\id 1TH - MAZATECO DE SAN PEDRO IXCATLÁN
\h 1 XTA̱ TESALÓNIKA̱
\mt1 Xo̱jo̱n xi tjón xi apostro̱ Pabloo̱ katsanguiyaa̱ xta̱ na̱ngo̱xi̱ xi chji̱a̱ni Tesalónika̱
\c 1
\s Bi ts'én kats'éntinde Pabloo̱ xta̱ na̱ngo̱xi̱ xi chji̱a̱ni Tesalónika̱
\p
\v 1 An Pabloo̱, Silbanoo̱ ko̱jo Timoo̱ ni'ántindejne̱ jún xi xta̱ na̱ngo̱xi̱i̱ Néná xi Na̱'miná ko̱jo Ndi̱a̱ná Jesukristoo̱ xi tindyiónjnú na̱xi̱ńdá Tesalónika̱. Néná xi Na̱'miná ko̱jo Ndi̱a̱ná Jesukristoo̱ nga tsjajnú kjo̱a̱ndaa̱ ko̱jo kjo̱a̱xioó.
\s Bi ts'en íni̱jmi Pabloo̱ kjo̱a̱a̱ chi̱bo̱a̱ xi kats'én xta̱ xi chji̱a̱ni Tesalónika̱
\p
\v 2 Ngatsjé ni̱xtjin boe'éjne̱ ndok'óchji Néná kjo̱a̱a̱ ngayeje jún, kó foa'átsjienjne̱ jún nga ndokjo̱a̱jne̱ Néná.
\v 3 Nguindyi̱ko̱n Néná xi na̱'miná ngatsjé ni̱xtjin foa'átsjienjne̱ jún, xikó ts'én s'ijinjnú Néná kó ni'ánjnú ni xi mejeén kui, ko̱jo xikó ts'én tjójnú kó bosíko̱jojnú xingu̱i̱jnú, ko̱jo kjo̱a̱a̱ nga ndyi̱ni'ánchíkjo̱a̱jnú kjo̱a̱ni̱ma̱ xi ndyi̱bitjatiójnú nga ndyi̱chiyájnúu̱ nga k'o̱xié'ájnú Ndi̱a̱ná Jesukristoo̱.
\v 4 Jún ṉts'ie, Néná tjoó jún kó je yajne̱ nga kui xi ja'ájinjnú jún.
\v 5 Nga̱t'a̱ kui éntjatsi̱e̱e̱ Jesukristoo̱ xi ik'íni̱jmijne̱ jún, jmí tsi ta én tsi nga ik'íni̱jmijne̱, nga'niuú Néná boá, kó A̱sién Ni̱xtjii̱n Néná kats'énxá, kó nde jó nde jánjín kamájne̱ nga ik'íni̱jmijne̱. Kó ti yajnú jún kóts'en kixindyionjne̱ ngu̱i̱jinjnú, tangat'anii̱ nganda tsa̱jún.
\p
\v 6 Kó jún kachja'ánguijnú ji̱n kó ti kachja'ánguijnúu̱ Ndi̱a̱ná nga kixindyionjnú, nga̱t'a̱ nda tsi tsie kjo̱a̱ni̱ma̱ ikitjatiójnú nga kachjábéjnú eén Néná, tanga A̱sién Ni̱xtjii̱n Néná katsjájnú kjo̱a̱tsja.
\v 7 Kó bo̱a̱ ts'én nga jún boá kui chi̱bo̱a̱ xi kijítji̱ngui ngayeje xta̱ xi s'ijii̱n Néná xi chji̱a̱ni Masedonia̱ ko̱jo Akaya̱.
\v 8 Nga̱t'a̱ jún boá xi tjón kachjábéjnú eén Ndi̱a̱ná, kó kjimatsie, jmí tsi ta nangui Masedonia̱ ko̱jo Akaya̱ tsi, mején ngayeje ngu̱i̱ndie tjiyá xikó ts'én s'ijinjnú Néná, kó ngaskande nguiti chjiénjín nga tjín ni xi ko̱ndókjo̱a̱jne̱ ji̱n kjo̱a̱a̱ kui nii̱.
