\id 1JN
\h Tutu Xuva Nunuu
\toc1 Tutu Xuva Nunuu
\mt Tutu nunuu ña tāa rachaꞌnu Xuva
\c 1
\s Ma tuꞌun Ndioo ña chàꞌa kivi koo yo chiꞌin Ndioo
\p
\v 1 Rakan kùu ra ma tuꞌun Ndioo. Ta takani ìyo ra nda ora tūvi ma ñuñivi. Ta ma tuꞌun iꞌya kùu ma tuꞌun ña chīni ndi ta ndēꞌe ndi ra chiꞌin tinuu ndi. Takan kàꞌan ndi ndia, vati jānani ndi ndaꞌaꞌ ndi ma tuꞌun ikan. Ta ma tuꞌun ikan kùu yi ña chàꞌa kivi koo ndito yo.
\v 2 Yakan va ndèꞌe ndi ti cha kīchi yi ma nuu ñuꞌuꞌ ñuñivi iꞌya, ta ma tuꞌun ikan kùu Cristu. Ta chaꞌaꞌ ma tuꞌun ikan kùu yi ña kàtituꞌun ndi nuu ndo, ikan na niꞌi ndo nuu koo ndito ndo endeeni chiꞌin Ndioo. Vati ma tuꞌun ikan kùu ra ña ìyo ra chiꞌin ma Tatá yo va cha kīchi ra nuu ìyo yo.
\v 3 Yakan va cha kātituꞌun ndi nuu ndo ma tuꞌun ndēꞌe ndi ta chīni ndi, ikan na inuu koo ndo chiꞌin ndi takua inuu ìyo ndi chiꞌin ma Rachaꞌnu Ndioo Tatá yo ta chiꞌin ma seꞌe ra Rachaꞌnu Jesucristu ndia.
\v 4 Teꞌen tāa ndi ndisaa ma tuꞌun iꞌya kuenda ndo, ikan na nduvaꞌa kuii sii kuuni yo.
\s Ndioo kùu ra takua kùu ma ñuꞌú ña jàndondichin
\p
\v 5 Tuꞌun iꞌya kùu ma tuꞌun jānaꞌa ma Rachaꞌnu Cristu nuu ndi: Ma Rachaꞌnu Ndioo kùu ra takua kùu ma ñuꞌú ña jàndondichin nuu yo, vati nïꞌiin taꞌvi töve kùu ra takua kùu nuu naa.
\v 6 Vati tu kàtio ña ìyo vaꞌa yo chiꞌin ra, ta juuni chàkunuu yo nuu naa chaꞌaꞌ ña jàꞌa yo ma ña kini, tajan kùuni yi kaꞌan yi ña tuꞌun vata kùu ma ña kàꞌan yo ora jaꞌa yo takan. Yakan va na yüvi itiꞌ ndaa kùu ma itiꞌ kuàꞌan yo tu takan jàꞌa yo.
\v 7 Vatu chàkunuu yo nuu ma ñuꞌú ña jàndondichin yi itiꞌ yo takua ìyo ma Rachaꞌnu nuu ñuꞌú, tajan cha inuuni koo yo chiꞌin ma ñivi taꞌan yo. Ta ma nii ma Rachaꞌnu Jesucristu ra Seꞌe Ndioo endee jànaa raꞌ tandiꞌi ma kuatio.
\p
\v 8 Ta tu katio ña tüvi ìyo kuatio, tajan jandaꞌviñaꞌa yo juuni maa yo, vati mamaa tuꞌun vata kùu ma ña kàꞌan yo ta töve kuàꞌan yo itiꞌ ndaa.
\v 9 Va tu naꞌma yo ndisaa ma kuati jàꞌa yo nuu ma Rachaꞌnu Ndioo, ta chìto yo ña kùu chinunio ña Ndioo ni jachinu ra ña kàꞌan ra, ti iin ra ndaa kùu ra, yakan va ni janaa ndio ra ndisaa ma kuatio, ta ni janandoo ra ma anima yo ndia.
\v 10 Ta tu katio ña tüvi ìyo nïꞌiin kuatio, tajan kùuni yi kaꞌan yi ña jàꞌa yo ña na kuu ma Rachaꞌnu Ndioo iin ra vata, vati chàtuꞌunio ra, ta ma ña ndicha kùu yi ña takäꞌan chinunio ma tuꞌun ra.
\c 2
\s Rachaꞌnu Cristu kùu ma ra kàꞌan chaꞌaꞌ yo
\p
\v 1 Ndyoꞌo seꞌyu tài ma tuꞌun iꞌya kuenda ndo, ikan na jäꞌa ga ndo ma kuati. Ta tu ìyo iin nda ndyoꞌo jàꞌa kuati, na koto ndo ti ìyo iin ra kàꞌan chaꞌaꞌ yo nuu Ndioo, ta rakan kùu ra Jesucristu, ra vaꞌa.
\v 2 Vati Jesucristu kùu ra ña sōkó ra ra ta chīꞌí ra nuu kruu kuenda ña janaa ra kuatio. Ta yöve chaꞌaꞌ maa yo ni, va juuni chaꞌaꞌ tandiꞌi ma ñivi ìyo ñuñivi ndia.
\p
\v 3 Ta tu ndicha ña jàchiꞌin yo ma tuꞌun kàꞌan ma Rachaꞌnu Ndioo, tajan na chinuni ndio yo ti ndicha vaꞌa ña cha nākoto vaꞌa yo ma Rachaꞌnu Ndioo.
