\id COL - MAZATECO DE SAN PEDRO IXCATLÁN
\h XTA̱ KOLOSA̱
\mt1 Xo̱jo̱n xi apostro̱ Pabloo̱ katsanguiyaa̱ xta̱ na̱ngo̱xi̱ xi chji̱a̱ni Kolosa̱
\c 1
\s Bi ts'én kats'éntinde Pabloo̱ xta̱ na̱ngo̱xi̱ xi chji̱a̱ni Kolosa̱
\p
\v 1 An Pabloo̱, nda̱ apostroo̱\f + \fr 1.1 \ft “Xi kananguiyaa̱” tsó “nda̱ apostro̱” axa̱ “já apostro̱” nga én griego̱.\f* Jesukristoo̱ nga̱t'a̱ bo̱a̱ ts'én kamámejeén Néná, ko̱jo nda̱ ṉts'ié xi 'mí Timoo̱,
\v 2 ni'ántindejne̱ jún xi xta̱ tsjiee̱ Néná ko̱jo xi s'ijinjnú Kristo Kjisoo̱ xi tindyiónjnú na̱xi̱ńdá Kolosa̱. Néná xi Na̱'miná ko̱jo Ndi̱a̱ná Jesukristoo̱ nga tsjajnú kjo̱a̱ndaa̱ ko̱jo kjo̱a̱xioó.
\s Bi ts'én tsí'átjé Pabloo̱ xta̱ na̱ngo̱xi̱ xi chji̱a̱ni Kolosa̱
\p
\v 3 Ngatsjé ni̱xtjin nga ndokjo̱a̱tjéjne̱ jún, boe'éjne̱ ndok'óchji Néná, Na̱'mii̱ Ndi̱a̱ná Jesukristoo̱.
\v 4 Nga̱t'a̱ je kanda'yájne̱ kjo̱a̱a̱ nga s'ijinjnú Kristo Kjisoo̱ ko̱jo kjo̱a̱a̱ nga tjójnú ngayeje xta̱ tsjiee̱ Néná.
\v 5 Jún, bo̱a̱ ndyi̱ni'ánjnú, nga̱t'a̱ ndeskande nga kanda'yájnú én xi ja̱koxi̱ xi ya'a éntjatsi̱e̱e̱ Néná, ndyi̱chiyájnúu̱ ni xi Néná tikóntjoó ndi'ak'ajmii̱ xi tsja̱ajnú.
\p
\v 6 Kui éntjatsi̱e̱ xi kanda'yájnú, je tji'bíni̱jmi ngayeje són nga̱sondiee̱ kó nda tjíts'eén xtaa̱, xikó kamá ngu̱i̱jinjnú ni̱xtjin nga kamáya ja̱koxi̱jnú kjo̱a̱ndaa̱ Néná.
\v 7 Kuí eén xi kamájnú nga akóyájnú nda̱ ṉts'ié xi tjóná xi 'mí Epafraa̱, kui nda̱ xi kixi̱ fíjo̱ xaá nga tjíts'én xaá Jesukristoo̱ nganda tsa̱jún.
\v 8 Kuí boá xi katsáyájne̱ kjo̱a̱a̱ jún ko̱jo kjo̱a̱a̱ nga A̱sién Ni̱xtjii̱n Néná xi kats'én nga ndyi̱ni'ántjójnú xingu̱i̱jnú.
\p
\v 9 Kuíni nga ji̱n ndeskande koó nga kanda'yájne̱, ngatsjé ni̱xtjin ndyi̱ndokjo̱a̱tjéjne̱ jún ko̱jo ndyi̱chjiá'ájne̱ Néná tsi̱'e̱ nga ko̱kó cha̱n cha̱njnú ni xi mejeén nga si̱'ánjnú jún ko̱jo tsi̱'e̱ nga tsja̱jnú ngayeje to̱ko̱ya kjo̱a̱kjínkón ko̱jo nga A̱sién Ni̱xtjii̱n xi tsja̱ajnú nga ka̱makjínjnú ni xi tsi̱'e̱ Néná.
\v 10 Bo̱a̱ ngatama tsi̱'e̱ nga nda si̱'ánjnú xikó ts'én xta̱ xi tsi̱'e̱ Ndi̱a̱ná, ko̱jo nga si̱'ánjnú ni xi tsja maa̱ Néná, ko̱jo nga si̱'ánjnú ngayeje to̱ko̱ya ni xi nda, kó nga nda ngase xcha̱jnú kókón Néná.
