\id 2TI
\h Tutu Timoteu Uvi
\toc1 Tutu Timoteu Uvi
\mt Tutu uvi ña tāa rachaꞌnu Paulu kuenda Timoteu
\c 1
\s Paulu tàa ra tutu iꞌya kuenda Timoteu
\p
\v 1 Yuꞌu Paulu, tàchi̱ tutu iꞌya nuu̱n, yoꞌo Timoteu, vati maa ma Rachaꞌnu Ndioo, chāꞌa tiñu nui ña na kui tatun ma Jesucristu, ti takan kùuni Ndioo ña na jaꞌi. Yakan va, cha chìto yo, ti maa ra chāꞌa ra tuꞌun ña na koo ndito yo endeeni chiꞌin Jesucristu.
\v 2 Ta chaꞌaꞌ yakan kùu yi ña tàchi̱ ma tutu iꞌya nuu̱n, ti kùuni̱ ndeꞌi ñu̱n takua kùuni̱ ndeꞌi iin ra seꞌe mai. Ta juuni kùuni̱ ña na kuꞌva ma Rachaꞌnu Ndioo Tatá yo, chiꞌin chitoꞌo yo Rachaꞌnu Jesucristu ñamani ra nuu̱n. Ta na kundaꞌvini ra ñuu̱n, ikan na koo viun kuenda ra.
\s Paulu kàtituꞌun ra nuu Timoteu naja kua ìyo yi ña jaꞌa ra, ikan na koto ma ñivi ña ñivi Jesucristu kùu ra
\p
\v 3 Nani kivi ora chàꞌi taꞌvindioo nuu ma Rachaꞌnu Ndioo, endee chàkuꞌuni̱ ñu̱n, ta nàkaꞌin ñu̱n nuu ra ndia, vati jàkaꞌnu vaꞌi Ndioo chiꞌin chinituni ndai takua jākaꞌnu ma ndian kūu ñivi̱, ndian chīyo tatiempu ra ndia.
\v 4 Ta juuni yaꞌa chàkuꞌuni̱ naja kua chāku̱n ma ora kēsio, chaꞌaꞌ ña kùuniun ndeꞌun yuꞌu. Va vitin yaꞌaga kùuni̱ ndikoi kundeꞌi ñu̱n, ikan na sii kuuni̱.
\v 5 Yakan va chàkuꞌuni̱ naja kua yaꞌa chìnuniun ma tuꞌun Ndioo. Ta juuni chàkuꞌuni̱ ña jiꞌna kuii ma peꞌun Loida chiꞌin ma maꞌun Eunice, kùu ma ñivi kīchaꞌa chìnuni. Ta juuni chìtoi ña yoꞌo kùu̱n iin ra yaꞌa chìnuniun ndia.
\p
\v 6 Yakan va jànini̱ ñu̱n ña na kuàtiñu vaꞌun ma ndatu ña chāꞌa Rachaꞌnu Ndioo nuu̱n ora jūndii̱ ma ndaꞌi xiniun niku.
\v 7 Ti ma Rachaꞌnu Ndioo, chàꞌa ra ma Tati Ií Ra nuu yo kuenda ña na jäyuꞌvio yo, ikan na jandeenio ta kuunio ndeꞌo ma ndian taꞌan yo. Ta juuni chàꞌa ra ña na jaꞌa yo kuenda nuu yo chiꞌin ma ña jàꞌa yo ndia.
\v 8 Yakan va koto kükanuu̱n ña kàtituꞌu̱n ma tuꞌun ma Rachaꞌnu chitoꞌo yo nuu ma ñivi. Ta juuni koto kükanuu̱n yuꞌu chaꞌaꞌ ña indii̱ ma tichi vekaa chaꞌaꞌ ma tiñu jàꞌi kuenda Rachaꞌnu. Yakan va na jandeeniun ñu̱n chaꞌaꞌ ma tundoꞌo ndeꞌun ña kàtituꞌu̱n ma tuꞌun vaꞌa Ndioo. Vati ma Rachaꞌnu Ndioo cha chāꞌa ra ndatu ra nuu̱n.
