\id PHP - MAZATECO DE SAN PEDRO IXCATLÁN
\h XTA̱ FILIPO̱
\mt1 Xo̱jo̱n xi apostro̱ Pabloo̱ katsanguiyaa̱ xta̱ na̱ngo̱xi̱ xi chji̱a̱ni Filipo̱
\c 1
\s Bi ts'én kats'éntinde Pabloo̱ xta̱ na̱ngo̱xi̱ xi chji̱a̱ni Filipo̱
\p
\v 1 An Pabloo̱ ko̱jo Timoo̱, ji̱n xi mosoo̱ Jesukristoo̱, ni'ántindejne̱ ngayeje jún xi xta̱ tsjiee̱ Kristo Kjisoo̱ xi tindyiónjnú na̱xi̱ńdá Filipo̱ kó ti ni'ántindejne̱ já xi nguito̱ko̱o̱ na̱ngo̱xi̱i̱ ko̱jo já xí bosikójo kui jaá.
\v 2 Néná xi Na̱'miná ko̱jo Ndi̱a̱ná Jesukristoo̱, nga tsjajnú kjo̱a̱ndaa̱ ko̱jo kjo̱a̱xioó.
\s Bi ts'én íni̱jmi Pabloo̱ xikó ts'én tsíchji̱a̱tjé xta̱ na̱ngo̱xi̱ xi chji̱a̱ni Filipo̱
\p
\v 3 Ngatsjé ni̱xtjin nga foa'átsjienna jún tsjáa̱ ndok'óchji Néná.
\v 4 Tsja mana ngatsjé ni̱xtjin nga chjiátjejnú'un ngayejejnú.
\v 5 Nga̱t'a̱ je ta ngo tsi kich'iá yojoná nga ndyi̱ni'án xaá éntjatsi̱e̱e̱ Jesukristoo̱, ndeskande ni̱xtjin nga tjón kanda'yájnú kó ngaskande ngot'e̱.
\v 6 Néná xí íts'i̱yanii̱ nga kats'én ngo xá xi nda ngu̱i̱jii̱n jún, kó bee̱ ko̱n an nga sa̱'índo̱jo ngaskande ni̱xtjin nga kjo̱e̱'e nguiní Jesukristoo̱.
\p
\v 7 Nda kji'i nga bo̱a̱ ts'én tjíts'enkjó an kjo̱a̱a̱ ngayejejnú, nga̱t'a̱ ngu̱i̱jin ini̱ma̱na tindyiónjnú. Nga̱t'a̱ ti kuíni kjo̱a̱ndaa̱ Néná xi tjisákóná jún ko̱jo an. Tsi ndo̱bo̱a̱ya ko̱jo tsi nguindyi̱ko̱n jáxaá tikón an, ts'énxiya an kó ts'énboko cha̱n cha̱n an nga ja̱koxi̱ boá éntjatsi̱e̱e̱ Jesukristoo̱.
\v 8 Nga̱t'a̱ Néná xí chistiko̱ nga achichí tjóna ngayeje jún xikó ts'én 'niú tjoó Jesukristoo̱ an.
\p
\v 9 Kó mí'áa̱ Néná nga chjiáa̱ nga 'niú ngase k'uiéjnú kjo̱a̱tjó, kó nga Néná tsja̱a ngasejnú kjo̱a̱kjíntakón ko̱jo nga kixi̱ ts'én ka̱makjínjnú ni xi tsi̱'e̱.
\v 10 Tsi̱'e̱ nga bo̱a̱ ts'én nda ka̱ma chje̱'éjinjnú mí ni xi ja̱koxi̱ nga nda, ko̱jo nga tsjiets'én ku̱i̱ndyionjnú ko̱jo nga jmíjín xi ka̱maa̱ ch'o ts'én ku̱i̱chji̱a̱ta'injnú ni̱xtjin nga kji̱ndi̱bá nguiní Kristoo̱.
\v 11 Kui ni̱xtjii̱n ko̱kójnú jún kjín to̱ko̱ya ni xi kixi̱ xi kini'ánjnú, ni xi katsjájnú Jesukristoo̱ nga si̱'ánjnú, tsi̱'e̱ nga xtaa̱ tsja̱á kjo̱a̱je kó sa̱'íntsjaá Néná.
\s Bi ts'én íni̱jmi Pabloo̱ nga nganda tsi̱'e̱ kjima ni xi ts'énfoa'ajin
\p
\v 12 Jún ṉts'ie, mejénna nga xcha̱jnú nga kui ni xi kjimata'in an, kuí nii̱ xi katsjánga'niú ngasee̱ nga kjimatsie éntjatsi̱e̱e̱ Jesukristoo̱.
