\id EPH - MAZATECO DE SAN PEDRO IXCATLÁN
\h XTA̱ ÉFESO̱
\mt1 Xo̱jo̱n xi apostro̱ Pabloo̱ katsanguiyaa̱ xta̱ na̱ngo̱xi̱ xi chji̱a̱ni Éfeso̱
\c 1
\s Bi ts'én kats'éntinde Pabloo̱ xta̱ na̱ngo̱xi̱ xi chji̱a̱ni na̱xi̱ńdá Éfeso̱
\p
\v 1 An Pabloo̱, nda̱ xi apostroo̱\f + \fr 1.1 \ft “Xi kananguiyaa̱” tsó “nda̱ apostro̱” axa̱ “já apostro̱” nga én griego̱.\f* Jesukristoo̱ kamá nga̱t'a̱ bo̱a̱ ts'én kamámejeén Néná, ts'entindejnú'un jún xta̱ xi tsjie ko̱jo xi s'ijinjnú Kristo Kjisoo̱ xi tindyiónjnú na̱xi̱ńdá Éfeso̱.
\v 2 Néná xi Na̱'miná ko̱jo Ndi̱a̱ná Jesukristoo̱, nga tsjajnú kjo̱a̱ndaa̱ ko̱jo kjo̱a̱xioó.
\s Bi ts'én akóyá Pabloo̱ kjo̱a̱a̱ kjo̱a̱ni'ánchikonñé xi Néná tsjáná
\p
\v 3 Nga ni'ántsjaá Néná, kui xi Na̱'mii̱ Ndi̱a̱ná Jesukristoo̱. Kui xi kats'én nga ngu̱i̱jii̱n Kristoo̱ kasakoná ngayeje to̱ko̱ya kjo̱a̱ni'ánchikonñé xi ndibání ndi'ak'ajmi ján xi tsjáná a̱sién ni̱xtjii̱n.
\v 4 Kristoo̱ kats'énkjién Néná nga ja'ájinná nguindiee̱ nga kamánda nga̱sondiee̱, tsi̱'e̱ nga tsjiets'én ku̱i̱ndyión kó jmí jé k'uiéjínná nguindyi̱ko̱n kui.
\v 5 Tangat'anii̱ nga tjoó ñá Néná kuíni nga índa ndeskande koó ngas'e̱ tsi̱'e̱ nga Jesukristoo̱ sa̱'ínkjién nga ndií sa̱'ínná ñá, xikó ts'én kamámejeén kó tsja kamaá kui.
\v 6 Kuíni nga, nga ni'ántsjaá Néná kjo̱a̱a̱ kui kjo̱a̱nda je xi akó xi ta katsjáná xi kasakojinná ngu̱i̱jii̱n kui ndí xi tjoó kui.
\v 7 Kuí ndií xi k'ien tsi̱'e̱ nga Néná ts'axié'áná ñá, kó kuíni nga tjínná kjo̱a̱ni'ánjetakoón jéná, xikó kji'i tsie kjo̱a̱nda je xi katsjáná Néná,
\v 8 ko̱jo tsie kjo̱a̱kjínkón ko̱jo kjo̱a̱kjíntakón xi katsjáná,
\v 9 kó akóná ni xi kamámejeén nga sa̱'ín, xi íjñá 'ma kje̱'e ni̱xtjin, nga̱t'a̱ kamátsjaá nga índa tjón tjón ni xi sa̱'ín Kristoo̱.
\v 10 Kji'a nga kjo̱chó ni̱xtjin xi íjñá, Néná sa̱'índo̱jo ni xi índa nga ku̱i̱'ítikó ngu̱i̱jii̱n Kristoo̱ ngayeje ni xi tjín ndi'ak'ajmii̱ ko̱jo ni xi tjín t'ananguii̱.
\p
\v 11 Xikó ts'én índa tjón tjón Néná, bo̱a̱ ts'én kats'énkjién Kristoo̱ tsi̱'e̱ nga ko̱jo ji̱n ja'ájinjne̱ nga katsjájne̱ ni xi tsja̱á ndií, nga̱t'a̱ Néná ts'enkjátjosón ngayeje ni xi mejeén nga sa̱'ín kui.
\v 12 Kó nga ji̱n xi tjón kamájne̱ nga kis'iejne̱ kjo̱a̱chiyá kjo̱a̱a̱ ni nda xi sa̱kójinjne̱ Kristoo̱, kuíni nga ndyi̱ni'ántsjáa̱ kui Néná xi tjiín kjo̱a̱jee̱.
\v 13 Kó ko̱jo jún kanda'yájnú kó kis'ijinjnú éntjatsi̱e̱ ja̱koxi̱i̱ Jesukristoo̱, kui éntjatsi̱e̱ xi ts'axié'ájnú, kó nga kis'ijinjnú Kristoo̱, A̱sién Ni̱xtjii̱n Néná íjñájnú ngo chi̱bo̱a̱ nga je Néná ndokjo̱a̱nijnú xikó ts'én katsáyatjón kui.
\v 14 A̱sién Ni̱xtjii̱n xi ik'íjñangui tsi̱'e̱ nga xcha̱ nga sa̱kóná ni xi katsáyáná Néná nga tsja̱á ndií, nguije ka̱mandé ngayeje xta̱ xi je kamáchjítjé kjo̱a̱ndeé kó nga ndií ka̱ma ñá, tsi̱'e̱ nga ngayeje ñá si̱'antsjáa̱ kui Néná xi tjiín kjo̱a̱jee̱.
\s Bi ts'én tsíchji̱a̱tjé Pabloo̱ xta̱ na̱ngo̱xi̱ Éfeso̱ nguindyi̱ko̱n Néná
\p
\v 15 Tangat'anii̱ kui nii̱ nga ko̱jo an, nguije tsint'ie an kjo̱a̱a̱ nga s'ijinjnú Ndi̱a̱ná Kjisoo̱ ko̱jo nga tjójnú ngayeje xta̱ na̱xi̱ńdá tsjiee̱,
\v 16 ngatsjé ni̱xtjin tsjáa̱ ndok'óchji Néná kjo̱a̱a̱ jún, kó ts'enkja'átsjienjnú'un nga chjiátjejnú'un,
\v 17 tsi̱'e̱ nga kui Néná xi tsi̱'e̱ Ndi̱a̱ná Jesukristoo̱, kui Na̱'mi xi tjiín kjo̱a̱jee̱, nga tsjajnú A̱sién Ni̱xtjii̱n tsi̱'e̱ nga k'uiéjnú kjo̱a̱kjínkoón ko̱jo nga ko̱kójnú kókón Néná.
