\id 2TH - MAZATECO DE SAN PEDRO IXCATLÁN
\h 2 XTA̱ TESALÓNIKA̱
\mt1 Xo̱jo̱n xi ma jó xi apostro̱ Pabloo̱ katsanguiyaa̱ xta̱ na̱ngo̱xi̱ xi chji̱a̱ni Tesalónika̱
\c 1
\s Bi ts'én kats'éntinde Pabloo̱ xta̱ na̱ngo̱xi̱ xi chji̱a̱ni Tesalónika̱
\p
\v 1 An Pabloo̱, Silbanoo̱ ko̱jo Timoo̱ ni'ántindejne̱ jún xta̱ na̱ngo̱xi̱i̱ Néná xi Na̱'miná ko̱jo Ndi̱a̱ná Jesukristoo̱ xi tindyiónjnú na̱xi̱ńdá Tesalónika̱.
\v 2 Néná xi Na̱'miná ko̱jo Ndi̱a̱ná Jesukristoo̱, nga tsjajnú kjo̱a̱ndaa̱ ko̱jo kjo̱a̱xioó.
\s Bi ts'én íni̱jmi Pabloo̱ ni xi ka̱mata'in xtaa̱ kji'a nga kjo̱e̱'e nguiní Kristoo̱
\p
\v 3 Jún ṉts'ie, ngatsjé ni̱xtjin chjiénga ko̱e̱'éjne̱ ndok'óchji Néná kjo̱a̱a̱ jún, xikó ts'én chjiénga nga ko̱e̱'é, nga̱t'a̱ kjimatsie kui kjo̱a̱s'ijinjnú ko̱jo kui kjo̱a̱tjó xi je tjínjnú ngayejejnú ko̱jo kjo̱a̱a̱ nga 'niú kjimatjójnú xta̱ xi ngasee̱.
\v 4 Kuíni nga tsja majne̱ kjo̱a̱a̱ jún ngu̱i̱jii̱n xta̱ na̱ngo̱xi̱ xi ngasee̱ Néná, kjo̱a̱a̱ kui kjo̱a̱tsiekon ko̱jo kjo̱a̱s'ijin xi tjínjnú nga tjimíyotji̱nguijnú ko̱jo kui kjo̱a̱ni̱ma̱ xi ndyi̱ni'ánchíkjo̱a̱jnú.
\v 5 Kuí nii̱ xi ts'énbokóná nga Néná kixi̱ ts'en skotsíjee̱n mí nii̱ xi nda ko̱jo tsi mí nii̱ xi ndajín xi ndyi̱ts'en xtaa̱. Néná ts'énboa'axki̱jnú nga kui boá xi ko̱tixomajnú jún, kuíni nga kjo̱a̱ni̱ma̱ ndyi̱bitjatiójnú.
\p
\v 6 Nga̱t'a̱ kixi̱ kji'i nga Néná sa̱'ínkja'atio kjo̱a̱ni̱ma̱ kui xta̱ xi ndyi̱ts'enkjá'atiojnú kjo̱a̱ni̱ma̱ jún.
\v 7 Kó jún xi ndyi̱bitjatiójnú kjo̱a̱ni̱ma̱ tsja̱ajnú ngo kjo̱a̱ni'ánkja'yá xikoó ji̱n. Kui nii̱ ka̱ma kji'a nga Ndi̱a̱ná Kjisoo̱ kjo̱e̱'ekákó yojoo̱ nga kji̱ndi̱bájo̱ni ndi'ak'ajmi ján ndítsjiee̱ xi tjiín nga'niú.
\v 8 Ngu̱i̱jii̱n ndi'í kji̱ndi̱báni, tsi̱'e̱ nga sa̱'ínjeé ngayeje xta̱ xi kamábejín Néná, ti nde tsint'ié'énjiín éntjatsi̱e̱e̱ Ndi̱a̱ná Jesukristoo̱.
\v 9 Kui xtaa̱, Néná sa̱'ínkjié ngatsjé ni̱xtjin kó kjin k'uíndonii̱ nínga tikón Ndi̱a̱ná ko̱jo kjo̱a̱jee̱ ko̱jo nga'niuú.
\v 10 Bo̱a̱ ka̱ma ni̱xtjin nga kjo̱e̱'e Ndi̱a̱ná tsi̱'e̱ nga xta̱ tsjiee̱ tsja̱á kjo̱a̱je kó ngayeje xta̱ xi je kis'ijii̱n kui, tsja ka̱maa̱ nga sku̱i̱e̱. Ngu̱i̱jii̱n kui xtaa̱ je tindyiónjnú jún nga̱t'a̱ je kis'ijinjnú ni xi je ki'míyajne̱ ko̱jo ni xi kini'ánjne̱ ji̱n.
