīnuni ña kàꞌan ra,
\q ta ndāa ra kuàꞌan ra itiꞌ andivi.
\c 4
\s Ndian ni jaña ña chìnuni tuꞌun Cristu
\p
\v 1 Va ma Tati Ií Ndioo, kàꞌan kachin vaꞌa yi, ti ma tiempu nuu ni ndiꞌinia ìyo ndian ni jaña na ña chìnuni na ma tuꞌun Ndioo, vati ni jachiꞌin ndio na ma tuꞌun vata ña jànaꞌa ndian tati xaan ña jàndaꞌviñaꞌa yi na.
\v 2 Ta ikan jan ndisaa ndio ma ñivi ikan, chaꞌaꞌ ña kùu na ñivi chiꞌin uvi nuu ña chànini, ndian jànaꞌa na mamaa tuꞌun vata, ta tüva kachin chànini na, ta tüva kanuu na jaꞌa na kuaꞌaꞌ ma ña kini.
\v 3 Ta ma ndian jàꞌa takan ti tüvi chàꞌa na ña tàndaꞌa ma ñivi chìnuni tuꞌun Ndioo, vati iin kuati kùu yi kuenda na, kàti na. Ta juuni kàti na ña ìyo saꞌan ña küu kacho, vati iin kuati kùu yi ndia. Va yuꞌu kàti̱ ña tüvi vaꞌa ma ña jànaꞌa na, ti maa ma Rachaꞌnu Ndioo, jātuvi yi kuenda ña kachi yo ndian chìnuni ta chìto ma tuꞌun ndaa yi. Ta chaꞌaꞌ ndisaa ña nìꞌo nuu ra ìyo yi ña kuꞌva yo taꞌvindioo nuu ra chaꞌaꞌ yi ndia.
\v 4 Yakan va cha chìto yo ti ndisaa ma ña jàꞌa Ndioo ña vaꞌa kùu yi. Ta nïꞌiin nakuyi küu kaꞌan yo ña na väꞌa yi, tuva chàꞌa yo taꞌvindioo nuu ra ora nìꞌo yi,
\v 5 ti chiꞌin tuꞌun Ndioo jàꞌií ra nuu yi ora kàꞌan yo chiꞌin ra chaꞌaꞌ yi.
\s Iin ra jàtiñu vaꞌa kuenda ma Rachaꞌnu Jesucristu
\p
\v 6 Takan kūu yakan va tu jànaꞌa vaꞌun ma tuꞌun ndaa iꞌya nuu ma ndian kùu yanio ta chìnuni vaꞌun yi, ni kùu̱n iin ra jàtiñu vaꞌa kuenda ma Rachaꞌnu Jesucristu, ti ni tindee yi ñu̱n chaꞌaꞌ ña tāndikun vaꞌun ma itiꞌ ña jànaꞌa yi ñu̱n.
\v 7 Va tüvi vaꞌa ña jàchiꞌun ma tuꞌun vata ña kàꞌan kuaꞌaꞌ ma ndian ìyo ma ñuñivi iꞌya, ti tüvi nda kuenda yi. Tiá vaꞌa ña na jakaꞌnu̱n ma Rachaꞌnu Ndioo ta jaꞌun naja kua kàꞌan ra.
\v 8 Ndicha vaꞌa ti ma tiñu jàꞌa yo ña jàndoniꞌo ma kuñu yo ìyo nuu chàtiñu yi va kuenda vitini, va tu jàꞌa yo ma tiñu Ndioo ta jàkaꞌnu yo ra, vaꞌaga yi kuenda yo, ti tìndee yi yo ma ñuñivi iꞌya vitin, ta juuni ni tindee yi yo ora koo yo chiꞌin Ndioo endeeni ma tiá itiꞌ nuu ndia.
\v 9 Ndicha kuii ti tuꞌun iꞌya ña ndaa kùu yi, ta ìyo yi ña tasoꞌo vaꞌa ndisaa ndo yi.
\v 10 Ta chaꞌaꞌ yakan kùu yi ña jàtiñu yo ta ndèꞌo tundoꞌo jāꞌa ñivi kàtiꞌini chata yo, vati ìyo ma tundeeni ma Ndioo ndito chiꞌin yo ta chìnunio ña ndicha ña ni jachinu Ndioo ma kua kāti ra nuu yo. Vati rakan ni tindee ra tandiꞌi ñivi, va tiaga kuaꞌaꞌ ni tindee ra ma ndian chìnuni ta ni jakakú ra na, ikan na koo na endeeni chiꞌin ra.
