\id 2CO - MAZATECO DE SAN PEDRO IXCATLÁN
\h 2 XTA̱ KORINTO̱
\mt1 Xo̱jo̱n xi ma joó xi apostro̱ Pabloo̱ katsanguiyaa̱ xta̱ na̱ngo̱xi̱ xi chji̱a̱ni Korinto̱
\c 1
\s Bi ts'én kats'éntinde Pabloo̱ xta̱ na̱ngo̱xi̱ xi chji̱a̱ni Korinto̱
\p
\v 1 An Pabloo̱, an xí kamá an ngo nda̱ apostroo̱\f + \fr 1.1 \ft “Xi kananguiyaa̱” tsó “nda̱ apostro̱” axa̱ “já apostro̱” nga én griego̱.\f* Jesukristoo̱ nga̱t'a̱ bo̱a̱ ts'én kamámejeén Néná. An ko̱jo nda̱ ṉts'ié xi 'mí Timoo̱ ni'ántindejne̱ xta̱ na̱ngo̱xi̱i̱ Néná xi síndo na̱xi̱ńdá Korinto̱, ko̱jo ngayeje xta̱ tsjiee̱ Néná xi síndo ngayeje nangui Akaya̱.
\v 2 Néná xi Na̱'miná ko̱jo Ndi̱a̱ná Jesukristoo̱, nga tsjajnú kjo̱a̱ndaa̱ ko̱jo kjo̱a̱xioó.
\s Bi ts'én akó Pabloo̱ nga Néná boá xi katsjá nga'niuú nga ja'atio kjo̱a̱ni̱ma̱
\p
\v 3 Nga ni'ántsjaá Néná, kui xi Nee̱ ko̱jo Na̱'mii̱ Ndi̱a̱ná Jesukristoo̱, kui xi Na̱'miná ko̱jo xi Néná xí ma ni̱ma̱a̱ ñá ko̱jo xi tsjanga'niúná ngatsjé ni̱xtjin.
\v 4 Kuí xí tsjanga'niúná tsi̱'e̱ nga xchikjoaná ngayeje kjo̱a̱ni̱ma̱, tsi̱'e̱ nga ka̱maná ko̱e̱'énga'niúu̱ ngayeje xta̱ xi ndyi̱foa'atio kjo̱a̱ni̱ma̱, xikó ts'én Néná ts'éntsjá nga'niúná, bo̱a̱ ts'én ko̱e̱'énga'niúu̱ xta̱ xi ngasee̱.
\p
\v 5 Nga̱t'a̱ xikó ts'én tsie kjo̱a̱ni̱ma̱ ndyi̱bitjajín ngat'aa̱ Kristoo̱, ti bo̱a̱ ti ts'én Kristoo̱ ts'éntsjá nga'niúná.
\v 6 Tsi̱'e̱ nga k'uiéjnú nga'niú ko̱jo nga kjo̱tjo'ajnú, kuíni nga kjo̱a̱ni̱ma̱ ndyi̱bitjatiójne̱ ji̱n. Kó tsi sa̱kó nga'niújne̱ ji̱n, tsi̱'e̱ nga k'uiéjnú nga'niú ko̱jo nga kjo̱tjo'ajnú, tsi̱'e̱ nga xchikjoajnú ko̱jo sa̱kó nga'niújnú kji'a nga k'uiéjnú ti kuii̱ kjo̱a̱ni̱ma̱ xikoó xi ndyi̱bitjajinjne̱ ji̱n.
\v 7 'Niátakónjne̱ jún nga̱t'a̱ yajne̱ nga tsi nijan ku̱i̱tjatió kuí kjo̱a̱ni̱ma̱a̱, ti bo̱a̱ ti ts'én nijan sa̱kó nga'niúná nga.
\p
\v 8 Jún ṉts'ie, mejénjínjne̱ nga k'ui'májne̱ kjo̱a̱ni̱ma̱ xi ikitjatiójne̱ nangui Asia̱, achichí tsie ni xi kamáta'injne̱ kó ta'ya kichikjo̱a̱jne̱, ngaskande je nguiti kini'ánkjójínjne̱ tsi ti ku̱i̱ndyión ngasejne̱ nga̱sondie.
\v 9 Nga̱t'a̱ ji̱n je tanisién ko̱yajne̱ kamájne̱, tsi̱'e̱ nga ti ji̱njín xi kamá'niátakónjne̱ yojojne̱, tasá Néná xí ka̱ma'niátakónjne̱, kui Néná xi ts'énkja'á'yaá xta̱ xi je jesoón.
\v 10 Néná xín kats'énkja'ajne̱ kjo̱a̱bo̱yaa̱ kó bee̱ takónjne̱ nga xín sa̱'ínkja'ajne̱ kó nga takó bo̱a̱ sa̱'ín.
\v 11 Ndókjo̱a̱tjéjnú ji̱n, nga̱t'a̱ tsi kjín ka̱ma xi ku̱i̱chji̱a̱tjéjne̱, ti kjín ka̱ma xta̱ xi tsja̱á ndok'óchji Néná kjo̱a̱a̱ kui kjo̱a̱ni'ánchikonñé xi tsjájne̱ ji̱n.
\s Bi ts'én íni̱jmi Pabloo̱ ánní nga ta xo̱jo̱n tsi xi katsanguiyaa̱ xta̱ na̱ngo̱xi̱ xi chji̱a̱ni Korinto̱
\p
\v 12 Tsja majne̱ nga nda tikón kjo̱a̱kjíntakónjne̱ kó yajne̱ nga tsjie ko̱jo nga kixi̱ kis'iṉtso̱majne̱ ngu̱i̱jinjnú ko̱jo ngu̱i̱jii̱n ngayeje xtaa̱, kji'a nga bo̱a̱ kini'ánjne̱, kjo̱a̱ndaa̱ Néná xi tsanguintjinguijne̱, jmí tsi xikó ts'én tjíjinkon xtaa̱ kui nga̱sondiee̱.
\v 13 Ni xi ka̱makjínjnú boá xi kini'án'indójne̱ xo̱jo̱n xi ndyi̱ni'ányajnú, kó skoya an nga ka̱makjín cha̱n cha̱njnú ngayejee̱ nii̱.
\v 14 Xikó ts'én je kamákjín chiíjnú nga ni̱xtjin nga kjo̱e̱'e nguiní Ndi̱a̱ná Jesukristoo̱, jún tsja ka̱majnú kjo̱a̱a̱ ji̱n, xikó ts'én ji̱n tsja ka̱majne̱ kjo̱a̱a̱ jún.
\p
\v 15 'Niú kamá'niátakónjnú'un kuíni nga kats'enkjó an nga tjón jún kjuinkátsijenjnú'un, tsi̱'e̱ nga k'uiéjnú kjo̱a̱nda nga jó ndyi̱ya kjuinkátsijenjnú'un.
\v 16 Kó ts'enkjó an nga tjón kjuinkátsijenjnú'un nga kjuin an nangui Masedonia̱, s'e̱ jaskan nga kji̱ndi̱bá nguiñá an ti kjo̱a̱'atio nguiñá an ki̱a̱a̱, ki̱a̱ ka̱ma nga jún ka̱ma ko̱siko̱jojnú'un nga kjuin an xtji̱e̱e̱n nangui Judea̱.
\v 17 Kó nguije bo̱a̱ ts'én kats'enkjó an, ¿a ndajín kats'enkjó an nga kats'en an kui nii̱ tsobo̱a̱? ¿Axa̱ a berií takónjnú nga nda ts'én'binda an ni xi sa̱'in an xikoó ngo xta̱ xi ti kji'a “jo̱o̱n” ko̱jo “jmí” tsó nga chji̱a̱?
\v 18 Tanga Néná xí chistiko̱ nga ji̱n jmí tsi “jo̱o̱n” s'e̱ ti kji'a “jmí” 'míjne̱.
\v 19 Nga̱t'a̱ Jesukristoo̱ kuí xí ndií Néná, kó kjo̱a̱a̱ kuí boá xi ik'íni̱jmijne̱ Silbanoo̱, Timoo̱ ko̱jo an ngu̱i̱jinjnú, jmí tsi “jo̱o̱n” ko̱jo “jmí” ti kji'a katsó, kui boá xi ngatsjé ni̱xtjin “jo̱o̱n” tsó Néná.
\v 20 Nga̱t'a̱ ngayeje ni xi katsáyatjón Néná nga sa̱'ín kuí xí fotjosón ngat'aa̱ Kristoo̱, kó kuíni nga “bo̱a̱ kji'i” 'mí ñá nga boe'ée̱ kjo̱a̱je Néná.
\v 21 Néná boá xi tsjáná nga'niú jún ko̱jo ji̱n tsi̱'e̱ nga 'niú ku̱i̱ndyiá kjo̱a̱a̱ nga je kis'ijinná Kristoo̱, kó kui boá kui Néná xi ja'ájinná.
\v 22 Kuí Néná xi je kats'énka'aná chi̱bo̱a̱ nga íjñajin ngu̱i̱jin ini̱ma̱ná A̱sién Ni̱xtjii̱n xikoó ngo ni xi tikónguí tsi̱'e̱ nga xcha̱ nga sa̱'ínkjatjosón ni xi jaskan tsja̱aná.
\p
\v 23 Nguindyi̱ko̱n Néná nga ngataya an tsi bo̱a̱jín kji'i ni xi ts'énxiyajnú'un, kji̱e̱ fíjín an Korinto̱, nga̱t'a̱ mejénjínna nga ndasen ka̱majnú.
\v 24 Jmí tsi ji̱n xi si̱'anjne̱ kjo̱a̱'niú kjo̱a̱a̱ xikó ts'én s'ijinjnú, tasá mejénjne̱ nga ji̱n ko̱siko̱jojne̱ jún tsi̱'e̱ nga k'uiéjnú kjo̱a̱tsja, nga̱t'a̱ je 'niú tindyiajnú nga s'ijinjnú Néná.
\c 2
\p
\v 1 Kuíni nga bo̱a̱ kixian an nga nguiti kjuinkonjínjnú'un tsi̱'e̱ nga jmí kjo̱a̱ndasen tsjajínjnú'un.
\v 2 Nga̱t'a̱ tsi an sa̱'indasenjnú'un, ¿'yá xi jaskan tsja̱ana kjo̱a̱tsja an, a mí tsi ta jún tsi?
\v 3 Kuíni nga kats'en'indójnú'un kui xo̱jo̱o̱n, tsi̱'e̱ nga nga kjócho an, sa̱'ínndasenjínna xta̱ xi chjiénga kjo̱a̱tsja tsja̱ana, bee̱ ko̱n an nga kjo̱a̱tsjana ti kuíni xi kjo̱a̱tsjajnú nga.
\v 4 Nga̱t'a̱ achichí ndasen ko̱jo boa kjimaa̱ ini̱ma̱na, kó achichí ndándyíkón an xi tjitjón nga kats'en'indó an kui xo̱jo̱o̱n, jmí tsi tsi̱'e̱ nga ndasen ka̱majnú, tasá kjo̱a̱a̱ nga mejénna nga xcha̱jnú nga achichí tjóna jún.
\s Bi ts'én íni̱jmi Pabloo̱ ánní nga si̱'anjetakoón nda̱ xi ndajín kats'eén
\p
\v 5 Tanga tsi tjín xi kats'éndasenna, jmí tsi ta an tsi xi kats'éndasenna, mején ngaskande ko̱jo ngayejejnú xi kats'éndasenjnú. Mejeén ngaskande xian an, tsi̱'e̱ nga ts'atiojín kuichji̱a̱ an.
\v 6 Kjín ma jún xi je 'niú kandokjo̱a̱jojnú kui nda̱ xi kats'éndasenna, kó je ka̱manii̱ kui nii̱.
\v 7 Kó kuíni nga, tasá ti'anjetakónjnúu̱ kó ti'andajonjnúu̱, tsi̱'e̱ nga kjo̱a̱ndasee̱n sa̱'ín'onjiín.
\v 8 Kó kuíni nga 'niú mí'ájnú'un tsi̱'e̱ nga ko̱kójnúu̱ kui nga tjójnú.
\v 9 Nga̱t'a̱ kuíni nga kats'en'indójnú'un kui xo̱jo̱o̱n, tsi̱'e̱ nga skuie an tsi ja̱koxi̱ nga ndyi̱nda'yá'énjnú'un ngayeje ni xi t'íxianjnú'un.