\v 9 Nga̱t'a̱ ti kuii̱ kui xtaa̱ xi ndyi̱chji̱a̱ kjo̱a̱a̱ nga jún nda ts'én kini'ánsénjne̱ nga jáchochonjne̱ ko̱jo xikó ts'én ik'índomasienjnú a̱sie̱én ne xi ts'énda xtaa̱, tsi̱'e̱ nga kini'ánjo̱'ojnú kui Néná xi tikoón ko̱jo xi ja̱koxi̱i̱,
\v 10 kó ndyi̱chiyájnúu̱ nga ndi'ak'ajmii̱ kji̱ndi̱báni ndií Néná, kui xi Néná kats'énkja'á'yaá ngu̱i̱jii̱n xta̱ xi je jesoón, kui xi Kjisoo̱, kui xi k'o̱xié'aná ni̱xtjin nga kjo̱a̱xcha̱án Néná kji̱ndi̱bánié kui nga̱sondiee̱.
\c 2
\s Bi ts'én íni̱jmi Pabloo̱ xikó ts'én kats'énxá ngu̱i̱jii̱n xta̱ na̱ngo̱xi̱ xi chji̱a̱ni Tesalónika̱
\p
\v 1 Nga̱t'a̱ ti juún yajnú, já ṉts'ie, nga jmí tsi ta kjo̱a̱ndaní nga tsanguínchonjne̱.
\v 2 Kó ti yajnú nga nda tsi tsie kjo̱a̱ni̱ma̱ ikitjatiójne̱ ngas'e̱ ki̱a̱ na̱xi̱ńdá Filipo̱, Néná katsjájne̱ nga'niú nga ki'míyajne̱ jún éntjatsi̱e̱e̱, nga 'niú kixindyiajne̱ nda tsi kjín ma xi kondra̱jne̱ kis'iṉdo.
\v 3 Kji'a nga ki'míyajne̱ eén, jmí tsi bo̱a̱jín kji'i ni xi ki'míyajne̱, ti nde jmíjiín ni xi ndándí, ti nde jmí tsi kandokjo̱a̱jne̱ tsi̱'e̱ nga tjín xi x'i̱ṉcha̱jojne̱.
\v 4 Tasá ndokjo̱a̱jne̱ xikoó xta̱ xi Néná je kats'énjo̱'o ko̱jo xi Néná kats'én'niátakón tsi̱'e̱ nga ku̱i̱'íni̱jmi éntjatsi̱e̱e̱, kó kuíni nga bo̱a̱ ts'én ndokjo̱a̱jne̱, jmí tsi kjo̱a̱a̱ nga xtaa̱ xi ko̱e̱'éjne̱ kjo̱a̱tsja, tasá Néná xi katse'éjne̱ kjo̱a̱tsja, kui Néná xi kot'a kókji'i ini̱ma̱ná.
\v 5 Kó ti je yajnú nga jmí ni̱xtjin nga én ixi'á kandokjo̱a̱jojne̱ jún, ti nde kich'íṉchajojínjne̱ tsi̱'e̱ nga to̱n kichjiá'ájne̱. Néná xí chistiko̱ kjo̱a̱a̱ kui nii̱.
\v 6 Ti nde jmí ni̱xtjin nga ikindyiséjne̱ tsi xtaa̱ ko̱jo tsi jún ko̱jo tsi kje̱'e xta̱ xi kats'éndikónjne̱, nda tsi kamá tsi jún ik'íniéjne̱ yojojne̱ kjo̱a̱a̱ nga apostroo̱ Kristoo̱ ji̱n.
\v 7 Tanga tasá tjó kini'ánjo̱jne̱ jún, xikó maá ngo na̱a xi ts'énxchá ko̱jo xi koo̱n ndií.
\v 8 Achichí 'niú tjójne̱ jún, kó jmí tsi ta éntjatsi̱e̱e̱ Néná tsi xi kini'ánk'as'ienjne̱, ngaskande kamá katse'éjne̱ kjo̱a̱mindyionjne̱ nga, nga̱t'a̱ achichí 'niú tjó kamájne̱ jún.