\p
\v 11 Ta ndisaa tuꞌun iꞌya, ìyo yi ña kaꞌun ta janaꞌun yi nuu na.
\v 12 Na janaꞌun nuu ma ñivi ña na tiñuꞌu na ñuu̱n vaji ra tivaani kùu̱n. Va na janaꞌun nuu na ma kua ìyoun chiꞌin ma ña jàꞌun ta chiꞌin ma tuꞌun kàꞌun ma itiꞌ vaꞌa kuàꞌun. Ta juuni na kuuniun ndeꞌun na, ta na kùu̱n iin ra ña töve jàꞌa kuati, ta na chìnuniun tuꞌun Cristu chiꞌin ndisaa animaun ta chinituniun ndia. Takan koun, ikan na kuu ndeꞌe na ñu̱n, ta tandikun na itiꞌ kuàꞌun.
\v 13 Va takua yuꞌu juuni kuyangai tiá ma itiꞌ teꞌen, ta yoꞌo na jakuaꞌun ma tuꞌun Ndioo nuu kaꞌìin tiꞌvi ma ndian chìnuni, ta na kundayuꞌu vaꞌun na ta janaꞌun ma itiꞌ kuꞌu̱n na ndia.
\v 14 Na jakuendaun ma ndatu ña chāꞌa Ndioo nuu̱n ora jūndii ndrachaꞌnu ndiso tiñu veñuꞌu ndaꞌaꞌ ndra xiniun takua kùuni ma Rachaꞌnu Ndioo, koto näaniun yi.
\p
\v 15 Takan kūu yakan va na tasoꞌo vaꞌun ma tuꞌun já chinu kàꞌin iꞌya, ikan na ndeꞌe ma ndian chìnuni naja kua ndìkun vaꞌun ma itiꞌ Ndioo, takua ikan ìyo yi ña jaꞌa na ndia.
\v 16 Ta \fig La resurrección|57GR-gn38n.tif|col|4:16-17||Ndisaa ndian chìnuni ni koo ndito na endeeni chiꞌin Jesucristu|4.16\fig*na jaꞌa vaꞌun kuenda nuu̱n chiꞌin ma tuꞌun jànaꞌun ma itiꞌ kuàꞌun nuu ma ndian chìnuni. Ta koto jäñaun ma ña vaꞌa ña jàꞌun ndia, vati tu jaꞌun ma takua kùuni Ndioo, ni kaku̱n. Ta juuni ni kakú tandiꞌi ma ndian jàchiꞌin ma tuꞌun Ndioo ña kàꞌun ndia.
\c 5
\s Paulu kàtituꞌun ra naja kua ìyo yi ña koo yo chiꞌin ma ndian chìnuni
\p
\v 1 Koto käꞌun yuꞌu ma ndrachaꞌnu, vati tiá vaꞌa ña viviini kàꞌun chiꞌin ndra ora chùnda yuꞌu̱n ndra, ti ìyo yi ña tiñuꞌu̱n ndra takua tiñuꞌu̱n iin tatáun. Ta juuni na vii kaꞌun chiꞌin ma ndra tivaa, vati ìyo yi ña tiñuꞌu̱n ndra takua tiñuꞌu̱n iin ra kùu yaniun.
\v 2 Ta ma ñivi ñaꞌa chaꞌnu, juuni ìyo yi ña tiñuꞌu̱n vi, ta kuuniun ndeꞌun, vi takua kùuniun ndeꞌun ma maꞌá maun. Ta juuni ìyo yi ña tiñuꞌu̱n ma ñivi ñaꞌa yoko, ta kuuniun ndeꞌun vi, takua kùuniun ndeꞌun ma ñivi ñaꞌa taꞌun ndia. Yakan va na jaꞌun mamaa ña vaꞌa chiꞌin na.
\p
\v 3 Na tindeun ma ñivi ñaꞌa ña kìndoo ndaꞌvi tu tüvi ìyo ndian tìndee vi.
\v 4 Vati tu ma ñivi kìndoo ndaꞌvi ìyo seꞌe vi a seꞌe yani vi, ndiakan ìyo yi ña koo tuꞌva na ña tindee na vi, takua kūmi vi na ora kūu na ndiakuati, ti ñivi maa na kùu vi. Yakan va ora jàꞌa yo teꞌen, nduvaꞌa kuii chìsii ma Rachaꞌnu Ndioo ndeꞌe ra yo, ti ña vaꞌa kùu yi.