\v 9 Ta juuni maa ra kùu ra ña jākakú ra yo, ta kāchin ra yo ña na ií koo yo chiꞌin ra. Vati ma Rachaꞌnu Ndioo, na tüvi nī jakakú ra yo chaꞌaꞌ nïꞌiin tiñu ña jàꞌa yo kuenda ra, ti jāꞌa ra yi, vati takani cha chānini ra jàꞌa ra yi takan niku. Ta antea ña jātuvi Ndioo ma ñuñivi iꞌya kāchin ra yo ña na kuu yo ndian ñivi Jesucristu, ta chaꞌaꞌ rakan kùu yi ña chāꞌa ra ñamani ra nuu yo.
\v 10 Ta juuni Ndioo jànaꞌa ra nuu yo naja kua kùuni ra ndeꞌe ra yo chaꞌaꞌ Rachaꞌnu Jesucristu, ora kīchi jàkakú ra yo nuu ma kuati. Ta juuni ra kùu ra ña jāndiꞌi ra nuu ma ndatu, ña jàꞌa ña na kuvio. Yakan va chiꞌin ma tuꞌun vaꞌa kàꞌan ra kùu yi ña tàvaniꞌi ra nuu ndichin ña na koo ndito yo endeeni. Ta chaꞌaꞌ yakan kùu yi ña tüva ni kuvio chaꞌaꞌ ña chìnuni yo ma tuꞌun ra.
\p
\v 11 Takan kūu yakan va maa ma Rachaꞌnu Ndioo kāchin ra yuꞌu, ta chāꞌa ra tiñu nui ña na kui tatun ra kuenda ña na janaꞌi ta katituꞌin ma tuꞌun vaꞌa chaꞌaꞌ ra nuu ma ndian yüvi judíu ndia.
\v 12 Ta chaꞌaꞌ yakan kùu yi ña yaꞌa ndèꞌi tundoꞌo. Va ni tüvi kukanui chaꞌaꞌ yi vaji takan kùu yi, vati chìtoi yo kundeeni̱, ta juuni cha chìto vaꞌi ña, rakan ni kumi vaꞌa ra yuꞌu chiꞌin ndatu ra endeeni, nda ora ni chaa kivi ña ni kichaa ndiko ra.
\p
\v 13 Yakan va na jaꞌun takua kātituꞌin nuu̱n, ikan na chinuni vaꞌun ma tuꞌun Ndioo, ta kùuniun ndeꞌun inga ñivi ndia. Vati ñivi Rachaꞌnu Jesucristu kùu̱n.
\v 14 Ta na kumi vaꞌun ma tuꞌun vaꞌa ña chāꞌa ma Tati Ií Ndioo nuu̱n ña na jaꞌun, vati juuni ìyo yi chiꞌin yo ndia.
\p
\v 15 Ta juuni cha chìto vaꞌun naja kua kūu yi ña ndākoo maꞌiin ma ndian chìnuni ña kīchi itiꞌ ñuꞌuꞌ Asia yuꞌu. Ta tañu ndiakan ìyo ndra nàni Figelu chiꞌin Hermógenes.
\v 16 Ta na kundaꞌvini Ndioo ma Onesíforu, chiꞌin ndisaa ma ñivi ìyo veꞌe ra. Vati kuaꞌaꞌ chaꞌaꞌ kīchi kuꞌva ra tundeeni yuꞌu ma tichi vekaa iꞌya, ta ni tüvi nī kukanuu ra chaꞌi, vaji indii̱ ma tichi vekaa.
\v 17 Ta rakan, na tüvi nī jaꞌa ra takua jāꞌa ma inga na ti ma ora kīchaa ra ma ñuu Roma, numini kīchaꞌa ra nànduku ra yuꞌu, nda kati nātaꞌan ra yuꞌu.
\v 18 Yakan va na kundaꞌvini ma Rachaꞌnu ra ora ni kichi ndiko ra ña ni jandondaa ra kuati ma ñivi. Ta cha chìto vaꞌun, yoꞌo Timoteu, naja kua tīndee ma Onesíforu yo ora chīyo yo ma ñuu Efesu niku.
\c 2
\s Paulu kàtituꞌun ra naja kua ìyo yi ña koo vaꞌa iin ra kùuni kuu jandaru Jesucristu
\p
\v 1 Ta yoꞌo Timoteu seꞌyu, na jandeeniun ña koo vaꞌun chiꞌin ma ñamani ña chāꞌa ma Rachaꞌnu Cristu Jesuu nuu̱n.
