\id PHM
\h Tutu Filemón
\toc1 Tutu Filemón
\mt Tutu tàchi rachaꞌnu Paulu nuu Filemón
\c 1
\s Paulu tāa ra tutu iꞌya kuenda Filemón
\p
\v 1 Yuꞌu Paulu ra indii tichi vekaa chaꞌaꞌ Rachaꞌnu Jesucristu, tài tutu iꞌya chiꞌin ra yanio Timoteu kuendaun yoꞌo Filemón, vati yoꞌo kùu̱n iin ra mañeru ndi, ra yaꞌa vaꞌa ña jàtiñu chiꞌin ndi.
\v 2 Tàa ndi ma tutu iꞌya kuenda ndisaa ma ñivi Ndioo ña kùtiꞌvi ma veꞌun. Takua kùu ma ña taꞌan yo Apia chiꞌin ra yanio Arquipu, ra jàtiñu nduvaꞌa kuii chiꞌin yo chaꞌaꞌ ma tuꞌun Ndioo.
\v 3 Yakan va na jaꞌa ma Rachaꞌnu Ndioo Tatá yo chiꞌin ma Rachaꞌnu Jesucristu ña na koo vaꞌa ndo chiꞌin ma anima ndo. Ta juuni na jakoyo ra ñamani ra chata ndo, ikan na koo vii ndo vati yaꞌa kùuni ndi ndeꞌe ndi ndo.
\s Paulu kàꞌan ra chaꞌaꞌ Filemón nuu Ndioo
\p
\v 4 Tandiꞌi kivi ora chàꞌi taꞌvindioo nuu ma Rachaꞌnu Ndioo chitoꞌi juuni kàꞌin nuu ra chaꞌun ndia.
\v 5 Vati cha chìnituꞌin ña yaꞌa chìnuniun tuꞌun Rachaꞌnu Jesucristu, ta yaꞌa kùuniun ndeꞌun ndisaa ma ñivi ìyo kuenda Ndioo ndia.
\v 6 Yakan va ora kàꞌin chiꞌin ma Rachaꞌnu Ndioo juuni kàtituꞌin naja kua jāꞌun ña chìnuniun ma tuꞌun ra, ta naja kua jāꞌun ña kàtituꞌu̱n yi nuu ma ñivi. Takan ìyo yi ña janaꞌun nuu ndisaa ma ñivi, ikan na koto kachin gaun naja kua ìyo ií yo jāꞌa ma Rachaꞌnu Jesucristu.
\v 7 Yakan va chaꞌaꞌ yakan kùu yi ña yaꞌa chìsii̱ ta vaꞌa kùuni̱ jàꞌun yoꞌo yani, vati yaꞌa kùuniun ndeꞌun ma ndian kùu taꞌan yo, ta janiniun ta chàꞌun tundeeni nuu na ña na chinuni na tiaga.
\s Paulu chìkan ra ñamani nuu Filemón kuenda ma ra nàni Onésimu
\p
\v 8 Yakan va vaji tatun Cristu kùi ta kùu ndakain ña na jaꞌun ma tiñu ìyo yi ña jaꞌun, vati chāꞌa ra ma ndatu ra nui,
\v 9 va kùuni̱ ña vaꞌa ga ña na jànini̱ ñu̱n chiꞌin ma tuꞌun vii chaꞌaꞌ ña kùuniun ndeꞌun yuꞌu indukuni kua kùuni̱ ndeꞌi ñu̱n. Ta yuꞌu Paulu jin iin ra cha chicha kùi, ta vitin juuni indii̱ vekaa chaꞌaꞌ ña iin ra kàꞌan chaꞌaꞌ ma Rachaꞌnu Cristu Jesuu kùi.
\v 10 Ta chaꞌaꞌ yakan vitin chìkain iin ñamani nuu̱n chaꞌaꞌ ma ra nàni Onésimu, vati rakan cha kùu ra takua kùu iin ra seꞌi vitin, chaꞌaꞌ ña kīchaꞌa ra chìnuni ra tuꞌun Jesucristu nuu indii ra chiꞌi̱n ma tichi vekaa iꞌya.
\p
\v 11 Vati ma ora ña Onésimu kùu ra musu̱n niku, na tükuii vaꞌa jāꞌa ra, va vitin kùu yi ña ni jatiñu vaꞌa ra chiꞌun takua jàtiñu ra chiꞌi̱n vitin.
\v 12 Yakan va vitin tàchi ndikoi ra nuu̱n, ta kùuni̱ ña na kiꞌin kuendaun ra takua jàꞌun chiꞌi̱n ndia.