\v 9 Ngatja'átsjienjnú, já ṉts'ie, kóts'en kini'ánxájne̱ ko̱jo jendajne̱, nga̱t'a̱ nga ni̱xtjin ko̱jo nga ni̱xtji̱e̱n kini'ánxájne̱, tsi̱'e̱ nga jmí tsi jún ik'íniéjne̱ yojojne̱ nga ik'íni̱jmijne̱ éntjatsi̱e̱e̱ Néná.
\p
\v 10 Jún ko̱jo Néná xi chistiko̱jnú, nga ji̱n xi xta̱ tsjie, xta̱ xi kixi̱ ko̱jo xta̱ xi jmíjín xi ch'o ts'én kandokjo̱a̱ta'in kamájne̱ nga kis'iṉtjajne̱ ngu̱i̱jinjnú jún xi s'ijinjnú Néná.
\v 11 Jún je yajnú nga xikó ts'énjo̱ na̱'mii̱ ngo ndí, bo̱a̱ kats'enjo̱jnú'un nga ngo nga ngojnú nga 'niú tsíchji̱a̱jojnú'un ko̱jo nga katsjanga'niújnú'un.
\v 12 Kó ki'míyajne̱ nga kixi̱ ku̱i̱ṉtsomajnú xikó ts'én mejeén Néná, kui Néná xi tsíchji̱a̱jnú tsi̱'e̱ nga kui xi ko̱tíxomajnú kó sa̱kójnú kjo̱a̱jee̱.
\p
\v 13 Kó kuíni nga ji̱n ngatsjé ni̱xtjin boe'éjne̱ ndok'óchji Néná, nga̱t'a̱ nga kanda'yájnú eén Néná xi ik'íni̱jmijne̱, kachjábéjnú jmí tsi xikoó eén xtaa̱, tasá xikoó nga én xí ja̱koxi̱i̱ Néná, kui én xi bosíkjoyajnú jún xi s'ijinjnú Néná.
\v 14 Nga̱t'a̱ jún, já ṉts'ie, bo̱a̱ ti kamáta'injnú xikoó xta̱ na̱ngo̱xi̱i̱ Néná xi chji̱a̱ni Kristo Kjisoo̱ ki̱a̱ nangui Judea̱, nga̱t'a̱ ti ikitjatiójnú kjo̱a̱ni̱ma̱ ngu̱i̱ya tsja xta̱ nanguijnú, kó ti kui nii̱ xi kamaá kui xta̱ na̱ngo̱xi̱i̱ ngu̱i̱ya tsja xta̱ judío̱ xi s'ijinjiín Kjisoo̱.
\v 15 Kui boá kui xtaa̱ xi kats'énk'ién Ndi̱a̱ná Kjisoo̱ kó ti kats'énk'ién já chji̱ni̱e̱'e̱én Néná nga, kó tsangatji̱nguijne̱ ji̱n. Kui xtaa̱ tsjájiín kjo̱a̱tsja Néná, kó kondraa̱ ngayeje xtaa̱ síndo.
\v 16 Kó katsjandiéjín nga kandokjo̱a̱jojne̱ xta̱ xi judío̱jiín, tsi̱'e̱ nga ti bo̱a̱ ti ts'én kjo̱tjo'a nga. Bo̱a̱ ts'én nga tsie ngase jé ts'én xikó kji'i xi je kats'én. Tanga ngot'e̱ 'ne̱ je je'enié kui xtaa̱ kjo̱a̱xcha̱án Néná.
\s Bi ts'én íni̱jmi Pabloo̱ nga kamámején kijíkatsijee̱n nguinií xta̱ na̱ngo̱xi̱ Tesalónika̱
\p
\v 17 Tanga ji̱n já ṉts'ie, chiboa ni̱xtjin nguije jatjojne̱ ngu̱i̱ndiejnú, nda tsi kamáyajínjne̱ jún tanga ini̱ma̱jne̱ ki̱a̱ tikónjo̱jnú kó achichí kamámejénjne̱ nga tsanguíntsitsijen nguiníjne̱.
\v 18 Kamámejénjne̱ nga tsanguínchonjne̱ jún, kó kjénní nga an Pabloo̱, kjín ndi̱ya kamámejénna nga kijí an, tanga xindajín Satanaa̱ katsjandiéjínna.
