\id ACT - MAZATECO DE SAN PEDRO IXCATLÁN
\h NI XI KAMÁ
\mt1 Xo̱jo̱n xi tjít'a ni xi kats'én já apostroo̱
\c 1
\s Bi ts'én katsáyatjón Kjisoo̱ nga sa̱nguíya A̱sién Ni̱xtjii̱n Néná
\p
\v 1 Xo̱jo̱n xi tjoón, ji ndí Teofilo̱, ít'a an kjo̱a̱a̱ ndeskande nga íts'i̱yanii̱ ngayeje ni xi kats'én ko̱jo ni xi akóyá Kjisoo̱,
\v 2 ngaskande ni̱xtjin nga kijí ndi'ak'ajmi ján, nguije ja̱ bo̱a̱ je katsjaá kjo̱a̱botíxoma já apostro̱ xi je ja'ájin nga A̱sién Ni̱xtjii̱n Néná kats'énkjién,
\v 3 kui já apostro̱ xi akoó yojoo̱, nguije k'ien kó ja'á'yaá, kó bo̱a̱ ts'én akó cha̱n cha̱a̱n chi̱bo̱a̱ nga tikón, yichán ni̱xtjin akoó yojoo̱ Kjisoo̱ kui jaá kó tsíchji̱a̱jo kjo̱a̱a̱ xikó ts'én ko̱tíxoma Néná.
\p
\v 4 Kó kji'a nga síndotikó ko̱jo já apostroo̱, Kjisoo̱ atíxomaa̱ tsi̱'e̱ nga kjo̱tjojín na̱xi̱ńdá Jerusale̱n, kó bi katsoó:
\p –Chiyájnúu̱ nga kjo̱tjosón ni xi katsó Na̱'mii̱ nga ka̱ma, xikó ts'én je tsíchji̱a̱jojnú'un.
\v 5 Nga̱t'a̱ ja̱koxi̱ boá nga Juaa̱ ndójoa atíndání xtaa̱, tanga ngui chiboa ni̱xtjin kó jún sa̱tíndánijnú A̱sién Ni̱xtjii̱n Néná.
\s Bi ts'én kijí Kjisoo̱ ndi'ak'ajmi ján
\p
\v 6 Kós'e̱ kui já xi kamátikójo̱ Kjisoo̱, bi ts'én asíyaá:
\p –Ji Ndi̱a̱, ¿a kui ni̱xtjii̱n nga ko̱e̱'ée̱ nga xta̱ xi chji̱a̱ni Israe̱l ko̱tíxomaa̱ nangui xi tsi̱'e̱?
\p
\v 7 Kó Kjisoo̱ bi katsoó kui jaá:
\p –Júnjín tsoboájnú nga xcha̱jnú chi̱bo̱a̱ ko̱jo ni̱xtjin nga sa̱'ínkjatjosón Na̱'mii̱ ni xi je índa, ni xi ngototo kui botixómaá nga sa̱'ín,
\v 8 tanga kji'a nga kjo̱e̱'ekónjnú A̱sién Ni̱xtjii̱n Néná, sa̱kójnú nga'niuú, kó ka̱ma chistiko̱na ka̱majnú kó jmí tsi ta na̱xi̱ńdá Jerusale̱n tsi, ko̱jo ngayeje nangui Judea̱, ko̱jo nangui Samaria̱, ko̱jo ngaskande nínga fet'aa̱ t'ananguii̱.
\p
\v 9 Kó nguije katsó kui nii̱, kamábe ngayeje kui já apostroo̱ kóts'en kachjanink'a Kjisoo̱ kó ngo ṉdi̱ yí'má, kó nguiti kamábejín ngase kui jaá.
\v 10 Kó tji̱e̱nga ndyi̱kotsijen ndá ndaá kui jaá nk'a ján, kamábe nga sa kjin sa kjin kijí Kjisoo̱, kó jó já xi ndyi̱yajá ṉjño tiboa je'ekoón kui já apostroo̱,
\v 11 kó bi katsoó:
\p –Já Galilea̱, ¿mí kjo̱a̱a̱ nga nk'a ján ndyi̱tsitsijenjnú? Ti kuíni Kjiso̱ xi'bi̱ xi kis'ijñajo̱jnú xi je tsanguínjo̱ ndi'ak'ajmi ján xi kji̱ndi̱bá nguiní xikó ts'én kamáyajnú nga kijí ndi'ak'ajmi ján.
\s Bi ts'én katjo'ójin Matíaa̱ nga apostro̱ kamá
\p
\v 12 Kós'e̱ jatjoni ki̱a̱ tji̱ngu̱i̱ xi 'mí oliboo̱, s'e̱ kijí nguiní na̱xi̱ńdá Jerusale̱n, ngo kilometro̱ kijíyase, xi tsjandié kjo̱a̱kitii̱ nga monguín ndsa̱ko nga ngo ni̱xtjin ndikón.
\v 13 Kó nga jachó na̱xi̱ńdaá, kijínijínguí nk'aa̱ kui ndi'a nínga síndo kui jaá, nínga síndo Peé ko̱jo Juaa̱, ko̱jo Sandiyaá, ko̱jo Jandree̱, ko̱jo Nguiripee̱, ko̱jo Tomaa̱, ko̱jo Bartolomee̱, ko̱jo Matioo̱, ko̱jo Sandiyá ndií Alfeoo̱, ko̱jo Ximoo̱ nda̱ xi Chi̱ni̱ ki'mií nga, ko̱jo Judaa̱, ṉts'i̱e̱ Sandiyaá.
\v 14 Ngayeje kui jaá kamátikó nga 'niú kis'iṉdo nga tsíchji̱a̱a̱ Néná kui ko̱jo tjín ínchjín, ko̱jo na̱ Riyaa̱ na̱aa̱ Kjisoo̱ ko̱jo já ṉts'i̱e̱.
\p
\v 15 Kui ni̱xtjin ján, Peé jastjíe̱n ngamasiee̱n kui já ṉts'iee̱, ma ra tsi ta úchán ko̱jo kan xi kamátikoó, kó bi katsoó:
\p
\v 16 –Jún ṉts'ie, chjiénga jatjosón ni xi kjit'a xo̱jo̱n eén Néná nga A̱sién Ni̱xtjii̱n Néná kats'énkíchji̱a̱ Ndabii̱ kjo̱a̱a̱ Judaa̱, nga kui xi kitsjientjoón xta̱ xi katsoboá Kjisoo̱,
\v 17 nga̱t'a̱ Judaa̱ nijan kamájo̱ná, kó ti kasakoo̱ kui xaá nga.
\v 18 Tanga kui, kijí kó ts'atsie ngo t'anangui kui to̱n xi kamáchjínií kjo̱a̱a̱ ni xi ndajín xi kats'én, s'e̱ kaxaxixtien kó kat'osén to̱ko̱, kó kitjiyá masien masien, kó ngayeje tsi'ee̱ jatjo.
\v 19 Kó kui nii̱ kamábe ngayeje xta̱ na̱xi̱ńdá Jerusale̱n, kuíni nga kui ngu̱i̱ndiee̱ Aséldama̱ katsoó, nga én tsi̱'e̱ kui jaá, ngu̱i̱ndiee̱ jín, tsó kui eén.
\v 20 Nga̱t'a̱ bo̱a̱ ts'én kjit'a xo̱jo̱n eén Néná xi 'mí Salmoo̱:
\q Ngas'ietiya ndi'aa̱,
\q kó nga jmíjín xi k'uíndo'yá.
\m Kó ti bi tsó nga:
\q Kje̱'e xi nga kjíbé xaá.
\p
\v 21 Kó chjiénga, nga kui já xi ngatsjé ni̱xtjin k'i̱e̱ síndojo̱jne̱, nga kis'ijñajin ngasejne̱ Ndi̱a̱ Kjisoo̱,
\v 22 ndeskande nga Juaa̱ atíndá Kjisoo̱, kó ngaskande ni̱xtjin nga tsanguínjo̱ ndi'ak'ajmi ján, nga ngo kui jaá xi nijan ngatamajo̱ná chistiko̱ nga ja'á'yaá Kjisoo̱.
\p
\v 23 Kó jó ma xi kini'ánkaxoma ja'eén: Kosie̱ xi 'mí Barsabaa̱ xi ti Justo̱ ki'mií nga, ko̱jo nda̱ xi 'mí Matíaa̱.
\v 24 Kó bi katsó kui jaá nga tsíchji̱a̱a̱ Néná:
\p –Ji Ndi̱a̱, ji xi ye ngayeje ini̱ma̱a̱ xtaa̱, takejne̱ 'yání nga jó kui jaá xi je kachje'éjin ji,
\v 25 tsi̱'e̱ nga k'uijñá ngu̱i̱ndiee̱ xá apostro̱ xi íjñámasien Judaa̱, tangat'aa̱ nga kats'énkjatjosónjín, nga kijí ngu̱i̱ndie xi katsoboaá kui.
\p
\v 26 Kó kui jaá katsatonyáni 'yání ngajoó xi sa̱ko̱ó kui xaá, kó Matíaa̱ katjo'ójin, kó kui kamáxki̱jo xi ngui tiengo já apostroo̱.
\c 2
\s Bi ts'én je'e A̱sién Ni̱xtjii̱n Néná
\p
\v 1 Kó nga jachó ni̱xtjii̱n s'ué Pentekostee̱, ngayeje xta̱ xi s'ijii̱n Kjisoo̱ kis'iṉdotikó xtín,
\v 2 kó ta niján ma kjindibáni ndi'ak'ajmi ján nga janie xikoó ngo tjo̱'niú xi kanda'yá ngayeje ngu̱i̱ya ndi'a nínga síndo kui xtaa̱,
\v 3 kó ki̱a̱ kamáya ni xi ja̱ kon najen ma kon, xikoó ndi'í, xi kamákabisoón, kó nga̱són to̱ko̱ nga ngo nga ngo kui xtaa̱ kis'iṉdosón kui nii̱,
\v 4 kó ngayejee̱ nga ts'as'iée̱n A̱sién Ni̱xtjii̱n Néná, kó íts'i̱yanii̱ nga tsíchji̱a̱ ja̱ kje̱'e ja̱ kje̱'e én, xikó ts'én katsjaa̱ A̱sién Ni̱xtjii̱n Néná nga ku̱i̱chji̱a̱.
\p
\v 5 Kó ki̱a̱ na̱xi̱ńdá Jerusale̱n kis'iṉdo xta̱ judío̱ xi bendikón Néná, xi ngayeje són nga̱sondiee̱ kjindibáni.
\v 6 Kó nga kanda'yá kui nii̱, kamátikó xta̱ kjiín, kó nde bejín mí ni xi sa̱'ín, nga̱t'a̱ ńgó ńgó tsíchji̱a̱ én tsi̱'e̱.
\v 7 Kó achichí kijíndikoón kó bi katsó nga asíyaá xkjín:
\p –¿A xta̱ Galilea̱jín ngayeje xta̱ xi ndyi̱chji̱a̱ kui eén?
\v 8 ¿Kóts'en nga, nga ngo nga ngo ñá kanda'yáa̱ nga tsa̱ñá én xí tsíchji̱a̱?
\v 9 Nga̱t'a̱ k'i̱e̱ síndojinná xta̱ xi chji̱a̱ni Partia̱, xta̱ xi chji̱a̱ni Media̱, xta̱ xi chji̱a̱ni Elaa̱m, xta̱ xi ndokjo̱a̱ ñá Mesopotamia̱, xta̱ xi chji̱a̱ni Judea̱, xta̱ xi chji̱a̱ni Kapadosia̱, xta̱ xi chji̱a̱ni Ponto̱, xta̱ xi chji̱a̱ni Asia̱,
\v 10 xta̱ xi chji̱a̱ni Frijia̱, xta̱ xi chji̱a̱ni Panfilia̱, xta̱ xi chji̱a̱ni Ejipto̱, xta̱ xi chji̱a̱ni nangui Libia̱ xi tiña manii̱ na̱xi̱ńdá Sirene̱. Ti bo̱a̱ ti ts'én tjín xta̱ xi chji̱a̱ni Roma̱, tjín xi xta̱ judío̱, kó tjín xi xta̱ judío̱jín tanga s'ijii̱n Néná,
\v 11 ti bo̱a̱ ti ts'én tjín xta̱ xi chji̱a̱ni Kreta̱ ko̱jo xta̱ xi chji̱a̱ni Arabia̱. Ngayejee̱ nga kanda'yáa̱ ñá nga ndyi̱chji̱a̱ én tsa̱ñá kjo̱a̱a̱ kókji'i kjo̱a̱ndikón xi ts'én Néná.
\p
\v 12 Kó ngayejee̱ nga achichí kijíndikoón kó nde bejín mí ni xi sa̱'ínkjó, s'e̱ ja̱ k'i̱e̱ ja̱ ngaján bi katsoó xkjín:
\p –¿Mí xi mejeén tsó kui nii̱?
\p
\v 13 Tanga tjín xi ta tsajnókie nga bi katsó:
\p –Ch'i̱ kui jaá.
\s Peé bi ts'én tsíchji̱a̱yajin tjón tjón xta̱ kjiín
\p
\v 14 Tanga Peé ko̱jo já apostro̱ xi ngui tiengoo̱ kixindyia kixi̱, kó Peé 'niú tsíchji̱a̱ nga bi katsó:
\p –Jún já judío̱ ko̱jo ngayeje jún xi tindyiónjnú na̱xi̱ńdá Jerusale̱n, ngatamayajnú kui nii̱ kó nda nda'yájnú én xi kuichjiájojnú'un.
\v 15 Nga̱t'a̱ bo̱a̱jín kji'i xikó ts'én ndyi̱ni'ánkjójnú, ch'i̱jín kui jaá, nga̱t'a̱ s'e̱ tsi chi̱bo̱a̱ nijan nga tajño̱ó,
\v 16 tanga kuí nii̱ xi katsó nda̱ chji̱ni̱e̱'e̱én Néná xi 'mí Joe̱l nga bi katsó:
\q
\v 17 Bi ka̱ma nga kju̱i̱e̱t'a ni̱xtjii̱n, tsó Néná,
\q skitjójón an A̱sién Ni̱xtjinna ngayeje xta̱,
\q ndí xi̱'injnú ko̱jo ndí ínchjínjnú
\q ku̱i̱chji̱a̱ xikoó chji̱ni̱e̱'énna,
\q jakjíndí xo̱ngojnú kjín to̱ko̱ya ni ko̱ko̱ó,
\q kó xta̱ xi xchaá ngu̱i̱jin ńjñaá ko̱e̱'échinii̱.
\q
\v 18 Kó moso̱na xi xi̱'in ko̱jo xi ínchjiín,
\q skitjójón an A̱sién Ni̱xtjinna kui ni̱xtjin ján,
\q kó ku̱i̱chji̱a̱ xikoó chji̱ni̱e̱'énna.
\q
\v 19 Kó nk'aa̱ ndi'ak'ajmii̱ koko an kjo̱a̱ndikón,
\q kó koko an chi̱bo̱a̱ nguindie t'ananguii̱,
\q kó jín, ndi'í ko̱jo ṉdi̱ k'uié.
\q
\v 20 Ts'ueé s'i̱jñó,
\q kó saá xikoó tsi jín ka̱ma,
\q nguindiee̱ ni̱xtjin nga kji̱ndi̱bá Ndi̱a̱ná,
\q ni̱xtjin je, ni̱xtjin tsjakji'i.
\q
\v 21 Kó kjo̱tjo'a ngayeje xta̱ xi sa̱'ínkjién ja'eén Ndi̱a̱ná nga ku̱i̱chji̱a̱a̱.
\p
\v 22 Jún bo̱a̱ já xi chji̱a̱ni Israe̱l, nda'yájnú kui én xi xian an: Kjisoo̱ nda̱ xi chji̱a̱ni na̱xi̱ńdá Nasare̱t, ngo nda̱ xi Néná akójnú nga kis'iee̱ nga'niú ko̱jo nga tsie kjo̱a̱ndikón xí kats'én ngu̱i̱ya tsja nga kis'ijñajo̱jnú, xikó ts'én ti juún je yajnú,
\v 23 kuí nda̱a̱, xi kini'ánk'as'ien nga ja̱ bo̱a̱ je índa Néná nga bo̱a̱ ka̱maa̱, kuí xí ik'íta'niújnú ko̱jo xi kini'ánk'iénjnú, nga kini'ánk'as'ienjnú ngu̱i̱ya tsja xta̱ xi ndajín nga akjat'a kro̱,
\v 24 kuí xí Néná kats'énkja'á'yaá, nga ja'áxiín ngu̱i̱ya tsja kjo̱a̱bo̱yaa̱, nga̱t'a̱ kjo̱a̱bo̱yaa̱ kamájiín nga kui íjña'niú.
\v 25 Nga̱t'a̱ nda̱ re Ndabii̱ bi katsó kjo̱a̱a̱ kui:
\q Ngatsjé ni̱xtjin kamábe an nga kje̱n an tikón Ndi̱a̱a̱,
\q nga̱t'a̱ kuí xí tikónt'a ndsa̱ fojní an tsi̱'e̱ nga jmíjín xi sa̱'íntíyana.
\q
\v 26 Kuíni nga achichí tsja máa̱ ini̱ma̱na,
\q kó ndso̱'boa an tsja kis'iee̱.
\q Kó ngaskande kotíjña an nga k'uiéna kjo̱a̱chiyá.
\q
\v 27 Nga̱t'a̱ k'uijñí masienjínní ki̱a̱ ngu̱i̱ndiee̱ kjo̱a̱bo̱yaa̱
\q ti nde ko̱e̱'éndiéjín ji nga kjo̱tson yojoo̱
\q nda̱ xi tsjie nguindyikin ji.
\q
\v 28 Jí xi akakení ndi̱ya̱á kjo̱a̱mindyioo̱n,
\q kó achichí kjo̱a̱tsja tiboe'éní nga kje̱n ji tikón an.
\p
\v 29 Jún ṉts'ie, ka̱ma bi xianjnú'un kjo̱a̱a̱ nda̱ xi tji̱e̱ xcháná xi 'mí Ndabii̱ nga jmí tsi ta k'ien tsi, kis'inijín nga, kó nga̱tsjo̱ó k'i̱e̱ tikónjinná ngaskande kui ni̱xtjin xi'bi̱.
\v 30 Tanga nga nda̱ chji̱ni̱e̱'e̱én Néná kamá Ndabii̱, Néná xi katsáyatjoón nga ngo nda̱ xi xta̱ tji̱e̱e̱ kui xi ko̱tíxomaa̱ Israe̱l.
\v 31 Ndabii̱, nguindiee̱ kamábe nga kjo̱a̱'á'yaá Kristoo̱ ko̱jo nga ki̱a̱jín k'uijñá yojoo̱ ngu̱i̱ndiee̱ kjo̱a̱bo̱yaa̱, ti nde kjo̱tsonjín yojoo̱.
\v 32 Kuí Kjiso̱ xi'bi̱ xi Néná kats'énkja'á'yaá, kó ji̱n xi chistiko̱ ji̱n.
\v 33 Kuíni nga kini'ándíkón nga ki̱a̱ tsja fojnií Néná tikón, kó nguije Na̱'mii̱ katsjaá A̱sién Ni̱xtjii̱n Néná xi katsáyatjón nga tsja̱a, kó kui nii̱ xi ndyi̱yajnú ko̱jo xi ndyi̱nda'yájnú.
\v 34 Nga̱t'a̱ kuijín Ndabii̱ xi kijí ndi'ak'ajmi ján, tanga ti kuíni xi bi katsó:
\q Bi katsoó Ndi̱a̱ná, Ndi̱a̱na:
\q “Ti̱ndyint'ení nga fojnína nínga botixoma an,
\q
\v 35 ngaskande nga k'uíndo an nguindie ndsa̱ki kondra̱ tse̱.”
\p
\v 36 Ngatama be cha̱n cha̱n ngayeje xta̱ Israe̱l, nga ti kuíni Kjiso̱ xi'bi̱ xi jún akjat'ajnú kro̱, kó Néná kuí xí kats'én nga Ndi̱a̱ná ko̱jo Kristoo̱ kamá.
\p
\v 37 Nga tsint'ié kui eén ngayeje xta̱ xi kamátikó ki̱a̱, achichí on kamaá ini̱ma̱a̱ kó bi katsó nga asíyaá Peé ko̱jo já apostro̱ xi ngasee̱:
\p –Jún ṉts'ie, ¿mí xi si̱'án ji̱n 'ne̱?
\p
\v 38 Kó Peé bi katsoó kui jaá:
\p –Ti'ank'oyajnú yojojnú, kó ja'eén Jesukristoo̱ nga ni'ánkjién nga satíndájnú nga ngo nga ngojnú, tsi̱'e̱ nga Néná sa̱'ínjetakoón jéjnú, kó bo̱a̱ ts'én sa̱kójnú A̱sién Ni̱xtjin xi Néná tsja̱ajnú.
\v 39 Nga̱t'a̱ kuí nii̱ xi katsáyatjón Néná nga tsja̱ajnú jún ko̱jo ndíjnú, ko̱jo xta̱ xi kjin síndo, ko̱jo ngayeje xta̱ xi Ndi̱a̱ná ku̱i̱chji̱a̱a̱.
\p
\v 40 Kó kui eén ko̱jo kjín to̱ko̱ya én xi kats'énkjién Peé nga tsíchji̱a̱jo ko̱jo nga atíxomaa̱ xtaa̱ nga bi katsoó:
\p 'Na̱xié'ájnú yojojnú ngu̱i̱jii̱n kui xta̱ xi ts'én ni xi ndajiín.
\p
\v 41 Kó bo̱a̱ ts'én, kui xta̱ xi iskjíbé kui eén, atíndá yojoo̱, kó kamá ra tsi ta ngui ján mi̱ xta̱ xi kis'ijii̱n Néná.
\v 42 Kó tanisién kamá'niátakón ni xi akóyá já apostroo̱, kó ta ngo tsa'a xkjín, ko̱jo kamátikó xtín nga iskjinie ko̱jo nga kats'e, ko̱jo nga tsíchji̱a̱a̱ Néná.
\s Bi ts'én kis'iṉdo xta̱ xi tjón kis'ijii̱n Kjisoo̱
\p
\v 43 Kó ngayeje xtaa̱ kijíndikoón kjo̱a̱a̱ kjo̱a̱ndikón ko̱jo chi̱bo̱a̱ xi kats'én Néná ngu̱i̱ya tsja já apostroo̱.
\v 44 Kó ngayeje xta̱ xi kis'ijii̱n Néná 'niú tsa'a xtín yojoo̱, kó ngayeje ni xi kis'iee̱ ta tsi̱'e̱ yeje kamá,
\v 45 kó atíñá ni xi tjiín, kó too̱n kats'énkabii̱ xtaa̱ xikó ts'én kamáchjieén nga ngo nga ngo.
\v 46 Kó ndyiojón ndyiojón kamátikó ki̱a̱ na̱ngo̱xi̱i̱, kó xki̱ ndi'a akjángá paa̱n kó iskjinie xtín nga tsja kamaá ko̱jo nga nda kamá ini̱ma̱a̱,
\v 47 nga kats'éntsjaá Néná, kó kis'iee̱ kjo̱a̱ndaa̱ ngayeje xta̱ na̱xi̱ńdaá. Kó ndyiojón ndyiojón Ndi̱a̱ná kats'énkjín kui xta̱ xi je tsíchji̱a̱a̱ nga ts'axié'á.
\c 3
\s Peé bi ts'én kats'éndaya ngo nda̱ xi majín fí
\p
\v 1 Ngo ndi̱ya Peé ko̱jo Juaa̱ kijí na̱ngo̱xi̱ chi̱bo̱a̱ ján nga kamánguixón, chi̱bo̱a̱ nga ndokjo̱a̱a̱ Néná.
\v 2 Kó ngo nda̱ xi ni̱ma̱ se ngaskande koó nga katsen, ndyiojón ndyiojón tsanguínk'íjña ngu̱i̱xtio nga̱ntjo̱a̱ na̱ngo̱xi̱ xi 'mí Tsjakji'ii̱, tsi̱'e̱ nga ku̱i̱'aa̱ to̱nchji̱e̱ xta̱ xi 'bos'ien na̱ngo̱xi̱i̱,
\v 3 kó kui nda̱a̱ nga kamábe nga Peé ko̱jo Juaa̱ je ma k'as'ien na̱ngo̱xi̱i̱, tsí'aá to̱nchji̱e̱.
\v 4 Kó Peé ko̱jo Juaa̱ asko'á ndá ndá kui nda̱a̱, s'e̱ bi katsó Peé:
\p –Tsitsíjinjne̱.
\p
\v 5 Kó kui nda̱ ni̱ma̱a̱ asko'á ndá ndá kui jaá, nga̱t'a̱ askoyá nga to̱n tsja̱á.
\v 6 Kó Peé bi katsoó:
\p –Jmí to̱ntiboa, jmí to̱nsiniéjínna xi tsjaa̱, tanga ni xi tjínna tsjaa̱: Ja'eén Jesukristoo̱ nda̱ xi chji̱a̱ni Nasare̱t ts'enkjién an nga bi t'íxiaán, ti̱sítji̱n kó tiṉtje̱.
\p
\v 7 Kó iskjíbé tsja fojní kó kats'énkjastjíe̱n, kó tji̱e̱nmá kasakonga'niuú ngu̱i̱ya se ko̱jo ṉdato'oo̱ se,
\v 8 kó nda̱ ni̱ma̱ see̱ iskjínk'á ma nga kasasien kixi̱ kó tji̱e̱nmá kistso'bá, s'e̱ ts'as'ienjo̱ Peé ko̱jo Juaa̱ ngu̱i̱ya na̱ngo̱xi̱i̱, kistso'bá kó iskjínk'á iskjítsiña nga kats'éntsjaá Néná.
\v 9 Kó ngayeje xta̱ na̱xi̱ńdaá kamábe nga je kamá kistso'bá ko̱jo nga kats'éntsjaá Néná.
\v 10 Kó kamáya nga kui nda̱a̱ xi kis'ijña nga̱ntjo̱a̱a̱ na̱ngo̱xi̱ xi 'mí Tsjakji'ii̱ nga tsí'á to̱nchji̱e̱ kó xtaa̱ achichí kijíndikoón ko̱jo katsakjónní kjo̱a̱a̱ ni xi kamaá.
\s Peé bi ts'én tsíchji̱a̱yajii̱n xtaa̱ ndi̱tsen na̱ngo̱xi̱i̱
\p
\v 11 Nda̱ ni̱ma̱ xi je kamándayaa̱ ta ki̱a̱ kistso'bátji̱ngui'niúrií Peé ko̱jo Juaa̱. Ngayeje xta̱ na̱xi̱ńdaá kijíndikoón kui nii̱, kó tsanga ma nga kijítji̱nguii̱ nínga tikón ngo ngu̱i̱ndie xi 'mí Pórtikoo̱ Salomoo̱, nínga síndo kui jaá.
\v 12 Nga kamábe Peé kui nii̱, bi katsoó xta̱ na̱xi̱ńdaá:
\p –Já xi chji̱a̱ni Israe̱l, ¿ánní nga kjifíndikónkonjnú kui nii̱? ¿Kó mí kjo̱a̱a̱ nga jún ndyi̱tsitsijendájne̱ ji̱n, xikoó tsi nga'niú tsa̱ji̱n ko̱jo tsi tangat'anii̱ nga yandíkónjne̱ Néná tsi kuíni nga kamándaya kui nda̱a̱?
\v 13 Néná xi tsi̱'e̱ Abraa̱m, xi tsi̱'e̱ Isaa̱ ko̱jo xi tsi̱'e̱ Jako̱b, Néná xi tsi̱'e̱ xta̱ tji̱e̱ xcháná, kui xi katsjaá kjo̱a̱je Kjisoo̱, kui xi ndií, kui nda̱ xi jún kini'ánk'as'ienjnú ko̱jo xi kini'ánch'ojnú nguindyi̱ko̱n xtitjón Pilatoo̱, kji'a nga ja̱ bo̱a̱ je bo̱a̱ katsó nga ku̱i̱'íjñandé.
\v 14 Tanga jún nguindiee̱ nga chji̱a̱'ajnú nga s'i̱jña ndé, nga̱t'a̱ nda̱ xi tsjie ko̱jo nda̱ xi kixi̱ kamá, kó tasá jún kichjiá'ájnú nga ik'íjñandé ngo nda̱ xi ts'enk'ién ini̱ma̱.
\v 15 Kó bo̱a̱ ts'én kini'ánk'iénjnú xi tsjáná kjo̱a̱mindyioo̱n, kui xi Néná kats'énkja'á'yaá kó ji̱n xi chistiko̱jne̱.
\v 16 Kó tangat'anii̱ nga s'ijinjne̱ Kjisoo̱, nga kui nda̱ xi'bi̱, kui xi ndyi̱yajnú ko̱jo xi ja̱ bo̱a̱ je yajnú, kasakonga'niuú, kó tangat'anií nga s'ijii̱n Kjisoo̱, kuíni nga kamándaya cha̱n cha̱n kui nda̱a̱ nguindyikónjnú.
\p
\v 17 Kó ngot'e̱ 'ne̱ já ṉts'ie, je be an nga yajínjnú ni xi kini'ánjnú jún ko̱jo já xí botixómaá.
\v 18 Tanga Néná bi ts'én kats'énkjatjosón ni xi katsáyatjón nínga kats'énkíchji̱a̱ ngayeje já chji̱ni̱e̱'e̱én nga Kristoo̱ chjiénga tsie kjo̱a̱ni̱ma̱ kjo̱a̱'atio.
\v 19 Kuíni nga, ti'ank'oyajnú yojojnú, kó Néná ti'ansenjnúu̱, tsi̱'e̱ nga kui sa̱'ínkjié jéjnú, kó kji̱ndibáchonjnú Ndi̱a̱a̱ nga ni̱xtjin xi nda,
\v 20 kó Néná sa̱nguíyajnú Kjisoo̱, kui xi ndeskande koó nga ítjats'ennii̱ nii̱ nga ja'ájin nga Kristo̱jnú ka̱ma,
\v 21 kui xi je taxá bo̱a̱ kji'ini nga ndi'ak'ajmii̱ k'uijñá ngaskande ni̱xtjin nga ka̱mandaya ngayeje nii̱, kui ni xi katsó Néná nga kats'énkíchji̱a̱ já chji̱ni̱e̱'én tsjiee̱ xi kis'iṉdo ni̱xtjin xchá ján.
\v 22 Nga̱t'a̱ Moisee̱ bi katsoó xta̱ xi xcháná: “Kuí Néná xi Ndi̱a̱ná xi kjo̱a̱'ájin ngu̱i̱jii̱n ṉts'iéjnú ngo nda̱ chji̱ni̱e̱'e̱én Néná xikoó an, kuí xí nda'yájnúu̱ ngayeje ni xi ku̱i̱chji̱a̱.
\v 23 Kó ngayeje xta̱ xi ku̱i̱nt'iejiín ni xi ka̱tso̱ kui nda̱ chji̱ni̱e̱'e̱én Néná, si̱'ankjie ngu̱i̱jii̱n xta̱ na̱xi̱ńdaá.”
\p
\v 24 Kó ngayeje já chji̱ni̱e̱'e̱én Néná ndeskande xi ya'anii̱ Samuee̱l nga tsíchji̱a̱ kó katsáyá ni xi kjima kui ni̱xtjin xi'bi̱.
\v 25 Jún boá xi xikoó tsi ndií já chji̱ni̱e̱'e̱én Néná, ko̱jo ni xi índajo̱ Néná xta̱ tji̱e̱ xcháná nga bi katsoó Abraa̱m: “Ngayeje xta̱ na̱xi̱ńdá xí tjín nga̱sondiee̱ nda ka̱mata'in ngat'aa̱ xta̱ tji̱e̱ xi k'uieé ji.”
\v 26 Kji'a nga Néná kats'énkja'á'yaá ndií, tjón jún katsanguiyajnú, tsi̱'e̱ nga kats'énchikonñéjnú, ko̱jo tsi̱'e̱ nga bo̱a̱ ts'én nga ngo nga ngojnú nguiti jmí ni ch'o kji'i si̱'ánjínjnú.
\c 4
\s Bi ts'én tsíchji̱a̱ Peé ko̱jo Juaa̱ nguindyi̱ko̱n jáxaá
\p
\v 1 Kó tji̱e̱nga Peé ko̱jo Juaa̱ ndyi̱chji̱a̱jo xta̱ na̱xi̱ńdaá, jachó já chiná'mii̱ ko̱jo nguito̱ko̱o̱ jajún xi konda na̱ngo̱xi̱i̱ ko̱jo já saduseoo̱,
\v 2 achichí kamáxtií kui jaá nga̱t'a̱ Peé ko̱jo Juaa̱ ndyi̱bokoyaá xta̱ na̱xi̱ńdaá nga xtaa̱ foa'á'yá nguinií nguije fesón xikó ts'én ja'á'yaá Kjisoo̱,
\v 3 kó kandobá kui jaá kó kananguis'ien ndo̱bo̱a̱ya ngaskande nga kamánguindyiojón nga̱t'a̱ nga je kamánguixón kui ni̱xtjii̱n.
\v 4 Tanga kjín ma xta̱ xi tsint'ié kui eén xi kis'ijii̱n, kó ma ra tsi ta ún mi̱ nga ta soboá já xi̱'in.
\p
\v 5 Kó nga kamánguindyiojón kamátikó ki̱a̱ na̱xi̱ńdá Jerusale̱n já xí botixómaá, já xchá nguito̱ko̱o̱ na̱xi̱ńdaá, já chji̱ni̱e̱kjo̱a̱kitii̱,
\v 6 ko̱jo nguito̱ko̱o̱ chiná'mi xi 'niú nk'a xaá xi 'mí Anáa̱, ko̱jo Kaifaa̱, ko̱jo Juaa̱, ko̱jo Rijaá, ko̱jo ngayeje xi xkjín ma já nguito̱ko̱o̱ chiná'mii̱,
\v 7 kó ngamasiee̱n kui xtaa̱ índo kui jaá, kó bi katsoó nga asíyaá:
\p –¿Mí xá xi tjínjnú? Kó, ¿'Yá xi katsanguiyajnú nga kui nii̱ ni'ánjnú?
\p
\v 8 Kós'e̱ Peé nga 'niú tjíjii̱n A̱sién Ni̱xtjii̱n Néná bi katsoó kui jaá:
\p –Jún já xi botixómá ko̱jo xta̱ xi xchá:
\v 9 Jún ndyi̱bosíyajnú kjo̱a̱a̱ kjo̱a̱nda xi kini'aán ngo nda̱ xi oo̱n, tsi̱'e̱ nga xcha̱jnú kóts'en kamándaya,
\v 10 ngatamayajnú ngayeje jún, ko̱jo ngayeje xta̱ Israe̱l nga nga'niuú Jesukristo̱ xi chji̱a̱ni Nasare̱t, kui xi akjat'ajnú kro̱, tanga Néná kats'énkja'á'yá nguinií ngu̱i̱jii̱n xta̱ xi je jesoón, tangat'anii̱ kuí nga kui nda̱a̱ kamándaya nguindyikónjnú.
\v 11 Kuí Kjiso̱ xi'bi̱ xi ndi̱jo̱ xi kats'énch'ó já chji̱ni̱e̱xo̱ó, tanga kui boá xi kamá ndi̱jo̱ nga'niuú ndi'aa̱.
\v 12 Kó jmíjín ingo ngase xi ka̱maa̱ k'o̱xié'á xtaa̱, nga̱t'a̱ Néná katsanguiyajín kje̱'e ngase kui nga̱sondiee̱ xi ka̱maa̱ k'o̱xié'aná.
\p
\v 13 Kós'e̱ kji'a nga kamábe jáxaá nga katsakjónjín nga tsíchji̱a̱ Peé ko̱jo Juaa̱, kamákjiín nga kui já apostroo̱ jmí xo̱jo̱n kamájiín, kó achichí kijíndikoón kó kamábe nga Kjisoo̱ kis'iṉtso̱majo̱.
\v 14 Kó nga kamábe nga kui nda̱ xi kamándayaa̱ ki̱a̱ nijan tikónjo̱ kui jaá, nde kamájín ngo ni katsó kondraa̱.
\v 15 Kós'e̱ katsjá kjo̱a̱ nga ka'naxié Peé ko̱jo Juaa̱ nínga kamátikó kui xtaa̱ kó ja̱ k'i̱e̱ ja̱ ngaján ndyi̱foyáni,
\v 16 nga bi katsó:
\p –¿Mí xi si̱'anjo̱ kui jaá? Nga̱t'a̱ ja̱koxi̱ nga ngo chi̱bo̱a̱ kats'én, kó ngayeje xta̱ xi síndo na̱xi̱ńdá Jerusale̱n xi kamábe, kó ka̱majín bo̱a̱jín kji'i k'uín,
\v 17 tanga ta tsi̱'e̱ nga nguiti ka̱ma tsiejín ngase kui nii̱ ngu̱i̱jii̱n xta̱ na̱xi̱ńdaá, tasá ku̱i̱ndyiandikóo̱n, tsi̱'e̱ nga nguiti ingojín xi ku̱i̱chji̱a̱jo ngase kjo̱a̱a̱ ja'eén Kjisoo̱.
\p
\v 18 Kó kandokjo̱a̱a̱, s'e̱ katse'eé kjo̱a̱ tsi̱'e̱ nga nguiti chiíjín ku̱i̱chji̱a̱ ko̱jo nga nguiti ko̱kóyajín ngase kjo̱a̱a̱ Kjisoo̱.
\v 19 Tanga Peé ko̱jo Juaa̱ bi katsó nga tsíchji̱a̱:
\p –Bo̱a̱ t'ínjnú tsi kixi̱ nguindyi̱ko̱n Néná nga jún xi ko̱nda'yá'énjne̱ nguindiee̱ nga Néná xi ko̱nda'yá'énjne̱,
\v 20 nga̱t'a̱ ka̱majín nga nguiti ko̱ndókjo̱a̱jínjne̱ ni xi je kamáya ji̱n ko̱jo ni xi je kanda'yá ji̱n.
\p
\v 21 S'e̱ jáxaá indyiándikoón kui já apostroo̱ s'e̱ índondé, kó jmí ni kasakojiín xi sa̱'ínjénií, nga̱t'a̱ ngayeje xta̱ na̱xi̱ńdaá katsjaá kjo̱a̱je Néná kjo̱a̱a̱ ni xi kats'én Peé ko̱jo Juaa̱,
\v 22 nga̱t'a̱ kui nda̱ xi kamándaya nga kamá kui kjo̱a̱ndikoón, tjín raá ts'atio yichán nó.
\s Ni xi tsí'aá Néná já apostroo̱ ko̱jo xta̱ xi ngasee̱
\p
\v 23 Kó nguije kis'iṉtsomandé Peé ko̱jo Juaa̱ kijíkón nguinií xkjín kó katsáyá yejee̱ ni xi katsoó já nguito̱ko̱o̱ chiná'mii̱ ko̱jo já xchá nguito̱ko̱o̱ na̱xi̱ńdaá.
\v 24 Kó kui jaá nguije tsint'ieé ni xi katsó, ngayejee̱ tsíchji̱a̱ xtiín Néná nga bi katsó:
\p –Ji Ndi̱a̱, xi botíxome ji, ji xi kini'índe ndi'ak'ajmii̱, t'ananguii̱, ndáchíkoón, ko̱jo ngayeje ni xi tjiín kui nii̱,
\v 25 nga bi kase nga kini'ínkíchji̱e̱ mosóo̱ xi 'mí Ndabii̱ nga kananguiyée̱ A̱sién Ni̱xtjíi̱n:
\q ¿Mí kjo̱a̱a̱ nga ndyi̱kjandayáxchán xta̱ xi tjín nga̱sondiee̱?
\q ¿Mí kjo̱a̱a̱ nga xta̱ na̱xi̱ńdaá taxkiya ndyi̱ts'enkjó ngo ni xi jmí ni chjíjiín?
\q
\v 26 Kamátikó já re ko̱jo xta̱ xi botixómaá t'ananguii̱,
\q nga ndyi̱ts'enxchán kondraa̱ Ndi̱a̱a̱,
\q ko̱jo kondraa̱ Kristo̱ xi ja'ájin kui.
\p
\v 27 Nga̱t'a̱ nga ja̱koxi̱ nga ngo tjín kats'én yojoo̱ Erodee̱, Ponsio Pilatoo̱, xta̱ xi Israe̱ljín ko̱jo xta̱ Israe̱l, k'i̱e̱ kui na̱xi̱ńdaá nga kondra̱ kijií nda̱ tsjie ko̱jo moso̱ xi 'mí Kjisoo̱, kui xi ji kachje'éjin ji nga Kristoo̱ ka̱ma,
\v 28 tsi̱'e̱ nga sa̱'ín ni xi ja̱ bo̱a̱ je ik'índe ko̱jo ja̱ bo̱a̱ je bo̱a̱ kase nga bo̱a̱ ka̱ma.
\v 29 Kó ngot'e̱ 'ne̱, Ndi̱a̱, tsitsíjíi̱n nga ndyi̱mindyiándíkón, kó te'ée̱ nga'niú ngayeje mosóo̱ tsi̱'e̱ nga stsa̱kjonjín nga ku̱i̱chji̱a̱ ée̱n.
\v 30 Tjienníjne̱ ndse̱ tsi̱'e̱ nga nga'niúu̱ ka̱mandayani xta̱ xi oo̱n kó nga ja'eén Kjisoo̱, ndí xi tsjiée̱, ka̱makjién nga ka̱ma chi̱bo̱a̱ ko̱jo kjo̱a̱ndikón.
\p
\v 31 Kó nguije kamá nga tsíchji̱a̱a̱ Néná, ngu̱i̱ndie nínga síndotikó jatsié, kó ngayeje kui xtaa̱ ts'as'iée̱n A̱sién Ni̱xtjii̱n Néná, kó nde nguiti jmí ndikón kis'iejínnii̱ nga tsíchji̱a̱ eén Néná.
\s Xta̱ xi je kis'ijii̱n Kjisoo̱ bi ts'én akjángaá xkjín ni xi tjiín
\p
\v 32 Kó xta̱kjín xi kis'ijii̱n eén Néná, ta ngo ini̱ma̱ ko̱jo ngo kjo̱a̱kjíntakón tsi kamá, kó nde ngojín xi tsi̱'e̱ soboá kamaá ni xi kis'iee̱, nga̱t'a̱ ta tsi̱'e̱ yeje kamá ni xi kis'iee̱ nga ngo nga ngo.
\v 33 Kó já apostroo̱ achichí nga'niú kis'iee̱ nga katsáyá kóts'en ja'á'yaá Ndi̱a̱ Kjisoo̱, kó Néná tsie kjo̱a̱nda katsjaá ngayeje kui jaá.
\v 34 Kó bo̱a̱ ts'én nga nde ngojín kui jaá xi kamáchjieén ngo ni, nga̱t'a̱ ngayeje xi kis'iee̱ k'ijñá ko̱jo ndi'a, atíñá,
\v 35 kó kui too̱n jachók'índo nguindie se já apostroo̱ tsi̱'e̱ nga kui jaá xi kats'énkabisoón xtaa̱ xikó ts'én kamáchjieén nga ngo nga ngo.
\v 36 Kó Kosiee̱ ngo nda̱ lebita̱ xi chji̱a̱ni tji̱ngu̱i̱ Chipre̱, kui xi Bernabee̱ katsoó já apostroo̱ (ndií xi ts'endajónná, tsó kui ja'eén),
\v 37 kui nda̱a̱ ngo nangui kis'ijñaa̱, kó atíñá, kó kui too̱n já apostroo̱ kijíjoo̱.
\c 5
\s Bi kats'én Ananíaa̱ ko̱jo na̱ Safiraa̱
\p
\v 1 Tanga kis'ijña ngo nda̱ xi 'mí Ananía̱, ko̱jo chjo̱ón, xi 'mí na̱ Safira̱ xi atíñá ngo xo'ba xi tikoón,
\v 2 kó kui nda̱a̱ ko̱jo chjo̱ón nijan kamá nga índa nga kats'énk'as'ien yejejiín já apostroo̱ too̱n ni xi atíñá.
\v 3 Tanga Peé bi katsoó:
\p –Ananía̱, ¿ánní nga xindajín Satanaa̱ ts'as'iée̱n ngu̱i̱jii̱n ini̱máa̱ nga ik'índiseje̱ ji A̱sién Ni̱xtjii̱n Néná nga kachjábé ji ngo tjín kui too̱n ni xi akatíñí?