\v 13 Ta vaji yuꞌu chànini̱ ña na kindoo ra chiꞌi̱n ña tìndee ra yuꞌu ma tichi vekaa tiñu nuu̱n ña juuni yanga ña indii̱ ma iꞌya chaꞌaꞌ ña kàtituꞌin ma tuꞌun vaꞌa.
\v 14 Va nī kuuni̱ jaꞌi ma kua ikan tu töve kuꞌva jiꞌnaun ndatu ña vaꞌa yi. Ta juuni kùuni̱ ña na kuꞌvaun ndatu ña na ndoo ra, va töve chaꞌaꞌ ña janini̱ ñu̱n kùu yi, vati chaꞌaꞌ ña kùuni maun kùu yi.
\v 15 Nda kèsiin ma Onésimu chiꞌun ta ndàkoo ra ñu̱n tia tiempuni, ikan ma tiá itiꞌ nuu ni koo ra chiꞌun endeeni.
\v 16 Va vitin ta itiꞌ nuu na yüva ra musu̱n ni kuu ra, ti ra vaꞌa ga kùu ra vitin chaꞌaꞌ ña chìnuni ra. Iin ra nduvaꞌa yó kuuni ndeꞌe kùu ra. Yakan va yuꞌu kùuni ndeꞌi ra, ta yoꞌo va ìyo ga yi ña kùuniun ndeꞌun ra. Yakan va na kuuniun ndeꞌun ra takua kùu ma ndian yaniun ña chìnuni takua chìnuni yoꞌo.
\p
\v 17 Yakan \fig Amen los unos a los otros como me aman a mi|58AP-14-10.tif|col|17||Nuu kàꞌan Paulu na kuuni ñivi ndeꞌe na ma taꞌan na indukuni kua kuuni na ndeꞌe na ra|1.17\fig*va tu kùuniun ndeꞌun yuꞌu takua iin merun, ta juuni kua ikan ìyo yi ña kuuniun ndeꞌun ra ndia.
\v 18 Tatu ìyo iin ña tüvi vaꞌa jāꞌa ra, a tàvi ra nuu̱n ora chīyo ra chiꞌun niku, na nakaꞌun yi nuu yuꞌu.
\v 19 Ta chiꞌin ma tuꞌun iꞌya ña yuꞌu tài yi juuni chiꞌin ndaꞌi ña juuni chàꞌi tuꞌun nuu̱n ña ni kaꞌndai ma kuenda ña tàvi ra nuu̱n, tuva takan kùu yi. Va ìyo yi ña kukuꞌuniun ña ndisaa ma ña ìyo nuu̱n kùu ma ña tàviun nui.
\v 20 Yakan va chìkain ñamani nuu̱n, yoꞌo yani, ña na kuꞌvaun tundeeni yuꞌu, ikan na sii kùuni̱ kuenda ma Cristu, vati juuni ma ra chìnuni kùu̱n ndia.
\p
\v 21 Ta chaꞌaꞌ yakan kùu yi ña cha chìto vaꞌi ña ni jaꞌun takua kàꞌin nuu ma tutu iꞌya. Ta juuni ni jaꞌun tiaga kuaꞌaꞌ ma ña vaꞌa ña kàꞌin chiꞌun tiá itiꞌ nuu ndia.
\v 22 Ta yüvi ñaꞌani kùu yi vati juuni kùuni̱ ña na jandovaꞌun ma nuu koi chiꞌun ndia. Vati ndatui ña na kuꞌva Ndioo ña na kei nuu indii̱, ikan na kuu kundeꞌi ñu̱n vati chìtoi ña endee kàꞌun chiꞌin ra chaꞌi ña takan ni kuu yi.
\s Ma tuꞌun nuu ndiꞌinia ña kàꞌan Paulu kuenda Filemón
\p
\v 23 Takan kūu yakan va ma ra nàni Epafra, ra indii vekaa chiꞌi̱n chaꞌaꞌ ma Rachaꞌnu Cristu Jesuu, juuni tàchi ra iin saludu nuu̱n,
\v 24 Ta takani Marku, Aristarcu, Dema ta Luka tāchi ndra saludu nuu̱n ndia, vati ndraꞌya kùu ndra ña tìndee ndra yuꞌu ña jàꞌa ndra ma tiñu nuu Ndioo.
\p
\v 25 Ta ma Rachaꞌnu Jesucristu na koso ra ma ñamani ra chata ndisaa ndo. Ta takan na kuu yi. Amén.