\id GAL - MAZATECO DE SAN PEDRO IXCATLÁN
\h XTA̱ GALASIA̱
\mt1 Xo̱jo̱n xi apostro̱ Pabloo̱ katsanguiyaa̱ xta̱ na̱ngo̱xi̱ xi chji̱a̱ni Galasia̱
\c 1
\s Bi ts'én kats'éntinde Pabloo̱ xta̱ na̱ngo̱xi̱ xi chji̱a̱ni Galasia̱
\p
\v 1 An Pabloo̱, nda̱ apostro̱\f + \fr 1.1 \ft “Xi kananguiyaa̱” tsó “nda̱ apostro̱” axa̱ “já apostro̱” nga én griego̱.\f* xi jmí tsi xtaa̱ xi katsanguiya, nga̱t'a̱ Jesukristoo̱ ko̱jo Néná xi Na̱'mi xi kats'énkja'á'yaá kui, kuí xí katsjáxána.
\v 2 An xí tjíts'entindejnú'un jún ko̱jo ngayeje já ṉts'ie xi chji̱a̱ni na̱ngo̱xi̱i̱ nangui Galasia̱:
\v 3 Nga tsjajnú kjo̱a̱ndaa̱ ko̱jo kjo̱a̱xioó Néná xí Na̱'mii̱ ko̱jo Ndi̱a̱ná Jesukristoo̱,
\v 4 kui xi katsjá yojoo̱ nga kini'ánk'ién tangat'anii̱ jéná, tsi̱'e̱ nga k'o̱xié'aná kui nga̱sondie xi ndajín xi tindyión kuí ni̱xtjii̱n, xikó ts'én kamámejeén Néná xí Na̱'mii̱.
\v 5 Kui tsi̱'e̱ ngatama kjo̱a̱jee̱ ngatsjé ni̱xtjin. Bo̱a̱ kji'i.
\s Bi ts'én íni̱jmi Pabloo̱ nga jmíjín ingo éntjatsi̱e̱e̱ Néná
\p
\v 6 Achichí kijíndikónna nga tanisién tsá kini'ánkjinjnúu̱ yojojnú Néná, kui Néná xi tsíchji̱a̱jnú nga katsjájnú kjo̱a̱nda xi sakóná ngat'aa̱ Kristoo̱, tanga kje̱'e éntjatsi̱e̱ ndyi̱monguíntji̱nguíjnú.
\v 7 Nga ja̱koxi̱ jmíjín kje̱'e éntjatsi̱e̱, ta ni xi kjima nga tjín xta̱ xi ndyi̱mindyiátsabejnú kó mejeén nga ko̱síkjoyá éntjatsi̱e̱e̱ Kristoo̱.
\v 8 Tanga nda tsi ngaskande ji̱n ko̱jo tsi ngo ndítsjiee̱ ndi'ak'ajmii̱ xi ku̱i̱'íni̱jmijnú kje̱'e éntjatsi̱e̱e̱ Néná kjo̱a̱a̱ xi je ik'íni̱jmijne̱, ngat'íko̱jonii̱.
\v 9 Xikó je kixiánjnú'un ngas'e̱, ti bo̱a̱ xian nguiñá an ngot'e̱: Tsi tjín xi ku̱i̱'íni̱jmi kje̱'e éntjatsi̱e̱e̱ Néná xi kje̱'e tsó xikoó xi je kini'ánk'as'ienjnú, ngat'íko̱jonii̱.
\p
\v 10 Nga̱t'a̱, ¿a kjo̱a̱ndaa̱ xtaa̱ xí ts'énmongase an, axa̱ kjo̱a̱ndaa̱ Néná boá? ¿Axa̱ xtaa̱ xí ts'éntsjáa kjo̱a̱tsja? Nga̱t'a̱ tsi mejénna nga xtaa̱ xi tsja ka̱maa̱ ni xi sa̱'in an, nguiti mosoo̱ Kristoo̱jín ka̱ma an.
\s Bi ts'én íni̱jmi Pabloo̱ kjo̱a̱a̱ xá xi kats'én
\p
\v 11 Tanga xiyájnú'un kui nii̱ já ṉts'ie, nga kui éntjatsi̱e̱ xi je kixiyajnú'un, jmí tsi tsi̱'e̱ xtaa̱.
\v 12 Nga̱t'a̱ jmí tsi ngo xta̱ xi katsjána ko̱jo tsi xi akóyána, kuí Jesukristoo̱ xi katsáyána kui eén.
\p
\v 13 Je kanda'yájnú xikó ts'én kis'ijña an, nga kamábendikón an Néná xikó ts'én xta̱ judíoo̱, kó kóts'en nga tsangatji̱nguíi̱ xta̱ na̱ngo̱xi̱i̱ Néná ko̱jo kóts'en kamámejénna nga kats'enkjié an.
\v 14 Xikó ts'én tikoón xta̱ judíoo̱ nga k'uíndo nguindyi̱ko̱n Néná, achichí ma xta̱ nanguina xi nijan kamáxchájo̱ an xi kats'ée̱n nga ja'atjóo̱n, nga̱t'a̱ 'niú ngase chi̱ni̱ kamá an nga kats'enkjatjosón an kjo̱a̱xcha̱á xta̱ xi xchána.
\v 15 Tanga nguindiee̱ nga stse̱n an, Néná íjñát'axínna kó katsjáxána, nga̱t'a̱ achichí je kjo̱a̱ndaa̱ kui.
\v 16 Kó ni̱xtjin nga kamámejeén akóna ndií, tsi̱'e̱ nga k'uini̱jmi an éntjatsi̱e̱e̱ Néná ngu̱i̱jii̱n xta̱ xi judío̱jín, kó nde ngojín xta̱ xi asíyáa̱ tsi nda ko̱jo tsi ndajín kji'i kui nii̱.
\v 17 Ti nde kijíjín an na̱xi̱ńdá Jerusale̱n nga kijíkatsijée̱n kui já xi kamá apostro̱ nguindiee̱ nga kamá an, tasá ti kji'a kijí an ngu̱i̱ndie xi síndojin nangui Arabia̱, s'e̱ ti kijí nguiní an Damasko̱.
\p
\v 18 S'e̱ jaskan nguije ja'a ján nó kijí an na̱xi̱ńdá Jerusale̱n tsi̱'e̱ nga sku̱i̱e̱ an nda̱ xi 'mí Peé, kó tji'ún ni̱xtjin kamána ki̱a̱a̱ ko̱jo kui nda̱a̱,
\v 19 tanga nde ingojín já apostro̱ xi ngasee̱ xi kamábe ngase an, ta kuí tsi Sandiyaá kui xi ṉts'i̱e̱ ma Ndi̱a̱ná Jesukristoo̱.