\v 2 Ta ndisaa ma tuꞌun ña kātituꞌin nuu̱n ma nuu kaꞌìin kuaꞌaꞌ testigu, ìyo yi ña katituꞌu̱n yi nuu ma ndian chìnuni vaꞌa, ta ndiakan na koo tuꞌva na ña jànaꞌa ndiko na yi nuu inga ñivi.
\p
\v 3 Yakan va ora ndèꞌun tundoꞌo chaꞌaꞌ ma tiñu jàꞌun kuenda ma Rachaꞌnu Jesucristu, ìyo yi ña jandeeniun, takua jàndeeni ma ndra jandaru ora ndèꞌe ndra tundoꞌo chaꞌaꞌ ma tiñu jàꞌa ndra.
\v 4 Vati ndisaa ma ndra kùu jandaru, na küu kiꞌvi ndra jàꞌa ndra inga tiñu, ti ìyo yi ña koo tuꞌva ndra kuenda ma ra chàꞌnda tiñu nuu ndra, ikan na sii kùuni ra chaꞌaꞌ ma tiñu jàꞌa ndra kuenda ra.
\v 5 Ta juuni takan kùu yi chiꞌin ma ndra chàsiki, tuva tüvi chàsiki vaꞌa ndra takua ìyo yi ña kusiki ndra na küu jakanaa ndra tüva töve chàsiki ndra tava kàꞌan yi nuu ma tutu kua ìyo yi ña jaꞌa ndra yi.
\v 6 Taku ma ndra jàtiñu nuu ni kava iin ndatiñu ndra, ìyo yi ña jatiñu jiꞌna ndra, tajan chàa ndio ma kivi ña keta ma ndatiñu ndra.
\v 7 Ta nakaniniun chaꞌaꞌ ma tuꞌun kàꞌin chiꞌun, ta maa ma Rachaꞌnu Jesucristu ni jaꞌa ra ña na kutuniniun ndisaa yi.
\p
\v 8 Yakan va na kukuꞌuniun ma Rachaꞌnu Jesucristu, vati juuni ñivi ma Rey David kùu ra ndia. Ta juuni Jesucristu ikan kùu ra ña nātaku ndiko ra tañu ñivi ndií. Ta tuꞌun vaꞌa ikan kùu ma ña kàtituꞌin.
\v 9 Ta vitin chaꞌaꞌ ña kàtituꞌin ma tuꞌun Jesuu nuu ma ñivi kùu yi ña yaꞌa jàndeꞌe na tundoꞌo yuꞌu, takua jàndeꞌe na tundoꞌo iin ra kini. Yakan va vaji indii̱ vekaa ta ndikuin ña ndèꞌi tundoꞌo, va ma tuꞌun Ndioo na küu kasi nïꞌiin na yi.
\v 10 Yakan va yuꞌu nduvaꞌa kuii jàndeeni̱ vaji ndèꞌi tundoꞌo, vati kùuni ndeꞌi ña ma ndian kāchin Ndioo, ta kùuni̱ ña na niꞌi na nuu kakú na jàꞌa Jesucristu, ikan na koo vaꞌa na chiꞌin ra nuu ìyo ña tacha ra nani kivi.
\p
\v 11 Yakan va ìyo yi ña chinunio ma tuꞌun iꞌya, vati ña ndicha kùu yi:
\q Tu chìꞌo chiꞌin ma Rachaꞌnu Cristu,
\q juuni ni niꞌo nuu koo ndito yo chiꞌin ra ndia.
\q
\v 12 Ta tu jàndeenio ña yaꞌa ndèꞌo tundoꞌo chaꞌaꞌ ña jàtiñu yo kuenda ra,
\q juuni ni kaꞌnda yo tiñu chiꞌin ra ma nuu chàꞌnda ra tiñu ndia.
\q Ta tu kàtio ña töve nàkoto yo ra,
\q ta juuni ni kati ra ña töve nàkoto ra yo ndia.
\q
\v 13 Ta vaji jàña yo ña chìnunio ma tuꞌun ra,
\q va rakan endee tüvi jàña ra ña kùu ra takua kùu ra.
\q Vati na küu jaña ra ña jàꞌa ra ma tuꞌun chāꞌa ra nuu yo.
