\id 2PE
\h Tutu Petuꞌ Uvi
\toc1 Tutu Petuꞌ Uvi
\mt Tutu uvi ña tāchi rachaꞌnu Petuꞌ
\c 1
\s Petuꞌ kàñaꞌa ra chiꞌin ndisaa ma ndian chìnuni
\p
\v 1 Yuꞌu ra nàni Simón Petuꞌ, kùi iin ra jàꞌa tiñu ta ra kùu tatun Jesucristu, tài ma tutu iꞌya kuenda ndo, vati Rachaꞌnu Jesucristu, ra kùu Ndioo yo ña jàkakú yo, kùu ra iin ra jàꞌa ña ndakuu ndaa ma ñivi, ti chàꞌa ra ña kùu ndo ndian yaꞌa ga vii chìnuni ndo ma tuꞌun ra ma juuni ma takua chāꞌa ra ña chìnuni ndi yi ndia.
\v 2 Ta na ndokuaꞌa ma ñamani Ndioo chiꞌin ndo, ta na koo vii ndo chiꞌin ra chaꞌaꞌ ma ña nàkoto ndo ma Rachaꞌnu Ndioo chiꞌin Rachaꞌnu Jesuu ra kùu chitoꞌo yo.
\s Naja kua ìyo ma ñivi chìnuni tuꞌun Ndioo
\p
\v 3 Chaꞌaꞌ ña yaꞌa kaꞌnu kùu ndatu ma Ndioo kùu yi ña cha nīꞌo tandiꞌi ma ña chìniñuꞌu yo nuu ra, ikan na kuu koo ndito yo takua kùuni ra, ta na kuu ndakuu yo ndian ií kuenda ra. Ta takani kùu yi ña cha nīꞌo ndisaa yakan chaꞌaꞌ ña nàkoto yo Ndioo, ta kāchin ra yo chaꞌaꞌ ña iin ra yaꞌaga kaꞌnu kùu ra, ta chaꞌaꞌ ña yaꞌaga ìyo tundeeni ra chiꞌin yo ndia.
\v 4 Chaꞌaꞌ ma tuꞌun iꞌya kùu yi ña Ndioo chāꞌa ra tuꞌun ra nuu yo, ta yakan ti yaꞌa ga kaꞌnu yi ta yaꞌa ga ìyo kuenda yi. Ta chaꞌaꞌ ma tuꞌun kaꞌnu iꞌya ña Ndioo chāꞌa ra nuu ndo ña kuu chaa ndo nuu niꞌi ndo koo ndo takua ìyo ra, ta juuni ni jakakú ra ndo nuu ni jandiꞌi na ndo, takua ni taꞌan ma ndian ìyo ñuñivi chaꞌaꞌ ña yaꞌa chàtaꞌani na jàꞌa na ma ña kini.
\p
\v 5 Yakan va vitin kùu ndo ndian chìnuni tuꞌun ra. Ta na jaꞌa ndo chiꞌin ndisaa ma tundeeni ndo ña kuꞌun ndo itiꞌ nuu chaꞌaꞌ ma ña chìnuni ndo chiꞌin ña kùu ndo ndian vaꞌa ndia. Ta takan kùu yi ña kuꞌun ndo tiaga itiꞌ nuu chaꞌaꞌ ña kùu ndo ndian vaꞌa chiꞌin ma ña nàkoto ndo niyi kùuni Ndioo ndia.
\v 6 Ta takan kùu yi ña kuꞌun ndo tiaga itiꞌ nuu chaꞌaꞌ ma ña nàkoto ndo niyi kùuni Ndioo chiꞌin ma ña töve yaꞌa ndu jàꞌa ndo ma ña chàtaꞌani ma kuñu ndo jaꞌa yi. Ta takan kùu yi ña kuꞌun ndo tiaga itiꞌ nuu chaꞌaꞌ ma ña töve yaꞌa ndu jaꞌa ndo chiꞌin ma ña jàndeeni ndo ña ndèꞌe ndo tundoꞌo. Ta takan kùu yi ña kuꞌun ndo tiaga itiꞌ nuu chaꞌaꞌ ma ña jàndeeni ndo chiꞌin ma ña kùu ndo ndian yaꞌa ií takua kùu Ndioo ndia.