\v 19 Nga̱t'a̱ kji'a nga kji̱ndi̱bá nguiní Ndi̱a̱ná Jesukristoo̱, ¿mí ni xi ndyi̱chiyájne̱? ¿Axa̱ mí ni xi tsja ka̱majne̱? ¿Axa̱ mí ni xi tsja̱ajne̱ kjo̱a̱je? ¿A júnjín bo̱a̱?
\v 20 Nga̱t'a̱ jún boá xi ja̱koxi̱ nga kjo̱a̱jejne̱ ko̱jo kjo̱a̱tsjajne̱.
\c 3
\s Bi ts'én íni̱jmi Pabloo̱ mí kjo̱a̱a̱ nga katsanguiya Timoo̱ na̱xi̱ńdá Tesalónika̱
\p
\v 1 Kó bo̱a̱ ts'én nguije nguiti kichikjo̱a̱jínjne̱, tsi̱'e̱ nga kamámejénjne̱ xcha̱jne̱ xikó ts'én tindyiónjnú, ik'índajne̱ tsi̱'e̱ nga kixindyion so̱bo̱a̱jne̱ na̱xi̱ńdá Atena̱,
\v 2 kó kananguiyajne̱ nda̱ ṉts'ié xi 'mí Timoo̱, kui xi tjíts'én xaá Néná nga ts'éntsáyá éntjatsi̱e̱e̱ Kristoo̱, tsi̱'e̱ nga kijítsjanga'niújnú ko̱jo nga ko̱síko̱jojnú kjo̱a̱a̱ nga 'niú ku̱i̱ndyiajinjnú kjo̱a̱s'ijinjnú,
\v 3 tsi̱'e̱ nga ngojín xi sa̱'ínkjié kjo̱a̱ nga kjo̱a̱'atio kui kjo̱a̱ni̱ma̱a̱. Ja̱ ti júnní yajnú nga chjiénga bo̱a̱ ka̱mata'in ñá.
\v 4 Nga̱t'a̱ ti bo̱a̱ ti ts'én kji'a nga takó tindyionjinjne̱ jún, kandokjo̱a̱tjónjne̱ nga kui kjo̱a̱ni̱ma̱a̱ ku̱i̱tjatió, kó bo̱a̱ kamá, xikó ts'én je yajnú.
\v 5 Kuíni nga ko̱jo an, nguiti kamá'niújínna nga kamámejénna skuie an xikó ts'én tindyiónjnú jún, kó katsanguiya an Timoo̱ tsi̱'e̱ nga skuie an tsi takó 'niú tindyionjinjnú kjo̱a̱s'ijinjnú. Katsakjonña an nga tsi ta xindajín kui xi kjit'ayákónná askot'ayákónjnú jún, kós'e̱ tsi ta ta kjo̱a̱nda kamá xájne̱.
\s Bi ts'én íni̱jmi Pabloo̱ ni xi katsó Timoo̱
\p
\v 6 Tanga ngot'e̱ 'ne̱, Timoo̱ je je'eni na̱xi̱ńdá Tesalónika̱, kó ya'ajne̱ én nda kjo̱a̱a̱ kjo̱a̱s'ijinjnú ko̱jo kjo̱a̱a̱ kjo̱a̱tjó xi tjínjnú jún. Ti bo̱a̱ ti katsójne̱ nga tsjá xó ts'en foa'átsjienjnú ji̱n ngatsjé ni̱xtjin, ko̱jo nga achichí xó mejénjnú jún nga xcha̱jnú ji̱n, ti bo̱a̱ ti ts'én mejénjne̱ ji̱n nga xcha̱jne̱ jún.
\v 7 Kó kuíni ṉts'ie, ngu̱i̱jii̱n ngayeje kui kjo̱a̱ni̱ma̱ ko̱jo kui kjo̱a̱boaa̱, achichí tsie nga'niú kasakojne̱ nga jún takó 'niú tindyionjinjnú kjo̱a̱s'ijinjnú.
\v 8 Nga̱t'a̱ ngot'e̱ 'ne̱ tjisákónga'niújne̱ nga yajne̱ nga jún 'niú tindyiajnú nga s'ijinjnú Ndi̱a̱ná.
