\id JUD
\h Tutu Juda
\toc1 Tutu Juda
\mt Tutu ña tāa rachaꞌnu Juda, ra kùu tatun Jesuu
\c 1
\p
\v 1 Yuꞌu Juda ra kùu yani Jandiau, ra jàkuu tiñu nuu ma Rachaꞌnu Jesucristu, tàchi̱ saludu nuu ndyoꞌo ti ma Rachaꞌnu Ndioo Tatá yo kāchin ra ndo ta kùuni ra ndeꞌe ra ndo, ta ma Rachaꞌnu Jesucristu kùu ra ma ra kùmi ra ndo.
\v 2 Ta na kundaꞌvini ga ma Rachaꞌnu ndeꞌe ra ndo ta na koo vii ndo ta kùuni ndo ndeꞌe ndo taꞌan ndo, takua kùuni ma Rachaꞌnu ndeꞌe ra ndo.
\s Nuu kàꞌan Juda chata ma ndian kùu matru ña jànaꞌa tuꞌun vata
\p
\v 3 Ndyoꞌo yani̱ ndian yaꞌa kùuni̱ ndeꞌi, cha ìyo tiempu ña kùuni̱ tai iin tutu kuenda ndo ña kàꞌan yi chaꞌaꞌ ña kàkú ndo jàꞌa Ndioo kua jàkakú ra yuꞌu ndia. Va vitin tài tuꞌun iꞌya kuenda ndo ti ìyo yi ña janini̱ ndo, koto küꞌva ndo ña jakesiin na ndo, ta sama na ma tuꞌun ndaa chaꞌaꞌ ma Rachaꞌnu Jesuu ña chìnuni ndo ña iin chaꞌani chāꞌa ra yi nuu tandiꞌi yo ndian kùu ñivi ra.
\v 4 Vati ìyo iin ma ndra cha kīꞌvi xeꞌe ma tañu ndo ña jàꞌani ndra ña ndra vaꞌa chìnuni tuꞌun Ndioo kùu ndra. Ta takan jàndaꞌviñaꞌa ndra ndo ti yüvi ma ndian chìnuni kùu ndra takua kùu ndo. Ti jànaꞌa ndra ña vaꞌani tu kiꞌvi ndra jaꞌa ndra ma ña kini chaꞌaꞌ ña cha ìyo ma ñamani Ndioo chiꞌin ndra, kùuni ndra. Ta juuni kàti ndra ña ma Rachaꞌnu Jesucristu yöve uvanuu ra kùu ma ra chitoꞌo yo, kàti ndra. Yakan va kua kàti ma nuu tutu Ndioo tatiempu, ma Rachaꞌnu Ndioo ni jakutuni ra ma kuati ndrakan, ikan na ndeꞌe ndra tundoꞌo chaꞌaꞌ ña jàꞌa ndra.
\p
\v 5 Ta vaji cha chìto ndo, ta vitin kùuni̱ jakukuꞌun ndikoni̱ ndo ña ma ora cha yāꞌa jakakú ndio ma Rachaꞌnu Ndioo ndian judíu ndian kùu ñivi ra ma nuu tundoꞌo ña jàndeꞌe ma ñivi ìyo ma ñuu Egiptu ma tatiempu. Ta ma ora cha yāꞌa yakan, ma Rachaꞌnu Ndioo jāndeꞌe ra ma tundoꞌo ta jānaa ra ma ndian judíu ndian tüvi chìnuni ña chīyo tañu na ndia.
\v 6 Ta jàkukuꞌuni ndo ña ìyo kuaꞌaꞌ ma tati ña jàꞌa tiñu nuu Ndioo ña tüvi jàꞌa na tiñu nuu ra takua ìyo yi ña jaꞌa na yi, ti ndākoo na yi niku. Va ma tati ikan cha chūꞌni ma Rachaꞌnu Ndioo na ma nuu naa chiꞌin ma kadena kaa kuenda ña na ndeꞌe na tundoꞌo endeeni, nda kati chaa ma kivi nuu ndiꞌinia ña Ndioo ni jakutuni ra na chaꞌaꞌ ma kuati na.
\v 7 Ta indukuni tāꞌan ma ndian ìyo ñuu Sodoma chiꞌin ma ñuu Gomorra chiꞌin ma inga ma ndian ìyo ma ñuu kuati ña kàndii yatini xiin yi. Ma ndra ñuu ikan nduvaꞌa kuii kuaꞌaꞌ kuati jāꞌa ndra chiꞌin ma kuñu ndra, nda kati chàtaꞌani ndra kiꞌvi ndra juuni chiꞌin ndraꞌii chiꞌin ndra. Yakan va indukuni jāꞌa ma Ndioo chiꞌin ndra ti jānaa ndiꞌi ra ma ñuu ikan chiꞌin ñuꞌú. Ta ma tuꞌun iꞌya jànaꞌa yi nuu yo ña takan Ndioo ni jaꞌa ra chiꞌin ma ndian jàꞌa ma ña kini takan. Va ni jandeꞌe ra tundoꞌo na, ta ni jakutuni ra ma kuati na, ikan na kayu na endeeni.