\v 20 Néná xí be nga ja̱koxi̱ ngayeje ni xi ts'én'bit'a an xo̱jo̱n.
\p
\v 21 S'e̱ jaskan kijí an ngu̱i̱ndie xi síndo ngu̱i̱jii̱n Siria̱ ko̱jo Silisia̱.
\v 22 Kó kui ni̱xtjin ján nde kamábejínna xta̱ na̱ngo̱xi̱i̱ Kristoo̱ xi síndo nangui Judea̱.
\v 23 Ta bi tsi katsó xtaa̱ nga tsíchji̱a̱: “Kui nda̱ xi tsangatji̱nguiná ngas'e̱, kui boá xi ngot'e̱ ts'én'bini̱jmi éntjatsi̱e̱e̱ kui kjo̱a̱s'ijin xi kje̱'e ni̱xtjin kamámejeén kats'énkjié.”
\v 24 Kó tangat'anii̱ kui nii̱ nga kui xtaa̱ katsjaá kjo̱a̱je Néná.
\c 2
\p
\v 1 Jaskan nguije ja'a tienijún nó, kijí nguiní an na̱xi̱ńdá Jerusale̱n nga kijíjo̱na Bernabee̱ kó ti kijíjo̱ an Titoo̱ nga.
\v 2 Kó kijí an nga̱t'a̱ Néná akóna nga chjiénga bo̱a̱ sa̱'in an, kó tsi̱'e̱ nga ta kjo̱a̱ndajiín xá xi tjíts'en an, kixiyáa̱ kui xtaa̱ kui éntjatsi̱e̱ xi 'bini̱jmíi̱ xta̱ xi judío̱jín.
\v 3 Tanga ti nde Titoo̱ nda̱ griego̱ xi tji̱e̱njona kini'ánjiín kjo̱a̱'niú nga sa̱'iín yojoo̱ sirkunsisioo̱n.
\v 4 Kó nda tsi tjín já ṉts'ie xi maña̱ xi kijíjin'maá xta̱ná, tsi̱'e̱ nga skotsíjen'maá kui kjo̱a̱ndeé kjo̱a̱kitii̱ xi katsjáná ñá xi s'ijinná Kristo Kjisoo̱, tsi̱'e̱ nga kui jaá sa̱'ínná kjo̱a̱'niú nga moso̱ xi kastiñaá kjo̱a̱kitii̱ sa̱'ínná.
\v 5 Kui xtaa̱ nde chií katse'éndiejínjne̱, nga̱t'a̱ mejénjne̱ nga ja̱koxi̱i̱ éntjatsi̱e̱e̱ Néná takó s'i̱jñajinjnú.
\p
\v 6 Tanga kui já xi ya nga nguito̱ko̱o̱ na̱ngo̱xi̱i̱ nde chií ni xi tja̱tsi̱e̱ yísónjiín éntjatsi̱e̱ xi ini̱jmi an. Tsi nguito̱ko̱ ko̱jo tsi jmí, jmí ndasenjínna, nga̱t'a̱ ta ngo ndse̱je̱n ñá nguindyi̱ko̱n Néná.
\v 7 Tasá kamákjiín nga Néná boá xi katsjáxána nga an xi k'uini̱jmíi̱ xta̱ xi judío̱jín, xikó ts'én Peé katsjáxaá nga kui xi ku̱i̱'íni̱jmi̱í xta̱ xi judíoo̱.
\v 8 Nga̱t'a̱ kui Néná xi kats'énkjién Peé nga apostroo̱ xta̱ xi judío̱ kamá, ti kuíni xi kats'énkjiénna nga apostroo̱ xta̱ xi tjín nga̱sondiee̱ kamá an.
\p
\v 9 Sandiyaá, Peé ko̱jo Juaa̱, kui boá xi ya nga nguito̱ko̱o̱ na̱ngo̱xi̱i̱, nga kamákjiín kjo̱a̱a̱ kui kjo̱a̱nda xi katsjána Néná, katsjájne̱ tsja nga ik'índajo̱jne̱ tsi̱'e̱ an ko̱jo Bernabee̱ si̱'anjne̱ xaá Néná ngu̱i̱jii̱n xta̱ xi judío̱jín, tji̱e̱nga kui jaá sa̱'ín xaá Néná ngu̱i̱jii̱n xta̱ xi judío̱.
\v 10 Ta kui tsi ni xi tsí'ájne̱ nga xchi̱yajínjne̱ xta̱ ni̱ma̱ xi chji̱a̱ni na̱ngo̱xi̱i̱ Jerusale̱n, kó kui nii̱ xi ngayeje kon an nga nda tjíts'enkjatjosón an.
\s Pabloo̱ bi ts'én kats'énxchánjo̱ Peé ki̱a̱ na̱xi̱ńdá Antiokía̱
\p
\v 11 Tanga nga je'e Peé k'i̱e̱ na̱xi̱ńdá Antiokía̱, kats'énxchánjo̱ tíkje̱n an, nga̱t'a̱ nga ts'énmonganié éntjatsi̱e̱e̱ Jesukristoo̱.
\v 12 Nga̱t'a̱ tjón ma ra iskjiniejo̱ ṉño̱ xta̱ xi judío̱jín, nguindiee̱ nga kjo̱chó já xi katsanguiya Sandiyaá, tanga nga jachó kui jaá, xín kijí kó íjñámasien, nga̱t'a̱ katsakjónnií xta̱ xi tsó nga chjién xó nga ko̱jo xta̱ xi judío̱jiín sa̱'iín sirkunsisio̱n yojoo̱.
\v 13 Kó xta̱ judío̱ xi ngase xi s'ijii̱n Kjisoo̱ ti jókje̱n kamá xikoó Peé nga, kó ngaskande Bernabee̱ kats'énjo̱'o kjo̱a̱jókje̱e̱n kui jaá nga ti bo̱a̱ ti kats'én kui nga.
\v 14 Kó kuíni nga kamábe an nga jmí tsi kixi̱ tjimájo̱ yojoo̱ xikó kji'i ja̱koxi̱i̱ éntjatsi̱e̱e̱ Kjisoo̱, bi kixiáa̱n Peé nguindyi̱ko̱n ngayeje xta̱ na̱xi̱ńdá: “Tsi ji xi nda̱ judío̱ ji, kó tsi tindyin ji xikó maá xta̱ xi judío̱jín, ¿mí kjo̱a̱a̱ nga mejeén si̱'íi̱n kjo̱a̱'niú xta̱ xi judío̱jín nga k'uíndo xikó ts'én síndo xta̱ xi judíoo̱?”
\p
\v 15 Ji̱n xi xta̱ judío̱ ji̱n, jmí tsi xta̱ jé ji̱n xikoó xta̱ xi judío̱jín, kó jmí tsi xta̱ jé xi judío̱jín xikó 'mií kui xtaa̱.