\s Timoteu, kùu iin ra jàkuu tiñu kuenda Cristu
\p
\v 14 Yakan va na jakukuꞌuniun na ña tu kùuni na koo vaꞌa na kuenda Ndioo, na tüvi ìyo yi ña kanitaꞌan yuꞌu na chaꞌaꞌ ma tuꞌun ni kuuni, ti na tüvi nda kuenda yi. Vati ma ora jàꞌa na takan, jàkanuu ndio ma chinituni ma ndian tàsoꞌo yi, ta ndàkoo ndio na itiꞌ vaꞌa kuàꞌan na.
\v 15 Yakan va na nanduku̱n naja kua jàtiñu vaꞌun kuenda Ndioo, ikan na kichi siini ra chiꞌun, ta katituꞌu̱n ma tuꞌun ndaa nuu ma ñivi. Takan ìyo yi ña jaꞌun yi, ikan na tüvi kukanuu̱n ora ni ndeꞌun ra.
\v 16 Ta koto jächiꞌun ma tuꞌun vata ña kàꞌan ma ñivi, ti na tüvi nda kuenda yi. Vati ma ndian chàtaꞌani jaꞌa takan, tiaga kiꞌvi na jàꞌa na ma ña kini ña tüvi vaꞌa kuenda Ndioo.
\v 17 Ta ma tuꞌun vata ña jànaꞌa na kua kuita kuati yi nuu ma ñivi takua kuàndita iin kueꞌe xaan ña ìyo kuñu yo, ta kùu yi kuvio jaꞌa yi. Ta tañu ma ndian jànaꞌa ma tuꞌun vata ikan, uvi ndra nàni Himeneu chiꞌin Filetu.
\v 18 Vati ndrakan jāña ndra ña chìnuni ndra ma tuꞌun ndicha, ta kīchaꞌa ndio ndra kàti ndra ña na tüva ni nataku ndiko ma ndian ndií, ti cha yāꞌa ma kivi ña jànataku ma Ndioo na, kàti ndra. Yakan va takan jàꞌa ndra ña jàkanuu ndra xini uvi uni ma ndian chìnuni tuꞌun Ndioo.
\v 19 Vaji takan jàꞌa ndra, ma tuꞌun ndaa ña chāꞌa Ndioo nuu yo kùu yi iin ña tüvi sama. Vati teꞌen kàꞌan yi: “Ma Rachaꞌnu Ndioo, cha nàkoto vaꞌa ra nda ndian kùu ma ñivi ra”, kàti yi. Ta ìyo inga tuku nuu kàꞌan yi teꞌen ndia: “Ndisaa ndian kàꞌan ña kùu na kuenda Cristu, ìyo yi ña jaña na ña jaꞌa na ña kini”, kàti yi.
\p
\v 20 Va taku ma tichi veꞌe iin ndian kuika, ìyo kuaꞌaꞌ nuu ma koꞌo chàtiñu na, ti ìyo koꞌo oro, ta koꞌo plata, chiꞌin yachin, ta koꞌo ñukisi ndia. Vati ìyo siin ma koꞌo chàtiñu na kuenda ma viko jàꞌa na, ta ìyo siin ma koꞌo ña chàtiñu na nani kivi ma tichi veꞌeni ndia.
\v 21 Yakan va tu cha ndōꞌií yo, ta cha jāña yo ña jàꞌa yo ma ña kini, tajan ni kuàtiñu ma Ndioo yo ña, na jaꞌa yo ma tiñu vaꞌa, takua jàꞌa ma ndian kuika ña chàtiñu na ma koꞌo vaꞌa, ora jàꞌa na ma viko kaꞌnu.
\v 22 Ta na jaꞌun kuenda nuu̱n, chiꞌin ma ña chàniniun, koto küuniun jaꞌun ma ña kini, takua jàꞌa ma ndian yoko, ña ìyo ma tiempu iꞌya. Vati ìyo yi ña nanduku̱n ma itiꞌ vaꞌa Ndioo. Ta juuni ìyo yi ña chinuni vaꞌun ma tuꞌun ra, ta kuuniun ndeꞌun ma ndian taꞌun ndia. Yakan va na koo viun, takua ìyo ma ndian chìnuni ña jàkaꞌnu na ma Rachaꞌnu Ndioo chiꞌin ndisaa anima na.