\v 4 Va tu ìyo nda yo kàꞌan ña cha nākoto vaꞌa yo ma Rachaꞌnu Ndioo kàtio, ta tüvi jachiꞌo ma tuꞌun kàꞌan Ndioo ña ìyo yi ña jaꞌa yo, tajan ma ña kàꞌan yo kùu yi takua kùu iin mamaa kuentuni, ta töve kuàꞌan yo itiꞌ ndaa.
\v 5 Va tu ìyo iin ndian jàchiꞌin ma tuꞌun ma Rachaꞌnu Ndioo, ta kùuni yi kaꞌan yi ña nduvaꞌa kuii kùuni na ndeꞌe na ra. Ta takan chìto vaꞌa na ña cha ndōꞌiin anima na chiꞌin ra.
\v 6 Yakan va ma yo kàti ña cha ndōꞌiin anima yo chiꞌin ma Rachaꞌnu Ndioo, ìyo yi ña koo vaꞌa yo ta jaꞌa yo takua jāꞌa ma Rachaꞌnu Jesucristu ora chīyo ra ma nuu ñuꞌuꞌ ñuñivi iꞌya.
\s Tuꞌun chaa ña kàtituꞌun ma Rachaꞌnu Ndioo kuenda yo
\p
\v 7 Ndyoꞌo yani ma tuꞌun iꞌya ña tài kuenda jakotoi ndo na yüvi iin tuꞌun chaa kùu yi kuenda ndo, vati juuni ma tuꞌun chaꞌnu ña takani cha chīto ndo tatiempu kùu yi. Ñaꞌa kùu ma tuꞌun ña cha chīni ndo niku.
\v 8 Ta vaji takan kùu yi va ma tuꞌun tài kuenda ndo ma tuꞌun chaa kùu yi, vati ndicha vaꞌa ña jàꞌa Jesucristu takua kàꞌan yi, takua ikan vaꞌa jàꞌa nda maa ndo ndia. Vati ma ña nuu naa chani naa yi kueeni, kueeni. Ta vitin cha ndōndichin ndicha kuii ma itiꞌ vaꞌa kuenda yo.
\p
\v 9 Va tu ìyo nda yo kàꞌan ña mamaa ña vaꞌa kùu ma ña jàꞌa yo, ta kuàꞌan yo itiꞌ ndichin kàtio, vaji indukuni xaanio ndeꞌo ma ndian kùu taꞌan yo, kùuni yi kaꞌan yi, ti juuni takäꞌan chinuni vaꞌa yo ma tuꞌun ra ti juuni indii ga yo ma nuu naa.
\v 10 Vatu ìyo ma ndian kùuni na ndeꞌe na taꞌan na cha ìyo na nuu ndichin ta töve kòyo na tichi kuati.
\v 11 Va ma ndian xaani na ndeꞌe na taꞌan na ìyo na nuu naa ta kuàꞌan na itiꞌ nuu naa, ta tüvi chìto na nda itiꞌ kùu ma itiꞌ kuàꞌan na, vati ma ña kini ta naa kùu yi ña cha chāsi yi tinuu na.
\p
\v 12 Yakan va tài ma tuꞌun iꞌya nuu ndo ndyoꞌo seꞌyu, ikan na kuꞌva ndo kuenda ña cha jàkaꞌnuni ma Rachaꞌnu Ndioo kuati ndo chaꞌaꞌ ña chīꞌí ma Rachaꞌnu Jesucristu chaꞌaꞌ ndo.
\v 13 Ta tài ma tuꞌun iꞌya nuu ndyoꞌo tatá ndrachaꞌnu chaꞌaꞌ ña cha nākoto ndo ma Rachaꞌnu Jesucristu, ti takani ìyo ra antea ña koo ma nuu ñuꞌuꞌ ñuñivi iꞌya. Ta juuni tài yi nuu ndyoꞌo ndian tivaa ndia, vati juuni cha kūndee ndo jàkanaa ndo ma kuiꞌna ndia. Ta cha tāi ma tuꞌun iꞌya kuenda ndyoꞌo seꞌyu, ti cha nākoto ndo ma Rachaꞌnu Ndioo yo.
\v 14 Ta cha tāi ma tuꞌun iꞌya kuenda ndo ndyoꞌo tatá ndrachaꞌnu, vati cha chìto ndo nda ra kùu ma ra takani ìyo. Ta juuni cha tāi yi kuenda ndyoꞌo ndian tivaa ndia, vati yaꞌa niꞌi jāꞌa ndo ña kūndee ndo chinuni ndo tuꞌun Ndioo chiꞌin ndisaa anima ndo, ta chaꞌaꞌ ña cha kūndee ndo jàkanaa ndo ma kuiꞌna ndia.
\p
\v 15 Yakan va na töve kuuni ndo ndeꞌe ndo ma ñuñivi ta ni ma ña kini ìyo nuu yi ndia, vati tu ìyo nda ndian kùuni na ndeꞌe na ma ñuñivi, kùuni yi kaꞌan yi ña na tüvi kùuni ndicha na ndeꞌe na ma Rachaꞌnu Ndioo Tatá yo.
\v 16 Vati ndisaa ña kini ma ña ìyo ñuñivi, yüvi ña chàꞌa ma Rachaꞌnu Ndioo Tatá yo kùu yi va kùu yi ña chàꞌa ma ñuñivini. Ta ñaꞌa kùu ma ña kini ña chàꞌa ma ñuñivi ña chàtaꞌanio jaꞌa yo ña kini chiꞌin kuñu yo chiꞌin ma ña kini ña chàtaꞌanio ndeꞌo chiꞌin ma ña kùtayi yo chiꞌin ndatiñu ña ìyo yo.