\p
\v 11 Kuíni nga, nga ndokjo̱a̱jne̱ Néná ngatsjé ni̱xtjin ndokjo̱a̱tjéjne̱ jún, tsi̱'e̱ nga Néná ko̱a̱'axki̱jnú nga ko̱jo jún boá xi tindyionjinjnú ngu̱i̱jii̱n xta̱ xi tsíchji̱a̱a̱ kui. Kó ti ndokjo̱a̱jne̱ Néná tsi̱'e̱ nga sa̱'ínkjatjosón nga sa̱'ínkjién nga'niuú kjo̱a̱a̱ ngayeje ni xi nda xi mejénjnú si̱'ánjnú tangat'anii̱ nga s'ijinjnú.
\v 12 Bo̱a̱ ts'én Ndi̱a̱ná Jesukristoo̱ k'uieé kjo̱a̱je ngat'aa̱ jún, kó ngat'aa̱ kui nga k'uiéjnú kjo̱a̱je jún, tangat'anii̱ kjo̱a̱ndaa̱ Néná xí Na̱'mii̱ ko̱jo Ndi̱a̱ná Jesukristoo̱.
\c 2
\s Bi ts'én íni̱jmi Pabloo̱ ni ch'o kji'i xi ka̱ma nguindiee̱ nga ko̱kó yojoo̱ Jesukristoo̱
\p
\v 1 Jún ṉts'ie, kjo̱a̱a̱ nga kjo̱e̱'e nguiní Ndi̱a̱ná Jesukristoo̱ ko̱jo kjo̱a̱a̱ nga nijan ka̱matikójo̱ ñá, 'niú chjiá'ájne̱ jún nga,
\v 2 nga bosíkjojínjnú kjo̱a̱ni'ánkjójnú, ti nde ngata̱ jmíjín xi mindyiandikónjnú, tsi tjín xi bo̱a̱ ka̱tso̱jnú nga ngo ni akoó a̱sién ni̱xtjii̱n, ko̱jo tsi én ko̱jo tsi ngo xo̱jo̱n kjit'a xi xikoó tsi ji̱n kananguiyajne̱ nínga bo̱a̱ tsó nga Ndi̱a̱ná je je'e.
\v 3 Ngata̱ chiíjín boe'éndiejnú tsi tjín xi k'o̱ṉcha̱jojnú, nga̱t'a̱ kjo̱e̱'ejín Ndi̱a̱ná tsi tjónjín xtaa̱ kondra̱ k'uíndonii̱ Néná, ko̱jo nga ko̱kó yojoo̱ xta̱ nga̱sondie xi tsi̱'e̱ jeé, ndií ndo̱bo̱a̱ṉk'iee̱n.
\v 4 Kui xi kondraa̱ ko̱jo xi skjánjo̱ ngayeje ni xi Néná tsoó xtaa̱ ko̱jo ngayeje ni xi bendikón xtaa̱, kó k'uijñá ngu̱i̱ndie ndikoón Néná, nga Néná sa̱'ín yojoo̱.
\p
\v 5 ¿A foa'átsjienjínjnú nga tsíchji̱a̱jojnú'un kjo̱a̱a̱ kui nii̱, kji'a nga takó ki̱a̱ kis'ijñajinjnú'un?
\v 6 Kó ngot'e̱ 'ne̱ jún je yajnú mí ni xi ts'én'bichjaá xta̱ nga̱sondie xi tsi̱'e̱ jeé, tsi̱'e̱ nga kji'a ma nga kjo̱chó ni̱xtjii̱n kjo̱tjokjá.
\v 7 Nga̱t'a̱ je tjits'énxá nga'niuú ni xi tji'maá ni xi ndajiín, ta chaja tsi nga xtjo̱'óxín ngamasiee̱n kui xi ts'én'bichjaá.
\v 8 S'e̱ kji'a 'ne̱ nga kjo̱tjokjá kui xta̱ nga̱sondie xi tsi̱'e̱ jeé, kó Ndi̱a̱ná Kjisoo̱ ta tjo̱o̱ ts'oa tsi xi sa̱'ínkjién nga sa̱'iín, kó ndi'í 'naa̱ nga kjo̱e̱'e, sa̱'ínkjié.
\v 9 Kui xta̱ nga̱sondie xi tsi̱'e̱ jeé xindajín Satanaa̱ boá xi ko̱síko̱jo nga kji̱ndi̱bá, kó achichí nga'niú k'uieé, kó sa̱'ín chi̱bo̱a̱ ko̱jo kjo̱a̱ndikón xi ndiso.