\v 10 An sa̱'injetakóo̱n xta̱ xi jún si̱'anjetakónjnúu̱ ngo ni, nga̱t'a̱ ni xi je kats'enjetakón an, tsi chjiénga si̱'anjetakón an, bo̱a̱ kats'en an nguindyi̱ko̱n Kristoo̱ nganda tsa̱jún,
\v 11 tsi̱'e̱ nga xindajín Satanaa̱ sa̱kóndiéjiín nga sa̱nguínjin yojoo̱ kui nii̱, nga̱t'a̱ je ya nga tanisién ndajín ni xi ts'énkjó kui.
\s Nda̱ kamaá Pabloo̱ na̱xi̱ńdá Troa̱
\p
\v 12 Kji'a nga jachó an na̱xi̱ńdá Troa̱ nga ini̱jmi an éntjatsi̱e̱e̱ Kristoo̱, kasakona ngu̱i̱ndie nga sa̱'in an xaá Ndi̱a̱ná kui nanguii̱.
\v 13 Nda̱ kamaá ini̱ma̱na nga̱t'a̱ kasakojínna nda̱ ṉts'ié an xi 'mí Titoo̱, kó kuíni nga kats'enkixot'a an kui xtaa̱, s'e̱ kijí an nangui Masedonia̱.
\s Bi ts'én íni̱jmi Pabloo̱ nga Néná kats'énkjién kui nga kui xi ku̱i̱'íni̱jmi éntjatsi̱e̱e̱ Kristoo̱
\p
\v 14 Ndok'óchji̱í Néná, nga ngatsjé ni̱xtjin tsjájne̱ nga ni'ánjne̱ ngu̱i̱yaa̱ ja'eén Kristoo̱ ko̱jo nga ji̱n ts'énkjiénjne̱ nga bokó ngayeje ngu̱i̱ndie kjo̱a̱kjíntakoón xikó maá tsi ngo ni xi sije̱n.
\v 15 Nga̱t'a̱ ji̱n xikónií ni sije̱n xi Kristoo̱ ts'énk'ás'ieén Néná xi kjifoa'ándá ngu̱i̱jii̱n xta̱ xi fotjo'a ko̱jo ngu̱i̱jii̱n xta̱ xi kichajá.
\v 16 Kui xta̱ xi tjichájaá, ji̱n xikónií tsi je̱n kjo̱a̱bo̱ya kjimaa̱ ji̱n, tanga kui xta̱ xi fotjo'aa̱ ji̱n xí xikoó ngo ni sije̱n xi tsjá kjo̱a̱mindyioo̱n kjimaa̱. Kó kjo̱a̱a̱ kui nii̱, ¿'yá xi tjiín nga'niú nga ka̱maa̱ sa̱'ín kui xaá?
\v 17 Nga̱t'a̱ jmí tsi bo̱a̱ kónjne̱ xikoó kjín xta̱ xi ndyi̱foa'áchjí nga ndyi̱chji̱a̱ eén Néná, ngayejení ini̱ma̱jne̱ nga ndyi̱'bíni̱jmijne̱ Kristoo̱. Bo̱a̱ ndyi̱ni'ánjne̱ nguindyi̱ko̱n Néná xi katsjájne̱ kui xaá.
\c 3
\s Bi ts'én íni̱jmi Pabloo̱ kjo̱a̱a̱ ni xi Néná tjón índajo̱ xtaa̱ ko̱jo ni tja̱tsi̱e̱ xi jaskan índajo̱
\p
\v 1 Kji'a nga bo̱a̱ ndyi̱'míjne̱, ¿a ti ji̱nní xi nda ko̱ndókjo̱a̱jne̱ kjo̱a̱a̱ ji̱n? ¿Axa̱ chjiénjne̱ nga tjín xi tsja̱ajne̱ ngo xo̱jo̱n xi nda ku̱i̱chji̱a̱ kjo̱a̱a̱ ji̱n, tsi̱'e̱ nga jún ka̱makjínjnú 'yání xi ji̱n? ¿Axa̱ chjiénga jún si̱'andajnú ngo xo̱jo̱n xi nda ku̱i̱chji̱a̱ kjo̱a̱a̱ ji̱n, tsi̱'e̱ nga ka̱makjiín xtaa̱ 'yání xi ji̱n?
\v 2 Jún boá xi xikoó ngo xo̱jo̱n xi nda ku̱i̱chji̱a̱ kjo̱a̱a̱ ji̱n, kui xi Kristoo̱ ít'a ngu̱i̱jin ini̱ma̱jne̱. Xo̱jo̱n xi ngayeje xtaa̱ be ko̱jo ts'enyá,
\v 3 nga̱t'a̱ ya cha̱n cha̱n nga jún boá xi xikoó kui xo̱jo̱n xi Kristoo̱ kats'énda xi ji̱n kini'ánk'as'ienjne̱ jún, ngo xo̱jo̱n xi jmí tsi tinta̱ kini'án'indóni, tasá A̱sién Ni̱xtjii̱n Néná xi tikoón xi kini'án'indóni, ngo xo̱jo̱n xi jmí tsi nga̱soón ngo ndi̱jo̱ kini'án'indó, tasá ngu̱i̱jin ini̱ma̱ná boá nínga akjat'a.
\p
\v 4 Nguindyi̱ko̱n Néná nga Kristoo̱ boá xi tjíts'en nga 'niátakón an xá xi tjíts'en an.
\v 5 Jmí tsi kjo̱a̱a̱ tsi s'i̱jinjne̱ nga ti ji̱i̱n xi ka̱majne̱ si̱'an xá xi ndyi̱ni'ánjne̱, Néná boá xi tsjájne̱ nga'niú nga ni'ánjne̱ kui xaá.
\v 6 Kó kui boá xi kats'énjne̱ nga mosoo̱ kjo̱a̱'bínda tja̱tsi̱e̱ xi índajo̱ xta̱a̱ ka̱majne̱, jmí tsi ngo ni xi kjit'a ngo xo̱jo̱n, tasá ngo ni xi tjíts'én A̱sién Ni̱xtjii̱n Néná. Nga̱t'a̱ kjo̱a̱kiti xi kisit'aa̱ kui boá xi fíjo̱na kjo̱a̱bo̱yaa̱, tanga A̱sién Ni̱xtjii̱n Néná kui boá xi tsjáná kjo̱a̱mindyioo̱n.
\p
\v 7 Kó tsi xá xi kis'iee̱ kjo̱a̱kiti xi fíjo̱ná kjo̱a̱bo̱yaa̱ xi kini'án'indóni nga̱soón ngo tie ndi̱jo̱o̱, kis'iee̱ kjo̱a̱je kó ngaskande xta̱ xi chji̱a̱ni Israe̱l kamájín kamábe kje̱n Moisee̱, tangat'anii̱ kui kjo̱a̱je xi tikónjin kje̱n, kó kui kjo̱a̱jee̱ tsiejín kamaá,
\v 8 kó ¿kóts'en nga jejín ngase ka̱ma kjo̱a̱jee̱ ni xi ts'én A̱sién Ni̱xtjii̱n Néná?
\p
\v 9 Nga̱t'a̱ tsi kis'iee̱ kjo̱a̱je xaá kjo̱a̱kiti xi sa̱'ínjeé xtaa̱, 'niú ngase k'uieé kjo̱a̱je xaá éntjatsi̱e̱e̱ Néná xi sa̱'ínkixi̱ xtaa̱ nguindyi̱ko̱n Néná.
\v 10 Nga̱t'a̱ nga ja̱koxi̱ kui ni xi kis'iee̱ kjo̱a̱jee̱ je kichajá kjo̱a̱jee̱, tsi x'i̱chi̱bo̱a̱ ndse̱je̱n kuí kjo̱a̱je xi 'niú je ngase xi tikón ngot'e̱.
\v 11 Tsi kis'iee̱ kjo̱a̱je ngo ni xi tsiejín kamaá, achichí ra tsie ngase kjo̱a̱je k'uieé ni xi k'uijñá ngatsjé ni̱xtjii̱n.
\p
\v 12 Nga̱t'a̱ yajne̱ nga bo̱a̱ kji'i ni xi s'ijinjne̱, kuíni nga 'niátakónjne̱ ni xi ndokjo̱a̱jne̱.
\v 13 Jmí tsi bo̱a̱ ndyi̱ni'ánjne̱ xikó kats'én Moisee̱ nga ngo ṉjño í'má kje̱n, tsi̱'e̱ nga xta̱ xi chji̱a̱ni Israe̱l sku̱i̱e̱jín ndi'ií kui kjo̱a̱je xi'ba̱, kjo̱a̱je xi tsiejín ts'andíyaá.
\v 14 Tanga kis'ijñoó kjo̱a̱kjíntakoón kui xtaa̱, nga̱t'a̱ ngaskande ngot'e̱ kji'a nga ts'enyá ni xi índajo̱ Néná ngas'e̱, ti kuii̱ ṉjñoo̱ bo'má kjo̱a̱kjíntakoón. Kó kui ṉjñoo̱ kji̱e̱ tjo'óxínjiín, nga̱t'a̱ ta kuí tsi Kristoo̱ xi maa̱ foa'áxín.
\v 15 Tanga ngaskande ngot'e̱, kji'a nga ni'ánya xo̱jo̱n kjo̱a̱kiti xi kats'énda Moisee̱, kui ṉjñoo̱ nga̱són ini̱ma̱a̱ kui xtaa̱ takó tikón.
\v 16 Tanga nguije s'i̱jii̱n Ndi̱a̱ná, xtjo̱'óxín kui ṉjñoo̱.
\v 17 Nga̱t'a̱ Ndi̱a̱ná kui boá xi A̱sién Ni̱xtjii̱n, kó nínga tikón A̱sién Ni̱xtjii̱n Ndi̱a̱ná, tjín kjo̱a̱ndé.
\v 18 Kó kuíni nga ngayeje ñá nguiti jmíjínná kui ṉjño xi bo'má kje̱n. Xikoó kji'a nga ngo chi̱tsen bokó kje̱n, bo̱a̱ ts'en bokó ñá kjo̱a̱jee̱ Ndi̱a̱ná. Bo̱a̱ kon kjimá xikó maá a̱sie̱én Néná, nga̱t'a̱ ngatsjé ni̱xtjin sa kji'bé sa kji'béná tsie kjo̱a̱jee̱, tangat'anii̱ ni xi tjíts'én A̱sién Ni̱xtjii̱n Ndi̱a̱ná.
\c 4
\s Bi ts'én katsáyá Pabloo̱ xikó ts'én íni̱jmi eén Néná
\p
\v 1 Kó kuíni nga tangat'anii̱ kjo̱a̱ni̱ma̱takoón Néná nga katsjájne̱ kui xaá, kó ndyi̱ni'ankjiéjínjne̱ kjo̱a̱.
\v 2 Ni'ánjínjne̱ ni xi ni'án nínga 'maa̱ ko̱jo ni xi tsja̱aná kjo̱a̱soboá, jmí kjo̱a̱maña ndyi̱ni'ánkjiénjínjne̱, ti nde jmí tsi ndyi̱'bosíkjoyájne̱ eén Néná. Néná be nga ja̱koxi̱ ni xi ndokjo̱a̱jne̱ kó bo̱a̱ ts'én ndyi̱bokojne̱ kókónjne̱ nguindyi̱ko̱n xta̱ xi nda síndo kjo̱a̱kjíntakoón.
\v 3 Tanga tsi takó tikón'má ngase éntjatsi̱e̱e̱ Néná xi ndyi̱'bíni̱jmijne̱, tikón'má kuí eén, tanga ngu̱i̱jii̱n xta̱ xi kichajaá nga tikón'má.
\v 4 Nga̱t'a̱ nee̱ kui nga̱sondiee̱ kats'énjñoó kjo̱a̱kjíntakoón kui xta̱ xi s'ijinjiín, tsi̱'e̱ nga sku̱i̱e̱ cha̱n cha̱njín kjo̱a̱tsijee̱n ndi'í 'naa̱ éntjatsi̱e̱ xi ts'éntsáyá kjo̱a̱jee̱ Kristoo̱, kó kuíni nga, nga ya ñá Kristoo̱, makjínná kókji'i kjo̱a̱jee̱ Néná.