\v 13 Nga̱t'a̱ ngayeje jajún xi 'niú nk'a xaá xi tsi̱'e̱ xtitjoón ko̱jo xta̱ xi ngasee̱ be nga tikón 'niú an tangat'anii̱ Kristoo̱.
\v 14 Kó mején ngayeje já ṉts'iee̱, nga be nga tikón 'niú an, 'niú kjima'niátakón ngase Ndi̱a̱ná kó tsakjónjín ma nga ndyi̱'bíni̱jmi eén Néná.
\p
\v 15 Kjénní nga ja̱koxi̱ nga tjín xta̱ xi 'bini̱jmi kjo̱a̱a̱ Kristoo̱ tanga ta kjo̱a̱a̱ kjo̱a̱'ontakón tsi ko̱jo tsi kjo̱a̱a̱ nga kjo̱a̱'atjón, tanga kje̱'e xi ngayejee̱ kon nga ts'én kuí nii̱.
\v 16-17 Xta̱ xi 'bini̱jmi kjo̱a̱a̱ Kristoo̱ tanga nga kjo̱a̱a̱ nga mejeén kjo̱a̱'atjón, bo̱a̱ ndyi̱ts'én nga̱t'a̱ nganda tsi̱'e̱ xí ndyi̱mongase, kó ndyi̱ts'énkjó nga mejeén sa̱'ínni'in ngasena nga k'i̱e̱ tikón 'niú an. Tanga xta̱ xi ngasee̱ xi ndyi̱'bíni̱jmi kjo̱a̱a̱ Kristoo̱, tangat'anií kjo̱a̱tjoó nga bo̱a̱ ndyi̱ts'én, nga̱t'a̱ be nga tikón 'niú an tsi̱'e̱ nga xiyá cha̱n cha̱n an éntjatsi̱e̱e̱ Néná nguindyi̱ko̱n jáxaá.
\v 18 Tanga jmí ndasenjín, tsi bo̱a̱ kji'i ko̱jo tsi bo̱a̱jín kji'i, tanga tji'bíni̱jmi kjo̱a̱a̱ Kristoo̱, kó kuí ni xi'bi̱ xi tsja mana. Kó s'e̱ tsja ngase ka̱mana.
\p
\v 19 Nga̱t'a̱ je be an nga kjo̱a̱a̱ nga ndyi̱ndokjo̱a̱jnúu̱ Néná ko̱jo nga kjo̱a̱a̱ Jesukristoo̱ ts'éntsjána A̱sién Ni̱xtjii̱n, kui nii̱ xi xta̱ ndé sa̱'ínna.
\v 20 Bo̱a̱ ka̱ma xikó ts'én mejénna kó ts'énkoyáa̱ nga ta jmíjín ni xi tsja̱ana kjo̱a̱soboá. Tasá 'niú kosien an xikó ts'én síkijí an, kó xcha̱ kjo̱a̱jee̱ Kristoo̱ tangat'anii̱ ni xi kjimata'in an, tsi tikón an ko̱jo tsi k'ien an.
\v 21 Nga̱t'a̱ bi xian an: Tsi tikón an, Kristoo̱ xi tikónni an. Kó tsi ko̱ya an, je kats'en an.
\v 22 Tanga tsi nga tikón ngase an kui nga̱sondiee̱, 'niú chjínií xá xi tjíts'en an. Bejín an mí ni xi kjo̱a̱'ajin an.
\v 23 Nga̱t'a̱ achichí ni'in mana nga ngo nga jó kui nii̱ xi kjo̱a̱'ajin an: nga̱t'a̱ ta bo̱a̱ mejénna ko̱ya an tsi̱'e̱ nga ki̱a̱ kotíjña an nínga tikón Kristoo̱, nga̱t'a̱ nda ngase kjimana kui nii̱,
\v 24 tanga mejénna kotíjña ngase an kui nga̱sondiee̱, tangat'anii̱ jún.
\v 25 Kó be an nga bo̱a̱ kji'i kui nii̱, kó kotíjña ngase an, kó takó kotíjñajinjnú'un ngayejejnú tsi̱'e̱ nga 'niú ngase s'i̱jinjnú kó tsja ka̱majnú nga bo̱a̱ si̱'ánjnú.
\v 26 Bo̱a̱ ts'én kji'a nga kjuinkátsijen nguiníjnú'un k'uié ngasejnú kjo̱a̱ nga si̱'antsjájnúu̱ Kristo Kjisoo̱.