\v 5 Va ma ñivi ndicha ña kìndoo ndaꞌvi ta maꞌiin, endee kàꞌan ndaꞌvi vi ta ndàtu vi ndaꞌaꞌ ma Rachaꞌnu Ndioo nduvi ta niñuu, ti chìto vi ña ni tindee ra vi.
\v 6 Vati tu ma ñaꞌa ña kìndoo ndaꞌvi jàꞌa ña naja kua kùuni maa ña, ma yakan kùan takua kùu iin ña tüva ndito kuenda ma Rachaꞌnu Ndioo, vati nàndukuan naja jàkaꞌnuan juuni maa ña, ta tüvi jàkaꞌnuan Ndioo.
\v 7 Yakan va na janaꞌun ndisaa tuꞌun vaꞌa iꞌya nuu na, ikan na jaꞌa na ma ña vaꞌa ndia, ta takan küu naniꞌi ma ñivi ña kàꞌan na chata na.
\v 8 Vati ma ndian tüvi nàkanini chaꞌaꞌ ña tìndee na ma ñivi na, ta ni töve nàkani itiꞌ na chaꞌaꞌ ma ñivi na ña ìyo tichi veꞌe na, ndiakan cha jāña na ña chìnuni na ma tuꞌun Ndioo jàꞌa ma kuati na, ti tiaga kini kùu ma anima na kua ma anima ndian töve chìnuni.
\p
\v 9 Va kùu nakuisoun sivi ma ñivi kindoo ndaꞌvi tu cha chinu vi uni xiko kuiya ta itiꞌ nuu. Ta tu chīyo uvani ii vi ndia.
\v 10 Ta tu kùu vi iin ñivi ña kàꞌan vaꞌa ma ñivi chata, chaꞌaꞌ ña kùndaꞌvini vi ma ñivi chàa ma nuu ìyo veꞌe vi. Ta juuni tu jakuaꞌnu vaꞌa vi ma seꞌe vi ndia, ta nakata vi chaꞌa ma ndian chìnuni ña chaa veꞌe vi, ta takan jànaꞌa vi ti tìñuꞌu vi na. Ta juuni tu tindee vi ma ndian ndèꞌe tundoꞌo, ta chìtuꞌun vi chaꞌaꞌ ma tiñu vaꞌa ña ìyo yi ña jaꞌa vi ndia.
\p
\v 11 Ta tu ìyo ñivi yoko ñivi kìndoo ndaꞌvi, tüvi ìyo yi ña nakuisoun sivi vi. Vati ni keta iin kivi ña ni kuuni ndiko vi tandaꞌa vi chiꞌin inga raꞌii, ta ikan ni jaña ndio vi ña jàꞌa vi tiñu kàꞌan Cristu,
\v 12 ikan kùu yi ma nuu koyo ndio vi tichi kuati chaꞌaꞌ ña jāña vi ña jàꞌa vi ma tuꞌun chāꞌa vi nuu Cristu.
\v 13 Vati juuni yaꞌa chàtaꞌani ndio vi kakunuu vi ta veꞌe ta veꞌe ma ñivi, ta ndakuu suchan ndio vi, ta yüvi yakani kùu yi, ti kìchaꞌa ndio vi nàtuꞌun vi tuꞌun vata chata ma ñivi. Yakan va ikan kùu ma nuu kìꞌvi ndio vi tichi ndisaa tuxaꞌini, ta nàtuꞌun vi tuꞌun ña tüvi ìyo yi ña kaꞌan vi.
\v 14 Ta chaꞌaꞌ yakan kùu yi ña kùuni̱ ña na koo ndiko ma ii ma ñivi ñaꞌa yoko ña kìndoo ndaꞌvi, ta tandaꞌa ndiko vi, ikan na koo ndiko seꞌe vi ta kumi vaꞌa vi na chiꞌin ma ii vi ndia. Ta chaꞌaꞌ yakan kùu yi ña na küu kaꞌan tiꞌini ma ñivi xaani ndeꞌe nuu vi chata vi, ti ma tiñu vaꞌa jàꞌa vi.
\v 15 Takan kàti̱ chiꞌin ndo, ti ìyo ma ñivi ñaꞌa ña cha jāña vi ma itiꞌ Ndioo, ta tāndikun vi kuàꞌan vi itiꞌ kuàꞌan ma kuiꞌna.