\v 7 Ta takan kùu yi ña kuꞌun ndo tiaga itiꞌ nuu chaꞌaꞌ ma ña kùu ndo ndian ií chiꞌin ma ña yaꞌa kùuni ndo ndeꞌe ndo taꞌan ndo ndian chìnuni. Ta takan kùu yi ña kuꞌun ndo tiaga itiꞌ nuu chaꞌaꞌ ña kùuni ndo taꞌan ndo chiꞌin ma ña kùuni ndo ndeꞌe ndo Ndioo chiꞌin tandiꞌi ñivi takua jàꞌa Ndioo.
\p
\v 8 Ta tu ndyoꞌo jàꞌa ndo tandiꞌi ma tuꞌun iꞌya ta kuaꞌnu ndo chiꞌin yi, ndisaa yakan ni kumi yi ndo, ta töve ni kuu ndo ma ndian töve chàtiñu Ndioo, ti ìyo nda kuenda ndo chiꞌin ma ña nàkoto kachin vaꞌa ndo ma Rachaꞌnu Jesucristu ra kùu chitoꞌo yo.
\v 9 Ta tu ìyo nda ndyoꞌo töve jàꞌa ndo ndisaa ma tuꞌun iꞌya ta töve kuaꞌnu ndo chiꞌin yi, kùuni yi kaꞌan yi ña kùu ndo takua kùu ndian kuaá ta kùu ndo ndian töve ndichin vaꞌa ndeꞌe, ti nàani ndo ña Ndioo kùu ma ra jānaa ma kuati ña jāꞌa ndo itiꞌ chata niku.
\p
\v 10 Yakan va ndyoꞌo yani, takua cha kāna ma Ndioo ndo ta kāchin ra ndo, na kunumi ndo ña na kutuꞌva vaꞌa ndo ña kùu ndo ñivi Ndioo ndicha. Tu jaꞌa ndo ndisaa yakan, endee na töve ni jaña ndo ña chìnuni ndo tuꞌun Ndioo.
\v 11 Ta tu takan jàꞌa ndo yaꞌa sii ni kuuni Ndioo ña ni kuꞌva ra kiꞌvi ndo nuu chàꞌnda ma Rachaꞌnu Jesucristu tiñu endeeni, ta rakan kùu ma chitoꞌo yo ta ma ra jàkakú yo.
\p
\v 12 Yakan va endeeni ni jakukuꞌuni̱ ndo chaꞌaꞌ ma tuꞌun iꞌya, vaji cha chìto ndo yi ta na töve jàña ndo ma tuꞌun ndaa chìnuni ndo vitin.
\v 13 Vati ora juuni kuyanga gai ma ñuñivi iꞌya, chànini̱ ti ña ndaa kùu ma ña jàꞌi ña kuu kundayuꞌi ndo chaꞌaꞌ ma tuꞌun iꞌya.
\v 14 Ma Rachaꞌnu chitoꞌo yo Jesucristu cha chāꞌa ra ña kotoi ña numini ni ndakoi ma tiñu iꞌya ti chani kuvi̱ numi kuii ni.
\v 15 Va ni jaꞌi chiꞌin ndisaa kuii ma ña ndei ora kuyanga ña takäꞌan kuvi̱, ikan ora na chaa ña ni nai, kùu kukuꞌuni ndo yuꞌu chaꞌaꞌ ma tuꞌun iꞌya ña chūndayuꞌi ndo.
\s Ma ndian ìyo iꞌya ndēꞌe na Jesuu nuu ña yaꞌa ga tacha ra
\p
\v 16 Ma tuꞌun ña jànaꞌa ndi nuu ndo chaꞌaꞌ ma ndatu Jesuu chiꞌin chaꞌaꞌ ña ni kichi ndiko ra ma ñuñivi iꞌya, töve iin kuentu ña kīchi ma tichi ma chinituni maani ndi kùu ma ña kàꞌan ndi, vati ndēꞌe kachin ndi chiꞌin tinuu ndi ma Rachaꞌnu chitoꞌo yo Jesuu ta juuni ndēꞌe ndi ra ora yaꞌa tacha ra ndia.