\v 17 Ta ma nuu ñuꞌuꞌ ñuñivi iꞌya cha kua ndiꞌi yi chiꞌin tandiꞌi ña kini ña chàtaꞌani na jaꞌa na, vatu jaꞌa yo takua kùuni ma Rachaꞌnu Ndioo ña jaꞌa yo, tajan ni niꞌo ma nuu ni koo yo endeeni chiꞌin ra.
\s Ìyo ndian kàꞌan tuꞌun vata
\p
\v 18 Ndyoꞌo seꞌyu vitin va cha kēta ndio ma kivi nuu ndiꞌinia. Ta takua chīni ndo ña ni kichi ndio iin ra xaani ndeꞌe ma Rachaꞌnu Cristu, ta vitin ti cha kīchaꞌa keta kuaꞌaꞌ ma ndian kini ña tüvi kùuni ndeꞌe ma Rachaꞌnu Cristu. Ta chaꞌaꞌ yakan kùu yi ña cha chìto yo ña chani keta ma kivi nuu ndiꞌinia.
\v 19 Va juuni ma ñivi kèe tañu yo kùu ma ndian jàꞌa takan, ti na yüvi ma ndian chìnuni ndicha kùu na, vati tu ndicha ña ma ndian chinuni kùu na, na tüvi ìyo yi ña kesiin na chiꞌo ti endee ìyo yi ña kindoo na koo na chiꞌin yo niku. Va takan kūu yi, ikan na kuꞌva yo kuenda ña na yüvi ndisaa ma ñivi kùu ma ndian chìnuni tuꞌun Ndioo takua chìnuni maa yo.
\p
\v 20 Vati nuu ndisaa ndo chāꞌa ma ra Cristu Tati Ií Ndioo kuenda ña na koo yi chiꞌin ndo ta kuꞌva yi chinituni ndo. Yakan va ndisaa ndo cha chìto ndo tuꞌun ndaa.
\v 21 Tàchi̱ ma tuꞌun iꞌya nuu ndo, vati cha chìtoi ña cha nàkoto ndo nda ña kùu ma ña ndicha ta nda ña kùu ma ña töve ndicha. Ta juuni cha chìto ndo ti ma ña ndicha na tüvi jàndaꞌviñaꞌa yi ndia.
\v 22 Vati ma ndian kàꞌan tuꞌun vata, ndiakan kùu ma ndian kàꞌan ña na yüvi Jesuu kùu ra ma Cristu. Yakan va cha chìto ndo ti ndiakan kùu ma ndian tüvi kùuni ndeꞌe ma Rachaꞌnu Cristu, vati ndiakan tüvi chìnuni na tuꞌun ma Rachaꞌnu Ndioo Tatá yo ta ni tuꞌun ma ra Seꞌe ra Jesucristu ndia.
\v 23 Yakan va tandiꞌi ma ndian tüvi chìnuni tuꞌun ma ra Seꞌe Ndioo, kùuni yi kaꞌan yi ña ni ma tuꞌun Ndioo Tatá yo, na tüvi chìnuni na, tuva takan ndia. Va takua ma ndian kàtituꞌun kachin nuu ma ñivi ña ndicha ña ma Rachaꞌnu Jesucristu kùu ma ra Seꞌe Ndioo, ndiakan kùu ma ndian ìyo ndicha kuenda ma Ndioo Tatá yo.
\p
\v 24 Yakan va na chinuni ndo ma tuꞌun Ndioo ña cha chīni ndo ma tajiꞌna. Vati tuva ndicha ña chìnuni ndo ma tuꞌun Ndioo ta töve ndakoo ndo ña chìnuni ndo yi, tajan ni koo ndo chiꞌin ma Rachaꞌnu Ndioo Tatá yo ta chiꞌin ma ra kùu Seꞌe ra ndia.
\v 25 Vati ma Rachaꞌnu Jesucristu cha chāꞌa ra tuꞌun nuu yo ña endeeni ni koo yo chiꞌin ra.
\p
\v 26 Yakan va tài ma tuꞌun iꞌya nuu ndo, ikan na kuꞌva ndo kuenda ña yaꞌa kuaꞌaꞌ ma ndian jàndaꞌviñaꞌa ndo ìyo.
\v 27 Va taku ndyoꞌo ti cha chāꞌa ma Jesucristu ma Tati Ií Ndioo nuu ndo ña na koo yi chiꞌin ndo, ikan na tüva kuàtiñu ndo inga ma ndian jànaꞌa nuu ndo. Vati maa ma Tati Ií Ndioo kùu yi ña jànaꞌa yi tandiꞌi kuii ma tuꞌun vaꞌa ña chìto ndo, vati ma Tati Ií Ndioo jànaꞌa yi ma ña ndicha vaꞌa, ti na yüvi ña kàꞌan tuꞌun vata kùu yi. Yakan va na induku koo ndo chiꞌin ma Rachaꞌnu Cristu, takua jānaꞌa ma Tati Ií Ndioo nuu ndo niku.
\p
\v 28 Ta vitin ndyoꞌo seꞌyu na ndoꞌiin ndo chiꞌin ma Rachaꞌnu Jesuu, ikan na tüvi yuꞌvi ndo ta töve kukanuu ndo ndeꞌe ndo ra ma kivi vàchi ndiko ra.