\v 10 Kó ngayeje to̱ko̱ya ni xi ndajín sa̱'ínkjién tsi̱'e̱ nga k'o̱ṉcha̱jo kui xta̱ xi xcha̱jaa̱, nga̱t'a̱ kamámejénjiín nga kats'énjo̱'o ko̱jo kats'éntjó ni xi ja̱koxi̱i̱, tsi̱'e̱ nga sa̱ko̱ó kjo̱a̱'naxié'aá katsaki.
\v 11 Kuíni nga Néná sa̱nguíyaá kui xtaa̱ ngo nga'niú xi k'o̱ṉcha̱jo, tsi̱'e̱ nga ka̱maa̱ sa̱'íns'ijin kui kjo̱a̱ndisoo̱.
\v 12 Bo̱a̱ ts'én sa̱tíjeé ngayeje xi kis'ijinjiín ni xi ja̱koxi̱i̱ kó tasá tsja kamaá nga kats'én ni xi kixi̱jín nguindyi̱ko̱n Néná.
\s Bi ts'én íni̱jmi Pabloo̱ kjo̱a̱a̱ nga 'niú ku̱i̱ndyiajin xta̱ xi chji̱a̱ni Tesalónika̱ ni xi tsi̱'e̱ Néná
\p
\v 13 Tanga ji̱n chjiénga ngatsjé ni̱xtjin ko̱e̱'éjne̱ ndok'óchji Néná kjo̱a̱a̱ jún, já ṉts'ie xi Ndi̱a̱ná tjoó, nga̱t'a̱ nga tjón tjón Néná jún xi ja'ájinjnú tsi̱'e̱ nga sa̱kójnú kjo̱a̱'naxié'aá, nga̱t'a̱ A̱sién Ni̱xtjii̱n Néná ts'éntsjiejnú ko̱jo je kis'ijinjnú én xí ja̱koxi̱i̱.
\v 14 Néná tsíchji̱a̱jnú nga ki'míyajne̱ jún éntjatsi̱e̱e̱, tsi̱'e̱ nga sa̱kójnú kjo̱a̱jee̱ Ndi̱a̱ná Jesukristoo̱.
\p
\v 15 Kó kuíni ṉts'ie, 'niú ti̱ndyiónjnú kó chjábe tsján tsjánjnú kui kjo̱a̱bokoyá xi akakoyájne̱ jún tsi én xi kandokjo̱a̱jne̱ ko̱jo tsi xo̱jo̱n xi akjat'ajne̱.
\v 16 Kó kuí ma Ndi̱a̱ná Jesukristoo̱ ko̱jo Néná xi Na̱'miná, kui xi ts'éntjóná ko̱jo xi tsjáná nga'niú ngatsjé ni̱xtjin ko̱jo tsjáná kjo̱a̱chiyá ngat'aa̱ kjo̱a̱ndaa̱,
\v 17 nga tsja nga'niuú ini̱ma̱jnú tsi̱'e̱ nga ko̱ndókjo̱a̱jnú én xi nda ko̱jo nga si̱'ánjnú xá xi nda.
\c 3
\s Bi ts'én tsí'á Pabloo̱ nga ko̱ndókjo̱a̱a̱ Néná
\p
\v 1 Kó nga fet'aa̱ já ṉts'ie, kji'a nga ko̱ndókjo̱a̱jnúu̱ Néná ndókjo̱a̱tjéjnú ji̱n, tsi̱'e̱ nga eén Ndi̱a̱ná kjo̱chó ngayeje ngu̱i̱ndie kó xcha̱ndíkón, xikó kamá ngu̱i̱jinjnú.
\v 2 Kó ndokjo̱a̱jnúu̱ tsi̱'e̱ nga xín sa̱'ínkja'ajne̱ ngayeje xta̱ xi ch'okon ko̱jo xi ndajín. Nga̱t'a̱ jmí tsi ngayeje xtaa̱ xi s'ijii̱n Néná.
\v 3 Tanga Ndi̱a̱ná ts'enkjátjosón ni xi chji̱a̱, kó kuí xí sa̱'ín nga 'niú ku̱i̱ndyiajnú kó xín sa̱'ínkja'aboa'ájnú xindajín.
\v 4 'Niátakónjne̱ Ndi̱a̱ná kjo̱a̱a̱ jún, kjo̱a̱a̱ ni xi ndyi̱ni'ánjnú ko̱jo ni xi s'e̱ si̱'ánjnú, kui ni xi je akakoyájne̱.
\v 5 Kó Ndi̱a̱ná ngatakoyajnú nga bo̱a̱ ts'en si̱'antjójnú xikó ts'én ts'éntjó Néná, kó ti'anchíkjo̱a̱jnú ni xi ndyi̱bitjajinjnú xikó ts'én kats'énchíkjo̱a̱ Kristoo̱.