\v 18 Ti mí'áa̱ Néná nga ka̱makjín cha̱n cha̱njnú kókji'i kui kjo̱a̱chiyaá xta̱ xi je Néná tsíchji̱a̱a̱, tsi̱'e̱ nga xcha̱jnú kókji'i je ni xi tsja̱á xta̱ tsjiee̱.
\v 19 Kó nga ka̱makjínjnú kókji'i je nga'niú xi tikoón Néná nganda tsa̱ñá xí s'ijinná kui. Kui nga'niuú kui boá xi Néná akó,
\v 20 kui xi kats'énkjién nga kats'énkja'á'yaá Kristoo̱ ngu̱i̱jii̱n xta̱ xi je jesoón kó Néná ki̱a̱ kats'énk'ijñá t'a tsja fojnií ki̱a̱ ndi'ak'ajmii̱.
\v 21 Néná íjñá Kristoo̱ ngo ngu̱i̱ndie xi nk'a nga̱soón ngayeje xi botixómá kui nga̱sondiee̱, xá, nga'niú, xi yandíkón ko̱jo nga̱soón ngayeje ni xi tjiín ja'én xi ni'ánkaxoma, jmí tsi ta kuí tsi ni̱xtjin xi'bi̱ ko̱jo ni̱xtjin xi s'e̱ ndibaá nga,
\v 22 kó ngayeje nii̱ xi Néná íjñá ngu̱i̱ya tsja Kristoo̱ kó kui boá xi kats'én nga Kristoo̱ xi ka̱ma nguito̱ko̱o̱ ngayejee̱ nii̱ ngandaa̱ xta̱ na̱ngo̱xi̱i̱,
\v 23 nga̱t'a̱ xta̱ na̱ngo̱xi̱i̱ kui boá xi yojoo̱ Kristoo̱, kui Kristo̱ xi ts'én nga ka̱mando̱jo tajmí niní. Tsi jmíjín xta̱ na̱ngo̱xi̱i̱ nde tikón ndo̱jojín ra Kristoo̱.
\c 2
\s Bi ts'én akóyá Pabloo̱ kjo̱a̱a̱ nga jatjo'a ñá tangat'anii̱ ni xi kats'én Kristoo̱
\p
\v 1 Néná katsjájnú kjo̱a̱mindyion kji'a nga jún xta̱ xi je jesón kamájnú tangat'anii̱ kjo̱a̱a̱ ni xi ndajín xi kini'ánjnú ko̱jo kjo̱a̱a̱ jéjnú,
\v 2 kui xi kixindyionjinjnú kje̱'e ni̱xtjin, nga̱t'a̱ ki̱a̱ tsanguíntji̱nguijnúu̱ nii̱ kui nga̱sondiee̱, kó kini'ánjnú ni xi mejeén nguito̱ko̱o̱ a̱sién ni̱xtjin xi ndajín kui xi botixómá ngu̱i̱jin tjo̱o̱ ko̱jo xi ts'énxá ngu̱i̱jii̱n xta̱ xi nt'ié'énjiín Néná.
\v 3 Ti bo̱a̱ ti ts'én kixindyión ngayeje ñá kje̱'e ni̱xtjin, nga ki̱a̱ tsanguíntji̱nguíi̱ ko̱jo kini'ánkjatjosóo̱n kui ni xi kamámejeén yojoná ko̱jo ni xi kini'ánkjó. Kuíni nga Néná kamá atíjéná, xikoó xta̱ xi ngasee̱.
\v 4 Tanga Néná achichí 'niú ni̱ma̱ máa xtaa̱ kó kats'énkjién kjo̱a̱tjó jee̱ nga kats'éntjóná,
\v 5 kó nda tsi je akayá ngu̱i̱jii̱n jéná, nijan katsjáná kjo̱a̱mindyion ko̱jo Kristoo̱. Tangat'aa̱ kjo̱a̱ndaa̱ Néná nga jún je ta jatjo'a kjo̱a̱nda tsi jnú.
\v 6 Kó Néná nijan kats'énkja'á'yáná ko̱jo Kristoo̱, kó ki̱a̱ nijan kats'énk'índoná ko̱jo Kristo Kjisoo̱ ki̱a̱ ndi'ak'ajmii̱,
\v 7 bo̱a̱ kats'én tsi̱'e̱ nga ni̱xtjin xi s'e̱ ndibaá ko̱kó kókji'i je kjo̱a̱cho̱o̱n kjo̱a̱ndaa̱ ko̱jo xikó ts'én nda ni xi katsjáná ñá, ngat'aa̱ ni xi kats'én Kristo Kjisoo̱.
\v 8 Nga̱t'a̱ tangat'anii̱ kjo̱a̱ndaa̱ Néná nga jún je jatjo'ajnú nga̱t'a̱ kis'ijinjnú, kó kui nii̱ jmí tsi ngo ni xi jún kasako so̱bo̱a̱jnú, kjo̱a̱nda xi tsi̱'e̱ Néná boá.
\v 9 Jmí tsi kjo̱a̱a̱ ni xi ndyi̱ni'ánjnú, tsi̱'e̱ nga jmíjín xi je k'o̱xié yojoo̱.
\v 10 Nga̱t'a̱ Néná boá xi kats'éndaná, ngat'aa̱ Kristo Kjisoo̱ tsi̱'e̱ nga ni xi nda si̱'án, kui ni xi Néná índa tjón tjón tsi̱'e̱ nga ki̱a̱ ku̱i̱ṉtsomajin ni xi ndaa̱.
\s Bi ts'én íni̱jmi Pabloo̱ kjo̱a̱a̱ kjo̱a̱xió xi tjínná ngat'aa̱ Kristoo̱
\p
\v 11 Kó kuíni nga jún xi xta̱ xi judío̱jínjnú ndeskande koó nga katsenjnú, ngatja'átsjienjnú nga kje̱'e ni̱xtjin “xta̱ xi kini'ánjiín sirkunsisio̱n” katsójnú kui xta̱ judío̱ xi je kats'eén sirkunsisio̱n yojoo̱.