\v 11 Ngasakó ngasejnú nga'niú xikó kji'i kui nga'niú xi tjiín kui Néná xi tjiín kjo̱a̱jee̱, tsi̱'e̱ nga xchikjoajnú tajmí niní kó ngat'iéjnú kjo̱a̱chiyákjo̱a̱.
\v 12 Tsja ngat'iéjnú nga ko̱e̱'éjnúu̱ ndok'óchji Na̱'mii̱, nga̱t'a̱ kuí Na̱'mii̱ xi je íjñandaná tsi̱'e̱ nga sa̱kóná ngu̱i̱ndie xi sakoó xta̱ tsjie xi chji̱a̱ni ngu̱i̱ndie nínga tsijee̱n.
\v 13 Néná boá xi xín kats'énkja'aboa'áná nga'niuú ngu̱i̱ndie nínga jñoó kó je kijíjo̱ná nínga ts'énbotixómá ndí tjoó,
\v 14 kui xi íchjítjéná tsi̱'e̱ nga jatjo'a ñá ko̱jo nga kini'ánjetakoón jéná.
\s Bi ts'én akóyá Pabloo̱ ni xi kats'én Kristoo̱ nganda tsa̱ñá
\p
\v 15 Kji'a nga ndyi̱ya kókón Kristoo̱, ja̱ Néná xi majín yaa̱ xí ndyi̱ya kókón. Kristoo̱ boá xi ndií Néná xi tjón tikón nguindiee̱ nga kini'ánda ngayeje ni xi kini'ándaa̱.
\v 16 Nga̱t'a̱ tangat'anií kui nga Néná kats'énda ngayeje ni xi tjín ndi'ak'ajmii̱ ko̱jo nga̱sondiee̱, ni xi ya ko̱jo ni xi yajín xikoó xi nguito̱ko̱, xi tjiín xaá, xi tjiín nga'niú ko̱jo xi botíxomá. Ngayeje nii̱ xi kamánda ngat'aa̱ kui, kó kuí xí tsi̱'e̱ ka̱ma.
\v 17 Kristoo̱ tikón ndeskande nguindiee̱ nga kini'ánda ngayeje nii̱, kó tangat'anií kui nga síndonda ngayeje nii̱.
\v 18 Kristoo̱ boá xi tikóntjoón xta̱ na̱ngo̱xi̱i̱, kó xta̱ na̱ngo̱xi̱i̱ kui boá xi yojoo̱ Kristoo̱. Kristoo̱ boá xi tjón ja'á'yaá ngu̱i̱jii̱n xta̱ xi je jesoón, tsi̱'e̱ nga kui xi nk'a ngase k'uijñaá ngayeje ni xi tjiín.
\v 19 Nga̱t'a̱ tsja kamaá Na̱'mii̱ nga íjñajii̱n Jesukristoo̱ xi kókón kui.
\v 20 Kó nga ngat'aa̱ Kristoo̱ nga Néná boá xi kats'én nga kjo̱e̱'ekón nguinií ngayeje xi síndot'axiín, xi síndo kui nga̱sondiee̱ ko̱jo xi síndo ndi'ak'ajmii̱, kó Kristoo̱ boá xi katsjá kjo̱a̱xioó tangat'anii̱ jín xi iskjitjón t'a kroo̱.
\p
\v 21 Jún ngas'e̱ kixindyión t'axínjnúu̱ Néná, kó ngu̱i̱jin ini̱ma̱jnú kondraa̱ kui kamájnú, kjo̱a̱a̱ ni xi ndajín xi kini'ánjnú,
\v 22 tanga ngot'e̱ 'ne̱ Néná boá xi kats'én nga kjoé'e̱chon nguiníjnúu̱, tangat'anii̱ nga Kristoo̱ kats'énk'as'ien yojoo̱ nga kini'ánk'ién, tsi̱'e̱ nga ka̱ma ku̱i̱ndyiajnú nguindyi̱ko̱n Néná xikoó xta̱ xi tsjie, xi jmíjiín ni xi ndándí ko̱jo nga jmíjín xi ka̱maa̱ ch'o ts'en ku̱i̱chji̱a̱ta'in.
\v 23 Bo̱a̱ ka̱ma tsi ja̱koxi̱ nga 'niú tindyiajnú ko̱jo tsi 'niú tikón kjo̱a̱s'ijinjnú, ko̱jo nga jmí ni̱xtjin kju̱i̱e̱ kjo̱a̱chiyá xi tikónjnú kjo̱a̱a̱ kui éntjatsi̱e̱e̱ Kristoo̱ xi je kanda'yájnú, kuí eén xi je tji'bíni̱jmi ngayeje són nga̱sondiee̱, kó an Pabloo̱ katse'éxána nga k'uini̱jmi an kui eén.