\v 23 Ta koto jächiꞌun ma tuꞌun vata ña tüvi nda kuenda. Vati cha chìto vaꞌun ña mamaa kuatini nànduku na, chiꞌin ma tuꞌun kàꞌan na.
\v 24 Vati taku ndyoꞌo ndian jàkuu tiñu Ndioo, tüvi ìyo yi ña kanitaꞌan yuꞌu ndo chiꞌin taꞌan ndo, ti ìyo yi ña koo vaꞌa ndo chiꞌin tandiꞌi na. Ta juuni ìyo yi ña koo tuꞌva ndo kuenda ña jànaꞌa ndo nuu inga ñivi. Ta na jandeeni ndo tuva ìyo nda ndian kàꞌan chata ma tuꞌun ña jànaꞌa ndo.
\v 25 Ta juuni ìyo yi ña kundaꞌvini ndo na, ta na tindee ndo ma ndian kàꞌan chata ndo, ikan na tindee Ndioo na ña jaña na ma itiꞌ kini kuàꞌan na. Ta takan kùu naniꞌi na naja kua kuꞌun na ma itiꞌ ndaa ra.
\v 26 Yakan va takan ìyo yi ña jaꞌa na, ikan na kakú na tichi ndaꞌaꞌ ma kuiꞌna. Vati vitin juuánꞌ kùu ma ñáꞌ chàꞌnda tiñu nuu na ña, na jaꞌa na tandiꞌi ma ña kùuniánꞌ.
\c 3
\s Paulu, kàtituꞌun ra naja kua ni jaꞌa ma ñivi ora ni kichi ndiko Jesuu
\p
\v 1 Ta juuni ìyo yi ña kotoun ña nuu ni ndiꞌi ma tiempu iꞌya, yaꞌaga ni koo tundoꞌo.
\v 2 Vati ìyo ndian ni jakaꞌnu na juuni maani na. Ta ni kuuni na ndeꞌe na ma xuꞌunꞌ, ta ni jandotayi ndio na na. Ta ni kaꞌan tiꞌini na chata Ndioo, ta töva ni jachiꞌin na ña kàꞌan ma tatá na chiꞌin maꞌá na. Ta töva ni nakaꞌan na Ndioo chaꞌaꞌ ma ndatiñu ña nìꞌi na. Ta ni töve ni jakaꞌnu na ra ndia.
\v 3 Ta juuni na töve ni ndakimani na ma ndian kùu taꞌan na, ta ni töve ni kundaꞌvini na na ndia. Ta ikan jan ni kaꞌan na tuꞌun vata chata inga ñivi, ti yaꞌa xaani na ndèꞌe na na, ta na küu kaꞌnda na tiñu nuu juuni ma ña kùuni ma kuñu na ndia, vati na kündeega na jaꞌa na ma ña vaꞌa.
\v 4 Ta juuni ni xikoñaꞌa na chaꞌaꞌ ndian amigu na, ta ni tüvi chànini jiꞌna na ma ña jaꞌa na. Ta ni jandotayi na na. Ta endee ni nanduku na jaꞌa na kuati ña chàtaꞌani ma kuñu maa na. Ta töva ni nanduku na itiꞌ vaꞌa Ndioo.
\v 5 Ta ni katituꞌun na nuu ma ñivi ña yaꞌa jàkaꞌnu na Ndioo, va na tüvi ndicha, ti töve ìyo ndatu Ndioo chiꞌin na. Yakan va koto ndïkitaꞌun chiꞌin ma ndian jàꞌa takan.
\v 6 Vati tañu ma ndiakan, ìyo ndra chàtaꞌani kakunuu ta veꞌe ta veꞌe ma ñivi ñaꞌa ña töve ndetiñu kèñaꞌa na chaꞌaꞌ ña ìyo kuaꞌaꞌ kuati vi ña jāꞌa vi niku. Ta ma ñivi ñaꞌa ikan na küu jandeeni vi ma ña töve vaꞌa chànini vi.
\v 7 Yakan va vaji yaꞌa chàtaꞌani vi jàkuaꞌa vi ma tuꞌun chaa, va na küu chaa vi ña koto vi ma ña ndicha.