\v 12 Kui ni̱xtjin ján kjin kixindyionnijnúu̱ Kristoo̱, kó xín kixindyionnijnúu̱ xta̱ Israe̱l, kó nde tsa̱júnjín kamá ni xi índajo̱ Néná xi katsáyatjón nga tsja̱á xta̱ xi tsi̱'e̱, kis'iejínjnú kjo̱a̱chiyá ko̱jo kis'iejínjnú Néná k'i̱e̱ kui nga̱sondiee̱.
\v 13 Kjin kixindyionjnú kje̱'e ni̱xtjin, tanga ngot'e̱ 'ne̱ ngat'aa̱ Kristo Kjisoo̱ je tiña tindyiónjnú, tangat'anii̱ nga k'ien Kristoo̱.
\v 14 Nga̱t'a̱ Kristoo̱ boá xi kjo̱a̱xióná, kó kui boá xi xta̱ ngo tji̱e̱ kats'én xta̱ xi judío̱ ko̱jo xi judío̱jín, kó kats'énkjié kui ni xi kondra̱ kamánii̱ nga ndajín tsa'a xkjín kui xtaa̱, kui xi xikoó tsi ngo xó xi kis'ijña ngamasiee̱n.
\v 15 Kristoo̱ katsjá yojoo̱ nga kats'énkjié kjo̱a̱kiti xi kjín ni tjít'aa̱, kó nga jó tjín xta̱ na̱xi̱ńdaá ta ngo tsi tji̱e̱ kats'én, nga kats'énda ngo tjín xta̱ na̱xi̱ńdá xi tja̱tsi̱e̱ xi kats'éngojo̱ yojoo̱ kui, kó kui bo̱a̱ xi kats'én nga nda tsa'a nguiní xkjín nga ngo nga ngo.
\v 16 K'ient'a kui kroo̱, tsi̱'e̱ nga ta ngo tsi yojo kats'én nga jó tji̱e̱e̱ xta̱ na̱xi̱ńdaá, kó yíndajo̱ Néná nga kats'énkjié ni xi kondra̱ kamánii̱ nga ndajín tsa'a xkjín nga jó kui na̱xi̱ńdaá.
\p
\v 17 Kristoo̱ je'etsjá éntjatsi̱e̱ xi ya'a kjo̱a̱xioó. Kó bo̱a̱ ts'én kasakojnú kjo̱a̱xioó jún xi kjin kixindyionjnúu̱ Néná ngas'e̱, kó ti kasakoo̱ xta̱ xi tiña síndonii̱ Néná nga.
\v 18 Kó ngat'aa̱ Kristoo̱ nga xta̱ xi judío̱ ko̱jo xi judío̱jín ta ngo tsi A̱sién Ni̱xtjin tikónná kó ka̱ma kjóchochontiñáa̱ Na̱'mii̱.
\v 19 Kó kuíni nga jún, je nguiti xta̱ xi xín nanguijínjnú ko̱jo tsi xta̱ xi timasónjnú, je xta̱ tsjiee̱ Néná jún, kó je k'i̱e̱ ndokjo̱a̱nijnú ndi'aa̱ Néná.
\v 20 Jún xikónií ngo ndi'a nk'a xi kjimanda kui xi já apostroo̱ ko̱jo já chji̱ni̱e̱'e̱én Néná ítjats'ennii̱ nga ndyi̱kjinink'a, kó Jesukristoo̱ boá kui xi ndi̱jo̱ nga'niuú kui ndi'aa̱.
\v 21 Kristoo̱ boá xi be kóts'en nga nda kjimanda kui ndi'aa̱, kó kui ndi'aa̱ kjimanda ngaskande nga ngo na̱ngo̱xi̱ tsjiee̱ Ndi̱a̱ná ka̱ma.
\v 22 Tangat'anii̱ nga ngo majo̱jnú Kristoo̱ nga jún xi ka̱majnú xikoó ngo na̱ngo̱xi̱ nínga k'uijñá A̱sién Ni̱xtjii̱n Néná.
\c 3
\s Bi ts'én íni̱jmi Pabloo̱ kjo̱a̱a̱ xá xi katse'eé ngandaa̱ xta̱ xi judío̱jín
\p
\v 1 Kó kuíni nga an, Pabloo̱, ndo̱bo̱a̱ya tikón an tangat'anii̱ Kristo Kjisoo̱ nganda tsa̱jún xi xta̱ xi judío̱jínjnú.
\v 2 Jún je kanda'yájnú nga Néná katsjána xá tsi̱'e̱ nga xiyájnú'un kjo̱a̱nda xi índa, nganda tsa̱jún.
\v 3 Néná akóna ni xi índa xi tji'maá ngas'e̱, xikó ts'én je kats'én'indó chiboajnú'un.
\v 4 Kji'a nga si̱'anyajnú kui xo̱jo̱o̱n, xcha̱jnú nga nda makjínna ni xi índa Néná ngat'aa̱ Kristoo̱.
\v 5 Kui ni 'maa̱ ngojín xta̱ xi akakoo̱ kje̱'e ni̱xtjin, xikó ts'én ngot'e̱ A̱sién Ni̱xtjii̱n Néná akoó já apostro̱ tsjiee̱ ko̱jo já chji̱ni̱e̱'e̱én Néná.
\v 6 Kó kuí bí ni xi índaa̱: nga xta̱ xi judío̱jiín ko̱jo kui sa̱ko̱ó ni xi Néná tsjaá ndií, kó nga ta ngo tsi yojoo̱ Kristoo̱ ka̱ma, kó nga nga jó tjiín nga sa̱ko̱ó ni xi Néná katsáyatjón nga tsja̱á xta̱ xi s'ijii̱n éntjatsi̱e̱e̱ Kristo̱ Kjisoo̱.
\p
\v 7 Néná katsjáxána nga k'uini̱jmi an éntjatsi̱e̱e̱ kjo̱a̱a̱ kjo̱a̱ndaa̱, kui xi katse'éna tangat'anii̱ nga'niuú Néná xi tjíts'énxájinna.
\v 8 An xí achichí chichí ngase an ngu̱i̱jii̱n xta̱ tsjiee̱ Néná, tanga an katse'éna kui kjo̱a̱ndaa̱ nga k'uini̱jmíi̱ xta̱ xi judío̱jiín éntjatsi̱e̱e̱ kjo̱a̱cho̱n tsiee̱ Kristoo̱ xi jmíjín xi makjín yejee̱.
\v 9 Kó nga boko cha̱n cha̱a̱n ngayeje xtaa̱ kókji'i ni xi índa kui ni xi tji'maá ndeskande kui ni̱xtjin ján kui Néná xi kats'énda ngayeje ni xi tjiín.