\s Bi ts'én akóyá Pabloo̱ kjo̱a̱a̱ xá xi katse'eé
\p
\v 24 Ngot'e̱ 'ne̱ achichí tsja mana kjo̱a̱a̱ kjo̱a̱ni̱ma̱ xi ts'énfoa'atio an nganda tsa̱jún, nga̱t'a̱ bo̱a̱ ts'én kjimando̱jona yojona nga ts'énfoa'atio an kjo̱a̱ni̱ma̱ xi tjisákoó Kristoo̱ ngandaa̱ xta̱ na̱ngo̱xi̱i̱, nga̱t'a̱ xta̱ na̱ngo̱xi̱i̱ kuí boá xi yojoo̱ Kristoo̱.
\v 25 Bo̱a̱ ts'én kats'enxá an ngu̱i̱jii̱n xta̱ na̱ngo̱xi̱i̱, xikó ts'én índa Néná nga katsjána xá nganda tsa̱jún, tsi̱'e̱ nga k'uini̱jmi yeje an eén Néná.
\v 26 Ts'én'bini̱jmi an kui én xi kis'ijña 'ma ni̱xtjin xchá ján, kui xi akakojiín xta̱ xi kis'ie ngas'e̱, tanga ngot'e̱ 'ne̱ tjibókoo̱ xta̱ na̱xi̱ńdá tsjiee̱ Néná.
\v 27 Néná kamámejeén akoó kui xtaa̱ kókji'i kjo̱a̱cho̱o̱n kjo̱a̱jee̱ ni xi tji'maá ngu̱i̱jii̱n xta̱ xi tjín ngayeje nga̱sondiee̱, kó kui ni xi tji'má xi tjis'íjñátsijen ngot'e̱ kui boá Kristo̱ xi tikónjinjnú, kó tangat'aa̱ kui boá nga ndyi̱chiyájnú nga sa̱kójnú kjo̱a̱je.
\p
\v 28 Kristo̱ xi'bi̱ xi ndyi̱'bíni̱jmijne̱, kó ndyi̱botíxomajne̱ ngayeje xtaa̱, kó ndyi̱bokoyájne̱ nga ndyi̱ni'ánkjiénjne̱ ngayeje kjo̱a̱kjínkón xi tsjájne̱ Néná, tsi̱'e̱ kui xtaa̱ ka̱ma xikoó xta̱ xi s'ijii̱n Kristoo̱ xikó ts'én mejeén Néná.
\v 29 Tangat'anii̱ kui nii̱ nga 'niú tjíts'enxá an nga ts'enkjién an ngayeje nga'niúna ko̱jo ngayeje nga'niú xi tsjána Kristoo̱.
\c 2
\p
\v 1 Mejénna nga xcha̱jnú nga tanisién tsie kjo̱a̱ni̱ma̱ xi ts'énfoa'atio an nganda tsa̱jún, ko̱jo ngandaa̱ xta̱ na̱ngo̱xi̱ xi chji̱a̱ni Laodisea̱ ko̱jo ngandaa̱ xta̱ xi kji̱e̱ bejín kje̱n an.
\v 2 Tsjáa̱ kjo̱a̱ni̱ma̱ yojona tsi̱'e̱ nga sa̱kó nga'niuú ini̱ma̱a̱ xta̱ na̱ngo̱xi̱i̱, nga ta ngo tjín ko̱a̱'a xkjín nga k'uieé kjo̱a̱tjó, nga k'uieé kjo̱a̱cho̱o̱n kjo̱a̱kjíntakón xi ndaa̱, tsi̱'e̱ nga ka̱makjiín ni xi íjña'ma Néná ngas'e̱, kui xi Kristoo̱ ngot'e̱.
\v 3 Kuíni nga kji'a nga xcha̱ Kristoo̱ sa̱kóná ngayeje kjo̱a̱kjínkón ko̱jo kjo̱a̱kjíntakón xi 'niú chjínií.
\v 4 Kui nii̱ ts'én xiyájnú'un tsi̱'e̱ nga ngojín xi k'o̱ṉcha̱jojnú nga sa̱'ínkjién én ndiso xi tsjatsó.
\v 5 Nga̱t'a̱ nda tsi ki̱a̱jín tikónjinjnú'un nga an ma, ki̱a̱ tikónjo̱jnú ini̱ma̱na, kó tsja mana nga kixi̱ tindyiónjnú ko̱jo nga takó 'niú ti̱ndyiónjnú nga s'ijinjnú Kristoo̱.