\v 17 Vati Jesuu nīꞌi ra ndatu ra chiꞌin ma ña iñuꞌu ra ndaꞌaꞌ Rachaꞌnu Ndioo, ra kùu Tatá yo ora chīni ndi ña yaꞌa niꞌi kàꞌan ra itiꞌ andivi teꞌen: “Raꞌya kùu ma ra seꞌi, ra yaꞌa ga kùuni ndeꞌi, ta yaꞌa ga chisii̱ chiꞌin ra”, kāti Ndioo.
\v 18 Juuni maa ndi chīni ma tuꞌun ña kāꞌan ma Ndioo itiꞌ andivi, ma ora kaꞌìin ndi ma xini yuku ií chiꞌin ma Jesuu niku.
\v 19 Yakan va chìto kachin tiaga yo ña ndicha kùu ma tuꞌun Ndioo ña kàꞌan ndian kàꞌan chiꞌin tuꞌun yuꞌu Ndioo. Ta ndyoꞌo vaꞌani jàꞌa ndo ña tàsoꞌo ndo ma tuꞌun chaꞌaꞌ Cristu, ti ma tuꞌun ikan kùu yi kuenda yo takua kùu iin ñuꞌú ndaꞌaꞌ ña tìin yi ma nuu naa, ta tìin yi nda kati kundichin takua jàꞌa ma chele kundichin ña keta ma ora ni tuvinia. Ta chaꞌaꞌ ma tuꞌun ikan kùu yi ña jandondichin yi ma anima yo.
\v 20 Va kùuni̱ ña na kiꞌin kuenda ndo ma tuꞌun ña ni kaꞌin iꞌya: ña nïꞌiin ma tuꞌun ña kàꞌan ma nuu tutu Ndioo, nïꞌiin ma ñivi ña kàꞌan chiꞌin tuꞌun yuꞌu Ndioo na küu kaꞌan na yi kuenda kaꞌnuni takua kùuni maa na.
\v 21 Vati nïꞌiin tuꞌun Ndioo ña kàꞌan ndiakan, na töve nī kaꞌan ndra ma ña kùuni maa ndra, ti ma ndra kàꞌan chiꞌin tuꞌun yuꞌu Ndioo kāꞌan ndra mamaa tuꞌun Ndiooni, ti maa ma Tati Ií Ndioo ña ìyo chiꞌin ndra kùu yi ña jànaꞌa yi ma kua ìyo yi ña kaꞌan ndra.
\c 2
\s Ma ndra jànaꞌa tuꞌun vata
\p
\v 1 Va tatiempu juuni chīyo iin ndra jàꞌani ña kùu ndra ndra kàꞌan chiꞌin tuꞌun yuꞌu Ndioo niku ma ñuu Israel, ta takan ni koo iin ma ndra kùu matru vata kàꞌan kuenda Ndioo ma tañu ndo itiꞌ nuu ndia. Ma ndrakan xeꞌeni ni janaꞌa ndra ma tuꞌun vata ña jàkanuu yi xini ma ñivi, ta ni kaꞌan ndra ti töve ndicha kùu ña jākakú ma Rachaꞌnu chitoꞌo yo ndra, ta ma tuꞌun ña jànaꞌa ndra iꞌya numini ni naa ndra jàꞌa yi, ti töve ña ndicha kùu ma ña kàꞌan ndra.
\v 2 Yaꞌa ga kuaꞌaꞌ ñivi ni jachiꞌin na ma ña ni kaꞌan ndra, ta ni jaꞌa na indukuni ma takua jàꞌa ndra. Ta chaꞌaꞌ yakan kùu yi ña inga ñivi ora ndeꞌe na ña jaꞌa ndra, ni kaꞌan na chata Cristu chiꞌin itiꞌ ndaa ña jànaꞌa ra ndia.
\v 3 Ma ndra kàꞌan chiꞌin tuꞌun yuꞌu Ndioo ikan, chaꞌaꞌ ña yaꞌa ga chàtaꞌani ndra ma xuꞌunꞌ kùu yi. Yakan va ni janaꞌa ndra ma tuꞌun vata nuu ndo, ta jàꞌani ndra ña tuꞌun ndaa kùu ña kàꞌan ndra, va cha ìyo kuiya ña ndàtu Ndioo ña jàndeꞌe ra tundoꞌo ndra chaꞌaꞌ yi, ikan na naa ndra.