\v 10 Kó bo̱a̱ ts'én ngot'e̱ 'ne̱ xta̱ na̱ngo̱xi̱i̱ xi ku̱i̱'íjñátsijen tsi̱'e̱ nga ngayeje nga'niú ko̱jo xi botixómá xi tjín nk'a ján, sku̱i̱e̱ kókji'i to̱ko̱ya kjo̱a̱kjínkón xi tjiín Néná.
\v 11 Kui nii̱ xi índa tjón tjón Néná ndeskande koó ngas'e̱, kó ngot'e̱ 'ne̱ je jatjosón ngat'aa̱ Kristo Kjisoo̱, kui xi Ndi̱a̱ná.
\v 12 Ndok'óchjinií Kristoo̱ ko̱jo nga s'ijinná kui, kuíni nga ma'niátakón nga monguínchon tiñáa̱ Néná.
\v 13 Kó kuíni nga mí'ájnú'un tsi̱'e̱ nga ko̱yajín takónjnú nga xcha̱jnú kui kjo̱a̱ni̱ma̱ xi ts'énfoa'atio an nganda tsa̱jún, tasá kuí nii̱ xi kjo̱a̱jejnú ngatama.
\s Bi ts'én tsí'átjé Pabloo̱ xta̱ na̱ngo̱xi̱ xi chji̱a̱ni Éfeso̱
\p
\v 14 Tangat'anii̱ kui nii̱ nga bosien an tikóna nguindyi̱ko̱n Na̱'mii̱ Ndi̱a̱ná Jesukristoo̱.
\v 15 Kui xi kats'énda ngayeje tji̱e̱ tsi tsi̱'e̱ ndítsjie ki̱a̱ ndi'ak'ajmii̱ ko̱jo tsi tsi̱'e̱ xta̱ k'i̱e̱ t'ananguii̱.
\v 16 Mí'áa̱ Néná tsi̱'e̱ nga xikó kji'i kjo̱a̱cho̱o̱n kjo̱a̱jee̱ tsja nga'niuú ini̱ma̱jnú nga sa̱'ínkjién A̱sién Ni̱xtjii̱n.
\v 17 Tsi̱'e̱ nga Kristoo̱ ngat'íjñajin ini̱ma̱jnú, nga̱t'a̱ nga s'ijinjnú. Kó nga jún k'uiéjnú tsie kjo̱a̱tjó xikoó ngo yá xí na̱nga̱ kijí ja̱maa̱ ko̱jo nga 'niú ku̱i̱ndyionjnú.
\v 18 Bo̱a̱ ts'én jún ko̱jo ngayeje xta̱ tsjiee̱ Néná ka̱majnú nda ka̱makjínjnú kókji'i tiyá, ndojó, na̱nga̱ ko̱jo nk'a kjo̱a̱tjoó Kristoo̱.
\v 19 Kó mí'áa̱ Néná tsi̱'e̱ nga xcha̱jnú kui kjo̱a̱tjoó Kristoo̱ xi foa'atjoón ngayeje kjo̱a̱kjíntakón, tsi̱'e̱ nga Néná s'i̱jñajin ndo̱jo ndo̱jojnú.
\p
\v 20 Nga ni'ántsjaá Néná kui xi achichí nga'niú tjiín tsi̱'e̱ nga ts'atio ngase ni xi sa̱'ín xi chji̱a̱'áa̱ ko̱jo ni xi makjínná, xikó kji'i kui nga'niuú xi ts'énxájinná.
\v 21 Ngate'eé kjo̱a̱je Néná ngu̱i̱jii̱n xta̱ na̱ngo̱xi̱ xi tsi̱'e̱ Kristo Kjisoo̱, ngatsjé ni̱xtjin. Bo̱a̱ kji'i.
\c 4
\s Bi ts'én akóyá Pabloo̱ nga ki̱a̱ tindyionjíi̱n Kristoo̱
\p
\v 1 Kuíni nga an, nga ndo̱bo̱a̱ya tikón an tangat'anii̱ Ndi̱a̱ná, 'niú mí'ájnú'un tsi̱'e̱ nga kixi̱ ku̱i̱ndyionjnú xikó ts'én chjiénga k'uíndo xta̱ xi Ndi̱a̱ná tsíchji̱a̱a̱.
\v 2 Nga xta̱ xi ni̱ma̱kjo̱a̱ ko̱jo xi nt'ié'én ka̱majnú, tsie takón ngatamajnú kó ja̱ k'i̱e̱ ja̱ ngaján ti'anchíkjo̱a̱jnúu̱ xingu̱i̱jnú nga k'uiéjnú kjo̱a̱tjó.
\v 3 Ti̱'ánjnú ngo kjo̱a̱'niú tsi̱'e̱ nga k'uiéjnú kjo̱a̱xió kó ngo xtín ch'i̱a̱jnú yojojnú xikó ts'én kats'éngojnú A̱sién Ni̱xtjii̱n Néná.
\v 4 Ta ngo tsi yojoo̱ Kristoo̱ ma ngayeje ñá kó ti kuíni A̱sién Ni̱xtjin xi tikónjinná, kó ti bo̱a̱ ti ts'én ta ngo tsi kjo̱a̱chiyá xi kandokjo̱a̱ná ñá.
\v 5 Ta ngo tsi ma Ndi̱a̱ná xi tikón, ta ngo tsi ma kjo̱a̱s'ijii̱n, kó ta ngo tsi ma kjo̱a̱stíndaá.
\v 6 Ta ngo tsi ma Néná kui xi Na̱'miná ngayeje ñá, kui xi botixómaá, xi ts'énkjién ko̱jo tikónjii̱n ngayeje ni xi tjiín.
\p
\v 7 Tanga nga ngo nga ngo ñá je kasakoná kjo̱a̱nda xi Kristoo̱ kamámejeén katsjáná.
\v 8 Kuíni nga bi tsó xo̱jo̱n eén Néná:
\q Kji'a nga kijínijínguí nk'a ján kijíjo̱ xi síndo'niú,
\q kó katsjaá ni xi nda xtaa̱.
\p
\v 9 ¿Kó mí ni xi mejeén tsó nga “kijínijínguí nk'a ján”? Kuíni nga bo̱a̱ tsó kjo̱a̱a̱ nga tjón jatjajen nínga na̱ngaa̱ t'ananguii̱.