\v 9 Nga̱t'a̱ nde sakójínjne̱ én kóts'en ka̱ma ko̱e̱'éjne̱ ndok'óchji Néná kjo̱a̱a̱ nga 'niú s'ijinjnú Ndi̱a̱ná ko̱jo kjo̱a̱a̱ kui kjo̱a̱tsja xi jún ndyi̱boe'éjnú ji̱n nguindyi̱ko̱n Néná.
\v 10 Nga ni̱xtjin ko̱jo nga ni̱xtji̱e̱n 'niú ndyi̱chjiá'ájne̱ Néná nga ndyi̱ndokjo̱a̱jne̱ tsi̱'e̱ nga tsja̱ndiéjne̱ nga xcha̱ nguiñá xingu̱i̱, kó bo̱a̱ ts'én ka̱mando̱jo tsi ta'a tjín ni xi chaja ngasee̱ kjo̱a̱s'ijinjnú.
\p
\v 11 Néná kui xi Na̱'miná ko̱jo Ndi̱a̱ná Kjisoo̱ nga tsjandiéjne̱ tsi̱'e̱ nga ka̱ma konguínchonjne̱ jún.
\v 12 Ndi̱a̱ná ngatasikójojnú tsi̱'e̱ nga ja̱ k'i̱e̱ ja̱ ngaján si̱'antjó ngasejnú xingu̱i̱jnú ko̱jo ngayeje xtaa̱, xikó ts'én ni'ántjójne̱ jún.
\v 13 Néná nga tsja nga'niuú ini̱ma̱jnú kó kji'a nga kjo̱e̱'e nguiní Ndi̱a̱ná Jesukristoo̱ nga kjo̱e̱'éjo̱ xta̱ na̱xi̱ńdá tsjiee̱ nga jmíjín xi ka̱maa̱ ch'o ts'én ku̱i̱chji̱a̱ta'injnú ko̱jo nga 'niú tsjie ku̱i̱ndyionjnú nguindyi̱ko̱n Néná xi Na̱'miná.
\c 4
\s Bi ts'én íni̱jmi Pabloo̱ kjo̱a̱a̱ kjo̱a̱mindyion xi tsja maa̱ Néná
\p
\v 1 Kjo̱a̱a̱ ni xi chaja ngasee̱, já ṉts'ie, 'niú chjiá'ájne̱ ko̱jo 'niú botíxomajne̱ ngu̱i̱yaa̱ ja'eén Ndi̱a̱ná Kjisoo̱, tsi̱'e̱ nga ndyiojón ndyiojón nda ngase ts'én ku̱i̱ndyionjnú xikó ts'én tsja maa̱ Néná, xikó ts'én akakoyájne̱ ji̱n. Nga ja̱koxi̱ ja̱ je bo̱a̱ ndyi̱ni'ánjnú.
\p
\v 2 Nga̱t'a̱ jún je yajnú kui kjo̱a̱botíxoma xi je katse'éjne̱ jún, kui xi íjñá Ndi̱a̱ná Kjisoo̱.
\v 3 Nga̱t'a̱ Néná mejeén nga jún tsjiets'én ku̱i̱ndyionjnú nguindyi̱ko̱n kui, nga xín si̱'ankja'ájnúu̱ yojojnú kjo̱a̱tondoo̱.
\v 4 Nga chjiénga nga ngo nga ngojnú ngatamakjínjnú xikó ts'én xcha̱ndíkónjnú ko̱jo nga tsjiets'én si̱'ankjiénjnú yojojnú.
\v 5 Jmí tsi ni xi mejeén ini̱ma̱jnú xi si̱'ánjnú xikoó xta̱ xi tjín nga̱sondiee̱ xi bejín Néná.
\v 6 Ngata̱ ngojín xi monguikjo̱a̱a̱ ṉts'i̱e̱ ko̱jo tsi k'o̱ṉcha̱jo kjo̱a̱a̱ kui nii̱, nga̱t'a̱ Ndi̱a̱ná xí ts'énngojo kjo̱a̱a̱ ngayeje kui nii̱, xikó ts'én je ki'míya kixi̱ kixi̱jne̱ ji̱n.
\v 7 Nga̱t'a̱ Néná jmí tsi tsíchji̱a̱ná tsi̱'e̱ nga ni xi ndándí ku̱i̱ndyionjin, tsíchji̱a̱na tsi̱'e̱ nga ni xi tsjie ku̱i̱ndyionjin.