\v 29 Yakan va tava cha chìto ndo ti ma Rachaꞌnu Cristu kùu ra iin ra ndaa, ta juuni kua ikan ìyo yi ña koto ndo vati ndisaa nda ndyoꞌo jàꞌa ma ña ndaa, kùuni yi kaꞌan yi ña juuni ndian seꞌe Ndioo kùu ndo ndia.
\b
\c 3
\p
\v 1 Na kuꞌva ndo kuenda ña ma Rachaꞌnu Ndioo yaꞌa kùuni ra ndeꞌe ra yo, ta ndava nda seꞌe ra kùu yo kàti ra. Ta ndicha vaꞌa ña takan kùu yi vati kàti ra ña ndisaa yo kùu yo seꞌe ra. Yakan va ma ñivi ñuñivi töve nàkoto na yo chaꞌaꞌ ña töve nī nakoto na ma Rachaꞌnu Ndioo niku.
\v 2 Yakan va ndyoꞌo yani ndian yaꞌa kùuni ndi ndeꞌe ndi, cha kùu yo ma ndian seꞌe Ndioo vaji takäꞌan koto vaꞌa yo naja kua ni kuu yo tiá itiꞌ nuu, va cha chìto yo ti ma kivi ni ndeꞌo ma Rachaꞌnu Jesuu, ni ndakuu yo takua kàa ra chaꞌaꞌ ña ni ndeꞌo ra kua kàa ra.
\v 3 Vati tandiꞌi nda yo ndàtu ña ni ndeꞌo ra ma ora ikan, vitin cha nàndoo ma anima yo, ta ndàkuu ií yo takua ií kùu ma Rachaꞌnu Jesucristu.
\p
\v 4 Ta tandiꞌi nda yo jàꞌa kuati, vati tüvi jàꞌa yo takua kàꞌan ma ley ma Rachaꞌnu Ndioo. Ta ora jàꞌa yo kuati, kùuni yi kaꞌan yi ña töve jàchinu yo ma ña kua kàꞌan ma Ley Ndioo.
\v 5 Ta juuni cha chìto vaꞌa ndo ña ma Rachaꞌnu Jesucristu kīchi ra ma nuu ñuꞌuꞌ ñuñivi iꞌya kuenda ña jànaa ra kuati yo, ta rakan ti iin ra tüvi ìyo nïꞌiin kuati kùu ra.
\v 6 Yakan va ndisaa ndyoꞌo ña indukuni ìyo ndo chiꞌin ra töva chàkuu ndo jàꞌa ndo kuati. Va takua ma ndian endee chàkuu na jàꞌa na kuati, na tüvi nī ndeꞌe na ra ta ni tüvi nī nakoto na ra ndia.
\v 7 Yakan va koto küꞌva ndo ña jandaꞌviñaꞌa nïꞌiin ñivi ndo, ndyoꞌo seꞌyu, vati ma ndian jàꞌa ma tiñu ndaa, ndiakan kùu na ma ndian ndaa takua iin ra ndaa kùu ma Rachaꞌnu Cristu ndia.
\v 8 Va takua ma ndian endee jàꞌa kuati ndiakan kùu na ñivi kuiꞌna, vati takani cha jaꞌánꞌ ma kuati ikan, antea ña koo ma nuu ñuꞌuꞌ ñuñivi niku. Yakan va chaꞌaꞌ yakánꞌ kùu yi ña kīchi ma Jesucristu ra Seꞌe Ndioo kuenda ña na jandiꞌi ra tandiꞌi nuu ma ña jàꞌa ma kuiꞌna.
\p
\v 9 Vati nïꞌiin ma nda yo kùu seꞌe Ndioo, na küu ga jaꞌa yo ma kuati, vati cha ìyo ma ña ndito Ndioo chiꞌo takua kùuni ma Rachaꞌnu ña na kuu yi. Ta chaꞌaꞌ yakan kùu yi ña na tüva ìyo yi ña jaꞌa yo ma kuati.
\v 10 Ta juuni chìto yo nda ndian kùu ma ndian seꞌe Ndioo ta nda ndian kùu ma ndian seꞌe kuiꞌna. Vati ma ndian töve jàꞌa na tiñu ndaa ta juuni töve kùuni na ndeꞌe na ma taꞌan na, ndiakan yöve seꞌe Ndioo kùu na.
\s Ma ndian kùu ñivi Ndioo ndàkimani na ma ndian kùu taꞌan na
\p
\v 11 Ma tuꞌun ña jāꞌa ña kīchaꞌa chìnuni ndo ma nunuu, kàꞌan yi ña ìyo yi ña kuunio ndeꞌo ma ndian kùu taꞌan yo.
\v 12 Takan kàti yi ti tüvi kùuni yi ña jaꞌa yo takua jāꞌa ma ra nàni Caín, ra chīyo chiꞌin ma kuiꞌna niku. Ta chāꞌni ra ma ra yani ra. ¿Ta naja chāꞌni ra ra?, kùuni ndo. Chāꞌni ra ra ti töve vaꞌa kùu ma tiñu jàꞌa ra ta ma tiñu jāꞌa ma yani ra ña vaꞌa kùu yi.
\p
\v 13 Yakan va ndyoꞌo yani na näkanini ndo tuva tüvi kùuni ma ñivi ñuñivi ndeꞌe na ndo.
\v 14 Ta chìto vaꞌa yo ña ndākoo yo ma ña chīꞌo, ta vitin cha kūu yo ndian ndito jàꞌa ma Rachaꞌnu Ndioo chaꞌaꞌ ña nduvaꞌa kùunio ndeꞌo ma taꞌan yo. Ta tu tüvi kùunio ndeꞌo ma ndian kùu taꞌan yo, kùuni yi kaꞌan yi ña kùu yo takua kùu iin ra cha chīꞌí.