\v 10 Kó kui xi jatjajee̱n, ti kuíni bo̱a̱ xi kijínijínguí ngaskande nínga 'niú nk'aá nk'a ján, bo̱a̱ ts'én nga kis'ijñajin kui ngayeje nga̱sondiee̱.
\v 11 Kó kui boá xi índo nga tjín já xi apostro̱, xi chji̱ni̱e̱'e̱én Néná, xi 'bini̱jmi éntjatsi̱e̱e̱ Néná, xi síndotjoón xta̱ na̱ngo̱xi̱i̱ ko̱jo xi mostro̱.
\v 12 Tsi̱'e̱ nga ko̱ko̱yaá xta̱ tsjiee̱ Néná xikó ts'én ko̱síko̱jo xkjín, kó bo̱a̱ ts'én sa̱kó nga'niuú kui xta̱ na̱ngo̱xi̱i̱, kui xi yojoo̱ Kristoo̱.
\v 13 Bo̱a̱ ka̱ma ngaskande nga ngayeje ñá ngo kamá nga s'i̱jinná ko̱jo nga xcha̱ ndií Néná, kó nga ka̱ma ñá xikoó xta̱ xi je xchá xi je ndo̱jo kjin kjin xikoó Kristoo̱.
\v 14 Bo̱a̱ ts'én nga nguiti xikójiín ngo ndí ka̱ma ñá, xi ngotjón ngotjón bosíkjo ni xi ts'énkjó. Ka̱majín taxkiya konguíntji̱nguí ngo kjo̱a̱bokoyá tja̱tsi̱e̱ xi skjiénná kó k'o̱ṉcha̱joná, kui xi bokoyá xta̱ maña̱ xi ndi̱ya xi ndajín tjimaá.
\v 15 Tasá ni xi ja̱koxi̱i̱ xi ko̱ndókjo̱a̱ nga k'uiéná kjo̱a̱tjó, kó xikó ts'én kjimaxchá bo̱a̱ kon ka̱ma ngase ndyiojón ndyiojón xikoó Kristoo̱, kui xi nguito̱ko̱o̱ xta̱ na̱ngo̱xi̱i̱.
\v 16 Kristoo̱ boá xi tjits'énngo ngayeje xta̱ na̱ngo̱xi̱i̱ ta xikó kji'i xá xi ts'én nga ngo nga ngo, kó kui boá xi ts'én nga nda ts'én ko̱síko̱jo xkjín, tsi̱'e̱ nga ngu̱i̱jii̱n kjo̱a̱tjoó xtjonínk'á kui xta̱ na̱ngo̱xi̱i̱.
\s Bi ts'én akóyá Pabloo̱ kjo̱a̱a̱ xikó ts'én ku̱i̱ndyión nguindyi̱ko̱n Néná
\p
\v 17 Kuí ni xi'bi̱ xi t'íxianjnú'un ngu̱i̱yaa̱ ja'eén Ndi̱a̱ná, nga nguiti bo̱a̱jín ts'en mindyionjnú xikó ts'én síndo xta̱ xi bejín Néná, kui xta̱ xi síndo xikó ts'én ndyi̱ts'enkjó chini.
\v 18 Kui xtaa̱ kji'ijñórií kjo̱a̱kjíntakoón kó bo̱a̱jín ts'en síndo xikó ts'én mejeén Néná, tangat'anii̱ nga bejín ni xi ndyi̱ts'en nga̱t'a̱ tanisién tajá ini̱ma̱a̱.
\v 19 Je nguiti jmí kjo̱a̱soboájiín, je kats'énk'as'iee̱n yojoo̱ ni xi ndajín ko̱jo ngayeje to̱ko̱ya ni xi ndándí nguindyi̱ko̱n Néná.
\v 20 Tanga jún jmí tsi kui nii̱ xi kamájnú nga akakoyájnú kjo̱a̱a̱ Kristoo̱.
\v 21 Tsi ja̱koxi̱ nga je kanda'yájnú ko̱jo tsi ja̱koxi̱ nga Kristoo̱ xi akóyájnú, xikó kji'i kui ja̱koxi̱ xi tikoón kui,
\v 22 kuíni nga chjiénga nguiti bo̱a̱jín ts'en mindyionjnú xikó ts'én kixindyionjnú ngas'e̱, kji'a nga ni xi ts'aṉcha̱jojnú xi kamámejénjnú kini'ánjnú. Ti'antja̱tsi̱e̱yajnú yojojnú,
\v 23 kó ngatamatja̱tsi̱e̱ya a̱sién ni̱xtjinjnú ko̱jo kjo̱a̱kjíntakónjnú.
\v 24 Ti'antja̱tsi̱e̱yajnú yojojnú xikó ts'én Néná tjíts'éntja̱tsi̱e̱yajnú, xikó ts'én tjíjinkon kui nga ja̱koxi̱ nga kixi̱ ko̱jo tsjie.
\p
\v 25 Kó kuíni nga nguiti 'bíndisojínjnú, tasá én xí ja̱koxi̱ xi ndokjo̱a̱jojnú xtaa̱, nga̱t'a̱ ngayeje ñá ta ngo tsi yojo ndokjo̱a̱.
\p
\v 26 Tsi si̱'anxchánjnú, ngata̱ ni'ánjéjínjnú, kó nga jmí tsi nga ngo ni̱xtjii̱n nga k'uijñájnú kui kjo̱a̱xcha̱án.
\v 27 Ngata̱ boe'éndiejínjnú xindajín diabloo̱.
\p
\v 28 Kui xta̱ xi kats'énchejé ngas'e̱, nguiti bo̱a̱jín nga ts'én, tasá ngats'énxá, ngo xá xi nda nga ts'én nga sa̱'ínkjién tsja, tsi̱'e̱ nga k'uieé ngo ni xi tsja̱á xta̱ xi ka̱machjieén ngo ni.
\p
\v 29 Ngata̱ jmí én ch'o tsó ndokjo̱a̱jínjnú, tasá én nda xi tsja̱nga'niuú xtaa̱ xi ndokjo̱a̱jnú, tsi̱'e̱ nga ni xi nda sa̱ko̱ó xta̱ xi ku̱i̱nt'ie kui eén.
\v 30 Ngata̱ ni'ándasenjínjnúu̱ A̱sién Ni̱xtjii̱n Néná, kui xi katse'éjnú tsi̱'e̱ nga xcha̱ nga kjo̱tjo'ajnú ni̱xtjin nga ku̱i̱ndyiondéjnúu̱ jeé ngatsjé ni̱xtjin.
