\id 1CO - MAZATECO DE SAN PEDRO IXCATLÁN
\h 1 XTA̱ KORINTO̱
\mt1 Xo̱jo̱n xi tjón xi apostro̱ Pabloo̱ katsanguiyaa̱ xta̱ na̱ngo̱xi̱ xi chji̱a̱ni Korinto̱
\c 1
\s Bi ts'én kats'éntinde Pabloo̱ xta̱ na̱ngo̱xi̱ xi chji̱a̱ni Korinto̱
\p
\v 1 An Pabloo̱, nda̱ xi Néná tsíchji̱a̱a̱ nga katsjáxaá nga̱t'a̱ bo̱a̱ ts'én kamámejeén Néná nga apostroo̱\f + \fr 1.1 \ft “Xi kananguiyaa̱” tsó “nda̱ apostro̱” axa̱ “já apostro̱” nga én griego̱.\f* Jesukristoo̱ kamá. An ko̱jo nda̱ ṉts'ié xi 'mí Sóstenee̱ ni'ántindejne̱,
\v 2 xta̱ na̱ngo̱xi̱i̱ Néná xi síndo na̱xi̱ńdá Korinto̱ kui xi kamátsjie nguindyi̱ko̱n Néná ngat'aa̱ Kristo Kjisoo̱. Jún xi Néná tsíchji̱a̱jnú nga xta̱ tsjiee̱ ka̱majnú ko̱jo kui xta̱ xi tajñá ngu̱i̱ndiení je s'ijii̱n Ndi̱a̱ná Jesukristoo̱, Ndi̱a̱a̱ kui xtaa̱ ko̱jo Ndi̱a̱ tsa̱ñá.
\v 3 Néná xi Na̱'miná ko̱jo Ndi̱a̱ná Jesukristoo̱, nga tsjajnú kjo̱a̱ndaa̱ ko̱jo kjo̱a̱xioó.
\s Bi ts'én katsjaá Pabloo̱ ndok'óchji Néná kjo̱a̱a̱ kjo̱a̱ndaa̱ A̱sién Ni̱xtjii̱n
\p
\v 4 Ngatsjé ni̱xtjin tsjáa̱ ndok'óchji Néná kjo̱a̱a̱ jún, kjo̱a̱a̱ kjo̱a̱nda xi Néná katsjájnú, nga̱t'a̱ Kristo Kjisoo̱ xí kats'én nga kasakojnú kui nii̱,
\v 5 nga̱t'a̱ tangat'anii̱ Jesukristoo̱ nga Néná katsjájnú ngo kjo̱a̱cho̱n, kjo̱a̱a̱ xikó ts'én ndokjo̱a̱jnú ko̱jo ngayeje ni xi makjínjnú,
\v 6 kó bo̱a̱ ts'én akako nga ja̱koxi̱ boá kui én xi ini̱jmijnú'un kjo̱a̱a̱ Kristoo̱.
\v 7 Kuíni nga nde ngojín kjo̱a̱ndaa̱ Néná xi xcha̱jajnú, tji̱e̱nga ndyi̱chiyájnúu̱ ni̱xtjin nga ko̱kó yojoo̱ Ndi̱a̱ná Jesukristoo̱,
\v 8 kui xi tsja̱nga'niújnú ngaskande nga kju̱i̱e̱t'a nga̱sondiee̱, tsi̱'e̱ nga jmíjín xi ka̱maa̱ ch'o ts'en ku̱i̱chji̱a̱ta'injnú ni̱xtjin nga kjo̱e̱'e Ndi̱a̱ná Jesukristoo̱.
\v 9 Néná ts'enkjátjosón ni xi tsáyátjónná nga sa̱'ín, kó kuí xí tsíchji̱a̱jnú tsi̱'e̱ nga si̱'anngojo̱jnú yojojnú ndií Néná, kui xi Ndi̱a̱ná Jesukristoo̱.
\s Bi ts'én íni̱jmi Pabloo̱ kjo̱a̱a̱ kjo̱a̱xti xi tjiín xta̱ na̱ngo̱xi̱i̱
\p
\v 10 Já ṉts'ie, tangat'anii̱ xá xi katsjána Ndi̱a̱ná Jesukristoo̱, 'niú mí'ájnú'un nga ndse̱je̱n ka̱majnú nga ngo ni ko̱ndókjo̱a̱jnú, kó nga ko̱kjangajínjnú yojojnú, nga tasá nga ngo xtín ka̱majnú, kó nga ti kuii̱ ni xi si̱'ankjójnú ko̱jo nga ti kuii̱ ni xi kjójintakónjnú.
\v 11 Jún ṉts'ie, kui nii̱ t'íxian an, nga̱t'a̱ xta̱ xi xkjín Kloee̱ katsáyána nga ti juún xó xi ndyi̱ndokjo̱a̱tijojnú xingu̱i̱jnú.
\v 12 Kjo̱a̱a̱ ni xi ts'énchji̱a̱ an, nga tjín xó ngu̱i̱jinjnú xi bi tsó: “Pabloo̱ xi chjiá an”, kje̱'e xi bi tsó: “Apoloo̱ xi chjiá an”, kje̱'e xi bi tsó: “Sefaa̱ xi chjiá an”, kó kje̱'e xi bi tsó: “Kristoo̱ xi chjiá an.”
\v 13 Tanga, ¿A tsakjanga yojoo̱ Kristoo̱? ¿A Pabloo̱ xi akjat'a kro̱ nganda tsa̱jún? ¿Axa̱ nga kastindájnú, a je xta̱ xi tsi̱'e̱ Pabloo̱ kamájnú?
\v 14 Tsjáa̱ ndok'óchji Néná nga nde ngojín jún xi an atindá an, ta kuí tsi Krispoo̱ ko̱jo Gayoo̱,
\v 15 tsi̱'e̱ nga ngojín xi bo̱a̱ ka̱tso̱ nga xta̱ tsa'a̱n je kamá nga kastindá.
\v 16 Kjénní nga ti an xí atindá an xta̱ ngo ndi'aa̱ Estéfanaa̱, tanga foa'átsjienjínna tsi atindá ngase an kje̱'e xta̱.
\v 17 Nga̱t'a̱ jmí tsi katsanguiyana Kristoo̱ tsi̱'e̱ nga an xi kotinda an xta̱, katsanguiyana tsi̱'e̱ nga an xi k'uini̱jmi an éntjatsi̱e̱e̱ Néná, kó jmí tsi én kjínkón kuichji̱a̱ an, tsi̱'e̱ nga xcha̱jajín nga'niú xi tjiín nga k'ien Kristoo̱ t'a kroo̱.
\s Pabloo̱ bi ts'én íni̱jmi nga Kristoo̱ xi nga'niuú ko̱jo kjo̱a̱kjínkoón Néná
\p
\v 18 Nga̱t'a̱ én xi tsáyá nga k'ien Kristoo̱ t'a kroo̱ kjo̱a̱tsabé maá xta̱ xi tjimá kichajá, tanga xta̱ xi je jatjo'a xikoó ñá, nga'niuú Néná maná kuí eén.
\v 19 Nga̱t'a̱ je kjit'a xo̱jo̱n eén Néná nínga bi tsoó:
\q Sa̱'inkjatsón an kjo̱a̱kjínkoón xta̱ xi kjínkoón,
\q kó sa̱'ínkjié an nga'niuú ni xi makjiín xta̱ xi inda to̱ko̱.
\p
\v 20 ¿Mí chjínií nda̱ kjínkoón kui nga̱sondiee̱? ¿Mí chjínií nda̱ chji̱ni̱e̱kjo̱a̱kitii̱ kui nga̱sondiee̱? ¿Mí chjínií nda̱ xi máa̱ fotí kjo̱a̱a̱ ngayeje nii̱ kui nga̱sondiee̱? Nga̱t'a̱ Néná boá xi kats'éntsabéjii̱n kjo̱a̱kjínkoón xtaa̱ kui nga̱sondiee̱.
\v 21 Nga̱t'a̱ ngu̱i̱jin kjo̱a̱kjínkoón Néná índa nga jmí tsi kjo̱a̱kjínkoón xta̱ nga̱sondiee̱ xi sku̱i̱e̱ni Néná, tasá Néná tsja kamaá nga ts'axié'á xta̱ xi s'ijii̱n kui ni xi kjo̱a̱tsabé kjimaa̱ xtaa̱ kui nga̱sondiee̱.
\p
\v 22 Nga̱t'a̱ xta̱ judíoo̱ kjo̱a̱ndikón mí'á tsi̱'e̱ nga sku̱i̱e̱ nga'niuú Néná, kó xta̱ griegoo̱ kjo̱a̱kjínkón mongase,
\v 23 tanga ji̱n eén Kristo̱ xi akjat'a kroo̱ xí ndyi̱'bíni̱jmijne̱, kui én xi kjo̱a̱kichajá máa̱ xta̱ judíoo̱, kó xta̱ xi tjín nga̱sondiee̱ kjo̱a̱tsabé maá,
\v 24 tanga kui xta̱ xi Néná je tsíchji̱a̱a̱ tsi xta̱ judío̱ ko̱jo tsi xta̱ griego̱, kuí boá xi makjiín nga Kristoo̱ xi nga'niuú Néná ko̱jo xi kjo̱a̱kjínkoón Néná.
\v 25 Nga̱t'a̱ ni xi ts'en Néná xi xikoó tsi ta ton maá xtaa̱, je ngase ta bo̱a̱jiín kjo̱a̱kjíntakoón xtaa̱, kó ni xi inda kjimaa̱ xtaa̱, 'niú ngase ta bo̱a̱jiín nga'niuú xtaa̱.
\v 26 Jún ṉts'ie, tsitsíjenjnúu̱ nga Néná ja'ájinjnú nda tsi chiboa tsi majnú xi kjínkónjnú xikó ts'én ts'énkjó xta̱ nga̱sondiee̱, kó chiboa tsi majnú xi xta̱ xi xá tjiín ko̱jo tsi xi xta̱ xi yandíkón.
\v 27 Tanga Néná ja'ájin ni xi ta ton maá xtaa̱ kui nga̱sondiee̱, tsi̱'e̱ nga tsja̱á kjo̱a̱soboá xta̱ xi kjínkoón, kó Néná ja'ájin xta̱ xi indaa̱ kui nga̱sondiee̱, tsi̱'e̱ nga tsja̱á kjo̱a̱soboá xta̱ xi 'niú yandíkoón.
\v 28 Néná ja'ájin ni xi ta kon tamaa̱ nga̱sondiee̱ ko̱jo ni xi jmí ni chjíjiín, ko̱jo ni xi kji̱e̱ jmíjín, tsi̱'e̱ nga sa̱'ínchaja ni xi kuii̱,
\v 29 tsi̱'e̱ nga nde ngojín xi je ka̱maa̱ yojoo̱ nguindyi̱ko̱n Néná.
\v 30 Néná xi kats'éngojo̱jnú Kristo Kjisoo̱, kó ñá xi je kini'ángojo̱ yojoná makjínná ni xi tsi̱'e̱, kó Néná xi kats'énná nga xta̱ kjínkón ñá, nga kixi̱ tindyión nguindyi̱ko̱n, nga xta̱ tsjie ko̱jo nga xta̱ xi je kamáchjítjé jéná ñá,
\v 31 tsi̱'e̱ nga bo̱a̱ si̱'án xikó ts'én kjit'a xo̱jo̱n eén Néná: “Tsi tjín xi mejeén nga je k'o̱xié yojoo̱, bo̱a̱ nga ts'én, tanga kjo̱a̱a̱ ni xi kats'én Ndi̱a̱ná”
\c 2
\s Bi ts'én katsáyá Pabloo̱ xikó ts'én íni̱jmi eén tja̱tsi̱e̱e̱ Kristoo̱
\p
\v 1 Kó an já ṉts'ie, kji'a nga kijíkónjnú'un nga ini̱jmijnú'un én xí Néná íjña'ma ngas'e̱ tanga ngot'e̱ je tikón tsijen, jmí én nk'a jmí én yi'i kats'enkjienjín an.
\v 2 Kó kamámejénjínna nga kje̱'e ni tsíchji̱a̱ an ngu̱i̱jinjnú, ta ngototo kjo̱a̱a̱ Jesukristoo̱, kui xi akjat'a kroo̱.
\v 3 Kó nga jachó ma an achichí índa kamá an kó jatsiéndíkón ma an,
\v 4 kó nga tsíchji̱a̱jojnú'un ko̱jo nga ini̱jmijnú'un eén Néná jmí én xi ts'énkjién xta̱ chji̱ni̱e̱ xi kjínkón kats'enkjienjín an nga tsíchji̱a̱jojnú'un, tasá nga'niuú ko̱jo A̱sién Ni̱xtjii̱n Néná akó nga ja̱koxi̱ ni xi tsíchji̱a̱jojnú'un,
\v 5 tsi̱'e̱ nga s'i̱jinjnú kui Néná xi tjiín nga'niuú, kó jmí tsi kjo̱a̱kjínkoón xtaa̱ xi s'i̱jinjnú.
\s Bi ts'én akóyá Pabloo̱ ni xi akó A̱sién Ni̱xtjii̱n Néná
\p
\v 6 Tanga eén kjo̱a̱kjínkón boá xi ndokjo̱a̱jojne̱ kui xta̱ xi je 'niú makjiín eén Néná, tanga kuijín kjo̱a̱kjínkoón kui nga̱sondiee̱, ti nde kuijín chji̱a̱ni xi botixómaá kui nga̱sondie xi je kjifee̱.
\v 7 Én xi ndyi̱ndokjo̱a̱jne̱ kjo̱a̱kjínkoón Néná xi jmíjín xi bee̱ boá, kjo̱a̱kjínkón xi tji'maá, tsi̱'e̱ nga ko̱jo ñá ka̱ma k'uiéná kjo̱a̱je xi íjñanda Néná ndeskande nguindiee̱ nga kats'énda nga̱sondiee̱.
\v 8 Kui kjo̱a̱kjíntakoón nde ngojín xta̱ xi botixómaá nga̱sondiee̱ xi kamákjiín, nga̱t'a̱ tsi kamákjiín kui nii̱ yít'ajín ra kro̱ kui Ndi̱a̱ xi tjiín kjo̱a̱jee̱ tsobo̱a̱.
\v 9 Tanga bi ts'én kjit'a xo̱jo̱n eén Néná:
\q Ni xi nde ngojín xta̱ xi je kamábe,
\q ti nde ngojín xta̱ xi je tsint'ié,
\q ti nde ngojín xta̱ xi je íjñajin ngu̱i̱jin ini̱ma̱a̱,
\q kuí ni xi je tikóndaa̱ Néná tsi̱'e̱ xta̱ xi ndyi̱ts'entjó Néná.
\m
\v 10 Tanga A̱sién Ni̱xtjii̱n Néná je akóná kui nii̱, nga̱t'a̱ A̱sién Ni̱xtjii̱n ngayeje nii̱ xi kot'a, ngaskande ni xi 'niú tji'maá Néná.
\p
\v 11 Nga̱t'a̱, ngojín xta̱ xi be ni xi ts'énkjó kje̱'e xta̱. Nga ngo nga ngo xtaa̱ ta kuí tsi xi be ni xi ts'énkjó. Ti bo̱a̱ ti ts'én ta'yajín xi be ni xi tjíjinkon Néná, ta kuí tsi A̱sién Ni̱xtjii̱n Néná xí be.
\v 12 Tanga a̱sién ni̱xtjin xi katse'éná ñá, Néná xi katsjáná, jmí tsi nga̱sondiee̱, tsi̱'e̱ nga xcha̱ ngayeje kjo̱a̱nda xi tsjáná Néná.
\v 13 Én xi akóyáná A̱sién Ni̱xtjii̱n Néná xi ni'ánkjién kji'a nga ndokjo̱a̱ kuí nii̱, kó jmí tsi én xi ndibánií kjo̱a̱kjínkoón xtaa̱. Kó bo̱a̱ ts'én 'míyáa̱ xta̱ xi tikónjii̱n A̱sién Ni̱xtjii̱n Néná ni xi tsi̱'e̱ A̱sién Ni̱xtjii̱n.
\p
\v 14 Tanga kjíbéjín kui nii̱ xta̱ xi ts'énkjó ni xi tjíjinkon xta̱ nga̱sondiee̱, nga̱t'a̱ ta ton maá, kó makjínjiín nga̱t'a̱ ti kuíni A̱sién Ni̱xtjii̱n xi bokóná ni xi tsi̱'e̱ Néná.
\v 15 Xi tjíjii̱n A̱sién Ni̱xtjii̱n Néná makjiín ngayeje nii̱, tanga xta̱ xi ts'énkjó xikoó xta̱ nga̱sondiee̱ makjínjiín kókón xta̱ xi tjíjii̱n A̱sién Ni̱xtjii̱n Néná.
\v 16 Nga̱t'a̱ bi ts'én je tjít'a xo̱jo̱n eén Néná “¿'Yání xi be ni xi tjíjinkon Ndi̱a̱ná? ¿'Yá xi ko̱tíxomaa̱ kjo̱a̱a̱ ni xi sa̱'ín?” Tanga ñá tikónjinná kjo̱a̱kjíntakoón Kristoo̱.
\c 3
\s Bi ts'én akóyá Pabloo̱ kjo̱a̱a̱ xta̱ xi ts'énxát'aa̱ Néná
\p
\v 1 Kó an já ṉts'ie, kamájínna tsíchji̱a̱jojnú'un xikoó xta̱ xi je tikónjii̱n A̱sién Ni̱xtjii̱n Néná, tsíchji̱a̱jojnú'un xikoó xta̱ xi kui nga̱sondiee̱ chji̱a̱ni, xikoó xta̱ xi s'e̱ tsi kis'ijii̱n Kristoo̱.
\v 2 Kji'a nga akoyájnú'un jmí tsi én tajá tsíchji̱a̱jojnú'un, tasá én xi tajájín, nga̱t'a̱ jún xikónií jakjíndí xí xi̱xi̱ xi ntsjén 'bi xi jmí tsi ni chinie xi tajá kjinie kamájnú, kó kamákjínjínjnú, kó ngot'e̱ 'ne̱ kji̱e̱ ti̱ndyiondajínjnú tsi̱'e̱ nga ka̱makjínjnú ni xi ni'ii̱n.
\v 3 Nga̱t'a̱ takó bo̱a̱ ts'én tindyiónjnú xikoó xta̱ xi kui nga̱sondiee̱ chji̱a̱ni, nga̱t'a̱ tjínjnú kjo̱a̱chi̱ni̱, kjo̱a̱bixkán ko̱jo ndyi̱bokjangajnú yojojnú. Jún xta̱ nga̱sondiejnú kó bo̱a̱ ts'én timajnú xikoó xta̱ xi kui nga̱sondiee̱ chji̱a̱ni.
\v 4 Kji'a nga tsi tjín xi bi tsó: “Pabloo̱ xi chjiá an”, kó kje̱'e xi bi tsó: “Apoloo̱ xi chjiá an”, jún bo̱a̱ ts'én timajnú xikoó xta̱ xi kui nga̱sondiee̱ chji̱a̱ni.
\p
\v 5 ¿Kó 'yání bo̱a̱ xi Apoloo̱, ko̱jo 'yání bo̱a̱ xi Pabloo̱? Moso̱ boá, kui xi Néná kats'énkjién tsi̱'e̱ nga kis'ijinjnú, nga ngo nga ngo ji̱n kini'ánjne̱ xá xi katsjájne̱ Ndi̱a̱ná.