\p
\v 6 Kó kuíni nga, nguije kini'ánjo̱'ojnú Jesukristoo̱ kui xi Ndi̱a̱ná, chjiénga bo̱a̱ ts'én konguíntji̱nguíjnúu̱ xikoó xta̱ xi kui chji̱a̱ni.
\v 7 'Niú ti'an'niátakónjnú Kristoo̱, xikoó tsi ngo yá xi na̱nga̱ tjimá ja̱maa̱ ngatamajnú. 'Niú ti̱ndyiajnú kjo̱a̱a̱ kui kjo̱a̱s'ijii̱n xikó ts'én akakoyájnú, kó ngatsjé ni̱xtjin te'éjnúu̱ ndok'óchji Néná.
\s Bi ts'én akóyá Pabloo̱ kjo̱a̱a̱ kjo̱a̱mindyion xi tsjá Kristoo̱
\p
\v 8 Chónjnú yojojnú kó ngata̱ boe'éndiejínjnú nga tjín xi k'o̱ṉcha̱jojnú nga ko̱kóyajnú ngo én xi jmí ni chjíjiín xi fítji̱ngui kjo̱a̱xcha̱á xtaa̱. Kui nii̱, nii̱ a̱sién ni̱xtjii̱n kui nga̱sondiee̱ boá, kó jmí tsi kjo̱a̱bokoyá xi tsi̱'e̱ Kristoo̱.
\p
\v 9 Néná tikónjin ndo̱jo ndo̱jo ngu̱i̱jin yojoo̱ Kristoo̱.
\v 10 Kó jún je kamándo̱jojnú nga̱t'a̱ Kristoo̱ je kini'ángojo̱jnú yojojnú. Kristoo̱ xí botixómaá ngayeje a̱sién ni̱xtjin xi tjiín nga'niú ko̱jo xá.
\v 11 Kji'a nga kis'ijinjnú Kristoo̱ kini'ánjnú ngo sirkunsisio̱n, tanga jmí tsi ngo sirkunsisio̱n xi ni'aán yojoo̱ xtaa̱ xi kini'ánjnú, ngo sirkunsisio̱n xi ja'áxín jé xi kini'ánjnú, kó Kristoo̱ boá xi bo̱a̱ kats'énjo̱jnú.
\v 12 Kó nga kastindájnú, jún je nijan akjanijínjnú ko̱jo Kristoo̱, kó ti bo̱a̱ ts'én nijan ja'á'yájnú ko̱jo kui, nga̱t'a̱ kis'ijinjnú nga'niuú Néná, kui xi kats'énkja'á'yaá Kristoo̱ ngu̱i̱jii̱n xta̱ xi je jesoón.
\v 13 Nguindiee̱ nga sa̱kójnú kui sirkunsisioo̱n, xta̱ xi je jesón kamájnú nguindyi̱ko̱n Néná tangat'anii̱ jé xi kini'ánjnú. Tanga Néná nijan katsjá nguiníjnú kjo̱a̱mindyion jún nga̱t'a̱ kini'ángojo̱jnú yojojnú Kristoo̱, kó bo̱a̱ ts'én Néná kats'énjetakón ngayeje jéná.
\v 14 Néná iskjíndiyá kui xo̱jo̱n xi kjit'a jé xi tjitjíe̱nná kui xi tikón kondra̱ tsa̱ñá, kó kats'énkjié nga ki̱a̱ yít'a kroo̱.
\v 15 Néná kats'énkjién kuí Kristoo̱ nga kui xi kats'én, nga ja'áxiín nga'niuú kui a̱sién ni̱xtjin xi tjiín nga'niú ko̱jo xaá, kó ngayeje xi kamábe nga katsjaá kjo̱a̱soboá.
\p
\v 16 Kó kuíni nga, ngata̱ ni'ánsenjínjnúu̱ xta̱ xi kó ka̱tso̱ kjo̱a̱a̱ ni xi chiniejnú ko̱jo ni xi 'yójnú, ko̱jo tsi kjo̱a̱a̱ ni̱xtjii̱n s'ué, ko̱jo tsi kjo̱a̱a̱ s'ué xi ma nga chjindié saá ko̱jo tsi kjo̱a̱a̱ ni̱xtjin ndikón.
\v 17 Ngayeje kui nii̱ mejeén bokó chií ni xi jaskan ndibá, tanga Kristoo̱ boá xi ja̱koxi̱ nga bokó ni xi ndibaá.