\v 8 Kó kuíni nga, kui xta̱ xi 'bijñát'axín kui ni xi tjibókoyaá, jmí tsi xtaa̱ xi 'bijñát'axín, Néná boá xi 'bijñát'axín, kui Néná xi je katsjájnú A̱sién Ni̱xtjii̱n.
\p
\v 9 Kó kjo̱a̱a̱ nga k'uiéjnú kjo̱a̱tjó xi 'béná xikoó tsi ngo ṉts'ié, nde chjiénjín nga xo̱jo̱n kuit'ajnú'un kui nii̱, nga̱t'a̱ ti kuíni Néná xi je akóyájnú nga chjiénga ja̱ k'i̱e̱ ja̱ ngaján si̱'antjójnú xingu̱i̱jnú.
\v 10 Nga̱t'a̱ ti ja̱koxi̱ boá nga tjójnú ngayeje ṉts'ié xi síndo ngayeje nangui Masedonia̱. Tanga 'niú ndyi̱chjiá'ájne̱, jún já ṉts'ie, nga 'niú ngase ka̱matjójnú.
\v 11 Kó ti'ánjnú ngo kjo̱a̱'niú nga xió ts'én ku̱i̱ndyionjnú, ko̱jo nga xájnú xi si̱'ánjnú, ko̱jo nga ndsa̱jnú xi si̱'anxájo̱jnú xikó ts'én je atixomajnú'un,
\v 12 tsi̱'e̱ nga nda ts'én ku̱i̱ndyionjnú ngu̱i̱jii̱n xta̱ xi s'ijinjiín Néná, ko̱jo tsi̱'e̱ nga jmí ni xcha̱jajínjnú.
\s Bi ts'én íni̱jmi Pabloo̱ xikó ka̱ma nga kjo̱e̱'e Ndi̱a̱ná
\p
\v 13 Jún ṉts'ie, mejénjne̱ nga xcha̱jnú kjo̱a̱a̱ xta̱ xi je jesoón, tsi̱'e̱ nga jmí kjo̱a̱ndasen k'uiéjínjnú xikoó xta̱ xi ngasee̱ xi jmíjiín kjo̱a̱chiyá.
\v 14 Nga̱t'a̱ tsi s'ijinná nga Kjisoo̱ k'ien kó ja'á'yaá, ti bo̱a̱ ti ts'én chjiénga s'i̱jinná nga Néná sa̱'ínkja'aá kui xta̱ xi jesón nga s'ijii̱n Kjisoo̱.
\p
\v 15 Nga̱t'a̱ kui ni xi ndyi̱'míyajne̱ eén Ndi̱a̱ná boá, nga ñá xi takó tindyión nga̱sondiee̱ nga kji̱ndi̱bá nguiní Ndi̱a̱ná ki̱a̱jín konguíntjóo̱n kui xta̱ xi je jesoón.
\v 16 Nga̱t'a̱ ko̱nda'yá ngo nda̱ xi tsjá kjo̱a̱, kós'e̱ ku̱i̱chji̱a̱ ndítsjie nguito̱ko̱o̱ kó kjo̱ni̱e̱ tjioo̱ Néná, s'e̱ Ndi̱a̱ná kji̱ndi̱bájayani ndi'ak'ajmii̱, kó kui xta̱ xi s'ijii̱n Kristoo̱ xi je jesoón, kuí xí tjón kjo̱a̱'á'yaá.
\v 17 Jaskan konguín ñá kui xi takó tindyión nga̱sondie, si̱'ankjínijínguiná ñá ko̱jo kui xta̱ xi je jesoón nínga tikón ṉdi̱i̱, tsi̱'e̱ nga ki̱a̱ ngu̱i̱jin a̱sie̱én sa̱kóná Ndi̱a̱ná, kó bo̱a̱ ts'én ku̱i̱ndyionjo̱ Ndi̱a̱ná ngatsjé ni̱xtjin.
\v 18 Kó kuíni ja̱ k'i̱e̱ ja̱ ngaján te'énga'niújnúu̱ xingu̱i̱jnú nga si̱'ankjiénjnú kui eén.