\v 8 Ta tava jāꞌa ma ndra nàni Janes chiꞌin Jambre niku, ña töve nī jachiꞌin ndra tuꞌun jānaꞌa Moisés tatiempu, ta takan jàꞌa ma ndra matru iꞌya ña jàndaꞌviñaꞌa ndra ñivi, ti töve kùuni ndra chinuni ndra tuꞌun ndaa, ti ma maa ña kinini kùu ma ña chànini ndra. Ta ndrakan jàꞌani ndra ña kùu ndra ndian chìnuni tuꞌun Jesucristu, va töve ndicha kùu yi.
\v 9 Va ndrakan töve ni kundee ndra kuaꞌaꞌ tiempu ña jàndaꞌviñaꞌa ndra ñivi, ti numini ma ñivi ni kuꞌva na kuenda ña yüvi ndicha kùu ma ña jànaꞌa ndra. Jin ma takan chāꞌa ma ñivi kuenda ña ma Janes chiꞌin Jambre kùu ndra ndra vata ndia.
\s Ma tuꞌun nuu ndiꞌinia ña kàtituꞌun Paulu nuu Timoteu
\p
\v 10 Va taku yoꞌo Timoteu, cha chìto vaꞌi naja kua jàchiꞌun ma tuꞌun ña jànaꞌi nuu ma ñivi ti ìyoun takua ìyoi. Ta chìtoun naja kua chànini̱ ta chìtoun ña ìyoi kuenda ña jàkui ma tiñu ña kùuni Ndioo na jaꞌi, ta chìtoun ña yaꞌa chìnuni̱ tuꞌun ra ndia. Ta juuni chìtoun naja kua jàndeeni̱ vaji ndèꞌi tundoꞌo. Ta yuꞌu endee töve jàñai ña kùuni ndeꞌi ma ñivi taꞌan yo.
\v 11 Ta juuni cha chìtoun naja kua kānitaꞌan ñivi chiꞌi̱n, ta jāndeꞌe na tundoꞌo yuꞌu chaꞌaꞌ ma tuꞌun Ndioo, ora chàkunui kàtituꞌin yi itiꞌ ñuu Antioquía chiꞌin ñuu Iconiu ta Listra. Va tava kūtaꞌan ma Rachaꞌnu chiꞌi̱n, yakan va kūndei kakúi nuu ma ndisaa ma tundoꞌo ña ndēꞌi.
\v 12 Ta ndicha kuii ña, ndisaa ma ñivi kùuni koo takua kùuni ma Rachaꞌnu Cristu Jesuu, ìyo yi ña ndeꞌe na tundoꞌo chaꞌaꞌ ra ndia.
\v 13 Va ma ndian kini ta vata, ña jàꞌa takan chiꞌin na, tiaga kuaꞌaꞌ ma ña tüvi vaꞌa ni jaꞌa na, ti ni jandaꞌviñaꞌa na ma inga ñivi. Ta juuni ma ndiakan ni jandaꞌviñaꞌa na na ndia.
\p
\v 14 Vati taku yoꞌo Timoteu, na chinuni vaꞌun takua kūtuꞌvaun, ta na jaꞌun yi ndia, ti cha chìto vaꞌun nda ndian kùu ma ndian jānaꞌa nuu̱n.
\v 15 Vati juuni maun, cha chàkuꞌuniun naja kua kīchaꞌun jàkuaꞌun ma tutu Ndioo nda ora kūu̱n ravali. Yakan va ti ma tuꞌun kùu yi ña chàꞌa yi kuaꞌaꞌ chinituniun, ikan na koto vaꞌun naja kua jàkakú Rachaꞌnu Cristu Jesuu ñu̱n chaꞌaꞌ ña chìnuni vaꞌun tuꞌun ra.
\v 16 Vati tandiꞌi ma tuꞌun vaꞌa Ndioo ña tāa ma ñivi nuu tutu ra, kēta yi ma chìnituni ma Rachaꞌnu Ndioo. Yakan va nduvaꞌa kuii vaꞌa yi ña jànaꞌa yo yi nuu ma ñivi, ta jàkuaꞌa yo yi nuu na, ikan na kaꞌan yi tuva töve vaꞌa ma itiꞌ kuàꞌan na, ikan na chikoniꞌi ndiko na ma itiꞌ ndaa ña ìyo yi ña kuꞌun na kuenda ña koo vaꞌa na takua kùuni Ndioo.