\p
\v 31 Ti̱'anch'ojnúu̱ yojojnú kjo̱a̱ndasee̱n, kjo̱a̱xtindaa̱, kjo̱a̱tamaá, kjo̱a̱cha'ayaá, kjo̱a̱ch'otsoó ko̱jo ngayeje ni xi ndajiín.
\v 32 Tasá ndaxta̱ ngatamajnú ja̱ k'i̱e̱ ja̱ ngaján, ni̱ma̱takón ngatamajnú, kó ti'anjetakónjnúu̱ ja̱ k'i̱e̱ ja̱ ngaján xingu̱i̱jnú, xikó ts'én Néná kats'énjetakónjnú ngat'aa̱ Kristoo̱.
\c 5
\s Bi ts'én akóyá Pabloo̱ kjo̱a̱a̱ nga ku̱i̱ṉtjajnú xikoó xta̱ xi tjimá nínga tsijee̱n
\p
\v 1 Chja̱'ánguíjnúu̱ Néná, nga̱t'a̱ jún boá xi ndí tjoó kui.
\v 2 Kó tjó ti'anjo̱jnú ngayeje xtaa̱, xikó ts'én tjó kats'énná Kristoo̱ nga k'ientjéná, kó katsja yojoo̱ xikoó ngo chji̱e̱ ko̱jo kjo̱a̱tjó xi sije̱n kamaá Néná nga kini'ánk'as'iee̱n.
\p
\v 3 Tanga kjo̱a̱tondo̱ ko̱jo ngayeje ni xi ndándí, ko̱jo kjo̱a̱xki̱'á, nde chjiénjín nga ko̱ndókjo̱a̱ kui nii̱ ngu̱i̱jinjnú, nga̱t'a̱ kui nii̱ jmí tsi tsi̱'e̱ xta̱ xi tsjiee̱ Néná.
\v 4 Ti nde nga ndokjo̱a̱jínjnú én xi tsjáná kjo̱a̱soboá, én xi taxkiya, én kjan xi ch'o tsó, nga̱t'a̱ jmí ni chjíjiín kui eén, tasá én xí tsjaá ndok'óchji Néná xi ndokjo̱a̱jnú.
\v 5 Nga̱t'a̱ chjiénga xcha̱jnú kui nii̱: nga ja̱koxi̱ boá nga kui xta̱ xi ndyi̱ts'en kjo̱a̱tondo̱, ko̱jo xi ni xi ndándí ndyi̱ts'en, ko̱jo xi xki̱'á xi tjimátji̱ngui kje̱'e ne xi Nénájín, nga ngayeje kui xtaa̱ sa̱kójiín nga Kristoo̱ ko̱jo nga Néná ko̱tíxomaa̱.
\v 6 Ngata̱ ngojín xta̱ xi k'o̱ṉcha̱jojnú nga ku̱i̱chji̱a̱jojnú én xi jmí ni chjíjiín, nga̱t'a̱ tangat'anií kui nii̱ nga ndibánié kjo̱a̱xcha̱án Néná kui xta̱ xi nt'ié'énjiín.
\v 7 Ngata̱ ki̱a̱jín ni'án kamajo̱jnú kui xta̱ xi bo̱a̱ ndyi̱ts'e̱én.
\p
\v 8 Nga̱t'a̱ kje̱'e ni̱xtjin kixindyionjñójnú, tanga ngot'e̱ 'ne̱ nguije yajnú Ndi̱a̱ná, je nínga tsijen tindyiónjnú, kuíni nga tiṉtja̱jnú xikoó xta̱ xi tjimá nínga tsijee̱n.
\v 9 Ti̱'ánjnú ni xi ndaa̱, ni xi kixi̱, ko̱jo ni xi ja̱koxi̱i̱, nga̱t'a̱ kuí nii̱ xi bokó nga nínga tsijee̱n ndokjo̱a̱ ñá.
\v 10 Ngatsjé ni̱xtjin tindyi̱séjnú mí ni xi tsja maa̱ Ndi̱a̱ná.
\v 11 Kó ngata̱ ki̱a̱jín ni'án kamajo̱jnú kui xta̱ xi ndyi̱ts'en ni xi jmí ni chjíjiín xi tjimá nínga jñoó, tasá takójnúu̱ nga ndajín kji'i ni xi ndyi̱ts'en.
\v 12 Nga̱t'a̱ ngaskande soboá ma maná nga ndokjo̱a̱ kjo̱a̱a̱ ni 'ma xi ndyi̱ts'en.
\v 13 Tanga nguije ngayeje nii̱ 'bíndo tsijen nínga tsijee̱n, ya ngayejee̱, nga̱t'a̱ nínga tsijee̱n ts'en tsijen ngayeje nii̱.
\v 14 Kuíni nga bi ts'én tjít'a xo̱jo̱n eén Néná:
\q Ti'inkje'ée̱ yojóo, ji xi titsjafé ji,
\q kó ti̱sítji̱n ji ngu̱i̱jii̱n xta̱ xi je jesoón,
\q tsi bo̱a̱ si̱'in ji, Kristoo̱ xí sa̱'íntsijee̱n.
\p
\v 15 Tsitsíjen cha̱n cha̱njnúu̱ kóts'en tiṉtjajnú, jmí tsi ku̱i̱ndyionjnú xikoó xta̱ xi makjínjiín ni xi tsi̱'e̱ Néná, tasá ti̱ndyiónjnú xikoó xta̱ xi kjínkón.
\v 16 Ni xi nda ti'ánjnú ta xikó ts'én sa̱kóndiéjnú nga si̱'ánjnú, nga̱t'a̱ ja̱ je yajnú nga ch'o kjima kui ni̱xtjin xi'bi̱.
\v 17 Tangat'anii̱ kui nii̱ nga ngata̱ chinijín ni'ánjnú yojojnú, tasá ngatamakjínjnú mí ni xi mejeén Ndi̱a̱ná nga si̱'ánjnú.
\v 18 Ngata̱ ni'ánch'i̱jínjnú yojojnú, nga̱t'a̱ xaán xí ts'én nga ni'án tajmí niní, tasá ngas'ikitsienijnú A̱sién Ni̱xtjii̱n Néná,
\v 19 nga ko̱ndókjo̱a̱jojnú xingu̱i̱jnú ti'ankjiénjnú salmo̱, só xi ndaa̱ Néná ko̱jo só xi bokoyájnú a̱sién ni̱xtjii̱n, kó ndaájnú ko̱jo ti'antsjajnúu̱ Ndi̱a̱ná ngayejee̱ ini̱ma̱jnú.