\v 16 Kó je ya ji̱n nga ngojín xta̱ xi kixi̱ ka̱ma nguindyi̱ko̱n Néná kjo̱a̱a̱ ni xi tjíts'én nga sa̱'ínkjatjosón kjo̱a̱kitii̱, tasá kixi̱ ka̱ma tangat'anii̱ nga s'ijii̱n Jesukristoo̱. Kuíni nga ko̱jo ji̱n xi judío̱ ji̱n kini'áns'ijinjne̱ Jesukristoo̱ tsi̱'e̱ nga kixi̱ ka̱ma ji̱n tangat'anii̱ kjo̱a̱s'ijii̱n Kristoo̱, kó jmí tsi kjo̱a̱a̱ nga si̱'ankjatjosón ni xi tjít'a kjo̱a̱kitii̱, nga̱t'a̱ kjo̱a̱a̱ kjo̱a̱kitii̱ nde ngojín xta̱ xi ka̱ma kixi̱ nguindyi̱ko̱n Néná.
\p
\v 17 Ji̱n xi xta̱ judío̱ ji̱n xi ti s'ijinjne̱ Kristoo̱, ja̱ bo̱a̱ ts'én ndyi̱mindyiséjne̱ nga kixi̱ ka̱majne̱ nguindyi̱ko̱n Néná, tanga tsi bo̱a̱ ts'én tjis'íjñátsijen nga xta̱ jé kjimajne̱, ¿a kuí nii̱ xi tsó nga Kristoo̱ íjñajinjne̱ jeé? ¡Jmí ni̱xtjin!
\v 18 Nga̱t'a̱ tsi ti kotíjña nguiñá an xikó ts'én kis'ijña an ngas'e̱, ti ánní xi nda̱jé tjíts'en an yojona.
\v 19 Tanga nga atíxomana kjo̱a̱kitii̱, je k'ien an tangat'anii̱ kui kjo̱a̱kitii̱, tsi̱'e̱ nga tangat'anii̱ Néná nga kotíjña an.
\v 20 Je k'ien an nga̱t'a̱ je akjat'ajo̱na kro̱ Kristoo̱, je nguiti ánjín xi tikón ngase an, Kristoo̱ boá xi tikónjinna, kó bo̱a̱ ts'én tikón ngase an nga̱sondiee̱ tangat'anii̱ kjo̱a̱a̱ nga s'ijinna ndií Néná, kui xi kats'éntjóna ko̱jo katsjá yojoo̱ nga kini'ánk'ién tangat'anii̱ an.
\v 21 Xínjín ts'enkja'a an kjo̱a̱ndaa̱ Néná. Nga̱t'a̱ tsi kjo̱a̱kitii̱ xi sa̱'ínkixi̱ xtaa̱ nguindyi̱ko̱n Néná, ja̱ ta kjo̱a̱ndaraa̱ nga k'ien Kristoo̱ tsobo̱a̱.
\c 3
\s Bi ts'én íni̱jmi Pabloo̱ nga tangat'anii̱ kjo̱a̱s'ijii̱n nga sakóná A̱sién Ni̱xtjii̱n Néná
\p
\v 1 Jún xta̱ Galasia̱, ¡mí xi ta chininijnú! ¿'Yá xi ts'aṉcha̱jojnú jún tsi̱'e̱ nga ko̱nda'yá'énjínjnúu̱ kui én xí ja̱koxi̱i̱? Nga̱t'a̱ je akako cha̱n cha̱n xikoó tsi jún ma xi kamáyajnú kui Jesukristo̱ xi akjat'a kroo̱.
\v 2 Ta kui tsi ni xi mejénna skuie an kjo̱a̱a̱ jún: ¿A katse'éjnú A̱sién Ni̱xtjii̱n Néná kjo̱a̱a̱ nga ngo nii̱ kjo̱a̱kitii̱ xi ndyi̱ni'ánjnú, axa̱ kjo̱a̱a̱ nga kis'ijinjnú nga kanda'yájnú eén Néná?
\v 3 ¿A tanisién 'niú chinijnú? Nga tjón tjón A̱sién Ni̱xtjii̱n Néná asíko̱jojnú kjo̱a̱a̱ kóts'en ku̱i̱ndyionjnú, kó ngot'e̱ 'ne̱, ¿ánní nga jún so̱bo̱a̱ bo̱a̱ ndyi̱ni'ánkonjnú?
\v 4 ¿A ta kjo̱a̱ndaní kjo̱a̱ni̱ma̱ xi je ikitjatiójnú? Tsi ja̱koxi̱ nga ta kjo̱a̱nda,
\v 5 Néná katsjájnú A̱sién Ni̱xtjii̱n kó kats'én kjo̱a̱ndikón ngu̱i̱jinjnú, kó, ¿ánní nga bo̱a̱ ma? ¿A kjo̱a̱a̱ nga ndyi̱ni'ánkjatjosónjnú kjo̱a̱kitii̱? ¿Axa̱ kjo̱a̱a̱ nga kis'ijinjnú nga kanda'yájnú éntjatsi̱e̱e̱?
\s Bi ts'én íni̱jmi Pabloo̱ kjo̱a̱a̱ ni xi índajo̱ Néná Abraa̱m
\p
\v 6 Abraa̱m kis'ijii̱n Néná, kó kui nii̱ xi Néná kats'énchjínií nga ngo nda̱ xi kixi̱ kamá.
\v 7 Kó kuíni nga jún chjiénga xcha̱jnú nga xta̱ tji̱e̱e̱ Abraa̱m kui boá xi s'ijii̱n Néná.
\v 8 Kó xo̱jo̱n eén Néná kisit'a tjón tjón nga Néná sa̱'ínkixi̱ xta̱ nga̱sondiee̱ tangat'anii̱ nga Néná s'ijii̱n, kó Néná katsáyatjoón Abraa̱m nga bi katsoó: “Ji sa̱'inkjieén tsi̱'e̱ nga tangat'anii̱ ji nga nda ka̱mata'in ngayeje na̱xi̱ńdá xí tjín nga̱sondiee̱.”
\v 9 Kó kuíni nga ngayeje xta̱ xi s'ijii̱n Néná nda mata'in xikó ts'én nda kamáta'in Abraa̱m kui xi kis'ijii̱n Néná.
\p
\v 10 Nga̱t'a̱ ngayeje xta̱ xi ndyi̱koyaa̱ nga kjo̱tjo'a nga ndyi̱ts'enkjátjosón ni xi tjít'a kjo̱a̱kiti xi tikónnieé, ndajín síndo nguindyi̱ko̱n Néná, nga̱t'a̱ je kjit'a xo̱jo̱n eén Néná nínga bi tsoó: “Ngat'íko̱joo̱ ngayeje xta̱ xi sa̱'ínkjatjosónjín ngayeje ni xi kjit'a xo̱jo̱n kjo̱a̱kitii̱.”