\s Bi ts'én akóyaá Pabloo̱ xta̱ na̱ngo̱xi̱i̱ nga 'niú k'uíndo
\p
\v 27 Ta kui tsi nii̱ mí'ájnú'un: ti̱ndyiónjnú xikó ts'én tsoboaá nga k'uíndo xta̱ je s'ijii̱n éntjatsi̱e̱e̱ Kristoo̱. Kuíni nga tsi kjuinkátsijenjnú'un skuie an, kó tsi ki̱a̱jín kotíjña an kuint'ie an én xikó ts'én tindyiónjnú. 'Niú ti̱ndyiónjnú. Ngo tsi ni xi tjajintakónjnú. Ngondséje̱n ti'anga'niújnú nga ku̱i̱xkántjéjnú kjo̱a̱s'ijii̱n éntjatsi̱e̱e̱ Kristoo̱.
\v 28 Kó nga ta ndakonjín majnúu̱ kondra̱jnú, nga̱t'a̱ kuí nii̱ xi ko̱ko̱ó ngo chi̱bo̱a̱ kui xtaa̱ nga kju̱i̱e̱, tanga nga jún kjo̱tjo'ajnú. Néná tsja̱ajnú nga jún xi si̱'ánjnú.
\v 29 Nga̱t'a̱ jún je katse'éjnú nga s'i̱jinjnú Kristoo̱, tanga ti katse'éjnú nga tangat'anii̱ kui nga ku̱i̱tjatiojnú kjo̱a̱ni̱ma̱.
\v 30 Ti kuíni ni xi ndyi̱bitjajinjnú jún, xikoó ni xi je kamáyajnú nga kamáta'in an, kó ngot'e̱ 'ne̱ ndyi̱nda'yájnú nga takó ts'énfoa'ajin an.
\c 2
\s Bi ts'én íni̱jmi Pabloo̱ xi kókón chjiénga ka̱ma ñá
\p
\v 1 Kó kuíni nga tsi Kristoo̱ tsjanga'niújnú, tsi kjo̱a̱tjoó xi ts'éntsjájnú nga'niú, tsi A̱sién Ni̱xtjin xi tjíts'éngojnú, tsi 'niú tjójnú xingu̱i̱jnú kó tsi tjínjnú kjo̱a̱ni̱ma̱takón,
\v 2 ti'ando̱jojnú kjo̱a̱tsjana, nga ti bo̱a̱ ti ts'én ku̱i̱ndyionjnú, nga k'uiéjnú ti kuii̱ kjo̱a̱tjó, nga ngondséje̱n ka̱majnú ko̱jo nga ti kuii̱ ni xi kjójintakónjnú.
\v 3 Ngata̱ ngojín nii̱ xi ni'ánjnú tsi kjo̱a̱a̱ nga ku̱i̱tjátjónjnú ko̱jo tsi kjo̱a̱a̱ nga kjo̱a̱nk'atakón, tasá ni̱ma̱kjo̱a̱ ngatamajnú xikoó tsi nk'a ngase t'íjñájnú xta̱ xi ngasee̱.
\v 4 Jmí tsi nganda tsa̱jún xi ku̱i̱ndyi̱sejnú, tasá ngandaa̱ xta̱ xi ngasee̱ xi tindyi̱séjnú.
\v 5 Xi kókón Kristo Kjisoo̱, bo̱a̱ kon ngatamajnú.
\q
\v 6 Kó nda tsi Néná boá kui,
\q tanga jmí tsi iskjíbé tsján tsján kui nii̱.
\q
\v 7 Tasá ti kui íjñát'axín yojoo̱ nga Néná, kó moso̱ kamá,
\q xikoó ngo xta̱ nga̱sondie kamá nga kis'ijña,
\q
\v 8 kó nga xta̱ kamá, ni̱ma̱kjo̱a̱ kats'én ti kui yojoo̱,
\q kó tsint'ié'eén Néná ngaskande nga k'ien, nga k'ient'a kroo̱.
\q
\v 9 Kó kuíni nga Néná katsjaá ngo kjo̱a̱je xi je,
\q kó katsjaá ngo ja'én xi nk'a ta bo̱a̱jiín ja'én xi ngasee̱.
\q
\v 10 Tsi̱'e̱ nga nga ko̱nda'yá ja'eén Kjisoo̱, ngayeje xi ko̱sién tikoó,
\q ki̱a̱ ndi'ak'ajmii̱, t'ananguii̱ ko̱jo nguindie t'ananguii̱.