\p
\v 16 Ta tu ìyo iin ñaꞌa a iin raꞌii chìnuni tuꞌun Cristu, ta tichi veꞌe vi ìyo iin ña kìndoo ndaꞌvi, na tindee vi ña, ikan tüva kuaꞌaꞌ tiñu ìyo yi ña jaꞌa ma inga ndian chìnuni chiꞌan. Vati ma ndian chìnuni vaꞌa ga ña na tindee na ma ñivi kìndoo ndaꞌvi ña tüvi nïꞌiin ñivi.
\p
\v 17 Ta ma ndrachaꞌnu ña ndiso tiñu nuu ma ndian chìnuni, ìyo yi ña nduvaꞌa kuii tiñuꞌu ma ñivi ndra. Va ìyoga yi ña tiñuꞌu na, taku ma ndrachaꞌnu kàtituꞌun tuꞌun Ndioo, ta jànaꞌa ndra yi nuu ma ñivi.
\v 18 Vati ma tutu Ndioo, teꞌen kàꞌan yi:
\p “Na tüvi ìyo yi ña tiꞌo xikima yuꞌu ma kiti jàna yo ora jàtiñu ri.” Ta juuni ìyo inga tuꞌun ña kàꞌan ma tutu Ndioo: “Ma ra jàtiñu, ìyo yi ña niꞌi ra ma yaꞌvi ra ndia.”
\p
\v 19 Tu tisokuati iin ñivi chata iin rachaꞌnu ndiso tiñu ndian chinuni nuu̱n, koto jächiꞌun yi. Tiá vaꞌa ña na jachiꞌun yi tuva kàꞌan uvi a uni taꞌan na yi nuu̱n.
\v 20 Ta ma ndra tüvi kùuni jaña ña jàꞌa ma kuati, tiá vaꞌa ña na kaꞌun nuu ndra ma nuu kaꞌìin tiꞌvi tandiꞌi ma ñivi Ndioo, ikan na yuꞌvi ma ñivi Ndioo, ta tüvi jàꞌa na takua jāꞌa ndra.
\v 21 Yakan va yuꞌu Paulu, kàꞌin chiꞌun ndava nda nuu Ndioo chiꞌin Rachaꞌnu Jesucristu chiꞌin tandiꞌi tati jàꞌa tiñu nuu Ndioo ña kāchin ra, ña na jaꞌa vaꞌun ma ña kàꞌin chiꞌun, ta inuuni ndeꞌun ma ñivi ora jàꞌun yi.
\v 22 Ora ni kachiun ñivi ña ni koo tiñu kuenda Ndioo, koto jündiun ndaꞌun chata nda ndian ni kuuni, tu tüvi nàkanini vaꞌa jiꞌnaun ña ni jaꞌun yi, ikan na töve kosoun kuati ña jàꞌa inga na. Yakan va na jaꞌun kuenda nuu̱n, koto kiꞌviun tichi nda kuati ni kuuni.
\p
\v 23 Ta taku maun ña yaꞌaga nuuni kuꞌvi tichiun, na köꞌun mamaa takuini, ti juuni ìyo yi ña koꞌun itaꞌvi ma vinu, ikan na ndovaꞌun nuu ma kueꞌe ña jàꞌa ña kuꞌvi tichiun.
\p
\v 24 Ta ìyo uvi uni ndian jàꞌa kuati, ña numi kuiini chàꞌa yo kuenda ña ìyo kuati na, ti chìto yo ma ña jàꞌa na antea ña chaa ma kivi ña ndòndaa yi. Va ìyo ndian jàꞌa kuati, ña tüvi numini chàꞌa ma ñivi kuenda yo jāꞌa yi, ti yaꞌa xeꞌe ìyo yi. Va ni chaa iin kivi ña ni koto ndiꞌi yo yi.
\v 25 Ta juuni kùu yi, ña tu ìyo ma ndian jàꞌa iin tiñu vaꞌa, numi kuiini chàꞌa yo kuenda tu ma tiñu vaꞌa kùu yi. Va ìyo ma ndian jàꞌa tiñu töve vaꞌa, ta tüvi numi chàꞌa yo kuenda, va chìto yo ña ni chaa iin kivi ña ni koto ndiꞌi ma ñivi yi vaji yaꞌa xeꞌe ìyo yi ndia.
\b
\c 6
\p
\v 1 Ta tandiꞌi ndian chìnuni tuꞌun Cristu ndian kùu musu, ìyo yi ña tiñuꞌu vaꞌa na ma ndian kùu chitoꞌo na ña chàꞌnda tiñu nuu na, ikan ma chitoꞌo na küu kaꞌan tiꞌini na chata ma Rachaꞌnu Ndioo, ta chata ma tuꞌun ra ña jànaꞌa yo ndia.