\p
\v 8 Ta juuni ma ndra jàꞌani ña kùu ndra matru ikan, ña ìyo tañu ndo juuni jàꞌa ndra ma ña kini, ta takan töve tìñuꞌu ndra ma kuñu ndra, ta kàti ndra ña ma ña chàni ndra tichi ñumaꞌna ndra ìyo ma ndatu Ndioo chiꞌin yi kuenda ndra, ña na katituꞌun ndra yi nuu ma ñivi ña na jachiꞌin na yi. Ta töva jachiꞌin ndra ma Rachaꞌnu Ndioo ta ndava kàꞌan tiꞌini ndra chata ma ndatu ma tati ña jàꞌa tiñu nuu ra ndia.
\v 9 Vati ni ma tati ña nàni Mike, ña chàꞌnda yi tiñu nuu ma tati ña jàkuu tiñu nuu Ndioo, ta ma tati kùxini ikan vaji ìyo ndatu yi, tüvi nī kuuni yi tisokuati yi ma kuiꞌna ora kànitaꞌan yuꞌu yi chaꞌaꞌ ma ñundaꞌyu ma Moisés. Vati ndākoo ma tati kùxini ikan yi nuu ndaꞌa ma Ndioo ta teꞌen nākaꞌan yi chiꞌin ma kuiꞌna: “Ma Rachaꞌnu Ndioo, na jandeꞌe ra tundoꞌo ñu̱n”, kàti yi.
\v 10 Ta ma ndra matru vata ikan chàtuꞌun ndra ta kàꞌan tiꞌini ndra chaꞌaꞌ ma ña tüvi kutuni vaꞌani ndra. Ta ma ña töve vaꞌa ña jàꞌa ndra indukuni jàꞌa ndra yi takua jàꞌa kiti ña töve kuii chìto ndri ña jàꞌa ndri. Yakan va ni jandiꞌi maa ndra nuu ndra chaꞌaꞌ ma ña jàꞌa ndra takan.
\p
\v 11 Va ndaꞌvi taꞌan ma ndrakan ña kuàꞌan ndra ma itiꞌ kini takua jāꞌa ma ra nàni Caín. Ta chaꞌaꞌ xuꞌunꞌ ma ña nànduku ndra jakanaa ndra kùu yi ña ndākoo ndra ma tiñu vaꞌa jàꞌa ndra, ta kīꞌvi ndra jàꞌa ndra ma ña kini takua jāꞌa ma ra nàni Balaam. Ta chìꞌí ndra takua chīꞌí ra nàni Coré chaꞌaꞌ ña töve nī jachiꞌin ndra ma ña kàꞌan ma Rachaꞌnu Ndioo.
\v 12 Iin ña tukanuuni kùu yi ora chàa ma ndrakan nuu ndòꞌiin ndo ña jàꞌa ndo viko ta jàkaꞌnu ndo ma Ndioo. Ti endee chàchi ndra ta chìꞌi ndra, ta yaꞌa ga sii kùuni ndra ta töve tìñuꞌu ndra ma Rachaꞌnu Ndioo. Ta nànduku ndra ma ña vaꞌa kuenda maani ndra. Ta kùu ndra takua kùu ma viko ña tüvi ndiso yi takuii ña kèñuꞌu ma tati yi teꞌen tikan, ta juuni kùu ndra takua kùu ma yutun ña tüvi jàtiñu ndrun ma tiempu ña ìyo yi ña jatiñu ndrun. Yakan va ndisaa ma ndra jàꞌa takan cha chīꞌí ndra takua kùu ma yutun ití ña chīꞌí ndrun chiꞌin ndava nda ma yoꞌo ndrun ndia.
\v 13 Ndisaa ma ña jàꞌa ndra kùu yi ña jàkukanuu yi ndra ti yaꞌa kini kùu ma ña jàꞌa ndra, ta kùu ndra takua kùu ma xikiñu kini ña chàkoso yuꞌu tañuꞌu jàꞌa ma ola kaꞌnu. Takua ma ndoso chìnu ri itiꞌ andivi ta numini naa ri, takan kùu yi chiꞌin ma ndrakan, ndra chàkunuu teꞌen tikan, va numini ni naa ndra endeeni, ta ni kindoo ndra ma nuu naa.
\p
\v 14 Takan kūu ta kuenda ma tuꞌun iꞌya cha kātituꞌun ma ra nàni Enoc, ma ra kūu tata ucha ma Adán, teꞌen nākaꞌan ra chata ma ndian jàꞌa takan: “Ndèꞌi ma Rachaꞌnu ña vàchi ra chiꞌin nduvaꞌa kuii kuaꞌaꞌ mii ma ndian ií ndian jàkuu tiñu nuu ra chiꞌin ra.