\v 4 ¿A tse̱jín kamá kui xo'baa̱? Kó nguije akatíñí, ¿a tse̱jín kamá kui too̱n? ¿Ánní nga bo̱a̱ kji'i ni xi ik'íjñijin ini̱máa̱? Nga̱t'a̱ jmí tsi xta̱ xi ik'índiseje̱, Néná xi kich'íṉche̱je.
\p
\v 5 Kó nga tsint'ié kui eén Ananíaa̱, ja̱ kó ts'áka s'e̱ k'ien tji̱'ni̱u̱, kó achichí katsakjónní ngayeje xta̱ xi tsint'ié kui ni xi kamaá.
\v 6 Kó ja̱ kó kjindibá já xo̱ngo xi íxtié yojoo̱ Ananíaa̱, s'e̱ kijíkanijín.
\p
\v 7 Ja'a ra tsi ta ján ora̱, s'e̱ jachó chjo̱ón kui nda̱ xi k'iee̱n, kó nde bejín mí ni xi kamaá.
\v 8 Kó Peé bi katsoó:
\p –T'íyéní, ¿a bo̱a̱ kji'i akatíñájnú kui xo'ba xi akatíñájnú?
\p Kó bi katsó kui xta̱chjo̱ón:
\p –Jo̱o̱n, bo̱a̱ kji'i.
\p
\v 9 S'e̱ Peé bi katsoó:
\p –¿Ánní nga bo̱a̱ ts'én ik'índajnú nga kachjat'ayákónjnú A̱sién Ni̱xtjii̱n Ndi̱a̱a̱? Ján'a̱n, ki̱a̱ ndyi̱ndibá já xi kijíkanijín xi̱'íi̱n, kó ti bo̱a̱ ti ts'én ko̱e̱je̱kanijiín ji nga.
\p
\v 10 Ti kji'a ts'áka na̱ Safiraa̱ nguindie se Peé kó k'ien tji̱'ni̱u̱, kó nguije ts'as'ien já xo̱ngo̱ó ngu̱i̱yaa̱, je kji'ijñak'ien, kó ts'axié s'e̱ kijíkanijín t'a nínga kji'ijña ndie xi̱'ii̱n.
\v 11 Kó achichí katsakjónní ngayeje xta̱ na̱ngo̱xi̱i̱ ko̱jo ngayeje xta̱ xi tsint'ié kui nii̱.
\s Kjín kjo̱a̱ndikón kats'én já apostroo̱
\p
\v 12 Kó kui já apostroo̱ achichí kjín chi̱bo̱a̱ ko̱jo kjo̱a̱ndikón xí kats'én ngu̱i̱jii̱n xta̱ na̱xi̱ńdaá, kó ngayeje xtaa̱ ki̱a̱ kamátikó xtín nínga tikón ngu̱i̱ndie xi 'mí Pórtikoo̱ Salomoo̱.
\v 13 Xta̱ xi ngasee̱, nde nguiti ingojín xi nijan kamátikójo̱, tanga xta̱ na̱xi̱ńdaá 'niú ton ton kamábendikón kui já apostroo̱,
\v 14 kó xta̱ xi je tjis'ijii̱n Ndi̱a̱a̱ ta sa sá kamákjín, bo̱a̱ kji'i xi xi̱'in kó bo̱a̱ kji'i xi ínchjín,
\v 15 kó ngaskande ngu̱i̱ya ndi̱yatié ka'naxié xta̱ xi oo̱n, nga akjajñasón ṉcha̱n tsi̱'e̱ nga, nga kjo̱a̱'a Peé, nde ta tji̱nk'i̱e̱én xi kjo̱a̱'anié kui xta̱ xi oo̱n.
\v 16 Ti bo̱a̱ ti ts'én xta̱ xi síndo t'a tiñaa̱ na̱xi̱ńdá Jerusale̱n jachójo̱ xta̱ xi oo̱n, ko̱jo xta̱ ndyi̱ts'enní'iín a̱sién ni̱xtjin xi ndajín, kó ngayejee̱ nga kamándaya.
\s Bi ts'én ikiyotji̱nguii̱ Peé ko̱jo Juaa̱
\p
\v 17 Kó já nguito̱ko̱o̱ chiná'mi xi 'niú nk'a xaá ko̱jo xta̱ xi chji̱a̱ni já saduseoo̱ kamáchi̱ni̱,
\v 18 kuíni nga kandobá já apostroo̱ s'e̱ tsanguínjo̱ ndo̱bo̱a̱ya̱á na̱xi̱ńdaá.
\v 19 Tanga ngo ndítsjiee̱ Néná iskjíx'á nga̱ntjo̱a̱ ndo̱bo̱a̱ya̱á nga jñoó, s'e̱ índondé, kó bi katsoó:
\p
\v 20 –Tanguínjnú na̱ngo̱xi̱ ján kó t'íni̱jmijnúu̱ xta̱ na̱xi̱ńdaá eén Néná xi tsjá kjo̱a̱mindyioo̱n.
\p
\v 21 Kó nguije tsint'ié kui nii̱, nga 'niú tajño̱ó nga kamánguindyiojón ts'as'ien na̱ngo̱xi̱i̱ kó akóyá eén Néná.
\p Kós'e̱, chiná'mi xi 'niú nk'a xaá ko̱jo xta̱ xi nijan síndojo̱, tsíchji̱a̱a̱ xta̱ xi xchá xi chji̱a̱ni Israe̱l kó kamátikó ngayeje jáxaá, kó katsanguiya jajuún nga kijíchja'á já apostroo̱ nínga síndoyá ndo̱bo̱a̱ya̱á.
\v 22 Tanga nga jachó jajún xi kondaa̱ je nguiti jmíjín xi síndo ngu̱i̱ya ndo̱bo̱a̱ya̱á, kó tji̱e̱nmá kijí'oyá nguiní nga katsáyá,
\v 23 nga bi katsó:
\p –Ndo̱bo̱a̱ya̱á tjíchjá cha̱n cha̱n, kó jajún xi ndyi̱kondaa̱ takó bo̱a̱ ts'én ndyi̱a̱ kixi̱ ki̱a̱ nga̱ntjo̱a̱a̱, tanga nga kachjáx'ájne̱ nga̱ntjo̱a̱ ndo̱bo̱a̱ya̱á ta'yajín xi kasakojne̱ ngu̱i̱yaa̱.
\p
\v 24 Nga tsint'ié kui eén nda̱ nguito̱ko̱ xi konda na̱ngo̱xi̱i̱, ko̱jo já nguito̱ko̱o̱ chiná'mii̱, ja̱ k'i̱e̱ ja̱ ngaján asíyaá xkjín nga bo̱a̱ katsoó nga ñá tji̱e̱n kjo̱chó kui ni xi kjimaa̱.
\v 25 Ta kji'a ma jachó ngo nda̱, xi bi katsó:
\p –A yajnú 'ne̱, kui já xi kananguis'ienjnú ndo̱bo̱a̱ya, je síndo nguiní na̱ngo̱xi̱i̱ nga ndyi̱bokoyaá xta̱ na̱xi̱ńdaá.
\p
\v 26 Kós'e̱ nda̱ nguito̱ko̱o̱ jajuún ko̱jo jajún xi kondaa̱ kijíngase, tanga jmí ni kats'énjo̱jín, nga̱t'a̱ nga katsakjónní tsi xtaa̱ ndi̱jo̱ k'o̱ya.
\v 27 Kji'a nga jachójo̱, kijíjo̱ nguindyi̱ko̱n jáxaá, kó nguito̱ko̱o̱ chiná'mi xi 'niú nk'a xaá, bi katsoó:
\p
\v 28 –Ji̱n je tanisién 'niú akatíxomajne̱ nga nguiti chiíjín ko̱ndókjo̱a̱ni̱jmijnú kjo̱a̱a̱ Kjisoo̱ nga ko̱ko̱yajnú, kó ngayeje na̱xi̱ńdaá ik'íkitsiejnú kui ni xi akakoyájnú, kó mejénjnú nga ji̱n xi s'i̱niéjne̱ nga kini'ánk'ién Kjisoo̱.
\p
\v 29 Peé ko̱jo já apostroo̱ xi ngasee̱ bi katsó:
\p –Chjiénga Néná xi ko̱nda'yá'énjne̱ nguindiee̱ nga xtaa̱ xi ko̱nda'yá'énjne̱.
\v 30 Kui Néná xi tsi̱'e̱ xta̱ tji̱e̱ xcháná xi kats'énkja'á'yaá Kjisoo̱, kui Kjiso̱ xi jún kini'ánk'iénjnú nga akjat'ajnú kro̱.
\v 31 Kui Kjisoo̱ xi Néná iskjinink'a kó katsjaá ngo ngu̱i̱ndie nga kis'ijñat'aa̱ tsja fojnií, kó katsjaá xá nga kui xi k'o̱xié'á xtaa̱, tsi̱'e̱ nga xta̱ xi chji̱a̱ni Israe̱l sa̱'ínk'oyá yojoo̱ kó Néná sa̱'ínjetakoón jé xí ndyi̱ts'en.
\v 32 Kó ji̱n xí chistikoo̱ kui nii̱, ko̱jo A̱sién Ni̱xtjii̱n Néná, kui A̱sién Ni̱xtjin xi Néná katsjaá kui xta̱ xi ndyi̱nt'ié'eén.
\p
\v 33 Kó kui jaá nga tsint'ié kuí nii̱, achichí kamáxtií kó kamámejeén kats'énk'ién já apostroo̱.
\v 34 Kós'e̱ ngu̱i̱jii̱n kui jáxaá kis'ijña ngo nda̱ fariseo̱ xi 'mí Gamaliel, ngo nda̱ mostroo̱ kjo̱a̱kitii̱ xi tanisién kamábendikón xta̱ na̱xi̱ńdaá, kó kui nda̱a̱ jastjíe̱n kó tsí'á kjo̱a̱ tsi̱'e̱ nga ko̱'na̱xié ngotjón ndi̱tsee̱n já apostroo̱,
\v 35 kó jaskan bi katsó:
\p –Jún bo̱a̱ já Israe̱l, nda nda ma ti'ankjójnú ni xi si̱'ánjnúu̱ kui jaá.
\v 36 Nga̱t'a̱ nguindiee̱ kui ni̱xtjii̱n kistso'bá nda̱ xi 'mí Teudaa̱, nga tanisién 'niú je katsoó yojoo̱, kó kamájo̱ ra tsi ta nijún úchán já xi̱'in, tanga kini'ánk'ién, kó ngayeje já xi nijan kamá kastsojoboa ngayejee̱, kó ta ki̱a̱ tji̱e̱n je.
\v 37 Kó jaskan, ni̱xtjin nga katjo'ó'yá xki̱i̱ xta̱, kistso'bá nguiní Judaa̱ nda̱ xi chji̱a̱ni Galilea̱, kó kjín xta̱ xi kis'iṉtso̱matjingui nguinií, kó ti bo̱a̱ ti ts'én kini'ánk'ién nguiní, kó ngayeje xta̱ xi kis'iṉtso̱matjinguii̱ kastsojoboa yeje nguiní.
\v 38 Kó kuíni nga bi xianjnú'un, xióchonjnúu̱ kui jaá, kó ngata̱ kuijín ni'ánjo̱jnú, nga̱t'a̱ tsi tsi̱'e̱ xtaa̱ ni xi ndyi̱'bínda xi ndyi̱ts'en, kju̱i̱e̱ kjo̱a̱,
\v 39 tanga tsi tsi̱'e̱ Néná kui xaá, ka̱majínjnú si̱'ankjiéjnú. Chónjnú yojojnú nga̱t'a̱ tsi ta Néná xi ndyi̱bixkánjo̱jnú. Kó kui jaá kats'énseén ni xi ki'mií.
\p
\v 40 S'e̱ kandokjo̱a̱a̱ já apostroo̱, nguije ja̱ bo̱a̱ je akjaa̱, 'niú ik'íjñaá nga nguiti chiíjín ku̱i̱chji̱a̱ ngase kjo̱a̱a̱ ja'eén Kjisoo̱, s'e̱ ik'índondé nguijee̱.
\v 41 Kó kui já apostroo̱ a ta chichí tsja tjiín nga jataxie nínga síndo jáxaá, tangat'aa̱ nga Néná katsjaá nga ja'atio kjo̱a̱ni̱ma̱ kjo̱a̱a̱ nga tsinti'é'eén Kjisoo̱.
\v 42 Kó ndyiojón ndyiojón ki̱a̱ ndi̱tsee̱n na̱ngo̱xi̱i̱ ko̱jo xki̱ ndi'a akóyá ko̱jo íni̱jmi éntjatsi̱e̱e̱ Néná nga Kjisoo̱ xi Kristoo̱.
\c 6
\s Bi ts'én katse'éxaá yito já xi ko̱síko̱jo já apostroo̱
\p
\v 1 Kui ni̱xtjin ján, nguije kamákjín xta̱ xi s'ijii̱n Kjisoo̱, xta̱ griegoo̱ atíjétá'ín xta̱ ebreoo̱ nga bo̱a̱ katsó nga ndajín ts'én kjimasee̱n ínchjín k'án xi je jesón xi̱'ii̱n xi griego̱ nga tjíni'ánkabisoón ni xi skji̱ni̱e̱ ndyiojón ndyiojón.
\v 2 Kós'e̱ kui já apostro̱ xi tiejoó ítikó ngayeje xta̱ xi s'ijii̱n Kjisoo̱, kó bi katsó:
\p –Ndajín kji'i nga k'uijñá masien ji̱n eén Néná, tsi̱'e̱ nga si̱'ansenjne̱ yamíxaa̱.
\v 3 Kó kuíni ṉts'ie, tindyi̱séjinjnú yito já xi̱'in ngu̱i̱jinjnú xi nda ts'én síndo nguindyi̱ko̱n Néná, ko̱jo xi 'niú tjíjii̱n A̱sién Ni̱xtjii̱n Néná, ko̱jo xi tjiín kjo̱a̱kjínkón, tsi̱'e̱ nga kui xi sa̱'ín kui xaá.
\v 4 Kó ji̱n takó ko̱ndókjo̱a̱jne̱ Néná ko̱jo takó k'uini̱jmi̱jne̱ eén.
\p
\v 5 Tsja kamaá kui nii̱ ngayeje xta̱ xi kamátikoó, kó tsangasejin Ixtibaa̱, nda̱ xi 'niú s'ijii̱n Néná ko̱jo xi 'niú tjíjii̱n A̱sién Ni̱xtjii̱n Néná, ko̱jo Nguiripee̱, ko̱jo Prókoroo̱, ko̱jo Nikanoo̱r, ko̱jo Timoo̱n, ko̱jo Parmenaa̱, ko̱jo Ndikoraa̱ ngo nda̱ Antiokía̱ xi judío̱jín, tanga kats'énjo̱'o kjo̱a̱s'ijii̱n Néná,
\v 6 kui jaá xi tsanguínjo̱ nínga síndo já apostroo̱ tsi̱'e̱ nga tsíchji̱a̱tjé kó yejénnié tsja.
\p
\v 7 Kó eén Néná sa kjin sa kjin kanda'yá, kó 'niú kamákjín ngase xta̱ xi s'ijii̱n Kjisoo̱ ki̱a̱ na̱xi̱ńdá Jerusale̱n, kó ti bo̱a̱ ts'én kjín já chiná'mii̱ xi kats'énjo̱'o kjo̱a̱s'ijii̱n nga.
\s Bi ts'én kandobá Ixtibaa̱
\p
\v 8 Kó Ixtibaa̱, ngo nda̱ xi kis'iee̱ kjo̱a̱nda ko̱jo nga'niuú Néná, tsie kjo̱a̱ndikón ko̱jo chi̱bo̱a̱ xi kats'én ngu̱i̱jii̱n xta̱ na̱xi̱ńdaá.
\v 9 Tanga ngo xtín xta̱ xi chji̱a̱ni ndi'a nínga ndokjo̱a̱ eén Néná xi tsi̱'e̱ moso̱ xi kastiñá ngas'e̱ tanga xi je síndondé ngot'e̱ ko̱jo xta̱ xi chji̱a̱ni na̱xi̱ńdá Sirene̱, ko̱jo na̱xi̱ńdá Alejandría̱, ko̱jo nangui Silisia̱ ko̱jo nangui Asia̱, íts'i̱yanii̱ nga askjotíjo̱ Ixtibaa̱,
\v 10 kó kamájín xi kats'eén, nga̱t'a̱ nga tsíchji̱a̱ kis'iee̱ kjo̱a̱kjínkón ko̱jo A̱sién Ni̱xtjii̱n Néná.
\v 11 Kós'e̱ íchjií já xi bo̱a̱ ka̱tso̱ nga kuí ma xi tsint'ié nga ch'o katsoó kjo̱a̱kitii̱ Moisee̱ ko̱jo nga ch'o katsoó Néná.
\v 12 Kó bo̱a̱ ts'én kats'énkjaán xta̱ na̱xi̱ńdaá, ko̱jo já xchá nguito̱ko̱o̱ na̱xi̱ńdaá, ko̱jo já chji̱ni̱e̱kjo̱a̱kitii̱ tsi̱'e̱ nga katsoboá Ixtibaa̱, s'e̱ kijíjo̱ nínga síndo jáxaá,
\v 13 kó tsangase chistiko̱ ndiso xi bi katsó:
\p –Kui nda̱a̱ ta ngongá ch'o tjítsoó na̱ngo̱xi̱ tsjiená ko̱jo kjo̱a̱kitii̱.
\v 14 Ji̱n ma xi kanda'yájne̱ nga bo̱a̱ katsó nga kui xó Kjiso̱ xi chji̱a̱ni na̱xi̱ńdá Nasare̱t xi sa̱'ínkjatsón na̱ngo̱xi̱i̱, kó ko̱síkjo xó kjo̱a̱xchá xi katsjáná Moisee̱.
\p
\v 15 Kós'e̱ ngayeje jáxá xi síndotikó kui ngu̱i̱ndiee̱, asko'á ndá ndá Ixtibaa̱, kó kamábe kje̱n nga ja̱ kji'i kje̱n ndítsjie ma kji'i.
\c 7
\s Bi ts'én ts'axié'á yojoo̱, kó bi ts'én kini'ánk'ién Ixtibaa̱
\p
\v 1 Kó chiná'mi xi 'niú nk'a xaá bi katsoó Ixtibaa̱:
\p –¿A bo̱a̱ kji'i ni xi katsó kui jaá?
\p
\v 2 Kó Ixtibaa̱ bi katsó:
\p –Jún ṉts'ie, ko̱jo jún xi na̱'mijnú, nda'yájnú'un: Kui Néná xi tjiín kjo̱a̱jee̱, akoó yojoo̱ xta̱ tji̱e̱ xcháná xi 'mí Abraa̱m kji'a nga kis'ijña nangui Mesopotamia̱ nguindiee̱ nga ko̱e̱je̱ nangui Ara̱n,
\v 3 kó Néná bi katsoó: “Tja̱tje ji nanguíi̱ ko̱jo nanguii̱ xta̱ xingu̱i̱ kó t'en ji kui nangui xi kokóo.”
\v 4 Kós'e̱ Abraa̱m jatjoni nangui xi 'mí Kaldea̱, kó ki̱a̱ kis'ijña nangui Ara̱n, kó nguije k'ien na̱'mii̱, Néná kjindibájo̱ Abraa̱m kui nangui xi'bi̱, nínga tindyiónjnú ngot'e̱.
\v 5 Kó Néná nde chií nangui katsjájiín, ngaskande nínga ko̱sién ngo se katsjájiín, tanga katsáyatjoón nga tsja̱á nga tsi̱'e̱ ka̱ma kui nanguii̱ ko̱jo nga jaskan tsi̱'e̱ xta̱ tji̱e̱e̱ ka̱ma, nda tsi kui ni̱xtjin ján Abraa̱m kji̱e̱ jmí ndíjiín.
\v 6 Kó Néná bo̱a̱ katsoó nga xta̱ tji̱e̱e̱ k'uíndo xikoó xta̱ xi kje̱'e nangui síndo, kó nga moso̱ xi stiñá ka̱ma ko̱jo nga ch'o ka̱mata'in nijún úchán nó.
\v 7 Kó Néná bi katsoó: “An sa̱'ínjée̱ kui na̱xi̱ńdá nínga moso̱ xi stiñá sa̱'ín, kó nguije kamá kui nii̱ kjo̱tjo kui ngu̱i̱ndiee̱, kó k'i̱e̱ sa̱'índíkónná kui ngu̱i̱ndie xi'bi̱.”
\v 8 Kó Néná índajo̱ Abraa̱m tsi̱'e̱ nga sa̱'ín ni xi 'mí sirkunsisioo̱n, kó kuíni nga Abraa̱m kis'iee̱ ngo ndí xi 'mí Isaa̱, kó xi ma jin ni̱xtjin nga katsen kats'eén sirkunsisioo̱n, kó Isaa̱ ti bo̱a̱ ti kats'énjo̱ ndií, kui xi ki'mí Jako̱b, kó Jako̱b ti bo̱a̱ ti kats'énjo̱ nga tiejó ndií, kui xi xta̱ xi tji̱e̱ xcháná.
\p
\v 9 Kó já ṉts'i̱e̱ Kosiee̱ kamáchi̱ni̱ kó xta̱ xi chji̱a̱ni nangui Ejipto̱ atíñaá. Tanga kui nda̱a̱ Néná kis'ijñajo̱,
\v 10 kó kui Néná ts'axié'á ngayeje kjo̱a̱ni̱ma̱ xi ja'ajin, kó katsjaá kjo̱a̱nda ko̱jo kjo̱a̱kjínkón nguindyi̱ko̱n nda̱ faraoo̱n nda̱ re xi chji̱a̱ni nangui Ejipto̱, kó kui nda̱ ree̱ katsjaá Kosiee̱ nga kui xi kamá xtitjoón nangui Ejipto̱ ko̱jo nga kui xi ko̱tíxoma ngayeje ndi'aa̱.
\p
\v 11 Tanga kjindibá ngo kjindiá 'niú ngayeje nangui xi chji̱a̱ni Ejipto̱ ko̱jo nangui Kanaán, kó tsie kjo̱a̱ni̱ma̱ xi ja'a xta̱ tji̱e̱ xcháná nga̱t'a̱ kasakojiín ni xi iskjinie.
\v 12 Kó nga tsint'ié Jako̱b nga tjín to ndso̱ko̱a̱n ṉño̱ ki̱a̱ nangui Ejipto̱, katsanguiyatjón tjón xta̱ tji̱e̱ xcháná,
\v 13 xi ma jó ndi̱ya, Kosiee̱ akoó yojoo̱ já ṉts'i̱e̱, kó bo̱a̱ ts'én kamábe nda̱ faraoo̱n ñá nangui kjindibáni Kosiee̱.
\v 14 Kó Kosiee̱ tsíchji̱a̱a̱ Jako̱b xi na̱'mii̱ ko̱jo ngayeje xta̱ xkjín tsi̱'e̱ nga ko̱e̱je̱k'índo nangui Ejipto̱ kó ichítié ko̱jo kan ún kamá kui xtaa̱.
\v 15 Kó Jako̱b kijí nangui Ejipto̱ nínga k'ien, kó ti ki̱a̱ jesón xta̱ tji̱e̱ xcháná nga.
\v 16 Kó tsanguínjo̱ ṉdaa̱ Jako̱b ki̱a̱ nangui Sikee̱m, kó ki̱a̱ ik'índonijín kui nga̱tsjo xi Abraa̱m ts'atsiee̱ ndií Amoo̱r ki̱a̱ nangui Sikee̱m.
\p
\v 17 Kó xikó ts'én kjimatiña ni̱xtjin nga kjo̱tjosón ni xi katsoó Néná Abraa̱m, xta̱ xi chji̱a̱ni Israe̱l ta sa sá kamákjín ki̱a̱ na̱xi̱ńdá Ejipto̱,
\v 18 ngaskande nga Ejipto̱ atíxoma kje̱'e nda̱ re xi kamábejín 'yá kuií xi Kosiee̱.
\v 19 Kui nda̱ ree̱ achichí maña̱ kamá, kó ndajín kats'énjo̱ xta̱ tji̱e̱ xcháná, kats'eén kjo̱a̱'niú tsi̱'e̱ nga índomasien, tsi̱'e̱ nga ko̱ya ndí xi̱xii̱ xi s'e̱ katsee̱n, kó nga nguiti ka̱makjínjín ngase.
\v 20 Kó kui ni̱xtjin ján katsen nda̱ xi 'mí Moisee̱, ngo ndí xi achichí tsja kamaá Néná, kó xi xchaá ján sá kats'énxchá ki̱a̱ ndi'aa̱,
\v 21 kó nga ik'íjñámasien kui ndií, tsakjin xo̱ngo̱ó nda̱ faraoo̱n iskjíbé kó kats'énxchá xikoó tsi ndí tsi̱'e̱.
\v 22 Kó bo̱a̱ ts'én Moisee̱ akakoyaá ngayeje kjo̱a̱kjínkón xi máa xta̱ xi chji̱a̱ni Ejipto̱, kó ngo nda̱ xi 'niú chji̱ni̱e̱ kamá nga̱t'a̱ kis'iee̱ nga'niú én xí tsíchji̱a̱ ko̱jo ni xi kats'én.
\p
\v 23 Kó kji'a nga je ts'as'ien yichán nó Moisee̱, kats'énkjó ini̱ma̱a̱ nga ko̱e̱je̱katsijee̱n xkjín, kui xi xta̱ Israe̱l.
\v 24 Kó nga kamábe Moisee̱ nga ngo nda̱ xi chji̱a̱ni Ejipto̱ tjíts'en'oón ngo nda̱ xi ngo nangui mani Moisee̱, ts'axié'á, kó kats'énk'ién kui nda̱a̱.
\v 25 Moisee̱ kats'énkjó nga xta̱ Israe̱l kamákjiín nga Néná katsjaa̱ nga'niú kuí nga kui xi k'o̱xié'á, tanga bo̱a̱jín ts'en kats'énkjó kui xtaa̱.
\v 26 Kó nga kamánguindyiojón Moisee̱ kamábe nga jó já ndyi̱kján, kó tji̱e̱nmá kats'énk'íxió nga bi katsoó: “Jún bo̱a̱ já, xi ta ngo ṉts'iéjnú, ¿mí kjo̱a̱a̱ nga ti juún ndyi̱ni'án'ónjnú xingu̱i̱jnú?”
\v 27 Tanga kui nda̱ xi ts'énkjánjo̱ nda̱ xi ingoo̱, katsanguiṉña Moisee̱ kó bi katsoó: “¿'Yá xi katsjaá xá nga ji xi ko̱tixome ko̱jo tsi ji ne ndi'amasien kats'eén kjo̱a̱a̱ ji̱n?
\v 28 ¿A mejeénri si̱'ink'inní xikó ts'én kini'ínk'ín ngojña̱ nda̱ xi chji̱a̱ni nangui Ejipto̱?”
\v 29 Nguije tsint'ié ni xi ki'mií Moisee̱, tsanga xtji̱e̱e̱n nangui Madia̱n, kó ki̱a̱ kis'ijña xikoó tsi ngo xta̱ xi kje̱'e nangui chji̱a̱ni, kó ki̱a̱ kis'iee̱ jó ndí.
\p
\v 30 Nguije ja'a yichán nó nga jachók'íjñá kui ngu̱i̱ndie kixií, ki̱a̱ tiña tji̱ngu̱i̱ Sinaíi̱, ngo ndítsjiee̱ Néná akoó yojoo̱ ngu̱i̱jin ndi'ií ngo yá sarsa̱ xi tjítí.
\v 31 Kó Moisee̱ achichí kijíndikoón ni xi tjibókoo̱, kó kijíkatsijen tiñaa̱ tsi̱'e̱ nga nda sku̱i̱e̱, kó ki̱a̱ tsint'ieé nda̱a̱ Ndi̱a̱ná xi bi katsoó:
\v 32 “An boá xi Nee̱ xta̱ xi xcháa̱, Nee̱ Abraa̱m, Nee̱ Isaa̱ ko̱jo Nee̱ Jako̱b.” Kó Moisee̱ íts'i̱yanii̱ nga jatsiéndíkón kó nde kamámejénjiín nga askotsijen.
\v 33 Kó Ndi̱a̱ná bi katsoó Moisee̱: “Chje̱'éxín ji tji̱xíndié xi kji'iyaa̱ ndsa̱ki, nga̱t'a̱ ngu̱i̱ndie tsjie boá nínga tasín ji.
\v 34 Je kamábe cha̱n cha̱n an nga tanisién tsie kjo̱a̱ni̱ma̱ ndyi̱foa'atio xta̱ na̱xi̱ńdána xi síndo nangui Ejipto̱, kó je tsint'iée̱ nga ndyi̱kjandá nga ndyi̱chji̱a̱, kó kuíni nga kjindibáña an tsi̱'e̱ nga k'oxié'á an. Kó ngot'e̱ 'ne̱ ndibé ji nga̱t'a̱ nangui Ejipto̱ sanguiyaa ji.”
\p
\v 35 Nga̱t'a̱ kuí Moise̱ xi'bi̱, xi kats'énmejénjín kui jaá nga bi katsó: “¿'Yá xi katsjaá xá nga ji xi ko̱tixome ko̱jo tsi ji xi ne ndi'amasien kats'eén?”, Néná xi katsanguiya kui nda̱a̱ nga xá ko̱jo nga kui xi sa̱'índéjnú xikó katsoó kui ndítsjie xi kamábe ngu̱i̱jii̱n yá sarsaa̱.
\v 36 Kó kuí Moisee̱ xi ts'axié kui xtaa̱ ki̱a̱ nangui Ejipto̱ nguije kats'én kjo̱a̱ndikón kui nangui ján, ki̱a̱ ndáchíkón inií, ko̱jo ki̱a̱ nangui kixií yichán nó.
\v 37 Kó ti kuíni kui Moisee̱ xi bo̱a̱ katsoó xta̱ Israe̱l: “Néná kui xi Ndi̱a̱ná sa̱'ínkjastjíe̱n ngu̱i̱jii̱n ṉts'iéjnú ngo chji̱ni̱e̱'e̱én xikoó an.”
\v 38 Kó kuí bí Moisee̱ xi kamátikójo̱ xtaa̱ ko̱jo xta̱ tji̱e̱ xcháná ki̱a̱ nangui kixií, kó katsáyaá én xí katsó ndítsjiee̱ Néná nga tsíchji̱a̱jo ki̱a̱ ngu̱i̱jii̱n tji̱ngu̱i̱ Sinaíi̱. Kó kui én xi tsja̱aná, eén kjo̱a̱mindyioo̱n boá.
\p
\v 39 Kó xta̱ tji̱e̱ xcháná tsint'ié'énjín, kó kats'énch'ó Moisee̱ nga kui xi tikóntjón, kó tasá kamámejeén nga ko̱e̱je̱'oyá nguiní nangui Ejipto̱,
\v 40 kó xta̱ Israe̱l bi katsoó nda̱ xi 'mí Aaroo̱n: “Tasá ti'indejne̱ ne xi ko̱kójne̱ ndi̱yajne̱, nga̱t'a̱ yajínjne̱ mí ni xi kamaá kui Moisee̱ xi ts'axiéjne̱ nangui Ejipto̱.”
\v 41 Kó bo̱a̱ ts'én kats'énda ngo ndií cho̱yojo kó katsjaá kjo̱a̱tjó kui a̱sie̱én, kó kats'éntsjaá ni xi kats'énda tsja.
\v 42 Kó Néná íjñámasien kui xtaa̱, kó tasá katsjaá kjo̱a̱ nga kui ṉño xi tjín nk'a ján kats'éndikón, xikó ts'én kjit'a xo̱jo̱n xi kats'énda já chji̱ni̱e̱'e̱én Néná nínga bi tsoó:
\q Xta̱ Israe̱l,
\q ¿A an xí katse'éjnú'un kjo̱a̱tjó yichán nó ki̱a̱ nangui kixií?
\q
\v 43 Tasá kichínk'ájnú ngu̱i̱ndie ndikoón ne Moloo̱k,
\q ko̱jo a̱sie̱én ṉñóo ne Renfaa̱n,
\q a̱sie̱én ne xi ti juún kini'ándajnú
\q tsi̱'e̱ nga kini'ándikónjnú.
\q Kó kuíni nga ngot'e̱ 'ne̱ kjin sa̱'inkjíjnú'un, ts'ationii̱ nangui Babilonia̱.
\p
\v 44 Xta̱ tji̱e̱ xcháná kis'ijñaa̱ ngo ngu̱i̱ndie ndikón ki̱a̱ nangui kixií xi akó nga Néná índajo̱ xta̱ na̱xi̱ńdaá, xikó ts'én Néná katsáyaá Moisee̱ nga sa̱'índa, xikó kji'i xi akakoo̱,
\v 45 kui xi xta̱ tji̱e̱ xcháná ta katse'érií nga jachójo̱ nda̱ xi 'mí Josuee̱ kji'a nga iskjíbé t'ananguii̱ xta̱ xi Israe̱ljín, kui xi Néná ts'axié nguindyi̱ko̱n xta̱ tji̱e̱ xcháná, ngaskande nga kamá re Ndabii̱,
\v 46 kui nda̱ xi nda ts'ákaa̱ Néná nga kamábe kjo̱a̱ndaa̱, kó Ndabii̱ tsí'aá Néná nga sa̱'índa ngo ngu̱i̱ndie ndikón tsi̱'e̱ Nee̱ nda̱ xi mí Jako̱b.
\v 47 Nda̱ xi 'mí Salomoo̱ xi kats'éndaa̱ ngo ndi'a,
\v 48 tanga Néná xi tikón ndi'ak'ajmi ján, ki̱a̱jín tikón ngu̱i̱ya ndi'a xi ts'énda tsja xtaa̱, xikó tsó nda̱ chji̱ni̱e̱'e̱én Néná:
\q
\v 49 Ndi'ak'ajmi ján boá nínga botíxoma an,
\q kó t'ananguii̱ boá nínga bosien an ndsa̱ko an.
\q ¿Mí ndi'a xi si̱'andajnú'un? Tsó Ndi̱a̱ná,
\q ¿Kó ñání ngu̱i̱ndie nínga sa̱'inkja'yá an?
\q
\v 50 ¿A mí tsi ndsa̱ an xí kats'énda ngayeje kui nii̱?
\p
\v 51 Kó bi katsó ngase Ixtibaa̱:
\p Tanga jún tajá tokójnú ko̱jo ini̱ma̱jnú ko̱jo tji̱bo̱a̱nijonjnú, ngatsjé ni̱xtjin nga ndyi̱monguínjnúu̱ kondra̱ A̱sién Ni̱xtjii̱n Néná, xikó ma kats'én xta̱ xi xchájnú.
\v 52 ¿'Yání bo̱a̱ nda̱ chji̱ni̱e̱'e̱én Néná xi ch'ojín kats'énjo̱ xta̱ tji̱e̱ xchájnú? Kó kats'énk'ién xta̱ xi katsáyá nga kjo̱e̱'e ngo nda̱ xi kixi̱, xi ti juún ngot'e̱ 'ne̱ kini'ánk'as'ienjnú ngu̱i̱ya tsja xta̱ jé kó kini'ánk'iénjnú,
\v 53 jún xi ndítsjiee̱ Néná katsjájnú kjo̱a̱kitii̱ Néná, kó kanda'yá'énjínjnú.
\p
\v 54 Kó nga tsint'ié kui eén, kats'énxchán kó ngaskande iskjinieya ma ṉdaṉ'ni̱u̱ ngayeje kui xtaa̱ kondraa̱ Ixtibaa̱.
\v 55 Tanga Ixtibaa̱ kis'ikitsie maá A̱sién Ni̱xtjii̱n Néná, kó askotsijen ndi'ak'ajmi ján, s'e̱ kamábe kjo̱a̱jee̱ Néná, kó kamábe Kjisoo̱ nga ki̱a̱ tikónt'a tsja fojnií Néná,
\v 56 kó bi katsó Ixtibaa̱:
\p –¡Tsitsíjenjnú! Ts'énbé an nga tji̱e̱ntixa̱ ndi'ak'ajmi ján, kó ts'énbé an nga ndií nda̱ xi̱'ii̱n tsja fojnií Néná tikón.
\p
\v 57 Kós'e̱ kui xtaa̱ ta íchjá tsi tji̱bo̱a̱nijon, kó achichí 'niú tsíchji̱a̱ nga kjíts'uié Ixtibaa̱.
\v 58 Kó ts'axié Ixtibaa̱ ngu̱i̱jin na̱xi̱ńdá 'niuú nga kijík'aya ndi̱jo̱ nga kats'énk'ién, kó chistikoo̱ kijítsjaá ṉjñoo̱ ngo nda̱ xo̱ngo xi 'mí Saulo̱.
\v 59 Kó tji̱e̱nga tjifóya ndi̱jo̱ Ixtibaa̱, bi katsó nga tsíchji̱a̱a̱ Néná:
\p –Ji Ndi̱a̱ Kjiso̱, chjábe ji ini̱ma̱na.
\p
\v 60 Kó asién tikoó, s'e̱ achichí 'niú askandáyá nga bi katsó:
\p –¡Ji Ndi̱a̱, ngata̱ ki̱a̱jín ch'iée̱ xki̱ jé xi ndyi̱ts'enjona kui xtaa̱!
\p Kó nguije bo̱a̱ katsó, k'ien 'ne̱ nguijee̱.
\c 8
\s Sauloo̱ bi ts'én tsangatji̱nguii̱ xta̱ na̱ngo̱xi̱i̱
\p
\v 1 Kó ki̱a̱ tikón Sauloo̱ nga kini'ánk'ién Ixtibaa̱, kó nda kasasiee̱n kui nii̱.
\p Kui ni̱xtjii̱n íts'i̱yanii̱ nga 'niú ikiyotji̱nguii̱ xta̱ na̱ngo̱xi̱ xi chji̱a̱ni Jerusale̱n, kó ngayeje xta̱ na̱ngo̱xi̱i̱ kastsojoboa nga kijí nangui xi chji̱a̱ni Judea̱ ko̱jo Samaria̱, ta kuí tsi já apostroo̱ xi kastsojoboajín.
\v 2 Kó tjín xta̱ xi bendikón Néná kui ngu̱i̱ndiee̱ xi kijíkanijín Ixtibaa̱, kó 'niú askandátjé.
\v 3 Kó nda̱ xi 'mí Sauloo̱ tjíts'énkjié xta̱ na̱ngo̱xi̱i̱, kó xki̱ ndi'a ts'as'iennié nga ts'axié nga ífé kjo̱a̱'niú xi chjoón xi xi̱'in nga katsanguis'ien ndo̱bo̱a̱ya.
\s Bi ts'én ik'íni̱jmi éntjatsi̱e̱e̱ Néná nangui Samaria̱
\p
\v 4 Tanga kui xta̱ na̱ngo̱xi̱ xi kastsojoboaa̱ katsáyá éntjatsi̱e̱e̱ Néná nínga jachó ko̱jo nínga kis'iṉtso̱ma.
\v 5 Kó Nguiripee̱ kijí xtji̱e̱e̱n na̱xi̱ńdá Samaria̱ kó ki̱a̱ íni̱jmi kjo̱a̱a̱ Kristoo̱.
\v 6 Kó ngayeje xta̱ na̱xi̱ńdaá xi kamátikó nga asiénnijoo̱n én xí tsíchji̱a̱ kó kamábe ngayeje kjo̱a̱ndikón xí kats'én.
\v 7 Nga̱t'a̱ achichí kjín xta̱ xi síndojii̱n a̱sién ni̱xtjin xi ndajín, xi askandáyá ma nga jatjojii̱n, kó ti bo̱a̱ ti ts'én kamándayaa̱ kjín xta̱ xi ni̱ma̱, xi majín fostjíe̱n ko̱jo xi majín fí,
\v 8 kó achichí kjo̱a̱tsja kis'iee̱ kui xta̱ na̱xi̱ńdá ján.
\p
\v 9 Tanga kui ngu̱i̱ndiee̱ ki̱a̱ kis'ijña ngo nda̱ xi 'mí Ximo̱, nda̱ xi tji'e kamá ngas'e̱, kó kjín xta̱ xi chji̱a̱ni nangui Samaria̱ xi ts'aṉcha̱jo nga 'niú nda kamaá yojoo̱,
\v 10 kui nda̱a̱ ngayeje xta̱ xi xchá xi kjindí xi asiénnijoo̱n én xí tsíchji̱a̱, kó bi katsó:
\p –Kuí xi'bi̱ nga'niú xi jee̱ Néná.
\p
\v 11 Kó xtaa̱ 'niú asiénnijoo̱n, nga̱t'a̱ je kjín nónií nga ts'aṉcha̱jo xtaa̱ kjo̱a̱a̱ kjo̱a̱tji'e xi kamaá.
\v 12 Tanga nga kis'ijii̱n éntjatsi̱e̱ xi tsíchji̱a̱ Nguiripee̱ nga katsáyá kjo̱a̱a̱ nga ko̱tíxoma Néná ko̱jo kjo̱a̱a̱ ja'eén Jesukristoo̱, xi xi̱'in ko̱jo xi ínchjín atíndá yojoo̱.
\v 13 Ndeskande ti kui Ximo̱ tji'ee̱ kis'ijii̱n, kó atíndá yojoo̱ nga, kó kui Ximoo̱ ngatsjé ni̱xtjin kistso'bájo̱ Nguiripee̱ nga índikón nga kamábe chi̱bo̱a̱ ko̱jo kjo̱a̱ndikón xí kats'én Nguiripee̱.
\p
\v 14 Kji'a nga je tsint'ié já apostro̱ xi síndo na̱xi̱ńdá Jerusale̱n nga xta̱ xi chji̱a̱ni nangui Samaria̱ je kats'énjo̱'o nga iskjíbé eén Néná, kananguiya Peé ko̱jo Juaa̱ kui nanguii̱,
\v 15 kó nguije jachó kui já apostroo̱ tji̱e̱nmá tsíchji̱a̱tjé kui xta̱ xi je kis'ijii̱n eén Néná tsi̱'e̱ nga sa̱ko̱ó A̱sién Ni̱xtjii̱n Néná,
\v 16 nga̱t'a̱ nde kji̱e̱ ngojín kui jaá xi je je'enié A̱sién Ni̱xtjii̱n Néná, ta s'e̱ tsi kastindání ja'eén Kjisoo̱.
\v 17 Kós'e̱ Peé ko̱jo Juaa̱ íjñasoón tsja kui jaá, kós'e̱ bo̱a̱ ts'én ngayejee̱ nga kasakoo̱ A̱sién Ni̱xtjii̱n Néná.
\p
\v 18 Kó nga kamábe Ximoo̱ nga já apostro̱ Peé ko̱jo Juaa̱ ta íjñasónrií tsja xtaa̱ nga katsjaá A̱sién Ni̱xtjii̱n Néná, kamámejeén nga to̱n tsja̱á,
\v 19 kó Ximoo̱ bi katsó:
\p –Te'éjnú'un kui nga'niú xi tjínjnú, tsi̱'e̱ nga ko̱jo an ka̱mana tsjáa̱ A̱sién Ni̱xtjii̱n Néná xta̱ xi k'uijñásóo̱n ndsa̱ an.
\p
\v 20 Tanga Peé bi katsoó:
\p –¡Ngachaja ji ko̱jo tóon, nga̱t'a̱ tini'ínkjé ji nga stiñá kjo̱a̱ndaa̱ Néná!
\v 21 Jmí ni yejín ji kjo̱a̱a̱ ni xi kjima k'i̱e̱e̱, nga̱t'a̱ kixi̱jín tikón ini̱máa̱ nguindyi̱ko̱n Néná.
\v 22 Ti'ink'oyé ji ni ch'o kji'i tse̱, kó 'niú chji̱e̱'ée̱ Néná tsi ta'a nga sa̱'ínjetakoón ni xi bo̱a̱ ts'én ik'íjin ini̱máa̱,
\v 23 nga̱t'a̱ ts'énbéñaá ji nga tsie kjo̱a̱ndasen ko̱jo tsie kjo̱a̱ch'o kji'i tiṉtje̱jin.
\p
\v 24 S'e̱ bi katsó Ximoo̱:
\p –'Niú ndokjo̱a̱jnúu̱ Ndi̱a̱ná kjo̱a̱a̱ an, tsi̱'e̱ nga bo̱a̱jín ka̱mana kui ni xi ki'míjnú'un.