\v 2 Ta tu ìyo iin ma ndian kùu musu ta ma chitoꞌo na iin ndian chìnuni tuꞌun Ndioo kùu na, koto jäña na ña tìñuꞌu na na, ti indukuni ndian chìnuni tuꞌun Ndioo kùu na ndia. Vati ma ña ìyo yi ña jaꞌa na kùu yi ña na tiñuꞌu ga na na ta jatiñu niꞌiga na kuenda na, vati juuni yani na ndian chìnuni kùu na ndia. Yakan va, ndisaa tuꞌun iꞌya ìyo yi ña janaꞌun ta katituꞌu̱n yi nuu na.
\s Ma ña vaꞌa ndicha ni niꞌo chaꞌaꞌ ña chìnuni vaꞌa yo tuꞌun Ndioo
\p
\v 3 Tu ìyo nda ndian jànaꞌa iin tuꞌun ña tüvi indukuni kàꞌan kua kàꞌan ma tuꞌun ma Rachaꞌnu Jesucristu, ta juuni töve indukuni kàꞌan kua ma tuꞌun ndaa ña chìnunio,
\v 4 ndisaa ma ndiakan mamaa ndian kutayini kùu na, ti tüvi chìto na nïꞌiin nakuyi. Ta juuni na küu natuꞌun vaꞌanio chiꞌin na, ti endee kànitaꞌan yuꞌu na, ti tüva indukuni chànini ndio na kua chàninio, ta juuni kìchaꞌa na tixii na ta kaꞌan tiꞌini na chata ma ñivi, ti tüva ìyo tundeeni na chiꞌin ma ñivi, ti siin siin chànini na.
\v 5 Ta ma kuati ikan, tüvi nda ora ni chinu yi, ti ma ñivi ikan, kùu na takua kùu ma ndian tivi xini, vati tüvi chìto na ma tuꞌun ndaa, ta jàꞌani na ña chìnuni na tuꞌun Ndioo kuenda na ndokuika na jàꞌa yi. Yakan va vaꞌa ga ña na tüva ga titaꞌun chiꞌin na.
\v 6 Ndicha vaꞌa ña kùu kuaꞌnu yo chiꞌin ma ña chìnunio tuꞌun Ndioo, va tu sii kùunio chiꞌin ma ndatiñu ña ìyo nuu yo.
\v 7 Vati ora kāku yo ma ñuñivi iꞌya, tüvi nī kichaa inga nakuyi chiꞌo, ti sokaanio kāku yo. Ta indukuni ni taꞌan yo ma ora ni kuvi yo, ti tüvi ni kundaꞌa yo nïꞌiin nakuyi koꞌo ndia.
\v 8 Ti tuva cha ìyo ma ña kacho ta ìyo ma jaꞌma kuꞌun yo, tiá vaꞌa ña na sii kuunio chiꞌin yakani.
\v 9 Va ma ndian kùuni ndokuika, tia numini kòyo na tichi ma kuati. Ta ikan kùu ma nuu koyo na tichi xayu ma kuiꞌna jàꞌa ma ña kùuni na koo tiá ndatiñu na. Ta juuni maa yi kùu yi ña jandeꞌe yi tundoꞌo na, ta ni janaa yi na tiá itiꞌ nuu ndia.
\v 10 Ti tu yaꞌaga kùuni yo ma xuꞌunꞌ, ikan kìchaꞌa ma kuati kaꞌnu ña jàꞌa yo, ti numini kìchaꞌa yo kèsiin yo ma itiꞌ Ndioo jàꞌa ña tixin yo. Ta ikan kùu ma nuu juuni maa ndio yo jàndeꞌo tundoꞌo ma anima yo.
\s Ma tiñu vaꞌa jàkuu ma ndian chìnuni ma tuꞌun vaꞌa Ndioo
\p
\v 11 Yakan va yoꞌo Timoteu, ra jàkuu tiñu nuu Ndioo, koto näkaniun jaꞌun takua jàꞌa ma ndiakan, ti na kuꞌu̱n ma itiꞌ ndaa ña kuàꞌan Ndioo, ta na jakaꞌnu̱n ra ta na chinuni vaꞌun ma tuꞌun ra chiꞌin ndisaa animaun, ta na kuuniun ndeꞌun inga ñivi, ta na jandeeniun ña jàꞌa na chiꞌun, ta na kùu̱n iin ra yaꞌa vita anima ndèꞌun na ndia.