\q
\v 11 Kó nga ngayeje xi bo̱a̱ ka̱tso̱ nga Jesukristoo̱ xi Ndi̱a̱ná.
\q Bo̱a̱ ts'én nga s'i̱jña tsijen kjo̱a̱jee̱ Néná xí Na̱'mii̱.
\s Bi ts'én íni̱jmi Pabloo̱ kjo̱a̱a̱ kóts'en chjiénga k'uíndo xta̱ na̱ngo̱xi̱i̱ ngu̱i̱jii̱n xta̱ xi ngasee̱
\p
\v 12 Kó kuíni, jún ṉts'ie xi tjóna, xikó ts'én nga ndyi̱nda'yá'énjnú ngatsjé ni̱xtjin, kó jmí tsi ta kji'a tsi nga ki̱a̱ tikón an, bo̱a̱ ra ti'ánjnú ngot'e̱ nga kjin tikón an. Cha̱ndikónjnú Néná kó ngatjatsiejnú jún tji̱e̱nga si̱'andojo̱jnú ni xi tjíts'én ngu̱i̱jinjnú nga ts'énboxié'ajnú.
\v 13 Nga̱t'a̱ Néná boá xi tjíts'én nga ka̱mamejénjnú ko̱jo nga si̱'ankjatjosónjnú ni xi ndyi̱ni'ánjnú, tangat'anii̱ ni nda xi mejeén kui.
\p
\v 14 Ti̱'ánjnú ngayeje nii̱ kó nga ndokjo̱a̱ta'injínjnú xingu̱i̱jnú, ti nde ngata̱ ndokjo̱a̱tijínjnú.
\v 15 Tsi̱'e̱ nga jmíjín xi ka̱maa̱ ch'o ts'en ku̱i̱chji̱a̱ta'in, ko̱jo nga ndií Néná xi tsjie ka̱majnú ngu̱i̱jii̱n kui xta̱ ch'okon ko̱jo xta̱ xi ndajín xi tjín ngot'e̱. Ngu̱i̱jii̱n kui xtaa̱ jún xikónií ngo ṉño 'naa̱ nga̱sondiee̱ kjimajnú,
\v 16 nga 'niú kich'iajnú kui eén kjo̱a̱mindyioo̱n, kó bo̱a̱ ts'én kji'a nga kjo̱e̱'e nguiní Kristoo̱, an tsja ka̱mana kjo̱a̱a̱ jún nga skuie an nga ta kjo̱a̱ndajiín nga kistso'bá an ko̱jo nga kats'enxá an.
\v 17 Jún kjima'niátakónjnú Néná kó ndyi̱ni'ántsjájnúu̱, kó kui ni xi'ba̱ xikónií tsi ngo chji̱e̱ ndyi̱boe'éjnúu̱. Tsi an si̱'ank'ienna, an xí ka̱mando̱joní an kui chji̱e̱e̱. Tsi bo̱a̱ ka̱ma achichí tsja ka̱mana kó ti tsja mana kjo̱a̱a̱ jún.
\v 18 Kó ti bo̱a̱ ti ts'én jún tsja ngatamajnú kjo̱a̱a̱ kjo̱a̱tsjana.
\s Bi ts'én íni̱jmi Pabloo̱ nga Timoo̱ xi sa̱nguíyaá xta̱ xi chji̱a̱ni Filipo̱
\p
\v 19 Tanga tsi Ndi̱a̱ná Kjisoo̱ xi tsjandié, tsá sanguiyajnú'un Timoo̱, tsi̱'e̱ nga tsja ka̱mana nga sku̱i̱e̱ an xikó ts'én tindyiónjnú jún.
\v 20 Nga̱t'a̱ jmíjínna ingo nda̱ xi nda̱ kjimaa̱ nganda tsa̱jún xikoó Timoo̱.
\v 21 Nga̱t'a̱ ngayeje xta̱ xi ngasee̱ kjo̱a̱nda tsi̱'e̱ xi mongase, kó jmí tsi kjo̱a̱ndaa̱ Kristo Kjisoo̱ xi mongase.
\v 22 Tanga jún je yajnú kókón Timoo̱. Kui xi ts'énxájo̱na kó ts'en'bíni̱jmíjo̱na éntjatsi̱e̱e̱ Néná, kó bo̱a̱ kon kui xikoó ngo ndí xi ts'énxájo̱ na̱'mii̱.
\v 23 Kó kuíni nga ts'énkoya an tsi̱'e̱ nga tsá sanguiyajnú'un Timoo̱, nguije skuie an kó k'uié kjo̱a̱a̱ ni xi kjimana.