\v 11 Kó tikón tsijen tsijen nga ta'yajínni xi xcha̱ nga kixi̱ kjo̱a̱a̱ nga sa̱'ínkjatjosón kjo̱a̱kitii̱, nga̱t'a̱ bi tsó xo̱jo̱n eén Néná: “Nda̱ xi kixi̱ nguindyi̱ko̱n Néná tangat'anií kjo̱a̱s'ijii̱n nga k'uijñáni.”
\v 12 Tanga jmí tsi tjítsó kjo̱a̱kitii̱ nga xi s'ijii̱n Néná kui xi k'uíndo, tasá bi tsó: “Xi sa̱'ínkjatjosón kjo̱a̱kitii̱, kuí nii̱ xi k'uijñáni.”
\p
\v 13 Tsi̱'e̱ nga k'o̱kaniéjínná kjo̱a̱botíjeé kjo̱a̱kitii̱, Kristoo̱ iskjíbé kui kjo̱a̱botíjé xi chji̱a̱ni kjo̱a̱kitii̱ tangat'anii̱ ñá, nga̱t'a̱ bi ts'én kjit'a xo̱jo̱n eén Néná: “Ngat'íko̱joo̱ ngayeje xta̱ xi tsjienguíboa'át'a ngo yá.”
\v 14 Bo̱a̱ kats'én Kristoo̱ tsi̱'e̱ nga nda si̱'anjo̱ xta̱ xi tjín nga̱sondiee̱, jatjosón ni xi ki'mií Abraa̱m, tsi̱'e̱ nga sa̱kóná A̱sién Ni̱xtjii̱n Néná xi katsáyatjón nga tsja̱á xta̱ xi s'ijii̱n.
\p
\v 15 Jún ṉts'ie, k'uijñá chi̱bo̱a̱jnú'un ngo ni xi ts'én xtaa̱: Kji'a nga ngo nda̱ 'bínda ngo ni kó 'bijñá chi̱bo̱a̱ tsja, ta'yajín xi ka̱ma sa̱'ínkjié kui nii̱, ti nde ka̱majín tjín xi ko̱ósón ngasee̱ ni.
\v 16 Ngot'e̱ 'ne̱ nda kji'i, Néná katsáyatjoón Abraa̱m ni xi tsja̱á ko̱jo xta̱ tji̱e̱e̱. Tanga xo̱jo̱o̱n chji̱a̱jín kjo̱a̱a̱ xta̱ tji̱e̱ xi kjín, chji̱a̱ nga ta ngo tsi, nga bi tsó: “Tji̱e̱ xi tse̱”, tjítsó. Kui tji̱e̱e̱ kuí xí Kristoo̱.
\v 17 Ni xi mejénna xian an, kuí nii̱: Ni xi Néná índajo̱ nga atíxomaa̱ nga sa̱'ín Abraa̱m ka̱majiín sa̱'ínkjié ngo kjo̱a̱kiti xi je'e nijún úchán ko̱jo kantié nó jaskan, s'e̱ nguiti ka̱machjíjiín ni xi Néná je katsáyatjón nga tsja̱á Abraa̱m.
\v 18 Nga̱t'a̱ tsi kjo̱a̱kitii̱ ya'anii̱ ni xi tsja̱aná Néná, ja̱ je nguiti kuijín ni xi katsáyatjón Néná ya'anii̱ ni xi tsjá, tanga Néná bo̱a̱ katsoó Abraa̱m nga ta tsja̱arií kui nii̱.
\s Bi ts'én íni̱jmi Pabloo̱ kjo̱a̱a̱ mí kjo̱a̱a̱ nga kis'ijña kjo̱a̱kitii̱
\p
\v 19 Kós'e̱, ¿kó mí chjínií kjo̱a̱kitii̱? Je'e tsi̱'e̱ nga sku̱i̱e̱ xtaa̱ nga jé boá xi ndyi̱ts'en, kó ta kji'a tsi ka̱machjínií kui kjo̱a̱kitii̱ ngaskande nga kjindibá kui xta̱ tji̱e̱e̱ Abraa̱m xi Néná katsáyatjoón nga kjo̱e̱'e, kui xi Kristoo̱. Néná katsanguiya ndítsjiee̱ nga katsjaá Moisee̱ kjo̱a̱kitii̱, kó Moisee̱ xí katsjaá xtaa̱ kui kjo̱a̱kitii̱.
\v 20 Tanga Néná nga tsíchji̱a̱jo Abraa̱m jmíjín xi kats'énkjién, nga̱t'a̱ Néná ta ngo tsi ma.
\p
\v 21 Kós'e̱ kjo̱a̱kitii̱, ¿a kondra̱ tikónnii̱ ni xi katsáyatjón Néná nga tsja̱á Abraa̱m? ¡Jmí! Nga̱t'a̱ tsi kjo̱a̱kitii̱ ka̱maa̱ tsja̱aná kjo̱a̱mindyion, ja̱ kji'a nga ndyi̱ni'ánkjatjosón kuí kjo̱a̱kitii̱, kji'a ra tsobo̱a̱ nga kixi̱ tindyión nguindyi̱ko̱n Néná.
\v 22 Tanga xo̱jo̱n eén Néná tsó nga ngayeje xtaa̱ ngu̱i̱yaa̱ jeé síndo'yá'niú, tsi̱'e̱ nga kui xi s'ijii̱n Jesukristoo̱ Néná tsja̱á ni xi katsáyatjón nga tsja̱á xi s'ijii̱n kui.
\p
\v 23 Ngot'e̱ 'ne̱ s'ijinná Jesukristoo̱, tanga nguindiee̱ nga ko̱kó yojoo̱ Jesukristoo̱, kjo̱a̱kitii̱ íjña'niúná.
\v 24 Xikó ts'én ngo moso̱ nga kjíbenguí jakjíndií, bo̱a̱ ts'en kjo̱a̱kitii̱ nga fíjo̱ná nguindyi̱ko̱n Kristoo̱, tsi̱'e̱ nga s'i̱jinná, kó bo̱a̱ ts'én nga kixi̱ ka̱ma ñá nguindyi̱ko̱n Néná.
\v 25 Tanga ngot'e̱ 'ne̱ nguije s'ijinná Jesukristoo̱, je nguiti chjiénjínná nga tjín xi skíbenguíná.
\p
\v 26 Ngot'e̱ 'ne̱ nga ngayejejnú nga je ndií Néná jún nga̱t'a̱ s'ijinjnú Kristo Kjisoo̱.