\v 6 An xí xikoó ngo nda̱ xi ítji̱e̱ ngo xojmá, kó Apoloo̱ xikoó tsi kui xi asíndaá, tanga Néná boá xi kats'énxchá.
\v 7 Kó kuíni nga nda̱ xi ítji̱e̱e̱ ko̱jo nda̱ xi asíndaá jmí ni chjíjiín, ta kuí tsi Néná xi chjínií, nga̱t'a̱ kuí xí kats'énxchá xojmá xi kamátji̱e̱e̱.
\v 8 Xi 'bítji̱e̱e̱ ko̱jo xi asíndaá ta ngo ndse̱je̱n ngajoó, tanga nga ngo nga ngo Néná boá xi tsjaá chjií kjo̱a̱a̱ xá xi kats'én.
\v 9 Nga̱t'a̱ ji̱n xaá Néná boá xi nijan ndyi̱ni'ánjne̱, kó jún boá xi xikoó ngu̱i̱ndie nínga 'bítji̱e̱e̱ ko̱jo xikoó ndi'a xi tsi̱'e̱ Néná.
\v 10 Ngo chi̱bo̱a̱ k'uijñájnú'un. Xikó kji'i kjo̱a̱nda xi katsjána Néná, tsi chji̱ni̱e̱xó an, an xí íjñá an xó xi ik'ítjats'ennii̱ kui ndi'aa̱, kó kje̱'e xi tjíts'énda nk'aa̱, tanga chjiénga taxkiya sa̱'índajín ni xi tsoboaá nga sa̱'índa nga ngo nga ngo.
\v 11 Jesukristoo̱ boá xi xikoó kui xó xi tjón ik'ítjats'ennii̱ kui ndi'aa̱, kó ta'yajín xi ka̱maa̱ ku̱i̱'íjñá kje̱'e xó xi 'bítjats'ennii̱.
\v 12 Kó nga̱soón kui xó xi tjón ik'ítjats'ennii̱ ka̱ma si̱'anda ngo ndi'a nga si̱'ankjién to̱nsinié, to̱ntiboa, ndi̱jo̱ tsjakon, yá, yáxá ko̱jo ndi̱ji̱.
\v 13 Xcha̱ xá xi kats'én nga ngo nga ngo xtaa̱ ni̱xtjin nga Néná tsja̱á ni xi tsoboaá xtaa̱, nga̱t'a̱ ndi'í xi kjo̱e̱'e kui ni̱xtjii̱n ko̱kó kókón xá xi kats'én nga ngo nga ngo xtaa̱.
\v 14 Xi kats'énda xó xi xchikjoaá ndi'ií, kuí xí sa̱ko̱ó ni xi ni'aán.
\v 15 Tanga xi ndi'ií ku̱i̱'ítí kui ni xi kats'éndaa̱, kuí xí xcha̱ja xá xi kats'én, nda tsi kui kjo̱tjo'a soboá, xikoó ngo xi ka'naxiéjin ngu̱i̱jin ndi'ií.
\p
\v 16 ¿A yajínjnú nga na̱ngo̱xi̱i̱ Néná boá jún, ko̱jo nga A̱sién Ni̱xtjii̱n Néná tikónjinjnú?
\v 17 Tsi tjín xi sa̱'ínkjatsón na̱ngo̱xi̱i̱ Néná, Néná sa̱'ínkjatsón xi bo̱a̱ sa̱'iín, nga̱t'a̱ tsjie na̱ngo̱xi̱i̱ Néná, kó jún boá xi na̱ngo̱xi̱i̱ Néná.
\p
\v 18 Ngata̱ ngojín xi 'boṉcha̱jo yojoo̱, tsi tjín ngu̱i̱jinjnú ngo nda̱ xi nda̱ kjínkón kjimaa̱ yojoo̱ xikoó xta̱ kjínkoón kui nga̱sondiee̱, tasá xikoó ngo xta̱ xi jmí ni bejín nga ts'én yojoo̱ tsi̱'e̱ nga ngo nda̱ xi kjínkón ja̱koxi̱ ka̱ma.
\v 19 Nga̱t'a̱ kjo̱a̱kjínkón xi tjín nga̱sondiee̱ ta ton ts'én be Néná, nga̱t'a̱ je kjit'a xo̱jo̱n eén Néná nínga bi tsoó: “Néná ts'énkjién kjo̱a̱mañaa̱ já kjínkoón tsi̱'e̱ nga ti kuii̱ ku̱i̱xo̱jin.”
\v 20 Kó ti bi ti ts'én tjít'a nga: “Ndi̱a̱ná be nga kjo̱a̱kjíntakoón xta̱ xi kjínkoón ta kjo̱a̱ndaní.”
\v 21 Kó kuíni nga, ngata̱ ngojínjnú xi je ngatamaa̱ yojoo̱ kjo̱a̱a̱ 'yá xta̱ xi ndokjo̱a̱nijnú. Nga̱t'a̱ tsa̱jún ngayeje ni xi tjiín:
\v 22 Tsi tsi̱'e̱ Pabloo̱, tsi tsi̱'e̱ Apoloo̱, tsi tsi̱'e̱ Peé, tsi tsi̱'e̱ nga̱sondiee̱, tsi tsi̱'e̱ kjo̱a̱mindyioo̱n, tsi tsi̱'e̱ kjo̱a̱bo̱yaa̱, tsi tsi̱'e̱ ni xi kjima ngot'e̱, tsi tsi̱'e̱ ni xi s'e̱ ka̱ma, ngayeje kui nii̱ nga tsa̱jún,
\v 23 kó jún Kristoo̱ ndokjo̱a̱nijnú, kó Kristoo̱ Néná chji̱a̱ni.
\c 4
\s Bi ts'én akóyá Pabloo̱ kjo̱a̱a̱ xaá já apostroo̱
\p
\v 1 Kó kuíni nga mejénna nga jún kjójintakónjnú nga moso̱ xi tsi̱'e̱ Kristoo̱ boá ji̱n, ko̱jo nga ndyi̱bokojne̱ ngot'e̱ ni xi tsi̱'e̱ Néná, kui ni xi kis'ijña 'maa̱ xtaa̱ ngas'e̱.
\v 2 Kji'a nga ngo xi tjiín ngo xá, xi tsi̱'e̱ xaá monguii̱ nga kixi̱ ts'én ko̱e̱je̱jo xaá.
\v 3 Kó kjo̱a̱a̱ an ndasenjínna tsi jún ko̱jo tsi jáxaá xi bo̱a̱ ka̱tso̱ tsi nda ko̱jo tsi ndajín tjíts'en an, nga̱t'a̱ nde ti an ts'énjáa̱n yojona kui nii̱.
\v 4 Nga̱t'a̱ nda tsi nda tikón kjo̱a̱kjíntakónna, jmí tsi tangat'anii̱ kui nii̱ nga kixi̱ tikón an nguindyi̱ko̱n Néná, nga̱t'a̱ Ndi̱a̱ná xi tsáyá tsi nda ko̱jo tsi ndajín tjíts'en an.
\v 5 Kó kuíni nga, ngata̱ júnjín bo̱a̱ 'míjnú tsi nda ko̱jo tsi ndajín ndyi̱ts'en xtaa̱ nga nguindie ni̱xtjin, tasá chiyájnúu̱ ngaskande nga kjo̱e̱'e Ndi̱a̱ná, nga̱t'a̱ kui boá xi ku̱i̱'íjñátsijen ni xi tji'maá ko̱jo ni xi ni'ánkjó nga ngo nga ngo ñá, kó ko̱kó ngayeje ni xi mejeén sa̱'ín ini̱ma̱a̱ xtaa̱, kós'e̱ bo̱a̱ ts'én kui ni̱xtjii̱n Néná nda ts'én ku̱i̱chji̱a̱ kjo̱a̱a̱ ni xi kats'én nga ngo nga ngo xtaa̱.
\p
\v 6 Jún ṉts'ie, je ako an xikoó ngo chi̱bo̱a̱ kjo̱a̱a̱ an ko̱jo Apoloo̱ nganda tsa̱jún, tsi̱'e̱ nga ka̱makjínjnú nga ka̱majín ku̱i̱tjátjónjnúu̱ ni xi kjit'a xo̱jo̱n eén Néná. Ngata̱ ja̱ k'i̱e̱ ja̱ ngajánjín je 'naxiéjnú yojojnú kjo̱a̱a̱ kje̱'e xta̱.
\v 7 Nga̱t'a̱, ¿'yá xi bo̱a̱ tjítsó nga nda ngase ji xta̱? ¿Kó mí ni xi tjiín ji xi Nénájín xi katsjaá? Kó tsi Néná xi katsjaá, ¿mí kjo̱a̱a̱ nga je ti'naxié yojóo xikoó tsi ji kasako so̱bo̱a̱a̱ kui nii̱?
\p
\v 8 Jún xi xta̱ xi s'ijii̱n nga je nda kitsiejnú, je cho̱njnú. ¡Jún xikónií já re xi machjiénjiín ji̱n. Mejénna nga re ja̱koxi̱ ka̱majnú, tsi̱'e̱ nga bo̱a̱ ts'én ko̱jo ji̱n sa̱kójne̱ xá nga nijan ko̱tixomá!
\v 9 Nga̱t'a̱ ts'enkjó an nga Néná índojne̱ ji̱n xi já apostro̱ ji̱n ngaskande nga fet'aa̱, xikoó xta̱ xi je katse'éjeé nga ko̱ya, nga̱t'a̱ ngaskande xtaa̱ ko̱jo ndítsjiee̱ je índikónjne̱.
\v 10 Tangat'anii̱ nga ndyi̱nda'yá'énjne̱ Kristoo̱ nga xta̱ chini kjimajne̱ tsi̱'e̱ xta̱ xi ngasee̱, tanga jún kjo̱a̱a̱ ni xi bokoyaá Kristoo̱ nga xta̱ kjínkón kjimajnú. Ji̱n xta̱ indajne̱, kó jún xta̱ xi tjiín nga'niú, ji̱n ch'o ts'én ndyi̱bejne̱ xtaa̱ kó jún tjiyándikónjnú.
\v 11 Ngaskande kui ni̱xtjii̱n xi'bi̱ bojójne̱, xíndájne̱, jmíjínjne̱ ṉjño, akjat'a t'anijonjne̱ kó jmíjínjne̱ ngo ndi'a xi tsa̱ji̱n.
\v 12 Ji̱n xi tjíniéjne̱ yojojne̱, kó je jendajne̱ nga ndyi̱ni'ánxájojne̱ ndsa̱jne̱. Tsi ch'o tjí'míjne̱ tanga ji̱n ndyi̱ni'ánchikonñéjne̱, tsi tjimíyotji̱nguijne̱ tanga ji̱n ndyi̱ni'ánchíkjo̱a̱jne̱.
\v 13 Kji'a nga tjín xi ch'o tsójne̱, én nda ndokjo̱a̱jojne̱. Ngaskande ngot'e̱ xikó maá tsi xtjieé nga̱sondiee̱ ko̱jo tsi ni xi je ts'ajmi xtaa̱ kjimajne̱.
\p
\v 14 Jmí tsi tjíts'en'indó an kui eén tsi̱'e̱ nga kjo̱a̱soboá tsjajnú'un, tasá tsi̱'e̱ nga tsjajnú'un ngo kjo̱a̱botíxoma xikó maá tsi ndí tjóna majnú jún.
\v 15 Nga̱t'a̱ nda tsi tie mi̱ mostro̱ xi ko̱kóyajnú eén Kristoo̱, ta ngo tsi na̱'mi tikónjnú, nga̱t'a̱ an xí xikoó tsi na̱'mijnú nga kixiyajnú'un éntjatsi̱e̱e̱ Kristoo̱, kui én xi katsjájnú kjo̱a̱mindyioo̱n.
\v 16 Kó kuíni nga 'niú mí'ájnú'un nga chja̱'ánguíjnú'un.
\p
\v 17 Kuíni nga katsanguiyajnú'un nda̱ xi 'mí Timoo̱, nga kui xi xikoó ndí tjóna, ngo nda̱ xi kixi̱ tso'bájo̱ Ndi̱a̱ná, kuí xí sa̱'ínkja'átsjienjnú xikó tjíts'en an nga tjíts'enxát'áa̱ Kristo Kjisoo̱, xikó ts'én bokoyá an ngayeje na̱ngo̱xi̱ nínga foa'a an.
\v 18 Tanga tjín ka'a xi nguito̱ko̱ ndyi̱ts'en yojoo̱ nga̱t'a̱ ndyi̱ts'enkjó nga kjuinkátsijenjáa̱n.
\v 19 Tanga tsi Ndi̱a̱ná xi mejeén tsá ka̱ma kjuinkónjnú'un, kó kji'a skuie an kókji'i nk'a xaá xta̱ xi je ndyi̱ts'en yojoo̱, jmí tsi ta én xi ndyi̱chji̱a̱ tsi.
\v 20 Nga̱t'a̱ kji'a nga Néná botixómaá xtaa̱, ni xi ts'én xtaa̱ bokó nga Néná xi botixómaá kó jmí tsi ni xi tsó xtaa̱.
\v 21 Kji'a nga kjuinkátsijenjnú'un. ¿Kóts'en mejénjnú nga kjócho an? ¿A nga tajá kuichjiájojnú'un, axa̱ nga kjo̱a̱tjó ko̱jo kjo̱a̱nda ini̱ma̱ ya'a an nga kjócho an?
\c 5
\s Bi ts'én atíxoma Pabloo̱ kjo̱a̱a̱ ngo ni xi ndajín kji'i xi kamá ngu̱i̱jii̱n xta̱ na̱ngo̱xi̱i̱
\p
\v 1 Ja̱koxi̱ nga tajñání nda'yá nga tjín kjo̱a̱tondo̱ ngu̱i̱jinjnú, nga̱t'a̱ ngo nda̱ tikónjinjnú xi na̱ajoón tikónjo̱. ¡Ngaskande xta̱ xi bejín Néná ts'énjín kui nii̱!
\v 2 ¿Kóts'en nga tsja kjimajnú kjo̱a̱a̱ xikó ts'én síndo xta̱ na̱ngo̱xi̱i̱? ¿A mí tsi tasá ndasen ku̱i̱ndyionjnú nga bi kji'i ni xi tjíts'én kui nda̱a̱? Chjiénga nguiti ko̱e̱'éndiejínjnúu̱ nga ki̱a̱ k'uijñájinjnú kui nda̱ xi bo̱a̱ tjíts'eén.
\p
\v 3 Kó an nda tsi ki̱a̱jín tikónjo̱jnú'un nga jín nga yojo an, tanga ini̱ma̱na ki̱a̱ tikónjo̱jnú, kó je bo̱a̱ kixian an nga tjínrií jé kui nda̱ xi kats'én kui nii̱, xikoó tsi ki̱a̱ ma tikón an.
\v 4 Ja'eén Jesukristoo̱ ngatamatikónijnú kó ini̱ma̱na ki̱a̱ k'uijñájo̱jnú, kó nga'niú xi katsjájnú Ndi̱a̱ná Jesukristoo̱ k'uijñájo̱jnú nga.
\v 5 Kós'e̱ kji'a boá nga kui nda̱a̱ si̱'ank'as'ienjnúu̱ xindajín Satanaa̱, kó kui si̱'ankjatsón yojoo̱, tsi̱'e̱ nga kjo̱tjo'a kjin kjin a̱sién ni̱xtjii̱n, ni̱xtjin nga kjo̱e̱'e Ndi̱a̱ná Jesukristoo̱.
\p
\v 6 Ndajín kji'i nga tsja kjimajnú kjo̱a̱a̱ xikó ts'én síndo xta̱ na̱ngo̱xi̱i̱, kji'a nga ki̱a̱ tikónjinjnú nda̱ xi bo̱a̱ tjíts'eén. ¿A yajínjnú nga tsi nde ta chií tsi nisaa̱n xi mindyiakátjo̱ ngayeje nda̱'yo̱ paa̱n?
\v 7 Kó kuíni nga chje̱'éxínjnú kui jeé, nga̱t'a̱ kui jeé ts'enkjátsónjnú. Kuí xí xikoó nisan xi mindyiakátjo̱ nda̱'yo̱ paa̱n, kó tasá xikoó tsi nda̱'yo̱ tja̱tsi̱e̱ ngatamajnú kui xi ni'ánkjién nga manda pan xi chinie ni̱xtjii̱n s'ué paskuaa̱, nda̱'yo̱ xi tja̱tsi̱e̱ xi jmíjiín nisan xchá. Ja̱koxi̱ nga jún xi bo̱a̱ kónjnú ngot'e̱, nga̱t'a̱ Kristoo̱ kuí xí cho̱tsa̱nga̱a̱ s'ué paskua̱ná kui xi kini'ánk'ién nganda tsa̱ñá.
\v 8 Kó kuíni nga chjiénga si̱'án s'ué paskuaa̱ nga nda tjíjintakón ko̱jo nga ja̱koxi̱ ni xi ndyi̱ni'án, xikoó pan xi jmí nisan xchájiín. Nguiti si̱'ánjín ñá ni xi ndajín ko̱jo kjo̱a̱too̱n, nga̱t'a̱ kuí nii̱ xikónií nisan xi xchaá.
\p
\v 9 Xo̱jo̱n xi je kats'endajnú'un ngas'e̱ bo̱a̱ kixiánjnú'un nga ki̱a̱jín si̱'ankamajo̱jnú xta̱ xi tondo̱,
\v 10 jmí tsi kixian an nga tanisién xín ku̱i̱ndyionjnúu̱ xta̱ xi tondo̱ xi bejín Néná, ko̱jo xi chejé, ko̱jo xi ndyi̱ts'endikón a̱sie̱én ngo ne xi ts'énda xtaa̱, nga̱t'a̱ tsi ki̱a̱jín ku̱i̱ndyionjinjnú kui xtaa̱, chjiénga nguiti kuijín nga̱sondiee̱ ku̱i̱ndyionjnú.
\v 11 Ni xi kixian an nga ka̱majín si̱'ankamajo̱jnú ngo xta̱ xi ṉts'ié ka̱tso̱, xi tondo̱, xi xki̱'á ni, xi a̱sie̱én ngo ne xi ts'énda xtaa̱ ts'entsjájo̱, xi ch'o'a, xi ch'i̱, xi chejé, xi bo̱a̱ sa̱'ín nde ka̱majín nijan xi̱ni̱e̱jójnú ṉño̱.
\v 12 Nga̱t'a̱ ánjín tsoboána xiyá an tsi nda ko̱jo tsi ndajín ndyi̱ts'en xta̱ xi na̱ngo̱xi̱i̱jín chji̱a̱ni. Tanga, ¿a júnjín tsoboájnú nga jún xi bo̱a̱ k'uijnú tsi nda ko̱jo tsi ndajín ndyi̱ts'en xta̱ xi na̱ngo̱xi̱i̱ chji̱a̱ni?
\v 13 Nga̱t'a̱ Néná xi bo̱a̱ ka̱tso̱ tsi nda ko̱jo tsi ndajín kji'i ni xi ndyi̱ts'en xta̱ xi na̱ngo̱xi̱i̱jín chji̱a̱ni, tanga jún chjiénga ku̱i̱yotjinguijnúu̱ kui nda̱ jé xi tikónjinjnú.
\c 6
\s Bi ts'én akóyá Pabloo̱ xikó ts'én ka̱mandajin ngo kjo̱a̱xti nguindyi̱ko̱n xta̱ na̱ngo̱xi̱i̱
\p
\v 1 Kji'a nga ngo jún ko̱jo ingo ṉts'iéjnú xi tjínjnú ngo kjo̱a̱xti, ¿mí kjo̱a̱a̱ nga xta̱xá xi ti kuijín ni s'ijii̱n xikoó ñá xi monguínkatiejét'ajnú, nguindiee̱ nga xta̱ tsjiee̱ Néná xi konguínkatiejét'ajnúu̱?