\v 18 Ngata̱ ni'ánsenjínjnúu̱ xta̱ xi ni̱ma̱kjo̱a̱ ndyi̱ts'en yojoo̱ kó ndítsjie ndyi̱ts'endikón, kui boá xi ku̱i̱'íchjaá nga sa̱kójnú ni xi ni'án xi si̱'ánjnú, kui xtaa̱ ndyi̱tsó nga ngo ni akakoo̱ kó je 'boxié yojoo̱ tangat'anii̱ kjo̱a̱kjíntakón xi tsi̱'e̱ xi ndyi̱ts'enkjién.
\v 19 Jmí tsi ki̱a̱ ndyi̱fítji̱ngui kui xi tikóntjoón na̱ngo̱xi̱i̱, kui na̱ngo̱xi̱ xi yojoo̱ Kristoo̱. Kristoo̱ kui boá xi tjits'énngo kui yojoo̱, kó ts'éntsjánga'niuú nga kji'i'niuú ngayeje to̱ko̱ya ni xi ya'ajo̱ni, kó kjimaxchá kui yojoo̱ xikó ts'én mejeén Néná nga ka̱maxchá.
\p
\v 20 Tsi jún je nijan k'ienjnú ko̱jo Kristoo̱, je kamándéjnú kjo̱a̱a̱ kui nii̱ a̱sién ni̱xtjin xi botixómaá nga̱sondiee̱, ¿kó mí kjo̱a̱a̱ nga takó bo̱a̱ ts'én tindyiónjnú xikoó tsi kui nga̱sondiee̱ botixómájnú? ¿Ánní nga ndyi̱ni'ánsenjnúu̱ kjo̱a̱botíxoma xi tsó xtaa̱?
\v 21 Kui xi bi tsoó: “Ngata̱ ni'ínje̱jín ji kui nii̱. Ngata̱ chit'ejín kui nii̱. Ngata̱ ndse̱jín chjábení ji.”
\v 22 Kui kjo̱a̱botíxomaa̱, kjo̱a̱bokoyaá xtaa̱ boá, kó ni xi kjife nga tjíni'ánkjieén boá.
\v 23 Ja̱ ma xi ja̱koxi̱ makjiín máa̱ nga bo̱a̱ ts'én chji̱a̱, nga̱t'a̱ ts'énkjo̱a̱'niuú xtaa̱ nga sku̱i̱e̱ndíkón Néná ko̱jo nga ni̱ma̱kjo̱a̱ ka̱ma ko̱jo nga sa̱'ínkja'atio kjo̱a̱ni̱ma̱ yojoo̱, tanga jmí ni chjíjiín kui nii̱ tsi̱'e̱ nga ko̱síko̱joná nga 'bíchjaá ni xi mí'á yojoo̱.
\c 3
\p
\v 1 Je nijan ja'á'yájnú ko̱jo Kristoo̱, kuíni nga tindyi̱séjnú ni xi chji̱a̱ni ndi'ak'ajmi ján, nínga tikón Kristoo̱ tsja fojnií Néná.
\v 2 ¡Ni xi chji̱a̱ni ndi'ak'ajmii̱ xí ti'ankjójnú, jmí tsi ni xi chji̱a̱ni kui nga̱sondiee̱!
\v 3 Nga̱t'a̱ jún je jesónjnú kjo̱a̱a̱ ni nga̱sondiee̱, kó Néná je íjñá ngu̱i̱jii̱n Kristoo̱ kjo̱a̱mindyionjnú.
\v 4 Kó ni̱xtjin nga ko̱kó yojoo̱ Kristoo̱ kui xi kjo̱a̱mindyionjnú, kji'a boá nga ko̱jo jún ka̱matsijenjnú nga xcha̱ kjo̱a̱jee̱ kui.
\s Bi ts'én akóyá Pabloo̱ kjo̱a̱a̱ xikó ts'én xchóo̱n yojoná
\p
\v 5 Ti'ank'iénjnú ni nga̱sondie xi tikónjii̱n ini̱ma̱jnú kui ni xi kjo̱a̱tondoo̱, ko̱jo ni xi ndándií, ko̱jo nga kotíxomajnú ni xi ndajín xi mejeén sa̱'ín yojojnú, ko̱jo kjo̱a̱xki̱'á to̱n. Kui xi xki̱'á too̱n kui boá xi tjimátji̱ngui kje̱'e ne xi Nénájín.