\v 5 Nga̱t'a̱ jmí tsi kjo̱a̱a̱ ji̱n xi ndyi̱'bíni̱jmijne̱, kjo̱a̱a̱ Jesukristoo̱ nga kui xi Ndi̱a̱ná xí ndyi̱'bíni̱jmijne̱, kó ji̱n ta moso̱ tsa̱jún tsi kjimajne̱ tangat'anii̱ nga tikónjinjne̱ kjo̱a̱tjoó Kjisoo̱.
\v 6 Nga̱t'a̱ kuí Néná xi katsjá kjo̱a̱ nga nínga jñoó sa̱'íntsijen ndi'ií, kó ti kuíni xi kats'éntsijen ndi'ií ngu̱i̱jin ini̱ma̱ná, kó kats'éntsijee̱n tsi̱'e̱ nga ka̱makjínná kjo̱a̱jee̱ Néná xi tjíts'én 'na̱ kje̱n Jesukristoo̱.
\s Bi ts'én katsáyá Pabloo̱ ni xi ja'ajin
\p
\v 7 Néná katsjájne̱ kui kjo̱a̱cho̱n xi'bi̱, kó ji̱n xikónií ngo boso̱ ti̱ji nínga tikóntjó kui kjo̱a̱cho̱o̱n. Tsi̱'e̱ nga s'i̱jña tsijen nga kui nga'niú nda kji'ii̱ tsi̱'e̱ Néná ka̱ma, kó jmí tsi tsa̱ji̱n.
\v 8 Nda tsi kjín kjo̱a̱ni̱ma̱ ndyi̱bitjatiójne̱, tanga tjisákó ndi̱yajne̱ kóts'en kjo̱tjojinjne̱. Nda tsi nda̱ kjimajne̱, tanga jmí tsi yajínjne̱ mí ni xi si̱'anjne̱.
\v 9 Nda tsi tjimíyotji̱nguijne̱, tanga jmí tsi je íjñámasienjne̱ Néná. Nda tsi je akjatójójne̱, tanga jmí tsi je kini'ánchajajne̱.
\v 10 Ta nínga ndyi̱monguínjne̱, kich'iájne̱ ngu̱i̱jin yojojne̱ chi̱bo̱a̱a̱ kjo̱a̱ni̱ma̱ xi ja'atio Kjisoo̱ nga kini'ánk'ién, tsi̱'e̱ nga bo̱a̱ ts'én xcha̱ ngu̱i̱jin yojojne̱ kjo̱a̱mindyioo̱n Kjisoo̱ nga.
\v 11 Nga̱t'a̱ ji̱n xi tindyionjne̱, tjín xi mejeén sa̱'ínk'iénjne̱ tangat'anii̱ Kjisoo̱, tsi̱'e̱ nga ti bo̱a̱ ti ts'én kjo̱a̱mindyioo̱n Kjisoo̱ xcha̱ ngu̱i̱jin yojojne̱ xi máa̱ 'me.
\v 12 Kó bo̱a̱ ts'én ji̱n kjimayajne̱, kó jún ndyi̱mindyionjnú ngu̱i̱ya tsja Néná.
\p
\v 13 Bi ts'én je kjit'a xo̱jo̱n eén Néná: “Kis'ijinna, kuíni nga tsíchji̱a̱ an.” Kó ji̱n ti bo̱a̱ ti ts'én tjíjinjne̱. S'ijinjne̱ kó kuíni nga kandokjo̱a̱jne̱.
\v 14 Nga̱t'a̱ je ya ñá nga Néná boá xi kats'énkja'á'yaá Ndi̱a̱ná Kjisoo̱, kó ti bo̱a̱ ti ts'én sa̱'ínkja'á'yáná ñá nga, kó nijan kjo̱joná nguindyi̱ko̱n kui.
\v 15 Nga̱t'a̱ ngayeje kui nii̱ kjima nganda tsa̱jún, tsi̱'e̱ nga kjín xta̱ xi tsja̱á ndok'óchji Néná kjo̱a̱a̱ kui kjo̱a̱nda xi tjisákoó, kó bo̱a̱ ts'én Néná k'uié ngasee̱ kjo̱a̱je.
\p
\v 16 Kó kuíni nga ndyi̱ni'ankjiéjínjne̱ kjo̱a̱, nga̱t'a̱ nda tsi je kjife nga'niuú yojojne̱, tanga ini̱ma̱jne̱ kjimatja̱tsi̱e̱ya ndyiojón ndyiojón.
\v 17 Nga̱t'a̱ kui kjo̱a̱ni̱ma̱ xi ta ngotjón nga ndyi̱bitjatió ñá, kuí xí tsja̱aná ngo kjo̱a̱je xi ngatsjé ni̱xtjin ko̱jo xi nda ngase.
\v 18 Jmí tsi ni xi ndyi̱ya xí si̱'ansée̱n, kui ni xi yajiín xi si̱'ansée̱n, nga̱t'a̱ ni xi yaa̱, ta ngotjón tsi s'ijña, tanga ni xi yajiín ngatsjé ni̱xtjin s'ijña.
\c 5
\s Bi ts'én akóyá Pabloo̱ nga yojo tja̱tsi̱e̱ k'uiéná
\p
\v 1 Nga̱t'a̱ ñá je ya nga yojoná xikónií tsi ngo ndi'aṉjño xi tindyionyá kuí nga̱sondiee̱. Kó nga kjo̱tson kui ndi'aṉjñoo̱, ya nga ndi'ak'ajmi ján tikónna ngo ndi'a xi tikón ngatsjé ni̱xtjin xi tsjáná Néná, ngo ndi'a xi jmí tsi tsja xta̱ kamándani.
\v 2 Kuíni nga on kjimaná nga tindyión k'i̱e̱e̱, nga̱t'a̱ mejénná nga tsá ko̱e̱'éná kui ndi'a xi tikón ndi'ak'ajmii̱, kui xi xikoó tsi ngo ṉjño tja̱tsi̱e̱ xi xcha̱já.
\v 3 Nga̱t'a̱ bo̱a̱ ts'en nda tsi xchja̱'áxínná kui ṉjño xi tikónná ngot'e̱, xcha̱ kji'ixtíjínná.
\v 4 Nga̱t'a̱ tji̱e̱nga xikoó tsi kui ndi'aṉjñoo̱ tindyionyá nga kui xi yojoná, kjifoe'ets'i'ónná nga je jenda ñá. Nga̱t'a̱ nga ka̱mamejénná chja̱'áxín kui yojo xcháná, jmí tsi ndyi̱'mí nga mejénjínná nga k'uiéná ngo yojo, tasá mejénná nga ngo yojo tja̱tsi̱e̱ k'uiéná, tsi̱'e̱ nga kjo̱a̱mindyioo̱n k'uijñá ngajoo̱ ni xi 'mee̱.
\v 5 Néná boá xi íjñandaná kjo̱a̱a̱ kui nii̱, kó katsjáná A̱sién Ni̱xtjii̱n xikoó tsi ngo ni xi tikónguí, tsi̱'e̱ nga xcha̱ nga sa̱'ínkjatjosón ni xi katsáyatjón nga tsja̱aná.
\p
\v 6 Kó kuíni nga kjima'niátakón ngatsjé ni̱xtjin, nga̱t'a̱ je ya nga tji̱e̱nga kui yojo xchaá tindyionjin, kjin tindyionñáa̱ Ndi̱a̱ná.
\v 7 Nga̱t'a̱ tangat'anií kjo̱a̱s'ijii̱n nga tindyión, jmí tsi kjo̱a̱a̱ ni xi ndyi̱ya.
\v 8 Kjima'niátakón ñá kó mejénná nga k'uijñá masien kui yojo xchaá, tsi̱'e̱ nga nínga tikón Ndi̱a̱ná konguínkindyión.
\v 9 Kó kuíni nga ni'án ngo kjo̱a̱'niú nga ni'án ni xi tsja maa̱ Ndi̱a̱ná, nda tsi k'i̱e̱ tindyión ngu̱i̱jii̱n kui yojoo̱ ko̱jo tsi je akayá.
\v 10 Nga̱t'a̱ chjiénga ngayeje ñá ki̱a̱ konguínkindyiá nguindyi̱ko̱n Kristoo̱, tsi̱'e̱ nga sku̱i̱e̱ ni xi kini'án, kó nga ngo nga ngo ñá sa̱kóná ni xi tsoboáná, tsi nda ko̱jo tsi ndajín ni xi kini'án tji̱e̱nga kixindyión ngu̱i̱jii̱n kui yojoo.
\s Bi ts'én katsáyá Pabloo̱ kjo̱a̱a̱ nga nganda tsa̱ñá boá ni xi kats'én Kristoo̱
\p
\v 11 Kó kuíni nga, nga yandíkónjne̱ Ndi̱a̱ná ndyi̱'míya cha̱n cha̱njne̱ xtaa̱ nga ti s'i̱jii̱n nga. Néná be kókón ji̱n, kó mejénna nga ko̱jo jún xi nda ini̱ma̱jnú xcha̱jnú kókón ji̱n nga.
\v 12 Jmí tsi ti ji̱i̱n ingo ndi̱ya nda ndyi̱ndokjo̱a̱ nguiníjne̱ kjo̱a̱a̱ ji̱n nguindyikónjnú, tasá ndyi̱boe'éjne̱ ji̱n ngo ngu̱i̱ndie jún tsi̱'e̱ nga tsja ka̱majnú kjo̱a̱a̱ ji̱n, tsi̱'e̱ nga ka̱majnú ko̱ndokjo̱a̱'ajnú xta̱ xi je kjimaa̱ yojoo̱ kjo̱a̱a̱ xikó ts'én ndyi̱be xtaa̱ kó jmí tsi xikó kon kui.
\v 13 Nga̱t'a̱ tsi tsabéjne̱ tsó xtaa̱, tsabéjne̱ kjo̱a̱a̱ nga xaá Néná boá xi ndyi̱ni'ánjne̱, kó tsi nda ts'én tikón kjo̱a̱kjíntakónjne̱, nganda tsa̱jún boá.
\v 14 Nga̱t'a̱ kjo̱a̱tjoó Kristoo̱ ts'énjne̱ kjo̱a̱'niú nga bi ts'én ni'ánkjójne̱: nga tsi ngo xi k'ien kjo̱a̱a̱ ngayeje xtaa̱, kó kuíni nga ngayeje xtaa̱ jesón.
\v 15 Kó tangat'anii̱ ngayeje xtaa̱ nga k'ien Kristoo̱, tsi̱'e̱ nga kui xta̱ xi síndoo, jmí tsi kjo̱a̱a̱ kui nga k'uíndo ngase, k'uíndo tsi̱'e̱ nga sa̱'ín ni xi tsjaa̱ Kristoo̱, kui xi k'ien ko̱jo ja'á'yaá ngandaa̱ kui xtaa̱.
\v 16 Kó kuíni nga ji̱n je nguiti bo̱a̱jín ts'én tsitsijenjne̱ xtaa̱ xikó ts'én kotsijee̱n xkjín xtaa̱ kui nga̱sondiee̱, kó nda tsi ngas'e̱ bo̱a̱ ts'én kitsitsijenjne̱ Kristoo̱, tanga ngot'e̱ je nguiti bo̱a̱jín ts'en ndyi̱tsitsijenjne̱.
\v 17 Kó kuíni nga kui xta̱ xi je kats'éngojo̱ yojoo̱ Kristoo̱, ngo xta̱ xi tja̱tsi̱e̱ je kamá, ni xi xchaá je ja'a, kó ni xi tja̱tsi̱e̱ je je'e.
\p
\v 18 Kó ngayeje kui nii̱, Néná boá xi tjíts'én. Néná kats'énkjién Kristoo̱ nga yíndaná ñá ko̱jo kui, kó katsjáná ngo xá nga ko̱ndókjo̱a̱ kjoaá nga konguínchon tiña nguiñáa̱ Néná.
\v 19 Néná kats'énkjién Kristoo̱ tsi̱'e̱ nga xta̱ nga̱sondiee̱ sa̱'ín tiñaa̱ yojoo̱ Néná, kó kats'énxki̱jín jeé kui xtaa̱. Ji̱n katsjájne̱ nga k'uini̱jmi̱jne̱ kui eén, tsi̱'e̱ xtaa̱ sa̱'ín tiñaa̱ yojoo̱ Néná.
\v 20 Kó kuíni nga ji̱n, xta̱xchaá Kristoo̱ boá ji̱n. Xikónií tsi ti kui Néná xí ts'énchji̱a̱ kji'a nga ndyi̱ndokjo̱a̱jojne̱ jún, kuíni nga ngu̱i̱yaa̱ ja'eén Kristoo̱ chjiá'ájne̱ jún nga tjandajo̱jnú Néná.