\v 27 Ngayejejnú xi s'ijinjnú ko̱jo xi je kastindánijnú Kristoo̱ je kamángojo̱jnú, kó je xikoó tsi Kristoo̱ xi kjima ngo ṉjño xi kichajájnú.
\v 28 Je nguiti jmí ndasenjín tsi xta̱ judío̱ ko̱jo tsi xta̱ griego̱, tsi moso̱ xi kastiñá ko̱jo tsi xta̱ xi síndondé, tsi xi xi̱'in ko̱jo tsi xi ínchjín. Nga̱t'a̱ je kini'ángojnú yojojnú Kristo Kjisoo̱ kuíni nga je ta ngo ndse̱je̱njnú nguindyi̱ko̱n Néná.
\v 29 Tsi Kristoo̱ ndokjo̱a̱nijnú, ja̱ xta̱ tji̱e̱e̱ Abraa̱m jún, kó jún xí sa̱kójnú kui ni xi Néná katsáyatjón nga tsja̱á Abraa̱m.
\c 4
\p
\v 1 Tanga ti bi ti xianjnú'un nga: Tji̱e̱nga ndí chichí kui nda̱ xi sa̱ko̱ó nii̱ na̱'mii̱, bo̱a̱ fóyanii̱ xikoó ngo moso̱ chichí xi kastiñá, nda tsi kui tsi̱'e̱ ka̱ma ngayeje nii̱ na̱'mii̱.
\v 2 Tanga tjín xta̱ xi skoón kó kuí xí sku̱i̱e̱ ngayeje kui nii̱ ngaskande nga kjo̱chó ni̱xtjin xi íjñá na̱'mii̱ nga sa̱ko̱ó kui nii̱.
\v 3 Kó ti bo̱a̱ ti kji'inii̱ ñá kji'a nga kji̱e̱ yajín ñá Ndi̱a̱ná, moso̱ xi kastiñaá ni a̱sién ni̱xtjii̱n kui nga̱sondiee̱ kamá ñá.
\v 4 Tanga nga jatjosón kui ni̱xtjii̱n, Néná katsanguiya ndií, xi ngo xta̱chjón katsennii̱, kó kui ndií kjo̱a̱kitii̱ tikónjin ndeskande koó nga katsen,
\v 5 tsi̱'e̱ nga sa̱'índé xta̱ xi kjo̱a̱kitii̱ síndojin, kó bo̱a̱ ts'én nga Néná ndí tsi̱'e̱ sa̱'ínná ñá.
\p
\v 6 Nga̱t'a̱ nga je ndií Néná kamá ñá, Néná katsanguiya ngu̱i̱jin ini̱ma̱ná A̱sién Ni̱xtjii̱n ndií, kuí xí bi tsó nga chji̱a̱: “¡Abba, Na̱'mi!”
\v 7 Kó bo̱a̱ ts'én nga ji nguiti moso̱ xi kastiñájín ji ngot'e̱, ndií Néná jí, kó tsi ndí jí, ja̱ ti sa̱ko̱ó kui ni xi tsja̱á Néná ngayeje xi ndií.
\s Bi ts'én íni̱jmi Pabloo̱ nga nguiti moso̱ xi kastiñájín chjiénga ka̱ma ñá
\p
\v 8 Ngas'e̱ kji'a nga kji̱e̱ yajínjnú Néná, kjín ne xi Nénájín atíxomajnú.
\v 9 Tanga ngot'e̱ 'ne̱, nguije yajnú Néná, ko̱jo tsi Néná je bejnú jún, kuíni nga, ¿kóts'en nga ti ingo ndi̱ya nguiní konguíntji̱nguíjnúu̱ kui ni xi jmíjiín nga'niú ko̱jo ni xi jmí ni chjíjiín? ¿A mejénjnú nga ti ko̱tíxoma nguiníjnú ne xi Nénájín?
\v 10 Nga̱t'a̱ takó ndyi̱yandikonjnú ni̱xtjin ndikón xi ma xki̱ sá ko̱jo xki̱ nó.
\v 11 ¡Achichí nda̱ kjimana tsi ta kjo̱a̱nda ngayeje xá xi kats'en an nganda tsa̱jún!
\p
\v 12 Jún ṉts'ie, 'niú mí'ájnú'un tsi̱'e̱ nga bo̱a̱ kon ka̱majnú xi kókón an, nga̱t'a̱ je bo̱a̱ kon kjima an xikó kónjnú jún. Ngojín ni xi ndajín kji'i xi kini'ánjo̱jnú'un jún.
\v 13 Tanga je yajnú jún nga kastie chi'in an nga tjón tjón kixiyajnú'un éntjatsi̱e̱e̱ Néná.
\v 14 Kó nda tsi kats'enxtíjnú'un kjo̱a̱a̱ chi'in xi kis'iena, kini'ánch'ojínjnú'un, tasá nda kini'ánsénjnú'un xikoó tsi ngo ndítsjiee̱ Néná an, ngaskande xikó maá tsi Kristo Kjisoo̱ an.
\v 15 Kuíni nga, ¿ñá tikón kui kjo̱a̱tsja xi kis'iejnú kui ni̱xtjii̱n? Nga̱t'a̱ ka̱mana xiyá an nganda tsa̱jún, nga ngaskande ndyikonjnú ka'naxiéjnú tsi an tsí'ájnú'un, kó katse'éjnú'un.
\v 16 Kó ngot'e̱ 'ne̱, ¿a kondra̱ tsa̱jún kamá an, kjo̱a̱a̱ nga ni ja̱koxi̱ xi kixiyajnú'un?
\p
\v 17 Kui jaá kjima chi̱ni̱ kjo̱a̱a̱ jún, tanga jmí tsi kjo̱a̱a̱ ni xi nda, tasá kjo̱a̱a̱ nga mejeén nga xín si̱'ankja'ájnúu̱ yojojnú ji̱n, tsi̱'e̱ nga jún si̱'ansenjnúu̱ kui jaá.
\v 18 Nda kji'i nga ngatsjé ni̱xtjin chi̱ni̱ ka̱ma xtaa̱ kjo̱a̱a̱ ni xi ndaa̱, jmí tsi ta kji'a tsi nga ki̱a̱ tikónjinjnú'un.
\v 19 Tjóna jún xikó maá tsi ndína ma jún, tanga tji̱e̱nga bo̱a̱jín ts'en tindyiónjnú xikoó Kristoo̱, ts'énfoa'atio an kjo̱a̱ni̱ma̱ xikó maá tsi̱ndi̱o̱o̱ ngo na̱a xi ndí ts'én be'é.
\v 20 Kó mejénna nga ngot'e̱ ma ki̱a̱ kotíjñajojnú'un, tsi̱'e̱ nga kje̱'e ts'én kuichjiájojnú'un, nga̱t'a̱ nde bejín an mí xi sa̱'inkjó an kjo̱a̱a̱ jún.