\p
\v 4 Ta ndicha ña na töve nī jakaꞌnuni Ndioo kuati ma tati xaan ndian jāꞌa kuati, vati jākana ra na ma andayaꞌ, ta ndākoo ra na ma nuu naa ma andayaꞌ, ta endee ndìkun na chiꞌin karena, ta ikan kùu nuu tīvaꞌa ra na kuenda ña na chaa ma ora ña ni jakutunini ra ma kuati jāꞌa na.
\v 5 Ta juuni na töve nī jakaꞌnuni Ndioo ma kuati ma ñivi chīyo tatiempu niku, ti ma ña jāꞌa ra kūu yi ña tāchi ra ña na nduva ma tañuꞌu chata ma ndian kini ña töve jàkaꞌnu Ndioo, ta uvaa ra nàni Noé, ra jānaꞌa ndaa ma tuꞌun Ndioo nuu ma ñivi chiꞌin ucha taꞌan ga na tiá kùu ma ndian kākú ma ora ikan.
\v 6 Ta Ndioo juuni jākutunini ra ta chāꞌni ra ma ñivi ìyo ma ñuu Sodoma chiꞌin ñuu Gomorra, ta endee ndīꞌi ma ñivi kāyu ta endee mamaa yuyania na kīndoo, ikan na kuu yi iin seña ña Ndioo ni janaꞌa ra ña takan ni taꞌan chiꞌin nda ndian kini nikuuni ña töve jàkaꞌnu na ra.
\v 7 Vati Ndioo jākakú ra iin ra ndaa ña nàni Lot. Ta rakan ti yaꞌa ga sutini ra ña ndēꞌe ra ma ña kini ña jāꞌa ma ndra chīyo chiꞌin ra ñuu ikan,
\v 8 vati ma ra ndaa iꞌya nani kivi ìyo ra tañu ma ndian ñuu ikan niku, ta yaꞌa ga ndēꞌe ra tundoꞌo ta ndaꞌvi kùuni ma anima ra ora ndēꞌe ra ta chīni ra ndisaa ma tiñu kini ña jàꞌa ma ñivi ikan.
\v 9 Takan kùu yi ña ma Rachaꞌnu chìto vaꞌa ra tavanisiin ra ta jakakú ra ma ndian chìnuni tuꞌun ra tañu tundoꞌo ndèꞌe na, ta juuni chìto ra naja kua tivaꞌa ra ma ndian jàꞌa kuati, ikan na ndeꞌe na tundoꞌo nda kati chaa ma kivi ña ni jakutunini ra ma kuati ndisaa ñivi.
\v 10 Ta Ndioo ni jandeꞌe ra tia kuaꞌaꞌ tundoꞌo ma ñivi ña chàtaꞌani na jaꞌa na ma kuati takua kùuni ma anima na, ta ndiakan kùu na ma ndian töve jàchiꞌin ña kàꞌan ma ndian kùxini nuu na. Ta ndian yaꞌa ga tayi ta soꞌo, ta juuni ma ndian töve yuꞌvi na kàꞌan na tuꞌun kini chata ndian ìyo ndatu kaꞌnu ìyo andivi ndia.
\v 11 Va ni ma tati vaꞌa ña jàkuu tiñu nuu Ndioo töve jàꞌa yi takan, vaji ìyo tiaga tundeeni yi ña kùu kaꞌnda yi tiñu, na töve tisokuati yi ta kàꞌan ndaa yi chata ma ndatu kaꞌnu ikan nuu ndèꞌe Ndioo.
\p
\v 12 Va ma ndrakan kùu ndra takua kùu iin kiti kuꞌu, ti ndrikan na töve ìyo chinituni ndri, ti ìyo maa ndri takan kuii ni, kāku ndri va na töve nda kuenda ndri, ti itiꞌ nuu ni tiin ma ñivi ndri ta ni kaꞌni na ndri. Takan ni kuu chiꞌin ndrakan, ti töve vaꞌa kàꞌan ndra chata ma tuꞌun ña töve kùtunini ndra, ta ni kuvi ndra ma indukuni ma takua chìꞌí ma kiti kuꞌu ikan.