\v 17 Yakan va takan ìyo yi ña jaꞌa yo chaꞌaꞌ ña kùu yo ñivi Ndioo, ti chiꞌin ma tuꞌun ra jàndakuu vaꞌa ra yo, ikan na kutuꞌva yo ta jaꞌa yo ma ña vaꞌa takua kùuni ra.
\b
\c 4
\p
\v 1 Takan kūu yakan va ndava nda nuu Ndioo, chiꞌin nuu ma Rachaꞌnu Jesucristu, ra ni jakutuni ma ñivi ndìto chiꞌin ndian ndií, ora ni kichi kaꞌnda ra tiñu nuu yo, ña yuꞌu janini̱ ñu̱n ña,
\v 2 na katituꞌu̱n ma tuꞌun Ndioo nuu ma ñivi, ta koo tuꞌvaun chiꞌin na nda ora ni kuuni. Ta na janiniun na ta jandomaniun na, ikan na jachiꞌin na ma ña kàꞌan yi ta jaña na ña jàꞌa na ma ña tüvi vaꞌa. Ta ora janaꞌun nuu na, na iñuꞌu ta vii koun chiꞌin na, ikan na jachiꞌin na ma ña kàꞌan yi.
\v 3 Vati ni chaa iin kivi ña na töva ni jachiꞌin na ña kàꞌan ma lotrina vaꞌa. Ta ikan jan ni nanduku ndio na kuaꞌaꞌ ma ndian matru ña jànaꞌa nuu na, ta ndiakan ni jakuaꞌa chiꞌin na ma ña chàtaꞌani maa na ña na koto na.
\v 4 Yakan va töva ni jachiꞌin ndio na ña kàꞌan ma tuꞌun ndicha, vati ni jachiꞌin na ma tuꞌun ña jàndakuu maani ma ñivini.
\v 5 Va taku yoꞌo töve ìyo yi ña kanduu ña jàꞌun, vati ìyo yi ña ndakivaꞌa vaꞌun ma tuꞌun Ndioo tichi ma chinituniun, ta jandeeniun ma tundoꞌo ña ni ndeꞌun ndia. Ta juuni na katituꞌu̱n ma tuꞌun vaꞌa chaꞌaꞌ Jesucristu ña jàkakú yi na. Vati takan ìyo yi ña jatiñu vaꞌun chiꞌin ma tiñu chāꞌa Ndioo nuu̱n.
\p
\v 6 Ti taku yuꞌu, chani chaa ma kivi ña ni kuvi̱ kuenda ma Rachaꞌnu Ndioo, takua chàꞌni na iin kiti ora sòkó na ri kuenda ra.
\v 7 Ta juuni yuꞌu, cha jāndeeni ña jàꞌi tandiꞌi ma tiñu chāꞌa ma Rachaꞌnu Ndioo nui ña na jaꞌi yi. Ta endee tüvi nī jañai ña chìnuni vaꞌi ma tuꞌun ra.
\v 8 Yakan va ma ora ikan, ni koo vaꞌi chiꞌin ma Rachaꞌnu Ndioo, vati jātiñu vaꞌi kuenda ra. Ta ikan jan ni kuꞌva ndio ra iin ña vaꞌa kuendai ma ora ni kichi ra jakutuni ra ma ña jàꞌa ma ñivi, vati iin ra vesi ndaa kùu ra. Ta yüvi chiꞌin yuꞌuni, ni jaꞌa ra yi, vati ni jaꞌa ra yi chiꞌin tandiꞌi ma ñivi ña yaꞌaga kùuni ndeꞌe ra ta ndàtu ra ndia.
\s Paulu kàtituꞌun ra iin tiñu vaꞌa kuenda Timoteu
\p
\v 9 Yakan va yuꞌu Paulu, chìkain ñamani nuu̱n yoꞌo Timoteu ña na numini kichiun kichi ndeꞌun yuꞌu,
\v 10 ti cha ndākoo maꞌiinia ma ra nàni Dema yuꞌu ma iꞌya, ta kēe ra kuàꞌan ra itiꞌ ñuu Tesalónica, vati yaꞌa kùuni ra ndeꞌe ra ma ndatiñu ìyo ma ñuñivi iꞌya. Ta ma ra nàni Crescente, cha kēe ra kuàꞌan ra itiꞌ ñuꞌuꞌ Galacia, ta Titu kuàꞌan ra itiꞌ ñuꞌuꞌ Dalmacia ndia.