\s Bi ts'én íni̱jmi Pabloo̱ kjo̱a̱a̱ chi̱bo̱a̱ xi íjñá na̱ Agaa̱r ko̱jo na̱ Saraa̱
\p
\v 21 T'íyajnú'un jún, jún xi mejénjnú nga kjo̱a̱kitii̱ xi si̱'ankjatjosónjnú: ¿A kji̱e̱ nda'yájínjnúu̱ ni xi tjít'a kjo̱a̱kitii̱?
\v 22 Je kjit'a nga Abraa̱m jó ndí kis'iee̱: ngo xi katsee̱n na̱ mosoo̱ xi kastiñaá (Na̱ Agaa̱r), kós'e̱ ngo xi katsee̱n chjoón ndaa̱ (Na̱ Saraa̱), xi na̱ xi ndeé yojoo̱.
\v 23 Tanga kui ndí xi tsi̱'e̱ kui na̱ mosoo̱ xi kastiñaá katsen xikoó ñá nga̱t'a̱ bo̱a̱ ts'én kamámejeén na̱'mii̱ ko̱jo na̱aa̱, tanga ndií kui xta̱chjo̱ón ndaa̱ katsen nga̱t'a̱ Néná xi kamámejeén, nga̱t'a̱ ja̱ bo̱a̱ je bo̱a̱ katsoó nga ngo ndí tsja̱á.
\v 24 Kui nii̱, ngo chi̱bo̱a̱ bokóná. Nga jó ínchjiín jó kjo̱a̱'bínda ndyi̱bokó: Kjo̱a̱'bínda xi tjoón kui boá xi índa Néná ki̱a̱ tji̱ngu̱i̱ Sinaíi̱, kó kuí xí na̱ Agaa̱r, na̱a xi be'é ndí xi moso̱ xi kastiñaá.
\v 25 Na̱ Agaa̱r kuí xí xikónii̱ tji̱ngu̱i̱ Sinaíi̱, xi tikón ki̱a̱ nangui Arabia̱, xi xikónii̱ na̱xi̱ńdá Jerusale̱n ngot'e̱, nga̱t'a̱ kui na̱xi̱ńdaá ko̱jo xtaa̱ moso̱ xi kastiñá boá.
\v 26 Na̱ Saraa̱ kui boá xi xikónii̱ kjo̱a̱'bínda tja̱tsi̱e̱ xi índa Néná, kuí xí na̱xi̱ńdá Jerusale̱n xi chji̱a̱ni ndi'ak'ajmi ján, tikóndé kó ñá xi ndií.
\v 27 Nga̱t'a̱ bi ts'én kjit'a xo̱jo̱n eén Néná:
\q Tsja ngatamaa̱ ji xta̱chjón ndi̱, ji xi 'béjín ji ndí,
\q tajne̱ tsen ma ji, ji xi yejín ji tsi̱ndi̱o̱o̱ nga tsen ndí.
\q Nga̱t'a̱ kui chjoón xi ik'íjñámasiee̱n kjín ngase ndií k'uieé ta bo̱a̱jiín kui xta̱chjo̱ón xi tjiín xi̱'ii̱n.
\p
\v 28 Jún ṉts'ie, jún xí xikoó Isaa̱: Jún boá ndí xi katsáyatjón Néná nga tsja̱á Abraa̱m.
\v 29 Tanga xikó ts'én kui ni̱xtjin ján nga kui ndí xi katsen xikoó ñá, tsangatji̱nguii̱ ndí xi katsen xikó ts'én mejeén A̱sién Ni̱xtjii̱n Néná, ti bo̱a̱ ti kjima ngot'e̱.
\v 30 Tanga, ¿kó tsó xo̱jo̱n eén Néná? Ja̱ bi tsó: “Tiyítji̱nguíi̱ kui xta̱chjo̱ón xi moso̱ xi kastiñaá ko̱jo ndií, nga̱t'a̱ ndií kui xta̱chjo̱ón xi moso̱ xi kastiñaá ka̱majín sa̱ko̱ó ni xi sa̱ko̱ó ndií xta̱chjón xi ndeé.”
\v 31 Ja̱ kuíni ṉts'ie, jmí tsi ndií kui xta̱chjo̱ón xi moso̱ xi kastiñaá ñá, ndií kui xta̱chjo̱ón xi ndeé boá ñá.
\c 5
\s Bi ts'én íni̱jmi Pabloo̱ kjo̱a̱a̱ nga 'niú ti̱ndyiajnú ngu̱i̱yaa̱ kjo̱a̱ndéjnú
\p
\v 1 Kristoo̱ kats'éndéná tsi̱'e̱ nga ku̱i̱ṉtsomandé, kó kuíni nga 'niú ti̱ndyiajnú kó ngata̱ boe'éndiejínjnúu̱ nga tajmí niní xi ku̱i̱'íjña'niú nguiníjnú.
\p
\v 2 Nda'yájnú'un, an Pabloo̱, ts'énxiyajnú'un nga tsi si̱'ánjnúu̱ sirkunsisioo̱n yojojnú, xikónií tsi ndyi̱ni'ánchjíjínjnúu̱ ni xi kats'én Kristoo̱.
\v 3 Kó ti ts'énxiya nguiní an nga ta 'yání xi tjíts'eén sirkunsisio̱n yojoo̱, tjínrií kjo̱a̱'niú tsi̱'e̱ nga sa̱'ínkjatjosón ngayeje ni xi tjít'a kjo̱a̱kitii̱.
\v 4 Xta̱ xi ndyi̱mongase nga kixi̱ k'uíndo nguindyi̱ko̱n Néná nga ndyi̱ts'enkjátjosón kjo̱a̱kitii̱, je kats'énkjii̱n yojoo̱ Kristoo̱, kó kats'énch'ó kjo̱a̱ndaa̱ Néná.
\v 5 Tanga ñá tikónná A̱sién Ni̱xtjii̱n Néná kuíni nga ndyi̱chiyá nga sa̱kóná ngo kjo̱a̱kixi̱ tangat'aa̱ kjo̱a̱s'ijii̱n.
\v 6 Nga̱t'a̱ ndok'óchjinií Kristo Kjisoo̱, nga nguiti chjíjiín tsi kini'án ko̱jo tsi kini'ánjáa̱n sirkunsisioo̱n yojoná. Kjo̱a̱s'ijii̱n Néná xí chjínií ngat'aa̱ kjo̱a̱tjoó.
\p
\v 7 Achichí nda kji'i ndi̱ya xi ndyi̱monguínjnú jún katsaki. ¿Kó 'yá xi kats'énni'ínjnú tsi̱'e̱ nga kanda'yá'énjínjnúu̱ ni xi ja̱koxi̱i̱?