\v 2 ¿Axa̱ yajínjnú nga xta̱ tsjiee̱ Néná xí ko̱tso̱ya tsi tjiín ko̱jo tsi jmí jéjiín xtaa̱ kui nga̱sondiee̱? Kó tsi jún boá xi k'uiyájnú tsi tjiín ko̱jo tsi jmíjiín jé xtaa̱ kui nga̱sondiee̱, ¿kóts'en nga ka̱majínjnú si̱'andajinjnú ngo ndí ni xi chichí?
\v 3 ¿A yajínjnú nga ngaskande ndítsjiee̱ Néná ñá xi tsoboána nga k'uiyá tsi tjiín ko̱jo tsi jmíjiín jé? ¿Ja̱ kó mí kjo̱a̱a̱ nga ka̱majínná si̱'andajin ngo kjo̱a̱xti xi tjisákóná kui nga̱sondiee̱?
\v 4 Kó kuíni nga, tsi kjo̱a̱xti tjínjnú kjo̱a̱a̱ nii̱ kui nga̱sondiee̱, ¿mí kjo̱a̱a̱ nga xta̱ xi yandíkónjín ngu̱i̱jii̱n xta̱ na̱ngo̱xi̱i̱ xi ndyi̱monguínchonjnú nga sa̱'índajin kui kjo̱a̱xtii̱?
\v 5 Xiyá an kui nii̱ tsi̱'e̱ nga soboá ka̱majnú: ¿A nde ngojínjnú xi kjínkónjnú xi ka̱maa̱ sa̱'índajin ngo kjo̱a̱xti xi tjiín já ṉts'ie?
\v 6 Tsi ngo ṉts'ie skjánjo̱ xi ingo ṉts'iee̱. ¿Mí kjo̱a̱a̱ nga ki̱a̱ konguínjnú nguindyi̱ko̱n xta̱ xi s'ijinjiín Néná tsi̱'e̱ nga sa̱'índajin kui kjo̱a̱xtii̱?
\p
\v 7 Ja̱ je ndajín kji'i nga ti juún tjínjnú kjo̱a̱xti, tanga, ¿ánní nga tasájín ni'ánchíkjo̱a̱jnú nga tjín xi ndajín kji'i ni xi sa̱'ínjo̱jnú? ¿Ánní nga tasájín boe'éndiejnú nga tjín xi sa̱'ínchéjéjnú?
\v 8 Tasá ti juún ndajín kji'i ni xi ndyi̱ni'ánjnú kó ngaskande ti juún ni'ánchejéjnúu̱ ṉts'iéjnú.
\p
\v 9 ¿A yajínjnú nga xta̱ xi kixi̱jín síndo nguindyi̱ko̱n Néná, sa̱kójiín nga Néná xí ko̱tíxomaa̱? Ngata̱ ch'íṉcha̱jojínjnú yojojnú, sa̱kójiín nga Néná xí ko̱tíxomaa̱, xta̱ xi tondo̱, xta̱ xi ndyi̱ts'endikón a̱sie̱én ngo ne xi ts'énda xtaa̱, xta̱ xi ndyi̱ts'ent'aa̱ kjo̱a̱ xkjín, já xi xonda, ko̱jo já xi̱'in xi xi̱'in xkjín foyojojo̱,
\v 10 ko̱jo xta̱ xi chejé, xta̱ xi xki̱'á ni, xta̱ xi ch'i̱, xta̱ xi ch'o'a ko̱jo xta̱ xi 'boṉcha̱jo xtaa̱ s'e̱ foa'áxiín too̱n, ngayeje xta̱ xi bo̱a̱ ndyi̱ts'e̱én sa̱kójiín nga Néná xí ko̱tíxomaa̱.
\v 11 Kó tjín jún xi kui nii̱ kini'ánjnú ngas'e̱, tanga ngot'e̱ 'ne̱ je kini'ántsjiejónjnú yojojnú, kó je tsjiejnú ko̱jo je xta̱ kixi̱jnú nguindyi̱ko̱n Néná kó nga'niuú Ndi̱a̱ná Jesukristoo̱ ko̱jo A̱sién Ni̱xtjii̱n Néná xí kats'én kui nii̱.
\s Bi ts'én akóyá Pabloo̱ nga Néná xi tsi̱'e̱ yojoná
\p
\v 12 “Ngayeje nii̱ xi tsjandié kjo̱a̱kitii̱ nga ka̱ma sa̱'in an”, tanga jmí tsi ngayeje nii̱ xi nda sa̱'ínna. “Ngayeje nii̱ xi tsjandié kjo̱a̱kitii̱ nga ka̱ma sa̱'in an”, tanga tsjandiéjín an nga ngo kui nii̱ xi sa̱'ínna tsi̱'e̱ nga kui xi ko̱tíxomana.
\v 13 Ni chiniee̱ tsi̱'e̱ ndo̱'o̱stsa̱ná boá, kó ndo̱'o̱stsa̱ná tsi̱'e̱ ni chiniee̱ boá, tanga nga jó kui nii̱ xi sa̱'ínkjié Néná. Tanga yojoná jmí tsi katse'éná tsi̱'e̱ nga tondo̱ ka̱ma ñá, tasá tsi̱'e̱ nga xaá Ndi̱a̱ná xi si̱'án, nga̱t'a̱ yojoná tsi̱'e̱ Ndi̱a̱ná boá.
\v 14 Néná kats'énkjién nga'niuú nga kats'énkja'á'yaá Ndi̱a̱ná kó ti bo̱a̱ ti ts'én sa̱'ínkja'á'yáná ñá nga.
\p
\v 15 Nga ngo nga ngojnú jún ki̱a̱ ndokjo̱a̱nijnú na̱ngo̱xi̱i̱, kó na̱ngo̱xi̱i̱ kuí xí yojoo̱ Kristoo̱. Kó nga ngo nga ngojnú Kristoo̱ ndokjo̱a̱nijnú, kuíni nga ndajín kji'i nga ngo xi chji̱a̱ni kui yojoo̱ xi na̱ masien ko̱e̱je̱ ts'entsjájo̱.
\v 16 ¿A yajínjnú nga kji'a nga ngo nda̱ xi ko̱e̱je̱ ts'entsjájo̱ ngo na̱ masien, je kats'éngo yojoo̱ kui ko̱jo kui na̱ masiee̱n? Nga̱t'a̱ bi tsó xo̱jo̱n eén Néná: “Ngajoó ta ngo tsi yojo ka̱ma.”
\v 17 Tanga kui xta̱ xi ndyi̱ts'engojo̱ yojoo̱ Ndi̱a̱ná, ta ngo tsi A̱sién Ni̱xtjin ma ngajoó.
\p
\v 18 Tiyojnúu̱ kjo̱a̱tondoo̱. Ngayeje kje̱'e jé xi sa̱'ín ngo xta̱ jmí ni ts'énjiín yojoo̱, tanga tsi ngo xi tondo̱, ti kuíni yojoo̱ xi tjíts'énkjátsón.
\v 19 ¿A yajínjnú nga yojojnú na̱ngo̱xi̱i̱ A̱sién Ni̱xtjii̱n Néná boá? Néná xi katsjájnú A̱sién Ni̱xtjin xi tikónjinjnú. Júnjín xi tsa̱jún yojojnú.
\v 20 Nga̱t'a̱ Néná je ts'atsiejnú nga katsjá ngo chjí, kó kuíni nga ti'ankjiénjnú yojojnú tsi̱'e̱ nga ko̱e̱'éjnúu̱ kjo̱a̱je Néná.
\c 7
\s Bi ts'én akóyá Pabloo̱ kjo̱a̱a̱ kjo̱a̱xtii̱ xta̱ xi je ixaán
\p
\v 1 Kjo̱a̱a̱ ni xi ikít'ajnú'un kui xo̱jo̱n xi kananguiyajnú'un, xiyájnú'un nga nda kji'i tsi ngo nda̱ ku̱i̱xanjín,
\v 2 tanga tangat'anii̱ kjo̱a̱tondo̱ xi chji̱a̱ ini̱ma̱ná nga si̱'án, tasá já xi̱'ii̱n ngat'ieé ínchjín kó xi ínchjiín ngat'ieé xi̱'in.
\v 3 Xi xi̱'ii̱n ngats'enkjátjosoón nga kjojñájo̱ chjo̱ón kó bo̱a̱ ti ts'én xi chjo̱ón ngats'enkjátjosoón nga kjojñájo̱ xi̱'ii̱n.
\v 4 Nga̱t'a̱ xi chjo̱ón nguiti kuijín xi botixómá soboaá yojoo̱, xi̱'ii̱n xi botixómaá, kó xi xi̱'ii̱n nguiti kuijín xi botixómá soboaá yojoo̱, chjo̱ón xi botixómaá.
\v 5 Ngata̱ 'bíxi̱a̱njínjnúu̱ yojojnú xingu̱i̱jnú, ngototo tsi nga jójnú xi k'uíndajnú nga ku̱i̱ndyionxónjnú chiboa ni̱xtjin kjo̱a̱a̱ nga Néná ko̱ndókjo̱a̱jnúu̱, tanga nguije jatjosón ni̱xtjin xi ik'índajnú, ti'antsjajo̱ nguiníjnú xingu̱i̱jnú, nga̱t'a̱ tsájmi xindajín Satanaa̱ ka̱marií skít'ayákónjnú tsi ka̱ma'niújínjnú yojojnú.
\v 6 Kui nii̱ xiyájnú'un kó tsjandiéjnú'un tsi̱'e̱ nga bo̱a̱ si̱'ánjnú, tanga jmí tsi ts'énbotixomájnú'un.
\p
\v 7 Mejénna tsi ngayeje xtaa̱ ka̱ma xikoó an, tanga Néná boá xi katsjáná ja̱ kje̱'e ja̱ kje̱'e kjo̱a̱nda nga ngo nga ngo ñá.
\p
\v 8 Xi síndo k'án xo̱ngo ko̱jo ínchjín k'án xi je k'ien xi̱'ii̱n ts'énxiyáa̱ nga nda kji'i tsi ku̱i̱ndyionk'ánjnú xikoó an.
\v 9 Tanga tsi ka̱ma'niújínjnú yojojnú, tasá tixánjnú, nga̱t'a̱ tasá nda tsi ku̱i̱xanjnú ta bo̱a̱jiín tsi ch'o ts'én ku̱i̱chji̱a̱ ini̱ma̱jnú.
\p
\v 10 Tanga kui xta̱ xi je ixaán, tsjáa̱ kui kjo̱a̱botíxoma xi jmí tsi tsa'a̱n, tsi̱'e̱ Ndi̱a̱ná boá: Nga xi chjo̱ón ngata̱ 'bijñájín xi̱'ii̱n,
\v 11 kó tsi ku̱i̱'íjñá xi̱'ii̱n, nguiti bixanjín, ko̱jo tsi tasá ngatjíkánda nguinií xi̱'ii̱n, kó xi xi̱'ii̱n nga 'bijñájín chjo̱ón.
\p
\v 12 Kó xta̱ xi ngasee̱ xiyáa̱ ngo ni xi tsa'a̱n, jmí tsi ni xi tsi̱'e̱ Ndi̱a̱ná: Tsi ngo ṉts'ié xi tikoón ngo chjoón xi s'ijinjiín Néná tanga tsi kui naa̱ ngayeje kon nga tikónjo̱, kui ṉts'iee̱ ngata̱ 'bijñájín kui chjo̱ón.
\v 13 Kó tsi ngo chjoón xi s'ijii̱n Néná xi tikónjo̱ ngo xi̱'in xi s'ijinjiín Néná kó tsi kui nda̱a̱ ngayeje kon nga tikónjo̱, kui chjo̱ón ngata̱ 'bijñájín kui xi̱'ii̱n.
\v 14 Nga̱t'a̱ kui xi̱'in xi s'ijinjiín Néná je kamátsjie nguindyi̱ko̱n Néná nguije ngo chjoón xi s'ijii̱n Néná xi tikónjo̱, kó chjoón xi s'ijinjiín Néná je kamátsjie nguindyi̱ko̱n Néná nguije ngo xi̱'in xi s'ijii̱n Néná xi tikónjo̱, nga̱t'a̱ tsi bo̱a̱jín kji'i, ndií tsjiejín ka̱ma nguindyi̱ko̱n Néná, tanga ngot'e̱ 'ne̱ je xta̱ tsjiee̱ Néná.
\v 15 Tanga tsi kui xi̱'in ko̱jo tsi kui chjoón xi s'ijinjiín Néná ka̱mamejeén ku̱i̱'íjñá xkjín xi s'ijii̱n Néná, ngat'ijñá. Jmí kjo̱a̱'niújiín ngo ṉts'ié ko̱jo tsi ngo ndichjá xi s'ijii̱n Néná nga k'uijñájo̱ xi s'ijinjiín Néná, nga̱t'a̱ Néná mejeén nga k'uiéná kjo̱a̱xió nga ku̱i̱ndyión.
\v 16 Nga̱t'a̱ ¿kóts'en ye ji, ji xi chjoón ji, nga ka̱maa̱ ko̱sike̱je ji tsi̱'e̱ nga kjo̱tjo'a xi̱'íi̱n? ¿Axa̱ kóts'en ye ji, ji xi xi̱'in ji, nga ka̱maa̱ ko̱sike̱je ji tsi̱'e̱ nga kjo̱tjo'a chjóo̱n?
\s Bi ts'én akóyá Pabloo̱ nga nguije Néná ndokjo̱a̱ ñá kuí nii̱ xi 'niú chjínií
\p
\v 17 Ta xikó ts'énnií, chjiénga, nga ngo nga ngo ku̱i̱ndyión xikó ts'én katsjáná Ndi̱a̱ná kó nga ku̱i̱ndyión xikó ts'én íts'i̱yanii̱ nga tsíchji̱a̱ná Néná. Kuí nii̱ xi ts'énxiyáa̱ ngayeje xtaa̱ na̱ngo̱xi̱i̱.
\v 18 ¿A tjín xi tjiín sirkunsisioo̱n kji'a Néná tsíchji̱a̱a̱? Bo̱a̱ ts'én ngat'íjñá ra. ¿A tjín xi jmíjiín sirkunsisioo̱n nga kis'ijii̱n Kristoo̱? Ngata̱ ts'énjiín sirkunsisioo̱n yojoo̱.
\v 19 Nga̱t'a̱ jmí ni chjíjiín tsi kini'ánná ko̱jo tsi kini'ánjínná sirkunsisioo̱n, nga si̱'ankjatjosón kjo̱a̱botíxomaa̱ Néná kuí ni xi xi'ba̱ xi chjínií.
\v 20 Bo̱a̱ ts'én ti̱ndyionrajnú xikó ts'én kixindyionjnú nga tsíchji̱a̱jnú Néná.
\v 21 ¿A moso̱ xi kastiñá ji nga Néná tsíchjiáa̱? Ngata̱ nda̱jín maá, tanga tsi ka̱maa̱ ku̱i̱ndyión ndé, bo̱a̱ ti'in.
\v 22 Nga̱t'a̱ kui nda̱ xi moso̱ xi kastiñá kamá nga Néná tsíchji̱a̱a̱, je nda̱ xi tikóndé nguindyi̱ko̱n Néná ngot'e̱, kó ti bo̱a̱ ti ts'én kui nda̱ xi tso'bá ndé nga kandokjo̱a̱a̱, ngot'e̱ 'ne̱ je moso̱ xi kastiñá xi tsi̱'e̱ Kristoo̱ je kamá.
\v 23 Nga̱t'a̱ tsie kamáchjí nga kits'ítsiejnú, kó ngata̱ boe'éndiejínjnú nga moso̱ xi kastiñá tsi̱'e̱ xtaa̱ sa̱'ínjnú.
\v 24 Kó kuíni ṉts'ie, xikó ts'én tindyiónjnú nga tsíchji̱a̱jnú Néná, bo̱a̱ ts'én ti̱ndyion ngasejnú nguindyi̱ko̱n Néná.
\s Bi ts'én atíxomaa̱ Pabloo̱ xta̱ xi síndo k'án
\p
\v 25 Kó kjo̱a̱ ngaá xta̱ xi síndo xo̱ngo k'aán, jmíjínna ngo kjo̱a̱botíxomaa̱ Ndi̱a̱ná xi tsjáa̱, tanga xiyáa̱ ni xi bee̱ ko̱n an, nga̱t'a̱ Néná katsjána kjo̱a̱ni̱ma̱takoón nga kui xi kats'énna ngo nda̱ xi si̱'ans'ijíi̱n én xi ku̱i̱chji̱a̱.
\v 26 Ts'enkjó an nga nda kji'i nga k'uíndo ngase xtaa̱ xikó ts'én síndo, tangat'anii̱ kjo̱a̱ni̱ma̱ xi tjín kui ni̱xtjin xi je tima.
\v 27 ¿A tjiín chjo̱ón? Ngata̱ mindyisendiyejín ji nga chje̱'éxínt'ée̱ yojóo. ¿A jmíjiín chjo̱ón? Ngata̱ mindyisendiyejín ji nga ku̱i̱xen.
\v 28 Tanga tsi ku̱i̱xen, tini'ínjéjín ji, kó tsi ngo tsakjin xo̱ngo ku̱i̱xan, tjíts'énjéjín. Tanga xta̱ xi ku̱i̱xaa̱n k'uieé kjo̱a̱xtii̱ kui nga̱sondiee̱, kó an mejénna nga ku̱i̱tjájinjínjnú kui nii̱.
\p
\v 29 Tanga kui nii̱ xiyájnú'un já ṉts'ie, nga chiboa tsi ni̱xtjin tikón ngase, kuíni nga ni̱xtjin xi chaja ngasee̱, já xi je tjiín chjoón, ngat'índo xikoó tsi jmíjiín,
\v 30 kó xi ndyi̱kjandaá ngat'índo xikoó tsi ndyi̱kjandájín, kó xi tsja tjiín ngat'índo xikoó tsi tsjajín tjiín, kó xi ni ndyi̱'botsiee̱ ngat'índo xikoó tsi ngojín ni xi tsi̱'e̱,
\v 31 kó xi tsja kjimaa̱ nga ndyi̱ts'enkjién ni xi tjiín kui nga̱sondiee̱, ngat'índo xikoó tsi tsjajín kjimaa̱ nga ndyi̱ts'enkjién, nga̱t'a̱ kui nga̱sondie xi ndyi̱ya ngot'e̱ je makjie.
\p
\v 32 Mejénna nga nda̱jín ka̱majnú. Kui nda̱ xi tikón xo̱ngo k'aán nda̱ ngatamaa̱ ni xi tsi̱'e̱ Ndi̱a̱ná, kó nga ts'én ni xi tsja ka̱maa̱ Ndi̱a̱ná.
\v 33 Tanga kui nda̱ xi je ixaán nda̱ kjimaa̱ ni xi tjiín kui nga̱sondiee̱ ko̱jo ts'én ni xi tsja ka̱maa̱ chjo̱ón.
\v 34 Kó bo̱a̱ ts'én nga ngajoó nga nda̱ kjimaa̱. Kó kui na̱ xi tikón xo̱ngo k'aán ko̱jo na̱ xi kji̱e̱ bixanjiín nda̱ kjimaa̱ nii̱ Ndi̱a̱ná, kó nda̱ kjimaa̱ xikó ts'én tsjie sa̱'ínk'as'iee̱n Néná yojoo̱ ko̱jo ini̱ma̱a̱, tanga kui chjoón xi je tjiín xi̱'ii̱n, nda̱ kjimaa̱ nii̱ kui nga̱sondiee̱ ko̱jo ts'én ni xi tsja maa̱ xi̱'ii̱n.