\v 21 Kristoo̱ nde ngo jé kis'iejiín, nganda tsa̱ñá boá nga Néná xikoó tsi xta̱ jé kats'én, tsi̱'e̱ nga ñá xta̱ kixi̱ ka̱ma nguindyi̱ko̱n Néná, tangat'anii̱ ni xi kats'én Kristoo̱.
\c 6
\p
\v 1 Kó kuíni nga ji̱n xi xaá Néná ndyi̱ni'ánjne̱, 'niú chjiá'ájne̱ jún tsi̱'e̱ nga ngata̱ tonjín majnú kjo̱a̱ndaa̱ Néná.
\v 2 Nga̱t'a̱ bi tsó xo̱jo̱n eén Néná:
\q Ni̱xtjin xi ndaa̱ an tsint'iee̱,
\q kó ni̱xtjin nga ts'axié'á an xtaa̱ an asiko̱joo̱ ji.
\m Bo̱a̱ t'íxianjnú'un nga ngot'e̱ boá ni̱xtjin xi ndaa̱, kó ngot'e̱ boá ni̱xtjin nga Néná 'boxié'á xtaa̱.
\s Bi ts'én katsáyá Pabloo̱ ni xi ja'ajin tangat'anii̱ xá xi kats'én
\p
\v 3 Nde ngojín ni xi ndajín ni'ánjne̱, xi sa̱'ínkjién xtaa̱ tsi̱'e̱ nga ch'o ts'én skjo̱yá xájne̱.
\v 4 Tasá ngayeje ni xi ni'ánjne̱ bokó nga xaá Néná ndyi̱ni'ánjne̱, nga 'niú ndyi̱ni'ánchíkjo̱a̱jne̱, nga ndyi̱bitjatiójne̱ kjo̱a̱ni̱ma̱, nga chjiénjne̱ ngo ni, nga nda̱ kjimajne̱.
\v 5 Nga tjifoájne̱, nga ndyi̱ni'ánchíkjo̱a̱jne̱ tsi tjín xi ndyi̱fíjo̱jne̱ ndo̱bo̱a̱ya, nga tjíbixkánjo̱jne̱, nga xá 'niú ndyi̱ni'ánjne̱, nga ńjñá ko̱jo tsi kjindiá ndyi̱bitjatiójne̱.
\v 6 Tsjiets'én ndyi̱monguínjo̱jne̱ yojojne̱. Makjínjne̱ ni xi ndokjo̱a̱jne̱. Ni'ánchíkjo̱a̱jne̱. Tjínjne̱ kjo̱a̱nda. Tikónjinjne̱ A̱sién Ni̱xtjii̱n Néná. Tjínjne̱ ngo kjo̱a̱tjó xi nda.
\v 7 Ndyi̱'míyajne̱ én xí ja̱koxi̱i̱ kó nga'niuú Néná tikónjinjne̱. Kjo̱a̱kixi̱i̱ xikónií tsi ni xi ni'ánkjién nga bixkán ndyi̱ni'ánjne̱.
\v 8 Tjín ni̱xtjin nga yandíkónjne̱, kó tjín ni̱xtjin nga ch'o 'míjne̱. Tjín ni̱xtjin nga nda ndokjo̱a̱ kjo̱a̱a̱ ji̱n, kó tjín ni̱xtjin nga ch'o ts'én ndokjo̱a̱. Tjín ni̱xtjin nga xta̱ ndiso tjí'míjne̱, nda tsi ni xi ja̱koxi̱ boá xi ndokjo̱a̱jne̱.
\v 9 Nda tsi ngayeje xtaa̱ bejne̱, tanga xikoó tsi bejínjne̱. Xta̱ xi je kjifesón kjimajne̱, tanga ti kuí xí k'i̱e̱ tindyionjne̱. Tjíni'ánk'atiojne̱ kjo̱a̱ni̱ma̱, tanga jmí tsi je jesónjne̱.
\v 10 Tindyionjne̱ xikoó xta̱ xi ndasen síndo, tanga ngatsjé ni̱xtjin nga tsjatjínjne̱. Tindyionjne̱ xikoó xta̱ ni̱ma̱, tanga achichí xta̱ xi ni'áncho̱njne̱. Tindyionjne̱ xikoó xta̱ jmí nijiín, tanga ngayeje nii̱ xi tjínjne̱.
\p
\v 11 Jún xta̱ Korinto̱, je kandokjo̱a̱jo kixi̱ kixi̱jne̱ ji̱n, kó je ki'míyajne̱ ni xi tikónjin ini̱ma̱jne̱.
\v 12 Ji̱n achichí tjójne̱ jún, tanga jún bo̱a̱jín ndyi̱ni'ánjnú.
\v 13 Kuíni nga 'niú mí'ájnú'un xikoó tsi ndína majnú, tsi̱'e̱ bo̱a̱ si̱'ánjnú jún, nga ko̱kójnú jún ni xi tikónjii̱n ini̱ma̱jnú.
\s Bi ts'én katsáyá Pabloo̱ nga ka̱majín sa̱'ínngojo̱ yojoo̱ xkjín xta̱ xi s'ijii̱n Néná ko̱jo xi s'ijinjiín
\p
\v 14 Ngata̱ ki̱a̱jín nijan ni'ánngojo̱jnú yojojnú xta̱ xi s'ijinjiín Néná. Nga̱t'a̱, ¿mí ni xi nijan mani xkjín ni xi kixii̱ ko̱jo ni xi kixi̱jiín? ¿Axa̱ kóts'en nga nijan k'uíndo ndi'ií ko̱jo jñoó?
\v 15 ¿Kó kóts'en ka̱majo̱ xkjín Kristoo̱ ko̱jo xindajín Beliaa̱l? ¿Axa̱ kóts'en nga nda ko̱a̱'a̱ xkjín ngo xta̱ xi s'ijii̱n Néná ko̱jo ngo xi s'ijinjiín?
\v 16 ¿Kó kóts'en ka̱mangojo̱ xkjín na̱ngo̱xi̱i̱ Néná ko̱jo a̱sie̱én ngo ne xi ts'énda xtaa̱? Nga̱t'a̱ ñá boá xi na̱ngo̱xi̱i̱ Néná xi tikoón, xikó katsó ti kuii̱ Néná:
\q Ki̱a̱ kotíjñajíi̱n kó ki̱a̱ kjótso'bájíi̱n,
\q kó an xí Nee̱ ka̱ma an,
\q kó kui xtaa̱ xi xta̱ na̱xi̱ńdána ka̱ma.
\m
\v 17 Kó kuíni nga bi katsó ngase Néná:
\q Tji̱taxínjinjnú ngamasiee̱n kui xtaa̱, kó tji̱taxínboa'ájnú, tsó Ndi̱a̱ná.
\q Ngata̱ chiíjín ni'ánjo̱jnú ni xi ndándí nguindyikón an.
\q Kó an skíbéjnú'un.
\q
\v 18 Kó an xí Na̱'mijnú ka̱ma an,
\q kó jún xi ndína ka̱majnú,
\q bo̱a̱ tsó Ndi̱a̱ná xi tjiín nga'niuú.
\c 7
\p
\v 1 Jún xta̱ xi tjóna, ñá tsa̱ñá ni xi katsáyatjón Néná nga tsja̱á xta̱ xi tsi̱'e̱. Kuíni nga tsjiets'én ku̱i̱ndyión nguindyi̱ko̱n Néná, nga xín k'uijñá ni xi ts'énndándí yojoná ko̱jo ini̱ma̱ná. Si̱'ando̱jo kjin kjin kui kjo̱a̱tsjiee̱ nga xcha̱ndíkón Néná.
\s Bi ts'én katsáyá Pabloo̱ nga tsja kamaá kjo̱a̱a̱ ni xi ja'ajin xta̱ na̱ngo̱xi̱ xi chji̱a̱ni Korinto̱
\p
\v 2 Te'éjne̱ ngo ngu̱i̱ndie ngu̱i̱jii̱n ini̱ma̱jnú. Kji̱e̱ ngo xta̱ xi ndajín kji'i ni xi ndyi̱ni'ánjojne̱. Kji̱e̱ ngo xta̱ xi ndyi̱ni'án'ónjne̱. Kji̱e̱ ngo xta̱ xi ndyi̱ch'íṉcha̱jojne̱.
\v 3 Jmí tsi kui nii̱ t'íxianjnú'un nga jún ts'én'biniéjnú'un ngo ni, nga̱t'a̱ je bo̱a̱ kixiánjnú'un ngas'e̱, nga ngu̱i̱jii̱n ini̱ma̱jne̱ tindyiónjnú tsi̱'e̱ nga nijan ko̱ya ko̱jo tsi nijan ku̱i̱ndyión.
\v 4 Achichí kixi̱ chjiájojnú'un, kó achichí tsja mana kjo̱a̱a̱ jún. Achichí nga'niú tjisákóna. Ngaskande ja'atio maá kjo̱a̱tsja xi tjínna, nda tsi tsie kjo̱a̱ni̱ma̱ ndyi̱bitjatiójne̱.
\p
\v 5 Nga jáchójne̱ Masedonia̱ nde chií kini'ánkja'yájínjne̱, tasá ma tajñání kasakojne̱ kjo̱a̱xti. Xtaa̱ askjanjo̱ xkjín, kó kandakonni ji̱n.
\v 6 Tanga Néná kui xi tsja nga'niuú xta̱ xi tsie kjo̱a̱ni̱ma̱ ndyi̱foa'atioo̱, kui boá xi katsjanga'niújne̱ nga jachókónjne̱ Titoo̱.
\v 7 Kó jmí tsi ta kjo̱a̱a̱ nga jachó tsi Titoo̱, ko̱jo kjo̱a̱a̱ nga kasakonga'niuú ngu̱i̱jinjnú boá nga. Katsáyájne̱ nga mejénjnú xcha̱jnú ji̱n, kó nga ndasen kamájnú kjo̱a̱a̱ ni xi kamána, ko̱jo kjo̱a̱a̱ nga nda̱ kjimajnú kjo̱a̱a̱ an. Nga tsint'ie an kui nii̱ achichí 'niú ngase tsja kis'iena.
\p
\v 8 Nda tsi ndasen kamájnú kjo̱a̱a̱ kui xo̱jo̱n xi katsanguiyajnú'un, nda̱jín mana ngot'e̱. Kjénní nga nda̱ kamána ngas'e̱, nga̱t'a̱ be an nga kui xo̱jo̱o̱n kats'éndasenjnú chiboa ni̱xtjin.
\v 9 Ngot'e̱ 'ne̱ achichí tsja mana, jmí tsi kjo̱a̱a̱ nga ndasen kamájnú, tasá kjoaá nga kui kjo̱a̱ndasee̱n xi kats'én nga kini'ánk'oyajnú yojojnú. Xikó ts'én mejeén Néná boá ts'en kamándasenjnú, kó kuíni nga ji̱n jmí ni kini'ánjínjne̱ xi kats'én'ónjnú.
\v 10 Nga̱t'a̱ kui kjo̱a̱ndasen xi tsi̱'e̱ Néná, kui boá xi tsjáná nga ni'ánk'oyá yojoná, tsi̱'e̱ nga kjo̱tjo'a. Kuíni nga jmí kjo̱a̱jín nga nda̱ ka̱maná. Tanga kjo̱a̱ndasen xi tsjáná nga̱sondiee̱ kui boá xi ts'enk'iénná.
\v 11 Tsitsíjenjnúu̱ kókji'i ni xi nda je'ejo̱jnú kui kjo̱a̱ndasen xi tsi̱'e̱ Néná. Kamáyajnú nga jmí jéjínna kó ngaskande ka'naxié'ájnú'un. Ti bo̱a̱ ti ts'én kini'ánxchánjnú kó kandakonjnú tsi ngo ni xi ndajín ka̱ma. Kamámejénjnú xcha̱jnú'un kó kini'ánjéjnúu̱ nda̱ xi tjiín jeé. Ngayeje kui nii̱ xi jún akakonijnú nga jmí ni yajínjnú kjo̱a̱a̱ ni ch'o kji'i xi kamaá.