\v 6 Nga̱t'a̱ tangat'anií kui nii̱ nga ndibánié kjo̱a̱xcha̱án Néná kui xta̱ xi nt'ié'énjiín.
\v 7 Kui nii̱ xi kini'ánjnú ngas'e̱ nga bo̱a̱ ts'én kixindyionjnú.
\v 8 Tanga ngot'e̱ 'ne̱ ti ti'anch'ojnúu̱ yojojnú ngayeje kui ni xi'bi̱: kjo̱a̱tamaá, kjo̱a̱xtindaa̱, kjo̱a̱too̱n, kjo̱a̱ch'o'aa̱ ko̱jo én kjan xi ch'otsoó.
\v 9 Ngata̱ ja̱ k'i̱e̱ ja̱ ngajánjín 'bíndisojo̱jnú xingu̱i̱jnú, nga̱t'a̱ je xikoó tsi je ik'iéjnú ṉjño xchá xi kichajájnú ngas'e̱.
\v 10 Kó ngot'e̱ 'ne̱ xikoó tsi je kichajájnú ngo ṉjño xi tja̱tsi̱e̱, nga Néná tjíts'éntja̱tsi̱e̱yajnú xi kókón kui, ko̱jo nga nda ngase xcha̱jnú kókón Néná.
\v 11 Ngu̱i̱jii̱n kui xta̱ tja̱tsi̱e̱e̱ nguiti jmíjín xta̱ xi griego̱ ko̱jo tsi xta̱ judío̱, tsi xi tjiín ko̱jo tsi xi jmíjiín sirkunsisioo̱n, tsi kje̱'e ko̱jo tsi kje̱'ejín én chji̱a̱, tsi moso̱ xi kastiñá ko̱jo tsi xta̱ ndé, nga̱t'a̱ Kristoo̱ boá xi ngayeje nii̱, kó kui boá xi tikónjii̱n ngayeje ni xi tjiín.
\p
\v 12 Néná je ja'ájinjnú jún nga je xta̱ tsjiee̱ ko̱jo xta̱ xi tjoó kui majnú jún, kuíni nga ti'antja̱tsi̱e̱yajnú kjo̱a̱mindyionjnú, xikoó tsi ngo ṉjño xi tja̱tsi̱e̱ cha̱jájnú nga ni̱ma̱ ka̱majnú xingu̱i̱jnú, nga k'uiéjnú kjo̱a̱nda, nga k'uiéjnú kjo̱a̱ni̱ma̱kjo̱a̱, nga k'uiéjnú kjo̱a̱ndaxta̱ ko̱jo nga k'uiéjnú kjo̱a̱chiyákjo̱a̱.
\v 13 Ja̱ k'i̱e̱ ja̱ ngaján ti'anchíkjo̱a̱jnúu̱ xingu̱i̱jnú, kó ti'anjetakónjnúu̱ xingu̱i̱jnú tsi tjín xi ko̱ónguita'ínjnú. Xikó ts'én nga Kristoo̱ kats'énjetakónjnú, ti bo̱a̱ ti ts'én ti'anjetakónjnú jún.
\v 14 Ti'antjójnú xingu̱i̱jnú, nga̱t'a̱ kjo̱a̱tjoó kuí xí 'niú chjí ngasenii̱ ta bo̱a̱jiín ni xi ngasee̱, kó kui nii̱ xi ts'éngo kjin kjinjnú.
\v 15 Kjo̱a̱xioó Kristoo̱ ngatatixómaá ini̱ma̱jnú, nga̱t'a̱ tangat'anií kui nii̱ nga Néná tsíchji̱a̱nijnú tsi̱'e̱ nga ta ngo tsi yojoo̱ Kristoo̱ ka̱majnú nga k'uiéjnú kjo̱a̱xió. Te'éjnúu̱ ndok'óchji Néná kjo̱a̱a̱ kui nii̱.
\p
\v 16 ¡Eén Kristoo̱ 'niú nga t'íjñajinjnú xikoó tsi ngo kjo̱a̱cho̱n! Takoyajnúu̱ xingu̱i̱jnú kó ja̱ k'i̱e̱ ja̱ ngaján tatíxomajnúu̱ nga si̱'ankjiénjnú ngayeje kjo̱a̱kjínkón, ndaájnú ngayeje ini̱ma̱jnú nga ko̱e̱'éjnúu̱ ndok'óchji Ndi̱a̱ná nga ko̱ndajnú salmo̱, só xi ndaa̱ Néná ko̱jo só xi bokoyájnú a̱sién ni̱xtjii̱n.