\p
\v 25 Kó kui jaá jaskan nguije tsíchji̱a̱jo xta̱ na̱xi̱ńdaá kjo̱a̱a̱ 'yání xi Kjisoo̱ ko̱jo kjo̱a̱a̱ eén Néná, kijí'oyá nguiní na̱xi̱ńdá Jerusale̱n, kó kui já apostroo̱ íni̱jmi éntjatsi̱e̱e̱ Néná kjín na̱xi̱ńdá xi chji̱a̱ni nangui Samaria̱.
\s Nguiripee̱ bi ts'én tsíchji̱a̱jo ngo nda̱ xi chji̱a̱ni Etiopía̱
\p
\v 26 Ngo ndítsjiee̱ Néná tsíchji̱a̱jo Nguiripee̱ nga bi katsoó:
\p –Ti̱sítji̱n kó t'en ji kui ndi̱ya xi fí xtji̱e̱e̱n na̱ngui, kui ndi̱ya xi 'bítsi̱yanii̱ na̱xi̱ńdá Jerusale̱n ngaskande nga fochó na̱xi̱ńdá Gasa̱.
\p Kuí ndi̱ya̱á xi foa'a xtji̱e̱e̱n nangui kixií.
\v 27 S'e̱ Nguiripee̱ jastjíe̱n kó kijí kui ndi̱ya xi ki'mií, kó ki̱a̱ kasakoo̱ ngo nda̱ xi chji̱a̱ni nangui Etiopía̱ xi 'niú nk'a xaá xi ts'énkoón too̱n na̱ reinaa̱ nangui xi 'mí Kandase̱. Kui nda̱a̱ kijí na̱xi̱ńdá Jerusale̱n nga kijíts'endikón Néná,
\v 28 kó je ts'énfí'oyá nguiní nanguii̱ nga tjiyá ngo karro̱ xi tso'bájo̱, kó tjíts'enyá ngo xo̱jo̱n xi kats'én'indó nda̱ chji̱ni̱e̱'e̱én Néná xi 'mí Isayaa̱.
\v 29 Kó A̱sién Ni̱xtjii̱n Néná bi katsoó Nguiripee̱:
\p –T'en ji kó t'enchín tiñáa̱ kui karroo̱.
\p
\v 30 Kó nguije jachó tiña Nguiripee̱ tsint'ié nga kui nda̱ Etiopíaa̱ tjíts'enyá xo̱jo̱n xi kats'én'indó nda̱ chji̱ni̱e̱'e̱én Néná xi 'mí Isayaa̱, kós'e̱ Nguiripee̱ bi katsó nga asíyaá kui nda̱a̱:
\p –¿A kjimakjiín ji ni xi ti'ni'ínyé?
\p
\v 31 S'e̱ bi katsó kui nda̱ Etiopíaa̱:
\p –¿Ja̱ kóts'en ka̱makjínna nga jmíjín xi ndyi̱tsáyana kó tsó kui eén?
\p Kó kichjiá'aá Nguiripee̱ nga ts'as'ien ngu̱i̱ya karroo̱, kó ki̱a̱ kis'ijñat'aa̱.
\p
\v 32 Kó ki̱a̱ nínga tjíts'enyá kui nda̱a̱ xo̱jo̱n eén Néná bi tsó:
\q Tsanguínjo̱ xikoó ngo cho̱tsa̱nga̱ xi fí ni'ánk'ién,
\q ko̱jo xikoó ngo cho̱tsa̱nga̱ xi kjandayájín
\q nguije sikón nguindyi̱ko̱n xta̱ xi botie tsja̱a̱,
\q kó ti nde bo̱a̱ ts'én iskjíx'ájín ts'oa.
\q
\v 33 Ch'o kamáta'in kó ch'o ki'mií, kó jmíjín xi kixi̱ kats'énseén.
\q Jmíjín xi ku̱i̱chji̱a̱ kjo̱a̱a̱ xta̱ tji̱e̱e̱,
\q nga̱t'a̱ kachje'éxiín kjo̱a̱mindyioo̱n k'i̱e̱ kui t'ananguii̱.
\p
\v 34 Kó kui nda̱ xi chji̱a̱ni nangui Etiopíaa̱ bi katsó nga asíyaá Nguiripee̱:
\p –'Niú mí'aá t'íyéní, ¿'yá xi tjítsó nda̱ chji̱ni̱e̱'e̱én Néná, a ti kuíni xi tjítsoó yojoo̱ axa̱ kje̱'e xi tsó?
\p
\v 35 Kós'e̱ Nguiripee̱ iskjíbénií nínga tjíts'enyá xo̱jo̱n eén Néná nga tsíchji̱a̱jo kjo̱a̱a̱ éntjatsi̱e̱ tsi̱'e̱ Kjisoo̱.
\v 36 Kó nga ndyi̱fí ngu̱i̱ya ndi̱ya̱á, jachó ngo ngu̱i̱ndie nínga tjín ndójoa kó bi katsó kui nda̱ Etiopía̱ xi tso'bájo̱ Nguiripee̱:
\p –Tjín ndójoa k'i̱e̱, ¿mí xi 'bíchjaá nga ka̱ma sa̱tíndá an?
\p
\v 37 S'e̱ Nguiripee̱ bi katsó:
\p –Tsi ngayeje ini̱máa̱ nga s'ijii̱n, ka̱ma.
\p Kó kui nda̱a̱ bi katsó:
\p –S'ijinna nga Jesukristoo̱ xi ndií Néná.
\p
\v 38 Kós'e̱ kats'énkasién karroo̱, s'e̱ ngajoó jatjajen nga ts'as'ienjin ngu̱i̱jin ndójoaa̱, kós'e̱ Nguiripee̱ atíndá kui nda̱ Etiopíaa̱.
\v 39 Kó nguije ndyi̱fotjojin ngu̱i̱jin ndójoaa̱ kjindibá A̱sién Ni̱xtjii̱n Ndi̱a̱ná kó kijíjo̱ t'axín Nguiripee̱, kó kui nda̱ xi chji̱a̱ni nangui Etiopíaa̱, nguiti kamábejín ngase Nguiripee̱, kó achichí tsja kis'iee̱ nga kijí ra ndi̱ya xí tso'bá.
\v 40 Tanga Nguiripee̱ ki̱a̱ jachó na̱xi̱ńdá xi 'mí Asoto̱ kó ja'a xki̱ nangui nga katsáyá éntjatsi̱e̱e̱ Néná, ngaskande nga jachó na̱xi̱ńdá Sesarea̱.
\c 9
\s Bi ts'én kis'ijii̱n eén Néná nda̱ xi 'mí Sauloo̱
\r (Ni xi kamá 22:6-16; 26:12-18)
\p
\v 1 Tanga kui nda̱ xi 'mí Sauloo̱ nga takó ts'énmindyiándíkoón nga sa̱'ínk'ién ngayeje xta̱ xi s'ijii̱n Ndi̱a̱ná, jachó nguindyi̱ko̱n nguito̱ko̱o̱ chiná'mi xi 'niú nk'a xaá,
\v 2 kó jachókí'á ngo xo̱jo̱n tsi̱'e̱ nga ko̱e̱'éndieé nga ko̱e̱je̱ ki̱a̱ ndi'a nínga ndokjo̱a̱ eén Néná xi tjín Damasko̱, kó ko̱ngase xi chjoón xi xi̱'in xi tjimátji̱ngui ndi̱ya tja̱tsi̱e̱e̱ Néná tsi̱'e̱ nga ko̱e̱je̱jo ndo̱bo̱a̱ya ki̱a̱ Jerusale̱n.
\v 3 Tanga nguije kamátiñaa̱ Sauloo̱ nga makjachó ma Damasko̱, ta niján ma kjindibáni ndi'ak'ajmi ján ngo ndi'í xi kitínié,
\v 4 kó Sauloo̱ ts'áka t'ananguii̱, kós'e̱ tsint'ieé ngo nda̱ xi bi katsoó:
\p –Saulo̱, Saulo̱, ¿mí kjo̱a̱a̱ nga an timiyitji̱nguiní?
\p
\v 5 S'e̱ bi katsó Sauloo̱:
\p –¿'Yá jií bo̱a̱, Ndi̱a̱?
\p Kó bi katsó kui nda̱ xi tsíchji̱a̱a̱:
\p –An boá xi Kjisoo̱, kó ti an boá xi timiyitji̱nguiní.
\p
\v 6 Tanga ti̱sítji̱n kó titjás'i̱n ngu̱i̱jin na̱xi̱ńdá 'niuú, kó ki̱a̱ k'uiyaá ni xi chjiénga si̱'in ji.
\p
\v 7 Kó já xi nijan tjimájo̱ Sauloo̱ achichí katsakjónní, nga̱t'a̱ ja̱koxi̱ nga ti tsint'ié kui nda̱ xi tsint'ié Sauloo̱, tanga kamábejín 'yání xi tsíchji̱a̱a̱.
\v 8 Kós'e̱ nguije jastjíe̱n Sauloo̱ nga kji'ijñatójó t'ananguii̱, iskjíx'á ndyi̱ko̱n tanga nguiti ka̱majín kamábe, kó kuíni nga kachjábénguí tsi̱'e̱ nga tsanguínjo̱ Damasko̱.
\v 9 Kó ki̱a̱ kis'ijña ján ni̱xtjin nga kamájín kamábe, kó jmí ni iskjiniejín, ti nde jmí ni xi kats'ejín.
\p
\v 10 Kó ki̱a̱ na̱xi̱ńdá Damasko̱ kis'ijña ngo nda̱ xi s'ijii̱n Kristoo̱ xi 'mí Ananía̱, kó kui nda̱a̱ Ndi̱a̱ná akoó yojoo̱ nga bi katsoó:
\p –¡Ananía̱!
\p Kó bi katsó kui nda̱a̱:
\p –K'i̱e̱ tikón an Ndi̱a̱.
\p
\v 11 Kó Ndi̱a̱a̱ bi katsoó:
\p –Ti̱sítji̱n ji, kó t'en ji kui ndi̱yatié xi 'mí Ndi̱ya Kixii̱, kó ki̱a̱ ndi'aa̱ Judaa̱ tasíye ji nda̱ xi 'mí Sauloo̱ xi kjindibáni na̱xi̱ńdá Tarso̱, nga̱t'a̱ kui nda̱a̱ Néná ts'énchji̱a̱a̱ ki̱a̱a̱,
\v 12 kó je akakoo̱ nga ngo nda̱ xi 'mí Ananía̱ xi kjo̱chókoón kó kui ku̱i̱'íjñasoón tsja, tsi̱'e̱ nga ka̱matsijen nguinií.
\p
\v 13 Kó Ananíaa̱ bi katsoó Ndi̱a̱ná:
\p –Ji Ndi̱a̱, je kjín ma xi katsáyána kjo̱a̱a̱ kui nda̱a̱ ko̱jo kjo̱a̱a̱ ngayeje ni xi ndajín xi kats'énjo̱ xta̱ na̱xi̱ńdá tsjiée̱ ki̱a̱ Jerusale̱n,
\v 14 kó k'i̱e̱e̱ já nguito̱ko̱o̱ chiná'mii̱ je katsjaá kjo̱a̱ tsi̱'e̱ nga kjo̱jo ndo̱bo̱a̱ya ngayeje xta̱ xi ts'enkáxoma ja'ée̱n.
\p
\v 15 Tanga Ndi̱a̱ná bi katsoó:
\p –¡T'enchíi̱n! Nga̱t'a̱ nga kuí nda̱a̱ xi je ja'ajin an tsi̱'e̱ nga kuichji̱a̱jo kjo̱a̱a̱ an xta̱ xi Israe̱ljín, ko̱jo re, ko̱jo ngayeje xta̱ xi chji̱a̱ni Israe̱l,
\v 16 nga̱t'a̱ an xí kokóo̱ kókji'i tsie kjo̱a̱ni̱ma̱ kjo̱a̱'atio tangat'anii̱ ja'énna.
\p
\v 17 Kós'e̱ kijí Ananíaa̱ kó ts'as'ien ki̱a̱ ndi'a nínga tikón Sauloo̱, kó íjñasoón tsja Sauloo̱ kós'e̱ bi katsoó:
\p –Nda̱ ṉts'ie Saulo̱, Ndi̱a̱ Kjisoo̱ kui xi akoó yojoo̱ ngu̱i̱ya ndi̱ya nínga kjindibé, kuí xí katsanguiyana tsi̱'e̱ nga ka̱matsijen nguinií kó k'uijñájii̱n A̱sién Ni̱xtjii̱n Néná.
\p
\v 18 Kó ti kji'a ja̱ kon tji̱bo̱a̱tsjiee̱ tji̱o̱ kon ni xi jatjoo̱ ndyi̱ko̱n Sauloo̱, kós'e̱ kamátsijee̱n, jastjíe̱n, kó tji̱e̱nmá kastindá,
\v 19 kó nguije iskjinie ni chinie, kasakonga'niú nguinií. Kó kjín ni̱xtjin kamaá nga kis'ijñajii̱n xta̱ xi s'ijii̱n Kristoo̱ xi síndo Damasko̱.
\s Sauloo̱ bi ts'én íni̱jmi eén Néná Damasko̱
\p
\v 20 Kó Sauloo̱ ti kji'a íni̱jmi ki̱a̱ ndi'a nínga ndokjo̱a̱ eén Néná nga Kjisoo̱ xi ndií Néná.
\v 21 Kó ngayeje xta̱ xi tsint'ieé, kijíndikoón kó bi katsó:
\p –¿A kuijín xi'bi̱ xi tsangatji̱nguii̱ xta̱ xi s'ijii̱n Kjisoo̱ ki̱a̱ Jerusale̱n? ¿Kó a ti kuijínní xi'bi̱ xi je'e k'i̱e̱e̱ tsi̱'e̱ nga stso̱bo̱a̱ ngase xta̱, kó sa̱'ínk'as'iee̱n já nguito̱ko̱o̱ chiná'mii̱?
\p
\v 22 Tanga Sauloo̱ kis'ie ngasee̱ nga'niú nga tsíchji̱a̱ nga akoó nga kui Kjisoo̱ xi Kristoo̱. Kó kats'éntsabéjii̱n xta̱ judío̱ xi síndo Damasko̱.
\s Bi ts'én jatjo'maa̱ yojoo̱ Sauloo̱ ngu̱i̱ya tsja já judíoo̱
\p
\v 23 Kó jaskan nguije ja'a kjín ni̱xtjin, já judíoo̱ índa xtín tsi̱'e̱ nga sa̱'ínk'ién Sauloo̱,
\v 24 tanga tjín xi katsáyaá Sauloo̱ kui nii̱. Kó kui jaá nga ni̱xtjin ko̱jo nga ni̱xtji̱e̱n askondá nga̱ntjo̱a̱ xi tjichjá'yáni kui na̱xi̱ńdaá tsi̱'e̱ nga si̱'ank'ien,
\v 25 tanga xta̱ tsi̱'e̱ Kjisoo̱ ngo ni̱se̱nya íyá Sauloo̱ kó nguije jñoó kats'énkjatjajen nga̱xto̱n xó xi tjichjá'yáni na̱xi̱ńdá Damasko̱.
\s Bi ts'én jachó Sauloo̱ na̱xi̱ńdá Jerusale̱n
\p
\v 26 Kó nga jachó Sauloo̱ na̱xi̱ńdá Jerusale̱n, kamámejeén kamátikójo̱ xta̱ xi je kis'ijii̱n Kjisoo̱, tanga ngayeje kui xtaa̱ katsakjónní, nga̱t'a̱ kis'ijinjiín nga ko̱jo kui je xta̱ tsi̱'e̱ Kjisoo̱.
\v 27 Tanga kui nda̱ xi 'mí Bernabee̱ kijíjo̱ Sauloo̱ nga jachókakoó já apostroo̱, kó íni̱jmi̱í kóts'en Sauloo̱ kamábe Ndi̱a̱ná ngu̱i̱ya ndi̱ya nínga kjindibáni, kó nga Néná tsíchji̱a̱jo, kó nga ki̱a̱ Damasko̱ Sauloo̱ chiíjín katsakjónní nga tsíchji̱a̱ kjo̱a̱a̱ Kjisoo̱.
\v 28 Kó Sauloo̱ ki̱a̱ kis'ijñajo̱ kui jaá ki̱a̱ na̱xi̱ńdá Jerusale̱n nga kijí ko̱jo nga kjindibá, kó katsakjónjín nga tsíchji̱a̱ eén Néná,
\v 29 kó tsíchji̱a̱jo ko̱jo askjoyáni nga kats'énkjién ja'eén Ndi̱a̱ná nga ísejo̱ já judío̱ xi chji̱a̱ én griegoo̱, tanga kui jaá kats'énkjó nga sa̱'ínk'ién Sauloo̱.
\v 30 Kó nguije tsint'ié kui eén já ṉts'iee̱, kijíjo̱ Sauloo̱ na̱xi̱ńdá Sesarea̱, s'e̱ nguije jachó kui ngu̱i̱ndiee̱ katsanguiya na̱xi̱ńdá Tarso̱.
\p
\v 31 Tji̱e̱nga ngayeje xta̱ na̱ngo̱xi̱ xi chji̱a̱ni nangui Judea̱, nangui Galilea̱ ko̱jo nangui Samaria̱ kis'iee̱ kjo̱a̱xió ko̱jo kasakonga'niuú kó kamándikoón Néná nga kis'iṉdo, kó A̱sién Ni̱xtjii̱n Néná katsjá nga'niuú kui xtaa̱.
\s Bi ts'én kats'éndaya Peé nda̱ xi 'mí Eneaa̱
\p
\v 32 Kó Peé kijíkatsijee̱n xta̱ xi s'ijii̱n Kjisoo̱ xi síndo xki̱ nangui, kó ti bo̱a̱ ts'én kijíkatsijee̱n kui xta̱ tsjie xi síndo na̱xi̱ńdá xi 'mí Lida̱.
\v 33 Kó ki̱a̱ kasakoo̱ ngo nda̱ xi 'mí Enea̱ xi je ts'énya'a jin nó nga kji'ijña nga kamájín kijí.
\v 34 Kó Peé bi katsoó:
\p –Enea̱, Jesukristoo̱ xi tjíts'éndáyaá, ti̱sítji̱n kó chja̱'á'yé ji ṉcháa̱n.
\p Kó Eneaa̱ tji̱e̱nmá jastjíe̱n.
\v 35 Kó ngayeje xta̱ xi síndo na̱xi̱ńdá Lida̱ ko̱jo na̱xi̱ńdá Saro̱n kamábe nga kamándaya Eneaa̱, kó kis'ijii̱n Ndi̱a̱ná.
\s Bi ts'én kats'énkja'á'yaá Peé na̱ Dorkaa̱
\p
\v 36 Kui ni̱xtjin ján na̱xi̱ńdá Jope̱ kis'ijña ngo na̱ xi xta̱ tsi̱'e̱ Kjisoo̱ xi 'mí Tabita̱ (na̱ Dorka̱, tsó kui eén nga én griego̱). Kó kui xta̱chjo̱ón ngatsjé ni̱xtjin kats'én ni xi nda kó asíko̱jo xta̱ ni̱ma̱ xi jmí to̱n jiín.
\v 37 Kui ni̱xtjin ján, kui naa̱ kamá'oón kó k'ien. S'e̱ nguije kini'ángóyá ik'íjñá yojoo̱ ngo ndí ngu̱i̱ya'ma xi tikón nk'aa̱ ngo ndi'a.
\v 38 Kó na̱xi̱ńdá Jope̱ tiña manii̱ na̱xi̱ńdá Lida̱ nínga tikón Peé, kó kui xta̱ xi s'ijii̱n nga tsint'ié nga ki̱a̱ tikón, katsanguiya jó já xi bi katsoó Peé:
\p –Ti'in ngo kjo̱a̱nda tsá t'enje̱jne̱ na̱xi̱ńdá Jope̱.
\p
\v 39 Kó Peé tji̱e̱nmá kijíjo̱ kui jaá, kó nguije jachó, tsanguínjo̱ ki̱a̱ ndí ngu̱i̱ya'ma nínga kji'ijñak'ien na̱ Dorkaa̱, kó ngayeje ínchjín k'án xi je k'ien xi̱'ii̱n askandá nga ja'atjiyajoo̱n Peé, kó akoó ngayeje xtjí ko̱jo ṉjño ndio xi kats'énda na̱ Dorkaa̱ nga kis'ijña nga̱sondie.
\v 40 Kó Peé ts'axié ndi̱tsen ján ngayeje xta̱ xi síndo kui ngu̱i̱ndiee̱, kó asién tikoó, kó tsíchji̱a̱a̱ Néná, s'e̱ jaskan askotsijee̱n nínga kji'ijña ini̱ma̱a̱ s'e̱ bi katsó:
\p –Na̱ Dorka̱, ¡Ti̱sítji̱n!
\p Kó kui naa̱ ja̱ kó iskjíx'á ndyi̱ko̱n, kó nga kamábe Peé, kis'ijñando.
\v 41 Kó Peé tji̱e̱nmá iskjíbé tsja na̱ Dorkaa̱ nga kats'énkjastjíe̱n, s'e̱ tsíchji̱a̱a̱ xta̱ xi s'ijii̱n Kjisoo̱ ko̱jo ínchjín k'aán, kó akó na̱ Dorkaa̱ nga je ja'á'yaá.
\v 42 Kui kjo̱a̱ndikón xi kamá k'i̱e̱e̱ tsint'ié ngayeje xta̱ na̱xi̱ńdá xi síndo Jope̱, kó achichí xta̱ xi kis'ijii̱n Ndi̱a̱ná.
\v 43 Kó Peé kjín ni̱xtjin kis'ijña kui na̱xi̱ńdaá, ki̱a̱ ndi'aa̱ nda̱ xi 'mí Ximoo̱, nda̱ xi ts'éntie tji̱xi̱ín choo̱.
\c 10
\s Peé ko̱jo Korniee̱
\p
\v 1 Ki̱a̱ na̱xi̱ńdá Sesarea̱ kis'ijña ngo nda̱ xi 'mí Kornie̱, nda̱ nguito̱ko̱o̱ jajún xi 'mí Italianaa̱,
\v 2 kui nda̱a̱ ko̱jo xta̱ ndi'aa̱ kamábendikón ton ton Néná, kó tsie to̱nchji̱e̱ katsjá nga asíko̱jo xta̱ na̱xi̱ńdaá, kó ngatsjé ni̱xtjin tsíchji̱a̱a̱ Néná.
\v 3 Ngo ni̱xtjin nga ma ra tsi ta chi̱bo̱a̱ ján nga kamánguixón akakoo̱ ngo ni: kamábe xikoó tsi ngu̱i̱jin ńjñá ján nga ngo ndítsjiee̱ Néná ts'én'bos'ien nínga tikón, kó bi katsoó:
\p –¡Kornie̱!
\p
\v 4 Kó Korniee̱ ta askotsijendárií kui ndítsjiee̱, kó achichí katsakjon nga asíyaá, s'e̱ bi katsoó:
\p –¿Mí xi machjieén Ndi̱a̱?
\p Kós'e̱ bi katsó ndítsjiee̱:
\p –Nga tindokjo̱e̱e̱ Néná ko̱jo nga tibosíke̱je ngayeje xta̱ ni̱ma̱ xi jmí to̱njiín, je jachó kui nii̱ nguindyi̱ko̱n Néná.
\v 5 Kó ngot'e̱ 'ne̱ nanguíye ji já ki̱a̱ na̱xi̱ńdá Jope̱, tsi̱'e̱ nga kji̱ndi̱bájo̱ ngo nda̱ xi 'mí Ximo̱ xi ti Peé 'mií nga.
\v 6 Ki̱a̱ tikón ndi'aa̱ ngo nda̱ xi ti Ximo̱ 'mí, xi ts'éntie tji̱xi̱ín cho̱, kó ki̱a̱ t'a ndáchíkoón tikón ndi'aa̱.
\p
\v 7 Kó nguije kijí kui ndítsjie xi tsíchji̱a̱jo Korniee̱, tsíchji̱a̱a̱ jó já mosoo̱ tsi̱'e̱ nga sa̱'ínseén ko̱jo ngo nda̱jun xi kamábendikón ton ton Néná,
\v 8 kó nguije íni̱jmi yejee̱ kui nii̱, katsanguiya tji̱'ni̱u̱ na̱xi̱ńdá Jope̱.
\p
\v 9 Nga kamánguindyiojón mején nga ma ndis'ué, tji̱e̱nga tjimáya ndi̱ya kui jaá nga mején makjachó na̱xi̱ńdá Jope̱, Peé tsíchji̱a̱a̱ Néná nga̱són nk'aá ngo ndi'a.
\v 10 Kó 'niú kamábojoó kó kamámejeén iskjinie ni chinie, kó tji̱e̱nga tjíni'ánchján ni xi skji̱ni̱e̱, akakoo̱ ngo ni:
\v 11 Kamábe nga katjox'a ndi'ak'ajmi ján, kó ts'éndibájén t'ananguii̱ ngo ni xi ja̱ kji'i ṉjñonńtjibé je kji'i xi xikoó tsi tjín xi ndyi̱tsofó'niú nga nijún nijon,
\v 12 kó ki̱a̱ ngu̱i̱yaa̱ kui ṉjñoo̱ ndyi̱a̱ ngayeje to̱ko̱ya cho̱ xi nijún se tjín, ko̱jo cho̱ xi 'bifé yojoo̱, ko̱jo ngayeje to̱ko̱ya ni̱sie xi tjín nk'a ján.
\v 13 Kó Peé tsint'ié ngo nda̱ xi bi katsó:
\p –¡Ti̱sítji̱n Pé, ti'ink'in ji kui choo̱ kó chini̱ ji!
\p
\v 14 Tanga Peé bi katsó:
\p –Jmí Ndi̱a̱, kji̱e̱ ngo ndi̱ya kjíni̱e̱ an ngo ni xi taxkiya ko̱jo ni xi ndándí.
\p
\v 15 S'e̱ bi katsó nguiní kui nda̱a̱ xi ma jó ndi̱ya:
\p –Ni xi Néná je kats'éntsjie nguindyi̱ko̱n kui, ngata̱ ni ndándíjín sée̱.
\p
\v 16 Ján ndi̱ya kamá kui nii̱, kó kui ṉjñonńtjibeé tji̱e̱nmá katjo'ó'yá nguiní ndi'ak'ajmi ján.
\v 17 Kó tji̱e̱nga Peé nde bejín mí xi sa̱'ínkjó kjo̱a̱a̱ mí ni xi mejeén tsó kui ni xi akakoo̱, kui já xi katsanguiya Korniee̱ kui xi je ndyi̱bosíya ndi'a nínga tikón Ximoo̱, jachó nga̱ntjo̱a̱a̱.
\v 18 Kó asíyá tsi ki̱a̱ tikón kui nda̱ xi 'mí Ximoo̱ kui xi ti Peé ki'mií nga.
\v 19 Kó tji̱e̱nga Peé takó tjíts'énkjó ni xi kamábe, A̱sién Ni̱xtjii̱n Néná bi katsoó:
\p –Ján'a̱n ján ma já xi ndyi̱mongasee̱.
\v 20 Ti̱sítji̱n, titjaje̱n, kó nga jó nga jánjín 'bíjñíi̱ ini̱máa̱ nga k'uínje̱ kui jaá, nga̱t'a̱ an xí katsanguiya an.
\p
\v 21 Kós'e̱ Peé tji̱e̱nmá jatjajen nínga síndo kui jaá kó bi katsoó:
\p –An boá xi ndyi̱mindyiséjnú'un, ¿mí xá ndyi̱foé'e̱jnú?
\p
\v 22 Kó kui jaá bi katsoó:
\p –Nda̱ jun nguito̱ko̱ xi 'mí Korniee̱ xi katsanguiyajne̱, ngo nda̱ xi kixi̱ ko̱jo xi bendikón Néná xi nda tjindókjo̱a̱ kjo̱a̱a̱ kui ngayeje na̱xi̱ńdaá xta̱ judíoo̱, kó ngo ndítsjiee̱ Néná katsáyaá kui nda̱a̱ nga ku̱i̱chji̱a̱a̱ ji, tsi̱'e̱ nga k'uín ji ndi'aa̱ kó kui ku̱i̱nt'ie̱é ni xi ko̱ndókjo̱e̱je.
\p
\v 23 Kós'e̱ Peé kats'énk'as'ien ngu̱i̱ya ndi'a nínga tikón, kó kui jaá ki̱a̱ kamaá ngo ni̱xtji̱e̱n. S'e̱ nga kamánguindyiojón Peé kijíjo̱ kui jaá kó nijan kijíjo̱ já ṉts'ie xi síndo na̱xi̱ńdá Jope̱.
\p
\v 24 Kó nga kamánguindyiojón jachó na̱xi̱ńdá Sesarea̱ nínga je ndyi̱koyaa̱ Korniee̱ ko̱jo xta̱ tsi̱'e̱ ko̱jo já amingoo̱.
\v 25 Kó nguije ts'as'ien Peé kui ndi'aa̱, Korniee̱ tji̱e̱nmá kats'énk'as'ien kó asién tikoó kje̱n Peé nga kats'éndikón.
\v 26 Tanga Peé tji̱e̱nmá kats'énkjastjíe̱n Korniee̱ kó bi katsó:
\p –Tasin kixi̱ ji, nga̱t'a̱ ti xta̱ an xikoó ji.
\p
\v 27 Kó tji̱e̱nga tsíchji̱a̱jo kui nda̱a̱ ts'as'ienjo̱ ngu̱i̱ya ndi'aa̱, kó ki̱a̱ kamábe nga kjín ma xta̱ xi je síndotikó.
\v 28 Kó Peé bi katsoó kui xtaa̱:
\p –Je yajnú nga ji̱n xi xta̱ judío̱ ji̱n tsjandiéjínjne̱ kjo̱a̱kitijne̱ nga si̱'ankamajo̱jne̱ xta̱ xi kje̱'e nangui, tanga Néná akóna nga ka̱majín tsi taxkiya ko̱jo tsi tsjiejín xiáa̱n ngo xta̱,
\v 29 kuíni nga nguije kandokjo̱a̱na tji̱e̱nmá kjindibá an, kó mejénna sku̱i̱e̱ an mí kjoaá nga an kandokjo̱a̱jnú'un.
\p
\v 30 Kó bi katsó Korniee̱:
\p –Nijún ni̱xtjin tjínnií nga akakona ngo ni, mején ti kuii̱ chi̱bo̱a̱, k'i̱e̱ ndi'ana tikón an nga ts'énchji̱a̱a̱ Néná nga chi̱bo̱a̱ ján nga kamánguixoón, nga kamábe an ngo nda̱ xi ts'ényajá ngo ṉjño 'na̱,
\v 31 kó bi katsóna: “Kornie̱, je kanda'yá nga tindokjo̱e̱e̱ Néná kó chji̱e̱e̱ je tjíni'ánkja'átsjien nguindyi̱ko̱n Néná.
\v 32 Nanguíye ji xta̱a̱ na̱xi̱ńdá Jope̱ tsi̱'e̱ nga kji̱ndi̱bájo̱ nda xi 'mí Ximoo̱ kui xi ti Pé 'mií nga, xi tikón ndi'aa̱ nda̱ xi ingo xi 'mí Ximoo̱ xi ts'éntie tji̱xi̱ín cho̱ kui xi t'a ndáchíkoón tikón ndi'aa̱.”
\v 33 Kó kuíni nga tji̱e̱nmá katsanguiya an nga kijíndyiseé, kó ji kini'ín kjo̱a̱nda nga kjindibé. Ngot'e̱ 'ne̱ k'i̱e̱ tindyión xtín ngayeje ñá nguindyi̱ko̱n Néná kó mejénjne̱ ko̱nda'yájne̱ ngayeje ni xi je katsoó Néná nga k'uiyéjne̱.
\p
\v 34 Kó Peé bi katsó nga tsíchji̱a̱:
\p –Ngot'e̱ 'ne̱ makjínna nga ja̱koxi̱ nga Néná skjánjín ts'énjo̱ xtaa̱,
\v 35 tasá ngayeje na̱xi̱ńdá tsja maá Néná kjo̱a̱a̱ ngayeje xta̱ xi bendikón ko̱jo xi ni xi kixi̱ ndyi̱ts'en.
\v 36 Néná xí katsanguiyaa̱ eén xta̱ Israe̱l nga katsáyá éntjatsi̱e̱e̱ kjo̱a̱xioó ngat'aa̱ Jesukristoo̱, nga kui xi Ndi̱a̱ xi tsa̱ñá.
\v 37 Jún je yajnú ni xi ik'íni̱jmi̱í ngayeje na̱xi̱ńdá xi chji̱a̱ni nangui Judea̱, nga íts'i̱yanii̱ ngaskande nangui Galilea̱, jaskan nguije Juaa̱ katsáyá nga chjiénga, nga sa̱tíndá,
\v 38 ko̱jo nga Néná katsjaá nga'niú ko̱jo A̱sién Ni̱xtjii̱n Néná kui Kjiso̱ xi chji̱a̱ni Nasare̱t, kó kuí Kjisoo̱ xi kistso'bá nga kats'én ni xi nda ko̱jo nga kats'éndaya ngayeje xta̱ xi tsie kjo̱a̱ni̱ma̱ ndyi̱foa'a xi kjimani'ii̱n tangat'anii̱ xindajín diabloo̱, nga̱t'a̱ Kjisoo̱ Néná kistso'bájo̱,
\v 39 kó ji̱n xí chistiko̱ ji̱n kjo̱a̱a̱ ngayeje kjo̱a̱nda xi kats'én Kjisoo̱ nangui Judea̱ ko̱jo na̱xi̱ńdá Jerusale̱n, kós'e̱ jaskan kini'ánk'ién nga akjat'a kro̱.
\v 40 Kó kuí Kjisoo̱ xi Néná kats'énkja'á'yaá xi ma ján ni̱xtjin, kó katsjá kjo̱a̱ nga Kjisoo̱ akójne̱ yojoo̱,
\v 41 jmí tsi ngayeje xta̱ na̱xi̱ńdaá xi akoó yojoo̱, ta ji̱n tsi xi kamáyajne̱, ji̱n xi ja̱ bo̱a̱ je ja'ájinjne̱ Néná nga chistiko̱ kamájne̱, kó ji̱n kichiniejo̱ ko̱jo ki'yójo̱jne̱ jaskan nguije ja'á'yaá.
\v 42 Kó kuí xí atíxomajne̱ tsi̱'e̱ nga k'uini̱jmi̱jne̱ xta̱ na̱xi̱ńdaá nga kuí Néná xi katsjaá xá Kjisoo̱ nga kui xi ne ndi'amasiee̱n xta̱ xi síndo ko̱jo xi je jesón ka̱ma.
\v 43 Ngayeje já chji̱ni̱e̱'e̱én Néná ja̱ bo̱a̱ je tsíchji̱a̱ kjo̱a̱a̱ Kjisoo̱, kó bo̱a̱ ts'én tsíchji̱a̱ nga ngayeje xta̱ xi s'ijii̱n kui, sa̱ko̱ó kjo̱a̱jetakoón jeé.
\p
\v 44 Takó ts'énchji̱a̱ ngase Peé, nga A̱sién Ni̱xtjii̱n Néná kjindibánié ngayeje xta̱ xi ndyi̱bosiennijón kui eén.
\v 45 Kó kui xta̱ judío̱ xi s'ijii̱n Néná xi nijan jachójo̱ Peé achichí kijíndikoón nga ko̱jo kui xta̱ xi judío̱jiín kis'ijñajii̱n A̱sién Ni̱xtjii̱n Néná nga,
\v 46 nga̱t'a̱ nga kje̱'e én ndyi̱chji̱a̱ kui xtaa̱ nga kats'éntsjaá Néná.
\v 47 Kós'e̱ Peé bi katsoó:
\p –¿A tjín xi tsja̱ndiéjín nga sa̱tíndá kui xta̱ xi je katse'eé A̱sién Ni̱xtjii̱n Néná xikoó ji̱n?
\p
\v 48 Kó bo̱a̱ katsoó Peé nga sa̱tíndá xtaa̱ nga̱t'a̱ je kis'ijii̱n Ndi̱a̱ná Jesukristoo̱. Kós'e̱ kichjiá'aá Peé tsi̱'e̱ nga k'o̱ndíya ngasee̱ nga k'uijñá kui ngu̱i̱ndiee̱.
\c 11
\s Peé bi ts'én íni̱jmi̱í xta̱ na̱ngo̱xi̱ xi chji̱a̱ni Jerusale̱n ni xi kamá ndi'aa̱ Korniee̱
\p
\v 1 Tsint'ié já apostroo̱ ko̱jo já ṉts'ie xi chji̱a̱ni nangui Judea̱ nga ko̱jo xta̱ xi judío̱jiín je kats'énjo̱'o eén Néná nga.
\v 2 Kó nga jachó nguiní Peé na̱xi̱ńdá Jerusale̱n já xi s'ijii̱n nga chjiénga si̱'aa̱n sirkunsisioo̱n xtaa̱, tsi̱'e̱ nga xta̱a̱ Néná ka̱ma, tsíchji̱a̱ta'in Peé kó bi katsoó nga asíyaá:
\p
\v 3 ¿Mí kjo̱a̱a̱ nga ki̱a̱ k'ichíi̱n xta̱ xi kji̱e̱ ni'ánjiín sirkunsisioo̱n, kó mí kjo̱a̱a̱ nga ṉño̱ kichinieje̱ nga?
\p
\v 4 Kós'e̱ Peé íni̱jmi̱í ngaskande nga íts'i̱yanii̱ ngayeje ni xi kamaá, kó bi katsoó:
\p
\v 5 –Kji'a nga tikón an na̱xi̱ńdá Jope̱, tji̱e̱nga ts'énchji̱a̱a̱ Néná ngo ni akakona xi ja̱ kji'i ṉjñonńtjibé je kji'i, xi tjí'niú nga nijún nijon xi ts'éndibájén ndi'ak'ajmi ján ngaskande nínga tikón an,
\v 6 kó askotsijen ndá ndáa̱ ni xi ndyi̱a̱ ngu̱i̱yaa̱, kó kamábe an nga ndyi̱a̱ ngayeje to̱ko̱ya cho̱ xi tjín nijún se xi tjín t'ananguii̱, ko̱jo cho̱ tamá, ko̱jo cho̱ xi 'bifé yojoo̱, ko̱jo ni̱sie xi tjín nk'a ján.
\v 7 Kó ti tsint'ie an ngo nda̱ xi bi katsóna: “Ti̱sítji̱n Pé, ti'ink'in ji kui choo̱ kó chini̱ ji.”
\v 8 Kó bi kixian an nguijee̱: “¡Jmí Ndi̱a̱! Nga̱t'a̱ kji̱e̱ sa chií kjíni̱e̱ an ni xi taxkiya ko̱jo ni xi ndándí.”
\v 9 Kó kui nda̱ xi kanda'yáni ndi'ak'ajmi ján xi ma jó ndi̱ya bi katsó nguinína: “Ni xi Néná je kats'éntsjie nguindyi̱ko̱n kui, ngata̱ ni ndándíjín sée̱.”
\v 10 Ján ndi̱ya bo̱a̱ kamá, s'e̱ jaskan ti kijínijínguí nguiní ngayeje kui nii̱ ndi'ak'ajmi ján.
\v 11 Kó ti kji'a ján já xi kjindibáni na̱xi̱ńdá Sesarea̱ jachó ngasena ndi'a nínga tikón an.
\v 12 Kó A̱sién Ni̱xtjii̱n Néná katsanguiyana nga, nga jó nga jánjín k'uijñáa̱ ini̱ma̱na an nga kjuínjo̱ an kui jaá. Kó bo̱a̱ ti ts'én jun ma já ṉts'ie xi kats'énkamajo̱na nga kijíjo̱na, kó jáchójne̱ ndi'aa̱ nda̱ xi 'mí Korniee̱.
\v 13 Kó kuí xí íni̱jmijne̱ nga ngu̱i̱ya ndi'aa̱ kamábe ngo ndítsjiee̱ Néná xi jachókoón kó bi katsoó: “Nanguíye ji já ki̱a̱ na̱xi̱ńdá Jope̱ tsi̱'e̱ nga kji̱ndi̱bájo̱ kui nda̱ xi 'mí Ximoo̱ xi ti Pé 'mií nga,
\v 14 kuí xí bo̱a̱ ka̱tso̱o̱ kóts'en kjo̱tjo'áa̱ yojóo ji ko̱jo xta̱ xi síndo ndi'áa̱.”
\v 15 Kó nguije íts'i̱yanii̱ nga tsíchji̱a̱jo an, A̱sién Ni̱xtjii̱n Néná kjindibánié kui jaá, xikó kamáná ñá nga tjón tjón.
\v 16 Kós'e̱ bo̱a̱ ts'én ja'átsjienna ni xi katsóna Ndi̱a̱ná: “Ja̱koxi̱ nga Juaa̱ ndójoa xi atíndání, tanga jún A̱sién Ni̱xtjii̱n Néná xi sa̱tíndánijnú.”
\v 17 Nda kji'i tsi Néná xi katsjaá kui xtaa̱ kui kjo̱a̱nda xi katsjáná ñá xi je kis'ijinná Ndi̱a̱ná Jesukristoo̱, ¿kós'e̱ 'yání an, nga tsjandiéjáa̱n ni xi sa̱'ín Néná?
\p
\v 18 Kó nguije tsint'ié kui nii̱ xta̱ na̱ngo̱xi̱ xi chji̱a̱ni na̱xi̱ńdá Jerusale̱n, xioó kis'iṉdo, kó katsjaá kjo̱a̱je Néná nga bi katsó:
\p –¡Ko̱jo kui xta̱ xi Israe̱ljín katsjaá Néná nga sa̱'ínk'oyá yojoo̱ kjo̱a̱a̱ jé xí ndyi̱ts'en tsi̱'e̱ nga k'uieé kjo̱a̱mindyion!
\s Bi ts'én ik'íni̱jmi eén Néná na̱xi̱ńdá Antiokía̱
\p
\v 19 Ngot'e̱ 'ne̱, xta̱ xi kastsojoboa tangat'anii̱ nga ikiyotji̱nguii̱ kjo̱a̱a̱ Ixtibaa̱, ja'a nangui Fenisia̱ ko̱jo tji̱ngu̱i̱ Chipre̱ xi tikónjin ngu̱i̱jin ndáchíkoón, ko̱jo na̱xi̱ńdá Antiokía̱. Ki̱a̱ kandokjo̱a̱jo eén Néná kui xi xta̱ judíoo̱, tanga jmí tsi ko̱jo kje̱'e xta̱.
\v 20 Tanga tjín já xi s'ijii̱n Néná xi chji̱a̱ni tji̱ngu̱i̱ Chipre̱ ko̱jo na̱xi̱ńdá Sirene̱ xi jachó na̱xi̱ńdá Antiokía̱ kó tsíchji̱a̱jo xta̱ xi chji̱a̱ én griego̱ nga íni̱jmi̱í éntjatsi̱e̱e̱ Ndi̱a̱ná Kjisoo̱.
\v 21 Kó Néná katsjaá nga'niú nga asíko̱jo kui jaá, kó bo̱a̱ ts'én kjín xta̱ xi kis'ijii̱n nga, kós'e̱ kats'énjo̱'o Ndi̱a̱ná.
\p
\v 22 Kó kui xta̱ na̱ngo̱xi̱ xi chji̱a̱ni na̱xi̱ńdá Jerusale̱n tsint'ié kui nii̱, kó katsanguiya kui nda̱ xi 'mí Bernabee̱ na̱xi̱ńdá Antiokía̱,
\v 23 kó nga jachó, kamábe kjo̱a̱ndaa̱ Néná kó tsja kamaá, kó 'niú atíxomaa̱ ngayeje xtaa̱ tsi̱'e̱ nga ngayeje ini̱ma̱a̱ nga 'niú ka̱ma'niátakón Ndi̱a̱ná,
\v 24 nga̱t'a̱ Bernabee̱ ngo nda̱ xi tanisién nda ini̱ma̱ kamá, kó 'niú kistso'bájo̱ A̱sién Ni̱xtjii̱n Néná ko̱jo 'niú kis'ijii̱n. Kó achichí kjín xta̱ xi kats'énjo̱'o nga kis'ijii̱n Ndi̱a̱ná.
\p
\v 25 Kó jaskan nguije kamá kui nii̱, Bernabee̱ kijí na̱xi̱ńdá Tarso̱ nga kijíngase Sauloo̱.
\v 26 Kó nguije kasakoo̱ kijíjo̱ na̱xi̱ńdá Antiokía̱. Kó ki̱a̱ kis'iṉdojo̱ xta̱ na̱ngo̱xi̱i̱ ngo nó ndo̱jo, nínga kjín xta̱ akóyaá. Kó Antiokía̱ boá nínga tjón tjón xta̱ kristiano̱ ki'mií xta̱ xi kis'ijii̱n Kjisoo̱.