\v 12 Kó kuíni nga, nga kats'en'indó an kui xo̱jo̱o̱n, jmí tsi kats'enda an kjo̱a̱a̱ kui xi ndajín kji'i ni xi kats'eén, ko̱jo jmí tsi kjo̱a̱a̱ kui xi ndajín kji'i ni xi kini'ánjoo̱. Tasá kamámejénna nga xcha̱ nguindyi̱ko̱n Néná nga nda̱ kjimajnú ji̱n.
\v 13 Kó ngayeje kui nii̱ xi katsjájne̱ kjo̱a̱ni'ándajon.
\p Jmí tsi ta kuí tsi ni xi'bi̱ xi katsjájne̱ nga'niú, achichí 'niú tsja kamá ngasejne̱ kjo̱a̱a̱ kjo̱a̱tsjaa̱ Titoo̱, nga̱t'a̱ ngayejejnú nga katse'énga'niújnúu̱.
\v 14 Ja̱ bo̱a̱ je bo̱a̱ kixiáa̱n Titoo̱ nga achichí tsja kis'iena kjo̱a̱a̱ jún, kó jmí kjo̱a̱soboá kis'iejínna. Ja̱koxi̱ boá ngayeje ni xi je ki'míjne̱ jún, kó ti ja̱koxi̱ ni xi ki'míjne̱ Titoo̱ nga achichí tsjatjínjne̱ kjo̱a̱a̱ jún.
\v 15 Titoo̱ achichí tjó ngasee̱ jún nga foa'átsjiee̱n xikó ts'én ngayejejnú nga kanda'yá'énjnúu̱ ko̱jo nga 'niú kamáyandikónjnú.
\v 16 Achichí tsja mana nga be an nga jún tjíts'en 'niátakónjnú'un.
\c 8
\s Bi ts'én katsáyá Pabloo̱ nga chjiénga chja̱'ásoón to̱nchji̱e̱ xta̱ na̱ngo̱xi̱ xi chji̱a̱ni Judea̱
\p
\v 1 Kó ngot'e̱ 'ne̱ já ṉts'ie, mejénjne̱ nga xcha̱jnú kóts'en Néná katsjaá kjo̱a̱ndaa̱ xta̱ na̱ngo̱xi̱ xi síndo nangui Masedonia̱.
\v 2 Nda tsi tsie kjo̱a̱ni̱ma̱ xi ja'atio nga kichjat'ayákón, tanga tsja tjiín. Kó nda tsi 'niú ni̱ma̱ síndo, ja'ásón to̱nchji̱e̱e̱ xikoó tsi xta̱ cho̱n.
\v 3 An xí chistiko̱ an nga be an nga ngayeje kon nga katsjá xikó kji'i kamaá katsjá, kó ngaskande ts'atio ngase katsjá xikó kji'i máa̱ tsjá.
\v 4 'Niú tsí'ájne̱ tsi̱'e̱ nga ko̱e̱'éndiéjne̱ nga tsja k'uieé nga ko̱síko̱jo xta̱ tsjiee̱ Néná xi síndo Judea̱.
\v 5 Kó jmí tsi xikó ts'én kichiyájne̱, tasá tjón Néná kats'énk'as'iee̱n yojoo̱, s'e̱ jaskan katsjaá kon nga ka̱majo̱jne̱, bo̱a̱ kats'én xikó ts'én kamámejeén Néná.
\v 6 Kuíni nga 'niú kichjiá'ájne̱ Titoo̱ tsi̱'e̱ nga sa̱'índo̱jo nga kjo̱a̱'átikó kui to̱nchji̱e̱e̱ ngu̱i̱jinjnú, xikó ts'én íts'i̱yanii̱ nga kats'én kui kjo̱a̱ndaa̱.
\v 7 Achichí nda ni'ánjnú ngayeje ni xi ni'ánjnú. 'Niú s'ijinjnú, 'niú majnú ndokjo̱a̱ ni xi tsi̱'e̱ Néná, 'niú makjínjnú eén Néná, 'niú bosíko̱jojnú xta̱ xi kje̱'e, kó 'niú tjójnú ji̱n. Xikó ts'én ngatsjé ni̱xtjin nda ni'ánjnú ni xi ni'ánjnú, bo̱a̱ ti ts'én nda chja̱'ásónjnú kui to̱nchji̱e̱ xi'bi̱ nga.
\p
\v 8 Jmí tsi bo̱a̱ t'íxianjnú'un nga tjínjnú ngo kjo̱a̱'niú nga kui nii̱ si̱'ánjnú. Tasá mejénna nga xcha̱jnú ni nda xi ndyi̱ts'en já ṉts'ie xi ngasee̱, kó bo̱a̱ ts'én ka̱ma ko̱kójnú kjo̱a̱tjó nda xi tjínjnú jún.
\v 9 Nga̱t'a̱ je yajnú kjo̱a̱nda xi akóná Ndi̱a̱ná Jesukristoo̱, nga̱t'a̱ tangat'anii̱ nga tjoó jún nga ni̱ma̱ kamá kui, nda tsi cho̱n boá. Tsi̱'e̱ nga kui kjo̱a̱ni̱ma̱ xi kis'iee̱ kui, kamácho̱nnijnú jún.
\p
\v 10 Tsjajnú'un ngo kjo̱a̱botíxoma xi nda sa̱'ínjnú: Nó xi ikitjá, jún tjón ik'ítsi̱yajnúu̱ nga kachja'ásonjnú kui to̱nchji̱e̱e̱, tanga jmí tsi ta kandokjo̱a̱ tsi jnú, ik'íts'i̱yanijnúu̱ nga kini'ánjnú kui nii̱.
\v 11 Ngot'e̱ 'ne̱ ti'ando̱jojnú ni xi je ik'ítsi̱yajnúu̱ nga kini'ánjnú. Xikó ts'én ngayeje ini̱ma̱jnú nga kamámejénjnú kini'ánjnú kui nii̱, bo̱a̱ ts'én te'éjnú xikó ts'én tjisákójnú ngot'e̱.
\v 12 Nga̱t'a̱ tsi ngayeje takón nga ko̱e̱'é, Néná tsja ka̱maa̱ nga ndyi̱boe'é ni xi ndyi̱boe'é, nga̱t'a̱ kui mí'ájín ni xi jmíjínná.
\p
\v 13 Jmí tsi bo̱a̱ t'íxian an tsi̱'e̱ nga jún kjo̱a̱ni̱ma̱ ku̱i̱tjatiojnú tangat'anii̱ nga kje̱'e xi ko̱siko̱jojnú, tasá nga ta ngo ndse̱je̱n ngatamajnú.
\v 14 Ngot'e̱ 'ne̱, jún tsie tjínjnú kó ka̱ma ko̱siko̱jojnú xta̱ xi jmíjiín, nga̱t'a̱ kje̱'e ni̱xtjin kui xtaa̱ tsie k'uié ngaá kó kui ka̱ma ko̱síko̱jongajnú jún, kó bo̱a̱ ts'én nga ngo ndse̱je̱n ka̱majnú.
\v 15 Xikó ts'én kjit'a xo̱jo̱n eén Néná: “Xi tsie ni ja'átikó, nguiti kis'iejín ngasee̱, kó xi chiboa ja'átikó, ti nde chiboajín ngase kis'iee̱.”
\s Bi ts'én katsáyá Pabloo̱ 'yá xi ko̱e̱je̱jo to̱nchji̱e̱e̱
\p
\v 16 Tsjáa̱ ndok'óchji Néná nga̱t'a̱ íjñajin ngu̱i̱jin ini̱ma̱a̱ Titoo̱ nga nda̱ kjimaa̱ jún xikó kjimana an nga.
\v 17 Nga̱t'a̱ nga ja̱koxi̱ kats'énjo̱'o nga kats'énkjatjosón ni xi an tsí'áa̱, kó ngot'e̱ 'ne̱ mejeén nga ngayeje kon nga ko̱e̱je̱katsijenjnú.
\p
\v 18 Kó nijan kananguiyajo̱jne̱ Titoo̱ ngo nda̱ ṉts'ié xi achichí nda ndokjo̱a̱ kjo̱a̱a̱ kui ngayeje na̱ngo̱xi̱i̱, kjo̱a̱a̱ nga tanisién nda kji'i xá xi kats'én ngandaa̱ éntjatsi̱e̱e̱ Néná.
\v 19 Kó jmí tsi ta kuí tsi kui nii̱, ti bo̱a̱ ti ts'én xta̱ na̱ngo̱xi̱i̱ ja'ájin tsi̱'e̱ nga nijan ko̱e̱je̱jojne̱ nga konguínjo̱jne̱ kui to̱nchji̱e̱e̱. Ndyi̱ni'ánjne̱ kui xaá tangat'anii̱ kjo̱a̱jee̱ Ndi̱a̱ná, kó bo̱a̱ ts'én nga ndyi̱bokojne̱ nga mejénjne̱ ko̱siko̱jojne̱ xtaa̱.
\v 20 Mejénjínjne̱ nga tjín xi ku̱i̱chji̱a̱'onjne̱ kjo̱a̱a̱ xikó ts'én si̱'anxájo̱jne̱ to̱nchji̱e̱ tsie xi kjima tikoó.
\v 21 Kuíni nga kixi̱ kixi̱ ni'ánjne̱ ni xi ndyi̱ni'ánjne̱, jmí tsi ta nguindyi̱ko̱n Ndi̱a̱ná tsi, ko̱jo nguindyi̱ko̱n xtaa̱ nga.
\p
\v 22 Kó ti ki̱a̱ ndyi̱nanguiyajne̱ ingo nda̱ ṉts'ié, kui xi je kjín ndi̱ya akójne̱ nga nda fíjo̱ xaá, kó 'niú mejeén ko̱síko̱jojnú nga̱t'a̱ kui je 'niú ma'niátakónjnú jún.
\v 23 Kó kjo̱a̱a̱ Titoo̱ mejénna xiyájnú'un nga nijan tjíts'enxájo̱na tangat'aa̱ kjo̱a̱nda tsa̱jún. Kó kjo̱a̱a̱ já ṉts'ie xi ngasee̱ xta̱ na̱ngo̱xi̱i̱ xí katsanguiya, kó kui jaá ti ndyi̱tsja̱á kjo̱a̱je Kristoo̱ kjo̱a̱a̱ xá xi ndyi̱ts'en.
\v 24 Kji'a nga kjo̱chókónjnú ngatamabe ngayeje xta̱ na̱ngo̱xi̱i̱ kjo̱a̱tjójnú ko̱jo mí kjo̱a̱a̱ nga tsja majne̱ kjo̱a̱a̱ jún.
\c 9
\s Bi ts'én katsáyá Pabloo̱ xikó ts'én chja̱'ásón chji̱e̱ xi ko̱nanguíyaá xta̱ na̱ngo̱xi̱ xi chji̱a̱ni Judea̱
\p
\v 1 Nde chjiénjín nga xo̱jo̱n kuit'ajnú'un kjo̱a̱a̱ chji̱e̱ xi tjítjo'ásón tsi̱'e̱ xta̱ na̱ngo̱xi̱ tsjiee̱ Néná xi síndo Judea̱,
\v 2 nga̱t'a̱ je be an nga mejénjnú ko̱siko̱jojnú. Tsjá kamána nga kixiyáa̱ kui nii̱ xta̱ xi chji̱a̱ni nangui Masedonia̱, kó bo̱a̱ kixiáa̱n nga xta̱ xi chji̱a̱ni Akaya̱ ndeskande koó nó xi ikitjá je síndonda nga tsja̱a kui chji̱e̱e̱. Kji'a nga xta̱ xi chji̱a̱ni Masedonia̱ tsint'ie kui nii̱ mejeén ngayejee̱ nga kamámejeén asíko̱jo.
\v 3 Tanga ts'éntsanguiyájnú'un já ṉts'ie xi'bi̱, tsi̱'e̱ nga jmí tsi ta kjo̱a̱nda ka̱ma nga tsja kamána kjo̱a̱a̱ jún, tasá ti̱ndyiondajnú xikó kixiánjnú'un.
\v 4 Ti'ankjínjnúu̱ takónjnú kókji'i kjo̱a̱soboá k'uiéjne̱ ji̱n ko̱jo tsi jún tsi tjín xta̱ Masedonia̱ xi konguínjo̱jne̱, kó jún kji̱e̱ tikóndajínjnú kui chji̱e̱e̱.
