\id TIT - MAZATECO DE SAN PEDRO IXCATLÁN
\h TITOO̱
\mt1 Xo̱jo̱n xi apostro̱ Pabloo̱ katsanguiyaa̱ Titoo̱
\c 1
\s Pabloo̱ bi ts'én kats'éntinde Titoo̱
\p
\v 1 An Pabloo̱, mosoo̱ Néná ko̱jo apostroo̱\f + \fr 1.1 \ft “Xi kananguiyaa̱” tsó “nda̱ apostro̱” axa̱ “já apostro̱” nga én griego̱.\f* Jesukristoo̱, xikó ts'én s'ijii̱n xta̱ xi je ja'ájin Néná ko̱jo xikó kji'i kjo̱a̱kjíntakón xi ja̱koxi̱i̱ nga bendikón Néná, bo̱a̱ kji'i xána,
\v 2 kuíni nga ndyi̱chiyáa̱ kjo̱a̱mindyion ngatsjé ni̱xtjii̱n, kui ni xi ndeskande nguindiee̱ nga kamánda nga̱sondiee̱ katsáyatjón nga tsja̱aná kui Néná xi majiín 'bíndisoo̱.
\v 3 Nga jachó ni̱xtjin, Néná xi 'boxié'áná akó cha̱n cha̱n eén kó an katsjáxána nga ts'én'bini̱jmi an.
\v 4 Ji ts'éntsanguiyaa̱ kui xo̱jo̱o̱n Tito̱, nga̱t'a̱ ja̱koxi̱ boá nga ji xi ndína kjo̱a̱a̱ kjo̱a̱s'ijinná. Néná xi Na̱'miná ko̱jo Ndi̱a̱ná Jesukristoo̱ kui xi ts'axié'áná nga tsjaá kjo̱a̱ndaa̱, kjo̱a̱ni̱ma̱takoón ko̱jo kjo̱a̱xioó.
\s Bi ts'én katsáyá Pabloo̱ kjo̱a̱a̱ xá xi sa̱'ín Titoo̱
\p
\v 5 Ki̱a̱ kats'enk'ijñaá jí tji̱ngu̱i̱ Kreta̱, tsi̱'e̱ nga si̱'indaye ni xi chajaa̱ nga ka̱mandaya ko̱jo tsi̱'e̱ nga xki̱ nangui ko̱e̱'éxée̱ xta̱ xi xchaá na̱ngo̱xi̱i̱, xikó ts'én atixomaa̱ an nga si̱'in ji.
\v 6 Xi ka̱ma xta̱ xi xchaá kui boá xi jmíjín xi ch'o ts'en ku̱i̱chji̱a̱ta'in, xi ta ngo tsi chjoón tjiín, xi ndií s'ijin ka̱maa̱ Néná, ko̱jo xi ndií kixi̱ k'uíndo nga jmíjín xi ch'o ts'en ku̱i̱chji̱a̱ta'in ko̱jo nga ku̱i̱nt'ié'én.
\v 7 Nga̱t'a̱ chjiénga, nga kui xta̱ xi nguito̱ko̱o̱ na̱ngo̱xi̱i̱ ka̱ma, nga jmíjín xi ch'o ts'en ku̱i̱chji̱a̱ta'in nga tjíts'én xaá Néná. Nga nk'akonjín k'o̱xié yojoo̱, nga ka̱majín xtinda ka̱ma, nga chjiénjín nga ts'atio k'uí bino̱, ti nde nga ka̱majín xta̱ xi kján ka̱ma, ti nde nga ka̱majín sa̱'ín mején ndyi̱ko̱n too̱n ni xi ndajín ts'en kasako.
\v 8 Tasá chjiénga nga tsja ka̱maa̱ nga k'uíndo xta̱ ndi'aa̱, chjiénga sa̱'íntjó ni xi ndaa̱, ngo nda̱ xi nda sa̱'ínkjiín kon ni xi sa̱'ín, ngo nda̱ xi kixi̱, ngo nda̱ xi tsjie ko̱jo ngo nda̱ xi ti kuii̱ botixómaá yojoo̱.
\v 9 Én xi 'niátakón xi akakoyaá kuí xí chjiénga ko̱kóya, tsi̱'e̱ nga ka̱maa̱ tsja̱nga'niuú kje̱'e xta̱ nga sa̱'ínkjién kui kjo̱a̱bokoyá ndaa̱, ko̱jo tsi̱'e̱ nga sa̱'ínkie nga sa̱'ínk'oyá yojoo̱ kui xta̱ xi kondra̱ síndonii̱ kui kjo̱a̱bokoyaá.