\s Bi ts'én íni̱jmi Pabloo̱ kjo̱a̱a̱ nga chjiénga sa̱'ínxá xta̱ na̱ngo̱xi̱ xi chji̱a̱ni Tesalónika̱
\p
\v 6 Jún ṉts'ie, ngo kjo̱a̱botíxoma ko̱e̱'éjne̱: Ngu̱i̱yaa̱ ja'eén Ndi̱a̱ná Jesukristoo̱, xín ti'a̱nkja'ajnúu̱ yojojnú ngayeje ṉts'ié xi mejénjiín sa̱'ín xá xi nda ko̱jo xi fítji̱nguijín kui kjo̱a̱bokoyá xi ji̱n katse'éjne̱ jún.
\v 7 Nga̱t'a̱ jún je yajnú kóts'en chja̱'ánguíjne̱ ji̱n, nga̱t'a̱ jmí tsi kamámejénjínjne̱ kini'ánjne̱ xá xi nda nga kixindyionjne̱ ngu̱i̱jinjnú.
\v 8 Ti nde jmí tsi ni chiniee̱ ngo xta̱ taxkiya kichiniejne̱ s'e̱ ik'íchjíjínjne̱. Tasá 'niú kini'ánxájne̱ nga ni̱xtjin ko̱jo nga ni̱xtji̱e̱n tsi̱'e̱ nga jmí tsi jún ik'íniéjne̱ yojojne̱.
\v 9 Kó bo̱a̱ kini'ánjne̱, jmí tsi kjo̱a̱a̱ tsi jmíjínjne̱ kjo̱a̱nda, tasá tsi̱'e̱ nga ngo chi̱bo̱a̱ xi nda ka̱majne̱ xi jún konguíntji̱nguíjnú.
\v 10 Nga̱t'a̱ kji'a nga kixindyionjinjne̱ jún, katse'éjne̱ ngo kjo̱a̱botíxoma xi bi tsó: Tsi tjín xi mejénjiín sa̱'ínxá, jmíjiín kjo̱a̱nda nga ka̱ma skji̱ni̱e̱ ni chinie.
\v 11 Nga̱t'a̱ je kanda'yájne̱ nga tjín ngu̱i̱jinjnú xta̱ xi jmí xá xi nda ndyi̱ts'enjín, kó ni xi kuijín ndasee̱n xi ndyi̱tsanguijin yojoo̱.
\v 12 Kui xta̱ xi'ba̱ ndyi̱botíxomajne̱ ko̱jo 'niú ndyi̱ndokjo̱a̱jojne̱, ngat'aa̱ Ndi̱a̱ná Jesukristoo̱, nga xió ts'en sa̱'ínxá tsi̱'e̱ nga ku̱i̱e̱je̱e̱n ni xi skji̱ni̱e̱ ko̱jo ni xi k'uí.
\p
\v 13 Kó jún já ṉts'ie, ngata̱ fendajo̱jínjnú nga si̱'ánjnú ni xi ndaa̱.
\v 14 Kó tsi tjín xi ku̱i̱nt'ié'énjiín ni xi ndyi̱'míjne̱ ngu̱i̱yaa̱ kui xo̱jo̱o̱n, tsitsíjen cha̱n cha̱njnúu̱ 'yá kuí bo̱a̱, kó ngata̱ ki̱a̱jín ni'án kamajo̱jnú, tsi̱'e̱ nga soboá ka̱maa̱.
\v 15 Tanga ngata̱ kondra̱jínjnú ni'ánjnú, tasá tatíxomajnúu̱ xikó ni'ánjo̱ ngo ṉts'ié.
\s Pabloo̱ bi ts'én kats'énkjiet'a xo̱jo̱o̱n
\p
\v 16 Ndi̱a̱ná xi tsi̱'e̱ kjo̱a̱xioó nga tsjajnú ngatsjé ni̱xtjin kjo̱a̱xioó ngu̱i̱jii̱n tajmí niní xi ku̱i̱tjájinjnú. Ndi̱a̱ná ngat'íjñajo̱jnú ngayejejnú.
\p
\v 17 An Pabloo̱, an ma xi tjíts'en'indójnú'un kui kjo̱a̱tindee̱. Kuí bí chi̱bo̱a̱ xi bokó nga tsanguiyáa̱ xo̱jo̱n xtaa̱, bo̱a̱ ts'én ts'en'indó an.
\v 18 Ndi̱a̱ná Jesukristoo̱ nga tsjajnú kjo̱a̱ndaa̱ ngayeje jún. Bo̱a̱ kji'i.