\v 5 Kó kuíni nga kats'enkjó an nga 'niú tsí'áa̱ kui já ṉts'iee̱ tsi̱'e̱ nga ko̱e̱je̱tjón nga ko̱e̱je̱katsijenjnú, kó ko̱síko̱jojnú nga ku̱i̱'íjñanda kui chji̱e̱ xi jún ko̱e̱'éjnú ki'míjnú. Bo̱a̱ ts'én nga je s'i̱jñanda kui chji̱e̱ xi ngayeje takónjnú ko̱e̱'éjnú, kó jmí tsi xikoó tsi ngo kjo̱a̱'niú nga ko̱e̱'éjnú.
\p
\v 6 Ngatja'átsjienjnú kui nii̱: Xta̱ xi chiboa 'bítji̱e̱, chiboa cha̱n foa'átikó. Kó xta̱ xi tsie 'bítji̱e̱, tsie cha̱n foa'átikó.
\v 7 Nga ngo nga ngojnú te'éjnú xikó kji'i ndibánií ini̱ma̱jnú, kó jmí tsi ngayejejín takónjnú ko̱jo jmí tsi kjo̱a̱a̱ kjo̱a̱'niú nga ko̱e̱'éjnú. Nga̱t'a̱ Néná tjoó xta̱ xi tsja tjiín nga tsjá ni xi tsjá.
\v 8 Kó Néná tjiín nga'niú tsi̱'e̱ nga tsja̱ajnú ngayeje to̱ko̱ya kjo̱a̱nda, tsi̱'e̱ nga ngatsjé ni̱xtjin k'uiéjnú ngayeje ni xi chjiénjnú, kó ngaskande ts'atio ngase k'uiéjnú, tsi̱'e̱ nga ka̱ma ko̱siko̱jojnú xta̱ xi ngasee̱.
\v 9 Xikó ts'én kjit'a xo̱jo̱n eén Néná nínga bi tsoó:
\q Ni xi tjiín kuí kats'énkja'asón nga katsjaá xta̱ ni̱ma̱a̱,
\q kó kjo̱a̱kixi̱ tsi̱'e̱ ngatsjé ni̱xtjin tikón.
\m
\v 10 Néná xí tsjá xojmá xi s'itji̱e̱e̱, kó ti tsjá ni chiniee̱ nga. Kó ti bo̱a̱ ti ts'én tsja̱ajnú jún ngayeje ni xi chjiénjnú, kó sa̱'ínkjín ni nda xi ndyi̱'bítji̱e̱jnú, tsi̱'e̱ nga ka̱ma ko̱siko̱jojnú kje̱'e xta̱.
\v 11 Kjín to̱ko̱ya kjo̱a̱cho̱n k'uiéjnú, kó ka̱ma ngayeje takónjnú ko̱siko̱jojnú xtaa̱. Ni xi jún ko̱nanguíyajo̱jne̱ ji̱n, kuí xí sa̱'ín nga kjín ngase xta̱ xi tsja̱á ndok'óchji Néná.
\v 12 Kji'a nga tjifíjoo̱ kui kjo̱a̱bosíko̱joo̱ xta̱ na̱ngo̱xi̱ tsjiee̱, tjímonguínjoo̱ ni xi chjieén, kó bo̱a̱ ts'en kjín xta̱ xi tsja̱á ndok'óchji Néná.
\v 13 Nga ko̱siko̱jó kuí xtaa̱ sa̱'íntsjaá Néná, nga̱t'a̱ jún kanda'yá'énjnú éntjatsi̱e̱e̱ Jesukristoo̱ xi timatji̱nguijnú, ko̱jo kjo̱a̱a̱ nga ngayeje takónjnú nga ndyi̱bosíko̱jojnú xta̱ xi'ba̱ ko̱jo ngayeje xta̱ xi ngasee̱.
\v 14 Kó kji'a nga kui xtaa̱ ku̱i̱chji̱a̱a̱ Néná, ku̱i̱chji̱a̱tjéjnú kjo̱a̱a̱ nga tjoó jún ko̱jo kjo̱a̱a̱ kui kjo̱a̱nda je xi je katsjájnú Néná.
\v 15 ¡Ndok'óchji̱í Néná kjo̱a̱a̱ ni xi tsjáná! ¡Nde jmíjínná ngo én kó k'uíi̱n kjo̱a̱nda je xi ta katsjatsíná!
\c 10
\s Bi ts'én kijíjindojo̱ Pabloo̱ xá xi Néná katsjaá
\p
\v 1 Nguindyi̱ko̱n Kristo̱ xi tjoó ko̱jo xi nda ts'énjo̱ xtaa̱, an Pabloo̱ ngo ni kuichjiájojnú'un nga̱t'a̱ tjín xta̱ xi tsó nga chini xó an nga ki̱a̱ tikónjinjnú'un, tanga tajá xó chjiá an nga ki̱a̱jín tikónjinjnú'un.
\v 2 'Niú mí'ájnú'un nga kji'a nga kjuinkónjnú'un, ngata̱ jmí kjo̱a̱'niú ni'ánjínjnú'un nga tajá sa̱'injo̱jnú'un. Nga̱t'a̱ tjíngoo̱ ko̱n an nga tajá sa̱'injo̱ an kui xi ndyi̱tsó nga xikoó tsi xta̱ ta chiboa ndyi̱'naxiéjne̱ yojojne̱.
\v 3 Kjénní nga kui nga̱sondiee̱ tindyión ji̱n, tanga jmí tsi bo̱a̱ ts'én ndyi̱bixkánjne̱ xikó ts'én kján xtaa̱ kui nga̱sondiee̱.
\v 4 Nga̱t'a̱ kui ni xi ni xi tjíbixkánjo̱ ndyi̱'míi̱, jmí tsi nii̱ kui nga̱sondiee̱, nga'niuú Néná boá, nga'niú xi ka̱maa̱ sa̱'ínkjatsón nga'niuú ni xi ndajiín.
\v 5 Kó bo̱a̱ ts'én si̱'anchajajne̱ tajmí énní ko̱jo kjo̱a̱nk'atakón xi sakó nga'niuú xi 'bíchjaá xtaa̱ nga sku̱i̱e̱ Néná, tsi̱'e̱ nga ko̱sikjoyájne̱ kjo̱a̱kjíntakoón xtaa̱ kó ku̱i̱nt'ié'eén Kristoo̱.
\v 6 Kó je tindyiondajne̱ nga si̱'anjéjne̱ ta'yaní xi ku̱i̱nt'ié'énjín, tanga chjiénga jún tjón je nda kanda'yá'énjnú.
\p
\v 7 Jún xi tsitsíjenjnúu̱ ni xi ya sónk'aá. Tsi tjín xi s'ijii̱n nga Kristoo̱ chji̱a̱ni, nga ts'énkjó nga ko̱jo ji̱n ki̱a̱ ndokjo̱a̱ni ji̱n Kristoo̱ xikoó kui.
\v 8 Soboájín mana nga je k'oxié an yojona kjo̱a̱a̱ xá xi tjínjne̱, nga̱t'a̱ Ndi̱a̱ná xí katsjájne̱ kui xaá tsi̱'e̱ nga sa̱kó nga'niújnú jún, kó jmí tsi tsi̱'e̱ nga si̱'ankjiéjnú.
\v 9 Mejénjínna nga kuindyiandikónjnú'un kjo̱a̱a̱ xo̱jo̱n xi ts'éntsanguiyájnú'un,
\v 10 nga̱t'a̱ nga ja̱koxi̱ tjín xta̱ xi tsó nga xo̱jo̱nna achichí xó tajá ko̱jo 'niú xó chji̱a̱, tanga nga an ma xó xi tikónjinjnú'un inda xó an, kó nga ch'o xó énna.
\v 11 Tanga kui xta̱ xi tsó kui nii̱, chjiénga sku̱i̱e̱ nga xikó ts'én ndokjo̱a̱jne̱ nga xo̱jo̱n nga kjin tindyiónjnú, ti bo̱a̱ ti kon ka̱majne̱ nga ki̱a̱ ma ku̱i̱ndyionjo̱jne̱ jún.
\p
\v 12 Nga̱t'a̱ ka̱majín takónjne̱ nga nijan ka̱majne̱ kui xta̱ xi ti kuii̱ yojoo̱ nda ts'én'boxié. Kui xtaa̱ bejín ni xi ndyi̱ts'en nga ndyi̱tsaton kjo̱a̱ch'áṉcha̱ nga ndyi̱'bochi̱bo̱a̱jo yojoo̱ nga ndyi̱ts'enkjién kjo̱a̱kjíntakón xi tsi̱'e̱.
\v 13 Tanga ji̱n nga 'ne̱, ta ngototo xá xi katse'éjne̱ ji̱n xi je 'naxiénijne̱ yojojne̱. Ku̱i̱tjatiojínjne̱ tsindió xi íjñaá Néná xájne̱ tsi̱'e̱ nga jáchójne̱ ngaskande nínga tindyiónjnú jún.
\v 14 Kuíni nga jmí tsi ndyi̱bitjatiójne̱ nga je ndyi̱'naxiéjne̱ yojojne̱, xikoó tsi jáchójínjne̱ nínga tindyiónjnú. Ja̱koxi̱ nga ji̱n boá xi tjón jáchochonjne̱ nga ik'íni̱jmijne̱ éntjatsi̱e̱e̱ Kristoo̱.
\v 15 Kó jmí tsi ji̱n xi je ko̱'na̱xiéjne̱ yojojne̱ kjo̱a̱a̱ xá xi kats'én kje̱'e xta̱. Tasá ndyi̱chiyájne̱ nga 'niú ngase s'i̱jinjnú Néná, tsi̱'e̱ nga tsie ngase xá xi ka̱ma si̱'anjne̱ ngu̱i̱jinjnú.
\v 16 Kó bo̱a̱ ts'én kjin ngase konguínjne̱ nga k'uini̱jmi̱jne̱ éntjatsi̱e̱e̱ Kristoo̱, ngu̱i̱ndie xi kjin ngase máa̱ nínga tindyiónjnú. Tanga jmí tsi ki̱a̱ konguínjne̱ nínga kje̱'e xi je kats'énxá, tsi̱'e̱ nga jejín ko̱'na̱xiéjne̱ yojojne̱ kjo̱a̱a̱ xá xi kats'én kje̱'e xta̱.
\p
\v 17 Tsi tjín xi mejeén nga je k'o̱xié yojoo̱, bo̱a̱ nga ts'én, tanga kjo̱a̱a̱ ni xi Ndi̱a̱ná kats'énjo̱.
\v 18 Nga̱t'a̱ kuijín xi si̱'anjo̱'o kui xi nda ts'én'boxié yojoo̱. Kuí xí si̱'anjo̱'o kui xi Néná nda ts'én ku̱i̱chji̱a̱ kjo̱a̱a̱ kui.
\c 11
\s Bi ts'én katsáyá Pabloo̱ ni xi ts'én já apostro̱ ndisoo̱
\p
\v 1 ¡Achichí ra nda kji'i tsi si̱'anchíkjo̱a̱ chiíjnú'un tsi xikoó ngo nda̱ xi tsabeé nga kuichjiájojnú'un! Ta xikó ts'énnií tanga ti'anchíkjo̱a̱ chiíjnú'un.
\v 2 Nga̱t'a̱ kui kjo̱a̱chi̱ni̱ xi tjínna kjo̱a̱a̱ jún, Néná xí katsanguiya. Nga̱t'a̱ an je xikoó tsi katsjáa̱ jún nga ta ngo tsi xi̱'in xi ku̱i̱xanjo̱jnú, kó kui xi̱'ii̱n kuí xí Kristoo̱. Mejénna nga xikoó ngo tsakjin xo̱ngo xi kji̱e̱ jmí xi̱'in 'béjiín, nga bo̱a̱ ts'én sa̱'ink'as'iénjnú'un.
\v 3 Tanga nda̱ kjimana nga xikó ts'én ye̱e̱ kats'énkjién kjo̱a̱mañaa̱ nga ts'aṉcha̱jo na̱ Ebaa̱, nga ti bo̱a̱ ti ts'én xi̱'ṉcha̱jojnú jún, tsi̱'e̱ nga ka̱matsabéjii̱n kjo̱a̱kjíntakónjnú kó jmí tsi tsjie ts'én ko̱jo ngayeje takónjnú nga konguíntji̱nguíjnúu̱ Kristoo̱.