\v 13 Ta ni ndeꞌe ndra tundoꞌo ma takua jàndeꞌe na ma tundoꞌo ma inga ñivi. Yaꞌa ga sii kùuni ndra chaꞌaꞌ ma ña chàtaꞌani ndra jaꞌa ndra viko nda ora nikuuni. ¡Iin tukanuu kùu ndra chaꞌaꞌ ma kuati jàꞌa ndra ma ora kaꞌìin ndra ma nuu ìyo viko jàꞌa ndo, ta chisii ndra ora kanduu jaꞌa na ma ña töve vaꞌa ña chàtaꞌani ndra jaꞌa ndra!
\v 14 Na küu kuii ndeꞌe ndra ma iin ñaꞌa takani, vati cha kùuni ndra kiꞌvi ndra chiꞌin vi, endee na töve chìtatu ndra ña jàꞌa ndra ma kuati. Nduvaꞌa kèñaꞌa ndra ma ndian yaꞌa ga taꞌa kùuni, ikan na kuu kiꞌvi ndra chiꞌin na, ta iin ndian yaꞌa ga siini ma xuꞌunꞌ kùu ndra ndia. Ta chaꞌaꞌ yakan kùu yi ña Ndioo ndicha kuii ni jandeꞌe ra tundoꞌo nuu ndra.
\v 15 Iin ndian chānaa kùu ndra chaꞌaꞌ ña cha kēsiin ndra ma itiꞌ ndaa, ta tāndikun ndra kuàꞌan ndra itiꞌ kuàꞌan ra nàni Balaam seꞌe ra nàni Beor, ra nānduku kua jakanaa ra kuaꞌaꞌ xuꞌunꞌ chaꞌaꞌ ma tiñu ña töve vaꞌa ña jāꞌa ra.
\v 16 Ta chīninaa ra chaꞌaꞌ ma kuati ña jāꞌa ra: Iin burru jàna ra, nākaꞌan ri ma takua kàꞌan iin ñivi, ta nī chaꞌa ri jaꞌa ra ma ña töve vaꞌa takua kùuni ra jaꞌa ra.
\p
\v 17 Ma ndra matru ikan kùu ndra takua kùu iin soko ña töve takuii tichi, indukuni ma takua kùu iin viko ña kuàꞌan ora chàkin niꞌi tati, ta Ndioo ni jandeꞌe ra tundoꞌo ndra endeeni, ta ni tachi ra ndra nuu nduvaꞌa kuii naa.
\v 18 Ta ndrakan kàꞌan ndra tuꞌun yaꞌa ga sukun ña töve nda kuenda, ndèꞌo tu kuu keñaꞌa ndiko ndra ma ndian já ndākoo ña jàꞌa na ña kini niku chiꞌin tuꞌun ña jànaꞌa yi nuu na ña nànduku na naja kua kùu kiꞌvi ndiko na itiꞌ kini, ta na jaꞌa ndiko na ma kuati ña kùuni ma kuñu na jaꞌa yi.
\v 19 Ta ndrakan, endee chàꞌa ndra tuꞌun nuu na ña kuu kuꞌun na itiꞌ nuna, ta jaꞌa na ma ña kùuni maa na, vaji juuni maa ndra töve kuàꞌan ndra nuu nuna, va nani kivi endee jàꞌa ndra ma ña kini, ti na küu jaña ndra jaꞌa ndra yi. Ñaꞌa kùuni yi kaꞌan yi ña kùu ndra musu ma kuiꞌna, ti chàꞌndánꞌ tiñu nuu ndra, ta ndakánꞌ ndra kuàꞌan ndra ma itiꞌ nuu ni ndiꞌi ndra.
\v 20 Ti ma ndra cha nākoto ma Rachaꞌnu chitoꞌo yo Jesucristu, ta kākú na jāꞌa ra nuu ma tati xaan chiꞌin nuu ma kuati ña jàꞌa na ma ñuñivi iꞌya. Ta tu na ndakoo ndiko na ña jàꞌa na ma tiñu vaꞌa ña jàꞌa na, ta kìchaꞌa ndiko na jaꞌa na ma ña töve vaꞌa ña jāꞌa na niku, kaꞌvi ga töve vaꞌani kìndoo na ma takua chīyo na ma antea niku.
\v 21 Vaꞌa ga kuenda ndra tu töve nī nakoto na ma itiꞌ ndaa Ndioo niku, ti tava cha nākoto na yi vitin, ta jāña ndiko na ña jàꞌa na ma takua kàꞌan ma tuꞌun ìyo nuu tutu ií ña tāchi Ndioo kuenda yo.