\p
\v 35 Xiyájnú'un kui nii̱ nganda tsa̱jún, jmí tsi xiyájnú'un tsi̱'e̱ nga an xi ko̱nda'yá'énjnú'un, tasá tsi̱'e̱ nga ni xi nda si̱'ánjnú ko̱jo tsi̱'e̱ nga jmíjín ni xi ku̱i̱'íchjájnú nga nda ts'én si̱'ansenjnúu̱ Ndi̱a̱ná.
\p
\v 36 Tanga tsi tjín ngo nda̱ xi je índajo̱ ngo tsakjin xo̱ngo tsi̱'e̱ nga ku̱i̱xan kó tsi bee̱ kon nga chjiénga je ka̱ma ku̱i̱xanjo̱ nga̱t'a̱ je jachó noó nga ka̱ma ku̱i̱xan kui tsakji̱ín, ngatixanjo̱ nga̱t'a̱ tjíts'énjéjín.
\v 37 Tanga tsi xi tjíngoo̱ ko̱n nga k'uijñák'án, kó tsi ka̱maa̱ ku̱i̱'í'niuú yojoo̱, nda sa̱'ín tsi ku̱i̱xanjín.
\v 38 Kó kuíni nga xi je índa nga ku̱i̱xaa̱n, nda tjíts'én, kó kui xi k'uijñák'aán, nda ngase tjíts'én.
\p
\v 39 Chjo̱ón xi je ixaán tji̱e̱nga tikón xi̱'ii̱n chjiénjín nga ku̱i̱'íjñá, tanga tsi ko̱ya xi̱'ii̱n, kui chjo̱ón ka̱ma ku̱i̱xanjo̱ kje̱'e xi̱'in xi mejeén, tanga chjiénga nga xta̱ xi s'ijii̱n Néná xi ku̱i̱xanjo̱.
\v 40 Tanga bee̱ ko̱n an nga tsjá ngase ts'én k'uijñá tsi nguiti ku̱i̱xanjín, A̱sién Ni̱xtjii̱n Néná boá xi tikónjinna kji'a nga bo̱a̱ t'íxian an.
\c 8
\s Bi ts'én akóyá Pabloo̱ kjo̱a̱a̱ ni chinie xi ni'ánk'as'iee̱n a̱sie̱én ngo ne xi ts'énda xtaa̱
\p
\v 1 Kuichjiájomájnú'un kjo̱a̱a̱ ni chinie xi ni'ánk'as'iee̱n a̱sie̱én ngo ne xi ts'énda xtaa̱. Je ya ñá nga makjínná ni xi'ba̱, tanga ni xi be xtaa̱ kuí xí je 'boxié, tji̱e̱nga kjo̱a̱tjoó kuí xí tsja̱nga'niuú xtaa̱.
\v 2 Kó tsi tjín xi ts'énkjó nga be ngo ni, kui boá xi kji̱e̱ bejín xikó ts'én chjiénga sku̱i̱e̱.
\v 3 Tanga tsi tjín xta̱ xi ndyi̱ts'entjó Néná, Néná je be 'yá xta̱ xi'ba̱.
\p
\v 4 Kjo̱a̱a̱ ni chinie xi ni'ánk'as'iee̱n a̱sie̱én ngo ne xi ts'énda xtaa̱, je ya nga kui nee̱ jmí ni chjíjiín kui nga̱sondiee̱, kó ti je ya nga ta ngo tsi ma Néná.
\v 5 Nga ja̱koxi̱ tjín nk'a ján ko̱jo t'ananguii̱ xi ne tsoó xtaa̱, kó ngaskande kjín ne ko̱jo kjín ndi̱a̱ tjín kjimaa̱ xtaa̱.
\v 6 Tanga ñá je ya nga ta ngo tsi ma Néná xi tikón, xi Na̱'mii̱, xi kats'énda ngayeje ni xi tjiín, kó kui tsi̱'e̱ ñá, kó ta ngo tsi ma Ndi̱a̱ná kui xi Jesukristoo̱, kó tangat'anii̱ kui nga Néná kats'énda ngayeje nii̱, kó tangat'anii̱ Jesukristoo̱ nga tindyión ñá.
\p
\v 7 Tanga jmí tsi ngayeje xta̱ xi be kui nii̱, nga̱t'a̱ tjín ka'a xta̱ xi je kamángaá ngaskande ngot'e̱ nga ts'entsjaá a̱sie̱én ngo ne xi ts'énda xtaa̱ kó bo̱a̱ ts'én makjiín nga takó ndyi̱kjinie ni chinie xi xikoó tsi ja̱koxi̱ nga kui nee̱ xi tsi̱'e̱, kuíni nga ts'énkjó nga ndándí síndo nguindyi̱ko̱n Néná nga̱t'a̱ kji̱e̱ 'niújín tikón kjo̱a̱kjíntakoón.
\v 8 Nga ja̱koxi̱ jmí tsi tangat'anii̱ ni chiniee̱ nga 'niú ngase tiña ku̱i̱ndyiont'áa̱ Néná, nga̱t'a̱ jmí tsi nda ngase ka̱ma ñá kjo̱a̱a̱ ni chiniee̱, ti nde jmí tsi chiboa ngase ka̱ma ñá kjo̱a̱a̱ nga xi̱ni̱e̱ ján ni chinie.
\v 9 Xta̱ ndé ñá nga xi̱ni̱e̱ tajmí niní. Tanga chónjnú tsi tangat'anii̱ ni xi xi̱ni̱e̱jnú nga sa̱'ínjé ngo xta̱ xi kji̱e̱ 'niújín s'ijii̱n Néná.
\v 10 Nga̱t'a̱ tsi tjín xi kji̱e̱ 'niújín tikón kjo̱a̱kjíntakoón, kó tsi sku̱i̱e̱e̱ ji nga je ye ji kui nii̱, kó nga ki̱a̱ tindyint'e nga tichini ni chinie nínga ni'ándikón kui a̱sie̱én ne xi ts'énda xtaa̱, ¿a mí tsi ko̱jo kui nda ts'én sku̱i̱e̱ nga ka̱ma skji̱ni̱e̱ kui ni chinie xi kini'ánk'as'iee̱n kui a̱sie̱én ne xi ts'énda xtaa̱ nga?
\v 11 Kó tangat'anii̱ kui ni xi ye ji nga xcha̱ja ngo nda̱ ṉts'ié xi 'niújín tikón ngu̱i̱yaa̱ ni xi tsi̱'e̱ Néná, kui nda̱ ṉts'ie xi Kristoo̱ k'ientjéni.
\v 12 Kji'a nga ndyi̱ni'ánkjatsónjinjnú kjo̱a̱kjíntakoón ṉts'ié xi kji̱e̱ 'niújín s'ijii̱n Néná, ndajín kji'i ni xi ndyi̱ni'ánjnúu̱ ṉts'ié kó ti ndajín kji'i ni xi ndyi̱ni'ánjnúu̱ Kristoo̱ nga.
\v 13 Kó kuíni nga, tsi tangat'anii̱ ngo ni chinie xi skjíni̱e̱ an nga ngo ṉts'ié an k'o̱kajin ngo jé, tasá nguinijánjín skjíni̱e̱ an yojo, tsi̱'e̱ nga k'o̱kajinjín ngo jé ṉts'ié an.
\c 9
\s Bi ts'én íni̱jmi Pabloo̱ nga ja̱koxi̱ boá nga kui xi ngo nda̱ apostro̱
\p
\v 1 ¿A tikóndéjín an nguindyi̱ko̱n Néná? ¿A apostro̱jín an? ¿A ndyikón ánjín ma xi kamábe Ndi̱a̱ná Kjisoo̱? ¡Ndok'óchji̱í xá xi kats'en an nga jún je xta̱a̱ Kristoo̱ jún!
\v 2 Tsi tjín xi tsó nga apostro̱jín an, tanga nga ja̱koxi̱ jún xi yajnú nga nda̱ apostro̱ an, nga̱t'a̱ nga s'ijinjnú Néná ndyi̱bokojnú nga apostroo̱ Ndi̱a̱ná boá an.
\p
\v 3 Kui nii̱ xi kuichji̱a̱tjé an yojona kjo̱a̱a̱ xta̱ xi boa'ayana kjo̱a̱a̱ xá xi tjíts'en an:
\v 4 ¿A jmíjínjne̱ an ko̱jo Bernabee̱ kjo̱a̱nda nga ko̱e̱'éjne̱ ni xi xi̱ni̱e̱jne̱ ko̱jo ni xi s'i̱o̱jne̱?
\v 5 ¿A jmíjínjne̱ kjo̱a̱nda nga k'uiéjne̱ chjoón xi s'ijii̱n Néná kó ka̱ma konguínjo̱jne̱ nínga ndyi̱monguínjne̱, xikó ndyi̱ts'en já apostro̱ xi ngasee̱ ko̱jo já ṉts'ie Ndi̱a̱ná ko̱jo Peé?
\v 6 ¿Axa̱ ta Bernabee̱ ko̱jo an tsi xi tjínjne̱ kjo̱a̱'niú nga si̱'anxájne̱ tsi̱'e̱ nga sa̱kójne̱ ni xi ka̱machjiénjne̱?
\v 7 ¿'Yá nda̱jun xi kui ku̱i̱'íchjí to̱n xi ts'enkjié ngu̱i̱yaa̱ xaá? ¿'Yá xi ku̱i̱'ítji̱e̱ tostsi̱je kó skji̱ni̱e̱jín to xi kjo̱a̱'átikó? ¿'Yá xi skoón cho̱tsa̱nga̱ kó k'uíjín ntsjén xi 'boxieé kui choo̱?
\p
\v 8 Jmí tsi ta ni xi ts'enkjó tsi an xi t'íxian an, ta kjo̱a̱a̱ nga bo̱a̱ ts'én bokoyá kjo̱a̱kitii̱.
\v 9 Nga̱t'a̱ bi ts'én kjit'a xo̱jo̱n kjo̱a̱kitii̱ Moisee̱: “Ngata̱ fo'mejín ts'oa cho̱yojo xi̱'in xi ts'énxá nga bitjiá to ndso̱ko̱a̱n ṉño̱o̱.” ¿Kó Néná a cho̱yojo xi̱'ii̱n xi nda̱a̱?
\v 10 ¿A mí tsi nganda tsa̱ñá boá nga bo̱a̱ katsó? Nga̱t'a̱ kjo̱a̱kitii̱ nganda tsa̱ñá boá nga bo̱a̱ ts'én ikít'a, nga̱t'a̱ xi indyiákaxo t'ananguii̱ tsi̱'e̱ nga ka̱ma ku̱i̱'ítji̱e̱ ko̱jo xi bitjiá to ndso̱ko̱a̱n ṉño̱o̱ ngajoó nga tjiín nga skoyaá nga sa̱ko̱ó to xi tsoboaá nga kjo̱chó cha̱a̱n.
\v 11 Tsi ji̱n je ik'ítji̱e̱jne̱ ngu̱i̱jinjnú ngo xojmaá ni xi tsi̱'e̱ Néná, ¿a tsie ni xi ndyi̱mindyijne̱, nga sa̱kójne̱ chií ni xi tjínjnú jún kui nga̱sondiee̱?
\v 12 Tsi kje̱'e xi maá sakó chií ni xi tjínjnú kui nga̱sondiee̱, ¿a tsiejín ngase tsoboájne̱ ji̱n?
\p Tanga ni'ánkjiénjínjne̱ kui kjo̱a̱ndaa̱, tasá ndyi̱ni'ánchíkjo̱a̱jne̱ ngayeje nii̱ tsi̱'e̱ nga si̱'anni'ínjínjne̱ nga kjo̱chót'aa̱ xtaa̱ éntjatsi̱e̱e̱ Kristoo̱.
\v 13 ¿A yajínjnú nga xi ts'énxá na̱ngo̱xi̱i̱ kjinie ni xi tjo'ósón tsi̱'e̱ na̱ngo̱xi̱i̱ ko̱jo xi ndyi̱ts'enxát'a ṉcha̱n ndikoón ti ki̱a̱ sakoó yojoo̱ cho̱ xi ni'ánk'ién ki̱a̱a̱ nga?
\v 14 Kó ti bo̱a̱ ti ts'én Ndi̱a̱ná je índa nga kui xta̱ xi ku̱i̱'íni̱jmi éntjatsi̱e̱e̱ Néná, én xi ku̱i̱'íni̱jmi ngat'índoni nga ki̱a̱ sa̱ko̱ó xi skji̱ni̱e̱ xi k'uí.
\v 15 Tanga nde kji̱e̱ ngo kui kjo̱a̱ndaa̱ xi ts'enkjién an, ti nde jmí tsi kui nii̱ tjíts'en'indó an tsi̱'e̱ nga jún ko̱e̱'éjnú'un ni, nga̱t'a̱ tasá chjínií nga ngat'ien an, nguindiee̱ nga tjín xi kjo̱a̱'áxínna kui kjo̱a̱tsja xi tikónna tsi tjín xi ni tsjana.
\p
\v 16 Tsi ts'én'bini̱jmi an éntjatsi̱e̱e̱ Kristoo̱, jmí tsi kui ni nga je k'o̱xié an yojona, ta kjo̱a̱a̱ nga tikónna ngo kjo̱a̱'niú nga bo̱a̱ sa̱'in an, ¡xi̱x'i̱a̱n xó an tsi xiyájín an éntjatsi̱e̱e̱ Kristoo̱!
\v 17 Kó kuíni nga tsi ta an so̱bo̱a̱ xi mejénna nga sa̱'in an ni xi tjíts'en an, sa̱kóna ngo chjí, tanga tsi ik'íniéna nga sa̱'in an, ni xi katsjáxána Néná nga kamá'niátakónna kuí xí tjíts'enkjatjosón an.
\v 18 Kuíni nga, ¿ja̱ kós'e̱ mí chjí xi sa̱kóna? Kuí chjí xi'bi̱, nga ta k'uini̱jmi kjo̱a̱nda an éntjatsi̱e̱e̱ Kristoo̱ kó nga sa̱'inkjienjín an kjo̱a̱nda xi tjínna nga apostro̱ an.
\s Bi ts'én íni̱jmi Pabloo̱ ni xi kats'én nga kats'én xaá
\p
\v 19 Nda tsi ndéna yojona, je moso̱ xi kastiñaá ngayeje xtaa̱ je kats'en an yojona, tsi̱'e̱ nga kjín ngase xta̱ xi sa̱'in an tsi̱'e̱ nga kui xtaa̱ s'i̱jii̱n Kristoo̱.
\v 20 Ngu̱i̱jii̱n xta̱ judíoo̱, bo̱a̱ kats'en an xikó ts'én xta̱ judíoo̱, tsi̱'e̱ nga sa̱'in an nga kui xtaa̱ s'i̱jii̱n Kristoo̱. Ngu̱i̱jii̱n xta̱ xi kjo̱a̱kitii̱ kji'i'niúnií, bo̱a̱ kats'en an xikoó tsi kui kjo̱a̱kitii̱ kji'i'niúnií an, tsi̱'e̱ nga sa̱'in an nga kui xtaa̱ s'i̱jii̱n Kristoo̱, nda tsi kuijín kjo̱a̱kitii̱ kji'i'niuú an.
\v 21 Kó ngu̱i̱jii̱n xta̱ xi kjo̱a̱kitii̱jín kji'i'niúnií, xikoó tsi ngo kui xtaa̱ kats'en an yojona, tsi̱'e̱ nga sa̱'in an nga kui xtaa̱ s'i̱jii̱n Kristoo̱, jmí tsi kjo̱a̱a̱ tsi tjíts'enkjatjosónjín an kjo̱a̱kitii̱ Néná, tasá kjo̱a̱kitii̱ Kristoo̱ ts'énfítji̱ngui an.
\v 22 Ngu̱i̱jii̱n xta̱ xi kji̱e̱ 'niújín s'ijii̱n Néná, xikoó tsi ngo kui xtaa̱ kats'en an yojona, tsi̱'e̱ nga asiko̱jo an nga 'niú ngase s'i̱jii̱n. Xi kókón ngayeje to̱ko̱ya xtaa̱, bo̱a̱ kon kats'en an yojona, tsi̱'e̱ nga ti kuí xí kjo̱tjo'ani ka'a xta̱.
\v 23 Kó ngayeje kui nii̱ ts'en an, nga̱t'a̱ xaá éntjatsi̱e̱e̱ Jesukristoo̱ tjíts'en an, tsi̱'e̱ nga ko̱jo an sa̱kóna kjo̱a̱nda xi tsjá.
\p
\v 24 ¿A yajínjnú nga kji'a nga kjín xta̱ ndyi̱monga ndse̱je̱n, ta ngo tsi xi boe'eé ni xi ni'aán? Ja̱ tiyojnú ki̱a̱ ka̱maa̱ nga sa̱kójnú ni xi ni'aán.
\v 25 Ngayeje xta̱ xi stsáton ngo kjo̱a̱ṉton, 'bí'niuú yojoo̱ ni xi ndajín sa̱'iín, kó ja̱koxi̱ nga ts'én kui nii̱ tsi̱'e̱ nga sa̱ko̱ó ngo chjí xi fotson, tanga ñá ndyi̱ni'án ngo kjo̱a̱'niú tsi̱'e̱ nga sa̱kóná ngo chjí xi kjo̱tsonjín.
\v 26 Kó an xikónií ngo xi ts'énmonga, tanga jmí tsi taxkiya ts'énmonga an. Xikónií ngo xi ts'én kján, tanga jmí tsi taxkiya ts'én be'ée̱ tjo̱o̱,
\v 27 tasá ts'éntsjáa̱ kjo̱a̱ni̱ma̱ yojona kó ts'ée̱n kjo̱a̱'niú tsi̱'e̱ nga sa̱'ínkjatjosón ni xi mejénna nga sa̱'ín, nga̱t'a̱ tsi ta xcha̱ja an nguije ja̱ bo̱a̱ je ini̱jmíi̱ xta̱ xi ngasee̱.
\c 10
\s Bi ts'én akóyá Pabloo̱ nga kats'énkjién ni xi kamáta'in xta̱ tji̱e̱ xchaá xta̱ judíoo̱
\p
\v 1 Mejénjínna já ṉts'ie, nga xchi̱yajnú nga xta̱ tji̱e̱ xchaá xta̱ judíoo̱, ngayejee̱ nga ṉdi̱i̱ Néná kistso'bátjoón, kó ngayejee̱ nga ja'atio ndáchíkoón.
\v 2 Kó bo̱a̱ ts'én ngayejee̱ nga nijan kamángo Moisee̱ xikoó tsi nijan kastindá ngu̱i̱jii̱n kui ṉdi̱i̱ ko̱jo ngu̱i̱jii̱n kui ndáchíkoón,
\v 3 kó ngayejee̱ nga ta ngo tsi ni chinie xi iskjinie xi Néná katsjaá,
\v 4 ko̱jo ta ngo tsi ni 'yó xi kats'e xi Néná katsjaá. Nga̱t'a̱ kuí xí kats'e kui ndójoa xi jatjoo̱ kui ndi̱jo̱ je xi Néná katsjaá kó kui ndi̱jo̱o̱ kuí xí Kristoo̱, xi kistso'bátji̱nguii̱.