\c 5
\s Bi ts'én íni̱jmi Pabloo̱ kjo̱a̱a̱ xikó ts'én xchiyaá Ndi̱a̱ná
\p
\v 1 Jún ṉts'ie, nde chjiénjín nga xo̱jo̱n kuit'ajnú'un kjo̱a̱a̱ ni̱xtjin xi ndibá ko̱jo nga kjo̱tjosón nii̱.
\v 2 Nga̱t'a̱ ti juún je ya nda ndajnú nga ni̱xtjin nga kjo̱e̱'e Ndi̱a̱ná, ta nijan ma kjo̱e̱'e, xikó maá ngo chejé xi fochó nga jñoó.
\v 3 Kji'a nga bi ka̱tso̱ xtaa̱: “Tjínná kjo̱a̱xió ko̱jo je jmí ni ka̱majínná”, kji'a boá nga ta niján ma kji̱ndi̱bá nga kju̱i̱e̱ kui xtaa̱, xikó ma ma nga je ndibaá tsi̱ndi̱o̱o̱ ngo xta̱chjón xi ya'a ndí. Nguiti jmíjín kóts'en ka̱ma ku̱i̱yojnú.
\v 4 Tanga jún já ṉts'ie, ngata̱ nínga jñójín mindyionjnú, ki̱a̱ ka̱ma kji'a nga kjo̱chó ni̱xtjin nga kjo̱e̱'e Ndi̱a̱ná, ta niján ma kji̱ndi̱bá, kó kjo̱e̱'e xikoó tsi ngo chejé.
\v 5 Ngayejejnú nínga tsijee̱n ko̱jo nínga ni̱xtjii̱n tindyiónjnú. Jmí tsi nínga ni̱xtji̱e̱e̱n ko̱jo tsi nínga jñoó tindyión ñá.
\v 6 Kuíni nga chjiénjín nga tsjayójofé xikoó xta̱ xi ngasee̱, tasá nga tsjayójoféján ko̱jo nga nda ts'én ku̱i̱ndyión.
\v 7 Nga̱t'a̱ kui xi ndyi̱foyojofeé, nga jñoó nga ndyi̱foyojofé. Kó kui xi ma ch'ii̱, nga jñoó nga ma ch'i̱.
\v 8 Tanga ñá xi nga ni̱xtjii̱n ndokjo̱a̱ ñá, chjiénga nda ts'én ku̱i̱ndyión ngatsjé ni̱xtjin. Si̱'ans'ijin Néná, kó kui nii̱ xi ngatamaná ngo ṉjño ki̱cha̱ xi bo'má ni̱se̱e̱n ngo nda̱jun. Ngas'iená kjo̱a̱tjó. Xchiyáa̱ nga kjo̱tjo'a, kó kui nii̱ xi ngatamaná xikoó ngo ki̱cha̱ xi 'bijñaá to̱ko̱ ngo nda̱jun.
\v 9 Nga̱t'a̱ Néná jmí tsi bo̱a̱ ts'én índa nga sa̱kóná kjo̱a̱botíjeé, ja'ájinná tsi̱'e̱ nga sa̱kóná kjo̱a̱'naxié'aá ngat'aa̱ Ndi̱a̱ná Jesukristoo̱,
\v 10 kui xi k'ien tangat'anii̱ ñá, tsi̱'e̱ nga tsi tindyión ko̱jo tsi je akayá, ki̱a̱ nijan ku̱i̱ndyionjo̱ kui.
\v 11 Kó kuíni nga ja̱ k'i̱e̱ ja̱ ngaján te'énga'niújnúu̱ xingu̱i̱jnú, kó tasíko̱jojnú xingu̱i̱jnú tsi̱'e̱ nga 'niú ku̱i̱ndyiajnú ngu̱i̱yaa̱ kjo̱a̱s'ijinjnú, xikó je ndyi̱ni'ánjnú.
\s Bi ts'én akóyá Pabloo̱ ni xi chjiénga sa̱'ín xta̱ na̱ngo̱xi̱i̱
\p
\v 12 Jún ṉts'ie, 'niú chjiá'ájne̱ jún tsi̱'e̱ nga ka̱makjínjnú nga kui xi ndyi̱ts'enxájinjnú, xaá Ndi̱a̱ná xí ndyi̱ts'en, kó kuí xí síndotjónjnú ko̱jo xi ndyi̱bokoyájnú tsi̱'e̱ nga nda ts'én ku̱i̱ndyionjnú.