\v 20 Ngatsjé ni̱xtjin te'éjnúu̱ ndok'óchji Néná kjo̱a̱a̱ ngayeje nii̱, kui Néná xí Na̱'mii̱, nga si̱'ankjiénjnú ja'eén Ndi̱a̱ná Jesukristoo̱.
\s Bi ts'én akóyá Pabloo̱ xikó ts'én k'uíndojo̱ xkjín xtaa̱
\p
\v 21 Ja̱ k'i̱e̱ ja̱ ngaján cha̱ndikónjnú xingu̱i̱jnú, xikó ts'én yandíkónjnú Kristoo̱.
\p
\v 22 Jún xi ínchjínjnú, cha̱ndikónjnú xi̱'injnú, xikó ts'én yandíkónjnú Ndi̱a̱ná.
\v 23 Nga̱t'a̱ xi xi̱'ii̱n kui boá xi tikóntjoón xi chjo̱ón, xikó ts'én Kristoo̱ kui boá xi tikóntjoón ko̱jo xi ts'axié'á xta̱ na̱ngo̱xi̱i̱, kó nga xta̱ na̱ngo̱xi̱i̱ boá xi yojoo̱ Kristoo̱.
\v 24 Kó xikó ts'én xta̱ na̱ngo̱xi̱i̱ bendikón Kristoo̱, ti bo̱a̱ ti ts'én ínchjiín chjiénga sku̱i̱e̱ndíkón xi̱'ii̱n kjo̱a̱a̱ ngayeje nii̱.
\p
\v 25 Jún xi já xi̱'injnú, ti'antjójnú chjo̱ónjnú xikó ts'én Kristoo̱ kats'éntjó xta̱ na̱ngo̱xi̱i̱, kó tangat'anii̱ kui nga katsjá yojoo̱,
\v 26 kui nii̱ xi kats'én nga kats'én tsi̱'e̱. Eén kats'éntsjieni kó ndójoa aniéjónni,
\v 27 tsi̱'e̱ nga xta̱ na̱ngo̱xi̱i̱ k'uieé kjo̱a̱je nga kjo̱chó nguindyi̱ko̱n Kristoo̱, kó nga k'uiéjiín ni xi ndándí ko̱jo ni xi ch'o ts'én xcha̱, nga̱t'a̱ Kristoo̱ mejeén nga tsjie ko̱jo nga ndo̱jo kjin kjin ka̱ma xta̱ na̱ngo̱xi̱i̱.
\v 28 Ti bo̱a̱ ti ts'én já xi̱'ii̱n chjiénga sa̱'íntjó chjo̱ón xikó ts'én tjoó ti kuii̱ yojoo̱. Kui nda̱ xi tjoó chjo̱ón, tjórií ti kuii̱ yojoo̱.
\v 29 Nga̱t'a̱ ngojín xta̱ xi ch'oo̱ yojoo̱, tasá tsjaá ni chinie ko̱jo koo̱n, xikó ts'énjo̱ Kristoo̱ xta̱ na̱ngo̱xi̱i̱.
\v 30 Nga̱t'a̱ ñá boá xi tindyionjin ni xi ya'anii̱ yojoo̱ Kristoo̱.
\v 31 “Tangat'anií kui nii̱ nga nda̱ xi xi̱'ii̱n ku̱i̱'íjñá na̱'mii̱ ko̱jo na̱aa̱ tsi̱'e̱ nga sa̱'íngojo̱ yojoo̱ chjo̱ón, kó ngajoó nga ta ngo tsi yojo ka̱ma.”
\v 32 Achichí je kui ni xi tji'maá Néná, tanga ts'enkjién an kui nii̱ nga chjiá an kjo̱a̱a̱ Kristoo̱ ko̱jo kjo̱a̱a̱ xta̱ na̱ngo̱xi̱i̱.
\v 33 Kuíni nga jún, nga ngo nga ngojnú tjó ti'ánjnú chjo̱ónjnú xikó ts'én tjójnú yojojnú, kó kui xi chjo̱ón ngatama bendikón xi̱'ii̱n.
\c 6
\p
\v 1 Jún xi ndí jún xi s'ijinjnú Ndi̱a̱ná, nda'yá'énjnúu̱ xi xchájnú, nga̱t'a̱ kuí nii̱ xi kixi̱ nguindyi̱ko̱n Néná.
\v 2 Kjo̱a̱botíxoma xi tjón xi ts'éntsáyá ni xi Néná tsja̱á xta̱ xi ku̱i̱nt'ié'eén, kuí bí xi'bi̱: “Che̱ndikín jí na̱'míi̱ ko̱jo na̱áa̱,
\v 3 tsi̱'e̱ nga nda ts'én ku̱i̱ndyin kó tsie ni̱xtjin ka̱maa̱ nga ku̱i̱ndyin ji kui nga̱sondiee̱.”
\p
\v 4 Kó jún xi xi xchájnú, ngata̱ ni'ánxtindajínjnú ndíjnú, tasá nda ti'anchji̱ni̱e̱jnú ko̱jo ndokjo̱a̱jojnú nga si̱'anxchájnú xikó ts'én mejeén Ndi̱a̱ná.
\p
\v 5 Jún xi moso̱ xi kastiñájnú, tinda̱konjnú ko̱jo cha̱ndikónjnú nga ko̱nda'yá'énjnúu̱ kui xi ndi̱a̱jnú ma kui nga̱sondiee̱, kó ngayeje ini̱ma̱jnú nga ti'ánjnú xaá, xikó ts'én nda'yá'énjnúu̱ Kristoo̱.
\p
\v 6 Bo̱a̱ ti'ánjnú tanga jmí tsi ta kji'a tsi nga ndyi̱kotsijenjnú xtaa̱, tasá xikoó nga moso̱ xi tsi̱'e̱ Kristoo̱ majnú, kuíni nga ngayeje ini̱ma̱jnú nga ti'ánjnú ni xi mejeén Néná.
\v 7 Ngayeje takónjnú nga ti'ánjnú kui xaá, xikoó tsi tsi̱'e̱ Ndi̱a̱ná boá, kó jmí tsi tsi̱'e̱ xtaa̱.