\v 24 Kó kjima'niátakón an Ndi̱a̱ná nga tsja̱ndié nga ko̱jo an tsá kjuinkátsijenjnú'un.
\s Bi ts'én íni̱jmi Pabloo̱ nga Epafroditoo̱ xi sa̱nguíyaá xta̱ xi chji̱a̱ni Filipo̱
\p
\v 25 Tanga tjíts'enkjó an nga chjiénga sanguiyanguinijnú'un nda̱ ṉts'ié Epafroditoo̱, nda̱ ṉts'ie an xi nijan tjíts'enxájo̱na kó ts'énfoa'atiojo̱na kjo̱a̱ni̱ma̱ ngat'aa̱ Kristoo̱, kui xi ti juún kananguiyajnú'un tsi̱'e̱ nga ko̱síko̱jona nga sa̱'ín ni xi chjiénna.
\v 26 Nga̱t'a̱ achichí kamámejeén nga sku̱i̱e̱jnú ngayejejnú, kó achichí nda̱ kamaá kjo̱a̱a̱ nga jún je kamáyajnú nga ndajín kis'iee̱ kui.
\v 27 Nga̱t'a̱ ja̱koxi̱ nga kamá'oón, kó ngaskande mején k'ien, tanga Néná ni̱ma̱kamaá kui, kó ko̱jo an ni̱ma̱kamaá an Néná nga, tsi̱'e̱ nga k'uiéjín ngasena kjo̱a̱ndasen xikoó xi ja̱ bo̱a̱ je tjínna.
\v 28 Kuíni nga tasá tsá ts'éntsanguiyájnú'un, tsi̱'e̱ nga tsja ka̱majnú jún nga xcha̱ nguiníjnú ko̱jo tsi̱'e̱ nga nda̱jín ka̱mana an.
\v 29 Ngat'aa̱ Ndi̱a̱ná nda ti'anjo̱jnú nga kjo̱chókónjnú. Ngatsjé ni̱xtjin tjó ti'anjo̱jnú kui xta̱ xi xikoó kui.
\v 30 Nga̱t'a̱ mejeén k'ien nga íni̱jmi éntjatsi̱e̱e̱ Kristoo̱. Ndasenjín kamaá yojoo̱ kó mejeén k'ien, tangat'anii̱ nga katsjána kui kjo̱a̱bosíko̱jo xi kamájín nga jún ma xi katse'éjnú'un.
\c 3
\s Bi ts'én íni̱jmi Pabloo̱ mí ni xi chjí kamá ngasee̱ kui
\p
\v 1 Kjo̱a̱a̱ ngayeje ni xi ngasee̱, já ṉts'ie, tsja ngatamajnú kjo̱a̱a̱ Ndi̱a̱ná. 'Bojónjínna nga ti xiyá nguiníjnú'un ingo ndi̱ya ni xi je kats'en'indójnú'un, nga̱t'a̱ nganda tsa̱jún boá kui nii̱.
\p
\v 2 Chónjnú yojojnú kjo̱a̱a̱ kui xta̱ xi ndajín xi xikoó ńñaá, ko̱jo kui xta̱ xi ts'én xá xi ndajiín, ko̱jo kui xta̱ xi mejeén nga si̱'áa̱n yojoná sirkunsisio̱n xi jmí ni chjíjiín.
\v 3 Nga̱t'a̱ sirkunsisio̱n xi ndaa̱ kuí xí kich'iá ñá xi yandíkón Néná xikó ts'én bokoyáná A̱sién Ni̱xtjii̱n, kó kjima'niátakón ñá ni xi kats'én Kristo Kjisoo̱, jmí tsi ni xi kini'aán yojoná.
\v 4 Nda tsi an tjínna ngo kjo̱a̱ nga ka̱ma ka̱ma'niátakón an kui nii̱. Jmíjín ingo xi bo̱a̱ ts'én ka̱ma'niátakón kui nii̱ xikoó an.
\v 5 Nda̱ Israe̱l an, kó xi ma jin ni̱xtjin nga katsen an kini'ánna sirkunsisioo̱n. Xta̱ tji̱e̱e̱ Benjaa̱ chjiá an. Nda̱ ebreo̱ an ngu̱i̱jii̱n xta̱ ebreoo̱. Ngo nda fariseo̱ xi kats'énkjatjosón cha̱n cha̱n kjo̱a̱kitii̱ Moisee̱ kamá an.
\v 6 Achichí 'niú askóo̱n nga kats'enkjatjosón an kjo̱a̱kitii̱ nga ngaskande tsangatji̱nguíi̱ xta̱ na̱ngo̱xi̱i̱. Kixi̱ kis'ijña an xikó ts'én bokoyá kjo̱a̱kitii̱. Jmíjín xi ch'o ts'én tsíchji̱a̱ta'inna.