\v 22 Va ndicha kuii ti ni chinu ma ña kàꞌan ma iin tuꞌun ña kàꞌan teꞌen: “Ma ina chàchi ndiko ri ma juuni ña ndūchan ri, ta ma kini ña já nàkata yo, numini ni kiꞌvi ndiko ri kuti ri ndaꞌyu.”
\c 3
\s Ni keta iin kivi ña ni kichaa ndiko ma Rachaꞌnu Jesucristu
\p
\v 1 Ndyoꞌo yani ndian yaꞌa ga kùuni̱ ndeꞌi, ñaꞌa kùu ma tutu uvi ña tāchi̱ nuu ndo. Ña kàꞌan nuu ninduvi ma tutu ikan, kùuni̱ ña na titunini vaꞌa ndo chaꞌaꞌ ma ña ndaa ña chùndayuꞌi ndo.
\v 2 Na kukuꞌuni ndo ma ña kàꞌan ma ndra yaꞌa ga ií ña kàꞌan chiꞌin tuꞌun yuꞌu Ndioo tatiempu niku, ta juuni na kukuꞌuni ndo tuꞌun Rachaꞌnu Jesuu ra jàkakú yo ña tāchi ra nuu ndo chiꞌin ma ndra tatun ra.
\p
\v 3 Ma tuꞌun ña kùuni ña na kiꞌin kuenda ndo kùu ma ña ni kaꞌin iꞌya: Ta ma kivi nuu ndiꞌi nia, ni keta kuaꞌaꞌ ma ndian ni kaꞌan ndaa chata ña vaꞌa ta ni jaꞌa na ma ña kini takua chàtaꞌani maa na jaꞌa na,
\v 4 ta ni ndakatuꞌun na teꞌen: “¿Niyi kūu chiꞌin ma tuꞌun ña chāꞌa Ndioo nuu yo, ña Jesuu ni kichi ndiko ra ma ñuñivi iꞌya?, kùuni ndo. Vati nda ora cha chīꞌí ma ndian kùu tatá yo, ta töve sàma ma kua ìyo ma ñuñivi ti indukuni kàa ndisaa ña ìyo nuu yi. Ta indukuni takan kàa yi kua ma ora tūvi yi tatiempu”, kàti na.
\v 5 Ma ñivi ikan, na töve kuuni na kuꞌva na kuenda, vaji cha chìto na ña ma tatiempu chiꞌin tuꞌun Ndioo, jātuvi ra ma andivi chiꞌin ma ñuꞌuꞌ ñuñivi, ta juuni chiꞌin tuꞌun ra jākesiin ra ma ñuꞌuꞌ ití chiꞌin ma takuii.
\v 6 Ta juuni ma tatiempu Ndioo jānaa ra ma ñuñivi chiꞌin ña ndūva ma tañuꞌu kaꞌnu nuu yi jāꞌa ra niku.
\v 7 Ta ma andivi chiꞌin ma ñuꞌuꞌ ñuñivi ña ìyo vitin, cha ìyo tuꞌva yi jāꞌa ma Ndioo, kuenda ña ni kayu yi, jàꞌa ma tuꞌun ra. Ta ma ñuꞌú ikan ni kaꞌmi yi ma andivi chiꞌin ma ñuꞌuꞌ ñuñivi ma ora ni chaa ma kivi ña ni jakutunini Ndioo ma kuati ma ñivi ìyo ñuñivi. Ta ora ikan ni naa ndisaa ndian kini ña töve jàkaꞌnu na Ndioo ndia.
\p
\v 8 Ta takani ndian ndyoꞌo ndian yani ndian yaꞌa ga kùuni̱ ndeꞌi, koto näani ndo ña kuenda ma Rachaꞌnu Ndioo, iin kivini kùu yi tava kùu iin mii kuiya kuenda ra, ta mii kuiya kùu yi tava kùu iin kivini kuenda ra ndia.
\v 9 Na töve ña kuyanga ma Rachaꞌnu Ndioo ña jachinu ra ma tuꞌun ña chāꞌa ra nuu yo kùu yi, ma takua nàkanini ma ñivi töve chìnuni, vati chaꞌaꞌ ña jàndeeni Ndioo anima ra chaꞌaꞌ na kùu yi ña ndàtu ra, ti töve kùuni ra ña na kuꞌun nïꞌiin ñivi andayaꞌ, va kùuni ra ña na ndakoo na jàꞌa na kuati ta na chikoniꞌi na kuꞌun na itiꞌ ra.