\v 15 Yakan va tuva xaanio ndeꞌo ma ndian kùu taꞌan yo indukuni kùu yo takua kùu ma ndian chàꞌni ñivi. Ta juuni cha chìto ndo ña ma ndian chàꞌni ñivi tüvi niꞌi na nuu koo ndito na chiꞌin Ndioo ndia.
\v 16 Vati cha chìto yo ña ma Rachaꞌnu Jesucristu kùuni ra ndeꞌe ra yo. Yakan va chīꞌí ra chaꞌaꞌ yo. Ta chaꞌaꞌ yakan kùu yi ña kua ikan ìyo yi ña kuunio ndeꞌo ma ndian kùu taꞌan yo, ta na koo tuꞌva yo kuvio chaꞌaꞌ na takua jāꞌa ma Rachaꞌnu Jesucristu chaꞌaꞌ yo.
\v 17 Ta tu ìyo iin nda yo kuika ña ndèꞌo ña kumani iin nakuyi nuu taꞌan yo ta tüvi kundaꞌvini yo ra ña tìndee yo ra chiꞌin ma ña soko yo, kùuni yi kaꞌan yi ña tüvi ñivi Ndioo kùu yo, ti tüvi kùunio ndeꞌo ra, tu jaꞌa yo takan.
\v 18 Yakan va ndyoꞌo seꞌyu, na janaꞌa yo ña yaꞌa kùunio ndeꞌo ma Rachaꞌnu Ndioo chiꞌin tiñu jàꞌa yo kuenda ra, ta yüvi chiꞌin ma tuꞌun kàꞌan nio.
\p
\v 19 Yakan va tuva jaꞌa yo takan cha chìto yo ña kuàꞌan yo itiꞌ ndaa ma takua kùuni ma Rachaꞌnu Ndioo, tajan cha kùu koo taxiin ma anima yo nuu ra.
\v 20 Ta tu chàninio ña ma chinituni yo tisokuati yi yo, va tüvi chaꞌaꞌ yo kuenda ña ma Rachaꞌnu Ndioo kaꞌnu ga ra, ti chìto ra naja kua chàninio, ta naja kua chànini ma inga ñivi ndia.
\v 21 Yakan va ndyoꞌo yani tuva tüvi tisokuati ma chìnitunio yo, na tüvi ìyo yi ña yuꞌvio jàyatin yo yo nuu ma Rachaꞌnu Ndioo.
\v 22 Vati ma Rachaꞌnu Ndioo ni kuꞌva ra tandiꞌi ma ña ni ndakan yo nuu ra tuva ndicha ña jàchinu yo tandiꞌi ma ña kàꞌan ra, ta tu jaꞌa yo ma ña chàtaꞌani ra ña jaꞌa yo ndia.
\v 23 Yakan va na chinunio tuꞌun kàꞌan ra chaꞌaꞌ ma ra Seꞌe ra Jesucristu chiꞌin ña na kùunio ndeꞌo ndisaa ma ndian kùu taꞌan yo, ti ma tuꞌun ikan kùu ma tuꞌun ña Ndioo tāchi ra nuu yo ña na jaꞌa yo yi.
\v 24 Vati taku yo jachiꞌin ma ña kàꞌan Ndioo, cha chìto yo ti ìyo ra chiꞌo ta ìyo yo chiꞌin ra, chaꞌaꞌ ña chāꞌa ra ma Tati Ií ra ña na koo yi chiꞌo.
\c 4
\s Tati Ií Ndioo chiꞌin tati xaani ndeꞌe Rachaꞌnu Cristu
\p
\v 1 Ndyoꞌo yani tuva ìyo iin nda ndian kàꞌan ña chiꞌin ma Tati Ií Ndioo kùu yi ña kàꞌan na, na chïnuni ndo tuꞌun kàꞌan na numini. Vaꞌa ga ña na kiꞌin jiꞌna ndo kuꞌva na ndeꞌo tuva ndicha ña tuꞌun Ndioo kùu ma ña kàꞌan na. Vati ma nuu ñuꞌuꞌ ñuñivi iꞌya nduvaꞌa ìyo ma ndian kàꞌan ña tuꞌun Ndioo kùu yi kàꞌan na, va na tüvi ndicha ti mamaa ndian vatani kùu na.
\v 2 Yakan va takan ìyo yi ña jaꞌa ndo ta ndeꞌe ndo tuva ndicha ña kàꞌan na chiꞌin ma Tati Ií Ndioo. Vati tu kàti iin ra ña iin ra kàꞌan chiꞌin tuꞌun yuꞌu Ndioo kùu ra ta ìyo ma Tati Ií Ndioo chiꞌin ra, ìyo yi ña kuꞌva ra kuenda ña ma Rachaꞌnu Jesucristu kùu ra iin raꞌii ndicha ora kāku ra ma nuu ñuꞌuꞌ ñuñivi iꞌya.
\v 3 Va ma ndian töve chàꞌa na kuenda ña iin raꞌii kūu Jesucristu ora kīchi ra nuu ñuꞌuꞌ ñuñivi iꞌya, na yüvi ñivi Ndioo kùu na, ti ñivi xaani ndeꞌe Cristu kùu na ña kàꞌan na takan. Ta juuni cha chìto ndo ña ni koo ma ndian kini ña jàꞌa takan ma nuu ñuꞌuꞌ ñuñivi iꞌya. Ta ndicha ña takan kùu yi ti cha ìyo na ma vitin.