\v 5 Tanga Néná tsjajín kamaá xikó ts'én kis'iṉdo kjín kui xtaa̱, kuíni nga ki̱a̱ jesón nangui kixií.
\p
\v 6 Ngayeje kui nii̱ kamá xikoó ngo chi̱bo̱a̱ tsa̱ñá, tsi̱'e̱ nga ka̱mamejénjínná ni xi ndajín, xikó kats'én kui xtaa̱.
\v 7 Kó kuíni, ngata̱ ni'ántsjajo̱jínjnú a̱sie̱én ngo ne xi ts'énda xtaa̱, xikó kats'én chiboa kui xtaa̱, xikó ts'én kjit'a xo̱jo̱n eén Néná nínga bi tsoó: “Ngayeje xtaa̱ kis'iṉdotie nga iskjinie ko̱jo nga kats'e, s'e̱ jaskan jastjíe̱n nga kitié nga kats'éntsjaá kui nii̱.”
\v 8 Ti nde ngata̱ tondo̱jín majnú, xikó kats'én chiboa kui xtaa̱, kuíni nga nga ta ngo ni̱xtjin kan ján mi̱ kamá xi jesón.
\v 9 Ti nde ngata̱ chját'ayákónjín ñá Ndi̱a̱ná, xikó kats'én chiboa kui xtaa̱ nga askot'ayákón, kó ye̱ iskjiniee̱ nga jesón.
\v 10 Ti nde ngata̱ ndokjo̱a̱ta'injínjnú Néná, xikó kats'én chiboa kui xtaa̱, kó ndítsjie xi botixómaá kjo̱a̱bo̱yaa̱ kats'énkjiesón.
\p
\v 11 Ngayeje kui nii̱ xi kamaá xta̱ tji̱e̱ xchaá xta̱ judíoo̱ tsi̱'e̱ nga kis'ijñaná ngo chi̱bo̱a̱, kó kui nii̱ kini'án'indó ngu̱i̱yaa̱ xo̱jo̱n eén Néná tsi̱'e̱ nga bo̱a̱jín si̱'án ñá xi tindyión kui nga̱sondie xi je kjifet'aa̱.
\v 12 Kó kuíni nga, kui xta̱ xi ndyi̱ts'enkjó nga 'niú síndo kjimaa̱ yojoo̱ ngu̱i̱yaa̱ ni tsi̱'e̱ Néná, nga koo̱n yojoo̱ tsi̱'e̱ nga k'o̱kajín.
\v 13 Ni xi kjimata'injnú nga tjíchjat'ayákónjnú, jmí tsi ts'atio ngase kjo̱a̱a̱ ni xi kjimata'in xtaa̱. Ka̱ma ka̱ma'niátakónjnú Néná, kó tsja̱ndiéjín nga 'niú ngase chját'ayákónjnú kjo̱a̱a̱ ni xi kjo̱chíkjo̱a̱jnú. Tasá kji'a nga chját'ayákónjnú, Néná ko̱kójnú kóts'en kjo̱tjonguijnú yojojnú tsi̱'e̱ nga xchikjoajnú ni xi ka̱majnú.
\p
\v 14 Kó kuíni, ndí já ṉts'ie xi tjóna, tiyót'axínjnúu̱ a̱sie̱én ngo ne xi ts'énda xtaa̱.
\v 15 Ts'énchji̱a̱jojnú'un xikoó xta̱ xi makjiín: Ti juún ti'ankjójnú ni xi t'íxian an.
\v 16 Kui chi̱tsen kamáchikon xi ndyi̱chjiá'á nga Néná sa̱'ínchikonñé, ¿a ngayejejín ñá nga nijan kjimá nga ndyi̱'yó jiín Kristoo̱? Kó kji'a nga ndyi̱chinié pan xi akakjangaa̱, ¿a nijánjín kjimá nga ndyi̱chinié yojoo̱ Kristoo̱?
\v 17 Nga̱t'a̱ paa̱n ta ngo tsi ma, kó nda tsi kjín ma ñá ta ngo tsi yojo ma, nga̱t'a̱ ngayeje ñá nga ta ngo tsi pan xi ndyi̱chinié.
\p
\v 18 Tsitsíjen chi̱bo̱a̱yajnúu̱ xta̱ Israe̱l, nga kui boá xta̱ xi ndyi̱kjinie ni xi je kini'ánk'as'iee̱n kjo̱a̱tjó Néná, kó ¿a ki̱a̱jín nijan ndyi̱ts'engo yojoo̱ kui ko̱jo kui ṉchaa̱n nga ndyi̱kjinie kjo̱a̱tjó xi kini'ánk'as'iee̱n?
\v 19 Jmí tsi t'íxian an nga kui a̱sie̱én ne xi ts'énda xtaa̱ xi chjínií, ko̱jo tsi kui ni xi tjíni'ánk'as'iee̱n xi chjínií.
\v 20 Tasá t'íxian an nga xta̱ xi ts'énk'ás'ieén kjo̱a̱tjó ne xi ts'énda xtaa̱ nga xindajín boá xi ndyi̱ts'enk'ás'ieén kui nii̱, jmí tsi Néná xi ndyi̱ts'enk'ás'ieén, kó mejénjínna nga jún si̱'anngojo̱jnú yojojnú xindajiín.
\v 21 Ka̱majín s'i̱o̱yajnú chi̱tse̱én Ndi̱a̱ná, s'e̱ ti s'i̱o̱yajnú chi̱tse̱én xindajín nga, ti nde ka̱majín yamíxaa̱ Ndi̱a̱ná ku̱i̱ndyiont'ajnú, s'e̱ ti ku̱i̱ndyiont'ajnú yamíxaa̱ xindajín nga.
\v 22 ¿Axa̱ mejénná nga si̱'anchi̱ni̱ Ndi̱a̱ná? ¿A tjín ngasená nga'niú ta̱bo̱a̱jiín kui?
\s Bi ts'én akóyá Pabloo̱ nga ka̱majín taxkiya xi̱ni̱e̱ ni xi je kini'ánk'as'iee̱n ni xi nénájín
\p
\v 23 “Ma ni'án ngayeje nii̱” tsó xtaa̱, tanga jmí tsi ngayeje nii̱ xi nda sa̱'ínná. “Ma ni'án ngayeje nii̱” tsó xtaa̱, tanga jmí tsi ngayeje nii̱ xi tsja̱nga'niúná.
\v 24 Ngata̱ ngojín xi ngatangase kjo̱a̱nda tsi̱'e̱, tasá kjo̱a̱a̱ ni xi ndaa̱ xta̱ xi ngasee̱.
\p
\v 25 Ngayeje ni xi stiñá nínga stiñá yojoo̱ xi ka̱ma xi̱ni̱e̱jnú, kó ngata̱ bo̱a̱jín ts'en fojintakónjnú tsi kui nii̱ xi sa̱'índándíjnú nguindyi̱ko̱n Néná.
\v 26 Nga̱t'a̱ t'ananguii̱ ko̱jo ngayeje ni xi tjiín, tsi̱'e̱ Ndi̱a̱ná boá.
\p
\v 27 Tsi ngo xta̱ xi s'ijinjiín Néná ko̱tso̱yajnú tsi̱'e̱ nga konguín chi̱ni̱e̱jnú ṉño̱ ndi'aa̱, kó tsi mejénjnú konguínjnú, tanguínjnú kó chi̱ni̱e̱jnú ngayeje ni xi ko̱e̱'éjnú, kó chjiénjín nga bo̱a̱ ts'en kjójintakónjnú tsi kui nii̱ xi sa̱'índándíjnú nguindyi̱ko̱n Néná.
\v 28 Tanga tsi tjín xi bi ka̱tso̱jnú: “Kui nii̱ je kini'ánk'as'ienjne̱ ngo ne xi ts'énda xtaa̱.” Ngata̱ chiniejínjnú, tangat'anii̱ kui xi bo̱a̱ katsoó, ko̱jo tangat'anii̱ tsi kjo̱tson kjo̱a̱kjíntakoón xta̱ xi bo̱a̱ tsoó, nga̱t'a̱ t'ananguii̱ ko̱jo ngayeje ni xi tjiín, tsi̱'e̱ Ndi̱a̱ná boá.
\v 29 Kjo̱a̱kjíntakón xi xian an, tanga jmí tsi tse̱, tsi̱'e̱ xi ingoo̱ xi xian an.
\p Nga̱t'a̱ ¿mí kjo̱a̱a̱ nga xikó ts'én ts'énchji̱a̱ kjo̱a̱kjíntakoón xta̱ xi ngasee̱ nga kui xi ko̱kó mí ni xi tjíts'en an?
\v 30 Tsi tsjáa̱ ndok'óchji Néná kjo̱a̱a̱ nga kui katsjána ni chiniee̱, ¿mí kjo̱a̱a̱ nga tjín kon xi ku̱i̱'íchjána nga skjíni̱e̱ an ni chinie kjo̱a̱a̱ ni xi je katsja an ndok'óchji?
\p
\v 31 Kó kuíni, tsi xi̱ni̱e̱jnú, tsi s'i̱o̱jnú ko̱jo tsi kje̱'e ni si̱'ánjnú, ngayeje ni xi si̱'ánjnú nga takó kjo̱a̱jee̱ Néná.
\v 32 Ngata̱ ni'ánchajájínjnú xta̱ xi judíoo̱, ko̱jo xta̱ xi judío̱jín, ko̱jo xta̱ na̱ngo̱xi̱i̱ Néná.
\v 33 Xikó ts'en an nga ngayeje ni xi ts'en an, sasiénnií ngayeje xtaa̱, jmí tsi mongase an ni xi nda mana an, ni xi nda maá xta̱ xi ngasee̱ xi ts'en an, bo̱a̱ ts'en an tsi̱'e̱ nga kjo̱tjo'a kui xtaa̱.
\c 11
\p
\v 1 Chja̱'ánguíjnú'un xikó tjíts'en an, xikó ts'én an ts'énfoa'anguíi̱ Kristoo̱.
\s Bi ts'én akóyá Pabloo̱ nga chjiénga ku̱i̱'í'má to̱ko̱ ínchjiín
\p
\v 2 Tsjats'én chjiá an kjo̱a̱a̱ jún, já ṉts'ie, nga̱t'a̱ ngatsjé ni̱xtjin foa'átsjienjnú an, kó ndyi̱ni'ánjnú ngayeje nii̱ xikó ts'én akoyájnú'un, kuí nii̱ xi katse'éna kó ti bo̱a̱ ti ts'én kats'enk'as'ienjnú'un.
\v 3 Tanga mejénna nga xcha̱jnú nga Kristoo̱ xí tikóntjoón nga ngo nga ngo já xi̱'ii̱n, kó xi xi̱'ii̱n kuí xí tikóntjoón chjo̱ón, xikó ts'én nga Néná boá xi tikóntjoón Kristoo̱.
\v 4 Ngayeje já xi̱'in xi bo'má to̱ko̱ nga chji̱a̱a̱ Néná ko̱jo tsi nga ko̱tso̱ya ngo én xí Néná tsjaá, bendikónjín xi tikóntjoón kui.
\v 5 Tanga ngayeje ínchjín xi ku̱i̱'í'májín to̱ko̱ nga ku̱i̱chji̱a̱a̱ Néná ko̱jo tsi nga ko̱tso̱ya ngo én xí Néná tsjaá, bendikónjín xi tikóntjoón kui, kó nga bo̱a̱ tjíts'én ti bo̱a̱ ti kji'inii̱ tsi íjón taka takaa̱ to̱ko̱.
\v 6 Nga̱t'a̱ tsi ko̱ó'májín to̱ko̱ ínchjiín, tasá ngatatie tsjaa̱ ko̱jo tsi ngat'ijón taka takaa̱ to̱ko̱, tanga tsi soboaá nga ko̱tie tsjaa̱ ko̱jo tsi nga ku̱i̱'íjón taka takaa̱ to̱ko̱, ja̱ tasá ngat'í'má to̱ko̱.
\v 7 Xi xi̱'ii̱n ka̱majín ko̱ó'má to̱ko̱, nga̱t'a̱ xikó ts'én tjíjii̱n Néná bo̱a̱ ts'én kats'énda nda̱ xi tjoón, kó kuí nda̱a̱ xi akó kjo̱a̱jee̱ Néná, tanga xi chjo̱ón kuí xí bokó kjo̱a̱jee̱ xi xi̱'ii̱n.
\v 8 Nga̱t'a̱ nda̱ xi tjoón jmí tsi yojoo̱ naa̱ ka'naxiéni, naa̱ xi ka'naxiéni yojoo̱ nda̱ xi tjoón.
\v 9 Nga̱t'a̱ nda̱ xi tjoón jmí tsi kamánda tangat'anii̱ naa̱, naa̱ xí kamánda tangat'anii̱ nda̱ xi tjoón.
\v 10 Kó kuíni nga ínchjiín chjiénga ko̱a̱'a̱ ngo chi̱bo̱a̱ to̱ko̱ tsi̱'e̱ nga sku̱i̱e̱ndíkón xi botixómaá kui ko̱jo sku̱i̱e̱ndíkón ndítsjiee̱ nga.
\v 11 Tanga ngu̱i̱jii̱n ñá xi je s'ijinná Ndi̱a̱ná, xi xi̱'ii̱n jmíjín ra tsi jmíjín xi ínchjiín, kó xi ínchjiín jmíjín ra tsi jmíjín xi xi̱'ii̱n,
\v 12 nga̱t'a̱ xikó ts'én yojoo̱ nda̱ xi tjoón kjindibáni xi chjo̱ón, ti bo̱a̱ ti ts'én xi chjo̱ón kuí xí tokjánií xi xi̱'ii̱n, tanga ngayeje ni xi tjiín, nguindyi̱ko̱n Néná ndibání.
\p
\v 13 Ti juún bo̱a̱ t'ínjnú tsi nda ko̱jo tsi ndajín kji'i: ¿A nda kji'i nga ngo na̱ ku̱i̱chji̱a̱a̱ Néná kó ko̱ó'májín to̱ko̱?
\v 14 Xikó ts'én ya, ¿a bokoyájínná kui nii̱ nga kjo̱a̱soboá boá nga xi xi̱'ii̱n sa̱'índojó tsja̱to̱ko̱?
\v 15 Tanga kjo̱a̱tsjakji'i boá nga ínchjiín sa̱'índojó tsja̱a̱, nga̱t'a̱ bo̱a̱ ts'én katse'eé nga tsja̱ ndojoó kuí xí ko̱ó'mani to̱ko̱.
\v 16 Tanga tsi tjín xi mejeén ku̱i̱chji̱a̱ti kjo̱a̱a̱ ni xi'bi̱, ngájínjne̱ kje̱'e ni ji̱n ko̱jo ngayeje xta̱ na̱ngo̱xi̱i̱ Néná nga.
\s Bi ts'én akóyá Pabloo̱ xikó ts'én si̱'ankja'átsjien kjo̱a̱bo̱yaa̱ Ndi̱a̱ná
\r (Matioo̱ 26:26-29; Markoo̱ 14:22-25; Rkaa̱ 22:14-20)
\p
\v 17 Tsjajín ts'en kuichjiájojnú'un ni xi xianjnú'un ngot'e̱, nga̱t'a̱ nguindiee̱ nga nda sa̱'ínjnú nga matikójnú, tasá ndajín ts'énjnú kui nii̱.
\v 18 Tjón ma ra xiyájnú'un xikó ki'mína nga kji'a xó nga matikójnú jún xi xta̱ na̱ngo̱xi̱i̱, kja̱ ch'ia kja̱ ch'ia xójnú yojojnú, kó ngaskande s'ijin chiboana kui nii̱.
\v 19 Chjiénga nga kja̱ x'i̱a̱ kja̱ x'i̱a̱jnú xingu̱i̱jnú, tanga tsi̱'e̱ nga xcha̱ 'yání xi ja̱koxi̱ nga 'niú síndo nguindyi̱ko̱n Néná.
\v 20 Kji'a nga matikójnú, jmí tsi bo̱a̱ ndyi̱ni'ánjnú xikó ts'én akóyáná Ndi̱a̱ná nga iskjiniejo̱ ngase ṉño̱ xta̱a̱,
\v 21 nga̱t'a̱ nga chiniejnú ṉño̱ ni'ánkja'asónjínjnú ni xi kich'iajnú kó ta jún chinie so̱bo̱a̱jnú ni xi tsa̱jún, kó tjín xi sakójiín ni chinie, kó tjín xi ma ch'i̱.
\v 22 ¿A jmíjínjnú ndi'a nínga ka̱ma xi̱ni̱e̱ ko̱jo nínga ka̱ma s'i̱o̱jnú? ¿Mí kjo̱a̱a̱ nga ni'ánch'ojnú xta̱ na̱ngo̱xi̱i̱ Néná, kó mejénjnú ko̱e̱'éjnúu̱ kjo̱a̱soboá xta̱ xi ta jmíjín ni xi tjiín? ¿Mí xi xianjnú'un? ¿A tsjats'én kuichjiájojnú'un? ¡Kjo̱a̱a̱ kui nii̱, jmí!
\p
\v 23 Nga̱t'a̱ ni xi akóyána Ndi̱a̱ná kuí ma ni xi akoyájnú'un: Nga Ndi̱a̱ná Kjisoo̱ iskjíbé paa̱n kui ni̱xtji̱e̱n nga kini'ánk'as'ien kui,
\v 24 kó nguije katsjaá ndok'óchji Néná, akjángá kó bi katsó: “Kuí xi'bi̱ xi yojona, kui xi si̱'ank'as'ien nganda tsa̱jún, ti'ánjnú kui nii̱ tsi̱'e̱ nga kjo̱a̱'átsjienjnú an.”
\v 25 Ti bo̱a̱ ti ts'én, nguije iskjinie ni chiniee̱, iskjíbé chi̱tse̱én, kó bi katsó: “Kui chi̱tsen xi ndyi̱a̱ jínna kuí xí bokó kjo̱a̱'bínda tja̱tsi̱e̱ xi kats'én Néná ko̱jo xta̱ tsi̱'e̱, kui nii̱ xi ti'ánjnú ta xikó tjín ndi̱ya s'i̱o̱jnú, tsi̱'e̱ nga kjo̱a̱'átsjienjnú an.”
\v 26 Kuíni nga ta xikó tjín ndi̱ya nga xi̱ni̱e̱jnú kui paa̱n ko̱jo ta xikó tjín ndi̱ya nga s'i̱o̱jnú kui chi̱tse̱én, ndyi̱'míyajnú nga k'ien Ndi̱a̱ná, ngaskande ni̱xtjin nga kjo̱e̱'e nguiní kui.
\p
\v 27 Kó kuíni nga ngayeje xta̱ xi sku̱i̱e̱ndíkónjín nga taxkiya skji̱ni̱e̱ pan ko̱jo nga taxkiya k'uí kui chi̱tse̱én, nga sa̱'ínjín xikó katsó Ndi̱a̱ná, tjitsjíe̱nrií jé nga ts'én bendikónjín yojoo̱ ko̱jo jiín Ndi̱a̱ná.
\v 28 Kuíni nga nguindiee̱ nga skji̱ni̱e̱ paa̱n ko̱jo nga k'uí kui chi̱tse̱én nga kot'a cha̱n cha̱n yojoo̱ xikó ts'én síndo nguindyi̱ko̱n Néná,
\v 29 nga̱t'a̱ xi taxkiya skji̱ni̱e̱ ko̱jo xi taxkiya k'uí nga bejín nga yojoo̱ Ndi̱a̱ná boá kui nii̱, jé ts'énmonguii̱ yojoo̱ nga ts'én'bi ko̱jo nga ts'énkjinie.