\v 15 Vàchi ra ta ni jakutuni ra chaꞌaꞌ ndisaa kuii kuati ña jàꞌa ma ndian kini chaꞌaꞌ ña töve chìnuni na tuꞌun ra. Ta juuni ni jandeꞌe ra tundoꞌo ma ndian kàꞌan tiꞌini chata ra ndia.” Takan kāti Enoc tatiempu.
\p
\v 16 Ndisaa ndra matru vata ikan endee kaꞌantiꞌini ndra chata nda ña ni kùuni, ti tüvi kìndoo vaꞌani ndra chiꞌin ma tuꞌun ña kàꞌan na. Ta endee chàtuꞌun ndra ma ña jàꞌa inga ñivi. Vati ma ña nànduku ndra jàꞌa ndra kùu yi ña na kindoo vaꞌa ndra juuni chiꞌin maa ndra. Ta yaꞌa chàtaꞌani ndra jandotayi ndra ndra. Ta chàtaꞌani ndra jandomani ndra ma ñivi chiꞌin ma tuꞌun vii kuenda ña kùuni ndra kindoo vaꞌani ndra chiꞌin na.
\s Juda jàkuninaa ra ma ndian chìnuni tuꞌun Ndioo
\p
\v 17 Va taku ndyoꞌo ndian yani̱ ndian yaꞌa kùuni ndeꞌi, na kukuꞌun vaꞌani ndo takua kātituꞌun ma ndra kùu tatun Jesucristu.
\v 18 Vati ndrakan kātituꞌun ndra ña ma nuu ni ndiꞌi ma ñuñivi ni koo ñivi ña ni kaꞌan tiꞌini na chata ma ndian kùu ñivi Ndioo, ta ni jaꞌa na ma ña kini takua kùuni maa na.
\v 19 Ta juuni ndrakan jàkesiin ndra ma ñivi, ta jàꞌa ndra ma ña kini ña chàtaꞌani maa ndra jaꞌa ndra, vati töve ìyo ma Tati Ií Ndioo chiꞌin ndra.
\p
\v 20 Va taku ndyoꞌo ndian kùu yani ña chìnuni tuꞌun Ndioo, na chinuni vaꞌa ga ndo ma tuꞌun ra, ikan na niꞌi ga ndo naja kua koo ií ndo chiꞌin ra. Ta juuni na kaꞌan ndo chiꞌin ma Rachaꞌnu Ndioo kuenda ña na tindee ma Tati Ií ra ndo.
\v 21 Yakan va na koo vaꞌa ndo chiꞌin Ndioo chaꞌaꞌ ña yaꞌa kùuni ra ndeꞌe ra ndo. Ta na kuatu vaꞌa ndo ma Rachaꞌnu yo Jesucristu ma ora ni chaa ma kivi ña ni kuꞌva ra ña na koo ndito ndo chiꞌin ra endeeni chaꞌaꞌ ña yaꞌa kundaꞌvini ra ndo.
\p
\v 22 Ta na kundaꞌvini ndo ma ndian taꞌan ndo ña tüvi chìnuni vaꞌa,
\v 23 ta na tindee ndo ma inga ñivi, ikan na kakú na koto kuꞌun na ma andayaꞌ. Ta inga na na kundaꞌvini ndo ndeꞌe ndo na vaji juuni ìyo yi ña jaꞌa ndo kuenda nuu ndo chiꞌin ma ña kini jàꞌa na, koto juuni maa ndo na kïꞌvi ndo jaꞌa ndo ma ña kini ña jàꞌa na ndia.
\s Ma tuꞌun nuu ndiꞌinia ña kàꞌan Juda ña jàkaꞌnu ra ma Rachaꞌnu Ndioo
\p
\v 24 Ta ma Rachaꞌnu Ndioo ìyo ndatu, kuenda kumi ra ta takan töve jaꞌa yo ma kuati, ikan na kuu chaa yo koo yo ma nuu ìyo ra. Ta ni kuu yo takua kùu iin jaꞌma chaa ña nïꞌiin taꞌvi töve meku ta nduvaꞌa sii ni kuuni yo ora chaa yo nuu ìyo ra.
\v 25 Yakan va na jakaꞌnu yo ma Rachaꞌnu Ndioo, ti uvanuu ra kùu ma ra kùu jakakú yo chaꞌaꞌ ma Rachaꞌnu Jesucristu. Ti ma Rachaꞌnu Ndioo kùu ma ra chàꞌnda tiñu ta ìyo kuaꞌaꞌ ndatu ra ta ra nduvaꞌa kaꞌnu kùu ra ndia. Yakan va na jakaꞌnu yo ra vitin, itaan ta endeeni. Ta takan na kuu yi. Amén.