\p
\v 27 Kó kui ni̱xtjin ján tjín já chji̱ni̱e̱'e̱én Néná xi jatjoni na̱xi̱ńdá Jerusale̱n ngaskande nga jachó na̱xi̱ńdá Antiokía̱.
\v 28 Kó ngo kui jaá xi 'mí Agabo̱ xi bo̱a̱ katsó nga A̱sién Ni̱xtjii̱n Néná xó xi katsáyaá nga ngo kjindiá 'niú xi k'uié ngayeje són t'ananguii̱, kó bo̱a̱ kamá kui ni̱xtjin ján nga kis'ijña xtitjoón na̱xi̱ńdá Roma̱ nda̱ xi 'mí Klaudioo̱.
\v 29 Kós'e̱ xta̱ xi je kis'ijii̱n Kjisoo̱ xi chji̱a̱ni na̱xi̱ńdá Antiokía̱ bo̱a̱ katsó nga sa̱nguíyaá chji̱e̱ ṉts'ié xi síndo na̱xi̱ńdá Judea̱, xikó ts'én kasakoo̱ nga ngo nga ngo nga tsja̱a kui chji̱e̱e̱,
\v 30 kó kui nii̱ kats'én kui xtaa̱, kó Bernabee̱ ko̱jo Sauloo̱ katsanguiyajo̱ kui chji̱e̱e̱, tsi̱'e̱ xta̱ xi xchá xi chji̱a̱ni nangui Judea̱.
\c 12
\s Nga kini'ánk'ién Sandiyaá ko̱jo nga akja'ya ndo̱bo̱a̱ya Peé
\p
\v 1 Kó kui ni̱xtjin ján nda̱ re Erodee̱ katsoboá chiboa xta̱ na̱ngo̱xi̱i̱ tsi̱'e̱ nga sa̱'ín'oón.
\v 2 Kó ki̱cha̱ kats'énk'iénni Sandiyaá, ṉts'i̱e̱ Juaa̱.
\v 3 Kó nga kamábe nga tsja kamaá xta̱ judíoo̱ kui nii̱, ti bo̱a̱ ti ts'én katsoboá Peé. Kuí ma ngu̱i̱jii̱n s'ué nga chinie pan xi jmí nisanjiín.
\v 4 Kó nguije katsoboá, katsanguis'ien ndo̱bo̱a̱ya, kó nijún tjín jajún askondá, xi xki̱ nijún ndyi̱ya'a yojoo̱ nga ngo tjín, kó kats'énkjó kui nda̱ re Erodee̱ nga nguije ja'a s'ué paskuaa̱ sa̱'ínjeé Peé nguindyi̱ko̱n xta̱ na̱xi̱ńdaá.
\v 5 Kó kuíni nga Peé 'niú kichindá ngu̱i̱ya ndo̱bo̱a̱ya̱á, tanga xta̱ na̱ngo̱xi̱i̱ 'niú ton ton tsíchji̱a̱tjé Peé nga tsíchji̱a̱a̱ Néná.
\s Ngo ndítsjiee̱ Néná bi ts'én ts'axié Peé ngu̱i̱ya ndo̱bo̱a̱ya̱á
\p
\v 6 Kó ngo ni̱xtji̱e̱n nguindiee̱ nga Erodee̱ sa̱'ínjeé Peé nguindyi̱ko̱n xta̱ na̱xi̱ńdaá, Peé kji'ifé ngamasiee̱n jó jajún, nga tjitá'niú jó ń'niú ki̱cha̱, tji̱e̱nga jajún xi ngasee̱ ndyi̱konda nga̱ntjo̱a̱ ndo̱bo̱a̱ya̱á.
\v 7 Kó ta niján ma jachókoón ngo ndítsjiee̱ Néná, kó ngu̱i̱ya ndo̱bo̱a̱ya̱á ngo ndi'í kats'éntsijen yeje, kó kui ndítsjiee̱ kats'énjo̱ nguindie ni̱se̱e̱n Peé, kats'énkja'aá, s'e̱ bi katsoó:
\p –¡Tsá ti̱sítji̱n!
\p Kó tji̱e̱nmá ixónguí ń'niú ki̱cha̱ xi ndyi̱ya'a tsja Peé.
\v 8 Kó kui ndítsjiee̱ bi katsó ngasee̱:
\p –Che̱je ṉjñóo̱, ko̱jo tjaye tji̱xíndiée̱.
\p Kó bo̱a̱ kats'én Peé. Kó ti bi ti katsó nguiní kui ndítsjiee̱:
\p –Che̱jekjé ṉjño xi fot'e nga̱xten kó ndibétji̱nguiní.
\p
\v 9 Kó Peé kijítji̱nguii̱ ndítsjiee̱, kó nde bejín tsi ja̱koxi̱ ko̱jo tsi bo̱a̱jín kji'i ni xi tjíts'én ndítsjiee̱. Ta ngo ni xi ta tjibókorií kjimaa̱ Peé.
\v 10 Nguije ja'at'áa̱ jajún xi tjoón ko̱jo xi ma jó xi ndyi̱konda ndo̱bo̱a̱ya̱á, jachót'aa̱ nga̱ntjo̱a̱ ki̱cha̱ xi tikón kje̱n ndi̱yatieé, kui nga̱ntjo̱a̱a̱ ta katjox'a soboá, s'e̱ jataxie. Jaskan nguije ja'a ngo ndi̱yatié, kó kui ndítsjiee̱ íjñá soboá.
\v 11 Kós'e̱ Peé kamákjiín kó bi katsó:
\p –Ngot'e̱ 'ne̱ nga ja̱koxi̱ nga be an nga Néná katsanguiya ndítsjiee̱ tsi̱'e̱ nga k'o̱xié'ana ngu̱i̱ya tsja Erodee̱ ko̱jo ngayeje ni xi mejeén sa̱'ínjo̱na xta̱ judíoo̱.
\p
\v 12 Kó nguije kamákjiín Peé ni xi kamaá, tji̱e̱nmá kijí ndi'aa̱ na̱ Riyaa̱, na̱aa̱ nda̱ xi 'mí Juaa̱, xi ti Marko̱ ki'mií nga, nínga achichí kjín ma xta̱ xi je síndotikó nga ndyi̱chji̱a̱a̱ Néná.
\v 13 Kó nga jachó Peé tsíchji̱a̱ t'a nga̱ntjo̱a̱ xi tikón kje̱n ndi̱yatieé, kó ngo tsakjin xo̱ngo xi 'mí Rode̱ xi kats'énseén,
\v 14 kó nga tsint'ié nga nda̱a̱ Peé, achichí tsja kamaá, kó nguindiee̱ nga skjíx'á nga̱ntjo̱a̱a̱, tasá tsanga ma nga kijí'oyá nguiní ngu̱i̱ya ján nga kijítsáyá nga Peé xi sikón t'a nga̱ntjo̱a̱a̱.
\v 15 Tanga kui jaá bi katsoó kui tsakji̱ín:
\p –¡A tsabeéri!
\p Tanga ja̱koxi̱ nga Peé, katsó. Kó kui jaá bi katsó:
\p –Kuijín bo̱a̱, ta ndítsjiee̱ boá.
\p
\v 16 Tanga Peé takó tjíts'énkjaniéra nga̱ntjo̱a̱a̱, kó nguije kachjáx'aá kó nga kamáya nga kui, achichí katsakjónní kui jaá.
\v 17 Tanga Peé, ta tsja tsi akoó nga xió ti̱ndyiónjnú katsoó kui jaá, kós'e̱ íni̱jmi kóts'en Ndi̱a̱ná ts'axiéni ngu̱i̱ya ndo̱bo̱a̱ya̱á. Kó bi katsó ngase:
\p –T'íni̱jmijnúu̱ kui nii̱ Sandiyaá ko̱jo ṉts'ié xi ngasee̱.
\p S'e̱ jaskan jatjo kui ndi'aa̱ kós'e̱ kijí kje̱'e ngu̱i̱ndie.
\p
\v 18 Kó nguije kisisie̱én, ngo kjo̱a̱xti kis'iee̱ jajuún, nga̱t'a̱ kamábejín ni xi kamá kjo̱a̱a̱ Peé.
\v 19 Tanga Erodee̱ katsjá kjo̱a̱ nga ikindyisé nguiní Peé, kó nga kasakojín, jajuún ik'ínieé ni xi kamaá, s'e̱ katsjá kjo̱a̱ nga kini'ánk'ién jajún xi ndyi̱konda ndo̱bo̱a̱ya̱á. Jaskan nguije ja'a kui nii̱ Erodee̱ jatjo nangui Judea̱ kós'e̱ na̱xi̱ńdá Sesarea̱ kijík'íjñá.
\s Bi ts'én k'ien nda̱ re Erodee̱
\p
\v 20 Kó nda̱ re Erodee̱ achichí kats'énxchánjo̱ xta̱ xi chji̱a̱ni na̱xi̱ńdá Tiro̱ ko̱jo na̱xi̱ńdá Sido̱n, kó kui xtaa̱ índa nga kijíkoón Erodee̱. Kó kui xta̱ na̱xi̱ńdaá kamá xi kats'én nga nda tsa'a Blastoo̱, ngo nda̱ xi 'niú nk'a xaá xi nijan ma Erodee̱, kó kui xtaa̱ tsangui kjo̱a̱xió, nga̱t'a̱ na̱xi̱ńdá Tiro̱ ko̱jo na̱xi̱ńdá Sido̱n ki̱a̱ sakoó ni xi iskjinie xi kats'e kui na̱xi̱ńdaá nda̱ ree̱.
\v 21 Kó ngo ni̱xtjin kui nda̱ re Erodee̱ tsíchji̱a̱a̱ xtaa̱ nga yajá ṉjño ndaa̱, kós'e̱ kis'ijña són nínga botixómá, s'e̱ tsíchji̱a̱yajii̱n,
\v 22 kó ngayeje xtaa̱ askandáyá ma nga bi katsó:
\p –¡Kui xi ts'énchji̱a̱a̱, xta̱jín bo̱a̱, Néná boá!
\p
\v 23 Ti kuii̱ chi̱bo̱a̱ ngo ndítsjiee̱ Néná katsjaá ngo chi'in Erodee̱, nga̱t'a̱ katsjájiín kjo̱a̱je Néná, kó chi̱ndo kats'énkjié nga k'ien.
\p
\v 24 Tanga eén Ndi̱a̱ná kjifítsié nga tjí'míyaá xtaa̱ ngayeje són nga̱sondiee̱.
\p
\v 25 Kó Bernabee̱ ko̱jo Sauloo̱ nguije kamá xaá ki̱a̱ na̱xi̱ńdá Jerusale̱n, ti kijí'oyá nguiní nga nijan kijíjo̱ Juaa̱, kui nda̱ xi ti Marko̱ ki'mií nga.
\c 13
\s Bernabee̱ ko̱jo Sauloo̱ bi ts'én íts'i̱yanii̱ xaá nga tsíchji̱a̱ eén Néná
\p
\v 1 Kó ngu̱i̱jii̱n xta̱ na̱ngo̱xi̱ xi kis'iṉdo na̱xi̱ńdá Antiokía̱ kis'ie já chji̱ni̱e̱'e̱én Néná ko̱jo já mostro̱, kó kui boá xi Bernabee̱, Ximoo̱ nda̱ xi ti Jmá ki'mií nga, Rsioo̱ xi chji̱a̱ni na̱xi̱ńdá Sirene̱, Menaee̱m kui nda̱ xi nijan kamáxchá Erodee̱, xi kis'ijña xá nangui Galilea̱, ko̱jo Sauloo̱.
\v 2 Ngo ni̱xtjin tji̱e̱nga síndotikó nga ndyi̱ts'endikón Ndi̱a̱ná ko̱jo nga síndo kjindiá, A̱sién Ni̱xtjii̱n Néná bi katsó:
\p –T'íjñit'axínní Bernabee̱ ko̱jo Sauloo̱ tsi̱'e̱ nga sa̱'ín kui xá xi tsíchji̱a̱ñáa̱.
\p
\v 3 Kós'e̱ nguije tsíchji̱a̱a̱ Néná ko̱jo nguije ja'a nga kis'iṉdo kjindiá, ngayeje kui xta̱ na̱ngo̱xi̱i̱ íjñasoón tsja, s'e̱ kats'énkjí.
\s Já apostroo̱ bi ts'én tsíchji̱a̱ eén Néná tji̱ngu̱i̱ xi 'mí Chipre̱
\p
\v 4 A̱sién Ni̱xtjii̱n Néná katsanguiya Bernabee̱ ko̱jo Sauloo̱ nga kijí nangui xi 'mí Seleusia̱, s'e̱ ki̱a̱ iskjíbé nga kijíya ngo tjotso je xi kijíjo̱ tji̱ngu̱i̱ Chipre̱.
\v 5 Nga jachó na̱xi̱ńdá Salamina̱ xi tikónt'a ndáchíkoón, ki̱a̱ íts'i̱yanii̱ nga íni̱jmi eén Néná ngu̱i̱ya ndi'a nínga chji̱a̱ eén Néná xta̱ judíoo̱. Kó ki̱a̱ kis'ijñajo̱ Juaa̱ tsi̱'e̱ nga asíko̱jo.
\v 6 Kó ja'atjinde ngayeje tji̱ngu̱i̱ Chipre̱ ngaskande nga jachó nínga 'mí Pafo̱, ki̱a̱ kui ngu̱i̱ndiee̱ kasakoo̱ ngo nda̱ tji'e judío̱ xi 'mí Barjesu̱, nda̱ chji̱ni̱e̱'én ndiso,
\v 7 kó kui tji'ee̱ nda tsa'a nda̱ xtitjón xi 'mí Serjio Pauloo̱, ngo nda̱ xi achichí kjínkón kamá. Kui nda̱ xtitjón xi 'mí Serjio Pauloo̱ katsanguiyakja'á Bernabee̱ ko̱jo Sauloo̱, nga̱t'a̱ kamámejeén tsint'ié eén Néná.
\v 8 Tanga nda̱ tji'ee̱, (xi ti Elima̱ ki'mí nga én griegoo̱), katsjandiéjín kó íchjaá tsi̱'e̱ nga nda̱ xtitjoón s'i̱jinjiín eén Néná.
\v 9 Kós'e̱ Sauloo̱, kui nda̱ xi ti Pablo̱ ki'mí nga, xi 'niú tjíjii̱n A̱sién Ni̱xtjii̱n Néná, asko'á ndá ndá kui nda̱ tji'ee̱,
\v 10 s'e̱ bi katsoó:
\p –¡Ji chi ndiso, ji xi tjikítsiee̱ ngayeje kjo̱a̱ndiso ko̱jo ni xi ndajín, ndií xindajín diabloo̱ ko̱jo kondraa̱ ngayeje ni xi kixi̱! ¿Mí kjo̱a̱a̱ nga ji tini'ínkjatsén ji ndi̱ya kixii̱ Ndi̱a̱ná?
\v 11 Ngot'e̱ 'ne̱ Ndi̱a̱ná ko̱tíjeé nga ku̱i̱ndyin ti̱ka̱ ji, kó kjín ni̱xtjin nga xche̱jín ji ts'ueé.
\p Ti kuii̱ chi̱bo̱a̱ Elimaa̱ kamájñoó ndyi̱ko̱n, kó tsangase ngo xi iskjíbenguí tsi̱'e̱ nga kijíjo̱, nga̱t'a̱ tanisién 'niú kamáti̱ka̱.
\v 12 Kó nga kamábe kui nii̱ nda̱ xtitjoón, kijíndikoón ni xi akóyá Pabloo̱ kjo̱a̱a̱ Ndi̱a̱ná, kó kis'ijii̱n Ndi̱a̱ná.
\s Bi ts'én íni̱jmi eén Néná Pabloo̱ ko̱jo Bernabee̱ nangui Pisidia̱
\p
\v 13 Pabloo̱ ko̱jo xta̱ xi nijan tso'bájo̱ ki̱a̱ Pafo̱ iskjíbé ngo tjotso je xi kijíya nga kijí na̱xi̱ńdá Perje̱, xi chji̱a̱ni nangui Panfilia̱, tanga Juaa̱ ki̱a̱ íjñámasien kui jaá kó kijí'oyá nguiní na̱xi̱ńdá Jerusale̱n.
\v 14 Kó kui jaá ki̱a̱ na̱xi̱ńdá Perje̱ ja'a nga jachó na̱xi̱ńdá Antiokía̱ xi chji̱a̱ni nangui Pisidia̱, kó ngo ni̱xtjin ndikón ts'as'ien ngu̱i̱ya ndi'a nínga ndokjo̱a̱ eén Néná kó kis'iṉdonié yáxiríe̱ xi síndo kui ngu̱i̱ya ndi'aa̱.
\v 15 Kó jaskan nguije kini'ányajíi̱n xo̱jo̱n kjo̱a̱kitii̱ ko̱jo kjo̱a̱a̱ xo̱jo̱n xi kats'én'indó já chji̱ni̱e̱'e̱én Néná, já nguito̱ko̱o̱ ndi'a nínga ndokjo̱a̱ eén Néná katsanguiya nga bi katsoó:
\p –Jún já ṉts'ie, tsi tjínjnú ngo ni xi k'uinjnúu̱ kui xtaa̱ tsi̱'e̱ nga sa̱kó nga'niú ngasee̱, ndokjo̱a̱jnú ngot'e̱.
\p
\v 16 Kós'e̱ Pabloo̱ jastjíe̱n kó yején tsja tsi̱'e̱ nga xió k'uíndo kui xtaa̱ kó bi katsó:
\p –Jún xta̱ Israe̱l ko̱jo xta̱ xi judío̱jínjnú, tasiénnijúnjnú'un.
\v 17 Néná xi chji̱a̱ni Israe̱l kuí boá xi ja'ájin xta̱ tji̱e̱ xcháná tsi̱'e̱ nga ngo na̱xi̱ńdá 'niú ka̱ma kji'a nga takó kje̱'e nangui síndo ki̱a̱ nangui Ejipto̱, kó jaskan nga nga'niú xi tsi̱'e̱ Néná ts'axié kui xtaa̱ kui nangui ján.
\v 18 Kó Néná kats'énchíkjo̱a̱ ni xi kats'én kui xtaa̱ ki̱a̱ nangui kixií mején yichán nó,
\v 19 kó yito na̱xi̱ńdá 'niú kats'énkjié xi chji̱a̱ni nangui Kanaán, tsi̱'e̱ nga katsjaá kui nanguii̱ xta̱ xi xcháná.
\v 20 Kui ni xi kamaá, mején nijún úchán ichítié nó ts'andíyaá, kós'e̱ jaskan Néná katsjaá xta̱xá ngaskande nga jachó ni̱xtjin nga kamá nda̱ chji̱ni̱e̱'e̱én Néná nda̱ xi 'mí Samuee̱l.
\v 21 Kó jaskan kui xtaa̱ tsí'á ngo nda̱ re xi ko̱tíxomaa̱, kó Néná yichán nó katsjaá nda̱ re xi 'mí Sau̱l ndií nda̱ xi 'mí Sii̱ xi chji̱a̱ni xta̱ tji̱e̱e̱ Benjaa̱.
\v 22 Jaskan Néná ja'áxiín xaá Sau̱l kó Ndabii̱ íjñá ngajoo̱, kó bi katsó Néná kjo̱a̱a̱ Ndabii̱: “Je kasakona nga Ndabi̱ xi ndií Isaíi̱ ngo nda̱ xi nda kasasiee̱n ini̱ma̱na, kuí boá xi sa̱'ín ngayeje ni xi mejénna.”
\v 23 Xta̱ tji̱e̱e̱ Ndabii̱ kjindibáni Kjisoo̱, kui xi katsanguiya Néná tsi̱'e̱ nga k'o̱xié'á xta̱ Israe̱l xikó katsó nga katsáyatjón.
\v 24 Nguindiee̱ nga ko̱kó yojoo̱ Kjisoo̱ kjo̱a̱a̱ ni xi sa̱'ín, Jua Bautistaa̱ íni̱jmi̱í ngayeje xta̱ Israe̱l tsi̱'e̱ nga sa̱tíndá kó bo̱a̱ ts'én xcha̱ nga je kats'énk'oyá yojoo̱ jé xi kats'én.
\v 25 Nguije makjatjosón xá xi tjíts'én Jua Bautistaa̱, bi katsó: ¿'Yá ni an, kóts'en ndyi̱ni'ánkjójnú jún? “Ánjín bo̱a̱ xi ndyi̱chiyájnú'un, jaskanní ndibá xi kui, kó ngaskande an sakójínna kui kjo̱a̱ndaa̱ nga skjíndóo̱ ń'niuú tji̱xíndieé.”
\p
\v 26 Jún já ṉts'ie, xi xta̱ tji̱e̱e̱ Abraa̱m ko̱jo ngayeje jún xi xta̱ xi judío̱jínjnú tanga xi yandíkónjnú Néná, ñá boá xi kananguiyaná kui én xi k'o̱xié'aná.
\v 27 Nga̱t'a̱ xta̱ na̱xi̱ńdá xi síndo Jerusale̱n ko̱jo xta̱ xi botixómaá, kamábejín 'yání xi Kjisoo̱, ti nde kamákjínjiín kui én xí tsíchji̱a̱ já chji̱ni̱e̱'e̱én Néná xi ni'ánya xki̱ ni̱xtjin ndikón ki̱a̱ ndi'a nínga ndokjo̱a̱ eén Néná, kó bo̱a̱ ts'én kats'énkjatjosón én xi ja̱ bo̱a̱ je tsíchji̱a̱ já chji̱ni̱e̱'e̱én Néná nga kats'énjeé Kjisoo̱,
\v 28 kó nda tsi jmí kjo̱a̱ kasakojiín nga si̱'ank'ien, kui xtaa̱ tsí'áa̱ Pilatoo̱ tsi̱'e̱ nga kats'énk'ién.
\v 29 Kó nguije jatjosón ngayeje ni xi chji̱a̱ xo̱jo̱n eén Néná, ts'enje̱nguit'a kroo̱, kó kijík'íjñá yojoo̱ ngo nga̱tsjo̱ó.
\v 30 Tanga Néná kats'énkja'á'yaá ngu̱i̱jii̱n xta̱ xi je jesoón,
\v 31 kó kjín ni̱xtjin nga Kjisoo̱ akoó yojoo̱ xta̱ xi nijan kistso'bájo̱ nga jatjojo̱ nangui Galilea̱ kós'e̱ kijíjo̱ na̱xi̱ńdá Jerusale̱n, kó ngot'e̱ 'ne̱ kuí jaá xi chistiko̱ nguindyi̱ko̱n xta̱ na̱xi̱ńdaá.
\p
\v 32 Kó kuíni nga ji̱n ndyi̱'bíni̱jmijne̱ kui éntjatsi̱e̱e̱, kui én xi katsáyatjoón Néná xta̱ tji̱e̱ xcháná,
\v 33 kui xi Néná je kats'énkjatjosoón ndií kui xtaa̱, ko̱jo ñá, nga kats'énkja'á'yaá Kjisoo̱, xikó ts'én kjit'a xo̱jo̱n eén Néná ki̱a̱ Salmo̱ xki̱ xi ma jó nínga bi tsó: “Ji xi ndína ji, kó an xí Na̱'míi̱ an, ngot'e̱.”
\v 34 Kó nga kats'énkja'á'yaá ngu̱i̱jii̱n xta̱ xi jesoón, bo̱a̱ kats'én tsi̱'e̱ nga nguiti sa̱'ínkjatsónjín yojoo̱, xikó ts'én ts'énchji̱a̱ xo̱jo̱o̱n nínga bi tsó: “Tsjáa̱ an ni xi tsjie ko̱jo ni xi kixi̱ xi kixiyatjóo̱n Ndabii̱.”
\v 35 Kó kuíni nga bi tsó kje̱'e salmoo̱: “Ko̱e̱'éndiéjín ji nga kjo̱tson yojoo̱ nda̱ tsjiee̱.”
\v 36 Nga̱t'a̱ nga ja̱koxi̱ Ndabii̱ kats'énkjatjosoón ti kui xta̱ tsi̱'e̱, xikó katsoó Néná nga sa̱'ín, kós'e̱ jaskan nguije k'ien, ki̱a̱ nijan kis'inijínjo̱ xi xchaá, kó yojoo̱ jatson.
\v 37 Tanga yojoo̱ kui nda̱ xi Néná kats'énkja'á'yaá, jatsonjín.
\v 38 Kó bo̱a̱ ts'én jún já ṉts'ie, chjiénga xcha̱jnú, nga tji'bíni̱jmijnú nga tangat'anii̱ Kjisoo̱ nga sa̱kójnú kjo̱a̱ni'ánjetakoón jéjnú,
\v 39 kó nga ngayeje xi ngu̱i̱yaa̱ kjo̱a̱kitii̱ Moisee̱ kamákixi̱jínni nguindyi̱ko̱n Néná, tanga tangat'anii̱ Kjisoo̱ nga ka̱makixi̱ xi s'i̱jii̱n kui.
\v 40 'Niú nda chónjnú yojojnú tsi̱'e̱ nga júnjín k'o̱kaniéjnú ni xi kats'én'indó já chji̱ni̱e̱'e̱én Néná xi bi tsoó:
\q
\v 41 Tsitsíjenjnú jún xi mojnóchajnú eén Néná,
\q ngatjíndikónjnú kó ngachajajnú,
\q nga̱t'a̱ kui ni̱xtjinjnú tjín ngo ni xi sa̱'in an,
\q ngo ni xi s'ijinjín ka̱majnú,
\q tsi tjín xi ko̱tso̱yani̱jmijnú.
\p
\v 42 Kji'a nga jatjo Pabloo̱ ko̱jo já xi nijan tjimájo̱ ki̱a̱ ndi'a nínga ndokjo̱a̱ eén Néná, xta̱ xi judío̱jín tsí'aá nga ni̱xtjin ndikón xi ingoo̱ ku̱i̱chji̱a̱jo nguiní ngase xtaa̱ kjo̱a̱a̱ kui nii̱.
\v 43 Kó nguije kijí xta̱ xi síndo ndi'a nínga ndokjo̱a̱ eén Néná, achichí ma xta̱ judío̱ ko̱jo xta̱ xi judío̱jín tanga xi bendikón Néná xi kijítji̱nguii̱ Pabloo̱ ko̱jo Bernabee̱, kó kui jaá 'niú atíxomaa̱ kui xtaa̱ tsi̱'e̱ nga jmí ni̱xtjin ku̱i̱'íjñámasien kjo̱a̱ndaa̱ Néná xi je kasakoo̱.
\p
\v 44 Ni̱xtjin ndikoón xomana̱ xi ingoo̱ mején ngayeje xta̱ na̱xi̱ńdaá kamátikó tsi̱'e̱ nga tsint'ieé eén Néná.
\v 45 Tanga nga kamábe já judíoo̱ kui xta̱ kjiín, kamá'onkon, kó íts'i̱yanii̱ nga ch'o katsoó Pabloo̱ nga bo̱a̱ katsoó nga bo̱a̱jín kji'i ni xi ts'énchji̱a̱.
\v 46 Kós'e̱ Pabloo̱ ko̱jo Bernabee̱ takó tsíchji̱a̱ nga katsakjónjín nga bi katsoó:
\p –Tjínjne̱ ngo kjo̱a̱'niú nga ja̱koxi̱ nga jún tjón ko̱ndókjo̱a̱jojne̱ eén Néná, jún xi xta̱ judío̱ jún, tanga nga ti juún ndyi̱'míjnú ko̱jo nga s'ijinjínjnú nga sa̱kójnú kjo̱a̱mindyion ngatsjé ni̱xtjii̱n, tasá kui xta̱ xi judío̱jiín konguínchonjne̱.
\v 47 Nga̱t'a̱ bo̱a̱ ts'én katsanguiyajne̱ Ndi̱a̱ná nga bi katsó:
\q Ijñáñaá xikoó ngo ndi'í tsi̱'e̱ ngayeje xta̱ xi tjín nga̱sondiee̱,
\q tsi̱'e̱ nga k'uiyée̱ kóts'en k'oxié'á an xta̱ xi síndo ngayeje són t'ananguii̱.
\p
\v 48 Nga tsint'ié kui eén xta̱ xi judío̱jiín, achichí tsja kamaá kó katsjaá kjo̱a̱je eén Néná, kó kis'ijin yejee̱ xta̱ xi je katjo'ójii̱n nga sa̱ko̱ó kjo̱a̱mindyion ngatsjé ni̱xtjii̱n,
\v 49 kó bo̱a̱ ts'én ki'míya eén Néná ngayeje nangui.
\v 50 Tanga kui já judíoo̱ tsíchji̱a̱jo ínchjín xi nda ini̱ma̱a̱ ko̱jo xi yandíkón ko̱jo já xi̱'in xi 'niú yandíkón na̱xi̱ńdaá, kó indyiá'á tsi̱'e̱ nga tsangatji̱nguii̱ Pabloo̱ ko̱jo Bernabee̱ tsi̱'e̱ nga kjo̱tjo kui nanguii̱.
\v 51 Tanga kui jaá nguije ikiyotji̱nguii̱ ítsanie xa̱ xi yajájón se tsi̱'e̱ nga íjñá ngo chi̱bo̱a̱ nga ndajín kji'i ni xi kats'én kui xtaa̱, s'e̱ kijí nangui Ikonio̱.
\v 52 Kó xta̱ tsi̱'e̱ Néná achichí tsja kamaá nga kis'ikitsiee̱ A̱sién Ni̱xtjii̱n Néná.
\c 14
\s Bi kamá nga kis'iṉdo Pabloo̱ ko̱jo Bernabee̱ na̱xi̱ńdá Ikonio̱
\p
\v 1 Nga jachó Pabloo̱ ko̱jo Bernabee̱ na̱xi̱ńdá Ikonio̱, ts'as'ien ngajoó ngu̱i̱ya ndi'a nínga ndokjo̱a̱ eén Néná xi chji̱a̱ni já judíoo̱, kó ki̱a̱ tsíchji̱a̱jo xtaa̱ kjo̱a̱a̱ Kjisoo̱, kó kjín ma xta̱ xi kis'ijii̱n xi judío̱ ko̱jo xi chji̱a̱ én griego̱.
\v 2 Tanga xta̱ judíoo̱ xi kis'ijinjiín én xí tsíchji̱a̱ Pabloo̱ ko̱jo Bernabee̱ indyiá'á xta̱ xi judío̱jiín tsi̱'e̱ nga ch'o ko̱a̱'a̱ kui já ṉts'iee̱.
\v 3 Kuíni nga, achichí tsie kamaá kui ngu̱i̱ndiee̱ kó 'niú kamá'niátakón Ndi̱a̱ná nga íni̱jmi̱í xtaa̱ kjo̱a̱a̱ kjo̱a̱tjoó Néná. Kó Ndi̱a̱ná akó nga ja̱koxi̱ kui nii̱ nga katsjaá nga'niú tsi̱'e̱ nga sa̱'ín chi̱bo̱a̱ ko̱jo kjo̱a̱ndikón.
\v 4 Kó xta̱ xi chji̱a̱ni kui na̱xi̱ńdaá jó tjín kats'én yojoo̱ ngo tjín xi nijan kamá xta̱ judíoo̱, s'e̱ ngo tjín xi nijan kamá já apostroo̱.
\v 5 Tanga xta̱ xi judíoo̱ ko̱jo xta̱ xi judío̱jiín nijan kamá já xí botixómaá, kó kjíts'uieé kui jaá tsi̱'e̱ nga ndajín sa̱'ínjo̱ ko̱jo nga k'o̱ya ndi̱jo̱,
\v 6 kó nga kamábe Pabloo̱ ko̱jo Bernabee̱ kui ni xi ka̱mata'in, jatjo'ma kó na̱xi̱ńdá Listra̱ ko̱jo Derbe̱ kijí, na̱xi̱ńdá xi chji̱a̱ni nangui Likaonia̱, ko̱jo nangui xi tiña manii̱ kui ngu̱i̱ndiee̱,
\v 7 kó ki̱a̱ katsáyá éntjatsi̱e̱e̱ Néná.
\s Bi kini'ánjo̱ Pabloo̱ ko̱jo Bernabee̱ na̱xi̱ńdá Listra̱
\p
\v 8 Kó ki̱a̱ na̱xi̱ńdá Listra̱ kis'ijña ngo nda̱ xi ni̱ma̱ xi majín fotso'bá, xi jmí ni̱xtjin kamá kistso'bá nga̱t'a̱ ndeskande koó nga katsen nga ni̱ma̱ se, kui nda̱a̱ ngo yáxiríe̱ tikónnié.
\v 9 Nga tsint'ieé én xi ts'énchji̱a̱ Pabloo̱, Pabloo̱ asko'á ndá ndá kó kamábe nga kui nda̱a̱ 'niú s'ijii̱n Néná nga ka̱mandaya,
\v 10 kó Pabloo̱ 'niú tsíchji̱a̱jo kui nda̱a̱ nga bi katsoó:
\p –¡Ti̱sítji̱n kó t'íjñí na̱xo̱ ndsa̱ki!
\p Kó kui nda̱a̱ ta niján ma iskjínk'á kó kasasien kixi̱, s'e̱ kamá kistso'bá.
\v 11 Kós'e̱ nga kamábe kui xta̱ na̱xi̱ńdaá ni xi kats'én Pabloo̱ askandáyá ma nga tsíchji̱a̱ én Likaonia̱ nga bi katsó:
\p –¡Néná xta̱ kamá, kó kuí xí je'ekónná!
\p
\v 12 Kó Bernabee̱ ne Seuu̱ ki'mií, kó Pabloo̱ ne Erme̱ ki'mií, nga̱t'a̱ nga kuí xí tsíchji̱a̱ ma.
\v 13 Kó chiná'mii̱ ne Seuu̱, xi tikón na̱ngo̱xi̱i̱ nga bitjas'i̱e̱n na̱xi̱ńdaá, jachójo̱ cho̱yojo xi̱'in ko̱jo naxó tsjakon, kó kui chiná'mii̱ ko̱jo xta̱ na̱xi̱ńdaá kamámejeén kats'énk'as'iee̱n kjo̱a̱tjó.
\v 14 Tanga nga kamákjiín já apostro̱ Bernabee̱ ko̱jo Pabloo̱ ni xi ka̱mata'in ngaskande iskjíndiyájón maá ṉjñoo̱, s'e̱ kijíngajii̱n xtaa̱ kós'e̱ askandáyá nga bi katsó:
\p
\v 15 –¡Jún já! ¿Mí kjo̱a̱a̱ nga bi kji'i ni xi ndyi̱ni'ánjnú? A yajínjnú nga xta̱ ji̱n xikoó jún, ja̱ kuíni nga jé'e ji̱n nga k'uini̱jmi̱jne̱ éntjatsi̱e̱e̱ Néná tsi̱'e̱ nga k'uijñá masienjnú kui ni xi ni'ánjnú xi jmí ni chjíjiín, kó tasá Néná tindyi̱sé nguiníjnú, kui Néná xi tikón ja̱koxi̱i̱, xi kats'énda ndi'ak'ajmii̱, t'ananguii̱, ndáchíkoón ko̱jo ngayeje ni xi tjiín,
\v 16 kui xi kje̱'e ni̱xtjin katsjandié nga ngayeje xtaa̱ kja̱ kijí kja̱ kijí ndi̱ya̱á nga ngo nga ngo,
\v 17 nda tsi ngatsjé ni̱xtjin akoó xtaa̱ kjo̱a̱nda xi ts'én tsi̱'e̱ nga xcha̱ 'yání xi kui, nga̱t'a̱ kuí xí tsanguiyajnú stseé tsi̱'e̱ nga nda ka̱maxchá ni xi 'bítji̱e̱jnú, kó kuí xí tsjájnú nga nda xi̱ni̱e̱ nga nda s'i̱o̱jnú ko̱jo nga k'uieé kjo̱a̱tsja ini̱ma̱jnú.
\p
\v 18 Kó nda tsi kui nii̱ katsó, tanga takó achichí ni'in kamaá nga íchjaá xtaa̱ nga si̱'ank'as'iee̱n kjo̱a̱tjó.
\p
\v 19 Kó ta kji'a ma jachó já judío̱ xi chji̱a̱ni na̱xi̱ńdá Antiokía̱ ko̱jo na̱xi̱ńdá Ikonio̱ xi indyiá'á xtaa̱ tsi̱'e̱ nga kje̱'e ts'én kats'énkjó, kós'e̱ ndi̱jo̱ akjaya Pabloo̱ kó nguije kis'ijii̱n nga je k'ien katsó, iskjifé nga ts'axié ngu̱i̱jin na̱xi̱ńdaá.
\v 20 Tanga ngayeje xta̱ xi je s'ijii̱n Kjisoo̱ kamátikónié Pabloo̱, kó Pabloo̱ jastjíe̱n kó ti kijí nguiní ngu̱i̱jin na̱xi̱ńdaá, kó nga kamánguindyiojón kijí Pabloo̱ ko̱jo Bernabee̱ na̱xi̱ńdá Derbe̱.
\p
\v 21 Jaskan nguije íni̱jmi éntjatsi̱e̱e̱ Néná na̱xi̱ńdá Derbe̱ nínga kjín xta̱ kats'éns'ijin eén Néná, kijí nguiní na̱xi̱ńdá Listra̱, na̱xi̱ńdá Ikonio̱ ko̱jo na̱xi̱ńdá Antiokía̱,
\v 22 kó ki̱a̱ katsjá nga'niuú xta̱ xi s'ijii̱n Kjisoo̱, kó 'niú tsíchji̱a̱jo tsi̱'e̱ nga sa̱'íns'ijin kó bo̱a̱ katsoó nga chjiénga tsie kjo̱a̱ni̱ma̱ ku̱i̱tjatió tsi̱'e̱ nga ku̱i̱tjás'i̱e̱n nínga botixómá Néná.
\v 23 Kó Pabloo̱ ko̱jo Bernabee̱ xki̱ na̱ngo̱xi̱ katsjaá xá xta̱ xi xchá xi k'uíndotjoón na̱ngo̱xi̱i̱, kó nguije tsíchji̱a̱a̱ Néná ko̱jo nguije ja'a nga kats'én kjindiá, Ndi̱a̱ná kats'éngat'aa̱ kui xta̱ xi je kis'ijii̱n.
\s Pabloo̱ ko̱jo Bernabee̱ bi ts'én kijí'oyá nguiní na̱xi̱ńdá Antiokía̱
\p
\v 24 Pabloo̱ ko̱jo Bernabee̱ ja'a nangui Pisidia̱, ngaskande nga jachó nangui Panfilia̱,
\v 25 kó nguije katsáyá eén Néná na̱xi̱ńdá Perje̱, kijí na̱xi̱ńdá Atalía̱,
\v 26 ki̱a̱ kijíya ngo tjotso je tsi̱'e̱ nga jachó na̱xi̱ńdá Antiokía̱, na̱xi̱ńdá nínga kichjiá'átjeé Néná nga tsja̱á kjo̱a̱ndaa̱ tsi̱'e̱ xá xi je kats'én.
\v 27 Kó nguije jachó na̱xi̱ńdá Antiokía̱, ítikó xta̱ na̱ngo̱xi̱i̱ kó íni̱jmi̱í ngayeje ni xi kats'én Néná ngu̱i̱ya tsja kui jaá, ko̱jo nga Néná xi kats'én nga xta̱ xi judío̱jiín je s'i̱jii̱n Kjisoo̱ nga.
\v 28 Kó Pabloo̱ ko̱jo Bernabee̱ achichí tsie ts'andíyaá nga kis'iṉdojo̱ xta̱ xi je kis'ijii̱n Kjisoo̱.
\c 15
\s Bi ts'én kamátikó já apostroo̱ ko̱jo xta̱ xi xchaá na̱ngo̱xi̱i̱
\p
\v 1 Kui ni̱xtjin ján tjín xta̱ xi chji̱a̱ni nangui Judea̱ xi kijí na̱xi̱ńdá Antiokía̱ kó ki̱a̱ íts'i̱yanii̱ nga akóyaá ṉts'iee̱ nga kjo̱tjo'ájiín yojoo̱ tsi si̱'ánjiín sirkunsisioo̱n xikó kji'i kjo̱a̱xchá xí íjñá Moisee̱.
\v 2 Pabloo̱ ko̱jo Bernabee̱ 'niú askjoyáni kui nii̱ ko̱jo kui jaá, kó tichaa̱n Pabloo̱ ko̱jo Bernabee̱ kis'indonda ko̱jo kje̱'e ngase xta̱ xi katse'éxaá tsi̱'e̱ nga kijí na̱xi̱ńdá Jerusale̱n nga kijík'índa kui kjo̱a̱a̱ ko̱jo já apostroo̱ ko̱jo xta̱ xi xchaá na̱ngo̱xi̱ xi chji̱a̱ni kui na̱xi̱ńdá ján.
\p
\v 3 Kó kui jaá, nguije kats'énkjíyindi̱ya xta̱ na̱ngo̱xi̱i̱ ja'a nangui Fenisia̱ ko̱jo nangui Samaria̱, kó katsáyaá kóts'en xta̱ xi judío̱jiín íjñámasien kjo̱a̱xcha̱á kós'e̱ kats'éns'ijin Néná, kó ngayeje ṉts'iee̱ achichí tsja kamaá nga tsint'ié kuí nii̱.
\p
\v 4 Kó nga jachó na̱xi̱ńdá Jerusale̱n, ki̱a̱ ndyi̱koyaa̱ xta̱ na̱ngo̱xi̱i̱ ko̱jo já apostroo̱ ko̱jo xta̱ xi xchaá, kó katsáyaá ngayeje ni xi kats'én Néná ngu̱i̱ya tsja kui jaá.
\v 5 Tanga tjín xta̱ fariseo̱ xi je kis'ijii̱n eén Néná xi jastjíe̱n s'e̱ bi katsó:
\p –Chjiénga si̱'aa̱n sirkunsisioo̱n kui xta̱ xi je kis'ijii̱n eén Néná xi judío̱jiín, kó 'niú k'uijñáa̱ nga sa̱'ínkjatjosón kjo̱a̱kitii̱ Moisee̱.
\p
\v 6 Kó ítikó yojoo̱ já apostroo̱ ko̱jo xta̱ xi xchaá tsi̱'e̱ nga askjoyáni kui kjo̱a̱a̱.
\v 7 Kó nguije tsie askjoyáni kui kjo̱a̱a̱, jastjíe̱n Peé, kó bi katsoó:
\p –Jún já ṉts'ie, jún je yajnú nga je tsienii̱ nga Néná ja'ájinna ngu̱i̱jii̱n jún tsi̱'e̱ nga xiyáa̱ éntjatsi̱e̱e̱ Néná xta̱ xi judío̱jiín tsi̱'e̱ nga s'i̱jii̱n.
\v 8 Kó Néná xí be ini̱ma̱ná akó nga tjoó xtaa̱, nga̱t'a̱ katsjaá A̱sién Ni̱xtjii̱n Néná xikó ts'én katsjáná ñá,
\v 9 kó Néná skjánjín tjíts'énná ñá ko̱jo kui jaá, nga̱t'a̱ ti je kats'éntsjie ini̱ma̱a̱ nguije kis'ijii̱n Néná nga.
\v 10 Ngot'e̱ 'ne̱, ¿mí kjo̱a̱a̱ nga Néná ndyi̱chjat'ayákónjnú nga kjo̱a̱'niú ndyi̱ni'ánjnúu̱ kui xta̱ xi tsi̱'e̱ Néná nga ko̱a̱'anijín ngo ch'ia xi ngaskande ñá ko̱jo xta̱ tji̱e̱ xcháná kamájiín tsa'anijín?
\v 11 A mí tsi tasá s'ijin kjimaná nga ta kjo̱tjo'a ñá tangat'anii̱ kjo̱a̱ndaa̱ Ndi̱a̱ná Kjisoo̱, xikoó kui jaá.
\p
\v 12 Kó ngayeje xtaa̱ nga xió kis'iṉdo tji̱e̱nga tsint'ieé Bernabee̱ ko̱jo Pabloo̱ nga íni̱jmi kjo̱a̱a̱ ngayeje chi̱bo̱a̱ ko̱jo kjo̱a̱ndikón xí kats'én Néná ngu̱i̱ya tsja kui jaá ngu̱i̱jii̱n xta̱ xi judío̱jín.