\v 30 Kó tangat'aa̱ kui nii̱ nga ngu̱i̱jinjnú tjín xi oo̱n ko̱jo xi xk'ién tjimá kó kje̱'e xi je jesón.
\v 31 Tanga tsi ti ñaá xi xchít'a cha̱n cha̱n yojoná, Néná sa̱'ínka'anijínjínná ngo jé.
\v 32 Kji'a nga Néná kotsijee̱n tsi nda ko̱jo tsi ndajín ndyi̱ni'án, ts'enchji̱ni̱e̱ná tsi̱'e̱ nga sa̱tíjéjínná xikoó xtaa̱ kui nga̱sondiee̱.
\p
\v 33 Kó kuíni ṉts'ie, kji'a nga ka̱matikójnú nga xi̱ni̱e̱jnú ni chinie, chiyájnúu̱ xingu̱i̱jnú,
\v 34 tsi tjín xi bojoó, ndi'aa̱ nga kjinie ṉño̱, tsi̱'e̱ nga Néná ko̱tíjéjiín kjo̱a̱a̱ nga bo̱a̱ ts'én kamátikó. Kó kjo̱a̱a̱ ngayeje ni xi ngasee̱ an k'uijñánda an nga kjócho an.
\c 12
\s Bi ts'én akóyá Pabloo̱ nga A̱sién Ni̱xtjii̱n Néná ja̱ kje̱'e ja̱ kje̱'e kjo̱a̱nda xi tsjá
\p
\v 1 Jún ṉts'ie, mejénna nga xcha̱jnú nga ja̱ kje̱'e ja̱ kje̱'e kjo̱a̱nda xi A̱sién Ni̱xtjii̱n Néná tsjaá xta̱ na̱ngo̱xi̱i̱.
\p
\v 2 Jún je yajnú nga ngas'e̱ nga xta̱ xi s'ijinjiín Néná kamájnú, xikoó tsi kachjafé kjo̱a̱'niújnú nga ki̱a̱ tsanguíntji̱nguijnúu̱ a̱sie̱én ngo ne xi ts'énda xtaa̱, xi ni̱ma̱ xi majín chji̱a̱.
\v 3 Kó kuíni xiyájnú'un nga nde ngojín xta̱ xi A̱sién Ni̱xtjii̱n Néná tjíts'énkíchji̱a̱ xi “ngat'íko̱jonii̱ Kjisoo̱” ka̱tso̱, kó ti nde ngojín xta̱ xi tikónjinjiín A̱sién Ni̱xtjii̱n Néná xi “Kjisoo̱ xi Ndi̱a̱ná” ka̱tso̱.
\p
\v 4 Ja̱ kje̱'e ja̱ kje̱'e kjo̱a̱nda xi tjínná ñá, tanga ta ngo tsi ma A̱sién Ni̱xtjii̱n Néná xi tsjá kui kjo̱a̱ndaa̱.
\v 5 Ja̱ kje̱'e ja̱ kje̱'e ts'én ni'ánxá ñá nga bosíko̱jo xingu̱i̱, tanga ta ngo tsi ma Ndi̱a̱ná.
\v 6 Ja̱ kje̱'e ja̱ kje̱'e xá xi maná ni'án ñá, tanga ta ngo tsi ma Néná xi ts'én ngayejee̱ nii̱ nga ts'énxájii̱n ngayeje xta̱ na̱ngo̱xi̱i̱.
\v 7 Nga ngo nga ngo ñá katse'éná nga A̱sién Ni̱xtjii̱n Néná xi sa̱'ínxájin ngu̱i̱jin yojoná nganda tsi̱'e̱ xta̱ xi ngasee̱.
\v 8 Tjín xi A̱sién Ni̱xtjii̱n Néná xi tsjaá nga ko̱tso̱yaa̱ xtaa̱ én xi kjínkón, kó tjín xi ti kui A̱sién Ni̱xtjii̱n xi tsjaá nga ko̱tso̱yaa̱ xtaa̱ ni xi ka̱makjiín xtaa̱.
\v 9 Tjín xi ti kui A̱sién Ni̱xtjii̱n Néná xi tsjaá nga 'niú s'ijii̱n Néná, kó ti tjín nga xi ti kuii̱ A̱sién Ni̱xtjii̱n xi tsjaá nga ka̱maa̱ sa̱'índaya xta̱ xi oo̱n.
\v 10 Tjín xi máa̱ ts'én kjo̱a̱ndikón, kó kje̱'e xi maá tsáyá én xí Néná tsjaá, kje̱'e xi makjiín tsi ja̱koxi̱ nga A̱sién Ni̱xtjin Néná tjíjii̱n xtaa̱ axa̱ a̱sién ni̱xtjii̱n xindajín, kó kje̱'e xi maá chji̱a̱ én xi makjínjiín xta̱ xi ngasee̱ xi tsjá A̱sién Ni̱xtjin Néná, kó ti tjín xi maá ts'énk'átioya kui eén.
\v 11 Tanga ta ngo tsi A̱sién Ni̱xtjin Néná xi ts'én kui nii̱ kó xikó ts'én mejeén kui, kó bo̱a̱ ts'én tsjaá nga ngo nga ngo xta̱ na̱ngo̱xi̱i̱.
\s Bi ts'én akóyá Pabloo̱ kjo̱a̱a̱ nga ñá xi xta̱ na̱ngo̱xi̱ ta ngo tsi kich'iá yojoná
\p
\v 12 Nga̱t'a̱ xikó ts'én nga ngo yojo kjín ma ni xi ya'ajo̱ni, kó nda tsi kjín ni xi ya'ajo̱, ta ngo tsi yojo ma, ti bo̱a̱ ti kji'inii̱ Kristoo̱.
\v 13 Nga̱t'a̱ ta ngo tsi A̱sién Ni̱xtjii̱n Néná xi kastindá ngayeje ñá kó ngayeje ñá nga katse'éná nga ki'yó ti kui A̱sién Ni̱xtjii̱n, kó bo̱a̱ ts'én ta ngo yojo kamá, tsi xta̱ judío̱ ko̱jo tsi xta̱ xi judío̱jín, tsi moso̱ xi kastiñá ko̱jo tsi xta̱ xi tjimándé.
\p
\v 14 Nga̱t'a̱ ngo yojo jmí tsi ta ngo ndo̱jo ma, kjín ma ni xi ya'ajo̱nii̱.
\v 15 Tsi ngo ndsa̱ko xi bi ka̱tso̱: “Kjo̱a̱a̱ nga ndsa̱jín an, yojoo̱jín chjiá an”, jmí tsi tangat'anii̱ nga bo̱a̱ katsó, s'e̱ nguiti ki̱a̱jín yojoo ku̱i̱chji̱a̱ni.
\v 16 Kó tsi ngo tji̱bo̱a̱nijon xi bi ka̱tso̱: “Kjo̱a̱a̱ nga ndyikonjín an, yojoo̱jín chjiá an”, jmí tsi tangat'anii̱ nga bo̱a̱ katsó, s'e̱ nguiti ki̱a̱jín yojoo̱ ku̱i̱chji̱a̱ni.
\v 17 Tsi ngayeje yojoná nga ndyikon ka̱ma, ¿kóts'en ka̱ma ko̱nda'yá? Kó tsi ngayeje yojoná nga tji̱bo̱a̱nijon ka̱ma, ¿kóts'en ka̱ma xchíjen?
\v 18 Tanga xikó ts'én kasasiennii̱ Néná bo̱a̱ ts'én íjñá nga ngo nga ngo ni xi tjiín yojoná.
\v 19 Tanga tsi ngayeje yojoo nga ta ngo tsi ni xi ya'ajo̱ni kui yojoo ka̱ma, ¿kóts'en yojo k'uinní kui nii̱?
\v 20 Nga ja̱koxi̱ achichí kjín ma ni xi ya'ajo̱nii̱ yojoo̱, tanga yojoo ta ngo tsi ma.
\p
\v 21 Ndyikoo̱n ka̱majín bi ka̱tso̱o̱ ndsa̱a̱: “Chjiénjínna ji”, ti nde tokoo̱ ka̱majín bi ka̱tso̱o̱ ndsa̱koo̱: “Chjiénjínna jún”,
\v 22 tasá ni xi chji̱a̱ni yojoná xi nde 'niújín machjién maná, kuí xí 'niú machjién ngase,
\v 23 kó ni xi ya'aa̱ yojoná xi nde 'niújín chjínií maná, kuí xí 'niú nda ni'ánchoo̱n. Kó ni xi mejénjínná nga xcha̱, kuí xí nda ngase fo'má.
\v 24 Nga̱t'a̱ chjiénjín nga kjo'má nínga ka̱ma xcha̱, Néná bo̱a̱ ts'en índonda yojoná, nga 'niú ngase si̱'andíkón ni xi 'niújín chjínií maná.
\v 25 Bo̱a̱ kats'én Néná tsi̱'e̱ nga kjo̱tjot'ájiín xkjín ni xi ya'aa̱ yojoná, kó nga ja̱ k'i̱e̱ ja̱ ngaján skoón xkjín.
\v 26 Kó kuíni nga, tsi tjín ni xi ya'aa̱ yojoná xi kjo̱a̱ni̱ma̱ kjo̱a̱'atio, ngayeje xi ngasee̱ xi on ka̱maa̱ nga, kó tsi tjín ni xi ya'a yojoná xi ndikón si̱'anjo̱, ngayeje xi ngasee̱ xi tsja ka̱maa̱ nga.
\p
\v 27 Jún boá xi yojoo̱ Kristoo̱, kó nga ngo nga ngojnú tikónjnú ngo ngu̱i̱ndie ki̱a̱ kui yojoo.
\v 28 Néná íjñá nga ngu̱i̱jii̱n xta̱ na̱ngo̱xi̱i̱ tjón ma já apostro̱ k'uié, s'e̱ xi ma jó, já xi chji̱a̱ én xí Néná tsjaá, s'e̱ xi ma ján, já mostro̱, s'e̱ jaskan xta̱ xi ts'én kjo̱a̱ndikón, ko̱jo xi ts'endáya xi oo̱n, ko̱jo xi bosikójo, ko̱jo xi nguito̱ko̱, ko̱jo xi chji̱a̱ ja̱ kje̱'e ja̱ kje̱'e én xi tsjá A̱sién Ni̱xtjin Néná.
\v 29 ¿A ngayeje xta̱ na̱ngo̱xi̱i̱ xi já apostro̱? ¿A ngayejee̱ xi já xi chji̱a̱ én xí Néná tsjaá? ¿A ngayejee̱ xi já mostro̱? ¿A ngayejee̱ xi ts'én kjo̱a̱ndikón?
\v 30 ¿A ngayejee̱ xi tjiín kjo̱a̱nda nga ts'endáya xta̱ xi oo̱n? ¿A ngayejee̱ xi chji̱a̱ ja̱ kje̱'e ja̱ kje̱'e én xi tsjá A̱sién Ni̱xtjin Néná? ¿A ngayejee̱ xi ts'énk'átioya én xí Néná tsjaá xtaa̱?
\v 31 Ti'anmejenjnú kjo̱a̱nda xi nda ngasee̱ Néná. Ngot'e̱ 'ne̱ an kokojnú'un ngo ndi̱ya xi 'niú nda ngase kji'i.
\c 13
\s Bi ts'én akóyá Pabloo̱ kjo̱a̱a̱ kjo̱a̱tjoó
\p
\v 1 Tsi mana ngayeje én xi chji̱a̱ xta̱ nga̱sondiee̱ ko̱jo én xi chji̱a̱ ndítsjiee̱, tanga tsi jmíjínna kjo̱a̱tjó, an ta xikónií ngo ki̱cha̱ xi 'niú fonie ko̱jo tsi ngo platiyo̱ xi taxkiya fonie kjima an.
\v 2 Kó tsi tjínna ngo kjo̱a̱nda nga xiyá an én xí Néná tsjá, kó tsi makjínna ngayeje ni xi í'má Néná ngas'e̱, kó tsi makjínna tajmí niní, kó tsi 'niú s'ijinna Néná nga ngaskande ka̱mana sa̱'intíyáa̱ ngo na̱xi̱, tanga tsi jmíjínna kjo̱a̱tjó, jmí ni chjíjiín an.
\v 3 Tsi sa̱'inkja'asóo̱n xta̱ ni̱ma̱a̱ ngayeje ni xi tjínna, kó tsi sa̱'ink'as'ien an yojona tsi̱'e̱ nga ku̱i̱ti an ngandaa̱ xta̱ xi ngasee̱, tanga tsi jmíjínna kjo̱a̱tjó, ta kjo̱a̱ndaní ni xi tjíts'en an.
\p
\v 4 Tsi tjínná kjo̱a̱tjó, kji'a boá nga ni'ánchíkjo̱a̱, kó ndaxta̱ ni'án yojoná, 'béjínná kjo̱a̱'ontakón, ndokjo̱a̱jín ñá én xi nk'a, jejín 'na̱xié yojoná.
\v 5 Tsi tjínná kjo̱a̱tjó taxkiya si̱'ánjín ñá ngo ni, jmí kjo̱a̱ndikonkón k'uiéjínná, si̱'anxchánjín ñá, jmí kjo̱a̱'ontakón k'uíjinján ini̱ma̱ná.
\v 6 Tsi tjínná kjo̱a̱tjó tsjajín ka̱maná ngo ni xi kixi̱jín, tasá ni xi ja̱koxi̱i̱ xi tsja ka̱maná.
\v 7 Tsi tjínná kjo̱a̱tjó si̱'anjetakón ngayeje ni xi ku̱i̱tjájin, si̱'ans'ijin ngayeje ni xi tsi̱'e̱ Néná, xchiyáa̱ ngayeje ni xi ndaa̱, si̱'anchíkjo̱a̱ ngayeje ni xi ka̱mata'in.
\p
\v 8 Kjo̱chó ni̱xtjin nga nguiti jmíjín xi ku̱i̱chji̱a̱ én xí Néná tsjaá, kó nguiti ko̱ndókjo̱a̱jín ja̱ kje̱'e ja̱ kje̱'e én, ti nde nguiti ka̱machjienjín nga xcha̱ xikó ts'én ya ngot'e̱, tanga kjo̱a̱tjoó jmí ni̱xtjin kju̱i̱e̱.
\v 9 Nga̱t'a̱ tjín ni xi ya chií ngot'e̱, kó ta chií tsi ma ni xi tsáyáná xta̱ xi chji̱a̱ én xí Néná tsjaá,
\v 10 tanga kji'a nga kjo̱tjosón ndo̱jo ndo̱jo ni xi índa Néná nga ka̱ma, kji'a boá nga kju̱i̱e̱ ni xi ta chiboa tsi ya ngot'e̱.
\p
\v 11 Kji'a nga nda̱chí kamá an, tsíchji̱a̱ an xikoó ngo nda̱chí, kats'enkjó an xikoó ngo nda̱chí, ko̱jo kats'énkjínko̱n an xikoó ngo nda̱chí, tanga nguije kamáxchá an, xín íjñá an ni xi ts'én ngo nda̱chí.
\v 12 Tanga ngot'e̱ 'ne̱ ta ndyi̱ya xa̱ tsi ñá ni xi tsi̱'e̱ Néná xikoó tsi ngo chi̱tsen tsitsienjenjin xi xa̱ ya, tanga nga kjo̱chó ni̱xtjin tíkje̱n tíkje̱n xcha̱ Néná. Nga̱t'a̱ chiboa tsi be an ngot'e̱, tanga kjo̱chó ngo ni̱xtjin nga sku̱i̱e̱ cha̱n cha̱n an Néná xikó ts'én bena kui.
\v 13 Jmí ni̱xtjin kju̱i̱e̱ nga s'ijinná ni xi tsi̱'e̱ Néná, ko̱jo nga ndyi̱chiyá ni xi tsja̱aná, ko̱jo nga tjínná kjo̱a̱tjó, tanga ngu̱i̱jii̱n nga ján kui nii̱, kjo̱a̱tjoó boá xi 'niú chjí ngasenii̱.
\c 14
\s Bi ts'én akóyá Pabloo̱ kjo̱a̱a̱ nga ja̱ kje̱'e ja̱ kje̱'e én xí Néná tsja̱á xi ku̱i̱chji̱a̱ xtaa̱
\p
\v 1 Tindyi̱séjnú kjo̱a̱tjoó, kó ngatamamejénjnú kjín to̱ko̱ya kjo̱a̱nda xi tsjá A̱sién Ni̱xtjii̱n Néná, tanga ngu̱i̱jii̱n kui kjo̱a̱ndaa̱ 'niú ngase ti'anmejenjnú nga k'uiyájnú én xí Néná tsjá.
\v 2 Nga̱t'a̱ xi chji̱a̱ kje̱'e én xi A̱sién Ni̱xtjii̱n Néná tsjaá, jmí tsi xtaa̱ xi chji̱a̱jo, Néná xí chji̱a̱jo, nga̱t'a̱ ta'yajín xi makjiín kui eén, nga̱t'a̱ tsi̱'e̱ A̱sién Ni̱xtjii̱n Néná boá ni tji'má xi chji̱a̱,
\v 3 tanga xi tsáyá én xí Néná tsjaá kui boá xi chji̱a̱jo xtaa̱, tsi̱'e̱ nga skinínk'á, ko̱síko̱jo ko̱jo sa̱'índajoo̱n.
\v 4 Tanga kui xta̱ xi chji̱a̱ ngo én xi makjínjiín xta̱ xi ngasee̱ xi tsjá A̱sién Ni̱xtjin Néná, ta kui kjinink'á soboá yojoo̱, kó kui xta̱ xi chji̱a̱ én xí Néná tsáyaá, xta̱ na̱ngo̱xi̱i̱ xí kjinink'á.
\p
\v 5 Mejénna nga ngayejejnú nga ko̱ndókjo̱a̱jnú kje̱'e én xi makjínjiín xtaa̱ xi tsjá A̱sién Ni̱xtjii̱n Néná, tanga 'niú mején ngasena nga xta̱ xi tsáyá én xí Néná tsjaá ka̱majnú, nga̱t'a̱ nk'a ngase xaá xta̱ xi tsáyá én xí Néná tsjaá, ta bo̱a̱jiín xi chji̱a̱ kje̱'e én xi makjínjiín xtaa̱ xi tsjá A̱sién Ni̱xtjii̱n Néná, nda kji'í kui nii̱ ngototo tsi tjín xí sa̱'ínk'atioya ni xi mejeén tsó kui eén tsi̱'e̱ nga xtjonínk'á xta̱ na̱ngo̱xi̱i̱.
\v 6 Kó ngot'e̱ 'ne̱ já ṉts'ie, tsi kjóchokonjnú'un nga ts'énchji̱a̱ an kje̱'e én xi makjínjiín xtaa̱ xi tsjá A̱sién Ni̱xtjii̱n Néná. ¿Mí nganda xi sa̱kójnú tsi bo̱a̱ sa̱'in an? Kji'a nga nda kji'i tsi kuichjiájojnú'un ngo ni xi akóna Néná, ko̱jo tsi ngo ni xi makjínna xi xiyájnú'un, ko̱jo tsi xiyájnú'un ngo én xí Néná tsjá ko̱jo tsi ngo ni xi kokoyájnú'un.
\p
\v 7 Tsi ngayeje ni xi foniee̱ xikoó yánaxo̱o̱ ko̱jo arpaa̱ ja̱ kje̱'e já kje̱'ejín ts'én fonie nga ngo nga ngo, ¿kóts'en xcha̱ só xi tjíni'ánkjaniejo̱ yánaxo̱o̱ ko̱jo kóts'en xcha̱ só xi tjíni'ánkjaniejo̱ arpaa̱?