\v 13 Chjiénga xcha̱ndíkónjnú ko̱jo tjó ti'ánjnú kjo̱a̱a̱ xá xi ndyi̱ts'en. Ngat'iéjnú kjo̱a̱xió ngu̱i̱jinjnú.
\p
\v 14 Jún ṉts'ie, ti bo̱a̱ ti ts'én 'niú chjiá'ájne̱ jún, tsi̱'e̱ nga 'niú ko̱ndókjo̱a̱jojnú kui xta̱ xi tsi'eé, ko̱jo nga ko̱e̱'é nga'niújnúu̱ kui xta̱ xi je kats'énkjié kjo̱a̱, ko̱jo nga ko̱siko̱jojnú xi 'niújín s'ijii̱n, ko̱jo nga tsiekon ka̱majnú kjo̱a̱a̱ ngayeje xtaa̱.
\p
\v 15 Chónjnú nga ngojín xta̱ xi tsi ndajín kini'ánjo̱ kós'e̱ ti bo̱a̱ ti ts'én ndajín ts'en ku̱i̱'íchjií xi bo̱a̱ kats'énjoo̱ nga. Tasá ti'ánjnú ngo nga'niú tsi̱'e̱ nga ngatsjé ni̱xtjin nda si̱'anjo̱jnú xingu̱i̱jnú ko̱jo tsi xta̱ xi ngasee̱.
\p
\v 16 Ngatsjé ni̱xtjin nga tsja ngat'iéjnú.
\v 17 Ngatsjé ni̱xtjin ndokjo̱a̱jnúu̱ Néná.
\v 18 Te'éjnúu̱ ndok'óchji Néná kjo̱a̱a̱ ngayeje nii̱, nga̱t'a̱ kuí nii̱ xi mejeén Néná nga ko̱e̱'éjnú jún xi je s'ijinjnú Kristo Kjisoo̱.
\p
\v 19 Ngata̱ 'bíchjájínjnúu̱ nga sa̱'ínxájinjnú A̱sién Ni̱xtjii̱n Néná.
\v 20 Ngata̱ tonjín majnú én xi chji̱a̱ xta̱ xi Néná tsjaá ni xi ku̱i̱chji̱a̱.
\v 21 Chísónjnúu̱ ngayeje nii̱, kó ni xi ndaa̱ xí chjábejnú.
\v 22 Ti̱'anch'ojnúu̱ yojojnú ngayeje ni xi ndajiín.
\p
\v 23 Kó ti kuii̱ Néná xi tsi̱'e̱ kjo̱a̱xioó ngats'éntsjie ndo̱jo ndo̱jojnú nguindyi̱ko̱n kui, ngats'éntsjie a̱sién ni̱xtjinjnú, ini̱ma̱jnú ko̱jo yojojnú, kó nga jmíjín xi ch'o ts'én ku̱i̱chji̱a̱ta'injnú kji'a nga kjo̱e̱'e nguiní Ndi̱a̱ná Jesukristoo̱.
\v 24 Ka̱ma ka̱ma'niátakón Ndi̱a̱ná xi tsíchji̱a̱jnú, kuí xí sa̱'ínkjatjosón kui nii̱.
\s Pabloo̱ bi ts'én kats'énkjiet'a xo̱jo̱o̱n
\p
\v 25 Jún ṉts'ie, kji'a nga ko̱ndókjo̱a̱jnúu̱ Néná, ndókjo̱a̱tjéjnú ji̱n nga.
\p
\v 26 Ti'antindejnú ngayeje ṉts'ié.
\p
\v 27 Nguindyi̱ko̱n Ndi̱a̱ná 'niú mí'ájnú'un nga ti'anyajnúu̱ kui xo̱jo̱o̱n ngayeje ṉts'ié.
\p
\v 28 Ndi̱a̱ná Jesukristoo̱ nga tsjajnú kjo̱a̱ndaa̱. Bo̱a̱ kji'i.