\v 4 Kui nii̱ t'íxianjnú'un nga̱t'a̱ boe'éjnúu̱ ngu̱i̱ndie nga ngo xi kjo̱chó nga ku̱i̱'íni̱jmijnú kjo̱a̱a̱ ngo Kjiso̱ xi kje̱'e xikoó xi je ki'míyajne̱ ji̱n. Ni'ánjo̱'ójnú ngo a̱sién ni̱xtjin xi kje̱'e xikoó xi je kini'ánjo̱'ojnú jún. Ni'ánjo̱'ójnú ngo éntjatsi̱e̱ xi kje̱'e xikoó xi je kini'ánjo̱'ojnú jún.
\v 5 Kó bee̱ ko̱n an nga jmí tsi chichí ngase mana yojona, nguindyi̱ko̱n kui já apostro̱ yi'i xi tjiín.
\v 6 Nda tsi jmí tsi 'niú mana chjiá an nguindyi̱ko̱n xtaa̱, tanga be an ni xi tsi̱'e̱ Néná, kó kui nii̱ xi ngatsjé ni̱xtjin ndyi̱bokojne̱ jún.
\p
\v 7 Kji'a nga ini̱jmijnú'un éntjatsi̱e̱e̱ Néná ja'achjíjínjnú'un. Nga kui nii̱ kats'en an ni̱ma̱takón ijñá an yojona kó jún nk'a kats'enk'ijñájnú'un. ¿A kats'enjé an nga bo̱a̱ kats'en an?
\v 8 Kje̱'e na̱ngo̱xi̱ ja'axíi̱n too̱n tsi̱'e̱ nga kats'en an xána nga kats'ensénjnú'un.
\v 9 Kó kji'a nga kis'ijñajinjnú'un nga kamáchjiénna ngo ni, jmí ni̱xtjin nga jún iniéjnú'un yojona, nga̱t'a̱ kui ṉts'ié xi chji̱a̱ni nangui Masedonia̱ katsjána ngayeje ni xi kamáchjiénna. Ngojín ch'ia é xi kats'énni'ínjnú jún kamá an, kó jmí ni̱xtjin bo̱a̱ ka̱ma.
\v 10 Jmíjín xi ku̱i̱'íchjaá kui kjo̱a̱tsja xi'bi̱ ngayeje nangui Akaya̱. Be an nga ja̱koxi̱ ni xi t'íxian an, xikó ts'én ja̱koxi̱ Kristo̱ xi tikónjinna.
\v 11 ¿Mí kjo̱a̱a̱? ¿A kjo̱a̱a̱ nga tjójínná jún? ¡Néná be nga achichí tjóna jún!
\p
\v 12 Tanga ni xi ts'en an, takó sa̱'in ra an, tsi̱'e̱ nga tsjandiéjáa̱n kui xta̱ xi mejeén nga ka̱ma xikoó ji̱n tsi̱'e̱ nga je k'o̱xié yojoo̱.
\v 13 Nga̱t'a̱ ta xta̱ apostro̱ ndiso tsi bo̱a̱, kó kui boá xi ndyi̱'boṉcha̱jo maña̱ xtaa̱ nga apostroo̱ Kristoo̱ ndyi̱tsoó yojoo̱.
\v 14 Kó ngata̱ ma ndikónjínjnú, nga̱t'a̱ ti kuii̱ xindajín Satanaa̱ ts'enkjátsónyá maña̱ yojoo̱ nga ndítsjiee̱ Néná tsoó yojoo̱.
\v 15 Kó kuíni, ngata̱ fíndikónjínjnú nga tjín xta̱ xi bosikójo xindajín xi ts'enkjátsónyá maña̱ yojoo̱ nga xta̱ xi ts'én ni xi nda ma. ¡Tanga kjo̱chó ni̱xtjin nga sa̱ko̱ó chjií ni xi kats'én!
\s Bi ts'én katsáyá Pabloo̱ nga kjín kjo̱a̱ni̱ma̱ ja'atio tangat'anii̱ xaá
\p
\v 16 Ti bo̱a̱ ti xian nguiníjnú'un nga ngojín xi sa̱'ínkjó nga tsabéna, tanga tsi bo̱a̱ ts'én ni'ánkjójnú, te'éndiéjnú'un nga kuichjiájojnú'un xikoó ngo xi tsabeé, tsi̱'e̱ nga je k'o̱xié chií an yojona.
\v 17 Ni xi chjiá an, chjiá an tanga jmí tsi Ndi̱a̱ná xi ts'éntsjána ni xi kuichji̱a̱ an, taxkiya chji̱a̱ an nga̱t'a̱ ma ko̱n an nga je 'boxié an yojona.
\v 18 Kó nga achichí ma xta̱ xi je 'boxié yojoo̱ kjo̱a̱a̱ ni xi ts'én, kuíni nga ti bo̱a̱ ti sa̱'in an nga, nga je k'oxié an yojona.
\p
\v 19 Achichí kjínkónjnú jún, kuíni nga tsja majnú nga nda'yájnúu̱ xta̱ xi tsabeé.
\v 20 Ni'ánchíkjo̱a̱jnúu̱ tsi tjín xí moso̱ xi kastiñá sa̱'ínjnú, ko̱jo tsi tjín xí k'o̱ṉcha̱jojnú, ko̱jo tsi tjín xí sa̱'ínchéjéjnú ni xi tsa̱jún, ko̱jo tsi tjín xí je k'o̱xiéjnú yojoo̱, ko̱jo tsi tjín xí ko̱t'a t'anijonjnú.
\v 21 Tanga ji̱n jmí tsi bo̱a̱ ts'én tajá kini'ánjo̱jne̱ jún xikoó kui xtaa̱, achichí soboá mana nga bo̱a̱ xian an.
\p Tanga tsi tjín xí máa̱ nga je 'boxié yojoo̱, ja̱ ti bo̱a̱ ti ka̱ma sa̱'in an nga, nda tsi kjo̱a̱tsabé boá kui nii̱.
\v 22 ¿A xta̱ ebreo̱ boá kui jaá? Ja̱ ti kui an nga. ¿A xta̱ Israe̱l boá? Ja̱ ti kui an nga. ¿A xta̱ tji̱e̱e̱ Abraa̱m boá? Ja̱ ti kui an nga.
\v 23 ¿A xta̱ mosoo̱ Kristoo̱ boá kui jaá? Xikoó tsi tsabéna nga chjiá an. 'Niú ngase je kats'enxá an ta bo̱a̱jiín kui jaá, kjín ndi̱ya je akja'yana ndo̱bo̱a̱ya, ti kjín ndi̱ya je akjana, kó ti kjín ndi̱ya nga je mején ma ni'ánk'iénna.
\v 24 Ún ndi̱ya nga xta̱xá judíoo̱ katsjá kjo̱a̱ nga kini'ánjéna nga akjana kantji'ún nijún ń'niú, xikó ts'én tikoón nga botíjé kui jaá.
\v 25 Ján ndi̱ya je akjana yá. Ngo ndi̱ya nga ts'aya xtínna ndi̱jo̱ xtaa̱. Ján ndi̱ya kitinguíndió tjotso je xi kijíya an. Ngo ni̱xtjin ngo ni̱xtji̱e̱n je kitsjiensón an ndáchíkoón.
\v 26 Achichí kjín ndi̱ya xi je kistso'bá an tajñání, kuíni nga je kamábe an ndikoón ndeje', ndikoón xta̱ chejé, ndikoón ngu̱i̱jii̱n xta̱ nanguina ko̱jo ngu̱i̱jii̱n xta̱ xi judío̱jín, ndikoón ni xi ma ngu̱i̱jii̱n na̱xi̱ńdá 'niuú, ndikoón ni xi ma nínga jnoo̱ ko̱jo ngu̱i̱jin ndáchíkoón, ndikoón ngu̱i̱jii̱n xta̱ ndiso xi tix'i̱a̱n ṉts'ié ndyi̱tsó.
\v 27 Je tsie xá xi kats'en an xi kats'énkjiendana. Kjín ni̱xtjin indyiáńjñáa̱ yojona. Je ja'atio an bojó ko̱jo xíndá. Kjín ndyi̱ya ja'atio an kjindiá nga jmí ni iskjíni̱e̱jín an. Kjín ndi̱ya ja'atio an ṉch'án ko̱jo nga jmí ṉjño kis'iejínna.
\p
\v 28 Kui nii̱ ko̱jo kje̱'e ngase ni xi je kamána, kó ngaskande ndyiojón ndyiojón nda̱ kamána kjo̱a̱a̱ ngayeje xta̱ na̱ngo̱xi̱i̱.
\v 29 Tsi tjín xi ma oo̱n, kó ngaskande xikoó tsi ko̱jo an ma onna. Achichí xti mana kjo̱a̱a̱ kui xta̱ xi ndyi̱ts'enchajá kje̱'e xta̱.
\v 30 Tsi chjiénga je k'oxié an yojona, tasá mejénna nga je k'oxié an yojona nga̱t'a̱ nguiti jmíjínna nga'niú.
\v 31 Néná kui xi Na̱'mii̱ Ndi̱a̱ná Jesukristoo̱ be nga ja̱koxi̱ ni xi ts'énchji̱a̱ an, kó kui boá xi nga ni'ántsjaá ta kji'ání.
\v 32 Kji'a nga kis'ijña an na̱xi̱ńdá Damasko̱, nda̱ xtitjón xi ts'énxát'aa̱ nda̱ re Aretaa̱ índo jajuún xi askondá nga̱ntjo̱a̱a̱ na̱xi̱ńdaá tsi̱'e̱ nga stso̱bo̱a̱na.
\v 33 Tanga tjín xta̱ xi ngo ni̱se̱nya íyána tsi̱'e̱ nga kats'énkjatjajenna ngo nga̱ntjo̱a̱ masienkjá xi tikoón xoó na̱xi̱ńdaá, kó bo̱a̱ ts'én jatjo'ma an ngu̱i̱ya tsja kui xtitjoón.
\c 12
\s Bi ts'én katsáyá Pabloo̱ nga nga'niuú Kristoo̱ boá xi tikónni
\p
\v 1 Kjénní nga jmí ni chjíjiín nga je k'oxié an yojona, tanga chjiénga bo̱a̱ sa̱'ín an, kuíni nga kuichji̱a̱jo majnú'un kjo̱a̱a̱ ni xi kamábe an ko̱jo ni xi akóna Ndi̱a̱ná.
\v 2 Be an ngo nda̱ xi s'ijii̱n Kristoo̱, xi je tienijún nónií nga tsanguínjo̱ ngaskande xi ma ján ndi'ak'ajmii̱, bejín an tsi tsanguínjo̱ ko̱jo yojo, axa̱ ta a̱sién ni̱xtjin tsi, tanga Néná xí be kui nii̱.
\v 3 Kó ti be an kui nda̱ xi tsanguínjo̱ ndi'ak'ajmi ján, tsi yojo ko̱jo tsi a̱sién ni̱xtjii̱n ta Néná tsi xi be,
\v 4 kui nda̱a̱ tsanguínjo̱ ngu̱i̱ndie tsjachoo̱n Néná, nínga tsint'ié én xi 'niú tji'má xi kji̱e̱ ngo xta̱ nga̱sondiee̱ xi boe'éndieé nga ku̱i̱chji̱a̱.
\v 5 Ka̱marana je k'oxié an yojona kjo̱a̱a̱ ni xi kamaá kui nda̱a̱, tanga jmí tsi ti an xi je k'oxié an yojona, je k'oxié an yojona tanga kjo̱a̱a̱ nga nguiti jmíjínna nga'niú.
\v 6 Tanga tsi je k'oxié an yojona, kjo̱a̱tsabéjín bo̱a̱ tsi bo̱a̱ sa̱'in an, nga̱t'a̱ ni xi ja̱koxi̱ boá ni xi xiyá an. Tanga bo̱a̱jín sa̱'in an, nga̱t'a̱ mejénjínna nga tjín xi ts'atio sa̱'ínkjó kjo̱a̱a̱ xikó ts'én be ko̱jo xikó ts'én nt'ié kjo̱a̱a̱ an.