\p
\v 4 Ndyoꞌo seꞌyu, taku ndyoꞌo ndian kùu ñivi Ndioo, cha jākanaa ndo ma ndian vata ña xàani ndeꞌe Cristu, vati kaꞌnu ga ma Tati Ií Ndioo ña ìyo chiꞌin ndo kua ma tati xaan ña ìyo nuu ñuꞌuꞌ ñuñivi iꞌya.
\v 5 Tava ndian ìyo kuenda ma kuiꞌna kùu na, yakan va kàꞌan na ma tuꞌun kàꞌan nia ndian ìyo ñuñivini. Ta takan ma ndian tüvi chìnuni ña ìyo ñuñivi jàchiꞌin na ma tuꞌun kàꞌan na ndia.
\v 6 Va taku maa yo, ti ndian jàchiꞌin tuꞌun kàꞌan Ndioo kùu yo, yakan va ma ndian ìyo kuenda Ndioo jàchiꞌin na ma tuꞌun kàꞌan yo, va ma ndian tüvi ìyo kuenda Ndioo ti ni tüvi jàchiꞌin na ma ña kàꞌan yo. Yakan va takan ìyo yi ña jaꞌa yo, ikan na kuꞌva yo kuenda nda ndian kùu ma ndian kàꞌan ma tuꞌun ndicha chiꞌin ma Tati Ií Ndioo ta nda ndian kàꞌan tuꞌun vata chiꞌin ma tati kini.
\s Ndioo kùuni ra ndeꞌe ra ndisaa yo
\p
\v 7 Ndyoꞌo yani ìyo yi ña kuunio ndeꞌo ma ndian kùu taꞌan yo, ti kua ikan jànaꞌa ma Rachaꞌnu Ndioo nuu yo ña jàꞌa yo. Yakan va tandiꞌi nda yo kùuni vaꞌa yo ndeꞌo taꞌan yo, ndian seꞌe Ndioo kùu yo, ta juuni kùu yo ndian nàkoto ndicha vaꞌa Ndioo ndia.
\v 8 Va taku ma ndian tüvi kùuni na ndeꞌe na ma ndian kùu taꞌan na, na tüvi nàkoto na ma Rachaꞌnu Ndioo. Ti ma Rachaꞌnu Ndioo, kùu ra iin ra yaꞌa kùuni ndeꞌe ra yo.
\v 9 Vati ma Rachaꞌnu Ndioo kua ikan jānaꞌa ra nuu yo ña yaꞌa kùuni ra ndeꞌe ra yo ora tāchi ra ma ra uvanuu ra kùu Seꞌe ra nuu ñuꞌuꞌ ñuñivi iꞌya, ikan na kuꞌva ra ma kivi koo ndito yo chiꞌin ra.
\v 10 Ta ñaꞌa ndicha vaꞌa jànaꞌa yi yo ña Ndioo yaꞌa kùuni ra ndeꞌe ra yo. Ti jiꞌna ga ra kùu ra ña kīchaꞌa ra kùuni ra ndeꞌe ra yo ta na yüvi maa yo kùu yo ña kīchaꞌa yo kùunio ra. Yakan va chaꞌaꞌ yakan kùu yi ña tāchi ra ma ra Seꞌe ra nuu yo kuenda ña na kuvi ra chaꞌaꞌ yo, ikan na naa ma kuatio.
\p
\v 11 Yakan va ndyoꞌo yani ìyo yi ña kuunio ndeꞌo ma ndian kùu taꞌan yo takua jàꞌa ma Rachaꞌnu Ndioo ña kùuni ra ndeꞌe ra yo ndia.
\v 12 Vati nïꞌiin ñivi takäꞌan ndeꞌe na ma Rachaꞌnu Ndioo, va tu kùunio ndeꞌo ma ndian kùu taꞌan yo, tajan ma Rachaꞌnu Ndioo ìyo ndicha kuii ra chiꞌin yo, ta juuni cha ndōꞌiin yo chiꞌin ra chaꞌaꞌ ña yaꞌa kùuni ra ndeꞌe ra yo.
\v 13 Yakan va cha chìto yo ti ìyo yo kuenda Ndioo, ta rakan ìyo ra kuenda maa yo ndia, chaꞌaꞌ ña tāchi ra ma Tati Ií ra ña na koo yi chiꞌin yo.
\v 14 Ta juuni kàtituꞌun kachin ndi nuu ndo ña juuni maa ndi ndēꞌe ndi ña Ndioo Tatá yo tāchi ra ma ra Seꞌe ra nuu ñuꞌuꞌ ñuñivi, kuenda ña na jakakú ra kuaꞌaꞌ ñivi ìyo ñuñivi iꞌya.
\v 15 Yakan va tandiꞌi ma ndian nàkoto ña Jesuu kùu ra ma ra Seꞌe Ndioo, ndisaa ndiakan ìyo na chiꞌin Ndioo, ta Ndioo ìyo ra chiꞌin na ndia.
\p
\v 16 Yakan va cha chìto yo ta chìnunio ña ma Rachaꞌnu Ndioo kùuni ra ndeꞌe ra yo chiꞌin ndisaa ma ñivi ìyo ñuñivi. Ma Rachaꞌnu Ndioo kùu ra iin ra yaꞌa kùuni ndeꞌe yo. Ta nda ndian ni kuuni, ña ìyo na kuenda kùuni na ndeꞌe na Ndioo chiꞌin taꞌan na, kùuni yi kaꞌan yi ña ìyo na chiꞌin Ndioo, ta Ndioo ìyo ra chiꞌin na ndia.