\v 8 Én xi ndyi̱nda'yájnú ngot'e̱ jmí tsi én tsi̱'e̱ kui Néná xi ja'ájinjnú.
\v 9 Bi tsó xtaa̱ nga: “Nde ta chií tsi nisaa̱n xi mindyiakátjo̱ ngayeje nda̱'yo̱ paa̱n.”
\v 10 Kó 'niátakón an Ndi̱a̱ná nga kje̱'ejín ts'én si̱'ankjójnú, tanga Néná ko̱tíjeé kui xi ts'énmindyiátsabejnú, jmí ndasenjín ta'ya kuíni bo̱a̱.
\p
\v 11 Jún ṉts'ie, tsi an xi k'uini̱jmi an kjo̱a̱a̱ sirkunsisioo̱n, ¿mí kjo̱a̱a̱ nga ku̱i̱yotjinguina? Tsi bo̱a̱ kji'i, ¿a mí tsi sa̱'ínxchán xtaa̱ nga ko̱ndókjo̱a̱jo kjo̱a̱a̱ kui Kristo̱ xi akjat'a kroo̱?
\v 12 ¡Tasá ti kuii̱ ngatatiet'a yeje yojo ndikoón kui xta̱ xi ndyi̱mindyiátsabejnú!
\p
\v 13 Jún ṉts'ie, Néná tsíchji̱a̱jnú tsi̱'e̱ nga xta̱ ndé kamájnú, tanga ngata̱ ni'ánkjiénjínjnú kui kjo̱a̱ndeé tsi̱'e̱ nga ni xi ndajín kji'i xi si̱'ánjnú, tasá tjóts'én ti'ansenjnúu̱ ja̱ k'i̱e̱ ja̱ ngaján xingu̱i̱jnú.
\v 14 Nga̱t'a̱ ngayeje kjo̱a̱kitii̱ nga ta ngo tsi én, bi tsó: “Ti'intjé ji xtaa̱ xikó ma ts'en tjoó yojóo.”
\v 15 Tanga tsi ti juún tjínjnú kjo̱a̱xti, chónjnú yojojnú nga ti júnjín si̱'ankjiéjnú xingu̱i̱jnú.
\s Bi ts'én íni̱jmi Pabloo̱ kjo̱a̱a̱ ni xi mejeén yojoo̱ ko̱jo ni xi mejeén A̱sién Ni̱xtjii̱n Néná
\p
\v 16 Kuíni nga bi xianjnú'un: Ti̱ndyiónjnú xikó ts'én mejeén A̱sién Ni̱xtjii̱n Néná, kó ngata̱ ni'ánkjatjosónjínjnúu̱ ni xi mejeén yojojnú.
\v 17 Nga̱t'a̱ ni xi mejeén yojojnú kondra̱ tikónnii̱ ni xi mejeén A̱sién Ni̱xtjii̱n Néná, kó ni xi mejeén A̱sién Ni̱xtjii̱n Néná kondra̱ tikónnii̱ ni xi mejeén yojojnú, kó nga jó kui nii̱ satíkjo, kuí nii̱ xi tsjandiéjín nga chje̱'éjin ni xi ndaa̱ nda tsi mejénná si̱'án.
\v 18 Tanga tsi ni xi mejeén A̱sién Ni̱xtjii̱n Néná xi ndyi̱ni'ánkjatjosónjnú, nguiti kjo̱a̱kitii̱jín xi ko̱tíxomajnú.
\p
\v 19 Kó ya tsijen tsijen ni xi mí'á yojoo̱ xtaa̱, kó kuí bí xta̱ xi ts'én kui nii̱: xi ndyi̱ts'ent'aa̱ kjo̱a̱ xkjín, xi tondo̱, xi ndyi̱ts'en tajmí niní,
\v 20 xi ndyi̱ts'entsjájo a̱sie̱én ngo ne xi ts'énda xtaa̱, xi ndyi̱ts'en kjo̱a̱tji'e, xi ch'oo̱ xkjín, xi ndyi̱'boxié kjo̱a̱xti, xi tjiín kjo̱a̱chi̱ni̱, xi ngotjón ngotjón ndyi̱kján, xi ndyi̱ts'ench'ó xkjín, xi ndyi̱bokjangá yojoo̱ nga ndyi̱'boxié kjo̱a̱xchán kós'e̱ ngo ndíé ndyi̱ts'en yojoo̱,
\v 21 xi tjiín kjo̱a̱'ontakón, xi ndyi̱ts'enk'ién ini̱ma̱, xi tjimách'i̱, xi ch'o ts'én ndyi̱ts'entsjájo xtín xkjín. Ngayeje ni xi'bi̱ ko̱jo ni xi xikoó kui ni xi'bi̱, ts'enkátsjienjnú'un, xikó je kixiánjnú'un ngas'e̱, nga kui xta̱ xi ndyi̱ts'en kuí nii̱, sa̱kójiín nga Néná xí ko̱tíxomaa̱.
\p
\v 22 Tanga ni xi 'bítji̱e̱jinná A̱sién Ni̱xtjii̱n Néná kuí ni xi'bi̱: kjo̱a̱tjó, kjo̱a̱tsja, kjo̱a̱xió, kjo̱a̱jekon, kjo̱a̱ni̱ma̱takón, kjo̱a̱ndaxta̱, kjo̱a̱s'ijin,
\v 23 kjo̱a̱nda'yá'én, ko̱jo kjo̱a̱a̱ nga ka̱maná k'uí'niúu̱ yojoná ni xi ch'o kji'ii̱, tsi kui nii̱ si̱'án, jmíjín ngo kjo̱a̱kiti xi ku̱i̱'íchjáná.
\v 24 Xta̱ xi je tsi̱'e̱ Kristo Kjisoo̱, je nijan yít'a kro̱ yojoo̱, kui yojo jé xi mejeén sa̱'ín ni xi ndajín xi tjín kui nga̱sondiee̱.
\v 25 Kó tsi tindyión tangat'anii̱ A̱sién Ni̱xtjii̱n Néná, chjiénga ko̱e̱'éndiée̱ A̱sién Ni̱xtjii̱n Néná nga kui xi ko̱tíxomaná.
\p
\v 26 Nga jejín ko̱'na̱xié yojoná, ti nde nga si̱'anxtijáa̱n ja̱ k'i̱e̱ ja̱ ngaján xingu̱i̱, ti nde nga k'uiéjínná kjo̱a̱'ontakón nga ngo nga ngo.