\p
\v 10 Nga̱t'a̱ achichí xta̱ tjín xi nt'ié'énjiín kjo̱a̱bokoyá xi ndaa̱, kui xta̱ xi chji̱a̱ én xi jmí ni chjíjiín kó 'boṉcha̱jo xtaa̱, ngase ma kui xta̱ judío̱ xi bokoyá nga si̱'an sirkunsisioo̱n.
\v 11 Kui xtaa̱ chjiénga kjókjo ts'oa, nga̱t'a̱ ndyi̱bokoyá ni xi chjiénjín nga ko̱kóya. Bo̱a̱ ts'én 'boṉcha̱jo kjín xta̱, tangat'anii̱ nga mejeén sa̱'ín to̱n.
\p
\v 12 Ngo nda̱ chji̱ni̱e̱'én xi tsi̱'e̱ kui jaá xi bi katsó: “Xta̱ xi chji̱a̱ni tji̱ngu̱i̱ Kretaa̱, ngatsjé ni̱xtjin nga xta̱ ndiso, xta̱ xi ndajín, xta̱ xki̱'á ko̱jo xta̱ tsi'é boá.”
\v 13 Ja̱koxi̱ kuí ni xi katsó kui ndaa̱, kuíni nga 'niú ndokjo̱e̱je, tsi̱'e̱ nga kixi̱ kjo̱jo kjo̱a̱s'ijii̱n Néná,
\v 14 ko̱jo tsi̱'e̱ nga ki̱a̱jín sa̱'ínseén én xi jmí ni chjíjiín xi chji̱a̱ xta̱ judíoo̱, ti nde nga ki̱a̱jín sa̱'ínseén kjo̱a̱botíxomaa̱ xta̱ xi nguiti ki̱a̱jín ndyi̱fítji̱ngui ja̱koxi̱i̱ Néná.
\p
\v 15 Ngayeje nii̱ xi tsjie máa̱ xta̱ xi tsjiets'én tikón ini̱ma̱a̱, tanga xta̱ xi ndándí síndo nguindyi̱ko̱n Néná ko̱jo xi s'ijinjiín Néná ngojín ni xi tsjie máa̱, nga̱t'a̱ ngaskande ni xi ts'énkjó ko̱jo kjo̱a̱kjíntakoón tsjiejín tikón.
\v 16 Be xó Néná tix'i̱a̱n ndyi̱tsó, tanga ni xi ndyi̱ts'en bokó nga jmí tsi s'ijin ja̱koxi̱i̱ Néná. Kui boá kui xtaa̱ xi ndajín ko̱jo xi nt'ié'énjín, kó nde chiíjín máa̱ ts'én ni xi nda.
\c 2
\s Pabloo̱ bi ts'én tsíchji̱a̱jo Titoo̱ ni xi chjiénga ko̱kóya
\p
\v 1 Tanga ji ndokjoé ji ni xi nijan ma kjo̱a̱bokoyá xi nda xi akakoyaá.
\v 2 Bo̱a̱ t'íi̱n xta̱ xi xchaá nga nda sa̱'ínkjó, nga xcha̱ndíkón, nga nda sa̱'ínkjiín kon ni xi sa̱'ín, nga nda ts'én k'uíndojo̱ kjo̱a̱s'ijii̱n, nga k'uieé kjo̱a̱tjó ko̱jo nga k'uieé nga'niú tsi̱'e̱ nga sa̱'ínchíkjo̱a̱ ngayeje kjo̱a̱ni̱ma̱.
\v 3 Ti bo̱a̱ ti ts'én ínchjín xi xchaá chjiénga sku̱i̱e̱ndíkón Néná, kó chjiénjín nga én ndiso k'uitsómajo̱, ti nde ka̱majín ts'atio k'uí bino̱, chjiénga na̱ mostraa̱ ni xi ndaa̱ ka̱ma,
\v 4 tsi̱'e̱ nga ko̱kóyaá ínchjín kjindií nga sa̱'íntjó xi̱'ii̱n ko̱jo ndií,
\v 5 chjiénga nga nda sa̱'ínkjiín kon ni xi sa̱'ín, chjiénga tsjie ka̱ma ini̱ma̱a̱, ko̱jo nga skoón ndi'aa̱, nga ndaxta̱ ka̱ma ko̱jo nga sku̱i̱e̱ndíkón xi̱'ii̱n, bo̱a̱ ts'én nga ta'yajín xi ch'o ts'én ku̱i̱chji̱a̱ta'in eén Néná.
\p
\v 6 Ti bo̱a̱ ti ts'én 'niú ndokjo̱e̱je já xo̱ngo̱ó tsi̱'e̱ nga nda sa̱'ínkjiín kon ni xi sa̱'ín.