\v 10 Ma kivi ña ni kichaa ndiko ma Rachaꞌnu Jesuu, ni kuu yi iin kivi ña nïꞌiin ñivi na töve ndàtu na ra, ta ni keta ra numini ma tava jàꞌa ma iin rasuꞌu. Ta ma ora ikan ma andivi ni naa yi chiꞌin iin ña kalachan niꞌi vaꞌa, ta ma ñuñivi chiꞌin tandiꞌi ña ìyo nuu yi ni kayu ndiꞌi yi.
\p
\v 11 Ta takan ni naa ma tandiꞌi ma nakuyi jàꞌa ma Ndioo, ¡yakan va ìyo yi ña kuu ndo ndian ií ta na koo ndo takua kùuni ma Ndioo nani kivi!
\v 12 Na koo tuꞌva ndo kuatu ndo ma kivi ña ni chaa ma Ndioo ma ñuñivi iꞌya, ta na kunumi ndo jaꞌa ndo ma tava kùuni ra, ikan na kichaa ra numini tia. Ma kivi ikan ni kayu ma andivi, ta tandiꞌi ma ña ìyo nuu yi ni ndutu yi jaꞌa ma ñuꞌú nduꞌva nia ña ni tiin.
\v 13 Va tandiꞌi yo ndàtu yo ma ñuñivi chaa chiꞌin ma andivi chaa ña chāꞌa ma Ndioo tuꞌun ña ni kuꞌva ra nuu yo, ta ma nuu ma ñuñivi ikan, ta ma ikan yaꞌa ga ndaa ta vii ni koo ma ñivi takua kùuni Ndioo.
\p
\v 14 Yakan va ndyoꞌo yani ndian yaꞌa ga kùuni̱ ndeꞌi, ora juuni kuyanga ndo ndàtu ndo ña na kuu ndisaa ñaꞌa, na kunumi ndo koo vaꞌa ndo chiꞌin ma ñivi, ikan na vii nataꞌan ma Ndioo ndo, chiꞌin nïꞌiin kuati.
\v 15 Na kiꞌin kuenda vaꞌa ndo ma ña yaꞌa ga jàndeeni Ndioo ndo, ikan na kuu kakú ñivi nuu ma kuati na. Ta juuni chaꞌaꞌ ma tuꞌun iꞌya tāa ma ra yani yo Paulu, chiꞌin ma chinituni ña chāꞌa Rachaꞌnu Ndioo nuu ra niku.
\v 16 Ma nuu ma taꞌiiꞌiin ma tutu tāa ra kàꞌan ra takua kàꞌan ma tuꞌun iꞌya, vaji ìyo iin ma tuꞌun ña yaꞌa ga ndetiñu kùu kutunini yo nuu yi, ta ma ndian töve chìnuni chiꞌin ma ndian yaꞌa ga taꞌa kùuni, endee jàkesiin na ma ña kàꞌan yi takua jàꞌa na chiꞌin tandiꞌi tuꞌun Ndioo, ta chaꞌaꞌ yakan, Ndioo ni janaa ra na.
\p
\v 17 Yakan va kùuni̱ kaꞌin chiꞌin ndo, ndyoꞌo yani, ndian yaꞌa ga kùuni̱ ndeꞌi, ña tava ndyoꞌo takani cha chìto ndo ma tuꞌun iꞌya ma antea niku, na kumi kuenda vaꞌa ndo ndo, ikan na töve kuu keñaꞌa ma ndian töve chìnuni ndo, ta jaꞌa na ña na jaña ndo ma itiꞌ vaꞌa ña kuàꞌan ndo.
\v 18 ¡Va na kuaꞌnu vaꞌa ndo chiꞌin ma ñamani Ndioo, ta na nakoto vaꞌa ndo ra chiꞌin ma Rachaꞌnu Jesucristu ra jàkakú yo! ¡Na tiñuꞌu ndo ra chaꞌaꞌ ma ndatu kaꞌnu ña jàꞌa ra endeeni! Ta takan na kuu yi. Amén.