\v 8 Kó tsi tjio xi fonie nga ma kjo̱a̱xcha̱án ndajín ts'én kjo̱ni̱e̱, nde ngojín xi ku̱i̱'íjñanda yojoo̱ tsi̱'e̱ nga ko̱e̱je̱ kjo̱a̱xcha̱án nga ko̱ndókjo̱a̱a̱.
\v 9 Bo̱a̱ ma ngu̱i̱jinjnú, tsi ko̱ndókjo̱a̱jnú ngo én xi jmíjín xi ka̱makjiín, ¿kóts'en ka̱makjiín xtaa̱ ni xi ko̱ndókjo̱a̱jnú? ¡Xikónií tsi ta tjo̱o̱ xí ndyi̱ndokjo̱a̱jo tiyajnú!
\v 10 Kjénní nga achichí kjín to̱ko̱ya ma én xi tjín nga̱sondiee̱ kó ngayejee̱ nga tjiín mí ni xi tsó.
\v 11 Tanga tsi makjínjínna kó tsó ngo én xi tjindókjo̱a̱jona, xta̱ xi kje̱'e nangui ka̱maa̱ an xi ku̱i̱chji̱a̱jona, kó xi ku̱i̱chji̱a̱jona xikónií xta̱ xi kje̱'e nangui ka̱mana an.
\v 12 Ti bo̱a̱ ti kji'inii̱ ngu̱i̱jinjnú, nga mejénjnú nga k'uiéjnú kjín to̱ko̱ya kjo̱a̱ndaa̱ A̱sién Ni̱xtjii̱n, tanga tasá tindyi̱séjnú ngu̱i̱jii̱n kui kjo̱a̱ndaa̱, nga kjín ka̱ma kjo̱a̱nda xi skjinínk'á xta̱ na̱ngo̱xi̱i̱.
\p
\v 13 Kó kuíni nga kui xta̱ xi chji̱a̱ kje̱'e én xi makjínjiín xtaa̱ xi tsjá A̱sién Ni̱xtjii̱n Néná, ngatíchji̱a̱a̱ Néná tsi̱'e̱ nga ka̱maa̱ sa̱'ínk'atioya ni xi tsó kui eén.
\v 14 Nga̱t'a̱ tsi kji'a nga kuichjiáa̱ Néná sa̱'inkjien an kje̱'e én xi makjínjínna xi tsjá A̱sién Ni̱xtjii̱n, ini̱ma̱na xí chji̱a̱a̱ Néná, tanga kui nii̱ bosíko̱jojín kjo̱a̱kjíntakónna.
\v 15 ¿Ja̱ kó mí xi sa̱'in an? Ini̱ma̱na kuichjiáñáa̱ Néná, tanga ti sa̱'inkjien an kjo̱a̱kjíntakónna nga. Ini̱ma̱na sieñáa̱ Néná, tanga ti sa̱'inkjien an kjo̱a̱kjíntakónna nga.
\v 16 Nga̱t'a̱ tsi ta ini̱máa̱ xi tini'ínkjín kji'a nga tini'íntsjée̱ Néná, kó tsi ku̱i̱nt'ie̱é ji ngo nda̱ xi bejín ni xi tini'ín, ¿kóts'en nga “bo̱a̱ kji'i” ka̱tso̱ nga tiboe'é ji ndok'óchji kjo̱a̱a̱ nga bejín ni xi t'íse?
\v 17 Nga̱t'a̱ ji, nga ja̱koxi̱ nda ts'én tiboe'é ji ndok'óchji, tanga nda̱ xi ingoo̱ tjonink'ájín ngu̱i̱yaa̱ ni xi tsi̱'e̱ Néná.
\v 18 Tsjáa̱ ndok'óchji Néná nga̱t'a̱ chjiá ngase an kje̱'e én xi makjínjiín xtaa̱ xi tsjá A̱sién Ni̱xtjii̱n Néná ta bo̱a̱jiín ngayejejnú,
\v 19 tanga ngu̱i̱jii̱n xta̱ na̱ngo̱xi̱i̱ tasá mejénna kuichji̱a̱ an ún ndso̱'boa én xi kjo̱tjojin kjo̱a̱kjíntakónna tsi̱'e̱ nga kokoyáa̱ kje̱'e xta̱, ta bo̱a̱jiín tsi tie mi̱ ndso̱'boa én xi nde ta'yajín xi makjiín xi kuichji̱a̱ an.
\p
\v 20 Jún ṉts'ie, ngata̱ bo̱a̱jín ts'en fojintakónjnú xikó ts'én ts'énkjó jakjíndií, tasá bo̱a̱ ti'anjnú xikoó jakjíndií nga ts'ensénjiín ni xi ndajiín, tanga ti'ankjójnú xikoó ngo xta̱ xi xchá.
\v 21 Bi ts'én je kjit'a xo̱jo̱n kjo̱a̱kitii̱: “Kje̱'e én kuichji̱a̱jo an kui xta̱ na̱xi̱ńdaá, kó ts'oa xta̱ xi xín nangui sa̱'inkjien an, tanga nde bo̱a̱ ts'én ku̱i̱nt'iejínna, tsó Néná.”
\v 22 Kó kuíni nga, nga ndokjo̱a̱ kje̱'e én xi makjínjiín xtaa̱ xi tsjá A̱sién Ni̱xtjii̱n Néná, kuí nii̱ xi bokó nga'niuú Néná tsi̱'e̱ xta̱ xi s'ijinjiín Néná, jmí tsi tsi̱'e̱ xta̱ xi s'ijii̱n Néná. Tanga nga chji̱a̱ xta̱ xi tsáyá én xí Néná tsjaá, ngo chi̱bo̱a̱ tsi̱'e̱ xta̱ xi s'ijii̱n Néná, jmí tsi tsi̱'e̱ xta̱ xi s'ijinjiín Néná.
\v 23 Kó tsi nga ka̱matikó xta̱ na̱ngo̱xi̱i̱, kó ngayejee̱ nga ndyi̱chji̱a̱ kje̱'e én xi makjínjiín xtaa̱ xi tsjá A̱sién Ni̱xtjii̱n Néná, kó tsi ngo xta̱ xi bejín ni xi tjíni'án ko̱jo tsi ngo xta̱ xi s'ijinjiín Néná xi k'o̱s'ien ngu̱i̱ya na̱ngo̱xi̱i̱, kó ku̱i̱nt'ie̱é, ¿a mí tsi “tsabérií kui xtaa̱” ka̱tso̱?
\v 24 Tanga tsi ngayeje xtaa̱ xi ndyi̱tsáya én xí Néná tsjaá, kó tsi ngo xta̱ xi bejín ni xi tjíni'án ko̱jo tsi ngo xta̱ xi s'ijinjiín Néná xi k'o̱s'ien ngu̱i̱ya na̱ngo̱xi̱i̱, kó nga ku̱i̱nt'ie ni xi tjindókjo̱a̱a̱, ka̱makjiín nga xta̱ jé boá kui, kó bo̱a̱ ka̱maa̱ kui xikoó tsi ngayeje xtaa̱ xi ndyi̱tsáya tsi nda ko̱jo tsi ndajín kats'én,
\v 25 kó ni xi tji'maá ini̱ma̱a̱ ka̱matsijen, kó ko̱sién tikoó nga sa̱'índíkón Néná, kó bo̱a̱ ka̱tso̱ nga ja̱koxi̱ boá nga Néná ki̱a̱ tikónjinjnú.
\s Bi ts'én akóyá Pabloo̱ kjo̱a̱a̱ xikó si̱'án ngu̱i̱ya na̱ngo̱xi̱i̱
\p
\v 26 ¿Kó mí ni xi xianjnú'un já ṉts'ie? Kji'a nga matikójo̱jnú xingu̱i̱jnú tjín xi sie salmo̱, tjín xi bokoyaá xta̱ xi ngasee̱, tjín xi tsáyá ni xi bokoó Néná, tjín xi chji̱a̱ kje̱'e én xi makjínjiín xtaa̱ xi tsjá A̱sién Ni̱xtjii̱n Néná, tjín xi ts'énk'átioya én xi makjínjiín xtaa̱ xi tsjá A̱sién Ni̱xtjii̱n Néná. Ngayeje ni xi si̱'ánjnú nga ngo nga ngojnú, bo̱a̱ ti'ánjnú tsi̱'e̱ nga xtjonínk'á xta̱ na̱ngo̱xi̱i̱.
\v 27 Tsi tjín xi ku̱i̱chji̱a̱ kje̱'e én xi makjínjiín xtaa̱ xi tsjá A̱sién Ni̱xtjii̱n Néná, jó ngatama xta̱ xi bo̱a̱ sa̱'ín, ko̱jo tsi ngaskande ján tsi ngatama kó ńgó ńgó ngatíchji̱a̱, kó ngo xi ngats'énk'átioya mí xi mejeén tsó kui eén,
\v 28 tanga tsi jmíjín xi sa̱'ínk'atioya mí ni xi mejeén tsó kui eén, kui xi ts'énchji̱a̱ kje̱'e én xi makjínjiín xtaa̱ xi tsjá A̱sién Ni̱xtjii̱n Néná, tasá xió ngat'íjñá ngu̱i̱jii̱n xta̱ na̱ngo̱xi̱i̱, kó ta kui ngatíchji̱a̱jo soboá yojoo̱ ko̱jo ngatíchji̱a̱jo soboá Néná.
\v 29 Kó já xi tsáyá én xí Néná tsjaá tsi jó ko̱jo tsi ján ngatama nga ku̱i̱chji̱a̱, kó xta̱ xi ngasee̱ nga ts'énkjín cha̱n cha̱n kon kó tsó ni xi tsint'ié.
\v 30 Kó tsi Néná katsáyaá ngo ni ngo xta̱ xi tikón ki̱a̱a̱, ja̱ tasá kui tjón xió ngat'íjñá.
\v 31 Kó bo̱a̱ ts'én ngayejejnú, ńgó ńgó nga stso̱bo̱a̱a̱ ka̱ma ko̱tso̱ya én xí Néná katsjaá nga ku̱i̱chji̱a̱, tsi̱'e̱ nga ngayeje xtaa̱ sku̱i̱e̱ kó ngayejee̱ nga sa̱kó nga'niuú.
\v 32 Xi katse'eé kjo̱a̱nda nga ko̱tso̱ya én xí Néná tsjaá, kuí xí tjiín kjo̱a̱ nga sku̱i̱e̱ chi̱bo̱a̱a̱ nga ku̱i̱chji̱a̱.
\v 33 Nga̱t'a̱ Néná Nee̱ kjo̱a̱xió boá kó mejénjiín nga taxkiya si̱'án ngo ni ngu̱i̱ya na̱ngo̱xi̱i̱.
\p Xikó ma na̱ngo̱xi̱i̱ xta̱ tsjiee̱ Néná,
\v 34 ínchjiín ka̱majín ku̱i̱chji̱a̱ ngu̱i̱ya na̱ngo̱xi̱i̱, nga̱t'a̱ jmí kjo̱a̱jiín nga ka̱ma ku̱i̱chji̱a̱, chjiénga ku̱i̱nt'ié'eén xi̱'ii̱n xikó tsó kjo̱a̱kitii̱.
\v 35 Kó tsi tjín ni xi mejeén sku̱i̱e̱, ndi'aa̱ ngatasíyaá xi̱'ii̱n, nga̱t'a̱ ndajín kji'i tsi ínchjiín ku̱i̱chji̱a̱ ngu̱i̱jii̱n xta̱ na̱ngo̱xi̱i̱.
\p
\v 36 ¿A ngu̱i̱jinjnú ítjats'ennii̱ nga kandokjo̱a̱ eén Néná, axa̱ ta jún tsi xi ki'míyajnú?
\p
\v 37 Tsi tjín xi ts'énkjó nga kui xi máa̱ nga ko̱tso̱ya én xí Néná tsjaá, ko̱jo tsi kui xi máa̱ nga A̱sién Ni̱xtjii̱n Néná xi katsjaá ngo kjo̱a̱nda, tasá ngatamabe nga kjo̱a̱botíxomaa̱ Ndi̱a̱ná boá ni xi tjíts'en'indójnú'un k'i̱e̱e̱.
\v 38 Tanga tsi tjín xi sa̱'ínsenjiín ni xi ts'én'bit'ajnú'un k'i̱e̱e̱, ti nde kui si̱'ansenjiín nga.
\p
\v 39 Kó kuíni já ṉts'ie, ngatamamejénjnú nga k'uiyájnú én xí Néná tsjajnú, kó ngata̱ 'bíchjájínjnúu̱ nga ngo xi ku̱i̱chji̱a̱ kje̱'e én xi makjínjiín xtaa̱ xi tsjá A̱sién Ni̱xtjii̱n Néná.
\v 40 Tanga ngayeje ni xi si̱'ánjnú, ńgó tji̱e̱n ńgó tji̱e̱n ti'ánjnú.
\c 15
\s Pabloo̱ bi ts'én kats'énkja'átsjiee̱n xta̱ na̱ngo̱xi̱ Korinto̱ ni xi tjón akóyaá
\p
\v 1 Ngot'e̱ 'ne̱ já ṉts'ie, mejénna sa̱'inkja'átsjienjnú'un éntjatsi̱e̱e̱ Ndi̱a̱ná xi je ini̱jmijnú'un, kui xi je kini'ánjo̱'ojnú kó tangat'anii̱ kui nga je 'niú tindyiónjnú,
\v 2 kuí éntjatsi̱e̱e̱ xi sa̱'ín nga kjo̱tjo'ajnú, kó bo̱a̱ ka̱ma tsi si̱'ankjatjosónjnú én xi ini̱jmijnú'un, nga̱t'a̱ tsi bo̱a̱jín ka̱ma ta kjo̱a̱ndaní nga kis'ijinjnú kui éntjatsi̱e̱e̱.
\p
\v 3 Nga̱t'a̱ tjón ma ni xi kini'ánk'as'ienna xi kats'enk'as'ienjnú'un: Akoyájnú'un nga Kristoo̱ jéná xi k'ientjé xikó ts'én kjit'a xo̱jo̱n eén Néná,
\v 4 ko̱jo nga akjanijín, kó nga xi ma ján ni̱xtjin ja'á'yaá, xikó ts'én kjit'a xo̱jo̱n eén Néná,
\v 5 kó nga Kristoo̱ akoó yojoo̱ Peé, s'e̱ jaskan akoó yojoo̱ nga tiejó xta̱ tsi̱'e̱.
\v 6 Jaskan akoó yojoo̱ nga ta ngo ka'a ma ra ts'atio ún úchán já ṉts'ie, kó achichí ma kui jaá xi síndo tsjé ngot'e̱, nda tsi je jesón chiboa.
\v 7 S'e̱ jaskan Kristoo̱ akoó yojoo̱ Sandiyaá, s'e̱ akoó yojoo̱ ngayeje já apostroo̱.
\p
\v 8 Kó nga fet'a Kristoo̱ jaskan akóna yojoo̱ an, an xi xikoó tsi ngo ndí xi katsen xtió.
\v 9 Nga̱t'a̱ xian an nga an xí apostro̱ xi chichí ngase an ngu̱i̱jii̱n já apostro̱ xi ngasee̱, nde tsoboájínna an nga apostro̱ xiáa̱n yojona, nga̱t'a̱ an xí tsangatji̱nguíi̱ xta̱ na̱ngo̱xi̱i̱ Néná.
\v 10 Tanga tangat'anii̱ kjo̱a̱ndaa̱ Néná nga an xi an, kó kui kjo̱a̱nda xi katsjána ta kjo̱a̱ndajín kamá, tasá 'niú ngase kats'enxá an ta bo̱a̱jiín ngayeje já apostro̱ xi ngasee̱, nda tsi jmí tsi an xi bo̱a̱ kats'en an, kjo̱a̱nda xi katse'éna boá xi bo̱a̱ kats'én.
\v 11 Kuíni nga tsi an ko̱jo tsi já apostro̱ xi ngasee̱, ti kuíni éntjatsi̱e̱e̱ xi ik'íni̱jmijne̱, kó bo̱a̱ ts'én nga jún kis'ijinjnú.
\s Bi ts'én akóyá Pabloo̱ kjo̱a̱a̱ nga foa'á'yá nguinií xta̱ xi je jesoón
\p
\v 12 Tanga tsi tji'bíni̱jmi kjo̱a̱a̱ nga ja'á'yaá Kristoo̱ ngu̱i̱jii̱n xta̱ xi je jesoón, ¿kóts'en nga tjín jún xi bo̱a̱ ndyi̱'míjnú nga xta̱ xi je jesoón nguiti foa'á'yájiín?
\v 13 Nga̱t'a̱ tsi xta̱ xi fesoón nguiti foa'á'yájiín, ja̱ Kristoo̱ ti bo̱a̱ ti ts'én ja'á'yájiín tsobo̱a̱,
\v 14 kó tsi ja'á'yájiín Kristoo̱, ja̱ ta kjo̱a̱ndaní kui én xi ts'én'bini̱jmi an, kó ta kjo̱a̱ndaní kjo̱a̱s'ijin xi tjínjnú tsobo̱a̱.
\v 15 Tsi bo̱a̱ kji'i kui nii̱, ja̱ chistiko̱ ndisoo̱ Néná rá kjimajne̱ tsobo̱a̱, nga̱t'a̱ bo̱a̱ ndyi̱'míjne̱ nga Néná xí kats'énkja'á'yaá Kristoo̱, kui xi ja'á'yájín raa̱ tsobo̱a̱ tsi ja̱koxi̱ nga xta̱ xi je jesoón nguiti foa'á'yájiín.
\v 16 Nga̱t'a̱ tsi nguiti foa'á'yájiín xta̱ xi je jesoón, ja̱ ti bo̱a̱ ti ts'én Kristoo̱ ja'á'yájiín tsobo̱a̱.
\v 17 Kó tsi Kristoo̱ ja'á'yájiín, ta kjo̱a̱ndaní kjo̱a̱s'ijinjnú tsobo̱a̱, kó takó bo̱a̱ ra ts'én tindyionjinjnú jéjnú tsobo̱a̱.
\v 18 Kós'e̱ ja̱ ngaskande xta̱ xi je jesón xi kis'ijii̱n Kristoo̱ je kichajá tsobo̱a̱.
\v 19 Tsi ta kuí tsi nga̱sondiee̱ xi ndyi̱chiyá nga tjín ni xi sa̱kóná nga̱t'a̱ s'ijinná Kristoo̱, ñá rá xi tsoboáná nga xi̱x'i̱a̱n ngase ka̱tso̱ná xta̱ xi ngasee̱, ta̱bo̱a̱jiín xta̱ xi tjín nga̱sondiee̱.
\p
\v 20 Tanga ngot'e̱ 'ne̱ Kristoo̱ je ja'á'yaá ngu̱i̱jii̱n xta̱ xi je jesoón, kó kui boá xi xikoó ngo cha̱n xi tjón xi ni'ánk'as'iee̱n Néná, nga̱t'a̱ kui boá xi tjón ja'á'yaá ngu̱i̱jii̱n xta̱ xi je jesoón.
\v 21 Nga̱t'a̱ xikó ts'én nga tangat'anii̱ ngo nda̱ nga je'e kjo̱a̱bo̱yaa̱, ti bo̱a̱ ti ts'én tangat'anii̱ ngo nda̱ nga je'e kjo̱a̱foa'á'yaá xta̱ xi je jesoón.