\v 7 Ti jii̱ te'ée̱ ngo chi̱bo̱a̱ nga ni xi nda tini'ín ji. Nga ko̱ko̱yée̱, ngatamaya nga kixi̱ tini'ín ji ko̱jo nga tiyendikín jí yojóo.
\v 8 Én nda ndokjoé ji kó nde ngojín xi ka̱maa̱ ku̱i̱chji̱a̱ta'ii̱n, tsi̱'e̱ nga soboá ka̱maa̱ kondraa̱, kó bo̱a̱ ts'én nga nde chií ka̱majiín ch'o ka̱tso̱ná.
\p
\v 9 'Niú ndokjo̱e̱je moso̱ xi kastiñaá tsi̱'e̱ nga sku̱i̱e̱ndíkón xta̱ xi ndi̱a̱a̱ kjo̱a̱a̱ ngayeje ni xi sa̱'ín, kó nga ni xi tsja ka̱maa̱ ndi̱a̱a̱ xi sa̱'ín, kó nga ku̱i̱chji̱a̱'ájín,
\v 10 ngata̱ ts'énchéjéjiín, tasá ngo xta̱ xi 'niákón ngayeje nii̱ ngatama, tsi̱'e̱ nga ko̱kó ngayeje kjo̱a̱tsjakji'ii̱ kjo̱a̱bokoyá xi tsi̱'e̱ kui Néná xi ts'axié'áná.
\p
\v 11 Nga̱t'a̱ Néná je akoó kjo̱a̱ndaa̱ ngayeje xtaa̱, kó kui boá xi 'boxié'áná,
\v 12 nga ts'énbokoyáná nga nguiti si̱'án jín ñá ni xi ndajín ko̱jo ni nga̱sondie xi mejeén ini̱ma̱ná, ko̱jo nga nda si̱'ankjíi̱n takón ni xi si̱'án, ko̱jo nga kixi̱ si̱'án ko̱jo nga xcha̱ndíkón Néná tji̱e̱nga tindyión kuí nga̱sondiee̱.
\v 13 Xchiyaráa̱ kui kjo̱a̱chiyá xi tsjáná kjo̱a̱tsjaa̱: nga ko̱kó yojoo̱ Jesukristoo̱ kui Néná xi tjiín kjo̱a̱jee̱, ko̱jo kui xi ts'axié'áná,
\v 14 kui xi katsjá yojoo̱ nga kini'ánk'ién tangat'anii̱ ñá, nga íchjítjéná nga jatjo'a ñá kjo̱a̱a̱ ni xi ndajín xi kini'án ko̱jo tsi̱'e̱ nga sa̱'íntsjiená nga ñá xi xta̱ na̱xi̱ńdá xi tsi̱'e̱ ka̱ma ñá, kó nga ngayejee̱ takón nga ni xi nda si̱'án.
\p
\v 15 Kuí nii̱ xi chjiénga ko̱ko̱yée̱. Te'énga'níi̱ kó ti'inchji̱ni̱ ji xtaa̱ nga si̱'inkjín jí xá xi tjiín. Ngata̱ ngojín xta̱ xi ta ton skuiee̱.
\c 3
\s Bi ts'én íni̱jmi Pabloo̱ kjo̱a̱a̱ ni xi chjiénga sa̱'ín xta̱ na̱ngo̱xi̱i̱
\p
\v 1 Ti'inkja'átsjíi̱n xta̱ na̱ngo̱xi̱i̱ nga sku̱i̱e̱ndíkón xta̱ xi botixómaá ko̱jo jáxaá, ngatint'ié'eén kó ngat'índonda nga sa̱'ín ngayeje ni xi nda.
\v 2 Ngata̱ jmí xta̱ chji̱a̱ta'injín, ngata̱ jmí kjo̱a̱xchán 'boxiéjín, tasá ndaxta̱ ngatama, kó ngatamabe xta̱ xi ngasee̱ nga tjiín kjo̱a̱ni̱ma̱kjo̱a̱.
\p
\v 3 Nga̱t'a̱ ngas'e̱ ti bo̱a̱ ti ts'én ñá xta̱ chini kamá ko̱jo kanda'yá'énjín ñá, kis'iṉtso̱ma kichajá, kó mosoo̱ ngayeje to̱ko̱ya kjo̱a̱tsjaa̱ yojoná xi mejeén ini̱ma̱ná kamá, kó ngu̱i̱jii̱n ni xi ndajiín ko̱jo ngu̱i̱jii̱n kjo̱a̱'ontakón kixindyionjin, kó ñá kini'ánch'o kó ti kini'ánch'oná ñá.