\v 12 Ta na jandeeniun chìnuniun tuꞌun Ndioo, ikan na niꞌun ma nuu koun endeeni chiꞌin ra, ti takan kùuni ra ña na jaꞌun. Ti kāchin ra ñu̱n ma ora kātituꞌu̱n yi nuu kaꞌìin tiꞌvi kuaꞌaꞌ ndian kùu testigu ña chīnuni vaꞌun ma tuꞌun ra.
\v 13 Yakan va ndava nda nuu Ndioo, ra chàꞌa kivi koo ndito ndisaa ma ña ìyo ñuñivi, ta ndava nda nuu Jesucristu, ra juuni kātituꞌun ma tuꞌun ndaa nuu Ponciu Pilatu tatiempu,
\v 14 kàtituꞌin nuu̱n ña na jachiꞌun ta na jaꞌun ma tiñu kàꞌin ña jàꞌun, ta koto jäñaun ña jàꞌun yi, ikan na nïꞌiin na küu kaꞌan na chataun nda ora. Vati endeeni ìyo yi ña jaꞌun yi nda kati ni chaa ora ña ni kichaa ndiko ma Rachaꞌnu Jesucristu, ra chitoꞌo yo.
\v 15 Vati ma Rachaꞌnu Ndioo ni jaꞌa ra ña ni kichaa ndiko ra ma nda ora kùuni maa ra. Ta uvanuu ma Rachaꞌnu kùu ra ma ra na jakaꞌnu yo, ti ra chàꞌnda tiñu ninii ñuñivi kùu ra. Ta juuni kùu ra Rey kuxini nuu ndisaa rey, ta chitoꞌo ndisaa ndrachaꞌnu ndia.
\v 16 Uvanuu rakan kùu ma ra takani ìyo, ta ìyo endeeni, ta ìyo iin nuu endee tacha kàa, nuu nïꞌiin yo küu jayatin yo yo. Ta juuni nïꞌiin yo takäꞌan ndeꞌe ra, ta ni küu ndeꞌo ra ndia. Yakan va na jakaꞌnu yo ra endeeni chaꞌaꞌ ña endeeni kùu ra iin ra ìyo ndatu. Ta takan na kùu yi. Amén.
\p
\v 17 Ta na katituꞌu̱n nuu ma ndian kuika ña ìyo ma ñuñivi iꞌya, ña koto jändotayi yi na chiꞌin ma ña ìyo nuu na, ta ni chiꞌin ma xuꞌunꞌ ña ìyo nuu na ndia, vati ma xuꞌunꞌ na numini ni ndiꞌi yi. Tiá vaꞌa ña na kundaanio ma Rachaꞌnu Ndioo, vati maa ra kùu ma ra chàꞌa tandiꞌi ma ña ìyo nuu yo, ikan na sii kùunio chiꞌin yi.
\v 18 Ta juuni na katituꞌu̱n nuu ma ndian kuika, ña na jaꞌa na mamaa ña vaꞌa ta na koo vaꞌa na jàꞌa ma tiñu vaꞌa jàꞌa na. Ta juuni ña na tüvi kuu xii na chiꞌin ma ndatiñu ìyo nuu na, ti na tindee na inga ma ndian kùmani yi nuu ndia.
\v 19 Vati tu jaꞌa na takan, ni ndakuu yi iin yaꞌvi ña chàꞌa Ndioo nuu na ña kùndee yi na endeeni, ta juuni ndiakan kùu niꞌi ña na koo na endeeni chiꞌin ra ndia.
\s Ma tuꞌun nuu ndiꞌinia ña ìyo yi ña jaꞌa Timoteu
\p
\v 20 Yoꞌo Timoteu, kùuni̱ ña na jaꞌa vaꞌun ma tiñu Ndioo ña kàtiꞌtuꞌin nuu̱n. Ta koto jächiꞌun ma tuꞌun vata ña kàꞌan ñivi ñuñivi ña tüvi nda kuenda, ta ni ma tuꞌun ña vii kàꞌan yi kùunio, va tuꞌun vatani kùu yi.
\v 21 Vati ìyo ma ndian kàꞌan ma tuꞌun teꞌen, ta kùuni na ti nduvaꞌa kuii chìto na, kùuni na. Va töve. Ta java kèsiin na ma itiꞌ Ndioo, ta tüva chìnuni na ña kàꞌan ra. Ma Rachaꞌnu Ndioo, na kuꞌva ra ña na koo ma ñamani ra chiꞌun. Ta takan na kùu yi. Amén.