\c 6
\p
\v 1 Jún ṉts'ie, tsi ngo xi kamáya nga ngo jé tjíts'én, jún xi je tindyiónjnú xikó ts'én mejeén A̱sién Ni̱xtjii̱n Néná, chjiénga ni̱ma̱takón ka̱majnú nga ko̱siko̱jojnú tsi̱'e̱ nga sa̱'índaya yojoo̱ kui xi tjíts'énjeé, tanga chónjnú yojojnú nga ngo nga ngojnú, tsi̱'e̱ nga jmí tsi ko̱jo jún chját'ayákónjnú.
\v 2 Ja̱ k'i̱e̱ ja̱ ngaján tasíko̱jojnú xingu̱i̱jnú xi ndyi̱foa'atio kjo̱a̱ni̱ma̱, kó nga bo̱a̱ si̱'ánjnú ndyi̱ni'ánkjatjosónjnú kjo̱a̱kitii̱ Kristoo̱.
\p
\v 3 Tsi tjín xi je máa̱ yojoo̱, kó ya nga bo̱a̱jín kji'i ni xi bokó, ta ts'én 'boṉcha̱jo soboá tsi yojoo̱.
\v 4 Kó kuíni nga chjiénga, nga ngo nga ngo ñá xchít'a so̱bo̱a̱ yojoná kjo̱a̱a̱ ni xi ndyi̱ni'án, kó kji'a boá nga tsja ka̱maná kjo̱a̱a̱ ni xi ndyi̱ni'án, jmí tsi tangat'anii̱ kjo̱a̱a̱ ni xi ndyi̱ts'en kje̱'e xta̱.
\v 5 Nga̱t'a̱ chjiénga, nga ngo nga ngo ñá xi x'i̱a̱nijín ni xi ndyi̱ni'án.
\p
\v 6 Xta̱ xi tjibókoyaá éntjatsi̱e̱e̱ Néná, chjiénga tsja̱á mostroo̱ chiboa ngayeje kjo̱a̱nda xi sa̱ko̱ó.
\p
\v 7 Ngata̱ ch'íṉcha̱jojínjnú yojojnú, nga̱t'a̱ ngojín xi ka̱maa̱ ko̱jno̱kie Néná. Nga̱t'a̱ ni xi ku̱i̱'ítji̱e̱ xtaa̱, kuí nii̱ xi kjo̱a̱'á'yá.
\v 8 Nga̱t'a̱ kui xta̱ xi ndyi̱ts'en ni xi mejeén yojoo̱, kui boá xi xikoó tsi xojmá xi ndajín xi ndyi̱'bítji̱e̱, kó cha̱n xi kjo̱a̱'á'yá, kjo̱a̱bo̱ya boá. Tanga kui xi ni xi mejeén A̱sién Ni̱xtjii̱n Néná xí ndyi̱ts'en, kui boá xi xikoó tsi xojmá xi nda xi ndyi̱'bítji̱e̱, kó cha̱n xi kjo̱a̱'á'yá, kuí xí kjo̱a̱mindyioo̱n, nga̱t'a̱ A̱sién Ni̱xtjii̱n Néná xi sa̱'ínk'índo ngatsjé ni̱xtjin.
\v 9 Kó kuíni nga chjiénjín nga kju̱i̱e̱nda nga si̱'án ni xi nda, nga̱t'a̱ nga kjo̱chó ni̱xtjin, x'i̱je̱n kui cha̱a̱n ni xi ik'ítji̱e̱.
\v 10 Kó kuíni nga, ngatsjé ni̱xtjin nga ka̱ma xi si̱'án, si̱'áa̱n ni xi nda ngayeje xtaa̱, kó ngase ma kui xta̱ xi ti Néná s'ijii̱n nga.
\s Bi ts'én íni̱jmi Pabloo̱ kjo̱a̱a̱ nga kis'iee̱ kjo̱a̱je kui kjo̱a̱a̱ kroo̱ Kristoo̱
\p
\v 11 Tsitsíjenjnúu̱ kóts'en yi'i kats'en an kui én xi tjíts'enda an ngot'e̱.
\v 12 Ngayeje xta̱ xi ndyi̱ts'enjnú kjo̱a̱'niú tsi̱'e̱ nga si̱'ánjnúu̱ sirkunsisioo̱n yojojnú, bo̱a̱ ndyi̱ts'en nga̱t'a̱ mejeén nga nda sku̱i̱e̱ xtaa̱, mejénjiín nga ku̱i̱yotjinguií, kuíni nga ndyi̱'bíni̱jmijín kjo̱a̱a̱ kroo̱ Kristoo̱.
\v 13 Nga̱t'a̱ nde kui xta̱ xi ts'eén sirkunsisio̱n yojoo̱ ndyi̱ts'enkjátjosónjín kjo̱a̱kitii̱, tanga mejeén nga jún si̱'ánjnúu̱ sirkunsisio̱n yojojnú, tsi̱'e̱ nga je k'o̱xié yojoo̱ nga ku̱i̱chji̱a̱ nga tangat'anii̱ kui nga je tikónjnú kui chi̱bo̱a̱a̱.
\v 14 Kjo̱a̱ ngaá an 'ne̱, mejénjínna nga je k'oxié an yojona ngototo kjo̱a̱a̱ ni xi kats'én Ndi̱a̱ná Jesukristoo̱ nga k'ient'a kroo̱. Nga̱t'a̱ ki̱a̱ t'aa̱ kro̱ je k'ienjo̱ an Kristoo̱. Kó ni xi tsi̱'e̱ kui nga̱sondiee̱ je nguiti jmí ni bejín kjo̱a̱a̱ an, ti nde an nguiti jmí ni bejín an kjo̱a̱a̱ ni xi tsi̱'e̱ kui nga̱sondiee̱.
\v 15 Jmí ni chjíjiín tsi kini'ánná ko̱jo tsi kini'ánjínná sirkunsisioo̱n, ni xi chjínií, kui boá nga xta̱ tja̱tsi̱e̱ kats'énná Néná.
\v 16 Ngayeje xta̱ xi ndyi̱fítji̱ngui kui kjo̱a̱botíxomaa̱, ngat'ieé kjo̱a̱xió ko̱jo kjo̱a̱ni̱ma̱takón, ko̱jo ngayeje xta̱ xi tsi̱'e̱ Néná, xi xta̱ Israe̱l xi tsi̱'e̱ Néná tjí'mií.
\p
\v 17 Ngot'e̱ 'ne̱ mejénjínna nga tjín xi sa̱'ínxtína, nga̱t'a̱ je kjit'aa̱ yojona chi̱bo̱a̱ xi bokó nga Ndi̱a̱ná Kjisoo̱ chjiá an.
\s Pabloo̱ bi ts'én kats'énkjiet'a xo̱jo̱o̱n
\p
\v 18 Jún ṉts'ie, Ndi̱a̱ná Jesukristoo̱ ngat'íkitsiee̱ ini̱ma̱jnú kjo̱a̱ndaa̱. Bo̱a̱ kji'i.