\v 7 Tanga ngayeje kui nii̱ xi achichí chjínií kamána ngas'e̱, ngot'e̱ 'ne̱ tangat'anii̱ Kristoo̱ nguiti jmí ni chjíjiín kui nii̱ kjimana.
\v 8 Kó kjénní nga xikoó tsi ngo ni xi je kichajá kjimana kui nii̱, nga ndse̱je̱n ts'én 'bijñá an xikó kji'i 'niú nda ngase nga be an Kristo Kjisoo̱, Ndi̱a̱na. Tangat'anii̱ Kristoo̱ nga je ijñámasien an ngayeje nii̱, kó xikónií tsi xtjié kjimana kui nii̱, tsi̱'e̱ nga sa̱'in an Kristoo̱,
\v 9 kó nga ngo nijan ka̱ma an kui. Mejénjínna kjo̱a̱kixi̱ xi tsa'a̱n xi ndibánií nga ni'ánkjatjosón kjo̱a̱kitii̱. Tasá kui kjo̱a̱kixi̱ xi sakóná tangat'anii̱ nga s'i̱jinná Kristoo̱. Kó kui boá xi'ba̱ kjo̱a̱kixi̱ xi ndibánií Néná tangat'anii̱ nga s'ijinna.
\p
\v 10 Je ijñámasien an ngayeje nii̱ tsi̱'e̱ nga skuie an Kristoo̱, kó skuie an nga'niú xí kats'énkja'á'yaá ko̱jo nga sa̱kóna kjo̱a̱ni̱ma̱ xi ja'atio, kó nga xikoó tsi kui ka̱ma an nga kini'ánk'ién kui,
\v 11 bo̱a̱ ts'én mejénna nga sa̱kóna an kui kjo̱a̱foa'á'yaá ngu̱i̱jii̱n xta̱ xi je jesoón.
\s Bi ts'én íni̱jmi Pabloo̱ ni xi kamámejeén jachótji̱ngui nga kis'ijña
\p
\v 12 Jmí tsi bo̱a̱ t'íxian an nga je kasako yejena ni xi kixian an, ti nde jmí tsi t'íxian an nga je kamá an 'yání xi tjiín nga ka̱ma an. Tanga takó ts'énfítji̱ngui ra an ni xi kixian an, tsi̱'e̱ nga sa̱kóna ni xi kamámejeén Kristo Kjisoo̱ nga kats'én tsi̱'e̱na.
\v 13 Jún ṉts'ie, jmí tsi bo̱a̱ t'íxian an nga je jachótji̱nguíi̱ kui nii̱, ta kuí tsi nii̱ xi ts'en an: nga ngayeje ni xi je kis'ijña nga̱xto̱n an je kats'enchíya an, kó an tjíts'en an ngo kjo̱a̱'niú tsi̱'e̱ nga kjóchotji̱nguíi̱ ni xi jaskan ka̱ma.
\v 14 Ts'énfítji̱ngui ra an nínga chjiénga kjócho an, tsi̱'e̱ nga sa̱kóna ni xi ni'án xi tsjá Néná, Kristo Kjisoo̱ boá xi tjíts'énkjién Néná nga ts'énchji̱a̱na ndi'ak'ajmi ján.
\p
\v 15 Kó kuíni nga ngayeje ñá xi je kamá xi chjiénga ka̱ma, kuí nii̱ xi chjiénga kjójintakón. Kó tsi kje̱'e ts'en si̱'ankjójnú, Néná xi ko̱kójnú nga ndajín kji'i kui nii̱.
\v 16 Tanga kui ni xi je jachótji̱ngui ñá, chjiénga 'niú ku̱i̱ndyionjin rá kui nii̱.
\p
\v 17 Jún ṉts'ie, chja̱'ánguíjnú'un an, kó tsitsíjenjnúu̱ kui xta̱ xi bo̱a̱ ts'en síndo xikoó kui chi̱bo̱a̱ xi je katse'éjne̱ jún.
\v 18 Nga̱t'a̱ achichí ma xi tjimá kui xi xikoó xta̱ xi je kjín ndi̱ya kixiyajnú'un, kó ngaskande kjandá ma an ngot'e̱ nga xiyá nguiníjnú'un, nga achichí ma xta̱ xi kondra̱ síndonii̱ nga k'ien Kristoo̱ t'a kroo̱.