\v 8 Nga̱t'a̱ je yajnú nga Néná tsja̱á ngo chjí xta̱ xi ni xi nda ndyi̱ts'e̱én, tsi xta̱ ndé ko̱jo tsi xta̱ xi moso̱ xi kastiñá.
\p
\v 9 Kó jún xi ndi̱a̱jnú, je yajnú nga ta ngo tsi ma Ndi̱a̱ xi tikón ndi'ak'ajmii̱ xi botixómájnú jún ko̱jo moso̱ xi kastiñaá, kó Ndi̱a̱ná skjánjín ts'énjo̱ xta̱a̱, kuíni nga bo̱a̱ ti ti'anjo̱jnú moso̱jnú kó ngata̱ mindyiandikónjínjnúu̱.
\s Bi ts'én akóyá Pabloo̱ xikó ts'én k'uijñánda yojoná tsi̱'e̱ nga sa̱'ínjínná xindajín
\p
\v 10 Kó nga fet'aa̱ ṉts'ie, ngasakó nga'niújnú ngu̱i̱jii̱n nga'niú xi jee̱ Ndi̱a̱ná.
\v 11 Xikoó já jún xi 'bínda yojoo̱ nga fí kján, bo̱a̱ ts'én t'índajnú yojojnú, tsi̱'e̱ nga 'niú ku̱i̱ndyiajnú kji'a nga ka̱mamejeén k'o̱ṉcha̱jojnú xindajín diabloo̱.
\v 12 Nga̱t'a̱ jmí tsi xta̱ nga̱sondie xi ndyi̱bixkánjo̱, xi tjiín nga'niú boá xi ndyi̱bixkánjo̱, ko̱jo xi nk'a xaá, ko̱jo xi botixómá nga̱sondie jñó xi'bi̱, ko̱jo nga'niuú a̱sién ni̱xtjin xi ndajín xi tjín nk'a ján.
\v 13 Kuíni nga, t'índajnú yojojnú xikoó já jún xi Néná je katsjaá ngayeje ni tsi̱'e̱ nga skoón yojoo̱, tsi̱'e̱ nga kjo̱chíkjo̱a̱jnú nga kjo̱chó ni̱xtjin xi ndajiín. Kó nguije tjíndajnú yojojnú 'niú ti̱ndyiónjnú.
\v 14 Kuíni nga 'niú ti̱ndyiajnú. Ti'ankjiénjnú ni xi ja̱koxi̱i̱, xikoó tsi kui xi ngatamajnú ngo tji̱xi̱n xi 'bíkjá ndáyaá ngo nda̱jun. Ti'ankjiénjnú kjo̱a̱kixi̱i̱ xikoó tsi kui xi ngatamajnú ngo ṉjño ki̱cha̱ xi bo'má ni̱se̱e̱n ngo nda̱jun.
\v 15 Ti̱ndyiondajnú nga k'uini̱jmijnú éntjatsi̱e̱e̱ kjo̱a̱xioó xikoó tsi kui xi ngatamajnú ndié xi boyá ngo nda̱jun.
\v 16 Ngatsjé ni̱xtjin chjábejnú kjo̱a̱s'ijii̱n kó kui xi ngatamajnú xikoó ngo ki̱cha̱ xi 'bíchjaá ni xi ndajín xi ts'énkjién ngo nda̱jun. Kuí kjo̱a̱s'ijii̱n xi ngat'íchjaá kji'a nga xindajín ka̱mamejeén sa̱'ín'onjnú.
\v 17 Kó chjábejnú kjo̱a̱'naxié'aá, kó kui xi ngatamajnú xikoó ngo ki̱cha̱ xi 'bijñaá to̱ko̱ ngo nda̱jun. Kó chjábejnú eén Néná, kó kui xi ngatamajnú xikoó ngo ki̱cha̱ ndojó xi tsi̱'e̱ A̱sién Ni̱xtjii̱n Néná.
\v 18 Ngatsjé ni̱xtjin ndokjo̱a̱jnúu̱ Néná kó te'éndiéjnúu̱ nga A̱sién Ni̱xtjii̱n xi ko̱síko̱jojnú nga ko̱ndókjo̱a̱jnú, ti̱ndyiondajnú kó ngata̱ ni'ánkjiejínjnú takónjnú, kó chji̱a̱'atjejnú ngayeje xta̱ tsjiee̱ Néná.
\v 19 Ti bo̱a̱ ti ts'én ndókjo̱a̱tjéjnú'un nga ko̱ndókjo̱a̱jnúu̱ Néná, tsi̱'e̱ nga tsja̱ana én xi k'uini̱jmi an, ko̱jo tsi̱'e̱ nga stsakjonjín an nga kuichji̱a̱ an, kó bo̱a̱ ts'én nga ka̱ma koko an ni xi kisi'ma ngas'e̱ xi ts'énbokó éntjatsi̱e̱e̱ Néná ngot'e̱.
\v 20 Tangat'anií kui nii̱ nga ndo̱bo̱a̱ya tikón an ngot'e̱. Xta̱xchaá Néná boá an, ndókjo̱a̱tjéjnú'un nga ko̱ndókjo̱a̱jnúu̱ Néná tsi̱'e̱ nga stsakjonjín an nga kuichji̱a̱ an xikó ts'én chjiénga ku̱i̱chji̱a̱ an.
\s Pabloo̱ bi ts'én kats'énkjiet'a xo̱jo̱o̱n
\p
\v 21 Tíkikoo̱, nda̱ ṉts'ie xi tjóna ko̱jo xi kixi̱ ts'én xaá Ndi̱a̱ná, ko̱tso̱yajnú kóts'en tikón an ko̱jo mí ni xi tjíts'en an.
\v 22 Kuíni nga ki̱a̱ ts'éntsanguiyájnú'un jún, tsi̱'e̱ nga ko̱tso̱yajnú kóts'en tindyionjne̱, kó bo̱a̱ ts'én tsja̱nga'niuú ini̱ma̱jnú.
\p
\v 23 Néná xí Na̱'mii̱ ko̱jo Ndi̱a̱ná Jesukristoo̱, nga tsjaá ngayeje ṉts'ié, kjo̱a̱xió, kjo̱a̱tjó ko̱jo kjo̱a̱s'ijin.
\v 24 Ngat'ieé kjo̱a̱nda ngayeje xta̱ xi tjoó Ndi̱a̱ná Jesukristoo̱, ngo kjo̱a̱tjó xi fejín. Bo̱a̱ kji'i.