\v 13 Kó nguije xió kis'iṉdo kui jaá Sandiyaá bi katsó:
\p –Jún já ṉts'ie, nda'yámajnú'un:
\v 14 Ximoo̱ íni̱jminá kó kats'én Néná nga tjón tjón nga kamáni̱ma̱a̱ xta̱ xi judío̱jiín, ko̱jo nga ja'ájin nga na̱xi̱ńdá xi tsi̱'e̱ Néná ku̱i̱chji̱a̱ni.
\v 15 Kó kui nii̱, ti bo̱a̱ ti tsó xikó ts'én ít'a xo̱jo̱n já chji̱ni̱e̱'e̱én Néná nínga bi tsó:
\q
\v 16 Jaskan nguije kamá kui nii̱, kjoé'e̱ nguiñá an
\q kó kjoé'e̱ ts'endáya ngu̱i̱ndie ndikoón Ndabii̱ xi jatsoo̱n,
\q kó sa̱'indaya an xó xi je ixóndoó,
\q kó ti sa̱'inkjastjíe̱n nguiní an kui ndi'aa̱,
\q
\v 17 tsi̱'e̱ nga xta̱ xi ngasee̱ ko̱ngase Ndi̱a̱ná,
\q ko̱jo ngayeje xta̱ xi Israe̱ljín
\q xi je kamátsjie ngu̱i̱yaa̱ ja'énna,
\q
\v 18 bi tsó Ndi̱a̱ná xi bokó ngayeje kui nii̱ ndeskande ni̱xtjin xchá ján.
\p
\v 19 Kuíni nga an xi xian an nga ka̱majín si̱'anxtii̱ xta̱ xi Israe̱ljín xi je íjñámasien kjo̱a̱xcha̱á tsi̱'e̱ nga Néná je ko̱e̱je̱tji̱ngui,
\v 20 ta ka̱ma ta ngo tsi xo̱jo̱n si̱'andáa̱ nínga k'uiyáa̱ tsi̱'e̱ nga ku̱i̱'íjñát'axiín yojoo̱ ngayeje ni xi ndándí xi chji̱a̱ni ngo a̱sie̱én ngo ne xi ts'énda xtaa̱, kó nga sa̱'ínkamajo̱jín xi tondo̱, ko̱jo nga skji̱ni̱e̱jín yojoo̱ cho̱ xi ni'ánxíndo nga ni'ánk'ién ko̱jo yojo xi ndyi̱a̱a̱ jín.
\v 21 Nga̱t'a̱ ngaskande ni̱xtjin xchá ján, Moisee̱ índo xki̱ na̱xi̱ńdá xta̱ xi ku̱i̱'íni̱jmi nga sa̱'ínyá kjo̱a̱kitii̱ ngu̱i̱ya ndi'a nínga ndokjo̱a̱ eén Néná xki̱ ni̱xtjin ndikón.
\p
\v 22 Kós'e̱ nda kasasiee̱n já apostroo̱ ko̱jo xta̱ xi xchaá ko̱jo ngayeje xta̱ na̱ngo̱xi̱i̱, nga ja'ájin já xi chji̱a̱ni kui já xi̱'ii̱n xi katsanguiya na̱xi̱ńdá Antiokía̱ xi nijan kijíjo̱ Pabloo̱ ko̱jo Bernabee̱, Judaa̱ nda̱ xi ti Barsaba̱ 'mií nga, ko̱jo nda̱ xi 'mí Silaa̱ xi achichí kamáyandikón ngu̱i̱jii̱n já ṉts'iee̱,
\v 23 kó kui jaá xi kananguiyajo̱ ngo xo̱jo̱n xi bi tsó:
\p “Ji̱n xi já apostro̱ ji̱n ko̱jo xta̱ xi xchá xi ṉts'ie majnú, tinde bo̱a̱ t'ínjnú já ṉts'ie xi xta̱ xi judío̱jín xi síndo na̱xi̱ńdá Antiokía̱, nangui Siria̱ ko̱jo nangui Silisia̱.
\v 24 Je kanda'yájne̱ nga tjín xta̱ xi ti k'i̱e̱ jatjojinná, kui xi jmí kjo̱a̱ katse'éjiín, kó kui xi ndyi̱ts'enxtií ini̱ma̱jnú, nga katsanguiya nga si̱'ánjnú sirkunsisioo̱n ko̱jo nga si̱'ankjatjosónjnú kjo̱a̱kitii̱.
\v 25 Nda tsakínjne̱, nga ik'índajne̱ nga kachje'éjinjne̱ já xi̱'in xi tjójne̱ kuíni nga kananguiyachonjne̱ jún Bernabee̱ ko̱jo Pabloo̱,
\v 26 já xi je kitsjienkon yojoo̱ tangat'anii̱ ja'eén Ndi̱a̱ná Jesukristoo̱.
\v 27 Kó kuíni nga ki̱a̱ kananguiyajne̱ Judaa̱ ko̱jo Silaa̱, kó kuí jaá xi kuí ma xi ku̱i̱chji̱a̱jojnú jún tsi̱'e̱ nga ko̱tso̱ya yejejnú ti kuii̱ ni xi'bi̱.
\v 28 Nga̱t'a̱ je nda tsakiín A̱sién Ni̱xtjii̱n Néná ko̱jo ji̱n tsi̱'e̱ nga taxkiya si̱'ánjínjnú ngo ni, ta kuí tsi ni xi xikoó xi'bi̱:
\v 29 Nga xi̱ni̱e̱jínjnú yojoo̱ cho̱ xi je kini'ánk'as'iee̱n ngo a̱sie̱én ngo ne xi ts'énda xtaa̱, ko̱jo nga xi̱ni̱e̱jínjnú jín ko̱jo yojoo̱ cho̱ xi kini'ánxíndo ko̱jo nga ka̱majín tondo̱ ka̱majnú. Tsi si̱'ankjatjosónjnú ngayeje kui nii̱, nda kji'i ni xi ndyi̱ni'ánjnú. Nda ngas'iejnú.”
\p
\v 30 Kó bo̱a̱ ts'én kui jaá nguije kats'énkixot'a xkjín, kijí na̱xi̱ńdá Antiokía̱ kó ítikó ngayeje xta̱ na̱ngo̱xi̱i̱ nga kats'énk'as'ien kui xo̱jo̱o̱n.
\v 31 Kó nguije kats'ényá xta̱ na̱ngo̱xi̱i̱ kui xo̱jo̱o̱n, achichí tsja kamaá nga kui eén xi kats'éndajoo̱n.
\v 32 Kó nga já chji̱ni̱e̱'e̱én Néná kamá Judaa̱ ko̱jo Silaa̱, kats'éndajoo̱n ko̱jo katsjá nga'niuú ṉts'iee̱ nga tsíchji̱a̱jo,
\v 33 kó nguije ja'a kjín ni̱xtjin, kui ṉts'iee̱ xió kats'énkixot'a kui jaá nga kijí'oyá nguiní nangui nínga síndo xta̱ xi katsanguiya.
\v 34 Tanga Silaa̱ kamámejeén nga kis'ijña ki̱a̱a̱.
\v 35 Kó Pabloo̱ ko̱jo Bernabee̱ ko̱jo kjín ngase xta̱ takó kis'iṉdo ra na̱xi̱ńdá Antiokía̱ nga akóyá ko̱jo nga íni̱jmi éntjatsi̱e̱e̱ Néná.
\s Bi ts'én íts'i̱yanii̱ Pabloo̱ xi ma jó ndi̱ya nga kats'én xaá Néná
\p
\v 36 Nguije ja'a kjín ni̱xtjin, Pabloo̱ bi katsoó Bernabee̱:
\p –Tjianchóo̱n ingo ndi̱ya ngayeje ṉts'ié xi síndo ngayeje na̱xi̱ńdá nínga je ik'íni̱jmi eén Néná, tsi̱'e̱ nga xcha̱ kóts'en síndo.
\p
\v 37 Kó Bernabee̱ kamámejeén nga nijan kijíjo̱ Juaa̱, kui nda̱ xi ti Marko̱ ki'mií nga,
\v 38 tanga Pabloo̱ kasasienjiín nga kjo̱jo, nga̱t'a̱ Markoo̱ nangui Panfilia̱ índomasien kó nguiti kamámejénjiín nga kats'én xá xi ki'mií.
\v 39 Kó Pabloo̱ ko̱jo Bernabee̱ ndse̱je̱njín kamá kós'e̱ kja̱ xín kja̱ xín kijí nga ngo nga ngo, kó Bernabee̱ kijíjo̱ Markoo̱ nga kijíya ngo tjotso je tji̱ngu̱i̱ Chipre̱.
\v 40 Tanga Pabloo̱ ja'ájin Silaa̱, kó jatjo kui ngu̱i̱ndiee̱ nguije já ṉts'iee̱ tsíchji̱a̱tjé nga kats'énk'as'ien ngu̱i̱ya tsja Néná,
\v 41 kó kui jaá ja'a nangui Siria̱ ko̱jo nangui Silisia̱, nga katsjá nga'niuú xta̱ na̱ngo̱xi̱i̱.
\c 16
\s Timoo̱ bi ts'én nijan kijíjo̱ Pabloo̱ ko̱jo Silaa̱
\p
\v 1 Kó nga jachó Pabloo̱ nangui Derbe̱ ko̱jo Listra̱ ki̱a̱ kasakoo̱ ngo nda̱ xi s'ijii̱n Kjisoo̱ kui xi 'mí Timo̱, ndií ngo xta̱chjón xi judío̱ xi ti bo̱a̱ ti ts'én s'ijii̱n Kjisoo̱ nga, kó na̱'mii̱ nda̱ griego̱ boá,
\v 2 kó já ṉts'ie xi chji̱a̱ni nangui Listra̱ ko̱jo nangui Ikonio̱ achichí nda tsíchji̱a̱ kjo̱a̱a̱ kui nda̱a̱.
\v 3 Pabloo̱ kamámejeén kijíjo̱ Timoo̱, tanga nguindiee̱ nga kjo̱jo kats'eén sirkunsisioo̱n tsi̱'e̱ nga ch'ojín ka̱maa̱ xta̱ judío̱ xi síndo kui ngu̱i̱ndiee̱, nga̱t'a̱ ngayeje kui jaá be nga na̱'mii̱ Timoo̱ nda̱ griego̱ boá.
\v 4 Kó xikó ts'én ndyi̱foa'a ngayeje na̱xi̱ńdá kats'énk'as'iee̱n kjo̱a̱botíxoma xi je ja̱ bo̱a̱ índajo̱ já apostroo̱ ko̱jo xta̱ xi xchaá na̱ngo̱xi̱i̱ xi chji̱a̱ni na̱xi̱ńdá Jerusale̱n nga sa̱'ínkjatjosón kui xtaa̱.
\v 5 Kó bo̱a̱ ts'én kui xta̱ na̱ngo̱xi̱i̱ 'niú kis'ijin ngasee̱ Kjisoo̱, kó ndyiojón ndyiojón kamákjín ngase.
\s Bi ts'én akakoo̱ ngo ni Pabloo̱ kjo̱a̱a̱ nda̱ xi chji̱a̱ni Masedonia̱
\p
\v 6 Kó nga ja'a nangui Frijia̱ ko̱jo Galasia̱, A̱sién Ni̱xtjii̱n Néná katsjandiéjiín nga tsíchji̱a̱ eén Néná nangui Asia̱,
\v 7 kó nga jachó tsindioó nangui Misia̱ kamámejeén nga ko̱e̱je̱ nangui Bitinia̱, tanga A̱sién Ni̱xtjii̱n Néná katsjandiéjiín nga ki̱a̱ kijí.
\v 8 Kó nga ja'a tiña nangui Misia̱, jatjajen nga jachó na̱xi̱ńdá Troa̱.
\v 9 Kó nga jñoó Pabloo̱ akakoo̱ ngo ni, nínga kamábe ngo nda̱ xi chji̱a̱ni nangui Masedonia̱ xi sikón kixi̱ nga 'niú tsí'aá nga bi katsoó: “Titjé chií ji nangui Masedonia̱ kó tasíke̱jejne̱.”
\v 10 Kó nguije akakoo̱ kui nii̱ Pabloo̱, tji̱e̱nmá ik'íjñandajne̱ yojojne̱ nga konguínjne̱ nangui Masedonia̱, nga̱t'a̱ je yajne̱ nga ja̱koxi̱ boá nga Néná ki̱a̱ ts'énchji̱a̱jne̱ tsi̱'e̱ nga k'uini̱jmi̱jne̱ éntjatsi̱e̱e̱ Néná kui ngu̱i̱ndiee̱.
\s Bi ts'én jachó Pabloo̱ ko̱jo Silaa̱ na̱xi̱ńdá Filipo̱
\p
\v 11 Kó ki̱a̱ na̱xi̱ńdá Troa̱ kachjábéjne̱ ngo tjotso je xi tsanguinyájne̱ tsi̱'e̱ nga jáchó kixi̱ kixi̱jne̱ tji̱ngu̱i̱ Samotrasia̱, kó nga kamánguindyiojón jáchójne̱ na̱xi̱ńdá Neápoli̱,
\v 12 kó tsanguínjne̱ xtji̱e̱e̱n Filipo̱, na̱xi̱ńdá 'niú xi tjón xi chji̱a̱ni nangui Masedonia̱, ko̱jo ngo kolonia̱ nínga síndo kjín xta̱ Roma̱ kó ki̱a̱ kixindyionjne̱ kjín ni̱xtjin.
\v 13 Kó ngo ni̱xtjin ndikón jataxiejne̱ na̱xi̱ńdaá, nga tsanguínjne̱ t'a ndejeé', nínga kini'ánkjójne̱ nga ki̱a̱ tikón ngo ngu̱i̱ndie nínga ndokjo̱a̱a̱ Néná, kó ki̱a̱ kixindyionjne̱ kó ki̱a̱ kandokjo̱a̱jojne̱ eén Néná ínchjín xi kamátikó kui ngu̱i̱ndiee̱.
\v 14 Kó ngo kui xta̱chjo̱ón xi 'mí na̱ Lidia̱, xi chji̱a̱ni na̱xi̱ńdá Tiatira̱ xi botiñá ṉjño nda ṉjño tsjakon xi a̱sién koán ndyi̱ya'a, kui xta̱chjo̱ón 'niú kamábendikón Néná kó tsint'ié eén, kó Ndi̱a̱ná kats'én'inda ini̱ma̱a̱ tsi̱'e̱ nga asiénnijoo̱n én xí tsíchji̱a̱ Pabloo̱.
\v 15 Kó nga kastindá kui xta̱chjo̱ón ko̱jo xta̱ ngu̱i̱ya ndi'aa̱, jaskan 'niú tsí'ájne̱ nga bi katsó:
\p –Tsi jún xi bo̱a̱ 'míjnú nga ja̱koxi̱ nga an s'ijinna Ndi̱a̱ná, ndibá ni̱'ankja'yájnú ndi'ana.
\p Kó 'niú kats'énjne̱ nga ki̱a̱ ku̱i̱ndyionjne̱ ndi'aa̱.
\p
\v 16 Kó nga ndyi̱monguínjne̱ ndi̱ya nga ndyi̱monguín ndokjo̱a̱jne̱ Néná, ki̱a̱ kasakojne̱ ngo tsakjin xi ts'énxájo̱ ngo a̱sién ni̱xtjin xi kot'asoón xtaa̱, moso̱ kamá kui tsakji̱ín kó achichí to̱n kats'én ndi̱a̱a̱ nga askot'asón.
\v 17 Kó kui tsakji̱ín tji̱e̱nmá kijítji̱nguijne̱ ji̱n ko̱jo Pabloo̱ kó askandáyá ma nga bi katsó:
\p –¡Kui jmi̱i̱, Néná xi tikón ndi'ak'ajmi ján ndyi̱ts'enxájo kó kuí xí ndyi̱tsáyajnú ndi̱ya xi k'o̱xié'ájnú!
\p
\v 18 Kui tsakji̱ín kjín ni̱xtjin nga ta soboá bo̱a̱ katsó, ngaskande nga nguiti kichikjo̱a̱jiín Pabloo̱ kó kamáxtií kós'e̱ bi katsoó kui a̱sién ni̱xtjin xindajín xi tikónjii̱n kui tsakji̱ín:
\p –¡Ja'eén Jesukristoo̱ xi bo̱a̱ t'íxianñaa̱, nga kjo̱tje ji ngu̱i̱jin yojoo̱ kui tsakji̱ín!
\p Kó ti kji'a jatjo kui a̱sién ni̱xtjii̱n.
\p
\v 19 Tanga ndi̱a̱a̱ kui tsakji̱ín kamábe nga nguiti sa̱'ínjín ngase to̱n tangat'aa̱ nga sa̱'ínxá kui tsakji̱ín, kó katsoboá Pabloo̱ ko̱jo Silaa̱, kós'e̱ kijíjo̱ nguindyi̱ko̱n jáxaá, ki̱a̱ nínga tikón ndi̱tsen ndo̱bo̱a̱xa̱á,
\v 20 kó jachójo̱ nínga síndo ne ndo̱bo̱a̱xa̱á, s'e̱ bi katsó:
\p –Kui já judíoo̱ achichí ndyi̱ts'enxtí k'i̱e̱ na̱xi̱ńdáná,
\v 21 kó ndyi̱bokoyá kjo̱a̱xcha̱á ni xi tsjandiéjín kjo̱a̱kitii̱ nga ka̱ma si̱'án, nga̱t'a̱ nga na̱xi̱ńdá Roma̱ ndokjo̱a̱ ñá.
\p
\v 22 Kó bo̱a̱ ts'én xta̱ na̱xi̱ńdaá kondra̱ kijií kui jaá, kó já ne ndo̱bo̱a̱xa̱á katsjá kjo̱a̱ tsi̱'e̱ nga kachja'áxiín ṉjño xi ndyi̱yajá s'e̱ akjaa̱ ń'niú,
\v 23 kó nguije akja tsa̱nga̱ tsa̱ngaa̱, akja'ya ndo̱bo̱a̱ya, kó katse'eé kjo̱a̱ nda̱ xi konda ndo̱bo̱a̱ya̱á nga 'niú nda skondá,
\v 24 kui nda̱ xi katse'eé kjo̱a̱a̱, katsanguis'ien kui jaá ngaskande ngu̱i̱ya 'niuú ndo̱bo̱a̱ya̱á, s'e̱ ikít'a se Pabloo̱ ko̱jo Silaa̱ jó yá yi'i.
\p
\v 25 Tanga mején ma ra masien ni̱xtji̱e̱n, tji̱e̱nga Pabloo̱ ko̱jo Silaa̱ ndyi̱chji̱a̱a̱ ko̱jo ndyi̱siee̱ só xi ndaa̱ Néná, kó tji̱e̱nga já xi nijan síndojo̱ ngu̱i̱ya ndo̱bo̱a̱ya̱á ndyi̱nt'ie,
\v 26 ta niján ma kjindibá ngo kjo̱a̱ndikón 'niú xi ítsanieyá ngayeje xoó ndo̱bo̱a̱ya̱á, kó ti kji'a katjox'a ngayeje nga̱ntjo̱a̱a̱ ndo̱bo̱a̱ya̱á, kó ngayeje já xi ndyi̱a̱'niú ndo̱bo̱a̱ya̱á katjondó ń'niú ki̱cha̱ xi síndota'niúní.
\v 27 Kó nga ja'áa nda̱jun xi ts'énkonda ndo̱bo̱a̱ya̱á, kamábe nga je tji̱e̱ntixa̱ nga̱ntjo̱a̱a̱ ndo̱bo̱a̱ya̱á, kó ts'axié ki̱cha̱ xi kjit'aa̱, kó ti kuii̱ tjíts'énk'ién yojoo̱ katsaki, nga̱t'a̱ kats'énkjó nga je ra jatjo chejé já xi síndo'niú ndo̱bo̱a̱ya̱á.
\v 28 Tanga Pabloo̱ 'niú tsíchji̱a̱ nga bi katsó:
\p –¡Ngata̱ jmí ni ni'ínjíi̱n yojóo, nga̱t'a̱ k'i̱e̱ tindyionyejejne̱!
\p
\v 29 Kós'e̱ kui nda̱juu̱n ndo̱bo̱a̱ya̱á tsí'á ngo ndi'í xi kats'éntsijee̱n, s'e̱ ts'as'ien manga manga ngu̱i̱ya ndo̱bo̱a̱ya̱á, kó kjifotsié ma nga ts'éntsakjónní, s'e̱ asién tikoó kje̱n nínga síndo Pabloo̱ ko̱jo Silaa̱,
\v 30 kó ts'axié nga jó kui jaá ndo̱bo̱a̱ya̱á kós'e̱ bi katsó nga asíyaá:
\p –Jún bo̱a̱ já, ¿mí xi sa̱'in an tsi̱'e̱ nga kjo̱tjo'a an?
\p
\v 31 Kó kui jaá bi katsó:
\p –Ti'ins'ijin ji Ndi̱a̱ná Jesukristoo̱, kó kjo̱tjo'a ji ko̱jo xta̱ ngu̱i̱ya ndi'áa̱.
\p
\v 32 Kó kandokjo̱a̱jo eén Néná kui nda̱ xi konda ndo̱bo̱a̱ya̱á ko̱jo ngayeje xta̱ xi síndo ndi'aa̱.
\v 33 Kó kui nda̱a̱, ti kuii̱ chi̱bo̱a̱a̱ ni̱xtji̱e̱e̱n aniéjón nínga oo̱n Pabloo̱ ko̱jo Silaa̱, kós'e̱ kui ko̱jo ngayeje xta̱ ngu̱i̱ya ndi'aa̱ kastindá.
\v 34 S'e̱ jaskan kijíjo̱ ndi'aa̱ kós'e̱ katsjaá ni chinie, kó kui nda̱juu̱n ko̱jo xta̱ ngu̱i̱ya ndi'aa̱ achichí tsja kamaá nguije kis'ijii̱n Néná.
\p
\v 35 Nga kamánguindyiojón nga tajñó ngasee̱, já ne ndo̱bo̱a̱xa̱á katsanguiya jajún xi ko̱e̱je̱tsáyaá nda̱jun xi konda ndo̱bo̱a̱ya̱á tsi̱'e̱ nga k'o̱xié Pabloo̱ ko̱jo Silaa̱.
\v 36 Kó nda̱jun xi konda ndo̱bo̱a̱ya̱á bi katsoó Pabloo̱:
\p –Já ne ndo̱bo̱a̱xa̱á je katsjána kjo̱a̱ nga k'oxiéjnú'un, kó je ka̱ma xió konguínjnú.
\p
\v 37 Tanga Pabloo̱ bi katsoó jajuún:
\p –Ji̱n xi já Roma̱ ji̱n, ik'iéjne̱ ko̱jo akjajne̱ nguindyi̱ko̱n xta̱ na̱xi̱ńdaá ngu̱i̱ndiee̱ nga k'uiyájne̱ mí jé xi kini'ánjne̱, kós'e̱ kananguis'ienjne̱ ndo̱bo̱a̱ya, ¿a kó ngot'e̱ 'ne̱ mejeén já ne ndo̱bo̱a̱xa̱á nga k'o̱xié'májne̱? ¡Tanga jmí! Kui ngatjandiba k'axié soboájne̱.
\p
\v 38 Kó jajuún kijíts'enkint'ié já ne ndo̱bo̱a̱xa̱á kui nii̱, kós'e̱ achichí katsakjónní nguije tsint'ié nga na̱xi̱ńdá Roma̱ chji̱a̱ni kui jaá.
\v 39 S'e̱ já ne ndo̱bo̱a̱xa̱á ts'axié ndo̱bo̱a̱ya̱á kui jaá kó 'niú tsí'áa̱ tsi̱'e̱ nga kjo̱tjo ngu̱i̱jii̱n na̱xi̱ńdaá.
\v 40 Kó nguije jatjo ndo̱bo̱a̱ya Pabloo̱ ko̱jo Silaa̱ kijí ndi'aa̱ kui xta̱chjo̱ón xi 'mí na̱ Lidiaa̱, kós'e̱ nguije kamábe já ṉts'iee̱ katsjá nga'niuú, s'e̱ jatjo kui ngu̱i̱ndiee̱.
\c 17
\s Bi kamáta'in Pabloo̱ na̱xi̱ńdá Tesalónika̱
\p
\v 1 Kó nguije ja'a Pabloo̱ ko̱jo Silaa̱ na̱xi̱ńdá xi 'mí Anfípoli̱ ko̱jo Apolonia̱, jachó na̱xi̱ńdá Tesalónika̱, nínga xta̱ judíoo̱ kis'ijñaa̱ ngo ndi'a nínga ndokjo̱a̱ eén Néná.
\v 2 Kó Pabloo̱ xikó ts'én ngaá, nga xki̱ ni̱xtjin ndikón fí ndi'a nínga ndokjo̱a̱ eén Néná, ján ni̱xtjin ndikón kijí síkijí nínga askjotíjo̱ xta̱ judíoo̱ xikó tsó xo̱jo̱n eén Néná,
\v 3 nínga katsáyaá kui xtaa̱ nga Kristoo̱ chjiénga takó ko̱ya, kós'e̱ kjo̱a̱'á'yá nguinií ngu̱i̱jii̱n xta̱ xi jesoón, kó bi katsoó:
\p –Ti kuíni Kjiso̱ xi ts'én'bini̱jmijnú'un xi Kristoo̱.
\p
\v 4 Kó tjín xta̱ judío̱ xi kis'ijii̱n kó nijan kamájo̱ Pabloo̱ ko̱jo Silaa̱, kó ti bo̱a̱ ti ts'én kjín xta̱ griego̱ xi kamábendikón Néná ko̱jo achichí ínchjín xi 'niú ya kui ngu̱i̱ndiee̱.
\v 5 Tanga tangat'anii̱ kui ni xi kamaá nga xta̱ judío̱ xi s'ijinjiín Néná achichí kamáchi̱ni̱, kó ítikó já xi ch'okon máa̱ yojoo̱ xi taxá 'bítso̱maya ndi̱yatié tsi̱'e̱ nga kis'ie kjo̱a̱se ko̱jo kjo̱a̱ch'o kji'i na̱xi̱ńdaá, kó kui jaá ts'as'iennié ndi'aa̱ nda̱ xi 'mí Jasoo̱n nga tsangase Pabloo̱ ko̱jo Silaa̱, tsi̱'e̱ nga k'o̱xié ko̱jo sa̱'ínk'as'iee̱n xta̱ na̱xi̱ńdaá,
\v 6 tanga nga kasakojiín Pabloo̱ ko̱jo Silaa̱ kui ngu̱i̱ya ndi'aa̱, ta kuí nda̱ xi 'mí Jasoo̱n ko̱jo ngui chiboa já ṉts'ie xi iskjifé iskjíṉña nga kijíjo̱ nguindyi̱ko̱n xta̱xá xi chji̱a̱ni kui na̱xi̱ńdaá, kó bi katsó kui jaá nga askandáyá:
\p –¡Kuí já bí xi ndyits'enkjátsón ngayeje són nga̱sondiee̱, kó ti je je'e k'i̱e̱e̱ nga,
\v 7 kó kui nda̱ xi 'mí Jasoo̱n katsjandieé nga kats'énk'as'ien ndi'aa̱! ¡Ngayeje kui jaá nga ndyi̱foa'atjé kjo̱a̱botíxomaa̱ nda̱ xtitjón xi 'mí Sesaa̱, nga̱t'a̱ bo̱a̱ ndyi̱tsó nga ndyi̱chji̱a̱, nga tikón xó ingo nda̱ re xi 'mí Kjiso̱!
\p
\v 8 Kó nga tsint'ié kuí nii̱ xta̱ na̱xi̱ńdaá ko̱jo jáxaá 'niú ngase kamákjaán,
\v 9 tanga nda̱ xi 'mí Jasoo̱n ko̱jo já xí ngasee̱ ngo to̱n íchjí xi íjñangui yojoo̱, kós'e̱ kini'ánkjíndé.
\s Bi kats'én Pabloo̱ ko̱jo Silaa̱ na̱xi̱ńdá Berea̱
\p
\v 10 Kó ti kji'a, nguije kamájñoó, já ṉts'ie xi síndo kui na̱xi̱ńdaá kats'énkjí Pabloo̱ ko̱jo Silaa̱ ki̱a̱ na̱xi̱ńdá Berea̱, kó nguije jachó kui jaá kijí ki̱a̱ ndi'a nínga chji̱a̱ eén Néná xta̱ judíoo̱,
\v 11 kó kui xta̱ judíoo̱ nda ngase xta̱ ta bo̱a̱jínnii̱ xi síndo na̱xi̱ńdá Tesalónika̱, nga̱t'a̱ achichí tsja kamaá nga tsint'ieé eén Néná, kó ndyiojón ndyiojón iskjít'oyá xo̱jo̱n eén Néná kui já judíoo̱ ta tsi̱'e̱ nga sku̱i̱e̱ tsi kjeén nga ja̱koxi̱ én xi tjí'míyaá.
\v 12 Kó bo̱a̱ ts'én achichí kjín ma kui xtaa̱ xi kis'ijii̱n, kó ti bo̱a̱ ti ts'én kjín ma xta̱ griego̱ xi bo̱a̱ ti ts'én kis'ijii̱n nga, xi ínchjín ko̱jo xi xi̱'in xi 'niú ya kui na̱xi̱ńdaá.
\v 13 Tanga nguije kamábe xta̱ judío̱ xi chji̱a̱ni na̱xi̱ńdá Tesalónika̱ nga Pabloo̱ ko̱jo ki̱a̱ íni̱jmi eén Néná na̱xi̱ńdá Berea̱, kijí kui nangui ján kó ti bo̱a̱ ti ts'én kats'énse ko̱jo indyiátsabeé xta̱ kjiín.
\v 14 Kuíni nga já ṉts'ie xi chji̱a̱ni kui ngu̱i̱ndiee̱ tji̱e̱nmá katsáyaá Pabloo̱ tsi̱'e̱ nga tsá ko̱e̱je̱ nínga tikónt'a ndáchíkoón, tji̱e̱nga Silaa̱ ko̱jo Timoo̱ takó kis'iṉdo na̱xi̱ńdá Berea̱.
\v 15 Kó kui xta̱ xi nijan tso'bájo̱ Pabloo̱ kijíjo̱ ngaskande na̱xi̱ńdá Atena̱, tanga Pabloo̱ katsjaá kjo̱a̱ kui jaá nga ko̱e̱je̱'oyá nguiní na̱xi̱ńdá Berea̱ kó nga ko̱tso̱yaa̱ Silaa̱ ko̱jo Timoo̱ nga tsá ko̱e̱je̱ na̱xi̱ńdá Atena̱.
\s Bi kats'én Pabloo̱ nga kis'ijña na̱xi̱ńdá Atena̱
\p
\v 16 Tji̱e̱nga Pabloo̱ ts'énkoyaa̱ Silaa̱ ko̱jo Timoo̱ ki̱a̱ na̱xi̱ńdá Atena̱, Pabloo̱ achichí kamáxtií nga̱t'a̱ kui xta̱ na̱xi̱ńdaá achichí a̱sie̱én ngo ne xi ts'énda xtaa̱ kats'éndikón.
\v 17 Kó kuíni nga askjotíjo̱ já judíoo̱ ko̱jo kje̱'e xta̱ xi bendikón Néná ki̱a̱ ndi'a nínga ndokjo̱a̱ eén Néná, kó bo̱a̱ ts'én ndyiojón ndyiojón fotí ki̱a̱ ndi̱tsen nínga matikó xta̱ na̱xi̱ńdaá.
\v 18 Kó tjín xta̱ xi kjínkón xi 'mí filósofo̱ xi iskjít'oyá ni xi akóyá já xi 'mí Epikúreo̱, ko̱jo xi iskjít'oyá ni xi akóyá já xi 'mí estoiko̱ xi íts'i̱yanii̱ nga askjotíjo̱ Pabloo̱, kó tjín xi bi katsó:
\p –¿Mí ni xi ts'énchji̱a̱ kui nda̱ xi tá se chji̱a̱a̱?
\p Kó kje̱'e xi bi katsó:
\p –Ma raá tsi kui nda̱a̱ xi ts'én'bini̱jmi kjo̱a̱a̱ Ne xi tja̱tsi̱e̱.
\p Kui nii̱ xi katsó kui jaá nga̱t'a̱ nga Pabloo̱ íni̱jmi éntjatsi̱e̱e̱ Kjisoo̱ ko̱jo kjo̱a̱a̱ nga ja'á'yá nguinií.
\v 19 Kó tsanguínjo̱ Pabloo̱ nínga síndo jáxá xi 'niú nk'a xaá xi botixómaá na̱xi̱ńdá Atena̱, kó bi ts'én asíyá kui jaá:
\p –¿A ka̱ma xcha̱jne̱ mí ni tja̱tsi̱e̱ xi kjoé'e̱kakoyéjne̱?
\v 20 Nga̱t'a̱ ni tja̱tsi̱e̱ ko̱jo ni xi makjínjínjne̱ xi tindokjo̱e̱jejne̱ kó mejénjne̱ xcha̱jne̱ mí ni xi tsó kui nii̱.
\p
\v 21 Nga̱t'a̱ ngayeje xta̱ xi chji̱a̱ni na̱xi̱ńdá Atena̱ ko̱jo xta̱ xi ki̱a̱jín chji̱a̱ni, xi kis'iṉdo kui ngu̱i̱ndiee̱, ta soboá ni tja̱tsi̱e̱ xi s'e̱ kjima xi kamámejeén tsint'ié.
\p
\v 22 Kó Pabloo̱ tji̱e̱nmá jastjíe̱n ngu̱i̱jii̱n xta̱xá xi chji̱a̱ni na̱xi̱ńdá Atena̱, kó bi katsoó:
\p –Jún bo̱a̱ já xi chji̱a̱ni Atena̱, je kamákjínna nga jún kjén nga ta yandíkónjnú ne xi síndojnú.
\v 23 Nga̱t'a̱ nga ts'énkotsijen an ngu̱i̱ndiejnú nínga ni'ándikónjnú nejnú, ts'énbé an ngo ṉcha̱n ndikón xi bi tsó én xi kjit'aa̱: “Tsi̱'e̱ ngo Ne xi nde yajín.” Ja̱ nda kji'i, kui ni xi yajínjnú kó ndyi̱ni'ándikónjnú, kjo̱a̱a̱ kui boá kui ni xi kjoé'e̱k'ini̱jmijnú'un.
\p
\v 24 Kui Ne xi kats'énda nga̱sondiee̱ ko̱jo ngayeje ni xi tjiín, kui xi Ndi̱a̱a̱ ndi'ak'ajmii̱ ko̱jo t'ananguii̱, ki̱a̱jín tikón ngu̱i̱ya ndi'a na̱ngo̱xi̱ xi kats'énda xtaa̱,
\v 25 ti nde tsja xtaa̱ chjiénjiín nga sa̱'ínseén, xikoó tsi ngo ni chjieén, nga̱t'a̱ kuí xí Néná xi tsjáná ngayeje kjo̱a̱mindyion ko̱jo tjo̱ xi ndyi̱jnájén, ko̱jo ngayeje nii̱.
\p
\v 26 Kó ta ngo xta̱ xi ngo jín ngo yojo kats'énkjínni ngayeje xta̱ na̱xi̱ńdaá, tsi̱'e̱ nga k'uíndo ngayeje són t'ananguii̱, kó bo̱a̱ ts'én katsjaá chi̱bo̱a̱ mí ni̱xtjin kó ñá ngu̱i̱ndie nínga k'uíndo,
\v 27 tsi̱'e̱ nga ko̱ngase Néná, kó tsi ta'a sa̱'ínjo̱ nga sa̱ko̱ó, nda tsi nga ja̱koxi̱ nde kjinjín tikónná Néná nga ngo nga ngo ñá.
\v 28 Nga̱t'a̱ tangat'anií Néná nga tindyión, ko̱jo nga ndyi̱ni'ántíyá, ko̱jo xikó katsó xta̱ chji̱ni̱e̱jnú xi kats'éndaya eén nga bi katsó: “Ñá boá xi xta̱ tji̱e̱e̱ Néná.”
\v 29 Kó ja̱ kuíni tsi xta̱ tji̱e̱e̱ Néná ñá, ka̱majín bo̱a̱ ts'én si̱'ankjó nga Néná xikoó tsi ngo a̱sién xi to̱nsinié, xi to̱ntiboa, ko̱jo tsi ndi̱jo̱ xi xta̱ kats'énda xikó ts'én makjiín.
\v 30 Kuíni nga Néná kats'énjetakoón kje̱'e ni̱xtjin ngayeje kjo̱a̱jñótokoó xtaa̱, tanga ngot'e̱ 'ne̱ tajñá ngu̱i̱ndiení ts'énbotixómáná tsi̱'e̱ nga si̱'ank'oyá yojoná kó xcha̱ndíkón kui,
\v 31 nga̱t'a̱ nga Néná je ja'ájin ngo ni̱xtjin nga kixi̱ ts'én ko̱tíjeé xtaa̱ kui nga̱sondiee̱, kó je ja'ájin ngo nda̱ xi sa̱'ín kui nii̱, kó je íjñá chi̱bo̱a̱ná ngayeje ñá, kji'a nga kats'énkja'á'yaá ngu̱i̱jii̱n xta̱ xi je jesoón.
\p
\v 32 Kó nga tsint'ié kui xtaa̱ nga foa'á'yaá xta̱ xi fesoón, tjín xi tsajnókie Pabloo̱, kó kje̱'e xi bi katsó:
\p –Tasá kje̱'e ni̱xtjin ko̱nda'yá nguiní ji̱n kjo̱a̱a̱ ni xi t'íse.
\p
\v 33 Kó bo̱a̱ ts'én Pabloo̱ ja'ajin masien masiee̱n kui jaá.
\v 34 Tanga tjín xi kis'ijii̱n kó kijítji̱nguii̱, ngu̱i̱jii̱n kui jaá ki̱a̱ tso'bájo̱ kui nda̱ xi 'mí Nisioo̱ ngo nda̱ xi ti tjiín xá na̱xi̱ńdá Atena̱, ko̱jo ngo xta̱chjón xi 'mí na̱ Dámari̱ ko̱jo kjín ngase xta̱.
\c 18
\s Bi ts'én kis'ijña Pabloo̱ na̱xi̱ńdá Korinto̱
\p
\v 1 Jaskan nguije kamá kui nii̱, Pabloo̱ jatjo na̱xi̱ńdá Atena̱ s'e̱ kijí na̱xi̱ńdá Korinto̱.
\v 2 Kó ki̱a̱ kasakoo̱ ngo nda̱ judío̱ xi 'mí Akila̱, xi chji̱a̱ni nangui Ponto̱, ngu̱i̱chí ngu̱i̱ndie ni̱xtjin, Akilaa̱ ko̱jo chjo̱ón xi 'mí na̱ Prisilaa̱ nangui Italia̱ kjindibáni, nínga jatjo, nga̱t'a̱ nda̱ xi atíxomaa̱ Roma̱ xi 'mí Klaudioo̱ katsjá kjo̱a̱ nga ka'naxié ngayeje xta̱ judío̱ xi síndo na̱xi̱ńdá Roma̱, kó Pabloo̱ kijíkoón kui xtaa̱,
\v 3 kó nga ti kuíni xá kats'én kui jaá, nga kats'énda ndi'aṉjño ndichjon, ki̱a̱ kis'ijñajo̱ tsi̱'e̱ nga nijan kats'énxájo̱ kui jaá.
\v 4 Kó xki̱ ni̱xtjin ndikón Pabloo̱ fí ki̱a̱ ngu̱i̱ya ndi'a nínga ndokjo̱a̱ eén Néná, nínga tsíchji̱a̱jo ko̱jo kats'én'indakon tsi̱'e̱ nga s'i̱jii̱n eén Néná xta̱ xi judío̱ ko̱jo xi griego̱.
\p
\v 5 Kó nga jachó Silaa̱ ko̱jo Timoo̱ nga kjindibáni nangui Masedonia̱, Pabloo̱ ta kui xá kats'én nga íni̱jmi eén Néná ko̱jo nga akoó xta̱ judíoo̱ nga ja̱koxi̱ nga Kjisoo̱ boá xi Kristoo̱.
\v 6 Tanga kui xtaa̱ ta kje̱'e ts'én kats'énkjó, kós'e̱ ch'o katsó, s'e̱ Pabloo̱ ítsanie xa̱a̱ ṉjñoo̱ nga akó nga ch'o kamaá ni xi ki'mií, kó bi katsoó:
\p –Ti júnní ndyi̱mindyijnúu̱ jé yojojnú nga xcha̱jajnú, ánjín kónna ni xi ka̱majnú, nga̱t'a̱ tsjie an, ngot'e̱ 'ne̱ tasá xta̱ xi judío̱jín xi kjuinkóo̱n.
\p
\v 7 Kó jatjo Pabloo̱ ki̱a̱ ndi'a nínga ndokjo̱a̱ eén Néná, kós'e̱ kijí ndi'aa̱ ngo nda̱ xi 'mí Tisio Justo̱, xi achichí kamábendikón Néná, xi tikón tiña t'a ndi'a nínga ndokjo̱a̱ eén Néná.
\v 8 Kó kui nda̱ xi 'mí Krispoo̱, xi nguito̱ko̱o̱ ndi'a nínga ndokjo̱a̱ eén Néná, ko̱jo xta̱ ngu̱i̱ya ndi'aa̱ kis'ijii̱n Ndi̱a̱ná, kó ti bo̱a̱ ti ts'én kjín ma xta̱ xi chji̱a̱ni na̱xi̱ńdá Korinto̱ xi nguije tsint'ieé Pabloo̱ kis'ijii̱n kós'e̱ kastindá.
\v 9 Kó ngo ni̱xtji̱e̱n, Ndi̱a̱ná bi katsoó Pabloo̱ nga akoó ngo ni:
\p –Ngata̱ ndakinjín ma ji, takó ndokjoé ra ji énna kó ngata̱ fokjejín ndso̱'boe,
\v 10 nga̱t'a̱ an tso'bájoo̱ kó jmíjín xi kó sa̱'ínjoo̱, nga̱t'a̱ achichí je kjín ma xta̱ xi je tsa'a̱n xi síndo kui na̱xi̱ńdaá.
\p
\v 11 Kó bo̱a̱ ts'én Pabloo̱ ngo nó ko̱jo jun sá kamaá nga kis'ijña na̱xi̱ńdá Korinto̱, nga akóyaá kui xtaa̱ eén Néná.
\p
\v 12 Tanga kui ni̱xtjin ján nga kamá xtitjoón nangui Akaya̱ nda̱ xi 'mí Galioo̱n, xta̱ judíoo̱ kamátikó xtín nga kijií kondra̱ Pabloo̱, kós'e̱ kijíjo̱ ngu̱i̱ndie nínga botíjeé,
\v 13 kó bi katsoó nda̱ xtitjoón:
\p –Kui nda̱a̱ ta kui xá tso'bání nga tjíts'én indakon xtaa̱ tsi̱'e̱ nga sku̱i̱e̱ndíkón Néná, tanga jmí tsi xikó tjítsó kjo̱a̱kitii̱.
\p
\v 14 Ta s'e̱ tsi ku̱i̱chji̱a̱ Pabloo̱ katsaki nga tji̱e̱nmá kui nda̱ xi 'mí Galioo̱n bi katsoó xta̱ judíoo̱:
\p –Tsi kjo̱a̱a̱ ngo jé ko̱jo tsi kjo̱a̱a̱ nga ngo xta̱ kini'ánk'ién, an ka̱ma ra kuint'iejnú'un jún xi judío̱jnú,
\v 15 tanga tsi ta kjo̱a̱a̱ nga ta én tsi, ko̱jo kjo̱a̱a̱ ja'én, ko̱jo tsi kjo̱a̱a̱ kjo̱a̱kiti tsa̱jún, tasá ti juún ti'andajin so̱bo̱a̱jnú, nga̱t'a̱ mejénjínna nga an skongajin an kjo̱a̱a̱ kui nii̱.
\p
\v 16 Kó xtitjoón tsangatji̱nguii̱ kui xtaa̱ ki̱a̱ ngu̱i̱ndie nínga botíjeé.
\v 17 Kós'e̱ katsoboá xtín kui xta̱ judíoo̱ nda̱ xi 'mí Sóstenee̱, nguito̱ko̱o̱ ndi'a nínga ndokjo̱a̱ eén Néná, s'e̱ ik'ieé ki̱a̱ kje̱n ngu̱i̱ndie nínga ni'ánjeé, tanga nda̱ xtitjón xi 'mí Galioo̱n nde nguiti ki̱a̱jín kats'énseén kui nii̱.