\v 19 Kó nga fet'a kju̱i̱e̱ kuí xtaa̱, kui xi nga̱nts'o̱a̱ boá xi ndyi̱fítji̱ngui xikoó tsi nee̱, kó mongase kjo̱a̱jee̱ ngu̱i̱jii̱n ni xi chjiénga tsja̱á kjo̱a̱soboá, kui xi ta nii̱ kui nga̱sondiee̱ tsi xi kjijinkon.
\v 20 Tanga ñá ndi'ak'ajmi ján ndokjo̱a̱ ñá, kó ti ndyi̱chiyáa̱ nga ndi'ak'ajmii̱ kjindibáni kui xi k'o̱xié'aná, kui xi Ndi̱a̱ná Jesukristoo̱.
\v 21 Kó kui boá xi ko̱síkjoyá yojo ni̱ma̱kjo̱a̱ná, tsi̱'e̱ nga xikoó yojoo̱ kjo̱a̱jee̱ kui ka̱ma, kui nii̱ xi sa̱'ín nga sa̱'ínkjién nga'niú xi tjiín nga botixómaá ngayeje nii̱.
\c 4
\s Bi ts'én íni̱jmi Pabloo̱ kjo̱a̱a̱ nga ngatsjé ni̱xtjin tsja ngatamajnú kjo̱a̱a̱ Ndi̱a̱ná
\p
\v 1 Kuíni nga jún bo̱a̱ ndí ṉts'ie xi achichí mejénna nga skuie an ko̱jo xi tjóna, jún boá xi kjo̱a̱tsjana ko̱jo chjií xá xi je kats'en an. Jún ṉts'ie xi tjóna, 'niú ti̱ndyiajnú ngat'aa̱ Ndi̱a̱ná.
\p
\v 2 'Niú mí'áa̱ na̱ Ebodiaa̱ ko̱jo na̱ Síntikee̱, tsi̱'e̱ nga ti kuii̱ ni xi sa̱'ínkjó ngajoó ngat'aa̱ Ndi̱a̱ná.
\v 3 Kó ji 'niú mí'aá, ji xi 'niátakoón nga nijan ndyi̱ni'ánxá, tsi̱'e̱ nga ko̱sike̱je ji kui ínchjiín, kui xi nijan kats'énxájo̱na nga ini̱jmi an éntjatsi̱e̱e̱ Néná, ko̱jo Klementee̱ ko̱jo xta̱ xi ngase xi nijan kats'énxájo̱na. Kui xi je kjit'a ja'eén xo̱jo̱n nínga tjít'a ja'eén xta̱ xi k'uíndo ngatsjé ni̱xtjii̱n.
\p
\v 4 Tsja ngatamajnú ngatsjé ni̱xtjin ngat'aa̱ Ndi̱a̱ná. Ingo ndi̱ya bo̱a̱ xian nguiníjnú'un: ¡Tsja ngatamajnú!
\v 5 Ngayeje xta̱ xi ngatamabejnú nga xta̱ xi ndaxta̱jnú. Ndi̱a̱ná je tikón tiña.
\p
\v 6 Ngata̱ jmíjín ni xi nda̱ ngatamajnú, tasá ngayeje ni xi machjiénjnú t'íyajnúu̱ Néná nga ko̱ndókjo̱a̱jnúu̱. Chji̱a̱'ajnúu̱, kó ti bo̱a̱ ti ts'én te'éjnúu̱ ndok'óchji kjo̱a̱a̱ ni xi ts'éntsjájnú.
\v 7 Kó kjo̱a̱xioó Néná, kui kjo̱a̱xió xi foa'atjoón ngayeje kjo̱a̱kjíntakoón, skoón ini̱ma̱jnú ko̱jo kjo̱a̱kjíntakónjnú ngat'aa̱ Kristo Kjisoo̱.
\s Bi ts'én akóyá Pabloo̱ kjo̱a̱a̱ ni xi si̱'ankjójnú
\p
\v 8 Kó nga fet'aa̱ já ṉts'ie, kuí nii̱ xi ti'ankjójnú: ngayeje ni xi ja̱koxi̱, ngayeje ni xi yandíkón nguindyi̱ko̱n Néná, ngayeje ni xi kixi̱, ngayeje ni xi tsjie, ngayeje ni xi 'niú nda, ko̱jo ngayeje ni xi tjiín ja'én xi nda. Tsi tjín ni xi nda ko̱jo ni xi tsoboaá nga ni'ántsja, kuí nii̱ xi ti'ankjójnú.