\p
\v 7 Kó tsi̱'e̱ nga jejín k'o̱xié an yojona kjo̱a̱a̱ kui ni xi 'niú chjínií xi je akóna Néná, Néná je katsjána ngo kjo̱a̱ni̱ma̱ xi ts'énfoa'atio an, xikó maá tsi ngo nda'yá sis'ieén yojona. Ngo mosoo̱ xindajín Satanaa̱ tjíts'énkja'ationa kjo̱a̱ni̱ma̱, tsi̱'e̱ nga jejín k'o̱xié an yojona,
\v 8 kjo̱a̱a̱ kui nii̱ je ján ndi̱ya tsí'áa̱ Ndi̱a̱ná tsi̱'e̱ kjo̱a̱'áxínna kui kjo̱a̱ni̱ma̱a̱,
\v 9 tanga tasá bi katsóna: “Kjo̱a̱ndana boá xi machjieén, nga̱t'a̱ nga'niúna ma tsijen kjin kjin ngu̱i̱jii̱n xta̱ xi jmíjiín nga'niú.” Kó kuíni nga je k'oxié an yojona nga̱t'a̱ nguiti jmíjínna nga'niú, tsi̱'e̱ nga bo̱a̱ ts'én xcha̱ nga'niuú Kristoo̱ ngu̱i̱jii̱n ni xi ts'en an.
\v 10 Tangat'aa̱ nga tjóna Kristoo̱, achichí tsja mana nga̱t'a̱ nguiti jmíjínna nga'niú, ko̱jo kjo̱a̱a̱ nga ch'o 'mína, ko̱jo kjo̱a̱a̱ nga jmíjínna ni xi machjiénna, ko̱jo kjo̱a̱a̱ nga miyotji̱nguina, ko̱jo kjo̱a̱a̱ kjo̱a̱ni̱ma̱ xi ts'en foa'atio an. Nga̱t'a̱ kji'a nga jmíjínna nga'niú, kji'a boá nga 'niú ngase kjima an.
\s Pabloo̱ bi ts'én akó nga nda̱ kamaá xta̱ na̱ngo̱xi̱ xi chji̱a̱ni Korinto̱
\p
\v 11 Xikó maá tsi ngo nda̱ xi tsabeé kjima an nga je 'boxié an yojona, tanga jún xi kini'ánjnú'un kjo̱a̱'niú nga bo̱a̱ kats'en an. Jún xi chjiénga kini'ántsjajnú'un katsaki, nga̱t'a̱ jmí tsi chiboa ngase chjií an ta bo̱a̱jiín kui já xi apostro̱ yi'i ndyi̱tsoó yojoo̱, nda tsi bo̱a̱ xián an nga jmí ni chjíjiín an.
\v 12 Kis'iena kjo̱a̱chiyákón nga kats'énxájinjnú'un, kó kjo̱a̱ndikoón ko̱jo chi̱bo̱a̱a̱ ko̱jo ni xi kats'en an nga kats'enkjién an nga'niuú Néná, kuí nii̱ xi bokó nga ja̱koxi̱ nga nda̱ apostroo̱ Néná boá an.
\v 13 Nga̱t'a̱ ¿mí ni xi kasakoo̱ xta̱ na̱ngo̱xi̱ xi ngasee̱ xi kasakojínjnú jún? Ta ngototo nga júnjín iniéjnú'un yojona nga kis'ijñajinjnú'un, xikó kats'enjo̱ an xta̱ na̱ngo̱xi̱ xi ngasee̱. ¡Ti̱'anjetakónjnú'un nga ndajín kji'i ni xi kats'enjo̱jnú'un, nga bo̱a̱ kats'en an!
\p
\v 14 Je tikónda an tsi̱'e̱ nga kjuinkátsijenjnú'un xi ma ján ndi̱ya, kó ti nde ngot'e̱ jmí tsi jún k'uiniéjnú'un yojona. Nga̱t'a̱ jmí tsi ni xi tjínjnú jún xi ts'énmongase an, jún xi ts'énmongasejnú'un. Xi xchaá xi chjiénga kjo̱a̱'átjó tsi̱'e̱ nga tsja̱á ndií, jmí tsi ndií kjo̱a̱'átjó tsi̱'e̱ nga tsja̱á xi xchaá.
\v 15 Kó kuíni nga an, nga xikoó tsi na̱'mijnú ma an, achichí tsja ka̱mana nga sa̱'ínkjién yeje an ni xi tjínna, kó ngaskande yojona ngatjie tsi tangat'anii̱ nganda tsa̱jún. Tsi bo̱a̱ ts'én 'niú tjóna jún, ¿a chiboa ngase ka̱matjójnú jún an?
\p
\v 16 Ja̱ je yajnú nga jmí tsi jún iniéjnú'un yojona, tanga tjín xta̱ xi̱ ndyi̱tsó nga an, ngo xó nda̱ maña̱ xi ts'aṉchajojnú'un jún.
\v 17 Kji'a nga tjín xi katsanguiyajnú'un, ¿a ts'aṉcha̱jojnú nga to̱n tsí'ájnú?
\v 18 Titoo̱ 'niú tsí'áa̱ tsi̱'e̱ nga ko̱e̱je̱katsijenjnú, kó katsanguiyajo̱ an ingo nda̱ ṉts'ié. ¿Axa̱ ts'aṉcha̱jojnú Titoo̱? ¿A mí tsi ja̱koxi̱ nga Titoo̱ ko̱jo an ti bo̱a̱ ti ts'én tjíjinjne̱? ¿A mí tsi ti kuii̱ ni ndyi̱ni'ánjne̱ nga?
\p
\v 19 ¿A ndyi̱ni'ánkjójnú nga ndyi̱chjiá'ájne̱ jún ngo kjo̱a̱ni'ánjetakón? Nguindyi̱ko̱n Néná nga ngat'aa̱ Kristoo̱ nga ndokjo̱a̱jne̱. Jún xta̱ xi tjójne̱, ngayeje ni xi ni'ánjne̱ tsi̱'e̱ nga tjisákó nga'niújnú boá.
\v 20 Nga̱t'a̱ nda̱ kjimana tsi kji'a nga kjuinkátsijenjnú'un bo̱a̱jín ts'én sa̱kóna jún xikó ts'én mejénna an, kó nga bo̱a̱jín ts'én sa̱kójnú an xikó ts'én mejénjnú jún. Nda̱ kjimana tsi ndyi̱bokjangájnú yojojnú, tsi tjínjnú kjo̱a̱'ontakón, tsi tjínjnú kjo̱a̱xti, tsi tjínjnú kjo̱a̱ndikonkón, tsi tjínjnú kjo̱a̱ndokjo̱a̱ta'in, tsi tjínjnú énya, tsi tjínjnú kjo̱a̱nk'atakón ko̱jo tsi tjínjnú kjo̱a̱xchán.
\v 21 Ti nda̱ kjimana nga tsi kji'a nga kjóchokón nguiníjnú an, Néná sa̱'ínni̱ma̱takónna ngu̱i̱jinjnú, kó ngaskande ska̱ndá ma ra an kjo̱a̱a̱ kui xta̱ xi kats'énjé ngas'e̱ kó kji̱e̱ ts'énk'oyájín yojoo̱ kjo̱a̱a̱ ni ndándí xí ndyi̱ts'en, ko̱jo nga ndyi̱ts'en kjo̱a̱tondo̱, ko̱jo xi ndyi̱ts'enk'ás'ieén yojoo̱ ni xi ch'o kji'ii̱.
\c 13
\s Bi ts'én katsáyá Pabloo̱ xikó sa̱'ínjo̱ xta̱ na̱ngo̱xi̱ xi chji̱a̱ni Korintoo̱ nga kjo̱chókatsijee̱n
\p
\v 1 Kui xi'bi̱ xi ma ján ndi̱ya nga kjuinkátsijenjnú'un. Ngayeje ni xi ka̱mandajin chjiénga tsi jó ko̱jo tsi ján chistiko̱ xi si̱'ankjién nga ku̱i̱chji̱a̱ ni xi be.
\v 2 Je bo̱a̱ kixiánjnú'un kji'a nga jáchokónjnú'un xi ma joó ndi̱ya, kó ngot'e̱ nda tsi ki̱a̱jín tikón an nga tjíts'en'indóo̱ kui xta̱ xi kats'énjé ngas'e̱, ko̱jo ngayeje xta̱ xi ngasee̱, nga tsi kjuin nguiñá an ni̱ma̱jín ka̱mana jún.
\v 3 Bo̱a̱ ts'en an nga̱t'a̱ ndyi̱mindyiséjnú ni xi ko̱kó nga eén Kristoo̱ boá xi ts'énchji̱a̱ an, tanga Kristoo̱ ngu̱i̱jinjnú bokó nga'niuú, jmí tsi ki̱a̱ tikónjinjnú xikoó ngo xi jmíjiín nga'niú.
\v 4 Nga̱t'a̱ nda tsi jmí nga'niú kis'iejiín nga k'ient'a kro̱ xikoó ngo xta̱, tanga tikón ngot'e̱ tangat'anii̱ nga'niuú Néná. Nga̱t'a̱ ti bo̱a̱ ti ts'én ji̱n jmíjínjne̱ ngo nga'niú xikoó kui nga k'ient'a kroo̱, tanga tangat'anii̱ nga'niuú Néná nga Kristoo̱ tikónjinjne̱ nganda tsa̱jún.
\p
\v 5 Tsitsíjen cha̱n cha̱njnúu̱ yojojnú tsi s'ijinjnú Kristoo̱. Chít'a so̱bo̱a̱jnú yojojnú. ¿Axa̱ a yajínjnú nga Jesukristoo̱ tikónjinjnú? Ngototo tsi ndajín ts'en jatjo xki̱i̱ nga kichit'ajnú yojojnú.
\v 6 Tanga skoyáa̱ nga xcha̱jnú jún nga nda ts'én jatjo xki̱jne̱ ji̱n nga eén Kristoo̱ xi ndyi̱ndokjo̱a̱jne̱.
\v 7 Ndyi̱ndokjo̱a̱jne̱ Néná tsi̱'e̱ nga si̱'ánjínjnú ni xi ndajín kji'i, jmí tsi tsi̱'e̱ nga xcha̱ nga ji̱n je kichit'ajne̱ yojojne̱ kó nda jatjojne̱, tasá tsi̱'e̱ nga ni xi nda si̱'ánjnú jún, nda tsi xtaa̱ ndyi̱tsó nga ndajín ts'én jatjo xki̱jne̱.
\v 8 Nga̱t'a̱ ta jmíjín ni xi ka̱ma si̱'anjne̱ kondraa̱ ja̱koxi̱i̱ Jesukristoo̱, kuíni nga tasá kjo̱a̱ndaa̱ ja̱koxi̱i̱ ni xi ndyi̱ni'ánjne̱.
\v 9 Achichí tsja majne̱ nga tsó xtaa̱ nga ji̱n jmíjínjne̱ nga'niú, kó nga jún tjínjnú nga'niú xi tsjá Néná. Takó ndyi̱ndokjo̱a̱jne̱ Néná tsi̱'e̱ nga ka̱ma kixi̱ ndo̱jo ndo̱jojnú xikó ts'én mejeén kui.
\v 10 Kuíni nga kui xo̱jo̱o̱n tjíts'en'indójnú'un nguindiee̱ nga kjuinkátsijenjnú'un, tsi̱'e̱ nga, nga kjócho an tajájín sa̱'injo̱jnú'un, nga̱t'a̱ Ndi̱a̱ná xí katsjána kui xaá, jmí tsi tsi̱'e̱ nga sa̱'inkjiéjnú'un, tasá tsi̱'e̱ nga sa̱kó nga'niújnú jún.
\s Pabloo̱ bi ts'én kats'énkjiet'a xo̱jo̱o̱n
\p
\v 11 Kó nga fet'anii̱ ni xi xiyájnú'un já ṉts'ie, mejénna nga k'uiéjnú kjo̱a̱tsja, tindyi̱séjnú nga xta̱ xi kixi̱ ndo̱jo ndo̱jo ka̱majnú, te'é nga'niújnúu̱ xingu̱i̱jnú, kó ti bo̱a̱ ti ts'én ngas'iejnú jún, ngat'iéjnú kjo̱a̱xió, kó bo̱a̱ ts'én nga Néná xi tjiín kjo̱a̱xioó ko̱jo xi tjiín kjo̱a̱tjoó nga t'íjñajinjnú.
\v 12 Ti'antindejnú xingu̱i̱jnú nga ngo nga ngojnú.
\v 13 Tinde xó bo̱a̱ tsó ngayeje xta̱ tsjiee̱ Néná.
\p
\v 14 Kjo̱a̱ndaa̱ Ndi̱a̱ná Jesukristoo̱, kjo̱a̱tjoó Néná ko̱jo A̱sién Ni̱xtjii̱n Néná ngat'índojo̱jnú ngatsjé ni̱xtjin. Bo̱a̱ kji'i.