\p
\v 18 Kó achichí kjín ni̱xtjin kamá ngasee̱ Pabloo̱ nga kis'ijña na̱xi̱ńdá Korinto̱. S'e̱ jaskan nguije kats'énkixot'a já ṉts'iee̱, nijan kijíjo̱ na̱ Prisilaa̱ ko̱jo Akilaa̱ nga kijíya ngo tjotso je nga kijí nangui Siria̱, kó ki̱a̱ na̱xi̱ńdá Senkrea̱ nga tikón ngase Pabloo̱, nguindiee̱ nga ko̱e̱je̱, íjón taka takaa̱ to̱ko̱, tsi̱'e̱ nga kats'énkjatjosón ngo ni xi je tsíchji̱a̱tjón nga sa̱'ín.
\v 19 Kó nguije jachó na̱xi̱ńdá Éfeso̱, Pabloo̱ ki̱a̱ índo na̱ Prisilaa̱ ko̱jo Akilaa̱, s'e̱ kijí ndi'a nínga ndokjo̱a̱ eén Néná nínga askjotíjo̱ xta̱ judío̱ xi ki̱a̱ kamátikó kui ngu̱i̱ndiee̱.
\v 20 Kó kui xtaa̱ 'niú tsí'aá Pabloo̱ tsi̱'e̱ nga kjín ngase ni̱xtjin ka̱maa̱ nga nijan k'uíndojo̱, tanga kamájo̱'ójiín,
\v 21 tasá kats'énkixot'a kui jaá, kós'e̱ bi katsó ngasee̱:
\p –Tsi ta'a Néná xi bo̱a̱ tsó, kjoé'e̱katsijén nguiníjnú'un ingo ndi̱ya.
\p S'e̱ jatjoni na̱xi̱ńdá Éfeso̱ Pabloo̱ nga kijíya ngo tjotso je,
\v 22 kó nguije jachó na̱xi̱ńdá Sesarea̱, kijí na̱xi̱ńdá Jerusale̱n nínga kijí ts'en tínde xta̱ na̱ngo̱xi̱i̱, s'e̱ jaskan kijí xtji̱e̱e̱n na̱xi̱ńdá Antiokía̱.
\v 23 Kó nguije ja'a ni̱xtjin, Pabloo̱ kijí kó kistso'bá nguiní ingo ndi̱ya nga ngo nga ngo ngu̱i̱ndie xi chji̱a̱ni nangui Galasia̱ ko̱jo Frijia̱, nínga katsjá nga'niuú ngayeje xta̱ xi tsi̱'e̱ Néná.
\s Apoloo̱ bi ts'én katsáyá eén Néná na̱xi̱ńdá Éfeso̱
\p
\v 24 Kui ni̱xtjin ján jachó na̱xi̱ńdá Éfeso̱ ngo nda̱ judío̱ xi 'mí Apolo̱ xi chji̱a̱ni na̱xi̱ńdá Alejandría̱, ngo nda̱ kjínkón xi tanisién 'niú kamábe xo̱jo̱n eén Néná.
\v 25 Kuí nda̱a̱ xi akakoyaá kjo̱a̱a̱ ndi̱ya̱á Ndi̱a̱ná Kjisoo̱, kó kis'iee̱ ngo a̱sién ni̱xtjin xi achichí tsjats'én tsíchji̱a̱ nga nda akóyá cha̱n cha̱n kjo̱a̱a̱ Ndi̱a̱a̱, nda tsi ta kuí tsi kjo̱a̱botíndaá Juaa̱ xi kamábe,
\v 26 kó kui nda̱a̱ jmíjín xi katsakjónní nga tsíchji̱a̱ ki̱a̱ ndi'a nínga ndokjo̱a̱ eén Néná, tanga nga tsint'ieé na̱ Prisilaa̱ ko̱jo Akilaa̱, kijíjo̱ t'axín kós'e̱ katsáyá nda ndaa̱ kjo̱a̱a̱ ndi̱ya̱á Néná.
\v 27 Kó kui nda̱a̱ kamámejeén ja'a nangui Akaya̱, kó já ṉts'iee̱ katsjaá nga'niú kó kats'éndaa̱ ngo xo̱jo̱n xta̱ xi s'ijii̱n Kjisoo̱ xi síndo kui nangui ján, tsi̱'e̱ nga nda ts'én sa̱'ínseén Apoloo̱, nguije jachó nangui Akaya̱ 'niú asíko̱jo ngayeje xtaa̱ kui xi tangat'anii̱ kjo̱a̱ndaa̱ Néná nga je kis'ijii̱n.
\v 28 Apoloo̱ 'niú tsíchji̱a̱jo já judíoo̱ xi kis'ijinjiín Kjisoo̱ kó ki̱a̱ iskjíbénií xo̱jo̱n eén Néná nga akoó nga ja̱koxi̱ nga Kjisoo̱ xi Kristoo̱.
\c 19
\s Bi ts'én kis'ijña Pabloo̱ na̱xi̱ńdá Éfeso̱
\p
\v 1 Kó tji̱e̱nga nga nda̱ xi 'mí Apoloo̱ kis'ijña na̱xi̱ńdá Korinto̱, Pabloo̱ ja'ajin na̱xii̱ s'e̱ jachó nguiní ngaskande na̱xi̱ńdá Éfeso̱, nínga kasakoo̱ kjín xta̱ xi je s'ijii̱n Kjisoo̱,
\v 2 xi bi katsoó nga asíyaá:
\p –¿A kis'ijñajinjnú jún A̱sién Ni̱xtjii̱n Néná kji'a nguije kis'ijinjnú eén Néná?
\p Kó kui xtaa̱ bi katsó:
\p –Nde kji̱e̱ chií nda'yájne̱ kjo̱a̱a̱ A̱sién Ni̱xtjii̱n Néná.
\p
\v 3 Kós'e̱ Pabloo̱ bi katsó:
\p –¿Kó mí kjo̱a̱botíndá xi katse'éjnú?
\p Kó bi katsó kui xtaa̱:
\p –Kjo̱a̱a̱ xikó ts'én atíndá Juaa̱ boá.
\p
\v 4 S'e̱ bi katsoó Pabloo̱:
\p –Jo̱o̱n, Juaa̱ atíndá ngayeje xta̱ xi kats'énk'oyá yojoo̱, kó katsáyaá kui xtaa̱ nga sa̱'íns'ijin xi jaskan kji̱ndi̱bákoón kui, kó kuí Kjisoo̱ xi'ba̱.
\p
\v 5 Kó nguije tsint'ié kui nii̱, tji̱e̱nmá kastindá yejeni ja'eén Ndi̱a̱ná Kjisoo̱.
\v 6 Kó nguije Pabloo̱ íjñasoón tsja, ti bo̱a̱ ti ts'én kjindibánié A̱sién Ni̱xtjii̱n Néná, kós'e̱ tsíchji̱a̱ tji̱'ni̱u̱ én xi makjínjínná, kó tsíchji̱a̱ xikoó chji̱ni̱e̱'e̱én Néná.
\v 7 Ma ra tsi ta tiejó já xi̱'in xi síndojii̱n ngayeje kui xtaa̱.
\p
\v 8 Kó Pabloo̱ ján sá kamaá nga kijí ki̱a̱ ndi'a nínga ndokjo̱a̱ eén Néná, nínga jmí ndikón kis'iejiín nga tsíchji̱a̱ eén Néná, kó tsíchji̱a̱jo ko̱jo kats'én'indakon ngayeje xtaa̱ kjo̱a̱a̱ xikó ts'én botixómá Néná.
\v 9 Tanga tjín xta̱ xi tangat'anii̱ kjo̱a̱kitikjo̱a̱a̱ nga kis'ijinjiín én xi kandokjo̱a̱jo, kó ch'o ts'én tsíchji̱a̱ nguindyi̱ko̱n xtaa̱ kjo̱a̱a̱ ndi̱ya tja̱tsi̱e̱e̱, tanga Pabloo̱ ts'axié t'axín yojoo̱ kó kijíjo̱ ngayeje xta̱ na̱ngo̱xi̱i̱ ki̱a̱ na̱xko̱ya̱á kui nda̱ xi 'mí Tiranoo̱, nínga ndyiojón ndyiojón akóyá kui eén.
\v 10 Kó jó nó kamaá nga ta kui xá kats'én, kó kuíni nga bo̱a̱ ts'én ngayeje xta̱ xi síndo nangui Asia̱ xi judío̱ ko̱jo xi griego̱ tsint'ié eén Ndi̱a̱ná Kjisoo̱.
\v 11 Kó Néná achichí kjo̱a̱ndikón kats'én ngu̱i̱ya tsja Pabloo̱,
\v 12 ngaskande poñoo̱ ko̱jo ṉjño xi kats'énkjién Pabloo̱ tsanguínjoo̱ ngayeje xta̱ xi oo̱n, kó kamándaya ngayeje chi'in xi koo̱n, kó bo̱a̱ ti ts'én a̱sién ni̱xtjin xi ndajín xi kis'iṉdojii̱n yojoo̱ xtaa̱ jatjo.
\p
\v 13 Tanga tjín xta̱ judío̱ xi kis'iṉtso̱maya ndi̱yatié ján xi ts'axié a̱sién ni̱xtjin xi ndajín xi tjíjii̱n ngu̱i̱jin yojoo̱ xtaa̱, kó kamámejeén kats'énkjién ja'eén Ndi̱a̱ Kjisoo̱, kó bi katsoó kui a̱sién ni̱xtjii̱n:
\p –¡Ja'eén Ndi̱a̱ná Kjisoo̱ xi íni̱jmi Pabloo̱, an xí ts'énchji̱a̱jojnú'un nga tji̱taxi̱e̱jinjnú ngu̱i̱jin yojoo̱ xtaa̱!
\p
\v 14 Kui nii̱ xi kats'én nga yito ndií ngo nda̱ judío̱ xi 'mí Eseba̱, kui xi nguito̱ko̱o̱ chiná'mi kamá ma ra.
\v 15 Tanga kui a̱sién ni̱xtjin xi ndajiín bi katsoó nga tsíchji̱a̱:
\p –Be an Kjisoo̱, kó ti be an 'yání Pabloo̱, tanga jún, ¿'yání jún?
\p
\v 16 Kó kui nda̱ xi tjíjii̱n ngu̱i̱jin yojoo̱ kui a̱sién ni̱xtjin xi ndajiín kjíts'uieé kui jaá, kó nga tanisién tsie nga'niú tjiín, kats'eén kui jaá, 'niú askjanjo̱ kós'e̱ kui jaá tsanga kji'ixtí nguije kini'án'oón.
\v 17 Kó ngayeje xta̱ xi síndo na̱xi̱ńdá Éfeso̱ xi judío̱ ko̱jo xi griego̱, nguije tsint'ié kui nii̱, achichí katsakjónní, kó bo̱a̱ ts'én 'niú kamáya ngase ja'eén Ndi̱a̱ Kjisoo̱.
\p
\v 18 Kó achichí kjín ma xta̱ xi je kis'ijii̱n eén Néná xi katsáyá nguindyi̱ko̱n na̱xi̱ńdaá ngayeje ni xi ndajín kji'i xi kats'én ngas'e̱.
\v 19 Kó ti bo̱a̱ ti ts'én kjín ma xta̱ xi iskjít'oyá kjo̱a̱tji'e xi jachójo̱ xo̱jo̱n xi kats'énkjién kó nguindyi̱ko̱n xta̱ na̱xi̱ńdaá ítí ngayeje kui xo̱jo̱o̱n. Nga kichisoón kótjín to̱n tjínnií kui xo̱jo̱o̱n, tjín raá tsi ta ichítié mi̱ to̱ntiboa.
\v 20 Kó bo̱a̱ ts'én eén Néná sa kjimatsie sa kjimatsie ngase, kó kjimaya nga'niuú.
\p
\v 21 Kó nguije jatjosón kui nii̱, Pabloo̱ kamámejeén kijí na̱xi̱ńdá Jerusale̱n nga ja'a nangui Masedonia̱ ko̱jo Akaya̱, kó bo̱a̱ katsó nga jaskan nguije kijí na̱xi̱ńdá Jerusale̱n ko̱e̱je̱ na̱xi̱ńdá Roma̱.
\v 22 Kó katsanguiya nangui Masedonia̱ jó já xi bosikójo, kui xi 'mí Timoo̱ ko̱jo Erastoo̱, tji̱e̱nga Pabloo̱ kjín ni̱xtjin kamá ngasee̱ nga kis'ijña nangui Asia̱.
\s Bi ts'én kis'ie kjo̱a̱xti na̱xi̱ńdá Éfeso̱
\p
\v 23 Kui ni̱xtjin ján kis'ie na̱xi̱ńdá Éfeso̱ ngo kjo̱a̱xti tsie kjo̱a̱a̱ ndi̱ya tja̱tsi̱e̱e̱.
\v 24 Nga̱t'a̱ ngo nda̱ xi 'mí Demetrio̱ xi kats'énda ni to̱ntiboa xi ja̱ kon na̱ngo̱xi̱i̱ na̱ ne Artemisaa̱ kon, kó achichí to̱n kats'én já xi kats'énxájo̱ kui nda̱a̱,
\v 25 kó kui Demetrioo̱ ítikó já xi ti kuii̱ xá ts'én, kó bi katsoó:
\p –Jún bo̱a̱ já, ja̱ je yajnú nga tsi̱'e̱ nga nda ku̱i̱ndyión, kui xáná xi ts'éntsjáná to̱n,
\v 26 kó je yajnú, kó je nda'yájnú nga kui nda̱ xi 'mí Pabloo̱ jmí tsi ta Éfeso̱ tsi nga ts'énchji̱a̱, mején ngayeje nangui Asia̱ nga je akjángá achichí kjín xta̱ nga bo̱a̱ katsoó nga kui xó ne xi ts'énda xtaa̱, nénájín xó boá.
\v 27 Kó kjén nga ta ndikón kji'i kui én xi ts'énchji̱a̱ kui nda̱a̱, nga̱t'a̱ xáná ka̱marií nguindie ján ko̱e̱je̱, kó ti bo̱a̱ ti kji'inii̱ na̱ngo̱xi̱i̱ na̱ ne Artemisaa̱ ka̱marií nga nguiti 'niújín xcha̱ ja'eén, kó bo̱a̱ ts'én ka̱ma ch'o ngayeje nga'niuú kui na̱ ne xi ni'ándikón ngayeje nangui Asia̱ ko̱jo mején ngayeje nga̱sondiee̱.
\p
\v 28 Nguije tsint'ié kui nii̱, achichí kats'énxchán xta̱ na̱xi̱ńdaá, kó askandáyá ma nga bi katsó:
\p –¡Tsie ngatamaa̱ Artemisaa̱, na̱ nee̱ xta̱ xi chji̱a̱ni na̱xi̱ńdá Éfeso̱!
\p
\v 29 Kó ngayeje xta̱ na̱xi̱ńdaá nga nde nguiti kamábejín mí xi sa̱'ín kui xtaa̱, kó bo̱a̱ ts'én kui xtaa̱ kjíts'uieé nda̱ xi 'mí Gayoo̱ ko̱jo Aristarkoo̱, kui xi já xi chji̱a̱ni nangui Masedonia̱ xi nijan kijíjo̱ Pabloo̱, kó kachjafé kui jaá ngaskande ngu̱i̱ndie nínga matikó xtaa̱.
\v 30 Kó Pabloo̱ kamámejeén ts'as'ienjii̱n xtaa̱, tsi̱'e̱ nga ku̱i̱chji̱a̱jo, tanga xta̱ xi je s'ijii̱n eén Néná katsjandiéjiín.
\v 31 Kó ti bo̱a̱ ti ts'én ngu̱i̱jii̱n jáxá xi chji̱a̱ni nangui Asia̱ kis'iṉdojin já xi nda tsa'a Pabloo̱ xi katsanguiya tsáyaá tsi̱'e̱ nga ki̱a̱jín sa̱nguínjin yojoo̱.
\v 32 Tjín xi askandáyá ngo ni, kó tjín xi kje̱'e katsó nga askandáyá, nga̱t'a̱ ngayeje xtaa̱ je xtii̱, kó kjín ngase ma xi nde bejín mí kjo̱a̱a̱ nga kamátikó.
\v 33 Kó tjín já nguito̱ko̱ judíoo̱ xi katsanguiṉña ngo nda̱ xi 'mí Rijaá, tsi̱'e̱ nga kje̱n xtaa̱ kjo̱chó kó sku̱i̱e̱ ni xi kjimaa̱. Kó Rijaá yején tsja tsi̱'e̱ nga xió k'uíndo xtaa̱ ko̱jo tsi̱'e̱ nga ku̱i̱chji̱a̱ nganda tsi̱'e̱ xta̱ judíoo̱.
\v 34 Tanga nga kamákjiín kui xtaa̱ nga ti judío̱ní kui nda̱a̱, ma ra tsi ta jó ora̱ nga askandáyá ngayeje kui xtaa̱ nga bi katsó:
\p –¡Tsie ngatamaa̱ Artemisaa̱, na̱ nee̱ xta̱ xi chji̱a̱ni na̱xi̱ńdá Éfeso̱!
\p
\v 35 Kós'e̱ nguije kixixió xta̱ na̱xi̱ńdaá, nda̱ xi ts'énda xo̱jo̱o̱n, bi katsoó:
\p –Jún bo̱a̱ já xi ndokjo̱a̱jnú na̱xi̱ńdá Éfeso̱, ¿kó 'yá nda̱ xi bejín nga xta̱ na̱xi̱ńdá Éfeso̱ kuí xí ndyi̱konda na̱ngo̱xi̱i̱ na̱ ne Artemisaa̱ ko̱jo a̱sién xi kjindibáni nk'a ján?
\v 36 Xikoó kui nii̱, nga jmíjín xi bo̱a̱jín kji'i ka̱tso̱, jún xió ra ti̱ndyiónjnú, kó nga jmí ni ni'ánjínjnú tsi tjónjín nda si̱'ankjójnú.
\v 37 Nga̱t'a̱ nga kui já xi jún jé'e̱jojnú jmí tsi ngo ni xi ndajín kji'i kats'én, ti nde jmí tsi ch'o ts'én ndyi̱chji̱a̱ kjo̱a̱a̱ na̱ngo̱xi̱i̱ na̱ ne Artemisaa̱.
\v 38 Tsi Demetrioo̱ ko̱jo xta̱ xi nijan ndyi̱ts'enxájo tjiín ngo ni xi ku̱i̱chji̱a̱ kondraa̱ kui jaá, ja̱ kui xá síndoni jáxaá ko̱jo ndi'a ndo̱bo̱a̱xa̱á, ki̱a̱ ngatatiéjéta'ín xkjín kó ki̱a̱ ngat'axié'á yojoo̱ ja̱ k'i̱e̱ ja̱ ngaján.
\v 39 Kó tsi tjín ngase kje̱'e ni xi chji̱a̱'ajnú, chjiénga ngu̱i̱jii̱n nga ka̱matikó ngayeje xta̱ na̱xi̱ńdaá ko̱jo jáxaá, nga k'uíndajnú.
\v 40 Kjo̱a̱a̱ kui ni xi kamá ngot'e̱ tsi ndajín ni̱xtjin tjín xta̱ xi ko̱tíjétá'ínná nga ñá xi ndyi̱'bítsié kui kjo̱a̱xtii̱, kó nde ta yajín kó k'uíi̱n tsi tjín xi ko̱síyaná mí kjo̱a̱a̱ nga íts'i̱yanii̱ kui kjo̱a̱xtii̱.
\p
\v 41 Kó nguije tsíchji̱a̱ kui eén, kats'énkixot'a xta̱ xi kamátikoó.
\c 20
\s Bi ts'én kijí Pabloo̱ nangui Masedonia̱ ko̱jo Gresia̱
\p
\v 1 S'e̱ nguije kamá kui kjo̱a̱xtii̱, Pabloo̱ tsíchji̱a̱a̱ xta̱ xi s'ijii̱n Kjisoo̱ kó nguije katsjaá kjo̱a̱botíxoma ko̱jo nguije janíkjá, kats'énkixot'a, s'e̱ kijí nangui Masedonia̱.
\v 2 Kó nguije ja'a ngayeje kui ngu̱i̱ndie ján nga kijítsjanga'niuú nga tsie én tsíchji̱a̱jo já ṉts'iee̱, jaskan jachó nangui Gresia̱,
\v 3 nínga ján sá kamaá nga kis'ijña, kó tsijen kamaá nga tjín ni xi ndyi̱'bínda xta̱ judíoo̱ nguije ma kjíya ma ngo tjotso je nga ko̱e̱je̱ nangui Siria̱ kó tasá kats'énkjó nga kjo̱a̱'a nguiní ingo ndi̱ya nangui Masedonia̱.
\v 4 Kó nijan kijíjo̱ nda̱ xi 'mí Sópatee̱r ndií Piroo̱ xi chji̱a̱ni na̱xi̱ńdá Berea̱, ko̱jo nda̱ xi 'mí Aristarkoo̱ ko̱jo nda̱ xi 'mí Sekoón xi chji̱a̱ni nangui Tesalónika̱, ko̱jo nda̱ xi 'mí Gayoo̱ xi chji̱a̱ni Derbe̱ ko̱jo Timoo̱, ko̱jo nda̱ xi 'mí Tíkikoo̱ ko̱jo Trófimoo̱ xi chji̱a̱ni nangui Asia̱.
\v 5 Kui jaá kijítjón kó ki̱a̱ askoyájne̱ na̱xi̱ńdá Troa̱,
\v 6 kó ji̱n, nguije ja'a ni̱xtjin nga chinie pan xi jmí nisanjiín, jatjojne̱ na̱xi̱ńdá Filipo̱ nga tsanguinyájne̱ ngo tjotso je, kó xi ma ún ni̱xtjin jachótji̱nguijne̱ na̱xi̱ńdá Troa̱ nínga yito ni̱xtjin kamájne̱ nga kixindyionjne̱ ki̱a̱.
\s Bi ts'én jachó Pabloo̱ na̱xi̱ńdá Troa̱
\p
\v 7 Kó nga ni̱xtjin tjoón xomanaa̱ kamátikójne̱ nga akakjangajne̱ paa̱n, kó Pabloo̱ tsíchji̱a̱jo xta̱ xi s'ijii̱n Kjisoo̱, tanga kjo̱a̱a̱ nga kamánguindyiojón ko̱e̱je̱, kuíni nga ngaskande masien ni̱xtji̱e̱n jachoó nga tsíchji̱a̱jo já ṉts'iee̱.
\v 8 Kó ki̱a̱ kixindyiontikójne̱ ngo ngu̱i̱ya'maa̱ ngo ndi'a nk'a, nínga achichí ndi'ixó xi tjítí tjín.
\v 9 Kó ngo nda̱ xo̱ngo xi 'mí Eutiko̱ tikónt'a nga̱ntjo̱a̱ masienkjaá ndi'aa̱, kó kjo̱a̱a̱ nga Pabloo̱ achichí ts'andíyaá nga tsíchji̱a̱, tichaa̱n kamáńjñaá kui nda̱a̱ s'e̱ kis'ifé, kó kjindibájén nga ts'ákanguí ngaskande xi ma ján tíkjaá kui ndi'a nk'aa̱, kó je k'ien nga kachjanink'a.
\v 10 Tanga Pabloo̱ jatjajen kó kaxaxixtienñé kui nda̱a̱, s'e̱ janíkjá, kó bi katsoó já ṉts'iee̱:
\p –¡Ngata̱ ndakonjín majnú tikón kui nda̱a̱!
\p
\v 11 S'e̱ jaskan Pabloo̱ ti kijínijínguí nguiní kui ndi'a nk'aa̱ nínga akjángá paa̱n, iskjinie, kó takó tsíchji̱a̱ ngaskande nga kisisie̱én, s'e̱ kijí nguijee̱.
\v 12 Kó kui nda̱ xi ts'ákanguií, je tikón nga tsanguínjo̱, kó kui ni xi kamaá achichí katsjánga'niú ngasee̱ kui xtaa̱.
\s Bi ts'én jatjoni Pabloo̱ na̱xi̱ńdá Troa̱ s'e̱ kijí na̱xi̱ńdá Mileto̱
\p
\v 13 Kó ji̱n tsanguíntjónjne̱ kó ngo tjotso je tsanguinyájne̱ ngaskande na̱xi̱ńdá Aso̱n nga tsanguínchja'ájne̱ Pabloo̱, nga̱t'a̱ bo̱a̱ ts'én kis'inda nga kamámejeén nga ndi̱ya ndsa̱ko kijí.
\v 14 Kó nguije kasakojne̱ Pabloo̱ na̱xi̱ńdá Aso̱n nijan tsanguinyájne̱ ngo tjotso je kó tsanguínjne̱ na̱xi̱ńdá Mitilene̱.
\v 15 Nguije jatjojne̱ kui ngu̱i̱ndiee̱, nga kamánguindyiojón ikitjajne̱ t'a tji̱ngu̱i̱ xi 'mí Kío̱, s'e̱ ingo ni̱xtjin ngase kamájne̱ nga jáchójne̱ na̱xi̱ńdá xi 'mí Samo̱, kó nguije kixindyionjne̱ na̱xi̱ńdá Trojilio̱, ti ingo ni̱xtjin kamá nguiníjne̱ nga jáchójne̱ na̱xi̱ńdá Mileto̱.
\v 16 Nga̱t'a̱ Pabloo̱ bo̱a̱ katsó nga tsiejín k'o̱ndíyaá nangui Asia̱, kó kamámejénjiín ja'a na̱xi̱ńdá Éfeso̱, nga̱t'a̱ tsá kamámejeén nga kjo̱chó na̱xi̱ńdá Jerusale̱n, nga̱t'a̱ tsi ka̱ma ki̱a̱ kjo̱a̱'aa̱ ni̱xtjii̱n s'ué Pentekostee̱.
\s Bi ts'én tsíchji̱a̱jii̱n Pabloo̱ xta̱ xi xchaá na̱xi̱ńdá Éfeso̱
\p
\v 17 Nga kis'ijña Pabloo̱ na̱xi̱ńdá Mileto̱, tsíchji̱a̱a̱ xta̱ xi xchaá na̱ngo̱xi̱ xi chji̱a̱ni na̱xi̱ńdá Éfeso̱.
\v 18 Kó nguije jachókoón kui xta̱ xi xchaá, bi katsoó:
\p –Je yajnú kó tjíts'en an ngaskande koó nga tjón jé'e an nangui Asia̱,
\v 19 nga k'i̱e̱ ni̱ma̱ tikónjinjnú'un nga tjíts'ensée̱n Ndi̱a̱ná, nga ts'énkjandá an nga ts'énchji̱a̱ an nga ts'énfoa'ajin an kjo̱a̱ni̱ma̱ kjo̱a̱tjó tangat'anii̱ ni xi mejeén sa̱'ínjo̱na xta̱ judíoo̱.
\v 20 Tanga jmí ni̱xtjin ijñámasien an nga ini̱jmijnú'un nganda tsa̱jún, nga ts'énbokoyájnú'un nguindyi̱ko̱n xta̱ na̱xi̱ńdaá ko̱jo nga ts'énfikónjnú'un ndi'ajnú,
\v 21 kó xta̱ xi judío̱ ko̱jo xta̱ xi judío̱jín ts'énxiyáa̱ nga sa̱'ínk'oyá yojoo̱ kó sku̱i̱e̱ Néná kó nga s'ijii̱n Ndi̱a̱ná Jesukristoo̱.
\v 22 Kó ngot'e̱ 'ne̱ ts'énfí an na̱xi̱ńdá Jerusale̱n, nínga tjíts'énna kjo̱a̱'niú A̱sién Ni̱xtjii̱n Néná, kó nde bejín an mí ni xi ka̱mana ki̱a̱a̱,
\v 23 ta ngototo nga A̱sién Ni̱xtjii̱n Néná ts'éntsáyána nga ngayeje na̱xi̱ńdá 'niú, ndo̱bo̱a̱ya si̱'ankjína ko̱jo nga tsie kjo̱a̱ni̱ma̱ xi kjo̱a̱'atio an.
\v 24 Tanga an, jmí ndasenjínna yojona, ti nde jmí ni tsjakji'i mí'ájáa̱n kjo̱a̱mindyioo̱n, nga̱t'a̱ tsjakji'ina ngaskande nga kjóchot'áa̱ xá xi sa̱'ínkjatjosón an xi katsjána Ndi̱a̱ná Kjisoo̱, nga xiyá an éntjatsi̱e̱e̱ tsi̱'e̱ kjo̱a̱ndaa̱ Néná.
\p
\v 25 Kó kui nga ngot'e̱ 'ne̱ 'niú kixi̱ tikón an nga nde ingojín jún, xi je ini̱jmíi̱ éntjatsi̱e̱e̱ nínga botixómá Néná xi sku̱i̱e̱ ngase kje̱n an.
\v 26 Kuíni nga ngot'e̱ 'ne̱ xiyájnú'un nga jmíjínna jé tsi xcha̱jajnú,
\v 27 nga̱t'a̱ je kasayajnú'un ngayeje ni xi mejeén sa̱'ín Néná, kó jmí ni i'majínjnú'un.
\v 28 Kó bo̱a̱ ts'én nda chónjnú yojojnú kó chónjnú ngayeje xta̱ na̱ngo̱xi̱i̱, nínga A̱sién Ni̱xtjii̱n Néná katsjájnú ngo xá nga stsitsíjenjnúu̱ tsi̱'e̱ nga jún xi xchindájnú xta̱ na̱ngo̱xi̱i̱ Ndi̱a̱ná, kui xi jiín ndí tsi̱'e̱ íchjítjéni.
\v 29 Nga̱t'a̱ nga je be an nga nguije kjuin an, kjo̱e̱'e kje̱'e xi xikó maá cho̱lobo̱ tamá nga ka̱mamejeén sa̱'ínkjié xta̱ na̱ngo̱xi̱i̱,
\v 30 kó ngaskande ti juún tjín xi kjo̱tjojin xi ko̱kóya kjo̱a̱ndiso, tsi̱'e̱ nga xta̱ tsi̱'e̱ Néná ki̱a̱ ko̱e̱je̱tji̱nguii̱.
\v 31 Kuíni nga ti̱ndyiondajnú, kó ti'ankja'átsjienjnú nga ján nó kamána nga ni̱xtjin ko̱jo nga ni̱xtji̱e̱n nga askandájo̱ majnú'un nga atixomajnú'un nga ngo nga ngojnú.
\p
\v 32 Kó ngot'e̱ 'ne̱, já ṉts'ie, mí'átjée̱ Néná kjo̱a̱a̱ jún ko̱jo éntjatsi̱e̱e̱ kjo̱a̱ndaa̱ kui xi tjiín nga'niú tsi̱'e̱ nga 'niú ngase s'i̱jinjnú Néná kó tsja̱ajnú jún ngayeje ni xi katsáyá nga tsja̱á xta̱ tsjiee̱.
\p
\v 33 Jmí to̱ntiboa, ti nde jmí to̱nsinié, ti nde jmí ṉjñoo̱ xtaa̱ kamámejénjínna,
\v 34 tasá ti juún kamáyajnú nga ni xi kamáchjiénna ko̱jo xta̱ xi kis'iṉdojo̱na, ndsa̱ an xí kats'énxá nga kasakojne̱ kui nii̱.
\v 35 Ngatsjé ni̱xtjin akoyájnú'un nga bo̱a̱ ts'én si̱'anxá ko̱jo nga ko̱siko̱jó xta̱ xi ni̱ma̱ tjimá, kó ti'ankja'átsjienjnú kui én xí tsíchji̱a̱ Ndi̱a̱ná Kjisoo̱ xi bi tsó: “Achichí ra tsjakji'i ngase nga ñá ko̱e̱'é, ta bo̱a̱jínnii̱ nga ñá ko̱e̱'éná.”
\p
\v 36 Jaskan nguije bo̱a̱ katsó nga tsíchji̱a̱ Pabloo̱ tji̱e̱nmá asién tikoó, s'e̱ nijan tsíchji̱a̱a̱ Néná ko̱jo kui xtaa̱.
\v 37 Kó ngayeje kui xtaa̱ askandá ma nga janíkjá ko̱jo nga katsjaá ngo ndsó t'anijon Pabloo̱,
\v 38 achichí ndasen kis'iṉdo kui xtaa̱, nga̱t'a̱ bo̱a̱ katsoó Pabloo̱ nga nguiti sku̱i̱e̱jínni. S'e̱ nijan kijíjo̱ ngaskande t'a tjotso jee̱.
\c 21
\s Bi ts'én kijí Pabloo̱ na̱xi̱ńdá Jerusale̱n
\p
\v 1 Kji'a nguije ik'íjñájne̱ já ṉts'iee̱, tsanguinyájne̱ ngo tjotso je, kó tsanguín ndojójne̱ ngaskande tji̱ngu̱i̱ xi 'mí Ko̱s, kó bo̱a̱ ts'én nga kamánguindyiojón tsanguínjne̱ tji̱ngu̱i̱ xi 'mí Roda̱, kó ki̱a̱ tsanguínni ji̱n ngaskande nga jáchójne̱ na̱xi̱ńdá xi 'mí Pátara̱.
\v 2 Kó ki̱a̱ kasakojne̱ ngo tjotso je xi ts'énfí nangui Fenisia̱, kó kui tsanguinyájne̱.
\v 3 Kó nga ikitjajne̱ kamáyajne̱ tji̱ngu̱i̱ Chipre̱, kó xtji̱e̱e̱n ndsa̱ skónjne̱ kis'ijña kui tji̱ngu̱i̱i̱ ngaskande nga jáchójne̱ nangui Siria̱, nga̱t'a̱ kui tjotso je xi tindyionyájne̱ ch'ia kats'énkjatjajen ki̱a̱ na̱xi̱ńdá Tiro̱, kó ki̱a̱ jáchójne̱.
\v 4 Kó ki̱a̱ kasakojne̱ xta̱ xi s'ijii̱n Kjisoo̱, kó yito ni̱xtjin kamájne̱ nga kixindyionjo̱jne̱ ki̱a̱a̱, kó kui xtaa̱ A̱sién Ni̱xtjii̱n Néná katsáyatjoón nga ki'míyaá kjo̱a̱a̱ Pabloo̱ nga tasá ko̱e̱je̱jín na̱xi̱ńdá Jerusale̱n, kó katsáyaá Pabloo̱ kui nii̱.
\v 5 Kó nguije ja'a xi ma yito ni̱xtjin, tsanguínjne̱, kó ngayeje kui jaá kijíjo̱ chjo̱ón ko̱jo ndií, nínga kijíjo̱jne̱ ngaskande ndi̱tsee̱n na̱xi̱ńdaá, kó ki̱a̱ nga̱nde ndáchíkoón ikindyia yejejne̱ tikójne̱ ko̱jo kandokjo̱a̱jne̱ Néná.
\v 6 Jaskan nguije kini'ánkixot'ajne̱ xingu̱i̱jne̱, tsanguinyájne̱ tjotso jee̱, kó kui jaá kijí'oyá nguiní ndi'aa̱.
\p
\v 7 Kó nguije jet'ajne̱ nga tsanguínjne̱ ngu̱i̱jin ndáchíkoón nga tsanguínni ji̱n na̱xi̱ńdá Tiro̱ ngaskande na̱xi̱ńdá Tolemaida̱, nínga kini'ántindejne̱ já ṉts'iee̱, ngo ni̱xtjin kamájne̱ nga kixindyionjo̱jne̱ ki̱a̱a̱.
\v 8 Kó nga kamánguindyiojón tsanguínjne̱ kó bo̱a̱ ts'én jáchójne̱ ngaskande na̱xi̱ńdá Sesarea̱, kó tsanguínjne̱ ndi'aa̱ Nguiripee̱, nda̱ xi chji̱a̱ eén Néná, kui xi ma yitoni já xi asíko̱jo já apostroo̱, kó ki̱a̱ kixindyionjo̱jne̱ kui nda̱a̱.
\v 9 Nguiripee̱ nijún ínchjín xo̱ngo tjiín, kui ínchjiín xi tsíchji̱a̱ xikoó chji̱ni̱e̱'e̱én Néná.
\v 10 Kó kjín ni̱xtjin kixindyionjne̱ ki̱a̱ nangui Sesarea̱, kó jachó ngo nda̱ chji̱ni̱e̱'e̱én Néná xi chji̱a̱ni nangui Judea̱ xi 'mí Agabo̱,
\v 11 kui nda̱ xi nga jachókónjne̱, iskjíbé tji̱xi̱ín Pabloo̱, íta'niú tsja ko̱jo se, s'e̱ bi katsó:
\p –A̱sién Ni̱xtjii̱n Néná bi katsó nga ki̱a̱ xó na̱xi̱ńdá Jerusale̱n xta̱ judíoo̱ bi xó ts'én ku̱i̱'íta'niú nda̱ xi tsi̱'e̱ kui tji̱xi̱ín, kós'e̱ sa̱'ínk'as'ien xó ngu̱i̱ya tsja xta̱ xi judío̱jiín.
\p
\v 12 Kó nga kanda'yájne̱ kui eén, ji̱n ko̱jo xta̱ xi chji̱a̱ni na̱xi̱ńdá Sesarea̱ 'niú kichjiá'ájne̱ Pabloo̱ tsi̱'e̱ nga ko̱e̱je̱jín na̱xi̱ńdá Jerusale̱n.
\v 13 Kós'e̱ Pabloo̱ bi katsójne̱:
\p –¿Mí kjoaá nga ndyi̱cha'ájnú, kó ngaskande an kjimandasee̱n ini̱ma̱na? An je tikónda an nga jmí tsi ta k'uí'niútsína ko̱jo tsi ngaskande nga ni'ánk'iénna ki̱a̱ na̱xi̱ńdá Jerusale̱n tangat'anii̱ ja'eén Ndi̱a̱ná Kjisoo̱.
\p
\v 14 Kó nga kamá'indakónjínjne̱, tasá bi ki'míjne̱:
\p –Ngatama ni xi mejeén Ndi̱a̱ná nga ka̱ma.
\p
\v 15 Jaskan nguije kamá kui nii̱, ik'índajne̱ yojojne̱, s'e̱ tsanguínjne̱ na̱xi̱ńdá Jerusale̱n.
\v 16 Kó tjín xta̱ xi s'ijii̱n eén Néná xi nijan kijíjo̱jne̱ xi chji̱a̱ni na̱xi̱ńdá Sesarea̱, kui xtaa̱ xi kijíjo̱jne̱ ndi'aa̱ ngo nda̱ xi chji̱a̱ni tji̱ngu̱i̱ Chipre̱ xi 'mí Mnaso̱n, nda̱ xi je tsienii̱ nga s'ijii̱n eén Néná, kuí xí tsja̱ndiéjne̱ nga ku̱i̱ndyionjne̱ ndi'aa̱ katsaki.
\s Pabloo̱ bi ts'én kijí ndi'aa̱ Sandiyaá
\p
\v 17 Kó nga jáchójne̱ na̱xi̱ńdá Jerusale̱n, já ṉts'iee̱ achichí tsja kamaá nga jáchochonjne̱.
\v 18 Kó nga kamánguindyiojón Pabloo̱ nijan kijíjo̱jne̱ nga tsanguínchonjne̱ Sandiyaá, kó ti ki̱a̱ síndo ngayeje xta̱ xi xchaá na̱ngo̱xi̱i̱.
\v 19 Kó nguije Pabloo̱ kats'éntinde, katsáyá cha̱n cha̱a̱n nga ngo nga ngo ni xi kats'én Néná ngu̱i̱ya tsja tsi̱'e̱ ngu̱i̱jii̱n xta̱ xi judío̱jiín.
\v 20 Kó nguije tsint'ié kui xtaa̱, katsjaá kjo̱a̱je Néná, s'e̱ bi ki'mií Pabloo̱:
\p –Nda kji'i nda̱ ṉts'ie, já je ye ji nga ngu̱i̱jii̱n xta̱ judíoo̱ ta mi̱jín ra ma xta̱ xi je kis'ijii̱n eén Néná, kó ngayeje kui xtaa̱ achichí ndyi̱ts'enchíni̱t'aa̱ kjo̱a̱kitii̱ Moisee̱.
\v 21 Kó tjíni'ánkint'ié kjo̱a̱a̱ ji xta̱ xi judío̱ xi síndo ngu̱i̱jii̱n xta̱ xi judío̱jín nga ngayejee̱ nga tibokoyée̱ nga ku̱i̱'íjñát'axín kjo̱a̱kitii̱ Moisee̱, kó bo̱a̱ t'ísée̱ nga ka̱majín sa̱'iín sirkunsisioo̱n jakjíndií, ti nde ka̱majín sa̱'ín kjo̱a̱xchá xi tjínná.
\v 22 ¿Mí xi si̱'án 'ne̱? Takó sku̱i̱e̱ xtaa̱ nga jé'e ji.
\v 23 Tasá nda ngase nga si̱'in ji kui nii̱: K'i̱e̱ ngu̱i̱jinná nijún ma já xi síndojinná xi chjiénga sa̱'ínkjatjosón ngo ni xi katsáyatjoón Néná nga sa̱'ín.
\v 24 T'enje̱ ji, nijan ti'antsjiejónjnú yojojnú kó t'íchjíi̱ to̱n xi kju̱i̱e̱e̱ tsi̱'e̱ nga kui jaá ka̱ma ku̱i̱'íjón taka takaa̱ to̱ko̱, kó bo̱a̱ ts'én sku̱i̱e̱ ngayejee̱ nga ja̱koxi̱jín ni xi tjí'mí kjo̱a̱a̱ ji, kó nga tasá ji tini'ínkjatjosén kjo̱a̱kitii̱.
\v 25 Kó kjo̱a̱a̱ xta̱ xi judío̱jín xi je kis'ijii̱n eén Néná, je kini'án'indójne̱ ngo xo̱jo̱n, nínga ki'míyajne̱ nga ka̱majín skji̱ni̱e̱ yojoo̱ cho̱ xi je kini'ánk'as'iee̱n a̱sie̱én ngo ne xi ts'énda xtaa̱, ti nde ka̱majín skji̱ni̱e̱ jiín ko̱jo yojoo̱ cho̱ xi ni'ánxíndo nga ni'ánk'ién, kó ti bo̱a̱ ti ts'én ka̱majín tondo̱ ka̱ma.
\p
\v 26 Kós'e̱ bo̱a̱ ts'én Pabloo̱ kijíjo̱ nga nijún kui jaá, kó nga kamánguindyiojón nijan kats'éntsjiejón yojoo̱, kós'e̱ jaskan ts'as'ien na̱ngo̱xi̱i̱ tsi̱'e̱ nga katsáyaá kji'aní nga kju̱i̱e̱t'a ni̱xtjin nga kjo̱tjosón ni xi katsáyatjón nga sa̱'ín, ko̱jo kjo̱a̱a̱ kji'ání nga sa̱'ínk'as'ien chji̱e̱e̱ nga ngo nga ngo kui jaá.
\p
\v 27 Kó nguije makjie xi yito ni̱xtjii̱n, chiboa já judíoo̱ xi chji̱a̱ni nangui Asia̱ kamábe Pabloo̱ ngu̱i̱ya na̱ngo̱xi̱i̱, kó kui jaá xi indyiákjaán xta̱ na̱xi̱ńdaá. Kós'e̱ kjíts'uieé Pabloo̱,
\v 28 kó askandáyá ma nga bi katsó:
\p –¡Jún bo̱a̱ já Israe̱l, tasíke̱jejne̱! Kuí nda̱ xi'bi̱ xi tso'bá tajñá nanguiní nga ts'énbokoyaá xtaa̱ ngo ni kondraa̱ xta̱ nanguiná, xi kondra̱ tikoón kjo̱a̱kitii̱ Moisee̱ ko̱jo kondra̱ tikoón kui na̱ngo̱xi̱i̱, kós'e̱ bo̱a̱ ts'én ngot'e̱ k'i̱e̱ tjíts'énk'ás'ién kui na̱ngo̱xi̱i̱ xta̱ griego̱, kó kuí boá nga xi tjíts'éndándí kui ngu̱i̱ndie tsjiee̱ Néná.
\p
\v 29 Nga̱t'a̱ ngu̱i̱ndie ni̱xtjin kamáya Pabloo̱ ki̱a̱ na̱xi̱ńdaá nga tso'bájo̱ nda̱ xi 'mí Trófimoo̱ xi chji̱a̱ni na̱xi̱ńdá Éfeso̱, kó kats'énkjó kui xtaa̱ nga Pabloo̱ xi kijíjo̱ ki̱a̱ na̱ngo̱xi̱i̱.