\v 17 Vati tu cha ndōꞌiin yo chiꞌin Rachaꞌnu Ndioo chaꞌaꞌ ña yaꞌa kùuni ra ndeꞌe ra yo, tajan tüvi ìyo yi ña yuꞌvio ma ora ni chaa ma kivi ña ni jakutuni ra ma ñivi. Vati taku maa yo cha jāꞌa yo ma ña vaꞌa ma nuu ñuꞌuꞌ ñuñivi iꞌya takua jàꞌa ma Rachaꞌnu.
\v 18 Yakan va tuva ndicha ña kùunio ndeꞌo ma Rachaꞌnu Ndioo chiꞌin taꞌan yo, na tüvi ìyo yi ña yuꞌvio ndeꞌo ra ma ora ni jakutuni ra ma ñivi, vati tu chìto yo ña jàꞌa yo ma ña vaꞌa ta na tüvi ndasio. Ti juuni ma ña ndasio kùu yi ña jàndeꞌe yi tundoꞌo yo. Yakan va tu ìyo nda yo ndasii, kùuni yi kàꞌan yi ña takäꞌan ndoꞌiin vaꞌa anima yo chiꞌin ra chaꞌaꞌ ña töve kùunio ndeꞌo ra.
\p
\v 19 Takua maa yo, ti kùunio ndeꞌo ma Rachaꞌnu Ndioo vati jiꞌnaga maa ra kùu ma ra kīchaꞌa kùuni ra ndeꞌe ra yo.
\v 20 Ta tu ìyo nda yo kàꞌan ña yaꞌa kùunio ndeꞌo ma Rachaꞌnu Ndioo, va juuni ma ora ikan xaanio ndeꞌo ma ndian taꞌan yo, iin ndian vatani kùu yo tuva takan. Va tu töve kùunio ndeꞌo ma ndian kùu taꞌan yo ña kùu na ndian ndichin vaꞌa ndeꞌo, kùuni yi kaꞌan yi ña küu kuunio ndeꞌo ma Rachaꞌnu Ndioo. Ta Rakan, ti töve ndichin vaꞌa ndeꞌo ra.
\v 21 Takan kūu ta chaꞌaꞌ yakan kùu yi ña chàꞌa ma Rachaꞌnu Ndioo ma tuꞌun iꞌya nuu yo: Tu ndicha ña kùunio ndeꞌo ma Rachaꞌnu Ndioo, kùuni yi kaꞌan yi ña ìyo yi ña kuunio ndeꞌo ndian kùu taꞌan yo ndia.
\c 5
\s Cha jàkanaa ma ndian chìnuni tuꞌun Ndioo ma ña kini
\p
\v 1 Yakan va tandiꞌi nda yo chìnuni ña Jesuu kùu ra ma Cristu, ndisaa ndiakan kùu na seꞌe Ndioo. Ta ndisaa yo ña kùunio ndeꞌo ma Rachaꞌnu Ndioo Tatá yo juuni kùunio ndeꞌo ma ndian kùu seꞌe ra ndia.
\v 2 Yakan va tu kùunio ndeꞌo ma Rachaꞌnu Ndioo ta jachiꞌo ma tuꞌun ña tāchi ra nuu yo, juuni kua ikan kùu koto kachin yo ña kuunio ndeꞌo ndian kùu seꞌe ra ndia.
\v 3 Vati jànaꞌa yo ña kùunio ndeꞌo ma Rachaꞌnu Ndioo ora jàchiꞌo ma tuꞌun ña kàꞌan ra, ti tandiꞌi ma tuꞌun tāchi ra nuu yo töve ndetiñu jàꞌa yo yi.
\v 4 Vati tandiꞌi nda yo kùu seꞌe Ndioo cha jākanaa yo ma ña kini ña ìyo ma ñuñivi chaꞌaꞌ ña chìnunio ma tuꞌun Jesucristu.
\v 5 Yakan va, ¿nda yo kùu ma ndian jàkanaa ma kuati ìyo nuu ñuꞌuꞌ ñuñivi?, kùuni ndo. Ma ndian chìnuni ña ma Rachaꞌnu Jesuu kùu ra ma Seꞌe Ndioo, ndiakani kùu ma ndian jàkanaa.
\s Tuꞌun kàꞌan naja kua ìyo ma ra seꞌe Ndioo
\p
\v 6 Ora kīchi ma Rachaꞌnu Jesucristu ma nuu ñuꞌuꞌ ñuñivi iꞌya jānaꞌa ra nuu yo ña kùu ra Seꞌe Ndioo ora jākunduta ra ta juuni ora chāti ra ma nii ra. Yüvi chiꞌin ma takuini kùu yi ña jānaꞌa ra nuu yo va juuni chiꞌin ma nii ra ndia. Ta ikan jan chāꞌa ra ma Tati Ií ra nuu yo, ikan na kuꞌva yi kuenda nuu yo chaꞌaꞌ ma ña ndicha ña kàꞌan ra.
\v 7 Ta chaꞌaꞌ yakan kùu yi ña ìyo uni taꞌan yi ña kùu yi testigu ma andivi: Rachaꞌnu Ndioo Tatá yo chiꞌin ma ra kùu tuꞌun Ndioo, ta Tati Ií ra ndia. Ndi uni yi kùu yi iin ni ña kua kùu yi.
