\id 2JN
\h Tutu Xuva Uvi
\toc1 Tutu Xuva Uvi
\mt Tutu uvi ña tāa rachaꞌnu Xuva
\c 1
\s Nduvaꞌa kuii kundaꞌvini Xuva ma ndian ìyo kuenda Ndioo
\p
\v 1 Yuꞌu iin ra kuxini ndian chìnuni, tài tutu iꞌya kuenda yoꞌo iin ñaꞌa ña kùu iin ña kāchin Ndioo ña kùu̱n iin ñivi ra, ta juuni tài yi kuenda ndian kùu seꞌun ndia. Ndicha kuii ña yaꞌa kùuni̱ ndeꞌi ndo. Ta yüvi yuꞌuni va juuni ndisaa ndian nàkoto ma tuꞌun ndaa, juuni kùuni na ndeꞌe na ndo ndia.
\v 2 Yakan va nduvaꞌa kùuni̱ ndeꞌi ndo chaꞌaꞌ ña cha chìto yo ma tuꞌun ndaa, ta ma tuꞌun ikan ti na tüva ni naani yo yi, vati endeeni koo yi chiꞌo.
\v 3 Ma Rachaꞌnu Ndioo ra kùu Tatá yo chiꞌin ma Rachaꞌnu Jesucristu ra kùu Seꞌe ra, na kuꞌva ra ma ñamani ra nuu ndo ta na kundaꞌvini ra ndo, ikan na koo vii ndo chiꞌin taꞌan ndo. Ta na takan jaꞌa ra chiꞌin ndisaa yo ña nàkoto ma tuꞌun ndaa, ta juuni ndisaa yo ña yaꞌa kùuni yo ndeꞌo taꞌan yo ndia.
\p
\v 4 Yakan va nduvaꞌa kuii chisii̱ vati ndēꞌi uvi uni ndian kùu ñivi taꞌan ndo ña chìnuni ndicha ma tuꞌun ndaa, ta jàꞌa na takua kàꞌan ma Ndioo Tatá yo ña na jaꞌa yo.
\v 5 Ta vitin ndyoꞌo ndian chìnuni, chìkain ñamani nuu ndo ña na ndakimani ndo ma ñivi taꞌan yo ña kùuni na ndeꞌe na taꞌan na ndia. Ta ma tuꞌun ña tài kuenda ndo ma vitin, ti na yüvi tuꞌun chaa kùu yi kuenda yo, vati ma tuꞌun ña cha chīni yo nda ora kīchaꞌa yo chìnuni yo kùu yi.
\v 6 Yakan va jànaꞌa yo ña yaꞌa kùuni yo ndeꞌo ma Rachaꞌnu Ndioo ora chàkuu yo kuenda jachiꞌo ma tuꞌun ña kàꞌan ra, vati cha kātituꞌun ma Ndioo Tatá yo chiꞌin yo ña ìyo yi ña na koo yo kuenda kùunio ndeꞌo ma ndian kùu taꞌan yo, takua cha chīni ndo ma ora kīchaꞌa ndo chìnuni ndo niku.
\p
\v 7 Vati nuu ma ñuꞌuꞌ ñuñivi iꞌya chàkunuu nduvaꞌa kuii kuaꞌaꞌ ma ndian jandaꞌviñaꞌa ìyo vitin. Ta juuni ma ndiakan kùu ma ndian töve kuꞌva na kuenda ña ma Rachaꞌnu Jesucristu kùu ra iin raꞌii ndicha ora kāku ra ma nuu ñuꞌuꞌ ñuñivi iꞌya. Takan kàꞌan na ña kùuni na jandaꞌviñaꞌa na yo, vati xaani na ndeꞌe na ma Rachaꞌnu Jesuu.
\v 8 Yakan va na jaꞌa ndo kuenda nuu ndo chiꞌin ma tuꞌun jànaꞌa na, koto jänaa ndo ma yaꞌvi ña jākanaa ndo chaꞌa ma tiñu cha jàꞌa yo kuenda Ndioo. Vati ìyo yi ña niꞌi ndo tandiꞌi ña vaꞌa ña chàꞌa ma Rachaꞌnu Ndioo Tatá yo nuu ndo.
\p
\v 9 Ta ndian tiso tiaga siki ña jàꞌani na ña kàꞌan na ma tuꞌun ña jānaꞌa Cristu nuu yo, kùuni yi kaꞌan yi ña na tüva ìyo ma Rachaꞌnu Ndioo chiꞌin na tuva kua ikan jàꞌa na. Vati tu endee kuàꞌan yo itiꞌ ra takua jànaꞌa ma Rachaꞌnu Cristu, kùuni yi kaꞌan yi ña ìyo ma Ndioo Tatá yo chiꞌin yo, ta juuni ìyo ma Rachaꞌnu Seꞌe ra chiꞌin yo ndia.
\v 10 Ta tu ìyo nda ndian chaa nuu ìyo ndo va tüvi jànaꞌa na tuꞌun ndaa takua kàꞌan ma tuꞌun jànaꞌa ma Rachaꞌnu Cristu, vaꞌaga ña na töve kàñaꞌa ndo chiꞌin na, ta ni küꞌva ndo veꞌe ndo kundaa na ndia.
\v 11 Vati tu ìyo ndaa ndyoꞌo ña tìñuꞌu ndo na, kùuni yi kaꞌan yi ña indukuni kùtaꞌan ndo chiꞌin ma ña kini ña jàꞌa na ndia.
\s Ma tuꞌun nuu ndiꞌinia ña kàꞌan Xuva
\p
\v 12 Ìyo kuaꞌaꞌ ga ma tuꞌun ña kùuni kaꞌin chiꞌin ndo, vati töve kùuni̱ tai yi nuu tutu. Vaꞌa ga ña kuꞌun mai ma nuu ìyo ndo, ta ikan natuꞌun taꞌan yo yi, ikan na sii kùuni ndisaa yo.
\p
\v 13 Ta vitin ma ñivi taꞌan ndo ndian ìyo iꞌya, ndian kāchin ma Ndioo, tàchi na iin saludu nuu ndo. Ta takan na kuu yi. Amén.