\p
\v 30 Kó ngayeje xta̱ na̱xi̱ńdaá kamákjaán, kó tsá kamátikó xta̱ kjiín, kó kandobá Pabloo̱ kó kachjafé kachjaṉña nga ka'naxié ndi̱tsen na̱ngo̱xi̱i̱, kó ja̱ kó íchjá nga̱ntjo̱a̱a̱.
\v 31 Kó nguije ma ni'ánk'ién ma Pabloo̱, jachoó én nda̱ nguito̱ko̱o̱ jajún xi chji̱a̱ni na̱xi̱ńdá Roma̱ nga ngayeje xta̱ na̱xi̱ńdá Jerusale̱n kamáxtií,
\v 32 kó kui nda̱ nguito̱ko̱o̱ tji̱e̱nmá ítikó jajún ko̱jo jajún xi nk'a xaá kó tsanga ma nga kijí nínga síndotikó xtaa̱, kó xta̱ na̱xi̱ńdaá nguije kamábe nguito̱ko̱o̱ jajuún ko̱jo jajuún, nguiti ye'éjínnii̱ Pabloo̱.
\v 33 Kós'e̱ nda̱ nguito̱ko̱o̱ jajuún kijíkón tiñaa̱, kó katsoboá Pabloo̱ s'e̱ katsjaá kjo̱a̱ jajuún nga jó ń'niú ki̱cha̱ ik'íta'niú, kó asíyá 'yá kuií bo̱a̱, kó mí ni xi kats'én.
\v 34 Tanga tjín xta̱ xi ndyi̱kjandayá ma nga ngo ni tsíchji̱a̱ kó kje̱'e xi kje̱'e katsó, kó ngaskande nda̱ nguito̱ko̱o̱ jajuún nde kamájiín kats'éndajin kui kjo̱a̱a̱ tangat'anii̱ nga achichí se ndyi̱ts'en xta̱ na̱xi̱ńdaá, kó kuíni nga katsjá kjo̱a̱ nga tsanguínjo̱ Pabloo̱ ki̱a̱ ndi'a nínga síndo jajuún.
\v 35 Kó nga jachó ki̱a̱ xókíjoo̱n ndi'aa̱ jajuún, ja̱chon nga kichínk'á tsi Pabloo̱, nga̱t'a̱ achichí ndyi̱ts'enxchán xta̱ kjiín,
\v 36 nga̱t'a̱ ngayeje kui xtaa̱ ki̱a̱ tjimátji̱nguii̱ nga ndyi̱kjandayá ma nga bi katsó:
\p –¡Ngat'ien Pabloo̱!
\s Bi ts'én ts'axié'á yojoo̱ Pabloo̱ nguindyi̱ko̱n xta̱ na̱xi̱ńdaá
\p
\v 37 Nguije si̱'ank'as'ien ma ki̱a̱ ngu̱i̱ya ndi'aa̱ jajuún, Pabloo̱ bi ts'én asíyaá nda̱ nguito̱ko̱o̱ jajuún:
\p –¿Ji, a ka̱ma kuichji̱a̱jo ngotjoón?
\p S'e̱ bi katsó nda̱ nguito̱ko̱o̱ jajuún:
\p –¿A maári ndokjo̱a̱ én griego̱?
\v 38 ¿A jijín kui nda̱ xi chji̱a̱ni nangui Ejipto̱ xi je tsienii̱ nga íts'i̱yanii̱ nga ts'axié ngo kjo̱a̱xchán, kó jatjojo̱ nijún mi̱ jajúnk'ijñaá ki̱a̱ nangui kixií?
\p
\v 39 S'e̱ Pabloo̱ bi katsoó:
\p –Nda̱ judío̱ an, kó na̱xi̱ńdá Tarso̱ xi chji̱a̱ni nangui Silisia̱ katsen an, ngo nda̱ xi chji̱a̱ni ngo na̱xi̱ńdá xi 'niú chjínií, tanga ngo kjo̱a̱nda mí'aá, te'éndié chiíní nga kuichji̱a̱jo an xta̱ na̱xi̱ńdaá.
\p
\v 40 Kó nga nda̱ nguito̱ko̱o̱ jajuún katsjá kjo̱a̱ nga tsíchji̱a̱, s'e̱ Pabloo̱ tji̱e̱nmá kasasien kixi̱ ki̱a̱ xókíjoo̱n kó ta tsja yejeén xtaa̱ tsi̱'e̱ nga xió kis'iṉdo, kó kji'a nguije xió kis'iṉdo xtaa̱, én ebreo̱ tsíchji̱a̱jo nga bi katsó:
\c 22
\p
\v 1 –Jún já ṉts'ie ko̱jo já xchá, nda'yájnú ni xi kuichjiájojnú'un nga kuichji̱a̱tjé an yojona.
\p
\v 2 Kó nga tsint'ié xta̱ na̱xi̱ńdaá nga én ebreo̱ tsíchji̱a̱jo Pabloo̱, xió ngase kis'iṉdo, s'e̱ bi katsó ngase nga tsíchji̱a̱jo:
\p
\v 3 –Nda̱ judío̱ an, ki̱a̱ katsen an na̱xi̱ńdá Tarso̱, xi chji̱a̱ni nangui Silisia̱, tanga k'i̱e̱ kamáxchá an na̱xi̱ńdá Jerusale̱n kó kui nda̱ chji̱ni̱e̱ xi 'mí Gamaliel xí akóyána, xikó tsó kjo̱a̱kitii̱ xta̱ tji̱e̱ xcháná, chi̱ni̱ an kjo̱a̱a̱ Néná xikó ndyi̱ni'ánjnú xi jún kui ni̱xtjin xi'bi̱.
\v 4 Ngas'e̱ tsangatji̱nguíi̱ nga sa̱'ínk'ién an xta̱ xi tjimátji̱ngui kui ndi̱ya tja̱tsi̱e̱e̱, kó katsoboa an kós'e̱ katsanguis'ien an ndo̱bo̱a̱ya xi xi̱'in ko̱jo xi ínchjín.
\v 5 Kó chiná'mi xi 'niú nk'a xaá ko̱jo ngayeje xta̱ xi xchaá xi chistiko̱ kjo̱a̱a̱ kui nii̱, kó kuí jaá xi katsjána ngo xo̱jo̱n tsi̱'e̱ já ṉts'ie xi judío̱ xi chji̱a̱ni na̱xi̱ńdá Damasko̱, kó kijí an kui ngu̱i̱ndie ján nga kijíngase an xta̱ xi s'ijii̱n Kjisoo̱ tsi̱'e̱ nga kjoé'e̱jo an k'i̱e̱ na̱xi̱ńdá Jerusale̱n, kó k'i̱e̱ ka̱majeé.
\s Bi ts'én íni̱jmi Pabloo̱ xikó ts'én kis'ijii̱n eén Néná
\r (Ni xi kamá 9:1-19:12-18)
\p
\v 6 Kó tji̱e̱nga ts'énfí an ndi̱ya̱á, kó nguije makjachó tiña an na̱xi̱ńdá Damasko̱, mején ndis'ué rá, ngo ndi'í 'niú xi kjindibáni ndi'ak'ajmi ján xi ta niján ma ja'atjiyajonna,
\v 7 kó ts'ákatójó an t'ananguii̱, kó tsint'ie an ngo nda̱ xi bi katsóna: “Saulo̱, Saulo̱, ¿mí kjo̱a̱a̱ nga an timiyitji̱nguiní?”
\v 8 Kó an bi kixiáa̱n nga asíyaá kui xi ts'énchji̱a̱jona: “¿'Yá ji bo̱a̱ Ndi̱a̱?” Kó kui nda̱a̱ bi katsóna: “An boá xi Kjisoo̱, xi chji̱a̱ni na̱xi̱ńdá Nasare̱t, an xí timiyitji̱nguiní.”
\v 9 Kui já xi nijan tjimájo̱na kamábe ja̱koxi̱ ndi'ií, tanga tsint'iéjiín nda̱ xi ts'énchji̱a̱jona.
\v 10 Kó bi kixiáa̱n: “¿Mí xi mejeén nga sa̱'in an Ndi̱a̱?” Kó Ndi̱a̱a̱ bi katsóna: “Ti̱sítji̱n kó takó t'en ra ji na̱xi̱ńdá Damasko̱ kó ki̱a̱ k'uiyaá ngayeje ni xi si̱'in ji.”
\v 11 Kó nda̱a̱ ndi'ií kui kjo̱a̱jee̱ kats'énti̱ka̱na, kó kuíni já xi nijan tso'bájo̱ an iskjíbenguína nga kijíjo̱na ngaskande na̱xi̱ńdá Damasko̱.
\p
\v 12 Kó ki̱a̱ kui nguindiee̱ tikón ngo nda̱ xi 'mí Ananía̱, ngo nda̱ xi 'niú ni̱ma̱ máa xta̱ ko̱jo xi 'niú kamábendikón kjo̱a̱kitii̱ Moisee̱, ngayeje xta̱ judío̱ xi síndo na̱xi̱ńdá Damasko̱ kjén nga ta nda tsíchji̱a̱ kjo̱a̱a̱ kui nda̱a̱,
\v 13 kó jachókónna kó nguije je'ekón tiñana bi katsóna: “Nda̱ ṉts'ie Saulo̱, ngatamatsijen nguinií.” Kós'e̱ ti kji'a kamátsijenna, kó kamábe an nda̱ xi 'mí Ananíaa̱.
\v 14 Kó bi katsó ngasena: “Kuí Nee̱ xta̱ tji̱e̱ xcháná xi ja'ájii̱n ji tsi̱'e̱ nga xchi̱e̱ ji ngayeje ni xi mejeén sa̱'ín, ko̱jo tsi̱'e̱ nga xchi̱e̱ ji Kjisoo̱ xi kixii̱, kó ko̱nda'yé ji nda̱a̱ nga ts'oa ma xi ku̱i̱chji̱a̱joo̱,
\v 15 nga̱t'a̱ ji xi ka̱ma ji chistiko̱ tsi̱'e̱ ngayeje xtaa̱ kó bo̱a̱ ts'én k'uiyé ji ni xi xchi̱e̱ ko̱jo ni xi ko̱nda'yé ji.
\v 16 Kó ngot'e̱ 'ne̱, nguiti chiyéjín ngase, ti̱sítji̱n, tatíndé yojóo kó taníjín ngayeje jée̱ nga si̱'inkaxome ji ja'eén Néná.”
\s Bi ts'én kananguiya Pabloo̱ ngu̱i̱jii̱n xta̱ xi judío̱jín
\p
\v 17 Kó nguije kijí nguiní an na̱xi̱ńdá Jerusale̱n, kijí an na̱ngo̱xi̱i̱ nga tsíchji̱a̱a̱ Néná kó ki̱a̱ akakona ngo ni.
\v 18 Kamábe an Néná nga bi katsóna: “Tsá ti'íi̱n yojóo kó tsá titjaxi̱e̱ ji na̱xi̱ńdá Jerusale̱n, nga̱t'a̱ jmíjín xi s'i̱jii̱n ni xi ko̱ndókjo̱e̱ kjo̱a̱a̱ an.”
\v 19 Kó an bi kixiáa̱n: “Ndi̱a̱, je be ngayeje kui xtaa̱ nga an xí kistso'bá an ngayeje ndi'a nínga ndokjo̱a̱ eén Néná kó kijíjo̱ an ndo̱bo̱a̱ya kui xta̱ xi kis'ijii̱n ji, kó kats'en'óo̱n,
\v 20 kó kji'a nga kini'ánk'ién mosoo̱ xi 'mí Ixtibaa̱, xi tsíchji̱a̱ kjo̱a̱a̱ ji, ti ki̱a̱ tikón an kó nda kasasienna nga kini'ánk'ién, kó ngaskande ti an askóo̱n ṉjñoo̱ xta̱ xi kats'énk'ién.”
\v 21 Kó Néná bi katsóna: “Je ka̱ma k'uín ji 'ne̱, nga̱t'a̱ kjin nangui nínga sanguiyaa ji nínga síndo xta̱ xi judío̱jín.”
\s Nda̱ jun nguito̱ko̱o̱ bi ts'én katsoboá Pabloo̱
\p
\v 22 Kó ngaskande k'i̱e̱ tji̱e̱n jachó nga tsíchji̱a̱ Pabloo̱, s'e̱ íts'i̱yanii̱ nga askandáyá ma xta̱ na̱xi̱ńdaá nga bi katsó:
\p –¡Kui nda̱a̱ chjiénjín nga k'uijñá ngase! ¡Tasá ti'ank'iénjnú nguiti mejénjínjne̱ xcha̱ ji̱n nga k'uijñá ngase!
\p
\v 23 Kó nga askandáyá kui xtaa̱ ítsanie ma ṉjñoo̱ nga ndyi̱'bojmi xa̱a̱ ngu̱i̱jin a̱sie̱én,
\v 24 nda̱ nguito̱ko̱o̱ jajuún katsjá kjo̱a̱ tsi̱'e̱ nga ko̱nanguís'ién Pabloo̱ ngu̱i̱ya ndi'aa̱ jajuún kó katsjá kjo̱a̱ nga kjoaá tsi̱'e̱ nga ku̱i̱e̱je̱nts'oa mí kjo̱a̱a̱ nga xta̱ na̱xi̱ńdaá ndyi̱kjandayá nga ch'oo̱ kui.
\v 25 Tanga nguije tjitá'niú tsi̱'e̱ nga kjoaá, Pabloo̱ bi katsó nga asíyaá nda̱ nguito̱ko̱o̱ jajuún xi nk'a ngase xaá xi tikónjin ki̱a̱a̱:
\p –¿A tsjandiéjnú kjo̱a̱kitii̱ nga ka̱ma kjoájnúu̱ ngo nda̱ Roma̱, kó ngase nga kji̱e̱ sakójínjnú ngo jé xi kats'én?
\p
\v 26 Kó nga tsint'ié kuí nii̱, kui nda̱jun nguito̱ko̱ xi nk'a ngase xaá kijítsáyaá nda̱jun nguito̱ko̱ xi ingoo̱, nga bi katsoó:
\p –¿Mí xi si̱'in ji? A yejín nga kui nda̱a̱, nda̱ Roma̱ boá.
\p
\v 27 S'e̱ nda̱jun nguito̱ko̱o̱ kijíkón tiñaa̱ Pabloo̱, kó bi katsó nga asíyaá:
\p –¿A kjén xoó nga nda̱ Roma̱ ji?
\p S'e̱ Pabloo̱ bi katsó:
\p –Jo̱o̱n.
\p
\v 28 Kó nda̱jun nguito̱ko̱o̱ bi katsoó:
\p –An achichí to̱n kis'inguina nga nda̱ Roma̱ kamá an.
\p Kó Pabloo̱ bi katsó:
\p Tanga an ki̱a̱ katsen an ngo na̱xi̱ńdá xi chji̱a̱ni Roma̱, kuíni nga nda̱ Roma̱ an.
\p
\v 29 Tanga nguije bo̱a̱ katsó, kui já xi ko̱'on Pabloo̱ tji̱e̱nmá kitsjuien, kó ngaskande ti kui nda̱ nguito̱ko̱o̱ jajuún, nguije tsint'ié nga Pabloo̱ nda̱ Roma̱ boá, katsakjónní nga̱t'a̱ ngaskande ń'niú ki̱cha̱ ma ik'íta'niú.
\s Bi ts'én tsanguínjo̱ Pabloo̱ nguindyi̱ko̱n jáxá judíoo̱
\p
\v 30 Nga kamánguindyiojón, nda̱jun nguito̱ko̱o̱, kamámejeén sku̱i̱e̱ cha̱n cha̱n mí kjo̱a̱a̱ nga ndyi̱bonguíta'in Pabloo̱ já judíoo̱, s'e̱ ja'áxiín ń'niú ki̱cha̱ xi tjitá'niúní, kó ítikó ngayeje já nguito̱ko̱o̱ chiná'mii̱ ko̱jo ngayeje jáxá nguito̱ko̱o̱, s'e̱ jachójo̱ Pabloo̱ nguindyi̱ko̱n kui jáxaá.
\c 23
\p
\v 1 Kó Pabloo̱ askotsijen ndá ndaá ngayeje jáxaá kós'e̱ bi katsoó:
\p –Jún já ṉts'ie, ngaskande ngot'e̱ nda ts'én tikón kjo̱a̱kjíntakónna kó tsjats'én tikón an nguindyi̱ko̱n Néná.
\p
\v 2 Kó chiná'mi xi 'niú nk'a xaá xi 'mí Ananíaa̱, katsjaá kjo̱a̱ xta̱ xi síndo t'a tiñaa̱ Pabloo̱ tsi̱'e̱ nga ts'axtio ts'oa.
\v 3 Kós'e̱ Pabloo̱ bi katsoó:
\p –¡Néná ku̱i̱'eé ji, jókje̱n! Xi ja̱ kui xá tindyin ni ji ki̱a̱a̱ tsi̱'e̱ nga ka̱majéna xikó tsó kjo̱a̱kitii̱, ¿kó ánní nga tibitjatjée̱n xikó tsó kjo̱a̱kitii̱ nga tjín xi tinanguiye ji tsi̱'e̱ nga ku̱i̱'éna?
\p
\v 4 Kó xta̱ xi síndo ki̱a̱a̱ bi katsoó Pabloo̱:
\p –¿Ánní bi ts'én ch'o sée̱ chiná'mi xi 'niú nk'a xaá xi chji̱a̱ni Néná?
\p
\v 5 Kó Pabloo̱ bi katsó:
\p –Jún ṉts'ie, bejín an tsi chiná'mi xi 'niú nk'a xaá kui nda̱a̱, nga̱t'a̱ je kjit'a xo̱jo̱n eén Néná nínga bi tsoó: “Ngata̱ ch'ojín sée̱ xta̱xá xi botixómaá nangui tse̱.”
\p
\v 6 Kó nga kamákjiín Pabloo̱ nga ngu̱i̱jii̱n kui jáxaá tjín xi chji̱a̱ni xta̱ saduseo̱ ko̱jo kje̱'e xi chji̱a̱ni xta̱ fariseo̱, bi katsó nga 'niú tsíchji̱a̱:
\p –Jún já ṉts'ie, nda̱ fariseo̱ an, kó ti xta̱ fariseo̱ chji̱a̱ni xingu̱i̱ an, kó tjíni'ánjéna nga̱t'a̱ ts'énkoyáa̱ nga kjo̱a̱'á'yá nguinií xta̱ xi je jesoón.
\p
\v 7 Kó nguije tsíchji̱a̱ kui nii̱ Pabloo̱, xta̱ fariseoo̱ ko̱jo xta̱ saduseoo̱ íts'i̱yanii̱ nga tsíchji̱a̱tijo xkjín, kós'e̱ jó tjín kamá kui xta̱ xi kamátikoó.
\v 8 Nga̱t'a̱ xta̱ saduseoo̱ s'ijinjiín nga foa'á'yá nguinií xta̱ xi je jesoón, ko̱jo nga jmíjín xó ndítsjie ko̱jo a̱sién ni̱xtjin, tanga xta̱ fariseoo̱ s'ijinrií ngayeje kui nii̱.
\v 9 Kó ngayeje xtaa̱ askandáyá xtín, kó tjín já xi chji̱ni̱e̱kjo̱a̱kiti, xi xta̱ fariseo̱ chji̱a̱ni, xi jastjíe̱n kó bi katsó:
\p –Kui nda̱a̱ jmí ni ch'o kji'i kats'énjín, ¿kó tsi ngo a̱sién ni̱xtjin ko̱jo tsi ngo ndítsjie tsíchji̱a̱jo ki?
\p
\v 10 Kó kui kjo̱a̱see̱ sa tsie sa tsie kjima, kó kuíni nga nda̱jun nguito̱ko̱o̱ katsakjónní tsi sa̱'ínxi̱ xta̱ na̱xi̱ńdaá Pabloo̱, kó katsanguiyakja'á jajún xi k'o̱xié Pabloo̱ tsi̱'e̱ nga k'o̱xié kui ngu̱i̱ndiee̱ kós'e̱ kjo̱jo nguiní ki̱a̱ ndi'aa̱ jajuún.
\p
\v 11 Ni̱xtji̱e̱n xi manguindyiojón, Ndi̱a̱ná akoó yojoo̱ Pabloo̱, kó bi katsoó:
\p –Ti'in 'niú takín Pablo̱, nga̱t'a̱ xikó ts'én kandokjo̱e̱ ji kjo̱a̱a̱ an k'i̱e̱ na̱xi̱ńdá Jerusale̱n, kó bo̱a̱ ti ts'én chjiénga ko̱ndókjo̱e̱je ji xta̱ na̱xi̱ńdá xi chji̱a̱ni Roma̱.
\s Bi ts'én kis'inda nga si̱'ank'ien Pabloo̱
\p
\v 12 Kó nga kamánguindyiojón nga ni̱xtjii̱n, tjín xta̱ judío̱ xi nijan índa tsi̱'e̱ nga sa̱'ínk'ién Pabloo̱, kó ngaskande nguiboanéná katsó nga jmí ni skji̱ni̱e̱jín ko̱jo jmí ni k'uijín ngaskande nga sa̱'ínk'ién Pabloo̱.
\v 13 Kó ts'atio yichán kamá já xi̱'in xi bo̱a̱ katsó,
\v 14 xi kijíkoón já nguito̱ko̱o̱ chiná'mii̱ ko̱jo xta̱ xi xchá judíoo̱ kó bi katsoó:
\p –Ji̱n je ngaskande nguiboanéná ki'míjne̱ nga ta jmíjín ni xi xi̱ni̱e̱ ji̱n tji̱e̱nga kji̱e̱ ni'ánk'iénjínjne̱ Pabloo̱.
\v 15 Ngot'e̱ 'ne̱ jún ko̱jo xi ngase jáxá nguito̱ko̱o̱, chji̱a̱'ajnúu̱ nda̱jun nguito̱ko̱o̱ tsi̱'e̱ nga ndyiojón ngatjandibajo̱ nguindyikónjnú Pabloo̱, ta tsi̱'e̱ nga ta ni xi si̱'anjo̱ ñá nga ko̱siyáa̱ kókji'i kjo̱a̱ xi tso'bá, kó ji̱n je ku̱i̱ndyiondajne̱ nga si̱'ank'ienjne̱ nguindiee̱ nga kjo̱e̱'e k'i̱e̱e̱.
\p
\v 16 Tanga ndií ndichja Pabloo̱ tsint'ié kui ni xi tjis'índata'in tsinii̱, kó tji̱e̱nmá kijí ndi'aa̱ jajuún kós'e̱ katsáyá tji̱'ni̱u̱ú Pabloo̱.
\v 17 Pabloo̱ tsíchji̱a̱a̱ ngo nda̱ nguito̱ko̱o̱ jajún xi nk'a ngase xaá kó bi katsoó:
\p –T'enje̱ ji kui nda̱chií nínga tikón nda̱jun nguito̱ko̱o̱ nga̱t'a̱ tjín ni xi ko̱tso̱yaa̱.
\p
\v 18 Kó kui nda̱jun nguito̱ko̱o̱ xi 'niú nk'a xaá kijíjoo̱ kui nda̱chií nda̱jun nguito̱ko̱ xi ingoo̱ kó bi katsoó:
\p –Pabloo̱, kui nda̱ xi tji'yá ndo̱bo̱a̱ya̱á tsíchji̱a̱na kó tsí'ána nga kji̱ndi̱bájóo̱ k'i̱e̱e̱ kui nda̱chií, nga̱t'a̱ tjín xó ni xi ku̱i̱chji̱a̱joo̱ ji.
\p
\v 19 Kó nda̱jun nguito̱ko̱o̱ iskjíbé tsja kui nda̱chií, s'e̱ kijíjo̱ t'axín, kó bi katsó nga asíyaá:
\p –¿Mí ni xi k'uiyéní?
\p
\v 20 Kó kui nda̱chií bi katsó:
\p –Xta̱ judíoo̱ je índa xtín tsi̱'e̱ nga ku̱i̱'aa̱ ji nga ndyiojón ko̱nanguíye ji Pabloo̱ nínga síndo jáxá nguito̱ko̱o̱, ta tsi̱'e̱ nga ta ni xi si̱'anjo̱ nga ko̱síya cha̱n cha̱a̱n xoó mí ni xi tso'bání.
\v 21 Tanga ngata̱ ni'íns'injinjíi̱n, nga̱t'a̱ ts'atio yichán ma já xi̱'in xi ndyi̱konda 'ma, kó kui jaá ngaskande nguiboanéná je katsó nga jmí ni skji̱ni̱e̱jín xó ko̱jo jmí ni k'uijín xó ngaskande nga sa̱'ínk'ién xó Pabloo̱, kó ngot'e̱ je síndonda nga ta ndyi̱koyárií ni xi se ji.
\p
\v 22 S'e̱ kui nda̱ nguito̱ko̱o̱ jajuún kats'énkjí nda̱chií, kó bo̱a̱ katsoó nga ta'yajín xi ko̱tso̱yaa̱ ni xi je katsáyaá kui nda̱juu̱n.
\s Bi ts'én kananguiya Pabloo̱ nguindyi̱ko̱n nda̱ xtitjón xi 'mí Firii̱
\p
\v 23 Kó kui nda̱jun nguito̱ko̱o̱ tsíchji̱a̱a̱ jó já nguito̱ko̱o̱ jajuún xi 'niú nk'a ngase xaá, kó katsjaá kjo̱a̱ nga ku̱i̱'índonda jó úchán jajún xi 'bítso̱mayise, ichítié ko̱jo kan jajún ndi̱je̱ ko̱jo jó úchán jajún xi boa'a yá yijó, tsi̱'e̱ nga ko̱e̱je̱ na̱xi̱ńdá Sesarea̱ nga ka̱ma chi̱bo̱a̱ nijan nga jñó,
\v 24 kó ti bo̱a̱ ti ts'én katsjá kjo̱a̱ nga ik'íjñandaa̱ ngo ndi̱je̱ xi k'uijñásón Pabloo̱, kós'e̱ katsjá kjo̱a̱ tsi̱'e̱ nga nda kjo̱jo ko̱jo nga si̱'an'onjiín ngaskande nga kjo̱chójo̱ nínga tikón nda̱ xtitjón xi 'mí Firii̱.
\v 25 Kó ngo xo̱jo̱n katsanguiyajo̱ kui jajuún xi bi tsó:
\p
\v 26 “Nda̱ Klaudio̱ Lisiaa̱, tsanguiyaa̱ tinde ji nda̱ xtitjón Firi̱.
\v 27 Xta̱ judíoo̱ katsoboá kui nda̱a̱, kó je mejeén sa̱'ínk'ién katsaki, tanga nguije tsint'ie an nga na̱xi̱ńdá Roma̱ chji̱a̱ni, kijíjo̱ an jajúnna kós'e̱ ts'axié'á an,
\v 28 nga̱t'a̱ kamámejénna skuie an mí kjo̱a̱a̱ xi tjifonguíta'in, kijíjo̱ an nguindyi̱ko̱n jáxá judíoo̱,
\v 29 kó kasakona nga kixii̱ nga kjo̱a̱a̱ kjo̱a̱kitii̱ kui jaá ni xi tjifonguíta'inni, tanga jmí kjo̱a̱jín ma nga si̱'ank'ien ko̱jo nga ngaskande nde ka̱majín nga ndo̱bo̱a̱ya k'uijñá.
\v 30 Tanga nga je kamábe an nga já judíoo̱ índa tsi̱'e̱ nga sa̱'ínk'ién, ki̱a̱ ts'éntsanguiyaa̱ ji, kó ti bo̱a̱ ti ts'én je tsí'áa̱ xta̱ xi ndyi̱bonguíta'in nga ki̱a̱ ngat'índa nguindyikin mí xi ch'onii̱ kui nda̱a̱.”
\p
\v 31 Kó bo̱a̱ ts'én jajuún, kats'én xikó kji'i ni xi je ki'mií, iskjíbé Pabloo̱ kó nga jñoó kijíjo̱ na̱xi̱ńdá Antípatri̱,
\v 32 kó nga kamánguindyiojón, jajún xi 'bítso̱mayisee̱ kijí'oyá nguiní ndi'a nínga 'bíndo, kós'e̱ jajún ndi̱je̱e̱ kui xi kijíjo̱ Pabloo̱ takó kijí ra.
\v 33 Kó nga jachó na̱xi̱ńdá Sesarea̱, kats'énk'as'iee̱n xo̱jo̱n xi ndyi̱ya'aa̱ xtitjoón kó ti bo̱a̱ ti ts'én kini'ánk'as'iee̱n Pabloo̱ nga.
\v 34 Kó nguije kats'ényá xo̱jo̱o̱n, nda̱ xtitjoón asíyá ñá chji̱a̱ni Pabloo̱, kó nguije kamábe nga nangui Silisia̱ chji̱a̱ni,
\v 35 bi katsoó:
\p –Kji'a boá kuint'iee̱ nguije kjo̱e̱'e kui xta̱ xi ndyi̱bonguíta'ii̱n ji.
\p Kós'e̱ katsjá kjo̱a̱ nga ki̱a̱ xchindá Pabloo̱ ndo̱bo̱a̱xa̱á Erodee̱.
\c 24
\s Bi ts'én ts'axié'á yojoo̱ Pabloo̱ nguindyi̱ko̱n nda̱ xtitjón xi 'mí Firii̱
\p
\v 1 Kó xi ma ún ni̱xtjin nguijee̱, nda̱ xi 'mí Ananíaa̱ xi chiná'mi xi 'niú nk'a xaá jachó na̱xi̱ńdá Sesarea̱ nínga tso'bájo̱ chiboa xta̱ xi xchá ko̱jo ngo nda̱ xi 'boxié'áná xi 'mí Tértulo̱, kui jaá jachókoón nda̱ xtitjoón tsi̱'e̱ nga ko̱ónguíta'in ngase Pabloo̱.
\v 2 Kó nguije jachójoo̱ Pabloo̱, nda̱ xi 'mí Tértuloo̱ íts'i̱yanii̱ nga yínguíta'in, nga bi katsoó nda̱ xtitjón Firii̱:
\p –Ndok'óchji̱í ji, nda̱ xtitjón, nga xió kji'i nanguiná, kó ti bo̱a̱ ti ts'én ndok'óchji̱í nga̱t'a̱ tangat'anii̱ kjo̱a̱kjíntakóo̱n nga achichí ni xi nda kji'i kjima na̱xi̱ńdáná.
\v 3 Ngatsjé ni̱xtjin kó ta són tjisákójne̱ ngayeje kui nii̱, tangat'anii̱ ji nda̱ xtitjón Firi̱, kó achichí ndok'óchji boe'éjne̱ ji.
\v 4 Tanga tsi̱'e̱ nga tsiejín k'o̱ndíyajne̱ nga ko̱ndókjo̱a̱jojne̱ ji, 'niú mí'aá ngo kjo̱a̱nda tsi̱'e̱ nga ko̱nda'yé chiíjne̱ ngotjón.
\v 5 Kui nda̱a̱ je 'niú ts'éntsjájne̱ kjo̱a̱xti, kó ngayeje són nga̱sondiee̱ tso'bá nga jó tjín tjíts'én xta̱ judíoo̱, ko̱jo nga kui xi nguito̱ko̱o̱ xta̱ xi chji̱a̱ni Nasare̱t tjíts'en yojoo̱,
\v 6 kó ngaskande kamámejeén kats'éndándí na̱ngo̱xi̱jne̱, kó kuíni nga kandobájne̱.
\v 7 Tanga nda̱xá xi 'mí Lisiaa̱ katsanguijin tsi̱'e̱ nga kats'énxchán kó ja'áxínyindsa̱jne̱,
\v 8 nga katsanguiya xta̱ xi yínguíta'in tsi̱'e̱ nga kjo̱chókoón ji, kó ka̱ma ti jii̱ si̱'inkijints'oe, tsi̱'e̱ nga xchi̱e̱ ji nga ja̱koxi̱ ngayeje ni xi ndyi̱fonguita'injne̱.
\p
\v 9 Kó ngayeje xta̱ judío̱ xi síndo ki̱a̱a̱ ti nijan kamá kui jaá nga bo̱a̱ kji'i kui nii̱ katsó.
\v 10 Nda̱ xtitjoón ta tsja yejeén Pabloo̱ tsi̱'e̱ nga ku̱i̱chji̱a̱, kó Pabloo̱ bi katsó:
\p –Achichí tsjatjínna nga kuichji̱a̱ an nga k'oxié'á an yojona nguindyikin ji, nga̱t'a̱ je be an nga je kjín nónií nga ji xi tindyin ne ndi'amasiee̱n kui na̱xi̱ńdaá.
\v 11 Ti ji ka̱ma ko̱siye nga, nga s'e̱ tjín raá tsi ta tiejó ni̱xtjin nga kijíts'endikón an Néná na̱xi̱ńdá Jerusale̱n.
\v 12 Kó ta'yajín xi kamábena nga tjín xi ts'énchji̱a̱tijo̱ an, ti nde jmí xta̱ ts'én mindyiatsabéjáa̱n ki̱a̱ ndi̱tsen na̱ngo̱xi̱i̱ ko̱jo ngu̱i̱ya ndi'a nínga ndokjo̱a̱ eén Néná ko̱jo tsi ki̱a̱ na̱xi̱ńdaá,
\v 13 ti nde jmí chi̱bo̱a̱jiín kui xtaa̱ kjo̱a̱a̱ ni xi ndyi̱bonguíta'inna.
\v 14 Tanga ngo tsi ni xi ku̱i̱e̱je̱nts'oa an, nga Ne xi tsi̱'e̱ xta̱ tji̱e̱ xchána xi tjíts'endikón an, xikó kji'i ndi̱ya tja̱tsi̱e̱e̱ xi kje̱'e tjín ndyi̱tsoó kui xtaa̱, nga̱t'a̱ s'ijinna ngayeje ni xi kjit'a xo̱jo̱n kjo̱a̱kitii̱ Néná ko̱jo xo̱jo̱n xi kats'én'indó já chji̱ni̱e̱'e̱én Néná,
\v 15 kó ti bo̱a̱ ti ts'én s'ijinna xikó ts'én s'ijii̱n kui xtaa̱, kó ts'énkoyáa̱ nga Néná sa̱'ínkja'á'yaá xta̱ xi je jesoón, tsi xi kixi̱ ko̱jo tsi xi kixi̱jín.
\v 16 Kó kuíni nga ta ngatsjé ni̱xtjin nga nda tikón kjo̱a̱kjíntakónna nga ch'ojín tjíts'en an nguindyi̱ko̱n Néná ko̱jo nguindyi̱ko̱n xtaa̱.
\p
\v 17 Jaskan nguije ja'a kjín nó nga kistso'bá an kje̱'e ngu̱i̱ndie, jé'e nguiñá an na̱xi̱ńdána tsi̱'e̱ nga tsja an chji̱e̱ ko̱jo kjo̱a̱nda,
\v 18 kó kui nii̱ tjíts'en an ndi̱tsee̱n na̱ngo̱xi̱i̱ nga chiboa já judío̱ kamábena nga kats'entsjie an yojona xikó ts'én tikón nga si̱'an kui nii̱, kó nde kjínjín xta̱ xi tjimájo̱na ko̱jo jmí kjo̱a̱se kis'iejín,
\v 19 kji'a nga kamábena já judío̱ xi chji̱a̱ni nangui Asia̱ ki̱a̱ na̱ngo̱xi̱i̱, kó kuí jaá xi chjiénga ka̱ma kjo̱e̱'e k'i̱e̱e̱ nga ko̱ónguíta'inna, tsi tjín ni xi tjiín kondra̱ tsa'a̱n.
\v 20 Kó tsi jmí, kui xi síndo k'i̱e̱e̱ ngatíchji̱a̱ tsi mí jé xi kasakoo̱ nga kats'en an kji'a nga kijí an nguindyi̱ko̱n xta̱xá judíoo̱,
\v 21 axa̱ marií tsi kji'a nga kis'ijñajíi̱n 'niú tsíchji̱a̱ an nga bi kixiáa̱n: “Ngot'e̱ 'ne̱ jún ndyi̱ni'ánjéjnú'un tangat'anii̱ nga s'ijinna nga kjo̱a̱'á'yaá xta̱ xi je jesoón.”
\p
\v 22 Kó Firii̱ nguije tsint'ié kui nii̱, nga̱t'a̱ je 'niú je be cha̱n cha̱n kjo̱a̱a̱ ndi̱ya tja̱tsi̱e̱e̱, íjñát'axín kui kjo̱a̱a̱, s'e̱ bi katsó:
\p –Kji'a nga kjo̱e̱'e nda̱ nguito̱ko̱o̱ jajún xi 'mí Lisiaa̱, nda skuie ngase an kjo̱a̱ xi tsa̱jún.
\p
\v 23 Kós'e̱ Firii̱ katsanguiya nda̱jun nguito̱ko̱ xi nk'a ngase xaá tsi̱'e̱ nga takó ngat'íjñá 'niú rá Pabloo̱, tanga nga tsjandié chií nga ku̱i̱'íjñandé ko̱jo nga tsja̱á kjo̱a̱ nga ka̱ma kjo̱chókoón xta̱ xi nda be tsi̱'e̱ nga tsja̱á ni xi chjieén.
\p
\v 24 Kó nguije kjín ni̱xtjin ja'a, jachó nguiní Firii̱ nga nijan tso'bájo̱ chjo̱ón xi 'mí na̱ Drusilaa̱, xi xta̱chjón judío̱, kó Firii̱ katsanguiya nga kijíchja'aá Pabloo̱ kó tsint'ieé ni xi tsíchji̱a̱ Pabloo̱ kjo̱a̱a̱ kjo̱a̱s'ijii̱n Jesukristoo̱.
\v 25 Tanga kji'a nga tsíchji̱a̱ Pabloo̱ kjo̱a̱a̱ nga chjiénga kixi̱ ku̱i̱ndyión nga jmí ni ch'o kji'i si̱'án ján, ko̱jo nga si̱'anchji̱ni̱e̱ so̱bo̱a̱ yojoná nga nda kji'i ni xi si̱'án, nga̱t'a̱ nga s'e̱ kjo̱chó ni̱xtjin nga Néná ko̱tso̱ya tsi nda ko̱jo tsi ndajín kini'án, s'e̱ Firii̱ achichí katsakjónní nga tsint'ié kuí nii̱, kós'e̱ bi katsó:
\p –Tasá t'en ji ngot'e̱, jaskan kuichji̱a̱ nguiñaá kji'a nga ka̱ma'ana.
\p
\v 26 Kó Firii̱ askoyaá nga Pabloo̱ to̱n tsja̱á, kuíni nga achichí kjín ndi̱ya tsíchji̱a̱a̱ tsi̱'e̱ nga kui ku̱i̱chji̱a̱jo.
\v 27 Jó nó ja'a nga bo̱a̱ kamá, s'e̱ Firii̱ jaskan je xaá kó ngajoo̱ kis'ijña nda̱ xi 'mí Porsio Festoo̱, kó Firii̱ kamámejeén nga nda kis'ijñajo̱ xta̱ judíoo̱, kuíni nga ndo̱bo̱a̱ya íjñá ra Pabloo̱.
\c 25
\s Nga ts'axié'á yojoo̱ Pabloo̱ nguindyi̱ko̱n nda̱ xtitjón xi 'mí Festoo̱
\p
\v 1 Nguije jachók'íjñá xtitjón nda̱ xi 'mí Festoo̱, xi ma ján ni̱xtjin jatjoni na̱xi̱ńdá Sesarea̱ kui nda̱a̱, s'e̱ kijí na̱xi̱ńdá Jerusale̱n.
\v 2 Ki̱a̱ na̱xi̱ńdá Jerusale̱n já nguito̱ko̱o̱ chiná'mii̱ ko̱jo já judíoo̱ xi 'niú yandíkoón atíjétá'ín Pabloo̱,
\v 3 kó ngo kjo̱a̱nda xi 'niú tsí'áa̱ xtitjoón, tsi̱'e̱ nga sa̱nguíya Pabloo̱ na̱xi̱ńdá Jerusale̱n, kó kui jaá índa nga ngu̱i̱ya ndi̱ya̱á sa̱'ínk'ién Pabloo̱.
\v 4 Kuíni nga Festoo̱ bi katsoó kui jaá nga Pabloo̱ takó k'uijñá 'niú rá ndo̱bo̱a̱ya ki̱a̱ na̱xi̱ńdá Sesarea̱, nga̱t'a̱ ti kuii̱ Festoo̱ tjíts'énkjó nga jaskan ko̱e̱je̱ ki̱a̱a̱.
\v 5 Kó bi katsoó:
\p –Xi tjín ngasee̱ xá ngu̱i̱jinjnú ngatjandibatjinguína kó tsi tjín ni xi ndajín kji'i kats'én kui nda̱a̱, tatíjéta'ínjnú.
\p
\v 6 Festoo̱ kamá raa̱ tsi jin ko̱jo tsi tie ni̱xtjin ki̱a̱ na̱xi̱ńdá Jerusale̱n, s'e̱ jaskan kijí nguiní na̱xi̱ńdá Sesarea̱, kó nga kamánguindyiojón jachók'íjñasón yáxiríe̱ ndikoón kó katsjá kjo̱a̱ nga tsanguínjoo̱ Pabloo̱.
\v 7 Kó nguije ts'as'ien Pabloo̱ kui ngu̱i̱ndiee̱, já judío̱ xi kjindibáni na̱xi̱ńdá Jerusale̱n, achichí ni xi ndikón yínguíta'in Pabloo̱, tanga ngaskande ngojín kui jeé xi kasakoo̱ ngakixi̱,
\v 8 tji̱e̱nga Pabloo̱ bi katsó nga ts'axié'á yojoo̱:
\p –An, nde ngojín jé tjíts'en an kondraa̱ kjo̱a̱kitii̱ já judíoo̱, ti nde kondraa̱ na̱ngo̱xi̱i̱, ti nde kondraa̱ xtitjoón na̱xi̱ńdá Roma̱.
\p
\v 9 Tanga Festoo̱ kamámejeén nga nda kis'ijñajo̱ já judíoo̱, s'e̱ bi katsó nga asíyaá Pabloo̱:
\p ¿A mejeén k'uín ji na̱xi̱ńdá Jerusale̱n, tsi̱'e̱ nga ki̱a̱ sa̱'indajin an kjo̱a̱xtíi?
\p
\v 10 Kó Pabloo̱ bi katsó:
\p –K'i̱e̱ tikón an kje̱n ngu̱i̱ndie nínga botíjeé, kó k'i̱e̱ bí nínga chjiénga ka̱majéna. Xikó ts'én je nda ye ji nga ngojín ni xi ndajín kji'i tjíts'en an kondraa̱ já judíoo̱.
\v 11 Tsi ngo jé kats'en an, kó tsi tangat'anii̱ kui nii̱ nga si̱'ank'ienna, tsakjonjín an nga ko̱ya an, tanga tsi ja̱koxi̱jín ni xi tjíbotijétá'ínna, ngojín xta̱ xi tjiín ngakixi̱ xi sa̱'ínk'as'ienna ngu̱i̱ya tsja kui jaá. Mí'á an nga ti kuii̱ nda̱ xtitjón Sesaa̱ xi ngats'énjéna.
\p
\v 12 Kós'e̱ Festoo̱ askjoyáni ko̱jo já xi tsáyaá ni xi ts'én, s'e̱ bi katsó:
\p –Tji̱e̱nga je kichjié'é ji nga nda̱ xtitjoón sa̱'ínjeé, ja̱ nda̱ xtitjoón k'uíchíi̱n tsobo̱a̱.
\s Festoo̱ ko̱jo Agripaa̱ bi ts'én askjoyá kjo̱a̱a̱ Pabloo̱
\p
\v 13 Nguije ja'a chiboa ni̱xtjin, nda̱ re Agripaa̱ ko̱jo chjo̱ón, xi 'mí na̱ Berenisee̱ kijí na̱xi̱ńdá Sesarea̱ nga kijí ts'en tínde Festoo̱.
\v 14 Kó nga kjín ni̱xtjin nga ki̱a̱ kis'iṉdojo̱, Festoo̱ íni̱jmi̱í nda̱ re Agripaa̱ kjo̱a̱a̱ Pabloo̱, kó bi katsoó:
\p –K'i̱e̱ tikón ngo nda̱ xi Firii̱ íjñá ndo̱bo̱a̱ya,
\v 15 kui xi nga kis'ijña an na̱xi̱ńdá Jerusale̱n, já nguito̱ko̱o̱ chiná'mii̱ ko̱jo xta̱ xi xchá judíoo̱ atíjétá'ín, kó tsí'ána nga an tsja an kjo̱a̱ nga ka̱majeé nga si̱'ank'ien,
\v 16 tanga an bi kixiáa̱n nga jáxaá na̱xi̱ńdá Roma̱ ngájiín nga ts'énjeé nga sa̱'ínk'ién ngo xta̱ tsi tjónjín skjo̱ ndo̱bo̱a̱xá xi tjíbotijétá'iín ko̱jo xi ndyi̱botíjeé, tsi̱'e̱ nga k'o̱xié'á yojoo̱ kjo̱a̱a̱ ni xi tjíbotijétá'ínni.