\v 22 Nga̱t'a̱ xikó ts'én nga tangat'anii̱ Adaa̱n nga ngayeje xtaa̱ fesón, ti bo̱a̱ ti ts'én tangat'anii̱ Kristoo̱ nga ngayeje xtaa̱ k'uíndo nguiní.
\v 23 Tanga ńgó tji̱e̱n ńgó tji̱e̱n kjo̱a̱'á'yaá xikó ts'én tsoboaá nga ngo nga ngo: Tjón ma Kristoo̱ je ja'á'yaá, s'e̱ jaskan kji'a nga kjo̱e̱'e nguiní Kristoo̱, kjo̱a̱'á'yaá xta̱ xi tsi̱'e̱.
\v 24 Kós'e̱ kjo̱tjosón ni xi ka̱ma kui nga̱sondiee̱, Kristoo̱ tjón sa̱'ínkjié ngayeje xi botixómá, ko̱jo xi tjiín xá ko̱jo xi tjiín nga'niú, s'e̱ jaskan sa̱'ínk'as'ien nínga botíxoma ngu̱i̱ya tsja Néná xí Na̱'mii̱.
\v 25 Nga̱t'a̱ Kristoo̱ chjiénga kui ko̱tíxoma ngaskande nga ngayeje kondra̱ tsi̱'e̱ ku̱i̱'índo nguindie se.
\v 26 Kó kui kondra̱ xi kju̱i̱e̱t'a xi kju̱i̱e̱e̱, kjo̱a̱bo̱yaa̱ boá.
\v 27 Nga̱t'a̱ Néná je índo ngayeje nii̱ nguindie se Kristoo̱. Kó kji'a nga tsó nga ngayeje nii̱ je síndo nguindie se Kristoo̱, je ya cha̱n cha̱n nga jmí tsi ko̱jo Néná xi tsó, nga̱t'a̱ kuí Néná xi índo ngayeje nii̱ nga Kristoo̱ xi ko̱tíxomaa̱.
\v 28 Kó nguije ngayeje nii̱ je síndo nguindie se Kristoo̱, kji'a boá nga ti kui Kristoo̱, kui xi ndií Néná, sa̱'ínk'as'iee̱n yojoo̱ Néná kui xi kats'énk'as'iee̱n ngayeje nii̱, kó bo̱a̱ ts'én nga ngayeje nii̱ nga tsi̱'e̱ Néná ka̱ma.
\p
\v 29 Tjín xi botíndá yojoo̱ ngajoo̱ xta̱ xi je jesoón kó ts'énkjó nga bo̱a̱ ts'én kjo̱tjo'a kui xi je jesoón nga. Tanga tsi nguiti foa'á'yájiín xta̱ xi je jesoón, ¿mí tsjá ngajoo̱ kui xta̱ xi je jesoón ndyi̱botíndá yojoo̱ xi bo̱a̱ ndyi̱ts'e̱én?
\p
\v 30 Kó ji̱n, ¿ánní nga ndyi̱ni'ánchíkjo̱a̱jne̱ ngayeje ni xi ndajín xi kjimata'injne̱ ngatsjé ni̱xtjin?
\v 31 Jún ṉts'ie, be an nga tajmí ni̱xtjinní ka̱mana ko̱ya an kjo̱a̱a̱ ni xi tjíts'en an, ja̱koxi̱ kuí nii̱ xikó ts'én ja̱koxi̱ nga tsja mana nga s'ijinjnú Ndi̱a̱ná Jesukristoo̱.
\v 32 Tsi xikoó ngo xta̱ an nga askjanjo̱ an cho̱ tamá ki̱a̱ Éfeso̱, ¿mí ni xi kats'en an xi katse'éna? Tsi ja̱koxi̱ nga xta̱ xi je jesoón nguiti foa'á'yájiín, tasá bo̱a̱ si̱'án xikó tsó kui eén “ja̱ tasá xi̱ni̱e̱ ko̱jo s'i̱o̱ ngot'e̱, nga̱t'a̱ ndyiojón je ko̱ya.”
\p
\v 33 Ngata̱ boe'éndiejínjnú nga tjín xi k'o̱ṉcha̱jojnú, xikó tsó kui eén “xta̱ xi 'bítso̱majo̱ xta̱ xi ndajín, ti ndajín ma nda tsi kui nga”
\v 34 Chjáx'ajnú ndyikonjnú, kó ngata̱ ni'ánjéjínjnú, nga̱t'a̱ tjín ngu̱i̱jinjnú xta̱ xi bejín ni xi tsi̱'e̱ Néná, xiyá an kui nii̱ tsi̱'e̱ nga soboá ka̱majnú.
\s Bi ts'én akóyá Pabloo̱ kó ka̱ma nga kjo̱a̱'á'yaá xta̱ xi je jesoón
\p
\v 35 Tjín rá xi ko̱síya nga bi ka̱tso̱: “¿Kó ka̱ma nga kjo̱a̱'á'yá nguinií xta̱ xi je jesoón? ¿Kókón ka̱ma yojoo̱ nga kjo̱a̱'á'yaá?”
\v 36 ¡Nda̱ chini xi bo̱a̱ t'íse ji! Ni xi 'bítji̱e̱ ji, kjo̱a̱'ájiín tsi tjónjín ko̱ya tsi̱'e̱ nga ku̱i̱'íńts'ién kó k'uieé xka̱,
\v 37 kó ni xi k'uítji̱e̱ ji, jmí tsi bo̱a̱ kji'i yojo xi kjo̱a̱'aá, ta ngo tsi xojmá, tsi xojmaá to ndso̱ko̱a̱n ṉño̱ ko̱jo tsi kje̱'e xojmá.
\v 38 Néná xi tsjaá xojmaá ngo yojo xi mejeén kui, kó nga ngo nga ngo xojmaá Néná tsjaá ngo yojo xi bokiín.
\v 39 Jmí tsi ngayeje yojoo̱ xi ti bo̱a̱ ti kon. Kje̱'e kon yojoo̱ xtaa̱, kje̱'e kon yojoo̱ choo̱, kje̱'e kon yojoo̱ ni̱siee̱ kó kje̱'e kon yojoo̱ cho̱ xi tjín ngu̱i̱jin ndójoaa̱.
\v 40 Kó kje̱'e kon ni xi síndo nk'a ján, kje̱'e kon ni xi síndo k'i̱e̱ t'ananguii̱. Tanga kje̱'e kji'i kjo̱a̱tsjakji'ii̱ ni xi síndo nk'a ján, kó kje̱'e kji'i kjo̱a̱tsjakji'ii̱ ni xi síndo k'i̱e̱ t'ananguii̱.
\v 41 Kje̱'e kji'i kjo̱a̱tsjakji'ii̱ ts'ueé, kje̱'e kji'i kjo̱a̱tsjakji'ii̱ saá, kó kje̱'e kji'i kjo̱a̱tsjakji'ii̱ ṉñóo. Kó nga ngo nga ngo ṉñóo ja̱ kje̱'e ja̱ kje̱'e kji'i kjo̱a̱tsjakji'ii̱.
\p
\v 42 Ti bo̱a̱ ti ka̱ma kjo̱a̱a̱ nga kjo̱a̱'á'yaá xta̱ xi je jesoón. Ni xi fonijiín, ni xi máa̱ fondo boá, tanga ni xi kjo̱a̱'á'yaá, ni xi nguiti ka̱majiín kjo̱ndo boá.
\v 43 Ni xi fonijiín, ni xi jmí ni chjíjiín boá, tanga nga kjo̱a̱'á'yá nguinií, ni xi tjiín kjo̱a̱je boá. Ni xi fonijiín, ni xi jmíjiín nga'niú boá, tanga nga kjo̱a̱'á'yá nguinií, ni xi k'uieé nga'niú boá.
\v 44 Ni xi fonijiín, yojo xi kich'iá ngot'e̱ boá, tanga nga kjo̱a̱'á'yá nguinií yojo xi A̱sién Ni̱xtjii̱n Néná ku̱i̱'índa boá. Tsi tjín yojo xikoó xi kich'iá, ti bo̱a̱ ti ts'én tjín yojo xi A̱sién Ni̱xtjii̱n Néná ku̱i̱'índa.
\p
\v 45 Bi ts'én kjit'a xo̱jo̱n eén Néná: “Nda̱ xi tjón xi 'mí Adaa̱n, kini'ánda kó kis'ijña nga̱sondie.” Tanga kui Ada̱n xi jet'aa̱ kui xi Kristoo̱, kui boá xi A̱sién Ni̱xtjin xi tsjá kjo̱a̱mindyion.
\v 46 Tanga jmí tsi kjo̱a̱mindyion xi tsjá a̱sién ni̱xtjin xi tjoón. Kjo̱a̱mindyion xi tsjá kui nga̱sondiee̱ boá xi tjón tikón, jaskanní k'uijñá kjo̱a̱mindyion xi tsjá a̱sién ni̱xtjii̱n.
\v 47 Kui nda̱ xi tjoón ṉdie kamándani, kó xta̱ xi chji̱a̱ni kui t'ananguii̱ kamá, kó nda̱ xi ma joó, kui xi Ndi̱a̱ná, ndi'ak'ajmii̱ kjindibáni.
\v 48 Xikoó nda̱ xi kini'ándani ṉdiee̱, ti bo̱a̱ ti kon ngayeje xta̱ nga̱sondiee̱. Xikoó nda̱ xi kjindibáni ndi'ak'ajmi ján, ti bo̱a̱ ti kon ngayeje xi chji̱a̱ni ndi'ak'ajmi ján.
\v 49 Kó xikó ts'én nga bo̱a̱ kon ñá xikoó nda̱ xi ṉdie kamándanii̱, ti bo̱a̱ ti ts'én bo̱a̱ kon ka̱ma ñá xikó kji'i nda̱ xi kjindibáni ndi'ak'ajmi ján.
\p
\v 50 Jún ṉts'ie, xiyájnú'un nga kui yojo xi tikónná ngot'e̱ ka̱majín s'i̱jña nga ko̱tíxoma Néná, ti nde ni xi máa̱ fotsoo̱n sakójiín ngu̱i̱ndie ngu̱i̱jii̱n ni xi fotsonjiín.
\v 51 Tanga mejénna nga xcha̱jnú ngo ni xi tji'maá Néná: Jmí tsi ngayeje ñá nga ko̱ya, tanga ngayeje ñá nga sa̱síkjoyá,
\v 52 ngotjón chií, xikó maá tsi nga chjáx'a ko̱jo nga 'bíchjá ndyikón, bo̱a̱ ts'én sa̱síkjoyá, nguije kjo̱ni̱e̱ tjio xi fet'aa̱. Nga̱t'a̱ nga kjo̱ni̱e̱ tjioo̱, kji'a boá nga ngayeje xta̱ xi je jesoón kjo̱a̱'á'yaá tsi̱'e̱ nga nguiti ko̱yajín, kó ñá sa̱síkjoyá.
\v 53 Nga̱t'a̱ kui yojo xi kich'iá ngot'e̱ xi máa̱ fotsoo̱n, chjiénga ka̱ma yojo xi nguiti kjo̱tsonjín, kó yojo xi 'mee̱ ngot'e̱, chjiénga ka̱ma yojo xi nguiti ko̱yajín.
\v 54 Kó nguije yojo xi máa̱ fotsoo̱n ka̱ma yojo xi nguiti fotsonjiín, kó nguije yojo xi máa̱ 'me ka̱ma yojo xi nguiti majiín 'mee̱, kji'a boá nga kjo̱tjosón ni xi tsó xo̱jo̱n eén Néná: “Kjo̱a̱bo̱yaa̱ je kini'aán nga kini'ánchaja.”
\v 55 Ji kjo̱a̱bo̱ya, ¿ñá nií 'ne̱ nga ji xi kini'ín? Ji Kjo̱a̱bo̱ya, ¿ñání tikón nga'niúu̱ xi ni'ínk'inje ji xtaa̱ 'ne̱?
\v 56 Nga̱t'a̱ kjo̱a̱bo̱yaa̱ jeé ts'énkjién nga ts'enk'ién xtaa̱, kó jeé kjo̱a̱kitii̱ ts'énkjién tsi̱'e̱ nga xcha̱ jeé.
\v 57 Tanga ndok'óchjinií Néná nga katsjáná nga kini'áa̱n kjo̱a̱bo̱yaa̱ tangat'aa̱ ni xi kats'én Ndi̱a̱ná Jesukristoo̱.
\p
\v 58 Kó kuíni jún bo̱a̱ ndí ṉts'ie xi tjóna, 'niú ti̱ndyiajnú, kó ndyiojón ndyiojón sa'niú sa'niú ti'ánjnú xaá Ndi̱a̱ná, nga̱t'a̱ jún je yajnú nga ta kjo̱a̱ndajiín xaá Ndi̱a̱ná xi ndyi̱ni'ánjnú.
\c 16
\s Bi ts'en katsáyá Pabloo̱ xikó ts'én chja̱'ásón chji̱e̱ xi ko̱nanguíyaá xta̱ na̱ngo̱xi̱ Jerusale̱n
\p
\v 1 Kjo̱a̱a̱ chji̱e̱ xi chja̱'ásón tsi̱'e̱ xta̱ tsjiee̱ Néná xi síndo na̱xi̱ńdá Jerusale̱n, bo̱a̱ ts'én chja̱'ásónjnú xikó kixiáa̱n xta̱ na̱ngo̱xi̱ xi chji̱a̱ni nangui xi síndo Galasia̱.
\v 2 Xki̱ tamingo̱ nga ngo nga ngojnú chjiénga k'uijñát'axínjnú chií to̱n xikó kji'i kini'ánjnú, kó chja̱'átjójnú tsi̱'e̱ nga, nga kjócho an jmí tsi kji'a chja̱'ásónjnú chji̱e̱e̱.
\v 3 Kó kji'a nga kjócho an, sanguiya an na̱xi̱ńdá Jerusale̱n xta̱ xi jún chja̱'ájinjnú xi tsjáa̱ ngo xo̱jo̱n tsi̱'e̱ nga kjo̱jo chji̱e̱ xi kini'ánkixójnú,
\v 4 kó tsi nda kji'i nga ko̱jo an kjuin an, ka̱ma kjuínjo̱ an nga.
\s Bi ts'en katsáyá Pabloo̱ ni xi índa nga sa̱'ín
\p
\v 5 Kó kjuinkónjnú'un jaskan nga kjo̱a̱'a an Masedonia̱, nga̱t'a̱ nangui xi síndo Masedonia̱ kjo̱a̱'a an.
\v 6 Kó ka̱ma ra kjín ni̱xtjin ka̱mana nínga tindyiónjnú, axa̱ ka̱ma ra ki̱a̱ kjo̱a̱'ana cho̱ṉch'a̱án tsi̱'e̱ nga jún ka̱ma ko̱siko̱jojnú'un nínga ts'énfí an nguijee̱.
\v 7 Nga̱t'a̱ mejénjínna nga ta ngotjón tsi skuiejnú'un ngot'e̱ nga kjo̱a̱'a an, nga̱t'a̱ tasá skoyáa̱ nga kjín ni̱xtjin ka̱mana nínga tindyiónjnú, tsi Ndi̱a̱ná xi tsja̱ndiéna.
\v 8 Tanga na̱xi̱ńdá Éfeso̱ kotíjña an ngaskande nga ka̱ma s'ué Pentekostee̱,
\v 9 nga̱t'a̱ ki̱a̱ tjisákondiéna nga ka̱ma sa̱'inxá an, nda tsi kjín ma xta̱ xi kondra̱na xi sasiénjiín ni xi tjíts'en an.
\p
\v 10 Kó tsi ki̱a̱ kjo̱chókónjnú Timoo̱, tjó ti'ánjnú tsi̱'e̱ nga tsja k'uieé nga k'uijñájinjnú, nga̱t'a̱ ti kuíni xaá Ndi̱a̱ná xi tjíts'én kuí xikoó an.
\v 11 Kó kuíni ngata̱ boe'éndiejínjnú nga tjín xi sa̱'ínch'ó kui nda̱a̱, tasá tasíko̱jojnú tsi̱'e̱ nga xió ts'én kji̱ndi̱bákónna, nga̱t'a̱ an ts'énkoyáa̱ kui ko̱jo já ṉts'ie xi nijan ndibájo̱.
\p
\v 12 Kó kjo̱a̱a̱ nda̱ ṉts'ié xi 'mí Apoloo̱, achichí índasée̱n tsi̱'e̱ nga kjo̱jo já ṉts'iee̱, tanga kamámejénjiín kijí ngot'e̱, kji'a nga sa̱kóndieé ko̱e̱je̱konjnú.
\s Pabloo̱ bi ts'én kats'énkjiet'a xo̱jo̱o̱n
\p
\v 13 Ti̱ndyiondajnú, kó 'niú ti̱ndyiajnú kjo̱a̱a̱ kjo̱a̱s'ijinjnú, ngata̱ ndakonjín majnú, kó te'énga'niújnúu̱ yojojnú.
\v 14 Kó ngayeje ni xi si̱'anjo̱jnú xingu̱i̱jnú nga takó nga tjínjnú kjo̱a̱tjó.
\p
\v 15 Jún ṉts'ie, je yajnú nga xta̱ xkjín Estéfanaa̱ kui boá xi tjón kats'énk'oyá yojoo̱ nga tsint'ié eén Néná ngu̱i̱jii̱n xta̱ xi síndo nangui Akaya̱, kó kui xtaa̱ katsjá yojoo̱ nga ndyi̱bosikójo xta̱ tsjiee̱ Néná.
\v 16 'Niú mí'ájnú'un jún nga tasiénnijonjnúu̱ kui xta̱ xi xikoó xta̱ xi'bi̱, ko̱jo ngayeje xta̱ xi ndyi̱bosikójo kui jaá ko̱jo xi ti kuii̱ kui xaá ndyi̱ts'en.
\v 17 Achichí tsja kamána nga je'ekónna Estéfanaa̱, Natoo̱ ko̱jo Akaikoo̱, nga̱t'a̱ kuí jaá xi asíko̱jona ngajojnú.
\v 18 Nga̱t'a̱ kuí jaá xi katsjaá kjo̱a̱xió ko̱jo nga'niú ini̱ma̱na xikó kats'énjo̱jnú jún nga, cha̱ndikónjnú kui xta̱ xi xikoó kui jaá.
\p
\v 19 Tinde xó bo̱a̱ tsó xta̱ na̱ngo̱xi̱ xi síndo nangui Asia̱. Akilaa̱ ko̱jo na̱ Prisilaa̱ ko̱jo xta̱ na̱ngo̱xi̱ xi matikó ndi'aa̱ ts'entíndejnú jún nga ti s'ijinjnú Néná nga.
\v 20 Tinde xó bo̱a̱ tsó ngayeje já ṉts'ie xi síndo k'i̱e̱e̱. Ti'antindejnú xingu̱i̱jnú nga ngo nga ngojnú.
\p
\v 21 Pabloo̱ boá an, kó ngo tinde ts'éntsanguiyájnú'un nga an ma xi ts'én'bit'a an kui xo̱jo̱o̱n.
\p
\v 22 Tsi tjín xi tjójiín Ndi̱a̱ná Jesukristoo̱, ngat'íko̱jonii̱. ¡Ja̱bí'i̱n Ndi̱a̱!
\p
\v 23 Ndi̱a̱ná Jesukristoo̱ nga tsjajnú kjo̱a̱ndaa̱.
\v 24 Tjóna ngayejejnú xikó ts'én Ndi̱a̱na Kristo Kjisoo̱ tjoó ñá. Bo̱a̱ kji'i.