\v 11 Uvanuunia Luka, kùu ma ra kīndoo chiꞌi̱n vitin. Yakan va ora ni kichiun, na kunanduku̱n ra nàni Marku, ta kundakaun ra kichiun, vati chìniñuꞌi ra chiꞌin ma ña jàꞌi.
\v 12 Ta ma ra nàni Tíkiku, ti tāchi̱ ra kuàꞌan ra itiꞌ ñuu Efesu ndia.
\v 13 Ta juuni na kundaꞌun ma jaꞌma chùsukuin chiꞌin ndisaa tutui, ta ma ñii ña natuvi nuu tài ña ndākoi ñuu Troa, veꞌe ra nàni Carpu. Va ma ña chìniñuꞌugai ña kundaꞌun kùu ma ñii ikan.
\p
\v 14 Ta ma Jandu, ra jàtiñu chiꞌin kaa, yaꞌa xaani ra ndèꞌe ra yuꞌu. Va ni kuꞌva ma Rachaꞌnu ma yaꞌvi ra chaꞌaꞌ ña jāꞌa ra takan.
\v 15 Yakan va na jaꞌa vaꞌun kuenda nuu̱n chiꞌin ra, vati yaꞌa xàani ra ndeꞌe ra ma tuꞌun Ndioo ña jànaꞌa yo nuu ma ñivi.
\v 16 Ta ora yāꞌi ma chaꞌaꞌ nunuu nuu ma ndra kumitiñu, tükuii yo nī tindee yuꞌu ma ora ikan. Vati ndisaa ndra chīnu ndra, ta ndākoo maꞌiin ndra yuꞌu nuu ndra. Yakan va kùuni ña na tüvi tiꞌi ma Rachaꞌnu Ndioo kuenda ra chaꞌaꞌ ña jāꞌa ndra takan ma ora ikan.
\v 17 Va ma Rachaꞌnu Ndioo kūtaꞌan ra chiꞌi̱n, ta chāꞌa ra ñandei ña na katituꞌin ndisaa tuꞌun vaꞌa chaꞌaꞌ ma Rachaꞌnu Jesucristu. Tajan ndisaa ma ndian yüvi judíu kīchaꞌa ndio na tàsoꞌo na ma tuꞌun Ndioo ña kàtituꞌin nuu na. Ta takan kūu ña jākakú ma Rachaꞌnu Ndioo yuꞌu ma nuu kuaꞌaꞌ tundoꞌo ikan.
\v 18 Ta juuni ni jakakú ra yuꞌu nuu ma tichi ndaꞌaꞌ ndian jàꞌa ña kini ndia. Ta ikan endeeni ni kumi ra yuꞌu, nda kati chaa ma kivi ña ni kuꞌin chiꞌin ra nuu chàꞌnda ra tiñu itiꞌ andivi. Ta na jakaꞌnu yo ra ndisaa tiempu. Ta takan na kuu yi. Amén.
\s Ma tuꞌun nuu ndiꞌinia ña kàtituꞌun Paulu nuu Timoteu
\p
\v 19 Takan kūu ta vitin tàchi̱ saludu nuu ma ña nàni Priscila chiꞌin iian Aquila, ta nuu ndisaa ñivi Onesíforu ndia.
\v 20 Ta ikan jan ma ra nàni Latu, kīndoo ra ma ñuu Corintu. Ta ma Trófimu, ndōo ra ma ñuu Miletu, vati kuꞌvi ra.
\v 21 Ta yoꞌo, na kunumiun kichiun antea ña koyo ma tiempu vichin. Tàchi ma ra nàni Eubulu saludu nuu̱n, chiꞌin Pudente, ta Linu, chiꞌin ña nàni Claudia, ta chiꞌin ndisaa ma ndian chìnuni ndia.
\p
\v 22 Ta ma Rachaꞌnu Jesucristu, na kumi ra ñu̱n, ta na koo ma ñamani Ndioo chiꞌin ndisaa ndo ndia. Ta takan na kuu yi. Amén.