\v 17 Ngayeje ni xi si̱'ánjnú ko̱jo ni xi k'uinjnú ngongá ja'eén Ndi̱a̱ná Kjisoo̱ xi ti'ankjiénjnú nga ko̱e̱'éjnúu̱ ndok'óchji Néná xí Na̱'mii̱, ngat'aa̱ ni xi kats'én Kristoo̱ kjo̱a̱a̱ jún.
\s Bi ts'én akóyá Pabloo̱ xikó ts'én chjiénga k'uíndo xtaa̱
\p
\v 18 Jún xi ínchjínjnú, cha̱ndikónjnú xi̱'injnú. Bo̱a̱ ti'ánjnú xikó ts'én nda maá xta̱ xi tjimátji̱nguii̱ Ndi̱a̱ná.
\v 19 Jún xi xi̱'injnú, ti'antjójnú chjo̱ónjnú kó ngata̱ tajájín ni'ánjo̱jnú.
\v 20 Jún xi ndíjnú, nda'yá'énjnúu̱ ngayeje ni xi ka̱tso̱jnú xi xchájnú, nga̱t'a̱ kuí nii̱ xi tsja maa̱ Ndi̱a̱ná.
\v 21 Jún xi xi xchájnú, ngata̱ ni'ánxtindajínjnú ndíjnú, tsi̱'e̱ nga ko̱yajín kon.
\v 22 Jún xi moso̱ xi kastiñájnú, nda'yá'énjnúu̱ ngayeje ni xi ka̱tso̱jnú ndi̱a̱jnú kui nga̱sondie xi'bi̱, jmí tsi ta kji'a tsi nga ndyi̱kotsijenjnú tsi̱'e̱ nga tsja ka̱maa̱ kui, ngayeje ini̱ma̱jnú nga ti'ankjatjosónjnúu̱, bo̱a̱ ti'ánjnú nga̱t'a̱ yandíkónjnú Ndi̱a̱ná.
\v 23 Ngayeje ni xi si̱'ánjnú, ngayeje ini̱ma̱jnú nga ti'ánjnú, xikoó tsi xaá Ndi̱a̱ná xi ndyi̱ni'ánjnú, kó jmí tsi xaá xtaa̱.
\v 24 Nga̱t'a̱ je yajnú nga Ndi̱a̱ná tsja̱ajnú ni xi tsoboájnú. Nga̱t'a̱ jún boá xi ndyi̱ni'ánsenjnúu̱ Kristoo̱, nga kui xi Ndi̱a̱jnú xi ja̱koxi̱i̱.
\v 25 Tanga kui xta̱ xi ni xi kixi̱jín sa̱'iín, sa̱ko̱ó ni xi tsoboaá kjo̱a̱a̱ kui ni xi kats'én, nga̱t'a̱ Néná skjánjín ts'énjo̱ xtaa̱.
\c 4
\p
\v 1 Jún xi ndi̱a̱jnú, ta són ngatamajnú ko̱jo ni xi kixi̱ ti'anjo̱jnú moso̱jnú, ngatja'átsjienjnú nga jún ti tikónjnú ngo Ndi̱a̱ ndi'ak'ajmi ján.
\p
\v 2 Ngatsjé ni̱xtjin ndokjo̱a̱jnúu̱ Néná. Ti̱ndyiondajnú kó te'éjnúu̱ ndok'óchji Néná.
\v 3 Ndókjo̱a̱tjéjnú ji̱n, tsi̱'e̱ nga Ndi̱a̱ná tsja̱ndiéjne̱ nga k'uiyájne̱ eén kó k'uini̱jmi̱jne̱ ni xi kis'ijña 'ma ngas'e̱ kó je tjibóko ngot'e̱ ngat'aa̱ Kristoo̱, nga̱t'a̱ tangat'anii̱ kui nii̱ nga ndo̱bo̱a̱ya tikón an.
\v 4 Chji̱a̱'ajnúu̱ Néná tsi̱'e̱ nga an ka̱ma koko cha̱n cha̱n an kui eén, xikó ts'én nga chjiénga xiyá an.
\p
\v 5 Ti̱ndyiónjnú xikoó xta̱ xi kjínkón ngu̱i̱jii̱n xta̱ xi s'ijinjiín Néná, kó ni xi nda ti'ánjnú nga k'uiéjnú ngu̱i̱ndie.
\v 6 Nga ko̱ndókjo̱a̱jnú chjiénga nda ka̱tso̱ énjnú kó tsja ngatamaa̱ xtaa̱, tsi̱'e̱ nga xcha̱jnú kóts'en ko̱ndókjo̱a̱jongajnú nga ngo nga ngo xtaa̱.