\p
\v 9 Ti'ankjatjosónjnú ni xi kamájnú nga akoyájnú'un, ni xi je kachjábéjnú, ni xi je kanda'yájnú ko̱jo ni xi kitsitsijenjnúu̱ nga kats'en an, kuí nii̱ xi ti'ánjnú. Bo̱a̱ ts'én nga kui Néná xi tjiín kjo̱a̱xioó k'uijñájinjnú.
\s Pabloo̱ bi ts'én katsjaá ndok'óchji xta̱ na̱ngo̱xi̱ xi chji̱a̱ni Filipo̱, nga̱t'a̱ asíko̱jo
\p
\v 10 Achichí tsja mana ngat'aa̱ Ndi̱a̱ná nga jachó ni̱xtjin nga jún kini'ánkjó nguiníjnú'un. Kjénní nga kini'ánkjójnú'un, tanga kis'iejínjnú ngu̱i̱ndie kóts'en ko̱siko̱jojnú'un.
\v 11 Jmí tsi kui nii̱ t'íxianjnú'un kjo̱a̱a̱ nga ngo ni chjiénna, nga̱t'a̱ je be an kóts'en nga chjiénga tsja ka̱mana ta xikó ts'én tikón an.
\v 12 Je be an kóts'en mindyión nga xta̱ ni̱ma̱, kó ti je be an kóts'en mindyión nga tsie ni tjínná. Je kamána nga ja'ajin an tajmí niní, ta bo̱a̱a̱ tsi kitsiena ko̱jo tsi bojóna, ko̱jo tsi ts'atio tjínna ko̱jo tsi ta jmíjín ni xi tjínna.
\v 13 Kristoo̱ xí tsjanga'niúna, tsi̱'e̱ nga xchikjoana tajmí niní.
\v 14 Tanga jún, nda kini'ánjnú nga kamándasenjnú kjo̱a̱a̱ kjo̱a̱ni̱ma̱na.
\p
\v 15 Kó xikó ts'én nga je yajnú jún, xta̱ xi chji̱a̱ni Filipo̱, nga kji'a nga íts'i̱yañáa̱ nga ini̱jmi an éntjatsi̱e̱e̱ Néná, kji'a nga jatjoni an nangui Masedonia̱, nde ngojín na̱ngo̱xi̱ xi katsjá ko̱jo tsi asíko̱jona, ta jún chií xi bo̱a̱ kini'ánjnú.
\v 16 Nga̱t'a̱ nga kis'ijña an na̱xi̱ńdá Tesalónika̱, ngo jó ndi̱ya kananguiyajnú'un ni xi kamáchjiénna.
\v 17 Jmí tsi chji̱e̱ xi ts'énmongase an, tasá ts'énmongase an nga tsie ngase kjo̱a̱cho̱n k'uiéjnú nguindyi̱ko̱n Néná.
\v 18 Ngayeje ni xi kananguiyajnú'un je kini'ánk'as'ienna, kó ngaskande ts'atio tjínna ngot'e̱. Epafroditoo̱ kats'énk'as'ienna ni xi kananguiyajnú'un, kó kui nii̱ xi kats'éndojo̱ ni xi kamáchjiénna. Kuí nii̱ xi xikoó ngo kjo̱a̱nda xi tjiín ni sije̱n, ngo kjo̱a̱tjó xi tsja maa̱ Néná nga kjíbé.
\v 19 Kui Néná xi ts'énxájo̱ an tsja̱ajnú jún ngayeje ni xi chajajnú, xikó kji'i kjo̱a̱cho̱o̱n kjo̱a̱je xi tjiín Kristo Kjisoo̱.
\v 20 Néná xí Na̱'mii̱ kui tsi̱'e̱ ngatama kjo̱a̱jee̱ ngatsjé ni̱xtjin. Bo̱a̱ kji'i.
\s Pabloo̱ bi ts'én kats'énkjiet'a xo̱jo̱o̱n
\p
\v 21 Tinde bo̱a̱ t'ínjnú ngayeje xta̱ tsjiee̱ Kristo Kjisoo̱. Já ṉts'ie xi nijan síndojo̱na tinde xó bo̱a̱ tsó.
\v 22 Ti bo̱a̱ ti ts'én tinde xó bo̱a̱ tsó ngayeje xta̱ tsjiee̱ Néná. Ti ts'entíndejnú kui xta̱ xi ndyi̱ts'enxá ndi'aa̱ nda̱ xtitjoón xi 'mí Sesaa̱.
\p
\v 23 Nga t'íjñajinjnú kjo̱a̱ndaa̱ Ndi̱a̱ná Jesukristoo̱. Bo̱a̱ kji'i.