\v 17 Kó kuíni nga, nga je'e kui jaá k'i̱e̱e̱, nde askoyájáa̱n, nga̱t'a̱ nga kamánguindyiojón nga jachókatíjñasón an yáxiríee̱ ngu̱i̱ndie nínga botíjeé kijíchja'ána kui nda̱a̱,
\v 18 tanga kui já xi jachó xi ko̱tíjétá'ín jmí ni tsíchji̱a̱jín kjo̱a̱a̱ jé xi kats'enkjó an nga kats'én Pabloo̱,
\v 19 ta kuí tsi ni xi tsíchji̱a̱, kjo̱a̱a̱ na̱ngo̱xi̱ xi tso'bá ko̱jo kjo̱a̱a̱ ngo xó nda̱ xi 'mí Kjiso̱, xi je k'ien, kó tikón xó tjítsó.
\v 20 Kó nga an nde bejín an mí ni xi sa̱'íi̱n kui kjo̱a̱a̱, s'e̱ asíyáa̱ Pabloo̱ tsi mejeén nga ko̱e̱je̱ na̱xi̱ńdá Jerusale̱n tsi̱'e̱ nga ki̱a̱ ka̱majeé kjo̱a̱a̱ kui ni xi tjíbotijétá'ínni.
\v 21 Tanga kjo̱a̱a̱ nga Pabloo̱ tsí'á nga nda̱ xtitjoón Sesaa̱ sa̱'índajii̱n kjo̱a̱xtii̱, kó kuíni nga je katsja an kjo̱a̱ nga takó ngat'íjñá ra ndo̱bo̱a̱ya ngaskande nga ka̱ma sanguiyakóo̱n xtitjón Sesaa̱.
\p
\v 22 S'e̱ nda̱ Agripaa̱ bi katsoó nda̱ xi 'mí Festoo̱:
\p –Ko̱jo an mejénna kuint'iée̱ kui nda̱a̱ kó ka̱tso̱.
\p Kós'e̱ Festoo̱ bi katsoó:
\p –Ti ndyiojoón ka̱ma ko̱nda'yée̱.
\p
\v 23 Kó bo̱a̱ ts'én nga kamánguindyiojón, Agripaa̱ ko̱jo na̱ Berenisee̱ jachó ndikón ndikón ki̱a̱ ngu̱i̱ndie nínga botíjeé, kó nijan jachójo̱ já nguito̱ko̱o̱ jajún ko̱jo xta̱ xi 'niú yandíkón kui na̱xi̱ńdaá, kó Festoo̱ tsí'á nga kijíchja'á Pabloo̱.
\v 24 Kós'e̱ Festoo̱ bi katsó:
\p –Nda̱ Re Agripa̱, ko̱jo já xi nijan síndojinná k'i̱e̱e̱, k'i̱e̱ tikónjnú kui nda̱a̱, kjo̱a̱a̱ kjín ma xta̱ judío̱ xi ndyi̱bonguíta'in, ki̱a̱ na̱xi̱ńdá Jerusale̱n ko̱jo k'i̱e̱ na̱xi̱ńdá Sesarea̱, kó 'niú ndyi̱mí'á nga si̱'ank'ien.
\v 25 Tanga bejiín ko̱n an nga ngo jé xi 'niú kats'én nga si̱'ank'ien ma, tanga nga ti kuii̱ ts'énmí'á nga kui nda̱ xtitjón xi tikón Roma̱ nga ts'énjeé, kuíni nga ki̱a̱ ts'én tsanguiyakonñaa̱.
\v 26 Tanga nga jmíjínna ni xi xian an kjo̱a̱a̱ kui, nda̱ xtitjón, tasá k'i̱e̱ jé'e̱jo an nguindyikin, nda̱ re Agripa̱, tsi̱'e̱ nga nguije ikindyisé ndi̱ya̱á skuie an kóts'en kuit'a an xo̱jo̱n xi sanguiyáa̱ nda̱ xtitjoón.
\v 27 Nga̱t'a̱ ndajín kji'i mana nga ngo nda̱ xi tji'yá ndo̱bo̱a̱ya taxkiya sanguiya an kó xiyájín an mí kjo̱a̱a̱ xi tjíbotijétá'ínni.
\c 26
\s Bi ts'én ts'axié'á yojoo̱ Pabloo̱ nguindyi̱ko̱n nda re Agripaa̱
\p
\v 1 Kó nda̱ re Agripaa̱ bi katsoó Pabloo̱:
\p –Ka̱ma ko̱ndókjo̱e̱ ji kóts'en ko̱'na̱xié'é yojóo.
\p Kós'e̱ Pabloo̱ iskjinink'a tsja kó bi katsó nga tsíchji̱a̱:
\p
\v 2 –Kjén nga ta tsjakji'ina nga ka̱ma kuichji̱a̱ an ngot'e̱ nguindyikin ji nda̱ re Agripa̱, tsi̱'e̱ nga k'oxié'á an yojona kjo̱a̱a̱ ngayeje ni xi ndyi̱bonguíta'inna xta̱ judíoo̱,
\v 3 nga̱t'a̱ je ye yeje ji, nda̱ re, kjo̱a̱a̱ kjo̱a̱xchá xi tjiín xta̱ judíoo̱ ko̱jo kjo̱a̱a̱ ni ni'in xi chji̱a̱jo xkjín, ja̱ kuíni nga mí'á'ñaa̱ nga nda nda ma nda'yéní ni xi kuichji̱a̱ an.
\s Bi ts'én kis'ijña Pabloo̱ ngas'e̱
\p
\v 4 Ngayeje xta̱ judíoo̱ be kóts'en kis'ijña an ki̱a̱ nanguina ko̱jo na̱xi̱ńdá Jerusale̱n ndeskande koó nga kjindí an.
\v 5 Kó ti be, kó ka̱ma ko̱tso̱ya tsi mejeén, nga ndeskande koó ngas'e̱ nga xikó ts'én 'niú kjo̱a̱kiti xi tjiín na̱ngo̱xi̱i̱ nga kis'ijña an xikoó ngo nda̱ fariseo̱.
\v 6 Kó ngot'e̱ 'ne̱, k'i̱e̱ tikón an tsi̱'e̱ nga si̱'anjéna, tangat'anii̱ nga ts'énkoyáa̱ kjo̱a̱a̱ ni xi Néná katsáyatjón nga tsja̱á xta̱ tji̱e̱ xcháná,
\v 7 kó nga tiejó tji̱e̱e̱ xta̱ xi chji̱a̱ni Israe̱l ndyi̱koya nga Néná sa̱'ínkjatjosón kui nii̱, kó kuíni nga ndyi̱bendikón Néná kó ndyi̱ts'enseén Néná nga ni̱xtjin ko̱jo nga ni̱xtji̱e̱n. Tangat'anii̱ kui kjo̱a̱chiyaá, ji nda̱ re Agripa̱, nga xta̱ judíoo̱ ndyi̱bonguíta'inna ngot'e̱.
\v 8 ¡Mí ni! ¿Ánní nga s'ijinjínjnú nga Néná ts'énkja'á'yaá xta̱ xi je jesoón?
\p
\v 9 Ti an bo̱a̱ ts'én kats'enkjó an ngas'e̱ nga chjiénga tsie ni sa̱'in an tsi̱'e̱ nga si̱'ankjie an ngayeje xta̱ xi s'ijii̱n ja'eén Kjiso̱ xi chji̱a̱ni na̱xi̱ńdá Nasare̱t,
\v 10 kó bo̱a̱ kats'en an ki̱a̱ na̱xi̱ńdá Jerusale̱n, kó já nguito̱ko̱o̱ chiná'mii̱ katsjána kjo̱a̱ nga kjín xta̱ tsjiee̱ Néná xi katsanguis'ien an ndo̱bo̱a̱ya, kó nda kasasienna nga kini'ánk'ién kui xtaa̱.
\v 11 Kó kjín ndi̱ya kats'enjée̱ nga kats'ée̱n kjo̱a̱'niú tsi̱'e̱ nga ch'o ka̱tso̱ kjo̱a̱a̱ kjo̱a̱s'ijii̱n, kó kui nii̱ kats'en an ngayeje ngu̱i̱ya ndi'a nínga ndokjo̱a̱ eén Néná, kó achichí kamáxtína kondra̱ tsi̱'e̱ kui jaá nga̱t'a̱ ngaskande na̱xi̱ńdá xi xín tsangatji̱nguíi̱.
\s Bi ts'én íni̱jmi Pabloo̱ xikó ts'én kis'ijii̱n Néná
\r (Ni xi kamá 9:1-19; 22:6-16)
\p
\v 12 Kó kui xá ts'énfí an na̱xi̱ńdá Damasko̱, nga katsjána kjo̱a̱ nga katsanguiyana já nguito̱ko̱o̱ chiná'mii̱,
\v 13 tanga ki̱a̱ ngu̱i̱ya ndi̱ya boá, nda̱ re Agripa̱, nga ndis'ueé, kamábe an ngo ndi'í xi kjindibáni ndi'ak'ajmi ján, ngo ndi'í xi 'niú ngase ta bo̱a̱jiín ndi'ií ts'ueé, xi kitíniéna an ko̱jo já xi nijan tjimájo̱na,
\v 14 kó ngayejejne̱ nga ts'ákajne̱ t'ananguii̱, s'e̱ tsint'ie an ngo nda̱ xi chji̱a̱ én ebreo̱ xi bi katsóna: “Saulo̱, Saulo̱, ¿mí kjo̱a̱a̱ nga timiyitji̱nguiní? ¡Ti jiní xi ti'ni'ín'íi̱n yojóo, xikoó tsi ti jii̱ ti'bée̱ ngo nda'yańts'én yojóo!”
\v 15 Kó an bi kixiáa̱n: “¿'Yá jií bo̱a̱ Ndi̱a̱?” S'e̱ Ndi̱a̱a̱ bi katsóna: “An boá xi Kjisoo̱, kó an boá xi timiyitji̱nguiní.
\v 16 Tanga ti̱sítji̱n, kó tasin kixi̱, nga̱t'a̱ k'i̱e̱ akóo yojona tsi̱'e̱ nga tsjaxaá kó moso̱na ka̱ma ji ko̱jo chistikoo̱ ni xi je kamáye ngot'e̱ ko̱jo ni xi s'e̱ xchi̱e̱ nga kokóo yojona,
\v 17 k'oxié'áñaá ngu̱i̱ya tsja xta̱ xi judío̱ ko̱jo xta̱ xi judío̱jín, kui xi ts'éntsanguiyáa̱ ji ngot'e̱,
\v 18 tsi̱'e̱ nga chjéx'e ji ndyi̱ko̱n, kó nguiti nínga jñójín k'uitsóma ngase, tasá nínga tsijen ngat'ítso̱ma, tsi̱'e̱ nga nguiti kuijín nga'niuú xindajín Satanaa̱ k'uitsómatji̱nguii̱, nga tasá Néná ngat'ítso̱matji̱nguii̱, tsi̱'e̱ nga s'ijii̱n an, kó sa̱ko̱ó kjo̱a̱ni'ánjetakoón jeé ko̱jo kui ngu̱i̱ndie xi katsó Néná nga tsja̱á xta̱ xi je kats'éntsjie yojoo̱.”
\s Bi ts'én tsint'ié'eén Pabloo̱ ni xi akakoo̱
\p
\v 19 Kó bo̱a̱ kji'i kui nii̱, nda̱ re Agripa̱, kó bo̱a̱ ts'én kats'enkjatjosón an ni xi akóna Néná xi kjindibáni ndi'ak'ajmi ján,
\v 20 kó kuíni nga tjón ma xta̱ xi chji̱a̱ni na̱xi̱ńdá Damasko̱ katsáyáa̱ eén Néná, s'e̱ jaskan xta̱ xi chji̱a̱ni na̱xi̱ńdá Jerusale̱n ko̱jo ngayeje xta̱ xi chji̱a̱ni nangui Judea̱, kó ti katsáyáa̱ xta̱ xi judío̱jín nga, katsáyáa̱ tsi̱'e̱ nga sa̱'ínk'oyá yojoo̱ jé xí ndyi̱ts'en kó nga tasá Néná ko̱ngase ko̱jo nga sa̱'ín ni xi nda kji'i, kós'e̱ bo̱a̱ ts'én ko̱kó yojoo̱ nga ja̱koxi̱ nga je ndi̱ya̱á Néná tjimá.
\v 21 Tangat'anii̱ kui nii̱ nga xta̱ judíoo̱ katsoboána ndi̱tsee̱n na̱ngo̱xi̱i̱, kó ngaskande kamámejeén nga kats'énk'iénna.
\v 22 Tanga tangat'anii̱ nga Néná asíko̱jona kuíni nga kixi̱ tikón an ngot'e̱, nga ts'énchji̱a̱jo an kjo̱a̱a̱ ndi̱ya̱á Néná ngayeje xta̱, xi xchá xi kjindí, jmí ni̱xtjin nga kje̱'e ni xi ts'énchji̱a̱jo an kjo̱a̱a̱ ni xi tsíchji̱a̱ já chji̱ni̱e̱'e̱én Néná ko̱jo Moisee̱ nga tsíchji̱a̱ kjo̱a̱a̱ ni xi ka̱ma:
\v 23 Nga Kristoo̱ chjiénga ko̱ya, tanga nga jaskan nguije k'ien, kuí xí tjón ka̱ma nga kjo̱a̱'á'yaá, kó nga kuí xí ku̱i̱'íni̱jmi kjo̱a̱a̱ ndi'ií, tsi̱'e̱ nga kjo̱tjo'áa̱ yojóo xta̱ na̱xi̱ńdaá ko̱jo xta̱ xi judío̱jiín.
\s Pabloo̱ bi ts'én 'niú tsí'aá nda̱ re Agripaa̱ tsi̱'e̱ nga s'ijii̱n
\p
\v 24 Kó tji̱e̱nga Pabloo̱ bi tjítsó kjo̱a̱a̱ nga ts'én'boxié'á yojoo̱, nda̱ xi 'mí Festoo̱ ngaskande 'niú ma tsíchji̱a̱ nga bi katsó:
\p –¡Tsabeéri, Pabloo̱! Kjo̱a̱a̱ nga ta ja'atio nga tichjat'ayé ji xo̱jo̱n kuíni nga je kjimatsabé maá.
\p
\v 25 Tanga Pabloo̱ bi katsó:
\p –Tsabéjínna, ji nda̱ Festo̱, tasá ni xi ts'énchji̱a̱ an xi tjiín ngakixi̱ kó ja̱koxi̱ nga bo̱a̱ kji'i.
\v 26 Ja̱ ki̱a̱ tikón ki̱a̱a̱ nda̱ re Agripaa̱ xi be nda nda kui nii̱, kó kuíni nga tsakjonjín an nga ts'énchji̱a̱ an nguindyi̱ko̱n kui, nga̱t'a̱ berií ko̱n an nga ja̱koxi̱ nga ko̱jo kui be ngayeje kui nii̱, nga̱t'a̱ jmí tsi ngo ngu̱i̱ndyióngu̱i̱nijon 'ma nínga kamá kui nii̱.
\v 27 ¿A s'ijii̱n ji nda̱ re Agripa̱ ni xi kats'én'indó já chji̱ni̱e̱'e̱én Néná? Je be an nga s'ijii̱n ji.
\p
\v 28 Kó nda̱ re Agripaa̱ bi katsoó:
\p –¿A tini'ínkjé nga xtaa̱ Kristoo̱ tji̱e̱nmá ka̱ma an nga?
\p
\v 29 Kó bi katsoó Pabloo̱ nguijee̱:
\p –Tsi tsie ko̱jo tsi chiboa ni̱xtjin, achichí ra nda kji'i tsi Néná xi bo̱a̱ ka̱tso̱ nga jmí tsi ta jí tsi xi s'ijii̱n nda̱ re, ko̱jo ngayeje xta̱ xi ndyi̱nt'iena ngot'e̱ xi nga s'ijii̱n nga, tsi̱'e̱ nga bo̱a̱ sa̱'ín xikó tjíts'en an, tanga nga kuijín ń'niú ki̱chaa̱ si̱t'a.
\p
\v 30 S'e̱ nguije tsint'ié kui eén, nda̱ re Agripaa̱, nda̱ xtitjoón, na̱ Berenisee̱ ko̱jo ngayeje xta̱ xi síndo ki̱a̱a̱ jastjíe̱n yeje,
\v 31 s'e̱ kijíjo̱ t'axín xkjín nínga kijíchji̱a̱ kjo̱a̱a̱ kui nii̱, bi katsó nga tsíchji̱a̱jo xkjín:
\p –Kui nda̱a̱ jmí ni kats'énjín tsi̱'e̱ nga si̱'ank'ien ma, ti nde jmí kjo̱a̱jín nga ndo̱bo̱a̱ya ma k'uijñá.
\p
\v 32 Kó nda̱ re Agripaa̱ bi katsoó Festoo̱:
\p –Kamá kini'ánkjíndé kui nda̱a̱, tsi kuijín xi tsí'á nga nda̱ xtitjoón xi sa̱'ínjeé.
\c 27
\s Bi ts'én kananguiya Pabloo̱ na̱xi̱ńdá Roma̱
\p
\v 1 Kó nguije katse'é kjo̱a̱ nga katsanguiyajne̱ nangui Italia̱, Pabloo̱ ko̱jo já xi nijan kis'ijñajo̱ ndo̱bo̱a̱ya, kini'ánk'as'iee̱n ngo nda̱jun nguito̱ko̱ xi 'mí Julio̱ xi chji̱a̱ni jajuún nda̱ xtitjoón.
\v 2 Kó tsanguinyájne̱ ngo tjotso je xi chji̱a̱ni na̱xi̱ńdá Adramitio̱ xi je makjí ma ki̱a̱ nangui Asia̱, kó ki̱a̱ nijan tikónjo̱jne̱ nda̱ xi 'mí Aristarkoo̱, xi chji̱a̱ni Tesalónika̱, na̱xi̱ńdá xi chji̱a̱ni nangui Masedonia̱,
\v 3 kó nga kamánguindyiojón jáchójne̱ na̱xi̱ńdá xi 'mí Sido̱n, nínga nda̱ xi 'mí Julioo̱ achichí nda kats'énjo̱ Pabloo̱, nga̱t'a̱ katsjandieé nga kijíkatsijee̱n xta̱ xi nda ya'a ko̱jo nga nda kats'énseén kui xtaa̱.
\v 4 Kó nguije jatjojne̱ na̱xi̱ńdá Sido̱n, ki̱a̱ ikitjajne̱ t'a tji̱ngu̱i̱ Chipre̱, nga̱t'a̱ tjo̱o̱ ndáchíkoón kondra̱ kamájne̱,
\v 5 kó nguije ikitjatjíyajonjne̱ na̱xi̱ńdá Sisilia̱ ko̱jo Panfilia̱, jáchójne̱ Mira̱ ngo na̱xi̱ńdá xi chji̱a̱ni nangui Lisia̱.
\p
\v 6 Kó nda̱ nguito̱ko̱o̱ jajuún ki̱a̱ kasakoo̱ ngo tjotso je xi chji̱a̱ni na̱xi̱ńdá Alejandría̱ xi ts'énfí nangui Italia̱, kó ki̱a̱ kats'énk'as'ienjne̱ kui tjotso jee̱ tsi̱'e̱ nga tsanguín ndojójne̱.
\v 7 Achichí kjín ni̱xtjin nga inda inda kijí tjotso je xi timayajne̱, kó ta'ya jáchójne̱ kje̱n na̱xi̱ńdá Jnido̱, nga̱t'a̱ takó 'niú tji̱e̱n tjo̱o̱ ndáchíkoón, kó ki̱a̱ ikitjajne̱ kje̱n t'a na̱xi̱ńdá Salmo̱n nga ikitjatjíyajonjne̱ tji̱ngu̱i̱ Kreta̱,
\v 8 kó ta'ya ts'énfí tjotso jee̱ t'a ndáchíkoón, s'e̱ jáchójne̱ ngo ngu̱i̱ndie xi 'mí Bueno Puerto̱, tiña na̱xi̱ńdá Lasea̱.
\p
\v 9 Kó nguije ja'a kjín ni̱xtjin, nguije nguiti majín ta chiboa miṉtja̱jin ndáchíkoón, nga̱t'a̱ je kjimatiña cho̱ṉch'a̱án, kuíni nga Pabloo̱ bi ts'én atíxomaa̱ kui jaá,
\v 10 nga bi katsoó:
\p –Jún bo̱a̱ já, berií ko̱n an nga 'niú ndikón kji'i nga bi ts'én ndyi̱monguín, ko̱jo nga xcha̱ja tjotso jee̱ ko̱jo ch'ia xi ya'a, kó ngaskande tsi ndajín ni̱xtjin ngaskande ñá ko̱ya.
\p
\v 11 Tanga nda̱ nguito̱ko̱o̱ jajuún kats'én ngasee̱ xki̱ ni xi katsó nda̱ xi tsi̱'e̱ tjotso jee̱ ko̱jo nda̱ xi ts'énxájo̱ ta bo̱a̱jiín ni xi katsó Pabloo̱.
\v 12 Kó nga kui ngu̱i̱ndie ján ndajín ma kji'i nga ki̱a̱ kjo̱a̱'aa̱ cho̱ṉch'a̱án, kó ta mején ngayejee̱ nga kats'énkjó nga tasá nda tsi kjo̱tjo ki̱a̱a̱ s'e̱ sa̱'ín kjo̱a̱'niú tsi̱'e̱ nga kjo̱chó na̱xi̱ńdá Fenise̱, ngo na̱xi̱ńdá xi tikónt'a ndáchíkón xi chji̱a̱ni Kreta̱, xi kis'ijñaa̱ ngo ngu̱i̱ndie nínga ka̱maa̱ nda ts'én kjo̱a̱'aa̱ cho̱ṉch'a̱án.
\s Bi ts'én kitsjien ngo tjo̱'niú ngu̱i̱jin ndáchíkoón
\p
\v 13 Kó kats'énkjó kui jaá nga takó ka̱ma ko̱e̱je̱ ndojó ra, nga̱t'a̱ je íts'i̱yanii̱ ngo ndí tjo̱ inda xi kitsjien xtji̱e̱e̱n na̱ngui, jatjo kó ki̱a̱ kijí xi ingoboaá tji̱ngu̱i̱ Kreta̱.
\v 14 Tanga jaskan kjindibá ngo tjo̱'niú xtji̱e̱e̱n t'a tji̱ngu̱i̱i̱ xi ítsanieyá ma tjotso je xi 'mí Euroklidoo̱n,
\v 15 kó tjo̱o̱ iskjifé tjotsojne̱, kó nguiti kamájínjne̱ ikjienda nga̱t'a̱ xtji̱e̱e̱n kje̱n ts'én be'é tjo̱o̱ ndáchíkoón, tasá chjínií katse'éndiejne̱ nga kijíjo̱jne̱ tjo̱o̱ ta nínga kamámejénrií.
\v 16 Kós'e̱ ikitjajne̱ xtji̱e̱e̱n nga̱xto̱n ngo ndí tji̱ngu̱i̱ xi 'mí Klauda̱, nínga tjo̱o̱ nguiti 'niújín tji̱e̱n, kó achichí kjo̱a̱ni̱ma̱ kis'inguijne̱ nga kini'ánkijinjne̱ tjotso chichií,
\v 17 nguije kats'énk'as'ien tjotso chichií ngu̱i̱ya tjotso jee̱, kui jaá íkjá ń'niú tjotso jee̱ tsi̱'e̱ nga katsjaa̱ nga'niú, kó achichí katsakjónní tsi ki̱a̱ kjojñá'niú tjotso jee̱ ngu̱i̱jin tsomí xi 'mí Sirtee̱, kós'e̱ yején ṉjñoo̱ tjotso jee̱, s'e̱ katsjandieé tsi̱'e̱ nga ta nínga mejénrií tjo̱o̱ kijíjo̱.
\v 18 Tanga nga kamánguindyiojón 'niú ngase kitsjien tjo̱o̱, kó kuíni nga atítsojo ngayeje ch'ia xi ts'énya'a tjotso jee̱ ngu̱i̱jin ndáchíkoón,
\v 19 kó xi ma jaán ni̱xtjin, ti kuii̱ jaá ts'ajmi ngándá yeje ngu̱i̱jin ndáchíkoón ni xi ni'ánkjién nga ni'ánxájo̱ tjotso jee̱.
\v 20 Kó kjín ni̱xtjin nga nguiti kamáyajín ts'ueé ko̱jo ṉñóo, kó nga tanisién 'niú kamá tjo̱ xi kamánié ji̱n kó je nde nguiti ndyi̱chiyájínjne̱ tsi kjo̱tjo'a ngasejne̱ yojojne̱.
\p
\v 21 Kó nga je kjín ni̱xtjin nga nguiti ndyi̱chiniéjín ji̱n ṉño̱, tichaa̱n jastjíe̱n Pabloo̱ kós'e̱ bi katsó:
\p –Jún já, tsi jún xi kini'ánjnú'un xki̱ nga jatjoján tji̱ngu̱i̱ Kreta̱, ta sa ra bo̱a̱jín kamáná ñá ko̱jo tjotso je xi timaya.
\v 22 Kó ngot'e̱ 'ne̱ te'énga'niújnúu̱ yojojnú, nga̱t'a̱ nde ngojín jún xi ko̱yajnú, nda tsi tjotso jee̱ xcha̱ja.
\v 23 Nga̱t'a̱ kó ni̱xtji̱e̱n ngo ndítsjie xi katsanguiya Néná tsíchji̱a̱jona, kui Néná xi chjiá an ko̱jo xi tjíts'en an xaá,
\v 24 kó bi katsóna: “Ngata̱ ndakinjín ma ji Pablo̱, nga̱t'a̱ chjiénga kjóchonchíi̱n nda̱ xtitjón xi 'mí Sesaa̱, kó Néná je katsjandieé ji ko̱jo ngayeje xta̱ xi nijan tjimájoo̱ ngu̱i̱jin ndaá nga ko̱yajínjnú.”
\v 25 Kó kuíni já, te'énga'niújnúu̱ yojojnú, nga̱t'a̱ 'niákón an Néná kó bee̱ ko̱n an nga kjo̱tjosón kui ni xi tsíchji̱a̱jona kui ndítsjiee̱.
\v 26 Tanga chjiénga ngo tji̱ngu̱i̱ kjojñá'niú tjotsoná.
\p
\v 27 Mejeén jó xomana̱ ja'a nga timajinjne̱ ndáchíkón xi 'mí Adriátikoo̱ nga kijíjo̱jne̱ k'i̱e̱ kijíjo̱jne̱ ján tjoó, nga mején ma ra masien ni̱xtji̱e̱n já xi ndyi̱ts'enxájo tjotso jee̱ kamábe nga je kjimatiñajne̱ t'a chji̱ndi̱e̱ nínga tikón ngo t'anangui.
\v 28 Ts'achi̱bo̱a̱ kókji'i na̱nga̱ ndójoaa̱, kó kantji'ún ngo metro̱ nga na̱nga̱, kós'e̱ ngu̱i̱chí boa'á ngase ti ts'achi̱bo̱a̱ ma nguiní ingo ndi̱ya kó je kan yito Metro̱ tjiín nga na̱nga̱ ki̱a̱a̱.
\v 29 Kó tangat'aa̱ nga ndyi̱tsakjoón tsi ndi̱jo̱ stíkjojójo̱, xtji̱e̱e̱n nga̱xto̱n tjotso jee̱ ts'ajmijin ngu̱i̱jin ndáchíkoón nijún ki̱cha̱tji̱ xi bojñá'niúní tjotso jee̱, kó kamámejeén nga tsá sisi̱én.
\v 30 Kó já xi ts'énxájo̱ tjotso jee̱ kats'énkjó nga ko̱ngaa̱ tjotso jee̱, kó kuíni nga íts'i̱yanii̱ nga ts'enje̱ngui tjotso xi̱xii̱, tix'i̱a̱n ja̱ kats'én xi ki̱cha̱ xi ts'énkasién tjotso jee̱ ts'enje̱ngui xtji̱e̱e̱n to̱ko̱ tjotso jee̱ kats'én,
\v 31 kó Pabloo̱ katsáyaá nda̱jun nguito̱ko̱o̱ ko̱jo jajuún kó bi katsoó:
\p –Tsi kui jaá k'i̱e̱jín k'uíndo ngu̱i̱yaa̱ tjotso jee̱, ti nde jún kjo̱tjo'ájínjnú nga.
\p
\v 32 Kós'e̱ bo̱a̱ ts'én jajuún tsatie ń'niuú tjotso chichií, kó ts'ajmijin ngu̱i̱jin ndáchíkoón.
\p
\v 33 Kó nguije tjisísi̱e̱én, Pabloo̱ tsíchji̱a̱jo ngayeje jaá tsi̱'e̱ nga skji̱ni̱e̱ chií ni chinie, kó bi katsoó:
\p –Je jó xomana̱nii̱ nga ndyi̱tsjayojoféjínjnú ko̱jo nga tindyión kjindiájnú.
\v 34 Tasá ti'ánjnú ngo kjo̱a̱nda chi̱ni̱e̱ chiíjnú ni chinie, chjiénga bo̱a̱ si̱'ánjnú tsi mejénjnú ku̱i̱ndyionjnú, nga̱t'a̱ nde ngojín tsja̱tokó xcha̱ja.
\p
\v 35 Kó nguije tsíchji̱a̱ kui eén, Pabloo̱ iskjíbé ngo pan, kós'e̱ katsjaá ndok'óchji Néná nguindyi̱ko̱n ngayeje kui jaá, kó akjángá, s'e̱ iskjinie,
\v 36 kó ngayejee̱ nga tsja kamaá kó ti iskjinie kui jaá nga.
\v 37 Kó xi ndyi̱a̱jne̱ ngu̱i̱ya tjotso jee̱ jó úchán ichítié ko̱jo kan jun xta̱ majne̱ ngayejejne̱.
\v 38 Kó jaskan nguije iskjinie ngayeje ni xi kamámejeén, ts'ajmijin to ndso̱ko̱a̱n ṉño̱o̱ ngu̱i̱jin ndáchíkoón tsi̱'e̱ nga kamáxtja̱ ngase tjotso jee̱.
\s Bi ts'én kamá xi̱ tjotso jee̱
\p
\v 39 Kó nguije kisisie̱én, já xi ts'énxájo̱ tjotso jee̱ nde kamábejín t'ananguii̱, tanga kamábe ngo t'a chji̱ndi̱e̱e̱ ndáchíkoón, kó kats'énkjó nga ki̱a̱ skjién boa'á t'a tjotso jee̱ kui ngu̱i̱ndiee̱.
\v 40 Kó tsatie ń'niuú ki̱cha̱tji̱ xi bojñá'niúní tjotso jee̱, kó ki̱a̱ índomasien ngu̱i̱jin ndáchíkoón, kó kats'énxa̱n yejee̱ yándyindá xi ni'ánkjieén nga ni'ánkjí tjotso jee̱, s'e̱ iskjinink'a ṉjño xi tikón to̱ko̱ tjotso jee̱, kós'e̱ kats'énkjí tjotso jee̱ xtji̱e̱e̱n t'a chji̱ndi̱e̱e̱.
\v 41 Tanga kui tjotso jee̱ jachó nínga jó nga'niuú ndójoaa̱ tjín, kó ki̱a̱ kis'inijín 'niú tsomií t'a chji̱ndi̱e̱e̱, kó to̱ko̱ tjotso jee̱ kasasienijín'niú ngu̱i̱jin tsomií, kó nguiti ka̱majín kamátíyaá, tji̱e̱nga xtji̱e̱e̱n tjats'en tjotso jee̱ je katjox'a nga ye'ét'aa̱ tjo̱o̱ ndáchíkoón.
\v 42 Kó kui jajuún kamámejeén kats'énk'ién ngayeje já xi ndyi̱fí 'niuú, tsi̱'e̱ nga skji̱sónjín nga ko̱nga,
\v 43 tanga nda̱ nguito̱ko̱o̱ jajuún, xi kamámejeén ts'axié'á Pabloo̱, katsjandiéjín nga si̱'ank'ien kui jaá, kó tasá katsjá kjo̱a̱ tsi̱'e̱ nga xi máa̱ chíkji̱so̱ón kui tjón ngat'ajmijin yojoo̱ ngu̱i̱jin ndójoaa̱ tsi̱'e̱ nga kjo̱chó nga̱són kixí ján,
\v 44 kó xi majiín chíkji̱so̱ón, yátie ko̱jo xi̱i̱ tjotso jee̱ kats'énkjién nga iskjísón, kó ngayejee̱ nga jatjo'aa̱ yojoo̱ nga jachó t'a chji̱ndi̱e̱e̱.
\c 28
\s Bi kats'én Pabloo̱ tji̱ngu̱i̱ Malta̱
\p
\v 1 Kó kji'a nguije jatjo'ajne̱ yojojne̱, kji'a nga kamáyajne̱ nga Malta̱ 'mí kui tji̱ngu̱i̱i̱.
\v 2 Kó xta̱ xi síndo kui ngu̱i̱ndiee̱ kjén nga ta nda kats'énjo̱jne̱ ngayejejne̱, kó nga je stsé kjíboa'a ko̱jo nga achichí ṉch'án ngo ndi'í ítsié kós'e̱ tsíchji̱a̱jne̱ tsi̱'e̱ nga tsanguínkindyiont'ajne̱ kui ndi'ií.
\v 3 Kó nguije Pabloo̱ ja'átikó chikín kixí xi ts'én mindyiájin ngu̱i̱jin ndi'ií kó ngo ye̱ xi ts'én mongaa̱ sibeé iskjiniee̱ tsja Pabloo̱.
\v 4 Kó nga kamábe kui xta̱ xi chji̱a̱ni kui tji̱ngu̱i̱i̱ nga tsja Pabloo̱ tji̱e̱nguiboa'a kui ye̱e̱, bi katsó ja̱ k'i̱e̱ ja̱ ngajaán xkjín:
\p –Nda̱ ts'enk'ién ini̱ma̱ rá kui nda̱a̱, nga̱t'a̱ nda tsi jatjo'aa̱ yojoo̱ ngu̱i̱jin ndáchíkoón, tanga kjo̱a̱kixi̱i̱ Néná katsjandiéjiín nga k'uijñá ngase.
\p
\v 5 Tanga Pabloo̱ ki̱a̱ ítsaniejin ngu̱i̱jin ndi'ií kui ye̱e̱, kó jmí ni kamájiín.
\v 6 Kó ngayeje kui xtaa̱ ndyi̱koyaa̱ nga ka̱ma ske ko̱jo tsi ta niján ma ko̱ya ndyi̱tsó, tanga jaskan ngu̱i̱chí sajín, nga kamábe nga jmí ni kamájiín, kje̱'e ni kats'énkjó nga ngo rá ne Pabloo̱ katsó.
\p
\v 7 Kó tiña kui ngu̱i̱ndiee̱ kjín xo'ba kis'ie xi tsi̱'e̱ ngo nda̱ xi nk'a xaá xi chji̱a̱ni kui tji̱ngu̱i̱i̱ xi 'mí Publio̱, xi kjén nga ta nda kats'énjo̱jne̱ nga kixindyionjne̱ ki̱a̱a̱ ján ni̱xtjin.
\v 8 Kó na̱'mii̱ kui nda̱ xi 'mí Publioo̱ kji'ijña'on nga ṉt'e̱ ndyi̱a̱a̱ ko̱jo chi'in tji̱jmájín tjiín, kó Pabloo̱ kijíkatsijee̱n kó nguije tsíchji̱a̱a̱ Néná, íjñasoón tsja, kós'e̱ kamándaya.
\v 9 Nguije kamá kui nii̱, je'ekoón Pabloo̱ kje̱'e ngase xta̱ xi oo̱n xi tjín kui tji̱ngu̱i̱i̱, kó bo̱a̱ ts'én ngayejee̱ nga kamándaya,
\v 10 kó achichí nda kats'énjo̱jne̱ ngayeje kui xtaa̱, kó jaskan nguije ndyi̱monguín nguiníjne̱ ngu̱i̱ya tjotso jee̱, katsjájne̱ ngayeje ni xi kamáchjiénjne̱ tsi̱'e̱ ndi̱ya̱á.
\s Bi ts'én jachó Pabloo̱ na̱xi̱ńdá Roma̱
\p
\v 11 Nguije kamájne̱ ján sá nga kixindyionjne̱ kui tji̱ngu̱i̱i̱, tsanguinyájne̱ ngo tjotso je xi ki̱a̱ ja'aa̱ cho̱ṉch'a̱án, xi chji̱a̱ni na̱xi̱ńdá Alejandría̱, xi kjit'a a̱sie̱én ne xi 'mí Kasto̱r ko̱jo Polu̱s.
\v 12 Kó nga jáchójne̱ na̱xi̱ńdá xi 'mí Sirakusa̱, ján ni̱xtjin kamájne̱ nga kixindyionjne̱ ki̱a̱a̱,
\v 13 kó ki̱a̱ jatjo nguiníjne̱ ngaskande nga jáchójne̱ na̱xi̱ńdá Rejio̱, kó ingo ni̱xtjin ngase kis'ie ngo tjo̱ xi kjindibá xtji̱e̱e̱n na̱ngui, kó ngaskande xi ingo ni̱xtjii̱n jáchójne̱ na̱xi̱ńdá Puteoli̱,
\v 14 nínga kasakojne̱ já ṉts'ie xi bo̱a̱ katsójne̱ nga ngo xomana̱ ku̱i̱ndyionjo̱jne̱ ki̱a̱, kó bo̱a̱ ts'én ngaskande nga fet'a tsanguínjne̱ na̱xi̱ńdá Roma̱.
\v 15 Kó já ṉts'ie xi chji̱a̱ni na̱xi̱ńdá Roma̱ ja̱ bo̱a̱ je tsint'ié kui eén kjo̱a̱a̱ ji̱n, kó kuíni nga kijíkja'ayindi̱yajne̱ ngaskande ngo ngu̱i̱ndie xi 'mí Foro̱ tsi̱'e̱ Apioo̱ ko̱jo ngu̱i̱ndie xi 'mí Ján Taberna̱, kó nga kamábe kui jaá, Pabloo̱ katsjaá ndok'óchji Néná kó 'niú tsja kamá ngasee̱.
\v 16 Kó nga jáchójne̱ na̱xi̱ńdá Roma̱, jajuún katsjandié nga xín kis'ijña Pabloo̱, tanga ta ngo nda̱jun xi askondá.
\s Pabloo̱ Bi ts'én íni̱jmi eén Néná na̱xi̱ńdá Roma̱
\p
\v 17 Kó nga ja̱ bo̱a̱ je ján ni̱xtjinnii̱ nga jachó na̱xi̱ńdá Roma̱, Pabloo̱ tsíchji̱a̱a̱ ngayeje xta̱ xi síndotjoón xta̱ judío̱ xi síndo na̱xi̱ńdá Roma̱, kó nguije kamátikó yeje kui jaá, bi katsoó:
\p –Jún já ṉts'ie, nde ngo ni tjíts'enjín an kondraa̱ xta̱ judíoo̱ ti nde kondraa̱ kjo̱a̱xchá xi tjiín xta̱ tji̱e̱ xcháná, tanga takó bo̱a̱ ts'én ki̱a̱ na̱xi̱ńdá Jerusale̱n kini'ánk'as'ienna ngu̱i̱ya tsja xta̱ Roma̱,
\v 18 kui xta̱ xi jaskan nguije kats'énkijents'oana kamámejeén íjñandéna, nga̱t'a̱ jmí jé kasakojiín kjo̱a̱a̱ an tsi̱'e̱ nga si̱'ank'ienna,
\v 19 tanga xta̱ judíoo̱ katsjandiéjín, kó kuíni nga tsí'á an nga nda̱ xtitjoón xi ko̱ngasee̱ tsi tjínna jé ko̱jo tsi jmíjínna, nda tsi jmíjínna ngo ni xi konguíta'in an xta̱ na̱xi̱ńdána.
\v 20 Kó kuíni nga tsíchji̱a̱ yejejnú'un jún, tsi̱'e̱ nga skuiejnú'un kó xiyájnú'un, nga̱t'a̱ tangat'anií kui ni xi ndyi̱chiyáa̱ ñá xi xta̱ Israe̱l, kó kuíni nga bi ts'én tjitá'niú an k'i̱e̱e̱.
\p
\v 21 Kó kui jaá bi katsoó Pabloo̱:
\p –Ji̱n, nde ngo xo̱jo̱n tjinanguiyajínjne̱ xi chji̱a̱ni nangui Judea̱ xi chji̱a̱ kjo̱a̱a̱ ji, ti nde ngojín já ṉts'ie judío̱ xi ndyi̱ndibání ján xi ch'o ts'én ndyi̱chji̱a̱ kjo̱a̱a̱ kondra̱ tse̱.
\v 22 Mejénjne̱ ko̱nda'yájne̱ kóts'en ni'ínkjé ji, nga̱t'a̱ je yajne̱ nga tajñání tjindókjo̱a̱ kjo̱a̱a̱ kondraa̱ kui ndi̱ya tja̱tsi̱e̱e̱.
\p
\v 23 Kó nguije ngo ni̱xtjin ik'íjñaá, achichí xta̱ jachókoón Pabloo̱, kui xi katsáyaá kjo̱a̱a̱ xikó ts'én ko̱tíxoma Néná ndeskande nga tajño̱ó ngaskande nga kamánguixoón, kamámejeén Pabloo̱ nga sa̱'ín'indakon kui xtaa̱ kjo̱a̱a̱ Kjisoo̱, nga kats'énkjién xo̱jo̱n kjo̱a̱kitii̱ Moisee̱ ko̱jo xo̱jo̱n xi kats'én'indó já chji̱ni̱e̱'e̱én Néná.
\v 24 Kó tjín xi kis'ijii̱n ni xi katsó Pabloo̱, kó tjín xi kis'ijinjiín nga,
\v 25 kó nga jmí ni índajín, ńgó ńgó kijí, kó Pabloo̱ ta bi tsi katsoó:
\p –Achichí nda tsíchji̱a̱jo xta̱ tji̱e̱ xchájnú A̱sién Ni̱xtjii̱n Néná nga kats'énkíchji̱a̱ nda̱ chji̱ni̱e̱'e̱én Néná xi 'mí Isayaa̱ nga bi katsó:
\q
\v 26 T'en ji kó t'íyée̱ kui xta̱ na̱xi̱ńdaá:
\q Nda tsi 'niú ko̱nda'yájnú, tanga ka̱makjínjínjnú,
\q ko̱jo ti nda tsi 'niú stsitsíjenjnú, nde xcha̱jínjnú,
\q
\v 27 nga̱t'a̱ tanisién 'niú tajá ini̱ma̱a̱ kui xta̱ na̱xi̱ńdaá,
\q kó kats'énxtiya yojoo̱,
\q kó íchjá ndyi̱ko̱n,
\q tsi̱'e̱ nga ka̱majín sku̱i̱e̱ ti nde ka̱majín ku̱i̱nt'ie,
\q ko̱jo ti nde kamákjínjiín,
\q tsi̱'e̱ nga ánjín kjo̱e̱'ekónna,
\q kó nga ka̱majín an sa̱'indaya an.
\m
\v 28 Jún ngatamayajnú nga ngot'e̱ 'ne̱ Néná ts'éntsjaá kjo̱a̱'naxié'aá xta̱ xi judío̱jín, kó tasá kui xi ku̱i̱nt'ie kui eén.
\p
\v 29 Kó nguije katsó kui nii̱, já judíoo̱ kijí, kó tsíchji̱a̱tijo xkjín.
\p
\v 30 Kó Pabloo̱ jó nó chi̱bo̱a̱ chi̱bo̱a̱ kamaá nga kis'ijña ngo ndi'a xi íchjí sá, nínga kats'énseén ngayeje xta̱ xi jachókoón,
\v 31 kó nde jmíjín xi kats'énni'ii̱n nga íni̱jmi eén kjo̱a̱a̱ xikó ts'én ko̱tíxoma Néná, ko̱jo nga akóyá kjo̱a̱a̱ Ndi̱a̱ná Jesukristoo̱.