\v 4 Tanga kji'a nga akó kjo̱a̱ndaa̱ Néná kui xi ts'axié'áná ko̱jo kjo̱a̱tjó xi tjiín kjo̱a̱a̱ ngayeje xtaa̱,
\v 5 ts'axié'áná, tanga jmí tsi kjo̱a̱a̱ ni xi kini'án tsi kjo̱a̱a̱ ngo ni xi kixi̱ xi kini'án, tasá tangat'anii̱ nga kamáni̱ma̱a̱ ñá. Kats'éntsjiená kji'a nga kats'éntsen nguiníná kó A̱sién Ni̱xtjii̱n xi kats'éntja̱tsi̱e̱yaniná.
\v 6 Néná achichí tsie A̱sién Ni̱xtjii̱n íjñajinná ngat'aa̱ kui Jesukristo̱ xi ts'axié'áná.
\v 7 Néná kats'énkixi̱ná kjo̱a̱a̱ kjo̱a̱ndaa̱, bo̱a̱ kats'én tsi̱'e̱ nga k'uiéná ngo kjo̱a̱chiyá nga sa̱kóná kui kjo̱a̱mindyion ngatsjé ni̱xtjii̱n.
\p
\v 8 Én xí 'niátakón boá xi'bi̱, kó mejénna nga 'niú ko̱ndókjo̱a̱ kjo̱a̱a̱ kui nii̱, tsi̱'e̱ nga kui xta̱ xi s'ijii̱n Néná ta soboá ni xi nda xí sa̱'ín. Achichí nga nda kui eén kó machjieén ngayeje xtaa̱.
\v 9 Tanga ngata̱ ni'ínsenjíi̱n kjo̱a̱ndokjo̱a̱ti ni xi jmí ni chjíjiín, ko̱jo kjo̱a̱a̱ tji̱e̱e̱ xta̱ xi xchaá xtaa̱, ko̱jo kjo̱a̱a̱ kjo̱a̱ndokjo̱a̱tii̱, ko̱jo kjo̱a̱ndokjo̱a̱tii̱ kjo̱a̱kitii̱, nga̱t'a̱ jmí ni chjíjiín kui nii̱ kó bosikójojínná.
\p
\v 10 Kui nda̱ xi bokjángá xta̱ na̱ngo̱xi̱i̱, ndokjo̱e̱je tsi ngo ko̱jo tsi jó ndi̱ya, tanga tsi sa̱'ínsenjín, nguiti boe'éndiejíi̱n ngu̱i̱ya na̱ngo̱xi̱i̱.
\v 11 Je ye ji nga kui xi bo̱a̱ tjíts'eén je kats'énkjatsón soboá yojoo̱, ngu̱i̱jii̱n jeé tikónjin, kó ti kuíni tjíts'énkjí yojoo̱ nínga xcha̱ja.
\s Bi ts'én kats'énkjiet'a Pabloo̱ kui xo̱jo̱o̱n
\p
\v 12 Nguije sanguiyaa̱ Artemaa̱ ko̱jo tsi Tíkikoo̱, ti'in ji ngo kjo̱a̱'niú tsi̱'e̱ nga kji̱ndi̱béchinní na̱xi̱ńdá Nikópoli̱, nga̱t'a̱ je bo̱a̱ kixian an nga ki̱a̱ sa̱'ínkja'a an cho̱ṉch'a̱án.
\v 13 Tasíke̱je ngayeje ni xi ka̱maa nga ko̱sike̱je nda̱ xi 'boxié'áná xi 'mí Senaa̱ ko̱jo Apoloo̱, te'ée̱ ngayeje ni xi ka̱machjieén tsi̱'e̱ nga takó ko̱e̱je̱ kó nga jmí ni xcha̱jajiín.
\v 14 Kó xta̱ tsa̱ñá ngatamakjiín nga sa̱'ín ni xi nda ko̱jo nga ko̱síko̱jo tsi ngo xta̱ xi chjieén tsja, tsi̱'e̱ nga k'uíndo xikoó xta̱ xi ka̱ma ngasee̱ nda ts'én k'uíndo nguindyi̱ko̱n Néná.
\p
\v 15 Tinde xó bo̱a̱ tsó ngayeje xta̱ xi síndojo̱na k'i̱e̱e̱. Ti'in tinde ji xta̱ xi tjoó ñá ngu̱i̱yaa̱ kjo̱a̱s'ijii̱n. Néná nga tsjajnú kjo̱a̱ndaa̱ ngayeje jún. Bo̱a̱ kji'i.