\v 8 Ta juuni ìyo uni taꞌan yi ña kùu testigu ma nuñuꞌuꞌ ñuñivi iꞌya ndia: Ma Tati Ií Ndioo chiꞌin ma takuii chiꞌin ma nii. Ndi uni yakan indukuni kua kàꞌan yi.
\v 9 Ta tu chìnunio ma tuꞌun kàꞌan ñivi chiꞌin yo, ta ìyo yi ña chinuni ga yo kua kàꞌan Rachaꞌnu Ndioo, vati kàꞌan ra chaꞌaꞌ naja kua ìyo ma ra kùu Seꞌe ra chiꞌin yo.
\v 10 Yakan va tu chìnunio ma tuꞌun ma ra Seꞌe Ndioo, cha chìto yo ti ña ndicha kùu ma tuꞌun ña kàꞌan Ndioo chaꞌaꞌ Seꞌe ra ña ìyo tichi anima yo, va taku ma ndian tüvi chìnuni ma tuꞌun Ndioo, ndiakan kàti na ti mamaa tuꞌun vatani kùu ma ña kàꞌan ra. Takan kàti na ti tüvi chìnuni na ña tuꞌun ndaa kùu ma ña kàꞌan Ndioo chaꞌaꞌ ma ra kùu Seꞌe ra.
\v 11 Ma Rachaꞌnu Ndioo cha kāti kachin ra nuu yo, ti kùuni ra ña na niꞌo nuu ni koo yo endeeni chiꞌin ra. Ta chaꞌaꞌ ña ndōꞌiin yo chiꞌin Seꞌe ra kùu yi ña niꞌo nuu ni koo yo endeeni chiꞌin ra.
\v 12 Yakan va ma ndian chìnuni tuꞌun ma ra Seꞌe ma Rachaꞌnu Ndioo, cha nìꞌi na yi, va takua ma ndian tüvi chìnuni tuꞌun ma ra Seꞌe Ndioo, na tüvi nìꞌi na yi.
\s Ma tuꞌun nuu ndiꞌinia ña kàꞌan Xuva kuenda ña jàkuninaa ra ma ñivi
\p
\v 13 Tài ma tuꞌun iꞌya kuenda ndo ndian chìnuni tuꞌun ma Rachaꞌnu Jesuu ra kùu Seꞌe Ndioo, ikan na koto kachin ndo ña cha nìꞌi ndo nuu ni koo ndo endeeni chiꞌin ra.
\p
\v 14 Yakan va na tüvi ìyo yi ña yuꞌvio kàꞌan yo chiꞌin ma Rachaꞌnu Ndioo, vati cha kàti ra ña tu kàꞌan yo chiꞌin ra ma ña vaꞌa ña kùuni maa ra, ni tasoꞌo ra ma ña kàꞌan yo.
\v 15 Yakan va cha chìto yo ti ora kàꞌan yo chiꞌin ma Rachaꞌnu Ndioo, tàsoꞌo ra ma ña kàꞌan yo. Ta juuni cha chìto yo ña tu chìkan yo iin nakuyi nuu ra, ta cha nīꞌo yi ndia.
\p
\v 16 Ta tu ndeꞌo ña ma ndian kùu taꞌan yo jàꞌa na iin kuati, ña tüvi iin kuati kaꞌnu ña kundaka yi na itiꞌ nuu kuvi na endeeni, na kaꞌan yo chiꞌin Ndioo kuenda na, ikan na jakaꞌnuni ra ma kuati na ta kuꞌva ra itiꞌ koo ndito na chiꞌin ra. Ta tu jaꞌa na iin kuati kaꞌnu ña ìyo yi ña kuvi na endeeni, ta tüvi ìyo yi ña kaꞌan yo chaꞌaꞌ na nuu Ndioo tuva takan.
\v 17 Yakan va tandiꞌi ma ña tüvi vaꞌa ña jàꞌa ma ñivi iin kuati kùu yi. Va töve ndisaa kuati ña jàꞌa ma ñivi ndàka yi nuu kuvi na endeeni.
\p
\v 18 Ta juuni cha chìto yo ña ndisaa ndian kùu seꞌe Ndioo, töva ìyo na ña jaꞌa na kuati, vati ma ra Seꞌe Ndioo kùu ma ra jàꞌa kuenda na. Ta chaꞌaꞌ yakan kùu yi ña na küu ga jaꞌa ma kuiꞌna jaꞌánꞌ ña na kuꞌun na itiꞌ kini.
\p
\v 19 Va cha chìto yo ti ñivi ìyo kuenda Ndioo kùu maa yo, va cha yatin ndisaa ma ñivi ñuñivi kùu ma ndian ìyo kuenda ma kuiꞌna.
\v 20 Ta juuni cha chìto yo ña kīchaa ma ra Seꞌe Ndioo nuu ñuꞌuꞌ ñuñivi iꞌya ta chāꞌa ra chinituni yo, ikan na nakoto yo ma Ndioo ndicha. Ta chaꞌaꞌ yakan kùu yi ña indukuni ìyo yo chiꞌin ra, ta chiꞌin ma ra Seꞌe ra Jesucristu ndia. Yakan va ma rakan kùu ra ma Ndioo ndicha, vati chàꞌa ra nuu koo yo endeeni chiꞌin ra.
\p
\v 21 Yakan va ndyoꞌo seꞌyu, na jaꞌa ndo kuenda nuu ndo ta tüva ìyo yi ña jakaꞌnu ga ndo ma ndioo yutun ña jàndaꞌviñaꞌa. Ta takan na kuu yi. Amén.