\s Pabloo̱ bi ts'én kats'énkjiet'a xo̱jo̱o̱n
\p
\v 7 Xikó ts'én tikón an k'i̱e̱e̱, ndí nda̱ ṉts'ié xi 'mí Tíkikoo̱ ko̱tso̱yajnú, kui nda̱ xi tjóna ko̱jo xi nda tjíts'én xaá nga mosoo̱ Ndi̱a̱ná xikoó an.
\v 8 Kuí nda̱a̱ xi ts'éntsanguiyájnú'un jún, tsi̱'e̱ nga ko̱tso̱yajnú kóts'en tindyionjne̱ ko̱jo nga tsja nga'niuú ini̱ma̱jnú.
\v 9 Ki̱a̱ nijan kjo̱jo nda̱ xi 'mí Onésimoo̱, ndí nda̱ ṉts'ié xi tjóna xi 'niátakón an, xi nda̱ nanguijnú ma, kuí jaá xi ko̱tso̱yajnú ngayeje ni xi kjima k'i̱e̱e̱.
\p
\v 10 Nda̱ xi 'mí Aristarkoo̱, xi nijan tikónjo̱ an ndo̱bo̱a̱ya, tinde xó bo̱a̱ tsó, ko̱jo nda̱ xi 'mí Markoo̱, xi ṉts'i̱e̱xtio ma Bernabee̱, jún je kanda'yájnú én kjo̱a̱a̱ kui nda̱a̱. Tsi ki̱a̱ kjo̱chókónjnú nda ti'anjo̱jnú.
\v 11 Ti bo̱a̱ ti ts'én tinde xó bo̱a̱ tsó nda̱ xi 'mí Kjisoo̱, kui xi Justo̱ 'mií nga. Ta kui tsi kui já judíoo̱ xi ndyi̱bosikójona kjo̱a̱a̱ xá xi ts'en an ngandaa̱ kjo̱a̱botíxomaa̱ Néná, kó kuí kui jaá xi tsjanga'niúna kjimana.
\v 12 Tinde xó bo̱a̱ tsó nda̱ xi 'mí Epafraa̱, xi nda̱ nanguijnú ma, xi ti mosoo̱ Kristoo̱ nga, kui nda̱a̱ ngatsjé ni̱xtjin ngayeje ini̱ma̱a̱ ts'énmí'átjéjnú jún nga chji̱a̱a̱ Néná, tsi̱'e̱ nga 'niú ku̱i̱ndyiajnú nga ka̱ma ndo̱jo kjin kjinjnú nga si̱'ánjnú ngayeje ni xi mejeén Néná.
\v 13 An xí chistiko̱ an kjo̱a̱a̱ nga achichí nda̱ kjimaa̱ jún nda̱ xi 'mí Epafraa̱ ko̱jo kjo̱a̱a̱ xta̱ xi síndo Laodisea̱ ko̱jo Yerápoli̱.
\v 14 Tinde xó bo̱a̱ tsó Rkaa̱ kui nda̱ xi chji̱ni̱e̱ndiki tjoó, ko̱jo nda̱ xi 'mí Demaa̱.
\p
\v 15 Tinde bo̱a̱ t'ínjnú ṉts'ié xi chji̱a̱ni Laodisea̱, ti'antindejnú na̱ Ninfaa̱ ko̱jo xta̱ na̱ngo̱xi̱ xi matikó ndi'aa̱.
\v 16 Kó nguije kini'ánya ngu̱i̱jinjnú kui xo̱jo̱o̱n, nanguiyajnúu̱ xta̱ na̱ngo̱xi̱i̱ na̱xi̱ńdá Laodisea̱ tsi̱'e̱ nga si̱'anyaa̱ nga, kó ti ti'anyajnú ki̱a̱a̱ kui xo̱jo̱n xi kananguiyaa̱ kui xtaa̱.
\v 17 Bi t'ínjnúu̱ nda̱ xi 'mí Arkipoo̱: “Ti'in ji ngo kjo̱a̱'niú nga nda si̱'inkjatjosén ji kui xá xi katsjaá Ndi̱a̱ná.”
\p
\v 18 An Pabloo̱, ts'éntsanguiyájnú'un ngo tinde ngu̱i̱yaa̱ kui xo̱jo̱o̱n. Ngatja'átsjienjnú nga ndo̱bo̱a̱ya tikón an. Néná nga tsjajnú kjo̱a̱ndaa̱. Bo̱a̱ kji'i.