\id PHM - MAZATECO DE SAN PEDRO IXCATLÁN
\mt FILEMOO̱
\cl Capitulo 1 FILEMOO̱
\p
\v 1 An Pabloo̱ xi tikón 'niú an tangat'anii̱ nga ts'én'bini̱jmi an Kristo Kjisoo̱ ko̱jo nda̱ ṉts'ié xi 'mí Timoo̱ ni'ántindejne̱ ji nda̱ ṉts'ie Filemo̱, ji xi tjójne̱ nga̱t'a̱ ti xaá Kristoo̱ tini'ín ji nga.
\v 2 Ti ni'ántindejne̱ na̱ ndichjá xi 'mí na̱ Apiaa̱ ko̱jo nda̱ xi 'mí Arkipoo̱, nda̱ xi nijan ts'énkjántjéjo̱ná ni xi ndaa̱. Ni'ántindejne̱ xta̱ na̱ngo̱xi̱ xi matikó ndi'áa̱ nga Filemo̱.
\v 3 Néná xi Na̱'miná ko̱jo Ndi̱a̱ná Jesukristoo̱, ngatsjajnú kjo̱a̱ndaa̱ ko̱jo kjo̱a̱xioó.
\v 4 Nga foa'átsjienna ji nga chjiáa̱ Néná. Ngatsjé ni̱xtjin tsjáa̱ ndok'óchji,
\v 5 nga̱t'a̱ je ki'míyana kókji'i tjoó xta̱ tsjiee̱ Néná, ko̱jo nga 'niú s'ijii̱n Ndi̱a̱ná Kjisoo̱.
\v 6 Mí'áa̱ Néná tsi̱'e̱ nga kui xi je kis'ijii̱n Kristoo̱ tangat'anii̱ kui kjo̱a̱s'ijin xi tjiín ji, nda ts'én ka̱makjiín ngayeje ni nda xi ka̱ma si̱'án tangat'anii̱ Kristo Kjisoo̱.
\v 7 Ji ṉts'ie, achichí tsjatjínna kó tsjanga'niúna kjo̱a̱tjó xi tjiín, nga̱t'a̱ ji xi katse'é nga'níi̱ ini̱ma̱a̱ xta̱ tsjiee̱ Néná.
\v 8 Kó kuíni nga nda tsi tangat'anii̱ ja'eén Kristoo̱ nga tikónna ngo kjo̱a̱nda nga an xi kotixomaa ji ni xi si̱'in,
\v 9 tanga tasá mejénna nga 'niú kuí'aá tangat'anii̱ kjo̱a̱tjoó. An, Pabloo̱, nga je kamáxchá an kó nga tangat'anii̱ nga ts'én'bini̱jmi an Jesukristoo̱ nga tikón 'niú an ngot'e̱,
\v 10 ngo kjo̱a̱nda 'niú mí'aá xi si̱'íi̱n Onésimoo̱, kui nda̱ xi xikoó tsi ndína kamá nga kixiyáa̱ eén Néná ki̱a̱ ngu̱i̱ya ndo̱bo̱a̱ya̱á.
\v 11 Kui nda̱ xi kje̱'e ni̱xtjin kamachjiénjiín ji, tanga ngot'e̱ 'ne̱ ngajó ñá kamáchjiénná.
\v 12 K'i̱e̱ sanguiya nguiñaá ingo ndi̱ya, nda ti'inje̱ xikoó tsi an ma xi kjócho an.
\v 13 Mejénna nga k'i̱e̱ k'uiñájo̱na katsaki, tsi̱'e̱ nga kui xi k'uijñá ngu̱i̱ndiée̱ nga sa̱'ínsenna tji̱e̱nga tikón an ndo̱bo̱a̱ya tangat'anii̱ nga ts'én'bini̱jmi an éntjatsi̱e̱e̱ Néná.
\v 14 Tanga mejénjínna kats'en an ngo ni tsi jijín xi bo̱a̱ se ji nga sa̱'ín an, tsi̱'e̱ nga kui kjo̱a̱nda xi tini'ínní, jmí tsi kjo̱a̱'niú ka̱ma, tasá ngo ni xi si̱'in ngayeje ini̱máa̱.
\v 15 Bee̱ ko̱n an nga Onésimoo̱ ja'áxínt'axín ma raa̱ yojoo̱ ji chiboa ni̱xtjin, tsi̱'e̱ nga ngot'e̱ 'ne̱ ki̱a̱ k'uijñájóo̱ ngatsjé ni̱xtjin.
\v 16 Jmí tsi xikoó ngo moso̱ xi kastiñá, tasá xikoó ngo xta̱ xi chjí ngasenii̱ ta bo̱a̱jiín ngo moso̱ xi kastiñá, xikoó ngo nda̱ ṉts'ié xi tjó, nga̱t'a̱ achichí tjóna kui, tanga chjiénga 'niú ngase ka̱ma tjoó ji, jmí tsi ta kjo̱a̱a̱ nga xta̱ tsi, tasá kjo̱a̱a̱ nga ṉts'ié boá.
\v 17 Kó kuíni nga, tsi xikoó nga ṉts'ie t'ísení nga̱t'a̱ ti kuíni ni xi s'ijinná, nda ti'inje̱ xikoó tsi an ma xi kjócho an.
\v 18 Kó tsi tjín ni xi ndajín kji'i xi kats'énjóo̱, ko̱jo tsi tjín ni xi tjitjieén tse̱, an chje̱'échjíní.
\v 19 An Pabloo̱, an ma xi tjíts'enda an kui xo̱jo̱o̱n kó bi xian an: An k'uichjí an. Tanga ka̱mana sa̱'inkja'átsjiée̱n ni xi tjitjíe̱n tsa'a̱n, nga̱t'a̱ tangat'anií én xi íni̱jmi̱í nga tjiín kjo̱a̱mindyion nguindyi̱ko̱n Néná.
\v 20 Jo̱o̱n ṉts'ie, mí'aá kui kjo̱a̱ndaa̱ tangat'anii̱ nga tjoó Ndi̱a̱ná. Ngat'aa̱ Kristoo̱ nga ko̱e̱'é nga'níi̱ ini̱ma̱na tsi bo̱a̱ si̱'in.
\v 21 Ji xi tjíts'en'indoó kui xo̱jo̱o̱n, nga̱t'a̱ be an nga ko̱nda'yé'ínní, kó be an nga ts'atio ngase si̱'inkjatjosén ji ni xi ts'énmí'aá.
\v 22 Ingo ni ngase, t'íjñindení ngo ngu̱i̱ndie nínga tsjayojo ndi'áa̱, nga̱t'a̱ ts'énkoya an nga Néná tsja̱ndiéna nga kjuinkónjnú'un, nga̱t'a̱ jún ndyi̱chjiá'ájnú kui nii̱ nga.
\v 23 Tinde xó bo̱a̱ tsó Epafraa̱, nda̱ xi nijan tikónjo̱ an ndo̱bo̱a̱ya tangat'anii̱ nga s'ijii̱n Kristo Kjisoo̱.
\v 24 Ko̱jo tinde xó bo̱a̱ tsó Markoo̱, Aristarkoo̱, Demaa̱ ko̱jo Rkaa̱, já xi ndyi̱bosikójona xá xi tjíts'en an.
\v 25 Kjo̱a̱ndaa̱ Ndi̱a̱ná Jesukristoo̱ ngas'ijñajii̱n ini̱ma̱jnú.